GEN 1:1 ताँन् भन्दा ओंसों परमेश्‍वरजी मु नेरो पृथ्बी बनेइ।
GEN 1:2 पृथ्‍बी छाबन् मुँ बिब था आसेल धै तोइ आरेल। मा ङ्युँइए फिर मिछु खैरिमल। धै परमेश्‍वरए प्ल्ह क्‍युए फिर स्‍युररिमल।
GEN 1:3 झाइले परमेश्‍वरजी “मि म्रोंयाँरिगे” बिमा मि म्रोंयाँइ।
GEN 1:4 धै परमेश्‍वजी मि म्रोंबलाइ ङ्‍ह्‍योमा च छ्याँब मुँल। खीजी मि म्रोंब नेरो आम्रोंब स्‍यो-स्‍यो लइ।
GEN 1:5 परमेश्‍वरजी मि म्रोंबने “त्‍हिंइ” बिइ, धै मिछु खैबने “म्‍हुँइसा” बिइ। ङेसा तइ धै न्‍हाँग तइ, च ओंसोंबै त्हिंइ मुँल।
GEN 1:6 झाइले परमेश्‍वरजी बिइ, “क्‍युए म्‍हाँजोर क्ल्‍ह्‍यो घ्रि तरिगे, धै चइ क्‍यु ङ्हिंबाँ लरिगे,” बिमा
GEN 1:7 परमेश्‍वरजी बनेसि च क्ल्‍ह्‍योए न्‍होंर्बै नेरो फिर्बै क्यु स्‍यो-स्‍यो लमिंमा छान् तयाइ।
GEN 1:8 परमेश्‍वरजी च फिर्बै क्ल्‍ह्‍योने “मु” बिइ। ङेसा तइ धै न्‍हाँग तइ, च ङ्हिरोबै त्हिंइ मुँल।
GEN 1:9 झाइले परमेश्‍‍वरजी बिइ, “मुए न्‍होंर्बै क्यु क्ल्‍ह्‍यो घ्रिर खागु तयाद् धै ओबानो क्ल्‍ह्‍यो म्रोंयाद्!” बिमा छान् तयाइ।
GEN 1:10 परमेश्‍वरजी ओबानो क्ल्‍ह्‍योने “पृथ्‍बी” बिइ, धै खागु तबै क्‍युने “मा ङ्युँइ” बिइ। धै परमेश्‍वरजी ङ्ह्‍योमा च छ्याँब मुँल।
GEN 1:11 झाइले परमेश्‍वरजी बिइ, “सइ ट्हा-ट्हुमैं, प्‍लु तबै रो-रोबै धुँमैं नेरो खें-खेंमैंन् पाह्रसि प्लु तबै सिंधुँमैं म्‍लोरिगे,” बिमा छान् तयाइ।
GEN 1:12 सइ ट्हा-ट्हुमैं, प्‍लु तबै धुँमैं नेरो खें-खेंमैंन् पाह्रबै ल्हें खालर्बै प्लु तबै सिंधुँमैं म्‍लोमिंइ। धै परमेश्‍वरजी ङ्ह्‍योमा च छ्याँब मुँल।
GEN 1:13 ङेसा तइ धै न्‍हाँग तइ, च सोंरोबै त्हिंइ मुँल।
GEN 1:14 परमेश्‍वरजी धबै बिइ, “मुर त्‍हिंइ नेरो म्‍हुँइस फेलबर चारबै सैमैं तरिगे। चमैंइ चाडमैं, त्हिंइमैं, बर्षमैं फेलबै केमैं लरिगे,
GEN 1:15 धै पृथ्बीर मि म्रोंल् लमिंबर च सैमैं मुर तरिगे,” बिमा छान् तयाइ।
GEN 1:16 झाइले परमेश्‍वरजी बेल्‍ले थेबै चारबै सै ङ्हिं बनेइ। थेबै चारबै सै त्हिंइर प्रेबै ल्हागिर नेरो च्‍योंबै चारबै सै म्हुँइँसर प्रेबर बनेइ। धै खीजी मुसारमैं या बनेइ।
GEN 1:17 झाइले पृथ्बीर मि म्रोंन् लमिंबर,
GEN 1:18 त्हिंइ नेरो म्‍हुँइँसए फिर क्‍ल्‍हे तबर, धै मि म्रोंब नेरो मिछु खैब स्यो-स्यो लबर परमेश्‍वरजी च चारबै सैमैं मुर थेंमिंइ। खीजी ङ्ह्‍योमा च छ्याँब मुँल।
GEN 1:19 ङेसा तइ धै न्‍हाँग तइ, च प्लिरोबै त्हिंइ मुँल।
GEN 1:20 परमेश्‍वरजी बिइ, “क्‍युर सो प्ह्‍याबै सैमैंइ प्‍लिंरिगे धै नमेंमैं मुर प्‍हुररिगे।”
GEN 1:21 छतसि मा ङ्युँइर थे-थेबै क्युर टिबै सैमैंइ प्लिंइ धै सर प्रबै स्यो-स्योबै सो प्ह्‍याबै ताँन् सैमैं नेरो प्ह्‍या प्‍ह्‍याबै नमेमैं या परमेश्‍वरजी बनेइ। झाइले परमेश्‍वरजी ङ्ह्‍योमा चमैं छ्याँब मुँल।
GEN 1:22 झाइले परमेश्‍वरजी चमैंने “प्हारदै रोदै ल्हें तदै मा ङ्युँइर प्‍लिंदै ह्‍याद्। छलेन नमेंमैं या पृथ्बीर ल्हें तदै ह्‍यारिगे,” बिसि आशिक पिंइ।
GEN 1:23 ङेसा तइ धै न्‍हाँग तइ, च ङ्‍हरोबै त्हिंइ मुँल।
GEN 1:24 परमेश्‍वरजी बिइ, “पृथ्‍बीइ स्यो-स्योबै धिंर न्‍हबै खेदोमैं, सर फोइ क्ल्याँसि प्रबै प्हँलाँ-प्हुँलुँमैं नेरो क्ह्‍योंर्बै खेदोमैं या लरिगे,” बिमा छान् तयाइ।
GEN 1:25 परमेश्‍वरजी स्यो-स्योबै क्ह्‍योंर्बै खेदोमैं, स्यो-स्योबै धिंर न्‍हबै खेदोमैं नेरो स्यो-स्योबै फोइ क्ल्याँसि सर प्रबै प्हलाँ-प्हुलुँमैं बनेइ। धै परमेश्‍वरजी ङ्ह्‍योमा च छ्याँब मुँल।
GEN 1:26 धबै परमेश्‍वरजी बिइ, “तारे म्‍हि ङ्यो धोंन् तब ङ्यो धोंन् ब्योंब बनेले। चमैंइ मा ङ्युँइर्बै ताँगमैं, मुर्बै नमेंमैं, धिंर न्‍हबै खेदोमैं, क्ह्‍योंर्बै खेदोमैं नेरो सर प्रबै ताँन् सैमैं फिर क्‍ल्‍हे लरिगे।”
GEN 1:27 छतसि परमेश्‍वरजी म्हिलाइ ह्रोंस् धोंन् तब बनेइ, खीजी चमैं ह्रोंस धोंन् ब्योंब बनेइ। छले मुँयुँ नेरो च्हमिरि ङ्हिंना-ङ्हिंन् खीजी बनेइ।
GEN 1:28 परमेश्‍वरजी चमैंने आशिक पिंसि बिइ, “प्हारदै रोदै ल्हें तदै ह्‍याद्। पृथ्बीर प्लिंदै चए फिर क्‍ल्‍हे लदै ह्‍याद्। मा ङ्युँर्बै ताँगमैं, मुर्बै नमेमैं नेरो ह्‍युलर्बै ताँन् सो प्ह्‍याबै सैमैं फिर्बै क्ल्हे तद्।”
GEN 1:29 झाइले परमेश्‍वरजी बिइ, “ङ्‍ह्‍योद्! क्हेमैंए चबै सै तरिगे बिसि पृथ्‍बीर्बै ताँन् प्‍लु पिंबै धुँमैं नेरो रोर्न प्‍लु तबै ताँन् सिंधुँमैं ङइ पिंम्।
GEN 1:30 पृथ्‍बीर्बै ताँन् खेदोमैं, मुर्बै ताँन् नमेमैं नेरो सर प्रबै ताँन् सो प्ह्‍याबै सैमैंइ चबै ल्हागिर ङइ प्याँ पिंमैं पिंम्,” बिमा छान् तयाइ।
GEN 1:31 ह्रोंसजी बनेबै तोन्दोंरि सै परमेश्‍वरजी ङ्ह्‍योमा बेल्‍ले छ्याँब मुँल। ङेसा तइ धै न्‍हाँग तइ, च टुरोबै त्हिंइ मुँल।
GEN 2:1 छले मु नेरो पृथ्बी चर मुँबै तोन्दोंरि सै बनेल् खाँइ।
GEN 2:2 ह्रोंसजी लबै के परमेश्‍वरजी टुरोर खाँइ। धै ह्रोंसजी लबै ताँन् केउँइँले खीजी ङिरोर भों न्हइ।
GEN 2:3 झाइले परमेश्‍वरजी ङिरोबै त्हिंइलाइ आशिक पिंसि च त्हिंइ पबित्र लमिंइ। तलेबिस्याँ ह्रोंसजी लबै ताँन् केउँइँले ङिरोर भों न्हइ।
GEN 2:4 मु नेरो पृथ्बी बनेबै ताँमैं चुन् ग। याहवेह परमेश्‍वरजी मु नेरो पृथ्बी बनेबै त्हेर
GEN 2:5 सर प्याँ पिंमैं घ्रि या आरेल, धै छिमैं तोइ आम्‍लोल। तलेबिस्याँ याहवेह परमेश्‍वरजी पृथ्बीर नाँ आकुलल। धै स ताब क्योब लबै म्हि या खाबै आरेल।
GEN 2:6 दिलेया पृथ्बीउँइँले स्योंमैं त्‍होंसि ताँन् स प्हाँमिंमल।
GEN 2:7 झाइले याहवेह परमेश्‍वरजी सउँइँले म्हि बनेसि चए नखुँरि सो फुइमिंमा म्हि सोगों तइ।
GEN 2:8 परमेश्‍वरजी स्यारउँइँ अदन बिबै क्ल्ह्‍योरि बगैंचा घ्रि बनेसि खीजी बनेबै म्हि चर थेंमिंइ।
GEN 2:9 झाइले ङ्ह्‍योबर छ्याँब, चबर लिंबै रो रोबै ल्‍हें सिंधुँमैं याहवेह परमेश्‍वरजी सउँइँले म्‍लोमिंइ। धै बगैंचाए म्हाँजोर खोंयोंइ आखाँबै छ्‍ह योंबै सिधुँ नेरो छ्याँब आछ्याँब फेलल् खाँबै ज्ञान पिंबै सिंधुँ या रुँइँइ।
GEN 2:10 बगैंचा प्हाँबर अदनउँइँले स्‍यों घ्रि त्‍होंल, च फ्रेसि स्‍यों प्लि तल।
GEN 2:11 स्‍यों घ्रिए मिं पिशोन ग। चु स्‍यों हबीलाए ताँन् ह्‍युलर बग्दिम्। चर मारा योंम्।
GEN 2:12 (च ह्‍युलर्बै मारा छ्याँब तम्। चर बेल्‍ले लिंबै थाँ खबै गोकुल बिबै सिंधुँमैं नेरो छ्याँब तुथु प्ह्‍युरुमैं या योंम्।)
GEN 2:13 झाइले अर्को स्‍योंए मिं गीहोन ग। कूशए ह्‍युलजरे बग्दिबै स्‍यों चुन् ग।
GEN 2:14 झाइले अर्को स्‍योंए मिं टाइग्रिस ग। चु स्‍यों अश्‍शुरए स्यारउँइँ बग्दिम्। धै अर्को स्‍योंए मिं यूफ्रेटिस ग।
GEN 2:15 याहवेह परमेश्‍वरजी अदनए बगैंचा ङ्ह्‍योबर नेरो ताब स्युइब लबै ल्हागिर म्हि चर बोसि थेंमिंइ।
GEN 2:16 झाइले खीजी म्हिने बिइ, “बगैंचार्बै ताँन् सिंधुँर्बै रो क्हिइ तोइ आमैंन्ले चस्याँ तम्।
GEN 2:17 दिलेया छ्याँब नेरो आछ्याँब सेल् लमिंबै ज्ञान पिंबै रो बिस्याँ क्हिइ आचद्। तलेबिस्याँ च रो चबै तोदोंन् क्हि सियाब्मुँ।”
GEN 2:18 याहवेह परमेश्‍वरजी बिइ, “म्हि घ्रिन् टिब छ्याँब आरे। छतसि ङइ चए ल्हागिर चने ङ्‍हेंब चलाइ ल्होब थु घ्रि बनेब्मुँ।”
GEN 2:19 याहवेह परमेश्‍वरजी सउँइँले क्ह्‍योंर्बै ताँन् खेदो नेरो मुर प्हुरर्बै ताँन् नमेमैं बनेसि म्हिइ चमैंए मिं तोतो थेंमन बिसि था सेबर च ङाँर पखइ। धै म्हिइ सो प्ह्‍याबै सैमैंल तो तो मिं पिंइ चमैंए मिं चन् तइ।
GEN 2:20 छले म्हिइ न्‍हबै खेदोमैं, मुर प्हुरबै नमेमैं नेरो ताँन् क्ह्‍योंर्बै खेदोमैंए मिं थेंइ। दिलेया आदमए ल्हागिर ङ्‍हेंब नेरो ल्होब खाबै आयोंल।
GEN 2:21 छतसि याहवेह परमेश्‍वरजी म्हिलाइ थेबै न्हरु च्हुइमिंसि चए रेसिं घ्रि ट्हुइसि चर सेइ प्लिंमिंइ।
GEN 2:22 याहवेह परमेश्‍वरजी म्हिउँइँले ट्हुइबै रेसिंउँइँले च्हमिरि घ्रि बनेसि म्हि ङाँर पखइ।
GEN 2:23 च च्हमिरि म्रोंसि म्हिइ बिइ, “चुम् ङए ह्रुइबए ह्रुइब, नेरो ङए सेए सेन् ग! चुने च्हमिरि बिब्मुँ, तलेबिस्याँ चु मुँयुँउँइँले ट्हुइब् ग।”
GEN 2:24 छतसि मुँयुँइ ह्रोंसए आबा-आमालाइ पिसि ह्रोंसए प्ह्रेंस्योने क्ह्रिरिमुँ। धै चमैंए ज्यु घ्रिन् तमुँ।
GEN 2:25 मुँयुँ नेरो चए प्ह्रेंस्यो ङ्हिंना-ङ्हिंन् क्लुँनन् मुँल। दिलेया फा आपिमल।
GEN 3:1 याहवेह परमेश्‍वरजी बनेबै क्ह्‍योंर्बै सो प्ह्‍याबै सैमैं न्होंरि प्हुरि ताँन् भन्दा स्योर्गु मुँल। चइ च्हमिरिने “परमेश्‍वरजी क्हेमैंने बगैंचार्बै सिंधुँर्बै रो खाबै या आचद् बिइमुँ वा?” बिसि ङ्योएइ।
GEN 3:2 च्हमिरिइ प्‍हुरिने बिइ, “बगैंचार्बै सिंधुँर्बै रो ङिइ चल् खाँम्।
GEN 3:3 दिलेया ‘बगैंचाए म्हाँजोर मुँबै सिंधुँर्बै रो बिस्याँ क्हेमैंइ आचद्, आछुइद्। आस्‍याँ क्हेमैं सियाब्मुँ,’ बिसि परमेश्‍वरजी ङिने बिइमुँ।”
GEN 3:4 प्‍हुरिइ च्हमिरिने बिइ, “क्हेमैं आसि।
GEN 3:5 क्हेमैंइ च रो चबै त्हिंइर्न क्हेमैंए सैं न्होंर्बै मि थोंब्मुँ, धै छ्याँब आछ्याँब सेल् खाँबै ज्ञान योंसि क्हेमैं या परमेश्‍वर धोंन् तब्मुँ बिसि परमेश्‍वरजी सेइमुँ।”
GEN 3:6 झाइले च सिंधुँर्बै रो चबर लिंब, ङ्ह्‍योमा छ्याँब नेरो बुद्धि योंबै ल्हागिर च सिंधुँए रो चल् त्हुमन बिसि च्हमिरिइ मैंइ। छतसि चइ च सिंधुँए रो टोंसि चवाइ, ह्रोंसए प्युँलाज्यै पिंइ, धै प्युँज्यै या चइ।
GEN 3:7 च रो चबै तोंदोंन् चमैं ङ्हिंना ङ्हिंनए मि थोंयाँइ, झाइले खेंमैं क्लुँनन् मुँन बिसि चमैंइ सेइ। छतसि तुँबुए लमैं थुसि ह्रोंसए ल्हागिर क्‍वें टुसि खिइ।
GEN 3:8 झाइले ङेसा छजाँ याहवेह परमेश्‍वर बगैंचार स्‍युररिमा चमैंइ खीए कै थेइ, धै बगैंचार्बै सिंधुँमैंए म्हाँजोरि याहवेह परमेश्‍वरउँइँले लोयाइ।
GEN 3:9 दिलेया याहवेह परमेश्‍वरजी “क्हि खनिर मुँ?” बिसि म्हिलाइ हुइ।
GEN 3:10 चइ बिइ, “ङइ बगैंचार क्हिए कै थेइ धै ङ ङ्हिंसि लोयाइ, तलेबिस्याँ ङ क्लुँनन् मुँल।”
GEN 3:11 “क्हि क्लुँनन् मुँ बिसि खाबइ बिइ? ङइ आचद् बिबै सिंधुँर्बै रो क्हिइ चवाल् वा?” बिसि परमेश्‍वरजी ङ्योएइ।
GEN 3:12 म्हिइ बिइ, “ङने टिरिगे बिसि क्हिइ पिंबै च्हमिरिइ च सिंधुँर्बै रो ङ पिंइ। धै ङइ चइ।”
GEN 3:13 छतमा याहवेह परमेश्‍वरजी च्हमिरिने “क्हिइ तले छ लल?” बिमा च्हमिरिइ बिइ, “प्हुरिइ ङने ‘तोइ आत! च रो चलेन् तम्’ बिसि स्योर तेइ। छतसि ङइ चइ।”
GEN 3:14 झाइले याहवेह परमेश्‍वरजी प्‍हुरिने बिइ, “क्हिइ स्योर तेबइले क्हि धिंर न्‍हबै खेदोमैं नेरो ताँन् क्ह्‍योंर टिबै खेदोमैं न्होंरि क्हिइ ल्हें सराप योंब्‍मुँ। क्हि फोइ क्ल्याँसि प्रल् त्हुब्मुँ धै क्हिए छ्ह तिगोंन् स चब्‍मुँ।
GEN 3:15 क्हि नेरो च्हमिरिए म्हाँजोरि धै क्हिए सन्तानमैं नेरो च्हमिरिए सन्तानए म्हाँजोरि ङइ प्होंब्-नेब् लमिंम्। च्हमिरिए सन्तानइ क्हिए क्र प्‍लेब्मुँ धै क्हिइ चए प्‍हले तिंजुर चोब्‍मुँ।”
GEN 3:16 झाइले खीजी च्हमिरिने बिइ, “क्हिए प्हसे फिबै त्हेर्बै बेथा ङइ बेल्‍ले बडिमिंब्‍मुँ। क्हिइ दुःखले प्हसे फिब्‍मुँ। क्हिए सैं प्युँ ङाँइँन तरिब्‍मुँ, छतसि चइ क्हिए फिर क्‍ल्हे लब्‍मुँ।”
GEN 3:17 च लिउँइँ खीजी आदमने बिइ, “क्हिइ प्ह्रेंस्योए ताँ थेसि ङइ आचद् बिबै सिंधुँर्बै रो चबइले क्हिइ लमा सइ सराप योंइमुँ। क्हिए छ्ह तिगोंन् दुःखले के लसि चल् त्हुब्मुँ।
GEN 3:18 सइ क्हिए ल्हागिर पुजु नेरो क्‍ह्रुमैं म्‍लोमिंब्‍मुँ धै क्हिइ म्रोंर्बै प्याँ पिंमैं चब्मुँ।
GEN 3:19 क्हि सर आकोंन् समा क्हिए ङ्‍होर्बै छैब प्ह्‍युरसि दुःखले कमैंबै कमैं चल् त्हुब्मुँ। क्हि सउँइँलेन् बनेल, क्हि सन् ग, क्हि सिसि सर्न कोंयाब्मुँ।”
GEN 3:20 आदमइ ह्रोंसए प्‍ह्रेंस्‍योए मिं हब्बा थेंइ, तलेबिस्याँ च ताँन् सोगोंमैंए आमा ग।
GEN 3:21 याहवेह परमेश्‍वरजी आदम नेरो चए प्‍ह्रेंस्‍योए ल्हागिर ट्हुबिए क्‍वें बनेसि खिमिंइ।
GEN 3:22 धै याहवेह परमेश्‍वरजी बिइ, “ङ्यो धोंलेन् म्हि छ्याँब-आछ्याँब सेल् खाँब् तइमुँ। तारे चइ खोंयोंइ सोल् योंबै सिंधुँर्बै रो टोंसि चल् आयोंरिगे। आस्याँ च खोंयोंन् बिलै सोरिब्मुँ।”
GEN 3:23 छतसि “सउँइँलेन् च बनेल, च सर्न के लरिगे” बिसि याहवेह‍ परमेश्‍वरजी अदनए बगैंचाउँइँले चलाइ तेवाइ।
GEN 3:24 खीजी म्हिलाइ तेवाबै लिउँइँ खोंयोंन् बिलै सोल् योंबै सिंधुँर फेनेबै घ्याँर खाबै या आखरिगे बिसि रुँबै ल्हागिरि अदनए बगैंचार्बै स्यारउँइँले करूबमैं नेरो कारग्युले स्युररिबै मिइ लुँरिबै सेलाँ (तरवार) थेंमिंइ।
GEN 4:1 आदम ह्रोंसए प्ह्रेंस्योने बालु तइ, धै हब्बाइ प्हसे नोसि कयिन फिइ, धै बिइ, “याहवेहजी ल्होमिंसि ङइ च्ह घ्रि फिइ।”
GEN 4:2 चइ धबै कयिनए अलि हाबिल फिइ। हाबिल क्‍यु छैं तइ, कयिन बिस्याँ म्रोंर के लब तइ।
GEN 4:3 दे त्हे लिउँइँ कयिनइ म्रोंर रोबै सैमैंउँइँले च्हौदे भेटि याहवेहए ङाँर पखइ।
GEN 4:4 दिलेया हाबिलइ ह्रोंसए क्युए बगालउँइँले ओंसों फिबै छोबै क्यु भेटि पखइ। छतमा याहवेह हाबिल नेरो चए भेटि म्रोंसि सैं तोंइ।
GEN 4:5 दिलेया कयिन नेरो चए भेटि म्रोंसि सैं आतों। छतमा कयिन बेल्‍ले ह्रिस खसि ङ्‍हो छु लइ।
GEN 4:6 छतमा याहवेहजी कयिनने बिइ, “क्हि तले ह्रिस खल? क्हिए ङ्‍हो तले छु लल?
GEN 4:7 क्हिइ छ्याँबै भेटि पखस्‍याँ ङ क्हि म्रोंसि सैं आतोंमल् वा? क्हिइ छ्याँब के आलस्याँ पाप क्हिए म्रार्न क्हुइ टिरिम्। चइ क्हिए फिर क्ल्हे तल् म्हैम्, दिलेया क्हि चए फिर क्‍ल्‍हे तल् त्हुम्।”
GEN 4:8 कयिनइ ह्रोंसए अलि हाबिलने “खो, ङ्यो बैरु म्रोंर ह्‍याले,” बिइ। झाइले चमैं म्रोंर ह्‍यामा कयिनइ ह्रोंसए अलि हाबिल सैवाइ।
GEN 4:9 छतमा याहवेहजी कयिनने “क्हिए अलि हाबिल खनिर मुँ?” बिसि ङ्योएमा चइ बिइ, “तुसि! ङइ आसे। ङ ङए अलिए प्ह्रोंछैं वा?”
GEN 4:10 याहवेहजी बिइ, “क्हिइ छाबै आछ्याँबै के तले लल? क्हिए अलिए कोइ सउँइँले ङने ग्वार ह्रिरिइमुँ।
GEN 4:11 क्हिइ सराप योंइमुँ। तारे क्हिइ सर खेति लल् योंरिब आरे। क्हिइ अलि सैवामा सइ सुँ फैइ। क्हिए अलिए कोइ स प्हाँइमुँ।
GEN 4:12 तारेसेरो क्हिइ सर खेति लमा सइ क्हिए ल्हागिर रोमैं तोइ पिंरिब आरे। क्हि पृथ्‍बीर खोंयोंन् बिलै छिं ङ्हाँन् आयोंन्ले स्‍युररिल् त्हुब्मुँ।”
GEN 4:13 कयिनइ याहवेहने बिइ, “ङइ सैदिल् आखाँबै दण्ड ङलाइ तइ।
GEN 4:14 तिंयाँ क्‍हिजी चु क्ल्ह्‍योउँइँले ङलाइ तेवासिन् मुँ, धै ङ क्हिउँइँले लोल् त्हुब्मुँ। ङ पृथ्बीरि छिं ङ्हाँन् आयोंन्‍ले स्‍युररिल् त्हुब्मुँ, छतसि ङलाइ स्याब्मैंइ ङ सैवाब्‍मुँ।”
GEN 4:15 छबिमा याहवेहजी चने बिइ, “छ आङिं! खाबइ कयिन सैमुँ चने बालु ङि गुणा खी किंब्मुँ।” छतसि कयिन स्याब्मैं खाबज्यै आसैरिगे बिसि याहवेहजी चए ज्युर चिनु घ्रि लमिंइ।
GEN 4:16 झाइले कयिन याहवेहउँइँले त्‍होंसि अदनए स्यारउँइँ मुँबै नोद बिबै ह्‍युलर टिबर होंइ।
GEN 4:17 कयिन ह्रोंसए प्ह्रेंस्योने बालु तसि चए प्ह्रेंस्योइ प्‍हसे नोइ, धै हनोक बिबै च्ह फिइ। कयिनइ सहर घ्रि बनेसि ह्रोंसए च्‍हए मिं हनोक च सहरए मिंर्न थेंइ।
GEN 4:18 झाइले हनोकउँइँले ईराद बिबै च्ह योंइ। ईरादउँइँले महूयाएल बिबै च्ह योंइ। महूयाएलउँइँले मतूशाएल बिबै च्ह योंइ। मतूशाएलउँइँले लेमेख बिबै च्ह योंइ।
GEN 4:19 लेमेखइ प्ह्रेंस्यो ङ्हिं पखइ। थेब्स्योए मिं आदा, च्योंब्स्योए मिं सिल्‍ला मुँल।
GEN 4:20 आदाइ याबाल बिबै च्ह फिइ। तम्‍बुर टिब्‍मैंए नेरो खेदो न्हब्‍मैंए खे च मुँल।
GEN 4:21 चए अलिए मिं यूबाल मुँल। च बिस्याँ बीणा नेरो मुरलि ह्राब्‍मैंए खे मुँल।
GEN 4:22 सिल्‍ला बिबै च्योंब्स्योइ तूबलकयिन बिबै च्ह फिइ। चइ ताँन् खालर्बै काँस नेरो पैए हातियारमैं बनेमल। तूबलकयिनए अङाँ नामा बिब् मुँल।
GEN 4:23 लेमेखइ ह्रोंसए प्ह्रेंस्योमैंने बिइ, “ओ आदा नेरो सिल्‍ला, ङए ताँ थेद्। ओ लेमेखए प्ह्रेंस्योमैं, ङइ बिबै ताँमैं छेनाले थेद्। तलेबिस्याँ ङलाइ नल् लबै म्हि ङइ सैवाइमुँ, ङलाइ प्रिंसि आधाकल्सो लबै फ्रेंसि या ङइ सैवाइमुँ।
GEN 4:24 कयिनलाइ सैब्मैंल म्हि ङि सिल् त्हुब्मुँ बिस्याँ, लेमेखलाइ सैब्मैंल झन् ङिच्‍युसे ङि म्हि सिल् त्हुब्मुँ।”
GEN 4:25 धबै आदम ह्रोंसए प्ह्रेंस्योने बालु तसि चए प्ह्रेंस्योइ च्‍ह फिइ। “कयिनइ सैवाबै हाबिलए साटोरि परमेश्‍वरजी ङलाइ कोलो घ्रि पिंइमुँ।” बिसि हब्बाइ चए मिं शेत थेंइ।
GEN 4:26 शेतलै या च्‍ह घ्रि तइ, चए मिं एनोश थेंमिंइ। च त्‍हेउँइँले म्‍हिमैंइ याहवेहए मिं किंबर होंइ।
GEN 5:1 आदमए बंशमैं चुमैंन् ग। परमेश्‍वरजी म्हि बनेमा खीजी ह्रोंस धोंबन् बनेइ। खीजी मुयुँ नेरो च्हमिरि बनेइ।
GEN 5:2 खीजी चमैंलाइ बनेसि आशिक पिंसि “म्हि” बिबै मिं थेंइ। आदम बिबै ओंसोंबै म्हिए प्हसेमैंए ताँ चुर प्ह्रिथेंइमुँ।
GEN 5:3 आदम प्रसे सोंच्‍यु बर्ष तमा चइ च्‍ह घ्रि योंइ। चए मिं शेत थेंइ।
GEN 5:4 शेत फिबै लिउँइँ आदम प्रेब्ब्रा बर्ष सोसि अरू च्‍ह-च्‍हमिमैं योंइ।
GEN 5:5 आदम कुब्ब्रासे सोंच्‍यु बर्ष तसि सिइ।
GEN 5:6 शेत प्रसे ङ्‍हदिं तमा एनोश बिबै च्ह योंइ।
GEN 5:7 एनोश फिबै लिउँइँ शेत प्रेब्ब्रासे ङिदिं सोसि अरू च्‍ह-च्‍हमिमैं योंइ।
GEN 5:8 शेत कुब्ब्रासे च्‍युसे ङ्हिंदिं तसि सिइ।
GEN 5:9 एनोश कुच्‍यु बर्ष तमा केनान बिबै च्ह योंइ।
GEN 5:10 केनान फिबै लिउँइँ एनोश प्रेब्ब्रासे च्‍युसे ङ्‍हदिं सोसि अरू च्‍ह-च्‍हमिमैं योंइ।
GEN 5:11 एनोश कुब्ब्रासे ङ्‍हदिं तसि सिइ।
GEN 5:12 केनान ङिच्‍यु बर्ष तमा चइ महलालेल बिबै च्ह योंइ।
GEN 5:13 महलालेल फिबै लिउँइँ केनान प्रेब्ब्रासे प्‍लिच्‍यु बर्ष सोसि अरू च्‍ह-च्‍हमिमैं योंइ।
GEN 5:14 केनान कुब्ब्रासे च्‍युदिं तसि सिइ।
GEN 5:15 महलालेल टुच्‍युसे ङ्‍हदिं तमा येरेद बिबै च्ह योंइ।
GEN 5:16 येरेद फिबै लिउँइँ महलालेल प्रेब्ब्रासे सोंच्‍यु बर्ष सोसि अरू च्‍ह-च्‍हमिमैं योंइ।
GEN 5:17 महलालेल प्रेब्ब्रासे कुच्युसे ङ्‍हदिं तसि सिइ।
GEN 5:18 येरेद प्रसे टुच्‍युसे ङ्हिंदिं तमा चइ हनोक बिबै च्ह योंइ।
GEN 5:19 हनोक फिबै लिउँइँ येरेद प्रेब्ब्रा बर्ष सोसि अरू च्‍ह-च्हमिमैं योंइ।
GEN 5:20 येरेद कुब्ब्रासे टुच्‍युसे ङ्हिंदिं तसि सिइ।
GEN 5:21 हनोक टुच्‍युसे ङ्‍हदिं तमा चइ मतूशेलह बिबै च्ह योंइ।
GEN 5:22 मतूशेलह फिबै लिउँइँ हनोक सोंब्ब्रा बर्ष समा परमेश्‍वरने बा-बालुन् प्ररिइ। धै अरू च्‍ह-च्‍हमिमैं योंइ।
GEN 5:23 च त्हेर हनोक सोंब्ब्रासे टुच्‍युसे ङ्‍हदिंर्बै मुँल।
GEN 5:24 हनोक परमेश्‍वरने बा-बालुन् प्रमल। छले प्रना-प्रन् चलाइ खाबज्यै आम्रों, तलेबिस्याँ परमेश्‍वरजी चलाइ क्‍वे बोवाल।
GEN 5:25 मतूशेलह प्रसे प्रेच्‍युसे ङिदिं तमा लेमेख बिबै च्ह योंइ।
GEN 5:26 लेमेख फिबै लिउँइँ मतूशेलह ङिब्ब्रासे प्रेच्‍युसे ङ्हिंदि सोसि अरू च्‍ह-च्‍हमिमैं योंइ।
GEN 5:27 मतूशेलह कुब्ब्रासे टुच्युसे कुदिं तसि सिइ।
GEN 5:28 लेमेख प्रसे प्रेच्‍युसे ङ्हिंदिं तमा च्ह घ्रि योंइ।
GEN 5:29 चइ ह्रोंसए च्हए मिं नोआ थेंसि बिइ, “याहवेहजी सलाइ सराप पिंल। दिलेया च सउँइँलेन् ङ्योइ लबै केउँइँले चु कोलोइ भों न्हल् पिंब्मुँ।”
GEN 5:30 नोआ फिबै लिउँइँ लेमेख ङ्‍हब्ब्रासे कुच्‍युसे ङ्‍हदिं सोसि अरू च्‍ह-च्‍हमिमैं योंइ।
GEN 5:31 लेमेख ङिब्ब्रासे ङिच्‍युसे ङ्हिंदिं तसि सिइ।
GEN 5:32 नोआ ङ्हब्ब्रा बर्ष तमा शेम, हाम नेरो येपेत योंइ।
GEN 6:1 लिउँइँ ह्‍युलर म्हिमैं ल्हें तदै ह्‍यामा चमैंल च्‍हमिमैं फिइ।
GEN 6:2 झाइले परमेश्‍वरए च्हमैंइ म्हिमैंए च्‍हमिमैं छ्याँब् म्रोंसि ह्रों-ह्रोंसइ खोबै प्ह्रेंस्योमैं पखइ।
GEN 6:3 छतमा याहवेहजी बिइ, “ङइ म्हिमैंलाइ खोंयोंन् बिलै सोल् पिंरिब् आरे, तलेबिस्याँ म्हि सिल् त्हुब्मुँ। तारेसेरो चमैं प्रसे ङ्हिस्यु बर्ष मत्‍त्रे सोब्‍मुँ।”
GEN 6:4 च त्‍हेर नेरो लिउँज्यै या पृथ्बीरि नेफिलिममैं मुँल। परमेश्‍वरए च्हमैं म्हिमैंए च्‍हमिमैं ङाँर ह्‍याब्रें लसि प्‍हसेमैं फिइ। चमैंन् स्योंम्बै भोंब्मैं-खाँब्मैं नेरो मिं कालिदिब्मैं मुँल।
GEN 6:5 पृथ्बीरि म्हिमैंइ ल्हें आछ्याँबै केमैं लब्रें लइ। धै खोंयोंन् बिलै चमैंइ आछ्याँबै ताँमैं मत्‍त्रे मैंरिब याहवेहजी म्रोंइ।
GEN 6:6 छतमा “ङइ तले म्हिमैं बनेसि पृथ्बीर थेंगे?” बिसि याहवेहजी पछुत लसि बेल्‍ले सैं नइ।
GEN 6:7 छतसि याहवेहजी बिइ, “ङइ बनेबै म्हिमैं, सर क्ल्याँसि प्रबै प्हँलाँ-प्हुँलुमैं, क्ह्‍योंर टिबै खेदोमैं नेरो मुर्बै नमेमैं ताँन् पृथ्‍बीउँइँले नास लवाब्मुँ। तलेबिस्याँ चुमैं बनेबइले ङए सैं नइमुँ।”
GEN 6:8 दिलेया नोआलाइ बिस्याँ याहवेहजी छ्याँब म्रोंइ।
GEN 6:9 नोआए ताँमैं चुन् ग। चए पलोर नोआ मत्‍त्रे छ्याँबै के लबै म्हि मुँल। च परमेश्‍वरने बा-बालुन् प्रमल।
GEN 6:10 नोआइ शेम, हाम नेरो येपेत बिबै च्‍ह सौंलो योंइ।
GEN 6:11 दिलेया पृथ्‍बीर खन्तोंदोंन् सैब् म्‍लोब् लब नेरो आछ्याँबै सैइ प्लिंब परमेश्‍वरजी म्रोंइ।
GEN 6:12 छले पृथ्‍बीर्बै म्हिमैं सैब् म्‍लोब् नेरो आछ्याँबै के लब परमेश्‍वरजी म्रोंइ। तलेबिस्याँ पृथ्‍बीर्बै ताँन् म्हिमैंए सैं दुष्‍ट तल् खाँल।
GEN 6:13 छतसि परमेश्‍वरजी नोआने बिइ, “ङइ ताँन् म्हिमैं नास लवाबै सैं लल् खाँइमुँ। तलेबिस्याँ चमैंइ लबै आछ्याँबै केमैंइ पृथ्बी प्‍लिंइमुँ। छतसि ङइ चमैंलाइ पृथ्‍बीउँइँले नास लवाम्।
GEN 6:14 छतसि क्हिइ गोपेर बिबै सिंए क्यु झाज घ्रि बनेद्। झाजर कोठा-कोठा लसि च न्‍होंर नेरो फिर अलकत्राइ स्‍यालद्।
GEN 6:15 क्हिइ च झाज छले बनेदु: झाज प्रसे प्लिच्‍यु मिटर ह्रिंब, ङ्हिस्युसे सों मिटर प्‍ल्‍हाब नेरो च्‍युसे ङ्हिं मिटर नुब लद्।
GEN 6:16 झाजर मि म्रोंरिगे बिसि तिउरु वाथेंसि स्युद्। झाज तल सोंबै बनेद्। चए रेर म्रा घ्रि थेंन्।”
GEN 6:17 “मु न्‍होंर्बै ताँन् सो प्ह्‍याबै सैमैं नास लवाबर ङइ पृथ्‍बीर नाँ बाडि कुलब्मुँ, धै पृथ्‍बीर मुँबै ताँन् सो प्ह्‍याबै सैमैं सियाब्मुँ।
GEN 6:18 दिलेया ङइ क्हिने बाछा फैब्‍मुँ। क्हि, क्हिए प्ह्रेंस्यो नेरो क्हिए च्ह-चोंमैं ताँन् क्यु झाज न्‍‍होंर होंब्मुँ।
GEN 6:19 “झाइले सो प्ह्‍याबै ताँन् खालर्बै त्होब नेरो मोंमा क्हिने बालुन् सोरिगे बिसि तिजोर-तिजोर क्यु झाजए न्होंर पखो।
GEN 6:20 ताँन् खालर्बै नमेमैं, खेदोमैं नेरो सर क्‍ल्याँसि प्रबै ताँन् प्हँलाँ-प्हुँलुँमैं तिजोर-तिजोर क्हिने बालुन् सोरिगे बिसि झाजर न्होंर पखो।
GEN 6:21 ह्रोंसए ल्हागिर नेरो ताँन् खालर्बै सो प्ह्‍याबै सैमैंइ चबै ल्हागिर ताँन् खालर्बै चबै सै पसि क्हिने बालु थेंन्।”
GEN 6:22 परमेश्‍वरजी बिब् धोंले नोआइ ताँन् लइ।
GEN 7:1 झाइले याहवेहजी नोआने बिइ, “क्हि नेरो क्हिए परवा क्यु झाज न्‍होंर ह्‍याद्। तलेबिस्याँ ङइ चु पृथ्‍बीर छ्याँबै के लबै म्हि क्हि मत्‍त्रे म्रोंइमुँ।
GEN 7:2 झाइले ताँन् खालर्बै चल् तबै खेदोमैं न्होंर्बै त्होब नेरो मोंमा ङिजोर धै चल् आतबै खालर्बै खेदोमैं त्होब नेरो मोंमा तिजोर क्यु झाजर पखो।
GEN 7:3 झाइले पृथ्‍बी तिगोंन् नमेमैंए प्लु आथुँयारिगे बिसि नमेमैं या भाले नेरो योंम लसि ङिजोर क्हिने बालुन् पखो।
GEN 7:4 तारेबै ङिरोर ङइ पृथ्‍बीर प्लिच्यु त्हिंइ प्लिच्यु म्‍हुँइस नाँ कुलब्मुँ। धै ङइ बनेबै सो प्ह्‍याबै सैमैं ताँनन् पृथ्‍बीउँइँले नास लवाब्मुँ।”
GEN 7:5 झाइले याहवेहजी लद् बिबै के ताँनन् नोआइ लइ।
GEN 7:6 पृथ्‍बीर नाँ बाडि तमा नोआ टुब्ब्रा बर्षर्बै मुँल।
GEN 7:7 नाँ बाडिउँइँले सोरिगे बिसि नोआ, चए प्ह्रेंस्यो, च्ह-चोंमैं क्यु झाज न्होंर होंइ।
GEN 7:8 परमेश्‍वरजी बिब् धोंले चल् तब नेरो चल् आतबै खेदोमैं, नमेंमैं नेरो सर क्‍ल्याँसि प्रबै ताँन् सो प्ह्‍याबै सैमैं
GEN 7:9 भाले नेरो योंम तिजोर-तिजोर नोआने बालु क्यु झाजर होंइ।
GEN 7:10 झाइले ङिरो लिउँइँ पृथ्‍बीर नाँ बाडि तबर होंइ।
GEN 7:11 नोआ टुब्ब्रा बर्ष तबै सालर्बै म्हैंन ङ्हिंर्बै च्युसे ङिगैं तमा मुउँइँले नाँ युबै युबन् तइ। धै पृथ्बी न्होंर्बै थे-थेबै क्युए मुल्मैं ताँन् त्होंयाँइ।
GEN 7:12 छले पृथ्‍बीर प्लिच्यु त्हिंइ प्लिच्यु म्हुँइँस नाँ युबै युबन् तइ।
GEN 7:13 च त्हिंइर्न नोआ, चए प्ह्रेंस्यो, च्हमैं शेम, हाम, येपेत नेरो चमैंए प्ह्रेंस्योमैं सौंलो क्यु झाज न्होंर होंइ।
GEN 7:14 चमैंने बालु ताँन् खालर्बै क्ह्‍योंर्बै खेदोमैं, धिंर न्हबै खेदोमैं, सर क्ल्याँसि प्रबै प्हँलाँ-प्हुँलुँमैं नेरो नमेंमैं या क्यु झाज न्होंर होंइ।
GEN 7:15 परमेश्‍वरजी नोआने बिब् धोंले सो प्ह्‍याबै ताँन् खालर्बै भाले नेरो योंम नोआने बालु क्यु झाज न्होंर होंइ।
GEN 7:16 च लिउँइँ याहवेहजी झाजए म्रा तोरमिंइ।
GEN 7:17 पृथ्बीरि प्लिच्यु त्हिंइ समा नाँ बाडि तरिमा पृथ्‍बीर क्यु ल्हें तसि क्यु झाज क्यु फि-फि क्वेसि सउँइँले कैंडो ह्‍याबर होंइ।
GEN 7:18 नाँ युबै युब् तरिमा पृथ्‍बीर क्यु बेल्‍ले ल्हें तसि क्यु झाज क्यु फि-फि क्वेबर होंइ।
GEN 7:19 पृथ्‍बीर नाँ युबै युबन् तमा क्यु बेल्‍ले ल्हें तसि नुब नुबै कोंमैं ताँन् प्ल्हुँयाँइ।
GEN 7:20 नुबै कोंमैं या मिटर ङि समा प्ल्हुँ‍वाल।
GEN 7:21 पृथ्‍बीर प्रब् टिब् लबै ताँन् सो प्ह्‍याबै सैमैं नमेंमैं, न्हबै खेदोमैं, क्ह्‍योंर्बै खेदोमैं, सर क्ल्याँसि प्रबै प्हँलाँ-प्हुँलुँमैं, म्हिमैं ताँन् सियाइ।
GEN 7:22 छले पृथ्‍बीर मुँबै सो प्ह्‍याबै सैमैं ताँन् सियाइ।
GEN 7:23 पृथ्‍बीर मुँबै ताँन् सो प्ह्‍याबै सैमैं म्हि, खेदो, क्ल्याँइ प्रबै प्हँलाँ-प्हुँलुँ, नमेंमैं ताँन् पृथ्‍बीउँइँले याहवेहजी नास लवाइ। नोआने बालु झाजर मुँब्मैं मत्‍त्रे सोइ।
GEN 7:24 पृथ्बीर प्रसे ङ्‍हच्यु त्हिंइ समा क्यु चैरिइ।
GEN 8:1 दिलेया परमेश्‍वरजी नोआ नेरो चने बालु क्यु झाजर मुँबै ताँन् धिंर न्हबै खेदोमैं नेरो क्ह्‍योंर्बै खेदोमैं मैंसि पृथ्‍बीर खैं कुल्मिंइ। धै क्यु ङ्हारबर होंइ।
GEN 8:2 स न्होंर्बै थे थेबै क्युए मुल्मैं ङ्हारयाइ धै मुउँइँले नाँ युब टियाइ।
GEN 8:3 झाइले पृथ्‍बीर क्यु ङ्हा-ङ्हारै ह्‍यासि प्रसे ङ्‍हच्यु त्हिंइ लिउँइँ क्यु ङ्हारयाइ
GEN 8:4 च सालर्बै म्हैंन ङिलाए च्युसे ङिगैंर क्यु झाज आरारातए कोंर टियाइ।
GEN 8:5 क्यु ङ्हारदै ह्‍यामा म्हैंन च्युर्बै ओंसोंबै त्हिंइरि कोंमैंए च्होमैं म्रोंइ।
GEN 8:6 प्लिच्यु त्हिंइ लिउँइँ ह्रोंसइ बनेबै क्यु झाजए च्योंने म्रा नोआइ थोंसि
GEN 8:7 कग घ्रि प्हुरवामा सर्बै क्यु आङ्हारन् समा च कग छाइ-छुइ प्हुररिइ।
GEN 8:8 च लिउँइँ “सर क्यु ङ्हारइ उ” बिसि ङ्ह्‍योबर नोआइ तोंगु (ढुकुर) घ्रि या प्हुरमिंइ।
GEN 8:9 दिलेया पृथ्बीरि क्यु आङ्हारल। छतसि च तोंगु प्हले न्हेबै क्ल्ह्‍यो आयोंसि च ङाँर्न झाजर एखइ। छतसि नोआइ ह्रोंसए यो स्योंसि च तोंगु क्यु झाज न्होंर थेंइ।
GEN 8:10 झाइले ङिगैं लिउँइँ नोआइ धबै च तोंगु झाजउँइँले प्हुरमिंइ।
GEN 8:11 च तोंगु ङेसर च ङाँर एखमा चए सुँर भर्खर टोंबै जैतुनए प्हो घ्रि मुँल। छतमा सर क्यु ङ्हारयान बिब नोआइ सेइ।
GEN 8:12 ङिगैं लिउँइँ चइ धबै च तोंगु प्हुरमिंइ, दिलेया च लार बिस्याँ च तोंगु च ङाँर आएखा।
GEN 8:13 नोआ टुब्ब्रासे तिदिं तबै सालर्बै ओंसोंबै म्हैंनर्बै ओंसोंबै त्हिंइर पृथ्‍बीर क्यु ङ्हारयाइ। धै नोआइ झाजए म्रा थोंसि ङ्ह्‍योमा सर क्यु ङ्हारयाल।
GEN 8:14 म्हैंन ङ्हिलर्बै ङ्हिस्युसे ङिगैंर स ताँन् कारयाल।
GEN 8:15 छतसि परमेश्‍वरजी नोआने बिइ,
GEN 8:16 “क्हि, क्हिए प्ह्रेंस्यो, च्ह-चोंमैं ताँन् झाजउँइँले त्होंन्।
GEN 8:17 क्हिने बालु मुँबै ताँन् सो प्ह्‍याबै सैमैं खेदोमैं, नमेंमैं, क्ल्याँसि प्रबै प्हँलाँ-प्हुँलुँ बैरु तेद्। चमैं पृथ्‍बीर ल्हें तदै ह्‍युलर प्लिंदै ह्‍यारिगे।”
GEN 8:18 झाइले नोआ, चए प्ह्रेंस्यो नेरो च्ह-चोंमैं झाजउँइँले त्होंइ।
GEN 8:19 खेदोमैं ताँन्, क्ल्‍याँसि प्रबै प्हँलाँ-प्हुँलुँ, नमेंमैं पृथ्‍बीर प्रब् टिब् लबै सो प्ह्‍याबै सैमैं या चमैंए ह्रें-ह्रें पार्ले क्यु झाजउँइँले त्होंखइ।
GEN 8:20 झाइले नोआइ याहवेहए ल्हागिर ख्रो पिंबै क्ल्ह्‍यो घ्रि बनेसि चल् तबै खेदोमैं नेरो नमेंमैं घ्रि-घ्रि किंसि परमेश्‍वरए मिंर ख्रो पिंइ।
GEN 8:21 याहवेहजी ख्रोए लिंबै थाँ किंबै लिउँइँ ह्रोंसए सैंर बिइ, “म्हिए सैंर्बै ताँमैं कोलो ओंनोंन् आछ्याँब तलेया म्हिइ लबै केउँइँले तारे ङइ खोंयोंइ पृथ्बीलाइ सराप पिंरिब् आरे। तोगो ङइ नास लब् धोंले सो प्ह्‍याबै ताँन् सैमैं धबै ङ नास लरिब् आरे।”
GEN 8:22 “चु पृथ्बी मुरिब्दे, प्लु प्लुब नेरो रो खुबै त्हे, खुँब नेरो ख्वालब सर्ख नेरो बर्ख, त्हिंइ नेरो म्हुँइँस म्हरिब् आरे।”
GEN 9:1 च लिउँइँ परमेश्‍वरजी नोआ नेरो चए च्हमैं आशिक पिंसि “प्हारदै रोदै, सन्तानमैं ल्हें तदै पृथ्‍बीर प्लिंदै ह्‍याद्,” बिइ।
GEN 9:2 पृथ्‍बीर्बै ताँन् खेदोमैं मुर्बै ताँन् नमेंमैं सर क्ल्याँसि प्रबै ताँन् प्हलाँ-प्हुँलुँ मा ङ्युँइर्बै ताँन् ताँगमैं या क्हेमैं म्रोंसि ङ्हिंब्मुँ। चमैं ताँन् ङइ क्हेमैंए योर्न पिंइमुँ।
GEN 9:3 चु ताँन् सो प्ह्‍याबै सैमैं क्हेमैंए चबै सै तब्मुँ। ङइ ओंसों प्याँ पिंमैं पिंब् धोंले चु ताँन् सो प्ह्‍याबै सैमैं या क्हेमैंलाइ पिंम्।
GEN 9:4 “छतसि क्हेमैंइ तोइ सैलेया से चलेन् तमुँ दिलेया को बिस्याँ आचद् तलेबिस्याँ कोर सो मुँ।
GEN 9:5 खाबज्यै म्हिलाइ सैस्याँ चइ सजैं योंम्। खेदोमैंलाज्यै या ङइ खि किंब्मुँ।
GEN 9:6 परमेश्‍वरजी म्हिलाइ ह्रोंस धोंबन् बनेइमुँ। छतसि खाबइ म्हिलाइ सैमुँ, चलाज्यै या म्हिइ सैब्मुँ।
GEN 9:7 क्हेमैं प्हारदै रोदै प्हसेमैं ल्हें फिदै ह्‍युलर प्लिंरिगे।”
GEN 9:8 धबै परमेश्‍वरजी नोआ नेरो चए च्हमैंने बिइ,
GEN 9:9 “क्हेमैं नेरो क्हेमैंए क्वें-क्वेंमिमैंने
GEN 9:10 छलेन क्यु झाजउँइँले क्हेमैंने बालु त्होंखबै ताँन् सो प्ह्‍याबै सैमैं नमेंमैं, न्हबै खेदोमैं, क्ह्‍योंर्बै खेदोमैं क्हेमैंने बालु मुँबै ह्‍युलर्बै सो प्ह्‍याबै ताँन् सैमैंने ङइ बाछा फैम्।
GEN 9:11 तारे सो प्ह्‍याबै ताँन् सैमैं नाँ बाडिए क्युइ खोंयोंइ सिरिब् आरे, धै पृथ्बी नास लबर नाँ बाडि खोंयोंइ तरिब् आरे बिसि ङइ क्हेमैंने बाछा फैम्।”
GEN 9:12 परमेश्‍वरजी बिइ, “चु बाछा ङ नेरो क्हेमैं धै क्हेमैंने बालु मुँबै ताँन् सो प्ह्‍याबै सैमैंए म्हाँजोरि ताँन् पुस्तए ल्हागिर ङइ लमिंइमुँ चए चिनु चु तब्मुँ।
GEN 9:13 ङइ न्हाँम्स्योर ह्‍यार्गों थेंब्मुँ, झाइले ङ नेरो पृथ्‍बीए म्हाँजोरि च ह्‍यार्गों बाछाए चिनु तब्मुँ।
GEN 9:14 ङइ पृथ्‍बीर न्हाँम्स्यो कुलमा न्हाँम्स्योर ह्‍यार्गों म्रोंब्मुँ,
GEN 9:15 ङ नेरो क्हेमैं धै सो प्ह्‍याबै ताँन् सैमैंए म्हाँजोरि फैबै बाछा ङइ मैंब्मुँ। धै नाँ बाडिइ धबै सो प्ह्‍याबै सैमैं खोंयोंइ सैरिब् आरे।
GEN 9:16 न्हाँम्स्योर ह्‍यार्गों म्रोंमा ङइ च ङ्ह्‍योसि चु खोंयोंन् बिलै तरिबै बाछा मैंब्मुँ। चु बाछा परमेश्‍वर नेरो ह्‍युलर्बै सो प्ह्‍याबै ताँन् सैमैंने फैइमुँ।
GEN 9:17 ङइ पृथ्‍बीर्बै सो प्ह्‍याबै ताँन् सैमैं, ङ नेरो क्हेमैंए म्हाँजोरि फैबै बाछाए चिनु चुन् ग।”
GEN 9:18 झाजउँइँले बैरु त्होंसि खबै नोआए च्हमैं शेम, हाम नेरो येपेत ग। हाम कनानए आबा मुँल।
GEN 9:19 नोआए च्हमैं चु सौंलो मुँल। चुमैंउँइँलेन् ताँन् पृथ्‍बी प्लिंयाँइ।
GEN 9:20 म्रोंर के लबै नोआइ अँगुरए धुँमैं रुँइँइ।
GEN 9:21 तिगें नोआ अँगुरए प्हाइ म्हेरसि क्लुँनन् ह्रोंसए तम्बु न्होंर रोरिल।
GEN 9:22 कनानए आबा हामइ ह्रोंसए आबा क्लुँनन् रोरिब् म्रोंइ। धै बैरु त्होंसि ह्रोंसए आघेंमैं ङ्हिंने था पिंइ।
GEN 9:23 झाइले शेम नेरो येपेतइ क्वें घ्रि किंसि चमैं ङ्हिंइ काँदार थेंइ। धै लिग्याँइ सर्दिदै ह्‍यासि चमैंइ आबाए फिर हुमिंइ। चमैंए लि लिग्याँइ तोबइले चमैंइ खेंमैंए आबा क्लुँनन् मुँबाआम्रों।
GEN 9:24 नोआ प्हाए न्हरुउँइँले छोरबै लिउँइँ चए च्ह च्योंबइ लबै के था योंइ।
GEN 9:25 झाइले चइ बिइ, “कनानइ सराप योंरिगे। च ह्रोंसए आघेंमैंए केब्छैंमैंए केब्छैं तब्मुँ।”
GEN 9:26 चइ शेमए ल्हागिर बिइ, “शेमइ म्हाँदिबै याहवेह थेब तरिगे! कनान शेमए केब्छैं तरिगे।
GEN 9:27 परमेश्‍वरजी येपेतए क्ल्ह्‍यो-न्हें ल्हें लमिंरिगे! धै च शेमने क्ह्रिसि बालुन् टिरिगे! कनान बिस्याँ शेमए केब्छैं तरिगे।”
GEN 9:28 नाँ बाडि तबै लिउँइँ नोआ सोंब्‍ब्रासे ङ्‍हच्यु बर्ष समा सोइ।
GEN 9:29 झाइले नोआ कुब्‍ब्रासे ङ्‍हच्यु बर्ष तसि सियाइ।
GEN 10:1 नोआए च्हमैं शेम, हाम नेरो येपेतए ताँमैं चुन् ग। नाँ बाडि तबै लिउँइँ चमैंलैया च्हमैं फिइ।
GEN 10:2 येपेतए च्हमैं: गोमेर, मागोग, मादे, यावान, तूबल, मेशेक नेरो तीरास मुँल।
GEN 10:3 गोमेरए च्हमैं: अशकनज, रीपत नेरो तोगर्मा मुँल।
GEN 10:4 यावानए च्हमैं: एलीशाह, तर्शीश, कित्तीम नेरो रोदानीम मुँल।
GEN 10:5 चुमैंउँइँलेन् मा ङ्युँइए छ्योगोर टिब्मैंए ह्‍युलर ताँनल ह्रोंसए क्युइर नेरो ह्रोंसए ह्रें-ह्रेंर ख्याँयाइ।
GEN 10:6 हामए च्हमैं: ‍कुश, मिश्रइम‌‍‌, पूत नेरो कनान मुँल।
GEN 10:7 कूशए च्हमैं: सेबा, हवीला, सब्ता, रामाह नेरो सब्तका मुँल। धै रामाहए च्हमैं: सेबा नेरो ददान मुँल।
GEN 10:8 कूशइ निम्रोद बिबै च्ह योंइ। चुन् ओंसोंबै ह्‍युल-ह्‍युललाइ ट्होल् खाँबै म्हि तइ।
GEN 10:9 निम्रोद याहवेहए उँइँर बेल्‍ले छेनाले शिकार क्ल्योंल् ह्रमल। छतसि “चु म्हि निम्रोद धोंले बेल्‍ले छेन्ले शिकार क्ल्योंल् ह्रबै म्हि मुँन!” बिसि अहान् चल्दिइमुँ।
GEN 10:10 ओंसों निम्रोदए ग्याल्सर बाबेल, एरेक, अक्‍कद नेरो कल्नेह बिबै सहरमैं मुँल। चु सहरमैं शिनार बिबै ह्‍युलर मुँ।
GEN 10:11 च ह्‍युलउँइँले च अश्शूर ह्‍युलर ह्‍यासि निनबे, रहोबोत-इर नेरो कालह सहरमैं बनेइ।
GEN 10:12 झाइले निनबे नेरो कालहए म्हाँजोर रेसेन सहर बनेइ। रेसन बिस्याँ थेबै सहर ग।
GEN 10:13 मिश्रइम लूदि, अनामी, लहाबी, नप्‍तूही,
GEN 10:14 पत्रुसी, कस्लूही चुमैंउँइँले पलिश्तिमैं तखइ। चुमैं कप्‍तोरीमैंए खे मुँल।
GEN 10:15 कनानइ ह्रोंसए च्ह थेब सिदोन नेरो हेत योंइ।
GEN 10:16 झाइले कनानउँइँले हित्ती, यबूसी, एमोरी, गिर्गाशी,
GEN 10:17 हिव्वी, अरकी, सिनी,
GEN 10:18 अर्वादी, सेमारी नेरो हमातीमैं तखइ। च लिउँइँ कनानए सन्तानमैं खन्तोंदोंन् ख्याँयाइ।
GEN 10:19 छतसि कनान ह्‍युलए साँदा सिदोनउँइँले न्हुउँइँ (दक्षिणउँइँ) गरार ह्‍याबै घ्याँउँइँ गाजा समा धै सदोम, गमोरा, अदमा नेरो सबोयिम ह्‍याबै घ्याँउँइँ तसि लाशा समा मुँल।
GEN 10:20 हामए च्हमैंए खेमैं, चमैंए क्युइमैं, ह्‍युल नेरो ह्रेंमैं चुन् ग।
GEN 10:21 येपेतए अलि शेमलैया च्हमैं फिइ। शेम एबेरए सन्तानमैंए खे मुँल।
GEN 10:22 शेमए च्हमैं: एलाम, अश्शूर, अर्पक्षद, लूद नेरो अराम मुँल।
GEN 10:23 आरामए च्हमैं: ऊज, हुल, गेतेर नेरो मेशेक मुँल।
GEN 10:24 अर्पक्षदइ शेलह योंइ। शेलहइ एबेर योंइ।
GEN 10:25 एबेरइ च्ह ङ्हिं योंइ। घ्रिए मिं पेलेग मुँल। तलेबिस्याँ चए पलोर्न पृथ्‍बीर्बै म्हिमैं स्यो-स्योबै क्ल्ह्‍योर टिनेइ। पेलेगए अलिए मिं योक्‍तान मुँल।
GEN 10:26 योक्‍तानए च्हमैं: अल्मोदद, शेलेप, हसर्मविद, येरह,
GEN 10:27 हदोरम, ऊजाल, दिक्ला,
GEN 10:28 ओबाल, अबमाएल, शेबा,
GEN 10:29 ओपीर, हवीला नेरो योबाब मुँल। चु ताँन् योक्‍तानए च्हमैं मुँल।
GEN 10:30 चमैं टिबै क्ल्ह्‍यो मेशाउँइँले स्यारउँइँबै (पुर्बाउँइबै) सपारा ह्‍याबै घ्याँ समा मुँल।
GEN 10:31 शेमए च्हमैं, चमैंए खेमैं, ह्रेंमैं, क्युइ नेरो चए ह्‍युल चुमैंन् ग।
GEN 10:32 नोआए च्हमैंए खेमैं चमैंए ह्रों-ह्रोंसए ह्रेंमैं चुमैंन् ग। नाँ बाडि तबै लिउँइँ चुमैंउँइँलेन् पृथ्बीरि ह्रें-ह्रें स्यो-स्यो तसि खन्तोंदोंन् ख्याँयाइ।
GEN 11:1 च त्हेर पृथ्बीरि ताँन् म्हिमैंइ क्युइ घ्रिन् पोंमल।
GEN 11:2 म्हिमैं स्यारउँइँ सर्दिदै ह्‍यामा शिनार बिबै ह्‍युलर च्येप्ला तबै क्ल्ह्‍यो स्यासि चर्न टिइ।
GEN 11:3 चमैंइ खेंमैंए न्होंर “ल्हु, ङ्योइ इँट बनेसि ख्रोंले।” बिसि चमैंइ युँमाए क्ल्ह्‍योरि इँट नेरो सए क्ह्‍लोरि अलकत्रा ओलेइ।
GEN 11:4 झाइले चमैंइ बिइ, “ल्हु, ङ्यो ह्रोंसए ल्हागिर सहर घ्रि नेरो स्वर्ग समा फेनेबै नुबै धररा घ्रि बनेसि। ह्रोंसए मिं थेंले। धै ङ्यो पृथ्बीर खनिरै आप्हुँले।”
GEN 11:5 झाइले म्हिमैंइ बनेबै सहर नेरो धरर ङ्ह्‍यो‍बर याहवेह क्युरु युइ।
GEN 11:6 याहवेहजी बिइ, “चुमैं क्युइ घ्रिन् पोंबै ह्रेंमैं तइ बिस्याँ तारे चुमैंइ लल् म्हैब तोइ मुँलेया लल् खाँम्।
GEN 11:7 छतसि खो, ङ्यो क्युरु ह्‍यासि चमैंइ घ्रिइ पोंबै क्युइ घ्रिइ आक्हिरिगे बिसि चमैंए क्युइ खलबल लवाले।”
GEN 11:8 छले याहवेहजी च क्ल्ह्‍योउँइँले चमैं ह्‍युल तिगोंन् प्हुँमिंइ। छ लवामा चमैंइ च सहर बनेब पिवाइ।
GEN 11:9 छतसि च क्ल्ह्‍योए मिं बाबेल थेंमिंइ। तलेबिस्याँ याहवेहजी चर्न ताँन् पृथ्‍बीर्बै क्युइ खलबल लवाल। च क्ल्ह्‍योउँइँलेन् चमैं पृथ्‍‍बि तिंगोंन् प्हुँमिंइ।
GEN 11:10 शेमए च्ह-क्वेंमैंए ताँमैं चुन् ग। नाँ बाडि तबै ङ्हिंदिं लिउँइँ शेम प्र बर्षर्बै तमा अर्पक्षद बिबै च्ह योंइ।
GEN 11:11 अर्पक्षद फिबै लिउँइँ शेम ङ्‍हब्ब्रा बर्ष समा सोसि अरू च्ह-च्हमिमैं या योंइ।
GEN 11:12 अर्पक्षद सोंच्युसे ङ्‍हदिं तमा शेलह बिबै च्ह योंइ।
GEN 11:13 शेलह फिबै लिउँइँ अर्पक्षद प्लिब्ब्रासे सोंदिं समा सोसि अरू च्ह-च्हमिमैं या योंइ।
GEN 11:14 शेलह सोंच्यु बर्षर्बै तमा एबेर बिबै च्ह योंइ।
GEN 11:15 एबेर फिबै लिउँइँ शेलह प्लिब्ब्रासे सोंदिं समा सोसि अरू च्ह-च्हमिमैं या योंइ।
GEN 11:16 एबेर सोंच्युसे प्लिदिं तमा पेलेग बिबै च्ह योंइ।
GEN 11:17 पेलेग फिबै लिउँइँ एबेर प्लिब्ब्रासे सोंदिं समा सोसि अरू च्ह-च्हमिमैं या योंइ।
GEN 11:18 पेलेग सोंच्यु बर्षर्बै तमा चइ रऊ बिबै च्ह योंइ।
GEN 11:19 रऊ फिबै लिउँइँ पेलेग ङ्हिंब्ब्रासे कुदिं समा सोसि अरू च्ह-च्हमिमैं या योंइ।
GEN 11:20 रऊ सोंच्युसे ङ्हिंदि तमा सरूग बिबै च्ह योंइ।
GEN 11:21 सरूग फिबै लिउँइँ रऊ ङ्हिंब्ब्रासे ङिदिं समा सोसि अरू च्ह-च्हमिमैं या योंइ।
GEN 11:22 सरूग सोंच्यु बर्षर्बै तमा चइ नाहोर बिबै च्ह योंइ।
GEN 11:23 नाहोर फिबै लिउँइँ सरूग ङ्हिंब्ब्रा बर्ष समा सोसि अरू च्ह-च्हमिमैं या योंइ।
GEN 11:24 नाहोर ङ्हिस्युसे कुदिं तमा तेरह बिबै च्ह योंइ।
GEN 11:25 तेरह फिबै लिउँइँ नाहोर प्रसे च्युसे कुदिं समा सोसि अरू च्ह-च्हमिमैं या योंइ।
GEN 11:26 तेरह ङिच्यु बर्षर्बै तमा अब्राहम, नाहोर नेरो हरान बिबै च्हमैं योंइ।
GEN 11:27 तेरहए ताँमैं चुन् ग। अब्राहम, नाहोर नेरो हरानए आबा तेरह मुँल। धै हरानए च्ह लोत मुँल।
GEN 11:28 हरान कल्दिमैंए ऊर बिबै क्ल्ह्‍योर फिल। चए आबा तेरह सोगों मुँमन् हरान च ह्‍युलर सिइ।
GEN 11:29 अब्राहम नेरो नाहोरइ ब्ह्‍या लसि प्ह्रेंस्यो पखइ। अब्राहमए प्ह्रेंस्योए मिं साराई नेरो नाहोरए प्ह्रेंस्योए मिं मिल्का मुँल। मिल्का हरानए च्हमि मुँल। मिल्का नेरो यिस्काए आबा हरान मुँल।
GEN 11:30 साराई थरि मुँल चल च्ह-च्हमि तोइ आरेल।
GEN 11:31 तेरहइ ह्रोंसए च्ह अब्राहम हरानए च्ह ह्रोंसए क्वें लोत नेरो अब्राहमए प्ह्रेंस्यो ह्रोंसए चों साराई किंसि कल्दिमैंए ऊर बिबै क्ल्‍योंउँइँले कनान ह्‍युलर ह्‍याब् बिसि चमैं बालुन् त्होंइ। दिलेया हरान बिबै क्ल्ह्‍योर फेनेसि चर्न टिइ।
GEN 11:32 तेरह ङ्हिंब्ब्रासे ङ्‍हदिं सोसि हरानर सिइ।
GEN 12:1 याहवेहजी अब्रामने बिइ, “क्हिए ह्‍युल, क्हिए ङ्‍हेब्-ट्हु नेरो क्हिए आबाए धिंउँइँले त्होंसि ङइ तेंबै ह्‍युलर ह्‍याद्।
GEN 12:2 ङइ क्हिउँइँले थेबै ह्रें लमिंब्मुँ, धै क्हिलाइ आशिक पिंसि। क्हिए मिं कालिदिब् लमिंब्मुँ, झाइले क्हि आशिकए मुल तब्मुँ।
GEN 12:3 क्हिए फिर आशिक पिंब्मैंलाइ ङइ आशिक पिंब्मुँ, क्हिए फिर सराप पिंब्मैंलाइ ङइ सराप पिंब्मुँ। क्हिउँइँलेन् पृथ्‍बीर्बै ताँन् म्हिमैंइ आशिक योंब्मुँ।”
GEN 12:4 छतसि याहवेहजी बिब् धोंलेन् अब्राम च क्ल्ह्‍योउँइँले त्होंइ। धै चए अलिए च्ह लोतै या चने बालु ह्‍याइ। हरानउँइँले त्होंह्‍यामा अब्राम ङिच्युसे ङ्‍हदिंर्बै मुँल।
GEN 12:5 अब्राम ह्रोंसए प्ह्रेंस्यो साराई, ह्रोंसए अलिए च्ह लोत नेरो खेंमैंइ हरानर खागु लबै सै न्होर नेरो केब्-केब्स्योमैं किंसि कनान ह्‍युलउँइँ ह्‍याइ धै चमैं कनानर फेनेइ।
GEN 12:6 अब्राम च ह्‍युलर फेसि च ह्‍युलजरे प्र-प्रइ ह्‍यामा शकेमर मुँबै मोरेए चोखो सिंधुँ मुँबै क्ल्ह्‍योर फेइ। च त्हेर च क्ल्ह्‍योर कनानीमैं टिमल।
GEN 12:7 च लिउँइँ याहवेह अब्राम ङाँर म्रोंयुसि चने बिइ, “ङइ क्हिए सन्तानमैं चु ह्‍युल पिंब्मुँ।” छ बिबै लिउँइँ याहवेहए ल्हागिर चइ ख्रो पिंबै क्ल्ह्‍यो घ्रि चर बनेइ।
GEN 12:8 च क्ल्ह्‍योउँइँले ह्‍यासि च बेथेलए स्यारउँइँ मुँबै कोंर टिइ। धै बेथेललाइ पश्‍चिमउँइँ नेरो ऐ सहरलाइ स्यारउँइँ लसि ह्रोंसए तम्बु टौंदिइ। चर चइ याहवेहए ल्हागिर ख्रो पिंबै क्ल्ह्‍यो घ्रि बनेसि याहवेहए मिं किंइ।
GEN 12:9 झाइले अब्राम अझै प्र-प्रइ नेगेब बिबै न्हुउँइँ ह्‍याइ।
GEN 12:10 झाइले च कनान ह्‍युलर थेबै अँङ्गल तसि अब्राम मिश्र ह्‍युलर टिबर ह्‍याइ।
GEN 12:11 च मिश्र ह्‍युलर फेबि छेमा अब्रहामइ ह्रोंसए प्ह्रेंस्यो साराईने बिइ, “क्हि ङ्ह्‍योबर बेल्‍ले छ्याँब मुँ बिसि ङइ सेइमुँ।
GEN 12:12 तारे मिश्रीमैंइ क्हिलाइ म्रोंसि ‘चुम् चए प्ह्रेंस्यो मुँन,’ बिब्मुँ। धै चमैंइ ङलाइ सैवासि क्हि सोगों थेंब्मुँ।
GEN 12:13 छतसि क्हिइ ‘ङ चए अङाँ ग’ बिमिंन्। क्हिइ छ बिमिंस्याँ ङ सोल् योंब्मुँ।”
GEN 12:14 झाइले अब्राम मिश्र ह्‍युलर फेनेमा चर्बै म्हिमैंइ च च्हमिरि बेल्‍ले छ्याँब म्रोंइ।
GEN 12:15 झाइले फारो म्रुँए सिपाइमैंइ च च्हमिरिलाइ म्रोंमा “च बेल्‍ले छ्याँब मुँ!” बिसि फारो ङाँर बिनेइ। छतसि चमैंइ साराईलाइ म्रुँए दरबारर बोइ।
GEN 12:16 साराई बेल्‍ले छ्याँब म्रोंसि फारो म्रुँइ अब्रामलाइ छेन् लसि र-क्युमैं, म्येमैं, केब्-केब्स्योमैं, गधामैं नेरो सलुमैं पिंइ।
GEN 12:17 दिलेया म्रुँइ अब्रामए प्ह्रेंस्यो साराई बोबइले याहवेहजी फारो नेरो चए परवारए फिर ङ्हिंन्-ङ्हाँबै दुःखमैं कुल्मिंइ।
GEN 12:18 छतमा फारो म्रुँइ अब्रामलाइ हुँइसि बिइ, “क्हिइ ङने चु तो लल? चु च्हमिरि क्हिए प्ह्रेंस्यो ग बिसि क्हिइ ङने तले आबिल?
GEN 12:19 ‘चु ङए अङाँ ग’ बिसि क्हिइ तले बिल? छतसि ङए प्ह्रेंस्यो लबर चलाइ ङइ बोल। ङ्‍ह्‍योद्! क्हिए प्ह्रेंस्यो चुर्न मुँ बोइ ह्‍याद्!”
GEN 12:20 च लिउँइँ फारो म्रुँइ ह्रोंसए म्हिमैंने अब्रामलाइ ह्‍याल् पिंन् बिइ। धै अब्राम, चए प्ह्रेंस्यो नेरो चने मुँबै तोन्दोंरि सैमैं बोसि मिश्र ह्‍युलउँइँले कुल्मिंइ।
GEN 13:1 झाइले अब्रामइ ह्रोंसए प्ह्रेंस्यो, ह्रोंसने मुँबै तोन्दोंरि सैमैं नेरो ह्रोंसए अलिए च्ह लोतै या किंसि मिश्र ह्‍युलउँइँले कैंडो क्रेखसि नेगेब बिबै ह्‍युलर फेखइ।
GEN 13:2 अब्राम बेल्‍ले प्लबै म्हि मुँल तलेबिस्याँ चने खेदोमैं मारा-चाँदिमैं ल्हें मुँल।
GEN 13:3 च नेगेबउँइँले प्रदै ओंसों चइ बेथेल नेरो ऐए म्हाँजोर तम्बु टौंदिबै क्ल्ह्‍‍योर फेखइ।
GEN 13:4 चइ चर ओंसों ख्रो पिंबै क्ल्ह्‍यो बनेसि याहवेहए मिं किंल।
GEN 13:5 अब्रामने बालु ह्‍याबै लोतलै या र-क्युमैं, खेदोमैं नेरो तम्बुमैं मुँल।
GEN 13:6 चमैंए र-क्युमैं नेरो खेदोमैं ल्हें तसि चमैं ङ्हिंए खेदोमैंए ल्हागिरि च ह्‍युलर्बै छिइ आयो। छतसि चमैं बालु टिल् आखाँब् तइ।
GEN 13:7 छतमा अब्राम नेरो लोतए खेदो छब्मैंए न्होंरि प्होंगि तइ। च त्हेर कनानीमैं नेरो परिज्जीमैं या च ह्‍युलर टिमल।
GEN 13:8 छतमा अब्रामइ लोतने बिइ, “ङ्यो ह्रोंसए म्हिमैं ग। छतसि ङ्यो नेरो ङ्योए प्ह्रोंछैंमैं न्होंरि प्होंगि आतबै ल्हागिर
GEN 13:9 ङ्यो फ्रेयाल् त्हुम्। ङ्‍ह्‍योद्, ताँन् ह्‍युल क्हिए ओंसों मुँ। क्हि त्हर्ग्योउँइँ ह्‍यास्याँ ङ क्योलोउँइँ ह्‍यामुँ क्हि क्योलोउँइँ ह्‍यास्याँ ङ त्हर्ग्योउँइँ ह्‍याम्।”
GEN 13:10 लोतइ खन्तोंदोंन् ङ्ह्‍योमा क्यु ल्हें मुँबै यर्दन स्योंए ब्याँसि सोअर समा फेनब् म्रोंइ। च क्ल्ह्‍योर याहवेहजी बनेबै अदनए बगैंचा धोंन् तब नेरो मिश्र ह्‍युलर धोंले क्यु ल्हें मुँल। (चु ताँ याहवेहजी सदोम नेरो गमोरा बिबै सहर नास लब् भन्दा ओंसोंबै ताँ ग।)
GEN 13:11 छतमा लोतइ यर्दनर्बै ताँन् ब्याँसि त्हाँसि स्यारउँइँ ह्‍याइ। छले चमैं ङ्हिं फ्रेयाइ।
GEN 13:12 अब्राम कनान ह्‍युलर्न टिइ। लोत बिस्याँ ब्याँसिर्बै सहरजरे टिनेइ। चइ सदोम बिबै सहर समा ह्रोंसए तम्बु टौंउँदिसि टिइ।
GEN 13:13 सदोमर्बै म्हिमैं दुष्‍टमैं मुँल। चमैंइ याहवेहजी आखोबै पाप केमैं लमल।
GEN 13:14 लोत अब्रामने फ्रेयाबै लिउँइँ याहवेहजी अब्रामने बिइ, “तारे क्हि मुँबै क्ल्ह्‍योउँइँले ताइ (उत्तर) माइ (दक्षिण) स्यार (पूर्व) नेरो छ्यो न्हु (पश्‍चिम) खन्तोंदोंन् ङ्‍ह्‍योद्।
GEN 13:15 क्हिइ म्रोंबै ताँन् क्ल्ह्‍यो क्हि नेरो क्हिए सन्तानलाइ ङइ खोंयोंन् बिलै क्ल्हे तबर पिंब्मुँ।
GEN 13:16 ङइ क्हिए प्हसेमैं पृथ्‍बीर्बै त्हुल् धोंलेन् ल्हें लमिंब्मुँ। खाबज्यै त्हुल् च्योल् आखाँ! त्हुल् च्योल् खाँम् बिस्याँ क्हिए प्हसेमैं या च्योल् खाँब्मुँ।
GEN 13:17 रेद्! ह्‍युलए खन्तोंदोंन् ह्‍याद्। तलेबिस्याँ ङइ चु ताँन् क्ल्ह्‍यो क्हिलाइ पिंब्मुँ।”
GEN 13:18 झाइले अब्रामइ ह्रोंसए तम्बु सार्दिसि हेब्रोनर मुँबै मम्रेए फलाँटए सिंधुमैं ङाँर खसि चर्न टिइ। चइ चर याहवेहए ल्हागिर ख्रो पिंबै क्ल्ह्‍यो घ्रि बनेइ।
GEN 14:1 च त्हेर ल्हडें घ्रि तमा पूर्व ह्‍युलर्बै म्रुँमैं प्लिइ कनान ह्‍युलर्बै म्रुँमैं ङ्‍हने नेइ। छलेन शिनारर्बै अम्रापेल म्रुँ, एल्‍लासार्बै अर्योक म्रुँ, एलामर्बै कदोर्लाओमेर म्रुँ नेरो गोयिमर्बै तिदाल म्रुँ नेबर खइ।
GEN 14:2 धै चमैं सदोमर्बै बेरा म्रुँ, गमोरार्बै बिर्शा म्रुँ, अदमार्बै शिनाब म्रुँ, सबोयिमर्बै शेमेबेर म्रुँ नेरो बेलार्बै (अथवा सोअरर्बै) म्रुँए बिरोधर नेइ।
GEN 14:3 चमैं ताँन् सिद्दिमए ब्याँसिर (अथवा चज मा ङ्युँइर) खागु तइ।
GEN 14:4 चमैं च्युसे ङ्हिंदिं समा कदोर्लाओमेरए न्होंर टिसि के लरिल। दिलेया च्युसे सोंदिं तमा चमैं चए न्होंर टिल् आङिंसि चए बिरोध लइ।
GEN 14:5 छतसि च्युसे प्लिदिं तमा कदोर्लाओमेर नेरो चने क्ह्रिबै म्रुँमैं खसि अस्तेरोत-कर्णेमर रपाइमैं, हामर जूजीमैं, शावेकिर्यातैमर एमिमैं,
GEN 14:6 नेरो सेइर कोंर्बै ह्‍युल खागुबै होरीमैं ट्होवासि चर्बै म्हि आटिबै क्ल्ह्‍यो एलपरान समन् चमैंइ क्ल्हे लसि खेंमैंए न्होंर पखइ।
GEN 14:7 च लिउँइँ चमैं एखसि एन मिशपातर (अथवा कादेशर) खसि अमालेकीमैंए ताँन् ह्‍युल नेरो हासेसोन-तामारर टिबै एमोरीमैं या ट्होवासि चमैंलाज्यै या खेंमैंए न्होंर थेंइ।
GEN 14:8 च लिउँइँ सदोम, गमोरा, अदमा, साबोयिम नेरो बेलार्बै (अथवा सोअरर्बै) म्रुँमैं खागु तसि सिद्दिमए ब्याँसिर चमैंने नेबर तयार तइ।
GEN 14:9 धै च म्रुँ ङ्‍ह म्रुँ प्लिने नेबर खइ। अथवा एलामर्बै कदोर्लाओमेर म्रुँ, गोयिमर्बै तिदाल म्रुँ, शिनारर्बै अम्रापेल म्रुँ नेरो एल्‍लासारर्बै अर्योक म्रुँने नेबर खइ।
GEN 14:10 सिद्दिमए ब्याँसिर अलकत्रइ प्लिंरिबै होंल्दोंमैं मुँल। कदोर्लाओमेर म्रुँइ ट्होमा सदोम नेरो गमोराए म्रुँमैं नेबै क्ल्ह्‍योउँइँले भौदिमा चमैंए को-कोइ म्हिमैं च होंल्दोंजरे पायाइ। दिलेया अरू म्रुँमैं सों कोंउँइँ भौदिइ।
GEN 14:11 च म्रुँ प्लि सदोम नेरो गमोरार्बै ताँन् सैमैं किंसि खेंमैंए घ्याँ क्हासि ह्‍याइ।
GEN 14:12 चमैंइ सदोमर टिबै अब्रामए अलिए च्ह लोत नेरो चए तोन्दोंरि सैमैं या बोयाइ।
GEN 14:13 दिलेया भौदिह्‍याबै म्हि घ्रिइ हिब्रू ह्रेंर्बै अब्रामने चु ताँ बिइ। अब्राम एश्कोल नेरो आनेरए अलि एमोरी मम्रेए ङ्‍ह् सिं धुँए खागु टिमल। चुमैं अब्रामने क्ह्रिब्मैं मुँल।
GEN 14:14 झाइले अब्रामइ ह्रोंसए अलिए च्हलाइ फैसि बोबै ताँ थेसि ह्रोंसए धिंर फिसि तालिम योंबै सोंब्ब्रासे च्युसे प्रे केब्छैंमैं किंसि चमैं दान बिबै क्ल्ह्‍यो समा ल्हाबोइ।
GEN 14:15 अब्रामइ ह्रोंसए म्हिमैं टोलि-टोलि लसि फेलइ धै म्हुँइँसर शत्तुरमैंए फिर ह्‍वानेमा चमैंलाइ ट्होवाइ। धै दमस्कसए उत्तरउँइँबै होबा समा चमैं ल्हाबोइ।
GEN 14:16 झाइले चइ ह्रोंसए अलिए च्ह लोत, चए ताँन् सै न्होर, च्हमिरिमैं, म्हिमैं नेरो चमैंने मुँबै तोन्दोंरि सैमैं या एपखइ।
GEN 14:17 छले कदोर्लाओमेर नेरो चने क्ह्रिबै म्रुँमैंए फिर ट्होसि एखमा शावेए ब्याँसिर (अथवा म्रुँए ब्याँसिर) सदोमर्बै म्रुँ चने त्होबर खइ।
GEN 14:18 च लिउँइँ शालेमर्बै मल्कीसेदेक म्रुँ या क्हें नेरो अँगुरए प्हा किंसि अब्राम ङाँर खइ। च ताँन् भन्दा थेबै परमेश्‍वरए खेगि मुँल।
GEN 14:19 “स्वर्ग नेरो पृथ्बी बनेबै ताँन् भन्दा थेबै परमेश्‍वरउँइँले अब्रामइ आशिक योंरिगे!
GEN 14:20 क्हिलाइ शत्तुरमैंए फिर ट्होल् पिंबै ताँन् भन्दा थेबै परमेश्‍वरए मिं थेब तरिगे!” बिसि चइ अब्रामए फिर आशिक पिंइ। धै अब्रामइ ह्रोंसइ ट्होइ पखबै तोन्दोंरि सैए च्युबाँर्बै तिंबाँ मल्कीसेदेकलाइ पिंइ।
GEN 14:21 छले पिंमा सदोमर्बै म्रुँइ अब्रामने बिइ, “क्हिइ ट्होसि पखबै तोन्दोंरि सैमैं क्हिनेन् थेंन्। ङए म्हिमैं मत्‍त्रे ङलाइ पिंन्।”
GEN 14:22 दिलेया अब्रामइ सदोमर्बै म्रुँने बिइ, “स्वर्ग नेरो पृथ्बी बनेबै याहवेह ताँन् भन्दा थेबै परमेश्‍वरए उँइँरि ङइ छले कसम चइमुँ:
GEN 14:23 ङ क्हिए रु घ्रि या जुत्ताए तनि घ्रि या किंरिब् आरे। आस्याँ ‘ङइ लमा अब्राम प्लब् तइ’ बिसि क्हिइ बिब्मुँ।
GEN 14:24 ङ ह्रोंसए ल्हागिर तोइ सै आकिं। ङने मुँबै म्हिमैंइ कति चइ च नेरो चमैंए भाउ मत्‍त्रे किंब्मुँ। दिलेया आनेर, एश्कोल नेरो मम्रेइ बिस्याँ ह्रों-ह्रोंसए भाउ किंरिगे।”
GEN 15:1 च लिउँइँ याहवेह अब्राम ङाँर म्रोंयुसि चने बिइ, “अब्राम, क्हि आङ्हिंन्, क्हिए ढाल ङन् ग; ङइ क्हिलाइ बेल्‍ले थेबै इनाम पिंब्मुँ।”
GEN 15:2 दिलेया अब्रामइ बिइ, “ओ याहवेह परमेश्‍वर, क्हिजी ङ तो पिंइमुँ रो? तलेबिस्याँ ङल प्हसे घ्रि या आरे, तारे ङए धिंर्बै क्ल्हे दमस्कसर्बै एलीएजर तब्मुँ।
GEN 15:3 क्हिजी ङलाइ प्हसेमैं आपिंइमुँ। छतसि ङए धिंर फिबै केब्छैंन् ङए धिंर्बै क्ल्हे तब्मुँ।”
GEN 15:4 दिलेया “च एलीएजर बिबै केब्छैं क्हिए धिंर्बै क्ल्हे तरिब आरे, तलेबिस्याँ क्हिए च्हन् क्हिए धिंर्बै क्ल्हे तब्मुँ,” बिसि याहवेहजी बिबै ताँ धबै अब्रामइ थेइ।
GEN 15:5 खीजी चलाइ बैरु बोसि बिइ, “मुउँइँ ङ्योद्! मुर्बै मुसारमैं च्योल् खाँम् उ आखाँ? क्हिए प्हसेमैं या मुसारा धोंलेन् ल्हें तब्मुँ।”
GEN 15:6 छबिमा अब्रामइ याहवेहजी बिबै ताँ क्वेंइ। चइ खीजी बिबै ताँ क्वेंबइले याहवेहजी चलाइ ठिक ठर्दिइ।
GEN 15:7 खीजी धबै चने बिइ, “चु ह्‍युल क्हिलाइ पिंबर कल्दिमैंए ऊरउँइँले क्हि पखबै याहवेह ङन् ग।”
GEN 15:8 दिलेया अब्रामइ खीने “ओ याहवेह परमेश्‍वर, ङ चु ह्‍युलए क्ल्हे तल् योंम् बिसि ङइ खैले सेल् खाँम्?” बिसि ङ्योएइ।
GEN 15:9 खीजी चने बिइ, “ङए ल्हागिर सोंदिंर्बै म्ये घ्रि, सोंदिंर्बै र, सोंदिंर्बै क्यु, तोंगु घ्रि नेरो परेवाए प्हसे घ्रि पखो।”
GEN 15:10 अब्रामइ च ताँन् सैमैं खी ङाँर पसि थोइ। धै म्हाँजोर ङ्हिंबाँ लसि ओंसों थेंमिंइ नमेंमैं बिस्याँ ङ्हिंबाँ आल।
GEN 15:11 छले थेंमा च सियाबै खेदो नेरो नमेंमैं फिर क्व्रेमैं ह्‍वाखमा अब्रामइ चमैं ल्हाइ।
GEN 15:12 त्हिंयाँ लियामा अब्राम बेल्‍ले न्हरु च्हुइरिल। छले न्हरु च्हुइरिमा ङ्हिंन् ङ्हाँबै मिछु खैबइ च हुवाइ।
GEN 15:13 च लिउँइँ याहवेहजी अब्रामने बिइ, “क्हिए प्हसेमैं आगुए ह्‍युलर बसैं ह्‍यासि टिब्मुँ, च ह्‍युलर्बै म्हिमैंए केब्छैंमैं तब्मुँ, छले प्लिब्ब्रा बर्ष समा चमैंइ ल्हें दुःख योंल् त्हुब्मुँ बिसि खैलसेया मैंथेंन्।
GEN 15:14 दिलेया क्हिए प्हसेमैं खाब् ह्रेंमैंए केब्छैं तब्मुँ, च ह्रेंर्बै म्हिमैंलैया ङइ निसाफ लब्मुँ। लिउँइँ चमैं त्होंखमा ल्हें मारा-मुइ किंसि खब्मुँ।
GEN 15:15 क्हि बिस्याँ खेब् तन् समा शान्तिले सोसि सिब्मुँ धै पाब्मुँ।
GEN 15:16 पुस्ता प्लि लिउँइँ क्हिए प्हसेमैं चुर्न एखब्मुँ, तलेबिस्याँ एमोरीमैंए आछ्याँबै के तोगो समा आखाँइमुँ।”
GEN 15:17 त्हिंयाँ लियाबै लिउँइँ म्हुँइँस तमा मिखु त्होंबै मिए पु घ्रि नेरो लुँरिबै मिए प्हैं घ्रि सेए चौटामैंए म्हाँजोउँइँले त्होंयाइ।
GEN 15:18 च त्हिंइर्न याहवेहजी अब्रामने छ बिसि बाछा फैइ, “मिश्र ह्‍युलर्बै स्योंउँइँले यूफ्रेटिस बिबै थेबै स्यों समार्बै चु ताँन् ह्‍युलै या ङइ क्हिए प्हसेमैंलाइ पिंइमुँ।
GEN 15:19 केनि, कनज्जी, कदमोनि,
GEN 15:20 हित्ती, परिज्जी, रपाइ,
GEN 15:21 एमोरी, कनानी, गिर्गाशी नेरो यबूसीमैंए ह्‍युलमैं ताँन् ङइ क्हिए प्हसेमैंलाइ पिंइमुँ।”
GEN 16:1 अब्रामए प्ह्रेंस्यो साराईउँइँले अब्रामल प्हसे आतल। साराईल हागार बिबै मिश्री केब्स्यो घ्रि मुँल।
GEN 16:2 तिगैं साराई अब्रामने बिइ, “याहवेहजी ङलाइ प्हसे तल् आपिं। छतसि क्हि ङए केब्स्यो ङाँर ह्‍याद्। खनिज्यै च ङाँइले ङए ल्हागिर प्हसे तल् खाँम् उ?” छबिमा अब्रामइ साराईए ताँ ङिंइ।
GEN 16:3 अब्राम कनानर टिबै च्युदिं लिउँइँ ह्रोंसए प्ह्रेंस्यो साराई ह्रोंसए केब्स्यो मिश्रीथेंस्यो हागार अब्रामए प्ह्रेंस्यो तबर पिंइ।
GEN 16:4 झाइले अब्राम हागार ङाँर ह्‍यामा हागारइ प्हसे नोइ। चइ प्हसे नोब् सेसि ह्रोंसए नेब्स्योलाइ म्हि आच्हिबर होंइ।
GEN 16:5 छतमा साराई अब्रामने बिइ, “ङए फिर खबै अनिया क्हिए फिर खरिगे। ङइ ह्रोंसए केब्स्यो क्हिने बालु तबर पिंब् ग, च प्हसे नोबै तोदोंन् ङलाइ म्हि आच्हिबर होंइ। छतसि याहवेहजी क्हि नेरो ङए म्हाँजोरि निसाफ लमिंरिगे।”
GEN 16:6 छबिमा अब्रामइ साराईने बिइ, “क्हिए केब्स्यो क्हिए योर्न मुँ। चने खै लदा ङ्हाँमुँ छान् लद्।” छबिमा साराई चए फिर बेल्‍ले दुःख पिंबर होंइ। ल्हें दुःख योंमा हागार साराईउँइँले भौदिह्‍याइ।
GEN 16:7 याहवेहए स्वर्गदूतइ शूर सहर ह्‍याबै घ्याँर म्हि आटिबै क्ल्ह्‍योर क्युए मुल ङाँर हागारलाइ त्होइ।
GEN 16:8 झाइले स्वर्गदूतइ बिइ, “ओ साराईए केब्स्यो हागार, खनिउँइँले खल? खनिर ह्‍याबर होंल?” चइ बिइ, “ङए नेब्स्यो साराईउँइँले भौदिरिलो।”
GEN 16:9 याहवेहए स्वर्गदूतजी चने बिइ, “क्हिए नेब्स्यो ङाँर एसि ह्‍याद्, धै चए न्होंर टिद्।”
GEN 16:10 याहवेहए दूतइ धबै चने बिइ, “ङइ क्हिलाइ ल्हें प्हसेमैं पिंब्मुँ। चमैं खाबज्यै च्योल् खाँरिब् आरे।”
GEN 16:11 याहवेहए दूतइ चने बिइ, “क्हिइ प्हसे नोइमुँ क्हिइ च्ह घ्रि फिब्मुँ। चए मिं इश्माएल थेंनु, तलेबिस्याँ याहवेहजी क्हिए दुःख म्रोंइमुँ।
GEN 16:12 क्हिए च्ह क्ह्‍योंर्बै गदा धों तब्मुँ। चए यो ताँन् म्हिमैंने नेबर रेब्मुँ, ताँन् म्हिमैंए यो चने नेबर रेब्मुँ। ह्रोंसए ताँन् ह्रजे-म्हजेमैंने ख्रे लसि टिब्मुँ।”
GEN 16:13 हागारइ बिइ, “क्ह्रोंसेंन ङइ परमेश्‍वर म्रोंसेया ङ सोगोंन् मुँ।” छतसि ह्रोंसने बालु ताँ लबै याहवेहलाइ चइ “ङलाइ म्रोंबै परमेश्‍वर” बिसि मिं थेंइ।
GEN 16:14 छतसि च क्यु खादुँए मिं “ङलाइ म्रोंबै सोगों परमेशवरए क्यु खादुँ” ग। च क्ल्ह्‍यो कादेश नेरो बेरेदए म्हाँजोर मुँ।
GEN 16:15 छले हागारइ अब्रामल च्ह घ्रि फिइ। च च्हए मिं अब्रामइ इश्माएल थेंइ।
GEN 16:16 हागारइ इश्‍माएल फिबै त्हेर अब्राम प्रेच्युसे ट्हुदिंर्बै मुँल।
GEN 17:1 अब्राम कुच्युसे कुदिं तमा याहवेह अब्राम ङाँर युसि चने बिइ, “तोन्दोंरि सै लल् खाँबै परमेश्‍वर ङ ग। छतसि छ्याँबै केमैं लसि ङए उँइँर प्रद्।
GEN 17:2 ङइ क्हिलाइ ल्हें सन्तानमैं पिंब्मुँ बिसि ङ नेरो क्हिए म्हाँजोरि बाछा फैब्मुँ।”
GEN 17:3 झाइले अब्राम पत्खु तमा परमेश्‍वरजी धबै चने बिइ,
GEN 17:4 “थेद्! ङइ फैबै बाछा क्हिने बालुन् मुँ। क्हि ल्हें ह्रेंमैंए खे तब्मुँ।
GEN 17:5 छतसि तारे क्हिए मिं अब्राम आङिं, अब्राहाम तब्मुँ। तलेबिस्याँ ङइ क्हिलाइ ल्हें ह्रेंमैंए खे लमिंब्मुँ।
GEN 17:6 ङइ क्हिलाइ ल्हें सन्तानमैं पिंब्मुँ धै क्हिउँइँलेन् ल्हें ह्रेंमैं तब्मुँ। क्हिउँइँलेन् म्रुँमैं त्होंब्मुँ।”
GEN 17:7 “क्हि नेरो क्हिए सन्तानए परमेश्‍वर तबर, धै क्हिए लिउँइँ खबै सन्तानमैंने ङए बाछा खोंयोंइ बिलै तरिबै ल्हागिर फैब्मुँ।
GEN 17:8 क्हि तोगो टिबै चु कनान ह्‍युल क्हि नेरो क्हिए लिउँइँ खबै सन्तानलाइ खोंयोंइ बिलै क्ल्हे तबर पिंब्मुँ, धै ङ चमैंए परमेश्‍वर तब्मुँ।”
GEN 17:9 परमेश्‍वरजी अब्राहामने धबै बिइ, “क्हिइ ङए बाछा ङिंल् त्हुब्मुँ। क्हि नेरो क्हिए लिउँइँ खबै सन्तानमैं चमैंए लिउँइँ खबै पुस्ताज्यै ङिंल् त्हुब्मुँ।
GEN 17:10 क्हि नेरो क्हिए लिउँइँ खबै ताँन् सन्तानमैंज्यै या ङिंल् त्हुबै ताँ चुन् ग: क्हेमैंए न्होंर्बै ताँन् मुँयुँमैंइ ज्युर्बै ट्हुबि क्ह्‍याँसि चिनु लल् त्हुब्मुँ।
GEN 17:11 क्हेमैंए च्हमैं प्रेरोर च चिनु लल् त्हुब्मुँ, ङ नेरो क्हेमैंए म्हाँजोर्बै बाछाए चिनु चुन् तब्मुँ।
GEN 17:12 क्हेमैंए पुस्ता-पुस्ता समा च्हमैं फिमा ताँन् मुँयुँमैंइ प्रेरोर्न चमैंए ज्युर चिनु लल् त्हुब्मुँ। क्हिए धिंर फिब् मुँले, आगुए ह्‍युलउँइँले खलै, किंइ पखबै केब्छैं मुँलेया चमैं ताँन् मुँयुँमैंए ज्युर चिनु लल् त्हुब्मुँ।
GEN 17:13 छलमा ङए बाछा क्हेमैंए ट्हुबिर खोंयोंइ बिलै तरिब्मुँ।
GEN 17:14 ज्युर चिनु आलबै मुँयुँमैं ह्रोंसए ह्रेंउँइँले स्यो लवाब्मुँ तलेबिस्याँ ङइ फैबै बाछा चइ आङिं।”
GEN 17:15 परमेश्‍वरजी धबै अब्राहामने बिइ, “क्हिए प्ह्रेंस्योने साराई बिसि आहुइद्, तारे चए मिं सारा तब्मुँ।
GEN 17:16 ङइ चलाइ आशिक पिंब्मुँ धै च ङाँइले क्हिलाइ च्ह घ्रि पिंब्मुँ। ङइ चलाइ आशिक पिंबइले च ल्हें ह्रेंमैंए आमा तब्मुँ। धै ह्रें-ह्रेंमैंए म्रुँमैं या च ङाँइले तब्मुँ।”
GEN 17:17 छबिमा अब्राहाम पत्खु तसि सैं न्हों-न्हों निस्योसि बिइ, “प्र बर्ष तयाबै म्हिलैया प्हसे तम् रो वा? धै कुच्यु बर्ष तयाबै साराई प्हसे फिलै रो वा?
GEN 17:18 ङ सिबै लिउँइँ इश्माएलाइन ङए च्हइ योंबै हक योंरिगे।”
GEN 17:19 दिलेया परमेश्‍वरजी आब्रहामने बिइ, “आङिं! क्हिए प्ह्रेंस्यो साराईन क्हिए ल्हागिर च्ह घ्रि फिब्मुँ। क्हिइ चए मिं इसहाक थेंब्मुँ। च नेरो चए लिउँइँबै सन्तानने ङइ ङए बाछा फैब्मुँ।
GEN 17:20 क्हिइ इश्माएलए ल्हागिर यो छ्युँ लब ङइ थेइ। छतसि ङइ चलाइ आशिक पिंब्मुँ धै प्हसेमैं ल्हें लमिंब्मुँ। च च्युसे ङ्हिं म्रुँमैंए आबा तब्मुँ, ङइ च ङाँइले थेबै ह्रेंमैं लमिंब्मुँ।
GEN 17:21 दिलेया ङए बाछा इसहाकनेन् फैब्मुँ। क्हुरिंम्बै चु त्हेजरे साराई क्हिउँलेन् च्ह फिब्मुँ।”
GEN 17:22 चने बालु ताँ लल् खाँबै लिउँइँ परमेश्‍वर अब्राहामउँइँले ह्‍याइ।
GEN 17:23 च त्हिंइर्न अब्राहामइ ह्रोंसए च्ह इश्‍माएल नेरो ह्रोंसए धिंर फिबै केब्छैंमैं नेरो ह्रोंसए धिंर्बै ताँन् मुँयुँमैंल परमेश्‍वरजी बिब् धोंले ज्युर चिनु लइ।
GEN 17:24 ज्युर चिनु लमा अब्राहाम कुच्युसे कुदिं तल।
GEN 17:25 चए च्ह इश्माएलए ज्युर चिनु लमा च च्युसे सोंदिंर्बै मुँल।
GEN 17:26 च त्हिंइर्न अब्राहाम नेरो चए च्ह इश्माएलए ज्युर चिनु लल।
GEN 17:27 चने बा-बालुन् चए धिंर फिब नेरो अरू ह्‍युलउँइँले किंइ पखबै ताँन् मुँयुँमैंए ज्युर चिनु लल।
GEN 18:1 तिगें त्हिंइर्बै ख्वालबै त्हेर अब्राहाम मम्रे बिबै क्ल्ह्‍योर ङ्‍हसिं धुँए ङाँर्बै ह्रोंसए तम्बुए म्रार टिरिमा याहवेह च ङाँर म्रोंयुइ।
GEN 18:2 चइ ङ्‍ह्‍योमा ह्रोंसए ओंसों मुँयुँमैं सों रारिब् म्रोंइ। चमैं म्रोंसि चए तम्बुए म्राउँइँले त्होंसि न्हे‍ह्‍याइ धै पत्खु तसि चमैंलाइ फ्योइ।
GEN 18:3 धै चइ बिइ, “ओ चिब्मैं, ङए फिर क्हेमैंए म्हाँया मुँस्याँ क्हिए केब्छैंए तम्बु न्होंर आहोंनले छलेन् आह्‍यामिंन्।
GEN 18:4 क्हेमैंए प्हले ख्रुबै ल्हागिर ङ क्यु पखमुँ। क्हेमैं चु सिंधुँ न्होंर्न भों न्हद्।
GEN 18:5 क्हेमैं ह्रोंसए केब्छैं ङाँर युइ छतसि ङ क्हेमैंए ल्हागिर चबै सै पखमुँ च चदु धै भों न्हसि ह्‍याल् खाँमुँ। क्हेमैं ङए तम्बुर खसेरो ङइ मान लल् पिंन्।” चमैंइ बिइ, “तम् तम्, ह्‍याद्। क्हिइ बिब् धोंन् लद्।”
GEN 18:6 झाइले अब्राहाम च तोदोंन् तम्बुर सारा ङाँर ह्‍यासि “युन्ले प्रो ङ्‍हब्यों चेंसि क्हें झोंन्,” बिइ।
GEN 18:7 अब्राहाम बिस्याँ प्ह्रोंर ह्‍यासि ह्रोंसए खेदोमैंए बगलउँइँले क्ल्या भार घ्रि किंसि चए केब्छैंने सैबर पिंइ। धै सैबै तोंदोंन् चइ ह्‍योइ।
GEN 18:8 झाइले चइ दै, ङ्‍हे नेरो ह्‍योबै से बोसि चमैंए उँइँर थेंमिंइ। चमैंइ आचन् समा च चमैं ङाँर्न रारिइ।
GEN 18:9 चमैंइ चने “क्हिए प्ह्रेंस्यो सारा खनिर मुँ?” बिसि ङ्योएमा चइ “चम् तम्बुर मुँ,” बिइ।
GEN 18:10 झाइले याहवेहजी बिइ, “क्हुरिंम्बै चु त्हेजरे ङ क्हि ङाँर एयुब्मुँ। च्हमा क्हिए प्ह्रेंस्यो साराई च्ह घ्रि फिब्मुँ।” साराई चु ताँ चए लिउँइँ तम्बुए म्राउँइँले थेरिल।
GEN 18:11 अब्राहाम नेरो सारा खेब्-माँब् तसि चमैंए छ्ह ल्हें तयाल् खाँल। साराए क्होर्बै या टियाल् खाँल।
GEN 18:12 छतसि सारा सैं न्हों-न्हों “ङ माँब् तयाल् खाँइमुँ ङए प्युँ या खेब् तयाल् खाँइमुँ छाबै त्हेरै या ङ सैं तोंल् योंम् रो वा?” बिसि निस्योइ।
GEN 18:13 “‘माँब् तयालेया ङइ च्ह-च्हमि योंम् रो वा?’ बिसि सारा तले निस्योइ? बिसि याहवेहजी अब्राहामने ङ्योएइ।
GEN 18:14 याहवेहजी लल् आखाँबै सै तोइ मुँ वा? क्हुरिंम्बै ङ युम् बिबै त्हेर ङ क्हि ङाँर एयुब्मुँ। च्हमा साराल च्ह घ्रि तब्मुँ।”
GEN 18:15 दिलेया साराई ङ्हिंदै “ङम् निआस्यो बिइ।” चइ बिइ, “आङिं! क्हि निस्योल।”
GEN 18:16 झाइले च मुँयुँमैंइ छाइले सदोमउँइँ ङ्ह्‍योबर होंइ। छतसि अब्राहाम चमैंने बालु दे क्याइ समा घ्याँ तेंबर ह्‍याइ।
GEN 18:17 याहवेहजी बिइ, “ङइ लबर होंबै के अब्राहामउँइँले लोइ थेंले वा?
GEN 18:18 अब्राहामउँइँले घ्रि थेब नेरो भोंबै ह्रें तब्मुँ। च ङाँइलेन् पृथ्‍बीर्बै ताँन् ह्रेंमैंइ आशिक योंब्मुँ।
GEN 18:19 तलेबिस्याँ चइ ह्रोंसए च्ह-च्हमिमैं नेरो परवामैं ‘छेनाले लोदा-सैंदा लसि याहवेहजी बिब् धोंले प्रबर ल्हैदिरिगे’ बिसि ङइ च त्हाँइमुँ। चमैंइ छ लस्याँ याहवेहजी अब्राहामने फैबै बाछा पूरा लमिंब्मुँ।”
GEN 18:20 धबै याहवेहजी बिइ, “सदोम नेरो गमोराए बिरोधर ल्हें ताँ रेइमुँ। तलेबिस्याँ चमैंइ ल्हें पाप लइमुँ।
GEN 18:21 तारे ङइ थेबै ताँ अनुसार चमैंइ लबै केमैं क्ह्रोंसेंन् ङिंब् उ आङिं बिसि ङ्ह्‍योबर ङ क्युरु ह्‍याब्मुँ। आङिंस्याँ ङइ सेब्मुँ।”
GEN 18:22 छतसि च मुँयुँमैं ङ्हिं छाइले तसि सदोमउँइँ ह्‍याइ। अब्राहाम बिस्याँ याहवेहए उँइँर्न रारिइ।
GEN 18:23 झाइले अब्राहाम याहवेह ङाँर ह्‍यासि बिइ, “दुष्‍टमैंने बालु ठिक के लब्मैं या क्हिजी सैवाम्मा?
GEN 18:24 च क्ल्ह्‍योर ठिक के लब्मैं ङ्‍हच्यु मुँस्याँ च ङ्‍हच्यु म्हि आजोगेल्‍ले च क्ल्ह्‍यो नास लवाम्मा?
GEN 18:25 दुष्‍ट म्हिमैंने बालु ठिक के लब्मैं सैबै के क्हिउँइँले खोंयोंइ आतरिगे। क्हिउँइँले छ्याँबै के लब्मैं नेरो आछ्याँबै के लब्मैंए नों खोंयोंन् बिलै घ्रिन् आतरिगे। पृथ्‍बीर्बै नियाधिशइ क्ह्रोंसेंन्बै निसाफ आल रो वा?”
GEN 18:26 याहवेहजी बिइ, “सदोम सहर न्होंर ठिक के लब्मैं ङ्‍हच्यु मुँस्याँ चमैं सोरिगे बिसि ङइ ताँन् म्हिमैं जोगेमिंब्मुँ।”
GEN 18:27 अब्राहामइ बिइ, “ओ याहवेह, ङ स नेरो मेब्रो धों तलेया क्हिने बालु ताँ सेबै आँट लइमुँ।
GEN 18:28 चर म्हि ङ्‍ह आयोल्‍ले ठिक के लब्मैं प्लिच्युसे ङ्‍ह मत्‍त्रे मुँलेया क्हिजी ताँन् सैवाम्मा?” खीजी बिइ, “चर ठिक के लब्मैं प्लिच्युसे ङ्‍ह मत्‍त्रे मुँस्याँ ङइ ताँन् सैरिब् आरे।” अब्राहामइ धबै बिइ, “ठिक के लब्मैं प्लिच्यु मत्‍त्रे मुँस्याँ खै लम्दि?”
GEN 18:29 खीजी बिइ, “ठिक के लबै प्लिच्यु म्हिमैं सोरिगे बिसि ङइ च सहर नास लरिब् आरे।”
GEN 18:30 अब्राहामइ बिइ, “ओ याहवेह, क्हि ह्रिस आखस्याँ ङ धबै ताँ घ्रि ङ्योएम् ओ। चर ठिक के लब्मैं सोंच्यु मत्‍त्रे मुँस्याँ खै लम्दि?” खीजी बिइ, “चर ठिक के लब्मैं सोंच्यु मत्‍त्रे मुँलेया ङइ च सहर नास लरिब् आरे।”
GEN 18:31 अब्राहामइ बिइ, “ओ याहवेह, ङ क्हिने ताँ सेबै आँट लरिइमुँ गार आम्हाँदिद् ओ। चर ठिक के लब्मैं ङ्हिस्यु मुँस्याँ खै लम्दि?” खीजी बिइ, “ठिक के लबै ङ्हिस्यु म्हि सोरिगे बिसि ङइ च सहर नास लरिब् आरे।”
GEN 18:32 झाइले अब्राहामइ बिइ, “ओ याहवेह, क्हि ह्रिस आखस्याँ ङ धबै ताँ घ्रि ङ्योएम् ओ। चर ठिक के लब्मैं च्यु मत्‍त्रे मुँस्याँ खै लम्दि?” खीजी बिइ, “ठिक के लबै म्हि च्यु सोरिगे बिसि ङइ च सहर नास लरिब् आरे।”
GEN 18:33 छले याहवेह अब्राहामने ताँ सेल् खाँबै लिउँइँ छाइले ह्‍याइ। अब्राहाम बिस्याँ ह्रोंसए तम्बुर एखइ।
GEN 19:1 च स्वर्गदूतमैं ङ्हिं ङेसर सदोमर युइ। च त्हेर लोत सदोमए मुल म्रार क्हुँरिल। चमैं म्रोंसि लोत चमैंने त्होबर रेइ, धै कुरसि चमैंलाइ फ्योसि बिइ,
GEN 19:2 “ओ चिब्मैं, गार आम्हाँदिल्‍ले ह्रोंसए केब्छैंए धिंर खसि क्हेमैंए प्हले ख्रुसि चुर्न म्हुँइँस थोदु। धै न्हाँगर युनन् रेसि ह्‍याद्।” दिलेया चमैंइ बिइ, “मुँरिगे, ङि चु बैरुबै चोकर्न रोम्।”
GEN 19:3 दिलेया लोतइ चमैंने बेल्‍ले कर ल्हैदिमा चमैं चने बालु धिंर ह्‍याइ। धै लोतइ प्लेढा आझोंबै क्हें झोंसि चमैंए उँइँर थेंमिंमा चमैंइ चइ।
GEN 19:4 चमैं रोब् भन्दा ओंसों सदोमर्बै फ्रेंसिमैं नेरो खेब्मैं घ्रि या आचैल्‍ले ताँन् म्हिमैं खसि लोतए धिंर कारग्यु लइ।
GEN 19:5 चमैंइ लोतलाइ हुइसि बिइ, “ङेसर क्हि ङाँर खबै म्हिमैं खनिर मुँ? चमैं बैरु ङि ङाँर पुयु ङि चमैंने रोम्।”
GEN 19:6 चमैंइ छबिमा लोत म्राए बैरु चमैं ङाँर ह्‍यासि लिउँइँले म्रा तोरवासि
GEN 19:7 चमैंने बिइ, “ओ थुमैं, गार आम्हाँदिल्‍ले छाबै आछ्याँबै के आलमिंन्।
GEN 19:8 बरु ङए च्हमिमैं ङ्हिं कन्येन् मुँ। ङइ चमैं क्हेमैं ङाँर पुइमिंम्। क्हेमैंइ चमैंने तो लदा ङ्हाँमुँ लद्। चु म्हिमैं तोइ आलमिंन् तलेबिस्याँ चुमैं ङए प्ह्रेंमैं ग। चमैं ङए धिंर खसेरो ङइ चुमैं जोगेल् त्हुम्।”
GEN 19:9 दिलेया चमैंइ बिइ, “क्हि ङि ङाँर टिखबै म्हि मत्‍त्रे ग, क्हिइ ङिए फिर निसाफ लल् म्हैइमुँ! ङिए घ्याँ स्योद्! आस्याँ ङिइ च म्हिमैंने भन्दा क्हिने आछ्याँबै के लब्मुँ।” छ बिसि लोतलाइ कैवासि म्रा फोर्दिबर होंइ।
GEN 19:10 दिलेया धिं न्होंर्बै म्हि ङ्हिंइ लोतलाइ चैंसि धिं न्होंर झोंसि म्रा तोरवाइ।
GEN 19:11 झाइले चमैंइ म्रा बैरु मुँबै ताँन् म्हिमैंए मि आम्रोंब् लवाइ। धै च म्हिमैंइ म्रा स्याल् आखाँ।
GEN 19:12 झाइले च म्हि ङ्हिंइ लोतने बिइ, “क्हिने बालु चुर अरू खाबै मुँ वा? म्हो, च्ह-च्हमिमैं, चु क्ल्ह्‍योर क्हिने खाबै मुँ बिस्याँ चमैं किंसि चु क्ल्ह्‍योउँइँले त्होंइ ह्‍याद्।
GEN 19:13 तलेबिस्याँ ङइ चु क्ल्ह्‍यो नास लवाम्। चु क्ल्ह्‍योर्बै म्हिमैंए आछ्याँबै ताँमैं स्वर्गर याहवेह ङाँर फेनेइमुँ। छतसि चु क्ल्ह्‍यो नास लवाबर खीजी ङि कुल्मिंब् ग।”
GEN 19:14 च म्हिमैंए ताँ थेसि लोतइ ह्रोंसए च्हमिमैं ब्ह्‍या लब् बिसि ह्रिथेंबै म्होमैं ङाँर ह्‍यासि बिइ, “रेद्, चु क्ल्ह्‍योउँइँले ह्‍याले। तलेबिस्याँ याहवेहजी चु क्ल्ह्‍यो नास लवाबर होंइमुँ।” दिलेया म्होमैंइ लोतइ स्योर तेइ ङ्हाँसि आक्वें।
GEN 19:15 मि म्रोबि छेमा च स्वर्गदूतमैंइ लोतने “रेद्, क्हिए प्ह्रेंस्यो नेरो चुर मुँबै क्हिए च्हमि ङ्हिं किंसि ह्‍याद्। आह्‍यास्याँ चु क्ल्ह्‍योर्बै म्हिमैंइ योंबै सजैंर क्हेमैं या नास तयाब्मुँ बिदै युनन् ह्‍याबर कर ल्हैदिइ।”
GEN 19:16 दिलेया लोतइ क्हैल् लरिमा याहवेहजी चमैंए फिर ल्हयो खसि स्वर्गदूतमैंइ लोत, चए प्ह्रेंस्यो नेरो च्हमि ङ्हिंए यो क्हासि च क्ल्ह्‍योउँइँले बैरु पखइ।
GEN 19:17 चमैं बैरु पखबै लिउँइँ स्वर्गदूत घ्रिइ बिइ, “क्हेमैंए ज्यु जोगेबर न्हेह्‍याद्, लिग्याँ तोसि आङ्ह्‍योद्, धै ब्याँसिर खनिरै आराद्। क्हेमैं आसिरिगे बिसि कोंउँइँ न्हे‍ह्‍याद्।”
GEN 19:18 दिलेया लोतइ चमैंने बिइ, “ओ चिब्मैं, छाबै दुःख ङि फिर आतरिगे।
GEN 19:19 क्हेमैंइ ङए फिर ल्हयो खसि ङए ज्यु जोगेमिंइ। दिलेया ङ कोंउँइँ भौदिल् आखाँ, आस्याँ चु क्ल्ह्‍यो नास लवामा ङै या सियाब्मुँ।
GEN 19:20 ङ्ह्‍योत्ति, च च्योंबै नाँस चेंदोन् मुँ। ङ चर्न ह्‍याल् पिंन्, च नाँस च्योंब मुँ, आङिं वा? चर ह्‍यास्याँ ङ सोलै।”
GEN 19:21 च म्हिइ चने बिइ, “तम्-तम्। क्हिइ बिबै ताँ ङइ ङिंम्। क्हिइ बिबै नाँस ङइ नास लरिब् आरे।
GEN 19:22 क्हि युन चर न्हे‍ह्‍याद्, तलेबिस्याँ क्हि चर आफेन् समा ङइ तोइ लल् आखाँ।” (छतसि च नाँसए मिं सोअर थेंइ।)
GEN 19:23 लोत सोअर बिबै नाँसर फेनेमा त्हिंयाँ फ्योयाल् खाँल।
GEN 19:24 झाइले याहवेहजी सदोम नेरो गमोराए फिर मुउँइँले मि नेरो बारुद कुल्मिंइ।
GEN 19:25 छले याहवेहजी चर्बै नाँसमैं नेरो ब्याँसि धै चर टिबै ताँन् म्हिमैं नेरो सर म्‍लोबै तोन्दोंरि सैमैं नास लवाइ।
GEN 19:26 दिलेया लोतए प्ह्रेंस्योइ लिउँइँ तोसि सदोमउँइँ ङ्ह्‍योमा च चजए त्हो तयाइ।
GEN 19:27 प्हँन्हाँग्धों न्हाँगर्न रेसि अब्राहाम ओंसोंन् याहवेहने त्होसि ताँ लबै क्ल्ह्‍योर ह्‍याइ।
GEN 19:28 चर ह्‍यासि माइ ङ्ह्‍योमा सदोम, गमोरा नेरो ब्याँसिर्बै ताँन् क्ल्ह्‍योमैं म्रोंइ। च क्ल्ह्‍योउँइँले भट्टिर्बै मिखु धोंब कैंडो खरिब् म्रोंइ।
GEN 19:29 छले ब्याँसिर्बै नाँसमैं नास लवामा परमेश्‍वरजी अब्राहामलाइ मैंइ। लोत टिबै क्ल्ह्‍यो नास लवामा च क्ल्ह्‍योउँइँले खीजी लोत जोगेमिंइ।
GEN 19:30 लोत सोअर नाँसर टिब ङ्हिंसि ह्रोंसए च्हमि ङ्हिं किंसि कोंर ह्‍यासि चर्बै उ घ्रिर टिबर होंइ।
GEN 19:31 तिगें च्हमि थेब्स्योइ च्योंब्स्योने बिइ, “ङ्योए आबा खेब् तयाइ। चु ह्‍युलर ङ्योने ब्ह्‍या लबर खब्मैं खाबै आरे।
GEN 19:32 छतसि ङ्योइ तारे ङ्योए आबा प्हाइ म्हेरन् लसि चने रोले, धै आबाउँइँले ङ्योइ प्हसेमैं योंले।”
GEN 19:33 च म्हुँइँसर चमैंइ खेंमैंए आबालाइ अँगुरए प्हा थुँल् पिंइ, धै च्हमि थेब्स्यो ह्रोंसए आबाने रोइ। च्हमि खसि रोसि रेसि ह्‍याबै या लोतइ आसे।
GEN 19:34 प्हँन्हाँग्धों च्हमि थेब्स्योइ च्योंब्स्योने बिइ, “तल् म्हुँइँसर ङ आबाने रोइ। तिंयाँ म्हुँइँसर धबै ङ्योइ चलाइ प्हा थुँल् पिंले। धै क्हि ह्‍यासि आबाने रोद्। छले ङ्योइ आबाउँइँले प्हसेमैं योंले।”
GEN 19:35 झाइले चमैंइ च म्हुँइँसरै या खेंमैंए आबालाइ प्हा थुँल् पिंसि च्योंब्स्यो आबाने रोनेइ। च्योंब्स्यो खसि रोसि रेसि ह्‍याबै या लोतइ आसे।
GEN 19:36 छले लोतए च्हमि ङ्हिंइ खेंमैंए आबाउँइँलेन् प्हसे नोइ।
GEN 19:37 च्हमि थेब्स्योइ च्ह घ्रि फिसि चए मिं मोआब थेंइ। तिंजरोबै मोआबीमैंए खे चुन् ग।
GEN 19:38 च्योंब्स्योज्यै च्ह घ्रि फिसि चए मिं बेन-अमि थेंइ। तिंजरोबै अम्मोनिमैंए खे चुन् ग।
GEN 20:1 च क्ल्ह्‍योउँइँले अब्राहाम नेगेब बिबै क्ल्ह्‍योउँइँ ह्‍याइ, धै कादेश नेरो शूरए म्हाँजोर्बै गरार बिबै ह्‍युलर टिइ। गरार ह्‍युलर टिमा चर्बै म्हिमैंने
GEN 20:2 अब्राहामइ ह्रोंसए प्ह्रेंस्यो सारालाइ “चम् ङए अङाँ ग,” बिइ। छबिमा गरारर्बै अबीमेलेक म्रुँइ सारालाइ ह्रोंस ङाँर पखबर ल्हैदिइ।
GEN 20:3 दिलेया म्हुँइँसर परमेश्‍वर अबीमेलेक ङाँर म्होंडर युसि बिइ, “थेद्, च च्हमिरि आगुए प्ह्रेंस्यो ग! छतसि क्हिइ चलाइ पखस्याँ क्हि सियाब्मुँ।”
GEN 20:4 अबीमेलेक च त्हे समा सारा ङाँर आह्‍याल। छतसि चइ बिइ, “ओ प्रभु, ङइ आछ्याँबै के तोइ आलइमुँ! ङइ तोइ न्होह्रों आललैया क्हिजी ङि सैवाम्मा?
GEN 20:5 ‘च ङए अङाँ ग’ बिसि च म्हि ह्रोंसइन् ङने बिब आङिं रो वा? धै च च्हमिरिज्यै या ‘च ङए आघें ग’ बिसि बिब आङिं रो वा? ङइ चु के छ्याँबै सैंइ लब् ग। ङइ तोइ आछ्याँबै के आलइमुँ।”
GEN 20:6 झाइले परमेश्‍वरजी अबीमेलेकने म्होंडर बिइ, “अँ, क्हिए छ्याँबै सैंउँलेन् चु के लब् ग बिसि ङइ सेइमुँ। ङए उँइँर क्हिइ आछ्याँबै के आलरिगे बिसि क्हि जोगेमिंब ङन् ग। छतसि ङइ च च्हमिरि क्हिइ छुइल् आपिंल।
GEN 20:7 तारे अब्राहामए प्ह्रेंस्यो एवाद्, तलेबिस्याँ च अगमबक्‍ता ग। चइ क्हिए ल्हागिर प्राथना लमिंब्मुँ, धै क्हि सोब्मुँ। दिलेया क्हिइ च च्हमिरि आएमिंस्याँ क्हि नेरो क्हिए ताँन् म्हिमैं खैलेबिलेया सियाब्मुँ बिसि सैंर मैंन्।”
GEN 20:8 अबीमेलेक न्हाँगर्न रेसि ह्रोंसए ताँन् सिपाइमैं हुइसि चु ताँन् ताँमैं बिइ। च ताँ थेसि चर्बै म्हिमैं बेल्‍ले ङ्हिंयाँइ।
GEN 20:9 छतमा अबीमेलेकइ अब्राहाम हुइसि बिइ, “क्हिइ ङिने तो लल् म्हैल? ङइ क्हिल तो न्होह्रों लवाइ? क्हिइ ङ नेरो ङए ह्‍युलए फिर च्हौ थेबै छ्याब खबै के तले तल् पिंल? क्हिइ ङने लल् आतबै के लइ!
GEN 20:10 तो मैंसि क्हिइ ङने बालु छाबै के लल?”
GEN 20:11 अब्राहामइ बिइ, “तलेबिस्याँ चु क्ल्ह्‍योर परमेश्‍वरने ङ्हिंब खाबै आरे। छतसि म्हिमैंइ ङए प्ह्रेंस्यो छ्याँब् म्रोंसि ङलाइ सैवासि चलाइ बोवाम् उ? बिसि ङइ मैंल।
GEN 20:12 छतसि ङइ चने ‘ङए अङाँ ग’ बिसि बिब् ग। च ताँ क्ह्रोंसेंन ग, तलेबिस्याँ चु ङए आबाए च्हमि ग, दिलेया आमा स्यो-स्योन् ग। धै चु ङए प्ह्रेंस्यो तइ।
GEN 20:13 परमेश्‍वरजी ङलाइ ङए आबाए धिं पिसि आगुए ह्‍युलर क्याइ-माइ स्युरइ प्रब लमिंइ। छतसि ङइ साराने ‘गार् आम्हाँदिल्‍ले क्हिइ म्हिमैंने बालु चु ङए आघें ग बिद् ओ’ बिसि ङइ बिल।”
GEN 20:14 छ बिबै लिउँइँ अबीमेलेकइ र-क्युमैं, क्ल्या-मेमैं, केब्-केब्स्योमैं पखसि अब्राहामलाइ पिंइ, धै चए प्ह्रेंस्यो सारा या एमिंइ।
GEN 20:15 झाइले अबीमेलेकइ बिइ, “ङ्‍ह्‍योद्, ङए ह्‍युल क्हिए ओंसोंन् मुँ। क्हि खनिर टिदा ङ्हाँइमुँ चर्न टिद्।”
GEN 20:16 अबीमेलेकइ साराने बिइ, “क्हिए आघेंलाइ ङइ चाँदिए हजार घ्रि पिंइमुँ। क्हिने बालु मुँबै म्हिमैंए उँइँर क्हिल तोइ छ्याब् आरे बिब चु मुइ प्रमाण तब्मुँ। तारे खाबज्यै या क्हिए फिर आछ्याँब मैंरिब् आरे।”
GEN 20:17 छतसि अब्राहामइ परमेश्‍वरने प्राथना लइ, धै परमेश्‍वरजी अबीमेलेक नेरो चए प्ह्रेंस्यो धै चए केब्स्योमैंइ धबै प्हसे योंल् खाँरिगे बिसि चमैं सल् लमिंइ।
GEN 20:18 तलेबिस्याँ अब्राहामए प्ह्रेंस्यो साराई लमा याहवेहजी अबीमेलेकए धिंर मुँबै ताँन् च्हमिरिमैंए कोख म्रुवाल।
GEN 21:1 याहवेहजी अब्राहामने बाछा फैब् धोंले साराए फिर ल्हयो खइ। धै खीजी बिब्‌ धोंलेन् लमिंसि
GEN 21:2 साराई प्हसे नोइ, धै परमेश्‍वरजी चने बिब् धोंले अब्राहाम खेब् तबै त्हेर साराई च्ह घ्रि योंइ।
GEN 21:3 साराई फिबै चए च्हए मिं अब्राहामइ इसहाक थेंइ।
GEN 21:4 चए च्ह प्रेरो तमा अब्राहामइ परमेश्‍वरजी बिब्‌ धोंलेन् ज्युर चिनु लइ।
GEN 21:5 चए च्ह इसहाक फिमा अब्राहाम प्र बर्ष तल् खाँल।
GEN 21:6 छले च्ह योंमा साराई बिइ, “परमेश्‍वरजी ङए सैं तोंन् लमिंसि ङ निस्योल् पिंइमुँ। चु ताँ थेब्मैं ताँन् ङने बालु निस्योब्मुँ।”
GEN 21:7 धबै साराई बिइ, “‘साराई प्हसेलाइ ङ्‍हे तिंल् योंम्’ बिसि खाबज्यै अब्राहामने आबिमल। दिलेया च खेब् तबै त्हेरै या ङ ङाँइले चल च्ह घ्रि फिइ।”
GEN 21:8 कोलो इसहाक थेब् ततै ह्‍यामा चइ ङ्‍हे थुँब पिवाबै त्हिंइर अब्राहामइ थेबै भत्तेर लइ।
GEN 21:9 तिगें मिश्रीथेंस्यो हागारइ अब्राहामउँइँले फिबै च्ह इश्माएलइ ह्रोंसए च्ह इसहाकलाइ गिजेरिब् साराई म्रोंइ।
GEN 21:10 छतसि साराई अब्राहामने बिइ, “चु केब्स्यो नेरो चए च्ह छुइले तेवाद्। तलेबिस्याँ चु केब्छैंए च्ह ङए च्ह इसहाकने बालु क्हिए सै न्होरए क्ल्हे तल् योंरिब् आरे।”
GEN 21:11 इश्माएलै या ह्रोंसए च्हन् तबइले च ताँ थेसि अब्राहामए सैं आतों।
GEN 21:12 दिलेया परमेश्‍वरजी अब्राहामने बिइ, “च कोलो नेरो क्हिए केब्स्यो हागारए ल्हागिरि क्हिइ न्हुँ आलद्। ङइ क्हिने बाछा फैब् धोंले क्हिए सन्तान इसहाकउँइँलेन् तब्मुँ। छतसि साराई क्हिने खै बिमुँ छान् लद्।
GEN 21:13 च केब्स्योए च्हउँइँले या ल्हें सन्तानमैं तब्मुँ। ङइ चउँइँले या ह्रें घ्रि लमिंब्मुँ। तलेबिस्याँ इश्माएलै या क्हिए च्हन् ग।”
GEN 21:14 छ बिबै प्हँन्हाँगधों अब्राहाम न्हाँकर्न रेसि क्हें नेरो क्युए छकला (मशक) घ्रि हागारए प्हैंदार थेंमिंइ, धै च नेरो कोलो ङ्हिंना-ङ्हिंन् कुल्मिंइ। झाइले हागार बेर्शेबा बिबै तोइ आरेबै क्ल्ह्‍योजरे स्युर प्रइ।
GEN 21:15 छले प्र-प्रमा छकलार्बै क्यु थुँल् खाँबै लिउँइँ चइ कोलो ल्हों न्होंर वाथेंसि
GEN 21:16 प्र मिटरदे क्याइ ह्‍यासि टिइ, तलेबिस्याँ “च कोलो सिब ङइ म्रोंल् आत्हुरिगे” बिसि चइ सैं न्हों-न्हों मैंइ। झाइले हागार चर टिसि बेल्‍ले क्रोबर होंइ।
GEN 21:17 दिलेया परमेश्‍वरजी कोलो क्रोब थेइ। धै परमेश्‍वरए दूतजी स्वर्गउँइँले हागारने बिइ, “ओ हागार, क्हिए फिर तो दुःख तइ? क्हि आङ्हिंन्, तलेबिस्याँ कोलो क्रोब परमेश्‍वरजी थेइमुँ।
GEN 21:18 रेद्, कोलो ङाँर ह्‍यासि चलाइ रेमिंन्, धै चए सैं क्होल् लमिंन्। ङइ च ङाँइले थेबै ह्रें घ्रि लमिंब्मुँ।”
GEN 21:19 छबिसि परमेश्‍वरजी हागारए मि थोंमिंमा चइ क्यु खाँदु घ्रि म्रोंइ। धै ह्‍यासि छकालर क्यु खाइ पखसि कोलो थुँमिंइ।
GEN 21:20 च कोलोए फिर परमेश्‍वरजी म्हाँया लबइले च थेब ततै ह्‍याइ, धै पारान बिबै तोइ आकेबै क्ल्ह्‍योर टिसि मे त्हँले ल्हिल् ह्रबै म्हि तइ।
GEN 21:21 धै चए आमाइ चए ल्हागिर मिश्र ह्‍युलउँइँले प्ह्रेंस्यो घ्रि पखमिंइ।
GEN 21:22 च त्हेर अबीमेलेक म्रुँ नेरो चए सेनापति पिकोलइ अब्राहामने बिइ, “क्हिइ लबै तोन्दोंरि केर परमेश्‍वरजी आशिक पिंइमुँ।
GEN 21:23 छतसि ङ नेरो ङए च्ह-च्हमि, ङए क्वें-क्वेंमिंमैंने बालु क्हिइ स्योर तेबै केमैं खोंयोंइ लरिब् आरे बिसि ङने बालु चुर परमेश्‍वरए उँइँर बाछा फैद्। धै क्हिए फिर ङइ छ्याँब लब् धोंलेन् क्हिज्यै या ङए फिर छ्याँबै केमैं लम् बिसि ङने बाछा फैद्, धै क्हि टिबै चु ह्‍युलए ल्हागिरै या क्हिइ छ्याँबै केमैं लम् बिसि ङने बाछा फैद्।”
GEN 21:24 अब्राहामइ बिइ, “तम्, तम्, ङ छाबन् बाछा फैम्।”
GEN 21:25 दिलेया अबीमेलेक म्रुँए केब्छैंमैंइ खैच्हिजी लसि प्हेंवाबै क्यु खाँदुए बारेर अब्राहामइ अबीमेलेकने ताँ लइ।
GEN 21:26 अबीमेलेकइ बिइ, “छाबै के खाबइ लगे, च ङइ था आसे। क्हिइ ङने तोगो समा तोइ आबि। तिंयाँ मत्‍त्रे ङइ चु ताँ थेइ।”
GEN 21:27 च ताँ तबै लिउँइँ अब्राहामइ क्युमैं-मेमैं पसि अबीमेलेकलाइ पिंइ। धै चमैं ङ्हिंइ बाछा फैइ।
GEN 21:28 अब्राहामइ क्युए बगालउँइँले म्हदो ङि स्योले थेंइ।
GEN 21:29 अबीमेलेकइ अब्राहामने “क्हिइ चु म्हदो ङि तले स्योले थेंल?” बिसि ङ्योएमा
GEN 21:30 अब्राहामइ बिइ, “चु क्यु खाँदु ङइ ताब् ग बिसि ग्वाइ तबै ल्हागिर चु क्यु म्हदो ङि क्हि किंन्।”
GEN 21:31 झाइले चर चमैं ङ्हिंन-ङ्हिंनइ बाछा फैबइले च क्ल्ह्‍योए मिं बेर्शेबा थेंइ।
GEN 21:32 झाइले चमैंइ बेर्शेबा बिबै क्ल्ह्‍योर खेंमैं न्होंर बाछा फैबै लिउँइँ अबीमेलेक नेरो चए सेनापति पिकोल पलिश्ती बिबै ह्‍युलर एह्‍याइ।
GEN 21:33 अब्राहामइ बेर्शेबार झ्याउए सिंधुँ घ्रि रुँइँसि खोंयोंन् बिलै तरिबै याहवेह परमेश्‍वरलाइ सेवा लइ।
GEN 21:34 च लिउँइँ अब्राहाम पलिश्तीमैंए ह्‍युलर ल्हें त्हिंइ समा टिइ।
GEN 22:1 तिस्याँदे लिउँइँ परमेश्‍वरजी अब्राहामए थेबै जाँच लसि चने बिइ, “ओ अब्राहाम।” चइ बिइ, “होइ, ङ चुर्न मुँ।”
GEN 22:2 झाइले परमेश्‍वरजी बिइ, “क्हिइ बेल्‍ले खोबै क्हिए घ्रिदे मुँबै च्ह इसहाक किंसि ङइ तेंबै क्ल्ह्‍यो मोरियाह ह्‍युलर्बै कोंर ह्‍यासि च कोलो ख्रो पिंन्।”
GEN 22:3 छबिमा अब्राहाम न्हाँकर्न रेसि ख्रो पिंबै सिं क्लेसि गधाए फिर तेमैं फैइ। धै चए केब्छैं ङ्हिं नेरो च्ह इसहाक किंसि परमेश्‍वरजी चने बिबै क्ल्ह्‍योउँइँ ह्‍याइ।
GEN 22:4 छले ह्‍यारिमा सोंरोर अब्राहामइ च क्ल्ह्‍यो ह्रेंगोर म्रोंइ।
GEN 22:5 धै अब्राहामइ चए केब्छैंमैंने बिइ, “क्हेमैं चुर गधा ङाँर टिरिद्। ङ नेरो चु कोलो ताइ ह्‍यासि ख्रो पिंसि क्हेमैं ङाँर्न एयुम्।”
GEN 22:6 अब्राहामइ ख्रो पिंबै सिं ह्रोंसए च्ह इसहाकलाइ नोमिंइ, झाइले मि नेरो छुरि चए योर किंसि चमैं ङ्हिंना-ङ्हिंन् ह्‍याइ।
GEN 22:7 छले ह्‍यारिमा इसहाकइ ह्रोंसए आबाने बिइ, “ओ आबा।” आबाइ बिइ, “तो बिल, च्हेज्यों?” चइ बिइ, “ङ्योने मि नेरो सिंमैं मुँ, दिलेया ख्रो पिंबै क्यु झज खोइ?”
GEN 22:8 अब्राहामइ बिइ, “च्हेज्यों, ख्रो पिंबै क्यु झज परमेश्‍वरजीन् जुरेमिंम्,” बिसि चमैं ङ्हिं बालुन् ह्‍याइ।
GEN 22:9 धै परमेश्‍वरजी चने तेंबै क्ल्ह्‍योर फेबै लिउँइँ अब्राहामइ चर ख्रो पिंबै क्ल्ह्‍यो घ्रि बनेसि सिं थेंइ। धै ह्रोंसए च्ह इसहाक फैसि सिंए फिर थेंइ।
GEN 22:10 झाइले अब्राहामइ ह्रोंसए च्ह ख्रो पिंब् बिसि छुरि क्वेइ।
GEN 22:11 दिलेया याहवेहए दूत घ्रिइ स्वर्गउँइँले चलाइ कै तेसि बिइ, “ओ अब्राहाम, अब्राहाम!” चइ बिइ, “होइ, ङ चुर्न मुँ।”
GEN 22:12 दूतजी बिइ, “क्हिइ च कोलोए फिर यो आरेद्, चलाइ तोइ आलद्। तारे क्हि परमेश्‍वरने ङ्हिंमना बिसि ङइ सेइ, तलेबिस्याँ क्हिए च्ह घ्रि, क्हिए घ्रिदे मुँबै च्है या क्हिइ ङ ङाँइले लोइ आथें।”
GEN 22:13 झाइले अब्राहामइ कोंउँइँ ङ्‍ह्‍योमा क्यु साँढे घ्रि झ्याडिर रु क्होरिब् म्रोंइ। धै अब्राहाम ह्‍यासि च क्यु साँढे पखसि ह्रोंसए च्हए क्ल्ह्‍योरि च क्युए ख्रो पिंइ।
GEN 22:14 छतसि अब्राहामइ च क्ल्ह्‍योए मिं “याहवेहजी जुरेमिंब्मुँ” थेंइ। “याहवेहए कोंर खीजी जुरेमिंब्मुँ” बिसि तिंजरो या म्हिमैंइ बिरिम्।
GEN 22:15 याहवेहए दूतजी धबै स्वर्गउँइँले कै तेसि अब्राहामने बिइ,
GEN 22:16 “ङ याहवेहजी बिइमुँ, ङइ ह्रोंसए मिंर बाछा फैइमुँ, क्हिए घ्रिदे मुँबै च्है या ङए मिंर ख्रो पिंबै सैं लइ। क्हिइ चु के लबइले ङइ क्हिलाइ आशिक पिंब्मुँ।
GEN 22:17 क्हिए प्हसेमैं बडिसि मुर्बै सारमैं नेरो मा ङ्युँइर्बै बालुवा धोंलेन् ल्हें लमिंब्मुँ। क्हिए सन्तानइ खेंमैंए शत्तुरमैंए सहरमैं क्ल्हे लब्मुँ।
GEN 22:18 ङए ताँ क्हिइ ङिंइ। छतसि क्हिए सन्तानउँइँले ह्‍युलर्बै ताँन् ह्रेंमैंइ आशिक योंब्मुँ।”
GEN 22:19 च लिउँइँ अब्राहाम ह्रोंसए केब्छैंमैं ङाँर एखइ, झाइले चमैं ताँन् बेर्शेबा समा बा-बालुन् एखइ। धै अब्राहाम बेर्शेबार्न टिइ।
GEN 22:20 चए दे त्हे लिउँइँ “मिल्काज्यै क्हिए अलि नाहोरउँइँले च्ह प्रेउँलो फिइमुँ” बिबै ताँ अब्राहामइ थेइ।
GEN 22:21 थेब ऊज, चए अलि बूज नेरो आरामए आबा कमूएल,
GEN 22:22 धै केसेद, हजो, पिलदाश, यिदलाप नेरो बतूएल।
GEN 22:23 बतूएल रिबेकाए आबा तइ। चु प्रेउँलो च्हमैं अब्राहामए अलि नाहोरउँइँले मिल्काइ फिब् ग।
GEN 22:24 चइ ब्ह्‍या लसि पखबै रुमा मिं लबै प्ह्रेंस्योज्यै तेबह, गहम, तहस नेरो माका फिइ।
GEN 23:1 सारा प्रसे ङ्हिस्युसे ङिदिं सोइ।
GEN 23:2 सारा कनान ह्‍युलर्बै किर्यत-अर्बा अथवा हेब्रोन बिबै सहरर सिइ। सारा सियाबइले अब्राहाम बेल्‍ले शोक तसि सिनु थेंबै क्ल्ह्‍योर ह्‍याइ।
GEN 23:3 अब्राहाम साराए सिनु मुँबै क्ल्ह्‍योउँइँले रेसि हित्तीमैंने छ बिइ,
GEN 23:4 “ङ अरू ह्‍युलउँइँले खसि क्हेमैंए म्हाँजोर टिइमुँ। ङए प्ह्रेंस्यो सियाइ। छतसि सिनु पाबै छगोंए ल्हागिर क्ल्ह्‍यो घ्रि ङने चुँन् ओ।”
GEN 23:5 हित्तीमैंइ अब्राहामने बिइ,
GEN 23:6 “ओ चिब, ङिए ताँ थेद्! ङिए म्हाँजोर क्हि ह्रब् सेब् नेरो चिब ग। छतसि ङिए छगोंमैं न्होंर ताँन् भन्दा छ्याँबै छगों त्हाँसि क्हिए प्ह्रेंस्योए सिनु पाद्। क्हिए प्ह्रेंस्योए सिनु पाबै क्ल्ह्‍यो आपिं बिसि ङिइ बिरिब् आरे।”
GEN 23:7 चमैंइ छ बिब् थेसि अब्राहाम हित्तीमैं ओंसों कुरसि चमैंलाइ फ्योइ।
GEN 23:8 धै चइ चमैंने छ बिइ, “ङए प्ह्रेंस्योए सिनु क्हेमैंए क्ल्ह्‍योर पाल् पिंम् बिस्याँ ङए ताँ घ्रि थेमिंन्। धै सोहोरए च्ह एप्रोनने ङए ताँ बिमिंन्।
GEN 23:9 चइ ह्रोंसए म्रों ङाँर मुँबै मक्पेला बिबै उ ङने चुँरिगे। क्हेमैं ताँनए उँइँर च उए सै किंरिगे धै च उए क्ल्हे ङ तरिगे।”
GEN 23:10 च त्हेर अब्राहामइ चु ताँ बिरिमा एप्रोन बिबै चिब या हित्तीमैंए च्हों धिंर सहरर्बै थेबै म्रार्न टिरिल। छतसि चर्बै ताँन् म्हिमैंइ थेल्‍ले एप्रोनइ अब्राहामने बिइ,
GEN 23:11 “ओ चिब, ङए ताँ थेद्! ङए म्रों नेरो म्रों ङाँर मुँबै उ क्हिलाइ पिंस्यो। ङए म्हिमैंए उँइँर्न ङइ च उ क्हिलाइ पिंस्यो। क्हिए प्ह्रेंस्योए सिनु चर्न पाद्।”
GEN 23:12 एप्रोनइ छबिमा अब्राहामइ धबै च ह्‍युलर्बै म्हिमैंलाइ मान लसि फ्योइ।
GEN 23:13 झाइले चइ चर्बै ताँन् म्हिमैंइ थेल्‍ले एप्रोनने बिइ, “गार आम्हाँदिल्‍ले ङए ताँ थेद् ओ। ङइ च क्ल्ह्‍योए सै क्हिलाइ पिंस्यो। च मुइ क्हिइ किंनु धै चर ङए प्ह्रेंस्योए सिनु पाल् योंरिगे।”
GEN 23:14 छबिमा एप्रोनइ अब्राहामने बिइ,
GEN 23:15 “ओ चिब, ङए ताँ थेद्! क्ल्ह्‍योए सै चाँदिए मुइ प्लिब्ब्र ग। दिलेया क्हि नेरो ङए न्होंर च तोइ आङिं! क्हिए प्ह्रेंस्योए सिनु चर्न पाद्।”
GEN 23:16 छबिमा अब्राहामइ एप्रोनए ताँ ङिंइ। छतसि चइ हित्तीमैंए उँइँर एप्रोनइ बिब् धों प्रेन् चाँदिए मुइ प्लिब्ब्र च त्हेर चल्दिबै पारइ क्वेसि पिंइ।
GEN 23:17 छले मम्रेए स्यार हारबै मक्पेलार मुँबै एप्रोनए म्रों नेरो चर मुँबै उ, सिधुँमैं ताँन्
GEN 23:18 एप्रोनइ च म्हि च्होंर खबै ताँन् म्हिमैं नेरो हित्तीमैंए उँइँर अब्राहामए मिंर लमिंइ।
GEN 23:19 च लिउँइँ अब्राहामइ ह्रोंसए प्ह्रेंस्यो सारा कनान ह्‍युलर हेब्रोनए चेंदो मुँबै मम्रे ङाँर्बै मक्पेलार्बै म्रों ङाँर्बै उर पाइ।
GEN 23:20 छले च म्रों नेरो चर मुँबै उ हित्तीमैंउँइँले छगोंए ल्हागिर अब्राहामए मिंर दर्ता तइ।
GEN 24:1 अब्राहामए छ्ह ल्हें तसि खेब् तयाल् खाँल। याहवेहजी अब्राहामए तोन्दोंरि सैर आशिक पिंल।
GEN 24:2 तिगें अब्राहामइ ह्रोंसए धिंर्बै ताँन् सैमैं छेनाले ङ्ह्‍योबै केब्छैं चिबने बिइ, “क्हिए यो ङए प्हाँ न्होंर थेंन्।
GEN 24:3 स्वर्ग नेरो पृथ्‍बीर्बै याहवेह परमेश्‍वरए उँइँर ङइ क्हिने कसम चबर ल्हैदिम्। क्हिइ ङए च्हए ल्हागिर तोगो ङ टिबै कनान ह्‍युलर्बै च्हमिरिमैं खाबै ब्ह्‍या लसि खैलसया आपखमिंन्।
GEN 24:4 बरु ङए ह्‍युलर ङए ङेंमैं ङाँर ह्‍यासि ङए च्ह इसहाकल प्ह्रेंस्यो घ्रि पखमिंन्।”
GEN 24:5 छबिमा च केब्छैंइ अब्राहामने बिइ, “च च्हमिरि चु ह्‍युलर ङने बालु खल् आङिंइ बिस्याँ, खाब् ह्‍युलउँइँले क्हि खल चर्न क्हिए च्हलाइ ङइ एबोब् वा?”
GEN 24:6 अब्राहामइ चने बिइ, “क्हिइ ङए च्ह चर खैलसे एसि आबोद्।
GEN 24:7 ङए आबाए धिं नेरो ङए ह्‍युलउँइँले ङलाइ पखबै स्वर्ग नेरो पृथ्‍बीर्बै याहवेह परमेश्‍वरजी कसम चसि ‘ङइ क्हिए सन्तानलाइ चु ह्‍युल पिंब्मुँ,’ बिसि ङने बाछा फैइमुँ। छतसि ङए च्हए ल्हागिर क्हिइ च क्ल्ह्‍योउँइँले प्ह्रेंस्यो घ्रि पखल खाँरिगे बिसि खीजीन् ह्रोंसए स्वर्गदूत क्हिए ओंसों ओंसों कुलब्मुँ।
GEN 24:8 दिलेया च च्हमिरि क्हिने बालु खबै सैं आलस्याँ ङए चु कसम क्हिए फिर ल्हैदिरिब् आरे। क्हिइ ङए च्हलाइ खैलसे चर एसि आबोद्।”
GEN 24:9 झाइले च केब्छैंइ ह्रोंसए क्ल्हे अब्राहामए प्हाँ न्होंर यो थेंसि चु ताँर चने बालु कसम चइ।
GEN 24:10 च लिउँइँ च केब्छैं ह्रोंसए क्ल्हेए च्युउँलो सलु नेरो ताँन् खालर्बै छ्याँ-छ्याँबै सैमैं किंसि अराम-नाहारैमउँइँले तसि नाहोरए ह्‍युलर ह्‍याइ।
GEN 24:11 चर फेनेसि सहरए बैरु क्यु खादु ङाँर चइ सलुमैं च्युइँथेंइ। ङेसा छझँ च्हमिरिमैं क्यु खाबर चर खमल।
GEN 24:12 झाइले चइ सैं न्हों-न्हों प्राथना लइ। “ओ ङए क्ल्हेए याहवेह परमेश्‍वर, ङए फिर ल्हयो खसि तिंयाँ ङए के छ्याँब् लमिंन्। झाइले ङए क्ल्हे अब्राहामए फिरै या ल्हयो खमिंन्।
GEN 24:13 ङ चु क्यु खादु ङाँर रारिइमुँ, सहरर्बै म्हिमैंए च्हमिमैं क्यु खाबर खसिन् मुँ।
GEN 24:14 खाब् च्हमिरिने ङइ ‘क्हिए गौरिउँइँले ङ क्यु थुँल् पिंन्’ बिमुँ, धै चइ ङने ‘अँ अँ थुँन्! ङइ क्हिए सलुमैं या क्यु खासि थुँल् पिंम्,’ बिमुँ, च च्हमिरिन् क्हिए केब्छैं इसहाकए ल्हागिर क्हिजी त्हाँबै प्ह्रेंस्यो तरिगे। छलस्याँ ङए क्ल्हेए फिर क्हिजी ल्हयो खना बिसि ङइ सेब्मुँ।”
GEN 24:15 चइ प्राथना लल् आखाँबै त्हेर्न अब्राहामए अलि नाहोर नेरो मिल्काए च्ह बतूएलए च्हमि रिबेका प्हैंदार गौरि तेंसि खइ।
GEN 24:16 च बेल्‍ले छ्याँब नेरो खाब् मुँयुँमैंने या आरोब मुँल। क्यु खादुर तसि चइ गौरिर क्यु खासि कैंडो क्रेखइ।
GEN 24:17 च लिउँइँ च केब्छैं चने त्होबर न्हेह्‍यासि बिइ, “गार आम्हाँदिल्‍ले क्हिए गौरिउँइँले ङलाइ च्युगुदे क्यु थुँबर पिंन्।”
GEN 24:18 चइ “तम्, थुँन्” बिसि आतुरल्‍ले गौरि ह्रोंसए योर थेंसि चलाइ क्यु थुँल् पिंइ।
GEN 24:19 चलाइ क्यु पिंल् खाँबै लिउँइँ चइ बिइ, “ङइ क्यु खासि क्हिए सलुमैं या म्रेंनाले थुल् पिंम्।”
GEN 24:20 छ बिसि चइ ह्रोंसए गौरिर्बै क्यु डुँडर युसि धबै क्यु खाबर क्यु खादुउँइँ न्हेह्‍याइ। झाइले चए ताँन् सलुमैं या क्यु खासि पिंनेइ।
GEN 24:21 च म्हि बिस्याँ याहवेहजी ह्रोंसए केमैं छ्याँब लमिंब ङिंब् उ आङिंगे बिसि था सेबर आपोंनले च ङाँइ ङ्ह्‍योरिइ।
GEN 24:22 सलुमैंइ क्यु थुँल् खाँबै लिउँइँ च म्हिइ आधा तोलाए माराए फुलि नेरो तोला च्युए माराए रयाँ ङ्हिं ट्हुइसि रिबेकाने
GEN 24:23 “क्हि खाबै च्हमि जा? क्हिए आबाए धिंर ङि टिबै क्ल्ह्‍यो मुँ वा?” बिसि ङ्योएइ।
GEN 24:24 रिबेकाइ चने बिइ, “ङ नाहोरउँइँले मिल्काइ फिबै बतूएलए च्हमि ग।”
GEN 24:25 रिबेकाइ धबै चने बिइ, “ङिने छि नेरो पराल ल्हें मुँ। टिबै क्ल्ह्‍यो या मुँ।”
GEN 24:26 छबिमा च म्हिइ ह्रोंसए क्र कुरसि बेल्‍ले मान्ले यो छ्युँ लसि याहवेहलाइ फ्योसि बिइ,
GEN 24:27 “ङए क्ल्हे अब्राहामए याहवेह परमेश्‍वर बेल्‍ले थेब मुँ। खीजी ङए क्ल्हेने फैबै बाछा पूरा लमिंइ। तलेबिस्याँ याहवेहजी ङलाइ घ्याँर डोरेसि ङए क्ल्हेए ङेंमैंए धिंर पखमिंइमुँ।”
GEN 24:28 च लिउँइँ च च्हमिरि ह्‍यासि ह्रोंसए आमाए परवाने ताँन् ताँमैं बिइ।
GEN 24:29 रिबेकाल लाबान मिं लबै आघें घ्रि मुँल। च ताँ थेसि लाबन क्यु खादुउँइँ च म्हि मुँबै क्ल्ह्‍योउँइँ न्हेह्‍याइ।
GEN 24:30 तलेबिस्याँ लाबानइ ह्रोंसए अङाँए नखुँर नथ नेरो योर रयाँ खिब म्रोंल। धै च म्हिइ ङने छ बिल बिबै ताँ चए अङाँउँइँले ओंसोंन् थेल। छतसि लाबान च म्हि ङाँर ह्‍याइ।
GEN 24:31 छले ह्‍यामा क्यु खादुए रेर च म्हि रारिब् म्रोंसि लाबानइ बिइ, “ओ याहवेहए आशिक योंबै म्हि, धिं न्होंर खो। तले बैरु रारिल? ङइ क्हिए टिबै क्ल्ह्‍यो नेरो सलुमैंए क्ल्ह्‍यो लथेंइमुँ।”
GEN 24:32 छबिमा च म्हि लाबानने बालु धिंर ह्‍याइ। झाइले लाबानइ सलुमैंए तिमैं सर थेंसि चमैंलाइ पराल नेरो छिमैं पिंइ। धै चइ अब्राहामए केब्छैं नेरो चने मुँबै म्हिमैं प्हले ख्रुबै क्यु पिंइ।
GEN 24:33 झाइले केब्छैंए उँइँर चबै सैमैं या थेंमिंइ। दिलेया चइ बिइ, “ओंसों ङए ताँ क्हेमैंने आबिन् समा ङ तोइ आच।” लाबानइ “क्हिए ताँ तो मुँ? ल्हु, बिद्,” बिइ।
GEN 24:34 झाइले चइ बिइ, “ङ अब्राहामए केब्छैं घ्रि ग।
GEN 24:35 याहवेहजी ङए क्ल्हेए फिर ल्हें आशिक पिंबइले च बेल्‍ले थेबै म्हि तइमुँ। याहवेहजी चलाइ ल्हें र-क्युमैं, मेमैं क्लामैं, मारा, चाँदि, केब्छैं, केब्स्योमैं, सलुमैं नेरो गधामैं पिंइमुँ।
GEN 24:36 ङए क्ल्हेए प्ह्रेंस्यो साराई माँब् तबै त्हेरै या चल च्ह घ्रि फिइमुँ। धै चइ ह्रोंसने मुँबै तोन्दोंरि सै चलाइन पिंइमुँ।
GEN 24:37 ‘ङए च्हए ल्हागिर क्हिइ तोगो ङ टिबै चु कनान ह्‍युलर्बै कनानीमैंए च्हमिमैं खाबै ब्ह्‍या लसि आपखो!’ बिसि ङए क्ल्हेइ ङने कसम चबर लैदिइमुँ।
GEN 24:38 ‘बरु ङए ङेंमैं नेरो ङए आबाए धिंर ह्‍यासि ङए च्हए ल्हागिरि प्ह्रेंस्यो घ्रि पखमिंन्।’
GEN 24:39 “‘खनिज्यै च च्हमिरि ङने बालु खल् आङिंस्याँ तो लब्दि?’ बिसि ङइ ङए क्ल्हेने ङ्योएमा
GEN 24:40 चइ ङने बिइ, ‘ङ याहवेहए सेवा लबै म्हि ग। छतसि खीजीन् ह्रोंसए स्वर्गदूत क्हिने बालु कुलब्मुँ, छले कुलमा क्हिए के छ्याँब तब्मुँ। धै ङए ङेंमैं नेरो ङए आबाए धिंउँइँले ङए च्हए ल्हागिरि क्हिइ प्ह्रेंस्यो घ्रि पखब्मुँ।
GEN 24:41 क्हि ङए ङेंमैं ङाँर ह्‍यासेया चमैंइ च च्हमि आपिंस्याँ ङइ चबै चु कसम क्हिलाइ ल्हैदिरिब् आरे।’
GEN 24:42 “तिंयाँ क्यु खादुर फेखसि ङइ छ बिसि प्राथना लइ, ‘ओ याहवेह, ङए क्ल्हे अब्राहामए परमेश्‍वर, क्हिए सैं मुँस्याँ क्हिजी ङए केमैं छ्याँब लमिंन्।
GEN 24:43 ङ्‍ह्‍योद्, ङ इनारर रारिइमुँ। क्यु खाबर खबै च्हमिरि घ्रिने ङइ “क्हिए गौरिउँइँले ङलाइ च्युगुदे क्यु थुँल् पिंन्” बिमा
GEN 24:44 चइ ङने “थुँन्, थुँन् बिदै ङ क्यु थुँल् पिंसि क्हिए सलुमैंलाज्यै या ङइ क्यु ख्योमिंब्मुँ,” बिमुँ, च च्हमिरिन् ङए क्ल्हेए च्हए ल्हागिरि क्हिजी त्हाँबै प्ह्रेंस्यो तरिगे।’
GEN 24:45 “ङइ छले सैं न्हों-न्हों प्राथना लल् खाँब् भन्दा ओंसोंन् रिबेका प्हैंदर गौरि थेंसि खइ, धै इनारर तसि क्यु ख्योइ। ङइ चने ‘गार आम्हाँदिल्‍ले ङलाइ क्यु थुँल् पिंन्,’ बिइ।
GEN 24:46 “छ बिबै तोदोंन् चइ ह्रोंसए प्हैंदउँइँले गौरि तसि क्यु थुँन् बिइ। धै क्हिए सलुमैंलाज्यै ङइ क्यु थुँल् पिंब्मुँ बिमा ङइ क्यु थुँइ। च लिउँइँ ङए सलुमैंलाज्यै या चइ क्यु थुँल् पिंइ।
GEN 24:47 “झाइले ङइ ‘क्हि खाबए च्हमि जा?’ बिसि चने ङ्योएमा चइ ‘नाहोर नेरो मिल्काए च्ह बतूएलए च्हमि ग’ बिइ। छबिमा चए नखुँर ङइ फुलि नेरो योर रयाँमैं खिमिंइ।
GEN 24:48 झाइले ङइ ह्रोंसए क्र कुरसि मान लसि याहवेहलाइ फ्योइ, धै ङए क्ल्हे अब्राहामए याहवेह परमेश्‍वरलाइ धन्यबाद पिंइ। तलेबिस्याँ ङए क्ल्हेए अलिए क्वेंमि चए च्हए ल्हागिर पिंबर ङ फेनल् त्हुबै घ्याँर खीजी डोरेसि पखमिंइ।
GEN 24:49 तारे क्हेमैंइ ङए क्ल्हेए फिर ल्हयो खसि क्ह्रोंसेंन्ले चु के लमिंम् बिस्याँ ङने बिद्। छ आललैया ङने बिद्, झाइले ङ क्योलो त्हेब्रे खनइ तले ह्‍यालै।”
GEN 24:50 च लिउँइँ लाबान नेरो बतूएलइ बिइ, “चु ताँ याहवेहउँइँलेन् तब् ग। छतसि ङि क्हिने छ्याँब आछ्याँब तोइ बिल् आखाँ।
GEN 24:51 ङ्‍ह्‍योद्! रिबेका क्हिए उँइँर्न मुँ। याहवेहजी बिब् धोंले च क्हिए क्ल्हेए च्हए प्ह्रेंस्यो तरिगे। छतसि चलाइ बोसि ह्‍याद्।”
GEN 24:52 अब्राहामए केब्छैंइ चमैंए ताँ थेबै लिउँइँ सर कुरसि मान लसि याहवेहलाइ फ्योइ।
GEN 24:53 च लिउँइँ चइ मारा नेरो चाँदिए घाँनामैं नेरो क्वेंमैं पखसि रिबेकालाइ पिंइ। चए आघें नेरो आमालाज्यै या सै ल्हें फेबै ह्रोमै-क्होल्सैमैं पिंइ।
GEN 24:54 झाइले च नेरो चने मुँबै म्हिमैंइ चसि थुँसि च म्हुँइँस चर्न थोइ। न्हाँगर रेसि चइ बिइ, “ङए क्ल्हे ङाँर तारे ङ ह्‍याल् पिंन्।”
GEN 24:55 दिलेया रिबेकाए आघें नेरो आमाइ बिइ, “ङिए च्हमि कुरो-च्युरोदे चुर ङिनेन् टिल् पिंन्। च लिउँइँ च ह्‍यास्याँ तम्।”
GEN 24:56 छबिमा चइ बिइ, “ङ क्हैल् आलमिंन्। तलेबिस्याँ ङ फेनल् त्हुबै क्ल्ह्‍योर याहवेहजी डोरेमिंइमुँ। छतसि ङ ङए क्ल्हे ङाँर ह्‍याम्। ङलाइ ह्‍याल् पिंन्।”
GEN 24:57 चमैंइ बिइ, “छबिस्याँ च्हमि हुइसि चइ तो बिमुँ ङि चए सुँउँइँलेन् थेम्।”
GEN 24:58 झाइले चमैंइ रिबेका हुइसि “क्हि चु म्हिने बालु ह्‍याम्मा?” बिसि ङ्योएमा चइ “अँ, ङ ह्‍याम्,” बिइ।
GEN 24:59 छतसि चमैंइ ह्रोंसए रिं रिबेका नेरो चए केब्स्यो, अब्राहामए केब्छैं नेरो चने खबै म्हिमैंने कुल्मिंइ।
GEN 24:60 चमैंइ रिबेकाए फिर आशिक पिंसि बिइ, “ओ ङिए रिं, क्हिल ल्हें ल्हें प्हसेमैं तरिगे धै क्हि ल्हें सन्तानए आमा तरिगे, झाइले क्हिए सन्तानइ खेंमैंने ख्रे लब्मैंए सहरमैं ट्होरिगे।”
GEN 24:61 च लिउँइँ रिबेका नेरो चए केब्स्योमैं सलुर क्रेसि च म्हिए लिलि ह्‍याइ। छले रिबेका बोसि च केब्छैं चए घ्याँ क्हाइ।
GEN 24:62 चमैं फेनेबै त्हेर इसहाक बेअर-लहैरोइउँइँले खल। तलेबिस्याँ च नेगेव बिबै ह्‍युलर टिमल।
GEN 24:63 इसहाक ङेसा छझँ स्युरबर बैरु त्होंयाल। चइ ङ्ह्‍योमा सलुमैं खरिब् म्रोंइ।
GEN 24:64 रिबेकाज्यै या इसहाकलाइ म्रोंइ। झाइले सलुउँइँले तसि
GEN 24:65 “ङ्योने त्होबर खरिबै म्हि खाब् जा?” बिसि ङ्योएमा केब्छैंइ बिइ, “च ङए क्ल्हे ग।” छबिमा रिबेकाइ क्रमुँइ ह्रोंसए लि हुइ।
GEN 24:66 च लिउँइँ च केब्छैंइ ह्रोंसइ लबै ताँन् केमैं इसहाकने बिइ।
GEN 24:67 झाइले इसहाकइ रिबेका ह्रोंसए आमा साराए तम्बुर बोसि ब्ह्‍या लइ। छले रिबेका इसहाकए प्ह्रेंस्यो तइ। धै चइ रिबेकालाइ म्हाँया लइ। छले ह्रोंसए आमा सियाबै लिउँज्यै या इसहाकइ भों योंइ।
GEN 25:1 अब्राहामइ धबै ब्ह्‍या लइ। चए मिं कतूरा मुँल।
GEN 25:2 कतूराइ अब्राहामउँइँले जिम्रान, योक्षान, मदान, मिद्यान, यिशबाक नेरो शूह बिबै च्हमैं फिइ।
GEN 25:3 योक्षानइ शेबा नेरो ददान बिबै च्हमैं योंइ। ददानए प्हसेमैं अश्शूरी, लतूशी नेरो लऊम्मीमैं मुँल।
GEN 25:4 मिद्यानए च्हमैं एपा, एपेर, हानोक, अबिदा नेरो एल्दा मुँल। चु ताँन् कतूराए सन्‍तानमैं मुँल।
GEN 25:5 दिलेया अब्राहामइ ह्रोंसने मुँबै तोन्दोंरि सै इसहाकलाइन पिंइ।
GEN 25:6 च सोगों मुँमन् चइ पखबै प्ह्रेंस्योए च्हमैंलाइ चइ पिंदा ङ्हाँबै सैमैं पिसि ह्रोंसए च्ह इसहाकउँइँले फ्रेवासि चमैं स्यारउँइँ कुल्मिंइ।
GEN 25:7 अब्राहाम प्रसे ङिच्युसे ङ्‍हदिं (१७५) समा सोइ।
GEN 25:8 अब्राहाम ल्हें समा सोसि खेब् तसि सिइ। धै चए सियाबै खेमैंने त्होनेइ।
GEN 25:9 झाइले चए च्हमैं इसहाक नेरो इश्माएलइ हित्ती सोहोरए च्ह एप्रोनए म्रोंर मुँबै मम्रे ङाँर्बै मक्पेलाए उ न्होंर चलाइ पाइ।
GEN 25:10 च म्रों ङाँर्बै उ अब्राहामइ हित्तीमैंउँइँले किंल। अब्राहाम नेरो चए प्ह्रेंस्यो सारा चर्न पाइ।
GEN 25:11 अब्राहाम सिबै लिउँइँ चए च्ह इसहाकए फिर परमेश्‍वरजी आशिक पिंइ। च त्हेर इसहाक बेअर-लहै-रोइ ङाँर टिमल।
GEN 25:12 साराए केब्स्यो मिश्रीस्यो हागारउँइँले फिबै अब्राहामए च्ह इश्माएलए प्हसेमैंए ताँ चुन् ग:
GEN 25:13 इश्माएलए च्हमैंए मिं चुमैं ग: इश्माएलए च्ह थेब नबायोत मुँल च लिउँइँ केदार, अदबेल, मिब्साम,
GEN 25:14 मिश्मा, दुमा, मस्सा,
GEN 25:15 हदद, तेमा, यतूर, नापीश नेरो केदमा मुँल।
GEN 25:16 इश्माएलए च्हमैंए मिं चुमैंन् ग: चमैं च्युसे ङ्हिं कुलए खेमैं मुँल। छले चमैंए मिं खेंमैं टिबै ह्‍युल नेरो क्ल्ह्‍योमैंने क्ह्रिल्‍ले थेंइ।
GEN 25:17 इश्माएल प्रसे सोंच्युसे ङिदिं तमा सियाइ, धै ह्रोंसए खेमैंने त्होनेइ।
GEN 25:18 इश्माएलए प्हसेमैं शुरउँइँले हवीलाए म्हाँजोर्बै क्ल्ह्‍योर टिमल। च क्ल्ह्‍यो मिश्रर्बै स्यारउँइँ पूर्वउँइँ अश्शूर ह्‍याबै घ्याँर मुँल। चमैं खेंमैंए आघें-अलिमैंने आक्ह्रिसि ह्रेंगो टिनेल।
GEN 25:19 अब्राहामए च्ह इसहाकए ताँ छले मुँ।
GEN 25:20 इसहाक प्लिच्यु बर्षर्बै तमा पद्दन-आरामथें अरामी बिबै बतूएलए च्हमि रिबेकाने ब्ह्‍या लइ।
GEN 25:21 रिबेका थरि तबइले इसहाकइ ह्रोंसए प्ह्रेंस्योए ल्हागिर याहवेहने प्राथना लइ। चए प्राथना याहवेहजी थेसि रिबेकाइ प्हसे नोइ।
GEN 25:22 फो न्होंर्बै कोलोमैं फो न्होंर्न खें-खेंमैंन् नेबर होंइ। छतमा चइ याहवेहने “ङए फो न्होंर तले छ तइमुँ?” बिसि ङ्योएमा
GEN 25:23 याहवेहजी चने बिइ, “क्हिए फोर ह्रें ङ्हिं मुँ, क्हिए फोउँइँलेन् चमैं ह्रें ङ्हिं तसि स्यो-स्योले फिब्मुँ। आघें भन्दा अलि भोंब तब्मुँ। धै थेबइ च्योंबए सेवा लब्मुँ।”
GEN 25:24 झाइले चइ प्हसे फिबै त्हे तमा। चए फोर जौंले प्हसेमैं मुँन।
GEN 25:25 थेब ज्यु तिगोंन् ओ-ओल् ब्योंबै मुइए क्वें खिब् धों ब्योंब फिइ। छतसि चए मिं एसाव थेंइ।
GEN 25:26 च लिउँइँ याकूब चए अलि एसावए प्हले तिंजा योइ क्हासि त्होंइ। छतसि चए मिं याकूब थेंइ। रिबेकाइ चमैं फिबै त्हेर इसहाक टुच्यु बर्षर्बै तल।
GEN 25:27 चमैं थेब् तसि आघें एसाव बेल्‍ले छेनाले मेत्हँले ल्हिल् ह्रब तइ। धै याकूब बिस्याँ धिर्न च्याँले टिरिब तइ।
GEN 25:28 एसाव हेर ह्‍यासि मेत्हँले ल्हिसि फोमैं-एमैं सै पुइसि ह्रोंसए आबालाइ से चल् पिंमल। छतसि इसहाकइ च्ह थेबलाइ म्हाँया लमल। दिलेया रिबेकाइ बिस्याँ च्योंब च्ह याकूब म्हाँया लमल।
GEN 25:29 तिगें याकूबइ मस्याँ ट्हा तेरिबै त्हेर एसाव हेउँइँले युइ। च बेल्‍ले फो ख्रेंरिल।
GEN 25:30 छतमा एसावइ याकूबने “ङ बेल्‍ले फो ख्रेंइमुँ, च मस्याँ खु च्हौदे थुँल् पिंन्,” बिइ। (छतसि चने एदोम बिम्।)
GEN 25:31 छबिमा याकूबइ बिइ, “ओंसों च्ह थेबइ योंल् त्हुबै हग ङ पिंन्।”
GEN 25:32 एसावइ बिइ, “ङम् सिबर्न होंइ। तारे ङइ योंबै हगल तो के?”
GEN 25:33 याकूबइ बिइ, “क्हिइ योंबै च्ह थेबै हग ङने पिंम् बिसि ओंसों बाछा फैद्।” छबिमा एसावइ बाछा फैइ। झाइले चइ योंबै हग याकूबलाइ पिंवाइ।
GEN 25:34 च लिउँइँ याकूबइ एसावलाइ क्हें नेरो मस्याँ ट्हा पिंइ। चब-थुँब् लसि एसाव ह्रोंसए घ्याँ क्हाइ। छले एसावइ ह्रोंसइ योंबै हग तो धोंइ आङ्हाँल्‍ले पिवाइ।
GEN 26:1 ओंसों अब्राहामए पलोर तब् धों तबै अँङ्गल् धबै इसाहकए पलोरै या तइ। छतसि इसाहक पलिश्‍तिमैंए अबीमेलेक म्रुँ ङाँर गरार ह्‍युलर ह्‍याइ
GEN 26:2 तलेबिस्याँ याहवेहजी इसहाक ङाँर युसि बिइ, “क्हि मिश्र ह्‍युलर आह्‍याद्! ङइ क्हिने टिद् बिबै ह्‍युलर्न टिद्।
GEN 26:3 ङ क्हिने बालु तब्मुँ, धै क्हिए फिर आशिक पिंब्मुँ। चु ताँन् ह्‍युल क्हि नेरो क्हिए सन्तानमैं पिंब्मुँ। क्हिए आबा अब्राहामने बालु फैबै बाछा ङइ पूरा लब्मुँ।
GEN 26:4 मुर्बै सारमैं धोंले क्हिए सन्तानमैं ल्हें लमिंब्मुँ। धै चु ताँन् ह्‍युल चमैंलाइ पिंब्मुँ। क्हिए सन्तानमैंउँइँलेन् ह्‍युलर्बै ताँन् ह्रेंमैंइ आशिक योंब्मुँ।
GEN 26:5 तलेबिस्याँ अब्राहामइ ङइ बिबै ताँमैं ङिंइ, धै ङइ लद् बिबै केमैं या लइ।”
GEN 26:6 छतसि इसहाक गरार ह्‍युलर्न टिइ।
GEN 26:7 च क्ल्ह्‍योर्बै म्हिमैंइ इसहाकाए प्ह्रेंस्योए बारेर ङ्योएमा चइ “च ङए अङाँ ग” बिइ। तलेबिस्याँ रिबेका बेल्‍ले छ्याँब मुँल, छतसि “चर्बै म्हिमैंइ ङलाइ सैवासि ङए प्ह्रेंस्यो बोवाम् उ?” ङ्हाँसि च ङ्हिंइ। छतसि रिबेकालाइ ह्रोंसए प्ह्रेंस्यो बिल् आखाँ।
GEN 26:8 इसहाक चर ल्हें त्हिंइ टिबै लिउँइँ पलिश्तीमैंए अबीमेलेक म्रुँइ झ्यालउँइँले ङ्ह्‍योमा इसहाक ह्रोंसए प्ह्रेंस्योने बालु म्हाँया लरिब् म्रोंइ।
GEN 26:9 छतब् म्रोंमा अबीमेलेकइ इसहाक हुइसि बिइ, “चम् क्हिए प्ह्रेंस्योन् मुँनदि। तले क्हिइ ‘ङए अङाँ ग’ बिसि ङिने स्योर तेल?” इसाकइ चने बिइ, “च ङए प्ह्रेंस्यो ग बिस्याँ चुर्बै म्हिमैंइ ङलाइ सैवाम् उ बिसि ङइ मैंल।”
GEN 26:10 अबीमेलेकइ बिइ, “क्हिइ ङिने चु तो लल? म्हिमैंइ क्हिए प्ह्रेंस्योने आछ्याँबै के लस्याँ ङिए फिर क्हिइ छ्याब् ल्हैदिमल।”
GEN 26:11 झाइले अबीमेलेकइ “चु म्हि नेरो चुए प्ह्रेंस्योलाइ खाबज्यै तोइ आलद्। खाबज्यै या चुमैंलाइ तोइ लस्याँ च खैलसे सिल् त्हुब्मुँ” बिसि ताँन् म्हिमैंलाइ लोदा सैंदा लइ।
GEN 26:12 चर टिमा इसहाकइ खेति ल्हैदिइ। झाइले याहवेह परमेश्‍वरजी चए फिर आशिक पिंसि च बर्षर चइ ल्हें ल्हें रा-रोमैं खुइ।
GEN 26:13 छले च प्लब ततै ह्‍यासि झन् बेल्‍ले प्लबै म्हि तइ।
GEN 26:14 चल ल्हें र-क्युमैं, मे-क्ल्हामैं नेरो केब्छैं-केब्स्योमैं तब् म्रोंसि पलिश्तीमैंइ चए फिर ह्रिस लबर होंइ।
GEN 26:15 छतसि ओंसोंन् अब्राहामए केब्छैंमैंइ ताबै ताँन् क्यु खादुमैं पलिश्तीमैंइ युँमा नेरो स झोंसि म्रुवाइ।
GEN 26:16 इसहाक बेल्‍ले प्लब् म्रोंसि अबीमेलेकइ चने बिइ, “तारे ङिए ह्‍युलउँइँले क्हि ह्‍याद्, तलेबिस्याँ तिंजरो ङि भन्दा क्हि बेल्‍ले भोंब तइमुँ।”
GEN 26:17 छबिमा इसहाक च क्ल्ह्‍योउँइँले त्होंह्‍यासि गरारए ब्याँसिर तम्बु टौंदिसि चर्न टिबर होंइ।
GEN 26:18 झाइले ओंसोंन् ह्रोंसए आबाए पलोर ताथेंबै क्यु खादुमैं धबै ताबर होंइ। तलेबिस्याँ अब्राहाम सिबै लिउँइँ पलिश्तीमैंइ च क्यु खादुमैं म्रुवाल। धै चइ च इनारए मिं ह्रोंसए आबाइ ओंसों थेंबै मिंन् थेंइ।
GEN 26:19 झाइले इसहाकए केब्छैंमैंइ ब्याँसिर क्यु खादु तामा क्युए मुल स्याइ।
GEN 26:20 दिलेया गरारर्बै प्ह्रोंछैंमैंइ “चु क्यु ङिल् ग” बिसि इसहाकए प्ह्रोंछैंमैंने प्होंबर होंइ। छतसि इसहाकइ च क्यु खादुए मिं “एसेक” बिब् थेंइ। तलेबिस्याँ चमैं प्होंरिल।
GEN 26:21 धबै चमैंइ अर्को क्यु खादु तामा चरै या छलेन् प्होंगि तइ। छतसि इसहाकइ चए मिं “सित्ना” थेंइ।
GEN 26:22 च क्ल्ह्‍योउँइँले अर्को क्ल्ह्‍योर ह्‍यासि चइ धबै इनार ताइ। चर बिस्याँ खाबज्यै या प्होंगि लबर आख। छतसि चइ च इनारए मिं रहोबोत बिसि थेंइ। “तारेम् याहवेह परमेश्‍वरजी ङ्योलाइ टिबै क्ल्ह्‍यो पिंइमुँ। छतसि ङ्यो चु क्ल्ह्‍योर आशिक योंसि ल्हें ततै ह्‍याब्मुँ,” बिइ।
GEN 26:23 च लिउँइँ इसहाक च क्ल्ह्‍यो वाथेंसि बेर्शेबा बिबै क्ल्ह्‍योर ‍टिनेइ।
GEN 26:24 याहवेह च म्हुँइँसर्न इसहाक ङाँर युसि बिइ, “ङ क्हिए आबा अब्राहामए परमेश्‍वर ग। आङ्हिंन्! तलेबिस्याँ ङ क्हिने बालुन् मुँ। ङइ क्हिए फिर आशिक पिंब्मुँ, ङए सेवा लबै अब्राहामने बालु ङइ बाछा फैब् धोंले क्हिए सन्तानमैं ङइ ल्हें लमिंब्मुँ।”
GEN 26:25 झाइले इसहाकइ चर ख्रो पिंबै क्ल्ह्‍यो घ्रि बनेसि याहवेहए मिं क्वेइ। धै ह्रोंसए तम्बु चर्न टौंदिइ। चरै या चए केब्छैंमैंइ अर्को क्यु खादु घ्रि ताइ।
GEN 26:26 तिगें अबीमेलेक ह्रोंसए सल्‍ला पिंबै अहुज्जत नेरो ह्रोंसए फौजर्बै सेनापति पिकोललाइ किंसि गरारउँइँले इसहाक ङाँर खइ।
GEN 26:27 इसहाकइ चमैंने बिइ, “ओंसों क्हेमैंइ ह्रिस लसि ङलाइ ल्हावाइ। तोगो क्हेमैं चुर तो लबर खल?”
GEN 26:28 चमैंइ बिइ, “याहवेह क्हिने बालु मुँ बिसि ङिइ सेइ। छतसि ङ्योए न्होंर तोइ आछ्याँबै केमैं आतरिगे बिसि बाछा घ्रि फैले बिसि ङि खब् ग।
GEN 26:29 छ लस्याँ ङिए फिर क्हिइ आछ्याँब लरिब् आरे। ङिज्यै या ङिए ह्‍युलउँइँले क्हिलाइ तोइ आलल्‍ले छेनालेन् कुल्मिंल। क्हि याहवेहए आशिक योंबै म्हि मुँन।”
GEN 26:30 छबिमा इसहाक सैं तोंसि चमैंलाइ चब् थुँब् लमिंइ।
GEN 26:31 च प्हँन्हाँग्धों न्हाँगर्न रेसि खेंमैं बाछा फैसि क्ह्रिइ। च लिउँइँ इसहाकइ चमैं ह्‍याल् पिंइ। छले चमैं क्ह्रिसि छेनाले फ्रेयाइ।
GEN 26:32 च त्हिंइर्न इसहाकए केब्छैंमैंइ खेंमैंइ ताबै इनारए बारेर इसहाकने बिइ, “ङिइ ताबै क्ल्ह्‍योर क्यु त्होंइ।”
GEN 26:33 छबिमा इसहाकइ च क्यु खादुए मिं “शिबा” थेंइ। छतसि च सहरए मिं तिंजरो या बेर्शेबा बिम्।
GEN 26:34 एसाव प्लिच्यु बर्षर्बै तमा हित्ती च्हमिरिमैं ङ्हिं ब्ह्‍या लइ। प्ह्रेंस्यो घ्रिए मिं यहूदीत मुँल। चए आबा हित्ती बेरी बिब् मुँल। अर्को प्ह्रेंस्योए मिं बासमत मुँल। चए आबाए मिं हित्ती एलोन मुँल।
GEN 26:35 च च्हमिरिमैं ङ्हिंइ खेंमैंए कें-स्युइमि इसहाक नेरो रिबेकालाइ ककाँ क्युँ-क्युँ ङ्हाँल् लइ।
GEN 27:1 इसहाक खेब् तयाल। छतसि चइ मि छेनाले म्रोंल् आखाँमल। तिगें इसहाकइ ह्रोंसए च्ह थेब एसाव हुइसि बिइ, “ओ ङए च्ह।” चइ बिइ, “होइ आबा! क्हिए ल्हागिर ङइ तो लदु?”
GEN 27:2 इसाहकइ बिइ, “ङ खेब् तयाइमुँ। ङ खोंयों सिम् बिसि ङइ आसे।
GEN 27:3 छतसि क्हि हेर ह्‍यासि फो सैसि पुइ यु।
GEN 27:4 धै चए ट्हा लिंन्ले ह्‍योसि ङ ङाँर पखो, ङ सिब् भन्दा ओंसों च ट्हा चसि क्हिलाइ आशिक पिंम्।”
GEN 27:5 इसहाकइ एसावने चु ताँमैं बिरिमा चए प्ह्रेंस्यो रिबेकाइ थेरिल। झाइले एसाव हेर फो सैबर ह्‍यामा
GEN 27:6 रिबेकाइ ह्रोंसए च्ह च्योंब याकूबने बिइ, “क्हिए आबाइ क्हिए आघें एसावने
GEN 27:7 ‘हेर ह्‍यासि फो सै पखसि चए ट्हा लिंन्ले ह्‍योसि पखो। च ट्हा चसि ङ सिब् भन्दा ओंसों याहवेहए उँइँर ङइ क्हिए फिर आशिक पिंब्मुँ,’ बिसि ताँ सेरिब ङइ थेइ।
GEN 27:8 छतसि च्हेज्यों, ङइ बिबै ताँ ङिंन्।
GEN 27:9 प्ह्रोंर ह्‍यासि छ्याँ-छ्याँबै र म्होदो ङ्हिं सैसि पखो। झाइले क्हिए आबाइ खोबै ट्हा ङइ ह्‍योमिंस्यो।
GEN 27:10 च ट्हा किंसि क्हि आबा ङाँर ह्‍याद्। झाइले च चसि च सिब् भन्दा ओंसों क्हिलाइ आशिक पिंरिगे।”
GEN 27:11 याकूबइ ह्रोंसए आमा रेबेकाने बिइ, “आमा, ङए आघें एसाव मुइ ल्हें मुँबै म्हि ग। ङल मुइ आरे।
GEN 27:12 आबाइ ङलाइ छुइ बिस्याँ ङ स्योर्गु ग बिसि आबाइ था सेब्मुँ। छतसि आशिक आङिंन ङए फिर सराप ग खब्मुँ।”
GEN 27:13 आमाइ चने बिइ, “च्हेज्यों, क्हिए फिर पिंबै सराप ङए फिर्न खरिगे! ङइ बिब् धों लद्। ह्‍यासि च रमैं सैसि पखो।”
GEN 27:14 आमाइ छबिमा च ह्‍यासि र-म्होदोंमैं सै पखसि आमाने पिंइ। झाइले याकूबए आबा इसाहकइ खोबै ट्हा चइ ह्‍योमिंइ।
GEN 27:15 झाइले ह्रोंसए च्ह थेब एसावए छ्याँ-छ्याँबै क्वेंमैं ट्हुइसि रिबेकाइ च्ह च्योंब याकूब खिमिंइ।
GEN 27:16 झाइले रए ट्हुबिमैं याकूबए यो नेरो खरिर खिमिंइ।
GEN 27:17 च लिउँइँ चइ ह्‍योबै लिंबै ट्हा नेरो क्हें ह्रोंसए च्ह याकूबए योर पिंइ।
GEN 27:18 ट्हा किंसि याकूब ह्रोंसए आबा ङाँर ह्‍यासि “ओ आबा!” बिमा इसहाकइ बिइ, “होइ, क्हि खाब् जा? ठागु उ आच्यों जा?”
GEN 27:19 याकूबइ आबाने बिइ, “ङ क्हिए च्ह थेब एसाव ग। क्हिइ बिब् धोंले ङइ लइमुँ। तारे रेसि क्हुँन्, ङइ सैसि पखबै से ट्हा चदु, धै ङलाइ आशिक पिंन्।”
GEN 27:20 इसहाकइ ह्रोंसए च्हने “ओ ठागु, क्हिइ च्हौ युनन् खैले फो स्यासि सैइ?” बिसि ङ्योएमा चइ बिइ, “याहवेह क्हिए परमेश्‍वरजी ल्होमिंबइले ङइ चु योंल् खाँइ।”
GEN 27:21 छबिमा इसहाकइ याकूबने बिइ, “ठागु, ङ ङाँर खोदि, क्हि ङए च्ह थेब एसाव ङिंब् उ आङिं बिसि ङो सेबर ङइ क्हि छुइम्।”
GEN 27:22 याकूब ह्रोंसए आबाए ङाँर ह्‍याइ। झाइले इसहाकइ चलाइ छुइसि बिइ, “कैम् याकूबल् ग, योमैं बिस्याँ एसावल् धोंन् तब मुँ।”
GEN 27:23 चए योमैं चए आघें एसावल् धोंन् तब मुइ-मुइ मुँल। छतसि इसहाकइ छ्योंलों फेल् आखाँ। छान् तलेया इसहाकइ याकूबए फिर आशिक पिंइ।
GEN 27:24 इसहाकइ चने “क्हि क्ह्रोंसेंन ङए च्ह एसावन् वा?” बिसि ङ्योएमा याकूबइ बिइ, “अँ ङ एसावन् ग।”
GEN 27:25 च लिउँइँ इसहाकइ बिइ, “क्हिइ सैसि पखबै से ट्हा चुर पखो। च चसि क्हिलाइ आशिक पिंस्यो।” आबाइ छबिमा याकूबइ से ट्हा पखसि आबालाइ पिंमा खिइ चै। झाइले याकूबइ अँगुरए प्हा या आबालाइ पिंनेइ धै आबाइ थुँइ।
GEN 27:26 च लिउँइँ इसहाकइ चने बिइ, “ठागु, ङ ङाँर खसि ङ म्वें लद्।”
GEN 27:27 याकूब आबा ङाँर ह्‍यासि म्वें लमा इसहाकइ चए क्वेंमैंए थाँ किंसि “ङए च्हए थाँ याहवेहजी आशिक पिंबै म्रोंर्बै थाँ धोंबन् मुँ बिसि चए फिर आशिक पिंइ।
GEN 27:28 परमेश्‍वरजी मुउँइँले शीतमैं कुल्मिंरिगे धै क्हिए म्रोंर ल्हें रा-रोमैं रोरिगे।
GEN 27:29 ह्रें-ह्रेंर्बै म्हिमैं क्हिए केब्छैंमैं तरिगे, चमैंइ क्हि फ्योरिगे। क्हिए आघेंमैं-अलिमैंए फिर क्हि क्ल्हे तरिगे, झाइले क्हिए आमाउँइँले योंबै सन्तानमैं क्हिए ओंसों कुररिगे। क्हिए फिर सराप झोंब्मैं ताँनइ सराप योंरिगे, झाइले क्हिए फिर आशिक पिंब्मैं ताँनइ आशिक योंरिगे।”
GEN 27:30 इसहाकइ याकूब आशिक पिंल् खाँबै लिउँइँ याकूब ह्रोंसए आबाउँइँले ह्‍याबै तोदोंन् चए आघें एसाव हेउँइँले फो सैसि युइ।
GEN 27:31 चज्यै बेल्‍ले लिंबै से ट्हा तेसि ह्रोंसए आबा ङाँर पखसि बिइ, “आबा, रेसि क्हुँन्। ङइ पखबै से ट्हा चसि ङए फिर आशिक पिंन्।”
GEN 27:32 इसहाकइ चने “क्हि खाब् जा?” बिसि ङ्योएमा चइ बिइ, “ङ क्हिए च्ह थेब एसाव ग।”
GEN 27:33 इसहाक बेल्‍ले त्हारदै बिइ, “फो सैसि ङ ङाँर ओंसों से ट्हा पखबै म्हि खाब् जा? क्हि खब् भन्दा ओंसोंन् ङइ चसि चए फिर आशिक पिंल् खाँइ! छतसि तारे च आशिक योंबै म्हि तब्मुँ।”
GEN 27:34 चु ताँ थेसि एसाव बेल्‍ले सैं नसि थेबै कैले क्रोदै “ओ आबा, ङलाज्यै या आशिक पिंन्,” बिइ।
GEN 27:35 दिलेया इसहाकइ बिइ, “क्हिए अलि स्योर तेसि खइ, धै क्हिइ योंल् त्हुबै आशिक चइ बोल् खाँइ।”
GEN 27:36 छबिमा एसावइ बिइ, “चए मिं याकूब थेंब ठिकन् मुँन! च बेल्‍ले स्योर तेबै म्हि ग। तोगो चइ ङने ङ्हिब्ले स्योर तेल् खाँइ। ओंसों चइ ‘च्ह थेबइ योंबै हग’ ङउँइँले किंवाँइ। तोगो या ङइ योंल् त्हुबै आशिक स्योर तेसि बोयान। ओ आबा, ङए ल्हागिर क्हिइ आशिक घ्रि या आथेंइमुँ वा?”
GEN 27:37 इसहाकइ एसावने बिइ, “ओ ठागु, च क्हिए फिर्बै चिब ङइ लमिंल् खाँइ। धै चए ताँन् आघें-अलिमैं या ङइ चए केब्छैंमैं लवाइ। म्रोंर्बै रा-रोमैं नेरो अँगुरए प्हा या ङइ चन् पिंवाँइ। तारे क्हिए ल्हागिर ङइ तोइ आशिक पिंल् आखाँ!”
GEN 27:38 एसावइ आबाने धबै बिइ, “ओ आबा, क्हिने बालु आशिक च्हग मत्‍त्रे मुँ रो वा? ङलाज्यै या आशिक पिंन् बिसि” एसाव थेबै कै तेसि क्रोइ।
GEN 27:39 झाइले चए आबा इसहाकइ बिइ, “क्हिए ल्हागिर मुउँइँले शीत आयु। क्हिए म्रोंर्बै स या छ्याँब् तरिब आरे।
GEN 27:40 क्हि सेलाँए भरर सोब्मुँ, धै क्हि अलिए केब्छैं तब्मुँ। दिलेया ङ ‘क्हिए केब्छैं आङिं, क्हिए न्होंर ङ आटि’ बिसि चए न्होंरउँइँले क्हि स्योब्मुँ।”
GEN 27:41 आबाइ याकूबलाइ आशिक पिंबइले एसाव ह्रोंसए अलि याकूबने ख्रे लबर होंइ। छतमा “ङए आबा सिबै त्हे तखइ। च सिबै लिउँइँ ङइ याकूब सैवाब्मुँ” बिसि एसावइ सैं न्हों-न्हों मैंइ।
GEN 27:42 दिलेया एसावइ लल् म्हैबै ताँ रिबेकाइ थेसि च्ह च्योंब याकूब हुइसि बिइ, “थेद्, क्हिए आघें एसावइ क्हि सैब् बिसि दाउ लरिइमुँ।
GEN 27:43 छतसि ओ च्हेज्यों, ङइ बिबै ताँ ङिंन्। क्हि हरान ह्‍युलर क्हिए मामा लाबान ङाँर भौदिह्‍याद्।
GEN 27:44 क्हिए आघेंए ह्रिस आम्हन् समा मामानेन् टिद्।
GEN 27:45 आघेंने बालु क्हिइ लबै केमैं चइ म्‍लेसि क्हिने ह्रिस खब म्हबै लिउँइँ ङइ क्हि किंबर म्हिमैं कुल्मिंब्मुँ। क्हेमैं ङ्हिं तिंगेंर्न ङउँइँले फ्रेयाब ङइ सैदिल् आखाँ!”
GEN 27:46 च लिउँइँ रिबेकाइ इसहाकने बिइ, “एसावइ ब्ह्‍या लबै चु हित्तीस्योमैंइ ङलाइ ककाँ क्युँ-क्युँ ङ्हाँन् लइ। याकूबज्यै चु ह्‍युलर्बै छाबै हित्तीस्योन् ब्ह्‍या लस्याँ ङ तले सोरिब? सिलेन् तम्!”
GEN 28:1 झाइले इसहाकइ याकूब हुइसि आशिक पिंसि बिइ, “ओ च्हेज्यों, क्हिइ कनानी च्हमिरिमैं खाबै या ब्ह्‍या आलद्।
GEN 28:2 पद्दन-आराम बिबै ह्‍युलर ङए कें क्हिए बाज्यु बतूएलए धिंर ह्‍यासि क्हिए मामा लाबानए च्हमि घ्रि ब्ह्‍या लद्।
GEN 28:3 तोन्दोंरि सै लल् खाँबै परमेश्‍वरजी क्हिए फिर आशिक पिंरिगे, धै क्हिइ प्हसेमैं ल्हें योंसि क्हिए सन्तान बेल्‍ले ल्हें तरिगे। धै क्हि ल्हें ह्रेंमैंए खे तरिगे।
GEN 28:4 क्हि तोगो चुर आगुए ह्‍युलर टिरिइमुँ, दिलेया परमेश्‍वरजी चु ह्‍युल अब्राहामलाइ पिंब् ग। क्हि चु ह्‍युलर्बै क्ल्हे तरिगे बिसि परमेश्‍वरजी अब्राहामए फिर पिंबै आशिक क्हि नेरो क्हिए प्हसेंमैंलाज्यै या पिंरिगे।”
GEN 28:5 छबिसि इसहाकइ याकूब कुलइ। धै पद्दन-आराम बिबै ह्‍युलर एसाव नेरो याकूबए आमा रिबेकाए आघें अरामथें बतूएलए च्ह लाबान ङाँर ह्‍याइ।
GEN 28:6 इसहाकइ याकूबए फिर आशिक पिंसि प्ह्रेंस्यो पखबर पद्दन-आरामर कुलब नेरो “क्हिइ कनानी च्हमिरिमैं खाबै या ब्ह्‍या लसि आपखो,” बिबै ताँ एसावइ सेइ।
GEN 28:7 धै आबा-आमाए ताँ ङिंसि याकूब पद्दन-आराम ह्‍युलइ ह्‍यान बिबै ताँ या एसावइ सेइ।
GEN 28:8 झाइले “ङए आबाइ कनानी च्हमिरिमैं आखोमन बिबै या एसावइ क्होइ।”
GEN 28:9 छतसि एसाव इश्माएल ङाँर ह्‍यासि चए च्हमि महलत ब्ह्‍या लसि पखइ। महलत नबायोतए अङाँ मुँल।
GEN 28:10 याकूब बेर्शेबा नाँस वाथेंसि हारान बिबै ह्‍युलउँइँ ह्‍याइ।
GEN 28:11 क्ल्ह्‍यो घ्रिर फेबै लिउँइँ म्हुँइँस तयाबइले च चर्न टिइ। धै च क्ल्ह्‍योर्बै युँमा घ्रि किंसि ह्रोंसए क्रेगुँ लसि रोइ।
GEN 28:12 छले रोरिमा चइ छाबै म्होंड म्रोंइ: सउँइँले मु समा ह्‍याबै लि घ्रि मुँन, चए च्हो मुर्न फेनेब् मुँन। धै परमेश्‍वरए दूतमैं चर क्रेब माइ तब लमन।
GEN 28:13 याहवेह चए रेर रासि याकूबने बिइ, “ङ याहवेह, क्हिए बाज्यु अब्राहामए परमेश्‍वर नेरो क्हिए आबा इसहाकए परमेश्‍वर ग। क्हि तोगो रोरिबै क्ल्ह्‍यो क्हि नेरो क्हिए सन्तानमैं ङइ पिंब्मुँ।
GEN 28:14 क्हिए सन्तानमैं ह्‍युलर्बै स त्हुल् धोंलेन् ल्हें तब्मुँ। क्हिए सन्तान स्यार (पूर्व) छ्यो-न्हुँ (पश्‍चिम) च्योंबो (उत्तर) नेरो छ्यो ल्हुइ (दक्षिणाइ) खन्तोंदोंन् ल्हें तदै ह्‍याब्मुँ। क्हि नेरो क्हिए सन्तानउँइँले ह्‍युलर्बै ताँन् म्हिमैंइ आशिक योंब्मुँ।
GEN 28:15 ङ क्हिने बालु तब्मुँ। क्हि खनिर ह्‍यालेया ङइ जोगेमिंब्मुँ। धै क्हिलाइ चु ह्‍युलर एपखब्मुँ। ङइ क्हिने बिबै बाछा पूरा आलन् समा ङइ क्हि पिरिब् आरे।”
GEN 28:16 झाइले याकूब न्हरुउँइँले छोरसि बिइ, “क्ह्रोंसेंन चु क्ल्ह्‍योर परमेश्‍वर मुँन छाबै ताँ ङइ आसेल।”
GEN 28:17 च बेल्‍ले ङ्हिंसि “चु बेल्‍ले पबित्र क्ल्ह्‍यो मुँन! चु परेमेश्‍वरए धिं मुँन! चु क्ल्ह्‍यो स्वर्गए म्रा ग मुँन,” बिइ।
GEN 28:18 याकूब न्हाँकर्न रेसि चइ क्रेगुँ लबै युँमा किंसि त्हो धोंले क्योइ, धै चए च्होर छ्युगु युमिंइ।
GEN 28:19 छलसि चइ च क्ल्ह्‍योए मिं बेथेल थेंइ। ओंसों च क्ल्ह्‍योए मिं लूज मुँल।
GEN 28:20 च लिउँइँ याकूबइ परमेश्‍वरने छले भकल लइ, “ओ परमेश्‍वर ङने बालु क्हि तइ बिस्याँ, प्रबै घ्याँर ङ जोगेमिंइ बिस्याँ, धै ङ चबै क्हें नेरो खिबै क्वें पिंइ बिस्याँ,
GEN 28:21 ङ छेनाले आबाए धिंर एखल् योंइ बिस्याँ, ङए परमेश्‍वर क्हि तब्मुँ।
GEN 28:22 झाइले ङइ त्हो धोंले क्योथेंबै चु युँमा परमेश्‍वरए धिं तब्मुँ। धै क्हिजी ङलाइ पिंबै तोन्दोंरि सैमैंउँइँले च्युबाँर्बै तिबाँ ङइ खैलेबिलेन् क्हिए मिंर पिंब्मुँ।”
GEN 29:1 च लिउँइँ याकूब रेसि ह्रोंसए घ्याँ क्हाइ, धै स्यारइ टिबै म्हिमैंए ह्‍युलर फेनेइ।
GEN 29:2 छले ह्‍यारिमा चइ म्रोंए म्हाँजोर क्यु खादु म्रोंइ। चए कारग्युले क्युए बगाल सों मुँल। च क्यु खादुउँइँले म्हिमैंइ क्यु बगालमैं क्यु थुँल् पिंमल। क्यु खादुए सुँ हुथेंबै थेबै युँमा घ्रि मुँल।
GEN 29:3 ताँन् बगालमैं चर बालु तबै त्हेर प्ह्रोंछैंमैंइ क्यु खादुए सुँर्बै युँमा स्योवासि क्युमैं क्यु थुँल् पिंमल। क्यु थुल् पिंल् खाँबै लिउँइँ धबै चमैंइ क्यु खादुए सुँ च युँमाइन हुथेंमल।
GEN 29:4 याकूबइ चमैंने “ओ अलिमैं, क्हेमैं खनिर्बै जा?” बिसि ङ्योएमा चमैंइ बिइ, “ङि हरानथेंमैं ग।”
GEN 29:5 चइ बिइ, “क्हेमैंइ नाहोरए क्वें लाबान बिब ङो सेम्मा।” चमैंइ बिइ, “अँ, ङिइ ङो सेम्।”
GEN 29:6 याकूबइ चमैंने “च सबन् मुँ वा?” बिसि ङ्योएमा चमैंइ बिइ, “च सबन् मुँ। ङ्ह्‍योत्ति, चए च्हमि राहेल क्युमैं पखसि खसिन् मुँ।”
GEN 29:7 याकूबइ चमैंने बिइ, “ङेस आतइमुँ। र-क्युमैं खुबै त्हे आतइमुँ। छतसि र-क्युमैं क्यु थुँल् पिंसि धबै छबर बोद्।”
GEN 29:8 चमैंइ बिइ, “ताँन् बगालमैं खागु आतन् समा धै क्यु खादुए सुँउँइँले युँमा आस्योन् समा ङिंइ र-क्युमैं क्यु थुँल् पिंल् आखाँ। युँमा स्योबै लिउँइँ ङिइ र-क्युमैं क्यु थुँल् पिंब्मुँ।”
GEN 29:9 याकूब चमैंने छले ताँ सेरिमा राहेल ह्रोंसए आबाए क्युमैं पखसि चर फेखइ, तलेबिस्याँ चइ क्यु छब्ब्रें लमल।
GEN 29:10 याकूबइ ह्रोंसए मामा लाबानए च्हमि राहेल नेरो मामाए क्युमैं म्रोंसि क्यु खादुए सुँर्बै युँमा स्योमिंइ, धै चइ मामाए क्युमैं क्यु थुँल् पिंइ।
GEN 29:11 च लिउँइँ याकूबइ राहेल म्वें लसि क्रोबर होंइ।
GEN 29:12 याकूबइ चने बिइ, “ङ क्हिए ङोंलो ग, क्हिए आबाए अङाँ रिबेकाए च्ह ग।” छबिमा राहेल धिंर न्हेह्‍यासि ह्रोंसए आबाने चु ताँ बिइ।
GEN 29:13 ह्रोंसए भान्जा याकूब खबै ताँ था सेसि लाबान चने त्होबर न्हेखइ। धै चने अँखलो ख्वेसि म्वें लसि ह्रोंसए धिंर पखइ। च लिउँइँ याकूबइ लाबानने ताँन् ताँ बिबै लिउँइँ
GEN 29:14 लाबानइ चने बिइ, “क्ह्रोंसेंन क्हि ङए ह्रुइब नेरो से ग।” याकूब चने बालु म्हैंन घ्रि टिबै लिउँइँ।
GEN 29:15 लाबानइ याकूबने बिइ, “ङ्यो ह्रोंसए नातो न्होंर्बै तबर्न क्हिइ छलेन् ङए के लब् आ? क्हिए नों सै कति तल् त्हुमुँ ङने बिद्।”
GEN 29:16 लाबानल च्हमि ङ्हिं मुँल। थेब्स्योए मिं लेआ धै च्योंब्स्योए मिं राहेल मुँल।
GEN 29:17 लेआए मि दे क्ह्रिस्यु मुँल। दिलेया राहेल बिस्याँ ज्यु क्ह्रिब नेरो छ्याँब मुँल।
GEN 29:18 याकूबइ राहेल खोइ। छतसि चइ मामाने बिइ, “क्हिए च्हमि च्योंब्स्यो राहेल ब्ह्‍या लबै ल्हागिर ङ ङिदिं समा क्हिए के लब्मुँ।”
GEN 29:19 लाबानइ बिइ, “चलाइ अरूमैंने बालु ब्ह्‍या लमिंब् भन्दा क्हिने पिंब छ्याँब तम् छतसि ङने बालुन् टिद्।”
GEN 29:20 झाइले याकूबइ राहेल योंबै ल्हागिर ङिदिं समा के लइ। चइ राहेल बेल्‍ले खोमल छतसि ङिदिं या चइ च्युगुदे धोंन् ङ्हाँइ।
GEN 29:21 च लिउँइँ याकूबइ लाबानने बिइ, “ङइ क्हिए के लल् खाँइ। तारे ङए प्ह्रेंस्यो तबर राहेल ङलाइ पिंन्।”
GEN 29:22 छबिमा लाबानइ च क्ल्ह्‍योर्बै ताँन् म्हिमैं हुइसि भत्येर पिंइ।
GEN 29:23 दिलेया म्हुँइँसर चए च्हमि थेब्स्यो लेआ याकूब ङाँर पखमिंइ, धै याकूब चने बालु तइ।
GEN 29:24 (लाबानइ ह्रोंसए केब्स्यो जिल्पा बिब ह्रोंसए च्हमि लेआए केब्स्यो तबर पिंइ।)
GEN 29:25 याकूबइ न्हाँगर ङ्ह्‍योमा लेआ ग मुँन। छतमा चइ लाबानने बिइ, “क्हिइ ङने तले छ लल? ङइ राहेल ब्ह्‍या लबर क्हिए के लब आङिं वा? क्हिइ तले ङने छले स्योर तेल?”
GEN 29:26 लाबानइ बिइ, “ङिए ह्‍युलर थेब्स्योए ब्ह्‍या आलमन् च्योंब्स्योए ब्ह्‍या लल् आत।
GEN 29:27 छतसि लेआने बालु ब्ह्‍या लसि ङिरो टिद्। धै क्हिइ धबै ङिदिं ङए के लइ बिस्याँ ङइ च्योंब्स्यो च्हमि या क्हिलाइ पिंस्यो।”
GEN 29:28 याकूबइ छान् लइ। लेआने सद् घ्रि टिबै लिउँइँ लाबानइ ह्रोंसए च्हमि च्योंब्स्यो राहेलै या याकूबए प्ह्रेंस्यो तबर पिंइ।
GEN 29:29 (लाबानइ ह्रोंसए केब्स्यो बिल्हा बिब ह्रोंसए च्हमि राहेलए केब्स्यो तबर पिंइ।)
GEN 29:30 याकूब राहेलने बालु तइ। लेआ नेरो राहेलए न्होंरि चइ राहेलने ल्हें म्हाँया लमल। छले याकूबइ धबै ङिदिं लाबानए के लइ।
GEN 29:31 याकूबइ लेआ आखोब् म्रोंसि याहवेहजी चए कोख थोंमिंइ। दिलेया राहेल थरि तइ।
GEN 29:32 लेआइ प्हसे नोसि च्ह घ्रि फिइ। “क्ह्रोंसेंन याहवेहजी ङए दुःख म्रोंइमुँ। तारे ङए प्युँज्यै ङने म्हाँया लब्मुँ।” छ बिसि चइ च च्हए मिं रूबेन थेंइ।
GEN 29:33 चइ धबै प्हसे नोसि म्हैल च्ह फिइ। “‘ङलाइ आखोइमुँ’ बिब याहवेहजी सेसि खीजी ङलाइ चु च्है या पिंइमुँ।” बिसि चइ बिइ। छतसि चइ म्हैल च्हए मिं शिमियोन थेंइ।
GEN 29:34 च धबै प्हसे नोसि सैंला च्ह फिसि बिइ, “तारे ङए प्युँइ ङलाइ म्हाँया लब्मुँ। तलेबिस्याँ ङइ चल च्ह सों फिल् खाँइ।” छतसि चए मिं लेबी थेंइ।
GEN 29:35 च धबै प्हसे नोसि च्ह च्योंब फिइ। “चु लार ङ याहवेहए मिं क्वेब्मुँ बिइ।” छतसि चए मिं यहूदा थेंइ। च लिउँइँ चइ प्हसे आफि।
GEN 30:1 राहेल ङाँइँले याकूबए प्हसेमैं आत। छतसि राहेलइ ह्रोंसए आनने ह्रिस लबर होंइ। चइ याकूबने “ङलाज्यै प्हसेमैं पिंन्! आपिंस्याँ ङ सियाब्मुँ,” बिइ।
GEN 30:2 छबिमा याकूबइ राहेलने ह्रिस खसि बिइ, “ङ परमेश्‍वर वा? क्हिए कोख म्रुवाबम् परमेश्‍वरजी ग।”
GEN 30:3 राहेलइ बिइ, “ङए केब्स्यो बिल्हा चुर्न मुँ। चुने बालु तदु धै ङए ल्हागिर चइ प्हसे योंमिंरिगे। छले च ङाँइले ङै या आमा तल् खाँम्।”
GEN 30:4 छबिसि राहेलइ चए केब्स्यो बिल्हा याकूबए प्ह्रेंस्यो तबर पिंइ।
GEN 30:5 झाइले बिल्हा प्हसे नोसि याकूब ङाँइँले च्ह घ्रि फिइ।
GEN 30:6 छतमा राहेलइ बिइ, “परमेश्‍वरजी ङ ठिक म्रोंइ, धै ङए ताँ थेमिंसि ङलाइ च्ह घ्रि पिंइ।” छतसि चइ चए मिं दान थेंइ।
GEN 30:7 राहेलए केब्स्यो बिल्हाइ धबै प्हसे नोसि चइ याकूबल म्हैला च्ह फिइ।
GEN 30:8 छतमा राहेलइ बिइ, “ङइ बेल्‍ले नेसि ङए आनलाइ ट्होइ।” छतसि चइ च च्हए मिं नप्‍ताली थेंइ।
GEN 30:9 ह्रोंसइ प्हसे आफिब् सेसि लेआइ ह्रोंसए केब्स्यो जिल्पा बोसि याकूबए प्ह्रेंस्यो तबर पिंइ।
GEN 30:10 झाइले लेआए केब्स्यो जिल्पाइ याकूबल च्ह घ्रि फिइ।
GEN 30:11 छतमा लेआइ “ङ्‍हो सब् तइमुँ!” बिइ। छतसि चइ चए मिं गाद थेंइ।
GEN 30:12 जिल्पाइ याकूब ङाँइले धबै च्ह घ्रि फिइ।
GEN 30:13 छतमा “ङ ङ्‍हो सब्स्यो मुँन! तारे ताँन् च्हमिरिमैंइ ङने ङ्‍हो सब्स्यो बिब्मुँ,” बिसि लेआइ बिइ। छतसि चइ चए मिं आशेर थेंइ।
GEN 30:14 गहुँ खैंबै त्हे तमा लेआए च्ह थेब रूबेन म्रोंर ह्‍याइ, चर चइ तेमै धों तबै ङ्‍हे युबै ट्हा बिशाखमूल योंसि ह्रोंसए आमा लेआ ङाँर पखइ। धै च तेमैं धों तबै सै राहेलइ म्रोंमा “गार आम्हाँदिल्‍ले क्हिए च्हइ पखबै तेमैं ङलाज्यै च्युगुदे पिंन्दि,” बिइ।
GEN 30:15 दिलेया लेआइ चने बिइ, “ङए प्युँ ङ ङाँइले प्हेंवाब च्योंरि ताँ वा? च्हगै आतन तोगो ङए च्हइ पखबै तेमैं या क्हिइ किंल् म्हैल् वा?” राहेलइ बिइ, “छ बिस्याँ क्हिए च्हइ पखबै तेमैं ङलाइ पिंस्याँ चए साटोर ङइ कोंने म्हुँइँसर ङए प्युँ याकूब क्हि ङाँर कुल्मिंस्यो।”
GEN 30:16 ङेसर याकूब म्रोंउँइँले खमा लेआ चने त्होबर ह्‍यासि बिइ, “ङए च्हइ पखबै बिशाखमूल तेमैं राहेललाइ पिंसि चए खिर ङइ क्हिलाइ किंइमुँ। छतसि क्हि कोंने म्हुँइँसर ङ ङाँर खल् त्हुम्।” छबिमा च म्हुँइँसर याकूब चने रोइ।
GEN 30:17 परमेश्‍वरजी लेआए प्राथना थेइ। धै चइ धबै प्हसे नोसि याकूब ङाँइले च्ह फिइ।
GEN 30:18 लेआइ बिइ, “ङए केब्स्यो ङए प्युँने बालु तबर ङइ पिंबइले परमेश्‍वरजी ङलाइ इनाम पिंइ।” छतसि चइ च च्हए मिं इस्साखार थेंइ।
GEN 30:19 लेआ धबै प्हसे नोसि याकूब ङाँइले च्ह फिइ।
GEN 30:20 लेआइ बिइ, “परमेश्‍वरजी ङलाइ बेल्‍ले थेबै सै पिंइमुँ। तारे ङए प्युँउँइँले ङइ म्हाँया योंब्मुँ। तलेबिस्याँ ङइ चल च्ह ट्हु फिल् खाँइ।” छतसि चइ च्ह च्योंबए मिं जबूलून थेंइ।
GEN 30:21 च लिउँइँ चइ च्हमि घ्रि फिसि चए मिं दीना थेंइ।
GEN 30:22 च लिउँइँ परमेश्‍वरजी राहेललाइ मैंसि चए प्राथना थेइ, धै खीजी चए कोख थोंमिंइ।
GEN 30:23 झाइले च प्हसे नोसि च्ह घ्रि फिइ। “परमेश्‍वरजी ङए फिर्बै ‘आछ्याँबै च्येमैं-मिंमैं’ स्योमिंइ,” बिसि चइ बिइ।
GEN 30:24 छतसि चइ कोलोए मिं योसेफ थेंइ।
GEN 30:25 राहेलइ योसेफ फिबै लिउँइँ याकूबइ मामा लाबानने बिइ, “तारे ङ ह्रोंसए ह्‍युल नेरो धिंर ह्‍याल् पिंन्।
GEN 30:26 ङइ क्हिए के लसि योंबै ङए प्ह्रेंस्योमैं नेरो प्हसेमैं बोल् पिंन्। तलेबिस्याँ ङइ लबै छ्याँबै केमैं क्हिइ सेल् खाँइमुँ। छतसि ङ ह्‍याल् पिंन्।”
GEN 30:27 दिलेया लाबानइ चने बिइ, “याहवेहजी क्हिउँइँले ङए फिर आशिक पिंइमुँ बिब ङइ सेइमुँ। छतसि ङए फिर दयाम्हाँया मुँस्याँ अझै टिमिंन्।
GEN 30:28 क्हिए नों सै कति किंमुँ ङने बिद्, क्हिइ कति बिमुँ, ङइ च्हगन् पिंस्यो।”
GEN 30:29 याकूबइ लाबानने बिइ, “ङइ क्हिला खैबै केमैं लइमुँ, धै क्हिए खेदोमैं ङने बालु खैले ल्हें ततै ह्‍याइमुँ च क्हिइ सेइमुँ।
GEN 30:30 ङ खब् भन्दा ओंसों क्हिने बालु सै न्होर च्युगुदे मत्‍त्रे मुँल तोगो ल्हें तइमुँ। ङइ खनिर यो झोंलेया क्हिए फिर याहवेहजी आशिक पिंइमुँ। तारे ह्रोंसए धिं-नाँए ल्हागिर ङइ खोंयों तौदु लब?”
GEN 30:31 “ङइ क्हिलाइ तो पिंले दि?” बिसि लाबानइ बिमा याकूबइ बिइ, “क्हिइ ङलाइ तोइ पिंलै आत्हु। ङए ताँ ङिंम् बिस्याँ ङ क्हिए खेदोमैं अझै छरिस्यो।
GEN 30:32 तिंयाँ क्हिए ताँन् बगालउँइँले थोप्ले नेरो पेटारे रमैं, धै म्‍लोंग्या क्यु म्होंदोमैं ताँन् फ्रेसि स्यो-स्यो लल् पिंन्। चमैंन् ङए नों सै तरिगे।
GEN 30:33 छलमा ङ भर लल् खाँब मुँ उ आरे बिसि क्हिइ लिउँइँ क्ह्रोंसेंन था सेब्मुँ। ङए रमैं न्होंर थोप्ले पेटारे नेरो क्यु म्होदोमैं न्होंर म्‍लोंग्या आङिंब्मैं क्हिइ स्यास्याँ क्हिए उँइँर ङ ह्‍यो ठर्दिब्मुँ।”
GEN 30:34 लाबानइ “तम् तम्, क्हिइ बिब् धोंलेन् लद्,” बिइ।
GEN 30:35 दिलेया च त्हिंइर लाबानइ पेटारे, थोप्ले र बुग्या-म्होदोमैं नेरो तार्ग्या दाग मुँबै र म्होदोमैं नेरो ताँन् म्‍लोंग्या क्यु म्होदोमैं स्यो लसि ह्रोंसए च्हमैं पिंवाँइ।
GEN 30:36 च लिउँइँ लाबानइ च खेदोमैं किंसि याकूबउँइँले सोंरोबै घ्याँ ह्‍याइ। धै याकूबइ चर लाबानए चैबै बगालमैं छबर होंइ।
GEN 30:37 झाइले याकूबइ ङडा, खोंलों नेरो प्हुगिए हाँगमैं पखसि तार्ग्या-तार्ग्या धर्का बनेबर चए फि छाइ।
GEN 30:38 झाइले बगालमैंइ क्यु थुँबै डोंडए ओंसों चइ च हाँगमैं थेंमिंइ। क्यु थुँबर खमा चमैं चर कोंयामल।
GEN 30:39 च बगालमैं च हाँगमैं ओंसों कोंयाबइले चमैंज्यै या प्हसेमैं छाबन् छिर्केमिर्के, पेटारे नेरो थोप्ले फिइ।
GEN 30:40 धै याकूबइ च प्हसेमैं स्यो लसि चैबै बगालमैं लाबानए छिर्के-मिर्के नेरो म्‍लोंग्य क्युमैं ङाँइ कुलइ। छले याकूबइ ह्रोंसए बगालमैं लाबानए बगालने आकोंल्‍ले स्योले थेंइ।
GEN 30:41 भों-भोंबै र-क्युमैं कोंबै त्हेर च हाँगमैंए उँइँर कोंयारिगे बिसि बगालइ क्यु थुँबै डोंडए ओंसों याकूबइ च हाँगमैं थेंमिंमल।
GEN 30:42 दिलेया भों आरेबै बगालमैंए ल्हागिर चइ च हाँगमैं आथेंमल। छतसि भों आरेब्मैं लाबानल तइ, भों मुँब्मैं याकूबल तइ।
GEN 30:43 छले याकूब बेल्‍ले प्लब तइ। चल र-क्युमैं, सलु, गधामैं या ल्हें तइ केब्छैं-केब्स्योमैं या ल्हें तइ।
GEN 31:1 “ङ्योए आबाए तोन्दोंरि सै याकूबइ बोल् खाँइ, धै ङ्योए आबाए ताँन् सैमैंउँइँलेन् चइ च्हौ ल्हें सैमैं योंइमुँ,” बिसि लाबनए च्हमैंइ बिरिब याकूबइ थेइ।
GEN 31:2 झाइले चए फिर लाबनइ ओंसोंबै धोंले छेन् आलब याकूबइ म्रोंइ।
GEN 31:3 च लिउँइँ याहवेहजी याकूबने बिइ, “क्हिए खेमैं नेरो क्हिए ङ्‍हेब्-ट्हुब् ङाँर एह्‍याद्। ङ क्हिने तब्मुँ।”
GEN 31:4 छतसि राहेल नेरो लेआ ह्रोंसए र-क्युए बगाल मुँबै खर्कर याकूबइ त्होबर हुइ।
GEN 31:5 त्होसि चमैंने बिइ, “क्हेमैंए आबाए सैं ङने ओंसोंबै धों तब ङइ आम्रोंइमुँ। दिलेया ङए आबाए परमेश्‍वर ङने बालु मुँ।
GEN 31:6 ङए भोंइ खाँन् समा ङइ क्हेमैंए आबाए सेवा लब क्हेमैंइ सेइमुँ।
GEN 31:7 दिलेया क्हेमैंए आबाइ ङ लुइमुँ, ङए नों सै च्युखे फेर्दिइमुँ। दिलेया परमेश्‍वरजी चइ ङए न्होह्रों लल् आपिइमुँ।
GEN 31:8 लाबनइ ‘थोप्लेमैं ताँन् क्हिए केए नों सै तरिगे’ बिमा ताँन् बगालमैंइ थोप्लेमैंन् फिइ। धै ‘पेटारेमैं ताँन् क्हिए केए नों सै तरिगे’ बिमा ताँन् बगालमैंइ पेटारेमैंन् फिइ।
GEN 31:9 छले परमेश्‍वरजी क्हेमैंए आबाए र-क्युए बगालमैं चउँइँले किंसि ङलाइ पिंइमुँ।
GEN 31:10 “बगाल कोंबै त्हेर म्होदोए फिर क्रेबै बुग्यमैं पेटारे, थोप्ले नेरो छिर्केमिर्के तब ङइ म्होंडर म्रोंइ।
GEN 31:11 च त्हेर परमेश्‍वरए स्वर्गदूतइ म्होंडर ङने ‘ओ याकूब!’ बिमा ङइ ‘होइ, ङ चुर्न मुँ,’ बिइ।
GEN 31:12 “धै खीजी बिइ, ‘ङ्ह्‍योत्ति! बगलाए फिर क्रेबै ताँन् बुग्यामैं पेटारे, थोप्ले नेरो छिर्केमिर्के मुँ। तलेबिस्याँ लाबानइ क्हिए फिर लबै के म्रोंसि ङइ छ लब् ग।
GEN 31:13 क्हिइ युँमा क्योसि छ्युगु युसि भकल लबै क्ल्ह्‍यो बेथलर्बै परमेश्‍वर ङन् ग। तारे रेद्, चु क्ल्ह्‍योउँइँले क्हि फिबै क्ल्ह्‍योर एह्‍याद्।’”
GEN 31:14 च लिउँइँ राहेल नेरो लेआइ चने बिइ, “ङिए आबाए धिंर ङिए हगर्बै ङिइ योंल् त्हुबै सै तोइ मुँ रो वा? चइ ङिलाइ आगुए ह्‍युलर्बै म्हिमैं धोंन् मैंइमुँ आङिं वा?
GEN 31:15 चइ ङि चुँवाँइमुँ ङिलाइ पिंबै मुइ या चइन नुवाइमुँ।
GEN 31:16 ङिए आबा ङाँइले परमेश्‍वरजी बोयाबै ताँन् सै न्होर ङि नेरो ङिए प्हसेमैंल् तइमुँ। छतसि तारे परमेश्‍वरजी क्हिने तो-तो लद् बिइमुँ छान् लद्।”
GEN 31:17 च लिउँइँ याकूब रेसि ह्रोंसए च्हमैं नेरो प्ह्रेंस्योमैं सलुमैंए फिर थेंइ।
GEN 31:18 झाइले पद्दन-आरामर टिमा ह्रोंसइ योंबै ताँन् सै न्होर नेरो ह्रोंसए खेदोमैं ताँन् किंसि ह्रोंसए आबा इसहाक ङाँर कनान ह्‍युलउँइँ ह्‍याबर त्होंइ।
GEN 31:19 च त्हेर लाबान ह्रोंसए क्युए पै प्ह्रेबर ह्‍याल। आबा धिंर आरेबै मौका च्ह्‍यासि राहेलइ ह्रोंसए आबाए धिंर्बै देवतामैं ह्‍योसि बोइ।
GEN 31:20 च फिरै या मामा लाबानने याकूबइ स्योर तेइ, तलेबिस्याँ भौदिल् म्हैबै ताँ लाबानलाइ आबिल।
GEN 31:21 छले ह्रोंसने मुँबै तोन्दोंरि सै किंसि याकूब भौदिसि यूफ्रेटिस बिबै थेबै स्यों तर्दिसि गिलाद बिबै कोंउँइँ ह्‍याइ।
GEN 31:22 सोंरोर याकूब भौदिह्‍यान बिबै ताँ लाबानइ थेइ।
GEN 31:23 छतसि ह्रोंसए आघें-अलिमैं किंसि ङिरो समा याकूबलाइ ल्हाबोमा गिलाद बिबै कोंर चलाइ स्याइ।
GEN 31:24 दिलेया च म्हुँइँसर आरामि लाबान ङाँर परमेश्‍वर म्होंडर म्रोंयुसि चने बिइ, “न्ह क्रों मि क्रों तद्। क्हिइ याकूबने छ्याँब आछ्याँब तोइ आबिद्।”
GEN 31:25 लाबानइ याकूबलाइ स्यामा याकूबइ ह्रोंसए तम्बु गिलादए कोंर टौंदिल। छलेन लाबानज्यै ह्रोंसए आघें-अलिमैंने बालु तम्बु च क्ल्ह्‍योर्न टौंदिइ।
GEN 31:26 झाइले लाबानइ याकूबने बिइ, “क्हिइ ङ छल्दिसि ङए च्हमिमैं ल्हडेंउँइँले क्हा पखब्मैं धोंले पखब तले जा छ लब?
GEN 31:27 ङने तोइ आबिल्‍ले था आयोंन्ले भौदिसि क्हिइ तले ङ धोका पिंल? ङइ बीणा नेरो छिनछिन ह्रासि सैं तोंल्‍ले क्हि कुलमल।
GEN 31:28 ङए क्वें-क्वेंमिमैं नेरो च्हमिमैं कुलबै त्हेर तले म्वें लल् आपिंल? क्हिइ चु आछ्याँब के लइ।
GEN 31:29 क्हिए न्होह्रों लबै भों ङने मुँ। दिलेया क्हिए आबाए परमेश्‍वरजी तल् म्हुँइँसर ङने बिइ, ‘क्हि न्ह क्रों मि क्रों तद्। क्हिइ याकूबने छ्याँब आछ्याँब तोइ आबिद्।’
GEN 31:30 छतसि तारे क्हिए आबाए धिंर ह्‍याबै सैं लसि क्हि प्रइमुँ ङइ क्होइ। दिलेया ङए धिंर्बै देवतामैं तले ह्‍योल?”
GEN 31:31 याकूबइ लाबानने बिइ, “क्हिए च्हमिमैं ङ ङाँइले क्हिइ प्हेंवाम् उ ङ्हाँसि ङ ङ्हिंइ।
GEN 31:32 दिलेया क्हिए देवतामैं खाब्ने बालु स्यामुँ च म्हि सिल् त्हुब्मुँ। छतसि ङने बालु क्हिए सै तो-तो मुँ च ङ्योए ङें-ट्हुब्मैंए ओंसों म्हैदु, धै योंस्याँ किंन्।” राहेलइ च देवतामैं ह्‍योब याकूबइ आसेल।
GEN 31:33 छबिमा लाबान याकूबए तम्बु न्होंर नेरो लेआए केब्स्यो ङ्हिंए तम्बु न्होंर होंइ। दिलेया च देवतामैं स्याल् आखाँ। धै लेआए तम्बुउँइँले त्होंसि राहेलए तम्बु न्होंर होंइ।
GEN 31:34 राहेल बिस्याँ आबाए धिं-देवतामैं किंसि ह्रोंसए सलुए काँठि न्होंर्बै बोरर झोंसि चए फिर टिरिल। लाबानइ तम्बुर खन्तोंदोंन् म्हैइ दिलेया च योंल् आखाँ।
GEN 31:35 राहेलइ ह्रोंसए आबाने बिइ, “आबा, क्हि ङने ह्रिस आखद् ओ। ङ क्होर्बै तइमुँ छतसि क्हिए ओंसों रेल् आखाँ।” छले चइ म्हैबम् म्हैइ दिलेया धिंर्बै देवतामैं ‍योंल् आखाँ।
GEN 31:36 छतमा याकूब ह्रिस खसि लाबानलाइ हौदिसि बिइ, “ङइ क्हिला तो न्होह्रों लवाइ छले ङलाइ ल्हा प्रब?
GEN 31:37 ङए ताँन् सैमैं क्हिइ ङ्‍ह्‍योल् खाँइ। क्हिए धिंर्बै सैमैं तो योंइ खोइ? क्हि नेरो ङए ङे-ट्हुब्मैंए ओंसों चु ताँ थेंन्। चमैंइन ङ्योए न्होंर निसाफ लमिंरिगे।
GEN 31:38 “ङ्हिस्यु बर्ष ङ क्हिने बालुन् टिइ। च्हौ त्हे समा क्हिए र-क्युमैंए प्हसे खोंयोंइ आप्युल। क्हिए बगालर्बै क्युमैं ङइ आचल।
GEN 31:39 क्ह्‍योंर्बै चें भलुमैंइ र-क्यु सैवालै या चए सै ङइन नोसि चए साटोर अरू खेदोमैं ङइ पिंमल। त्हिंयाँर मुँले म्हुँइँसर मुँले म्हिमैंइ क्हिए खेदोमैं ह्‍योवास्याँ चए साटो या क्हिइ ङ ङाँइलेन् किंमल।
GEN 31:40 त्हिंइर्बै ख्वालबइ नेरो म्हुँइँसर्बै ङ्युँबइ ङलाइ बेल्‍ले दुःख तमल ङइ कति दुःख योंइ। ङ तिफुँइ न्हरु च्हुइल् आयोंमल।
GEN 31:41 क्हिए च्हमि ङ्हिंए ल्हागिर ङइ च्युसे प्लिदिं क्हिए के लइ। धै ट्हुदिं समा क्हिए बगालमैं छैं लइ। चु ङ्हिस्यु बर्ष समा छ लसिन् ङ क्हिए धिंर टिइ। दिलेया क्हिइ ङए नों सै आबडिमिं झन च्युखे फेर्दिइ।
GEN 31:42 ङए आबाए परमेश्‍वर, ङए बाज्यु अब्राहाम नेरो इसहाकए परमेश्‍वर ङने बालु आरेस्याँ क्ह्रोंसेंन क्हिइ ङए यो क्होत्तेन् कुल्मिंमल। दिलेया ङइ योंबै दुःख नेरो ङइ लबै के खीजी म्रोंइ। छतसि खीजी तल् म्हुँइँसर क्हिलाइ हौदिब् ग।”
GEN 31:43 लाबानइ याकूबने बिइ, “चु च्हमिमैं ङए च्हमिमैंन् ग। चु कोलोमैं या ङए क्वेंमैं ग। चु बगालमैं या ङए बगालमैंन् ग। चुर क्हिइ म्रोंबै तोन्दोंरि सै ङलन् ग। दिलेया चु ङए च्हमिमैं नेरो चमैंइ फिबै च्ह-च्हमिमैंए फिर ङइ तो लल् खाँमुँ?
GEN 31:44 छतसि तारे खो, क्हि नेरो ङए न्होंर बाछा घ्रि फैले। छले ङ्योइ फैबै बाछा क्हि नेरो ङए म्हाँजोर साक्षि तरिगे।”
GEN 31:45 झाइले याकूबइ युँमा घ्रि पखसि त्हो धोंले क्योइ।
GEN 31:46 धै याकूबइ ह्रोंसए ङे-टहुमैंने “क्हेमैंज्यै युँमामैं पखो बिमा” चमैंइ युँमामैं पखसि थुप्रो लइ। धै च युँमाए थुप्रो ङाँर चमैंइ चब् थुँब् लइ।
GEN 31:47 लाबानइ च युँमाए थुप्रोए मिं “यगर-सहदूता” थेंइ। दिलेया याकूबइ चने “गलेद” बिइ।
GEN 31:48 लाबानइ याकूबने बिइ, “क्हि नेरो ङए म्हाँजोर बाछाए साक्षि तसि ङ्योए सैंर चु बाछा मैंल् लबर तिंयाँ चु युँमाए थुप्रो क्योइमुँ।” छतसि चए मिं गलेद थेंइ।
GEN 31:49 धबै लाबानइ चु ताँ या बिइ, “ङ्यो स्यो-स्यो तयालेया क्हि नेरो ङलाइ याहवेहजी ङ्ह्‍योरिगे।” छतसि च थुप्रोए मिं मिस्पा या मुँल।
GEN 31:50 लाबानइ याकूबने धबै बिइ, “खनिज्यै ङए च्हमिमैंए फिर क्हिइ आछ्याँब लइबिस्याँ धै चमैंए फिर अरू प्ह्रेंस्योमैं पखइबिस्याँ, ङने था आसेलेया, परमेश्‍वरजी क्हि नेरो ङलाइ ङ्ह्‍योरिमुँ।
GEN 31:51 क्हि नेरो ङए म्हाँजोर ङइ क्योथेंबै चु युँमाए थुप्रो नेरो त्हो ङ्‍ह्‍योद्।
GEN 31:52 चु थुप्रो नेरो त्हो साक्षि तरिगे। तारे चु थुप्रो ङ्वैसि क्हि ङाँर ङ न्होह्रों लबर क्योंजा खरिब् आरे। छलेन चु थुप्रो नेरो त्हो ङ्वैसि क्हि या ङ ङाँर तोइ न्होह्रों लबर चोंजा आखो।
GEN 31:53 क्हिए बाज्यु अब्राहाम नेरो ङए बाज्यु नाहोर नेरो चमैंए आबा तेराहए परमेश्‍वरजी ङ्योए म्हाँजोर निसाफ लरिगे।” छतसि याकूबइ ह्रोंसए आबा इसहाकए परमेश्‍वर साक्षि थेंसि कसम चइ।
GEN 31:54 झाइले याकूबइ कोंर क्यु सैसि ख्रो पिंइ, धै ह्रोंसए ङें-ट्हुब्मैं हुइसि चब्-थुँब् पिंइ। चमैंइ चब्-थुँब लसि च क्ल्ह्‍योर्न म्हुँइँस थोइ।
GEN 31:55 लाबान न्हाँगर्न रेसि ह्रोंसए क्वें-क्वेंमिमैं नेरो च्हमिमैं म्वें लसि आशिक पिंसि धिंर एह्‍याइ।
GEN 32:1 याकूब या ह्रोंसए घ्याँ क्हासि ह्‍यामा परमेश्‍वरए दूतमैं चने बालु त्होइ।
GEN 32:2 याकूबइ चमैं म्रोंसि “चु परमेश्‍वरए स्वर्गदूतमैं टिबै क्ल्ह्‍यो ग मुँन बिसि।” चइ च क्ल्ह्‍योए मिं महनोम थेंइ।
GEN 32:3 याकूबइ एदोम ह्‍युलर्बै सेइरर ह्रोंसए आघें एसाव ङाँर त्होबर ह्रोंस भन्दा ओंसों स्यार्बोमैं कुल्मिंइ।
GEN 32:4 “‘ङ तोगो समा लाबानने बालु टिइमुँ। छतसि तोगो समा आखब् ग, बिसि क्हिए केब्छैं याकूबइ बिइमुँ’ बिसि ङए क्ल्हे एसावने बिमिंन्,” बिसि याकूबइ चमैंने बिइ।
GEN 32:5 “‘ङने बालु म्ये-क्ल्या, गधा, र-क्यु नेरो केब्छैं-केब्स्योमैं या ल्हें मुँ। छतसि क्हिउँइँले ल्हयो योंब्मुँ बिसि तोगो क्हि ङाँर यो छ्युँ लबर ङइ चु म्हिमैं कुलइमुँ,’ बिसि ङए क्ल्हे एसावने बिमिंन्।”
GEN 32:6 च स्यार्बोमैं याकूब ङाँर एखसि बिइ, “ङि क्हिए आघें एसाव ङाँर ह्‍यासि खइ। च क्हिने त्होबर म्हि प्लिब्ब्रा किंसि खसिन् मुँ।”
GEN 32:7 छ बिब् थेसि याकूब बेल्‍ले ङ्हिंसि त्हारइ। धै ह्रोंसने मुँबै म्हिमैं, र-क्युमैं, म्ये-क्ल्यामैं नेरो सलुमैंए बगाल भाग ङ्हिंर चुइ।
GEN 32:8 तलेबिस्याँ एसाव खसि बगाल घ्रि सैवालेया अर्को बगाल सोब्मुँ बिसि चइ मैंइ।
GEN 32:9 धै याकूबइ छले प्राथना लइ, “ओ ङए बाज्यु अब्राहाम, ङए आबा इसहाकए परमेश्‍वर, ओ याहवेह, क्हिजी ङने ‘क्हि क्हिए ह्‍युलर क्हिए ङे-ट्हुमैं ङाँर ह्‍याद्। ङइ क्हिए तोन्दोंरि सै छ्याँब लमिंस्यो’ बिल।
GEN 32:10 क्हिजी ह्रोंसए केब्छैंए फिर कति ल्हें म्हाँया लसि उँइँमिंइमुँ दिलेया च म्हाँया योंबै लायकर्बै ङ आरे। तलेबिस्याँ ङ प्हरे घ्रि मत्‍त्रे छेसि यर्दन स्यों तर्दिसि ह्‍याल। तोगो ङल बगाल ङ्हिं तइमुँ।
GEN 32:11 ङ क्हिने यो छ्युँ लमुँ ङए आघें एसावए योउँइँले ङ जोगेमिंन्। तलेबिस्याँ ङ नेरो ङए म्रिं प्हसेमैंने नेखम् उ बिसि ङ ङ्हिंइमुँ।
GEN 32:12 दिलेया क्हिजी ‘क्ह्रोंसेंन ङइ क्हिए तोन्दोंरि सै छ्याँब लमिंब्मुँ, धै क्हिए प्हसेमैं मा ङ्युँइर्बै बलुवा धोंले च्योलै आखाँल्‍ले ल्हें लमिंब्मुँ,’ बिल।”
GEN 32:13 च म्हुँइँसर याकूब चर्न टिइ। धै ह्रोंसए आघें एसावलाइ पिंबै ल्हागिर ह्रोंसने मुँबै खेदोमैं फ्रेसि थेंइ:
GEN 32:14 ङ्हिब्ब्रा र-म्होदो, र-बुग्या ङ्हिस्यु, क्यु आमा ङ्हिब्ब्रा, क्यु साँडे ङ्हिस्यु,
GEN 32:15 ङ्‍हे ङ्‍हेबै सलु सोंच्यु नेरो चमैंए प्हसेमैं, म्ये प्लिच्यु क्ल्या भारा च्यु, गधा आमा ङ्हिस्यु धै गधा त्होब च्यु।
GEN 32:16 छले ताँन् बगालमैं फ्रेसि ह्रोंसए केब्छैंमैंने जिम्‍मा पिंसि बिइ, “क्हेमैं ङ भन्दा ओंसों ह्‍याद् धै बगालमैंए म्हाँजोर च्युगुदे खालि क्ल्ह्‍यो थेंन्।”
GEN 32:17 चइ ताँन् भन्दा ओंसों ह्‍याबै म्हिने बिइ, “ङए आघें एसावइ क्हिने त्होसि ‘क्हि खाबै म्हि जा? क्हि खनिर ह्‍याब् जा? क्हिए ओंसों-ओंसों ह्‍याबै चु खेदोमैं खाबल् जा?’ बिसि ङ्योएस्याँ,
GEN 32:18 ‘चु क्हिए केब्छैं याकूबल ग। चु ताँन् चए क्ल्हे एसावए ल्हागिरि क्होल्सै बिसि कुल्मिंब् ग। च ङिए लिलि खसिन् मुँ,’ बिसि बिद्।”
GEN 32:19 छलेन याकूबइ बगालए लिलि प्रब्मैं ताँनने बिइ, “एसावने त्होमा क्हेमैंइ छ बिद्,
GEN 32:20 ‘क्हिए केब्छैं याकूब ङिए लिलि खसिन्मुँ।’” तलेबिस्याँ “ङए ओंसों-ओंसों कुलबै क्होल्सैमैं म्रोंसि चए ह्रिस म्हह्‍यालै धै चए उँइँर ङ ह्‍यामा चइ ङ खल् पिंब्मुँ,” बिब याकूबए सैंर मैंइ।
GEN 32:21 छतसि च क्होल्सैमैं ओंसों कुल्मिंइ, च बिस्याँ च म्हुँइँसर ह्रोंसए तम्बुर्न टिइ।
GEN 32:22 च म्हुँइँसर याकूब रेसि ह्रोंसए प्ह्रेंस्योमैं ङ्हिं, केब्स्यो ङ्हिं नेरो च्हमैं च्युसे घ्रि किंसि यब्बोक बिबै स्यों तर्दिइ।
GEN 32:23 च्हमैं स्यों क्योंजा कुल्मिंबै लिउँइँ ह्रोंसने बालु मुँबै तोन्दोंरि सैमैं या कुल्मिंइ।
GEN 32:24 छले याकूब घ्रिन् मुँमा म्हुँइँसर म्हि घ्रि नाँ आन्होंन् समा चने नेइ।
GEN 32:25 च स्वर्गदूतइ याकूब ट्होल् आखाँब् सेसि याकूबए क्रेर्बै खोक्रोर छुइ, धै खीने नेन-नेन् याकूबए क्रेर्बै जोर्ने प्ल्ह्‍याइ।
GEN 32:26 झाइले च स्वर्गदूतइ बिइ, “मि म्रोंबि छेइ, ङ ह्‍याल् पिंन्।” दिलेया याकूबइ बिइ, “ङए फिर आशिक आपिंन् समा ङइ क्हि ह्‍याल् आपिं।”
GEN 32:27 च स्वर्गदूतइ याकूबने “क्हिए मिं तो जा?” बिसि ङ्योएमा चइ “ङए मिं याकूब ग,” बिइ।
GEN 32:28 च स्वर्गदूतइ बिइ, “क्हिइ परमेश्‍वर नेरो म्हिमैंने नेसि ट्होल् खाँइ। छतसि तारे क्हिए मिं याकूब आङिं, इस्रायल तब्मुँ।”
GEN 32:29 झाइले याकूबज्यै यो छ्युँ लसि चने “क्हिए मिं तो जा? ङने बिद्,” बिसि ङ्योएइ। “ङए मिं क्हिइ तो लबर ङ्योएल?” बिदै खीजी याकूबलाइ आशिक पिंइ।
GEN 32:30 “परमेश्‍वर ङए ओंसोंन् म्रोंसेया ङ सोइ,” बिसि याकूबइ च क्ल्ह्‍योए मिं पनीएल थेंइ।
GEN 32:31 चए क्रे नबै लमा च खोचें-खोचेंले प्रसि पनीएल ङ्वेल् खाँमा त्हिंयाँ प्योइ।
GEN 32:32 याकूबए क्रेर्बै च स्वर्गदूतइ छुइबइले तिंजरो या इस्राएलीमैंइ क्रेर्बै च आच।
GEN 33:1 याकूबइ ङ्ह्‍योमा एसाव नेरो चने बालु प्लिब्ब्रा म्हिमैं खरिब् म्रोंइ। छतमा चइ ह्रोंसए च्ह-च्हमिमैंलाइ लेआ, राहेल नेरो केब्स्योमैं ङ्हिंए जिम्मार पिंइ।
GEN 33:2 चइ केब्स्योमैं नेरो चमैंए च्हमैं ताँन् भन्दा ओंसों थेंमिंइ, च लिउँइँ लेआ नेरो चए च्ह च्हमिमैं, धै राहेल नेरो चए च्ह योसेफ बिस्याँ ताँन् भन्दा लिउँइँ थेंइ।
GEN 33:3 याकूब ह्रोंसए आघें ङाँर आफेन् समा ङिखे समा सर फ्योदै ह्‍याइ।
GEN 33:4 दिलेया एसाव न्हेखसि याकूबलाइ अँखलो ख्वेसि म्वें लइ। धै चमैं ङ्हिं बेल्‍ले क्रोइ।
GEN 33:5 एसावइ च्हमिरिमैं नेरो कोलोमैं म्रोंसि “क्हिने बालु मुँब्मैं खाब्मैं जा?” बिमा याकूबइ “परमेश्‍वरजी क्हिए केब्छैंए फिर दयाम्हाँया लसि पिंबै ङए च्ह-च्हमिमैं ग,” बिइ।
GEN 33:6 च लिउँइँ केब्स्योमैं नेरो चए प्हसेमैं खसि एसावलाइ फ्योइ।
GEN 33:7 लेआ नेरो चए प्हसेमैं या खसि फ्योइ। ताँनइ फ्योल् खाँबै लिउँइँ योसेफ नेरो राहेल खसि फ्योइ।
GEN 33:8 “ङइ त्होबै चु बगालए अर्थ तो जा?” बिसि एसावइ याकूबने ङ्योएमा याकूबइ बिइ, “ङए फिर क्हिइ ल्हयो खरिगे बिसि ङइ चु बगालमैं कुल्मिंब् ग।”
GEN 33:9 दिलेया एसावइ बिइ, “आच्यों, ङने बालु ल्हें मुँ। छतसि क्हिने बालु मुँबै सैमैं क्हिनेन् मुँरिगे।”
GEN 33:10 याकूबइ बिइ, “आङिं, क्हिए म्हाँया ङए फिर मुँस्याँ गार आम्हाँदिल्‍ले ङए योर्बै क्होल्सैमैं किंमिंन्। तलेबिस्याँ ङए फिर च्हौ थेबै म्हाँया उँइँसि क्हिइ ङलाइ मान लइ। क्ह्रोंसेंन क्हिने त्होल् योंमा परमेश्‍वर म्रोंब् धोंन् ङ्हाँइ।
GEN 33:11 क्हिए ल्हागिर्न पखबै चु क्होल्सैमैं गार आम्हाँदिल्‍ले किंन्, तलेबिस्याँ ङए फिर परमेश्‍वरए आशिक मुँबइले ङने ल्हेंन् मुँ।” छले याकूबइ किंलन् त्हुम् बिसि कर लमा एसावइ च क्होल्सैमैं किंइ।
GEN 33:12 झाइले एसावइ बिइ, “तारे ङ्यो ह्‍याले! क्हिए ओंसों ओंसों ङ प्रब्मुँ।”
GEN 33:13 दिलेया याकूबइ एसावने बिइ, “चु कोलोमैं च्योंबन् मुँ बिब क्हिइ सेइमुँ, धै ङ्‍हे ङ्‍हेल् त्हुबै खेदोमैं या मुँ। चु बगालमैं तिगेंर्न ल्हें प्रमिंइ बिस्याँ ताँन् सियाम् उ बिसि ङ न्हुँ खइमुँ।
GEN 33:14 छतसि ङ क्हिने यो छ्युँ लमुँ, ङ भन्दा ओंसों क्हि ह्‍यादु। ङ बिस्याँ ओंसों ह्‍याबै खेदोमैं नेरो प्हसेमैंए प्रबै त्होंर प्रसि क्हि ङाँर सेइरर आफेखन् समा नुजीले प्रसि खब्मुँ।”
GEN 33:15 एसावइ बिइ, “छ बिस्याँ ङने बालु मुँबै च्युगुदे म्हिमैं क्हि ङाँर वाथेंम्।” दिलेया याकूबइ बिइ, “च म्हिमैं चैदिलै रो वा? क्हिए दयाम्हाँया ङए फिर मुँसेरो तम्।”
GEN 33:16 छबिमा एसाव च त्हिंइर्न सेइरर एह्‍याइ।
GEN 33:17 याकूब बिस्याँ सुक्‍कोतउँइँ ह्‍यासि ह्रोंसए टिबै क्ल्ह्‍‍यो नेरो खेदोमैंए प्ह्रो बनेइ। छतसि च क्ल्ह्‍योए मिं सुक्‍कोत थेंइ।
GEN 33:18 याकूब पद्दन-आरामउँइँले ह्‍याबै लिउँइँ कनान ह्‍युलर्बै शकेम बिबै सहरर छेनाले फेखइ, धै च सहरए ओंसों तम्बु टौंदिसि टिइ।
GEN 33:19 चइ चाँदिए मुइ प्र झोंसि च क्ल्ह्‍यो शकेमए आबा हमोरए च्हमैंने किंइ।
GEN 33:20 चर चइ ख्रो पिंबै क्ल्ह्‍यो घ्रि बनेसि चए मिं एल-एलोह-इस्राएल थेंइ।
GEN 34:1 तिगें याकूब ङाँइले लेआइ फिबै च्हमि दीना कनान ह्‍‍युलर्बै च्हमिरिमैंने त्होबर ह्‍यामा।
GEN 34:2 च क्ल्ह्‍योर्बै क्रथे हिव्‍वि हमोरए च्ह शकेमइ चलाइ म्रोंइ। धै चलाइ तिराइ बोसि चने रोसि चए आब्रु वाइ।
GEN 34:3 शकेमइ दीनालाइ खोमल। छतसि चइ दिनाने म्हाँया लसि छ्याँ-छ्याँबै ताँमैं लइ।
GEN 34:4 छतमा शकेमइ ह्रोंसए आबा हमोरने बिइ, “ङए प्ह्रेंस्यो लबर च च्हमिरि ङलाइ पखमिंन्।”
GEN 34:5 शकेमइ ह्रोंसए च्हमि दीना न्होंवाबै ताँ याकूबइ थेइ। दिलेया चए च्हमैं खेदोमैं छबर ह्‍याल। छतसि चमैं आखन् समा च तोइ आबिल्‍ले टिरिइ।
GEN 34:6 च त्हेर्न शकेमए आबा हमोर ताँ लबर याकूब ङाँर खइ।
GEN 34:7 शकेमइ दीनालाइ न्होंवाबै ताँ याकूबए च्हमैंइ थेइ। छतसि चमैं खेदोमैं छबै क्ल्ह्‍योउँइँले खल। चमैं बेल्‍ले ह्रिस खसि सैदिल् आखाँन् तइ, तलेबिस्याँ याकूबए च्हमि न्होंवासि शकेमइ इस्राएलर्बै म्हिमैंए आब्रु वाल। छाबै के लब छ्याँब ताँ आङिंल।
GEN 34:8 दिलेया हमोरइ चमैंने बालु छ बिसि ताँ लइ, “ङए च्ह शकेमइ क्हिए च्हमि दीना बेल्‍ले खोइमुँ। छतसि गार आम्हाँदिल्‍ले क्हिए च्हमिने बालु ङए च्ह ब्ह्‍या लल् पिंन्।
GEN 34:9 क्हेमैं ङिने बालु ङे-च्याद्। क्हेमैंए च्हमिमैं ङिलाइ पिंन्, ङिए च्हमिमैं क्हेमैंइ किंन्।
GEN 34:10 क्हेमैं ङिने बालुन् टिद्। चु क्ल्ह्‍यो क्हेमैंए ल्हागिर खुला मुँ। चुर्न टिसि छों लदु धै सै न्होर तोद्।”
GEN 34:11 शकेमज्यै या दीनाए आबा नेरो आघें-अलिमैंने बिइ, “ङए फिर क्हेमैंइ ल्हयो खमिंन्। क्हेमैंइ तो ह्रिलेया ङइ पिंस्यो।
GEN 34:12 गर्दुवा ह्रोंमैं क्होल्सै क्हेमैंइ कति ह्रिलेया ङइ पिंस्यो। चु च्हमिरिने ङ ब्ह्‍या लल् पिंन्।”
GEN 34:13 शकेमइ चमैंए रिं दीना न्होंवाबइले याकूबए च्हमैंइ शकेम नेरो चए आबा हमोरए फिर आछ्याँबै सैंले स्योर तेसि बिइ,
GEN 34:14 “ज्युर चिनु आलब्मैंने ङिए रिं पिंबै के ङिउँइँले तल् आखाँ। छले पिंस्याँ ङिए आब्रु ह्‍याम्।
GEN 34:15 छतसि ङिइ बिब् धोंले क्हेमैंइ लस्याँ क्हेमैंइ बिबै ताँ या ङि ङिंम्। क्हेमैंज्यै या ङिइ धोंलेन् ताँन् मुँयुँमैंल ज्युर चिनु लद्। छलस्याँ मत्‍त्रै ङिए च्हमिमैं क्हेमैंने पिंस्यो।
GEN 34:16 धै ङिज्यै या क्हेमैंए च्हमिमैं किंस्यो। झाइले ङि क्हेमैंने ह्रें घ्रिन् तसि टिस्यो।
GEN 34:17 ङिए ताँ थेसेया क्हेमैंइ ज्युर चिनु लल् आङिंस्याँ ङिए च्हमि बोसि ङि चु क्ल्ह्‍योउँइँले छ्युडिह्‍याब्मुँ।”
GEN 34:18 हमोर नेरो चए च्ह शकेमइ चमैंइ बिबै ताँ छ्याँब ङ्हाँइ।
GEN 34:19 छतसि च फ्रेंसिइ चु के तिफुँइ क्हैल् आल। तलेबिस्याँ याकूबए च्हमि चइ बेल्‍ले खोल। ह्रोंसए परवार चलाइ ताँनइ म्हाँया लमल।
GEN 34:20 झाइले हमोर नेरो चए च्ह शकेम सहरर्बै मुल म्रार खसि सहरथेंमैं ताँनने बिइ,
GEN 34:21 “चु म्हिमैं ङ्योने क्ह्रिल् खाँब्मैं मुँन। छतसि चुमैं टिबै ल्हागिर क्ल्ह्‍यो या ल्हें मुँ। चुमैं चु ह्‍युलर्न टिसि छों लरिगे।
GEN 34:22 ङ्यो नेरो चमैंए म्हाँजोर ब्ह्‍या तरिगे। छतसि चमैं ङ्योने बालु ह्रें घ्रिन् तसि टिबै ल्हागिर चमैंइ धोंले ङ्योए ताँन् मुँयुँमैंल ज्युर चिनु लल् त्हुम्।
GEN 34:23 छलस्याँ चमैंए खेदोमैं नेरो तोन्दोंरि सैमैं ङ्योलन् आत रो वा? छतसि चमैंए ताँ ङ्योइ ङिंले। चमैंए ताँ ङ्योइ ङिंस्याँ चमैं ङ्योने बालुन् टिब्मुँ।”
GEN 34:24 छबिमा सहरर्बै मुल म्रार्बै म्हिमैं ताँनइ हमोर नेरो चए च्ह शकेमए ताँ ङिंइ, धै चमैं ताँनइ ज्युर चिनु लइ।
GEN 34:25 ज्युर चिनु लबै सोंरोर चमैं बेल्‍ले नसि टिरिमा याकूबए च्ह ङ्हिं दीनाए आघेंमैं शिमियोन नेरो लेबी ह्रों-ह्रोंसए सेलाँमैं किंसि खाबज्यै आसेल्‍ले सहरर होंसि मुँयुँमैं ताँन् सैवाइ।
GEN 34:26 हमोर नेरो चए च्ह शकेमै या चमैंइ सेलाँइ ल्हिसि सैवाइ। धै शकेमए धिंउँइँले दीना किंसि ह्‍याइ।
GEN 34:27 च लिउँइँ याकूबए च्हमैं म्हि सिबै क्ल्ह्‍योर ह्‍यासि च सहर लुडिइ, तलेबिस्याँ हामोरए च्हइ चमैंए रिं न्होंवाल।
GEN 34:28 चमैंइ च सहरर्बै ताँन् र-क्युमैं, गधामैं नेरो म्रोंर मुँबै तोन्दोंरि सैमैं या बोयाइ।
GEN 34:29 सहरर्बै मुइ योंबै ताँन् सैमैं, च्हमिरिमैं, कोलोमैं नेरो धिंर्बै ताँन् सैमैं या चमैंइ लुडिइ।
GEN 34:30 झाइले याकूबइ शिमियोन नेरो लेबीने बिइ, “कनानी नेरो परिज्जीथेंमैंए उँइँर क्हेमैंइ ङ खाबज्यै आखोब नेरो आक्वेंब लमिंसि दुःख योंल् लमिंइ। ङए म्हिमैं च्युगुदे मुँ। खनिज्यै चुर्बै म्हिमैं ताँन् त्हुँसि ङने नेखस्याँ ङ नेरो ङए परवामैं ताँन् सैवाब्मुँ।”
GEN 34:31 दिलेया चमैंइ बिइ, “ङिए रिं चइ फ्यालुस्यो धों लल् योंम्मा?”
GEN 35:1 च लिउँइँ परमेश्‍वरजी याकूबने बिइ, “रेसि बेथेलर ह्‍यादु धै चर्न टिद्। क्हिए आघें एसावउँइँले क्हि भौदिरिबै त्हेर क्हि ङाँर म्रोंयुबै परमेश्‍वरए मिंर ख्रो पिंबै ल्हागिर ख्रो पिंबै क्ल्ह्‍यो घ्रि चर बनेद्।”
GEN 35:2 छबिमा याकूबइ ह्रोंसए परवा नेरो ह्रोंसने मुँबै ताँन् म्हिमैंने बिइ, “क्हेमैंने मुँबै आगुए देवतामैं ताँन् भ्योंवान् धै क्हेमैं चोखो तसि क्वें फेर्दिद्।
GEN 35:3 झाइले ङ्यो बेथेलर ह्‍याले। ङए फिर दुःख तबै त्हेर ङए ताँ थेमिंब नेरो ङ खनिर ह्‍यालेया ङने बालु तमिंबै परमेश्‍वरए ल्हागिर चर ङइ ख्रो पिंबै क्ल्ह्‍यो घ्रि बनेब्मुँ।”
GEN 35:4 याकूबए ताँ थेसि चमैंइ ह्रों-ह्रोंसने बालु मुँबै आगुए ह्‍युलर्बै देवतामैं नेरो ह्रोंसए न्हर खिबै कुण्डलमैं याकूबलाइ पिंइ धै चइ शकेम ङाँर्बै फलाँटए सिंधुँ न्होंर च सैमैं पाइ।
GEN 35:5 छाइले चमैं ह्‍यामा च खागुबै ह्‍युलर्बै म्हिमैंइ “चुमैं परमेश्‍वरए म्हिमैं ग,” बिब् सेसि ङ्हिंइ, छतमा खाबज्यै चमैंलाइ आल्ह।
GEN 35:6 याकूब ह्रोंसए ताँन् म्हिमैंने कनान ह्‍युलर्बै लूज सहर, अथवा बेथेलर, फेखइ।
GEN 35:7 झाइले चइ चर ख्रो पिंबै क्ल्ह्‍यो घ्रि बनेसि च क्ल्ह्‍योए मिं एल-बेथेल थेंइ, तलेबिस्याँ च ह्रोंसए आघें एसावउँइँले भौदिह्‍याबै त्हेर परमेश्‍वरजी च क्ल्ह्‍योर्न खी म्रोंल् पिंइ।
GEN 35:8 चर रिबेकाए केब्स्यो दबोरा सिइ, धै च बेथेल ङाँर्बै फलाँटए सिधुँ न्होंर चमैंइ पाइ। छतसि च क्ल्ह्‍योए मिं अल्‍लोन-बकुत थेंइ।
GEN 35:9 याकूब पद्दन-आरामउँइँले एखबै लिउँइँ परमेश्‍वर धबै च ङाँर म्रोंयुसि चलाइ आशिक पिंइ।
GEN 35:10 परमेश्‍वरजी चने बिइ, “क्हिए मिं याकूब ग। दिलेया तारे क्हिलाइ याकूब बिरिब् आरे, क्हिए मिं इस्राएल तब्मुँ।” छले चए मिं इस्राएल तइ।
GEN 35:11 परमेश्‍वरजी चने धबै बिइ, “ङ तोन्दोंरि सै लल् खाँबै परमेश्‍वर ग। क्हिए सन्तानमैं ल्हें तब्मुँ। क्हिउँइँलेन् ल्हें ह्रेंमैं तखब्मुँ। धै क्हि म्रुँमैंए खे तब्मुँ।
GEN 35:12 अब्राहाम नेरो इसहाकलाइ पिंबै ह्‍युल ङइ क्हिलाइ पिंब्मुँ। धै क्हिए लिउँइँ खबै सन्तानलाइ ङइ च ह्‍युल पिंब्मुँ।”
GEN 35:13 झाइले चने ताँ सेबै क्ल्ह्‍योउँइँले परमेश्‍वर कैंडो क्रेयाइ।
GEN 35:14 चने बालु परमेश्‍वर ताँ सेबै क्ल्ह्‍योर याकूबइ युँमा घ्रि क्योइ। च लिउँइँ चइ चए फिर अँगुरए खुगु नेरो छ्युगु युमिंइ।
GEN 35:15 परमेश्‍वरजी चने ताँ सेबै क्ल्ह्‍योए मिं याकूबइ बेथेल थेंइ।
GEN 35:16 चमैं धबै बेथेलउँइँले ह्‍यामा एप्रात फेखबि छेमा राहेल सुत्केरि बेथा ल्हैदिसि बेल्‍ले नइ।
GEN 35:17 च सैदिलै आखाँन्ले नमा सुसार लबै च्हमिरिइ चने बिइ, “आङ्हिंन्! क्हिल धबै च्ह घ्रि फिब्मुँ।”
GEN 35:18 दिलेया राहेलइ सो पिबै त्हेर चइ च प्हसेए मिं बेन-ओनि थेंइ। दिलेया याकूबइ बिस्याँ च कोलोए मिं बेन्यामीन थेंइ।
GEN 35:19 छले राहेल सिइ, धै एप्रात अथवा बेथलेहेम ह्‍याबै घ्याँर चमैंइ पाइ।
GEN 35:20 याकूबइ चए छगोंए फिर त्हो घ्रि क्योइ। चु राहेलए छगोंर्बै त्हो ग। चु तोगो समा मुँ।
GEN 35:21 झाइले याकूब ह्‍यासि मिग्दल-एदेरए क्योंजा ह्रोंसए तम्बु टौंदिइ।
GEN 35:22 याकूब (इस्राएल) च ह्‍युलर टिमा चए च्ह थेब रूबेन चए आबाए केब्स्यो बिल्‍हाने बालु रोइ। चु ताँ याकूबइ थेसि मि धोंलेन् लुँबै ह्रिस खइ। याकूबल च्युसे ङ्हिं च्हमैं मुँल।
GEN 35:23 लेआउँइँले च्ह थेब रूबेन, च न्होंर्बै शिमियोन, लेबी, यहूदा, इस्साखार नेरो जबूलून मुँल।
GEN 35:24 राहेलए च्हमैं योसेफ नेरो बेन्यामीन मुँल।
GEN 35:25 राहेलए केब्स्यो बिल्हाउँइँले च्हमैं दान नेरो नप्‍ताली मुँल।
GEN 35:26 लेआए केब्स्यो जिल्पाउँइँले च्हमैं: गाद नेरो आशेर मुँल। चु ताँन् पद्दन-आरामर फिबै याकूबए च्हमैं ग।
GEN 35:27 याकूब चए आबा इसहाक ङाँर मम्रे बिबै क्ल्ह्‍योर खइ। (चु क्ल्ह्‍यो किर्यत-अर्बा नेरो हेब्रोन बिब् ग।) चर अब्राहाम नेरो इसहाक ओंसों टिल।
GEN 35:28 इसहाकए छ्ह प्रसे प्रेच्यु बर्ष तल।
GEN 35:29 छले इसहाकए छ्ह ल्हें तसि सिइ। धै ह्रोंसए खेमैं-मामैंने त्होनेइ। धै चए च्हमैं एसाव नेरो याकूबइ चलाइ पाइ।
GEN 36:1 एसाव अथवा एदोमए ताँमैं चुन् ग।
GEN 36:2 एसावइ कनानी च्हमिरिमैं ङ्हिं ब्ह्‍या लइ चमैं हित्ती एलोनए च्हमि आदा नेरो हिव्वी सिबोनए क्वेंमिं धै अनाए च्हमि ओहोलीबामा मुँल।
GEN 36:3 झाइले इश्माएलए च्हमि नेरो नबायोतए अङाँ बासमत मुँल
GEN 36:4 एसावउँइँले आदाइ एलीपज फिइ, धै बासमतइ रूएल फिइ।
GEN 36:5 छलेन ओहोलीबामाइ येऊश, यालाम नेरो कोरह फिइ। कनान ह्‍युलर फिबै एसावए च्हमैं चुमैंन् ग।
GEN 36:6 एसावइ ह्रोंसए प्ह्रेंस्योमैं, च्ह-च्हमिमैं, चए धिंर्बै ताँन् म्हिमैं, ह्रोंसने मुँबै ताँन् खेदोमैं नेरो कनान ह्‍युलर खागु लबै ताँन् सै न्होर बोसि ह्रोंसए अलि याकूबने फ्रेसि अर्को ह्‍युलर ह्‍याइ।
GEN 36:7 चमैंल ल्हें सै न्होर मुँल, छतसि चमैं बालुन् टिल् आखाँ। चमैंए खेदोमैंइ लमा चमैं टिबै क्ल्ह्‍योर निर्बा तल् आखाँ।
GEN 36:8 छतसि एसाव (अथवा एदोम) सेइर ह्‍युलर टिइ।
GEN 36:9 सेइर बिबै ह्‍युलए कोंजरे टिबै एदोमिमैंए खेमैं एसावए ताँ छले मुँ।
GEN 36:10 एसावए च्हमैंए मिं चुमैंन् ग: एसावए प्ह्रेंस्यो आदाए च्ह एलीपज मुँल। धै बासमतए च्ह रूएल मुँल।
GEN 36:11 एलीपजए च्हमैं: तेमान, ओमार, सपो, गाताम नेरो कनज मुँल।
GEN 36:12 एसावए च्ह एलीपजल तीम्न मिं मुँबै प्ह्रेंस्यो घ्रि मुँल। एलीपजउँइँले चइ अमालेक फिइ। एसावए प्ह्रेंस्यो आदाए क्वेंमैं चमैंन् ग।
GEN 36:13 रूएलए च्हमैं: नहत, जेरह, शम्मा नेरो मिज्जा मुँल। एसावए प्ह्रेंस्यो बासमतए क्वेंमैं चमैंन् ग।
GEN 36:14 एसावए प्ह्रेंस्यो ओहोलीबामा सिबोनए क्वेंमिं नेरो अनाए च्हमि मुँल। एसावउँइँले चइ च्हमैं येऊश, यालाम नेरो कोरह फिइ।
GEN 36:15 एसावए प्हसेमैं न्होंर्बै चिब्मैं चुमैंन् ग। चए च्ह थेब एलीपजए चिब च्हमैं तेमान, ओमार, सपो, कनज,
GEN 36:16 कोरह, गाताम नेरो अमालेक। एदोम ह्‍युलर एलीपजउँइँले तबै चिब्मैं चुमैंन् ग। चुमैं आदाए क्वेंमैं ग।
GEN 36:17 एसावए च्ह रूएलए च्हमैं: नहत, जेरह, शम्मा नेरो मिज्जा मुँल। चमैं एदोम ह्‍युलर रूएलउँइँले तबै चिब्मैं चुमैंन् ग। एसावए प्ह्रेंस्यो बासमतए क्वेंमैं चुमैंन् ग।
GEN 36:18 एसाबए प्ह्रेंस्यो ओहोलीबामाए चिब च्हमैं: येऊश, यालाम नेरो कोरह मुँल। अनाए च्हमि एसावए प्ह्रेंस्यो ओहोलीबामाइ फिबै चिब्मैं चुमैंन् ग।
GEN 36:19 एसाव अथवा एदोमए च्हमैं न्होंर्बै चिब्मैं चुमैंन् ग।
GEN 36:20 च ह्‍युलर टिबै एदोमथें होरी सेइरए च्हमैं लोतान, शोबाल, सिबोन, अना ग।
GEN 36:21 दीशोन, एसेर नेरो दीशान। एदोम ह्‍युलर सेइरए च्हमैं होरीमैंए चिब्मैं मुँल।
GEN 36:22 लोतानए च्हमैं: होरी नेरो हेमान ग। तीम्न लोतानए अङाँ मुँल।
GEN 36:23 शोबालए च्हमैं: अल्बान, मानहत, एबाल, शपो नेरो ओनाम मुँल।
GEN 36:24 सिबोनए च्हमैं: अय्या नेरो अना मुँल। अनाइ ह्रोंसए आबा सिबोनए गधामैं छरिमा क्यु आयोंबै ह्‍युलरि लल क्युए मुल स्याब चु अना ग।
GEN 36:25 अनाए च्ह-च्हमिमैं: दीशोन नेरो चए च्हमि ओहोलीबामा ग।
GEN 36:26 दीशोनए च्हमैं: हेमदान, एश्बान, यित्रान नेरो करान मुँल।
GEN 36:27 एसेरए च्हमैं: बिल्हान, जावान नेरो अकान मुँल।
GEN 36:28 दीशानए च्हमैं: ऊज नेरो आरान मुँल।
GEN 36:29 होरीमैंए चिब्मैं लोतान, शोबाल, सिबोन, अना,
GEN 36:30 दीशोन, एसेर नेरो दीशान ग। सेइर ह्‍युलर चमैंए खलकर्बै होरीमैंए चिब्मैं चुमैंन् ग।
GEN 36:31 इस्राएलर्बै अरू म्रुँमैंइ ग्याल्स लब् भन्दा ओंसों एदोम ह्‍युलर ग्याल्स लबै म्रुँमैं चुमैंन् ग:
GEN 36:32 बओरए च्ह बेलाइ एदोमर ग्याल्स लमल। चए राजधानीए मिं दिन्हाबा मुँल।
GEN 36:33 बेला सिबै लिउँइँ बोज्रार टिबै जेरहए च्ह योबाबइ चए क्ल्ह्‍योर ग्याल्स लइ।
GEN 36:34 योबाब सिबै लिउँइँ तेमानीमैंए ह्‍युलर्बै हूशामइ चए क्ल्ह्‍योर ग्याल्स लइ।
GEN 36:35 हूशाम सिबै लिउँइँ मोआब ह्‍युलर मिद्यानलाइ ट्होबै बददए च्ह हददइ चए क्ल्ह्‍योर ग्याल्स लइ। चए राजधानीए मिं अवीत मुँल।
GEN 36:36 हदद सिबै लिउँइँ मास्रेकार टिबै सम्‍लाइ चए क्ल्ह्‍योर ग्याल्स लइ।
GEN 36:37 सम्‍ला सिबै लिउँइँ स्योंए रेर्बै रहोबोत सहरर्बै शौलइ चए क्ल्ह्‍योर ग्याल्स लइ।
GEN 36:38 शौल सिबै लिउँइँ अक्बोरए च्ह बाल-हानानइ चए क्ल्ह्‍योर ग्याल्स लइ।
GEN 36:39 अक्बोरए च्ह बाल-हनान सिबै लिउँइँ हददइ चए क्ल्ह्‍योर ग्याल्स लइ। चए राजधानीए मिं पाऊ मुँल। चए प्ह्रेंस्योए मिं महेतबेल मुँल। च मत्रेदए च्हमि नेरो मे-जाहाबए क्वेंमिं मुँल।
GEN 36:40 एसावउँइँले तबै चिब्मैंए मिं, चमैं टिबै क्ल्ह्‍यो नेरो बंशमै चुमैंन् ग: तीम्न, अल्वा, यतेत,
GEN 36:41 ओहोलीबामा, एलाह, पीनोन,
GEN 36:42 कनज, तेमान, मिब्सार,
GEN 36:43 मग्दीएल नेरो ईराम। चमैंइ क्ल्हे लबै ह्‍युलर टिबै क्ल्ह्‍योर्बै चिब्मैं चुमैंन् ग। एदोमिमैंए खे नेरो एसावए ताँ चुन् ग।
GEN 37:1 याकूब ह्रोंसए आबा टिबै कनान ह्‍युलर टिमल।
GEN 37:2 चए सन्तानए ताँ चुन् ग। चए च्ह योसेफ च्युसे ङिदिं तमा चए आघेंमैंने बालु र-क्युमैंए बगाल छमल। चमैं याकूबए केब्स्योमैं बिल्हा नेरो जिल्पाए च्हमैं मुँल। तिंगें योसेफइ ह्रोंसए आघेंमैंइ लबै आछ्याँबै केमैं आबा ङाँर बिखइ।
GEN 37:3 याकूब (इस्राएल) खेब् तबै त्हेर योसेफ फिबइले चइ अरू च्हमैं भन्दा योसेफलाइ ल्हें म्हाँया लमल। छतसि चइ योसेफए ल्हागिर छ्याँब बुट्टा झोंबै ह्रिंबै बखु टुमिंइ।
GEN 37:4 छले आबाइ अरू च्हमैं भन्दा चए फिर ल्हें म्हाँया लब् म्रोंसि चए आघेंमैं चने बालु ख्रे लबर होंइ। धै चने बालु छेनाले आपोंमल।
GEN 37:5 तिगें योसेफइ म्होंड म्रोंइ। चइ च म्होंड आघेंमैंने सेमा चमैं झन चने बालु ल्हें ख्रे लबर होंइ,
GEN 37:6 तलेबिस्याँ चइ चमैंने बिइ, “ङइ म्रोंबै म्होंड थेद् ओ।
GEN 37:7 ङ्यो ताँन् म्रोंर गउँए प्हैं फैरिल। ङए प्हैं राइ, धै क्हेमैंए प्हैंमैंइ कारग्युले ङए प्हैं फ्योइ।”
GEN 37:8 छबिमा चए आघेंमैंइ चने बिइ, “ङिए फिर क्हिइ ग्याल्स लल् म्हैल् वा? ङिए फिर क्हि क्ल्हे तल् म्हैल् वा?” छतमा चइ म्रोंबै म्होंडए ताँमैंइ लमा आघेंमैं चने बालु बेल्‍ले ख्रे लबर होंइ।
GEN 37:9 च लिउँइँ चइ धबै म्होंड म्रोंसि आघेंमैंने बिइ, “ङइ धबै म्होंड म्रोंइ। त्हिंयाँ, लयाँ नेरो च्युसे घ्रि मुसारमैंइ ङलाइ फ्योरिल।”
GEN 37:10 छले चइ ह्रोंसए आबा नेरो आघेंमैंने चु म्होंड सेमा चए आबाइ चलाइ हौदिसि बिइ, “क्हिइ म्रोंबै चु म्होंड खैबै म्होंड जा? ङ, क्हिए आमा नेरो क्हिए आघेंमैं खसि क्हिलाइ कुरसि फ्योले वा?”
GEN 37:11 छतमा चए आघेंमैंइ चने ह्रिस लबर होंइ। दिलेया आबाइ बिस्याँ च ताँ सैं न्होंर्न थेंइ।
GEN 37:12 तिगें योसेफए आघेंमैंइ आबाए र-क्युमैं छबर शकेम बिबै क्ल्ह्‍योर ह्‍याल।
GEN 37:13 छतमा याकूबइ (इस्राएलइ) योसेफने बिइ, “क्हिए आघेंमैं शकेमर र-क्युमैं छसिन् मुँ। छतसि खो! ङइ क्हि चमैं ङाँर कुलब्मुँ।” योसेफइ “तम्, ङ ह्‍याबर तयार मुँ, आबा,” बिइ।
GEN 37:14 याकूबइ चने बिइ, “क्हिए आघेंमैं नेरो र-क्युमैं छ्याँबन् मुँ उ आरे ह्‍यासि ङ्‍ह्‍योद्। झाइले च ताँमै ङ ङाँर बिखो।” छबिसि चइ योसेफलाइ हेब्रोनए ब्याँसिउँइँले शकेमर कुलइ। योसेफ शकेमर फेनेमा
GEN 37:15 म्हि घ्रिइ च म्रोंर स्युररिब स्यासि चने “क्हिइ खाबलाइ म्हैल?” बिसि ङ्योएइ।
GEN 37:16 “ङ ङए आघेंमैं म्हैरिलो। चमैंइ र-क्युमैं खनिर छरिइमुँ? गार आम्हाँदिल्‍ले ङने बिमिंन् बिसि चइ,” बिइ।
GEN 37:17 धै च म्हिइ बिइ, “चमैं छुइले ह्‍याइ। चमैंइ ‘ङ्यो दोतानइ ह्‍‍याले’ बिरिब ङइ थेल।” छबिमा योसेफ ह्रोंसए आघेंमैं म्हैदै ह्‍यामा चमैंलाइ दोतानर स्याइ।
GEN 37:18 आघेंमैंइ ह्रेंगोउँइँले योसेफ खरिब् म्रोंसि च खेंमैं ङाँर फेखब् ओंसोंन् चलाइ सैबै मत लइ।
GEN 37:19 चमैंइ खेंमैंए न्होंर बिइ, “च म्होंड म्रोंबै म्हि खसिन् मुँ। तारे चलाइ सैसि होंल्दों घ्रिर भ्योंवाले।
GEN 37:20 झाइले ‘क्ह्‍योंर्बै खेदोमैंइ चलाइ चवान’ बिसि ङ्योइ आबाने बिले। धै चए म्होंडमैं तो तमना ङ्ह्‍योले।”
GEN 37:21 चु ताँ थेसि आघें रूबेनइ “ङ्योइ चलाइ सैल् आत,” बिसि चमैंए योउँइँले योसेफ जोगेल् म्हैइ।
GEN 37:22 “चलाइ आसैले, बरु चुर तोइ आरेबै क्ल्ह्‍योर्बै चु होंल्दोंर भ्योंवाले। दिलेया चए फिर यो आझोंले।” चमैंए योउँइँले जोगेसि योसेफ ह्रोंसए आबा ङाँर कुल्मिंबै सैं मैंसि रूबेनइ छ बिल।
GEN 37:23 झाइले योसेफ ह्रोंसए आघेंमैं ङाँर फेखमा चइ खिबै छ्याँबै बुट्टा झोंबै बख्खु चमैंइ प्लिसि प्हेंवाइ।
GEN 37:24 च लिउँइँ चमैंइ चलाइ क्हासि क्यु आरेबै थेबै होंल्दोंर भ्योंवाइ।
GEN 37:25 च लिउँइँ चमैं चब् चबर टिमा क्होवाँइ ङ्ह्‍योमा गिलादउँइँले छों लबर खबै इश्माएलीमैं म्रोंइ। चमैंइ लिंबै थाँ खबै मसल, लेप नेरो मूर्र सलुमैंए फिर थेंसि मिश्रउँइँ ह्‍यारिल।
GEN 37:26 छतमा यहूदाइ ह्रोंसए आघें-अलिमैंने बिइ, “ङ्योइ ह्रोंसए अलि सैसि चए को लोस्याँ तो फाइदा तमुँ?
GEN 37:27 छतसि चए फिर ङ्योइ यो आझोंले, बरु चलाइ इश्माएलीमैंए योर चुँवाले। तलेबिस्याँ च ङ्योए अलि ग, ङ्योए से-को घ्रि ग।” छबिमा चए आघें-अलिमैंइ चइ बिबै ताँ ङिंइ।
GEN 37:28 लिउँइँ छों लबै मिद्यानिथेंमैं च घ्याँउँइँले खमा योसेफए आघेंमैंइ चलाइ होंल्दोंउँइँले चैंपसि इश्माएलीमैंए योर चाँदिए मुइ ङ्हिस्युर चुँवाइ। छले चमैंइ योसेफ मिश्र बिबै ह्‍युलर बोइ।
GEN 37:29 च लिउँइँ रूबेन होंल्दोंर एखमा योसेफलाइ चर आम्रोंमा सैं नसि ह्रोंसए क्वें ट्होवाइ।
GEN 37:30 झाइले अलिमैं ङाँर ह्‍यासि बिइ, “च फ्रेंसिम् चर आरेन! तारे ङ खनिर ह्‍याब?”
GEN 37:31 झाइले चमैंइ र घ्रि सैसि योसेफए बख्खु कोर प्ल्हुँमिंइ।
GEN 37:32 झाइले च छ्याँबै बुट्टा झोंबै बख्खु चमैंइ खेंमैंए आबा ङाँर पखसि बिइ, “ओ आबा! चु बख्खु ङिइ योंइ। ङ्ह्‍योत्ति, चु क्हिए च्हल् ङिंब् उ आङिं?”
GEN 37:33 याकूबइ च क्वें सेसि बिइ, “चु ङए च्हए बख्खु ग। क्ह्‍योंर्बै खेदोमैंइ चलाइ चवालै! क्ह्रोंसेंन ङए च्ह च्यता-चिति लवालै।”
GEN 37:34 छतमा चइ ह्रोंसए क्वें ट्होवाइ, धै ह्रेंगा खिसि ह्रोंसए च्हए ल्हागिर ल्हें त्हे समा शोक लइ।
GEN 37:35 चए च्ह-च्हमिमैं ताँनइ आबाए सैं क्होमिंल् म्हैइ। दिलेया आबाए सैं क्होल् आङिं। छतसि आबाइ योसेफए ल्हागिर शोक लसि “ङ शोक लसिन् ङए च्ह ङाँर क्रोंर ह्‍याम्,” बिइ।
GEN 37:36 योसेफ बिस्याँ मिश्र ह्‍युलर फेनेमा मिद्यानिमैंइ चलाइ फारो म्रुँए दरबार रुँब्मैं न्होंर्बै पोतीफर बिबै कप्‍तानने चुँवाइ।
GEN 38:1 च त्हेर यहूदा ह्रोंसए आघें-अलिमैं वाथेंसि हिरा मिं मुँबै अदुल्‍लामथें ङाँर ह्‍याइ।
GEN 38:2 चर यहूदाइ शूआ मिं लबै कनानीए च्हमि म्रोंसि चलाइ ब्ह्‍या लसि पखइ।
GEN 38:3 चइ प्हसे नोसि च्ह घ्रि फिइ। चए मिं एर थेंइ।
GEN 38:4 च धबै प्हसे नोसि च्ह फिसि चए मिं ओनान थेंइ।
GEN 38:5 धबै चइ च्ह घ्रि फिसि चए मिं शेलह थेंइ। चइ च फिबै त्हेर यहूदा कजीब बिबै क्ल्ह्‍योर टिरिल।
GEN 38:6 यहूदाइ ह्रोंसए च्ह थेब एरए ल्हागिर तामार मिं मुँबै प्ह्रेंस्यो पखमिंइ।
GEN 38:7 दिलेया यहूदए च्ह थेब एरइ याहवेहए उँइँर आछ्याँबै के लमल छतसि याहवेहजी च सैवाइ।
GEN 38:8 छतसि यहूदाइ म्हैला च्ह ओनानने बिइ, “क्हिए चों ङाँर ह्‍यासि क्हिए आघेंए ल्हागिर प्हसेमैं योंमिंन्।”
GEN 38:9 दिलेया च्होंउँइँले खबै प्हसे ह्रोंसल आतब् सेसि चों ङाँर ह्‍यामा ओनानइ आघेंलै या प्हसे आतरिगे बिसि प्लु सर भ्योंवामल।
GEN 38:10 चइ छले आछ्याँबै सैंले चु के लब् म्रोंसि याहवेहजी चलाज्यै या सैवाइ।
GEN 38:11 छतमा यहूदाइ ह्रोंसए च्हों तामारने बिइ, “ङए च्ह शेलह थेब् आतन् समा म्हरेस्योन् तसि क्हिए आबाए धिंर टिद्।” तलेबिस्याँ शेलह या चए आघेंमैं धोंलेन् सियाम् उ बिसि च ङ्हिंल। छतसि तामार ह्रोंसए आबाए धिंर ह्‍यासि टिइ।
GEN 38:12 चर टिदै लमा तिगें यहूदाए प्ह्रेंस्यो शूआए च्हमि सियाइ। प्ह्रेंस्योए शोक लबै त्हे खाँबै लिउँइँ यहूदा चए थु अदुल्‍लामथें हिरालाइ किंसि तिम्नार क्युए पै प्ह्रेब्मैं ङाँर ह्‍याइ।
GEN 38:13 क्युए पै प्ह्रेबर ह्रोंसए कें तिम्नार ह्‍यासिन् मुँ बिब तामारइ था सेइ।
GEN 38:14 छतसि म्हिमैंइ च ङो आसेरिगे बिसि म्हरेस्योए क्वें प्लिसि लि हुसि। तिम्नार्बै घ्याँर मुँबै एनैम सहरर्बै म्रार टिइ। तलेबिस्याँ शेलह थेब् तसेया शेलहए प्ह्रेंस्यो तल् आयोंब चइ म्रोंइ।
GEN 38:15 चइ लि हुब् म्रोंसि यहूदाइ चलाइ फ्रें क्ल्योंबै च्हमिरि मुँन ङ्हाँइ।
GEN 38:16 घ्याँए रेर ह्‍यासि चइ चने बिइ, “ङ क्हि ङाँर खल् पिंन्।” तलेबिस्याँ चइ ह्रोंसए चों ग बिसि ङो आसेल। “क्हि ङ ङाँर खम् बिस्याँ ङलाइ तो पिंम् दि?” बिसि चइ ङ्योएमा
GEN 38:17 चइ बिइ, “बगालउँइँले ङइ र म्होदो घ्रि पिंस्यो।” चइ बिइ, “क्हिइ च र-म्होदो ङ ङाँर आकुलन् समा क्हिए तो मुँले सै ङने थेंम् उ?”
GEN 38:18 यहूदाइ बिइ, “ङइ तो सै थेंलेदि?” चइ बिइ, “क्हिए छाप नेरो चए छो धै क्हिए योर्बै चु प्हरे थेंस्याँ तम्।” छबिमा यहूदाइ चने च सैमैं पिंसि चने बालु तइ। च लिउँइँ चउँइँले चइ प्हसे नोइ।
GEN 38:19 च रेसि धिंर ह्‍याइ धै लि हुबै क्वें प्लिवासि म्हरेस्योमैंइ खिबै क्वें खिइ।
GEN 38:20 यहूदाइ च च्हमिरिने थेंबै सैमैं च ङाँइले पबै ल्हागिर चए थु अदुल्‍लामथेंने र-म्होदो घ्रि कुलइ। दिलेया चइ च च्हमिरि आत्हो।
GEN 38:21 छतसि चइ च क्ल्ह्‍योर्बै म्हिमैंने ङ्योएइ, “एनैमर घ्याँए रेर टिबै फ्रें क्ल्‍योंबै च्हमिरि खनिर मुँ?” बिमा चमैंइ चने बिइ, “चुर छाबै फ्रें क्ल्योंबै च्हमिरि आरे।”
GEN 38:22 छतसि च म्हि यहूदा ङाँर एखसि “ङइ च च्हमिरि आत्हो बिइ, धै च क्ल्ह्‍योर्बै म्हिमैंज्यै या ‘चुर छाबै च्हमिरि आरे बिइ।’”
GEN 38:23 यहूदाइ बिइ, “च सैमैं चनेन् थेंरिगे, आस्याँ ङ्यो फा फिल् त्हुब्मुँ। ङइ चु र-म्होदो कुलल्दो आत्होसेरो तो लब्दि।”
GEN 38:24 म्हैंन सोंल् लिउँइँ म्हि घ्रिइ यहूदाने बिइ, “क्हिए चों तामारइ फ्रें क्ल्योंसि प्हसे नोइमुँ।” छबिमा यहूदाइ बिइ, “चलाइ चुर पखसि ख्रोंवाँन्।”
GEN 38:25 छले तामार पखसि खरिमा चइ ह्रोंसए कें ङाँर छ बिसि सउँसर पिंमिंइ, “चु सैमैं खाबल् जा, चउँइँलेन् ङइ प्हसे नोब् ग। ङ्‍ह्‍योद्, चु छाप चु छो नेरो चु प्हरे खाबल् जा?”
GEN 38:26 छबिमा यहूदाइ बिइ, “चु सैमैं ङल् ग! चम् ङ भन्दा धर्मि मुँन। तलेबिस्याँ ङइ ङए च्ह च्योंब शेलह चए प्युँ तबर आपिंल।” च लिउँइँ च धबै चने बालु आप्र।
GEN 38:27 प्हसे फिबै त्हेर तामारए फोर जौंले मुँन बिब था योंइ।
GEN 38:28 च प्हसे फिबै बेथा खमा प्हसे घ्रिइ यो बैरु तेइ धै सुसर लबै च्हमिरिइ चए योर ओल्ग्या रु घ्रिइ फैसि बिइ, “ओंसों फिब चुन् ग।”
GEN 38:29 दिलेया चइ ह्रोंसए यो न्होंर बोबै लिउँइँ चए अलि ग फिइ। छतमा च सुसर लबै च्हमिरिइ बिइ, “तो जा क्हिम् छले खैचिजीले त्होंयुब!” छतसि चए मिं फारेस थेंइ।
GEN 38:30 लिउँइँ योर ओल्ग्या रुइ फैब फिइ। चए मिं जेरह थेंइ।
GEN 39:1 इश्‍माएलीमैंइ योसेफ किंसि मिश्र ह्‍युलर बोइ। धै फारो म्रुँए दरबार रुँब्मैं न्होंर्बै कप्‍तान पोतीफर बिबै म्हिए योर चुँवाँइ।
GEN 39:2 दिलेया याहवेह परमेश्‍वर योसेफने बालु मुँल। छतसि चर च प्लब् ततै ह्‍याइ। च ह्रोंसए क्ल्हे मिश्रीथेंए धिंर टिमल।
GEN 39:3 “याहवेह चने बालु मुँब नेरो चइ लबै ताँन् केमैं याहवेहजी छ्याँब लमिंम्” बिसि चए क्ल्हे पोतीफरइ म्रोंसि
GEN 39:4 सैं तोंइ, धै ह्रोंसए धिंर के लब्मैंए न्होंर्बै चिब लमिंइ। ह्रोंसने मुँबै तोन्दोंरि सैए जिम्मा योसेफलाइ पिंइ।
GEN 39:5 चइ ह्रोंसए धिंर्बै नेरो ह्रोंसने मुँबै तोन्दोंरि सैए जिम्मा योसेफलाइ पिंबै त्हेसेरो योसेफ चर मुँबइले याहवेहजी च मिश्रीथेंए धिंर आशिक पिंसि चए धिं-नाँ नेरो म्रोंर रोबै ताँन् सैमैंए फिर आशिक पिंइ।
GEN 39:6 छतमा ह्रोंसने मुँबै तोन्दोंरि सैमैं योसेफए जिम्मार पिवाइ। ह्रोंसइ चबै सै बाहेक ह्रोंसने मुँबै तोइ सैलेया चइ वास्ता आलमल। योसेफ ङ्ह्‍योबर बेल्‍ले छ्याँब मुँल।
GEN 39:7 छतमा दे त्हे लिउँइँ चए क्ल्हेए प्ह्रेंस्योइ योसेफउँइँ ङ्ह्‍योसि “ङने बालु रोद्,” बिइ।
GEN 39:8 दिलेया योसेफइ आङिंसि चने बिइ, “ङ चु धिंर मुँबइले ङए क्ल्हेइ चु धिंर मुँबै तोइ सैलेया न्हुँ आल। चने मुँबै तोन्दोंरि सैमैं या चइ ङए जिम्मार पिंइमुँ।
GEN 39:9 चु धिंर ङ भन्दा थेब खाबै आरे। क्हि बाहेक अरू तोन्दोंरि सै चइ ङए जिम्मर्न पिंइमुँ, तलेबिस्याँ क्हि चए प्ह्रेंस्यो ग। छतसि चु आछ्याँबै के ङइ खैले लब, धै परमेश्‍वरए बिरोधर ङइ खैले पाप लल् खाँमुँ?”
GEN 39:10 च च्हमिरिइ त्हिंइ ह्रोंसे योसेफने ताँ ललेया चने बालु रोब टिब लबर योसेफ आङिंमल।
GEN 39:11 तिगें योसेफ के लबर धिं न्होंर ह्‍यामा धिंर अरू के लब्मैं खाबै आरेल।
GEN 39:12 छतमा च च्हमिरिइ योसेफए क्वें क्हासि “ङने बालु रोद्,” बिइ। दिलेया योसेफइ ह्रोंसए क्वें चए योर्न वाथेंसि न्हेह्‍याइ, धै धिं न्होंउँइँले बैरु त्होंह्‍याइ।
GEN 39:13 योसेफइ ह्रोंसए क्वें चए योर्न वाथेंसि धिं न्होंउँइँले त्होंह्‍याब् म्रोंसि,
GEN 39:14 च च्हमिरिइ ह्रोंसए केब्छैंमैं हुइसि बिइ, “ङ्ह्‍योत्ति! ङिए मिं वाबर ङए प्युँइ चु हिब्रू म्हि चुर पखन। च म्हि ङने बालु रोबर धिं न्होंर खइ। दिलेया ङ थेबै कैले ओरइ।
GEN 39:15 छले ङ ओरब् थेसि चइ ह्रोंसए क्वें ङ ङाँर वाथेंसि धिं न्होंउँइँले बैरु न्हेह्‍याइ।”
GEN 39:16 चए प्युँ धिंर आखन् समा चइ च क्वें ह्रोंसनेन् थेंइ।
GEN 39:17 लिउँइँ चए प्युँ खमा चु ताँ बिइ, “ङ्यो ङाँर क्हिइ पखबै च हिब्रू केब्छैं ङए मिं वाबर धिं न्होंर खइ।
GEN 39:18 दिलेया ङ ओरबै तोदोंन् चइ ह्रोंसए क्वें ङ ङाँर्न वाथेंसि धिं न्होंउँइँले भौदिह्‍याइ।”
GEN 39:19 प्ह्रेंस्योइ बिबै ताँ थेमा पोतीफर मि धोंलेन् लुँबै ह्रिस खइ।
GEN 39:20 झाइले चइ योसेफलाइ म्रुँए कैदिमैं च्युथेंबै झेलर च्युवाइ। छले योसेफ झेलर टिइ।
GEN 39:21 दिलेया याहवेह योसेफने बालु मुँल। खीजी चए फिर ल्हयो खइ, छतसि योसेफ झेलर्बै चिबइ खोबै म्हि तल् पिंइ।
GEN 39:22 छतसि झेलर्बै चिबइ च झेलर च्युथेंब्मैंए फिर्बै चिब योसेफ लमिंइ। चर लल् त्हुबै केमैं तो मुँलेया योसेफइ ल्हैदिसेरो तयामल।
GEN 39:23 योसेफए जिम्मार पिंबै तोइ सैलेया झेलर्बै चिबइ न्हुँ लल् आत्हुमल। तलेबिस्याँ याहवेह योसेफने बालु मुँल। योसेफइ लबै तोन्दोंरि के याहवेह परमेश्‍वरजी बेल्‍ले छ्याँब लमिंइ।
GEN 40:1 दे त्हे लिउँइँ मिश्रर्बै म्रुँए थुँबै सैमैं पिंखबै चिब नेरो चबै सैमैं ह्‍योमिंबै चिबइ म्रुँए बिरोधर अपराध लइ।
GEN 40:2 छतमा फारो ह्रोंसए थुँबै सैमैं पिंखबै चिब नेरो चबै सैमैं ह्‍योमिंबै चिबने ह्रिस खइ।
GEN 40:3 झाइले चइ चमैंलाइ दरबार रुँब्मैंए न्होंर्बै कप्‍तानने झेलर च्युबर पिंवाइ। च झेलर योसेफै या च्युथेंल।
GEN 40:4 च कप्‍तानइ चमैं योसेफए जिम्मार थेंमिंइ। चर योसेफइ चमैंलाइ ङ्ह्‍योबै केमैं लमल। दे त्हे समा चमैं झेलर्न टिइ।
GEN 40:5 झेलर फेबै मिश्रर्बै म्रुँए थुँबै सैमैं पिंनेबै चिब नेरो चबै सैमैं ह्‍योमिंबै चिब ङ्हिंइन तिंगें स्यो-स्योबै म्होंड म्रोंइ।
GEN 40:6 योसेफ न्हाँगर चमैं ङाँर खमा चमैं न्हुँ लसि टिरिब् म्रोंइ।
GEN 40:7 छतमा योसेफइ चमैंने “तिंयाँ क्हेमैं तले आतोंन्ले टिरिल?” बिसि ङ्योएइ।
GEN 40:8 चमैंइ चने बिइ, “ङिइ म्होंड म्होंइ। दिलेया म्होंडए अर्थ बिमिंबै म्हि चुर खाबै आयों।” योसेफइ चमैंने बिइ, “म्होंडए अर्थ परमेश्‍वरजी मत्‍त्रे सेल् खाँम्। क्हेमैंए म्होंडमैं ङने सेद्।”
GEN 40:9 योसेफइ छबिमा म्रुँए थुँबै सैमैं पिंनेबै चिबज्यै या ह्रोंसए म्होंड सेइ। “ङए म्होंडर ङए उँइँर अँगुरए धुँ घ्रि मुँल।
GEN 40:10 अँगुरए धुँर हाँग सों मुँल। चर च्योंरि हाँगमैं म्‍लोखसि टमैं या बेल्‍ले छेन्ले प्हारइ, धै अँगुरए झुप्पामैं पाँ-पाँले अँगुर रोसि मिंइ।
GEN 40:11 फारोए प्हेल ङए योर मुँल। धै ङइ अँगुर च्ह्‍योरसि फारोए प्हेलर झोंसि च प्हेल फारोए योर थेंमिंइ।”
GEN 40:12 योसेफइ चने बिइ, “चुए अर्थ चुन् ग: हाँग सों बिब सोंरो ग।
GEN 40:13 सोंरो न्होंर फारो म्रुँइ क्हि झेलउँइँले तेमिंब्मुँ, धै क्हिलाइ धबै ओंसोंबै केन् पिंब्मुँ। ओंसों क्हिइ फारोलाइ थुँबै सैमैं पिंनेब् धोंलेन् धबै क्हिइ थुँबै सैमैं चए योर थेंब्मुँ।
GEN 40:14 दिलेया क्हिए बिब् धों तमा ङलाज्यै या मैंन् ओ। गार आम्हाँदिल्‍ले फारोने ङए ताँ लसि चु झेलउँइँले ङ तेमिंन्।
GEN 40:15 तलेबिस्याँ क्ह्रोंसेंन म्हिमैंइ ङलाइ हिब्रूमैंए ह्‍युलउँइँले क्हासि पखब् ग। धै चुरै या झेलर टिल् त्हुबै के ङइ तोइ आलल।”
GEN 40:16 च म्होंडए अर्थ छ्याँब तब् म्रोंसि चबै सैमैं ह्‍योमिंबै चिबज्यै या योसेफने बिइ, “ङज्यै या छाबै म्होंड घ्रि म्होंइ। ङए क्रर क्हेंए ट्हलो सों मुँल।
GEN 40:17 ताँन् भन्दा फिर्बै ट्हलोरि फारोए ल्हागिर ह्‍योमिंबै ल्हें खालर्बै चबै सैमैं मुँल। दिलेया ङए क्रर मुँबै ट्हलोउँइँले नमेंमैंइ चो-चोसि चरिल।”
GEN 40:18 योसेफइ बिइ, “चु म्होंडए अर्थ चुन् ग: ट्हलो सों बिब सोंरो ग।
GEN 40:19 सोंरो न्होंर फारो म्रुँइ क्हिलाइ या झेलउँइँले तेसि, क्हिए क्र थोवाब्मुँ, धै क्हि सिंधुँर च्योवाब्मुँ। धै नमेंमैंइ क्हिए से चो-चोसि चब्मुँ।”
GEN 40:20 सोंरो लिउँइँ फारो फिबै त्हिंइ मुँल। छतमा फारो म्रुँइ च त्हिंर ह्रोंसए ताँन् चिबनाँब्मैं चब्-थुँब् लबर हुइल। धै चए थुँबै सैमैं पिंब नेरो चबै सैमैं ह्‍योबै चिब्मैं या झेलउँइँले तेपखसि चमैं ङाँर राल् पिंइ।
GEN 40:21 चइ ह्रोंसए थुँबै सैमैं पिंखबै चिबलाइ धबै ओंसोंबै ह्रोंसए केन् लल् पिंइ, धै चइ फारोए प्हेल फारोए योर पिंब्रें लइ।
GEN 40:22 झाइले योसेफइ चमैंए म्होंडए अर्थ बिमिंब् धोंले चबै सैमैं ह्‍योबै चिब बिस्याँ फारो म्रुँइ च्योवाइ।
GEN 40:23 दिलेया फारोए थुँबै सैमैं पिंनेबै चिबइ योसेफलाइ आमैं, चइ योसेफलाइ म्‍लेयाइ।
GEN 41:1 ङ्हिदिं योबै लिउँइँ फारो म्रुँइ म्होंड घ्रि म्रोंइ। म्होंडर च नील स्योंए छ्योगोर रारिल।
GEN 41:2 नील स्योंउँइँले ख्युँइँ-ख्युँइँ ब्योंबै छो-छोबै म्येमैं ङिउँलो त्होंखसि काँसाए घारिर रेंबर होंइ।
GEN 41:3 च लिउँइँ ह्रुइब नेरो ट्हुबि मत्‍त्रे मुँबै प्ल्याँडु म्येमैं ङिउँलो नील स्योंउँइँलेन् त्होंसि ओंसोंबै म्येमैंने बालु राइ।
GEN 41:4 च ह्रुइब् नेरो ट्हुबि मत्‍त्रे मुँबै प्ल्याँडु म्येमैंइ च ख्युँइँ-ख्युँइँ ब्योंबै छो-छोबै म्येमैं ङिउँलो चवाइ। च त्हेर्न फारो छोरयाइ।
GEN 41:5 च लिउँइँ च धबै न्हरु च्हुयाइ‍, झाइले अर्को म्होंड म्रोंइ। म्रेब नेरो मिंबै रोए नाँमैं डाँठ घ्रिर्न ङिउँलो म्‍लोरिल।
GEN 41:6 च लिउँइँ आम्रेब नेरो स्यारउँइँले (पुर्बउँइँले) खबै लल खैंइ ङ्योंलोंवाबै रोए नाँ ङिउँलो त्होंइ।
GEN 41:7 झाइले च आम्रेबै नाँमैंइ च ङिउँलो छ्याँब नेरो म्रेबै नाँमैं क्ल्ह्‍योंवाइ। धै फारो छोरमा “च म्होंड मुँन!” बिब् सेइ।
GEN 41:8 न्हाँगर चए सैंर बेल्‍ले न्हुँ तसि चइ मिश्र ह्‍युलर्बै ताँन् जादु लब्मैं नेरो ह्रब-सेब्मैं हुइसि चमैंने चइ म्रोंबै म्होंडमैं सेइ। दिलेया फारोए म्होंडए अर्थ बिमिंब चर खाबै आत्हों।
GEN 41:9 च त्हेर च फारोए थुँबै सैमैं पिंनेबै चिबइ फारोने बिइ, “ङइ म्‍लेयाबै ताँ तिंयाँ चिइ।
GEN 41:10 क्हिइ ह्रोंसए केब्छैंमैंने ह्रिस खसि चबै सैमैं ह्‍योबै चिब, तोन्दोंरि सैमैं रुँबै कप्‍तान नेरो ङ पोतीफरए झेलर च्युवामा
GEN 41:11 म्हुँइँस तिरोर्न च नेरो ङइ स्यो-स्योबै अर्थ मुँबै म्होंडमैं म्रोंल।
GEN 41:12 च झेल न्होंर कप्‍तान पोतीफरए हिब्रू केब्छैं फ्रेंसि घ्रि ङिने बालु मुँल। चने ङिए म्होंडमैं सेमा चइ ङि ङ्हिंए म्होंडए अर्थ ङिने बिमिंइ।
GEN 41:13 ङिए म्होंडए अर्थर चइ खै बिल छान् तइ। ङ ह्रोंसए केर धबै एखइ, दिलेया च ह्‍योब्-तेब् लबै चिब बिस्याँ क्हिइ च्योवाइ।”
GEN 41:14 चु ताँ थेसि फारो म्रुँइ योसेफ हुइबर कुलइ, धै चमैंइ चलाइ झेलउँइँले पखइ। च दाह्रि मुरा नेरो क्र प्ह्रेसि छारा क्वें खिसि फारो ङाँर खइ।
GEN 41:15 फारो म्रुँइ योसेफने बिइ, “ङइ म्होंड घ्रि म्रोंइ। दिलेया च म्होंडए अर्थ चुर खाबज्यै या बिल् आखाँ। क्हिइ म्होंडए ताँमैं थेबै लिउँइँ अर्थमैं बिल् खाँम् रो बिब ङइ थेइ।”
GEN 41:16 योसेफइ फारोने बिइ, “छाबै ह्रबम् ङ आरे। दिलेया परमेश्‍वरजी क्हिए म्होंडए अर्थ बिमिंब्मुँ।”
GEN 41:17 फारो म्रुँइ योसेफने बिइ, “ङए म्होंडर ङ नील स्योंए छ्योगोर रारिल।
GEN 41:18 च त्हेर बेल्‍ले ख्युँइँ-ख्युँइँ ब्योंबै छो-छोबै म्येमैं ङिउँलो नील स्योंउँइँले त्होंसि काँसाए घारिर रेंबर होंइ।
GEN 41:19 च लिउँइँ ङिउँलो रालै आखाँन् ब्योंब ह्रुइब् नेरो ट्हुबि मत्‍त्रे मुँबै प्ल्याँडु म्येमैं त्होंखइ। ङइ मिश्रर खोंयोंइ आम्रोंबै म्येमैं चमैंए लिलि ह्‍याइ।
GEN 41:20 च ह्रुइब् नेरो ट्‍हुबि मत्‍त्रे मुँबै प्ल्याँडु म्येमैंइ ओंसोंबै ख्युँइँ-ख्युँइँ ब्योंबै छो-छोबै म्येमैं ङिउँलो चवाइ।
GEN 41:21 दिलेया चमैंइ च छोबै म्येमैं ङिउँलो चवाइ बिसि खाँबज्यै बिल् आखाँमल, तलेबिस्याँ चमैं अझै ओंसोंबै धोंबन् आछोबै प्ल्याँडु मुँल। झाइले ङ छोरयाइ।
GEN 41:22 “ङइ धबै म्होंडर चु या म्रोंइ। डाँठ घ्रिर्न ङिउँलो म्रेब नेरो मिंबै नाँ त्होंइ।
GEN 41:23 च लिउँइँ ङ्योंलोंयाब नेरो पुर्बउँइँले खबै लल खैंइ ल्हिवाबै आम्रेबै ङिउँलो नाँमैं त्होंइ।
GEN 41:24 च आम्रेबै नाँमैंइ च म्रेब नेरो मिंबै ङिउँलो नाँमैं क्ल्ह्‍योंवाइ। ङइ ह्रब्-सेब्मैंने चु म्होंड सेइ, दिलेया खाबज्यै या ङलाइ चुए अर्थ बिमिंल् आखाँ।”
GEN 41:25 लिउँइँ योसेफइ फारोने बिइ, “क्हिए म्होंडमैं ङ्हिंना-ङ्हिंनए अर्थ घ्रिन् ग। परमेश्‍वरजी तो लल् म्हैइमुँ च क्हिने उँइँमिंइमुँ।
GEN 41:26 च ख्युँइँ-ख्युँइँ ब्योंबै छो-छोबै म्येमैं ङिउँलो ङिदिं ग, धै च छ्याँबै नाँ ङिउँलो या ङिदिंन् ग। म्होंड घ्रिन् ग।
GEN 41:27 चमैंए लिउँइँ खबै ह्रुइब् नेरो ट्हुबि मत्‍त्रे मुँबै प्ल्याँडु म्येमैं ङिदिंन् ग। धै च खैंइ पोंवाबै आम्रेबै रोए नाँ ङिउँलो या अँङ्गल् ङिदिं समन् तम् बिब् ग।
GEN 41:28 परमेश्‍वरजी खीजी लल् म्हैबै के क्हिलाइ उँइमिंब् ग। चु ङइ क्हिने बिब् धोंलेन् तब्मुँ।
GEN 41:29 मिश्र ह्‍युलर खन्तोंदोंन् ङिदिं समा बेल्‍ले सागल तब्मुँ,
GEN 41:30 दिलेया च लिउँइँ ङिदिं समा बेल्‍ले अँङ्गल तब्मुँ, धै मिश्र ह्‍युल तिगोंन् च सागलए त्हे म्‍लेयाब्मु, धै अंङ्गलइ ह्‍युल नास लवाब्मुँ।
GEN 41:31 च लिउँइँ खबै अंङ्गलइ लमा ह्‍युलर तबै सागल मैंरिब् आरे। तलेबिस्याँ च अँङ्गल् बेल्‍ले ङ्हिंन् ङ्हाँब् तब्मुँ।
GEN 41:32 क्हिइ ङ्हिखे समा क्हेसि म्रोंबै म्होंडए अर्थ चुन् ग, चु क्ह्रोंसेंन लब् बिसि परमेश्‍वरजी मैंल् खाँइमुँ, धै परमेश्‍वरजी युनन् चु के लब्मुँ।
GEN 41:33 “छतसि तारे क्हिइ मिश्र ह्‍युलर ग्याल्स लबै ल्हागिर ह्रब्-सेब नेरो बुद्धि मुँबै म्हि त्हाँन्।
GEN 41:34 झाइले सागलाए ङिदिं समा मिश्र ह्‍युलर्बै म्ल्ह-नारिए ङ्‍हबाँ खुबर क्हिइ चाँजो लब्मैं त्हाँन्।
GEN 41:35 चमैंइ तारे खबै सागलए बर्षर्बै ताँन् म्ल्ह-नारिमैं खुरिगे। नाँस-नाँसर चबै ल्हागिर म्ल्ह-नारिमैं फारोए धनसारमैंर साँथेंरिगे, छतसि रुँबै म्हिमैं या त्हाँन्।
GEN 41:36 अंङ्गलइ ह्‍युल नास आतरिगे बिसि मिश्रर खबै ङिदिंबै अंङ्गलए ल्हागिर च म्ल्ह-नारिमैं छेनाले थेंमिंरिगे।”
GEN 41:37 चु छ्याँबै ताँ फारो नेरो चए ताँन् चिब्मैंइ खोइ।
GEN 41:38 झाइले फारो म्रुँइ चमैंने बिइ, “चु धों तबै परमेश्‍वरए प्ल्ह मुँबै म्हि ङ्योइ अरू योंल् खाँम्मा?”
GEN 41:39 छबिमा फारो म्रुँइ योसेफने बिइ, “परमेश्‍वरजी क्हिने ताँन् सैमैं उँइँमिंइमुँ। धै क्हि धों तबै ह्रब्-सेबै म्हि अरू खाबै आरे।
GEN 41:40 छतसि ङए ह्‍युलए फिर क्ल्हे क्हिन् तइ। क्हिइ बिब् धोंले ङए ताँन् म्हिमैं प्रब्मुँ। चु राजगद्दिए ल्हागिर मत्‍त्रे क्हि भन्दा ङ थेब् तब्मुँ।”
GEN 41:41 धबै फारो म्रुँइ योसेफने बिइ, “लु थेद्, क्हिलाइ मिश्र ह्‍युल तिगोंन् ङइ क्ल्हे तल् पिंइमुँ।”
GEN 41:42 छबिसि फारो म्रुँइ छाप मुँबै ह्रोंसए च्या योउँइँले प्लिसि योसेफए योर खिमिंइ। धै छ्याँबै मलमलाए क्वेंइ पैरेमिंसि चए खरिर माराए सिग्रि खिमिंइ।
GEN 41:43 झाइले योसेफलाइ फारोइ ह्रोंसए न्होंर्बै चिब धोंले रथर क्रेसि स्युरइ। छतमा योसेफए ओंसों-ओंसों “च्हि तुँसि फ्योद्!” बिदै म्हिमैं ओरप्रइ। छले फारो म्रुँइ योसेफलाइ मिश्र ह्‍युल तिगोंन् क्ल्हे तल् पिंइ।
GEN 41:44 फारो म्रुँइ धबै योसेफने बिइ, “ङ फारो म्रुँ ग, दिलेया क्हिजी तम् तम् लद् आबिन् समा चु मिश्र ह्‍युलर खाबज्यै या तोइ लल् योंरिब् आरे।”
GEN 41:45 फारो म्रुँइ योसेफए मिं सापनत-पानेह थेंइ। धै चइ चलाइ ओन बिबै देवताए खेगि पोतिपेराए च्हमि आसनतने बालु ब्ह्‍या लमिंइ। च लिउँइँ योसेफ मिश्र ह्‍युलर खन्तोंदोंन् प्रबर होंइ।
GEN 41:46 मिश्रर्बै फारो म्रुँए के लबै त्हेर योसेफ सोंच्यु बर्षर्बै मुँल। च त्हेसेरो योसेफ फारो ङाँइले त्होंसि मिश्र ह्‍युल तिगोंन् प्रबर होंइ।
GEN 41:47 सागलाए ङिदिं समा म्रोंउँइँले बेल्‍ले ल्हें रा-रोमैं खइ।
GEN 41:48 छतमा चइ मिश्रर्बै म्रोंर्बै ताँन् रा-रोमैं सागलए ङिदिं समा खागु लसि नाँ-नाँसर ङ्‍हेरेथेंइ।
GEN 41:49 मा ङ्युँइर्बै बालुवा खुब् धोंलेन् योसेफइ ल्हें-ल्हें रा-रोमैं खुइ। रा-रोमैं ल्हें तबइले चइ हिसाब थेंबै या पिवाइ।
GEN 41:50 अँङ्गल तब् भन्दा ओंसोंन् ओन् बिबै देवताए खेगि पोतिपेराए च्हमि आसनत ङाँइले योसेफल च्हमैं ङ्हिं योंल् खाँल।
GEN 41:51 “परमेश्‍वरजी ङए ताँन् दुःख नेरो ङए आबाए धिंर्बै ताँमैं ङलाइ म्‍लेल् पिंइमुँ,” बिसि योसेफइ च्ह थेबए मिं मनश्शे थेंइ।
GEN 41:52 “ङइ दुःख योंबै ह्‍युलरै या परमेश्‍वरजी ङलाइ च्हमैं पिंइमुँ,” बिसि चइ च्ह च्योंबए मिं एफ्राइम थेंइ।
GEN 41:53 मिश्र ह्‍युलर ङिदिंबै सागलए त्हे नुयाइ।
GEN 41:54 झाइले योसेफइ बिब् धोंलेन् ङिदिंबै अँङ्गल खबर होंइ। ताँन् ह्‍युलर अँङ्गल् तइ। दिलेया मिश्र ह्‍युलर बिस्याँ रा-रोमैं ल्हें मुँल।
GEN 41:55 मिश्र ह्‍युल तिंगोंन् अँङ्गल तसि तो म्हैसे तोइ आयोंमा चर्बै म्हिमैंइ फारो म्रुँने बालु “रा-रोमैं पिंन्” बिसि यो छ्युँ लइ। छलमा फारो म्रुँइ ताँन् मिश्रीमैंने “योसेफ ङाँर ह्‍याद्। चइ क्हेमैंने तो लद् बिमुँ छान् लद्,” बिइ।
GEN 41:56 मिश्र ह्‍युल तिंगोंन् अँङ्गल तइ, झाइले योसेफइ ताँन् धनसारमैं थोंसि मिश्रीमैंने रा-रोमैं चुँबर होंइ। तलेबिस्याँ मिश्र ह्‍युल तिंगोंन् बेल्‍ले थेबै अँङ्गल् तल।
GEN 41:57 पृथ्‍बी तिंगोंन् थेबै अँङ्गल् तल। छतसि ताँन् ह्‍युलर्बै म्हिमैं मिश्रर योसेफ ङाँर रा-रोमैं किंबर खइ।
GEN 42:1 मिश्रर म्ल्ह-नारिमैं मुँ बिब् सेसि याकूबइ ह्रोंसए च्हमैंने बिइ, “क्हेमैं तले घ्रिइ घ्रिए लिर ङ्ह्‍योसि टिरिमुँ?
GEN 42:2 मिश्रर म्ल्ह-नारिमैं मुँ रो बिब ङइ थेइमुँ। ङ्यो सोब् गो बिस्याँ चर ह्‍यासि ङ्योए ल्हागिर म्‍ल्ह-नारिमैं किंइ पखो।”
GEN 42:3 आबाइ छबिमा योसेफए आघेंमैं च्युउँलो मिश्रर म्‍ल्ह-नारिमैं किंबर ह्‍याइ।
GEN 42:4 दिलेया याकूबइ योसेफए अलि बेन्यामीन आघेंमैंने बालु आकुल। तलेबिस्याँ चलाइ तोइ तयाम् उ ङ्हाँसि याकूब ङ्हिंल।
GEN 42:5 छले याकूबए च्हमैं अरू म्हिमैंने बालु म्‍ल्ह-नारिमैं किंबर ह्‍याइ। तलेबिस्याँ कनान ह्‍युलरै या अँङ्गल् तल।
GEN 42:6 च त्हेर योसेफ मिश्रर्बै क्रथे मुँल। ह्‍युलर्बै ताँन् म्हिमैंने म्‍ल्ह नारिमैं चुँब या चन् मुँल। छतसि योसेफए आघेंमैं खसि क्र कुरदै चलाइ फ्योइ।
GEN 42:7 योसेफइ ह्रोंसए आघेंमैं म्रोंसि ङो सेइ। दिलेया चइ चमैंने बालु ङो आसेब् धोंले “क्हेमैं खनिउँइँले खल?” बिसि थेबै कैले ङ्योएइ। चमैंइ बिइ, “ङि कनान ह्‍युलउँइँले म्‍ल्ह-नारिमैं किंबर खब् ग।”
GEN 42:8 योसेफइ ह्रोंसए आघेंमैं ङो सेलेया चमैंइ बिस्याँ चलाइ ङो आसेल।
GEN 42:9 छतमा चमैंए बारेर ओंसोंन् चइ म्रोंबै म्होंड मैंसि योसेफइ चमैंने बिइ, “क्हेमैं छैं लबर खब्मैं ग। चु ह्‍युलर तो-तो मुँगे बिसि क्होबर क्हेमैं खब् ग।”
GEN 42:10 चमैंइ योसेफने बिइ, “ओ चिब, छ आङिं। ङि क्हिए केब्छैंमैं म्‍ल्ह-नारिमैं किंबर खब् ग। ङि ताँन् म्हि घ्रिए च्हमैं ग।
GEN 42:11 ङि सोजो म्हिमैं ग, ङि क्हिए केब्छैंमैं ग, छैं लबर खब्मैं आङिं।”
GEN 42:12 चइ चमैंने बिइ, “आङिं, क्हेमैं चु ह्‍युलर तो-तो तरिगे बिसि क्होबर खब् ग।”
GEN 42:13 छबिमा चमैंइ बिइ, “क्हिए केब्छैंल ङि च्युसे ङ्हिं आघें-अलिमैं मुँल। ङि कनान ह्‍युलर्बै म्हि घ्रिए च्हमैं ग। च्योंब तोगो आबाने मुँ। अलि घ्रि बिस्याँ ङिने आरे।”
GEN 42:14 योसेफइ चमैंने बिइ, “ङइ बिब् धोंलेन् क्हेमैं क्ह्रोंसेंन्ले छैं लबर खब्मैंन् मुँन।
GEN 42:15 तारे ङइ क्हेमैंए जाँच छले लब्मुँ। फारो म्रुँए मिंर कसम चसि ङ बिमुँ, क्हेमैंए च्योंब अलि आखन् समा चु क्ल्ह्‍योउँइँले क्हेमैं ह्‍याल् योंरिब् आरे।
GEN 42:16 छतसि क्हेमैंए न्होंर घ्रि क्हेमैंए अलि किंबर कुलद्। च आखन् समा क्हेमैं झेलर टिल् त्हुम्। छले क्हेमैंए ताँ क्ह्रोंसेंन्बै ङिंब उ आङिं बिसि ङइ ङ्ह्‍योब्मुँ। क्ह्रोंसेंन्बै आङिंस्याँ फारो म्रुँए मिंर कसम चसि ङ बिमुँ क्हेमैं छैं लब्मैंन् ग।”
GEN 42:17 झाइले योसेफइ चमैं ताँन् सोंरो समा झेल घ्रिर्न च्युथेंइ।
GEN 42:18 सोंरो लिउँइँ योसेफइ चमैंने बिइ, “ङ परमेश्‍वरने ङ्हिंबै म्हि ग। छतसि क्हेमैंइ चु के लस्याँ क्हेमैं सोब्मुँ।
GEN 42:19 क्ह्रोंसेंन्लेन् क्हेमैं सोजो म्हिमैं ग बिस्याँ क्हेमैंए न्होंर घ्रि चु झेलर्न टिद्। धै अरूमैं क्हेमैंए फोदें परवामैं चल् पिंबै ल्हागिर म्‍ल्ह-नारिमैं बोसि ह्‍याद्।
GEN 42:20 धै क्हेमैंए च्योंबै अलि ङ ङाँर पइ खो। छ लस्याँ मत्‍त्रे ङइ क्हेमैंए ताँ क्ह्रोंसेंन्बै मुँन बिसि सेब्मुँ। धै क्हेमैं सिरिब् आरे। छबिमा चमैंइ छान् लइ।”
GEN 42:21 चमैंइ खें-खेंमैंए न्होंर बिइ, “क्ह्रोंसेंन ङ्योइ ह्रोंसए अलिलाइ दुःख पिंबइले तोगो ङ्योइ चु नों योंइमुँ। तलेबिस्याँ चइ ङ्योने यो छ्युँ लसि क्रोसेया ङ्योइ चए ताँ आथे। छतसि चु छाबै दुःख ङ्योए फिर खब् ग।”
GEN 42:22 रूबेनइ चमैंने बिइ, “ङइ च कोलो तोइ आलद् बिसि क्हेमैंने बिब् आङिं वा? क्हेमैंइ थेबै न्ह आल। तारे चलाइ सैवाबै नों ङ्योइ नोल् त्हुम्।”
GEN 42:23 योसेफ नेरो ह्रोंसए आघेंमैं स्यो-स्योबै क्युइ पोंमल। छतसि चमैंइ पोंबै ताँमैं योसेफइ क्होम् उ बिसि चमैंइ आसेल।
GEN 42:24 योसेफ चमैंउँइँले तिराइ तोसि क्रोइ। तिस्यादे लिउँइँ चमैं ङाँइ तोसि चमैंने ताँ सेइ। च लिउँइँ चइ चमैंउँइँले शिमियोन किंसि चमैंए मिए ओंसोंन् चलाइ फैइ।
GEN 42:25 योसेफइ के लब्मैंने बिइ, “चमैंए नेंदोंजरे म्‍ल्ह-नारिमैं झोंमिंन्, धै चमैंइ पखबै चाँदिए मुइ या चमैंए नेंदोंर्न झोंमिंन्। धै चमैंए ल्हागिर घ्याँर चबै सैमैं या पिंन्।” बिमा चमैंइ छान् लइ।
GEN 42:26 झाइले ह्रोंसए गधामैं फिर म्‍ल्ह-नारिमैं थेंसि चमैं छाइले प्रइ।
GEN 42:27 घ्याँर बास टिबै क्ल्ह्‍योर चमैं न्होंर्बै म्हि घ्रिइ ह्रोंसए गधा दाना पिंब् बिसि नेंदों फैमा नेंदोंए सुँर खेंमैंए चाँदिए मुइ या म्रोंइ।
GEN 42:28 चइ आघें-अलिमैंने बिइ, “ङए चाँदिए मुइम् एमिंन उ तो जा? ङ्ह्‍योत्ति, चुर ङए नेंदोंए सुँर्न मुँ।” छ बिब् थेमा चमैंए सैंइ क्ल्ह्‍यो पिवाइ। चमैं ङ्हिंसि त्हारदै खें-खेंमैं न्होंर “परमेश्‍वरजी ङ्योने चु तो लगे?” बिबर होंइ।
GEN 42:29 झाइले चमैं कनान ह्‍युलर ह्रोंसए आबा याकूब ङाँर फेनेसि खेंमैंए फिर तबै ताँमैं ताँन् आबाने बिइ।
GEN 42:30 “च ह्‍युलर्बै क्ल्हेइ ङिने थेबै कैले पोंइ। चइ ङिने च ह्‍युलर्बै छैं लबर खब्मैं बिइ।
GEN 42:31 दिलेया ‘ङिम् सोजो म्हिमैं ग। ङि छैं लबर खब्मैं आङिं,’ बिसि ङिइ बिइ।
GEN 42:32 ‘ङि ताँन् आबा घ्रिए च्हमैं ग। ङिए त्येमैं च्युसे ङ्हिं मुँल, च्योंब तोगो कनान ह्‍युलर आबाने बालु मुँ, अलि घ्रि आरे।’
GEN 42:33 “छबिमा च ह्‍युलर्बै क्ल्हेइ ङिने बिइ, ‘चु ताँउँइँले क्हेमैं सोजो म्हिमैं मुँन बिसि ङइ सेब्मुँ। क्हेमैंए आघें-अलिमैं न्होंर घ्रि चुर ङने वाथेंन्। अरू अंङ्गलर क्हेमैंए परवा फोदें आतरिगे बिसि म्‍ल्ह-नारिमैं किंसि ह्‍याद्।
GEN 42:34 धै क्हेमैंए च्योंबै अलि चुर ङ ङाँर पखो। छ लस्याँ क्हेमैं छैं लबर खब्मैं आङिंन, सोजो म्हिमैं मुँन बिसि ङइ सेब्मुँ। धै ङइ क्हेमैंए अलि क्हेमैंए योर पिंस्यो। झाइले क्हेमैं चु ह्‍युलर छों लल् योंब्मुँ।’”
GEN 42:35 छबिसि चमैंइ खेंमैंए नेंदोंमैं स्वालमा नेंदोंए सुँर चमैं ताँनए चाँदिए मुइ मुँन! छले नेंदोंर चाँदिए मुइ म्रोंसि चमैं नेरो चमैंए आबा ङ्हिंयाँइ।
GEN 42:36 चमैंए आबा याकूबइ चमैंने बिइ, “क्हेमैंइ ङए च्हमैं ङ ङाँइले प्हेंसि ङ बेल्‍ले न्हुँ खन् लइमुँ। योसेफ आरे, शिमियोन चर वाथेंइ तारे बेन्यामीन या बोल् म्हैइमुँ। छले ताँन् दुःखमैं ङए फिर्न तखइमुँ!”
GEN 42:37 दिलेया रूबेनइ ह्रोंसए आबाने बिइ, “बेन्यामीन ङए जिम्मार पिंन् ङइ च क्हि ङाँर्न एपखब्मुँ। बेन्यामीन क्हि ङाँर आपखस्याँ ङए च्ह ङ्हिं क्हिइ सैवाद्।”
GEN 42:38 दिलेया याकूबइ बिइ, “ङए च्ह क्हेमैंने ह्‍यारिब् आरे! तलेबिस्याँ चए आघें सियाइ तारे चु घ्रि चैमुँ। छतसि क्हेमैंइ बोम् बिबै क्ल्ह्‍योर चए फिर तोइ आछ्याँब तखइ बिस्याँ ङ खेब् तसि क्र सारयाबै त्हेर शोकने बालु क्रोंर सथेंनेब्मुँ।”
GEN 43:1 कनान ह्‍युलर ङ्हिंन् ङ्हाँबै अँङ्गल् तल।
GEN 43:2 मिश्रउँइँले पखबै म्‍ल्ह-नारिमैं चमैंइ चल् खाँल छतमा चमैंए आबाइ चमैंने “ङ्योए ल्हागिरि च्हौदे म्‍ल्ह-नारिमैं किंबर धबै ह्‍याद्,” बिइ।
GEN 43:3 आबाइ छबिमा योसेफए आघें यहूदाइ चने बिइ, “‘क्हेमैंए अलि क्हेमैंने बालु आपखस्याँ ङए उँइँर खल् योंरिब् आरे!’ बिसि च म्हिइ ङिने बिइमुँ।
GEN 43:4 छतसि ङिए अलि ङिने बालु क्हिइ कुलस्याँ ङि ह्‍यासि क्हिए ल्हागिर म्‍ल्ह-नारिमैं किंसि पखब्मुँ।
GEN 43:5 चलाइ आकुलस्याँ ङि या आह्‍या। तलेबिस्याँ ‘क्हेमैंए अलि क्हेमैंने बालु आपखस्याँ क्हेमैं ङए ङाँर खल् योंरिब् आरे,’ बिसि च म्हिइ बिइमुँ।”
GEN 43:6 छबिमा याकूबइ (इस्राएलइ) बिइ, “क्हेमैंल अर्को अलि या मुँ बिसि च म्हिने बिइरि ङए फिर क्हेमैंइ तले छाबै न्हुँ तल् पिंल?”
GEN 43:7 चमैंइ बिइ, “च म्हिइ ङ्योए परवाए बारेर ङ्योएब्-च्वेब् लसि ‘क्हेमैंए आबा सोगोंन् मुँ वा? क्हेमैंल अरू अलि या मुँ वा?’ बिसि ङ्योएइ। छले ङ्योएमा ‘अँ, ङिल अलि घ्रि मुँ,’ बिसि ङिइ बिल् त्हुइ। चइ ‘क्हेमैंए अलि चुर पखो’ बिब्मुँ बिसि ङिइ खैले सेब्दि?”
GEN 43:8 झाइले यहूदाइ आबाने बिइ, “बेन्यामीन ङने बालु कुलमिंन् क्हिइ च ङिने बालु कुलस्याँ ङि ह्‍याब्मुँ। धै ङ्यो नेरो ङ्योए प्हसेमैं चल् आयोंसि सिल् त्हुरिब् आरे।
GEN 43:9 चुए जिम्मा ङ तइ। ङइ च खैले बिलै क्हि ङाँर एपखस्यो। ङइ चु एसि क्हिए ओंसों आथेंस्याँ ङ खोंयोंन् बिलै या क्हिए उँइँर छ्याब् मुँबन् ठर्दिब्मुँ।
GEN 43:10 ङ्योइ क्हैल् आलस्याँ ङ्यो ङ्हिखे समा ह्‍याब-खब लल् खाँमल।”
GEN 43:11 झाइले चमैंए आबाइ चमैंने बिइ, “छ आलै आत बिस्याँ छ लद्: चु ह्‍युलर्बै छ्याँ-छ्याँबै सैमैं, लिंबै थाँ खबै फोबै छ्युगु, च्हौदे, क्वे खुदु, छ्याँबै मसला, मुर्रा, पेस्ता नेरो बदाम च म्हिए ल्हागिरि क्हेमैंए नेंदोंर झोंसि बोमिंन्।
GEN 43:12 क्हेमैंइ चाँदिए मुइ या दोब्बर बोसि ह्‍याद्। तलेबिस्याँ ओंसोंबै मुइ या क्हेमैंए नेंदोंए सुँर फेखल। म्‍लेयासि क्हेमैंए नेंदोंर फेखलै। च मुइ एवाल् त्हुम्।
GEN 43:13 ह्रोंसए अलि या किंसि धबै च म्हि ङाँर ह्‍याद्।
GEN 43:14 क्हेमैंए अर्को अलि नेरो बेन्यामीन फ्रेपखबै ल्हागिर च म्हिए उँइँरि तोन्दोंरि सै लल् खाँबै परमेश्‍वरजी क्हेमैंए फिर ल्हयो खरिगे। ङ प्हसे आरेब् तयाम् बिलेन तरिगे।”
GEN 43:15 झाइले चमैंइ ह्रोंमैं-क्होल्सै, दोब्बर चाँदिए मुइ नेरो बेन्यामीन किंसि मिश्रउँइँ ह्‍याइ, धै योसेफए ओंसों राइ।
GEN 43:16 योसेफइ चमैंने बालु बेन्यामीन म्रोंसि ह्रोंसए धिंर्बै के लब्मैंए चिबने बिइ, “चु म्हिमैं ङए धिंर बोदु, धै क्यु साँडे घ्रि सैसि कैं-ट्हा ह्‍योद्। चु म्हिमैं तिंयाँ त्हिंयाँर ङने बालुन् चब् चब्मुँ।”
GEN 43:17 योसेफइ लद् बिब् धोंलेन् च चिबइ लइ। धै च म्हिमैं योसेफए धिंर पखइ।
GEN 43:18 छले योसेफए धिंर पखमा योसेफए आघेंमैं ङ्हिंसि खें-खेंमैंन् बिइ, “ओंसोंबै लार ङ्योए नेंदोंर एमिंबै चाँदिए मुइइ लमा ङ्यो चुर खल् त्हुब् ग। तारे चइ ङ्योने निउँ म्हैसि ङ्यो ह्रोंसए केब्छैं लवाब्मुँ। धै ङ्योए गधामैं या प्हेंसि किंवाब्मुँ।”
GEN 43:19 छतसि चमैंइ योसेफए धिंर्बै के लबै चिबने म्रार ह्‍यासि बिइ,
GEN 43:20 “ओ चिब, ओंसों या ङि म्‍ल्ह-नारिमैं किंबर खल।
GEN 43:21 धिंर एह्‍यामा बास टिबै क्ल्ह्‍योर फेसि ङिए नेंदों प्ल्हमा ङिइ नेंदोंमैंए सुँर ङिए चाँदिए मुइ म्रोंइ। दिलेया ङिइ चु मुइ एपखइमुँ।
GEN 43:22 ङिए नेंदोंर ङिए चाँदिए मुइ खाबइ झोंमिंइ च ङिइ आसे। तोगो म्‍ल्ह-नारिमैं किंबर अर्को मुइ या ङिइ पखइमुँ।”
GEN 43:23 चिबइ बिइ, “क्हेमैं न्हुँ आलद्, आङ्हिंन्। क्हेमैंए परमेश्‍वर, क्हेमैंए आबाए परमेश्‍वरजीन् च मुइ क्हेमैंए नेंदोंर थेंमिंलै। क्हेमैंइ बोबै म्‍ल्ह-नारिए सैम् ङइ योंल।” च्हौ बिसि चइ शिमियोन झेलउँइँले चमैं ङाँर पखइ।
GEN 43:24 च म्हिइ चमैं योसेफए धिं न्होंर बोसि खेंमैंए प्हले ख्रुबर क्यु पिंइ, धै चमैंए गधामैं या चबै सैमैं नेरो क्यु पिंइ।
GEN 43:25 झाइले त्हिंइ आधार योसेफने त्होनेब् बिसि खेंमैंइ पखबै क्होल्सैमैं छेइ, तलेबिस्याँ चिबइ कैं चर्न चब्मुँ बिसि चमैंने बिल।
GEN 43:26 योसेफ धिंर खबै लिउँइँ चमैंइ खेंमैंइ पखबै क्होल्सैमैं योसेफलाइ पिंसि यो छ्युँ लसि फ्योइ।
GEN 43:27 योसेफइ चमैंने ताँमैं ङ्योलु-च्युलु लदै “क्हेमैंए खेब् तयाबै आबा सबन् मुँ वा? च तोगो सोगोंन् मुँ वा?” बिसि ङ्योएमा
GEN 43:28 चमैंइ बिइ, “क्हिए केब्छैं, ङिए आबा सबन् मुँ, तिंयाँ समा सोरिइमुँ,” बिदै कुरसि चलाइ फ्योइ।
GEN 43:29 योसेफइ ङ्ह्‍योमा ह्रोंसए अलि ह्रोंसए आमाइ फिबै च्ह बेन्यामीन म्रोंसि बिइ, “क्हेमैंइ ङने बालु ताँ लबै क्हेमैंए च्योंबै अलि चुन् वा?” धै योसेफइ चने बिइ, “ओ आच्यों, परमेश्‍वरए दयाम्हाँया क्हिए फिर तरिगे।”
GEN 43:30 ह्रोंसए अलि म्रोंमा चए सैंर बेल्‍ले म्हाँया खसि क्रोदा ङ्हाँसि योसेफइ युन्ले क्रोबै क्ल्ह्‍यो म्हैइ। धै च रोबै क्ल्ह्‍योर ह्‍यासि क्रोइ।
GEN 43:31 तिस्याँदे लिउँइँ लि ख्रुसि आक्रोब्धों ब्योंन्ले बैरु युसि चब् लब्मैंने बिइ, “तारे चब् पखो।”
GEN 43:32 झाइले चब् लब्मैंइ योसेफए ल्हागिर स्योले, आघें-अलिमैंए ल्हागिर स्योले धै चने बालु चबै अरू मिश्रीमैंए ल्हागिर स्योले कैं थेंइ, तलेबिस्याँ मिश्रीमैंइ हिब्रूमैंने बालु क्हुँसि चब् चब आतमल। छ लस्याँ मिश्रीमैंल मिं ह्‍यामल।
GEN 43:33 थेबउँइँले च्योंब समा ह्रों-ह्रोंसए उमेर अनुसार योसेफइ चमैं क्हुँल् पिंल। छले क्हुँमिंब् म्रोंसि चमैं प्लेटोयासि घ्रिइ घ्रिलाइ ङ्ह्‍योबर होंइ।
GEN 43:34 चमैंए भाउ योसेफए टेबलउँइँले ट्हुइसि बोल। दिलेया बेन्यामीनए भाउ चमैं ताँनल् भन्दा ङ्‍हबाँ ल्हें मुँल। छले चमैंइ योसेफने बालु चब् थुँब् लसि सैं तोंइ।
GEN 44:1 च लिउँइँ योसेफइ ह्रोंसए धिंर्बै के लबै चिबने बिइ, “चमैंइ बोल् खाँबै म्‍ल्ह-नारिमैं चमैंए नेंदोंर झोंमिंन् धै चमैंए चाँदिए मुइ या चमैंए नेंदोंए सुँर थेंमिंन्।
GEN 44:2 झाइले ङए चाँदिए प्ह्‍येल नेरो म्‍ल्ह-नारिमैं किंब् बिसि चमैंइ पखबै चाँदि बालु लसि च्योंबए नेंदोंए सुँर झोंमिंन्।” छबिमा योसेफइ बिब् धोंलेन् चइ लइ।
GEN 44:3 प्हँन्हाँग्धों न्हाँगर्न योसेफइ ह्रोंसए आघें अलिमैं खेंमैंए गदामैंने बालुन् कुलमिंइ।
GEN 44:4 चमैं सहरउँइँले दे क्याइ फेनेबै लिउँइँ योसेफइ केब्छैंमैं न्होंर्बै चिबने बिइ, “क्हि युन्ले च म्हिमैंए लिलि ह्‍यादु, धै चमैंने त्होसि ‘ङिइ छेन् लना लन् क्हेमैंइ ङिए न्होह्रों तले लल? बिद्।
GEN 44:5 ङए क्ल्हेए चाँदिए प्ह्‍येल तले पखल? चु प्ह्‍येलर्न ङए क्ल्हेइ थुँबै सैमैं थुँम्, धै च प्ह्‍येलउँइँलेन् चइ छ्याँब्-आछ्याँब फेलम् चु क्हेमैंइ बेल्‍ले आछ्याँबै के लइ।’”
GEN 44:6 च के लबै चिबइ चमैंने त्होबै लिउँइँ क्ल्हेइ खै बिल छान् बिमा
GEN 44:7 चमैंइ के लबै चिबने बिइ, “ओ चिब, तले छाबै ताँ लल? छाबै के क्हिए केब्छैंमैंइ खोंयोंइ आल।
GEN 44:8 ङिए नेंदोंमैंए सुँर ओंसों योंबै चाँदि ङिइ कनान ह्‍युलउँइँले एसि चुर पखइ, आङिं वा? ङिइ खैले क्हिए क्ल्हेए धिंउँइँले चाँदि नेरो मारा ह्‍योमल?
GEN 44:9 क्हिए केब्छैंमैंए न्होंर खाब्ने च प्ह्‍येल स्यामुँ च सैवाद्। धै ङि या क्हिए केब्छैंमैं तब्मुँ।”
GEN 44:10 च चिबइ बिइ, “तम्, क्हेमैंइ बिब् धोंन् तरिगे। दिलेया खाब्ने बालु च प्ह्‍येल स्यामुँ च ङए केब्छैं तब्मुँ। अरूमैं बिस्याँ छ्याब् मुँब तरिब् आरे, चमैं ह्‍याल् खाँम्।”
GEN 44:11 छबिमा ताँनइ युन्ले ह्रों-ह्रोंसए नेंदों सर थेंसि प्ल्हइ।
GEN 44:12 झाइले च चिबइ थेब्मैंए नेंदोंउँइँले म्हैबै तों लमा च प्हेल बेन्यामीनए नेंदोंर योंइ।
GEN 44:13 छतमा चमैं सैं नसि ह्रोंसए क्वें ट्होइ। धै गदामैं फिर ति थेंसि सहरउँइँ एखइ।
GEN 44:14 यहूदा नेरो चए आघें-अलिमैं योसेफए धिंर फेखमा च चर्न मुँल। धै चमैंइ चए ओंसों खसि फ्योइ।
GEN 44:15 योसेफइ चमैंने बिइ, “क्हेमैंइ छाबै के तले लल? आसेल्‍ले लबै के ङ धों तबै म्हिइ सेम् बिसि क्हेमैंइ आसेल् वा?”
GEN 44:16 यहूदाइ बिइ, “ङिइ क्हिने तो बिब, चु ताँर ङिइ खैले आङिं बिल् खाँमुँ? क्हिए केब्छैंमैंए आछ्याँबै केमैं परमेश्‍वरजी उँइँमिंइमुँ। तारे नेंदोंर च प्ह्‍येल स्याबै म्हि मत्‍त्रे आङिं, ङि ताँन् क्हिए केब्छैंमैं तइ।”
GEN 44:17 दिलेया योसेफइ बिइ, “ङ ङाँइले छाबै के खोंयोंइ तरिब् आरे। नेंदोंर च प्ह्‍येल स्याबै म्हि मत्‍त्रे ङए केब्छैं तब्मुँ। छतसि क्हेमैं छिं ङ्हाँन्ले ह्रोंसए आबा ङाँर सैं तोंदै ह्‍याद्।”
GEN 44:18 दिलेया यहूदा योसेफए उँइँर ह्‍यासि बिइ, “ओ ङए प्रभु, ङ यो छ्युँ लमुँ क्हिए केब्छैंइ ताँ घ्रि बिल् पिंन्। क्हि म्रुँ धों तबै थेबै म्हि ग दिलेया क्हिए केब्छैंने बालु ह्रिस आखमिंन्।
GEN 44:19 क्हिइ ह्रोंसए केब्छैंमैंने ‘क्हेमैंल आबा नेरो अरू अलि या मुँ वा?’ बिसि ङ्योएल
GEN 44:20 छतसि ङिइ क्हिने बिइ, ‘ङिए आबा खेब् तयाइमुँ। च खेब् तयाबै त्हेर्बै कोलो ङिल अलि च्योंब घ्रि मुँ। चए आघें सियाल् खाँइ। चए आमाउँइँले फिब तारे च घ्रि मत्‍त्रे मुँ। छतसि आबाइ चलाइ बेल्‍ले खोम्।’
GEN 44:21 “छबिमा क्हिइ ह्रोंसए केब्छैंमैंने ‘च चुर ङ ङाँर पखो, ङइ ङ्ह्‍योम्,’ बिइ।
GEN 44:22 ‘च कोलोइ ह्रोंसए आबा वाथेंल् आखाँ। चइ ह्रोंसए आबा वाथेंइ बिस्याँ चए आबा सियाब्मुँ,’ बिसि ङिइ क्हिने बिल।
GEN 44:23 दिलेया क्हिइ ङिने बिइ, ‘क्हेमैंए च्योंबै अलि क्हेमैंने बालु आपखस्याँ क्हेमैं धबै ङए ओंसों राल् योंरिब् आरे।’
GEN 44:24 “छतसि ङि ङिए आबा ङाँर ह्‍यासि क्हिइ बिबै ताँमैं चने बिइ।
GEN 44:25 छबिमा ङिए आबाइ बिइ, ‘धबै ह्‍यासि च्युगुदे म्‍ल्ह-नारिमैं किंइ पखो।’
GEN 44:26 छबिमा ‘ङि ह्‍याल् आखाँ। ङिए च्योंबै अलि ङिने बालु कुलस्याँ ङि ह्‍याब्मुँ। ङिए च्योंबै अलि ङिने बालु आकुलस्याँ ङि च म्हिए उँइँर ह्‍याल् योंरिब् आरे,’ बिसि ङिइ चने बिल।
GEN 44:27 “छबिमा ङिए आबाइ ङिने बिइ, ‘ङए प्ह्रेंस्यो राहेलउँइँले च्ह ङ्हिं तब क्हेमैंइ सेइमुँ।
GEN 44:28 चमैं न्होंरि च्ह घ्रिइ ङलाइ वाथेंइ। च त्हेसेरो ङइ चलाइ आम्रोंइमुँ, धै क्ह्रोंसेंन्लेन् क्ह्‍योंर्बै सिंहमैंइ चलाइ चवासि ङए च्ह च्यता-चिति लवालै।
GEN 44:29 चु च्योंबै या क्हेमैंइ ङ ङाँइले बोसि चए फिर तोइ तयास्याँ ङए चु सारयाबै क्र शोकने बालुन् क्रोंर सथेंनेब्मुँ।’
GEN 44:30 “छतसि ङि ङिए आबा ङाँर फेनेमा ङिने बालु चु कोलो आम्रोंसि आत। तलेबिस्याँ चु कोलो ङ्ह्‍योसिन् च सोरिइमुँ।
GEN 44:31 छतसि ङिने बालु चु कोलो आम्रोंबै तोदोंन् च सियाब्मुँ। ङि क्हिए केब्छैंमैंइ क्र सारयाबै ङिए आबा शोकने बालुन् क्रोंर सनेल् त्हुब्मुँ।
GEN 44:32 च्हौ मत्‍त्रै आङिं! क्हिए च्ह ङए अलि खैलसे या क्हि ङाँर एपखस्यो बिसि ङइ आबाने बिथेंइमुँ। ‘ङइ चु कोलो क्हि ङाँर एइ आपखस्याँ ङए छ्ह तिगोंन् ङ क्हिए ओंसों छ्याब् मुँबन् तरिब्मुँ।’
GEN 44:33 “छतसि चिब, ङ क्हिने यो छ्युँ लमुँ चु कोलोए क्ल्ह्‍योर ङ क्हिए केब्छैं तल् पिंन्। धै चु कोलो चए आघेंमैंने बालु धिंर एह्‍याल् पिंन्।
GEN 44:34 तलेबिस्याँ चु कोलो ङने बालु आबोल्‍ले ङए आबा ङाँर ङ खैले ह्‍याब? ङए आबाए फिर दुःख तब ङइ ङ्ह्‍योल् आखाँ।”
GEN 45:1 छबिमा ह्रोंसए ङाँर रारिबै ताँन् केब्छैंमैंए ओंसों सैं फैल् आखाँसि योसेफइ ओरसि “ताँन् म्हिमैं छुइले बैरु कुलमिंन् बिइ।” छबिमा चर मुँबै म्हिमैं ताँन् बैरु ह्‍याइ। छतमा योसेफइ ह्रोंसए आघें-अलिमैंने ह्रोंसलाइ ङो सेमिंमा चर अरू खाबै आरेल।
GEN 45:2 छतसि च थेबै कैले क्रोइ, धै च क्रोब मिश्रीमैंइ थेइ। धै फारोए परवाज्यै या चु ताँ सेइ।
GEN 45:3 योसेफइ ह्रोंसए आघें-अलिमैंने बिइ, “ङ योसेफ ग। ङए आबा अझै सोगोंन् मुँ वा?” छबिमा आघेंमैं चने ङ्हिंसि तोइ बिल् आखाँ।
GEN 45:4 छतसि योसेफइ ह्रोंसए आघें-अलिमैंने “गार आम्हाँदिल्‍ले ङ ङाँर खो!” बिइ। चमैं च ङाँर खबै लिउँइँ चइ बिइ, “क्हेमैंइ मिश्रर चुँवाबै क्हेमैंए अलि ङन् ग।
GEN 45:5 क्हेमैंइ ङलाइ चुँवाबै ताँर क्हेमैं न्हुँ आलद्। ह्रोंसए फिरै या ह्रिस आलद्। तलेबिस्याँ म्हिमैं जोगेमिंबै ल्हागिर परमेश्‍वरजी क्हेमैं भन्दा ङ ओंसों चुर कुलब् ग।
GEN 45:6 ह्‍युलर अँङ्गल् तब तोगो ङ्हिदिं तइ। अझै ङ्‍हदिं समा खनिरै ताब-क्ह्‍योब् तरिब् आरे, म्‍ल्ह-नारिमैं या खुरिब् आरे।
GEN 45:7 दिलेया क्हेमैंए ल्हागिर भाग घ्रि पृथ्‍बीर जोगेसि थेंबर नेरो क्हेमैंए न्होंर्बै ल्हें म्हि जोगेमिंरिगे बिसि परमेश्‍वरजी क्हेमैं भन्दा ओंसों ङलाइ चुर कुलब् ग।
GEN 45:8 छतसि ङलाइ चुर कुलब क्हेमैंइ आङिं, परमेश्‍वरजीन् ग। खीजी फारोए क्ल्ह्‍योर ङ थेंमिंइमुँ धै चए परवार्बै चिब लमिंसि मिश्र ह्‍युलर्बै चिब लमिंइमुँ।
GEN 45:9 तारे युनन् ङए आबा ङाँर ह्‍यासि ‘परमेश्‍वरजी ङलाइ मिश्र ह्‍युल तिगोंर्बै क्ल्हे लमिंइमुँ, बिसि क्हिए च्ह योसेफइ बिइमुँ। छतसि क्हैल् आलल्‍ले ङ ङाँर खो!
GEN 45:10 क्हि गोशेन ह्‍युलर टिब्मुँ। क्हि नेरो क्हिए प्हसेमैं, क्हिए क्वें-क्वेंमिमैं, क्हिए खेदोमैं नेरो क्हिने मुँबै तोन्दोंरि सै ङए ङाँर्न तब्मुँ।
GEN 45:11 चर क्हिए चब-थुँब ङइ ङ्ह्‍योब्मुँ। तलेबिस्याँ अँङ्गल् अझै ङ्‍हदिं चैमुँ। आस्याँ क्हि, क्हिए परवार नेरो क्हिने बालु मुँब्मैं ताँन् फोदेन् तयाब्मुँ,’ बिसि ङए आबाने बिद।
GEN 45:12 “क्हेमैंने बालु पोंब ङ योसेफन् ग बिसि क्हेमैं नेरो ङए अलि बेन्यामीनज्यै या म्रोंइमुँ।
GEN 45:13 मिश्र ह्‍युलर ङइ कति थेबै मिं योंइमुँ क्हेमैंइ तो तो म्रोंइमुँ च ताँन् ताँ ङए आबाने खैलसेया बिद्, धै युनन् ङए आबा चुर पइ खो।”
GEN 45:14 ह्रोंसए अलि बेन्यामीनए खरिर अँगालो झोंसि च बेल्‍ले क्रोइ, छलेन बेन्यामीन या चलाइ क्हासि क्रोइ।
GEN 45:15 चइ ह्रोंसए ताँन् आघेंमैं या म्वें लसि चमैंने बालु क्रोइ। च लिउँइँ ह्रोंसए आघेंमैं खीने बालु ताँमैं सेबर होंइ।
GEN 45:16 योसेफए आघें-अलिमैं खइमुँ बिबै ताँ फारो नेरो चए चिब्मैंज्यै थेइ, धै चमैं या बेल्‍ले सैं तोंइ।
GEN 45:17 फारो म्रुँइ योसेफने बिइ, “‘क्हेमैं ह्रोंसए गधामैं ति नोमिंसि कनान ह्‍युलर ह्‍याद्,’ बिसि क्हिए आघें-अलिमैंने बिद्।
GEN 45:18 ‘धै क्हेमैंए आबा नेरो क्हेमैंए परवार्बै ताँन् म्हिमैं किंसि ङ ङाँर खोरिगे। मिश्रर्बै ताँन् भन्दा छ्याँबै क्ल्ह्‍यो ङइ क्हेमैंलाइ पिंब्मुँ, धै क्हेमैंइ चु ह्‍युलर्बै ताँन् भन्दा छ्याँबै रा-रोमैं चब्मुँ।
GEN 45:19 क्हेमैंए म्रिं-प्हसेमैंए ल्हागिरि मिश्रउँइँले गाडामैं बोयाद्। धै क्हेमैंए आबा किंसि खो!’ बिसेया चमैंने बिद्।
GEN 45:20 ‘मिश्रर्बै ताँन् छ्याँ-छ्याँबै सैमैं क्हेमैंलन् ग। छतसि क्हेमैंए समनमैंए न्हुँ आलद्।’”
GEN 45:21 याकूबए (इस्राएलए) च्हमैंइ छान् लइ। फारोइ बिब् धोंलेन् योसेफइ चमैंलाइ गाडामैं नेरो घ्याँर चैदिबै सैमैं ताँन् पिंइ।
GEN 45:22 चइ चमैं ताँनलाइ खिबै छारा क्वेंमैं पिंइ। दिलेया बेन्यामीनलाइ बिस्याँ चाँदिए मुइ सोंब्ब्र नेरो खिबै छारा क्वें ङ्‍हजोर पिंइ।
GEN 45:23 ह्रोंसए आबाए ल्हागिरि चइ मिश्रर्बै छ्याँ-छ्याँबै सैमैं ति च्युउँलो लसि गधामैंए फिर तेंमिंइ, धै ह्रोंसए आबाए ल्हागिर घ्याँर चबै सैमैं, क्हें नेरो म्‍ल्ह-नारिमैं ति च्युउँलो लसि गदा आमाए फिर तेंमिंसि चमैं कुलइ।
GEN 45:24 छले चइ ह्रोंसए आघें-अलिमैं कुलमा “क्हेमैं घ्याँर प्होंब नेब आलद् ओ,” बिइ।
GEN 45:25 छले चमैं मिश्रउँइँले कैंडो कनान ह्‍युलर खेंमैंए आबा याकूब ङाँर ह्‍याइ।
GEN 45:26 धै आबाने बिइ, “योसेफ तोगो समा सोगोंन् मुँन, मिश्र ह्‍युलर्बै थेबै म्हि या चन् मुँन।” च ताँ थेसि याकूब प्लेटोयासि चमैंए ताँ आक्वें।
GEN 45:27 दिलेया योसेफइ चमैंने बिमिंबै ताँमैं थेबै लिउँइँ धै ह्रोंसलाइ किंबर योसेफइ कुल्मिंबै गाडामैं म्रोंबै लिउँइँ याकूबए सैं चिइ धै चमैंए ताँ क्वेंइ।
GEN 45:28 झाइले याकूबइ बिइ, “ङए च्ह योसेफ तोगो समा सोगोंन् मुँन। च्हौ तसेरो ङलाइ तइ। ङ ह्‍याब्मुँ धै ङ सिब् भन्दा ओंसों चलाइ ङ्ह्‍योब्मुँ।”
GEN 46:1 याकूब (इस्राएल) ह्रोंसने मुँबै तोन्दोंरि सै किंसि प्रइ, धै बेर्शेबार खसि ह्रोंसए आबा इसहाकए परमेश्‍वरए मिंर ख्रो पिंइ।
GEN 46:2 च म्हुँइँसर परमेश्‍वर याकूबने दर्शनर पोंसि “याकूब, याकूब” बिसि चलाइ हुइइ। धै याकूबइ “ङ चुर्न मुँ,” बिइ।
GEN 46:3 खीजी बिइ, “ङ परमेश्‍वर क्हिए आबाए परमेश्‍वर ग। मिश्र ह्‍याबर आङ्हिंन् चर ङइ क्हिउँइँले थेबै ह्रें घ्रि बनेब्मुँ।
GEN 46:4 क्हिने बालु ङ मिश्रर ह्‍याब्मुँ, धै क्हिलाइ खैले बिलेन ङइ धबै एसि पखब्मुँ। धै क्हि सिमा योसेफए योइ क्हिए मि हुमिंब्मुँ। धै ह्रोंसए यो क्हिए मिर थेंब्मुँ।”
GEN 46:5 च लिउँइँ याकूब बेर्शेबाउँइँले ह्‍याइ। फारो म्रुँइ चलाइ पखबर गाडामैं कुल्मिंमा याकूबए च्हमैंइ ह्रोंसए आबा, प्हसेमैं नेरो परवामैं च गाडामैंर झोंसि बोइ।
GEN 46:6 ह्रोंसए खेदोमैं नेरो कनान ह्‍युलर खागु लबै सैमैं किंसि याकूब नेरो चए ताँन् परवा मिश्रर ह्‍याइ।
GEN 46:7 याकूबइ ह्रोंसने बालु ह्रोंसए च्हमैं-च्हमिमैं क्वें क्वेंमिमैं ताँन् मिश्रर बोइ।
GEN 46:8 मिश्रर ह्‍याबै याकूबए च्हमैंए मिंमैं चुन् ग: याकूबए च्ह थेब रूबेन मुँल।
GEN 46:9 रूबेनए च्हमैं, हानोक, पल्‍लु, हेस्रोन नेरो कर्मि मुँल।
GEN 46:10 शिमियोनए च्हमैं: यमूएल, यामिन, ओहद, याकिन, सोहोर नेरो कनानी प्ह्रेंस्योउँइँबै च्ह सों मुँल।
GEN 46:11 लेबीए च्हमैं: गेर्शोन, कहात नेरो मरारि।
GEN 46:12 यहूदाए च्हमैं: एर, ओनान, शेलह, फारेस नेरो जेरह मुँल, दिलेया एर नेरो ओनान कनान ह्‍युलर्न सियाल। फारेसए च्हमैं हेस्रोन नेरो हामूल मुँल।
GEN 46:13 इस्साखारए च्हमैं: तोला, पुवा, याशूब नेरो शिम्रोन मुँल।
GEN 46:14 जबूलूनए च्हमैं: सेरेद, एलोन नेरो यहलेल मुँल।
GEN 46:15 चुमैं याकूबउँइँले लेआइ पद्दन-आरामर फिबै च्हमैं नेरो चए च्हमि दीना या मुँल। लेआउँइँले याकूबए सन्तानमैं ताँन् लसि सोंच्युसे सों मुँल।
GEN 46:16 गादए च्हमैं: सेफोन, हाग्‍यि, शूनि, यसबोन, एरि, अरोदि नेरो अरेलि मुँल।
GEN 46:17 ‍आशेरए च्हमैं यिम्ना, यिश्‍वा, यिश्‍वि नेरो बरिआ नेरो चमैंए अङाँ सेरह मुँल। बरिआए च्हमैं हेबेर नेरो मल्कीएल मुँल।
GEN 46:18 लाबानइ ह्रोंसए च्हमि लेआने पिंबै केब्स्यो जिल्पाइ फिबै याकूबए सन्तानमैं चुमैं मुँल। चुमैं ताँन् लसि च्युसे ट्हु म्हिमैं मुँल।
GEN 46:19 याकूबए प्ह्रेंस्यो राहेलए च्हमैं: योसेफ नेरो बेन्यामीन मुँल।
GEN 46:20 योसेफए च्हमैं मनश्शे नेरो एफ्राइम ओनए खेगि पोतिपेराए च्हमि आसनतउँइँले मिश्रर फिल।
GEN 46:21 बेन्यामीनए च्हमैं बेला, बेकेर, अश्बेल, गेरा, नामान, एहि, रोश, मुप्पिम, हुप्पिम नेरो आर्द मुँल।
GEN 46:22 चुमैं राहेलउँइँले फिबै याकूबए सन्तानमैं मुँल। चुमैं ताँन् लसि च्युसे प्लि म्हिमैं मुँल।
GEN 46:23 दानए च्ह: हुशिम मुँल।
GEN 46:24 नप्‍तालीए च्हमैं: यहसेल, गुनि, येसेर, नेरो शिल्‍लेम मुँल।
GEN 46:25 लाबानइ ह्रोंसए च्हमि राहेललाइ पिंबै केब्स्यो बिल्‍हाइ याकूबउँइँले फिबै सन्तानमैं चुमैंन् मुँल। चुमैं ताँन् लसि म्हि ङि मुँल।
GEN 46:26 चए चोंमैं आच्योल्‍ले याकूबने बालु मिश्रर ह्‍याबै चए ताँन् सन्तानमैं ट्हुच्युसे ट्हु मुँल।
GEN 46:27 मिश्रर फिबै योसेफए च्हमैं ङ्हिं मुँल। मिश्रर खबै याकूबए धिंर्बै परवार ताँन् लसि म्हि ङिच्यु मुँल।
GEN 46:28 “गोशेन ह्‍याबै घ्याँ उँइँमिंन्” बिसि याकूबइ यहूदालाइ योसेफ ङाँर ओंसों कुलइ। धै चमैं गोशेनर फेनेमा
GEN 46:29 योसेफइ के लब्मैंने ह्रोंसए रथ तेबर ल्हैदिइ। धै गोशेन समा ह्रोंसए आबा याकूबने त्होबर ह्‍याइ। धै आबालाइ म्रोंबै तोदोंन् योसेफ आबाने अँखलो ख्वेसि क्रोबै क्रोबन् तइ।
GEN 46:30 याकूबइ योसेफने बिइ, “क्हिए लि म्रोंल् योंसि क्हि सोगों मुँब ङइ सेइ। छतसि तारे ङ सन्तोकले सिल् खाँब्मुँ।”
GEN 46:31 योसेफइ ह्रोंसए आघें-अलिमैं नेरो ह्रोंसए आबाए परवाने बिइ, “‘कनान ह्‍युलर्बै ङए आघें-अलिमैं नेरो ङए आबाए परवामैं ङ ङाँर खइमुँ बिसि तारे ङ ह्‍यासि फारोने बिब्मुँ।
GEN 46:32 चमैं ताँन् खेदोमैं न्हबै प्ह्रोंछैंमैं ग। छतसि चमैंइ ह्रोंसए ताँन् बगालमैं नेरो चमैंने मुँबै तोन्दोंरि सै किंसि खइमुँ।’
GEN 46:33 धै फारो म्रुँइ क्हेमैं हुइसि ‘क्हेमैंइ तो के लमुँ?’ बिसि ङ्योएब्मुँ।
GEN 46:34 छले ङ्योएमा ‘क्हिए केब्छैंमैं ङि आबा-च्हमैं ताँन् कोलोउँइँले तोगो समा खेदोमैं न्हब्मैं ग,’ बिद्। छ बिस्याँ क्हेमैं गोशेनर टिल् योंब्मुँ। तलेबिस्याँ मिश्रीमैं ताँनइ प्ह्रोंछैंमैंलाइ हेल् लम्।”
GEN 47:1 झाइले योसेफ फारो ङाँर ह्‍यासि बिइ, “ङए आबा नेरो आघें-अलिमैं चमैंए र-क्युमैं, म्येमैं नेरो चमैंए तोन्दोंरि सै किंसि कनान ह्‍युलउँइँले खइमुँ। चमैं तोगो गोशेन ह्‍युलर मुँ।”
GEN 47:2 छ बिसि योसेफइ ह्रोंसए आघेंमैं न्होंउँइँले म्हि ङ्‍ह किंसि फारो ङाँर त्होबर बोइ।
GEN 47:3 योसेफए आघेंमैंने “क्हेमैंइ तो केमैं लमुँ?” बिसि फारोइ ङ्योएइ। चमैंइ फारोने बिइ, “ङि क्हिए केब्छैंमैं ङिए खेमैं-मामैं ओंनोंन् प्ह्रोंछैंमैं ग।
GEN 47:4 कनान ह्‍युलर बेल्‍ले थेबै अँङ्गल् तबइले क्हिए केब्छैंमैंइ र-क्यु छबै क्ल्ह्‍यो आयों। छतसि ङि चु ह्‍युलर्न टिबर खइमुँ। यो छ्युँ लमुँ ङि क्हिए केब्छैंमैंइ गोशेन ह्‍युलर टिल् योंरिगे।”
GEN 47:5 झाइले फारोइ योसेफने बिइ, “क्हिए आबा नेरो आघें-अलिमैं क्हि ङाँर खना।
GEN 47:6 मिश्र ह्‍युल क्हिए योर्न मुँ। चु ह्‍युलर्बै ताँन् भन्दा छ्याँबै क्ल्ह्‍योर क्हिए आबा नेरो आघें-अलिमैं टिल् पिंन्। चमैं गोशेन ह्‍युलर्न टिल् पिंन्। धै चमैं न्होंर सिपालु म्हिमैं मुँस्याँ चमैंए जिम्मार ङए खेदोमैं या कुल्मिंन्।”
GEN 47:7 च लिउँइँ योसेफइ ह्रोंसए आबा याकूबलाज्यै या फारोने त्होबर बोइ। छले त्होमा याकूबइ फारोए फिर आशिक पिंइ।
GEN 47:8 फारोइ याकूबने “क्हि कति बर्ष तइ?” बिसि ङ्योएमा
GEN 47:9 याकूबइ बिइ, “ङइ तोगो समा थोबै छ्ह प्रसे सोंच्यु तइ। ङए छ्ह रिन्ठि नेरो दुःखर थोरिइमुँ। ङए खेमैं ल्हें सोल चमैं सोब्द प्रे छ्ह तोगो ङल आयोइमुँ।”
GEN 47:10 याकूबइ धबै फारोलाइ आशिक पिंसि फारोउँइँले त्होंसि ह्‍याइ।
GEN 47:11 झाइले फारोइ बिब् धोंलेन् योसेफइ ह्रोंसए आबा नेरो आघें-अलिमैंलाइ मिश्रर्बै ताँन् भन्दा छ्याँब रामसेस बिबै ह्‍युलर चमैं क्ल्हे तबर क्ल्ह्‍योमैं पिंइ।
GEN 47:12 योसेफइ ह्रोंसए आबा आघें-अलिमैं नेरो ह्रोंसए आबाए परवा ताँनलाइ चमैंए प्हसेमैं कति मुँ च ङ्‍ह्‍योसि चबै सैमैं या पिंइ।
GEN 47:13 बेल्‍ले थेबै अँङ्गल् तबइले ह्‍युलर चबै सैमैं तोइ आरेल। अंङ्गलइ लमा मिश्र नेरो कनान ह्‍युल ङ्हिंर्बै म्हिमैं चल् आयोंल।
GEN 47:14 मिश्र नेरो कनान ह्‍युलर्बै म्हिमैंने म्‍ल्ह-नारिमैं चुँसि योंबै मुइ ताँन् योसेफइ खागु लसि फारोए दरबारर थेंल।
GEN 47:15 च त्हेर मिश्र नेरो कनान ह्‍युलर्बै म्हिमैंए मुइ ताँन् म्‍ल्ह-नारिमैं किंसि खाँयाल। छतसि मिश्रीमैं ताँन् योसेफ ङाँर खसि बिइ, “ङिलाइ धबै म्‍ल्ह-नारिमैं पिंन्। क्हि मुँन-मुँन् क्हिए उँइँर्न ङि खैले सिब? ङिने मुँबै मुइ ताँन् खाँयाइ।”
GEN 47:16 योसेफइ चमैंने बिइ, “क्हेमैंए मुइ खाँयास्याँ खेदोमैं पखो। क्हेमैंए खेदोमैंए साटोर ङइ म्‍ल्ह-नारिमैं पिंस्यो।”
GEN 47:17 योसेफइ बिब् धोंलेन् चमैंइ खेंमैंए खेदोमैं योसेफ ङाँर पखइ। धै योसेफइ चमैंए घोडा, क्यु, म्ये, गधामैंए साटोर चमैंलाइ म्‍ल्ह-नारिमैं पिंसि ल्होइ। च सालर चइ खेदोमैंए साटोर चमैंलाइ म्‍ल्ह-नारिमैं पिंइ।
GEN 47:18 च बर्ष खाँसि क्हुरिंम्बै सालरै या धबै चमैं खसि योसेफने बिइ, “ङिए मुइ ताँन् खाँयाबै ताँ क्हिइ सेइमुँ। खेदोमैंए बगालमैं या ताँन् क्हिलन् तल् खाँइमुँ। तारे क्हिलाइ पिंबर ङिए ज्यु नेरो क्ल्ह्‍यो बाहेक ङिने बालु तोइ आरे।
GEN 47:19 ङि सिल् आपिंन्। ङिए क्ल्ह्‍यो या बाँजो तल् आपिंन्। ङिलाइ म्‍ल्ह-नारिमैं पिंसि ङि नेरो ङिए क्ल्ह्‍यो-न्हेंमैं या किंन्। धै ङि ह्रोंसए क्ल्ह्‍यो-न्हेने बालुन् म्रुँए केब्छैं-केब्स्योमैं तब्मुँ। बरु ङिए क्ल्ह्‍यो-न्हें या बाँझ आतरिगे ङि या सोल् योंरिगे,” बिसि ङिलाइ प्लु पिंन्।
GEN 47:20 छले योसेफइ मिश्रर्बै ताँन् क्ल्ह्‍यो फारोए ल्हागिर किंइ। चर थेबै अँङ्गल् तबइले मिश्रीमैंइ ह्रोंसए ताँन् क्ल्ह्‍यो-न्हें या चुँइ, धै चमैंए क्ल्ह्‍योमैं फारो म्रुँल् तयाइ।
GEN 47:21 मिश्रर्बै छेउ घ्रिइले अर्को छेउ समार्बै ताँन् म्हिमैं चइ केब्छैंमैं तइ।
GEN 47:22 दिलेया खेगिमैंए क्ल्ह्‍यो बिस्याँ चइ आकिं, तलेबिस्याँ खेगिमैंए ल्हागिर फारोउँइँले म्‍ल्ह-नारिए भाउ स्यो लल। धै फारोइ पिंबै भागउँइँले चमैंइ चमल। छतसि चमैंइ खेंमैंए क्ल्ह्‍यो-न्हें चुँल् आत्हु।
GEN 47:23 योसेफइ मिश्रीमैंने बिइ, “ङ्‍ह्‍योद्, तिंयाँ ङइ फारोए ल्हागिर क्हेमैं नेरो क्हेमैंए क्ल्ह्‍यो न्हेंमैं किंइमुँ। तारे क्हेमैंए ल्हागिर प्लु चुर मुँ म्रोंर प्लु प्लुद्।
GEN 47:24 दिलेया रोमैं मिंबै त्हेर चए ङ्‍हबाँ क्हेमैंइ फारो म्रुँलाइ पिंल् त्हुम्। धै प्लिबाँ बिस्याँ प्लुए ल्हागिर नेरो क्हेमैंए परवा, प्हसेमैं चबर क्हेमैंल तब्मुँ।”
GEN 47:25 चमैंइ बिइ, “ङिए सो क्हिइ जोगेमिंइमुँ। छलेन क्हिए म्हाँया ङि फिर तरिगे। ङि फारोए केब्छैंमैं तब्मुँ।”
GEN 47:26 छतसि मिश्र ह्‍युलर्बै क्ल्ह्‍यो-न्हेंउँइँले खबै रोमैंए ङ्‍हबाँ फारोल तब्मुँ बिसि योसेफइ ठिम घ्रि बनेइ। च ठिम तिंयाँ समन् मुँ। खेगिमैंए क्ल्ह्‍यो मत्‍त्रे फारोल आत।
GEN 47:27 इस्राएलीमैं मिश्रर्बै गोशेन ह्‍युलर टिसि चर्बै क्ल्ह्‍योमैं ह्रोंसइ क्ल्हे लइ। चर चमैंल बिब् धों मैंब् धों तइ, धै चमैंए सन्तानमैं या ल्हें ततै ह्‍याइ।
GEN 47:28 छले याकूब मिश्रर च्युसे ङिदिं टिइ, च प्रसे प्लिच्युसे ङिदिं सोइ।
GEN 47:29 याकूब सिबै त्हे तमा चइ ह्रोंसए च्ह योसेफ हुइसि बिइ, “क्ह्रोंसेंन ङइ बिबै ताँ ङिंम् बिस्याँ क्हिए यो ङए प्हाँ न्होंर थेंसि ङलाइ मिश्रर पारिब् आरे बिसि ङने कसम चद्।
GEN 47:30 ङए खेमैं-माँमैं मुँबै क्ल्ह्‍योर्न ङए छगों तरिगे। छतसि ङ सियामा मिश्रउँइँले बोसि ङए खेमैं पाबै क्ल्ह्‍योर्न ङ पाद्।” योसेफइ आबाने बिइ, “क्हिइ बिब् धोंलेन् ङइ लस्यो आबा।”
GEN 47:31 धबै याकूबइ योसेफने बिइ, “छ बिस्याँ ङइ बिब् धोंलेन् लम्,” बिसि ङने कसम चद् बिमा योसेफइ कसम चइ। झाइले याकूब ह्रोंस रोबै क्ल्ह्‍योर्बै क्रेगुँर पद्खु तइ।
GEN 48:1 दे त्हे लिउँइँ आबा नइमुँ बिसि योसेफइ म्हिमैंउँइँले था योंइ। छतसि मनश्शे नेरो एफ्राइम बिबै च्हमैं किंसि योसेफ याकूब ङाँर ह्‍याइ।
GEN 48:2 क्हिए च्ह योसेफ खइमुँ बिब् थेसि याकूब बेल्‍ले भों लसि रेइ धै खाटर क्हुँइ।
GEN 48:3 याकूबइ योसेफने बिइ, “कनान ह्‍युलर्बै लूजरि तोन्दोंरि सै लल् खाँबै परमेश्‍वर ङ ङाँर म्रोंयुइ।
GEN 48:4 ‘थेद्, ङइ क्हिलाइ छ्याँब् लमिंसि क्हिए सन्तानमैं ल्हें लमिंब्मुँ। क्हिउँइँलेन् ल्हें ह्रेंमैं लमिंब्मुँ, धै क्हिए च्ह क्वेंमैंन् चु ह्‍युलए फिर खोंयोंन् बिलैया क्ल्हे तल् पिंब्मुँ,’ बिसि खीजी ङलाइ आशिक पिंइ।”
GEN 48:5 याकूबइ धबै बिइ, “ङ मिश्रर खब् भन्दा ओंसों मिश्रर फिबै क्हिए च्हमैं ङ्हिं ङलन् ग। रूबेन नेरो शिमियोन धोंले एफ्राइम नेरो मनश्शे या ङलन् ग।
GEN 48:6 क्हिल धबै अरू प्हसेमैं तइ बिस्याँ चमैं क्हिल तब्मुँ। चमैंइ एफ्राइम नेरो मनश्शेउँइँले हक योंब्मुँ।
GEN 48:7 ङ पद्दन-आरामउँइँले खमा एप्रातर आफेबर्न कनान ह्‍युलर राहेल सियाइ। धै एप्रात अथवा बेथलेहेमर ह्‍याबै घ्याँए रेर ङइ चलाइ पाइ।”
GEN 48:8 योसेफए च्हमैं म्रोंसि याकूबइ “चु कोलोमैं खाब्मैं जा?” बिसि ङ्योएइ।
GEN 48:9 योसेफइ ह्रोंसए आबाने बिइ, “परमेश्‍वरजी मिश्र ह्‍युलर पिंबै ङए च्हमैं ग।” छबिमा याकूबइ बिइ, “चमैं ङ ङाँर पखोदि, चमैंए फिर ङइ आशिक पिंम्।”
GEN 48:10 च त्हेर याकूबए छ्ह ल्हें तबइले चइ मि छेनाले म्रोंल् आखाँमल। छतसि योसेफइ ह्रोंसए च्हमैं याकूब ङाँर बोमिंइ धै याकूबइ चमैं अँखलो ख्वेसि म्वें लइ।
GEN 48:11 धै याकूबइ योसेफने बिइ, “ङइ धबै क्हिलाइ म्रोंल् योंब्मुँ बिसि आमैंल। दिलेया क्हिए प्हसेमैं या परमेश्‍वरजी म्रोंल् पिंइमुँ।”
GEN 48:12 झाइले योसेफइ याकूबए क्ह्‍वेंउँइँले प्हसेमैं स्योवाइ, धै कुरसि आबालाइ फ्योइ।
GEN 48:13 योसेफइ च्हमैं ङ्हिं किंसि एफ्राइमलाइ याकूबए क्योलोउँइँ थेंइ धै मनश्शेलाइ याकूबए त्हेब्रेउँइँ थेंमिंइ। छले ह्रोंसए त्हेब्रेउँइँ नेरो याकूबए (इस्राएलए) क्योलोउँइँ लसि ह्रोंसए प्हसेमैं एस्राएलए चेंदो बोइ।
GEN 48:14 दिलेया मनश्शे ठागु मुँलेया याकूबइ क्योलो यो स्योंसि च्योंब एफ्राइमए क्रर थेंइ, धै त्हेब्रे यो ठागु मनश्शेए क्रर थेंइ।
GEN 48:15 झाइले चइ योसेफने छले आशिक पिंसि बिइ, “ङए बाज्यु अब्राहाम नेरो आबा इसहाक खेंमैंइ म्हाँदिबै परमेश्‍वरए उँइँर प्रमल। च परमेश्‍वरजीन् ङए छ्ह तिगोंन् तिंयाँ समा ङ डोरेइमुँ,
GEN 48:16 ङलाइ ताँन् दुःखउँइँले फ्रेमिंबै स्वर्गदूतइ चुमैंए फिर आशिक पिंरिगे! चु कोलोमैंने ङए बाज्यु अब्राहाम, ङए आबा इसहाक नेरो ङए मिं आम्हरिगे। पृथ्‍बीर चुमैंल ल्हें-ल्हें सन्तानमैं तरिगे।”
GEN 48:17 छले आबाइ ह्रोंसए क्योलो यो एफ्राइमए क्रर थेंब् म्रोंसि योसेफए सैं आक्हो, छतसि आबाए यो एफ्राइमए क्रउँइँले स्योसि मनश्शेए क्रर थेंमिंबै ल्हागिर आबाए यो क्हासि।
GEN 48:18 योसेफइ आबाने बिइ, “छले आङिं आबा, चु ठागु ग। चुए क्रर क्हिए क्योलो यो थेंमिंन्।”
GEN 48:19 बिमा याकूबइ बिइ, “ङइ सेइमुँ, च्ह, ङइ सेइमुँ। मनश्शेलै या थेबै कुल तब्मुँ। दिलेया चए अलि च भन्दा थेब तब्मुँ। चए अलिए सन्तानमैं बेल्‍ले थेबै ह्रेंमैं तब्मुँ।”
GEN 48:20 च त्हिंइर याकूबइ चमैं फिर छ बिसि आशिक पिंइ, “इस्राएलीमैंइ आशिक पिंमा क्हेमैंए मिं किंब्मुँ: ‘परमेश्‍वरजी क्हेमैं या एफ्राइम नेरो मनश्शे धोंन् लमिंरिगे बिसि।’” छले याकूबइ मनश्शे भन्दा एफ्राइम ओंसों थेंइ।
GEN 48:21 झाइले याकूबइ योसेफने बिइ, “तारे ङ सिबै त्हे तइमुँ, दिलेया परमेश्‍वर क्हेमैंने बालु तरिब्मुँ, धै क्हेमैंए खेमैं-मामैंए ह्‍युलर धबै क्हेमैंलाइ एबोब्मुँ।
GEN 48:22 शकेम क्हिए आघेंमैं आपिंल्‍ले ङइ क्हिलाइ पिंइमुँ। च क्ल्ह्‍यो ङइ सेलाँ नेरो मेत्हलेइ नेसि एमोरीमैंउँइँले ट्होसि किंब् ग।”
GEN 49:1 झाइले याकूबइ ह्रोंसए च्हमैं हुइसि बिइ, “क्हेमैं चुर खागु तद्। तारे पिरु क्हेमैंए फिर तो तखब्मुँ च ङइ बिमिंस्यो।
GEN 49:2 “ओ याकूबए च्हमैं खागु तसि क्हेमैंए आबा इस्राएलइ बिब थेद्।
GEN 49:3 “रूबेन क्हि ङए च्ह थब ग, ङए भों मुँबै त्हेर्बै ओंसोंबै शक्‍ति नेरो भोंए रो ग। मान नेरो शक्‍तिर ताँन् भन्दा क्हि थेब ग।
GEN 49:4 दिलेया क्युए भेल धोंले छाइ माइ तब क्हि। तलेबिस्याँ क्हिए आबाए खाडर क्हि क्रेसि ङए खाडए आब्रु वाइ। ङए क्ल्ह्‍योर क्हि क्रेइ! छतसि क्हिए आब्रु टिरिब् आरे।
GEN 49:5 “शिमियोन नेरो लेबी आघें अलि ग, चमैंइ सेलाँ ओलेम्।
GEN 49:6 ओ ङए सो, चमैंए म्हि च्होंर आखो, चमैंने प्रब टिब आलद्, तलेबिस्याँ चमैं ह्रिस खसि म्हिमैं सैवाइमुँ, चमैंइ तो लदा ङ्हाँमुँ चन् लसि क्ल्यामैंए मुल च थोवाइमुँ।
GEN 49:7 चमैंए ह्रिस फिर सराप खरिगे, तलेबिस्याँ चने दयाम्हाँया आरे। ङइ चमैंलाइ इस्राएल तिगोंन् प्हुँवाब्मुँ, धै चमैंलाइ सग्याँ प्हुग्याँ लवाब्मुँ।
GEN 49:8 “ओ यहूदा, क्हिए आघें-अलिमैंइ क्हिए मान लब्मुँ। क्हिए योइ क्हिए शत्तुरमैं ट्होसि चमैंए खरि क्हाब्मुँ। छतसि क्हिए आबाए च्हमैं क्हिए ओंसों कुरब्मुँ।
GEN 49:9 ओ यहूदा क्हि भोंबै सिंह धों तब् ग। ओ ङए च्ह हेउँइँले फो सैसि क्हि युइमुँ, क्हि कुरमुँ धै सिंह धोंलेन् रोरिमुँ। सिंह आमालाइ धोंले खाबज्यै क्हिलाइ रेबै आँट लरिब् आरे?
GEN 49:10 यहूदाए योउँइँले म्रुँए प्हरे स्योरिब् आरे, चए क्ल्हे आखन् समा, ग्याल्स ओलेबै प्हरे चए प्हलेए प्हाँइले स्योरिब् आरे। छतमा ह्रेंमैंइ चइ बिबै ताँ ङिंब्मुँ।
GEN 49:11 चए गधा अँगुरए धुँर च्युँइँब्मुँ, धै गधाए प्हसेलाइ बेल्‍ले छ्याँबै हाँगर च्युँइँब्मुँ। चइ ह्रोंसए क्वेंमैं अँगुरए प्हार ख्रुब्मुँ धै खिबै क्वेंमैं अँगुरए खुगुर ख्रुब्मुँ।
GEN 49:12 चए मि अँगुरए प्हा भन्दा ओल्ग्या, धै चए स ङ्‍‍हे भन्दा तार्ग्या तब्मुँ।
GEN 49:13 “जबूलूनए टिबै क्ल्ह्‍यो मा ङ्युँइए रेर तब्मुँ, च क्यु झाजमैं टिबै क्ल्ह्‍यो तब्मुँ। धै चए साँदा सिदोन समा तब्मुँ।
GEN 49:14 “इस्साखार भोंबै गधा ग, च ति ङ्हिंए पोर रोरिम्।
GEN 49:15 ह्रोंसए भों न्हबै क्ल्ह्‍यो छ्याँब मुँन, धै ताँ बिमिंबर ह्रोंसए ह्‍युल सैं तोंब मुँन बिब् सेसि चइ ति नोबर ह्रोंसए प्हैंद तोब्मुँ। धै केब्छैंइ धोंलेन् के लल् ङिंब्मुँ।
GEN 49:16 “इस्राएलर्बै कुलमैं घ्रि तसि दानइ ह्रोंसए म्हिमैंए निसाफ लब्मुँ।
GEN 49:17 दान बिस्याँ घ्याँर्बै प्हुरि घ्रि अथवा घ्याँर्बै बिष मुँबै प्हुरि तब्मुँ। चइ गोडाए प्हले तिंजा चोब्मुँ धै घोडाए फिर क्रेबै म्हि चए लिलि क्हुरिह्‍याम्।
GEN 49:18 “ओ याहवेह, क्हिजी जोगेमिंम् बिसि ङ पैंरिइमुँ।
GEN 49:19 “गाधए फिर टोलि घ्रिइ ह्‍वाखब्मुँ, दिलेया चइ चमैंलाइ ल्हावाब्मुँ।
GEN 49:20 “आशेर ह्‍युलर रोबै म्‍ल्ह-नारिमैं छ्याँब तब्मुँ। छतसि चइ म्रुँमैंए ल्हागिर लिं-लिंबै चबै सैमैं चुब्मुँ।
GEN 49:21 “नप्‍ताली पिवाबै फो ग, चइ छ्याँ-छ्याँबै प्हसेमैं फिब्मुँ।
GEN 49:22 “योसेफ बेल्‍ले रो-रोबै झ्याल् घ्रि ग, क्यु मुल ङाँर्बै रो रोबै झ्याल् ग। चए हाँगमैं गाराए फिफि ख्ल्याँब्मुँ।
GEN 49:23 मेत्हँले प्रिंब्मैंइ चलाइ बेल्‍ले दुःख पिंब्मुँ। चए फिर मेत्हँलेइ प्रिंसि चलाइ ल्हाब्मुँ।
GEN 49:24 दिलेया इस्राएल जोगेमिंबै पारा नेरो प्ह्रोंछैंउँइँले याकूबइ म्हाँदिबै भोंबै परमेश्‍वरए योउँइँले योसेफए त्हँले आकुरा, धै चए यो भोंब तरिब्मुँ।
GEN 49:25 क्हिए आबाए परमेश्‍वरजीन् क्हि ल्होमिंम्। तोन्दोंरि सै लल् खाँबै परमेश्‍वरजी क्हिए फिर आशिक पिंम् ताइ स्वर्गर्बै आशिकमैं, माइ क्रों न्होंर्बै आशिकमैं, ल्हें ल्हें सन्तानमैं तबै आशिकमैं पिंम्।
GEN 49:26 क्हिए आबाइ योंबै आशिक स्योंम्बै कोंमैंइ पिंबै आशिक भन्दा भोंब मुँ। च ताँन् आशिक योसेफए क्र फिर तरिगे। चए आघें-अलिमैं न्होंरि च चिब तइमुँ।
GEN 49:27 “बेन्यामीन रुएबै प्याँगु घ्रि ग। न्हाँगर सैसि पखबै से चइ चम्, धै ङेसर चइ लुडिबै सै चुम्।”
GEN 49:28 चुमैं ताँन् एस्राएलए च्युसे ङ्हिं कुलमैं ग। चमैंए आबाइ चमैं ताँनइ योंल् त्हुबै आशिक पिंसि बिबै ताँमैं चुन् ग।
GEN 49:29 झाइले याकूबइ चमैंने बिइ, “ङ ङए म्हिमैं ङाँर ह्‍याबर होंइमुँ। हिति एप्रोंनए म्रोंर्बै उर ङए खेमैंने बालु ङलाइ पाद्।
GEN 49:30 च कनान ह्‍युलर मम्रे ङाँर्बै मक्पेलार्बै म्रोंर मुँबै उर ङ पाद्। च उ म्रोंने बालुन् अब्राहामइ हित्ती एप्रोनउँइँले छगोंए ल्हागिर किंल।
GEN 49:31 चर्न चमैंइ अब्राहाम नेरो चए प्ह्रेंस्यो सारा पाल। धै इसहाक नेरो चए प्ह्रेंस्यो रिबेका या चर्न पाल। ङज्यै या लेआ चर्न पाइ।
GEN 49:32 च म्रों नेरो चर्बै उ हित्तीमैंउँइँले किंब् ग।”
GEN 49:33 च्हमैंने चु ताँ बिल् खाँबै लिउँइँ याकूबइ ह्रोंसए प्हले क्ल्ह्‍योर स्योंसि सो पिंइ, धै ह्रोंसए खेमैंने त्होनेइ।
GEN 50:1 छतमा योसेफ ह्रोंसए आबाए फिर पद्खु तसि क्रोदै चलाइ म्वें लइ।
GEN 50:2 झाइले योसेफइ ह्रोंसए के लबै बैद्यमैंने ह्रोंसए आबाए सिनुर लिंबै थाँ खबै मसला फोबर ल्हैदिमा च बैद्यमैंइ याकूबए सिनुर लिंबै थाँ खबै मसला फोमिंइ।
GEN 50:3 चु के लबर प्लिच्यु त्हिंइ छ्युल तलेबिस्याँ लिंबै थाँ खबै मसला फोबर च्हगन् छ्युमल। च सिमा मिश्रीमैंइ ङिच्यु त्हिंइ समा शोक लइ।
GEN 50:4 शोक लबै त्हे खाँबै लिउँइँ योसेफइ फारोए के लबै चिब्मैंने छ बिसि ताँ लइ, “क्हेमैंए म्हाँया ङए फिर मुँस्याँ गार आम्हाँदिल्‍ले चु ङए ताँ फारोने बिमिंन्।
GEN 50:5 ‘ङए आबाइ ङने “ङ सिबर होंइमुँ। छतसि कनान ह्‍युलर बोसि ङइ तासि बनेबै ङए छगोंर्न ङ पाद् बिसि ङने कसम चबर ल्हैदिल।” छतसि ङ ह्‍यासि ङए आबालाइ चर पासि एखल् पिंन्।’”
GEN 50:6 फारोइ बिइ, “क्हिने चइ कसम चबर ल्हैदिब् धोंलेन् ह्‍यासि क्हिए आबालाइ पाद्।”
GEN 50:7 छबिमा योसेफ ह्रोंसए आबालाइ पाबर ह्‍याइ। चने बालु फारोए ताँन् चिब्मैं, के लबै म्हिमैं नेरो मिश्रर्बै ताँन् थेबै म्हिमैं ह्‍याइ।
GEN 50:8 छलेन योसेफए परवार्बै ताँन् म्हिमैं, चए आघें-अलिमैं नेरो चए आबाए परवार्बै ताँन् म्हिमैं चने ह्‍याइ। दिलेया खेंमैंए प्हसेमैं नेरो खेदोमैंए बगालमैं गोशेन ह्‍युलर्न वाथेंइ।
GEN 50:9 चमैंने बालु रथर क्रेब्मैं नेरो घोडाए फिर क्रेब्मैं या ह्‍याइ। छतमा म्हलामिमैं ल्हें मुँल।
GEN 50:10 छले चमैं यर्दन ङाँर्बै आतादए खलर फेनेसि चर बेल्‍ले शोक लसि क्रोइ। योसेफइ चर ङिरो समा ह्रोंसए आबाए ल्हागिर शोक लइ।
GEN 50:11 छतमा कनानीथेंमैंइ आतादए खलर शोक लब् म्रोंसि “चु मिश्रीथेंमैंइ थेबै शोक लरिइमुँ बिइ।” छतसि च यर्दन ङाँर्बै क्ल्ह्‍योए मिं हाबिल-मिश्रइम थेंइ।
GEN 50:12 छले याकूबइ चमैंने बिब् धोंले चए च्हमैंइ लइ।
GEN 50:13 चए च्हमैंइ चए सिनु कनानर बोसि अब्रामइ हित्ती एप्रोनने किंबै मम्रें ङाँर्बै मकपेलार्बै उर पाइ।
GEN 50:14 ह्रोंसए आबा पाबै लिउँइँ ह्रोंसए आघें-अलिमैं नेरो आबा पाबर चने बालु ह्‍याबै म्हिमैंने योसेफ मिश्रर एह्‍याइ।
GEN 50:15 खेंमैंए आबा सियाब् म्रोंसि योसेफए आघें-अलिमैंइ खेंमैं न्होंर बिइ, “तारे योसेफ ङ्योने बालु ख्रे लसि ङ्योइ चने लबै ताँन् आछ्याँबै केए खी किंब्मुँ।”
GEN 50:16 छतसि चमैंइ योसेफ ङाँर छ बिसि सँउँसर कुलइ, “क्हिए आबाइ सिब् भन्दा ओंसों छाबै ताँ बिल:
GEN 50:17 ‘क्हेमैंइ योसेफने गार आम्हाँदिल्‍ले ङिइ क्हिने लबै आछ्याँबै केए ल्हागिर क्हिए आघेंमैं क्षमा लद्।’ तारे यो छ्युँ लमुँ, गार आम्हाँदिल्‍ले ङि क्हिए आबाए परमेश्‍वरए केब्छैंमैंए आछ्याँबै के क्षमा लमिंन् बिद्।” चु ताँ थेसि योसेफ क्रोइ।
GEN 50:18 चए आघेंमैं या खसि चए ओंसों पद्खु तसि “थेद्, ङि क्हिए केब्छैंमैं ग,” बिइ।
GEN 50:19 दिलेया योसेफइ चमैंने बिइ, “आङ्हिंन्! ङ परमेश्‍वरए क्ल्ह्‍योर मुँ रो वा?
GEN 50:20 ङए फिर क्हेमैंइ न्होह्रों लबै सैं लल दिलेया परमेश्‍वरजी च केउँइँले छ्याँब लमिंबै सैं मैंइ। च के तिंयाँ ङ्यो ताँनए फिर तरिइमुँ छतमा ल्हें म्हि सोरिइमुँ।
GEN 50:21 छतसि आङ्हिंन्! क्हेमैं नेरो क्हेमैंए प्हसेमैं या ङइ न्हब्मुँ।” छले चइ चमैंए सैं भोंब् लमिंसि चमैंए सैं क्होमिंइ।
GEN 50:22 योसेफ नेरो चए आबाए परवामैं ताँन् मिश्रर्न टिइ। धै योसेफ प्रसे च्युदिं समा सोसि
GEN 50:23 एफ्राइमए क्वें-क्वेंमिंमैं या म्रोंइ। मनश्शेए च्ह माकिरए प्हसेमैं या योसेफए प्हलेर थेंमिंइ।
GEN 50:24 झाइले योसेफइ ह्रोंसए आघें-अलिमैंने बिइ, “ङ सिबै त्हे तइ। परमेश्‍वरजी क्ह्रोंसेंन्लेन् क्हेमैंलाइ वास्ता लब्मुँ। खीजी अब्राहाम, इसहाक नेरो याकूबने बाछा फैसि पिंम् बिबै ह्‍युलर चु ह्‍युलउँइँले क्हेमैं बोमिंब्मुँ।”
GEN 50:25 झाइले याकूबए प्हसेमैंने कसम चबर ल्हैदिसि योसेफइ बिइ, “परमेश्‍वरजी क्हेमैंलाइ छेनाले ङ्‍ह्‍योब्मुँ। परमेश्‍वरजी क्हेमैंलाइ बोह्‍याम् बिबै क्ल्ह्‍योर क्हेमैं ह्‍यामा ङए ह्रुइबमैं या बोयाद्।”
GEN 50:26 छले योसेफ प्रसे च्युदिं तसि सिइ। धै चमैंइ याकूबए सिनुर बेल्‍ले लिंबै थाँ खबै मसला नेरो आक्राँन् लबै मैं फोसि बकासर झोंसि मिश्र ह्‍युलर्न थेंइ।
EXO 1:1 याकूब मिश्र ह्‍युलर ह्‍यामा चए च्हमैं या ह्रों-ह्रोंसए परवा किंसि चने बालुन ह्‍याइ। च च्हमैंए मिं चुमैंन् ग:
EXO 1:2 रूबेन, शिमियोन, लेबी, यहूदा,
EXO 1:3 इस्साखार, जबूलून्, बेन्यामीन,
EXO 1:4 दान, नप्‍ताली, गाद, नेरो आशेर।
EXO 1:5 याकूबए सन्तानमैं ताँन् लसि ङिच्यु मुँल। योसेफ बिस्याँ ओंसों ओंनोंन् मिश्रर मुँल।
EXO 1:6 चर टिमा योसेफ नेरो चए ताँन् आघें-अलिमैं धै च पुस्तार्बै ताँन् म्हिमैं सियाइ।
EXO 1:7 दिलेया इस्राएलए सन्तानमैं बिस्याँ बेल्‍ले ल्हें ततै ह्‍यासि मिश्र ह्‍युल तिगोंन् चमैंइ प्लिंयाइ।
EXO 1:8 झाइले मिश्रर योसेफलाइ ङो आसेबै म्रुँ घ्रिइ शासन लबर होंइ।
EXO 1:9 चइ ह्रोंसए म्हिमैंने बिइ, “ङ्‍ह्‍योद्, इस्राएलीमैं ङ्यो भन्दा ल्हें ततै ह्‍यासि बेल्‍ले भोंब तइमुँ।
EXO 1:10 चमैं ल्हें ततै ह्‍याब्मुँ, धै खनिज्यै प्होंब-नेब तस्याँ चमैं ङ्योए शत्तुरमैंने क्ह्रिसि ङ्योए बिरोधर प्होंब-नेब लब्मुँ धै चु ह्‍युल पिसि ह्‍याब्मुँ। छतसि तारे ङ्योइ च्हैंसि मैंसि चमैंने बालु के लल् त्हुम्।”
EXO 1:11 छतसि मिश्रीमैंइ इस्राएलीमैंलाइ बेल्‍ले गारो के ल्हैदिबै चिब्मैं त्हाँइ। धै चमैंइ फारोए ल्हागिर पिताम नेरो रामसेस बिबै म्ल्ह नारिमै खुथेंबै सहरमैं बनेइ।
EXO 1:12 दिलेया मिश्रीमैंइ इस्राएलीमैंए फिर कति दुःख पिंलेना चमैं च ह्‍युलर ल्हें तसि प्लिंदै ह्‍याइ। छतमा मिश्रीमैं चमैंने ङ्हिंबर होंइ।
EXO 1:13 छतमा मिश्रीमैंइ इस्राएलीमैंलाइ खैच्हिजिले के लबर ल्हैदिइ।
EXO 1:14 मसला नेरो इटा बनेब धै म्रोर्बै ताँन् खालर्बै केब्छैंमैंइ लबै केमैं लबर ल्हैदिसि चमैंए छ्ह ककाँ क्युँक्युँ ङ्हाँन् लइ।
EXO 1:15 झाइले मिश्रर्बै म्रुँइ शिप्रा नेरो पूआ मिं लबै हिब्रू सुँडेनिमैं हुइसि बिइ,
EXO 1:16 “हिब्रूस्योमैंइ प्हसे फिसि चमैंए सुसर लमा च्ह फिस्याँ सैवाद्, च्हमिं फिस्याँ आसैद्।”
EXO 1:17 दिलेया च सुँडेनिमैं परमेश्‍वरने ङ्हिंमल। छतसि मिश्रर्बै म्रुँइ बिब् धोंले चमैंइ आल, चमैंइ च्हमैं या सोगोंन् थेंमिंइ।
EXO 1:18 छतमा मिश्रर्बै म्रुँइ च सुँडेनिमैं हुइसि “क्हेमैंइ च्हमैंलाइ तले आसैल? तले छ लल?” बिसि ङ्योएइ।
EXO 1:19 सुँडेनिमैंइ फारोने बिइ, “हिब्रूस्योमैं मिश्रीस्योमैं धों तब आरे। चमैं भोंभों धुँधुँ तब मुँ। ङि फेनेब् भन्दा ओंसोंन् चमैंइ प्हसे फिम्।”
EXO 1:20 छले परमेश्‍वजी सुँडेनिमैंए फिर ल्हयो खइ, धै इस्राएलीमैं ल्हें त-तै ह्‍यासि भोंब तइ।
EXO 1:21 छले सुँडेनिमैंइ परमेश्‍वरने ङ्हिंबै लमा खीजी चमैंलाइ प्हसेमैं पिंइ।
EXO 1:22 छतमा फारो म्रुँइ ह्रोंसए ताँन् म्हिमैंने “हिब्रूमैंला च्हमैं कति फिलेया चमैं ताँन् नील स्योंर भ्योंवाँन्, च्हमिंमैं बिस्याँ सोगोंन् थेंन्,” बिसि ल्हैदिइ।
EXO 2:1 च त्हेर लेबीए कुलर्बै म्हि घ्रिइ खेमैंए कुलर्बन च्हमिरि घ्रिने ब्ह्‍या लइ।
EXO 2:2 च च्हमिरिइ प्हसे नोसि च्ह घ्रि फिइ। च कोलो बेल्‍ले छ्याँब म्रोंसि चइ म्हैंन सौंल् समा लोथेंइ।
EXO 2:3 झाइले च कोलो अझै लोल् आखाँबइले च कोलोए ल्हागिर कूशए टोक्रि घ्रि पखसि चलाइ तारपिन नेरो अलकत्राइ स्यालइ। धै कोलो टोक्रि न्होंर थेंसि चइ नील स्योंए रेर काँसए घारिर थेंमिंइ।
EXO 2:4 च कोलोए आना बिस्याँ चलाइ खै तब् ङ्‍हे बिसि ह्रेंगोर रासि ङ्‍ह्‍योरिल।
EXO 2:5 च त्हेर्न फारो म्रुँए च्हमि नील स्योंर ख्रुबर खल। चए केब्स्योमैं च स्योंए तिरर स्युररिल। छतमा चइ काँसए घारिर च टोक्रि म्रोंसि ह्रोंसए केब्स्योलाइ टोक्रि किंबर कुलइ।
EXO 2:6 धै चइ टोक्रि फैमा क्रोरिबै कोलो म्रोंइ। चइ ल्हयो खसि कोलोलाइ ङ्‍ह्‍योसि बिइ, “चुम् हिब्रूमैंए कोलो घ्रि मुँन!”
EXO 2:7 धै च कोलोए आनाइ फारो म्रुँए च्हमिने बिइ, “चु कोलोलाइ ङ्‍हे थुँमिंबर ङइ खाब् मुँले हिब्रूस्यो घ्रि हुइ पखले वा?”
EXO 2:8 छबिमा फारोए च्हमिइ चने “तम् तम् ह्‍याद्।” बिमा च च्हमिरि ह्‍यासि कोलोए आमा हुइसि पखइ।
EXO 2:9 झाइले फारोए च्हमिइ चने बिइ, “चु कोलो बोसि ङ्‍हे थुँमिंब्रें लद्। ङइ क्हिए नों सै पिंब्मुँ।” छबिमा च च्हमिरिइ कोलो बोसि ङ्‍हे थुँमिंब्रें लइ।
EXO 2:10 कोलो थेब् तबै लिउँइँ कोलोए आमाइ च कोलो फारोए च्हमि ङाँर बोइ। धै चइ च कोलोलाइ च्ह धोंलेन् न्हरिमा “चुलाइ ङइ क्युउँइँले तेब् ग। छतसि ङइ चुए मिं मोशा थेंम्,” बिइ।
EXO 2:11 मोशा फ्रेंसि तबै लिउँइँ ह्रोंसए म्हिमैं हिब्रूमैं ङाँर ह्‍याइ। चर चमैंइ ल्हें ल्हें दुःख योंरिब् म्रोंइ। च्हमन ह्रोंसए हिब्रू म्हि घ्रिलाइ मिश्रीइ धोंरिबै या चइ म्रोंइ।
EXO 2:12 झाइले चइ छाइ-छुइ ङ्‍ह्‍योमा चर खाबै आम्रोंमा च मिश्री सैसि बलुवार पाइ।
EXO 2:13 धबै प्हँन्हाँग्धों मोशा चर ह्‍यामा हिब्रूमैं ङ्हिं नेरिब म्रोंइ। धै चइ खैच्हिजी लबै म्हिने “क्हिइ ह्रोंसए म्हिलाइ तले प्रिंल?” बिइ।
EXO 2:14 छबिमा चइ बिइ, “क्हि ङिए क्रथे नेरो निसाफ लबै म्हि खाबइ लमिंइ? च मिश्रीने सैब् धोंले ङलाज्यै या सैल् म्हैल् वा?” छबिमा मोशाइ सैं न्हों-न्हों ङ्हिंसि बिइ, “क्ह्रोंसेंन चु ताँ खन्तोंदोंन् थेबर होंना।”
EXO 2:15 फारोइ चु ताँ था सेसि मोशालाइ सैबै सैं लइ। दिलेया मोशा फारो ङाँइले भौदिसि मिद्यान ह्‍युलर ह्‍यासि टिइ। तिगैं च क्यु खादुँ ङाँर टिरिमा
EXO 2:16 मिद्यानर्बै खेगिला (पुजारिला) च्हमि ङिग्लो ह्रोंसए आबाए र-क्युमैं क्यु थुँमिंबै ल्हागिर क्यु खासि डुँडर झोंबर होंल।
EXO 2:17 च त्हेर्न कोइ प्ह्रोंछैंमैं खसि च च्हमिरिमैं ल्हाबर होंइ। दिलेया मोशा रेसि चमैंलाइ ल्होमिंसि चमैंए र-क्युमैं क्यु थुँल् पिंइ।
EXO 2:18 झाइले चमैं ह्रोंसए आबा रूएल ङाँर खमा चमैंए आबाइ “क्हेमैं तिंयाँ तले च्हौ युनन् खल?” बिसि ङ्योएइ।
EXO 2:19 चमैंइ बिइ, “मिश्री घ्रिइ ङिलाइ प्ह्रोंछैंमैंए योउँइँले जोगेमिंइ। च्हौ मत्‍त्रे आङिंना, चइ ङिए ल्हागिर क्यु खासि ङिए र-क्युमैं थुँल् पिंइ।”
EXO 2:20 छबिमा चइ ह्रोंसए च्हमिमैंने बिइ, “च खनिर मुँ? क्हेमैंइ च म्हिलाइ तले वाथेंसि खल? ह्‍याद्, ङ्योने बालु चब् चबर हुइ पखो।”
EXO 2:21 हुइ पखमा मोशा च म्हिने बालु टिल् ङिंइ। धै चइ ह्रोंसए च्हमि सिप्पोरा मोशाने ब्ह्‍या लमिंइ।
EXO 2:22 सिप्पोराइ च्ह घ्रि फिइ, धै मोशाइ बिइ, “चु ह्‍युलर ङ टिल् योंसेरो ङइ चु च्हए मिं गेर्शोम थेंइमुँ।”
EXO 2:23 ल्हें त्हिंइ लिउँइँ मिश्रर्बै म्रुँ सियाइ। इस्राएलीथेंमैं केब्छैं तसि टिल् त्हुबइले प्ल्हाबै सो हेंसि ल्होमिन् बिसि प्राथना लइ। चमैंइ लबै प्राथना परमेश्‍वर ङाँर फेनेइ।
EXO 2:24 परमेश्‍वरजी चमैंए प्ल्हाबै सो हेंबै प्राथना थेइ, धै अब्राहाम, इसहाक नेरो याकूबने ह्रोंसइ फैबै बाछा मैंइ।
EXO 2:25 छतसि परमेश्‍वरजी इस्राएलीमैं फिर ङ्ह्‍योइ धै चमैंए फिर न्हुँ लइ।
EXO 3:1 मोशाइ ह्रोंसए क्यें मिद्यानर्बै खेगि यित्रोए र-क्युमैं छरिल। छले छरिमा क्यु आयोंबै क्ल्ह्‍योए क्योंजा परमेश्‍वरए कों होरेब बिबै क्ल्ह्‍यो समन् चइ र-क्युमैं छदै बोइ।
EXO 3:2 चर लुँरिबै झ्याडि घ्रिर याहवेहए दूत च ङाँर म्रोंयुइ। धै मोशाइ झ्‍याडिर ङ्ह्‍योमा चर मि लुँरिल दिलेया झ्याडि बिस्याँ आख्रोंल।
EXO 3:3 दमोशाइ बिइ, “च झ्याडिर लुँरिबै मि तले आसिगे? ङ चए रेर ह्‍यासि च औदिबै सै ङ्‍ह्‍योम्।”
EXO 3:4 मोशा च ङ्ह्‍‍योबर छाइ ह्‍यारिब याहवेहजी म्रोंइ। धै झ्‍याडिए म्हाँजोउँइँले “ओ मोशा, मोशा” बिसि परमेश्‍वरजी हुइइ। मोशाइ “ङ चुर्न मुँ,” बिइ।
EXO 3:5 झाइले परमेश्‍वरजी बिइ, “छुइ चेंदो आखो। क्हिए प्हलेर्बै जुत्ता प्लिद् तलेबिस्याँ क्हि राबै क्ल्ह्‍यो पबित्र क्ल्ह्‍यो ग।”
EXO 3:6 खीजी धबै बिइ, “ङ क्हिए खेमैं माँमैं अब्राहाम, इसहाक नेरो याकूबए परमेश्‍वर ग।” छबिमा मोशाइ परमेश्‍वरलाइ ङ्‍ह्‍योब ङ्हिंसि ह्रोंसए लि हुइ।
EXO 3:7 झाइले याहवेहजी बिइ, “मिश्रर मुँबै ङए म्हिमैंइ योंबै दुःख ङइ म्रोंइमुँ। धै के ल्हैदिबै चिब्मैंइ दुःख पिंमा चमैंइ ग्वार ह्रिबै या ङइ थेइमुँ। चमैंइ दुःख योंब ङइ सेइमुँ।
EXO 3:8 छतसि चमैं मिश्रीमैंए योउँइँले फ्रेसि च ह्‍युलउँइँले छ्याँब नेरो थेबै ह्‍युलर, अथवा ङ्‍हे नेरो खुदु ल्हें योंबै ह्‍युलर पखबर ङ तयुइमुँ। च ह्‍युलर कनानी, हित्ती, एमोरी, परिज्जी, हिव्वी नेरो यबूसीमैं टिब्मुँ।
EXO 3:9 तोगो इस्राएलीमैंइ ग्वार ह्रिब ङइ थेइमुँ। मिश्रीमैंइ चमैंलाइ ह्रुगुदिसि दुःख पिंब ङइ म्रोंइमुँ।
EXO 3:10 छतसि तारे क्हि ह्‍यासि ङए इस्राएली म्हिमैं मिश्रउँइँले तेसि पखबर ङइ क्हि फारो म्रुँ ङाँर कुलसिन् मुँ।”
EXO 3:11 दिलेया मोशाइ परमेश्‍वरने बिइ, “फारो म्रुँ ङाँर ह्‍यासि मिश्रउँइँले इस्राएलीमैं पखल् खाँब ङ खाब् जा?”
EXO 3:12 छबिमा परमेश्‍वरजी धबै बिइ, “ङ क्हिने बालु तब्मुँ। ङइ क्हिलाइ कुलब् ग बिबै चिनु चु तब्मुँ: क्हिइ च म्हिमैं मिश्रउँइँले तेइ पखमा क्हेमैंइ चु कोंर ङए सेवा लब्मुँ।”
EXO 3:13 मोशाइ परमेश्‍वरने बिइ, “ङ इस्राएलीमैं ङाँर ह्‍यासि चमैंने छले बिमा, ‘क्हेमैंए खेमैंए परमेश्‍वरजी ङ क्हेमैं ङाँर कुलब् ग।’ बिसि, चमैंइ ‘खीए मिं तो जा?’ बिसि ङ्योएस्याँ ङइ चमैंने तो बिब?”
EXO 3:14 छबिमा परमेश्‍वरजी मोशाने बिइ, “ङ ग, च ङन् ग।” धबै खीजी बिइ, “इस्राएलीमैंने क्हिइ छ बिद्, ‘ङ ग’ बिबजी क्हेमैं ङाँर ङ कुलब् ग।”
EXO 3:15 परमेश्‍व‍रजी मोशाने चु ताँ या बिइ, “इस्राएलीमैंने बिद्, ‘याहवेह, क्हेमैंए खेमैं माँमैंए परमेश्‍वर अथवा अब्राहाम, इसहाक नेरो याकूबए परमेश्‍वरजी ङ क्हेमैं ङाँर कुलब् ग।’ ङए मिं खोंयोंन् बिलै याहवेह (अथवा ङ ङन् ग) बिब् तरिब्मुँ, धै ताँन् पुस्ता समा ङए मिंन् छले मैंरिगे।”
EXO 3:16 “छतसि ह्‍याद्। ह्‍यासि इस्राएलर्बै चिबनाँबमैं खागु लसि चमैंने बिद्, ‘याहवेह, क्हेमैंए खेमैं माँमैंए परमेश्‍वर, अब्राहाम, इसहाक नेरो याकूबए परमेश्‍वर, ङ ङाँर म्रोंयुसि बिइ: ङइ क्हेमैं ङ्‍ह्‍योब-च्योब लइमुँ धै मिश्रर क्हेमैंइ योंबै दुःख ङइ म्रोंइमुँ।
EXO 3:17 ङइ क्हेमैंलाइ मिश्रर्बै दुःखउँइँले ‍तेसि छ्याँब नेरो थेबै ह्‍युलर अथवा ङ्‍हे नेरो खुदु ल्हेंयाबै ह्‍युलर पखबर ङइ बाछा लइमुँ। च ह्‍युलर कनानी, हित्ती, एमोरी, परिज्जी, हिव्वी नेरो यबूसीमैं टिब्मुँ।’
EXO 3:18 “इस्राएलर्बै चिबनाँबमैंइ क्हिए ताँ थेब्मुँ, धै क्हि नेरो चिबनाँबमैं मिश्रर्बै म्रुँ ङाँर ह्‍यासि क्हेमैंइ चने छ बिद्, ‘हिब्रूमैंए याहवेह परमेश्‍वरजी ङिने त्होइमुँ। छतसि तारे ङि क्हिने बिन्ति लमुँ, ङिए याहवेह परमेश्‍वरए ल्हागिर क्यु आयोंबै क्ल्ह्‍योर ख्रो पिंबर सोंरोबै घ्याँर ङि ह्‍याल् पिंन्।’
EXO 3:19 दिलेया मिश्रर्बै म्रुँइ क्हेमैं आकुलै आतबै त्हे आखन् समा ह्‍याल् पिंब आरे बिब ङइ सेइमुँ।
EXO 3:20 छतसि ङ चमैंए म्हाँजोर ङए यो क्वेसि औदिबै केमैंउँइँले मिश्रीमैंए फिर ल्हिब्मुँ। च लिउँइँ च म्रुँइ क्हेमैंलाइ ह्‍याल् पिंब्मुँ।
EXO 3:21 “ङइ क्हेमैंए फिर मिश्रीमैंइ ल्हयो खल् लमिंब्मुँ, धै क्हेमैं ह्‍यामा यो क्होते ह्‍यारिब् आरे।
EXO 3:22 क्हेमैंए च्हमिरिमैं ताँनइ ह्रोंसए मिश्री ङ्‍हेब् ट्हुब् नेरो चए धिंर टिबै मिश्री च्हमिरिने मारा चाँदिए घाँनामैं नेरो क्वेंजग ह्रिब्मुँ। धै क्हेमैंइ च सैमैं ह्रों-ह्रोंसए च्ह च्हमिमैं खिमिंब्मुँ। छले क्हेमैंइ मिश्रीमैंए सैमैं किंसि ह्‍याब्मुँ।”
EXO 4:1 मोशाइ बिइ, “खनिज्यै चमैंइ ङलाइ आक्वेंसि ङए ताँ आथेल्‍ले ‘याहवेह क्हि ङाँर म्रोंयुब आङिं,’ बिइ बिस्याँ तो लब?”
EXO 4:2 छबिमा याहवेहजी मोशाने “क्हिए योर तो मुँ?” बिमा चइ “प्हरे” बिइ।
EXO 4:3 याहवेहजी “च प्हरे सर भ्योंवान्” बिइ। मोशाइ प्हरे सर भ्योंवामा प्हरे प्हुरि तयाइ, छतमा मोशा च प्हुरि म्रोंसि ङ्हिंसि भौदिइ।
EXO 4:4 झाइले परमेश्‍वरजी मोशाने बिइ, “क्हिए यो स्योंसि प्हुरिए मिर क्हाद्,” बिमा मोशाइ यो स्योंसि क्हामा प्हुरि चए योर धबै प्हरेन् तयाइ।
EXO 4:5 धै याहवेहजी बिइ, “ङ याहवेह, चमैंए खेमैं अब्राहाम, इसहाक नेरो याकूबए परमेश्‍वर, क्हि ङाँर म्रोंयुब् मुँन बिसि इस्राएलीमैंइ चुन् केउँइँले क्वेंब्मुँ।”
EXO 4:6 झाइले याहवेहजी चने धबै बिइ, “क्हि यो ह्रोंसए बखु न्होंर झोंन्,” बिमा चइ ह्रोंसए यो बखु न्होंर झोंइ, धै लिउँइँ बखु न्होंउँइँले यो ट्हुइमा च कोर खसि क्लिं धोंले तारग्या तयाना।
EXO 4:7 धै खीजी चने “क्हिए यो धबै बखु न्होंर झोंन्,” बिमा चइ बखु न्होंर यो झोंइ। धै लिउँइँ बैरु तेमा च यो ह्रोंसए ज्युर्बै अरू सेमैं धोंन् तयाइ।
EXO 4:8 झाइले परमेश्‍व‍रजी बिइ, “चमैंइ क्हिए ताँ आक्‍वेंसि च ओंसोंबै चिनु वास्ता आलस्याँ चमैंइ लिउँइँबै चिनु म्रोंसि क्‍वेंब्मुँ।
EXO 4:9 चमैंइ चु चिनुमैं ङ्हिं म्रोंसेया आक्‍वेंसि, क्हिए ताँ या आथेस्याँ, नील स्योंर्बै च्युगुदे क्यु किंसि कारा क्ल्ह्‍योर ङेमिंन्। क्हिइ नील स्योंउँइँले पखबै क्यु सर को तयाब्मुँ।”
EXO 4:10 दिलेया मोशाइ याहवेहने बिइ, “प्रभु, ङ छेनाले पोंबै म्हि आङिं। ओंसों या पोंल् आह्रबन् मुँल, तोगो क्हि पोंबै लिउँज्यै या पोंल् आह्रबन् मुँ, तलेबिस्याँ ङ क्हुदिसि पोंबर क्हैइमुँ।”
EXO 4:11 छबिमा याहवेहजी चने बिइ, “म्हिए सुँ खाबइ बनेइ? म्हिलाइ लडा, न्ह आथेब, मि म्रोंब, आम्रोंब खाबइ लमिंम्? ङ याहवेहजीन् आङिं वा?
EXO 4:12 छतसि ह्‍याद्! क्हि पोंबर ङइ ल्होमिंब्मुँ, क्हिइ तो तो पोंल् त्हुम् चै या ङइ लोमिंब्मुँ।”
EXO 4:13 दिलेया मोशाइ बिइ, “ओ प्रभु, ङ यो छ्युँ लमुँ, अरू म्हिलाइन चु केर कुल्मिंन्।”
EXO 4:14 छबिमा याहवेह मोशाए फिर ह्रिस खसि बिइ, “लेबी कुलर्बै हारून क्हिए आघें आरे वा? ङइ सेइमुँ च छेनाले पोंल् खाँम्। च क्हिलाइ त्होबर खसिन्मुँ, क्हिलाइ म्रोंसि च सैं तोंब्मुँ।
EXO 4:15 क्हिइ चने बालु ताँ लसि चइ बिल् त्हुबै ताँ चने बिद्। क्हेमैं ङ्हिंने बालु ङ तब्मुँ धै क्हेमैंइ तो लल् त्हुम् च ङ लोमिंस्यो।
EXO 4:16 क्हिए ल्हागिर च क्हिए सुँ धों तसि म्हिमैंने पोंमिंब्मुँ, धै क्हि चए ल्हागिर परमेश्‍वर धोंन् तसि तो बिल् त्हुम् बिब्मुँ।
EXO 4:17 दिलेया चु प्हरे क्हिइन बोयाद्। चु प्हरेउँइँले क्हिइ औदिबै केमैं लब्मुँ।”
EXO 4:18 च लिउँइँ मोशा ह्रोंसए क्यें यित्रो ङाँर एखसि चने बिइ, “यो छ्युँ लम्, मिश्रर मुँबै ङए आघें-अलिमैं सोगों मुँ उ आरे बिसि ङ्‍ह्‍योबर ह्‍याल् पिंन्,” बिमा यित्रोइ मोशाने “तम्, सैं क्होसि ह्‍याद्!” बिइ।
EXO 4:19 मोशा मिधानर ठिमा याहवेहजी चने बिल, “मिश्रर एह्‍याद्, तलेबिस्याँ क्हिलाइ सैल म्हैब्मैं ताँन् सिल् खाँइ।”
EXO 4:20 छतसि मोशा ह्रोंसए प्ह्रेंस्यो नेरो च्हमैं गदार क्रेमिंसि परमेश्‍वरजी छेद् बिबै प्हरे योर किंसि मिश्रर एह्‍याइ।
EXO 4:21 याहवेहजी धबै मोशाने बिइ, “क्हि मिश्रर एह्‍यामा ङइ क्हिए योर थेंमिबै भोंउँइँले औदिबै केमैं फारो म्रुँए उँइँर लद्। दिलेया ङइ चए सैं सारो लब्मुँ। छतसि चइ ङए म्हिमैंलाइ ह्‍याल् पिंरिब् आरे।
EXO 4:22 च त्हेर क्हिइ फारो म्रुँने छले बिद्, ‘याहवेहजी बिइमुँ, इस्राएल ङए च्ह थेब ग।
EXO 4:23 चइ ङए सेवा लबर ङए च्ह ह्‍याल् पिंन् बिसि ङइ क्हिने बिइ, दिलेया क्हिइ चलाइ ह्‍याल् आपिं। छतसि ङइ क्हिए च्ह थेब सैवाब्मुँ।’”
EXO 4:24 झाइले घ्याँर बास टिबै क्ल्ह्‍योर याहवेहजी मोशाने त्होसि चलाइ सैल् म्हैइ।
EXO 4:25 दिलेया चए म्रिं‍‍ सिप्पोराइ छ्यारबै कर्द किंसि ह्रोंसए च्हए ज्युर चिनु लसि मोशाए प्हलेर छुइमिंसि “क्हि ङए ल्हागिर कोए प्युँ ग!” बिइ।
EXO 4:26 छलमा याहवेहजी चलाइ पिमिंइ। (धै ज्युर चिनु लबइले सिप्पोराइ “क्हि कोए प्युँ ग” बिल।)
EXO 4:27 याहवेहजी हारूनने “मोशाने त्होबर क्यु आयोंबै क्ल्ह्‍योर ह्‍याद्,” बिइ। छबिमा च परमेश्‍वरए कोंर मोशाने त्होबर ह्‍याइ, धै मोशाने त्होसि म्वें लइ।
EXO 4:28 झाइले याहवेहजी मोशालाइ मिश्रर ह्‍याद् बिसि तोन्दोंरि बिल त्हुबै ताँमैं नेरो लल् त्हुबै औदिबै केमैंए बारेर मोशाइ हारूनने बिइ।
EXO 4:29 छ बिबै लिउँइँ मोशा नेरो हारून मिश्रर ह्‍यासि इस्राएलीमैंए चिबनाँबमैं ताँन् खागु लइ।
EXO 4:30 झाइले परमेश्‍वरजी मोशाने बिबै ताँन् ताँमैं हारूनइ चमैंने बिइ। धै मोशाइ इस्राएलीमैंए उँइँर औदिबै केमैं लसि उँइँइ।
EXO 4:31 छले उँइँमा हारूनइ बिबै ताँ म्हिमैंइ क्वेंइ। धै याहवेहजी इस्राएलीमैंए न्हुँ लमना धै चमैंए दुःख या म्रोंइमुँ बिसि चमैंइ थेमा चमैंइ क्र कुरसि याहवेहलाइ फ्योसि खीए मिं क्वेइ।
EXO 5:1 च लिउँइँ मोशा नेरो हारून फारो म्रुँ ङाँर ह्‍यासि बिइ, “‘क्यु आयोंबै क्ल्ह्‍योर ङए ल्हागिर चाड म्हाँदिबर ङए म्हिमैं ह्‍याल् पिंन्,’ बिसि इस्राएलीमैंए याहवेह परमेश्‍वरजी बिइमुँ।”
EXO 5:2 दिलेया फारोइ बिइ, “याहवेह बिब खाब् रो? ङइ तले चए ताँ ङिंसि इस्राएलीमैं ह्‍याल् पिंब? याहवेह ङइ ङो आसे, छतसि इस्राएलीमैं ङइ ह्‍याल् आपिं।”
EXO 5:3 झाइले चमैंइ बिइ, “हिब्रूमैंए परमेश्‍वर ङिने त्होइमुँ। यो छ्युँ लमुँ, क्यु आयोंबै क्ल्ह्‍योर सोंरोबै घ्याँर ह्‍यासि ङिए परमेश्‍वरए ल्हागिर ख्रो पिंबर ङि ह्‍याल् पिंन्। आस्याँ खीजी ङिलाइ नब छब लसि, सेलाँइ (तरवारइ) ल्हिसि सैब्मुँ।”
EXO 5:4 छबिमा मिश्रर्बै म्रुँइ चमैंने बिइ, “ओ मोशा नेरो हारून, म्हिमैंइ लबै केर क्हेमैंइ तले न्होह्रों लमुँ? लल् त्हुबै केमैं लद्!”
EXO 5:5 फारोइ धबै बिइ, “ङ्‍ह्‍योद्, तारे ह्‍युलर क्हेमैंए म्हिमैं ल्हें तइमुँ। क्हेमैंइ चमैंलाइ के लल् आपिंदा ङ्हाँइमुँ!”
EXO 5:6 च त्हिंइर फारोइ मिश्री के ल्हैदिबै चिब्मैं नेरो इस्राएली नाइकेमैंने छ बिबर ल्हैदिइ:
EXO 5:7 “तारे इँट बनेबर चमैंलाइ पराल आपिंन्। चमैं ह्रोंसन् ह्‍यासि ह्रोंसए ल्हागिर पराल खुरिगे।
EXO 5:8 दिलेया इँट बिस्याँ चमैंइ तोगो समा कति बनेदै खइमुँ च्हगन् बनेबर ल्हैदिद्। इँट घ्रि या ताइ माइ आतरिगे तलेबिस्याँ चमैं प्ल्हेउ तइमुँ। छतसि ‘ङिए परमेश्‍वरए मिंर ख्रो पिंबर ह्‍याल् पिंन्,’ बिसि चमैं ओरइमुँ।
EXO 5:9 चमैंइ केमैं लरिरिगे, धै स्योलिबै ताँर सैं आह्‍यारिगे बिसि चु म्हिमैंलाइ ल्हें केमैं लबर ल्हैदिद्।”
EXO 5:10 छबिमा मिश्री के ल्हैदिबै चिब्मैं नेरो इस्राएली नाइकेमैं ह्‍यासि म्हिमैंने बिइ, “‘तारे ङइ क्हेमैंलाइ पराल आपिं,’ बिसि फारो म्रुँइ बिइमुँ।
EXO 5:11 ‘क्हेमैं ह्रोंसन् ह्‍यासि पराल खनिर योंमुँ छाइलेन् म्हैसि पखो। दिलेया क्हेमैंइ ओंसों इँट कति बनेल च्हगन् बनेल् त्हम्।’”
EXO 5:12 छतसि म्हिमैं मिश्र तिगोंन् पराल खुबर खन्तोंदोंन् ख्याँयाइ।
EXO 5:13 च के ल्हैदिबै चिब्मैंइ म्हिमैंने छ बिसि अत्तु चुइ, “पराल पिंमा त्हिंइर कति के लमल, पराल आपिंमै या च्हगन् लल् त्हुम्,” बिइ।
EXO 5:14 झाइले इस्राएली नाइकेमैंलाइ फारोए के ल्हैदिबै चिब्मैंइ धोंइ, धै “ओंसों धोंले तिंजोरै या इँट बनेसि ह्रोंसए के तले पूरा आलल?” बिसि ङ्योइ।
EXO 5:15 झाइले इस्राएली नाइकेमैं फारो ङाँर ह्‍यासि यो छ्युँ लसि बिइ, “क्हिए केब्छैंमैं फिर क्हिइ तले छाबै आछ्याँबै के लल?
EXO 5:16 क्हिए केब्छैंमैंलाइ ‘परालै या आपिं, दिलेया चमैंइ ङिने इँट या बनेद्’ बिम्। च्हगै आतन चमैंइ ङिलाइ धोंरिइमुँ दिलेया कसूर क्हिए म्हिमैंलन् मुँ।”
EXO 5:17 छबिले या फारोइ बिइ, “क्हेमैं प्ल्हेउ मुँ, के लदा आङ्हाँ। छतसि ‘ङि याहवेह ल्हागिर ख्रों पिंबर ह्‍याल् पिंन् बिसि क्हेमैंइ बिमुँ।’
EXO 5:18 तारे ह्‍यासि के लद्। पराल बिस्याँ क्हमैंलाइ पिंरिब् आरे, दिलेया तोक्दिबै इँट क्हेमैंइ बनेलन् त्हुम्।”
EXO 5:19 ओंसों इँट कति बनेल च्हगन् त्हिंइ ह्रोंसे बनेब् त्हुम् बिबै ताँ थेसि इस्राएली नाइकेमैंइ खेंमैंए फिर दुःख खब सेइ।
EXO 5:20 झाइले च नाइकेमैं फारो ङाँइँले त्होंखमा मोशा नेरो हारूनलाइ घ्याँर पैंरिब स्याइ।
EXO 5:21 झाइले चमैंइ बिइ, “क्हेमैंइ तो तो लइमुँ? याहवेहजी म्रोंसि क्हेमैंए निसाफ लरिगे, तलेबिस्याँ क्हेमैंइ फारो नेरो चए के लबै चिब्मैंइ ङिलाइ आखोब्मैं लमिंइमुँ। छतसि ङिलाइ सैबर क्हेमैइ चमैंए योर सेलाँ पिंइमुँ।”
EXO 5:22 झाइले मोशा याहवेह ङाँर एह्‍यासि बिइ, “ओ याहवेह, क्हिजी चु म्हिमैंए फिर तले दुःख तल् पिंल? छान् तरिगे बिसि ङलाइ कुलल् वा?
EXO 5:23 ङ क्हिए मिंर पोंबर फारो ङाँर ह्‍याबै त्हेसेरो चइ चु म्हिमैंए फिर झन् दुःख पिंइमुँ। दिलेया क्हिजी ह्रोंसए म्हिमैंलाइ च दुःखउँइँले आफ्रेमिंइमुँ।”
EXO 6:1 च त्हेर याहवेहजी मोशाने बिइ, “ङइ फारोलाइ तो लब्मुँ बिसि तारे क्हिइ म्रोंब्मुँ। ङए भोंबै योइ लमा चइ क्हेमैं ह्‍याल् पिंब्मुँ। ङए भोंबै योइ लमा चइ ह्रोंसए ह्‍युलउँइँले चमैंलाइ ल्हावाब्मुँ।”
EXO 6:2 झाइले परमेश्‍वरजी मोशाने धबै बिइ, “ङ याहवेह ग!
EXO 6:3 अब्राहाम, इसहाक नेरो याकूब ङाँर ङ तोन्दोंरि सै लल् खाँबै परमेश्‍वरए क्हो किंसि म्रोंयुइ। दिलेया याहवेह बिबै ङए मिंउँइँले चमैं ङाँर आम्रोंयु।
EXO 6:4 चमैं आगुए ह्‍युलर ह्‍यासि टिबै कनान बिबै ह्‍युल ङइ चमैंलाइ पिंम् बिसि चमैंने बाछा फैइ।
EXO 6:5 मिश्रीमैंइ केब्छैं लसि थेंबै इस्राएलीमैंइ दुःखए सो हेंब ङइ थेइमुँ। धै ङइ चमैंने फैबै बाछा ङइ मैंइमुँ।
EXO 6:6 “छतसि ‘ङ याहवेह ग’ बिसि इस्राएलीमैंने बिद्। ‘ङइ क्हेमैंलाइ मिश्रीमैंइ पिंबै दुःखउँइँले फ्रेमिंब्मुँ, धै चमैंए केब्छैं तसि टिल् त्हुबइले तेइ पखब्मुँ। ङए भों मुँबै यो रेसि चमैंए फिर ङ्हिंन् ङ्हाँबै दुःख पिंसि क्हेमैंलाइ जोगेमिंब्मुँ।
EXO 6:7 ङइ क्हेमैंलाइ ङए म्हिमैं तल् पिंब्मुँ, धै ङ क्हेमैंए परमेश्‍वर तब्मुँ। मिश्रीमैंए कब्छैं तसि टिल् त्हुबइले क्हेमैंलाइ तेइ पखबै ङ याहवेह क्हेमैंए परमेश्‍वर ग बिसि क्हेमैंइ सेब्मुँ
EXO 6:8 धै ङइ अब्राहाम, इसहाक नेरो याकूबने बाछा फैसि पिंम् बिबै ह्‍युलर क्हेमैंलाइ पखब्मुँ, धै च ह्‍युल क्हेमैंलाइ क्ल्हे तबर पिंब्मुँ। ङन् याहवेह ग।’ बिसि चमैंलाइ बिद्।”
EXO 6:9 मोशाइ इस्राएलीमैंने छान् बिसि बिमिंइ, दिलेया चमैं आगुए केब्छैं तसि टिल् त्हुबइले चमैंए सैं सियाल। छतसि चमैंइ मोशाए ताँ थेल् आङिं।
EXO 6:10 छतमा याहवेहजी मोशाने बिइ,
EXO 6:11 “ह्‍याद्, मिश्रर्बै फारो म्रुँने ‘इस्राएलीमैं क्हिए ह्‍युलउँइँले ह्‍याल् पिंन्!’ बिसि बिद्।”
EXO 6:12 छबिमा मोशाइ याहवेहने बिइ, “इस्राएलीमैंइ ङए ताँ आथे! ङ पोंलै आह्रबै म्हि ग, ङए ताँ फारोइ झन् खैले थेम् रो?”
EXO 6:13 झाइले याहवेहजी इस्राएलीमैं नेरो मिश्रर्बै फारो म्रुँए बारेर मोशा नेरो हारूनने ताँ ल्हैदिइ। “इस्राएलीमैंलाइ मिश्रउँइँले तेइ पखो!” बिसि चमैंने बिइ।
EXO 6:14 इस्राएलए च्ह थेब रूबेनए च्हमैं हानोक, पल्‍लु, हेस्रोन नेरो कर्मि मुँल। चुमैंउँइँले रूबेनए बंशमैं खब् ग।
EXO 6:15 शिमियोनए च्हमैं यमूएल, यामिन, ओहद, याकिन, सोहोर नेरो कनानी च्हमिरिए च्ह शौल मुँल। चुमैंउँइँले शिमियोनए बंशमैं खब् ग।
EXO 6:16 लेबीए च्हमैं सों गेर्शोन, कहात नेरो मरारि मुँल। चुमैंउँइँले लेबीए बंशमैं खब् ग। (लेबी प्रसे सोंच्युसे ङिदि बर्ष समा सोइ।)
EXO 6:17 गेर्शोनए च्हमैं ङ्हिं लिब्नि नेरो शिमि मुँल।
EXO 6:18 कहातए च्हमैं अम्राम, यिसहार, हेब्रोन नेरो उज्जीएल मुँल। (कहात प्रसे सोंच्युसे सोंदि समा सोइ।)
EXO 6:19 मरारिए च्हमैं महलि नेरो मूशि मुँल। लेबीए बंशमैं चए पुस्ता अनुसार चुमैं ताँन् ग।
EXO 6:20 अम्रामइ ह्रोंसए फोज्यों योकेबेदने ब्ह्‍या लसि हारून नेरो मोशा फिइ। (अम्राम प्रसे सोंच्युसे ङिदिं बर्ष समा सोइ।)
EXO 6:21 यिसहारए च्हमैं कोरह, नेपेग नेरो जिक्रि मुँल।
EXO 6:22 उज्‍जीएलए च्हमैं मीशाएल, एलसाफान नेरो सिथ्रि मुँल।
EXO 6:23 हारूनइ अम्मिनादाबए च्हमि नहशोनए अङाँ एलीशेबाने ब्ह्‍या लइ। चइ नादाब, अबिहू, एलाजार नेरो ईतामार फिइ।
EXO 6:24 कोरहए च्हमैं अस्सिर, एल्काना नेरो अबिआसाप मुँल। कोरहए बंशमैं चुमैंन् ग।
EXO 6:25 हारूनए च्ह एलाजारइ पतिएलए च्हमिमैं न्होंर्बै घ्रिने ब्ह्‍या लसि पिनहास फिइ। लेबीमैंए परवारर्बै चिब्मैं चमैंए बंशमैं चुन् ग।
EXO 6:26 याहवेहजी चु हारून नेरो मोशाने “इस्राएलीमैंलाइ कुल कुल लसि मिश्रउँइँले तेइ पखो” बिसि बिल।
EXO 6:27 मिश्रर्बै फारो म्रुँने “इस्राएलीमैंलाइ मिश्रउँइँले ह्‍याल् पिंन्!” बिब चु मोशा नेरो हारून मुँल।
EXO 6:28 याहवेहजी मिश्रर मोशाने बालु पोंबै त्हिंर,
EXO 6:29 “ङ याहवेह ग। ङइ क्हिने तो-तो ताँ बिबर ल्हैदिइमुँ, च ताँन् मिश्रर्बै फारो म्रुँने बिद्,” बिइ।
EXO 6:30 दिलेया मोशाइ याहवेहने बिइ, “ङ पोंलै आह्रबै म्हिए ताँ फारोइ खैले थेलै रो?”
EXO 7:1 छबिमा याहवेहजी मोशाने बिइ, “थेद्, ङइ फारोए ल्हागिर क्हि परमेश्‍वर धोंन् लमिंइमुँ, धै क्हिए आघें हारून क्हिए ताँ पोंमिंबै म्हि तब्मुँ।
EXO 7:2 ङइ क्हिने बिबै ताँन् ताँमैं क्हिइ क्हिए आघें हारूनने बिद्, धै क्हिए आघें हारूनइ इस्राएलीमैंलाइ ह्रोंसए ह्‍युलर ह्‍याल् पिंन् बिसि फारोने बिब्मुँ।
EXO 7:3 दिलेया ङइ फारोए सैं सारो लवाब्मुँ। धै ङइ ङ्हिंन् ङ्हाँन् तबै औदिबै चिनुमैं ल्हें लमिंब्मुँ।
EXO 7:4 दिलेया फारोइ क्हेमैंए ताँ थेरिब् आरे। छतमा ङइ ङए शक्‍ति मिश्र ह्‍युलर उँइँब्मुँ। धै छेनाले निसाफ लसि ङए म्हिमैं मिश्रउँइँले तेइ पखब्मुँ।
EXO 7:5 ङइ मिश्र ह्‍युलर ह्रोंसए यो क्वेसि चमैंए म्हाँजोउँइँले इस्राएलीमैं तेइ पखब्मुँ। छलमा मिश्रीमैंइ ङ याहवेह मुँन बिसि सेब्मुँ।”
EXO 7:6 याहवेहजी मोशा नेरो हारूनने बिब् धोंलेन् चमैंइ लइ।
EXO 7:7 फारोने ताँ लमा मोशा प्रेच्यु बर्षर्बै नेरो हारून प्रेच्युसे सोंदिर्बै मुँल।
EXO 7:8 झाइले याहवेहजी मोशा नेरो हारूनने बिइ,
EXO 7:9 “फारोइ क्हेमैंने ‘औदिबै के लसि उँइँन्’ बिमा, क्हिइ हारुने ‘प्हरे फारोए उँइँर भ्योंवाँन्’ बिदु, धै च प्हरे प्हुरि तब्मुँ।”
EXO 7:10 छतसि मोशा नेरो हारून फारो ङाँर ह्‍यासि याहवेहजी बिब् धोंलेन् हारूनइ ह्रोंसए प्हरे किंसि फारो नेरो चए म्हिमैंए ओंसों भ्योंवामा प्हरे प्हुरि तयाइ।
EXO 7:11 छतमा फारोज्यै या ह्रोंसए ह्रब सेब्मैं नेरो टुना मुना लब्मैं हुइबर कुलइ। धै च मिश्रर्बै जादु लब्मैंज्यै या ह्रों-ह्रोंसए न्होंर्बै सिपउँइँले छान् लइ।
EXO 7:12 ताँनइ ह्रों-ह्रोंसए प्हरे भ्योंवामा प्हुरि तयाइ। दिलेया हारूनए प्हरेइ चमैंए प्हरे क्ल्ह्‍योंवाइ।
EXO 7:13 दिलेया फारोए सैं सारो तइ। धै याहवेहजी बिब् धोंलेन् फारोइ चमैंए ताँ आथे।
EXO 7:14 झाइले याहवेहजी मोशाने बिइ, “फारोए सैं सारो तइमुँ। छतसि चइ म्हिमैं ह्‍याल् आपिं।
EXO 7:15 न्हाँकर्न फारो नील स्योंउँइँ ह्‍यारिबै त्हेर क्हि च प्हुरि तबै प्हरे बोसि नील स्योंए तिरर चने त्होबर रारिद्।
EXO 7:16 झाइले चने छ बिद्, ‘हिब्रूमैंए याहवेह परमेश्‍वरजी ङलाइ क्हि ङाँर कुलइमुँ। खीजी क्हिने “ङए म्हिमैंलाइ क्यु आयोंबै क्ल्ह्‍योर ङए सेवा लबर ह्‍याल् पिंन्!” बिइ। दिलेया तोगो समा क्हिइ ह्‍याल् आपिं।
EXO 7:17 छतसि “ङ्‍ह्‍योद्, ङइ नील स्योंर्बै क्यु ङए योर्बै प्हरेइ प्रिंब्मुँ। धै च को तयाब्मुँ। छले ङ याहवेह ग बिबै ताँ क्हिइ सेब्मुँ।
EXO 7:18 झाइले स्योंर्बै ताँगमैं सियाब्मुँ, धै स्यों बेल्‍ले थाँ नाँबइले मिश्रीमैंइ चर्बै क्यु थुँल् खाँरिब् आरे,” बिसि याहवेहजी बिइमुँ।’”
EXO 7:19 धबै याहवेहजी मोशाने बिइ, “‘मिश्ररर्बै स्यों, क्युखादुँ, ङ्‍ह्‍योखो, नेरो कुलोर्बै क्यु को तयारिगे बिसि क्हिए प्हरे किंसि च ताँनए फिर क्हिए यो स्योंन्,’ बिसि हारूनने बिद्। ‘छलस्याँ ताँन् मिश्रर मुँबै क्यु, सिं नेरो युँमाइ बनेबै छेदो न्होंर्बै क्युमैं या, को तयाब्मुँ।’”
EXO 7:20 झाइले मोशा नेरो हारूनइ याहवेहजी बिब् धोंलेन् लइ। फारो नेरो चए के लब्हिमैंए उँइँर्न हारूनइ प्हरे नील स्योंए क्युर प्रिंमा ताँन् क्यु को तयाइ।
EXO 7:21 नील स्योंर्बै ताँगमैं सियासि स्यों थाँ नाँबर होंइ, धै मिश्रर्बै ताँन् क्यु को तयाबइले मिश्रीमैंइ स्योंर्बै क्यु थुँल् आखाँल।
EXO 7:22 दिलेया मिश्रर्बै जादु लब्मैंज्यै या ह्रोंसए न्होंर्बै सिपउँइँले छान् लइ। याहवेहजी बिब् धोंलेन् फारोए सैं सारो तसि चमैंए ताँ आथे।
EXO 7:23 च्हौ थेबै दुःख तलेया तो तल् तरिगे बिसि फारो ह्रोंसए दरबारर एह्‍याइ।
EXO 7:24 नील स्योंर्बै क्यु थुँल् आखाँबइले ताँन् मिश्रीमैंइ नील स्योंए रेजरे थुँबै क्युए ल्हागिर ताबर होंइ।
EXO 7:25 याहवेहजी नील स्योंर्बै क्यु को लमिंसि ङिगें तइ।
EXO 8:1 धबै याहवेहजी मोशाने बिइ, “फारो ङाँर ह्‍यासि ‘ङए म्हिमैं ङए सेवा लबर ह्‍याल् पिंन् बिसि याहवेहजी बिइमुँ,’ बिद्।
EXO 8:2 ‘क्हिइ चमैंलाइ ह्‍याल् आपिंस्याँ ङइ क्हिए ताँन् ह्‍युलर प्हद्गोमैं कुलसि ह्रुगुदिल् पिंब्मुँ।
EXO 8:3 झाइले नील स्योंर प्हद्गोइ प्लिंसि च क्हिए दरबारर, क्हि रोबै कोठार, क्हिए खाटर, क्हिए के लब्मैंए धिं-धिंर, क्हिए म्हिमैंए फिर, क्हिए कोदाजरे नेरो प्रो चेंबै भाँडाजरे खब्मुँ।
EXO 8:4 च प्हद्गोमैं क्हिने, क्हिए म्हिमैंने, क्हिए के लब्मैं फिरै या खब्मुँ,’ बिसि चने बिद्।”
EXO 8:5 झाइले याहवेहजी मोशाने बिइ, “‘मिश्र तिगोंन् प्हद्गोमैं खरिगे बिसि हारूनइ प्हरे किंसि स्योंमैं, कुलोमैं नेरो ङ्‍ह्‍योमैं फिर यो स्योंन्,’ बिसि हारूनने बिद्।”
EXO 8:6 छबिमा हारूनइ मिश्रर्बै क्यु मुँबै क्ल्ह्‍योजरे ह्रोंसए यो स्योंमा प्हद्गोमैं त्होंसि मिश्र ह्‍युल हुवाइ।
EXO 8:7 छलेन जादु लब्मैंज्यै ह्रोंसए न्होंर्बै सिपउँइँले छान् लसि मिश्रर प्हद्गोमैं तेवाइ।
EXO 8:8 छतमा फारोइ मोशा नेरो हारूनलाइ हुइबर कुलसि बिइ, “याहवेहजी ङ नेरो ङए म्हिमैंउँइँले प्हद्गोमैं स्योमिंरिगे बिसि खीने बिन्ति लमिंन्। छलस्याँ खीए ल्हागिर ख्रो पिंबर क्हिए म्हिमैं ङइ ह्‍याल् पिंब्मुँ।”
EXO 8:9 मोशाइ फारोने बिइ, “प्हद्गोमैं क्हि नेरो क्हिए धिंउँइँले म्हह्‍यारिगे, नील स्योंर मत्‍त्रे तरिगे बिसि ङइ क्हि नेरो क्हिए के लब्मैं नेरो क्हिए म्हिमैंए ल्हागिर याहवेहने खोंयों बिन्ति लमिंल् त्हुम बिसि बिद्।”
EXO 8:10 फारोइ “प्हन्हाँग” बिइ। मोशाइ बिइ, “क्हिइ बिब् धोंलेन् तब्मुँ, धै ङिए याहवेह परमेश्‍वर धोंब अरू खाबै आरे बिसि क्हिइ सेब्मुँ।
EXO 8:11 प्हद्गोमैं क्हि, क्हिए धिंउँइँले, क्हिए के लबै म्हिमैंउँइँले नेरो क्हिए म्हिमैंउँइँले एह्‍याब्मुँ, नील स्योंर मत्‍त्रे तब्मुँ।”
EXO 8:12 झाइले मोशा नेरो हारून फारोउँइँले त्होंइ ह्‍याइ। धै फारोए फिर कुल्मिंबै प्हद्गोमैं स्योवामिंन् बिसि मोशाइ याहवेहने प्राथना लइ।
EXO 8:13 छलमा याहवेहजी मोशाइ बिब् धोंलेन् लमिंसि धिंर, ह्‍युर नेरो म्रोंजरे मुँबै प्हद्गोमैं सियाइ।
EXO 8:14 म्हिमैंइ चमैं खुसि क्ल्ह्‍यो घ्रिर थेंमा, मिश्र ह्‍युल आछ्याँबै थाँ नाँबर प्लिंयाइ।
EXO 8:15 दिलेया फारोइ प्हद्गोमैं सियाब म्रोंलेया याहवेहजी बिब् धोंलेन् चइ ह्रोंसए सैं सारो लसि मोशा नेरो हारूनए ताँ आथे।
EXO 8:16 छतमा याहवेहजी धबै मोशाने बिइ, “त्हुलउँइँले मिश्र तिगोंन् मोसोमैं तयारिगे बिसि प्हरे किंसि त्हुलर प्रिंन् बिसि हारूनने बिद्।”
EXO 8:17 याहवेहजी मोशाने बिब् धोंले हारूनइ प्हरे किंसि स त्हुलर प्रिंमा मिश्र ह्‍युलर्बै ताँन् स त्हुला मोसो मोसोन् तयासि म्हिमैं नेरो खेदोमैंने कुयाइ।
EXO 8:18 धै जादु लब्मैंज्यै ह्रोंसए न्होंर्बै सिपउँइँले मोसो बनेल् म्हैइ, दिलेया बनेल् आखाँ। दिलेया म्हिमैं नेरो खेदोमैंने मोसो तरिइ।
EXO 8:19 छतमा जादु लब्मैंइ फारोने बिइ, “चु के परमेश्‍वरजीन् लब् ग।” छबिलेना याहवेहजी बिब् धोंलेन् फारोए सैं सारो तसि चमैंए ताँ आथे।
EXO 8:20 धबै याहवेहजी मोशाने बिइ, “प्हन्हाँग न्हाँकर्न ह्‍यासि फारो स्योंर ह्‍याबै त्हेर चने त्होसि बिद्, ‘ङए सेवा लबर ङए म्हिमैं ह्‍याल् पिंन् बिसि याहवेहजी बिइमुँ’ बिद्।
EXO 8:21 ‘ङए म्हिमैं ह्‍याल् आपिंस्याँ, ङ्‍ह्‍योद्, क्हि, क्हिए के लब्मैं फिर, क्हि म्हिमैं नेरो क्हिए धिंर ङइ बेल्‍ले ल्हें च्युमिंमैं कुल्मिंब्मुँ, छलेन मिश्रीमैंए धिं-धिंर नेरो चमैं टिबै क्ल्ह्‍योजरै या च्युमिंइ प्लिंब्मुँ।
EXO 8:22 दिलेया च त्हिंइर याहवेह चु ह्‍युलर मुँ बिब् क्हिइ सेरिगे बिसि ङए म्हिमैं टिबै गोशेन ह्‍युललाइ बिस्याँ ङइ जोगेमिंब्मुँ, चर च्युमिं तरिब् आरे।
EXO 8:23 छले ङए म्हिमैं नेरो क्हिए म्हिमैंए म्हाँजोर ङइ स्यो-स्योबै केमैं लब्मुँ। चु औदिबै चिनुमैं प्हन्हाँग तब्मुँ।’”
EXO 8:24 च्हमा याहवेहजी छान् लइ। फारोए दरबार नेरो चए के लब्मैंए धिं-धिंर बेल्‍ले ल्हें च्युमिंमैं खइ, धै च्युमिंमैंइ मिश्र ह्‍युलर बेल्‍ले ह्रुगुदिइ।
EXO 8:25 छतमा फारोइ मोशा नेरो हारून हुइसि बिइ, “क्हेमैं ह्‍यासि चु ह्‍युलए न्होंर्न ह्रोंसए परमेश्‍वरए ल्हागिर ख्रो पिंन्।”
EXO 8:26 दिलेया मोशाइ बिइ, “छ लब ठिक आत, तलेबिस्याँ ङिए याहवेह परमेश्‍वरए ल्हागिर ङिइ पिंबै ख्रो म्रोंसि मिश्रीमैं छेरम्। मिश्रीमैंइ आखोबै ख्रो चमैंए ओंसों पिंइ बिस्याँ चमैंइ ङिलाइ युँमाइ आप्रिं रो वा?
EXO 8:27 ङि सोंरोबै घ्याँ ह्‍यासि क्यु आयोंबै क्ल्ह्‍योर ह्रोंसए परमेश्‍वरजी बिब् धोंलेन् खीए ल्हागिर ङिइ ख्रो पिंल् त्हुम्।”
EXO 8:28 छबिमा फारोइ बिइ, “तम्, ङइ क्हेमैंलाइ क्यु आयोंबै क्ल्ह्‍योर क्हेमैंए याहवेह परमेश्‍वरए ल्हागिर ख्रो पिंबर ह्‍यालम् पिंम्, दिलेया ह्रेंगो बिस्याँ आह्‍याद्। ङए ल्हागिरै या प्राथना लमिंन्।”
EXO 8:29 मोशाइ बिइ, “ङ क्हि ङाँइले बैरु ह्‍याबै तोंदोंन् क्हि, क्हिए के लब्मैं नेरो क्हिए म्हिमैंउँइँले प्हन्हाँगन् च च्युमिंमैं स्योह्‍यारिगे बिसि याहवेहने प्राथना लब्मुँ। दिलेया याहवेहए ल्हागिर ख्रो पिंबर ह्‍याल् पिंम् बिसि धबै स्योर आतेद्।”
EXO 8:30 झाइले मोशा फारो ङाँइले बैरु ह्‍यासि याहवेहने प्राथना लइ।
EXO 8:31 छलमा याहवेहजी मोशाइ बिब् धोंलेन् लमिंइ, धै फारो, चए के लब्मैं नेरो चए म्हिमैंउँइँले च च्युमिंमैं घ्रि या आचैल्‍ले स्योह्‍याइ।
EXO 8:32 छ तलेना चु लारै या फारोइ धबै सैं सारो लसि म्हिमैं ह्‍याल् आपिं।
EXO 9:1 याहवेहजी धबै मोशाने बिइ, “फारो ङाँर ह्‍यासि चने ‘ङए म्हिमैं ङए सेवा लबर ह्‍याल् पिंन् बिसि हिब्रूमैंए याहवेह परमेश्‍वरजी बिइमुँ,’ बिद्।
EXO 9:2 ‘क्हिइ अझै चमैंलाइ ह्‍याल् आपिंल्‍ले क्वेइ थेंस्याँ
EXO 9:3 क्हिए खेदोमैं, घोडा, गदा, सलु (ऊँट) म्येमैं नेरो र-क्युमैं फिर ङइ ङ्हिंन् ङ्हाँबै नब छब तल् लवाब्मुँ।
EXO 9:4 दिलेया ङइ इस्राएलीमैंए खेदोमैं नेरो मिश्रीमैंए खेदोमैं फेलब्मुँ। धै इस्राएलीमैंल खेदोमैं घ्रि या सिरिब् आरे।
EXO 9:5 ङइ प्हन्हाँगन् चु के लब्मुँ बिसि त्हे तौदिइ,’ बिसि फारोने बिद।”
EXO 9:6 चए प्हँन्हाँग्धों याहवेहजी च के लइ, धै मिश्रर्बै खेदोमैं ताँन् सिइ, इस्राएलीमैंल बिस्याँ खेदो घ्रि या आसि।
EXO 9:7 फारोइ चजरे ङ्‍ह्‍योबर म्हिमैं कुलमा इस्राएलीमैंल खेदोमैं घ्रि या सिब चमैंइ आम्रों। छान् तलेया फारोए सैं सारो तरिसि चइ म्हिमैं ह्‍याल् आपिं।
EXO 9:8 च लिउँइँ याहवेहजी मोशा नेरो हारूनने बिइ, “कोदाउँइँले ह्रों-ह्रोंसए मुट्ठि तिगों मेब्रो किंनु, धै मोशाइ फारोए ओंसों च मेब्रो मुउँइँ टाँमिंरिगे।
EXO 9:9 च मेब्रो ताँन् मिश्रर त्हुल तसि मिश्रर्बै ताँन् म्हिमैं नेरो खेदोमैंए ज्युर पोर तयाब्मुँ।”
EXO 9:10 छबिमा चमैं कोदार्बै मेब्रो किंसि फारोए ओंसों रासि मोशाइ च मेब्रो मुउँइँ टाँमिंइ, धै म्हिमैं नेरो खेदोमैंए ज्युर पोरमैं त्होंखइ।
EXO 9:11 जादु लब्मैं पोरइ लमा मोशाए उँइँर राल् आखाँ। तलेबिस्याँ जादु लब्मैंए ज्युर नेरो मिश्रीमैं ताँनए ज्युर पोर खल।
EXO 9:12 दिलेया याहवेहजी फारोए सैं सारो लमिंइ, धै याहवेहजी मोशाने बिब् धोंले मोशा नेरो हारूनए ताँ चइ आथे।
EXO 9:13 याहवेहजी धबै मोशाने बिइ, “प्हन्हाँग न्हाँकर्न रेसि फारो ङाँर ह्‍यासि चने, ‘ङए सेवा लबर ङए म्हिमैं ह्‍याल् पिंन्!’ बिसि हिब्रूमैंए याहवेह परमेश्‍वरजी बिइमुँ बिद्।
EXO 9:14 ‘ह्‍याल् आपिंस्याँ चु लार ङइ क्हिए फिर, के लब्मैंए फिर नेरो म्हिमैंए फिर बेल्‍ले थेबै दुःखमैं कुलब्मुँ। छले पृथ्‍बीर ङ धोंबै परमेश्‍वर खाबै आरे बिसि क्हिइ सेब्मुँ।
EXO 9:15 ङइ ह्रोंसए यो स्योंसि क्हि नेरो क्हिए म्हिमैं नल् लवास्याँ क्हि चु पृथ्‍बीउँइँले नास तयामल,
EXO 9:16 दिलेया ह्‍युल तिगोंन् ङए मिं बिप्ररिगे धै ङए शक्‍ति क्हिइ म्रोंल् खाँरिगे बिसि ङइ क्हिलाइ सोगों थेंइमुँ।
EXO 9:17 अझै या क्हि थेब् प्हैंसि ङए म्हिमैं ह्‍याल् आपिंब्मुँ।
EXO 9:18 छतसि प्हन्हाँग चु त्हेर्न ङइ बेल्‍ले थेबै तिस्यु कुलब्मुँ। च्हौ थेबै तिस्यु मिश्र ह्‍‍युलर तोगो समा आयुइमुँ।
EXO 9:19 छतसि “खेदोमैं नेरो बैरु मुँबै ताँन् सैमैं युना न्होंर झोंन्!” बिबर म्हिमैं कुलद्, तलेबिस्याँ धिं न्होंर आझोंल्‍ले बैरुन् वाथेंबै म्हिमैं नेरो खेदोमैं तिस्युइ ह्रासि सियाब्मुँ।’”
EXO 9:20 धै फारोए के लब्मैं न्होंरि याहवेहजी बिबै ताँने ङ्हिंब्मैंइ ह्रों-ह्रोंसए केब्छैंमैं नेरो खेदोमैं धिं न्होंर झोंइ।
EXO 9:21 दिलेया याहवेहजी बिबै ताँने आङ्हिंब्मैंइ ह्रों-ह्रोंसए केब्छैंमैं नेरो खेदोमैं बैरुन् टिल् पिंइ।
EXO 9:22 झाइले याहवेहजी मोशाने बिइ, “क्हिए यो मुउँइँ स्योंन्, धै मिश्र तिगोंन् तिस्यु युसि मिश्रर्बै म्हि, खेदो, म्रोंर म्‍लोबै ताँन् सैमैं तिस्युइ ह्रारिगे।”
EXO 9:23 झाइले मोशाइ ह्रोंसए प्हरे मुउँइँ स्योंमा याहवेहजी मु ङ्‍हेल् लवासि पृथ्‍बीर काम्‍लि-तिम्‍लि रासि मिश्रर ङ्हिंन ङ्हाँबै तिस्यु कुल्मिंइ।
EXO 9:24 तिस्यु युसि काम्‍लि-तिम्‍लि राइ। छाबै तिस्यु मिश्र ह्‍युलर ओंसों खोंयोंइ आयुल!
EXO 9:25 ताँन् मिश्ररर्बै बैरु मुँबै म्हि नेरो खेदो तिस्युइ प्रुइ। तिस्युइ म्रोंर म्‍लोबै सैमैं नेरो सिंधुँमैं तोइ आचैन् लवाइ।
EXO 9:26 दिलेया इस्राएलीमैं मत्‍त्रे टिबै गोशेन ह्‍युलर तिस्यु आयु।
EXO 9:27 छतमा फारोइ मोशा नेरो हारून हुइसि “चु लारै ङइ पाप लइ,” बिइ। “याहवेहजी ठिक लइमुँ, ङ नेरो ङए म्हिमैंज्यै आछ्याँबै केमैं लइमुँ!
EXO 9:28 छतसि याहवेहने प्राथना लमिंन्, तलेबिस्याँ चु मु ङ्‍हेब नेरो तिस्युइ सारुन् लइ। ङइ क्हेमैं ह्‍याल् पिंब्मुँ। तारे क्हेमैं अझै चुर टिल् आत्हु।”
EXO 9:29 मोशाइ म्रुँने बिइ, “ङ सहरउँइँ त्होंह्‍याबै तोंदोंन् ङइ याहवेह ङाँइ ह्रोंसए यो स्योंब्मुँ, झाइले मु ङ्‍हेब नेरो तिस्यु युब टियाब्मुँ। छले पृथ्‍बी याहवेहलन् ग बिसि क्हिइ सेब्मुँ।
EXO 9:30 दिलेया क्हि नेरो क्हिए के लब्मैंइ बिस्याँ तोगो समा याहवेह परमेश्‍वरने आङ्हिंइमुँ बिसि ङइ सेइमुँ।”
EXO 9:31 नाँ त्होंबै जौ नेरो सारबै सनपाटर तिस्युइ प्रुवाल।
EXO 9:32 दिलेया गहुँ बिस्याँ तिस्युइ आप्रु तलेबिस्याँ गहुँल नाँमैं आत्होंल।
EXO 9:33 झाइले मोशा फारो ङाँइले त्होंसि सहर बैरु ह्‍यासि याहवेह ङाँइ ह्रोंसए यो स्योंमा मु ङ्‍हेब नेरो तिस्यु युब टियाइ, धै नाँ या टियाइ।
EXO 9:34 दिलेया फारोइ नाँ तिस्यु नेरो मु ङ्‍हेब टियाब् म्रोंसि फारो नेरो चए के लब्मैंइ सैं सारो लसि धबै पाप लइ।
EXO 9:35 छले फारोए सैं सारो तइ, झाइले याहवेहजी मोशाने बिब् धोंलेन् चइ इस्राएलीमैं ह्‍याल् आपिं।
EXO 10:1 याहवेहजी धबै मोशाने “फारो ङाँर ह्‍याद्,” बिइ। “तलेबिस्याँ चमैंए म्हाँजोर ङए चु औदिबै चिनुमैं उँइँरिगे बिसि ङइ च नेरो चए के लब्मैंए सैं सारो लमिंब् ग।
EXO 10:2 छ लमा ङइ मिश्रीमैं म्हाँजोर खै-खैबै चिनुमैं उँइँइ बिसि क्हिए च्ह क्वेमैंने बिब्मुँ, झाइले याहवेह ङन् ग बिसि क्हेमैंइ सेब्मुँ।”
EXO 10:3 छतसि मोशा नेरो हारून फारो ङाँर ह्‍यासि चने बिइ, “हिब्रूमैंए याहवेह परमेश्‍वरजी क्हिने ‘खोंयों समा क्हि च्योंने तसि ङइ बिब् आङिं?’ बिइ। ‘ङए सेवा लरिगे बिसि ङए म्हिमैं ह्‍याल् पिंन्।
EXO 10:4 क्हिइ ङए म्हिमैं ह्‍याल् आपिंस्याँ प्हन्हाँग ङइ क्हिए ह्‍युलर तिरिमैं पखब्मुँ।
EXO 10:5 तिरिमैंइ स आम्रोंन्ले हुवाब्मुँ। तिस्युउँइँले जोगेसि ङैबै सैमैं नेरो क्ह्‍योंर म्‍लोबै ताँन् सिधुँए प्होमैं चमैंइ चवाब्मुँ।
EXO 10:6 क्हिए धिंर, क्हिए के लब्मैंए धिंमैंर नेरो ताँन् मिश्रीमैंए धिंमैंर तिरिइ प्लिंब्मुँ। च्हौ ल्हें दु:ख क्हिए खेमैंइ तिंयाँ समा खोंयोंन् बिलै आम्रोंल,’ बिइ।” च्हौ बिसि मोशा फारो ङाँइँले त्होंसि ह्‍याइ।
EXO 10:7 फारोए के लब्मैंइ चने “खोंयों समा चुइ ङ्योलाइ दुःख पिंमुँ?” बिइ। “मिश्र ह्‍युल नास तयाइ बिब क्हिइ आसेइमुँ वा? च म्हिमैंलाइ खेंमैंए याहवेह परमेश्‍वरए सेवा लबर ह्‍याल् पिंन्।”
EXO 10:8 झाइले फारोए म्हिमैंइ मोशा नेरो हारून फारो ङाँर पखइ। फारोइ चमैंने बिइ, “ह्‍यासि क्हेमैंए याहवेह परमेश्‍वरए सेवा लद्। दिलेया ह्‍याब्मैं खा-खाब्मैं जा?”
EXO 10:9 मोशाइ बिइ, “ङि, ङिए कोलोमैं, खेब् माँब्मैं, च्ह च्हमिमैं, र-क्युमैं नेरो खेदोमैं किंसि ह्‍याब्मुँ, तलेबिस्याँ ङिइ याहवेहए ल्हागिर चाड म्हाँदिल् त्हुम्।”
EXO 10:10 फारोइ बिइ, “ङइ च्हमिरिमैं नेरो कोलोमैं क्हेमैंने ह्‍याल् पिंम् बिस्याँ क्हेमैंए रक्षा लबर याहवेह क्हेमैंनेन् मुँल् त्हुम्! तलेबिस्याँ क्हेमैंए सैंर आछ्याँब ताँमैं मुँ।
EXO 10:11 छ आत! क्हेमैं ह्‍यासि याहवेहए सेवा लदा ङ्हाँम। छतसि मुँयुँमैं मत्‍त्रे बोसि ह्‍याद्।” झाइले फारोए म्हिमैंइ मोशा नेरो हारून फारो ङाँइँले ल्हावाइ।
EXO 10:12 छतमा याहवेहजी मोशाने बिइ, “तिरिमैं मिश्रर खसि तिस्युइ आस्याबै म्रोंर्बै प्याँ-पिं ट्हा-ट्हुमैं ताँन् चवारिगे बिसि मिश्र ह्‍युलउँइँ ह्रोंसए यो स्योंन्।”
EXO 10:13 छबिमा मोशाइ ह्रोंसए प्हरे मिश्रए फिर स्योंमा याहवेहजी च त्हिंइ नेरो म्हुँइँसा मिश्रर स्यारउँइँले खैं खमिंइ। झाइले न्हाँग तमा स्यारबै खैंइ तिरिमैं पखइ।
EXO 10:14 तिरिमैं मिश्रर खसि ह्‍युल तिगोंन् टिइ। च्हौ ल्हें तिरि चु भन्दा ओंसों खोंयोंन् बिलै आखल, लिउँइँज्यै या धबै खरिब् आरे।
EXO 10:15 तिरिइ ताँन् क्ल्ह्‍यो म्‍लोंगि ब्योंन्ले हुवाइ। धै तिस्युइ आस्याबै मिश्रर्बै ताँन् प्याँ पिं ट्हा ट्हुमैं नेरो सिंधुँर्बै रोमैं तोइ आचैल्‍ले चवाइ।
EXO 10:16 छतमा फारोइ मोशा नेरो हारून युनन् हुइबर कुलसि “ङइ क्हेमैंए याहवेह परमेश्‍वर नेरो क्हेमैंए बिरोधर पाप लइ,” बिइ।
EXO 10:17 “छतसि तारे ङ यो छ्युँ लमुँ, ङए पाप तोगोइन क्षमा लद्, धै ङए फिर तखबै चु दुःख खीजी स्योमिंरिगे बिसि क्हेमैंए याहवेह परमेश्‍वरने यो छ्युँ लसि प्राथना लद्।”
EXO 10:18 छबिमा मोशा फारो ङाँइँले त्होंइ ह्‍यासि याहवेहने यो छ्युँ लसि प्राथना लइ।
EXO 10:19 झाइले याहवेहजी छ्यो न्हुउँइँले (पश्‍चिमउँइँले) बेल्‍ले थेबै खैं खमिंइ, खैंइ तिरिमैं सुएज बिबै मा ङ्युँइउँइँ नोबोइ। मिश्रर तिरि घ्रि या आचै।
EXO 10:20 दिलेया याहवेहजी फारोए सैं सारो लमिंमा चइ इस्राएलीमैं ह्‍याल् आपिं।
EXO 10:21 याहवेहजी धबै मोशाने बिइ, “छुइमा या था सेबै मिछु खैब मिश्रर तयारिगे बिसि क्हिए यो मुउँइँ स्योंन्।”
EXO 10:22 छबिमा मोशाइ ह्रोंसए यो मुउँइँ स्योंमा मिश्रर सोंगैं समा मिछु खैयाइ।
EXO 10:23 सोंगैं समा मिश्रीमैंइ खाबै म्रोंल् आखाँ, खाबै या ह्रोंसए क्ल्ह्‍योउँइँले प्रल् आखाँ दिलेया इस्राएलीमैं टिबै क्ल्ह्‍योर बिस्याँ मि म्रोंरिल।
EXO 10:24 छतमा फारोइ मोशालाइ हुइसि बिइ, “क्हेमैं ह्‍यासि याहवेहए सेवा लद्! क्हेमैंए च्हमिरिमैं नेरो कोलोमैं या क्हेमैंने ह्‍यारिगे, दिलेया र-क्युमैं नेरो खेदोमैं मत्‍त्रे वाथेंन्।”
EXO 10:25 छबिमा मोशाइ बिइ, “ङिए याहवेह परमेश्‍वरए ल्हागिर ख्रो पिंबर ङिए योर ख्रो पिंबै सैमैं नेरो मिइ ख्रोंबै ख्रोमैं हिइ बोल् पिंल् त्हुम्।
EXO 10:26 खेदोमैं न्होंर्बै को-कोइ ङिइ ह्रोंसए याहवेह परमेश्‍वर म्हाँदिबर ख्रो पिंल् त्हुम्। ङि चर आफेन् समा याहवेहए मिंर तो तो ख्रो पिंल् त्हुम् बिसि ङिइ आसे। छतसि ङिए खेदोमैं ङिने बालुन् बोयाब्मुँ।”
EXO 10:27 दिलेया याहवेहजी फारोए सैं सारो लमिंमा फारोइ चमैं ह्‍याल् आपिं।
EXO 10:28 फारोइ मोशाने बिइ, “ङ ङाँइँले ह्‍याद्। न्ह क्रो मिं क्रोले टिसि ङए ओंसों धबै आखो। तलेबिस्याँ क्हिइ ङए लि ङ्ह्‍योबै त्हिंइर्न क्हि सिब्मुँ।”
EXO 10:29 मोशाइ बिइ, “क्हिइ बिब् धोंलेन् तरिगे, ङ धबै क्हिए लि खोंयोंन् बिलै ङ्‍ह्‍योरिब् आरे।”
EXO 11:1 झाइले याहवेहजी मोशाने बिइ, “ङइ धबै थेबै दुःख घ्रि फारो नेरो मिश्रफिर कुलब्मुँ। च लिउँइँ चइ क्हेमैं च ह्‍युलउँइँले छेनाले ह्‍याल् पिंब्मुँ।
EXO 11:2 तारे ताँन् मुइँमैं नेरो च्हमिरिमैंइ ह्रों-ह्रोंसए ङ्‍हेब् ट्हुब्मैंने मारा चाँदिए घानामैं ह्रिद् बिसि क्हिए म्हिमैंने बिद्।”
EXO 11:3 झाइले याहवेहजी मिश्रीमैंइ च इस्राएलीमैंलाइ मान लबै सैं पिंइ। धै मिश्र ह्‍युलर्बै फारोए के लब्मैं नेरो समाजर्बै म्हिमैंइ मोशा बेल्‍ले थेबै म्हि मुँन बिसि मैंइ।
EXO 11:4 छतसि मोशाइ फारोने बिइ, “‘म्हुँइँस आधाजरे ङ मिश्रए म्हाँजोउँइँले तसि ह्‍याब्मुँ’ बिसि याहवेहजी बिइमुँ।
EXO 11:5 ‘राजगद्दिर टिबै फारोए च्ह थेबउँइँले किंसि ह्रेंदो प्ह्रोबै केब्स्योए च्ह थेब, खेदोमैंए ओंसों फिबै प्हसेमैं नेरो मिश्रर्बै च्ह थेब समा ताँन् सिब्मुँ। धबै खेदोमैंए ओंसों फिब्मैं या ताँन् सिब्मुँ
EXO 11:6 मिश्रर ओंसों खोंयोंइ आथेबै क्रोबै कै थेब्मुँ, छाबै कै धबै थेरिब् आरे।
EXO 11:7 छान् तलेया खेदोमैंए बिरोधर मुँले म्हिमैंए बिरोधर मुँले इस्राएलीमैंए म्हाँजोर नगि घ्रि या छुरिब् आरे। छतमा याहवेहजी मिश्रीमैं नेरो इस्राएलीमैंए म्हाँजोर फेलमन बिसि क्हेमैंइ सेब्मुँ।’”
EXO 11:8 झाइले मोशाइ म्रुँने बिइ, “क्हिए के लब्मैं ङ ङाँर खसि फ्योसि ‘क्हि नेरो क्हिए लिलि ल्हैदिबै ताँन् म्हिमैं त्होंह्‍याद्!’ बिब्मुँ। च लिउँइँ ङ त्होंह्‍याब्मुँ।” च्हौ बिसि मोशा बेल्‍ले ह्रिस खसि फारोउँइँले त्होंह्‍याइ।
EXO 11:9 “मिश्रर ङए औदिबै केमैं ल्हें तदै ह्‍यारिगे बिसि फारोइ क्हिए ताँ थेरिब् आरे,” बिसि याहवेहजी मोशाने बिल।
EXO 11:10 मोशा नेरो हारूनइ औदिबै केमैं ताँन् फारोए उँइँर लइ। दिलेया याहवेहजी फारोए सैं सारो लमिंसि चइ इस्राएलीमैं ह्रोंसए ह्‍युलउँइँले ह्‍याल् आपिं।
EXO 12:1 मिश्र ह्‍युलर याहवेहजी मोशा नेरो हारूनने बिइ,
EXO 12:2 “चु म्हैंन क्हेमैंए ल्हागिर बर्षए ओंसोंबै म्हैंन तब्मुँ।
EXO 12:3 म्हैंनर्बै च्युगैंर क्हेमैं ताँनइ ह्रों-ह्रोंसए परवाए ल्हागिर ताँन् घराना अनुसार घ्रि-घ्रि र बोग्या पइ थेंरिगे बिसि इस्रालर्बै ताँन् म्हिमैंने बिद्।
EXO 12:4 म्हि घ्रिए घरानार र बोग्या घ्रि चबै म्हि च्युगुदे तस्याँ चइ ह्रोंसए ङ्‍हेब् ट्हुब्मैंने म्हिमैं च्योसे क्ह्रिरिगे। ताँन् म्हिमैंइ कति चम् बिसि र बोग्या च्योद्।
EXO 12:5 क्हेमैंइ त्हाँबै खेदो, र मुँले क्यु मुँले तोइ खोट आरेबै तिदिंर्बै पइ खो।
EXO 12:6 क्हेमैंइ च बोग्या म्हैंनर्बै च्युसे प्लिगैं समा थेंसि इस्राएलर्बै ताँन् म्हिमैंइ च ङेसा छजँ सैल् त्हुम्।
EXO 12:7 झाइले खा-खाबै धिंर च ख्रोए से चमुँ, चमैंइ च को म्राए न्होंरि फिरि नेरो क्होवाइ फोरिगे।
EXO 12:8 चमैंइ च म्हुँइँसर्न चए से मिर ख्रोंसि प्लेढा आझोंबै क्हें नेरो काँबै पिंट्हाने चरिगे
EXO 12:9 च से स्युन् आचद्, क्युर ख्वालसि आङिं, चए क्र प्हलेमैं नेरो न्होंर्बै सेमैं ताँन् बालुन मिर ख्रोंसि चद्।
EXO 12:10 च से न्हाँग समा आथेंन्, न्हाँग समा तोइ ङैस्याँ मिर ख्रोंवान्।
EXO 12:11 चु याहवेहजी दुःखउँइँले फ्रेमिंबै चाड ग। छतसि क्हेमैंइ फगि खिसि, प्हलेर जुत्ता खिसि, योर प्हरे किंसि यु-युनले चद्।
EXO 12:12 “च म्हुँइँसर ङ मिश्र तसि ह्‍याब्मुँ, धै मिश्रर्बै म्हि नेरो खेदोए ओंसों फिब्मैं सैवाब्मुँ, धै मिश्रर्बै ताँन् देवतामैंए बिरोधर ङइ निसाफ लब्मुँ। तलेबिस्याँ ङ याहवेह ग।
EXO 12:13 क्हेमैं टिबै धिंजरे च को क्हेमैंए ल्हागिर चिनु तब्मुँ। ङइ च को म्रोंसि क्हेमैंलाइ तोइ आलल्‍ले पिवाब्मुँ, ङइ मिश्रीमैं नास लमा क्हेमैंए फिर तोइ दुःख तरिब् आरे।
EXO 12:14 च चाड क्हेमैंए ल्हागिर म्‍लेसे म्‍लेल् आखाँबै त्हिंइ तब्मुँ, क्हेमैंइ च त्हिंइ याहवेहए ल्हागिर चाड म्हाँदिब्मुँ। क्हेमैंइ चु चाड पुस्ता पुस्ता समा लिउँज्यै या खोंयोंन् बिलै म्हाँदिब्रें लद्।
EXO 12:15 “क्हेमैंइ ङिगैं समा प्लेढा आझोंबै क्हें चद्। ओंसोंबै त्हिंइर्न क्हेमैंइ ह्रों-ह्रोंसए धिंउँइँले ताँन् प्लेढा भ्योंवाँन्। तलेबिस्याँ खाबइ ओंसोंबै त्हिंइउँइँले ङिगैं समा प्लेढा झोंबै क्हें चमुँ च म्हि इस्राएलउँइँले तेवाब्मुँ।
EXO 12:16 ओंसोंबै त्हिंइर नेरो ङिगैंर्बै त्हिंइर क्हेमैं खागु तसि ङए सेवा लद्। च त्हिंइ ङ्हिंर ताँन् म्हिमैंइ ह्‍योब् तेबै के मत्‍त्रे लद् अरू तोइ आलद्।
EXO 12:17 क्हेमैंइ प्लेढा आझोंबै क्हें चबै चाड म्हाँदिब्ब्रें लद्। तलेबिस्याँ चु त्हिंइर्न ङइ क्हेमैंए टोलि-टोलिलाइ मिश्रउँइँले पखब् ग। छतसि क्हेमैंइ चु चाड पुस्ता पुस्ता समा लिउँज्यै या खोंयोंन् बिलै म्हाँदिल् त्हुम्।
EXO 12:18 ओंसोंबै म्हैंनए च्युसे प्लिगैंए ङेसउँइँले ङ्हिच्युसे तिगैंए ङेसा समा प्लेढा आझोंबै क्हें चद्।
EXO 12:19 क्हेमैंए धिंर ङिगैं समा क्हेंर झोंबै प्लेढा थेंल् आत। खाबज्यै प्लेढा झोंबै सै चस्याँ च आगुए ह्‍युलर्बै म्हि मुँलेया इस्राएली मुँलेया च इस्राएलीमैं ङाँइँले तेवाब्मुँ।
EXO 12:20 ङिगैं समा क्हेमैंइ प्लेढा झोंबै क्हें आचद्। क्हेमैं खनिर टिलेया प्लेढा आझोंबै क्हें चल् त्हुम्।”
EXO 12:21 झाइले मोशाइ इस्राएलर्बै ताँन् चिबनाँब्मैं हुइबर चमैंलाइ कुलसि छ बिइ, “ह्‍यासि ह्रों-ह्रोंसए परवा अनुसार घ्रि-घ्रि र-क्यु तो मुँलेया तेसि दुःखने फ्रेबै चाडर ख्रो पिंबर त्हाँसि सैद्।
EXO 12:22 हिसप धुँए ला भाँडार्बै कोर प्ल्हुँसि म्राए क्होवाइ नेरो त्हो ङ्हिंर प्राद्। क्हेमैं न्होंर खाबै या न्हाँग समा धिंर्बै म्राउँइँले बैरु आत्होंन्।
EXO 12:23 याहवेह मिश्रीमैं ल्हिबर चमैंए ह्‍युलजरे ह्‍यामा म्रा फिर नेरो त्हो ङ्हिंर खीजी को म्रोंब्मुँ झाइले च म्रा वाथेंसि नास लबै सै क्हेमैं सैबर धिं न्होंर होंल् आपिं।
EXO 12:24 क्हेमैंइ चु ताँ खोंयोंन् बिलै तरिबै रोस घ्रि धोंले ह्रोंस नेरो ह्रोंसए लिउँइँबै सन्तानए ल्हागिर म्हाँदिद्।
EXO 12:25 याहवेहजी बाछा फैसि पिंम् बिबै ह्‍युलर क्हेमैं होंमा क्हेमैंइ चु चाड म्हाँदिद्।
EXO 12:26 क्हेमैंए च्ह-च्हमिमैंइ ‘चु चाडए अर्थ तो जा’ बिसि ङ्योएस्याँ,
EXO 12:27 ‘चु याहवेहजी दुःखउँइँले फ्रेमिंबै चाडए ख्रो ग। मिश्रर मुँबै इस्राएलीमैंए धिंजरे ह्‍यासि खीजी मिश्रीमैंलाइ ल्हिमा ङ्योए धिं पिथेंल।’” च ताँ थेसि म्हिमैं ताँनइ क्र कुरसि खीए सेवा लइ।
EXO 12:28 झाइले याहवेहजी मोशा नेरो हारूनने बिब् धोंले इस्राएलीमैंइ ताँन् लइ।
EXO 12:29 झाइले राजगद्दिर टिबै फारोए च्ह थेबउँइँले किंसि झेलर मुँब्मैंए च्ह थेब, खेदोमैंए ओंसो फिब नेरो मिश्रर्बै च्ह थेब्मैं ताँन् याहवेहजी च म्हुँइँस आधार सैवाइ।
EXO 12:30 फारो चए के लब्मैं नेरो मिश्रीमैं ताँन् म्हुँइँसर्न रेइ। मिश्रर बेल्‍ले क्रोब्-म्होब तइ, तलेबिस्याँ चर च्ह थेब आसिबै धिं घ्रि या आरेल।
EXO 12:31 छतमा फारोइ म्हुँइँसर्न मोशा नेरो हारून हुइबर कुलसि बिइ, “क्हेमैं नेरो इस्राएलीमैं ताँन् ङए म्हिमैंए म्हाँजोउँइँले त्होंइ ह्‍याद्, धै क्हेमैंइ बिब् धोंलेन् याहवेहए सेवा लद्।
EXO 12:32 क्हेमैंइ बिब् धोंलेन् ह्रों-ह्रोंसए र-क्यु नेरो खेदोमैं किंसि ह्‍याद्। ङलाज्यै आशिक पिंन्।”
EXO 12:33 मिश्रीमैंइ इस्राएलीमैंलाइ युनन् खेंमैंए ह्‍युलउँइँले कुलबै सैं लइ। “चुमैंलाइ युनन् आकुलस्याँ ङि ताँन् सिब्मुँ,” बिसि चमैंइ बिइ।
EXO 12:34 छतमा इस्राएलीमैंइ ह्रों-ह्रोंसए चेंबै प्रोर प्लेढा आझोंबन् थेंसि चमैंइ ह्रों-ह्रोंसए प्रो चेंबै भाँडामैं क्वेंर म्होरसि प्हैंदर थेंइ।
EXO 12:35 मोशाइ बिब् धोंले इस्राएलीमैंइ लइ, चमैंइ मिश्रीमैंने मारा चाँदिए घाना नेरो क्वेंमैं या ह्रिइ।
EXO 12:36 याहवेहजी मिश्रीमैंइ इस्राएलीमैंए फिर ल्हयो खन् लमिंइ। छतमा चमैंइ ह्रिबै ताँन् सै मिश्रीमैंइ पिंइ। छले चमैंइ मिश्रीमैंए सै न्होर बोयाइ।
EXO 12:37 इस्राएलीमैं रामसेसउँइँले प्रसि सुक्‍कोत बिबै क्ल्ह्‍योर ह्‍याइ। प्हलेइ प्रब्मैं च्हमिरिमैं नेरो कोलोमैं पिसि लाख टुदे मुँल।
EXO 12:38 चमैंने बालु अरू म्हिमैं र-क्यु नेरो खेदोमैं या बोइ।
EXO 12:39 चमैंइ ह्रोंसने बालु मिश्रउँइँले पखबै चेंबै प्रोला प्लेढा आझोंल्‍ले क्हें बनेइ। तलेबिस्याँ चमैं मिश्रउँइँले ल्हामा ह्रोंसए ल्हागिर चबै सैमैं बनेबै त्हे आयोंल।
EXO 12:40 इस्राएलीमैं मिश्रर प्लिब्रासे सोंच्यु बर्ष समा टिल।
EXO 12:41 प्लिब्रासे सोंच्यु बर्ष तबै त्हिंइर्न याहवेहए ताँन् म्हिमैं मिश्रउँइँले त्होंइ।
EXO 12:42 मिश्रउँइँले चमैं तेइ पखबर च म्हुँइँसर याहवेह न्हरु आच्हुइल्‍ले चमैं म्रोंइ। छतसि इस्राएलीमैं या च म्हुँइँसर न्हरु आच्हुइल्‍ले पुस्ता पुस्ता समा याहवेहए मान लरिगे।
EXO 12:43 याहवेहजी मोशा नेरो हारूनने बिइ, “दुःखउँइँले फ्रेमिंबै चाडर लल् त्हुबै ताँमैं चुन् ग: आगुए ह्‍युलर्बै म्हिमैंइ ख्रो पिंबै सेमैं आचरिगे।
EXO 12:44 दिलेया किंसि पखबै केब्छैंमैंइ ज्युर चिनु लल् खाँइ बिस्याँ च चरिगे।
EXO 12:45 आगुए ह्‍युलर्बै म्हि नेरो नों सै फोसि थेंबै केब्छैंइ च आचरिगे।
EXO 12:46 “चब् थुँब् ह्‍योब् तेब् लबै धिंर्न च चल् त्हुम्, चए से धिंउँइँले बैरु आबोद्, चए ह्रुइब घ्रि या आचोद्।
EXO 12:47 इस्राएलर्बै ताँन् म्हिमैंइ चु ताँमैं ललन् त्हुम्।
EXO 12:48 दिलेया क्हिने बालु आगुए ह्‍युलर्बै म्हि खाबै मुँस्याँ, चइ दुःखउँइँले फ्रेमिंबै चाड म्हाँदिबै सैं लस्याँ चए धिंर्बै ताँन् मुँयुँमैंइ ट्हुबिर चिनु लल् त्हुम्। छलमा चइ च ह्‍युलर्न फिब धोंले च चाड म्हाँदिल् खाँम्। ट्हुबिर चिनु आलबै म्हिइ च आचरिगे।
EXO 12:49 च ह्‍युलर्बै म्हिमैं नेरो आगुए ह्‍युलर्बै म्हिए ल्हागिर ठिम घ्रिन् म्हाँदिल् त्हुब्मुँ।”
EXO 12:50 याहवेहजी मोशा नेरो हारूनने बिब् धोंलेन् ताँन् इस्राएलीमैंइ लइ।
EXO 12:51 याहवेहजी इस्राएलीमैंलाइ टोलि-टोलि लसि मिश्रउँइँले च त्हिंइर्न तेसि पखइ।
EXO 13:1 याहवेहजी मोशाने बिइ,
EXO 13:2 “इस्राएलीमैं न्होंर्बै म्हिमैंए च्ह थेब्मैं नेरो खेदोए ओंसों फिबै त्होब ङल् ग। छतसि ङलाइ पिंन्।”
EXO 13:3 झाइले मोशाइ म्हिमैंने बिइ, “क्हेमैं केब्छैं तसि टिबै मिश्र ह्‍युलउँइँले त्होंइ खबै चु त्हिंइ क्हेमैंइ मैंथेंन्, तलेबिस्याँ याहवेहजी ह्रोंसए योए शक्‍तिजी क्हेमैं च क्ल्ह्‍योउँइँले तेइ पखइ। च त्हिंइर प्लेढा झोंबै क्हें आचद्।
EXO 13:4 आबीब म्हैंनर्बै तिंयाँबै त्हिंइर क्हेमैं मिश्र ह्‍युलउँइँले त्होंइ ह्‍यासिन् मुँ।
EXO 13:5 याहवेहजी क्हेमैंने कनानी, हित्ती, एमोरी, हिव्वी नेरो यबूसीमैंए ह्‍युल अथवा ङ्‍हे नेरो क्वे खुदु बगेबै ह्‍यु‍लर पखब्मुँ, च ह्‍युल खीजी क्हेमैंए खेमैंने पिंम् बिसि ओंसों बाछा फैल, छतसि चु म्हैंनर चु चाड म्हाँदिद्।
EXO 13:6 क्हेमैंइ ङिगैं समा प्लेढा आझोंबै क्हें चद्, धै ङिगैंर याहवेहए ल्हागिर चाड म्हाँदिद्।
EXO 13:7 ङिगैं समा प्लेढा आझोंबै क्हें चद्। क्हेमैंए साँद न्होंरै या प्लेढा झोंबै चब सैमैं नेरो सोडामैं म्रोंल् आता; क्हेमैंए ह्‍युलर या आयोंरिगे।
EXO 13:8 च चाड म्हादिबै त्हिंर ‘मिश्रउँइँले त्होंइ खमा याहवेहजी ङए ल्हागिर लमिंबै केमैं मैंबै ल्हागिर चु चाड म्हाँदिब् ग,’ बिसि क्हेमैंइ ह्रोंसए च्हमैंने बिद्।
EXO 13:9 याहवेहजी ह्रोंसए शक्‍तिए योजी मिश्रउँइँले क्हेमैं तेइ पखब् ग। छतसि याहवेहजी पिंबै ठिमर्बै ताँमैं क्हेमैंए सुँर तरिगे बिसि क्हेमैंए ल्हागिर योर नेरो ङ्‍होए ओंसों क्हेमैंलाइ मैंल् लमिंबै चिनु तब्मुँ।
EXO 13:10 बर्ष ह्रोंसे तोक्दिबै त्हेर चु चाड म्हाँदिब्ब्रें लद्।
EXO 13:11 “याहवेहजी क्हेमैं नेरो क्हेमैंए खेमैंने कसम चसि क्रें (बाछा) लब् धोंले कनानीमैंए ह्‍युलर क्हेमैंलाइ बोसि च ह्‍युल क्हेमैंलाइ पिंसि।
EXO 13:12 क्हेमैं ताँनइ च्ह थेब याहवेहलाइ पिंन्। क्हेमैंए खेदोमैंइ ओंसों फिबै त्होबामैं या ताँन् याहवेहए ल्हागिर्न तब्मुँ।
EXO 13:13 दिलेया गदाए ओंसों फिबै प्हसेलाइ क्यु प्हसे घ्रि पिंसि खामिंन्। छले आखाबिय्याँ चए खरि चोमिंन्। ह्रोंसए च्हमैं न्होंर च्ह थेबै या खाल् त्हुम्।
EXO 13:14 प्हँना लिउँइँ क्हेमैंए च्हमैंइ तले छ लब् जा बिसि क्हेमैंने ङ्योए बिस्याँ, च त्हेर क्हेमैंइ चमैंने छले बिद्, ‘याहवेहजी ङिलाइ केब्छैं तसि टिल् त्हुबै मिश्र ह्‍युलउँइँले ह्रोंसए शक्‍तिए योजी तेइ पखमिंइ।
EXO 13:15 च त्हेर फारोइ सैं सारो लसि ङिलाइ ह्‍याल् आपिं, छतमा याहवेहजी मिश्रर ताँन् म्हि नेरो खेदोए ओंसों फिब्मैं सैवाइ। छतसि ओंसों फिबै त्होबामैं याहवेहए ल्हागिर ख्रो पिंमुँ, धै ङए च्हमैं न्होंर्बै च्ह थेबलाइ या ख्रो पिंसि खाम्।
EXO 13:16 चु याहवेहजी ङिलाइ ह्रोंसए शक्‍तोए योजी मिश्रउँइँले तेइ पखमिंइ बिसि क्हेमैंए ल्हागिर योर मुँबै चिनु, नेरो ङ्‍होर मुँबै चिनु घ्रि तब्मुँ।’”
EXO 13:17 फारोइ च म्हिमैं ह्‍याल् पिंमा पलिश्तीमैंए ह्‍युलए घ्याँउँइँले ह्‍यामा रिन्ठि तलेना परमेश्‍वरजी चमैंलाइ च घ्याँउँइँले आपख। तलेबिस्याँ “चु म्हिमैंइ ल्हडें म्रोंसि मिश्रर्न एह्‍यालै,” बिसि परमेश्‍वरजी बिल।
EXO 13:18 छतसि परमेश्‍वरजी चमैंलाइ स्युरसि म्हि आटिबै क्ल्ह्‍योए घ्याँउँइँले ओल्ग्या मा ङ्युँइर बोमा। इस्राएलीमैं ल्हडें लब् तयार तरिगे बिसि मिश्रउँइँले त्हों ह्‍याइ।
EXO 13:19 ओंसों ओंसों योसेफइ इस्राएलीमैंने “परमेश्‍वरजी क्हेमैंए ल्हागिरि क्‍ह्रोसेन्ले ल्होमिंब् मुँ। च त्हेर क्हेमैंइ ङए ह्रुइबमैं छुउँइँले बोयाद्,” बिसि चु ताँर कसम चबर ल्हैदिल। छतसि मोशाइ योसेफए ह्रुइबमैं बोसि ह्‍याइ।
EXO 13:20 इस्राएलीमैं सुक्‍कोतउँइँले ह्‍याबै लिउँइँ म्हि आटिबै क्ल्ह्‍योए ङाँर एथाम् बिबै नाँसर प्ह्रों बनेसि बास टिइ।
EXO 13:21 झाइले चमैं त्हिंइ म्हुँइँस प्रल् खाँरिगे बिसि चमैंलाइ घ्याँ तेंबर याहवेह त्हिंइर न्हाँम्स्योए त्हो, नेरो म्हुँइँसर मिए राब तसि चमैंए ओंसों-ओंसो ह्‍यामल।
EXO 13:22 छले परमेश्‍वर त्हिंइर न्हाँम्स्योए त्हो तसि, धै म्हुँइँसर मिए राब तसि म्हिमैंए ओंसों-ओंसों ह्‍याब खोंयोंन् बिलै आपि।
EXO 14:1 झाइले याहवेहजी मोशाने बिइ,
EXO 14:2 “इस्राएलीमैं एसि मिग्दोल नेरो काँसए घारि मुँबै मा ङ्युँइ म्हाँजोर पि-हहिरोत ङाँर बाल सेफोनए ओंसों प्ह्रों बनेसि टिरिगे बिसि लैदिद्।
EXO 14:3 ‘चमैं अलमल् तसि ह्‍युल स्युररिइमा म्हि आटिबे क्ल्‍ह्‍योर चमैं क्वेथेइँमुँ,’ बिसि फारोइ इस्राएलीमैंए बारेर मैंब्मुँ।
EXO 14:4 ङइ फारोए सैं सारो लमिंब्मुँ धै चइ इस्राएलीमैं ल्हाब्मुँ। दिलेया फारो नेरो चए ताँन् सिपाइमैंउँइँले ङए मिं थेब् तल् योंब्मुँ। छतमा मिश्रीमैंइ ‘ङन् याहवेह ग।’ बिसि सेब्मुँ।” याहवेहजी छले बिमा इस्राएलीमैंइ छान् लइ।
EXO 14:5 झाइले मिश्रर्बै म्रुँइ च म्हिमैं भौदिह्‍याबै ताँ थेसि च नेरो चए के लब्मैंए सैं प्लिंयाइ धै “ङ्योइ तो लगे? ङ्योइ इस्राएलीमैंलाइ ह्‍याल् पिंइ, ङ्योए केबछैंमैं ह्‍याइ!” बिइ।
EXO 14:6 छ तसि चइ रथ तयार लसि ह्रोंसए सिपाइमैं बोइ।
EXO 14:7 चइ छ्याँ-छ्याँबै टुब्रा रथमैं नेरो मिश्रर्बै अरू रथमैं धै च ताँनए फिर्बै अफिसरमैं या किंसि बोइ।
EXO 14:8 इस्राएलीमैं सैं भोंन्ले घ्याँर प्ररिल, दिलेया याहवेहजी मिश्रर्बै फारो म्रुँए सैं सारो लमिंमा चइ चमैंए लिलि ह्‍याइ।
EXO 14:9 झाइले मिश्रीमैं, फारोए घोडामैं ताँन्, रथ, चए घोडा क्रेब्मैं नेरो सिपाइमैंइ इस्राएलीमैं ल्हाबोमा पि-हहिरोतए ङाँर बाल सेफोनए ओंसों मा ङ्युँइए छ्योगोर प्ह्रों बनेसि टिबै त्हेर्न चमैंलाइ स्याइ।
EXO 14:10 झाइले इस्राएलीमैंइ ङ्‍ह्‍योमा फारो नेरो मिश्रीमैं खेंमैंए लिलि खरिब् म्रोंसि चमैं बेल्‍ले ङ्हिंसि याहवेहने ग्वार ह्रिइ।
EXO 14:11 चमैंइ मोशाने बिइ, “मिश्रर छगोंमैं आरेल् वा? क्हिइ चु क्यु आयोंबै क्ल्ह्‍योर ङि सिबर पखल् वा? ङि मिश्रउँइँले पखसि खैइ तब् ङे?
EXO 14:12 ङि मिश्रर मुँमा ङिइ क्हिने मिश्रीमैंए केब्छैंन् तसि ङि टिल् पिंन् बिब आङिं वा? क्यु आयोंबै क्ल्ह्‍योर सिब भन्दा ङि मिश्रीमैंए केब्छैंन् तसि टिब छ्याँब तमल।”
EXO 14:13 मोशाइ इस्राएलीमैंने बिइ, “क्हेमैं आङ्हिंन्ले सैं भोंब लद्। ङ्ह्‍योद्! याहवेहजी तिंयाँ क्हेमैंलाइ मिश्रउँइँले फ्रेमिंब्मुँ। चु मिश्रीमैं क्हेमैंइ तिंयाँ म्रोंइमुँ, तारे क्हेमैंइ धबै चमैंलाइ खोंयोंन् बिलै म्रोंरिब् आरे।
EXO 14:14 याहवेहन् क्हेमैंए ल्हागिर नेमिंब्मुँ। छतसि क्हेमैं सैं भोंन् लसि तोइ आलले टिद्।”
EXO 14:15 याहवेहजी मोशाने बिइ, “क्हिइ तले ङने ग्वार ह्रिल? इस्राएलीमैंने ओंसों प्रबर ल्हैदिद्।
EXO 14:16 ह्रोंसए योइ प्हरे क्वेसि मा ङ्युँइउँइँ (समुद्रउँइँ) स्योंन्। धै मा ङ्युँइ ङ्हिंबाँतमा इस्राएलीमैं चए म्हाँजोउँइँले ओबनो क्ल्ह्‍योर प्रसि ह्‍याल् खाँब्मुँ।
EXO 14:17 ङइ मिश्रीमैंए सैं सारो लमिंब्मुँ, धै चमैं क्हेमैंए लिलि ल्हैदिब्मुँ। दिलेया फारो नेरो चए ताँन् सिपाइमैं चए रथमैं नेरो चए घोडा क्रेब्मैंउँइँले ङए महिमा तल्मिंब्मुँ।
EXO 14:18 फारो, चए रथमैं नेरो चए गोडा क्रेब्मैंलाइ ङइ ट्होवामा मिश्रीमैंइ ङन् याहवेह ग बिबै ताँ सेब्मुँ।”
EXO 14:19 झाइले इस्राएलर्बै सिपाइमैंए ओंसों-ओंसों प्रबै परमेश्‍वरए दूत स्योसि चमैंए लिग्याँइ ह्‍याइ, धै न्हाँम्स्योए त्हो या चमैंए ओंसोंउँइँले स्योसि चमैंए लिग्याँइ राइ।
EXO 14:20 मिश्रीमैंए सिपाइमैं नेरो इस्राएलीमैंए सिपाइमैंए म्हाँजोर न्हाँम्स्यो खसि म्हुँइँस तिमि तिराइ मि आम्रोंब् तइ धै अर्को क्ल्ह्‍योइ मि म्रोंब् लमिंइ। छतमा चमैं म्हुँइँसतिमि घ्रि घ्रिए ङाँर खल् आखाँ।
EXO 14:21 झाइले खीजी बिब् धोंलेन् मोशाइ ह्रोंसए यो मा ङ्युँइए फिर स्योंइ, धै याहवेहजी म्हुँइँसतिमि स्यारउँइँले खैं कुल्मिंसि मा ङ्युँइर्बै क्युलाइ लिग्याँइ स्योमिंमा क्यु ङ्हिंबाँ तसि मा ङ्युँइर (समुद्र) कारा क्ल्ह्‍यो तयाइ।
EXO 14:22 धै चमैंए क्योलो नेरो त्हेब्रे हार चमैंए ल्हागिर क्यु बान्‍नो तइ, छतमा इस्राएलीमैं मा ङ्युँइए म्हाँजोउँइँले कारा क्ल्ह्‍योर प्रसि ह्‍याइ।
EXO 14:23 मिश्रीमैं, फारोए घोडामैं, रथमैं, नेरो घोडा क्रेब्मैंइ चमैंलाइ मा ङ्युँइए (समुन्द्रए) न्हों-न्होंन् ल्हाबोइ।
EXO 14:24 झाइले च म्हुँइँसर याहवेहजी मिश्रीमैंए सिपाइमैंलाइ मि नेरो न्हाँम्स्योए त्होउँइँले ङ्‍ह्‍योइ, धै मिश्रीमैंए सिपाइमैं अलमल् लमिंइ।
EXO 14:25 खीजी चमैंए रथए पाङ्ग्रामैं प्ल्हमिंमा चमैंइ च ओलेबर गारो तइ। छतमा मिश्रीमैंइ बिबर होंइ, “ङ्यो इस्राएलीमैंउँइँले भौदिह्‍याले, तलेबिस्याँ याहबेह चमैंए ख तसि ङ्योए बिरोधर नेरिइमुँ।”
EXO 14:26 झाइले याहवेहजी मोशाने बिइ, “मिश्रीमैंए रथमैं नेरो घोडा क्रेब्मैंए फिर च क्यु धबै बडिइ युरिगे बिसि क्हिए यो मा ङ्युँइए (समुन्द्रए) फिर स्योंन्।”
EXO 14:27 मोशाइ ह्रोंसए यो मा ङ्युँइए (समुन्द्रए) फिर स्योंइ, धै न्हाँगर मि म्रोंमा मा ङ्युँइ धबै एसि ह्रोंसए क्ल्ह्‍योर एखइ। मिश्रीमैं भौदिबर होंमा याहवेहजी चमैं मा ङ्युँइर्न भ्योंमिंइ।
EXO 14:28 क्यु एइ खसि रथमैं, घोडा क्रेब्मैं इस्राएलीमैंए लिलि खबै फारोए सिपाइमैं, ताँन् क्युइ हुवाइ, चमैं न्होंर घ्रि या आसो।
EXO 14:29 दिलेया इस्राएलीमैं बिस्याँ मा ङ्युँइए म्हाँजोउँइँले कारा क्ल्ह्‍योर प्रसि ह्‍याइ। चमैंए क्योलो नेरो त्हेब्रेउँइँ क्यु बान्‍नों तइ।
EXO 14:30 च त्हिंइर याहवेहजी इस्राएलीमैंलाइ मिश्रीमैंए योउँइँले जोगेमिंइ। मिश्रीमैं बिस्याँ मा ङ्युँइए छेउर सिसि क्हुरिह्‍याब् इस्राएलीमैंइ म्रोंइ।
EXO 14:31 याहवेहजी मिश्रीमैंए फिर लमिंबै थेबै के इस्राएलीमैंइ म्रोंसि चमैंइ याहवेहने ङ्हिंइ, च त्हेसेरो चमैंइ याहवेह नेरो खीए केब्छैं मोशाए फिर बिश्‍वास लइ।
EXO 15:1 झाइले मोशा नेरो इस्राएलीमैंइ याहवेहए ल्हागिर चु क्वे प्रिंइ: “ङ याहवेहए ल्हागिर क्वे प्रिंब्मुँ, तलेबिस्याँ खीजी थेबै लडें लसि ट्होइमुँ। खीजी घोडा नेरो चए फिर क्रेब्मैं मा ङ्युँइर (समुन्द्रर) भ्योंमिंइमुँ।
EXO 15:2 याहवेहन् ङए शक्‍ति ग, ङलाइ जोगेमिंब खीन् ग, छतसि ङ खीलाइ क्वे प्रिंब्मुँ। खी ङए परमेश्‍वर ग, ङ खीए सेवा लब्मुँ, खी ङए खेमैंए परमेश्‍वर ग, ङ खीए मिं थेब् लब्मुँ।
EXO 15:3 याहवेहन् ल्हडेंर नेमुँ, खीए मिं याहवेह ग।
EXO 15:4 “खीजी फारोए रथमैं नेरो चए सिपाइमैं या मा ङ्युँइर भ्योंमिंइमुँ। फारोए धाँसे थेबै चिबनाँब्मैं ओल्ग्या मा ङ्युँइर (समुद्रर) प्ल्हुँयाइ।
EXO 15:5 गैरु क्युइ चमैंलाइ हुवाइ। चमैं युँमा धोंले गैरुर प्ल्हुँयाइ।
EXO 15:6 “ओ याहवेह, क्हिए क्योलो यो बेल्‍ले भोंब् मुँल। ओ याहवेह, क्हिए क्योलो योइ शत्तुरमैं त्हुला भुँ लवाइ।
EXO 15:7 क्हिजी ल्हडेंर ट्होवाँइले क्हिए बिरोधर राब्मैं क्युरु खारमिंइ। क्हिजी ह्रोंसए मि धोंबै ह्रिस उँइँमिंइ, च ह्रिसइ चमैंलाइ पराल धोंले ख्रोंवाइ।
EXO 15:8 क्हिए नखुँर्बै सोइ फुइमा क्युए थुप्रो तयाइ। प्ल्होंखबै क्यु क्ल्ह्‍यो घ्रिर्न थुप्रो तसि बान्‍नों धोंले राइ। गैरु क्यु मा ङ्युँइए म्हाँजोर चाँयाइ।
EXO 15:9 शत्तुरइ बिइ, ‘ङइ चमैं ल्हासि स्याब्मुँ, लुडिबै सैमैं ङ चुब्मुँ, च लुडिबै सैमैंउँइँले तो लदा ङ्हाँमुँ च ङ किंब्मुँ। ङइ ङए सेलाँ (तरवार) ट्‍हुइसि चमैं सैवाब्मुँ।’
EXO 15:10 दिलेया क्हिजी ह्रोंसए सो फुइमा मा ङ्युँइ (समुन्द्रइ) चमैं हुवाइ। बेल्‍ले भोंबै मा ङ्युँइर चमैं पैए सिसा धोंले प्ल्हुँयाइ।
EXO 15:11 “ओ याहवेह, देवतामैं न्होंर क्हि धों तब खाब् मुँ? बेल्‍ले पबित्र, बेल्‍ले मान लल् त्हुब, औदिबै के लबर क्हि धों तब खाब् मुँ?
EXO 15:12 क्हिजी क्हिए क्योलो यो स्योंमा पृथ्‍बीइ चमैं क्ल्ह्‍योंवाइ।
EXO 15:13 क्हिए खोंयोंन् बिलै आखाँबै म्हाँयार क्हिजी मिश्रउँइँले फ्रेमिंबै म्हिमैं डोरेब्मुँ। क्हिजी ह्रोंसए भोंउँइँले चमैं क्हिए पबित्र क्ल्ह्‍योर डोरेब्मुँ।
EXO 15:14 ह्रें-ह्रेंमैंइ क्हिए बारेर थेसि त्हारब्मुँ। पलिश्त ह्‍युलर टिब्मैं ङ्हिंसि न्हुँ खब्मुँ।
EXO 15:15 एदोमर्बै क्र थेब्मैं ङ्हिंब्मुँ, मोआबर्बै चिब्मैं त्हारब्मुँ। कनानर टिबै ताँन् म्हिमैं भों आरेब् धोंन् तयाब्मुँ।
EXO 15:16 ओ याहवेह, क्हिए म्हिमैं क्योंजा अतर्दिन् समा क्हिजी मिश्रउँइँले फ्रेसि पखबै म्हिमैं क्योंजा आह्‍यान् समा, च ह्रेंमैं ङ्हिंसि त्हारमा क्हिए योर्बै भोंजी चमैं युँमा धोंले क्ल्ह्‍यो घ्रिर्न टिम्।
EXO 15:17 क्हिजी क्हिए म्हिमैं पखसि ह्रोंसए कोंर थेंब्मुँ। ओ याहवेह, च क्ल्ह्‍योर्न क्हिए ल्हागिर टिबै क्ल्ह्‍यो बनेइ, ओ याहवेह, च पबित्र क्ल्ह्‍यो क्हिए योजीन् बनेइ।
EXO 15:18 याहवेहजी खोंयोंइ बिलै ग्याल्स लरिब्मुँ।”
EXO 15:19 इस्राएलीमैं मा ङ्युँइए म्हाँजोउँइँले क्यु आरेबै सर प्रसि ह्‍याइ, दिलेया फारोए घोडामैं, रथमैं नेरो घोडा फिर क्रेब्मैं मा ङ्युँइर (समुन्द्रर) होंमा याहवेहजी चमैं फिर मा ङ्युँइए क्यु एपखइ।
EXO 15:20 छतमा अगमबक्‍तास्यो मिरियम, हारूनए आनाइ, योर खैंचडी किंमा ताँन् च्हमिरिमैं या खैंचडी किंसि सेदै चए लिलि त्होंइ।
EXO 15:21 मिरियमइ छ बिदै क्वे प्रिंबर होंइ, “याहवेहए मिंर क्वे प्रिंले, तलेबिस्याँ खीजी औदिबै के लसि ट्होइमुँ। घोडा नेरो चए फिर क्रेब्मैं खीजी मा ङ्युँइर (समुन्द्रर) भ्योंवाइमुँ।”
EXO 15:22 छ तबै लिउँइँ मोशाइ इस्राएलीमैं काँसए घारि मुँबै मा ङ्युँइउँइँले डोरेसि बोइ। चमैं शूर बिबै क्यु आरेबै क्ल्ह्‍योउँइँ ह्‍यामा चमैंइ सोंरो समा प्रमा चमैंइ क्यु आयों।
EXO 15:23 झाइले मारा बिबै क्ल्ह्‍योर त्होंखबै लिउँइँ चमैंइ मारार्बै क्यु थुँल् आखाँ, तलेबिस्याँ चर्बै क्यु काँब मुँल। (छतसि चए मिं मारा (काँब) तइ।
EXO 15:24 छतसि म्हिमैंइ “ङि तो थुँब?” बिसि मोशाने गनगन लबर होंइ।
EXO 15:25 छतमा मोशाइ याहवेह परमेश्‍वरने प्राथना लमा याहवेहजी चने सिंए म्हुँडा घ्रि उँइँमिंइ, धै चइ सिंए म्हुँडा क्युर झोंमा क्यु लिंब तइ। याहवेहजी च क्ल्ह्‍योर्न चमैंए छ्ह थोबै ल्हागिर ठिममैं पिंसि चर्न खीजी चमैंए जाँच लइ।
EXO 15:26 खीजी बिइ, “क्हेमैंइ ङए ताँ छेनाले थेसि ङइ बिबै ताँन् ताँमैं नेरो ङए ठिममैं म्हाँदिइ बिस्याँ, ङइ मिश्रीमैं फिर कुलब् धों तबै नब-छबमैं घ्रि या क्हेमैंए फिर कुलरिब् आरे, तलेबिस्याँ क्हेमैं सल् लबै याहवेह ङन् ग।”
EXO 15:27 झाइले चमैं एलीम बिबै क्ह्ल्योर फेखइ, चर च्युसे ङ्हिं क्युए मुल नेरो ङिच्यु खजूरए धुँमैं मुँल। चमैंइ च क्यु ङाँर्न प्ह्रों बनेसि टिइ।
EXO 16:1 इस्राएलीमैं एलीमउँइँले प्रसि मिश्रउँइँले प्रबै म्हैंन ङ्हिंए च्युसे ङ्‍हगैंर एलीम नेरो सिनै बिबै कोंए म्हाँजोर मुँबै तोइ आरेबै सिनै बिबै क्ल्ह्‍योर फेखइ।
EXO 16:2 चर फेखमा ताँन् म्हिमैं मोशा नेरो हारूनने गनगन लबर होंइ।
EXO 16:3 इस्राएलीमैंइ चमैंने बिइ, “ङि मिश्रर याहवेहए योउँइँले सिस्याँ छ्याँब तमल। तलेबिस्याँ ङि चर ह्‍योबै भाँडोए कारग्युले क्हुँसि से नेरो अरू चबै सैमैं म्रेंन्ले चल् योंमल। दिलेया क्हेमैंइ ङि ताँन् फोतेंन् सैबर क्यु आयोंबै क्ल्ह्‍योर पखइमुँ।”
EXO 16:4 छबिमा याहवेहजी मोशाने बिइ, “क्हेमैंए ल्हागिर ङइ स्वर्गउँइँले क्हें कुल्मिंब्मुँ। म्हिमैं त्हिंइ ह्रोंसे बैरु ह्‍यासि तिगैंर्बै छो योल्‍ले मत्‍त्रे खुरिगे। ङइ बिबै ताँ चमैंइ ङिमना उ आङिंमना बिसि ङइ जाँच लब्मुँ।
EXO 16:5 तेल् उँइँ खुब् भन्दा ट्हुगैंर चमैंइ ङ्हिछो तल्‍ले खुसि छेनाले थेंरिगे।”
EXO 16:6 छतसि मोशा नेरो हारूनइ ताँन् इस्राएलीमैंने बिइ, “याहवेहजीन् क्हेमैंलाइ मिश्रउँइँले तेइ पखब् ग बिसि क्हेमैंइ तिंयाँबै ङेसर था सेब्मुँ,
EXO 16:7 प्हँना न्हाँगर क्हेमैंइ याहवेहए चारबै ह्‍वे म्रोंब्मुँ, क्हेमैंइ याहवेहए बिरोधर गनगन लब खीजी थेइमुँ। ङि खाब् जा क्हेमैं ङिए बिरोधर गनगन लब? ङिम् खीजी बिब् धोंले प्रब्मैं मत्‍त्रे ग्।”
EXO 16:8 धबै मोशाइ बिइ, “याहवेहजी क्हेमैंलाइ ङेसर चबर से नेरो न्हाँगर म्रेंनाले क्हें पिंब्मुँ, तलेबिस्याँ क्हेमैंइ खीए बिरोधर गनगन लब खीजी थेइमुँ। ङि खाब् रो? क्हेमैंए चु गनगन ङिए बिरोधर आङिं, याहवेहए बिरोधर तइमुँ।”
EXO 16:9 झाइले मोशाइ हारूनने बिइ, “इस्राएलर्बै ताँन् म्हिमैंने छ बिद्, ‘याहवेहए उँइँर खो, तलेबिस्याँ क्हेमैंइ लबै गनगन खीजी थेइमुँ।’”
EXO 16:10 झाइले इस्राएलर्बै ताँन् म्हिमैंने हारून छले पोंमा चमैंइ क्यु आयोंबै क्ल्ह्‍योउँइँ ङ्ह्‍योइ। छले ङ्ह्‍योमा न्हँम्स्योर याहवेहए चारबै ह्‍वे म्रोंइ।
EXO 16:11 याहवेहजी मोशाने बिइ,
EXO 16:12 “इस्राएलीमैं गन गन लब ङइ थेइमुँ। क्हेमैंइ ङेसर से चल् योंब्मुँ, धै न्हाँगर क्हें म्रेंन्ले चल् योंब्मुँ। छले चल् योंमा ङ क्हेमैंए याहवेह परमेश्‍वर ग बिसि क्हेमैंइ सेब्मुँ।”
EXO 16:13 च लिउँइँ ङेसर बट्टाइ नेमेमैं खसि चमैं टिबै ब्यारेक हुवाइ, धै न्हाँगर च ब्यारेकए कारग्युले शीत युरिइ।
EXO 16:14 च शीत कारसि ह्रुइ धोंबै चबै सै तइ।
EXO 16:15 इस्राएलीमैंइ च म्रोंसि खेंमैंए न्होंरि “चु सै तो जा?” बिबर होंइ, तलेबिस्याँ चमैंइ च सै तो जा बिसि आसेल। छतमा मोशाइ चमैंने बिइ, “चु याहवेहजी क्हेमैंए ल्हागिर पिंबै क्हें ग।
EXO 16:16 याहवेहजी ‘क्हेमैं ताँनइ ह्रोंसइ कति चमुँ च्हग खुद्,’ बिइमुँ। ‘परवार्बै म्हि घ्रिए ल्हागिर म्हन् ङ्हिंए दरइ खुद्।’”
EXO 16:17 इस्राएलीमैं छान् लइ, कोइइ ल्हें, कोइइ च्युगुदे खुइ।
EXO 16:18 चमैंइ च चबै सै क्होंइँमा ल्हें खुब्मैंला ल्हें आत, च्युगुदे खुब्मैंलैया च्युगुदे आत। चमैं ताँनइ ह्रोंसइ चल् खाँब्दे खुइ।
EXO 16:19 मोशाइ चमैंने बिइ, “खाबज्यै या च्हौदे ङैसि प्हँन्हाँग्धों समा आथेंन्।”
EXO 16:20 दिलेया चमैं न्होंरि को-कोइइ मोशाए ताँ सैंर आथे, छतमा चमैंइ ह्रोंसइ चसि ङैब प्हँन्हाँग्धों समा थेंमा चर प्हुँलुँ तसि थाँ नाँबर होंइ। छाब् म्रोंसि मोशा चमैंने ह्रिस खइ।
EXO 16:21 छले न्हाँग ह्रोंसे चमैं ताँनइ खेंमैंइ चल् खाँब्दे खुइ, त्हिंयाँ चर्केबै लिउँइँ च क्हें युलियामल।
EXO 16:22 ट्हुगैंर चमैंइ म्हि घ्रिए ल्हागिर सोदाजरे भन्दा ङ्हिछो तल्‍ले म्हन् प्लि खुमल। छलमा चमैं न्होंर्बै चिब्मैं खसि च ताँए बारेर मोशाने ङ्योएइ।
EXO 16:23 झाइले मोशाइ चमैंने बिइ, “याहवेहजी लद् बिबै ताँ चुन् ग: ‘प्हन्हाँग प्रिबै (के आलबै) त्हिंइ ग, याहवेहए ल्हागिर म्हाँदिबै त्हिंइ ग। ह्‍योल् त्हुबै सैमै ह्‍योद्, प्लुल् त्हुबै सैमैं प्लुद्। ङैबै सैमैं प्हन्हाँगए ल्हागिर थेंन्।’”
EXO 16:24 मोशाइ बिब् धोंले चमैंइ ङैबै क्हें न्हाँग समन् थेंमा थाँ या आनाँ, प्हुँलुँ या आत।
EXO 16:25 धै मोशाइ बिइ, “च तिंयाँ चद्, तलेबिस्याँ तिंयाँ याहवेहए ल्हागिर प्रिबै त्हे ग। तिंयाँ क्हेमैंइ च चबै सै सर योंरिब् आरे।
EXO 16:26 ट्हुगैं समा क्हेमैंइ च चबै सै खुद्, दिलेया ङिगैंर प्रिबै त्हिंइ ग, छतसि च त्हिंइर क्हेमैंइ तोइ योंरिब् आरे।”
EXO 16:27 दिलेया ङिगैंरै या चमैं न्होंर्बै को-कोइ च चबै सै खुबर ह्‍याइ, दिलेया चमैंइ तोइ आयोंल।
EXO 16:28 झाइले याहवेहजी मोशाने बिइ, “क्हेमैंइ खोंयों समा ङइ बिबै ताँमैं आङिं?
EXO 16:29 सैंर थेंन्, याहवेहजी क्हेमैंए ल्हागिर प्रिबै त्हिंइ पिंइमुँ। छतसि याहवेहजी क्हेमैंए ल्हागिर ट्हुगैंर ङ्हिरोबै क्हें पिंइमुँ। ङिगैंर क्हेमैं ताँन् खनिर मुँ चर्न टिरिद्, खाबै या ह्रोंसए धिंउँइँले बैरु आह्‍याद्।”
EXO 16:30 छतसि म्हिमैंइ ङिगैंर भों न्हइ।
EXO 16:31 इस्राएलीमैंइ च क्हेंए मिं “मन्‍न” थेंइ। च धनिया प्लु धों तब तार्ग्या मुँल। धै च क्वे खुदुर बनेबै क्हें धोंले लिंब मुँल।
EXO 16:32 मोशाइ बिइ, “क्हेमैंलाइ मिश्रउँइँले तेइ पखमा क्यु आयोंबै क्ल्ह्‍योर याहवेहजी क्हेमैंलाइ च चबै सै चल् पिंल। छतसि लिउँइँबै च्ह क्वें-क्वेंमिमैंइ म्रोंरिगे प्हना लिउँइँ समा मन्‍न ङ्हिम्न थेंन् बिसि खीजी बिइमुँ।”
EXO 16:33 च लिउँइँ मोशाइ हारूनने बिइ, “झोंबै भाँडो घ्रि किंसि चर ङ्हिम्ना मन्‍न झोंसि लिउँइँबै च्ह क्वें-क्वेंमिमैंइ म्रोंबै ल्हागिर तरिगे बिसि याहवेहए ओंसों थेंमिन्।”
EXO 16:34 याहवेहजी मोशाने बिब् धोंलेन् च मन्‍न खोंयोंइ बिले तरिगे बिसि हारूनइ ठिम थेंबै मुदुसए ओंसों मन्‍न थेंइ। च मन्‍न यहवेइ फैबै बाछा मुँबै युमा ङ्हि ओंसों थेंइ।
EXO 16:35 इस्राएलीमैं कनान ह्‍युलर फेनेसि टिबै तौदु आतन् समा चमैंइ मन्‍न चरिइ।
EXO 16:36 (ओमेरे घ्रि, आधा पथि ग।)
EXO 17:1 ताँन् इस्राएलीमैं सिनए क्यु आयोंबै क्ल्ह्‍योउँइँले याहवेहजी बिब् धोंलेन् क्ल्ह्‍यो-क्ल्ह्‍योर ह्‍यासि रपिदिम बिबै क्ल्ह्‍योर ब्यारेक लइ। चर चमैंइ प्ह्रों बनेइ, दिलेया चर म्हिमैंए ल्हागिर थुँबै क्यु आरेल।
EXO 17:2 छतमा चमैंइ मोशाने ह्रिस खसि बिइ, “ङिलाइ थुँबै क्यु पिंन्।” छबिमा मोशाइ चमैंने बिइ, “क्हेमैं तले ङने ह्रिस खमुँ? क्हेमैं तले याहवेहए जाँच लमुँ?”
EXO 17:3 दिलेया म्हिमैंलाइ क्यु पिइ, छतसि चमैंइ मोशाने बालु गनगन लइ, “क्हिइ ङि, ङिए प्हसेमैं नेरो खेदोमैं क्यु थुँल् आयोंल्‍ले सैबर तले मिश्रउँइँले चुर पखल?”
EXO 17:4 छबिमा मोशाइ याहवेहने “ङ चु म्हिमैंलाइ तो लब? चुमैंइ ङ युँमाइ ल्हिल् म्हैमुँ!” बिसि प्राथना लइ।
EXO 17:5 छ लमा याहवेहजी मोशाने बिइ, “इस्राएलीमैंए चिबनाँब्मैं न्होंर्बै को-कोइ नेरो क्हिइ नील स्योंर ल्हिबै प्हरे योर किंसि म्हिमैंए ओंसो-ओंसों ह्‍याद्।
EXO 17:6 ङ होरेब मुँबै पारार क्हिए ओंसों राब्मुँ। क्हिइ पारार प्हरेइ ल्हिद्, छले ल्हिमा म्हिमैंइ थुँबै क्यु छाइले त्होंब्मुँ।” झाइले मोशाइ इस्राएलीमैंए चिबनाँब्मैंए ओंसों छान् लइ।
EXO 17:7 याहवेह ङ्योए म्हाँजोर मुँ उ आरे बिसि इस्राएलीमैंइ आक्वेंसि प्होंगि कैगि लसि याहवेहए जाँच लइ, छतसि च क्ल्ह्‍योए मिं मोशाइ मस्साह नेरो मेरीबा थेंइ।
EXO 17:8 च लिउँइँ रपिदिम बिबै क्ल्ह्‍योर अमालेकीमैं खसि इस्राएलीमैंए फिर ह्‍वानेइ।
EXO 17:9 छतमा मोशाइ यहूशूने बिइ, “अमालेकीमैंने नेबै ल्हागिर च्हौदे म्हिमैं त्हँसि नेबर ह्‍याद्। प्हन्हाँग याहवेहए प्हरे ङए योर किंसि ङ कोंए फिर राब्मुँ।”
EXO 17:10 मोशाइ बिब् धोंले यहोशूइ लइ, धै अमालेकीमैंने नेबर होंइ। मोशा, हारून नेरो हुर बिस्याँ कोंए फिर ह्‍याइ।
EXO 17:11 मोशाइ यो कैंडो क्वेरिमा इस्राएलीमैंइ ट्होमल। यो क्युरु लमा अमालेकीमैंइ ट्होमल।
EXO 17:12 मोशाए यो नारमा हारून नेरो हुरइ युँमा घ्रि पखसि चए न्होंर थेंमिंमा च चए फिर क्हुँइ। धै हारून नेरो हुरइ घ्रि तिराइ घ्रि तिराइ रासि चए ह्‍योरमिंइ। त्हिंयाँ आलिन् समा चए यो कैंडोन् क्वेरिइ।
EXO 17:13 छलमा यहोशूइ अमालेकी सिपाइमैंलाइ सेलाँइ (तरवारइ) ल्हिसि तोइ आचैन् लवाइ।
EXO 17:14 च लिउँइँ याहवेहजी मोशाने बिइ, “चु ताँ मैंबै ल्हागिर कापिर प्ह्रिथेंन्। ङइ चु ह्‍युलउँइँले अमालेकीमैंए मिं क्ह्रन् म्हवाम् बिसि यहोशूने बिद्।”
EXO 17:15 मोशाइ चर ख्रो पिंबै क्ल्ह्‍यो घ्रि बनेसि चए मिं “याहवेह ङए ताच्यैं (झन्डा) ग” थेंइ।
EXO 17:16 झाइले मोशाइ बिइ, “याहवेहए ताच्यैं क्वेद्! पुस्ता पुस्ता समा याहवेह अमालेकीमैंने नेमिंब्मुँ।”
EXO 18:1 परमेश्‍वरजी मोशा नेरो खीए इस्राएली म्हिमैं मिश्रउँइँले तेइ पखमा चमैंए ल्हागिर तोन्दोंरि लबै केमैं मिद्यानर्बै खेगि यित्रो, मोशाए क्येंइ थेइ।
EXO 18:2 ओंसों मोशाइ ह्रोंसए प्ह्रेंस्यो सिप्पोरा मैता कुलइ। छतसि मोशाए क्यें यित्रोइ सिप्पोरा
EXO 18:3 नेरो चए च्ह ङ्हिं मोशा ङाँर पखइ। (च्ह घ्रिए मिं गेर्शोम मुँल, तलेबिस्याँ च फिबै त्हेर मोशाइ, “ङ आगुए ह्‍युलर टिबै म्हि तइमुँ,” बिल। छतसि च्हए मिं चइ गेर्शोम थेंइ।
EXO 18:4 अर्को च्हए मिं एलीएजर मुँल, तलेबिस्याँ मोशाइ, “ङए आबाए परमेश्‍वरजी ङलाइ ल्होमिंसि फारोए सेलाँउँइँले ङ जोगेमिंइ,” बिल। छतसि च्हए मिं चइ एलीएजर थेंइ।)
EXO 18:5 मोशाए च्हमैं नेरो प्ह्रेंस्यो पसि मोशाए क्यें यित्रो परमेश्‍वरए कों ङाँर मोशा टिबै क्यु आयोंबै क्ल्ह्‍योर खइ।
EXO 18:6 यित्रोइ मोशाने, “ङ क्हिए क्यें यित्रो, क्हिए प्ह्रेंस्यो नेरो क्हिए च्ह ङ्हिं किंसि क्हि ङाँर खसिन् मुँ,” बिसि सउँसर कुलल।
EXO 18:7 छतसि मोशा ह्रोंसए क्येंने त्होबर ह्‍याइ, धै त्होसि क्येंलाइ फ्योइ, धै रासि म्वैं लइ। चमैंइ खें-खेंमैंए छ्याँब आछ्याँब ताँमैं ङ्योएसि मोशाए तम्बु न्होंर होंइ।
EXO 18:8 इस्राएलीमैंलाइ मिश्रउँइँले फ्रेमिंबर याहवेहजी फारो नेरो मिश्रीमैंए फिर लबै तोन्दोंरि ताँमैं नेरो इस्राएलीमैंइ घ्याँर तो-तो दुःख योंइ, धै याहवेहजी चमैंलाइ खैले जोगेमिंइ बिबै ताँमै ताँन् मोशाइ ह्रोंसए क्येंने बिइ।
EXO 18:9 इस्राएलीमैं मिश्रीमैंए योउँइँले फ्रेसि पखमा चमैंए ल्हागिर याहवेहजी लबै छ्याँबै ताँमैं थेसि यित्रो सैं तोंइ।
EXO 18:10 यित्रोइ बिइ, “मिश्रीमैं नेरो फारो म्रुँए योउँइँले क्हेमैं फ्रेमिंबै याहवेहए मिं थेब् तरिगे! खीजी ह्रोंसए म्हिमैंलाइ मिश्रीमैंए केब्छैंमैं तबइँले फ्रेमिंइ!
EXO 18:11 याहवेह ताँन् देवतामैं भन्दा थेब मुँन बिसि ङइ तोगो सेइ, तलेबिस्याँ मिश्रीमैंइ इस्राएलीमैंए फिर आछ्याँबै के लमा खीजी चमैंलाइ जोगेमिंइ।”
EXO 18:12 च लिउँइँ मोशाए क्यें यित्रोइ परमेश्‍वरए ल्हागिर मिइ ख्रोंबै ख्रो नेरो अरू भेटिमैं या पिंइ। झाइले हारून नेरो इस्राएलर्बै चिबनाँब्मैं मोशाए क्यें यित्रोने परमेश्‍वरए ओंसों क्हें चबर खइ।
EXO 18:13 प्हन्हाँगधों मोशा म्हिमैंए निसाफ लबर टिमा न्हाँगउँइँले ङेसा समा म्हिमैं मोशाए कारग्युले टिइ।
EXO 18:14 मोशाइ म्हिमैंए ल्हागिर लबै ताँन् केमैं मोशाए क्येंइ म्रोंसि चने ङ्योएइ, “क्हिइ चु म्हिमैंए ल्हागिर लबै के तो जा? क्हि घ्रि मत्‍त्रे तले निसाफ लबर टिरिमुँ? छलेन म्हिमैं न्हाँगउँइँले ङेसा समा तले क्हिए कारग्युले रारिमुँ?”
EXO 18:15 मोशाइ ह्रोंसए क्येंने बिइ, “म्हिमैं ङ ङाँइँले परमेश्‍वरए इच्छा क्होबर खम्।
EXO 18:16 चमैं न्होंरि आक्ह्रिबै ताँमैं तोइ मुँस्याँ चमैं ङ ङाँर खम्, धै ङ चमैंए म्हाँजोरि निसाफ लमिंब्मुँ। छलमा ङइ चमैंने परमेश्‍वरए ठिममैं बिमिंब्मुँ।”
EXO 18:17 मोशाए क्येंइ चने बिइ, “क्हिइ लबै चु के छ्याँब आत।
EXO 18:18 छलमा क्हि नारब्मुँ क्हि ङाँर खब्मैं या नारब्मुँ। तलेबिस्याँ क्हिए ल्हागिर चु के बेल्‍ले गारो मुँ। क्हि घ्रिइ चु के लल् खाँरिब् आरे।
EXO 18:19 तारे ङए ताँ थेद्। परमेश्‍वर क्हिने बालु तरिगे बिसि ङ क्हिलाइ सल्‍ला पिंब्मुँ, बरु क्हि म्हिमैंए आक्ह्रिबै ताँ परमेश्‍वरए ओंसों बोब छ्याँब मुँ।
EXO 18:20 क्हिइ चमैंलाइ परमेश्‍वरजी बिबै ताँमैं नेरो चमैंइ छ्ह खैले थोल् त्हुम् बिबै ताँ नेरो चमैंइ लल् त्हुबै केमैं चमैंलाइ लोमिंन्।
EXO 18:21 दिलेया म्हिमैंए न्होंउँइँले ह्रब्-सेबै म्हिमैं त्हाँन्। चमैं परमेश्‍वरने ङ्हिंब्मैं, बिश्‍वास योग्यर्बै म्हिमैं, आछ्याँबै केमैं आलब छ्याँबै के लबै म्हिमैं तल् त्हुम्। चमैं हजार-हजार, प्र-प्र, ङ्‍हच्यु-ङ्‍हच्यु नेरो च्यु-च्युए फिर चिब तबर त्हाँन्।
EXO 18:22 चमैंइ खोंयोंइ बिले म्हिमैंए आक्ह्रिबै ताँमैं क्ह्रिमिंबै के लरिगे। थे-थेबै आक्ह्रिबै ताँमैं बिस्याँ चमैंइ क्हि ङाँर पखरिगे, दिलेया च्योंबै ताँमैं चमैंइन क्ह्रिमिंरिगे। छ लस्याँ क्हिए के योंब्मुँ, तलेबिस्याँ चमैंज्यैया क्हिए ति नोबर ल्होमिंब्मुँ।
EXO 18:23 परमेश्‍वरजी बिब् धोंले क्हिइ लइ बिस्याँ क्हिइ चु के आनरल्‍ले लल् खाँब्मुँ, धै चु म्हिमैंया सैं क्होसि ह्रों-ह्रोंसए धिंर ह्‍याब्मुँ।”
EXO 18:24 छबिमा मोशाइ चए क्येंइ बिबै ताँ ङिंइ, धै खिइ बिब् धोंले ताँन् लइ।
EXO 18:25 मोशाइ ताँन् इस्राएलीमैं न्होंर ह्रब्-सेबै म्हिमैं त्हाँसि हजार-हजार, प्र-प्र, ङ्‍हच्यु-ङ्‍हच्यु, च्यु-च्युए फिर्बै चिब्मैं तल् पिंइ।
EXO 18:26 चमैंइ खोंयोंइ बिलै म्हिमैंए आक्ह्रिबै ताँमैं क्ह्रिमिंबै के लमल। क्ह्रिल् आखाँबै ताँमैं मत्‍त्रे चमैंइ मोशा ङाँर पखमल, दिलेया च्योंब ताँमैं चमैं खेंमैंन क्ह्रिमिंमल।
EXO 18:27 च लिउँइँ मोशाइ ह्रोंसए क्येंलाइ मान लसि कुलइ, धै यित्रो ह्रोंसए ह्‍युलउँइँ ह्‍याबै घ्याँ क्हाइ।
EXO 19:1 इस्राएलीमैं मिश्रउँइँले त्होंबै म्हैंन सोंलर सिनै बिबै क्यु आयोंबै क्ल्ह्‍योर फेखइ।
EXO 19:2 चमैं रपिदिमउँइँले प्रसि सिनै बिबै तोइ आरेबै क्ल्‍ह्‍योर फेखसि च कोंए ओंसों इस्राएलीमैइ तम्बु टौंदिइ।
EXO 19:3 च लिउँइँ मोशा कों क्रेसि परमेश्‍वर ङाँर ह्‍यामा याहवेहजी कोंउँइँले चने बिइ, “क्हिइ याकूबए घराना नेरो इस्राएलीमैंने छ बिद्:
EXO 19:4 ‘क्हेमैंलाइ जोगेबै ल्हागिर ङइ मिश्रीमैंलाइ खै लइ, क्व्रेइ ह्रोंसए प्हसे प्ह्‍यागोर नोब् धोंले ङइ क्हेमैंलाइ नोसि ङ ङाँर पखब क्हेमैंइ म्रोंइमुँ।
EXO 19:5 तारे ङए ताँ छेनाले थेसि ङने बाछा फैब् धोंले क्हेमैं प्रइ बिस्याँ, ताँन् ह्‍युल ङलन् तलेया ताँन् ह्रेंमैं न्होंरि क्हेमैं ङए म्हिमैं तब्मुँ।
EXO 19:6 क्हेमैं ङए ल्हागिर पबित्र ह्रें (जात) तसि ङए खेगिमैं तब्मुँ।’ क्हिइ इस्राएलीमैंने बिल् त्हुबै ताँ चुन् ग।”
EXO 19:7 च लिउँइँ मोशा कोंउँइँले क्युरु युसि म्हिमैंए चिबनाँब्मैं खागु लसि याहवेहजी चने बिद् बिसि ल्हैदिबै ताँन् ताँमैं चमैंए ओंसों बिमिंइ।
EXO 19:8 छतमा ताँन् म्हिमैंइ तिख्खेर “याहवेहजी बिबै ताँन् ताँमैं ङिइ लब्मुँ,” बिइ। छबिमा म्हिमैंइ बिबै ताँमै मोशाइ याहवेहने बिमिंइ।
EXO 19:9 याहवेहजी मोशाने बिइ, “थेद्, ङ क्हिने ताँ लब म्हिमैंइ थेरिगे धै खोंयोंन् बिलै या क्हिए फिर बिश्‍वास लरिगे बिसि ङ क्हि ङाँर रुँदो न्हाँम्स्योर युब्मुँ।” म्हिमैंइ बिबै ताँ मोशाइ याहवेहने बिमा
EXO 19:10 याहवेहजी चने बिइ, “क्हि म्हिमैं ङाँर ह्‍यासि ‘तिंयाँ नेरो प्हन्हाँग पबित्र तसि ह्रों-ह्रोंसए क्वें ख्रुद्,’ बिद्।
EXO 19:11 झाइले नोगि चमैं छेसि टिरिगे, तलेबिस्याँ नोगि सिनै कोंर ताँन् म्हिमैंइ म्रोंल्‍ले ङ युब्मुँ।
EXO 19:12 कोंए कारग्युले बार थोसि म्हिमैंने छ बिद्, ‘क्हेमैं न्ह क्रों मि क्रोंले टिद्, क्हेमैं कों फिर आह्‍याद्, धै चए साँदमैं या आछुइद्। कों छुइबै म्हिलाइ खैले बिलैया सैवाब्मुँ।
EXO 19:13 खाबज्यै च कों आछुइद्। खेदो मुँलेया म्हि मुँलेया च कों छुइ बिस्याँ चमैंलाइ आछुइल्‍ले युँमाइ तलेया म्ये त्हलेइ तलेया ल्हिसि सैवाद्। च सोल् योंरिब् आरे।’ दिलेया थुतुरु ह्राबै कै थेबै लिउँइँ मत्‍त्रे चमैं कोंर खरिगे।”
EXO 19:14 मोशा कोंउँइँले क्युरु म्हिमैं ङाँर युबै लिउँइँ चइ म्हिमैंलाइ पबित्र लइरि चमैइ ह्रों-ह्रोंसए क्वें ख्रुइ।
EXO 19:15 च लिउँइँ चइ म्हिमैंने बिइ, “नोगिए ल्हागिर छेइ टिद्। क्हेमैं च्हमिरिमैंने बालु आतद्।”
EXO 19:16 नोगिम्धों न्हाँग तमा कोंर गड्‌याङगुडुङ तइ, धै काम्‍लि तिम्‍लि रासि कोंर रुँदो न्हाँमस्यो राइ, धै बेल्‍ले ङ्‍हेबै थुतुरिए कै थेइ। छतमा ब्यारेकर मुँबै ताँन् म्हिमैं ङ्हिंसि थरथर त्हारइ।
EXO 19:17 च लिउँइँ मोशाइ ब्यारेकउँइँले म्हिमैंलाइ परमेश्‍वरने त्होबर पखमा म्हिमैं कोंए फेदिर राइ।
EXO 19:18 याहवेह मि तसि चर युबइले सिनै कों मिखु-मिखुइ प्लिंयाँइ। मिए भट्टिउँइँले मिखु त्होंब् धोंलेन् मिखु त्होंमा कोंमैं बेल्‍ले त्हारबर होंइ।
EXO 19:19 छतमा थुतुरिए कै अझै सार्ले ङ्‍हेबर होंमा मोशा पोंबर होंइ, धै परमेश्‍वरजी मु गड्‌याङगुडुङ लवासि मोशालाइ ज्वाफ पिंइ।
EXO 19:20 झाइले याहवेह सिनै कोंए च्होर युसि मोशालाइ कोंए च्होर हुइ। छतसि मोशा कोंर क्रेसि ह्‍याइ।
EXO 19:21 याहवेहजी मोशाने बिइ, “याहवेह ङ्‍ह्‍योब् बिसि म्हिमैं बार ङ्‍वैसि कोंर आखरिगे बिसि क्हि क्युरु ह्‍यासि चमैंलाइ कों आछुइद् बिद्। चमैंइ छ लस्याँ चमैं न्होंर ल्हें म्हि सियाब्मुँ।
EXO 19:22 ङ ङाँर खमा खेगि या पबित्र तल् त्हुम्। पबित्र आतस्याँ ङइ च त्हेर्न चमैं सैवाब्मुँ।”
EXO 19:23 मोशाइ याहवेहने बिइ, “म्हिमैं सिनै कोंर क्रेसि खल् आखाँ, तलेबिस्याँ चु कों पबित्र मुँ ङ्हाँसि कोंए कारग्युले क्हिजी बार थोद् बिसि ल्हैदिल।”
EXO 19:24 याहवेहजी चने बिइ, “क्हि क्युरु ह्‍यासि हारूनने बालु कोंर क्रेसि खो। खेगिमै नेरो म्हिमैं बिस्याँ, बार ङ्वैसि कोंर क्रेसि ङ ङाँर आखरिगे। आस्याँ ङइ चमैं सैवाब्मुँ।”
EXO 19:25 च लिउँइँ मोशा क्युरु म्हिमैं ङाँर ह्‍यासि याहवेहजी बिबै ताँ बिमिंइ।
EXO 20:1 परमेश्‍वरजी चु ताँन् ताँमैं बिइ:
EXO 20:2 “ङ याहवेह क्हेमैंए परमेश्‍वर ग, क्हेमैं केब्छैंमैं तसि टिबै मिश्र ह्‍युलउँइँले ङइन तेसि पखइ।
EXO 20:3 “छतसि ङलाइ मत्‍त्रे म्हाँदिद् अरू देवतामैं आम्हाँदिद्।
EXO 20:4 “क्हेमैंइ ह्रोंसए ल्हागिर मु, पृथ्‍बी नेरो क्यु न्होंर मुँबै सैमैंला कु (मूर्ति) आबनेद्।
EXO 20:5 चमैंए ओंसों आकुरद्, चमैंए पूजा आलद्, तलेबिस्याँ क्हेमैंए याहवेह परमेश्‍वर ङ ह्रिस लबै परमेश्‍वर ग। ङलाइ छेरब्मैंए पुस्ता सों, प्लि समा दण्ड पिंब्मुँ,
EXO 20:6 दिलेया ङलाइ म्हाँया लब्मैं नेरो ङइ बिबै ताँ ङिंब्मैंए हजार-हजार पुस्ताए फिर ङ ल्हयो खब्मुँ।
EXO 20:7 “ह्रोंसए याहवेह परमेश्‍‍वरए मिं फाकर्र्न आकिंन्, तलेबिस्याँ ङए मिं फाक्‍कर्न किंब्मैंलाइ ङइ छ्याब् ल्हैदिब्मुँ।
EXO 20:8 “प्रिबै त्हिंइ पबित्र ङ्हाँल् त्हुम् बिसि सैंर मैंन्।
EXO 20:9 ट्हुगैं समा ह्रोंसए लल् त्हुबै केमैं ताँन् लद्,
EXO 20:10 दिलेया क्हेमैंए याहवेह परमेश्‍वरए ल्हागिर ङिगैं ‘प्रिबै त्हिंइ’ ग। च त्हिंइर क्हेमैंए च्ह च्हमि, केब्छैं-केब्स्योमैं, खेदोमैं नेरो आगुए ह्‍युलर्बै म्हिमैं खाबज्यै तो के या आलद्।
EXO 20:11 तलेबिस्याँ टुगैंर ङ याहवेहजी मु, पृथ्‍बी, मा ङ्युँइ (समुन्द्र) नेरो चर मुँबै तोन्दोंरि सैमैं बनेइ, धै ङिगैंर भों न्हइ। छतसि प्रिबै त्हिंइलाइ याहवेहजी आशिक पिंसि पबित्र लइ।
EXO 20:12 “ह्रोंसए आबा-आमाए मान लद्, छलस्याँ ङइ पिंबै ह्‍युलर क्हेमैं ह्रिंग्यो छ्ह योंब्मुँ।
EXO 20:13 “म्हि आसैद्।
EXO 20:14 “ब्यभिचार आलद्।
EXO 20:15 “आह्‍योद्।
EXO 20:16 “ह्रोंसए ङ्‍हेब्टुमैंए बिरोधर स्योर तेसि छ्याब् आल्हैदिद्।
EXO 20:17 “ह्रोंसए ङ्‍हेब्मैंए धिं-नाँ, प्ह्रेंस्यो, केब्छैं-केब्स्योमैं, क्ल्या, गदा चए तो सै म्रोंलेया आम्रोद्।”
EXO 20:18 च त्हेर काम्‍लि तिम्‍लि रासि मु ङ्‍हेब नेरो थुतुरिए कै थेइ धै कोंउँइँले मिखु खब म्रोंसि चमैं थरथरले त्हारसि ह्रेंगोन् रारिइ।
EXO 20:19 चमैंइ मोशाने बिइ, “क्हि ङिने पोंइ बिस्याँ ङिइ क्हिए ताँ थेब्मुँ, दिलेया परमेश्‍वर ङिने आपोंरिगे। खी ङिने पोंस्याँ ङि सिब्मुँ।”
EXO 20:20 मोशाइ म्हिमैंने बिइ, “क्हेमैं आङ्हिंन्, तलेबिस्याँ क्हेमैंए जाँच लबर, क्हेमैंइ पाप आलरिगे धै खीने ङ्हिंरिगे बिसि परमेश्‍वर युइमु।”
EXO 20:21 दिलेया म्हिमैं ह्रेंगोन् रारिइ। परमेश्‍वर मुँबै रुँदो न्हाँम्स्योर खीए ङाँर मोशा ह्‍याइ।
EXO 20:22 छले ह्‍यामा याहवेहजी मोशाने बिइ, “ङ स्वर्गउँइँले क्हेमैंने पोंब क्हेमैंइ म्रोंइमुँ बिसि क्हिइ इस्राएलीमैंने बिद्।
EXO 20:23 क्हेमैंइ ह्रोंसए ल्हागिर चाँदि नेरो माराए देवतामैं बनेसि आफ्योद्।
EXO 20:24 “क्हेमैंइ ङए ल्हागिर सए ख्रो पिंबै क्ल्ह्‍यो बनेसि मिइ ख्रोंबै ख्रोमैं, क्ह्रिमिंबै ख्रोमैं, क्युमैं नेरो खेदोए ख्रोमैं पिंन्। ङए मिंए मान लबै क्ल्ह्‍योजरे ङ युसि क्हेमैंलाइ आशिक पिंब्मुँ।
EXO 20:25 ङए ल्हागिरि क्हेमैंइ युँमाए ख्रो पिंबै क्ल्ह्‍यो बनेमा कुन्दिबै युँमाए ख्रो पिंबै क्ल्ह्‍यो आबनेद्। तलेबिस्याँ छिनइ युँमार कुन्दिमा क्हेमैंइ ख्रो पिंबै क्ल्ह्‍यो अशुद्ध लब्मुँ।
EXO 20:26 छलेन क्हेमैंए म्रोंल् आतबै सै आम्रोंरिगे बिसि लिउँइँले ङए मिंर ख्रो पिंबै क्ल्ह्‍योर आक्रेद्।
EXO 21:1 “तारे ङइ क्हेमैंए ल्हागिर पिंबै ठिममैं चुन् ग।
EXO 21:2 “क्हेमैंइ हिब्रू म्हि मुइ फोसि केब्छैं तबर थेंइ बिस्याँ चइ टुदि समा मत्‍त्रे क्हेमैंए के लरिगे। ङिदिर च तोइ आफोन्ले ह्रोंसए धिंर ह्‍याल् पिंन्।
EXO 21:3 केब्छैं तबर च घ्रिन् खब् ग बिस्याँ च घ्रिन् ह्‍यारिगे। चइ ब्ह्‍या लसि प्ह्रेंस्योने बालु खब् ग बिस्याँ प्ह्रेंस्यो बोसिन् ह्‍यारिगे।
EXO 21:4 “चए क्ल्हेइ चलाइ ब्ह्‍या लमिंसि च्ह च्हमिंमैं योंइ बिस्याँ, म्रिं प्हसेमैं क्ल्हे ङाँर्न टिल् त्हुब्मुँ, च म्हि घ्रि मत्‍त्रे ह्‍याल् योंब्मुँ।
EXO 21:5 दिलेया च केब्छैंइ ‘ङ ह्रोंसए क्ल्‍हे नेरो म्रिं, प्हसेमैंए म्हाँया खमुँ, छतसि ङ ह्रोंसए धिंर आह्‍या’ बिइ बिस्याँ,
EXO 21:6 चए क्ल्हेइ चलाइ निसाफ लबै म्हिमैं ङाँर बोसि म्रार राल् पिंसि चए न्ह थोंमिंरिगे। छ लबै लिउँइँ आसिन् समा च म्हि क्ल्हेए केब्छैं तब्मुँ।
EXO 21:7 “खाबज्यै या ह्रोंसए च्हमि केब्स्यो तबर चुँइँमुँ बिस्याँ मुयु केब्छैंमैं धोंले च केब्स्यो धबै क्ल्हेए धिंउँइँले ह्‍याल् योंरिब् आरे।
EXO 21:8 दिलेया च च्हमिरि ह्रोंसए ल्हागिरि पखबै लिउँइँ क्ल्हेइ चलाइ आखोइ बिस्याँ केब्स्योए आबाइ मुइ पिंसि चलाइ आबाइ बोयाल् त्हुम्। क्ल्हेइ चए फिर ठिक के आलबइले चलाइ अरू ह्रेंमैंने चुँल् योंरिब् आरे।
EXO 21:9 दिलेया क्ल्हेइ चलाइ ह्रोंसए च्हए प्ह्रेंस्यो तबर त्हाँइ बिस्याँ, चने केब्स्यो धोंन् आङिं, च्हमिं धोंन् ङ्हाँल् त्हुम्।
EXO 21:10 च केब्स्यो पखसि क्ल्हेइ अर्को प्ह्रेंस्यो पखइ बिस्याँ, थेब्स्योलाइ चब् थुँब्, नेरो क्वें पिंसि प्ह्रेंस्योलाइ म्हाँया लब आपिरिगे।
EXO 21:11 क्ल्हेइ चने चु केमैं सों आलस्याँ, मुइ तिफुँइ आफोल्‍ले च फ्रेयाल् खाँब्मुँ।
EXO 21:12 “खाबज्यै या म्हिलाइ प्रिंसि सैवास्याँ चलाज्यै या सैवाल् त्हुम्।
EXO 21:13 दिलेया खाबज्यै या ह्रना-ह्रन् म्हि आसैलै या परमेश्‍वरजीन् छ तल् पिंब् ग बिस्याँ, चए ल्हागिर भौदिह्‍याबै क्ल्ह्‍यो घ्रि ङइ तोक्दिमिंब्मुँ।
EXO 21:14 दिलेया म्हि ह्रिस खसि दाउ ङ्‍ह्‍योसि म्हिलाइ सैइ बिस्याँ, छाबै म्हिलाइ सैबर बोयाद्, ङए ख्रो पिंबै क्ल्ह्‍योर ह्‍यसि टिलेया सैबर बोयाद्।
EXO 21:15 “ह्रोंसए आबा-आमालाइ प्रिंबै म्हिलाइ सैवालन् त्हुम्।
EXO 21:16 “खाबइ म्हिमैं क्हासि चुँमुँ अथवा आचुँले थेंमुँ, छाबै म्हिलाज्यै या सैवालन् त्हुम्।
EXO 21:17 “ह्रोंसए आबा आमाए फिर गाल् केबै म्हि या सैवालन् त्हुम्।
EXO 21:18 “म्हिमैं प्होंगि कैगि लसि घ्रिइ घ्रिलाइ युँमा नेरो योइ ल्हिमा च म्हि सिबम् आसि दिलेया आधा कल्सो तसि क्ल्ह्‍योर तयास्याँ
EXO 21:19 लिउँइँ धबै प्हरे तुँसि प्रल् खाँस्याँ, चलाइ प्रिंबै म्हि छ्याब आरेब तब्मुँ। दिलेया च क्ल्ह्‍योर तमा छेनाले आसन् समा प्रिंबै म्हिइन मैंए सै नेरो चब् थुँब ङ्‍ह्‍योल् त्हुम्।
EXO 21:20 “खाबज्यै या ह्रोंसए केब्छैं केब्स्योलाइ प्हरेइ प्रिंमा सियाइ बिस्याँ च सैवाबै म्हिइ दण्ड योंलन् त्हुम्।
EXO 21:21 दिलेया च म्हि तिगें ङ्हिंगैं लिउँइँ रेइ बिस्याँ च प्रिंबै म्हिलाइ दण्ड आपिंन्, तलेबिस्याँ क्ल्हेइ सै फोसि केब्छैंलाइ किंब् ग।
EXO 21:22 “म्हिमैं प्होंब नेब तमा फोर प्हसे मुँबै च्हमिरिलाइ ने म्योंसि फिबै त्हे आतबन् प्हसे फिइ, दिलेया च च्हमिरिलाइ तोइ नोक्सन आतइ बिस्याँ, च्हमिरिए प्युँइ बिब् धोंलेन् नेरो निसाफ लबै म्हिमैंइ तोक्दिब् अनुसार नें म्योंल् लबै म्हिइ मुइ फोल् त्हुम्।
EXO 21:23 दिलेया च्हमिरिलाज्यै या नें म्योंइ बिस्याँ सोए खि सो किंल् त्हुम।
EXO 21:24 छलेन मिए खि मि, सए खि स, योए खि यो, प्हलेए खि प्हले,
EXO 21:25 डामए खि डाम, नें म्योंबए खि नें म्योंब, प्रिंबए खि प्रिंब च म्हिइ योंरिगे।
EXO 21:26 “खाबज्यै ह्रोंसए केब्छैं-केब्स्योए मिंर प्रिंसि तिवास्याँ, चए मिंए साटोर चइ तोइ आफोल्‍ले फ्रेसि ह्‍याल् योंम्।
EXO 21:27 छलेन ह्रोंसए केब्छैं केब्स्योए सर प्रिंमा स चुयाइ बिस्याँ, च सए साटोर चइ तोइ आफोल्‍ले फ्रेसि ह्‍याल् योंम्।
EXO 21:28 “क्ल्याइ रुइ थासि म्हिलाइ सैवाइ बिस्याँ, च क्ल्‍या युँमाइ ल्हिसि सैवाद्, चए से आचद्, धै चए क्ल्हेलाइ दण्ड आपिंन्।
EXO 21:29 दिलेया च क्ल्याइ ओंसों या थाब्रें लमल बिसि क्ल्हेने बिलेया चइ क्ल्या च्युँइ आथेंबै लमा म्हिमैं थासि सैवाइ बिस्याँ च क्ल्या युँमाइ ल्हिसि सैवाद्, धै चए क्ल्हेलाज्यै या सैवाद्।
EXO 21:30 दिलेया च म्हिलाइ आसैबै ल्हागिर मुइ तोक्दिस्याँ चइ ह्रोंसए ज्यु जोगेबै ल्हागिर तोक्दिबै मुइ फोल् त्हुम्।
EXO 21:31 क्ल्याइ कोलोमैं थासि सैवास्याँ, चु ठिमर बिब् धोंले या लद्।
EXO 21:32 क्ल्याइ थासि केब्छैं केब्स्यो सैवास्याँ, क्ल्याए क्ल्हेइ केब्छैंए क्ल्हेलाइ चाँदिए सोंच्यु सिक्‍का पिंल् त्हुम्, धै च क्ल्या युँमाइ ल्हिसि सैवाद्।
EXO 21:33 “खाबज्यै या इनारए क्हा आझोंल्‍ले ह्‍वाङ्‍गन् थेंमा इनार तासि आहुल्‍ले थेंमा चर क्ल्या अथवा गदा पायास्याँ,
EXO 21:34 च इनार बनेबै म्हिइ क्ल्या अथवा गदाए क्ल्हेलाइ मुइ पिंसि च सियाबै खेदो चइन योंरिगे।
EXO 21:35 म्हि घ्रिए क्ल्याइ अर्को म्हिए क्ल्यालाइ थासि सैवास्याँ, क्ल्हेमैं ङ्हिं क्ह्रिसि च सोगों क्ल्या चुँसि योंबै सै नेरो सियाबै क्ल्याए से या चुल् त्हुम्।
EXO 21:36 दिलेया च क्ल्याइ ओंसों ओंनोंन् थामल बिसि क्ल्हेइ सेलेया च क्ल्या च्युँइँसि आथेंस्याँ, च क्ल्हेइ क्ल्याए खि क्ल्यान् पिंल् त्हुम्, धै सियाबै क्ल्या चलन् तरिगे।
EXO 22:1 “खाबज्यै या क्ल्या अथवा क्यु ह्‍योसि सैलेया चुँलेया, चइ क्ल्याए खि क्ल्या ङ्‍ह नेरो क्युए खि क्यु प्लि पिंल् त्हुम्।
EXO 22:2 “ह्‍योइ म्हुँइँसर धिंर ह्‍योरिबै तोंर स्याइ बिस्याँ चलाइ प्रिंमा च सियास्याँ, चलाइ सैवाबै छ्याब् प्रिंबै म्हिए फिर खरिब् आरे।
EXO 22:3 दिलेया त्हिंयाँ प्योल् खाँइमुँ बिस्याँ, चए फिर म्हि सैबै छ्याब् ल्हैदिब्मुँ। “ह्‍योइ दण्ड फोल् त्हुम्। ह्‍योसि बोबै सै क्ल्या, गदा, क्यु तो मुँलेया स्याइ बिस्याँ चए ङ्हिथु फोल् त्हुम्।
EXO 22:4 ह्‍योने बालु फोबै सै तोइ आरेस्याँ, चइ ह्‍योबै के लबइले चइ फोल् त्हुबै दण्ड केब्छैं तसि फोल् त्हु म्।
EXO 22:5 “खाबज्यै ह्रोंसए खेदो रेंबर पिवामा खेदोइ आगुए म्रोंर्बै रा-रोमै चवास्याँ, खेदोए क्ल्हेइ ह्रोंसए म्रों नेरो अँगुरए बारिर्बै ताँन् भन्दा छ्याँबै रोमैं खि पिंल् त्हुम्।
EXO 22:6 “खाबज्यै ह्रोंसए म्रोंर घुरान्मैं ख्रोंमा आगुए म्रोंर्बै खेतिमैं तोइ आचल्‍ले ख्रोंवाँइ बिस्याँ, चए खि घुरान्मैं ख्रोंबै म्हिइन पिंल् त्हुम्।
EXO 22:7 “खाबज्यै ह्रोंसए ङ्‍हेब्मैंने मुइ मुँले अरू तो सै मुँले थेंल् पिंइ, झाइले च म्हिए धिंउँइँले ह्‍योवाइ धै ह्‍योलाइ स्याइ बिस्याँ च ह्‍योइ तिंबाँर ङ्हिंबाँ तेंसि पिंल् त्हुम्।
EXO 22:8 दिलेया ह्‍यो आस्यास्याँ, ङ्‍हेब्मैंइ थेंल् पिंबै सै धिं क्‍ल्‍हेइन लोइ उ आलो बिसि था सेबै ल्हागिर छेनाले निसाफ लबै म्हिमैं ङाँर च ह्‍यारिगे।
EXO 22:9 “क्ल्या, गदा, क्यु, क्वें, तो मुँले म्हह्‍याबै सैए बारेर खाबज्यै ‘च सै ङल ग’ बिइ बिस्याँ, चमैं ङ्हिंन-ङ्हिंन् निसाफ लबै म्हिमैं ङाँर ह्‍यारिगे। धै निसाफ लबै म्हिमैंइ दोषि ठर्दिबै म्हिइन ह्रोंसए ङ्‍हेब्मैंलाइ तिंबाँर ङ्हिंबाँ तेंसि पिंल् त्हुम्।
EXO 22:10 “छलेन खाबज्यै ह्रोंसए ङ्‍हेब्मैंलाइ गदा, क्ल्या, क्यु थेंल् पिंइ, दिलेया च खेदो खाबज्यै आम्रोंल्‍ले सियालेया, ने म्योंलेया अथवा खाबज्यै ल्हा बोइ बिस्याँ,
EXO 22:11 ह्रोंसए ङ्‍हेब्मैंए सैमैं ङइ आछुइमुँ बिसि याहवेहए ओंसों कसम चसि चमैं ङ्हिंए न्होंरि आक्ह्रिबै ताँ क्ह्रिरिगे। धै खेदोए क्ल्‍हेइ च ताँ ङिंरिगे, छलमा ङ्‍हेब्मैंए सै थेंबै म्हिइ खि फोल् आत्हु।
EXO 22:12 दिलेया खेदो ङ्‍हेब्मैंन ह्‍योब् ग बिस्याँ, खेदोए क्ल्हेलाइ खि फोल् त्हुब्मुँ।
EXO 22:13 क्ह्‍योंर्बै चें भलुइ खेदोलाइ सैवाइ बिस्याँ, च खेदो थेंबै म्हिइ खेदोए सिनु फखसि उँइँल् त्हुब्मुँ। धै च खेदो चें भलुइन सैवाब् ग बिस्याँ खेदो थेंबै म्हिइ खि फोल् आत्हु।
EXO 22:14 “खाबज्यै ह्रोंसए ङ्‍हेब्मैंउँइँले खेदो ङैसि बोमा क्ल्याए क्ल्हे आरेमा क्ल्या नें म्योंइ अथवा सियाइ बिस्याँ, ङैबै म्हिइ चए खि पिंरिगे।
EXO 22:15 दिलेया क्ल्याए क्ल्‍हे क्ल्यानेन् मुँस्याँ ङै बोबै म्हिइ चए खि फोल् त्हुरिब् आरे। च खेदो नों सै फोसि पखब् ग बिस्याँ, चए नोक्सन् तब नों सैन पूरा लब्मुँ।
EXO 22:16 “खाबज्यै मग्नि आतबै कन्येलाइ न्होंवाइ बिस्याँ, न्होंवाबै म्हिइ प्ह्रेंस्योए सै फोसि च कन्येने ब्ह्‍या लरिगे।
EXO 22:17 दिलेया आबाइ च्हमिलाइ च मुँयुँने ब्ह्‍या लल् आपिंस्याँ, कन्येए छ्या अनुसार च मुँयुँइ कन्येए आबालाइ मुइ फोल् त्हुम्।
EXO 22:18 “जादु लबै च्हमिरि सोगों आथेंन्।
EXO 22:19 “खेदोने न्होंब्मैं सैवाल् त्हुम्।
EXO 22:20 “याहवेह बाहेक अरू देवतालाइ ख्रो पिंब्मैं खैलसेया सैवाल् त्हुम्।
EXO 22:21 “आगुए ह्‍युलर्बै म्हिमैंलाइ दुःख आपिंन्, धै न्होह्रों या आलद, तलेबिस्याँ क्हेमैं या मिश्रर परदेशि मुँल।
EXO 22:22 “म्हरेस्यो नेरो आबा आरेब्मैं आलुडिद्।
EXO 22:23 क्हेमैंइ लुडिसि चमैंइ ङने ग्वार ह्रिमा ङइ चमैंए ताँ थेब्मुँ।
EXO 22:24 ङ बेल्‍ले ह्रिस खसि सेलाँइ क्हेमैं सैवाब्मुँ, झाइले क्हेमैंए प्ह्रेंस्योमैं म्हरेस्यो तब्मुँ धै क्हेमैंए च्ह-च्हमिंमैं आबा आरेब्मैं तब्मुँ।
EXO 22:25 “क्हेमैंने बालु मुँबै ङए ङ्हाँदु म्हिलाइ क्हेमैंइ छे पिंइ बिस्याँ चए फिर क्ल्हे आप्हैंन्, चने ब्याजै या आकिंन्।
EXO 22:26 क्हेमैंए ङ्‍हेब्मैंए नेंबै क्वें क्हिइ धितोर थेंइमुँ बिस्याँ, त्हिंयाँ लिब् भन्दा ओंसोंन् च क्वें एमिंन्,
EXO 22:27 तलेबिस्याँ चल नेंबै क्वें च घ्रि मत्‍त्रे ग। च घ्रि या क्हिइ थेंवास्याँ च तो नेंसि रोब? छतसि चइ ङने ग्वार ह्रिइ बिस्याँ ङ चए ताँ थेब्मुँ, तलेबिस्याँ ङइ ल्हयो खमुँ।
EXO 22:28 “परमेश्‍वर आस्यारद्, छलेन क्हेमैंए फिर्बै चिब्मैंलाज्यै या सराप आझोंन्।
EXO 22:29 “क्हेमैंए म्रोंर्बै रोमैं नेरो अँगुरए खुगु परमेश्‍वरए मिंर पखबर क्हैन् आलद्। “क्हेमैंए च्ह थेब ङए ल्हागिर पिंन्।
EXO 22:30 “छलेन क्हेमैंए खेदोमैं नेरो क्युमैं या ङलाइ पिंन्। च ओंसों फिबै खेदोए प्हसे ङिगें समा ह्रोंसए आमाने टिरिगे, प्ह्रेगैंर बिस्याँ क्हेमैंइ च खेदोए प्हसे ङए ल्हागिर पिंन्।
EXO 22:31 “क्हेमैं ङए पक्‍का म्हिमैं तल् त्हुम्। छतसि क्हेमैंइ चें भलुइ सैबै खेदोए से आचद्। च से क्हेमैंइ नगिमैं पिंन्।
EXO 23:1 “स्योर ताँ आपोंन्। दुष्‍टलाइ जोगेब् बिसि स्योर ताँआपोंन्।
EXO 23:2 आगुए न्होह्रों लबर म्हि हुलने आत्हुँन्। मुद्दा तमा खाबल् म्हि ल्हें मुँ चए ख लसि आगुइ लबै निसाफ आन्होंन्।
EXO 23:3 ङ्हाँदु म्हि मुद्दार फेमा ‘च म्हि ङ्हाँदु ग,’ बिसि चए ख आलद्।
EXO 23:4 “क्हेमैंइ ह्रोंसए शत्तुरमैंए म्ये, गदा स्योरसि ह्‍यारिब म्रोंइ बिस्याँ, च खेदोलाइ क्ल्हे ङाँर समिंन्।
EXO 23:5 क्हेमैंए फिर ह्रिस लब्मैंए गदा तिइ प्लेवाब म्रोंस्याँ, चलाइ छलेन् आवाथेंन्, चलाइ रेबर ल्होद्।
EXO 23:6 “मुद्दा तमा ङ्हाँदु म्हिइ ठिक निसाफ योंल् पिंन्।
EXO 23:7 “स्योर ताँ तिफुँइ पोंसि छ्याब आल्हैदिद्। छ्याब् आरेबै म्हि नेरो स्योर आतेबै म्हिलाइ सिबै दण्ड आपिंन्, तलेबिस्याँ छ्याब् मुँबै म्हिलाइ ङइ खोंयोंन् बिलै छ्याब् आरे बिल् आखाँ।
EXO 23:8 ख्याब आचद्, तलेबिस्याँ ख्याबइ म्हिमैं मि आम्रोंब् लवाम्, धै चइ क्ह्रोंसेंन्बै ताँ आसे। छतसि छ्याब् आरेब्मैंइ निसाफ आयों।
EXO 23:9 “आगुए ह्‍युलर्बै म्हिमैंलाइ दुःख आपिंन्। क्हेमैं मिश्रर परदेशि तसि टिबइले आगुए ह्‍युलर टिब्मैंए सैं खैतब् तम् बिसि क्हेमैंइ सेइमुँ।
EXO 23:10 “टुदिं समा ह्रोंसए म्रोंर प्लु प्लुसि छाइले खबै रोमैं खुद्।
EXO 23:11 दिलेया ङिदिंर च क्ल्ह्‍यो आक्योल्‍ले बाँजोन् पिवाद्, च क्ल्ह्‍योउँइँले खबै रोमैं ङ्हाँदुमैंइ चरिगे। चमैंइ चसि ङैब क्ह्‍योंर्बै खेदोमैंइ चरिगे। क्हेमैंए अँगुरए ह्‍वे (बारि) नेरो जैतुनए ह्‍वे या छान् लद्।
EXO 23:12 “टुगैं समा के लद्, दिलेया ङिगैंर भों न्हद्, छ लस्याँ क्हेमैंए क्ल्या, गदा, क्हिए धिंर्न फिबै केब्छैं नेरो आगुए ह्‍युलर्बै म्हिमैंइ भों न्हल् योंब्मुँ।
EXO 23:13 “ङइ बिबै ताँन् ताँ क्हेमैंइ सैंर थेंन्। अरू देवतामैंए मिं या आकिंन्। क्हेमैंए सुँउँइँले देवतामैंए मिं या आकिंन्।
EXO 23:14 “ङए मान लबर बर्षर सोंखे चाड म्हाँदिद्।
EXO 23:15 क्हेमैंइ प्लेढा आझोंबै क्हें चबै चाड म्हाँदिद्। ङइ क्हेमेंने बिब् धोंले आबीब म्हैंनर बिबै त्हेर ङिगैं समा प्लेढा आझोंबै क्हें चद्, तलेबिस्याँ चु म्हैंनर्न क्हेमैं मिश्र ह्‍युलउँइँले त्होंइ खब् ग। क्हेमैं ङ ङाँर खमा यो क्होत्‍ते आखो।
EXO 23:16 “अर्को, क्हेमैंइ म्रोंर प्लुसि खबै ओंसोंबै रो परमेश्‍वरए मिंर पिंसि बालि खैंबै चाड म्हाँदिद्। “अर्को, ह्रोंसइ रुँइँबै रो ह्रोंसए म्रोंउँइँले खुमा बालि ङ्‍हेरबै चाड म्हाँदिद्।
EXO 23:17 “क्हेमैंए ताँन् मुँयुँमैं बर्षर सोंखे याहवेहए उँइँर ह्‍याल् त्हुब्मुँ।
EXO 23:18 “ङलाइ खेदोए ख्रो पिंबै कोने प्लेढा झोंबै क्हें आचडेद्। “ङए ल्हागिर चाडर ख्रो पिंबै खेदोमैंए छि प्हन्हाँग समा आथेंन्।
EXO 23:19 “क्हेमैंए म्रोंर ताँन् भन्दा ओंसों रोबै छ्याँबै रो ह्रोंसए याहबेह परमेश्‍वरए धिंर पखो। “र बोक्याए से चए आमाए ङ्‍हेर आह्‍योद्।
EXO 23:20 “ङ्‍ह्‍योद्, क्हेमैंलाइ घ्याँर जोगेबर नेरो ङइ तयार लबै क्ल्ह्‍योर क्हेमैंलाइ सथेंनेबर ङइ क्हेमैंए ओंसो-ओंसो स्वर्गदूत घ्रि कुलब्मुँ।
EXO 23:21 क्हेमैंइ चए ताँ छेनाले थेद्, तलेबिस्याँ चलाइ ङइ कुलब् ग। छतसि चए बिरोध आलद्, आस्याँ चइ क्हेमैंए पापमैं क्षमा लरिब् आरे।
EXO 23:22 क्हेमैंइ चइ बिबै ताँ ङिंसि ङइ बिब् धों लस्याँ, ङ क्हेमैंए ताँन् शत्तुरमैं नेरो बिरोधीमैंए बिरोध लब्मुँ।
EXO 23:23 ङए दूत क्हेमैंए ओंसो-ओंसो ह्‍यासि एमोरी, हित्ती, परिज्जी, कनानी, हिव्‍वि नेरो यबूसीमैंए ह्‍युलर क्हेमैं सथेंनेब्मुँ, धै ङइ चमैंए मिं क्ह्रन् मेटिमिंब्मुँ।
EXO 23:24 चमैंए देवतामैं पूजा लसि आफ्योद्, चमैंए छ्यार लब् धोंले आलद्, चमैंए देवतामैं फतिवाद्, चमैंए पबित्र युँमामैं या फतिवाद्।
EXO 23:25 क्हेमैंइ ह्रोंसए याहवेह परमेश्‍वरए सेवा लद्। छ लस्याँ ङइ क्हेमैंए रा-रोमैंर आशिक पिंब्मुँ, धै ङइ क्हेमैंए नब्-छब् सल् लमिंब्मुँ।
EXO 23:26 क्हेमैंए ह्‍युलर खाबै या प्हसे प्युलब नेरो थरि तरिब् आरे। ङइ क्हेमैंलाइ ह्रिंबै छ्ह पिंब्मुँ।
EXO 23:27 “क्हिए बिरोध लब्मैंलाइ ङए मान लबर ल्हैदिब्मुँ। क्हेमैं खाब् ह्रेंमैं ङाँर नेबर ह्‍यामुँ चमैं ताँनलाइ खेंमैंए न्होंर्न ङइ आक्ह्रिन् लवाब्मुँ, धै क्हेमैं ङाँइँले क्हेमैंए शत्तुरमैं ल्हाब्मुँ।
EXO 23:28 ङ क्हेमैंए ओंसों-ओंसों च्ह्‍युगु कुलब्मुँ‍, झाइले च च्ह्‍युगुइ क्हेमैंउँइँले हिव्वी, कनानी नेरो हित्तीमैंलाइ ल्हाब्मुँ।
EXO 23:29 दिलेया ङ चमैंलाइ तिदिं न्होंर्न क्हेमैं ङाँइले ल्हारिब् आरे, छ लस्याँ ह्‍युल सुन्य तब्मुँ, धै क्हेमैं भन्दा क्ह्‍योंर्बै खेदोमैं ल्हें तब्मुँ।
EXO 23:30 क्हमैंए म्हिमैं ल्हें तसि च ह्‍युल क्हेमैंइ क्ल्हे आलन् समा ङ चमैंलाइ दे-दे लसि क्हेमैं ङाँइँले ल्हाब्मुँ।
EXO 23:31 ङ क्हेमैंए ह्‍युलए साँध ओल्ग्या माँ ङ्युँइउँइँले पलिश्‍तिमैंए माँ ङ्युँइ समा छलेन क्यु आयोंबै क्ल्ह्‍योउँइँले यूफ्रेटिस स्यों समा तोक्दिमिंब्मुँ। च ह्‍युलर्बै म्हिमैंलाइ ङइ क्हेमैंए योर सुम्पिदिवाब्मुँ, धै क्हेमैंइ चमैंलाइ ल्हाब्मुँ।
EXO 23:32 चमैं नेरो चमैंए देवतामैंने क्ह्रिबै बाछा क्हेमैंइ आफैद्।
EXO 23:33 च म्हिमैंलाइ क्हेमैंए ह्‍युलर टिल् आपिंन्। टिल् पिंइ बिस्याँ क्हेमैंलाइ ङए बिरोधर पाप लबर ल्हैदिब्मुँ, तलेबिस्याँ क्हेमैंइ चमैंए देवतामैंए पूजा लइ बिस्याँ क्हेमैं जालर फेब्मुँ।”
EXO 24:1 याहवेहजी धबै मोशाने बिइ, “क्हि हारून, नादाब, अबिहू नेरो इस्राएलर्बै चिब्मैं न्होंर्बै ङिच्यु चिब्मैं कों क्रेसि ङ ङाँर खो, धै ह्रेंगोउँइँलेन् क्र कुरसि ङलाइ फ्योद्।
EXO 24:2 दिलेया मोशा मत्‍त्रे ङ ङाँर खल् त्हुम्, अरू चिब्मैं ङ ङाँर आखो, धै अरू म्हिमैंइ कोंर प्हले या आम्हैरिगे।”
EXO 24:3 मोशा ह्‍यासि याहवेहजी बिबै ताँमैं नेरो लल् त्हुबै ठिममैं म्हिमैंने बिमिंमा चमैं ताँनइ सुँ घ्रिले, “याहवेहजी बिबै ताँन् ताँमैं ङि लब्मुँ,” बिइ।
EXO 24:4 झाइले मोशाइ याहवेहए ताँन् ताँमैं प्ह्रिइ। धै प्हँन्हाँग्धों न्हाँकर्न रेसि मोशाइ कोंए जरर ख्रो पिंबै क्ल्ह्‍यो घ्रि बनेसि चर इस्राएलए कुल घ्रि-घ्रि ल्हागिर घ्रि-घ्रि लसि च्युसे ङ्हिं युँमा क्योइ।
EXO 24:5 च लिउँइँ मोशाइ इस्राएलर्बै फ्रेसिमैं कुलइ, धै चमैंइ याहवेहए मिंर मिइ ख्रोंबै ख्रोमैं नेरो क्ह्रिमिंबै ल्हागिर क्ल्या साँढेमैं ख्रो पिंइ।
EXO 24:6 च खेदोमैंए ङ्हिबाँर्बै तिबाँ को मोशाइ भाँडोर झोंइ, धै तिबाँ को ख्रो पिंबै क्ल्ह्‍योर प्रामिंइ।
EXO 24:7 च लिउँइँ मोशाइ याहवेहजी ल्हैदिबै ताँ प्ह्रिबै कितब किंसि म्हिमैंए उँइँर थेबै कैले खेमिंमा “याहवेहजी ल्हैदिबै ताँन् ताँमैं ङिं लब्मुँ,” बिसि चमैंइ बिइ।
EXO 24:8 च लिउँइँ मोशाइ भाँडोर्बै को किंसि म्हिमैं फिर प्रासि बिइ, “थेद्, चु याहवेहजी बाछा फैबै को ग। खीजी चु बाछा खीजी ताँन् ताँमैं बिब् धोंले क्हेमैंने फैइमुँ।”
EXO 24:9 च लिउँइँ मोशा, हारून, नादाब, अबिहू नेरो इस्राएलर्बै चिब्मैं न्होंर्बै ङिच्यु चिब्मैं कोंर क्रेसि
EXO 24:10 इस्राएलए परमेश्‍वरलाइ म्रोंइ। खीए प्हले न्होंर निरइ स्युबै मु धोंबै छ्याँबै युँमा प्लना मुँल।
EXO 24:11 दिलेया परमेश्‍वरजी इस्राएलर्बै चिब्मैंए न्होह्रों आल। चमैंइ परमेश्‍वरलाइ म्रोंइ धै बालुन् चब् थुँब् लइ।
EXO 24:12 याहवेहजी मोशाने बिइ, “कोंर ङ ङाँर खसि टिद्। क्हिइ म्हिमैंलाइ लोमिंरिगे बिसि ङइ ठिम नेरो लल् त्हुबै ताँमैं युँमाए प्लनार प्ह्रिइमुँ। च युँमा क्हिलाइ पिंब्मुँ।”
EXO 24:13 छबिमा मोशा नेरो चलाइ ल्होबै यहूशू रेसि परमेश्‍वरए पबित्र कोंर ह्‍याइ।
EXO 24:14 मोशाइ च चिब्मैंने बिइ, “ङि एसि आयुन् समा ङिलाइ चुर्न प्रेंरिद्। हारून नेरो हुर क्हेमैंनेन् तब्मुँ। खाबलैया तोइ ताँ आक्ह्रिस्याँ चमैं ङाँर ह्‍याद्।”
EXO 24:15 छ बिसि मोशा सिनै कोंर ह्‍यामा न्हाँम्स्योइ कों हुवाइ।
EXO 24:16 याहवेहए चारबै ह्‍वे सिनै कोंर चारइ। ट्हुगैं समा न्हाँम्स्योइ कों हुवाइ, धै ङिगैंर याहवेहजी न्हाँम्स्यो न्होंउँइँले मोशालाइ हुइ।
EXO 24:17 इस्राएलीमैंइ कोंए च्होर ङ्‍ह्‍योमा याहवेहए ह्‍वे लुँरिबै मि धों तब् म्रोंल।
EXO 24:18 मोशा न्हाँम्स्यो न्होंउँइँले कोंर ह्‍याइ, धै प्लिच्यु त्हिंइ प्लिच्यु म्हुँइँस चर टिइ।
EXO 25:1 याहवेहजी मोशाने बिइ,
EXO 25:2 “चमैंइ ङए ल्हागिर भेटि पल् त्हुम् बिसि इस्राएलीमैंने बिद्, चमैं ताँनइ सैं तोंदै पिंबै भेटि क्हिइ ङए ल्हागिर किंन्।
EXO 25:3 चमैंइ पिंबै भेटिमैं चुन् तम्: मारा, चाँदि, काँसा,
EXO 25:4 नीलो, कलेजी, ओल्ग्या रु, मलमलए क्वें, रए मुइ बनेब क्वें,
EXO 25:5 ओल्ग्या रङ झोंबै क्यु साँडए ट्हुबि, ङ्याँ-ङ्याँ ह्‍याबै ट्हुबि, बबुलए सिं,
EXO 25:6 बत्तिए म्रोबै ल्हागिर जैतुनए छ्युगु, अभिषेक लबै छ्युगु नेरो लिंबै थाँ खबै धुपए ल्हागिर मसलामैं,
EXO 25:7 एपोद नेरो खेगिए तिंर खिबै क्वेंए ल्हागिर आनिक्स नेरो अरू मँगो तुथुमैं।
EXO 25:8 “ङ चमैंए म्हाँजोर टिबर चमैंइ ङए ल्हागिर पबित्र तम्बु घ्रि टौंदिल् त्हुम्।
EXO 25:9 ङइ क्हिने उँइँबै नमुना धोंले क्हिइ पबित्र तम्बु नेरो चर चैदिबै ताँन् सैमैं बनेद्।
EXO 25:10 “चमैंइ बबुल सिंए मुदुस घ्रि बनेरिगे। च ङ्हिउरु ह्रिंब, तिउरुसे आधा प्ल्हाब, तिउरुसे आधा नुब तल् त्हुम्।
EXO 25:11 क्हिइ च मुदुसए न्हों, फि छ्याँबै माराइ म्होरद्। चए कारग्युले माराए ङाँ सैद्।
EXO 25:12 च नोबै ल्हागिर माराए न्हमैं प्लि बनेसि मुदुसए प्हले प्लि प्ह्‍याद्। न्ह ङ्हिं तिराइ न्ह ङ्हिं तिराइ प्ह्‍यामिंन्।
EXO 25:13 छलेन क्हिइ बबुल सिंए प्हरे बनेसि माराइ म्होरद्।
EXO 25:14 मुदुस नोबै ल्हागिर च प्हरेमैं मुदुसए हार ङ्हिंर मुँबै न्हमैंर क्ह्‍युद्।
EXO 25:15 च प्हरेमैं मुदुसए न्हमैंर क्ह्‍युथेंल् त्हुम्। च प्हरेमैं न्हउँइँले आट्हुइद्।
EXO 25:16 ङए ठिममैं प्ह्रिबै युँमाए प्लना ङ क्हिलाइ पिंब्मुँ, च मुदुसर च युँमाए प्लना थेंन्।
EXO 25:17 “छलेन छ्याँबै माराए मुदुसए क्हा घ्रि बनेद्। च ङ्हिउरुसे आधा ह्रिंब, तिउरुसे आधा प्ल्हाब तल् त्हुम्।
EXO 25:18 माराए प्ह्‍या ङ्हिं मुँबै करूबमैं बनेसि मुदुसए छेउ छेउर थेंन्।
EXO 25:19 करूब घ्रि तिरैबै च्होर करूब घ्रि तिरैबै च्होर थेंन्। माराए टुक्र घ्रिउँइँले च क्हा नेरो करूब ङ्हिं बनेद्।
EXO 25:20 च करूबमैंइ प्ह्‍यामैं क्होवाइ फैसि मुदुसए क्हालाइ प्ह्‍यामैंइ हुल् त्हुम्। चमैंए सुँ मुदुसउँइँ ह्‍वेंल् त्हुम्।
EXO 25:21 च क्हा मुदुसए फिर थेंन्। ङए ठिममैं प्ह्रिबै युँमाए प्लना क्हिलाइ पिंब्मुँ, च युँमाए प्लना च मुदुसर थेंन्,
EXO 25:22 चर्न ङ क्हिने त्होब्मुँ। ठिम थेंबै मुदुसए क्हा फिर्बै करूबमैंए म्हाँजोउँइँले इस्राएलथेंमैंए ल्हागिर ङए ताँन् ठिममैं क्हिलाइ पिंब्मुँ।
EXO 25:23 “क्हिइ बबुल सिंए टेबल घ्रि बनेद्। च ङ्हिउरु ह्रिंब, तिउरु प्ल्हाब, तिउरुसे आधा नुब तल् त्हुम्।
EXO 25:24 च टेबल छ्याँबै माराइ म्होरसि चए कार्ग्यलै माराइ ङाँ सैद्।
EXO 25:25 चए कारग्युले योरिं प्लि प्ल्हाब गेर बनेसि चए कारग्युले माराइ ङाँ सैद्।
EXO 25:26 टेबल नोबै ल्हागिर माराए न्ह प्लि बनेद्, धै च न्हमैं टेबलए प्हले प्लिर प्ह्‍यामिंन्।
EXO 25:27 टेबल नोबै ल्हागिर प्हेरमैं क्ह्‍युबै क्ल्ह्‍यो तल्‍ले च न्हमैं घेराए रेर प्ह्‍याद्।
EXO 25:28 टेबल नोबै प्हरे बबुल सिंल बनेसि च प्हरेलाइ माराइ म्होरद्।
EXO 25:29 क्हिइ टेबलर थेंबै ल्हागिर छ्याँबै माराए थलिमैं, धुपार, करुवा नेरो प्हेलामैं बनेद्।
EXO 25:30 ङए मिंर पिंबै क्हेंमैं टेबलर थेंसि खोंयोंन् बिलै ङए ओंसों थेंमिंन्।
EXO 25:31 “क्हिइ छ्याँबै माराए पानस बनेद्। चए क्हाबै क्ल्ह्‍यो, प्हेला धों ब्योंबै ट, टए त्होर नेरो टमैं माराए टुक्राउँइँलेन् बनेद्।
EXO 25:32 चए हाँग ट्हु बैरु हार त्होंल् त्हुम्, हाँग सों पानसए तिरै छलेन तिरै हाँग सों तल् त्हुम्।
EXO 25:33 ताँन् हाँगर हाडे बदामए ट धोंबै त्होर नेरो प्होमैं मुँबै सों-सौंलो ट बनेसि हाँगमैं पैरेद्।
EXO 25:34 छलेन पानस बत्तिर हाडे बदामए ट धोंब प्लिउलो, टए त्होर नेरो ट या तल् त्हुम्।
EXO 25:35 सोंजोर हाँगमैंए ताँन् जोर न्होंर घ्रि-घ्रि टए त्होर बनेद्।
EXO 25:36 पानस बत्ति, टए त्होर नेरो हाँगमैं छ्याँबै माराए टुक्र घ्रिउँइँलेन् बनेद्।
EXO 25:37 पानसए ओंसों मि म्रोंरिगे बिसि ङिउलो पलर छ्युगु झोंसि म्रोंसि पानसए ओंसों थेंन्।
EXO 25:38 चए सलेदाए थनर नेरो मोसो झोंबै भाँडो छ्याँबै माराला बनेद्।
EXO 25:39 पानस नेरो च ताँन् सजेबै सैमैं सोंच्युसे ङ्‍ह किलो छ्याँबै माराला बनेद्।
EXO 25:40 ङइ क्हिने कोंर उँइँबै नमुना धोंले क्हिइ मैंसि च्हैंसि बनेद्।
EXO 26:1 “क्हिइ पर्दा च्युउलो झोंबै पबित्र तम्बु बनद्। च पर्दामैं छेनाले रोबै सुति क्वेंला तल् त्हुम्। च क्वेंमैं मु रङ (नीलो), कलेजी नेरो ओल्ग्या रङर्बै रुइ रोब तल् त्हुम्। माराए के लल् ह्रब्मैंइ बनेबै करूबमैं चर थेंन्।
EXO 26:2 ताँन् पर्दामैं नाप घ्रिर्बै तल् त्हुम्, ताँन् पर्दामैं ङ्हिस्युसे प्रेउरु ह्रिंब, प्लिउरु प्ल्हाब तल् त्हुम्।
EXO 26:3 ङ्‍हउलो पर्दा अर्को पर्दामैंने जोड्दिद्, छलेन अर्को पर्दा ङ्‍ह या अर्को पर्दा घ्रि‍ घ्रिने जोड्दिद्।
EXO 26:4 ओंसों जोड्दिबै भागए दे क्याइ दनेबै ङाँर मु रङर्बै सुर्कानि झोंन्। छलेन लिउँइँ जोड्दिबै भागए दे क्याइ दनेबै ङाँरै या छलेन् सुर्कानि झोंन्।
EXO 26:5 पर्दा घ्रिर ङ्‍हच्यु सुर्कानि झोंन्, छलेन लिउँइँ जोड्दिबै भागए अर्को पर्दार ङ्‍हच्यु सुर्कानि झोंन्। च सुर्कानिमैं तिरैना ह्‍वेंल् त्हुम्।
EXO 26:6 झाइले माराए अङ्‌कुसि ङ्‍हच्यु बनेसि पर्दामैं जोड्दिद्, छलमा पबित्र तम्बु घ्रिन् तब्मुँ।
EXO 26:7 “पबित्र तम्बु हुबै ल्हागिर रए मुइइ रोबै क्वेंए पर्दा च्युसे घ्रि टुद्।
EXO 26:8 ताँन् पर्दामैं च्युसे सों मिटर ह्रिंब नेरो मिटर ङ्हि प्ल्हाब तल् त्हुम्। च्युसे घ्रि पर्दामैं नाप घ्रिर्बैन् तल् त्हुम्।
EXO 26:9 ङ्‍हउलो क्वें गैंदिसि पर्दा घ्रि बनेदु। छलेन टुउलो क्वें गैंदिसि पर्दा घ्रि बनेद्। टुउलो क्वें गैंदिसि बनेबै पर्दा बिस्याँ तम्बुए ओंसों च्योद्।
EXO 26:10 ओंसों गैंदिबै भागए क्याइ दनेबै पर्दाए ङाँर ङ्‍हउलो सुर्कानि झोंन्, छलेन अर्को गैंदिबै भागए क्याइ दनेबै पर्दाए ङाँरै या ङ्‍हउलो सुर्कानि झोंन्।
EXO 26:11 पर्दा ङ्हिं गैंदिसि घ्रिन् लबै ल्हागिर क्हिइ काँसाए ङ्‍हच्यु अङ्‍कुसि बनेसि पर्दाए सुर्कानिर झोंन्।
EXO 26:12 ङैब आधा पर्दा पबित्र तम्बुए लिउँइँ च्योद्।
EXO 26:13 तम्बु हुसि ह्रिंग्यो तबै पर्दा तिउरु छुइ हार धै तिउरु छाइबै हार पबित्र तम्बु हुबै ल्हागिर पर्दाए ङो ङ्हिंर च्योइ थेंन्।
EXO 26:14 “तम्बु हुबै ल्हागिर ओल्ग्या रङ फोबै क्यु साँडए ट्हुबिए पर्दा बनद्, छलेन सिल ताँगाए ट्हुबिए अर्को पर्दा बनेद्।
EXO 26:15 “पबित्र तम्बुए ल्हागिर बबुल सिंए फालेमैं बनेद्।
EXO 26:16 च फालेमैं ताँन् च्युउरु ह्रिंब, छलेन तिउरुसे आधा प्ल्हाब तल् त्हुम्।
EXO 26:17 च फालेमैं जोड्दिबै ल्हागिर च फालेमैंर ङ्हिं-ङ्हिं चोसोमैं थेंल् त्हुम्। क्हिइ पबित्र तम्बुए ल्हागिर ताँन् फालेमैं छलेन् बनेद्।
EXO 26:18 पबित्र तम्बुए छ्यो ल्हुए (दक्षिण) भागए ल्हागिर ङ्हिस्यु फालेमैं बनेद्।
EXO 26:19 च ङ्हिस्यु फालेए न्होंर चाँदिए प्लिच्यु क्योबै क्ल्ह्‍यो बनेद्। क्योबै क्ल्ह्‍यो ङ्हिं फाले घ्रिर न्होंर थेंन्, धै ताँन् चोसाए न्होंर क्योबै क्ल्ह्‍यो घ्रि थेंन्।
EXO 26:20 पबित्र तम्बुए उत्तर हारए ल्हागिर ङ्हिस्यु फालेमैं बनेद्।
EXO 26:21 झाइले च फालेमैंए न्होंर क्योबै क्ल्ह्‍यो ङ्हिं योल्‍ले चाँदिए प्लिच्यु क्योबै क्ल्ह्‍योमैं बनेद्।
EXO 26:22 पबित्र तम्बुए छ्यो न्हुए भागए (पश्‍चिम दिशा) ल्हागिर टुउलो फाले बनेद्।
EXO 26:23 कुना-कुनार झोंबै ल्हागिर क्हिइ फाले ङ्हिं बनेद्।
EXO 26:24 च फालेमैं ताइले माइ समा ङ्हिथु खप्टिदिद्, च फालेमैं न्ह घ्रिर्न जोड्दिद्। च फालेमैं ङ्हिं या छलेन् जोड्दिद्।
EXO 26:25 ‍तम्बुर फ्रेउलो फालेमैं तल् त्हुम्, च फालेए ल्हागिर चाँदिए च्युसे टुउलो क्योबै क्ल्ह्‍यो तल् त्हुम्। फाले घ्रिए न्होंर ङ्हिं-ङ्हि क्योबै क्ल्ह्‍यो तल् त्हुम्।
EXO 26:26 “क्हिइ बबुल सिंए बारमैं बनेद्। च्युसे ङ्‍ह पेडो तबै बारमैं बनेद। पबित्र तम्बुए तिरैबै फालेमैंए ल्हागिर ङ्‍हउलो बार बनेद्।
EXO 26:27 छलेन अर्को फालेमैंए ल्हागिर ङ्‍हउलो बार बनेद्। धै छ्यो न्हुए भागर्बै फालेमैंए ल्हागिर ङ्‍हउलो बार बनेद्।
EXO 26:28 फालेमैंए म्हाँजोर मुँबै बार छेउ घ्रिउँइँले अर्को छेउ समा फनेल् त्हुम्।
EXO 26:29 फालेमैं माराइ म्होरद्। बारमैं क्हाबै ल्हागिर माराए न्हमैं बनेद्। बारमैं या माराइ म्होरल् त्हुब्मुँ।
EXO 26:30 “क्हिलाइ कोंर नमुना उँइँब् धोंले पबित्र तम्बु बनेद्।
EXO 26:31 “झाइले पबित्र तम्बुए न्होंर सजेबै ल्हागिर, मु रङ, कलेजी रङ, ओल्ग्या रुइ छेनाले ख्रिंबै सुति क्वेंए पर्दा बनेद्। धै सिपालु म्हिइ बनेबै करूबमैं चर थेंल् त्हुम्।
EXO 26:32 माराइ म्होरबै बबुल सिंए प्लिउलो त्होर माराए अङ्‍कुसिइ च पर्दा च्योद्।
EXO 26:33 क्हिइ च पर्दामैं अङ्‍कुसिइ च्योद् धै चए लिउँइँ ठिम थेंबै मुदुस थेंन्। च पर्दाइ क्हेमैंए ल्हागिर पबित्र क्ल्ह्‍योलाइ ताँन् भन्दा पबित्र क्ल्ह्‍योउँइँले स्यो लब्मुँ।
EXO 26:34 ताँन् भन्दा पबित्र क्ल्ह्‍योर्बै ठिम थेंबै मुदुसए फिर क्हा थेंन्।
EXO 26:35 पर्दाए बैरु हार पबित्र क्ल्ह्‍योए उत्तर हार टेबल थेंन्, छलेन पबित्र क्ल्ह्‍योए छ्यो न्हुउँइँ टेबलए ओंसों पानस थेंन्।
EXO 26:36 “तम्बुए म्राए ल्हागिर मु रङ, कलेजी रङ, ओल्ग्या रु नेरो छेनाले रोबै सुति क्वेंए बुट्‍टा फ्रिंबै पर्दा बनेद।
EXO 26:37 च पर्दाए ल्हागिर बबुल सिंए त्हो ङ्‍ह बनेद्, धै च त्होलाइ माराइ म्होरद्। अङ्‍कुसिमैं माराल तल् त्हुम्। चए ल्हागिर काँसाए ङ्‍हउलो क्हा बनेद्।
EXO 27:1 “क्हिइ बबुल सिंए ङ्‍हउरु ह्रिंब, ङ्‍हउरु प्ल्हाब, सोंउरु नुब चार पाटे मिइ ख्रोंसि ख्रो पिंबै क्ल्ह्‍यो बनेद्।
EXO 27:2 चए कुना प्लिर रु घ्रि-घ्रि बनेद्। ख्रो पिंबै क्ल्ह्‍यो नेरो रु सिं घ्रिउँइँलेन् बनेल् त्हुम्। च ख्रो पिंबै क्ल्ह्‍योलाइ काँसाइ म्होरद्।
EXO 27:3 छि ङ्हाँबै मेब्रो तोबै भाँडोमैं नेरो बेल्चामैं, प्हेला, अङ्‍कुसि तबै काँटा नेरो मिर ह्‍योबै भाडोमैं ताँन् काँसाल बनेद्।
EXO 27:4 काँसाए जालि घ्रि बेनेसि चए कुना प्लिर काँसाए न्ह प्लि प्ह्‍याद्।
EXO 27:5 जालि ख्रो पिंबै क्ल्ह्‍योए न्होंर ङाँए च्हो-च्होर थेंन्, छले थेंमा जालि ख्रो पिंबै क्ल्ह्‍योए म्हाँजोर समा फेनेल् त्हुम्।
EXO 27:6 ख्रो पिंबै क्ल्ह्‍यो नोबै प्हरेमैं बबुल सिंल बनेसि काँसाइ म्होरद्।
EXO 27:7 ख्रो पिंबै क्ल्ह्‍यो नोमा च प्हरेमैं ख्रो पिंबै क्ल्ह्‍योए न्ह ङ्हिंर क्ह्‍युद्।
EXO 27:8 ङइ क्हिलाइ कोंर उँइँब् धोंले च ख्रो पिंबै क्ल्ह्‍यो खोत्ते फालेल बनेद्।”
EXO 27:9 “क्हिइ ङ टिबै पबित्र तम्बुए कारग्युले ह्‍यु बनेसि बार थोदु, चए छ्यो ल्हुए (दक्षिण) भाग प्र क्रुल तल् त्हुम्, चलाइ थोबै ल्हागिर छेनाले ख्रिंबै सुति क्वेंए पर्दा बनेद्।
EXO 27:10 पर्दा च्योबै ल्हागिर काँसाए त्हो ङ्हिस्यु, धै त्हो क्योबै क्ल्ह्‍यो या ङ्हिस्युन् काँसाल् तल् त्हुम्। झाइले चर च्योबै छोमैं नेरो अङ्‍कुसि बिस्याँ चाँदिल् तल् त्हुम्।
EXO 27:11 छलेन उत्तरउँइँबै भागए ल्हागिरै या प्र क्रु ह्रिंबै पर्दा तल् त्हुम्। चए त्होमैं ङ्हिस्यु, त्हो क्योबै क्ल्ह्‍यो या ङ्हिस्युन् काँसाल तल् त्हुम्। दिलेया त्होमैंए अङ्‍कुसि नेरो छोमैं बिस्याँ चाँदिल तल् त्हुम्।
EXO 27:12 ङाँए छ्यो न्हुउँइँबै पर्दामैं ङ्‍हच्यु क्रु तल् त्हुम्। चए त्होमैं च्युउलो क्योबै क्ल्ह्‍यो या च्युउलो तल् त्हुम्।
EXO 27:13 स्यारउँइँबै (पूर्ब पट्टि) भागए ल्हागिर ङ्‍हच्यु क्रुर्बै पर्दा तल् त्हुम्।
EXO 27:14 मुल म्राए तिरैबै भागए ल्हागिर च्युसे ङ्‍ह क्रु पर्दा तल् त्हुम्। चए त्होमैं सोंउलो, क्योबै क्ल्ह्‍यो या सोंउलोन् तल् त्हुम्।
EXO 27:15 अर्को हारए ल्हागिरै या च्युसे ङ्‍ह क्रु पर्दामैं तल् त्हुम्। चए त्हो सोंउलो क्योबै क्ल्ह्‍यो या सोंउलोन् तल् त्हुम्।
EXO 27:16 “म्राए ल्हागिर मु रङ, कलेजी रङ नेरो ओल्ग्या रुइ रोबै क्वें नेरो छेनाले ख्रिंबै सुति क्वेंए बुट्टा झोंबै ङ्हिस्यु क्रुए पर्दा तल् त्हुम्। चए त्होमैं प्लिउलो, क्योबै क्ल्ह्‍यो या प्लिउलो तल् त्हुम्।
EXO 27:17 घेराए प्लि हारर्बै त्होमैंए छो नेरो अङ्‍कुसिमैं चाँदिल तल् त्हुम्। चए क्योबै क्ल्ह्‍योमैं काँसाल तल् त्हुम्।
EXO 27:18 घेरा प्र क्रु ह्रिंब नेरो ङ्‍हच्यु क्रु प्ल्हाब तल् त्हुम्। चए पर्दामैं छेनाले ख्रिंबै सुति क्वेंए ङ्‍हउरु ह्रिंब तल् त्हुम्। चए क्योबै क्ल्ह्‍योमैं काँसाल तल् त्हुम्।
EXO 27:19 पबित्र तम्बुर चैदिबै तोन्दोंरि सैमैं नेरो काँटिमैं काँसाल तल् त्हुम्।
EXO 27:20 “बत्ति म्रोबै ल्हागिर म्हाबै जैतुनए छ्याँबै छ्युगु पइ खो बिसि इस्रलिमैंने बिद्। धै बत्तिमैं खोंयोंन् बिलै लुँरिगे।
EXO 27:21 पबित्र तम्बुर ठिम थेंबै मुदुसए उँइँर्बै पर्दाए बैरु हारून नेरो चए च्हमैंइ याहवेहए उँइँर च बत्तिमैं ङेसउँइँले न्हाँग समा लुँरिल् लल् त्हुम्। इस्राएलीमैंए पुस्ता-पुस्ता समा खोंयोंन् बिलै चु के लल् त्हुब्मुँ।
EXO 28:1 “ङए ल्हागिर खेगि (पुजारि) के लरिगे बिसि इस्राएलीमैंए म्हाँजोउँइँले क्हिए आघें हारून नेरो चए च्हमैं नादाब, अबिहू, एलाजार नेरो इताममार क्हि ङाँर हुइद्।
EXO 28:2 क्हिए आघें हारूनए ल्हागिर बेल्‍ले छ्याँब नेरो इजेत तबै खेगिइ खिबै क्वें टुमिंन्।
EXO 28:3 ‘हारूनइ खेगि के लबै ल्हागिर खेगिइ खिबै क्वें टुमिंन्,’ बिसि ङइ क्वें टुबर लोमिंब्मैंने बिद्। च क्वें खिसि चइ ङए सेवा लरिगे।
EXO 28:4 क्हिए आघें हारून नेरो चए च्हमैं खेगि तसि ङए सेवा लबै ल्हागिर च क्वें टुब्मैंइ चमैंए ल्हागिर चु पबित्र क्वें टुमिंरिगे: तिंर खिबै क्वें, एपोद, लबेदा, अलखा, क्रेगि नेरो फगि।
EXO 28:5 चुमैंइ चु क्वें टुमा मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल टुरिगे।
EXO 28:6 “च क्वें टुब्मैंइ एपोद टुमा मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल छेनाले टुरिगे।
EXO 28:7 च क्वेंमैं जोड्दिबै ल्हागिर काँदए छेउ ङ्हिंर फैसों ङ्हिं तल् त्हुम्।
EXO 28:8 फिर खिबै फगि एपोद टुबै क्वेंउँइँलेन् मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल टुल् त्हुम्।
EXO 28:9 “इस्राएलए च्हमैंए मिं आनिक्स बिबै युँमा ङ्हिंर प्ह्रिद्।
EXO 28:10 च्ह थेबइले सुरु लसि च्ह टुए मिं आनिक्स बिबै युँमा घ्रिर खोप्दिसि प्ह्रिद्, अरू च्ह टुए मिं अर्को आनिक्स बिबै युँमार खोप्दिसि प्ह्रिद्।
EXO 28:11 युँमार खोप्दिल् ह्रब्मैंइ खैले खोप्दिमुँ, छलेन् युँमा ङ्हिंर इस्राएलए च्हमैंए मिं खोप्दिद्। झाइले च युँमा माराए के लबै म्हिने जोड्दिबर ल्हैदिद्।
EXO 28:12 इस्राएलए च्हमैं मैंबै ल्हागिर च युँमा ङ्हिं एपोदए प्हैंदर च्योमिंन्। झाइले याहवेहजी खोंयोंन् बिलै मैंरिगे बिसि चमैंए मिं हारूनइ ह्रोंसए प्हैंदर नोरिगे।
EXO 28:13 झाइले क्हिइ मारा तोबै धिं ङ्हिं बनेद्।
EXO 28:14 छो धोंले ख्रिंबै छ्याँबै माराए सिक्रि ङ्हिं बनेद्, धै च ख्रिंबै सिक्रि मारा तोबै धिंर जोड्दिद्।
EXO 28:15 “निसाफ लबै म्हिए ल्हागिर छेनाले टुल् ह्रबै म्हिए लहागिर तिंर खिबै क्वें बनेद्। एपोद बनेब् धोंलेन् मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल टुल् त्हुम्।
EXO 28:16 च क्वें चार पाटे नेरो ङ्हिबाताले टुल् त्हुम्। च बित्ता घ्रि ह्रिंब, बित्ता घ्रिन् प्ल्हाब तल् त्हुम्।
EXO 28:17 चर मणिजगोए प्लिउलो ल्हस्यार लसि मणिमैं जोड्दिद्। ओंसोबै ल्हस्यारर मानिक, पुष्‍पराज नेरो बेरुज झोंन्
EXO 28:18 ल्हस्यार ङ्हिंर फिरोजा, निर नेरो पन्‍ना झोंन्,
EXO 28:19 ल्हस्यार सोंर नीलमणि, हाकिक नेरो कटेलाल झोंन्,
EXO 28:20 ल्हस्यार प्लिर पितमणि, आनिक्स नेरो बिल्‍लौर झोंन्। चु ताँन् मारा तोबै धिंजरे बोसि जोड्दिद्।
EXO 28:21 इस्राएलए कुल ङो सेबै ल्हागिर च च्युसे ङ्हिं मणिर याकूबए च्युसे ङ्हिं च्हमैंए मिं घ्रि-घ्रिले खोप्दिद्।
EXO 28:22 “तिंर खिबै क्वेंए ल्हागिर छो धोंले ख्रिंबै छ्याँबै माराए सिक्रिमैं बनेद्।
EXO 28:23 माराए रिंङ ङ्हिं बनेसि तिंर खिबै क्वेंए कुना ङ्हिंर च्योमिंन्।
EXO 28:24 च माराए सिक्रि ङ्हिं तिंर खिबै क्वेंए छेउ-छेउर मुँबै रिंङ ङ्हिंर जोड्दिद्।
EXO 28:25 च सिक्रि ङ्हिंए च्हो ङ्हिं बिस्याँ मारा तोबै धिंर जोड्दिसि एपोदए काँदर्बै फैसोंए ओंसों खिद्।
EXO 28:26 धबै माराए न्ह ङ्हिं बनेसि तिंर खिबै क्वेंए न्होंर्बै कुना ङ्हिंर एपोदए ङाँर जोड्दिद्।
EXO 28:27 धबै माराए न्ह ङ्हिं बनेसि एपोदए उँइँ हार काँद ङ्हिंर्बै फैसोंए न्होंउँइँले नेरो एपोदए फिर खिबै फगिए फिर्बै सिउनिर जोड्दिद्।
EXO 28:28 तिंर खिबै क्वें एपोदउँइँले आसर्दिरिगे बिसि तिंर खिबै क्वें रिंङउँइँले एपोदए रिंङजगोर मु रङर्बै फित्ताइ फगिर फैद्।
EXO 28:29 “हारून पबित्र क्ल्ह्‍योर होंमा चइ इस्राएलए कुलए मिं खोप्दिबै तिंर खिबै क्वें खिब्मुँ धै ङ याहवेहजी ङए म्हिमैं मैंरिब्मुँ।
EXO 28:30 तिंर खिबै क्वेंर ऊरीम नेरो तुम्मिम थेंन्। हारून ङए ओंसों खब्रें लमा चए तिंर खिबै क्वें तल् त्हुम्। छले हारूनइ इस्राएलीमैंए ल्हागिर ङए इच्छा तो मुँ च छेनाले था सेल् खाँब्मुँ।
EXO 28:31 “एपोद फिर खिबै क्वें ताँन् मु रङल बनेद्।
EXO 28:32 चर क्र क्ह्‍युबै क्ल्ह्‍यो बनेद्, धै क्र क्ह्‍युबै क्ल्ह्‍यो आट्होरिगे बिसि कारग्युर्ले रोसि घेराए ङाँ सैद्।
EXO 28:33 चए प्ह्रिर्बै ङाँर मु रङ, कलेजी रङ, नेरो ओल्ग्या रुइ अनार बनेसि म्हाँ-म्हाँजोर माराए स्यों च्योमिन्।
EXO 28:34 चए प्ह्रिर्बै ङाँर माराए स्यों नेरो अनार कारग्युले च्योद्।
EXO 28:35 हारूनइ खेगि के लमा च क्वें खिरिगे। च पबित्र क्ल्ह्‍योर ङए ओंसों खमा बैरु त्होंमा स्योंए कै थेब्मुँ धै च सिरिब् आरे।
EXO 28:36 “क्हिइ पबित्र माराए प्लना बनेसि च्यार छाप झोंब् धोंले ‘याहवेहए ल्हागिर पबित्र’ बिसि चर खोप्दिद्।
EXO 28:37 धै चलाइ मु रङए छोइ उँइँ तल्‍ले फैसि
EXO 28:38 हारूनए ङ्‍होर खिद्, धै याहवेहए मिंर इस्राएलीमैंइ भेटिमैं पिंमा गल्ति तलेया च दोष हारूनइ नोरयगे बिसि खोंयोंन् बिलै हारूनए ङ्‍होर च ङ्‍होर खिबै सै तल् त्हुम्। छलस्याँ इस्राएलीमैंइ पिंबै भेटिमैं याहवेहजी किंब्मुँ।
EXO 28:39 “प्हले समा फेनेबै ह्रिंग्यो क्वें नेरो क्रेगि छेनाले ख्रिंबै सुति क्वेंल बनेदु। बुट्टा झोंबै रुइन फगि या बनेद्।
EXO 28:40 “क्हिइ हारूनए च्हमैंए ल्हागिर बेल्‍ले मान तबै छ्याँबै लबेदा, फगि, नेरो क्रेगिमैं टुद्।
EXO 28:41 चु क्वेंमैं क्हिए आघें नेरो चए च्हमैं खिमिंसि खेगि के लबर चमैंलाइ त्हाँसि छ्युगु फोद्।
EXO 28:42 “चमैंए ज्यु हुबै ल्हागिर प्हले लिगु समा फेनेल्‍ले सुति क्वेंए न्होंर खिबै क्वें टुद्।
EXO 28:43 चमैंने छ्याब् आतरिगे धै आसिरिगे बिसि हारून नेरो चए च्हमैं पबित्र क्ल्ह्‍योर सेवा लबर ङ ङाँर खमा च क्वें खिरिगे।
EXO 29:1 “ङए सेवा लबर हारून नेरो चए च्हमैंलाइ पबित्र लबर क्हिइ चमैंए ल्हागिर लल् त्हुबै के चुन् ग: तोइ खोट आरेबै क्ल्या भारा नेरो क्यु साँड् ङ्हिं पइ खो।
EXO 29:2 झाइले गहुँए प्रोए क्हें, छ्युगुर चेंबै फुरौला नेरो छ्युगु फोबै बाबर क्हें प्लेढा आझोंल्‍ले बनेद्।
EXO 29:3 ट्हलोर झोंसि क्हेंए ट्हलो क्ल्या भारा नेरो क्यु साँड्मैं पइ खो।
EXO 29:4 “च लिउँइँ हारून नेरो चए च्हमैं ङ टिबै पबित्र तम्बुए म्रा ङाँर पखसि चमैंलाइ ख्रुमिंन्।
EXO 29:5 झाइले हारूनलाइ लबेदा, एपोद न्होंर खिबै क्वें, एपोद, नेरो तिंर खिबै क्वें खिसि चए फिर फगि खिमिंन्।
EXO 29:6 चए क्रर क्रेगि तिमिंन् झाइले क्रेगिए फिर पबित्र मुकुट कुमिंन्।
EXO 29:7 च लिउँइँ अभिषेक लबै छ्युगु चए क्रर कुमिंसि चलाइ स्यो लद्।
EXO 29:8 “हारूनए च्हमैं पखसि लबेदा खिमिंन्।
EXO 29:9 हारूनए च्हमैंए क्रर क्रेगि तिंमिंन्। धै हारून नेरो चए च्हमैंलाइ फगि खिमिंन्। झाइले खोंयोंन् बिलै चमैं खेगि तल् योंब्मुँ। छले हारून नेरो चए च्हमैं खेगि के लबर त्हाँन्।
EXO 29:10 “च क्ल्या भारा ङ टिबै पबित्र तम्बुए ओंसों पइ खो, चमैंए क्रए फिर हारून नेरो चए च्हमैंइ यो थेंबर ल्हैदिद्।
EXO 29:11 च क्ल्या भारा ङ टिबै पबित्र तम्बुए म्रा ओंसों सैसि ख्रो पिंन्।
EXO 29:12 क्ल्या भाराए च्युगुदे को योरिंइ किंसि ख्रो पिंबै क्ल्ह्‍योए कुना प्लिर्बै रुर फोद्, धै ङैबै को ख्रो पिंबै क्ल्ह्‍योए न्होंर ङेवाद्।
EXO 29:13 झाइले न्हाँनु भुँडिमैं हुबै छि नेरो ओएटा, खइ नेरो चए फिर्बै छि किंसि ख्रो पिंबै क्ल्ह्‍योर ख्रोंन्।
EXO 29:14 दिलेया, क्ल्या भाराए से, ट्हुबि नेरो न्हाँनुमैं म्हिमैं टिबै ब्यारेकए बैरु बोसि ख्रोंन्। चु खेगिमैंए पाप ख्रुबै ख्रो ग।
EXO 29:15 “धबै क्यु साँड् घ्रि किंसि चए क्रर हारून नेरो चए च्हमैंने यो थेंबर ल्हैदिद्।
EXO 29:16 च क्यु साँड् ख्रो पिंसि चए को ख्रो पिंबै क्ल्ह्‍योए कारग्युले फ्रुँन्।
EXO 29:17 क्यु साँड्लाइ कुदु-कुदु लसि चए न्हाँनु नेरो प्हलेमैं ख्रुसि क्रने बालन् थेंमिंन्।
EXO 29:18 च सक्लोन् क्यु साँड् ख्रो पिंबै क्ल्ह्‍योर ख्रोंन्। चए छ्याँब थाँइ ङ सैं तोंन् लम्।
EXO 29:19 “क्हिइ अर्को क्यु साँड् किंन्, हारून नेरो चए च्हमैंइ च क्यु साँडए क्रर यो थेंबर ल्हैदिद्।
EXO 29:20 च क्यु ख्रो पिंसि चए च्युगुदे को किंसि हारून नेरो चए च्हमैंए क्योलो हारबै न्हमे नेरो चमैंए क्योलो योए यो आबा नेरो प्हले आबार फोद्। ङैब को ख्रो पिंबै क्ल्ह्‍योए कारग्युले फ्रुँमिंन्।
EXO 29:21 ख्रो पिंबै क्ल्ह्‍योर्बै को नेरो अभिषेक लबै छ्युगु च्युगुदे किंसि हारून नेरो चए क्वेंर फ्रुमिन्। छलेन हारूनए च्हमैं नेरो चमैंए क्वेंरै या फ्रुमिंन्। छलमा हारून, चए च्हमैं नेरो चमैंए क्वेंमैं या पबित्र तब्मुँ।
EXO 29:22 “चु क्यु साँडेए छि, छि मुँबै मे, न्हाँनु भुँडिमैं हुबै छि, ओएटा, छि मुँबै पाङरु ङ्हिं नेरो क्योलो प्हाँ क्ह्‍याँसि किंन्।
EXO 29:23 याहवेहए उँइँर मुँबै प्लेढा आझोंबै क्हें झोंबै ट्हलोउँइँले क्हें घ्रि नेरो छ्युगुर ख्रोंबै फुरौला घ्रि नेरो बाबर किंसि
EXO 29:24 चु ताँन् हारून नेरो चए च्हमैंए योर थेंन्। चु सैमैं याहवेहजी खोबै छ्याँबै ख्रो तबर पिंबर ल्हैदिद्।
EXO 29:25 झाइले याहवेहजी खोबै थाँ तरिगे बिसि ङइ खोबै भेटिमैं चमैंए योइ मिइ ख्रोंबै ख्रोने बालु ख्रो पिंबै क्ल्ह्‍योर ख्रोंवान्। चु याहवेहए ल्हागिर मिउँइँले चडेबै ख्रो ग।
EXO 29:26 “झाइले हारूनइ ख्रो पिंबै क्यु साँडए कु से किंसि याहवेहजी खोबै छ्याँबै ख्रो तबर पिंन्। च क्हिए भाग तब्मुँ।
EXO 29:27 “अर्पण लबै क्यु साँडउँइँले हारून नेरो चए च्हमैंए ल्हागिर क्युए कु से नेरो प्हाँ से पबित्र लद्।
EXO 29:28 इस्राएलीमैंइ हारून नेरो चए च्हमैंए ल्हागिर खोंयोंन् बिलै पिंल् त्हुबै भाग चुन् तल् त्हुम्। तलेबिस्याँ इस्राएलीमैंइ क्ह्रिमिंबै भेटिमैंउँइँले याहवेहए ल्हागिर पिंल् त्हुबै भाग चुन् ग।
EXO 29:29 “हारूनए पबित्र क्वें चए च्हमैंलाइ पिंन्, चमैंइ च क्वें खिसि अभिषेक लसि खेगि तबर त्हाँन्।
EXO 29:30 हारूनए साटोर खेगि के लबै च्ह ङ टिबै पबित्र तम्बु न्होंर सेवा लबर खमा ङिगैं समा च कवें खिल् त्हुम्।
EXO 29:31 “खेगि त्हाँमा सैबै क्यु साँड् बोसि चए से पबित्र क्ल्ह्‍योर ह्‍योद्।
EXO 29:32 च लिउँइँ हारून नेरो चए च्हमैंइ च क्युए से नेरो ट्हलोर मुँबै क्हें ङ टिबै पबित्र तम्बुए म्रा ङाँर चरिगे।
EXO 29:33 चमैंलाइ त्हाँसि पबित्र लबर तो-तो सैमैंइ ओलेल, च सैमैं चमैंइ चरिगे। अरू म्हिमैंइ बिस्याँ आचरिगे, तलेबिस्याँ च पबित्र मुँ।
EXO 29:34 क्युए से नेरो क्हेंमैं प्हन्हाँग समा ङैस्याँ च मिर ख्रोंवान्। च खाबज्यै या आचद्, तलेबिस्याँ च पबित्र मुँ।
EXO 29:35 “ङइ क्हिने बिब् धोंले हारून नेरो चए च्हमैंने लद् बिद्। ङिगैं छ्युल्‍ले चमैंलाइ त्हाँन्।
EXO 29:36 पाप क्षमा तबै ल्हागिर त्हिंइ ह्रोंसे क्हिइ क्ल्या भारा सैसि ख्रो पिंन्, धै ख्रो पिंबै क्ल्ह्‍यो क्षमा तबै ल्हागिर ख्रो पिंमा चलाइ पबित्र लबर जैतुनए छ्युगु कुसि अभिषेक लद्।
EXO 29:37 ख्रो पिंबै क्ल्ह्‍योलाइ पाप क्षमा तब नेरो पबित्र लबै ल्हागिर ङिगैं समा क्हिइ ख्रो पिंबै क्ल्ह्‍योर छ्युगु कुसि अभिषेक लद्। छलमा ख्रो पिंबै क्ल्ह्‍यो बेल्‍ले पबित्र तब्मुँ धै चलाइ छुइबै तोन्दोंरि सैमैं या पबित्र तब्मुँ।
EXO 29:38 “ख्रो पिंबै क्ल्ह्‍योर खोंयोंन् बिलै त्हिंइ ह्रोंसे तिदिंर्बै क्यु ङ्हिं क्हिइ ख्रो पिंल् त्हुम्।
EXO 29:39 क्यु घ्रि न्हाँगर क्यु घ्रि ङेसर ख्रो पिंन्।
EXO 29:40 न्हाँगर सैबै क्युने बालु लिटर घ्रि जैतुनए छ्युगुर चेंबै किलो घ्रि प्रो नेरो अर्ग बलिए ल्हागिर लिटर घ्रि अँगुरए कुमिंन्।
EXO 29:41 ङेसर सैबै क्युने बालु या न्हाँगर्बै धोंलेन् रा-रोए ख्रो नेरो अर्ग बलि पिंल् त्हुम्। याहवेहए ल्हागिर लिंबै थाँ खबै ख्रो या मिर ख्रोंसि पिंल् त्हुम्।
EXO 29:42 “क्हेमैंए पुस्ता-पुस्ता समा याहवेहए उँइँर पबित्र तम्बुए म्रा ङाँर मिर ख्रोंसि ख्रो पिंब्रें लद्। च क्ल्ह्‍योर्न ङ क्हिने ताँ लबर क्हिने त्होब्मुँ।
EXO 29:43 इस्राएलीमैंने ङ चर्न त्होब्मुँ। ङए चारबै ह्‍वेइ च तम्बु पबित्र लब्मुँ।
EXO 29:44 “ङइ ख्रो पिंबै क्ल्ह्‍यो नेरो तम्बु पबित्र लब्मुँ। झाइले हारून नेरो चए च्हमैंलाज्यै या खेगि तसि ङए सेवा लबै ल्हागिर पबित्र लब्मुँ।
EXO 29:45 इस्राएलीमैंए म्हाँजोर ङ टिब्मुँ, धै चमैंए परमेश्‍वर तब्मुँ।
EXO 29:46 ङ याहवेह चमैंए परमेश्‍वर ग धै ङ चमैंए म्हाँजोर टिबै ल्हागिर ङइ चमैंलाइ मिश्र ह्‍युलउँइँले तेइ पखइ बिसि चमैंइ सेब्मुँ। ङ याहवेह चमैंए परमेश्‍वर ग।
EXO 30:1 “धुप म्रोबै ल्हागिर क्हिइ अर्को बबुल सिंए क्ल्ह्‍यो घ्रि बनेद्।
EXO 30:2 च तिउरु ह्रिंब, तिउरु प्ल्हाब, ङ्हिउरु नुब चार पाटे तल् त्हुम्। चए रुमैं या क्ल्ह्‍यो बनेबै सिंए टुक्राल तल् त्हुम्।
EXO 30:3 चए क्होइबै भाग, कारग्युबै भागमैं नेरो चए रुमैं या छ्याँबै माराइ म्होरसि चए कारग्युले माराए ङाँ सैद्।
EXO 30:4 माराए न्हमैं बनेसि क्ल्ह्‍योए हार ङ्हिंर प्ह्‍याद्। च क्ल्ह्‍यो नोबै ल्हागिर चए ङाँ न्होंर प्हरे क्युलबै क्ल्ह्‍यो तल् त्हमु।
EXO 30:5 च प्हरेमैं या बबुल सिंल बनेसि माराइ म्होरद्।
EXO 30:6 चु धुप म्रोबै क्ल्ह्‍यो ठिम थेंबै मुदुसए ओंसों च्योथेंबै पर्दाए ओंसों थेंन्, चर्न ङ क्हिने त्होब्मुँ।
EXO 30:7 “न्हाँग ह्रोंसे बत्ति तयार लबर खमा हारूनइ छ्याँब थाँ खबै धुप च क्ल्ह्‍योर म्रोरिगे।
EXO 30:8 ङेसरै या बत्ति म्रोमा हारूनइ छ्याँब थाँ खबै धुप च क्ल्ह्‍योर म्रोरिगे। छलेन खबै पुस्ता-पुस्ता समा खोंयोंन् बिलै याहवेहए उँइँर धुप म्रोरिल् त्हुम्।
EXO 30:9 चु क्ल्ह्‍योर क्हिइ अरू खालर्बै धुप, मिर ख्रोंसि पिंबै ख्रो, रा-रोए ख्रो नेरो प्हा या आचडेद्।
EXO 30:10 सालर तिला हारूनइ पाप ख्रुबर ख्रो पिंबै खेदोए को चए प्लिउलो रुर फोसि चु क्ल्ह्‍यो पबित्र लरिगे। चु पबित्र लबै के पुस्ता-पुस्ता समा सालर तिला लरिल् त्हुम्। ङ याहवेहए ल्हागिर चु क्ल्ह्‍यो बेल्‍ले पबित्र ग।”
EXO 30:11 याहवेहजी मोशाने बिइ,
EXO 30:12 “क्हिइ इस्राएलीमैं च्योमा चमैंए न्होंर्बै ताँनइ ह्रोंस सोल् योंरिगे बिसि याहवेहलाइ सै फोल् त्हुब्मुँ, छलमा चमैंए फिर दुःख खरिब् आरे।
EXO 30:13 च्योब्मैं ताँनइ तोक्दिबै मुइ फोल् त्हुब्मुँ। च तोक्दिबै मुइ भेटिए रुपर ताँनइ फोल् त्हुब्मुँ।
EXO 30:14 ङ्हिस्यु बर्ष भन्दा क्होइबै म्हिमैंइ याहवेहए मिंर च मुइ पिंल् त्हुम्।
EXO 30:15 क्हेमैं पाप क्षमा तबै ल्हागिर याहवेहए मिंर भेटि पिंमा प्लब्मैंइ ल्हें ङ्हाँदुमैंइ च्युगुदे आपिंरिगे।
EXO 30:16 च भेटि क्हेमैं पाप क्षमा तबै ल्हागिर पिंब् ग बिसि याहवेहजी इस्राएलीमैं मैंरिगे बिसि इस्राएलीमैंउँइँले मुइ किंसि पबित्र तम्बुए ल्हागिर खर्ज लदु।”
EXO 30:17 याहवेहजी मोशाने बिइ,
EXO 30:18 “क्यु झोंबै ल्हागिर काँसाए प्हले मुँबै काँसाए बाटा बनेसि पबित्र तम्बु नेरो मिइ ख्रोंसि ख्रो पिंबै क्ल्ह्‍योए म्हाँजोर थेंसि चर क्यु झोंन्।
EXO 30:19 हारून नेरो चए च्हमैंइ च क्युइ यो प्हले ख्रुरिगे।
EXO 30:20 चमैं पबित्र तम्बुर होंस्याँ, धै याहवेहए मिंर ख्रो पिंबै क्ल्ह्‍योर ख्रो ख्रोंबर खस्याँ चमैंइ चु क्युइ यो-प्हले ख्रुल् त्हुम। आस्याँ चमैं सियाब्मुँ।
EXO 30:21 चमैं आसिरिगे बिसि चमैंइ चु क्युइ यो-प्हले ख्रुरिगे। हारून नेरो चए पुस्ता-पुस्ता समा छलेन् प्हले ख्रुल् त्हुब्मुँ।”
EXO 30:22 याहवेहजी मोशाने बिइ,
EXO 30:23 “क्हिइ ताँन् भन्दा छ्याँब मसला, लिटर घ्रि मूर्र, आधा किलो दालचिनि, आध किलो बोझो,
EXO 30:24 किलो घ्रि लेपो, चु ताँन् सैमैं पबित्र तम्बुर मुँबै पाराइ क्वेल् त्हुम्। लिटर प्लि जैतुनए छ्युगु चर कोंसि
EXO 30:25 अभिषेक लबै ल्हागिर पबित्र छ्युगु बनेद्।
EXO 30:26 झाइले ङ टिबै पबित्र तम्बु, ठिम थेंबै मुदुस, टेबल, टेबलर थेंबै सैमैं, पानस नेरो पानसर थेंबै सैमैं, धुप म्रोंबै ख्रो पिंबै क्ल्ह्‍यो,
EXO 30:27 टेबल नेरो चए ताँन् सैमैं, सामदान नेरो चए ताँन् सैमैं, धुप म्रोंबै ख्रो पिंबै क्ल्ह्‍यो,
EXO 30:28 मिर ख्रोंसि ख्रो पिंबै क्ल्ह्‍यो, चर्बै सैमैं, प्हले ख्रुबै बाटा नेरो चए प्हलेजरे या च छ्युगुइ अभिषेक लद्।
EXO 30:29 च सैमैं बेल्‍ले पबित्र तरिगे बिसि छले अभिषेक लसि पबित्र लद्। च सैमैं तो सैइ छुइलेया च पबित्र तब्मुँ।
EXO 30:30 “खेगि तसि ङए सेवा लरिगे बिसि हारून नेरो चए च्हमैं अभिषेक लसि पबित्र लदु।
EXO 30:31 ‘इस्राएलीमैंए पुस्ता-पुस्ता समा ङए सेवा लबै ल्हागिर अभिषेक लबै पबित्र छ्युगु चुन् तरिगे,’ बिसि चमैंने बिद्।
EXO 30:32 ‘चु छ्युगु अरू म्हिमैंए फिर आकुमिंन्, चु सैमैंन् कोंसि धबै छाबन् छ्युगु आबनेद्। चु छ्युगु पबित्र मुँ, चु छ्युगु क्हेमैंइ पबित्र मुँ ङ्हाँन्।
EXO 30:33 खाबइ चु सैमैं कोंसि अभिषेक लबै छ्युगु धोंन् बनेमुँ, धै खेगि बाहेक अरू अरू म्हिमैंए फिर चु छ्युगु फोमुँ, ङए म्हिमैं ङाँइँले च म्हि तेवाब्मुँ।’”
EXO 30:34 याहवेहजी धबै मोशाने बिइ, “लिंबै थाँ खबै मसलामैं खोटो, सेखलेट, हिङ धोंबै चोप नेरो लिंबै थाँ खबै धूपमैं बराबरले कोंसि
EXO 30:35 लिंब थाँ खबै छ्युगु बनेब् धोंले धुप बनेद्। च धुप पबित्र तरिगे बिसि चजै या कोंन्।
EXO 30:36 चु धुप क्हेमैंए ल्हागिर बेल्‍ले पबित्र तल् त्हुम्। छतसि चए तिबाँ त्हुल् तल्‍ले तोंसि च्हौदे ङ टिबै पबित्र तम्बुर ठिम थेंबै मुदुसए ओंसों थेंन्।
EXO 30:37 च धुप बनेब् धोंले क्हेमैंए ल्हागिर धुप आबनेद्। याहवेहए ल्हागिर च धुप पबित्र मुँ ङ्हाँन्।
EXO 30:38 च धुपए थाँ खोसि खाबज्यै या च धुप धोंले अरू धुप बनेइ बिस्याँ च ह्रोंसए म्हिमैंउँइँले तेवाल् त्हुम्।”
EXO 31:1 याहवेहजी मोशाने बिइ,
EXO 31:2 “ङइ यहूदाए कुलर्बै हुरए क्वें नेरो ऊरीए च्ह बजलेललाइ त्हाँइमुँ।
EXO 31:3 ङइ चलाइ परमेश्‍वरए प्ल्हजी प्लिंसि ह्रब सेब नेरो ताँन् खालर्बै के लल् ह्रबै सिप पिंइमुँ।
EXO 31:4 चइ मारा, चाँदि नेरो काँसार नक्सा प्ह्रिब,
EXO 31:5 छलेन हिरा थोसि जोड्दिब, सिंर बुट्टा झोंब नेरो अरू ल्हें खालर्बै बुट्टा झोंबै केमैं लरिगे बिसि चलाइ त्हाँब् ग।
EXO 31:6 चलाइ ल्होबर दान कुलर्बै अहीसामाकए च्ह ओहोलीआबलाइया त्हाँइमुँ। धै ङइ क्हिने लद् बिबै तोन्दोंरि सैमैं बनेबर अरू ताँन् के लब्मैंलाइ ङइ सिप पिंइमुँ।
EXO 31:7 छतसि ङ टिबै पबित्र तम्बु, ठिम थेंबै मुदुस, हुबै क्हा नेरो तम्बु सजेबै ताँन् सैमैं, चमैंइ बनेरिगे:
EXO 31:8 टेबल नेरो चर थेंबै समानमैं, छ्याँबै माराए पानस नेरो चए समानमैं, धुप म्रोंबै ख्रो पिंबै क्ल्ह्‍यो,
EXO 31:9 मिर ख्रोंसि ख्रो पिंबै क्ल्ह्‍यो नेरो चर चैदिबै सैमैं, प्हले ख्रुबर क्यु झोंबै बाटा नेरो चए प्हलेमैं,
EXO 31:10 खेगि के लबर हारून नेरो चए च्हमैंइ खिल् त्हुबै क्वेंमैं,
EXO 31:11 अभिषेक लबै छ्युगु नेरो पबित्र तम्बुए ल्हागिर लिंबै थाँ खबै धुप। ङइ क्हिने बिब् धोंले चमैंइ चु ताँन् सैमैं बनेल् त्हुब्मुँ।”
EXO 31:12 च लिउँइँ याहवेहजी मोशाने बिइ,
EXO 31:13 “क्हिइ इस्राएलीमैंने चु या बिद्, प्रिबै त्हिंइ ङए भों न्हबै त्हिंइ ग। छतसि क्हेमैंइ खैले बिलेना प्रिबै त्हिंइर के आलद्। क्हेमैंलाइ पबित्र लमिंम् बिसि क्हेमैंइ सेरिगे बिसि, क्हेमैं नेरो ङए म्हाँजोर चु प्रिबै त्हिंइ खोंयोंन् बिलै चिनु घ्रि तब्मुँ।
EXO 31:14 क्हेमैंइ प्रिबै त्हिंइर के आलद्, तलेबिस्याँ क्हेमैंए ल्हागिर चु पबित्र त्हिंइ ग। चु ताँ आम्हाँदिब्मैं खैलसे या सैल् त्हुम्। च त्हिंइर के लब्मैंलाइ समाजउँइँले तेवाब्मुँ।
EXO 31:15 टुगैं समा के लरिगे, दिलेया ङिगैंर भों न्हबै त्हिंइ ग, चु त्हिंइ याहवेहए ल्हागिर पबित्र ग। चु त्हिंइर के लब्मैंलाइ सैवाल् त्हुम्।
EXO 31:16 इस्राएलीमैंइ च त्हिंइर के आलरिगे, खेंमैंए तुस्ता-पुस्ता समा खोंयोंन् बिलै च त्हिंइ बाछाए चिनु धोंलेन् म्हाँदिल् त्हुम्।
EXO 31:17 इस्राएलीमैंए म्हाँजोर चु प्रिबै त्हिंइ खोंयोंन् बिलै तबै चिनु घ्रि तब्मुँ, तलेबिस्याँ याहवेहजी टुगैं न्होंर मु नेरो पृथ्‍बी बनेइ, धै ङिगैंर भों न्हइ।”
EXO 31:18 याहवेहजी सिनै कोंर मोशाने ताँ लल् खाँबै लिउँइँ खीए योरिंइ प्ह्रिबै युँमाए प्लना ङ्हिं खीजी मोशालाइ पिंइ।
EXO 32:1 मोशा कोंउँइँले युब क्हैन् लब म्रोंसि इस्राएलीमैं हारून ङाँर खागु तसि “ङिलाइ मिश्र ह्‍युलउँइँले तेइ पखबै मोशालाइ तो तइ ङिइ आसे। छतसि रेद्, ङिए ओंसों-ओंसों घ्याँ तेंबर देवता घ्रि बनेमिंन्,” बिबर होंइ।
EXO 32:2 छबिमा हारूनइ चमैंने बिइ, “क्हेमैंए म्रिं नेरो च्ह-च्हमिंमैंइ न्हप्हेर खिबै माराए रिंङमैं प्लिसि ङ ङाँर पखो।”
EXO 32:3 छबिमा ताँन् म्हिमैंइ ह्रों-ह्रोंसए न्हर्बै माराए रिंङमैं प्लिसि हारून ङाँर पखइ।
EXO 32:4 हारूनइ म्हिमैंउँइँले मारा किंसि मिर गाल्दिइ, धै कोप्दिसि क्ल्या भारा घ्रि बनेइ। छाब् म्रोंसि म्हिमैंइ बिइ, “ओ इस्राएलीमैं! क्हेमैंलाइ मिश्रउँइँले तेइ पखबै क्हेमैंए देवता चुन् ग!” बिइ।
EXO 32:5 छतसि हारूनइ माराए क्ल्या भाराए ओंसों ख्रो पिंबै क्ल्ह्‍यो घ्रि बनेसि बिइ, “प्हन्हाँग याहवेहए मिंर चाड घ्रि म्हाँदिब्मुँ।”
EXO 32:6 प्हँन्हाँग्धों म्हिमैं न्हाँकर्न रेसि मिर ख्रोंसि पिंबै खेदोमैं नेरो क्ह्रिमिंबै भेटिमैं बोसि ख्रो पिंइ। झाइले चमैं चब् थुँब् लसि मोज लबर होंइ।
EXO 32:7 छलब् म्रोंसि याहवेहजी मोशाने बिइ, “क्हि युनन् क्युरु ह्‍याद्, तलेबिस्याँ क्हिइ मिश्रउँइँले तेइ पखबै क्हिए म्हिमैंइ पाप लसि ङलाइ म्हाँदिब पिवाइमुँ।
EXO 32:8 ङइ प्रबर ल्हैदिबै घ्याँ चमैंइ च्हौ युनन् पिवासि अर्कोन् घ्याँ प्रइमुँ। चमैंइ ह्रोंसए ल्हागिर क्ल्या भाराए कु बनेसि चलाइन म्हाँदिसि ख्रो पिंसि, ‘ओ इस्राएलीमैं, क्हेमैंलाइ मिश्र ह्‍युलउँइँले तेइ पखबै क्हेमैंए देवता चुन् ग’ बिइमुँ।”
EXO 32:9 याहवेहजी मोशाने बिइ, “चु म्हिमैं बेल्‍ले आच्योब्मैं मुँन बिसि ङइ म्रोंइ।
EXO 32:10 तारे ङने तोइ आबिद्, ङ चमैंने बेल्‍ले ह्रिस खइमुँ। तारे ङइ चमैं नास लवाब्मुँ। धै क्हि ङाँइँलेन् ङइ थेबै ह्रें घ्रि बनेब्मुँ।”
EXO 32:11 दिलेया मोशाइ ह्रोंसए याहवेह परमेश्‍वरने यो छ्युँ लसि “ओ याहवेह!” बिइ। “क्हिइ ह्रोंसए थेबै भों मुँबै योइ मिश्रउँइँले तेइ पखबै ह्रोंसए म्हिमैंए फिर तले च्हौ थेबै ह्रिस खल?
EXO 32:12 क्हिइ ह्रोंसए म्हिमैंलाइ कोंर सैबै सैं लसि पखब् ग बिसि मिश्रीमैंलाइ तले बिल् पिंमुँ? छतसि क्हि ह्रिस आखद्, सैं एसि ह्रोंसए म्हिमैंलाइ नास तल् आपिंन्।
EXO 32:13 ह्रोंसए केब्छैंमैं अब्राहाम, इसहाक नेरो याकूबलाइ मैंन्दि। चमैंने बालु क्हिजी ह्रोंसए मिंर कसम चसि ‘ङइ क्हेमैंए सन्तान मुर्बै सारमैं धोंले ल्हें लमिंब्मुँ। ङइ क्हेमैंए खेमैंलाइ पिंम् बिसि बाछा फैबै चु ताँन् ह्‍युल क्हेमैंए सन्तानलाइ पिंब्मुँ, धै क्हेमैंए सन्तानमैंइ च क्ल्ह्‍योर खोंयोंन् बिलै क्ल्हे लब्मुँ’ बिसि बिल।”
EXO 32:14 छबिमा याहवेहजी ह्रोंसए म्हिमैंलाइ नास लवाब्मुँ बिलेया खीजी सैं एसि चमैंलाइ जोगेमिंइ।
EXO 32:15 झाइले परमेश्‍वरजी लद् बिबै ताँमैं हार ङ्हिर्न प्ह्रिबै युँमाए प्लना ङ्हिं योर किंसि मोशा कोंउँइँले तयुइ।
EXO 32:16 परमेश्‍वर खीजीन च युँमाए पलानमैं बनेसि खीजी लद् बिबै ताँमैं चर प्ह्रिथेंल।
EXO 32:17 म्हिमैं कै तेब् थेसि यहोशूइ मोशाने “ब्यारेक न्होंर म्हिमै प्होंब् धों तबै कै थेइमुँ,” बिइ।
EXO 32:18 दिलेया मोशाइ बिइ, “चु कैम् लडइ ट्होब्मैंलै या आङिं, हार्दिब्मैंलै या आङि। ङइमि क्वे प्रिंबै कै ग थेइमुँ दि।”
EXO 32:19 झाइले मोशा ब्यारेक चेंदों खरिमा माराए क्ल्या भाराए उँइँर म्हिमैं सेरिब् म्रोंइ। छतमा मोशा बेल्‍ले ह्रिस खसि च युँमाए प्लनामैं कोंए जरर भ्योंवामा च तियाइ।
EXO 32:20 छलेन चमैंइ बनेबै माराए क्ल्या भारा मिर त्हुला भुँले ख्रोंवासि क्युर कोंवाँइ, धै च क्यु इस्राएलीमैंलाइ थुँबर ल्हैदिइ।
EXO 32:21 च लिउँइँ मोशाइ हारूनने बिइ, “चु म्हिमैंइ क्हिलाइ तो लइ? क्हिइ चुमैंलाइ तले च्हौ थेबै पाप के लबर ल्हैदिब?”
EXO 32:22 हारूनइ बिइ, “ओ चिब, क्हि ङने ह्रिस आखमिंन्। चु म्हिमैं खैतब् मुँ बिसि क्हिइ सेइमुँ। चुमैं खोंयोंन् बिलै आछ्याँबै के लदा ङ्हाँइमुँ।
EXO 32:23 चमैंइ ङने, ‘ङि मिश्रउँइँले तेइ पखबै मोशालाइ तो तगे ङिइ आसे। छतसि ङिए ओंसों-ओंसों घ्याँ तेंबै ल्हागिर देवता बनेमिन्’ बिसि बिइ।
EXO 32:24 छबिमा ङइ चमैंने ‘माराए घानामैं खिब्मैंइ घानामैं प्लिसि ङ ङाँर पखो,’ बिइ, झाइले चमैंइ घानामैं ङने पिंइ। धै ङइ च घानामैं मिर झोंवामा क्ल्या भारा तयाइ!”
EXO 32:25 हारूनइ म्हिमैंलाइ तो लदा ङ्हाँम् लल् पिंबइले म्हिमैंइ ह्रोंसए सैंर तो मैंमुँ चन् लसि शत्तुरमैं निस्युबै के तल् पिंना बिसि मोशाइ था सेइ।
EXO 32:26 छतसि मोशा ब्यारेकए म्रा ङाँर रासि, “याहवेहलाइ म्हाँदिब्मैं ङ ङाँइ खो!” बिमा ताँन् लेबीमैं च ङाँर खागु तखइ।
EXO 32:27 धै मोशाइ लेबीमैंने बिइ, “‘क्हेमैं ताँनइ ह्रों-ह्रोंसए सेलाँ किंसि ब्यारेकर्बै चु म्राउँइँले अर्को म्रा समा ह्‍यासि ह्रोंसए अलिमैं, थुमैं नेरो ङ्‍हेब् ट्हुब्मैं सैद्!’ बिसि इस्राएलर्बै याहवेह परमेश्‍वरजी ल्हैदिइमुँ।”
EXO 32:28 मोशाइ बिब् धोंलेन् लेबीमैं लइ, च त्हिंइर हजार सों म्हिमैं सैवाइ।
EXO 32:29 झाइले मोशाइ लेबीमैंने बिइ, “तिंयाँ क्हेमैंइ ह्रों-ह्रोंसए च्ह नेरो अलिमैं सैसि याहवेहए ल्हागिर स्यो लइमुँ। छतसि याहवेहजी क्हेमैंए फिर आशिक पिंइमुँ।”
EXO 32:30 प्हँन्हाँग्धों मोशाइ म्हिमैंने बिइ, “क्हेमैंइ थेबै पाप लइमुँ। क्हेमैंइ लबै पापए क्षमा ह्रिबर तारे ङ याहवेह ङाँर ह्‍यामुँ।”
EXO 32:31 च लिउँइँ मोशा याहवेह ङाँर ह्‍यासि बिइ, “चु म्हिमैंइ थेबै पाप लइमुँ! चमैंइ माराए कु बनेसि फ्योइमुँ।
EXO 32:32 दिलेया चमैंए पाप क्हिइ क्षमा लमिंन्। क्षमा आलमिंस्याँ क्हिजी ह्रोंसए म्हिमैंए मिं प्ह्रिबै कितबउँइँले ङए मिं मेटिमिन्।”
EXO 32:33 याहवेहजी मोशाने बिइ, “ङए बिरोधर पाप लबै म्हिलाइन ह्रोंसए कितबउँइँले ङ मेटिमिंब्मुँ।
EXO 32:34 तारे ह्‍याद्! ङइ बिबै क्ल्ह्‍योर म्हिमैंलाइ घ्याँ तेंसि बोद्। ङए दूतमैं क्हिए ओंसों-ओंसों ह्‍याब्मुँ। दिलेया चमैंलाइ सजैं पिंबै त्हे खबै लिउँइँ चमैंए पापए दण्ड ङ पिंब्मुँ।”
EXO 32:35 झाइले हारूनइ बनेबै माराए क्ल्या भारा चमैंइ फ्योबइले याहवेहजी रूढि कुलसि म्हिमैं सैवाइ।
EXO 33:1 याहवेहजी मोशाने बिइ, “क्हिए सन्तानलाइ पिंम् बिसि ङइ अब्राहाम, इसहाक नेरो याकूबने बाछा फैबै क्ल्ह्‍योर मिश्रउँइँले फखबै म्हिमैंने ह्‍याद्।
EXO 33:2 क्हेमैंए ओंसों-ओंसों दूत घ्रि कुल्मिंब्मुँ, धै कनानी, एमोरी, हित्ती, परिज्जी, हिव्वी नेरो यबूसीमैंलाइ ल्हाब्मुँ।
EXO 33:3 दिलेया क्हेमैं आच्योब्मैं ग, धै ङ क्हेमैंने ह्‍यास्याँ ङइ क्हेमैंलाइ सैवालै। छतसि ङ क्हेमैंने बालु ह्‍यारिब् आरे।”
EXO 33:4 चु ताँ थेसि म्हिमैंइ न्हुँ लसि खाबज्यै या घानामैं आखि।
EXO 33:5 तलेबिस्याँ “‘क्हेमैं आच्योमैं ग। ङ तिस्याँदे क्हेमैंने ह्‍यास्याँ ङइ क्हेमैंलाइ सैवालै। छतसि तोगो क्हेमैंइ ह्रोंसए घानामैं प्लिद्, धै क्हेमैंलाइ तो लल् त्हुमुँ ङ बिचार लस्यो,’ बिसि इस्राएलीमैंने बिद् बिसि याहवेहजी मोशाने बिल।”
EXO 33:6 छतसि इस्राएलीमैंइ सिनै कों वाथेंसि घानामैं आखिमल।
EXO 33:7 म्हिमैं टिबै ब्यारेकउँइँले ल्हें ह्रेंगो मोशाइ तम्बु घ्रि टौंदिमल। च तम्बुलाइ मोशाइ याहवेहने त्होबै तम्बु बिमल, धै याहवेहने त्होदा ङ्हाँब्मैं च तम्बुर ह्‍यामल।
EXO 33:8 मोशा च तम्बुर ह्‍यामा ताँन् म्हिमैं ह्रोंसए तम्बुए म्रार रासि मोशा याहवेहने त्होबै तम्बु न्होंर आहोंन् समा च ङाँइन ङ्‍ह्‍योरिमल।
EXO 33:9 मोशा न्होंर होंमा न्हाँम्स्योए त्हो रासि च तम्बुए म्रार रामल। झाइले न्हाँम्स्योए म्हाँजोउँइँले याहवेहजी मोशाने ताँ सेमल।
EXO 33:10 म्हिमैंइ न्हाँम्स्योए त्हो तम्बुए म्रार राब् म्रोंमा चमैं रेसि ह्रों-ह्रोंसए तम्बुर्बै म्रार कुरसि फ्योमल।
EXO 33:11 म्हिमैं ह्रोंसए थुमैंने ताँ सेब् धोंले याहवेह या मोशाने बालु सुँ-सुँ ह्‍वेंसि ताँ सेमल। झाइले मोशा ब्यारेकर एखमा चलाइ ल्होबै फ्रेंसि नुनए च्ह यहोशू च तम्बुर टिमल।
EXO 33:12 झाइले मोशाइ याहवेहने बिइ, “क्हिजी ङने ‘चु म्हिमैं बोसि ह्‍याद्,’ बिमुँ, दिलेया ङने बालु खा-खाब् कुलम् बिसि क्हिजी ङने आबिइमुँ। ‘ङइ क्हिलाइ क्हिए मिंइ सेम्: धै क्हिए फिर ङए म्हाँया मुँ,’ बिसि क्हिजी बिइमुँ।
EXO 33:13 क्हिए म्हाँया ङए फिर मुँ बिस्याँ, ङइ क्हिलाइ ङो सेल् खाँरिगे धै क्हिए उँइँर छ्याँबै केमैं लसि क्हिलाइ सैं तोंन् लल् खाँरिगे बिसि ङलाइ क्हिए घ्याँ उँइँमिंन्। चु ह्रें (जात) क्हिलन् ग बिसि मैंमिंन्।”
EXO 33:14 छबिमा याहवेहजी बिइ, “ङ क्हिने बालुन् ह्‍याब्मुँ, धै क्हिलाइ भों न्हल् पिंब्मुँ।”
EXO 33:15 मोशाइ याहवेहने बिइ, “क्हि ङिने बालुन् आह्‍यास्याँ ङिलाइ चु क्ल्ह्‍योउँइँले क्याइ आबोमिंन्।
EXO 33:16 क्हि ङिने बालु आह्‍यास्याँ क्हिए म्हिमैं नेरो ङइ क्हिए म्हाँया योंइमुँ बिसि अरू ह्रेंमैंइ खैले सेब? ङ नेरो क्हिए म्हिमैं पृथ्‍बीर्बै ताँन् म्हिमैंने स्योन् उँइँबर क्हि ङिने बालुन् तल् त्हुम्।”
EXO 33:17 याहवेहजी मोशाने बिइ, “क्हिइ बिब् धोंले ङ लब्मुँ, तलेबिस्याँ ङए म्हाँया क्हिने मुँ, धै ङइ क्हिलाइ क्हिए मिंइ सेइमुँ।”
EXO 33:18 मोशाइ यो छ्युँ लसि बिइ, “क्हिए चारबै ह्‍वे उँइँमिन्।”
EXO 33:19 याहवेहजी बिइ, “ङ क्हिए उँइँर्न ङए औदिबै छ्याँबै केमैं उँइँमिंसि ‘याहवेहए’ मिं ओरसि पोंब्मुँ। खाबलाइ ङ दयाम्हाँया लदा ङ्हाँमुँ चलाइ ङ दयाम्हँया लमुँ, खाबलाइ ल्हयो खदा ङ्हाँमुँ चलाइ ङ ल्हयो खमुँ।
EXO 33:20 दिलेया क्हिइ ङए लि म्रोंल् खाँरिब् आरे, तलेबिस्याँ ङए लि ङ्ह्‍योस्याँ म्हिमैं सोल् आखाँ।
EXO 33:21 दिलेया ङए रेर पारा घ्रि मुँ। चर्न क्हि राद्।
EXO 33:22 ङए चाराबै ह्‍वे छाइले ह्‍यामा ङइ क्हिलाइ च पाराए पोर थेंब्मुँ, धै छाइले ङ आखन् समा ङए योइ क्हिलाइ हुथेंब्मुँ।
EXO 33:23 च लिउँइँ ङए यो स्योवामा ङए क्हो क्हिइ म्रोंब्मुँ, लि बिस्याँ म्रोंरिब् आरे।”
EXO 34:1 याहवेहजी मोशाने बिइ, “ओंसोंबै धोंलेन् युँमाए प्लना ङ्हिं थोसि पखो। क्हिइ ओंसों तिवाबै युँमाए प्लनार प्ह्रिबै ताँमैं च युँमाए प्लनार ङइ प्ह्रिब्मुँ।
EXO 34:2 प्हन्हाँग न्हाँकर्न छेसि सिनै कोंर ङने त्होबर खो।
EXO 34:3 क्हिने खाबै या आखरिगे, कोंर खनिरै या म्हिमैं आम्रोंरिगे। र-क्यु नेरो खेदोमैं या चर आरेंरिगे।”
EXO 34:4 छतसि मोशाइ धबै युँमाए प्लना ङ्हिं थोसि याहवेहजी बिब् धोंलेन् न्हाँकर्न युँमाए प्लना किंसि सिनै कोंर ह्‍याइ।
EXO 34:5 झाइले याहवेह न्हाँम्स्यो न्होंउँइँले तयुइ, धै मोशाने बालु रासि ह्रोंसए मिं “याहवेह” बिसि ओरइ।
EXO 34:6 च लिउँइँ याहवेह चए ओंसोंउँइँले ह्‍यासि छ बिसि ओरइ, “याहवेह, याहवेह! ङ म्हिमैंए फिर बेल्‍ले म्हाँया नेरो ल्हयो खबै पइरमेश्‍वर ग! ङ युनन् ह्रिस आख, थेबै म्हाँया लमुँ, भर पर्दिल् खाँब् मुँ।
EXO 34:7 ङइ हजार-हजार पुस्ताए फिर आशिक पिंमुँ, धै दुष्‍ट केमैं, प्होंगि कैगि लब नेरो पापए क्षमा लमिंम्। दिलेया दोषिलाइ खैले बिलेना सजैं पिंमुँ। आबा-आमाइ लबै पापए दण्ड चमैंए च्ह-च्हमिमैं, क्वें-क्वेंमिमैं पुस्ता सों प्लि समा पिंमुँ।”
EXO 34:8 छ बिबै तोंदोंन् मोशाइ सर क्र कुरसि परमेश्‍वरलाइ फ्योइ।
EXO 34:9 धै मोशाइ बिइ, “ओ याहवेह, क्हिए म्हाँया ङने मुँ बिस्याँ ङ यो छ्युँ लमुँ, क्हिन् ङिने बालु प्रमिंन्। चु म्हिमैं आच्योब्मैं मुँलेया ङिए दुष्‍ट केमैं नेरो पापए क्षमा लमिंसि ङिलाइ क्हिए म्हिमैं लमिंन्।”
EXO 34:10 याहवेहजी मोशाने बिइ, “थेद्, ङ इस्राएलीमैंने बालु बाछा घ्रि फैम्। क्हिए म्हिमैंए ओंसों ङ औदिबै केमैं लब्मुँ। छाबै के पृथ्‍बीर्बै खाब् ह्रेंमैंए ङाँर आलइमुँ। ङ याहवेहजी क्हिए ल्हागिर छाबै औदिबै के लमना बिसि क्हिने बालु मुँबै म्हिमैंइ म्रोंब्मुँ।
EXO 34:11 ङइ क्हिने बिबै ताँ म्हाँदिद्। ङइ क्हिए उँइँर्न एमोरी, कनानी, हित्ती, परिज्जी, हिव्वी नेरो यबूसीमैं ल्हाब्मुँ।
EXO 34:12 छतसि न्ह क्रों मि क्रोंले टिद्! क्हि ह्‍याबै ह्‍युलर्बै म्हिमैंने बालु बाछा आफैद्। बाछा फैस्याँ क्हेमैंए ल्हागिर ङो चुब् धोंन् तब्मुँ।
EXO 34:13 बरु चमैंए ख्रो पिंबै क्ल्ह्‍योमैं फुवाद्, चमैंए पबित्र युँमामैं त्हुला भुँ लवाद्, धै चमैंए अशेरा देबीए कुमैं (मूर्तिहरु) फुमिंन्!
EXO 34:14 क्हेमैंइ अरू देवतामैंए पूजा आलद्, तलेबिस्याँ ङ याहवेह ह्रिस लबै परमेश्‍वर ग।
EXO 34:15 “न्ह क्रों मि क्रों तद्! च ह्‍युलर्बै म्हिमैंने बालु बाछा आफैद्, तलेबिस्याँ चमैं ह्रोंसए देवतामैंए पूजा लसि ख्रो पिंमा चमैंइ क्हेमैंलाज्यै या हुइब्मुँ, धै चमैंइ ख्रो पिंबै से क्हेमैंइ चब्मुँ।
EXO 34:16 क्हेमैंए च्हमैंइ चमैंए च्हमिमैं ब्ह्‍या लसि पखलै, धै च च्हमिमैंइ ह्रोंसए देवतामैं पूजा लसि क्हेमैंए च्हमैंलाज्यै या पूजा लबर ल्हैदिब्मुँ।
EXO 34:17 “क्हेमैंइ ह्रोंसए ल्हागिर तो सैलैया कु (मूर्ति) बनेसि आफ्योद्।
EXO 34:18 “प्लेढा आझोंब क्हें चबै चाड म्हाँदिद्। ङइ बिब् धोंले आबीब म्हैंनर ङिगैं समा प्लेढा आझोंब क्हें चद्, तलेबिस्याँ च म्हैंनर क्हेमैं मिश्र ह्‍युलउँइँले त्होंइ खब् ग।
EXO 34:19 “च्ह थेब्मैं नेरो क्हेमैंए खेदोमैंइ ओंसों फिबै त्होबामैं, भालेमैं ङलन् ग।
EXO 34:20 दिलेया गदाइ ओंसों फिबै प्हसेए साटोर क्यु झजा पिंसि स्यो लद्। चलाइ स्यो आलस्याँ चए खरि चुवाद्। ह्रोंसए च्ह थेब्मैंलायै या तो मुँले सै पिंसि स्यो लद। “खाबै या भेटि आपल्‍ले ङ ङाँर खल् आत।
EXO 34:21 “टुगैं समा ह्रोंसए के ति लद्, ङिगैंर बिस्याँ भों न्हद्। क्ल्या क्योब नेरो रो खुबै त्हेरै या ङिगैंर भों न्हद्।
EXO 34:22 “ओंसों मिंबै गउँ खैंमा क्हेमैंइ नोगि चबै चाड म्हाँदिद्। छलेन सर्खर रा-रोमैं खुमा प्ह्रोर टिबै चाड म्हाँदिद्।
EXO 34:23 “क्हेमैंए ताँन् मुँयुँमैं बर्षर सोंखे इस्राएलर्बै याहवेह परमेश्‍वरए उँइँर खल् त्हुम्।
EXO 34:24 ङइ ह्रें-ह्रेंमैं क्हेमैं ङाँइँले ह्रेंगो ल्हामिंसि क्हेमैंए साँदमैं बडिमिंब्मुँ। क्हेमैं बर्षर सोंखे ह्रोंसए याहवेह परमेश्‍वरए उँइँर चाड म्हाँदिबर ह्‍याइ बिस्याँ खाबज्यै या क्हेमैंए क्ल्ह्‍यो लोब लरिब् आरे।
EXO 34:25 “ङए मिंर ख्रो पिंमा प्लेढा झोंसि ख्रोंबै क्हें आचडेद्। दुःखने फ्रेबै चाडर ख्रो पिंबै सैमैं प्हँन्हाँग्धों समा आथेंन्।
EXO 34:26 “क्हेमैंए म्रोंर्बै धाँसे ओंसों रोबै छ्याँबै रा-रोमैं ह्रोंसए याहवेह परमेश्‍वरए धिंर पखो। “र बोक्याए से चए आमाए ङ्‍हेर आह्‍योद्।”
EXO 34:27 याहवेहजी मोशाने बिइ, “चु ताँमैं प्ह्रिद्, तलेबिस्याँ चु ताँ धोंलेन् क्हि नेरो इस्राएलीमैंने ङइ बाछा फैइमुँ।”
EXO 34:28 मोशा सिनै कोंर याहवेहने बालु प्लिच्यु त्हिंइ प्लिच्यु म्हुँइँस तोइ आचल्‍ले तोइ आथुँल्‍ले टिसि युँमाए प्लनामैंर बाछा फैबै ताँमैं, अथवा म्हिमैंइ ललन् त्हुबै “च्युउलो ताँमैं” प्ह्रिइ।
EXO 34:29 म्हिमैंइ ललन् त्हुबै ताँमैं प्ह्रिबै युँमाए प्लना ङ्हिं योर किंसि कोंउँइँले तयुमा परमेश्‍वर चने बालु ताँ सेरिबइले ह्रोंसए लि चाररिइमुँ बिबै ताँ मोशाइ था आसेल।
EXO 34:30 हारून नेरो इस्राएलीमैंइ मोशालाइ ङ्‍ह्‍योमा चए लि चारब म्रोंइ। छतमा चमैं मोशाए ङाँर ह्‍याबर ङ्हिंइ।
EXO 34:31 दिलेया मोशाइ चमैंलाइ हुइमा हारून नेरो इस्राएलर्बै ताँन् चिबनाँब्मैं मोशाए ङाँर खइ, झाइले मोशाइ चमैंने ताँ सेइ।
EXO 34:32 च लिउँइँ इस्राएलर्बै ताँन् म्हिमैं चए ङाँर खइ, धै सिनै कोंर याहवेहजी मोशाने बिबै ताँन् ताँ मोशाइ चमैंने “ललन् त्हुबै ताँ चुन् ग” बिसि बिमिंइ।
EXO 34:33 मोशाइ चमैंने ताँ सेल् खाँबै लिउँइँ ह्रोंसए लि क्वेंइ हुइ।
EXO 34:34 मोशा याहवेहए उँइँर पबित्र तम्बु न्होंर खीने ताँ सेबर ह्‍यामा नेरो बैरु आत्होंन् समा क्वेंइ लि आउमल। झाइले याहवेहजी ललन् त्हुम् बिसि बिबै ताँ मोशा बैरु युसि इस्राएलीमैंने बिमिंमा
EXO 34:35 इस्राएलीमैंइ मोशाए लि चाररिब म्रोंमल। याहवेहने बालु ताँ सेबर पबित्र तम्बु न्होंर आहोंन् समा मोशाइ धबै क्वेंइ लि हुमल।
EXO 35:1 मोशाइ इस्राएलर्बै ताँन् ह्रेंमैं खागु लसि बिइ, “क्हेमैंइ ललन् त्हुम् बिसि याहवेहजी पिंबै ताँ चुन् ग:
EXO 35:2 क्हेमैंइ टुगैं समा के लद्, दिलेया ङिगैं क्हेमैंए ल्हागिर पबित्र ग। चु याहवेहए मिंर भों न्हबै त्हिंइ ग। खाबज्यै या च त्हिंइर के लइ बिस्याँ च म्हि सैवाल् त्हुम्।
EXO 35:3 प्रिबै त्हिंइर क्हेमैंए धिंर मि या आफुइद्।”
EXO 35:4 मोशाइ इस्राएलर्बै ताँन् म्हिमैंने बिइ, “ललन् त्हुम् बिसि याहवेहजी बिबै ताँ चुन् ग:
EXO 35:5 क्हेमैंइ याहवेहए मिंर भेटि पखो। भेटि पिंदा ङ्हाँब्मैंइ छाबै सैमैं पिंरिगे: मारा, चाँदि, काँसा;
EXO 35:6 मु रङर्बै क्वें, कलेजी रङर्बै क्वें, ओल्ग्या रु, नेरो छेनाले ख्रिंबै सुतिए क्वें; रए मुइ;
EXO 35:7 ओल्ग्या रङ झोंबै क्यु साँडए ट्हुबि, सिल ताँगए ट्हुबि; बबुल सिं;
EXO 35:8 बत्ति म्रोबै ल्हागिर छ्युगु; अभिषेक लबै छ्युगु नेरो लिंबै थाँ खबै धुप बनेबै मसलामैं;
EXO 35:9 एपोद नेरो तिंर खिबै क्वेंर जोड्दिबै आनिक्स नेरो अरू सै ल्हें फेबै रत्नमैं।
EXO 35:10 “क्हेमैंए न्होंरि सिप मुँबै म्हिमैं ताँन् खसि याहवेहजी लबर ल्हैदिबै सैमैं बनेद्:
EXO 35:11 पबित्र तम्बु, तम्बु स्युबै पाल, पाल टौंदिमा चैदिबै छत, अँङ्‍कुसिमैं फैलोमैं, बार थोबै सैमैं, त्होमैं, क्योबै क्ल्ह्‍योमैं;
EXO 35:12 बाछा फैबै बकस, बकसर नोबै प्हरेमैं, बकसए क्हा नेरो पर्दा;
EXO 35:13 टेबल, टेबलर नोबै प्हरेमैं, टेबल बनेमा चैदिबै सैंमैं, परमेश्‍वर मिंर चडेबै क्हें;
EXO 35:14 बत्ति म्रोंबै पानस, दारमैं, नेरो बत्ति म्रोबै छ्युगु;
EXO 35:15 धुप म्रोबै क्ल्ह्‍यो, च क्ल्ह्‍यो नोबै प्हरेमैं, अभिषेक लबै छ्युगु, लिंबै थाँ खबै धुप; पबित्र तम्बुए म्रार्बै पर्दा;
EXO 35:16 मिइ ख्रोंबै ख्रो पिंबै क्ल्ह्‍यो, चए फिर तिबै काँसाए जालि, च नोबै प्हरेमैं, चैदिबै ताँन् सैमैं; प्हले ख्रुबै ल्हागिर क्यु झोंबै काँसाए बाटा, बाटाए प्हलेमैं;
EXO 35:17 पबित्र तम्बु कारग्युले थोबै पर्दामैं, च टौंदिबै त्होमैं, क्योबै क्ल्ह्‍योमैं, कारग्युले थोबै म्रार्बै पर्दा;
EXO 35:18 पबित्र तम्बु, कारग्युले थोबै काँटिमैं, छोमैं;
EXO 35:19 पबित्र क्ल्ह्‍योर सेवा लमा खेगिमैंइ खिबै क्वेंमैं, हारूनइ खेगि के लमा खिबै पबित्र क्वेंमैं नेरो हारूनए च्हमैंइ खेगि के लमा खिबै क्वेंमैं।”
EXO 35:20 च लिउँइँ इस्राएलर्बै ताँन् म्हिमैं मोशा ङाँइँले ह्‍याइ।
EXO 35:21 सैं प्ल्हसि पिंदा ङ्हाँब्मैंइ पबित्र तम्बु बनेबै ल्हागिर चैदिबै सैमैं नेरो खेगिमैंइ खिबै क्वें टुबै ल्हागिर याहवेहए मिंर भेटिमैं पखइ।
EXO 35:22 सैं प्ल्हसि पिंदा ङ्हाँबै मुँयुँमैं नेरो च्हमिरिमैइ ल्हें खालर्बै माराए घानामैं, पिन, न्हखुमैं, च्यामैं, सिक्रिमैं सजेबै सैमैं पसि याहवेह मिंर थेंमिइ।
EXO 35:23 खाब्ने बालु मु रङ, कलेजी रङ, ओल्ग्या रङइ रोबै रु, नेरो छेनाले ख्रिंबै सुति क्वें, रए पै, ओल्ग्या रङर्बै क्यु साँडए ट्हुबिमैं नेरो सिल ताँगए ट्हुबिमैं मुँल, च सैमैं पखइ।
EXO 35:24 चाँदि नेरो काँसाए भेटि पिंब्मैंइ याहवेहए मिंर पखइ। सेवार चैदिबै बबुल सिं मुँब्मैंइ चन् पखइ।
EXO 35:25 च्हमिरिमैंइ ह्रों-ह्रोंसइ पेरबै मु रङर्बै रु, कलेजी रङर्बै रु, ओल्ग्या रङर्बै रु नेरो छेनाले ख्रिंबै सुतिए क्वें पखइ।
EXO 35:26 पै पेरल् ह्रबै च्हमिरिमैंइ रए मुइ पेरइ।
EXO 35:27 चिबनाँबमैंइ एपोद नेरो तिंर खिबै क्वेंर जोड्दिबै आनिक्स नेरो अरू मणिमैं पखइ।
EXO 35:28 बत्ति म्रोबै छ्युगु, अभिषेक लबै छ्युगु, छ्याँबै थाँ खबै छ्युगु, नेरो लिंबै थाँ खबै धुप बनेबै ल्हागिर मसला या पखइ।
EXO 35:29 याहवेहजी मोशाने लबर ल्हैदिबै केमैंए ल्हागिर पिंदा ङ्हाँबै इस्राएलर्बै ताँन् मुँयुँमैं नेरो च्हमिरिमैंइ सैं तोंदै भेटि पखइ।
EXO 35:30 मोशाइ इस्राएलीमैंने बिइ, “थेद्, याहवेहजी यहूदा कुलर्बै हुरए क्वें ऊरीए च्ह बजलेललाइ त्हाँइमुँ।
EXO 35:31 खीजी चलाइ परमेश्‍वरए प्ल्हजी प्लिंमिंइमुँ, धै सिप, ज्ञान बुद्धि, नेरो तोन्दोंरि लल् ह्रब लमिंइमुँ।
EXO 35:32 मारा, चाँदि नेरो काँसार बुट्टा झोंब,
EXO 35:33 हिरा थोब नेरो जोड्दिब, सिंर बुट्टा झोंब धै ताँन् खालर्बै केमैं लल् ह्रबै सिप खीजी चलाइ पिंइमुँ।
EXO 35:34 च नेरो दानए कुलर्बै अहीसामाकए च्ह ओहोलीआबइ अरूमैंलाइ लोमिंरिगे बिसि याहवेहजी चमैंलाइ तोन्दोंरि लल् ह्रबै सिप पिंइमुँ।
EXO 35:35 चमैंइ ताँन् खालर्बै भाँडार बुट्टा झोंब, मु रङर्बै क्वें, कलेजी रङर्बै क्वें, ओल्ग्या रङर्बै क्वें नेरो छेनाले ख्रिंबै सुतिए क्वें रोसि बुट्टा झोंबै केमैं छेनाले लल् खाँरिगे बिसि खीजी चमैंलाइ सिपमैं पिंइमुँ।”
EXO 36:1 “छतसि बजलेल, ओहोलीआब नेरो ल्हें खालर्बै सिप मुँबै म्हिमैंइ याहवेहजी लद् बिब् धोंबै के लरिगे बिसि खीजी चमैंलाइ पबित्र तम्बु बनेबर ज्ञान नेरो सिप पिंइमुँ।”
EXO 36:2 छतसि बजलेल, ओहोलीआब नेरो याहवेहजी ज्ञान नेरो सिपमैं पिंबै ताँन् म्हिमैं मोशाइ हुइसि के लद् बिसि ल्हैदिइ।
EXO 36:3 इस्राएलीमैंइ पबित्र तम्बु बनेबै ल्हागिर पखबै ताँन् भेटिमैं मोशाए योउँइँले चमैंइ किंइ। दिलेया इस्राएलर्बै म्हिमैंइ न्हाँगै ह्रोंसे मोशा ङाँर भेटिमैं पखमल।
EXO 36:4 छतसि पबित्र तम्बु छेनाले बनेल् ह्रब्मैं ह्रों-ह्रोंसए केमैं पिसि मोशा ङाँर ह्‍यासि बिइ,
EXO 36:5 “याहवेहजी बनेबर ल्हैदिबै केए ल्हागिर चैदिब् भन्दा ल्हें सैमैं म्हिमैंइ परिइमुँ।”
EXO 36:6 छतमा पबित्र तम्बु बनेबर तारे खाबज्यै या तो सैया आपखो बिसि मोशाइ ताँन् ब्यारेकजरे बिइ। छबिमा म्हिमैंइ भेटि पखब पिवाइ,
EXO 36:7 तलेबिस्याँ तम्बु बनेबर चमैंने बालु चैदिब सैमैं भन्दा ल्हें मुँल।
EXO 36:8 के लब्मैं न्होंर्बै छेनाले बनेल् ह्रब्मैंइ पर्दा च्युउलो मुँबै तम्बु बेनेइ। च पर्दामैं मु रङ, कलेजी रङ नेरो ओल्ग्या रङइ रोबै क्वें नेरो छेनाले ख्रिंबै सुति क्वेंला बुट्टा पिंल् ह्रब्मैंइ बनेबै करूबमैं पर्दार मुँल।
EXO 36:9 च पर्दामैं ताँन् नाप घ्रिर्बैन् ङ्‍ह्‍युस्युसे प्रे क्रु ह्रिंब नेरो प्लिउरु प्ल्हाब मुँल।
EXO 36:10 पर्दामैं ङ्‍हउलो-ङ्‍हउलो जोड्दिसि थे-थेबै पर्दामैं ङ्हिं बनेइ।
EXO 36:11 च थे-थेबै पर्दाए बैरुउँबै ङाँर चमैंइ मु रङर्बै क्वेंए सुर्कानि झोंबै क्ल्ह्‍यो बनेइ।
EXO 36:12 पर्दा ङ्हिंर्न चमैंइ ङ्‍हच्यु-ङ्‍हच्यु सुर्कानि बनेइ। च सुर्कानिमैं तिरैना ह्‍वेंब् मुँल।
EXO 36:13 चमैंइ माराए अङ्‍कुसिमैं बनेसि च पर्दामैं जोड्दिइ। छले पबित्र तम्बु क्ल्ह्‍यो घ्रिर्न तइ।
EXO 36:14 पबित्र तम्बु हुबै ल्हागिर चमैंइ रए मुइ रोबै क्वेंला च्युसे घ्रि पर्दामैं बनेइ।
EXO 36:15 च पर्दामैं नाप घ्रिर्बैन् सोंच्यु क्रु ह्रिब नेरो प्लिउरु प्ल्हाब मुँल।
EXO 36:16 चमैंइ पर्दा ङ्‍हउलो जोड्दिसि थेबै पर्दा घ्रि बनेइ। छलेन पर्दा टुउलो जोड्दिसि अर्को पर्दा बनेइ।
EXO 36:17 थेबै पर्दामैं जोड्दिबै ङाँ-ङाँर चमैंइ ङ्‍हच्यु-ङ्‍हच्यु सुर्कानि बनेइ।
EXO 36:18 च पर्दामैं जोड्दिबै ल्हागिर चमैंइ काँसाए ङ्‍हच्यु अङ्‍कुसिमैं बनेसि प्ह्‍याइ।
EXO 36:19 तम्बु हुबै ल्हागिर चमैंइ ओल्ग्‍या रङर्बै क्यु साँडए ट्हुबिए पर्दा नेरो सिल ताँगए ट्हुबिए पर्दामैं बनेइ।
EXO 36:20 चमैंइ पबित्र तम्बुए ल्हागिर बबुल सिंए फ्ल्याकमैं बनेइ।
EXO 36:21 फालेमैं ताँन् च्युउरु ह्रिंब नेरो तिउरुसे आधा प्ल्हाब मुँल।
EXO 36:22 ताँन् फालेर जोड्दिबै चोसामैं ङ्हिं उँइ-उँइँ ह्‍वेंसि थेंल। चु धोंलेन् पबित्र तम्बु बनेबै फ्ल्याकमैं बनेइ।
EXO 36:23 चमैंइ छ्यो ल्हुए (दक्षिण) ल्हागिर ङ्‍ह्‍युस्यु फ्ल्याकमैं बनेइ।
EXO 36:24 झाइले ङ्‍ह्‍युस्यु फालेमैंए न्होंर प्लिच्यु चाँदिए क्योबै क्ल्ह्‍योमैं बनेइ। फ्ल्याक घ्रिए न्होंर क्योबै क्ल्ह्‍यो ङ्हिं चोसामैं न्होंर क्योबै क्ल्ह्‍यो घ्रि बनेइ।
EXO 36:25 पबित्र तम्बुए ताइ हार (उत्तर) चमैंइ ङ्‍ह्‍युस्यु फ्ल्याकमैं बनेइ।
EXO 36:26 झाइले ताँन् फ्ल्याकए न्होंर ङ्हिं-ङ्हिं लसि चाँदिए प्लिच्यु क्योबै क्ल्ह्‍योमैं बनेइ।
EXO 36:27 पबित्र तम्बुए छ्यो न्हुँ हारए ल्हागिर (पश्‍चिम हार) चमैंइ फालेमैं टुउलो बनेइ।
EXO 36:28 पबित्र तम्बुए कुना-कुनाए ल्हागिर फ्ल्याकमैं ङ्हिं बनेइ।
EXO 36:29 च कुनार्बै फ्ल्याकमैं ताइले माइ समा ङ्हिपो ङ्हिपो झोंसि रिंङ घ्रिर्न जोड्दिल। कुना ङ्हिंर्बै फ्ल्याकमैं या चमैंइ छलेन् बनेइ।
EXO 36:30 च फ्ल्याकमैं प्रेउलोए ल्हागिर चाँदिए च्युसे टुउलो क्योबै क्ल्ह्‍यो बनेसि फालेमैंए न्होंर थेंमिंइ।
EXO 36:31 पबित्र तम्बुर्बै तिरैबै फालेमैं थोबै ल्हागिर बबुल सिंए बारमैं बनेइ।
EXO 36:32 छलेन अर्को फालेमैं थोबै ल्हागिर ङ्‍हउलो बारमैं बनेइ, धै छ्यो न्हुँर्बै (पश्‍चिम) कुनार मुँबै फ्ल्याकमैं थोबर ङ्‍हउलो बार बनेइ।
EXO 36:33 फालेमैंए म्हाँजोर्बै बार बिस्याँ छेउ घ्रिउँइँले अर्को छेउ समा फेनेल्‍ले बनेइ।
EXO 36:34 चमैंइ फ्ल्याकमैं माराइ म्होरइ, धै बारमैं क्हाबै ल्हागिर माराए न्हमैं बनेइ। बारमैं या माराइना म्होरइ।
EXO 36:35 चमैंइ मु रङ, कलेजी रङ, नेरो ओल्गया रुइ रोबै क्वें नेरो छेनाले ख्रिंबै सुतिए क्वेंला पर्दा घ्रि बनेइ, चर बुट्टा झोंल् ह्रब्मैंइ करूबए बुट्टामैं झोंइ।
EXO 36:36 पर्दा च्योबै ल्हागिर बबुल सिंए त्हो प्लिउलो बनेसि माराइ म्होरइ। अङ्‍कुसिमैं या माराल बनेइ। त्होमैं धाँदिबर चाँदिए क्योबै क्ल्ह्‍यो प्लिउलो बनेइ।
EXO 36:37 तम्बुए म्राए ल्हागिर चमैंइ मु रङ, कलेजी रङ नेरो ओल्ग्या रङर्बै रुइ रोबै क्वें नेरो छेनाले ख्रिंबै सुतिए क्वेंर बुट्टा झोंबै पर्दा बनेइ।
EXO 36:38 च पर्दा च्योबै ल्हागिर चमैंइ त्हो ङ्‍हउलो बनेसि त्होए च्हो नेरो छो माराइ म्होरइ, झाइले त्हो धाँदिबै ल्हागिर काँसाए ङ्‍हउलो क्योबै क्ल्ह्‍योमैं बनेइ।
EXO 37:1 बजलेलइ बबुल सिंए मुदुस बनेइ। च ङ्हिउरुसे आधा ह्रिंब, तिउरुसे आधा प्ल्हाब नेरो तिउरुसे आधा नुब मुँल।
EXO 37:2 चइ मुदुसए न्हों नेरो बैरु छ्याँबै माराइ म्होरसि कारग्युले माराइ ङाँ सैइ।
EXO 37:3 चइ मुदुसर प्ह्‍याबै माराए प्लिउलो न्हमैं बनेसि मुदुसए प्हले प्लिर प्ह्‍यामिंइ।
EXO 37:4 छलेन चइ बबुल सिंए प्हरेमैं बनेसि माराइ म्होरइ।
EXO 37:5 झाइले मुदुस नोबै ल्हागिर च प्हरेमैं मुदुसए न्हमैंर क्युलइ।
EXO 37:6 चइ ङ्हिउरुसे आधा ह्रिंब नेरो तिउरुसे आधा प्ल्हाब छ्याँबै माराला बाछाए मुदुसए का घ्रि बनेइ।
EXO 37:7 चइ मुदुसए क्योबै क्ल्ह्‍योर माराए करूब ङ्हिं बनेइ।
EXO 37:8 करूब घ्रि छेउ घ्रिर, करूब घ्रि अर्को छेउर प्ह्‍यामिंइ। च करूब ङ्हिं नेरो मुदुसए क्योबै क्ल्ह्‍यो माराए डल्‍ला घ्रिउँइँलेन् बनेइ।
EXO 37:9 च करूबमैंइ ह्रों-ह्रोंसए प्ह्‍यामैं फैसि मुदुसए काए फिर छरि लल। चमैंए सुँ उँइँ उँइँ लसि मुदुसए काउँइँ ह्‍वेंल।
EXO 37:10 बजलेलइ ङ्हिउरु ह्रिंब तिउरु प्ल्हाब तिउरुसे आधा नुब बबुल सिंए टेबल बनेसि
EXO 37:11 छ्याँबै माराइ म्होरइ धै चए कारग्युले माराए ङाँ सैइ।
EXO 37:12 टेबलए कारग्युले योरिं प्लि प्ल्हाबै घेरा बनेसि चए कारग्युले माराए ङाँ सैइ।
EXO 37:13 टेबलर प्ह्‍याबै ल्हागिर चइ माराए न्ह प्लि बनेसि टेबलए प्हले प्लिए कुनार प्‍ह्‍यामिंइ।
EXO 37:14 टेबल नोबै प्हरेमैं क्युलबै ल्हागिर घेराए रेर्न च न्हमैं मुँल।
EXO 37:15 चइ टेबल नोबै ल्हागिर बबुल सिंए प्हरेमैं बनेसि माराइ म्होरइ।
EXO 37:16 टेबलर थेंबै थलिमैं, धुपरा, प्हेलामैं, प्हा झोंसि चडेबै करुवामैं चइ ताँन् छ्याँबै माराल बनेइ।
EXO 37:17 चइ छ्याँब माराए बत्ति म्रोंबै पानस बनेइ। चए क्योबै क्ल्ह्‍यो, डाँठ, ट धोंबै प्हेला, कोपिला, नेरो टमैं माराए डल्‍ला घ्रिउँइँलेन् बनेल।
EXO 37:18 तिरै सोंउलो अर्को हार सोंउलो लसि टुउलो हाँगमैंबत्ति म्रोंबै पानसउँइँले बैरु त्होंल।
EXO 37:19 हाँग घ्रिर हाडे बदामए ट धों ब्योंबै प्हेला, नेरो कोपिला धै टमै मुँल। अर्को हाँगरै या प्हेला सोंउलो मुँल। पानसउँइँले त्होबै टुउलोन् हाँगमैं घ्रि खालर्बैन् मुँल।
EXO 37:20 पानसर हाडे बदामए ट धों ब्योंबै प्हेला प्लि नेरो टमैं धै टै या मुँल।
EXO 37:21 पानसउँइँले त्होंबै टुउलो हाँगमैं न्होंर ओंसोंबै हाँग न्होंर कोपिला घ्रि, अर्को हाँग न्होंर कोपिला धै अर्को हाँग न्होंरै या कोपिला मुँल।
EXO 37:22 बत्ति म्रोंबै पानस, कोपिला नेरो हाँगमैं माराए डल्‍ला घ्रिउँइँलेन् बनेइ।
EXO 37:23 चइ पानसर थेंबै पलमैं, थनर (चिम्टा) नेरो पुज्या झोंबै भाँडो छ्याँबै माराला बनेइ।
EXO 37:24 चइ सोंच्युसे ङ्‍ह किलो छ्याँब माराइ बत्ति म्रोंबै पानस नेरो चर सजेबै सैमैं बनेइ।
EXO 37:25 चइ धुप म्रोबै क्ल्ह्‍यो बबुल सिंला बनेइ। च ख्रो पिंबै क्ल्ह्‍यो तिउरु ह्रिंब, तिउरु प्ल्हाब, ङ्हिउरु नुब चार पाटे मुँल। ख्रो पिंबै क्ल्ह्‍योए रुमैं या ख्रो पिंबै क्ल्ह्‍यो बनेबै सिंलन् बनेल।
EXO 37:26 ख्रो पिंबै क्ल्ह्‍योए हार प्लिर्बै भाग नेरो रुमैं या छ्याँबै माराइ म्होरसि कारग्युले माराए ङाँ बनेइ।
EXO 37:27 ख्रो पिंबै क्ल्ह्‍यो नोबै प्हरेमैं क्युलबै ल्हागिर ख्रो पिंबै क्ल्ह्‍योए हार ङ्हिंर्न माराए न्हमैं ङ्हिं बनेसि ख्रो पिंबै क्ल्ह्‍योए हार ङ्हिंर्न प्ह्‍यामिंइ।
EXO 37:28 चइ बबुल सिंए प्हरेमैं बनेसि माराइ म्होरइ।
EXO 37:29 अभिषेक लबै पबित्र छ्युगु नेरो अत्तर बनेब्मैंइ धोंले लिंबै थाँ खबै धुप चइ बनेइ।
EXO 38:1 धै बजलेलइ ङ्‍हउरु ह्रिंब, ङ्‍हउरु प्ल्हाब, सोंउरु नुब चार पाटे मिइ ख्रोंसि ख्रो पिंबै बबुल सिंए क्ल्ह्‍यो बनेइ।
EXO 38:2 चए कुना प्लिर रुमैं बनेइ। च ख्रो पिंबै क्ल्ह्‍यो नेरो रुमैं सिं घ्रिउँइँलेन् बनेसि काँसाइ म्होरइ।
EXO 38:3 चइ ख्रो पिंबै क्ल्ह्‍योर चैदिबै भाँडोमैं, बेल्चामैं, क्यु झोंबै बाटामैं, से तिबै काँटामैं, मि म्ल्हमैं झोंबै भाँडोमैं काँसाला बनेइ।
EXO 38:4 ख्रो पिंबै क्ल्ह्‍योए फिर तिबै ल्हागिर चइ ख्रो पिंबै क्ल्ह्‍योए ङाँए न्होंर म्हाँजोर समा फेनेल्‍ले काँसए जालि घ्रि बनेइ।
EXO 38:5 चइ काँसाए जालिए कुना प्लिर नोबै प्हरे क्युलबै ल्हागिर न्ह प्लिउलो बनेइ।
EXO 38:6 प्हरेमैं बबुल सिंल बेनेसि काँसाइ म्होरइ।
EXO 38:7 च प्हरेमैं ख्रो पिंबै क्ल्ह्‍योए रे प्लिर प्ह्‍याबै न्हमैंर ख्रो पिंबै क्ल्ह्‍यो नोबै ल्हागिर क्युलइ। चइ बबुल सिंउँइँले न्होंर खोक्रो तबै ख्रो पिंबै क्ल्ह्‍यो बनेइ।
EXO 38:8 पबित्र तम्बुए म्रार के लबै च्हमिरिमैंइ ङ्‍ह्‍योबै दर्पनउँइँले (ऐना) चइ काँसाए क्यु झोंबै भाँडो नेरो च भाडोए प्हले बनेइ।
EXO 38:9 छेनाले ख्रिंबै सुति क्वेंए पर्दामैं बनेसि याहवेहए पबित्र तम्बु थोइ। पर्दाए माइ हारबै भाग (दक्षिण) प्र क्रुल मुँल।
EXO 38:10 च पर्दा च्योबै त्होमैं ङ्हिस्यु, चए क्योबै क्ल्ह्‍यो या ङ्हिस्युन् काँसाल मुँल। त्होए अङ्‍कुसिमैं नेरो छोमैं चाँदिल मुँल।
EXO 38:11 पर्दाए ताइ हारबै भाग या (उत्तर) प्र क्रुल मुँल। त्होमैं नेरो क्योबै क्ल्ह्‍योमैं या काँसालन् ङ्हिस्युन् मुँल। त्होमैंए अङ्‍कुसि नेरो छोमैं बिस्याँ चाँदिल मुँल।
EXO 38:12 छ्यो न्हुँ हारबै पर्दामैं ङ्‍हच्यु क्रुल मुँल। चए त्होमैं च्यु, क्योबै क्ल्ह्‍यो या च्युन् मुँल, त्होए अङ्‍कुसि नेरो छोमैं चाँदिल मुँल।
EXO 38:13 स्यार हारबै पर्दाए भाग (पूर्व) ङ्‍हच्यु क्रुल मुँल।
EXO 38:14 मुल म्रा हारबै पर्दामैं च्युसे ङ्‍ह क्रुल मुँल। चए त्होमैं नेरो क्योबै क्ल्ह्‍यो या सोंउलोन् मुँल।
EXO 38:15 ह्‍युर्बै म्राए क्योलो नेरो त्हेब्रे हारबै पर्दामैं च्युसे ङ्‍ह क्रुल मुँल। चए त्होमैं नेरो क्योबै क्ल्ह्‍यो या सोंउलोन् मुँल।
EXO 38:16 ह्‍युर्बै प्लि हारबै पर्दामैं छेनाले रोबै सुति क्वेंल मुँल।
EXO 38:17 त्होए क्योबै क्ल्ह्‍योमैं काँसाल मुँल, त्होर्बै अङ्‍कुसि नेरो छोमैं चाँदिल मुँल। त्होए च्होमैं चाँदिइ म्होरल। ह्‍युर्बै त्होमैंर च्योबै छोमैं या चाँदिलन् मुँल।
EXO 38:18 ह्‍युर्बै मुल म्रार्बै पर्दा मु रङ, कलेजी रङ नेरो ओल्ग्या रङर्बै रुइ टुसि बुट्टा झोंब मुँल। च पर्दा ङ्हिस्यु क्रु ह्रिंब नेरो ङ्‍हउरु नुब मुँल।
EXO 38:19 च पर्दा च्योबै त्होमैं नेरो क्योबै क्ल्ह्‍योमैं प्लि काँसाल मुँल। अङ्‍कुसि नेरो छोमैं चाँदिल मुँल, त्होए च्होमैं या चाँदिइ म्होरल।
EXO 38:20 पबित्र तम्बु नेरो तम्बुए ह्‍युर्बै काँटिमैं काँसाल मुँल।
EXO 38:21 पबित्र तम्बु बनेबर ल्हैदिबै सैमैं छले मुँ। मोशाइ बिब् धोंले खेगि हारूनए च्ह ईतामारइ ल्हैदिब् अनुसार लेबीमैंइ प्ह्रिल।
EXO 38:22 याहवेहजी मोशाने बिब् धोंले यहूदाए कुलर्बै ऊरीए च्ह, हुरए क्वें बजलेलइ लइ।
EXO 38:23 चने बालु दानए कुलर्बै अहीसामाकए च्ह ओहोलीआब मुँल। च भाडर बुट्टा प्रिंल् ह्रब् नेरो मु रङर्बै, कलेजी रङर्बै नेरो ओल्ग्या रङर्बै रुमैं नेरो छेनाले ख्रिंबै सुतिइ बुट्टा झोंल् ह्रब् मुँल।
EXO 38:24 पबित्र तम्बु बनेसि याहवेहए मिं फुलबै ल्हागिर पखबै मारा पबित्र तम्बुर्बै पार अनुसार हाजार घ्रि किलो मुँल।
EXO 38:25 इस्राएलर्बै म्हिमैं च्योबै त्हेर खुबै चाँदि पबित्र तम्बुर मुँबै पारर क्वेमा ३,४३० किलो मुँल।
EXO 38:26 ङ्हिस्यु बर्ष भन्दा कैंडुबै म्हिमैं च्योमा लाख टुसे हजार सोंसे ङ्‍हब्रसे ङ्हच्यु (६,०३,५५०) तल। च ताँन् म्हिमैंइ एखबै मुइ पबित्र तम्बुर्बै पारइ क्वेमा आधा शेकेल मुँल।
EXO 38:27 ३,४०० किलो चाँदि पबित्र तम्बु नेरो पर्दाए क्योबै क्ल्ह्‍योमैं बनेबै ल्हागिर मुँल। क्योबै क्ल्ह्‍यो घ्रि बनेमा ३४ किलो ल्हैदिइ।
EXO 38:28 ङैब सोंच्यु किलो चाँदिउँइँले चमैंइ त्होए च्होमैंए ल्हागिर अङ्‍कुसि बनेसि त्होए च्होमैं म्होरसि छोमैं बनेइ।
EXO 38:29 याहवेहए मिंर फुलबै काँसा २,४२५ किलो मुँल।
EXO 38:30 च काँसाइ पबित्र तम्बुर्बै मुल म्राए क्योबै क्ल्ह्‍योमैं, ख्रो पिंबै क्ल्ह्‍यो, जालि नेरो ख्रो पिंबै क्ल्ह्‍योर्बै ताँन् सैमैं,
EXO 38:31 ह्‍युर्बै क्योबै क्ल्ह्‍योमैं, मुल म्राए क्योबै क्ल्ह्‍योमैं, नेरो पबित्र तम्बुर चैदिबै काँटि नेरो ह्‍युए कारग्युले चैदिबै काँटिमैं बनेइ।
EXO 39:1 पबित्र तम्बुर के लबै खेगिमैंए ल्हागिर चमैंइ मु रङ, कलेजी रङ, नेरो ओल्ग्या रङर्बै रुमैंइ रोबै क्वेंमैं टुइ। छलेन याहबेहजी मोशाने बिब् धोंलेन् चमैंइ हारूनइ खेगि के लमा खिबै क्वें या टुइ।
EXO 39:2 मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वें छेनाले ख्रिंसि एपोदै या टुइ।
EXO 39:3 चमैंइ माराए तारमैं बनेसि च तारइ मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंर बुट्टा झोंइ।
EXO 39:4 एपोद प्हैदर छ्योरिगे बिसि चमैंइ एपोदए छेउ ङ्हिंर तनामैं प्ह्‍यामिंइ।
EXO 39:5 छलेन याहवेहजी मोशाने बिब् धोंलेन् चमैंइ मु रङ, कलेजी रङ, ओल्ग्या रङ, माराए तार नेरो छेनाले ख्रिंबै सुतिए क्वें ख्रिंसि एपोदए फिर खिबै छ्याँबै फगि रोइ।
EXO 39:6 चमैंइ माराए स्युउनिर तुथु जोड्दिसि इस्राएलए च्युसे ङ्हिं च्हमैंए मिं तुथुर प्ह्रिइ।
EXO 39:7 याहवेहजी मोशाने बिब् धोंलेन् इस्रालए च्युसे ङ्हिं च्हमैं मैंरिगे बिसि चमैंइ तुथु एपोदए प्हैंदर प्ह्‍यामिंइ।
EXO 39:8 एपोद टुब् धोंलेन् बुट्टामैं झोंल् ह्रबै म्हिइ के लब् धोंले चमैंइ मारा, मु रङ, कलेजी रङ, ओल्‍ग्‍या रङर्बै रु नेरो क्वें छेनाले ख्रिंसि तिंर खिबै क्वें बनेइ।
EXO 39:9 च तिंर खिबै क्वें बित्ता घ्रि ह्रिंब, बित्ता घ्रि प्ल्हाब ङ्हिथरले ताब चार पाटे मुँल।
EXO 39:10 चर मणिमैं ल्हस्यार प्लि लसि मणिमै जोद्डिइ। तिस्यार मानिक, पुष्पराज नेरो बेरुज मुँल।
EXO 39:11 ङ्हिस्यारर फिरोजा, निर नेरो पन्‍ना मुँल।
EXO 39:12 सोंस्यारर ओल्ग्या मणि, हाकिक नेरो कटेला मुँल।
EXO 39:13 प्लिस्यारर पितमणि, आनिक्स नेरो बिल्‍लौर मुँल। चु ताँन् मणिमैं माराइ जोड्दिल।
EXO 39:14 इस्राएलए खेमैं मैंबै ल्हागिर च च्युसे ङ्हिं तुथु घ्रि-घ्रिर याकूबए च्युसे ङ्हिं च्हमैंए मिं प्ह्रिथेंल।
EXO 39:15 तिंर खिबै क्वें बनेबै ल्हागिर चमैंइ छो धोंले ख्रिंबै छ्याँबै माराए सिक्रिमैं बनेइ।
EXO 39:16 चमैंइ माराए न्ह ङ्हिं नेरो न्ह प्ह्‍यबै धिं ङ्हिं बनेसि तिंर खिबै क्वेंए कुना ङ्हिंर न्हमैं ङ्हिं प्ह्‍यामिंइ।
EXO 39:17 माराए सिक्रि ङ्हिं तिंर खिबै क्वेंए छेउ-छेउ ङ्हिंर मुँबै न्हमैं ङ्हिंर जोड्दिमिंइ।
EXO 39:18 सिक्रि ङ्हिंए छेउ ङ्हिं रिङ प्ह्‍याबै धिंर जोड्दिसि एपोदए प्हैंदर्बै उँइँ हारबै तनिर प्ह्‍यामिंइ।
EXO 39:19 चमैंइ माराए रिङ ङ्हिं बनेसि तिंर खिबै क्वेंए अर्को कुना ङ्हिंर एपोदए न्हों हारबै ङाँर प्ह्‍यामिंइ।
EXO 39:20 चमैंइ अझै माराए रिङ ङ्हिं बनेसि एपोदए उँइँ हारबै प्हैंद ङ्हिंर्बै तनिर नेरो एपोदए फिर खिबै फगिए फिर्बै सिउनिर प्ह्‍यामिंइ।
EXO 39:21 याहवेहजी मोशाने बिब् धोंलेन् एपोदए फिर फगि आसर्दिरिगे बिसि तिंर खिबै क्वेंए रिङमैं नेरो एपोदए रिङमैं मु रङर्बै फिताइ फगिर फैइ।
EXO 39:22 झाइले एपोदए न्होंर खिबै लबेदामैं मु रङर्बै क्वेंइ टुइ।
EXO 39:23 लबेदाए म्हाँजोर क्र क्ल्युलबै सुँ बनेसि चए कारग्युले आटोरिगे बिसि ङाँ सैमिंइ।
EXO 39:24 लबेदाए माइबै फरोर मु रङ, कलेजी रङ, ओल्ग्या रु नेरो छेनाले ख्रिंबै सुति क्वें ख्रिंसि अनारमैं बनेइ।
EXO 39:25 छ्याँबै माराए स्योंमैं बनेसि च फेरोए कारग्युले अनारए म्हाँ-म्हाँजोर माराए स्योंमैं च्योमिंइ।
EXO 39:26 याहवेहजी मोशाने बिब् धोंलेन् सेवा लमा खिबै लबेदाए माइबै फेरोए कारग्युले माराए स्यों नेरो अनार च्योमिंइ।
EXO 39:27 हारून नेरो चए च्हमैंइ खिबै ल्हागिर सुति क्वेंए लबेदामैं,
EXO 39:28 क्रेगि, कुलेमैं नेरो न्होंर खिबै क्वें चमैंइ टुइ।
EXO 39:29 याहवेहजी मोशाने बिब् धोंलेन् छेनाले ख्रिंबै सुति क्वें ख्रिंसि, मु रङ, कलेजी रङ, ओल्ग्या रुइ बुट्टा झोंबै फगि टुइ।
EXO 39:30 चमैंइ छ्याँबै माराल पबित्र मुकुट बनेसि चर “याहवेह मिंर पिंब् ग” बिसि कोप्दिइ।
EXO 39:31 याहवेहजी मोशाने बिब् धोंलेन् चमैंइ क्रेगिए ओंसों मु रङर्बै पित्ताइ फैइ।
EXO 39:32 याहवेहजी मोशाने बिब् धोंलेन् पबित्र तम्बु बनेबै के ताँन् खाँइ।
EXO 39:33 झाइले चमैंइ पबित्र तम्बु नेरो चर चैदिबै तोन्दोंरि सैमैं मोशा ङाँर पइ: अङ्‍कुसिमैं, फ्ल्याकमैं, बार थोबै सैंमैं, नेरो त्होमैं क्योबै क्ल्ह्‍योमैं,
EXO 39:34 तम्बु उबै ल्हागिर ओल्ग्या रङर्बै क्यु साँडए ट्हुबि, बाछाए मुदुस उँइँर थेंबै पर्दामैं,
EXO 39:35 ठिम थेंबै मुदुस, मुदुसर क्युलबै प्हरेमैं, नेरो मुदुसए क्हा,
EXO 39:36 टेबल नेरो चए चैदिबै सैमैं, परमेश्‍वरए मिंर पिंबै क्हें,
EXO 39:37 छ्याँबै माराए पानस, पलमैं, बत्ति म्रोबै तेल, नेरो चैदिबै तोन्दोंरि सैमैं,
EXO 39:38 धुप म्रोबै ल्हागिर माराल ख्रो पिंबै क्ल्ह्‍यो, अभिषेक लबै छ्युगु नेरो छ्याँब थाँ खबै धुप, पबित्र तम्बुए म्रार्बै पर्दा,
EXO 39:39 काँसाए ख्रो पिंबै क्ल्ह्‍यो, काँसाए जालि, ख्रो पिंबै क्ल्ह्‍यो नोबै प्हरेमैं नेरो चर चैदिबै सैमैं, यो प्हले ख्रुबै ल्हागिर क्यु झोंबै बाटा नेरो बाटाए प्हलेमैं,
EXO 39:40 ह्‍युर कारग्यु लबै पर्दा, त्होमैं नेरो चमैंए क्योबै क्ल्ह्‍योमैं, ह्‍युर्बै म्राए पर्दा, छोमैं नेरो काँटिमैं, पबित्र तम्बुर चैदिबै सैमैं,
EXO 39:41 पबित्र तम्बुर हारून खेगि नेरो चए च्हमैंइ खेगि के लमा खिबै पबित्र क्वेंमैं।
EXO 39:42 छलेन याहवेहजी मोशाने बिब् धोंलेन् इस्राइलिमैंइ ताँन् के लइ।
EXO 39:43 मोशाइ चमैंइ लबै ताँन् केमैं ङ्‍ह्‍योमा याहवेहजी बिब् धोंलेन् चमैंइ लइ बिब् म्रोंइ। छतसि मोशाइ चमैं ताँनए फिर आशिक पिंइ।
EXO 40:1 याहवेहजी मोशाने बिइ,
EXO 40:2 “ओंसोंबै म्हैंनर्बै ओंसोंबै त्हिंइर याहवेहए पबित्र तम्बु क्योद्।
EXO 40:3 ठिम थेंबै मुदुस चर थेंन्, धै चए ओंसों पर्दा च्योद्।
EXO 40:4 टेबलै या न्होंर थेंसि चए फिर सजेबै सैमैं थेंन्, धै पानस न्होंर पखसि चर पलमैं थेंन्।
EXO 40:5 ठिम थेंबै मुदुसए ओंसों धुप म्रोबै ख्रो पिंबै क्ल्ह्‍यो थेंन्, झाइले पबित्र तम्बुए म्रार पर्दा झोंन्।
EXO 40:6 पबित्र तम्बुए म्रार्बै ओंसों मिर ख्रोंसि ख्रो पिंबै क्ल्ह्‍यो थेंन्।
EXO 40:7 च लिउँइँ पबित्र तम्बु नेरो मिइ ख्रोंबै ख्रोमैं पिंबै क्ल्ह्‍योए म्हाँजोर बाटा थेंसि क्यु झोंन्।
EXO 40:8 ह्‍युर कारग्युले बार थोसि ह्‍युर्बै म्रार पर्दा झोंन्।
EXO 40:9 “झाइले अभिषेक लबै छ्युगुइ पबित्र तम्बु नेरो चर मुँबै तोन्दोंरि सैर फोसि पबित्र तम्बु नेरो चर मुबै सैमैं चोखो लद्। छ लस्याँ च ताँन् पबित्र तब्मुँ।
EXO 40:10 छलेन मिर ख्रोंसि ख्रो पिंबै क्ल्ह्‍यो नेरो चर्बै तोन्दोंरि सैमैं या छ्युगु फोसि पबित्र लद्। छलमा च ताँन् पबित्र तब्मुँ।
EXO 40:11 झाइले क्यु झोंबै बाटा नेरो बाटाए प्हले या छ्युगु फोसि पबित्र लद्।
EXO 40:12 “च लिउँइँ हारून नेरो चए च्हमैं पबित्र तम्बुए म्रार पखसि ख्रुबर ल्हैदिद्।
EXO 40:13 हारूनलाइ पबित्र क्वें खिमिंसि अभिषेक लद्, झाइले च खेगि तसि ङए सेवा लरिगे बिसि चलाइ पबित्र लद्।
EXO 40:14 हारूनए च्हमैं पसि लबेदा खिमिंन्।
EXO 40:15 चमैंए आबालाइ अभिषेक लब् धोंले हारूनए च्हमैंइ खेगि तसि ङए सेवा लरिगे बिसि चमैंलाज्यै या अभिषेक लद्। छले अभिषेक लमा चमैंए पुस्ता-पुस्ता समा खोंयोंन् बिलै चमैं खेगिन् तरिब्मुँ।”
EXO 40:16 याहवेहजी ल्हैदिबै तोन्दोंरि के मोशाइ लइ।
EXO 40:17 छले चमैंइ मिश्र ह्‍युल पिथेंबै ङ्हिदिंर्बै ओंसोंबै म्हैंनर्बै ओंसोंबै त्हिंइर याहवेहए पबित्र तम्बु क्योइ।
EXO 40:18 मोशाइ पबित्र तम्बु क्योइ, धै चए क्योबै क्ल्ह्‍योमैं तिसि फ्ल्याकमैंइ बार थोसि त्होमैं क्योइ।
EXO 40:19 याहवेहजी बिब् धोंले पबित्र तम्बुए फिर पाल टौंदिसि पालए फिर सिंइ नोंमिंइ।
EXO 40:20 झाइले लद् बिबै च्युउलो ताँ प्ह्रिबै युँमाए प्लना ङ्हिं बाछाए मुदुसर झोंसि चइ चए क्हा मुदुसए फिर थेंइ।
EXO 40:21 याहवेहजी बिब् धोंलेन् मोशाइ ठिम थेंबै मुदुस पबित्र तम्बु न्होंर थेंइ, झाइले च मुदुस म्हिमैंइ आम्रोंरिगे बिसि पर्दा झोंइ।
EXO 40:22 झाइले पबित्र तम्बुए ताइ हार पर्दाए बैरु टेबल थेंइ।
EXO 40:23 याहवेहजी मोशाने बिब् धोंलेन् टेबलए फिर याहवेह फुलबै क्हें थेंइ।
EXO 40:24 छलेन पबित्र तम्बुर्बै टेबलए ओंसों दक्षिण हारै पानस थेंइ।
EXO 40:25 याहवेहजी बिब् धोंलेन् खीए ओंसों पानसर बत्ति म्रोइ।
EXO 40:26 पर्दाए ओंसों मोशाइ माराल धुप म्रोबै क्ल्ह्‍यो थेंइ।
EXO 40:27 याहवेहजी बिब् धोंलेन् लिंबै थाँ खबै धुप म्रोइ।
EXO 40:28 झाइले पबित्र तम्बुए म्रार पर्दा झोंइ।
EXO 40:29 झाइले याहवेहजी बिब् धोंले पबित्र तम्बुए म्रा ओंसों चइ मिइ ख्रोंबै ख्रो पिंबै क्ल्ह्‍यो थेंइ धै मिइ ख्रोंबै ख्रो नेरो रा-रोमैं फुलइ।
EXO 40:30 पबित्र तम्बु नेरो ख्रो पिंबै क्ल्ह्‍योए म्हाँजोर चइ बाटा थेंसि क्यु झोंइ।
EXO 40:31 याहवेहजी बिब् धोंलेन् मोशा, हारून नेरो हारूनए च्हमैंइ च बाटार्बै क्युइ यो प्हलेमैं ख्रुइ,
EXO 40:32 पबित्र तम्बु न्होंर अथवा ख्रो पिंबै क्ल्ह्‍योर ह्‍यामा चमैंइ यो प्हले ख्रुब्रें लमल।
EXO 40:33 मोशाइ पबित्र तम्बु नेरो ख्रो पिंबै क्ल्ह्‍योए कारग्युले गेरा झोंसि ह्‍युए धेरा बनेइ, धै ह्‍युर्बै म्रार पर्दा झोंइ। छले मोशाइ ताँन् केमैं खाँइ।
EXO 40:34 च लिउँइँ न्हाँम्स्योइ पबित्र तम्बु हुवामा याहवेहए चारबै ह्‍वेइ पबित्र तम्बु चारइ।
EXO 40:35 छतमा मोशा पबित्र तम्बु न्होंर होंल् आखाँल।
EXO 40:36 पबित्र तम्बुउँइँले न्हाँम्स्यो स्योयामा इस्राएलीमैं अरू क्ल्ह्‍योर ह्‍यामल।
EXO 40:37 पबित्र तम्बुउँइँले न्हाँम्स्यो आस्योन् समा चमैं खनिरै आह्‍यामल।
EXO 40:38 छतमा इस्राएलीमैं खनिर प्रलैया त्हिंयाँर पबित्र तम्बुए फिर याहवेह युइमुँ बिसि उँइँबै न्हाँम्स्यो तमल, म्हुँइँसर बिस्याँ न्हाँम्स्योर मि लुँब् म्रोंमल।
RUT 1:1 ल्हें त्हे ओसों निसाफ लबै म्हिमैंइ ग्याल्स त्हेजरे यहूदा ह्‍युलर थेबै अँगल् तइ। छतसि यहूदार्बै बेथलेहेम नाँसउँइँले म्हि घ्रि ह्रोंसए प्ह्रेंस्यो नेरो च्ह ङ्हिं किंसि मोआबी ह्‍युलर टिबर ह्‍याइ।
RUT 1:2 चए मिं एलीमेलेक मुँल। चए प्ह्रेंस्योए मिं नाओमी धै चए च्हमैंए मिं महलोन नेरो किल्योन मुँल। चमैं यहूदार्बै बेथलेहेम नासर्बै एप्रातीमैं मुँल। चमैं मोआबी ह्‍युलर ह्‍यासि चर्न टिइ।
RUT 1:3 चर टिमा नाओमीए प्युँ एलीमेलेक सियाइ, धै नाओमी नेरो चए च्ह ङ्हिं मत्‍त्रे तइ।
RUT 1:4 च च्हमैं ङ्हिंइ मोआब थेंस्योमैं ओर्पा नेरो रूथने ब्ह्‍या लइ। चमैं च क्ल्ह्‍योर च्युदिदे टिरिमा
RUT 1:5 च च्हमैं ङ्हिं महलोन नेरो किल्योनै या सियाइ। छले नाओमी ह्रोंसए प्युँ नेरो च्ह ङ्हिंने फ्रेयाइ।
RUT 1:6 ह्रोंसए ह्‍युलर्बै म्हिमैंलाइ याहवेहजी आशिक पिंसि चब-थुँब् पिंइमुँ रो बिबै ताँ नाओमीइ मोआब ह्‍युलर थेइ। छतसि नाओमी नेरो चए चोंमैं ह्रोंसए धिंर एह्‍याबै सैं लइ।
RUT 1:7 नाओमीइ ह्रोंसए चोंमैं ङ्हिं किंसि ह्रोंस टिबै क्ल्ह्‍यो वाथेंइ, धै ह्रोंसए धिंर ह्‍याबर यहूदाए घ्याँ क्हाइ।
RUT 1:8 झाइले घ्याँर प्ररिमा नाओमीइ ह्रोंसए चोंमैंने बिइ, “क्हेमैं ह्रों-ह्रोंसए माइत धिंर एह्‍याद्, धै ह्रोंसए आमाने टिद्! सियाबै ङए च्हमैं नेरो ङए फिर क्हेमैंइ म्हाँया लब् धोंलेन् क्हेमैंए फिरै या याहवेहजी म्हाँया लरिगे।
RUT 1:9 याहवेजी धबै क्हेमैंए धिं-नाँ चुमिंसि प्युँमैंए धिंर छेनाले थेंमिंरिगे!” च्हौ बिसि नाओमीइ चोंमैंलाइ म्वें लमा चोंमैं बेल्‍ले क्रोइ।
RUT 1:10 धै चोंमैंइ नाओमीने बिइ, “ङि या क्हिने बालुन् क्हिए म्हिमैं ङाँर ह्‍याम्।”
RUT 1:11 छबिमा नाओमीइ बिइ, “ओ ङए च्हमिमैं, क्हेमैं ङने तले ह्‍याब? क्हेमैं एयाद्; क्हेमैंए ल्हागिर ङइ धबै च्हमैं फिल् खाँम्मा? आखाँ!
RUT 1:12 छतसि ङए च्हमिमैं, क्हेमैं ह्रोंसए माइतउँइँ एह्‍याद्, तलेबिस्याँ क्हमैंए ल्हागिर ङइ ब्ह‍या लसि च्हमैं फिब्गो बिलेया ङ माँब तयाइमुँ। प्हसे योंबै आशा लसि तिंयाँ म्हुँइँसर्न ब्ह्‍या लसि च्हमैं फिलै या
RUT 1:13 चमैं थेब् तन् समा क्हेमैंइ पैंल् खाँम्‍मा? ब्ह्‍या आलल्‍ले टिम्मा? छ तलन् आखाँ ङए च्हमिमैं। क्हेमैंए फिर ङइ बेल्‍ले न्हुँ लइमुँ, दिलेया ङइ तोइ लमिंल् आखाँ। तलेबिस्याँ याहवेहए ङए बिरोधर मुँ।”
RUT 1:14 चु ताँ थेसि चमैं धबै बेल्‍ले क्रोइ। धै स्युमिलाइ म्वें लसि ओर्पा माइत धिंउँइँ एह्‍याइ। रूथ बिस्याँ स्युमिनेन् टिइ।
RUT 1:15 धै नाओमीइ रूथने बिइ, “ङ्ह्‍योत्ति, क्हिए आन ह्रोंसए म्हिमैं नेरो ह्रोंसए देवतामैंए ङाँर एह्‍याइ; क्हि या आन धोंलेन् ह्रोंसए माइतउँइँन एह्‍याद्।”
RUT 1:16 छबिमा रूथइ बिइ, “क्हिलाइ वाथेंसि ह्‍याबर ङलाइ कर आल्हैदिद्। क्हि खनिर ह्‍यामुँ, ङइ या चर्न ह्‍यामु, धै क्हि खनिर टिमुँ, ङइ या चर्न टिमु। क्हिए म्हिमैं ङए म्हिमैं ग, क्हिए परमेश्‍वर ङए परमेश्‍वर ग।
RUT 1:17 क्हि खनिर सिमुँ, ङइ या चर्न सिम्, धै क्हि खनिर पामुँ ङइ या चर्न पारिगे। कालइ बाहेक क्हि नेरो ङलाइ तो सैज्यै या फ्रेल् आखाँरिगे! क्हिलाइ ङइ वाथेंस्याँ याहवेहजी ङए फिर थेबै दण्ड पिंरिगे।”
RUT 1:18 रूथइ ह्रोंसने ह्‍याबै ल्हागिर भों लब् म्रोंसि नाओमीइ रूथने अरू तोइ आबि।
RUT 1:19 धै चमैं ङ्हिं प्र-प्रइ बेथलेहेम सहरर फेनेइ। चमैं चर खइमुँ बिब ताँनइ सेइ। झाइले चर्बै चमिरिमैंइ बिइ, “क्हि नाओमीन् आङिं वा?” बिसि ङ्योएमा
RUT 1:20 नाओमीइ चमैंने बिइ, “अँ ङ नाओमीन् ग, दिलेया क्हेमैंइ ङने नाओमी आबिद्; ङलाइ मारा बिद्, तलेबिस्याँ ताँन् भन्दा थेबै परमेश्‍वरजी ङए छ्ह बेल्‍ले काँब लइमुँ।
RUT 1:21 ङ छुइले ह्‍यामा ङने तोन्दोरि मुँल, तोगो ङने तोइ आरे, याहवेहजी ङलाइ क्होत्तेन् एभइ। छतसि क्हेमैंइ ङने नाओमी आबिद्। याहवेह ङए बिरोदर मुँ, तान् भन्दा थेबै परमेश्‍वरजी ङए फिर थेबै दु:ख तल् पिंइमुँ।”
RUT 1:22 छले नाओमी चए चों मोआबी थेंस्यो रूथने बालु बेथहेलमर एखइ। च्हमा चर जौ खैंबै त्हे तल।
RUT 2:1 चर बोअज बिबै प्लबै म्हि मुँल। च ह्रोंसए प्युँ एलीमेलेक ङाँइले नाओमीलै या नातो फेमल।
RUT 2:2 तिंगैं मोआब थेंस्यो रूथइ नाओमीने बिइ, “ङ म्रोंर ह्‍यासि खाबइ ङए फिर ल्हयो खमुँ, चए लिलि म्रोंमैंइ वाथेंबै जौ सिलमैं खुबर ह्‍याल् पिंन्,” बिमा नाओमीइ “ओं ओं ह्‍याद, ङए च्हमि,” बिइ।
RUT 2:3 छतसि जौ खैंब्मैंए लिलि म्रोंर जौए सिलमैं म्हैबर रूथ ह्‍याइ। छले ह्‍यामा चए क्यें एलीमेलेकए नातो फेबै बोअजए म्रोंर च फेनेइ।
RUT 2:4 च्हमा बोअजै या बेथलेहेम सहरउँइँले म्रोंर फेनेइ। बोअजइ जौ खैंब्मैंने “याहवेह क्हेमैंने प्रे तरिगे!” बिमा चमैंज्यै या बिइ, “याहवेहजी क्हिए फिर आशिक पिंरिगे!”
RUT 2:5 झाइले बोअजइ ह्रोंसए के लब्मैं न्होंर्बै चिबने “चु च्हमिरि खाब् जा?” बिसि ङ्योएमा
RUT 2:6 चिबइ बिइ, “च मोआब ह्‍युलउँइँले नाओमीने खबै मोआबी थेंस्यो ग।
RUT 2:7 ‘म्रोंमैंए लिलि जौ सिलमैं खुल् पिंन्,’ बिसि चइ ङने यो छ्युँ लइ। च न्हाँग ओंनोंन् के लसिन् मुँ, तोगो तिस्यादे भों न्हरिइमुँ।”
RUT 2:8 छबिमा बोअजइ रूथने बिइ, “ओ ङए च्हमि, थेद्, अरूमैंए म्रोंर ह्‍यासि सिलमैं आम्हैद्, ङए के लबै म्रिंस्योमैंने प्रे चुर्न सिलमैं म्हैद्।
RUT 2:9 चमैंइ खैंबै क्ल्ह्‍योर चमैंए लिलि सिलमैं म्हैद्। खाबज्यै या क्हिने तोइ आलद् बिसि ङइ चुर्बै फ्रेसिमैंने बिइमुँ। धै क्हि क्यु पिस्याँ चर फ्रेसिमैंइ खामिंसि थेंबै गौरिर्बै क्यु थुँन्।”
RUT 2:10 छबिमा रूथइ बोअजए प्हलेर कुरसि बिइ, “ङ अरू ह्‍युलर्बै च्हमिरि बिब् था सेसेया क्हिइ ङए फिर तले च्हौ थेबै ल्हयो खइ?”
RUT 2:11 बोअजइ बिइ, “ह्रोंसए प्युँ सियासे या स्युमिलाइ म्हाँया लसि ह्रोंसए ह्‍युल, ह्रोंसए आबा‍-आमा वाथेंसि खाबै ङो आसेबै आगुए ह्‍युलर स्युमिने प्रे खब् ग बिबै ताँ ङइ थेइ।
RUT 2:12 छले छ्याँबै के लबइले क्हिए फिर इस्राएलए परमेश्‍वर याहवेहजी आशिक पिंरिगे। खी ङाँर क्हि खइमुँ, छतसि खीजी खोंयोंन् बिलै क्हिए फिर आशिक पिंरिगे।”
RUT 2:13 छबिमा रूथइ बिइ, “ङ क्हिए क्येब्स्यो आङिंलै या क्हिइ ङए सैं क्होमिंसि ङए फिर ल्हयो लइ, छलेन् खोंयोंन् बिलै ङइ क्हिउँइँले ल्हयो योंरिगे।”
RUT 2:14 प्रु चबै त्हे तमा बोअजइ चने बिइ, “खो खो, प्रु चखो, क्हें लुँसि सिर्कार तिंसि चद्।” छबिमा रूथ जौ खैंब्मैंनेन् बालु क्हुँमा बोअजइ चलाइ ङ्‍होबै जौ या पिंइ, धै चइ म्रेंनाले चसि ङैब थेंइ।
RUT 2:15 लिउँइँ च धबै सिल खुबर रेमा “चलाइ सिलमैं मत्त्रे आङिं, खैंथेंबै प्हैंउँइँलेन् किंल् पिंन्। चने तोइ आबिद्,” बिसि बोअजइ ह्रोंसए म्रोमैंने बिइ।
RUT 2:16 “जौ खैंमा जौए प्हैंउँइँले दे-दे चए ल्हागिर वाथेंन्, चलाइ आहौदिल्‍ले त्हुँल् पिंन्।”
RUT 2:17 छतसि रूथइ ङेस समा म्रोंर जौ सिल खुइ। ह्रोंसइ खुबै जौ सिलमैं नेमा ङ्‍हब्योंदे तइ।
RUT 2:18 धै जौ नोसि च धिंर ह्‍यामा चइ पखबै जौ स्युमिलाइ उँइँइ। धै चसि ङैपखबै जौ या चइ स्युमिलाइ पिंइ।
RUT 2:19 धै स्युमिइ “तिंयाँ क्हि जौ सिलमैं खाबए म्रोंर खुल? क्हिलाइ ह्रोंसए म्रोंर सिलमैं म्हैल् पिंबै म्हिइ आशिक योंरिगे,” बिइ। छबिमा रूथइ “तिंयाँ ङइ जौ सिलमैं खुबै क्ल्ह्‍यो क्ल्हेए मिं बोअज मुँल,” बिसि ह्रोंसइ जौ सिलमैं खुबै क्ल्ह्‍यो क्ल्हेए बारेर चइ स्युमिने ताँ लइ।
RUT 2:20 च ताँ थेसि नाओमीइ ह्रोंसए चोंने बिइ, “याहवेहजी च म्हिलाइ आशिक पिंरिगे! याहवेहजी सोगोंमैं नेरो सियाब्मैंए फिर ल्हयो खमिंइ!” धबै नाओमीइ चने बिइ, “च ङ्योए नातो न्होंर्बै म्हिन् ग। ङ्योए फिर दु:ख तमा ङ्योलाइ ल्होल् त्हुबै म्हिमैं न्होंर च घ्रि ग।”
RUT 2:21 स्युमिइ छबिमा रूथइ धबै बिइ, “च म्हिइ ‘ङए म्रोंर्बै जौ खुल् आखाँन् समा क्हि या ङए म्रोंमैंने बालुन् जौ खुरिद्,’ बिसि ङने बिइमुँ।”
RUT 2:22 नाओमीइ बिइ, “अँ ङए च्हमि, क्हि चए केब्स्योमैंने बालुन् प्रब छ्याँब तम्। अरूए म्रोंर ह्‍यास्याँ क्हिलाइ हौदिब धोंब लल् खाँम्।”
RUT 2:23 छतसि जौ नेरो गउँ खुल् आखाँन् समा रूथै या बोअजए म्रोंमैंने बालु सिलमैं खुप्रइ। छले च ह्रोंसए स्युमिने प्रे टिरिल।
RUT 3:1 तिगैं रूथए स्युमि नाओमीइ चने बिइ, “ओ ङए च्हमि, ङए सैंर तारे क्हि ब्ह्‍या लसि ह्रोंसल्न धिं-नाँ चुसि टिस्याँ तमला ङ्हाँइमुँ।
RUT 3:2 बोअज ङ्योए नातो न्होंर्बै म्हि ग, क्हि या चए म्रोंस्योमैंनेन् बा-बालु के लप्रइमुँ; तिंयाँ म्हुँइँसर बोअजइ खलर जौ बतेब्मुँ।
RUT 3:3 छतसि ख्रुसि छ्युगु फोद्, धै छ्याँबै क्वें खिसि खलर ह्‍याद्, दिलेया चइ चब-थुँब लल् आखाँन् समा क्हि चए ओंसों आह्‍याद्।
RUT 3:4 च रोबर ह्‍यामा चए रोबै क्ल्ह्‍यो ङ्ह्‍योथेंन्। झाइले च न्हरु च्हुयाबै लिउँइँ क्हि था आसेल्‍ले चए प्हले प्ह्रिर ह्‍यासि चइ नेंबै क्वें आलले चैंसि रोद्। च लिउँइँ क्हिइ तो लल् त्हुम् बिबै ताँ चइन क्हिने बिब्मुँ।”
RUT 3:5 छबिमा रूथइ बिइ, “क्हिइ तो लद् बिमुँ ङइ चन् लम्।”
RUT 3:6 झाइले रूथ खलर ह्‍याइ, धै स्युमिइ बिब् धोंलेन् लइ।
RUT 3:7 बोअजइ चब्-थुँब् लल् खाँसि सैं तोंदै जौ थुप्ब्रो लथेंबै तिराइ ह्‍यासि रोइ। छले रोरिमा रूथ था आसेल्‍ले ह्‍यासि बोअजए प्हले ङाँइबै नेबै क्वें ओसि रोइ।
RUT 3:8 म्हुँइँस आधार बोअज न्हरुइले छोरमा ह्रोंसए प्हले ङाँर च्हमिरि घ्रि रोरिब् चइ म्रोंइ।
RUT 3:9 “क्हि खाब जा?” बिसि बोअजइ ङ्योएमा रूथइ बिइ, “ङ क्हिए केब्स्यो रूथ ग। क्हिए नेंबै क्वे ह्रोंसए केब्स्योए फिर नेंमिंन्, तलेबिस्याँ ङए दु:ख सुखर ल्होमिंल् त्हुबै म्हि क्हिन् ग।”
RUT 3:10 बोहजइ बिइ, “याहवेहजी क्हिए फिर आशिक पिंरिगे। क्हि ढुक्‍का तद्, क्हिइ स्युमिलाइ लबै म्हाँया भन्दा चु ताँ थेब् मुँ, तलेबिस्याँ प्लब, ङ्हाँब फ्रेंसिमैं खाबने या क्हि आल्हैदि।
RUT 3:11 तारे ढुक्‍का तसि टिद्। क्हिलाइ चैदिबै के ङइ क्हिए लागिर लमिंब्मुँ, तलेबिस्याँ क्हि छ्याँबै सुबास मुँबै च्हमिरि ग बिसि चुर्बै ताँन् म्हिमैंइ सेइमुँ।
RUT 3:12 क्हिए दु:ख सुखर ल्होमिंल् त्हुबै म्हि ङ ग बिब क्ह्रोंसेन ग, दिलेया अझै ङ भन्दा चेंदोंर्बै नातो फेबै म्हि घ्रि मुँ। चइ क्हेमैंए दु:ख सुखर ल्होमिंल् त्हुम्।
RUT 3:13 क्हि तिंयाँबै म्हुँइँस चुर्न थोदु, धै प्हन्हाँग क्हिए ल्हागिर लल् त्हुबै के चइ लमिंम् बिस्याँ, ठिकन् मुँ; आलइ बिस्याँ ङइ लमिंस्यो। सोगों याहवेहए मिंर कसम चसि ङ बिमुँ, न्हुँ आलद्।”
RUT 3:14 छबिमा न्हाँग आतन् समा रूथ बोअजए प्हले ङाँर्न रोरिइ, दिलेया मिं म्रोंब् भन्दा ओंसों रूथ रेइ। तलेबिस्याँ “खलर च्हमिरि घ्रि मुँल!” बिबै ताँ खाबज्यै आसेरिगे बिसि बोअजइ ओंसोंन् बिल।
RUT 3:15 धबै बोअजइ “क्हिइ कुबै क्रमुँ तोद्,” बिमा चइ क्रमुँ तोइ, धै बोअजइ जौ टुब्योंदे क्ह्‍वेसि रूथलाइ नोल् पिंइ। झाइले रूथ सहरर एह्‍याइ।
RUT 3:16 रूथ ह्रोंसए स्युमि ङाँर खमा “ओ ङए च्हमि, तो तो तइ?” बिसि स्युमिइ रूथने ङ्योएइ।
RUT 3:17 बोअजइ ह्रोंसने बिबै ताँन् ताँमै रूथइ स्युमिने सेइ। धै “क्हिए स्युमि ङाँर क्हि यो क्होतेंन् आह्‍याद्,” बिसि चु जौ टुब्यों या चइ ङलाइ पिंइ।
RUT 3:18 धबै नाओमीइ बिइ, “ओ ङए च्हमि, आअदेल्‍ले टिद्, तलेबिस्याँ बोअजइ चइ लल् त्हुबै के तिंयाँन् लब्मुँ। च के आलन् समा च ढुक्‍काले टिरिब् आरे।”
RUT 4:1 छतसि बोअज सहरर्बै मुल म्रा ङाँर ह्‍यासि टिरिबै तिस्याँदे लिउँइँ चमैंलाइ दु:ख सुखर ल्होल् त्हुबै एलीमेलेकए चेंदोर्बै नातो फेबै म्हि च घ्याँन् खइ। चए बारेर बोअजइ ओसोंन् रूथने बिल। चलाइ म्रोंसि “ओ ङए थु, चुर खो,” बिसि बोअजइ चलाइ हुइ। छले हुइमा चै या बोअज ङाँर खसि टिइ।
RUT 4:2 च त्हेर्न सहरउँइँले चिबनाँब्मैं च्यु च घ्याँर् खरिल। छतसि चमैंलाज्यै या बोअजइ “तिस्याँ चुर टिमिंन्,” बिसि यो छ्युँ लमा चमैं या टिइ।
RUT 4:3 झाइले नाओमी नेरो रूथलाइ दु:ख सुखर ल्होल् त्हुबै एलीमेलेकए चेंदोर्बै नातो फेबै म्हिने बिइ, “ङ्योए आघेंए प्ह्रेंस्यो नाओमी मोआब ह्‍युलउँइँले एखइमुँ, चइ ह्रोंसने मुँबै म्रों तिलुँ चुँल् म्हैमुँ।
RUT 4:4 छतसि चु चिबनाँब्मैंए ओंसों च म्रों क्हिइ किंरिगे बिब ङए सैं मुँ। तलेबिस्याँ चेंदोंर्बै नातो न्होंर्बै हगवाल क्हि ग। क्हिइ आकिं बिस्याँ ङन् किंम्, तलेबिस्याँ ङै या नातो न्होंर्बै म्हिन् ग।” छबिमा चइ “अँ अँ ङन् किंम्,” बिइ।
RUT 4:5 धबै बोअजइ बिइ, “तम् तम्। नाओमीए क्ल्ह्‍यो किंम् बिस्याँ क्हिइ मोआब ह्‍युलउँइँले नाओमीने खबै म्हरेस्यो रूथने ब्ह्‍या लल् त्हुम्। तलेबिस्याँ सियाबै म्हिए मिं आम्हबै ल्हागिर च क्ल्ह्‍यो चए परवाए न्होंर्न तल् त्हुम्।”
RUT 4:6 चु ताँ थेसि च चेंदोंर्बै नातो फेबै म्हिइ बिइ, “चु क्ल्ह्‍यो ङ आकिं, क्हिन् किंन्। ङ चेंदोंर्बै हगवाल मुँनबिलेया चु क्ल्ह्‍‍यो किंबै हग ङइ क्हिलाइन पिंस्यो, तलेबिस्याँ चु क्ल्ह्‍यो किंइबिस्याँ लिउँइँ ङइ योंल् त्हुबै सै न्होर आयों उ बिसि ङ ङ्हिंइमुँ।”
RUT 4:7 स्योंम इस्राएलीमैंइ क्ल्ह्‍‍यो किंब-चुँब लमा तारे ताँ पक्‍का तइ ओ बिबै ल्हागिर चुँबै म्हिइ किंबै म्हिलाइ ह्रोंसए जुत्ता प्लिसि पिंबै छ्या मुँल। छले चमैंइ ह्रोंसए ताँ पक्‍का लमल।
RUT 4:8 छतसि च चेंदोंर्बै नातो फेबै म्हिइ “क्हिइन चु म्रों किंन्” बिसि ह्रोंसए जुत्ता प्लिसि बोअजलाइ पिंइ।
RUT 4:9 झाइले बोअजइ चर्बै चिबनाँब्मैं नेरो ताँन् म्हिमैंने बिइ, “एलीमेलेक, महलोन नेरो किल्‍योनए ताँन् सैमैं ङइ नाओमीए योउँइँले किंइमुँ बिबै ताँर तिंयाँ क्हेमैं साँचि मुँ।
RUT 4:10 च बाहेक सियाबै म्हिए मिं खोंयोंइ आम्हरिगे बिसि महलोनए प्ह्रेंस्यो मोआबीस्यो रूथने ङइ ब्ह्‍या लइमुँ। चु सहरर्बै म्हिमैंए मिं प्ह्रिबै खाता नेरो ङ्योए म्हाँजोउँइँले महलोनए मिं खोंयोंइ म्हरिब् आरे बिबै ताँए साँचि या क्हेमैंन् मुँ।”
RUT 4:11 छबिमा मुल म्रार मुँबै चिबनाँब्मैं नेरो ताँन् म्हिमैंइ “चु ताँर ङि साँचि मुँ,” बिइ। “धै क्हिए धिंर खबै चु च्हमिरिलाइ इस्राएलए कुल बनेबै स्योंम्बै राहेल नेरो लेआलाइ धोंले आशिक पिंरिगे। एप्राताए कुलर क्हिलाइ ताँनइ म्हाँदिरिगे। बेथलेहेमर क्हिए मिं कालेदिरिगे।
RUT 4:12 झाइले याहवेहजी चु च्हमिरिउँइँले पिंबै प्हसेमैंउँइँले क्हिए सन्तान यहूदाउँइँले तामारइ फिबै च्ह फारेसए सन्तान धोंन् तरिगे।”
RUT 4:13 छले बोअजइ रूथलाइ ब्ह्‍या लसि ह्रोंसए धिंर बोइ। धै याहवेहजी आशिक पिंसि चमैंलाइ च्ह घ्रि पिंइ।
RUT 4:14 छतसि चर्बै च्हमिरिमैंइ नाओमीने बिइ, “याहवेहए मिं थेब् तरिगे! क्हिलाइ ल्होबै अर्को म्हि याहवेहजी पिंमा क्हिइ क्वें योंइ। इस्राएलर चु कोलोए मिं कालेदिरिगे।
RUT 4:15 क्हिए च्होंइ क्हिलाइ ल्हें म्हाँया लकमुँ, क्हिए ल्हागिर च्ह ङिइ भन्दा च थेब् ग। धै तोगो चउँइँले क्हिइ क्वें योंइमुँ। चु कोलोइ क्हिलाइ छारा छ पिंब्मुँ, धै क्हि माँब् तमा चुइ क्हि छेनाले न्हब्मुँ।”
RUT 4:16 नाओमीइ च कोलो सुसर लसि क्ह्‍वेंदर ख्वेमल।
RUT 4:17 चमैंए ङ्‍हेब्-ट्हुबमैंइ “नाओमीइ च्ह योंइ!” बिसि चए मिं ओबेद थेंइ। चुन् ओबेद यिशैए आबा नेरो दाऊदए बाज्यु तइ।
RUT 4:18 फारेसए च्ह हेस्रोन तइ,
RUT 4:19 हेस्रोनए च्ह आराम तइ, आरामए च्ह अम्‍मीनादाब तइ,
RUT 4:20 अम्‍मीनादाबए च्ह नहशोन तइ, नहशोनए च्ह सल्‍मोन तइ,
RUT 4:21 सल्‍मोनए च्ह बोअज तइ, बोअजए च्ह ओबेद तइ,
RUT 4:22 ओबेदए च्ह यिशै तइ, धै यिशैए च्ह दाऊद तइ।
EST 1:1 चुर मुँबै ताँमैं म्रुँ अहासूरसए पलोर तल। च म्रुँ अहासूरसइ भारात ह्‍युलउँइँले कूश ह्‍युल समा प्रसे ङ्हिस्युसे ङिं ह्‍युल फिर ग्याल्स लल।
EST 1:2 च त्हेर म्रुँ अहासूरसइ शूशनर मुँबै ह्रोंसए राजगद्दिर टिसि शासन लल।
EST 1:3 चइ शासन लबै सोंदिर ह्रोंसए ताँन् के लब्मैंए जिम्मा नोब्मैं नेरो चर्बै चिब्मैंए ल्हागिर थेबै भत्‍तेर पिंइ। छले भत्‍तेर पिंमा चर ताँन् ह्‍युलर्बै म्रुँमैंए प्हसेमैं, फारसी नेरो मादी सेनामैं, थे-थेबै म्हिमैं नेरो ताँन् ह्‍युलर्बै चिबनाँब्मैं खइ।
EST 1:4 च त्हेर म्रुँइ ह्रोंसए दरबारर मुँबै सै न्होरमैं नेरो सै ल्हें फेब छ्याँ-छ्याँबै सैमैं प्रसे प्रेज्यु त्हिंइ (म्हैंन ट्हुल्) समा उँइँइ।
EST 1:5 च त्हेमैं नुयाबै लिउँइँ म्रुँइ राजधानी शूशनर्बै थेब च्योंबै म्हिमैं ताँनलाइ भत्तेर पिंइ। च भत्तेर म्रुँए दरबारर्बै बगैंचा न्होंर ङिगैं समा तइ।
EST 1:6 च बगैंचर सुतिए तार्ग्या, पिङ्ग्या पर्दामैं च्योंल। च पर्दा तार्ग्या नेरो कलाँजी रङर्बै छोइ सिङ्गमरमर बिबै तार्ग्या युमाए त्होर मुँबै चाँदिए रिंङमैंर फैल, धै चर छ्याँ-छ्याँबै बुट्‍टा झोंबै ओल्ग्या, तार्ग्या सिङ्गमरमर नेरो सै ल्हें फेबै छ्याँ-छ्याँबै युमामैं ह्‍युर तिल। छलेन म्हि क्हुँबै ल्हागिर चए फिर मारा नेरो चाँदिए सोफामैं थेंल।
EST 1:7 धै सैं तोंदै म्रुँइ स्यो-स्योबै बुट्‍टा झोंबै माराए प्हेलर अँगुरए प्हा झोंसि चर टिबै म्हिमैंलाइ म्रेंन्ले थुँल् पिंइ।
EST 1:8 चर खाबलाज्यै या कर ल्हैदिसि थुँल् पिंल् आयोंमल। छतसि ह्रोंसए के लब्मैंने “म्हिमैंइ थुँल् खाँब्दे थुँल् पिंन्,” बिसि म्रुँइ ओंसोंन् बिथेंल।
EST 1:9 च त्हेर्न म्रुँस्यो बश्तीज्यै या म्रुँ अहासूरसए दरबारर च्हमिरिमैंए ल्हागिर भत्तेर पिंइ।
EST 1:10 भत्तेर लबै ङिरोर अँगुरए प्हा थुँदै निस्योदै सैं तोंसि म्रुँइ ह्रोंसए केब्छैंमैं ङि महूमान, बिज्‍था, हर्बोना, बिग्‍ता, अबगथा, जेथेर नेरो कर्कास हुइसि “म्रुँस्योलाइ मुकुट कुसि पैरेदिसि ङ ङाँर पखो,” बिसि ल्हैदिइ,
EST 1:11 तलेबिस्याँ म्रुँस्यो बश्ती बेल्‍ले छ्याँब मुँल। छतसि चर्बै चिबनाँब्मैं नेरो अरू ताँन् मुँयुमैंइ म्रुँस्यो म्रोंरिगे बिबै सैं म्रुँल् मुँल।
EST 1:12 दिलेया चइ खो बिसि सँउँसर कुलसेया म्रुँस्यो बश्ती आखमा म्रुँ मि धोंलेन् लुँबै ह्रिस खइ।
EST 1:13 च त्हेर “छाबै म्हिमैंए ल्हागिर तो लल् त्हुम्? नियम कानुनर तो मुँ?” बिसि क्होबर म्रुँइ ह्रब् सेब्मैंने सल्‍ला किंइ।
EST 1:14 फारस नेरो मादी ह्‍युलर्बै कर्शेना, शेथार, अद्‌माथा, तर्शीश, मेरेस, मर्सेना नेरो ममूकान बिबै म्हिमैं म्रुँने बालुन् मुँल। चमैं खोंयोंन् बिलै म्रुँ ङाँर ह्‍याल् योंमल धै च ग्याल्सर्बै थेबै मान योंब्मैं मुँल।
EST 1:15 छतसि म्रुँइ चमैंने बिइ, “म्रुँस्योलाइ किंबर ङइ म्हिमैं कुलसेया च आख। ङइ बिब चइ आङिं! तारे छाबै म्हिलाइ कानुनइ पिंल् त्हुबै सजैं तो मुँ? तलेबिस्याँ ङइ किंबर म्हिमैं कुलसेया च खल् आङिं।”
EST 1:16 छबिमा ममूकानइ बिइ, “म्रुँल् मत्त्रै आङि। म्रुँस्यो बश्तीइ म्रुँ अहासूरसए ग्याल्सर्बै ताँन् चिबनाँब्मैं नेरो अरू ताँन् मुँयुमैंल या अब्ब्रु वाइ।
EST 1:17 म्रुँस्यो बश्तीइ लबै केमैं तारे खन्तोदोंर्बै चमिरिमैंइ थेब्मुँ, धै चमैंज्यै या ह्रों-ह्रोंसए प्युँलाइ तो धोंइ आङ्हाँब्मुँ। ‘म्रुँ अहासूरइ म्रुँस्यो बश्ती ह्रोंसए ङाँर पोखो बिसि म्हिमैं कुलसेया म्रुँस्यो बश्ती आङि,’ बिसि चमैंइ बिब्मुँ।
EST 1:18 म्रुँस्यो बश्तीइ छ लइ बिब थेमा फारस नेरो मादीर्बै थे-थेबै घरानार्बै च्हमिरिमैंइ म्रुँए के लबै चिब्मैंने चु ताँ लब्मुँ। चु ताँइ लमा चर्बै च्हमिरिमैंज्यै या ह्रोंसए प्युँमैंलाइ तो धोंइ आङ्हाँब्मुँ, छलमा चमैंए प्युँमैं बेल्‍ले ह्रिस खब्मुँ।
EST 1:19 छतसि तारे बश्ती खोंयोंइ क्हिए ङाँर खल् आयोंरिगे बिब क्हिए सैं मुँस्याँ फरिसीमैं नेरो मादीमैंए कानुनइ थोल् आखाँबै प्ह्रिछ्या घ्रि प्ह्रिबर ल्हैदिद्। धै म्रुँस्यो बश्तीए क्ल्ह्‍योरि च भन्दा छ्याँबै च्हमिरिलाइ म्रुँस्यो लसि थेंन्।
EST 1:20 छले म्रुँइ प्ह्रिछ्या प्ह्रिइ बिबै ताँ ताँन् ग्याल्सर थेनेरिगे। छलस्याँ थेब च्योंब ताँन् च्हमिरिमैंइ ह्रों-ह्रोंसए प्युँइ बिब ङिंब्मुँ।”
EST 1:21 ममूकानइ बिबै चु ताँ म्रुँ नेरो म्रुँए चिब्मैंइ छ्याँब ङ्हाँइ, धै म्रुँइ ममूकानइ बिब् धोंन् लइ।
EST 1:22 झाइले “चर्बै मुँयुँमैंइ ह्रोंसए धिंर्बै परवार क्ल्हे लरिगे,” बिसि म्रुँइ ग्याल्सर्बै खन्तोदोंन् ह्रों-ह्रोंसए क्युइर प्ह्रिछ्या प्ह्रिसि कुलइ।
EST 2:1 लिउइ म्रुँ अहासूरसए ह्रिस म्हमा म्रुँस्यो बश्ती नेरो चइ लबै केए बिरोधर चइ प्ह्रिबै प्ह्रिछया मैंइ।
EST 2:2 छतमा म्रुँए सेवा लब्मैंइ बिइ, “क्हिए ल्हागिर छ्याँ-छ्याँबै छमिंमैं म्हैद्।
EST 2:3 ह्रोंसए ग्याल्सर्बै ताँन् ह्‍युलउँइँले क्हिइ छ्याँ-छ्याँबै छमिंमैं क्हि टिबै क्ल्ह्‍यो शूशनर्बै दरबरर पखो बिसि क्हिए के लबै म्हिमैं खटिदिद्। धै क्हिए के लबै म्हि हिचडा हेगेए जिम्मार चमैंलाइ थेंन्। धै चमैंलाइ पैरेबै सैमैं पिंन्।
EST 2:4 झाइले खाब् छमिंलाइ क्हिइ खोमुँ चलाइन बश्तीए क्ल्ह्‍योर म्रुँस्यो तरिगे।” चु ताँ म्रुँइ बेल्‍ले छ्याँब ङ्हाँइ, धै छान् लइ।
EST 2:5 राजधनि शूशनर बिन्यामिन खलकर्बै मोर्दकै मिं मुँबै यहूदी घ्रि मुँल। च याईरए च्ह मुँल, याईरए आबा शिमि मुँल, शिमिए आबा किश मुँल।
EST 2:6 बेबिलोनर्बै म्रुँ नबुकदनेसरइ यरूशलेमउँइँले यहूदार्बै म्रुँ यहोयाकीन च्युबर बोमा चु किश बिबै म्हि या चमैंने बालु बोल।
EST 2:7 चइ ह्रोंसए प्हाज्योंए च्हमि हदस्सा बिबै एस्तर धर्म च्हमि बनेल, तलेबिस्याँ चल आबा-आमा खाबै आरेल। च बेल्‍ले छ्याँब मुँल। चए आबा आमा सिबै लिउँइँ मोर्दकैइ च ह्रोंसए च्हमि धोंले न्हल।
EST 2:8 च्हम म्रुँइ प्ह्रिबै प्ह्रिछ्यार्बै ताँ खन्तोदोंन् थेनेइ। छतसि ल्हें म्हिमैंइ ह्रों-ह्रोंसए छमिंमैं शूशनर्बै म्रुँए दरबरर हेगेए जिम्मार पिंखइ। एस्तरलाज्यैया च छमिंमैंए जिम्मा किंबै म्हि हेगेए जिम्मा दरबरर पखइ।
EST 2:9 एस्तर म्रोंमा हेगे बेल्‍ले सैं तोंसि चइ पैरेबै ल्हागिर एस्तरलाइ छ्या-छ्याँबै सैमैं पिंइ। झाइले म्रुँए दरबारउँइँले चए सेवा लबै ल्हागिर हेगेइ छमिंमैं ङि खटेइ। च छमिंमैं टिबै धिंर अरूलाइ भन्दा चमैंलाइ छेन् लइ।
EST 2:10 एस्तरइ ह्रोंसए परवा नेरो ह्रेंए बारेर खाबलाज्यै या तोइ आबिल, तलेबिस्या मोर्दकैइ एस्तरने चु ताँ खाब्नेइ आबिद् बिल।
EST 2:11 एस्तर खै तरिइमुँ बिसि क्होबर च छमिंमैं टिबै धिंर्बै ह्‍यु घ्याँ मोर्दकैइ त्हिंइ ह्रोंसे प्ररिमल।
EST 2:12 च त्हेर छमिंमैं म्रुँ ङाँर बोब् भन्दा ओंसों म्हैंन टुल् समा मुर्रए छ्युगु, म्हैना टुल अत्तर फोसि छ्याँ-छ्याँबै सैमैंइ पैरेमिंमल। धै तिदिं योबै लिउँइँ छमिंमैं पलो-पलोले म्रुँ ङाँर बोमल।
EST 2:13 छमिं खाब् मुँलै खेंमैं टिबै धिंउँइँले म्रुँए दरबरर ह्‍यामा ह्रोंस चैदिबै सैमैं तो मुँलेया चइ बोसि ह्‍याल् योंमल।
EST 2:14 छमिं ङेसर म्रुँए ङाँर बोमल, धै प्हन्हाँधों न्हाँगर म्रुँइ न्हबै च्हमिरिमैंए जिम्मा किंबै म्हि हिचड शाश्गजए जिम्मार अर्को धिंर च बोमल, धै म्रुँ सैं तोंसि चए मिं तेसि आहुइन् समा च म्रुँ ङाँर ह्‍याल् आयोंमल।
EST 2:15 च त्हेर्न मोर्दकैए प्हाज्यों अबीहेलए च्हमि एस्तर म्रुँ ङाँर ह्‍याबै पलो खइ। (मोर्दकैइ एस्तरलाइ ह्रोंसए च्हमि धोंलेन् न्हल।) झाइले च छमिंमैं रुँबर थेंबै हिचड हेगेइ तो-तो बोद् बिल च मत्त्रे एस्तरइ बोइ, अरू तोइ आबो। एस्तरलाइ म्रोंब्मैं ताँनइ चलाइ छ्याँब ङ्हाँइ।
EST 2:16 म्रुँ अहासूरसइ ग्याल्स लसि टुदिंसे म्हैंन च्युल् तमा, तेबेत (पौष) बिबै म्हैनर, एस्तरलाइ दरबारर म्रुँ ङाँर बोइ।
EST 2:17 ताँन् अरू च्हमिरिमैं भन्दा म्रुँइ एस्तरलाइ बेल्‍ले खोइ, धै चए सैं ताँन् अरू छमिंमैं भन्दा एस्तर ङाँइ ह्‍याइ, छतसि म्रुँइ एस्तरए क्रर म्रुँस्योइ कुबै मुकुट कुमिंसि चलाइ बश्तीए क्ल्ह्‍योर म्रुँस्यो तल् पिंइ।
EST 2:18 च लिउँइँ म्रुँइ ह्रोंसए ग्याल्सर्बै ताँन् ह्‍युलर छुट्टि लसि ह्रोंसए ग्याल्सर्बै चिबनाँब्मैं नेरो ह्रोंसए सेवा लब्मैं हुइसि एस्तरए मिंर थेबै भत्तेर पिंइ। धै ताँनलाइ सै ल्हें फेबै सैमैं पिंइ।
EST 2:19 ताँन् छमिंमैं धबै खागु लमा मोर्दकै म्रुँए दरबारए मुल म्रार टिरिल।
EST 2:20 मोर्दकैइ बिब् धोंलेन् एस्तरइ च त्हे समा च खाब म्हिमैं ग बिसि नेरो ह्रोंसए परवाए बारेर खाब्नेया तोइ आबिल। तलेबिस्याँ कोलो ओंनोंन् चइ मोर्दकैइ बिबै ताँ ङिंमल।
EST 2:21 तिगैं मोर्दकै म्रुँए दरबारए मुल म्रार टिरिमा दरबारए म्रार राबै हिचड ङ्हिं बिग्थाना नेरो तेरेश म्रुँने ह्रिस खसि म्रुँलाइ सैबै ताँ लरिल।
EST 2:22 चु ताँ थेसि मोर्दकैइ म्रुँस्यो एस्तरने बिइ, धै एस्तरइ मोर्दकैइ बिबै ताँ म्रुँने बिइ।
EST 2:23 चु ताँ क्ह्रोंसेंन ङिंन उ आङिन बिसि ङ्योलु-च्युलु लमा चु ताँ क्ह्रोंसेन मुँन बिब् सेसि चमैं ङ्हिंलाइ सिं धुँर च्योवाइ। धै ओंसों तबै ताँमैं प्ह्रिथेंबै कितबर म्रुँए उँइँर चु ताँ या प्ह्रिथेंइ।
EST 3:1 च लिउँइँ म्रुँ अहासूरसइ अगागी ह्रेंर्बै हम्मदाताए च्ह हामानए मान बढिमिंसि ताँन् भन्दा थेबै चिब लमिंइ।
EST 3:2 झाइले म्रुँइ बिब् धोंलेन् म्रुँए दरबारर्बै मुल म्रार राब्मैं ताँनइ हामानलाइ च्हि तुँसि फ्योमल। दिलेया मोर्दकैइ बिस्याँ छ आलमल।
EST 3:3 छतसि म्रुँए दरबारर्बै मुल म्रार राब्मैंइ मोर्दकैने, “क्हिइ म्रुँइ बिबै ताँ तले आङिंल?”
EST 3:4 बिसि त्हिंइ ह्रोंसे बिरिमल। दिलेया मोर्दकइ चमैंए ताँ थेबै न्है आलमल। मोर्दकैइ “ङ यहूदी ग” बिसि चमैंने ओंसोंन् बिल। छतसि च अझै हामानलाइ फ्योब आफ्योब् बिसि चमैंइ “मोर्दकैइ क्हिलाइ आफ्योब् ग,” बिसि हामानने बिइ।
EST 3:5 छले मोर्दकैइ च्हि तुँसि चलाइ आफ्योबै ताँ सेसि हामान बेल्‍ले ह्रिस खइ।
EST 3:6 दिलेया चइ मोर्दकैए फिर यो झोंब मत्‍त्रे आङिं, म्रुँ अहासूरसए ग्याल्सर मुँबै चए ह्रेंर्बै ताँन् यहूदीमैंलाइ सैवाबै चाँजो लइ।
EST 3:7 छतसि म्रुँ अहासूरसइ ग्याल्स लबै च्युसे ङ्हिं बर्षर्बै नीसान (बैसाख) बिबै ओंसोंबै म्हैनरि “यहूदीमैंलाइ खाब म्हैनर्बै खाब त्हिंइर सैब?” बिसि त्हिंइ तोक्दिबर हामानए उँइँर म्हिमैंइ म्हैन ह्रोंसे चिट्ठा झोंमल। (च चिट्ठालाइ “पूर” बिमल।) चिट्ठा लिउँइँबै अदार (चैत्र) बिबै च्युसे ङ्हिं म्हैंनर्बै च्युसे सों त्हिंइर तइ।
EST 3:8 झाइले हामानइ म्रुँ अहासूरसने बिइ, “क्हिए ग्याल्सर मुँबै ह्रेंमैंए म्हाँजोर छाबै ह्रें घ्रि मुँ, चमैंए रोस अरू म्हिमैंल् भन्दा स्योन् मुँ। चमैंइ म्रुँए कानुनमैं आम्हाँदि, छतसि म्रुँए ल्हागिर चमैं ठिक आरे।
EST 3:9 चु ताँ क्हिए सैंर ठिकन् ग ङ्हाँस्याँ छाबै म्हिमैं सैल् त्हुम् बिबै प्ह्रिछ्या घ्रि प्ह्रिबर ल्हैदिद्। छलस्याँ च केए ल्हागिर ङज्यैया लाख सों किलो चाँदि पिंब्मुँ।”
EST 3:10 छबिमा म्रुँइ ह्रोंसए छाप मुँबै च्या चए योउँइँले प्लिसि यहूदीमैंए शत्तुर अगागी ह्रेंर्बै हम्मदाताए च्ह हामानलाइ पिंइ।
EST 3:11 झाइले म्रुँइ हामानने बिइ, “च चाँदि क्हिनेन् थेंन्, धै चु ह्रें या क्हिए योर्न पिंमुँ। क्हिइ तो लदा ङ्हाँमुँ, चन् लद्।”
EST 3:12 झाइले ओंसोंबै म्हैंनए च्युसे सों त्हिंइर म्रुँइ बिबै ताँमैं प्ह्रिबर म्हिमैं हुइइ, धै हामानइ बिब् धोंलेन् म्रुँए के लबै चिब्मैं, ताँन् क्ल्ह्‍योर्बै चिबनाँब्मैं नेरो ताँन् क्ल्ह्‍योर्बै ताँन ह्रेंमैंए चिब्मैंलाइ, चमैंए क्युइर्न प्ह्रिछ्या प्ह्रिसि कुलइ। म्रुँ अहासूरसए मिंउँइँलेन् च प्ह्रिछ्या प्ह्रिल, धै च प्ह्रिछ्यार म्रुँए छाप मुँबै च्याए छापै या झोंल।
EST 3:13 च प्ह्रिछ्यार तारे खबै च्युसे ङ्हिंर्बै अदार बिबै म्हैनए च्युसे सों त्हिंइर यहूदी ह्रेंर्बै कोलोमैं चिब्मैं, फ्रेंसि छमिमैं, खेब्-माँब्मैं, ताँन् सैवासि चमैंए ताँन् सै न्होर किंवाँन् बिबै ताँमैं च प्ह्रिछ्यार मुँल।
EST 3:14 तोक्दिबै त्हेर यहूदीमैं सैबर ताँन् म्हिमैं तयार तरिगे बिसि प्ह्रिछ्यार्बै ताँमैं ताँन् म्हिमैंइ सेल् त्हुम्।
EST 3:15 म्रुँइ ल्हैदिब् धोंले च प्ह्रिछ्या बोब्मैं युनन् क्ल्ह्‍यो क्ल्ह्‍योर ह्‍याइ। चु ताँमैं राजधानी शूशनर्बै म्हिमैंने या बिइ। चु ताँ थेसि शूशनर्बै म्हिमैं खैलबैल तइ, दिलेया म्रुँ नेरो हामान बिस्याँ प्हा थुँबर टिइ।
EST 4:1 चु ताँ था सेसि मोर्दकैइ ह्रोंसए क्वें ट्होदै नइ ह्रेंग खिसि मेप्रो फोसि थेबै कैले क्रोदै सहरजरे स्युर प्रइ।
EST 4:2 च्हमा मर्दकइ म्रुँए दरबारए मुल म्रा समा ह्‍याइ, तलेबिस्याँ नइ ह्रेंग खिसि खाबै या म्रुँए मुल म्राउँइँले न्होंर होंल् आयोंमल।
EST 4:3 छले म्रुँइ कुलबै प्ह्रिछ्या योंबै ताँन् क्ल्ह्‍योर्बै यहूदीमैं क्रोदै न्हुँ लसि बर्त टिइ, झाइले चमैं नइ ह्रेंगा खिसि मेप्रोए फिर टिइ।
EST 4:4 छतबै ताँ एस्तरए केब्स्योमैं नेरो हिचडमैंइ एस्तर ङाँर खसि बिमा म्रुँस्यो खैल-तोल तसि आदेइ। झाइले मोर्दकैइ नइ ह्रेंग प्लिइ भ्योंवासि छ्याँबै क्वें खिरिगे बिसि एस्तरइ चए ल्हागिर क्वेंमैं पिमिंइ, दिलेया मोर्दकैइ च क्वें खिल् आङिं।
EST 4:5 छतसि मोर्दकैइ खै तरिगे तो तरिगे बिसि क्होबर एस्तरइ हताक बिबै हिचड घ्रि हुइसि मोर्दकैइ ङाँर कुलइ। चु हिचड एस्तरए के लबै ल्हागिर म्रुँइ खटेबै म्हि मुँल।
EST 4:6 झाइले च हताक म्रुँए दरबारए उँइँर मुँबै चौरर मोर्दकैए ङाँर ह्‍याइ।
EST 4:7 छले हताक च ङाँर खमा मोर्दकैइ “म्रुँइ यहूदीमैं सैल् त्हुम् बिसि प्ह्रिछ्या प्ह्रिइ, धै युहूदिमैं सैबर हामानइ लाख सों किलो चाँदि पिंम्। छतसि ङ बेल्‍ले न्हुँ खइमुँ बिबै ता एस्तरने बिमिंन्,” बिसि हाताकने बिइ।
EST 4:8 म्रुँइ शूशनर यहूदीमैं सैल् त्हुम् बिसि प्ह्रिबै प्ह्रिछ्यार्बै ताँमैं अर्को काउदर सार्दिसि चु प्ह्रिछ्या एस्तरलाइ पिंन् बिइ, धै “ह्रोंसए ह्रेंमैं जोगेबै ल्हागिर क्हि म्रुँ ङाँर ह्‍यासि बिन्ति लद्!” बिबै ताँ या एस्तरने खैलसेया बिद् बिसि मोर्दकैइ हताक कुलइ।
EST 4:9 छले हताक ह्‍यासि मोर्दकैइ बिबै ताँन् ताँमैं एस्तरने बिइ।
EST 4:10 च लिउँइँ धबै मोर्दकैइ ङाँर ह्‍यासि चु ताँ बिद् बिसि एस्तरइ हताक कुलइ,
EST 4:11 “मुँयुमैं मुँलै च्हमिरिमैं मुँलै, म्रुँ आहसुरसए दरबार न्होंर होंम् बिस्याँ चए ल्हागिर घ्रि मत्‍त्रे ठिम मुँ। म्रुँइ ह्रोंसने मुँबै माराए प्हरे आस्योंस्याँ च सैवाब्मुँ, माराए प्हरे स्योंइ बिस्याँ च सोल् योंब्मुँ। ङै या म्रुँ ङाँर ह्‍याल् आयोंब सोंच्यु त्हिंइ तइ।”
EST 4:12 हताक ह्‍यासि एस्तरइ बिबै ताँमैं मोर्दकैने बिइ।
EST 4:13 धै मोर्दकैइ हताकने म्रुँस्यो एस्तरए ल्हागिर चु सँउँसर कुलइ, “क्हि म्रुँस्यो तसि म्रुँए दरबारर मुँ बिबर्न यहूदीमैं न्होंरि ङ मत्त्रे सोल् योंब्मुँ बिबै सैं क्हिइ आमैंन्।
EST 4:14 छाबै त्हेर क्हि आपोंल्‍ले टिइ बिस्याँ यहूदीमैं जोगेमिंबर अरूमैंन् त्होंब्मुँ, दिलेया क्हि नेरो क्हिए आबाए सन्तानमैं ताँन् सिब्मुँ। ह्रोंसए ह्रेंमैंलाइ जोगेबै ल्हागिर्न क्हि चु त्हेर्न म्रुँस्यो तसि म्रुँए दरबारर टिल् योंइ उ?”
EST 4:15 धबै एस्तरइ मोर्दकै ङाँर छ बिसि कुलइ,
EST 4:16 “छ बिस्याँ क्हि ह्‍यासि शूशनर्बै ताँन् यहूदीमैं खागु लद्, धै सोंरो समा त्हिंयाँ म्हुँइँस तोइ आचल्‍ले तोइ आथुँन्ले ङए ल्हागिर बर्त टिद्। ङ नेरो ङए केब्स्योमैं या छलेन् बर्त टिम्। च लिउँइँ ठिमए बिरोधर मुँलैया ङ म्रुँ अहासूरस ङाँर ह्‍याब्मुँ। सिल् त्हुम् बिस्याँ, ङ सिब्मुँ।”
EST 4:17 च ताँ थेसि मोर्दकै ह्‍यासि एस्तरइ चने बिब् धोंन् लइ।
EST 5:1 बर्त टिसि सोंरोर एस्तरइ म्रुँस्योइ खिल् त्हुबै क्वें खिइ, धै म्रुँए दरबारए न्होंर्बै ह्‍युर ह्‍यासि रारिइ। च त्हेर म्रुँ ह्रोंसए गद्दिर क्हुँसि मुल म्राउँइँ ह्‍वेंरिल।
EST 5:2 च्हमा एस्तर ह्‍युर रारिब् म्रोंसि म्रुँइ ह्रोसए योर्बै माराए प्हरे एस्तरउँइँ स्योंइ। छलमा एस्तर चेंदो ह्‍यासि म्रुँए प्हरेए च्होर छुइ।
EST 5:3 झाइले म्रुँइ बिइ, “म्रुँस्यो एस्तर, क्हिलाइ तो चैदिइमुँ? क्हिइ तो ह्रिलैया ङइ पिंस्यो, ङए आधा ग्याल्स ह्रिलेया ङइ क्हि पिंस्यो।”
EST 5:4 छबिमा एस्तरइ बिइ, “ओ म्रुँ, क्हिइ छ्याँब ङ्हाम् बिस्याँ हामान नेरो क्हि खैलसेया खमिंन्। तिंयाँ ङइ क्हिए ल्हागिर लिंबै चबै सैमैं ह्‍योथेंइमुँ।”
EST 5:5 छबिमा एस्तरइ बिब् धोंलेन् म्रुँइ “हामान युनन् हुइ पउ,” बिसि म्हि कुलइ। धै म्रुँ नेरो हामान एस्तरए ङाँर चब् चबर ह्‍याइ।
EST 5:6 च्हमा अँगुरए प्हा थुँदै म्रुँइ एस्तरने धबै बिइ, “क्हिइ ङने तो ह्रिइमुँ? तो ह्रिलैया ङइ पिंस्यो। क्हिइ ह्रिदा ङ्हाँबै सै तो जा? बिद्, ङ‍ए आधा ग्याल्स समान् ह्रिलैया ङइ पिंस्यों।”
EST 5:7 एस्तरइ बिइ, “ङए बिन्ति चुन् मुँ:
EST 5:8 ओ म्रुँ, ङए ताँ ङिंम् बिस्याँ, ङइ ह्रिबै सै पिंम् बिस्याँ, प्हन्हाँगै या क्हेमैंए ल्हागिर ङइ ह्‍योथेंबै चबै सैमैं चबर खमिंन्। धै च्हमन् ङए सैंर्बै ताँमैं ङइ क्हिने बिस्यो।”
EST 5:9 च त्हिंइर हामान सैं तोंदै ह्‍यारिमा मोर्दकै म्रुँए दरबारए मुल म्राए ओसों म्रोंइ। हामान म्रोंलेया च आरे, आङ्हिंन्ले क्हुँइ। छाब् म्रोंसि हामान बेल्‍ले ह्रिस खइ।
EST 5:10 छ तलेया हामानइ ह्रोंसए ह्रिस थौंदसि धिंर ह्‍याइ। झाइले चइ ह्रोंसए थुमैं नेरो ह्रोंसए प्ह्रेंस्‍यो जेरेश हुइबर म्हि कुलइ।
EST 5:11 चमैं खबै लिउँइँ हामानइ ह्रोंसए सै न्होरमैं कति मुँ बिबै ताँ, च्ह-च्हमि कति मुँ बिबै ताँ नेरो के लब्मैंए न्होंर म्रुँइ चलाइ खैले ताँन् भन्दा थेबै पदर थेंमिंइ बिबै ताँ चमैंने बिइ।
EST 5:12 हामानइ धबै बिइ, “च्हौ मत्त्रे आङिं, के लब्मैं न्होंर म्रुँने बालु चब् थुँब लबर म्रुँस्यो एस्तरइ ङलाइ मत्त्रे हुइइ। धबै प्हान्हागै या म्रुँने बालुन् चब् थुँब् लबर ङलाइ हुइमुँ।
EST 5:13 दिलेया ङल थेबै मान, ल्हें सै न्होरमैं नेरो च्ह-च्हमिमैं मुँलेया च यहूदी मोर्दकै म्रुँए दरबारए मुल म्राए ओसों क्हुँरिब् म्रोंन् समा ङए सैंर सन्तोक आत।”
EST 5:14 चु ताँ थेसि चए प्ह्रेंस्यो जेरेश नेरो चए ताँन् थुमैंइ बिइ, “चलाइ च्योसि सैवाबै ल्हागिर ङ्हिंस्युसे ङ्‍ह मिटर नुबै त्हो क्योदु, धै प्हान्हा न्हाकर्न च त्होर मर्दाकैलाइ च्योवासि सैबर ल्हैदिद् बिसि म्रुँने बिदु। च लिउँइँ सैं तोंदै म्रुँने बालु म्रुँस्योइ ह्‍योथेंबै चब् चबर ह्‍याद्।” छबिमा चु ताँ हामानइ बेल्‍ले छ्याँब ङ्हाँइ, धै चइ मोर्दकै च्योवाबै ल्हागिर त्हो क्योबर ल्हैदिइ।
EST 6:1 च म्हुँइँसर म्रुँलाइ तिफुँइ न्हरु आख। छतसि म्रुँइ ह्रोंसए के लबै म्हि घ्रिने चए ग्याल्सर ओसों तल् खाँबै ताँमैं प्ह्रिथेंबै कितब पखसि खेमिंन् बिसि ल्हैदिइ, धै चइ कतब पखसि म्रुँए ल्हागिर खेमिंइ।
EST 6:2 म्रुँए म्रार राबै म्हि ङ्हिं बिग्थाना नेरो तेरेशइ म्रुँ अहासूरसलाइ सैबै चाँजो लइमुँ बिबै ताँ च कितबर प्ह्रिथेंल। धै च ताँ मोर्दकैउँइँले सेल बिसि थेइ।
EST 6:3 झाइले चु ताँ सेसि म्रुँइ बिइ, “चु ताँए ल्हागिर मोर्दकैलाइ तो इनाम पिंइ दि?” धै म्रुँए सेवा लब्मैंइ बिइ, “मोर्दकैए ल्हागिर तोइ इनाम आपिंइमुँ।”
EST 6:4 छबिमा म्रुँइ “चोकर खाब् मुँ?” बिसि ङ्योएइ। च त्हेर्न हामानइ मोर्दकै च्योब बिसि चइ बनेबै त्हो क्योसि म्रुँने च ताँ बिबर दरबारर्बै चोकर फेखल।
EST 6:5 छतसि म्रुँए सेवा लब्मैंइ बिइ, “चोकर हामान रारिइमुँ।” धै म्रुँइ “च न्होंर पखो,” बिसि ल्हैदिइ।
EST 6:6 झाइले हामान न्होंर खमा, म्रुँइ चने “म्रुँइ ह्रोंसए सैंउँइँलेन् मान् इजेत पिंदा ङ्हाँबै म्हिए ल्हागिर तो लल् त्हुमुँ?” बिसि चने ङ्योएइ। छबिमा “म्रुँइ मान् इजेत पिंबै म्हि ङ बाहेक् अरू खाब् मुँलै?” बिसि हामानइ मैंइ।
EST 6:7 छतसि चइ म्रुँने बिइ, “खाबलाइ म्रुँइ मान्-इजेत पिंदा ङ्हामुँ,
EST 6:8 चए ल्हागिर म्रुँइ ह्रोंसइ खिबै क्वें, म्रुँइ क्रेबै घोडा नेरो म्रुँए क्रर कुबै मुकुट पखरिगे।
EST 6:9 च क्वें नेरो घोडा म्रुँए के लब्मैं न्होंर्बै ताँन् भन्दा थेबै पद मुँबै चिबए योर पिंरिगे, धै च चिबइ म्रुँइ मान-इजेद पिंदा ङ्हाँबै म्हिलाइ च सैमैं पैरेमिंरिगे। धै सहरर्बै घ्याँजरे च घोडा फिर क्रेसि स्युररिमिमा ‘म्रुँइ मान-इजेत पिंबै म्हिलाइ खैबै इनाम पिंइमुँ ङ्‍ह्‍योद्!’ बिदै चिबनाँब्मैं चए ओंसों-ओंसों घ्याँजरे ओररिगे।”
EST 6:10 झाइले म्रुँइ हामानने बिइ, “छ बिस्याँ क्हिइ बिब् धोंलेन् च क्वें नेरो घोडा युनन् पखो, धै यहूदी मोर्दकैए ल्हागिर छान् लद्। च दरबारर्बै ओंसों मुल म्रार टिरिम्। क्हिइ बिबै ताँन् ताँमैंर घ्रि या आछुटिरिगे।”
EST 6:11 म्रुँइ बिब् धोंलेन् हामानइ च क्वें पखसि मोर्दकै घोडा फिर क्रेमिंइ, धै सहरर्बै घ्याँजरे स्युरदै बोसि ओंसों-ओसों हामान छ बिदै ओरइ, “म्रुँइ मान-इजेत पिंबै म्हिलाइ खैबै इनाम पिंइमुँ ङ्ह्‍योद्!” बिसि बिइ।
EST 6:12 झाइले मोर्दकै धबै म्रुँए मुल म्रार एखइ। हामान बिस्याँ सुँ हुदै धिंर ह्‍याइ।
EST 6:13 धै चइ ह्रोंसए प्ह्रेंस्यो जेरेश नेरो ताँन् थुमैंने ह्रोंसए फिर तखबै ताँन् ताँमैं बिइ। धै चलाइ सल्‍ला पिंबै थुमैं नेरो चए प्ह्रेंस्यो जेरेशइ चने बिइ, “च मोर्दकै यहूदी ह्रें ग बिस्याँ, क्हिइ चए न्होह्रों लल् आखाँ। क्हिइ चए फिर ट्होल् आखाँ, क्हिइ चए ओंसों खैलेबिले कुरल् त्हुब्मुँ।”
EST 6:14 छले चमैंइ हमानने प्रे च ताँमैं लरिबै त्हेर म्रुँए के लबै हिचडामैं फेखइ, धै हामानलाइ एस्तरए ङाँर चब चबर बोयाइ।
EST 7:1 झाइले म्रुँ नेरो हामान म्रुँस्यो एस्तर ङाँर चब् चबर ह्‍याइ।
EST 7:2 च अर्को त्हिंइर अँगुरए प्हा थुँदै म्रुँइ म्रुँस्यो एस्तरने धबै बिइ, “म्रुँस्यो एस्तर, तारे क्हिए सैंर तो मुँ? बिद्। क्हिइ तो ह्रिदा ङ्हाँइमुँ? च ङइ क्हि पिंस्यो। क्हिइ ङए आधा ग्याल्स ह्रिलैया ङइ पिंस्यो।”
EST 7:3 छबिमा म्रुँस्यो एस्तरइ बिइ, “ओ म्रुँ, क्हि ङए फिर ल्हयो खम् बिस्याँ, धै ङए यो छ्युँ पिंदा ङ्हाँस्याँ, ङ नेरो ङए ह्रेंमैं जोगेमिंन्।
EST 7:4 तलेबिस्याँ ङ नेरो ङए ह्रेंमैंलाइ सैवासि ङिए मिं-क्ह्रन् म्हवाद् बिसि म्हिमैंलाइ मुइ पिंइमुँ। ङिलाइ केब्छैं-केब्स्योमैं तबर मत्‍त्रे चुँवाब् ग बिस्याँ ङ आपोंन्ले टिमल, च्हौ च्योंबै ताँर म्रुँलाइ छोंरों ङ्हाँन् आलमल।”
EST 7:5 चु ताँ थेसि म्रुँ अहासूरसइ एस्तरने बिइ, “छाबै के लबै म्हि खाब् जा? च खनिर मुँ?”
EST 7:6 एस्तरइ बिइ, “ङलाइ सैल् म्हैबै ङिए शत्तुर चु दुष्‍ट हामानन् ग।” छ बिब् थेसि म्रुँ नेरो म्रुँस्योए ओंसों हामान बेल्‍ले ङ्हिंइ।
EST 7:7 झाइले म्रुँ ह्रिसइ मि धों तसि अँगुरए प्हा थुँरिबै क्ल्ह्‍योउँइँले रेसि दरबारए बगैंचाए बैरु ह्‍याइ। हामान बिस्याँ ह्रोंसए ज्यु जोगेबर म्रुँस्यो एस्तरने यो छ्युँ लरिइ, तलेबिस्याँ तारे म्रुँइ दण्ड पिब्मुँ बिब चइ सेल।
EST 7:8 झाइले म्रुँ दरबारए बगैंचाउँइँले अँगुरए प्हा थुँबै क्ल्ह्‍योर धबै एखमा एस्तर रोबै सोफाए फिर हामान क्रेरिब म्रोंइ। छाब् म्रोंसि म्रुँ ह्रिस खसि “चुइ ङए धिंर, ङए ओंसोंन् म्रुँस्योलाइ न्होंवाल् म्हैमुँ उ तो जा?” बिसि ओरइ। म्रुँइ छ बिबै तोदोंन् हिचडमैंइ हामानए लि हुवाइ।
EST 7:9 झाइले म्रुँए ओंसों खोंयोंइ रारिबै हिचडामैं न्होंर्बै हर्बोनाइ बिइ, “ङ्ह्‍योद्, क्हिलाइ जोगेबै मोर्दकैलाइ च्योवाब् बिसि चुइ ह्रोंसए धिंर ङ्हिस्युसे ङ्‍ह मिटर नुबै त्हो क्योइमुँ।” झाइले म्रुँइ बिइ, “छ बिस्याँ च त्होर चलाइन च्योवाद्।”
EST 7:10 म्रुँइ छबिमा मोर्दकैलाइ च्योब् बिसि क्योबै त्होर चमैंइ हामानलाइन च्योवाइ। च लिउँइँ बल्‍ल म्रुँए ह्रिस म्हइ।
EST 8:1 च त्हिंइर्न म्रुँ अहासूरसइ यहूदीमैंए शत्तुर हामानए धिं-नाँ ताँन् एस्तरलाइ पिंवाइ। झाइले एस्तरइ म्रुँने मोर्दकै ङए प्हाज्यों ग बिइ, छतसि च त्हेउँइँले मोर्दकै म्रुँ ङाँर खल् योंइ।
EST 8:2 झाइले म्रुँइ ह्रोंसए योर्बै च्या प्लिसि मोर्दकैलाइ पिंइ। च च्या म्रुँइ ओंसों हामान पिंल, धबै लिउँइँ चइन प्हेंवाइ। धै एस्तरज्यै या हामानए धिं-नाँए जिम्मा मोर्दकैलाइ पिंइ।
EST 8:3 धबै एस्तरइ म्रुँए प्हले फ्योसि क्रोदै बिइ, “अगागी ह्रेंर्बै म्हि हामानइ यहूदीमैंए बिरोधर लल् म्हैबै आछ्याँबै चाँजोमैं स्योवामिंन्।”
EST 8:4 छबिमा म्रुँइ एस्तर ङाँइ ह्रोंसए माराए प्हरे स्योंमा एस्तर रेसि म्रुँए ओंसों राइ।
EST 8:5 एस्तरइ धबै बिइ, “ङइ बिबै ताँ क्हिइ छ्याँब ङ्हाँस्याँ, ङए फिर ल्हयो मुँस्याँ, धै चु के क्हिइ ठिक ङ्हाँस्याँ, अगागी ह्रेंर्बै हम्मदाताए च्ह हामानइ यहूदीमैंलाइ नास लल् त्हुम् बिसि प्ह्रिबै प्ह्रिछ्यार्बै ताँमैं थोबर अर्को प्ह्रिछ्या प्ह्रिबर ल्हैदिसि क्हिए ग्याल्सर्बै ताँन् क्ल्ह्‍यो-क्ल्ह्‍योर पिमिंन्।
EST 8:6 तलेबिस्याँ ङए म्हिमैंए फिर तखबै दु:ख ङइ खैले सैदिब? ङए परवा नास तब ङइ खैले ङ्‍ह्‍योब?”
EST 8:7 छबिमा म्रुँ अहासूरसइ म्रुँस्यो एस्तर नेरो यहूदी मोर्दकैने बिइ, “ङ्ह्‍योद्, ङइ हामानए ताँन् सैमैं म्रुँस्यो एस्तरलाइ पिंइमुँ, हामान बिस्याँ च्योसि सैवाइमुँ, तलेबिस्याँ चइ यहूदीमैंलाइ सैल् म्हैइ।
EST 8:8 दिलेया म्रुँए मिंर प्ह्रिसि चइ च्याए छाप ल्हैदिबै प्ह्रिछ्या खाबज्यै थोल् आखाँ। छतसि तारे क्हेमैंइ क्हेमैंए ल्हागिर खैले छ्याँब तम् ङ्हाँमुँ, छलेन ङए मिंर अर्को प्ह्रिछ्या घ्रि प्ह्रिद्, धै ङए च्याए छाप ल्हैदिद्।”
EST 8:9 छतसि सीवान (आषाढ) म्हैनर्बै ङ्हिस्युसे सों त्हिंइर म्रुँइ खटिदिबै सचिबमैं ताँन् मोर्दकैइ हुइइ, धै मोर्दकैइ बिब् धोंलेन् भारातउँइँले कूश ह्‍युल् समार्बै प्रसे ङ्हिस्युसे ङि ह्‍युलर्बै ताँन् क्रथे मिंथेमैं नेरो चिबनाँब्मैंए खें-खेंमैंए लिपि नेरो क्युइर प्ह्रिछ्या प्ह्रिइ। छलेन युहूदिमैंए ल्हागिरै या चमैंए लिपि नेरो क्युर्न प्ह्रिछ्या प्ह्रिइ।
EST 8:10 च प्ह्रिछ्या मोर्दकैइ म्रुँ अहासूरसए मिंर प्ह्रिसि म्रुँए च्याए छाप ल्हैदिइ। धै प्ह्रिछ्या बोबै ल्हागिर बेल्‍ले न्हेल् खाँबै घोडामैंर म्हिमैं क्रेमिंसि क्ल्ह्‍यो-क्ल्ह्‍योर कुलइ।
EST 8:11 “क्ल्ह्‍यो-क्ल्ह्‍योर्बै यहूदीमैं ताँन् क्ह्रिसि ह्रोंसए ह्रेंमैंलाइ जोगेल् त्हुम्। धै क्हेमैं नेरो क्हेमैंए म्रिं-प्हसेमैंने नेखबै ह्रेंमैं खाबन् मुँलेया, आर्मि पुलिसमैं मुँलेया, क्हेमैंज्यै या चमैं सैवासि चमैंए मि-क्ह्रन् म्हवाल् खाँम्, धै चमैंए धिं-नाँमैं या क्हेमैंइ किंल् खाँम्।
EST 8:12 अदार (फागुन) बिबै च्युसे ङ्हिं म्हैनर्बै च्युसे सों त्हिंइर क्हेमैंइ चु के लल् खाँम्,” बिसि च प्ह्रिछ्यार प्ह्रिल।
EST 8:13 तोक्दिबै त्हिंइर यहूदीमैंइ ह्रोंसए शत्तुरमैंने खि किंल् खाँरिगे बिसि चु प्ह्रिछ्यार्बै ताँमैं क्ल्ह्‍यो-क्ल्ह्‍योर्बै ताँन् म्हिमैंलाइ बिबर ल्हैदिल।
EST 8:14 छतसि म्रुँइ बिब् धोंलेन् म्रुँए छ्याँबै घोडामैंर क्रेसि म्हिमैं प्ह्रिछ्या बोसि क्ल्ह‍यो-क्ल्ह्‍योर ह्‍याइ। धै म्रुँए टिबै क्ल्ह्‍यो शूशनर्बै म्हिमैंने या चु ताँ बिइ।
EST 8:15 च लिउँइँ म्रुँमैंइ खिबै तार्ग्या नेरो मु रङर्बै क्वें खिसि मोर्दकै कलाँजी रङर्बै सुतिए पछ्यौर पोइ, धै माराइ बनेबै मुकुट कुसि मोर्दकै म्रुँए दरबाराउँइँले त्होंइ। छले शूशन सहरर मुँबै ताँन् म्हिमैं बेल्‍ले सैं तोंदै उफर्दिइ,
EST 8:16 धै यहूदीमैं बेल्‍ले सैं तोंइ, तलेबिस्याँ तारे ङ्हिंल् आत्हुमल।
EST 8:17 छतमा म्रुँए ग्याल्सर्बै ताँन् क्ल्ह्‍योजरे मुँबै यहूदीमैं सैं तोंदै लिं-लिंबै चबै सैमैं चबै त्हिंइ तइ। च्हमा अरू ह्रेंर्बै ल्हें ह्रेंमैं या यहूदी ह्रें तखइ, तलेबिस्याँ चमैं यहूदीमैंने ङ्हिंइ।
EST 9:1 म्रुँइ ओंसोंन् बिब् धोंले अदार (फागुन) बिबै च्युसे ङ्हिं म्हैनर्बै च्युसे सोंगैंर प्ह्रिछ्यार प्ह्रिब् धोंलेन् लबै त्हे तखइ। च त्हिंइर यहूदीमैंए शत्तुरमैंइ यहूदीमैं खेंमैंए न्होंर थेंल् योंबै आशा लल, दिलेया उल्टोन् चमैं यहूदीमैंए न्होंर टिल् त्हुबै त्हिंइ तइ।
EST 9:2 च त्हिंइर म्रुँ अहासूरसए ग्याल्सर मुँबै क्ल्ह्‍यो-क्ल्ह्‍योर्बै ताँन् यहूदीमैं ह्रों-ह्रोंसए क्ल्ह्‍योर खेंमैंने नेबर खब्मैंलाइ सैब् बिसि खागु तल। छतसि म्हिमैं ङ्हिंसि चमैंने नेखल् आखाँ।
EST 9:3 च क्ल्ह्‍योर्बै ताँन् चिब्मैं, क्रथे मिंथेमैं, म्रुँए के लब्मैं नेरो म्रुँए सेवा लब्मैंइ यहूदीमैंलाइ ल्होइ, तलेबिस्याँ चमैं मोर्दकैने ङ्हिंइ।
EST 9:4 म्रुँए दरबारर के लब्मैं न्होंर्बै क्रथे मोर्दकै थेब तइमुँ, धै चइ थेब-थेबै के लबै हग योंइमुँ बिबै ताँ ताँन् क्ल्ह्‍योजरे थेनेइ।
EST 9:5 छतसि यहूदीमैंइ खेंमैंलाइ हेल लब्मैंलाइ खै लदा ङ्हामुँ छान् लल् योंइ। धै चमैंइ ताँन् शत्तुरमैं सेलाँइ सैवाइ।
EST 9:6 यहूदीमैंइ राजधानी शूशनर ङ्‍हप्र मुँयुँमैं सैवाइ।
EST 9:7 धै चमैंइ पर्शन्दाता, दल्फोन, अस्पाता,
EST 9:8 पोराता, अदलिया, अरीदाता,
EST 9:9 पर्मशता, अरीशै, अरीदै, नेरो बैजाता सैवाइ।
EST 9:10 दिलेया यहूदीमैंइ चमैंए सैमैं तोंइ आकिं। चुमैं यहूदीमैंए शत्तुर हामानए च्ह च्यु हम्मदाताए क्वेंमैं मुँल।
EST 9:11 च त्हिंइर्न शूशनर्बै राजधानीर मुँयुँमैं कति सैवाइमुँ बिबै ताँ म्हिमैंइ म्रुँने बिइ।
EST 9:12 चु ताँ थेसि “यहूदीमैंइ शूशनर्बै राजधानीर मुँयुँमैं ङ्‍हप्र नेरो हामानए च्ह च्यु सैवान!” बिसि म्रुँइ म्रुँस्यो एस्तरने बिइ। “चुरमि छ लइ बिस्याँ अरू क्ल्ह्‍योरम् झन खै लगे? तारे क्हिए सैंर तोइ ताँ मुँस्याँ बिद्। तो ह्रिलेया ङइ पिंस्यो।”
EST 9:13 एस्तरइ बिइ, “क्हिए सैं मुँस्याँ तिंयाँ खै लल प्हन्हागै या यहूदीमैंइ शूशनर छान् लल् योंरिगे, धै हामानए च्ह च्युए सिनु त्होर च्योवारिगे।”
EST 9:14 छबिमा म्रुँइ म्हिमैंने छान् लबर ल्हैदिइ, धै म्हिमैंइ हामानए च्ह च्युए सिनु त्होर च्योवाइ।
EST 9:15 धबै अदार म्हैनर्बै च्युसे प्लिगैंरै या शूशनर्बै यहूदीमैं ताँन् खागु तसि चर्बै मुँयुँमैं सोंप्र सैवाइ। दिलेया चमैंने मुँबै सैमैं तोंइ आकिं।
EST 9:16 छलेन म्रुँए ग्याल्सर्बै अरू क्ल्ह्‍योजरेबै यहूदीमैं या ह्रों-ह्रोंसए क्ल्ह्‍योर खागु तसि ह्रोंसए म्हिमैं जोगेबर शत्तुरमैंने नेइ। छले नेमा चमैंइ ङिच्युसे हजार ङ्‍ह म्हिमैं सैवाइ, दिलेया चमैंने मुँबै सैमैं तोइ आकिं।
EST 9:17 छले अदार म्हैनर्बै च्युसे सोंगैंर चमैंइ खेंमैंए शत्तुरमैं सैवाइ, धै च्युसे प्लिगैंर भों न्हसि सैं तोंदै लिं-लिंबै चबै सैमैं चइ।
EST 9:18 दिलेया शूशनर्बै यहूदीमैं बिस्याँ अदार म्हैनर्बै च्युसे सों नेरो च्युसे प्लि, चु ङ्हिरोन् खेंमैंए शत्तुरमैंने नेइ। छतसि च्युसे ङ्‍‍हगैंर लिं-लिंबै चबै सैमैं चसि सैं तोंदै चमैं भों न्हइ। छले चमैंइ चु त्हिंइलाइ चाड म्हाँदिइ।
EST 9:19 दिलेया नाँस जरेबै यहूदीमैंइ बिस्याँ अदार म्हैनर्बै च्युसे प्लिगैंर चाड म्हाँदिम्। च त्हिंइर चमैंइ घ्रिइ घ्रिलाइ चबै सैमैं पिमिंम्।
EST 9:20 मोर्दकैइ चु ताँन् ताँमैं प्ह्रिबर ल्हैदिइ। झाइले म्रुँ अहासूरसए ह्‍युलर मुँबै ताँन् क्ल्ह्‍यो जरेबै यहूदीमैंलाइ प्ह्रिछ्यामैं पिमिंइ।
EST 9:21 च प्ह्रिछ्यार “तारे सेरे बर्ष ह्रोंसे चु अदार म्हैनए च्युसे प्लि नेरो च्युसे ङ्‍ह त्हिंइलाइ बेल्‍ले छेन्ले म्हाँदिद्।
EST 9:22 च त्हिंइ ङ्योइ शत्तुरमैंलाइ ट्होबै त्हिंइ ग। च त्हिंइ ङ्यो न्हुँ नेरो दु:खउँइँले फ्रेसि छिं ङ्हाँबै त्हिंइ ग। छतसि सैं तोंदै म्हाँदिद्। च त्हिंइर घ्रिइ घ्रिलाइ चबै सैमैं पिमिंन्, धै आयो-आख्युब्मैंलाइ चल् पिंन्,” बिसि प्ह्रिल।
EST 9:23 छले मोर्दकैइ कुलबै प्ह्रिछ्यार्बै ताँमैं ताँन् यहूदीमैंइ ङिंइ, धै च छ्यान् तइ।
EST 9:24 तलेबिस्याँ च त्हेए ल्हागिर्न अगागी ह्रेंर्बै हम्मदाताए च्ह यहूदीमैंए शत्रु हामानइ यहूदीमैं सैब् बिसि चिट्टा झोंबै चाँजो लइ, चिट्टाने हिब्रू क्युइर “पूरिम्” बिम्।
EST 9:25 हामानइ यहूदीमैं सैबै चाँजो लइमुँ बिबै ताँ एस्तरउँइँले म्रुँ सेसि “हामानइ यहूदीमैंलाइ खै लल् म्हैइमुँ चलाज्यै छन् लद्!” बिसि म्रुँइ प्ह्रिछ्या प्ह्रिबर ल्हैदिइ। छले ह्रोंसै लबै आछ्याँबै चाँजोइ लमा हामान नेरो चए च्हमैं त्होर च्योवाइ।
EST 9:26 (छतसि च त्हिंइमैंलाइ “पूर” बिबै ताँफुँउँइँले “पूरिम” बिइ।) च प्ह्रिछ्यार प्ह्रिबै ताँमैं ताँन् चमैंए छ्हर तल।
EST 9:27 छतसि यहूदीमैंइ “बर्ष ह्रोंसे ङ्हिरो खेंमैं, खेंमैंए प्हसेमैं नेरो यहूदी तखब्मैं ताँनइ चाड म्हाँदिल् त्हुम्,” बिसि ठिम बनेइ।
EST 9:28 “यहूदीमैंए ल्हागिर च त्हिंइमैंर तो-तो तल बिबै ताँ क्हेमैंइ खोयोंन् बिलै आम्‍लेरिगे बिसि ताँन् क्ल्हयोर्बै यहूदीमैंइ चु चाड म्हाँदिल् त्हुम्।”
EST 9:29 चु ताँ धबै अबीहेलए च्हमि म्रुँस्यो एस्तर नेरो यहूदी मोर्दकैइ “चु पूरिम बिबै चाड खैले बिलै म्हाँदिल् त्हुम्। चु ङ्योए ल्हागिर थेबै त्हिंइ ग,” बिसि थेबै अधिकारले अर्को प्ह्रिछ्या प्ह्रिइ।
EST 9:30 धै म्रुँ अहासूरसए ग्याल्सर मुँबै प्रसे ङ्हिस्युसे ङि क्ल्ह्‍यो-क्ल्ह्‍योर्बै यहूदीमैंलाइ “तारे ङ्यो ङ्हिंल् आत्हु, ङ्योइ न्हुँ लल् आत्हु,” बिसि एस्तरइ चमैंलाइ भों खबै प्ह्रिछ्यामैं पिमिंइ।
EST 9:31 झाइले यहूदी मोर्दकै नेरो म्रुँस्यो एस्तरइ “चु पूरिम बिबै चाड ठिक त्हिंइर म्हाँदिद्,” बिसि ल्हैदिइ। (यहूदीमैंइ खेंमैंज्यै ह्रोंस नेरो ह्रोंसए सन्तानमैंए ल्हागिर ओंसों योंबै दु:खमैं मैंदै बर्त टिसि सैं नब् म्हाँदिबै ठिम लब् धोंले चमैंइ पूरिम बिबै चाड म्हाँदिबै ठिम लइ।)
EST 9:32 छले म्रुँस्यो एस्तरइ पूरिमए ल्हागिर पक्‍का लबै ताँ कितबर प्ह्रिबर ल्हैदिइ।
EST 10:1 झाइले म्रुँ अहासूरसइ चए ताँन् ह्‍युल तिगों नेरो मा ङ्युँए रे-रेमैंर मुँबै नाँसथेंमैंलाइ बालि फोबर ल्हैदिइ।
EST 10:2 म्रुँ अहासूरसए शक्ति, चए छ्याँबै केमैं, नेरो मोर्दकैलाइ थेबै मान पिंसि चए बयन्, चु ताँन् ताँमैं मादी नेरो फारस ह्‍युलर्बै म्रुँमैंए इतिहासए कितबर प्ह्रिइमुँ
EST 10:3 यहूदी मोर्दकै म्रुँ अहासूरस भन्दा न्होंर्बै ताँन् भन्दा चिब मुँल। च यहूदीमैंए थेबै म्हि मुँल। धै चइ ह्रोंसए यहूदी म्हिमैंए ल्हागिर बेल्‍ले छ्याँबै के लसि खातोनोइ खोबै म्हि तइ। मोर्दकैइ ह्रोंसए ह्रेंर्बै म्हिमैंए ताँन् सन्तानमैंए ल्हागिर शन्तिए ताँमैं मत्‍त्रे लइ।
PSA 1:1 दुष्‍टमैंए सल्‍लार आप्रब, नेरो पापिमैंइ लब् धोंले आलब, धै परमेश्‍वर स्यारब्मैंने बालु आटिबै म्हिइ आशिक योंम्।
PSA 1:2 दिलेया याहवेहए ठिमर्न (नियमर्न) च सैं तोंरिमुँ, धै त्हिंयाँ म्हुँइँस खीए ठिम सैंर थेंरिम्।
PSA 1:3 च स्योंए रेर रुँइँबै सिंधुँ धोंन् तम्। चइ रो रोल् त्हुबै त्हेर रो पिंम्, धै चए प्हो खोंयोंइ आङ्योंलों। चइ तो के ललेया छ्याँब तम्।
PSA 1:4 दुष्‍ट के लब्मैं बिस्याँ छाब आत! चमैं खैंइ नोइ बोयाबै पुइ धोंन् तम्।
PSA 1:5 छतसि दुष्‍ट के लब्मैं निसाफ लबै त्हेर राल् खाँरिब् आरे, धै पापिमैं ठिक के लब्मैंने बालु टिल् योंरिब् आरे।
PSA 1:6 छलेन याहवेहजी ठिक के लब्मैं प्रल् त्हुबै घ्याँर रक्षा लमिंम्, दिलेया दुष्‍ट म्हिमैं बिस्याँ नास तबै घ्याँर प्रम्।
PSA 2:1 अरू ह्रेंमैंइ तले जाल रोमुँ? धै म्हिमैंइ तोन् तोर्बै ताँमैं तले मैंम्?
PSA 2:2 याहवेह नेरो खीजी छ्युगु फोसि त्हाँबै म्रुँए बिरोधर ह्‍युलर्बै म्रुँमैं राम्, धै चर्बै चिब्मैं खागु तसि खेंमैंए न्होंर मदो लसि
PSA 2:3 “चमैंइ फैबै सँउँलिमैं ङ्योइ टोंवाले धै चमैंइ फैबै छोमैं प्लवाले,” बिसि चमैंइ बिम्।
PSA 2:4 चमैं म्रोंसि स्वर्गर्बै राजगद्दिर टिबै याहवेह निस्योम्; खीजी चमैंलाइ प्ह्रम्।
PSA 2:5 झाइले याहवेह ह्रिस खसि चमैंलाइ हौदिब्मुँ, धै ह्रोंसए थेबै ह्रिसर खीजी चमैंलाइ ङ्हिंन् लब्मुँ।
PSA 2:6 “सियोन बिबै ङए पबित्र कोंर ङइ ह्रोंसए म्रुँ थेंइमुँ,” बिसि खीजी बिम्।
PSA 2:7 “याहवेहजी बिद् बिबै ताँ ङइ बिब्मुँ: खीजी ङने बिइ, ‘क्हि ङए च्ह ग; तिंयाँ ङ क्हिए आबा तइमुँ।
PSA 2:8 ङने बालु ह्रिद्, धै ङइ ताँन् ह्रेंमैंए फिर क्हिलाइ क्ल्हे लमिंब्मुँ, झाइले पृथ्‍बीर्बै ताँन् साँदर टिबै ह्रेंमैंए फिर क्हिलाइ क्ल्हे लमिंब्मुँ।
PSA 2:9 पैए प्हरे छेसि क्हि चमैंए म्रुँ तब्मुँ, सए भाँडो तिब् धोंले क्हिइ चमैं त्हुल भुँ लवाब्मुँ।’”
PSA 2:10 छतसि ओ म्रुँमैं! बुद्धि मुँब् तद्; ओ ह्‍युलर्बै क्रथे मिंथेमैं, न्हक्रों मिक्रों तद्।
PSA 2:11 ङ्हिंसि त्हारदै याहवेहए सेवा लद्, धै सैं तोंन्।
PSA 2:12 च्हलाइ मान लसि फ्योद्, छ आलस्याँ खी ह्रिस खब्मुँ, धै क्हेमैं घ्याँर्न सिब्मुँ, तलेबिस्याँ खी युनन् ह्रिस खम्। खीए प्हलेर ग्वार ह्रिबर ह्‍याब्मैंइ आशिक योंब्मुँ।
PSA 3:1 ह्रोंसए च्ह अब्शालोमउँइँले न्हेयामा दाऊदइ प्ह्रिबै भजन। ओ याहवेह, ङए शत्तुरमैं बेल्‍ले ल्हें मुँ! ङए बिरोधर रेब्मैं या ल्हेंन् मुँ!
PSA 3:2 “परमेश्‍वरजी चलाइ ल्होमिंरिब् आरे,” बिसि ङए बारेर ल्हें म्हिइ बिरिइमुँ। तिस्याँदे मैंन्
PSA 3:3 दिलेया ओ याहवेह, क्हि ङलाइ जोगेमिंबै ढाल ग, क्हिजी ङलाइ मान पिंम्, क्हिजी ङए क्र कैंडो लमिंम्।
PSA 3:4 ङ थेबै कैले याहवेहने ग्वार ह्रिब्रें लमुँ, धै खीजी ह्रोंसए पबित्र कोंउँइँले ङलाइ ज्वाफ पिंमुँ। तिस्याँदे मैंन्
PSA 3:5 ङ रोमा न्हरु खयामुँ, धै छोरमुँ, तलेबिस्याँ याहवेहजीन् ङ जोगेमिंम्।
PSA 3:6 ङए बिरोधर ङए कारग्युले राबै हजार च्यु शत्तुरमैंने या ङ ङ्हिंरिब् आरे।
PSA 3:7 ओ याहवेह ल्हुसे! ओ ङए परमेश्‍वर, ङलाइ जोगेमिंन्! ङए ताँन् शत्तुरमैंए क्ह्राँबोर ल्हिमिंन्; धै दुष्‍टमैंए स चोमिंन्।
PSA 3:8 क्हिए आशिकए यो क्हिए म्हिमैंए फिर तरिगे; तलेबिस्याँ याहवेहजी ह्रोंसए म्हिमैं जोगेमिंम्। तिस्याँदे मैंन्
PSA 4:1 क्वे प्रिंब्मैंए चिबए ल्हागिर बीणा-सारङ्गींमैं ह्रादै दाऊदइ भजन घ्रि प्रिंब। ओ ङलाइ ठिक ठर्दिमिंबै परमेश्‍वर, ङइ ग्वार ह्रिमा ङलाइ ज्वाफ पिंन्। ङए फिर दुःख तमा क्हिजी ल्होमिंइ। ङए फिर दयाम्हाँया लमिंसि ङए प्राथना थेमिंन्!
PSA 4:2 ओ म्हिमैं, खोंयों समा क्हेमैंइ ङए थेबै मिं वासि ङ फाफिन् लरिम्? खोंयों समा क्हेमैं केर आफेबै सैंमैं खोरिम् धै स्योलिबै देवतामैंए लिलि प्ररिम्? तिस्याँदे मैंन्
PSA 4:3 दिलेया याहवेहजी खीजी बिब् ङिंब्मैंलाइ ह्रोंसए ल्हागिर स्यो लथेंइमुँ बिब क्हेमैंइ सेद्; ङइ ग्वार ह्रिमा याहवेहजी थेब्मुँ।
PSA 4:4 ङ्हिंसि त्हारद् धै पाप आलद्; क्ल्ह्‍योर रोमा ह्रों-ह्रोंसए खोंर चु ताँ मैंन्, धै च्याँ तद्। तिस्याँदे मैंन्
PSA 4:5 याहवेहजी खोबै ख्रो पिंन्, धै खीए फिर्न भर थेंन्।
PSA 4:6 “ङिलाइ छ्याँबै सैमैं खाबइ उँइँल् खाँमुँ?” बिसि ल्हें म्हिइ ङ्योएरिइमुँ। ओ याहवेह, ङइ ग्वार ह्रिमा क्हिए लिर्बै ह्‍वे ङिए फिर चारमिंसि आशिक पिंन्।
PSA 4:7 ल्हें रा-रोमैं नेरो अँगुरए लिंबै प्हा योंसि चमैं सैं तोंब् भन्दा क्हिजी ङए सैं ल्हें तोंन् लमिंइमुँ।
PSA 4:8 ङ रोमा तोइ न्हुँ आलल्‍ले न्हरु च्हुइब्मुँ; तलेबिस्याँ ओ याहवेह, क्हिजी मत्‍त्रे ङ जोगेमिंब्मुँ।
PSA 5:1 क्वे प्रिंब्मैंए चिबए ल्हागिर मुरलि ह्रादै दाऊदइ भजन घ्रि प्रिंब। ओ याहवेह, ङए ताँमैंर न्ह तोमिंन्; ङइ दुःख तबै सो हेंमा क्हिजी थेमिंन्।
PSA 5:2 ओ ङए म्रुँ, ङए परमेश्‍वर, ङ क्हिनेन् प्राथना लम्, छतसि ङइ ग्वार ह्रिमा थेमिंन्।
PSA 5:3 ओ याहवेह, न्हाँगर्न क्हिजी ङए कै थेम्; ङइ न्हाँग फोर्न क्हिने प्राथना लसि क्हि ङाँइँले योंबै ज्वाफ ह्रेरिम्।
PSA 5:4 क्हि आछ्याँबै केर सैं तोंबै परमेश्‍वर आङिं; धै आछ्याँबै सैमैं क्हिने टिल् आखाँ।
PSA 5:5 थेब् प्हैंब्मैं क्हिए ओंसों रालन् आखाँ; आछयाँबै के लब्मैं ताँन् क्हिजी हेल लम्।
PSA 5:6 स्योर तेसि पोंब्मैं क्हिजी नास लम्; म्हि सैब्मैं नेरो लुब्मैंने याहवेह छेरम्।
PSA 5:7 दिलेया ङ बिस्याँ क्हिए खोंयोंइ आनुबै म्हाँयाइ लमा क्हिए धिं न्होंर होंल् योंब्मुँ। मान लदै ङ पबित्र क्ल्ह्‍योउँइँ तोसि क्हिलाइ फ्योब्मुँ।
PSA 5:8 ओ याहवेह, ङए शत्तुरमैं ल्हें मुँ छतसि क्हिए ठिक घ्याँर ङ डोरेमिंन्; क्हिए घ्याँ ङए ओंसों सोजो लमिंन्।
PSA 5:9 चमैंए सुँइ क्ह्रोंसेंन्बै ताँ आपों; चमैंए खों आछ्याँबै सैमैंइ प्लिंइमुँ; चमैंए म्‍लोगो थोंथेंबै छगों ग; छतसि चमैंइ फिब्लो पार्दिसि पोंम्।
PSA 5:10 ओ परमेश्‍वर, चमैंए दोष उँइँमिंन्; ह्रोंसइ चुबै ङोर चमैं खेंमैंन् फेरिगे; चमैंइ ल्हें अपराधमैं लइमुँ, छतसि चमैं पिवाद्, तलेबिस्याँ चमैं क्हिए बिरोधर राइमुँ।
PSA 5:11 दिलेया क्हि ङाँइँले ग्वार योंब्मैं सैं तोंरिगे, धै चमैं खोंयोंइन सैं तोंदै क्वे प्रिंरिगे। धै क्हिए मिंलाइ म्हाँया लब्मैं क्हिनेन् सैं तोंरिगे बिसि चमैं जोगेमिंन्।
PSA 5:12 तलेबिस्याँ ओ याहवेह, ठिक के लब्मैंलाइ क्हिजी आशिक पिंम्, ढालइ धोंले क्हिए म्हाँयाजी चमैं जोगेमिंब्मुँ।
PSA 6:1 क्वे प्रिंब्मैंए चिबए ल्हागिर बीणा-सारङ्गीं ह्रादै शिमिनिथ भाकाले प्रिंब। दाऊदए भजन घ्रि। ओ याहवेह, क्हि ह्रिस खमा ङ आहौदिद्, क्हिए ह्रिसर ङ प्हरेइ आप्रुद्।
PSA 6:2 ओ याहवेह, ङने भों तिफुँइ आरे, छतसि ङए फिर ल्हयो खमिंन्; ओ याहवेह, ङए ह्रिबमैं नइमुँ, छतसि ङ सल् लमिंन्।
PSA 6:3 ङए सो खैता-खैता तइमुँ! ओ याहवह, खोंयों समा पैंरिब् जा, खोंयों समा?
PSA 6:4 ओ याहवेह, ङ ङाँइ तोद्, ङ सिल् आपिंन्; खोंयोंइ आनुबै क्हिए म्हाँया ङए फिर मुँबइले ङ जोगेमिंन्।
PSA 6:5 सियाब्मैंइ क्हिलाइ आमैं; क्रोंर क्हिए मिं खाबइ क्वेब्मुँ?
PSA 6:6 ङ क्रोसि तोइ लल् आखाँब् तइमुँ; म्हुँइँस ह्रोंसे ङ क्रो-क्रोइ ङए क्ह्‍ल्यो प्हाँइमुँ, धै ङए मिग्लिइ ङए क्रेगु या प्हाँइमुँ।
PSA 6:7 न्हुँइ लमा ङए मि आचारब् तइमुँ; ङए शत्तुरमैंइ दुःख पिंबइले ङ छेनाले म्रोंल् आखाँब् तइमुँ।
PSA 6:8 ओ आछ्याँबै के लबै म्हिमैं, ङ ङाँइँले ह्‍याद्, तलेबिस्याँ ङ क्रोब याहवेहजी थेइमुँ।
PSA 6:9 ल्होमिंन् बिसि ङइ ग्वार ह्रिमा याहवेहजी थेइमुँ; ङइ लबै प्राथनाए ज्वाफ खीजी पिंम्।
PSA 6:10 ङए ताँन् शत्तुरमैं फापिल् त्हुब्मुँ; धै खैता-खैता तयाब्मुँ, चमैं फाफिसि तिस्यार्न ङ ङाँइँले स्योयाब्मुँ।
PSA 7:1 दाऊदइ याहवेहए उँइँर बेन्यामीनि कूशए बारेर प्रिंबै भजन घ्रि। ओ ङए याहवेह परमेश्‍वर, ङ ग्वार योंबर क्हिए प्हलेर्न खमुँ; ङलाइ दुःख पिंबर ल्हाखब्मैं ताँनउँइँले ङ जोगेमिंन् धै फ्रेमिंन्।
PSA 7:2 क्हिजी आजोगेमिंस्याँ चमैंइ सिंहइ धोंले ङ रुएवाब्मुँ, धै ङलाइ फ्रेमिंबै म्हि खाबै आरेमा चमैंइ ङ कुदु-कुदु लवाब्मुँ।
PSA 7:3 ओ ङए याहवेह परमेश्‍वर, ङए योइ तोइ आछ्याँबै केमैं लइमुँ बिस्याँ,
PSA 7:4 छलेन ङए थुलाइ ङइ तोइ न्होह्रों लस्याँ, धै ङए शत्तुरलाइ ङइ फाक्‍कर्न लुडिस्याँ
PSA 7:5 ङए शत्तुरइ ङलाइ ल्हामा चइ ङ स्यारिगे, धै ङलाइ सैसि सर प्लेवारिगे; धै ङए ज्यु त्हुलर कोंवारिगे। तिस्याँदे मैंन्
PSA 7:6 ओ याहवेह, ह्रिस खमा रेद्, धै ङए शत्तुरमैंने नेबर क्हिन् रामिंन्; ओ ङए परमेश्‍वर, रेद, ङए ठिक निसाफ लमिंन्।
PSA 7:7 ह्रें-ह्रेंमैं क्हिए कारग्यु तरिगे, धै नुबै क्ल्ह्‍योउँइँले चमैंए फिर ग्याल्स लद्।
PSA 7:8 याहवेहजी ताँन् ह्रेंमैंए फिर निसाफ लब्मुँ। ओ याहवेह, ङइ लबै ठिक के अनुसार्बै नेरो ङने तोइ छ्याब् आरेब अनुसार्बै ङए ठिक निसाफ लमिंन्।
PSA 7:9 ओ ठिक निसाफ लबै परमेश्‍वर, सैं नेरो खों खैतब मुँ बिसि क्हिजी ङ्‍ह्‍योम्। दुष्‍ट म्हिमैंइ लबै आछ्याँबै केमैं सदसुदुले म्हवाद्, दिलेया ठिक के लब्मैं भोंब लमिंन्।
PSA 7:10 परमेश्‍‍वरन् ङए ढाल ग, छ्याँबै खों मुँब्मैं खीजी जोगेमिंम्।
PSA 7:11 परमेश्‍वरजी ठिक निसाफ लम्, धै खीजी त्हिंइ ह्रोंसे दुष्‍टमैंए फिर ह्रोंसए ह्रिस उँइँम्।
PSA 7:12 म्हिमैंइ सैं आएस्याँ खीजी ह्रोंसए सेलाँ म्याब्मुँ; खीजी ह्रोंसए त्हलेर छोइ फैसि तयार लब्मुँ।
PSA 7:13 खीजी ङ्हिंन् ङ्हाँबै हतियारमैं खुथेंइमुँ, धै खीजी मेमैं मिए प्हैं लसि चमैंलाइ ल्हिब्मुँ।
PSA 7:14 दुष्‍टमैंए सैंर आछ्याँबै ताँमैंइ प्लिंरिम्, चमैंइ आगुलाइ दुःख पिंबै ताँमैं मैंरिम्; चमैंइ स्योलिबै ताँमैं लम्।
PSA 7:15 चमैंइ ताबै थेबै होंर चमैं ह्रोंसन् पायाम्।
PSA 7:16 चमैंइ लबै आछ्याँबै केमैंए दण्ड चमैंए क्रर्न खम्, चमैंइ लबै दुष्‍ट केमैं चमैंए क्रर्न कुखम्।
PSA 7:17 याहवेहजी ठिक निसाफ लम्, छतसि ङ खीलाइ धन्यबाद पिंम्, धै ताँन् भन्दा थेबै याहवेहए मिंर ङ क्वे प्रिंब्मुँ।
PSA 8:1 क्वे प्रिंब्मैंए चिबए ल्हागिर “गित्तित” बिबै भाका धोंले प्रिंबै दाऊदए भजन। ओ याहवेह, ङिए क्ल्हे, ह्‍युल तिगोंन् क्हिए मिं बेल्‍ले थेब मुँ! क्हिए मिंर क्वे प्रिंब मु भन्दा क्होवाइ थेनेम्।
PSA 8:2 कोलोमैं नेरो ङ्‍हे थुँबै कोलो ओंलाँमैंए सुँउँइँले या क्हिजी ह्रोंसए मिंर क्वे प्रिंल् पिंइमुँ। क्हिए शत्तुरमैं नेरो बिरोधीमैंए सुँ म्रुबै ल्हागिर क्हिजी छ लब् ग।
PSA 8:3 क्हिजी बनेबै मु, क्हिजी मुर थेंमिंबै लयाँ नेरो मुसारमैं ङइ ङ्‍ह्‍योमा,
PSA 8:4 म्हि तो जा? क्हिजी तले चए वास्ता लब? म्हिए च्ह तो जा? क्हिजी तले चए न्हुँ लब?
PSA 8:5 क्हिजी म्हिए च्हलाइ स्वर्गदूतमैं भन्दा च्युगुदे न्होंवाँइ थेंमिंइ, धै लिउँइँ खीलाइ थेबै मानए मुकुट कुमिंइ।
PSA 8:6 क्हिजी खीलाइ क्हिए योइ बनेबै सैमैं फिर्बै क्ल्हे तल् पिंइ; धै क्हिजी तोन्दोंरि सै खीए प्हले न्होंर थेंमिंइ।
PSA 8:7 र-क्युमैं क्ल्यामैं मेमैं, क्ह्‍योंर्बै ताँन् खेदोमैं,
PSA 8:8 मुर प्हुरबै नमेंमैं, मा ङ्युँइर्बै ताँगामैं, नेरो मा ङ्युँइ न्होंर मुँबै ताँन् सो प्ह्‍याबै सैमैं या म्हिए च्हए न्होंर्न थेंमिंइ।
PSA 8:9 ओ याहवेह, ङिए क्ल्हे, ह्‍युल तिगोंन् क्हिए मिं बेल्‍ले थेब मुँ!
PSA 9:1 क्वे प्रिंब्मैंए चिबए ल्हागिर दाऊदए भजन घ्रि। “च्ह सियाइ” बिबै भाकर प्रिंब। ओ याहवेह, खों न्होंउँइँलेन् ङ क्हिए मिं थेब् लब्मुँ; क्हिजी लबै ताँन् औदिबै केमैंए बयन ङ लब्मुँ।
PSA 9:2 ङ क्हिनेन् सैं तोंसि उफर्दिब्मुँ। ओ ताँन् भन्दा थेबै परमेश्‍वर, ङ क्हिए मिंर्न क्वे प्रिंब्मुँ।
PSA 9:3 क्हिलाइ म्रोंसि ङए शत्तुरमैं लिग्याँइ तोसि न्हेयामा क्हिए उँइँर्न थुरसि नास तयाम्।
PSA 9:4 तलेबिस्याँ राजगद्दिर क्हुँसि क्हिजी ठिक निसाफ लइमुँ धै ङइ योंल् त्हुबै सैमैं ङलाइ पिंइमुँ।
PSA 9:5 अरू ह्रेंमैंलाइ क्हिजी हौदिइमुँ; झाइले दुष्‍ट म्हिमैं नास लवाइमुँ; क्हिजी चमैंए मिं क्ह्रन् म्हवाइमुँ।
PSA 9:6 ङए शत्तुरमैंए फिर तोइ आचैन् लवाबै दुःख खइमुँ, चमैं टिबै क्ल्ह्‍योमैं क्हिजी स्युवाइमुँ; छतसि चमैंए मिं क्ह्रन् म्हयाइमुँ।
PSA 9:7 दिलेया याहवेहजी खोंयोंन् बिलै ग्याल्स लमुँ; खीजी निसाफ लबै ल्हागिर ह्रोंसए राजगद्दि बनेइमुँ।
PSA 9:8 खीजी ह्‍युलर्बै म्हिमैंए फिर ठिक निसाफ लम्, खीजी खाबलाज्यै या आफेलल्‍ले निसाफ लम्।
PSA 9:9 आगुइ क्र ओलै आपिंब्मैंए ल्हागिर याहवेह किल्‍ला ग। दुःख तमा ग्वार योंबै क्ल्ह्‍यो खीन् ग।
PSA 9:10 क्हिलाइ ङो सेब्मैंइ क्हिए फिर्न भर लम्; तलेबिस्याँ ओ याहवेह, क्हिलाइ म्हैब्मैंलाइ क्हिजी खोंयोंइ पिरिब् आरे।
PSA 9:11 सियोनर टिबै याहवेहए ल्हागिर क्वे प्रिंन्! खीजी लबै केमैं ह्रें-ह्रेंमैंए उँइँर बिमिंन्!
PSA 9:12 तलेबिस्याँ याहवेहजी दुःख तब्मैं आम्ले, चमैंइ ग्वार ह्रिमा खीजी थेम्, धै चमैंलाइ दु:ख पिंब्मैंलाइ दण्डा पिंम्।
PSA 9:13 ओ याहवेह, ङ फिर दयाम्हाँया लमिंन्! ङ्ह्‍योत्ति, ङलाइ आखोब्मैंउँइँले ङइ बेल्‍ले दुःख योंल् त्हुइमुँ। छतसि कालए सुँउँइँले ङलाइ जोगेमिंन्।
PSA 9:14 यरूशलेमर्बै तगररि ङइ क्हिए मिं थेब लरिमा क्हिजी ङलाइ जोगेमिंबइले ङ सैं तोंसि चर टिल् योंरिगे बिसि ङ कालए सुँउँइँले फ्रेमिंन्।
PSA 9:15 अरू ह्रेंमैं ह्रोंसइ ताबै होंल्दोंर खेंमैंन् पायाइमुँ, चमैंइ लोसि चुबै ङोइ चमैं ह्रोंसन् स्याइमुँ।
PSA 9:16 याहवेहजी ठिक निसाफ लम् बिब ताँनइ सेइमुँ, दुष्‍टमैं बिस्याँ खेंमैंइ लबै केर खेंमैंन् फसेइमुँ। च्याँ तसि तिस्याँदे मैंन्
PSA 9:17 दुष्‍ट म्हिमैं नेरो परमेश्‍वर म्‍लेयाबै ताँन् ह्रेंमैं सिसि ह्‍याबै क्रोंर फेनेम्।
PSA 9:18 दिलेया आयों आख्युब्मैं परमेश्‍वरजी खोंयोंइ म्‍लेरिब् आरे, दुःख योंब्मैंए आशा खोंयोंइ म्हरिब् आरे।
PSA 9:19 ओ याहवेह रेद्, म्हिमैंइ ट्होल् आयोंरिगे, ह्रें-ह्रेंमैंए निसाफ लमिंन्।
PSA 9:20 ओ याहवेह, चमैं क्हिने ङ्हिंरिगे, चमैंम् म्हि मत्‍त्रे ग बिसि अरू ह्रेंमैंइ सेरिगे। तिस्याँदे मैंन्
PSA 10:1 ओ याहवेह, क्हि तले ह्रेंगो राल? ङए फिर दुःख तमा क्हि तले लोइ टिल?
PSA 10:2 दुष्‍ट म्हिमैंइ ङम् ङन् ग बिब् प्हैंसि ङ्हाँदु म्हिमैंलाइ ह्रुगुदिम्, चमैंइ लबै चाँजोर चमैंन् फसेरिगे!
PSA 10:3 तलेबिस्याँ दुष्‍टमैं ह्रोंसए सैंर मैंबै आछ्याँबै ताँर्न प्हैंरिम्, चमैंइ खोंबै म्हिलाइ आशिक पिंम्, धै याहवेहलाइ स्यारम्।
PSA 10:4 ङम् ङन् ग बिसि दुष्‍टमैंइ परमेश्‍वर आम्है, चमैंइ तोइ ताँरै या परमेश्‍वर आमैं।
PSA 10:5 चमैंइ लबै केमैं खोंयोंन् बिलै चमैंए सैंर मैंब् धोंन् तम्। चमैं थेब् प्हैंरिम्, छतसि क्हिए ठिममैं चमैंउँइँले ह्रेंगो तम्। चमैंइ ह्रोंसए ताँन् शत्तुरमैं प्ह्रम्।
PSA 10:6 “तो सैज्यैया ङलाइ लाल् खाँरिब् आरे, छतमा ङए फिर खोंयोंन् बिलै तोइ दुःख तरिब् आरे,” बिसि चमैंए सैंर मैंम्।
PSA 10:7 चमैंए सुँर आगुलाइ हौदिब, स्योर तेब नेरो सराब पिंबै ताँ मत्‍त्रे मुँ; चमैंए सुँर केरै आफेबै छेरन् ङ्हाँबै ताँ मत्‍त्रे मुँ।
PSA 10:8 नाँ-नाँसए चेंदो चमैं दाउ च्ह्‍यासि टिम्, क्होइ टिबै क्ल्ह्‍योजरे चमैंइ सोजो म्हिमैं सैम्; चमैंइ लो‍-लोइ दुःख योंरिब्मैंए छैं लरिम्।
PSA 10:9 झ्याडिए न्होंर लोसि पैंरिबै सिंह धोंले, ल्होबै म्हि खाबै आरेब्मैं क्हाबर च क्होइ टिम्, ल्होबै म्हिमैं खाबै आरेब्मैंलाइ चइ ह्रोंसए जालर चैं बोम्।
PSA 10:10 दुःख योंब्मैं क्र ओलै आपिंमा चमैं नारसि क्हुरियाम्, चमैंए भोंइ लमा दुःख योब्मैं पोंयाम्।
PSA 10:11 चमैंइ सैं न्होंर मैंइमुँ, “परमेश्‍वरजी खीए मोंडा ङउँइँले लोइमुँ, धै ङलाज्यै या म्‍लेवाइमुँ, छतसि ङइ लबै के या आम्रों।”
PSA 10:12 ओ याहवेह रेत्ति! क्हिए यो क्वेदु, ल्होब्मैं खाबै आरेब्मैंलाइ आम्‍लेमिंन्।
PSA 10:13 दुष्‍ट म्हिमैंइ तले परमेश्‍वरलाइ स्यारमुँ? ङइ लबै केए हिसाब परमेश्‍वरजी आथें बिसि चए सैंर तले मैंमुँ।
PSA 10:14 दिलेया ओ परमेश्‍वर, क्हिजी दुःख योंब्मैंए दुःख म्रोंमुँ, क्हिजी चमैंए दुःख ह्रोंसए योर्न किंमुँ, दुःख योंब्मैं ताँन् क्हिए प्हलेर्न खमुँ, खाबै आरेब्मैंलाइ ल्होमिंब क्हिन् ग।
PSA 10:15 दुष्‍टमैं नेरो आछ्याँबै के लब्मैंइ तोइ लल् आखाँन् लवाद्; आछ्याँबै के लब् आपिंन् समा चमैंइ लबै केए दण्ड पिंन्।
PSA 10:16 याहवेह खोयोंन् बिलै तरिबै म्रुँ ग, छतसि खीए फिर बिश्‍वास आलबै ह्रेंमैं खीए ह्‍युलउँइँले नास तयाब्मुँ।
PSA 10:17 ओ याहवेह! दुःख योंब्मैंए प्राथना क्हिजी थेम्; क्हिजी चमैंए सैं भोंब् लम्, धै चमैंइ ग्वार ह्रिब क्हिजी थेम्।
PSA 10:18 आबा आरेब्मैं नेरो आगुइ क्र ओलै आपिंब्मैं क्हिजी जोगेमिंम्, तलेबिस्याँ ह्‍युलर्बै सिल् त्हुबै म्हिइ धबै खाबै फिरै या दुःख पिंल् खाँरिब् आरे।
PSA 11:1 क्वे प्रिंब्मैंए चिबए ल्हागिर दाऊदए भजन ङ ग्वार योंबर याहवेहए प्हलेर्न खमुँ; छतसि “नमे धोंले ह्रोंसए कोंर प्हुर ह्‍याद्, बिसि क्हेमैंइ खैले ङने बिल् खाँमुँ,
PSA 11:2 तलेबिस्याँ ङ्‍ह्‍योद्, दुष्‍टमैंइ त्हलेर छोइ फैइमुँ; मिछु खैबै क्ल्ह्‍योउँइँले सोजो म्हिमैंलाइ ल्हिब् बिसि चमैंइ मे छोर थेंइमुँ।
PSA 11:3 ठिमइ बिब् धोंले म्हिमैं आप्रस्याँ ठिक के लब्मैंइ तो लल् खाँम् रो?”
PSA 11:4 दिलेया याहवेह ह्रोंसए पबित्र क्ल्ह्‍योर मुँ; याहवेहए राजगद्दि स्वर्गर मुँ; खीजी म्हिमैंलाइ छेनाले ङ्‍ह्‍योमुँ; खीजी ह्रोंसए मिजी चमैंए जाँच लमुँ।
PSA 11:5 याहवेहजी ठिक के लब्मैंए जाँच लमुँ; आछ्याँबै के लब्मैं नेरो म्हि सैब् म्‍लुबै के लदा ङ्हाँब्मैं खीजी आखो।
PSA 11:6 आछ्याँबै के लब्मैंए फिर खीजी मि नेरो बारुद प्रामिंब्मुँ, धै ट्हुबिन् लास्युवाबै लल खैंइ चमैं ख्रोंवाब्मुँ।
PSA 11:7 तलेबिस्याँ याहवेहजी ठिक निसाफ लम्, ठिक केमैं खीजी खोम्; सोजो म्हिमैंइ खीए लि म्रोंब्मुँ।
PSA 12:1 क्वे प्रिंब्मैंए चिबए ल्हागिर शिमिनिथ भाकार प्रिंबै दाऊदइ प्ह्रिबै भजन घ्रि। ओ याहवेह, ल्होमिंन्! तलेबिस्याँ क्हिजी बिब् ङिंबै म्हि तारे घ्रि या आचैइमुँ, म्हिमैंए म्हाँजोर भर लल् खाँब्मैं खाबै आरे।
PSA 12:2 ताँनइ ह्रोंसए ङ्‍हेब् ट्हुब्मैंने स्योर तेसि पोंम्, चमैं फिब्लो पार्दिसि स्योर ताँमैं पोंम्।
PSA 12:3 फिब्लो पार्दिसि पोंब्मैं, नेरो थेब् प्हैंसि पोंब्मैं याहवेहजी थोवारिगे।
PSA 12:4 “ङिइ पोंसि पोंइ चमैंलाइ ट्होब्मुँ,” बिसि चमैंइ बिमुँ। “ङिए सुँ ङिलन् ग! ङिए फिर खाब् क्ल्हे तल् खाँमुँ?”
PSA 12:5 “आखाँम्मैं लुडिवाइमुँ, धै ङ्हाँदुमैंइ दुःखए सो हेंइमुँ। छतसि तारे ङ रेब्मुँ, धै चमैंए न्होह्रों लब्मैंउँइँले ङइ चमैं जोगेमिंब्मुँ,” बिसि याहवेहजी बिमुँ
PSA 12:6 याहवेहजी फैबै बाछामैं खोट आरेब मुँ, सए कोदर मिइ ङिखे समा खारिदिबै चाँदि धोंब खीजी फैबै बाछा मुँ।
PSA 12:7 ओ याहवेह, ङिए रक्षा क्हिजी लमिंब्मुँ, क्हिजी खोंयोंन् बिलै छाबै म्हिमैंउँइँले जोगेसि थेंमिंब्मुँ,
PSA 12:8 आछ्याँबै के लब्मैंलाइ म्हिमैंइ खोम्। छतसि दुष्‍ट म्हिमैं ङम् ङन् ग बिब् प्हैंसि ताँनइ म्रोंल्‍ले प्रम्।
PSA 13:1 क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, खोंयों समा क्हिजी ङ म्‍लेमुँ? क्हिजी खोंयोंइन म्‍लेवाम्‍मा? क्हिजी ह्रोंसए लि ङने खोंयों समा लोरिम्?
PSA 13:2 खोंयों समा ङइ सैं न्होंरि दुःख सैदिल् त्हुब् जा? धै त्हिंइ ह्रोंसे ङइ कति न्हुँ लब? खोंयों समा ङए शत्तुरमैं ङए फिर ट्होगों तरिम्?
PSA 13:3 ओ याहवेह ङए परमेश्‍वर, ङए फिर मि ङ्‍ह्‍योमिंन्, धै ङने ज्वाफ पिंन्, ङलाइ धबै भों पिंन्, आस्याँ ङ क्रोंर फेब्मुँ।
PSA 13:4 आस्याँ ङए शत्तुरइ, “ङइ च ट्होवाइ,” बिब्मुँ, धै ङ क्हुरियामा ङए शत्तुरमैं सैं तोंब्मुँ।
PSA 13:5 दिलेया क्हिए खोंयोंइ आनुबै म्हाँयार ङइ सैं केंइमुँ, क्हिजी ङ जोगेमिंबइले ङए सैं तोंब्मुँ।
PSA 13:6 ङ याहवेहए क्‍वे प्रिंब्मुँ, तलेबिस्याँ खीजी ङए फिर ल्हयो खम्।
PSA 14:1 क्वे प्रिंब्मैंए चिबए ल्हागिर दाऊदए भजन। आमादुमैंइ ह्रोंसए सैंर “परमेश्‍वर आरे!” बिमुँ। चमैंइ छेरन् ङ्हाँबै केमैं लमुँ, चमैं छेरन् ङ्हाँन् तब्मैं मुँ; छ्याँबै के लब्मैं खाबै आरे।
PSA 14:2 ताँ क्होब्मैं नेरो परमेश्‍वर म्हैब्मैं खाबै मुँ उ बिसि याहवेहजी स्वर्गउँइँले म्हिमैंलाइ ङ्ह्‍योम्।
PSA 14:3 चमैं ताँन् आछ्याँबै घ्याउँइँ प्रइमुँ, धै चमैं ताँन् छेरन् ङ्हाँन् तयाइमुँ। खाबज्यै छ्याँबै के आल, छ्याँबै के लब्मैं घ्रि या आरे।
PSA 14:4 चु आछ्याँबै के लब्मैंइ तोइ आसे वा? ह्‍योइ लुडिब् धोंले चुमैंइ ङए म्हिमैं लुडिसि ह्रोंसए फो न्हम्, चुमैंइ याहवेहए मिं खोंयोंइ आकिं।
PSA 14:5 छतसि चमैं ङ्हिंसि आदिदिम्, तलेबिस्याँ ठिक के लब्मैंने बालु परमेश्‍वर तम्।
PSA 14:6 क्हेमैं दुष्‍टमैंइ ङ्हाँदुमैंए चाँजोमैं फुवाम्, दिलेया चमैंइ ग्वार योंबै क्ल्ह्‍यो याहवेहन् ग!
PSA 14:7 इस्राएलीमैं जोगेमिंबै याहवेह सियोनउँइँले युरिगे बिसि ङ प्राथना लम्! याहवेहजी ह्रोंसए म्हिमैंलाइ धबै सुख पिंमा याकूबए सन्तानमैं निस्योब्मुँ धै इस्राएलीमैंया बेल्‍ले सैं तोंब्मुँ!
PSA 15:1 दाऊदए भजन घ्रि ओ याहवेह, क्हिए पबित्र तम्बुर खाब् होंल् खाँमुँ? क्हिए पबित्र कोंर खाब् टिल् योंमुँ?
PSA 15:2 क्हिजी प्रद् बिबै घ्याँर प्रब, धै ठिक केमैं लब, खों न्होउँइँलेन् क्ह्रोंसेंन्बै ताँ पोंब,
PSA 15:3 ह्रोंसए लेइ आगुलाइ आस्यारब ह्रोंसए ङ्‍हेब्मैंए न्होह्रों आलब, धै ह्रोंसए थुमैंए बारेर आछ्याँबै ताँ आपोंब,
PSA 15:4 आछ्याँबै के लब्मैंलाइ आखोब, दिलेया याहवेहने ङ्हिंब्मैंलाइ मान लब, ह्रोंसए न्होह्रों तलेया ङ लम् बिबै के पूरा लब,
PSA 15:5 मुइ पिंमा ब्याज आकिंब, धै तोइ छ्याब आरेबै म्हिमैंलाइ नास लबर घुस (ख्याब) आकिंब, छाबै म्हि क्हिए पबित्र कोंर टिल् योंमुँ। छ लबै म्हिइ खोंयोंइन रक्षा योंम्।
PSA 16:1 दाऊदइ प्ह्रिबै मिक्‍ताम। ओ परमेश्‍वर, ङ जोगेमिंन्, तलेबिस्याँ ङ क्हिए प्हलेर ग्वार योंबर खइमुँ।
PSA 16:2 ङइ याहवेहने बिइमुँ, “क्हि ङए प्रभु ग; ङए ल्हागिर क्हि मत्‍त्रे छ्याँब ग, अरू तो सै या छ्याँब आरे।”
PSA 16:3 इस्राएल ह्‍युलर्बै परमेश्‍वरए म्हिमैं बेल्‍ले कालदिब मुँ, चमैं म्रोंसि ङ सैं तोंरिम्।
PSA 16:4 दिलेया अरू देउतमैंए लिलि प्रब्मैंइ ह्रोंसए फिर्न ल्हें दुःख थौदिम्। च देउतमैंए मिंर कोए ख्रो ङइ पिंरिब् आरे, धै ङए सुँइ चमैंए मिं किंरिब् आरे।
PSA 16:5 ओ याहवेह, ङइ योंल् त्हुबै सैमैं पिंब क्हिन् ग ङलाइ चैदिबै ताँन् सै क्हिजी पिंम्, ङए छ्ह या क्हिए योर्न मुँ।
PSA 16:6 ङए ल्हागिर क्हिजी थेंमिंबै साँद बेल्‍ले छ्याँबै सैं तोंबै क्ल्ह्‍योर मुँ। क्ह्रोंसेंन, ङइ खेमैंए सै न्होर योंइँमुँ।
PSA 16:7 ङलाइ लोदा सैंदा लबै याहवेहए मिं ङ थेब् लब्मुँ, ङए खोंइ म्हुँइँसरै या ङलाइ लोदा सैंदा लम्।
PSA 16:8 ङइ याहवेह खोंयोंइन ङए ओंसों थेंइमुँ। ङए क्योलोउँइँ खी मुँ, छतसि ङ छाइ छुइ तरिब् आरे।
PSA 16:9 छतसि ङए सैं तोंइमुँ, ङए ज्यु या ढुक्‍क मुँ,
PSA 16:10 तलेबिस्याँ क्हिजी ङए प्ल्हलाइ क्रोंर वाथेंरिब् आरे, धै ह्रोंसए पबित्र म्हिए ज्यु क्हिजी क्राँल् पिंरिब् आरे।
PSA 16:11 क्हिजी खोंयोंइ आखाँबै छ्ह योंबै घ्याँ ङलाइ उइमिंइमुँ; क्हिने त्होमा ङए सैं बेल्‍ले तोंन् लमिंब्मुँ; क्हिए क्योलो योर खोंयोंन् बिलै सैं तोंल् योंम्।
PSA 17:1 दाऊदइ लबै प्राथना! ओ याहवेह! ल्होमिंन् बिसि ङइ ग्वार ह्रिमा क्हिजी थेमिंन्! छ्याँबै खोंउँइँले लबै ङए प्राथनार क्हिए न्ह तोमिंन्!
PSA 17:2 ङने तोइ छ्याब् आरे िबबै निसाफ क्हिउँइँलेन् खरिगे! क्हिजी ङ ङाँइ ङ्ह्‍योमा ङ ठिक के लब् म्रोंरिगे!
PSA 17:3 क्हिजी ङए खोंर तोइ आछ्याँबै सै मुँ उ? बिसि म्हैलै या धै म्हुँइँसरै या ङए जाँच ललेया या ङए खों न्होंर क्हिजी आछ्याँबै सै तोइ योंरिब् आरे। ङए सुँइ पोंबै ताँइ खाबलाज्यै या सैं नल् लरिब् आरे बिसि ङइ मैंइमुँ।
PSA 17:4 म्हिमैंए केए ल्हागिर बिब् ग बिस्याँ, क्हिए सुँर्बै ताँउँइँलेन् न्होह्रों लबै केउँइँले ङइ ह्रोंसलाइ जोगेसि थेंइमुँ।
PSA 17:5 क्हिजी प्रद् बिबै घ्याँर ङए प्हलेइ भोंन्‍ले म्हैमुँ, धै ङए प्हले आप्लेइमुँ।
PSA 17:6 ओ परमेश्‍वर, ङ क्हिनेन् प्राथना लम्, तलेबिस्याँ क्हिजी ङइ ह्रिबै सै पिंम्, क्हिए न्ह ङ ङाँइ तोमिंनु, धै ङइ बिबै ताँ थेमिंन्।
PSA 17:7 ओ प्रभु, ह्रोंसए शत्तुरमैंउँइँले जोगेबै ल्हागिर क्हिने ग्वार ह्रिखब्मैंलाइ क्हिजी ह्रोंसए क्योलो योइ जोगेमिंसि, क्हिए खोंयोंइ आनुबै म्हाँयाजी लबै प्लेटोयान् तबै केमैं उँइँमिंन्।
PSA 17:8 क्हिए मिफुँ धोंले ङ जोगेसि थेंमिंन्।
PSA 17:9 ङलाइ लुडिबै दुष्‍टमैंउँइँले नेरो ङए न्होह्रों लबर ङए कारग्यु तखबै शत्तुरमैंउँइँले जोगेबर क्हिए प्ह्‍यागोंए न्होंर ङलाइ लोथेंन्।
PSA 17:10 चमैंए सैंर दयाम्‍हाँया तोइ आरे, दिलेया चमैं बेल्‍ले थेब् प्हैंसि पोंम्।
PSA 17:11 चमैंइ ल्हासि-ल्हाइ ङलाइ स्याइमुँ, तारे चमैं ङए कारग्यु तब्मुँ, धै ङलाइ सर क्हुरवाबै ल्हागिर चमैंइ दाउ ङ्‍ह्‍योम्।
PSA 17:12 फो ख्रेंसि चबै सै म्हैप्रबै सिंह धोंन् चमैं तइमुँ, थेबै सिंह धोंले चमैं क्ह्‍वेइ टिइमुँ।
PSA 17:13 ओ याहवेह, रेत्ति, चमैंने नेसि ट्होमिंन्। क्हिए सेलाँइ च दुष्‍टमैंउँइँले ङ जोगेमिंन्।
PSA 17:14 ओ याहवेह, च म्हिमैंइ चु ह्‍युलर्बै सै मत्त्रे म्हैम्, क्हिए योजी च म्हिमैं ङाँइँले ङ जोगेमिंन्। क्हिजी खोबै म्हिमैंलाइ बिस्याँ, क्हिजी चल् पिंम्, चमैंए च्ह-च्हमिमैंए ल्हागिरै या तोन्दोंरि योल्‍ले-ख्युल्‍ले पिंमुँ, धै खेंमैंए प्हसेमैंए ल्हागिर चमैंइ ल्हें सै न्होर साँथेंइमुँ।
PSA 17:15 ङ ठिक के लसि क्हिए लि ङ्‍ह्‍योब्मुँ, धै छोरमा ङ क्हिलाइ म्रोंसि सैं तोंब्मुँ।
PSA 18:1 क्वे प्रिंब्मैंए चिबए ल्हागिर याहवेहए के लबै दाऊदए भजन घ्रि। चए ताँन् शत्तुरमैं नेरो शाऊलए योउँइँले फ्रेमिंबै त्हिंइर चइ याहवेहने चु क्वेए ताँफुँमैं बिइ। ओ याहवेह, क्हिजी ङलाइ भों पिंम्, ङइ क्हिलाइ म्हाँया लम्।
PSA 18:2 याहवेह ङ लोबै पारा, ङए किल्‍ला नेरो ङ जोगेमिंबै ङए परमेश्‍वर ग। ङए परमेश्‍वर ङ रक्षा लमिंबै पारा ग। ढाल धोंले भोंब् तसि खीजी ङलाइ जोगेमिंम्! ङ खाबज्यै तोइ लल् आखाँबै क्ल्ह्‍योर खीजी थेंमिंइ।
PSA 18:3 ङ याहवेहए मिं किंम्, खी मान लल् त्हुब मुँ, ङए शत्तुरमैंउँइँले खीजी ङ जोगेमिंब्मुँ।
PSA 18:4 कालए छोइ ङ कारग्यु लखइ, नास लवाबै बाढिइ ङ आदेल् लइ।
PSA 18:5 क्रोंर्बै छोमैंइ ङ फैवाइ, कालए ङोइ ङए घ्याँ थोइ।
PSA 18:6 ङए सैंरै आमैंबै दुःखमैं ङए फिर तखमा ङइ याहवेहने ग्वार ह्रिइ, छले ल्होमिंन् बिसि ङए परमेश्‍वरलाइ हुइमा खीजी ह्रोंसए टिबै क्ल्ह‍योउँइँले ङए ताँ थेमिंइ।
PSA 18:7 च्हमा सयो खसि ह्‍युल लायाइ, कोंमैंए तेंमैं या थरथरले लायाइ, तलेबिस्याँ खी ह्रिस खल।
PSA 18:8 खीए नखुँउँइँले मिखु त्होंइ, खीए सुँउँइँले त्होंबै मिइ ताँन् ख्रोंवाइ, धै लुँरिबै मिए राब खीए सुँउँइँले लुँइ।
PSA 18:9 खी स्वर्ग थोंसि क्युरु युइ; म्‍लोंकि ब्योंबै न्हाँम्स्यो खीए प्हले न्होंर मुँल।
PSA 18:10 खी करूबए फिर क्रेसि प्हुरइ; धै खैंए प्ह्‍यागोंर कैंडो प्हुरयाइ।
PSA 18:11 मिछु खैब खीजी ह्रोंसए नेंबै सै लइ; क्युइ म्‍लोंग्या लवाबै रुँदो न्हाँम्स्यो खीजी ह्रोंसए टिबै क्ल्ह्‍यो लइ।
PSA 18:12 खीए चारबै ह्‍वेर न्हाँम्स्योउँइँले काम्‍लि तिम्‍लि, तिस्यु नेरो मिए राब युइ।
PSA 18:13 याहवेहजी स्वर्गउँइँले थेबै कै तेमा, ताँन् भन्दा थेबै परमेश्‍वरए कै खन्तोंदोंन् कोयाइ। छतमा तिस्यु नेरो मिए राब तेयुइ।
PSA 18:14 खीजी ह्रोंसए मे ल्हिसि शत्तुरमैं सग्याँ-प्हुग्याँ लवाइ, धै नाँम्रिइ ल्हिसि चमैं खैला तोला लवाइ।
PSA 18:15 ओ याहवेह, क्हिजी हौदिमा, क्हिए नखुँउँइँले त्होंबै थेबै सोइ मा ङ्युँइए तेंमैं नरो पृथ्बीए तेंमैं म्रोंयाँइ।
PSA 18:16 खीजी स्वर्गउँइँले ह्रोंसए यो स्योंसि ङलाइ क्हासि, मा ङ्युँइए गैरुउँइँले ङलाइ चैंसि तेमिंइ।
PSA 18:17 ङ भन्दा भोंबै शत्तुर नेरो ङलाइ आखोब्मैंउँइँले खीजी फ्रेमिंइ, तलेबिस्याँ चमैं ङ भन्दा बेल्‍ले भोंब मुँल।
PSA 18:18 ङए फिर दुःख तमा चमैं ङए फिर ह्‍वाखइ, दिलेया याहवेहजी ङ ल्होमिंइ।
PSA 18:19 खीजी ङ खाबज्यै तोइ लल् आखाँबै क्ल्ह्‍योर पखसि ङलाइ जोगेमिंइ, तलेबिस्याँ खी ङने बालुन् सैं तोंल।
PSA 18:20 ङइ ठिक के लबइले याहवेहजी ङ इनाम पिंइ, ङए योइ लबै छ्याँबै केमैं ङ्‍ह्‍योसि खीजी ङ आशिक पिंइ।
PSA 18:21 तलेबिस्याँ ङ याहवेहए घ्याँर प्रइमुँ, ङए परमेश्‍वरउँइँले ह्रेंगो तसि ङइ आछ्याँबै केमैं आलइमुँ।
PSA 18:22 खीजी पिंबै ठिममैं ङइ म्हाँदिइमुँ, धै खीजी ल्हैदिबै केमैं ङइ आपिइमुँ।
PSA 18:23 ङइ आछ्याँबै केमैं तोइ आलल्‍ले टिल। छतसि खीए उँइँर ङ छ्याब् आरेब् मुँल।
PSA 18:24 छतसि याहवेहजी ङइ लबै ठिक के, नेरो खीए उँइँर ङए योमैंइ लबै ठिक केमैं ङ्‍ह्‍योसि ङलाइ आशिक पिंइँमुँ।
PSA 18:25 क्हिजी बिब् ङिंब्मैंने क्हि म्हाँया लम्। छ्याब् आरेब्मैंलाइ क्हिजी छ्याब् आरेबन् उँइँमिंम्।
PSA 18:26 छ्याँबै के लब्मैंने क्हिजी छ्याँबन् लमुँ, धै खाबने या आक्ह्रिबै म्हिमैंने क्हिजी आक्ह्रिबै ब्यबहार लम्।
PSA 18:27 थेब् आप्हैंब्मैंलाइ क्हिजी जोगेमिंब्मुँ, दिलेया थेब् प्हैंब्मैं बिस्याँ क्हिजी कुरुवाब्मुँ।
PSA 18:28 ओ याहवेह, क्हिजी ङए बत्ति लुँरिल् पिंम्, ङ मिछु खैबर प्ररिमा ङए परमेश्‍वरजी मि म्रोंल् लमिंम्।
PSA 18:29 क्हिजी ल्होमिंमा ङ सिपाइमैंने नेनिल् खाँम्, ङए परमेश्‍वरजी ल्होमिंबइले ङइ गारा ङ्वैल् खाँम्।
PSA 18:30 परमेश्‍वरए बारेर बिब् ग बिस्याँ, खीए घ्याँ बेल्‍ले छ्याँब मुँ, याहवेहजी बिबै बाछा भर लल् खाँब मुँ; खीए प्हलेर ग्वार योंब्मैं ताँनए ल्हागिर ढाल ग।
PSA 18:31 तलेबिस्याँ याहवेह धों तबै परमेश्‍‍वर अरू खाब् मुँ? ङ्योए परमेश्‍वर धों तबै लोबै पारा अरू खाब् मुँ रो?
PSA 18:32 परमेश्‍वरजीन् ङलाइ भोंब लमिंम्, धै ङइ लल् म्हैबै केमैं खीजी छ्याँब् लमिंम्।
PSA 18:33 खीजी ङए प्हलेमैं भोंब लमिंमुँ, छतसि फो धोंले ङ नु-नुबै क्ल्ह्‍योजरेया प्रल् खाँम्।
PSA 18:34 छलेन ल्हडे खैले ट्होमुँ बिसेया खीजी ङलाइ लोमिंइमुँ, छतसि ङए योइ काँसाए त्हँलेमैंया कुरल् खाँम्।
PSA 18:35 ङलाइ जोगेमिंबै ल्हागिर क्हिन् ङए ढाल तइमुँ। धै क्हिए क्योलो योजी ङ ल्होमिंइमुँ, ङलाइ थेब् लमिंबै ल्हागिर क्हि ह्रोंसन् कुरइमुँ।
PSA 18:36 ङ प्रबै ल्हागिर क्हिजी प्ल्हाबै घ्याँ बनेमिंम्, छतसि ङए प्हले प्लेरिब् आरे।
PSA 18:37 ङए शत्तुरमैं ल्हाबोमा ङइ चमैं स्याइ, चमैंलाइ आसैन् समा ङ आएखल।
PSA 18:38 चमैं रेलै आखाँन्ले ङइ प्रिंइ, धै चमैं ङए प्हले ङाँर क्हुरियाइ।
PSA 18:39 क्हिजी ङ शत्तुरमैंने नेबै ल्हागिर भोंब लमिंइ; क्हिजी ङए शत्तुरमैं ङए प्हलेर कुरामिंइ।
PSA 18:40 क्हिजी ङए शत्तुरमैं लिग्याँ तोसि न्हेयाल् पिंइ, छतसि ङए शत्तुरमैं ङइ सैवाइ।
PSA 18:41 चमैंइ ल्होमिंन् बिसि ग्वार ह्रिइ, दिलेया चमैं जोगेमिंब खाबै आरेल। चमैंइ याहवेहने या ग्वार ह्रिइ, दिलेया खीजी चमैंने तोइ ज्वाफ आपिं।
PSA 18:42 खैंइ नोइ बोबै त्हुल धोंले ङइ चमैं त्हुल भुँ लवासि घ्याँर्बै हिल धोंले ङइ चमैं भ्योंवाइ।
PSA 18:43 ङए बिरोधीमैंए योउँइँले क्हिजी ङ जोगेमिंइमुँ, क्हिजी ङ अरू ह्रेंमैंए चिब लमिंइमुँ, ङो आसेबै म्हिमैं या ङए न्होंर मुँ।
PSA 18:44 ङए ताँ थेबै तोंदोंन् चमैंइ ङइ बिब् धोंन् लम्, अरू ह्‍युलर्बै म्हिमैं या ङए उँइँर कुरम्।
PSA 18:45 चमैं ङ्हिंसि लल-लुलु तयाम्, चमैं ह्रों-ह्रोसए लोबै किल्‍लाउँइँले ङ्हिंसि त्हारदै त्होंह्‍याम्।
PSA 18:46 याहवेह सोगों मुँ! ङ लोबै पाराए मिं थेब तरिगे! ङ जोगेमिंबै परमेश्‍वरए मिं बेल्‍ले थेब तरिगे।
PSA 18:47 ङए शत्तुरमैंने खि किंब नेरो म्हिमैंलाइ ङए न्होंर थेंमिंब परमेश्‍वरन् ग।
PSA 18:48 खीजी ङलाइ ङए शत्तुरमैंउँइँले जोगेमिंम्। ङए शत्तुरमैंए फिर क्हिजी ङ ट्होगो लमिंइ, म्हिसै प्रब्मैंए योउँइँले क्हिजी ङ जोगेमिंइ।
PSA 18:49 छतसि ओ याहवेह, अरू ह्रेंमैंए म्हाँजोर ङ क्हिए मिं थेब लब्मुँ, धै क्हिए मिं क्वेब्मुँ।
PSA 18:50 खीजी ह्रोंसए म्रुँलाइ ट्होगों लमिंम्, धै खीजी त्हाँबै म्रुँ दाऊद नेरो चए सन्तानए फिर खोंयोंइ आनुबै म्हाँया लरिम्।
PSA 19:1 क्वे प्रिंब्मैंए चिबए ल्हागिर दाऊदए भजन घ्रि। परमेश्‍वरए छ्याँबै बयन मुइ लमुँ, खीजी बनेबै मुसारामैंइ खीए केमैं उँइँमिंम्।
PSA 19:2 त्हिंइ ह्रोंसे चमैंइ ताँ सेम्; धै म्हुँइँस ह्रोंसे चमैंइ ज्ञानए ताँमैं उँइँमिंम्।
PSA 19:3 चमैंने ताँफुँमैं आरे, चमैंल क्युइ या आरे, चमैंए कै या आथे।
PSA 19:4 दिलेया चमैंए कै ह्‍युल तिगोंन् कोनिइमुँ, चमैंइ पोंबै ताँमैं ताँन् ह्‍युलर फेनेइमुँ, खीजी त्हिंयाँ टिबै ल्हागिर मुर क्ल्‍ह्‍यो घ्रि लथेंइमुँ।
PSA 19:5 च त्हिंयाँ ब्ह्‍याए जग्‍यउँइँले पैरेसि त्होंइ खबै प्ह्रेंरो धों तब् मुँ, ट्होइ खबै म्हि सैं तोंब् धोंलेन् ह्रोंसए के लबर च सैं तोंम्।
PSA 19:6 मुए छेउ घ्रिर च त्होंमुँ, धै स्युरदै अर्को छेउ समा फेनेम्। चए राबउँइँले तो सै या लोल् आखाँ।
PSA 19:7 याहवेहए ठिम खोट आरेब मुँ, च ठिमइ सैं सिब्मैंलाइ भों पिंम्। खीजी बिबै ताँमैं भर लल् खाँब मुँ, आह्र आसेब्मैंलाइ च ताँइ बुद्धि पिंम्।
PSA 19:8 याहवेहए ठिममैं ठिक मुँ, खीजी ल्हैदिबै के लइ बिस्याँ सैं तोंल् योंम्। याहवेहजी बिबै ताँमैं ठिक मुँ, च ताँमैंइ ङ्योए न्ह मि थोंमिंम्।
PSA 19:9 खीलाइ मान लद् बिबै ताँ छ्याँब मुँ, धै खोंयोंन् बिलै तरिब्मुँ। याहवेहए ठिमर्बै ताँमैं क्ह्रोंसेंन्बै मुँ, चु ताँमैं ठिक मुँ।
PSA 19:10 मारा भन्दा याहवेहए ताँमैं म्हैल् त्हुब मुँ, छ्याँबै मारा भन्दा झन ल्हें खीए ताँ म्हैल् त्हुम्; खीए ताँ क्वे खुदु भन्दा खुदुब् मुँ, धै न्हाँज्युउँइँले तेयुबै खुदु भन्दा च बेल्‍ले लिंब तम्।
PSA 19:11 चु ताँमैंउँइँलेन् क्हिए केब्छैंइ तो लल् त्हुम् बिसि सेमुँ, चु ताँमैंइ बिब् धों लस्याँ थेबै इनाम योंम्।
PSA 19:12 ह्रोंसइ लबै गल्तिमैं खाबइ सेल् खाँम् रो? खाबज्यै सेल् आखाँ। छतसि ङइ था आसेल्‍ले लबै गल्तिमैं क्षमा लमिंन्।
PSA 19:13 क्हिए केब्छैंइ ह्रना-ह्रन् पाप केमैं लल् आपिंन्? च सैमैंइ ङलाइ पापर च्होवाल् आखाँरिगे, छ लस्याँ ङ क्हिए उँइँर छ्याब् आरेब तब्मुँ, धै थेबै अपराधउँइँले जोगेसि ङ दोष आरेब् तब्मुँ।
PSA 19:14 ओ याहवेह, ङ लोबै पारा नेरो ङलाइ खामिंबै परमेश्‍वर, ङए सुँउँइँले त्होंबै ताँफुँमैं नेरो ङए सैंर मैंबै ताँमैं क्हिए उँइँर छ्याँब तरिगे।
PSA 20:1 क्वे प्रिंबै चिबए ल्हागिर - दाऊदए भजन घ्रि। ओ म्रुँ, दुःखए त्हेर ग्वार ह्रिमा याहवेहजी क्हि ल्होमिंरिगे, याकूबए परमेश्‍वरजी क्हिए रक्षा लमिंरिगे।
PSA 20:2 खीजी ह्रोंसए पबित्र क्ल्‍ह्‍योउँइँले क्हिलाइ ल्होमिंरिगे, छले खीजी सियोनउँइँले क्हि ल्होमिंरिगे।
PSA 20:3 क्हिइ पिंबै ताँन् भेटिमैं खीजी मैंरिगे, धै क्हिइ ख्रोंइ पिंबै ख्रोमैं म्रोंसि खी सैं तोंरिगे। तिस्याँदे मैंन्
PSA 20:4 क्हिए सैंर मैंबै ताँमैं खीजी योमिंरिगे, धै क्हिइ लल् म्हैबै ताँन् केमैंर आशिक पिंरिगे।
PSA 20:5 क्हिजी ट्‍होमा ङि सैं तोंदै क्हिए जय-जय लब्मुँ, धै ङिए परमेश्‍वरए मिं क्वेदै ङि ह्रोंसए झन्डा क्वेब्मुँ। याहवेहजी क्हिइ ह्रिबै तोन्दोंरि सैमैं पिंरिगे।
PSA 20:6 याहवेहजी ह्रोंसजी त्हाँबै म्हिलाइ ल्होमिंमुँ। खीजी खीए पबित्र स्‍वर्गउँइँले ह्रोंसए क्योलो योर मुँबै जोगेमिंबै भोंउँइँले, ह्रोंसइ त्हाँबै म्हि जोगेमिंब्मुँ बिसि ङइ तोगो सेइमुँ।
PSA 20:7 कोइइ रथमैंए फिर, कोइइ घोडामैंए फिर भर लम्, दिलेया ङिम् ङिए याहवेह परमेश्‍वरए मिंर्न भर लम्।
PSA 20:8 चमैं क्र कुरसि क्हुरयाम्, दिलेया ङिम् आक्हुरल्‍ले राम्।
PSA 20:9 ओ याहवेह, म्रुँलाइ ट्होगों लमिंन्, धै ङिइ ग्वार ह्रिमा ङिलाज्यै ल्होमिंन्।
PSA 21:1 क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, क्हिजी शक्‍ति पिंबइले म्रुँ सैं तोंइमुँ। धै क्हिजी ट्होगों लमिंबइले खी बेल्‍ले सैं तोंसि उफर्दिइमुँ।
PSA 21:2 क्हिजी म्रुँए सैंर मैंब् धों लमिंइमुँ, धै खीजी यो छ्युँ लसि ग्वार ह्रिमा क्हिजी थेमिंइमुँ। तिस्याँदे मैंन्
PSA 21:3 छ्याँ-छ्याँबै सैमैं पुयुसि क्हि चने त्होबर युइ, धै छ्याँबै माराए मुकुट चए क्रर कुमिंइ।
PSA 21:4 चइ क्हिने छ्ह ह्रिमा क्हिजी चलाइ खोंयोंइ आखाँबै छ्ह पिंइ।
PSA 21:5 क्हिजी ट्होंगों लमिंबइले खीए मिं थेब तइमुँ, क्हिजी चए मिं थेब् लसि म्रुँमैंइ योंब् धों तबै मान पिंइमुँ।
PSA 21:6 क्ह्रोंसेंन्ले क्हिजी चलाइ खोंयोंइ आखाँबै आशिक पिंइमुँ, धै क्हि चने तमिंबइले चए सैं खोंयोंन् बिलै तोंरिम्।
PSA 21:7 तलेबिस्याँ म्रुँइ याहवेहए फिर भर थेंम्, ताँन् भन्दा थेबै परमेश्‍वरए खोंयोंइ आनुबै म्हाँया चए फिर मुँबइले च खोंयोंइ ङ्हिंल् त्हुरिब् आरे।
PSA 21:8 क्हिए योजी ह्रोंसए ताँन् शत्तुरमैं म्हैसि पखब्मुँ, धै क्हिए शत्तुरमैं ताँन् क्हिए क्योलो योजी क्हाब्मुँ।
PSA 21:9 क्हि युबै त्हेर क्हिजी चमैं लुँरिबै मिर भ्योंवाब्मुँ, याहवेहजी ह्रोंसए ह्रिसर चमैं क्ल्ह्‍योंवाब्मुँ, धै मिइ चमैं ख्रोंवाब्मुँ।
PSA 21:10 क्हिजी पृथ्‍बीर चमैंए सन्तानमैं घ्रि या आचैल् लवाब्मुँ, धै चमैंए खलकमैं म्हिमैंए म्हाँजोउँइँले नास लवाब्मुँ।
PSA 21:11 चमैंइ क्हिए बिरोधर आछ्याँबै ताँमैं मैंलेया, धै ङो चुसि क्हिए न्होह्रों लल् म्हैले या चमैंए सैंर मैंब् धों तरिब् आरे।
PSA 21:12 क्हिजी त्हलेर मे थेंसि चमैं ल्हिमा चमैं लिग्याँ तोसि न्हेयाब्मुँ।
PSA 21:13 ओ याहवेह, ह्रोंसए थेबै भोंर क्हि ताँन् भन्दा थेब् तद्! क्हिए भोंजी लबै थेबै केए क्वे प्रिंदै ङि क्हिए मिं क्वेब्मुँ।
PSA 22:1 क्वे प्रिंब्मैंए चिबए ल्हागिर, “त्हिंयाँ प्योबै त्हेर्बै फो आमा” बिबै भाकार प्रिंल् त्हुबै दाऊदए भजन घ्रि। ओ ङए परमेश्‍वर, ओ ङए परमेश्‍वर, क्हिजी ङ तले पिवाल? सैं आतोंसि क्रोसेया ङ आजोगेमिंल्‍ले क्हि तले ङ ङाँइँले ह्रेंगो तल?
PSA 22:2 ओ ङए परमेश्‍वर, ङइ त्हिंइ ह्रोंसे क्हिए मिंन् किंइमुँ, म्हुँइँस ह्रोंसे या क्हिनेन् ग्वार ह्रिइमुँ छान् ललेया ङ छिं आङ्हाँइमुँ।
PSA 22:3 दिलेया क्हि पबित्र परमेश्‍वर राजगद्दिर टिम्, इस्राएलीमैंइ क्हिए मिं क्वेम्।
PSA 22:4 ङिए खेमैं माँमैंइ क्हिए फिर्न भर लमल, चमैंइ क्हिए फिर भर लबइले क्हिजी चमैं जोगेमिंइ।
PSA 22:5 चमैंइ ओरदै क्हिनेन् ग्वार ह्रिइ, छतसि चमैं सोइ। चमैंइ क्हिए फिर्न भर लबइले चमैं फा पिल् आत्हुल।
PSA 22:6 दिलेया ङ प्हुँलुँ धोंन् तब् मुँ, म्हि आङिं बिसि म्हिमैंइ ङलाइ तोइ धोंइ आङ्हाँ, धै ङलाइ प्ह्रइमुँ।
PSA 22:7 ङलाइ म्रोंब्मैं ताँनइ ङउँइँ ङ्‍ह्‍योसि म्हदे म्‍लिंसि छ बिदै खरि च्यारम्:
PSA 22:8 “याहवेहजीन् जोगेमिंम् बिसि खीए फिर्न चइ भर लम्। च म्रोंसि याहवेह सैं तोंम्, छतसि खीजीन् चलाइ जोगेमिंरिगे,” बिसि चमैंइ ङलाइ प्ह्रम्।
PSA 22:9 चमैंइ तोन् बिलेया आमाए फोउँइँले ङलाइ तेब क्हिन् ग। आमाए क्ह्‍वेंउँइँलेन् क्हिजी ङलाइ क्हिए फिर भर लब लोमिंइ।
PSA 22:10 फिबै त्हे ओंनोंन् ङ क्हिलन् ग, आमाए फोर मुँब् ओंनोंबै ङए परमेश्‍वर क्हिन् ग।
PSA 22:11 ङ ङाँइले ह्रेंगो आतमिंन्, तलेबिस्याँ ङए न्होह्रों लल् म्हैब्मैं ल्हें मुँ, ङलाइ ल्होमिंब खाबै आरे।
PSA 22:12 साँढे धोंले भोंबै शत्तुरमैंइ ङ घेर्दिइमुँ, बाशान ह्‍युलर्बै भोंबै साँढेमैं धों तबै शत्तुरमैं ङए कारग्युले मुँ।
PSA 22:13 फो ख्रेंसि ङ्‍हेदै ह्‍वाखबै सिंहमैं धोंले ङए न्होह्रों लबै ल्हागिर चमैंइ सुँ आँ लम्।
PSA 22:14 क्यु ङेयाब् धोंले ङए भों नुयाइमुँ, ङए ह्रिबए जोर्निमैं ताँन् प्ल्ह्‍याइमुँ। ङए खों युलुयाबै मम् बत्ति धोंन् तयाइमुँ।
PSA 22:15 भों नुयासि ङ तियाबै पु धोंन् तयाइमुँ, ङए ले ताइ ह्रेंयाइमुँ, सियारिगे बिसि क्हिजी ङ त्हुलर भ्योंथेंइमुँ।
PSA 22:16 दुष्‍ट म्हिमैं ङए कारग्युले मुँ, नगिमैंइ धोंले चमैंइ ङ घेर्दिइमुँ, चमैंइ ङए यो प्हलेमैंर खुँ थोंवाइमुँ।
PSA 22:17 ङए ताँन् ह्रिबमैं ङइ च्योल् खाँम्, म्हिमैंइ आछ्याँबै सैंले ङ ङाँइ ङ्ह्‍योबै ङ्‍ह्‍योबन् लम्।
PSA 22:18 चिट्टा झोंसि चमैंइ ङए क्वें खें-खेंमैंए न्होंर चुम्।
PSA 22:19 दिलेया ओ याहवेह, ङ ङाँइले क्हि ह्रेंगो आतमिंन्! ओ ङए भों, युनन् ङलाइ ग्वार पिंन्।
PSA 22:20 सेलाँउँइँले ङ जोगेमिंन्, चु नगिमैंउँइँले ङ सिल् आपिंन्।
PSA 22:21 चेंमैंए सुँउँइँले ङ फ्रेमिंन्, धै क्ह्‍योंर्बै साँढेए रुउँइँले ङ जोगेमिंन्।
PSA 22:22 ङए अलिमैंए उँइँर क्हिजी लबै छ्याँबै केमैंए बयन लदै ङ क्हिए मिं थेब लब्मुँ। ल्हें म्हि च्होंबै क्ल्ह्‍योरै या ङ क्हिलाइन थेब् लब्मुँ
PSA 22:23 ओ याहवेहलाइ मान लब्मैं, खीलाइन थेब् लद्! ओ याकूबए ताँन् सन्तानमैं, खीए मिं क्वेद्! ओ इस्राएलए ताँन् सन्तानमैं, खीने ङ्हिंन्!
PSA 22:24 तलेबिस्याँ आगुइ ह्रुगुदिसि दुःख योंबै म्हिलाइ खीजी ल्होमिंम्, हेलै या आल, खीजी ह्रोंसए मोंडा छाबै म्हिमैंउँइँले आलो, चइ ल्होमिन् बिसि ग्वार ह्रिमा खीजी थेम्।
PSA 22:25 ल्हें म्हि च्होंबै क्ल्ह्‍योर ङए छ्याँबै बयन तल् पिंब क्हिन् ग, छतसि क्हिलाइ मान लब्मैंए उँइँर बाछा फैसि लम् बिबै के ङइ पूरा लब्मुँ।
PSA 22:26 ङ्हाँदुमैं चसि म्रेंब्मुँ, याहवेह म्हैब्मैंइ खीलाइन थेब् लब्मुँ। धै चमैं खोंयोंन् बिलै सोरिल् योंब्मुँ!
PSA 22:27 ह्‍युलर मुँबै ताँन् ह्रेंमैंइ क्हिलाइन मैंब्मुँ धै क्हि ङाँइँन तोखब्मुँ। ह्रें-ह्रेंर्बै म्हिमैं ताँनइ क्हिलाइन फ्योब्मुँ।
PSA 22:28 तलेबिस्याँ ताँन् ह्रेंमैंए म्रुँ क्हिन् ग, क्हिजीन् खन्तोंदोंन् ग्याल्स लम्।
PSA 22:29 ह्‍युलर्बै ताँन् प्लो प्लोब्मैंइ भोज चदै सैं तोंदै क्हिए मिं क्वेब्मुँ। ह्रोंसलाइ जोगेल् आखाँब्मैं सर्न कोंनेल् त्हुब्मुँ, चमैं ताँनइ क्हिए उँइँर्न च्हि तुँब्मुँ।
PSA 22:30 लिउँइँ खबै सन्तानइ खीए के लब्मुँ, लिउँइँ खबै पुस्तमैंने या चमैंइ याहवेहए बारेर बिमिंब्मुँ,
PSA 22:31 तिंयाँ समा आफिबै म्हिमैंलाज्यै या चमैंइ खीजी लबै ठिक केमैंए बारेर बिमिंब्मुँ।
PSA 23:1 दाऊदए भजन घ्रि याहवेह ङए प्ह्रोंछैं ग, ङने तोइ खाँचो तरिब् आरे।
PSA 23:2 खीजी ङ पिंग्या छि मुँबै क्‍ल्‍ह्‍योर टिल् पिंमुँ, क्यु पिसि हार-हार तब सल् लबै क्यु ङाँर खीजी ङलाइ डोरेसि बोम्।
PSA 23:3 खीजी ङ धबै सोगों लमिंमुँ। ङइ खीए मिं थेब लरिगे बिसि खीजी ङ ठिक घ्याँर डोरेमिंम्।
PSA 23:4 मिछु खैबै खोल्सर प्रल् त्हुलेया ङ तो सैने या ङ्हिंरिब् आरे, तलेबिस्याँ क्हि ङने बालु मुँ; क्हिए तुँबै प्हरे नेरो ह्‍वाबै प्हरेइ ङए रक्षा लम्।
PSA 23:5 ङए शत्तुरमैंए उँइँर, क्हिजी ङए ल्हागिर चब् थुँब तयार लमिंमुँ। क्हिजी ङलाइ प्ह्रेंमैं धोंले मान लइमुँ, धै ङए प्हेल आप्लिंन् समा क्हिजी झोंरिम्।
PSA 23:6 क्ह्रोंसेंन्ले क्हिए खोंयोंइ आनुबै म्हाँया नेरो आशिक ङए छ्ह तिगोंन् ङने प्रे तरिब्मुँ, धै ङ खोंयोंन् बिलै याहवेहए धिंर टिब्मुँ।
PSA 24:1 दाऊदए भजन घ्रि पृथ्‍बी नेरो चर मुँबै तोन्दोंरि सैमैं याहवेहलन् ग, ह्‍युल नेरो चर टिब्मैं ताँन् खीलन् ग,
PSA 24:2 तलेबिस्याँ खीजी पृथ्‍बी मा ङ्युँए फिर थेंइमुँ, धै पृथ्‍बीए जग गैरु क्युए फिर थेंइमुँ।
PSA 24:3 याहवेए कोंर खाब् क्रेल् खाँमुँ? धै खीए पबित्र क्‍ल्‍ह्‍योर खाब् राल् खाँमुँ?
PSA 24:4 आछ्याँबै केमैं आलब्मैं, छ्याँबै सैं प्ह्‍याब्मैं, कु ङाँइ सैं आल्हैदिब्मैं धै स्योलिबै ताँर कसम आचब्मैंन्, याहवेहए कोंर क्रेल् खाँम्।
PSA 24:5 छाबै म्हिमैंइन याहवेह ङाँइँले आशिक योंब्मुँ, धै चमैंलाइ जोगेमिंबै परमेश्‍वरजी चमैंलाइ ठिक ठर्दिमिंब्मुँ।
PSA 24:6 खीलाइ म्हैबै म्हिमैं छाबन् तम्, चमैंइ याकूबए परमेश्‍वरने त्होबै सैं लम्। तिस्याँदे मैंन्
PSA 24:7 ओ मुल् म्रामैं, मान लल् त्हुबै म्रुँ होंरिगे बिसि क्हेमैंए क्र कैंडो लद्! ओ स्योंम्बै म्रामैं, नुब् तद्!
PSA 24:8 मान लल् त्हुबै म्रुँ खाब् जा? याहवेहन् ग! खी भोंब नेरो शक्‍ति मुँब मुँ, याहवेहजीन् ल्हडें ट्होम्।
PSA 24:9 ओ मुल् म्रामैं, मान लल् त्हुबै म्रुँ होंरिगे बिसि क्हेमैंए क्र कैंडो लद्! ओ स्योंम्बै म्रामैं, नुब तद्!
PSA 24:10 मान लल् त्हुबै म्रुँ खाब् जा? स्वर्गर्बै सेनामैंए चिब याहवेहन् ग! खीन् मान लल् त्हुबै म्रुँ ग। तिस्याँदे मैंन्
PSA 25:1 दाऊदए भजन घ्रि। ओ याहवेह, ङए सैं क्हि ङाँइँन लमुँ।
PSA 25:2 ओ ङए परमेश्‍वर, ङइ क्हिए फिर्न भर लइमुँ, ङलाइ फा पिन् आलमिंन्, ङए शत्तुरमैं ङए फिर ट्होगों तल् आपिंन्।
PSA 25:3 क्हिए फिर भर थेंब्मैं खाबै या खोंयोंइ फा पिल् त्हुरिब् आरे, दिलेया फाकर्न धोका पिंब्मैं फा पिल् त्हुब्मुँ।
PSA 25:4 ओ याहवेह, ङलाइ क्हिए घ्याँ तेंमिंन्, क्हिए घ्याँर प्रबर ङलाइ लोमिंन्।
PSA 25:5 क्हिए क्ह्रोंसेंन्बै घ्याँर प्रबर ङलाइ लोमिंन्, तलेबिस्याँ ङलाइ जोगेमिंबै परमेश्‍वर क्हिन् ग; धै ङइ त्हिंतिमिंन् क्हिए फिर्न आशा लइमुँ।
PSA 25:6 ओ याहवेह, स्योंम् ओंनोंन् ङए फिर मुँबै क्हिए थेबै दयाम्हाँया मैंमिंन्!
PSA 25:7 ओ याहवेह, ङए फ्रेंसिर्बै पापमैं नेरो ङइ लबै आछ्याँबै केमैं आमैंमिंन्; क्हि खोंयोंन् बिलै म्हाँया लबै परमेश्‍वर ग, छतसि ङलाइ आम्‍लेमिंन्, तलेबिस्याँ क्हिए सैं छ्याँब मुँ।
PSA 25:8 याहवेहजी ठिक निसाफ लमुँ, खी स्वाब मुँ, छतसि खीजी पापिमैंलाज्यै या ठिक घ्याँर प्रबर लोमिंम्।
PSA 25:9 खीजी थेब् आप्हैंब्मैंलाइ ठिक घ्याँर डोरेमिंब्मुँ, धै चमैंलाइ खीए घ्याँर प्रबर लोमिंब्मुँ।
PSA 25:10 खीजी फैबै बाछाए ताँमैं ङिंब्मैंलाइ याहवेहजी खोंयोंइ आनुबै म्हाँया लसि भर पर्दिल् खाँन्ले डोरेम्।
PSA 25:11 ओ याहवेह, ङइ आछ्याँबै केमैं ल्हें लइ। ङलाइ क्षमा पिंन्, तलेबिस्याँ क्हि क्षमा पिंबै परमेश्‍वर ग।
PSA 25:12 याहवेहलाइ मान लब्मैंइ खेंमैं खैले प्रल् त्हुम् बिबै ताँ खीउँइँलेन् लोल् योंब्मुँ।
PSA 25:13 चइ सुखर त्हिंइमैं थोब्मुँ, धै चए सन्तानमैं ह्‍युलए फिर क्ल्हे तब्मुँ।
PSA 25:14 याहवेहलाइ मान लब्मैंने बालु खी बेल्‍ले क्ह्रिबै थु तम्, धै खीजी फैबै बाछाए ताँमैं चमैंलाइ सेल् पिंम्।
PSA 25:15 ङए मिइ खोंयोंन् बिलै याहवेह ङाँइँन ङ्‍ह्‍योरिमुँ, तलेबिस्याँ खीजीन् ङए प्हलेमैं ङोउँइँले जोगेमिंब्मुँ।
PSA 25:16 ङ ङाँइ तोमिंन् धै ङए फिर दयाम्हाँया लमिंन्, तलेबिस्याँ ङ घ्रिन् मुँ धै ङए फिर दुःख तइमुँ।
PSA 25:17 ङए सैंर्बै दुःखमैं ल्हें ततै ह्‍याइमुँ; क्हिजीन् चु दुःखउँइँले ङ फ्रेमिंन्।
PSA 25:18 ङए दुःख नेरो पिरमैं क्हिजी बिचार लमिंन्, धै ङए ताँन् पापमैं क्षमा लमिंन्।
PSA 25:19 ङ्ह्‍योत्ति, ङए शत्तुरमैं कति ल्हें मुँ, चमैंइ ङलाइ बेल्‍ले हेल् लम्।
PSA 25:20 ङए रक्षा लमिंन् धै ङलाइ जोगेमिंन्! ङ फा फिल् आत्हुरिगे, तलेबिस्याँ ङ क्हिए प्हलेर ग्वार योंबर खइमुँ।
PSA 25:21 ङइ स्योर आतेइमुँ, ङइ लबै छ्याँब आछ्याँबै केमैं ताँन् ङइ क्हिनेन् बिइमुँ। छतसि ङलाइ जोगेमिंन्, तलेबिस्याँ ङइ क्हिए फिर्न आशा थेंइमुँ।
PSA 25:22 ओ परमेश्‍वर, क्हिजी त्हाँबै इस्राएललाइ दुःखउँइँले फ्रेमिंन्।
PSA 26:1 दाऊदए भजन ओ याहवेह, ङने तोइ छ्याब् आरे बिसि उँइँमिंन्, तलेबिस्याँ ङइ छ्याब् खबै केमैं आलइमुँ, धै ङइ तिफुँइ छाइ-छुइ आतल्‍ले क्हिए फिर्न भर लइमुँ।
PSA 26:2 ओ याहवेह, ङलाइ जाँचेद्, ङ खैबै म्हि जा बिसि बिचार लमिंन्; ङए सैं नेरो खों जाँचेद्।
PSA 26:3 तलेबिस्याँ क्हिजी लबै खोंयोंइ आनुबै म्हाँया ङइ झलझलले मैंरिमुँ, धै क्हिए भर लल् खाँबै घ्याँर ङ प्ररिमुँ।
PSA 26:4 ङ स्योर तेब्मैंने बालु आटि, धै छलु म्हिलु लब्मैंने या आप्र।
PSA 26:5 आछ्याँबै के लब्मैं म्रोंसि ङ छेरम्, धै दुष्‍ट म्हिमैंने ङ आटि।
PSA 26:6 ओ याहवेह, ङए योइ छ्याब् खबै केमैं तोइ आलइमुँ; छतसि क्हिए मिंर ख्रो पिंबै क्ल्ह्‍योर क्हिए मिं क्वेदै ङ प्रम्।
PSA 26:7 थेबै कै तेसि धन्यबादए क्वे प्रिंदै क्हिजी लबै औदिबै केमैंए बयन ङइ लप्रम्।
PSA 26:8 ओ याहवेह, क्हि टिबै धिं, क्हिए चारबै ह्‍वे मुँबै क्‍ल्‍ह्‍योलाइ ङइ म्हाँया लम्।
PSA 26:9 पापिमैंने बालुन् ङलाइ नास आलद्, धै म्हि सैमैंने ङलाइ बालु आलमिंन्।
PSA 26:10 चमैंए योइ आछ्याँबै केमैं लम्, धै चमैंए क्योलो योइ खोंयोंन् बिलै ख्याब किंम्।
PSA 26:11 दिलेया ङइमि छ्याब् आखबै छ्ह थोइमुँ; छतसि ङलाइ जोगेमिंन्, ङए फिर दयाम्हाँया लमिंन्।
PSA 26:12 ङ सोजो घ्याँर प्रइमुँ ङइ ल्हें म्हिए म्हाँजोर क्हिए मिं क्वेब्मुँ।
PSA 27:1 दाऊदए भजन याहवेह ङए चारबै ह्‍वे नेरो ङए मुक्‍ति ग! ङ खाब्ने ङ्हिंब? याहवेहन् ङए रक्षा लबै किल्‍ला ग। छतसि ङ खाब् म्रोंसि ङ्हिंब?
PSA 27:2 ङए शत्तुरमैं नेरो बिरोधीमैं दुष्‍ट म्हिमैं ग! चमैं ङए से चबर ङए बिरोधर रामा चमैंए प्हले थुरियासि क्हुरह्‍याम्।
PSA 27:3 सेनामैं ङए बिरोधर कारग्यु तखलेया, ङए सैं ङ्हिंरिब् आरे। ङए बिरोधर लडें तलेया ङ परमेश्‍वरए फिर भर थेंब्मुँ।
PSA 27:4 ङइ याहवेहने ताँ घ्रि ह्रिइमुँ, ङइ म्हैबै ताँ चुन् ग: खी टिबै क्ल्ह‍योर ङइ खीलाइ म्हैल् खाँरिगे, ङए छ्ह तिगोंन् याहवेहए धिंर टिल् योंरिगे, धै खीए छ्याँबै केमैं ङ्ह्‍योल् योंरिगे।
PSA 27:5 तलेबिस्याँ दुःख तमा खीजी खी टिबै क्‍ल्‍ह्‍योर ङलाइ जोगेसि थेंमिंब्मुँ, खीए पबित्र तम्बु न्होंर खीजी ङ लोसि थेंमिंब्मुँ, धै थेबै पाराए फिर खीजी ङ नुल्‍ले थेंमिंब्मुँ।
PSA 27:6 झाइले ङए कारग्यु तखबै शत्तुरमैंए फिर खीजी ङए क्र कैंडो लमिंब्मुँ, छतसि खीए पबित्र तम्बुर ङ सैं तोंदै ओरादै ख्रो पिंखब्मुँ; धै भजन प्रिंदै याहवेहए मिं थेब् लब्मुँ।
PSA 27:7 ओ याहवेह, ङइ थेबै कै तेसि ग्वार ह्रिमा क्हिजी थेमिंन्; ङए फिर दयाम्हाँया लमिंन् धै ङलाइ ज्वाफ पिंन्!
PSA 27:8 “क्हेमैंइ ङए मोंड म्हैद्!” बिसि क्हिजी बिइ। छतसि ङए सैंइ क्हिने बिइ, “ओ याहवेह, क्हिए मोंड ङ म्हैब्मुँ।”
PSA 27:9 ओ ङए मुक्‍ति पिंबै परमेश्‍वर! क्हिए मोंड ङ ङाँइँले आलोमिंन्, ह्रिस खमा क्हिए के लबै म्हिलाइ आस्योमिंन्। ङलाइ जोगेमिंबै परमेश्‍वर क्हि ग। छतसि ङलाइ आपिमिंन्।
PSA 27:10 ङए आबा-आमाइ ङलाइ वाथेंलेया याहवेहजी ङलाइ समल्दिब्मुँ।
PSA 27:11 ओ याहवेह, क्हिए छ्याँबै घ्याँर प्रबर ङलाइ लोमिंन्। ङए शत्तुरमैं ल्हें मुँ, छतसि क्हिए छ्याँबै घ्याँर डोरेमिंन्।
PSA 27:12 शत्तुरमैंए योर ङलाइ आपिंमिंन्; तलेबिस्याँ ङए बिरोधर स्योर ताँ पोंब्मैं रेइमुँ, चमैं सैब् म्‍लोब् लब् बिसि प्रइमुँ।
PSA 27:13 सोगोंमैंए ह्‍युलर ङ याहवेहए छ्याँबै केमैं म्रोंब्मुँ बिब ङलाइ अझै बिश्‍वास मुँ।
PSA 27:14 याहवेहए घ्याँ ङ्‍ह्‍योरिद्; सैं च्योंब आलद्, खीजी क्हिए सैं भोंब् लमिंब्मुँ; छतसि ङ बिमुँ! याहवेहए घ्याँ ङ्‍ह्‍योरिद्।
PSA 28:1 दाऊदए भजन ओ याहवेह, ङ लोबै पारा, क्हिनेन् ङ ग्वार ह्रिमुँ, ङइ ग्वार ह्रिमा आथेब् धों आलमिंन्, क्हिजी ङए ताँ आथेमिंस्याँ, सिसि क्रोंर ह्‍याब्मैं धों ङ तब्मुँ।
PSA 28:2 ल्होमिंन् बिसि क्हिनेन् ग्वार ह्रिमुँ, धै क्हिए ताँन् भन्दा पबित्र क्‍ल्‍ह्‍योउँइँ ङ ह्रोंसए यो क्वेमुँ, छतसि ङए ताँमैं थेमिंन्।
PSA 28:3 दुष्‍ट म्हिमैं नेरो आछ्याँबै के लब्मैंने बालु ङलाइ दण्ड आपिंन्! चमैंइ ह्रोंसए ङ्‍हेब्मैंने बालु छ्याँबै ताँ लम्, दिलेया चमैंए खोंर बिस्याँ आछ्याँबै ताँ मैंम्।
PSA 28:4 चमैंइ लबै आछ्याँबै केमैं नेरो चमैंए योइ लबै केमैं ङ्ह्‍योसि योंल् त्हुबै दण्ड चमैंलाइ पिंन्; चमैंए योइ खैबै के लइमुँ छाबन् दण्ड चमैंलाइ पिंन्, चमैंइ योंल् तुबै दण्ड चमैंलाइ पिंन्।
PSA 28:5 याहवेहजी लबै केमैं नेरो खीए योजी लबै केमैं चमैंइ वास्ता आल, छतसि खीजी चमैंलाइ नास लवाब्मुँ, खोंयोंइ चमैंलाइ बनेरिब् आरे।
PSA 28:6 याहवेहए मिं थेब् तरिगे! तलेबिस्याँ ल्हयो खमिंन् बिबै प्राथना लमा खीजी थेमिंइमुँ।
PSA 28:7 याहवेह ङए शक्‍ति नेरो ङए ढाल ग! ङइ खीनेन् सैं केइमुँ, धै खीजीन् ङ ल्होमिंबइले ङए सैं बेल्‍ले तोंइमुँ, धै ङ भजन प्रिंसि खीलाइ धन्यबाद पिंब्मुँ।
PSA 28:8 याहवेहजी खीए म्हिमैंलाइ भों पिंम्, धै खीजी त्हाँबै म्रुँ जोगेसि रक्षा लमिंम्।
PSA 28:9 क्हिए म्हिमैं जोगेमिंन्, धै ह्रोंसजी त्हाँबै म्हिमैंलाइ आशिक पिंन्! चमैंए प्ह्रोंछैं तमिंनु, धै खोंयोंन् बिलै चमैंए वास्ता लमिंन्।
PSA 29:1 दाऊदए भजन घ्रि। ओ थेबै शक्ति मुँबै परमेश्‍वरए दूतमैं, याहवेहए मिं क्वेद्! खी बेल्‍ले थेब मुँ बिसि खीए भोंए बयन लद्।
PSA 29:2 याहवेहए मिं क्वेसि खीलाइ लल् त्हुबै मान लद्, खी धोंलेन् पबित्र तसि खीए मिं क्वेद्।
PSA 29:3 याहवेहए कै मा ङ्युँइ फिर थेल् खाँम्, मान पिंल् त्हुबै परमेश्‍वर बेल्‍ले ओरम्, याहवेह थेबै कैले मा ङ्युँइए फि-फि ओरम्।
PSA 29:4 याहवेहजी पोंबै ताँर शक्‍ति मुँ, याहवेहए कै बेल्‍ले भोंब मुँ।
PSA 29:5 याहवेहए कैजी थे-थेबै देबदारुए धुँमैं या चोवाम्; लेबनानए कोंर्बै देबदारुए धुँमैं याहवेहजी कुदु-कुदु लवाम्।
PSA 29:6 खीजी लेबनानर्बै कोंमैं मे झज धोंलेन् उफर्दिमिंम्, धै सिरिओन बिबै कों क्‍ह्‍योंर्बै साँडे धोंले उफर्दिमिंम्।
PSA 29:7 काम्‍लि-तिम्‍लिने युबै चड्कनेइ धोंलेन् याहवेहए कैजी ल्हिम्।
PSA 29:8 याहवेहए कैजी क्यु आयोंबै क्‍ल्‍ह्‍यो लाम्, याहवेहजी कादेश बिबै क्यु आयोंबै क्‍ल्‍ह्‍यो लाम्।
PSA 29:9 याहवेहए कैइ चाँफए धुँमैं ख्योदे लवाम्, क्ह्‍यों तोइ आचैन् लवाम्, छतसि “परमेश्‍वर बेल्‍ले थेब मुँ!” बिदै खीए मन्दिरर ताँन् म्हिमैं ओरम्।
PSA 29:10 याहवेह नाँ बाढिए फिर टिम्, याहवेह खोंयोंन् बिलै म्रुँ धोंले राजगद्दिर टिम्।
PSA 29:11 तोंन् तलेया याहवेहजी ह्रोंसए म्हिमैंए सैं ढुक्‍का लमिंम्। तलेबिस्याँ याहवेहजी ह्रोंसए म्हिमैंलाइ भों पिंम्।
PSA 30:1 परमेश्‍वरए योर मन्दिर सुम्पिदिमा चु क्वे प्रिंन्। दाऊदए भजन घ्रि। ओ याहवेह, क्हिजी ङ गैरुउँइँले कैंडो तेमिंइ, धै ङ म्रोंसि ङए शत्तुरमैं निस्योल् आपिंइमुँ, छतसि ङ क्हिए मिं थेब् लब्मुँ।
PSA 30:2 ओ ङए याहवेह परमेश्‍वर, ङ नमा ङइ क्हिने ल्होमिंन् बिसि ग्वार ह्रिइ, धै क्हिजी ङ सल् लमिंइ।
PSA 30:3 ओ याहवेह, क्हिजी ङए सोलाइ क्रोंउँइँले तेमिंइ, धै सिसि क्रोंर ह्‍याब्मैंउँइँले ङलाइ जोगेमिंइ।
PSA 30:4 ओ याहवेहए म्हिमैं, खीए ल्हागिर भजन प्रिंन्, धै खीए पबित्र मिंर धन्यबाद पिंन्।
PSA 30:5 तलेबिस्याँ खी तिस्याँदे मत्‍त्रे ह्रिस खम्, दिलेया ङ्योए छ्ह तिगोंन् खीजी ल्हयो खरिम्। म्हुँइँस् तिमिंन् मिग्लि युलेया न्हाँगर बिस्याँ सैं तोंल् योंब्मुँ।
PSA 30:6 ताँन् सै ठिक तबै त्हेरि ङइ बिइ, “ङ खोंयोंइ ङ्हिंरिब् आरे।”
PSA 30:7 ओ याहवेह, क्हिजी ङ ल्होमिंसि ङलाइ नुबै कोंर बोसि थेंमिंइ, दिलेया क्हिजी ह्रोंसए मोंडा लोवामा ङए सैं नइ।
PSA 30:8 ओ याहवेह, ङइ क्हिनेन् ग्वार हिइमुँ। ल्होमिंन् बिसि ङइ क्हिनेन् ग्वार ह्रिइमुँ।
PSA 30:9 “ङ सियास्याँ क्हिलाइ तो फायदा तमुँ? ङ क्रोंर ह्‍यामा क्हिलाइ तो फायदा तमुँ? स त्हुलइ क्हिलाइ थेब् लम् रो वा? क्हि भर लल् खाँबै परमेश्‍वर ग बिसि स त्हुलइ क्हिए बयन लम् रो वा?
PSA 30:10 ओ याहवेह ङए ताँ थेमिंनु, ङए फिर ल्हयो खमिंनु! ओ याहवेह, ङलाइ ल्होमिंन्।”
PSA 30:11 ङ क्रोरिमा क्हिजी ङ सैं तोंल् लमिंइ; क्हिजी ङए नइँए ह्रेंग प्लिमिंसि खाँसों ङ्हाँबै क्वें खिमिंइ।
PSA 30:12 छतसि ङ तोइ आबिल्‍ले टिरिब् आरे, ङ क्हिलाइन थेब् लबै क्वेमैं प्रिंमुँ। ओ ङए याहवेह पारमेश्‍वर, ङ खोंयोंन् बिलै क्हिलाइन धन्यबाद पिंरिब्मुँ।
PSA 31:1 क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, ङ खोंयोंइ फा पिल् आत्हुरिगे बिसि ङ क्हिए प्हलेर ग्वार योंबर खइमुँ। क्हि ठिक के लबै परमेश्‍वर ग। छतसि ङलाइ जोगेमिंन्!
PSA 31:2 ङइ ग्वार ह्रिमा न्ह तोमिंनु; युनन् ङ जोगेमिंनु! क्हि ङए रक्षा लबै पारा तमिंन्, ङलाइ जोगेबै भोंबै किल्‍ला तमिंन्!
PSA 31:3 ङ लोबै पारा नेरो ङए किल्‍ला क्हिन् ग; छतसि क्हिए मिं कैंडों तबै ल्हागिर ङलाइ डोरेसि ङ प्रल् त्हुबै घ्याँ उँइँमिंन्।
PSA 31:4 क्हि ङए ग्वार योंबै क्‍ल्‍ह्‍यो ग। ङए ल्हागिर चुबै ङोउँइँले ङ जोगेमिंन्,
PSA 31:5 ङए छ्ह क्हिए योर्न पिंमुँ; ओ क्ह्रोंसेंन्बै याहवेह परमेश्‍वर, ङलाइ दु:खउँइँले फ्रेमिंबमुँ।
PSA 31:6 स्योलिबै कु पूजा लब्मैं ङइ आखो; ङ बिस्याँ याहवेहए फिर्न भर लम्।
PSA 31:7 क्हिए खोंयोंइ आनुबै म्हाँयाजी ङ छिं ङ्हाँल् योंइमुँ, छतसि ङ बेल्‍ले सैं तोंब्मुँ, तलेबिस्याँ क्हिजी ङए दुःख म्रोंइमुँ, ङए सैंर्बै दुःख क्हिजी सेइमुँ,
PSA 31:8 क्हिजी ङलाइ शत्तुरए योर फेल् आपिंइमुँ, धै क्हिजी ङए प्हले प्ल्हाबै क्‍ल्‍ह्‍योर थेंमिंइमुँ।
PSA 31:9 ओ याहवेह, ङए फिर दयाम्हाँया लमिंन्, तलेबिस्याँ ङ थेबै दुःखर फेइमुँ, शोकइ लमा ङए मि आचारइमुँ, धै ङए सैं च्योंयाइमुँ, ङए ज्यु या कारयाइमुँ।
PSA 31:10 तलेबिस्याँ ङए छ्ह दुःखर, नेरो ङए त्हिंइमैं शोकर थोइमुँ, ङइ लबै आछ्याँबै केमैंइ लमा ङए भों नुयाइमुँ, धै ङए ह्रिब्मैं या ङ्युयाइमुँ।
PSA 31:11 ङए शत्तुरमैंइ लमा ङए ङ्‍हेब्मैंए उँइँर ङ म्हि आच्हिन् तइमुँ, धै ङए थुमैं ङ म्रोंसिन् ङ्हिंइमुँ। घ्याँजरे ङलाइ म्रोंब्मैं ङउँइँले भौदियाम्।
PSA 31:12 सियाबै म्हिलाइ म्‍लेब् धोंले ताँनइ ङ म्‍लेयाइमुँ; ङ फतियाबै भाडो धोंन् तइमुँ।
PSA 31:13 ल्हें म्हिइ ङए बिरोधर आछ्याँबै ताँ पोंब ङइ थेइमुँ, छतसि ङ खन्तोदोंउँइँलेन् ङ्हिंल् त्हुइमुँ! चमैं क्ह्रिसि ङए बिरोधर मत लम्; धै ङलाइ सैबै जाल रोम्।
PSA 31:14 दिलेया ओ याहवेह, ङइ क्हिए फिर्न भर लइमुँ; ङइ बिमुँ: “क्हिन् ङए परमेश्‍वर ग।”
PSA 31:15 ङए छ्ह क्हिए योर्न मुँ; ङए शत्तुरमैं नेरो ङलाइ ह्रुगुदिब्मैंए योउँइँले ङ जोगेमिंन्!
PSA 31:16 क्हिए लि ह्रोंसए के लबै म्हिए फिर चारमिंन्; खोंयोंइ आनुबै क्हिए म्हाँयाजी ङलाइ जोगेमिंन्!
PSA 31:17 ओ याहवेह, ङ फापिल् आत्हुरिगे, तलेबिस्याँ ङइ क्हिने ग्वार ह्रिइमुँ; दिलेया दुष्‍टमैं बिस्याँ फा पिन् तयारिगे; धै चमैं क्रोंर च्याँले टिरिगे।
PSA 31:18 स्योर ताँ पोंबै चमैंए म्हदेमैं म्रुयारिगे, तलेबिस्याँ चमैंइ थेब् प्हैंदै ठिक के लब्मैंए बिरोधर म्हि आच्हिल्‍ले पोंम्।
PSA 31:19 क्हिलाइ मान लब्मैंए ल्हागिर क्हिजी साँथेंबै छ्याँबै सैमैं कति थेब मुँ! क्हिए प्हलेर्न ग्वार योंब्मैंलाइ क्हिजी च छ्याँबै सैमैं पिंब ताँन् म्हिमैंइ म्रोंइमुँ!
PSA 31:20 क्हि टिबै रक्षा योंबै क्‍ल्‍ह्‍योर क्हिजी म्हिमैंए जालउँइँले चमैंलाइ लोसि थेंमिंमुँ। चमैंलाइ छ्याब् ल्हैदिबै लेमैंउँइँले क्हिजी चमैं ह्रोंस टिबै क्‍ल्‍ह्‍योर जोगेसि थेंमिंब्मुँ।
PSA 31:21 याहवेहए मिं थेब् तरिगे, तलेबिस्याँ शत्तुरमैंइ घेर्दिबै सहर न्होंर ङ मुँमा खीजी खोंयोंइ आनुबै म्हाँया ङए फिर उँइँमिंइ।
PSA 31:22 ङ्हिंबै त्हेर ङइ बिइ, “क्हि ङाँइँले ङ ह्रेंगो तइमुँ।” दिलेया ल्होमिंन् बिसि क्हिने ग्वार ह्रिमा क्हिजी ङए ताँ थेमिंइ।
PSA 31:23 ओ खीए ताँन् म्हिमैं, याहवेहलाइ म्हाँया लद्! खीए फिर बिश्‍वास लब्मैंलाइ याहवेहजी रक्षा लम्, दिलेया थेब् प्हैंब्मैंलाइ बिस्याँ खीजी पिंल् त्हुबै दण्ड पिंम्।
PSA 31:24 ओ याहवेहए फिर आशा थेंब्मैं, भोंसि तद्, क्हेमैंए सैं भोंब् लद्!
PSA 32:1 दाऊदए मस्किल बिबै भजन घ्रि पापए क्षमा योंसि पाप त्होयाबै म्हि ङ्‍हो सब् ग।
PSA 32:2 छाबै म्हिलाइ याहवेहजी दोषि आठर्दि, छले आछ्याँबै सैं आरेबै म्हिए फिर खीजी आशिक पिंम्।
PSA 32:3 पाप लसेया ङइ “पाप लइमुँ” आबिल्‍ले टिमा त्हिंइतिमिंन् ङ क्रोबइले ङए ह्रिब्मैं ङ्युयाइ।
PSA 32:4 तलेबिस्याँ त्हिंयाँ म्हुँइँस क्हिजी ङलाइ थेबै दण्ड पिंइ। छतसि ख्वालबै त्हेर्बै त्हिंयाँइ ख्रोंब् धोंले ङए ज्युर्बै भों खाँयाल। तिस्याँदे मैंन्
PSA 32:5 लिउँइँ क्हिए उँइँर ङ पापि ग बिसि ङइ बिल, धै ङइ लबै आछ्याँबै केमैं ङइ आलो। “ङइ लबै आछ्याँबै केमैं याहवेहए उँइँर बिब्मुँ,” बिसि ङइ बिइ, धै ङए पापमैं क्हिजी क्षमा लमिंइ। तिस्याँदे मैंन्
PSA 32:6 छतसि क्हिलाइ त्होल् खाँबै त्हे मुँमन् क्हिजी बिब् ङिंब्मैं ताँनइ प्राथना लरिगे। छलमा प्ल्हों खबै भेल्गज्यै या चमैंलाइ छुइरिब् आरे।
PSA 32:7 क्हिन् ङए लोइ टिबै क्‍ल्‍ह्‍यो ग, क्हिजी ङ दुःखउँइँले जोगेमिंइमुँ, छतसि ङलाइ जोगेमिंबै परमेश्‍वर क्हिन् ग बिसि सैं तोंदै क्वे प्रिंसि ङ क्हिए मिं क्वेब्मुँ। तिस्याँदे मैंन्
PSA 32:8 “ङइ क्हिलाइ लोमिंब्मुँ,” बिसि याहवेहजी बिइ। “क्हि प्रल् त्हुबै घ्याँर ङइ क्हिलाइ डोरेमिंब्मुँ; ङइ क्हिलाइ लोदा-सैंदा लसि क्हिए फिर्न मि छरिब्मुँ।
PSA 32:9 क्हेमैं बुद्धि आरेबै घोडा नेरो खच्‍चर धों आतद्! चमैंलाइ तार झोंबै ल्हागिर लगाम नेरो पैए प्हरे चैदिम्, आस्याँ क्हिइ चमैंलाइ तार झोंल् आखाँ।”
PSA 32:10 दुष्‍ट म्हिमैंइ ल्हें दुःख योंल् त्हुब्मुँ, दिलेया याहवेहए फिर भर लब्मैंलाइ बिस्याँ खीजी खोंयोंइ आनुबै म्हाँया लसि रक्षा लमुँ।
PSA 32:11 ओ ठिक के लब्मैं, याहवेहजी लबै केमै मैंसि सैं तोंसि कै तेद्, ओ छ्याँबै सैं प्ह्‍याब्मैं, सैं तोंदै खीए जयजय लद्।
PSA 33:1 ओ ठिक के लब्मैं, सैं तोंदै याहवेहए मिंर भजन प्रिंन्! छ्याँबै सैं प्ह्‍याब्मैंइ खीए मिंर क्वे प्रिंब ङ्‍हेंम्।
PSA 33:2 बीणा ह्रादै याहवेहए मिं थेब् लद्; तार च्यु मुँबै सारङ्गी ह्रादै खीए मिंर क्वे प्रिंन्।
PSA 33:3 खीए ल्हागिर छारा क्वे घ्रि प्रिंन्; जय जय लदै क्ह्‍युरल्‍ले बाजामैं ह्राद्।
PSA 33:4 तलेबिस्याँ याहवेहजी बिबै ताँ ठिक मुँ; धै खीए ताँन् केमैं भर लल् खाँब तम्।
PSA 33:5 याहवेहजी खाबलाज्यै या आफेल्‍ले ठिक निसाफ लब खोम्; खीजी लबै छ्याँबै केमैं ह्‍युल तिगोंन् मुँ।
PSA 33:6 याहवेहए बचनइ मु बनेइ, धै चर मुँबै तोन्दोंरि सै बनेइ।
PSA 33:7 खीजी मा ङ्युँइर्बै क्यु खागु लमुँ; खीजी गैरु मा ङ्युँइमैं ह्रोंसए धन्सरर थेंमुँ।
PSA 33:8 पृथ्बीर्बै ताँन् म्हिमैं याहवेह म्रोंसि ङ्हिंरिगे; ह्‍युलर टिबै ताँन् म्हिमैंइ खीलाइ म्हाँदिरिगे।
PSA 33:9 तलेबिस्याँ खीजी बचन पोंसि तोन्दोंरि सैमैं लमिंइ; खीजी तयाद् बिमा ताँन् सै तयाइ।
PSA 33:10 अरू ह्रेंमैंइ लबै आछ्याँबै चाँजोमैं याहवेहजी फुवाम्, चमैंइ लल् म्हैबै आछ्याँबै केमैं खीजी तल् आपिं।
PSA 33:11 दिलेया याहवेहजी लबै चाँजोमैं बिस्याँ खोंयोंन् बिलै तरिम्, खीए खोंर मैंबै ताँमैं पुस्ता पुस्ता समा तरिम्।
PSA 33:12 याहवेहलाइ परमेश्‍वर बिसि म्हाँदिबै म्हिमैंइ आशिक योंम्। खीजी ह्रोंसए म्हिमैं लबर चमैंलाइ त्हाँइ।
PSA 33:13 याहवेहजी स्वर्गउँइँले ङ्ह्‍योमुँ धै खीजी म्हिमैंए ताँन् सन्तानलाइ म्रोंमुँ।
PSA 33:14 खीजी ह्रोंस टिबै राजगद्दिउँइँले पृथ्बीर्बै ताँन् म्हिमैं ङ्ह्‍योरिम्।
PSA 33:15 ताँन् म्हिमैंलाइ मैंबै सैं पिंब खीन् ग, धै चमैंइ लबै तोन्दोंरि केमैं खीजी म्रोंम्।
PSA 33:16 सेनाए भोंउँइँले म्रुँ जोगेल् आखाँ; नेबर ह्‍याबै म्हि ह्रोंसए भोंउँइँले सोल् आखाँ।
PSA 33:17 ट्होबै ल्हागिर घोडाए फिर भर लब तोनतोर्न ग, च कतिन् भोंलेया जोगेल् आखाँ।
PSA 33:18 दिलेया याहवेहजी खीने ङ्हिंब्मैंए छैं लम्; तलेबिस्याँ चमैंइ खीए खोंयोंइ आनुबै म्हाँयाए फिर आशा थेंइमुँ।
PSA 33:19 छतसि चमैंलाइ सोगों थेंबै ल्हागिर अँङ्गालरै या खीजी चमैंलाइ तोइ सैरै या खाँचो आलमिं।
PSA 33:20 छ बिसि याहवेहए फिर आशा थेंसि ङ्योइ खीए घ्याँ ङ्‍ह्‍योरिम्; तलेबिस्याँ ङ्योलाइ ल्होमिंब नेरो ङ्योए रक्षा लबै परमेश्‍वर खीन् ग।
PSA 33:21 खीजीन् ङ्योए सैं तोंन् लमिंम्, तलेबिस्याँ खीए पबित्र मिंर ङ्योइ भर लम्।
PSA 33:22 ओ याहवेह, क्हिए फिर ङिइ आशा थेंइमुँ; छतसि क्हिए खोंयोंइ आनुबै म्हाँया ङिए फिर तरिगे।
PSA 34:1 दाऊदए भजन घ्रि। दाऊदइ आबिमेलेखए उँइँर सोबलमैंल् धोंबै ब्योर उँइँइ। छतसि आबिमेलेखइ दाऊदलाइ ल्हावाइ। खोंयोंन् बिलेया ङ याहवेहए मिं क्वेरिब्मुँ; ङए सुँर खोंयोंन् बिलै खीलाइन थेब् लबै ताँमैं तरिब्मुँ।
PSA 34:2 ङए सोइ याहवेहर्न सैं तोंरिब्मुँ; दुःख योंब्मैं चु ताँ थेसि छिं ङ्हाँब्मुँ।
PSA 34:3 ङने बा-बालुन् याहवेहए मिं थेब् लद्, धै ङ्यो खागु तसि खीए मिं कैंडो लले!
PSA 34:4 ङइ याहवेहने ग्वार ह्रिमा खीजी ङलाइ ज्वाफ पिंइ धै ङलाइ ङ्हिंन् लबै ताँन् सैमैंउँइँले ङ फ्रेमिंइ।
PSA 34:5 खी ङाँइ ङ्ह्‍योब्मैं बेल्‍ले सैं तोंल् योंब्मुँ, धै फा पिसि चमैंए क्र खोंयोंइ कुरल् त्हुरिब् आरे।
PSA 34:6 दुःख योंबै म्हिइ याहवेहने ग्वार ह्रिमा खीजी चए ताँ थेमिंइ धै चए ताँन् दुःखउँइँले फ्रेमिंइ।
PSA 34:7 याहवेहलाइ मान लब्मैं ताँनए कारग्युले खीजी खीए स्वर्गदूत रुँबर ल्हैदिम्, धै चमैं जोगेमिंम्।
PSA 34:8 याहवेहजी कति ल्हें ल्हयो खमुँ बिसि ह्रोंसैन म्हैसि क्होद्। खीए प्हलेर्न ग्वार योंबै म्हिइ आशिक योंमुँ!
PSA 34:9 ओ याहवेहए म्हिमैं, खीलाइ मान लदै खीजी बिबै ताँ ङिंन्! तलेबिस्याँ खीलाइ मान लब्मैंने तोइ सैलै या खाँचो आत।
PSA 34:10 भर्खर्बै सिंहमैं चबै सै तोइ आयोंसि फोत्तेन् तब्मुँ, दिलेया याहवेहलाइ म्हैब्मैंने बिस्याँ छ्याँब सैमैंल खाँचो तरिब् आरे।
PSA 34:11 ओ च्ह-च्हमिमैं खो, ङए ताँ थेद्; याहवेहलाइ खैले म्हाँदिल् त्हम् बिसि ङइ क्हेमैंलाइ लोमिंब्मुँ।
PSA 34:12 क्हेमैंए न्होंरि खाबज्यै ह्रिंबै छ्ह सोसि सैं तोंन्ले छ्ह थोल् योंस्याँ तमल ङ्हाँस्याँ,
PSA 34:13 ह्रोंसए लेइ आछ्याँबै ताँ आपोंन्, धै ह्रोंसए म्हदेइ स्योर आतेद्,
PSA 34:14 आछ्याँबै के लबउँइँले एखो धै छ्याँबै के लद्; आक्ह्रिबै म्हिमैं क्ह्रिमिंन्, खोंयोंन् बिलै छाबन् के लरिद्।
PSA 34:15 याहवेहजी ठिक के लब्मैंए फिर मि छरिमुँ धै चमैंए ताँ थेम्।
PSA 34:16 दिलेया आछ्याँबै के लब्मैंलाइ खीजी बिरोध लम्। छतसि चमैं सिबै लिउँइँ ताँन् म्हिमैंइ युनन् म्‍लेवाम्।
PSA 34:17 ठिक के लब्मैंइ ग्वार ह्रिमा याहवेहजी थेमुँ धै चमैंए ताँन् दुःखउँइँले फ्रेमिंम्।
PSA 34:18 सैं चोयाब्मैंने बालु याहवेह तमुँ; धै सैं सियाब्मैंलाइ खीजी सैं क्होल् लमिंमुँ।
PSA 34:19 ठिक के लबै म्हिए फिर ल्हें दुःखमैं खमुँ, दिलेया याहवेहजी चए ताँन् दुःखउँइँले फ्रेमिंम्।
PSA 34:20 खीजी चए ताँन् ह्रिब्मैंए रक्षा लमुँ; चए ह्रिब्मैं घ्रि या चोरिब् आरे।
PSA 34:21 ह्रोंसइ लबै आछ्याँबै केइन दुष्‍ट म्हिमैं सैवाब्मुँ, धै ठिक के लब्मैंलाइ आखोब्मैंइ दण्‍ड योंब्मुँ।
PSA 34:22 याहवेहजी ह्रोंसए के लब्मैं जोगेमिंम्; खीए प्हलेर्न ग्वार योंब्मैं खाबै या दोषि ठर्दिरिब् आरे।
PSA 35:1 दाऊदए भजन घ्रि ओ याहवेह, ङए बिरोध लब्मैंए बिरोध लमिंन्; ङने नेखब्मैंने क्हिन् नेमिंन्!
PSA 35:2 क्हिए ढाल छेदु, पैए जामा खिदु, धै ङ ल्होबर खमिंन्!
PSA 35:3 बर्षा छेदु, धै ङलाइ ल्हाप्रब्मैंलाइ ल्हिद् “क्हिलाइ मुक्‍ति पिंबै परमेश्‍वर ङन् ग,” बिसि ङए सोने बिमिंन्।
PSA 35:4 ङलाइ सैल् म्हैब्मैं फापिसि लि उँइँलै आखाँन् तरिगे। ङए न्होह्रों लल् म्हैब्मैं ल्हावारिगे धै अलमल् तयारिगे!
PSA 35:5 चमैं खैंइ नोइ बोवाबै पुइ धोंन् तरिगे, धै याहवेहए दूतमैंइ चमैं ल्हावारिगे!
PSA 35:6 चमैंए घ्याँ मिछु खैब् नेरो प्लेब तरिगे, धै याहवेहए दूतइ चमैं ल्हासिन् टिरिगे!
PSA 35:7 तलेबिस्याँ तोनतोर्न चमैंइ ङलाइ फसेबै ल्हागिर ङो चुइ, धै तोनतोर्न ङलाइ सैबै ल्हागिर हों ताइ।
PSA 35:8 थाइ आसेल्‍ले चमैं नास तयारिगे! चमैंइ लोइ चुबै ङोर चमैंन् फेरिगे; चमैंइ ताबै होंर चमैंन् पयासि नास तयारिगे!
PSA 35:9 ङ बिस्याँ याहवेहनेन् सैं तोंब्मुँ, छले खीजी ङलाइ जोगेमिंबइले ङए सैं बेल्‍ले तोंब्मुँ।
PSA 35:10 “ओ याहवेह, क्हि धों तब खाब् मुँ? क्हिजी भों आरेब्मैंलाइ ह्रोंस भन्दा भोंबै म्हिमैंउँइँले जोगेमिंम्, छले भों आरेब्मैं नेरो आयों आख्युब्मैंलाइ ह्रुगिदिबै म्हिमैंउँइँले क्हिजी चमैंलाइ जोगेमिंम्,” बिसि ङए ताँन् ज्यु नेरो सैंइ बिप्रम्।
PSA 35:11 स्योलिबै ताँ पोंब्मैं खसि ङइ था आसेबै ताँमैंए बारेर ङए फिर छ्याब् ल्हैदिम्।
PSA 35:12 चमैंए फिर ङइ छ्याँबन् ललेया चमैंइ ङए न्होह्रों लम्; धै ङए सैं बेल्‍ले च्योंन् लवाम्।
PSA 35:13 दिलेया चमैं नब्-छब् तमा ङइ नइँए ह्रेंग खिसि बर्त टिसि चमैंए ल्हागिर प्राथना लमल।
PSA 35:14 ङए थुमैं नेरो ङए आघें अलिमैंए ल्हागिर न्हुँ लब् धोंलेन् ङइ चमैंए ल्हागिर न्हुँ लमल; ह्रोंसए आमाए ल्हागिर शोक लब् धोंले, ङइ क्र कुरसि चमैंए ल्हागिर शोक लइ।
PSA 35:15 दिलेया ङए फिर दुःख तमा चमैं निस्योदै ङए बिरोधर खागु तइ; ङइ थाइ आसेल्‍ले ङए न्होह्रों लबर चमैं खागु तइ। चमैंइ खोंयोंइन ङए बिरोधर आछ्याँबै ताँमैंन् लरिइ।
PSA 35:16 आछ्याँब खों मुँब्मैंइ भत्यारर बिरोध लसि प्ह्रब् धोंले चमैं ङए फिर ह्रिस खसि स ह्रादै पोंइ।
PSA 35:17 ओ याहवेह, खोंयों समा क्हिजी ङए फिर तरिबै अनिया ङ्ह्‍योरिमुँ? ङए बिरोधर रासि खोंयोंन् बिलै ङए न्होह्रों लल् म्हैबै सिंहमैं धों तबै म्हिमैंउँइँले ङ जोगेमिंन्।
PSA 35:18 म्हिमैं च्होबै क्ल्ह्‍योर ङइ क्हिलाइन धन्यबाद पिंम्; छलेन ल्हें म्हिए म्हाँजोरै या ङइ क्हिए मिंन् थेब् लब्मुँ।
PSA 35:19 तोन् तोर्न ङए बिरोध लबै शत्तुरमैं ङ म्रोंसि सैं तोंल् आयोंरिगे, धै तोन् तोर्न ङलाइ हेल् लब्मैंइ मि स्युरसि ङलाइ प्ह्रल् आयोंरिगे।
PSA 35:20 तलेबिस्याँ चमैंइ क्ह्रिबै ताँ खोंयोंइ आपों, क्ह्रिसि टिब्मैंए म्हाँजोरै या स्योलिबै ताँमैं बिसि छ्याब् ल्हैदिल् म्हैम्।
PSA 35:21 चमैंइ ङलाइ प्ह्रमा “क्हिइ लबै के ङिए मिइन म्रोंल् योंइ!” बिसि अझै ङए बिरोधर्न पोंम्।
PSA 35:22 ओ याहवेह, चमैं ङए बिरोधर पोंब क्हिजी थेइमुँ; छतसि आपोंल्‍ले आटिमिंन्! ओ थेब प्रभु, ङउँइँले ह्रेंगो आतमिंन्!
PSA 35:23 ङए निसाफ लबै ल्हागिर रेमिंन्, ओ थेबै प्रभु, ङए परमेश्‍वर, ङए ल्हागिर नेमिंन्!
PSA 35:24 ओ ङए याहवेह परमेश्‍वर, क्हि ठिक निसाफ लबै परमेश्‍वर ग। छतसि ङलाइ तोइ दोष आरेब ठर्दिमिंन्, धै ङए बिरोधर पोंबै म्हिमैं सैं तोंल् आयोंरिगे!
PSA 35:25 चमैंइ खेमैंए सैंर “अँ, ङिए सैंर मैंब् धोंन् तइ!” बिल् आयोंरिगे। “ङिइ चलाइ ट्होवाइ!” बिल् आयोंरिगे।
PSA 35:26 ङए फिर दुःख तमा ङए बिल्‍लि लदै निस्योब्मैं ताँन् फापिल् त्हुरिगे धै खैलातोला तबर फेरिगे! “ङिम् च भन्दा थेब् ग,” बिसि प्हैंब्मैं या ताँन् लि उँइँलै आखाँल्‍ले फापिल् त्हुरिगे।
PSA 35:27 “चम् ठिक के लबै म्हि ग,” बिसि ङए बारेर छ्याँबै ताँ पोंब्मैं सैं तोंसि छिं ङ्हाँल् योंसि कै तेरिगे। “ह्रोंसए के लबै म्हिल बिब् धों पोंब् धों तब् म्रोंसि याहवेह सैं तोंइमुँ। छतसि खीए मिं थेब् तरिगे!” बिसि चमैंइ खोंयोंन् बिरिगे।
PSA 35:28 क्हिजी लबै ठिक केमैंए बयन लदै ङ खोंयोंन् बिलै क्हिए मिं क्वेरिब्मुँ।
PSA 36:1 क्वे प्रिंब्मैंए चिबए ल्हागिर याहवेहए सेवा लबै दाऊदए भजन घ्रि दुष्‍ट म्हिइ लबै आछ्याँबै केमैंए बारेर ङए खोंर ताँ घ्रि मुँ, च ताँ तो जा बिस्याँ च परमेश्‍वर म्रोंसि आङ्हिं।
PSA 36:2 तलेबिस्याँ चइ ङम् ङन् ग बिसि ह्रोंसलाइ थेब् लम्, धै ह्रोंसइ लबै आछ्याँबै केमैं चइ आम्रों; छतसि चइ पाप केमैंन् लरिम्।
PSA 36:3 चए सुँइ स्योलिबै ताँमैं नेरो आछ्याँबै ताँमैं पोंमुँ; छ्याँबै केमैं लब नेरो केर फेबै ताँमैं पोंब चइ पिवाइमुँ।
PSA 36:4 क्‍ल्‍ह्‍योर रोरिमै या चइ आछ्याँबै चाँजोमैंन् लरिम्; छतसि च आछ्याँबै घ्याँर्न प्रम्; छले चइ आछ्याँबै केमैंन् लप्रम्।
PSA 36:5 ओ याहवेह, ङिए फिर क्हिजी लबै खोंयोंइ आनुबै म्हाँया स्वर्ग समा फेनेइमुँ, क्हि‍जी बिबै ताँमैं या मु समा भर लल् खाँब मुँ।
PSA 36:6 ओ याहवेह, क्हिजी लबै ठिक के बेल्‍ले थेबै कोंमैं धों तब् मुँ; क्हिजी लबै निसाफमैं तो सैज्यै या लाल् आखाँबै मा ङ्युँइए गैरु धों तब मुँ; क्हिजी म्हिलाइ मत्‍त्रे आङिं, ताँन् सो प्ह्‍याबै सैंमैंलाइ वास्ता लम्।
PSA 36:7 ओ याहवेह, क्हिए खोंयोंइ आनुबै म्हाँया बेल्‍ले थेब मुँ! ताँन् म्हिमैंइ क्हिए प्ह्‍यागोमैं न्होंर ग्वार योंम्।
PSA 36:8 क्हिजी पिंसिन् ङिइ म्रेंन्ले चल् योंइमुँ, स्यों धोंले खोंयोंन् बिलै युरिबै आशिकइ क्हिजी ङिलाइ प्लिंमिंइमुँ।
PSA 36:9 तलेबिस्याँ क्हिउँइँलेन् म्हिमैंइ खोंयोंइ आखाँबै छ्ह योंमुँ, क्हि चारबै ह्‍वे ग, छतसि क्हिए छ्याँबै घ्याँर ङि प्रल् योंइमुँ।
PSA 36:10 क्हिलाइ ङो सेब्मैंए फिर क्हिए खोंयोंइ आनुबै म्हाँया खोंयोंन् बिलै तरिगे, धै छ्याँबै खों मुँब्मैंलाइ खोंयोंन् बिलै ठिक ठर्दिमिंन्।
PSA 36:11 थेब् प्हैब्मैंए प्हलेइ ङलाइ प्लेल् आयोंरिगे, दुष्‍ट म्हिमैंए योज्यै या ङलाइ क्हाल् आखाँरिगे।
PSA 36:12 आछ्याँबै के लब्मैं क्हुरयाइमुँ चमैं रेलै आखाँन्ले प्योयाइमुँ।
PSA 37:1 दाऊदए भजन घ्रि। दुष्‍ट म्हिमैं प्लब् म्रोंसि सैं च्योंब् आलद्; दुष्‍ट म्हिमैंइ तो ललैया चमैंए फिर ह्रिस आलद्।
PSA 37:2 तलेबिस्याँ चमैं छि धोंले युनन् करायाम्, धै नो धोंले ङ्योंलोंयाब्मुँ।
PSA 37:3 छतसि याहवेहए फिर भर थेंनु, धै छ्याँबै केमैं लद्; क्हेमैं ह्‍युलर टिमा योब ख्युब तब्मुँ।
PSA 37:4 याहवेहनेन् सैं तोंन्, धै खीजी क्हिए सैंर मैंबै ताँमैं योमिंब्मुँ।
PSA 37:5 ह्रोंसइ लल् म्हैबै तोन्दोंरि के याहवेहए योर्न थेंवाँन्, खीए फिर्न भर थेंन्, धै क्हिए ल्हागिर तो लल् त्हुमुँ खीजीन् लमिंब्मुँ।
PSA 37:6 न्हागर्बै चारब ह्‍वे धोंले क्हिइ लबै ठिक के खीजी उँइँमिंब्मुँ, धै त्हिंयाँ आधार्बै त्हिंयाँ धोंले क्हिए ठिक निसाफ लमिंब्मुँ।
PSA 37:7 याहवेहए उँइँर च्याँले टिदु, धै आअदेल्‍ले खीलाइ पैंरिद्; आछ्याँबै के लबै म्हि प्लब् तमा, धै चइ आछ्याँबै चाँजोमैं लमा सैं च्योंब् आलद्।
PSA 37:8 ह्रिस आलद्, ह्रिस लब पिवाद्। सैं च्योंब् आलद्, छाबै बानि ब्योरइ आछ्याँबै घ्याँउँइँ ल्हैदिवाम्।
PSA 37:9 तलेबिस्याँ आछ्याँबै के लब्मैं नास तयाब्मुँ, याहवेहए फिर भर थेंब्मैं बिस्याँ ह्‍युलए फिर क्ल्हे तल् योंब्मुँ।
PSA 37:10 तारेबै दे त्हेर्न दुष्‍ट म्हिमैं नास तयाब्मुँ; क्हिइ म्हैले या चमैं योंरिब् आरे।
PSA 37:11 दिलेया थेब् आप्हैंब्मैंइ ह्‍युलर क्ल्हे लब्मुँ, धै चमैं छिं ङ्हाँसि सैं तोंल् योंब्मुँ।
PSA 37:12 दुष्‍ट म्हिइ ठिक के लबै म्हिए बिरोधर आछ्याँबै चाँजोमैं लम्, धै च म्रोंसि स ह्राम्,
PSA 37:13 दिलेया चलाइ प्ह्रसि प्रभु निस्योम्, तलेबिस्याँ च नास तयाब्मुँ बिब खीजी सेइमुँ।
PSA 37:14 दुःख योंब्मैं नेरो आयों आख्युब्मैंलाइ सैबै ल्हागिर, धै क्ह्रोंसेंन्बै घ्याँर प्रब्मैंलाइ नास लबै ल्हागिर, दुष्‍टमैंइ सेलाँ छेम् धै त्हँले या कुरम्।
PSA 37:15 दिलेया चमैंइ छेबै सेलाँइ चमैंए तिंन् म्‍लेवाब्मुँ, धै चमैंए त्हँले चोयाब्मुँ।
PSA 37:16 दुष्‍टमैंने मुँबै ल्हें सै न्होर भन्दा ठिक के लब्मैंने मुँबै च्युगुदे सै छ्याँब ग।
PSA 37:17 तलेबिस्याँ दुष्‍ट म्हिमैंए भों याहवेहजी नास लवाब्मुँ, दिलेया ठिक के लब्मैंलाइ खीजी जोगेसि थेंब्मुँ।
PSA 37:18 याहवेहजी दोष आरेबै म्हिमैंए वास्ता लमुँ, धै चमैंइ योंल् त्हुबै सैमैंए हग चमैंने खोंयोंन् बिले तरिब्मुँ;
PSA 37:19 दुःख तबै त्हेरै या चमैं फापिल् त्हुरिब् आरे; अँङ्गलै त्हेरै या चमैं योब-ख्युब तब्मुँ।
PSA 37:20 दिलेया दुष्‍ट म्हिमैं बिस्याँ नास तयाब्मुँ; याहवेहए शत्तुरमैं चउरर्बै छि धोंन् तम्; चमैं युनन् नास तयाब्मुँ, मिखु धोंलेन् चमैं म्हयाब्मुँ।
PSA 37:21 दुष्‍ट म्हिमैंइ छे किंमुँ, धै चमैंइ छे आफो, दिलेया ठिक के लबै म्हिंमैंइ बिस्याँ थेबै सैंले पिंम्।
PSA 37:22 याहवेहउँइँले आशिक योंब्मैंइ ह्‍युलए फिर क्ल्हे लब्मुँ, दिलेया खीउँइँले सराब योंब्मैं बिस्याँ नास तयाब्मुँ।
PSA 37:23 म्हिइ लबै केमैं याहवेहजी खोइ बिस्याँ च प्रल् त्हुबै घ्याँर खीजीन् चलाइ डोरेम्।
PSA 37:24 च थुरलैया क्हुररिब् आरे तलेबिस्याँ याहवेहजी ह्रोंसए योइन चए यो क्हासि क्हुरल् पिंरिब् आरे।
PSA 37:25 ङ फ्रेसि मुँब् ओंनोंबै तिंयाँ खेब तन् समै या, याहवेहजी ठिक के लबै म्हिलाइ पिवाब नेरो चए प्हसेमैं ह्रिसि चब ङइ खोंयोंइ आम्रोंइमुँ।
PSA 37:26 चइ खाँचो तब्मैंलाइ यो प्ल्हसि पिंमुँ, धै चए प्हसेमैंइ आशिक योंब्मुँ।
PSA 37:27 आछ्याँबै केमैं लब् पिसि छ्याँबै केमैं लप्रद्; छलस्याँ खोंयोंन् बिलै क्हिइ ह्‍युलर क्ल्हे लल् योंब्मुँ।
PSA 37:28 तलेबिस्याँ ठिक निसाफ लबै म्हिमैंलाइ याहवेहजी खोम्; खीए म्हिमैं खीजी पिरिब् आरे। चमैंलाइ खोंयोंन् बिलै खीजी जोगेसि थेंमुँ, दिलेया दुष्‍ट म्हिमैंए सन्तान बिस्याँ नास लवाब्मुँ।
PSA 37:29 ठिक के लबै म्हिमैंइ ह्‍युलर क्ल्हे तल् योंब्मुँ धै चर खोंयोंन् बिलै टिब्मुँ।
PSA 37:30 ठिक के लबै म्हिइ ज्ञान बुद्धिए ताँमैं पोंम्, धै चए लेइ ठिक ताँ पोंम्।
PSA 37:31 चइ म्हाँदिबै परमेश्‍वरए ठिम चए खोंर तम्; छतसि चए प्हले प्लेरिब् आरे।
PSA 37:32 ठिक के लबै म्हिमैंलाइ खैले सैल् योंब् ङ्‍हे बिसि दुष्‍ट म्हिमैं च्ह्‍याइ टिम्।
PSA 37:33 दिलेया ठिक के लबै म्हिमैंलाइ याहवेहजी दुष्‍ट म्हिमैंए योर पिरिब् आरे, धै निसाफ तमै या खीजी चमैंलाइ छ्याब् आरेबन् ठर्दिमिंब्मुँ।
PSA 37:34 याहवेहए घ्यार्न प्ररिद्, खीलाइन पैंरिद्। धै खीजी क्हेमैंलाइ चु ह्‍युलर्बै क्ल्हे तल् पिंब्मुँ; धै दुष्‍टमैं नास तब क्हिए मिइन म्रोंब्मुँ।
PSA 37:35 आगुए न्होह्रों लबै दुष्‍ट म्हि घ्रि ङइ म्रोंइमुँ, च बेल्‍ले सपर्दिबै च्हसिंए धुँ धों तब् मुँल।
PSA 37:36 दिलेया दे लिउँइँन ङ ह्‍यामा च आरेल, ङइ म्हैलेया चने त्होल् आयोंल।
PSA 37:37 छ्याब् आरेबै म्हिमैंलाइ मैंन्, सोजो म्हिमैंलाइ ङ्ह्‍योद्; तलेबिस्याँ छाबै म्हिमैंल सन्‍तानमैं तब्मुँ।
PSA 37:38 दिलेया आछ्याँबै के लब्मैं बिस्याँ नास तयाब्मुँ; धै दुष्‍ट म्हिमैंए सन्तानमैंल मिं क्ह्रन् म्हयाब्मुँ।
PSA 37:39 ठिक के लब्मैंलाइ याहवेहजी जोगेमिंम्; दुःख तबै त्हेर चमैंए लोबै क्ल्ह्‍यो खीन् ग।
PSA 37:40 याहवेहजी चमैंलाइ ल्होमिंसि जोगेमिंम्; खीजी दुष्‍टमैंउँइँले चमैं फ्रेमिंम् धै चमैंलाइ रक्षा लम्, तलेबिस्याँ चमैंइ खीए प्हलेर्न चमैंइ ग्वार योंम्।
PSA 38:1 याहवेहए मिंरि ख्रो पिंबै ल्हागिर दाऊदए भजन घ्रि। ओ याहवेह, क्हि ह्रिस खमा ङलाइ आहौदिद्, धै क्हिए लल ह्रिसर ङलाइ दण्ड आपिंन्।
PSA 38:2 तलेबिस्याँ क्हिए योइ प्रिंबै मे ङए ज्युर क्योयाइमुँ, धै ङ बेल्‍ले नइमुँ।
PSA 38:3 क्हि ह्रिस खबइले ङए ताँन् ज्यु नइमुँ। ङइ लबै पाप केमैंइ लमा ङए ह्रिबमैं आभोंब् तइमुँ।
PSA 38:4 ङइ लबै आछ्याँबै केमैंइ ङ क्र समा हुवाइमुँ, छले ङइ लबै आछ्याँबै केमैं ल्हें तयाबइले ङ क्र ओलै आखाँन् तयाइमुँ;
PSA 38:5 ङ आमादु तसि आछ्याँबै केमैं लबइले, ङए घामैं पौदिसि क्राँथाँ नाँइमुँ।
PSA 38:6 ङ कुरयासि त्हुलर्न क्हुरयाल् खाँइमुँ, छतसि शोकइ लमा ङ त्हिंतिमिंन् क्रो प्ररिल् त्हुइमुँ।
PSA 38:7 ङए क्रे बेल्‍ले ख्रोंइमुँ, ङए ज्यु ताँन् नइमुँ।
PSA 38:8 ङने भों तिफुँइ आरे, ङए ज्यु रगा-रुगु तयाल् खाँइमुँ; छतसि ङए सैंर्बै शोकइ लमा ङ क्रोरिल् त्हुइमुँ।
PSA 38:9 ओ याहवेह, ङए सैंर मुँबै ताँन् ताँमैं क्हिजी सेइमुँ; ङए दुःख या क्हिजी म्रोंइमुँ।
PSA 38:10 ङए तिं ढुक्-ढुक् तइमुँ; ङने भों आरे, ङए मि या आम्रोंब् तयाल् खाँइमुँ।
PSA 38:11 ङए क्राँथाँ नाँबै घाइ लमा ङए थुमैं नेरो ङए ङ्‍हेब् ट्हुब्मैं ङउँइँले ह्रेंगो तम्, धै ङए परवामैं या ङ ङाँर आख।
PSA 38:12 ङलाइ सैल् म्हैब्मैंइ ङ सैबै ल्हागिर ङो चुम्; ङए न्होह्रों लल् म्हैब्मैंइ ङलाइ सैबै मत लम्। छले चमैं खोंयोंन् बिलै ङए बिरोधर जाल रोरिम्।
PSA 38:13 दिलेया ङ न्ह आथेबै म्हि धोंन् तइमुँ, चमैंइ तो पोंइमुँ ङइ वास्ता आल। ङ लड धोंन् तइमुँ, ङइ तोइ आपों।
PSA 38:14 न्ह आथेबै म्हि धोंन् ङ तइमुँ, छतसि ङइ तोइ ज्वाफ पिंल् आखाँ।
PSA 38:15 दिलेया, ओ याहवेह, क्हिए फिर्न ङइ आशा थेइमुँ; ओ ङए याहवेह परमेश्‍वर, ङए ताँ क्हिजी थेमिंब्मुँ,
PSA 38:16 तलेबिस्याँ “चमैंइ ङए बिरोधर जाल रोल् आयोंरिगे, धै ङए प्हले प्लेयासि ङ क्हुरियामा ङ म्रोंसि चमैं निस्योल् आयोंरिगे,” बिसि ङइ क्हिने बिल।
PSA 38:17 दिलेया ङए सैंर खोंयोंन् बिलै शोकन् तरिइमुँ, ङ क्हुरियाबिन् छेइमुँ।
PSA 38:18 ङइ छेरन् ङ्हाँबै केमैं लइमुँ बिसि ङइ क्हिने बिइमुँ; ङइ लबै आछ्याँबै केमैंइ लमन् ङइ शोक लइमुँ।
PSA 38:19 ङए शत्तुरमैं बेल्‍ले भोंब्मैं मुँ, तोन्-तोर्न ङलाइ हेल लब्मैं ल्हेंन् मुँ।
PSA 38:20 ङइ छेन् लना-लन् ङए न्होह्रों लब्मैंइ ङए बिरोधर आछ्याँबै ताँमैं पोंम्।
PSA 38:21 ओ याहवेह, ङलाइ आपिद्! ओ ङए परमेश्‍वर, ङउँइँले ह्रेंगो आतमिंन्!
PSA 38:22 ओ याहवेह, ङलाइ जोगेमिंबै परमेश्‍वर, ङ ल्होबर युनन् युमिंन्!
PSA 39:1 क्वे प्रिंब्मैंए चिब यदूतूनएल्हागिर दाऊदए भजन घ्रि। “ङइ तो के ललेया च्हैंसि मैंसि छेनाले लब्मुँ, धै ङए सुँज्यै या आछ्याँबै ताँमैं पोंरिब् आरे। दुष्‍ट म्हिमैंए उँइँर ङ तोइ ताँ पोंरिब् आरे,” बिसि ङइ बिल।
PSA 39:2 छले छ्याँब आछ्याँब तोइ आपोंन्‍ले ङ च्याँले टिलेया ङए सैंर ल्हें दुःख तइ।
PSA 39:3 छाइ मैंसे आत छुइ मैंसे आत, ङए सैंर खैता-खैता ङ्हाँइ। छतसि बल्‍ल ङइ पोंइ:
PSA 39:4 “ओ याहवेह, ङ खोंयों सिम् बिबै ताँ ङलाइ सेल् पिंन्। ङ कति सोम्? तारे ङ कति ल्हें सोम् बिसि ङइ सेल् योंरिगे!
PSA 39:5 क्हिजी तिस्याँदेए ल्हागिर मत्‍त्रे ङ सोल् पिंइमुँ, क्हिए उँइँर ङए छ्ह तोइ आङिं। ताँन् म्हिए छ्ह मुठि घ्रि सोर मत्‍त्रे ह्रेंरिइमुँ! तिस्याँदे मैंन्
PSA 39:6 म्हिमैं छरि धोंलेन् म्हयाम्। म्हिमैंइ फाक्‍कर्बै केमैं लप्ररिम्! चइ ल्हें सै न्होर खागु लमुँ दिलेया च खाबल् तनेमुँ चइ आसे!
PSA 39:7 “तारे ओ याहवेह, ङइ तोए ल्हागिर पैंले? ङए आशा क्हिनेन् मुँ।
PSA 39:8 ङए ताँन् पापउँइँले ङ फ्रेमिंनु! आमादुमैंइ ङ प्ह्रल् आयोंरिगे!
PSA 39:9 ङ च्याँले टिइ, ङइ तोइ आपों, तलेबिस्याँ क्हिजीन् ङलाइ छले टिल् पिंइ।
PSA 39:10 तारे ङलाइ दण्ड आपिंन्; क्हिजी दण्ड पिंबइले ङ सिबिन् छेइमुँ।
PSA 39:11 आछ्याँबै केमैं लबै म्हिलाइ क्हिजी हौदिसि दण्ड पिंमुँ, चइ खोबै सैमैं ताँन् प्हुँलुइ चसि नास लवाब् धोंले क्हिजी नास लवाब्मुँ। म्हिमैं तोइ आङिं, चमैंम् मुठि घ्रि सो मत्‍त्रे ग! तिस्याँदे मैंन्
PSA 39:12 “ओ याहवेह, ङए प्राथना थेमिंनु, ङइ क्हिने ग्वार ह्रिमा क्हिजी थेमिंनु; ङ क्रोदै ग्वार ह्रिमा ङलाइ ल्होमिंन्! तलेबिस्याँ ङए खेमैं धोंलेन् ङ आगुए ह्‍युलर्बै म्हि ग, स्याँ म्हि मुँलेया ङ क्हिनेन् टिम्।
PSA 39:13 ङ सिसि ङए मिं म्हयाब् भन्दा ओंसोंन्, ङ धबै सैं तोंल् योंबै ल्हागिर क्हिए ह्रिस ङउँइँले स्योमिंन्!”
PSA 40:1 क्वे प्रिंब्मैंए चिबए ल्हागिर दाऊदए भजन घ्रि। ङइ आआदेनाले याहवेहलाइन पैंरिइ, धै खीजी ङ ङाँइ न्ह तोसि ङइ ग्वार ह्रिब थेमिंइ।
PSA 40:2 खीजी ङलाइ नास तबै होंल्दोउँइँले नेरो हिलए ढाबउँइँले तेसि पखइ, खीजी ङए प्हले पाराए फिर थेंमिंइ, धै ङ राबर भोंबै क्‍ल्‍ह्‍यो पिंइ।
PSA 40:3 खीजी खीए मिंलाइ थेब् लबै ल्हागिर छारा क्वे घ्रि ङए सुँर थेंमिंइ, छतसि ङ्योए परमेश्‍वरए मिं थेब् लबै क्वे ङइ प्रिंइ, छाब् म्रोंसि म्हिमैं हार म्हाँदिसि ङ्हिंब्मुँ, धै याहवेहए फिर्न चमैंइ भर थेंब्मुँ।
PSA 40:4 थेब् प्हैंब्मैं ङाँइ आङ्ह्‍योब, धै स्योलिबै देवतामैं ङाँइ ल्हैदिब्मैंने आत्हुँब, याहवेहए फिर्न भर थेंब, छाबै म्हिइ आशिक योंब्मुँ। 1
PSA 40:5 ओ याहवेह, ङए परमेश्‍वर, क्हिजी लबै औदिबै केमैं नेरो क्हिजी ङिए ल्हागिर लबै चाँजोमैं ल्हेंन् मुँ। क्हिजी लबै औदिबै केमैं ल्हेंन् मुँ, छतसि ङइ च केमैंए बयन लल् आखाँ। क्हि धों तब अरू खाबै आरे!
PSA 40:6 ख्रो नेरो भेटि क्हिजी आम्है, मिर ख्रोंसि पिंबै ख्रो नेरो पाप ख्रुबै ल्हागिर्बै ख्रो क्हिजी आह्रि। बरु क्हिए ताँ थेबै ल्हागिर क्हिजी ङए न्हमैं थोमिंइमुँ।
PSA 40:7 छतसि ङइ बिइ, “ङ चुर्न खइमुँ! ङइ तो-तो लल् त्हुडम् बिसि काउदए प्हैंर प्ह्रिथेंइमुँ।
PSA 40:8 ओ ङए परमेश्‍वर, क्हिजी ङने ल्हैदिबै के ङइ सैं तोंन्ले लम्, तलेबिस्याँ क्हिए ठिम ङए सैंर मुँ।”
PSA 40:9 ओ याहवेह, क्हिजी ङिलाइ जोगेमिंम् बिबै ताँ ङइ थेबै म्हि च्होंर बिइमुँ। ङए सुँइ चु ताँ आपोंन्ले टिल् आखाँ बिसि क्हिजी छेनाले सेइमुँ।
PSA 40:10 क्हिजी रक्षा लमिंम् बिबै सैं तोंबै ताँ ङइ ह्रोंसए खोंर लोइरि आथेंइमुँ, बरु क्हि जोगेमिंब नेरो भर लल् खाँब मुँ बिसि ङइ पोंइमुँ। क्ह्रोंसेंन्बै खोंयोंइ आनुबै म्हाँया लबै परमेश्‍वर क्हिन् ग बिसि ङइ थेबै म्हि च्होंर बिइमुँ।
PSA 40:11 ओ याहवेह, ङए फिर खोंयोंन् बिलै ल्हयो खरिद्! क्हि भर थेंल् खाँबै परमेश्‍वर ग। क्हिजी ङलाइ खोंयोंन् बिलै म्हाँया लरिम्। छतसि ङलाइ जोगेमिंन्।
PSA 40:12 तलेबिस्याँ ङए फिर ल्हें दुःख तइमुँ; ङइ लबै आछ्याँबै केमैंइ लमा ङ क्र ओलै आखाँन् तयाइमुँ; क्रप्हो भन्दा ल्हें दु:खमैं ङए फिर तबइले ङइ मि या छेन्ले आम्रों; छतसि ङए सैं बेल्‍ले च्योंयाइमुँ।
PSA 40:13 ओ याहवेह, ङलाइ जोगेमिंबै सैं लमिंन्! ओ याहवेह, ङ ल्होबर युनन् युमिंन्!
PSA 40:14 ङलाइ सैल् म्हैब्मैं ताँन् अलमल् तसि फा फिन् तरिगे। ङए न्होह्रों तब् म्रोंसि सैं तोंब्मैं लिग्याँ तोसि न्हेयारिगे धै आगुइ चमैंलाइ म्हि आच्हिन् लवारिगे!
PSA 40:15 ङलाइ प्ह्रब्मैं फा फिसि लि उँइँल् आखाँरिगे।
PSA 40:16 दिलेया क्हिलाइ म्हैब्मैं ताँन् क्हिलाइन मैंसि सैं तोंरिगे धै छिं ङ्हाँरिगे! “क्हिजी जोगेमिंइ!” बिसि धन्यबाद पिंब्मैंइ खोंयोंइन् बिलै “याहवेह बेल्‍ले थेब मुँ!” बिसि बिरिगे!
PSA 40:17 ङ बिस्याँ आयोंब् नेरो आख्युब मुँ, दिलेया प्रभुजी ङलाइ मैंम्। क्हिजी ङलाइ ल्होसि ताँन् दुःखउँइँले फ्रेमिंम्। ओ ङए परमेश्‍वर, युनन् यमिंन्।
PSA 41:1 क्वे प्रिंब्मैंए चिबए ल्हागिर दाऊदए भजन घ्रि। आयों आख्युब्मैंए खाँचो टार्दिमिंबै म्हिइ आशिक योंम्! छाबै म्हिए फिर दुःख तमा याहवेहजी चलाइ दुःखउँइँले फ्रेमिंम्।
PSA 41:2 याहवेहजी चए रक्षा लब्मुँ, धै खोंयोंइ आखाँबै छ्ह पिंसि चलाइ जोगेमिंब्मुँ; च ह्‍युलर मुँमै या खीजी चलाइ आशिक पिंब्मुँ; धै चलाइ शत्तुरमैंए योर पिरिब् आरे।
PSA 41:3 च नबै त्हेरै या याहवेहजी चलाइ ल्होब्मुँ; धै चलाइ सल् लमिंब्मुँ।
PSA 41:4 ङइ बिइ, “क्हिजी आखोबै केमैं ङइ लइमुँ!” दिलेया ओ याहवेह ङए फिर दयाम्हाँया लमिंन्, धै ङ सल् लमिंन्।
PSA 41:5 ङए शत्तुरमैंइ “चु खोंयों सियाब् ङ्‍हे चुए मिं क्ह्र खोंयों म्हयाब् ङहे?” बिसि ङए बारेर आछ्याँबै ताँमैं लमुँ।
PSA 41:6 ङलाइ ङ्ह्‍योबरम् खनबिलैया चमैं छ्याँबै सैंउँइँले आख; चमैंइ सुँइ लिरिक्‍क लमुँ, दिलेया बैरु त्होंयाबै लिउँइँ ङए ताँन् लप्रम्।
PSA 41:7 ङलाइ आखोब्मैं ताँन् खागु तसि ङए बारेर खस्या-खुस्युले ताँ लम्; ङ‍ए बिरोधर चमैंइ आछ्याँबै चाँजोमैं लम्।
PSA 41:8 चमैंइ बिमुँ, “च बेल्‍ले आछ्याँबै रोगइ स्याइमुँ, च रोबै क्‍ल्‍ह्‍योउँइँले धबै रेरिब् आरे।”
PSA 41:9 ङने बेल्‍ले क्ह्रिब, ङनेन् चब् थुँब् लब, ङइ खोबै थुइन, ङए बिरोधर आछ्याँबै ताँमैं लप्रम्।
PSA 41:10 दिलेया ओ याहवेह, ङ फिर दयाम्हाँया लमिंन्; चमैंए खि फोल् योंबै ल्हागिर ङ सल् लमिंन्।
PSA 41:11 ङए शत्तुरमैंइ ङए फिर ट्होल् खाँरिब् आरे। छतसि ङ म्रोंसि क्हि सैं तोंइमुँ बिब ङइ सेइमुँ।
PSA 41:12 तो ठिक मुँ च केन् ङइ लबइले क्हिजी ङ ल्होमिंम्, धै क्हिजी खोंयोंन् बिलै ङ क्हिए उँइँर्न थेंम्।
PSA 41:13 इस्राएलए याहवेह परमेश्‍वरए मिं खोंयोंन् बिलै थेब् तरिगे। आमेन। छान् तरिगे।
PSA 42:1 क्वे प्रिंब्मैंए चिबै ल्हागिर कोराए च्हमैंइ प्रिंबै मस्किल घ्रि फोइ क्यु पिसि स्योंर्बै क्यु म्हैब् धोंले, ओ परमेश्‍वर, ङए सोज्यै या क्हिन् म्हैरिमुँ।
PSA 42:2 क्हि खोंयोंन् बिलै तरिबै परमेश्‍वरने खोंयों त्होनेब् ङ्‍हे बिसि ङए सोइ क्हिलाइन म्हैरिमुँ।
PSA 42:3 ङए मिग्लि त्हिंयाँ म्हुँइँस ङए चबै सै तइमुँ, छाब् म्रोंमा ङए शत्तुरमैंइ “क्हिए परमेश्‍वर खनिर मुँ?” बिसि खोंयोंन् बिलै ङलाइ प्ह्ररिम्।
PSA 42:4 सैं तोंदै धन्यबाद पिंबै म्हिमैंए चिब ङ तल। छतसि परमेश्‍वरए मिं क्वेबर ह्‍याबै ल्हें म्हिमैंने क्ह्रिसि ङइ चमैंलाइ परमेश्‍वरए धिंउँइँ बोब्रें लमल। चु ताँमैं मैंरिमा ङए सैं बेल्‍ले नम्।
PSA 42:5 ओ ङए सो, क्हि तले आतोंल? धै ङए खों न्होंर क्हि तले च्हतर्लै आदेल? क्हिए आशा परमेश्‍वरने थेंन्; तलेबिस्याँ खी ङलाइ मुक्‍ति पिंबै परमेश्‍वर ग। छतसि ङ अझै खीलाइन थेब् लब्मुँ।
PSA 42:6 ङए सैं आतों। छतसि ङइ यर्दन स्यों नेरो हेर्मोन कोंमैंए ह्‍युलउँइँले धै मिसारए कोंउँइँले क्हिलाइन मैंम्।
PSA 42:7 मा ङ्युँइए क्यु प्ल्होंइ खमा क्हिए ताँन् क्युए भेल्गमैं नेरो मा ङ्युँइर्बै क्युमैंइ ङए सैं खैता-खैता ङ्हाँन् लवाइमुँ।
PSA 42:8 दिलेया याहवेहए खोंयोंइ आनुबै म्हाँया त्हिंयाँर ङने तमुँ, धै म्हुँइँसर खीए मिंर भजनमैं प्रिंसि ङलाइ छ्ह पिंबै परमेश्‍वरने ङइ प्राथना लम्।
PSA 42:9 ङए परमेश्‍वरने, ङ लोबै पाराने, ङइ बिम्: “क्हिजी तले ङ म्‍लेल? शत्तुरमैंइ क्र ओल् आपिंसि ङ तले न्हुँ लसि प्ररिल् त्हुइमुँ?”
PSA 42:10 ङए ह्रिबमैंर सेलाँइ थोसि घा तब् धोंले ङए शत्तुरमैंइ ङलाइ प्ह्रम्, धै चमैंइ त्हिंइतिमिन् ङने बिरिम्, “क्हिए परमेश्‍वर खनिर मुँ?”
PSA 42:11 ओ ङए सो, क्हि तले आतोंल? धै ङए खों न्होंर क्हि तले च्हतर्ले आदेल? क्हिए आशा परमेश्‍वरने थेंन्; तलेबिस्याँ खी ङलाइ मुक्‍ति पिंबै परमेश्‍वर ग। छतसि ङ अझै खीलाइन थेब् लब्मुँ।
PSA 43:1 ओ परमेश्‍वर, ङने तोइ छ्याब् आरे बिमिंन्, धै क्हिजी बिब् आङिंबै ह्रेंमैंए बिरोधर ङए ख लसि पोंमिंन्, छलु म्हिलु लब्मैं नेरो दुष्‍ट म्हिमैंउँइँले ङलाइ जोगेमिंन्!
PSA 43:2 तलेबिस्याँ, ओ परमेश्‍वर, क्हिए प्हलेर्न ङइ ग्वार योंम्। ङलाइ तले पिवाल? शत्तुरमैंए योर फेसि ङ तले क्रोप्ररिल् त्हुइमुँ?
PSA 43:3 क्हिए क्ह्रोंसेंन्बै ताँमैं ङने बिमिंसि क्हिए चारबै ह्‍वे उँइँमिंन्; चमैंइन ङ डोरेरिगे; धै क्हिए पबित्र कोंर क्हि टिबै क्‍ल्‍ह्‍योर ङ फेनेल् योंरिगे।
PSA 43:4 ओ परमेश्‍वर, ङए परमेश्‍वर, छलस्याँ क्हिए मिंर ख्रो पिंबै क्ल्ह्‍योर ङ फेनेब्मुँ, धै ङए सैं तोंन् लबै परमेश्‍वरए मिंर ङइ बीणा ह्रादै क्हिए क्वे प्रिंब्मुँ।
PSA 43:5 ओ ङए सैं, क्हि तले आतोंल? ओ ङए खों, क्हि तले च्हतर्ले आदेल? क्हिए आशा परमेश्‍वरने थेंन्; तलेबिस्याँ खी ङलाइ मुक्‍ति पिंबै परमेश्‍वर ग। छतसि ङ अझै खीलाइना थेब् लब्मुँ।
PSA 44:1 क्वे प्रिंब्मैंए चिबए ल्हागिर कोराए च्हमैंइ प्ह्रिबै मस्किल घ्रि ओ परमेश्‍वर, स्योंमा ङिए खे-मामैंए पलोर क्हिजी बेल्‍ले थेबै केमैं लल बिसि ङिए खे-मामैंइ बिब ङिए न्हइ थेल।
PSA 44:2 क्हिजी ह्रोंसए योजीन् अरू ह्रेंमैं ल्हावासि ङिए खेमैं चर टिल् पिंइ; क्हिजी अरू म्हिमैंलाइ कुरवासि ङिए खेमैंलाइ थेब् लमिंइ।
PSA 44:3 तलेबिस्याँ चमैंइ सेलाँइ नेसि ह्‍युल ट्होब आङिं, धै चमैंइ ह्रोंसए यो पाख्राए भोंइ नेसि ट्होबै या आङिं, दिलेया क्हिए क्योलो योर्बै भों नेरो क्हिए चारबै मोंडए ह्‍वेइन चमैंइ ट्होब् ग, तलेबिस्याँ क्हिजी चमैंए फिर म्हाँया लमल।
PSA 44:4 क्हिन ङए म्रुँ नेरो ङए परमेश्‍वर ग; क्हिजी याकूबलाइ ट्होगों लमिंम्!
PSA 44:5 क्हिजी ल्होमिंबइले ङिइ ह्रोंसए शत्तुरमैं ल्हाल् खाँइ। ङिए बिरोधर राब्मैं ङिइ क्हिए मिंए भोंउँइँले प्लेम्।
PSA 44:6 ङ ह्रोंसए मेत्हले फिर भर आल, ङए सेलाँइ ङलाइ ट्होल् आपिं,
PSA 44:7 दिलेया ङिए शत्तुरमैंए फिर क्हिजी ङिलाइ ट्होल् पिंब्मुँ, धै ङिए बिरोधीमैं फापिल् लवाब्मुँ।
PSA 44:8 ङिए सैं खोंयोंइ बिलै परमेश्‍वरर्न तोंरिम्, धै ङि खोंयोंन् बिले क्हिए मिं क्वेरिम्। तिस्याँदे मैंन्
PSA 44:9 दिलेया क्हिजी ङिलाइ पिवासि ङिए सेनामैं आल्होमिंबइले ङि कुरल् त्हुइमुँ।
PSA 44:10 क्हिजी ङिलाइ शत्तुरमैंए फिर ट्होल् आखाँब् लमिंबइले चमैंइ ङिने मुँबै सैमैं लुडिइमुँ।
PSA 44:11 अरू ह्रेंमैंए म्हाँजोर क्हिजी ङि खन्तोंदोंन् प्हुँवाइ। र-क्युमैं सैबर पिंवाब् धोंलेन् क्हिजी ङिलाज्यै या सैबर पिंवाइ।
PSA 44:12 ह्रोंसए म्हिमैंलाइ तो धोंइ आङ्हाँन्ले क्हिजी चुँवाइ; चमैं चुँवासि क्हिलाइ तोइ फायद आतइमुँ।
PSA 44:13 ङिए ङ्‍हेब्मैंए ओंसों क्हिजी ङिलाइ आगुइ प्ह्रन् छेब लवाइ, म्हिमैंए उँइँर क्हिजी ङिलाइ चमैंइ आक्वेंब नेरो म्हि आच्हिब लवाइ।
PSA 44:14 अरू ह्रेंमैंए म्हाँजोर क्हिजी ङि आउ निस्योबै घ्याँ तल् पिंइमुँ, छतसि ङि म्रोंसि म्हिमैंइ क्र लाम्।
PSA 44:15 छतमा म्हिमैंइ त्हिंइतिमिन् ङए मिं वाम्, छतसि फापिसि ङइ लि उँइँलै आखाँइमुँ।
PSA 44:16 ङए बिरोधर राबै शत्तुरमैंइ लमा फापिसि ङइ क्र ओलै आखाँइमुँ।
PSA 44:17 क्हिइ ल्हैदिबै केमैं ङिइ लरिइमुँ, क्हिलाइन मैंसि ङि टिरिइमुँ, दिलेया चु ताँन् दुःख ङिए फिर्न तइमुँ।
PSA 44:18 दुःखन् तनाबिलेया ङिए सैं क्हि ङाँइन मुँ, क्हिइ तेंबै घ्याँउँइँले ङि छाइ-छुइ आतइमुँ।
PSA 44:19 दिलेया क्हिजी ङिलाइ त्हुल भुँ लवासि सेलमैं टिबै क्ल्ह्‍योर मिछु खैबर भ्योंवाइ।
PSA 44:20 खनिज्यै ङिइ ह्रोंसए परमेश्‍वरए मिं म्‍लेयासि अरू देवतामैं फ्योनेस्याँ
PSA 44:21 खीजी चु आसेमल् रो वा? तलेबिस्याँ खीजी खों न्होंर्बै ताँमैं सेम्।
PSA 44:22 छले सैबर बोबै क्यु धोंन् ङि तइमुँ, क्हिए ल्हागिर ङि खोंयोंन् बिलै सिब् धोंन् तल् त्हुइमुँ।
PSA 44:23 छतसि ओ प्रभु, तले रोल? रेद्! छोरद्! खोंयोंइ ङिलाइ आपिद्।
PSA 44:24 ङि ङाँइले तले ह्रेंगो तल? ङि फिर तबै दुःख नेरो कष्‍ट तले म्‍लेल?
PSA 44:25 ङि त्हुलर कोंयाइमुँ; ङिए ज्यु सर्न ह्रेंयाइमुँ।
PSA 44:26 रेद्, ङिलाइ ल्होमिंन्! क्हिए खोंयोंइ आनुबै म्हाँयाजी ङिलाइ जोगेमिंन्!
PSA 45:1 क्वे प्रिंब्मैंए चिबए लागिर, लिलि ट बिबै भाकार प्रिंबै कोराए च्हमैंए मस्किल घ्रि, म्हाँया क्वे घ्रि। छ्याँबै ताँमैंइ प्लिंसि ङए सैं बेल्‍ले तोंइमुँ; म्रुँए ल्हागिर ङइ प्ह्रिबै कबिता ङ बिमुँ; ङए ले छेनाले प्ह्रिल् ह्रबै म्हिए कलम धों तइमुँ।
PSA 45:2 मुँयुमैंए न्होंर क्हि बेल्‍ले छ्याँब मुँ; क्हि पोंबरै बेल्‍ले ह्रब मुँ; तलेबिस्याँ परमेश्‍वरजी खोंयोंन् बिलै क्हिए फिर आशिक पिंरिम्।
PSA 45:3 ओ थेब शक्‍ति मुँबै म्रुँ, क्हिए थेबै मिंए मान नेरो क्हिए थेबै केमैं उँइँबै ल्हागिर ह्रोंसए क्रेर सेलाँ खिद्।
PSA 45:4 क्ह्रोंसेंन्बै ताँ पोंल् त्हुम्, करल् त्हुम् ठिक निसाफ लल् त्हुम् बिदै ह्रोंसए शक्तिर ट्होदै ह्‍याद्। क्हिए क्योलो योजी औदिबै केमैं लमुँ!
PSA 45:5 क्हिए म्ह्रुछु तबै मेइ म्रुँए शत्तुरमैंए तिंर म्‍लेवारिगे; अरू ह्रेंमैं क्हिए प्हलेर्न कुरखरिगे।
PSA 45:6 ओ परमेश्‍वर, क्हिए ग्याल्स खोंयोंन् बिलै तरिम्। ठिक केमैं लसि ह्रोंसए म्हिमैंए फिर क्हिजी ग्याल्स लम्;
PSA 45:7 ठिक केमैं लब क्हिजी खोमुँ, आछ्याँबै केमैं बिस्याँ क्हिजी आखो। छतसि परमेश्‍वर, क्हिए परमेश्‍वरजी क्हिए थुमैंलाइ भन्दा क्हिलाइ ल्हें आशिक पिंसि क्हिए सैं तोंन् लमिंइमुँ;
PSA 45:8 क्हिए ताँन् क्वेंमैंर मूर्र, एलवा नेरो लेबोए लिंब थाँ खम्। हात्तिए समैंइ सजेबै दरबारउँइँले त्होंबै गिटार-सारङ्गींमैंए छ्याँब कैइ क्हिए सैं तोंन् लम्;
PSA 45:9 क्हिउँइँले मान योंबै च्हमिरिमैं न्होंर म्रुँमैंए च्हमिमैं या मुँ; क्हिए क्योलोउँइँ ओपीरर्बै माराए घानइ पैरिदिबै म्रुँस्यो राइमुँ।
PSA 45:10 ओ च्हमि छेनाले थेद्, क्हिए म्हिमैं नेरो क्हिए आबाए धिं म्‍लेवाद्।
PSA 45:11 छ लइ बिस्याँ क्हि छ्याँब् म्रोंसि म्रुँ सैं तोंब्मुँ। खीलाइ म्हाँदिद्, तलेबिस्याँ खी क्हिए क्ल्हे ग।
PSA 45:12 टुरोसर्बै म्रुँए च्हमि क्होल्सै किंसि खब्मुँ, प्लबै म्हिमैंइ क्हिनेन् आशा थेंब्मुँ।
PSA 45:13 म्रुँए च्हमि ह्रोंसए कोठार टिमा कति छ्याँब मुँ! चए क्वेंरै या माराइन बुट्टा प्रिंइमुँ।
PSA 45:14 छले बेल्‍ले छ्याँबै क्वें खिसि चलाइ म्रुँ ङाँर सनेब्मुँ, चए थुमैं या चए लिलिन् खब्मुँ।
PSA 45:15 निस्यो-स्योइ सैं तोंदै चमैं खमुँ, धै चमैं म्रुँए दरबार न्होंर होंम्।
PSA 45:16 क्हिए खेमैं म्रुँ तब् धोंले क्हिए सन्तानमैं या म्रुँ तब्मुँ; क्हिजी चमैंलाइ ताँन् ह्‍युलए फिर क्ल्हे तल् पिंब्मुँ।
PSA 45:17 लिउँइँबै पुस्त-पुस्त समा क्हिए मिं मैंरिब लमिंब्मुँ; छतसि अरू ह्रेंमैंइ खोंयोंन् बिलै क्हिए मिं थेब् लब्मुँ।
PSA 46:1 क्वे प्रिंब्मैंए चिबए ल्हागिर। अलामोत बिबै भाकार प्रिंबै कोराए च्हमैंए क्वे घ्रि। ङ्योए लोबै क्‍ल्‍ह्‍यो नेरो भों पिंब परमेश्‍वरन् ग, दुःख तमा युन्लेन् ङ्योलाइ ल्होमिंब खीन् ग।
PSA 46:2 छतसि ह्‍युल लालेया, मा ङ्युँइर कोंमैं तेयालेया,
PSA 46:3 मा ङ्युँइ घ्वा-घ्वाले ङ्‍हेसि पिबि थोलै या, धै च प्ल्होंखसि कोंमैं लालै या ङि ङ्हिंरिब् आरे। तिस्याँदे मैंन्
PSA 46:4 स्यों घ्रि मुँ, च स्योंइ ताँन् भन्दा थेबै परमेश्‍वरए म्हिमैं टिबै सहर नेरो खी टिबै पबित्र क्ल्ह्‍यो सैं तोंल् लम्।
PSA 46:5 परमेश्‍वर च सहरर मुँ; छतसि च तेयारिब् आरे; न्हाग छझँ मि छेनाले आम्रोंबर्न परमेश्‍वरजी च ल्होमिंब्मुँ।
PSA 46:6 ह्रें-ह्रेंमैं ङ्हिंसि त्हारम् धै ग्याल्समैं लायाम्; खीजी थेब कै तेमा पृथ्‍बी बिलेयाम्।
PSA 46:7 स्वर्गर्बै सेनामैंए चिब याहवेह ङ्योने बालु मुँ; ङ्योलाइ जोगेमिंबै किल्‍ला याकूबए परमेश्‍वर ग। तिस्याँदे मैंन्
PSA 46:8 खो, याहवेहजी लबै केमैं ङ्ह्‍योनेले। ह्‍युलर खीजी नास लबै केमैं ङ्ह्‍योद्।
PSA 46:9 ह्‍युलर तरिबै ल्हडें खीजी तल् आपिं; खीजी त्हलें चुवाम्, धै मेमैं कुदुकुदु लवाम्; झाइले ढालमैं मिर ख्रोंसि मेउरो लवाम्।
PSA 46:10 “च्याँले टिद्, धै ङ परमेश्‍वर ग बिसि सेद्। ह्रें-ह्रेंमैंए फिर ङ थेब् तब्मुँ, ताँन् ह्‍युलरै या ङन् थेब् तब्मुँ!” बिसि याहवेहजी बिम्।
PSA 46:11 स्वर्गर्बै सेनामैंए चिब याहवेह ङ्योने बालु मुँ; ङ्योलाइ जोगेमिंबै किल्‍ला याकूबए परमेश्‍वर ग। तिस्याँदे मैंन्
PSA 47:1 क्वे प्रिंब्मैंए चिबए ल्हागिर कोरहए च्हमैंए भजन घ्रि। ओ ताँन् ह्रेंमैं, योप्ल्ह ह्राद्! सैं तोंदै थेबै कै तेसि परमेश्‍वरए जय-जय लद्!
PSA 47:2 तलेबिस्याँ ताँन् भन्दा थेबै याहवेहने बेल्‍ले ङ्हिंल् त्हुब मुँ, पृथ्बी तिगोंर्बै थेबै म्रुँ खीन् ग।
PSA 47:3 खीजी ह्रें-ह्रेंर्बै म्हिमैं ङिए न्होंर पखइ, धै म्हिमैंलाइ ङिए प्हले न्होंर लमिंइ।
PSA 47:4 खीजी ङि याकूबए सन्तानमैं खोइमुँ, खीजी ङिए ल्हागिर टिबै ह्‍युल त्हाँइ, धै च ह्‍युल योंसि ङि सैं तोंइ। तिस्याँदे मैंन्
PSA 47:5 परमेश्‍वर कैंडो ह्‍यारिमा म्हिमैंइ बेल्‍ले सैं तोंदै खीए मिं क्वेइमुँ, छले याहवेह कैंडो ह्‍यामा चमैंइ थुतुरु या ह्राइ।
PSA 47:6 परमेश्‍वरए मिं थेब् लदै क्वे प्रिंन्, ङ्योए म्रुँलाइ थेब् लदै क्वे प्रिंन्, खीए मिंर क्वे प्रिंन्!
PSA 47:7 तलेबिस्याँ ह्‍युल तिगोंर्बै म्रुँ परमेश्‍वरन् ग; छतसि खीए मिं थेब् लबै भजन प्रिंन्।
PSA 47:8 ह्रें-ह्रेंमैंए फिर परमेश्‍वरजी ग्याल्स लमुँ; परमेश्‍वर ह्रोंसए पबित्र राजगद्दिर टिमुँ।
PSA 47:9 अब्राहामए परमेश्‍वरए म्हिमैंने बालु अरू ह्रेंमैंए क्रथे मिंथेमैं खागु तइमुँ। तलेबिस्याँ पृथ्बीर्बै म्रुँमैं परमेश्‍वरए योर्न मुँ; खी बेल्‍ले थेब मुँ!
PSA 48:1 कोराहए च्हमैंए भजन घ्रि, क्वे घ्रि। याहवेह बेल्‍ले थेब मुँ, धै ङ्योए परमेश्‍वरए सहरर, खीए पबित्र कोंर, खी बेल्‍ले थब् लल् त्हुब मुँ!
PSA 48:2 च सहर नुबै क्ल्ह्‍योर बेल्‍ले छ्याँब मुँ, ह्‍युलर्बै ताँन् म्हिमैंइ च म्रोंसि सैं तोंम्। सापोन कों भन्दा सियोन कों ताँन् भन्दा थेब म्रुँए सहर ग।
PSA 48:3 परमेश्‍वर चए किल्‍लामैंर तमुँ, धै खीजी चए रक्षा लमिंम् बिसि ताँनलाइ सेल् पिंइमुँ।
PSA 48:4 ङ्ह्‍योत्ति, म्रुँमैं खागु तसि नेबर खइ,
PSA 48:5 दिलेया सियोन कों म्रोंसि चमैं प्लेटोयाइ; धै ङ्हिंसि भौदिह्‍याइ।
PSA 48:6 छले चमैं बेल्‍ले ङ्हिंसि सुत्केरि बेथा ल्हैदिबै च्हमिरि धोंन् तइ।
PSA 48:7 तर्शीशर्बै क्यु झाजमैं स्यारउँइँले खबै खैंइ नास लब् धोंलेन् क्हिजी चमैं या नास लवाब्मुँ।
PSA 48:8 ङ्योइ तो थेइ, चन् स्वर्गर्बै सेनामैंए चिब याहवेहए सहरर म्रोंइमुँ, ङ्योए परमेश्‍वरए सहरर ङ्योइ छले म्रोंइमुँ। खीजी च सहर खोंयोंन् बिलै जोगेसि थेंब्मुँ। तिस्याँदे मैंन्
PSA 48:9 ओ परमेश्‍वर, क्हिजी लबै खोंयोंइ आनुबै म्हाँयाए बारेर क्हिए पबित्र क्ल्ह्‍योर ङिइ खोंयोंइ मैंरिम्।
PSA 48:10 ओ परमेश्‍वर, पृथ्बीए छेउ समा म्हिमैंइ क्हिए मिं सेब्मुँ। छलेन पृथ्बी तिगोंन् म्हिमैंइ क्हिए मिं क्वेम्। क्हिए क्योलो योइ ठिक के लम्।
PSA 48:11 सियोन कों सैं तोंम्! क्हिजी ठिक के लब् म्रोंसि यहूदा ह्‍युलर्बै म्हिमैं निस्योम्!
PSA 48:12 सियोनए कारर्ग्युन् स्युरदै प्रद्, चर्बै धररमैं च्योद्,
PSA 48:13 चर्बै गारामैं छेनाले ङ्ह्‍योद्, चर्बै किल्‍लामैं छेनाले सेथेंन्।
PSA 48:14 छ लस्याँ “खोंयोंन् बिलै तरिबै ङ्योए परमेश्‍वर खीन् ग, धै खीजीन् ङ्योलाइ खोंयोंन् बिलै डोरेब्मुँ,” बिसि क्हेमैंइ लिउँइँबै पुस्ताने बिल् खाँब्मुँ।
PSA 49:1 क्वे प्रिंब्मैंए चिबए ल्हागिर कोराए च्हमैंए भजन घ्रि। ओ ताँन् ह्रें-ह्रेंर्बै म्हिमैं चु ताँ थेद्! ह्‍युलर टिबै ताँन् म्हिमैं न्ह तोद्,
PSA 49:2 च्योंब नेरो थेब, प्लब्मैं नेरो ङ्हाँदुमैं ताँनइ थेद्!
PSA 49:3 ङए सुँइ बुद्धिए ताँ पोंब्मुँ; ङए सैंर मैंबै ताँमैंइ क्होबै शक्ति पिंम्।
PSA 49:4 ङ अहान् थेब्मुँ; बीणा ह्रादै ङइ च ताँए अर्थ खोल्दिमिंब्मुँ।
PSA 49:5 ङए फिर दुःखन् तलेया, धै आछ्याँबै के लब्मैंइ ङलाइ कारर्ग्यु लखलेया,
PSA 49:6 प्लबै म्हिमैंइ खेंमैंए सै न्होरए फिर थेब् प्हैंसि ङलाइ म्हि आच्हिन् ललेया ङ ङ्हिंरिब् आरे।
PSA 49:7 खाबज्यै या सै फोसि अरू म्हिलाइ खाल् आखाँ, छलेन ङलाइ जोगेमिंन् बिसि खाबज्यै या परमेश्‍वरलाइ सै फोल् आखाँ।
PSA 49:8 तलेबिस्याँ छए सै ल्हें मुँ। म्हि खोंयोंन् बिलै सोरिगे
PSA 49:9 धै क्रोंर आह्‍यारिगे बिसि खाबज्यै तो सैज्यै या म्हिए सै फोल् आखाँ।
PSA 49:10 तलेबिस्याँ बुद्धि मुँबै म्हिमैं या सिल् त्हुब, धै आमादुमैं नेरो आह्र आसेब्मैं ङ्हिंन-ङ्हिंन् सियामा सै न्होर अरूमैंए ल्हागिर्न वाथेंल् त्हुमन बिब ताँनइ म्रोंइमुँ।
PSA 49:11 चमैंए छगों खोंयोंन् बिलै चमैंए धिं तब्मुँ, पुस्ता पुस्ता समा चमैं छगोंर टिब्मुँ। चमैंए धिं-नाँमैं, क्ल्ह्‍यो न्हेंमैंर खेंमैंए मिं थेंलेया
PSA 49:12 मान इजेत मुँलेया च खोंयोंन् बिलै सोरिल् आखाँ। च नास तयाबै खेदोमैं धोंन् ग।
PSA 49:13 ह्रोंसए फिर भर थेंबै म्हिमैंए गति या छाबन् तम्; धै चमैंए लिलि प्रसि चमैंए ताँ क्वेंब्मैंए गति या छाबन् तम्। तिस्याँदे मैंन्
PSA 49:14 क्युमैं धोंले चमैं क्रोंर ह्‍याल् त्हुम्, चमैंलाइ कालइ बोयाम्! ठिक के लब्मैंन् चमैंए फिर न्हाँगन् क्ल्हे तब्मुँ। चमैं टिबै क्‍ल्‍ह्‍योउँइँले ह्रेंगोर चमैंए ज्यु क्रोंर क्राँयाब्मुँ।
PSA 49:15 दिलेया ङलाइ बिस्याँ परमेश्‍वरजी क्रोंउँइँले फ्रेमिंब्मुँ, धै खीने बालुन् टिल् पिंब्मुँ। तिस्याँदे मैंन्
PSA 49:16 छतसि म्हिमैं प्लब् योब् तसि चमैंइ थेबै धिं योंलेया क्हेमैं तो धोंइ आङ्हाँन्।
PSA 49:17 तलेबिस्याँ च सियामा चइ तोइ बोल् खाँरिब् आरे; चइ योंबै मान इजेतै या चए लिलि छगोंर ह्‍यारिब् आरे।
PSA 49:18 च सोन् समा चइ “ङम् ङ्‍हो सब् ग” बिसि मैंलेया म्हिमैंउँइँले चइ थेबै मान इजेत योंलेया
PSA 49:19 च ह्रोंसए खेमैं माँमैंनेन् च्ह्‍यालनेब्मुँ, चइ खोंयोंइ आखाँबै चारबै छ्ह योंबै ह्‍वे म्रोंल् योंरिब् आरे।
PSA 49:20 मान इजेत मुँबै म्हि मुँलेया चइ आक्होस्याँ नास तसि ह्‍याबै खेदोमैं धोंन् तब् ग।
PSA 50:1 आसापए भजन घ्रि। ताँन् भन्दा थेब शक्‍ति मुँबै याहवेह परमेश्‍वर पोंम्, त्हिंयाँ प्योबै क्ल्ह्‍योउँइँले त्हिंयाँ लिबै क्ल्ह्‍यो समा ह्‍युलर्बै ताँन् म्हिमैंलाइ खीजी हुइम्।
PSA 50:2 बेल्‍ले छ्याँबै सियोनउँइँले बेल्‍ले म्हारल्‍ले परमेश्‍वर चारइमुँ।
PSA 50:3 ङ्योए परमेश्‍वर युसिन् मुँ, युसि खी च्याँले टिरिब् आरे; खीए ओंसों लुँबै मि मुँ, खीए कारर्ग्युले नाँ-खैंमैं मुँ।
PSA 50:4 ह्रोंसए म्हिमैंए निसाफ लबर खीजी मु नेरो पृथ्‍बीलाइ हुइब्मुँ:
PSA 50:5 “ख्रो पिंसि ङने बाछा फैब नेरो ङलाइ क्वेंबै म्हिमैं ङ ङाँर पखो।”
PSA 50:6 “खीजी ठिक के लम्,” बिसि मुइ बिमुँ, “तलेबिस्याँ ठिक निसाफ लबै परमेश्‍वर क्हिन् ग। तिस्याँदे मैंन्
PSA 50:7 “ओ ङए म्हिमैं, ङ पोंमुँ, ङए ताँ थेद्!” बिसि परमेश्‍वरजी बिम्। “ओ इस्राएल, ङ परमेश्‍वर ग, ङ क्हिए परमेश्‍वर ग। ङ क्हिए बिरोधर पोंब्मुँ:
PSA 50:8 दिलेया क्हिइ पिंबै ख्रोमैंए ल्हागिर ङइ क्हिलाइ दोष आपिं, ङए मिंर मिर ख्रोंसि पिंबै ख्रोमैं क्हिइ खोंयोंन् बिलै पखब ङइ म्रोंइमुँ।
PSA 50:9 दिलेया क्हिए धिंर्बै साँड्मैं नेरो क्हिए प्ह्रोंर्बै र बुग्यामैं ङलाइ आचैदि।
PSA 50:10 तलेबिस्याँ क्ह्‍योंर्बै ताँन् खेदोमैं नेरो ताँन् कोंजरेबै खेदोमैं ङलन् ग।
PSA 50:11 कोंजरेबै ताँन् नमेमैं नेरो सर मुँबै सो प्ह्‍याबै सैमैं या ङइ ताँन् ङो सेम्।
PSA 50:12 ङ फोतेन् तलेना क्हिने ह्रिल् आत्हु, तलेबिस्याँ पृथ्बी नेरो चर मुँबै तोन्दोंरि सैमैं ङलन् ग।
PSA 50:13 साँड्मैंए से ङइ चम्‍मा? धै रए को थुँम्‍मा?
PSA 50:14 बरु ङलाइ धन्यबाद पिंसि ङए मिं क्वेद्! चुन् पिंल् त्हुबै ख्रो ग। धै ताँन् भन्दा थेबै परमेश्‍वए मिंर लबै भकल पूरा लद्।
PSA 50:15 धै दुःख तबै त्हेर ङने ग्वार ह्रिद्; ङइ क्हि दुःखउँइँले फ्रेमिंब्मुँ, झाइले क्हिइ ङए मिं थेब् लब्मुँ।”
PSA 50:16 दिलेया दुष्‍टमैंने बिस्याँ परमेश्‍वरजी बिमुँ, “ङए ठिम खेब नेरो ङइ फैबै बाछाए ताँमैं बारेर पोंब क्हेमैंल तोए हग मुँ?
PSA 50:17 ङइ लोमिंबै ताँमैं क्हिइ आखो, धै ङइ ल्हैदिबै केमैं क्हिइ आल।
PSA 50:18 ह्‍यो त्होमा क्हि चनेन् त्हुँयाम्, धै ब्यभिचार लबै म्हिमैं त्होमा क्हि चमैंनेन् क्ह्रियाम्।
PSA 50:19 “क्हिए सुँइ आछ्याँबै ताँमैं पोंमुँ, धै क्हिए लेइ फिब्लो पार्दिब ताँमैं लम्।
PSA 50:20 क्हि खोंयोंन् बिलै ह्रोंसए अलिए बिरोधर पोंम्; धै ह्रोंसए अलिलाइन क्हिइ स्यारम्।
PSA 50:21 क्हिइ चु ताँन् आछ्याँबै केमैं लइमुँ दिलेया ङ तोइ आपोंन्ले टिइ; छतसि ङै या क्हि धोंन् तब्मुँ बिब क्हिए सैंर ङ्हाँमै। छ आङिं! ङइ क्हि हौदिब्मुँ धै क्हिइ खैबै केमैं लइमुँ बिब क्हिए ओंसोंन् ताँन् उँइँमिंब्मुँ।
PSA 50:22 “ओ परमेश्‍वरलाइ आमैंब्मैं, छेनाले मैंन्। आमैंस्याँ ङइ क्हि कुदु-कुदु लवाब्मुँ, क्हिलाइ फ्रेमिंब खाबै तरिब् आरे!
PSA 50:23 धन्यबादए ख्रो पिंबै म्हिइन ङए मिं थेब् लब्मुँ। धै ठिक घ्याँर प्रब्मैंलाइन ङइ जोगेमिंब्मुँ,” बिसि फरमेश्‍वरजी बिइमुँ।
PSA 51:1 दाऊदइ बेथसेबा न्होंवाबै लिउँइँ नाथन बिबै अगमबक्‍ता दाऊदए ङाँर ह्‍याइ। च त्हेर दाऊदइ क्वे प्रिंब्मैंए चिबए ल्हागिर भजन घ्रि प्ह्रिइ। ओ परमेश्‍वर, क्हिए खोंयोंइ आनुबै म्हाँयाइ ङए फिर ल्हयो खमिंन्। क्हिजी लबै थेबै म्हाँयाउँइँले ङए पापमैं त्होमिंन्।
PSA 51:2 ङइ लबै ताँन् आछ्याँबै केमैंउँइँले ङ फ्रेमिंन्, धै ङए पाप त्होमिंसि ङ चोखो लमिंन्!
PSA 51:3 तलेबिस्याँ ङइ लबै आछ्याँबै केमैं ङइ सेइमुँ, ङइ लबै पाप खोंयोंइन ङइ मैंरिम्।
PSA 51:4 क्हिए बिरोधर्न ङइ पाप केमैं लइमुँ, धै क्हिजी आखोबै केमैंन् ङइ लइमुँ, छतसि क्हिजी ङने बिबै ताँ क्ह्रोंसेंन् ग, धै क्हिजी लबै निसाफ ताँनए उँइँर ठिक मुँ।
PSA 51:5 क्ह्रोंसेंन फिबै त्हे ओंनोंन् ङ पापि मुँल, ङए आमाए फो न्होंर मुँब् ओंनोंन् ङ पापि मुँल।
PSA 51:6 क्ह्रोंसेंन क्हिजी ङए खों छ्याँब् तरिगे ङ्हाँम्, छतसि क्हिजी ङए सैंर ज्ञान-बुद्धिए ताँमैं झोंमिंम्।
PSA 51:7 लुँडइ ङए सैं म्यामिंन् धै ङए सैं छ्याँब तब्मुँ; छले ख्रुमिंमा ङ चोखो तसि क्लिं भन्दा तार्ग्या तब्मुँ।
PSA 51:8 ङलाइ सैं तोंबै ताँ नेरो आनन्‍द तबै ताँमैं थेल् पिंन्; क्हिजी त्हुल भुँ लवाबै ङए ह्रिबमैं सरिगे धै ङ सैं तोंल् योंरिगे।
PSA 51:9 ङइ लबै पाप केमैं क्हिजी आङ्‍ह्‍योद्, धै ङइ लबै आछ्याँबै केमैं मेटिमिंन्।
PSA 51:10 ओ परमेश्‍वर, ङए खों छ्याँब लमिंन्, धै ङलाइ ठिक सैं पिंन्।
PSA 51:11 क्हि ङाँइँले ङ आस्योमिंन्, धै ङ ङाँइँले क्हिए पबित्र प्ल्ह आबोमिंन्।
PSA 51:12 क्हिजी पिंबै मुक्‍तिउँइँले धबै ङ सैं तोंन् लमिंन्, धै आछ्याँबै केमैं या लदा आङ्हाँबै सैं पिंन्।
PSA 51:13 क्हिजी छ लमिंस्याँ आछ्याँबै के लब्मैंलाइ ङइ क्हिए क्ह्रोंसेंन्बै ताँमैं लोमिंब्मुँ, धै आछ्याँबै के लब्मैं क्हि ङाँइ एब्मुँ।
PSA 51:14 ओ परमेश्‍वर, ङलाइ जोगेमिंबै परमेश्‍वर, ङइ म्हि सैवाइ, च पापउँइँले ङ क्षमा पिंन्, ङए पाप क्षमा लमिंबइले क्हिए मिं क्वेदै ङ क्वे प्रिब्मुँ।
PSA 51:15 ओ याहवेह, ङलाइ पोंल् ह्रब् लमिंन्, धै ङइ क्हिए मिंन् थेब् लब्मुँ।
PSA 51:16 क्हि ख्रोर सैं तोंस्याँ क्हिए मिंर ङइ ख्रो पिंमल, दिलेया मिर ख्रोंसि पिंबै ख्रोमैंरै या क्हि सैं आतों।
PSA 51:17 ङ पापि ग बिसि मैंबै सैंन् परमेश्‍वरजी खोबै ख्रो ग; ओ परमेश्‍वर, ङइ आछ्याँबै के लना बिसि न्हुँ लबै म्हिलाइ क्हिजी म्हाँया लम्।
PSA 51:18 क्हिए सैंर मैंब् धोंलेन् सियोनए फिर ल्हयो खमिंन्; यरूशलेमर्बै फुयाबै गारामैं धबै रुइमिंन्;
PSA 51:19 धै क्हिए सैं तोंल् लबर म्हिमैंइ ठिक ख्रोमैं पिंखब्मुँ, मिर ख्रोंसि पिंबै ख्रोमैं नेरो अरू पिंल् त्हुबै ख्रोमैं म्हिमैंइ पिंब्मुँ, छले साँडेमैं क्हिए मिंर ख्रो पिंबै क्ल्ह्‍योर पखब्मुँ।
PSA 52:1 क्वे प्रिंब्मैंए चिबए ल्हागिर। एदोम ह्‍युलर्बै दोएग शाऊल ङाँर खसि चने “दाऊद अहिमेलेकए धिंर ह्‍याइमुँ,” बिमा दाऊदइ चु मस्किल प्ह्रिइ। ओ भोंबै म्हि, आछ्याँबै केमैं लसि क्हि तले थेब् प्हैंल? क्हि तले त्हिंतिमिन् प्हैंरिम्? छाबै म्हि परमेश्‍वरजी तिफुँइ आखो!
PSA 52:2 क्हि फिब्लो पार्दिसि के लमुँ, छ्यारबै छुरिइ धोंले क्हिए लेइ नास लवाबै चाँजो लम्।
PSA 52:3 छ्याँबै के भन्दा आछ्याँबै के क्हिइ खोम्, धै क्ह्रोंसेंन्बै ताँ भन्दा स्योलिबै ताँमैं क्हि पोंम्। तिस्याँदे मैंन्
PSA 52:4 ओ फिब्लो पार्दिबै म्हि, म्हिमैंए न्होह्रों लबै ताँमैंर क्हि सैं तोंम्।
PSA 52:5 छतसि परमेश्‍वरजी क्हिलाइ योगोर्लेन् नास लवाब्मुँ; क्हिए तम्बुउँइँलेन् खीजी क्हि चैंबोब्मुँ, सोगोंमैंए ह्‍युलउँइँले खीजी क्हि स्युसि भ्योंवाब्मुँ। तिस्याँदे मैंन्
PSA 52:6 छलब् म्रोंसि ठिक के लब्मैं या ङ्हिंब्मुँ; धै निस्योसि चलाइ छ बिब्मुँ,
PSA 52:7 “ङ्ह्‍योत्ति! परमेश्‍वरए फिर भर आलबै म्हि! चुइ ह्रोंसने मुँबै ल्हें सै न्होरए फिर भर लइ, धै अरूमैं नास लवासि भोंब तइ।”
PSA 52:8 दिलेया ङ बिस्याँ परमेश्‍वरए धिंर मुँबै पिंक्यो भ्योंबै जैतुनए धुँ धोंन् तइमुँ, तलेबिस्याँ परमेश्‍वरए खोंयोंइ आनुबै म्हाँयार ङइ भर थेंइमुँ।
PSA 52:9 क्हिजी लमिंबै छ्याँबै केमैंए ल्हागिर ङ खोंयोंन् बिलै क्हिए मिंन् थेब् लब्मुँ। क्हिए मिं छ्याँब मुँ, छतसि ङइ क्हिए फिर्न भर लब्मुँ, क्हिजी बिब् ङिंब्मैंने बालुन् ङै या क्हिए मिं क्वेब्मुँ।
PSA 53:1 क्वे प्रिंब्मैंए चिबए ल्हागिर दाऊदए मस्किल घ्रि। माहालत बिबै भाकार प्रिंल् त्हुम्। आमादुमैंइ ह्रोंसए सैंर “परमेश्‍वर आरे!” बिमुँ। चमैंइ आछ्याँबै केमैं लमुँ, चमैं छेरन् ङ्हाँन् तब्मैं मुँ; छ्याँबै के लब्मैं खाबै आरे।
PSA 53:2 ताँ क्होब्मैं नेरो परमेश्‍वर म्हैब्मैं खाबै मुँ उ बिसि परमेश्‍वरजी स्वर्गउँइँले म्हिमैंलाइ ङ्ह्‍योम्।
PSA 53:3 चमैं ताँन् आछ्याँबै घ्याउँइँ प्रयाइ, धै चमैं ताँन् छेरन् ङ्हाँन् तयाइमुँ। खाबज्यै छ्याँबै के आल, छ्याँबै के लब्मैं घ्रि या आरे।
PSA 53:4 चु आछ्याँबै के लब्मैंइ तोइ आसे वा? ह्‍योइ लुडिब् धोंले चुमैंइ ङए म्हिमैं लुडिसि ह्रोंसए फो न्हम्, चुमैंइ परमेश्‍वरए मिं खोंयोंइ आकिं।
PSA 53:5 ङ्हिंलन् आत्हुबै क्ल्ह्‍योरै या चमैं ङ्हिंसि त्हारब्मुँ, क्हेमैंए बिरोधर राब्मैंलाइ परमेश्‍वरजी चमैंए ह्रुबि या सग्याँ-प्हुग्याँ लवाब्मुँ। तलेबिस्याँ परमेश्‍वरजी चमैं आखो; छतसि क्हेमैंइन चमैंलाइ फापिल् लल् खाँम्।
PSA 53:6 इस्राएलए मुक्‍ति पिंबै म्हि सियोनउँइँले युस्याँ कति छ्याँब् तमल! धै परमेश्‍वरजी ह्रोंसए म्हिमैंलाइ धबै सुख पिंमा याकूब निस्योरिगे, इस्राएल सैं तोंरिगे!
PSA 54:1 क्वे प्रिंब्मैंए चिबए ल्हागिर बीणा-सारङ्गीं ह्रादै प्रिंबै भजन। जीपथेंमैं शाऊल ङाँर ह्‍यासि “दाऊद ङ्योए न्होंर लोइमुँ,” बिमा दाऊदइ चु मस्किल प्ह्रिइ। ओ परमेश्‍वर, क्हिए थेबै भोंइ ङ जोगेमिंन्, क्हिए शक्तिइ ङलाइ छ्याब् आरेब लमिंन्।
PSA 54:2 ओ परमेश्‍वर, ङए प्राथना थेमिंन्; ङए सुँउँइँले त्होंबै ताँ फुँमैंर न्ह तोमिंन्!
PSA 54:3 तलेबिस्याँ स्याँमैंइ ङए न्होह्रों लम्; ल्हयो आखब्मैंइ ङलाइ सैल् म्हैइमुँ; चमैंइ खोंयोंइ परमेश्‍वरलाइ आमैं। तिस्याँदे मैंन्
PSA 54:4 परमेश्‍वरजी खैलसेया ङलाइ ल्होमिंम्, याहवेहजी ङ जोगेमिंम्।
PSA 54:5 ङए शत्तुरमैंइ लबै आछ्याँबै केमैंए दण्ड खीजी चमैंलाइ पिंब्मुँ। ठिक निसाफ लसि क्हिजी चमैं नास लवाद्।
PSA 54:6 ओ याहवेह, क्हिजी ङए ताँन् दुःखउँइँले खैलसे फ्रेमिंब्मुँ, धै ङए शत्तुरमैंए फिर ङ ट्होगों तब ङइ म्रोंब्मुँ।
PSA 54:7 छतसि सैं तोंदै ख्रो किंसि ङ क्हि ङाँर खब्मुँ; क्हिए मिं छ्याँब मुँ, छतसि ङइ क्हिए मिं थेब् लब्मुँ।
PSA 55:1 क्वे प्रिंब्मैंए चिबए ल्हागिर बीणा-सारङ्गीं ह्रादै। दाऊदइ प्ह्रिबै मस्किल घ्रि। ओ परमेश्‍वर, ङए प्राथनार क्हिए न्ह तोमिंन्, धै ङइ यो छ्युँ लसि ग्वार ह्रिमा क्हिए लि आलोमिंन्!
PSA 55:2 ङए ताँ थेमिंनु धै ङलाइ ज्वाफ पिंन्; ङए सैंर ताँ क्ल्योंसि ङ बेल्‍ले न्हुँ खइमुँ,
PSA 55:3 तलेबिस्याँ शत्तुरमैंइ ङलाइ थेबै कैले हौदिम्, धै दुष्‍टमैंइ ङलाइ क्र ओलै आपिं। चमैं ह्रिस खसि ङलाइ दुःख पिंम्; धै ङए फिर खैच्हिजिले पोंम्।
PSA 55:4 सिबन् मुँन बिब् मैंसि बेल्‍ले ङ्हिंसि ङ खैता-खैता तइमुँ।
PSA 55:5 बेल्‍ले ङ्हिंसि ङ त्हारम्, छतसि ङ रेलै आखाँन् तइमुँ।
PSA 55:6 “तोंगुल् धोंले प्ह्‍यागों मुँस्याँ ङ प्हुरह्‍यामल धै भों न्हमल।
PSA 55:7 छले ह्रेंगो ह्‍यासि खाबै आरेबै क्‍ल्‍ह्‍योर टिमल। तिस्याँदे मैंन्
PSA 55:8 चु थेब नाँ-खैंउँइँले ह्रेंगो ङइ ग्वार योंबै क्ल्ह्‍योर ङ युन्लेन् ह्‍यामल।”
PSA 55:9 दुष्‍टमैंइ सहरजरे प्होंब् नेब् नेरो सैब् म्‍लोबै केमैं लब मत्‍त्रे ङइ म्रोंइमुँ, छतसि ओ प्रभु, चमैंए क्युइ घ्रिइ पोंब घ्रिइ आक्होब लवाद्।
PSA 55:10 आगुए न्होह्रों लब् बिसि चमैं त्हिंयाँ म्हुँइँस सहरर्बै गाराए फि-फि प्रप्रम्, चमैंए सुँइ आछ्याँबै ताँमैं पोंमुँ; धै चमैंए सैंइ आछ्याँबै चाँजोमैं लम्।
PSA 55:11 सहरर आछ्याँबै के लबै दुष्‍टमैं ल्हें मुँ, घ्याँर प्रमैया चमैंइ स्योलिबै ताँमैं पोंसि म्हिलाइ थर्केम्।
PSA 55:12 शत्तुरइन म्हि आच्हिसि पिंबै दुःखम् ङइ सैदिल् खाँमला; शत्तुरइन सैबर खस्याँम् चउँइँले ङ लोल् खाँमल,
PSA 55:13 दिलेया ङलाइ दुःख पिंबै म्हिम् ङ धों तबै म्हि ङने क्ह्रिबै थुन् ग मुँन।
PSA 55:14 म्हिमैंने बालु परमेश्‍वरए धिंर ह्‍यामा ङि ङ्हिंना-ङ्हिंनइन ह्रोंसए सैंर्बै ताँमैं घ्रिइ घ्रिने बिमल।
PSA 55:15 थाइ आसेल्‍ले ङए शत्तुरमैं कालए सुँर फेरिगे; सोगोंन् चमैं क्रोंर ह्‍याल् त्हुरिगे; तलेबिस्याँ चमैंए सैंइ आछ्याँबै चाँजो मत्त्रे लम्।
PSA 55:16 दिलेया ङ परमेश्‍वरने बिन्ति लमुँ, धै याहवेहजी ङ जोगेमिंब्मुँ।
PSA 55:17 न्हाँगर, त्हिंयाँर, ङेसर, कति त्हेर्न बिलै ङए दुःखर ङइ खीने ग्वार ह्रिमा खीजी ङए ताँ थेब्मुँ।
PSA 55:18 ल्हें म्हि ङए बिरोधर रासि ङने नेखलेया परमेश्‍वरजीन् ङलाइ चमैंउँइँले फ्रेसि जोगेमिंम्; छतसि चमैंइ ङलाइ तोइ लल् आखाँ।
PSA 55:19 खोंयोंन् बिलै राजगद्दिर क्हुँसि ग्याल्स लबै परमेश्‍वरजी ङए ताँ थेसि चमैंलाइ दण्ड पिंब्मुँ। तिस्याँदे मैंन् तलेबिस्याँ चमैं परमेश्‍वर म्रोंसि आङ्हिं, धै चमैंइ खेंमैंए आछ्याँबै बानि ब्योरै या खोंयोंइ आपि।
PSA 55:20 ङए थुइ ह्रोंसने क्ह्रिबै थुमैंए फिर्न खैच्हिजी लइ; छले चइ ह्रोंसइ फैबै बाछा फुवाइ।
PSA 55:21 चइ सुँइ लिरिक्‍क लमल, दिलेया चए सैं आछ्याँब मुँल; चइ ङ्याँ ह्‍याल्‍ले आथेलै थेथे ङ्हाँन्ले ताँ पोंमल, छले स्युट्‍टले पोंसि सेलाँइ धोंले चइ न्होह्रों लमल।
PSA 55:22 क्हिए दुःखए ताँमैं याहवेहने बिद्, धै खीजी क्हि ख्वेब्मुँ; खीजी ठिक के लब्मैंलाइ खोंयोंइ नास तल् पिंरिब् आरे।
PSA 55:23 दिलेया ओ परमेश्‍वर, क्हिजी दुष्‍टमैं नास तबै होंल्दोंर भ्योंवाब्मुँ; म्हि सैब्मैं नेरो छलु म्हिलु लब्मैं आधा बैंसर्न सियाब्मुँ। दिलेया ङइ बिस्याँ क्हिए फिर्न भर थेंइमुँ।
PSA 56:1 क्वे प्रिंब्मैंए चिबलाइ, “ह्रेंगोबै तेरेबिन्थक बिबै सिंधुँर टिबै तोंगु” भाकार प्रिंन्। पलिश्‍तिमैंइ गातर दाऊद क्हाबै बारेर दाऊदइ चु मिक्‍ताम घ्रि प्ह्रिइ। ओ परमेश्‍वर, ङए फिर दयाम्हाँया लमिंन्, तलेबिस्याँ त्हिंइतिमिन् म्हिमैं ङने नेबर खम्; धै चमैंइ ङलाइ ह्रुगुदिम्।
PSA 56:2 ङए शत्तुरमैंइ त्हिंइतिमिन् ङलाइ ल्हाम्; ल्हें म्हि ह्रिस उँइँदै ङने नेबर खम्।
PSA 56:3 छतसि ङ ङ्हिंमा ङइ क्हिए फिर्न भर थेंम्।
PSA 56:4 परमेश्‍वरजी पोंबै ताँमैंए बयन ङ लरिमुँ। खीए फिर्न ङइ भर लइमुँ, छतसि ङ ङ्हिंरिब् आरे। म्हिमैंइ ङलाइ तो लल् खाँमुँ?
PSA 56:5 त्हिंइतिमि चमैंइ ङइ पोंबै ताँमैंए उल्टो अर्थ ल्हैदिम्; चमैंइ खोंयोंन् बिलै ङए न्होह्रों लबै ल्हागिर चाँजोमैं लम्।
PSA 56:6 ङइ आसेल्‍ले चमैंइ ङए बिरोधर आछ्याँबै चाँजो लम्; चमैंइ ङ प्रबै घ्याँ ङ्ह्‍योमुँ; ङ सैब् बिसि चमैं च्ह्‍याइ टिम्।
PSA 56:7 ओ परमेश्‍वर, चमैंइ लबै आछ्याँबै केमैंए दण्ड चमैंलाइ पिंन्; क्हिए ह्रिसर चमैंलाइ क्हुरवाद्!
PSA 56:8 ङइ योंबै दुःखए हिसाब-कितब थेंमिंन्, ङए मिग्लि खेरो ह्‍याल् आपिंन्। ङइ योंबै दुःखए हिसाब-कितब क्हिजी आप्ह्रिइमुँ वा?
PSA 56:9 ल्होमिंन् बिसि ङइ क्हिने ग्वार ह्रिमा ङए शत्तुरमैं लिग्याँ तोसि न्हेयाब्मुँ। परमेश्‍वरजी खैलसे ङए ख लम् बिब ङइ सेइमुँ।
PSA 56:10 परमेश्‍वरजी पोंबै ताँमैंए बयन ङ लरिमुँ। याहवेहजी पोंबै ताँमैंए बयन ङ लरिमुँ।
PSA 56:11 ङइ खीए फिर्न भर लइमुँ, छतसि ङ ङ्हिंरिब् आरे। म्हिमैंइ ङलाइ तो लल् खाँमुँ?
PSA 56:12 ओ परमेश्‍वर, ङइ क्हिने बालु लबै भकल पूरा लल् त्हुमुँ; क्हिए मिंर ङइ धन्यबादए ख्रो पिंब्मुँ,
PSA 56:13 तलेबिस्याँ छ्ह योंब्मैंए फिर परमेश्‍वरए ह्‍वे चारब् धोंले ङए फिरै या क्हिए ह्‍वे चारमिंन्; ङ क्हिए उँइँर छेनाले प्ररिगे बिसि क्हिजी ङए प्हले थुरसि क्हुरल् आपिं, धै कालए सुँउँइँले या क्हिजी ङ फ्रेपखइ।
PSA 57:1 क्वे प्रिंब्मैंए चिबलाइ, “नास आलद्” बिबै भाकार चु क्वे प्रिंन्। दाऊद शाऊलउँइँले न्हेयासि उ न्‍होंर होंबै त्हेए बारेर दाऊदइ चु मिक्‍ताम प्ह्रिइ। ङए फिर ल्हयो खमिंन्, ओ परमेश्‍वर, ल्हयो खमिंन्! क्हिए प्हलेर्न ग्वार योंबर ङ खइमुँ; चु दु:ख पिंबै सैंमैं आस्योवान् समा क्हिए प्ह्‍यागोंए न्होंर्न ङइ ग्वार योंब्मुँ।
PSA 57:2 ङए ल्हागिर तोन्दोंरि लमिंबै ताँन् भन्दा थेबै परमेश्‍वरनेन् ङइ ग्वार ह्रिइमुँ।
PSA 57:3 खीजी स्वर्गउँइँलेन् ङलाइ जोगेमिंब्मुँ; ङलाइ ह्रुगुदिब्मैंलाइ खीजी हौदिब्मुँ। तिस्याँदे मैंन् छले खीजी खीए खोंयोंइ आनुबै म्हाँया नेरो खी भर लल् खाँबै परमेश्‍वर ग बिबै ताँ ङलाइ उँइँमिंब्मुँ।
PSA 57:4 ङ सिंहमैं धों तबै म्हिमैंए म्हाँजोर मुँ; म्हिलाइ नास लबै खेदोमैंने ङ टिल् त्हुइमुँ। चुमैंए स बर्षा नेरो मे धों तब मुँ, चुमैंए ले बेल्‍ले छ्यारबै क्होज धों तब मुँ।
PSA 57:5 ओ परमेश्‍वर, क्हि मु भन्दा क्होवाइ मुँ बिसि ताँन् म्हिमैंने उँइँमिंन्; धै ह्‍युल् तिगोंन् क्हिए थेबै मिंए बयन तरिगे!
PSA 57:6 ङए प्हले क्होसि क्हुरयारिगे बिसि शत्तुरमैंइ जाल तिइमुँ; शोकइ लमा ङए क्र कुरयाइमुँ। ङ प्रल् त्हुबै घ्याँजरे चमैंइ होंल्दों ताइमुँ, दिलेया चमैंइ ताबै होंल्दोंर खेंमैंन् पायाइमुँ। तिस्याँदे मैंन्
PSA 57:7 ओ परमेश्‍वर, ङइ क्हिए फिर्न भर लइमुँ, ङइ क्हिए फिर्न भर लइमुँ। छतसि ङ बाजा ह्रादै क्वे प्रिंब्मुँ।
PSA 57:8 ओ ङए ज्यु, छोरद्! ओ बीणा नेरो सारङ्गी, क्ह्‍युरल्‍ले कै तेद्! तलेबिस्याँ नाँ न्होंन बिब सेरिगे!
PSA 57:9 ओ याहवेह, अरू ह्रेंमैंए म्हाँजोर ङ क्हिए मिं थेब् लब्मुँ; धै ह्‍यु-ह्‍युलर ह्‍यासि क्हिए मिंर क्वे प्रिंब्मुँ।
PSA 57:10 तलेबिस्याँ क्हिए खोंयोंइ आनुबै म्हाँया स्वर्ग भन्दा थेब् मुँ, क्हिजी पोंबै ताँमैं भर लल् खाँब मुँ, धै क्हिए भर लल् खाँबै ताँमैंइ मुन् छुइनेम्।
PSA 57:11 ओ परमेश्‍वर, क्हि मु भन्दा क्होवाइ मुँ बिसि ताँन् म्हिमैंने उँइँमिंन्! क्हिए थेबै मिंए बयन ह्‍युल् तिगोंन् तरिगे!
PSA 58:1 क्वे प्रिंब्मैंए चिबए ल्हागिर, “नास आलद्” बिबै भाकार प्रिंब। दाऊदइ प्ह्रिबै मिक्‍ताम घ्रि। ओ क्रथे मिंथेमैं, क्ह्रोंसेंन्लेन् क्हेमैंइ स्योर आतेल्‍ले ठिक ताँमैं मत्‍त्रे पोंम्‍मा? क्हेमैंइ म्हिमैंए फिर ठिक निसाफ लम्‍मा?
PSA 58:2 आल! आछ्याँबै चाँजोमैं लसि; ह्‍युलर क्हेमैंइ सैब्-म्‍लोब् लम्।
PSA 58:3 आमाए फो न्होंउँइँलेन् दुष्‍ट म्हिमैंइ आछ्याँबै ताँ मैंम्; फिबै तोदोंन् चमैं आछ्याँबै घ्याँउँइँ प्रसि स्योलिबै ताँमैं पोंम्।
PSA 58:4 चमैंए ताँ प्हुरिए म्येकैं धोंन् तम्। न्ह आथेबै साँबे प्हुरिइ धोंले चमैंइ खेंमैंए न्ह म्रुम्।
PSA 58:5 जादु लब्मैंइ क्ह्‍युरल्‍ले साँने ह्रासि प्हुरि हुइलेया प्हुरिइ थेल् आङिं। छलेन च म्हिमैंइ थेबै न्ह आल।
PSA 58:6 ओ परमेश्‍वर, चमैंए स चमैंए सुँ न्होंर्न चोवामिंन्; ओ याहवेह, च सिंहमैं धों तबै दुष्‍टमैं म्हिमैंए काँस पोंवामिंन्।
PSA 58:7 चैबै क्यु सर्न म्हयाब् धोंलेन् चमैंए मिं क्ह्रन् म्हयारिगे; चमैंइ त्हलेर मे झोंमा मे बोदो तयारिगे।
PSA 58:8 प्रना-प्रन् च्युँयाबै कबो धोंले चमैं म्हयारिगे, म्हैंन आयोबर्न प्युलुयाबै कोलोइ धोंले चमैंइ खोंयोंइ त्हिंयाँ आम्रोंरिगे।
PSA 58:9 पिंग्या मुँले कारयाब मुँलेया पुजु युनन् लुँसि क्हेमैंए भाँडोमैं लाब् भन्दा ओंसोंन् परमेश्‍वरजी दुष्‍ट म्हिमैं नास लवाब्मुँ।
PSA 58:10 छले पापिमैंइ दण्ड योंब् म्रोंसि ठिक के लब्मैं सैं तोंब्मुँ; धै दुष्‍ट म्हिमैंए कोर चमैंइ प्हले ख्रुब्मुँ।
PSA 58:11 छाब् म्रोंसि “ठिक के लब्मैंइ क्ह्रोंसेंन इनाम योब् मुँन; धै पृथ्‍बीर ठिक निसाफ लब परमेश्‍वर मुँन,” बिसि म्हिमैंइ बिब्मुँ।
PSA 59:1 क्वे प्रिंब्मैंए चिबए ल्हागिर, “नास आलद्” बिबै भाकार प्रिंन्। शाऊलइ दाऊद सैबर म्हिमैं चए धिं ङ्ह्‍योबर कुल्मिंमा दाऊदइ चु मिक्‍ताम प्ह्रिइ। ओ ङए परमेश्‍वर, ङए शत्तुरमैंउँइँले ङ फ्रेमिंन्; ङए बिरोधर राब्मैंउँइँले ङ रक्षा लमिंन्;
PSA 59:2 आछ्याँबै के लबै दुष्‍टमैंउँइँले ङ फ्रेमिंन्, ङलाइ सैल् म्हैबै म्हिमैंउँइँले ङ जोगेमिंन्।
PSA 59:3 ङ्ह्‍योद्! ङलाइ सैबर चमैं ह्रेसि टिइमुँ; चमैं ङए बिरोधर रासि “खैले चलाइ सैल् योंब् ङ्‍हे?” बिसि ङलाइ च्ह्‍याइ टिइमुँ। दिलेया ओ याहवेह, ङइ तोइ अपराध, तोइ पाप आलइमुँ,
PSA 59:4 ङइ आछ्याँबै के तोइ आललै या चमैं तोन्-तोर्न ङने नेबर खम्। ङए दुःख ङ्‍ह्‍योमिंन्, रेसि ङलाइ ल्होमिंन्!
PSA 59:5 ओ ताँन् भन्दा थेबै याहवेह परमेश्‍वर, इस्राएलए परमेश्‍वर, क्हिलाइ आम्हाँदिबै ह्रेंमैंए फिर दण्ड पिंबर रेद्; धोक पिंबै दुष्‍ट म्हिमैंए फिर तिफुँइ ल्हयो आखद्। तिस्याँदे मैंन्
PSA 59:6 ङ्हुर-ङ्हुरले ङ्हेदै नगि स्युरब् धोंले ङेस ह्रोंसे खागु तसि चमैं सहरजरे स्युरम्।
PSA 59:7 ङ्ह्‍योद्, चमैंए सुँउँइँले तो त्होंमुँ? चमैंए ले सेलाँ धों तब् मुँ; चमैंए सैंर “ङिइ छ बिब खाबज्यै आथेइमुँ!” ङ्हाँम्।
PSA 59:8 दिलेया ओ याहवेह, च शत्तुरमैंलाइ क्हिजी प्ह्रब्मुँ; ताँन् अरू ह्रेंमैं म्रोंसि क्हि निस्योब्मुँ।
PSA 59:9 ओ ङए भों, ङ क्हिलाइन ङ्ह्‍योब्मुँ, तलेबिस्याँ, ओ परमेश्‍वर क्हि ङए किल्‍ला ग।
PSA 59:10 परमेश्‍वरए खोंयोंइ आनुबै म्हाँया ङए फिर थेब मुँ। खी ङए ओं-ओंसों ह्‍याब्मुँ, धै ङए बिरोधर राब्मैंलाइ ङइन ट्होल् पिंब्मुँ।
PSA 59:11 दिलेया ओ याहवेह, ङिए ढाल, चमैं आसैमिंन्, आस्याँ ङए म्हिमैंइ चमैंलाइ म्‍लिवाब्मुँ; बरु क्हिए थेबै भोंइ चमैंलाइ सग्याँ-प्हुँग्याँ लवासि ट्होवाद्!
PSA 59:12 चमैंए सुँर्बै पाप नेरो म्हदेर्बै ताँफुँमैंइ लमा चमैं थेब् प्हैंबइले ङोर फेरिगे। चमैंइ प्ह्रबै ताँमैं नेरो स्योलिबै ताँमैं लमा
PSA 59:13 क्हिए ह्रिसइ चमैं नास लवामिंन्, चमैं तोइ आचैल्‍ले नास लवामिंन्! छलेन परमेश्‍वरजी इस्राएलए फिर ग्याल्स लमिंम् बिब पृथ्‍बीर्बै ताँन् साँदर टिबै ह्रेंमैंइ सेरिगे। तिस्याँदे मैंन्
PSA 59:14 ङ्हुर्-ङ्हुरले नगि स्युरब् धोंले ङेस ह्रोंसे खागु तसि चमैं सहरजरे स्युरम्।
PSA 59:15 चब सैमैं म्हैबर चमैं स्युर प्रम् धै म्रेंन्ले चल् आयोंमा चमैं ओरम्।
PSA 59:16 दिलेया ङ बिस्याँ क्हिए शक्‍तिए क्वे प्रिंब्मुँ; ङए फिर क्हिजी लबै खोंयोंइ आनुबै म्हाँयाए बारेर ङ न्हाँगर्न क्वे प्रिंब्मुँ, तलेबिस्याँ क्हि ङए किल्‍ला नेरो ङए फिर दुःख तमा ङइ ग्वार योंबै क्‍ल्‍ह्‍यो तइमुँ।
PSA 59:17 ओ ङए भों, क्हिए बयन लदै ङ क्वे प्रिंब्मुँ, ओ परमेश्‍वर, क्हि ङए किल्‍ला, नेरो ङलाइ खोंयोंइ आनुबै म्हाँया लबै परमेश्‍वर ग।
PSA 60:1 क्वे प्रिंब्मैंए चिबए ल्हागिर, “शुशान-एदथ” बिबै भाकार प्रिंब। दाऊदइ अरम-नहरैम नेरो अरम-जोबाहने बालु नेइ, धै योआबइ एसि चजए ब्याँसिर हजार च्युसे ङ्हिं एदोमिमैं सैइ। च त्हेरि दाऊदइ चु मिक्‍ताम लोमिंबै ल्हागिर प्ह्रिइ। ओ परमेश्‍वर, क्हिजी ङि पिवाइमुँ, क्हिजी ङि सग्याँ-प्हुँग्या लवाइमुँ; ङि म्रोंसि क्हि ह्रिस खइमुँ, दिलेया तारेम् क्हि ङि ङाँइ तोमिंनु।
PSA 60:2 क्हिजी ङिए ह्‍युललाइ थर्केसि क्ल्हेवाइमुँ। चर्बै होंल्दोंमैं म्यालमिंन्, तलेबिस्याँ च त्हाररिइमुँ।
PSA 60:3 क्हिजी ह्रोंसए म्हिमैंए फिर सैदिलै आखाँबै दुःख तल् पिंइमुँ; छलमा क्हिजी ह्रिस खसि ङिलाइ म्हेरबै प्हा थुँल् पिंब् धोंले ङिए प्हलेमैं छेनाले म्हैल् आखाँब् तइमुँ।
PSA 60:4 दिलेया मेत्हलेमैं छेब्मैंउँइँले जोगेबै ल्हागिर क्हिलाइ मान लब्मैंए ल्हागिर क्हिजी झन्डा घ्रि क्योमिंइमुँ। तिस्याँदे मैंन्
PSA 60:5 क्हिजी म्हाँया लब्मैं दु:खउँइँले फ्रेमिंबर क्हिए क्योलो योजी ङि जोगेमिंन्, ङिए प्राथना ज्वाफ पिंन्!
PSA 60:6 “शकेमलाइ ट्होसि ङइ चुमिंब्मुँ, धै सुक्‍कोतर्बै ब्याँसि च्हैंसि स्यो-स्यो लब्मुँ,” बिसि परमेश्‍वरजी ह्रोंसए पबित्र क्‍ल्‍ह्‍योउँइले बिइमुँ।
PSA 60:7 “गिलाद ङल् ग, मनश्शे या ङलन् ग; एफ्राइम ङए मुकुट ग, यहूदा ङए ल्हागिर म्रुँइ छेबै प्हरे धों तब् ग।
PSA 60:8 मोआब ङए ल्हागिर यो प्हले ख्रुबै क्‍ल्‍ह्‍यो ग, एदोमए फिर ङइ ह्रोंसए जुत्ता भ्योंमुँ; पलिश्तए फिर ङ ट्होगों तसि ओरम्।”
PSA 60:9 खाबइ ङलाइ किल्‍ला मुँबै सहरर बोमिंब् ङ्‍हे? एदोम समा खाबइ ङ डोरेमिंब् ङ्‍हे?
PSA 60:10 ओ परमेश्‍वर, क्हिजीन् ङिलाइ पिवाइ, आङिं वा? तारे ङिए सिपाइमैंने बालु आह्‍या वा?
PSA 60:11 शत्तुरमैंने नेल् त्हुमा ङि ल्होमिंन्, तलेबिस्याँ म्हिमैंइ ल्होल् आखाँ!
PSA 60:12 परमेश्‍वरउँइँले मत्‍त्रे ङ्योइ ट्होल् खाँब्मुँ, तलेबिस्याँ ङ्योए शत्तुरमैं प्लेवाब खीन् ग।
PSA 61:1 क्वे प्रिंब्मैंए चिबए ल्हागिर गिटार-सारङ्गींमैं ह्रादै प्रिंबै दाऊदए भजन। ओ परमेश्‍वर, ङइ ग्वार ह्रिब थेमिंन्, ङए प्राथना छेनाले थेमिंन्;
PSA 61:2 ङ‍ए सैं आतेसि पृथ्बीए छ्योगोउँइँले ङइ क्हिने ग्वार ह्रिमा, ङ भन्दा थेबै पारार डोरेमिंन्,
PSA 61:3 तलेबिस्याँ ङए ग्वार योंबै क्‍ल्‍ह्‍यो नेरो शत्तुरमैंउँइँले जोगेल् योंबै भोंबै धरर क्हिन् ग।
PSA 61:4 खोंयोंन् बिलै क्हिए तम्बुर ङलाइ टिल् पिंन्! क्हिए प्ह्‍यागोंमैंइ ङए रक्षा लद्। तिस्याँदे मैंन्
PSA 61:5 तलेबिस्याँ ओ परमेश्‍वर, क्हिने बालु ङइ फैबै भकलमैं क्हिजी थेइमुँ; क्हिलाइ मान लब्मैंइ योंल् त्हुबै सैमैं क्हिजी ङलाज्यै या पिंइमुँ।
PSA 61:6 म्रुँए छ्ह ह्रिंग्यो लमिंन्; च खोंयोंन् बिलै सोरिगे।
PSA 61:7 च परमेश्‍वरए ओंसों खोंयोंन् बिलै राजगद्दिर टिरिगे; क्हिजी खोंयोंइ आनुबै म्हाँया लबइले नेरो च क्हिए फिर भर लल् खाँबइले चए रक्षा लमिंन्!
PSA 61:8 झाइले दिन ह्रोसे क्हिने फैबै भकल ङइ पूरा लमा ङ क्हिए मिं खोंयोंन् बिलै थेब् लसि क्वे प्रिंब्मुँ।
PSA 62:1 क्वे प्रिंब्मैंए चिब यदूतूनएल्हागिर दाऊदए भजन घ्रि। क्ह्रोंसेंन ङए सोइ परमेश्‍वरर मत्‍त्रे भों न्हल् योंम्; खीजी ङ जोगेमिंम्।
PSA 62:2 खी मत्‍त्रे ङ रक्षा लमिंबै पारा, नेरो ङए किल्‍ला ग, छतसि ङ ङ्हिंसि त्हाररिब् आरे।
PSA 62:3 खोंयों समा क्हेमैंइ म्हिए न्होह्रों लरिमुँ? फुयाबै गारा नेरो आभोंबै बार धों तबै म्हिलाइ क्हेमैं ताँन् त्हुँसि क्र ओलै आखाँन् लब् वा?
PSA 62:4 चए थेबै पदउँइँले चलाइ क्युरु तवाबर चमैंइ मत्‍त्रे आछ्याँबै ताँ मैंरिम्। चमैं स्योलिबै ताँमैंर सैं तोंम्। चमैंए सुँइ आशिक पिंमुँ, सैं न्होंर बिस्याँ सराप पिंम्। तिस्याँदे मैंन्
PSA 62:5 छतसि ओ ङए सो, परमेश्‍वरर मत्‍त्रे भों न्हद्; ङए आशा खीजीन् पूरा लमिंम्।
PSA 62:6 खी मत्‍त्रे ङ रक्षा लमिंबै पारा नेरो ङए किल्‍ला ग; छतसि ङ ङ्हिंसि त्हाररिब् आरे।
PSA 62:7 परमेश्‍वरए फिर बिश्‍वास लसि ङइ मुक्‍ति नेरो मान योंमुँ। ङए भोंबै पारा नेरो ङए ग्वार योंबै क्‍ल्‍ह्‍यो परमेश्‍वरन् ग।
PSA 62:8 छतसि ओ म्हिमैं, खोंयोंन् बिलै खीनेन् भर थेंन्; खीए ओंसों ह्रोंसए सैंर्बै ताँ बिद्; तलेबिस्याँ ङ्योए ग्वार ह्रिबै क्‍ल्‍ह्‍यो परमेश्‍वर ग। तिस्याँदे मैंन्
PSA 62:9 आयोब् आख्युब्मैं मुट्ठि घ्रि सो मत्‍त्रे ग, प्लब्मैं या तोइ केर आफे, तलेबिस्याँ पारर क्वेमा चमैं योंयाम्, चमैं ङ्हिंना-ङ्हिंन् मुट्ठि घ्रि सो मत्‍त्रे ग।
PSA 62:10 धुदिबै केर भर आतद् धै ह्‍योबै सैर थेब् आप्हैंन्; क्हिए सै न्होर ल्हें तलेया चए फिर भर आथेंन्।
PSA 62:11 परमेश्‍वरजी ताँ घ्रि पोंइमुँ, ङइ ल्हें खे च ताँ थेइमुँ: ओ परमेश्‍वर, क्हि बेल्‍ले भोंब मुँ,
PSA 62:12 ओ याहवेह, क्हिजी खोंयोंइ आनुबै म्हाँया लमुँ। तलेबिस्याँ क्हिजी ताँन् म्हिमैंलाइ ह्रों-ह्रोंसइ लबै के अन्सार्बै नों सै पिंम्।
PSA 63:1 दाऊद यहूदा ह्‍युलर्बै क्यु आयोंबै क्‍ल्‍ह्‍योर टिमा खीजी प्ह्रिबै भजन घ्रि। ओ परमेश्‍वर, क्हि ङए परमेश्‍वर ग; ङए सैं न्होंइले क्हिए साँ खरिम्, क्यु आरेसि कारयाबै बाँजो क्‍ल्‍ह्‍योर क्यु पिब्मैंइ क्यु म्हैब् धोंले ङए ज्युइ क्हिलाइन म्हैब्मुँ।
PSA 63:2 पबित्र क्‍ल्‍ह्‍योर ङइ क्हिलाइ म्रोंइमुँ, क्हि शक्‍ति मुँब नेरो बेल्‍ले म्हारब ङइ म्रोंइ।
PSA 63:3 ङए ल्हागिरि क्हिए खोंयोंइ आनुबै म्हाँया छ्ह भन्दा थेब मुँ, छतसि ङए म्हदिइ क्हिए मिं थेब् लब्मुँ।
PSA 63:4 ङए छ्ह तिगोंन् क्हिलाइन थेब् लब्मुँ, धै क्हिए मिंर ङ ह्रोंसए यो क्वेब्मुँ।
PSA 63:5 लिंबै चबै सैमैं चसि म्रेंब् धोंले ङए सो छिं ङ्हाँब्मुँ, ङए सुँइ सैं तोंबै क्वेमैं प्रिंसि क्हिलाइन थेब् लब्मुँ,
PSA 63:6 रोबै क्‍ल्‍ह्‍योर ङइ क्हिलाइन मैंम्, धै म्हुँइँस तिमिंन् ङ क्हिलाइन मैंरिम्,
PSA 63:7 तलेबिस्याँ क्हिजी ङ ल्होमिंइमुँ, छतसि ङ क्हिए प्ह्‍यागोंमैंए छरि न्होंर सैं तोंसि क्वे प्रिंमुँ।
PSA 63:8 ङए सो क्हिए कुगु न्होंर टिरिम्; क्हिए क्योलो योजी ङ ख्वेसि जोगेमिंम्।
PSA 63:9 ङलाइ सैल् म्हैब्मैं बिस्याँ क्रोंर फेनेसि नास तयाब्मुँ।
PSA 63:10 सेलाँइ चमैंलाइ सैवाब्मुँ, धै सेलमैंए चबै सै तब्मुँ।
PSA 63:11 परमेश्‍वरजी लबै के म्रोंसि म्रुँ सैं तोंरिब्मुँ। खीए मिंर कसम चब्मैंइ खीलाइन थेब् लरिब्मुँ, दिलेया स्योर तेब्मैंए सुँ म्रुवाब्मुँ।
PSA 64:1 क्वे प्रिंब्मैंए चिबए ल्हागिर दाऊदइ प्ह्रिबै भजन घ्रि। ओ परमेश्‍वर, ङइ ग्वार ह्रिमा ङए ताँ थेमिंन्, शत्तुरमैं म्रोंसि ङ ङ्हिंइमुँ, छतसि ङ जोगेमिंन्।
PSA 64:2 ङए बिरोधर ङइ आसेल्‍ले दुष्‍टमैंइ लबै चाँजोमैं नेरो आछ्याँबै के लब्मैंइ ङए बिरोधर रोबै जालउँइँले ङलाइ लोथेंन्।
PSA 64:3 सेलाँर धार झोंब् धोंले चमैंइ खेंमैंए लेर धार झोंमुँ, मे त्हँलेइ ल्हिब् धोंलेन् चमैंइ पोंबै ताँमैंइ म्हिए सैं नल् लम्।
PSA 64:4 तोइ दोष आरेब्मैंलाज्यै या चमैंइ तो धोंइ आङ्हाँन्ले दोष ल्हैदिब्मुँ। छले आगुए फिर खैच्हिजिले पोंसेया चमैंए सैंर तोइ आङ्हाँ।
PSA 64:5 आछ्याँबै केमैं लबर चमैंइ खें-खेंमैंए न्होंर घ्रिइ घ्रिलाइ भों पिंमुँ। खाबज्यै आसेल्‍ले ङो चुले बिसि चमैं क्ह्रिसि मत लमुँ। “ङ्योइ लबै चु के खाबइ म्रोंम्‌ रो?” बिसि चमैंइ बिम्।
PSA 64:6 म्हिमैंए सैं कति आछ्याँब् तमना, चमैंइ आगुए न्होह्रों लबै जाल रोमुँ, दिलेया “ङिइ ठिक चाँजोमैं लइमुँ,” बिम्।
PSA 64:7 दिलेया परमेश्‍वरजी चमैंए फिर मे त्हलेइ ल्हिब्मुँ, धै चमैं था आसेल्‍ले घायते तब्मुँ।
PSA 64:8 चमैंइ पोंबै ताँ खेंमैंए फिर्न खीजी एखल् लब्मुँ, धै चमैं नास लवाब्मुँ। झाइले चमैंलाइ म्रोंम्मैं ताँनइ प्ह्रदै क्र लाब्मुँ।
PSA 64:9 छतब् म्रोंसि ताँन् ह्रेंर्बै म्हिमैं ङ्हिंब्मुँ, चमैंइ परमेश्‍वरजी लबै केए बयन लब्मुँ, धै खीजी लबै केमैं छेनाले क्होल् म्हैब्मुँ।
PSA 64:10 ठिक के लब्मैं याहवेहनेन् सैं तोंब्मुँ, धै खीए प्हलेर्न ग्वार योंम्। सोजो म्हिमैं ताँनइ खीए मिं थेब् लब्मुँ!
PSA 65:1 क्वे प्रिंब्मैंए चिबए ल्हागिर दाऊदए भजन घ्रि, क्वे घ्रि। ओ परमेश्‍वर, सियोनर ङिइ क्हिए मिं क्वेब्मुँ, छले क्हिने फैबै ताँन् भकलमैं ङिइ पूरा लब्मुँ।
PSA 65:2 ओ प्राथना थेमिंबै परमेश्‍वर, क्हिए प्हलेर्न ताँन् म्हिमैं खब्मुँ।
PSA 65:3 ङिइ छेरन् ङ्हाँबै केमैं लसि पापर प्ल्हुँरिम ङिए अपराधमैं क्हिजी क्षमा लमिंइ।
PSA 65:4 क्हिजी त्हाँबै म्हिमैंइ आशिक योंम्, धै क्हिजी चमैंलाइ क्हि ङाँर पखसि क्हिए धिंर्बै ह्‍युर टिल् पिंम्! क्हिए धिंर्बै लिं-लिंबै सैमैं नेरो क्हिए पबित्र धिंर मुँबै आशिकमैंइ ङिं बेल्‍ले सैं तोंल् लमिंब्मुँ।
PSA 65:5 ओ ङिलाइ जोगेमिंबै परमेश्‍वर, क्हिजी ठिक के लमा थेब्-थेबै केमैंउँइँले ङिलाइ ज्वाफ पिंम्। पृथ्‍बीर्बै ताँन् साँदर टिबै ह्रेंमैं नेरो ह्रें-ह्रेंगोर्बै मा ङ्युँइए रेजरेबै ताँन म्हिमैंइ क्हिए फिर्न आशा थेंरिम्।
PSA 65:6 क्हिजी ह्रोंसए भोंउँइलेन् नुबै कोंमैं बनेइ, थे-थेबै के लबै शक्‍ति क्हिनेन् मुँ।
PSA 65:7 थेबै कैले ङ्‍हेबै मा ङ्युँइ नेरो चर्बै भेल्गमैं ङ्‍हेब, नेरो ह्रें-ह्रेंमैंइ लबै खैला-बैला क्हिजीन् च्याँ लमिंम्।
PSA 65:8 क्हिजी लबै थे-थेबै केमैं म्रोंसि ह्‍युल तिगोंर्बै म्हिमैं ङ्हिंम्। न्हाँग तमा ङेसा तमा क्हिजी म्हिमैं सैं तोंदै क्वेमैं प्रिंल् पिंम्।
PSA 65:9 क्हिजी पृथ्बीए वास्ता लमुँ, धै नाँ कुलमिंसि स प्हाँमिंमुँ, क्हिजी चर ल्हें रा-रोमैं रोमिंमुँ। म्हिमैंए ल्हागिर चबै सैमैं योंरिगे बिसि परमेश्‍वरए स्योंमैं क्युइ प्लिंरिमुँ, तलेबिस्याँ क्हिजी छान् तरिद् बिल।
PSA 65:10 क्ल्योबै क्ल्ह्‍योए छेउ समन् क्हिजी छेनाले क्युइ क्योमिंम्। नाँ कुलसि स ङ्याल-ङ्याल लमिंम्, झाइले क्हिजी चर ल्हें रोमैं रोल् पिंम्।
PSA 65:11 क्हिजी ठिक त्हेर ल्हें रा-रोमैं योंल् पिंम्। धै क्हिए भकारिमैं खोंयोंन् बिलै प्लिंरिम्।
PSA 65:12 तोइ आकेबै क्ल्ह्‍योरै या पिंक्योले छिमैंइ प्लिंइमुँ, धै कोंमैं सैं तोंइमुँ,
PSA 65:13 खर्कमैं र-क्युमैंइ प्लिंइमुँ, धै ब्याँसिमैं रा-रोमैंइ प्लिंइमुँ। छतसि ताँन् क्ह्रिमा चमैंइ कै तेसि सैं तोंदै क्वे प्रिंम्।
PSA 66:1 क्वे प्रिंब्मैंए चिबए ल्हागिर भजन, क्वे घ्रि। ओ पृथ्बीर मुँबै तोंन्दोरि सैमैं, सैं तोंदै परमेश्‍वरए जयजय लद्।
PSA 66:2 खीए मिं थेब् लसि क्वे प्रिंन्, खीए मान् लदै छेनाले क्वे प्रिंन्!
PSA 66:3 “क्हिजी लबै केमैं औदिले छ्याँब मुँ!” बिसि परमेश्‍वरने बिद्। “क्हिए शक्ति बेल्‍ले थेब् मुँ, छतसि क्हिए शत्तुरमैं ङ्हिंसि क्हिए उँइँर कुरम्।
PSA 66:4 पृथ्बीर मुँबै तोंन्दोरि सैमैंइ क्हिए प्हले फ्योम्, चमैंइ क्हिलाइन थेब् लदै क्वे प्रिंम्, चमैंइ क्हिए मिं थेब् लदै क्वे प्रिंम्।” तिस्याँदे मैंन्
PSA 66:5 खो, परमेश्‍वरजी लबै केमैं ङ्‍ह्‍योद्, म्हिमैंए ल्हागिर खीजी लबै केमैं औदिले छ्याँब् मुँ!
PSA 66:6 खीजी मा ङ्युँइर ओबनो क्‍ल्‍ह्‍यो लमिंइ; धै चमैं प्हलेइ प्रसिन् मा ङ्युँइए क्योंज ह्‍याइ। खो, खीजी लबै के ङ्ह्‍योसि ङ्यो सैं तोंले।
PSA 66:7 खीजी ह्रोंसए भोंइन खोंयोंन् बिलै ग्याल्स लरिम्, खीजी अरू ह्रेंमैंए फिर ङ्‍ह्‍योरिम्। छतसि खीए बिरोधर राब्मैं थेब् आप्हैंरिगे। तिस्याँदे मैंन्
PSA 66:8 ओ ह्रें-ह्रेंर्बै म्हिमैं, ङ्योए परमेश्‍वरए मिंर क्वे प्रिंन्; खीए मिं क्वेब खन्तोदोंर्बै म्हिमैंइ थेरिगे,
PSA 66:9 खीजी ङ्योए सो जोगेथेंइमुँ, धै ङ्योए प्हले प्लेल् आपिंइमुँ।
PSA 66:10 ओ परमेश्‍वर, क्हिजी ङिए जाँच् लइमुँ, क्हिजी ङि चाँदि धोंले खार्दिइमुँ।
PSA 66:11 क्हिजी ङि ङोर फेल् पिंजी; धै ङिए क्होर ल्हिबै ति नोल् पिंइ।
PSA 66:12 क्हिजी म्हिमैंलाइ ङिए क्र फिर प्लेल् पिंइ, ङि मि नेरो क्युउँइँले तसि ह्‍याइ, दिलेया क्हिजी छ्याजाल्हुलु तबै क्‍ल्‍ह्‍योर ङि पखमिंइ।
PSA 66:13 ङ क्हिए मन्दिरर मिर ख्रोंसि पिंबै ख्रोमैं किंसि खब्मुँ; धै क्हिने लबै भकल पूरा लब्मुँ।
PSA 66:14 ङ दुःखर मुँबै त्हेर ङइ क्हिने लबै भकल पूरा लब्मुँ।
PSA 66:15 ङइ क्हिए मिंर छोबै खेदोमैं मिर ख्रोंसि ख्रोमैं पिब्मुँ, क्यु साँडेमैं ख्रोंसि ङ ख्रो पिंखब्मुँ; क्ल्या भारामैं नेरो र-बुग्यामैं ङइ क्हिए मिंर ख्रो पिंब्मुँ। तिस्याँदे मैंन्
PSA 66:16 परमेश्‍वरलाइ मान लब्मैं, ताँन् खसि थेद्, ङए ल्हागिर खीजी लमिंबै केमैं ङलाइ बिल् पिंन्।
PSA 66:17 ङए सुँइ खीने ग्वार ह्रिइ, धै ङए लेइ खीए मिं क्वेइ।
PSA 66:18 ङए सैंइ पाप मैंरिस्याँ परमेश्‍रजी ङए ताँ आथेमल।
PSA 66:19 दिलेया परमेश्‍वरजी ङए ताँ खैलसे थेमिंइमुँ, खीजी ङए प्राथना छेनाले थेमिंइमुँ।
PSA 66:20 परमेश्‍वरए मिं थेब् तरिगे! खीजी ङए प्राथना थेमिंइमुँ, धै खीए खोंयोंइ आनुबै म्हाँया ङउँइँले आस्योइमुँ।
PSA 67:1 क्वे प्रिंब्मैंए चिबए ल्हागिर बीणा-सारङ्गींमैं ह्रादै प्रिंबै। भजन घ्रि, क्वे घ्रि। ह्‍युलर्बै ताँन् म्हिमैंइ ङो सेरिगे धै क्हिजी जोगेमिंम् बिबै ताँ ताँन् ह्रेंमैंइ था सेरिगे बिसि
PSA 67:2 परमेश्‍वरजी ङ्योए फिर दयाम्हाँया लरिगे, ङ्योए फिर आशिक पिंरिगे, धै खीए लि ङ्योए फिर चारमिंरिगे! तिस्याँदे मैंन्
PSA 67:3 ओ परमेश्‍वर, ताँन् ह्रेंमैंइ क्हिलाइन थेब लरिगे, ताँन् ह्रेंमैंइ क्हिलाइन थेब लरिगे!
PSA 67:4 क्हिजी ह्रें-ह्रेंमैंए फिर ठिक निसाफ लमुँ, धै ह्‍युलर्बै ह्रें-ह्रेंमैं घ्याँ तेंमिंम्। छतसि ह्रें-ह्रेंमैं सैं तोंरिगे धै छिं ङ्हाँसि क्वे प्रिंरिगे! तिस्याँदे मैंन्
PSA 67:5 ओ परमेश्‍वर, ह्रें-ह्रेंमैंइ क्हिलाइन थेब लरिगे, ताँन् ह्रेंमैंइ क्हिलाइन थेब लरिगे!
PSA 67:6 परमेश्‍वरजी ङ्योए फिर आशिक पिंब्मुँ, छतसि सइ ल्हें रोमैं रोमिंब्मुँ।
PSA 67:7 पृथ्‍बीर्बै ताँन् साँदर टिबै ह्रेंमैंइ परमेश्‍वर ङ्हिंरिगे बिसि खीजी ङ्योए फिर आशिक पिंरिगे।
PSA 68:1 क्वे प्रिंब्मैंए चिबए ल्हागिर दाऊदए भजन घ्रि, क्वे घ्रि। परमेश्‍वर रेब्मुँ, खीए शत्तुरमैं सग्याँ प्हुँग्याँ लवाब्मुँ, धै खीलाइ आखोब्मैं खीउँइँले न्हेयाब्मुँ!
PSA 68:2 खैले खैंइ मिगु बोमु, छलेन क्हिइ चमैंलाइ बोब्मुँ; मिए ङाँर क्योलों युलियाब् धोंले परमेश्‍वरए उँइँर आछ्याँबै के लब्मैं नास तयाब्मुँ!
PSA 68:3 दिलेया ठिक के लब्मैं बिस्याँ सैं तोंरिब्मुँ; चमैं परमेश्‍वरए उँइँर सैं तोंरिगे; चमैं सैं तोंबै कै तेरिगे!
PSA 68:4 परमेश्‍वरए मिंर क्वे प्रिंन्, खीए मिं थेब् लबै क्वे प्रिंन्; न्हाँम्स्योमैंए फिर क्रेसि स्युरबै परमेश्‍वरलाइ थेब् लद्; खीए मिं याहवेह ग; खीए उँइँर सैं तोंन्!
PSA 68:5 ह्रोंसए पबित्र क्‍ल्‍ह्‍योर टिबै परमेश्‍वर आबा आरेब्मैंए आबा ग, धै खीजी म्हरेस्योमैंलाइ रक्षा लमिंम्।
PSA 68:6 खाबै आरेबै म्हिमैंलाइ खीजी परवा पिंम्; झेलर मुँब्मैंलाइ तेसि सैं तोंल् पिंम्; दिलेया परमेश्‍वरजी बिब् आङिंब्मैं बिस्याँ त्हिंयाँइ ख्रोंबै क्‍ल्‍ह्‍योर टिम्।
PSA 68:7 ओ परमेश्‍वर, क्हिजी ह्रोंसए म्हिमैं खैले डोरेमिंजी, छलेन क्हि तोइ आरेबै क्‍ल्‍ह्‍योउँइँले तसि ओंसों ह्‍याइ। तिस्याँदे मैंन्
PSA 68:8 च त्हेर सिनै बिबै कोंर युबै परमेश्‍वरए उँइँर, इस्राएलए परमेश्‍वरए उँइँर, पृथ्बी त्हारइ, मुउँइँले नाँ युइ।
PSA 68:9 ओ परमेश्‍वर, क्हिजी नाँ कुलसि कारबै क्‍ल्‍ह्‍यो क्योसि छ्याँब् लमिंइमुँ।
PSA 68:10 क्हिए म्हिमैं च क्‍ल्‍ह्‍योर टिइमुँ, धै खीजी ङ्हाँदुमैंलाइ छ्याँबै सैमैं पिंसि सैं तोंल् पिंइ।
PSA 68:11 ल्हडें लबर ह्‍याद् बिसि याहवेहजी ताँ लइ। धै “म्रुँमैं नेरो चमैंए सिपाइमैं युनन् न्हेयाइ!” बिसि ल्हें च्हमिरिमैंइ ताँ लइ।
PSA 68:12 धिंर पखबै सैमैं च्हमिरिमैंइ चुम्।
PSA 68:13 चमैंइ पखबै सैमैं न्होंर कोइ चाँदिइ म्होरबै तोंगुए प्ह्‍यागोंमैं नेरो छ्याँबै माराइ म्होरबै चए प्ह्‍यागोंमैं मुँल। (दिलेया क्हेमैं को-कोइ मुँयुँमैं ल्हडें लबै त्हेर तले क्यु प्ह्रोंर टिरिल?)
PSA 68:14 तोनदोंरि लल् खाँबै परमेश्‍वरजी म्रुँमैंलाइ ह्‍युलर खन्तोदोंन् प्हुँवामा साल्मोन बिबै कोंर क्लि झोंब् धों तल।
PSA 68:15 बाशान बिबै कों बेल्‍ले छ्याँब् मुँ; च कोंर क्लिं क्हाँ मुँबै च्होमैं ल्हें मुँ!
PSA 68:16 ओ ल्हें च्होमैं मुँबै कों, परमेश्‍वरजी ग्याल्स लल् म्हैबै सियोन बिबै कोंउँइँ तले आछ्याँबै सैंले ङ्ह्‍योल? चर याहवेह खोंयोंन् बिलै टिब्मुँ।
PSA 68:17 परमेश्‍वरए रथमैं लाख लाख करोड करोड मुँ! सिनै कोंउँइले प्रभु ह्रोंसए पबित्र क्‍ल्‍ह्‍योर युइमुँ।
PSA 68:18 क्हि नुबर क्रे ह्‍यामा क्हाइ बोब्मैंलाइ क्हिए लिलि बोइ, क्हिजी म्हिमैंउँइँले क्होल्सै किंइ, ओं, क्हिजी बिब् आङिंब्मैंउँइँले या किंइ। छलेन याहवेह पारमेश्‍वर चर टिम्।
PSA 68:19 प्रभुए मिं थेब् तरिगे! ङ्योलाइ जगेमिंबै परमेश्‍वर खीन् ग, त्हिंइ ह्रोंसे ङ्योए दुःख खीजी नोमिंम्। तिस्याँदे मैंन्
PSA 68:20 ङ्योए परमेश्‍वर जोगेमिंबै परमेश्‍वर ग। याहवेह ङ्योए प्रभु ग, खीजीन् ङ्योलाइ सिबउँइले सोगों लमिंम्।
PSA 68:21 क्ह्रोंसेंन ह्रोंसए शत्तुरमैंए क्र परमेश्‍वरजी तिवाब्मुँ, पापर प्ररिब्मैंए क्र कोच्याब्मुँ।
PSA 68:22 “क्हेमैंइ ह्रोंसए प्हले ङए शत्तुरमैंए कोर प्ल्हुँरिगे, धै क्हेमैंए नगिमैंए लेइ चमैंए को ल्हेंल् योंरिगे बिसि
PSA 68:23 ङजी च शत्तुरमैं बाशान बिबै क्ल्ह्‍योउँइँले एपखब्मुँ; ङजी चमैं मा ङ्युँइए न्होंउँइँले पखब्मुँ,” बिसि याहवेहजी बिल।
PSA 68:24 ओ परमेश्‍वर, क्हिजी ट्होसि खब ताँनइ म्रोंइमुँ! ङए परमेश्‍वर ङए म्रुँ ग! क्हिजी ट्होसि पबित्र क्‍ल्‍ह्‍योर युइ।
PSA 68:25 ओंसों ओंसों क्वे प्रिंब्मैं मुँ, चमैंए लिलि बाज ह्राब्मैं, चमैंए म्हाँजोर खैजरि ह्राबै छमिमैं मुँ।
PSA 68:26 “ल्हें म्हि च्होंबै क्ल्ह्‍योर परमेश्‍वरए मिं थेब लद्; इस्राएली म्हिमैंए म्हाँजोर याहवेहए मिं थेब लद्,” बिसि चमैंइ बिइमुँ।
PSA 68:27 चमैंए लिउँइँ ताँन् भन्दा च्योंबै बेन्यामीनए कुलइ अरूमैं डोरेइमुँ, चए लिउँइँ यहूदए कुलए चिब्मैं खइमुँ, धै जबूलून नेरो नप्‍तालीमैंए कुलमैं या खइमुँ।
PSA 68:28 ओ परमेश्‍वर, ह्रोंसए शक्ति उँइँन्, धै ओंसों ङिए ल्हागिर लब् धोंले ह्रोंसए शक्ति उँइँमिंन्।
PSA 68:29 यरूशलेमर क्हिए मन्दिरर ह्रेंगोउँइँले खबै म्रुँमैंइ क्हिए ङाँर बालि फोखब्मुँ।
PSA 68:30 काँसए घारिर टिबै च खेदो धों तबै मिश्र ह्‍युललाइ हौदिद्, मे प्हसेमैंए म्हाँजोर साँडेइ थाब् धों तबै च ह्रेंलाइ हौदिद्! चाँदिए भेटि पखसि चमैंइ क्हिलाइ कुरसि फ्योबर ल्हैदिद्। ल्हडें लदा ङ्हाँब्मैं खन्तोदोंन् प्हुँवाँन्।
PSA 68:31 मिश्र ह्‍युलउँइँले थेबै म्हिमैं खब्मुँ, कूश ह्‍युलर्बै म्हिमैं ह्रोंसए योमैं क्वेसि परमेश्‍वरने प्राथना लब्मुँ।
PSA 68:32 ओ पृथ्बीर्बै म्हिमैं, परमेश्‍वरए मिंर क्वे प्रिंन्; खीए मिं थेब् लदै क्वे प्रिंन्। तिस्याँदे मैंन्
PSA 68:33 खी स्योंम् ओंनोंन् स्वर्गर स्युरम्; मु ङ्‍हेब् धोंले खी ह्रोंसए कै तेम्।
PSA 68:34 परमेश्‍वरए शक्तिए बारेर बिप्रद्! खीजी इस्राएलए फिर ग्याल्स लमुँ, खीए शक्ति ताँन् म्हिमैंइ मुर म्रोंमुँ।
PSA 68:35 ओ परमेश्‍वर, क्हि पबित्र क्‍ल्‍ह्‍योउँइँले युमा क्हि म्रोंसि ताँन् म्हिमैं ङ्हिंम्; इस्राएलए परमेश्‍वरजी ह्रोंसए म्हिमैंलाइ शक्ति नेरो भों पिंम्। परमेश्‍वरए मिं थेब् तरिगे!
PSA 69:1 क्वे प्रिंब्मैंए चिबलाइ, “लिलि ट” बिबै भाकार प्रिंबै दाऊदए भजन। ओ परमेश्‍वर, ङ जोगेमिंन् तलेबिस्याँ स्योंर्बै क्यु ङए खरि समा फेखइमुँ।
PSA 69:2 ङ हिलर प्ल्हुँबि छेइमुँ, चर ङए प्हले म्हैबै क्‍ल्‍ह्‍यो आरे; गैरु क्युर ङ प्ल्हुँबि छेइमुँ, बाढि ङए फिर प्ल्होंखइमुँ।
PSA 69:3 ल्होमिंन् बिसि ओरन-ओरन ङ नारइमुँ; ङए म्‍लोंगो कारयाइमुँ। ङए परमेश्‍वरए घ्याँ ङ्ह्‍योन-ङ्ह्‍योन् ङ‍ए मि छेनाले म्रोंल् आखाँब् तइमुँ।
PSA 69:4 तोन् तोर्न ङलाइ आखोब्मैं ङए क्रप्होमैं भन्दा ल्हें मुँ; तोन् तोर्न ङए शत्तुरमैं ल्हें मुँ; चमैंइ ङ सैल् म्हैम्। ङइ आलुडिबै सैमैं या चमैंइ खैले बिलेया पिंन् बिम्।
PSA 69:5 ओ परमेश्‍वर, ङ आमादु मुँ बिब क्हिजी सेइमुँ; ङइ लबै आछ्याँबै केमैं क्हिजी म्रोंइमुँ।
PSA 69:6 ओ याहवेह, ताँन् भन्दा थेबै प्रभु, ङइ लमा क्हिने आशा थेंब्मैं फापिल् आत्हुरिगे। ओ इस्राएलए परमेश्‍वर ङइ लमा क्हिलाइ म्हैब्मैं फापिल् आत्हुरिगे।
PSA 69:7 तलेबिस्याँ क्हिए फिर ङइ भर लबइले आगुइ आखो, धै ङ फापिन् तसि लि उँइँल् आखाँ।
PSA 69:8 छतसि ङए अलिमैंए म्हाँजोर ङ ङो आसेब् धोंन् तइमुँ, ङए त्येमैंए ङाँर ङ स्याँ तइमुँ,
PSA 69:9 तलेबिस्याँ क्‍हिए धिं ङलाइ बेल्‍ले म्हाँया खम्, क्हिलाइ गाल् केब्‍मैंए गाल् ङए फिर तइमुँ।
PSA 69:10 ङ थेब् आप्हैंनले क्रोदै बर्त टिमा म्हिमैंइ ङ प्ह्रम्।
PSA 69:11 छले शोक लसि ङइ नइँए ह्रेंग खिमा म्हिमैंइ ङ प्ह्रम्।
PSA 69:12 मुल म्रार खागु तब्मैंइ ङ स्यारम्, धै प्हाइ म्हेरब्मैंइ ङए बारेर क्वे प्रिंम्!
PSA 69:13 दिलेया, ओ याहवेह, ङ क्हिनेन् प्राथना लम्। क्हिजी तोक्दिबै त्हेर, ओ परमेश्‍वर, क्हिए खोंयोंइ आनुबै म्हाँयाइ लमा क्हिजी खैलेबिलै ङलाइ जोगेमिंम् बिसि ज्वाफ् पिंन्।
PSA 69:14 ङ हिलर प्ल्हुँबउँइँले जोगेमिंन्; ङलाइ आखोब्मैं नेरो गैरु क्युउँइँले ङ जोगेमिंन्।
PSA 69:15 नाँ बाढिमैंइ ङ आउरिगे, धै क्युइ ङ आप्ल्हुँरिगे, झाइले क्रोंइ ह्रोंसए सुँ ङए फिर आम्रुरिगे।
PSA 69:16 ओ याहवेह, क्हिए खोंयोंइ आनुबै म्हाँया थेब मुँ, छतसि ङ ज्वाफ पिंनु; क्हिजी थेबै ल्हयो खसि ङए वास्ता लमिंन्।
PSA 69:17 क्हिए लि ह्रोंसए केब्छैंउँइँले आलोमिंनु; तलेबिस्याँ ङए फिर थेबै दुःख तइ। छतसि युनन् ज्वाफ पिंन्।
PSA 69:18 ङए चेंदोले खमिंनु धै ङलाइ जोगेमिंनु; ङए शत्तुरमैंउँइँले ङलाइ खामिंन्!
PSA 69:19 ङलाइ प्ह्रब, ङ फापिल् लब, नेरो ङए मिं ह्‍याब क्हिजी सेम्; ङए ताँन् शत्तुरमैं क्हिजी सेम्।
PSA 69:20 म्हिमैंइ प्ह्रमा ङए सैं चोयाइमुँ, धै ङए सैं बेल्‍ले नइमुँ। ङए फिर ल्हयो खब्मैं खाबै मुँ उ बिसि म्हैइ, दिलेया खाबै आरेल, धै सैं क्होल् लमिंब्मैं या खाबै मुँ उ बिसि ङइ म्हैइ, दिलेया खाबै आयों।
PSA 69:21 ङए चबै सैर चमैंइ काँ झोंइ, धै ङ क्यु पिमा चमैंइ ङलाइ प्हा क्युँ पिंइ।
PSA 69:22 चमैंए ल्हागिर थेंबै चबै सैमैं चमैंलाइ ङो चुब् धों तरिगे; धै ख्रो पिंसि चबै सैमैं चमा चमैं नास तयारिगे।
PSA 69:23 छेनाले म्रोंल् आखाँरिगे बिसि चमैंए मि मिछु तरिगे, धै चमैंए क्रे खोंयोंन् बिलै कुदुँ तरिगे।
PSA 69:24 चमैंए फिर क्हिए ह्रिस ङेमिंन्, धै लुँबै मि धोंले क्हिए ह्रिसइ चमैंए फिर सजैं पिंरिगे।
PSA 69:25 चमैं टिबै क्‍ल्‍ह्‍यो नास तयारिगे; चमैंए धिंर खाबै सोगों आतरिगे।
PSA 69:26 तलेबिस्याँ क्हिजी सजैं पिंबै म्हिलाइ चमैंइ ह्रुगुदिम्, धै क्हिजी घाइते लब्मैंलाइ चमैंइ बेल्‍ले स्यारम्।
PSA 69:27 चमैंइ लबै पापए हिसाब थेंन्; धै क्हिजी म्हिमैं जोगेमिंमा चमैं जोगेल् आयोंरिगे।
PSA 69:28 छ्ह योंब्‍मैंए मिं प्‍ह्रिथेंबै कितबउँइँले चमैंए मिं मेटियारिगे; धै ठिक के लब्मैंने बालु चमैंए मिं आप्ह्रिरिगे।
PSA 69:29 दिलेया ङलाइ दुःख नेरो न्हुँ तइमुँ; ओ परमेश्‍वर, क्हिजी म्हिमैंलाइ जोगेमिंमा ङए रक्षा लमिंन्!
PSA 69:30 धै ङ क्वे प्रिंसि परमेश्‍वरए मिं थेब् लब्मुँ; धन्यबाद पिंसि ङ खीए मिं क्वेब्मुँ।
PSA 69:31 क्ल्या भार ख्रो पिंब् भन्दा, रु नेरो खुर मुँबै क्ल्या ख्रो पिंब् भन्दा खीए मिं क्वेस्याँ याहवेह बेल्‍ले सैं तोंब्मुँ।
PSA 69:32 छलब् म्रोंसि आगुइ क्र ओलै आपिंब्मैं सैं तोंब्मुँ। ओ परमेश्‍वर म्हैब्मैं, क्हेमैंए सैं भोंब तरिगे।
PSA 69:33 तलेबिस्याँ याहवेहजी दुःख योंब्मैंए ताँ थेम्, धै झेलर च्युवाबै ह्रोंसए म्हिमैंलाइ खीजी वास्ता लम्।
PSA 69:34 स्वर्ग नेरो पृथ्बीइ खीए मिं थेब् लरिगे, मा ङ्युँइ नेरो चर मुँबै सो प्ह्‍याबै तोन्दोंरि सैमैंइ खीए मिं थेब् लरिगे।
PSA 69:35 तलेबिस्याँ परमेश्‍वरजी यरूशलेमलाइ जोगेमिंब्मुँ धै यहूदाए सन्तानमैं टिबै सहरमैं धबै बनेब्मुँ, झाइले म्हिमैं चर टिब्मुँ धै च क्‍ल्‍ह्‍योए क्ल्हे चमैं तब्मुँ;
PSA 69:36 च क्‍ल्‍ह्‍योर्बै हग खीए के लबै म्हिमैंए प्हसेमैंइ योंब्मुँ, धै खीलाइ म्हाँया लब्मैं चर टिब्मुँ।
PSA 70:1 क्वे प्रिंब्मैंए चिबए ल्हागिर, याहवेहए मिंरि ख्रो पिंबै ल्हागिर दाऊदइ प्ह्रिबै भजन ओ परमेश्‍वर, ङलाइ युनन् जोगेमिंन्! ओ याहवेह, ङ ल्होबर युनन् युमिंन्!
PSA 70:2 ङलाइ सैल् म्हैब्मैं अलमल् तसि फा फिन् तरिगे! ङए न्होह्रों तब् म्रोंसि सैं तोंब्मैं लिग्याँ तोसि न्हेयारिगे धै आगुइ चमैंलाइ म्हि आच्हिन् लवारिगे!
PSA 70:3 ङलाइ प्ह्रब्मैं फा फिसि लि उँइँलै आखाँरिगे।
PSA 70:4 दिलेया क्हिलाइ म्हैब्मैं ताँन् क्हिलाइन मैंसि सैं तोंरिगे धै छिं ङ्हाँरिगे! “क्हिजी जोगेमिंइ!” बिसि धन्यबाद पिंब्मैंइ खोंयोंइन् बिलै “परमेश्‍वर बेल्‍ले थेब मुँ!” बिसि बिरिगे!
PSA 70:5 दिलेया ङ आयोब् नेरो आख्युब मुँ; ओ परमेश्‍वर, ङए ङाँर युनन् युमिंन्! क्हिजी ङलाइ ल्होसि ताँन् दुःखउँइँले फ्रेमिंम्। ओ याहवेह, युनन् युमिंन्!
PSA 71:1 ओ याहवेह, ङ ग्वार योंबर क्हिए प्हलेर खइमुँ; ङ खोंयोंइ फापिल् आत्हुरिगे!
PSA 71:2 क्हि ठिक निसाफ लबै परमेश्‍वर ग, छतसि आछ्याँबै सैमैंउँइँले फ्रेमिंसि ङलाइ जोगेमिंन्, ह्रोंसए न्ह ङ ङाँइ तोमिंनु धै ङ जोगेमिंन्!
PSA 71:3 ङ क्हि ङाँर खरिमा ङए शत्तुरमैंइ ङ आस्यारिगे बिसि ङ रक्षा लमिंबै पारा तमिंन्। ङलाइ जोगेबर ल्हैदिद्, तलेबिस्याँ क्हि ङए ङ रक्षा लमिंबै पारा नेरो किल्‍ला ग।
PSA 71:4 ओ ङए परमेश्‍वर, दुष्‍टए योमैंउँइँले ङ फ्रेमिंन्, दयाम्हाँया आरेबै अनिया लबै म्हिउँइँले ङ जोगेमिंन्।
PSA 71:5 तलेबिस्याँ, ओ याहवेह परमेश्‍वर, ङइ क्हिए फिर आशा लइमुँ, ङ फ्रेंसि तब् ओंनोंन् ङइ क्हिए फिर भर थेंइमुँ।
PSA 71:6 फिब् ओंनोंन् ङइ क्हिए फिर भर लइमुँ; ङ‍ए आमाए प्होउँइँले तेमिंब क्हिन् ग। छतसि खोंयोंन् बिलै ङ क्हिए मिं थेब् लरिब्मुँ।
PSA 71:7 ल्हें म्हिए ल्हागिर ङ आछ्याँबै ताँ तल् खाँब्मुँ बिबै चिनु तइमुँ, दिलेया क्हि ङए भोंबै ग्वार योंबै क्‍ल्‍ह्‍यो तइमुँ।
PSA 71:8 ङए सुँइ क्वे प्रिंसि क्हिए मिं थेब् लरिमुँ, धै त्हिंइतिमिन् ङइ क्हिए थेबै मिंए बारेर बिप्रम्।
PSA 71:9 खेब् तबै त्हेर ङलाइ आपिदु, ङए भों नुयामा ङलाइ आवाथेंन्।
PSA 71:10 तलेबिस्याँ ङए शत्तुरमैंइ ङए बिरोधर ताँ लम्, ङलाइ सैल् म्हैब्मैं खेंमैंए न्होंर छ बिसि मत लम्,
PSA 71:11 “परमेश्‍वरजी चलाइ पिवाइमुँ; छतसि चलाइ ल्हाबोसि क्हाद्, तलेबिस्याँ चलाइ जोगेब खाबै आरे।”
PSA 71:12 ओ परमेश्‍वर, ङ ङाँइँले ह्रेंगो आतमिंन्; ओ ङए परमेश्‍वर, ङ ल्होबर युनन् युमिंन्!
PSA 71:13 ङ छ्याब् ल्हैदिब्मैं फा पिसि मेब्रो तयारिगे; ङए न्होह्रों लल् म्हैब्मैं फापिन् तसि लि उँइँल् आखाँरिगे।
PSA 71:14 दिलेया ङ बिस्याँ खोंयोंन् बिलै क्हिए फिर आशा लरिब्मुँ, धै क्हिलाइन झन् थेब् लब्मुँ।
PSA 71:15 क्हिजी लबै ठिक केमैं नेरो क्हिजी ङ जोगेमिंबै बारेर त्हिंइतिमि ङए सुँइ पोंब्मुँ। दिलेया च केमैं कति मुँ बिब ङइ आसे।
PSA 71:16 ओ याहवेह परमेश्‍वर, क्हिजी लबै शक्‍ति मुँबै केमैं ङ बिप्रब्मुँ, क्हिजी लबै ठिक निसाफमैं मत्‍त्रे ङ बिप्रब्मुँ।
PSA 71:17 ओ परमेश्‍वर, ङ फ्रेंसि तब् ओंनोंबै क्हिजी ङलाइ लोमिंइमुँ, छतसि क्हिजी लबै औदिबै केमैंए बारेर तिंयाँबै त्हिंइ समा ङइ बिप्रइमुँ।
PSA 71:18 ओ परमेश्‍वर, चु पुस्ता नेरो लिउँइँ खबै ताँन् पुस्तामैंने क्हिजी लबै शक्‍ति मुँबै केमैं आबिन् समा ङ खेब् तसि ङए क्र सारयामैं या ङलाइ आपिद्।
PSA 71:19 ओ परमेश्‍वर, क्हिजी लबै ठिक निसाफ मु समा फेनेम्, क्हिजी थेबै केमैं लइमुँ। ओ परमेश्‍वर, क्हि धों तब खाब् मुँ?
PSA 71:20 क्हिजी ङए फिर ल्हें दुःखमैं खल् पिंइ, दिलेया क्हिजी ङ धबै सोगों लमिंब्मुँ, पृथ्‍बीए न्होंउँइँले क्हिजी ङ धबै कैंडो पखब्मुँ।
PSA 71:21 क्हिजी ङए मान बडिमिंब्मुँ, धै ङए सैं धबै क्होमिंब्मुँ।
PSA 71:22 ओ ङए परमेश्‍वर, क्हि भर लल् खाँबै परमेश्‍वर तबइले ङ बीणा ह्रादै क्हिन् थेब लब्मुँ। ओ इस्राएलर्बै पबित्र परमेश्‍वर, सारङ्गी ह्रासि ङ क्हिलाइन थेब् लबै क्वे प्रिंब्मुँ।
PSA 71:23 क्हिलाइ थेब् लबै क्वेमैं प्रिंमा ङए म्हदेमैं सैं तोंसि ओरब्मुँ, तलेबिस्याँ क्हिजी ङ जोगेमिंइमुँ।
PSA 71:24 ङए न्होह्रों लल् म्हैब्मैं फापिसि खैला तोला तबर फेइमुँ, छतसि ङए लेइ त्हिंइतिमिंन् क्हिजी लबै ठिक केमैंए बयन लब्मुँ।
PSA 72:1 सोलोमनए भजन ओ परमेश्‍वर, क्हिजी लब् धोंले म्रुँलाइ निसाफ लल् पिंन्, धै क्हिजी ठिक के लब् धोंले म्रुँए च्हलाइ ठिक के लबर लोमिंन्।
PSA 72:2 धै क्हिए म्हिमैं नेरो दुःख योंब्मैंए फिर चइ ठिक निसाफ लब्मुँ।
PSA 72:3 कोंमैंइ क्हिए म्हिमैंलाइ प्लोब लमिंम्, धै क्लिं क्हाँमैंइ ठिक केमैं लल् पिंब्मुँ।
PSA 72:4 म्हिमैं दुःख तमा चइ रक्षा लब्मुँ, ङ्हाँदुमैंए प्हसेमैंलाइ जोगेब्मुँ, धै आगुए न्होह्रों लब्मैंलाइ चइ न्होंर प्लेवाब्मुँ!
PSA 72:5 लयाँ नेरो त्हिंयाँ मुँन् समा ताँन् पुस्ता-पुस्ताइ चए मिं क्वेरिगे।
PSA 72:6 छि खैंवाबै चउरर युबै नाँ धों तब नेरो स क्योबै झरि धों तब च तब्मुँ।
PSA 72:7 चए ग्याल्सर ठिक के लब्मैंल बिब् धों तरिगे, धै लयाँ मुँन् समा तोन्दोंरि सै छ्याँब तरिगे!
PSA 72:8 मा ङ्युँइ घ्रिउँइँले अर्को मा ङ्युँइ समा, धै यूफ्रेटिस बिबै स्योंउँइँले पृथ्बीए साँद् समा चइ ग्याल्स लब्मुँ!
PSA 72:9 क्यु आयोंबै क्‍ल्‍ह्‍योर्बै ह्रेंमैं चए उँइँर कुरब्मुँ, धै चए शत्तुरमैंइ त्हुल ल्हेंब्मुँ!
PSA 72:10 तर्शीश नेरो ह्रेंगोबै मा ङ्युँइए रेजरेबै म्रुँमैंइ च ङाँर बालि फोखब्मुँ; शेबा नेरो सेबाए म्रुँमैंइ चलाइ भेटि पिंखब्मुँ!
PSA 72:11 ताँन् म्रुँमैं चए उँइँर पदखु तब्मुँ, धै ताँन् ह्रेंमैंइ चए सेवा लब्मुँ!
PSA 72:12 ङ्हाँदुमैंइ नेरो ल्होबै म्हि आरेब्मैंलाइ ग्वार ह्रिमा चइ जोगेमिंब्मुँ।
PSA 72:13 भों आरेब्मैं नेरो ङ्हाँदुमैंए फिर चइ ल्हयो खब्मुँ, धै ङ्हाँदुमैंए ज्यु जोगेमिंब्मुँ।
PSA 72:14 आगुइ क्र ओलै आपिंब्मैं नेरो ल्हें दुःख योंब्मैंलाइ चइ जोगेमिंब्मुँ, तलेबिस्याँ चए उँइँर चमैंए को किंसे किंल् आखाँब मुँ।
PSA 72:15 चइ ह्रिंग्यो छ्ह योंरिगे; शेबा ह्‍युलर्बै मारा म्हिमैंइ चलाइ भेटि पिंरिगे! चए ल्हागिर म्हिमैंइ खोंयोंइन् बिले प्राथना लरिगे, त्हिंइतिमिन् चमैंइ चए फिर आशिक ह्रिरिगे!
PSA 72:16 ह्‍युल तिगोंन् रा-रोमैंइ प्लिंरिगे; कोंए च्होजरे च रा-रोमैं बेल्‍ले छ्याँरिगे; च‍ए रोमैं लेबनान धोंले म्रेरिगे; च खर्कर्बै छि मौलिदिब् धोंले सहरर्बै म्हिमैं प्लोरिगे।
PSA 72:17 चए मिं खोंयोंन् बिलै तरिगे, त्हिंयाँ धोंले चए बयन ल्हें समा तरिगे! ताँन् ह्रेंमैंइ चउँइँले आशिक योंरिगे, धै चमैंइ चए मिं थेब् लरिगे।
PSA 72:18 याहवेह परमेश्‍वरजी मत्‍त्रे औदिबै केमैं लम्, छतसि इस्राएलए परमेश्‍वरए मिं थेब तरिगे।
PSA 72:19 खीए थेबै मिं खोंयोंन बिलै क्वेरिगे; पृथ्बी तिगोंन् म्हिमैंइ खीए थेबै के म्रोंरिगे!
PSA 72:20 यिशैए च्ह दाऊदए प्राथना चुर खाँइ।
PSA 73:1 आसापए भजन घ्रि। क्ह्रोंसेंन इस्राएलए ल्हागिर, छ्याँबै सैं प्ह्‍याब्मैंए ल्हागिर, परमेश्‍वर स्वाब मुँ।
PSA 73:2 दिलेया ङए प्हले प्लेबर होंल, प्हले प्लेब् धोंले ङए बिश्‍वास म्हायाबि छेल,
PSA 73:3 तलेबिस्याँ दुष्‍टमैं छ्याँब् तब् म्रोंसि च थेब् प्हैंब्मैंए फिर ङइ ह्रिस लमल।
PSA 73:4 चमैं आसिन् समा दुःख तरिब् आरे; चमैं नब्-छब् आत, चमैंए ज्यु भोंब तम्।
PSA 73:5 अरू म्हिमैंइ धोंले चमैंइ दुःख आयों; अरू म्हिमैंए फिर आछ्याँबै ताँमैं खब् धोंले चमैंए फिर आख।
PSA 73:6 सिक्रि खिल् योंमा सैं तोंब् धोंले थेब् प्हैंमा चमैं सैं तोंम्; धै क्वें खिब् धोंले चमैंइ प्होंगि कैगि लम्।
PSA 73:7 चमैंए सारो सैंउँइँले दुष्‍ट केमैं खम्; चमैंए सैंइ खोंयोंन् बिलै आछ्याँब ताँ मैंरिम्।
PSA 73:8 चमैंइ आगुए बिल्‍लि लम्, झाइले दुष्‍ट ताँ पोंम्; धै ङम् ङन् ग बिसि अरूलाइ क्र ओलै आपिं।
PSA 73:9 मु ङिलन् ग बिसि चमैंए सुँइ बिम्, धै चमैंए लेइ पृथ्बी तिगोंन् अधीन लम्।
PSA 73:10 छतसि परमेश्‍वरए म्हिमैं चमैं ङाँइ एखम्, धै ल्हें क्यु थुँब् धोंले चमैंए ताँ क्वेंम्।
PSA 73:11 “ङ्योइ लबै के परमेश्‍वरजी खैले सेमुँ? ताँन् भन्दा थेबै परमेश्‍वरने ज्ञान मुँ वा?” बिसि चमैंइ बिमुँ।
PSA 73:12 दुष्‍टमैं छाब तम्: चमैं खोंयोंइ न्हुँ आल, चमैंए सै न्होर ल्हें तरिम्।
PSA 73:13 क्ह्रोंसेंन ङइ तोनतोर्न ह्रोंसए सैं छ्याँब् प्ह्‍याइमुँ, धै गल्ति आलइमुँ बिसि ङइ यो ख्रुइमुँ।
PSA 73:14 त्हिंतिमिन् ङइ दुःख योंइमुँ; धै न्हाँग ह्रोंसे ङइ दण्ड योंल् त्हुइमुँ।
PSA 73:15 दिलेया दुष्‍टमैंइ पोंब् धोंले ङज्यै या पोंस्याँ क्हिए सन्तानलाइ ङइ दु:ख पिंमल।
PSA 73:16 चु ताँमैं ङइ क्होल् म्हैमा ङए ल्हागिर बेल्‍ले गारो तइ।
PSA 73:17 दिलेया लिउँइँ ङ परमेश्‍वरए पबित्र क्‍ल्‍ह्‍योर होंमा खी ङाँर खसि मत्‍त्रे चमैंए लिउँइँ तरिबै ताँमैं ङइ क्होइ।
PSA 73:18 क्ह्रोंसेंन क्हिजी चमैंलाइ प्हले प्लेबै क्‍ल्‍ह्‍यो जरे थेंम्; क्हिजी चमैं नास तयाबर भ्योंवाँम्।
PSA 73:19 थाइ आसेल्‍ले चमैं नास तयाम्, चमैं बेल्‍ले ङ्हिंमा ताँन् नोबोइ!
PSA 73:20 न्हाँगर छोरमा म्होंड म्हयाब् धोंले, ओ प्रभु, क्हि छोरमा चमैंलाइ तो धोंइ आङ्हाँ।
PSA 73:21 ङए सैंर दुःख तल, ङए सैं ककाँ क्युँ-क्युँ ङ्हाँल,
PSA 73:22 छतसि ङ च्हैंब् मैंल् आखाँब नेरो ताँ क्होल् आखाँब् मुँल; क्हिए उँइँर ङ खेदो धोंन् तब् मुँल।
PSA 73:23 दिलेया ङ खोंयोंन् बिलै क्हिने बालुन् मुँ; क्हिजी ङए क्योलो यो क्हामुँ।
PSA 73:24 क्हिजी सल्‍ला पिंसि ङलाइ डोरेमिंम्, धै लिउँइँ ङ क्हि ङाँर मान योंबै क्ल्ह्‍योर बोब्मुँ।
PSA 73:25 ङए ल्हागिर स्वर्गर क्हि बाहेक अरू खाब् मुँ? धै पृथ्‍बीरै या क्हि बाहेक ङइ खोब खाबै आरे।
PSA 73:26 ङए सैं नेरो ज्यु ङ्हिंन-ङ्हिंन् भों आरेलै खाँम्, दिलेया परमेश्‍वरजी ङए सैंर भों पिंम् धै खोंयोंन् बिलै ङ‍ए चैदिबै सै क्हिन् ग।
PSA 73:27 क्हिउँइँले ह्रेंगो तब्मैं सियाब्मुँ; क्हिलाइ बिश्‍वास आलसि पिवाब्मैं क्हिजी नास लम्।
PSA 73:28 दिलेया परमेश्‍वरने चेंदो तरिब ङए ल्हागिर छ्याँब ग, याहवेह परमेश्‍वरए प्हलेर्न ङ ग्वार योंबर खइमुँ। छतसि क्हिए ताँन् केमैंए बयन ङइ लब्मुँ।
PSA 74:1 आसापए मस्किल घ्रि ओ परमेश्‍वर, क्हिजी तले ङिलाइ युगुर्लै पिवाल? ङि क्हिए खर्गर्बै क्युमैं ग। क्हिए ह्रिस तले ङिए फिर मि धोंले लुँइमुँ?
PSA 74:2 क्हिजी ओंसोंन् त्हाँबै म्हिमैं मैंमिंन्। क्हिए म्हिमैं तबर क्हिजी ङिलाइ केब्छैं तबउँइँले फ्रेसि पखइ! क्हि टिबै सियोन कों मैंमिंन्।
PSA 74:3 शत्तुरमैंइ क्हिए मन्दिरर मुँबै ताँन् सैमैं नास लवाइ! नास तयाबै सहरउँइँ ह्रोंसए खसि ङ्ह्‍योद्!
PSA 74:4 क्हिजी ङिने त्होबै क्‍ल्‍ह्‍योर क्हिए शत्तुरमैं ओरइमुँ; ट्होबै चिनु उँइँबै ल्हागिर चमैंइ ह्रोंसए झन्डा क्योइमुँ।
PSA 74:5 म्हिइ सिंधुँमैंर तइ थोवाब् धोंले चमैंइ त छेसि क्हिए मन्दिर नास लवाइ।
PSA 74:6 चमैंइ ह्रोंसए त नेरो घनइ बुट्टा झोंबै खापामैं त्हुला भुँ लवाइ।
PSA 74:7 चमैंइ क्हिए पबित्र क्‍ल्‍ह्‍योर मि त्हवासि नास लवाइ; क्हिए मिं मुँबै क्‍ल्‍ह्‍यो चमैंइ जुठ लवाइ।
PSA 74:8 “चमैं ताँनलाइ ङिइ प्लेवाब्मुँ,” बिसि चमैंइ ह्रोंसए सैंर मैंइ; परमेश्‍वरए मिं क्वेबै ह्‍युलर्बै ताँन् क्ल्ह्‍यो चमैंइ ख्रोंवाइ।
PSA 74:9 औदिबै चिनुमैं ङिइ तोइ आम्रों; तारे अगमवक्तामैं घ्रि या आचै, धै चु दुःख खोंयों समा तरिब्मुँ बिसि ङि आसे।
PSA 74:10 ओ परमेश्‍वर, खोंयों समा शत्तुरमैंइ क्हिलाइ प्ह्रब्मुँ? शत्तुरमैंइ खोंयोंइन क्हिए मिंलाइ स्याररिम्‍म?
PSA 74:11 क्हिजी ह्रोंसए यो, ह्रोंसए क्योलो योइ तले तोइ लल् आपिंल? क्वें न्होंउँइँले यो ट्हुइदु धै चमैं नास लमिंन्!
PSA 74:12 दिलेया ओ परमेश्‍वर, क्हि स्योंम् ओंनोंन् ङए म्रुँ ग, क्हिजी पृथ्‍बीर मुक्ति पुयुमुँ।
PSA 74:13 क्हिजी ह्रोंसए शक्तिजी मा ङ्युँइ ङ्हिंबाँ लवाइ; मा ङ्युँइए न्होंर मुँबै सो प्ह्‍याबै थे-थेबै ङ्हिंन् ङ्हाँबै सैमैंए क्र त्हुला भुँ लवाइ।
PSA 74:14 माँ ङ्युँइर टिबै बेल्‍ले ङ्हिंन् ङ्हाँबै लिव्यातनए क्रमैं क्हिजी त्हुला भुँ लवाइ; धै चए से क्यु आयोंबै क्‍ल्‍ह्‍योर टिबै खेदोमैंलाइ क्हिजी चबर पिंइ।
PSA 74:15 क्हिजीन् क्युए मुल तिसि स्यों युल् पिंइ; क्हिजी खोंयोंइन युरिबै स्योंमैं ङ्हाह्रमिंइ।
PSA 74:16 त्हिंइ क्हिलन् ग, म्हुँइँसै या क्हिलन् ग; त्हिंयाँ नेरो लयाँ क्हिजीन् बनेइ।
PSA 74:17 पृथ्‍बीर्बै साँदमैं क्हिजीन् थेंब् ग; ख्वालबै त्हे नेरो खुँबै त्हे क्हिजीन् बनेब् ग।
PSA 74:18 ओ याहवेह, शत्तुरमैंइ क्हिलाइ खैले प्ह्रइमुँ, धै मुर्ख म्हिमैंइ क्हिए मिंलाइ स्यारइमुँ बिसि मैंमिंन्।
PSA 74:19 तोंगु धों तबै ह्रोंसए म्हिमैंलाइ क्ह्‍योंर्बै खेदोमैं धों तबै दुष्‍टमैंए उँइँर फेल् आपिंन्; आगुइ क्र ओलै आपिंबै क्हिए म्हिमैंलाइ खोंयोंइ आम्‍लेद्।
PSA 74:20 ह्‍युलर्बै मिछु खैबै क्‍ल्‍ह्‍योर म्हिसैब्मैंइ प्लिंरिइमुँ, छतसि क्हिजी फैबै बाछा मैंमिंन्।
PSA 74:21 आगुइ क्र ओलै आपिंब्मैं फापिसि लिउँइँ तोल् आत्हुरिगे; दुःख योंब्मैं नेरो आयों आख्युब्मैंइ क्हिए मिं थेब लरिगे।
PSA 74:22 ओ परमेश्‍वर, रेत्ति, क्हिजी लबै केमैं आगुइ न्होह्रों लल् आपिंन्; आमादुमैंइ त्हिंतिमिन् क्हिलाइन प्ह्ररिमुँ, छतसि मैंन्!
PSA 74:23 क्हिए बिरोधीमैं ओरब धै क्हिए शत्तुरमैं प्होंब नेब लदै ह्‍याब आम्‍लेमिंन्!
PSA 75:1 क्वे प्रिंब्मैंए चिबए ल्हागिर “नास आलद्” बिबै भाकार प्रिंबै आसापए भजन घ्रि, क्वे घ्रि। ओ परमेश्‍वर, ङिइ क्हिलाइन धन्यबाद पिंम्, क्हि ङिए चेंदो मुँ, छतसि ङिइ क्हिलाइ धन्यबाद पिंम्। क्हिजी लबै औदिबै केमैंए बयन् म्हिमैंइ लम्।
PSA 75:2 “ङजी ठिक त्हे तोक्दिइमुँ,” बिसि परमेश्‍वरजी बिइमुँ। “च त्हेर खाबै आफेलल्‍ले ङइ निसाफ लब्मुँ,
PSA 75:3 पृथ्बी नेरो चर मुँबै ताँन् सैमैं त्हारलेया पृथ्बीए त्होमैं थाम्दिसि थेंब ङन् ग। तिस्याँदे मैंन्
PSA 75:4 थेब् प्हैंब्मैंने ङजी बिमुँ, ‘थेब् आप्हैंन्’, धै दुष्‍टमैंने बिमुँ, ‘क्हेमैं थेब प्हैंसि ओक्रों आतद्;
PSA 75:5 क्हेमैं स्वर्गए बिरोधर पोंसि ओक्रों आतद्; थेब् प्हैंसि आपोंन्।’”
PSA 75:6 स्याराउँइँले (पुर्वाउँइँले) मुँलेया न्हुँरउँइँले (पश्‍चिमउँइँले) मुँलेया क्यु आयोंबै क्‍ल्‍ह्‍योउँइँले मुँलेया खाबज्यै या म्हिलाइ थेब् लल् आखाँ।
PSA 75:7 दिलेया परमेश्‍वरजीन् निसाफ लमा घ्रिलाइ च्योंब लमुँ, घ्रिलाइ थेब लमुँ।
PSA 75:8 याहवेहए योर प्हेल घ्रि मुँ, खीए ह्रिसइ च प्हेलर प्लिंइमुँ। पृथ्बीर्बै दुष्‍टमैं ताँनइ दण्ड योंम्, प्हेलर मुँबै सै तोइ आचैल्‍ले चमैं थुँल् खाँल् त्हुम्।
PSA 75:9 दिलेया खीजी लबै थे-थेबै केमैंए बयन ङ खोंयोंन् बिले लब्मुँ; याकूबए परमेश्‍वरए मिं क्वेसि ङ क्वे प्रिंब्मुँ,
PSA 75:10 तलेबिस्याँ परमेश्‍वरजी बिइ, “ताँन् दुष्‍टमैंए भों ङइ नास लवाब्मुँ, दिलेया ठिक के लब्मैंए भों थेब लमिंब्मुँ।”
PSA 76:1 क्वे प्रिंब्मैंए चिबलाइ बीणा-सारङ्गीं ह्रादै प्रिंबै आसापए भजन घ्रि, क्वे घ्रि। यहूदा ह्‍युलर्बै म्हिमैंइ परमेश्‍वर ङो सेइमुँ; इस्राएलर खीए मिं बेल्‍ले थेब मुँ।
PSA 76:2 यरूशलेमर खीए तम्बु मुँ, खी टिबै क्‍ल्‍ह्‍यो सियोन बिबै कोंर मुँ।
PSA 76:3 चर शत्तुरमैंए लुँरिबै मेमैं, ढालमैं, सेलाँ नेरो ल्हडें लमा छेबै हतियारमैं खीजी चोवाइ। तिस्याँदे मैंन्
PSA 76:4 क्हि बेल्‍ले चारबै ह्‍वे ग, ह्रोंसए शत्‍तुरमैं ट्होवासि कोंउँइँले क्युरु युमा क्हि बेल्‍ले ङ्‍हो ल्होंब्मुँ।
PSA 76:5 भोंबै सैं मुँबै सिपाइमैंए ताँन् सैमैं लुडिवाइमुँ, झाइले चमैं सिसि थेबै न्हरु च्हुइरिइमुँ। धै च नेल् खाँब्मैंए भों नुयासि यो क्वेल् आखाँइमुँ।
PSA 76:6 ओ याकूबए परमेश्‍वर, क्हिजी हौदिमा घोडा नेरो चर क्रेब्मैं ङ्हिंन-ङ्हिंन् ओलेल् आखाँब् तयाइ।
PSA 76:7 दिलेया ओ याहवेह, क्हिने मत्‍त्रे ङ्हिल् त्हुब मुँ! क्हि ह्रिस खमा क्हिए उँइँर खाब् राल् खाँमुँ?
PSA 76:8 ओ परमेश्‍वर, क्हिजी स्वर्गउँइँले निसाफ लइमुँ;
PSA 76:9 पृथ्‍बीर्बै आगुए न्होंर मुँब्मैं ताँन् जोगेबै ल्हागिर क्हि निसाफ लबर रेमा पृथ्‍बीर्बै म्हिमैं ङ्हिंसि आपोंल्‍ले टिइ। तिस्याँदे मैंन्
PSA 76:10 क्ह्रोंसेंन् म्हिमैंने क्हिए ह्रिस खमा क्हिए मिंन् थेब् लब्मुँ; झाइले क्हिए ह्रिसउँइँले सोब्मैंइ आछ्याँबै के लब पिवाब्मुँ।
PSA 76:11 याहवेह क्हेमैंए परमेश्‍वरने लबै भकलमैं पूरा लद्; खीए खागु मुँबै ह्रेंमैंइ खीलाइ बालि फोरिगे। खीजी ताँनलाइ ङ्हिंबर ल्हैदिब्मुँ।
PSA 76:12 थेब् प्हैंबै क्रथे मिंथेमैं खीजी कुरवाम्; पृथ्‍बीर्बै म्रुँमैं खीने ङ्हिंम्।
PSA 77:1 क्वे प्रिंब्मैंए चिब यदूतूनए ल्हागिर, आसापए भजन घ्रि। थेबै कैले ङइ परमेश्‍वरने ग्वार ह्रिम्, खीजी थेरिगे बिसि ङइ थेबै कैले ओरम्।
PSA 77:2 दुःख योंबै त्हेर ङइ प्रभु म्हैम्; ङइ आनारल्‍ले म्हुँइँस तिमिंन् ङए यो स्योंइ; परमेश्‍वरजी आल्होमिंन् समा ङ छिं आङ्हाँ।
PSA 77:3 परमेश्‍वर मैंमा ङइ न्हुँ लसि सो खुइ लम्; खीलाइ मैंमा ङए सैं च्योंब् तम्। तिस्याँदे मैंन्
PSA 77:4 क्हिजी ङए मि च्युँ ललै आपिं; ङलाइ थेबै दुःख लमा पोंलै आखाँ।
PSA 77:5 ह्‍याबै त्हिंइमैं, ओंसों ओंनोंबै बर्षमैं, ङइ मैंम्।
PSA 77:6 म्हुँइँसर ङइ ह्रोंसए क्वेमैं मैंइ; तले जा बिसि ङइ सैंर मैंल। धै ङए सैंइ चु ताँमैं ङ्योलु-च्युलु लइ:
PSA 77:7 “प्रभुजी ङ्योलाइ युगुर्लै वाथेंम् रो वा? खीजी धबै खोंयोंइ ङ्योए फिर ल्हयो आख रो वा?
PSA 77:8 खीए खोंयोंइ आनुबै म्हाँया युगुर्लै खाँयाँइ वा? खीए बाछा युगुर्लै नुयाइ वा?
PSA 77:9 परमेश्‍वरजी दयाम्हाँया लब म्‍लेयाइ वा? ह्रिस खसि तारे खीजी म्हाँया आल रो वा?” बिसि ङइ ङ्योएल। तिस्याँदे मैंन्
PSA 77:10 झाइले ताँन् भन्दा थेबै परमेश्‍वरए क्योलो योर भों आरेन उ? बिब ङइ मैंइ। चु ताँर ङए सैं च्योंब् तइ।
PSA 77:11 दिलेया याहवेहजी लबै केमैं ङ मैंब्मुँ; क्ह्रोंसेंन्ले क्हिजी ओंसों ओंनोंन् लबै औदिबै केमैं ङ मैंब्मुँ।
PSA 77:12 क्हिजी लबै ताँन् केमैंए बारेर ङइ सैंर मैंब्मुँ, धै क्हिजी लबै ताँन् शक्‍तिए केमैंए बारेर ङ बिचार लब्मुँ।
PSA 77:13 ओ परमेश्‍वर, क्हिजी लबै ताँन् केमैं पबित्र मुँ। ङिए परमेश्‍वर धों तबै थेबै देवता अरू खाब् मुँ?
PSA 77:14 क्हि औदिबै केमैं लबै परमेश्‍वर ग; क्हिजी ह्रोंसए शक्ति ह्रें-ह्रेंमैंए म्हाँजोर उँइँमिंइमुँ।
PSA 77:15 ह्रोंसए योए भोंइ क्हिजी ह्रोंसए म्हिमैं, अथवा याकूब नेरो योसेफए सन्तानमैं जोगेमिंइ। तिस्याँदे मैंन्
PSA 77:16 ओ परमेश्‍वर, मा ङ्युँइर्बै क्युइ क्हि म्रोंइ, क्युइ क्हि म्रोंमा चमैं ङ्हिंयाँइ, धै थेबै मा ङ्युँइ त्हारइ।
PSA 77:17 न्हाम्स्योंमैंइ नाँ युमिंइ; मु बेल्‍ले ङ्हेबर होंइ; मेमैं धोंले क्हिए काम्‍लि-तिम्‍लि खोन्तोदोंन् चारबर होंइ।
PSA 77:18 नाँ-खैंर मु ङ्हेब् धोंले क्हिए कै तेइ; क्हिए कम्‍लि-तिम्‍लिइ ताँन् ह्‍युल चारइ; पृथ्‍बी ङ्हिंसि त्हारइ।
PSA 77:19 क्हिजी डोरेबै घ्याँ मा ङ्युँइए महाँजोर मुँल, क्हि प्रबै घ्याँ थेबै क्युए महाँजोर मुँल; दिलेया क्हिए प्हलेए म्है आम्रोंल।
PSA 77:20 मोशा नेरो हारूनए योउँइँले क्हिजी ह्रोंसए म्हिमैं क्युमैंए बगल धोंले डोरेइ।
PSA 78:1 आसापए मस्किल घ्रि ओ ङए म्हिमैं, ङइ लोमिंबै ताँमैंर न्ह तोद्; ङइ बिबै ताँमैं छेनाले थेद्।
PSA 78:2 ङइ आहनउँइँले पोंब्मुँ, था आसेबै स्योंम्बै ताँमैं ङइ बिमिंब्मुँ।
PSA 78:3 च ताँमैं ङ्योए बाज्यूमैंइ ङ्योने बिथेंइमुँ, छतसि ङ्योइ थेसि सेइमुँ।
PSA 78:4 चु ताँमैं ङ्योइ ह्रोंसए प्हसेमैंउँइँले लोइरि थेंरिब् आरे, दिलेया तारे खबै पुस्तमैंने याहवेहजी लबै औदिबै केमैं नेरो खीए भोंए बारेर धै खीजी लबै प्लेटोयान् तबै केमैंए बयन ङ्योइ लब्मुँ।
PSA 78:5 याकूबए सन्तानए ल्हागिर खीजी ताँमैं बिइ, धै इस्राएल ह्रें न्होंर ठिम घ्रि पिंइ, ह्रोंसए सन्तानमैंने चु ताँ लोमिंरिगे बिसि खीजी ङ्योए खेबाज्युमैंने बिमिंइ।
PSA 78:6 तलेबिस्याँ लिउँइँबै पुस्तामैंइ चु ताँ ह्ररिगे, धै अझै तोगो समा आफिबै कोलो ओंलामैंइ चु ताँ सेरिगे, धै चमैंइ ह्रोंसए सन्तानमैंने या चु ताँ बिरिगे।
PSA 78:7 छले चमैंइ परमेश्‍वरए फिर भर थेंमल, धै खीजी लबै केमैं आम्‍लेमल, धै खीए ताँमैं ङिंमल।
PSA 78:8 ह्रोंसए खेबाज्युमैंइ लब् धोंले सैं सारो नेरो बिब् आङिंबै पुस्तामैं चमैं आतरिगे। चमैंए खेबाज्युमैंइ परमेश्‍वरए फिर भर आम्हाँदिमल, चमैंइ खीए फिर बिश्‍वास आलमल।
PSA 78:9 एफ्राइमर्बै म्हिमैं मे त्हलेमैं छेमल, दिलेया नेबै त्हेर चमैं क्हो तोसि न्हेयाइ।
PSA 78:10 चमैंइ परमेश्‍वरजी फैबै बाछा आम्हाँदि, धै खीए ठिमर प्रदा आङ्हाँ।
PSA 78:11 खीजी लबै केमैं चमैंइ म्‍लेयाइ, च औदिबै केमैं खीजी चमैंने उँइँमिंल।
PSA 78:12 चमैंए खेबाज्युमैंए उँइँर मिश्र ह्‍युलर्बै सोअन बिबै सहरए चेप्ला तबै क्ल्ह्‍योर खीजी औदि-औदिबै केमैं लल।
PSA 78:13 खीजी मा ङ्युँइ ङ्हिबाँ लइ धै क्युए म्हाँजोउँइँले चमैंलाइ क्योंज डोरेबोइ, धै खीजी गारा धोंले क्यु रामिंइ।
PSA 78:14 त्हिंयाँर न्हाँम्स्योए त्हो नेरो म्हुँइँसर मिए राब तसि खीजी चमैं डोरेमिंइ।
PSA 78:15 क्यु आयोंबै क्‍ल्‍ह्‍योर खीजी पारा ङ्हिबाँ फैलसि तिवाइ, धै मा ङ्युँइर्बै क्यु धोंले चमैंलाइ ल्हें क्यु थुँल् पिंइ।
PSA 78:16 खीजी पाराउँइँले स्योंमैं त्होंमिंइ धै स्यों धोंले क्यु बग्दिमिंइ।
PSA 78:17 दिलेया क्यु आयोंबै क्‍ल्‍ह्‍योर ताँन् भन्दा थेबै परमेश्‍वरए बिरोधर चमैंइ आछ्याँबै के लदै लइ, खीजी बिबै ताँ या आङिंमल।
PSA 78:18 ह्रोंसए सैंर मैंब् धोंले चबै सै ह्रिसि चमैंइ सेन-सेन् परमेश्‍वरए जाँच लइ।
PSA 78:19 “परमेश्‍वरजी क्यु आयोंबै क्‍ल्‍ह्‍योर चबै सैमैं पिंल् खाँम्मा?” बिसि चमैंइ परमेश्‍वरए बिरोधर पोंइ।
PSA 78:20 “खीजी पारर प्रिंमा पार तिसि क्यु त्होंइ, स्योंमैं धोंले क्यु ल्हें बग्दिइ। दिलेया खीजी ङ्योलाइ चबै सैमैं या पिंल् खाँम् रो वा? धै खीजी ह्रोंसए म्हिमैंए ल्हागिर से पिंल् खाँम् रो वा?”
PSA 78:21 चमैंए ताँ थेसि याहवेह बेल्‍ले ह्रिस खइ; धै याकूबए सन्तानए बिरोधर खीजी मि कुलसि चमैं नास लवाइ, इस्राएलए बिरोधर खी बेल्‍ले थेबै ह्रिस खइ,
PSA 78:22 तलेबिस्याँ चमैंइ परमेश्‍वरए फिर बिश्‍वास आलल, खीजी जोगेमिंम् बिबै ताँर चमैंइ भर आथेंल।
PSA 78:23 दिलेया “चबै सै कुलद्” बिसि मुने बिमा खीजी मुर्बै म्रामैं थोंमिंइ,
PSA 78:24 म्हिमैंइ चबै ल्हागिर खीजी मन्‍न बर्सादिमिंइ, धै चमैंलाइ स्वर्गर्बै चबै सैमैं पिंइ।
PSA 78:25 स्वर्गदूतमैंइ चबै क्हें म्हिमैंइ चइ; परमेश्‍वरजी चमैंलाइ ल्हें चबै सैमैं पिंइ।
PSA 78:26 खीजी मुर स्यारउँइँले खैं खल् पिंइ, धै खीजी ह्रोंसए शक्तिजी न्हुरउँइँले खैं खल् पिंइ;
PSA 78:27 छलेन स त्हुल धोंले खीजी चमैंए फिर से कुल्मिंइ, मा ङ्युँइर्बै बालुवा धोंले नमेमैं कुल्मिंइ।
PSA 78:28 चमैं टिबै क्ल्ह्‍यो न्होंर नेरो चमैंए तम्बुजरे खीजी नमेमैं युल् पिंइ।
PSA 78:29 खीजी चमैंए सैंर मैंब् धोंले पिंल, छतसि चमैंइ म्रेंन्ले चइ।
PSA 78:30 दिलेया चमैंए चबै सै चमैंए सुँर मुँमन्, चमैं म्रेंब् भन्दा ओंसों,
PSA 78:31 चमैंए फिर परमेश्‍वरए थेबै ह्रिस मि धोंले लुँइ। चमैंए न्होंर्बै भोंबै म्हिमैं खीजी सैवाइ, धै इस्राएलर्बै फ्रेंसिमैं ताँन् क्हुरवाइ।
PSA 78:32 छान् ललेया चमैंइ पाप के लरिइ; खीजी औदिबै केमैं ललैया चमैंइ खीए फिर बिश्‍वास आल।
PSA 78:33 छतसि खीजी चमैंए छ्ह नुल् लवाइ, धै चमैंए बर्षमैं ङ्हिंदा ङ्हाँन् तब लवाइ।
PSA 78:34 छले परमेश्‍वरजी म्हिमैं सैवामा अरूमैंइ खीलाइ म्हैइ; झाइले चमैंइ सैं एसि खी ङाँइ एइ।
PSA 78:35 परमेश्‍वर चमैंए रक्षा लमिंबै पारा ग, धै ताँन् भन्दा थेबै परमेश्‍वरजी चमैंलाइ जोगेमिंम् बिसि चमैंइ मैंइ।
PSA 78:36 दिलेया च लिउँइँ चमैंइ सुँइ मत्‍त्रे खीलाइ थेब लइ; धै ह्रोंसए लेइ खीने स्योर ताँ पोंइ।
PSA 78:37 चमैंए खोंइ खीए फिर भर आलल; खीजी फैबै बाछा चमैंइ फुवाल।
PSA 78:38 दिलेया खीजी ल्हयो खबइले चमैंए पाप क्षमा लमिंइ, धै चमैंलाइ नास आलल; खीजी ह्रोंसए ह्रिस ल्हें खे समा थौंदिइ थेंइ, धै खीजी ह्रोंसलाइ ह्रिस खल् आपिं।
PSA 78:39 चमैंम् ज्यु मत्‍त्रे ग, चमैंम् खैं धोंले ह्‍याबै ह्‍याबन् तम्, बिसि खीजी मैंइ।
PSA 78:40 क्यु आयोंबै क्‍ल्‍ह्‍योर चमैंइ ल्हें खे खीए बिरोध लइ, धै तोइ आकेबै क्‍ल्‍ह्‍योर खीए सैं नल् लइ!
PSA 78:41 चमैंइ घरिघरि खीए जाँच लइ, धै इस्राएलए बेल्‍ले थेबै परमेश्‍वरलाइ चमैंइ ह्रिस खल् लइ।
PSA 78:42 खीए शक्ति चमैंइ आमैंल, खीजी शत्तुरमैंउँइँले फ्रेमिंबै त्हिंइ चमैंइ आमैंल।
PSA 78:43 च त्हेर खीजी मिश्र ह्‍युलर ह्रोंसए चिनुमैं उँइँमिंइ, धै सोअनर्बै चेप्ला तबै क्ल्ह्‍योर औदिबै केमैं लल।
PSA 78:44 च त्हेरि मिश्रीमैंए स्योंमैं खीजी को लवाइ, छतसि च स्योंमैंर्बै क्यु चमैंइ थुँल् आखाँल।
PSA 78:45 चमैंलाइ च्हिरिगे बिसि चमैंए म्हाँजोर खीजी च्योमिमैं कुल्मिंइ, धै नास लबै प्हद्गोमैं या कुलइ।
PSA 78:46 खीजी चमैंए म्ल्ह-नारे नम्ज्योमैंइ चल् पिंइ, धै चमैंइ के लसि खबै रा-रोमैं या तिरिमैंइ चवाल् पिंइ।
PSA 78:47 खीजी चमैंए अँगुरए धुँमैंलाइ तिस्युइ नेरो चमैंए तोंबुए धुँमैं प्हमइ नास लल् पिंइ।
PSA 78:48 खीजी चमैंए खेदोमैं तिस्युइ धै चमैंए र-क्युए बगल कम्‍लि-तिम्‍लिइ ल्हिल् पिंइ।
PSA 78:49 चमैंने बालु खी थेबै ह्रिस खल। छतसि चमैंलाइ न्होह्रों लबर खीजी सैवाबै दूतए बगल कुलइ।
PSA 78:50 खीजी ह्रोंस ह्रिस खबै घ्याँ तयार लइ; चमैंलाइ कालउँइँले आजोगेमिं, दिलेया चमैंलाइ रुडिइ नास लवाइ।
PSA 78:51 खीजी मिश्र ह्‍युलर्बै च्ह थेब्मैं ताँन् सैवाइ, हाम बिबै ह्रेंर्बै ठागुमैं या सैवाइ।
PSA 78:52 धै खीजी ह्रोंसए म्हिमैं क्युमैं धोंले बैरु तेसि पखइ, धै क्यु बगल धोंले चमैंलाइ क्यु आयोंबै क्‍ल्‍ह्‍योए म्हाँजोउँइँले खीजी डोरेइ।
PSA 78:53 चमैं आङ्हिंरिगे बिसि खीजी जोगेदै पखइ, दिलेया चमैंए शत्तुरमैं बिस्याँ मा ङ्युँइर प्ल्हुँयाइ।
PSA 78:54 छले परमेश्‍वरजी ह्रोसए पबित्र ह्‍युलर चमैं डोरेइ, च कोंमैं मुँबै ह्‍युल खीजी ह्रोंसए क्योलो योइ ट्होसि चमैंलाइ पखइ।
PSA 78:55 चमैंए उँइँर खीजी अरू ह्रेंमैंलाइ ल्हावाइ, झाइले चमैंए क्ह्ल्‍यो न्हेमैं खेमैंए सै न्होर धोंले भाग-भाग लसि इस्राएलीमैंलाइ पिंइ, धै कुल-कुल लसि चमैंए तम्बुर टिल् पिंइ।
PSA 78:56 दिलेया चमैंइ परमेश्‍वरए जाँच लइ, धै ताँन् भन्दा थेबै परमेश्‍वरए बिरोध लसि खीलाइ ह्रिस खल् लइ, धै खीजी बिबै ताँमैं आङिंल।
PSA 78:57 चमैं ह्रोंसए खेबाज्युमैं धोंले बाछा फुवाब् नेरो धोका पिंब्मैं तइ, धै भर लल् आखाँबै न्होंयाबै मेत्हले धों तब् मुँल।
PSA 78:58 नुबै कोंजरे पूजा लबै क्‍ल्‍ह्‍यो बनेसि चमैंइ खीलाइ ह्रिस खल् लइ; धै चमैंइ कुमैं बनेसि फ्योइ, छतसि खी थेबै ह्रिस खइ।
PSA 78:59 च ताँ सेसि परमेश्‍वर बेल्‍ले ह्रिस खइ, धै इस्राएलीमैंलाइ युगुर्लै पिवाइ।
PSA 78:60 शिलोर मुँबै पबित्र तम्बुए न्होंर खी म्हिमैंए म्हाँजोर टिमल, दिलेया तोगो च तम्बु खीजी पिवाइ।
PSA 78:61 बाछा फैसि प्ह्रिबै युमा थेंबै मुदुस खीजी अरू ह्‍युलर पिमिंइ, खीए शक्ति बेल्‍ले थेब मुँ धै खी बेल्‍ले छ्याँब मुँ बिबै चिनु खीजी शत्तुरमैंए योर पिंवाइ।
PSA 78:62 खीजी ह्रोंसए म्हिमैं सेलाँइ सैल् पिंइ, धै चमैंने बेल्‍ले ह्रिस खइ।
PSA 78:63 चमैंए फ्रेंसिमैं ताँन् मिइ ख्रोंवाइ, छतमा चमैंए च्हमिमैंए ल्हागिर ब्ह्‍या लब खाबै आयों।
PSA 78:64 चमैंए खेगिमैं सेलाँइ सैवाइ, धै चमैंए म्हरेस्योमैंइ शोक ललै आयों।
PSA 78:65 लिउँइँ न्हरुउँइँले छोरब् धोंले याहवेह छोरइ, अँगुरए प्हाइ पिब् धोंले खी छोरइ।
PSA 78:66 खीजी ह्रोंसए बिरोधीमैं सग्याँप्हुँग्या लवाइ, खीजी खोंयोंन् बिलै चमैंलाइ फापिल् लवाइ।
PSA 78:67 छले खीजी योसेफए सन्‍तानमैं पिवाइ; खीजी एफ्राइमए कुललाइ आत्हाँ,
PSA 78:68 दिलेया यहूदाए कुल नेरो ह्रोंसजी खोबै सियोन कों खीजी त्हाँइ।
PSA 78:69 खीजी ह्रोंसए पबित्र क्‍ल्‍ह्‍यो नुबर मुँबै स्वर्ग धोंबन् बनेइ, धै पृथ्बी धोंलेन् खोंयोंन् बिलै तरिगे बिसि खीजी च क्ल्ह्‍यो बनेइमुँ।
PSA 78:70 खीजी ह्रोंसए के लबै म्हि दाऊदलाइ त्हाँइ, धै चलाइ क्यु प्ह्रोंउँइँले तेसि पखइ।
PSA 78:71 क्युमैंए छैं लबै केउँइँले दाऊद पखसि खीजी चलाइ याकूबए सन्तानए प्ह्रोंछैं तल् पिंइ, खीजी त्हाँबै इस्राएली म्हिमैंए म्रुँ तल पिंइ।
PSA 78:72 चु ङइ लल् त्हुबै के ग ङ्हाँसि दाऊदइ चमैंए छैं लइ, धै चइ चमैंलाइ छेनाले डोरेइ।
PSA 79:1 आसापए भजन घ्रि। ओ परमेश्‍वर, अरू ह्रेंमैंइ क्हिए ह्‍युलए फिर ह्‍वाखइमुँ; धै क्हिए पबित्र मन्दिर चमैंइ जुठ लइमुँ; चमैंइ यरूशलेम नास लवाइमुँ।
PSA 79:2 क्हिए के लबै म्हिमैंए सिनु मुर प्हुरबै नमेमैंलाइ चबै ल्हागिर शत्तुरमैंइ पिंइमुँ, चमैंए से क्ह्‍योंर्बै खेदोमैं पिंइमुँ।
PSA 79:3 शत्तुरमैंइ चुमैंए को क्यु धोंले यरूशलेमर बग्दिवाइमुँ, धै चुमैंलाइ पाबै म्हिमैं खाबै आरे।
PSA 79:4 छतसि ङिए चेंदो मुँबै ह्रेंमैंइ ङिलाइ बिल्‍लि लइमुँ, झाइले ङिए खागु टिबै म्हिमैंइ ङिलाइ प्ह्रसि निस्योम्।
PSA 79:5 ओ याहवेह, खोंयों समा? क्हि खोंयोंइन ङिने ह्रिस खरिब्मा? क्हिए ह्रिस मि धोंले खोंयों समा लुँरिमुँ?
PSA 79:6 च ह्रेंमैंइ क्हिलाइ आम्हाँदि, च ह्‍युलमैंर्बै म्हिमैंइ क्हिए मिं आकिं, छतसि चमैंए फिर क्हिए ह्रिंस उँमिंन्।
PSA 79:7 तलेबिस्याँ चमैंइ याकूबलाइ क्ल्ह्‍योंवाइमुँ धै च टिबै क्‍ल्‍ह्‍यो तोइ आचैन् लवाइमुँ।
PSA 79:8 ङिए खेमैंइ लबै पापए हिसाब ङिने आकिंन्; ङिए फिर क्हिजी युनन् ल्हयो खमिंन्, तलेबिस्याँ ङिलाइ क्हिए थेबै खाँचो मुँ।
PSA 79:9 ओ ङिलाइ मुक्ति पिंबै परमेश्‍वर, ङिइ क्हिए मिं थेब लरिगे बिसि ङिलाइ ल्होमिंन्। क्हिए मिं थेब लबै ल्हागिर ङिए पाप क्षमा लसि ङिलाइ जोगेमिंन्।
PSA 79:10 “चमैंए परमेश्‍वर खनिर मुँ?” बिसि अरू ह्रेंमैंइ तले बिए? क्हिए के लब्मैंए बग्दिबै कोए खी क्हिजीन् किंम् बिसि अरू ह्रेंमैंइ सेरिगे! ङिज्यै या म्रोंरिगे!
PSA 79:11 झेलर मुँब्मैंइ ल्हयो खल्‍ले ओरबै कै क्हि ङाँर फेनेरिगे; सिल् त्हुबै दण्ड योंब्मैंलाइ क्हिए थेबै शक्‍तिउँइँले रक्षा लमिंन्!
PSA 79:12 ओ प्रभु, क्हिलाइ प्ह्रसि ङिए ङ्‍हेब् ट्हुब्मैंइ क्हिए मिं वाइमुँ, छतसि चए ङिखे गुणा खी चमैंने किंमिंन्।
PSA 79:13 छ लमा ङि, क्हिए म्हिमैं, क्हिए खर्गर्बै क्युमैं ग। छतसि ङि खोंयोंन् बिलै क्हिए मिं क्वेब्मुँ; पुस्त-पुस्त समा ङिइ क्हिए छ्याँबै बयन लब्मुँ।
PSA 80:1 क्वे प्रिंब्मैंए चिबलाइ, “बाछाए लिलि टमैं” बिबै भाकार प्रिंबै आसापए भजन घ्रि। ओ इस्राएलए प्ह्रोंछैं, न्ह तोमिंन्! तलेबिस्याँ क्युए बगल धोंले क्हिजी योसेफए सन्तानमैंलाइ डोरेम्। क्हि करूबमैंए म्हाँजोर टिम्, छतसि क्हिए शक्ति उँइँमिंन्।
PSA 80:2 एफ्राइम, बेन्यामीन नेरो मनश्शे बिबै कुलमैंए उँइँर क्हिए शक्ति उँइँमिंन्, धै ङि जोगेमिंबर युमिंन्!
PSA 80:3 ओ परमेश्‍वर, ङिए ह्‍युल धबै भोंब लमिंन्; ङिए फिर लहयो लद्, धै ङि सोब्मुँ।
PSA 80:4 ओ याहवेह, स्वर्गर्बै सेनामैंए चिब, परमेश्‍वर, ह्रोंसए म्हिमैंए प्राथना थेसि खोंयों समा क्हि ह्रिस खरिब्मुँ?
PSA 80:5 क्हिजी चबै ल्हागिर चमैंलाइ न्हुँ पिंइमुँ, धै ल्हें-ल्हें मिग्लि थुँल् पिंइमुँ।
PSA 80:6 क्हिजी ङिए खागु टिबै ह्रेंमैं प्होंबर खल् पिंइमुँ, धै ङिए शत्तुरमैंइ ङिलाइ प्ह्रम्।
PSA 80:7 ओ सेनामैंए परमेश्‍वर, ङिए ह्‍युल धबै भोंब लमिंन्; ङिए फिर लहयो लद्, धै ङि सोब्मुँ।
PSA 80:8 अँगुरए धुँ घ्रि धोंले क्हिजी ङिलाइ मिश्र ह्‍युलउँइँले पखमिंइ; क्हिजी अरू ह्रेंमैं ल्हावासि च धुँ कनान ह्‍युलर रुँइँइ।
PSA 80:9 क्हिजी च रुँइँबै ल्हागिर स ताइ; च धुँए जर गैरुले च्योंमा च जर ह्‍युल तिगोंन् फैलिदिइ।
PSA 80:10 च धुँए छरिइ कोंमैं हुवाब् धोंले ङिइ ताँन् ह्‍युल ट्होवाइ, चए हाँगमैंइ लेबनानर्बै थे-थेबै देवदारु बिबै धुँमैं हुवाइ।
PSA 80:11 चए हाँगमैं थेबै मा ङ्युँइ समा नेरो चए च्होमैं यूफ्रेटिस बिबै स्यों समा फैलिदिइ।
PSA 80:12 दिलेया तोगो च अँगुरए धुँ मुँबै गारामैं क्हिजी तले फुवाल? च घ्याँउँइँले ह्‍याब्मैं ताँनइ चए रोमैं ह्‍योम्।
PSA 80:13 क्ह्‍योंर्बै तिलिमैंइ च धुँ नास लब् धोंले, धै क्ह्‍योंर्बै खेदोमैंइ चए रोमैं चब् धोंले, ङिए खागु मुँबै ह्रेंमैंइ ङिलाइ नास लवाइ।
PSA 80:14 ओ सेनामैंए परमेश्‍वर, ङि ङाँइ तोमिंन्! स्वर्गउँइँले क्युरु ङ्ह्‍योमिंन्, धै च अँगुरए धुँ छेनाले छैं लमिंन्।
PSA 80:15 च अँगुरए धुँ क्हिजी ह्रोंसए क्योलो योइ रुँइँब् ग, धै क्हिजी ह्रोंसए ल्हागिर फारमिंबै च्ह ङि ग!
PSA 80:16 दिलेया शत्तुरमैंइ क्हिए अँगुरए धुँ थोवासि मिइ ख्रोंइमुँ! क्हिजी हौदिमा क्हिए म्हिमैं नास तयाम्!
PSA 80:17 ह्रोंसजी त्हाँबै ह्रेंलाइ आशिक पिंन्! चमैंलाइ क्हिजी भोंब् लमिंइ।
PSA 80:18 छलस्याँ क्हिउँइँले ङि खोंयोंइ क्हो तोरिब् आरे; ङिलाइ सोगों लमिंनु, धै ङि क्हिए मिं क्वेब्मुँ।
PSA 80:19 ओ याहवेह, क्हि स्वर्गर्बै सेनामैंए चिब, नेरो परमेश्‍वरन् ग! ङिए ह्‍युल धबै भोंब लमिंन्; ङिए फिर लहयो लद्, धै ङि सोब्मुँ।
PSA 81:1 क्वे प्रिंब्मैंए चिबए ल्हागिर: गित्तित ह्राब् धोंलेन् आसापए भजन परमेश्‍वरए मिंर सैं तोंदै क्वे प्रिंन्! खी ङ्योए शक्ति ग, छतसि थेबै कै तेदै याकूबए परमेश्‍वरए जयजय लद्!
PSA 81:2 क्वे प्रिंन्! खैंजडि ह्राद्! सारङ्गी नेरो बीणा या छेनाले ह्राद्!
PSA 81:3 ङ्योए थेबै चाड सुरु लबर औंसि नेरो पूर्नेर क्यु साँडेए रूँए थुतुरु ह्राद्।
PSA 81:4 इस्राएलए ल्हागिर चु निसाफ घ्रि ग, याकूबए परमेश्‍वरजी लद् बिसि ल्हैदिबै ताँ ग,
PSA 81:5 खी मिश्र ह्‍युलए बिरोधर रेमा योसेफए ह्रेंए ल्हागिर खीजी निसाफ घ्रि बिथेंइ। च क्‍ल्‍ह्‍योर्न ङइ ङो आसेबै कै छ बिब् थेल:
PSA 81:6 “क्हेमैंए प्हैंदउँइँले ङइ ल्हिबै ति तमिंइ; ल्हिबै ट्हलोउँइँले क्हेमैंए यो तेमिंइ।
PSA 81:7 दुःख तमा क्हेमैंइ ङने ग्वार ह्रिइ, धै क्हेमैंए दु:खउँइँले ङइ फ्रेमिंइ। मु ङ्हेबै क्‍ल्‍ह्‍योउँइँले खाबज्यै आम्रोंल्‍ले ङइ क्हेमैंलाइ ज्वाफ पिंइ; मेरिबार त्होंखबै क्युर ङइ क्हेमैंए जाँच लइ। तियाँदे मैंन्
PSA 81:8 “ओ ङए म्हिमैं थेद्! ङइ क्हेमैंलाइ लोदा सैंदा लब्मुँ! ओ इस्राएल, क्हेमैंइ ङए ताँ थेब् गो बिस्याँ!
PSA 81:9 क्हेमैंए म्हाँजोर आगुए देवता थेंल् आत; क्हेमैं अरू ह्रेंए देवताए ओंसों कुरल् आत।
PSA 81:10 ङ याहवेह क्हेमैंए परमेश्‍वर ग, क्हेमैंलाइ मिश्र ह्‍युलउँइँले ङइ तेसि पखइ। क्हेमैंए सुँ आँ लद्, ङइ म्रेंन्ले चल् पिंब्मुँ।
PSA 81:11 “दिलेया ङ‍ए म्हिमैंइ ङइ बिबै ताँ थेल् आङिं; इस्रएल ङए न्होंर टिल् आङिं।
PSA 81:12 छतसि चमैं खेंमैंए सैंर मैंब् धोंले प्ररिगे बिसि चमैंए सैंर्बै इच्छार्न ङइ पिमिंइ।
PSA 81:13 ङए म्हिमैंइ ङए कै थेरिगे, धै इस्राएल ङए घ्याँर प्ररिगे बिब ङए सैं मुँ!
PSA 81:14 छतस्याँ चमैंए शत्तुरमैंलाइ ङइ युनन् ट्होवामल, धै चमैंलाइ दुःख पिंब्मैंए बिरोधर ङए यो रेमल!
PSA 81:15 याहवेहलाइ तो धोंइ आङ्हाँब्मैं खी म्रोंसि ङ्हिंमल, दिलेया चमैंइ खोंयोंन् बिलै दण्ड योंरिल् त्हुमल।
PSA 81:16 दिलेया ङइ इस्राएलीमैंलाइ ताँन् भन्दा छ्याँबै गहुँ चल् पिंमल, धै पारार्बै खुदुइ क्हेमैंलाइ म्रेंल् पिंमल।”
PSA 82:1 आसापए भजन घ्रि। स्वर्गर्बै म्हिमैंए च्होंर परमेश्‍वर टिइमुँ; देवतामैंए उँइँर खीजी निसाफ लम्:
PSA 82:2 “खोंयों समा क्हेमैं अनिया लब्मैंए ख लरिमुँ? धै दुष्‍टमैं ङाँइन ल्हैदिरिमुँ?” बिइ। तिस्याँदे मैंन्
PSA 82:3 “ङ्हाँदुमैं नेरो आबा आरेब्मैंल ठिक निसाफ लमिंन्; आयों-आख्युब्मैं नेरो आगुइ क्र ओलै आपिंब्मैंए रक्षा लमिंन्।
PSA 82:4 आखाँब्मैं नेरो आयों-आख्युब्मैं जोगेमिंन्; दुष्‍टमैंए योउँइँले चमैंलाइ फ्रेमिंन्।
PSA 82:5 क्हेमैंने ज्ञान आरे, क्होल् आखाँ, क्हेमैं मिछु खैबर प्ररिम्; ठिमइ बिब् धोंले आप्र।
PSA 82:6 “क्हेमैं देवतामैं ग!” बिसि ङइ बिल। “क्हेमैं ताँन् भन्दा थेबै परमेश्‍वरए च्हमैं ग,
PSA 82:7 दिलेया म्हिमैं धोंले क्हेमैं सिब्मुँ, धै चिब्मैं धोंले क्हमैं नास तब्मुँ।”
PSA 82:8 ओ परमेश्‍वर, रेत्ति, पृथ्बीए निसाफ लमिंन्; तलेबिस्याँ ताँन् ह्रें-ह्रेंमैंए हग वाल क्हि ग।
PSA 83:1 आसापए भजन घ्रि, क्वे घ्रि। ओ परमेश्‍वर, क्हि आपोंल्‍ले आटिमिंन्! ओ परमेश्‍वर, तोइ आबिल्‍ले आटिमिंन्, के आलल्‍ले आटिमिंन्!
PSA 83:2 ङ्ह्‍योत्ति, क्हिए शत्तुरमैं सयो खब् धों तइमुँ, क्हि आखोब्मैंइ क्र कैंडो लइमुँ।
PSA 83:3 चमैंइ स्योर तेसि क्हिए म्हिमैंलाइ ङो चुइमुँ, क्हिए खोबै म्हिमैंए बिरोधर चमैंइ ताँ लइमुँ।
PSA 83:4 “खो, ङ्यो चमैंए ह्रें नास लले; धै इस्राएलीमैंए मिं क्ह्रन् म्हयारिगे,” बिसि चमैंइ बिमुँ।
PSA 83:5 चमैं सैं घ्रि तसि जाल् रोइमुँ, क्हिए बिरोध लबै ताँर चमैंइ मत लइमुँ।
PSA 83:6 एदोमथेंमैं नेरो इश्माएलीमैं, मोआबीमैं नेरो हग्रिमैं,
PSA 83:7 गबालि, अम्‍मोनि नेरो अमालेकी, पलिश्ती नेरो टुरोसथेंमैं, चुमैं ताँन् क्हिए बिरोधर मत लसि क्ह्रिइमुँ।
PSA 83:8 लोतए सन्‍तानमैंलाइ ल्होबर अश्शूरीमैं या चमैंनेन् क्ह्रिइमुँ। तिस्या मैंन्
PSA 83:9 मिद्यानिमैंलाइ क्हिजी सैब् धोंले, किशोन स्योंर सिसरा नेरो याबिनलाइ क्हिजी लब् धोंले, क्हिए फिर जाल रोब्मैंलाज्यै या लद्।
PSA 83:10 सिसरा नेरो याबिनलाइ एन्दोर बिबै क्ल्ह्‍योर क्हिजी नास लवासि चमैंए ज्यु सर क्राँयाइ।
PSA 83:11 छलेन चमैंए क्रथे मिंथेमैंलाइ ओरब नेरो जएब धोंन् लमिंन्, जेबह नेरो सल्मुन्‍नालाइ धोंले चमैंए चिब्मैंलाज्यै या लमिंन्,
PSA 83:12 तलेबिस्याँ “परमेश्‍वरजी ह्रोंसए म्हिमैंलाइ पिंबै क्‍ल्‍ह्‍यो ङ्योइ क्ल्हे लले,” बिसि जेबह नेरो सल्मुन्‍नाइ बिल।
PSA 83:13 ओ ङए परमेश्‍वर, चमैंलाइ छाज्यै प्लिल् खाँब छुज्यै प्लिल् खाँबै नो धों, नेरो खैंइ नोबोबै पुइ धों लमिंन्।
PSA 83:14 खैले मिइ क्ह्‍यों (बन) ख्रोंसि मेउरो लवाम्, धै मिए राबाइ कोंमैं ख्रोंवाम्,
PSA 83:15 छलेन क्हिए थेबै नाँ-बाडिइ चमैंलाइ ङ्हिंन् लसि क्हिए थेबै नाँ-खैंइ चमैंलाइ ल्हामिंन्!
PSA 83:16 ओ याहवेह, चमैंइ क्हिए मिं म्हैप्ररिगे बिसि चमैंए लि फापिन् लवाद्।
PSA 83:17 ह्‍युल तिगोंन् क्हि मत्‍त्रे ताँन् भन्दा थेबै परमेश्‍वर ग धै क्हिए मिं याहवेह ग सेरिगे बिसि
PSA 83:18 चमैं खोंयोंन् बिलै फापिल् त्हुरिगे, चमैं ङ्हिंरिगे, धै चमैं आब्रु ह्‍याल्‍ले सियारिगे।
PSA 84:1 क्वे प्रिंब्मैंए चिबए ल्हागिर: गित्तित भाकार कोराए च्हमैंए भजन घ्रि। ओ स्वर्गर्बै सेनामैंए चिब याहवेह, क्हि टिबै क्‍ल्‍ह्‍यो कति छ्याँब मुँ!
PSA 84:2 याहवेहए धिंर टिबै ल्हागिर ङए सोइ थेबै इच्छा लम्, धै मूर्छ तम्; ङए खों नेरो ज्युइ सैं तोंसि खोंयोंन् बिलै तरिबै परमेश्‍वरलाइ क्वे प्रिंम्।
PSA 84:3 ओ स्वर्गर्बै सेनामैंए चिब याहवेह, ङए म्रुँ नेरो ङए परमेश्‍वर, क्हिए मिंर ख्रो पिंबै थाँनए चेंदो कोल्मेंइ प्हसे योंमुँ, धै चिब्लिमैंइ च्हों थासि ह्रोंसए प्हसेमैं चर थेंम्।
PSA 84:4 क्हिए धिंर टिसि खोंयोंन् बिलै क्हिए मिंर क्वे प्रिंरिब्मैंइ आशिक योंम्। तिस्याँदे मैंन्
PSA 84:5 क्हिउँइँले भों योंब्मैं, नेरो सियोन कोंर ह्‍याबै सैं लब्मैंइ आशिक योंम्।
PSA 84:6 चमैं बाका बिबै ब्याँसि तसि ह्‍यामा चर क्युए मुल् बनेम्; बर्खर्बै नाँइ चर ङ्ह्‍योखोमैं तम्।
PSA 84:7 चमैं ताँन् सियोनर देवतामैंए परमेश्‍वरए आम्रोंखन् समा चमैंइ भोंए फिर भों योंम्।
PSA 84:8 ओ स्वर्गर्बै सेनामैंए चिब याहवेह परमेश्‍वर, ङए प्राथना थेमिंन्; ओ याकूबए परमेश्‍वर, ङए ताँ थेमिंन्! तिस्याँदे मैंन्
PSA 84:9 ओ परमेश्‍वर, ढाल धोंले ङिलाइ जोगेबै म्रुँ ङाँइ ङ्ह्‍योमिंन्; छ्युगु फोसि त्हाँबै ह्रोंसए म्हिए फिर मि ङ्ह्‍योमिंन्।
PSA 84:10 अरू क्‍ल्‍ह्‍योजरे हजार त्हिंइमैं थोब् भन्दा क्हिए ह्‍युमैंर तिगें टिब छ्याँब तम्। दुष्‍टमैंए तम्बुमैंर टिब् भन्दा बरु ङए परमेश्‍वरए धिंर रुँबै म्हि तब ङलाइ खोम्।
PSA 84:11 तलेबिस्याँ याहवेह परमेश्‍वर त्हिंयाँ नेरो ढाल ग; याहवेहजी दयाम्हाँया लमुँ धै मान इजेत पिंम्; ठिक घ्याँर प्रब्मैंलाइ खीजी ताँन् छ्याँबै सैमैं पिंब्मुँ।
PSA 84:12 ओ स्वर्गर्बै सेनामैंए चिब याहवेह, क्हिए फिर भर थेंबै म्हिइ आशिक योंम्!
PSA 85:1 क्वे प्रिंब्मैंए चिबए लागिर कोराए च्हमैंए भजन घ्रि। ओ याहवेह, ह्रोंसए ह्‍युलए फिर क्हिजी ल्हयो उँइँमिंइ; याकूबए सन्तानमैंए सुख शान्ति क्हिजी एमिंइ।
PSA 85:2 ह्रोंसए म्हिमैंए आछ्याँबै केमैं क्हिजी क्षमा लमिंइ; चमैंए ताँन् पापमैं क्हिजी हुमिंइ। तिस्याँदे मैंन्
PSA 85:3 क्हिजी ह्रिस खब पिवाइ; धै लुँरिबै ह्रिसउँइँले एखइ।
PSA 85:4 ओ ङिलाइ मुक्ति पिंबै परमेश्‍वर, ङिलाइ एपखमिंन्, धै ङिए फिर खबै क्हिए ह्रिस म्हमिंन्!
PSA 85:5 ङिने बालु क्हि खोंयोंइन ह्रिस खरिम्मा? पुस्ता-पुसता समा ङिने बालु ह्रिस खरिम्मा?
PSA 85:6 क्हिए म्हिमैं क्हिने बालुन् सैं तोंल् योंरिगे बिसि ङिलाइ धबै भोंसि आलमिं वा?
PSA 85:7 ओ याहवेह, खोंयोंइ आनुबै क्हिए म्हाँया ङिने उँइँमिंन्, धै क्हिउँइँले योंबै मुक्ति ङिलाइ पिंन्।
PSA 85:8 याहवेह परमेश्‍वरजी बिबै ताँमैं ङ थेरिब्मुँ, तलेबिस्याँ खीए म्हिमैंने खीजी शान्तिए ताँ पोंब्मुँ। दिलेया चमैं धबै आछ्याँबै घ्याँर आप्ररिगे!
PSA 85:9 क्ह्रोंसेन्ले खीलाइ मान लब्मैंलाइ खीजी खैतबै त्हेरै या जोगेमिंब्मुँ; छतसि ङ्योए ह्‍युलर खी मुँ बिसि ङ्योइ था सेल् खाँम्।
PSA 85:10 खोंयोंइ आनुबै म्हाँया लबै परमेश‍वर नेरो भर लल् खाँबै इस्राएलीमैं क्ह्रिइमुँ; परमेश्‍वरजी ठिक के लमा म्हिमैं छिं ङ्हाँल् योंम्। धै म्हिमैंइ परमेश्‍वरने म्हाँया लम्।
PSA 85:11 म्हिमैंइ परमेश्‍वरए फिर भर लमा पृथ्‍बीउँइँलेन् मुर फेनेम्, परमेश्‍वरजी ठिक के लमा स्वर्गउँइँले क्युरु ङ्ह्‍योम्।
PSA 85:12 याहवेहजी छ्याँबै सैमैं ङ्योलाइ खैलसेया पिंब्मुँ, धै ङ्योए म्रोंइ ल्हें रा-रोमैं रोब्मुँ।
PSA 85:13 परमेश्‍वरजी लबै ठिक केमैं खीए ओंसों-ओंसों ह्‍याब्मुँ, धै खीए ल्हागिर घ्याँ तयार लब्मुँ।
PSA 86:1 दाऊदए प्राथना ओ याहवेह, ङए प्राथना थेमिंन् धै ज्वाफ पिंन्, तलेबिस्याँ ङ ङ्हाँदु नेरो आयों आख्युब् मुँ।
PSA 86:2 क्हिजी बिबै ताँ ङइ ङिंम्, ङलाइ रक्षा लमिंन्। क्हि ङए परमेश्‍वर ग। छतसि क्हिए के लबै म्हिलाइ जोगेमिंन्, ङइ क्हिए फिर भर लम्।
PSA 86:3 ओ प्रभु, ङए फिर दयाम्हाँया लमिंन्, तलेबिस्याँ ङ त्हिंइतिमिन् क्हिए मिं किंरिम्।
PSA 86:4 क्हिए के लबै म्हिलाइ सैं तोंल् लमिंन्, तलेबिस्याँ ओ प्रभु, ङ क्हिलाइन प्राथना लरिम्।
PSA 86:5 तलेबिस्याँ ओ प्रभु, क्हि स्वाब नेरो क्षमा पिंरिब् मुँ, क्हिए मिं किंब्मैं ताँनलाइ क्हिजी खोंयोंइ आनुबै थेबै म्हाँया लम्।
PSA 86:6 ओ याहवेह, ङए प्राथानर क्हिए न्ह तोमिंन्; ल्होमिंन् बिसि ग्वार ह्रिमा ङए ताँ थेमिंन्।
PSA 86:7 ङए दुःखए त्हिंइर ङ क्हिने ग्वार ह्रिमुँ, तलेबिस्याँ क्हिजी ज्वाफ पिंब्मुँ।
PSA 86:8 ओ प्रभु, क्हि धों तब अरू देवतामैं खाबै आरे, क्हिजी लब् धों तबै केमैं अरू खाबज्यै या लल् आखाँ।
PSA 86:9 ओ प्रभु, क्हिजी बनेबै ताँन् ह्रें-ह्रेंमैं क्हिए उँइँर कुरब्मुँ, धै चमैंइ क्हिए मिं थेब् लब्मुँ।
PSA 86:10 तलेबिस्याँ क्हि बेल्‍ले थेब मुँ धै औदिबै केमैं लम्; घ्रि मत्‍त्रे परमेश्‍वर क्हि ग।
PSA 86:11 ओ याहवेह, क्हिए घ्याँर प्रबर ङलाइ लोमिंन्, धै क्हिए क्ह्रोसेंन्बै घ्याँर ङ प्रब्मुँ; क्हिए मिंलाइ ङइ मान लल् खाँरिगे बिसि ङए सैं खोंयोंन् बिलै क्हि ङाँइन तल् पिंन्।
PSA 86:12 ओ याहवेह ङए परमेश्‍वर, ङए खों न्होंउँइँले ङ क्हिए मिं थेब् लब्मुँ, धै ङ खोंयोंन् बिलै क्हिए मिं क्वेब्मुँ।
PSA 86:13 तलेबिस्याँ ङए फिर क्हिए खोंयोंइ आनुबै म्हाँया बेल्‍ले थेब मुँ; धै क्हिजी ङए सो क्रोंर्बै गैरु क्ल्ह्‍योउँइँले फ्रेमिंइमुँ।
PSA 86:14 ओ परमेश्‍वर, घमण्डि म्हिमैं ङए बिरोधर रेइमुँ; दयाम्हाँया आरेब्मैंइ ङलाइ सैल् म्हैइमुँ; धै च म्हिमैंइ क्हिलाइ आमैं।
PSA 86:15 दिलेया ओ प्रभु, क्हि ल्हयो खब नेरो दयाम्हाँया मुँबै परमेश्‍वर ग, युनन् ह्रिस आखब, ताँनए फिर खोंयोंइ आनुबै म्हाँया लब नेरो भर लल् खाँब मुँ।
PSA 86:16 ङए फिर दयाम्हाँया लसि ङ ङाँइ तोमिंनु; ह्रोंसए के लबै म्हिलाइ क्हिए शक्ति पिंनु, धै ह्रोंसए केब्स्योए च्हलाइ जोगेमिंनु।
PSA 86:17 ओ याहवेह, क्हिजी ङ ल्होमिंइमुँ धै ङए सैं क्होमिंइमुँ। छतसि क्हिजी ङिए फिर छ्याँबन् लम् बिसि ङलाइ चिनु घ्रि उँइँमिंन्, धै ङलाइ आखोब्मैं च चिनु म्रोंसि फापिरिगे।
PSA 87:1 कोरहए च्हमैंए भजन घ्रि, क्वे घ्रि। याहवेहजी ह्रोंसए सहरए जग पबित्र कोंर झोंइमुँ।
PSA 87:2 याकूबए सन्तानमैं टिबै ताँन् क्‍ल्‍ह्‍योमैं भन्दा खीजी यरूशलेम सहर ल्हें म्हाँया लम्।
PSA 87:3 ओ परमेश्‍वरए सहर, क्हिए बारेर छ्याँब बयन लइमुँ। तिस्याँदे मैंन्
PSA 87:4 ङलाइ ङोसेबै ह्रेंमैं न्होंर ङ मिश्र नेरो बेबिलोनए बारेर बिमिंब्मुँ; धै पलिश्त, टुरोस नेरो कूश ह्‍युलर्बै म्हिमैंए बारेरै या “चु यरूशलेमर्न फिल!” बिसि ङ चमैं ङए म्हिमैं ठर्दिब्मुँ।
PSA 87:5 म्हिमैंइ सियोनए बारेर छले बिब्मुँ, “चु तान् म्हि चर्न फिल; झाइले ताँन् भन्दा थेबै परमेश्‍वरजीन् चलाइ भोंब लमिंब्मुँ।”
PSA 87:6 याहवेहजी ह्रें-ह्रेंर्बै मिं प्ह्रिमा “चुमैं ताँन् यरूशलेमर्बै म्हिमैं ग,” बिसि प्ह्रिब्मुँ। तिस्याँदे मैंन्
PSA 87:7 “ओ यरूशलेम, ङए ताँन् आशिकमैं योंबै क्ल्ह्‍यो क्हिन् ग!” बिसि चमैंइ बाजा ह्रामा क्वे प्रिंब्मुँ।
PSA 88:1 कोराए च्हमैंए भजन घ्रि, क्वे घ्रि, क्वे प्रिंब्मैंए चिबलाइ, “महलत-लिन्‍नोत” बिबै भाका धोंलेन् प्रिंल् त्हुम्। हेमान एज्रिए मस्किल घ्रि। ओ याहवेह, ङलाइ जोगेमिंबै परमेश्‍वर; ङइ त्हिंयाँ म्हुँइँस क्हिने ग्वार ह्रिइमुँ;
PSA 88:2 क्हिए उँइँर ङए प्राथना फेनेरिगे; ङइ ग्वार ह्रिमा क्हिए न्ह तोमिंन्!
PSA 88:3 तलेबिस्याँ ङए सैंर ल्हें दुःख तइमुँ, छतसि युनन् ङ क्रोंर फेनेबि छेइमुँ।
PSA 88:4 क्रोंर फेनेबै म्हि धोंन् ङ तइमुँ; भों आरेबै म्हि धोंन् ङ तइमुँ।
PSA 88:5 सिनुमैंने बालु ङलाइ थेंमिंइमुँ, छगोंर रोबै सैवाबै म्हिमैं धोंले ङ तइमुँ। क्हिजी खोंयोंइ चमैंलाइ आमैं, क्हिजी चमैंलाइ वास्ता आलल्‍ले पिवाइमुँ।
PSA 88:6 क्हिजी ङलाइ क्रोंर्बै ताँन् भन्दा गैरु मिछु खैब क्‍ल्‍ह्‍योर थेंइमुँ।
PSA 88:7 क्हिए ह्रिसइ ङलाइ प्लेथेंइमुँ, धै क्हिजी ह्रोंसए ह्रिसइ ङलाइ दु:ख पिंइमुँ। तिस्याँदे मैंन्
PSA 88:8 ङए खोबै थुमैंने क्हिजी ङ ह्रेंगो लमिंइमुँ; चमैंए उँइँर क्हिजी ङ आखोब् लमिंइमुँ। ङ च्युथेंइमुँ, छतसि ङ बैरु त्होल् आखाँ।
PSA 88:9 शोकइ लमा ङए मिइ छेनाले म्रोंल् आखाँ। ओ याहवेह, त्हिंइ ह्रोंसे ङ क्हिनेन् ग्वार ह्रिइमुँ; ङए यो क्हि ङाँइन स्योंइमुँ।
PSA 88:10 सिनुमैंने क्हिजी ह्रोंसए औदिबै केमैं उँइँम्मा? च सिनुमैं सोगों तसि क्हिए मिं थेब् लम् रो वा? तिस्याँदे मैंन्
PSA 88:11 क्हिजी लबै खोंयोंइ आनुबै म्हाँयाए बारेर छगोंर बयन लम्मा? धै नास तबै क्ल्ह्‍योर क्हि भर लल् खाँब मुँ बिसि खाबज्यै बिल् खाँम्मा?
PSA 88:12 क्हिजी लबै औदिबै केमैं मिछु खैबै क्‍ल्‍ह्‍योर म्रोंल् खाँम्‍मा? धै क्हिजी लबै ठिक केमैं मैंल् खाँबै शक्ति नुयाबै त्हेरै म्रोंल् खाँम् रो वा?
PSA 88:13 दिलेया ओ याहवेह, ङम् क्हिनेन् ग्वार ह्रिमुँ; धै न्हाँकर्न ङइ लबै प्राथना क्हिए उँइँर खम्।
PSA 88:14 ओ याहवेह, क्हिजी ङलाइ तले पिवाल? ङउँइँले ह्रोंसए लि तले लोल?
PSA 88:15 कोलो ओंनोंन् ङए फिर दुःख तइमुँ, धै सिबि छेइमुँ, क्हिजी हौदिबइले ङ बेल्‍ले ङ्हिंइमुँ, छतसि ङए सैं च्योंब तइमुँ।
PSA 88:16 क्हिए ह्रिस ङए फिर खइमुँ; क्हिजी हौदिमा ङ नास तइमुँ।
PSA 88:17 त्हिंइ ह्रोंसे क्हिजी क्युइ धोंले ङलाइ घेर्दिसि हुइमुँ; खन्तदोंउँइँले क्हिजी ङलाइ घेर्दिइमुँ।
PSA 88:18 ङए थुमैं नेरो ङए फिर म्हाँया लब्मैंलाइ क्हिजी ङउँइँले ह्रेंगो लवाइ; छतसि मिछु खैबै क्ल्ह्‍यो ङने क्ह्रिबै थु तइमुँ।
PSA 89:1 एतान एज्रिए मस्किल घ्रि। याहवेहजी लबै खोंयोंइ आनुबै म्हाँयाए बारेर ङइ खोंयोंइ क्वे प्रिंब्मुँ; क्हि भर लल् खाँब मुँ बिसि ङइ ताँन् पुस्ता-पुस्ताने बिमिंब्मुँ।
PSA 89:2 “क्हिए आनुबै म्हाँया खोंयोंन् बिलै तरिब्मुँ; मु तरिब् धोंले क्हिए ताँ खोंयोंन् बिलै भर लल् खाँब लइमुँ,” बिसि ङ बिप्रब्मुँ।
PSA 89:3 “ङइ त्हाँबै म्हिने बाछा फैइमुँ,” बिसि याहवेहजी बिइ। “ङए के लबै म्हि दाऊदने ङइ चु कसम चइमुँ:
PSA 89:4 ‘क्हिए सन्तानलाइ खोंयोंन् बिलै ङइ म्रुँ तल् पिंब्मुँ, धै क्हिए ग्याल्स पुस्ता-पुस्ता समा तल् पिंब्मुँ,’ बिसि ङए के लबै म्हि दाऊदने कसम चइमुँ।” तिस्याँदे मैंन्
PSA 89:5 ओ याहवेह, क्हिजी औदिबै केमैं लइमुँ धै क्हि भर लल् खाँब मुँ बिसि स्वर्गदूतमैं च्होंबै क्ल्ह्‍योर चमैंइ क्हिए मिं थेब् लब्मुँ।
PSA 89:6 तलेबिस्याँ मुर मुँब्मैं न्होंर याहवेहने बालु खाब् च्हैंल् खाँमुँ? स्वर्गर्बै सो प्ह्‍याबै सैमैं न्होंरै या याहवेह धों तब खाब् मुँ?
PSA 89:7 स्वर्गदूतमैं च्होंबै क्ल्ह्‍योर परमेश्‍वरने बेल्‍ले ङ्हिंल् त्हुम्, धै खीए खागु मुँब्मैंइ खीए मान लल् त्हुम्।
PSA 89:8 ओ स्वर्गर्बै सेनामैंए चिब याहवेह परमेश्‍वर, क्हि धों तब शक्ति मुँब खाब् मुँ? ओ याहवेह, क्हि तोन्दोंरि सैर भर लल् खाँब मुँ।
PSA 89:9 प्ल्हों खबै मा ङ्युँइलाइ क्हिजीन् तार झोंम्; चए भेल्गलाइ क्हिजीन् च्याँ लमिंम्।
PSA 89:10 क्हिजी सैवाबै म्हि धोंले राहाबलाइ त्हुल भुँ लवाइ; क्हिजी ह्रोंसए शत्तुरमैंलाइ ह्रोंसए भोंबै योजी सग्याँ प्हुँग्याँ लवाइ।
PSA 89:11 मु क्हिलन् ग; पृथ्बी या क्हिलन् ग; ताँन् ह्‍युल नेरो चर मुँबै तोन्दोंरि सै क्हिजीन् बनेब् ग।
PSA 89:12 उत्तर नेरो दक्षिण क्हिजीन् बनेब् ग; तबोर नेरो हेर्मोन कोंमैं सैं तोंदै क्हिए मिंर क्वे प्रिंम्।
PSA 89:13 क्हिए पाख्रर बेल्‍ले शक्ति मुँ; क्हिए यो भोंब मुँ, क्हिए क्योलो यो नुब मुँ।
PSA 89:14 ठिक के नेरो ठिक निसाफ लसि क्हिजी ग्याल्स लम्; क्हिजी खोंयोंन् आनुबै म्हाँया नेरो भर लल् खाँबै के लम्।
PSA 89:15 ओ याहवेह, क्हिए छ्याँबै बयन लल् ह्रब्मैं आशिक योंम्, चमैं क्हिए ल्हयोए ह्‍वेर प्ररिम्।
PSA 89:16 चमैं त्हिंइतिमिन् क्हिए मिं किंसि सैं तोंम्, धै क्हिजी लबै ठिक केमैं म्रोंसि चमैं आनन्द तम्।
PSA 89:17 तलेबिस्याँ क्हिजीन् चमैंलाइ थेबै शक्ति पिंम्। क्हिए म्हाँयाजी ङिलाइ ट्होल् लमिंइमुँ,
PSA 89:18 तलेबिस्याँ ढालइ धोंले ङिलाइ रक्षा लमिंबै म्हि याहवेहलन् ग, इस्राएलर्बै पबित्र परमेश्‍वरजी ङिलाइ ङिए म्रुँ पिंइमुँ।
PSA 89:19 क्हिजी बिब् ङिंबै म्हिने तिखे दर्शनर बिइ: “ङइ बेल्‍ले भोंबै म्हिलाइ भों पिंइमुँ; इस्राएली म्हिमैंए न्होंउँइँले त्हाँबै म्हिलाइ ङइ म्रुँ लमिंइमुँ।
PSA 89:20 ङए के लबै म्हि दाऊदलाइ ङइ योंइमुँ; ह्रोंसए पबित्र छ्युगु फोसि ङइ चलाइ त्हाँइमुँ।
PSA 89:21 ङए यो चए फिर तब्मुँ; ङए पाख्रइ चलाइ भोंब लमिंब्मुँ।
PSA 89:22 शत्तुरमैं खाबज्यै या चलाइ ट्होरिब् आरे; दुष्‍टमैंइ चलाइ दुःख पिंरिब् आरे।
PSA 89:23 चए बिरोधीमैंलाइ चए उँइँर्न त्हुल भुँ लवाब्मुँ, धै चलाइ आखोब्मैंलाइ ङइ सैवाब्मुँ।
PSA 89:24 ङलाइ चइ भर लल् खाँब्मुँ धै ङइ खोंयोंइ आनुबै म्हाँया चने लब्मुँ, धै ङए मिंउँइँले च भोंब तब्मुँ
PSA 89:25 ङइ चए यो मा ङ्युँइए फिर धै चए क्योलो यो स्योंमैंए फिर थेंब्मुँ।
PSA 89:26 चइ ङने छ बिसि बिन्ति लब्मुँ, ‘क्हि ङए आबा, ङए परमेश्‍वर ग, धै क्हिजी ङ जोगेमिंसि रक्षा लमिंम्।’
PSA 89:27 चलाइ ङए च्ह थेब लमिंब्मुँ, पृथ्बीर्बै म्रुँमैंए न्होंर ताँन् भन्दा थेब चलाइ लमिंब्मुँ।
PSA 89:28 ङइ चए फिर ङए म्हाँया खोंयोंन् बिलै थेंब्मुँ, धै चने बालु फैबै ङए बाछा खोंयोंन् बिलै तरिब्मुँ।
PSA 89:29 चए सन्तानलाइ खोंयोंन् बिलै ङ भोंब लमिंब्मुँ, धै चए ग्याल्स मु मुँन् समा तरिब्मुँ।
PSA 89:30 “चए प्हसेमैंइ ङए ठिम आम्हाँदिइ बिस्याँ धै ङए निसाफमैंर आप्रइ बिस्याँ,
PSA 89:31 ङए निसाफमैं चमैंइ फुवाइ बिस्याँ धै ङए ताँ आङिंइ बिस्याँ,
PSA 89:32 चमैंइ लबै पापए सजैं प्हरेइ पिंब्मुँ, धै चमैंइ लबै आछ्याँबै केमैंए सजैं कोरइ प्रुब्मुँ,
PSA 89:33 दिलेया ङए खोंयोंइ आनुबै म्हाँया दाऊदउँइँले स्योरिब् आरे, चने बालु ङइ फैबै बाछा ङ भर पर्दिल्‍ले लब्मुँ।
PSA 89:34 ङइ फैबै बाछा ङ फुरिब् आरे, ङए सुँउँइँले त्होंबै बचन ङ फेर्दिरिब् आरे।
PSA 89:35 ‘दाऊदए सन्तान खोंयोंन् बिलै तरिब्मुँ, धै त्हिंयाँ मुँन् समा चए राजगद्दि ङए उँइँर तरिब्मुँ।
PSA 89:36 मुर लयाँ भर लल् खाँबै साक्षि तरिब् धोंले दाऊदए राजगद्दि ङइ खोंयोंन् बिलै थेंमिंब्मुँ,’ बिसि
PSA 89:37 ह्रोंसए पबित्र मिंर ङइ खोंयोंबै ल्हागिर कसम चइमुँ; दाऊदलाइ ङ स्योर तेरिब् आरे।” तिस्याँदे मैंन्
PSA 89:38 दिलेया छ्युगु फोसि त्हाँबै ह्रोंसए म्हिलाइ ह्रिस खसि क्हिजी पिवाइमुँ, धै तो धोंइ आङ्हाँइमुँ।
PSA 89:39 ह्रोंसए के लबै म्हिने क्हिजी बाछा टोंवाँइमुँ; चए मुकुट सर कोंवासि क्हिजी अपबित्र लवाइमुँ।
PSA 89:40 चए यरूशलेम सहर रक्षा लबै ताँन् गारामैं क्हिजी फुवाइमुँ; धै चए किल्‍लामैं नास लवाइमुँ।
PSA 89:41 च घ्याँ तसि ह्‍याब्मैं ताँनइ चए सहर लुडिइमुँ; धै ह्रोंसए ङ्‍हेब्मैंइ चलाइ प्ह्रइमुँ।
PSA 89:42 चए शत्तुरमैंए क्योलो यो क्हिजी ट्होल् लमिंइमुँ; चए ताँन् शत्तुरमैंलाइ क्हिजी सैं तोंल् लमिंइमुँ।
PSA 89:43 चए सेलाँए धार क्हिजी आछ्याँरब् लमिंइमुँ, धै ल्हडेर ह्‍याल् आखाँब् लमिंइमुँ।
PSA 89:44 चए मान क्हिजी प्हेंवाइमुँ, धै चए राजगद्दि सर भ्योंवाइमुँ।
PSA 89:45 चए छ्ह क्हिजी रिंठि लमिंइमुँ; क्हिजी चलाइ फापिन् लवाइमुँ। तिस्याँदे मैंन्
PSA 89:46 ओ याहवेह, ह्रोंसलाइ युगुर्लै लोथेंब्मुँ? क्हिए ह्रिस खोंयों समा मि धोंले लुँरिब्मुँ?
PSA 89:47 ङए छ्ह कति रिंठि मुँ बिसि मैंमिंन्दि! क्हिजी म्हिमैंलाइ फाकर्न बनेल् वा?
PSA 89:48 आसिल्‍ले खोंयोंन् बिलै सोरिबै म्हि खाब् मुँ? खाबइ ह्रोंसए सोलाइ क्रोंउँइँले फ्रेल् खाँमुँ? तिस्याँदे मैंन्
PSA 89:49 ओ प्रभु, क्हिजी लबै खोंयोंइ आनुबै ओंसोंबै म्हाँया खनिर ह्‍याइ? क्हिजी दाऊदने बालु म्हाँया लब्मुँ बिसि चबै कसम खनिर ह्‍याइ?
PSA 89:50 ओ प्रभु, क्हिए के लबै म्हिलाइ म्हिमैंइ खैले प्ह्रइमुँ, धै अरू ह्रेंमैंइ गाल् केब ङइ खैले सैदिरिइमुँ, च ताँ मैंमिंन्दि।
PSA 89:51 ओ याहवेह, क्हिए शत्तुरमैंइ ङलाइ हेल लइमुँ, क्हिजी छ्युगु फोसि त्हाँबै म्हिलाइ चमैंइ प्ह्रइमुँ।
PSA 89:52 याहवेहए मिं खोंयोंन् बिलै थेब् तरिगे!
PSA 90:1 परमेश्‍वरए म्हि मोशाइ लबै प्राथना घ्रि ओ प्रभु, पुस्ताउँइँले पुस्ता समा ङिए टिबै क्‍ल्‍ह्‍यो क्हि तमिंइमुँ।
PSA 90:2 कोंमैं तखब् भन्दा ओंसों, क्हिजी पृथ्बी नेरो ह्‍युल बनेब भन्दा ओंसों, ओंसोंउँइँले लिउँइँ समा क्हिन् परमेश्‍वर ग।
PSA 90:3 “ओ म्हिए प्हसेमैं सर एखो!” बिसि क्हिजी म्हिमैं स त्हुलर कोंमिंम्।
PSA 90:4 क्हिए ल्हागिर हजार बर्ष घ्रि ह्‍याबै त्हिंइ घ्रि धों मत्‍त्रे ग, धै म्हुँइँसर्बै तिस्याँ मत्‍त्रे धों तब् ग।
PSA 90:5 नाँए प्हलें युब् धोंले क्हिजी म्हिमैंलाइ बोयाम्, चमैं न्हाँगर्बै म्‍लोखबै छि धोंब मुँ,
PSA 90:6 च न्हाँगर मल्गेमुँ धै थेब् तदै ह्‍यामुँ, ङेसर च ङ्योंलोंसि कारयाम्।
PSA 90:7 क्हिए ह्रिसर ङि नास तइमुँ, क्हि थेबै ह्रिस खमा ङि ङ्हिंम्।
PSA 90:8 ङिइ लबै छेरन् ङ्हाँबै केमैं क्हिजी ङ्ह्‍योरिइमुँ, ङिए न्होंर्बै आम्रोंबै पापमैं क्हिजी म्रोंरिइमुँ।
PSA 90:9 क्हिए थेबै ह्रिसर ङिए ताँन् त्हिंइमैं थोम्; ङिइ ह्रोंसए बर्षमैं दुःखर नुयाम्।
PSA 90:10 ङिए छ्ह ङिंच्यु बर्ष मत्‍त्रे ग, भों लस्याँ प्रेच्यु बर्ष सोलै; दिलेया च छ्ह दुःख नेरो न्हुँ लसि थोइ; च त्हिंइमैं युनन् ह्‍याम्, धै ङि सियाम्।
PSA 90:11 क्हिए ह्रिस कति ल्हें मुँ बिसि खाबइ क्होइमुँ? क्हिए थेबै ह्रिस क्हिलाइ लल् त्हुबै मान धों तब् ग।
PSA 90:12 छतसि ङिइ बुद्धि योंल् खाँरिगे बिसि ङिए छ्ह कति रिंन्ठि मुँ बिसि ङिलाइ लोमिंन्।
PSA 90:13 अझै क्हि खोंयों समा ह्रिस खरिमुँ? ओ याहवेह, ह्रोंसए के लब्मैंए फिर ल्हयो खमिंन्!
PSA 90:14 ङिए छ्ह तिगोंन् सैं तोंदै निस्योल योंरिगे बिसि क्हिए खोंयोंइ आनुबै म्हाँयाजी न्हाँगर्न ङिलाइ छिं ङ्हाँन् लमिंन्।
PSA 90:15 कति त्हिंइ समा क्हिजी ङिए फिर दुःख पिंइ, धै कति बर्षमैं आगुइ ङिलाइ ह्रुगुदिइमुँ, च्हगन् ङिलाइ सैं तोंन् लमिंन्।
PSA 90:16 क्हिए के लब्मैंने क्हिजी लबै केमैं उँइँमिंन्, धै क्हिजी लबै औदिबै केमैं ङिए सन्‍तानमैंलाइ म्रोंल् पिंन्।
PSA 90:17 ङिए याहवेह परमेश्‍वरए आशिक ङिए फिर तरिगे, ङिए योइ लबै केमैं ङिए ल्हागिर छ्याँब् लमिंन्; ङिए योइ लबै केमैं छ्याँब् लमिंन्!
PSA 91:1 ताँन् भन्दा थेबै परमेश्‍वरने ग्वार ह्रिबै म्हि तोन्दोंरि लल् खाँबै परमेश्‍वरए छरि न्होंर टिरिब्मुँ।
PSA 91:2 याहवेहए बारेर ङ बिब्मुँ, “खी ङए ग्वार योंबै क्‍ल्‍ह्‍यो नेरो ङए किल्‍ला ग, खी ङए परमेश्‍वर ग, खीए फिर ङइ भर थेंम्।”
PSA 91:3 नमे सैब्मैंए ङोउँइँले नेरो आछ्याँबै ह्रिंउँइँले खीजी क्हिलाइ खैलसेया जोगेमिंब्मुँ।
PSA 91:4 खीजी ह्रोंसए प्ह्‍यागोंइ क्हिलाइ हुमिंब्मुँ, धै खीए प्ह्‍यागों न्होंर क्हिइ ग्वार योंब्मुँ; खी भर लल् खाँबै परमेश्‍वर ग, छतसि ढाल तसि खीजी क्हिलाइ रक्षा लमिंम्।
PSA 91:5 म्हुँइँसर ङ्हिंन् लखबै सैउँइँले नेरो त्हिंइर प्हुरसि खबै मेउँइँले क्हि ङ्हिंल् त्हुरिब् आरे।
PSA 91:6 मिछु खैबर खबै ह्रिं, नेरो त्हिंइ आधार नास लबै नब् छबउँइँले क्हि ङ्हिंल् त्हुरिब् आरे।
PSA 91:7 क्हिए रेर हजार घ्रि म्हि धै क्हिए क्योलो योउँइँ हजार च्यु म्हि क्हुरियाले या च सैइ क्हिलाइ स्यारिब् आरे।
PSA 91:8 क्हिइ ह्रोंसए मिइ मत्‍त्रे च म्रोंब्मुँ धै दुष्‍टमैंइ योंबै सजैं म्रोंब्मुँ।
PSA 91:9 याहवेहने क्हि टिरिम्, ताँन् भन्दा थेबै परमेश्‍वर क्हिइ ग्वार योंबै क्‍ल्‍ह्‍यो तइमुँ।
PSA 91:10 छतसि क्हिल तोइ नोक्सन् तरिब् आरे, क्हि टिबै धिं ङाँर ह्रिंमैं खरिब् आरे।
PSA 91:11 तलेबिस्याँ प्रबै घ्याँजरे क्हिलाइ जोगेबर खीजी ह्रोंसए स्वर्गदूतमैं कुलब्मुँ।
PSA 91:12 क्हिए प्हले युँमार आथुररिगे बिसि स्वर्गदूतमैंइ क्हिलाइ यो-योर्न तोब्मुँ।
PSA 91:13 सिंह नेरो गोमनलाइ क्हिजी प्लेब्मुँ; भखर्बै सिंह नेरो प्हुरिलाइ क्हिइ प्हले न्होंर प्लेवाब्मुँ।
PSA 91:14 “चइ ङने म्हाँया लबइले ङइ चए दुःखउँइँले फ्रेमिंब्मुँ, चइ ङए मिं किंइमुँ, छतसि ङइ चए रक्षा लब्मुँ।
PSA 91:15 चइ ग्वार ह्रिमा ङइ चलाइ ज्वाफ पिंब्मुँ; चए दुःखर ङ चने बालु तब्मुँ; चए दुःखउँइँले ङइ फ्रेमिंब्मुँ, धै चलाइ थेब् लब्मुँ।
PSA 91:16 ह्रिंबै छ्ह पिंसि ङइ चलाइ सन्तोक् लमिंब्मुँ धै चलाइ जोगेमिंब्मुँ,” बिसि ङइ दर्शन पिंब्मुँ।
PSA 92:1 प्रिबै त्हिंइर प्रिंबै क्वे घ्रि। ओ ताँन् भन्दा थेबै परमेश्‍वर, क्हिए मिंर क्वे प्रिंब नेरो याहवेहलाइ धन्यबाद पिंब बेल्‍ले छ्याँबै ताँ ग।
PSA 92:2 ङिए फिर क्हिजी लबै खोंयोंइ आनुबै म्हाँयाए बारेर न्हाँगर प्रिंब, धै म्हुँइँसर क्हि भर लल् खाँबै परमेश्‍वर ग बिसि बयन लब,
PSA 92:3 झाइले तार च्यु मुँबै सारङ्गी नेरो बीणा ह्रादै क्हिए मिं क्वेब बेल्‍ले छ्याँबै ताँ ग।
PSA 92:4 तलेबिस्याँ ओ याहवेह, क्हिजी ह्रोंसए केमैंउँइँले ङए सैं तोंल् लमिंइमुँ; क्हिए योजी लबै केमैं म्रोंसि ङ बेल्‍ले सैं तोंदै क्वे प्रिंम्।
PSA 92:5 ओ याहवेह, क्हिजी लबै केमैं कति थेब मुँ! क्हिए बिचारमैं कति गैरु मुँ!
PSA 92:6 दिलेया च्हैंब-मैंब लल् आखाँबै म्हिइ चु ताँ क्होल् आखाँ; आमादुइ चु ताँ क्होल् आखाँ।
PSA 92:7 दुष्‍ट म्हिमैं छि धोंले मौलिदिलेया धै आछ्याँबै के लब्मैंल बिब् धों मैंब् धों तलेया, चमैं युगुर्ले नास तयाब्मुँ।
PSA 92:8 दिलेया ओ याहवेह, क्हि खोंयोंन् बिलै नुबै क्‍ल्‍ह्‍योर मुँ।
PSA 92:9 ओ याहवेह, क्हिए शत्तुरमैं क्ह्रोंसेंन्ले नास तब्मुँ; दुष्‍ट म्हिमैं ताँन् सग्याँ प्हुग्याँ तयाब्मुँ।
PSA 92:10 ङ बिस्याँ क्ह्‍योंर्बै साँढे धोंले क्हिजी ङए भों थेब लमिंब्मुँ; छ्युगु फोसि ङलाइ त्हाँइमुँ।
PSA 92:11 ङए शत्तुरमैं हार्दिब ङए मिइ म्रोंइमुँ; ङए शत्तुरमैं ल्हावाबै ताँ ङए न्हइ थेइमुँ।
PSA 92:12 ठिक के लबै म्हिमैं बिस्याँ छोग्रए धुँ धोंले मौलदिम्; लेबनानल कोंर्बै थेबै देवदारु सिं धुँ धोंले चमैं थेब त-तै ह्‍याब्मुँ।
PSA 92:13 याहवेहजी च म्हिमैंलाइ ह्रोंसए धिंर रुँइँइमुँ; चमैं ङ्योए परमेश्‍वरए मन्दिरर मौलिदिब्मुँ।
PSA 92:14 खिब् तयालैया चमैंइ रो ल्हें रोब्मुँ; चमैं ताजा नेरो पिंक्यो ब्योंब् तरिब्मुँ,
PSA 92:15 धै “याहवेह स्वाब मुँ; खी ङ रक्षा लमिंबै पारा ग, धै खीजी आछ्याँबै के खोंयोंइ आल!” बिसि बयन लब्मुँ।
PSA 93:1 याहवेहजी ग्याल्स लमुँ! म्रुँइ खिब् धों तबै क्वें खीजी खिम्, फगि खिसि भों खब् धोंले याहवेह बेल्‍ले शक्‍ति मुँब मुँ। पृथ्बीए तें बेल्‍ले भोंब् मुँ, च खोंयोंइ छाइ-छुइ तरिब् आरे।
PSA 93:2 ओ याहवेह, क्हि टिबै राजगद्दि स्योंम् ओंनोंन् भोंन्ले थेंइमुँ, क्हि ओंसों ओंनोंन् मुँल।
PSA 93:3 ओ याहवेह, मा ङ्युँइमैं प्ल्हों खइमुँ, चए भेल्कमैं बेल्‍ले ओरइमुँ, चए थेबै भेल्कमैं प्ल्हों खइमुँ।
PSA 93:4 दिलेया चए कै भन्दा, थेबै मा ङ्युँइए भोंबै भेल्कमैं भन्दै या, ताँन् भन्दा क्होंवाइ टिबै याहवेह बेल्‍ले भोंब मुँ।
PSA 93:5 क्हिजी पिंबै ठिमैं ताँनइ भर लल् खाँब मुँ। ओ याहवेह, क्हिए धिं खोंयोंन् बिलै पबित्र मुँ।
PSA 94:1 ओ याहवेह, क्हिजी आछ्याँबै के लब्मैंलाइ दण्ड पिंम्, ह्रोंसए ह्रिस उँइँन्!
PSA 94:2 ओ पृथ्बीर्बै नियाधिश रेत्ति; थेब् प्हैंब्मैंइ लबै केए दण्ड चमैंलाइ पिंन्!
PSA 94:3 ओ याहवेह, दुष्‍टमैं खोंयों समा, दुष्‍टमैं खोंयों समा सैं तोंरिल् योंब्मुँ?
PSA 94:4 चमैं प्हैंसि ताँ लरिम्; दुष्‍ट म्हिमैं थेब् प्हैंरिमुँ।
PSA 94:5 ओ याहवेह, क्हिए म्हिमैंलाइ चमैंइ प्लेम्, धै क्हिजी त्हाँबै म्हिमैंलाइ ह्रुगिदिम्।
PSA 94:6 म्हरेस्यो नेरो बिदेशिमैंलाइ चमैंइ सैम्, छलेन आबा आरेब्मैंलाज्यै या सैम्;
PSA 94:7 “याहवेहजी आम्रों; याकूबए परमेश्‍वरजी वास्ता आल,” बिसि चमैंइ बिमुँ।
PSA 94:8 ओ ङए म्हिमैंए न्होंर्बै च्हैंब् मैंब् लल् आखाँब्मैं, मैंन्दि! ओ मुर्खमैं, क्हेमैं खोंयों च्हैंब् मैंब् लल् खाँब्मैं तमुँ?
PSA 94:9 न्ह बनेमिंबै परमेश्‍वरजी ङ्योए ताँ आथे रो वा? मि बनेमिंबै परमेश्‍वरजी आम्रों रो वा?
PSA 94:10 अरू ह्रेंमैंलाइ दु:ख पिंबै परमेश्‍वरजी दण्ड आपिं रो वा? म्हिमैंलाइ लोमिंबै परमेश्‍वरने बुद्धिए खाँचो तम् रो वा?
PSA 94:11 याहवेहजी म्हिमैंए सैंर्बै ताँमैं क्होम्, चमैं केर आफेब्मैं ग बिसि खीजी सेम्।
PSA 94:12 ओ याहवेह, क्हिजी तार झोंबै म्हि नेरो ह्रोंसए ठिमउँइँले क्हिजी लोमिंबै म्हिइ आशिक योंम्।
PSA 94:13 दुष्‍टमैंए ल्हागिर होल्दों आतन् समा ठिक के लब्मैंए फिर दुःख तलेया क्हिजी छिं ङ्हाँल् पिंम्।
PSA 94:14 तलेबिस्याँ याहवेहजी ह्रोंसए म्हिमैंलाइ भ्योंरिब् आरे; खीजी ह्रोंसजी त्हाँबै म्हिमैं पिरिब् आरे।
PSA 94:15 न्याय लब्मैंइ धबै ठिक निसाफ लब्मुँ, धै छ्याँबै सैं प्ह्‍याब्मैं ताँन् च ठिक निसाफए लिलि प्रब्मुँ।
PSA 94:16 दुष्‍ट म्हिमैंए बिरोधर ङने बालु खाब् रामुँ? आछ्याँबै के लब्मैंए बिरोधर ङए ख लसि खाब् रामुँ?
PSA 94:17 याहवेहजी ङ आल्होस्याँ ङए सो उँयाँनन् तोइ कै आथेबै क्रोंर ह्‍यामल।
PSA 94:18 ओ याहवेह, “ङए प्हले प्लेइमुँ” बिसि ङ‌इ बिमा क्हिए खोंयोंइ आनुबै म्हाँयाजी ङ थौंदिमिंइ।
PSA 94:19 ङए सैंर बेल्‍ले न्हुँ तमा क्हिजी ङए सैं क्होमिंसि तोंल् लमिंइ।
PSA 94:20 दुष्‍ट क्रथे मिंथेमैं क्हिने बालु क्ह्रिल् खाँम्‍मा? ह्रोंसइ बनेबै निसाफमैंउँइँले चमैंइ अनिया लम्।
PSA 94:21 ठिक के लब्मैंए बिरोधर चमैं जाल रोम्, धै तोइ छ्याब् आरेबै म्हिलाइ सैवाम्।
PSA 94:22 दिलेया याहवेह ङए किल्‍ला तमिंइमुँ, छतसि ङए परमेश्‍वर ङ रक्षा लमिंबै पारा ग।
PSA 94:23 चमैंइ लबै पाप खीजी चमैंए फिर्न कुमिंब्मुँ, धै दुष्‍ट केमैं लबइले चमैंलाइ नास लवाब्मुँ; ङ्योए याहवेह परमेश्‍वरजी चमैं नास लवाब्मुँ।
PSA 95:1 खो, याहवेहए मिंर ङ्यो क्वे प्रिंले! ङ्यो रक्षा लमिंबै पारा ङाँर ह्‍यासि सैं तोंदै कै तेसि ओरले!
PSA 95:2 धन्यबाद पिंदै खीए ओंसों ह्‍याले, सैं तोंदै कै तेसि खीए मिं थेब् लले!
PSA 95:3 तलेबिस्याँ याहवेह बेल्‍ले थेबै परमेश्‍वर ग, ताँन् देवतामैंए फिर्बै थेबै म्रुँ खीन् ग।
PSA 95:4 खीए योर पृथ्‍बीर्बै गैरु-गैरु क्‍ल्‍ह्‍योमैं मुँ, नु-नुबै क्लिं क्हाँए च्होमैं या खीलन् ग।
PSA 95:5 मा ङ्युँइ खीलन् ग, खीजीन् च बनेब् ग, धै कार क्‍ल्‍ह्‍यो या खीए योजीन् बनेब् ग।
PSA 95:6 खो, क्र कुरसि खीलाइ फ्योले धै ङ्यो बनेबै याहवेहए ओंसों च्हि तुँले!
PSA 95:7 तलेबिस्याँ खीन् ङ्योए परमेश्‍वर ग, धै ङ्यो खीए खर्गर्बै क्युमैं, नेरो खीए म्हिमैं ग। तिंयाँ क्हेमैंइ खीए कै थेद्!
PSA 95:8 याहवेहजी छले बिमुँ, “क्हेमैंए खेमैंइ मेरीबा नेरो क्यु आयोंबै क्‍ल्‍ह्‍योर्बै मस्साहर लब् धोंले ह्रोंसए सैं सारो आलद्।
PSA 95:9 चर ङइ लबै केमैं क्हेमैंए खेमैंइ म्रोंसे या चमैंइ ङए जाँच लइ।
PSA 95:10 छतसि च त्हेर्बै म्हिमैंने ङ प्लिच्यु बर्ष समा बेल्‍ले ह्रिस खसि बिइ, ‘चु म्हिमैंइ ङए घ्याँ आसेइमुँ, चुमैंए सैं ङ ङाँइले ह्रेंगो तयाइमुँ।’
PSA 95:11 छतसि ‘ङइ भों न्हल् पिंबै क्‍ल्‍ह्‍योर चुमैं खोंयोंइ होंल् योंरिब् आरे!’ बिसि ह्रिसर ङइ कसम चइ।”
PSA 96:1 ‍‍एयाहवेहए मिंर छारा क्वे घ्रि प्रिंन्; पृथ्बी तिगोंर्बै म्हिमैंइ याहवेहए ल्हागिर क्वे प्रिंन्।
PSA 96:2 याहवेहए ल्हागिर क्वे प्रिंन्, खीए मिं क्वेद्; खीजी ङ्योलाइ जोगेमिंइमुँ बिसि त्हिंइ ह्रोंसे बिप्रद्!
PSA 96:3 खी बेल्‍ले थेब मुँ बिसि अरू ह्रेंमैंए म्हाँजोर बिप्रद्, ताँन् म्हिमैंए म्हाँजोर खीजी लबै औदिबै केमैंए बयन लद्!
PSA 96:4 तलेबिस्याँ याहवेह बेल्‍ले थेब मुँ, धै खीए मिं बेल्‍ले नुल्‍ले क्वेल् त्हुब मुँ; ताँन् देवतामैंल् भन्दा खीए मिं बेल्‍ले क्वेल् त्हुम्।
PSA 96:5 तलेबिस्याँ अरू ह्रेंमैंइ म्हाँदिबै देवतामैं कु मत्‍त्रे ग, दिलेया याहवेहजीम् मु बनेइ।
PSA 96:6 खीए उँइँर इजेत नेरो मान मुँ; खीए पबित्र क्‍ल्‍ह्‍यो म्रोंमा खी कति भोंब मुँ, कति छ्याँब् मुँ बिसि सेल् खाँम्।
PSA 96:7 ओ ह्रें-ह्रेंमैंए परवा, याहवेहए बयन लद्! याहवेहए मिं बेल्‍ले थेब् मुँ, खी बेल्‍ले भोंब् मुँ बिसि बयन लद्!
PSA 96:8 खीए मिंलाइ ङ्‍हेंबै मान याहवेहलाइ पिंन्; भेटि किंसि खीए ह्‍युमैंर खो!
PSA 96:9 खी पबित्र नेरो छ्याँब तब् सेसि याहवेहलाइ फ्योद्; पृथ्बी तिगोंर्बै म्हिमैं खीए उँइँर थरथरले त्हारद्।
PSA 96:10 “याहवेहजी ग्याल्स लम्! खीजीम् पृथ्‍बी भोंब् लसि थेंमिंइमुँ, छतसि चलाइ लाल् आखाँ; खीजी खाबलाज्यै आफेलल्‍ले ताँन् म्हिमैंए निसाफ लब्मुँ,” बिसि अरू ह्रेंमैंए म्हाँजोर बिद्!
PSA 96:11 मु आनन्द तरिगे, पृथ्बी सैं तोंरिगे; मा ङ्युँइ नेरो चर मुँबै तोन्दोंरि सैं बेल्‍ले तोंरिगे;
PSA 96:12 म्रों नेरो चर मुँबै तोन्दोंरि सै बेल्‍ले तोंरिगे! छलेन क्ह्‍योंर्बै ताँन् सिंधुँमैं आनन्दले याहवेहए उँइँर क्वे प्रिंब्मुँ;
PSA 96:13 तलेबिस्याँ खी युसिन् मुँ, पृथ्बीर मुँबै म्हिमैंए निसाफ लबर खी युसिन् मुँ। ह्‍युलर्बै म्हिमैंए निसाफ खीजी ठिकले लब्मुँ; धै खीजी ह्रेंमैंए निसाफ भर लल् खाँल्‍ले लब्मुँ।
PSA 97:1 याहवेहजी ग्याल्स लम्, पृथ्‍बी सैं तोंरिगे; मा ङ्युँइर्बै कोंमैं सैं तोंरिगे!
PSA 97:2 खीए कारर्ग्युले न्हाँम्स्यो नेरो मिछु खैब मुँ; राजगद्दिर टिसि खीजी ठिक केमैं नेरो ठिक निसाफ लम्।
PSA 97:3 खीए ओंसों ओंसों मि ह्‍यामुँ, धै खीए कारर्ग्यु मुँबै शत्तुरमैं ख्रोंवाम्।
PSA 97:4 खीए कम्‍लि-तिम्‍लिइ ह्‍युलर चारम्; पृथ्‍बीइ म्रोंसि थरथरले त्हारम्।
PSA 97:5 ताँन् ह्‍युलर्बै क्ल्हे याहवेहए उँइँर क्योंलों धोंले कोंमैं युलियाम्।
PSA 97:6 खीजी लबै ठिक केमैंए बयन मुइ लम्, धै खी कति थेब मुँ बिसि ताँन् ह्रेंमैंइ म्रोंम्।
PSA 97:7 कु पूजा लब्मैं ताँन् फापिल् त्हुम्, कुलाइ थेबै सै ङ्हाँसि फ्योब्मैं ताँन् फापिल् त्हुम्; छतसि ओ ताँन् देवतामैं, खीए प्हले फ्योद्!
PSA 97:8 ओ याहवेह, क्हिजी ठिक निसाफ लबै ताँ सियोनर्बै म्हिमैंइ थेसि सैं तोंइमुँ, धै यहूदार्बै नाँसमैं सैं तोंइमुँ।
PSA 97:9 तलेबिस्याँ ओ याहवेह, ह्‍युलए फिर ताँन् भन्दा थेबै परमेश्‍वर क्हिन् म्रुँ ग; ताँन् देवतामैं भन्दा थेब क्हिन् मुँ।
PSA 97:10 याहवेहने म्हाँया लब्मैं ताँनइ आछ्याँबै केमैं लब पिवारिगे! तलेबिस्याँ खीजी ह्रोंसए म्हिमैंलाइ रक्षा लमिंम्; धै दुष्‍टमैंए योउँइँले चमैं फ्रेमिंम्।
PSA 97:11 ठिक के लब्मैंए फिर परमेश्‍वरए ह्‍वे चारम्, धै छ्याँबै खों प्ह्‍याब्मैं सैं तोंल् योंब्मुँ।
PSA 97:12 ओ ठिक के लब्मैं, याहवेहने सैं तोंन्, धै खीए पबित्र मिंर धन्यबाद पिंन्!
PSA 98:1 भजन घ्रि। याहवेहए मिंर छारा क्वे प्रिंन्, तलेबिस्याँ खीजी औदिबै केमैं लइमुँ! खीए क्योलो यो नेरो पबित्र योजी ह्रोंसए म्हिमैं दु:खउँइँले फ्रेमिंइमुँ।
PSA 98:2 खीए त्हाँबै म्हिमैं जोगेमिंब याहवेहजी उँइँमिंइमुँ; धै खीजी ह्रोंसए ठिक केमैं ह्रें-ह्रेंमैंए ओंसों उँइँमिंइमुँ।
PSA 98:3 इस्राएलए परवाए फिर लबै खोंयोंइ आनुबै म्हाँया नेरो चमैंइ खोंयोंइ खीए फिर भर लल् खाँम् बिसि याहवेहजी मैंइमुँ। ङ्योए परमेश्‍वरजी जोगेमिंबै केमैं ह्‍युलर्बै ताँन् साँदर टिबै ह्रेंमैंइ म्रोंइमुँ।
PSA 98:4 ओ ताँन् ह्‍युलर्बै म्हिमैं, सैं तोंदै याहवेहए मिंर कै तेद्; सैं तोंदै क्वे प्रिंसि खीए जयजय लद्।
PSA 98:5 बीणा ह्रादै क्ह्‍युरल्‍ले भजन प्रिंन्, बीणा ह्रादै याहवेहए मिं क्वेद्!
PSA 98:6 थुतुरु नेरो क्युए रु ह्रादै याहवेह म्रुँए उँइँर सैं तोंदै कै तेसि ओरद्।
PSA 98:7 मा ङ्युँइ नेरो चर मुँबै ताँन् सो प्ह्‍याबै सैमैंइ थेबै कैले खीए मिं क्वेरिगे; छलेन पृथ्बी नेरो चर मुँबै तोन्दोंरि सैमैंज्यै या थेबै कै तेरिगे।
PSA 98:8 स्योंमैंइ योप्ल्ह ह्रारिगे; कोंमैंइ सैं तोंदै तिखेर्न क्वे प्रिंरिगे;
PSA 98:9 चमैं ताँनइ याहवेहए उँइँर क्वे प्रिंरिगे, तलेबिस्याँ निसाफ लबर खी पृथ्बीर युम्। खीजी ह्‍युलर ठिक निसाफ लब्मुँ, धै ह्रें-ह्रेंर्बै म्हिमैं खाबै आफेलल्‍ले खीजी ठिक निसाफ लब्मुँ।
PSA 99:1 याहवेहजी ग्याल्स लम्; छतसि ह्रें-ह्रेंमैं त्हाररिगे! करूबमैंए म्हाँजोर खी क्हुँम्; पृथ्बी लारिगे!
PSA 99:2 सियोनर याहवेह थेब मुँ; ताँन् ह्रेंमैंए फिर खी बेल्‍ले थेब मुँ।
PSA 99:3 बेल्‍ले मान लल् त्हुबै क्हिए मिं चमैंइ थेब् लरिगे! खी पबित्र मुँ!
PSA 99:4 म्रुँ बेल्‍ले भोंब मुँ, ठिक निसाफ खीजी खोम्। क्हिजी खाबै आफेलल्‍ले निसाफ लमुँ; याकूबए सन्तानमैंए फिर क्हिजी ठिक निसाफ नेरो ठिक के लइमुँ।
PSA 99:5 ङ्योए याहवेह परमेश्‍वरए मिं क्वेद्; धै खीए प्हले फ्योद्! तलेबिस्याँ खी पबित्र मुँ!
PSA 99:6 मोशा नेरो हारून खीए खेगिमैं मुँल, खीए मिं किंब्मैं न्होंर शमूएल मुँल। चमैंइ याहवेहने ग्वार ह्रिमा खीजी चमैंलाइ ज्वाफ पिंइ।
PSA 99:7 न्हाँम्स्योए त्हो तसि खी चमैंने पोंइ; खीजी बिबै ताँमैं नेरो ठिममैं चमैंइ म्हाँदिइ।
PSA 99:8 ओ ङिए याहवेह परमेश्‍वर, क्हिजी चमैंलाइ ज्वाफ पिंइ; क्हिजी चमैंइ लबै आछ्याँबै केमैंए दण्ड पिंलेया चमैंलाइ क्षमा पिंबै परमेश्‍वर क्हि ग।
PSA 99:9 ङ्योए याहवेह परमेश्‍वरए मिं थेब् लद्, धै खीए पबित्र कोंर खीए मिं क्वेद्; तलेबिस्याँ ङ्योए याहवेह परमेश्‍वर पबित्र मुँ।
PSA 100:1 धन्यबाद पिंबै भजन घ्रि। ओ ताँन् ह्‍युलर्बै म्हिमैं याहवेहए मिंर सैं तोंदै कै तेसि ओरद्!
PSA 100:2 सैं तोंदै याहवेह फ्योद्! सैं तोंबै क्वे प्रिंसि खीए उँइँर खो!
PSA 100:3 याहवेहन् परमेश्‍वर ग बिसि सेद्! खीजीन् ङ्योलाइ खीए म्हिमैं तल् पिंइ, ङ्यो खीलन् ग, छतसि ङ्यो खीए म्हिमैं नेरो खीए खर्गर्बै क्युमैं ग।
PSA 100:4 धन्यबाद पिंदै खीए तगरउँइँले न्होंर होंन्, धै खीए मिं क्वेदै खीए ह्‍युमैंर ह्‍याद्! धै खीए मिं थेब् लदै धन्यबाद पिंन्,
PSA 100:5 तलेबिस्याँ याहवेह स्वाब मुँ, खीए म्हाँया खोंयोंन् बिलै तरिमुँ, पुस्ता-पुस्ता समान् खीए फिर ङ्योइ भर लल् खाँम्।
PSA 101:1 दाऊदए भजन घ्रि। क्हिजी लबै खोंयोंइ आनुबै म्हाँया नेरो ठिक निसाफए बारेर ङ क्वे प्रिंब्मुँ; ओ याहवेह, क्हिए मिंर ङ क्वे प्रिंब्मुँ।
PSA 101:2 न्ह क्रों मि क्रोंले ङ छ्याब् आरेबै छ्ह थोब्मुँ। ङ ङाँर क्हि खोंयों युमुँ? छ्याँबै बानि ब्योर लसि ङ ह्रोंसए धिंर छ्ह थोब्मुँ।
PSA 101:3 केर आफेबै सैमैं ङ‍ए उँइँर थेंरिब् आरे। दुष्‍ट के लब्मैंलाइ ङ आखो; छाबै म्हिमैंने ङ प्ररिब् आरे।
PSA 101:4 आछ्याँबै सैं प्ह्‍याब्मैंने ङ ह्रेंगोन् टिब्मुँ; दुष्‍ट केमैं ङ खोंयोंइ लरिब् आरे।
PSA 101:5 न्हों-न्हों ह्रोंसए ङ्‍हेब्मैंए ताँ लबै म्हिलाइ ङइ नास लब्मुँ। ह्रोंसन् ह्रब् सेब् प्हैंसि थेब् प्हैंबै म्हिलाइ ङ सैदिरिब् आरे।
PSA 101:6 भर लल् खाँबै म्हिमैं ङने बालु टिल् योंरिगे बिसि चमैंए फिर ङए मि छरिमुँ; ठिक घ्याँर प्रबै म्हिइ ङए सेवा लब्मुँ।
PSA 101:7 छलु म्हिलु लबै म्हि ङए धिंर टिल् योंरिब् आरे; स्योलिबै ताँ पोंबै म्हि ङए उँइँर टिल् योंरिब् आरे।
PSA 101:8 ह्‍युलर्बै ताँन् दुष्‍ट म्हिमैं ङइ न्हाँग ह्रोंसे नास लवाब्मुँ, दुष्‍ट के लब्मैं ताँनलाइ याहवेहए सहरउँइँले ङइ ल्हावाब्मुँ।
PSA 102:1 दुःख तबै त्हेर लबै प्राथना। दुःख तमा याहवेहने ह्रोंसए दुःख ङेम्। ओ याहवेह, ङए प्राथना थेमिंन्; ल्होमिंन् बिसि लबै प्राथना क्हि ङाँर फेनेरिगे!
PSA 102:2 ङए फिर दुःख तमा क्हिए लि ङ ङाँइँले आलोमिंन्! क्हिए न्ह ङ ङाँइ तोमिंन्; धै ङइ ग्वार ह्रिमा ङलाइ युनन् ज्वाफ पिंन्!
PSA 102:3 तलेबिस्याँ मिखु धोंले ङए छ्ह ह्‍यारिइमुँ, धै मिए राबइ ख्रोंब् धोंले ङए ह्रिबमैं ख्रोंइमुँ।
PSA 102:4 ङए खों छि धोंले ङ्योंलोंसि काराह्‍याइमुँ; धै ङ‍इ चब् चबै या म्‍लेयाम्।
PSA 102:5 ङए सैंर ल्हें न्हुँ मुँ, छतसि ङए ज्यु ह्रिब नेरो ट्हुबि मत्‍त्रे तइमुँ।
PSA 102:6 क्यु आयोंबै क्‍ल्‍ह्‍योर्बै खोंगों धोंले ङ घ्रिन् तसि टिइमुँ, तोइ आचैल्‍ले फुह्‍याबै धिंर टिबै खोंगों धों ङ तइमुँ;
PSA 102:7 न्हरु आखसि ङ आरोल्‍ले टिरिइमुँ; धै धिं फिर्बै थुने फ्रेयाबै नमे धों ङ तइमुँ।
PSA 102:8 ङए शत्तुरमैंइ त्हिंतिमिन् ङलाइ स्यारम्; ङलाइ प्ह्रसि निस्युब्मैंइ ङ खै ङहाँल् त्हुइमुँ चमैंया छान् ङ्हाँल् त्हुरिगे बिसि आगुलाइ सराप पिंम्।
PSA 102:9 क्हि ह्रिस खबइले चबै सै धोंले ङइ मेब्रो चइमुँ,
PSA 102:10 धै मिग्लि कोंबै क्यु थुँइमुँ। तलेबिस्याँ क्हिजी ङलाइ क्वेसि तिराइ भ्योंवाइमुँ।
PSA 102:11 ङए छ्ह ङेसार्बै छरि धोंन् तब् ग; ङ छि धोंले ङ्योंलोंयाइमुँ।
PSA 102:12 दिलेया ओ याहवेह, क्हि खोंयोंन् बिलै राजगद्दिर टिरिम्; पुस्ता-पुस्ता समा क्हिलाइ मैंरिब्मुँ।
PSA 102:13 क्हि राब्मुँ धै सियोनाए फिर ल्हयो खब्मुँ; सियोनाए फिर ल्हयो खबै त्हे तोगोन् ग; तौदिबै त्हे फेखइमुँ।
PSA 102:14 सियोन नास तयाल् खाँलेया क्हिए के लबै म्हिमैंइ चर्बै युँममैं म्हाँया लम्; धै चर्बै त्हुलए फिरै या ल्हयो खम्।
PSA 102:15 याहवेहए मिंर ताँन् ह्रेंमैं ङ्हिंब्मुँ, पृथ्बीर्बै ताँन् म्रुँमैंइ क्हिए मिं थेब् लब्मुँ।
PSA 102:16 तलेबिस्याँ याहवेहजी धबै सियोन बनेमिंब्मुँ; झाइले ह्रोंसइ योंबै मानर खी युब्मुँ।
PSA 102:17 दु:ख योंब्मैंइ लबै प्राथना खीजी थेब्मुँ; धै चमैंए प्राथना थेलेया आथेब् धों आल।
PSA 102:18 “नुबै क्‍ल्‍ह्‍योर मुँबै ह्रोंसए पबित्र क्ल्ह्‍योउँइँले याहवेहजी क्युरु ङ्ह्‍योइ; खीजी स्वर्गउँइँले पृथ्बीर ङ्ह्‍योइ।
PSA 102:19 झेलर च्युथेंब्मैंइ ग्वार ह्रिब खीजी थेइ, धै सिल त्हुबै म्हिमैंलाइ जोगेमिंइ,” बिसि
PSA 102:20 तिंयाँ समा आफिबै म्हिमैंइ याहवेहए मिं थेब् लरिगे धै लिउँइँ खबै पुस्तामैंए ल्हागिर चु ताँ प्ह्रिसि थेंरिगे।
PSA 102:21 छले सियोनर चमैंइ याहवेहए मिंए बयन लरिगे, धै यरूशलेमर खीए मिं थेब् लरिगे।
PSA 102:22 च त्हेर याहवेहए मिं क्वेबर ह्रें-ह्रेंर्बै म्हिमैं नेरो ग्याल्स ग्याल्सर्बै म्हिमैं चर खागु तब्मुँ।
PSA 102:23 ङए छ्ह थोदै लमा खीजी ङए भों नुवाइमुँ; धै ङए छ्ह रिंठि लमिंइ।
PSA 102:24 छतसि ङइ बिइ, “ओ ङए परमेश्‍वर, आधा बैंसार्न ङलाइ आबोमिंन्।” पुस्ता पुस्ता समा क्हिए बर्षमैं तरिम्!
PSA 102:25 स्योंमन् क्हिजी पृथ्बीए जग झोंमिंइ, धै मु क्हिए योजीन् बनेब् ग।
PSA 102:26 च सैमैं नास तयाब्मुँ, क्हि बिस्याँ खोंयोंन् बिलै तरिब्मुँ; क्वें धोंले चमैं स्योब तयाब्मुँ। क्वें फेर्दिब् धोंले क्हिजी प्लिसि फेर्दिमिंब्मुँ, धै चमैं ताँन् भ्योंवाब्मुँ।
PSA 102:27 दिलेया क्हि बिस्याँ खोंयोंइ आफेर्दि, धै क्हिए छ्ह खोंयोंइ आनु।
PSA 102:28 ङिए च्ह-च्हमिमैं क्हिए रक्षा योंसि टिब्मुँ; धै चमैंए प्हसेमैं या तोइ आतल्‍ले क्हिए उँइँर टिरिब्मुँ।
PSA 103:1 दाऊए भजन घ्रि ओ ङए सो, याहवेहए मिं क्वेद्; ओ ङए खों, खीए पबित्र मिं थेब लद्!
PSA 103:2 ओ ङए सो, याहवेहए मिं क्वेद्; धै खीजी लबै छ्याँबै केमैं आम्‍लेद्।
PSA 103:3 क्हिइ लबै ताँन् छेरन् ङ्हाँबै केमैं खीजी क्षमा लमिंम्; धै क्हिए ताँन् नब-छब सल् लमिंम्,
PSA 103:4 खीजी क्हि कालउँइँले जोगेमिंम्; धै मुकुट कुब् धोंले खीए खोंयोंइ आनुबै म्हाँया नेरो क्हिए फिर खीजी ल्हयो खम्।
PSA 103:5 क्व्रे धोंले क्हिए छ्ह धबै छारा तरिगे बिसि छ्याँ-छ्याँबै सैमैं पिंसि खीजी क्हिलाइ सैं तोंन् लमिंम्।
PSA 103:6 आगुइ क्र ओलै आपिंब्मैं ताँनए ल्हागिरि याहवेहजी ठिक के नेरो निसाफ लमिंम्।
PSA 103:7 खीजी मोशालाइ ह्रोंसए घ्याँर प्रबर ल्हैदिइ; धै इस्राएलीमैंए उँइँर खीजी थे-थेबै केमैं लसि उँइँइ।
PSA 103:8 याहवेह ल्हयो खब नेरो दयाम्हाँया मुँबै परमेश्‍वर ग, युनन् ह्रिस आखब, ताँनए फिर खोंयोंइ आनुबै म्हाँया लब नेरो भर लल् खाँब मुँ।
PSA 103:9 खीजी खोंयोंइ छ्याब् आल्हैदिरि, धै खीए खोंर खोंयोंन् बिलै ह्रिस आथेंरि।
PSA 103:10 ङ्योइ कति थेबै पाप ललेया ङ्योइ लबै पापए दण्ड खीजी ङ्योलाइ आपिं, धै ङ्योइ आछ्याँबै के ललेया ङ्योइ लबै छेरन् ङ्हाँबै केमैंए दण्ड खीजी आपिं।
PSA 103:11 तलेबिस्याँ पृथ्‍बीउँइँले मु कति नुब मुँ, खीलाइ मान लब्मैंए फिर खीए खोंयोंइ आनुबै म्हाँया या च्हगन् थेब मुँ।
PSA 103:12 स्यारउँइँले (पूर्व) न्हुँर (पश्‍चिम) कति ह्रेंगो मुँ, ङ्योइ लबै छेरन् ङ्हाँबै केमैं खीजी च्हगन् ह्रेंगो स्योवाइमुँ।
PSA 103:13 खैले आबाइ ह्रोंसए च्ह च्हमिमैंए फिर ल्हयो खमुँ, छलेन खीलाइ मान लब्मैंए फिर याहवेहजी ल्हयो खम्।
PSA 103:14 तलेबिस्याँ ङ्यो खैले बनेइ बिब खीजी सेइमुँ, ङ्यो स त्हुल मत्‍त्रे ग बिबै या खीजी सेइमुँ।
PSA 103:15 म्हिए छ्ह छि धों तब् ग, क्ह्‍योंर्बै ट धोंले च प्हारसि म्हारम्,
PSA 103:16 दिलेया खैंइ लवामा च खारयाम्, धै च चुर दने मुँल बिबै या खाबज्यै आसे।
PSA 103:17 दिलेया खीए मान लब्मैं खीजी खोंयोंन् बिलै म्हाँया लरिम्। धै चमैंए च्ह-क्वेंमैं,
PSA 103:18 खीने फैबै बाछा पूरा लब्मैं, नेरो खीजी बिबै के लब्मैं ताँनए ल्हागिर खी क्वेंल् खाँब् तरिब्मुँ।
PSA 103:19 याहवेहए राजगद्दि स्वर्गर मुँ, ताँनए फिर खीजी ग्याल्स लम्।
PSA 103:20 ओ खीजी बिबै ताँमै ङिंबै शक्‍ति मुँबै स्वर्गदूतमैं, याहवेहए मिं क्वेद्।
PSA 103:21 ओ स्वर्गर्बै ताँन् सेनामैं, खीए सैंर मैंब् धोंबै के लबै स्वर्गदूतमैं, याहवेहए मिं क्वेद्।
PSA 103:22 ओ खीजी बनेबै तोंन्दोरि सैमैं, खीजी ग्याल्स लबै ताँन् क्ल्ह्‍योर, याहवेहए मिं क्वेद्! ओ ङए सो, याहवेहए मिं क्वेद्!
PSA 104:1 ओ ङए सो, याहवेहए मिं क्वेद्! ओ ङए याहवेह परमेश्‍वर, क्हि बेल्‍ले थेब मुँ! क्वें खिब् धोंले क्हिजी मान नेरो इजेत पैरेइमुँ।
PSA 104:2 क्हिजी क्वें खिब् धोंले चारबै ह्‍वे पैरेइमुँ, क्हिजी तम्बु धोंले मु टौंदिइमुँ।
PSA 104:3 खीजी ह्रोंसए नुबै कोठार्बै दलिनमैं क्युमैंए फिर थेंम्; खीजी न्हाँमस्योमैं ह्रोंसए रथ बनेम्; खी खैंए प्ह्‍यामैंर प्ररिम्।
PSA 104:4 खीजी खैंलाइ ह्रोंसए दूत, धै मिए राब ह्रोंसए के लब्मैं बनेम्।
PSA 104:5 पृथ्बी खोंयोंन् बिलै भोंब तरिगे बिसि खीजी चलाइ जगए फिर थेंइ।
PSA 104:6 क्हिजी चलाइ क्वेंइ धोंले गैरु क्युइ हुमिंइ; धै कोंमैए फिफि क्यु फेनेइ।
PSA 104:7 दिलेया क्हिजी हौदिमा क्यु न्हेयाइ, क्हिए कै थेबै तोदोंन् च क्यु स्योयाइ।
PSA 104:8 धै कोंमैंए फिफिउँइँले ब्याँसि तदै च क्यु क्हिजी तयार लथेंबै क्‍ल्‍ह्‍योर तेयाइ।
PSA 104:9 क्युइ धबै पृथ्‍बी आप्ल्हुँरिगे बिसि क्युइ ङ्वेल् आखाँबै साँद क्हिजी थेंमिंइ।
PSA 104:10 खीजी खोल्सजरे क्युए धरु कुलमुँ; कोंमैंए म्हाँजोउँइँले च क्यु बग्दिम्।
PSA 104:11 चेर्बै ताँन् सो प्ह्‍याबै सैमैंलाइ चमैंइ क्यु पिंम्; क्ह्‍योंर्बै गधामैंज्यै चर्बै क्युन् थुँम्।
PSA 104:12 चमैंए रेजरे मुर्बै नमेमैंइ च्हों थाम्; हाँगमैंए म्हाँजोर चमैंइ क्वे प्रिंम्।
PSA 104:13 ह्रोंसए नुबै कोठामैंउँइँले खीजी कोंजरे नाँ कुल्मिंम्; खीजी नाँ कुल्मिंबइले पृथ्बीर रा-रोमैंइ प्लिंमुँ।
PSA 104:14 खेदोमैंए ल्हागिर छि नेरो म्हिमैंए ल्हागिर ट्हा ट्हुमैं खीजी म्‍लोमिंम्। धै सउँइँले म्हिमैंइ चबै सैमैं रोब्मुँ,
PSA 104:15 अँगुरए प्हाइ म्हिमैंए सैं तोंन् लब्मुँ, छ्युगुइ म्हिमैंए लि वाँ-वाँ ब्योंल् लब्मुँ धै म्हिमैंए खों भोंब् लबर खीजी क्हें पिंम्।
PSA 104:16 लेबनान कोंर्बै देबदारुमैंलाइ याहवेहजी ल्हें क्यु पिंइमुँ, चमैं खीजी रुँइँबै सिंधुँमैं ग।
PSA 104:17 चर नमेमैंइ च्हों थामुँ; चर बकुलइ धिं बनेम्।
PSA 104:18 नुब्-नुबै कोंमैं क्ह्‍योंर्बै रमैं टिबै ल्हागिर ग; पारामैं क्ह्‍योंर्बै भइँकोदलेमैंए ल्हागिर ग्वार योंबै क्‍ल्‍ह्‍यो ग।
PSA 104:19 लयाँइ औंसि-पूर्णि फेलम्; त्हिंयाँइ ह्रोंस लिबै त्हे था सेम्।
PSA 104:20 क्हिजी मिछु खैल् लम्, धै म्हुँइँस तम्, झाइले क्ह्‍योंर्बै ताँन् सो प्ह्‍याबै सैमैं त्होंखम्।
PSA 104:21 चेंमैंइ ह्रोंसए चबै सै म्हैबर ङ्हेम्, चइ परमेश्‍वरउँइँले ह्रोंसए चबै सैमैं म्हैम्।
PSA 104:22 त्हिंयाँ खमा सिंहमैं ह्रोंसए रोर ह्‍यासि रोम्।
PSA 104:23 झाइले म्हिमैं ह्रोंसए के लबर त्होंम् धै ङेस समा के लरिम्।
PSA 104:24 ओ याहवेह, क्हिजी लबै केमैं कति ल्हें मुँ! चु ताँन् सैं क्हिजी ह्रोंसए बुद्धिइ बनेइ; क्हिजी बनेबै तोन्दोंरि सैइ पृथ्बी प्लिंइमुँ।
PSA 104:25 चर बेल्‍ले थेबै मा ङ्युँइ मुँ, चर च्योलै आखाँबै थेब च्योंब सो प्ह्‍याबै सैमैं मुँ।
PSA 104:26 चर क्यु झाजमैं प्रम्, धै चर लिव्यातन या मुँ, क्हिजी चलाइ चर क्ल्योंबै ल्हागिर बनेइ।
PSA 104:27 फो ख्रेंबै त्हेर क्हिजी चमैंलाइ चबै सै पिंब्मुँ बिसि चमैं ताँनइ क्हिए घ्याँ ङ्ह्‍योरिम्।
PSA 104:28 क्हिजी चमैंलाइ चबै सै पिंमा चमैंइ खुम्; क्हिजी ह्रोंसए यो प्ल्हमा चमैं लिंबै सैमैं चसि म्रेंम्।
PSA 104:29 क्हिजी ह्रोंसए लि लोमा चमैं ङ्हिंम्; क्हिजी चमैंए सो किंमा चमैं सियाम् धै धबै सर्न कोंयाम्।
PSA 104:30 क्हिजी ह्रोंसए प्ल्ह कुलमुँ, धै चमैंलाइ बनेमुँ, धै क्हिजी पृथ्बीलाइ छार लमिंम्।
PSA 104:31 याहवेहए मिं खोंयोंन् बिलै थेब् तरिगे; ह्रोंसइ लबै केमैंर याहवेह सैं तोंरिगे,
PSA 104:32 खीजी पृथ्बीर ङ्ह्‍योमा च त्हारम्, खीजी छुइमा कोंमैंउँइँले मिखु त्होंम्!
PSA 104:33 ङए छ्ह तिगोंन् याहवेहए मिंर ङ क्वे प्रिंरिब्मुँ; ङ सोन् समा ङए परमेश्‍वरए क्वे प्रिंब्मुँ।
PSA 104:34 ङइ खीए बारेर मैंबै ताँमैं खीजी खोरिगे, तलेबिस्याँ ङ याहवेहर सैं तोंरिम्।
PSA 104:35 पापिमैं बिस्याँ पृथ्बीउँइँले मेटियारिगे, धै दुष्‍टमैं धबै खोंयोंइ आचैरिगे! ओ ङए सो, याहवेहलाइ धन्यबाद पिंन्! याहवेहए मिं थेब लद्!
PSA 105:1 याहवेहलाइ धन्यबाद पिंन्, खीए प्हलेर ग्वार ह्रिद्; अरू ह्रेंमैंए म्हाँजोर खीजी लबै केमैं बिमिंन्!
PSA 105:2 खीए ल्हागिरि क्वे प्रिंन्, खीए मिं थेब् लद्; खीजी लबै औदिबै केमैंए बयन लद्।
PSA 105:3 खीन् पबित्र मुँ बिसि खीए मिं थेब् लद्; याहवेहलाइ म्हैब्मैंए सैं तोंरिगे।
PSA 105:4 याहवेहनेरो खीए शक्ति म्हैद्; खोंयोंन् बिलै खीलाइ म्हैद्।
PSA 105:5 ओ खीए के लबै म्हि अब्रहामए सन्तानमैं ओ खीजी त्हाँबै याकूबए सन्तानमैं,
PSA 105:6 खीजी लबै औदिबै केमैं मैंन्, खीजी लबै औदिबै केमैं नेरो खीजी लबै निसाफ मैंन्।
PSA 105:7 खीन् याहवेह ङ्योए परमेश्‍वर ग; ह्‍युल् तिगोंन् खीजीन् निसाफ लम्।
PSA 105:8 खीजी ह्रोंसइ फैबै बाछा खोंयोंन् बिलै मैंरिमुँ, खीजी बिथेंबै ताँमैं हजार-हजार पुस्तामैंए ल्हागिर ग।
PSA 105:9 च बाछा खीजी अब्राहामने फैइ, खीजी फैबै बाछा पक्‍का तम् बिबै ताँर इसहाकने कसम चइ।
PSA 105:10 “ङजी क्हि कनान ह्‍युल पिंब्मुँ, च क्हिए हगर्बै अँश तब्मुँ,” बिसि
PSA 105:11 खीजी याकूबने च क्ह्रोंसेंन्बै निसाफ बनेइ, छले इस्राएलने खोंयोंन् बिलै तरिबै बाछा खीजी फैइ।
PSA 105:12 कनान ह्‍युलरि चमैं च्योमा च्युगुदे मत्‍त्रे मुँल, सारय च्युगुदे, चमैं आगुए ह्‍युलर्बै म्हिमैं धों मुँल,
PSA 105:13 चमैं घ्रि ह्‍युलउँइँले अर्को ह्‍युलर, धै घ्रि क्ल्ह्‍योउँइँले अर्को क्ल्ह्‍योर स्युर प्रमल।
PSA 105:14 दिलेया खीजी चमैंए फिर खाबज्यै या तोइ न्होह्रों लल् आपिंल; चमैंए ल्हागिर खीजी म्रुँमैंलाज्यै या छ बिसि हौदिइ,
PSA 105:15 “ङइ त्हाँबै म्हिमैंलाइ आछुइद्; ङए अगमबक्‍तामैंलाइ तोइ न्होह्रों आलद्!”
PSA 105:16 खीजी च कनान ह्‍युलर अङ्गल कुल्मिंइ, धै चमैंइ प्लुबै प्लुमैं या तोइ म्‍लोल् आपिं;
PSA 105:17 खीजी योसेफ मिं मुँबै म्हि घ्रि चमैंए ओंसों कुल्मिंइ, च केब्छैं तबर चुँवाल।
PSA 105:18 म्हिमैंइ चए प्हलेर कडि फैसि दुःख पिंइ, धै चए खरिर पैए सँउँलि खिमिंइ।
PSA 105:19 योसेफइ बिबै अगमबाणि पूरा आतन् समा च झेलर टिइ। “चइ क्ह्रोंसेंन्बै ताँ पोंइ” बिसि याहवेहजी ह्रोंसए ताँइ प्रमाण पिंइ।
PSA 105:20 फारो म्रुँइ म्हि कुलबै लिउँइँ झेलर्बै क्रथेइ योसेफलाइ पिवाइ, छले मिश्र ह्‍युलर्बै म्रुँइ चलाइ छ्याब् आरेब ठर्दिमिंइ।
PSA 105:21 फारो म्रुँइ चलाइ खीए ताँन् सै न्होरए जिम्‍मा पिंसि खीए धिंर्बै क्ल्हे तल् पिंइ।
PSA 105:22 म्रुँए के लबै क्रथे मिंथेमैंलाइ योसेफइ छेनाले लोमिंरिगे धै म्रुँलाइ ताँ लोमिंब्मैंलाज्यै या ज्ञान-बुद्धि पिंरिगे बिसि छान् लइ।
PSA 105:23 लिउँइँ याकूब मिश्र ह्‍युलर ह्‍याइ; झाइले इस्राएल हामए ह्‍युलर आगुए ह्‍युलर्बै म्हि धोंले टिइ।
PSA 105:24 याहवेहजी ह्रोंसए इस्राएली म्हिमैं ल्हें लमिंइ; धै चमैंए शत्तुरमैं भन्दा चमैं बेल्‍ले भोंब् लमिंइ।
PSA 105:25 खीजी त्हाँबै म्हिमैंलाइ मिश्रीमैंइ आखोरिगे बिसि परमेश्‍वरजी चमैंए सैं एमिंइ; ह्रोंसए के लब्मैंए बिरोधर राबै सैं चमैंलाइ पिंइ।
PSA 105:26 च लिउँइँ याहवेहजी ह्रोंसए के लबै म्हि मोशा नेरो खीजी त्हाँबै हारून कुल्मिंइ।
PSA 105:27 चमैंइ मिश्रीमैंए म्हाँजोर खीजी लबै औदिबै केमैं उँइँमिंइ; छलेन हामए ह्‍युलर चमैंइ खीए शक्तिए केमैं उँउँइ।
PSA 105:28 खीजी मिछु खैब कुलमा ताँन् ह्‍युल आचि-म्हाँचि तयाइ, तलेबिस्याँ खीजी पोंबै ताँमैंए बिरोध चमैंइ लल।
PSA 105:29 खीजी चमैंए ह्‍युलर्बै स्योंमैं ताँन् को लवाइ, धै चर्बै ताँगमैं ताँन् सियाइ।
PSA 105:30 चमैंए ह्‍युल प्हद्गोमैंइ प्लिंयाइ; चमैंए म्रुँमैं रोबै क्ल्ह्‍योजरे या प्हद्गोमैंइ प्लिंयाइ।
PSA 105:31 खीजी पोंब् धोंलेन् चमैंए ह्‍युल तिगोंन् च्योमि नेरो मोसोइ प्लिंयाइ।
PSA 105:32 खीजी नाँलाइ तिस्यु लमिंइ, धै चमैंए ह्‍युल तिगोंन् काम्‍लि-तिम्‍लि रामिंइ।
PSA 105:33 खीजी चमैंए अँगुरए धुँ नेरो तोंबुए धुमैं नास लवाइ धै चमैंए ह्‍युलर्बै सिंधुमैं चुवाइ।
PSA 105:34 खीजी बिब् धोंले तिरिमैं नेरो च्योलै आखाँबै नम्ज्योंमैं खइ,
PSA 105:35 नम्ज्योंमैंइ चमैंए ह्‍युलर्बै ताँन् प्याँ-पिंमैं नेरो चमैंए म्रोंर्बै रा-रोमैं चवाइ।
PSA 105:36 झाइले खीजी चमैंए ह्‍युलर्बै च्ह थेब नास लवाइ, चमैंए ओंसों फिबै च्हमैं सैवाइ।
PSA 105:37 मारा नेरो चाँदिने खीजी इस्राएलीमैंलाइ बैरु तेमिंइ, धै चमैंए न्होंर खाबलै या न्होह्रों आत।
PSA 105:38 चमैं त्होंसि ह्‍यामा मिश्र ह्‍युल सैं तोंइ, तलेबिस्याँ इस्राएलीमैंने चमैं ङ्हिंमल।
PSA 105:39 छरि तरिगे बिसि खीजी न्हाँम्स्यो थेंमिंइ, धै म्हुँइँसर मि म्रोंरिगे बिसि मि पिंइ।
PSA 105:40 चमैंइ चबै सै ह्रिमा खीजी बट्टाइ नमेमैं पिंइ धै मुर्बै क्हें चमैंलाइ म्रेंन्ले पिंइ।
PSA 105:41 खीजी पारा तिवामा क्यु त्होंइ, क्यु आयोंबै क्‍ल्‍ह्‍योर स्यों धोंले क्यु बगेइ।
PSA 105:42 ह्रोंसए के लबै म्हि अब्राहामने फैबै पबित्र बाछा खीजी चिइ।
PSA 105:43 खीजी ह्रोंसइ त्हाँबै म्हिमैंलाइ सैं तोंन् लदै जयजय बिदै ओरदै पखइ।
PSA 105:44 खीजी चमैंलाइ अरू ह्रेंमैंए ह्‍युल पिंइ, धै अरू म्हिमैंइ दुःख लसि योंबै सैमैं ताँन् चमैंइ क्ल्हे लइ।
PSA 105:45 खीजी लबै निसाफमैं चमैंइ ङिंरिगे, धै खीए ठिममैं म्हाँदिरिगे बिसिन् चु ताँन् तब् ग। याहवेहए मिं थेब् लद्!
PSA 106:1 याहवेहए मिं थेब् लद्! याहवेहलाइ धन्यबाद पिंन्, तलेबिस्याँ खीजी ङ्योए फिर ल्हयो खम्, धै खोंयोंइ आनुबै म्हाँया लरिम्!
PSA 106:2 याहवेहजी लबै थेबै केमैंए बयन खाबइ लल् खाँमुँ? “खी कति थेब मुँ!” बिसि खीए बयन खाबइ लल् खाँमुँ?
PSA 106:3 ठिक निसाफ लब्मैंइ आशिक योंब्मुँ, धै चमैंइ खोंयोंन् बिलै ठिक के लसि सैं तोंरिब्मुँ।
PSA 106:4 ओ याहवेह, क्हिजी त्हाँबै म्हिमैंइ सुख शान्ति योंब ङइ म्रोंल् योंरिगे, धै क्हिए म्हिमैं सैं तोंमा ङै या सैं तोंल् योंरिगे, झाइले क्हिए हगवाला म्हिमैंने क्ह्रिसि क्हिए मिं थेब् लल् खाँरिगे बिसि
PSA 106:5 क्हिजी ह्रोंसए म्हिमैंए फिर ल्हयो खमा ङलाज्यै या मैंमिंन्, धै चमैंलाइ खामिंमा ङलाज्यै या ल्होमिंन्।
PSA 106:6 ङिए खेमैंइ धोंले ङिज्यै या पाप लइमुँ; ङिइ छेरन् ङ्हाँब नेरो दुष्‍ट केमैं लइमुँ।
PSA 106:7 ङिए खेमैं मिश्र ह्‍युलर मुँमा क्हिजी लबै औदिबै केमैं चमैंइ वास्ता आल, क्हिजी लबै खोंयोंइ आनुबै म्हाँया चमैंइ आमैं, झन् काँसए घारि मुँबै मा ङ्युँइर चमैं ताँनइ क्हिए बिरोध लइ।
PSA 106:8 बिरोध ललेया ह्रोंसए बेल्‍ले थेबै शक्‍ति म्रोंरिगे बिसि, खीजी ह्रोंसए मिंए आब्रु जोगेबै ल्हागिर चमैं जोगेमिंइ।
PSA 106:9 खीजी काँसए घारि मुँबै मा ङ्युँइलाइ हौदिमा च ङ्हारयाइ, धै खीजी क्यु आयोंबै क्ल्ह्‍योर्बै घ्याँर धोंलेन् च गैरु क्‍ल्‍ह्‍योउँइँले ह्रोंसए म्हिमैं डोरेसि बोइ।
PSA 106:10 छले खीजी चमैंलाइ शत्तुरमैंए योउँइँले जोगेसि शत्तुरमैंए योउँइँले फ्रेमिंइ।
PSA 106:11 चमैंए शत्तुरमैंलाइ बिस्याँ मा ङ्युँइए क्युइ हुवाइ, चमैंए न्होंरि घ्रि या आसो।
PSA 106:12 झाइले खीजी बिबै ताँर बिश्‍वास लसि चमैंइ खीए मिं थेब् लदै भजन क्वेमैं प्रिंइ।
PSA 106:13 दिलेया खीजी लबै केमैं चमैंइ युनन् म्‍लेयाइ; धै खीजी तो बिब् ङ्‍हे बिसि चमैंइ थेबर आपैं।
PSA 106:14 तोइ आकेबै क्‍ल्‍ह्‍योर चमैंइ मिश्रर्बै लिंब-लिंबै चबै सै मैंसि बेल्‍ले चदा ङ्हाँइ, धै चमैंइ क्यु आयोंबै क्ल्ह्‍योर परमेश्‍वरए जाँच लइ।
PSA 106:15 छतसि चमैंइ ह्रिबै सैमैं खीजी पिंइ, दिलेया चमैंए फिर खीजी ह्रिं कुल्मिंइ।
PSA 106:16 तम्बुर चमैंइ मोशा नेरो याहवेहए पबित्र म्हि हारूनए फिर ह्रिस लइ।
PSA 106:17 छतमा पृथ्बी क्ल्येयासि दातानलाइ क्ल्ह्‍योंवाइ, झाइले अबिरामए म्हिमैंलाइ म्यालवाइ।
PSA 106:18 चमैंने क्ह्रिब्मैंए म्हाँजोर मि लुँइ; मिए राबाइ दुष्‍टमैं मेब्रो लवाइ।
PSA 106:19 चमैंइ होरेब बिबै क्ल्ह्‍योर क्ल्या भाराए कु बनेसि चए पूजा लइ।
PSA 106:20 छले चमैंइ बेल्‍ले थेबै परमेश्‍वर पिसि छि चबै क्ल्याए कुलाइ मान लइ।
PSA 106:21 मिश्र ह्‍युलर थेबै केमैं लसि खेंमैं जोगेमिंबै परमेश्‍वर चमैंइ म्‍लेयाइ।
PSA 106:22 चमैंए ल्हागिर्न खीजी हामए ह्‍युलर औदिबै केमैं नेरो ओल्ग्‍या मा ङ्युँइर ङ्हिंन् ङ्हाँबै केमैं लल।
PSA 106:23 छतसि खीजी चमैं नास लवाम् बिल, दिलेया खीए नास लबै ह्रिस म्हल् लबै ल्हागिर खीजी त्हाँबै मोशा खीए ओंसों राइ।
PSA 106:24 चमैंइ खीजी बिबै बाछा आक्वें, छतसि चमैंइ कनान ह्‍युलर होंल् आङिंसि च छ्याँबै ह्‍युललाइ तो धोंइ आङ्हाँ।
PSA 106:25 चमैंइ ह्रोंसए तम्बुर गनगन लइ, धै याहवेहजी बिबै ताँ आथे।
PSA 106:26 छतमा चमैंलाइ क्यु आयोंबै क्‍ल्‍ह्‍योर नास लवाम् बिसि खीजी यो रेसि कसम चइ।
PSA 106:27 झाइले चमैंए सन्तानमैं अरू ह्रेंमैंए म्हाँजोर नेरो ह्‍यु-ह्‍युलर प्हुँवाब्मुँ बिइ।
PSA 106:28 चमैंइ पोर बिबै क्‍ल्‍ह्‍योर बाल बिबै देवताए पूजा लइ, धै सो आप्ह्‍याबै देवतामैंलाइ चडेबै सैमैं चइ।
PSA 106:29 चमैंइ आछ्याँबै केमैं लसि याहवेह ह्रिस खल् लइ, छतमा चमैंए म्हाँजोर ङ्हिंन् ङ्हाँबै ह्रिं खइ।
PSA 106:30 दिलेया पिनहास बिबै म्हि रेसि छेरन् ङ्हाँबै के लबै म्हिलाइ सजैं पिंइ, धै याहवेहजी च ङ्हिंन् ङ्हाँबै ह्रिं म्हल् लवाइ।
PSA 106:31 चु केइ लमा चए पुस्ता-पुस्ता समा खोंयोंन् बिलै चलाइ ठिक के लबै म्हि बिम्।
PSA 106:32 मेरिबाए क्युरै या चमैंइ याहवेह ह्रिस खल् लइ, चमैंइ लमा मोशाइ दु:ख योंइ।
PSA 106:33 चमैंइ खीए सैं नल् लइ, छतसि मोशाइ तब आतब ताँ पोंइ।
PSA 106:34 याहवेहजी आछ्याँबै के लबै ह्रेंमैं नास लवाद् बिसि चमैंने बिलेया चमैंइ चमैं नास आल।
PSA 106:35 झन् चमैं आगु ह्रेंमैंनेन् प्रब टिब लसि चमैंइ लब् धोंबै केमैंन् लइ।
PSA 106:36 परमेश्‍वरए म्हिमैंइ चमैंए कुमैं फ्योइ, च कुमैं चमैंए ल्हागिर ङो चुब् धोंन् तइ।
PSA 106:37 चमैंइ ह्रोंसए च्ह-च्हमिमैं स्यागि म्होंगिलाइ ख्रो पिंइ;
PSA 106:38 तोइ छ्याब् आरेबै ह्रोंसए च्ह-च्हमिमैं चमैंइ कनानर्बै कुमैंए ल्हागिर ख्रो पिंइ, धै चमैंए कोइ च ह्‍युल अपबित्र तइ।
PSA 106:39 छले चमैं ह्रोंसए केइन पापर च्होयाइ, धै ह्रोंसइ लबै आछ्याँबै केइ लमा चमैं ब्यभिचार लब् धोंन् तइ।
PSA 106:40 छतसि ह्रोंसए म्हिमैंए फिर याहवेह बेल्‍ले ह्रिस खइ, धै ह्रोंसजी त्हाँबै म्हिमैं म्रोंसि खी छेरइ।
PSA 106:41 झाइले खीजी चमैं अरू ह्रेंमैंए योर पिंवाइ, धै चमैंए शत्तुरमैंइ चमैंए फिर ग्याल्स लइ।
PSA 106:42 चमैंए शत्तुरमैंइ चमैंलाइ क्र ओलै आपिं, धै चमैंलाइ ह्रोंसए शक्‍तिए न्होंर थेंइ।
PSA 106:43 ल्हें खे खीजी चमैंलाइ दुःखउँइँले फ्रेमिंइ, दिलेया चमैंइ ह्रोंसए सैंर तो मैंमुँ चन् लइ, धै ह्रोंसए छेरन् ङ्हाँबै केइ लमा चमैं पापर्न प्ल्हुँयाइ।
PSA 106:44 दिलेया चमैंइ ओरदै ग्वार ह्रिब थेसि खीजी चमैंए दुःख ङ्‍ह्‍योइ।
PSA 106:45 खीजी चमैंए ल्हागिर ह्रोंसइ फैबै बाछा मैंइ, धै चमैंए फिर खोंयोंइ आनुबै म्हाँया लबइले खीए सैं एइ।
PSA 106:46 चमैंलाइ फैसि बोयाब्मैंलाज्यै या खीजी चमैंए फिर ल्हयो खल् लमिंइ।
PSA 106:47 ओ ङिए याहवेह परमेश्‍वर, ङि जोगेमिंन्! क्हिए पबित्र मिंलाइ धन्यबाद पिंबर नेरो क्हिए मिं क्वेदै सैं तोंबर अरू ह्रेंमैंए म्हाँजोउँइँले ङि खागु लमिंन्।
PSA 106:48 इस्राएलए याहवेह परमेश्‍वर खोंयोंन् बिलै थेब् तरिगे! धै ताँन् म्हिमैंइ “आमेन” बिरिगे। याहवेहए मिं थेब् लद्!
PSA 107:1 याहवेहलाइ धन्यबाद पिंन्, तलेबिस्याँ खी स्वाब मुँ, खीए म्हाँया खोंयोंन् बिलै तरिम्!
PSA 107:2 याहवेहजी खामिंब्मैंइ छान् बिरिगे! खीजी शत्तुरमैंए योउँइँले सै फोसि चमैंलाइ फ्रेमिंइ।
PSA 107:3 खीजी चमैंलाइ ह्‍युल-ह्‍युलउँइँले, स्यार, न्हुँर नेरो ताइ माइले खागु लइमुँ।
PSA 107:4 को-कोइ क्यु आयोंबै क्‍ल्‍ह्‍योजरे अलमल् तसि प्रमल, टिबै ल्हागिर चमैंइ खनिरै सहरर्बै घ्याँ आस्या।
PSA 107:5 फो ख्रेंसि क्यु पिसि, चमैंए सो ह्‍याम् उ बिदिन् तल।
PSA 107:6 छतमा चमैंइ ह्रोंसए दुःखर याहवेहने क्रोदै ग्वार ह्रिइ, धै खीजी चमैंए दु:खउँइँले फ्रेमिंइ।
PSA 107:7 चमैं छ्याँबै क्ल्ह्‍योर फेनेसि टिल् खाँरिगे बिसि खीजी चमैंलाइ ठिक घ्याँर डोरेइ।
PSA 107:8 याहवेहजी लबै खोंयोंइ आनुबै म्हाँयाए ल्हागिर नेरो म्हिमैंए फिर खीजी लबै औदिबै केमैंए ल्हागिर चमैंइ धन्यबाद पिंरिगे।
PSA 107:9 तलेबिस्याँ खीजी क्यु पिब्मैंलाइ क्यु पिब सल् लमिंम्, धै फो ख्रेंब्मैंलाइ लिंब् लिंबै सैमैंइ म्रेंल् पिंम्।
PSA 107:10 को-कोइलाइ दु:ख नेरो सँउँलिइ फैथेंमल, चमैं मिछु खैबै कालए छरि न्होंर टिमल,
PSA 107:11 तलेबिस्याँ चमैंइ परमेश्‍वरजी पोंबै ताँमैं थोल, धै ताँन् भन्दा थेबै परमेश्‍वरजी पिंबै सल्‍ला तो धोंइ आङ्हाँल।
PSA 107:12 छतसि खीजी चमैंलाइ बेल्‍ले दुःखले के लल् पिंइ; चमैं क्हुरियामा चमैंलाइ ल्होब खाबै आत।
PSA 107:13 छतमा चमैंइ ह्रोंसए दुःखर याहवेहने क्रोदै ग्वार ह्रिइ, धै खीजी चमैंए दु:खउँइँले फ्रेमिंइ।
PSA 107:14 खीजी मिछु खैबै कालए छरि न्होंउँइँले चमैंलाइ बैरु पखइ, धै खीजी चमैंए फैछोमैं कुदु-कुदु लवाइ।
PSA 107:15 याहवेहजी लबै खोंयोंइ आनुबै म्हाँयाए ल्हागिर नेरो म्हिमैंए फिर खीजी लबै औदिबै केमैंए ल्हागिर खीलाइ धन्यबाद पिंरिगे।
PSA 107:16 तलेबिस्याँ खीजी काँसाए मुल म्रामैं फुवाम्, धै नुल्‍ले थोइ थेंबै पैए बारमैं टोंवाम्।
PSA 107:17 को-कोइ ह्रोंसइ लबै आछ्याँबै केमैंइ लमा मुर्ख तइ, धै ह्रोंसए अपराधइ लमा बेल्‍ले दुःख योंइ।
PSA 107:18 चमैंलाइ चबै सैमैं तिफुँइ चदा आङ्हाँ। छतसि चमैं सिबिन् छेल।
PSA 107:19 छतमा चमैंइ ह्रोंसए दुःखर याहवेहने क्रोदै ग्वार ह्रिइ, धै खीजी चमैंए दु:खउँइँले फ्रेमिंइ।
PSA 107:20 खीजी सयाद् बिमा चमैं सयाइ; धै चमैंलाइ कालउँइँले जोगेमिंइ।
PSA 107:21 याहवेहजी लबै खोंयोंइ आनुबै म्हाँयाए ल्हागिर नेरो म्हिमैंए फिर खीजी लबै औदिबै केमैंए ल्हागिर खीलाइ धन्यबाद पिंरिगे।
PSA 107:22 चमैंइ धन्यबादए ख्रो पिंरिगे, धै सैं तोंबै क्वेमैं प्रिंदै खीजी लबै केमैंए बयन लरिगे।
PSA 107:23 को-कोइ झाजर क्रेसि स्युरइ; चमैं मा ङ्युँइए फिर छों लब्मैं मुँल।
PSA 107:24 याहवेहजी लबै केमैं चमैंइ म्रोंइ, मा ङ्युँइए गैरु क्ल्ह्‍योर खीजी लबै औदिबै केमैं चमैंइ म्रोंइ।
PSA 107:25 तलेबिस्याँ खीजी बिमा थेबै नाँ-खैं तइ, नाँ खैंइ लमा मा ङ्युँइर्बै भेलमैं रेइ।
PSA 107:26 च भेलमैं मु समन् क्रेसि ह्‍याइ, धै धबै मा ङ्युँइए तेंर्न तेयुइ; छाबै दु:खइ लमा चमैं भों आखन् तयाइ।
PSA 107:27 प्हा ल्हें थुँसि म्हेरबै म्हिमैं धोंब चमैं लयाल; धै चमैं तोइ मैंल् आखाँब् तयाल।
PSA 107:28 छतमा चमैंइ ह्रोंसए दुःखर याहवेहने क्रोदै ग्वार ह्रिइ, धै खीजी चमैंए दु:खउँइँले फ्रेमिंइ।
PSA 107:29 खीजी थेबै नाँ-खैं च्याँ लमिंइ; धै मा ङ्युँइर्बै भेलमैं या टियाइ।
PSA 107:30 नाँ-खैं च्याँ तबै लिउँइँ चमैं सैं तोंइ, धै चमैं ह्‍यादा ङ्हाँबै क्ल्ह्‍योर खीजी सथेंनेइ।
PSA 107:31 याहवेहजी लबै खोंयोंइ आनुबै म्हाँयाए ल्हागिर नेरो म्हिमैंए फिर खीजी लबै औदिबै केमैंए ल्हागिर खीलाइ धन्यबाद पिंरिगे।
PSA 107:32 ल्हें म्हि च्होंबै क्ल्ह्‍योर चमैंइ खीए बयन लरिगे, धै चिबनाँबमैं च्होंबै क्‍ल्‍ह्‍योर चमैंइ खीए मिं थेब् लरिगे।
PSA 107:33 खीजी स्योंमैं क्यु आयोंबै क्‍ल्‍ह्‍यो धोंन् लवामुँ, क्युए मुलमैं कारबै क्‍ल्‍ह्‍यो धोंन् लवामुँ,
PSA 107:34 धै मलिलो सलाइ चज ङ्हाँबै ह्रुखो लमिंइ। चर टिबै म्हिमैंइ आछ्याँबै केमैं लबइले छ तब् ग।
PSA 107:35 खीजी क्यु आयोंबै क्‍ल्‍ह्‍योमैं ङ्ह्‍योखोमैं लमिंइ, धै कारयाबै क्‍ल्‍ह्‍योमैंर स्योंमैं युमिंइ;
PSA 107:36 फो ख्रेंरिब्मैंलाइ खीजी चर टिबर पखइ, धै चमैंइ खेंमैं टिबै ल्हागिर सहर घ्रि बनेइ।
PSA 107:37 चमैंइ म्रोंर प्लु प्लुसि अँगुरए धुँमैं या रुँइ, धै छ्याँबै रोमैं रोइ धै योंइ;
PSA 107:38 चमैंए फिर खीजी आशिक पिंसि चमैंए सन्तान ल्हें तइ, झाइले चमैंए खेदोंमैं या खीजी च्युगुदे तल् आपिं।
PSA 107:39 चमैंए फिर दु:ख कष्‍ट नेरो शोक तमा चमैं च्युगुदे तयाइ धै चमैं म्हि आच्हिन् तयाइ।
PSA 107:40 खीजी क्रथे मिंथेमैंलाइ खाबज्यै आक्वेंब लवामुँ, धै सिंधुँमैं तोइ आरेबै क्‍ल्‍ह्‍योजरे चमैंलाइ क्याइ खैने माइ खै लवामुँ।
PSA 107:41 दिलेया खीजी ङ्हाँदुमैंलाइ चमैंए दुःखउँइले फ्रेसि कैंडो लमिंम्; धै चमैंए परवामैं क्युए बगल धोंले ल्हें लमिंइ।
PSA 107:42 ठिक के लब्मैंइ चु म्रोंब्मुँ धै तोंब्मुँ, दिलेया दुष्‍ट म्हिमैंइ ह्रोंसए सुँ म्रुब्मुँ।
PSA 107:43 बुद्धि मुँबै म्हिमैंइ चु ताँमैं छेनाले क्होल् म्हैरिगे, धै याहवेहजी लबै खोंयोंइ आनुबै म्हाँया चमैंइ क्होब्मुँ।
PSA 108:1 दाऊदइ प्ह्रिबै भजन घ्रि, क्वे घ्रि। ओ परमेश्‍वर, ङए सैंइ क्हिए फिर्न भर थेंइमुँ; छतसि सैं न्होंउँइँले ङ बाजा ह्रादै क्वे प्रिंब्मुँ।
PSA 108:2 ओ बीणा नेरो सारङ्गी छोरद्! ङ न्हाँगलाइ छोरब्मुँ।
PSA 108:3 ओ याहवेह, ह्रें-ह्रेंमैंए म्हाँजोर ङ क्हिए मिं क्वेब्मुँ; ह्रें-ह्रेंमैंए म्हाँजोर ङ क्हिए मिंर क्वे प्रिंब्मुँ।
PSA 108:4 तलेबिस्याँ क्हिए खोंयोंइ आनुबै म्हाँया मु भन्दा थेब मुँ; धै क्हिए भर लल् खाँबै ताँ न्हाँम्स्यो समन् फेनेम्।
PSA 108:5 ओ परमेश्‍वर, क्हि मु भन्दा क्होवाइ मुँ बिसि ताँन् म्हिमैंने उँइँमिंन्; धै क्हिए छ्याँबै बयन ह्‍युल तिगोंन् तरिगे।
PSA 108:6 क्हिजी म्हाँया लब्मैं दु:खउँइँले फ्रेमिंबर क्हिए क्योलो योजी ङि जोगेमिंन्, ङए प्राथना ज्वाफ पिंन्।
PSA 108:7 “शकेमलाइ ट्होसि ङइ चुमिंब्मुँ, धै सुक्‍कोतर्बै ब्याँसि च्हैंसि स्यो-स्यो लब्मुँ,” बिसि परमेश्‍वरजी ह्रोंसए पबित्र क्‍ल्‍ह्‍योउँइले बाछा लइमुँ।
PSA 108:8 “गिलाद ङल् ग, मनश्शे या ङलन् ग; एफ्राइम ङए मुकुट ग, यहूदा ङए ल्हागिर म्रुँइ छेबै प्हरे धों तब् ग।
PSA 108:9 मोआब ङए ल्हागिर यो प्हले ख्रुबै क्‍ल्‍ह्‍यो ग, एदोमए फिर ङइ ह्रोंसए जुत्ता भ्योंमुँ; पलिश्तए फिर ङ ट्होगों तसि ओरम्।”
PSA 108:10 खाबइ ङलाइ किल्‍ला मुँबै सहरर बोमिंब् ङ्‍हे? एदोम समा खाबइ ङ डोरेमिंब् ङ्‍हे?
PSA 108:11 ओ परमेश्‍वर, क्हिजीन् ङिलाइ पिवाइ, आङिं वा? तारे ङिए सिपाइमैंने बालु आह्‍या वा?
PSA 108:12 शत्तुरमैंने नेल् त्हुमा ङि ल्होमिंन्, तलेबिस्याँ म्हिमैंइ ल्होल् आखाँ!
PSA 108:13 परमेश्‍वरउँइँले मत्‍त्रे ङ्योइ ट्होल् खाँब्मुँ, तलेबिस्याँ ङ्योए शत्तुरमैं प्लेवाब खीन् ग।
PSA 109:1 क्वे प्रिंब्मैंए चिबए ल्हागिर दाऊदए भजन घ्रि। ओ परमेश्‍वर, ङ क्हिए मिं क्वेब्मुँ, आपोंन्ले आटिमिंन्!
PSA 109:2 तलेबिस्याँ आछ्याँबै के लब्मैं नेरो स्योलिबै ताँ पोंब्मैं ङए बिरोधर पोंइमुँ, धै चमैंइ स्योर तेबै लेइ ङए बिरोधर पोंइमुँ।
PSA 109:3 चमैंइ ङने छेरन् ङ्हाँबै ताँमैं पोंइमुँ, धै तोन् तोर्न चमैं ङए फिर ह्‍वाखम्।
PSA 109:4 ङइ चमैंए फिर म्हाँया ललेया चमैंइ ङलाइ छ्याब् ल्हैदिम्, दिलेया ङ बिस्याँ चमैंए ल्हागिर प्राथना लरिम्।
PSA 109:5 चमैंलाइ छ्याँन् ललेया चमैंइ ङए न्होह्रों लम्, धै ङइ म्हाँया ललेया चमैंइ ङलाइ हेल लम्।
PSA 109:6 छतसि ङए शत्‍तुरए बिरोध लबै ल्हागिर दुष्‍ट म्हि घ्रि त्हाँन्; धै चए फिर छ्याब् ल्हैदिबै म्हि चए क्योलोउँइँ राल् पिंन्।
PSA 109:7 चए निसाफ तमा च छ्याब् मुँब ठर्दिरिगे; धै चइ प्राथान लमा चलाइन दण्ड योंरिगे!
PSA 109:8 चए छ्ह रिंठि तरिगे; धै चए पद आगुइ प्हेंवारिगे!
PSA 109:9 चए प्हसेमैं आबा आरेब्मैं तरिगे धै चए प्ह्रेंस्यो म्हरेस्यो तरिगे!
PSA 109:10 चए प्हसेमैं आगुने ह्रिसि चल् त्हुरिगे, चमैं टिबै फुयाबै धिंउँइँले त्होंसि चबै सैमैं म्हैल् त्हुरिगे!
PSA 109:11 चने मुँबै ताँन् सै न्होर साउइ किंवारिगे; धै चइ दुःख लसि रोबै रोमैं स्याँमैंइ लुडिरिगे!
PSA 109:12 चए फिर म्हाँया लब्मैं खाबै आतरिगे, धै चए आबा आरेबै प्हसेमैंए फिर ल्हयो खब्मैं या खाबै आतरिगे!
PSA 109:13 चए सन्तानमैं ताँन् नास तयारिगे; धै लिउँइँ खबै पुस्तार चए मिं क्ह्रन् म्हयारिगे!
PSA 109:14 चए खेबाज्युइ लबै आछ्याँबै केमैं याहवेहजी मैंरिगे, धै चए आमाइ लबै पाप खोंयोंइ आमेटिरिगे!
PSA 109:15 चमैंइ लबै पाप खोंयोंइन याहवेहए उँइँर तरिगे, धै खीजी चमैंए मिं पृथ्बीउँइँले मेटिवारिगे!
PSA 109:16 तलेबिस्याँ आगुए फिर म्हाँया लम् बिसि चइ खोंयोंइ आमैं, दिलेया दु:ख योंब्मैं नेरो आयों-आख्युब्मैंलाइ चइ ह्रुगिदिइ, धै सैं चोयाब्मैंलाइ सैयाइ।
PSA 109:17 चइ खैले आगुए फिर सराप झोंइ, छलेन चए फिर सराप ल्हैदिरिगे; चइ आगुए फिर आशिक पिंब आखोमल, छतसि चइ आशिक आयोंरिगे!
PSA 109:18 क्वें खिब् धोंले चइ सराप लब खिइमुँ; चए फोर क्यु धोंले सरापइ प्लिंइ, धै छ्युगु धोंले चए ह्रिबर सराप होंइ!
PSA 109:19 चए ल्हागिर सराप क्वें धोंन् तरिगे, धै चए क्रेर सराप खोंयोंइ खिरिबै फगि धोंन् तरिगे!
PSA 109:20 ङए फिर छ्याब् ल्हैदिब्मैं नेरो ङए बिरोधर आछ्याँबै ताँ पोंब्मैंलाइ याहवेहजी छाबन् इनाम पिंरिगे!
PSA 109:21 दिलेया ओ याहवेह, ङए थेबै प्रभु, ङइ क्हिए मिं थेब लरिगे बिसि ङए फिर ल्हयो खमिंन्; क्हिए खोंयोंइ आनुबै म्हाँया बेल्‍ले थेब मुँ, छतसि ङलाइ जोगेमिंन्।
PSA 109:22 तलेबिस्याँ ङ आयोंब आख्युब मुँ, धै ङए सैं बेल्‍ले नइमुँ।
PSA 109:23 ङेसर्बै छरि धोंले ङ म्हयामुँ; तिनि क्वेंउँइँले भ्योंवाब् धोंले ङलाइ खारासि भ्योंवाइमुँ।
PSA 109:24 बर्त टिब्रें लमा ङए च्हिमैं आभोंब् तइमुँ; ङए ज्यु च्हवेसि कारयाइमुँ।
PSA 109:25 ङलाइ छ्याब् ल्हैदिब्मैंए उँइँर ङ आखोबै म्हि तइमुँ; ङलाइ म्रोंमा चमैंइ क्र लाम्।
PSA 109:26 ओ ङए याहवेह परमेश्‍वर, ङलाइ ल्होमिंन्! क्हिए खोंयोंइ आनुबै म्हाँयाजी ङ जोगेमिंन्!
PSA 109:27 क्हिए योइन छ लइ बिसि चमैंइ सेरिगे; ओ याहवेह, चु क्हिजीन् लब् ग बिसि चमैंइ क्होरिगे!
PSA 109:28 चमैंइ ङलाइ सराप पिंलेया क्हिजी आशिक पिंब्मुँ! चमैंइ ङए फिर यो झोंखमा चमैं फापिल् तब्मुँ, दिलेया क्हिए के लबै म्हि ङ सैं तोंल् योंब्मुँ!
PSA 109:29 ङए फिर छ्याब् ल्हैदिब्मैं फापिल् त्हुबै क्वें खिरिगे; धै फापिबै पछ्यौरइ चमैं हुवारिगे!
PSA 109:30 ङ ह्रोंसए सुँइ याहवेहलाइ बेल्‍ले थेब लब्मुँ; ल्हें म्हिए म्हाँजोर ङ खीए क्वे प्रिंब्मुँ।
PSA 109:31 तलेबिस्याँ दण्ड पिंबै म्हिउँइँले दु:ख योंबै म्हिलाइ जोगेमिंबै ल्हागिर चए क्योलोउँइँ खी रारिम्।
PSA 110:1 दाऊदए भजन घ्रि। “ङइ क्हिए शत्तुरमैं क्हिए प्हले न्होंर आप्लेन् समा क्हि ङए क्योलोउँइँ टिद्,” बिसि याहवेहजी ङए प्रभुने बिइमुँ।
PSA 110:2 “क्हिजी भोंन्ले ग्याल्स लब सियोनउँइँले ल्हें क्ल्ह्‍योर फेनेरिगे,” बिसि याहवेहजी क्हिलाइ हग पिंब्मुँ। “क्हिए शत्तुरमैंए फिर क्ल्हे लद्!
PSA 110:3 क्हिजी नेल् त्हुबै त्हिंइर क्हिए म्हिमैं खेंमैंए सैंइ मैंसि नेबै ल्हागिर न्हागर्न खब्मुँ। न्हाँगर्बै शीत धोंले क्हिए फ्रेंसिमैं सियोनए पबित्र कोंमैंर क्हि ङाँर खब्मुँ।”
PSA 110:4 “मल्किसेदेकए पदरि क्हि खोंयोंन् बिलै खेगि तब्मुँ,” बिसि याहवेहजी कसम चइमुँ। खीए सैं फेर्दिरिब् आरे।
PSA 110:5 ओ याहवेह, ङए प्रभु अधिकार किंसि क्हिए क्योलोउँइँ टिम्; ह्रिस खबै त्हेर खीजी म्रुँमैं त्हुलफुँ लवाब्मुँ।
PSA 110:6 खीजी ह्रें-ह्रेंमैंए निसाफ लमा ल्हें सिनुमैं खागु लब्मुँ; धै पृथ्बी तिगोंर्बै म्रुँमैं त्हुलफुँ लवाब्मुँ।
PSA 110:7 खी म्रुँ तसि ग्याल्स लबै अधिकार योंब्मुँ; छले खी भोंब तसि शत्तुरमैंए फिर ट्होगों तब्मुँ।
PSA 111:1 याहवेहए मिं थेब लद्! ठिक के लब्मैंए म्हाँजोर नेरो म्हि ल्हें च्होंबै क्ल्ह्‍योर ङए सैं न्होंउँइँले याहवेहलाइ धन्यबाद पिंब्मुँ।
PSA 111:2 याहवेहजी लबै केमैं बेल्‍ले थेब मुँ, खीए केमैं म्रोंसि सैं तोंब्मैं ताँनइ च केमैं क्होल् म्हैम्।
PSA 111:3 खीजी लबै केमैंइ खीए मान नेरो इजेत थेब लमुँ, धै खीजी लबै ठिक केमैं खोंयोंन् बिलै तरिम्।
PSA 111:4 खीजी ह्रोंसए औदिबै केमैं मैंरिल् पिंइमुँ; याहवेहजी ङ्योए फिर ल्हयो खसि दयाम्हाँया लम्।
PSA 111:5 खीने बालु ङ्हिंब्मैंलाइ खीजी चबै सैमैं जुटेमिंब्मुँ; धै खीजी फैबै बाछा खोंयोंइ मैंरिम्।
PSA 111:6 अरू ह्रेंमैंए क्ल्ह्‍यो-ने ह्रोंसए म्हिमैंलाइ पिंसि खीजी ह्रोंसइ लबै औदिबै केमैं खीए म्हिमैंलाइ उँइँमिंइमुँ।
PSA 111:7 खीए योजी लबै केमैं भर लल् खाँब नेरो ठिक मुँ; खीजी के ल्हैदिबै ताँमैं भर लल् खाँब तम्।
PSA 111:8 खीजी बिबै ताँमैं खोंयोंन् बिलै तरिम्, चु ताँ पिंमा याहवेह भर लल् खाँब नेरो क्ह्रोंसेंन्बै मुँल।
PSA 111:9 खीजी ह्रोंसए म्हिमैंलाइ जोगेमिंइ; ह्रोंसइ फैबै बाछा खोंयोंन् बिलै तरिगे बिसि खीजी बिइ। खीए मिं पबित्र नेरो मान लल् त्हुब मुँ!
PSA 111:10 याहवेहलाइ मान लब बुद्धि योंबै घ्याँ ग; खीजी बिबै ताँ ङिंब्मैंइ छेनाले च्हैंब् मैंब् लल् खाँम्। खीए मिं खोंयोंन् बिलै थेब् तरिम्!
PSA 112:1 याहवेहए मिं थेब लद्! याहवेहलाइ मान लब धै खीए ताँमैं सैं तोंदै म्हाँदिबै म्हिइ आशिक योंम्!
PSA 112:2 चए सन्तान ह्‍युलर बेल्‍ले भोंब तब्मुँ; ठिक के लबै म्हिए सन्तानइ आशिक योंब्मुँ।
PSA 112:3 चए धिंर सैन्होर तब्मुँ, धै चइ लबै ठिक केमैं खोंयोंन् बिलै तरिम्।
PSA 112:4 सोजो म्हिमैंए ल्हागिर म्हुँइँसरै या ह्‍वे चारम्, चमैंइ दयाम्हाँया लम्, ल्हयो खम्, ठिक के लम्।
PSA 112:5 सैं प्ल्हसि छे पिंब नेरो भर म्हाँदिल् खाँबै के लरिबै म्हिल बिब् धों मैंब् धों तम्।
PSA 112:6 ठिक के लबै म्हि खोंयोंन् बिलै छ्याँबै घ्याँर प्रम्; छाबै म्हिलाइ खोंयोंन् बिलै मैंरिम्।
PSA 112:7 आछ्याँबै ताँमैं थेमा च आङ्हिं; चइ याहवेहए फिर भर लबइले चए सैं भोंब मुँ।
PSA 112:8 चए सैं भोंब मुँ, छतसि च आङ्हिं, लिउँइँ शत्तुरमैं हार्दियाब चइ म्रोंब्मुँ।
PSA 112:9 आयोंब्-आख्युब्मैंलाइ चइ सैं प्ल्हसि पिंइमुँ; चइ लबै ठिक केमैं खोंयोंन् बिलै तरिम्; चलाइ ताँनइ मान लब्मुँ, धै चए क्र कैंडो तब्मुँ।
PSA 112:10 दुष्‍ट म्हिमैंइ चु म्रोंसि ह्रिस लब्मुँ, धै स ह्रासि नास तयाब्मुँ; दुष्‍ट म्हिमैंल बिब् धों मैंब् धों आत।
PSA 113:1 याहवेहए मिं थेब् लद्! ओ याहवेहए सेवा लब्मैं, खीए मिं थेब् लद्! खीए मिं क्वेद्!
PSA 113:2 तोगोउँइँले खोंयोंन् बिलै याहवेहए मिं थेब् तरिगे!
PSA 113:3 त्हिंयाँ प्योबै त्हे सेरो त्हिंयाँ लिबै त्हे समन् खीए मिं थेब् तल् त्हुम्!
PSA 113:4 याहवेहजी ताँन् ह्रेंमैंए फिर ग्याल्स लम्, धै खीए मान मु भन्दा नुब मुँ बिसि ताँन् म्हिमैंने उँइँमिंन्! खीए मिंर क्वे प्रिंब मु भन्दा नुब मुँ।
PSA 113:5 ङ्योए याहवेह परमेश्‍वर धों तब खाब् मुँ? खी ताँन् भन्दा नुबै क्‍ल्‍ह्‍योर म्रुँ तसि क्हुँम्,
PSA 113:6 दिलेया मु नेरो पृथ्बी ङ्ह्‍योबर खी कुरम्।
PSA 113:7 खीजी आयों आख्युब्मैं त्हुलउँइँले रेमिंम्, धै ङ्हाँदुमैं मेब्रोए रासउँइँले क्वेमिंम्।
PSA 113:8 खीए म्हिमैंए क्रथे मिंथेमैंने प्रे ग्याल्स लबै ल्हागिर खीजी चमैं टिल् पिंम्।
PSA 113:9 थरिस्योलाइ खीजी सैं तोंल्‍ले टिबै ल्हागिरि परवा पिंम्। याहवेहए मिं थेब् लद्!
PSA 114:1 याहवेहजी इस्राएलीमैं मिश्र ह्‍युलउँइँले पखइ, आक्होबै क्युइ पोंबै म्हिमैंए म्हाँजोउँइँले याकूबए परवारमैं त्होंखइ।
PSA 114:2 च त्हेरि यहूदा ह्‍युल याहवेहए पबित्र क्‍ल्‍ह्‍यो तयाइ, धै इस्राएल खीए ग्याल्स तइ।
PSA 114:3 याहवेहजी चु के लब् म्रोंसि मा ङ्युँइ भौदियाइ; यर्दन स्यों उल्टोले प्रबर होंइ।
PSA 114:4 कोंमैं ङ्हिंसि क्यु साँडेमैं धोंले धै डाँडामैं क्यु झज धोंले उफार्दिबर होंइ।
PSA 114:5 ओ मा ङ्युँइ, क्हिलाइ तो तइ? तले भौदियाइ। ओ यर्दन, क्हि तले लिउँइँन एह्‍याल?
PSA 114:6 ओ कोंमै, क्यु साँडेमैं धोंले क्हेमैं तले उफार्दिल, ओ डाँडामैं, क्यु झज धोंले क्हेमैं तले उफार्दिल?
PSA 114:7 ओ पृथ्‍बी, याहवेहए उँइँर ङ्हिंन्, याकूबए परमेश्‍वरए उँइँर थरथरले त्हारद्;
PSA 114:8 खीजी पारालाइ क्युए ङ्ह्‍योखोमैं लमिंइ, धै प्रोलाइ क्युए मुल लमिंइ।
PSA 115:1 ओ याहवेह, क्हि खोंयोंइ आनुबै म्हाँया लब नेरो भर लल् खाँबै परमेश्‍वर ग! छतसि ङिलाइ आङिं, दिलेया क्हिलाइन मान तरिगे।
PSA 115:2 “चमैंए परमेश्‍वर खनिर मुँ?” बिसि अरू ह्रेंमैंइ तले बिमुँ?
PSA 115:3 ङिए परमेश्‍वर स्वर्गर मुँ; खीजी तो लदा ङ्हाँमुँ चन् लम्।
PSA 115:4 दिलेया चमैंए कुमैं मारा नेरो चाँदिबै मत्‍त्रे ग, म्हिमैंए योइ च कुमैं बनेइमुँ।
PSA 115:5 चमैंल सुँ मुँ, दिलेया पोंल् आखाँ; मि मुँ, दिलेया म्रोंल् आखाँ।
PSA 115:6 चमैंल न्ह मुँ, दिलेया थेल् आखाँ; नखु मुँ, दिलेया थाँ नाँल् आखाँ।
PSA 115:7 चमैंल यो मुँ, दिलेया छुइल् आखाँ; प्हले मुँ, दिलेया प्रल् आखाँ; धै चमैंए म्‍लोगोउँइँले कै त्होंल् आखाँ।
PSA 115:8 छतसि चमैंलाइ बनेब्मैं या चमैं धोंन् तब्मुँ; चमैंए फिर भर थेंब्मैं या छाबन् तब्मुँ।
PSA 115:9 ओ इस्राएलए सन्तानमैं, याहवेहए फिर भर थेंन्! क्हेमैंलाइ ल्होब नेरो जोगेब खीन् ग।
PSA 115:10 ओ हारूनए सन्तान, याहवेहए फिर भर थेंन्! क्हेमैंलाइ ल्होब नेरो जोगेब खीन् ग।
PSA 115:11 ओ याहवेहलाइ मान लब्मैं, याहवेहए फिर भर थेंन्! क्हेमैंलाइ ल्होब नेरो जोगेब खीन् ग।
PSA 115:12 याहवेहजी ङ्योलाइ मैंरिइमुँ; धै ङ्योए फिर आशिक पिंब्मुँ; इस्राएलए सन्तानलाइ खीजी आशिक पिंब्मुँ; हारूनए सन्तानलाइ खीजी आशिक पिंब्मुँ;
PSA 115:13 याहवेहलाइ मान लब्मैं थेब च्योंब ताँनलाइ, खीजी आशिक पिंब्मुँ।
PSA 115:14 याहवेहजी क्हेमैंलाइ ल्हें लमिंरिगे, क्हमैं नेरो क्हेमैंए सन्तानलाइ ल्हें लमिंरिगे।
PSA 115:15 स्वर्क नेरो पृथ्‍बी बनेबै याहवेहउँइँले क्हेमैंइ आशिक योंरिगे!
PSA 115:16 स्वर्ग याहवेहलन् ग, दिलेया पृथ्‍बी बिस्याँ खीजी म्हिमैंलाइ पिंइमुँ।
PSA 115:17 सियाब्मैंइ याहवेहए मिं थेब आल, क्रोंर ह्‍याब्मैंइ खीए मिं थेब आल।
PSA 115:18 दिलेया ङिम् तोगोउँइँले खोंयोंन् बिलै याहवेहलाइ मिं थेब लब्मुँ। याहवेहए मिं थेब लद्!
PSA 116:1 ङ याहवेहने म्हाँया लम्, तलेबिस्याँ ङइ ग्वार ह्रिमा खीजी थेमिंइ।
PSA 116:2 खीजी ह्रोंसए न्ह ङ ङाँइ तोइ, छतसि ङ सोन् समा खीनेन् ग्वार ह्रिब्मुँ।
PSA 116:3 कालए छोइ ङलाइ फैइ; क्रोंर्बै दुःख ङ फिर खइ; दुःख नेरो शोक ङलाइ प्लेइ।
PSA 116:4 “ओ याहवेह, ङए सो जोगेमिंन्!” बिसि ङइ याहवेहए मिंर प्राथना लइ।
PSA 116:5 याहवेहजी ताँनए फिर दयाम्हाँया लसि ठिक के लम्; ङ्योए परमेश्‍वरजी ल्हयो खम्।
PSA 116:6 याहवेहजी आह्र आसेब्मैंलाइ रक्षा लम्; ङए भों नुयाबै त्हेरैया खीजी ङ जोगेमिंइ।
PSA 116:7 ओ ङए सो, याहवेहजी क्हि छ्याँब लमिंइमुँ, छतसि धबै तिखे छिं तद्।
PSA 116:8 ओ याहवेह, क्हिजी ङए सो कालाउँइँले फ्रेमिंइमुँ, ङए मिर मिग्लि युल् आपिंइमुँ, धै ङए प्हले थुरल् आपिंइमुँ।
PSA 116:9 छतसि ङ सोगोंमैंए ह्‍युलर मुँन् समा याहवेहए घ्याँर प्रब् टिब् लल् खाँम्।
PSA 116:10 “ङए फिर ल्हें दुःख तइमुँ,” बिबै त्हेर खीए फिर ङइ पक्‍का बिश्‍वास लइ।
PSA 116:11 धै “ताँन् म्हिमैं स्युर्गु ग!” बिसि ङ आदेबै त्हेर बिइ।
PSA 116:12 याहवेहजी ङए फिर लबै छ्याँबै केमैंए खि ङइ खैले फोब् ङ्‍हे?
PSA 116:13 याहवेहजी ङलाइ जोगेमिंइ, छतसि खीलाइ धन्यबाद पिंबर ङ अँगुरए प्हा खीए मिंर पिंब्मुँ।
PSA 116:14 याहवेहए ताँन् म्हिमैंए उँइँर खीने लबै ङए भकलमैं ङ पूरा लब्मुँ।
PSA 116:15 याहवेहए म्हिमैं सिमा खी बेल्‍ले न्हुँ लम्।
PSA 116:16 ओ याहवेह, क्ह्रोंसेंन्ले ङ क्हिए केब्छैं ग; ङ क्हिए केब्छैं ग, क्हिए केब्स्योए च्ह। क्हिजी ङ सिबउँइँले जोगेमिंइमुँ।
PSA 116:17 ङ क्हिए ल्हागिर धन्यबादए ख्रो पिंब्मुँ धै याहवेहए मिंर ग्वार ह्रिब्मुँ।
PSA 116:18 याहवेहए ताँन् म्हिमैंए उँइँर, खीए मन्दिरर्बै ह्‍युमैंर,
PSA 116:19 ओ यरूशलेम, क्हिए म्हाँजोर, याहवेहने लबै ङए भकलमैं ङ पूरा लब्मुँ। याहवेहए मिं थेब् लद्!!
PSA 117:1 ओ ताँन् ह्रें-ह्रेंमैं, याहवेहए मिं थेब् लद्! ओ ताँन् म्हिमैं, खीए जय-जय लद्!
PSA 117:2 तलेबिस्याँ ङ्योए फिर खीए खोंयोंइ आनुबै म्हाँया बेल्‍ले थेब मुँ, धै याहवेहए फिर खोंयोंन् बिलै भर लल् खाँम्। याहवेहए मिं थेब् लद्!!
PSA 118:1 याहवेहलाइ धन्यबाद पिंन्, तलेबिस्याँ खी स्वाब मुँ, धै खीए खोंयोंइ आनुबै म्हाँया खोंयोंन् बिलै तरिम्।
PSA 118:2 “खीए खोंयोंइ आनुबै म्हाँया खोंयोंन् बिलै तरिम्” बिसि इस्राएलीमैंइ बिरिगे।
PSA 118:3 “खीए खोंयोंइ आनुबै म्हाँया खोंयोंन् बिलै तरिम्,” बिसि हारूनए प्हसेमैंइ बिरिगे।
PSA 118:4 “खीए खोंयोंइ आनुबै म्हाँया खोंयोंन् बिलै तरिम्,” बिसि याहवेहलाइ मान लब्मैंइ बिरिगे।
PSA 118:5 बेल्‍ले दु:ख तमा ङइ याहवेहने ग्वार ह्रिइ, खीजी ङने ज्वाफ पिंइ, धै ङए दुःखउँइँले फ्रेमिंइ।
PSA 118:6 याहवेह ङने बालुन् मुँ, छतसि ङ तो सैने या ङ्हिंरिब् आरे, म्हिमैंइ ङलाइ तोइ लल् आखाँ।
PSA 118:7 याहवेह ङने बालुन् मुँ, खीजी ङ ल्होमिंमुँ। छतसि शत्तुरमैंलाइ ङइ ट्होवाब म्रोंब्मुँ।
PSA 118:8 म्हिमैंए फिर भर थेंब् भन्दा याहवेहए प्हलेर्न ग्वार योंब छ्याँब तम्।
PSA 118:9 क्रथे मिंथेब्मैंए फिर भर थेंब् भन्दा याहवेहए प्हलेर्न ग्वार योंब छ्याँब तम्।
PSA 118:10 ताँन् ह्रेंमैं ङए कारग्यु तखइ, दिलेया याहवेहए शक्‍तिउँइँले ङइ चमैं सैवाइ!
PSA 118:11 चमैंइ ङ खन्तदोंइले कारग्यु लखइ, दिलेया याहवेहए शक्‍तिउँइँले ङइ चमैं सैवाइ!
PSA 118:12 चमैंइ क्वेमैंइ धोंले ङ म्होरखइ, दिलेया पुजुए झ्याँगर लुँब् धोंले चमैं तिस्यार्न सियाइ। याहवेहए शक्‍तिउँइँले ङइ चमैं सैवाइ!
PSA 118:13 शत्तुरमैंइ भोंन्ले लिग्याँइ ङलाइ कैवामा ङ क्हुरयाबि छेल, दिलेया याहवेहजी ङ ल्होमिंइ।
PSA 118:14 याहवेहजी ङलाइ शक्‍ति पिंमा ङइ खीए मिंर क्वें प्रिंम्, तलेबिस्याँ खीजी ङ जोगेमिंइमुँ।
PSA 118:15 “याहवेहए क्योलो योजी शक्‍तिए के लइमुँ,” बिसि ठिक के लब्मैंइ तम्बुर सैं तोंबै कै नेरो ट्होब कै तेम्।
PSA 118:16 “याहवेहए क्योलो यो कैंडो क्वेइमुँ, याहवेहए क्योलो योजी शक्‍तिए के लइमुँ!”
PSA 118:17 ङ सिरिब् आरे, सोगोंन् तरिब्मुँ, धै याहवेहजी लबै केमैं ङ बिप्रब्मुँ।
PSA 118:18 याहवेहजी ङ थेबै दण्ड पिंइमुँ, दिलेया खीजी ङ सिल् आपिंइमुँ।
PSA 118:19 ठिक के लब्मैं मन्दिरर्बै तगरमैंउँइँले होंम्। च तगरमैं ङए ल्हागिर थोंमिंन्। च न्होंर होंसि ङइ याहवेहलाइ धन्यबाद पिंब्मुँ।
PSA 118:20 चु तगर याहवेहल् ग, च न्होंर ठिक के लब्मैं मत्‍त्रे होंल् योंब्मुँ।
PSA 118:21 क्हिजी ङए प्राथनाए ज्वाफ पिंबै ल्हागिर नेरो ङलाइ जोगेमिंबै ल्हागिर ङ क्हिलाइ धन्यबाद पिंम्।
PSA 118:22 धिं लब्मैंइ केर आफे बिसि भ्योंवाबै युँमान् तेंर्बै क्र युँमा तइ।
PSA 118:23 चु के याहवेहउँइँले तब् ग, ङ्योइ मैंरिमा चु आच्म्‍मबै के मुँ।
PSA 118:24 तिंयाँबै त्हिंइ याहवेहजी बनेब् ग। छतसि चु त्हिंइर ङ्यो आनन्दले सैं तोंले।
PSA 118:25 “ओ याहवेह, ङि जोगेमिंन्” बिसि ङ क्हिने यो छ्युँ लम्! ओ याहवेह, ङ क्हिने यो छ्युँ लमुँ, ङिए सैंर मैंब् धों लमिंन्।
PSA 118:26 याहवेहए मिंर युबै म्रुँइ आशिक योंम्। धै ङिइ क्हेमैं ताँनलाइ याहवेहए धिंउँइँले आशिक पिंम्।
PSA 118:27 याहवेहन् परमेश्‍वर ग, खीजी ङ्योलाइ चारबै ह्‍वे पिंइमुँ। छतसि सिं धुँए हाँगमैं छेसि चाड म्हाँदिब्मैंने बालु सैं तोंदै ख्रो पिंबै क्ल्ह्‍यो समा क्रेयाद्।
PSA 118:28 क्हि ङए परमेश्‍वर ग, छतसि ङ क्हिलाइन धन्यबाद पिंब्मुँ, क्हि ङए परमेश्‍वर ग, ङ क्हिलाइन थेब् लब्मुँ।
PSA 118:29 याहवेहलाइ धन्यबाद पिंन्, तलेबिस्याँ खी स्वाब मुँ। खीए खोंयोंइ आनुबै म्हाँया खोंयोंन् बिलै तरिम्।
PSA 119:1 छ्याब् आरेब्मैंइ आशिक योंम्; चमैं याहवेहए ठिमर बिब् धोंले प्रम्।
PSA 119:2 खीजी बिबै ताँमैं ङिंब्मैं, नेरो सैं न्होंउँइँले खीलाइ म्हैब्मैंइ आशिक योंम्।
PSA 119:3 चमैंइ आछ्याँबै केमैं आल, दिलेया खीए घ्याँर प्रम्।
PSA 119:4 ङिइ लल् त्हुबै के ताँन् छेनाले लरिगे बिसि ङिइ लल् त्हुबै ताँमैं क्हिजी पिंथेंइमुँ।
PSA 119:5 क्हिए निसाफमैं ङिंबै ल्हागिर ङल आछ्याँबै घ्याँर प्रबै सैं आखस्याँ कति छ्याँब् तमल!
PSA 119:6 झाइले क्हिए ताँन् ताँमैं च्हैंसि मैंसि लसि ङ फापिल त्हुरिब आरे।
PSA 119:7 क्हिए ठिक ठिममैं लोसि ङए छ्याँबै सैंइ क्हिए मिं थेब् लब्मुँ।
PSA 119:8 क्हिजी पिंबै ठिमर्बै ताँमैं ङिंस्यो; ङलाइ खैंमैंइ आपिमिंन्।
PSA 119:9 फ्रेंसि म्हिइ आछ्याँबै केमैंउँइँले ह्रोंसलाइ खैले जोगेसि थेंल् खाँम्? क्हिए ताँइ बिब् धोंले प्रसिन् ग।
PSA 119:10 ङइ ह्रोंसए सैं न्होंउँइँलेन् क्हिलाइ म्हैमुँ; क्हिए ताँमैं थोसि प्रबइले ङ जोगेमिंन्
PSA 119:11 क्हिए बिरोधर ङइ पाप आलरिगे बिसि क्हिजी बिबै ताँमैं ङए सैं न्होंर जोगेसि थेंइमुँ।
PSA 119:12 ओ याहवेह, क्हिए मिं थेब् तरिगे! क्हिए ठिममैं ङ लोमिंन्!
PSA 119:13 क्हिए सुँउँइँले त्होंबै ताँन् ठिममैंए बयन ङइ लमुँ।
PSA 119:14 ल्हें सैन्होर योंबै म्हि सैं तोंब् धोंले क्हिजी बिबै ताँमैं ङिंबर ङए सैं तोंम्।
PSA 119:15 क्हिजी लद् बिबै ताँमैं ङइ सैंर मैंमुँ धै क्हिजी लोमिंबै ताँमैं ङइ मैंरिइमुँ।
PSA 119:16 क्हिजी पिंबै ठिममैंर ङए सैं तोंरिब्मुँ; धै क्हिए ताँमैं ङ खोंयोंइ म्‍लेरिब् आरे।
PSA 119:17 ङ ल्हें सोसि क्हिए ताँमैं ङिंरिगे बिसि ह्रोंसए के लबै म्हिलाइ बिब् धों मैंब् धों लमिंनु।
PSA 119:18 क्हिए ठिमर्बै आचम्बै ताँमैं ङइ म्रोंल् योंरिगे बिसि ङए मि थोमिंनु।
PSA 119:19 ङम् चु ह्‍युलर ङ्हिरोबै प्ह्रें ग; क्हिए ताँमैं ङउँइँले आलोमिंन्!
PSA 119:20 क्हिए ठिममैं क्होबर ङए खों खोंयोंन् बिलै क्यु पिब् धोंन् तम्।
PSA 119:21 थेब् प्हैंब्मैंलाइ क्हिजी हौदिमुँ। चमैं सरापए न्होंर मुँ, क्हिजी तेंबै घ्याँर चमैं आप्र।
PSA 119:22 क्हिजी बिबै ताँमैं ङइ ङिंइमुँ। छतसि ङए अब्ब्रु वासि ङलाइ प्ह्रब्मैं ङ ङाँइँले स्योमिंन्।
PSA 119:23 क्रथे मिंथेमैं खागु तसि ङए बिरोधर ताँ लम्, दिलेया क्हिए के लबै म्हिइ क्हिए निसाफमैं छेनाले मैंब्मुँ।
PSA 119:24 क्हिजी बिबै ताँमैंइ ङए सैं तोंन् लइमुँ; च ताँमैंइन ङलाइ छेनाले लोदा सैंदा लम्।
PSA 119:25 ङ त्हुलर्न सिबि छेइमुँ, छतसि क्हिजी बिब् धोंलेन् ङए रक्षा लमिंन्!
PSA 119:26 ङए बानि ब्योर खै तब् मुँ बिसि ङइ क्हिने बिमा क्हिजी ङ जवाफ पिंइ; क्हिजी पिंबै ठिममैं ङलाइ लोमिंन्!
PSA 119:27 क्हिजी ल्हैदिबै केमैं छेनाले क्होल् खाँरिगे बिसि क्हिजी लबै औदिबै केमैं ङइ मैंरिम्।
PSA 119:28 शोकइ लमा ङ तोइ लल् आखाँब् तइमुँ; छतसि क्हिए ताँइ बिब् धोंले ङ भोंब् लमिंन्!
PSA 119:29 आछ्याँबै घ्याँमैंउँइँले ङलाइ स्यो लसि थेंन्; धै ङए फिर दयाम्हाँया लसि क्हिए ठिमर्बै ताँमैं ङ लोमिंन्!
PSA 119:30 ङइ क्ह्रोंसेन्बै घ्याँ त्हाँइमुँ; क्हिए निसाफमैं ङइ ङए ओंसों थेंइमुँ।
PSA 119:31 ओ याहवेह, क्हिजी बिबै ताँमैं ङइ ङिंइमुँ। ङ फाफिल् लल् आपिंन्!
PSA 119:32 क्हिजी बिबै घ्याँर ङ प्रइमुँ, तलेबिस्याँ क्हिजी ङए खों खाँसों ङ्हाँन् लमिंइमुँ!
PSA 119:33 ओ याहवेह, क्हिए निसाफमैंइ बिब् धोंलेन् प्रब ङलाइ लोमिंन्; धै चमैंइ बिब् ङिंसि ङ लिउँइँ समा प्ररिगे।
PSA 119:34 ङलाइ क्होल् खाँबै शक्ति पिंन्, धै ङइ क्हिए ठिमर्बै ताँमैं म्हाँदिब्मुँ; धै ङए खों न्होंउँइँलेन् ङ ङिंब्मुँ।
PSA 119:35 क्हिजी ल्हैदिबै के छेनाले लल् खाँबै म्हि ङलाइ तल् पिंनु, तलेबिस्याँ च केर्न ङए सैं तोंम्।
PSA 119:36 ङए सैंर तोइ सैलैया लोब् आखरिगे बिसि ङए सैंर क्हिए बिबै ताँमैं थेंमिंन्।
PSA 119:37 ङए मिइ केर आफेबै सैमैं ङ्ह्‍योल् आपिंन्; क्हिए ताँइ बिब् धोंलेन् ङए‍ रक्षा लमिंन्।
PSA 119:38 क्हिलाइ मान लबै म्हिमैंने क्हिजी बाछा फैइमुँ; क्हिए के लबै म्हिए ल्हागिर च बाछा पूरा लमिंन्।
PSA 119:39 क्हिए ठिममैं छ्याँब मुँ, दिलेया च ठिममैं म्हाँदिबइले म्हिमैंइ ङलाइ प्ह्रम्। ङ फा पिल त्हुलै बिसि ङ ङ्हिंम्। छतसि ङलाइ प्ह्रबै म्हिमैं ङउँइँले स्योमिंन्!
PSA 119:40 क्हिजी ल्हैदिबै केमैं ताँन् ङइ लइमुँ! छतसि ठिक निसाफ लसि ङलाइ जोगेमिंन्!
PSA 119:41 ओ याहवेह, क्हिए खोंयोंइ आनुबै म्हाँया ङइ योंरिगे, क्हिजी बाछा फैसि पिंम् बिबै मुक्ति ङए ङाँर खरिगे;
PSA 119:42 छतस्याँ ङलाइ प्ह्रब्मैंलाज्यै या ङइ बिल् योंब्मुँ, तलेबिस्याँ क्हिजी बिबै ताँर ङइ भर थेंइमुँ।
PSA 119:43 खोंयोंन् बिलै ङइ क्हिए क्ह्रोंसेंन्बै ताँमैं पोंल् खाँरिगे; तलेबिस्याँ क्हिए निसाफमैंर ङइ आशा थेंइमुँ।
PSA 119:44 क्हिए ठिमर्बै ताँमैं ङइ खोंयोंन् बिलै म्हाँदिब्मुँ।
PSA 119:45 ङ खाँसो ङ्हाँन्ले प्रब्मुँ, तलेबिस्याँ क्हिजी ल्हैदिबै केमैं लबै भों ङइ लइमुँ।
PSA 119:46 म्रुँमैंए उँइँर क्हिजी बिबै ताँमैंए बारेर ङ पोंब्मुँ, धै ङ फापिल् त्हुरिब् आरे।
PSA 119:47 क्हिजी ल्हैदिबै केमैं लमा ङए सैं तोंम्, तलेबिस्याँ क्हिजी बिबै ताँमैं ङइ खोम्।
PSA 119:48 क्हिजी बिबै ताँमैं ङइ खोसि म्हाँदिम, धै क्हिए निसाफैंन् ङइ मैंरिम्।
PSA 119:49 ह्रोंसए के लबै म्हिने फैबै बाछा मैंमिंन्, तलेबिस्याँ चउँइँले क्हिजी ङलाइ आशा पिंइमुँ।
PSA 119:50 ङए फिर दुःख तमा क्हिजी फैबै बाछाइन ङए सैं क्होमिंइमुँ, च बाछाइन ङ जोगेमिंइमुँ।
PSA 119:51 तोंन् तोर्न थेब् प्हैंब्मैंइ ङलाइ प्ह्रसि निस्योइमुँ, दिलेया क्हिए ठिमउँइँले ङ ह्रेंगो आतइमुँ।
PSA 119:52 क्हिजी स्योंम् ओंनों लबै निसाफमैं ङइ मैंरिइमुँ। छतसि ओ याहवेह, चमैंइन ङए सैं क्होमिंइमुँ।
PSA 119:53 क्हिए ठिमर्बै ताँमैंइ बिब् धों आलबै दुष्‍टमैं म्रोंसि ङ बेल्‍ले ह्रिस खइमुँ।
PSA 119:54 ङ खनिर टिलैया क्हिए निसाफमैंए बारेर ङइ भजन प्रिंरिम्।
PSA 119:55 ओ याहवेह म्हुँसरैया ङ क्हिलाइन मैंरिमुँ, धै क्हिए ठिमइ बिब् धोंलेन् ङइ लरिम्।
PSA 119:56 ङ खोंयोंन् बिलै क्हिजी ल्हैदिबै केमैं ङइ लरिइमुँ।
PSA 119:57 ओ याहवेह, ङ‍ए चैदिबै सै क्हिन् ग! क्हिए ताँमैं ङिंम् बिसि ङइ बाछा फैइमुँ।
PSA 119:58 ङए खों न्होंउँइँलेन् क्हिलाइ म्हैइमुँ; क्हिजी फैबै बाछा मैंसि ङए फिर दयाम्हाँया लमिंन्।
PSA 119:59 ङए बानि ब्योर ङइ च्हैंब् मैंब् लइमुँ, धै क्हिए ताँइ बिब् धोंबै घ्याँर ङइ प्रबै भों लइमुँ।
PSA 119:60 क्हैल् आलल्‍ले युन्ले क्हिजी ल्हैदिबै के लबै सैं ङल् मुँ।
PSA 119:61 दुष्‍ट म्हिमैंइ ङलाइ छोइ फैथेंलैया क्हिए ठिमर्बै ताँमैं ङ म्‍लेरिब् आरे।
PSA 119:62 क्हिजी लबै ठिक निसाफमैंए ल्हागिर म्हुँइँस आधरैया क्हिलाइ धन्यबाद पिंबर ङ रेम्।
PSA 119:63 क्हिने ताँन् ङ्हिंब्मैंए थु ङ ग; ओं, क्हिजी ल्हैदिबै के ताँन् लब्मैंए थु ङ ग।
PSA 119:64 ओ याहवेह, क्हिए खोंयोंइ आनुबै म्हाँयाजी पृथ्बी प्लिंइमुँ; क्हिए निसाफमैं ङलाइ लोमिंन्!
PSA 119:65 ओ याहवेह, क्हिजी ताँ बिब् धोंलेन् क्हिए के लबै म्हिलाइ बिब् धों मैंब् धों लमिंन्।
PSA 119:66 क्हिए ताँमैं ङइ क्वेंइमुँ; छतसि ज्ञान बुद्धिए छ्याँब ताँमैं ङलाइ लोमिंन्।
PSA 119:67 ङए फिर दुःख खब् भन्दा ओंसों ङ घ्याँ फ्लेसि प्ररिल, दिलेया तारेम् क्हिजी बिबै ताँमैं ङिंसि ङ प्रब्मुँ।
PSA 119:68 क्हि स्वाब मुँ, क्हिजी छ्याँबै के लम्; क्हिए निसाफइ बिब् धोंले प्रब ङलाइ लोमिंन्।
PSA 119:69 थेब् प्हेंब्मैंइ ङए बिरोधर स्योलिबै ताँमैं ललैया, क्हिजी ल्हैदिबै केमैं ङइ ताँन् खोंउँइँले लम्;
PSA 119:70 चमैंए खों सारो मुँ, चमैंइ खाबलाज्यै या दयाम्हाँया आल। दिलेया ङए सैं बिस्याँ क्हिए ठिमर्बै ताँमैंर्न तोंरिम्।
PSA 119:71 ङए फिर दुःखमैं तखब छ्याँबन् तइ, तलेबिस्याँ क्हिए निसाफमैं ङइ क्होल् योंइ।
PSA 119:72 मारा नेरो चाँदिए हजार टुक्र भन्दै या क्हिए सुँउँइँले त्होंबै ठिम ङए ल्हागिर बेल्‍ले छ्याँब मुँ।
PSA 119:73 क्हिए योजीन् ङ बनेइ; क्हिए ताँमैं लोबर ङलाइ क्होबै शक्ति पिंन्।
PSA 119:74 क्हिजी बिबै ताँर ङइ आशा थेंइमुँ; छतसि क्हिलाइ मान लब्मैं ङलाइ म्रोंसि सैं तोंरिगे!
PSA 119:75 ओ याहवेह, क्हिजी लबै निसाफमैं ठिक मुँ। तले ङलाइ दुःख पिंइ बिस्याँ क्हि भर लल् खाँब मुँ बिसि ङइ सेइमुँ।
PSA 119:76 ङ क्हिए के लबै म्हिने क्हिजी फैबै बाछाउँइँले क्हिए खोंयोंइ आनुबै म्हाँयार ङए सैं क्होमिंन्।
PSA 119:77 क्हिए ठिमर्बै ताँमैंइन ङए सैं तोंन् लमिंम्; छतसि ङ सोरिगे बिसि क्हिए ल्हयो ङए फिर थेंमिन्।
PSA 119:78 थेब् प्हैंब्मैं फा पिन् तरिगे तलेबिस्याँ चमैंइ तोन् तोर्न ङए न्होह्रों लम्; दिलेया ङ बिस्याँ क्हिजी ल्हैदिबै केमैं मैंरिब्मुँ।
PSA 119:79 क्हिलाइ मान लब्मैं ङउँइँ तोरिगे; ओं, क्हिजी बिबै ताँमैं क्होब्मैं ङउँइँ तोरिगे।
PSA 119:80 ङ फापिल् आत्हुबै ल्हागिर क्हिए निसाफमैंइ बिब् धोंले ङए खों छ्याब मुँब आतरिगे।
PSA 119:81 क्हिजी खोंयों जोगेमिंब् ङ्‍हे बिसि क्हिए घ्याँ ङ्‍ह्‍योन-ङ्‍ह्‍योन् ङ नारल् खाँइ। दिलेया क्हिजी फैबै बाछार ङइ आशा थेंइमुँ।
PSA 119:82 क्हिजी फैबै बाछाए ताँ मैंन-मैंन् ङए मि छेन्ले आम्रोंब् तल् खाँइमुँ; “खोंयों क्हिजी ङए सैं क्होमिंमुँ?”
PSA 119:83 केर आफेबै च्युँयाबै छाकल धोंन् ङ तयाइमुँ, दिलेया क्हिए निसाफमैं ङइ आम्‍लेइमुँ।
PSA 119:84 ङइ अझै खोंयों समा प्रेंल् त्हुब् जा? ङए न्होह्रों लब्मैंलाइ क्हिजी खोंयों दण्ड पिम्?
PSA 119:85 क्हिए ठिमर्बै ताँ आङिंसि थेब् प्हैंब्मैंइ ङ पायारिगे बिसि होंल्दो ताइमुँ।
PSA 119:86 क्हिए ताँन् ताँमैं भर लल् खाँब मुँ; छतसि ङ ल्होमिंन्, तलेबिस्याँ म्हिमैंइ तोन् तोर्न ङलाइ ह्रुगुदिइमुँ!
PSA 119:87 चमैंइ ङ धन्दै सैवाब, दिलेया क्हिजी ल्हैदिबै केमैं ङइ लसिन् मुँ।
PSA 119:88 क्हिए खोंयोंइ आनुबै म्हाँयाइ ङए फिर रक्षा लमिंन्, तलेबिस्याँ क्हिए सुँउँइँले त्होंबै ताँमैंइ बिब् धों ङइ लब्मुँ।
PSA 119:89 ओ याहवेह, क्हिजी बिबै ताँ खोंयोंन् बिलै तरिम्; सवर्गर च भोंले थेंइमुँ।
PSA 119:90 क्हिजी पोंबै ताँमैं पुस्ता-पुस्ता समान् तरिम्; पृथ्बी क्हिजीन् छेनाले बनेइ, छतसि च खोंयोंन् बिलै तरिम्।
PSA 119:91 क्हिए निसाफमैंइ तो‍-तो बिइमुँ तिंयाँ समन् छान् तरिइमुँ, तलेबिस्याँ क्हिए ताँ तोंन्दोरिइ म्हाँदिल् त्हुम्।
PSA 119:92 क्हिए ठिमर्बै ताँमैंइ ङए सैं तोंल् आलस्याँ, ङए दुःखइ लमा ङ सियामल।
PSA 119:93 क्हिजी लोदा सैंदा लबै ताँमैं ङ खोंयोंइ म्‍लेरिब् आरे, तलेबिस्याँ चमैंउँइँलेन् ङ सोरिल् योंइमुँ।
PSA 119:94 क्हिजी ल्हैदिबै केमैं ङइ लसिन् मुँ; ङ जोगेमिंनु तलेबिस्याँ ङ क्हिलन् ग।
PSA 119:95 ङलाइ सैब् बिसि दुष्‍ट म्हिमैं ह्रेसि टिइमुँ, दिलेया ङए सैंइ क्हिजी बिबै ताँमैंन् मैंरिम्।
PSA 119:96 तो सैन् मुँलेया तिस्याँ मत्‍त्रे ग बिब ङइ सेइमुँ, दिलेया क्हिए ताँमैं बिस्याँ खोंयोंन् बिलै तरिम्।
PSA 119:97 क्हिए ठिम ङइ बेल्‍ले खोम्! त्हिंतिमिन् ङ चन् मैंरिम्।
PSA 119:98 क्हिए ताँमैं खोंयोंन् बिलै ङए सैंर थेंइमुँ, च ताँमैंइन ङए शत्तुरमैं भन्दा ङ बुद्धि मुँब लमिंम्।
PSA 119:99 ङलाइ लोमिंब्मैंइ भन्दा ङइ ल्हें क्होइमुँ, तलेबिस्याँ क्हिजी बिबै ताँमैं ङए सैंर मैंरिमुँ।
PSA 119:100 चिब्मैंइ भन्दा ङइ ल्हें च्हैंब् मैंब् लल् खाँम्; तलेबिस्याँ क्हिजी ल्हैदिबै केमैं ङइ लम्।
PSA 119:101 क्हिजी बिब् धोंबै केमैं लल् खाँरिगे बिसि ङइ आछ्याँबै के लबै घ्याँर प्रब पिवाइमुँ।
PSA 119:102 क्हिए निसाफमैंइ बिब् धोंलेन् ङ प्ररिइमुँ, तलेबिस्याँ छले प्रबर क्हिजीन् ङ लोमिंइमुँ।
PSA 119:103 क्हिजी फैबै बाछा ङए लेर बेल्‍ले लिंब तइमुँ, क्वे खुदु भन्दै या ङए सुँर च बेल्‍ले लिंइमुँ।
PSA 119:104 क्हिजी ल्हैदिबै केमैंउँइँलेन् ङइ च्हैब् मैंब् लल् खाँबै शक्ति योंइमुँ; छतसि ताँन् आछ्याँबै के लबै घ्याँमैं ङइ पिवाल् खाँइमुँ।
PSA 119:105 क्हिए ताँ ङए प्हलेमैंए ल्हागिर बत्ति ग, धै ङ प्रल् त्हुबै घ्याँर ङलाइ डोरेबै ह्‍वे ग।
PSA 119:106 क्हिए ठिक निसाफमैंइ बिब् धोंबै के लब्मुँ बिसि ङइ कसम चइमुँ।
PSA 119:107 ङइ बेल्‍ले दुःख योंइमुँ; ओ याहवेह, क्हिजी बिब् धोंलेन् ङलाइ जोगेमिंन्!
PSA 119:108 ओ याहवेह, ङइ क्हिए मिं क्वेमा क्हि सैं तोंमिंन्। धै क्हिए निसाफमैं ङलाइ लोमिंन्।
PSA 119:109 ङ कालए सुँर्न फेल् त्हुलैया क्हिए ठिमर्बै ताँमैं ङइ म्‍लेरिब् आरे।
PSA 119:110 दुष्‍ट म्हिमैंइ ङए ल्हागिर ङो चुइमुँ, दिलेया क्हिजी ल्हैदिबै केमैं ङइ लइन मुँ।
PSA 119:111 क्हिजी बिबै ताँमैं ङए ल्हागिर मारा मुइ भन्दा थेब मुँ, च ताँमैंइ खोंयोंइ बिलै ङ‍ए सैं तोंन् लम्।
PSA 119:112 ङ आसिन् समा क्हिए निसाफमैं म्हाँदिब्मुँ बिसि ङइ सैं लइमुँ।
PSA 119:113 सैं ङ्हिरि तबै म्हिमैं ङइ आखो, दिलेया क्हिए ठिम ङइ खोम्।
PSA 119:114 क्हि ङए लोबै क्‍ल्‍ह्‍यो नेरो ढाल ग; क्हिए ताँर ङइ भर थेंइमुँ।
PSA 119:115 ङए परमेश्‍वरए ताँमैं ङइ छेनाले ङिंरिगे बिसि, ओ दुष्‍ट के लब्मैं, ङउँइँले ह्रेंगो तह्‍याद्।
PSA 119:116 ङ सोरिबै ल्हागिर क्हिजी फैबै बाछा अनुसार ङलाइ भोंब लमिंन्। ङइ थेंबै आशा फुल् आपिंन्।
PSA 119:117 ङ सोल् योंरिगे ङलाइ जोगेमिंन्; धै क्हिए निसाफमैं खोंयोंन् बिले ङइ छेनाले म्हाँदिब्मुँ!
PSA 119:118 क्हिए निसाफमैं आङिंब्मैं क्हिजी भ्योंवाम्, तलेबिस्याँ चमैंइ पोंबै स्योलिबै ताँमैं केर आफे।
PSA 119:119 पृथ्बीर्बै ताँन् दुष्‍ट म्हिमैंलाइ क्हिजी कसिं भ्योंब् धोंले भ्योंवाम्, छतसि क्हिजी बिबै ताँमैं ङइ बेल्‍ले खोम्।
PSA 119:120 क्हिने ङ्हिंसि ङ त्हाररिमुँ, धै क्हिए निसाफमैं म्रोंसि ङ ङ्हिंइमुँ।
PSA 119:121 ङइ क्ह्रोंसेंन्बै ठिक केमैं लसि प्रइमुँ; छतसि दुःख पिंब्मैंए योर ङलाइ आवाथेंन्।
PSA 119:122 ह्रोंसए के लबै म्हिलाइ छ्याँबै के लमिंबै जिम्मा किंन्; थेब् पैंब्मैंइ ङलाइ खैच्हिजी लल् आयोंरिगे।
PSA 119:123 क्हिजी खोंयों जोगेमिंब् ङ्‍हे? धै क्हिजी फैबै क्ह्रोंसेंन्बै बाछा खोंयों पिंब् ङ्‍हे? बिसि ङए मि छेन्ले आम्रोंब् तल् खाँइमुँ;
PSA 119:124 क्हिए खोंयोंइ आनुबै म्हाँयार ह्रोंसए के लबै म्हिए फिर ल्हयो लमिंन्, धै क्हिए निसाफमैं ङलाइ लोमिंन्।
PSA 119:125 ङ क्हिए के लबै म्हि ग! छतसि क्हिजी बिबै ताँमैं क्होल् खाँरिगे बिसि ङलाइ च्हैंब् मैंब् लल् पिंन्!
PSA 119:126 ओ याहवेह, म्हिमैंइ क्हिए ठिमए बिरोध लइमुँ! चमैंलाइ तो लल् त्हुब् जा क्हिजीन् लद्।
PSA 119:127 मारा मुइ भन्दा, बेल्‍ले छ्याँबै मारा भनदै या, क्हिए ताँमैंन् ङइ खोम्,
PSA 119:128 धै क्हिजी लद् बिबै ताँन् केमैं ङइ लइमुँ; आछ्याँबै के लबै ताँन् घ्याँ ङइ आखो।
PSA 119:129 क्हिजी बिबै ताँमैं औदिबै मुँ; छतसि सैं न्होंउँइँलेन् ङइ चमैं ङिंइमुँ।
PSA 119:130 क्हिए ताँए अर्थ खोल्दिमिंमा ज्ञान बुद्धि योंमुँ, धै आह्र आसेब्मैं या ह्रब् सेब् तम्।
PSA 119:131 क्हिए ताँमैं ङइ छेनाले क्होदा ङ्हाँसि ङ क्यु पिब् धोंले सो हेंम्।
PSA 119:132 क्हिए मिं म्हाँया लब्मैंए फिर क्हिजी ल्हयो लब् धोंले ङए फिर दयाम्हाँया लसि ङ ङाँइ तोमिंन्।
PSA 119:133 क्हिजी फैबै बाछाइ बिब् धोंलेन् ङलाइ ठिक घ्याँर डोरेमिंन्, तोइ सैज्यै या ङलाइ पापर च्होवाल् आखाँरिगे।
PSA 119:134 क्हिजी ल्हैदिबै केमैं लल् खाँबै ल्हागिर ङलाइ दु:ख पिंब्मैंउँइँले ङ जोगेमिंन्।
PSA 119:135 क्हिए के लबै म्हिलाइ छ्याँब लमिंन्; धै क्हिए निसाफमैं ङलाइ लोमिंन्।
PSA 119:136 म्हिमैंइ क्हिए ठिम आङिंब् म्रोंमा ङए सैं नसि मिग्लि युम्।
PSA 119:137 ओ याहवेह, क्हिजी ठिक के लमुँ, धै क्हिए निसाफमैं ठिक मुँ।
PSA 119:138 क्हिजी बिबै ताँमैं ठिक मुँ, धै क्ह्रोंसेंन्बै भर लल् खाँबै ताँमैं मुँ।
PSA 119:139 ङए शत्तुरमैंइ क्हिए ताँमैंलाइ तो धोंइ आङ्हाँब् म्रोंसि ङ बेल्‍ले त्होंदो रासि मिइ धोंले ङलाइ ख्रोंइमुँ।
PSA 119:140 क्हिजी फैबै बाछार्बै ताँमैं जाँच लसि पक्‍का मुँ, छतसि क्हिए के लबै म्हिइ च ताँ बेल्‍ले खोम्।
PSA 119:141 ङ तोंन् तोर्बै मुँ बिसि म्हिमैंइ म्हि आच्हि, दिलेया क्हिजी ल्हैदिबै केमैं ङइ आम्‍ले।
PSA 119:142 क्हिजी लबै ठिक केमैं खोंयोंन् बिलै तरिमुँ, धै क्हिए ठिमर क्ह्रोंसेंन्बै ताँमैं मुँ।
PSA 119:143 ङए फिर थेबै दुःख तइमुँ, दिलेया क्हिए ताँमैंइ ङए सैं तोंल् लइमुँ।
PSA 119:144 क्हिजी बिबै ताँमैं खोंयोंन् बिलै ठिक मुँ! ङ सोरिगे बिसि च ताँमैं क्होबै शक्ति पिंन्।
PSA 119:145 ओ याहवेह, ङए सैं न्होंउँइँलेन् ङइ क्हिने ग्वार हिमा ङ जवाफ पिंन्, धै क्हिए निसाफमैं ङइ म्हाँदिब्मुँ।
PSA 119:146 ङइ क्हिने ग्वार ह्रिमा ङ जोगेमिंन्, झाइले क्हिजी बिबै ताँमैं अनुसार ङ प्रब्मुँ।
PSA 119:147 त्हिंइ प्योब् भन्दा ओंसों रेसि ङ क्हिने ग्वार ह्रिमुँ; ङइ क्हिए ताँए फिर आशा थेंइमुँ।
PSA 119:148 क्हिजी फैबै बाछाए ताँमैं मैंबै ल्हागिर म्हुँइँस तिरो ङ न्हरु आख।
PSA 119:149 ओ याहवेह, क्हिजी खोंयोंन् बिलै ङने म्हाँया लमुँ; छतसि ङए ताँ थेमिंनु, क्हिए निसाफमैं अनुसार ङलाइ जोगेमिंन्।
PSA 119:150 आछ्याँबै के लप्रबै दुष्‍ट म्हिमैं ङए ङाँर खसिन् मुँ, क्हिए ठिमर्बै ताँमैं चमैंइ तिफुँइ आम्हाँदि!
PSA 119:151 दिलेया ओ याहवेह, क्हि ङए ङाँर्न मुँ, धै क्हिए ताँन् ताँमैं क्ह्रोंसेंन्बै मुँ।
PSA 119:152 खोंयोंन् बिलै तरिगे बिसि क्हिजी क्हिए ताँमैं प्ह्रिथेंइ बिसि ङइ च ताँमैंउँइँले ओंसों ओंनोंन् लोइ।
PSA 119:153 क्हिए ठिम ङइ आम्‍लेइमुँ, छतसि ङए दुःख ङ्ह्‍योमिंसि ङ फ्रेमिंन्।
PSA 119:154 ङए ख लसि ङए ल्हागिर पोंमिंन्, धै चु दु:खउँइँले ङ फ्रेमिंन्; क्हिजी फैबै बाछा अनुसार ङलाइ जोगेमिंन्!
PSA 119:155 दुष्‍टमैंइ मुक्ति योंरिब् आरे, तलेबिस्याँ क्हिए निसाफमैं चमैंइ आम्हाँदि।
PSA 119:156 ओ याहवेह, क्हिजी ङए फिर बेल्‍ले ल्हयो खमुँ; क्हिए निसाफमैंइ बिब् धोंलेन् ङए रक्षा लमिंन्।
PSA 119:157 ङलाइ ह्रुगुदिबै शत्तुरमैं ल्हें मुँ, दिलेया क्हिजी तामैं बिब् धोंलेन् प्ररिब ङ आपिइमुँ।
PSA 119:158 धोका पिंबै म्हिमैं ङइ तिफुँइ आखो; तलेबिस्याँ क्हिजी बिबै ताँमैं चमैंइ आङिं।
PSA 119:159 ङ्ह्‍योत्ति, क्हिजी चु के लद् बिबै ताँमैं ङइ कति म्हाँया लइमुँ! छतसि ओ याहवेह, क्हिए खोंयोंइ आनुबै म्हाँयाजी ङलाइ रक्षा लमिंन्।
PSA 119:160 क्हिजी पोंबै ताँन् ताँमैं क्ह्रोंसेंन्बै मुँ, क्हिए ताँन् ठिक निसाफमैं खोंयोंन् बिलै तरिम्।
PSA 119:161 क्रथे मिंथेमैंइ तोन्-तोर्न ङलाइ ह्रुगुदिम्, दिलेया ङए सैं क्हिए ताँर्न तरिम्।
PSA 119:162 लुडिसि पखबै सै न्होर योंबै म्हि सैं तोंब् धोंले क्हिजी फैबै बाछए ताँर ङ सैं तोंम्।
PSA 119:163 स्योलिबै ताँमैंर ङ धोंइ आङ्हाँ, छाबै ताँमैं ङइ आखो, दिलेया क्हिए ठिम ङइ खोम्।
PSA 119:164 क्हिए ठिक निसाफमैंए ल्हागिर तिंगैंर्न ङइ ङिखे समा क्हिए मिं थेब् लम्।
PSA 119:165 क्हिए ठिमइ खोब्मैंइ तो सैरै या न्हुँ लल् आत्हु; तो सैज्यै या चमैंलाइ ट्होल् आखाँ।
PSA 119:166 ओ याहवेह, क्हिजी जोगेमिंब्मुँ बिसि ङइ ह्रेरिइमुँ; धै क्हिए ताँमैं अनुसार ङ प्ररिइमुँ।
PSA 119:167 क्हिजी बिबै ताँमैं ङइ ङिंरिइमुँ; तलेबिस्याँ च ताँमैं ङइ बेल्‍ले खोम्।
PSA 119:168 क्हिजी ल्हैदिबै केमैं ङइ लमुँ, धै क्हिजी बिबै ताँमैं ङइ ङिंम्; तलेबिस्याँ ङए ताँन् बानि ब्योर क्हिजी सेइमुँ।
PSA 119:169 ओ याहवेह, ङइ ग्वार ह्रिमा क्हिजी थेमिंनु; क्हिए ताँइ बिब् धोंले ङलाइ क्होबै शक्ति पिंन्!
PSA 119:170 ङइ यो छ्युँ लमा क्हिजी थेमिंनु; क्हिजी फैबै बाछा अनुसार ङलाइ फ्रेमिंन्।
PSA 119:171 क्हिए निसाफमैं ङलाइ क्हिजी लोमिंम्; छतसि ङए सुँउँइँले खोंयोंन् बिलै क्हिए मिं क्‍वेबै ताँमैं त्होंरिगे।
PSA 119:172 क्हिए ताँमैं ताँन् ठिक मुँ; छतसि ङए सुँइ क्हिए बाछाए छ्याँबै बयन प्रिंरिगे।
PSA 119:173 क्हिजी ल्हैदिबै केमैं ङइ लइमुँ; छतसि क्हिए योजी खोंयोंन् बिलै ङलाइ ल्होमिंरिगे।
PSA 119:174 ओ याहवेह, ङइ क्हिए मुक्तिर आशा थेंइमुँ, धै क्हिए ठिमइ ङए सैं तोंल् लम्।
PSA 119:175 क्हिए मिं क्वेबै ल्हागिर ङ सोल् योंरिगे, धै क्हिए निसाफमैंइ ङलाइ ल्होरिगे।
PSA 119:176 म्हयाबै क्यु धों ङ तप्ररिइमुँ; ह्रोंसए केब्छैंलाइ म्हैदु, तलेबिस्याँ क्हिए ताँमैं ङइ आम्‍लेइमुँ।
PSA 120:1 कैंडो क्रेबै त्हेर्बै क्वे ङए दुःखर ङ याहवेहने ग्वार ह्रिमा खीजी ङने ज्वाफ पिंम्।
PSA 120:2 स्योर तेबै म्हदे मुँबै म्हिमैंउँइँले, नेरो छलु म्हिलु लबै म्हिए लेउँइँले, ओ याहवेह, ङ जोगेमिंन्।
PSA 120:3 ओ स्योर तेबै ले, खीजी क्हिए फिर कति थेबै दण्ड पिंलै? क्हिने झन् खै लब्मुँ?
PSA 120:4 खीजी क्हिए फिर सिपाइमैंइ छेबै म्ह्रुछु तबै मेमैंइ दण्ड पिंब्मुँ, धै झ्याडिर लुँरिबै मिए राबइ ख्रोंवाब्मुँ।
PSA 120:5 धिक्‍कार ङ, तलेबिस्याँ मेशेकर्बै ल्हयो आखब्मैं टिब् धोंले धै केदारर्बै तम्बुमैंए म्हाँजोर स्याँ म्हि टिब् धोंले ङ क्हेमैंए म्हाँजोर टिइमुँ।
PSA 120:6 शान्तिलाइ आखोब्मैंए म्हाँजोर ङ टिब ल्हें तइ।
PSA 120:7 ङ शान्ति म्हैबै म्हि ग, दिलेया ङ छले पोंमा चमैं नेबर तयार तम्।
PSA 121:1 कैंडो क्रेबै त्हेर्बै क्वे कोंमैंउँइँ ङइ मि ङ्ह्‍योमुँ। ङलाइ ल्होबर खनिउँइँले युम्?
PSA 121:2 स्वर्ग नेरो पृथ्बी बनेबै याहवेहउँइँले ङलाइ ल्होबर युम्।
PSA 121:3 खीजी क्हिए प्हले प्लेल् पिंरिब् आरे; क्हिए रक्षा लबर खी खैंमइ न्हरु च्हुइरिब् आरे।
PSA 121:4 क्ह्रोंसेंन इस्राएलए रक्षा लबर खी खोंयोंइ न्हरु आकु धै न्हरु या च्हुइरिब् आरे।
PSA 121:5 याहवेहजी क्हि रक्षा लमिंम्; याहवेह क्हिए क्योलो योउँइँबै छरि ग।
PSA 121:6 त्हिंइर्बै त्हिंयाँइ क्हिए न्होह्रों लरिब् आरे, धै म्हुँइँसर्बै लयाँइ क्हिए न्होह्रों लरिब् आरे।
PSA 121:7 क्हिलाइ न्होह्रों लबै तोन्दोंरि सैमैंउँइँले याहवेहजी जोगेमिंब्मुँ; खीजी क्हिए सोए रक्षा लमिंब्मुँ।
PSA 121:8 क्हि बैरु ह्‍यामा न्होंर खमा खनि ह्‍यालै या याहवेहजी क्हिए रक्षा लमिंब्मुँ, तोगोउँइँले खोंयोंन् बिलै।
PSA 122:1 कैंडो क्रेबै त्हेए ल्हागिर दाऊदइ प्ह्रिबै क्वे घ्रि “लु, ङ्यो याहवेहए धिंर ह्‍याले!” बिसि म्हिमैंइ ङने बिमा ङए सैं तोंइ।
PSA 122:2 ओ यरूशलेम, ङिए प्हलेमैं क्हिए म्रामैं न्होंर राइमुँ!
PSA 122:3 छेन्ले क्ह्रिबै सहर घ्रि धोंले यरूशलेम बेल्‍ले छेन्ले बनेइमुँ।
PSA 122:4 याहवेहजी इस्राएलीमैंने ताँ बिब् धोंले कुल-कुलर्बै म्हिमैं, याहवेहए कुलमैं, खीए मिंलाइ धन्यबाद पिंबर चु सहरर ह्‍यामुँ।
PSA 122:5 चुर्न दाऊदए खलगर्बै म्रुँमैं निसाफ लबर चु सहरर्बै गद्दिमैंए फिर क्हुँम्।
PSA 122:6 यरूशलेमर शान्ति तरिगे बिसि प्राथना लद्! “क्हिए फिर म्हाँया लब्मैंल बिब् धों तरिगे!
PSA 122:7 क्हिए गारमैंए न्होंर शान्ति तरिगे, धै क्हिए किल्‍लामैंए न्होंर छ्याँब क्ह्‍युब तरिगे!”
PSA 122:8 “क्हिए न्होंर शान्ति तरिगे!” बिसि ङए आघें-अलिमैं नेरो ङए थुमैंए ल्हागिर ङइ बिब्मुँ।
PSA 122:9 याहवेह ङ्योए परमेश्‍वरए धिं छेन् लल् खाँरिगे बिसि “ङइ क्हिए ल्हागिर” प्राथना लइमुँ।
PSA 123:1 कैंडो क्रेबै त्हेर्बै क्वे ओ स्वर्गर्बै राजगद्दिर टिबै परमेश्‍वर, क्हि ङाँइन ङ ङए मि क्वेइमुँ।
PSA 123:2 खैले केब्छैंमैंए मिइ ह्रोंसए क्ल्हेए योउँइँ ङ्ह्‍योमुँ, खैले क्येब्स्योए मिइ ह्रोंसए क्ल्हेस्योए योउँइँ ङ्ह्‍योमुँ, छलेन ङिए याहवेह परमेश्‍वरजी ङिए फिर ल्हयो आखन् समा ङिए मि खी ङाँइँन ङ्ह्‍योरिम्।
PSA 123:3 ङिए फिर ल्हयो खमिंन्, ओ याहवेह, ङिए फिर ल्हयो खमिंन्, तलेबिस्याँ म्हिमैंइ प्ह्रब ङिइ ल्हें सैदिइमुँ।
PSA 123:4 थेब प्हैंब्मैंइ प्ह्रब नेरो ह्रब् सेब् प्हैंब्मैंइ हेल लब ङिइ ल्हें सैदिरिइमुँ।
PSA 124:1 कैंडो क्रेबै त्हेए ल्हागिर दाऊदइ प्ह्रिबै क्‍वे। “याहवेह ङ्योने बालु आरेस्याँ!” इस्राएलीमैंइ बिरिगे।
PSA 124:2 “याहवेह ङ्योने आरेस्याँ म्हिमैंइ सैल् म्हैबै त्हेरि
PSA 124:3 चमैंए ह्रिंस ङिए फिर मि धोंले लुँमा चमैंइ ङि सोगोंन् क्ल्ह्‍योंवामल।
PSA 124:4 प्ल्होंखबै बाढिइ धोंले चमैंइ ङि गास घ्रिन् लवामल; धै प्हलें ङिए फिर प्रमल;
PSA 124:5 प्ल्हों खबै बाढिइ ङि नोइ बोयामल।”
PSA 124:6 याहवेहजी शत्तुरमैंए योउँइँले ङ्योलाइ सिल् आपिं। छतसि खीए मिं थेब् तरिगे!
PSA 124:7 नमे सैइ प्रबै म्हिइ चुबै ङोउँइँले नमे स्योरब् धोंले ङि स्योर खइमुँ; चमैंए जाल ट्होयाइ, धै ङि त्होंल् योंइ!
PSA 124:8 स्वर्ग नेरो पृथ्बी बनेबै याहवेहए मिंर ङ्योइ ग्वार योंम्।
PSA 125:1 कैंडो क्रेबै त्हेर्बै क्वे याहवेहए फिर भर थेंब्मैं सियोन कों धों तम्, च कोंलाइ खाबज्यै लाल् आखाँ, खोंयोंन् बिलै तरिम्।
PSA 125:2 यरूशालेमलाइ कोंमैंइ कारर्ग्यु लब् धोंले, याहवेह ह्रोंसए म्हिमैंए कारर्ग्युले खोंयोंन् बिलै तरिम्।
PSA 125:3 ठिक के लब्मैंए ह्‍युलर दुष्‍टमैं तरिब् आरे, आस्याँ ठिक के लब्मैंए योइ आछ्याँबै के लब्मुँ।
PSA 125:4 ओ याहवेह, छ्याँब लब्मैंलाइ छ्याँबन् लमिंन्, छलेन छ्याँबै खों प्ह्‍याब्मैंलाज्यै या छ्याँबन् लमिंन्
PSA 125:5 दिलेया आछ्याँबै के लप्रब्मैं बिस्याँ याहवेहजी दुष्‍ट के लब्मैंलाइ पिंब् धों तबै सजैं पिंब्मुँ! इस्राएलए फिर शान्ति तरिगे!
PSA 126:1 कैंडो क्रेबै त्हेर्बै क्वे याहवेहजी ङिलाइ सियोनर एपखमा ङि म्होंड धोंन् ङ्हाँइ।
PSA 126:2 धै ङि बेल्‍ले सैं तोंसि निस्योदै क्वे प्रिंइ! छाब् म्रोंसि “याहवेहजी चमैंए ल्हागिर थेबै केमैं लमिंइमुँ।” बिसि अरू ह्रेंर्बै म्हिमैंइ बिइ।
PSA 126:3 याहवेहजी ङ्योए ल्हागिर थेबै के लमिंइमुँ, छतसि ङ्यो सैं तोंइमुँ।
PSA 126:4 ओ याहवेह, नेगेब ह्‍युलर स्योंमैं प्ल्हों खब् धोंले शत्‍तुरमैंइ बोसि च्युथेंबै ङिए म्हिमैं एसि पखमिंन्।
PSA 126:5 क्रोदै प्लु प्लुब्मैंइ सैं तोंबै क्वे प्रिंदै खैंब्मुँ।
PSA 126:6 क्रोदै प्लु नोसि प्लुबर ह्‍याब्मैंइ म्ल्हा-नारेए तिमैं नोसि सैं तोंबै क्वे प्रिंदै एखब्मुँ।
PSA 127:1 कैंडो क्रेबै त्हेए ल्हागिर सोलोमनइ प्ह्रिबै क्वे याहवेहजीन् धिं आबनेस्याँ बनेब्मैंए के फाकर्न तम्। याहवेहजीन् सहर आरुँमिंस्याँ रुँब्मैंइ रुँब फाकर्न तम्।
PSA 127:2 चबै सैमैंए ल्हागिर दुःख लबर न्हाँगर्न रेब नेरो ङेसर क्हैल्‍ले रोबै या फाकर्न ग, तलेबिस्याँ खीजी म्हाँया लब्मैंलाइ, न्हरु पिंम्।
PSA 127:3 च्ह च्हमिमैं याहवेहजी पिंबै आशिकमैं ग, फो न्होंर्बै प्हसेमैं खीजी पिंबै इनाम ग।
PSA 127:4 ल्हडेर ह्‍याबै म्हिए योर्बै मे धों तब फ्रें-छमिंर योंबै प्हसेमैं तम्।
PSA 127:5 त्हुर ल्हें मे मुँबै म्हि आशिक योंबै म्हि ग, तलेबिस्याँ निया लबै क्ल्ह्‍योर शत्तुरमैंए उँइँर राल् त्हुमा च फापिल् त्हुरिब् आरे।
PSA 128:1 कैंडो क्रेबै त्हेर्बै क्वे याहवेहलाइ मान लब्मैं नेरो खीए घ्याँर प्रब्मैं ताँनइ आशिक योंम्!
PSA 128:2 क्हिइ ह्रोंसइन के लसि चब्मुँ; क्हिए फिर आशिक युब्मुँ धै छ्याँब तब्मुँ।
PSA 128:3 क्हिए प्ह्रेंस्यो क्हिए धिंर बेल्‍ले रोबै अँगुरए धुँ धों तब्मुँ; क्हिए प्हसेमैं क्हिए टेबलए खागु जैतुनए त्होर धोंन् तब्मुँ।
PSA 128:4 याहवेहलाइ मान लबै म्हिइ आशिक योंब्मुँ।
PSA 128:5 याहवेहजी सियोनउँइँले क्हिए फिर आशिक पिंरिगे! क्हिइ ह्रोंसए छ्ह तिगोंन् यरूशलेमर छ्याँब तब म्रोंरिगे!
PSA 128:6 क्हिइ क्वें-क्वेंमिमै म्रोंल् योंरिगे! इस्राएलए फिर शान्ति तरिगे!
PSA 129:1 कैंडो क्रेबै त्हेर्बै क्वे “ङ कोलो मुँब् ओंनोन् चमैंइ ङए फिर ल्हें खे दुःख पिंइमुँ!”
PSA 129:2 “ङ कोलो मुँब् ओंनोन् चमैंइ ङए फिर ल्हें खे दुःख पिंइमुँ। दिलेया चमैंइ ङलाइ ट्होल् आखाँइमुँ।
PSA 129:3 क्ल्याछैंमैंइ ङए क्होर क्ल्योइ; चमैंइ खेंमैंए क्होरए फलिइ ङए क्हो तिगोंन् क्ल्योइ।
PSA 129:4 दिलेया याहवेहजी ठिक निसाफ लमुँ; छतसि खीजी दुष्‍टमैंए योउँइँले ङ फ्रेमिंइमुँ।”
PSA 129:5 सियोन म्रोंसि छेरब्मैं ताँन् फापिल् त्हुरिगे धै लिग्याँइ स्योयारिगे!
PSA 129:6 धिं फिर्बै छि धोंन् चमैं तब्मुँ! फारब् भन्दा ओंसोंन् च ङ्योंलोंयाब्मुँ।
PSA 129:7 छि खैंमा च मुठ्ठि घ्रि या तल् आखाँ, धै प्हैं फैमा च आङ्लो घ्रि या तल् आखाँ।
PSA 129:8 “याहवेहए आशिक क्हिए फिर तरिगे! याहवेहए मिंर ङिइ क्हिलाइ आशिक पिंम्!” बिसि च घ्याँ तसि ह्‍याब्मैंइ आबि।
PSA 130:1 कैंडो क्रेबै त्हेर्बै क्वे ओ याहवेह, गैरु क्ल्ह्‍योउँइँले ङइ क्हिने ग्वार ह्रिइमुँ!
PSA 130:2 ओ याहवेह, ङइ ग्वार ह्रिब थेमिंन्! ल्हयो खमिंन् बिसि ङइ ग्वार ह्रिब क्हिए न्हइ थेमिंन्!
PSA 130:3 ओ याहवेह, म्हिमैंइ लबै पापए हिसाब क्हिजी थेंइ बिस्याँ, ओ प्रभु, क्हिए उँइँर खाब् राल् खामुँ?
PSA 130:4 दिलेया क्हिजी क्षमा पिंम्, छतसि ङइ क्हिलाइ मान लम्।
PSA 130:5 ङ याहवेहए घ्याँ ङ्ह्‍योरिम्, ङए सोइ खीलाइ प्रेंरिम्, धै खीए बचनर ङइ आशा थेंम्;
PSA 130:6 न्हाँग खोंयों तब् ङ्‍हे बिसि पालेइ न्हाँग ह्रेब् भन्दा ल्हें ङए सोइ याहवेहए घ्याँ ङ्ह्‍योरिम्।
PSA 130:7 ओ इस्राएल, याहवेहए फिर आशा थेंन्! तलेबिस्याँ याहवेजी खोंयोंन् बिलै म्याँया लरिम्, धै तोंन्दोरि आछ्याँबै सैउँइँले खीजीन् जोगेमिंम्।
PSA 130:8 इस्राएलइ लबै ताँन् पापउँइँले खीजी फ्रेमिंब्मुँ।
PSA 131:1 कैंडो क्रेबै त्हेए ल्हागिर दाऊदइ प्ह्रिबै क्वे घ्रि ओ याहवेह, ङए सैं थेब आप्हैं, ङ थेब् तदा आङ्हाँ; ह्रोंसइ आक्होबै सैमैं नेरो ह्रोंसइ लल् आखाँबै सैमैंर ङ क्होसि आटि।
PSA 131:2 दिलेया आमाने टिल् योंमा कोलो च्याँ तब् धोंले छले ङइ ङए खों दरो नेरो ढुक्‍का लइमुँ। आमाए ङ्‍हे थुँब् पिबै कोलो धोंले ङए खों छिं तइमुँ।
PSA 131:3 ओ इस्राएल, तोगोउँइँले खोंयोंन् बिलै याहवेहए फिर आशा थेंन्।
PSA 132:1 कैंडो क्रेबै त्हेर्बै क्वे ओ याहवेह, दाऊदलाइ मैंमिंन्, चइ योंबै ताँन् दुःखमैं मैंमिंन्।
PSA 132:2 चइ याहवेहए मिंर कसम चइमुँ; धै तोन्दोंरि सै लल् खाँबै याकूबइ म्हाँदिबै परमेश्‍वरए मिंर भकल लइ:
PSA 132:3 “याहवेहए ल्हागिर क्‍ल्‍ह्‍यो घ्रि तौदु लल् आखाँन् समा, याकूबइ म्हाँदिबै तोन्दोंरि सै लल् खाँबै परमेश्‍वरए ल्हागिर टिबै क्‍ल्‍ह्‍यो घ्रि ङइ आयोंन् समा,
PSA 132:4 ङ ह्रोंसए धिं न्होंर होंरिब् आरे, ह्रोंसए खाडरै या क्रेरिब् आरे,
PSA 132:5 ङए मिर न्हरु या खल् पिंरिब् आरे, धै ङए मि तिस्याँ या च्युँ लल् पिंरिब् आरे।”
PSA 132:6 बाछा प्ह्रिथेंबै बाकसए बारेर ङिइ एप्राता बिबै नाँसर थेल; याआरर्बै चेप्ला तबै क्ल्ह्‍योर ङिइ च बाकस स्याइ।
PSA 132:7 “खी टिबै क्‍ल्‍ह्‍योर ङ्यो ह्‍याले; खीए प्हले म्हैबै क्ल्‍ह्‍योर ह्‍यासि खीए मिं क्वेले!”
PSA 132:8 ओ याहवेह रेत्ति, क्हिए शक्तिए बाकस बालु क्हिए भों न्हबै क्‍ल्‍ह्‍योर युमिंन्।
PSA 132:9 क्वें खिब् धोंले क्हिए खेगिमैंइ खोंयोंन् बिलै ठिक के लरिगे, धै क्हिए म्हिमैं सैं तोंदै क्हिए जयजय लरिगे।
PSA 132:10 क्हिजी ह्रोंसए के लबै म्हि दाऊदने फैबै बाछा मैंसि क्हिजी त्हाँबै म्रुँउँइँले क्हिए लि आलोमिंन्।
PSA 132:11 याहवेहजी दाऊदने बाछा घ्रि फैइमुँ; चु बाछाउँइँले खी स्योयारिब् आरे: “क्हिए च्हमैंए न्होंर्बै घ्रिलाइ ङइ क्हिए राजगद्दिर थेंमिंब्मुँ।
PSA 132:12 क्हिए च्हमैंइ ङइ फैबै बाछा नेरो ङइ चमैंने लोमिंबै ताँमैं ङिंइ बिस्याँ, चमैंए च्हमैं या खोंयोंन् बिलै क्हिए राजगद्दिर टिब्मुँ।”
PSA 132:13 याहवेहजी सियोनलाइ त्हाँइमुँ; खीजी चलाइ ह्रोंस टिबै क्‍ल्‍ह्‍यो बनेदा ङ्हाँइमुँ:
PSA 132:14 “खोंयोंन् बिलै ङए भों न्हबै क्‍ल्‍ह्‍यो चु ग; चु राजगद्दिर ङ टिब्मुँ, तलेबिस्याँ चुर्न ङ टिदा ङ्हाँइमुँ।
PSA 132:15 चु सहरलाइ चैदिबै तोन्दोंरि सैर ङइ आशिक पिंब्मुँ; चर्बै ङ्हाँदुमैंलाइ ङइ क्हेंइ म्रेंल् पिंब्मुँ।
PSA 132:16 चर्बै खेगिमैंलाइ ङइ मुक्ति पिंब्मुँ, धै चर्बै ङए म्हिमैं सैं तोंदै कै तेसि ओरब्मुँ।
PSA 132:17 दाऊदए ल्हागिर चर ङइ थेबै म्रुँ घ्रि बनेब्मुँ; ङइ त्हाँबै म्रुँए ल्हागिर बत्ति घ्रि तयार लब्मुँ।
PSA 132:18 चए शत्तुरमैंलाइ ङइ फापिल् लवाब्मुँ, दिलेया चए क्रर मुकुट चारब्मुँ।”
PSA 133:1 कैंडो क्रेबै त्हेए ल्हागिर दाऊदइ प्ह्रिबै क्वे घ्रि थेद्, आघें-अलिमैं क्ह्रिसि टिब बेल्‍ले छ्याँबै सैं तोंबै ताँ ग!
PSA 133:2 सै ल्हें फेबै छ्युगु हारूनए क्रर युमिंब् धोंब चु तम्। च छ्युगु हारूनए दाह्रि समा युम्, चए क्वेंए ङाँ समा फेनेम्।
PSA 133:3 हेर्मोन बिबै कोंर्बै शीत धोंन् च छ्याँब तम्! च शीत सियोनर्बै कोंमैंर युम्। चर्न खोंयोंइ आखाँबै छ्ह योंबै आशिक युरिगे बिसि याहवेहजी बिइमुँ।
PSA 134:1 कैंडो क्रेबै त्हेर्बै क्वे ओ याहवेहए सेवा लब्मैं, म्हुँइँसर याहवेहए धिंर राब्मैं, याहवेहए मिं क्वेद्!
PSA 134:2 पबित्र क्ल्ह्‍योर ह्रोंसए यो क्वेसि याहवेहए मिं क्वेद्!
PSA 134:3 स्वर्ग नेरो पृथ्बी बनेबै याहवेहजी सियोनउँइँले क्हिए फिर आशिक पिंरिगे।
PSA 135:1 याहवेहए मिं क्वेद्! याहवेहए मिं थेब् लद्, ओ याहवेहए सेवा लब्मैं खीए मिं थेब् लद्!
PSA 135:2 याहवेहए धिंर ङ्योए परमेश्‍वरए धिंर्बै ह्‍युमैंर राब्मैं खीए मिं क्वेद्।
PSA 135:3 याहवेह बेल्‍ले स्वाब मुँ, छतसि खीए मिं थेब लद्; खीजी म्हिमैंए फिर ल्हयो खम्, छतसि खीए मिंर क्वे प्रिंन्।
PSA 135:4 तलेबिस्याँ याहवेहजी याकूबलाइ ह्रोंसल् लबर, धै इस्राएलीमैंलाइ ह्रोंसए म्हिमैं तबर त्हाँइमुँ।
PSA 135:5 याहवेह बेल्‍ले थेब मुँ, छतसि ङ्योए प्रभु ताँन् देवतामैं भन्दा थेब मुँ बिसि ङइ सेइमुँ।
PSA 135:6 स्वर्गर, पृथ्बीर, नेरो मा ङ्युँइमैंए गैरु क्ल्ह्‍योमैंरै या, याहवेहजी ह्रोंसए सैंर मैंब् धोंले लम्।
PSA 135:7 खीजी पृथ्बीए च्होउँइँले न्हाँम्स्यो रेमिंम्, खीजी नाँने बालु काम्‍लि-तिम्‍लि कुल्मिंम् धै खीए भण्डरउँइँले खैं तेमिंम्।
PSA 135:8 स्योंम खीजी मिश्रीमैंए ओंसों फिबै च्हमैं, नेरो ओंसों फिबै खेदोमैं सैवाइ।
PSA 135:9 ओ मिश्र ह्‍युल, क्हिए ह्‍युलए म्हाँजोर्न फारो नेरो चए ताँन् के लब्मैंए उँइँर खीजी औदिबै चिनु नेरो प्लेटोयाबै केमैं लइ।
PSA 135:10 खीजी ल्हें ह्रें-ह्रेंमैं सैवाइ, भों-भोंबै म्रुँमैं या सैवाइ:
PSA 135:11 एमोरीमैंए म्रुँ सिहोन, नेरो बाशानर्बै म्रुँ ओगलाज्यै या सैवाइ, धै कनान ह्‍युलर्बै ताँन् ग्याल्समैं खीजी नास लवाइ।
PSA 135:12 झाइले चमैंए क्‍ल्‍ह्‍यो-न्हेए फिर खीए म्हिमैं इस्राएलीमैंलाइ क्ल्हे तल् पिंइ।
PSA 135:13 ओ याहवेह, क्हिए मिं खोंयोंन् बिलै तरिम्, ओ याहवेह, पुस्ता-पुस्ता समा म्हिमैंइ क्हि मैंरिब्मुँ।
PSA 135:14 तलेबिस्याँ याहवेहजी ह्रोंसए म्हिमैंए ठिक निसाफ लब्मुँ, धै ह्रोंसए सेवा लब्मैंए फिर ल्हयो खब्मुँ।
PSA 135:15 अरू ह्रेंमैंए कुमैं मारा नेरो चाँदिउँइँले म्हिमैंए योइन बनेब् ग।
PSA 135:16 चमैंल सुँ मुँ, दिलेया पोंल् आखाँ; मि मुँ, दिलेया म्रोंल् आखाँ;
PSA 135:17 न्ह मुँ, दिलेया थेल् आखाँ, चमैंइ सो आसें।
PSA 135:18 छाबै सैमैं बनेब्मैं या छाबन् तब्मुँ, धै कुमैंए फिर भर थेंब्मैं या कुमैं धोंन् तब्मुँ।
PSA 135:19 ओ इस्राएलए सन्तानमैं, याहवेहए मिं थेब् लद्! ओ हारूनए सन्तानमैं, याहवेहए मिं थेब् लद्!
PSA 135:20 ओ लेबीए सन्तानमैं, याहवेहए मिं थेब् लद्! ओ याहवेहलाइ मान लब्मैं, याहवेहए मिं थेब् लद्!
PSA 135:21 सियोनर टिब्मैं याहवेहए मिं थेब् लद्, यरूशलेमर टिबै याहवेहए मिं थेब् लद्। याहवेहए मिं क्वेद्!
PSA 136:1 याहबेहलाइ धन्यबाद पिंन्, तलेबिस्याँ खी स्वाब मुँ।
PSA 136:2 देवतामैं भन्दा थेबै परमेश्‍वरलाइ धन्यबाद पिंन्।
PSA 136:3 प्रभुमैंए प्रभुलाइ धन्यबाद पिंन्।
PSA 136:4 खीजी मत्‍त्रे औदिबै थेब-थेबै केमैं लम्।
PSA 136:5 खीजी ह्रोंसए ज्ञान बुद्धिइ स्वर्ग बनेइ।
PSA 136:6 खीजी क्युए फिर पृथ्बी थेंइ।
PSA 136:7 खीजी त्हिंयाँ नेरो लयाँ बनेइ।
PSA 136:8 त्हिंइए फिर क्ल्हे लबर खीजी त्हिंयाँ बनेइ।
PSA 136:9 म्हुँइँसए फिर क्ल्‍हे लबर लयाँ नेरो मुसारा बनेइ।
PSA 136:10 खीजी मिश्र ह्‍युलर्बै च्ह थेब ताँन् सैवाइ।
PSA 136:11 खीजी इस्राएलीमैंलाइ मिश्र ह्‍युलउँइँले तेसि पखइ।
PSA 136:12 खीए भोंबै यो नेरो पाखरइ चमैं तेसि पखइ।
PSA 136:13 खीजी ओल्ग्या मा ङ्युँइ ङ्हिबाँ लवाइ।
PSA 136:14 खीजी इस्राएलीमैंलाइ चए म्हाँजोउँइँले डोरेपइ।
PSA 136:15 मिश्रर्बै म्रुँ फारो नरो चए सेनालाइ खीजी ओल्ग्या मा ङ्युँइर भ्योंवाइ।
PSA 136:16 खीजी ह्रोंसए म्हिमैंलाइ क्यु आयोंबै क्‍ल्‍ह्‍योउँइँले डोरेपइ।
PSA 136:17 खीजी थे-थेबै म्रुँमैं सैवाइ।
PSA 136:18 कालिदिबै म्रुँमैं या खीजी सैवाइ।
PSA 136:19 एमोरीमैंए म्रुँ सिहोनलाइ खीजी सैवाइ।
PSA 136:20 बाशानर्बै म्रुँ ओगलाज्यै या खीजी सैवाइ।
PSA 136:21 खीजी चमैंए ह्‍युल ह्रोंसए म्हिमैंलाइ क्ल्हे तल् पिंइ,
PSA 136:22 खीजी ह्रोंसए के लबै इस्राएलीमैंलाइ च ह्‍युल पिंइ।
PSA 136:23 ङि हार्दियामैं या खीजी ङिलाइ आम्‍ले।
PSA 136:24 ङिए शत्तुरमैंउँइँले खीजी फ्रेमिंइ।
PSA 136:25 सो प्ह्‍याबै तोन्दोंरि सैलाइ खीजी चबै सै पिंम्।
PSA 136:26 स्वगर्बै परमेश्‍वरलाइ धन्यबाद पिंन्।
PSA 137:1 बेबिलोनर्बै स्योंमैंए रेर टिमा सियोनलाइ मैंसि ङ्यो क्रोइ।
PSA 137:2 चर्बै बैंस बिबै सिधुँमैंर ङ्योइ ह्रोंसए बीणामैं च्योइ।
PSA 137:3 तलेबिस्याँ ङ्योलाइ च्युबर बोब्मैंइ चर ङ्योने क्वे प्रिंबर ल्हैदिइ, धै “ङिए सैं तोंबै ल्हागिर सियोनए क्वेंमैं प्रिंन्!” बिसि ङ्योए फिर दुःख पिंब्मैंइ ङ्योने बिइ।
PSA 137:4 आगुए ह्‍युलर ङ्योइ याहवेहए क्वे खैले प्रिंब?
PSA 137:5 ओ यरूशलेम, ङइ क्हिलाइ म्‍लेयाइ बिस्याँ ङए क्योलो योइ ह्रोंसए सिपमैं म्‍लेयारिगे!
PSA 137:6 ङइ क्हिलाइ आमैंस्याँ, ङए ताँन् भन्दा सैं तोंबै सै यरूशलेम ग! बिसि ङइ आबिस्याँ, ङए ले तालुर ह्रेंयारिगे!
PSA 137:7 ओ याहवेह, यरूशलेम नास तबै त्हिंइर एदोमिमैंइ खैबै के लल मैंन्दि, “चु फुवाद्, चुए तें समन् फुवाद्!” बिसि चमैं चिरल।
PSA 137:8 ओ बेबिलोनए च्हमि, क्हि नास लवाब्मुँ। ङिए फिर क्हिइ खै लल, छाबन् खि किंबै म्हिइ आशिक योंब्मुँ।
PSA 137:9 क्हिए च्युगुथिरि कोलोमैंलाइ क्हासि युँमार प्योवाबै म्हिइ आशिक योंब्मुँ।
PSA 138:1 दाऊदए भजन घ्रि ओ याहवेह, ङए सैं न्होंउँइँले क्हिलाइ धन्याबाद पिंम्, देवतामैंए ओंसों ङ क्हिलाइन थेब लम्।
PSA 138:2 क्हिजी ह्रोंसए मिं नेरो क्हिए बाछामैं तोन्दोंरि सैमैंए फिर बेल्‍ले थेब लइमुँ। छतसि क्हिए पबित्र क्ल्ह्‍योउँइँ ङ तोसि क्हिलाइन फ्योब्मुँ, धै क्हि खोंयोंइ आनुबै म्हाँया लब नेरो ङइ भर लल् खाँबै परमेश्‍वर ग बिसि ङ क्हिए मिं थेब लब्मुँ।
PSA 138:3 ङइ ग्वार ह्रिमा क्हिजी ङलाइ ज्वाफ पिंइ, धै क्हिजी ङ आङ्हिंब नेरो भोंब लमिंइ।
PSA 138:4 ओ याहवेह, क्हिए सुँउँइँले त्होंबै ताँ थेमा ताँन् ह्‍युलर्बै म्रुँमैंइ क्हिन थेब् लरिगे।
PSA 138:5 चमैंइ याहवेहजी लबै केमैंए बारेर क्वे प्रिंरिगे, तलेबिस्याँ याहवेहए मिं बेल्‍ले थेब मुँ।
PSA 138:6 याहवेह बेल्‍ले थेब मुँलेन थेब् आप्हैंब्मैंलाइ खीजी ङ्ह्‍योम्, दिलेया थेब् प्हैंब्मैं बिस्याँ खीजी ह्रेंगोउँइँलेन् ङो सेम्।
PSA 138:7 ङइ ल्हें दुःख योंलै या क्हिजी ङ जोगेमिंम्। ङए शत्तुरमैं ह्रिस खसि ङने छैखमा क्हिजी यो स्योंम्, झाइले ह्रोंसए क्योलो योजी ङ जोगेमिंम्।
PSA 138:8 याहवेहजी ङए ल्हागिर लबै चाँजोमैं पूरा लमिंब्मुँ। ओ याहवेह, ङिए फिर क्हिए म्हाँया खोंयोंन् बिलै तरिब्मुँ। क्हिए योजी लबै केमैं आवामिंन्।
PSA 139:1 क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, क्हिजी छेनाले ङए जाँच लइमुँ, धै ङ खैब मुँ बिसि क्हिजी सेइमुँ।
PSA 139:2 ङ टिब नेरो राब क्हिजी सेइमुँ, ङए सैंर मैंबै ताँ क्हिजी ह्रेंगोउँइँलेन् क्होमुँ।
PSA 139:3 ङ बैरु ह्‍यालेया धिंर रोलेया ङलाइ तो तइमुँ बिसि क्हिजी छेनाले सेम्, धै ङइ तो लइमुँ बिब क्हिजी ताँन् सेइमुँ।
PSA 139:4 ओ याहवेह, ङए सुँइ तोइ ताँ पोंब् भन्दा ओंसोंन् ङइ तो बिल् म्हैइमुँ बिब क्हिजी छेनाले सेइमुँ।
PSA 139:5 ङए लिलि ओंसों कारग्युले क्हि मुँ, धै रक्षा लबर क्हिजी ह्रोंसए यो ङए फिर थेंमिंइमुँ।
PSA 139:6 क्हिए छाबै ज्ञान म्रोंसि ङ प्लेटोयाइमुँ, क्हिए ज्ञान क्होबर ङए ल्हागिर बेल्‍ले गारो मुँ।
PSA 139:7 क्हिए प्ल्हउँइँले ङ खनिरै ह्‍याल् आखाँ! धै क्हिउँइँले ङ खनिरै भौदिल् आखाँ!
PSA 139:8 ङ स्वर्गर ह्‍यालेन क्हि चर्न तमुँ! क्रोंर रोलेया क्हि चर्न तमुँ!
PSA 139:9 त्हिंयाँ खबै क्ल्ह्‍योउँइँलेन् त्हिंयाँ लिबै क्ल्ह्‍यो समा प्हुरसि ह्‍यालेया
PSA 139:10 चरै या क्हिए योजी ङ डोरेमिंब्मुँ, धै क्हिए क्योलो योजी ङ क्हाथेंब्मुँ।
PSA 139:11 “मिछु खैबइ ङ हुवाब्मुँ, धै ङए कारग्यु चारबै ह्‍वे या मिछु तयाब्मुँ,” बिसि ङइ बिलेया
PSA 139:12 च मिछु खैब क्हिए ल्हागिर म्हुँइँस छु तरिब् आरे। मिछु खैब क्हिए ल्हागिर चारबै ह्‍वे धोंबन् ग। छतसि त्हिंयाँर्बै मि म्रोंब् धोंले म्हुँइँस चारब्मुँ।
PSA 139:13 क्हिजीन् ङए न्होंर्बै भागमैं बनेइ, क्हिजी आमाए फो न्होंर ङ केमिंइ।
PSA 139:14 ङ औदिले छेन्ले बनेइमुँ, छतसि ङ क्हिए मिं थेब् लमुँ। क्हिए केमैं औदिबै मुँ बिब ङइ छेनाले सेइमुँ।
PSA 139:15 आमाए फोर ङए ह्रिबमैं बनेसिन् मुँमा ङ खैले बनेब बिसि क्हिजी सेल् खाँल। झाइले ङ पृथ्बीए गैरुर बनेदै मुँमा,
PSA 139:16 क्हिजी ङए आबनेबै ज्यु म्रोंइ। ङ कति सोल् योंम् बिसि ङ फिब् भन्दा ओंसोंन् क्हिए कितबर प्ह्रिथेंल।
PSA 139:17 ओ परमेश्‍वर, ङए ल्हागिर क्हिए बिचारमैं सै ल्हें फेबै सैमैं भन्दा थेब मुँ! चमैं च्योसे च्योल् आखाँब मुँ!
PSA 139:18 चमैं ङइ च्योल् त्हुस्याँ, च बालुवाए त्हुल् भन्दा ल्हें तमल। ङ छोरमा ङ क्हिने बालुन् तमुँ।
PSA 139:19 ओ परमेश्‍वर, क्हिजी दुष्‍टमैं नास लवास्याँ कति छ्याँब तमल! ओ म्हि सैमैं, ङ ङाँइँले ह्रेंगो त‍याद्!
PSA 139:20 च शत्‍तुरमैंइ क्हिए बिरोधर आछ्याँबै ताँ पोंम्, चमैंइ क्हिए मिं फाकर्न किंम्।
PSA 139:21 ओ याहवेह, क्हिलाइ आखोब्मैं ङइ कत्ति आखो! छलेन क्हिए बिरोधर रेब्मैंलाइ ङइ आछ्याँबै मिइ ङ्ह्‍योम्!
PSA 139:22 छाबै म्हिमैंलाइ ङ तिफुँइ आखो; ङइ चमैंलाइ शत्तुरमैं धोंन् ङ्हाँइमुँ।
PSA 139:23 ओ परमेश्‍वर, ङ जाँचेदु, धै ङए खोंर्बै ताँमैं सेदु! ङ जाँचेदु, धै ङए न्हुँ कति ल्हें मुँ बिसि क्होमिंनु!
PSA 139:24 आछ्याँबै घ्याँर प्रइमुँ उ बिसि ङ जाँचेदु, धै खोंयोंइ आखाँबै छ्ह योंबै घ्याँर ङ डोरेमिंनु।
PSA 140:1 क्वे प्रिंबै चिबए ल्हागिर दाऊदए भजन घ्रि। ओ याहवेह, दुष्‍टमैंउँइँले ङ फ्रेमिंनु। म्हिसैमैंउँइँले ङ जोगेमिंन्।
PSA 140:2 चमैंइ ह्रोंसए खोंर आछ्याँबै चाँजोमैं लम्, धै त्हिंइ ह्रोंसे नेबै के लम्।
PSA 140:3 प्हुरिइ च्हिब् धोंले चमैंए लेइ नल् लम्, चमैंए सुँर प्हुरिए म्येकैं ल्हें तम्। तिस्याँदे मैंन्
PSA 140:4 ओ याहवेह, दुष्‍टमैंए योउँइँले ङ जोगेमिंन्, म्हिसैमैंउँइँले ङ रक्षा लमिंन्, ङए प्हले थुरवाबै चाँजो चमैंइ लइमुँ।
PSA 140:5 थेब् प्हैंबै म्हिमैंइ ङए ल्हागिर ङो चुइमुँ, चमैंइ ह्रोंसए जालए छो च्योइमुँ, धै ङ प्रबै घ्याँर ङो चुइमुँ। तिस्याँदे मैंन्
PSA 140:6 ओ याहवेह, ङ क्हिने बिमुँ, “क्हि ङए परमेश्‍वर ग!” ओ याहवेह, ङइ ग्वार ह्रिब थेमिंनु!
PSA 140:7 ओ याहवेह, ङलाइ जोगेमिंबै शक्ति मुँबै परमेश्‍वर, ल्हडें तबै त्हिंइर क्हिजी ङए क्र जोगेमिंमुँ।
PSA 140:8 ओ याहवेह, दुष्‍टमैंए सैंर मैंब योल् आपिंनु, चमैंइ लबै चाँजोमैं फुवाद्, आस्याँ चमैं थेब् प्हैंब्मुँ। तिस्याँदे मैंन्
PSA 140:9 ङलाइ घेर्दिब्मैंए क्रए फिर चमैंए सुँइ पोंबै आछ्याँबै ताँइन हुवारिगे!
PSA 140:10 लुँरिबै मिए राब चमैंए फिर उँयारिगे! बेल्‍ले लुँरिबै मिर चमैं भ्योंवारिगे, धै रेलै आखाँन्ले चमैं हिल् मुँबै होल्दोंर तेयारिगे!
PSA 140:11 आगुलाइ स्यारब्मैं चु ह्‍युलर टिल् आयोंरिगे, म्हिसैमैं युनन् नास तबर फेरिगे!
PSA 140:12 आगुइ क्र ओलै आपिंब्मैंए ख लसि याहवेहजी मुद्दा नेमिंम्, धै ङ्हाँदुमैंए ठिक निसाफ लमिंब्मुँ बिसि ङ सेइमुँ।
PSA 140:13 क्ह्रोंसेन ठिक के लब्मैंइ क्हिए मिंलाइ थेब लब्मुँ, झाइले सोजो म्हिमैं क्हिए उँइँर टिब्मुँ।
PSA 141:1 दाऊदए भजन घ्रि। ओ याहवेह, ङइ क्हिलाइ हुइमा क्हि युनन् युमिंन्। ङइ क्हिलाइ हुइमा ङए कै थेमिंन्।
PSA 141:2 ङइ लबै प्राथना क्हिए उँइँर लिंबै थाँ खबै धुप धोंब तरिगे, ङइ ह्रोंसए यो क्वेमा ङेसर पिंबै ख्रो धोंन् तरिगे।
PSA 141:3 ओ याहवेह, ङए सुँइ आछ्याँबै ताँ पोंल् आपिंन्, ङए म्हदिइ आछ्याँबै ताँ पोंल् आपिंन्।
PSA 141:4 दुष्‍ट के लब्मैंने बालु आछ्याँबै के लबर ङए सैं ह्‍याल् आपिंन्, धै चमैंए लिं-लिंबै चबै सैमैं ङइ चल् आत्हुरिगे।
PSA 141:5 ठिक के लबै म्हिइ ङलाइ धोंरिगे, छ लमा ङए ल्हागिर म्हाँया लब् धोंन् तब्मुँ, चइ ङ हौदिरिगे, छले हौदिमा ङए क्रए ल्हागिर छ्युगु तब्मुँ। ङए क्रइ च छ्युगु स्योवारिब् आरे। दिलेया आछ्याँबै के लब्मैंए बिरोधर ङइ खोंयोंइ बिलै प्राथना लब्मुँ।
PSA 141:6 चमैंए क्रथे मिंथेमैं कोंउँइँले क्युरु भ्योंवामा ङइ पोंबै ताँ क्ह्रोंसेंन ग बिसि दुष्‍टमैंइ क्होब्मुँ।
PSA 141:7 चमैंइ बिब्मुँ, “खैले क्होर क्ल्योब्मैंइ म्रों क्ल्योसि डल्‍ल तिवामुँ, छलेन ङ्योए ह्रिबमैं क्रोंए सुँर सग्याँ-प्हुँग्या तब्मुँ।”
PSA 141:8 ओ याहवेह ङए प्रभु, ङए मि क्हि ङाँइन ङ्‍ह्‍योरिमुँ, क्हिए प्हलेर्न ङ ग्वार ह्रिबर खइमुँ! ङलाइ कालए सुँर आभ्योंमिंन्!
PSA 141:9 दुष्‍टमैंइ ङए ल्हागिर तोबै ङो, नेरो आछ्याँबै के लब्मैंइ तोबै ङोउँइँले ङ जोगेमिंन्।
PSA 141:10 दुष्‍टमैं खेंमैंइ तोबै ङोर फेयारिगे, ङ बिस्याँ तोइ आतनले स्योरइ खरिगे।
PSA 142:1 उर मुँमा दाऊदइ चु मस्किल प्राथना लइ। ओरदै ङ याहवेहने ग्वार ह्रिमुँ, ङए फिर ल्हयो खमिंन् बिसि थेबै कै तेदै ङइ याहवेहने यो छ्युँ लम्।
PSA 142:2 ङइ ह्रोंसए ताँमैं खीए उँइँर थेंमुँ, खीने बालुन् ङइ ह्रोंसए दुःख ङेमुँ।
PSA 142:3 ङए सैं च्योंब् तमा ङइ तो लल् त्हुम् बिब क्हिजी सेम्! ङ प्रबै घ्याँर म्हिमैंइ ङए ल्हागिर ङो चुइमुँ।
PSA 142:4 ङए क्योलोउँइँ ङ्ह्‍योमिंनु, ङए न्हुँ लब खाबै या आरे, ङ ग्वार योंबै क्‍ल्‍ह्‍यो खनिरै आरे। खाबज्यै या ङए वास्ता आल।
PSA 142:5 ओ याहवेह, ङ क्हिनेन् ग्वार ह्रिमुँ; “क्हि ङए ग्वार योंबै क्‍ल्‍ह्‍यो, नेरो सोगोंमैंए ह्‍युलर ङ‍ए चैदिबै सै क्हिन् ग!” बिसि ङइ बिमुँ।
PSA 142:6 ङइ ग्वार ह्रिब थेमिंनु, तलेबिस्याँ ङ थेबै दुःखर फेइमुँ! ङलाइ ल्हाब्मैंउँइँले जोगेमिंनु, तलेबिस्याँ चमैं ङ भन्दा बेल्‍ले भोंब मुँ!
PSA 142:7 ङइ क्हिए मिं थेब् लल् खाँरिगे बिसि झेलर च्युब् धों तबै दुःखउँइँले ङ फ्रेमिंनु! छले क्हिजी ङए फिर छ्याँब् लब् म्रोंसि ठिक के लब्मैं ङए कारर्ग्युले खागु तखब्मुँ।
PSA 143:1 दाऊदए भजन घ्रि। ओ याहवेह, ङए प्राथना थेमिंनु, ल्होमिंन् बिसि ङइ ग्वार ह्रिब थेमिंनु! क्हि भर लल् खाँब नेरो ठिक के लबै परमेश्‍वर ग, छतसि ङलाइ जवाफ पिंनु।
PSA 143:2 ह्रोंसए केब्छैंए बिरोधर निसाफ आलमिंनु, तलेबिस्याँ क्हिए उँइँर सोगों म्हिमैं खाबै या ठिक ठर्दिल् आखाँ।
PSA 143:3 ङलाइ सैब् बिसि शत्तुरइ ल्हामुँ, चइ ङलाइ सर क्हुरवासि प्लेवामुँ। ओंसोंन् सियाब्मैंलाइ धोंले चइ ङ मिछु खैबर टिलन् त्हुम् बिसि ल्हैदिमुँ।
PSA 143:4 छतसि ङए सैं खैता-खैता तइमुँ, धै ङए सैं बेल्‍ले च्योंइमुँ।
PSA 143:5 ह्‍याबै त्हिंइमैं ङइ मैंमुँ, धै क्हिजी ताँन् केमैं खैले लगे बिसि ङए सैंर मैंरिमुँ; धै क्हिए योइ औदिबै केमैं खैले लगे बिसि ङ मैंरिमुँ।
PSA 143:6 ङए यो क्हि ङाँइन स्योंमुँ, कारयाबै क्‍ल्‍ह्‍योइ क्यु ल्हें ङाब् धोंले ङए सोइ क्हिलाइन म्हैरिम्। तिस्याँदे मैंन्
PSA 143:7 ओ याहवेह, ङइ ग्वार ह्रिब युनन् थेमिंन्, ङए सैं खैता-खैता तइमुँ! ङने बालु क्हिए लि आलोमिंनु, आस्याँ ङ क्रोंर फेनेब्मैं धोंन् तब्मुँ।
PSA 143:8 न्हाँग छजँ क्हिए खोंयोंइ आनुबै म्हाँयाए बारेर थेरिगे; तलेबिस्याँ क्हिए फिर्न ङइ भर थेंइमुँ। ङ प्रल् त्हुबै घ्याँ ङलाइ लोमिंनु, तलेबिस्याँ ङए सो ङ क्हि ङाँइन क्वेमुँ।
PSA 143:9 ओ याहवेह, ङए शत्तुरमैंउँइँले ङ जोगेमिंनु! तलेबिस्याँ क्हिए प्हलेर्न ङ ग्वार योंबर खइमुँ!
PSA 143:10 क्हिए सैंर मैंब पूरा लबै ल्हागिर ङलाइ लोमिंनु, तलेबिस्याँ क्हि ङए परमेश्‍वर ग! क्हिए खों बेल्‍ले छ्याँब मुँ, छतसि ङलाइ छ्याँबै घ्याँर डोरेमिंनु!
PSA 143:11 ओ याहवेह, ङइ क्हिए मिं थेब लरिगे बिसि ङए सो जोगेमिंनु! क्हिजी खोंयोंइ ठिक के लमुँ, छतसि ङए दुःखउँइँले फ्रेमिंनु!
PSA 143:12 ङए फिर क्हिए म्हाँया खोंयोंइ आनुल्‍ले मुँ, छतसि ङए शत्तुरमैं सैवाद्, धै ङए फिर दु:ख पिंब्मैं ताँनलाइ नास लवाद्, तलेबिस्याँ ङ क्हिए केब्छैं ग।
PSA 144:1 दाऊदए भजन। याहवेह ङ रक्षा लमिंबै पारा ग, छतसि ङ खीए मिं थेब् लब्मुँ। ङए योमैं नेबर, नेरो ङए योरिंमैं ल्हडें लबर खीजी लोमिंमुँ।
PSA 144:2 खी ङए फिर खोंयोंइ आनुबै म्हाँया लबै परमेश्‍वर नेरो ङए किल्‍ला ग, ङलाइ खाबज्यै तोइ लल् आपिंब ङलाइ जोगेब परमेश्‍वर ग, खी ङए ढाल ग, खीए प्हलेर्न ङ ग्वार योंमुँ। खीजी अरू ह्रेंमैंलाइ ङए न्होंर थेंमिंमुँ।
PSA 144:3 ओ याहवेह, म्हि तो जा? क्हिजी तले चए वास्ता लब? म्हिए च्ह तो जा? क्हिजी तले चए न्हुँ लब?
PSA 144:4 तलेबिस्याँ म्हिम् मुठि घ्रि सो धोंबन् ग, चए छ्ह छरि धोंले ह्‍यायाम्।
PSA 144:5 ओ याहवेह, ह्रोंसए मु थोंसि क्युरु युमिंनु! कोंमैंउँइँले मिखु त्होंखरिगे बिसि छुइमिंन्!
PSA 144:6 काम्‍लि-तिम्‍लि चारमिंसि ङए शत्तुरमैं खन्तोदोंन् प्हुँवाँन्! क्हिए मे त्हलेमैं ल्हिसि चमैं सग्या-प्हुग्या लवाद्!
PSA 144:7 नुबै क्‍ल्‍ह्‍योउँइँले ह्रोंसए यो स्योमिंनु, प्ल्होंखबै बाडि नेरो आगुए ह्‍युलर्बै म्हिमैंए योउँइँले ङ जोगेमिंसि फ्रेमिंनु।
PSA 144:8 चमैंए सुँइ स्योर ताँमैं पोंमुँ, धै चमैंइ कसम चलेया स्योलिबै ताँ पोंमुँ।
PSA 144:9 ओ परमेश्‍वर, क्हिए ल्हागिर ङ छारा क्वे घ्रि प्रिंब्मुँ; तार च्यु प्ह्‍याबै सारङ्गी ह्रासि ङ क्हिए मिंर क्वे प्रिंब्मुँ,
PSA 144:10 क्हिजी म्रुँमैंलाइ ट्होल् पिंमुँ, क्हिजी ह्रोंसए के लबै दाऊदलाइ न्होह्रों लबै सेलाउँइँले जोगेमिंमुँ।
PSA 144:11 ङलाइ आगुए ह्‍युलर्बै म्हिमैंए योउँइँले जोगेमिंसि फ्रेमिंनु। चमैंए सुँइ स्योर ताँमैं पोंमुँ, धै चमैंइ कसम चलेया स्योलिबै ताँ पोंमुँ।
PSA 144:12 झाइले फ्रेंसि तबै त्हेर ङ्योए च्हमैं सपर्दिबै सिंधुँमैं धोंन् तरिगे, धै ङ्योए च्हमिमैं दरबार सिंगार्दिबर कुन्दिबै त्होमैं धोंब तरिगे;
PSA 144:13 ङ्योए धनसारमैंर ल्हें खालर्बै रोमैंइ प्लिंरिगे, ङ्योए क्युमैं हजार गुणा बडिरिगे, ङ्योए म्रोंजरे लाखै लाख क्यु तरिगे;
PSA 144:14 ङ्योए क्ल्यामैंइ ल्हिबै ति नोरिगे, ङ्योए सहरए गारमैं आफुरिगे, धै ङ्यो झेलर ह्‍याल् आत्हुरिगे, ङ्योए घ्याँजरे क्रोबै कै आथेरिगे!
PSA 144:15 चु आशिकमैं योंबै म्हि ङ्हो सब् ग! याहवेहलाइ परमेश्‍वर बिसि म्हाँदिब्मैं ङ्हो सब् ग!
PSA 145:1 याहवेहए मिं थेब् लदै प्रिंबै दाऊदए क्वे घ्रि। ओ ङए परमेश्‍वर, ङए म्रुँ, ङ क्हिए मिं थेब् लब्मुँ, ङ खोंयोंन् बिलै क्हिलाइ धन्यबाद पिंब्मुँ।
PSA 145:2 त्हिंइ ह्रोंसे ङ क्हिलाइ धन्यबाद पिंब्मुँ धै खोंयोंन् बिलै ङ क्हिए मिं थेब् लब्मुँ।
PSA 145:3 याहवेह थेब मुँ, धै थेब् लसि म्हाँदिल् त्हुब मुँ, खी कति थेब मुँ बिसि खाबज्यै क्होल् आखाँ।
PSA 145:4 क्हिजी लबै केए बयन पुस्ता घ्रिइ अर्को पुस्ताने लब्मुँ, धै क्हिजी लबै शक्तिए केमैं चमैंइ बयन लब्मुँ।
PSA 145:5 क्हि बेल्‍ले छ्याँब नेरो म्हारब मुँ बिसि चमैंइ बयन लब्मुँ; क्हिजी औदिबै केमैं खैले लगे बिसि क्हिजी लबै केमैंए बारेर ङ मैंब्मुँ,
PSA 145:6 क्हिजी लबै औदिबै थे-थेबै केमैंए बारेर म्हिमैंइ बयन लब्मुँ, धै क्हि कति थेब मुँ बिसि ङज्यै या बिप्रब्मुँ।
PSA 145:7 क्हिजी थे-थेबै छ्याँबै के लब्मुँ बिसि चमैंइ बयन लब्मुँ धै क्हिजी लबै ठिक केमैंए बारेर क्वे प्रिंदै जयजय लब्मुँ।
PSA 145:8 याहवेहजी दयाम्हाँया लमुँ धै ल्हयो खमुँ, खी युनन् ह्रिस आख, धै खोंयोंइ आनुबै म्हाँया लम्।
PSA 145:9 याहवेहजी ताँनए फिर छ्याँब लम्, ह्रोंसजी बनेबै तोन्दोंरि सैमैंए फिर ल्हयो खमुँ।
PSA 145:10 ओ याहवेह, क्हिजी बनेबै तोन्दोंरि सैमैंइ क्हिलाइन धन्यबाद पिंब्मुँ, धै क्हिए म्हिमैंइ क्हिए मिं क्वेब्मुँ!
PSA 145:11 ताँन् म्हिमैंइ क्हिजी लबै शक्तिए केमैं था सेरिगे, धै क्हिए ग्याल्सर्बै छ्याँ-छ्याँबै म्हारबै सैमैं म्रोंरिगे बिसि
PSA 145:12 क्हिए म्हिमैंइ क्हिए ग्याल्सर्बै छ्याँ-छ्याँबै ताँमैंए बयन लब्मुँ, धै क्हिजी लबै शक्तिए केमैं बिब्मुँ।
PSA 145:13 क्हिए ग्याल्स खोंयोंन् बिलै तरिबै ग्याल्स ग, पुस्ता-पुस्ता समा क्हिजी क्ल्हे लरिब्मुँ। याहवेहजी फैबै ताँन् बाछामैं भर लल् खाँब मुँ, ह्रोंसइ बनेबै तोन्दोंरि सैलाइ खीजी म्हाँया लम्।
PSA 145:14 क्हुरियाब्मैं ताँनलाइ याहवेहजी ल्होमिंम्; आगुइ प्लेथेंब्मैं ताँनलाइ खीजी रेमिंम्।
PSA 145:15 सो प्ह्‍याबै तोन्दोंरि सैमैंइ क्हि ङाँइन ङ्ह्‍योम्, धै चमैं फो ख्रेंमा क्हिजी चबै सै पिंमुँ।
PSA 145:16 क्हिजी यो प्ल्हसि तोन्दोंरि सै पिंमुँ; धै ताँन् सो प्ह्‍याबै सैमैंए सैंर मैंब योमिंब्मुँ।
PSA 145:17 याहवेहजी लबै तोन्दोंरि केमैं ठिक मुँ, धै ह्रोंसइ बनेबै तोन्दोंरि सैमैंलाइ म्हाँया लम्।
PSA 145:18 याहवेहए मिं किंब्मैं ताँनए चेंदों खी तरिम्, क्ह्रोसेंन्बै छ्याँबै सैंइ खीए मिं किंब्मैं ताँनए चेंदों खी तरिम्।
PSA 145:19 खीने बालु ङ्हिंब्मैं ताँनए सैंर मैंब खीजी पूरा लमिंम्; चमैंइ हुइब खीजी थेमुँ धै चमैंलाइ जोगेमिंम्।
PSA 145:20 खीए फिर म्हाँया लब्मैं ताँनलाइ याहवेहजी रक्षा लमिंम्, दिलेया दुष्‍टमैं बिस्याँ खीजी नास लवाब्मुँ।
PSA 145:21 ङए सुँइ याहवेहए मिं थेब् लसि पोंब्मुँ। सो प्ह्‍याबै तोन्दोंरि सैमैंइ खोंयोंन् बिलै खीए पबित्र मिं थेब् लरिगे।
PSA 146:1 हल्‍लेलूयाह! ओ ङए सो, याहवेहए मिं थेब् लद्!
PSA 146:2 ङए छ्ह तिगोंन् ङ याहवेहए मिं थेब् लब्मुँ, छ्ह तिगोंन् ङ परमेश्‍वरए क्वेमैं प्रिंरिब्मुँ।
PSA 146:3 क्रथे मिंथेमैं नेरो सिल् त्हुबै म्हिमैंए फिर भर आथेंन्, तलेबिस्याँ चमैंइ जोगेमिंल् आखाँ।
PSA 146:4 चमैंइ सो पिमा चमैं सर कोंयाम्, च त्हिंइर्न चमैंए चाँजोमैं या नुयाम्।
PSA 146:5 याकूबए परमेश्‍वरजी ल्होमिंबै म्हिइ आशिक योंम्, ह्रोंसए याहवेह परमेश्‍वरने चइ आशा लम्।
PSA 146:6 स्वर्ग, पृथ्बी, मा ङ्युँइ, नेरो चर मुँबै तोंन्दोरि सैमैं खीजी बनेइ, खी खोंयोंन् बिलै भर लल् खाँब मुँ;
PSA 146:7 आगुइ क्र ओलै आपिंब्मैंलाइ याहवेहजी ठिक निसाफ लमुँ, खीजी फो ख्रेंब्मैंलाइ चल् पिंमुँ। याहवेहजी कैदिमैं बैरु तेमिंम्,
PSA 146:8 याहवेहजी मि आम्रोंब्मैंए मि थोंमिंम्। ल्हिबै ति नोसि ओलै आखाँब्मैंलाइ याहवेहजी रेमिंम्, याहवेहजी ठिक के लब्मैं म्हाँया लम्।
PSA 146:9 अरू ह्‍युलउँइँले खबै तोइ आरेब्मैं याहवेहजी रक्षा लम्, आबा-आमा आरेब्मैं नेरो म्हरेस्योमैं खीजी ल्होमिंम्, दिलेया दुष्‍ट म्हिमैंए चाँजो खीजी फुवाम्।
PSA 146:10 याहवेहजी खोंयोंन् बिलै ग्याल्स लब्मुँ, ओ सियोन, क्हिए परमेश्‍वरजी पुस्ता-पुस्ता समा ग्याल्स लब्मुँ। हल्‍लेलूयाह! याहवेहए मिं क्वेद्!
PSA 147:1 हल्‍लेलूयाह! ङ्योए परमेश्‍वरए क्वे प्रिंब बेल्‍ले छ्याँब ताँ गो, खीए मिं थेब् लब कति सैं तोंबै ताँ मुँ।
PSA 147:2 याहवेहजी यरूशलेम धबै बनेमिंमुँ, इस्राएलउँइँले ल्हामिंब्मैंलाइ खीजी खागु लमिंमुँ।
PSA 147:3 खीजी चोयाबै सैं सल् लमिंमुँ धै चमैंए सैं क्होल् लमिंमुँ।
PSA 147:4 मुसारमैं च्हगन् मुँ बिसि खीजी सेइमुँ; धै च ताँन् मुसारमैंए मिं थेंमिंइमुँ।
PSA 147:5 ङ्योए प्रभु बेल्‍ले थेब नेरो भोंब मुँ, खीए बुद्धि च्हैंसे च्हैंल् आखाँब मुँ;
PSA 147:6 याहवेहजी ङ्हाँदुमैं नेरो सैं च्योंब तब्मैंलाइ भों पिंमुँ, दिलेया दुष्‍टमैंलाइ बिस्याँ खीजी सर प्योवाम्।
PSA 147:7 धन्यबाद पिंदै याहवेहए क्वे प्रिंन्; बीणा ह्रादै ङ्योए परमेश्‍वरए क्वे प्रिंन्।
PSA 147:8 खीजी मु न्हाँम्स्योइ हुमिंमुँ; धै पृथ्बीर नाँ युल् पिंमुँ; खीजी कोंजरे छि म्‍लोमिंमुँ।
PSA 147:9 खेदोमैं नेरो कगए प्हसेमैं ङ्‍हेमा खीजी चल् पिंमुँ।
PSA 147:10 घोडाए भोंने खी सैं आतों, म्हिए प्हलेने या खी सैं आतों,
PSA 147:11 दिलेया याहवेहलाइ मान लब्मैं नेरो खीए खोंयोंइ आनुबै म्हाँयार भर लब्मैंने खी सैं तोंमुँ।
PSA 147:12 ओ यरूशलेम, याहवेहए मिं क्वेद्! ओ सियोन, ह्रोंसए परमेश्‍वर थेब् लद्!
PSA 147:13 तलेबिस्याँ क्हिए मुल म्रामैंए जीगलमैं खीजी भोंब लमिंइमुँ, धै क्हिए प्हसेमैंए फिर खीजी आशिक पिंइमुँ।
PSA 147:14 क्हिए साँदमैंर खीजी प्होंगि तल् आपिं; धै ताँन् भन्दा छ्याँबै गउँ क्हिलाइ पिंमुँ।
PSA 147:15 खीजी पृथ्बीर छ लद् छु लद् बिमुँ, धै खीए ताँ पृथ्बीइ युनन् ङिंम्।
PSA 147:16 क्युए पै धोंलेन् खीजी क्लिं कुल्मिंम्, मेब्रो धोंलेन् खीजी प्हमइ प्रामुँ।
PSA 147:17 खीजी तिस्यु कुल्मिंमुँ, खीजी कुल्मिंबै ङ्युँबै खैंर खाब् राल् खाँमुँ?
PSA 147:18 खीजी ताँ पोंसि चमैं ताँन् बिलिदिवाम्। खीजी खैं कुल्मिंमा क्युमैं बगेबर होंम्।
PSA 147:19 खीजी ह्रोंसए ताँ याकूबने धै ह्रोंसए ठिममैं नेरो निसाफमैं इस्राएलने उँइँमिंइमुँ।
PSA 147:20 अरू ह्रेमैंए ल्हागिर खीजी छाबै केमैं आलइमुँ; खीए ठिममैं चमैंइ आसेइमुँ। हल्‍लेलूयाह! याहवेहए मिं क्वेद्!
PSA 148:1 हल्‍लेलूयाह! स्वर्गउँइँले याहवेहए मिं क्वेद्; मुउँइँले खीलाइन थेब् लद्!
PSA 148:2 ओ ताँन् स्वर्गदूतमैं, खीलाइन थेब् लद्; ओ खीए स्वर्गर्बै सिपाइमैं, खीलाइन थेब् लद्!
PSA 148:3 ओ त्हिंयाँ नेरो लयाँ, खीलाइन थेब् लद्, ओ मुर्बै चारबै मुसारमैं, खीलाइन थेब् लद्!
PSA 148:4 ओ नुबै मु नेरो मुए फिर्बै क्युमैं, खीलाइन थेब् लद्!
PSA 148:5 चमैंइ याहवेहए मिंन् थेब् लरिगे! तलेबिस्याँ खीए सुँइ पोंमा च सैमैं तयाइ।
PSA 148:6 चमैं खोंयोंन् बिलै तरिगे बिसि खीजी लमिंइ; झाइले खोंयोंइ आम्हबै ठिम चमैंए ल्हागिरि खीजी पिंथेंइ।
PSA 148:7 ह्‍युलउँइँले याहवेहए मिं क्वेद्! ओ थेबै मा ङ्युँइ न्होंर टिबै सो प्ह्‍याबै सैमैं, नेरो ताँन् गैरु मा ङ्युँइ,
PSA 148:8 धै काम्‍लि-तिम्‍लि, तिस्यु, क्लिं नेरो न्हाँम्स्यो, धै खीजी बिबै ताँ ङिंबै नाँ-खैंज्यै या खीलाइन थेब् लद्!
PSA 148:9 क्लिंक्हाँ नेरो ताँन् कोंमैं, रो-रोबै सिंधुँमैं नेरो ताँन् थे-थेबै देवदारुमैं,
PSA 148:10 क्ह्‍योंर टिबै खेदोमैं नेरो म्ये-क्ल्यामैं, फोइ क्ल्याँबै सो प्ह्‍याबै सैमैं नेरो मुर प्हुरबै नमेमैंज्यै या याहवेहलाइन थेब लद्!
PSA 148:11 ओ, ह्‍युलर्बै म्रुँमैं, ताँन् ह्रेंर्बै म्हिमैं, क्रथे मिंथेमैं नेरो ह्‍युलर्बै ताँन् हग मुँब्मैं,
PSA 148:12 फ्रेंसि-छमिमैं खेब्मैं नेरो कोलोमैंज्यै या याहवेहलाइन थेब लद्!
PSA 148:13 चुमैं ताँनइ याहवेहए मिं थेब् लरिगे, तलेबिस्याँ खीए मिं मत्‍त्रे थेब मुँ; पृथ्बी नेरो मु भन्दा याहवेह थेब मुँ।
PSA 148:14 खीजी बेल्‍ले खोबै खीए इस्राएलर्बै म्हिमैंइ खीलाइन थेब् लल् खाँरिगे बिसि खीजी चमैंलाइ भोंबै ह्रें लमिंइमुँ। हल्‍लेलूयाह! याहवेहए मिं थेब् लद्!
PSA 149:1 हल्‍लेलूयाह! याहवेहए ल्हागिर छारा क्वे घ्रि प्रिंन्, खीजी बिब् ङिंब्मैंने बालु तसि खीए मिं थेब् लद्!
PSA 149:2 ह्रोंसलाइ बनेबै परमेश्‍वरर्न इस्राएल सैं तोंरिगे; सियोनर्बै म्हिमैं ह्रोंसए म्रुँने सैं तोंरिगे!
PSA 149:3 सेदै चमैंइ खीए मिं थेब् लरिगे, धै खैंचडी नेरो बीणा ह्रासि चमैंइ खीए क्वेमैं प्रिंरिगे!
PSA 149:4 तलेबिस्याँ ह्रोंसए म्हिमैं म्रोंसि याहवेह सैं तोंम्; कुरब्मैंलाइ खीजी ट्होगों लमिंम्।
PSA 149:5 खीजी बिब् ङिंब्मैं ट्होगों तल् योंमा सैं तोंरिगे; धै रोबै क्‍ल्‍ह्‍योरै या सैं तोंदै क्वेमैं प्रिंरिगे।
PSA 149:6 चमैंए सुँइ परमेश्‍वरए क्वेमैं प्रिंरिगे। अरू ह्रेंमैंने खि किंबै ल्हागिर,
PSA 149:7 म्हिमैंलाइ दण्ड पिंबै ल्हागिर, चमैंए म्रुँमैं सँउँलिइ
PSA 149:8 नेरो चमैंए चिब्मैं पैइ फैबै ल्हागिर धै चमैंए बिरोधर प्ह्रिब् धोंले निसाफ लबै ल्हागिर
PSA 149:9 परमेश्‍वरए म्हिमैंइ धार ङ्हिं मुँबै सेलाँ छेरिगे! छ लस्याँ खीजी बिब् ङिंब्मैं ताँनइ मान योंम्। हल्‍लेलूयाह! याहवेहए मिं थेब् लद्!
PSA 150:1 हल्‍लेलूयाह! खीए पबित्र क्ल्‍ह्‍योर याहवेह मिं क्वेद्; खीजी बनेबै मु बेल्‍ले थेब् तब् म्रोंसि खीए शक्‍तिए बयन लद्!
PSA 150:2 खीजी लबै थे-थेबै केमैंए बारेर खीए मिं क्वेद; खी बेल्‍ले थेबै परमेश्‍वर ग, छतसि खीए मिं क्वेद्!
PSA 150:3 क्युए रु ह्रासि खीए मिं क्वेद्; बीणा नेरो सारङ्गी ह्रासि खीए मिं क्वेद्!
PSA 150:4 खैंचडी ह्रासि सेदै खीए मिं क्वेद्; बीणा-सारङ्गीं नेरो मुराली ह्रासि खीए मिं क्वेद्!
PSA 150:5 छिनिमिनि ह्रासि खीए मिं क्वेद्; बेल्‍ले कोल्‍ले छ्योंलो ह्रादै खीए मिं क्वेद्!
PSA 150:6 सो प्ह्‍याबै ताँन् सैमैंइ याहवेहए मिं क्वेरिगे! हल्‍लेलूयाह! याहवेहए मिं थेब् लद्!
PRO 1:1 दाऊदए च्ह इस्राएलर्बै म्रुँ सोलोमनए ज्ञान बुद्धिए ताँमैं।
PRO 1:2 चुउँइँले म्हिमैंइ ज्ञान बुद्धि नेरो छ्यान्पर्गनए ताँमैं योंब्मुँ; धै गैरु ताँमैं क्होब्मुँ।
PRO 1:3 झाइले च्हैंब-मैंब लब नेरो छ्यान्पर्गन मुँबै छ्ह थोब्मुँ।
PRO 1:4 आह्र-आसेब्मैं ह्र‍ब्-सेब् तब्मुँ, फ्रेंसि-छमिमैंइ ज्ञान-बुद्धि योंब्मुँ।
PRO 1:5 ह्रब्-सेबै म्हिइ थेरिगे धै ल्हें ह्रब-सेब तरिगे, धै क्होबै म्हि ल्हें क्होल् खाँब् तरिगे।
PRO 1:6 चु ताँमैंउँइँले बुद्धि मुँब्मैंइ झोंबै अहानमैं, टोक्‍कमैं नेरो चमैंइ बिबै गैरु गैरु ताँए अर्थ या म्हिमैंइ क्होब्मुँ।
PRO 1:7 बुद्धि योंबै ल्हागिर म्हिमैंइ याहवेहलाइ म्हाँदिल् त्हुम्; दिलेया आमादुइ छ्ह खैलेन् थोलेन् तम् बिमुँ, धै ज्ञान बुद्धिए ताँमैं थेल् आङिं।
PRO 1:8 ओ ङए च्ह, ह्रोंसए आबाए ताँ थेद्, धै ह्रोंसए आमाए अर्थिमैं आम्‍लेद्।
PRO 1:9 तलेबिस्याँ च ताँमैं क्हिए क्रर ङ्‍हेंबै क्रेगि नेरो मान लइरि कुर खिमिंबै माला धों तब् ग।
PRO 1:10 ओ ङए च्ह, पाप लले बिसि पापिमैंइ भाँडेल् म्हैस्याँ,
PRO 1:11 “खो, म्हि सैबर ङिने बालु लोइरि टिले; सोजो म्हि लुडिबर च्ह्‍यासि टिले;
PRO 1:12 सियाबै म्हिलाइ छगोंइ क्‍ल्‍ह्‍योंवासि क्रोंए तेंर्न फेनेब् धोंले, ङ्योइ चमैंलाइ सोगोंन् क्ल्ह्‍योंवाले।
PRO 1:13 सै ल्हें फेबै ताँन् सैमैं ङ्योइ प्हेंवाले, धै लुडिबै सैमैंइ ङ्योए धिंमैं प्लिंले;
PRO 1:14 ङिने बालु क्ह्रिदु, धै लुडिबै सैमैं ङ्यो चुस्यो,” बिलैया चमैंए ताँ आङिंन्।
PRO 1:15 ओ ङए च्ह, चमैंने बालु आप्रद्; चमैं प्रबै घ्याँर क्हि आप्रद्,
PRO 1:16 तलेबिस्याँ चमैं आतुरले पाप के लबर ह्‍याम्, धै चमैं म्हि सैबर खोंयोंन् बिलै युनन् छेम्।
PRO 1:17 नमेमैंइ म्रोंन्ले जाल् तिब फाक्‍कर्न ग,
PRO 1:18 दिलेया चु म्हिमैं ह्रोंसए ज्यु ह्‍याबै घ्याँर्न प्र-प्रइमुँ; छतसि खेंमैंइ तिबै जालर्न चमैं च्होयाब्मुँ।
PRO 1:19 आउलाइ लुसि छलु म्हिलुले ल्हें सै न्होर खुब्मैंए गति या छाबन् तब्मुँ; चइ खुबै सै न्होरइन चलाइ नास लवाम्।
PRO 1:20 म्हि धोंले थेबै कै तेसि बुद्धि घ्याँजरे ओरम्, चइ बजार जरे कै तेप्रम्;
PRO 1:21 म्हिमैं च्होंसि ताँ लरिबै क्ल्ह्‍योर चइ कै तेमुँ, सहरए मुल म्राजरे रासि च छले ओरम्:
PRO 1:22 “ओ आमादुमैं, क्हेमैं खोंयों समा ज्ञान बुद्धिलाइ तो धोंइ आङ्हाँन्ले प्ररिमुँ? खोंयों समा आउलाइ प्ह्रबै ताँमैं लसि सैं तोंरिमुँ, ओ आमादुमैं, तले जा, क्हेमैंइ ज्ञान बुद्धिलाइ तो धोंइ आङ्हाँब?
PRO 1:23 ङइ हौदिलैया क्हेमैंए सैंर चु ताँम् ङए ल्हागिर्न ग ङ्‍हाँस्याँ, ङइ ह्रोंसए खोंर्बै ताँ क्हेमैंने बिमल; धै ङए ताँमैं क्हेमैंलाइ सेल् पिंमल।
PRO 1:24 दिलेया ङइ हुइमा क्हेमैंइ थेल् आङिं, ङ ङाँर खो बिसि ङइ यो स्योंम क्हेमैं खाबै या आख।
PRO 1:25 ङइ हौदिब क्हेमैंए ल्हागिर्न ग बिब क्हेंमैइ आक्हो; ङइ लबै लोदा सैंदाए ताँमैं क्हेमैंइ तो धोंइ आङ्हाँ।
PRO 1:26 छतसि क्हेमैंए फिर आफत तमा ङ निस्योब्मुँ। धै क्हेमैंए फिर दु:ख तमा ङइ क्हेमैं प्ह्रब्मुँ।
PRO 1:27 थेबै नाँ-खैं धों तबै दुःख क्हेमैंए फिर खब्मुँ, खैं स्युरब् धोंले क्हेमैंए फिर दुःख स्युरब्मुँ, दुःखइ लमा क्हेमैं क्र ओलै आखाँन् तब्मुँ।
PRO 1:28 “च त्हेर क्हेमैंइ ङने ग्वार ह्रिब्मुँ, दिलेया ङइ थेरिब् आरे; चमैंइ दु:खले ङ म्हैप्रब्मुँ दिलेया चमैंइ ङ स्यारिब् आरे।
PRO 1:29 तलेबिस्याँ चमैंइ ज्ञान बुद्धिए ताँमैं तो धोंइ आङ्हाँ, धै याहवेहने या आङ्हिं,
PRO 1:30 ङइ लोदा सैंदा लमा चमैंइ थेल् आङिं, धै चमैं छ्याँब् तरिगे बिसि ङइ हौदिमा चमैं आच्यो,
PRO 1:31 चमैंइ लबै केए नों चमैंइ योंब्मुँ, धै चमैंए आछ्याँबै केमैंइ लमा खेंमैंन् दुःख तब्मुँ।
PRO 1:32 खेंमैंए सैंर मैंब् धोंले प्रबइले आमादुमैं सिब्मुँ, छले ज्ञान बुद्धिए ताँमैंलाइ तो धोंइ आङ्हाँबै आमादुमैं नास तयाब्मुँ;
PRO 1:33 दिलेया ङइ बिबै ताँमैं थेब्मैं जोगेब्मुँ धै चमैंल तोइ न्होह्रों तरिब् आरे, चमैं आङ्हिंनले ढुक्‍कले टिल् योंब्मुँ।”
PRO 2:1 ओ ङए च्ह, ङए ताँ क्हिइ छेनाले थेइ बिस्याँ, ङइ बिबै ताँमैं क्हिए सैं न्होंर थेंइ बिस्याँ,
PRO 2:2 क्हिए न्हेमेइ बुद्धिए ताँ थेइ बिस्याँ, क्होल् त्हुबै ताँमैंउँइँ क्हिए सैं छेनाले ल्हैदिस्याँ,
PRO 2:3 बुद्धिए ताँमैं क्होबै ल्हागिर क्हिइ ङने ह्रिस्याँ, क्होल् खाँबै शक्‍ति योंबै ल्हागिर थेबै कै तेसि ह्रिस्याँ,
PRO 2:4 चाँदि धोंले क्हिइ च म्हैस्याँ, लोथेंबै सै न्होर म्हैब् धोंले चलाइ म्हैस्याँ,
PRO 2:5 क्हिइ याहवेहने खैले ङ्हिंल त्हुमुँ बिबै ताँमैं छेनाले क्होब्मुँ, धै परमेश्‍वरए ज्ञान योंब्मुँ।
PRO 2:6 तलेबिस्याँ याहवेहजीन् म्हिमैंलाइ बुद्धि पिंम्, खीए सुँउँइँले ज्ञान बुद्धिए ताँमैं त्होंम्;
PRO 2:7 सोजो म्हिमैंलाइ खीजी ट्होगो लमिंम्; धै स्योर आतेल्‍ले प्रब्मैंलाइ रक्षा लम्।
PRO 2:8 तलेबिस्याँ खीजी ठिक के लब्मैंलाइ छ्याँबै घ्याँर डोरेब्मुँ, धै खीए फिर भर थेंब्मैंलाइ रक्षा लम्।
PRO 2:9 छतसि खीजी बिबै ताँ ङिंब्मैंइ ठिक के खैले लब, खाबलाज्यै या आफेलल्‍ले ठिक निसाफ खैले लब, छ्याँबै केमैं तो जा बिसि क्होब्मुँ;
PRO 2:10 तलेबिस्याँ बुद्धि क्हिए खों न्होंर खब्मुँ, धै ज्ञानइ क्हिए सैं प्लिंसि छिं ङ्‍हाँब्मुँ,
PRO 2:11 छले च्हैंब्-मैंब् लल् खाँबइले आछ्याँबै केउँइँले क्हि फ्रेब्मुँ, ह्रब-सेब तल् खाँसि क्हि दुष्‍टमैंउँइँले जोगेब्मुँ।
PRO 2:12 दुष्‍ट म्हिमैंइ लबै केउँइँले नेरो स्योलिबै ताँ पोंबै म्हिमैंउँइँले बुद्धिइ क्हिलाइ जोगेमिंब्मुँ।
PRO 2:13 दुष्‍ट म्हिमैं छ्याँबै घ्याँर प्रब् पिसि मिछु खैबै घ्याँर प्रम्।
PRO 2:14 आछ्याँबै केमैं लमा चमैं सैं तोंमुँ, धै आगुए न्होह्रों लल् योंमा चमैं छिं ङ्‍हाँम्।
PRO 2:15 चमैं प्रबै घ्याँमैं ख्यद-ख्योदे मुँ, धै चमैंए प्रब-टिबै चाल आछ्याँब मुँ।
PRO 2:16 फ्रें क्ल्योंप्रबै च्हमिरिउँइँले नेरो आछ्याँबै के लबै म्रिंस्योइ वाँबै ताँउँइँले बुद्धिइ क्हिलाइ जोगेमिंब्मुँ।
PRO 2:17 च च्हमिरिइ ह्रोंसए प्युँ पिवासि परमेश्‍वरए उँइँर फैबै बाछा म्‍लेयाइमुँ।
PRO 2:18 चए धिं न्होंर होंबै म्हि कालइ क्युरु-क्यरु बोमुँ धै चए घ्याँर प्रबै म्हिए प्ल्ह नर्गर फेनेम्;
PRO 2:19 छाबै च्हमिरि ङाँर ह्‍याब्मैं खाबै एइरि आख, चमैंइ खोंयोंइ आखाँबै छ्ह योंबै घ्याँ आयों (च्ह्‍योल् आखाँ)।
PRO 2:20 छतसि छ्याँबै के लसि छ्ह थोबै म्हिइ धोंले क्हिज्यै या छ्ह थोद्। धै ठिक के लब्मैंए घ्याँर प्रद्।
PRO 2:21 तलेबिस्याँ ठिक लब्मैं परमेश्‍वरए ग्याल्सर टिल् योंब्मुँ, छले तोइ छ्याब् आरेबै म्हिमैं चर टिब्मुँ,
PRO 2:22 दिलेया दुष्‍टमैं बिस्याँ परमेश्‍वरजी छाइले स्योवाब्मुँ, धै बिश्‍वास घात लब्मैंलाइ नो धोंले स्युसि भ्योंवाब्मुँ।
PRO 3:1 ओ ङए च्ह, ङइ लोमिंबै ताँमैं आम्‍लेद्, ङइ बिबै ताँमैं ह्रोंसए खोंर थेंन्।
PRO 3:2 छलस्याँ क्हिइ ह्रिंबै छ्ह योंब्मुँ, क्हिल बिब् धों तब्मुँ।
PRO 3:3 क्हिइ खोंयोंइ बिलै ताँनलाइ म्हाँया लरिद्, धै भर लल् खाँब तरिद्; च ताँमैं क्हिइ ह्रोंसए खरिर माला धोंले खिरिद्, धै क्हिए खों न्होंर प्ह्रिथेंन्।
PRO 3:4 छ लइबिस्याँ परमेश्‍वर नेरो म्हिमैंउँइँले क्हिइ थेबै मान योंब्मुँ।
PRO 3:5 क्हिए सैं न्होंउँइँलेन् याहवेहए फिर भर थेंन्, ङइ तोन्दोंरि ह्रइमुँ-सेइमुँ बिसि ह्रोंसए फिर भर आलद्।
PRO 3:6 ह्रोंसइ लल् म्हैबै केर खीलाइ मैंन्, धै खीजी क्हिलाइ छ्याँबै घ्याँर डोरेब्मुँ।
PRO 3:7 क्हि ह्रोंसन् ह्रब्-सेब् आप्हैंन्; याहवेहलाइ म्हाँदिद्, आछ्याँबै केमैं पिवाद्।
PRO 3:8 छ लइबिस्याँ क्हिए ह्रिब भोंब तब्मुँ। धै क्हि नब्-छब् तरिब् आरे।
PRO 3:9 क्हिए सै न्होर नेरो म्रोंउँइँले खबै रा-रोए फुइ याहवेहए मिंर थेंसि खीए मान लद्;
PRO 3:10 छलस्याँ क्हिए भकरिमैं ङेयाल्‍ले प्लिंब्मुँ, धै क्हिए भाडमैं अँगुरए खुगुइ प्लिंब्मुँ।
PRO 3:11 ओ ङए च्ह, याहवेहजी तार झोंमा छोरों आङ्हाँन्। खीजी हौदिमा आछ्याँब आमैंन्,
PRO 3:12 तलेबिस्याँ खैले आबाइ ह्रोसए च्हलाइ तार झोंमुँ, छलेन याहवेहज्यै या ह्रोंसइ खोबै म्हिलाइ तार झोंम्।
PRO 3:13 बुद्धि योंसि च्हैंब् मैंब् लबै म्हिइ आशिक योंम्
PRO 3:14 तलेबिस्याँ चाँदि भन्दा बुद्धि ल्हें छ्याँब् ग, माराइ भन्दा चइ बेल्‍ले फायद पिंम्।
PRO 3:15 हिरा-मोति भन्दा च सै ल्हें फेम्, क्हिइ खोबै तोइ सैमैंने या च च्हैंल् आखाँ।
PRO 3:16 बुद्धिए क्योलो योउँइँ ह्रिंबै छ्ह मुँ; धै त्हरग्यो योउँइँ सै न्होर नेरो मान इजेत मुँ।
PRO 3:17 चए घ्याँर प्रब्मैं सैं तोंल् योंम्, चए घ्याँर प्रब्मैं छिं ङ्‍हाँल् योंम्।
PRO 3:18 बुद्धि ख्वेब्मैंए ल्हागिर च छ्ह योंबै सिंधुँ ग; च क्हाब्मैंइ आशिक योंम्।
PRO 3:19 तलेबिस्याँ याहवेहजी बुद्धिइन पृथ्बीए जग झोंइ; खीजी च्हैंसि मैंसि मु चए क्ल्ह्‍योर थेंइ;
PRO 3:20 खीए ज्ञानइ मा ङ्युँइ लमिंइ, धै न्हाँम्स्योउँइँले क्युरु नाँ युमिंइ।
PRO 3:21 ओ ङए च्ह, छ्याँबै बुद्धि नेरो च्हैंब-म्हैबै ताँ जोगेसि थेंन् क्हिउँइँले च ह्रेंगो ह्‍‍याल् आपिंन्।
PRO 3:22 चुमैंइ क्हिलाइ छ्ह पिंम् धै क्हिए कुर ङ्‍हेबै माला धों तब्मुँ।
PRO 3:23 झाइले क्हि घ्याँर छेनाले प्रब्मुँ, धै क्हिए प्हले थुरारिब् आरे।
PRO 3:24 रोरिमैं या क्हि ङ्हिंरिब् आरे, क्हि रोमा छ्याँबै न्हरु खब्मुँ।
PRO 3:25 थाइ आसेल्‍ले दुःख खसि दुष्‍टमैं नास तमा क्हि आङ्हिंन्,
PRO 3:26 तलेबिस्याँ याहवेहजीन् क्हिए सैंर भों पिंब्मुँ धै खीजी क्हिए प्हलेमैं ङोउँइँले जोगेमिंब्मुँ।
PRO 3:27 खाँचोर मुँबै म्हिमैंलाइ खाँन् समा ह्रोंसने मुँबै सैमैं पिंन्।
PRO 3:28 क्हिने मुँन-मुँन्, “प्हन्हाँजरे पिंस्यो!” बिसि क्हिने ह्रिखब्मैंलाइ आबिद्।
PRO 3:29 क्हिए फिर भर लसि क्हिए ङाँर टिबै म्हिए बिरोधर जाल आरोद्।
PRO 3:30 क्हिल तोइ न्होह्रों आलबै म्हिलाइ तोन्-तोर्न छ्याब् आल्हैदिद्।
PRO 3:31 म्हि सैमैंए ह्रिस आलद्, धै चमै प्रबै घ्याँर आप्रद्।
PRO 3:32 तलेबिस्याँ आछ्याँबै के लप्रब्मैं याहवेहजी आखो, दिलेया सोजो म्हिमैं बिस्याँ खीजी भर लम्।
PRO 3:33 दुष्‍टमैंए धिंर याहवेहजी सराप पिंम्, ठिक के लब्मैंए धिंर बिस्याँ खीजी आशिक पिंम्।
PRO 3:34 आगुलाइ प्ह्रब्मैंलाइ खीजी प्ह्रम्, दिलेया कुरब्मैंलाइ खीजी ल्हयो खम्।
PRO 3:35 ह्रब्-सेबै म्हिइ मान इजेत योंम्, दिलेया आमादुमैंलाइ बिस्याँ फापिन् लवाब्मुँ।
PRO 4:1 ओ च्ह-च्हमिमैं, ह्रोंसए आबाए अर्ति ङेंन्, आबाए अर्ति सैंर थेंरिद्। छलस्याँ च्हैंब् मैब् लल् खाँब्मुँ।
PRO 4:2 तलेबिस्याँ ङइ क्हेमैंलाइ छ्याँबै ताँमैं लोमिंमुँ, छतसि ङए अर्तिमैं आम्‍लेद्।
PRO 4:3 तलेबिस्याँ ङै या आबाए च्ह मुँल, आमाइ ङलाइ बेल्‍ले म्हाँया लमल।
PRO 4:4 ङए आबाइ ङ लोदा सैंदा लदै “ङइ बिबै ताँमैं क्हिए सैंर थेंन्; ङइ बिबै ताँमैं ङिंन्, छलस्याँ क्हिइ छेनाले छ्ह थोब्मुँ,” बिमल।
PRO 4:5 “बुद्धि म्हैद्, च्हैंब् मैंब लल् खाँब तद्; ङइ बिबै ताँमैं आम्‍लेद्, धै ङइ बिबै ताँमैं थेलैया आथेब् धों आलद्।
PRO 4:6 बुद्धिए ताँलाइ तो धोंइ आङ्हाँन्, चइ क्हिए रक्षा लब्मुँ; चलाइ म्हाँया लद्, चइ क्हिलाइ छेनाले डोरेब्मुँ।
PRO 4:7 बुद्धि छ्याँबै ताँ ग; छतसि बुद्धि म्हैद्, क्हिइ तोन्दोंरि सै योंलेया च्हैंब् मैंब लल् खाँब तद्।
PRO 4:8 बुद्धिए ताँमैं थेबै सै धों ङ्‍हाँन्, चइ क्हिए न-मि थेब् लब्मुँ; चलाइ म्हैद्, छलस्याँ चइ क्हिए आब्रु थेंब्मुँ।
PRO 4:9 क्हिए खरिर चइ बेल्‍ले ङ्‍हेंबै माल पैरेमिंब्मुँ; धै क्हिए क्रर बेल्‍ले ङ्‍हेंबै मुकुट कुमिंब्मुँ।”
PRO 4:10 ओ ङए च्ह थेद्, ङइ बिबै ताँमैं ङेंन्, धै क्हिइ ह्रिंबै छ्ह योंब्मुँ।
PRO 4:11 ङइ क्हिलाइ बुद्धि योंबै ताँमैं लोमिंमुँ; धै ठिक घ्याँर डोरेमुँ।
PRO 4:12 क्हि प्रमा, तो सैज्यै क्हिए प्हले क्होल् लरिब् आरे, धै क्हि न्हेमा क्हिए प्हले थुररिब् आरे।
PRO 4:13 अर्तिए ताँमैं खोंयोंन् बिलै मैंथेंन्; चलाइ स्योरल् आपिंन्, चइ बिब ङेन, तलेबिस्याँ चइ क्हिलाइ छ्ह पिंम।
PRO 4:14 दुष्‍ट म्हिमैं प्रबै घ्याँर आप्रद्, धै आछ्याँबै के लब्मैंइ लब् धोंले आलद्।
PRO 4:15 दुष्‍ट म्हिमैंइ लबै केमैं आलद्, च घ्याँर क्हि आप्रद्; चमैं प्रबै घ्याँर आप्रद् ह्रोंसए घ्याँर प्रद्।
PRO 4:16 तलेबिस्याँ दुष्‍ट म्हिमैं आछ्याँबै केमैं आलन् समा रोल् आखाँ; धै आगुए न्होह्रों आलन् समा न्हरु आख।
PRO 4:17 दुष्‍ट के चमैंए चबै सै ग, धै आगुए न्होह्रों लब चमैंए थुँबै सै ग।
PRO 4:18 दिलेया ठिक के लप्रबै म्हि प्रबै घ्याँ चारबै ह्‍वे धोंन् तम्, च ह्‍वे त्हिंयाँ आधा समा बेल्‍ले चारदै ह्‍याम्।
PRO 4:19 दिलेया दुष्‍ट म्हिमैं प्रबै घ्याँ बिस्याँ बेल्‍ले मिछु खैब् धों तम्; तो सैर प्हले थुरइमुँ बिसि चमैंइ आसे।
PRO 4:20 ओ ङए च्ह, ङए ताँमैं सैंर थेंन्; ङइ बिबै ताँमैं छेनाले थेद्।
PRO 4:21 क्हिउँइँले च ताँमैं स्योरसि ह्‍याल् आपिंन्; च ताँमैं क्हिए खोंर थेंन्।
PRO 4:22 तलेबिस्याँ ङए ताँमैं थेबै म्हिइ छ्ह योंम्, धै चए ज्यु सम्।
PRO 4:23 ह्रोंसए सैंर आछ्याँबै ताँमैं आमैंन्, तलेबिस्याँ क्हिए सैंइ मैंबै ताँमैंन् क्हिए छ्हर तम्।
PRO 4:24 आछ्याँबै ताँ-फुँमैं क्हिए सुँउँइँले आत्होंरिगे, स्योर ताँमैं क्हिए म्हदेइ आपोंरिगे।
PRO 4:25 फा पिन् तसि क्हिए क्र क्युरु आतरिगे बिसि। भर लल् खाँब तसि ठिक केमैं लद्।
PRO 4:26 क्हिइ लबै केमैं ताँन् छ्याँब तरिगे बिसि। क्हिइ च्हैंसि-मैंसि के लद्;
PRO 4:27 क्हि क्योलो त्हर्ग्योउँइँ आतोद्; आछ्याँबै केमैं लबर आप्रद्।
PRO 5:1 ओ ङए च्ह, ह्रब-सेब तबै ल्हागिर ङए ताँ सैंर थेंन्; ङइ बिबै ताँमैं छेनाले थेद्।
PRO 5:2 छलस्याँ छ्याँबै घ्याँर खैले प्रल् त्हुम् बिबै ताँ क्हिइ सेब्मुँ, धै क्हिए म्हदेइ ज्ञान बुद्धिए ताँ पोंब्मुँ।
PRO 5:3 तलेबिस्याँ फ्रें क्ल्योंप्रबै च्हमिरिए सुँउँइँले खुदु चैम्, चइ पोंबै ताँमैं छ्युगु भन्दा प्लेब तम्,
PRO 5:4 दिलेया लिउँइँ च च्हमिरि काँ धोंले काँब, नेरो धार ङ्हिं मुँबै छ्यारबै सेलाँ धों तम्।
PRO 5:5 चए प्हले कालए घ्याँउँइँ क्युरु ल्हैदिम्; चए प्हलेमैं क्रोंउँइँ फेनेम्;
PRO 5:6 चइ छ्ह योंबै घ्याँउँइँ आप्र; चए प्रब-टिब आछ्याँब मुँ, अझै चइ चु ताँ सेल् आखाँ।
PRO 5:7 तारे ओ ङए च्ह-च्हमिमैं, ङए ताँ थेद्, धै ङइ बिबै ताँमैं ङिंन्,
PRO 5:8 फ्रें क्ल्योंप्रबै च्हमिरिउँइँले ह्रेंगो टिद्, चए धिंर्बै म्राए चेंदो आह्‍याद्।
PRO 5:9 आस्याँ क्हिइ ह्रोंसए न‍-मिं वाब्मुँ धै दयाम्हाँया आरेबै म्हिए योर फेब्मुँ,
PRO 5:10 क्हिए सै न्होर स्यामैंइ चवाब्मुँ, धै क्हिइ छैब प्ह्‍युरासि कमैबै सैमैंइ आगुए धिं प्लिंब्मुँ,
PRO 5:11 धै खिब् तबै त्हेर क्हि क्रोल् त्हुब्मुँ, च त्हेर क्हिला ह्रुइब् नेरो ट्हुबि मत्त्रे तब्मुँ,
PRO 5:12 झाइले क्हिइ बिब्मुँ, “ओहो, ङ खै तदा ङ्‍हाँमुँ छान् तप्रइ, लोदा सैंदा लमा ङइ आङिं!
PRO 5:13 गुरूमैंइ बिबै ताँमैं ङइ आङिं, धै म्हिमैंइ लोमिंमा ङइ थेबै न्ह आल।
PRO 5:14 ङ नास तबै होल्दोंर्न फेइमुँ, धै हिमैंए उँइँर ङए न मिं ह्‍याल् खाँइमुँ।”
PRO 5:15 ह्रोंसए ङ्‍हेखोर्बै क्यु थुँन्, ह्रोंसए क्यौदुउँइँले युब क्यु थुँन्।
PRO 5:16 क्हिए क्यौदुउँइँर्बै क्यु घ्याँजरे तले ङेयाल् पिंब? धै क्हिए स्योंर्बै क्यु बजार जरे बग्दिल् पिंम्मा?
PRO 5:17 च क्यु क्हिए ल्हागिर मत्‍त्रे तरिगे, आगुए ल्हागिर तिफुँइ आतरिगे।
PRO 5:18 क्हिए प्ह्रेंस्यो क्हिए ल्हागिर आशिक तरिगे, धै क्हिए बैंसर्बै प्ह्रेंस्योने क्हि सैं तोंन्।
PRO 5:19 च म्हाँया खबै फो नेरो तोंइ धोंले चनेन् सैं तोंसि टिद्। क्हि खोंयोंइ बिले चलाइ म्हाँया लरिद्।
PRO 5:20 ओ ङए च्ह, क्हि तले फ्रें क्ल्योंइ प्रबै च्हमिरिने म्हाँयार फस्दिरिमुँ, क्हि तले आउए प्ह्रेंस्योने प्रमुँ?
PRO 5:21 तलेबिस्याँ म्हिमैं खैले प्रब-टिब लइमुँ बिब याहवेहजी सेम्, धै खीजी चमैंइ लबै केमैंए जाँच लम्।
PRO 5:22 ह्रोंसइ लबै आछ्याँबै केइन दुष्‍ट म्हि ङोर फेम्, धै ह्रोंसइ लबै आछ्याँबै केमैंन च पापर च्होवाम्।
PRO 5:23 खै तदा ङ्‍हाँमुँ छान् लप्रबइले च सिब्मुँ, लोदा सैंदाए ताँमैं आथेसि आमादु तबइले चइ आछ्याँबै केमैं लप्रम्।
PRO 6:1 ओ ङए च्ह, क्हि ह्रोंसए ङ्‍हेंब्मैंए जमानि टिइमुँ बिस्याँ, ङो आसेबै म्हिइ ङ्‍हेंब्मैंने छे किंमा चुइ आफोस्याँ ङइ फोमिंस्यो बिसि क्हिइ बाछा फैइमुँ बिस्याँ,
PRO 6:2 ह्रोंसइ फैबै बाछाइ क्हि फस्दियास्याँ, धै ह्रोंसए सुँइ पोंबै ताँइ क्हि ङोर फेइमुँ बिस्याँ,
PRO 6:3 ओ ङए च्ह, ह्रोंसलाइ जोगेबै ल्हागिर ङइ बिब् धों लद्, तलेबिस्याँ क्हि आगुए योर फेयाइमुँ! छतसि ह्रोंसन् च्योंने तसि च ङाँर ह्‍याद्, धै जमानि टिसि क्हिइ बाछा फैबै ताँ माफ लमिंन् बिसि यो छ्युँ लद्।
PRO 6:4 क्हि न्हरु आच्हुइद्, धै मि च्युँ आलद्!
PRO 6:5 शिखार क्लोंब्मैंए योउँइँले फो स्योरब् धोंले, धै ङो चुब्मैंए ङोउँइँले नमें स्योरब् धोंले, क्हि या स्योर खो।
PRO 6:6 ओ प्ल्हेगु, नौरो ङाँर ह्‍यासि चइ लबै के ङ्ह्‍योद्, धै बुद्धि मुँब् तद्।
PRO 6:7 चल घ्याँ तेंब खाबै आत, छैं लब खाबै आत, हाकिम या आत।
PRO 6:8 दिलेया रा-रोमैं खुबै त्हेर चमैंइ चबै सैमैं खुम्, धै खैंबै त्हेर रा-रोमैं खुथेंम्।
PRO 6:9 ओ प्ल्हेगु, खोंयों समा क्हि रोरिमुँ? क्हि न्हरुउँइँले खोंयों छोरमुँ?
PRO 6:10 “ङ तिस्याँदे रोम्, तिस्याँदे न्हरु च्हुइम्, यो च्याफैसि तिस्याँदे भों न्हम्,” बिमा
PRO 6:11 ह्‍यो खब् धोंले क्हिए फिर दु:ख खब्मुँ, धै थाइ आसेल्‍ले क्हि आयोंब आख्युब तयाब्मुँ।
PRO 6:12 केर आफेबै दुष्‍ट म्हिइ आगुए ताँ लप्रम्।
PRO 6:13 छाबै म्हिमैंइ न्ह च्हैजै मि च्हैजै लम्, धै यो-प्हालेज्यै या हास्त लम्।
PRO 6:14 चए सैंइ आछ्याँबै ताँमैं मत्त्रे मैंम्, धै चइ खोंयोंन् बिलै आक्ह्रिबै ताँबै रेम्।
PRO 6:15 छतसि चए फिर थाइ आसेल्‍ले दुःख खब्मुँ; धै मैं-ङों लल् आयोंल्‍लेन् च सियाब्मुँ।
PRO 6:16 याहवेहजी आखोबै बानिमैं ङिग्लो मुँ, ङिउलो ताँमैं खीए उँइँर बेल्‍ले आछ्याँब मुँ:
PRO 6:17 ह्रिस खल्‍ले ङ्ह्‍योबै मि, स्योलिबै ताँ पोंबै ले, छ्याब आरेबै म्हि सैबै यो,
PRO 6:18 आछ्याँबै चाँजोमैं लबै सैं, आछ्याँबै के लबर युन्-युन् प्रबै प्हले,
PRO 6:19 स्योलिबै ग्वाइ पिंबै, आघें-अलिमैंए म्हाँजोर प्होंगि रेबै म्हि। छाबै बानि मुँबै म्हिमैं याहवेहजी तिफुँइ आखो।
PRO 6:20 ओ ङए च्ह, ह्रोंसए आबाइ बिबै ताँमैं ङिंन्, धै ह्रोंसए आमाइ पिंबै अर्तिमैं आपिद्।
PRO 6:21 च क्हिए खों न्होंर खोंयोंइन थेंन्; धै क्हिए खरिर खिद्।
PRO 6:22 क्हि प्रमा चइ घ्याँ तेंब्मुँ; धै क्हि रोरिमैं या च क्हिनेन् तब्मुँ; क्हि छोरमा चइ क्हिलाइ लोदा-सैंदा लब्मुँ।
PRO 6:23 तलेबिस्याँ चइ बिबै ताँमैं क्हिए ल्हागिर बत्ति ग, धै लोदा सैंदाए ताँमैं क्हिलाइ घ्याँ तेंबै ह्‍वे ग, धै बानि छ्याँब् तरिगे बिसि हौदिमा छ्याँबै छ्ह थोबर क्हिलाइ घ्याँ उँइँम्।
PRO 6:24 आछ्याँबै के लप्रबै च्हमिरि नेरो छ्याँ-छ्याँबै ताँ पोंसि फसेल् म्हैबै च्हमिरिउँइँले चइ जोगेब्मुँ।
PRO 6:25 च च्हमिरिलाइ छ्याँब म्रोंसि आछ्याँबै सैं आमैंन्, चए मिइ क्हिलाइ आफसेरिगे।
PRO 6:26 तलेबिस्याँ फ्यालुस्योइ क्हि ङ्‍हाँदु लवाम्, धै फ्रें क्ल्योंप्रबै च्हमिरिइ क्हिए छ्ह नास लवाम्।
PRO 6:27 म्हिइ ह्रोंसए क्वें आख्रोंन्ले तिंर मि थेंल् खाँम् रो वा?
PRO 6:28 लुँरिबै मि राबाए फिर प्रइ बिस्याँ चए प्हले आख्रों रो वा?
PRO 6:29 आगुए प्ह्रेंस्योने प्रबै म्हि या छान् तम्; दण्ड आयोंन् समा च स्योररिब् आरे।
PRO 6:30 फो ख्रेंबै म्हिइ ह्‍योइसि चइ बिस्याँ, म्हिमैंइ चलाइ आछ्याँब आबि।
PRO 6:31 दिलेया चइ ह्‍योरिब् स्याइ बिस्याँ चइ तिबाँ चवास्याँ ङिबाँ तेंसि फोल् त्हुब्मुँ, चए धिंर्बै ह्रोंसए सै न्होर ताँन् पिंल् त्हुब्मुँ।
PRO 6:32 आगुए प्ह्रेंस्योने प्रबै म्हि आमादु ग; चइ ह्रोंसन् नास लवाम्!
PRO 6:33 छाबै म्हिलाइ ताँनइ प्रिंमुँ धै चए न-मि ह्‍याम्, धै चए आब्रु ह्‍याबै ताँ खोंयोंइ म्हरिब् आरे।
PRO 6:34 तलेबिस्याँ च म्रिंस्योए प्युँलाइ ह्रिस खल् लमा झन् ह्रिस खम्, छतसि ल्हयो आखल्‍ले चइ खि किंम्।
PRO 6:35 ह्रिस म्हबर तो पिंलेया चइ किंल् आङिं; क्होल्सैंमैं क्हिइ कति पिंलेया चए ह्रिस आम्ह।
PRO 7:1 ओ ङए च्ह, ङइ बिबै ताँमैं ङिंन्, धै ङइ बिबै ताँमैं क्हिए सैंर थेंन्;
PRO 7:2 ङइ बिबै ताँमैं ङिंस्याँ क्हिए छ्ह छ्याँब तब्मुँ; क्हिए मि फुँ जोगेब् धोंले ङए अर्तिमैं जोगेसि थेंन्।
PRO 7:3 योर च्या खिब् धोंले ङइ बिबै अर्थिमैं सैंर थेंन्; धै क्हिए खोंर प्ह्रिथेंन्।
PRO 7:4 बुद्धिने “क्हि ङए अङाँ ग,” बिदु, धै क्होल् खाँबै शक्‍तिने ङइ खोबै थु ग बिद्।
PRO 7:5 चइ फ्यालुस्योउँइँले क्हि ह्रेंगो थेंब्मुँ, धै लिरिक्‍ले पोंसि फसेल् म्हैबै च्हमिरिउँइँले क्हि जोगेब्मुँ।
PRO 7:6 ङ ह्रोंसए धिंर्बै झ्यालर टिसि झ्यालउँइँले बैरु ङ्ह्‍योमा तो म्रोंइ बिस्याँ,
PRO 7:7 आह्र-आसेबै फ्रेंसिमैंए म्हाँजोर कत्ति क्होल् आखाँबै म्हि घ्रि ङइ म्रोंइ।
PRO 7:8 त्हिंइ लियासि ङेंस तमा मिछु खैबै त्हेर
PRO 7:9 च म्हि फ्रें क्ल्योंप्रबै च्हमिरि टिबै धिंर्बै घ्याँर प्ररिल, धै चए धिंउँइँन ह्‍यारिल।
PRO 7:10 च्हमिरि घ्रि चने त्होबर खइ, चलाइ फसेबै ल्हागिर च फ्यालुस्योमैं धोंले पैरेसि खल।
PRO 7:11 च केर आफेबै ताँ पोंब नेरो आगुए ताँ थोबै ट्होगोस्यो मुँल; च खोंयोंइ धिंर आटि,
PRO 7:12 खोंयों घ्याँजरे, खोंयों बजारजरे, खोंयों कुनाकाप्चाजरे च लोसि टिम्।
PRO 7:13 च म्हिलाइ क्हासि च च्हमिरिइ म्वें लसि फा आपिल्‍ले बिइ:
PRO 7:14 “तिंयाँ ङइ लबै भक्‍कल पूरा लसि ङए धिंर ख्रो पिंबउँइँले से मुँ।
PRO 7:15 छतसि क्हिने त्होबर ङ बैरु युब् ग, ङइ क्हि म्हैल, तोगो स्याइमुँ।
PRO 7:16 ङ रोबै क्‍ल्‍ह्‍योर ङइ, मिश्र ह्‍युलर्बै बुट्टा झोंबै च्यातर तिइमुँ;
PRO 7:17 ङ रोबै क्‍ल्‍ह्‍योर छ्याँबै थाँ खबै मूर्र, घ्युकुमारि नेरो लेबोमैं फ्रुँसि छ्याँबै थाँ खल् लथेंइमुँ।
PRO 7:18 छतसि खो, न्हाँग समा ङ्यो म्हाँया लदै अँगलो ख्वेसि बेल्‍ले सैं तोंदै टिले।
PRO 7:19 तलेबिस्याँ ङए प्युँ धिंर आरे, च ह्रेंगो ह्‍याइमुँ,
PRO 7:20 चइ मुइ ल्हेंन् बोइमुँ, धै सत् ङ्हिं समा च धिंर आख।”
PRO 7:21 वाँ-वाँसि च म्हिलाइ चइ भुत्तुक्‍कन लवाइ, धै लिरिक्‍ले पोंसि चलाइ फसेवाइ।
PRO 7:22 धै सैबर बोबै क्ल्या धोंले, धै तिंर मेइ आम्‍लोन् समा फो सैं तोंदै उफर्दिमा ङोर फेब् धोंले,
PRO 7:23 च म्हि युन्ले च च्हमिरिए लिलि ह्‍याइ। धै नमें युन्ले ङोउँइँ ह्‍याब् धोंले च म्हिइ ह्रोंस नास लम् बिबै ताँ चइ आसे।
PRO 7:24 ओ ङए च्हमैं, ङए ताँ थेद्, धै ङइ बिबै ताँमैंर न्ह तोद्।
PRO 7:25 च च्हमिरिए फिर क्हेमैंए सैं आह्‍यारिगे; धै चए लिलि आप्रद्,
PRO 7:26 चइ ल्हें म्हि नास लवाइमुँ, धै चइ सैवाब्मैं ल्हेंन् मुँ।
PRO 7:27 धै चए धिंर ह्‍याब्मैं क्रोंर म्हैबर ह्‍याब्मैं ग, चर ह्‍याब्मैं कालए ङाँर फेनेम्।
PRO 8:1 बुद्धिइ थेबै कैले हुइरिमुँ! च्हैंब्-मैंब् लल् खाँबै शक्तिइ थेबै कै तेइमुँ!
PRO 8:2 घ्याँ रेजरे, घ्याँ त्हुँजे जरे खन्तोदोंन् बुद्धि राम्;
PRO 8:3 सहर न्होंर होंबै मुल गेट जरे छ बिदै बुद्धि ओरम्:
PRO 8:4 “ओ म्हिमैं, ङ ङाँइ खो, ङइ बिबै बुद्धिए ताँमैं क्हेमैंए ल्हागिर्न ग।
PRO 8:5 ओ बुद्धि आरेब्मैं, बुद्धि म्हैद्; ओ आमादुमैं, च्हैंब्-मैंब् लल् खाँब्मैं तद्।
PRO 8:6 थेद्, ङइ पोंबै ताँमैं क्हेमैंए ल्हागिर केर फेम्, ङइ ठिक ताँ मत्त्रे पोंम्,
PRO 8:7 ङए सुँइ क्ह्रोंसेंन्बै ताँ पोंम्; स्योलिबै ताँमैं ङइ आखो।
PRO 8:8 ङइ सुँउँइँ ठिक ताँ मत्त्रे पोंम्, ङइ पोंबै ताँर छलु म्हिलु आत।
PRO 8:9 च्हैंब् मैंब् लल् खाँबै म्हिए ल्हागिर च छ्याँब मुँ, ज्ञान मुँबै म्हिए ल्हागिर च ठिक मुँ।
PRO 8:10 चाँदि भन्दा ङए अर्ति थेद्, छ्याँबै मारा भन्दा ङए ज्ञान म्हैद्,
PRO 8:11 तलेबिस्याँ हिरा-मोति भन्दा बुद्धि ठिक मुँ, क्हिइ म्हैबै छ्याँ-छ्याँबै सैमैं बुद्धिने च्हैंल् आखाँ।
PRO 8:12 “ङ बुद्धि ग, ङइ तोंन्दरि सै ह्रइमुँ सेइमुँ, ङने ज्ञान नेरो च्हैंब्-मैंबै शक्‍ति मुँ।
PRO 8:13 याहवेहलाइ म्हाँदिब आछ्याँबै के-ति पिब् ग। थेब् प्हैंब, शेखि लब, आछ्याँब् मैंब नेरो स्योलिबै ताँ पोंब्मैंलाइ ङइ आखो।
PRO 8:14 छ्याँबै सल्‍ला नेरो ठिक बुद्धि ङउँइँलेन् खम्, ङने क्होल् खाँबै शक्‍ति नेरो भों मुँ।
PRO 8:15 ङउँइँले बुद्धि योंसि म्रुँमैइ ग्याल्स लमुँ, धै क्रथे मिथेमैंइ ठिक ठिम बनेम्;
PRO 8:16 ङउँइँले बुद्धि योंसि क्रथे मिथेमैं नेरो ह्‍युलर्बै ताँन् थेबै म्हिमैंइ ग्याल्स लम्।
PRO 8:17 ङलाइ म्हाँया लब्मैंने ङइ म्हाँया लम्, धै ङलाइ म्हैब्मैंइ ङने त्होब्मुँ।
PRO 8:18 मान, इजेत सै न्होर नेरो ठिक के ङने मुँ।
PRO 8:19 ङ ङाँइले योंबै बुद्धि छ्याँबै मारा भन्दा या छ्याँब, नेरो चाँदि भन्दा सब मुँ।
PRO 8:20 ङ ठिक घ्याँर प्रम्, धै ठिक निसाफ लम्,
PRO 8:21 ङलाइ म्हाँया लब्मैंलाइ ङइ ल्हें सै न्होरमैं लमिंब्मुँ, धै चमैंए भकारि प्लिंमिंब्मुँ।
PRO 8:22 “याहवेहजी ह्‍युल बनेब् भन्दा ओंसोंन् ङलाइ बनेइ, खीजी बनेबै सैमैं भन्दा ओंसों-ओंनोंन् बुद्धि मुँल।
PRO 8:23 पृथ्बी बनेब् भन्दा ओंसोंन्, ङलाइ बनेइ।
PRO 8:24 ङ भन्दा ओंसों, मा ङ्युँइ, स्योंमैं तोइ आरेल।
PRO 8:25 खीजी क्लिंकाँमैं थेंब् भन्दा ओंसों, धै थे-थेबै कोंमैं बनेब् भन्दा ओंसोंन् ङ मुँल।
PRO 8:26 खीजी पृथ्बी नेरो स युँमा, सिं धुँमैं बनेब् भन्दा ओंसोंन ङ मुल।
PRO 8:27 खीजी पृथ्बीए फिर मु थेंमा, मा ङ्युँइए कारग्युले बार थोमा ङ चर्न मुँल।
PRO 8:28 खीजी न्हाँम्स्योमैं मुर थेंमा, थेबै मा ङ्युँइर ह्‍याबै क्युए मुल्मैं त्होंमिंमा,
PRO 8:29 क्युमैं खीजी बिब् भन्दा बैरु आह्‍यारिगे बिसि मा ङ्युँइर साँद थेंमा, खीजी पृथ्बीए जग झोंमा,
PRO 8:30 सिपालु म्हि घ्रि धोंले ङ खीने मुँल। त्हिंइ ह्रोंसे ङ सैं तोंरिमल, खीए उँइँर ङ खोंयोंइन आनन्द तरिमल।
PRO 8:31 खीजी बनेबै ह्‍युल म्रोंसि आनन्द तदै ताँन् म्हिमैंने ङ सैं तोंरिमल।
PRO 8:32 “ओ ङए च्हमैं, तारे ङए ताँ थेद्; ङए घ्याँर प्रब्मैंइ आशिक योंब्मुँ।
PRO 8:33 ङए अर्थि थेदु धै ह्रब्-सेब् तदु, च हेल आलद्।
PRO 8:34 ङए ताँ थेबै म्हिइ आशिक योंम्, चइ त्हिं ह्रोंसे ङए म्राउँइँन ङ्‍होरिमुँ, धै ङए म्रार पैंरिम्।
PRO 8:35 तलेबिस्याँ खाबइ ङलाइ त्होमुँ, चइ छ्ह योंम् धै याहवेहजी चए फिर ल्हयो खम्।
PRO 8:36 दिलेया ङने त्होल् आम्हैबै म्हिइ ह्रोंसलाइन नास लम्; ङलाइ हेल लबै म्हिइ कालने म्हाँया लम्।”
PRO 9:1 बुद्धिइ ह्रोंसए धिं बनेइमुँ; चइ त्हो ङिउलो क्योइमुँ।
PRO 9:2 भत्‍तेरए ल्हागिर चइ र-क्यु सैइमुँ; लिंबै अँगुरए प्हा नेरो चबै सैमैं टेबलर थेंइमुँ।
PRO 9:3 चइ ह्रोंसए केब्स्योमैं कुलइमुँ, धै सहरए नुबै क्ल्ह्‍योउँइँले,
PRO 9:4 “ओ बुद्धि आरेब्मैं चुर खो!” बिदै ताँनलाइ हुइमुँ,
PRO 9:5 धै “खो, ङने बालु चदु, ङने मुँबै लिंबै अँगुरए प्हा थुँन्।
PRO 9:6 आछ्याँबै के लब्मैंने आप्रद्, ताँ क्होद् धै लोद्। छलस्याँ क्हेमैं सोब्मुँ,” बिम्।
PRO 9:7 खैच्हिजिले पोंबै म्हिलाइ लोदा सैंदा लमा उल्टोन् फापेल् लमुँ, दुष्‍ट म्हिलाइ हौदिमा ह्रोंसलन् न्होह्रों तम्।
PRO 9:8 खैच्हिजिले पोंबै म्हिलाइ आहौदिद्, आस्याँ चइ क्हि हेल लब्मुँ; दिलेया बुद्धि मुँबै म्हिलाइ हौदिमा चइ क्हिलाइ म्हाँया लब्मुँ।
PRO 9:9 बुद्धि मुँबै म्हिलाइ अर्थि पिंमा च झन ह्रब्-सेब् तब्मुँ; ठिक के लबै म्हिलाइ लोमिंमा चइ झन् च्हैंब् मैंब् लल् खाँब्मुँ।
PRO 9:10 याहवेहने प्रे ङ्हिंब्मैंइ बुद्धि योंम्, पबित्र परमेश्‍वरलाइ ङोसेबै म्हि च्हैंब् मैंब् लल् खाँम्।
PRO 9:11 तलेबिस्या ङउँइँलेन् क्हिइ ह्रिंबै छ्ह योंब्मुँ, धै क्हि खिब् माँब् तन् समन् सोब्मुँ।
PRO 9:12 क्हि बुद्धि मुँब् तइ बिस्याँ, बुद्धिइन क्हिलाइ इनाम पिब्मुँ; दिलेया खैच्हिजिले पोंस्याँ क्हिज्यै दु:ख योंब्मुँ।
PRO 9:13 बुद्धि आरबै च्हमिरि थेबै कै तेसि पोंम्; च छ्यनपर्गन आरेब् नेरो ताँ आक्होब् तम्।
PRO 9:14 च ह्रोंसए धिंर्बै म्रार धै सहरर्बै ताँन भन्दा नुबै क्‍ल्‍ह्‍योर टिमा
PRO 9:15 चए रेउँइँले सरासर ह्रोंसए घ्याँर ह्‍यारिब्मैंलाइ
PRO 9:16 “ओ बुद्धि आरब्मैं ओ ताँ आक्होब्मैं, चुर खो!” बिदै हुइम्।
PRO 9:17 धै “ह्‍योइरि थुँबै क्यु लिंब तम्, लोइरि चबै क्हें ङाँबो खम्।” बिसि चइ बिम्।
PRO 9:18 दिलेया च ङाँर ह्‍याब्मैं क्रोंर फेनेम्, धै चए योर फेब्मैंइ कालए सुँर फेनेबै या था आसे।
PRO 10:1 बुद्धि मुँबै च्हइ ह्रोंसए आबा सैं तोंन् लम्, दिलेया आमाबै च्हइ आमालाइ न्हुँ खल् लम्।
PRO 10:2 अनिया लसि कमैंबै सै न्होर तोइ केर् आफे, दिलेया ठिक के लसि छ्ह थोस्याँ क्हि कालउँइँले फ्रेम्।
PRO 10:3 याहवेहजी ठिक के लब्मैं फोतें तल् आपिं, दिलेया दुष्‍टमैंइ मैंब् धों तब खीजी लल् आपिं।
PRO 10:4 प्ल्हेगु म्हि आयोंब्-आख्युब् तयाम्, दिलेय जाँगर खल्‍ले के लबै म्हि प्लब योब् तम्।
PRO 10:5 सर्खर म्‍ल्ह-नारि खुसि थेंबै च्ह बुद्धि मुँबै च्ह ग, दिलेया बालि खैबै त्हेर रोरिबै च्हइ आबाए मिं वाम्।
PRO 10:6 ठिक के लबै म्हिइ आशिक योंमुँ, दिलेया दुष्‍ट म्हिइ छ्याँ-छ्याँबै ताँ पोंलेया चए सैंर आछ्याँबन् तम्।
PRO 10:7 ठिक के लब्मैंलाइ मैंमा आशिक खम्, दिलेय दुष्‍टल मिं-क्ह्रन् म्हयाम्।
PRO 10:8 ताँ क्होबै म्हिइ अर्थि बुद्धिए ताँ ङिंम्, दिलेया ल्हें पोंबै आमादु नास तयाम्।
PRO 10:9 भर लल् खाँबै म्हि खनिर ह्‍यालै ढुक्‍कले प्रम्, दिलेया छलु म्हिलु लबै म्हिलाइ बिस्याँ म्हिमैंइ स्याब्मुँ।
PRO 10:10 मिइ च्यप्लने चिप्लिले हस्त लबै म्हिइ दुःख पखम्, धै ल्हें पोंबै आमादु केर आफेब् तम्।
PRO 10:11 ठिक के लबै म्हिइ पोंबै ताँमैंइ छ्याँबै घ्याँर डोरेम्, दिलेया दुष्‍ट म्हिइ पोंबै ताँइ आगुलाइ न्होह्रों लम्।
PRO 10:12 आगुलाइ म्‍लोसि पोंमा प्होंगि तम्, दिलेया म्हाँया लमा आछ्याँबै ताँमैं म्‍लेयाम्।
PRO 10:13 च्हैब् मैंब् लसि ताँ क्होबै म्हिइ बुद्धिए ताँ पोंम्, दिलेया आमाबै म्हिए ल्हागिर प्हरे चैदिम्।
PRO 10:14 बुद्धि मुँबै म्हिइ ज्ञान बुद्धिए ताँमैं सैंर थेंम्, दिलेया बुद्धि आरबै म्हिए सुँइ नास तबै ताँ पोंम्।
PRO 10:15 प्लबै म्हिए सै न्होर चए ल्हागिर भोंबै सहर ग; ङ्‍हाँदुमैं बिस्याँ दु:ख योंसि नास तयाम्।
PRO 10:16 ठिक के लसि योंबै मुइइ चमैंए छ्ह छ्याँब् तम्, दिलेया आछ्याँबै के लसि मुइइ कमेमा दण्ड योंम्।
PRO 10:17 लोद-सैंदाए ताँमैं ङिंबै म्हिमैं छ्याँबै छ्ह योंबै घ्याँर प्रमुँ, दिलेया लोदा सैंदा लमा थेबै न्ह आलबै म्हि आछ्याँबै घ्याँर फेम्।
PRO 10:18 सैं न्होंर आगुलाइ हेल लबै ताँ लोस्याँ क्हि स्योलिबै म्हि ग, धै आगुइ आब्रु ह्‍याबै ताँ लप्रबै म्हि आमादु ग।
PRO 10:19 ताँ ल्हें पोंमा आछ्याँबै तल् खाँम्, दिलेया च्हैंसि मैंसि पोंबै म्हि बुद्धि मुँब् ग।
PRO 10:20 ठिक के लबै म्हिइ निखुर चाँदि धों तबै छ्याँबै ताँमैं पोंम्, दिलेया दुष्‍ट म्हिए सैंर बिस्याँ केर आफेब् आछ्याँबै ताँमैं तम्।
PRO 10:21 ठिक के लबै म्हिइ पोंबै ताँइ ल्हें म्हिलाइ छ्याँब् लम्, दिलेया ज्ञान बुद्धिए ताँ आथेबइले आमादुमैं नास तयाम्।
PRO 10:22 याहवेहए आशिकइ क्हि प्लब तम्, धै क्हिए फिर दु:ख तल् पिंरिब् आरे।
PRO 10:23 आछ्याँबै के लमा सैं तोंस्याँ बुद्धि आरे, दिलेया च्हैंब् मैंब् लसि ताँ क्होल् खाँबै म्हि ज्ञान बुद्धिए ताँर सैं तोंम्।
PRO 10:24 तो सैने दुष्‍ट म्हि ङ्हिंमुँ, च सैन् चए फिर तखब्मुँ, दिलेया ठिक के लब्मैंए सैंर मैंब पूरा तब्मुँ।
PRO 10:25 नाँ-खैं खमा दुष्‍टमैं घ्रि या चैरिब् आरे, दिलेया ठिक के लब्मैं बिस्याँ खोंयोंन् बिले तरिब्मुँ।
PRO 10:26 क्युँइ स कृब धोंले धै मिखुइ मि ख्रोंब् धोंले, प्ल्हेगुलाइ के लबर कुलस्याँ, कुलबै म्हिलाइ चइ छलेन् दु:ख पिंब्मुँ।
PRO 10:27 याहवेहजी बिबै ताँ ङिंमा ह्रिंबै छ्ह योंम्, दिलेया दुष्‍ट म्हिमैंए छ्ह बिस्याँ घटिदिवाब्मुँ।
PRO 10:28 ठिक के लब्मैंइ आशा थेंबै ताँमैंइ लिउँइँ सैं तोंल् लम्, दिलेया दुष्‍ट म्हिमैंइ थेंबै आशा तोन्-तो तयाम्।
PRO 10:29 ठिक के लब्मैंए ल्हागिर याहवेहजी तेंबै घ्याँ लोबै क्‍ल्‍ह्‍यो ग, दिलेया दुष्‍टमैंलाइ बिस्याँ नास लम्।
PRO 10:30 ठिक के लबै म्हि ह्‍युलर खोंयोंइ क्ल्हे तल् योंब्मुँ, दिलेया दुष्‍ट म्हिमैं बिस्याँ ह्‍युलर क्ल्हे तल् योंरिब् आरे।
PRO 10:31 ठिक के लबै म्हिए सुँउँइँले बुद्धिए ताँमैं पोंम्, दिलेया स्योलिबै ताँ पोंबै ले थोवाब्मुँ।
PRO 10:32 ठिक के लबै म्हिए सुँइ ताँनइ क्वेंबै ताँमैं पोंम्, दिलेया दुष्‍ट म्हिए सुँइ बिस्याँ सैं नल् लबै ताँमैं मत्‍त्रे पोंम्।
PRO 11:1 छलु म्हिलु लबै पारा याहवेहजी आखो, दिलेया ठिक वजन मुँबै ढकइ छेन्ले क्वेस्याँ खी सैं तोंम्।
PRO 11:2 थेब् प्हैंस्याँ फापिल त्हुम्, दिलेया थेब आप्हैंब्मैंने बुद्धि तम्।
PRO 11:3 ठिक के लब्मैंइ भर लल् खाँबै के लम्, दिलेया भर लल् आखाँब्मैं ह्रोंसए आछ्याँबै केइन नास तम्।
PRO 11:4 परमेश्‍वरजी ल्हयो आखल्‍ले निसाफ लबै त्हिंइर सै न्होरइ तोइ लल् आखाँ। दिलेया ठिक के लस्याँ कालउँइँले फ्रेमिंम्।
PRO 11:5 भर लल् खाँबै म्हिइ लबै ठिक केइन च प्रबै घ्याँ छ्याँब लब्मुँ, दिलेया दुष्‍ट म्हिमैं बिस्याँ ह्रोंसइ लबै आछ्याँबै केइन क्युरु खारयाम्।
PRO 11:6 सोजो म्हिमैंइ लबै ठिक केइन चमैंए दुःखउँइँले फ्रेमिंम्, दिलेया भर लल् आखाँब्मैं बिस्याँ ह्रोंसइ लबै आछ्याँबै केइन ङोर फेम्।
PRO 11:7 दुष्‍ट म्हि सियामा चइ थेंबै आशा या नास तयाम्, धै कमैबै सै न्होरए फिर आशा थेंबै म्हि या नास तयाम्।
PRO 11:8 ठिक के लबै म्हि दुःखउँइँले जोगेब्मुँ, चए साटोर दुष्‍ट म्हिमैं दु:खर फेब्मुँ।
PRO 11:9 परमेश्‍वर आम्हाँदिबै म्हिए सुँइ पोंबै ताँइ ह्रोंसए ङ्‍हेब-ट्हुब्मैंए सैं नल् लम्, दिलेया ज्ञान बिद्धिए ताँ पोंबइले ठिक के लब्मैं दु:खउँइँले फ्रेल् योंब्मुँ।
PRO 11:10 ठिक के लब्मैंल बिब्धों-मैंब्धों तमा सहरर्बै म्हिमैं आनन्द तम्, छलेन दुष्‍ट म्हिमैं नास तमा म्हिमैं सैं तोंम्।
PRO 11:11 ठिक के लबै म्हिमैंइ आशिक पिंमा सहरर्बै म्हिमैंल बिब्धों तम्, दिलेया दुष्‍ट म्हिमैंए सुँइ पोंबै ताँइ लमा सहरर्बै म्हिमैं सग्या-प्हुग्याँ लवाम्।
PRO 11:12 ताँ आक्होल् आखाँबै म्हिइ ह्रोंसए ङ्‍हेब्मैंए बिल्‍लि लप्रम, दिलेया ताँ क्होबै म्हि ल्हें आपोंल्‍ले टिम्।
PRO 11:13 ताँ प्ह्रेइरि प्रबै म्हिइ बिल् आतबै ताँ खैले बिलै बिवाम्, दिलेया भर लल् खाँबै म्हिइ बिल् आतबै ताँमैं खों न्होंर्न थेंम्।
PRO 11:14 ठिक के लबै नेता आरेस्याँ ह्‍युल नुयाम्, दिलेया सल्‍ला पिंब्मैं ल्हें मुँस्याँ छ्याँब् तम्।
PRO 11:15 ङो आसेबै म्हिइ छे किंमा जमानि टिबै म्हिल नोक्सन तब्मुँ, दिलेया जमानि आटिबै म्हि बिस्याँ जोगेब्मुँ।
PRO 11:16 आगुए फिर ल्हयो खबै च्हमिरिलाइ ताँनइ मान लम्, दिलेया ल्हयो आखबै म्हिइ सै न्होर मत्त्रे खुम्।
PRO 11:17 आगुए फिर ल्हयो खबै म्हिल छ्याँब तम्, दिलेया दयाम्हाँया आरेबै म्हिलाइ दुःख तम्।
PRO 11:18 दुष्‍ट म्हिइ छलु म्हिलुए के लम्; दिलेया छलु म्हिलु आलल्‍ले ठिक के लबै म्हिइ खैलसे या इनाम योंम्।
PRO 11:19 ठिक के लबै म्हिए छ्ह छ्याँबै तमुँ, दिलेया दुष्‍ट म्हिए लिलि प्रबै म्हि कालए सुँर फेनेम्।
PRO 11:20 आछ्याँबै सैं मुँबै म्हिलाइ याहवेहजी आखो, दिलेया ठिक के लप्रबै म्हि म्रोंसि खी सैं तोंम्।
PRO 11:21 दुष्‍ट म्हिमैं दण्ड आयोंन् समा स्योरल् योंरिब् आरे, दिलेया ठिक के लब्मैं जोगेल् योंब्मुँ बिबै ताँ क्ह्रोंसेंन ग।
PRO 11:22 च्हमिरि छ्याँब् मुँलेया बुद्धि आरेस्याँ तिलिए नखुँर माराए बुँलाकि खिब् धोंन् तब् ग।
PRO 11:23 ठिक के लबै म्हिइ थेंबै आशा तो मुँलेया छ्याँब तम्, दिलेया दुष्‍ट म्हिमैंइ आशा थेंबै सै आयोंमा ह्रिस खम्।
PRO 11:24 सैं प्ल्हसि पिंबै म्हिइ मुइ झन ल्हें योंब्मुँ; दिलेया ह्रोंसने मुँन-मुँन् पिंल् आखाँबै म्हि झन् ङ्‍हाँदु तदै ह्‍याम्।
PRO 11:25 आगुए खाँचोर पिंल् खाँबै म्हिल बिब् धों तम्, धै अरूलाइ भों खबै ताँ बिमिंसि सैं क्होमिंबै म्हिए ल्हागिर ल्होबै म्हि योंम्।
PRO 11:26 म्‍ल्ह-नारि भकारिर तिगोले मुँलेया आचुँन्ले थेंबै म्हिलाइ म्हिमैंइ सराप पिंम्, दिलेया म्हिमैंलाइ म्‍ल्ह-नारि चुँल् त्हुम् बिब् मैंसि चुँबै म्हिइ आशिक योंम्।
PRO 11:27 छ्याँबै के लप्रबै म्हिलाइ ताँनइ खोम्, दिलेया आछ्याँबै के लप्रबै म्हिए फिर आछ्याँबन् तखम्।
PRO 11:28 ह्रोंसए सै न्होरए फिर भर लबै म्हि फापिल् त्हुम्, दिलेया ठिक के लबै म्हि पिङ्ग्या प्हो धोंले म्रौलेब्मुँ।
PRO 11:29 ह्रोंसए परवाए फिर दुःख पिंबै म्हिइ तोइ योंरिब् आरे, धै आमादु म्हि बुद्धि मुँबै म्हिए केब्छैं तब्मुँ।
PRO 11:30 ठिक के लबै म्हिइ छ्याँबै छ्ह थोब्मुँ, धै म्हिमैंलाइ छ्याँबै घ्याँर डोरेल् खाँबै म्हि बुद्धि मुँब् ग।
PRO 11:31 ठिक के लबै म्हिइ ह्रोंसइ लबै छ्याँबै केए इनाम चु ह्‍युलर्न योंब्मुँ, छलेन दुष्‍ट म्हिमैं नेरो पापिमैंइ झन् कति थेबै दण्ड योंलै?
PRO 12:1 लोदा सैंदाए ताँमैं ङिंबै म्हिइ ज्ञान बुद्धिए घ्याँर प्रम्, दिलेया लोदा सैंदा लमा थेल् आङिंबै म्हि आमादु ग।
PRO 12:2 स्वाबै म्हिलाइ याहवेहजी ल्हयो खम्, आछयाँबै के लबै म्हिलाइ खीजी दोषि ठर्दिब्मुँ।
PRO 12:3 आछ्याँबै के लबै म्हि जोगेल् आखाँ, दिलेया ठिक के लबै म्हिलाइ लाल् खाँरिब् आरे।
PRO 12:4 सिर सुबास मुँबै च्हमिरि ह्रोंसए प्युँए ल्हागिर मुकुट ग, दिलेया प्युँलाइ फापिल् लबै प्ह्रेंस्यो प्युँए ह्रिब क्राँयाब धोंन् तब् ग।
PRO 12:5 ठिक के लबै म्हिइ ठिक चाँजोमैं लम्, दिलेया दुष्‍टमैंए सल्‍ला बिस्याँ छलु म्हिलुबै तम्।
PRO 12:6 म्हिमैंलाइ सैले बिसि दुष्‍ट म्हिमैं ताँ लप्रम्, दिलेया ठिक के लब्मैंइ पोंबै ताँइ चमैंलाइ जोगेमिंम्।
PRO 12:7 दुष्‍ट म्हिमैं भ्योंवाब्मुँ, चमैं चैरिब् आरे; ठिक के लबै म्हिमैंए धिं बिस्याँ खोंयोंन् बिलै तरिब्मुँ।
PRO 12:8 ज्ञान बुद्धि ङ्ह्‍योसि म्हिमैंए बयन लम्, दिलेया आछ्याँबै सैं मुँबै म्हिलाइ बिस्याँ तो धोंइ आङ्हाँ।
PRO 12:9 धिंर चबै सै तोइ आरेलैया ङम् ङन् ग बिइ प्रबै म्हि भन्दा कालिदिबै म्हि आङिंलैया ह्रोंसने के लबै म्हि मुँब छ्याँब ग।
PRO 12:10 ठिक के लबै म्हिइ ह्रोंसए खेदोमैं वास्ता लम्, दिलेया दुष्‍ट म्हिमैंइ ह्रोंसए खेदोमैं ल्हयो आख।
PRO 12:11 ह्रोंसए म्रों ताब् क्ल्योब लसि रा-रोमैं रुँइँब्मैंने चबै सै ल्हें तम्, दिलेया केर आफेबै म्हिमैंए लिलि प्रब्मैं बुद्धि आरेब्मैं ग।
PRO 12:12 दुष्‍ट म्हिमैं ह्‍योमैंइ पखबै सैमैं लोब म्हाँदिम्, दिलेया ठिक के लबै म्हि बिस्याँ छ्याँबै के लसि प्रम्।
PRO 12:13 ह्रोंसइ पोंबै आछ्याँबै ताँइ लमा दुष्‍ट म्हि ङोर फेम्, दिलेया ठिक के लबै म्हि बिस्याँ दुःखउँइँले जोगेम्।
PRO 12:14 छ्याँबै ताँमैं पोंमा म्हिमैंइ छ्याँ-छ्याँब सैमैंन् योंब्मुँ, धै म्हिमैंइ खैबै के लइमुँ छाबन् इनाम योंब्मुँ।
PRO 12:15 आमादुइ ह्रोंस ठिक घ्याँर प्रइमुँ ङ्‍हाँम्, दिलेया ताँ क्होल् खाँबै म्हिइ आगुए सल्‍लामैं थेम्।
PRO 12:16 आमादुमैं युनन् ह्रिस खम्, दिलेया ताँ क्होल् खाँबै म्हिइ ह्रोंस फापिन् तमै या तोइ आबिल्‍ले टिरिम्।
PRO 12:17 स्योर आतेल्‍ले पोंबै म्हिइ ठिक ग्वाइ पिंम्, दिलेया छलु म्हिलु लबै म्हिइ स्योलिबै ग्वाइ पिंम्।
PRO 12:18 खैज्हिजिले पोंमा सेलाँइ धोंले म्हिलाइ म्‍लोम्, दिलेया च्हैंसि मैंसि छेनाले पोंमा नरिबै सैं सल् लम्।
PRO 12:19 क्ह्रोंसेंन्बै ताँ पोंबै म्हिलाइ खोंयोंन् बिलै ताँनइ म्हाँदिम्, दिलेया स्योलिबै ताँ पोंबै म्हिलाइ खाबज्यै आक्वें।
PRO 12:20 आछ्याँबै चाँजो लब्मैंए सैं छलु म्हिलु तम्, दिलेया आक्ह्रिब्मैंलाइ क्ह्रिमिंबर सल्‍ला पिंब्मैं बिस्याँ बेल्‍ले सैं तोंल् योंब्मुँ।
PRO 12:21 ठिक के लबै म्हिलाइ तोइ न्होह्रों आत, दिलेया दुष्‍ट म्हिमैंलाइ बिस्याँ ल्हें दुःख तम्।
PRO 12:22 स्योलिबै ताँ पोंबै म्हिलाइ याहवेहजी आखो, दिलेया छलु म्हिलु आलल्‍ले के लबै म्हिने खी सैं तोंम्।
PRO 12:23 ताँ क्होबै म्हिइ ह्रोंसइ ह्रब् सेबै ताँ आगुने बिप्रदै आपों, दिलेया आमादुमैंइ बिस्याँ ह्रोंसइ लबै आछ्याँबै ताँ बिप्रम्।
PRO 12:24 ह्रोंसइ लल् त्हुबै के लबै म्हिइ तोंन्दोंरि सैंर क्ल्हे तल् योंम्। प्ल्हेगु तइ बिस्याँ आगुए केब्छैं तल् त्हुम्।
PRO 12:25 न्हुँ लबै म्हि भों आखन् तम्, दिलेय छ्याँबै ताँइ म्हिलाइ सैं तोंल् लम्।
PRO 12:26 ठिक के लबै म्हिइ ह्रोंसए ङ्‍हेब् ट्हुब्मैंलाइ छ्याँबै घ्याँर डोरेम, दिलेया दुष्‍ट म्हिमैं प्रबै घ्याँर प्रमा चमैं आछ्याँबै घ्याँर फेनेम्।
PRO 12:27 प्ल्हेगुइ शिखार क्ल्योंमा तोइ स्याल् आखाँ, दिलेया ह्रोंसइ लल् त्हुबै के लबै म्हिइ सै न्होर खुम्।
PRO 12:28 ठिक घ्याँर प्रमा छ्ह छ्याँब तम्, च घ्याँर प्रस्याँ खाबै आसि।
PRO 13:1 बुद्धि मुँबै च्हइ आबाइ लोदा सैदा लमा छेनाले थेम्, दिलेया सुँ सुँर्न छैबै म्हिइ लोदा सैंदाए ताँ आथे
PRO 13:2 छ्याँबै ताँ पोंबै म्हिइ छ्याँबै सैमैं योंम्, दिलेया छलु म्हिलु लब्मैंइ सैब् म्‍लुब् लदा ङ्‍हाँम्।
PRO 13:3 खैच्हिजिले आपोंबै म्हिए छ्हर बिब् धों तम्, सुँर तो खमुँ चन् पोंबै म्हि नास तयाम्।
PRO 13:4 प्ल्हेगु म्हिइ ल्हें सै म्हैलेया चइ तोइ आयों, दिलेया भोंन्ले के लबै म्हिइ तोन्दोंरि योम्।
PRO 13:5 ठिक के लबै म्हिइ स्योर ताँ आपों, दिलेया दुष्‍ट म्हिइ फापिन् तबै ताँ पोंसि इजेत वाम्।
PRO 13:6 भर लल् खाँबै म्हिइ ठिक के लमुँ, छतसि चइ लबै ठिक केइन चलाइ जोगेम्, दिलेया दुष्‍ट म्हिमैं बिस्याँ चमैंइ लबै आछ्याँबै केइन पापर च्होयाम्।
PRO 13:7 कोइ म्हि ह्रोंसने तोइ आरेलैया प्लब् प्हैंम्; कोइ म्हि प्लब् मुँलेया तोइ आरेब् धोंले प्रम्,
PRO 13:8 सै न्होरइ म्हिलाइ शत्तुरमैंए योउँइँले जोगेल् खाँम्, दिलेया ङ्‍हाँदुमैंलाइ बिस्याँ खाबज्यै आहौदि।
PRO 13:9 ठिक के लबै म्हि चारबै बत्ति धों तब् ग, दिलेया दुष्‍ट म्हिमैंए बत्ति बिस्याँ सैवाब्मुँ।
PRO 13:10 थेब् प्हैंस्याँ प्होंगि मत्‍त्रे तम्, दिलेया सल्‍ला किंस्याँ ह्रब्-सेब् तम्।
PRO 13:11 छलु म्हिलु लसि खुबै सै न्होर तिस्यार्न नुयाम्, च्युगु-च्युगु लसि खुबै सै न्होर ल्हें ततै ह्‍याम्।
PRO 13:12 आशा थेंबै सै आयोंमा सैं सिम्, दिलेया सैर मैंब् धों तमा भों खम्।
PRO 13:13 सल्‍ला आकिंबै म्हिइ नौसन् ब्येहोर्दिल् त्हुँम्, दिलेया बिब् ङिंबै म्हिइ इनाम योंम्।
PRO 13:14 बुद्धि मुँबै म्हिइ लोमिंबै ताँ छ्ह योंब मुल् ग, चइ लमा च कालाए ङोउँइँले स्योरखम्।
PRO 13:15 बुद्धि मुँबै म्हिलाइ ताँनइ म्हाँदिम्, दिलेया छलु म्हुलु लबै म्हिए फिर दु:ख खम्।
PRO 13:16 बुद्धि मुँबै म्हिइ च्हैंसि मैंसि के लम्, दिलेया आमादुमैंइ तोइ आच्हैंन्ले के लम्।
PRO 13:17 स्योलिबै ताँ बिप्रबै म्हिए फिर दु:ख खम्, दिलेया भर लल् खाँबै ताँ पोंबै म्हिइ प्ल्होंरिबै सैं छि ङ्‍हाँन् लम्।
PRO 13:18 लोदा-सैंदाए ताँ आङिंबै म्हि फापिल् त्हुब्मुँ धै दुःख खब्मुँ, दिलेया लोदा सैंदाए ताँ थेबै म्हिइ मान योंब्मुँ।
PRO 13:19 ह्रोंसल् बिब् धों तमा सैं तोंमुँ, दिलेया आछ्याँबै केमैं पिब आमादुमैंलाइ छ्याँब आङ्हाँ।
PRO 13:20 बुद्धि मुँबै म्हिने प्रबै म्हि बुद्धि मुँबन् तम्, आमादुमैंने प्रस्याँ नास तम्।
PRO 13:21 पापिमैं खना ह्‍याले दुःखन् योंमुँ, ठिक के लबै म्हिइ आशिक योंम्।
PRO 13:22 छ्याँबै म्हिइ ह्रोंसए क्वें-क्वेंमिमैंए ल्हागिर सै न्होर पिंथेंम्, दिलेया पापिमैंए सै न्होर ठिक के लब्मैंए योर फेनेम्।
PRO 13:23 ङ्‍हाँदुमैंइ दु:ख लसि ल्हें रा-रोमैं खुमुँ, दिलेया अनिया लबै म्हिइ च प्हेंसि बोवाम्।
PRO 13:24 च्हलाइ तार आझोंबै आबाइ च्हलाइ हेल लम्, दिलेया च्हलाइ खोबै आबाइ छेनाले तार झोंम्।
PRO 13:25 ठिक के लबै म्हिइ म्रेंन्ले चल् योंम्, दिलेया दुष्‍ट‍ म्हिमैं बिस्याँ फोत्तेन् तम्।
PRO 14:1 बुद्धि मुँबै च्हमिरिइ ह्रोंसए धिंर्बै तौदु छेनाले लम्, दिलेया आमादु च्हमिरिइ ह्रोंसए धिं-नाँ फुवाम्।
PRO 14:2 ठिक के लबै म्हिइ याहवेहलाइ म्हाँदिमुँ, दिलेया आछ्याँबै के लप्रबै म्हिइ याहवेहलाइ तो धोंइ आङ्हाँ।
PRO 14:3 आमादुइ ह्रोंसलाइन न्होह्रों तल्‍ले पोंमुँ, दिलेया बुद्धि मुँबै म्हिइ पोंबै ताँइ चमैंलाइ जोगेम्।
PRO 14:4 क्ल्योबै क्ल्या आरेबै धिंर भकारिमैं क्होत्तेन् तम्, दिलेया क्ल्या क्ल्योमा ल्हें रा-म्रोमैं खुल् योंम्।
PRO 14:5 ठिक ग्वाइ पिंबै म्हिइ स्योर आते, दिलेया छल् तेब्मैं स्योर ताँ ल्हें पोंम्।
PRO 14:6 आगु प्ह्रबै म्हि ह्रब्-सेब् तल् म्हैलेया आत, दिलेया बुद्धि मुँबै म्हिइ च्हैंब् मैंब् लल् खाँम्।
PRO 14:7 आमादु म्हि ङाँइले ह्रेंगो टिद्, तलेबिस्याँ चए सुँउँइँले ज्ञान बुद्धिए ताँमैं आत्हों।
PRO 14:8 च्हैंब् मैंब् लल् खाँबै म्हिइ ह्रोंसइ लल् त्हुबै केमैं तो जा बिब् सेम्, दिलेया आमादुमैइ लबै केइ ह्रोंसलाइन न्होह्रों लम्।
PRO 14:9 आछ्याँबै के कतिन् ललेया आमादुमैंइ तो धोंइ आङ्हाँ, दिलेया ठिक के लबै म्हिलाइ ताँनइ म्हाँदिम्।
PRO 14:10 सैं नरिलैया तोंरिलैया ह्रोंसइन सेम्। छतसि म्हिए सैंर मुँबै ताँमैं खाबज्यै क्होल् आखाँ।
PRO 14:11 दुष्‍ट म्हिमैंए धिं फुवाब्मुँ, ठिक के लब्मैंल बिब् धोंन् तब्मुँ।
PRO 14:12 ह्रोंस प्रबै घ्याँ ठिक धों ङ्‍हाँलेया दिलेया लिउँइँ च घ्याँ कालाए सुँर फेनेम्।
PRO 14:13 निस्योरिलेया खोंर पिर तल् खाँम्, सैं तोंलेया लिउँइँ सैं नल् खाँम्।
PRO 14:14 छ्याँबै घ्याँ पिसि प्रबै म्हिइ खैलेबिलै दण्ड योंब्मु, दिलेया ठिक के लबै म्हिइ चइ लबै केमैंए इनाम योंब्मुँ।
PRO 14:15 आमादुमैंइ खैतबै ताँ मुँलेया क्वेंम्, दिलेया बुद्धि मुँबै म्हि न्हक्रों मिक्रोंले प्रम्।
PRO 14:16 बुद्धि मुँबै म्हि याहवेहने ङ्हिंमुँ धै आछ्याँबै केमैं आल, आमादु बिस्याँ च्हैंब् मैंब् लल् आखाँब नेरो ह्रिस ल्हें खब् तम्।
PRO 14:17 युनन् ह्रिस खबै म्हिइ न्होह्रों तबै के लम्, धै छलु म्हिलु लबै म्हि खाबज्यै आखो।
PRO 14:18 बुद्धि आरेबै म्हि न्होह्रों तबै के मत्त्रे लम्, दिलेया ताँ क्होबै म्हिइ च्हैंब्-मैंबै लल् खाँम्।
PRO 14:19 आछ्याँबै के लबै म्हिमैं छ्याँबै के लबै म्हिए उँइँर कुरल् त्हुब्मुँ, छलेन दुष्‍ट म्हिमैं ठिक के लब्मैंए म्रार कुरल् त्हुब्मुँ।
PRO 14:20 आयोंब्-आख्युब्मैंलाइ ङ्‍हेब्-ट्हुब्मैंज्यै या म्हि आच्हि, दिलेया प्लब्मैंल ल्हें थुँमैं तम्।
PRO 14:21 ह्रोंसए ङ्‍हेब्-ट्हुब्मैंलाइ हेल लबै म्हिइ पाप लम्, दिलेया आयोंब्-आख्युब्मैंए खाँचो टार्दिमिंबै म्हिइ आशिक योंम्।
PRO 14:22 आछ्याँबै केए चाँजो लब्मैं घ्याँ फ्लेब्मुँ, दिलेया छ्याँबै केए चाँजो लब्मैंलाइ ताँनइ म्हाँया लसि भर लल् खाँम्।
PRO 14:23 प्ल्हेगु आतल्‍ले बेल्‍ले के लस्याँ ह्रोंसलाइन फायदा तमुँ, दिलेया के आलल्‍ले ताँ ल्हें लरिबै म्हि बिस्याँ ङ्‍हाँदु तम्।
PRO 14:24 बुद्धि मुँबै म्हिए सै न्होर चमैंए मुकुट ग, दिलेया आमादुमैंइ अझै आमादु के मत्‍त्रे लम्।
PRO 14:25 क्ह्रोंसेंन्बै ग्वाइ पिंबै म्हिइ छ्याब् योंबै म्हिलाइ जोगेमिंम्, दिलेया स्योलिबै ग्वाइ पिंबै म्हिइ छल् लम्।
PRO 14:26 याहवेहने ङ्हिंबै म्हिइ रक्षा योंम्, धै चए प्हसेमैंए ल्हागिर खी लोबै क्ल्ह्‍यो तब्मुँ।
PRO 14:27 याहवेहने ङ्हिंबै म्हिइ छ्ह खैले थोल् त्हुम् बिब था सेम्, छतसि कालए ङोउँइँले च फ्रेल् खाँम्।
PRO 14:28 जनता ल्हें तस्याँ म्रुँइ मान इजेत योंम्, दिलेया जनता आरेस्याँ म्रुँए शासन नास तयाम्।
PRO 14:29 युनन् ह्रिस आखबै म्हि बुद्धि मुँबै म्हि ग, दिलेया युनन् ह्रिस खबै म्हि आमादु ग।
PRO 14:30 सैंर न्हुँ आरेस्याँ ज्यु छ्याँब तमुँ, दिलेया आगुए फिर ह्रिस लमा ह्रुइब क्राँयाम्।
PRO 14:31 ङ्‍हाँदुमैंलाइ क्र ओल् आपिंब्मैंइ चमैंलाइ बनेबै परमेश्‍वरलाइ मान आल, दिलेया आयों-आख्युब्मैंए खाँचो टार्दिमिंबै म्हिइ परमेश्‍वरए मान लमुँ।
PRO 14:32 दुष्‍ट म्हिमैंए लबै केइ ह्रोंसन् नास तयाम्, दिलेया ठिक के लब्मैं सिमै या आशा योंम्।
PRO 14:33 ताँ क्होबै म्हिए सैंर बुद्धि तम्, दिलेया आमादुमैंने बुद्धि मुँबै ताँमैं कति आरे।
PRO 14:34 ठिक के लमा ह्‍युलए मिं थेब् तम्, दिलेया पापइ ह्‍युलए न-मि वाम्।
PRO 14:35 बुद्धि मुँबै केब्छैं म्रोंसि म्रुँ सैं तोंम्, फापिल् लबै केब्छैं म्रोंसि च बेल्‍ले ह्रिस खम्।
PRO 15:1 च्योंने तइ पोंमा खरिबै ह्रिस या म्हम्, दिलेया ठस-ठसले पोंमा झन ह्रिस खम्।
PRO 15:2 बुद्धि मुँबै म्हिइ ठिक ताँमैं पोंम्, दिलेया आमादुमैंइ बुद्धि आरेबै ताँमैं लम्।
PRO 15:3 याहवेहजी खन्तोदोंन् ङ्ह्‍योरिम्, दुष्‍ट म्हि नेरो छ्याँबै म्हिमैं ङ्हिंन-ङ्हिंए फिर मि छरिम्।
PRO 15:4 छ्याँबै सुँइ पोंमा नरिबै सैं या सम्, दिलेया स्योलिबै ताँ पोंबै लेइ सैं नल् लम्।
PRO 15:5 आबाइ लोमिंबै ताँमैं आमादुइ आङिं, दिलेया बुद्धि मुँबै म्हिइ लोदा सैंदाए ताँमैं ङिंम्।
PRO 15:6 ठिक के लबै म्हिए धिंर सै न्होर ल्हें तम्, दिलेया दुष्‍ट म्हिइ कमैंबै सै न्होरइ चमैंए फिर्न दु:ख पम्।
PRO 15:7 बुद्धि मुँबै म्हिइ खन्तोदोंन् ज्ञानए ताँ बिप्रम्, आछ्याँबै सैं मुँबै म्हिइ बिस्याँ छ आल।
PRO 15:8 दुष्‍ट म्हिइ पिंबै ख्रो याहवेहजी आखो, दिलेया सोजो म्हिइ लबै प्राथना थेसि खी सैं तोंम्।
PRO 15:9 दुष्‍ट म्हिमैंइ लबै के याहवेहजी आखो, दिलेया छ्याँबै के लब्मैंलाइ खीजी म्हाँया लम्।
PRO 15:10 आछ्याँबै के लब्मैंइ थेबै दण्ड योंब्मुँ; धै लोदा सैंदाए ताँ आङिंबै म्हि सियाब्मुँ।
PRO 15:11 क्रों नेरो नर्ग खैतब मुँ बिसि याहवेहजी सेइमुँ बिस्याँ झन् म्हिमैंए खोंर्बै तोन्दोंरि ताँ खीजी था सेम्!
PRO 15:12 खैच्हिजिले पोंबै म्हिइ लोदा सैंदा लबै म्हिलाइ आखो; बुद्धि मुँबै म्हिइ पिंबै सल्‍ला चइ आम्है।
PRO 15:13 सैं तोंस्याँ म्हिए लि वाँ-वाँ ब्योंम्, दिलेया न्हुँ तमा सैं आतों।
PRO 15:14 ताँ क्होबै म्हिइ ज्ञानए ताँ म्हैम्, दिलेया आमादुमैंए सुँइ आछ्याँबै ताँमैं पोंम्।
PRO 15:15 आगुइ ह्रुगुदिब्मैं खोंयोंन् बिलै दुःखन् योंरिल् त्हुम्, दिलेया सैं तोंरिल् योंब्मैं खोंयोंन् बिलै छिं ङ्‍हाँल् योंब्मुँ।
PRO 15:16 प्लबन् तलेया सैं खैता-खैता तब् भन्दा ङ्‍हाँदु तलेया याहवेहलाइ म्हाँदिब छ्याँब् ग।
PRO 15:17 हेल तसि छोबै से चब् भन्दा पिंग्या ट्हा-ट्हुमैं चसि म्हाँयार ठिब छ्याँब् ग।
PRO 15:18 युनन् ह्रिस खबै म्हिइ प्होंगि तल् लम्, दिलेया युनन् ह्रिस आखबै म्हिइ प्होंरिबै म्हिमैं क्ह्रिल् लम्।
PRO 15:19 प्ल्हेगुए घ्याँ पुजुए बार मुँब् धों तम्, दिलेया सोजो म्हि प्रबै घ्याँ छ्याँबै मुल घ्याँ तम्।
PRO 15:20 बुद्धि मुँबै च्हइ आबालाइ सैं तोंन् लम्, दिलेया आमादुमैंइ ह्रोंसए आमालाइ तो धोंइ आङ्हाँ।
PRO 15:21 ताँ आक्होबै म्हि आछ्याँबै के लल् योंमा सैं तोंम्, दिलेया ताँ क्होबै म्हिइ छ्याँबै केमैं लम्।
PRO 15:22 सल्‍ला आलल्‍ले लबै चाँजोमैं न्होंयाम्, दिलेया ल्हें सल्‍ला किंसि लबै केमैं छ्याँब् तम्।
PRO 15:23 छ्याँबै जवाफ पिंल् योंमा म्हि सैं तोंम्, धै ठिक त्हेर पोंबै ताँ कति छ्याँब तम्।
PRO 15:24 बुद्धि मुँबै म्हि छ्याँबै घ्याँर प्रसि कैंडो कैंडो ह्‍याम्, बुद्धिइ चलाइ नर्गर ह्‍याबउँइँले जोगेम्।
PRO 15:25 थेब् प्हैंबै म्हिए धिं याहवेहजी फुवाम्, दिलेया म्हरेस्योमैंए साँद खीजी जोगेमिंम्।
PRO 15:26 दुष्‍ट म्हिमैंइ मैंबै आछ्याँबै ताँमैं याहवेहजी आखो, दिलेया ठिक के लबै म्हिमैंइ मैंबै ताँमैंर खी सैं तोंम्।
PRO 15:27 लोबि म्हिइ ह्रोंसए परवार दु:ख पखम्, दिलेया घुस आकिंबै म्हि सोब्मुँ।
PRO 15:28 ठिक के लबै म्हिइ च्हैंसि मैंसि जवाफ पिंम्, दिलेया दुष्‍ट म्हिए सुँउँइँले आछ्याँबै ताँमैं ल्हें त्होंम्।
PRO 15:29 दुष्‍ट म्हिमैंउँइँले याहवेह ह्रेंगो टिम्, दिलेया ठिक के लब्मैंए प्राथना खीजी थेम्।
PRO 15:30 लिथों ङ्‍होथो तब्मैं म्रोंमा सैं तोंम्, धै छ्याँबै सँउँसर थेल् योंमा भों खम्।
PRO 15:31 लोदा सैंदाए ताँ थेबै म्हि बुद्धि मुँब्मैंए थु ग।
PRO 15:32 लोदा सैंदाए ताँ आथेबै म्हिइ ह्रोंसल्न न्होह्रों लम्, दिलेया लोदा सैंदाए ताँ ङिंबै म्हि ह्रब्-सेब् तम्।
PRO 15:33 याहवेहए मान लबै म्हिइ बुद्धि योंम्, ह्रोंस च्योंने तस्याँ मान योंब्मुँ।
PRO 16:1 म्हिमैंइ सैंर चाँजोमैं लम्, दिलेया जवाफ याहवेहउँइँलेन् खम्।
PRO 16:2 म्हिमैंइ ह्रोंसइ लबै केमैं छ्याँबन् ङ्‍हाँलै, दिलेया म्हिमैंए सैंर तो मुँ बिब याहवेहजी सेम्।
PRO 16:3 क्हिइ लल् म्हैबै ताँन् केमैं याहवेहए योर थेंन्, धै क्हिइ लल् म्हैबै केमैं छ्याँब् तम्।
PRO 16:4 याहवेहजी तोन्दोंरि सैमैं खीए सैंर मैंब् धोंले बनेइमुँ, खीजी दुष्‍ट म्हिमैं या नास तबै त्हिंइए ल्हागिर साँथेंइमुँ।
PRO 16:5 याहवेहजी थेब् प्हैंब्मैं तिफुँइ आखो; चमैंइ खैले बिलैया दण्ड योंब्मुँ।
PRO 16:6 भर पर्दिल्‍ले छ्ह थोद्, धै परमेश्‍वरजी क्हिए पाप क्षमा लब्मुँ, धै याहवेहजी बिब् ङिंस्याँ क्हिला तोइ न्होंह्रो आत।
PRO 16:7 क्हिइ याहवेहलाइ सैं तोंन् लस्याँ खीजी शत्तुरमैंलाज्यै या क्हिए थु लमिंब्मुँ।
PRO 16:8 अनिया लसि कमैबै ल्हें सै न्होर भन्दा ठिक के लसि योंबै च्युगुदे सै न्होर छ्याँब् ग।
PRO 16:9 म्हिइ ह्रोंसए सैंर छ लमुँ, छु लमुँ बिमुँ, दिलेया चइ लल् त्हुबै केर याहवेहजीन् डोरेम्।
PRO 16:10 म्रुँइ छ्याँबै ताँ पोंमुँ; धै खोंयोंइन ठिक निसाफ लमिंम्।
PRO 16:11 छेनाले क्ह्‍वेब नेरो क्वेबै सै याहवेहजी खोम्; धै म्हन पथि नेरो ढगमैं ठिक तल् त्हुम् बिसि खीजी बिइमुँ।
PRO 16:12 ठिक के लबै म्रुँइ खोंयोंइ ग्याल्स लम्, तलेबिस्याँ छाबै म्रुँइ आछ्याँबै के तिफुँइ आखो।
PRO 16:13 ठिक के लबै म्हिमैंइ पोंबै ताँ थेसि म्रुँ सैं तोंम्, धै क्ह्रोंसेंन्बै ताँ पोंब्मैंलाइ म्रुँइ खोम्।
PRO 16:14 म्रुँलाइ ह्रिस खल् लबै म्हि सिल् त्हुब्मुँ, छतसि बुद्धि मुँबै म्हिइ ह्रिस खरिबै म्रुँलाइ सैं तोंन् लम्।
PRO 16:15 म्रुँलाइ सैं तोंन् लमा म्हिमैं सोल् योंम्, च ख्वालबै त्हेर नाँ पबै न्हाँम्स्यों धों खम्।
PRO 16:16 मारा योंब् भन्दा बुद्धि योंब छ्याँब् ग, धै चाँदि भन्दा ज्ञान बुद्धिलाइ त्हाँन्।
PRO 16:17 सोजो म्हिइ आछ्याँबै केमैं आल; आछ्याँबै के आलब्मैंइ छेनाले छ्ह थोल् खाँम्।
PRO 16:18 तोन् तोर्न थेब् प्हैंबै म्हि नास तयाब्मुँ, अरूमैंलाइ तो धोंइ आङ्हाँबै म्हिल मि-क्ह्रन् म्हयाब्मुँ।
PRO 16:19 थेब् प्हैंब्मैंने क्ह्रिसि लुडिबै सैमैं चुब् भन्दा बरु च्योंने तसि ङ्‍हाँदुमैंने टिब छ्याँब् ग।
PRO 16:20 लोदा सैंदा लमा छेनाले ङिंबै म्हिल बिब् धों तब्मुँ, याहवेहए फिर भर थेंब्मैंइ आशिक योंब्मुँ।
PRO 16:21 बुद्धि मुँबै म्हिलाइ ह्रब् सेब बिमुँ, धै छ्याँबै ताँइ म्हिमैंलाइ ह्रब् सेब् लम्।
PRO 16:22 च्हैंब् मैंब् लल् खाँबै म्हिलाइ बुद्धिइ छ्याँबै घ्याँर डोरेम्; दिलेया आमादुमैंइ ह्रोंसए न्होह्रों तबै के ह्रोंसइन लम्।
PRO 16:23 बुद्धि मुँबै म्हिइ च्हैंसि मैंसि पोंम्, धै चइ पोंबै ताँइ म्हिमैं ह्रब् सेब् तम्।
PRO 16:24 छ्याँबै ताँमैं क्वे खुदुए न्हाँज्यु धों तम्, चइ म्हिमैंलाइ भों पिंम्, धै सैं तोंन् लम्।
PRO 16:25 ह्रोंस प्रबै घ्याँ ठिक धों ङ्‍हाँलेया लिउँइँ च घ्याँ कालाए सुँर फेनेम्।
PRO 16:26 फो ख्रेंबै म्हिइ झन् के लम्; तलेबिस्याँ चल् त्हुसेरो के लल् त्हुम्।
PRO 16:27 दुष्‍ट म्हिइ आछ्याँबै के मत्त्रे लप्रम्, धै चइ पोंबै ताँइ म्हिमैंए सैं नल् लम्।
PRO 16:28 स्योलिबै ताँ लबै म्हिइ प्होंगि लम्, धै आगुए ताँ लप्रबै म्हिइ क्ह्रिरिबै थुमैंया आक्ह्रिल् लवाम्।
PRO 16:29 न्होह्रों लल् म्हैबै म्हिइ आगुलाइ फस्ला फुस्लु लवासि आछ्याँबै घ्याँर डोरेदिम्।
PRO 16:30 मि च्याब्लने चिब्लि लबै म्हिइ जाल रोमुँ; धै म्हदे म्‍लिब्मैंए बानि ब्योर आछ्याँब तम्।
PRO 16:31 सारबै क्र ङ्‍हेबै क्रेगि ग; ठिक के लब्मैंइ ह्रिंबै छ्ह योंम्।
PRO 16:32 ल्हडेंर नेबर ह्‍याबै म्हि भन्दा युनन् ह्रिस आखबै म्हि थेब ग, ह्रिस थाम्दिल् खाँबै म्हि सहरलाइ ट्होबै म्हि भन्दा थेब् ग।
PRO 16:33 म्हिइ चिट्टाम् झोंमुँ, दिलेया तोन्दोंरि ताँए जवाफ याहवेहउँइँलेन् खम्।
PRO 17:1 प्होंगि कैगि तबै धिंर सेने कैं चब् भन्दा क्ह्रिसि पैंगु प्रोलि चब छ्याँब् ग।
PRO 17:2 बुद्धि मुँबै केब्छैंइ केर आफेबै च्हलाइ न्होंर थेंब्मुँ, धै च्हइ धोंले चइ खे-बाज्युमैंए सै न्होर योंब्मुँ।
PRO 17:3 मारा नेरो चाँदि मिइ खार्दिम्, दिलेया म्हिए खों जाँच लब याहवेहन् ग।
PRO 17:4 दुष्‍ट म्हिइ आछ्याँबै ताँ थेदा ङ्‍हाँम्, स्योलिबै ताँ पोंबै म्हिइ न्होह्रों तबै ताँमैंन् थेल् म्हैम्।
PRO 17:5 ङ्‍हाँदुमैंलाइ प्ह्रबै म्हिइ चलाइ बनेबै परमेश्‍वरए आब्रु वाब् ग; धै आगुए फिर दुःख तमा सैं तोंबै म्हिमैंइ दण्ड योंब्मुँ।
PRO 17:6 क्वें-क्वेंमिमैं बाज्यु-भुज्युए क्रेगि ग, धै आबा-आमा प्हसेमैंए ङ्‍हो लोंबै सै ग।
PRO 17:7 आमादुमैंलाइ छ्याँबै ताँ पोंब आङ्हे, क्रथे मिथेमैंइ स्योलिबै ताँ पोंब झन् तिफुँइ आङ्हें।
PRO 17:8 घुस पिंबै म्हिल तो के मुँलेया छ्याँब तम्।
PRO 17:9 पाप के ललेया क्षमा पिंबै म्हिइ म्हाँया लम्; दिलेया घरि-घरि ताँ क्हेरिबै म्हिइ क्ह्रिबै थुमैं या फ्रेवाम्।
PRO 17:10 ताँ क्होबै म्हिलाइ तिला लोदा सैंदा लमा छ्याँब तम; दिलेया बुद्धि आरेबै म्हिलाइ कोर्राइ प्रखे प्रुलेया तार आख।
PRO 17:11 दुष्‍ट म्हिइ प्होंगि कैगि मत्‍त्रे लल् म्हैम्, छतसि सारो सैं मुँबै म्हि घ्रि चए बिरोधर कुलब्मुँ।
PRO 17:12 बुद्धि आरेबै म्हिइ आछ्याँबै के लरिबै त्हेर त्होब भन्दा बरु प्हसे प्हेंवाबै भलुने त्होब छ्याँब ग!
PRO 17:13 आगुइ क्हिलाइ छ्याँब ललैया क्हिइ चए न्होह्रों लइ बिस्याँ क्हिए धिंर खोंयोंइ आछ्याँबन् तम्।
PRO 17:14 प्होंगि मिब क्वेथेंबै क्युए बाँध फुयाब् धों तब् ग, छतसि प्होंगि तल् म्हैस्याँ च्याँ तयाल् त्हुम्।
PRO 17:15 छ्याब् मुँबै म्हिलाइ छ्याब् आरेब् बिब धै छ्याब आरेबै म्हिलाइ छ्याब् ल्हैदिब ङ्हिंन-ङ्हिंन म्रोंसि याहवेह छेरम्।
PRO 17:16 बुद्धि आम्हैबै आमादुए योर मुँबै मुइ तो केर फेमुँ?
PRO 17:17 क्ह्रिबै थुइ खोंयोंन् बिलै म्हाँया लमुँ, धै दु:ख सुखर आघें-अलिमैंन् केर फेम्।
PRO 17:18 चुइ आफोस्याँ ङइन फोस्यो बिसि आमादुइ आगुए ल्हागिर जमानि टिम्।
PRO 17:19 प्होंगि मिदा ङ्‍हाँबै म्हिइ पाप के लम्, धै ङम् ङन् ग बिसि प्हैंबै म्हिइ ह्रोंसल्न न्होह्रों लम्।
PRO 17:20 आछ्याँबै सैं मुँबै म्हिल बिब् धों आत, स्योलिबै ताँ पोंबै म्हिए छ्हर छ्याँब् आत।
PRO 17:21 आमाबै च्हइ आबा-आमालाइ पिर लम्, छाबै च्हइ आबा-आमालाइ खोंयोंइ सन्तोक आल।
PRO 17:22 सैंर सन्तोक मुँस्याँ नलेया सब् धोंन् ङ्‍हाँम्; दिलेया सैंर पिर मुँस्याँ ह्रिब्मैं ङ्युयाम्।
PRO 17:23 दुष्‍ट न्यायाधिसइ खाबै आम्रोंल्‍ले घुस किंम्, धै छेनाले निसाफ आल;
PRO 17:24 च्हैंब् मैंब् लल् खाँबै म्हिइ लबै के छ्याँब तम्, दिलेया आमादुमैंइ बिस्याँ आङिं आङिंबै सैमैं मत्‍त्रे ङ्ह्‍योप्रम्।
PRO 17:25 आमादु च्हइ ह्रोंसए आबालाइ शोक तल् लम्, धै आमालाइ पिर तल् लम्।
PRO 17:26 छ्याब आरेबै म्हिलाइ दण्ड पिंब, नेरो ठिक के लब्मैंलाइ कोर्राइ प्रुब ठिक आङिं।
PRO 17:27 बुद्धि मुँबै म्हिइ ल्हें आपों, धै च्हैब् मैंब् लल् खाँबै म्हि युनन् ह्रिस आख।
PRO 17:28 आमादुमैंया च्याँले टिस्याँ बुद्धि मुँबन् ब्योंब् धों तम्; धै खैच्हिजिले आपोंबै म्हि बुद्धि मुँबै म्हि ग।
PRO 18:1 आक्ह्रिबै म्हि लोबए लिलि प्रम्; धै छाबै म्हिइ क्ह्रिल् खाँबै ताँमैं थोम्।
PRO 18:2 आमादुमैंइ ताँ क्होदा आङ्हाँ; चमैं ह्रोंसए ताँ फिर लल् योंस्याँ मत्त्रे सैं तोंम्।
PRO 18:3 आछ्याँबै के लबै दुष्‍ट म्हि फापिल् तम्, धै छाबै म्हिलाइ खाबज्यै म्हि आल, चलाइ खाबज्यै आक्वें।
PRO 18:4 बुद्धि मुबै म्हिए ताँमैं माँ ङ्युइ धों ग; धै क्होबै म्हिए ताँमैं मुल् त्होंसि बग्दिब स्यों धों तब् ग।
PRO 18:5 दुष्‍ट म्हिए ख लब धै छ्याब आरेबै म्हिए ल्हागिर ठिक निसाफ आलब ठिक आङिं।
PRO 18:6 आमादुइ पोंबै ताँइ प्होंगि मिम्, धै ह्रोंसए सुँइ लमन् चलाइ आगुइ प्रिंम्।
PRO 18:7 ह्रोंसइ पोंबै ताँइन आमादुल न्होह्रों तम्; ह्रोंसइ पोंबै ताँइ लमन् च ङोर फेम्।
PRO 18:8 पार्दिइ पोंबै ताँ लिंबै चबै सै धोंन् तम्; चइ पोंबै ताँ म्हिमैंइ सैं न्होंर क्वेंम्।
PRO 18:9 लल् त्हुबै के युनन् आलबै म्हि न्होह्रों लबै म्हिए अलि धों तब् ग।
PRO 18:10 याहवेहए मिं बेल्‍ले भोंबै धरर धों ग; छतसि ठिक के लब्मैं चर ह्‍यामा ग्वार योंम्।
PRO 18:11 प्लबै म्हिए सैंर ह्रोंसने मुँबै सै न्होरन् भोंबै सहर ग; धै चए सैंर च बेल्‍ले नुल्‍ले झोंबै गारा धों तब् ग।
PRO 18:12 तोन् तोर्न थेब् प्हैंबै म्हि नास तयाब्मुँ, कुरबै म्हिइ मान योंब्मुँ।
PRO 18:13 ताँ थेब् भन्दा ओंसों ज्वाफ पिंबै म्हि आमादु ग; छाबै म्हि फापिन् तम्।
PRO 18:14 म्हि सोदा ङ्‍हाँबै सैंइ च नरिबै त्हेर आश् पिंम्, दिलेया च सैं आरेस्याँ सोबै आशा म्हयाम्।
PRO 18:15 ह्रब् सेब् तदा ङ्‍हाँबै म्हिइ ज्ञान बुद्धिए ताँमैं क्होल् म्हैम्; धै बुद्धि मुँबै म्हिइ छाबै ताँमैं थेबै सैं लम्।
PRO 18:16 थेबै म्हिलाइ त्होबर क्होल्सै बोसि ह्‍यास्याँ चए घ्याँ खोल्दिम्।
PRO 18:17 अर्को म्हि खसि ताँ छलफल आलन् समा मुद्दा झोंबै म्हिन् ठिक म्रोंम्।
PRO 18:18 प्होंगि-कैगि लबै म्हिमैं आक्ह्रिमा गोला झोंमिस्याँ चमैंए झगडामैं च्याँ तयाम्।
PRO 18:19 कारग्युले नुबै गारा झोंबै सहर ट्होब् भन्दा सैं नबै अलिलाइ वाँब झन् गारो तम्, धै अलिने प्होंब जिगल्सि झोंसि म्रा तोरब् धोंन् ग।
PRO 18:20 म्हिए सुँइ पोंमा सैं म्रेंमुँ, छाबन ताँजगो चए छर खम्।
PRO 18:21 सैब नेरो सोल् लबै शक्‍ति लेर मुँ, खैलि पोंइमु, चमैंइ चए रो चब्मुँ।
PRO 18:22 प्ह्रेंस्यो योंबै म्हिइ छ्याँब सै योंम् धै चइ याहवेहउँइँले दयाम्हाँया योंम्।
PRO 18:23 ल्हयो खमिंन् बिसि ङ्‍हाँदु म्हिइ बिन्ति लम्, दिलेया प्लबै म्हिइ आछ्याँल्‍ले जवाफ पिंम्।
PRO 18:24 म्हिल थुमैं ल्हें मुँलेया नोक्सन् तल् खाँम्, दिलेया कोइ थु बिस्याँ आघें-अलि भन्दा या सब तम्।
PRO 19:1 स्योरलिबै ताँ लबै बुद्धि आरबै म्हि भन्दा बरु ङ्‍हाँदु तलेया भर लल् खाँबै के लब छ्याँब ग।
PRO 19:2 च्हैंब् मैंब् आलल्‍ले ह्रब् प्हैंब छ्याँब आत, आतुरि लमा घ्याँ फ्लेम्।
PRO 19:3 बुद्धि आरेबै म्हिइ ह्रोंसए न्होह्रों तबै के लम्, चए खोंइ याहवेहए बिरोधर पोंम्।
PRO 19:4 मुइ मुँबै म्हिइ थुमैं ल्हें खुमुँ, दिलेया ङ्‍हाँदु म्हिलाइ थुमैंइ पिथेंम्।
PRO 19:5 स्योलिबै ग्वाइ पिंबै म्हिइ दण्ड योंब्मुँ, स्योर तेबै म्हि स्योरल् योंरिब् आरे।
PRO 19:6 क्रथे मिथेमैंइ ल्होमिरिगे बिसि ल्हें म्हिमैंइ बिन्ति लम्, धै क्होल्सै पिंखबै म्हिल थु ल्हें तम्।
PRO 19:7 ङ्‍हाँदु म्हिलाइ ह्रोंसए ह्रजे-म्हजेमैंइ हेल् लम्, चए थुमैंइ चलाइ पिवाम्! यो छ्युँ लसि चमैंए लिलि ह्‍यालेया चमैंलाइ आस्या।
PRO 19:8 बुद्धि म्हैबै म्हिइ ह्रोंसलाइ म्हाँया लम्, ज्ञान बुद्धि म्हैबै म्हिल बिब् धों मैंब् धों तम्।
PRO 19:9 स्योलिबै ग्वाइ पिंबै म्हिइ दण्ड योंब्मुँ, स्योर तेबै म्हि नास तब्मुँ।
PRO 19:10 बुद्धि आरेबै म्हि सुख योंब आङ्हे, छलेन म्रुँए च्हमैं केब्छैंए न्होंर टिब झन् आङ्हे।
PRO 19:11 च्हैंब् मैंब् लल् खाँबै म्हिइ ह्रिस थाम्दिल् खाँम्, आगुइ सैं नल् ललेया तोइ आङ्हाँब चए ल्हागिर छ्याँब ग।
PRO 19:12 म्रुँ ह्रिस खब सिंह ङ्‍हेब् धों तब् ग, दिलेया म्रुँइ ल्हयो खस्याँ छिर्बै शीत धों तम्।
PRO 19:13 आमादु च्हइ आबाए न्होह्रों लम्, धै कचकच लबै प्ह्रेंस्यो झरि त्हिंब् धों ग।
PRO 19:14 धिं नेरो सै न्होरमैं आबाउँइँले खम्, दिलेया च्हैंब् मैंब् लल् खाँबै प्ह्रेंस्यो बिस्याँ याहवेहउँइँले खम्।
PRO 19:15 प्ल्हेगु तसेरो न्हरु ल्हें खम्, धै प्ल्हेगु म्हि फतेन् तब्मुँ।
PRO 19:16 परमेश्‍वरजी बिबै ताँमैं ङिंबै म्हिइ ह्रोंसए छ्ह जोगेम्; दिलेया खीजी प्रद् बिबै घ्याँलाइ तो धों आङ्हाँबै म्हि सिब्मुँ।
PRO 19:17 आयो-आख्युब्मैंलाइ पिंब याहवेहलाइ खि पिंब् ग, धै खाबइ तो लइमुँ चए इनाम खीजी पिंब्मुँ।
PRO 19:18 क्हिए आशा ह्रोंसए प्हसेमैंए फिर तमा चमैंलाइ तार झोंन्, छ आलस्याँ चमैं नास तबर क्हिइ ल्होब् धों तम्।
PRO 19:19 ल्हें ह्रिस खबै म्हिइ सजैं योंब्मुँ, क्हिइ चलाइ जोगेइ बिस्याँ धबै छलेन् जोगेल् त्हुब्मुँ।
PRO 19:20 सल्‍ला पिंबै ताँमैं थेदु धै अर्थिमैं सैंर थेंन्, छलस्याँ क्हि ह्रब्-सेब् तब्मुँ।
PRO 19:21 म्हिए खोंर ल्हें चाँजोमैं तम्, दिलेया याहवेहए सैंर मैंबै ताँमैंन् पूरा तब्मुँ।
PRO 19:22 म्हिइ खोंयोंइ बिले लबै म्हाँया लरिगे ङ्‍हाँम्, स्योर तेब् भन्दा बरु आयों-आख्युब तब छ्याँब् ग।
PRO 19:23 याहवेहलाइ म्हाँदिमा छ्ह योंबै घ्याँर फेम्, छले च म्हि ढुका तसि टिल् खाँम्; धै चलाइ दुःखइ छुइल् आखाँ।
PRO 19:24 प्ल्हेगुइ थलिर्न यो थेंरिमुँ, धै चइ यो क्वेसि ह्रोंसए सुँरै या आबो।
PRO 19:25 आगुलाइ प्ह्रबै म्हिलाइ कोर्राइ प्रुद्, छलस्याँ ताँ आक्होबै म्हिइ बुद्धिए ताँ लोब्मुँ; ताँ क्होबै म्हिलाइ हौदिद्, छलस्याँ चइ ज्ञान बुद्धिए ताँ झन् क्होब्मुँ।
PRO 19:26 ह्रोंसए आबालाइ लुडेब नेरो आमालाइ ल्हावाबै च्ह फाआपिबै बेजति या।
PRO 19:27 ओ ङए च्ह, अर्थिए ताँमैं थेब् पिवाइ बिस्याँ ज्ञानए ताँमैं क्हिइ योंरिब् आरे।
PRO 19:28 स्योलिबै ग्वाइ पिंमा निसाफ न्होंवाम्; धै दुष्‍ट म्हिइ आछ्याँबै ताँमैं छ्याँब ङ्‍हाँम्।
PRO 19:29 खैच्हिजिले पोंब्मैंए ल्हागिर दण्ड, धै बुद्धि आरेबै म्हिए क्होर प्रिंबै ल्हागिर कोर्रामैं तयार लथेंइमुँ।
PRO 20:1 प्हा ल्हें थुँबै म्हिइ हल्‍ला लसि प्होंगि कैगि लम्, प्हार भुल्दिब्मैं आमादु ग।
PRO 20:2 ह्रिस खसि ङ्‍हेबै सिंहने ङ्हिंब् धोंलेन् ह्रिस खबै म्रुँने ङ्हिंन्; म्रुँलाइ ह्रिस खल् लबै म्हि सिल् त्हुम्।
PRO 20:3 प्होंगि आमिबै म्हिलाइ ताँनइ खोम्; दिलेया आमादुमैंइ प्होंगि मिबै ताँ लम्।
PRO 20:4 प्ल्हेगुइ ठिक त्हेर क्ल्या आक्ल्यो; छतसि बालि खुबै त्हेर चइ तोइ आयों।
PRO 20:5 म्हिए सैंर्बै ताँ इनारर्बै क्यु धों ग, दिलेया ताँ क्होबै म्हिइ च ख्योइरि बैरु पखम्।
PRO 20:6 ङ खोंयोंइ म्हाँया लम् बिसि ल्हें म्हिमैंइ प्हैंम्, दिलेया भर लल् खाँबै म्हि खाबइ त्होल् खाँमुँ?
PRO 20:7 ठिक के लबै म्हि छेनाले छ्ह थोम्, धै चए च्ह-च्हमिमैंइ आशिक योंम्।
PRO 20:8 ह्रोंसए राजगद्दिर टिसि निसाफ लमा म्रुँइ आछ्याँबै के लब्मैं ताँन् सेम्।
PRO 20:9 “ङए सैं छ्याँब मुँ; ङइ आछ्याँबै केमैं आलइमुँ, ङने पाप आरे,” बिसि खाबइ बिल् खाँमुँ?
PRO 20:10 आक्ह्रिबै म्हन पथि नेरो ढकमैं ओलेबै म्हिमैं याहवेहजी आखो!
PRO 20:11 कोलोए बानि ब्योरउँइँलेन्, धै चइ खैबै के लइमुँ, च खैबै घ्याँर प्रइमुँ बिसि क्हिइ चए बानि बयोर था सेम्।
PRO 20:12 थेबै न्ह नेरो ङ्ह्‍योबै मि, ङ्हिंन-ङ्हिंन् याहवेहजीन् बनेब् ग।
PRO 20:13 न्हरु ल्हें आच्हुइद्, आस्याँ क्हि आयोंब-आख्युब् तब्मुँ। जँङ्गर खल्‍ले के लद्, छलस्याँ क्हिलाइ तोइ खाँचो तरिब् आरे।
PRO 20:14 समन किंबै म्हिइ “चुम् छ्याँब आरे! छ्याँब आरे!” बिमुँ, दिलेया दे क्याइ फेसि “ङइ बेल्‍ले भाउ कसेसि किंइ!” बिम्।
PRO 20:15 मारा, चाँदिमैं ल्हें मुइ फेबै सै मुँन बिलेया, च भन्दा थेब ज्ञान बुद्धिए ताँ पोंबै म्हि ग।
PRO 20:16 ङो आसेबै म्हिए जमानि टिबै बुद्धि आरेबै म्हिल क्वें या किंथेंन्; धै फ्रें क्ल्योंप्रबै च्हमिरिए ल्हागिर चइ जमानि टिस्याँ चने मुँबै सैमैं बन्दगिर थेंन्।
PRO 20:17 छलु म्हिलु लसि योंबै चबै सै लिंब् ङ्‍हाँम्; दिलेया लिउँइँ चए सुँर च युँमाए फुमैं ङेब् धों तब्मुँ।
PRO 20:18 सल्‍ला किंसि चाँजो लद्; सल्‍ला मदो आलल्‍ले ल्हडेंर आह्‍याद्।
PRO 20:19 ताँ प्ह्रेबै म्हिइ बिल् आतबै ताँमैं बिप्रम्; छतसि ताँ प्ह्रेप्रबै म्हिने आप्रद्।
PRO 20:20 ह्रोंसए आबा आमाए फिर सराप झोंस्याँ क्हिए बत्ति मिछु खैबै त्हेर सैवाब्मुँ।
PRO 20:21 आतुरले अँश किंबै म्हिए सै न्होर लिउँइँ तोइ केर आफे।
PRO 20:22 “क्हिइ ङए न्होह्रों लइ, छतसि ङज्यै या क्हिए न्होह्रों लम्,” आबिद्; दिलेया याहवेहए फिर भर थेंन्, खीजी क्हिलाइ जोगेमिंब्मुँ।
PRO 20:23 आक्ह्रिबै म्हन पथि ढकमैं ओलेबै म्हि याहवेहजी आखो; धै लुबै पारा ओलेबै म्हि म्रोंसे या खी सैं आतों।
PRO 20:24 म्हिइ लबै चाजोमैं याहवेहजीन् तोक्दिब् ग। छतसि ह्रोंस प्रबै घ्याँ म्हिइ खैले सेल् खाँब?
PRO 20:25 च्हैंब् मैंब् आलल्‍ले परमेश्‍वरए मिंर भक्‍कल लस्याँ लिउँइँ पछुत खल् त्हुम्।
PRO 20:26 बुद्धि मुँबै म्रुँइ दुष्‍ट म्हिमैंलाइ प्हुँवाब्मुँ, धै म्ल्ह-नारिमैं नेबै चक्‍कामैं चमैंए फिर दल्दिब्मुँ।
PRO 20:27 म्हिए सैं याहवेहए बत्ति ग; च बत्तिइ म्हिए सैंर्बै ताँमैं था सेम्।
PRO 20:28 म्रुँइ भर लल् खाँबै के नेरो जनतालाइ म्हाँया लस्याँ खोंयोन् बिले म्रुँ तल् योंम्।
PRO 20:29 फ्रेसिमैं भोंमा ताँनइ म्हाँदिम्, खेब्-माँबल क्र सारयमा म्हारब म्रोंम्।
PRO 20:30 बेल्‍ले नल्‍ले प्रिंस्याँ आछ्याँबै के लब पिवाम्; छलेन कोर्राइ प्रुमा सैं ख्रुवाम्।
PRO 21:1 म्रुँए सैं याहवेहए योर मुँ, स्योंर्बै क्यु धोंले चलाइ खनि बोदा ङ्‍हाँमुँ छाइन खीजी लल् खाँम्।
PRO 21:2 म्हिइ खोंयोंन् बिलै ङइ ठिक लइमुँ ङ्‍हाँलै, दिलेया चए सैं खैतब् मुँ बिसि याहवेहजीन् जाँच लम्।
PRO 21:3 याहवेहए मिंर ख्रो पिंब् भन्दा छ्याँब नेरो ठिक के लब छ्याँब ग।
PRO 21:4 क्ह्रुबै मि, थेब् प्हैबै खों, नेरो दुष्‍ट म्हिमैंइ लबै केमैं ताँन् पाप ग।
PRO 21:5 च्हैंसि मैंसि चाँजोमैं लमा बिब् धों मैंब् धों तम्; दिलेया च्हैंब् मैंब् आलल्‍ले के लमा ङ्‍हाँदु तम्।
PRO 21:6 छलु म्हिलु लसि तोबै सै न्होर उडियाबै म्हस्यो नेरो कालए ङो ग।
PRO 21:7 खेंमैंइ लबै आछ्याँबै केइ लमा दुष्‍ट म्हिमैं नास तयाम्, तलेबिस्याँ चमैंइ ठिक के लल् आङिं।
PRO 21:8 दुष्‍ट म्हिमैं आछ्याँबै घ्याँर प्रम्, दिलेया सोजो म्हिइ ठिक के लम्।
PRO 21:9 कचकच लबै प्ह्रेंस्योने धिंर बालुन् टिब् भन्दा कौसिर्बै कुन घ्रिर टिब छ्याँब् तम्।
PRO 21:10 दुष्‍ट म्हिइ आछ्याँबै के मत्‍त्रे लल् म्हैम्; धै छाबै म्हिइ ह्रोंसए ङ्‍हेब्-ट्हुम्‍मैंलाइ आल्हो।
PRO 21:11 खैच्हिजिले पोंबै म्हिलाइ दण्ड पिंमा आह्र-आसेबै म्हिइ बुद्धि योंम्; ह्रब्-सेबै म्हिलाइ लोमिंमा चइ झन् ज्ञान योंम्।
PRO 21:12 दुष्‍ट म्हिमैंए धिंर तो-तो तइमुँ बिसि परमेश्‍वरजी सेम्; धै चमैंइ आछ्याँबै के लबइले खीजी चमैंलाइ नास लवाम्।
PRO 21:13 दुःख योंबै म्हिइ ग्वार ह्रिमा थबै न्ह आलल्‍ले टिबै म्हिइ ग्वार ह्रिमा चलाइ खाबज्यै ल्होरिब् आरे।
PRO 21:14 ह्रिस खरिबै म्हिलाइ खाबज्यै आसेल्‍ले क्होल्सैमैं पिंमा चए ह्रिस म्हम्, धै क्वेंर लोसि पिंबै घुसइ ह्रिस म्हल् लम्।
PRO 21:15 छ्याँबै निसाफ तमा ठिक के लब्मैं सैं तोंम्, दुष्‍टमैं बिस्याँ बेल्‍ले ङ्हिंम्।
PRO 21:16 क्ह्रियाल् खाँबै ताँ थोबै म्हि सिगोंमैंने बालु थु तबर फेनेब्मुँ।
PRO 21:17 सयल थोबै म्हि ङ्‍हाँदु तम्; धै प्हा नेरो छ्युगु ल्हें चबै म्हि प्लब आत।
PRO 21:18 ठिक के लब्मैंए फिर खबै दुःख फ्रेमिंब दुष्‍टमैंन् तब्मुँ, धै भर लल् खाँबै के लब्मैंए फिर खबै दुःख फ्रेमिंब छलु म्हिलु लब्मैंन् तब्मुँ।
PRO 21:19 ह्रिस खब नेरो प्होंगि मिबै प्ह्रेंस्योने बालु टिब् भन्दा क्यु आयोंबै क्‍ल्‍ह्‍योर टिब छ्याँब तम्।
PRO 21:20 बुद्धि मुँबै म्हिए धिंर सै न्होर नेरो छ्युगुइ प्लिंब्मुँ, दिलेया आमादुइ ह्रोंसइ योंबै मुइ ताँन् उडेयाम्।
PRO 21:21 ठिक के लब नेरो म्हाँया लबै म्हिए छ्ह छ्याँब तमुँ; बिब् धों मैंब् धों तमुँ धै ताँनइ म्हाँदिम्।
PRO 21:22 भोंबै म्हिमैं मुँबै सहरलाइ बुद्धि मुँबै म्हिइ ट्होल् खाँम्, धै चमैंइ भर थेंबै भोंबै गारामैं ताँन् फुवाम्।
PRO 21:23 सुँइ खैच्हिजिले आपोंइ बिस्याँ ह्रोंसए फिर दुःख तबइले जोगेम्।
PRO 21:24 ह्रिस खदै ओग्रोंले के लबै म्हिलाइ “घमण्डि” बिम्, च दयाम्हाँया आरेब नेरो बुद्धि आरेब् तम्।
PRO 21:25 के लदा आङ्हाँबइले प्ल्हेगु सिम्, तलेबिस्याँ चए योइ के लल् आम्है।
PRO 21:26 त्हिंतिमिन् चइ तोन्दोंरि सै झन् ल्हें योंस्या तमल ङ्‍हाँरिम्, दिलेया ठिक के लबै म्हिमैंइ यो प्ल्हसि पिंम्।
PRO 21:27 दुष्‍ट म्हिइ पिंबै ख्रो याहवेहजी आखो; झन् आछ्याँब सैं लसि पिंबै ख्रो कति आखो।
PRO 21:28 स्योलिबै ग्वाइ खाबज्यै या आक्वें, दिलेया च्हैंसि मैंसि पोंब्मैंए ताँ ताँनइ क्वेंम्।
PRO 21:29 आछ्याँबै के ललैया दुष्‍ट म्हिमैं आङ्हिंनले प्रम्, दिलेया सोजो म्हिइ च्हैंसि मैंसि लल् त्हुबै केमैं लम्।
PRO 21:30 याहवेहए बिरोधर म्हिए ज्ञान बुद्धि, चाँजोमैं नेरो खैतबै सल्‍ला केर आफे।
PRO 21:31 ल्हडें नेबर घोडामैं तयार लम्, दिलेया ट्होल् लब याहवेहए योर्न मुँ।
PRO 22:1 ल्हें सै न्होरमैं भन्दा बरु छ्याँब के लसि मिं कालिदिब छ्याँब् ग, मारा-चाँदि भन्दा बरु इजेत योंब छ्याँब् ग।
PRO 22:2 प्लब्मैं नेरो ङ्‍हाँदुमैं खाबै स्यो आरे, तलेबिस्याँ चमैं ङ्हिंन-ङ्हिंन् याहवेहजीन् बनेब् ग।
PRO 22:3 बुद्धि मुँबै म्हिइ ह्रोंसए फिर दुःख खब ओंसोंन् म्रोंसि लोबै क्‍ल्‍ह्‍यो म्हैम्, दिलेया आमादु म्हि छाइन ह्‍याम् धै दुःख योंबर फेम्।
PRO 22:4 च्योंरि तब नेरो याहवेहलाइ म्हाँदिबै म्हिइ सै न्होर, इजेत नेरो ह्रिंबै छ्ह योंम्।
PRO 22:5 दुष्‍ट म्हिमैंए घ्याँमैंर पुजु नेरो ङोमैं तम्; ह्रोंसलाइ जोगेबै म्हि च सैमैंउँइँले ह्रेंगो टिम्।
PRO 22:6 कोलोलाइ ठिक घ्याँर प्रबर छेनाले लोद्; छलस्याँ च खेब् तन् समा च घ्याँर्न प्ररिब्मुँ।
PRO 22:7 प्लब्मैंइ ङ्‍हाँदुमैंलाइ न्होंर थेंम्, धै छे किंबै म्हि बिस्याँ छे पिंबै म्हिए केब्छैं तम्।
PRO 22:8 आछ्याँबै के लप्रबै म्हिए फिर दु:ख खम्; धै अरूलाइ दु:ख पिंप्रब चइ पियाब्मुँ।
PRO 22:9 आयों-आख्युब्मैंलाइ पिंबै म्हिइ आशिक योंब्मुँ, तलेबिस्याँ चइ ह्रोंसए चबै सैमैं ङ्‍हाँदुमैंलाइ चुमिंम्।
PRO 22:10 आगुलाइ प्ह्रब्मैं बैरु तेवाद्; छलस्याँ प्होंगि तब, गाल् केब, सैं नबै ताँमैं नुयाम्।
PRO 22:11 छ्याँबै सैं नेरो छ्याँबै सुँले पोंबै म्हिल म्रुँ या थु तम्।
PRO 22:12 याहवेहए मिइ ज्ञानए छैं लरिम्; दिलेया भर लल् आखाँब्मैंइ पोंबै ताँ खीजी फुवाम्।
PRO 22:13 “बैरु सिंह मुँ! छतसि घ्याँर ह्‍यास्याँ ङलाइ सैवाम्!” बिसि प्ल्हेगु म्हिइ बिम्।
PRO 22:14 फ्यालुस्योए सुँ गैरु होंल्दों ग; याहवेहलाइ ह्रिस खल् लब्मैं च होंल्दोंर होंयाब्मुँ।
PRO 22:15 कोलोमैं आचडु मत्त्रे लदा ङ्‍हाँम्; दिलेया तार झोंबर प्हरेइ प्रुमा आचडु लब पिवाम्।
PRO 22:16 ह्रोंसए सै न्होर ल्हें लबर ङ्‍हाँदुमैंलाइ ह्रुगुदिब्मैं नेरो प्लब्मैंलाइ क्होल्समैं पिंब ङ्हिंन-ङ्हिंन् ङ्‍हाँदु तब्मुँ।
PRO 22:17 बुद्धि मुँब्मैंइ बिबै अहानमैं छेनाले थेद्, ङइ लोमिंबै ताँमैं क्हिए सैंर थेंन्,
PRO 22:18 तलेबिस्याँ च ताँमैं क्हिए खोंर थेंइ बिस्याँ धै च ताँमैं क्हिए सुँर मुँस्याँ च ताँइ क्हिए सैं तोंल् लब्मुँ।
PRO 22:19 क्हिए भर याहवेहए फिर तरिगे बिसि तिंयाँ ङइ चु ताँमैं क्हिलाइ लोमिंइमुँ, आँ क्हिलाइन लोमिंम्।
PRO 22:20 ङइ क्हिए ल्हागिर सल्‍लाए ताँमैं, अर्थि-बुद्धि नेरो ज्ञान योंबै सोंच्यु ताँमैं प्ह्रिइमुँ।
PRO 22:21 ह्रोंसलाइ कुलब्मैंए ङाँर क्हिइ ठिक जवाफमैं पिंल् खरिगे बिसि ङइ क्हिने क्ह्रोंसेंन्बै भर लल् खाँबै ताँमैं लोमिंइमुँ।
PRO 22:22 आयों आख्युब्मैं बिसि ङ्‍हाँदुमैंलाइ लुडिबै के आलद्; निसाफ लबै क्ल्ह्‍योर दु:ख योंब्मैंलाइ ह्रुगुदिबै के आलद्,
PRO 22:23 तलेबिस्याँ याहवेहजीन् चमैंए मुद्दा नेमिंब्मुँ, धै चमैंलाइ लुडिब्मैंलाइ याहवेहजी लुडिब्मुँ।
PRO 22:24 ह्रिस खबै म्हिने थु आतद्, युनन् ह्रिस खबै म्हिने प्रब् टिब् आलद्,
PRO 22:25 आस्याँ चए बानि ब्योर क्हिइ लोब्मुँ धै ह्रोंसन् ङोर फेब्मुँ।
PRO 22:26 बन्दगिर थेंबै सैमैंर यो आझोंन्, आगुए छेए जमानि आटिद्।
PRO 22:27 तलेबिस्याँ क्हिने आगुए छे फोबर मुइ आरेस्याँ क्हि रोबै खाटै या आगुइ बोवाब्मुँ।
PRO 22:28 क्हिए खेमैं मामैंइ स्योंम् ओंनोंन् क्योथेंबै साँदर्बै युँमामैं आस्योद्।
PRO 22:29 सैं झोंसि ह्रोंसए केमैं लबै म्हि क्हिइ म्रोंइमुँ वा? छाबै म्हि म्रुँए उँइँर रासि के लब्मुँ; तोन् तोर्बै म्हिमैंए उँइँर राल् त्हुरिब् आरे।
PRO 23:1 क्हि शासन लब्मैंने बालु चब् चबर टिमा क्हिए उँइँर थेंबै चबै सै छेनाले ङ्ह्‍योद्।
PRO 23:2 क्हि बेल्‍ले चब्ला मुँ बिस्याँ, क्हिए खरिर चक्‍कू थेंन्।
PRO 23:3 चए लिंबै चबै सैए लोब आलद्, तलेबिस्याँ छल कपट लसि चबै सै पिंलै खाँम्।
PRO 23:4 प्लब् तबर क्हिइ दु:खले के आलद्; ह्रोंसए बुद्धिइ तोइ के आलद्।
PRO 23:5 तिस्याँदे ल्हागिर सै न्होर योंम्; दिलेया नुयाम्, तलेबिस्याँ चल प्ह्‍यामैं प्ह्‍यामुँ धै क्रोवे धोंले मुउँइँ प्हुरयाम्।
PRO 23:6 सैं आसबै म्हिए चबै सैमैं आचद्, चए लिंबै चबै सैमैंए लोब आलद्,
PRO 23:7 तलेबिस्याँ चइ खोंयोंन् बिलै ह्रोंसए खि खैले रेब् ङ्‍हे बिसि मैंरिम्; चइ क्हिने “चद्! थुँन्!” बिलेया चए सैं क्हिए फिर छ्याँब आत!
PRO 23:8 क्हिइ च्युगुदे चलैया धबै तेवाब्मुँ, धै क्हिइ चने मान लसि पोंब खेरो ह्‍याम्।
PRO 23:9 आमादुने ताँ आसेद्, तलेबिस्याँ क्हिइ पोंबै बुद्धिए ताँमैं चइ आखो।
PRO 23:10 स्योंम् ओंनोंबै युँमा क्योबै साँद आस्योद्, टार-टोरमैंए क्‍ल्‍ह्‍यो न्हें आचब्दिद्।
PRO 23:11 तलेबिस्याँ चमैंलाइ ल्होमिंबै परमेश्‍वर बेल्‍ले भोंब मुँ; क्हिए बिरोधर खीजी चमैंए मुद्दा नेमिंब्मुँ।
PRO 23:12 अर्थिए ताँमैं क्हिए सैंर थेंन्, धै क्हिए न्हइ ज्ञान योंबै ताँमैं छेनाले थेद्।
PRO 23:13 कोलोमैंलाइ तार झोंब आपिद्; क्हिइ प्हरेइ प्रिंसि चलाइ सजैं पिंमा च आसि।
PRO 23:14 प्हरेइ प्रिंसि चलाइ सजैं पिंन्; छलमा क्हिइ चलाइ नरकउँइँले जोगेब्मुँ।
PRO 23:15 ओ ङए च्ह, क्हि बुद्धि मुँब् तइ बिस्याँ, ङए सैं बेल्‍ले तोंब्मुँ।
PRO 23:16 क्हिए सुँइ ठिक ताँ पोंमा ङए सैं बेल्‍ले तोंब्मुँ।
PRO 23:17 पापिमैं छ्याँब् तब् म्रोंसि क्हिइ ह्रिस आलद्, बरु त्हिंइतिमिन् याहवेहलाइ मान लरिद्।
PRO 23:18 छलस्याँ क्ह्रोंसेंन क्हिइ इनाम योंब्मुँ; धै क्हिइ थेंबै आशा तोन् तोर्न तरिब् आरे।
PRO 23:19 ओ ङए च्ह, थेद्, धै बुद्धि मुँब तद्, धै क्हिए सैंइ बुद्धिए ताँमैं मैंरिद्।
PRO 23:20 प्हाकोमैं नेरो से ल्हे चब्मैंने प्रब टिब आलद्,
PRO 23:21 तलेबिस्याँ प्हाकोमैं नेरो चब्लामैं ङ्‍हाँदु तब्मुँ, धै न्हरु ल्हें च्हुइब्मैं थौनि कुसि प्रबर फेब्मुँ।
PRO 23:22 क्हिलाइ छ्ह पिंबै आबाइ बिबै ताँ थेद्, धै ह्रोंसए आमा माँब तमा हेल आलद्।
PRO 23:23 क्ह्रोंसेंन्बै ताँ किंनु, धै च आचुँन्; सिरसुबास मुँब नेरो ताँ क्होबै म्हि तदु।
PRO 23:24 ठिक के लबै म्हिए आबा बेल्‍ले तोंब्मुँ; ह्रोंसए च्ह बुद्धि मुँब् तमा आबा ङ्‍हो लोंब्मुँ।
PRO 23:25 क्हिए आबा-आमा ङ्‍हो लोंरिगे; धै क्हिलाइ फिबै आमा बेल्‍ले तोंरिगे।
PRO 23:26 ओ ङ‍ए च्ह, क्हिए सैं ङलाइ पिंन्; ङइ लबै केमैं क्हिए मिइ म्रोंरिगे।
PRO 23:27 फ्यालुस्यो गैरु होंल्दों ग; फ्रें क्ल्योंप्रबै च्हमिरि रुबै इनार ग।
PRO 23:28 च ह्‍यो धोंले क्ह्‍वेसि टिम्, धै म्हिमैंए म्हाँजोर भर लल् आखाँब्मैं ल्हें तल् लब्मुँ।
PRO 23:29 खाबलाइ दुःख तम्? खाबलाइ शोक तम्? खाबइ प्होंगि मिम्? खाबइ कच-कच लम्? तोनतोर्न खाब् नेंम्योंम्? खाबए मिमैं को धोंले ओल्ग्या तम्?
PRO 23:30 चमैं क्हैन् समा प्हा थुँसि टिरिब्मैंन् कोंबै प्हा म्हैबर ह्‍यारिब्मैं ग।
PRO 23:31 चिबै ओल्ग्या प्हा प्हेलर झोंमा पिबि रामुँ, धै चए खुगु तेमा च आङ्ह्‍योद्!
PRO 23:32 लिउइ प्हुरिइ धोंले चइ च्हिम्, धै गोमन प्हुरिइ धोंले बिख झोंम्।
PRO 23:33 क्हिए मिइ औदिबै सैमैं म्रोंब्मुँ, क्हिए सैंइ तोन् तोर्बै ताँमैं मैंब्मुँ।
PRO 23:34 क्हि मा ङ्युँइए फिर रोरिब् धों तब्मुँ, धै क्हि मस्तुलए छोए फिर च्योरिब् धों तब्मुँ।
PRO 23:35 “चमैंइ ङलाइ धोंइ दिलेया ङलाइ आन; चमैंइ ङलाइ प्रिंइ दिलेया ङइ थाइ आयों; ङ खोंयों छोरसि धबै प्हा थुँब् ङ्‍हे,” बिसि क्हिइ बिब्मुँ।
PRO 24:1 दुष्‍ट म्हिमैं म्रोंसि ह्रिस आलद्, चमैंने बालु थु तबै सैं आलद्,
PRO 24:2 तलेबिस्याँ चमैंइ आगुए न्होह्रों लबै ताँमैं मैंरिम्, धै चमैंए सुँइ आत-आतबै ताँमैं पोंम्।
PRO 24:3 बुद्धिइ धिं बनेम्, धै च्हैंब्-मैंब् लसि धिं बनेल् खाँम्।
PRO 24:4 ज्ञान मुँबै म्हिए धिंर बेल्‍ले छ्याँ-छ्याँबै सैमैंइ प्लिंब्मुँ।
PRO 24:5 बुद्धि मुँबै म्हि भोंब तम्, धै ज्ञान मुँबै म्हि शक्ति मुँब तम्।
PRO 24:6 च्हैंब् मैंब् नेरो सल्‍ला मदो लसि क्हिइ ल्हडें नेल् खाँम्, धै सल्‍ला पिंब्मैं ल्हें मुँस्याँ क्हिइ ट्होब्मुँ।
PRO 24:7 आमादुए ल्हागिर बुद्धि स्यालै आखाँल्‍ले नुल्‍ले मुँ; थे-थेबै म्हि च्होंर छलफल लमा चइ तोइ बिल् आखाँ।
PRO 24:8 आछ्याँबै केमैं लबर चाँजोमैं लबै म्हिलाइ न्होह्रों लबै म्हि बिम्।
PRO 24:9 बुद्धि आरेबै म्हिइ लबै चाजोमैं पाप ग, आगुलाइ प्ह्रबै म्हिलाइ खाबज्यै आखो।
PRO 24:10 दुःख तमा रालै आखाँन् तइ बिस्याँ क्हिने भों आरे।
PRO 24:11 सैबर बोब्मैंलाइ जोगेद्; धै म्हि सैल् म्हैब्मैंलाइ सैल् आपिंन्।
PRO 24:12 क्हिइ “चए बारेर ङिइ तोइ था आयों!” बिलेया क्हिए खों च्हैंबै परमेश्‍वरजी आङ्ह्‍यो रो वा? क्हिए छ्ह जोगेबै परमेश्‍वरजी था आसे रो वा? ताँन् म्हिमैंलाइ चमैंइ लबै केए नों सै खीजी आपिं रो वा?
PRO 24:13 ओ ङए च्ह, क्वे खुदु चब्रें लद्, तलेबिस्याँ क्हिए ज्युए ल्हागिर क्वे खुदु छ्याँबै सै ग; क्वे च्होंउँइँले युबै खुदु चद्; क्हिलाइ च लिंल् छोरम्।
PRO 24:14 छलेन बुद्धि क्हिए सोए ल्हागिर खुदु धोंन् ग; क्हिइ च योंल् खाँइ बिस्याँ, च क्हिए इनाम तब्मुँ, धै क्हिइ थेंबै आशा पूरा तब्मुँ।
PRO 24:15 ठिक के लबै म्हिए धिंर न्होह्रों लबर लोइ टिबै दुष्‍ट म्हि धों आतद्; चने मुँबै सैमैं आलुडिड्;
PRO 24:16 तलेबिस्याँ ठिक के लबै म्हि ङिखे समा क्हुरियालेया धबै रेम्, दुष्‍ट म्हिमैं बिस्याँ थेबै दु:ख तसि नास तब्मुँ।
PRO 24:17 क्हिए शत्तुरमैंए न्होहों तमा क्हि सैं आतोंन्, धै चए क्हुरमा क्हि निआस्योद्।
PRO 24:18 छाबै म्हिमैं याहवेहजी आखो, छलब् म्रोंमा खीजी चउँइँले खीए ह्रिस स्योमिंब्मुँ।
PRO 24:19 दुष्‍ट म्हिमैंइ लमा न्हुँ आलद्, धै चमैंने ह्रिस आलद्,
PRO 24:20 तलेबिस्याँ दुष्‍ट म्हिमैंए छ्हर आशिक आख; दुष्‍ट म्हिमैंए बत्ति सैवाब्मुँ।
PRO 24:21 ओ ङए च्ह, याहवेहए मान् लद्, धै म्रुँ बिब् ङिंन्, धै याहवेह नेरो म्रुँए बिरोध लब्मैंने आक्ह्रिद्,
PRO 24:22 तलेबिस्याँ थाइ आसेल्‍ले चमैं नास तयाब्मुँ। याहवेह नेरो म्रुँइ चमैंलाइ पिंबै दुःख खाबइ था सेमुँ?
PRO 24:23 म्हि ङ्ह्‍यासि निसाफ लल् आत।
PRO 24:24 दुष्‍ट के लबै म्हिलाइ “क्हि ठिकन् मुँ,” बिबै म्हिलाइ ताँन् म्हिमैंइ सराप झोंब्मुँ, धै ह्रें-ह्रेंमैं च म्रोंसि छेरब्मुँ।
PRO 24:25 दिलेया दुष्‍ट म्हिमैंए दोष उँइँबै म्हिमैंल मैंब् धों बिब् धों तब्मुँ, धै चमैंए फिर बेल्‍ले आशिक युब्मुँ।
PRO 24:26 स्योर आतेल्‍ले जवाफ पिंब थुलाइ म्वैं लब् धों ग।
PRO 24:27 बैरुबै केमैं ताँन् म्हेलिदिद्; ह्रोंसए म्रोंर्बै केमैं ताँन् खाँन् लद्, च लिउँइँ ह्रोंसए धिं-नाँ चुद्।
PRO 24:28 ह्रोंसए ङ्‍हेब्-ट्हुब्मैंए बिरोधर तोनतोर्न ग्वाइ आटिद्, ह्रोंसए सुँइ छलु म्हिलुए ताँमैं आपोंन्।
PRO 24:29 “चइ ङए न्होह्रों लइ, छतसि ङज्यै या चए न्होह्रों लवाम्; ङइ चने खि किंब्मुँ,” आबिद्।
PRO 24:30 ङ प्ल्हेगु म्हिए म्रोंए घ्याँ ततै ह्‍यामा बुद्धि आरेबै म्हिए अँगुरए बारि ततै ह्‍यामा
PRO 24:31 चर खन्तोदोंन् पुजुमैं मुँल, पोलो नेरो नोइ म्रों हुवाल, धै युँमाए गारामैं ताँन् फुयाल।
PRO 24:32 छाब् म्रोंसि ङए सैंर ताँ घ्रि खइ, च ताँमैंउँइँले ङइ चु ताँमैं क्होइ:
PRO 24:33 “ङ तिस्याँदे रोम्, तिस्याँदे प्लिंम्, तिस्याँदे यो च्याफैसि भों न्हम्,” िबसि टिमा
PRO 24:34 क्हिए फिर ह्‍योमैं धोंले ङ्‍हाँदु, नेरो हतियार किंबै म्हि धोंले आयोंब्-आख्युब तिखेर्न कुखब्मुँ।
PRO 25:1 सोलोमनए चु अहानमैं यहूदार्बै म्रुँ हिजकियाए म्हिमैंइ सार्दिसि थेंब् ग।
PRO 25:2 म्हिमैंइ क्होसे क्होल् आखाँबै ताँमैंउँइँले या परमेश्‍वरए मिं थेब् तम्; छाबै ताँमैं क्होमिंबै म्रुँलाइ ताँनइ म्हाँदिम्।
PRO 25:3 खैले स्वर्गमैं बेल्‍ले नुल्‍ले मुँ, धै पृथ्बी गैरु मुँ, छलेन म्रुँमैंए सैंर तो मुँ बिब खाबज्यै सेल् आखाँ।
PRO 25:4 चाँदिर मुँबै कस तेवाद्, धै सुनारइ छ्याँबै भाँड बनेल् खाँब्मुँ।
PRO 25:5 आछ्याँबै म्हिमैं म्रुँउँइँले बैरु तेवाद्, धै चए ग्याल्स भोंब तब्मुँ।
PRO 25:6 म्रुँए ओंसों ह्रोंसन् थेब आतद्, धै थे-थेब म्हिमैंए म्हाँजोर टिल् आम्हैद्।
PRO 25:7 तलेबिस्याँ थेबै म्हिमैंए ओंसों क्हि टिबै क्ल्ह्‍योउँइँले क्हि क्युरु खारवाब् भन्दा “क्हि चु क्होइ खसि टिद्,” बिब क्हिए ल्हागिर इजेत तम्। क्हिए मिइ म्रोंबै ताँमैं बिबर
PRO 25:8 आतुरले अदालतर आह्‍याद्; तलेबिस्याँ क्हिए ङ्‍हेब्-ट्हुब्मैंइ लिउँइँ फापिन् लइबिस्याँ क्हिइ तो लमुँ?
PRO 25:9 ङ्‍हेब्-ट्हुब्मैंने ह्रोंसए ताँए छलफल लमा अरू म्हिए लोबै ताँमैं आबिद्।
PRO 25:10 आस्याँ च ताँ थेब्मैंइन क्हिलाइ फापिन् लब्मुँ, धै क्हिए इजेत ह्‍याब्मुँ।
PRO 25:11 ठिकले पोंबै ताँ चाँदिए थलिर थेंबै माराए स्याउ धों तब् ग।
PRO 25:12 छेन्ले थेबै म्हिए ल्हागिर बुद्धि मुँबै म्हिइ हौदिबै ताँ निखुर माराए ङ्‍हेंबै रिङ न्हर खिब् धों तब् ग।
PRO 25:13 बालि खैबै त्हेर ख्वालमा ङ्युँबै क्युइ खों सल् लब् धोंले भर लल् खाँबै सँउँसर बोबै म्हिइ चलाइ कुल्मिबै क्ल्हेमैंए सैं तोंल् लम्;
PRO 25:14 ह्रोंसइ पिंइ आपिंबै क्होल्से पिंइ बिसि थब् प्हैंबै म्हि नाँ आयुबै न्हाँम्स्यो नेरो खैं धों तब् ग।
PRO 25:15 ह्रिस आखल्‍ले पोंबै म्हिइ शासन लब्मैंलाइ वाँल् खाँम्; धै छ्याँबै ताँ पोंमा ह्रिब्मैं या गाल्दिवाल् खाँम्।
PRO 25:16 खुदु योंइ बिस्याँ चल् खाँब् मत्‍त्रे चद्; आस्याँ ल्हें चइ बिस्याँ क्हिइ रुइवाब्मुँ।
PRO 25:17 ह्रोंसए ङ्‍हेब्-ट्हुब्मैंए धिंर घरि-घरि आह्‍याद्, आस्याँ क्हिलाइ म्रोंसि वाक्‍क ङ्‍हाँसि चइ हेल लब्मुँ।
PRO 25:18 ह्रोंसए ङ्‍हेब्-टुब्मैंए बिरोधर स्योलिबै ग्वाइ पिंबै म्हि प्हरे, सेलाँ धै म्ह्रुछु तबै मेत्हले धों तब् ग।
PRO 25:19 दुःख तबै त्हेर भर लल् आखाँबै म्हिए फिर भर लब चुयाबै स नेरो जोर्नि प्ल्ह्‍याबै प्हले धों तब् ग।
PRO 25:20 सैंर दुःख मुँबै म्हिए उँइँर क्वे प्रिंब खुँबै त्हेर खिबै क्वें प्हेंसि बोब, नेरो घार चज क्युँ झोंब् धो तम्।
PRO 25:21 क्हिए शत्तुर फो ख्रेंइमुँ बिस्याँ चब् चल् पिंन्, धै क्यु पिइमुँ बिस्याँ चलाइ क्यु पिंन्।
PRO 25:22 छलमा चए क्रर लुँरिबै मि भुर कुवाब् धों तब्मुँ, धै याहवेहजी क्हिलाइ इनाम पिंब्मुँ।
PRO 25:23 उतरउँइँले युबै खैंइ नाँ स्योवाब् धोंले स्योलिबै ताँ पोंबै लेइ ह्रिस खल् लम्।
PRO 25:24 प्होंगि मिबै प्ह्रेंस्योने धिंर बालुन् टिब् भन्दा बरु कौसिर्बै कुन घ्रिर टिब छ्याँब् तम्।
PRO 25:25 ङ्युँबै क्युइ क्यु पिब सल् लब् धोंले ह्रेंगोउँइँले खबै छ्याँब सँउँसर तम्।
PRO 25:26 दुष्‍ट म्हिए उँइँर ठिक के लबै म्हि कुरब आछ्याँबै क्युए मुल् नेरो क्ह्रुसि क्यु युबै धरु धों तब् ग।
PRO 25:27 क्वे खुदु ल्हें चब छ्याँब आङिं, छलेना ह्रोंसन मान म्हैब छ्याँब आत।
PRO 25:28 ह्रोंसए सैंलाइ अधीनर थेंल् आखाँबै म्हि गारा आझोंबै सहर धों तब् ग।
PRO 26:1 ख्वालबै त्हेर क्लिं युब नेरो बालि खैंबै त्हेर नाँ त्हिंब् आङ्हेब् धोंले, आमादुइ मान योंब आङ्हें।
PRO 26:2 प्हुरियाबै कोल्मे नेरो आतुरले प्हुरियाबै चिब्लि नमे धोंले, तोनतोर्न झोंबै सराप आल्हैदि।
PRO 26:3 घोडालाइ कोर्रा, गधालाइ लगाम झोंब् धोंले, आमादुए क्होर प्हरेइ प्रिंल् त्हुम्।
PRO 26:4 आमादुइ पोंब् अनुसार्बै जवाफ चलाइ आपिंन्, आस्याँ क्हिइ या च धोंबन् तब्मुँ।
PRO 26:5 आमादुने पोंब् अनुसार्बै जवाफ चलाइ पिंन्, आस्याँ चइ ह्रोंसन् ह्रब् सेब् तब् मैंम्।
PRO 26:6 आमादुने सँउँसर कुलबै म्हिइ ह्रोंसए प्हलेर तइ ल्हिसि ह्रोंसए न्होह्रों लब् धों तब् ग।
PRO 26:7 आमादुइ झोंबै अहान डुड म्हिए प्हले स्याले तब् धों ग।
PRO 26:8 आमादुलाइ मान लब घुँयात्रोर युँमा फैब् धों ग।
PRO 26:9 आमादुइ झोंबै अहान प्हाकोए योर पुजुइ म्‍लुब् धों तब् ग।
PRO 26:10 आमादुमैं नेरो घ्याँर प्ररिबै म्हिलाइ केर ल्हैदिब मेत्हले छेबै म्हिइ खनि तमुँ छाइन मे ल्हिसि घा-घा लब् धों ग।
PRO 26:11 नगिइ ह्रोंसए रुइ चबर एसि ह्‍यामुँ छलेन बुद्धि आरेबै म्हिइ बुद्धि आरेबै कमैं लब्रें लम्।
PRO 26:12 ह्रोंसन् ह्रब्-सेब् ग बिसि प्हैंबै म्हि म्रोंइमुँ वा? छाबै म्हि भन्दा बरु आमादुए फिर आशा थेंल् खाँम्।
PRO 26:13 “घ्याँर सिंह मुँ! ङ्हिंन् तबै सिंहमैं घ्याँजरे मुँ!” बिसि प्ल्हेगु म्हिइ बिम्।
PRO 26:14 कब्जार म्रा छाइ-छुइ तब् धोंले, प्ल्हेगु म्हि खाडर क्याइ-माइ प्लिंरिम्।
PRO 26:15 प्ल्हेगुइ थलिर्न यो थेंरिमुँ, सुँर यो बोबै या छोरों ङ्‍हाँम्।
PRO 26:16 च्हैंसि मैंसि पोंबै म्हि ङि भन्दा प्ल्हेगुइ ह्रोंसन् ह्रब्-सेब् ङ्‍हाँम्।
PRO 26:17 आगुए आक्ह्रिबै ताँर यो झोंबै म्हि नेरो घ्याँजरे प्ररिबै नगिए न्हमेर क्हाबै म्हि धों तब् ग।
PRO 26:18 ह्रोंसए ङ्‍हेब् टहुब्मैंलाइ धोका पिंल् खाँबै लिउँइँ “ङइ स्यो-स्योलिर्न लब् ग!” बिबै म्हि
PRO 26:19 मिग्लु अथवा मेत्हलेइ खनि तमुँ छाइन ल्हिप्रबै म्हि धों तब् ग।
PRO 26:20 सिं आरेस्याँ मि सियाम्, ताँ स्यारब्मैं आरेस्याँ प्होंब-कैब म्हयाम्।
PRO 26:21 मि भुराए ल्हागिर क्रोफुँ धै मिए ल्हागिर सिं चैदिब् धोंलेन् प्होंगि मिबै म्हिइ प्होंब्-कैब् मचैम्।
PRO 26:22 ताँ प्ह्रेबै म्हिए ताँमैं लिंबै चबै सैमैं धों तम्; धै छाबै ताँमैं म्हिइ न्ह क्रोंले थेम्।
PRO 26:23 सए भाडोर चाँदिइ म्होरब् धोंले दुष्‍ट म्हिमैंइ सुँइ मत्त्रे छ्याँब् लम्।
PRO 26:24 छलु म्हिलु लबै म्हिइ ह्रोंसइ न्होह्रों ललैया आलब् धोंलेन् पोंम्; दिलेया छलु म्हिलु लब चइ आपि।
PRO 26:25 छाबै म्हिमैंइ छ्याँबै ताँमैं पोंलेया आक्वेंन्, तलेबिस्याँ चए सैंर छलु म्हिलु लबै ताँमैं मत्त्रे तम्।
PRO 26:26 ह्रोंसइ लबै छलु म्हिलुए केमैं खाबज्यै आसेइमुँ ङ्‍हाँलैया चइ लबै छलु म्हिलुए केमैं ताँन् म्हिमैंइ सेब्मुँ।
PRO 26:27 छतसि आगु पायारिगे बिसि ताबै होंल्दोंर ह्रोंसन् पायाब्मुँ, छलेन आगु सियारिगे बिसि युँमा क्हुरमिंमा च युँमा ह्रोंसए फिर्न तेयुब्मुँ।
PRO 26:28 स्योलिबै ताँ पोंबै म्हिइ ह्रोंसइ पोंबै ताँइ सैं नल् लबै म्हिलाइन हेल् लम्, धै सुँइ मत्त्रे छ्याँब लबै म्हिइ न्होह्रों लम्।
PRO 27:1 प्हन्हाँ छ लमुँ छु लमुँ बिसि प्हैंसि आपोंन्, तलेबिस्याँ प्हन्हाँ तो तम् बिब क्हिइ आसे।
PRO 27:2 ह्रोंसन् थेब् प्हैंसि आपोंन्, आगुइन क्हिलाइ थेब् लरिगे; आगुइन क्हिए छ्याँबै बयन लरिगे।
PRO 27:3 युँमा नेरो बलुवा बेल्‍ले ल्हिम्; च भन्दै या आमादुमैंइ पखबै दुःख झन् ल्हिम्।
PRO 27:4 ह्रिस खबै म्हिने दयाम्हाँया आत; छाबै म्हि तोन्-तोर्न त्होंदो राम्; दिलेया ह्रिस लबै म्हिए ओंसों खाब राल् खमुँ?
PRO 27:5 न्होह्रों लब् सेसेया म्हाँया खसि तोइ आबिल्‍ले टिब् भन्दा चइ लबै गल्ति उँइँमिंब छ्याँब् ग।
PRO 27:6 क्ह्रिबै थुइ छ्याँब तरिगे बिसिन् हौदिस्याँ चए ताँ क्‍वेंल् खाँम्, दिलेया शत्तुरइ म्हाँया लब् धों तलेया चए सैंइ आछ्याँबन् मैंम्।
PRO 27:7 बेल्‍ले म्रेंबै म्हिइ क्वे खुदु या आनि; दिलेया फो ख्रेंब्मैंइ आलिंबै सै या लिंन् छोरम्।
PRO 27:8 धिं पिइरि प्रबै म्हि च्होंउँइँले प्हुरयाबै नमें धों तम्।
PRO 27:9 लिंबै थाँ खबै अत्तर नेरो छ्युगुइ म्हिलाइ आनन्द लम्, छलेन क्ह्रिबै थुइ पिंबै सल्‍लाइ सैं तोंन् लम्।
PRO 27:10 ह्रोंसए थु नेरो ह्रोंसए आबाए थुलाइ आम्‍लेद्, धै क्हिए फिर दुःख तखमा ह्रेंगो मुँबै ह्रोंसए आघें अलिमैंए धिंर आह्‍याद्, तलेबिस्याँ ह्रेंगो मुँबै ह्रोंसए आघें अलिमैं भन्दा ह्रोंसए चेंदोंर्बै ङ्‍हेब्-ट्हुब्मैं ग्वार्दिब छ्याँब तम्।
PRO 27:11 ओ ङए च्ह, ङलाइ म्हि आच्हिल्‍ले पोंब्मैंए उँइँर ङइ जवाफ पिंल् योंरिगे बिसि बुद्धि मुँब् तद्, ङए सैं तोंन् लबै के लद्।
PRO 27:12 बुद्धि मुँबै म्हिइ ह्रोंसए फिर न्होह्रों तम् बिब ह्रेंगोउँइँलेन् म्रोंसि लोबै क्ल्ह्‍यो म्हैम्, दिलेया च्हैंब् मैंब् लल् आखाँबै म्हि छाइन ह्‍याम् धै दुःख योंबर फेम्।
PRO 27:13 ङो आसेबै म्हिए जमानि टिबै बुद्धि आरेबै म्हिल क्वें या किंथेंन्; धै फ्रें क्ल्योंप्रबै च्हमिरिए ल्हागिर चइ जमानि टिस्याँ चने मुँबै सैमैं बन्दगिर थेंन्।
PRO 27:14 न्हाकर्न रेसि थेबै कैले ह्रोंसए थुलाइ खाबज्यै आशिक पिंम् बिस्याँ, च सराप पिंब् धोंन् तब्मुँ।
PRO 27:15 बर्खर झरि त्हिंब नेरो प्होंगि मत्‍त्रे मिबै च्हमिरि घ्रिन् ग;
PRO 27:16 छाबै च्हमिरिलाइ अधीनर थेंब् बिब खैंलाइ क्हाब् धोंन् तब् ग, धै योइ छ्युगु क्हाब् धोंन् ग।
PRO 27:17 पैइन पैए धार झोंब् धोंले म्हिइन ह्रोंसए थुलाइ म्याम्।
PRO 27:18 तोंबु धुँलाइ छेनाले ङ्‍ह्‍योबै म्हिइन चए रो चब्मुँ, छलेन ह्रोंसए क्ल्हेए सेवा लबै म्हिइन मान योंब्मुँ।
PRO 27:19 क्युर लि म्रोंब् धोंले म्हि खैतब् मुँ बिसि चए खोंइन म्रोंम्।
PRO 27:20 क्रों नेरो नासइ न्होह्रों लब् आपिब् धोंले म्हिए मिइ म्रोंबै सैमैं आयोंन् समा सन्तोक आत।
PRO 27:21 मारा चाँदि मिर खार्दिब् धोंले आगुइ लबै बयनउँइँले म्हि खैतब् मुँ बिसि सेल् खाँम्।
PRO 27:22 नारि ह्रेंदोर प्ह्रोब् धोंले आमादुलाइ खलर झोंसि म्ल्ह धोंले धोंलेया चइ ह्रोंसए आमादु बानि पिरिब् आरे।
PRO 27:23 ह्रोंसए र-क्युमैं खै तरिइमुँ बिसि छेनाले छैं लद्; धै न्ह क्रों मि क्रोंले ह्रोंसए बगालमैं ङ्‍ह्‍योद्,
PRO 27:24 तलेबिस्याँ सै न्होर खोंयोंन् बिलै आटि; छलेन पुस्ता-पुस्त समा मुकुट कुल् योंम् बिब आरे।
PRO 27:25 कारयाबै छिमैं खैंवामा कमलो छिमैं पलेब्मुँ, धै कोंजरेबै पिंग्या छिमैं खुब्मुँ,
PRO 27:26 च लिउँइँ क्युमैंए पै क्हिए ल्हागिर क्वें तब्मुँ, धै र-बुख्यामैं क्ल्ह्‍यो किंबै सै तब्मुँ।
PRO 27:27 झाइले क्हि नेरो क्हिए परवाइ चबै ल्हागिर, नेरो क्हिए केब्स्योमैं न्हबै ल्हागिर क्हिए रमैंए ङ्‍हेइ योब्मुँ।
PRO 28:1 खाबज्यै आल्हालैया दुष्‍ट म्हि न्हेयाम्, दिलेया ठिक के लबै म्हिमैं बिस्याँ सिंह धोंले आङ्हिंल्‍ले टिरिम्।
PRO 28:2 ह्‍युलर्बै म्हिमैंइ आछ्याँबै के लमा चलेबै नेतामैं ल्हें त्होंम्, दिलेया बुद्धि मुँबै म्हिइ ह्‍युल चलेमा चए ग्याल्सर्बै म्हिमैंइ ल्हें त्हे समा सुख योंम्।
PRO 28:3 ङ्हाँदुमैंलाइ ह्रुगुदिबै क्रथे मिथेमैं म्ल्ह नारिमैं तोइ आचैल्‍ले नास लवाबै नाँ-तिस्यु धों तब् ग।
PRO 28:4 ठिमर्बै ताँ आङिंब्मैंइ दुष्‍ट म्हिमैंलाइ थेब् लम्; दिलेया ठिमर्बै ताँ ङिंब्मैंइ दुष्‍ट म्हिमैंए ताँ थोम्।
PRO 28:5 दुष्‍ट म्हिमैंइ ठिक के खैले लल् त्हुम् बिब आसे; दिलेया याहवेहजी बिबै ताँ ङिब्मैंइ च ताँमैं छेनाले क्होम्।
PRO 28:6 छलु म्हिलु लसि प्लब् भन्दा ठिक के लसि ङ्हाँदु तब छ्याँब ग।
PRO 28:7 ठिमर्बै ताँइ बिब् धोंले प्रब बुद्धि मुँबै च्ह ग; दिलेया चब् थुँबै लिलि मत्त्रे प्रबै च्हइ ह्रोंसए आबालाइ फापिन् लम्।
PRO 28:8 ब्याज ल्हें किंसि ह्रोंसए सै न्होर ल्हें लबै म्हिइ ङ्हाँदुमैंए फिर ल्हयो खबै म्हिए ल्हागिर सै न्होर खुम्!
PRO 28:9 ठिमइ बिब् धों आलबै म्हिए प्राथना याहवेहजी आखो।
PRO 28:10 सोजो म्हिलाइ वाँसि आछ्याँबै घ्याँउँइँ बोयाबै म्हि ह्रोंसन् ङोर फेम्, दिलेया सोजो म्हिइ आशिक योंम्।
PRO 28:11 प्लबै म्हिइ ह्रोंसलन् ह्रब्-सेब् प्हैंमुँ। दिलेया ङ्हाँदुन् तलेया ताँ क्होबै म्हिइ च खैतब् मुँ बिसि सेम्।
PRO 28:12 ठिक के लब्मैंइ ट्होमा ताँन् सैं तोंब्मुँ, दुष्‍टमैंइ ट्होमा म्हिमैं लोबर होंम्।
PRO 28:13 पापमैं लोइरि थेंबै म्हिल खोंयोंइ छ्याँब आत, दिलेया “पापमैं लइमु” बिसि पिवाबै म्हिइ आशिक योंम्।
PRO 28:14 याहवेहलाइ म्हाँदिरिबै म्हिए फिर आशिक युम्, दिलेया खीजी बिब् आङिंबै म्हि नास तयाम्।
PRO 28:15 दुष्‍ट म्रुँइ ग्याल्स लमा ङ्हाँदुमैं झन ङ्हाँदु तम्, छाबै म्रुँ ग्राँ-ग्राँ बिबै चें नेरो ह्‍वाखबै भलु धों तब् ग।
PRO 28:16 शासन चलेबै म्हि सैं सार मुँस्याँ आछ्याँब तम्, दिलेया छलु म्हिलु लसि सै न्होर आखुबै म्हिए छ्ह ह्रिंब् तम्।
PRO 28:17 म्हि सैए सैं खोंयोंइ छिं आङ्हाँ; छतसि चए छ्ह तिगोंन् च खैता-खैता तप्रम्; दिलेया खाबज्यै चलाइ आल्होरिगे, चए ख खाबज्यै आलरिगे।
PRO 28:18 छ्याँबै घ्याँर प्रबै म्हि जोगेब्मुँ, आछ्याँबै घ्याँर प्रबै म्हि तिख्खेर क्हुरियाब्मुँ।
PRO 28:19 ह्रोंसए म्रों तासि रुइब्मैंने ल्हें चबै सै तब्मुँ, दिलेया केर आफेबै ताँमैंए लिलि प्रब्मैं ङ्हाँदु तब्मुँ।
PRO 28:20 भर लल् खाँबै म्हिए फिर ल्हें आशिक युब्मुँ, दिलेया युनन् प्लब् तदा ङ्हाँबै म्हिइ दण्ड योंब्मुँ।
PRO 28:21 म्हि ङ्‍ह्‍योसि फेलब छ्याँब आङिं, दिलेया कोइ म्हिइ तिछोए ल्हागिर छाबै केमैं लम्।
PRO 28:22 पिंल् आचैबै म्हि प्ल्ब् तदा ङ्हाँमुँ, दिलेया ङ्हाँदु तदै ह्‍याब चइ आसे।
PRO 28:23 स्युइट्टले पोंबै म्हिइ भन्दा हौदिबै म्हिइ लिउँइँ धन्यबाद योंम्।
PRO 28:24 ह्रोंसए आबा-आमाए मुइ लुडिसेया “ङइ गल्ति आलइमुँ!” बिबै म्हि नास लबै म्हिए थु ग।
PRO 28:25 लोबि म्हिइ प्होंगि लम्, दिलेया याहवेहने भर थेंबै म्हिल बिब् धों तम्।
PRO 28:26 ह्रोंसए बुद्धिर मत्‍त्रे प्रबै म्हि आमादु ग, दिलेया ह्रब्-सेब्मैंए अर्थिमैं किंबै म्हि जोगेब्मुँ।
PRO 28:27 ङ्हाँदुमैंलाइ पिंबै म्हिल तो सैरैया आयों-आख्युब तरिब् आरे, ङ्हाँदुमैंलाइ आपिंबै म्हिए फिर सराप खब्मुँ।
PRO 28:28 दुष्‍ट म्हिमैंइ ग्याल्स लमा म्हिमैं लोयाम्, दिलेया चमैं नास तमा ठिक के लब्मैं बडिम्।
PRO 29:1 कतिन् हौदिसेया पोथाँइ आनबै म्हि थाइ आसेल्‍ले नास तयाम्।
PRO 29:2 ठिक के लब्मैं बडिमा म्हिमैं सैं तोंम्, दिलेया दुष्‍ट म्हिमैंइ ग्याल्स लमा म्हिमैंइ दुःख योंम्।
PRO 29:3 बुद्धि मुँबै च्हइ आबालाइ सैं तोंन् लम्, दिलेया रण्डिबाजी लप्रबै च्हइ ह्रोंसए सै न्होर ताँन् नुवाम्।
PRO 29:4 ठिक निसाफ बनेबै म्रुँइ ह्‍युल भोंब् लम्, दिलेया मुइए फिर मि ङ्ह्‍योब्मैंइ ह्‍युल न्होंवाम्।
PRO 29:5 ह्रोंसए ङ्‍हेब्मैंने स्युइट्टले पोंबै म्हिइ ह्रोंसए प्हलेर्न जाल तिम्।
PRO 29:6 दुष्‍ट म्हि ह्रोंसए पापइ लमा ह्रोंसन् ङोर फेम्, दिलेया ठिक के लबै म्हि बिस्याँ, सैं तोंदै क्वे प्रिंम्।
PRO 29:7 ङ्हाँदुमैंइ योंल् त्हुबै हगए ल्हागिर ठिक के लब्मैंइ छेनाले निसाफ लम्; दिलेया दुष्‍ट म्हिइ चमैंए वास्तै आल।
PRO 29:8 खैच्हिजिले पोंबै म्हिइ खन्तोदोंन् हल्‍ला लप्रम्, दिलेया बुद्धि मुँबै म्हिइ ह्रिस खब म्हल् लम्।
PRO 29:9 बुद्धि मुँबै म्हि आमादुने अदालतर ह्‍याइ बिस्याँ आमादु सुँ-सुँर्न छैसि ह्रिस खमुँ; धै चमैं क्ह्रिल् आखाँ।
PRO 29:10 म्हिसैमैंइ सोजो म्हि आखो, दिलेया ठिक के लब्मैंइ सोजो म्हिए रक्षा लम्।
PRO 29:11 ह्रिस आम्हन् समा आमादुमैं पोंबै पोंब् तम्; दिलेया बुद्धि मुँबै म्हिइ ह्रिस थाउदिम्।
PRO 29:12 चिबइ स्योर्गु ताँमैं ङेंस्याँ चए के लब्मैं ताँन दुष्‍ट तब्मुँ।
PRO 29:13 ङ्हाँदु नेरो ङ्हाँदुमैंलाइ हेल् लबै म्हि बराबर मुँ; चमैं ङ्हिंन-ङ्हिनलाइ याहवेहजी मि म्रोंल् पिंइमुँ।
PRO 29:14 ङ्हाँदुमैंए ल्हागिर छेनाले निसाफ लमिंबै म्रुँए ग्याल्स खोंयोंइन भोंब् तरिम्।
PRO 29:15 तार झोंबै प्हसेमैंने बुद्धि तम्, दिलेया तार आझोंबै प्हसेमैंइ आमा फापिन् लम्।
PRO 29:16 दुष्‍टमैं ल्हें तमा पापै केया ल्हें ततै ह्‍याम्, दिलेया ठिक के लब्मैंइ चमैं नास तयाब् म्रोंब्मुँ।
PRO 29:17 च्ह-च्हमिमैंलाइ तार झोंन्, छलस्याँ चमैंउँइँले क्हि सन्तोक तब्मुँ; चमैंइ क्हिए सैं तोंन् लब्मुँ।
PRO 29:18 परमेश्‍वरए ताँ आङिंबै म्हिमैं प्हुँयाम्, परमेश्‍वरए ठिम म्हाँदिबै म्हिइ आशिक योंब्मुँ।
PRO 29:19 ताँइ मत्‍त्रे केब्छैंइ आच्यो, चइ ताँ क्होलै या ओर-छ्योर आफे।
PRO 29:20 च्हैंब् मैंब् आलल्‍ले पोंबै म्हि क्हिइ म्रोंइमुँ वा? चने भन्दा आमादुए फिर ल्हें आशा तम्।
PRO 29:21 ह्रोंसए केब्छैंलाइ ओंसों ओंनोंन् चइ तो बिमुँ चन् लमिंइ बिस्याँ; लिउँइँ चइ क्हिने मुँबै ताँन् सैमैं किंब्मुँ।
PRO 29:22 दुष्‍ट म्हिइ प्होंगि लम्, धै युनन् ह्रिस खबै म्हिइ ल्हें पाप लम्।
PRO 29:23 तोन् तोर्न थेब् प्हैंबै म्हि कुरल् त्हुम्; दिलेया कुरबै म्हिइ मान योंब्मुँ।
PRO 29:24 ह्‍योने बालु त्हुँबै म्हि ह्रोंसए ल्हागिर्न शत्तुर ग; तलेबिस्याँ अड्‍डारि क्ह्रोसेंन्बै ताँमैं पोंस्याँ चइ सजैं योंब्मुँ, दिलेया आपोंस्याँ परमेश्‍वरउँइँले सराप योंब्मुँ।
PRO 29:25 म्हि म्रोंसि ङ्हिंब्मैं ङोर फेम्, दिलेया याहवेहए फिर भर लब्मैं तोइ सैने ङ्हिंल् आत्हु।
PRO 29:26 ल्हें म्हिमैं क्रथे मिथेमैंने प्रब् टिब् लदा ङ्हाँम्, दिलेया याहवेहजीन् म्हिमैंए ल्हागिर ठिक निसाफ लम्।
PRO 29:27 ठिक के लबै म्हिमैंइ छलु म्हिलु लब्मैंलाइ आखो, छलु म्हिलु लब्मैंइ ठिक के लब्मैं आखो।
PRO 30:1 याकेए च्ह आगूरए अहानमैं। भबिष्याबाणि: इथीएल नेरो यूकाललाइ आगूरइ चु अहान बिब् ग।
PRO 30:2 म्हिमैंए न्होंर ताँ आक्होब ङन् ग; म्हिने मुँल् त्हुबै बुद्धि ङने आरे!
PRO 30:3 ङने बुद्धि आरे, ङइ याहवेहए बारेर तोइ आसेइमुँ।
PRO 30:4 स्वर्ग समा खाब् क्रेयासि युइमुँ? खाबइ ह्रोंस‍ए मुठिर खैं क्हाइमुँ? ह्रोंसए क्वेंर खाबइ मा ङ्युँइ बेर्दिइमुँ? पृथ्बीए साँद खाबइ तोक्दिइमुँ? खीए मिं तो जा, धै खीए च्हए मिं तो जा? क्हिइ सेइमुँ बिस्याँ ङने बिद्!
PRO 30:5 परमेश्‍वरए ताँ छ्याब आरेब मुँ; खीए प्हलेर खब्मैं ताँनल खी ढाल ग।
PRO 30:6 खीए बचनर तोइ आथौदिद्, आस्याँ खीजी क्हिलाइ हौदिब्मुँ धै स्योर्गों बिब्मुँ।
PRO 30:7 ओ परमेश्‍वर ङइ क्हिने ताँ ङ्हिं ह्रिम्; ङ सिब् भन्दा ओंसों च ताँमैं ङए ल्हागिर लमिंन्:
PRO 30:8 स्योर तेब नेरो लुबै ताँमैं ङउँइँले ह्रेंगो थेंमिंन्; धै ङ ङ्हाँदु आलमिंन्, प्लबै या आलमिंन्; दिलेया ङए ल्हागिर चैदिबै चबै सै पिंन्।
PRO 30:9 आस्याँ प्लब् तबइले ङइ क्हिलाइ म्‍लेयालै धै “याहवेह खाब् जा?” बिसि ङइ बिलै; ङ ङ्हाँदु तसि ह्‍योलै, धै ङए परमेश्‍वरए मिं ङइ वालै।
PRO 30:10 क्ल्हेए ओंसों चए केब्छैंलाइ आस्यारद्; आस्याँ चइ क्हिलाइ सराप झोंब्मुँ, धै क्हि दोषि ठर्दिब्मुँ।
PRO 30:11 कोइ म्हिमैंइ ह्रोंसए आबालाइ सराप झोंम्, धै आमाए छ्याँबै बयन आल।
PRO 30:12 अरू म्हिमैं ह्रोंसन् शुद्ध मुँ ङ्हाँम्, दिलेया चमैंइ ह्रोंसए सैंर्बै क्ह्रि आख्रुइमुँ।
PRO 30:13 चमैं ह्रोंसन् बेल्‍ले छ्याँब मुँ बिसि थेब् प्हैंम्, चमैंए मिइ कति आछ्याँन्ले ङ्‍ह्‍योमुँ!
PRO 30:14 चमैंए समैं सेलाँ धों तब् ग; चमैंए बङ्गारा क्होजा धों तब् मुँ। चमैंइ ङ्हाँदुमैंलाइ क्ल्ह्‍योंवाम्, धै आयों-आख्युब्मैंलाइ सैवाम्।
PRO 30:15 जुकाल च्हमि ङ्हिं मुँ: चमैंइ “पिंन्! पिंन्!” बिदै ओररिम्। खोंयोंइ सान्दोक् आतबै सै सोंथो मुँ; खोंयोंइ “योइ” आबिबै सै प्लिथो मुँ।
PRO 30:16 क्रों, प्हसे आफिबै च्हमिरि, कारा क्ल्ह्‍यो नेरो मिइ खोंयोंइ “तइ” आबि।
PRO 30:17 ह्रोंसए आबालाइ प्ह्रब नेरो आमालाइ म्हि आच्हिबै म्हिए मि ब्याँसिर्बै कगामैंइ चोब्मुँ, धै क्व्रेमैंइ चवाब्मुँ।
PRO 30:18 ङए ल्हागिर अचम्मबै सै सोंथो मुँ, चमुँ; धै ङइ क्होलन् आखाँबै ताँ प्लिथो मुँ:
PRO 30:19 मुर क्व्रेमैं खैले प्हुरब, पाराए फिर प्हुरि खैले प्रब, मा ङ्युँइर झाज खैले प्रब, नेरो फ्रेंसि छमिने खैले प्रब।
PRO 30:20 फ्रें क्ल्योंप्रबै च्हमिरिए चाल छाब् तम्: च म्हिने प्रमुँ, धै ज्यु ख्रुमुँ, झाइले “ङइ तोइ गल्ति आलइमुँ,” बिम्।
PRO 30:21 पृथ्बीलाइ त्हारल् लबै सैमैं सोंथो मुँ; पृथ्बीइ सैदिल् आखाँबै सै प्लिथो मुँ:
PRO 30:22 केब्छैं म्रुँ तब, बुद्धि आरबै म्हिमैं म्रेंन्ले चल् योंब,
PRO 30:23 म्हाँया आयोंबै च्हमिरिइ ब्ह्‍या लब, धै ह्रोंसए नेब्स्योए क्ल्ह्‍योर केब्स्यो टिब।
PRO 30:24 पृथ्‍बीर च्योंब सै प्लिथो मुँ, दिलेया चमैं बेल्‍ले बुद्धि मुँब मुँ:
PRO 30:25 नौरोमैं ल्हें भोंब आरे, दिलेया ख्वालबै त्हेर चमैंइ चबै सैमैं खुथेंम्;
PRO 30:26 भइँकोदलेमैं ल्हें भोंब आरे; दिलेया चुइ पारार रो बनेसि टिम्;
PRO 30:27 तिरिमैंल म्रुँ आरे, दिलेया चमैं हुलले प्रम्;
PRO 30:28 खोरेलाइ योइ क्हाल् खाँम्, दिलेया च म्रुँए दरबारर टिम्।
PRO 30:29 छेन्ले प्रबै सै सोंथो मुँ, ठ-ठारले प्रबै सै प्लिथो मुँ:
PRO 30:30 खेदोमैंए न्होंर सिंह बेल्‍ले भोंब तम्, च तो सैने या आङ्हिं;
PRO 30:31 ठ-ठारले प्रबै नग भले, र बुख्या, नेरो सैनामैं कारर्ग्यु लसि प्रबै म्रुँ।
PRO 30:32 क्हि बुद्धि आरेबै के लप्रसि ह्रोंसन् थेब् प्हैंसि पोंस्याँ, धै क्हिइ आछ्याँब चाँजोमैं लस्याँ, ह्रोंसए सुँर योइ म्रुद्!
PRO 30:33 तलेबिस्याँ ङ्‍हे लोइरि छ्युगु त्होंम्, नखुँ नेस्याँ को युम्, छलेन आगुलाइ ह्रिस खल् लस्याँ प्होंगि तम्।
PRO 31:1 म्रुँ लमूएलए अहान: चु अहान चए आमाइ लोमिंब् ग:
PRO 31:2 “ओ ङए च्ह, ओ ङइ योंबै च्ह, ओ ङइ प्राथना लसि योंबै च्ह, क्हि तो लसिन् मुँ?
PRO 31:3 आछ्याँबै के लबै च्हमिरिमैंने प्रसि ह्रोंसए भों खेरो आवाद्! चुमैंइ म्रुँमैंलाइ खेंमैंए पदउँइँले तवाइमुँ।
PRO 31:4 “ओ लमूएल, म्रुँमैंइ अँगुरए प्हा थुँल् आत, धै क्रथे मिथेमैंइ प्हा थुँल् आत,
PRO 31:5 आस्याँ चमैंइ प्हा थुँसि कानुनर्बै ताँमैं म्‍लेयाब्मुँ, धै दुःख योंब्मैंइ योंल् त्हुबै हग योंरिब् आरे।
PRO 31:6 नास तबि छेब्मैंलाइ प्हा पिंलेन् तम्, छलेन सैंर न्हुँ तब्मैंलाइ अँगुरए प्हा पिंन्।
PRO 31:7 ङ्हाँदु तसि योंबै दु:ख म्‍लेबै ल्हागिर ङ्हाँदुमैंइ प्हा थुँरिगे, धै ह्रोंसए न्हुँमैं धबै आमैंरिगे।
PRO 31:8 “ह्रोंसए ल्हागिर पोंल् आखाँब्मैंए ख लसि पोंमिंन्, धै ङ्हाँदुमैंए ल्हागिर ठिक निसाफ लबर पोंन्।
PRO 31:9 ठिक निसाफ लबर क्हिए सुँ ओद्, तोइ आरेब्मैं नेरो आयों-आख्युब्मैंइ योंल त्हुबै हगए ल्हागिर पोंन्।”
PRO 31:10 छ्याँबै सिर-सुबास मुँबै प्ह्रेंस्यो खाबै योंल् खाँमुँ? च हिरा-मोति भन्दै या ल्हें छ्याँब् तम्।
PRO 31:11 चए प्युँइ चए फिर भर थेंम्, धै चलाइ तो सैलैया खाँचो तरिब् आरे।
PRO 31:12 चइ ह्रोंसए छ्ह तिगोंन प्युँए ल्हागिर छ्याँब् लम्, आछ्याँब तोइ आल।
PRO 31:13 चइ पै नेरो सुतिए क्वें बनेम्, धै भों खदै के लम्।
PRO 31:14 च छों लब्मैंए क्यु झाज धों तम्, चइ ह्रें-ह्रेंगोउँइँले चबै सैमैं पखम्।
PRO 31:15 च म्हुँइँसर्न रेमुँ, धै ह्रोंसए परवाए ल्हागिर चब्-थुँब् लम्, धै केब्स्योमैंलाइ के ल्हैदिम्।
PRO 31:16 च्हैंसि मैंसि चइ म्रों घ्रि किंम्; धै ह्रोंसइ कमैबै मुइइ अँगुरए खेति लम्।
PRO 31:17 प्ल्हेउ आतल्‍ले चइ के लम् धै चए योमैं भोंब् मुँ।
PRO 31:18 चइ छों लमा नफा तम्। म्हुँइँसरै या चए बत्ति आसि।
PRO 31:19 चइ राडे पेरम्, धै क्वेंमैं रोम्।
PRO 31:20 ङ्हाँदुमैंए फिर ल्हयो खसि चइ चैदिबै सै पिंम्, धै आयों-आख्युब्मैंलाइ पिंब्रें लम्।
PRO 31:21 ह्रोंसए परवाए ल्हागिर टो-टोबै क्वें मुँ। छतसि क्लिं युलेया चइ न्हुँ आल।
PRO 31:22 ह्रोंसए ल्हागिर चइ पोब् तिबै सै बनेम्; धै ङ्याँ-ङ्याँ ह्‍याबै कलाँजी रङर्बै क्वेंमैं चइ खिम्।
PRO 31:23 चए प्युँलाइ सहरर्बै थेबै म्हि बिसि ताँनइ म्हाँदिब्मुँ; धै ह्‍युल तिगोंर्बै थेबै म्हिमैंने टिम्।
PRO 31:24 चइ सुतिए क्वेंमैं टुसि चुँम् धै छों लब्मैंने फगिमैं चुँम्।
PRO 31:25 भों खल्‍ले चइ के लम् धै चल छ्याँबै बयन तम्, धै लिउँइँबै ल्हागिर चइ न्हुँ लल् आत्हु।
PRO 31:26 च च्हैंब् मैंब् लसि पोंम्, धै छ्याँ-छ्याँबै क्वेंल् खाँबै ताँमैं चइ लोमिंम्।
PRO 31:27 ह्रोंसए परवा खै तरिइमुँ बिसि चइ छेनाले ङ्ह्‍योम्, धै खोंयोंन् बिलै चइ के लरिम्।
PRO 31:28 छतसि चए च्ह-च्हमिमैंइ आमाए छ्याँबै बयन लम्; चए प्युँज्यै या छ बिसि चए बयन लम्, धै चलाइ थेब लम्:
PRO 31:29 “ल्हें च्हमिरिमैंइ छ्याँबै के लमुँ, दिलेया चमैं ताँनलाइ क्हिइन ट्होवाइमुँ।”
PRO 31:30 छ्याँबै मोडा फाक्‍कर्न ग, च तिस्याँर्न उडियाम्, दिलेया याहवेहलाइ म्हाँदिबै च्हमिरिलाइन थेब् लल् त्हुम्।
PRO 31:31 चइ छले छ्याँबै केमैं लसेरो चलाइ मान लद्, सहरर्बै ताँन् म्हिमैंए उँइँर चलाइ मान लरिगे।
JON 1:1 याहवेहए ताँ अमित्तैए च्ह योना ङाँर युइ:
JON 1:2 “रेद्, च निनवे बिबै थेबै सहरर ह्‍याद, धै चर्बै म्हिमैंए बिरोध ङए ताँ बिइ प्रद्, तलेबिस्याँ चर्बै म्हिमैंइ आछ्याँबै के लब ङइ म्रोंइमुँ।”
JON 1:3 दिलेया योना याहवेहजी बिब् आङिंसि तर्शीश बिबै सहरउँइँ ह्‍याइ। छले ह्‍यामा योप्पा सहरर फेखइ, चर चइ तर्शीशउँइँ ह्‍याँबै क्यु झाज घ्रि स्याइ। याहवेहउँइँले भौदिबर झाजए भारा फोसि च तर्शीशउँइँ ह्‍याबै झाजर क्रेइ।
JON 1:4 दिलेया याहवेहजी झाजन् फुवाल् म्हैबै थेबै नाँ-खैं मा ङ्युँइर खल् पिंइ।
JON 1:5 छतमा झाज ओलेब्मैं ङ्हिंसि ह्रों-ह्रोंसए देवतामैंए ग्वार ह्रिइ। धै झाज योंरिगे बिसि चर्बै ताँन् सैमैं मा ङ्युँइर भ्योंवाँइ। दिलेया योना बिस्याँ झाजए ताँन् भन्दा न्हों तलर न्हरु च्हुइरिल।
JON 1:6 छाब् म्रोंमा झाजर्बै कप्‍तान खसि योनाने बिइ, “कति रोल् खाँल? रेसि ह्रोंसए परमेश्‍वरने ग्वार ह्रिद्! ङ्यो खाबै नास आतरिगे बिसि खीजी जोगेमिंम् उ?”
JON 1:7 झाजर्बै म्हिमैंइ खेंमैंए न्होंर बिइ, “खाबइ पाप लसि च्हौ थेबै दु:ख ङ्योए फिर तखगे बिसि था सेबर ङ्यो चिट्ठा झोंले।” छ बिसि चमैंइ चिट्ठा झोंमा योनाए मिंर चिट्ठा फेइ।
JON 1:8 छतसि चमैंइ योनाने बिइ, “खाबइ पाप लसि ङ्योए फिर छाबै दु:ख तखइ? क्हिइ तो के लम्? क्हि खनिउँइँले खल? क्हिए ह्‍युल खनिर जा? क्हि खाब् ह्रेंर्बै जा? ङिने बिद्।”
JON 1:9 योनाइ चमैंने बिइ, “ङ मा ङ्युँइ नेरो स बनेबै स्वर्गर्बै याहवेह परमेश्‍वरलाइ म्हाँदिबै हिब्रू घ्रि ग।”
JON 1:10 छबिमा चमैं बेल्‍ले ङ्हिंसि योनाने बिइ, “क्हिइ तले चु लल?” (ओंसोंन् चइ ह्रोंसए ताँ बिल् खाँल, छतसि “च याहवेहउँइँले भौदिसि खन!” बिब चमैंइ था सेइ।)
JON 1:11 “मा ङ्युँइर नाँ-खैं झन् ल्हें तबर होंइ। छतसि तारे ङिइ क्हिलाइ खै लस्याँ मा ङ्युँइ च्याँ तम् दि?” बिसि चमैंइ ङ्योएइ।
JON 1:12 धै योनाइ चमैंने बिइ, “ङइ लमा चु नाँ-खैं तब् ग बिब ङइ सेइमुँ। छतसि ङ क्वेसि मा ङ्युँइर भ्योंवान्, धै मा ङ्युँइ च्याँ तब्मुँ।”
JON 1:13 दिलेया चमैंइ क्यु झाज खाँन् समा क्यु आरेबै क्ल्ह्‍योउँइँ पखबर भों लइ, दिलेया आखाँल, तलेबिस्याँ मा ङ्युँइर बेल्‍ले थेबै नाँ बाडि खसेन् मुँल, धै चमैंए बिरोदर च नाँ बाडि झन्-झन् बेल्‍ले ल्हें तदै ह्‍याइ।
JON 1:14 छतसि चमैंइ याहवेहने ग्वार ह्रिसि बिइ, “ओ याहवेह, ङिइ क्हिने यो छ्युँ लसि बिमुँ, चु म्हइ लबै आच्याँबै केउँइँले ङि नास आतरिगे, धै चुलाइ भ्योंवाबै पापए छ्याब् ङिए फिर आल्हैदिरिगे, तलेबिस्याँ ओ याहवेह, क्हिए सैंर मैंबै केन् क्हिइ लइमुँ।”
JON 1:15 झाइले चमैंइ योनालाइ क्वेसि मा ङ्युँइर भ्योंवाबै तोदोंन मा ङ्युँइ च्याँ तयाइ।
JON 1:16 छतमा च म्हिमैं याहवेहने बेल्‍ले ङ्हिंइ। धै याहवेहए मिंर ख्रो पिंसि “तारे ङि क्हिलाइन फ्योम्” बिइर बाछा फैइ।
JON 1:17 धै योनालाइ क्ल्ह्‍योंबर याहवेहजी बेल्‍ले थेबै ताँगा कुलइ। धै च ताँगाए फो न्होंर योना त्हिंइ सोंरो म्हुँइँस सोंरो टिइ।
JON 2:1 छले योनाइ ताँगाए फो न्होंउँइँले ह्रोंसए याहवेह परमेश्‍वरने प्राथना लसि
JON 2:2 छ बिइ: “थेबै दु:ख तसि ङइ याहवेहने ग्वार ह्रिइ, धै खीजी ङने ज्वाफ पिंइ; क्रोंर्बै गैरो क्ल्ह्‍योउँइँले ङइ ग्वार ह्रिइ, धै क्हिजी ङए कै छेनाले थेमिंइ।
JON 2:3 मा ङ्युँइए म्हाँजोर क्हिजी ङलाइ भ्योंवाइ, धै नाँ बाढिइ ङ कारर्ग्यु लइ; क्हिजी बनेबै छालमैं नेरो क्युए भेल्गमैं ङलाइ हुवाइ।
JON 2:4 झाइले ङइ बिइ, क्हिजी ङलाइ ल्हावाइ; दिलेया क्हिए पबित्र मन्दिरउँइँ ङ धबै ङ्ह्‍योम्।
JON 2:5 ङए सो किंब् बिसि च क्युमैं ङए फिर खइ; क्युए गैरु ङ खागु मुँल; क्युर्बै लेउमैं ङए क्र तिगोंन् बेरदिल।
JON 2:6 ङम् क्यु न्होंर्बै कोंमैंए तेंर्न फेनेल। चर क्रोंइ ङलाइ त्होंल् आपिं; दिलेया ओ ङए याहवेह परमेश्‍वर, क्हिजी ङ क्रोंउँइँले तेइरि पखइ।
JON 2:7 छले ङ सिबिन् छेमा, ङइ याहवेहलाइ मैंइ, ङइ लबै प्राथना क्हि ङाँर फेनेइ, क्हिए पबित्र मन्दिर न्होंर फेनेइ।
JON 2:8 केर आफेबै स्युलिबै सैमैंर सैं पिंबै म्हिमैंइ परमेश्‍वरउँइँले योंबै दयाम्हाँया योंल् आङिं।
JON 2:9 दिलेया ङ बिस्याँ धन्यबाद पिंबै कै तेदै क्हिए मिंर ख्रो पिंब्मुँ; धै ङइ लबै भकल ङ पूरा लब्मुँ। याहवेहजीन म्हिमैं जोगेमिंम्!”
JON 2:10 झाइले याहेवेहजी ताँगाने योनालाइ तेवाद् बिमा ताँगाइ योनालाइ क्यु आरेबै क्ल्ह्‍योर रुइवाइ।
JON 3:1 छले याहवेहजी धबै योनाने बिइ,
JON 3:2 “रेद्, थेबै निनवे सहर ह्‍याद्, धै ङइ क्हिने पिंबै ताँ चर ह्‍यासि बिप्रद्।”
JON 3:3 छले याहवेहजी बिब् धोंले योना रेसि निनवे सहर ह्‍याइ। (निनवे सहर बेल्‍ले थेब मुँल धै मिं कालिदिब् मुँल, च सहरए ताँन क्ल्ह्‍यो ङ्ह्‍योबर सोंरो छ्युमल।)
JON 3:4 योनाइ तिगें दे दिन छ्युल्‍ले प्रसि च सहर न्होंर होंसि ताँ बिबर होंइ, “तारेबै प्लिच्यु त्हिं न्होंर निनवे सहर नास तब्मुँ!”
JON 3:5 झाइले च ताँ थेसि निनवे सहरर्बै म्हिमैंइ परमेश्‍वरजी बिबै ताँ क्वेंइ। धै चिब्मैइ ताँनलाइ बर्त टिबर ल्हैदिइ, धै कोलमैं-चिबमैं ताँनइ “ङिइ आछ्याँबै केमैं लइनमैं” बिसि नइए रेंगए क्वें खिइ।
JON 3:6 योनाइ बिबै ताँ निनवेर्बै म्रुँ ङाँर फेनइ, धै च ह्रोंसए राजगद्दिउँइँले रेइ, धै ह्रोंसए क्वें प्लिसि चइ या नइए ह्रेंगए क्वें खिइ, झाइले म्येउरो फिर टिइ।
JON 3:7 छले चइ निनवे सहरर छ बिइरि घोषना लइ, “म्रुँ नेरो चर्बै जिम्म नोब्मैंइ बिब् धोंले, न म्हिमैंइ, न ख्योदोमैंइ, न क्ल्ह्‍यामैं-मेमैंइ, न र-क्युमैंइ, खाबजै या तो सैमैं या आचरिगे धै क्युइ या आथुँरिगे।
JON 3:8 छले म्हिमैं नेरो ख्योदोमैंइ नइए ह्रेंग कुरिगे धै बेल्‍ले ओरदै परमेश्‍वरने ग्वार् ह्रिरिगे। चमैंए ह्रोंसए दुष्‍ट केमैंउँइँले धै चमैंए आछ्याँन्ले प्रब टिबै बानि ब्योरउँइँले एरिगे।
JON 3:9 छले परमेश्‍वरजी खीए सैं एइरि ल्हयो लसि खीए थेबै ह्रिसउँइँले सैं एम् उ, धै ङ्यो नास तरिब् आरे, बिसि खाबइ सेइमुँ?”
JON 3:10 छले परमेश्‍वरजी चमैं ताँन खेंमैंए आछ्याँबै के लबै घ्याँ पिसि एखब् म्रोंइ, खीए खोंर ल्हयो खइ। छतसि खीजी सहर नास लम् बिब् धोंले सहर नास आल।
JON 4:1 दिलेया चु ताँमैं योनाइ तिफुँइ आखोसि झन् बेल्‍ले ह्रिस खइ।
JON 4:2 झाइले चइ याहवेहने प्राथना लसि बिइ, “ओ याहवेह, ह्रोंसए ह्‍युलर मुँबै त्हेर ङइ बिब् धोंन् तइ, आङिं वा? छतसि ङ तर्शिशर ह्‍याबै सैं लइ, तलेबिस्याँ क्हि दयाम्हाँया लबै परमेश्‍वर ग, ल्हयो लमुँ, ह्रिस खबर क्हैमुँ धै बेल्‍ले थेबै म्हाँया लम्। धै नास लबै ताँउँइँले सैं एम् बिसि ङइ सेइमुँ।
JON 4:3 छतसि ओ याहवेह, ङ तोगो क्हिने यो छ्युँ लमुँ, ङए सो ङउँइँले बोद्, ङए ल्हागिर सोब् भन्दा सिब छ्याँब तम्।”
JON 4:4 छबिमा याहवेहजी बिइ, “ह्रिस खबै हग क्हिल् मुँ रो वा?”
JON 4:5 झाइले योना सहरउँइँले त्होंसि सहरए पूर्वउँइँ मुँबै क्ल्ह्‍यो घ्रिर ह्‍यासि टिइ। चर चइ ह्रोंस टिबै प्ह्रों घ्रि लसि टिइ। च प्ह्रों न्होंर टिसि तारे चु सहरलाइ तो तब् मुँगे बिसि ङ्‍ह्‍योरिइ।
JON 4:6 झाइले याहवेह परमेश्‍वरजी लौकाए धुँ घ्रि म्‍लोमिंइ। धै योनाए क्रर छरि तसि त्हिंयाँइ आख्रोंरिगे बिसि च धुँ बडिमिंइ। च लौकाइ छरि लमा योना बेल्‍ले सैं तोंइ।
JON 4:7 दिलेया प्हन्हग्धों मि म्रोंबि छेमा परमेश्‍वरजी च लौकए धुँलाइ चबर प्हुँलुँ घ्रि कुलइ, धै प्हुँलुँइ धुँ थोवामा लौकए धुँ ङ्योंलोंयाइ।
JON 4:8 झाइले त्हिंयाँ खमा परमेश्‍वरजी पूर्वउँइँले बेल्‍ले छबै खैं कुल्मिंइ। योनाए क्रर त्हिंयाँइ बेल्‍ले ख्रोंमा योना सैं आचि आचि तबर होंइ। धै “ङ सोब् भन्दा सिब छ्याँब तमल!” बिसि सैं च्योंब् लइ।
JON 4:9 परमेश्‍वरजी योनाने बालु बिइ, “लौकाए धुँ सियामा क्हि च्हौ थेबै ह्रिस तले खल?” योनाइ बिइ, “ङ ह्रिस खब ठिक मुँ! ङ च्हौ ल्हें ह्रिस खइ ङ सिबर होंइ!”
JON 4:10 याहवेहजी बिइ, “चु धुँलाइ क्हिइ रुँइँ आरुँइ, ताब् स्युइबै या आल। दिलेया क्हिइ तोइ दु:खै आलबै चु धुँ सियामा क्हि च्हौ थेबै न्हुँ लब् वा? चु धुँ म्हुँइँस तिरोर्न म्‍लोइ, धै म्हुँइँस तिरोर्न सियाइ।
JON 4:11 दिलेया निनवे सहरर छ्याँब आछ्याँब फेलल् आखाँबै लाख घ्रिसे ङ्हिस्यु हजार भन्दा ल्हें म्हिमैं मुँ, धै ख्योदोमैं या चर ल्हेंन् मुँ। च थेबै सहरए ल्हागिर ङइ न्हुँ लल् आत्हुब् आ?”
MAT 1:1 चु येशूए खलकर्बै ताँ ग। येशू खीए खे, दाऊद म्रुँए हाँगउँइँले फिब् ग। दाऊद स्‍योंम्‍बै खे अब्राहामए हाँगउँइँले फिब् ग। च हाँगर्बै खेमैंए मिं छाब् मुँल:
MAT 1:2 अब्राहामए च्‍हए मिं इसहाक मुँल। इसहाकए च्‍ह याकूब मुँल। याकूबए च्‍हमैं यहूदा नेरो चए आघें-अलिमैं मुँल।
MAT 1:3 यहूदाए च्‍ह ङ्हिंए मिं फारेस नेरो जाहेर मुँल। (चमैंए आमाए मिं तामार मुँल।) फारेसए च्‍ह हेस्रोन मुँल। हेस्रोनए च्‍ह आराम मुँल।
MAT 1:4 आरामए च्‍ह अम्‍मीनादाब मुँल। अम्‍मीनादाबए च्‍ह नहशोन मुँल। नहशोनए च्‍ह सल्‍मोन मुँल।
MAT 1:5 सल्मोनए च्ह बोअज मुँल। बोअजए आमा राहाब मुँल। बोअजए च्‍ह ओबेद मुँल। (ओबेदए आमा रूथ मुँल।) ओबेदए च्‍ह यिशै मुँल।
MAT 1:6 यिशैए च्‍ह दाऊद म्रुँ मुँल। दाऊद म्रुँए च्‍ह सोलोमन मुँल। सोलोमनए आमा बतसेबा मुँल। बतसेबाए ब्ह्‍या ओंसों उरियाहने तल।
MAT 1:7 सोलोमनए च्‍ह रहबाम मुँल। रहबामए च्‍ह अबिया मुँल। अबियाए च्‍ह आसा मुँल।
MAT 1:8 आसाए च्‍ह यहोशापात मुँल। यहोशापातए च्‍ह यहोराम मुँल। यहोरामए च्‍ह उज्‍जियाह मुँल।
MAT 1:9 उज्‍जियाहए च्‍ह योताम मुँल। योतामए च्‍ह आहाज मुँल। आहाजए च्‍ह हिजकिया मुँल।
MAT 1:10 हिजकियाए च्‍ह मनश्‍शे मुँल। मनश्‍शेए च्‍ह आमोन मुँल। आमोनए च्‍ह योसिया मुँल।
MAT 1:11 योशियाहए च्‍हमैं यकोनियास नेरो चए अलिमैं मुँल। चमैं शत्तुरमैंइ ट्होवासि बेबिलोन ह्‍युलउँइँ बोयाबै त्हे भन्दा ओंसोंन् फिबै म्हिमैं मुँल।
MAT 1:12 क्हाइ बोयाबै लिउँइँ फिब्मैं यकोनियासए च्‍ह शालतिएल मुँल। शालतिएलए च्‍ह यरुबाबेल मुँल।
MAT 1:13 यरुबाबेलए च्‍ह अबिउद मुँल। अबिउदए च्‍ह एल्‍याकीम मुँल। एल्‍याकीमए च्‍ह आजोर मुँल।
MAT 1:14 आजोरए च्‍ह सादोक मुँल। सादोकए च्‍ह आखिम मुँल। आखिमए च्‍ह एलिउद मुँल।
MAT 1:15 एलिउदए च्‍ह एलाजार मुँल। एलाजारए च्‍ह मत्तान मुँल। मत्तानए च्‍ह याकूब मुँल।
MAT 1:16 याकूबए च्‍ह योसेफ मुँल। योसेफए प्ह्रेंस्यो मरियम मुँल। मरियम परमेश्‍वरजी कुल्मिंबै म्रुँ ख्रीष्‍ट येशूए आमा मुँल।
MAT 1:17 छले खे अब्राहामए पलोसेरो दाऊद म्रुँए पलो समा च्युसे प्लि पुस्‍ता तल। दाऊद म्रुँए पलोसेरो यहूदीमैंलाइ बेबिलोन ह्‍युलउँइँ बोयाबै त्हे समा अर्को च्युसे प्लि पुस्‍ता तल। झाइले च त्हेसेरो परमेश्‍वरजी कुलबै म्रुँ ख्रीष्‍ट फिबै त्हे समा च्‍योमा अर्को च्युसे प्लि पुस्‍ता तल।
MAT 1:18 येशू ख्रीष्‍ट छले फिइ। खीए आमा मरियम योसेफ बिबै म्हिने ब्ह्‍या लब् बिसि ह्रिथेंल। चमैं ब्ह्‍या लब् भन्दा ओंसों मरियमइ परमेश्‍वरए पबित्र प्ल्हए शक्‍तिउँइँले प्‍हसे नोन बिसि योसेफइ था सेइ।
MAT 1:19 दिलेया योसेफ धर्मि म्‍हि मुँल। छतसि चइ मरियम फा पिन् आलल्‍ले खाबज्यै था आसेन्‍ले वाबै सैं लइ।
MAT 1:20 दिलेया योसेफइ सैं न्‍हों-न्हों चु ताँ मैंरिमा परमेश्‍वरउँइँले युबै स्‍वर्गदूतजी चए म्‍होंडर म्रोंयुसि चने बिइ, “ओ दाऊदए खलकर्बै योसेफ, क्हिए प्ह्रेंस्यो मरियमलाइ तोइ आङ्हाँन्‍ले ब्ह्‍या लद्। तलेबिस्याँ चइ पबित्र प्ल्हउँइँले प्‍हसे नोइमुँ।
MAT 1:21 चइ च्‍ह घ्रि फिब्‍मुँ। क्हिइ खीए मिं येशू थेंब्मुँ। तलेबिस्याँ खीजी ह्रोंसए म्‍हिमैंलाइ चमैंए पापउँइँले जोगेमिंब्‍मुँ।”
MAT 1:22 अगमबक्‍ताइ बिबै ताँ पूरा तबै ल्हागिर्न छले तब् ग:
MAT 1:23 “ङ्ह्‍योद्! कन्ये घ्रिइ प्हसे नोसि च्ह घ्रि फिब्मुँ। धै म्हिमैंइ खीए मिं इम्मानुएल थेंब्मुँ” इम्मानुएल बिब परमेश्‍वर ङ्योने टिमुँ बिब् ग।
MAT 1:24 योसेफ न्हरुउँइँले छोरसि परमेश्‍वरए स्‍वर्गदूतइ बिब् धोंलेन् चइ ह्रोंसए प्ह्रेंस्यो मरियम ह्रोंसनेन् थेंइ।
MAT 1:25 दिलेया मरियमइ प्हसे आफिन् समा योसेफ ह्रोंसए प्‍ह्रेंस्‍यो मरियमने बालु आरो। झाइले च्‍ह फिबै लिउँइँ योसेफइ च्हए मिं “येशू” थेंइ।
MAT 2:1 यहूदीया ह्‍युलर्बै बेथलेहेम बिबै नाँसर हेरोद बिबै म्रुँए पलोरि येशू फिल। येशू फिबै लिउँइँ स्यारर्बै ङ्‌ह्‍योब् लिब्मैं यरूशलेमर फेखइ।
MAT 2:2 च ङ्‌ह्‍योब् लिब्मैंइ बिइ, “यहूदीमैंए म्रुँ तसि फिबै कोलो खनिर मुँ? तलेबिस्याँ खी फिइमुँ बिसि सेल् पिंबै मुसारा ङिइ स्यारउँइँले त्‍होंब म्रोंइ। छतसि खीलाइ फ्योबर ङि चुर खइमुँ।”
MAT 2:3 चु ताँ थेसि हेरोद म्रुँ बेल्‍ले आतिदिइ धै यरूशलेमथेंमैं या ताँन् आतिदिइ।
MAT 2:4 छतमा हेरोद म्रुँइ ख्रो पिंबै खेगि चिब्मैं नेरो शास्‍त्रिमैं खागु लसि “परमेश्‍वरजी कुल्मिंबै म्रुँ खनिर फिब्मुँ?” बिसि ङ्योएइ।
MAT 2:5 चमैंइ बिइ, “यहूदीया ह्‍युलर्बै बेथलेहेम नाँसर, तलेबिस्याँ अगमबक्‍ताइ ओंसोंन् छले प्‍ह्रिइमुँ:
MAT 2:6 ‘ओ यहूदा ह्‍युलर्बै बेथलेहेम नाँस, क्हि तो सैरै या यहूदार्बै सहरमैं भन्दा च्‍योंब आरे। तलेबिस्याँ क्हिउँइँलेन् चिब घ्रि त्‍होंब्‍मुँ। खीजीन् ङए म्‍हिमैं अथवा इस्राएलीमैंए छैं लब्‍मुँ।’”
MAT 2:7 च्हमा हेरोद म्रुँइ च स्यारउँइँले खबै ङ्‌ह्‍योब् लिब्मैं खाबज्यै आसेल्‍ले हुइसि मुसारा खोंयों म्रोंल बिसि चमैंउँइँले था सेइ।
MAT 2:8 झाइले चमैंने बिइ, “क्‍हेमैं बेथलेहेम नाँसर ह्‍यासि च कोलो छेन्‍ले म्‍हैद्, धै योंबै लिउँइँ कोलो खनिर मुँ बिसि ङने या बिद्। ङै या खीलाइ फ्योबर ह्‍याम्।”
MAT 2:9 म्रुँइ बिब् ङिसि चमैं ह्रोंसए घ्याँ क्‍हासि ह्‍याइ। छले ह्‍याम चमैंइ स्यारउँइँ म्रोंबै मुसार खेंमैंए ओंसों-ओंसों ह्‍याइ। धै कोलो मुँबै क्ल्ह्‍योर फेसि च मुसारा चर्न टिइ।
MAT 2:10 छले चमैंइ च सारा म्रोंमा चमैं बेल्‍ले सैं तोंइ।
MAT 2:11 झाइले चमैं च धिं न्‍होंर होंमा कोलो खीए आमा मरियमए क्‍वेंदर म्रोंइ। धै पत्खु तसि खीलाइ फ्योसि ह्रोंसए नेंदो फैसि मारा, छ्याँबै थाँ खबै धुप नेरो मूर्र बिबै लिंबै थाँ खबै छ्युगु भेटिमैं पिंइ।
MAT 2:12 झाइले एह्‍याबै त्हेर परमेश्‍वरजी “हेरोद म्रुँ ङाँर आह्‍याद्,” बिसि चमैंने म्होंडर बिइ। छतसि चमैं स्योबै घ्‍याँउँइँले ह्रोंसए ह्‍युलर एह्‍याइ।
MAT 2:13 च ङ्‌ह्‍योब् लिब्मैं ह्‍याबै लिउँइँ स्‍वर्गदूत घ्रिइ योसेफने म्‍होंडर बिइ, “रेद्, कोलो नेरो खीए आमा बोसि मिश्र ह्‍युलउँइँ ह्‍याद्। ङइ च ह्‍युलउँइँले आहुइन् समा चर्न टिरिद्, तलेबिस्याँ हेरोदइ चु कोलो सैबर म्है प्रइमुँ।”
MAT 2:14 झाइले योसेफ रेसि आमा नेरो च्ह बोसि च म्‍हुँइँसर्न मिश्र ह्‍युलउँइँ त्होंयाइ।
MAT 2:15 झाइले हेरोद आसिन् समा चमैं मिश्र ह्‍युलर्न टिरिइ। “ङइ ह्रोंसए च्‍ह मिश्र ह्‍युलउँइँले हुइमुँ।” बिसि अगमबक्‍ताउँइँले याहवेहजी ओंसोंन् बिबै ताँ छले पूरा तइ।
MAT 2:16 ङ्‌ह्‍योब् लिब्मैंइ खीने स्योर तेना बिब् सेसि हेरोद बेल्‍ले ह्रिस खइ। चइ मुसारा म्रोंबै त्हे च ङ्‌ह्‍योब् लिब्मैंने ङ्योएसि ओंसोंन् था सेल् खाँल। छतमा चमैंइ बिबै त्हे मैंसि हेरोदइ बेथलेहेम नेरो च खागुबै नाँसजरेबै ङ्हिंदि न्होंर्बै मुँयुँ कोलोमैं ताँन् सैबर ल्‍हैदिइ।
MAT 2:17 छले यर्मिया अगमबक्‍ताइ बिबै ताँ पूरा तइ। चइ स्‍योंमन् छले प्‍ह्रिथेंल:
MAT 2:18 “रामा नाँसर क्रोब्-म्‍होब् तसि दुःखए कै म्‍हिमैंइ थेइ। स्‍योंम्‍बै राहेलए खलकर्बै आमामैं ह्रोंसए कोलोमैंए ल्हागिर क्रोसेन् मुँ। चमैंए सैं खैलसे क्‍होल् आङिं। तलेबिस्याँ चमैंए कोलोमैं ताँन् सियाल।”
MAT 2:19 हेरोद म्रुँ सियाबै लिउँइँ याहवेहए स्‍वर्गदूत घ्रि मिश्र ह्‍युलरि योसेफए म्‍होंडर धबै बिइ।
MAT 2:20 “ओ योसेफ, रेद्, कोलो नेरो आमा बोसि इस्राएल ह्‍युलर एह्‍याद्। तलेबिस्याँ कोलो सैल् म्‍हैबै म्‍हिमैं सिल् खाँइमुँ।”
MAT 2:21 छबिमा योसेफ रेसि कोलो नेरो आमा बोसि इस्राएल ह्‍युलर एखइ।
MAT 2:22 दिलेया यहूदीयार अर्खिलाउस ह्रोंसए आबा हेरोदए क्‍ल्‍ह्‍योरि म्रुँ तइमुँ बिबै ताँ योसेफइ थेइ। चु ताँ थेसि योसेफ छाइ ह्‍याब ङ्हिंइ। छतमा म्‍होंडरि धबै परमेश्‍वर चने पोंइ। खीजी बिब् म्हाँदिसि योसेफ गालील ह्‍युलर ह्‍याइ।
MAT 2:23 चर ह्‍यासि नासरत बिबै सहरर टिइ। खीने नासरतथें बिब्‍मुँ बिसि अगमबक्‍ताइ स्‍योंमन् पोंबै ताँ छले पूरा तइ।
MAT 3:1 च त्हेर बप्‍तिस्‍मा पिंबै यूहन्‍ना यहूदीया ह्‍युलर्बै क्यु आयोंबै क्ल्ह्‍योजरे खसि परमेश्‍वरए ताँ छले बिमिंबर होंइ।
MAT 3:2 “पाप लब् पिसि परमेश्‍वरउँइँ सैं एद्, तलेबिस्याँ स्‍वर्गर्बै ग्याल्स चेंदोन् खइमुँ।”
MAT 3:3 स्‍योंम्‍बै यशैया बिबै अगमबक्‍ताइ छ बिसि यूहन्‍नाए बारेर प्‍ह्रिल: “क्यु आयोंबै क्ल्ह्‍योर म्‍हि घ्रिइ कै तेसि छ बिसिन् मुँ, ‘याहवेहए ल्हागिर घ्‍याँ छ्याद्! खी प्रबै ल्हागिर आछ्याँबै घ्‍याँमैं क्योंएँन्!’”
MAT 3:4 यूहन्‍नाइ सलुए मुइए क्‍वें खिमल, ट्हुबिए पेटि खिमल, तिरि नेरो क्‍वे खुदु चमल।
MAT 3:5 यरूशलेम सहरउँइँले, यहूदीया ह्‍युलर्बै ताँन् क्‍ल्‍ह्‍यो-क्‍ल्‍ह्‍योउँइँले नेरो यर्दन स्‍यों खागुबै नाँसजरेउँइँले ल्‍हें म्‍हिमैं च ङाँर ह्‍यारिल।
MAT 3:6 झाइले चमैं ताँनइ “ङिइ पाप लइमुँ,” बिसि यूहन्‍नाउँइँले यर्दन स्‍योंर प्‍ल्हुँसि बप्‍तिस्‍मा किंइ।
MAT 3:7 दिलेया फरिसीमैं नेरो सदुकीमैं न्होंर्बै ल्हें म्हि या खीने बप्‍तिस्‍मा किंबर खब् म्रोंसि यूहन्‍नइ चमैंने बिइ, “ओ प्‍हुरि धों तबै म्‍हिमैं, परमेश्‍वरए ह्रिसउँइँले स्योल् खाँम् बिसि खाबइ क्‍हेमैंने बिइ?
MAT 3:8 बरु परमेश्‍वरउँइँ सैं एसि छ्याँबै केमैं लसि उँइँन्।
MAT 3:9 ‘ङि यहूदीमैं परमेश्‍वरजी त्‍हाँबै म्‍हि अब्राहमए खलकर्बै तसेरो ङि परमेश्‍वरए सजैंउँइँले स्योल् योंब्‍मुँ,’ बिसि ह्रों-ह्रोंसन् बिआप्रद्। तलेबिस्याँ ङ क्हेमैंने बिमुँ, परमेश्‍वरजी अब्राहमए ल्हागिर चु युँमाउँइँले या सन्‍तान् लमिंल् खाँम्।
MAT 3:10 तोगोंन् सिं धुँर त फेल् खाँइँमुँ। छतसि छ्याँबै रो आरोबै ताँन् सिंधुँ परमेश्‍वरजी थोवाब्मुँ, धै मिर ख्रोंवाब्‍मुँ।
MAT 3:11 “क्‍हेमैंए सैं परमेश्‍वरउँइँ एइ बिब् उँइँबर ङइ क्‍युर प्‍ल्हुँमिंसि बप्‍तिस्‍मा पिंम्। दिलेया ङए लिलि युबै म्‍हि ङ भन्दा बेल्‍ले शक्‍ति मुँब मुँ। खीजी क्‍हेमैं परमेश्‍वरए पबित्र प्ल्ह नेरो मिइ बप्‍तिस्‍मा पिंब्‍मुँ। ङम् खीए जुत्ता नोबै लायगर्बै आरे।
MAT 3:12 सोंग्या टाबै नउलि खीए योर्न मुँ। खीजी ताँन् खालर्बै सोंग्या छेन्‍ले टाब्‍मुँ, धै खीए गहुँ धन्‍सारर खागु लब्मुँ, धै ताँन् पुइ खागु लसि खोंयोंइ आसिबै मिर ख्रोंवाब्‍मुँ।”
MAT 3:13 झाइले येशू यूहन्‍नाने बप्‍तिस्‍मा किंबर गालील ह्‍युलउँइँले यर्दन स्‍योंर युइ।
MAT 3:14 दिलेया यूहन्‍नाइ येशूने “क्‍हिजी ङलाइ बप्‍तिस्‍मा पिंल् त्‍हुब् ग। क्हिजी ङने बप्‍तिस्मा किंब् आ?” बिसि बप्‍तिस्‍मा किंबर क्वेबर होंइ।
MAT 3:15 दिलेया येशूजी यूहन्‍नाने बिइ, “तोगो छान् तरिगे। छले ङ्योइ परमेश्‍वरजी बिब् धोंले लब् छ्याँब मुँ।” छबिमा यूहन्‍नाइ येशूलाइ बप्‍तिस्‍मा पिंइ।
MAT 3:16 बप्‍तिस्‍मा किंल् खाँबै तोदोंन् येशू क्‍युउँइँले बैरु त्‍होंखमा स्वर्ग थोंसि परमेश्‍वरए प्ल्ह तोंगु धोंले ह्रोंसए फिर युरिब खीजी म्रोंइ।
MAT 3:17 झाइले “चु ङइ खोबै च्‍ह ग, चु म्रोंसि ङ बेल्‍ले सैं तोंइमुँ बिबै कै घ्रि स्वर्गउँइँले युइ।”
MAT 4:1 झाइले दुष्‍टउँइँले येशूए जाँच लबर परमेश्‍वरए पबित्र प्ल्हजी येशूलाइ क्यु आयोंबै क्ल्ह्‍योरि बोयाइ।
MAT 4:2 चर प्लिच्‍यु त्हिंइ प्लिच्यु म्हुँइँस समा बर्त टिमा येशूलाइ फो ख्रेंइ।
MAT 4:3 छतमा दुष्‍टइ येशू ङाँर खसि बिइ, “क्‍हि क्‍ह्रोंसेंन परमेश्‍वरए च्‍ह ग बिस्‍याँ चु युँमामैं ‘क्हें तयाद्,’ बिद्।”
MAT 4:4 छबिमा येशूजी बिइ, “परमेश्‍वरए छ्वेर छले प्‍ह्रिइमुँ, ‘चबै सैइ मत्‍त्रे म्हि सोल् आखाँ, परमेश्‍वरए सुँउँइँले त्‍होंबै ताँमैंउँइँले म्‍हि सोल् खाँम्।’”
MAT 4:5 छलेन दुष्‍टइ येशूलाइ यरूशलेम सहरर बोसि मन्दिरए धाँसे नुबै च्‍होर राल् पिंसि
MAT 4:6 खीने बिइ, “क्‍हि क्‍ह्रोंसेंन परमेश्‍वरए च्‍ह ग बिस्‍याँ छुइले क्युरु फाल् झोंन्। तलेबिस्याँ ‘परमेश्‍वरजी क्हिलाइ जोगेमिंबर ह्रोंसए स्‍वर्गदूतमैं कुलब्मुँ। धै क्हिए प्हले युँमार आथुरिगे बिसि चमैंए योइ क्‍हि तोब्मुँ,’ बिसि छ्वेर प्ह्रिइमुँ।”
MAT 4:7 येशूजी चने “‘क्‍हिइ याहवेह ह्रोंसए परमेश्‍वरए जाँच आलद्!’ बिसि छ्वेर प्‍ह्रिइमुँ,” बिइ।
MAT 4:8 धबै दुष्‍टइ येशू नुबै कोंर बोसि ह्‍युलर्बै ताँन् ग्याल्स नेरो चर्बै ताँन् छ्याँबै सैमैं खीने उँइँसि
MAT 4:9 खीने बिइ, “क्‍हिजी पद्खु तसि ङलाइ फ्‍योइ बिस्‍याँ ङइ चु ताँन् सैमैं क्हिलाइ पिंस्यो।”
MAT 4:10 छबिमा येशूजी चने बिइ, “दुष्‍ट, क्हि ङ ङाँइँले ह्रेंगो तयाद्! तलेबिस्याँ ‘क्‍हिइ याहवेह ह्रोंसए परमेश्‍वरलाइ फ्‍योदु, धै खीए सेवा मत्‍त्रे लद्,’ बिसि परमेश्‍वरए छ्वेर प्‍ह्रिइमुँ।”
MAT 4:11 येशूजी छ बिबै तोदोंन् दुष्‍ट खीलाइ वाथेंसि ह्‍याइ। धै स्‍वर्गदूतमैं युसि येशूए सेवा लइ।
MAT 4:12 हेरोद म्रुँइ यूहन्‍ना झेलर च्युवाइमुँ बिबै ताँ थेसि येशू गालील ह्‍युलर्न एइ।
MAT 4:13 येशूजी ह्रोंसए नासरत बिबै नाँस पिसि कफर्नहुम बिबै नाँसर युसि टिबर होंइ। चु सहर जबूलून नेरो नप्‍ताली ह्‍युलए चेंदो मा ङ्युए छेउर मुँ।
MAT 4:14 स्‍योंमन् यशैया अगमबक्‍ताइ बिबै ताँ छले पूरा तइ:
MAT 4:15 “ओ यर्दन स्‍योंए क्‍योंजा मा ङ्युउँइँले ह्‍याबै घ्‍याँर मुँबै जबूलून नेरो नप्‍तालीथेंमैं नेरो अरू ह्रेंमैं टिबै गालील ह्‍युल।
MAT 4:16 मिछु खैबर टिबै म्हिमैंइ थेबै चारबै ह्‍वे म्रोंइमुँ। सिल् त्‍हुबै मिछु खैबै ह्‍युलर टिब्मैंए फिर ह्‍वे घ्रि चारइमुँ।” यशैयाइ बिबै ताँ क्ह्रोंसेंन तबर छ तइ।
MAT 4:17 येशू कफर्नहुम नाँसर टिबै त्हे ओंनोंन् म्हिमैंने “पाप केमैं लब् पिसि परमेश्‍वरउँइँ सैं एद्, तलेबिस्याँ स्‍वर्गर्बै ग्याल्स (राज्‍य) चेंदोन् खइमुँ बिबर होंइ।”
MAT 4:18 तिगें येशू गालील बिबै मा ङ्युँइए छेउजरे प्ररिमा सिमोन पत्रुस नेरो चए अलि अन्‍द्रियास ङ्हिंना-ङ्हिंन् मा ङ्युँइर जाल प्रिंरिब म्रोंइ। तलेबिस्याँ चमैं ताँग क्हाब्‍मैं मुँल।
MAT 4:19 येशूजी चमैंने बिइ, “ङए लिलि प्रद्। ताँग खुब् धोंले अरू म्‍हिमैं ङ ङाँर खुपखब्‍मैं ङइ क्हेमैं लमिंब्मुँ।”
MAT 4:20 येशूजी छ बिबै तोदोंन् चमैंइ खेंमैंए जालमैं वाथेंसि खीए लिलि ल्‍हैदिइ।
MAT 4:21 येशू छाइले ह्‍यारिमा अर्को त्येमैं ङ्हिं, जब्दियाए च्‍हमैं याकूब नेरो यूहन्‍ना खेंमैंए आबाने डुँङ्गार क्हुँसि ह्रोंसए जाल टुरिब म्रोंसि खीजी चमैं या हुइ।
MAT 4:22 हुइबै तोदोंन् चमैंज्‍यै या खेंमैंए डुँङ्गा नेरो आबा वाथेंसि येशूए लिलि ल्‍हैदिइ।
MAT 4:23 येशू गालील ह्‍युल तिगोंन् स्‍युरदै चमैंए च्हों धिंजरेबै म्हिमैंने परमेश्‍वरए ताँमैं लोमिंदै स्‍वर्गर्बै ग्याल्सए बारेर सैं तोंबै ताँमैं बिप्रमल। धै ताँन् खालर्बै नब् छब्मैं नेरो मोंइ स्याबै म्‍हिमैं या सल् लमिंमल।
MAT 4:24 छले सिरिया ह्‍युल तिगोंन् येशूजी लबै औदिबै केमैंए बयन थेनेइ। छतमा म्‍हिमैंइ ननाओलिबै नब्‍मैं, मोंइ स्‍याब्‍मैं, र बेथाइ स्याब्‍मैं, स्याले बेथाइ स्याब्‍मैं ताँन् म्हिमैंइ खी ङाँर पखइ, धै खीजी चमैं ताँन् सल् लमिंमल।
MAT 4:25 छतमा गालील ह्‍युलउँइँले, डिकापोलिस ह्‍युलउँइँले, यरूशलेम सहरउँइँले, यहूदीया ह्‍युलउँइँले नेरो यर्दन स्‍यों क्‍योंजाउँइँले ल्हें म्हि खसि खीए लिलि ल्हैदिइ।
MAT 5:1 (म्हिमैंए हुल म्रोंसि येशू कोंउँइँ क्रेयाइ। चर ह्‍यासि क्हुँरिमा खीए चेलामैं खी ङाँर खइ।
MAT 5:2 झाइले खीजी चमैंने छ बिसि लोमिंबर होंइ:
MAT 5:3 “परमेश्‍वरजी शक्‍ति आपिंइ बिस्‍याँ ङइ तोइ लल् आखाँ बिबै म्‍हिमैंइ आशिक योंब्मुँ, तलेबिस्याँ स्‍वर्गर्बै ग्याल्स चमैंल् ग।
MAT 5:4 शोक लब्‍मैंइ आशिक योंब्मुँ, तलेबिस्याँ परमेश्‍वरजी चमैंए सैं क्‍होल् लमिंब्‍मुँ।
MAT 5:5 थेब् आप्‍हैंब्‍मैंइ आशिक योंब्मुँ, तलेबिस्याँ चमैंइ परमेश्‍वरउँइँले ह्‍युलर्बै हग योंब्‍मुँ।
MAT 5:6 फो ख्रेंबर कैं, क्यु पिबर क्यु म्हैब् धोंले परमेश्‍वर म्हैब्मैंइ आशिक योंब्मुँ, तलेबिस्याँ चमैंए सैंर मैंब योब्मुँ।
MAT 5:7 अरूए फिर ल्हयो खब्‍मैंइ आशिक योंब्मुँ, तलेबिस्याँ परमेश्‍वरजी चमैंए फिर ल्हयो खब्‍मुँ।
MAT 5:8 छ्याँबै सैं प्‍ह्‍याब्‍मैंइ आशिक योंब्मुँ, तलेबिस्याँ चमैंइ परमेश्‍वर म्रोंल् योंब्‍मुँ।
MAT 5:9 आक्‍ह्रिबै म्हिमैं क्ह्रिमिंब्मैंइ आशिक योंब्मुँ, तलेबिस्याँ परमेश्‍वरजी चमैंने खीए सन्‍तान बिब्‍मुँ।
MAT 5:10 परमेश्‍वरए मिंर के लमा दुःख योंब्‍मैंइ आशिक योंब्मुँ, तलेबिस्याँ स्‍वर्गर्बै ग्याल्स चमैंलन् ग।
MAT 5:11 “क्हेमैं ङए लिलि प्रबइले म्‍हिमैंइ क्‍हेमैं स्यारब, ह्रुगुदिब, क्हेमैंए बिरोधर स्योलिबै ताँमैं पोंइ बिस्याँ क्हेमैंइ आशिक योंब्मुँ।
MAT 5:12 च त्हेर क्‍हेमैं बेल्‍‍ले सैं तोंन्, तलेबिस्याँ स्‍वर्गर क्‍हेमैंए इनाम थेब तब्मुँ। छलेन स्‍योंम्बै अगमबक्‍तामैंलाज्यै या म्‍हिमैंइ ह्रुगुदिल।
MAT 5:13 “क्हेमैं ह्‍युलर्बै चज ग, दिलेया चजए स्वाद् म्‍हयाइ बिस्याँ च धबै तोइ स्वाद खल् लब? छाबै चज तो ललेया धबै स्‍वाद आखा, धै तो केरै आत्‍हुब तयाम्। छाबै चज बैरु भ्‍योंवासि म्हिमैंए प्हलेइ प्‍लेवाब्‍मुँ।
MAT 5:14 “झाइले अर्को ताँ, क्‍हेमैं ह्‍युलर्बै चारबै ह्‍वे ग। कोंर बनेबै सहर लोल् आखाँ।
MAT 5:15 म्हिमैंइ पानस म्रोसि पथि न्होंर आथें। बरु धिं न्होंर मुँब्मैंइ मि म्रोंरिगे बिसि पानस नुबै क्‍ल्‍ह्‍योर थेंम्।
MAT 5:16 छलेन क्‍हेमैंए छ्याँबै बाँनि अरू म्‍हिमैंइ म्रोंरिगे। छले क्‍हेमैंइ लबै छ्याँबै के म्हिमैंए उँइँर चाररिगे। धै चमैंइ स्वर्गर मुँबै क्हेमैंए परमेश्‍वर आबाए मान लरिगे।
MAT 5:17 “ङ मोशाइ प्‍ह्रिबै ठिमर्बै ताँमैं नेरो अगमबक्‍तामैंए ताँमैं थोबर युब बिसि क्हेमैंइ आमैंन्। च ताँमैं पूरा लबर ङ युब् ग।
MAT 5:18 तलेबिस्याँ क्ह्रोंसेंन ङ क्हेमैंने बिमुँ, स्वर्ग नेरो पृथ्‍बी नास आतन् समा ठिमर प्ह्रिबै च्‍योंब भन्दा च्‍योंबै ताँ या पूरा आतन्ले म्‍हरिब् आरे।
MAT 5:19 छतसि ठिमर प्ह्रिबै च्‍योंब भन्दा च्‍योंबै ताँ या आम्हाँदिसि अरूमैंने या ‘च ताँ ङिंल् आत्‍हु’ बिसि लोमिंबै म्हि स्वर्गए ग्याल्सरि च्‍योंब भन्दा च्‍योंब तब्‍मुँ। दिलेया ठिमर्बै ताँ ह्रोंसज्यै ङिंब धै अरूमैंने या ङिंल् त्‍हुम् बिसि लोमिंबै म्‍हि स्वर्गए ग्याल्सरि थेब तब्‍मुँ।
MAT 5:20 “तलेबिस्याँ ङ क्‍हेमैंने बिमुँ, शास्‍त्रिमैंइ नेरो फरिसीमैंइ लबै केमैं भन्दा क्हेमैंइ लबै केमैं छ्याँब आतइ बिस्याँ क्हेमैं खैलसेया स्वर्गर्बै ग्याल्सरि होंल् योंरिब आरे।
MAT 5:21 “‘क्हिइ म्हि आसैद्! म्‍हि सैबै म्हिइ दण्‍ड योंल् त्‍हुम्,’ बिसि स्योंम्बै म्हिमैंने छ बिब क्हेमैंइ थेइमुँ।
MAT 5:22 दिलेया ङ क्‍हेमैंने बिमुँ, ह्रोंसए अलिने ह्रिस खबै म्हिइ दण्‍ड योंम्, धै ह्रोंसए अलिने म्हि आच्हिल्‍ले पोंबै म्हिइ थेबै म्हि च्होंए उँइँर रामा ज्वाफ पिंल् त्हुम्। छलेन ह्रोंसए अलिने ‘क्‍हि आमादु’ ग बिबै म्हि नर्गर्बै मिर फेल् त्हुब्मुँ।
MAT 5:23 छतसि क्‍हिइ भेटि पिंबै क्ल्ह्‍योर ह्‍यासि परमेश्‍वरए मिंर भेटि पिंबर होंमा क्हिए अलिने आक्ह्रिबै ताँ क्हिए सैंर मैंस्याँ
MAT 5:24 क्हिए भेटि चर्न वाथेंसि ह्‍याद्। ओंसों ह्रोंसए अलिने क्ह्रिदु, धै खसि ह्रोंसए भेटि झोंन्।
MAT 5:25 “झाइले क्हिए शत्तुरने अदालतर ह्‍यामा घ्याँर्न चने क्ह्रियाद्। छ आलस्याँ चइ क्हि नियाधिशए योर पिवाब्मुँ। न्‍यायाधिशइ क्हि सिपाइमैंए योर पिवाब्मुँ, धै सिपाइमैंइ क्‍हि झेलर च्युवाब्‍मुँ।
MAT 5:26 क्ह्रोंसेंन ङ क्हेमैंने बिमुँ, क्हिइ फोल् त्हुबै मुइ ताँन् आफोन् समा झेलउँइँले क्हि त्‍होंल् योंरिब् आरे।
MAT 5:27 “ब्यभिचार आलद् बिबै ताँ क्हेमैंइ थेइमुँ।
MAT 5:28 दिलेया ङ क्हेमैंने बिमुँ, च्हमिरि घ्रि म्रोंसि चने आछ्याँबै सैंले ङ्‍ह्‍योबै म्हिइ ह्रोंसए सैंर चने ब्यभिचार लल् खाँइमुँ!
MAT 5:29 छतसि क्‍हिए क्‍योलोउँइँबै मिइ क्‍हिलाइ पाप लबर ल्हैदिम् बिस्याँ च मि ट्हुइसि भ्‍योंवाँन्। तलेबिस्याँ मि घ्रिइ लबउँइँले ताँन् ज्यु नर्गर फेब् भन्दा पाप लबर ल्‍हैदिबै मि घ्रि भ्योंवाँब छ्याँब तम्।
MAT 5:30 छलेन क्‍हिए क्‍योलो योइ क्‍हिलाइ पाप लबर ल्‍हैदिम् बिस्‍याँ च क्‍याँसि भ्‍योंवाँन्। तलेबिस्याँ ताँन् ज्यु नर्गर फेब् भन्दा पाप लबर ल्‍हैदिबै यो घ्रि भ्योंवाँब छ्याँब तम्।
MAT 5:31 “‘प्ह्रेंस्यो वाबै म्‍हिइ पार लबै काउद प्‍ह्रिसि प्ह्रेंस्योने पिंल् त्हुम्,’ बिबै ताँ या स्योंम्बै म्हिमैंने बिल।
MAT 5:32 दिलेया ङइ क्‍हेमैंने तो बिम् बिस्‍याँ खाबइ ह्रोंसए प्‍ह्रेंस्‍यो अरू म्‍हिने फ्रें आक्ल्‍‍योंलेया च प्‍ह्रेंस्‍यो पार लम् बिस्याँ च प्‍ह्रेंस्‍योइ धबै ब्ह्‍‍या लमा च म्हिइ ह्रोंसए प्‍ह्रेंस्‍यो ब्यभिचार लल् पिंम्। धै च वाबै प्ह्रेंस्योने ब्ह्‍या लबै मुयुँज्यै या ब्यभिचार लम्।
MAT 5:33 “‘क्‍हेमैंइ स्योलिबै कसम आचद्। बरु याहवेहने लबै भकल पूरा लद्,’ बिसि स्योंम्बै म्हिमैंने बिबै ताँ या क्‍हेमैंइ थेइमुँ।
MAT 5:34 दिलेया ङ क्‍हेमैंने बिमुँ, क्‍हेमैंइ खोंयोंन् बिलै तोइ सैलै या कसम आचद्। स्‍वर्गए मिं किंसि कसम आचद्, तलेबिस्याँ स्वर्ग परमेश्‍वरए टिबै क्ल्ह्‍यो ग।
MAT 5:35 पृथ्‍बीए मिं किंसि कसम आचद्, तलेबिस्याँ च परमेश्‍वरए प्‍हले न्‍हेबै क्‍ल्‍ह्‍यो ग। झाइले यरूशलेमए मि किंसि कसम आचद्, तलेबिस्याँ च धाँसे थेबै म्रुँए सहर ग।
MAT 5:36 क्‍हिइ ह्रोंसए क्र छुइसि कसम आचद्, तलेबिस्याँ क्‍हिइ क्रप्हो घ्रि या तार्ग्‍याउँइँले म्‍लोंग्‍या, म्‍लोंग्‍याउँइँले तार्ग्‍या लल् आखाँ।
MAT 5:37 क्हेमैंइ पोंबै ताँमैंर ‘ङिंब् मुँस्याँ ङिंबन् बिदु, आङिंब् मुँस्याँ आङिंबन् बिद्।’ चु भन्दा ल्हें दुष्‍टउँइँले खम्।
MAT 5:38 “झाइले अर्को ताँ, ‘मिए साटोरि मि, सए साटोरि स किंल् त्‍हुम्’ बिसि शास्‍त्रिमैंइ लोमिंब क्‍हेमैंइ थेइमुँ।
MAT 5:39 दिलेया ङ क्हेमैंने बिमुँ, क्‍हिए न्होह्रों लब्‍मैंने खि आफोद्। खाबज्यै क्‍हिए क्‍योलोउँइँबै क्ह्राँबोर ल्हिस्‍याँ क्‍हिइ त्हेब्रेउँइँबै क्ह्राँबो या चउँइँ तोमिंन्।
MAT 5:40 छलेन खाबज्‍यै क्‍हिए कमिजए ल्हागिर अड्डार मुद्दा झोंसि किंल् म्हैस्‍याँ चलाइ क्‍हिए बक्‍खु या पिंवाँन्।
MAT 5:41 खाबज्यै क्‍हिने ‘घण्टा घ्रिदे ङए ति नोबिन् बिस्याँ’ घण्टा ङ्हिंदेन् चए ति नोबिन्।
MAT 5:42 म्हिमैंइ क्‍हिने तोइ ह्रिसयाँ पिंन्, धै क्‍हिने छे ह्रिब्मैंलाइ ‘आपिं!’ आबिद्।
MAT 5:43 “झाइले अर्को ताँ, ‘क्हिए ङ्‍हेब्-ट्हुब्मैंने म्हाँया लदु, धै शत्तुरमैं हेल् लद्’ बिसि शास्‍त्रिमैंइ लोमिंब क्‍हेमैंइ थेइमुँ।
MAT 5:44 दिलेया ङ क्‍हेमैंने बिमुँ, क्‍हेमैंइ ह्रोंसए शत्तुरमैं म्हाँया लद्, धै क्‍हेमैंलाइ ह्रुगुदिबै म्हिमैंए ल्हागिर प्राथना लसि परमेश्‍वरने आशिक ह्रिमिंन्।
MAT 5:45 छ लस्‍याँ मत्‍त्रे क्‍हेमैं स्‍वर्गर टिबै आबाए सन्‍तान तब्‍मुँ। तलेबिस्याँ परमेश्‍वरजी दुष्‍ट म्हिमैं नेरो छ्याँब् लब्मैं ङ्हिंना-ङ्हिंनए फिर त्‍हिंयाँ प्रेमिंमुँ, धै धर्मि नेरो पापिमैं ङ्हिंना ङ्हिंनए ल्हागिर नाँ युमिंइमुँ।
MAT 5:46 ह्रोंसने म्हाँया लब्‍मैंने मत्‍त्रे क्‍हेमैंइ म्हाँया लइ बिस्‍याँ क्हेमैंइ तो इनाम योंमुँ? रोमी म्रुँए ल्हागिर बालि रेब्मैंज्यै छान् आल रो वा?
MAT 5:47 क्‍हेमैंइ ह्रोंसए म्हिमैंलाइ मत्‍त्रे छ्याँब् लइ बिस्याँ अरूइ भन्दा थेबै के तो लइ रो? परमेश्‍वर आम्हाँदिब्मैंज्‍यै या छान् आल रो वा?
MAT 5:48 छतसि क्‍हेमैंए स्‍वर्गर टिबै आबा पक्‍का के लब् धोंले क्हेमैं या छलेन् पक्‍का के लल् त्हुमुँ।”
MAT 6:1 “छेनाले मैंन्, क्हेमैंइ धर्मए केमैं लमा म्‍हिमैंइ म्रोंरिगे बिसि चमैंए उँइँर आलद्। छ लस्याँ स्वर्गर मुँबै क्‍हेमैंए परमेश्‍वर आबाउँइँले क्हेमैंइ तोइ इनाम योंरिब् आरे।
MAT 6:2 “छतसि क्‍हेमैंइ दान पिंमा च्हों धिंजरे नेरो घ्‍याँजरे ‘ङइ छ लइ छु लइ’ बिदै आप्रद्। छलेम् फिब्लो पार्दिब्मैंइ खेंमैंइ लबै छ्याँबै केमैं म्‍हिमैंइ म्रोंरिगे बिसि छ्याँब् प्हैंदा ङ्हाँब्मैंइ घ्याँजरे उँइँ प्रम्। ङ क्ह्रोंसेंन क्हेमैंने बिमुँ चमैंइ योंल् त्हुबै इनाम योंल् खाँइमुँ।
MAT 6:3 छतसि क्‍हिइ दान पिंमा क्हिए क्योलो योइ पिंब त्हेब्रे योइ आसेरिगे।
MAT 6:4 क्‍हिइ दान पिंमा खाबज्यै या आसेल्‍ले पिंन्। आम्रोंल्‍ले पिंब् म्रोंबै क्‍हिए आबाजी क्‍हिलाइ इनाम पिंब्‍मुँ।
MAT 6:5 “झाइले क्हेमैंइ प्राथना लमा फिब्लो पार्दिब्मैंइ धोंले सुँइ स्यो सैंइ स्योले आलद्। चमैंइ अरू म्‍हिमैंइ म्रोंरिगे बिसि च्हों धिंजरे नेरो घ्याँए रेजरे रासि प्राथना लम्। ङ क्ह्रोंसेंन क्हेमैंने बिमुँ, चमैंइ योंल् त्हुबै इनाम योंल् खाँइमुँ।
MAT 6:6 छतसि क्‍हेमैंइ प्राथना लमा ह्रोंसए कोठा न्‍होंर होंनु, धै म्रा तोरसि आम्रोंल्‍ले मुँबै परमेश्‍वर आबाने प्राथना लद्। आम्रोंल्‍ले लबै केमैं म्रोंबै परमेश्‍वर आबाजी क्‍हेमैंलाइ इनाम पिंब्‍मुँ।
MAT 6:7 “झाइले क्‍हेमैंइ प्राथना लमा परमेश्‍वर आम्हाँदिब्मैंइ लब् धोंले केर आफेबै ताँफुँमैं फाक्‍कर्न ल्हेंन् आलद्। ल्हें ताँफुँमैं च्योसि प्राथना लस्‍याँ परमेश्‍वरजी खेंमैंइ लबै प्राथना थेम् बिसि चमैंइ मैंम्।
MAT 6:8 छतसि क्‍हेमैं चमैं धों आतद्, तलेबिस्याँ क्‍हेमैं चैदिबै सैमैं क्हेमैंइ ह्रिब् भन्दा ओंसोंन् क्हेमैंए परमेश्‍वर आबाजी सेम्।
MAT 6:9 क्‍हेमैंइ प्राथना लमा छले लद्: ओ स्‍वर्गर मुँबै ङिए परमेश्‍वर आबा, क्हिए मिं पबित्र तरिगे।
MAT 6:10 क्हिए ग्याल्स युरिगे, स्‍वर्गर धोंले क्‍हिए सैंर मैंबै के पृथ्‍बीरै पूरा तरिगे।
MAT 6:11 ङिलाइ तिंयाँ त्हिंइ ह्रोंसेबै चबै सै पिंनु।
MAT 6:12 ङिए फिर आछ्याँब् लब्मैंलाइ ङिइ क्षमा पिंल् खाँब् धोंले ङिइ लबै आछ्याँबै केमैंउँइँले ङि क्षमा पिंनु।
MAT 6:13 ङिलाइ पापर च्होल् आपिंनु, दुष्‍टउँइँले जोगेमिंनु। [तलेबिस्याँ ग्याल्स, शक्‍ति नेरो थेबै मान खोंयोंइ बिले क्हिलन् ग। आमेन।]
MAT 6:14 “तलेबिस्याँ क्हेमैंए फिर आछ्याँब् लब्मैंलाइ क्हेमैंइ क्षमा लइ बिस्‍याँ स्वर्गर मुँबै क्हेमैंए परमेश्‍वर आबाज्‍यै या क्‍हेमैं क्षमा लमिंब्‍मुँ।
MAT 6:15 दिलेया क्हेमैंए फिर आछ्याँब् लब्मैंलाइ क्हेमैंइ क्षमा आपिंस्‍याँ क्हेमैंए परमेश्‍वर आबाज्‍यै क्‍हेमैंइ लबै आछ्याँबै केमैं क्षमा लरिब् आरे।
MAT 6:16 “झाइले क्‍हेमैं बर्त टिमा फिब्लो पार्दिब्मैंइ धोंले लि छुले आटिद्। तलेबिस्याँ म्हिमैंने ‘बर्त टिइमुँ’ बिसि उँइँबर चमैंइ लि छु लम्। क्ह्रोंसेंन ङ क्हेमैंने बिमुँ चमैंइ योंल् त्हुबै इनाम योंल् खाँइमुँ।
MAT 6:17 दिलेया क्‍हेमैं बर्त टिमा लि ख्रुसि क्रर छ्युगु फोसि सैं तोंन्ले टिद्।
MAT 6:18 ‘क्हिइ बर्त टिमा’ म्हिमैंइ म्रोंरिगे बिसि आङिं। दिलेया क्‍हेमैंए परमेश्‍वर आबाजी म्रोंरिगे। आम्रोंन्ले लबै के म्रोंबै परमेश्‍वर आबाजी क्हेमैं इनाम पिंब्‍मुँ।
MAT 6:19 “क्‍हेमैंइ ह्रोंसए ल्हागिर चु पृथ्‍बीर सै न्होर ल्हें खागु आलद्, तलेबिस्याँ चुर्बै सै न्होरम् प्हुँलुँइ चवाम्, खै खम्, धै ह्‍योमैंइ धिं फोर्दिसि ह्‍योवाम्।
MAT 6:20 छतसि क्‍हेमैंइ ह्रोंसए ल्हागिर स्‍वर्गर सै न्होर खागु लद्। स्‍वर्गरि प्‍हुँलुँज्यै आच, खै या आख धै ह्‍योज्‍यै या ह्‍योल् आखाँ।
MAT 6:21 तलेबिस्याँ खनिर क्हिए सै न्होर थेंमुँ, चर्न क्हिए सैं या तम्।
MAT 6:22 “ज्युर्बै बत्ति मि ग। छतसि क्‍हिए मि चारब मुँ बिस्याँ क्हिए ताँन् ज्यु या छ्याँब तसि चारब तम्।
MAT 6:23 दिलेया क्‍हिए मिइ म्रोंल् आखाँ बिस्याँ क्‍हिए ज्यु ताँन् मिछु तब्‍मुँ। छतसि क्‍हिए खों न्होंर मुँबै बत्ति मिछु त‍याइ बिस्याँ क्‍हिए छ्ह या मिछु खैबन् तयाब्मुँ।
MAT 6:24 “खाबज्यै या क्ल्हे ङ्हिंए सेवा लल् आखाँ। तलेबिस्याँ सेवा लबै म्हिइ क्ल्हे घ्रिलाइ हेल लब्मुँ, क्ल्हे घ्रिलाइ मान लब्मुँ, अथवा घ्रिलाइ छेन्‍ले म्हाँदिमुँ, अर्कोलाइ आम्हाँदि। छलेन क्‍हेमैंज्‍यै या परमेश्‍वर नेरो मुइ ङ्हिंना ङ्हिंनाए सेवा लल् आखाँ।
MAT 6:25 “छतसि ङ क्‍हेमैंने बिमुँ, ‘सोबै ल्हागिर ङि तो चब, तो थुँब, तो खिब?’ बिसि न्हुँ आलद्। चबै सै भन्दा जीवन थेब आङिं वा? धै क्वें भन्दा ज्यु थेब आङिं वा?
MAT 6:26 मुर प्‍हुरबै नेमामैं ङ्‌ह्‍योद्। चमैंइ खेति या आल, रोमैं या आखु, चमैंला धन्‍सारमैं या आरे। दिलया क्‍हेमैंए स्वर्गर्बै परमेश्‍वर आबाजी चमैं चल् पिंम्। च नेमामैं भन्दा क्‍हेमैं झन् थेब आङिं वा?
MAT 6:27 क्‍हेमैंए न्होंरि खाबइ न्हुँ लसि ह्रोंसए छ्ह च्‍हौदे या ह्रिंग्यो लल् खाँम्‍मा?
MAT 6:28 “झाइले तो खिब् ङ्‍हे बिसि क्‍हेमैं तले न्हुँ लमुँ? बारिर्बै टमैं ङ्‌ह्‍योत्ति! चमैं खैले फारम्। चमैंइ के आल, क्‍वें या आरो।
MAT 6:29 दिलेया ङ क्हेमैंने बिमुँ, स्‍योंम्‍बै सोलोमन म्रुँ बेल्‍ले प्‍ल्‍होसि छ्याँब् छ्याँबै क्‍वें खिनाबिलेया चु टमैं प्‍हारब् धोंले छ्याँब आरेल।
MAT 6:30 तिरो ङ्हिरोदे प्‍हारबै ट या परमेश्‍वरजी छले पैरिदिमिंम् बिस्याँ ओ बिश्‍वास आरेबै म्हिमैं, खीजी झन् क्‍हेमैंलाइ चमैं भन्दा ल्हें आपैरिदिमिं रो वा?
MAT 6:31 छतसि तो चब? तो थुँब? तो खिब? बिसि न्हुँ आलद्।
MAT 6:32 तलेबिस्याँ परमेश्‍वर ङो आसेब्‍मैंइ खोंयोंन् बिलै छलेन् न्हुँ लम्, क्‍हेमैं बिस्याँ छले न्हुँ लरिल् आत्हु। क्‍हेमैंलाइ तो-तो सैमैंए खाँचो मुँ बिसि क्‍हेमैंए स्वर्गर मुँबै परमेश्‍वर आबाजी सेम्।
MAT 6:33 बरु ओंसों क्हेमैंए सैं परमेश्‍वरए ग्याल्सउँइँ ल्‍हैदिद्, खीजी बिब् धोंले ताँन् लद्। धै खीजी चु ताँन् सैमैं क्हेमैंलाइ थप्दिमिंब्मुँ।
MAT 6:34 छतसि प्हँन्हाँबै ल्हागिर न्हुँ आलद्, तलेबिस्याँ प्हँन्हाँबै न्हुँ प्हँन्हाँबै त्हिंइन लम्। तिंयाँबै दुःख तिंयाँबै ल्हागिर योम्।”
MAT 7:1 “क्‍हेमैंलाइ छ्याब् आल्‍हैदिरिगे बिसि आगुए फिर छ्याब् आल्हैदिद्।
MAT 7:2 तलेबिस्याँ खैले क्हेमैंइ आगुए फिर छ्याब् ल्‍हैदिमुँ। छलेन परमेश्‍वरजी क्‍हेमैंए फिर छ्याब् ल्‍हैदिब्मुँ। क्‍हेमैंइ खैले क्होंएँमुँ, छलेन क्‍हेमैंलाज्यै या क्‍होंएँब्‍मुँ।
MAT 7:3 “क्‍हिइ तले ह्रोंसए अलिए मि न्होंर्बै कसिं म्रोंमुँ दिलेया ह्रोंसए मि न्होंर्बै म्हुँडा आम्रों?
MAT 7:4 ह्रोंसए मिर्न म्हुँडा मुँ बिस्याँ क्‍हिए अलिने ‘खोइ, क्‍हिए मिर्बै कसिं तेवाले,’ बिसि खैले बिल् खाँमुँ।
MAT 7:5 ओ फिब्लो पार्दिब्मैं, ओंसों ह्रोंसए मिर्बै म्हुँडा तेद्, झाइले बल्‍ल क्‍हिए अलिए मिर्बै कसिं तेबर म्रोंल् खाँम्।
MAT 7:6 “पबित्र सैमैं नगिमैं आपिंन्। छले पिंस्‍याँ चमैंइ क्‍हेमैंलाइ च्‍हिवाब्मुँ। छलेन ह्रोंसने मुँबै मोतिमैं तिलिए उँइँर आभ्योंन्, चमैंइ च मोतिमैं हिलर प्‍हलेइ प्‍लेवाम्।
MAT 7:7 “ह्रिब्रें लद् परमेश्‍वरजी क्‍हेमैंलाइ पिंब्मुँ। म्हैब्रें लद् क्‍हेमैंइ योंब्मुँ। म्रार ह्राब्रें लद् क्हेमैंए ल्हागिरि म्रा थोंमिंब्मुँ।
MAT 7:8 तलेबिस्याँ खाबइ ह्रिमुँ चइ योंब्मुँ, खाबइ म्हैमुँ चइ स्याब्मुँ, धै खाबइ म्रा ह्रामुँ चए ल्हागिरि म्रा थोंमिंब्मुँ।
MAT 7:9 क्हेमैंए प्हसेइ क्हें ह्रिमा क्हेमैंइ युँमा पिंम् रो वा?
MAT 7:10 झाइले चइ ताँग ह्रिमा क्हिइ प्हुरि पिंम् रो वा?
MAT 7:11 छले क्हेमैं दुष्‍टमैं तसेया ह्रोंसए प्हसेमैंलाइ छ्याँब सैमैं पिंल् ह्रम् बिस्याँ, स्वर्गर मुँबै क्हेमैंए परमेश्‍वर आबाजी खीने ह्रिब्मैंलाइ झन् ल्हें छ्याँबै सैमैं पिंब्मुँ।
MAT 7:12 “म्‍हिमैंइ क्‍हेमैंलाइ छ्याँब् लरिगे ङ्हाँब् धोंले क्‍हेमैंज्‍यै या चमैंलाइ छान् लद्। स्‍योंम्‍बै मोशा नेरो अगमबक्‍तामैंइ बिल् म्हैबै ताँ चुन् ग।”
MAT 7:13 “क्हेमैं रुबै म्राउँइँले न्‍होंर होंन्, तलेबिस्याँ नर्गर बोबै म्रा प्‍ल्‍हाब नेरो कर योंब घ्याँ तमुँ, च घ्‍याँर प्रब्‍मैं ल्‍हें तम्।
MAT 7:14 खोंयोंइ आखाँबै छ्ह योंबै म्रा रुब तमुँ, चु घ्‍याँर प्रब बेल्‍ले गारो तमुँ, च्युगुदे म्हिमैंइ मत्‍त्रे चु खोंयोंइ आखाँबै छ्ह योंबै घ्‍याँ स्‍याम्!
MAT 7:15 “झाइले परमेश्‍वरए ताँमैं स्योर ताँ पोंब्मैंउँइँले न्हक्रों मि क्रोंले टिद्। चमैं क्‍हेमैंए उँइँर क्‍यु धोंले खमुँ, दिलेया सैं न्‍होंनों बिस्‍याँ बनर्बै ङ्हिंन् ङ्हाँबै प्‍याँगु धों तम्।
MAT 7:16 चमैंइ लबै केमैं म्रोंसि क्‍हेमैंइ चमैं ङो सेब्मुँ। पुजुए धुँउँइँले अँगुर टोंम् रो वा? छलेन क्ह्रुए धुँउँइँले तुँबुए रो टोंम् रो वा?
MAT 7:17 सोबर्दिबै धुँरि रोमैं या छ्याँबन् रोमुँ, आसोबर्दिबै धुँरि रोमैं या आछ्याँबन् रोमुँ।
MAT 7:18 सोबर्दिबै धुँरि आछ्याँबै रोमैं रोल् आखाँ। छलेन आसोबर्दिबै धुँरि छ्याँबै रोमैं रोल् आखाँ।
MAT 7:19 छतसि म्हिमैंइ छ्याँब रो आरोबै ताँन् धुँमैं थोवासि मिर भ्योवाम्।
MAT 7:20 छले परमेश्‍वरए ताँर स्योर ताँ कोंसि पोंब्मैंइ लबै केमैं म्रोंसि क्‍हेमैंइ चमैंलाइ ङो सेब्मुँ।
MAT 7:21 “सुँइ मत्‍त्रे ङने ‘प्रभु, प्रभु,’ बिसि ङए मिं किंब्‍मैं स्‍वर्गर्बै ग्याल्सर होंल् योंरिब् आरे। स्वर्गर मुँबै ङए परमेश्‍वर आबाजी बिब् धोंले के लब्मैं मत्‍त्रे होंल् योंब्‍मुँ।
MAT 7:22 परमेश्‍वरजी निसाफ लबै त्हिंइर ल्‍हें म्‍हि ङ ङाँर खसि ‘प्रभु, प्रभु! ङिइ क्‍हिए मिंर म्‍हिमैंने सैं तोंबै ताँ आबिमिं वा? धै क्‍हिए मिंर मोंमैं आल्‍हाल् वा, क्हिए मिंर औदिबै शक्‍तिए केमैं या ल्हेंन् आलल् रो वा?’ बिसि बिब्मुँ।
MAT 7:23 ‘दिलेया च त्हेर ङइ चमैंने ङइ क्हेमैं आसे ओ आछ्याँबै के लब्मैं ङ ङाँइँले ह्रेंगो स्‍योह्‍याद्,’ बिसि बिब्मुँ।”
MAT 7:24 “छतमा ङइ बिबै ताँ थेब्मैं नेरो ङिंब्‍मैं धिं लबै बुद्धि मुँबै म्‍हि धों तबन् ग। च म्‍हिइ गैरु जग तासि पारा फिर धिं बनेइ।
MAT 7:25 झाइले थेबै नाँ खैं तसि प्हलें युसि च धिंए फिर उँयाँलेया च धिं आफु। तलेबिस्याँ च धिं गैरु जग तासि पारा फिर बनेल।
MAT 7:26 “दिलेया खाबइ ङए ताँ थेसेया आङिं, च म्‍हि बालुवाए फिर धिं लबै बुद्धि आरेबै म्‍हि धों तब् ग।
MAT 7:27 थेबै नाँ खैं तसि प्हलें युसि धिंए फिर उँयामा च धिं फुयाइ झाइले चला थेबै नोक्‍सान त‍याइ।”
MAT 7:28 येशूजी लोमिंबै चु ताँमैं थेबै लिउँइँ म्‍हिए हुल प्लेटोयाइ।
MAT 7:29 तलेबिस्याँ येशूजी चमैंए शास्‍त्रिमैंइ लोब् धोंले आलोमिंल, बरु खीजी हग मुँबै म्हिइ धोंले लोमिंमल।
MAT 8:1 येशू कोंउँइँले क्‍युरु युमा म्हिए हुल खीए लिलि ल्‍हैदिइ।
MAT 8:2 च त्हेर कोर खबै म्हि घ्रि येशू ङाँर खसि खीए ओंसों च्हि तुँसि बिइ, “ओ प्रभु, क्हिजी ङ सल् लमिंबै सैं मुँस्‍याँ ङ सल् लमिंल् खाँम्।”
MAT 8:3 छबिमा येशूजी यो स्‍योंसि च म्हिलाइ छुइदै बिइ, “ङइ क्हि सरिगे ङ्हाँइमुँ। सयाद्।” छ बिबै तोदोंन् च म्हिए कोर सयाइ।
MAT 8:4 झाइले येशूजी चने, “चु ताँ खाबलाज्यै या आबिद्। ह्‍यासि ख्रो पिंबै खेगिने क्हिए ज्यु उँइँन्, ‘क्हि सयना’ बिब म्हिमैंइ सेरिगे बिसि मोशाइ बिब् धोंले भेटि पिंन्।”
MAT 8:5 येशू कफर्नहुम बिबै नाँसर ह्‍यामा रोमी फौजीर्बै कप्‍तान घ्रि खी ङाँर खसि यो छ्युँ लसि बिइ,
MAT 8:6 “ओ प्रभु, ङए के लबै म्हि स्याले बेथाइ बेल्‍ले नसि धिंर रोरिइमुँ।”
MAT 8:7 खीजी चने बिइ, “ङ खसि चलाइ सल् लमिंस्‍यो।”
MAT 8:8 दिलेया च कप्‍तानइ बिइ, “प्रभु, क्‍हिलाइ ङए धिंर बोसि मान लबै लायगर्बै ङ आरे। क्‍हिजी सुँइ मत्‍त्रे सयाद् बिसि पोंमिंनु, धै ङए के लबै म्हि सयाम्।
MAT 8:9 ङज्यै चु ताँ छेन्ले सेम्, तलेबिस्याँ ङ या क्रथेए न्होंरि मुँ, धै ङए न्होंरि सिपाइमैं मुँ। ङइ घ्रिने ‘ह्‍याद्’ बिस्‍याँ च ह्‍याम्, अर्कोने ‘खो’ बिस्‍याँ च खम्। ङए के लबै म्हिने ङइ तो लद् बिमुँ छान् लम्।”
MAT 8:10 च कप्‍तानए ताँ थेसि येशू अचम्मा ङ्हाँसि खीए लिलि खब्‍मैंने बिइ, “ङ क्ह्रोंसेंन क्हेमैंने बिमुँ, इस्राएलरै या च्हौ थेबै बिश्‍वास लबै म्‍हि ङइ खोंयोंइ आत्होइमुँ।
MAT 8:11 ङ क्हेमैंने बिमुँ, स्यार (पूर्व) नेरो न्हुउँइँले (पश्‍चिम) ल्‍हें म्‍हिमैं खसि अब्राहाम, इसहाक नेरो याकूबने स्वर्गर्बै ग्याल्सर भोज चबर टिब्‍मुँ।
MAT 8:12 दिलेया च ग्याल्सर टिल् त्हुबै यहूदीमैं बैरु मिछु खैबै क्‍ल्‍ह्‍योर भ्योंवाब्‍मुँ। चर चमैं बेल्‍ले क्रोसि स ह्राब्‍मुँ।”
MAT 8:13 झाइले येशूजी कप्‍तानने “ह्‍याद्! क्‍हिइ बिश्‍वास लब् धोंन् क्हिलाइ तब्मुँ।” बिबै तोदोंन् कप्‍तानए के लबै म्हि सयाइ।
MAT 8:14 च लिउँइँ येशू पत्रुसए धिंर ह्‍यामा पत्रुसए स्‍युमिं जर खसि रोरिब् म्रोंइ।
MAT 8:15 येशूजी चए यो छुइबै तोदोंन् जरइ च पिवाइ। धै च रेसि येशूए सेवा लइ।
MAT 8:16 ङेसा तबै त्हेर म्‍हिमैंइ मोंइ स्‍याबै ल्‍हें म्‍हिमैं येशू ङाँर पखइ। धै खीजी परमेश्‍वरए ताँ पोंसिन् मोंमैं ल्‍हावाइ। छले चर्बै ताँन् नब्मैं सल् लमिंइ।
MAT 8:17 यशैया अगमबक्‍ताइ स्‍योंमन् छले बिल, “ङ्योए बेथामैं खीजीन् बोमिंइ, झाइले ङ्योए नब् छब्मैं ताँन् खीजीन् नोमिंइ।” येशैयाइ स्योंमन् बिबै ताँ पूरा तबर येशूजी छाबै सल् लबै के लइ।
MAT 8:18 झाइले येशूजी खीए खागु म्हिए हुल तब् म्रोंसि खीए चेलामैंने “मा ङ्युँइए क्‍योंजा ह्‍याले,” बिइ।
MAT 8:19 च त्हेर्न शास्त्रि घ्रि येशू ङाँर खसि “ओ गुरु, क्‍हि खनिर ह्‍यामुँ ङ या क्‍हिए लिलिन् ह्‍याम्,” बिइ।
MAT 8:20 छबिमा येशूजी चने बिइ, “स्‍येलमैंला टिबै रो मुँ, नमेमैंला च्‍हों मुँ, दिलेया ‘म्हिए च्हलम्’ क्र क्ह्‍युबै क्‍ल्‍ह्‍यो या आरे।”
MAT 8:21 चु ताँ थेसि खीए चेलामैं न्होंर्बै अर्को म्हि घ्रिइ बिइ, “ओ प्रभु, ओंसों ङए आबाए सिनु पाबर ह्‍याल् पिंन्।”
MAT 8:22 छबिमा येशूजी चने बिइ, “क्हि ङए लिलि खो। सिनुमैंलाइ सिनुमैंन पारिगे।”
MAT 8:23 झाइले येशू मा ङ्युँइए क्‍योंजा ह्‍याब् बिसि डुँङ्गार क्रेमा खीए चेलामैं या खीए लिलि ह्‍याइ।
MAT 8:24 तिस्याँदे लिउँइँ मा ङ्युँइर थेबै नाँ खैं तसि क्‍युए भेल्‍गाइ डुँङ्गा प्ल्हुँयाबि छेइ। येशू बिस्‍याँ न्‍हरु च्‍हुइरिल।
MAT 8:25 छतमा “ओ प्रभु, ङि सिबर होंइ ङिलाइ जोगेमिंन् बिदै चेलामैंइ येशूलाइ छोरवाइ।”
MAT 8:26 येशूजी चमैंने बिइ, “ओ बिश्‍वास आरेबै म्हिमैं, क्हेमैं तले छले ङ्हिंल?” च्‍हौ बिसि खी रेसि खैं नेरो मा ङ्युँइर्बै भेल्‍गालाइ हौदिमा नाँ खैं च्याँ त‍याइ।
MAT 8:27 छतब् म्रोंसि चर मुँबै म्‍हिमैंइ, “चुम् खैबै म्हि मुँगे नाँ, खैं नेरो भेल्‍गाज्‍यै या खीजी बिबै ताँ ङिंमना बिसि प्लेटोयाइ।”
MAT 8:28 झाइले येशू मा ङ्युँइए क्‍योंजा गदरिनिमैंए ह्‍युलर फेनेमा चर मोंइ स्याबै म्हि ङ्हिं छगोंउँइँले खरिमा खीने त्‍होइ। चमैं बेल्‍ले ङ्हिंदा ङ्हाँन् ब्योंब मुँल। छतसि खाबै या च घ्याँ ह्‍याब खब लल् आखाँमल।
MAT 8:29 चमैंइ येशूने त्‍होबै तोदोंन् “ओ परमेश्‍वरए च्‍ह, क्हिला ङिने तो के मुँ? ङिलाइ सजैं पिंबै त्हे आतबर्न सजैं पिंबर क्हि चुर खल् वा?” बिसि चिरइ।
MAT 8:30 चमैंए क्याइदने तिलिए बगाल रेंरिल।
MAT 8:31 च मोंमैंइ खीने “क्हिजी चु म्‍हिमैंउँइँले ङि ल्‍हावाम् बिस्‍याँ च तिलिमैंए बगाल न्‍होंर होंल् पिंन्,” बिसि यो छ्युँ लइ।
MAT 8:32 येशूजी चमैंने “ह्‍याद्!” बिबै तोदोंन् मोंमैं च म्‍हिमैंउँइँले त्‍होंसि तिलिमैंए बगाल न्‍होंर होंयाँइ। धै तिलिए ताँन् बगाल प्रोउँइँले ते‍यासि क्युर प्ल्हुँसि सियाइ।
MAT 8:33 छतब् म्रोंसि तिलि छब्मैं नाँसउँइँ नेह्‍याइ, धै नाँसर फेनेसि खेंमैंइ म्रोंबै ताँमैं नेरो मोंइ स्‍याबै म्‍हि ङ्हिं सबै ताँ नाँसथेंमैंने बिइ।
MAT 8:34 तिलि छब्मैंए ताँ थेसि नाँसर्बै ताँन् म्‍हिमैं येशूने त्‍होबर खइ, धै खीलाइ म्रोंमा “ङिए ह्‍युलउँइँले ह्‍यामिंन्,” बिसि म्हिमैंइ खीने यो छ्युँ लइ।
MAT 9:1 च लिउँइँ येशू डुँङ्गार क्रेसि तालए चोंजा ह्रोंसए नाँसउँइँ एखइ।
MAT 9:2 चर म्हिमैंइ स्याले तसि नबै म्हि घ्रि खाटनेन् बालु नोसि खी ङाँर पखइ। च म्‍हिमैंइ खीए फिर च्हौ थेबै बिश्‍वास लब् म्रोंसि येशूजी च स्याले म्‍हिने बिइ, “ओ बाबु, सैं थेब् लद्। क्‍हिए पाप क्षमा तइ।”
MAT 9:3 येशूजी च म्हिने बिबै ताँ थेसि को-कोइ शास्‍त्रिमैंइ खें-खेंमैंन् “चु म्‍हिइमि परमेश्‍वरए क्ल्ह्‍योर खी तइ ग पोंइमुँ दि!” बिबर होंइ।
MAT 9:4 चमैंए सैंर्बै ताँ सेसि येशूजी चमैंने बिइ, “क्हेमैंए सैं न्होंर छाबै आछ्याँबै ताँमैं तले मैंल?
MAT 9:5 चु ओलेल् आखाँबै म्‍हिने ‘क्हिए पाप क्षमा तइ’ बिब सजिल् मुँ उ ‘रेसि प्रद्’ बिब सजिल् मुँ?
MAT 9:6 दिलेया चु पृथ्‍बीरि पाप क्षमा पिंबै हग ङ परमेश्‍वरउँइँले कुल्‍मिंबै म्हिए च्हने मुँ बिसि क्हेमैंइ सेद्।” च्हौ बिसि खीजी च स्याले म्हिने “रेद्, क्हिए क्‍ल्‍ह्‍यो नोसि धिंर ह्‍याद्,” बिइ।
MAT 9:7 छ बिबै तोदोंन् च म्‍हि रेसि ह्रोंसए धिंउँइँ ह्‍याइ।
MAT 9:8 छले खीजी लबै औदिबै के म्रोंसि चर्बै म्हिमैं ङ्हिंयाँइ, धै म्हिमैंलाइ च्हौ थेबै शक्‍ति पिंबै परमेश्‍वरए मिं क्वेइ।
MAT 9:9 येशू च क्‍ल्‍ह्‍योउँइँले ह्‍यारिमा मत्ती बिबै म्‍हि घ्रि बालि रेबै क्ल्ह्‍योर क्हुँरिब म्रोंइ, धै चने या “ङए लिलि प्रद्!” बिइ। छबिमा मत्ती रेसि येशूए लिलि प्रइ।
MAT 9:10 च लिउँइँ येशू मत्तीए धिंर चब् चरिमा रोमी म्रुँए ल्हागिर बालि रेब्‍मैं नेरो पापिमैं खसि येशू नेरो खीए चेलामैंने बालुन् चब् चबर टिइ।
MAT 9:11 छाब् म्रोंसि फरिसीमैंइ खीए चेलामैंने “क्‍हेमैंए गुरु तले बालि रेब्‍मैं नेरो पापिमैंने बालुन् चब् जा?” बिसि ङ्योएइ।
MAT 9:12 चमैंए ताँ थेसि खीजी बिइ, “आनब्मैंए ल्हागिर बैद्द आचैदि, दिलेया नब्मैंए ल्हागिर चैदिम्।
MAT 9:13 क्‍हेमैं ह्‍यासि चु ताँए अर्थ तो मुँगे खेसि क्होद्, ‘ङ ख्रो आम्है, ल्हयो खब्मैं म्रोंसि ङ सैं तोंम्।’ धर्मि प्हैंब्मैंलाइ हुइबर ङ युब् आङिं, पापिमैं हुइबर युब् ग।”
MAT 9:14 च लिउँइँ बप्‍तिस्‍मा पिंबै यूहन्‍नाए चेलामैं येशू ङाँर खसि “ङि नेरो फरिसीमैं बर्त टिब्रें लम्, दिलेया क्‍हिए चेलामैं बिस्‍याँ बर्त आटि, तले जा?” बिसि खीने ङ्योएमा
MAT 9:15 येशूजी चमैंने बिइ, “प्ह्रेंरो जन्तिमैंने बालु मुँमा चमैंइ शोक लम्‍मा? दिलेया च त्हे खब्मुँ, प्ह्रेंरो चमैंउँइँले बोयाब्मुँ। चमैं सैं आतोंसि बर्त टिब्‍मुँ।”
MAT 9:16 “खाबज्‍यै स्योब क्‍वेंर छारा क्वेंए टालोइ आखे। तलेबिस्याँ छारा टालोइ क्वें ट्होवाम्। धै स्योब क्‍वें झन् ल्हें ट्होह्‍याम्।
MAT 9:17 छलेन खाबज्यै या आचिबै अँगुरए खु स्योब ट्हुबिए नेंदोर आझों। झोंइ बिस्‍याँ नेंदो ट्होह्‍यासि अँगुरए खु ङे‍याम्, धै नेंदों या ट्होयाम्। दिलेया छारा अँगुरए खु ट्हुबिए छारा नेंदोर झोंस्‍याँ नेंदो या आट्हो अँगुरए खु या आङेया।”
MAT 9:18 येशूजी चमैंने चु ताँ बिरिमा यहूदीमैंए चिब घ्रि खसि खीलाइ फ्योसि बिइ, “ङए च्हमि भर्खर्न सियाइ, दिलेया क्हि ह्‍यामिंसि चए फिर क्हिए यो थेंमिंनु। धै च सोब्‍मुँ।”
MAT 9:19 चइ छ बिबै तोदोंन् येशू रेसि ह्रोंसए चेलामैंने बालु चए लिलि ह्‍याइ।
MAT 9:20 छले ह्‍यारिमा च त्हेर्न च्युसे ङ्हिदि समा को त्हसि नबै च्हमिरि घ्रिइ येशूए लिउँइँले खसि खीए क्‍वेंए ङोर छुइ।
MAT 9:21 तलेबिस्याँ चइ सैं न्‍होंनोंन् “ङइ येशूए क्‍वें मत्‍त्रे छुइल् योंलेया ङ सयाम्,” बिसि चइ मैंरिल।
MAT 9:22 येशूजी लिउँइँ तोसि ङ्‍ह्‍योमा च च्हमिरि म्रोंसि बिइ, “ओ च्हमि, आङ्हिंन्, क्हिए बिश्‍वासइ लमा क्हि सयाइमुँ।” छ बिबै तोंदोंन् च च्हमिरि सयाइ।
MAT 9:23 झाइले येशू च्हों धिंर्बै चिबए धिंर फेनेमा शंङ्ख ह्राब्मैं नेरो म्हिए हुल खैला-बैला लरिब् म्रोंइ।
MAT 9:24 छाब म्रोंसि येशूजी चमैंने बिइ, “क्‍हेमैं ताँन् बैरु ह्‍याद्, चु कोलो आसिइमुँ, न्‍हरु च्‍हुइमुँ।” छबिमा चमैंइ आक्वेंसि येशूए बिल्‍लि लइ।
MAT 9:25 च म्‍हिए हुल बैरु तेवाबै लिउँइँ येशू कोलो मुँबै कोठार होंसि कोलोए योर क्‍हामा च कोलो सोगों तसि रे‍याइ।
MAT 9:26 झाइले येशूजी लबै औदिबै केए बारेर च ह्‍युल तिगोंन् थेनेइ।
MAT 9:27 येशू च क्‍ल्‍ह्‍योउँइँले ह्‍यामा कनमैं ङ्हिंइ “ओ दाऊदए च्ह, ङिए फिर ल्हयो खमिंन्,” बिसि ओरदै येशूए लिलि ल्हैदिइ।
MAT 9:28 खी धिं न्‍होंर होंबै लिउँइँ च कनमैं ङ्हिं येशू ङाँर्न खइ। धै येशूजी चमैंने “ङइ क्हेमैंए मि म्रोंल् लमिंल् खाँम् बिसि क्हेमैंइ क्वेंम्मा?” चमैंइ “ओं, गुरु, ङिइ क्वेंम्,” बिइ।
MAT 9:29 झाइले येशूजी चमैंए मि छुइसि बिइ, “छ बिस्‍याँ क्‍हेमैंइ क्वेंब् धोंलेन् क्हेमैंलाइ तरिगे।”
MAT 9:30 च्‍हौ बिमा चमैंए मि म्रोंयाइ। धै येशूजी चमैंने “चु ताँ खाबज्यै आसेरिगे,” बिइ।
MAT 9:31 दिलेया चमैं ह्‍यासि खीजी लबै औदिबै केमैंए बारेर च ह्‍युल तिगोंन् बिप्रइ।
MAT 9:32 झाइले खेंमैं च क्ल्ह्‍योउँइँले त्होंसि ह्‍यारिमा मोंइ स्‍यासि लडा तबै म्‍हि घ्रि म्‍हिमैंइ येशू ङाँर पखइ।
MAT 9:33 येशूजी मों ल्‍हावाबै लिउँइँ च लडा पोंइ। छतमा “इस्राएल ह्‍युलरि छ तब खोंयोंइ आम्रोंल,” बिसि म्‍हिमैं प्लेटोयाइ।
MAT 9:34 दिलेया “मोंमैंए चिबइ मों ल्‍हाबै शक्‍ति पिंसि चइ मों ल्हाम्,” बिसि फरिसीमैंइ बिबर होंइ।
MAT 9:35 येशू ताँन् सहरजरे नाँ-नाँसजरे स्‍युरसि चमैंए च्हों धिंजरे परमेश्‍वरए ग्याल्सर्बै सैं तोंबै ताँमैं म्‍हिमैंने बिमिंदै ताँन् खालर्बै नब् छब्मैं सल् लमिंदै प्रइ।
MAT 9:36 छले प्रमा म्‍हिए हुल म्रोंसि येशूए सैंर ल्‍हयो खइ। तलेबिस्याँ चमैं प्‍ह्रोंछैं आरेबै क्‍युमैं धोंले आशा आयोंसि प्ररिब् म्रोंइ।
MAT 9:37 छतमा खीजी ह्रोंसए चेलामैंने बिइ, “ङ्‌ह्‍योत्ति! रा-रोमैं ल्हेंन् मुँ, दिलेया रा-रोमैं खुबै म्रोंमैं बिस्‍याँ च्‍युगुदे मुँ।
MAT 9:38 छतसि रा-रोमैं खुबै म्रोंमैं कुल्‍मिंन् बिसि रोमैंए क्‍ल्‍हेने प्राथना लद्।”
MAT 10:1 खीजी ह्रोंसए च्युसे ङ्हिं चेलामैं हुइसि मोंमैं ल्‍हाब नेरो ताँन् खालर्बै नब् छब्मैं सल् लमिंबै हग पिंइ।
MAT 10:2 च्युसे ङ्हिं कुल्मिंबै चेला चिब्मैंए मिं चुमैंन् ग: ओंसों पत्रुस बिबै सिमोन, चए अलि अन्‍द्रियास, जब्दियाए च्ह याकूब नेरो चए अलि यूहन्‍ना,
MAT 10:3 झाइले फिलिप नेरो बारथोलोमाइ, थोमा, रोमी म्रुँए ल्हागिर बालि रेबै मत्ती, अल्‍फयसए च्‍ह याकूब, थेदियस,
MAT 10:4 ह्रोंसए ह्‍युलए फिर म्हाँया लबै सिमोन नेरो यहूदा इस्‍करियोत। चु इस्‍करयोतइ लिउँइँ येशूलाइ धोका पिंसि क्हाल् पिंइ।
MAT 10:5 येशूजी च च्युसे ङ्हिं चेलामैंने “क्‍हेमैं अरू ह्रेंमैं ङाँर नेरो सामरीमैंए नाँसजरे आह्‍याद्,” बिसि कुलइ।
MAT 10:6 “बरु इस्राएलीमैं ङाँर ह्‍याद्। चमैं म्‍हयाबै क्‍यु धों तब्‍मैं ग।
MAT 10:7 चर ह्‍यामा ‘स्वर्गर्बै ग्याल्स चेंदो फेखइमुँ,’ बिसि बिप्रद्।
MAT 10:8 नब् छब्मैं सल् लद्, सि‍याब्‍मैं सोंगों लद्, कोर खब्‍मैं सल् लद् धै मोंमैं ल्‍हावाद्। क्‍हेमैंइ परमेश्‍वरए आशिक छलेन् योंइ, छतसि अरू म्‍हिमैंलाज्यै या छलेन् पिंन्।
MAT 10:9 “क्हेमैंइ फगिर मारा, चाँदि नेरो क्‍योरए मुइमैं आनोद्।
MAT 10:10 क्हेमैं ह्‍यामा झोला, फेर्दिबै क्‍वें, जुत्ता आबोद्, प्‍हरे या आछेद्, तलेबिस्याँ म्रोंमैंइ चब्-थुँब् योंल् त्हुम्।
MAT 10:11 “सहरर मुँले नाँसर मुँले क्हेमैं ह्‍यासि चर्बै छ्याँबै सैं प्ह्‍याबै म्‍हि म्हैसि च नाँसर टिन् समा च म्‍हि ङाँर्न टिद्।
MAT 10:12 चए धिंर होंमा क्‍हिइ ‘छिं ङ्हाँरिगे’ बिसि आशिक पिंन्।
MAT 10:13 च धिंर्बै म्‍हिमैंए सैं छ्याँब मुँस्‍याँ क्‍हेमैंइ पिंबै आशिक चमैंइ योंरिगे, दिलेया चमैंए सैं छ्याँब आरेस्‍याँ क्‍हेमैंए छिं ङ्हाँब क्हेमैंनेन् एखरिगे।
MAT 10:14 खाबज्यै या क्‍हेमैंलाइ मान आलस्‍याँ, क्‍हेमैंए ताँ थेल् आङिंस्‍याँ च धिं नेरो च क्ल्ह्‍योउँइँले त्होंमा ह्रोंसए प्‍हलेर्बै त्‍हुला चर्न खारथेंन्।
MAT 10:15 क्ह्रोंसेंन ङ क्हेमैंने बिमुँ, लिउँइँ परमेश्‍वरजी निसाफ लबै त्हिंइर स्‍योंम्‍बै पाप लबै सदोमथेंमैं नेरो गमोराथेंमैंइ भन्दा च सहरर्बै म्‍हिमैंइ ल्हें सजैं योंब्मुँ।”
MAT 10:16 “ङ्‍ह्‍योद्! ङइ क्‍हेमैं प्याँगुमैंए म्हाँजोर क्यु धोंले कुलरिइमुँ। छतसि क्‍हेमैं प्‍हुरि धोंले बाठो, तोंगु धोंले सोजो तसि टिल् त्‍हुम्।
MAT 10:17 म्‍हिमैंउँइँले न्हक्रों मि क्रोंले टिद् तलेबिस्याँ चमैंइ क्‍हेमैं क्‍हासि अड्डर उजुर लब्‍मुँ, धै च्हों धिंजगोर बोसि कोर्राइ प्रुब्‍मुँ।
MAT 10:18 क्‍हेमैं ङए चेलामैं तबइले म्हिमैंइ क्‍हेमैं क्हासि क्रथेमैं नेरो म्रुँमैंए उँइँर राल् पिंब्‍मुँ। च त्हेर क्‍हेमैंइन चमैं नेरो अरू ह्रेंमैंने ङए ताँमैं बिमिंल् त्‍हुब्‍मुँ।
MAT 10:19 दिलेया चमैंइ क्‍हेमैंलाइ क्‍हामा क्‍हेमैंइ खैले पोंब् ङ्‍हे तो बिल् त्हुब् ङ्‍हे बिसि ओंसोंन् न्हुँ आलद्। क्‍हेमैंइ तो पोंल् त्‍हुम् बिसि च त्हेर्न परमेश्‍वरजी क्‍हेमैंने बिमिंब्मुँ।
MAT 10:20 तलेबिस्याँ पोंब क्‍हेमैं आङिं, दिलेया क्हेमैंए आबाए प्ल्ह क्‍हेमैंए सुँउँइँले पोंब्‍मुँ।
MAT 10:21 “ह्रों-ह्रोंसए त्येमैं न्होंर्न घ्रिइ-घ्रि सैबर पिंवाब्मुँ। छलेन आबाइ च्‍ह-च्हमिमैं सैबर पिंवाब्मुँ, धै च्‍ह-च्हमिंमैंइ आबा-आमामैंए बिरोधर रेसि सैबर ल्हैदिब्मुँ।
MAT 10:22 क्हेमैंइ ङए मिं किंबइले ताँन् म्‍हिमैंइ क्‍हेमैं हेल लब्‍मुँ। दिलेया सैदिसि लिउँइँ समा बिश्‍वासर भोंब् तेरिब्‍मैं परमेश्‍वरजी जोगेमिंब्मुँ।
MAT 10:23 छतसि म्हिमैंइ क्हेमैंलाइ क्ल्ह्‍यो घ्रिर ह्रुगुदिइ बिस्याँ च क्ल्ह्‍योउँइँले अर्को क्ल्ह्‍योउँइँ भौदिह्‍याद्। क्ह्रोंसेंन ङ क्हेमैंने बिमुँ, परमेश्‍वरउँइँले कुल्‍मिंबै म्हिए च्ह युब् भन्दा ओंसों क्‍हेमैंइ इस्राएलर्बै ताँन् क्ल्ह्‍योर खैलसेया स्युरल् खाँरिब् आरे।
MAT 10:24 “चेला ह्रोंसए गुरु भन्दा थेब आत धै क्ल्हे भन्दा केब्छैं थेब आत।
MAT 10:25 दिलेया चेला ह्रोंसए गुरु धोंब धै केब्छैं ह्रोंसए क्ल्हे धोंब तल् खाँस्‍याँ सैं तोंल् त्‍हुम्। म्हिमैंइ धिंर्बै क्ल्हेनेन् बालजिबुल बिसि मिं थेंम् बिस्‍याँ खीए परवामैंने झन् खै बिलै?
MAT 10:26 “छतसि म्‍हिमैंने आङ्हिंन्। तलेबिस्याँ तोगो तो सै लोथेंलेया लिउँइँ था सेब्‍मुँ। धै तोगो लोथेंबै ताँ लिउँइँ खन्तोदोंन् थेनेम्।
MAT 10:27 छतसि ङइ क्‍हेमैंने मिछु खैबर बिबै ताँ त्‍हिंइर बिमिंन्। धै ङइ क्‍हेमैंने खाबज्यै आथेल्‍ले बिबै ताँ क्हेमैंइ ताँनइ थेल्‍ले धिंए प्हेंउँइँले बिमिंन्।
MAT 10:28 “क्‍हिए ज्यु सैल् खाँब्‍मैंने आङ्हिंन्, तलेबिस्याँ चमैंइ क्‍हिए प्‍ल्‍ह सैल् आखाँ। बरु प्‍ल्‍ह नेरो ज्यु ङ्हिंन-ङ्हिंन् नर्गर भ्‍योंवासि नास लल् खाँबै परमेश्‍वर म्रोंसि ङ्हिंन्।
MAT 10:29 “मुइ घ्रिर कोर्मे ङ्हिं आलों वा? चमैं च्‍युगुथिरि मुँनबिलेया परमेश्‍वर आबाए इच्छा आरेस्याँ घ्रि या सर तेरिब् आरे।
MAT 10:30 परमेश्‍वरजी क्‍हेमैंए क्र प्हो या ताँन् घ्रि-घ्रिले च्‍योइमुँ।
MAT 10:31 छतसि क्हेमैं आङ्हिंन्, परमेश्‍वरए उँइँरि ल्‍हें कोर्मे भन्दा क्‍हेमैं झन् बेल्‍ले थेब् मुँ।
MAT 10:32 “छतसि खाबइ म्‍हिमैंए उँइँर ‘ङ येशूए म्‍हि ग’ बिमुँ, ङज्यै या ङए स्वर्गर मुँबै परमेश्‍वर आबाए उँइँर ‘चु म्‍हि ङलन् ग’ बिब्‍मुँ।
MAT 10:33 खाबइ म्‍हिमैंए उँइँर ‘ङइ येशू ङो आसे’ बिमुँ, ङज्यै या ङए स्वर्गर मुँबै परमेश्‍वर आबाए उँइँरि ‘चुम् ङइ ङो आसे’ बिब्‍मुँ।”
MAT 10:34 “ङ ह्‍युलर शान्‍ति पिंबर युब् ग बिसि आमैंन्। शान्‍ति पिंबर ङ युब आङिं, बरु सेलाँ (तरवार) चलेबर युब् ग।”
MAT 10:35 तलेबिस्याँ म्हिमैंलाइ चमैंए आबाने आक्ह्रिल् लबर, च्हमिमैं आमाने आक्ह्रिल् लबर, चोंमैं स्‍युमिने आक्ह्रिल् लबर ङ युब् ग।
MAT 10:36 म्‍हिए शत्तुर ह्रोंसए परवा न्होंर्बैन् तब्‍मुँ।
MAT 10:37 “खाबइ ङ भन्दा ह्रोंसए आबा-आमाए म्हाँया ल्हें लमुँ, च ङए म्‍हि तल् आखाँ। छलेन खाबइ ङ भन्दा ह्रोंसए च्‍ह-चमिए म्हाँया ल्हें लमुँ च ङए म्‍हि तल् आखाँ।
MAT 10:38 खाबइ ह्रोंसए क्रूस नोसि ङए लिलि आल्‍हैदि च ङए म्‍हि तल् आखाँ।
MAT 10:39 खाबइ ह्रोंसए ज्यु जोगेल् म्‍हैमुँ, चए ज्यु नास तब्‍मुँ। दिलेया ङए चेला तसि ह्रोंसए ज्यु पिंब्मैंइ जीबन योंब्‍मुँ।”
MAT 10:40 “क्‍हेमैंलाइ मान लब्मैंइ ङलाज्यै या मान लमुँ, धै ङलाइ मान लब्मैंइ ङ कुल्‍मिंबै परमेश्‍वरलाज्यै या मान लम्।
MAT 10:41 खाबइ ‘चु म्‍हि अगमबक्‍ता ग,’ बिसि अगमबक्‍तालाइ मान लमुँ, चज्यै या अगमबक्‍ताइ योंबै इनाम योंब्मुँ। छलेन ठिक के लबै म्हिलाइ ठिक के लबै म्हिन् मैंसि मान लब्मैंइ ठिक के लबै म्हिइ योंबै इनाम योंब्मुँ।
MAT 10:42 ‘चु म्‍हि येशूए म्‍हि ग,’ बिसि खाबज्यै ङए धाँसे च्‍योंबै चेलालाइ गिलाँस घ्रि ङ्युँबै क्‍यु मत्‍त्रे पिंनाबिले या चइ योंल् त्हुबै इनाम योंब्‍मुँ।”
MAT 11:1 येशूजी ह्रोंसए च्युसे ङ्हिं चेलामैंने लोदा सैंदा लल् खाँबै लिउँइँ चमैंए सहरजरे म्‍हिमैंलाइ लोमिंबर नेरो परमेश्‍वरउँइँले खबै सैं तोंबै ताँ बिबर ह्‍याइ।
MAT 11:2 बप्‍तिस्‍मा पिंबै यूहन्‍नाइ येशू ख्रीष्‍टजी लबै केमैंए बारेर थेसि ह्रोंसए चेलामैं येशू ङाँर ताँमैं ङ्योएबर कुल्‍मिंइ।
MAT 11:3 चमैं ह्‍यासि “ङिए गुरु यूहन्‍नाइ बिब् धोंले युबै म्‍हि क्हिन् उ, ङिइ अर्को म्‍हि अझै प्रेंल् त्‍हुमुँ?” बिसि येशूने ङ्योएइ।
MAT 11:4 येशूजी चमैंने बिइ, “क्‍हेमैंइ थेबै ताँमैं नेरो म्रोंबै केमैं यूहन्‍ना ङाँर ह्‍यासि बिद्।
MAT 11:5 कनमैंइ मि म्रोंइमुँ, डुँड्मैं प्रइमुँ, कोर खब्‍मैं सइमुँ, न्ह आथेब्मैंइ न्‍ह थेइमुँ, सियाब्‍मैं सोइमुँ धै ङ्हाँदुमैंने परमेश्‍वरउँइँले खबै सैं तोंबै ताँ बिमिंइमुँ।
MAT 11:6 चु ताँ या बिद्, ङए ताँ क्वेंसि तोइ संका आलबै म्‍हिइ आशिक योंब्मुँ।”
MAT 11:7 झाइले यूहन्‍नाए चेलामैं ह्‍याबै लिउँइँ येशूजी यूहन्‍नाए बारेर चर खबै म्‍हिए हुलने बिइ, “क्हेमैं क्यु आयोंबै क्ल्ह्‍योर तो ङ्‌ह्‍योबर ह्‍याल? खैंइ लारिबै म्वो ङ्‌ह्‍योबर ह्‍याल् वा?
MAT 11:8 आङिं बिस्‍याँ, तो ङ्‌ह्‍योबर ह्‍याल? छ्याँबै क्‍वें खिबै म्‍हि ङ्‌ह्‍योबर ह्‍याल् वा? छ्याँबै क्‍वें खिबै म्‍हिम् म्रुँमैंए दरबारर टिम्।
MAT 11:9 बित्ति, क्‍हेमैं क्‍ह्रोंसेंन् तो ङ्‌ह्‍योबर ह्‍याल? अगमबक्‍ता ङ्ह्‍योबर ह्‍याल् वा? ओं, ङ क्ह्रोंसेंन क्हेमैंने बिमुँ, अगमबक्‍ता भन्दा थेबै म्हि घ्रि क्हेमैंइ म्रोंइमुँ,
MAT 11:10 तलेबिस्याँ चु यूहन्‍नाए बारेर परमेश्‍वरए छ्वेर छले प्‍ह्रिइमुँ, ‘ङ्‍ह्‍योद्, क्हिए घ्‍याँ तयार लमिंरिगे बिसि क्हि भन्दा ओंसों ङइ ङए स्यार्बो कुल्मिंम्।’
MAT 11:11 क्ह्रोंसेंन ङ क्हेमैंने बिमुँ, च्हमिरिउँइँले फिब्मैं न्होंर बप्‍तिस्‍मा पिंबै यूहन्‍ना भन्दा थेबै म्‍हि अरू खाबै आतइमुँ। दिलेया स्वर्गर्बै ग्याल्सर ताँन् भन्दा च्योंब तब्मैं यूहन्‍ना भन्दा थेब तमुँ।
MAT 11:12 यूहन्‍नाइ सैं तोंबै ताँ बिमिंबै त्हेउँइँले तोगो समा स्वर्गर्बै ग्याल्स युन्ले ओंसों ह्‍यारिइमुँ। बिरोध लब्मैं बिस्याँ खैच्हिजिले च ग्याल्स ट्होल् म्हैम्।
MAT 11:13 तलेबिस्याँ बप्‍तिस्मा पिंबै यूहन्‍नाए पलो समा स्‍योंम्‍बै अगमबक्‍तामैं नेरो मोशाइ प्‍ह्रिबै ठिमर स्‍वर्गर्बै ग्याल्सए बारेर बिल।
MAT 11:14 क्हेमैंइ क्वेंम् बिस्याँ, युल् त्हुबै एलिया यूहन्‍नान् ग।
MAT 11:15 न्ह मुँब्मैंइ थेरिगे।”
MAT 11:16 “ङइ चु पुस्तार्बै म्‍हिमैं तो सैने च्हैंले? चुमैंम् बजारर क्‍ल्योंबै कोलोमैं धों तब् ग। चमैंइ थुमैं हुइसि छ बिसि ताँ लम्,
MAT 11:17 ‘ङिइ क्‍हेमैंए ल्हागिर मुरलि ह्रामिंइ, दिलेया क्‍हेमैं आसे। ङि न्हुँ लसि क्रोमा क्‍हेमैं खाबै या न्हुँ आल।’
MAT 11:18 छलेन बप्‍तिस्‍मा पिंबै यूहन्‍नाइ परमेश्‍वरए मिंर बर्त टिब्रें लमल, चइ प्हा या आथुँमल। दिलेया म्‍हिमैंइ ‘चलाइ मोंइ स्‍याइमुँ!’ बिमल।
MAT 11:19 म्हिए च्ह युसि चब् थुँब् लमा ‘ङ्‍ह्‍योत्ति, च चब्लाँ, प्हा को, बालि रेब्‍मैं नेरो अरू पापिमैंए थु!’ बिसि म्‍हिमैंइ बिमल। दिलेया परमेश्‍वरए बुद्धिए केमैं म्रोंसिन् क्ह्रोसेंन्ले बुद्धि छ्याँब् मुँन बिबै ताँ क्हेमैंइ सेल् खाँम्।”
MAT 11:20 येशूजी ल्‍हें औदिबै केमैं लबै नाँसजरेबै म्हिमैंइ खेंमैंइ लबै पाप पिसि परमेश्‍वरउँइँ सैं आए। छतसि खीजी चमैंने धिक्‍कार क्हेमैं बिदै।
MAT 11:21 “ओ खोराजीनथेंमैं नेरो बेथसेदाथेंमैं! धिक्‍कार मुँ क्‍हेमैं, तलेबिस्याँ क्हेमैं ङाँर लब् धोंबै औदिबै केमैं टुरोस नेरो सिदोन सहरजरे लस्याँ चमैंइ स्योंमन् ह्रेंगा खिसि मेब्ब्रो फोसि खेंमैंइ लबै आछ्याँबै केमैं पिसि परमेश्‍वरउँइँ सैं एमल।
MAT 11:22 ङ क्हेमैंने बिमुँ, परमेश्‍वरजी निसाफ लबै त्हिंइर च टुरोस नेरो सिदोनथेमैंइ भन्दा क्‍हेमैंइ थेबै सजैं योंब्मुँ
MAT 11:23 ओ कफर्नहुमथेंमैं, क्‍हेमैं स्वर्गर्न फेनेम् बिल् वा? आङिं! क्‍हेमैं नर्गर्न भ्‍योंवाब्‍मुँ। तलेबिस्याँ क्‍हेमैं ङाँर लब् धोंबै औदिबै केमैं सदोम सहरर लस्‍याँ च सहर नास आतल्‍ले तोगो समा तरिमल।
MAT 11:24 छतसि ङ क्हेमैंने बिमुँ, परमेश्‍वरजी निसाफ लबै त्हिंइर सदोमथेंमैंइ भन्दा क्‍हेमैंइ ल्हें सजैं योंब्मुँ।”
MAT 11:25 च त्हेर्न येशूजी प्राथना लसि “ओ आबा, स्वर्ग नेरो पृथ्‍बीर्बै क्‍ल्‍हे, ङ क्‍हिलाइ धन्‍यबाद पिंम्, तलेबिस्याँ ज्ञान बुद्धि मुँ बिसि ह्रब्-सेब् प्हैंब्मैंउँइँले क्‍हिजी चु ताँमैं लोथेंइ। दिलेया कोलोमैं धों तबै तोइ आसेबै म्‍हिमैंलाइ क्हिजी चु ताँ क्‍होल् लमिंइ।
MAT 11:26 ओ आबा, क्हिजी छान् लब छ्याँब ङ्हाँइ।”
MAT 11:27 येशूजी धबै बिइ, “ङए आबाजी तोन्दोंरि सै ङने पिंइमुँ। परमेश्‍वर आबाजी बाहेक अरू खाबज्‍यै परमेश्‍वरए च्‍हलाइ ङो आसे। छलेन च्ह बाहेक खाबज्यै परमेश्‍वर आबालाइ ङो आसे। ‘परमेश्‍वर आबा ङो सेरिगे’ बिसि च्हजी तेंमिंब्मैंइ मत्‍त्रे परमेश्‍वर आबा ङो सेमुँ।
MAT 11:28 “ओ ताँन् ल्हिबै ते नोसि नारब्मैं, ङ ङाँर खो, ङइ क्‍हेमैंलाइ भों न्‍हल् पिंब्मुँ।
MAT 11:29 ङए खर्गु नोद्, धै ङने बालु लोद्, तलेबिस्याँ ङ ताँनए फिर ल्हयो खम्, धै ङ थेब् आप्‍हैं। छतसि क्‍हेमैंए सैंर छिं ङ्हाँल् योंब्मुँ।
MAT 11:30 तलेबिस्याँ ङइ नोल् पिंबै खर्गु कर योंब नेरो ङइ नोल् पिंबै ते योंब्मुँ।”
MAT 12:1 येशू प्रिबै त्हिंइर गहुँ बारिए घ्याँउँइँले ह्‍यारिल। खीए चेलामैं फो ख्रेंसि गहुँए नाँ थुसि चबर होंइ।
MAT 12:2 छले चब् म्रोंसि फरिसीमैंइ खीने बिइ, “ङ्‍ह्‍योत्ति, क्‍हिए चेलामैंइ प्रिबै त्हिंइर तो लल् आत चन् लइमुँ।”
MAT 12:3 दिलेया खीजी चमैंने बिइ, “क्‍हेमैंइ परमेश्‍वरए छ्वे खोंयोंइ आखेइमुँ वा? ङ्योए खे दाऊद म्रुँ नेरो खीने मुँब्मैं फो ख्रेंमा खै लल?
MAT 12:4 खी मन्दिर न्होंर होंसि परमेश्‍वरए मिंर थेंबै क्हें चवाल। छ्वेर प्ह्रिब् धोंले च क्‍हें खेगिमैंइ बाहेक खाबज्यै या चल् आतमल।
MAT 12:5 झाइले क्‍हेमैंइ मोशाइ प्ह्रिबै ठिमर्बै ताँ आखेइमुँ वा? प्रिबै त्हिंइर मन्दिरर के लबै खेगिमैंइ के लब्रें लमा ठिमइ बिब् धोंले आल। दिलेया चमैं परमेश्‍वएर उँइँर छ्याब् आरेबन् ठर्दिम्।
MAT 12:6 ङ क्‍हेमैंने बिमुँ, मन्दिर भन्दा झन् थेबै सै चुर मुँ।
MAT 12:7 ‘ख्रो पिंब्‍मैं म्रोंसि ङ सैं आतों बरु ल्हयो खब्मैं म्रोंसि ङ सैं तोंम्,’ बिसि छले छ्वेर प्‍ह्रिइमुँ। चु ताँ क्‍ह्रोंसेंन छेनाले क्‍होइबिस्‍याँ क्‍हेमैंइ चु छ्याब् आरेबै म्‍हिमैं छ्याब् आल्‍हैदिमल।
MAT 12:8 तलेबिस्याँ ‘म्‍हिए च्‍ह’ प्रिबै त्हिंइर्बै या क्‍ल्‍हे ग।”
MAT 12:9 येशू च क्‍ल्‍ह्‍योउँइँले त्होंसि चमैंए च्हों धिंर ह्‍याइ।
MAT 12:10 चर यो कार‍याबै म्‍हि घ्रि मुँल। चमैंइ येशूलाइ छ्याब् ल्‍हैदिबै सैं लसि खीने “प्रिबै त्हिंइर म्‍हि सल् लब तम्मा?” बिसि ङ्योएइ।
MAT 12:11 येशूजी चमैंने बिइ, “क्‍हेमैं न्‍होंरि म्‍हि घ्रिए क्‍यु घ्रि प्रिबै त्हिंइर होंल्‍दोंर होंयास्याँ चैंसि बैरु आते रो वा?
MAT 12:12 क्‍यु भन्दा म्‍हि झन् बेल्‍ले थेब मुँ! छतसि प्रिबै त्हिंइर के लब ठिक मुँ।”
MAT 12:13 झाइले खीजी यो कारयाबै म्हिने “यो स्‍योंन् बिइ।” च म्‍हिइ यो स्‍योंमा च यो सयासि अर्को यो धोंबन् त‍याइ।
MAT 12:14 दिलेया फरिसीमैं बैरु त्‍होंसि येशूलाइ खैले सैब् ङ्‍हे बिसि खीए बिरोधर मत लइ।
MAT 12:15 खीलाइ सैबै मत लबै ताँ था सेसि येशू च क्ल्ह्‍योउँइँले ह्‍याइ। छले ह्‍यामा ल्‍हें म्‍हिमैं खीए लिलि ल्‍हौदिइ, धै खीजी ताँन् नबै म्‍हिमैं सल् लमिंइ।
MAT 12:16 दिलेया खीजी चमैंने “ङ खाब् जा बिसि खाबलसज्यै आबिद्,” बिइ।
MAT 12:17 यशैया अगमबक्‍ताइ बिबै ताँ पूरा तबर छ तब् ग:
MAT 12:18 “ङ्ह्‍योत्ति, ङए के लबै म्हि, खीलाइ ङइ त्हाँइमुँ। ङइ खीलाइ खोम्, खी म्रोंसि ङ बेल्‍ले सैं तोंइमुँ। खीए फिर ङए प्ल्ह कुल्मिंब्मुँ। छतसि खीजी ताँन् ह्रें-ह्रेंमैंए फिर निसाफ लब्‍मुँ।
MAT 12:19 खी खाब्ने या प्होंरिब् आरे, धै खोंयोंइ थेबै कैले ओररिब् आरे। खीए कै घ्‍याँजरे खाबज्यै थेरिब् आरे।
MAT 12:20 तियाबै म्वो खीजी चोरिब् आरे सिबि छेबै मेंदों सिल् पिंरिब् आरे। छेनाले निसाफ तरिगे बिसि खीजी खोंयोंइ भों आन्‍हल्‍ले के लब्‍मुँ।
MAT 12:21 छतसि खीए मिंर्न ताँन् ह्रेंमैंइ आशा थेंब्‍मुँ।”
MAT 12:22 झाइले मोंइ स्‍यासि कन तबै लडा म्‍हिमैंइ येशूए ङाँर पखइ। येशूजी च म्‍हि सल् लमिंमा च म्‍हि म्रोंल् खाँब, पोंल् खाँब् त‍याइ।
MAT 12:23 छले सल् लमिंब् म्रोंसि चर्बै म्‍हिमैं प्लेटोयासि “चु म्‍हि ङ्योए खे दाऊद म्रुँए च्ह मुइ उ?” बिबर होंइ।
MAT 12:24 चु ताँ थेसि फरिसीमैंइ बिइ, “चु म्हिइ मोंए म्रुँ बालजिबुलए शक्‍तिउँइँले मोंमैं ल्‍हाम्।”
MAT 12:25 येशूजी चमैंए सैंर्बै ताँ था सेसि फरिसीमैंने बिइ, “ह्रों-ह्रोंसए न्होंर्न आक्ह्रिसि प्होंब्-नेब् लस्याँ च ह्‍युल नास त‍याब्‍मुँ। छलेन खाब् मुँले सहर अथवा धिं घ्रिर्बै परवामैं प्होंब् नेब् लस्याँ चमैं या नास तयाम्।”
MAT 12:26 छलेन दुष्‍टइ दुष्‍टलाइन ल्‍हाइबिस्‍याँ चमैं या खें-खेंमैए न्होंर्न आक्ह्रिस्याँ चमैंए ग्याल्स खैले टिक्दिल् खाँमुँ?
MAT 12:27 ङइ बालजिबुलए शक्‍तिउँइँले मोंमैं ल्‍हाम् बिसि क्हेमैंइ बिम् बिस्याँ, क्‍हेमैंए चेलामैंइ खाबै शक्‍ति योंसि मों ल्‍हाम्? छतसि क्हेमैंए चेलामैंइन क्हेमैंए ताँ क्ह्रोंसेंन् आङिं बिसि क्हेमैंए फिर निसाफ लब्मुँ।
MAT 12:28 ङइ परमेश्‍वरए पबित्र प्ल्हए शक्‍तिउँइँले मों ल्‍हाब् ग बिस्याँ परमेश्‍वरए ग्याल्स क्‍हेमैंए ङाँर युल् खाँइमुँ।
MAT 12:29 “भोंबै म्‍हिलाइ आफैन् समा खाबइ चए धिं न्होंर होंसि चए सै न्होर ह्‍योल् खाँमुँ? च भोंबै म्हि फैबै लिउँइँ मत्‍त्रे चए धिंर ह्‍योल् खाँम्।
MAT 12:30 “ङए लिलि आप्रबै म्‍हि ङए बिरोधी ग, ङने बालु रोमैं आखुबै म्हिइ ताँन् हिनामिंना लवाम्।
MAT 12:31 छतसि ङ क्हेमैंने बिमुँ, म्हिमैंइ लबै पाप केमैं नेरो परमेश्‍वर स्यारबै ताँमैं क्षमा योंल् खाँम्, दिलेया पबित्र प्ल्हए बिरोधर पोंबै ताँमैं नेरो आछ्याँबै केमैंए क्षमा योंरिब् आरे।
MAT 12:32 ‘म्हिए च्‍हए’ बिरोधर पोंब्मैंइ क्षमा योंल् खाँम्। दिलेया पबित्र प्ल्हए बिरोधर पोंबै म्‍हिमैंइ चु छ्हर मत्‍त्रे आङिं लिउँइँबै छ्‍हरै या क्षमा योंरिब् आरे।
MAT 12:33 “छ्याँबै रोमैं रोबै ल्हागिर धुँ या छ्याँबन् तल् त्हुम्, धुँ आसोबर्दिस्‍याँ रोमैं या छ्याँब आरो। रोउँइँलेन् धुँ छ्याँब नेरो आछ्याँब फेलम्।
MAT 12:34 ओ प्‍हुरिए सन्‍तानमैं! क्‍हेमैंन् दुष्‍ट मुँसेरो खैले छ्याँबै ताँ पोंल् खाँमुँ? तलेबिस्याँ सैंर प्लिंबै ताँमैंन् सुँउँइँले पोंम्।
MAT 12:35 छ्याँबै सैं प्ह्‍याबै म्हिइ ह्रोंसए सैंर मुँबै छ्याँबै ताँमैंउँइँले छ्याँबै ताँन् पोंमुँ। आछ्याँबै सैं प्ह्‍याबै म्‍हिइ ह्रोंस् न्‍होंर्बै आछ्याँबै सैमैंउँइँले आछ्याँबै ताँमैंन् पोंम्।
MAT 12:36 “छतसि ङ क्हेमैंने बिमुँ, स्योलिबै ताँमैं पोंबै म्हिमैंइ निसाफ लबै त्हिंइर चमैंइ खेंमैंइ पोंबै स्योलिबै ताँमैंए लेखा पिंल् त्‍हुब्मुँ।
MAT 12:37 तलेबिस्याँ क्‍हिइ पोंबै ताँमैंउँइँलेन् क्हेमैं छ्याब् मुँब नेरो छ्याब् आरेब ठर्दिब्मुँ।”
MAT 12:38 को-कोइ शास्‍त्रिमैं नेरो फरिसीमैंइ येशूने बिइ, “ओ गुरु, क्हिउँइँले ङि औदिबै चिनु घ्रि ङ्‍ह्‍योदा ङ्हाँइमुँ।”
MAT 12:39 खीजी चमैंने बिइ, “तिंजोरोबै दुष्‍ट म्‍हिमैं नेरो ब्यभिचार लब्मैंइ चिनु म्हैम्। दिलेया स्‍योंम्‍बै योना अगमबक्‍ताइ उँइँबै औदिबै के बाहेक चु पुस्ताने अरू चिनु उँइँरिब् आरे।
MAT 12:40 तलेबिस्याँ खैले योना थेबै ताँगए फो न्‍होंर सोंरो समा टिइ, छलेन म्हिए च्ह या सोंरो समा स न्होंर टिब्‍मुँ।
MAT 12:41 झाइले परमेश्‍वरजी निसाफ लबै त्हिंइर निनवेथेंमैंइ क्‍हेमैं छ्याब् ल्‍हैदिब्‍मुँ। तलेबिस्याँ चमैंइ योनाइ बिबै ताँ थेसि खेमैंए आछ्याँबै केमैंउँइँले सैं एइ, दिलेया क्‍हेमैंए म्‍हाँजोरि योना भन्दा या थेबै म्‍हि चुर मुँ!
MAT 12:42 निसाफ लबै त्हिंइर ल्हुँर्बै (दक्षिणर्बै) म्रुँस्‍योइ क्‍हेमैंने छ्याब् ल्‍हैदिब्‍मुँ। तलेबिस्याँ च म्रुँस्‍यो सोलोमन म्रुँए बुद्धिए ताँ थेबर ह्रेंगोर्बै ह्‍युलउँइँले खइ। दिलेया सोलोमन म्रुँ भन्दा थेबै म्‍हि चुर मुँ!
MAT 12:43 “मों म्‍हिउँइँले त्‍होंइ ह्‍यासि टिबै ल्हागिर छ्याँबै क्ल्ह्‍यो म्‍हैदै क्यु आरेबै क्ल्ह्‍योजरे प्ररिम्। झाइले खनिरै टिबै क्‍ल्‍ह्‍यो आयोंस्‍याँ
MAT 12:44 ‘ङइ पिथेंबै धिंउँइँ एह्‍याल् त्हुइ’ बिसि च एखम्। छले एखमा च क्‍ल्‍ह्‍यो खाँसों ङ्हाँन् लथेंब स्याब्मुँ।
MAT 12:45 छतमा च ह्‍यासि ह्रोंस् भन्दा दुष्‍ट मोंमैं ङि हुइसि पखम्। धै चमैं ताँन् न्‍होंर होंसि चर्न टिमुँ च्‍हौ तल् खाँबै लिउँइँ च म्‍हिए हालत ओंसोंबै भन्दा झन् आछ्याँब तम्। तिंजोरोबै दुष्‍ट के लबै म्‍हिमैंए हालत या छाबन् तब्‍मुँ।”
MAT 12:46 येशूजी म्‍हिए हुलने चु ताँमैं पोंरिमा खीए आमा नेरो अलिमैं खीने ताँ लदा ङ्हाँसि बैरु रारिल।
MAT 12:47 छतसि चर्बै म्‍हि घ्रिइ येशूने बिइ, “क्‍हिए आमा नेरो अलिमैं क्‍हिने बालु ताँ लदा ङ्हाँइमुँ बिसि बैरु रारिइमुँ।”
MAT 12:48 छबिमा येशूजी चने बिइ, “ङए आमा खाब् जा? ङए अलिमैं खाब् जा?”
MAT 12:49 झाइले येशूजी ह्रोंसए चेलामैंउँइँ तेंसि बिइ। “ङ्‍ह्‍योद्, ङए आमा नेरो अलिमैं चुमैंन् ग।
MAT 12:50 तलेबिस्याँ स्वर्गर मुँबै ङए परमेश्‍वर आबाए सैंर मैंब् धोंले लब्मैंन् ङए अलि, ङए अङाँ, ङए आमा ग।”
MAT 13:1 च त्हिंइर्न येशू धिंउँइँले त्‍होंसि तालए छेउर ह्‍यासि क्हुँरिमा।
MAT 13:2 म्‍हिए हुल खीए खागु तखइ। छतसि खी डुँङ्गार क्रेसि क्हुँइ, म्‍हिए हुल बिस्याँ तालए रेर्न रारिइ।
MAT 13:3 खीजी चमैंलाइ ल्हें ताँ अहानउँइँले लोमिंइ। छले लोमिंमा येशूजी बिइ, “म्‍हि घ्रि प्‍लु प्‍लुबर ह्‍याइ।
MAT 13:4 चइ प्‍लु प्‍लुमा कोइ प्‍लु घ्‍याँर तेइ। घ्‍याँर तेबै प्‍लुमैं नेमामैं खसि चवाइ।
MAT 13:5 कोइ प्‍लुमैं गेगरर तेइ। चर स ल्‍हें आरेबइले प्‍लु युनन् म्‍लोइ।
MAT 13:6 दिलेया जरा छेन्‍ले च्‍योंल् आयोंबइले त्‍हिंयाँ प्रेबै तोदोंन् च प्लु ङ्योंलोंयासि कारयाइ।
MAT 13:7 कोइ प्‍लुमैं पुजुए ल्होंर तेइ धै पुजुए छ्यारइ लमा च प्लु सैवाइ।
MAT 13:8 दिलेया कोइ प्‍लुमैं छ्याँबै सर तेइ, धै कोइ प्र, कोइ ट्हुच्‍यु, कोइ सोंच्यु गुणा रो रोइ।
MAT 13:9 “न्ह मुँब्मैंइ थेरिगे।”
MAT 13:10 झाइले चेलामैं येशूए ङाँर खसि “क्‍हिइ तले म्हिमैंने अहानउँइँले मत्‍त्रे ताँ लमुँ?” बिसि खीने ङ्योएइ।
MAT 13:11 छबिमा येशूजी चमैंने बिइ, “परमेश्‍वरजी स्‍वर्गर्बै ग्याल्सए न्होंर्बै ताँमैं क्‍हेमैंलाइ सेल् पिंइमुँ। दिलेया अरू म्हिमैंलाइ बिस्‍याँ खीजी चुए बारेर सेल् आपिंइमुँ।
MAT 13:12 ङइ लोमिंबै ताँ छेनाले थेब्मैंइ झन् क्होल् योंब्मुँ। दिलेया ङए ताँ आथेब्मैंइ क्होइ बिसि ह्रब् प्हैंलेया चमैं ङाँइँले प्हेंवाब्मुँ।
MAT 13:13 म्हिमैंइ ङ्‌ह्‍योबम् ङ्‍ह्‍योमुँ दिलेया आम्रों, थेबम् थेमुँ, दिलेया आक्‍हो। छतसि ङ चमैंने अहानउँइँले मत्‍त्रे पोंम्।
MAT 13:14 स्‍योंम्‍बै यशैया अगमबक्‍ताइ बिबै ताँ चमैंने क्‍ह्रिखइमुँ: क्‍हेमैंइ थेबम् थेमुँ, थेलेया आक्‍हो, ङ्‌ह्‍योबम् ङ्‌ह्‍योमुँ, दिलेया आम्रों।
MAT 13:15 तलेबिस्याँ चु म्‍हिमैंए सैं क्होल् आखाँब् तइमुँ। चमैंए न्‍ह थेल् आखाँब् तइमुँ, झाइले चमैंए मि च्युँ लइमुँ। तिंयाँ चमैंए मिइ म्रोंल् खाँस्‍याँ, चमैंए न्‍हइ थेल् खाँस्‍याँ, झाइले चमैंए सैंइ क्‍होल् खाँस्‍याँ, चमैं ङ ङाँइ एखमल, धै ङइ चमैं सल् लमिंमल।
MAT 13:16 “दिलेया क्हेमैंइ आशिक योंइमुँ, तलेबिस्याँ क्हेमैंए मिइ छेनाले म्रोंल् खाँमुँ, क्‍हेमैंए न्हइ छेनाले थेल् खाँमुँ।
MAT 13:17 क्ह्रोंसेंन ङ क्हेमैंने बिमुँ, क्‍हेमैंइ म्रोंबै के नेरो थेबै ताँ स्‍योंम्‍बै अगमबक्‍तामैं नेरो ठिक के लब्मैंइ म्रोंदा ङ्हाँलेया म्रोंल् आयोंल। थेदा ङ्हाँलेया थेल् आयोंल।
MAT 13:18 “तारे प्‍लु प्‍लुबै ताँए अर्थ थेद्।
MAT 13:19 कोइ म्‍हिमैंइ स्‍वर्गर्बै ग्याल्सए बारेर थेलेया क्‍होल् आखाँ। छतसि चमैं घ्‍याँर तेबै प्‍लु धोंन् तब् ग। चमैंए सैंउँइँले दुष्‍टइ च प्‍लुमैं प्‍हेंवाम्।
MAT 13:20 खाबइ परमेश्‍वरए ताँ थेबै तोदोंन् सैं तोंसि युनन् क्वेंमुँ, च गेगरर तेबै प्‍लु धोंन् तब् ग।
MAT 13:21 चए जरा छेनाले सर च्योंल् आयोंबइले ल्‍हें त्हे समा सोल् आखाँ। तलेबिस्याँ परमेश्‍वरजी बिब् धोंले प्ररिमा तोइ दुःख तबै तोदोंन् च लिउँइँ स्योह्‍याम्।
MAT 13:22 पुजुर तेबै प्लु धों तबै म्हि छाब् ग: चइ परमेश्‍वरए ताँ थेलेया चु ह्‍युलर्बै न्हुँ नेरो मुइए लोबइ लमा चइ थेबै ताँर च भोंसि तल् आखाँ। छतसि तोइ रोमैं रोल् आखाँ।
MAT 13:23 मलिलो सर तेबै प्‍लु परमेश्‍वरए ताँ थेसि क्वेंबै म्‍हि धोंन् तब् ग: चइ कोइ प्र, कोइ ट्हुच्‍यु धै कोइ सोंच्‍यु गुणा रोमैं रोम्।”
MAT 13:24 येशूजी चमैंने धबै अहान् घ्रि बिइ, “स्‍वर्गर्बै ग्याल्स छ्याँबै प्‍लु प्‍लुबै म्‍हि धोंन् तब् ग। चइ छ्याँबै गहुँ प्लु म्रोंर प्लुइ।
MAT 13:25 दिलेया म्‍हुँइँसर म्‍हिमैं रोबै त्हेर चए शत्तुर खसि गहुँए न्होंरि सम्रिं रुँइँथेंसि ह्‍याइ।
MAT 13:26 झाइले प्‍लुमैं बडिसि नाँ त्‍होंबर होंमा सम्रिं या म्रोंइ।
MAT 13:27 च क्‍ल्‍हेए के लबै म्हिमैं खसि क्‍ल्‍हेने बिइ, ‘ओ चिब, क्‍हिइ म्रोंर छ्याँबै प्‍लु प्‍लुइ, आङिं वा? चर सम्रिं खनिउँइँले खइ?’
MAT 13:28 “क्‍ल्‍हेइ चमैंने बिइ, ‘चु खाब् मुँले शत्तुरइ लब् ग।’ “के लबै म्हिमैंइ ‘ङि ह्‍यासि ताँन् सम्रिं स्‍युइवाले वा?’ बिमा
MAT 13:29 “क्‍ल्‍हेइ बिइ, ‘तोगो आस्‍युइद्! तोगो च सम्रिं स्‍युइस्‍याँ गहुँ या सम्रिंने बालुन् स्‍युवाब्मुँ।
MAT 13:30 तोगो रा-रोमैं खुबै त्हे आतन् समा ङ्हिथुन् बालुन् बडिल् पिंन्। रा-रोमैं खुबै त्हेर ङए म्रोंमैंने “ओंसों सम्रिंमैं स्‍युइसि मिर ख्रोंवाबै ल्हागिर प्हैं फैद्। धै गहुँ ङए भकारिर खागु लसि थेंन् बिसि,” ङइ बिब्मुँ।’”
MAT 13:31 येशूजी चमैंने अर्को अहान या बिइ, “स्‍वर्गर्बै ग्याल्स पासगिए प्‍लु धोंन् तब् ग। म्‍हि घ्रिइ च प्‍लु ह्रोंसए म्रोंर प्‍लुइ।
MAT 13:32 प्‍लुमैं न्‍होंरि धाँसे च्‍योंबै फुँ चुन् तम्। दिलेया चु बडिबै लिउँइँ बिस्‍याँ ताँन् ट्हा ट्हुमैं भन्दा थेबै धुँ या चुलन् तम्। छतसि मुर्बै नेमामैं खसि चए हाँगजरे च्‍हों थासि टिम्।”
MAT 13:33 खीजी चमैंने धबै अर्को अहान् बिइ, “स्‍वर्गर्बै ग्याल्स प्लेढा धोंन् तब् ग। च्हमिरि घ्रिइ प्रो सोंब्‍योंर च्युगुदे प्लेढा झोंसि क्हें झोंमा च ताँन् क्हें फुल्दिम्।”
MAT 13:34 येशूजी म्‍हिमैंने चु ताँन् ताँमैं अहानउँइँले बिमिंइ। खीजी तोन्दोंरि ताँ अहानउँइँले मत्‍त्रे लोमिंमल।
MAT 13:35 अगमबक्‍ताइ बिबै ताँ पूरा तबर येशूजी छले पोंइ। स्योंमन् च म्हिइ छले प्ह्रिल, “ङ चमैंने अहानउँइँले पोंब्‍मुँ। ह्‍युल केब् ओंनोंबै लोथेंबै ताँमैं ङइ बिमिंब्‍मुँ।”
MAT 13:36 झाइले खी चर्बै म्‍हिए हुल वाथेंसि धिंर ह्‍यामा खीए चेलामैं खी ङाँर खसि “ङिने म्रोंर्बै सम्रिंए अर्थ बिमिंन्,” बिइ।
MAT 13:37 चमैंए ताँ थेसि खीजी चमैंने बिइ, “छ्याँबै प्‍लु प्‍लुबै म्हि म्हिए च्ह ग।
MAT 13:38 म्रों ह्‍युल ग। छ्याँबै प्‍लु बिस्याँ स्‍वर्गर्बै ग्याल्सर्बै सन्‍तान ग, धै सम्रिं दुष्‍टए सन्‍तान ग।
MAT 13:39 सम्रिं प्‍लुबै शत्तुर दुष्‍ट ग। रा-रोमैं खुबै त्हे बिस्याँ चु ह्‍युल नुयाबै त्हे ग। झाइले रा-रोमैं खुबै म्रोंमैं स्‍वर्गदूतमैं ग।
MAT 13:40 सम्रिं स्युइसि मिर ख्रोंवाब् धोंले चु ह्‍युल नुयाबै त्हेरै या छान् तब्‍मुँ।
MAT 13:41 च त्हिंइर म्हिए च्हजी ह्रोंसए स्‍वर्गदूतमैं ह्‍युलर कुल्‍मिंब्‍मुँ, धै पाप लबर ल्हैदिब्मैं नेरो आछ्याँबै के लब्मैं ताँनलाइ चमैंइ ङए ग्याल्सउँइँले खागु लसि
MAT 13:42 मिए राबर भ्‍योंवाब्‍मुँ। चर म्हिमैं बेल्‍ले क्रोसि स ह्राब्‍मुँ।
MAT 13:43 झाइले ठिक के लब्मैं खेंमैंए आबाए ग्याल्सरि त्‍हिंयाँ धोंले चारसि टिब्‍मुँ। “न्ह मुँब्मैंइ थेरिगे।”
MAT 13:44 “स्‍वर्गर्बै ग्याल्स म्रोंर पाथेंबै सै न्होर धोंन् तब् ग। म्‍हि घ्रिइ च योंसि लोथेंम्, धै च सैं तोंदै ह्‍यासि ह्रोंसने मुँबै तोन्दोंरि सै चुँसि च म्रों किंम्।
MAT 13:45 “धबै स्‍वर्गर्बै ग्याल्स छ्याँबै मोति म्‍हैबै छों लबै म्हि धोंन् तब् ग।
MAT 13:46 चइ बेल्‍ले सै ल्हें फेबै मोति स्याबै लिउँइँ ह्रोंसने मुँबै तोन्दोंरि सै चुँसि च मोति किंइ।
MAT 13:47 “झाइले स्‍वर्गर्बै ग्याल्स मा ङ्युँइर प्रिंबै जाल धोंन् तब् ग। च जालर ल्हें खालर्बै ताँगमैं फेम्।
MAT 13:48 जालर ताँगइ प्‍लिंबै लिउँइँ जाल प्रिंब्मैंइ जाल छ्योगर चैंपखसि छ्याँ-छ्याँब ताँगमैं ह्रोंसए भाँडोर झोंम्, दिलेया केर आफेब्मैं भ्‍योंवाम्।
MAT 13:49 चु ह्‍युल नुयाबै त्हेरै या छान् तब्‍मुँ: स्‍वर्गदूतमैं युसि दुष्‍ट म्‍हिमैंलाइ ठिक के लब्मैंए म्‍हाँजोउँइँले फेलब्‍मुँ।
MAT 13:50 झाइले मिए राबर भ्‍योंवाब्‍मुँ। चर चमैं बेल्‍ले क्रोसि स ह्राब्‍मुँ।”
MAT 13:51 येशूजी चमैंने “क्‍हेमैंइ चु ताँ क्‍होइ वा?” बिसि ङ्योएमा “चमैंइ क्होइमुँ,” बिसि ज्वाफ पिंइ।
MAT 13:52 धबै येशूजी चमैंने बिइ, “छतसि स्वर्ग ग्याल्सर्बै ताँ योंबै ताँन् शास्‍त्रिमैं धिंर्बै क्‍ल्‍हे धोंन् तब् ग। च धिं क्‍ल्‍हेइ ह्रोंसए धनसारउँइँले छारा नेरो स्योब सैमैं बैरु तेल् खाँम्।”
MAT 13:53 छले चु अहानउँइँले ताँमैं बिल् खाँबै लिउँइँ येशू च क्‍ल्‍ह्‍योउँइँले ह्‍याइ।
MAT 13:54 झाइले ह्रोंसए नाँसर खसि चमैंए च्हों धिंर ताँ लोमिंमा खीए ताँ थेबै म्हिमैं प्लेटोयासि बिइ, “चु छाबै औदिबै केमैं लबै शक्‍ति नेरो बुद्धि चइ खनिउँइँले योंगे?
MAT 13:55 चुम् सिंए के लबै म्हिए च्‍ह आङिं वा? चुए आमाए मिं मरियम आङिं वा? धै याकूब, योसेफ, सिमोन नेरो यहूदा चुए अलिमैं आङिं वा?
MAT 13:56 चुए अङाँमैं या चुर्न मुँ, आङिं वा? चुइ चु ताँन् ताँमैं खनिउँइँले योंगे?”
MAT 13:57 बिसि चमैंइ खीलाइ म्हि आच्हि। दिलेया येशूजी चमैंने बिइ, “अगमबक्‍ताइ ह्रोंसए नाँस नेरो धिंर मान आयों, दिलेया अरू क्ल्ह्‍योजरे खन्‍तोदोंन् मान योंम्।”
MAT 13:58 चमैंइ आक्वेंबइले येशूजी च क्‍ल्‍ह्‍योरि औदिबै केमैं ल्‍हें आल।
MAT 14:1 च त्हेर गालील ह्‍युलर्बै हेरोद म्रुँइ येशूए बारेर्बै ताँ थेइ।
MAT 14:2 चु ताँ थेसि हेरोदइ ह्रोंसए के लब्मैंने बिइ, “च क्‍युर प्‍ल्हुँसि बप्‍तिस्‍मा पिंबै यूहन्‍ना ग। च सिसेया धबै सोसि खना। छतसि चइ छाबै औदिबै के लबै शक्‍ति योंइमुँ।”
MAT 14:3 ह्रोंसए अलि फिलिपए प्ह्रेंस्योए घ्याँउँइँले हेरोदइ ओंसों यूहन्‍ना क्हासि झेलर च्युवाल।
MAT 14:4 तलेबिस्याँ यूहन्‍नाइ ओंसोंन् हेरोदने “ह्रोंसए अलिए प्ह्रेंस्योने ब्ह्‍या लब ठिक आत,” बिल।
MAT 14:5 छतसि हेरोदइ यूहन्‍ना सैबै सैं ललेया चर्बै यहूदी म्हिमैं म्रोंसि ङ्हिंमल। तलेबिस्याँ “यूहन्‍ना अगमबक्‍ता ग,” बिसि चमैंइ म्हाँदिमल।
MAT 14:6 दिलेया हेरोद फिबै त्हिंइ म्हाँदिमा हेरोदियासए च्हमि प्‍ह्रेंमैंए उँइँर म्रुँ सैं तोंन् लबर बेल्‍ले छेन्‍ले सेइ।
MAT 14:7 छाब् म्रोंसि हेरोद बेल्‍ले सैं तोंसि “क्‍हिइ तो ह्रिदा ङ्हाँइमुँ ह्रिद्, तो ह्रिलेया ङइ पिंस्‍यो,” बिसि च छमिंने बाछा फैसि कसम चइ।
MAT 14:8 च छमिइ ह्रोंसए आमाइ बिब् धोंलेन् “बप्‍तिस्‍मा पिंबै यूहन्‍नाए क्र थोसि थलिर झोंसि ङलाइ पिंन्,” बिसि ह्रिइ।
MAT 14:9 छ बिब् थेसि हेरोद म्रुँइ बेल्‍ले न्हुँ लइ, दिलेया चइ च्‍हौ ल्‍हें प्‍ह्रेंमैंए उँइँर बाछा फैबइले “आपिं” बिल् आखाँ।
MAT 14:10 छतसि चइ झेलर मुँबै यूहन्‍नाए क्र थोबर ल्हैदिइ।
MAT 14:11 झाइले चए क्र थलिर पखसि च छमिंने पिंइ। च छमिंइ ह्रोंसए आमा ङाँर बोइ।
MAT 14:12 च लिउँइँ यूहन्‍नाए चेलामैं खसि यूहन्‍नाए सिनु बोसि पाइ। धै चमैं येशू ङाँर ह्‍यासि चर तबै ताँमैं खीने बिइ।
MAT 14:13 छले यूहन्‍ना सैवाइ बिबै ताँ थेबै लिउँइँ येशू खी घ्रिन् डुँङ्गार क्रेसि खाबै आरेबै क्‍ल्‍ह्‍योर ह्‍याइ। येशू ह्‍याइ रो बिब् थेसि नाँसउँइँले म्‍हिए हुल प्हलेइ प्रसि खीए लिलि ल्‍हैदिइ।
MAT 14:14 येशू तालए छेउर फेमा च म्हिए हुल म्रोंसि खीए सैंर बेल्‍ले ल्हयो खइ। धै चमैं न्‍होंर्बै ताँन् नब्मैं सल् लमिंइ।
MAT 14:15 ङेसा तबै लिउँइँ चेलामैं खी ङाँर खसि बिइ, “म्‍हुँइँस तबि छेइमुँ। ङ्यो चुर खाबै आरेबै क्‍ल्‍ह्‍योर मुँ। चु म्‍हिमैं कुल्मिंन्। चुमैं नाँसजरे ह्‍यासि चबै सैमैं किंसि चरिगे।”
MAT 14:16 दिलेया येशूजी चमैंने “चमैं ह्‍याल् आत्हु। क्हेमैंइन चमैं चल् पिंन्,” बिइ।
MAT 14:17 छबिमा चमैंइ खीने बिइ, “ङिने बालु क्हें ङ्‍हबो नेरो ताँग ङ्हिं मत्‍त्रे मुँ।”
MAT 14:18 येशूजी “च सैमैं ङ ङाँर पउ,” बिइ।
MAT 14:19 झाइले खीजी म्‍हिए हुल चउरर क्हुँबर ल्‍हैदिइ। धै च क्‍हें ङ्‌हबो नेरो ताँग ङ्हिं योर छेसि स्‍वर्गउँइँ ङ्‌ह्‍योसि परमेश्‍वरलाइ धन्‍यबाद पिंइ। धै क्‍हें लुँसि चेलामैंने पिंइ। चेलामैंइ म्‍हिए हुलमैं चुमिंइ।
MAT 14:20 चमैं ताँनइ म्रेंन्ले चसि ङैबै क्हें लुँठेमैं चमैंइ खागु लमा च्युसे ङ्हिं ट्हलो तल।
MAT 14:21 चर चब्मैं च्हमिरिमैं नेरो कोलोमैं आच्योल्‍ले हजार ङ्‌ह मुँयुँमैं मुँल।
MAT 14:22 येशूजी म्हिए हुल छाइले कुलमा चेलामैंने “डुँङ्गार क्रेसि ङ भन्दा ओंसों क्‍योंजा ह्‍यारिद्,” बिसि ल्हैदिइ।
MAT 14:23 चमैं कुलल् खाँबै लिउँइँ येशू खी घ्रिन् कोंर प्राथना लबर ह्‍याइ। ङेसा तयालेया खी घ्रिन् कोंर्न मुँल।
MAT 14:24 दिलेया चेलामैं क्रेबै डुँङ्गा मा ङ्युँइए छ्योगउँइँले ल्हें ह्रेंगो फेनेल् खाँल। च त्हेर्न खैं उल्टोले खसि क्‍युए भेल्‍गाइ डुँङ्गा प्लिंवाबि छेल।
MAT 14:25 न्‍हाँगर्बै सों ह्राबै त्हेजरे येशू मा ङ्युँइए फि फि प्रसि चेलामैं ङाँर खइ।
MAT 14:26 खी क्‍यु फि फि प्ररिब् म्रोंसि चेलामैं ङ्हिंयाँइ, धै “चुम् मों ग,” बिसि चमैं ङ्हिंसि ओरबर होंइ।
MAT 14:27 दिलेया च तोदोंन् येशूजी चमैंने “आङ्हिंन्, ङन् ग! सैं भोंब् लद्,” बिइ।
MAT 14:28 छबिमा पत्रुसइ खीने बिइ, “ओ प्रभु, क्‍ह्रोंसेंन क्‍हिन् ग बिस्‍याँ, ङलाज्यै या क्‍यु फि फि प्रसि क्‍हि ङाँर खल् पिंन्।”
MAT 14:29 खीजी “तम्, खो,” बिमा पत्रुस डुँङ्गाउँइँले तसि येशू ङाँर ह्‍याबर क्यु फि फि प्रबर होंइ।
MAT 14:30 दिलेया खैं सार्लै खब् म्रोंसि च ङ्हिंयाँइ, धै प्ल्हुँह्‍याबि छेमा “ङलाइ जोगेमिंन्, प्रभु,” बिसि ओबर होंइ।
MAT 14:31 चइ कै तेबै तोदोंन् येशूजी चए योर क्‍हासि “ओ बिश्‍वास आरेबै म्हि, तले संका लल?” बिइ।
MAT 14:32 छ बिसि खेंमैं ङ्हिं डुँङ्गार क्रेबै तोदोंन् खैं टियाइ।
MAT 14:33 धै चेलामैंइ खीलाइ फ्योसि “क्‍ह्रोंसेंन क्‍हि परमेश्‍वरए च्‍हन् मुँन,” बिइ।
MAT 14:34 झाइले खेंमैं क्‍योंजा फेनेबै लिउँइँ गनेसरत बिबै क्‍ल्‍ह्‍योर फेखइ।
MAT 14:35 खेंमैं चर फेनेमा चर्बै म्‍हिमैंइ येशूलाइ ङो सेइ। छतसि चमैंइ च खागुबै नब्मैं खी ङाँर पखो बिसि सँउँसर पिमिंइ। धै म्हिमैंइ ताँन् नब्मैं खी ङाँर पखइ।
MAT 14:36 चमैंइ खीए क्वेंए ङो छुइल् पिंन् बिसि येशूने यो छ्युँ लइ, धै येशूए क्‍वें छुइब्मैं ताँन् सयाइ।
MAT 15:1 यरूशलेमउँइँले को-कोइ फरिसीमैं नेरो शास्‍त्रिमैं खसि येशूने ङ्योएइ,
MAT 15:2 “क्‍हिए चेलामैंइ ङ्योए खेमैंए छ्या तले आम्हाँदि? तलेबिस्याँ चमैंइ कैं चब् भन्दा ओंसों यो आख्रु।”
MAT 15:3 छबिमा खीजी चमैंने बिइ, “क्‍हेमैं या परमेश्‍वरजी बिबै ताँ म्हाँदिब् पिसि ह्रोंसए छ्यार्न तले प्रमुँ?
MAT 15:4 तलेबिस्याँ परमेश्‍वरजी बिइमुँ, ‘ह्रोंसए आबा आमाए मान लद्। ह्रोंसए आबा आमाए बिरोधर आछ्याँब ताँ पोंब्मैं सैवाल् त्हुम्।’
MAT 15:5 दिलेया क्हेमैंइ म्हिमैंलाइ छले लोमिंम्, ‘खाबज्यै ह्रोंसए आबा आमाने “क्हेमैंइ ङउँइँले योंल् त्हुबै सैमैं ङइ परमेश्‍वरए मिंर पिंवाइमुँ” बिस्याँ चइ ह्रोंसए आबा आमाए मान लल् आत्हु,’ बिम्।
MAT 15:6 छतसि क्हेमैंइ ह्रोंसए छ्या म्हाँदिबै ल्हागिरि परमेश्‍वरजी बिबै ताँ आम्हाँदिइमुँ।
MAT 15:7 ओ फिप्लो पार्दिब्मैं, यशैया अगमबक्‍ताइ ओंसोंन् क्‍हेमैंए बारेर ठिकन बिना,
MAT 15:8 ‘चु ह्रेंइ सुँइ मत्‍त्रे ङए मान लम्, दिलेया चमैंए सैं बिस्‍याँ ङ ङाँइँले ह्रेंगो मुँ।
MAT 15:9 चमैंइ ङए मिं किंब फाक्‍कर्न ग, तलेबिस्याँ चमैंइ “चु ताँमैं परमेश्‍वरए ठिम ग” बिसि म्हिमैंइ बनेबै छ्यामैं लोमिंम्।’”
MAT 15:10 झाइले येशूजी म्‍हिमैं खी ङाँर हुइसि “क्‍हेमैंइ चु ताँ छेनाले थेसि क्होद्,” बिइ।
MAT 15:11 “सुँउँइँले न्‍होंर होंबै सैइ म्हि पापर च्होल् आल। बरु सुँउँइँले बैरु त्‍होंबै आछ्याँबै ताँइ म्हिलाइ पापर च्होवाम्।”
MAT 15:12 च लिउँइँ चेलामैं खसि खीने बिइ, “क्‍हिजी बिबै ताँ थेसि फरिसीमैं बेल्‍ले ह्रिस खइमुँ बिब क्‍हिजी सेइमुँ वा?”
MAT 15:13 छबिमा खीजी बिइ, “स्वर्गर मुँबै ङए आबाजी आरुँइँबै धुँमैं जरान् स्‍युवाब्‍मुँ।
MAT 15:14 छतसि च फरिसीमैं म्रोंसि तोइ न्हुँ आलद्। चमैं कन अगुवामैं ग। कनइ कन डोरिदिस्‍याँ, ङ्हिंना ङ्हिंन् होंल्‍दोंर पायाम्।”
MAT 15:15 पत्रुसइ खीने “चु अहानए अर्थ ङिने बिमिंन्,” बिमा
MAT 15:16 येशूजी बिइ, “क्‍हेमैंज्यै या अझै चुए अर्थ आक्‍होइमुँ वा?
MAT 15:17 चबै सै सुँउँइँले फोर फेनेसि बैरु त्‍होंह्‍याम् बिब क्‍हेमैंइ आसेइमुँ वा?
MAT 15:18 दिलेया म्‍हिमैंए सुँउँइँले बैरु त्‍होंबै आछ्याँबै ताँमैं सैं न्‍होंउँइँले बैरु त्‍होंम्। छतसि सैं न्होंउँइँले त्होंबै आछ्याँबै ताँमैंइ म्‍हि पापर च्होवाम्।
MAT 15:19 तलेबिस्याँ म्‍हिए सैंउँइँलेन् आछ्याँब सैं मैंम्। चु आछ्याँब सैंइ लमा चइ म्‍हि सैब, आगुए प्ह्रेंस्यो प्रब, ब्यभिचार लब, आगुए सै न्होर ह्‍योब, स्‍योर तेब, धै फ्रम्दा क्योम्दा लब छाबै पापमैं लम्।
MAT 15:20 म्‍हिलाइ पापर च्होवाबै सैमैं चुन् ग। दिलेया यो आख्रुल्‍ले चब् चमा म्हि पापर आच्हो।”
MAT 15:21 येशू च क्‍ल्‍ह्‍यो पिसि टुरोस नेरो सिदोन बिबै सहर खागुबै ह्‍युलजरे ह्‍याइ।
MAT 15:22 च क्‍ल्‍ह्‍योउँइँले कनान ह्रेंर्बै च्हमिरि घ्रि ओरदै खसि येशूने बिइ, “ओ प्रभु, दाऊदए च्ह, ङए फिर ल्हयो खमिंन्। ङए च्हमि मोंइ स्यासि बेल्‍ले ह्रुगुदिइमुँ।”
MAT 15:23 दिलेया येशूजी चने तोइ ज्वाफ आपिं। छतमा खीए चेलामैं खसि यो छ्युँ लसि च च्हमिरि ओरदै ङ्योए लिलि खरिइमुँ “च च्हमिरि कुल्मिंन्,” बिइ।
MAT 15:24 येशूजी बिइ, “ङम् इस्राएल ह्रेंर्बै म्‍हयाबै क्‍युमैंए ल्हागिर मत्‍त्रे कुलब् ग।”
MAT 15:25 दिलेया च च्हमिरि खसि खीए ओंसों पत्खु तसि “ओ प्रभु, ङलाइ ल्होमिंन्,” बिइ।
MAT 15:26 छबिमा खीजी “कोलोमैंए चबै सै बोसि नगिमैं ङाँर भ्योंवाब छ्याँब आत,” बिइ।
MAT 15:27 च च्हमिरि बिइ, “अँ प्रभु, चु ताँ क्ह्रोसेंन् ग। दिलेया नगिमैंज्यै या ह्रोंसए क्‍ल्‍हेइ चमा तेयाबै फाँ फुँमैं चम्।”
MAT 15:28 चए ताँ थेसि येशूजी चने बिइ, “ओ नानि, ङए फिर क्‍हिइ थेबै बिश्‍वास लना! छतसि क्‍हिए सैंर मैंब् धोंले क्हिए ल्हागिरि तरिगे।” खीजी छ बिबै तोदोंन् च च्हमिरिए च्हमि सयाइ।
MAT 15:29 झाइले येशू च क्‍ल्‍ह्‍योउँइँले एसि गालील मा ङ्युँइए रेउँइँले कोंर ह्‍यासि क्हुँरिमा
MAT 15:30 म्हिए हुल खी ङाँर खागु तखइ। धै खेंमैंने बालु पखबै डुँडमैं, कनमैं, स्यालेमैं, लडामैं नेरो ल्‍हें अरू नब् छब्मैं खीए उँइँर थेंमिंमा खीजी चमैं सल् लमिंइ।
MAT 15:31 लडमैं पोंब, स्यालेमैं सयाब, डुडमैं प्रयाब, कनमैंइ म्रोंल् खाँब् तइ। छाब् म्रोंसि म्‍हिमैं प्लेटोयासि इस्राएल ह्रेंर्बै परमेश्‍वर बेल्‍ले थेब मुँन बिसि खीए मिं क्वेइ।
MAT 15:32 येशूजी खीए चेलामैं खी ङाँर हुइसि बिइ, “चु म्‍हिमैं म्रोंसि ङए सैंर ल्‍हयो खइमुँ। सोंरो ओंनोंन् चुमैं ङने मुँ, तोगो चुमैंने चबै सै या तोइ आरे। ङइ चुमैं फोदेंन् खेंमैंए धिंर कुलदा आङ्हाँ। छलेन् कुलस्‍याँ चुमैं घ्‍याँर्न फो ख्रेंसि प्रलन् आखाँन् तयाब्मुँ।”
MAT 15:33 छबिमा चेलामैंइ बिइ, “च्‍हौ ल्‍हें म्‍हिलाइ चु क्यु आयोंबै क्ल्ह्‍योर ङिइ खनिउँइँले चबै सै पखसि चल् पिंब?”
MAT 15:34 येशूजी चेलामैंने “क्‍हेमैंने क्‍हें कति मुँ?” बिमा चमैंइ बिइ, “क्‍हें ङिबो नेरो च्यों-च्योंबै ताँग च्हौदे मुँ।”
MAT 15:35 झाइले येशूजी च म्‍हिमैं सर क्हुँन् बिसि
MAT 15:36 येशूजी क्‍हें ङिबो नेरो ताँग योर छेसि परमेश्‍वरलाइ धन्‍यबाद पिंइ। धै क्‍हें लुँसि चेलामैंने पिंइ, झाइले चेलामैंइ च म्‍हिमैंलाइ चुमिंइ।
MAT 15:37 चमैं ताँनइ म्रेंन्ले चइ। धै चसि ङैंबै क्हें लुँठे खुमा ट्हलो ङि तल।
MAT 15:38 चर च्हमिरिमैं नेरो कोलोमैं आच्योल्‍ले मुँयुँमैं मत्‍त्रे हजार प्लि मुँल।
MAT 15:39 छले चल् पिंबै लिउँइँ येशूजी चमैं खेंमैंए धिंर कुलइ धै खी डुँङ्गार क्रेसि मगदान बिबै क्‍ल्‍ह्‍योउँइँ ह्‍याइ।
MAT 16:1 को-कोइ फरिसीमैं नेरो सदुकीमैं येशू ङाँर खसि खीए जाँच लबर “क्‍हि परमेश्‍वरउँइँले युब् ग बिस्‍याँ स्वर्गर्बै औदिबै चिनु घ्रि लसि उँइँन्,” बिइ।
MAT 16:2 छबिमा येशूजी चमैंने बिइ, “त्‍हिंयाँ लिबर होंमा क्‍हेमैंइ ‘आहा, तिंयाँम् मु ओल्‍ग्‍या तइमुँ प्‍हँन्हाँ नाँ आयु बिम्।’
MAT 16:3 झाइले न्‍हाँगर मु ओल्‍ग्‍या तसि न्हाँम्स्योइ हुवास्याँ क्‍हेमैंइ ‘तिंयाँम् नाँ खैं तलै बिम्।’ मु ङ्‌ह्‍योसि क्‍हेमैंइ त्हिंइ खैब तम् बिसि सेल् खाँम्, दिलेया खबर होंबै चिनुए अर्थ क्होल् आखाँ।
MAT 16:4 तिंजोरोबै दुष्‍ट नेरो ब्यभिचारि म्हिमैंइ चिनु म्हैम्, दिलेया योनाए चिनु बाहेक् अरू चिनुमैं चमैंने उँइँरिब् आरे।” च्हौ बिसि खी चमैं वाथेंसि ह्‍याइ।
MAT 16:5 चेलामैं तालए क्‍योंजा फेनेइ, दिलेया चमैंइ क्हें बोब म्‍लेयान।
MAT 16:6 येशूजी चमैंने बिइ, “छेनाले मैंन्, क्‍हेमैं फरिसी नेरो सदुकीमैंए क्हेंर झोंबै प्लेढाउँइँले जोगेसि टिद्।”
MAT 16:7 दिलेया चेलामैंइ येशूए ताँ आक्‍होसि “ङ्योइ क्‍हें पखब म्‍लेयासि प्रभुजी छ बिलै,” बिसि ह्रों-ह्रोंसन् ताँ लबर होंइ।
MAT 16:8 चमैंइ तो ताँ लसिन् मुँ बिब येशूजी सेसि चमैंने बिइ, “ओ, ङए फिर च्‍युगुदे या बिश्‍वास आलब्मैं! क्‍हेमैंने क्‍हें आरे बिसि तले ह्रों-ह्रोंसन् ताँ लरिल?
MAT 16:9 क्‍हेमैंइ अझै आक्‍होइमुँ वा? हजार ङ्‌ह म्‍हिमैंलाइ क्‍हें ङ्‌हबो चुमिंब म्‍लेह्‍याइ वा? क्हेमैंइ कति ट्हलो क्‍हें लुँठे खुल?
MAT 16:10 झाइले क्‍हें ङिबोइ हजार प्‍लि म्‍हिमैं चल् पिंसि क्हेमैंइ कति ट्हलो क्‍हें लुँठे खुल?
MAT 16:11 ङइ क्‍हेमैंने चबै क्हेंए बारेर ताँ लब आङिं बिब क्‍हेमैंइ तले आक्‍होल? ङइ फरिसी नेरो सदुकीमैंए क्हेंर झोंबै प्लेढाउँइँले जोगेसि टिद् बिब् ग।”
MAT 16:12 क्‍हेंर झोंबै प्लेढाने आङिं, फरिसी नेरो सदुकीमैंइ लोमिंबै ताँउँइँले जोगेसि टिद् बिब् मुँन बिसि बल्‍ल चेलामैंइ येशूजी बिबै ताँ क्‍होइ।
MAT 16:13 येशू कैसरिया फिलिप्पी बिबै सहरर फेखबै लिउँइँ खीजी खीए चेलामैंने “म्‍हिमैंइ म्हिए च्हने खाब् बिमुँ?” बिसि ङ्योएइ।
MAT 16:14 “कोइ बप्‍तिस्‍मा पिंबै यूहन्‍ना ग बिमुँ, कोइ स्योंम्बै एलिया ग बिमुँ, कोइ यर्मिया अथवा स्योंम्बै अगमबक्‍तामैं न्होंर्बै घ्रि ग बिम्,” बिसि चमैंइ बिइ।
MAT 16:15 झाइले येशूजी चमैंने “क्‍हेमैंइ ङलाइ खाब् बिम्दि?” बिसि ङ्योएमा
MAT 16:16 सिमोन पत्रुसइ बिइ, “क्‍हिम् खोंयोंन् बिलै तरिबै परमेश्‍वरए च्ह, खीजी कुल्मिंबै जोगेमिंबै म्रुँ ख्रीष्‍ट ग।”
MAT 16:17 येशूजी चने बिइ, “ओ, योनाए च्‍ह सिमोन, क्‍ह्रोसेंन क्‍हिइ आशिक योंइमुँ! तलेबिस्याँ छाबै ताँ क्‍हिइ म्‍हिउँइँले था सेब आङिं, दिलेया स्‍वर्गर मुँबै ङए आबाजी क्हिलाइ सेल् पिंब् ग।
MAT 16:18 छतसि ङइ क्‍हिलाइ पत्रुस बिम्। ङए चर्च ङ च पाराए फिर बनेब्‍मुँ, धै नर्गर्बै म्रामैंइ च चर्चए फिर ट्होल् खाँरिब् आरे।
MAT 16:19 ङइ स्‍वर्गर्बै ग्याल्सए साँजुमैं क्‍हिए योर पिंब्‍मुँ। क्हिइ पृथ्‍बीर तो फैब्मुँ च स्वर्गर फैब्मुँ, धै क्हिइ पृथ्‍बीर तो प्ल्हब्मुँ च स्वर्गरै या प्ल्हब्मुँ।”
MAT 16:20 झाइले खीजी चेलामैंने “ङ ख्रीष्‍ट ग बिसि खाबलाज्यै या आबिद् ओ,” बिसि ल्हैदिइ।
MAT 16:21 च त्हे ओंनोंन् खीजी ह्रोंसए चेलामैंने ह्रोंसइ नोल् त्हुबै दुःखए बारेर बिबर होंइ। “ङ यरूशलेम ह्‍याल् त्हुम्, धै चिबनाँब्मैं, ख्रो पिंबै खेगि चिब्मैं नेरो शास्‍त्रिमैंउँइँले ल्हें दुःख योसि सिल् त्हुम्। दिलेया सोंरोंर ङ सोगों तसि खब्मुँ।”
MAT 16:22 छबिमा पत्रुसइ येशूलाइ तिराइ बोसि “परमेश्‍वरजी क्हिए फिरि खोंयोंइ छ तल् पिंरिब् आरे प्रभु,” बिसि हौदिबर होंइ।
MAT 16:23 दिलेया खीजी पत्रुसने बिइ, “ओ दुष्‍ट, ङ ङाँइँले स्‍योह्‍याद्। क्‍हि ङ प्रल् त्‍हुबै घ्‍याँरि पुजु तइमुँ, तलेबिस्याँ क्‍हिए चु ताँ म्‍हिए ताँ ग, परमेश्‍वरउँइँले खब आङिं।”
MAT 16:24 झाइले येशूजी खीए चेलामैंने बिइ, “ङए लिलि खदा ङ्हाँम्मैं, ह्रोंसए ज्यु म्हाँया आलल्‍ले दुःख नोसि ङए लिलि खल् त्‍हुम्।
MAT 16:25 तलेबिस्याँ ह्रोंसलाइ जोगेल् म्‍हैब्मैं नास तब्‍मुँ। दिलेया ङए ल्हागिर ह्रोंसए ज्यु पिब्मैंइ खोंयोंइ आखाँबै छ्ह योंब्‍मुँ।
MAT 16:26 क्हेमैंइ ताँन् ह्‍युल योंनाबिलेया ह्रोंस नास तयाइ बिस्‍याँ तो फायदा तम् रो? म्हिइ ह्रोंसए सोए साटोरि तो सै पिंल् खामुँ?
MAT 16:27 तलेबिस्याँ म्हिए च्ह खीए आबाए मान योंसि स्‍वर्गदूतमैंने युमा म्‍हिमैंइ खैबै के लइमुँ छाबन् नों खीजी पिंब्‍मुँ।
MAT 16:28 क्ह्रोंसेंन ङ क्हेमैंने बिमुँ, चुर मुँब्मैं न्होंरि कति म्हिइ म्हिए च्ह खीए ग्याल्सर युरिब आम्रोंन् समा सिरिब् आरे।”
MAT 17:1 टुरो लिउँइँ येशूजी पत्रुस, याकूब नेरो चए अलि यूहन्‍ना स्योले नुबै कोंउँइँ बोयाइ।
MAT 17:2 कोंर फेनेमा चमैंए उँइँर येशूए रुप फेर्दियासि खीए लि त्‍हिंयाँ धोंले चारयाइ।
MAT 17:3 खीए क्वें या त्हिंयाँ धोंले चारयासि तार्ग्या तयाइ। धै स्‍योंम्‍बै मोशा नेरो एलिया बिब युसि येशूने पोंरिब म्रोंइ।
MAT 17:4 छाब म्रोंसि पत्रुसइ येशूने बिइ, “ओ प्रभु, ङ्यो चुर टिब छ्याँब् मुँन। क्‍हिए सैं मुँस्‍याँ ङइ चुर सौंलो टिबै क्ल्ह्‍यो बनेब्मुँ। घ्रि क्‍हिए ल्हागिरि, घ्रि मोशाए ल्हागिरि धै घ्रि एलियाए ल्हागिरि!”
MAT 17:5 पत्रुसइ छले ताँ लनालन् चारबै न्‍हाँम्‍स्योइ खेमैंलाइ हुवाइ। धै “चु ङइ खोबै च्‍ह ग। चु म्रोंसि ङ बेल्‍ले सैं तोंइमुँ। चइ बिबै ताँ छेनाले थेद्!” बिबै कै च न्‍हाँम्‍स्यो न्‍होंउँइँले थेइ।
MAT 17:6 छाबै कै थेमा चेलामैं बेल्‍ले ङ्हिंसि सर पद्खु तइ।
MAT 17:7 दिलेया येशू खसि चमैंलाइ छुइसि “रेद्, आङ्हिंन्,” बिइ।
MAT 17:8 झाइले चमैंइ मि ङ्‌ह्‍योमा चर येशू मत्‍त्रे म्रोंइ अरू खाबै आम्रों।
MAT 17:9 झाइले खेंमैं कोंउँइँले क्‍युरु युरिमा येशूजी चमैंने बिइ, “म्हिए च्ह सिबउँइँले धबै सोगों आतन् समा क्हेमैंइ म्रोंबै चु ताँ खाबलाज्यै या आबिद्।”
MAT 17:10 “शास्‍त्रिमैंइ तले एलिया ओंसों युल् त्हुम् बिम्?” बिसि चेलामैंइ खीने ङ्योएइ।
MAT 17:11 येशूजी चमैंने बिइ, “क्‍ह्रोंसेंन म्रुँ युब् भन्दा एलिया ओंसोंन् युमुँ, धै क्योंएँल् त्हुबै सैमैं क्योंएँमिंब्मुँ।
MAT 17:12 ङ क्हेमैंने बिमुँ, एलिया युल् खाँइमुँ, दिलेया म्‍हिमैंइ चलाइ ङो आसेसि खैच्हिजी लइ। छलेन म्हिए च्हज्यै या चमैंउँइँले थेबै दुःख योंब्मुँ।”
MAT 17:13 छबिमा “येशूजी बप्‍तिस्‍मा पिंबै यूहन्‍नाए बारेर खेंमैंने ताँ लना बिसि,” चेलामैंइ क्‍होइ।
MAT 17:14 झाइले चमैं म्‍हिए हुल मुँबै क्‍ल्‍ह्‍योर फेखबै लिउँइँ म्‍हि घ्रि येशूए उँइँर खसि च्हि तुँसि बिइ,
MAT 17:15 “प्रभु, ङए च्‍हए फिर ल्हयो खमिंन्। चलाइ र बेथाइ स्‍यासि बेल्‍ले दुःख तरिइमुँ। च खोंयों मिर फेमुँ, खोंयों क्‍युर फेमुँ।
MAT 17:16 ङइ चलाइ क्‍हिए चेलामैं ङाँर पखइ, दिलेया चमैंइ सल् लल् आखाँला।”
MAT 17:17 येशूजी खीए चेलामैंने बिइ, “क्हेमैंम् कति बिश्‍वास आरेबै आच्योबै म्‍हिमैं मुँन! ङ खोंयों समा क्‍हेमैंने टिल् त्‍हुम्? ङइ खोंयों समा क्हेमैंलाइ सैदिरिब् जा? खोइ च कोलो चुर ङ ङाँर पउ।”
MAT 17:18 झाइले येशूजी च मोंलाइ हौदिमा च मों कोलोउँइँले त्‍होंह्‍याइ। च तोदोंन् कोलो सयाइ।
MAT 17:19 छतब् म्रोंसि चेलामैं खाबज्यै आसेल्‍ले येशू ङाँर खसि “ङिइ च मों तले ल्‍हाल् आखाँगे?” बिसि ङ्योएइ।
MAT 17:20 खीजी चमैंने “क्‍हेमैंइ परमेश्‍वरए फिर छेनाले बिश्‍वास आलइरि ग। ङ क्ह्रोंसेंन क्हेमैंने बिमुँ, क्‍हेमैंने पासगिए फुँ द प्रि बिश्‍वास मुँस्‍याँ चु कों ‘क्‍याइ स्‍योह्‍याद्’ बिलेया च स्‍योह्‍याम्। धै क्‍हेमैंइ लल् आखाँबै सै तोइ तरिब् आरे।”
MAT 17:21 [दिलेया बर्त टिसि प्राथना आलन् समा क्‍हेमैंइ छाबै खालर्बै मों ल्‍हाल् आखाँ।]
MAT 17:22 खेंमैं धबै गालील ह्‍युलर खागु तमा येशूजी चमैंने बिइ, “म्हिए च्ह म्‍हिमैंए योर पिंवाब्मुँ।
MAT 17:23 चमैंइ खीलाइ सैवाब्‍मुँ, दिलेया सोंरोंर खी धबै सोगों तसि खब्‍मुँ।” छाबै ताँ थेमा चेलामैं बेल्‍ले न्हुँ लइ।
MAT 17:24 झाइले खेंमैं कफर्नहुम सहरर फेखमा मन्दिरर्बै बालि रेब्‍मैं खसि पत्रुसने “क्‍हेमैंए गुरुइ मन्दिरर्बै बालि आफो वा?” बिसि ङ्योएइ।
MAT 17:25 पत्रुसइ “फोम्, तले आफोब!” बिसि पत्रुस धिं न्‍होंर होंमा येशूजी चने “ओ सिमोन, क्‍हिइ खै ङ्हाँमुँ? चु ह्‍युलर्बै म्रुँमैंइ खाबउँइँले बालि रेम्? ह्रोंसए च्हमैंउँइँले रेम् उ अरू म्‍हिमैंउँइँले रेम्?” बिसि ङ्योएइ।
MAT 17:26 पत्रुसइ “अरू म्‍हिमैंउँइँले रेम् बिइ।” छबिमा येशूजी चने बिइ, “ए, छ बिस्‍याँ म्रुँए च्हमैंइमि बालि फोल् आत्‍हुमुना।
MAT 17:27 दिलेया चु म्‍हिमैं गार आम्‍हाँदिरिगे बिसि ङ्योइ बालि फोले। छतसि तालर ह्‍यासि बल्‍छि प्रिंन्। धाँसे ओंसों बल्‍छिर फेबै ताँग ट्हुइद्। चए सुँर क्‍हिइ चाँदिए मुइ घ्रि योंब्‍मुँ। च मुइ ङ्यो ङ्हिंए मन्दिरर्बै बालि फोब् योम्। चन् बोसि ङ्यो ङ्हिंए बालि फोबर चमैंने पिंन्।”
MAT 18:1 च त्हेर्न चेलामैं येशू ङाँर खसि “स्‍वर्गर्बै ग्याल्सर धाँसे थेब खाब् तमुँ?” बिसि खीने ङ्योएइ।
MAT 18:2 येशूजी च्‍युथिरि कोलो घ्रि हुइसि चमैंए म्हाँजोर राल् पिंसि
MAT 18:3 बिइ, “क्ह्रोंसेंन्ले ङ क्हेमैंने बिमुँ, क्‍हेमैंए सैं एसि छाबै च्‍योंबै कोलोमैंल् धों तबै सैं आप्‍ह्‍यास्याँ क्‍हेमैं स्‍वर्गर्बै ग्याल्सर खोंयोंइ होंल् योंरिब् आरे।
MAT 18:4 चु कोलो धोंलेन् च्‍योंब तसि थेब आप्‍हैंबै म्‍हि स्‍वर्गर्बै ग्याल्सर धाँसे थेब तब्मुँ।
MAT 18:5 झाइले खाबइ ङए मिंर छाबै कोलो घ्रि मान लमुँ, चइ ङलाज्यै या मान लम्।
MAT 18:6 “ङए फिर बिश्‍वास लबै छाबै कोलोमैं न्होंर्बै घ्रिलाइ खाबइ ङ ङाँइँले स्‍योवासि पाप लबर ल्हैदिमुँ, च म्हिइ च केए सजैं योंब् भन्दा चए खरिर थेबै ह्रेंदो च्‍योसि मा ङ्युँइर भ्‍योंवाब चए ल्हागिर छ्याँब तम्।
MAT 18:7 धिक्‍कार चु ह्‍युललाइ! तलेबिस्याँ चु ह्‍युलर म्‍हिमैंलाइ पापर च्होवाबै सैमैं मुँ। पापर च्होवाबै परिक्षाम् खम्, दिलेया अरू म्हिलाइ पापर च्होवाबै म्हिलाइ झन धिक्‍कार मुँ।
MAT 18:8 “क्‍हिए यो अथवा प्‍हलेइ क्‍हिलाइ पाप लबर ल्हैदिम् बिस्‍याँ च थोसि भ्‍योंवाँन्। तलेबिस्याँ यो प्‍हले ङ्हिंना ङ्हिंन्‍ने नर्गर्बै मिर ह्‍याब् भन्दा बरु डुँड तसि खोंयोंइ आखाँबै छ्ह योंब क्‍हिए ल्हागिर बेल्‍ले छ्याँब ग।
MAT 18:9 छलेन क्‍हिए मिइ क्‍हिलाइ पाप लबर ल्हैदिम् बिस्याँ चै या ट्हुइसि भ्‍योंवाँन्। मि ङ्हिंनेन् नर्गर्बै मिर ह्‍याब् भन्दा कन तसि खोंयोंइ आखाँबै छ्ह योंब क्‍हिए ल्हागिरि छ्याँब तम्।
MAT 18:10 “छतसि ङ क्हेमैंने बिमुँ, छेनाले मैंन्! क्हेमैंइ छाबै कोलोमैं धों तब्‍मैं खाबलाज्यै या हेल आलद्। तलेबिस्याँ चमैं जोगेमिंबर स्‍वर्गदूतमैं स्‍वर्गरि खोंयोंन् बिलै ङए आबाए उँइँर्न तम्।
MAT 18:11 [तलेबिस्याँ म्हिए च्ह म्हयाबै म्हिमैं म्हैसि जोगेमिंबर युब् ग।]
MAT 18:12 “क्‍हेमैंइ खै ङ्हाँमुँ? क्‍यु प्र मुँबै प्‍ह्रोंछैंइ क्‍यु घ्रि म्‍हयास्‍याँ चइ च कुच्युसे कु क्युमैं वाथेंसि च म्‍हयाबै क्‍यु घ्रि म्‍हैबर खन्तोंदोंन् आह्‍या रो वा?
MAT 18:13 क्ह्रोंसेंन ङ क्हेमैंने बिमुँ, चइ च म्‍हयाबै क्‍यु योंइ बिस्याँ आम्‍हबै कुच्युसे कु क्युमैंए ल्हागिर भन्दा च म्हयाबै क्यु योंइ बिसि प्‍ह्रोंछैं बेल्‍ले सैं तोंब्मुँ।
MAT 18:14 छलेन स्‍वर्गर मुँबै क्हेमैंए परमेश्‍वर आबालाज्यै या छाबै ङए फिर बिश्‍वास लबै कोलोमैं न्होंर घ्रि या नास आतरिगे बिबै सैं मुँ।
MAT 18:15 “क्‍हिए अलिइ क्‍हिए बिरोधर तोइ आछ्याँबै के लस्‍याँ, ओंसों च ङाँर ह्‍यासि क्हेमैं ङ्हिं मत्‍त्रे मुँमा चइ लबै आछ्याँबै केमैं उँइँमिंन्। धै चइ क्‍हिए ताँ ङिंस्‍याँ, क्‍हिए अलि ह्रोंसलन् तइ।
MAT 18:16 दिलेया चइ क्‍हिए ताँ थेल् आङिंस्‍याँ म्‍हि घ्रिदे ङ्हिंदे साक्षि ग्वाइ लबर क्‍हिने बालु बोसि चने सल्‍ला लद्। तलेबिस्याँ ‘उजुर लस्‍याँ साक्षि ग्वाइ टिब्‍मैं ङ्हिंदे सोंदे चैदिम्,’ बिसि ठिमर प्‍ह्रिथेंइमुँ।
MAT 18:17 अझै या चइ क्‍हेमैंए ताँ थेल् आङिंस्‍याँ बिश्‍वासीमैं ङाँर ह्‍यासि ताँन् ताँ बिद्। धै चमैंए ताँ या च अलिइ आङिंस्‍याँ च परमेश्‍वर आम्हाँदिब्मैं अथवा रोमी म्रुँए ल्हागिर बालि रेब्‍मैं धोंबन् तरिगे।
MAT 18:18 “क्ह्रोंसेंन ङ क्हेमैंने बिमुँ, क्‍हेमैंइ पृथ्‍बीरि तो फैमुँ, च स्वर्गरै या फैब्मुँ। धै क्‍हेमैंइ पृथ्‍बीरि तो प्ल्हमुँ, च स्‍वर्गरै या प्ल्हब्‍मुँ।
MAT 18:19 धबै ङ क्हेमैंने बिमुँ, पृथ्‍बीरि क्‍हेमैंए न्‍होंरि म्‍हि ङ्हिं क्ह्रिसि सैं घ्रिलेन् प्राथना लस्याँ क्हेमैंइ तो सै ह्रिलेया स्‍वर्गर मुँबै ङए परमेश्‍वर आबाजी च सै क्हेमैं पिंब्‍मुँ।
MAT 18:20 तलेबिस्याँ खनिर म्‍हि ङ्हिदे सोंदे ङए मिंर खागु तमुँ, चमैंए म्‍हाँजोरि ङ तब्‍मुँ।”
MAT 18:21 झाइले पत्रुस येशू ङाँर खसि “गुरु, ङए अलिइ ङए फिर आछ्याँबै के लब्रें लस्‍याँ कति खे समा चलाइ क्षमा पिंल् त्‍हुम्? ङिब्‍ले समा क्षमा पिंले उ?” बिसि ङ्योएइ।
MAT 18:22 येशूजी चने बिइ, “ङ क्हिने बिमुँ, ङिखे आङिं, ङिच्‍यु गुणा ङिखे समा क्षमा पिंल् त्‍हुम्!
MAT 18:23 छतसि स्‍वर्गर्बै ग्याल्स म्रुँ घ्रि धोंन् तब् ग। च म्रुँइ ह्रोंसए केब्छैंमैंने खीउँइँले बोबै छे ह्रिल् त्हुइ बिबै सैं लइ।
MAT 18:24 झाइले म्रुँइ हिसाब किंबर होंमा हजार च्‍यु माराए मुइ फोल् त्‍हुबै म्हि घ्रि म्रुँ ङाँर पखइ।
MAT 18:25 दिलेया च म्‍हिइ छे फोल् आखाँमा म्रुँइ ‘च, चए प्ह्रेंस्यो, च्‍ह-चमि नेरो चने मुँबै तोन्दोंरि सै चुँसि ङए मुइ पिंन्,’ बिसि ल्हैदिइ।
MAT 18:26 “च केब्छैंइ म्रुँए उँइँर च्‍हि तुँसि यो छ्युँ लसि ‘तिस्या पैंमिंन्, ङइ क्हिए ताँन् छे फोस्‍यो,’ बिइ।
MAT 18:27 “छबिमा म्रुँइ चए फिर ल्‍हयो खसि ‘क्हिइ ङने किंबै छे फोल् आत्हु! मुँरिगे!’ बिसि च केब्छैं ह्‍याल् पिंइ।
MAT 18:28 “दिलेया च केब्छैं बैरु त्होंह्‍यामा चइ ह्रोंसए चाँदिए मुइ प्र छे बोबै के लबै थु घ्रि त्होइ। धै ‘ङउँइँले बोबै छे फोद्’ बिसि चए खरिर क्हाइ।
MAT 18:29 “छबिमा चए थुइ च्‍हि तुँसि चने यो छ्युँ लसि ‘तिस्या पैंमिंन्, ङइ क्‍हिए छे फोस्‍यो,’ बिइ।
MAT 18:30 छबिमा चइ आङिंसि छे आफोन् समा चलाइ झेलर च्युवाइ।
MAT 18:31 “छ लब् म्रोंसि अरू के लब्मैंए सैं बेल्‍ले नइ। चमैं म्रुँ ङाँर ह्‍यासि ताँन् ताँ बिवाइ।
MAT 18:32 झाइले म्रुँइ च केब्छैं ह्रोंसए उँइँर हुइसि बिइ, ‘ओ दुष्‍ट केब्छैं! क्‍हिइ ङने यो छ्युँ लमा ल्हयो खसि ङइ क्‍हिइ किंबै छे फोल् आत्हु मुँरिगे बिसि पिवाइ!
MAT 18:33 ङइ क्‍हिए फिर ल्हयो खब् धोंले क्‍हिज्यै या ह्रोंसए थुए फिर ल्हयो खल् त्‍हुमल आङिं वा?’
MAT 18:34 झाइले म्रुँ बेल्‍ले ह्रिस खसि ‘चइ ताँन् छे आफोन् समा दण्ड पिंब्मैंए योर पिंवाँइ।’
MAT 18:35 “छतसि क्‍हेमैंज्यै ह्रोंसए अलिलाइ सैं न्‍होंउँइँले क्षमा आपिंस्याँ, स्‍वर्गर मुँबै ङए आबाज्यै या क्‍हेमैं क्षमा पिंरिब् आरे।”
MAT 19:1 येशूजी चु ताँमैं बिल् खाँबै लिउँइँ येशू गालील ह्‍युलउँइँले यहूदीया ह्‍‍‍युलर्बै यर्दन स्‍योंए क्योंजा मुँबै क्ल्ह्‍योउँइँ ह्‍याइ।
MAT 19:2 चर म्‍हिए हुलमैं खीए लिलि ल्हैदिइ। धै खीजी चर्न नबै म्हिमैं सल् लमिंइ।
MAT 19:3 कोइ फरिसीमैं खी ङाँर खसि खीए सैं किंबर “म्‍हिइ तो मुँले कारणइ ह्रोंसए प्ह्रेंस्यो वाब तम् उ आत?” बिसि ङ्योएइ।
MAT 19:4 येशूजी बिइ, “क्‍हेमैंइ परमेश्‍वए छ्वे आखेइमुँ वा? म्‍हि बनेब् ओंनोंन् परमेश्‍वरजी मुँयुँ नेरो च्हमिरि लमिंइ।
MAT 19:5 छतसि ‘म्हिइ ह्रोंसए आबा आमा पिसि ह्रोंसए प्‍ह्रेंस्‍योनेन् क्ह्रिसि चमैं ङ्हिंए ज्यु घ्रिन् तब्‍मुँ।’
MAT 19:6 तारे चमैं ङ्हिं आङिं, चमैं ज्यु घ्रिन् तब्मुँ। छतसि परमेश्‍वरजी त्हुँमिंब्मैं म्‍हिमैंइ फ्रेवाल् आत।”
MAT 19:7 फरिसीमैंइ खीने “छ बिस्‍याँ मोशाइ तले छले ठिम पिंइ ‘प्ह्रेंस्यो वादा ङ्हाँब्‍मैंइ पार लबै कउदा प्‍ह्रिसि वालेन् तम्’ बिसि तले बिगे?” बिसि ङ्योएइ।
MAT 19:8 खीजी चमैंने बिइ, “क्‍हेमैंए सैं सारो तबइले मोशाइ प्ह्रेंस्यो वालेन् तम् बिसि क्हेमैंने बिब् ग। दिलेया परमेश्‍वरजी म्‍हि बनेबै त्हे ओंनों छाबै छ्या आरेल।
MAT 19:9 ङ क्हेमैने बिमुँ, खाबइ ब्यभिचारए कारण बाहेक् ह्रोंसए प्‍ह्रेंस्‍यो वासि अर्को ब्ह्‍या लमुँ, चइ ब्यभिचार लमुँ। धै खाबइ आगुइ वाबै प्ह्रेंस्योने ब्ह्‍या लमुँ चज्यै या ब्यभिचार लमुँ।”
MAT 19:10 छबिमा चेलामैंइ खीने बिइ, “प्युँ नेरो प्ह्रेंस्योए म्हाँजोरि छान् तम् बिस्याँ ब्ह्‍या आलबन् छ्याँब तमना।”
MAT 19:11 येशूजी चमैंने बिइ, “ब्ह्‍या आललेन् तम् बिबै ताँ ताँन् म्‍हिइ ङिंल् खाँबै ताँ आङिं। ब्ह्‍या आलल्‍ले टिबै ल्हागिर परमेश्‍वरजी ल्होमिंल् त्हुम्, म्‍हिमैं ह्रोंसन् छले टिल् आखाँ।
MAT 19:12 तलेबिस्याँ कोइ फिब् ओनोंबै हिचड तमुँ, कोइ म्हिमैंइ लबै हिचड तमुँ। धै कोइ ‘स्‍वर्गर्बै ग्याल्सए के लबै ल्हागिरि ब्ह्‍या आललेन् तम्’ बिसि ब्ह्‍या आल। छतसि ब्ह्‍या आलल्‍ले टिल् खाँब्‍मैंइ चु ताँ ङिंरिगे।”
MAT 19:13 येशूजी कोलोमैं फिर यो थेंसि प्राथना लमिंरिगे बिसि म्हिमैंइ कोलोमैं खी ङाँर पखल। दिलेया खीए चेलामैंइ च म्‍हिमैं हौदिइ।
MAT 19:14 दिलेया येशूजी बिइ, “कोलोमैं ङ ङाँर खल् पिंन्, चमैं आक्वेद्। तलेबिस्याँ स्‍वर्गर्बै ग्याल्स छाबै कोलोमैंए ल्हागिर्न ग।”
MAT 19:15 झाइले खीजी कोलोमैं फिर यो थेंसि आशिक पिंबै लिउँइँ खी छाइले ह्‍याइ।
MAT 19:16 तिगें म्‍हि घ्रि येशू ङाँर खसि “ओ गुरु, ङइ खोंयोंइ आखाँबै छ्ह योंबर छ्याँबै के तो लल् त्हुमुँ?” बिसि ङ्योएमा
MAT 19:17 येशूजी चने बिइ, “क्‍हिइ छ्याँबै केए बारेर तले ङने ङ्योएमुँ? परमेश्‍वर घ्रि मत्‍त्रे छ्याँब मुँ। खोंयोंइ आखाँबै छ्ह योंदा ङ्हाँस्‍याँ क्हिइ परमेश्‍वरजी बिबै ताँमैं ङिंल् त्‍हुम्।”
MAT 19:18 चइ खीने बिइ, “खैबै ताँमैं ङिल् त्हुम्?” येशूजी बिइ, “क्हिइ म्‍हि आसैद्, ब्यभिचार आलद्, आह्‍योद्, स्‍योर आतेद्।
MAT 19:19 ह्रोंसए आबा आमाए मान लद्। ह्रोंसए ङ्‍हेब्-ट्हुब्मैंलाज्यै या ह्रोंसने धोंलेन् म्हाँया लद्।”
MAT 19:20 च फ्रेंसिइ खीने बिइ, “चु ताँन् ताँमैं ङइ लरिइमुँ। तारे तो लल् त्‍हुम्?”
MAT 19:21 येशूजी चने बिइ, “क्‍हि क्‍ह्रोंसेंनन्बै ठिक तदा ङ्हाँस्‍याँ ह्‍यासि क्‍हिने मुँबै तोन्दोंरि सै न्होर चुँसि योंबै मुइ ङ्हाँदुमैं चुमिंन्। छलस्याँ क्‍हिइ स्‍वर्गर सै न्होर योंब्‍मुँ। झाइले खसि ङए लिलि ल्‍हैदिद्।”
MAT 19:22 छ बिब् थेसि च फ्रेंसिं सैं च्योंब् लसि एह्‍याइ, तलेबिस्याँ चए सै न्होर ल्हें मुँल।
MAT 19:23 च लिउँइँ येशूजी खीए चेलामैंने बिइ, “क्ह्रोंसेंन ङ क्हेमैंने बिमुँ, प्लबै म्‍हिमैं स्‍वर्गर्बै ग्याल्सर होंब बेल्‍ले गारो तब्मुँ।
MAT 19:24 धबै ङ क्‍हेमैंने बिमुँ, प्लबै म्‍हि परमेश्‍वरए ग्याल्सर होंब् भन्दा बरु सलु ताए मिउँइँले क्‍युलब सजिल् तम्।”
MAT 19:25 चु ताँ थेसि चेलामैं प्लेटोयासि “छ तस्‍याँ खाबइ मुक्‍ति योंल् खाँमुँ?” बिसि ङ्योएइ।
MAT 19:26 येशूजी चमैं ङाँइ ङ्‌ह्‍योसि बिइ, “म्‍हिमैंइ लल् आखाँबै सै परमेश्‍वरजी लल् खाँम्।”
MAT 19:27 झाइले पत्रुसइ खीने बिइ, “ङिइमि तोन्दोंरि सै पिसि क्‍हिए लिलि ल्‍हैदिइमुँ। ङिइ तो योंम् दि?”
MAT 19:28 येशूजी चमैंने बिइ, “क्ह्रोंसेंन ङ क्हेमैंने बिमुँ, तारे खबै जुगरि बेल्‍ले मान योंबै राजगद्दिर म्हिए च्ह टिब्‍मुँ। क्‍हेमैं तोगो ङए लिलि ल्‍हैदिसेरो च त्हेर क्‍हेमैं या निसाफ लबै म्‍हिमैं धोंले ह्रों-ह्रोंसए च्युसे ङ्हिं गद्दिर टिब्‍मुँ। धै इस्राएल ह्रेंर्बै च्युसे ङ्हिं कुलए फिर क्‍हेमैंइ निसाफ लब्‍मुँ।
MAT 19:29 ङए ल्हागिरि ह्रोंसए धिं, आघें-अलि, अना-अङाँ, आबा-आमा, प्‍हसे, क्‍ल्‍ह्‍यो-न्‍हें वाथेंब्मैंइ च भन्दा प्र गुणा ल्हें योंब्‍मुँ। धै खोंयोंइ आखाँबै छ्ह योंबै हग या योंब्मुँ।
MAT 19:30 दिलेया तोगो ओंसों तब्मैं लिलि तब्मुँ, धै तोगो लिलि तब्मैं ओंसों तब्‍मुँ।”
MAT 20:1 “स्‍वर्गर्बै ग्याल्स म्रोंए क्‍ल्‍हे घ्रि धोंन् तब् ग। च क्ल्हे न्‍हाँक्‍कर्न ह्रोंसए म्रोंर के लबै म्रोंमैं म्हैबर बैरु ह्‍याइ।
MAT 20:2 चइ म्रोंमैंने तिगेंर योंबै नों सै तोक्दिसि चमैं के लबर म्रोंर कुल्‍मिंइ।
MAT 20:3 “झाइले कु ह्राबै त्हेजरे धबै बैरु ह्‍यामा चइ अरू म्‍हिमैं के आरेसि छलेन् रारिब् म्रोंइ।
MAT 20:4 छतसि चइ चमैंने बिइ, ‘क्‍हेमैं या ङए म्रोंर के लबर ह्‍याद्। क्‍हेमैंइ योंल् त्हुबै नों सै ङइ पिंस्‍यो।’
MAT 20:5 छबिमा चमैं के लबर म्रोंर ह्‍याइ। “धबै च क्‍ल्‍हे च्युसे ङ्हिं ह्राबै त्हेजरे धै सों ह्राबै त्हेजरे या बैरु ह्‍यासि म्‍हिमैंने छान् बिइ।
MAT 20:6 छलेन ङेसर्बै ङ्‍ह ह्राबै त्हेजरे च धबै बैरु ह्‍यामा अरू म्‍हिमैं छलेन् रारिब् म्रोंइ। धै चमैंने, ‘क्हेमैं त्हिंइतिमि छलेन् चुर तले रारिल?’ बिसि ङ्योएइ।
MAT 20:7 “चमैंइ बिइ, ‘खोइ, खाबज्यै या केर आल्‍हैदि। तो लब?’ “चइ चमैंने बिइ, ‘छ बिस्‍याँ क्‍हेमैं या ङए म्रोंर के लबर ह्‍याद्।’
MAT 20:8 “झाइले ङेसा तमा क्‍ल्‍हेइ के लब्मैंए चिबने बिइ, ‘म्रोंमैं हुइसि नों सै पिंन् धाँसे लिलि खब्‍मैंलाइ ताँन् भन्दा ओंसों पिंनु, धाँसे ओंसों खब्‍मैंलाइ ताँन् भन्दा लिलि पिंन्।’
MAT 20:9 छबिमा ङेसर्बै ङ्‍ह ह्राबै त्हेर खसि के लब्मैं खइ। चमैं ताँनइ तिंगेंर्बै नों सै योंइ।
MAT 20:10 झाइले धाँसे ओंसों के लब्मैं खइ, चमैंइ अरूइ भन्दा खेंमैंइ नों सै ल्हें योंलै ङ्हाँइ। दिलेया चमैं ताँनइ तिंगेंर्बै नों सै योंइ।
MAT 20:11 चमैंइ ह्रोंसए नों सै योंबै लिउँइँ क्‍ल्‍हेए बिरोधर पोंबर होंइ।
MAT 20:12 ‘चु लिउँइँ खबै म्‍हिमैंइ घण्‍टा घ्रि मत्‍त्रे के लइ, ङिइमि त्‍हिंइतिमि त्‍हिंयाँर सिया सियाले के लइ। दिलेया क्‍हिइ चमैंलाज्यै या ङिलाइ पिंब् धों प्रेन् नों सै पिंइ,’ बिसि चमैंइ बिबर होंइ।
MAT 20:13 “दिलेया च क्‍ल्‍हेइ चमैं न्‍होंर्बै म्‍हि घ्रिने बिइ, ‘ओ थु, ङइ क्‍हिए फिर तोइ अनिया आलइमुँ। क्‍हिइ ङने तिंगेंर्बै नों सैर के लम् बिसि बिब् आङिं वा?
MAT 20:14 क्‍हिए नों सै किंसि ह्‍याद्। चु क्‍हैल्‍ले खब्‍मैंलाज्यै या क्‍हिलाइ पिंब् धों प्रेन् नों सै ङइ पिंम्।
MAT 20:15 ङए मुइ ङइ तो लदा ङ्हाँमुँ च लल् आयों रो वा? ङइ ल्हयो खब् म्रोंसि क्‍हिए मि तले छब?’
MAT 20:16 “छलेन लिलिबै ओंसों तब्मुँ धै ओंसोंबै लिलि तब्‍मुँ।”
MAT 20:17 येशू यरूशलेमउँइँ ह्‍यारिमा च्युसे ङ्हिं चेलामैंलाइ स्योले बोसि बिइ,
MAT 20:18 “ङ्यो यरूशलेमउँइँ ह्‍यासिन् मुँ। तारे म्हिए च्ह म्‍हिमैंइ ख्रो पिंबै खेगि चिब्मैं नेरो शास्‍त्रिमैंए योर पिंवाब्‍मुँ, धै चमैंइ खीलाइ सैलन् त्हुबै छ्याब् ल्हैदिब्मुँ।
MAT 20:19 झाइले खीलाइ बिल्‍लि लसि कोर्राइ प्रुसि क्रूसर च्योवाद् बिसि चमैंइ अरू ह्रेंमैंए योर पिंवाब्‍मुँ, दिलेया सोंरोंर खी धबै सोगों तसि खब्‍मुँ।”
MAT 20:20 च लिउँइँ जब्‍दियाए प्ह्रेंस्योइ ह्रोंसए च्‍ह ङ्हिं येशू ङाँर बोसि खीए उँइँर च्हि तुँसि यो छ्युँ लइ।
MAT 20:21 छलमा येशूजी “क्‍हिलाइ तो चैदिइ?” बिसि चने ङ्योएइ। चइ बिइ, “क्‍हिए ग्याल्सर, ङए च्हमैं ङ्हिंर घ्रि क्हिए क्योलोउँइँ अर्को त्हेब्रेउँइँ टिल् योंरिगे।”
MAT 20:22 दिलेया येशूजी चमैंने बिइ, “क्‍हेमैंइ तो ह्रिरिइमुँ च सै क्‍हेमैंइ था आसे। तारे ङइ नोबि छेबै दुःख क्‍हेमैंइ नोल् खाँम्‍मा?” बिमा चमैंइ “खाँम्,” बिइ।
MAT 20:23 छबिमा येशूजी चमैंने बिइ, “ङइ नोब् धों तबै दुःख क्‍हेमैंज्यै या नोब्मुँ। दिलेया ङए क्‍योलो नेरो त्हेब्रेउँइँ टिल् पिंबै ताँ ङए योर आरे। च क्ल्ह्‍योमैं ङए आबाजी ओंसोंन् खाब्मैंए ल्हागिर तयार लथेंइमुँ चमैंए ल्हागिर्न ग।”
MAT 20:24 चु ताँ थेसि चेलामैं च्‍यु च त्ये ङ्हिंने ह्रिस खइ।
MAT 20:25 छतसि येशूजी चमैं ताँन् खी ङाँर हुइसि बिइ, “चु ह्‍युलर्बै म्रुँमैंइ म्हिमैंए फिर क्ल्हे लम्, धै चिबनाँब्मैंइ म्‍हिमैंए फिर अधिकार लम् बिब क्‍हेमैंइ सेइमुँ।
MAT 20:26 दिलेया क्‍हेमैं न्‍होंर बिस्‍याँ छ तरिब् आरे। क्‍हेमैंए न्होंरि खाब् थेब तदा ङ्हाँमुँ, चइ च्योंब् तसि क्हेमैंए सेवा लल् त्‍हुम्।
MAT 20:27 क्हेमैंए न्होंरि खाब् थेब तदा ङ्हाँमुँ च क्‍हेमैंए केब्छैं तल् त्‍हुम्।
MAT 20:28 छलेन म्हिए च्ह या अरूमैंउँइँले सेवा योंबर युब आङिं, दिलेया सेवा लबर नेरो ल्‍हें म्‍हिमैंए पापउँइँले फ्रेमिंबर ह्रोंसए ज्यु पिंबर युब् ग।”
MAT 20:29 च लिउँइँ खेंमैं यरिहो बिबै सहरउँइँले ह्‍यारिमा म्हिए हुल येशूए लिलि ल्हैदिइ।
MAT 20:30 घ्याँए रेर टिरिबै कनमैं ङ्हिंइ येशू च घ्‍याँउँइँले ह्‍याइनमुँ बिब् थेसि “ओ प्रभु, दाऊदए च्ह, ङिए फिर ल्हयो लमिंन् बिदै ओरइ।”
MAT 20:31 छबिमा म्‍हि हुलइ “आओरद्!” बिसि चमैं हौदिइ, दिलेया चमैं झन् सार्ले “ओ प्रभु, दाऊदए च्ह, ङिए फिर ल्हयो लमिंन्,” बिसि ओरइ।
MAT 20:32 छ बिब् थेमा येशू प्ररिबै तोर्न रायाइ धै चमैं हुइसि बिइ, “क्‍हेमैं तो चैदिइ? ङइ क्हेमैंए ल्हागिरि तो लमिंले?”
MAT 20:33 चमैंइ खीने “प्रभु, ङिए मि म्रोंन् लमिंन्,” बिइ।
MAT 20:34 येशूजी ल्‍हयो खसि चमैंए मिर छुइमिंइ धै छुइबै तोदोंन् चमैंए मि म्रोंल् खाँब् तयाइ धै चमैं येशूए लिलि ल्‍हैदिइ।
MAT 21:1 झाइले खेंमैं यरूशलेमए चेंदो जैतून कोंए बेथफागे बिबै नाँसर फेखमा येशूजी चेलामैं ङ्हिंने छ बिसि कुल्‍मिंइ,
MAT 21:2 “क्‍हेमैं च ओंसोंबै नाँसर ह्‍याद्। चर फेनेबै तोदोंन् गधाए आमा नेरो प्हसे च्युँइँथेंब क्हेमैंइ स्‍याब्‍मुँ। चमैं पिसि ङ ङाँर पखो।
MAT 21:3 खाबज्‍यै क्‍हेमैंने तोइ बिस्‍याँ, ‘प्रभुए ल्हागिरि चुमैं चैदिइमुँ’ बिद्। छ बिबै तोदोंन् च म्‍हिइ चमैं कुल्मिंब्‍मुँ।”
MAT 21:4 स्योंम्बै अगमबक्‍ताइ बिबै ताँ पूरा तबर छ तब् ग।
MAT 21:5 “सियोनए च्हमिने छ बिमिंन्, तारे क्‍हिए म्रुँ क्‍हि ङाँर खइन मुँ, थेब् आप्‍हैंन्‍ले गधाए फिर क्रेसि खइन मुँ, खी गधा झजए फिर क्रेसि खइमुँ,” बिसि बिल।
MAT 21:6 चेलामैं ह्‍यासि येशूजी बिब् धोंन् लइ।
MAT 21:7 चमैंइ गधा नेरो गधाए झज येशू ङाँर पखसि ह्रोंसए क्‍वेंमैं प्लिसि चमैंए फिर तिमिंइ। धै येशू चए फिर क्हुँइ।
MAT 21:8 खी छले खब् म्रोंसि चर्बै म्‍हि हुलइ ह्रोंसए क्‍वेंमैं प्‍लिसि घ्‍याँर तिमिंइ। अरू म्‍हिमैंइ सिं धुँए हाँगमैं थोसि घ्‍याँर तिमिंइ।
MAT 21:9 खीए लिलि ओंसों प्रब्मैंइ छले ओरल, “दाऊदए च्हए जय जय तरिगे! याहवेहए मिंर खबै म्‍हिला आशिक तरिगे! धाँसे थेबै परमेश्‍वरए जय जय तरिगे!”
MAT 21:10 छले येशू यरूशलेमर फेनेमा सहर तिगोंन् खैला-बैला तइ। धै “चु म्हि खाब् जा?” बिसि म्हिमैंइ ङ्योएबर होंइ।
MAT 21:11 येशूने मुँबै हुलइ बिइ, “चु गालील ह्‍युलर्बै नासरतउँइँले खबै अगमबक्‍ता येशू ग।”
MAT 21:12 झाइले येशू परमेश्‍वरए मन्दिरर ह्‍यासि चर किंबा-चुँब लबै म्‍हिमैं ताँन् बैरु ल्हामिंइ। धै मुइ त्हेब्मैंए टेबलमैं नेरो तोंगु चुँब्मैंए क्हुँबै सैमैं प्लिंवाँइ।
MAT 21:13 येशूजी चमैंलाइ हौदिसि बिइ, “‘ङए धिं प्राथना लबै धिं बिब्मुँ,’ बिसि परमेश्‍वरए छ्वेर प्‍ह्रिइमुँ। दिलेया क्‍हेमैंइमि चु ह्‍योमैं टिबै क्ल्ह्‍यो ग लना।”
MAT 21:14 च लिउँइँ कनमैं नेरो स्यालेमैं मन्दिरर खी ङाँर खइ, धै खीजी चमैं सल् लमिंइ।
MAT 21:15 झाइले ख्रो पिंबै खेगि चिब्मैं नेरो शास्‍त्रिमैंइ येशूजी लबै औदिबै केमैं म्रोंइ, धै “दाऊदए च्हए जय जय तरिगे!” बिसि कोलोमैंइ मन्दिरर ओररिब् चमैंइ थेइ। छतमा चमैं बेल्‍ले ह्रिस खसि
MAT 21:16 “चु कोलोमैंइ बिरिबै ताँ क्‍हिइ थेइमुँ वा?” बिसि येशूने ङ्योएइ। येशूजी बिइ, “थेइमुँ, तले आथेब! ‘च्‍योंबै कोलोमैं नेरो ओलाँ कोलोमैंए सुँउँइँले या परमेश्‍वरजी खीए मिं क्वेबर ल्हैदिइमुँ,’ बिसि परमेश्‍वरए छ्वेर प्ह्रिबै ताँ क्‍हेमैंइ खोंयोंइ आखेइमुँ वा?”
MAT 21:17 च्हौ बिसि चमैंलाइ वाथेंसि खी सहरउँइँले त्‍होंसि बेथानियार ह्‍यासि चर्न बास टिइ।
MAT 21:18 प्‍हँन्हाँग्धों न्‍हाँक्‍कर्न सहरउँइँ एखमा येशू फो ख्रेंइ।
MAT 21:19 घ्याँए रेर खीजी तुँबुए धुँ घ्रि म्रोंसि च धुँए ङाँर खमा च धुँर प्‍हो मत्‍त्रे म्रोंइ रो आयों। छतमा खीजी च धुँने बिइ, “तारे पिरु क्‍हिने खोंयोंइ रोमैं आरोरिगे।” छ बिबै तोदोंन् च धुँ ङ्योंलोंयाइ।
MAT 21:20 छाब् म्रोंसि चेलामैं प्लेटोयासि “च्‍हौ युनन् चु तुँबुए धुँ खैले ङ्योंलोंयागे?” बिइ।
MAT 21:21 येशूजी चमैंने बिइ, “क्ह्रोंसेंन ङ क्हेमैंने बिमुँ, क्‍हेमैंइ तोइ संका आलनाले क्वेंस्‍याँ चु तुँबुए धुँलाइ ङइ लब् धोंले क्हेमैंज्यै लल् खाँम्। च्‍हौ मत्‍त्रे आङिं, क्‍हेमैंइ चु कोंलाज्यै या ‘स्युसि मा ङ्युँइर तेयाद्’ बिलेया छान् तब्‍मुँ।
MAT 21:22 क्हेमैंइ परमेश्‍वरए फिर बिश्‍वास लसि प्राथनानर तो सै ह्रिलेया योंब्‍मुँ।”
MAT 21:23 च लिउँइँ येशू मन्दिरर ह्‍यासि ताँमैं लोमिंबर होंमा ख्रो पिंबै खेगि चिब्मैं नेरो यहूदी चिबनाँब्मैं खी ङाँर खसि “क्हिइ खाबै हगउँइँले चु केमैं लल? खाबइ चु केमैं लबै हग पिंइ?” बिसि ङ्योएइ।
MAT 21:24 येशूजी चमैंने बिइ, “ङज्‍यैया ओंसों क्‍हेमैंने ताँ घ्रि ङ्योएम्। क्‍हेमैंइ ज्वाफ पिंइबिस्‍याँ, खाबइ हग पिंसि ङइ चु के लम् बिसि क्हेमैंने बिस्‍यो।
MAT 21:25 लु बित्ति! यूहन्‍नाइ बप्‍तिस्‍मा पिंबै हग खनिउँइँले योंइ? परमेश्‍वरउँइँले योंइ उ म्‍हिमैंउँइँले योंइ?” छबिमा चमैं ह्रों-ह्रोंसन्, “स्वर्गउँइँले बिले बिस्याँ ‘छ बिस्‍याँ यूहन्‍नाइ बिबै ताँ क्‍हेमैंइ तले आक्वेंल?’ बिसि चइ बिब्मुँ बिदै छलफल लबर होंइ।
MAT 21:26 दिलेया ‘म्हिमैंउँइँले’ बिले बिस्‍याँ म्हिमैंइ तोइ लम् उ बिसि ङ्हिंल् त्हुइमुँ। तलेबिस्याँ यूहन्‍ना अगमबक्‍ता ग बिसि ताँन् म्हिमैंइ म्हाँदिम्।”
MAT 21:27 छतमा चमैंइ येशूने “तुसि, खनिउँइँले योंगे ङिइ आसे,” बिइ। छबिमा येशूजी चमैंने बिइ, “छ बिस्‍याँ ङज्यै या खनिउँइँले चु केमैं लबै हग योंइ बिसि क्‍हेमैंने आबि।”
MAT 21:28 येशूजी चमैंने धबै बिइ, “चु ताँए बारेर क्‍हेमैं खै ङ्हाँम्? म्‍हि घ्रिला च्‍ह ङ्हिं मुँल। आबा च्‍ह थेब ङाँर ह्‍यासि ‘ओ ठागु, तिंयाँ क्‍हि म्रोंर ह्‍यासि के लद्,’ बिमा
MAT 21:29 ठागुइ ‘ङ आह्‍या,’ बिइ। दिलेया लिउँइँ चए सैं एसि म्रोंर के लबर ह्‍याइ।
MAT 21:30 “आबाइ च्‍ह च्‍योंब्‍ने या छान् बिइ। च्‍योंबइ ‘तम् तम्, ङ ह्‍यास्‍यो,’ बिइ दिलेया च आह्‍या।
MAT 21:31 “चु च्‍ह ङ्हिंर आबाइ बिबै ताँ खाबइ ङिंइ? ठागुइ उ च्‍योंबइ?” चमैंइ “ठागुइ,” बिइ। झाइले येशूजी चमैंने बिइ, “क्ह्रोंसेंन ङ क्हेमैंने बिमुँ, रोमी म्रुँए ल्हागिर बालि रेब्मैं नेरो फ्यालुस्यो के लब्मैं क्‍हेमैं भन्दा ओंसों परमेश्‍वरए ग्याल्सर होंब्मुँ।
MAT 21:32 तलेबिस्याँ यूहन्‍ना छ्याँबै घ्‍याँ उँइँबर क्‍हेमैं ङाँर युँइ, दिलेया क्‍हेमैंइ चए फिर बिश्‍वास आल। दिलेया रोमी म्रुँए ल्हागिर बालि रेब्मैं नेरो फ्यालुस्योमैंइ चए फिर बिश्‍वास लइ। चु म्रोंसेया क्हेमैंइ पापउँइँले सैं आए, धै चए फिर बिश्‍वास आल।”
MAT 21:33 येशूजी चमैंने बिइ, “धबै अर्को ताँ थेद्। म्‍हि घ्रिइ अँगुरए खेति लसि कारग्युले बार थोइ। अँगुर म्‍हाबै कोल नेरो अँगुर रुँबै ल्हागिर म्हि टिबै क्ल्ह्‍यो या बनेइ। झाइले च म्रों आधे पिथेंसि च ह्रेंगोर्बै ह्‍युलउँइँ ह्‍याइ।
MAT 21:34 “लिउँइँ अँगुर खुबै त्हे तमा चइ के लबै म्‍हिमैं ह्रोंसए भाउ किंबर आधे लब्मैं ङाँर कुल्‍मिंइ।
MAT 21:35 दिलेया च आधे लब्मैंइ च के लबै म्‍हिमैं क्‍हासि घ्रिलाइ धोंइ, घ्रि सैवाइ, धै अर्कोलाइ युँमाइ ल्हिइ।
MAT 21:36 धबै च म्रोंए क्‍ल्‍हेइ ओंसोंबै भन्दा ल्हें के लबै म्‍हिमैं कुल्‍मिंइ। दिलेया च आधे लब्‍मैंइ ओंसों खब्‍मैंए फिर खै लल छान् लइ।
MAT 21:37 “लिउँइँ च म्रोंए क्‍ल्‍हेइ ‘ङए च्हलाइमि मान ललै’ ङ्हाँसि खीए च्‍ह चमैं ङाँर कुल्‍मिंइ।
MAT 21:38 दिलेया च आधे लब्‍मैंइ क्ल्हेए च्‍ह खरिब् म्रोंमा ‘झन्, चम् हग योंल् त्‍हुबै च्‍ह ग। चलाज्यै या सैवाले! चलाइ सैवास्‍याँ चए ताँन् सै न्होर ङ्योलन् तब्मुँ,’ बिसि मत लइ।
MAT 21:39 झाइले चमैंइ चलाज्यै या क्‍हासि म्रोंउँइँले बैरु बोसि सैवाइ।
MAT 21:40 “छतमा तारे च म्रोंए क्‍ल्‍हे खसि आधे लब्‍मैंलाइ तो ललै?”
MAT 21:41 चमैंइ खीने बिइ, “क्ल्हे खसि च दुष्‍ट म्‍हिमैं सैवाब्‍मुँ। धै रा-रोमैं खुबै त्हेर ह्रोंसइ योंल् त्हुबै भाउ पिंबै म्हिमैंनेन् आधे पिंब्मुँ।”
MAT 21:42 येशूजी चमैंने बिइ, “परमेश्‍वरए छ्वेर प्‍ह्रिबै चु ताँ क्‍हेमैंइ आखेइमुँ वा? ‘धिं लब्‍मैंइ केर आफे बिसि भ्योंवाबै युँमान् धाँसे तेंर्बै क्र युँमा तइमुँ। चु परमेश्‍वरउँइँले तब् ग। ङ्योए उँइँर चु के आचम्‍मबै मुँ।’
MAT 21:43 छतसि ङ क्‍हेमैंने बिमुँ, परमेश्‍वरए ग्याल्सर टिबै हग तारे परमेश्‍वरजी क्‍हेमैंउँइँले प्‍हेंसि रोमैं रोल् खाँबै अरू ह्रेंलाइ पिंब्‍मुँ।”
MAT 21:44 [चु युँमाए फिर क्‍हुरिह्‍याब्मैं नास तयाब्मुँ, धै खाबै फिर च युँमा तेयामुँ चलाइ प्लेवाब्‍मुँ।]
MAT 21:45 ख्रो पिंबै खेगि चिब्मैं नेरो फरिसीमैंइ खीजी बिबै अहान् थेसि “खीजी चु अहान् ङ्योए बारेर्न बिब् ग,” बिसि चमैंइ क्होइ।
MAT 21:46 छतसि चमैंइ येशूलाइ क्‍हाल् म्‍हैइ, दिलेया चमैं म्‍हिए हुल म्रोंसि ङ्हिंइ। तलेबिस्याँ म्हिमैंइ “येशू अगमबक्‍ता ग,” बिसि मैंमल।
MAT 22:1 येशूजी धबै चमैंने अहानउँइँले ताँ बिइ।
MAT 22:2 “स्‍वर्गर्बै ग्याल्स म्रुँ घ्रिने च्हैंल् खाँम्। चइ ह्रोंसए च्‍हए ब्ह्‍यार थेबै भत्‍यार लइ।
MAT 22:3 झाइले म्रुँइ भत्यारर न्हिम्‍तो पिंबर चए के लबै म्‍हिमैं कुल्‍मिंइ। दिलेया न्हिम्तो लब्मैं खल् आङिं।
MAT 22:4 “धै म्रुँइ छोबै खसिमैं नेरो मगिमैं सैसि भत्यार लइमुँ। तारे ब्ह्‍याए भत्‍यार चबर खो बिद् बिसि म्रुँइ अरू के लबै म्‍हिमैं न्हिम्‍तो लब्‍मैं ङाँर धबै कुल्मिंइ।
MAT 22:5 दिलेया च न्हिम्‍तो लबै म्हिमैं थेबै न्हइ आलल्‍ले घ्रि ह्रोंसए म्रोंउँइँ ह्‍याइ, अर्को छों लबर ह्‍याइ।
MAT 22:6 अरूमैंइ च न्हिम्‍तो पिंबर ह्‍या‍ब्मैंलाइन क्हासि खैच्हिजिले धोंसि सैवाइ।
MAT 22:7 छतमा च म्रुँ बेल्‍ले ह्रिस खसि ह्रोंसए सिपाइमैं कुल्‍मिंसि च म्हि सैमैं सैवाइ, धै चमैंए सहरर मिसा झोंवाइ।
MAT 22:8 “च लिउँइँ म्रुँइ ह्रोंसए के लबै म्‍हिमैंने बिइ, ‘ब्ह्‍याए भत्‍यार तयार मुँ, दिलेया ङइ न्हिम्‍तो लबै म्‍हिमैं बिस्‍याँ भत्‍यार चबै लायकर्बै आरेना।
MAT 22:9 छतसि क्‍हेमैं घ्याँजरे ह्‍यासि क्हेमैंने त्‍होब्मैं ताँनलाइ भत्‍यार चबर हुइद्।’
MAT 22:10 म्रुँइ छबिमा के लबै म्‍हिमैं घ्याँजरे ह्‍यासि चमैंने त्‍होब तब-आतब ताँन् म्हिमैं खागु लसि भत्यारर पखइ। धै ब्ह्‍या लबै धिं प्ह्रेंमैंइ प्‍लिंइ।
MAT 22:11 “म्रुँइ ब्ह्‍यार खबै प्‍ह्रेंमैं ङ्‌ह्‍योबर न्होंर खमा, ब्ह्‍यार खिल् त्‍हुबै क्‍वें आखिल्‍‍ले खबै म्हि घ्रि चइ म्रोंइ।
MAT 22:12 म्रुँइ चने ‘ओ थु, क्‍हि ब्ह्‍यार खिल् त्‍हुबै क्‍वें आ‍खिल्‍ले खैले न्‍होंर खल?’ बिसि ङ्योएमा चइ तोइ बिल् आखाँल।
MAT 22:13 झाइले म्रुँइ ह्रोंसए के लबै म्‍हिमैंने बिइ, ‘चए यो प्‍हले फैसि बैरु मिछु खैबै क्‍ल्‍ह्‍योर भ्‍योंवाँन्, चर म्‍हिमैं क्रोसि स ह्राब्‍मुँ।’
MAT 22:14 “तलेबिस्याँ हुइब्मैं ल्‍हें मुँ, त्हाँब्मैं बिस्याँ च्‍युगुदे मत्‍त्रे मुँ।”
MAT 22:15 चु ताँ थेसि फरिसीमैंइ येशूजी पोंबै ताँउँइँलेन् खीलाइ खैले ङोर फेल् लब् ङ्‍हे बिसि मत लइ।
MAT 22:16 छतसि फरिसीमैंइ ह्रोंसए चेलामैं हेरोद म्रुँए टोलिर्बै म्हिमैंने येशू ङाँर कुलइ। चमैं ह्‍यासि खीने बिइ, “ओ गुरु, क्‍हिजी क्‍ह्रोंसेंन्‍बै ताँ पोंमुँ, धै म्‍हिमैंलाइ परमेश्‍वरए क्ह्रोंसेंन्बै घ्‍याँर छेनाले प्रबर लोमिंम् बिब ङिइ सेइमुँ। क्‍हि खाब् म्रोंसेया आङ्हिं, तलेबिस्याँ क्हिजी म्‍हि ङ्‍ह्‍योसि के आल।
MAT 22:17 छतसि रोमी म्रुँलाइ बालि फोब तम् उ आत? ङिने बिमिंन्।”
MAT 22:18 दिलेया येशूजी चमैंए सैंर्बै आछ्याँबै ताँ सेसि चमैंने बिइ, “ओ फिब्लो पार्दिब्मैं, क्‍हेमैंइ तले ङए जाँच लल् म्‍हैल?
MAT 22:19 खोइ, च बालि फोबै मुइ ङने उँइँन्दि।” बिमा चमैंइ मुइ घ्रि पखसि येशूने पिंइ।
MAT 22:20 खीजी चमैंने “चु मुइर्बै छाप नेरो मिं खाबल् जा?” बिसि ङ्योएमा
MAT 22:21 चमैंइ खीने “चु कैसर म्रुँल् ग,” बिइ। येशूजी चमैंने बिइ, “छतसि कैसरलाइ पिंल् त्हुबै सै कैसरलाइन पिंन्, धै परमेश्‍वरलाइ पिंल् त्हुबै सै परमेश्‍वरलाइन पिंन्।”
MAT 22:22 चु ताँ थेसि चमैं प्लेटोयाइ, धै खीलाइ वाथेंसि छ्युडिह्‍याइ।
MAT 22:23 म्हि सिसि धबै सोगों आत बिबै सदुकीमैं च त्हिंइर्न येशू ङाँर खसि खीने बिइ,
MAT 22:24 “ओ गुरु, खाब् मुँले म्‍हि प्हसे आफिन्‍ले सियास्‍याँ चए अलिइ चों बोसि आघेंए ल्हागिरि सन्‍तान योंमिंरिगे बिसि मोशाइ बिल।
MAT 22:25 ङिला त्येमैं ङिउँलो मुँल। ठागुइ ब्ह्‍या लइ, दिलेया प्‍हसे आफिन्‍ले सियाइ। छतसि चइ अलिए ल्हागिर ह्रोंसए प्ह्रेंस्यो वाथेंइ ह्‍याइ।
MAT 22:26 छलेन म्हैला नेरो साँइलाज्यै छान् लइ। लिउँइँ च ङिउँलोन् छलेन् प्‍हसे आफिन्‍लेन् सियाइ।
MAT 22:27 चमैं ताँन् सिबै लिउँइँ च च्हमिरि या सियाइ।
MAT 22:28 छतसि सिबै म्‍हिमैं धबै सोगों तमा च त्येमैं ङिउँलो न्‍होंरि च च्हमिरि खाबै प्ह्रेंस्यो तलै? तलेबिस्याँ च ताँनए प्ह्रेंस्यो तल् खाँल।”
MAT 22:29 येशूजी चमैंने बिइ, “क्हेमैंइ ताँ आक्होइमुँ, तलेबिस्याँ परमेश्‍वरए छ्वे नेरो परमेश्‍वरए शक्‍ति खैब तम् बिसि क्‍हेमैंइ आसेइमुँ।
MAT 22:30 तलेबिस्याँ सिबै म्‍हिमैं धबै सोगों तबै लिउँइँ चमैं स्‍वर्गर्बै स्‍वर्गदूतमैं धोंन् तब्‍मुँ। छतसि म्‍हिमैंइ ब्ह्‍या आल ब्ह्‍या या आलमिं।
MAT 22:31 सिबै म्हिमैं धबै सोगों तबै बारेर परमेश्‍वरजी क्‍हेमैंने तो बिइमुँ, च क्‍हेमैंइ आखेइमुँ वा?
MAT 22:32 ‘ङ अब्राहाम, इसहाक नेरो याकूबए परमेश्‍वर ग।’ परमेश्‍वर सियाबै म्‍हिमैंए परमेश्‍वर आङिं, सोगोंमैंए परमेश्‍वर ग।”
MAT 22:33 छले खीजी लोमिंबै ताँमैं थेसि चर्बै म्‍हिए हुल प्लेटोयाइ।
MAT 22:34 येशूजी सदुकीमैंलाइ तोइ ज्वाफ पिंल् आखाँब् लवाइ रो बिब् थेसि फरिसीमैं येशू ङाँर खइ।
MAT 22:35 चमैं न्‍होंर्बै परमेश्‍वरए छ्वेर्बै ताँ लोमिंबै म्हि घ्रिइ खीए जाँच लबै सैंले खीने ङ्योएइ,
MAT 22:36 “ओ गुरु, परमेश्‍वरए छ्वेर मुँबै ताँमैं न्होंर आलसि आतबै ताँन् भन्दा थेबै ताँ तो जा?”
MAT 22:37 खीजी चमैंने बिइ, “‘क्‍हिइ ह्रोंसए याहवेह परमेश्‍वरलाइ ह्रोंसए खों न्होंइले, सैं न्होइले, ह्रोंसए ज्युइ खाँब्दे म्हाँया लल् त्‍हुम्।’
MAT 22:38 आलसि आतबै धाँसे ओंसोंबै थेबै ताँ चुन् ग।
MAT 22:39 आलसि आतबै अर्को थेबै ताँ या छाबन् मुँ, ‘क्‍हिइ ह्रोंसए ङ्‍हेब्-ट्हुब्मैंलाज्यै या ह्रोंसने धोंले म्हाँया लद्।’
MAT 22:40 मोशाइ प्‍ह्रिबै ठिम नेरो अगमबक्‍तामैंइ लोमिंल् म्हैबै ताँमैं चु ङ्हिंन् ग।”
MAT 22:41 झाइले फरिसीमैं खागु तमा येशूजी चमैंने ङ्योएइ,
MAT 22:42 “परमेश्‍वरजी कुल्मिंबै म्रुँ ख्रीष्‍टए बारेर क्‍हेमैं खै ङ्हाँम्? खी खाबै च्ह जा?” चमैंइ “दाऊदए च्ह ग,” बिइ।
MAT 22:43 येशूजी चमैंने बिइ, “छ बिस्‍याँ दाऊदइ परमेश्‍वरए पबित्र प्ल्हउँइँले खैले खीने प्रभु बिइ दि? तलेबिस्याँ दाऊदइ खीए बारेर छले बिइमुँ:
MAT 22:44 ‘याहवेहजी ङए प्रभुने बिइ, ङइ क्‍हिए शत्तुरमैं क्‍हिए प्‍हले न्‍होंर आलन् समा क्‍हि ङए क्‍योलोउँइँ टिद्।’
MAT 22:45 छले दाऊदइ खीने प्रभु बिम् बिस्याँ खी खैले दाऊदए च्ह तल् खाँमुँ?”
MAT 22:46 छबिमा खाबज्यै या येशूने ताँ तिजी या पोंल् आखाँ। च त्हिंइसेरो खाबज्यै खीने ताँ ङ्योएबै आँट लल् आखाँ।
MAT 23:1 झाइले येशूजी म्‍हिए हुल नेरो खीए चेलामैंने बिइ:
MAT 23:2 “शास्‍त्रिमैं नेरो फरिसीमैंइ मोशाइ प्‍ह्रिबै ठिमर्बै ताँमैं लोमिंम्।
MAT 23:3 छतसि चमैंइ बिबै ताँमैं क्‍हेमैंइ लद्, दिलेया चमैंइ लब् धोंले आलद्, तलेबिस्याँ चमैंइ लोमिंब् धोंले ह्रोंसइन आल।
MAT 23:4 चमैंइ नोलै आखाँब ल्हिबै ति फैसि म्हिमैं नोल् पिंम्, दिलेया खेंमैं बिस्‍याँ यो च्याफै टिरिम्।
MAT 23:5 दिलेया चमैंइ ह्रोंसइ लबै केमैं म्हिमैंइ म्रोंरिगे बिसि उँइँम्। ङि धर्मि ग बिसि उँइँबै ल्हागिर चमैंइ ठिमर्बै ताँमैं थेंबै बट्टामैं थे-थेब लसि ङ्‍हो नेरो यो पाख्रार खिम्, छलेन ह्रोंसइ खिबै क्‍वेंर ह्रिंग्यो ह्रिंग्यो झुम्कामैं च्योसि खिम्।
MAT 23:6 भत्यारजरे ह्‍यामा चमैंइ धाँसे मान योंबै क्‍ल्‍ह्‍यो म्‍हैमुँ। धै चिब प्हैंसि च्हों धिंर ओंसोंबै क्‍ल्‍ह्‍योजरे टिदा ङ्हाँम्।
MAT 23:7 बजारजरे स्‍युरबर ह्‍यामा म्‍हिमैंइ खेंमैं मान लसि ‘गुरु’ बिसि म्हाँदिरिगे ङ्हाँम्।
MAT 23:8 “दिलेया खाबज्यै या क्‍हेमैंने ‘गुरु’ आबिरिगे, तलेबिस्याँ क्‍हेमैंलाइ लोमिंबै गुरु घ्रि मत्‍त्रे मुँ, छतसि क्‍हेमैं ताँन् आघें-अलिमैं ग।
MAT 23:9 क्‍हेमैंइ चु पृथ्‍बीरि खाबलाज्यै या आबा आबिद्, तलेबिस्याँ क्हेमैंल घ्रि मत्‍त्रे आबा स्वर्गर मुँ।
MAT 23:10 छलेन खाबज्‍यै क्‍हेमैंने ‘क्ल्हे’ आबिरिगे, तलेबिस्याँ क्‍हेमैंए घ्रि मत्‍त्रे क्ल्हे परमेश्‍वरजी कुल्मिंबै म्रुँ ख्रीष्‍ट ग।
MAT 23:11 क्‍हेमैं न्‍होंरि धाँसे थेबै म्हिइ क्हेमैंए सेवा लल् त्हुब्मुँ।
MAT 23:12 ह्रोंसइन ह्रोंस थेब लबै म्हि परमेश्‍वरजी च्‍योंब् लवाब्‍मुँ। धै ह्रोंसइन ह्रोंस च्योंब् लबै म्हि परमेश्‍वरजी थेब लमिंब्‍मुँ।
MAT 23:13 “धिक्‍कार मुँ, शास्‍त्रिमैं नेरो फरिसीमैं, क्‍हेमैं फिब्लो पार्दिब्मैं! स्‍वर्गर्बै ग्याल्सर होंल् म्हैबै म्‍हिमैंलाइ क्‍हेमैंइ म्रा तोरवाम्। क्‍हेमैं ह्रोंसै या आहों, होंल् म्‍हैब्‍मैंलाज्यै या होंल् आपिं।
MAT 23:14 [धिक्‍कार मुँ, शास्‍त्रिमैं नेरो फरिसीमैं क्‍हेमैं फिब्लो पार्दिब्मैं! तलेबिस्याँ क्‍हेमैंइ म्हरेस्योमैंए धिं नाँ लुडिमुँ, धै म्हिमैंइ म्रोंरिगे बिसि ह्रिंग्‍यो प्राथना लब् प्हैंमुँ। छतसि अरूइ भन्दा क्‍हेमैंइ थेबै दण्‍ड योंल् त्‍हुब्‍मुँ।]
MAT 23:15 “धिक्‍कार मुँ, शास्‍त्रिमैं नेरो फरिसीमैं क्‍हेमैं फिब्लो पार्दिब्मैं! म्हि घ्रि क्हेमैंए घ्याँर प्ररिगे बिसि क्‍हेमैं मा ङ्युँइ नेरो ह्‍युलजरे स्युरदै म्हि म्हैदै प्रम्, धै क्‍हेमैंए घ्याँर प्रबै लिउँइँ च म्हिलाइ ह्रोंसइ भन्दा ल्हें नर्गर्बै दण्ड योंल् लम्।
MAT 23:16 “धिक्‍कार मुँ, क्हेमैं कन अगुवामैं! ‘खाबज्यै मन्दिरए मिंर कसम चलेया तोइ आत बिमुँ, दिलेया मन्दिरर मुँबै माराए मिंर कसम चमा च कसम ल्‍हैदिम्,’ बिसि चमैंइ लोमिंम्।
MAT 23:17 ओ बुद्धि आरेबै कनमैं, मारा थेब उ, मारालाइ पबित्र लबै मन्दिर थेब् जा?
MAT 23:18 ‘होम लबै क्‍ल्‍ह्‍योए मिंर खाबज्यै कसम चलेया तोइ आत बिमुँ, दिलेया च क्ल्ह्‍योए फिर चडिदिबै भेटिए मिंर कसम चस्‍याँ च कसम ल्‍हैदिम्,’ बिसि लोमिंम्।
MAT 23:19 ओ कनमैं, चडिदिबै भेटि थेब उ, चडिदिबै भेटिलाइ पबित्र लबै क्‍ल्‍ह्‍यो थेब् जा?
MAT 23:20 छतसि होम लबै क्‍ल्‍ह्‍योए मिंर कसम चबै म्हिइ होम लबै क्‍ल्‍ह्‍यो नेरो चर थेंबै ताँन् भेटिमैंए मिंरै या कसम चम्।
MAT 23:21 छलेन मन्दिरए मिंर कसम चबै म्हिइ मन्दिर नेरो चए न्होंर बास लबै परमेश्‍वरए मिंरै या कसम चम्।
MAT 23:22 स्‍वर्गए मिंर कसम चबै म्हिइ परमेश्‍वर टिबै क्ल्ह्‍यो नेरो चर टिबै परमेश्‍वरए मिंरै या कसम चम्।
MAT 23:23 “धिक्‍कार मुँ, शास्‍त्रिमैं नेरो फरिसीमैं क्‍हेमैं फिब्लो पार्दिब्मैं! क्हेमैंइ पतिना, सुँप नेरो जीराला च्युबाँरि तिबाँ परमेश्‍वरए मिंर पिंम्। दिलेया क्‍हेमैंइ छेनाले निसाफ आल, आगुए फिर ल्हयो आख धै भर लल् खाबै के या आल। चु ताँमैं परमेश्‍वरए ठिमर्बै आलसि आतबै थेबै ताँमैं ग। क्हेमैंइ च्युबाँर्बै तिबाँ पिंबै के लल् त्हुमल, छलेन चु मुख्‍य ताँमैं या ङिंल् त्‍हुमल।
MAT 23:24 ओ कन अगुवा‍मैं, क्‍हेमैंइ मोसोम् (भुसुना) चिसि ट्हुइमुँ, दिलेया सलु बिस्याँ क्‍ल्‍ह्‍योंवाम्!
MAT 23:25 “धिक्‍कार मुँ, शास्‍त्रिमैं नेरो फरिसीमैं क्‍हेमैं फिब्लो पार्दिब्मैं! क्‍हेमैंइ थलि नेरो प्‍हेलाए बैरु म्‍यासि ख्रुमुँ, दिलेया थलि नेरो प्‍हेलाए न्होंर बिस्याँ लुडिइ पखबै सैंमैंइ प्‍लिंमुँ।
MAT 23:26 ओ कन फरिसीमैं, ओंसों थलि नेरो प्‍हेलाए न्‍होंउँइँ म्यासि ख्रुद्, छलस्याँ बैरु या छ्याब तब्‍मुँ।
MAT 23:27 “धिक्‍कार मुँ, शास्‍त्रिमैं नेरो फरिसीमैं क्‍हेमैं फिब्लो पार्दिब्मैं! क्‍हेमैं चुनइ स्‍यालबै छगों धों तब मुँ। च छगों बैरुउँइँले ङ्‌ह्‍योमा छ्याँब म्रोंम्, दिलेया न्‍होंर सिबै म्‍हिए ह्रिब नेरो क्राँरिबै से मत्‍त्रे तम्।
MAT 23:28 छलेन क्‍हेमैं या बैरुउँइँले म्‍हिमैंए उँइँरि छ्याँबै खों मुँब् धों ब्योंब् म्रोंम्, दिलेया सैं न्‍होंर बिस्‍याँ आछ्याँब सैमैंइ प्‍लिंइमुँ।
MAT 23:29 “धिक्‍कार मुँ, शास्‍त्रिमैं नेरो फरिसीमैं, क्‍हेमैं फिब्लो पार्दिब्मैं! तलेबिस्याँ क्‍हेमैंइ अगमबक्‍तामैंए ल्हागिर छ्याँबै छगोंमैं बनेमुँ, धै स्योंमन् सियाबै छ्याँबै के लबै म्‍हिमैं मैंबै ल्हागिरि बनेबै देवल सिंगार्दिसि बिमुँ,
MAT 23:30 ‘ङि ह्रोंसए खेमैं मुँबै त्हेर मुँस्‍याँ अगमबक्‍तामैं सैबर ङि चमैंने आत्हुँमल।’
MAT 23:31 छले क्‍हेमैंइ अगमबक्‍तामैं सैवाब्‍मैंए सन्‍तान ग बिबै प्रमाण क्हेमैं ह्रोंसइन पिंइमुँ।
MAT 23:32 छतसि क्‍हेमैंए खेमैंइ लबै पापए के पूरा लद्।
MAT 23:33 प्‍हुरिमैं, ओ साँबे प्‍हुरिए प्हसेमैं! क्‍हेमैं नर्गर्बै मिउँइँले खैले स्योल् खाँमुँ?
MAT 23:34 छतसि ङइ क्‍हेमैं ङाँर अगमबक्‍तामैं, बुद्धि मुँबै म्‍हिमैं नेरो छ्वेर्बै ताँ लोमिंब्मैं कुल्‍मिंब्मुँ। चमैंए न्होंरि कोइ क्हेमैंइ सैवाब्‍मुँ, कोइ क्रूसर च्‍योवासि सैवाब्‍मुँ, कोइ क्हेमैंए च्हों धिंजरे बोसि कोर्राइ प्रुब्मुँ, धै सहर-सहरजरे ‍ह्रुगुदिब्मुँ।
MAT 23:35 ओंसों ओंनोंबै छ्याब् आरेबै म्‍हिमैं सैवाबै सजैं क्‍हेमैंए फिर्न तरिगे बिसि ङए ताँ बिमिंब्मैं कुल्मिंब्‍मुँ। तोइ छ्याब् आरेबै हाबिल नेरो बेरेक्याहए च्‍ह जकरिया सैवाबै पापए सजैं क्‍हेमैंए फिर्न खब्मुँ। मन्दिर नेरो होम् पिंबै क्‍ल्‍ह्‍योए म्‍हाँजोर क्‍हेमैंइ जकरिया सैवाइ।
MAT 23:36 छतसि क्ह्रोंसेंन ङ क्हेमैंने बिमुँ, चु ताँन् पापए सजैं चु पुस्तार्बै म्‍हिमैंए फिर खब्‍मुँ।
MAT 23:37 “ओ यरूशलेमथेंमैं, अगमबक्‍तामैं सैब्मैं, धै परमेश्‍वरजी कुल्मिंबै स्यार्बोमैं युँमाइ प्रिंब्मैं। नगा आमाइ प्हसेंमैं प्ह्‍या न्होंर हुब् धोंले ल्‍हें खे ङइ क्‍हेमैंलाइ हुल् म्‍हैइ, दिलेया क्‍हेमैं ङ ङाँर खोंयोंइ या खल् आङिं!
MAT 23:38 छतसि ङ्‍ह्‍योत्ति, क्‍हेमैंए धिं तोइ आचैन् तयाइमुँ।
MAT 23:39 तलेबिस्याँ ङ क्‍हेमैंने बिमुँ, ‘याहवेहए मिंर खबै म्रुँ बेल्‍ले ङ्‍हो सब् ग’ आबिन् समा क्‍हेमैंइ ङलाइ म्रोंरिब आरे।”
MAT 24:1 च लिउँइँ येशू क्वै धिउँइँले त्होंसि ह्‍याबि छेमा खीए चेलामैं खीने मन्दिरए धिंमैं उँइँब् बिसि खीए ङाँर खइ।
MAT 24:2 खीजी चमैंने बिइ, “क्हेमैंइ चु ताँन् धिंमैं म्रोंइ, आङि वा? क्ह्रोंसेंन ङ क्हेमैंने बिमुँ, प्‍हँना लिउँइँ चु मन्दिरर्बै युँमा घ्रिए फिर अर्को युँमा तरिब् आरे। ताँन् फुवासि भ्योंवाब्मुँ।”
MAT 24:3 येशू जैतून बिबै कोंर क्हुँरिमा खीए चेलामैं खाबज्यै आसेल्‍ले खी ङाँर खसि खीने ङ्योएइ, “छाबै त्हे खोंयों तम्? धै क्‍हि एयुबै त्हे नेरो चु ह्‍युल नास तमा खैबै चिनुमैं तमुँ?”
MAT 24:4 येशूजी चमैंने बिइ, “खाबज्यै क्हेमैंए सैं ङ्हिरि आलरिगे बिसि न्हक्रो मिक्रोले टिद्।
MAT 24:5 तलेबिस्याँ ल्‍हें म्‍हिमैं ङए मिंरि ‘ङ परमेश्‍वरजी कुलबै म्रुँ ख्रीष्‍ट ग’ बिसि क्‍हेमैं ङाँर खब्मुँ, धै ल्‍हें म्‍हिमैं खेंमैं ङाँइ लवाब्‍मुँ।
MAT 24:6 लडे तइ बिब् नेरो लडे तबै हल्‍लामैं क्‍हेमैंइ थेब्मुँ। दिलेया क्‍हेमैं आङ्हिंन्, छाबै लडे तलन् त्‍हुम्। छान् तलेया च त्हेर्न ह्‍युल नास तरिब् आरे।
MAT 24:7 तलेबिस्याँ ह्रेंए बिरोधर ह्रें राब्मुँ ग्याल्सए बिरोधर ग्याल्स राब्मुँ, धै क्ल्ह्‍यो-क्ल्ह्‍योरि अँङ्गल तब्मुँ, सयो खब्मुँ।
MAT 24:8 दिलेया चु ताँन् सैमैं सुत्‍केरि बेथा ल्हैदिबि छेब् धों तब् मत्‍त्रे ग।
MAT 24:9 “च त्हेर म्‍हिमैंइ क्‍हेमैं दुःख योंरिगे बिसि क्‍हासि दुष्‍टमैंए योर पिंवाब्मुँ, धै चमैंइ क्‍हेमैं सैवाब्‍मुँ। क्‍हेमैंइ ङए ताँ क्वेंइ बिसि ताँन् म्हिमैंइ क्‍हेमैंलाइ हेल लब्‍मुँ।
MAT 24:10 छतमा ल्‍हें म्‍हिमैंइ ङए फिर बिश्‍वास लब पिवाब्‍मुँ। चमैंइ खें-खेंमैंए न्‍होंर्न घ्रिइ-घ्रिए फिर धोका पिंसि क्हाल् पिंब्मुँ, धै हेल लुब्मुँ।
MAT 24:11 ल्‍हें म्‍हिमैं ‘ङ अगमबक्‍ता ग’ बिसि स्योर तेसि खब्‍मुँ, धै ल्हें म्हि खेंमैं ङाँइ लवाब्मुँ।
MAT 24:12 खन्‍तोंदोंन् आछ्याँबै के लब्मैं ल्‍हें ततै ह्‍याबइले म्‍हिमैंए न्‍होंरि म्हाँया म्‍हयाब्‍मुँ।
MAT 24:13 दिलेया लिउँइँ समा खीए फिर बिश्‍वास लसि टिब्मैंलाइ परमेश्‍वरजी जोगेमिंब्मुँ।
MAT 24:14 झाइले स्‍वर्ग ग्याल्सर्बै सैं तोंबै ताँ ताँन् ह्‍युलर्बै ह्रेंमैंए ल्हागिरि ग्वाइ तरिगे बिसि बिमिंब्मुँ, च लिउँइँ चु ह्‍युल नास तयाब्मुँ।
MAT 24:15 “झाइले स्‍योंम्‍बै अगमबक्‍ता दानिएलइ बिब् धोंले नास लबै छेरान्दे ब्योंबै सै पबित्र क्ल्ह्‍योर क्‍हेमैंइ म्रोंब्‍मुँ। (म्हिइ चु ताँ खेसि क्‍होरिगे।)
MAT 24:16 छ तब् म्रोंबै तोदोंन् यहूदीयार मुँब्मैं कोंउँइँ भौदिरिगे।
MAT 24:17 कौसिर मुँब्‍मैं धिं न्‍होंर मुँबै सैमैं ट्हुइब् बिसि क्युरु आतरिगे।
MAT 24:18 म्रोंर के लब्‍मैं धिंर मुँबै क्‍वें किंनिले बिसि धिंउँइँ आह्‍यारिगे।
MAT 24:19 ओंछेमैं! च त्हेर प्‍हसे नोबै च्हमिरिमैं नेरो ङ्‍हे तिंबै आमामैं बेल्‍ले दुःख तब्‍मुँ।
MAT 24:20 छतसि सर्खर नेरो प्रिबै त्हिंइर क्हेमैं भौदिल् आत्हुरिगे बिसि परमेश्‍वरने प्राथना लद्।
MAT 24:21 तलेबिस्याँ च त्हेर बेल्‍ले थेबै दुःख तब्‍मुँ। च धों तबै दुःख ह्‍युलए ओंसों ओंनों तिंयाँ समा खोंयोंइ आतइमुँ, धै लिउँज्यै या छाबै दुःख खोंयोंइ तरिब् आरे।
MAT 24:22 दिलेया च दुःखए त्हिंइ परमेश्‍वरजी आघटिमिंस्याँ खाबै या सोल् आखाँमल। छतसि परमेश्‍वरजी खीजी त्हाँबै म्‍हिमैं सोरिगे बिसि च त्हिंइ घटिमिंब्मुँ।
MAT 24:23 “खाबज्‍यै क्‍हेमैंने ‘ङ्‍ह‍योद्, परमेश्‍वरजी कुल्‍मिंबै म्रुँ ख्रीष्‍ट चुर मुँ,’ ‘चर मुँ,’ बिइ बिस्याँ क्हेमैंइ आक्‍वेंन्।
MAT 24:24 तलेबिस्याँ ‘ङ परमेश्‍वरजी कुल्मिंबै म्रुँ ख्रीष्‍ट ग’ बिसि स्‍योर तेब्मैं खब्मुँ। चमैंइ थे-थेबै चिनुमैं नेरो प्लेटोयान् तबै केमैं लसि उँइँब्मुँ, धै परमेश्‍वरजी त्हाँबै म्‍हिमैं खेंमैं ङाँइ बोल् म्‍हैब्‍मुँ।
MAT 24:25 छतसि छेनाले मैंन्! ङइ चु ताँ क्‍हेमैंने ओंसोंन् बिमिंइमुँ।
MAT 24:26 “चमैंइ क्‍हेमैंने ‘प्रभु क्यु आयोंबै क्ल्ह्‍योर मुँ!’ बिस्याँ क्‍हेमैं बैरु त्होंसि आह्‍याद्। ‘प्रभु धिं न्‍होंर मुँ’ बिलेया क्‍हेमैंइ आक्‍वेंन्।
MAT 24:27 तलेबिस्याँ स्यारउँइँले (पूर्वउँइँले) काम्‍लि-तिम्‍लि रामा न्हुउँइँ (पश्‍चिम) समा चारब् धोंले म्हिए च्ह ताँनइ म्रोंन्‍ले युब्‍मुँ।
MAT 24:28 “सिनु मुँबै क्‍ल्‍ह्‍योर क्‍व्रेमैं खागु तम्।”
MAT 24:29 “च दुःख तबै त्हिंइ खाँबै तोदोंन् त्‍हिंयाँ मिछु खैयाब्‍मुँ, लयाँ या चाररिब् आरे, धै मुसारमैं या मुउँइँले तेयाब्‍मुँ। छले मुर मुँबै सैमैं ताँन् लायाब्‍मुँ।
MAT 24:30 च लिउँइँ मुर म्हिमैंइ म्हिए च्हए चिनु म्रोंब्मुँ। धै म्हिए च्ह मुउँइँले थेबै शक्‍ति नेरो म्हारल्‍ले न्हाँम्स्योर युरिब म्हिमैंइ म्रोंब्‍मुँ। च त्हेर ताँन् ह्रें-ह्रेंर्बै म्हिमैं बेल्‍ले न्हुँ लसि क्रोब म्होब तब्मुँ।
MAT 24:31 झाइले थेबै कैलै थुतुरि ह्रासि खीजी ह्रोंसए स्‍वर्गदूतमैं कुल्‍मिंब्‍मुँ। धै खीजी त्हाँबै म्हिमैं मुर्बै छेउ घ्रिउँइँले अर्को छेउ समा ह्‍युलर्बै ताँन् क्ल्ह्‍योउँइँले स्‍वर्गदूतमैंइ खी ङाँर खागु लब्मुँ।”
MAT 24:32 “तुँबु धुँउँइँले लोद्। च धुँए हाँगमैं कलिलो तसि पिंग्‍या प्‍होमैं पलिदिमा बर्ख ल्‍हैदिना बिसि क्‍हेमैंइ सेमुँ।
MAT 24:33 छलेन चु ताँन् ताँमैं तब् म्रोंमा खी युबै त्हे तबि छेना बिसि क्‍हेमैंइ सेल् खाँम्।
MAT 24:34 क्ह्रोंसेंन ङ क्हमैंने बिमुँ, चु ताँमैं ताँन् पूरा आतन् समा चु पुस्‍ता म्‍हरिब आरे।
MAT 24:35 स्वर्ग नेरो पृथ्‍बी म्‍हयाब्‍मुँ, दिलेया ङइ बिबै ताँ खोंयोंइ या म्‍हरिब आरे।”
MAT 24:36 “च दुःख तबै त्हिंइ नेरो त्हे खोंयों तब्‍मुँ बिसि खाबज्यै था आसे। स्‍वर्गर मुँबै स्‍वर्गदूतमैंज्यै आसे, परमेश्‍वरए च्‍हज्यै या आसे। च ताँ परमेश्‍वर आबाजी मत्‍त्रे सेइमुँ।
MAT 24:37 स्‍योंम्‍बै नोआए पलोर था आसेल्‍ले नाँ बाढि युब् धोंले म्हिए च्ह या था आसेल्‍ले युब्‍मुँ।
MAT 24:38 नाँ बाढिइ नास लब् भन्दा ओंसों नोआ क्यु झाजर आहोंन् समा, म्‍हिमैं चब थुँब नेरो ब्ह्‍या लरिल।
MAT 24:39 झाइले बाढि युसि स्वात्तन् आबोन् समा चमैंइ तोइ आसेल। च धोंलेन् म्‍हिमैंइ आसेल्‍ले म्हिए च्ह युब्‍मुँ।
MAT 24:40 च त्हेर म्रों घ्रिर्न के लरिबै म्‍हि ङ्हिंरि घ्रि बोब्‍मुँ, अर्को चर्न वाथेंब्‍मुँ।
MAT 24:41 ह्रेंदो प्‍ह्रोरिबै च्हमिरिमैं ङ्हिंरि घ्रि चर्न वाथेंब्मुँ घ्रि बोब्‍मुँ।
MAT 24:42 “छतसि न्हक्रों-मिक्रोंले टिद्, तलेबिस्याँ क्‍हेमैंए प्रभु खोंयों युब्‍मुँ बिसि क्‍हेमैंइ आसे।
MAT 24:43 चु ताँ मैंन्दि, धिं क्‍ल्‍हेइ ‘ह्‍यो चु त्हेर्न खब्मुँ’ बिब था सेस्‍याँ च न्‍हरु आच्‍हुइल्‍ले टिरिमल, धै ह्‍योइ धिं फोर्दिल् आपिंमल।
MAT 24:44 छतसि क्‍हेमैं या न्हक्रों मिक्रोंले टिद्, तलेबिस्याँ क्‍हेमैंइ आमैंबै त्हेर म्हिए च्ह युब्‍मुँ।”
MAT 24:45 “भर लल् खाँब नेरो बुद्धि मुँबै केब्छैं खैबै तम्? च केब्छैंने क्ल्हेइ ‘धिंर्बै केब्‍छैंमैं चब-थुँब ठिक त्हेर पिंन्’ बिसि चए जिम्‍मार वाथेंम्।
MAT 24:46 लिउँइँ क्ल्हे धिंर एखमा खिइ बिब् धोंलेन् च केब्छैं के लरिब् स्‍यास्याँ च केब्छैंइ स्याबस योंब्मुँ।
MAT 24:47 क्ह्रोंसेंन ङ क्हेमैंने बिमुँ, क्ल्हेइ ह्रोंसए ताँन् सै न्होरए जिम्‍मा पिंबर चलाइ त्हाँब्‍मुँ।
MAT 24:48 दिलेया दुष्‍ट केब्छैंइ ‘ङए क्ल्हे तोगोंन् खरिब् आरे क्हैल्‍ले खलै’ ङ्हाँसि,
MAT 24:49 ह्रोंसने बालुन् के लब्‍मैंलाइ धोंब नेरो प्हा थुँब्‍मैंने थु तसि चब्-थुँब लबर होंइ बिस्‍याँ,
MAT 24:50 चइ थाइ आसेल्‍ले चए सैंरै आमैंबै त्हेर क्ल्हे फेखब्‍मुँ।
MAT 24:51 झाइले क्ल्हेजी चलाइ थेबै सजैं पिंसि फिब्लो पार्दिब्मैंए म्हाँजोर भ्योंवाब्मुँ। चर म्हिमैं क्रोसि स ह्राब्‍मुँ।”
MAT 25:1 येशूजी अझै बिइ, “स्‍वर्गर्बै ग्याल्स कन्ये च्युने च्हैंल् खाँम्। च कन्ये च्युइ ह्रों-ह्रोंसए बत्ति छेसि प्ह्रेंरोने त्‍होबर ह्‍याइ।
MAT 25:2 चमैं न्होंरि ङ्‍हउँलो बुद्धि मुँब् मुँल, ङ्‌हउँलो बुद्धि आरेबा मुँल।
MAT 25:3 तलेबिस्याँ च बुद्धि आरेब्‍मैंइ बत्ति मत्‍त्रे बोल, थप्दिबै छ्युगु बिस्याँ आबोल।
MAT 25:4 दिलेया बुद्धि मुँब्मैंइ बिस्याँ बत्तिने बालु थप्दिबै छ्युगु या बोल।
MAT 25:5 प्ह्रेंरो खब क्‍हैल् लबइले च कन्येमैं ताँन् न्‍हरु च्‍हुइयाइ।
MAT 25:6 “दिलेया म्‍हुँइँस आधार ‘ङ्‍ह्‍योत्ति! प्ह्रेंरो फेखबि छेइ! खीने त्‍होबर खो,’ बिबै कै थेइ।
MAT 25:7 छ बिब् थेसि च कन्येमैं च्यु छोरसि ह्रों-ह्रोंसए बत्ति सफा लसि छ्युगु झोंबर होंइ।
MAT 25:8 च बुद्धि आरेब्‍मैंइ बिस्याँ बुद्धि मुँब्मैंने ‘ङिए बत्ति सिबर होंइ! छतसि क्हेमैंने मुँबै च्हौदे छ्युगु ङिलाज्यै पिंन्,’ बिइ।
MAT 25:9 दिलेया च बुद्धि मुँब्मैंइ बिइ, ‘ङि नेरो क्हेमैंए ल्हागिर योबै छ्युगु ङिने आरे। दोकनर ह्‍यासि ह्रोंसए ल्हागिर चैदिबै छ्युगु किंन्।’
MAT 25:10 “छबिमा च बुद्धि आरेब्‍मैं छ्युगु किंबर ह्‍यारिमा प्ह्रेंरो धिंर फेखइ, धै बत्तिर छ्युगु झोंसि टिरिब्मैं प्ह्रेंरोने बालुन् ब्ह्‍याए भत्‍यार चबर धिं न्‍होंर होंइ। धै म्हिमैंइ म्रा तोरवाइ।
MAT 25:11 “तिस्‍याँदे लिउँइँ च बुद्धि आरेब्‍मैं या फेखइ, धै ‘ओ प्रभु, ङिए ल्हागिरै या म्रा थोंमिंन्,’ बिबर होंइ।
MAT 25:12 दिलेया खीजी चमैंने ‘क्ह्रोंसेंन क्हेमैं खाब् जा ङइ ङो आसे,’ बिइ।
MAT 25:13 “छतसि न्हक्रो मिक्रोले टिद्, तलेबिस्याँ ङ एयुबै त्हिंइ नेरो त्हे खोंयों तमुँ बिसि क्‍हेमैंइ आसे।
MAT 25:14 “स्‍वर्गर्बै ग्याल्स म्हि घ्रि धोंन् तब् ग। च आगुए ह्‍युलर ह्‍याबर होंमा ह्रोंसए केब्छैंमैं हुइसि ह्रोंसने मुँबै सै न्होर चमैंए जिम्‍मार पिंइ।
MAT 25:15 केब्छैंमैंइ के कति लल् खाँम् च ङ्‍ह्‍‍योसि खीजी घ्रिने माराए सिक्‍का ङ्‍ह, घ्रिने माराए सिक्‍का ङ्हिं, धै घ्रिने माराए सिक्‍का घ्रि जिम्‍मा ल्‍हैदिसि च आगुए ह्‍युलउँइँ ह्‍याइ।
MAT 25:16 माराए सिक्‍का ङ्‍ह योंबै म्‍हिइ युनन् ह्‍यासि च मुइउँइँले छों लसि अर्को सिक्‍का ङ्‍ह कमदिइ।
MAT 25:17 छलेन सिक्‍का ङ्हिं योंबै म्‍हिज्‍यै या अर्को सिक्‍का ङ्हिं कमदिइ।
MAT 25:18 दिलेया सिक्‍का घ्रि योंबै म्‍हिइ बिस्‍याँ ह्‍यासि होंल्‍दों तासि क्ल्हेए मुइ लोथेंइ।
MAT 25:19 “ल्‍हें त्हिंइ लिउँइँ चमैंए क्ल्हे एखसि चमैंने हिसाब ह्रिइ।
MAT 25:20 माराए सिक्‍का ङ्‍ह योंबै केब्छैंइ अरू सिक्‍का ङ्‍ह पखसि ‘चिब, क्‍हिजी ङने माराए सिक्‍का ङ्‍हए जिम्मा पिंल। ङइ छों लसि अर्को सिक्‍का ङ्‍ह कमदिइ पखइमुँ,’ बिइ।
MAT 25:21 “चए के म्रोंसि क्ल्हेजी चने बिइ, ‘स्‍याबास! क्‍हि छ्याँबै के लब नेरो भर लल् खाँब् तइ! क्हि च्युगुदे सैरै या भर लल् खाँब् तइ। छतसि तारे ङइ ल्‍हें सैमैंए जिम्मा क्हिलाइ पिंब्मुँ। क्हि ह्रोंसए क्ल्हेने बालुन् सैं तोंन्ले टिद्।’
MAT 25:22 “च लिउँइँ सिक्‍का ङ्हिं योंबै केब्छैंज्यै या क्ल्हे ङाँर खसि बिइ, ‘चिब, क्हिजी ङने सिक्‍का ङ्हिं पिंल। ङइ अर्को सिक्‍का ङ्हिं कमदिसि पखइमुँ।’
MAT 25:23 “चए के म्रोंसि क्ल्हेजी चने बिइ, ‘स्‍याबास! क्‍हि छ्याँबै के लब नेरो भर लल् खाँब् तइ! क्हिइ च्युगुदे सैरै या छ्याँबै के लसि भर लल् खाँब् तइ। छतसि तारे ङइ ल्‍हें सैमैंए जिम्मा क्हिलाइ पिंब्मुँ। क्हि ह्रोंसए क्ल्हेने बालुन् सैं तोंन्ले टिद्।’
MAT 25:24 “च लिउँइँ माराए सिक्‍का घ्रि योंबै केब्छैं क्ल्हे ङाँर खसि बिइ, ‘चिब! क्‍हि आरुँइँबै क्ल्ह्‍योउँइँले खैंमुँ, आटाबै क्ल्ह्‍योउँइँले खुमुँ, धै सारो सैं प्ह्‍याबै म्हि मुँ बिसि ङइ सेल।
MAT 25:25 छतसि ङम् ङ्हिंइ, धै ह्‍यासि क्हिए सिक्‍का स न्होंर लोथेंल। नाँ, क्‍हिए मुइन् किंन्।’
MAT 25:26 “छबिमा चए क्ल्हेजी चने बिइ, ‘ओ केर आत्हुबै प्ल्हेउ! ङइ आप्लुबै क्ल्ह्‍योर खैंमुँ, आटाबै क्ल्ह्‍योउँइँले खुमुँ बिसि क्हिइ सेस्याँ
MAT 25:27 क्‍हिइ ङए मुइ बैंकर थेंल् त्‍हुमल। धै ङ एखमा च मुइला ‍ब्याजै या ङइ योंमल।’
MAT 25:28 चुइ तिंफुँए फिर ङ्हिंफुँ आलसेरो ‘चने मुँबै सिक्‍‍का प्‍हेंसि सिक्‍का च्यु मुँबै म्‍हि पिंन्।
MAT 25:29 तलेबिस्याँ खाब्ने मुँ, चने मुँबै फिरै या थप्दिमिंब्मुँ, धै चने छ्येज्याल्हुल्हु तब्‍मुँ। खाब्ने आरे चने देदे मुँबै या प्‍हेंवाँब्मुँ।
MAT 25:30 चु केर आत्हुबै केब्छैं बैरु मिछु खैबै क्‍ल्‍ह्‍योर भ्‍योंवाँन्, चर म्‍हिमैं क्रोसि स ह्राब्‍मुँ।’
MAT 25:31 “म्हिए च्ह म्रुँ तसि खीए थेबै मानर ल्हें स्‍वर्गदूतमैंने बालुन युब्मुँ, धै ह्रोंसए पबित्र राजगद्दिर टिब्‍मुँ,
MAT 25:32 झाइले ताँन् ह्रें-ह्रेंर्बै म्‍हिमैं खीए उँइँर खागु तब्‍मुँ, धै प्‍ह्रोंछैंमैंइ र नेरो क्यु स्यो-स्यो लब् धोंलेन् खीजी घ्रिउँइँले घ्रि स्यो लब्मुँ।
MAT 25:33 खीजी क्‍यु धों तब्‍मैं ह्रोंसए क्योलो हारइ थेंब्मुँ, धै र धों तब्‍मैं त्हेब्रे हारइ थेंब्‍मुँ।
MAT 25:34 झाइले म्रुँजी ह्रोंसए क्‍योलो हारबै म्‍हिमैंने ‘खो, ङए आबाउँइँले आशिक योंबै म्‍हिमैं, ह्‍युल बनेब् ओंनोंन् क्‍हेमैंए ल्हागिर बनेथेंबै ग्याल्सर क्ल्हे लबर खो,’ बिब्मुँ।
MAT 25:35 तलेबिस्याँ ङ फो ख्रेंमा क्‍हेमैंइ चल् पिंइ। ङ क्‍यु पिमा क्हेमैंइ क्‍यु थुँल् पिंइ। ङ अरू ह्‍युलर्बै मुँलेया क्‍हेमैंइ धिंर बोसि टिल् पिंइ।
MAT 25:36 ङ क्‍लुनान् मुँमा क्‍हेमैंइ क्‍वें खिमिंइ। ङ नमा क्‍हेमैं ल्होबर खइ। ङ झेलर मुँमा क्‍हेमैं ङ ङाँर त्‍होबर खइ।
MAT 25:37 “चु ताँ थेसि ठिक के लब्मैंइ ‘ओ प्रभु, क्‍हि फो ख्रेंब ङिइ खोंयों म्रोंसि चब् चल् पिंल? क्‍यु पिब् सेसि खोंयों थुँल् पिंल?’ बिब्मुँ।
MAT 25:38 ‘क्‍हि अरू ह्‍युलर्बै मुँलेया ङिइ खोंयों धिंर बोसि क्‍हिए मान लल? क्‍हि क्‍लुनान् तब् म्रोंसि ङिइ खोंयों क्वें खिमिंल?
MAT 25:39 झाइले क्‍हि नबै त्हेर क्हिलाइ ल्होबर ङि खोंयों खइ? धै क्हि झेलर मुँब् सेसि क्हि ङाँर त्होबर ङि खोंयों खल?’
MAT 25:40 “छबिमा म्रुँइ चमैंने बिब्मुँ, ‘क्ह्रोंसेंन ङ क्हेमैंने बिमुँ, क्हेमैंइ ङए अलि-अङाँमैं न्होंर्बै धाँसे च्योंबै म्हिलाइ तो-तो लइ, च क्हेमैंइ ङलाइन लब् ग।’
MAT 25:41 “च लिउँइँ खीजी ह्रोंसए त्हेब्रे हारइ टिब्‍मैंने ‘ओ सराप योंबै म्हिमैं! ङ ङाँइँले ह्रेंगो तयाद्। दियाबलस नेरो चए दूतमैंए ल्हागिर बनेथेंबै खोंयोंइ आसिबै मिर ह्‍याद्,’ बिब्मुँ।
MAT 25:42 तलेबिस्याँ ङ फो ख्रेंमा क्‍हेमैंइ चबै सै आपिं, ङ क्‍यु पिमा क्‍हेमैंइ क्‍यु थुँल् आपिं।
MAT 25:43 ङ अरू ह्‍युलर्बै म्हि मुँमा क्‍हेमैंइ धिंर बोसि टिल् आपिं। ङ क्‍लुनान् तमा क्‍हेमैंइ क्‍वें आखिमिं। ङ नमा नेरो झेलर मुँमा क्‍हेमैं ङने त्होबर आखा।
MAT 25:44 “‘प्रभु, क्‍हि फो ख्रेंब नेरो क्यु पिब, अरू ह्‍युलर्बै म्हि मुँब, क्‍लुनन् तब, नब, नेरो झेलर टिब ङिइ खोंयों म्रोंसि क्हिए सेवा आल?’ बिसि चमैंइ ङ्योएब्मुँ।
MAT 25:45 “धबै म्रुँइ बिब्मुँ, ‘क्‍ह्रोंसेंन ङ क्हेमैंने बिमुँ, ङए चु अलि-अङाँमैं न्होंर्बै धाँसे च्योंबै म्हिलाइ क्‍हेमैंइ आल्होसेरो क्‍हेमैंइ ङलाइ आल्होब् ग।’
MAT 25:46 “छतसि चुमैंइ खोंयोंइ आखाँबै दण्‍ड योंब्‍मुँ, दिलेया ठिक के लब्मैंइ बिस्याँ खोंयोंइ आखाँबै छ्ह योंब्‍मुँ।”
MAT 26:1 येशूजी चु ताँन् ताँमैं बिल् खाँबै लिउँइँ ह्रोंसए चेलामैंने बिइ,
MAT 26:2 “क्‍हेमैंइ सेइमुँ, ङ्हिरो लिउँइँ दुःखने फ्रेबै चाड खमुँ। च त्हेर म्हिमैंइ म्हिए च्ह क्रूसर च्‍योवाबै ल्हागिर क्हाब्‍मुँ।”
MAT 26:3 झाइले ख्रो पिंबै खेगि चिब्मैं नेरो यहूदी चिबनाँब्मैं कैयाफा बिबै ख्रो पिंबै खेगि क्रथेए दरबारर खागु तइ।
MAT 26:4 धै चमैंइ म्हिमैंइ आसेल्‍‍ले येशूलाइ क्‍हासि सैबै मत लइ।
MAT 26:5 दिलेया चमैंइ बिइ, “चाडए त्हेर क्‍हाब आत। ङ्योइ छ लस्‍याँ म्‍हिमैं खैला-बैला तब्मुँ।”
MAT 26:6 येशू बेथानिया बिबै नाँसर सिमोन बिबै कोर खबै म्हिए धिंर मुँमा,
MAT 26:7 च्हमिरि घ्रिइ सिङ्गमरमरए परुर लिंबै थाँ खबै सै ल्हें फेबै अत्तर पखसि खी ङाँर खइ। धै खी चब् चबर क्हुँमा च च्हमिरिइ अत्तर खीए क्रर युमिंइ।
MAT 26:8 छ लब् म्रोंसि चेलामैं ह्रिस खसि बिइ, “तले च्हौ ल्हें सै फेबै अत्तर नोक्सन लब् जा?
MAT 26:9 चु अत्तर सै ल्हेर चुँसि योंबै मुइ ङ्हाँदुमैं पिंल् खाँमल।”
MAT 26:10 चमैंइ बिबै ताँ सेसि येशूजी चमैंने बिइ, “क्‍हेमैंइ चु च्हमिरि तले हौदिसि दुःख पिंमुँ? चुइमि ङए ल्हागिर बेल्‍ले छ्याँबै के लइमुँ।
MAT 26:11 तलेबिस्याँ ङ्हाँदुमैं खोंयोंइ या क्हेमैंनेन् तरिम्। ङ बिस्याँ खोंयोंइ या क्‍हेमैंने आत।
MAT 26:12 चइ चु अत्तर ङए ज्युर युमिंसि ङ पाबै ल्हागिर तयार लमिंब् ग।
MAT 26:13 क्ह्रोंसेंन ङ क्हेमैंने बिमुँ, ह्‍युल तिगोंन् परमेश्‍वरए सैं तोंबै ताँ बिमिंबै क्ल्ह्‍योजरे चु च्हमिरिइ लबै छ्याँबै केए बयन चलाइ मैंबै ल्हागिर म्‍हिमैंइ लब्‍मुँ।”
MAT 26:14 च लिउँइँ च्युसे ङ्हिं चेलामैं न्‍होंर्बै यहूदा इस्‍करियोतथें ख्रो पिंबै खेगि चिब्मैं ङाँर ह्‍यासि
MAT 26:15 बिइ, “ङइ येशूलाइ क्हासि क्हेमैंए योर पिंइ बिस्‍याँ ङलाइ तो पिंमुँ?” छबिमा चमैंइ चाँदिए मुइ सोंच्‍यु पिंइ।
MAT 26:16 च त्हेसेरो यहूदाइ येशूलाइ क्‍हाल् पिंबै दाउ ङ्ह्‍योबर होंइ।
MAT 26:17 प्लेढा आझोंबै क्हें चबै चाडए ओंसोंबै त्हिंइर चेलामैं येशू ङाँर खसि “ङिइ क्हिए ल्हागिरि दुःखने फ्रेबै चाड म्हाँदिबै तौदु खनिर लले?” बिसि ङ्योएइ।
MAT 26:18 खीजी चमैंने बिइ, “सहरर म्‍हि घ्रि ङाँर ह्‍यासि चने बिद्, गुरुजी बिइमुँ, ‘ङए ल्हागिर तोक्दिबै त्हे तखइमुँ। छतसि ङए चेलामैंने बालु ङ क्‍हिए धिंर दुःखने फ्रेबै चाड म्हाँदिदा ङ्हाँइमुँ,’ बिद्।” बिसि कुल्मिंइ।
MAT 26:19 छबिमा चेलामैंइ येशूजी बिब् धोंले दुःखने फ्रेबै चाड म्हाँदिबै तौदुमैं लइ।
MAT 26:20 ङेसा तबै लिउँइँ खी च्युसे ङ्हिं चेलामैंने बालु चब् चबर क्हुँइ।
MAT 26:21 खेंमैं चब् चरिबै त्हेर येशूजी बिइ, “क्ह्रोंसेंन ङ क्‍हेमैंने बिमुँ, क्हेमैंए न्होंरि म्‍हि घ्रिइ ङलाइ क्हाल् पिंब्मुँ।”
MAT 26:22 चु ताँ थेसि चमैं बेल्‍ले न्हुँ लसि घ्रि-घ्रिले “प्रभु, च म्हि ङ वा?” बिसि ङ्योएबर होंइ।
MAT 26:23 खीजी बिइ, “ङने बालुन् प्‍हेलार क्‍हें तुइँबै म्हिइन ङ क्हाल् पिंब्‍मुँ।
MAT 26:24 परमेश्‍वरए छ्वेर प्‍ह्रिब् धोंले म्हिए च्ह सिलन् त्‍हुम्, दिलेया म्हिए च्ह क्हाल् पिंबै म्हिलाइ धिक्‍कार मुँ। च म्हि आफिस्याँ चए ल्हागिरि छ्याँब तमल।”
MAT 26:25 खीलाइ क्हाल् पिंबै यूहदाइ “ओ गुरु, च म्हि ङ वा?” बिसि ङ्योएमा खीजी चने बिइ, “क्‍हिइ ह्रोंसइन बिइमुँ।”
MAT 26:26 खेंमैं चब् चरिमा येशूजी क्‍हें किंसि परमेश्‍वरलाइ धन्यबाद पिंसि क्‍हें लुँइ, धै चेलामैंने पिंसि बिइ, “नाँ, चु क्‍हें चद्! चु ङए ज्यु ग।”
MAT 26:27 छलेन खीजी प्‍हेला किंसि परमेश्‍वरलाइ धन्‍यबाद पिंसि “क्हेमैं ताँनइ चु थुँन् बिसि चेलामैंने पिंइ।
MAT 26:28 तलेबिस्याँ चु परमेश्‍वरजी फैबै छारा बाछार्बै ङए को ग। ल्‍हें म्‍हिमैंए पाप क्षमा तरिगे बिसि ङए को बगेब्मुँ।
MAT 26:29 दिलेया ङ क्हेमैंने बिमुँ, तारे पिरु ङए आबाए ग्याल्सर क्हेमैंने बालुन् छारा तरिकाले आथुँन् समा ङइ अँगुरए खु धबै थुँरिब आरे।”
MAT 26:30 च्हौ बिसि खेंमैं भजन घ्रि प्रिंसि जैतून कोंउँइँ ह्‍याइ।
MAT 26:31 झाइले येशूजी चमैंने बिइ, “तिंयाँबै म्‍हुँइँसर ङए फिर तखबै केमैं म्रोंसि क्‍हेमैं ताँनइ ङ वाथेंसि ह्‍याब्‍मुँ। तलेबिस्याँ परमेश्‍वरए छ्वेर छले प्‍ह्रिइमुँ, ‘ङइ क्युछैं सैवाब्‍मुँ, धै क्‍युए बगालमैं खन्‍तोंदोंन् प्हुँयाब्‍मुँ।’
MAT 26:32 दिलेया ङ सिसि धबै सोगों तबै लिउँइँ क्‍हेमैं भन्दा ओंसों गालील ह्‍युलर ह्‍याब्‍मुँ।”
MAT 26:33 पत्रुसइ खीने बिइ, “क्हिए फिर दुःख तमा ताँनइ क्‍हि पिवालेया ङइ खोंयोंइ या क्हिलाइ पिरिब् आरे।”
MAT 26:34 येशूजी चने बिइ, “क्ह्रोंसेंन ङ क्हिने बिमुँ, तिंयाँबै म्‍हुँइँसर नग भाले ओरब् भन्दा ओंसों सोंखे समा क्‍हिइ ङ ङो आसे बिब्मुँ।”
MAT 26:35 पत्रुसइ खीने बिइ, “क्‍हिने बालुन् सिल् त्‍हुलेया ङइ क्हि खोंयोंइ ङो आसे बिरिब आरे।” अरू चेलामैंज्यै या छान् बिइ।
MAT 26:36 झाइले येशू चेलामैंने बालु गेतसमनि बिबै बगैंचार ह्‍यासि “ङ दे क्याइ ह्‍यासि प्राथना लमुँ। क्‍हेमैं चुर्न टिरिद् ओ,” बिइ।
MAT 26:37 खीजी पत्रुस नेरो जब्दियाए च्‍ह ङ्हिं ह्रोंसने बालुन् बोसि ह्‍याइ, च्हमा खी शोकइ लमा खैता खैता तबर होंइ।
MAT 26:38 छतमा खीजी चमैंने बिइ, “ङए सैंर थेबै शोक तसि सिब् धोंन् तइमुँ। क्‍हेमैं न्हरु आच्हुल्‍ले ङने बालुन् चुर्न टिद्।”
MAT 26:39 झाइले येशू दे क्‍याइ ह्‍यासि सर पद्खु तसि “ओ ङए आबा, तल् खाँम् बिस्‍याँ चु दुःख ङ ङाँइँले स्‍योमिंन्। दिलेया ङइ मैंब् धोंले आङिं, क्‍हिए सैंर मैंब् धोंले तरिगे,” बिसि प्राथना लइ।
MAT 26:40 झाइले खी चेलामैं ङाँर खमा चमैं न्‍हरु च्‍हुइरिब स्‍याइ। छतमा खीजी पत्रुसने बिइ, “क्‍हेमैं घण्‍टा घ्रि या न्हरु आच्हुइल्‍ले ङने बालु टिल् आखाँ वा?
MAT 26:41 दुष्‍टए ङोर आफेरिगे बिसि न्हरु आच्हुइनाले प्राथना लद्। क्ह्रोसेंन सैंरम् खाँलै ङ्हाँमुँ, ज्यु बिस्याँ आखाँ।”
MAT 26:42 धबै ङ्हिखेबै लारै या येशू ह्‍यासि छले प्राथना लइ, “ओ ङए आबा, चु दुःख ङइ आनोसि आत बिस्याँ क्‍हिए सैंर मैंब् धोंन् तरिगे।”
MAT 26:43 खी धबै एखमा चेलामैं न्‍हरु च्‍हुइरिबन् स्‍याइ, तलेबिस्याँ चमैंए मि न्‍हरुइ स्युलुलुन् तरिल।
MAT 26:44 छ तब् म्रोंसि चमैं धबै चर्न वाथेंसि सोंखेबै लारै या ह्‍यासि ओंसों लब् धोंलेन् प्राथना लइ।
MAT 26:45 झाइले खी चेलामैं ङाँर खसि चेलामैंने बिइ, “क्‍हेमैं अझै रोसि भोंन् न्हरिल् वा? ङ्‌ह्‍योद्, म्हिए च्ह क्‍हासि ‍पापिमैंए योर पिंवाबै त्हे तयाल् खाँइमुँ।
MAT 26:46 रेद्, ह्‍याले। ङ्‍ह्‍योद्! ङलाइ क्हाल् पिंबै म्‍हि चेंदोन् मुँ।”
MAT 26:47 येशूजी छ बिइन मुँमा खीए च्युसे ङ्हिं चेलामैं न्‍होंर्बै यहूदा चर फेखइ। चने बालु सेलाँ (तरवार) नेरो प्‍हरे छेबै थेबै हुलै या खइ। चमैं ख्रो पिंबै खेगि चिब्मैं नेरो यहूदीमैंए चिबनाँब्मैंइ कुल्‍मिंब्‍मैं मुँल।
MAT 26:48 खीलाइ क्हाल् पिंबै यहूदाइ चमैंने ओंसोंन् “ङइ म्वें लबै म्हिन् क्‍हेमैंइ म्‍हैबै म्‍हि ग। चलाइन क्‍हाद्,” बिथेंल।
MAT 26:49 छ बिबै तोदोंन् यहूदा येशू ङाँर ह्‍यासि येशूने, “ओ गुरु,” बिसि म्वें लइ।
MAT 26:50 येशूजी चने “ओ थु, क्हि तो लब् बिसि खल, च युनन् लद् बिइ,” छ बिबै तोदोंन् यहूदाने खबै म्‍हिमैं खसि येशूलाइ क्‍हाइ।
MAT 26:51 येशूने बालु मुँब्मैं न्होंर्बै चेला घ्रिइ ह्रोंसए सेलाँ ट्हुइसि ख्रो पिंबै खेगि क्रथेए केब्छैंलाइ ल्हिसि चए न्‍हेमें थोवाइ।
MAT 26:52 छाब् म्रोंसि येशूजी चने “क्‍हिए सेलाँ स्युर झोंन् बिइ, तलेबिस्याँ सेलाँ छेब्मैं ताँन् सेलाँइन सैवाब्‍मुँ।
MAT 26:53 ङ ह्रोंसए आबाने बालु ल्होमिंन् बिसि यो छ्युँ लल् आखाँ ङ्हाँल् वा? ङइ बिस्याँ आबाइ तोगोंन् ङ जोगेमिंबर च्युसे ङ्हिं पल्टन भन्दा ल्हें स्‍वर्गदूतमैं आकुल रो वा?
MAT 26:54 दिलेया ङइ छले ल्होमिंन् बिस्याँ, परमेश्‍वरए छ्वेर चु तलन् त्हुम् बिसि प्ह्रिबै ताँ खैले पूरा तल् खाँमुँ?”
MAT 26:55 च त्हेर्न येशूजी खी क्‍हाबर खबै म्हिए हुलने बिइ, “ह्‍यो क्हाबर खब् धोंले सेलाँ नेरो प्‍हरे छेसि ङ ङाँर तले खल? ङइ त्हिंइ ह्रोंसे मन्दिरर लोमिंममा क्‍हेमैंइ ङलाइ आक्‍हा।
MAT 26:56 तलेबिस्याँ अगमबक्‍तामैंइ प्‍ह्रिबै ताँ पूरा तरिगे बिसि छ तब् ग।” च तोदोंन् चेलामैं ताँन् खी वाथेंसि भौदिह्‍याइ।
MAT 26:57 खीलाइ क्‍हाबोबै म्‍हिमैंइ येशू कैयाफा बिबै ख्रो पिंबै खेगि क्रथे ङाँर बोइ। चर शास्‍त्रिमैं नेरो चिबनाँब्मैं खागु तल।
MAT 26:58 पत्रुस या दे ह्रेंगोले येशूए लिलि ख्रो पिंबै खेगि क्रथेए धिंर्बै ह्‍यु समा ह्‍याइ। धै “लिउँइँ तो तमगे” बिसि ङ्‌ह्‍योबर न्होंर होंसि पालेमैंने बालु क्हुँइ।
MAT 26:59 झाइले ख्रो पिंबै खेगि चिब्मैं नेरो थेबै म्हि च्होंर्बै चिबनाँब्मैं ताँनइ येशू सैबै ल्हागिर खीए बिरोधर स्‍योर्गु ग्वाइ पिब्‍मैं योंल् खाँम् उ बिसि म्‍हैबर होंइ।
MAT 26:60 ल्‍हें स्योर्गु ग्वाइ पिंब्मैं खइ, दिलेया चमैंइ तोइ प्रमाण योंल् आखाँ। लिउँइँ म्हि ङ्हिं ओंसों खसि, बिइ।
MAT 26:61 “चु म्‍हिइ ‘ङइ परमेश्‍वरए मन्दिर फुवासि धबै सोंगैंर बनेल् खाँम्,’ बिइ।”
MAT 26:62 छबिमा ख्रो पिंबै खेगि क्रथे रेसि “चु म्हिमैंइ क्‍हिए बिरोधर पिंबै ग्वाइ तो जा? क्‍हि तोइ आबि वा?” बिसि खीने ङ्योएइ।
MAT 26:63 दिलेया येशू तोइ आबिल्‍ले टिरिइ। धै ख्रो पिंबै खेगि क्रथेइ येशूने बिइ, “सोगों परमेश्‍वरए मिंर कसम चसि बिद्। क्‍हि परमेश्‍वरजी कुल्मिंबै म्रुँ ख्रीष्‍ट, परमेश्‍वरए च्‍ह वा?”
MAT 26:64 येशूजी चने बिइ, “ङ चन् ग बिसि क्‍हिइन बिइमुँ दि। ङ क्हेमैंने बिमुँ, तारे म्हिए च्ह ताँनइ म्हाँदिल् त्हुबै परमेश्‍वरए क्‍योलोउँइँ क्हुँरिब नरो मुर्बै न्‍हाँम्‍स्योर युरिब क्‍हेमैंइ म्रोंब्‍मुँ।”
MAT 26:65 छ बिब् थेसि ख्रो पिंबै खेगि क्रथेइ ह्रोंसए क्‍वें ट्होसि चर्बै चिबनाँब्मैंने बिइ, “चुइ परमेश्‍वर स्यारसि पोंइ। तारे ङ्योलाइ अरू ग्वाइ तले चैदिइ? चुइ परमेश्‍वरए क्ल्ह्‍योर खी तसि पोंब क्हेमैंइ थेइ।
MAT 26:66 क्‍हेमैंए सैंर खै ङ्हाँमुँ?” चमैंइ बिइ, “चु सैलन् त्‍हुबै लायकर्बै मुँ।”
MAT 26:67 झाइले चमैंइ खीए लिर थुइसि खीलाइ धोंइ। को-कोइइ,
MAT 26:68 “ओ ख्रीष्‍ट, लु, अगमबाणि पोंन्! क्हिलाइ प्रिंब खाब् जा?” बिदै खीलाइ धोंइ।
MAT 26:69 पत्रुस बैरु ह्‍युर्न टिरिमा केब्स्यो घ्रि च ङाँर खसि “क्‍हि या गालीलथें येशूने बालु मुँल्दि आङि वा,” बिइ।
MAT 26:70 दिलेया पत्रुसइ चमैं ताँनए उँइँर “ङन् आङिं! क्‍हिइ बिबै ताँ ङइ तोइ आक्हो,” बिइ।
MAT 26:71 च लिउँइँ पत्रुस बैरु ह्‍युउँइँ ह्‍यारिमा चरै या अर्को केब्स्योइ चलाइ म्रोंसि “चु म्‍हि नासरतथें येशूने बालु मुँल बिसि चर मुँबै म्‍हिमैंने,” बिइ।
MAT 26:72 पत्रुसइ कसम चसि “आङिं! ङइ च म्हि ङो आसे,” बिइ।
MAT 26:73 तिस्याँदे लिउँइँ चर मुँबै म्‍हिमैं पत्रुस ङाँर खसि बिइ, “क्ह्रोंसेंन, क्हि या चमैं न्‍होंर्बै घ्रि ग, तलेबिस्याँ क्‍हिइ पोंबै ताँउँइँलेन् था सेम्।”
MAT 26:74 दिलेया पत्रुसइ “ङइ च म्हि सेन् आसे बिसि ह्रोंसलाइन सराप पिंदै कसम चबर होंइ।” छ बिबै तोदोंन् नग भाले ओरइ।
MAT 26:75 च त्हेर्न येशूजी ओंसों बिबै ताँ चिसि पत्रुस बैरु ह्‍यासि बेल्‍ले क्रोइ। तलेबिस्याँ येशूजी ओंसोंन् पत्रुसने “नग भाले ओरब् भन्दा ओंसोंन् क्‍हिइ सोंखे समा ङ ङो आसे बिब्‍मुँ,” बिल।
MAT 27:1 न्‍हाँक्‍कर्न, ख्रो पिंबै ताँन् खेगि चिब्मैं नेरो यहूदी चिबनाँब्मैंइ येशूलाइ सैब् बिसि खीए बिरोधर मत लइ।
MAT 27:2 झाइले चमैंइ खीलाइ फैसि रोमी क्रथे पिलातस ङाँर बोसि पिंवाइ।
MAT 27:3 येशूलाइ सैबै ताँ थेसि यहूदाए सैंर पछुत खइ, धै च चाँदिए मुइ सोंच्‍यु ख्रो पिंबै खेगि चिब्मैं नेरो शास्‍त्रिमैंलाइन एमिंबर पखसि बिइ,
MAT 27:4 “ङइ तोइ छ्याब् आरेबै म्‍हिलाइ धोका पिंसि पाप लइमुँ।” बिमा चमैंइ बिइ, “ङिलाइ तो मतलब? चम् क्‍हिन् सेद्।”
MAT 27:5 छबिमा यहूदाइ चाँदिए मुइमैं मन्दिरर भ्‍योंवाइ, धै ह्‍यासि ह्रोंसन् च्‍योसि सिइ।
MAT 27:6 ख्रो पिंबै खेगि चिब्मैंइ च चाँदिए मुइ खागु लसि “चु मुइ म्‍हि सैसि योंबै मुइ ग। छतसि चु मन्दिरर्बै बाकसर थेंब ठिक आत,” बिइ।
MAT 27:7 झाइले चमैंइ सल्‍ला लसि च मुइ अरू ह्‍युलर्बै म्हिमैं पाबै ल्हागिर कुमालेए क्ल्ह्‍यो किंइ।
MAT 27:8 छतसि तिंयाँ समा च क्‍ल्‍ह्‍योने “म्हि सैसि योंबै मुइइ किंबै क्ल्ह्‍यो” बिम्।
MAT 27:9 छले स्‍योंम्‍बै यर्मिया अगमबक्‍ताइ बिबै ताँ पूरा तइ, तलेबिस्याँ “इस्राएलर्बै म्‍हिमैंइ खीलाइ सैबर चाँदिए मुइ सोंच्‍यु तोक्दिल। छतसि चमैंइ च मुइ किंसि,
MAT 27:10 परमेश्‍वरजी ङने ल्हैदिब् धोंले चमैंइ च मुइ कुमालेए क्ल्ह्‍योए ल्हागिर पिंइ,” बिसि यर्मियाइ प्‍ह्रिल।
MAT 27:11 येशू क्रथेए उँइँर रामा क्रथेइ येशूने “क्‍हि यहूदीमैंए म्रुँ वा?” बिसि ङ्योएइ। येशूजी “क्‍हिइन बिइमुँ दि,” बिइ।
MAT 27:12 ख्रो पिंबै खेगि चिब्मैं नेरो शास्‍त्रिमैंइ खीए फिर तब आतबै छ्याब् ल्‍हैदिइ, दिलेया येशूजी तिजी या आपों।
MAT 27:13 छतमा पिलातसइ येशूने “चमैंइ च्‍हौ ल्‍हें छ्याब् क्‍हिए फिर ल्‍हैदिइमुँ, क्‍हिइ आथेइमुँ वा?” बिमा
MAT 27:14 येशूजी तिजी या ज्वाफ आपिं। छाब् म्रोंसि क्रथे या प्लेटोयाइ।
MAT 27:15 दुःखने फ्रेबै चाडर म्‍हिए हुलइ बिब् धोंले झेलर च्युथेंबै म्हि घ्रि क्रथेइ पिमिंबै छ्या मुँल।
MAT 27:16 च त्हेर आछ्याँबै मिं चल्दिबै बारब्‍बा बिबै म्हि घ्रि झेलर मुँल।
MAT 27:17 म्‍हिमैं खागु तमा पिलातसइ चमैंने “क्हेमैंए सैंर खै ङ्हाँइमुँ? क्हेमैंए ल्हागिर ङइ खाब् पिमिंले? बारब्‍बा पिमिंले उ ख्रीष्‍ट बिबै येशू पिमिंले?” बिसि ङ्योएइ।
MAT 27:18 तलेबिस्याँ चमैंइ येशूए फिर ह्रिस लसि खी ङाँर पखब् ग बिब क्रथेइ था सेल।
MAT 27:19 पिलातस निसाफ लबै क्‍ल्‍ह्‍योर क्हुँरिबै त्हेर चए प्ह्रेंस्योइ चलाइ छ बिसि सउँसर पिमिंइ, “च छ्याब् आरेबै म्‍हिलाइ तोइ आलद्, तलेबिस्याँ च म्‍हिए कारणइ लमा तल् म्‍हुँइँसर म्‍होंडर ङइ ल्‍हें दुःख योंइ।”
MAT 27:20 दिलेया ख्रो पिंबै खेगि चिब्मैं नेरो चिबनाँब्मैंइ “बारब्‍बालाइ पिवासि येशूलाइ सिबै सजैं पिंन्!” बिबर ल्हैदिसि चर्बै म्हिए हुललाइ सुरिदिवाइ।
MAT 27:21 दिलेया क्रथेइ धबै चमैंने “क्हेमैंइ चु म्‍हि ङ्हिंर खाब् पिमिंरिगे ङ्हाँइमुँ?” बिमा चमैंइ “बारब्‍बा पिमिंन्!” बिइ।
MAT 27:22 पिलातसइ चमैंने बिइ, “छबिस्याँ ङइ चु ख्रीष्‍ट बिबै येशूलाइ तो लले दि?” चमैं ताँनइ “चलाइ क्रूसर च्योवाद्,” बिइ।
MAT 27:23 पिलातसइ चमैंने “तले? चुइ आछ्याँबै के तो लइमुँ?” बिमा झन् चमैं “चलाइ क्रूसर च्योवाद्,” बिसि ओरबर होंइ।
MAT 27:24 ह्रोंसइ तोइ लल् आखाँब् म्रोंसि झन् खैला-बैला तम् उ बिब् मैंसि चइ म्‍हिमैंए उँइँर क्‍युइ यो ख्रुसि बिइ, “छबिस्याँ चु म्‍हि सैबै छ्याब् ङए फिर आल्‍हैदिरिगे। चलाइ सैबै पापए छ्याब् क्‍हेमैंए फिर्न खरिगे।”
MAT 27:25 छबिमा चर्बै ताँन् म्हिमैंइ बिइ, “चुलाइ सैबै छ्याब् ङि नेरो ङिए सन्‍तानए फिर्न तरिगे।”
MAT 27:26 छतसि पिलातसइ चमैंइ बिब् धोंलेन् बारब्‍बा पिमिंइ, येशूलाइ बिस्याँ कोराइ प्रुसि क्रूसर च्‍योवाबर सिपाइमैंए योर पिंवाइ।
MAT 27:27 झाइले क्रथेए सिपाइमैंइ येशू दरबारर बोइ, धै ताँन् पल्टनर्बै सिपाइमैं खीए उँइँर खागु लइ।
MAT 27:28 चमैंइ येशूए क्‍वें प्‍लिसि ओल्‍ग्‍या क्‍वें खिमिंइ।
MAT 27:29 चमैंइ पुजुए मुकुट या बनेसि खीए क्रर कुमिंइ, क्‍योलो योरि रिंए प्‍हरे छेल् पिंइ, धै येशूए उँइँर च्‍हि तुँसि फ्योब् धों लसि “ओ येहूदिमैंए म्रुँ!” बिदै खीए बिल्‍लि लइ।
MAT 27:30 चमैंइ येशूलाइ थुइसि खीए योर्बै प्‍हरे प्‍हेंसि खीए क्रर प्रिंइ।
MAT 27:31 छले चमैंइ येशूए बिल्‍लि लल् खाँबै लिउँइँ च ओल्‍ग्‍या क्‍वें प्‍लिसि धबै खीए क्‍वेंन् खिमिंसि क्रूसर च्योवाबर बोइ।
MAT 27:32 चमैंइ येशूलाइ बोसि घ्‍याँर ह्‍यारिमा सिमोन बिबै कुरेनीथेंने त्‍होइ, चमैंइ चने येशू च्‍योबै क्रूस कर ल्‍हैदिसि नोल् पिंइ।
MAT 27:33 झाइले चमैं गलगथा बिबै क्‍ल्‍ह्‍योर फेखइ। च गलगथाने क्र खोप्‍लें बिम्।
MAT 27:34 चर चमैंइ येशूलाइ काँ कोंबै अँगुरए प्हा थुँल् पिंइ, दिलेया खीजी म्ह्‍योंसि च थुँल् आङिं।
MAT 27:35 चमैंइ येशूलाइ क्रूसर च्योवाबै लिउँइँ खीए क्‍वें चिट्ठा झोंसि खेंमैंए न्होंर चुइ।
MAT 27:36 झाइले चमैं येशूलाइ रुँबर चर टिइ।
MAT 27:37 “येशू यहूदीमैंए म्रुँ ग बिसि खीए बिरोधर छ्याब् ल्हैदिसि प्ह्रिबै काउद खीए क्रए क्होउँइँ चमैंइ टौंदिथेंइ।”
MAT 27:38 झाइले चमैंइ ह्‍योमैं ङ्हिं या येशूने बालुन् घ्रि खीए क्‍योलोउँइँ घ्रि त्हेब्रेउँइँ क्रूसर च्योवाइ।
MAT 27:39 च घ्‍याँर प्रबै म्‍हिमैंज्यै या क्र लासि येशूए बिल्‍लि लसि
MAT 27:40 “क्हि मन्दिर फुवासि धबै सोंगैंर्न बनेल् खाँम् बिबै म्‍हि, आङिं वा? क्‍हि क्‍ह्रोंसेंन परमेश्‍वरए च्‍ह ग बिस्‍याँ लु, ह्रोंसलाइ जोगेबै ल्हागिर क्रूसउँइँले त यु!” बिइ।
MAT 27:41 छलेन ख्रो पिंबै खेगि चिब्मैं, शास्‍त्रिमैं नेरो चिबनाँब्मैंज्यै या खीए बिल्‍लि लदै बिइ,
MAT 27:42 “चुइ अरूमैं जोगेमिंइ, ह्रोंसलाइ बिस्‍याँ जोगेल् आखाँ। चु इस्राएलीमैंए म्रुँ ग बिस्‍याँ तोगो क्रूसउँइँले सर तयुल् खाँरिगे। छ लल् खाँस्‍याँ ङिज्यै या क्वेंब्मुँ।
MAT 27:43 चुइ परमेश्‍वरए फिर बिश्‍वास लम्, ‘ङ परमेश्‍वरए च्‍ह ग,’ बिसि चुइ बिमल। छतसि परमेश्‍वरजी चुने म्हाँया लम् बिस्याँ खीजीन् तोगो चुलाइ जोगेमिंरिगे।”
MAT 27:44 येशूने बालु क्रूसर च्योवाबै ह्‍योमैंज्यै या छलेन् खीए बिल्‍लि लइ।
MAT 27:45 झाइले त्हिंयाँर्बै च्युसे ङ्हिं ह्राबै त्हेसेरो सों ह्राबै त्हे समा ह्‍युल तिगोंन् मिछु खैयाइ।
MAT 27:46 सों ह्राबै त्हेजरे येशू छ बिदै थेबै कैले ओरइ, “इलोइ, इलोइ, लामा सबखथनि?” (चुए अर्थ “ओ ङए परमेश्‍वर, ओ ङए परमेश्‍वर, क्‍हिजी ङलाइ तले पिवाल?”)
MAT 27:47 छ बिब् थेसि चर रारिबै को-कोइ म्हिमैंइ बिइ, “चु म्हिइमि स्‍योंम्‍बै एलिया हुरिइमुँ।”
MAT 27:48 चमैं न्‍होंर्बै म्‍हि घ्रि न्हेह्‍यासि प्हा क्युँ ह्रुइर प्ल्हुँसि म्वोए प्हरेर फैसि खीलाइ थुँल् पिंइ।
MAT 27:49 दिलेया अरू म्‍हिमैंइ बिइ, “तारे, खनिज्यै एलिया चलाइ जोगेबर युम् उ? ङ्‍ह्‍योले!”
MAT 27:50 झाइले येशूजी धबै थेबै कै तेसि सो पिवाइ।
MAT 27:51 च त्हेर्न मन्दिरर्बै पर्दा क्‍वें ङ्हिबाँ फैले ताइले माइ समा ट्होह्‍याइ, धै सयो खइ, पारामैं तियाइ।
MAT 27:52 छगोंमैं थोंयासि ओंसोंन् प्रभुए फिर बिश्‍वास लसि सियाब्मैं सोगों तसि रेइ।
MAT 27:53 झाइले चमैं छगोंउँइँले त्होंखइ, धै येशू सिबउँइँले धबै सोगों तबै लिउँइँ चमैं यहूदीमैंए पबित्र सहर यरूशलेमर ह्‍याइ धै ल्‍हें म्‍हिमैं ङाँर म्रोंखइ।
MAT 27:54 सयो खब नेरो चर तबै ताँमैं म्रोंसि चर्बै कप्‍तान नेरो चने मुँबै येशूलाइ रुँबै सिपाइमैं बेल्‍ले ङ्हिंसि “चु म्‍हि क्‍ह्रोंसेन परमेश्‍वरए च्‍हन् मुँन,” बिइ।
MAT 27:55 चर ह्रेंगोउँइँले ङ्‌ह्‍योरिबै ल्‍हें च्हमिरिमैं या मुँल। चमैं येशूए सेवा लदै खीए लिलि गालील ह्‍युलउँइँले खल।
MAT 27:56 चमैं न्‍होंरि मग्दालाथेंस्यो मरियम, याकूब नेरो योसेफए आमा मरियम, धै जब्दियाए च्हमैंए आमा मुँल।
MAT 27:57 ङेसा तबै लिउँइँ अरिमाथियाथें योसेफ बिबै प्लबै म्‍हि घ्रि चर फेखइ। चै या येशूए चेला मुँल।
MAT 27:58 योसेफइ पिलातस ङाँर ह्‍यासि येशूए सिनु ह्रिइ, छले ह्रिमा पिलातसइ येशूए सिनु चलाइ पिन् बिसि सिपाइमैंने ल्‍हैदिइ।
MAT 27:59 योसेफइ येशूए सिनु बोसि छारा सुतिए क्‍वेंइ म्होरसि,
MAT 27:60 चइ पारा कोप्‍दिसि लबै ह्रोंसए छारा उर येशूए सिनु थेंइ, धै च उए सुँर थेबै युँमाइ हुथेंसि ह्‍याइ।
MAT 27:61 उए ओंसों मग्‍दालाथेंस्‍यो मरियम नेरो अर्को मरियम या क्हुँरिल।
MAT 27:62 चाडए ल्हागिर चैदिबै सैमैं तयार लबै त्हिंइए प्हाँन्हाँग्धों ख्रो पिंबै खेगि चिब्मैं नेरो फरिसीमैं पिलातस ङाँर खागु तइ।
MAT 27:63 चमैंइ पिलातसने बिइ, “ओ चिब, च स्योर्गुइ सोगों मुँमा ‘ङ सियालेया सोंरोंर धबै सोगों तसि खब्मुँ’ बिल। चइ बिबै ताँ ङिइ चिरिइमुँ।
MAT 27:64 छतसि सिपाइमैंने सोंरों समा ‘च छगों छेनाले रुँन्,’ बिसि बिद्। छ आलस्याँ चए चेलामैं खसि सिनु ह्‍योइ बोयालै धै ‘प्रभु सिबउँइँले धबै सोगों तसि रेना’ बिसि म्‍हिमैंने बिब्‍मुँ। धै चु स्योर्गु ताँ ओंसोंबै भन्दा झन् आछ्याँब तब्मुँ।”
MAT 27:65 पिलातसइ चमैंने “रुँबै म्हिमैं बोसि खाँन् समा छगों छेनाले रुँन्,” बिइ।
MAT 27:66 छबिमा चमैं ह्‍यासि छगों हुथेंबै युँमा ओल् आखाँल्‍ले भोंब् लसि छगों छेनाले रुँबै ल्हागिरि पालेमैं थेंइ।
MAT 28:1 प्रिबै त्हिंइए प्हँन्हाँग्धों आइतबार न्‍हाँक्‍कर्न मि म्रोंबै छझँ मग्‍दालाथेंस्‍यो मरियम नेरो अर्को मरियम छगों ङ्‌ह्‍योबर ह्‍याइ।
MAT 28:2 च त्हेर थेबै सयो खइ, तलेबिस्याँ स्‍वर्गउँइँले प्रभुए दूत घ्रि युसि छगों हुथेंबै युँमा प्लिंवासि युँमाए फिर टिइ।
MAT 28:3 चए लि बिजुलि धोंले चारब मुँल, धै चए क्‍वें क्‍लिं धोंब तार्ग्‍या मुँल।
MAT 28:4 छाब् म्रोंसि रुँबै म्हिमैं ङ्हिंसि त्‍हारइ, धै सिब् धोंन् तयाइ।
MAT 28:5 दिलेया स्‍वर्गदूतइ च च्हमिरिमैंने बिइ, “क्‍हेमैं आङ्हिंन्! क्‍हेमैं क्रूसर च्योवाबै येशू म्‍हैबर खब् ग बिसि ङइ सेइमुँ।
MAT 28:6 येशू चुर आरे। खीजी ओंसोंन् बिब् धोंले खी सोगों तसि रेल् खाँइमुँ। खो, खी पाबै क्‍ल्‍ह्‍यो ङ्‌ह्‍योद्।
MAT 28:7 क्हेमैं युनन् ह्‍यासि खीए चेलामैंने ‘खी सिबउँइँले धेबै सोगों तसि रेल् खाँइमुँ। धै क्‍हेमैं भन्दा ओंसों खी गालील ह्‍युलर ह्‍यारिइमुँ। चर्न क्‍हेमैंइ खीलाइ म्रोंब्‍मुँ,’ बिद्, लु, ङइ बिल् त्हुबै ताँ क्हेमैने बिमिंइमुँ।”
MAT 28:8 छबिमा चमैं ङ्हिंब् धों ङ्हाँदै सैं तोंदै आतुरले छगोंउँइँले त्होंसि खीए चेलामैंने सँउँसर बिबर न्हेह्‍याइ।
MAT 28:9 छले ह्‍यारिमा तिखेर्न येशू चमैंने त्‍होसि “क्हेमैंने शान्ति तरिगे,” बिइ। धै चमैं चेंदो खसि येशूए प्‍हले क्‍हासि फ्‍योइ।
MAT 28:10 झाइले येशूजी चमैंने बिइ, “आङ्हिंन्! क्हेमैं ङए अलिमैं ङाँर ह्‍यासि चमैंने ‘गालील ह्‍युलर ह्‍याद्।’ चर्न चमैंइ ङलाइ म्रोंब्‍मुँ,” बिद्।
MAT 28:11 च च्हमिरिमैं घ्याँर ह्‍यारिमा येशूए छगों रुँबै को-कोइ सिपाइमैं सहरर ह्‍यासि ख्रो पिंबै खेगि चिब्मैंने चर तबै ताँमैं बिइ।
MAT 28:12 च ताँ थेसि ख्रो पिंबै खेगि चिब्मैं शास्‍त्रिमैंने त्‍होसि सल्‍ला लइ, धै चमैंइ सिपाइमैंने मुइ ल्‍हें पिंसि
MAT 28:13 बिइ, “‘ङि रोरिबै त्हेर येशूए चेलामैं खसि सिनु ह्‍योइ बोयाना,’ बिसि क्हेमैंइ बिद्।
MAT 28:14 चु ताँ रोमी क्रथेइ थेस्याँ ङिइ चलाइ क्ह्रिल् लमिंसि क्हेमैंलाइ जोगेमिंस्यो।”
MAT 28:15 छबिमा सिपाइमैंइ मुइ किंसि चमैंइ बिब् धोंले लइ। छतसि तिंयाँ समा या यहूदीमैंइ चु ताँन् बिप्ररिइमुँ।
MAT 28:16 च च्युसे घ्रि चेलामैं येशूजी ह्‍याद् बिबै गालीलर्बै कोंर ह्‍याइ।
MAT 28:17 चमैंइ चर खीलाइ म्रोंसि सैं तोंसि फ्‍योइ, दिलेया कोइ चेलामैंइ बिस्याँ संका लइ।
MAT 28:18 छतमा येशू चमैं ङाँर खसि बिइ, “स्वर्ग नेरो पृथ्‍बीर्बै तोन्दोंरि हग परमेश्‍वरजी ङने पिंइमुँ।
MAT 28:19 छतसि क्‍हेमैं ह्‍युलर्बै ताँन् ह्रेंमैं ङाँर ह्‍यासि चेलामैं लदु, धै परमेश्‍वर आबा, परमेश्‍वर च्‍ह नेरो पबित्र प्ल्हए मिंर क्‍युर प्‍ल्हुँमिंसि बप्‍तिस्‍मा पिंन्।
MAT 28:20 झाइले ङइ क्‍हेमैंने ल्हैदिबै आलसि आतबै ताँन् केमैं लद् बिसि चमैंलाइ लोमिंन्। थेद्! ह्‍युल नुयाबै त्हिंइ समा ङ खोंयोंन् बिलै क्‍हेमैंने बालुन् तब्मुँ।”
MAR 1:1 चु परमेश्‍वरए च्‍ह येशू ख्रीष्‍टउँइँले खबै सैं तोंबै ताँ ग।
MAR 1:2 स्‍योंमा यशैया अगमबक्‍ताइ प्‍ह्रिब् धोंलेन् तखइमुँ: “ङ्ह्‍योद्, क्‍हिए घ्‍याँ तयार लमिंरिगे बिसि क्हि भन्दा ओंसों ङइ ङए स्यार्बो कुल्मिंम्।
MAR 1:3 क्यु आयोंबै क्ल्ह्‍योर म्‍हि घ्रिइ थेबै कै तेसि छ बिसिन् मुँ, ‘याहवेहए ल्हागिर घ्‍याँ छ्याद्! खी प्रबै ल्हागिर आछ्याँबै घ्याँमैं क्योंएँन्!’”
MAR 1:4 छले प्‍ह्रिब् धोंले ल्‍हें बर्ष लिउँइँ क्यु आयोंबै क्ल्ह्‍योर यूहन्‍ना बिबै म्हि खसि बिइ, “क्षमा योंबै ल्हागिर पाप लब पिसि परमेश्‍वरउँइँ सैं एदु, झाइले क्‍युर प्‍ल्हुँसि बप्‍तिस्‍मा किंन्। छलमा परमेश्‍वरजी क्‍हेमैंए पाप क्षमा लमिंब्मुँ।”
MAR 1:5 छबिमा यहूदीया ह्‍युल नेरो यरूशलेम सहरर्बै ताँन् म्‍हिमैं यूहन्‍ना ङाँर ह्‍यारिल। झाइले चमैं ताँनइ “ङिइ पाप लइमुँ,” बिसि यूहन्‍नाउँइँले यर्दन स्‍योंर प्‍ल्हुँसि बप्‍तिस्‍मा किंइ।
MAR 1:6 यूहन्‍नाइ सलुए मुइए क्‍वें खिमल, ट्हुबिए पेटि खिमल, तिरि नेरो क्‍वे खुदु चमल।
MAR 1:7 “ङए लिलि युबै म्‍हि ङ भन्दा बेल्‍ले शक्‍ति मुँबै म्हि ग। ङम् कुरासि खीए जुत्ताए तनि प्‍ल्हबै या आङ्‍हें बिदै यूहन्‍नाइ बिप्रमल।
MAR 1:8 ङइ क्‍हेमैं क्‍युर प्‍ल्हुँसि बप्‍तिस्‍मा पिंइ, दिलेया खीजी क्‍हेमैंलाइ पबित्र प्ल्हजी बप्‍तिस्‍मा पिंब्‍मुँ।”
MAR 1:9 च त्हेर्न येशू गालील ह्‍युलर्बै नासरत बिबै नाँसउँइँले युइ, झाइले यूहन्‍नाउँइँले यर्दन स्‍योंर क्युर प्‍ल्हुँसि बप्‍तिस्‍मा किंइ।
MAR 1:10 क्‍युउँइँले त्‍होंबै तोदोंन् येशूजी स्वर्ग थोंब् नेरो पबित्र प्ल्ह तोंगु धोंले ह्रोंसए फिर युरिब म्रोंइ।
MAR 1:11 च तोदोंन् “क्हि ङइ खोबै च्ह ग, क्‍हि म्रोंसि ङ बेल्‍ले सैं तोंइमुँ!” बिबै कै घ्रि स्वर्गउँइँले थेइ।
MAR 1:12 च लिउँइँ पबित्र प्ल्हजी येशूलाइ क्यु आयोंबै क्ल्ह्‍योर बोयाइ।
MAR 1:13 च क्‍ल्‍ह्‍योर दुष्‍टइ प्लिच्यु त्हिंइ समा खीलाइ पापर च्होवाल् म्हैइ। खी क्ह्‍योंर्बै खेदोमैंने टिल् त्हुमा स्‍वर्गदूतमैं युसि खीलाइ ल्होमिंइ।
MAR 1:14 हेरोद म्रुँइ बप्‍तिस्‍मा पिंबै यूहन्‍ना झेलर च्युवाबै लिउँइँ येशू गालील ह्‍युलर एह्‍यासि परमेश्‍वरउँइँले खबै सैं तोंबै ताँ बिमिंइ।
MAR 1:15 येशूजी छ बिइ, “तारे त्हे तल् खाँइमुँ, परमेश्‍वरए ग्याल्स चेंदो तखइमुँ। छतसि पाप लब पिसि परमेश्‍वरउँइँ सैं एसि सैं तोंबै ताँ क्वेंन्।”
MAR 1:16 तिगें येशू गालीलर्बै तालए रेजरे प्ररिमा सिमोन नेरो चए अलि तालर जाल प्रिंरिब म्रोंइ। तलेबिस्याँ चमैं ताँग क्हाब्मैं मुँल।
MAR 1:17 येशूजी चमैंने बिइ, “खो, ङए लिलि प्रद्। तारे क्‍हेमैं ताँग क्हाब्मैं आङिं, म्‍हिमैं ङए ग्ल्यासर पखब्मैं लमिंब्‍मुँ।”
MAR 1:18 येशूजी छ बिबै तोंदोंन् चमैंइ ह्रोंसए जालमैं वाथेंसि खीए लिलि प्रइ।
MAR 1:19 दे क्‍याइ फेनेबै लिउँइँ येशूजी जब्दियाए च्‍हमैं ङ्हिं याकूब नेरो यूहन्‍ना डुँङ्गार क्हुँसि जाल टुरिब म्रोंइ।
MAR 1:20 चमैं म्रोंबै तोंदोंन् खीजी हुइमा चमैंइ ह्रोंसए आबा जब्दिया खेंमैंए के लब्मैंने डुँङ्गार्न वाथेंसि खीए लिलि प्रइ।
MAR 1:21 झाइले खेंमैं कफर्नहुम बिबै नाँसर ह्‍याइ। चर फेनेबै तोदोंन् शनिबार प्रिबै त्हिंइर येशू च्हों धिंर ह्‍यासि म्हिमैं लोमिंबर होंइ।
MAR 1:22 येशूए ताँ थेब्‍मैं प्लेटोयाइ तलेबिस्याँ येशूजी म्हिमैंने अरू शास्‍त्रिमैंइ धोंले आलोमिंल, बरु हग मुँल्‍ले लोमिंल।
MAR 1:23 च त्हेर्न च्हों धिंर मोंइ स्‍याबै म्‍हि घ्रिइ चिरदै बिइ,
MAR 1:24 “ओ नासरतर्बै येशू, क्‍हिजी ङि तो लल् म्‍हैल? ङि सैबर खल् वा? क्‍हि परमेश्‍वरजी कुल्‍मिंबै पबित्र म्‍हि ग बिसि ङिइ सेइमुँ।”
MAR 1:25 येशूजी च मोंने हौदिसि बिइ, “च म्‍हिउँइँले तोइ आबिल्‍ले त्‍होंह्‍याद्!”
MAR 1:26 येशूजी च्हौ बिबै तोंदोंन् च मोंइ च म्‍हि त्हारल् लवासि थेबै कैले चिरसि चउँइँले त्‍होंह्‍याइ।
MAR 1:27 छ तब् म्रोंसि चर मुँबै म्‍हिमैं ताँन् प्लेटोयासि “चु खै तबै म्हि मुँगे? खोंयोंइ आथेबै ताँमैं या लोमिंमना! धै हग मुँल्‍ले मोंमैंलाइ त्होंह्‍याद् बिमा मोंमैंइ खीजी बिब ङिंमना बिबर होंइ।”
MAR 1:28 छ तबै तोंदोंन् येशूए छ्याँबै बयन गालील ह्‍युल तिगोंन् थेनेइ।
MAR 1:29 झाइले येशू, याकूब नेरो यूहन्‍ना च्हों धिंउँइँले त्‍होंसि सरसर सिमोन नेरो अन्‍द्रियासए धिंर ह्‍याइ।
MAR 1:30 चर सिमोनए स्‍युमि बेल्‍ले जर खसि क्‍ल्‍ह्‍योर रोरिल। छतसि येशू फेनेबै तोंदोंन् सिमोनइ ङए स्युमि नइमुँ बिइ।
MAR 1:31 येशू च नबै म्हि मुँबै क्‍ल्‍ह्‍योर ह्‍यासि चए यो क्‍हासि रेमिंइ। च तोदोंन् चए जर सयाइ। धै चइ खेंमैंए ल्हागिर चब् लबर होंइ।
MAR 1:32 त्हिंयाँ लियाबै लिउँइँ म्हिमैंइ येशू ङाँर नब् छब्मैं नेरो मोंइ स्‍याब्मैं ताँन् पखइ।
MAR 1:33 नाँसर्बै ताँन् म्‍हिमैं सिमोनए धिंर्बै ह्‍युर खागु तखल।
MAR 1:34 झाइले येशूजी ल्हें खालर्बै नबै म्‍हिमैं सल् लमिंइ, धै ल्‍हें म्हिमैंउँइँले मोंमैं या ल्‍हामिंइ। खी खाब् जा बिब मोंमैंइ सेमल, छतसि खीजी चमैं तोइ पोंल आपिं।
MAR 1:35 न्‍हाँगर मि म्रोंब् भन्दा ओंसोंन् येशू रेसि बैरु खाबै आरेबै क्‍ल्‍ह्‍योर ह्‍यासि प्राथना लइ।
MAR 1:36 छतमा सिमोन नेरो चने मुँबै म्‍हिमैंइ येशू म्‍हैदै ह्‍याइ,
MAR 1:37 चमैंइ येशूलाइ त्होसि “ताँन् म्हिमैंइ क्‍हि म्‍हैरिइमुँ,” बिइ।
MAR 1:38 दिलेया येशूजी चमैंने बिइ, “खो, बरु ङ्यो अरू चेंदोर्बै नाँसजरे ह्‍याले, चरै या सैं तोंबै ताँ बिमिंल् त्हुम्। तलेबिस्याँ चु केए ल्हागिर्न ङ युब् ग।”
MAR 1:39 झाइले येशू गालील ह्‍युलर्बै च्हों धिंमैंर सैं तोंबै ताँ बिप्रदै मोंमैं ल्‍हादै प्रइ।
MAR 1:40 झाइले कोर खबै म्‍हि घ्रि येशू ङाँर खसि च्‍हि तुँसि “ङलाइ सल् लमिंदा ङ्हाँस्याँ क्‍हिजी चु नबउँइँले ङ सल् लमिंल् खाँम् बिसि यो छ्युँ लइ।”
MAR 1:41 चए ताँ थेसि येशूजी ल्‍हयो खसि खीए योजी च म्हिलाइ छुइसि “ङइ क्हि सयारिगे ङ्हाँइमुँ क्हि सयाद्,” बिइ।
MAR 1:42 येशूजी छ बिबै तोंदोंन् च म्‍हि सयाइ।
MAR 1:43 झाइले येशूजी चने “ङइ क्हि सल् लबै ताँ खाबलाज्यै या आबिद् बिसि कुलइ।
MAR 1:44 थेद्, बरु ख्रो पिंबै खेगि ङाँर ह्‍यासि क्‍हिए ज्यु उँइँन्। क्हि सयान बिब म्हिमैंइ सेरिगे बिसि स्‍योंम्‍बै मोशाइ बिब् धोंले ख्रो पिंन्।”
MAR 1:45 दिलेया च म्‍हि ह्‍यासि येशूजी खी सल् लमिंबै ताँ म्हिमैंने बिप्रइ। छतमा येशू म्हिमैंइ म्रोंन्ले नाँसजरे प्रल् आयों, छतसि खी खाबै आरेबै क्ल्ह्‍योजरे टिइ। दिलेया खन्तोदोंउँइँले म्‍हिमैं येशूलाइ म्‍हैदै चर खइ।
MAR 2:1 दे त्हिंइ लिउँइँ येशू धबै कफर्नहुमर एखइ। छतमा खी धिंर्न मुँ बिब चर्बै म्हिमैंइ सेइ।
MAR 2:2 छतसि ल्‍हें म्‍हिमैं खी टिबै क्ल्ह्‍योर खागु तखइ। ल्हें म्हि खागु तमा चर क्हुँबै क्‍ल्‍ह्‍यो आयोंल, ह्‍युरै या राबै क्‍ल्‍ह्‍यो आरेल। तलेबिस्याँ चर येशूजी म्हिमैंने परमेश्‍वरए ताँ बिमिंरिल।
MAR 2:3 च त्हेर्न म्‍हि प्‍लिइ स्याले तबै म्‍हि घ्रि नोसि येशू ङाँर पखइ।
MAR 2:4 चर म्‍हिए हुल तबइले चमैंइ च स्याले म्हि येशूए ङाँर बोल् आखाँ। छतमा चमैंइ येशू मुँबै धिंप्हें ओवासि च नबै म्‍हि क्‍ल्‍ह्‍योने बालुन् येशू मुँबै क्‍ल्‍ह्‍योर तवाइ।
MAR 2:5 च म्‍हिमैंइ खीए फिर बिश्‍वास लब् म्रोंसि येशूजी च नबै म्‍हिने बिइ, “ओ च्हेंज्यो, क्‍हिए पापमैं क्षमा तइ।”
MAR 2:6 चु ताँ थेसि चर मुँबै शास्‍त्रिमैंइ खे-खेंमैंए सैं न्‍होंर छले मैंरिल,
MAR 2:7 “चु म्हि तले छले पोंगे? चुइमि परमेश्‍वरए क्ल्ह्‍योर खी तसि ग पोंरिइमुँ! परमेश्‍वरजी बाहेक् अरू खाबज्यै म्हिए पाप क्षमा लल् खाँम्‍मा?”
MAR 2:8 चमैंइ छाबै सैं मैंरिमुँ बिब येशूजी सेसि चमैंने बिइ, “क्‍हेमैंइ तले छाबै ताँ मैंरिल?
MAR 2:9 चु स्याले म्‍हिने क्हिए पाप क्षमा तइमुँ बिब छ्याँब उ ‘रेद्, क्‍हिए क्ल्ह्‍यो नोसि प्रद्’ बिब छ्याँब जा?
MAR 2:10 दिलेया चु पृथ्‍बीरि पाप क्षमा पिंबै हग ङ परमेश्‍वरउँइँले कुल्‍मिंबै म्हिए च्हने मुँ बिसि क्हेमैंइ सेद्।” च्हौ बिसि खीजी च स्याले म्हिने बिइ,
MAR 2:11 “रेद्, क्‍हिए क्‍ल्‍ह्‍यो नोसि धिंर ह्‍याद्।”
MAR 2:12 येशूजी छ बिबै तोदोंन् च म्‍हि खीए क्ल्ह्‍यो नोसि म्हिमैंउँइँले प्रयाइ। छाब् म्रोंसि चर्बै म्‍हिमैं प्लेटोयासि “छ लबम् ङिइ खोंयोंइ आम्रोंल।” बिदै परमेश्‍वरए मिं क्वेइ।
MAR 2:13 येशू धबै तालए छ्योगर ह्‍यामा म्हिए हुल खी ङाँर खइ। धै खीजी चमैंलाइ परमेश्‍वरए ताँ लोमिंइ।
MAR 2:14 च कल्ह्‍योउँइँले ह्‍यारिमा येशूजी अल्‍फयसए च्‍ह लेबी रोमी म्रुँए बालि रेबै क्ल्ह्‍योर क्हुँरिब् म्रोंसि चने, “ङए लिलि प्रद्,” बिमा लेबी रेसि येशूए लिलि प्रइ।
MAR 2:15 दे त्हे लिउँइँ च लेबीए धिंर येशू कैं चबर क्हुँमा रोमी म्रुँए ल्हागिर बालि रेबै म्‍हिमैं नेरो अरू पाप लबै म्हिमैं या येशू नेरो खीए चेलामैंने क्हुँरिल। तलेबिस्याँ खीए लिलि प्रब्मैं ल्हें मुँल।
MAR 2:16 दिलेया फरिसीमैं न्होंर्बै को-कोइ शास्‍त्रिमैंइ येशू छले पापि म्‍हिमैं नेरो बालि रेबै म्‍हिमैंए म्‍हाँजोर क्हुँसि चब् चरिब् म्रोंसि चमैंइ येशूए चेलामैंने “च तले छाबै पापि म्‍हिमैंने क्हुँसि चब् चब्जा?” बिइ।
MAR 2:17 चु ताँ थेसि येशूजी चमैंने बिइ, “आनबै म्‍हिमैंए ल्हागिर मैं लबै म्‍हि आचैदि, बरु नबै म्‍हिमैंए ल्हागिर मत्‍त्रे चैदिम्। ठिक के लब् प्हैंब्मैंए ल्हागिर ङ युब आङिं, दिलेया आछ्याँबै के लब्मैं हुइबै ल्हागिर ङ युब् ग।”
MAR 2:18 अरू म्हिमैं खसि येशूने बिइ, “क्‍युर प्ल्हुँसि बप्‍तिस्‍मा पिंबै यूहन्‍नाए चेलामैं नेरो फरिसीमैंए चेलामैं बर्त टिमुँ। क्हिए चेलामैं तले बर्त आटि?”
MAR 2:19 येशूजी चमैंने बिइ, “प्ह्रेरोने (दुलहाने) मुँबै म्हिमैंइ बर्त टिम्‌ रोवा? च धोंलेन् ङए चेलामैंने ङ मुँरिन् समा चमैं बर्त टिल् आत्हु!
MAR 2:20 खोंयों प्ह्रेरो चमैंउँइँले स्यो लवाबै त्हे खमुँ च्हमन् चमैं बर्त टिब्‍मुँ।”
MAR 2:21 धबै येशूजी बिइ, “खाबज्‍यै या स्योंबै क्‍वेंरि छारा क्‍वेंइ आखे तलेबिस्याँ छारा क्वें भन्दा स्योब क्वें युनन् ट्होह्‍याम्।
MAR 2:22 छलेन खाबज्‍यै या आचिबै अँगुरए प्हा ट्हुबिए स्योब नेंदोंर आझों। झोंइ बिस्‍याँ ट्हुबिए नेंदों ट्होवाम् धै प्हा या ङेयाम्, नेंदों या ट्होयाम्। छतसि आचिबै अँगुरए प्हा छारा नेंदोंर झोंल् त्हुम्।”
MAR 2:23 तिगें प्रिबै त्हिंइर येशू खीए चेलामैंने गहुँए बारिउँइँले ह्‍यारिल। प्रना प्रन् खीए चेलामैंइ गहुँए नाँ टोंबर होंइ।
MAR 2:24 छ लब् म्रोंसि फरिसीमैंइ खीने बिइ, “ङ्‌ह्‍योद्, प्रिबै त्हिंइर लल् आतबै केन् तले चमैंइ लरिइमुँ?”
MAR 2:25 येशूजी चमैंने बिइ, “ङ्योए खे दाऊदए बारेर्बै ताँ क्‍हेमैंइ परमेश्‍वरए छ्वेर आखेइमुँ वा? दाऊद नेरो चने मुँबै म्‍हिमैं फो ख्रेंमा चइ तो लल?
MAR 2:26 अबियाथार बिबै ख्रो पिंबै खेगि क्रथेए पलोरि दाऊद परमेश्‍वरए धिंर होंसि खीए मिंर थेंबै क्हें चल। दिलेया परमेश्‍वरए छ्वेर बिब् धोंले च क्‍हें ख्रो पिंबै खेगिमैंइ बाहेक अरूइ चल् आतमल। दिलेया दाऊदइ चइ, धै खीने मुँब्‍मैंलाज्यै या पिंइ।”
MAR 2:27 झाइले येशूजी चमैंने बिइ, “‘म्‍हिमैंइ आशिक योंरिगे’ बिसि परमेश्‍वरजी प्रिबै त्हिंइ लमिंब् ग। ‘म्‍हिमैंइ छ्याए ल्‍हिबै ति नोरिगे’ बिसि लब् आङिं।
MAR 2:28 छतसि म्हिए च्ह प्रिबै त्हिंइए फिर्बै या क्‍ल्‍हे ग।”
MAR 3:1 येशू च्हों धिंर धबै ह्‍यामा चर यो कारयासि ओलेल् आतबै म्‍हि घ्रि मुँल।
MAR 3:2 “के लल् आतबै प्रिबै त्हिंइरै येशूजी च म्‍हि सल् लमिंम् उ?” बिसि छ्याब् ल्‍हैदिबै सैंले को-कोइ म्हिमैं येशूए छैं लरिल।
MAR 3:3 येशूजी च यो ओलेल् आतबै म्‍हिने, “क्‍हि छुइ खो,” बिइ।
MAR 3:4 च लिउँइँ येशूजी चर मुँब्‍मैंने बिइ, “प्रिबै त्हिंइर परमेश्‍वरए छ्वेर बिब् धोंले खैबै के लब छ्याँब मुँ, छ्याँबै के लब् उ, आछ्याँबै के लब? म्‍हि जोगेदिब् उ, नास लब, तो छ्याँब मुँ?” छबिमा चर्बै म्‍हिमैं तोइ आबिल्‍ले टिरिइ।
MAR 3:5 च म्‍हिमैंए छाबै सारो सैं म्रोंसि येशूए सैं नसि ह्रिस खइ। धै चर खागु तबै म्हिमैं ङाँइ ङ्‌ह्‍योसि च नबै म्‍हिने “क्‍हिए यो स्‍योंन्!” बिमा च म्‍हिइ यो स्‍योंइ। धै स्योंबै तोदोंन् चए यो सयाइ।
MAR 3:6 छतब् म्रोंसि यहूदी ठिम बेल्‍ले छेनाले म्हाँदिबै टोलिर्बै फरिसीमैं च्हों धिंउँइँले बैरु त्‍होंइ ह्‍यासि येशूलाइ खैले सैले बिसि हेरोद म्रुँए म्हिमैंने सल्‍ला लबर होंइ।
MAR 3:7 च लिउँइँ येशू ह्रोंसए चेलामैंने तालउँइँ ह्‍यामा चर म्हिए हुल येशूए लिलि खइ। गालील ह्‍युलउँइँले, यहूदीया ह्‍युलउँइँले,
MAR 3:8 यरूशलेम सहरउँइँले, इदुमिआ ह्‍युलउँइँले, यर्दन क्‍योंजाउँइँले, टुरोस नेरो सीडोन बिबै सहरजरेबै ल्हें म्हि येशूजी लबै औदिबै छ्याँबै केमैंए बारेर थेसि खी ङाँर खइ।
MAR 3:9 म्हिए हुलइ खीलाइ आप्‍लेरिगे बिसि येशूजी ह्रोंसए ल्हागिर चेलामैंने डुँङ्गा पखबर ल्हैदिइ।
MAR 3:10 तलेबिस्याँ खीजी ल्‍हें नबै म्‍हिमैं सल् लमिंल, छतसि नब् छब्मैंइ येशूलाइ छुइबै ल्हागिर क्हि खगा ङ खगा लरिल।
MAR 3:11 मोंइ स्‍याबै म्‍हिमैंइ येशूलाइ म्रोंसि पत्खु तसि “क्‍हि परमेश्‍वरए च्‍ह ग बिसि चिरमल।”
MAR 3:12 दिलेया येशूजी च मोंमैंने हौदिसि “ङ खाब् जा बिसि क्हेमैंइ खाबलाज्यै आबिद्,” बिइ।
MAR 3:13 च लिउँइँ येशू कोंर ह्‍यासि खीजी त्हाँबै चेलामैं हुइमा चमैं येशू ङाँर खइ।
MAR 3:14 खीने बालु टिबर नेरो परमेश्‍वरउँइँले खबै सैं तोंबै ताँ बिप्रबर येशूजी च्युसे ङ्हि चेलामैं त्हाँइ।
MAR 3:15 धै मोंमैं ल्‍हाबै हग या चेलामैंलाइ पिंइ।
MAR 3:16 च च्युसे ङ्हिं चेला चिब्मैंए मिं छाब् मुँल: सिमोन, चए मिं येशूजी पत्रुस थेंइ,
MAR 3:17 जब्दियाए च्‍ह याकूब नेरो याकूबए अलि यूहन्‍ना। येशूजी चमैंए मिं बोअनरिगेश थेंइ, चए अर्थ मु ङ्‌हेबए च्हमैं ग।
MAR 3:18 झाइले अन्‍द्रियास, फिलिप, बारथोलोमाइ, मत्ती, थोमा, अल्‍फयसए च्‍ह याकूब, थेदियास, सिमोन कनानी,
MAR 3:19 छलेन येशूलाइ धोका पिंसि क्हाल् पिंबै यहूदा इस्‍करियोत।
MAR 3:20 च लिउँइँ येशू धिंर ह्‍यामा चर म्हिए हुल खागु तखइ। छतमा येशू नेरो खीए चेलामैंइ चब् चलै आयों।
MAR 3:21 चु ताँ थेसि येशूए परवाइ खी किंबर खइ, तलेबिस्याँ म्हिमैंइ “येशूए सैं क्ल्ह्‍योर आरे” बिमल।
MAR 3:22 यरूशलेमउँइँले खबै को-कोइ शास्‍त्रिमैंइ “येशूने बालजिबुल बिबै मों मुँ, च मोंमैंए चिबउँइँले शक्‍ति योंसि चइ मोंमैं ल्‍हाल् खाँमना बिसि छ्याब् ल्हैदिइ!”
MAR 3:23 छ बिब् थेसि येशूजी चमैं खी ङाँर हुइसि ताँ क्होमिंबै ल्हागिर चु अहान् बिइ, “दुष्‍टइ खैले दुष्‍ट ल्‍हाल् खाँमुँ?
MAR 3:24 ह्‍युल घ्रिर्बै म्हिमैं आक्‍ह्रिस्‍याँ च ह्‍युल लिउँइँ समा टिक्दिल् आखाँ।
MAR 3:25 छलेन धिं घ्रिर्बै म्‍हिमैं या आक्‍ह्रिस्‍याँ च धिं लिउँइँ समा टिक्दिल् आखाँ।
MAR 3:26 च धोंलेन् दुष्‍ट ह्रोंसनेन् आक्‍ह्रिस्‍याँ चै या लिउँइँ समा टिक्दिल् आखाँ, छतसि च युनन् नास तयाब्मुँ।
MAR 3:27 “खाबज्यै या भोंबै म्‍हिए धिंर होंसि चर्बै सैमैं ह्‍योदा ङ्हाँस्याँ, चइ ओंसों च भोंबै म्‍हि फैथेंल् त्‍हुम्, धै बल्‍ल ह्‍योल् खाँम्।
MAR 3:28 “क्ह्रोंसेंन ङ क्हेमैंने बिमुँ, म्‍हिमैंइ लबै पापमैं नेरो परमेश्‍वरए बिरोधर खैबै ताँमैं पोंलेया क्षमा योंल् खाँम्,
MAR 3:29 दिलेया परमेश्‍वरए पबित्र प्ल्हए बिरोधर पोंब्मैंइ क्षमा योंल् आखाँ। च खोंयोंन् बिलै दोषिन् ठर्दिब्मुँ।”
MAR 3:30 शास्‍त्रिमैंइ खीने बालु मों मुँ बिल, छतसि येशूजी चु ताँ बिइ।
MAR 3:31 झाइले येशूए आमा नेरो अलिमैं चर खइ, धै बैरुन् रासि येशूलाइ हुइबर ल्हैदिइ।
MAR 3:32 येशूए कारग्युले म्हिए हुल मुँल, च म्हिए हुल न्होंर्बै म्हिमैंइ बिइ, “ओ गुरु, क्‍हिए आमा नेरो अलिमैंइ क्‍हिलाइ बैरु हुइमुँ।”
MAR 3:33 दिलेया येशूजी चमैंने बिइ, “ङए आमा नेरो अलिमैं खाब जा?”
MAR 3:34 झाइले खीजी ह्रोंसए कारग्युले टिबै म्‍हिमैं ङाँइ ङ्‌ह्‍योसि बिइ, “ङ्‌ह्‍योद्, ङए आमा नेरो अलिमैं चुमैंन् ग।
MAR 3:35 तलेबिस्याँ परमेश्‍वरजी बिब् धोंले लब्मैंन् ङए अलि, अङाँ, नेरो आमा ग।”
MAR 4:1 येशूजी धबै गालीलर्बै तालए छ्योगर परमेश्‍वरए ताँ लोमिंबर होंमा चरै या म्हिए हुल तखइ। छतसि येशू डुँङ्गार क्रेसि तालए छ्योगउँइँले दे क्याइ ह्‍यासि डुँङ्गारर्न टिइ। म्हिमैं बिस्याँ तालए रेजरेन् टिरिल।
MAR 4:2 येशूजी अहानउँइँले ल्‍हें ताँ चमैंलाइ लोमिंदै बिइ,
MAR 4:3 “थेद्, म्‍हि घ्रि प्‍लु प्‍लुबै ल्हागिर ह्‍याइ।
MAR 4:4 झाइले प्‍लु प्‍लुमा कोइ घ्‍याँजरे फेइ, धै च प्‍लुमैं नेमेमैं खसि चवाइ।
MAR 4:5 कोइ प्‍लुमैं गेगरर फेइ। चर स ल्‍हें आरेबइले प्लु युनन् म्‍लोइ।
MAR 4:6 दिलेया जरा छेन्ले च्‍योंल् आयोंबइले त्‍हिंयाँ प्रेबै तोंदोंन् च प्लु ङ्योंलोंयासि कारयाइ।
MAR 4:7 कोइ प्‍लु पुजु मुँबै क्‍ल्‍ह्‍योर फेइ। पुजुए छ्यारइ च प्लु सैवाइ। छतसि रा-रोमैं रोल् आखाँ।
MAR 4:8 झाइले कोइ प्‍लु छ्याँबै सर फेइ। च प्‍लु म्‍लोखसि थेब ततै ह्‍याइ। धै कोइ सोंच्‍यु गुणा, कोइ टुच्‍यु गुणा, कोइ प्र गुणा रा-रोमैं ल्हें तइ।”
MAR 4:9 च लिउँइँ येशूजी बिइ, “न्ह मुँब्मैंइ थेरिगे।”
MAR 4:10 च लिउँइँ येशू खी घ्रिन् मुँमा खीए ताँमैं थेबै कोइ म्‍हिमैं नेरो च्युसे ङ्हि चेलामैंइ अहानए बारेर ङ्योएइ।
MAR 4:11 येशूजी चमैंने बिइ, “परमेश्‍वरए ग्याल्सर्बै क्होल् आखाँबै ताँ ङइ क्‍हेमैंने बिमिंइमुँ, दिलेया अरू म्हिमैंने बिस्‍याँ अहानउँइँले मत्‍त्रे बिम्।
MAR 4:12 ङ तले छले बिम् बिस्याँ, परमेश्‍वरए छ्वेर छ बिबै ताँ पूरा तरिगे: ‘चमैंइ ङ्‌ह्‍योबम् ङ्‌ह्‍योमुँ, दिलेया म्रोंल् आखाँ, थेबम् थेमुँ, दिलेया क्‍होल् आखाँ। चमैंइ म्रोंल् खाँस्‍याँ, झाइले क्‍होल् खाँस्‍याँ, परमेश्‍वरउँइँ सैं एमल, झाइले परमेश्‍वरजी क्षमा पिंमल।’”
MAR 4:13 झाइले येशूजी चमैंने बिइ, “क्‍हेमैंइ चु ताँए अर्थ आक्‍हो वा? छ बिस्‍याँ अरू अहानमैं खैले क्‍होल् खाँम्?
MAR 4:14 ल्हु, थेद्, चए अर्थ छले ग: प्‍लु प्‍लुबै म्‍हि परमेश्‍वरए बचन बिमिंबै म्‍हि धों तब् ग।
MAR 4:15 कोइ म्‍हिमैं घ्याँर फेबै प्लु धोंबन् मुँ। चमैंइ परमेश्‍वरए ताँ थेबै तोदोंन् दुष्‍टइ चमैंइ थेबै ताँ प्‍हेंबोम्। छतसि क्‍वेंल् आपिं।
MAR 4:16 कोइ म्‍हिमैं गेगरर तेबै प्‍लु धोंन् तम्। चमैंइ परमेश्‍वरए ताँ थेसि सैं तोंन्लेन् क्‍वेंम्,
MAR 4:17 दिलेया च ताँ चमैंए सैंर जरा आझों। छतसि दे त्हिंइ समा छ्याँबन् तमुँ, दिलेया परमेश्‍वरए ताँइ बिब् धोंले प्ररिमा तोइ दुःख तइबिस्‍याँ, म्‍हिमैंइ ह्रुगुदिस्‍याँ, चमैंइ ‘चुम् आत’ बिसि पिवाम्।
MAR 4:18 कोइ म्‍हिमैं पुजु न्‍होंर फेबै प्लु धोंन् तम्। चमैंइ परमेश्‍वरए ताँ थेम्,
MAR 4:19 दिलेया चमैंइ चु ह्‍युलर्बै सैमैंर न्हुँ लसि, सैन्होरए (सम्‍पत्तिए) लोब लसि, ह्‍युलर्बै सैमैंर सैं ह्‍यासि चमैंए सैंर परमेश्‍वरए ताँमैं फारल् आपिं।
MAR 4:20 दिलेया कोइ म्‍हिमैंइ परमेश्‍वरए ताँ थेसि छेनले क्‍वेंम्, झाइले छ्याँबै क्‍ल्‍ह्‍योर प्‍लु फेब् धोंले परमेश्‍वरए ताँ फारम्। धै ल्‍हें रोमैं रोम् कोइ सोंच्‍यु, कोइ टुच्‍यु, कोइ प्र रोमैं पिंम्।”
MAR 4:21 झाइले येशूजी चमैंने बिइ, “क्‍हेमैंइ बत्ति म्रोसि पथि न्‍होंर नेरो खाट न्होंर थेंम्‍मा? बरु नुबै क्‍ल्‍ह्‍योर थेंम्, आङिं वा?
MAR 4:22 तो सै तोगो लोथेंइमुँ, च लिउँइँ ताँनइ था सेमुँ, झाइले तोइ सै मुँलेया आम्रोंल्‍ले थेंलेया लिउँइँ ताँनइ था सेब्मुँ।
MAR 4:23 न्ह मुँब्मैंइ थेरिगे।”
MAR 4:24 येशूजी चमैंने बिइ, “क्‍हेमैंइ तो थेमुँ, च ताँ छेन्‍ले थेद्: तलेबिस्याँ छेनाले थेस्याँ क्‍हेमैंइ ल्हें क्होल् खाँब्मुँ धै झन् ल्हें क्होल् योंब्मुँ। दिलेया छेनाले आथेस्याँ ल्हें क्होल् आखाँ।
MAR 4:25 खाब्ने मुँ चलाइ झन् ल्‍हें पिंब्‍मुँ, खाब्ने आरे चने मुँबै सैमैं या प्‍हेंवाब्‍मुँ।”
MAR 4:26 झाइले येशूजी बिइ, “परमेश्‍वरए ग्याल्स छाब् ग: म्‍हि घ्रिइ म्रोंर प्‍लु प्‍लुइ।
MAR 4:27 धै च रोलैया, रेलैया त्हिंयाँ म्‍हुँइँसा प्लु म्‍लोरिमुँ धै थेब तम्। दिलेया प्‍लु खैले फारमुँ म्‍हिइ आसे।
MAR 4:28 सइ म्‍लोमिंसि च फारमुँ। ओंसों नाँ त्होंमुँ, नाँर फुँ झोंम् धै मिंम्।
MAR 4:29 बालि मिंमा च म्‍हि कोरे (आँसि) छेसि खैंबर ह्‍याम् तलेबिस्याँ रा-रोमैं खुबै त्हे तइमुँ।”
MAR 4:30 झाइले येशूजी बिइ, “परमेश्‍वरए ग्याल्स तो सैने च्‍हैंले? खैबै अहान् बिले?
MAR 4:31 चम् च्युगुथिरि प्लु धों तब् ग। च प्‍लु ताँन् भन्दा च्‍योंबै फुँ मुँलेया
MAR 4:32 लिउँइँ च फुँ थेब तमुँ, धै ताँन् प्याँ-पिं ट्हामैं भन्दा थेब तम्, चइ थे-थेबै हाँगमैं झोंम्। छतमा मुर्बै नेमेमैंइ च धुँए हाँगर च्हों थाम्।”
MAR 4:33 म्‍हिमैंइ क्‍होन् समा येशूजी चमैंने छाबै ल्‍हें अहान् झोंसि ताँ बिमिंइ।
MAR 4:34 अहान् आझोंन्ले येशूजी चमैंने आपोंमल, दिलेया खीए चेलामैंने बिस्‍याँ खाबज्यै आसेल्‍ले ताँन् ताँए मतलब क्होमिंमल।
MAR 4:35 च ङेसार येशूजी खीए चेलामैंने बिइ, “छ्यो! ङ्यो तारे ताल क्‍योंजा ह्‍याले।”
MAR 4:36 छबिसि म्हिए हुल चर्न वाथेंसि च चेलामैंइ खी क्हुँरिबै डुँङ्गार्न येशू बोयाइ। येशू क्रेबै डुँङ्गाने अरू डुँङ्गामैं या ह्‍यारिल।
MAR 4:37 ह्‍यामा ह्‍याम् चर बेल्‍ले थेबै नाँ-खैं तसि भेल्गइ डुँङ्गार ल्हिमा डुँङ्गार क्यु प्‍लिंयाल् म्‍हैइ।
MAR 4:38 येशू डुँङ्गाए लिउँइँ हार क्रेगुँ झोंसि न्‍हरु च्‍हुइरिल। छतमा चेलामैंइ येशूने “ओ चिब, ङ्यो सिबर होंइ क्‍हिजी तोइ न्हुँ आल वा?” बिदै छोरवाइ।
MAR 4:39 येशू रेसि नाँ-खैं हौदिसि तालए भेल्‍गने “च्याँ तयाद्!” बिबै तोदोंन् नाँ-खैं टियाइ।
MAR 4:40 झाइले येशूजी चेलामैंने बिइ, “क्‍हेमैं तले छले ङ्हिंल? क्‍हेमैंने अझै बिश्‍वास आरे वा?”
MAR 4:41 दिलेया चमैं झन् बेल्‍ले ङ्हिंसि खें-खेंमैंए न्होंर “चु खैबै म्‍हि जा? नाँ-खैं नेरो तालज्यै या खीजी बिब् ङिंब् मुँन,” बिसि ताँ लबर होंइ।
MAR 5:1 झाइले खेंमैं तालए क्‍योंजा गिरासिनी बिबै क्‍ल्‍ह्‍योर फेनेइ।
MAR 5:2 चर येशू डुँङ्गाउँइँले बैरु त्‍होंबै तोदोंन् मोंइ स्‍याबै म्‍हि घ्रि छगोंउँइँले खरिब त्होइ।
MAR 5:3 च छगोंजरे टिमल। खाबज्यै चलाइ सँउँलिइ फैथेंल् आखाँमल।
MAR 5:4 तलेबिस्याँ ल्‍हें खे च म्‍हि सँउँलिइ फैथेंमल, दिलेया चइ सँउँलि टोंवामल। खाबज्‍यै या चलाइ क्हाल् आखाँमल।
MAR 5:5 त्‍हिंयाँ, म्‍हुँइँसा च म्‍हि छगों नेरो कोंजरे ओरदै ह्रोंसलाइन युँमाइ रुएदै प्रमल।
MAR 5:6 छले प्ररिमा चइ ह्रेंगोउँइँले येशू खरिब् म्रोंमा न्हेह्‍यासि खीलाइ फ्‍योइ।
MAR 5:7 येशूजी चने “ओ मों, चु म्‍हिउँइँले त्‍होंइ खो” बिमा च म्हिइ थेबै कैले बिइ, “ओ ताँन् भन्दा थेबै परमेश्‍वरए च्‍ह येशू, क्‍हिजी ङ तो लल् म्‍हैल? ङ क्‍हिने यो छ्युँ लमुँ, ङ दुःख आपिंन्।”
MAR 5:9 झाइले येशूजी चने “क्‍हिए मिं तो जा?” बिसि ङ्योएमा चइ येशूने बिइ, “ङए मिं फौज ग तलेबिस्याँ ङि ल्‍हेन् मुँ।”
MAR 5:10 झाइले स्यागि म्होंगिमैं च क्ल्ह्‍योउँइँले बैरु आल्‍हामिंन् बिसि च म्‍हिइ येशूने यो छ्युँ लइ।
MAR 5:11 चर्बै पखजरे तिलिए थेबै बगाल रेंरिल।
MAR 5:12 “ङि च तिलिमैंए ङाँर ह्‍याल् पिंन्, ङि चमैं न्‍होंर होंम्,” बिसि च मोंमैंइ येशूने यो छ्युँ लइ।
MAR 5:13 झाइले येशूजी चमैंने ह्‍याद् बिमा मोंमैं च म्‍हिउँइँले त्‍होंसि तिलिमैंए न्‍होंर होंबै तोदोंन् हजार ङ्हिंदे तिलिमैं प्रोउँइँले तेयासि तालर प्ल्हुँह्‍यासि सियाइ।
MAR 5:14 छतमा च तिलि छबै प्ह्रोंछैंमैं नाँसउँइँ न्हेह्‍यासि नाँस नाँसजरे छ छ तइ बिइ। झाइले तो तगे बिसि ताँन् म्‍हिमैं चर ङ्‌ह्‍योबर खइ।
MAR 5:15 चमैं येशू ङाँर खमा मोंइ स्‍याबै म्‍हि सैं चिसि क्‍वें खिसि टिरिब् म्रोंइ। छाब् म्रोंसि चमैं या ङ्हिंइ।
MAR 5:16 झाइले च ताँमैं म्रोंबै म्हिमैंइ चर खब्मैंने मोंइ स्‍याबै म्‍हि नेरो च तिलिमैंए बारेर ताँन् ताँ बिमिंइ।
MAR 5:17 चु ताँ थेसि “चु क्‍ल्‍ह्‍योउँइँले ह्‍यामिंन्,” बिसि च म्हिमैंइ येशूने यो छ्युँ लइ।
MAR 5:18 येशू ह्‍याबै ल्हागिर डुँङ्गा क्रेबर होंमा मोंइ स्‍यासि सबै म्‍हिइ येशूने बालु ह्‍याम् बिसि यो छ्युँ लइ।
MAR 5:19 दिलेया खीजी च म्‍हिलाइ खल् आपिं। बरु “क्‍हिए धिंर ह्‍यासि परमेश्‍वरजी क्हिए फिर ल्हयो खसि क्‍हिए फिर कति थेबै के लमिंइ बिब क्‍हिए म्‍हिमैंने बिमिंन् बिसि खीजी चने,” बिइ।
MAR 5:20 छ बिबै तोंदोंन् च ह्‍यासि येशूजी खीए फिर थेबै के लमिंइ बिसि डेकापोलिस ह्‍युलर बिप्रबर होंइ। चए ताँ थेसि ताँन् म्‍हिमैं प्लेटोयाइ।
MAR 5:21 च लिउँइँ येशू डुङ्गा क्रेसि तालए चोंजा एखमा चर म्हिए हुल खीए कारर्ग्यु तखइ।
MAR 5:22 चर्बै च्हों धिंर्बै चिब्मैं न्होंर्बै याइरस बिबै म्‍हि घ्रि चर खइ, धै येशू म्रोंसि खीए प्‍हलेर फ्योसि
MAR 5:23 “ङए च्हमि च्‍योंब्स्यो नसि सार तइमुँ। छतसि च ससि सोरिगे बिसि क्‍हि ङए धिंर खसि चए फिर यो थेंमिंन्,” बिसि चइ यो छ्युँ लइ।
MAR 5:24 छबिमा येशू च म्‍हिने ह्‍याइ। म्हिए हुल या येशूए लिलिन् ह्‍याइ, खीए कारर्ग्यु ल्हें म्हि तबइले म्हिमैं खीने थुरमल।
MAR 5:25 चर च्युसे ङ्हिं बर्ष ओंसों ओनोंन् को त्‍हसि नरिबै च्हमिरि घ्रि मुँल।
MAR 5:26 ल्‍हें बैद्यमैंने मैं ललेया च सल् आखाँल। चने मुँबै मुइ ताँन् नुयाल, नब बिस्याँ आसल, बरु झन् सार ततै ह्‍याल।
MAR 5:27 येशूजी नब् छब्मैं सल् लमिंम् रो बिबै ताँ चइ ओंसोंन् थेल, छतसि म्हिए हुल न्होंर होंसि चइ लिउँइँले खसि येशूए क्‍वेंर छुइ।
MAR 5:28 तलेबिस्याँ “येशूए क्‍वें मत्‍त्रे छुइल् योंलेया ङ क्ह्रोंसेंन्ले सयामल,” बिसि चइ सैं न्होंर मैंल।
MAR 5:29 छले येशूए क्वें छुइबै तोंदोंन् च च्हमिरिए को त्‍हब टियाइ। छतमा ह्रोंस सयाब चइ था सेइ।
MAR 5:30 च तोदोंन् येशूजी ह्रोंसउँइँले शक्‍ति त्‍होंह्‍याब था सेसि म्हिए हुलउँइँ तोसि “ङए क्‍वें खाबइ छुइ?” बिसि ङ्योएइ।
MAR 5:31 च्हमा येशूए चेलामैंइ खीने बिइ, “च्‍हौ ल्हें म्हि ह्रोंसने थुरब सेनासेन्, ‘ङलाइ खाबइ छुइ’ बिसि ङ्योएब् वा?”
MAR 5:32 दिलेया येशूजी खी छुइबै म्‍हि खाब् मुँगे बिसि छाइ छुइ ङ्‌ह्‍योबर होंइ।
MAR 5:33 च च्हमिरि सब था सेसि ङ्हिंसि त्‍हारदै येशूए ओंसों च्‍हि तुँसि ह्रोंसने तबै ताँन् ताँमैं येशूने बिइ।
MAR 5:34 झाइले येशूजी च च्हमिरिने बिइ, “ओ नानि, क्‍हिए बिश्‍वासइ क्‍हि सयाइमुँ। आङ्हिंनले ह्‍याद्, तारे क्हिए नब सयाइ।”
MAR 5:35 येशू छले पोंरिमा याइरसए धिंउँइँले खबै म्‍हिमैंइ याइरसने बिइ, “क्‍हिए च्हमि सियाइ। तारे गुरुलाइ तले दुःख पिंब?”
MAR 5:36 दिलेया चमैंइ लबै ताँमैं थेसेया आथेब् धों लसि येशूजी याइरसने बिइ, “आङ्हिंन्, तोइ आङ्हाँन्ले बिश्‍वास लद्।”
MAR 5:37 च्हौ बिसि खीजी पत्रुस, याकूब नेरो याकूबए अलि यूहन्‍ना बाहेक् अरू खाबलाज्यै खीने बालु ह्‍याल् आपिं।
MAR 5:38 खेंमैं याइरसए धिंर फेखमा चर म्हिमैं शोकइ खैला तोला तसि क्रोरिब खीजी म्रोंल।
MAR 5:39 छ तब् म्रोंसि खीजी चमैंने बिइ, “क्‍हेमैं तले क्रोल? तले खैला तोला तरिल? चु कोलो आसिइमुँ, चु न्‍हरु च्‍हुरिइब् ग।”
MAR 5:40 दिलेया खीए ताँ थेसि चमैंइ बिल्‍लि लसि निस्युइ। छतसि येशूजी चर मुँब्मैं ताँन् बैरु कुलसि च कोलोए आबा-आमा नेरो खीने मुँबै चेलामैं सों बोसि कोलो मुँबै क्‍ल्‍ह्‍योर ह्‍याइ।
MAR 5:41 झाइले कोलोए यो क्‍हासि खीजी बिइ, “तालिता कूमि!” छ बिब, “ओ नानि, ङइ क्‍हिने बिमुँ, रेद्!” बिब् ग।
MAR 5:42 खीजी छ बिबै तोदोंन् च कोलो रेसि प्रबर होंइ। च कोलो च्युसे ङ्हिदिंर्बै मुँल। छ तब् म्रोंसि चर मुँबै म्‍हिमैं प्लेटोयाइ।
MAR 5:43 येशूजी चमैंने “चु ताँ खैलसेया खाब्ने या आबिद्,” बिइ। झाइले “चु कोलो चबै सैमैं पिंन्,” बिसि चर्बै म्हिमैंने ल्हैदिइ।
MAR 6:1 झाइले च क्‍ल्‍ह्‍योउँइँले येशू खीए नाँस नासरतउँइँन ह्‍याइ। खीए चेलामैं या खीए लिलिन् ह्‍याइ।
MAR 6:2 धै प्रिबै त्हिंइरि येशू च्हों धिंर ह्‍यासि म्हिमैंने परमेश्‍वरए ताँ लोमिंबर होंइ। खीए ताँ थेब्मैं न्होंर्बै ल्हें म्हिइ अचम्‍मा ङ्हाँसि छ बिइ, “चु म्‍हिजी छाबै ताँमैं खनिउँइँले ह्रगे? चु म्‍हिजी योंबै ज्ञान खैब जा? चु म्‍हिउँइँले छाबै अचम्‍माबै केमैं खैले तब् जा?
MAR 6:3 चुम् सिंए के लबै म्हि आङिं वा? चु मरियमए च्‍ह, याकूब, योसेफ, यहूदा नेरो सिमोनए आघें, आङिं वा? खीए अङाँमैं या चुर्न मुँ!” छ बिसि चमैंइ खी म्हि आच्हिन् लइ।
MAR 6:4 छतमा येशूजी चमैंने बिइ, “अगमबक्‍ताइ खन्‍तोदोंन् मान योंमुँ, दिलेया ह्रोंसए नाँसर, ह्रोंसए म्‍हिमैंए म्‍हाँजोर, नेरो ह्रोंसए धिंर मान आयों।”
MAR 6:5 येशूजी खीए नाँसर को-कोइ नबै म्‍हिमैंए फिर ह्रोंसए यो थेंसि चमैं सल् लमिंबै के बाहेक अरू औदिबै केमैं तोइ लल् आखाँल। तलेबिस्‍याँ चमैंइ बिश्‍वास आल।
MAR 6:6 चमैंइ खीए फिर बिश्‍वास आलब् म्रोंसि येशू प्लेटोयाइ। झाइले येशू च जरेबै नाँसजरे परमेश्‍वरए ताँ लोमिंदै प्रइ।
MAR 6:7 खीजी च्युसे ङ्हिं चेलामैं खी ङाँर हुइसि ङ्हिं-ङ्हिं लसि चमैंलाइ मोंमैं ल्‍हाबै हग नेरो शक्‍ति पिंइ।
MAR 6:8 धै खीजी चमैंने बिइ, “छले ह्‍यामा क्हेमैंइ चबै सैमैं, झ्योल, मुइ तोइ आबोद्। प्हरे बिस्याँ किंन्,
MAR 6:9 जुत्ता खिदु, दिलेया फेर्दिबै क्‍वेंमैं आबोद्।”
MAR 6:10 धबै येशूजी चेलामैंने बिइ, “क्‍हेमैं नाँसर ह्‍यामा खाबै धिंर क्‍हेमैंए मान् लमुँ, च नाँसउँइँले आत्‍होंन् समा च धिंर्न टिद्।
MAR 6:11 को-कोइ क्‍ल्‍ह्‍योर फेनेमा म्हिमैंइ क्‍हेमैंए मान आलस्‍याँ, क्‍हेमैंइ बिबै ताँ आथेस्‍याँ, च क्‍ल्‍ह्‍योउँइँले त्‍होंमा चमैंए बिरोधर ग्वाइ पिंबै ल्हागिर क्‍हेमैंए प्‍हलेर्बै त्‍हुल खारथेंन्।”
MAR 6:12 च लिउँइँ चेलामैं छाइले त्‍होंह्‍यासि “ताँन् म्‍हिमैंने ह्रोंसए आछ्याँबै बानि पिसि परमेश्‍वरउँइँ सैं एद्,” बिसि बिप्रइ।
MAR 6:13 झाइले च चेलामैंइ मोंइ स्‍याबै ल्‍हें म्‍हिमैंउँइँले मोंमैं ल्‍हाइ धै ल्‍हें नबै म्‍हिमैंलाइ [प्राथना लदै] छ्युगु फोसि सल् लमिंइ।
MAR 6:14 येशूजी लबै केए बारेर्बै ताँमैं खन्तोदोंन् थेनेल। छतसि हेरोद म्रुँज्यै या खीए बारेर्बै ताँ थेइ। को-कोइइ “बप्‍तिस्‍मा पिंबै यूहन्‍ना सिबउँइँले सोसि खना! छतैग चइ औदिबै केमैं लल् खाँना बिमल।”
MAR 6:15 दिलेया कोइइ, “चुम् एलिया बिबै अगमबक्‍ता ग,” बिइ। को-कोइइ “चुम् स्‍योंम्‍बै अगमबक्‍तामैं न्होंर्बै घ्रि धों तब् ग,” बिइ।
MAR 6:16 दिलेया हेरोदइ चु ताँ थेसि बिइ, “चुम् क्ह्रोंसेंन् यूहन्‍ना ग। चए क्र ङइ थोबर ल्‍हैदिल, चम् सोइ खना।”
MAR 6:17 तलेबिस्याँ च भन्दा ओंसों हेरोद म्रुँइ ह्रोंसए अलि फिलिपए प्ह्रेंस्यो हेरोदियासने ब्ह्‍या लल। छतसि “ह्रोंसए अलिए प्ह्रेंस्योने ब्ह्‍या लल् आत!” बिसि यूहन्‍नाइ बिबइले हेरोदइ यूहन्‍नालाइ क्हाबर ल्हैदिसि फैसि झेलर च्युवाल।
MAR 6:18 छतमा च हेरोदियासइ बिब् धोंले हेरोदइ सिपाइमैं कुलसि यूहन्‍ना झेलर च्युवाइ।
MAR 6:19 हेरोदियासइ यूहन्‍नाने इख थेंसि चलाइ सैबै सैं लल, दिलेया सैल् आखाँल,
MAR 6:20 तलेबिस्याँ यूहन्‍ना ठिक के लबै पबित्र म्‍हि मुँ बिबै ताँ हेरोदइ सेल। छतसि हेरोद चने ङ्हिंसि सैल् आपिंल। यूहन्‍नाए ताँ थेमा हेरोद खैताखैता तमल दिलेया सैं तोंदै चए ताँ थेमल।
MAR 6:21 लिउइ मत्‍त्रे हेरोदियासइ यूहन्‍ना सैबै मौका योंइ। च त्हिंइ हेरोद म्रुँ फिबै त्हिंइ मुँल। छतसि हेरोद म्रुँइ ह्रोंसए दरबारर्बै क्रथे मिंथेमैं, कप्‍तानमैं नेरो गालील ह्‍युलर्बै चिबनाँब्मैंए ल्हागिर भत्यार लइ।
MAR 6:22 च्हमा हेरोदियासए च्हमि भोज चबै कोठार खसि सेइ। छले सेसि हेरोद नेरो चर मुँबै ताँनए सैं तोंन् लइ। छतमा हेरोदइ चने बिइ, “क्‍हिइ ङने तो ह्रिदा ङ्हाँइमुँ ह्रिद्, तो ह्रिलेया ङइ क्‍हिलाइ पिंस्यो!”
MAR 6:23 कसम चसि चने बिइ, “ङए आधा ग्याल्स ह्रिलेया ङइ क्हिलाइ पिंस्‍यो।”
MAR 6:24 छबिमा च बैरु त्‍होंह्‍यासि चए आमाने “ङइ तो ह्रिले?” बिसि ङ्योएइ। चए आमाइ बिइ, “बप्‍तिस्‍मा पिंबै यूहन्‍नाए क्र ह्रिद्।”
MAR 6:25 आमाइ छ बिबै तोदोंन् च हेरोद म्रुँ ङाँर ह्‍यासि बिइ, “बप्‍तिस्‍मा पिंबै यूहन्‍नाए क्र थलिर झोंसि तोगोंन् ङलाइ पिंन्। ङइ ह्रिदा ङ्हाँब चुन् ग।”
MAR 6:26 चु ताँ थेसि हेरोद बेल्‍ले न्हुँ खइ, दिलेया भत्यारर मुँबै प्ह्रेंमैंए उँइँर कसम चसि क्हिइ तो ह्रिलेया पिंम् बिबइले हेरोदइ “आपिं,” बिल् आखाँ।
MAR 6:27 छतसि हेरोद म्रुँइ सिपाइ घ्रि कुलसि यूहन्‍नाए क्र पखबर ल्हैदिइ। धै सिपाइ झेलर ह्‍यासि यूहन्‍नाए क्र थोइ।
MAR 6:28 झाइले थलिर झोंसि च च्हमिरिने पिंइ। च च्हमिरिइ क्र बोसि ह्रोंसए आमाने पिंइ।
MAR 6:29 यूहन्‍नाए चेलामैंइ चु ताँ थेइ, धै चमैं खसि सिनु बोसि छगोंर पाइ।
MAR 6:30 येशूजी ओंसोंन् कुल्मिंबै चेला चिब्मैं खी ङाँर एखइ। धै खेंमैंइ तो तो लइ बिबै ताँ नेरो तो तो लोमिंइ बिबै तोन्दोंरि ताँ येशूने बिइ।
MAR 6:31 चर ह्‍याब खब म्‍हिमैं ल्‍हें तसि येशू नेरो खीए चेलामैंइ चबै नइ आयोंल। छतसि खीजी चेलामैंने बिइ, “खो, ङ्यो खाबै आरेबै क्‍ल्‍ह्‍योर ह्‍याले धै भों न्‍हले।”
MAR 6:32 छबिसि चमैं डुँङ्गार क्रेसि खाबै आरेबै क्‍ल्‍ह्‍योर ह्‍याइ।
MAR 6:33 दिलेया खेंमैं ह्‍यारिब ल्हें म्हिइ सेइ। छतसि खेंमैं तालए क्‍योंजा फेनेब् भन्दा ओंसोंन् नाँ-नाँसउँइँले ल्हें म्‍हिमैं न्हेदै तालए छेउर फेनेइ।
MAR 6:34 येशू तालए छेउर फेसि डुँङ्गाउँइँले त्‍होंमा ल्हें म्हि म्रोंइ। चमैं म्रोंसि खीए सैंर ल्‍हयो खइ तलेबिस्याँ चमैं प्ह्रोंछैं आरेबै क्‍युमैं धोंन् तरिल। छतसि येशूजी चमैंलाइ ल्‍हें ताँमैं लोमिंबर होंइ।
MAR 6:35 ङेसा तबि छेमा चेलामैं येशू ङाँर खसि बिइ, “चु खाबइ आरेबै क्‍ल्‍ह्‍यो ग। धै म्‍हुँइँसै या तबि छेइ।
MAR 6:36 छतसि चुमैं ह्‍याल् पिंन्। चुमैं छाइ छुइबै नाँसजरे ह्‍यासि चबै सैमैं किंसि चरिगे।”
MAR 6:37 दिलेया येशूजी चमैंने बिइ, “क्‍हेमैंइन चमैंलाइ चल् पिंन्।” छबिमा चेलामैंइ येशूने बिइ, “ङि ह्‍यासि म्हैंन प्रेल्बै नोंसैए क्‍हें किंइ पखसि चुमैं चल् पिंले वा?”
MAR 6:38 येशूजी चमैंने बिइ, “क्‍हेमैंने कति पो क्‍हें मुँ? ह्‍यासि ङ्योद्।” ङ्ह्‍योबै लिउँइँ चमैं खसि येशूने “क्‍हें ङ्‌हपो नेरो ताँग ङ्हिं मुँनमैं,” बिइ।
MAR 6:39 झाइले येशूजी “चर मुँबै म्हिमैंलाइ टोलि टोलि लसि ल्हस्यारल्‍ले चउरर क्हुँबर ल्हैदिद्,” बिइ।
MAR 6:40 झाइले चमैं कोइ ङ्‍हच्यु ङ्‍हच्युए टोलि लसि ल्हस्यारल्‍ले क्हुँइ। कोइ प्र प्रए टोलि लसि ल्हस्यारल्‍ले क्हुँइ।
MAR 6:41 झाइले येशूजी च क्‍हें ङ्‌हपो नेरो ताँग ङ्हिं किंसि मुउँइँ ङ्‌ह्‍योसि परमेश्‍वरलाइ धन्‍यबाद पिंइ। धै च क्‍हें लुँसि “म्हिमैं चुमिंन्,” बिसि चेलामैंने पिंइ। छलेन खीजी ताँग ङ्हिं या ताँनलाइ चुमिंइ।
MAR 6:42 झाइले ताँनइ बेल्‍ले म्रेंन्ले चइ।
MAR 6:43 म्हिमैंइ चल् आखाँसि ङैबै क्हें लुँठेमैं चेलामैंइ खुमा च्युसे ङ्हिं ट्हलो तल।
MAR 6:44 क्‍हें चबै आमुयुँमैं मत्‍त्रे हजार ङ्‌ह मुँल।
MAR 6:45 म्हिमैंइ चल् खाँबै तोदोंन् येशूजी ह्रोंसए चेलामैं डुँङ्गार क्रेसि खेंमैं ह्‍याब् भन्दा ओंसोंन् तालए क्‍योंजा बेथसेदा बिबै क्‍ल्‍ह्‍योर कुलइ। छले कुलबै तोंर्न म्हिमैंलाज्यै या खेंमैंए धिंर कुलइ।
MAR 6:46 च म्हिमैं ह्‍याबै लिउँइँ येशू कोंर प्राथना लबर ह्‍याइ।
MAR 6:47 ङेसा तबि छेमा चेलामैंए डुँङ्गा तालए म्‍हाँजोर मुँल। येशू बिस्याँ कोंर्न मुँल।
MAR 6:48 च त्हेर उल्टोले थेबै खैं खसि डुङ्गा ओलेब बेल्‍ले गारो तरिल। नाँ न्होबै छझँ, सों ह्राबै त्हेजरे येशू तालए फि फि प्रखसि चेमैं भन्दा ओंसों ह्‍याल् म्हैइ।
MAR 6:49 दिलेया चेलामैंइ येशू तालए फिर प्ररिब् म्रोंसि “मों मुँन!” बिसि चिरइ।
MAR 6:50 तलेबिस्याँ खी क्युए फिर प्रब् म्रोंसि चमैं ङ्हिंयाँल। दिलेया येशूजी युन्ले चमैंने भोंब तद्, “आङ्हिंन्! ङन् ग,” बिइ।
MAR 6:51 च्हौ बिसि येशू चमैंए डुँङ्गार क्रेइ। खी डुँङ्गार क्रेबै तोदोंन् खैं टियाइ। छ तब् म्रोंसि चमैं प्लेटोयाइ,
MAR 6:52 तलेबिस्याँ खीजी क्‍हें ङ्‍हपो नेरो ताँग ङ्हिंउँइँले हजार ङ्‌ह म्हिमैं चल् पिंब म्रोंलेया “येशू खैबै म्हि मुँगे” बिसि चमैंइ अझै आक्‍होल, तलेबिस्याँ चमैंए सैं सारो तल।
MAR 6:53 झाइले चमैं तालए चोंजा गनेसरत बिबै ह्‍युलर फेखबै लिउँइँ डुँङ्गा छ्योगर पखसि फैथेंइ।
MAR 6:54 खेंमैं डुँङ्गाउँइँले त्‍होंबै तोदोंन् म्‍हिमैंइ येशूलाइ ङो सेइ।
MAR 6:55 छतसि चमैं च जरेबै ह्‍युलजरे न्हेह्‍यासि नबै म्हिमैं रोबै क्ल्ह्‍योनेन् येशू मुँबै क्ल्ह्‍योर पखबर होंइ।
MAR 6:56 खी नाँसजरे ख-खनर ह्‍यामुँ च-चर्न म्‍हिमैंइ नबै म्‍हिमैं घ्याँ-घ्याँर्न पखसि थेंमिंमल, धै “क्‍हिए क्वेंए ङो मत्‍त्रे छुइल् पिंन्” बिसि नबै म्हिमैंइ येशूने यो छ्युँ लइ, धै येशूए क्‍वें छुइब्मैं ताँन् सयाइ।
MAR 7:1 तिगें यरूशलेमउँइँले खबै को-कोइ शास्‍त्रिमैं नेरो फरिसीमैं येशूए ङाँर खागु तखइ।
MAR 7:2 चर येशूए को-कोइ चेलामैंइ यो आख्रुल्‍ले चब् चब चमैंइ म्रोंइ।
MAR 7:3 (फरिसीमैं नेरो ताँन् यहूदीमैंइ खेंमैंए खेमैंइ थेंबै छ्यार यो आख्रुन् समा चब् आचमल।
MAR 7:4 झाइले बजारउँइँले खमा ह्रोंस आख्रुन् समा चमैंइ तोइ आचमल। धै थलि प्‍हेला भाँडमैं आम्‍यान् समा ह्‍योब् तेब आलबै छ्या मुँल।
MAR 7:5 छतसि च फरिसीमैं नेरो शास्‍त्रिमैंइ “क्‍हिए चेलामैंइ खेमैं-मामैंइ लथेंबै छ्यार तले आप्र? चुमैंइ तले यो आख्रुल्‍ले चब् चइ?” बिसि येशूने ङ्योएइ।
MAR 7:6 येशूजी छले बिइ, “क्हेमैं फिब्लो पार्दिबै म्‍हिमैंए बारेर येशैयाइ स्‍योंमन् छले प्ह्रिथेंइमुँ, ‘चु म्हिमैंइ सुँइ मत्‍त्रे ङलाइ म्हाँदिम्, दिलेया चमैंए सैंइ बिस्‍याँ ङलाइ आम्हाँदि।
MAR 7:7 चमैंइ फाक्‍कर्न ङए मिं किंम्, तलेबिस्याँ “चु परमेश्‍वरजी बिबै ताँ ग,” बिसि म्हिमैंइ लथेंबै छ्यामैं चमैंइ लोमिंम्।’
MAR 7:8 क्हेमैंइ परमेश्‍वरए ताँमैं स्योवासि म्हिमैंइ लथेंबै छ्या म्हाँदिम्।”
MAR 7:9 खीजी चमैंने बिइ, “ह्रोंसए छ्या म्हाँदिबै ल्हागिरि क्हेमैं बेल्‍ले ह्रब् प्हैंसि परमेश्‍वरए ताँमैं स्योवाइ।
MAR 7:10 ‘ह्रोंसए आबा-आमाए मान लद्।’ धै ‘खाब‍इ ह्रोंसए आबा आमाए बिरोधर आछ्याँबै ताँमैं पोंमुँ छाबै म्हिलाइ सैबै सजैं पिंन्,’ बिसि मोशाइ स्योंमन् बिथेंल।
MAR 7:11 दिलेया क्‍हेमैंइ लोमिंमा: ‘ह्रोंसए आबा आमालाइ ल्होबर पिंबै तो मुँले सै परमेश्‍वरलाइ पिंल् त्हुबै सै ग।’ बिम् बिस्‍याँ,
MAR 7:12 ‘च म्‍हिइ ह्रोंसए आबा आमालाइ तोइ पिंल् आत्हु’ बिम्।
MAR 7:13 छले ह्रोंसइ लरिबै छ्याए लिलि प्रसि क्‍हेमैंइ परमेश्‍वरए ताँमैं थोवाम्। छलेन क्‍हेमैंइ अरू ल्‍हें आतबै केमैं लरिइमुँ।”
MAR 7:14 झाइले येशूजी म्हिए हुल खी ङाँर हुइसि बिइ, “क्‍हेमैं ताँनइ ङए ताँ थेसि क्‍होद्।
MAR 7:15 चबै सैइ म्हिलाइ पापर च्होवाल् आखाँ, बरु म्‍हिए सैं न्‍होंउँइँले त्‍होंबै ताँमैंइ म्हिलाइ पापर च्होवाम्।
MAR 7:16 [थेबै न्‍ह मुँब्मैंइ थेरिगे।]”
MAR 7:17 झाइले म्हि हुलउँइँले त्‍होंसि धिं न्‍होंर होंबै लिउँइँ खीए चेलामैंइ येशूने च अहानए बारेर ङ्योएइ।
MAR 7:18 येशूजी चमैंने बिइ, “क्‍हेमैंज्यै या अझै आक्‍होइमुँ वा? सुँउँइँले म्‍हिए फो न्‍होंर होंबै सैइ पापर च्होल् आखाँ बिसि क्हेमैइ आसेइमुँ वा?
MAR 7:19 तलेबिस्याँ सुँउँइँले चबै सै सैं न्‍होंउँइँ आह्‍याल्‍ले फो न्‍होंउँइँ ह्‍याम्, झाइले बैरु त्‍होंह्‍याम्। छतसि चबै समैं तो चलेया तम्!” बिसि येशूजी बिइ।
MAR 7:20 येशूजी धबै बिइ, “म्हिए सैं न्होंउँइँले त्होंबै आछ्याँबै ताँइ मत्‍त्रे म्‍हि पाप खल् लवाम्।
MAR 7:21 तलेबिस्याँ म्हिमैंए सैंउँइँले आछ्याँबै ताँमैं मैंब, ब्यभिचार लब, ह्‍योब, म्‍हि सैब, रण्डिबाजी लब,
MAR 7:22 लोब लब, स्‍योर तेब, खैच्हिजिले पोंब, ख्रे लब, थेब् प्‍हैंब, आमादु तब,
MAR 7:23 छाबै पाप खबै ताँमैं ताँन् सैं न्‍होंउँइँले त्‍होंम्, धै म्हिलाइ पाप खल् लवाम्।”
MAR 7:24 च लिउँइँ येशू च क्‍ल्‍ह्‍यो वाथेंसि टुरोस नेरो सीडोन बिबै सहरउँइँ ह्‍यासि धिं घ्रिर होंइ। खी चर मुँ बिसि खाबज्‍यै था आसेरिगे बिब् येशूए सैं मुँल। दिलेया म्‍हिमैंइ था आसेल्‍ले येशू टिल् आखाँल।
MAR 7:25 येशू चर मुँ बिब च्हमिरि घ्रिइ था सेइ। चए च्हमि मोंइ स्‍याल। छतसि च येशू ङाँर खसि खीए प्‍हले फ्‍योइ।
MAR 7:26 च च्हमिरि यहूदीस्यो आङिंल, सिरिया ह्‍युलर्बै फोनिसियाथेंस्यो मुँल। “ङए च्हमि स्याबै मों ल्हामिंन्,” बिसि चइ येशूने यो छ्युँ लइ।
MAR 7:27 येशूजी च च्हमिरिने अहान् झोंसि बिइ, “ओंसों कोलोमैं म्रेंल् पिंन्, तलेबिस्याँ कोलोमैंए चबै सै नगिमैं पिंब ठिक आत।”
MAR 7:28 झाइले च च्हमिरिइ येशूने बिइ, “ओ प्रभु, धिंर्बै नगिमैं या कोलोमैंइ वाथेंबै चबै सैमैं चल् योंम्।”
MAR 7:29 येशूजी चने बिइ, “क्हिइ छ बिसेरो तोइ आङ्हाँन्ले ह्रोंसए धिंर ह्‍याद्। क्‍हिए च्हमिउँइँले मों त्‍होंह्‍याइ।”
MAR 7:30 च च्हमिरि धिंर फेनेमा कोलोउँइँले मों त्होंयासि कोलो खाटर रोरिब स्याइ।
MAR 7:31 झाइले येशू टुरोस सहरउँइँले त्‍होंसि सीडोन बिबै क्‍ल्‍ह्‍योर खइ। धै डिकापोलिस बिबै ह्‍युलए घ्‍याँउँइँले गालील तालर एखइ।
MAR 7:32 चर न्‍ह आथेसि छेन्‍ले पोंल् आखाँबै म्‍हि घ्रि म्‍हिमैंइ येशू ङाँर पखइ, धै “चए फिर यो थेंसि सल् लमिंन्,” बिसि येशूने यो छ्युँ लइ।
MAR 7:33 च न्ह आथेबै म्‍हिलाइ हुलउँइँले दे क्याइ खाबै आरेबै क्‍ल्‍ह्‍योर बोसि येशूजी ह्रोंसए योरिमैं चए न्‍हेमेंर क्ह्‍युसि थेंइ, झाइले खीए योर थुइसि च म्‍हिए लेर छुइ।
MAR 7:34 झाइले येशूजी मुउँइँ ङ्‌ह्‍योसि ह्रिंग्‍यो सो सेंसि चने “इफ्‍फाता” बिइ। (छ बिब “थोंयाँन्” बिब् ग।)
MAR 7:35 छ बिबै तोदोंन् चए आथेबै न्‍ह थेबर होंइ, धै छेन्‍ले आपोंबै सुँइ छेन्‍ले पोंबर होंइ।
MAR 7:36 झाइले येशूजी च म्‍हिमैंने, “चु ताँ खाब्ने या आबिद्!” बिइ। खीजी खाब्ने या आबिद् बिलेया, चमैं झन् सैं तोंदै ल्‍हें बिप्रमल।
MAR 7:37 चु ताँ थेब्मैं ताँन् प्लेटोयासि “येशूजी तो के बिलेया छ्याँब लमना। न्‍ह आथेबै म्‍हि थेल् लमना, आपोंबै म्‍हि पोंल् लमना बिबर होंइ।”
MAR 8:1 च त्हे लिउँइँ धबै म्‍हिए हुल येशू ङाँर खागु तखइ। दिलेया चमैंने चबै सै तोइ आरेमा येशूजी चेलामैं खी ङाँर हुइसि बिइ,
MAR 8:2 “चु म्हिए हुल म्रोंसि ङ ल्‍हयो खम्, तलेबिस्याँ चुमैं ङने बालु मुँब तिंयाँ सोंरो तइ। चुमैंने चबै सै तोइ आरे।
MAR 8:3 चुमैं छलेन् तोइ आचल्‍ले धिंर कुलइ बिस्‍याँ घ्‍याँर्न फो ख्रेंसि मुर्छा तब्मुँ। तलेबिस्याँ को-कोइम् ह्रेंगोउँइँले खबै म्‍हिमैं मुँ।”
MAR 8:4 चेलामैंइ खीने बिइ, “चु म्‍हि आटिबै क्‍ल्‍ह्‍योर चुमैंलाइ खैले चल् पिंल् खाँमुँ?”
MAR 8:5 येशूजी चमैंने “क्‍हेमैंने क्‍हें कति पो मुँ?” बिसि ङ्योएमा चमैंइ “क्हें ङिपो मुँ,” बिइ।
MAR 8:6 येशूजी म्हिए हुल सर क्हुँबर ल्हैदिइ। धै क्‍हें ङिपो किंसि परमेश्‍वरलाइ धन्‍यबाद पिंसि क्‍हें लुँइ। धै “म्‍हिमैं चुमिंन्” बिसि चेलामैंने पिंइ। येशूजी बिब् धोंले चमैंइ म्‍हिमैंलाइ चुमिंइ।
MAR 8:7 चमैंने च्‍युगुदे ताँग या मुँल। छतसि परमेश्‍वरलाइ धन्‍यबाद पिंसि येशूजी चेलामैंने चुमिंबर ल्हैदिइ।
MAR 8:8 झाइले म्हिमैंइ म्रेंन्‍ले चइ। चमैंइ चल् खाँबै लिउँइँ चेलामैंइ क्हें लुँठेमैं खागु लमा ड्हलो ङि प्‍लिंइ।
MAR 8:9 चर हजार प्‍लिदे म्‍हिमैं मुँल। झाइले येशूजी चमैं खेंमैंए धिंर कुलइ।
MAR 8:10 च तोदोंन् येशू खीए चेलामैंने डुँङ्गार क्रेसि दलमनुथा बिबै क्ल्ह्‍योर ह्‍याइ।
MAR 8:11 फरिसीमैं येशू ङाँर खसि “क्ह्रोंसंन क्हि स्वर्गउँइँले युब् ग बिस्याँ औदिबै चिनु लसि उँइँन्,” बिसि प्होंबर होंइ।
MAR 8:12 दिलेया खीए सैं नसि येशूजी बिइ, “तिंजोरोबै म्‍हिमैंइ तले औदिबै चिनु म्‍हैम्? क्‍ह्रोंसेंन् ङ क्‍हेमैंने बिमुँ, तिंजोरोबै म्हिमैंलाइ ङइ तोइ चिनु उँइँरिब् आरे।”
MAR 8:13 छ बिसि येशू चमैं वाथेंसि डुँङ्गार क्रेसि धबै तालए क्‍योंजा ह्‍याइ।
MAR 8:14 येशूए चेलामैंइ डुँङ्गार ह्‍यामा चबै सै बोब म्‍लेयान चमैंने क्हें घ्रि मत्‍त्रे मुँल।
MAR 8:15 छले ह्‍यारिमा येशूजी खीए चेलामैंने लोदा सैंदा लसि बिइ, “फरिसीमैं नेरो हेरोद म्रुँए क्हेंर झोंबै प्लेढाउँइँले न्ह क्रों मि क्रोंले टिद्।”
MAR 8:16 छबिमा “ङ्योने क्हें आरेमा प्रभुजी छ बिइ उ तो?” बिसि चमैंइ खें-खेंमैं ताँ लबर होंइ।
MAR 8:17 येशूजी चमैंए ताँ था सेसि चमैंने बिइ, “क्‍हेमैंने चबै सै आरे बिसि तले ताँ लल? ङ खाब् जा बिसि क्‍हेमैंइ अझै आसे वा? अझै आक्‍हो वा? क्‍हेमैंए सैं अझै सारोन् मुँ वा?
MAR 8:18 क्‍हेमैंए मि मुँलेया तले आम्रों? क्‍हेमैंए न्‍ह मुँलेया तले आथे? क्‍हेमैंइ तोइ आचि वा?
MAR 8:19 ङइ क्‍हें ङ्‌हपोइ हजार ङ्‌ह म्‍हिमैंलाइ म्रेंन्ले चल् पिंमा क्हेमैंइ ङैबै क्हें लुँठेमैं खुमा कति ट्हलो प्‍लिंल?” च चेलामैंइ येशूने बिइ, “च्युसे ङ्हिं ट्हलो।”
MAR 8:20 छलेन “क्‍हें ङिपोइ हजार प्‍लि म्‍हिमैं म्रेंन्ले चल् पिमा क्हेमैंइ कति ट्हलो खागु लल?” चमैंइ बिइ, “ट्हलो ङि प्लिंल।”
MAR 8:21 येशूजी चमैंने बिइ, “क्‍हेमैंइ अझै आक्‍हो वा?”
MAR 8:22 च लिउँइँ खेंमैं बेथसेदा बिबै क्‍ल्‍ह्‍योर फेखमा चर म्‍हिमैंइ मि आम्रोंबै म्हि घ्रि येशू ङाँर पखसि “चुए मि म्रोंबै ल्हागिर क्हिजी छुइमिंन्,” बिसि यो छ्युँ लइ।
MAR 8:23 छलमा येशूजी च मि आम्रोंबै म्‍हिए योर क्‍हासि नाँसउँइँले बैरु बोइ। झाइले चए मिर तु फोमिंसि चए मिर ह्रोंसए यो थेंसि “क्‍हिइ म्रोंल् खाँम् उ आखाँ?” बिसि चने ङ्योएइ।
MAR 8:24 झाइले ताइ ङ्‌ह्‍योसि चइ बिइ, “ङइ म्‍हिमैं म्रोंल् खाँम्, दिलेया चमैं सिं धुँ धोंले प्ररिब् म्रोंम्।”
MAR 8:25 छबिमा येशूजी धबै च म्‍हिए मिर छुइमा च म्‍हिइ ङ्‌ह्‍योइ,धै छेनाले म्रोंल् खाँब् तइ।
MAR 8:26 च लिउँइँ येशूजी च म्‍हिने “नाँ-नाँसर खनिरै आहोंल्‍ले सरासर धिंर ह्‍याद्,” बिसि कुलइ।
MAR 8:27 झाइले येशू नेरो खीए चेलामैं कैसरिया फिलिप्‍पी ह्‍युलर्बै नाँस नाँसउँइँ ह्‍याइ। छले घ्‍याँर ह्‍यारिमा येशूजी खीए चेलामैंने “म्‍हिमैंइ ङलाइ खाब् बिम्?” बिसि ङ्योएइ।
MAR 8:28 चेलामैंइ बिइ, “कोइ ‘बप्‍तिस्‍मा पिंबै यूहन्‍ना’ बिम्, कोइ ‘स्‍योंम्‍बै एलिया ग,’ बिम्, कोइ ‘स्‍योंम्‍बै अर्को अगमबक्‍ता घ्रि ग’ बिम्।”
MAR 8:29 येशूजी चमैंने “क्‍हेमैंइ ङलाइ खाब् बिम्दि?” बिसि ङ्योएमा। पत्रुसइ येशूने बिइ, “क्‍हिम् परमेश्‍वरजी कुल्मिंबै म्रुँ ख्रीष्‍ट ग।”
MAR 8:30 झाइले येशूजी चमैंने “चु ताँ खाबलाज्यै या आबिद्,” बिइ।
MAR 8:31 झाइले येशूजी चेलामैंने “म्हिए च्हजी ल्‍हें दुःख सैदिल् त्‍हुम्। चिबनाँब्मैं, ख्रो पिंबै खेगि चिब्मैं नेरो शास्‍त्रिमैंइ ङ म्‍हि आच्‍हिसि सैबर ल्हैदिम्। दिलेया सिबै सोंरोर ङ धबै सोगों तसि रेखब्मुँ बिसि लोमिंबर होंइ।”
MAR 8:32 येशूजी चु ताँ छेनाले क्होल्‍‍ले बिमिंइ। दिलेया पत्रुसइ येशू दे क्‍याइ बोसि “तले छाबै ताँ लल?” बिसि हौदिबर होंइ।
MAR 8:33 दिलेया येशू लिग्‍याँ तुसि चेलामैंउँइँ ङ्‌ह्‍योसि पत्रुसने “ओ दुष्‍ट, ङ ङाँइँले स्‍योह्‍याद्! तलेबिस्याँ क्‍हि परमेश्‍वरए ताँ आङिं, दिलेया म्‍हिइ मैंब् धोंले मैंमना,” बिसि हौदिइ।
MAR 8:34 झाइले येशूजी खीए चेलामैं नेरो म्हिए हुल खी ङाँर हुइसि बिइ, “खाब् मुँलेया ङने बालु प्रबै सैं मुँ बिस्‍याँ चइ ज्युए म्हाँया आलरिगे बरु क्रूस नोसि ङने बालु प्ररिगे।
MAR 8:35 तलेबिस्याँ खाबइ ह्रोंसए ज्युए म्हाँया लमुँ, चइ खोंयोंइ आखाँबै छ्ह आयों, छलेन ङउँइँले खबै सैं तोंबै ताँ बिप्रमा ह्रोंसए ज्यु नास तयालेया चइ खोंयोंइ आखाँबै छ्ह योंब्मुँ।
MAR 8:36 तलेबिस्याँ म्हिइ ह्‍युलर्बै तोन्दोंरि सैं योंलेया खोंयोंइ आखाँबै छह् योंल् आखाँ बिस्‍याँ चलाइ तोए फायदा तम्? फायदा आरे!
MAR 8:37 म्हिइ धबै खोंयोंइ आखाँबै छह् योंबै ल्हागिर तो पिंल् खाँमुँ?
MAR 8:38 छतसि खाबइ चु आछ्याँबै पापि जुगरि ङ नेरो ङए ताँ थेसि फापिमुँ, ङ म्हिए च्ह या ह्रोंसए आबाजी पिंबै मान नेरो पबित्र स्‍वर्गदूतमैंने बालु चु ह्‍युलए निसाफ लबर युमा च म्‍हि म्रोंसि ङै या फा पिब्‍मुँ।”
MAR 9:1 झाइले खीजी चमैंने बिइ, “क्ह्रोंसेंन ङ क्हेमैंने बिमुँ, चुर मुँबै म्‍हिमैं न्‍होंरि को-कोइ परमेश्‍वरए ग्याल्स शक्‍तिर युब् आम्रोंन् समा सिरिब् आरे।”
MAR 9:2 येशूजी छ बिबै टुरो लिउँइँ खीजी पत्रुस, याकूब नेरो यूहन्‍ना बोसि नुबै कोंर म्हि आरेबै क्ल्ह्‍योर ह्‍याइ, चर चेलामैंइ येशूए क्हो फेर्दियाब् म्रोंइ।
MAR 9:3 खीए क्‍वें या बेल्‍ले चारसि फोस्रे ब्योंब् तयाइ, छले छेन्ले ह्‍युलर्बै खाबज्यै या ख्रुल् आखाँ।
MAR 9:4 चमैंइ चर स्‍योंम्‍बै अगमबक्‍तामैं मोशा नेरो एलिया येशूने ताँ लरिब् म्रोंइ।
MAR 9:5 पत्रुसइ येशूने बिइ, “ओ गुरु, ङ्यो चुर टिब छ्याँब मुँ! ङिइ चुर टिबै क्ल्ह्‍यो सौंलो बनेम् ओ? घ्रि क्‍हिए ल्हागिर, घ्रि मोशाए ल्हागिर, घ्रि एलियाए ल्हागिर।”
MAR 9:6 चमैं बेल्‍ले ङ्हिंरिल। छतसि तो बिल् त्‍हुम् बिसि चइ था आसेल।
MAR 9:7 च तोदोंन् न्‍हाँम्‍स्यो खसि खेंमैं हुवाइ, धै न्हाँम्स्यो न्होंउँइँले “चु ङइ खोबै च्‍ह ग, क्‍हेमैंइ चुए ताँ थेद् बिबै कै थेइ।”
MAR 9:8 छ बिब् थेसि छाइ माइ ङ्‌ह्‍योमा चमैंइ येशू मत्‍त्रे खेंमैंने म्रोंइ अरू खाबै आम्रों।
MAR 9:9 झाइले खेंमैं कोंउँइँले क्‍युरु युरिमा येशूजी चमैंने “म्हिए च्ह सिसि धबै सोगों आतन् समा क्हेमैंइ कोंर म्रोंबै ताँमैं खाब्ने या आबिद् ओ,” बिइ।
MAR 9:10 खीजी बिबै ताँ चमैंइ अरूमैंने आबि, दिलेया सिसि धबै सोगों तब् बिब तो जा? बिसि खें-खेंमैंन् ताँ लबर होंइ।
MAR 9:11 च लिउँइँ चमैंइ “‘परमेश्‍वरजी कुल्मिंबै म्रुँ ख्रीष्‍ट युब् भन्दा ओंसों एलिया युल् त्‍हुम्,’ बिसि शास्‍त्रिमैंइ तले बिमुँ?” बिसि येशूने ङ्योएइ।
MAR 9:12 येशूजी बिइ, “क्‍ह्रोंसेंन ख्रीष्‍ट युब् भन्दा ओंसोंन् एलिया युसि न्होंयाबै तोन्दोंरि सैमैं क्योंएँमिंम्। दिलेया म्हिए च्हजी बिस्याँ ल्‍हें दुःख सैदिल् त्‍हुब्मुँ, धै म्हि आच्हिन् तब्मुँ बिसि परमेश्‍वरए छ्वेर तले प्ह्रिइमुँ?
MAR 9:13 दिलेया ङ क्हेमैंने बिमुँ, एलिया युल् खाँइ, धै खीए बारेर परमेश्‍वरए छ्वेर प्‍ह्रिब् धोंले म्हिमैंइ तो लदा ङ्हाँमुँ चन् लइ।”
MAR 9:14 झाइले खेंमैं अरू चेलामैं ङाँर एखमा चेलामैंए खागु म्हिए हुल रारिब नेरो को-कोइ शास्‍त्रिमैंइ चेलामैंने ताँमैं ङ्योएरिब् म्रोंइ।
MAR 9:15 म्हिए हुलइ येशू म्रोंबै तोदोंन् बेल्‍ले अचम्‍मा ङ्हाँह्‍याइ, धै येशू ङाँर न्हेह्‍यासि खीए मान लइ।
MAR 9:16 येशूजी म्हिए हुलने “क्‍हेमैंइ चु चेलामैंने तो ङ्योएरिल?” बिइ।
MAR 9:17 च म्हि हुल न्‍होंउँइँले म्‍हि घ्रिइ येशूने बिइ, “गुरु, ङए च्‍ह मोंइ स्‍यासि पोंल् आखाँइँमुँ। छतसि क्‍हि ङाँर पखइमुँ।
MAR 9:18 मोंइ स्‍यामा ङए च्ह सर प्योवाम्, सुँउँइँले पिबि त्होंम्, धै स ह्रासि कित्रि मित्रि तयाम्। ङइ क्‍हिए चेलामैंने चु मों ल्‍हामिंन् बिसि यो छ्युँ लल। दिलेया चमैंइ ल्हाल् आखाँल।”
MAR 9:19 झाइले येशूजी चमैंने बिइ, “च्या, क्‍हेमैं कति बिश्‍वास आलबै म्‍हिमैं मुँन! ङ क्‍हेमैंने कति समा टिल् त्‍हुम्? ङइ क्‍हेमैं खोंयों समा सैदिल् त्‍हुम्? च कोलो ङ ङाँर पउ।”
MAR 9:20 चमैंइ च कोलो येशूए ङाँर पखइ। येशू म्रोंबै तोदोंन् च कोलो स्‍याबै मोंइ च कोलोलाइ स्याल म्हाल लसि सर प्योवामा कोलोए सुँउँइँले पिबि त्होंसि पटाँपटाँ तबर होंइ।
MAR 9:21 येशूजी चए आबाने “खोंयोंसेरो चु कोलो छ तब् जा?” बिसि ङ्योएमा चइ बिइ, “च्‍युगुथिरि कोलो ओंनों ग।
MAR 9:22 च मोंइ ल्‍हें खे चु सैल् म्हैइ। खोंयों मिर झोंवामल, खोंयों क्‍युर भ्‍योंवामल। ओ गुरु, क्‍हिजी चु कोलो तोइ लमिंल् खाँस्‍याँ गार आम्हाँदिल्‍ले ङि ल्होमिंनु।”
MAR 9:23 येशूजी चने बिइ, “‘क्‍हिजी लमिंल् खाँस्याँ’ बिसि तले बिल? ङए फिर बिश्‍‍वास लब्मैंए ल्हागिर तोन्दोंरि सै तल् खाँम्।”
MAR 9:24 झाइले च कोलोए आबाइ युन्ले थेबै कैले बिइ, “ङइ क्हिए फिर बिश्‍वास लम्, ङए बिश्‍वास आभोंमा ङए बिश्‍वास भोंब लमिंन्।”
MAR 9:25 च्हमन् म्हिए हुल खी ङाँइ न्हेखरिब् म्रोंसि येशूजी च मोंने “ओ न्‍ह आथेबै लडा मों, ङ क्‍हिने बिमुँ, च कोलोउँइँले त्‍होंखो, तारे धबै खोंयोंइ च कोलोलाइ स्याल् आयों बिसि,” हौदिइ।
MAR 9:26 छबिमा मोंइ च कोलो स्यालाम्हाला लवासि थेबै कैले च कोलोउँइँले त्‍होंह्‍याइ। छलमा च कोलो सियाब् धोंन् तयाइ। छ तब् म्रोंमा ल्‍हें म्‍हिमैंइ “कोलोम् सियाइ बिबर,” होंइ।
MAR 9:27 दिलेया येशूजी चए यो क्‍हासि रेमिंमा च कोलो सोगों तयाइ।
MAR 9:28 येशू धिंर ह्‍याबै लिउँइँ खीए चेलामैंइ खाबज्यै आसेल्‍ले खीने “ङिइ च मों तले ल्‍हाल् आखाँगे?” बिसि ङ्योएइ।
MAR 9:29 येशूजी चमैंने बिइ, “छाबै खालर्बै मों प्राथनाइ बाहेक अरू तोइ ललेया ल्‍हाल् आखाँ।”
MAR 9:30 झाइले येशू नेरो खीए चेलामैं च क्‍ल्‍ह्‍यो पिसि गालील ह्‍युल ततै ह्‍याइ। खेंमैं खनिर मुँ बिसि खाबज्यै आसेरिगे बिब येशूए सैं मुँल,
MAR 9:31 तलेबिस्याँ खीजी ह्रोंसए चेलामैंने लोमिंबै तोंन् मुँल। खीजी चमैंने बिइ, म्हिए च्ह क्हासि म्‍हिमैंए योर पिंवाब्मुँ, धै चमैंइ खी सैवाब्‍मुँ, दिलेया सिबै सोंरो लिउँइँ धबै खी सोगों तसि खब्मुँ।
MAR 9:32 दिलेया खीजी बिबै चु ताँ चेलामैंइ क्‍होल् आखाँ, धै ङ्हिंसि खीने ङ्योएल् आखाँ।
MAR 9:33 झाइले खेंमैं कफर्नहुम बिबै क्ल्ह्‍योर फेखइ, धै धिं न्‍होंर मुँमा येशूजी चेलामैंने “घ्‍याँर खरिमा क्‍हेमैंइ तो ताँमैं लल?” बिसि ङ्योएइ।
MAR 9:34 दिलेया चमैं तोइ आबिल्‍ले टिइ, तलेबिस्याँ घ्‍याँर खरिमा चमैंइ “ङ्योए न्‍होंर खाब् थेब् जा?” बिसि खें-खेंमैंन् ताँ लरिल।
MAR 9:35 झाइले येशू क्हुँसि च्युसे ङ्हिं चेलामैं खागु लसि चमैंने बिइ, “थेब तदा ङ्हाँबै म्‍हि, ताँन् भन्दा च्‍योंब् तसि ताँनए सेवा लल् त्‍हुम्।”
MAR 9:36 झाइले खीजी कोलो घ्रि चेलामैंए म्‍हाँजोर पखसि च कोलो ख्वेसि चमैंने बिइ,
MAR 9:37 “ङए मिंर छाबै कोलो घ्रिलाइ म्हाँया लब्मैंइ, ङलाज्यै म्हाँया लमुँ। ङलाइ म्हाँया लब्मैंइ ङलाइ मत्‍त्रे आङिं, ङ कुल्‍मिंबै परमेश्‍वर आबालाज्यै या म्हाँया लम्।”
MAR 9:38 यूहन्‍नाइ येशूने बिइ, “ओ गुरु, म्‍हि घ्रिइ क्‍हिए मिं किंसि मोंमैं ल्‍हारिब ङिइ म्रोंइ। ङिइ चने ‘छाबै के लल् आयों’ बिसि लल् आपिं, तलेबिस्याँ च ङ्योए टोलिर्बै म्‍हि आङिंल।”
MAR 9:39 दिलेया येशूजी बिइ, “चलाइ छ आलद् आबिद्, तलेबिस्याँ ङए मिंर छाबै औदिबै के लबै म्‍हिइ ङए बारेर तोइ आछ्याँबै ताँमैं युन्ले पोंल् आखाँ।
MAR 9:40 तलेबिस्याँ ङ्योए बिरोध आलबै म्हि ङ्योए टोलिर्बै म्‍हि धों तबन् ग।
MAR 9:41 झाइले खाबइ ‘चुम् येशू ख्रीष्‍टए म्‍हि ग’ बिसि क्‍हेमैं क्‍यु थुँल् पिंलेया, क्‍ह्रोंसेंन ङइ क्‍हेमैंने बिमुँ, च म्‍हिइ खैले बिलेन ह्रोंसइ योंल् त्‍हुबै इनाम योंब्मुँ।”
MAR 9:42 येशूजी धबै बिइ, “ङए फिर बिश्‍वास लब्‍मैंए न्‍होंरि खाबइ ङ ङाँइँले म्हि घ्रि फ्रेवामुँ, च केए थेबै सजैं योंब् भन्दा बरु थेबै ह्रेंदो चए खरिर च्‍योसि तालर भ्‍योंवाब च म्‍हिए ल्हागिर छ्याँब तमल।
MAR 9:43 क्हिए योइ क्‍हि पापर च्होवाम् बिस्‍याँ च यो थोवाद्। यो ङ्हिंन ङ्हिंन् तसि नर्गर्बै मिर ह्‍याब् भन्दा बरु डुँड तनाबिलेया खोंयोंइ आखाँबै छह् योंब क्हिए ल्हागिर छ्याँब तम्।
MAR 9:44 [चर्बै प्हुलुँ खोंयोंइ आसि, चर्बै मि या खोंयोंइ आसि।]
MAR 9:45 छलेन क्‍हिए प्‍हलेइ क्‍हि पापर च्होवाम् बिस्‍याँ, च प्‍हले थोवाद्। प्‍हले ङ्हिंन ङ्हिंन् तसि नर्गर ह्‍याब् भन्दा बरु डुँड तनाबिलेया खोंयोंइ आखाँबै छह् योंब क्हिए ल्हागिर छ्याँब तम्।
MAR 9:46 [नर्गर्बै प्‍हुलुँइ म्‍हि चम्, चर्बै प्हुलुँ खोंयोंइ आसि, चर्बै मि या खोंयोंइ आसि।]
MAR 9:47 छलेन क्‍हिए मिइ क्‍हि पापर च्होवाम् बिस्‍याँ, च मि ट्हुइ भ्‍योंवान्। मि ङ्हिंन ङ्हिंन् तसि नर्गर ह्‍याब् भन्दा मि घ्रि मत्‍त्रे तनाबिलेया परमेश्‍वरए ग्याल्सर ह्‍याल् योंब क्हिए ल्हागिर छ्याँब तम्।
MAR 9:48 नर्गर्बै प्‍हुलुँइ म्‍हि चम्, चर्बै प्हुलुँ खोंयोंइ आसि, चर्बै मि या खोंयोंइ आसि।
MAR 9:49 “चजइ चबै सैमैं क्राँल् आलब् धोंले ताँन् म्‍हिमैंलाइ मिइ जाँच लब्मुँ।
MAR 9:50 चज लिंबै सै ग, चए स्वाद् म्हह्‍याइ बिस्याँ च तोइ लिंन् लब? च केर आफेब तइ। छतसि चज लिंब् तब् धोंले क्‍हेमैंए न्होंरि क्ह्रिसि टिद्। छले क्‍हेमैं क्ह्रिसि टिद्।”
MAR 10:1 झाइले येशू कफर्नहुम ह्‍युल पिसि यर्दन स्‍योंए क्योंजा यहूदीया ह्‍युलर ह्‍याइ। चरै या म्हिए हुल खी ङाँर खागु तखइ। धै सोदाजरे धोंले खीजी धबै चमैंलाइ लोमिंइ।
MAR 10:2 येशूलाइ ङो चुबै सैंले कोइ फरिसीमैं येशू ङाँर खसि “खाबज्यै ह्रोंसए प्ह्रेंस्यो वाल् तम् उ आत?” बिसि ङ्योएमा
MAR 10:3 येशूजी चमैंने “स्‍योंम्‍बै मोशाइ क्‍हेमैंने तो बिथेंइमुँ?” बिसि ङ्योएइ।
MAR 10:4 चमैंइ बिइ, “पार लबै कागत प्‍ह्रिसि च वालेन् तम् बिसि मोशाइ,” बिइमुँ।
MAR 10:5 दिलेया येशूजी चमैंने बिइ, “क्‍हेमैंए सैं सारो तबइले मोशाइ क्‍हेमैंने चु छाबै ताँ प्‍ह्रिमिंइ।
MAR 10:6 दिलेया ह्‍युल बनेब् ओंनोंन्, ‘परमेश्‍वरजी आमुयुँ नेरो च्हमिरि बनेइ।’
MAR 10:7 ‘छतसि मुँयुँमैं ह्रोंसए आबा आमाने फ्रेसि ह्रोंसए प्‍ह्रेंस्‍योने क्ह्रिसि टिरिम्।
MAR 10:8 चमैं ङ्हिं घ्रिन् तब्‍मुँ।’ छतसि चमैं ङ्हिं आङिं, दिलेया क्ह्रिसि घ्रिन् तब्‍मुँ।
MAR 10:9 छतसि परमेश्‍वरजी त्हुँमिंब्मैं म्‍हिमैंइ फ्रेवाल् आत।”
MAR 10:10 येशू धिंर एखबै लिउँइँ चेलामैंइ धबै चु ताँए बारेर खीने ङ्योएइ।
MAR 10:11 येशूजी चमैंने बिइ, “ह्रोंसए प्ह्रेंस्यो वासि अर्कोने ब्ह्‍या लब्मैंइ च ओंसोंबै प्ह्रेंस्योए बिरोधर ब्यभिचार लम्।
MAR 10:12 छलेन च्हमिरिइ ह्रोंसए प्युँ पिसि अर्कोने ब्ह्‍या लइबिस्‍याँ चज्यै ब्यभिचार लम्।”
MAR 10:13 येशूजी कोलोमैं छुइसि आशिक पिंरिगे बिसि म्‍हिमैंइ ह्रोंसए कोलोमैं खी ङाँर पखइ। दिलेया खीए चेलामैंइ “कोलोमैं खी ङाँर पखब आत बिसि चमैंलाइ हौदिइ।”
MAR 10:14 छ लब् म्रोंसि येशू ह्रिस खसि चेलामैंने बिइ, “च्योंब कोलोमैं ङ ङाँर खल् पिंन्, चमैंलाइ आक्वेद्, तलेबिस्याँ परमेश्‍वरए ग्याल्स छाबै कोलोमैंलन् ग।
MAR 10:15 क्ह्रोंसेंन्ले ङ क्हेमैंने बिमुँ, च्‍योंबै कोलोमैंइ [खेंमैंए आबा-आमाए फिर छेनले भर लब्] धोंले, परमेश्‍वरए फिर भर थेंसि म्‍हाँदिब्मैंइ मत्‍त्रे परमेश्‍वरउँइँले आशिक योंब्‍मुँ, धै परमेश्‍वरए ग्याल्सर होंब्‍मुँ।”
MAR 10:16 झाइले येशूजी च कोलोमैं ख्‍वेसि चमैंए फिर ह्रोंसए यो थेंसि आशिक पिंइ।
MAR 10:17 झाइले येशू घ्‍याँर ह्‍यारिमा म्‍हि घ्रि न्हेह्‍यासि येशूए ओंसों च्‍हि तुँसि खीने “ओ स्वाबै गुरु, खोंयोंइ आखाँबै छह् योंबै ल्हागिर ङइ तो लल् त्‍हुम्?” बिसि ङ्योएइ।
MAR 10:18 येशूजी चने बिइ, “ङने तले स्वाब बिमुँ? परमेश्‍वर बाहेक अरू खाबै या स्वाब आरे।
MAR 10:19 अरूलाइ आसैब, ब्यभिचार आलब, आह्‍योब, स्‍योर आतेब, अरूमैंए मुइ छलेन् आचब, ह्रोंसए आबा-आमाए मान् लब बिसि ठिमर्बै ताँ क्‍हिइ सेइमुँ।”
MAR 10:20 झाइले च म्‍हिइ येशूने बिइ, “गुरु, चु ताँमैं ङइ कोलो ओंनोंन् ङिंरिइमुँ।”
MAR 10:21 येशूजी म्हाँयाले च ङाँइ ङ्‌ह्‍योसि बिइ, “क्‍हिइ अझै के घ्रि लब चैमुँ: छतसि ह्‍यासि क्‍हिए क्‍ल्‍ह्‍यो न्‍हें ताँन् चुँसि योंबै मुइ ङ्हाँदुमैं पिंन्, छलस्याँ क्‍हिइ स्‍वर्गर सै न्होर ल्हें योंब्‍मुँ। धै खसि ङए लिलि प्रद्,” बिइ।
MAR 10:22 चु ताँ थेसि च लि छु लसि दुःख म्हाँदिसि प्रयाइ, तलेबिस्याँ च बेल्‍ले प्‍लोबै म्‍हि मुँल।
MAR 10:23 येशूजी छाइ माइ ङ्‌ह्‍योसि खीए चेलामैंने बिइ, “प्‍लोबै म्‍हिमैं परमेश्‍वरए ग्याल्सर होंब बेल्‍ले गारो मुँ।”
MAR 10:24 खीए ताँ थेसि चेलामैं प्लेटोयाइ। दिलेया येशूजी धबै चमैंने बिइ, “ओ ङए कोलोमैं, सै न्होरए फिर भर थेब्मैं परमेश्‍वरए ग्याल्सर होंब बेल्‍ले गारो मुँ।
MAR 10:25 प्‍लोबै म्‍हि परमेश्‍वरए ग्याल्सर होंब् भन्दा बरु ताए मिउँइँले सलु होंब सजिलो मुँ।”
MAR 10:26 छबिमा चेलामैं अचम्‍मा ङ्हाँसि “छ बिस्‍याँ खाब् म्‍हि जोगेल् खाँम्?” बिसि येशूने ङ्योएइ।
MAR 10:27 येशूजी चमैं ङाँइ ङ्‌ह्‍योसि बिइ, “म्‍हिइ चु के लल् आखाँ, दिलेया परमेश्‍वरजी लल् खाँम्, तलेबिस्याँ परमेश्‍वरजी तोन्दोंरि सै लमिंल् खाँम्।”
MAR 10:28 पत्रुसइ येशूने बिइ, “ङ्‌ह्‍योद्, ङिइमि तोन्दोंरि सै वाथेंसि क्‍हिए लिलि ल्‍हैदिइमुँ।”
MAR 10:29 येशूजी बिइ, “क्ह्रोंसेंन्ले ङ क्हेमैंने बिमुँ, ङए लिलि प्रबर नेरो ङउँइँले खबै सैं तोंबै ताँ बिप्रमा खाबइ ह्रोंसए धिं नाँ, आघें-अलि, अना-अङाँ, आबा-आमा, प्‍हसे, क्‍ल्‍ह्‍यो-न्‍हें वाथेंमुँ,
MAR 10:30 चइ दुःख सैदिल् त्‍हुलेया प्र गुणा धिं, आघें-अलि, अना-अङाँ, आबा-आमा, प्‍हसे, क्‍ल्‍ह्‍यो न्‍हें चु छ्‍हर्न योंम्। च्‍हौ मत्‍त्रे आङिं, लिउँइँबै छ्‍हरै या खोंयोंइ आखाँबै छह् योंब्‍मुँ।
MAR 10:31 तोगो थेब् तदा ङ्हाँब्‍मैं च्‍योंब् तब्‍मुँ, धै तोगो च्‍योंब तदा ङ्हाँब्‍मैं थेब तब्‍मुँ।”
MAR 10:32 झाइले खेंमैं यरूशलेम सहरउँइँ ह्‍यारिमा। येशू ओंसों ओंसों प्ररिल। चेलामैं प्लेटोरिल, धै लिलि खबै म्‍हिमैं बिस्याँ ङ्हिंरिल। येशूजी धबै च च्युसे ङ्हिं चेलामैं खाबै आरेबै क्ल्ह्‍योर बोसि खीए फिर तल् त्‍हुबै ताँमैं बिबर होंइ:
MAR 10:33 “थेद्, ङ्यो तोगो यरूशलेमउँइँ ह्‍यारिइमुँ। चर फेनेसि म्हिए च्ह ख्रो पिंबै खेगि चिब्मैं नेरो शास्‍त्रिमैंए योर पिंवाब्मुँ। झाइले ङ सिल् त्‍हुबै दण्‍ड पिंल् त्हुम् बिसि चमैंइ अरू ह्रेंमैंए योर सैबर पिंवाब्‍मुँ।
MAR 10:34 चमैंइ ङ थुइब्‍मुँ, बिल्‍लि लब्‍मुँ, बर्साइ ल्हिब्‍मुँ धै सैवाब्‍मुँ। दिलेया सोंरों लिउँइँ ङ धबै सोगों तसि खब्मुँ।”
MAR 10:35 झाइले जब्दियाए च्‍हमैं ङ्हिं याकूब नेरो यूहन्‍ना येशू ङाँर खसि बिइ, “ओ गुरु, ङिइ क्हिने तो ह्रिलेया ङिए ल्हागिर लमिंन्।”
MAR 10:36 खीजी चमैंने “क्‍हेमैंए ल्हागिर ङइ तो लमिंरिगे बिब क्हेमैंए सैं मुँ?” बिसि ङ्योएइ।
MAR 10:37 चमैंइ खीने बिइ, “क्‍हि म्रुँ तसि थेबै मान योंबै राजगद्दिर क्हुँमा ङि ङ्हिंरि घ्रि क्‍हिए क्‍योलोउँइ, घ्रि त्हेब्रेउँइँ क्हुँल् पिंनुँ।”
MAR 10:38 छबिमा येशूजी चमैंने बिइ, “क्‍हेमैंइ ह्रिबै सै क्‍हेमैंन आसेइमुँ। ङइ नोब् धों तबै दुःख क्‍हेमैंइ नोल् खाँम्‍मा? ङइ किंब् धों तबै बप्‍तिस्मा क्‍हेमैंइ किंल् खाँम्‍मा?”
MAR 10:39 चमैंइ खीने, “ङिइ खाँम्!” बिइ। येशूजी चमैंने बिइ, “ङइ नोब् धोंबै दुःख क्हेमैंज्यै या नोब्‍मुँ, धै ङइ किंब् धोंबै बप्‍तिस्मा क्‍हेमैंज्यै या किंब्‍मुँ।
MAR 10:40 दिलेया ङए क्‍योलोउँइँ नेरो त्हेब्रेउँइँ खाब् टिल् योंम्, च ङइ बिसि आत, परमेश्‍वरजी खाबए ल्हागिर तयार लथेंइमुँ चमैंन योंम्।”
MAR 10:41 चु ताँ थेसि अरू चेलामैं च्‍यु याकूब नेरो यूहन्‍नाने ह्रिस खइ।
MAR 10:42 छतमा येशूजी चमैं खी ङाँर हुइसि बिइ, चु ह्‍युलर ग्याल्स लबै म्‍हिमैंइ ह्रोंसए जनता दबिदिसि थेबै हगले शासन लम्, चु ताँ “क्‍हेमैंइ सेइमुँ।
MAR 10:43 दिलेया क्‍हेमैंए न्होंरि बिस्याँ छ लब् आत। क्‍हेमैंए न्होंरि थेब् तदा ङ्हाँब्मैंइ, अरूमैं ल्होल् त्‍हुम्।
MAR 10:44 छलेन क्हेमैंए न्होंरि ताँन् भन्दा थेब तदा ङ्हाँबै म्हि ताँनए केब्छैं तल् त्‍हुम्।
MAR 10:45 तलेबिस्याँ म्हिए च्ह मान म्हैबर युब आङिं, दिलेया म्हिमैं ल्होबर नेरो ल्‍हें म्‍हिमैंए पापउँइँले फ्रेमिंबै ल्हागिरि पापए सै फोबर ह्रोंसए ज्यु पिंबर युब् ग।”
MAR 10:46 च लिउँइँ खेंमैं यरिहो बिबै नाँसर फेखइ, धै येशू ह्रोंसए चेलामैं नेरो म्हिए हुलने यरिहोउँइँले त्‍होंह्‍यामा तिमैए च्‍ह बारतिमै बिबै कन घ्याँए रेर क्हुँरिल।
MAR 10:47 चइ खी नासरतर्बै येशू मुँन बिब् थेसि “ओ दाऊदए च्ह येशू, ङए फिर ल्हयो खमिंन्,” बिसि ओरबर होंइ।
MAR 10:48 छले कै तेमा ल्‍हें म्‍हिमैंइ चने “तोइ आबिद्,” बिसि हौदिइ। दिलेया च म्‍हि झन् “ओ दाऊदए च्ह, ङए फिर ल्हयो खमिंन्,” बिसि ओरइ।
MAR 10:49 झाइले येशू चर रासि “चलाइ चुर हुइपउ,” बिइ। म्‍हिमैंइ च कनने “भोंसि तद्, रेद्, खीजी क्‍हि हुइरिइमुँ युन्ले खो,” बिइ।
MAR 10:50 छ बिब् थेसि च कनइ ह्रोंसए बख्खु भ्‍योंवासि येशू ङाँर प्रखइ।
MAR 10:51 “क्‍हिए ल्हागिर ङइ तो लमिंरिगे ङ्हाँइमुँ?” बिसि येशूजी चने ङ्योएमा च कनइ खीने बिइ, “ओ गुरु, ङए मि म्रोंल् खाँब् तरिगे।”
MAR 10:52 झाइले येशूजी चने बिइ, “ह्‍याद्! क्‍हिए बिश्‍वासइ क्हि सयाइमुँ।” छ बिबै तोदोंन् चए मि म्रोंल् खाँब् तसि येशूए लिलि प्रयाइ।
MAR 11:1 झाइले खेंमैं यरूशलेम चेंदोबै जैतून कों खागुबै बेथफागे नेरो बेथानिया बिबै क्ल्ह्‍योर फेखमा खीजी ह्रोंसए चेलामैं न्‍होंर्बै म्हि ङ्हिंने छ बिसि कुलइ,
MAR 11:2 “क्हेमैं च ओंसोंबै नाँसर ह्‍याद्। चर फेनेबै तोंदोंन् तोगो समा खाबै आक्रेबै गधाए झज घ्रि च्युँइँथेंब क्हेमैंइ म्रोंब्‍मुँ, च गधाए झज पिसि चुर पउ।
MAR 11:3 खाबज्यै क्हेमैंने ‘चु तले पिल?’ बिसि ङ्योएस्‍याँ, ‘प्रभुए ल्हागिर चैदिइमुँ, के खाँबै लिउँइँ यु‍नन् एपखमिंस्यो,’ बिद्।”
MAR 11:4 झाइले चमैं ह्‍यामा गधाए झज घ्याँए रेर्बै धिं घ्रिए म्रा ङाँर च्‍युँइँथेंब स्‍याइ, धै चमैंइ च गधाए झज पिइ।
MAR 11:5 छलमा “चु गधाए झज तो लबर पिल?” बिसि चर रारिबै को-कोइ म्‍हिमैंइ चमैंने ङ्योएइ।
MAR 11:6 येशूजी लोमिंब् धोंलेन् चमैंइ बिमा चर्बै म्‍हिमैंइ बोह्‍‍याल् पिंइ।
MAR 11:7 चमैंइ गधाए झज येशूए ङाँर पखसि खेंमैंए क्वेंमैं चए फिर तिमिंइ, झाइले येशू चए फिर क्रेइ।
MAR 11:8 छले यरूशलेमउँइँ ह्‍यामा ल्‍हें म्‍हिमैंइ खेंमैंए क्वेंमैं येशूए मान् लबै ल्हागिर घ्‍याँर तिमिंइ, धै को-कोइ सिधुँर्बै हाँगमैं थोसि घ्‍याँर तिमिंइ।
MAR 11:9 झाइले खीए ओंसों ओंसों प्रबै म्‍हिमैंइ नेरो लिलि लिलि प्रबै म्‍हिमैंइ “परमेश्‍वरए मिं क्वेद्! याहवेहए मिंर खबै म्रुँलाइ परमेश्‍वरजी आशिक पिंरिगे!” बिदै जयजय लबर होंइ।
MAR 11:10 “ङ्योए खे दाऊद म्रुँए ग्याल्स धबै तखसिन् मुँ। च ग्याल्सए फिर परमेश्‍वरजी आशिक पिंरिगे! धाँसे थेबै परमेश्‍वरए जय जय तरिगे!”
MAR 11:11 झाइले खी यरूशलेमर खसि मन्दिर न्‍होंर होंइ। झाइले छाइ माइ तोन्दोंरि सै ङ्‌ह्‍योबै लिउँइँ म्‍हुँइँस तबि छेल। छतसि खीए च्युसे ङ्हिं चेलामैं बोसि बेथानिया बिबै नाँसर एह्‍याइ।
MAR 11:12 चए प्‍हँन्हाँग्धों खेंमैं बेथानिया बिबै नाँसउँइँले खरिमा येशूलाइ फो ख्रेंइ।
MAR 11:13 झाइले येशूजी ह्रेंगोर प्हो झ्वाम्‍मा तबै तुँबुए धुँ घ्रि म्रोंसि चर रो रोइमुँ उ बिसि ङ्‌ह्‍योबर ह्‍यामा येशूजी च धुँर प्हो मत्‍त्रे म्रोंइ, तलेबिस्याँ तुँबुए रो रोबै त्हे आतल।
MAR 11:14 छाब् म्रोंसि खीजी च तुँबुए धुँने बिइ, “तारे क्हिउँइँले खाबज्यै रोमैं चल् आयोंरिगे।” छ बिब खीए चेलामैंइ थेइ।
MAR 11:15 झाइले खेंमैं यरूशलेमर फेनेबै लिउँइँ येशू मन्दिर न्होंर होंसि चर छों लबै म्‍हिमैं बैरु तेवाइ। धै मुइ त्हेब्मैंए टेबलमैं नेरो तोंगु चुँब्मैं क्हुँबै सैमैं भ्योंवाइ।
MAR 11:16 झाइले खीजी छों लब्मैं खाबलाज्यै या मन्दिरए ह्‍युउँइँले प्रल् आपिं।
MAR 11:17 झाइले खीजी म्‍हिमैं लोमिंदै बिइ, “ङए धिं ‘ताँन् ह्रेंमैंए प्राथना लबै धिं तब्मुँ’ बिसि परमेश्‍वरए छ्वेर प्ह्रिइमुँ: दिलेया क्‍हेमैंइ चु धिं ह्‍योमैं टिबै क्‍ल्‍ह्‍यो ग लन।”
MAR 11:18 चु ताँ थेसि ख्रो पिंबै खेगि चिब्मैं नेरो शास्‍त्रिमैंइ “चलाइ खैले सैब् ङ्‍हे” बिसि घ्याँ म्हैबर होंइ, दिलेया येशू म्रोंसि चमैं ङ्हिंमल तलेबिस्याँ ताँन् म्हिमैंइ खीए ताँमैं थेसि अचम्‍मा ङ्हाँरिल।
MAR 11:19 झाइले म्‍हुँइँस तबै लिउँइँ येशू सहर बैरु त्‍होंह्‍याइ।
MAR 11:20 चए प्‍हँन्हाँग्धों न्‍हाँगर खेंमैं च घ्‍याँन् तसि खमा च तुँबुए धुँ जरउँइँले कारह्‍याब खेंमैंइ म्रोंइ।
MAR 11:21 छतब म्रोंसि पत्रुसइ तेल्‍बै ताँ मैंसि येशूने बिइ, “ओ गुरु, ङ्‌ह्‍योत्ति, क्‍हिजी सराप झोंबै तुँबुए धुँम् कारह्‍यान।”
MAR 11:22 येशूजी चमैंने बिइ, “परमेश्‍वरए फिर भर थेंस्‍याँ तोन्‍दोंरि सै तल् खाँम्।
MAR 11:23 क्ह्रोंसेंन ङ क्हेमैंने बिमुँ, खाबज्यै ह्रोंसए सैं न्‍होंर तोइ संका आलल्‍ले ह्रोंसइ बिबै ताँ खैले बिलेन् तम् बिसि बिश्‍वास लसि चु कोंने ‘क्‍हि छुइले स्‍योसि तालर तेह्‍याद्,’ बिलेन चए ल्हागिर छान् तम्।
MAR 11:24 छतसि ङ क्हेमैंने बिमुँ, क्‍हेमैंइ प्राथना लमा तो सै ह्रिलेया योंल् खाँइ बिसि बिश्‍वास लद्, छलस्याँ क्हेमैइ ह्रिबै सै योंब्‍मुँ।
MAR 11:25 झाइले स्‍वर्गर टिबै परमेश्‍वर आबाजी क्‍हेमैंइ लबै पाप क्षमा लमिंरिगे बिसि क्‍हेमैंइ प्राथना लमा खाब्ने या तोइ आक्‍ह्रिबै ताँमैं मुँस्‍याँ च म्‍हिलाइ क्षमा पिंन्।
MAR 11:26 [क्‍हेमैंइ अरूमैं क्षमा आलस्‍याँ स्‍वर्गर टिबै क्‍हेमैंए परमेश्‍वर आबाज्‍यै या क्‍हेमैंइ लबै पाप क्षमा लरिब् आरे।]”
MAR 11:27 झाइले खेंमैं धबै यरूशलेमर फेखसि येशू मन्दिर न्‍होंर छाइ छुइ प्ररिमा ख्रो पिंबै खेगि चिब्मैं, शास्‍त्रिमैं नेरो चिबनाँब्मैं खी ङाँर खसि
MAR 11:28 “छों लब्मैंलाइ ल्हावाब क्‍हिने तोए हग मुँ? च्हौ थेबै हग क्हिलाइ खाबइ पिंल?” बिसि येशूने ङ्योएइ।
MAR 11:29 येशूजी चमैंने बिइ, “ङइ क्‍हेमैंने ताँ घ्रि ङ्योएम्, क्‍हेमैंइ ङए ताँए ज्वाफ पिंइबिस्‍याँ ङइ खाबै हग योंसि चु के लम् बिसि क्‍हेमैंने बिम्।
MAR 11:30 लु बित्ति, यूहन्‍नाइ बप्‍तिस्मा पिंबै हग स्‍वर्गउँइँले योंइ उ म्‍हिमैंउँइँले योंइ?”
MAR 11:31 चु ताँ थेसि चमैं खें-खेंमैंन् छ बिसि ताँ लबर होंइ, “ङ्योइ ‘स्वर्गउँइँले’ बिइ बिस्‍याँ, ‘क्‍हेमैंइ यूहन्‍नाए फिर तले बिश्‍वास आलल?’ बिसि चइ बिब्‍मुँ।
MAR 11:32 दिलेया ‘म्‍हिमैंउँइँले हग योंब् ग’ बिब आत!” तलेबिस्याँ चर्बै म्‍हिमैं म्रोंसि चमैं ङ्हिंमल, तलेबिस्याँ ताँन् म्हिमैंइ यूहन्‍ना क्‍ह्रोंसेंन्‍बै अगमबक्‍ता ग बिमल।
MAR 11:33 छतसि चमैंइ येशूने, “ङिंइ आसे,” बिइ। झाइले येशूजी चमैंने बिइ, “ङज्‍यैया खैबै हगले चु के लमुँ बिसि क्‍हेमैंने आबि।”
MAR 12:1 झाइले खीजी चमैंने अहान झोंबर होंइ, “म्‍हि घ्रिइ अँगुरए खेति लसि च खेतिए कारग्युले बार थोइ, धै होंल्दों तासि अँगुर म्हाबै कोल घ्रि बनेसि म्रों रुँबै म्हि टिबै ल्हागिर टउ घ्रि या बनेइ। झाइले म्रों आधेर पिसि च क्‍ल्‍हे आगुए ह्‍युलउँइँ ह्‍याइ।
MAR 12:2 झाइले रोमैं खुबै त्हेर म्रोंए क्‍ल्‍हेइ ह्रोंसए योंल् त्‍हुबै भाउ किंबर के लबै म्हि घ्रि कुलइ।
MAR 12:3 दिलेया च आधे लबै म्‍हिमैंइ चलाइ बेल्‍ले धोंसि क्होत्तेन् ल्‍हामिंइ।
MAR 12:4 झाइले च क्‍ल्‍हेइ अर्को के लबै म्हि चमैं ङाँर कुलइ, दिलेया चमैंइ चए क्रर प्रिंसि चए आब्रु वाइ।
MAR 12:5 च क्‍ल्‍हेइ धबै अर्को के लबै म्हि कुलइ, चलाज्यै या चमैंइ सैवाइ। छलेन अरू के लबै ल्‍हें म्हिमैं कुलइ, दिलेया आधे लब्‍मैंइ कोइ धोंवाइ, कोइ सैवाइ।
MAR 12:6 तारे च क्‍ल्‍हेल कुल‍बै ल्हागिर ह्रोंसइ खोबै च्‍ह घ्रि मत्‍त्रे चैल। छतसि ‘चमैंइ ङए च्‍ह मान् ललै’ ङ्हाँसि ताँन् भन्दा लिउँइँ ह्रोंसए च्‍ह कुलइ।
MAR 12:7 दिलेया च आधे लब्‍मैंइ क्‍ल्‍हेए च्‍ह खरिब् म्रोंसि खेंमैं खेंमैंन् छ बिइ, ‘चुम् क्‍ल्‍हेए च्‍ह ग। खो, चु सैवाले, धै चुए ताँन् क्‍ल्‍ह्‍यो ङ्योए हग तब्‍मुँ।’
MAR 12:8 झाइले चमैंइ चलाइ क्‍हासि सैसि अँगुर म्रोंए बैरु भ्‍योंवाइ।
MAR 12:9 “छतसि म्रोंए क्‍ल्‍हेइ तो ललै? खी खसि च आधे लब्‍मैं सैवाब्‍मुँ, धै च अँगुरए म्रों अरू आधे लब्‍मैंने पिंब्‍मुँ।
MAR 12:10 क्‍हेमैंइ परमेश्‍वरए छ्वेर चु ताँ आखेइमुँ वा? ‘धिंए गारा झोंबै म्‍हिमैंइ केर आफे बिबै युँमान्, जगर्बै युँमा तइ।
MAR 12:11 चु ताँन् के याहवेहजी लमिंब् ग। ङ्योए ल्हागिर चु के अचम्मबै मुँ।’”
MAR 12:12 खीजी बिबै अहान् खेंमैंए बिरोधर बिब् ग, बिसि चमैंइ क्होइ। छतसि यहूदी चिबनाँब्मैंइ येशू क्‍हाबै सैं लइ। दिलेया म्हिए हुल म्रोंसि चमैं ङ्हिंबइले येशूलाइ वाथेंसि ह्रोंसए घ्‍याँ क्‍हाइ।
MAR 12:13 च लिउँइँ येशूलाइ ताँ क्‍हासि फसेद् बिसि चिबनाँब्मैंइ फरिसीमैं नेरो हेरोदिमैं न्होंर्बै को-कोइ येशू ङाँर कुलइ।
MAR 12:14 चमैं येशू ङाँर खसि बिइ, “ओ गुरु, क्‍हि क्‍ह्रोंसेंन्बै ताँ पोंम् बिब ङिइ सेइमुँ। क्‍हि खाब् म्रोंसेया आङ्हिं तलेबिस्याँ क्‍हिजी प्लोब, ङ्हाँब, खाबलाज्यै या आफेलल्‍ले परमेश्‍वरए घ्‍याँर प्रबर छेनाले लोमिंम्। छतसि ङिइ रोमी कैसर म्रुँलाइ बालि फोब तम् उ आत?” ङिने बिमिंन्।
MAR 12:15 चमैंइ जाल लइमुँ बिब येशूजी सेसि चमैंने बिइ, “क्‍हेमैंइ तले ङलाइ ङो चुमुँ? मुइ घ्रि पसि ङने उँइँन्।”
MAR 12:16 चमैंइ मुइ घ्रि पखसि पिंमा येशूजी चमैंने बिइ, “चु मुइर खाबै छाप नेरो मिं मुँ?” चमैंइ “चुम् रोमी कैसर म्रुँल् ग,” बिइ।
MAR 12:17 झाइले येशूजी चमैंने बिइ, “कैसर म्रुँलाइ पिंल् त्हुबै सैमैं म्रुँलाइन पिंनुँ, परमेश्‍वरलाइ पिंल् त्हुबै सैमैं परमेश्‍वरलाइन पिंनुँ।” येशूए ताँ थेसि चमैं प्लेटोयाइ।
MAR 12:18 झाइले म्‍हिमैं सिसि धबै सोगों आत बिबै को-कोइ सदुकीमैं येशू ङाँर खसि ङ्योएइ,
MAR 12:19 “गुरु, मोशाइ ङ्योलाइ पिंबै ठिमर छले प्‍ह्रिइमुँ, ‘कोइ म्‍हि ब्ह्‍या लसेया प्‍हसे आतल्‍ले सियाइबिस्‍याँ चए ल्हागिर प्हसे योंरिगे बिसि चए अलिइ चोंने ब्ह्‍या लल् त्हुम्,’ बिसि प्‍ह्रिथेंइमुँ।
MAR 12:20 छलेन परवा घ्रिरि अलिमैं ङि मुँल। ठागुइ ओंसों ब्ह्‍या लइ, दिलेया प्‍हसे आतल्‍ले सियाइ।
MAR 12:21 झाइले म्हैलइ चोंने ब्ह्‍या लइ, दिलेया चै या प्‍हसे आतल्‍ले सियाइ। झाइले साँइलइ चोंने ब्ह्‍या लइ, चै या छलेन् सियाइ।
MAR 12:22 छलेन अलिमैं ङिन ङिन् प्‍हसे आतल्‍ले सियाइ, लिउँइँ च च्हमिरि या सियाइ।
MAR 12:23 छतसि सियाब्‍मैं धबै सोगों तसि रेखमा च च्हमिरि खाबै प्ह्रेंस्यो तलै? तलेबिस्याँ च च्हमिरि अलिमैं ङिने ब्ह्‍या लल् खाँल।”
MAR 12:24 येशूजी चमैंने बिइ, “क्‍हेमैंइ परमेश्‍वरए छ्वेर्बै ताँ आक्हो, परमेश्‍वरए शक्‍ति या आसे। छतसि क्‍हेमैंइ ताँ आक्होबन् तइ, आङिं वा?
MAR 12:25 म्‍हिमैं सिसि धबै सोगों तमा ब्ह्‍या आल, चमैं स्‍वर्गदूतमैं धोंन् तम्।
MAR 12:26 अर्को ताँ, सियाबै म्हिमैं धबै सोगों तबै बारेर क्‍हेमैंइ मोशाइ प्‍ह्रिबै ठिमरि लुँरिबै झाढिए ताँ आखेइमुँ वा? च त्हेर परमेश्‍वरजी मोशाने ‘अब्राहाम, इसहाक नेरो याकूबए परमेश्‍वर ङन् ग,’ बिल।
MAR 12:27 खी सियाबै म्हि‍मैंए परमेश्‍वर आङिं, सोगों तब्‍मैंए परमेश्‍वर ग। क्‍हेमैंम् तिफुँइ ताँ आक्होब्मैं मुँन।”
MAR 12:28 शास्‍त्रिमैं न्होंर्बै म्हि घ्रि चर खमा म्हिमैंइ ङ्योएबै ताँमैंए ज्वाफ येशूजी छेनले पिंब् थेसि शास्‍त्रिइ खीने “मोशाइ पिंबै ठिमर्बै ताँमैं न्‍होंरि ताँन् भन्दा थेबै ताँ तो जा?” बिसि ङ्योएइ।
MAR 12:29 येशूजी बिइ, “ताँन् भन्दा थेबै ताँ चुन् ग, ‘ओ इस्राएलीमैं थेद्! ङ्योए याहवेह परमेश्‍वर घ्रि मत्‍त्रे मुँबै परमेश्‍वर ग।
MAR 12:30 क्हिइ ह्रब्दे सेब्दे, खाँब्दे, सैं न्होंउँइँले, खों न्होंउँइँले ह्रोंसए याहवेह परमेश्‍वरलाइ म्हाँया लद्।’
MAR 12:31 अर्को आज्ञा चुन् ग, ‘क्हिइ ह्रोंसए ङ्‍हेब्मैं ह्रोंसलाइ धोंले म्हाँया लद्।’ चु आज्ञा ङ्हिं भन्दा थेब अरू तोइ आरे।”
MAR 12:32 शास्त्रिइ धबै येशूने बिइ, “गुरु, क्‍हिजी छ्याँबै ताँ बिइ, तलेबिस्याँ परमेश्‍वर घ्रि मत्‍त्रे मुँ, खी बाहेक अरू खाबै आरे।
MAR 12:33 छतसि क्हिइ ह्रब्दे सेब्दे, खाँब्दे, सैं न्होंउँइँले, खों न्होंउँइँले परमेश्‍वरए म्हाँया लद्। धै ह्रोंसए ङ्‍हेब्मैं ह्रोंसलाइ धोंलेन् म्हाँया लल् त्‍हुम्। चु ताँ ङ्हिं ताँन् खालर्बै ख्रो पिंब् भन्दा थेब् ग।”
MAR 12:34 च शास्त्रिइ छले ह्रब् सेल्‍ले ज्वाफ पिंब् थेसि येशूजी चने बिइ, “क्‍हि परमेश्‍वरए ग्याल्सउँइँले ह्रेंगो आरे।” च त्हेसेरो खाबज्यै या येशूने ताँमैं ङ्योएबै आँट आल।
MAR 12:35 झाइले येशूजी मन्दिरर लोमिंमा बिइ, “‘परमेश्‍वरजी कुल्मिंबै म्रुँ ख्रीष्‍ट दाऊदए सन्‍तान ग,’ बिसि शास्‍त्रिमैंइ तले बिमुँ?
MAR 12:36 परमेश्‍वरए पबित्र प्ल्हजी दाऊदने चु ताँ बिद् बिसि परमेश्‍वरजी कुल्मिंबै म्रुँए बारेर छ बिल, ‘ङइ क्‍हिए शत्तुरमैं क्‍हिए प्‍हले न्‍होंर आथेंन् समा क्‍हि ङए क्‍योलोउँइँ टिद्। बिसि याहवेहजी ङए प्रभुने बिल।’
MAR 12:37 छले दाऊदइ ख्रीष्‍टने ‘ङए प्रभु’ बिम् बिस्‍याँ च म्रुँ खैले दाऊदए सन्‍तान तल् खाँम्?” झाइले म्हिए हुलइ येशूए ताँ सैं तोंन्‍ले थेरिल।
MAR 12:38 येशूजी ताँ लोमिंमा छले बिइ, “शास्त्रिमैंने न्हक्रों मिक्रोले टिद्। चमैं म्‍हिमैंइ मान् लरिगे बिसि ह्रिंग्‍यो क्‍वें खिसि सहरजरे छाइ माइ प्ररिम्।
MAR 12:39 चमैंइ च्हों धिंजरे नेरो भोज चबै क्‍ल्‍ह्‍योजरे मान् योंरिगे ङ्हाँमुँ।
MAR 12:40 चमैंइ ङ्हाँदु म्हरेस्योमैंए क्‍ल्‍ह्‍यो न्‍हें लुडिम्, दिलेया फिब्लो पार्दिसि ह्रिंग्‍यो ह्रिंग्‍यो प्राथना लम्। छाबै म्हिमैंइ परमेश्‍वरउँइँले झन् ल्‍हें दण्‍ड योंब्‍मुँ।”
MAR 12:41 येशू मन्दिरर भेटि झोंबै बाकसए चेंदो क्हुँसि म्‍हिमैंइ बाकसर भेटि झोंरिब ङ्‍ह्‍योरिमा प्लोबै म्‍हिमैंइ मुइ ल्‍हें झोंइ।
MAR 12:42 झाइले ङ्हाँदु म्हरेस्यो घ्रि खसि क्युराए मुइ ङ्हिफुँ झोंइ।
MAR 12:43 छाब् म्रोंसि येशूजी खीए चेलामैं खी ङाँर हुइसि बिइ, “क्ह्रोंसेंन ङ क्हेमैंने बिमुँ, चु बाकसर भेटि झोंबै म्‍हिमैंए न्‍होंरि चु ङ्हाँदु म्हरेस्योइ ताँन् भन्दा ल्‍हें झोंइ।
MAR 12:44 तलेबिस्याँ अरू म्‍हिमैंइ खेंमैंने ल्हें मुँबइले ल्हेंन् झोंइ, दिलेया चु म्हरेस्यो ङ्हाँदु तलेया ह्रोंसने तिंफुँइ आचैल्‍ले ताँन् झोंवाइ।”
MAR 13:1 झाइले येशू मन्दिरउँइँले त्‍होंमा खीए चेलामैं न्‍होंर्बै घ्रिइ खीने बिइ, “ओ गुरु, ङ्‌ह्‍योत्ति, च्हौ थे-थेबै मन्दिरर्बै युँमामैं नेरो थे-थेबै धिंमैं।”
MAR 13:2 येशूजी चने बिइ, “क्‍हिइ तोगो थे-थेबै छ्याँबै धिंमैं म्रोंइमुँ? प्‍हँना लिउँइँ चु मन्दिरर्बै युँमा घ्रि या खीए क्‍ल्‍ह्‍योर तरिब् आरे, घ्रि या आचैल्‍ले ताँन् गारामैं फुह्‍याब्‍मुँ।”
MAR 13:3 झाइले येशू मन्दिरए दे क्‍याइ जैतून बिबै कोंर क्हुँरिमा पत्रुस, याकूब, यूहन्‍ना नेरो अन्‍द्रियासइ खाबज्यै आसेल्‍ले येशूने ङ्योएइ,
MAR 13:4 “चु छाबै त्हिंइ खोंयों तब्मुँ? झाइले छ तबै त्हेर खैबै चिनुमैं तब्मुँ? ङिने बिमिंन्।”
MAR 13:5 येशूजी चमैंने बिइ, “न्ह क्रों मि क्रोंले टिद्, खाबज्‍यै या क्‍हेमैंलाइ लुल् आपिंन्।
MAR 13:6 ल्‍हें म्‍हिमैं ङए मिं किंसि, ‘ङ परमेश्‍वरजी कुलबै म्रुँ (ख्रीष्‍ट) ग,’ बिसि खब्‍मुँ, धै ल्‍हें म्‍हिमैं लुवाब्‍मुँ।
MAR 13:7 प्होंब् नेब् तब क्हेमैंइ म्रोंब्मुँ, ‘प्होंब् नेब् तरिइमुँ रो’ बिब थेब्‍मुँ, दिलेया क्हेमैं आङ्हिंन् तलेबिस्याँ चु तलन् त्हुम्। छान् तलेया नास तबै त्हे अझै आतइमुँ।
MAR 13:8 तलेबिस्याँ ह्रें-ह्रेंए म्‍हाँजोर प्होंब् कैब् तब, ग्याल्स ग्याल्सए न्होंर प्होंब् नेब् तब्‍मुँ क्‍ल्‍ह्‍यो क्‍ल्‍ह्‍योरि सयो ख‍ब्मुँ, अँङ्गल् तब्‍मुँ। दिलेया चु ताँन् सैमैं भर्खर सुत्‍केरि बेथा ल्हैदिब् धों मत्‍त्रे ग।
MAR 13:9 “क्‍हेमैं ह्रोंसए ल्हागिरि न्ह क्रों मिक्रोंले टिद्। तलेबिस्याँ म्‍हिमैंइ क्‍हेमैं क्‍हासि म्हि च्होंए उँइँर बोब्‍मुँ, झाइले च्हों धिंजरे क्‍हेमैं धोंब्‍मुँ। ङए फिर बिश्‍वास लबइले क्हेंमैंइ ङए बारेर ग्वाइ पिंबर क्रथेमैं नेरो म्रुँमैंए उँइँर राल् त्हुब्मुँ।
MAR 13:10 झाइले परमेश्‍वरउँइँले खबै सैं तोंबै ताँ ताँन् ह्रेंर्बै म्हिमैंने बिल् त्हुब्मुँ।
MAR 13:11 म्हिमैंइ क्‍हेमैंलाइ क्‍हासि बोयामा ‘तो बिब् ड्हे,’ बिसि क्‍हेमैं न्हुँ आलद्। तलेबिस्याँ च त्हेर्न परमेश्‍वरजी क्हेमैंने ‘पोंन्’ बिबै ताँ पोंन्। क्‍हेमैंइ पोंब आङिं, परमेश्‍वरए पबित्र प्ल्हजी पोंब् ग।
MAR 13:12 “च त्हेरि ह्रोंसए त्येमैं न्होंर्न घ्रिइ घ्रि सैबर पिंवाब्‍मुँ, छलेन आबा आमाइ च्‍ह च्हमि, च्‍ह चमिंमैंइ आबा आमा सैबर पिंवाब्‍मुँ।
MAR 13:13 ङए फिर बिश्‍वास लब्मैं तबइले ताँनइ क्‍हेमैं हेल् लब्‍मुँ। दिलेया लिउँइँ समा दुःख सैदिसि ढुक्‍कले टिब्मैं जोगेल् योंब्‍मुँ।
MAR 13:14 “क्हेमैंइ ‘नास लबै छेरन् तबै सै’ तल् आत्हुबै क्ल्ह्‍योर तब् म्रोंमा (चु ताँ खेबै म्‍हिइ क्‍होरिगे।) क्हेमैं यहूदीया ह्‍युलर मुँब्‍मैं कोंउँइँ भौदिल् त्हुब्मुँ।
MAR 13:15 कौसिर मुँब्‍मैं तो-तो सैमैं ट्हुइब् बिसि धिं न्होंर आहोंरिगे।
MAR 13:16 छलेन म्रोंर मुँब्‍मैं या ह्रोंसए खिबै क्‍वेंमैं किंब् बिसि धिंर आएरिगे।
MAR 13:17 च त्हेर फोर प्‍हसे नोब्‍मैं नेरो ङ्हे तिंबै आमामैंए ल्हागिर ओंछेमैं बेल्‍ले गारो तब्‍मुँ।
MAR 13:18 छतसि खुँबै त्हेर भौदिल् आत्हुरिगे बिसि प्राथना लद्।
MAR 13:19 तलेबिस्याँ च त्हेर तब् धों तबै दुःख परमेश्‍वरजी ह्‍युल केमिंब् ओंनोंबै तिंयाँ समा खोंयोंइ आतइमुँ, लिउँज्यै या छाबै दुःख खोंयोंइ तरिब् आरे।
MAR 13:20 परमेश्‍वरजी च दुःख तबै त्हे आघटिमिंस्‍याँ खाबै या सोल् आखाँमल। दिलेया परमेश्‍वरजी खीजी त्‍हाँबै म्‍हिमैंए ल्हागिर च त्हे घटिमिंइ‍मुँ।
MAR 13:21 “च त्हेर क्‍हेमैंने खाबज्यै ‘ङ्‍ह्‍योत्ति! परमेश्‍वरजी कुल्मिंबै म्रुँ ख्रीष्‍ट चुर मुँ, चर मुँ’ बिस्याँ चए ताँ आक्वेंन्।
MAR 13:22 तलेबिस्याँ ‘परमेश्‍वरजी कुल्‍मिंबै म्रुँ ङन् ग’ बिब्‍मैं नेरो ‘अगमबक्‍ता ङन् ग’ बिसि स्‍योर तेब्मैं ल्‍हें त्‍होंब्‍मुँ। परमेश्‍वरजी त्‍हाँबै म्‍हिमैंलाइ खाँन् समा लुबै ल्हागिर स्योलिबै ताँ बिब्मैंइ औदिबै चिनुमैं नेरो केमैं लब्‍मुँ।
MAR 13:23 छतसि क्‍हेमैं न्हक्रों मिक्रोंले टिद्। प्‍हँना लिउँइँ तबै तोन्दोंरि ताँमैं ङइ ओंसोंन् क्‍हेमैंने बिमिंइमुँ।
MAR 13:24 “च थेबै दुःख तबै लिउँइँ त्‍हिंयाँ म्‍हुँइँस छु तयाब्मुँ, धै लयाँए चारबै या म्हह्‍याब्मुँ।
MAR 13:25 मुर्बै सारमैं खारह्‍याब्‍मुँ, झाइले मुर्बै शक्‍तिमैं या लायाब्‍मुँ।
MAR 13:26 च लिउँइँ म्हिए च्ह बेल्‍ले थेबै शक्‍तिर नेरो बेल्‍ले म्हारल्‍ले न्हाँम्स्योए म्हाँजोर युरिब म्‍हिमैंइ म्रोंब्मुँ।
MAR 13:27 झाइले खीजी स्वर्गदूतमैं स नेरो मुर खन्तोदोंन् कुलब्मुँ, धै खीजी त्‍हाँबै म्‍हिमैं खन्तोदोंनउँइँले खागु लब्मुँ।
MAR 13:28 “छतसि क्‍हेमैंइ तुँबुए धुँमैंउँइँले लोद्। चए हाँगर कलिलो प्‍होमैं पलिदिब् म्रोंमा क्‍हेमैंइ बर्ष होंखन बिसि सेम्।
MAR 13:29 छलेन क्‍हेमैंइ चु ताँमैं तरिब् म्रोंमा खी चेंदोन् मुँ, युबि छेइमुँ बिसि सेद्।
MAR 13:30 क्ह्रोंसेंन ङ क्हेमैंने बिमुँ, चु तोन्दोंरि ताँ आतन् समा चु पुस्ता नास तरिब् आरे।
MAR 13:31 स्‍वर्ग नेरो पृथ्‍बी नास तयाब्‍मुँ, दिलेया ङए ताँ खोंयोंन् बिलै तरिम्।
MAR 13:32 “ह्‍‍युल नास तबै त्हे नेरो त्हिंइ आबाइ मत्‍त्रे सेइमुँ। स्‍वर्गर टिबै स्‍वर्गदूतमैंज्यै आसे, परमेश्‍वरए च्‍हज्यै या आसे।
MAR 13:33 छतसि न्हक्रों मिक्रोंले टिदु धै प्राथना लद्, तलेबिस्याँ च त्हे खोंयों तम् बिसि क्‍हेमैंइ आसे।
MAR 13:34 च त्हे चु अहान् धों तब् ग। म्‍हि घ्रिइ ह्रोंसए के लब्मैंने छ छ लद् ओ बिसि खें-खेंमैंए के फेलमिंसि ‘क्‍हेमैं छेन्‍ले टिद् ओ’ बिसि धिंउँइँले स्‍युरबर ह्‍याब् धों तब् ग।
MAR 13:35 छतसि क्हेमैं या न्हक्रों मिक्रोंले टिदु तलेबिस्याँ धिंए क्ल्हे ङेसर खम् उ, म्हुँइँस आधार खम् उ, नग ओरबै त्हेर खम् उ, प्‍हँन्हाँग्धों न्‍हाँगर खम् उ, खोंयों खम्? बिसि क्‍हेमैंइ आसे।
MAR 13:36 आस्याँ क्हेमैंए सैंरै आमैंबै त्हेर खस्याँ क्‍हेमैं न्‍हरु च्‍हुइरिब स्‍यालै।
MAR 13:37 छतसि ङइ क्‍हेमैंने बिब् धोंलेन्, ताँन् म्हिमैंने ‘न्हक्रों मिक्रोंले टिद्!’ बिमुँ।”
MAR 14:1 दुःखने फ्रेबै चाड नेरो प्लेढा आझोंबै क्हें चबै त्हिंइ खब ङ्हिरो चैल। ख्रो पिंबै खेगि चिब्मैं नेरो शास्‍त्रिमैंइ खाबज्यै आसेल्‍‍ले येशूलाइ खैले क्हासि सैब् ङ्‍हे बिसि घ्‍याँ म्‍हैरिल।
MAR 14:2 दिलेया “चाडए त्हेर ङ्योइ छ लल् आत। छ लइ बिस्याँ म्‍हिमैंए म्‍हाँजोर खैलाबैला तब्मुँ बिसि,” शास्त्रिमैंइ बिल।
MAR 14:3 च त्हेर येशू बेथानिया बिबै नाँसर सिमोन बिबै कोर खबै म्‍हि घ्रिए धिंर कैं चबर क्हुँमा च्हमिरि घ्रिइ सिङ्गमरमरए सिसा घ्रिर जटामसि बिबै सै ल्हें फेबै अत्तर पखइ। धै चइ सिसा तिसि येशूए क्रर अत्तर युमिंइ।
MAR 14:4 “चु अत्तर तले छले नोक्सन लगे? बिसि को-कोइ ह्रिस लसि खेंमैंए न्होंरि बिबर होंइ।
MAR 14:5 तलेबिस्याँ चु अत्तर चाँदिए सोंब्रार भन्दा ल्हेर चुँसि योंबै मुइ ङ्हाँदु‍मैंलाइ पिंल् खाँमल,” बिसि चमैंइ च च्हमिरिलाइ हौदिइ।
MAR 14:6 दिलेया येशूजी चमैंने बिइ, “मुँरिगे! क्हेमैं तले चुलाइ हौदिरिल? ङए ल्हागिर चुइ छ्याँबन् लइमुँ।
MAR 14:7 तलेबिस्याँ ङ्हाँदुमैं क्‍हेमैंने खोंयोंन् बिलै तरिब्‍मुँ। क्‍हेमैंइ चमैंलाइ तोइ पिंदा ङ्हाँस्‍याँ खोंयों पिंलेन् खाँम्। दिलेया ङम् खोंयोंइ या क्‍हेमैंने आत।
MAR 14:8 चु च्हमिरिइ तो लल् खाँमुँ चन् लइ। चइ अत्तर फोमिंसि ङए ज्यु पाबै ल्हागिर तयार लइमुँ।
MAR 14:9 क्ह्रोंसेंन ङ क्हेमैंने बिमुँ, परमेश्‍वरउँइँले खबै सैं तोंबै ताँ म्हिमैंइ ह्‍युल तिगोंन् बिप्रमा चु च्हमिरिलाइ मैंबै ल्हागिर चइ लबै केए बयनै या लब्‍मुँ।”
MAR 14:10 झाइले च्युसे ङ्हिं चेलामैं न्‍होंर्बै इस्‍करयोतथें यहूदाइ येशू क्हासि चमैंए योर पिंबै ल्हागिरि ख्रो पिंबै खेगि चिब्मैं ङाँर ह्‍याइ।
MAR 14:11 चए ताँ थेसि चमैं बेल्‍ले सैं तोंसि चलाइ “मुइ पिंस्‍यो” बिबै बाछा लइ। छतसि चइ येशू खैले क्हाब् ङ्‍हे बिसि घ्याँ म्हैबर होंइ।
MAR 14:12 प्लेढा आझोंबै क्हें चबै चाडए ओंसोंबै त्हिंइर दुःखने फ्रेबै चाडए ल्हागिर चमैंइ क्‍यु ख्रो पिंमल। छतसि येशूए चेलामैंइ “ङि खनिर ह्‍यासि क्हिए ल्हागिर दुःखने फ्रेबै चाडए भोज तौदु लले? क्‍हिए सैं तो मुँ? बिसि,” खीने ङ्योएइ।
MAR 14:13 झाइले येशूजी ह्रोंसए चेलामैं न्‍होंर्बै ङ्हिंने बिइ “सहरर ह्‍याद्, चर ह्‍यामा गौरिर क्‍यु खासि ह्‍यारिबै म्हि घ्रि क्हेमैंइ त्होब्‍मुँ। चए लिलि ह्‍याद्।
MAR 14:14 झाइले च म्‍हि होंबै धिंए क्‍ल्‍हेने छ बिद्, ‘ङए चेलामैंने बालु दुःखने फ्रेबै चाडए भोज चबै कोठा खनिर जा? बिसि गुरुजी ङ्योएइमुँ।’
MAR 14:15 छबिमा चैदिबै सैमैं तौदु लथेंबै फिर्बै तलर कोठा घ्रि चइ क्‍हेमैंलाइ तेंब्‍मुँ। चर्न क्‍हेमैंइ ङ्योए ल्हागिरि भोज तौदु लद्।”
MAR 14:16 झाइले चेलामैं ङ्हिं सहरर ह्‍यामा तोन्दोंरि सै खीजी बिब् धोंलेन् स्याइ, धै चमैंइ चर्न दुःखने फ्रेबै चाडए भोज तौदु लइ।
MAR 14:17 झाइले ङेसा तमा खी च्युसे ङ्हिं चेलामैंने च कोठार खइ।
MAR 14:18 खेंमैं चब् चरिमा येशूजी बिइ, “क्ह्रोंसेंन ङ क्हेमैंने बिमुँ, क्‍हेमैंए न्‍होंरि ङने बालु चबै म्‍हि घ्रिइ ङलाइ क्हाल् पिंब्मुँ।”
MAR 14:19 छ बिब् थेसि चेलामैं दुःख म्हाँदिसि पलो पलोले क्हिलाइ क्हाल् पिंबै म्हि “ङ उ?” बिसि येशूने ङ्योएबर होंइ।
MAR 14:20 येशूजी चमैंने बिइ, “क्हेमैं च्युसे ङ्हिं चेलामैं न्‍होंर्बै थलिर क्हें प्ल्हुँसि ङने बालु चरिबै म्हि घ्रिइ छ लब्मुँ।
MAR 14:21 परमेश्‍वरए छ्वेर म्हिए च्हए बारेर प्ह्रिब् धोंले तलन् त्‍हुम्। दिलेया म्हिए च्हलाइ धोका पिंबै म्हि आफिबन् स्वाब तमल।”
MAR 14:22 झाइले खेंमैं भोज चरिमा येशूजी क्‍हें छेसि परमेश्‍वरलाइ धन्यबाद पिंसि क्हें लुँइ, धै चेलामैंलाइ चुमिंदै बिइ, “किंन्, चु ङए ज्यु ग।”
MAR 14:23 छलेन खीजी प्‍हेला किंसि परमेश्‍वरलाइ धन्‍यबाद पिंसि चमैंलाइ पिंइ, धै चमैं ताँनइ च प्हेलाउँइँले थुँइ।
MAR 14:24 झाइले खीजी चमैंने बिइ, “चु परमेश्‍वरजी फैबै बाछार्बै ङए को ग। ल्‍हें म्‍हिमैंए पाप क्षमा तरिगे बिसि ङए को बगेब्मुँ।
MAR 14:25 क्ह्रोंसेंन ङ क्हेमैंने बिमुँ, परमेश्‍वरए ग्याल्सर छारा तरिकाले आथुँन् समा ङइ अँगुरए खुगु धबै खोंयोंइ थुँरिब् आरे।”
MAR 14:26 झाइले खेंमैं भजन घ्रि प्रिंसि जैतून बिबै कोंउँइँ ह्‍याइ।
MAR 14:27 झाइले येशूजी चमैंने बिइ, “तारे क्‍हेमैंइ ङलाइ वाथेंसि ह्‍याब्‍मुँ तलेबिस्याँ परमेश्‍वरए छ्वेर छले प्‍ह्रिइमुँ, ‘ङइ प्‍ह्रोंछैं सैवाब्‍मुँ, धै क्‍युमैं सोग्याँ प्हुँग्या तयाब्‍मुँ।’
MAR 14:28 छान् तलेया ङ सिसि धबै सोगों तसि क्‍हेमैं भन्दा ओंसोंन् गालील ह्‍युलर ह्‍याब्‍मुँ।”
MAR 14:29 छबिमा पत्रुसइ येशूने बिइ, “ताँनइ क्‍हि पिथेंलेया ङइ खोंयोंइ क्हि पिरिब् आरे।”
MAR 14:30 येशूजी पत्रुसने बिइ, “क्ह्रोंसेंन ङ क्हिने बिमुँ, तिंयाँबै म्‍हुँइँसर्न नग भाले ङ्हिखे ओरब् ओंसों सोंखे समा क्‍हिइ ङलाइ ङो आसे बिब्मुँ।”
MAR 14:31 दिलेया पत्रुसइ झन् ओरसि बिइ, “ङ क्‍हिने बालुन् सिल् त्‍हुलेया ङइ क्‍हि ङो आसे बिरिब आरे!” बिमा अरू चेलामैंज्‍यै या छान् बिइ।
MAR 14:32 च लिउँइँ खेंमैं गेतसमनि बिबै बगैंचार ह्‍यासि खीजी ह्रोंसए चेलामैंने बिइ, “ङइ प्राथना लरिन् समा क्‍हेमैं चुर्न टिरिद् ओ।”
MAR 14:33 बिसि पत्रुस, याकूब नेरो यूहन्‍ना खीने बालुन् बोइ। च्हमा खीए सैंर सैदिल् आखाँबै दुःख तसि बेल्‍ले आतिदिरिल।
MAR 14:34 खीजी चमैंने बिइ, “ङए सैंर्बै शोकइ लमा ङए सैं आचि-आचि ङ्हाँसि बेल्‍ले न्हुँ खइमुँ। क्‍हेमैं चुर न्हरु आच्हुइल्‍ले टिरिद्।”
MAR 14:35 बिसि खी दे क्‍याइ ह्‍यासि सर पत्खु तसि “तल् खाँम् बिस्‍याँ चु दुःखए त्हे ङ ङाँइँले स्योमिंनु,” बिसि प्राथना लइ।
MAR 14:36 “ओ आबा, क्‍हिजी लल् आखाँबै सै तोइ आरे। छतसि चु दुःख ङ ङाँइँले स्‍योमिंनु। दिलेया ङए सैंर मैंब् धोंले आङिं, क्‍हिए सैंर मैंब् धोंले तरिगे।”
MAR 14:37 खी प्राथना लसि चेलामैं ङाँर एखमा चमैं न्‍हरु च्‍हुइरिब् स्याइ। छतब् स्यामा खीजी पत्रुसने बिइ, “ओ सिमोन, क्‍हि न्‍हरु च्‍हुइरिल् वा? घण्टा घ्रि या न्हरु आच्हुइल्‍ले टिल् आखाँ वा?
MAR 14:38 दुष्‍टइ क्‍हेमैंलाइ पापर आच्होरिगे बिसि न्हरु आच्हुइल्‍ले प्राथना लद्। क्‍हेमैंए सैंइ खाँलै ङ्हाँम्, दिलेया ज्युइ बिस्याँ आखाँ।”
MAR 14:39 येशू धबै ह्‍यासि ओंसोंबै धोंलेन् प्राथना लइ।
MAR 14:40 धबै एखमा खीजी चमैं न्‍हरु च्‍हुइरिब् स्‍याइ। तलेबिस्याँ चमैंए मि न्हरुइ फैल् आखाँल। छतसि “खीने तो ज्वाफ पिंब् ङ्‍हे?” बिसि चमैंइ था आसेल।
MAR 14:41 सोंखेबै लारै या येशू प्राथना लसि खमा छाबन् स्‍याइ। छतसि खीजी चमैंने बिइ, “क्‍हेमैं अझै न्‍हरु च्‍हुइसि भों न्हरिल् वा? तारे न्हरु आच्हुइद्। ङ्‍ह्‍योद्! म्हिए च्ह पापिमैंए योर पिंवाबै त्हे तइ।
MAR 14:42 रेद्, ह्‍याले। ङ्‌ह्‍योद्! ङलाइ धोका पिंसि क्हाल् पिंबै म्‍हि फेखइ।”
MAR 14:43 येशूजी छ बिइन मुँमा खीए च्युसे ङ्हिं चेलामैं न्‍होंर्बै यहूदा चर फेखइ। चने बालु सेलाँ (तरवार) नेरो प्‍हरे छेबै ल्हें म्हि या खइ। चमैं ख्रो पिंबै खेगि चिब्मैं, शास्‍त्रिमैं, नेरो यहूदीमैंए चिबनाँब्मैंइ कुलल।
MAR 14:44 च यहूदाइ ओंसोंन् च क्‍हाबै म्‍हिमैंने छ बिथेंल, “ङ ह्‍यासि म्वें लबै म्हिलाइन क्हेमैंइ क्‍हासि बोद्।”
MAR 14:45 छतसि यहूदा येशू ङाँर ह्‍यासि “ओ गुरु” बिसि येशूलाइ म्वें लइ।
MAR 14:46 झाइले चमैंइ येशूए फिर यो झोंसि येशूलाइ क्‍हाइ।
MAR 14:47 चर रारिबै म्‍हिमैं न्‍होंर्बै म्हि घ्रिइ सेलाँ ट्हुइसि ख्रो पिंबै खेगि क्रथेए के लबै म्हिए न्‍हेमें थोवाइ।
MAR 14:48 येशूजी चमैंने बिइ, “ङ ह्‍यो वा? छले क्‍हेमैं सेलाँ नेरो प्हरे छेसि ङलाइ क्हाबर खब?
MAR 14:49 ङइ ओंसों ओंनोंन् त्हिंइ ह्रोंसे मन्दिरर क्‍हेमैंलाइ लोमिंमा क्‍हेमैंइ ङलाइ आक्‍हा। दिलेया परमेश्‍वरए छ्वेर प्‍ह्रिबै ताँ पूरा तरिगे बिसि चु तखब् ग।”
MAR 14:50 च तोदोंन् चेलामैं येशूलाइ वाथेंसि भौदिह्‍याइ।
MAR 14:51 दिलेया ज्युर सुतिए क्वें मत्‍त्रे बेर्दिबै फ्रेंसि घ्रि येशूए लिलि ल्हैदिल। चमैंइ च फ्रेंसिलाज्यै या क्‍हाइ।
MAR 14:52 दिलेया च फ्रेंसि क्‍वें वाथेंसि क्‍लुँनन् भौदिह्‍याइ।
MAR 14:53 च म्हिमैंइ येशूलाइ ख्रो पिंबै खेगि क्रथे ङाँर बोइ। चर ताँन् ख्रो पिंबै खेगि चिब्मैं, चिबनाँब्मैं नेरो शास्‍त्रिमैं ताँन् थेबै म्हि च्होंर खागु तल।
MAR 14:54 पत्रुस बिस्‍याँ दे ह्रेंगोले येशूए लिलि ल्‍हैदिसि ख्रो पिंबै खेगि क्रथेए ह्‍युर फेखसि ख्रो पिंबै खेगि क्रथेए पालेमैंने मि त्‍हिबर होंइ।
MAR 14:55 झाइले ख्रो पिंबै खेगि चिब्मैं नेरो थेबै म्हि च्होंर्बै म्हिमैंइ येशूलाइ सैबै ल्हागिर खीए बिरोधर प्रमाण म्‍हैइ, दिलेया तोइ योंल् आखाँ।
MAR 14:56 ल्‍हें म्‍हिमैंइ खीए बिरोधर स्योलिबै ग्वाइ पिंइ, दिलेया चमैंए ताँ घ्रि या आक्‍ह्रिल।
MAR 14:57 को-कोइ म्‍हिमैं रासि खीए बिरोधर स्‍योर तेसि छ बिबर होंइ,
MAR 14:58 “‘म्‍हिमैंइ बनेबै चु मन्दिर फुवासि म्‍हिए योइ आबनेबै अर्को मन्दिर ङइ सोंरोर्न बनेब्‍मुँ,’ बिब ङिइ थेइ।”
MAR 14:59 दिलेया चमैंइ बिबै चु ताँ या आक्‍ह्रिल।
MAR 14:60 झाइले ख्रो पिंबै खेगि क्रथे म्हि च्होंए म्‍हाँजोर रासि “चु म्‍हिमैंइ क्‍हिए बिरोधर बिबै ताँ तो जा? क्‍हिने तोइ ज्वाफ आरे वा?” बिसि येशूने ङ्योएइ।
MAR 14:61 दिलेया येशू तोइ आबिल्‍ले टिइ, ज्वाफ घ्रि या आपिं। ख्रो पिंबै खेगि क्रथेइ धबै येशूने “क्‍हि पबित्र परमेश्‍वरए च्‍ह खीजी कुल्मिंबै म्रुँ ख्रीष्‍ट वा?” बिसि ङ्योएइ।
MAR 14:62 येशूजी “अँ ङन् ग बिइ, क्‍हेमैंइ तिगें म्हिए च्ह परमेश्‍वरए क्‍योलो हार टिरिब् नेरो न्हाँम्स्योए न्होंउँइँले युरिब् म्रोंब्‍मुँ।”
MAR 14:63 खीए ताँ थेसि ख्रो पिंबै खेगि क्रथे बेल्‍ले ह्रिस खसि ह्रोंसए क्‍वें ट्होवासि बिइ, “तारे ङ्योलाइ अरू ग्वाइ आचैदि।
MAR 14:64 चइ परमेश्‍वरए बिरोधर पोंब क्‍हेमैंइ थेइ। तारे क्‍हेमैंए सैंर तो मैंमुँ?” बिमा चमैंइ “चलाइ सैलन् त्हुम्,” बिइ।
MAR 14:65 छबिमा को-कोइ खीलाइ थुइसि खीए मि हुवासि प्रिंदै बिइ, “ल्हु, बिद्, खाबइ क्‍हिलाइ प्रिंइ?” लिउँइँ चर्बै सिपाइमैंइ येशूलाइ क्हाबोसि खीलाइ बेल्‍ले प्रिंइ।
MAR 14:66 पत्रुस ह्‍युर्न टिरिमा ख्रो पिंबै खेगि क्रथेए केब्स्यो घ्रि चर खइ।
MAR 14:67 पत्रुस मि त्‍हिरिब म्रोंसि चइ बिइ, “क्‍हि या नासरतथें येशूने मुँल।”
MAR 14:68 दिलेया पत्रुसइ “आङिं! क्‍हिइ बिबै ताँ ङइ तोइ आक्हो, तोइ आसे,” बिसि बैरुबै म्राउँइँ त्होंह्‍यामा नग भाले ओरइ।
MAR 14:69 च केब्स्योइ धबै पत्रुसलाइ म्रोंसि चर रारिबै म्‍हिमैंने “चु म्‍हिम् येशूने प्रब्मैं न्होंर्बै घ्रि ग,” बिबर होंइ।
MAR 14:70 छबिमा पत्रुसइ धबै “आङिं!” बिइ। चजरे रारिबै म्‍हिमैंइ तिस्याँदे लिउँइँ पत्रुसने बिइ, “क्‍ह्रोंसेंन क्‍हि येशूए चेलामैं न्होंर्बै घ्रि ग, तलेबिस्याँ क्‍हि गालीलथें ग।”
MAR 14:71 चमैंइ छबिमा पत्रुसइ कसम चसि बिबर होंइ, “ङइ स्‍योर तेस्‍याँ परमेश्‍वरजी ङलाइ सराप पिंरिगे! क्हेमैंइ बिबै म्‍हि ङइ ङो आसे।”
MAR 14:72 छ बिबै तोदोंन् ङ्हिखेबै लार नग भाले ओरइ। च लिउँइँ मत्‍त्रे पत्रुसइ ओंसोंन् येशूजी “तिंयाँ म्‍हुँइँसर ङ्हिखेबै लार नग भाले ओरब् ओंसोंन् सोंखे समा क्हिइ ङलाइ ङो आसे बिब्‍मुँ,” बिबै ताँ मैंसि पत्रुस बेल्‍ले क्रोइ।
MAR 15:1 झाइले न्‍हाँगर मि म्रोंबै तोदोंन् ख्रो पिंबै खेगि चिब्मैं, चिबनाँब्मैं, शास्‍त्रिमैं नेरो थेबै म्हि च्होंर खागु तबै म्हिमैंइ सल्‍ला लसि येशूलाइ फैसि पिलातस बिबै रोमी क्रथे ङाँर बोयाइ।
MAR 15:2 पिलातसइ येशूने “क्‍हि यहूदीमैंए म्रुँ वा?” बिसि ङ्योएमा खीजी चने ज्वाइ पिंइ, “क्‍हिइन छ बिरिइमुँ दि।”
MAR 15:3 ख्रो पिंबै खेगि चिब्मैंइ येशूए फिर ल्‍हें छ्याब् ल्हैदिइ।
MAR 15:4 झाइले पिलातसइ धबै येशूने बिइ, “ङ्‌ह्‍योद्! चमैंइ क्‍हिए फिर ल्‍हें छ्याब्मैं ल्हैदिरिइमुँ। चमैंइ क्हिए फिर ल्हैदिबै छ्याबल क्‍हिइ तोइ ज्वाफ आपिं वा?”
MAR 15:5 छान् बिलेया येशूजी तोइ ज्वाफ आपिं। छतमा पिलातस प्लेटोयाइ।
MAR 15:6 बर्ष ह्रोंसे दुःखने फ्रेबै चाड खमा पिलातसइ म्हिमैंइ त्हाँबै म्हि घ्रि झेलउँइँले पिमिंमल।
MAR 15:7 च त्हेर रोमी म्रुँए बिरोधर राब्मैं झेलर मुँल। चमैंइ प्होंब् नेब् लसि म्‍हिमैं सैल। चमैं न्‍होंरि बरब्‍बा बिबै म्‍हि घ्रि मुँल।
MAR 15:8 म्हिए हुल खसि पिलातसने “क्‍हिइ ओंसों लब् धोंले ङिइ त्हाँबै म्हि पिमिंन्,” बिसि बिबर होंइ।
MAR 15:9 पिलातसइ चमैंने बिइ, “क्‍हेमैंए ल्हागिर यहूदीमैंए म्रुँ पिमिंरिगे ङ्हाँइमुँ वा?”
MAR 15:10 तलेबिस्याँ ख्रो पिंबै खेगि चिब्मैंइ येशूए फिर ह्रिस म्हाँदिसि खी ङाँर पखब् ग बिसि पिलातसइ सेल।
MAR 15:11 दिलेया ख्रो पिंबै खेगि चिब्मैंइ “बरब्‍बा पिमिंन् बिद् ओ!” बिसि म्हिए हुललाइ सुरिदिवाइ।
MAR 15:12 पिलातसइ धबै चमैंने “छ बिस्‍याँ क्‍हेमैंइ यहूदीमैंए म्रुँ बिबै म्हिलाइ ङइ तो लले दि?” बिसि ङ्योएइ।
MAR 15:13 चमैंइ धबै कै तेसि “चलाइ क्रूसर च्योवाद्,” बिइ।
MAR 15:14 पिलातसइ चमैंने “तले? चइ आछ्याँबै के तो लइमुँ?” बिसि ङ्योएमा चमैं झन थेबै कै तेसि “चलाइ क्रूसर च्योवाद्,” बिइ।
MAR 15:15 छतमा पिलातसइ च म्हिमैंए सैं तोंन् लबर बरब्‍बालाइ पिमिंइ, येशूलाइ बिस्याँ कोर्राइ प्रुल् पिंसि क्रूसर च्योवाबर पिंवाइ।
MAR 15:16 सिपाइमैंइ येशूलाइ दरबार न्‍होंर बोसि चर्बै अरू सिपाइमैं या ताँन् खागु लइ।
MAR 15:17 झाइले चमैंइ खीलाइ सुपारि रङर्बै क्‍वें खिमिंसि पुजुए मुकुट या लसि खीए क्रर कुमिंइ।
MAR 15:18 झाइले चमैंइ “यहूदीमैंए म्रुँ जय!” बिदै फ्योब् धों लसि बिल्‍लि लबर होंइ।
MAR 15:19 झाइले चमैंइ येशूए क्रर प्‍हरेइ प्रिंसि थुइ, धै च्‍हि तुँसि येशूलाइ फ्‍योब् धों लइ।
MAR 15:20 छले येशूए बिल्‍लि लसि चमैंइ सुपारि रङर्बै क्‍वें प्‍लिवासि खीए क्‍वेंन् खिमिंसि क्रूसर च्योबै ल्हागिर येशू बैरु बोइ।
MAR 15:21 खेंमैं घ्याँर ह्‍यारिमा कुरेनीथें सिमोन बिबै म्‍हि नाँसउँले बजार ह्‍याब् बिसि खरिब् त्होइ। च म्हि अलेक्जेन्डर नेरो रूफसए आबा मुँल। सिपाइमैंइ च म्हिने येशूए क्रूस कर ल्हैदिसि नोबर ल्‍हैदिइ।
MAR 15:22 च लिउँइँ चमैंइ येशूलाइ गलगथा बिबै क्‍ल्‍ह्‍योर बोइ। गलगथाए अर्थ क्र खोप्‍लें ग।
MAR 15:23 चर फेनेसि चमैंइ येशूलाइ मूर्र कोंबै प्हा थुँबर पिंइ, दिलेया येशूजी थुँल आङिं।
MAR 15:24 झाइले चमैंइ येशूए यो प्हलेर काँटि क्योसि क्रूसर च्योवाइ, धै येशूए क्‍वेंमैं चिट्ठा झोंसि चमैंइ चुइ।
MAR 15:25 चमैंइ येशूलाइ क्रूसर च्योवामा न्‍हाँगर्बै कु ह्राल।
MAR 15:26 झाइले “यहूदीमैंए म्रुँ” बिसि खीए फिर छ्याब् ल्हैदिबै ताँ क्रूसर प्‍ह्रिथेंल।
MAR 15:27 चमैंइ येशूलाइ क्रूसर च्योवामा ह्‍योमैं ङ्हिं या घ्रि खीए क्योलो हार, घ्रि खीए त्हेब्रेहार क्रूसर च्योवाइ।
MAR 15:28 छले परमेश्‍वरए छ्वेर बिबै ताँ पूरा तइ, “खी पापि म्हि धोंन् तसि पापिमैंने बालु च्योमिंइ।”
MAR 15:29 च घ्याँर प्रब्मैंइ क्र लादै “ओहो, क्हिम् मन्दिर फुवासि धबै सोंरोर्न बनेम् बिबै म्हि आङिं वा? बिसि येशूए बिल्‍लि लइ।
MAR 15:30 ल्हु, तारे च क्रूसउँइँले तयुसि ह्रोंसलाइन जोगेद्।”
MAR 15:31 छलेन ख्रो पिंबै खेगि चिब्मैं नेरो शास्‍त्रिमैंज्यै या छ बिसि येशूए बिल्‍लि लबर होंइ, “चुइ अरूलाइ जोगेमिंइ दिलेया ह्रोंसलाइ जोगेल् आखाँ।
MAR 15:32 च यहूदीमैंए म्रुँ बिबै ख्रीष्‍ट मुँस्याँ तारे क्रूसउँइँले तसि युरिगे। च क्रूसउँइँले तसि युब् म्रोंस्याँ मत्‍त्रे ङिइ चए फिर बिश्‍वास लब्मुँ।” खीने बालु क्रूसर च्योवाबै म्‍हिमैंज्यै या येशूए बिल्‍लि लइ।
MAR 15:33 त्‍हिंयाँर्बै च्युसे ङ्हिं ह्राबै त्हेसेरो सों ह्राबै त्हे समा ह्‍युल तिगोंन् मिछु तयाइ।
MAR 15:34 सों ह्राबै त्हेजरे येशूजी थेबै कैले बिइ, “इलोइ, इलोइ, लामा सबखथनि?” (छ बिबै अर्थ “ओ ङए परमेश्‍वर, ओ ङए परमेश्‍वर, क्‍हिजी ङलाइ तले पिवाल?” बिब् ग।)
MAR 15:35 चर राबै कोइ म्‍हिमैंइ येशूजी बिबै ताँ आक्होसि बिइ, “थेत्ति, चइ स्‍योंम्‍बै एलिया हुइरिइमुँ।”
MAR 15:36 झाइले म्‍हि घ्रि न्हेह्‍यासि प्हा क्युँर ह्रुइ प्ल्हुँइ। धै चइ म्वोए प्हरेर फैसि खीलाइ थुँल् पिंमा बिइ, “तारे, एलिया खनदै युसि चलाइ क्रूसउँइँले तमिंम् उ, ङ्‍ह्‍योले!”
MAR 15:37 झाइले येशूजी थेबै कै तेसि सो पिवाइ।
MAR 15:38 च तोंदोंन् यरूशलेमरि मन्दिरर्बै पर्दा ताइले माइ समा म्‍हाँजोर्न ङ्हिबाँ फैले टोह्‍याइ।
MAR 15:39 येशूजी सो पिब् म्रोंसि खीए ओंसों रारिबै कप्‍तानइ “चु म्‍हिम् क्‍ह्रोंसेंन परमेश्‍वरए च्‍ह मुँन,” बिइ।
MAR 15:40 चर च्हमिरिमैं या ह्रेंगोउँइँले ङ्‌ह्‍योरिल। चमैंए म्‍हाँजोरि मरियम बिबै मग्‍दालाथेंस्‍यो, च्‍योंब याकूब, योसेफए आमा मरियम नेरो सलोमि बिबै च्हमिरि मुँल।
MAR 15:41 येशू गालीलर मुँमा चमैंइ येशूए सेवा लदै खीने प्रमल। झाइले येशूने बालु यरूशलेमर खबै अरू ल्‍हें च्हमिरिमैं या चर रासि ङ्‌ह्‍योरिल।
MAR 15:42 प्रिबै त्हिंइए ओंसोंबै त्हिंइ तसेरो च त्हिंइ “प्रिबै त्हिंइए ल्हागिर चैदिबै सैमैं तौदु लथेंबै त्हिइ” बिमल।
MAR 15:43 छतमा अरिमाथियाथें योसेफ च ङेसार आङ्हिंन्ले पिलातस ङाँर ह्‍यासि येशूए सिनु ह्रिइ। (च योसेफ थेबै म्हि च्होंर्बै चिब मुँल। चइ परमेश्‍वरए ग्याल्स खोंयों युब् ङ्‍हे बिसि घ्‍याँ ङ्‌ह्‍योरिल।)
MAR 15:44 येशू सिल् खाँइ बिब् थेसि पिलातस अचम्‍मा ङ्हाँइ। छतसि कप्‍तानलाइ खी ङाँर हुइसि “क्ह्रोंसेंन येशू सिल् खाँइ वा?” बिसि ङ्योएइ।
MAR 15:45 येशू सिल् खाँइ बिब कप्‍तानउँइँले था सेसि पिलातसइ येशूए सिनु योसेफने बोयाल् पिंइ।
MAR 15:46 झाइले योसेफइ सुतिए क्‍वें किंसि पखइ धै येशूए सिनु क्रूसउँइँले तसि क्‍वेंर म्‍होरसि म्‍हिमैंइ युँमा कोप्दिसि लबै उ धों तबै छगोंर थेंइ, झाइले च उए सुँर युँमाइ हुथेंइ।
MAR 15:47 मग्‍दालाथेंस्‍यो मरियम नेरो योसेफए आमा मरियमइ येशूलाइ छगोंर थेंब ङ्‌ह्‍योरिल।
MAR 16:1 प्रिबै त्हिंइ लिउँइँ मग्‍दालाथेंस्‍यो मरियम, याकूबए आमा मरियम नेरो सलोमि बिबै च्हमिरिमैंइ येशूए सिनुर फोब् बिसि लिंबै थाँ खबै छ्युगु किंइ।
MAR 16:2 आइतबार न्‍हाँगर्न त्‍हिंयाँ प्योमा चमैं येशू थेंबै छगोंर ह्‍याइ।
MAR 16:3 छले ह्‍यारिमा चमैंइ “ङ्योए ल्हागिर खाबइ च उए सुँर्बै युँमा प्लिंमिंम् ङ्‍हे?” बिरिल।
MAR 16:4 तलेबिस्याँ च युँमा बेल्‍ले थेब मुँल। दिलेया छगोंर फेनेमा च्हौ थेबै युँमा या स्योथेंब च च्हमिरिमैंइ म्रोंइ।
MAR 16:5 झाइले उ न्‍होंर होंमा चमैंइ फोस्रे ब्योंबै क्‍वें खिबै फ्रेंसि घ्रि उए क्‍योलोउँइँ टिरिब् म्रोंइ। छाब् म्रोंसि चमैं ङ्हिंयाँइ।
MAR 16:6 दिलेया च फ्रेंसिइ चमैंने बिइ, “आङ्हिंन्! क्‍हेमैंइ क्रूसर सैवाबै नासरतर्बै येशू म्‍हैरिल् वा? येशू धबै सोगों तसि रेल् खाँइ। खी चुर आरे। ङ्‌ह्‍योत्ति येशूलाइ थेंबै क्‍ल्‍ह्‍यो चुन् ग।
MAR 16:7 तारे पत्रुस नेरो येशूए अरू चेलामैं ङाँर ह्‍यासि ‘येशू गालीलर क्हेमैं भन्दा ओंसोंन् ह्‍यासिन् मुँ। खीजी ओंसोंन् क्‍हेमैंने बिब् धोंले क्‍हेमैंइ खीलाइ चर म्रोंब्‍मुँ,’ बिसि बिद्।”
MAR 16:8 छबिमा च च्हमिरिमैं अचम्‍म ङ्हाँसि त्हारदै छगोंउँइँले त्‍होंसि न्हेह्‍याइ। चमैंइ खाबने या तोइ आबि, तलेबिस्याँ चमैंए सैं ङ्हिंरिल।
MAR 16:9 येशू आइतबार न्‍हाँगर्न सिबउँइँले धबै सोगों तबै लिउँइँ मग्‍दालाथेंस्‍यो मरियम ङाँर म्रोंखइ। येशूजी ओंसों च च्हमिरिउँइँले मों ङि ल्‍हामिंल।
MAR 16:10 मरियम ह्‍यासि येशूए चेलामैंने “येशू धबै सोगों तसि खइमुँ” बिइ, च त्हेर चमैं बेल्‍ले शोक लसि क्रोब-म्‍होब लरिल।
MAR 16:11 येशू धबै सोगों तसि मरियम ङाँर म्रोंखइ बिबै बिलेया, चमैंइ चए ताँ आक्वें।
MAR 16:12 च लिउँइँ चेलामैं ङ्हिं यरूशलेमउँइँले नाँसउँइँ ह्‍यारिमा येशू चमैं ङाँर म्रोंखइ। च त्हेर येशूए रुप स्योन् ब्योंब् म्रोंइ।
MAR 16:13 चमैं यरूशलेम एह्‍यासि चु ताँ अरूमैंने या बिइ, दिलेया खाबज्‍यै या येशू सिबउँइँले धबै सोगों तखइ बिबै ताँ आक्वें।
MAR 16:14 च लिउँइँ खीए च्युसे घ्रि चेलामैं चब् चरिमा खी म्रोंखइ। चमैंइ बिश्‍वास आलब नेरो सारो सैं म्रोंसि खीजी चमैंलाइ बेल्‍ले हौदिइ। तलेबिस्याँ खी धबै सोगों तखइमुँ बिब्‍मैंए ताँ चमैंइ आक्वेंमल।
MAR 16:15 झाइले येशूजी चमैंने बिइ, “ह्‍युल तिगोंन् ह्‍यासि ताँन् म्‍हिमैंने परमेश्‍वरउँइँले खबै सैं तोंबै ताँ बिमिंन्।
MAR 16:16 ङए फिर बिश्‍वास लसि बप्‍तिस्‍मा किंब्मैंइ मुक्‍ति योंब्‍मुँ, दिलेया बिश्‍वास आलब्‍मैं परमेश्‍वरए उँइँर छ्याब् मुँबन् ठर्दिब्‍मुँ।
MAR 16:17 बिश्‍वास लब्‍मैंइ ङए शक्‍ति योंसि छाबै औदिबै चिनुमैं लल् खाँब्मुँ: चमैंइ ङए मिं किंसि मोंमैं ल्‍हाब्‍मुँ, छारा क्युइमैं पोंब्‍मुँ।
MAR 16:18 चमैंइ प्‍हुरिमैं क्‍हाल् खाँब्‍मुँ, बिष थुँलेया तोइ न्होह्रों तरिब् आरे, चमैंइ नबै म्‍हिमैंए फिर यो थेंमा च म्हिमैं सब्मुँ।”
MAR 16:19 येशू छले चेलामैंने पोंल् खाँबै लिउँइँ परमेश्‍वरजी खीलाइ स्वर्गउँइँ बोयाइ, धै परमेश्‍वरए क्‍योलोउँइँ टिइ।
MAR 16:20 झाइले च चेलामैं खन्‍तोदोंन् ह्‍यासि खीए ताँ बिप्रइ। प्रभु चमैंने बालु तसि औदिबै चिनुमैं लसि चमैंइ बिबै ताँमैं क्ह्रोंसेंन् ग बिसि उँइँमिंइ।
LUK 1:1 ओ चिब थियोफिलस छ्याज्यालो मुँ! ङ्योए म्‍हाँजोरि तो-तो केमैं तइ बिसि ल्‍हें म्‍हिइ प्‍ह्रिल।
LUK 1:2 ओंसों ओंनोंन् चु ताँन् ताँ म्रोंब नेरो येशूउँइँले खबै सैं तोंबै ताँ बिमिंबै म्‍हिमैंइ च ताँमैं ङ्योलाइ सेल् पिंल। छतसि चमैंउँइँले ल्हें ताँमैं योंसि म्‍हिमैंइ प्‍ह्रिना।
LUK 1:3 छतमा ङज्‍यै या चु ताँन् के ओंसों ओंनोंन् खैले तइ बिसि छेन्‍ले मैंसि क्‍हिए ल्हागिर ओंसोंउँइँले लिउँइँ समा तबै ताँमैं तों फ्यार्ले प्‍ह्रिब ठिक तलै ङ्हाँसि प्ह्रिइमुँ।
LUK 1:4 म्‍हिमैंइ क्हिने ओंसोंन् लोमिंबै ताँमैं क्‍ह्रोंसेंन् तना बिब क्‍हिइ अझै छेनाले सेरिगे बिसि ङइ चु ताँ प्‍ह्रिइमुँ।
LUK 1:5 यहूदीया ह्‍युलर्बै हेरोद म्रुँए पलोर चु केमैं तखइ। यहूदीमैंए म्हाँजोर जकरिया बिबै ख्रो पिंबै खेगि घ्रि मुँल। च स्‍योंम्‍बै अबिया बिबै ख्रो पिंबै खेगिए खलकर्बै म्‍हि मुँल। चए प्ह्रेंस्योए मिं इलिशिबा मुँल। इलिशिबाए आबा या ख्रो पिंबै खेगि मुँल।
LUK 1:6 चमैं ङ्हिंइ परमेश्‍वरए उँइँर ठिक के लमल धै परमेश्‍वरए ताँमैं ङिंसि ठिमर बिब् धोंले छेनाले प्रमल।
LUK 1:7 इलिशिबा थरि मुँल। छतसि च्‍ह-चमिं तोइ आरेल। च्हौ मत्‍त्रे आङिंना, चमैं ङ्हिंना-ङ्हिंन् खिब्‌ माँब् तयाल।
LUK 1:8 तिगें जकरियाल मन्दिरर ख्रो पिंबै पलो तल। छतसि चइ खेगिए के लरिल।
LUK 1:9 खेगिमैंए रोस अनुसार चिट्ठा झोंमा परमेश्‍वरए मन्दिर न्होंर होंसि धुप झोंबै के जकरियाए मिंर फेइ।
LUK 1:10 चइ न्‍होंर धुप झोंरिमा बैरुबै म्हिमैं परमेश्‍वरने प्राथना लरिल।
LUK 1:11 च त्‍हेर्न परमेश्‍वरए स्‍वर्गदूत घ्रि धुप झोंबै क्‍ल्‍ह्‍योए क्‍योलोउँइँ रारिब् म्रोंसि
LUK 1:12 जकरिया बेल्‍ले आदिदिसि ङ्हिंयाँइ।
LUK 1:13 दिलेया स्‍वर्गदूतइ चने बिइ, “ओ जकरिया, क्‍हि आङ्हिंन्! तलेबिस्याँ परमेश्‍वरजी क्‍हिए ताँ थेइमुँ। तारे क्‍हिए प्ह्रेंस्यो इलिशिबाइ च्‍ह घ्रि फिब्‍मुँ, च च्‍हए मिं क्हिइ यूहन्‍ना थेंन्।
LUK 1:14 च्‍ह फिबइले क्‍हि बेल्‍ले सैं तोंब्‍मुँ। धै अरू ल्हें म्‍हिमैं या सैं तोंब्‍मुँ।
LUK 1:15 तलेबिस्याँ च च्‍ह परमेश्‍वरए उँइँर थेब तब्‍मुँ। चइ प्हा नेरो अरू म्हेरबै सैमैं खोंयोंइ थुँरिब आरे। च आमाए फोउँइँलेन् परमेश्‍वरए पबित्र प्ल्हजी प्लिंब्मुँ।
LUK 1:16 चइ इस्राएल ह्रेंर्बै ल्‍हें म्‍हिमैंलाइ खेंमैंए याहवेह परमेश्‍वर ङाँइ एपखब्मुँ।
LUK 1:17 परमेश्‍वरजी एलिया अगमबक्‍तालाइ शक्‍ति पिंब् धोंलेन्‌ क्‍हिए च्‍हज्यै या पबित्र प्ल्ह नेरो शक्‍ति योंब्‍मुँ। छतसि चइ आबामैं नेरो च्‍ह-चमिए म्हाँजोर क्ह्रिमिंब्‍मुँ, धै परमेश्‍वरजी बिब् आङिंब्‍मैंलाइ छ्याँबै घ्‍याँर डोरेब्मुँ। छले परमेश्‍वरजी कुल्‍मिंबै म्रुँ म्हाँदिबै ल्हागिर चइ म्‍हिमैं तयार लब्‍मुँ।”
LUK 1:18 दिलेया जकरियाइ स्‍वर्गदूतने बिइ, “ङ खेब् तयाल् खाँइ, ङए माँबै या माँब् तयाइमुँ। छतसि ङिइ च्‍ह योंम् बिसि खैले क्‍वेंब?”
LUK 1:19 स्‍वर्गदूतइ बिइ, “ङ गब्रिएल ग। ङ परमेश्‍वरए उँइँर रारिम्। क्‍हिने ताँ लबर नेरो चु सैं तोंबै ताँ बिद् बिसि परमेश्‍वरजी ङलाइ कुलब् ग।
LUK 1:20 दिलेया ङइ बिबै ताँ क्हिइ आक्‍वेंसेरो क्हि लडा तब्मुँ। चु ताँ पूरा आतन् समा क्‍हि पोंल् खाँरिब् आरे। ङइ बिबै ताँ ठिक त्‍हेर खैले बिलेना पूरा तब्‍मुँ।”
LUK 1:21 छ तरिमा बैरु खागु तबै म्‍हिमैं जकरिया पैंरिल। जकरियाइ मन्दिर न्होंर क्हैल् लबइले म्हिमैं प्लेटोयाल।
LUK 1:22 लिउँइँ जकरिया बैरु त्‍होंयुमा च म्हिमैंने पोंल् आखाँसि योइ हस्‍ता लइ। छतमा मन्दिर न्‍होंर चइ स्‍वर्गदूत म्रोंना बिबै ताँ बैरुबै म्‍हिमैंइ सेइ।
LUK 1:23 झाइले जकरियाइ खेगिए के लल् खाँसि ह्रोंसए धिंर ह्‍याइ।
LUK 1:24 च लिउँइँ चए प्ह्रेंस्यो इलिशिबाइ प्‍हसे नोइ। धै म्हैंन ङ्‌हल् समा धिंर्न लोसि टिरिमा चइ बिइ,
LUK 1:25 “म्हिमैंए उँइँर ङ हेल् आतरिगे बिसि ङए फिर ल्हयो खसि परमेश्‍वरजी ङलाइ प्हसे नोल् पिंइमुँ।”
LUK 1:26 इलिशिबाइ प्‍हसे नोबै म्हैंन ट्हुलर परमेश्‍वरजी गब्रिएल स्‍वर्गदूत गालील ह्‍युलर्बै नासरत बिबै नाँसर कुल्मिंइ।
LUK 1:27 च नाँसर मरियम बिबै कन्‍ये घ्रि मुँल। च स्‍योंम्‍बै दाऊद म्रुँए कुलर्बै योसेफ बिबै म्‍हिइ ब्ह्‍या लब् बिसि ह्रिथेंल। परमेश्‍वरजी गब्रिएल स्वर्गदूत मरियम ङाँर कुल्मिंइ।
LUK 1:28 गब्रिएल स्वर्गदूत च ङाँर युसि बिइ, “ओ नानि, च्हमिरिमैं न्होंर क्हि बेल्‍ले ङ्‍हो सब् मुँन। तलेबिस्याँ परमेश्‍वर क्‍हिने बालु मुँ, छतसि खीजी क्‍हिए फिर आशिक पिंइमुँ।”
LUK 1:29 स्वर्गदूतइ बिबै ताँ थेसि मरियम बेल्‍ले ङ्हिंसि “ङने तले छ बिगे? चुइ बिल् म्हैब तो मुँगे?” बिसि मैंबर होंइ।
LUK 1:30 धबै स्‍वर्गदूतइ मरियमने बिइ, “ओ मरियम, क्हि आङ्हिंन्! तलेबिस्याँ परमेश्‍वरजी क्‍हिए फिर ल्हयो खइमुँ।
LUK 1:31 थेद्! तारे क्‍हिइ प्‍हसे नोसि च्‍ह फिब्‍मुँ। क्हिइ खीए मिं येशू थेंन्।
LUK 1:32 खी बेल्‍ले कालदिब तब्‍मुँ। धै ताँन् म्‍हिमैंइ खीलाइ धाँसे थेबै परमेश्‍वरए च्‍ह बिब्‍मुँ। खीए खे दाऊद धोंले परमेश्‍वरजी खीलाइ म्रुँ लमिंब्‍मुँ।
LUK 1:33 याकूबए कुल इस्राएली म्हिमैंए फिर खीजी खोंयोंन् बिलै ग्याल्स लब्‍मुँ। खीए ग्याल्स खोंयोंइ म्‍हरिब् आरे।”
LUK 1:34 दिलेया मरियमइ स्‍वर्गदूतने बिइ, “ङ कन्‍ये ग। ङइ खैले च्‍ह फिमुँ?”
LUK 1:35 स्‍वर्गदूतइ चने बिइ, “पबित्र प्ल्ह क्‍हिए फिर युब्‍मुँ, धै ताँन् भन्दा थेबै परमेश्‍वरए शक्‍तिए छरिउँइँले क्‍हिइ प्‍हसे नोब्मुँ। छतसि क्‍हिए प्‍हसे पबित्र तब्मुँ, म्‍हिमैंइ खीने परमेश्‍वरए च्‍ह बिब्‍मुँ।
LUK 1:36 च्‍हौ मत्‍त्रे आङिं, क्‍हिए नातो न्होंर्बै आना इलिशिबा माँब् तबै त्हेरै या प्हसे नोइमुँ। तारे चइ प्‍हसे आफि, थरि त‍याइ बिसि म्हिमैंइ बिमल। दिलेया चइ प्‍हसे नोसि तोगो म्हैंन ट्हुल् तइमुँ।
LUK 1:37 तलेबिस्याँ परमेश्‍वरजी लल् आँखाँबै सै तोइ आरे।”
LUK 1:38 झाइले मरियमइ बिइ, “ङ परमेश्‍वरए के लबै च्हमिरि ग। क्‍हिइ बिब् धोंले ङए छ्हर तरिगे।” च लिउँइँ स्‍वर्गदूत मरियमउँइँले ह्‍याइ।
LUK 1:39 स्वर्गदूतए ताँ थेसि मरियम आतुरले यहूदीया ह्‍युलर्बै कोंर मुँबै नाँस घ्रिर ह्‍याइ।
LUK 1:40 च जकरियाए धिंर होंसि खीए आना इलिशिबालाइ छ्याज्यालो लइ।
LUK 1:41 मरियमइ छ्याज्यालो बिब इलिशिबाइ थेमा चए फो न्‍होंर्बै कोलो ओलेइ, च तोदोंन् इलिशिबा पबित्र प्ल्हजी प्लिंयाँइ।
LUK 1:42 झाइले इलिशिबाइ थेबै कैले मरियमने बिइ, “ओ नानि, च्हमिरिमैं न्‍होंरि क्हिइ बेल्‍ले आशिक योंइमुँ, धै क्‍हिए फोर्बै कोलोलाज्यै या परमेश्‍वरजी आशिक पिंइमुँ।
LUK 1:43 क्‍हि ङए प्रभुए आमा तसेया ङ ङाँर खबइले ङ बेल्‍ले ङ्‍हो सब् तइमुँ।
LUK 1:44 तलेबिस्याँ क्‍हिइ हुइब ङइ थेबै तोदोंन् ङए फोर्बै कोलो सैं तोंसि ओलेइ।
LUK 1:45 परमेश्‍वरजी क्हिने बिबै ताँमैं पूरा तब्‍मुँ बिब् क्वेंसि क्‍हि बेल्‍ले ङ्‍हो सब् तइमुँ।”
LUK 1:46 झाइले मरियमइ बिइ, “ङए सैं न्होंउँइँले परमेश्‍वरए मिं क्‍वेमुँ।
LUK 1:47 ङलाइ जोगेमिंबै परमेश्‍वरने बालु ङ बेल्‍ले सैं तोंम्।
LUK 1:48 तलेबिस्याँ ङ धों तबै आह्र आसेबै ह्रोंसए केब्स्योए फिर खीजी ल्हयो खसि ङ्‍ह्‍योइमुँ, तारे पिरु ताँन् म्‍हिमैंइ ङने ‘ङ्‍हो सब् मुँन,’ बिब्‍मुँ।
LUK 1:49 तोन्‍दोंरि लमिंल् खाँबै परमेश्‍वरजी ङए ल्हागिर बेल्‍ले थेबै के लमिंइमुँ। खीए मिं पबित्र मुँ।
LUK 1:50 खीए मान लब्‍मैंए पुस्‍ता-पुस्‍ताए फिर खीजी ल्हयो खम्।
LUK 1:51 खीजी ह्रोंसए भोंबै योजी थेबै केमैं लइँमुँ, सैं न्हों-न्हों छलम् छुलम् बिसि थेब् प्हैंब्मैंलाइ सग्याँ-प्हुग्याँ लवाइमुँ।
LUK 1:52 खीजी थेब् प्हैंबै म्रुँमैं चमैंए राजगद्दिउँइँले तवाइमुँ, आ‍यों आख्युब्मैंलाइ कैंडो लमिंइमुँ।
LUK 1:53 फो ख्रेंब्‍मैंलाइ खीजी लिंबै सैमैं चल् पिंइमुँ, दिलेया प्‍लोब्‍मैंए यो बिस्याँ खीजी क्होतेन् लसि एमिंइमुँ।
LUK 1:54 परमेश्‍वरजी ङ्योए खेमैंने फैबै बाछा पूरा लसि ह्रोंसलाइ म्हाँदिबै इस्राएलीमैं ल्होबर खी युइमुँ।
LUK 1:55 ङ्योए खे अब्राहाम नेरो खीए कुलर्बै सन्तानमैंने खीजी खोंयोंन् बिलै ल्हयो खरिम्।”
LUK 1:56 च त्हेर मरियम म्हैंन सोंल्दे इलिशिबाने टिसि ह्रोंसए धिंर ह्‍याइ।
LUK 1:57 झाइले इलिशिबाए सुत्‍केरि तबै त्‍हे तसि च्‍ह फिइ।
LUK 1:58 परमेश्‍वरजी इलिशिबाए फिर च्हौ थेबै ल्हयो खसि बेल्‍ले थेबै के लइमुँ बिबै ताँ थेसि इलिशिबाए ङ्‌हेब्-ट्हुब्मैं नेरो ह्रजे-म्‍हजेमैं चने बालुन् सैं तोंइ।
LUK 1:59 कोलो प्रेरो तबै लिउँइँ कोलोए ज्युर चिनु लसि मिं थेंबर ताँन् ङ्‍हेब्-ट्हुब्मैं नेरो ह्रजे-म्हजेमैं खागु तइ। चमैंइ कोलोए मिं आबाए मिं धोंन् तब जकरिया थेंल् म्‍हैल।
LUK 1:60 दिलेया चए आमाइ “आङिं, चुए मिं यूहन्‍ना थेंब् ग,” बिइ।
LUK 1:61 चमैंइ बिइ, “दिलेया क्‍हेमैंए ह्रजे-म्‍हजेमैं न्‍होंरि छाबै मिं खाबलै आरे।”
LUK 1:62 छतमा चमैंइ कोलोए आबाने हस्‍ता लसि “कोलोए मिं तो थेंदा ङ्हाँइमुँ?” बिसि ङ्योएमा
LUK 1:63 चइ प्‍ह्रिबै सै ह्रिसि “चुए मिं यूहन्‍ना ग बिसि” प्ह्रिमिंइ। छतमा चमैं ताँन् प्लेटोयाइ।
LUK 1:64 च तोदोंन् जकरिया पोंल् खाँब् तइ, धै परमेश्‍वरए मिं क्वेंबर होंइ।
LUK 1:65 परमेश्‍वरजी लबै छाबै के म्रोंसि चमैंए ङ्‌हेब्-ट्हुब्मैं छक्‍क तसि परमेश्‍वरने ङ्हिंइ। चु ताँए बयन यहूदीया ह्‍युलर्बै कों-कोंजरे थेनेइ।
LUK 1:66 च ताँ थेब्मैं ताँनइ “चु कोलो लिउँइँ खैब तब् ङ्‍हे?” बिसि ह्रोंसए सैंर मैंइ। तलेबिस्याँ परमेश्‍वरए शक्‍ति चए फिर मुँल।
LUK 1:67 जकरिया पबित्र प्ल्हजी प्लिंसि अगमबाणि पोंबर होंइ,
LUK 1:68 “इस्राएलीमैंइ म्हाँदिबै परमेश्‍वरए मिं थेब तरिगे। तलेबिस्याँ ह्रोंसए म्‍हिमैं जोगेमिंबै ल्हागिर खी युइमुँ।
LUK 1:69 खीजी दाऊद म्रुँए कुलर ङ्यो जोगेमिंबै ल्हागिर थेबै शक्‍ति मुँबै मुक्‍तिदाता कुल्मिंइमुँ।
LUK 1:70 खीजी चु ताँ स्योंम् ओंनोंन् ह्रोंसए पबित्र अगमबक्‍ताए सुँउँइँले पोंल।
LUK 1:71 खीजी ङ्योए शत्तुरमैं नेरो ङ्योए फिर खैच्हिजिले पोंब्‍मैंउँइँले ङ्यो जोगेमिंइमुँ।
LUK 1:72 खीजी ङ्योए खेमैंने फैबै पबित्र बाछा मैंसि ङ्योए फिर ल्हयो खमिंइमुँ।
LUK 1:73 खीजी ङ्योए खे अब्राहामने क्ह्रोंसेंन ङइ फैबै बाछा पूरा लमिंब्मुँ बिसि बाछा फैल।
LUK 1:74 छतसि‍ ङ्योए शत्तुरमैंए योउँइँले ङ्यो फ्रेमिंब्मुँ,
LUK 1:75 छतसि ङ्यो आङ्हिंनाले ह्रोंसए छ्ह तिगोंन् परमेश्‍वरए के छेनाले लसि खीए उँइँर छ्याँबै छ्ह थोल् खाँरिगे बिबै ताँ ओंसोंन् पोंल।
LUK 1:76 ओ ङए च्ह, क्‍हि ताँन् भन्दा थेबै अगमबक्‍ता तब्‍मुँ, तलेबिस्याँ परमेश्‍वरजी कुल्‍मिंबै म्रुँए ओंसों ह्‍यासि खीए ल्हागिर क्‍हिइ घ्‍याँ छ्याब्मुँ।
LUK 1:77 पापउँइँले क्षमा योंसि मुक्‍ति योंब्मुँ बिबै ताँ क्हिइ परमेश्‍वरए म्‍हिमैंने लोमिंब्मुँ।
LUK 1:78 तलेबिस्याँ ङ्योए परमेश्‍वरए ल्हयो म्हाँया मुँब मुँ, छतसि न्हाँगर प्योबै त्हिंयाँ धोंले खीए चारबै ह्‍वे स्वर्गउँइँले ङ्योए फिर चारब्मुँ।
LUK 1:79 झाइले मिछु खैबर टिब्मैं नेरो कालए सुँर फेल् म्हैब्मैंइ चारबै ह्‍वे योंब्मुँ, धै च ह्‍वेइ ङ्यो शान्तिए घ्याँर डोरेब्मुँ।”
LUK 1:80 च लिउँइँ कोलो यूहन्‍ना थेब् तदै ह्‍यासि सैं या चिदै ह्‍याइ। दिलेया इस्राएलीमैंए म्हाँजोर चु ताँमैं बिबै त्हे आतन् समा च म्‍हि आटिबै ‍क्ल्ह्‍योर्न टिइ।
LUK 2:1 यूहन्‍ना फिबै त्‍हेजरे ह्‍युल तोगोंर्बै म्‍हिमैं च्योबै ल्हागिर मिं प्‍ह्रिल् त्‍हुम् बिसि अगस्‍टस बिबै रोमी म्रुँइ बिइ।
LUK 2:2 (चु ओंसोंबै जनसंख्या च्योमा क्‍युरिनियस बिबै म्‍हि सिरिया ह्‍युलर्बै रोमी क्रथे मुँल।)
LUK 2:3 ताँन् म्‍हिमैं ह्रों-ह्रोंसए नाँसर मिं प्‍ह्रिबर ह्‍याइ।
LUK 2:4 छतसि योसेफै या गालील ह्‍युलर्बै नासरत सहरउँइँले यहूदीया ह्‍युलए बेथलेहेम बिबै नाँसर ह्‍याइ, तलेबिस्याँ चए खे दाऊद म्रुँ च बेथलेहेम नाँसर्बै मुँल।
LUK 2:5 चइ ह्रिथेंबै मरियम बोसि मिं प्‍ह्रिबर ह्‍याइ। च त्‍हेर मरियम प्‍हसे नोसिन् ‍मुँल,
LUK 2:6 धै बेथलेहेमर मुँमा मरियम सुत्‍केरि तबै त्‍हे तइ।
LUK 2:7 झाइले चइ ह्रोंसए च्‍ह थेब फिसि क्वेंइ म्होरसि खेदोमैंइ चब् चबै डोंडर नेथेंइ, तलेबिस्याँ चमैं टिबै ल्हागिर ठाँटिर क्‍ल्‍ह्‍यो आरेल।
LUK 2:8 च बेथलेहेम बिबै नाँसए पखजरे प्‍ह्रोंछैंमैं ह्रोंसए क्‍युमैं रुँबर म्‍हुँइँसर टिरिल।
LUK 2:9 च त्हेर्न स्‍वर्गदूत घ्रि चमैंए उँइँर रायुमा परमेश्‍वरए चारबै ह्‍वे चमैंए कारग्युले चारइ। छतमा चमैं बेल्‍ले ङ्हिंयाँइ।
LUK 2:10 दिलेया स्‍वर्गदूतइ चमैंने बिइ, “आङ्हिंन्! तलेबिस्याँ ङ क्‍हेमैंने बेल्‍ले सैं तोंबै छ्याँबै ताँ बिम्। चु ताँ ताँन् म्‍हिमैंए ल्हागिर तब्मुँ।
LUK 2:11 तिंयाँ बेथलेहेम बिबै दाऊदए नाँसर क्‍हेमैंए ल्हागिर मुक्‍ति पिंबै म्‍हि फिइमुँ। खीन परमेश्‍वरजी कुल्‍मिंबै प्रभु ख्रीष्‍ट ग।
LUK 2:12 चु ताँ क्‍हेमैंइ खै‍ले सेम् बिस्याँ च भर्खर फिबै कोलो क्वेंइ म्होरसि खेदोमैंइ चब् चबै डोंडर नेथेंब क्‍हेमैंइ म्रोंब्मुँ।”
LUK 2:13 छ बिरिबै तोदोंन् अरू ल्हें स्वर्गदूतमैं या तिखेर्न चमैं ङाँर रायुसि परमेश्‍वर बेल्‍ले थेब मुँ बिसि छले क्वे प्रिंइ,
LUK 2:14 “स्वर्गरि परमेश्‍वए मिं थेब तरिगे, धै पृथ्‍बीरि खीजी त्‍हाँबै म्‍हिमैंने शान्‍ति तरिगे!”
LUK 2:15 छले परमेश्‍वरए मिं क्वेसि स्वर्गदूतमैं स्‍वर्गउँइँ एह्‍याबै लिउँइँ। प्‍ह्रोंछैंमैंइ खेंमैंए न्होंर ताँ लइ, “तारे परमेश्‍वरजी ङ्योलाइ बिब् धोंलेन् बेथलेहेम नाँसर ह्‍याले धै चर तबै ताँमैं ङ्‍ह्‍योले।”
LUK 2:16 छ बिसि चमैं आतुरले ह्‍यामा मरियम, योसेफ नेरो डोंडर नेथेंबै च्‍युथिरि कोलो म्रोंइ।
LUK 2:17 च कोलो म्रोंमा स्‍वर्गदूतइ खेंमैंने चु कोलोए बारेर बिबै ताँ चमैंइ ताँन् म्‍हिमैंने बिमिंइ।
LUK 2:18 प्ह्रोंछैंमैंइ बिबै ताँ थेब्‍मैं ताँन् प्लेटोयाइ।
LUK 2:19 दिलेया मरियमइ चु ताँन् ताँ छेन्‍ले मैंसि सैंर थेंइ।
LUK 2:20 झाइले स्‍वर्गदूतइ खै बिल छाबन् प्ह्रोंछैंमैंइ म्रोंल् योंसि चमैंइ परमेश्‍वरए मिं बेल्‍ले थेब् लसि खीलाइ धन्‍यबाद पिंसि क्वे प्रिंदै एह्‍याइ।
LUK 2:21 प्‍हसे फिसि प्रेरोर कोलोए ज्युर चिनु लसि खीए मिं येशू थेंइ, तलेबिस्याँ च मिं प्‍हसे नोब् भन्दा ओंसोंन् स्‍वर्गदूतइ आमाने बिथेंल।
LUK 2:22 परमेश्‍वरजी ङ्योए खे मोशाने पिंबै ठिमर बिब् धोंले चमैंए रो छोंल् खाँबै लिउँइँ चमैंइ कोलो येशू परमेश्‍वरए ङाँर अर्पण लबर यरूशलेम सहरर बोइ।
LUK 2:23 तलेबिस्याँ “च्‍ह थेब्मैं याहवेहए ल्हागिर पबित्र तब्मुँ,” बिसि परमेश्‍वरए छ्वेर प्‍ह्रिइमुँ।
LUK 2:24 झाइले परमेश्‍वरए छ्वेर बिब् धोंले “तिजोर तोंगु मुँले परेवाए झज तिजोर मुँले” किंसि चमैं ख्रों पिंबर मन्दिरर ह्‍याइ।
LUK 2:25 च त्‍हेर यरूशलेम सहरर शिमियोन बिबै म्‍हि घ्रि टिमल। च छ्याँबै के लबै म्‍हि नेरो परमेश्‍वर म्हाँदिबै म्‍हि मुँल, चने बालु परमेश्‍वरए पबित्र प्ल्ह मुँल। इस्राएली म्‍हिमैंलाइ परमेश्‍वरजी जोगेमिंब्मुँ बिसि शिमियोनइ ल्हें बर्ष ओंनोंन् परमेश्‍वरए घ्याँ ङ्ह्‍योरिल।
LUK 2:26 परमेश्‍वरजी कुल्‍मिंबै म्रुँ ख्रीष्‍ट आम्रोंन् समा क्हि आसि बिसि पबित्र प्ल्हजी चने ओंसोंन् था पिंल।
LUK 2:27 झाइले पबित्र प्ल्हजी बिब् धोंले शिमियोन मन्दिर न्होंर होंमा। परमेश्‍वरए छ्वेर बिब् धोंले लबर कोलो येशूलाइ आबा-आमाइ मन्दिर न्होंर पखइ।
LUK 2:28 झाइले चइ कोलोलाइ ह्रोंसए क्वेंदर किंसि परमेश्‍वरलाइ धन्यबाद पिंसि बिइ,
LUK 2:29 “ओ प्रभु, तोगो क्‍हिजी ङने बिबै ताँ पूरा लमिंइमुँ, तारे ङ छेनाले सि‍याल् खाँम्।
LUK 2:30 तलेबिस्याँ क्‍हिजी कुल्‍मिंबै म्रुँ ख्रीष्‍ट ङए मिइ म्रोंल् योंइ।
LUK 2:31 ताँन् ह्रेंर्बै म्हिमैंइ खीलाइ म्रोंरिगे बिसि क्हिजी कुल्मिंब् ग।
LUK 2:32 चु कोलोन् अरू ह्रेंर्बै म्‍हिमैंलाइ क्‍हिए घ्‍याँ उँइँमिंबै चारबै ह्‍वे ग, छलेन क्हिए इस्राएली ह्रेंर्बै म्‍हिमैंए मिं थेब् लमिंबै चारबै ह्‍वे खीन् ग।”
LUK 2:33 चु ताँ थेमा कोलोए आबा-आमा प्लेटोयाइ।
LUK 2:34 झाइले शिमियोनइ चमैं फिर आशिक पिंदै मरियमने बिइ, “थेद्, इस्राएलीमैं न्होंरि ल्हें म्हि नास लबर नेरो ल्हें म्हि जोगेमिंबर चु कोलो कुलइमुँ। चु कोलो परमेश्‍वरजी कुलबै चिनु तब्मुँ, ल्हें म्हिइ चु कोलोए बिरोधर पोंब्मुँ।
LUK 2:35 छतमा खीजी म्‍हिमैंए सैं न्‍होंर्बै ताँमैं उँइँमिंब्‍मुँ। झाइले सेलाँइ (तरवारइ) म्‍लोब् धोंले क्‍हिए सैं बेल्‍ले नब्‍मुँ।”
LUK 2:36 झाइले च मन्दिरर हन्‍ना अगमबक्‍तास्यो मुँल। च‍ए आबा फनुएल बिब् मुँल, च आशेरए कुलर्बै मुँल। च हन्‍ना ब्ह्‍या लबै ङिदिंर्न प्युँ सियासि म्हरेस्यो तयाल।
LUK 2:37 च प्रेच्‍युसे प्‍लिदिं बर्ष तयाल। दिलेया च बर्त टिसि प्राथना लसि त्‍हिंयाँ म्‍हुँइँसा परमेश्‍वर सैंर मैंसि मन्दिरर्न टिरिमल।
LUK 2:38 च त्‍हेर्न हन्‍ना खसि परमेश्‍वरलाइ धन्‍यबाद पिंबर होंइ। झाइले परमेश्‍वरजी यरूशलेम जोगेमिंब्मुँ बिसि घ्याँ ङ्ह्‍योरिबै ताँन् म्हिमैंने चइ चु कोलोए बारेर ताँ लमल।
LUK 2:39 परमेश्‍वरए छ्वेर बिब् धोंले लल् त्‍हुबै ताँन् के लल् खाँसि योसेफ नेरो मरियम कोलो बोसि गालील ह्‍युलर्बै नासरत बिबै ह्रोंसए नाँसर एह्‍याइ।
LUK 2:40 परमेश्‍वरए आशिक खीए फिर मुँल। छतसि कोलो फारदै भोंब नेरो ह्रब-सेब त‍दै ह्‍याइ।
LUK 2:41 कोलोए आबा आमा सालै ह्रोंसे दुःखने फ्रेबै चाड म्हाँदिबर यरूशलेमर ह्‍याब्रें लमल।
LUK 2:42 येशू च्युसे ङ्हिंदिंर्बै तमा येशूलाइ बोसि चमैं चाड म्हाँदिबर यरूशलेमर ह्‍याइ।
LUK 2:43 चाड म्हाँदिल् खाँबै लिउँइँ येशूए आबा आमा धिंर एह्‍याइ। येशू बिस्याँ यरूशलेमर्न टिइ। येशू चर्न टियाइ बिसि आबा आमाइ आसेल।
LUK 2:44 खी घ्‍याँर प्रबै म्हिमैंए हुलर मुँलै ङ्हाँसि चमैं तिंगेंबै घ्‍याँ प्रइ ह्‍याइ। म्हुँइँस तबै लिउँइँ चमैंइ ह्रजे-म्हजेमैं नेरो ङो सेब् मिं सेब्‍मैंए न्‍होंर येशूलाइ म्‍हैबर होंइ।
LUK 2:45 दिलेया येशू खनिरै आयोंमा चमैं धबै येशू म्हैदै यरूशलेमर्न एखइ।
LUK 2:46 सोंरो लिउँइँ चमैं मन्दिरर ह्‍यामा येशू परमेश्‍वरए ठिम लोमिंबै म्हिमैंए म्हाँजोर क्हुँसि चमैंए ताँ थेसि चमैंने ताँमैं ङ्योएरिब स्याइ।
LUK 2:47 खीए क्होबै शक्‍ति नेरो छ्याँबै ज्वाफमैं पिंब् म्रोंसि खीए ताँ थेब्मैं ताँन् प्लेटोयाइ।
LUK 2:48 खी म्रोंसि आबा आमा या प्लेटोयाइ। धै आमाइ खीने बिइ, “ठागु, क्‍हिजी तले ङि छाबै दुःख पिंल? क्‍हिए आबा नेरो ङ बेल्‍ले न्हुँ लसि क्हिलाइ म्‍हैदै प्रइ!”
LUK 2:49 येशूजी चमैंने बिइ, “क्हेमैंइ तले ङलाइ म्‍हैरिल? ङए आबाए धिंर ङ मुँल् त्‍हुम् बिब क्‍हेमैंइ आसेल् वा?”
LUK 2:50 दिलेया येशूजी बिबै ताँ मरियम नेरो योसेफइ आक्‍हो।
LUK 2:51 च लिउँइँ येशू चमैंने बालु नासरत नाँसर एह्‍याइ, धै आबा आमाइ बिब् ङिंसि टिइ। चर म्रोंबै ताँन् ताँमैं आमाइ सैंर थेंइ।
LUK 2:52 येशू बिस्याँ ज्ञान बुद्धि नेरो ज्युर फारदै परमेश्‍वर नेरो म्हिमैंइ खोबै ‍म्हि तदै ह्‍या‍इ।
LUK 3:1 रोम सहरर्बै तिबेरियस बिबै म्‍हिइ च्युसे ङ्‍हदिं समा ग्याल्स लमा पन्‍तियस पिलातस यहूदीया ह्‍युलर्बै क्रथे मुँल। च त्हेर गालील बिबै ह्‍युलर हेरोद म्रुँ मुँल। इतुरिया नेरो त्राखोनितिस बिबै ह्‍युलर हेरोदए अलि फिलिप म्रुँ मुँल। अबिलेने बिबै ह्‍युलर लुसानियास बिबै म्हि म्रुँ मुँल।
LUK 3:2 झाइले यरूशलेमर हन्‍नास नेरो कैयाफा ख्रो पिंबै खेगि क्रथेमैं मुँल। च त्‍हेर क्यु आयोंबै क्ल्ह्‍योर जकरियाए च्‍ह यूहन्‍नाने परमेश्‍वरए ताँ युइ।
LUK 3:3 छतसि यूहन्‍ना यर्दन स्‍योंए खागुबै ताँन् क्‍ल्‍ह्‍योजरे स्‍युरसि म्हिमैंने पाप लब पिसि परमेश्‍वरउँइँ सैं एदु धै क्‍युर प्‍ल्हुँसि बप्‍तिस्‍मा किंनु। छलस्याँ परमेश्‍वरजी क्‍हेमैंए पाप क्षमा लमिंब्‍मुँ बिसि परमेश्‍वरए ताँ बिप्रबर होंइ।
LUK 3:4 स्योंम्बै यशैया अगमबक्‍ताइ यूहन्‍नाए बारेर ओंसोंन् छले प्‍ह्रिइमुँ, “क्यु आयोंबै क्ल्ह्‍योर म्‍हि घ्रिइ कै तेसि छ बिसिन् मुँ, ‘याहवेहए ल्हागिर घ्‍याँ छ्याद्! खी प्रबै ल्हागिर आछ्याँबै घ्‍याँमैं क्योंएँन्!
LUK 3:5 ताँन् होंल्‍दोंमैं म्यालब्मुँ झाइले ताँन् कोंमैं चेप्ला लब्मुँ, ख्यदा-ख्योदे घ्‍याँमैं सोजो तयाब्मुँ, धै कर आयोंबै घ्‍याँमैं कर योंब तयाब्मुँ।
LUK 3:6 छले ताँन् म्हिमैंइ परमेश्‍वरजी जोगेमिंमुँनामैं बिसि सेब्‍मुँ।’” छले यशैयाइ प्‍ह्रिथेंबै ताँ यूहन्‍ना खसि पूरा लइ।
LUK 3:7 छतसि ल्हें म्हि यूहन्‍ना ङाँर क्युर प्ल्हुँसि बप्‍तिस्मा पिंन् बिसि खइ। छले खमा यूहन्‍नाइ चमैंने बिइ, “ओ, प्‍हुरि धों तबै म्‍हिमैं! परमेश्‍वरजी पिंबि छेबै सजैंउँइँले स्योल् खाँम् बिसि खाबइ क्‍हेमैंने बिल?
LUK 3:8 छतसि क्हेंमैए सैं परमेश्‍वरउँइँ एसि छ्याँबै के लसि उँइँन्। ‘ङि यहूदीमैं परमेश्‍वरजी त्‍हाँबै म्‍हि अब्राहामए कुलर्बै सन्तानमैं ग। छतसि ङिइ परमेश्‍वरउँइँले सजैं आयों बिसि क्हेमैंइ आमैंन्’ तलेबिस्याँ परमेश्‍वरजी चु युँमाउँइँले या अब्राहामए ल्हागिर सन्तानमैं लमिंल् खाँम्।
LUK 3:9 तोगोन् त सिंधुँए जरर फेयाल् खाँइँमुँ छतसि छ्याँबै रो आरोबै सिंधुँमैं ताँन् थोवासि मिर झोंवाब्‍मुँ।”
LUK 3:10 चु ताँ थेसि ल्‍हें म्‍हिमैंइ यूहन्‍नाने “छ बिस्याँ तारे ङिइ तो लल् त्हुम्?” बिसि ङ्योएइ।
LUK 3:11 यूहन्‍नाइ बिइ, “खाब्ने खिबै क्वें ङ्हिजोर मुँ, चइ आरेबै म्हिमैं तिजोर पिंरिगे, धै खाब्ने चबै सै मुँ चइ फो ख्रेंब्मैं चल् पिंरिगे।”
LUK 3:12 झाइले रोमी म्रुँए ल्हागिर बालि रेब्‍मैं या क्युर प्ल्हुँसि बप्‍तिस्मा किंबर खल। चमैंइ यूहन्‍नाने “ओ गुरु, तारे ङिइ तो लल् त्हुम् बिसि ङ्योइ?”
LUK 3:13 यूहन्‍नाइ चमैंने “सरकारइ तोक्दिब् भन्दा ल्हें मुइ आकिंन्,” बिइ।
LUK 3:14 को-कोइ सिपाइमैंज्यै या “ङिइ खै लल् त्‍हुम्?” बिसि यूहन्‍नाने ङ्योएइ। यूहन्‍नाइ चमैंने बिइ, “खाब‍लाज्‍यै या अनिया लसि स्योर्गों छ्याब् ल्हैदिसि आलुट्दिद्। क्‍हेमैंए नों सै कति योंमुँ च्‍हगर्न सन्‍दोक तद्।”
LUK 3:15 मुक्‍ति पिंबै म्रुँ ख्रीष्‍ट खोंयों युम् ङ्‍हे बिसि म्हिमैं ह्रेरिल। छतसि “परमेश्‍वरजी कुल्‍मिंबै म्रुँ ख्रीष्‍ट यूहन्‍नान् मुँन उ?” बिसि ताँन् म्हिमैंइ मैंरिल।
LUK 3:16 छतमा यूहन्‍नाइ चमैं ताँनने बिइ, “ङइमि क्‍हेमैंलाइ क्युर प्ल्हुँसि बप्‍तिस्मा पिंम्। दिलेया ङ भन्दा शक्‍ति मुँबै म्‍हि घ्रि युब्‍मुँ। खीए जुत्ताए तनि प्‍ल्हबर ङ्‍हेंब ङ आरे। खीजी क्‍हेमैंलाइ परमेश्‍वरए पबित्र प्ल्ह नेरो मिइ बप्‍तिस्मा पिंब्मुँ।
LUK 3:17 सोंग्याँ टाबै नउलि खीने मुँ। च नउलिइ ह्रोंसए सोंग्याँ छेनाले टाब्मुँ, धै गहुँ भकारिर खागु लब्‍मुँ बिस्याँ पुइ खोंयोंइ आसिबै मिर ख्रोंवाब्‍मुँ।”
LUK 3:18 छाबै ल्‍हें खालर्बै अर्थिए ताँमैं बिसि यूहन्‍नाइ परमेश्‍वरजी कुल्‍मिंबै म्रुँ ख्रीष्‍टउँइँले खबै सैं तोंबै ताँमैं म्हिमैंने बिप्रइ।
LUK 3:19 दिलेया हेरोद म्रुँइ ह्रोंसए अलिए प्ह्रेंस्यो हेरोदियासलाइ प्ह्रेंस्यो लसि थेंब नेरो चइ आछ्याँबै केमैं लबइले यूहन्‍नाइ चलाइ हौदिल।
LUK 3:20 झाइले यूहन्‍ना झेलर च्युवासि हेरोदइ आछ्याँबै के लबै फिरै या झन् आछ्याँबै के लइ।
LUK 3:21 यूहन्‍ना झेलर च्‍युवाब् भन्दा ओंसों चए योउँइँले ताँन् म्हिमैंइ क्‍युर प्‍ल्हुँसि बप्‍तिस्मा किंइ। झाइले येशूज्यै बप्‍तिस्मा किंसि परमेश्‍वरने प्राथना लरिमा स्‍वर्ग थोंयाँइ।
LUK 3:22 झाइले परमेश्‍वरए पबित्र प्ल्ह तोंगुए क्‍होले येशूए फिर युसि टिइ। धै “क्‍हि ङए खोबै च्‍ह ग, क्‍हि म्रोंसि ङ बेल्‍ले सैं तोंइमुँ,” बिबै कै स्‍वर्गउँइँले युइ।
LUK 3:23 येशूजी धाँसे ओंसों औदिबै के लबर होंमा खी सोंच्‍यु बर्षर्बै दे मुँल। खी योसेफए च्ह ग बिसि म्हिमैंइ मैंमल। योसेफए आबा एली मुँल।
LUK 3:24 एलीए आबा मत्तात मुँल। मत्तातए आबा लेबी मुँल। लेबीए आबा मल्की मुँल। मल्‍किए आबा यान्‍ना मुँल। यान्‍नाए आबा योसेफ मुँल।
LUK 3:25 योसेफए आबा मत्तियाह मुँल। मत्तियाहए आबा आमोस मुँल। आमोसए आबा नहूम मुँल। नहूमए आबा इसली मुँल। इसलिए आबा नग्‍गै मुँल।
LUK 3:26 नग्‍गैए आबा मात मुँल। मातए आबा मत्तथियास मुँल। मत्तथियासए आबा सेमैन मुँल। सेमैनए आबा योसेख मुँल। योसेखए आबा योदा मुँल।
LUK 3:27 योदाए आबा योआनन मुँल। योआननए आबा रेशा मुँल। रेसाए आबा यरुबाबेल मुँल। यरुबाबेलए आबा शालतिएल मुँल। शालतिएलए आबा नेरि मुँल।
LUK 3:28 नेरिए आबा मल्की मुँल। मल्कीए आबा अद्दी मुँल। अद्दीए आबा कोसाम मुँल। कोसामए आबा इलमादाम मुँल। इलमादामए आबा एर मुँल।
LUK 3:29 एरए आबा यहोशू मुँल। यहोशूए आबा इलाजार मुँल। इलाजारए आबा योरीम मुँल। योरीमए आबा मत्तात मुँल। मत्तातए आबा लेबी मुँल।
LUK 3:30 लेबीए आबा शिमियोन मुँल। शिमियोनए आबा यहूदा मुँल। यहूदाए आबा योसेफ मुँल। योसेफए आबा योनान मुँल। योनानए आबा एल्याकिम मुँल।
LUK 3:31 एल्याकिमए आबा मलेआ मुँल। मलेआए आबा मिन्‍ना मुँल। मिन्‍नाए आबा मत्ताथा मुँल। मत्ताथाए आबा नातान् मुँल। नातानए आबा दाऊद मुँल।
LUK 3:32 दाऊदए आबा यिशै मुँल। यिशैए आबा ओबेद मुँल। ओबेदए आबा बोअज मुँल। बोअजए आबा सल्‍मोन मुँल। सल्‍मोनए आबा नहशोन मुँल।
LUK 3:33 नहशोनए आबा अम्‍मीनादाब मुँल। अम्‍मीनादाबए आबा आराम मुँल। आरामए आबा हेस्रोन मुँल। हेस्रोनए आबा फारेस मुँल। फारेसए आबा यहूदा मुँल।
LUK 3:34 यहूदाए आबा याकूब मुँल। याकूबए आबा इसहाक मुँल। इसहाकए आबा अब्राहाम मुँल। अब्राहामए आबा तेरह मुँल। तेरहए आबा नाहोर मुँल।
LUK 3:35 नाहोरए आबा सरूग मुँल। सरूगए आबा रऊ मुँल। रऊए आबा पेलेग मुँल। पेलेगए आबा एबेर मुँल। एबेरए आबा शेलह मुँल।
LUK 3:36 शेलहए आबा केनान मुँल। केनानए आबा अर्पक्षद मुँल। अर्पक्षदए आबा शेम मुँल। शेमए आबा नोआ मुँल। नोआए आबा लेमेख मुँल।
LUK 3:37 लेमेखए आबा मतूशेलह मुँल। मतूशेलहए आबा हनोक मुँल। हनोकए आबा येरेद मुँल। येरेदए आबा महलालेल मुँल। महलालेलए आबा केनान मुँल।
LUK 3:38 केनानए आबा एनोश मुँल। एनोशए आबा शेत मुँल। शेतए आबा आदम मुँल। आदमए आबा परमेश्‍वर मुँल।
LUK 4:1 येशू क्युर प्ल्हुँसि बप्‍तिस्मा किंबै लिउँइँ परमेश्‍वरए पबित्र प्ल्हजी प्लिंसि यर्दन स्‍योंउँइँले एखमा पबित्रए प्ल्हजी खीलाइ क्यु आयोंबै क्ल्ह्‍योर बोइ।
LUK 4:2 येशू चर प्लिच्‍यु त्हिंइ समा टिमा दियाबलस बिबै दुष्‍ट जाँच लबर चर खइ। च्‍हौ त्हिंइ समा तोइ आचन्‍ले टिमा येशूलाइ फो ख्रेंल।
LUK 4:3 छतमा दुष्‍टइ येशूने बिइ, “क्हि क्‍ह्रोंसेंन परमेश्‍वरए च्‍ह ग बिस्‍याँ चु युँमा ‘चबै सै त‍याद्’ बिद्।”
LUK 4:4 दिलेया येशूजी चने बिइ, “‘म्हि क्हेंइ मत्‍त्रे सोल् आँखाँ!’ बिसि परमेश्‍वरए छ्वेर प्‍ह्रिइमुँ।”
LUK 4:5 च लिउँइँ चइ खीलाइ नुबै कोंर बोसि ह्‍युलर्बै ताँन् ग्याल्समैं उँइँइ।
LUK 4:6 दष्‍टइ येशूने बिइ, “चु ताँन् ग्याल्सर्बै सैमैं पिंसि ङइ क्‍हि चुर्बै क्ल्हे तल् पिंस्‍यो। तलेबिस्याँ चु ताँन् ङइ योंइमुँ छतसि ङइ खाबलाइ पिंदा ङ्हाँमुँ पिंल् खाँम्।
LUK 4:7 छतसि क्‍हिइ ङ फ्‍योस्‍याँ ङइ चु तोन्‍दोंरि सैमैं क्‍हिलाइ पिंब्मुँ।”
LUK 4:8 येशूजी चने बिइ, “क्‍हिइ याहवेह ह्रोंसए परमेश्‍वरलाइ मत्‍त्रे फ्‍योद्, धै खीए सेवा मत्‍त्रे लद्,” बिसि परमेश्‍वरए छ्वेर छले प्‍ह्रिइमुँ।
LUK 4:9 धबै च दुष्‍टइ खीलाइ यरूशलेम सहरर बोसि मन्दिरए ताँन् भन्दा नुबै च्‍होर राल् पिंसि खीने बिइ, “क्‍हि परमेश्‍वरए च्‍ह ग बिस्‍याँ छुइले फाल् झोंन्।
LUK 4:10 तलेबिस्याँ परमेश्‍वरए छ्वेर छले प्ह्रिइमुँ, ‘क्‍हि जोगेमिंबै ल्हागिर परमेश्‍वरजी ह्रोंसए स्‍वर्गदूतमैं कुलब्‍मुँ।
LUK 4:11 झाइले चमैंइ क्‍हिलाइ यो-योर्न तोब्मुँ, आस्याँ क्हिए प्‍हले युँमार थुरयाब्मुँ,’ बिसेया प्ह्रिइमुँ।”
LUK 4:12 दिलेया येशूजी चने बिइ, “‘क्‍हिइ ह्रोंसए याहवेह परमेश्‍वरए जाँच आलद्,’ बिसि परमेश्‍‍वरए छ्वेर प्ह्रिइमुँ।”
LUK 4:13 दियाबलसइ येशूलाइ ताँन् खालर्बै जाँच लसेया खीलाइ पापर च्होल् आखाँमा “तारे मौका ङ्‍ह्‍योसि जाँच लल् त्हुइ” ङ्हाँसि च खीलाइ वाथेंसि ह्‍याइ।
LUK 4:14 च लिउँइँ येशू परमेश्‍वरए पबित्र प्ल्हए शक्‍ति योंसि गालील ह्‍यु‍लर एख‍इ। छले एखमा खीए बारेर्बै ताँ च खागुबै ताँन् नाँसजरे थेनेइ।
LUK 4:15 खीजी चर्बै च्हों धिंजगोर परमेश्‍वरए ताँ लोमिंबर होंइ। छले लोमिंमा ताँन् म्‍हिमैंइ खीए छ्याँबै बयन लमल।
LUK 4:16 झाइले येशू ह्रोंस फाराबै सहर नासरतर ह्‍याइ। खी प्रिबै त्हिंइर च्हों धिंर ह्‍याब्रें लबै बाँनि मुँल। छतसि च्हों धिंर ह्‍यासि परमेश्‍वरए छ्वे खेबर राइ।
LUK 4:17 चर्बै म्हिमैंइ खीने यशैया अगमबक्‍ताइ प्‍ह्रिबै छ्वे पिंइ। खीजी च फैसि चु ताँ प्ह्रिबै खण्ड चमैंए ल्हागिर खेमिंइ:
LUK 4:18 “याहवेह परमेश्‍वरए प्‍ल्ह ङए फिर मुँ, तलेबिस्याँ ङ्हाँदुमैंलाइ सैं तोंबै ताँ बिमिंबर खीजी ङलाइ त्हाँइमुँ। कैदिमैं झेलउँइँले तेमिंबर, धै कनमैं मि म्रोंल् लमिंबर। आगुइ क्र ओल् आपिंब्मैंलाइ रेमिंबर खीजी ङ कुल्मिंब् ग।
LUK 4:19 धै याहवेहजी ह्रोंसए म्हिमैं जोगेमिंबै त्हे खइमुँ बिबर खीजी ङ कुल्मिंब् ग।”
LUK 4:20 च्‍हौ खेल् खाँसि खीजी परमेश्‍वरए छ्वे च्हों धिंर्बै म्हिने पिंसि खी क्हुँइ। च्हों धिंर मुँबै ताँन् म्‍हिमैंइ खीलाइ ङ्‍ह्‍योबै ङ्‍ह्‍योबन् लरिल।
LUK 4:21 झाइले खीजी चमैंने बिइ, “तिंयाँ क्‍हेमैंइ चु ताँ थेना थेन् परमेश्‍वरए छ्वेइ तो बिइमुँ छान् तइमुँ।”
LUK 4:22 ताँन् म्हिमैंइ “चुम् स्‍वाबै म्हि मुँन!” बिसि खीए छ्याँबै बयन लइ, धै खीजी पोंबै सैं तोंबै छ्याँबै ताँमैं थेसि चमैं ताँन् प्लेटोयाइ। धै “चुम् योसेफए च्‍ह आङिं वा?” बिसि चमैंइ बिइ।
LUK 4:23 येशूजी चमैंने बिइ, “ओ बैद्य, क्‍हि ह्रोंसलाइन सल् लद्‍। क्हिजी कफर्नहुमर तो-तो केमैं ल‍इमुँ बिब ङिंइ थेल। छतसि चर लब् धों तबै केमैं ह्रोंसए नाँसरै या लद्‍ बिबै चु अहान् क्ह्रोसेंन क्‍हेमैंइ ङने बिब्मुँ आङिं वा।”
LUK 4:24 धबै खीजी चमैंने बिइ, “क्ह्रोसेंन ङ क्हेमैंने बिमुँ, अगमबक्‍ता खाबलाज्यै या ह्रोंसए ह्‍युलर्बै म्‍हिमैंइ आक्‍वें।
LUK 4:25 क्‍ह्रोंसेंन ङ क्‍हेमैंने बिमुँ, इस्राएल ह्‍युलर एलियाए पलोर साडे सोंदिं समा नाँ आयुमा थेबै अँङ्गल् तल। च त्‍हेर चर म्हरेस्योमैं ल्हेंन् मुँल।
LUK 4:26 दिलेया परमेश्‍वरजी चमैं ङाँर एलिया आकुल। बरु इस्राएल ह्‍युल भन्दा अर्को सिदोन ह्‍युलर्बै सारफत बिबै नाँसर्बै म्हरेस्यो घ्रि ङाँर मत्‍त्रे ल्होबर एलिया कुलइ।
LUK 4:27 झाइले एलीशा अगमबक्‍ताए पलोर इस्राएली म्‍हिमैं न्‍होंर कोर खबै म्‍हिमैं ल्हेंन् मुँल। दिलेया च कोर खब्‍मैं न्होंर खाबै आस, अरू ह्‍युलर्बै सिरियालिथें नामान बिबै म्‍हि मत्‍त्रे एलीशा ङाँर खसि सइ।”
LUK 4:28 चु ताँ थेसि च्हों धिंर मुँब्‍मैं ताँन् बेल्‍ले ह्रिस खइ।
LUK 4:29 छतसि चमैंइ येशूलाइ नाँसउँइँले बैरु तेवासि खेंमैंइ बनेबै सहरए कोंर्बै च्होर बोसि खीलाइ क्युरु भ्‍योंवाल् म्हैइ।
LUK 4:30 दिलेया येशू हुलए म्‍हाँजोउँइँले क्युलसि त्होंह्‍याइ।
LUK 4:31 च लिउँइँ येशू गालील ह्‍युलर्बै कफर्नहुम बिबै नाँसर ह्‍यासि प्रिबै त्हिंइर म्हिमैं लोमिंरिल।
LUK 4:32 खीजी लोमिंबै ताँ थेब्मैं प्लेटोयाइ तलेबिस्याँ खीजी हग मुँल्‍ले ताँ पोंमल।
LUK 4:33 च्हों धिंर मोंइ स्‍याबै म्‍हि घ्रि मुँल। चइ थेबै कैले चिरसि,
LUK 4:34 “ओ नासरतर्बै येशू, क्‍हिइ ङिलाइ तो लल् म्‍हैल? ङि सैबर खल् वा? क्‍हि परमेश्‍वरजी कुल्मिंबै पबित्र म्‍हि ग बिसि ङइ सेइमुँ।” बिइ।
LUK 4:35 छबिमा येशूजी हौदिदै च मोंने बिइ, “आपोंन्, च म्हिउँइँले त्‍होंइ ह्‍याद्।” बिमा मोंइ चलाइ म्हिमैंए म्हाँजोर प्योवासि तोइ नल् आलल्‍ले च म्हिउँइँले त्होंइ ह्‍याइ।
LUK 4:36 छ तब् म्रोंसि ताँन् म्‍हिमैं प्लेटोयासि “चु खैतबै ताँ जा? चुइमि हग नेरो शक्‍ति मुँल्‍ले मोंमैं हौदिबै तोदोंन् मोंमैं छ्युडिह्‍यामना बिसि ह्रों-ह्रोंसन् ताँ लबर होंइ।”
LUK 4:37 छतमा प्रभु येशूए छयाँबै बयन च खागुबै ताँन् ह्‍युलजरे थेनेइ।
LUK 4:38 येशू च्हों धिंउँइँले त्‍होंसि सिमोन बिबै म्‍हिए धिंर ह्‍यामा सिमोनए स्‍युमिं बेल्‍ले जर खसि नरिल। छतमा चर्बै म्‍हिमैंइ चुलाइ सल् लमिंन् बिसि येशूने यो छ्‍युँ लइ।
LUK 4:39 छबिमा खी च ङाँर रासि जरलाइ हौदि‌इ, छले हौदिमा जरइ चलाइ पिवाइ। धै सबै तोदोंन् रेसि खेंमैंए सेवा लइ।
LUK 4:40 त्‍हिंयाँ लिबि छेमा च जरेबै ल्हें खालर्बै नब्‍मैं म्हिमैंइ येशू ङाँर पखइ। धै खीजी घ्रि-घ्रिए फिर ह्रोंसए यो थेंसि चमैं ताँन् सल् लमिंइ।
LUK 4:41 ल्हें म्हिउँइँले मोंमैं थेबै कैले “क्‍हि परमेश्‍वरए च्‍ह ग,” बिदै त्होंयाइ। दिलेया खीजी हौदिसि चमैं पोंल् आपिं। तलेबिस्याँ “येशू परमेश्‍वरजी कुल्‍मिंबै म्रुँ ख्रीष्‍ट ग!” बिसि च मोंमैंइ सेमल।
LUK 4:42 च प्‍हँन्हाँग्धों मि म्रोंबै लिउँइँ येशू खाबै आरेबै क्‍ल्‍ह्‍योर ह्‍याइ। दिलेया म्‍हिए हुलइ म्‍है‍दै खी ङाँर खसि “ङिलाइ पिसि आह्‍यामिंन् बिसि,” यो छ्युँ लइ।
LUK 4:43 दिलेया खीजी चमैंने बिइ, “तारे परमेश्‍वरजी ग्याल्स लबर होंइमुँ। छतसि खीजी बिब ङिंनु, खीजी क्‍हेमैंए फिर आशिक पिंब्‍मुँ। बिसि चु सैं तोंबै ताँ ङइ अरू क्ल्ह्‍योरै या बिल् त्‍हुम्। तलेबिस्याँ चुए ल्हागिर्न परमेश्‍वरजी ङ कुल्‍मिंब् ग।”
LUK 4:44 च्हौ बिसि खी यहूदीया ह्‍युलर्बै च्हों धिंजगोर परमेश्‍वरउँइँले खबै सैं तोंबै ताँ बिप्रइ।
LUK 5:1 तिगें येशू गनेसरत बिबै तालए छ्योगोर रारिमा परमेश्‍वरए ताँ थेबर ल्हें म्‍हिमैं खी ङाँर खल।
LUK 5:2 येशूजी तालए छ्योगोर डुँङ्गा ङ्हिं म्रोंइ। ताँग क्हाब्मैं बिस्याँ डुङ्गाउँइँले त्‍होंसि खेंमैंए जाल ख्रुरिल।
LUK 5:3 च डुँङ्गा ङ्हिंर डुँङ्गा घ्रि सिमोनल् मुँल। सिमोन बिबै म्‍हिए डुँङ्गार येशू क्रेसि चने डुँङ्गा छ्योगोउँइँले दे क्‍याइ बोयाद्‍ बिसि खी च डुँङ्गार्न क्हुँसि म्‍हिए हुललाइ परमेश्‍वरए ताँ लोमिंबर होंइ।
LUK 5:4 ताँ लोमिंल् खाँबै लिउँइँ खीजी सिमोनने बिइ, “डुँङ्गा गैरु क्‍युउँइँ बोसि ताँग क्हाबर क्‍हेमैंए जाल प्रिंन्।”
LUK 5:5 छबिमा सिमोनइ बिइ, “गुरु, ङिइ म्‍हुँइँसतिमि सिया सियाले जाल प्रिंसेया ताँग घ्रि या आस्‍या। दिलेया क्‍हिइ बिसेरो ङइ जाल प्रिंम्।”
LUK 5:6 खीजी बिब् ङिंसि चमैंइ जाल प्रिंमा ल्‍हें ताँग स्‍यासि जालैया ट्होयाबर होंइ।
LUK 5:7 छतमा चमैंइ अर्को डुँङ्गार मुँबै थुमैंने “चुर खसि ङि ल्होमिंन्!” बिसि हस्‍त लइ, चमैं खसि डुँङ्गा ङ्हिंर्न ताँग प्‍लिंल् लइ, च्हौ ल्हें ताँग तबइले डुँङ्गामैं या प्ल्हुँबर होंइ।
LUK 5:8 छतब् म्रोंसि सिमोन पत्रुसइ येशू प्रभुए उँइँर पत्खु तसि बिइ, “ओ प्रभु क्‍हि ङ ङाँइँले ह्रेंगो तयाद्, तलेबिस्याँ ङ पापि म्‍हि ग।”
LUK 5:9 च्‍हौ ल्‍हें ताँग स्याब् म्रोंसि सिमोन नेरो चए थुमैं ताँन् प्लेटोयाइ।
LUK 5:10 छलेन सिमोनए गमस्‍ता थुमैं जब्दियाए च्‍हमैं याकूब नेरो यूहन्‍ना या प्लेटोयाइ। झाइले प्रभु येशूजी सिमोनने बिइ, “आङ्हिंन्! तारे पिरु क्‍हिइ ताँग खुबै के आङिं, म्हिमैं ङ ङाँर खुपबै के लब्‍मुँ।”
LUK 5:11 छबिमा चमैंइ ह्रोंसए डुँङ्गामैं छ्योगोर भ्योंथेंसि तोन्दोंरि सै वाथेंसि प्रभु येशूए लिलि प्र‍याइ।
LUK 5:12 तिगें येशू नाँस घ्रिर मुँमा ज्यु तोगोंन् कोर खबै म्‍हि घ्रि चर मुँल। चइ येशू म्रोंसि पद्खु तसि येशूने यो छ्युँ लसि बिइ, “ओ प्रभु, क्‍हिइ ङए कोर सल् लमिंबै सैं मुँस्‍याँ सल् लमिल् खाँम्।”
LUK 5:13 खीजी यो स्‍योंसि “ङज्यै क्हि स‍यारिगे ङ्हाँइमुँ, क्‍हि सयाद्” बिदै चलाइ छुइबै तोदोंन् चए कोर सयाइ।
LUK 5:14 छतमा येशूजी चने “थेद्, चु ताँ खाबलाज्यै खैलसे आबिद्। बरु क्हिए कोर सयाब सेरिगे बिसि सरासर ख्रो पिंबै खेगि ङाँर ह्‍यासि क्‍हिए ज्यु उँइँन् धै स्‍योंम्‍बै मोशाइ प्ह्रिबै ठिमर बिब् धोंले ‘क्हि शुद्ध तयान’ बिसि म्हिमैंलाइ उँइँबै ल्हागिर ख्रो पिंन्,” बिसि ल्हैदिइ।
LUK 5:15 छान् बिलेया येशूए बयन ओंसों भन्दा झन् खन्तोंदोंन् थेनेइ। छतसि खीए ताँ थेबर नेरो ह्रों-ह्रोंसए नब सल् लमिंरिगे बिसि थेबै हुल खी ङाँर खमल।
LUK 5:16 दिलेया येशू म्हिइ आम्रोंबै क्‍ल्‍ह्‍योउँइँ ह्‍यासि परमेश्‍वरने प्राथना लब्‍ब्रें लमल।
LUK 5:17 तिगें येशूजी परमेश्‍वरए ताँ म्हिमैंने लोमिंरिमा गालील नेरो यहूदीया ह्‍युलर्बै ताँन् नाँसउँइँले धै यरूशलेमउँइँले खबै फरिसीमैं नेरो शास्‍त्रिमैं या येशूए रेर क्हुँरिल। याहवेह परमेश्‍वरए नब् सल् लबै शक्‍ति येशूने मुँल।
LUK 5:18 च त्हेर्न म्‍हिमैंइ स्याले तसि ओलेल् आखाँबै म्‍हि घ्रि खाटने बालुन् पखइ, धै चमैंइ च नबै म्हिलाइ धिं न्होंर बोसि येशूए उँइँर थेंल् म्हैइ।
LUK 5:19 दिलेया म्हिए हुलइ लमा च म्‍हि न्‍होंर बोबै घ्‍याँ आयोंमा चमैं धिंए फिर क्रेइ, धै धिंए प्हें ओवासि नबै म्‍हि खाटनेन् बालु येशूए उँइँर तवाइ।
LUK 5:20 चमैंए च्हौ थेबै बिश्‍वास म्रोंसि येशूजी च नबै म्हिने बिइ, “ओ बाबु, क्‍हिए पाप क्षमा तइ।”
LUK 5:21 चु ताँ थेसि फरिसीमैं नेरो शास्‍त्रिमैंइ ह्रों-ह्रोंसन् “परमेश्‍वर म्‍हि आच्‍हिल्‍ले पोंब चु खाब् जा? परमेश्‍वरजी मत्‍त्रे पापए क्षमा पिंल् खाँम् आङिं वा? बिबर होंइ।”
LUK 5:22 दिलेया येशूजी चमैंए सैंर्बै ताँ था सेसि बिइ, “क्‍हेमैं ह्रोंसए सैंर तले छाबै ताँ मैंरिल?
LUK 5:23 प्रल् आखाँबै म्‍हिने तो बिब् छ्याँब तम्? ‘रेसि प्रद्’ बिब् उ ‘क्‍हिए पाप क्षमा तइ’ बिब तो बिब् सजिल् मुँ?
LUK 5:24 दिलेया म्हिए च्हने पृथ्‍बीर पाप क्षमा पिंबै हग मुँ बिसि क्हेमैंइ सेद्।” च्हौ बिसि खीजी च स्याले म्हिने “रेद्, क्‍हिए खाट नोसि धिंर ह्‍याद्,” बिइ।
LUK 5:25 येशूजी छ बिबै तोदोंन् च नबै म्‍हि चमैं ताँनए उँइँर रेसि ह्रोंस रोरिबै खाट नोसि परमेश्‍वरए मिं थेब लदै ह्रोंसए धिंर ह्‍याइ।
LUK 5:26 छाब् म्रोंसि चर्बै ताँन् म्हिमैं प्लेटोयाइ। धै परमेश्‍वरए के म्रोंसि बेल्‍ले ङ्हिंसि खीए मिं थेब लदै “तिंयाँ ङिंइ औदिबै के म्रोंइ,” बिइ।
LUK 5:27 च लिउँइँ येशू बैरु ह्‍यामा म्हालार बालि रेबै लेबी म्हि घ्रि म्रोंइ। च लेबी रोमी म्रुँए ल्हागिर बालि रेबै म्हि मुँल। येशूजी चने “ङए लिलि प्रद्,” बिइ।
LUK 5:28 छबिमा च लेबीइ खीए तोन्‍दोंरि सै वाथेंसि येशूए लिलि प्र‍याइ।
LUK 5:29 झाइले च लेबीइ येशूए ल्हागिर ह्रोंसए धिंर थेबै भोज लइ। चर रोमी म्रुँए ल्हागिर बालि रेब्मैं नेरो अरू ल्‍हें म्‍हिमैं या चमैंने क्हुँसि चरिल।
LUK 5:30 छले चरिमा फरिसीमैं नेरो चमैं न्‍होंर्बै शास्‍त्रिमैंइ येशूए चेलामैंए बिरोधर गनगन लसि “चु बालि रेब्‍मैं नेरो पापिमैंने क्‍हेमैंइ तले चब्-थुँब् लल?” बिबर होंइ।
LUK 5:31 दिलेया येशूजी चमैंने बिइ, “नब् छब् आतब्मैंए ल्हागिर बैद्य आचैदि, नब् छब्मैंए ल्हागिर मत्‍त्रे बैद्य चैदिम्।
LUK 5:32 छतसि ङ धर्मि प्हैंब्मैं हुइबर युब आङिं, दिलेया ‘पापिमैं पाप लब् पिसि परमेश्‍वरउँइँ सैं एरिगे,’ बिसि हुइबर युब् ग।”
LUK 5:33 चमैंइ येशूने बिइ, “बप्‍तिस्मा पिंबै यूहन्‍नाए चेलामैं बर्त टिब्ब्रें लसि प्राथना लम्। फरिसीमैंए चेलामैंज्‍यै या छान् लम्, दिलेया क्‍हिए चेलामैं बिस्याँ त्हिंइ ह्रोंसे चब् थुँब् लम् तले जा?”
LUK 5:34 येशूजी चमैंने बिइ, “ब्ह्‍या भत्यारर प्ह्रेंरो मुँन् समा प्ह्रेंरोने खबै प्‍ह्रेंमैंने तोइ आचल्‍ले टिद् बिल् तम्‍मा?
LUK 5:35 दिलेया प्ह्रेंरो चमैंने फ्रेयाबै त्हिंइ खब्मुँ, च त्हेर बल्‍ल चमैंइ बर्त टिब्मुँ।”
LUK 5:36 येशूजी चमैंने चु अहानै बिइ, “खाब‍ज्‍यै या छारा क्‍वें ट्‍होसि स्योब क्‍वेंर आखे। छ लइबिस्‍याँ छारा क्‍वें या ट्होवाम्, धै छारा क्‍वेंए टालो थौंनि क्‍वेंने आक्‍ह्रि।
LUK 5:37 “छलेन खाबज्‍यै भर्खर त्होंबै अँगुरए खु ट्हुबिए स्योब नेंदोंर आझों। झोंइ बिस्‍याँ अँगुरए खुइ ट्हुबिए स्योब नेंदों ट्होवाम्, धै खु ङेयाम्, झाइले नेंदों या ट्होयाम्।
LUK 5:38 छतसि भर्खर त्होंबै अँगुरए खु ट्हुबिए भोंबै नेंदोंर झोंल् त्‍हुम्।
LUK 5:39 “चिबै अँगुरए लिंबै खु थुँब्मैंइ आचिबै अँगुरए खु थुँबै सैं आल। तलेबिस्याँ चिबै अँगुरए खुन् चइ लिंन् छोरम्।”
LUK 6:1 तिगें प्रिबै त्हिंइर येशू नेरो खीए चेलामैं गहुँ बारिए घ्‍याँ तसि ह्‍यारिमा चेलामैंइ गहुँए नाँ थुसि योर नेसि चइ।
LUK 6:2 छले चब् म्रोंसि को-कोइ फरिसीमैंइ बिइ, “प्रिबै त्हिंइर तो लल् आत चन् क्हेमैंइ तले लमुँ?”
LUK 6:3 येशूजी चमैंने बिइ, “क्‍हेमैंइ परमेश्‍वरए छ्वेर आखेइमुँ वा? स्‍योंम्‍बै दाऊद नेरो खीए थुमैं फो ख्रेंमा चइ तो लल?
LUK 6:4 चइ परमेश्‍वरए मन्दिरर होंसि परमेश्‍वरए मिंर थेंबै क्हें चवाइ। धै ह्रोंसए थुमैंलाज्यै या च क्‍हें चल् पिंइ। ख्रो पिंबै खेगिमैंइ बाहेक अरू खाबज्‍यै या च क्हें चल् आतमल।”
LUK 6:5 धबै येशूजी चमैंने बिइ, “म्हिए च्ह प्रिबै त्हिंइर्बै क्‍ल्‍हे ग।”
LUK 6:6 धबै अर्को प्रिबै त्हिंइरै या येशू च्हों धिंर ह्‍यासि लोमिंबर होंइ। चर क्‍योलो यो कार‍याबै म्हि घ्रि मुँल।
LUK 6:7 छतसि खीजी प्रिबै त्हिंइरै या च नबै म्हिलाइ सल् लमिंम् उ सल् लस्याँ खीए फिर छ्याब् ल्‍हैदिल् योंम् बिसि को-कोइ शास्‍त्रिमैं नेरो फरिसीमैंइ खीए छैं लरिल।
LUK 6:8 दिलेया येशूजी चमैंए सैं न्‍होंर्बै ताँ क्‍होसि यो कार‍याबै म्हिने “रेसि चुर खो,” बिमा च म्हि रेसि राइ।
LUK 6:9 झाइले येशूजी फरिसीमैं नेरो शास्‍त्रिमैंने बिइ, “क्‍हेमैंने बालु ङइ ताँ घ्रि ङ्योएम्! प्रिबै त्हिंइर छ्याँबै के लब स्वाब उ आछ्याँबै के लब स्वाब? म्‍हि जोगेब छ्याँब उ सिल् पिंब छ्याँब?”
LUK 6:10 छ बिसि खीजी ताँन् म्‍हिमैं ङाँइ ङ्ह्‍योसि यो कारयाबै म्हिने “क्‍हिए यो स्‍योंन्,” बिइ। च म्‍हिइ यो स्योंमा चए यो सयाइ।
LUK 6:11 छ लब् म्रोंसि फरिसीमैं नेरो शास्‍त्रिमैं बेल्‍ले ह्रिस खसि चुलाइ तो लले बिसि खेमैं न्‍होंर मत लबर होंइ।
LUK 6:12 च त्‍हेजरे येशू कोंर ह्‍यासि म्‍हुँइँसतिमि परमेश्‍वरने प्राथना लसि म्हुँइँस थोइ।
LUK 6:13 मि म्रोंल् खाँबै लिउँइँ येशूजी चेलामैं ह्रोंस ङाँर हुइसि चमैं न्‍होंर्बै च्युसे ङ्हिं कुल्मिंबै चेला चिब्मैं त्‍हाँसि चमैंलाइ “कुल्मिंबै चेला चिब्मैं” बिबै मिं थेंइ।
LUK 6:14 कुल्मिंबै चेला चिब्मैंए मिं छले मुँ: सिमोन (चए मिं येशूजी पत्रुस थेंइ) चए अलि अन्‍द्रियास, याकूब, यूहन्‍ना, फिलिप नेरो बारथोलोमाइ,
LUK 6:15 मत्ती, थोमा, अल्‍फयसए च्‍ह याकूब नेरो सिमोन, (चने “ह्रोंसए ह्‍युललाइ म्‍हाँया लबै म्हि या” बिमल)।
LUK 6:16 याकूबए च्‍ह यहूदा नेरो यहूदा इस्‍करयोतथें (चु इस्‍करियोतथेंइ लिउँइँ धोका पिंसि येशूलाइ शत्तुरमैंए योर पिंवाम्।
LUK 6:17 च लिउँइँ खी कोंउँइँले चेलामैंने बालुन् क्युरु युसि चेप्ला तबै क्‍ल्‍ह्‍योर राइ। चर यहूदीया, यरूशलेम नेरो मा ङ्युँइ रेजरेबै टुरोस नेरो सिदोन सहर खागुबै ह्‍युलउँइँले या ल्हें म्हि खल। चर खीए अरू चेलामैं या मुँल। चमैं येशूजी लोमिंबै ताँ थेबर नेरो ह्रोंसए नब्-छब् सल् लमिंरिगे बिसि खल।
LUK 6:18 च त्‍हेर्न मोंमैंइ स्‍याबै म्हिमैं या येशूजी सल् लमिंइ।
LUK 6:19 ताँन् म्‍हिमैंइ येशूलाइ छुइल् म्‍हैमल, तलेबिस्याँ येशूउँइँले शक्‍ति त्होंरिल। छतमा चमैं ताँन् सल् लमल।
LUK 6:20 झाइले येशूजी खीए चेलामैं ङाँइ ङ्‌ह्‍योसि बिइ, “ओ आयों आख्युब्मैं, क्हेमैंइ आशिक योंब्मुँ तलेबिस्याँ परमेश्‍वरए ग्याल्स क्हेमैंलन् ग।
LUK 6:21 ओ तोगो फो ख्रेंब्मैं, क्हेमैंइ आशिक योंब्मुँ तलेबिस्याँ क्‍हेमैंइ म्रेंन्ले चल् योंब्‍मुँ। तोगो क्रोब्‍मैंइ आशिक योंब्मुँ, तलेबिस्याँ क्‍हेमैं निस्‍योल् योंब्‍मुँ।
LUK 6:22 “म्हिए च्हए फिर क्‍हेमैंइ बिश्‍वास लबइले म्‍हिमैंइ हेल लसि खेंमैंउँइँले स्यो लावाब्मुँ, धै क्हेमैं फिर आछ्याँबै ताँमैं पोंसि क्हेमैंए बिल्‍लि लब्मुँ, धै दुष्‍ट म्हिमैं धों ङ्हाँसि म्हि आच्हिन् लब्मुँ। छ ललेया क्हेमैंइ आशिक योंब्मुँ।
LUK 6:23 च त्‍हेर क्‍हेमैं सैं तोंदै उफरदिद्, तलेबिस्याँ स्‍वर्गर क्‍हेमैंए इनाम थेब तब्मुँ। चमैंए खेमैंज्‍यै या स्‍योंमा अगमबक्‍तामैंलाइ छलेन् ह्रुगुदिल।
LUK 6:24 दिलेया धिक्‍कार क्हेमैं तोगो प्लब्‍मैं! सै न्होरए लिलि प्रब्‍मैं क्हेमैंइ परमेश्‍वरए ग्याल्सर तोइ योंरिब् आरे। तलेबिस्याँ क्‍हेमैंइ सुख योंल् खाँइमुँ।
LUK 6:25 धिक्‍कार, क्‍हेमैं तोगो म्रेंन्ले चल् योंब्मैं! तलेबिस्याँ लिउँइँ क्‍हेमैं फो ख्रेंल् त्हुब्‍मुँ। धिक्‍कार, क्‍हेमैं तोगो निस्‍योब्‍मैं! तलेबिस्याँ लिउँइँ क्‍हेमैं शोक लसि क्रोल् त्हुब्‍मुँ।
LUK 6:26 धिक्‍कर, तोगो म्‍हिमैंइ स्वाब म्हि बिसि थेब् लब्मैं! तलेबिस्याँ चमैंए खेमैंज्यैया स्योलिबै ताँ पोंबै अगमबक्‍तामैं स्वाब म्हि बिसि थेब् लमल।
LUK 6:27 “छतसि ङए ताँ थेब्‍मैंने ङ बिमुँ, ह्रोंसए शत्तुरमैंलाज्यै या म्‍हाँया लद्, धै क्‍हेमैंलाइ हेल लब्‍मैंलाज्यै छ्याँब लद्।
LUK 6:28 क्‍हेमैंए फिर सराप पिंब्‍मैंलाज्यै आशिक पिंन्, धै क्‍हेमैंए फिर गाल् केब्‍मैंए ल्हागिर परमेश्‍वरने क्षमा ह्रिसि प्राथना लमिंन्।
LUK 6:29 खाबज्यै क्हिए क्‍हाँबोर ल्हिस्याँ अर्को क्‍हाँबो या तोमिंन्, छलेन खाबज्यै क्‍हिए बक्‍खु प्हेंवास्‍याँ ह्रेंगै या बोल् पिंन्।
LUK 6:30 क्‍हिने बालु ह्रिब्मैंलाइ पिंन्, धै क्‍हिए समनमैं बोयाब्मैंने धबै आह्रिद्।
LUK 6:31 “म्हिमैंइ ह्रोंसने छ्याँब् लरिगे ङ्हाँस्याँ क्हेमैंज्यै या चमैंने छ्याँबन् लद्।
LUK 6:32 ह्रोंसने म्‍हाँया लब्‍मैंने मत्‍त्रे म्‍हाँया लइ बिस्‍याँ क्‍हेमैंलाइ तो फयादा तइ? तलेबिस्याँ पापिमैंज्यै या ह्रोंसने म्हाँया लब्मैंने मत्‍त्रे म्हाँया लम्।
LUK 6:33 ह्रोंसलाइ छ्याँब लब्मैंलाइ मत्‍त्रे छ्याँब लइ बिस्‍याँ, क्‍हेमैंलाइ तो फयाद तइ? तलेबिस्याँ पापिमैंज्यै या छान् लम्।
LUK 6:34 फोल् खाँबै म्हिमैंलाइ मत्‍त्रे छे पिंइ बिस्याँ, क्‍हेमैंइ तो इनाम योंम् रो? तलेबिस्याँ पापिमैंज्यै छे फोल् खाँबै पापिमैंलाइ छे पिंम्।
LUK 6:35 छले आङिं, ह्रोंसए शत्तुरमैंलाज्यै या म्‍हाँया लद्, चमैंए फिर ल्हयो खद्, एल् आखाँबै म्‍हिमैंलाज्यै या छे पिंन्। छलस्याँ परमेश्‍वरङाँइँले क्‍हेमैंइ थेबै इनाम योंब्‍मुँ। धै क्‍हेमैं ताँन् भन्दा थेबै परमेश्‍वरए च्ह-च्हमि ठर्दिब्‍मुँ, तलेबिस्याँ परमेश्‍वरजी बैगुनिमैं नेरो दुष्‍टमैं फिर ल्हयो खम्।
LUK 6:36 क्‍हेमैंए परमेश्‍वर आबाजी ताँनए फिर ल्हयो खब् धोंले क्‍हेमैंज्यै या ताँनए फिर ल्हयो खद्।
LUK 6:37 “आगुए फिर छ्याब् आल्‍हैदिद्, आगुने चम् आछ्याँबै के लबै म्हि ग आबिद्। छलस्याँ परमेश्‍वरज्यै या क्‍हेमैंए फिर छ्याब् ल्हैदिरिब् आरे। अरूलाइ क्षमा पिंन्, धै परमेश्‍वरज्यै या क्‍हेमैंलाइ क्षमा पिंब्मुँ।
LUK 6:38 ह्रोंसने मुँबै सैमैं अरूलाज्यै या पिंन् छलस्याँ खाँदि-खाँदिसि, म्‍युरुरुले ङेयाल्‍ले परमेश्‍वरजी झन् ल्हें सैमैं क्हेमैंलाइ पिंब्‍मुँ। क्‍हेमैंइ खैले क्‍होंएँसि पिमुँ, छलेन परमेश्‍वरजी क्‍हेमैंलाज्यै या क्हों‍एँसि पिंब्‍मुँ।”
LUK 6:39 येशूजी चमैंने अहान् घ्रि बिइ, “कन घ्रिइ अर्को कन डोरेल् खाँम्‍मा? कनइ कन डोरेस्याँ ङ्हिंना ङ्हिंन् होंल्‍दोंर आपा‍य वा?
LUK 6:40 चेला ह्रोंसए गुरु भन्दा थेब आत, दिलेया गुरुइ लोमिंबै ताँमैं ह्रल् खाँबै लिउँइँ मत्‍त्रे च गुरु धोंब तल् खाँम्।
LUK 6:41 “क्‍हिइ ह्रोंसए अलिए मिर्बै कसिं म्रोंम्, दिलेया ह्रोंसए मिर्बै म्हुँडा बिस्‍याँ तले आम्रों?
LUK 6:42 क्हिइ ह्रोंसए मिर्बै म्हुँडा आम्रोंस्याँ, ह्रोंसए अलिने ‘ओ अलि क्‍हिए मिर कसिं मुँन तेमिंले ओ,’ बिसि क्‍हिइ खैले बिल् खाँम्? ओ फिब्लो पार्दिब्मैं! ओंसों ह्रोंसए मिर्बै म्हुँडा तेद्, धै बल्‍ल ह्रोंसए अलिए मिर्बै कसिं तेबर क्‍हिइ छेन्‍ले म्रोंल् खाँम्।
LUK 6:43 “छ्याँबै सिं धुँर न्‍होंह्‍याबै रो आरो। छलेन आछ्याँबै सिं धुँर छ्याँबै रो आरो।
LUK 6:44 सिं धुँ खैब मुँ, रो या छाबन् तम्। रो म्रोंसि सिं धुँ खैब मुँन बिब था सेम्। पुजुए धुँउँइँले म्‍हिमैंइ तुँबुए रो थुल् आखाँ, छलेन पुलुए धुँउँइँले पलाँ थुल् आखाँ।
LUK 6:45 छ्याँबै सैं प्ह्‍याबै म्‍हिइ ह्रोंसए सैंर मुँबै छ्याँबै सैमैंउँइँले छयाँबै ताँमैं पोंम्, धै आछ्याँबै सैं प्ह्‍याबै म्‍हिइ ह्रोंसए सैंर मुँबै आछ्याँबै सैंउँइँले आछ्याँबै ताँमैंन् पोंम्। तलेबिस्याँ सैंर तो मुँ चन् म्‍हिए सुँउँइँले त्‍होंम्।”
LUK 6:46 येशूजी धबै अर्को ताँ बिइ, “ङइ बिबै ताँ आङिंस्‍याँ क्‍हेमैंइ तले ङने ‘ओ प्रभु, प्रभु’ बिमुँ?
LUK 6:47 खाब् म्‍हि ङ ङाँर खसि ङइ बिबै ताँ थेसि ङइ खै बिमुँ छान् लमुँ, च म्हि खैबै तम् बिसि ङ क्‍हेमैंने बिमुँ:
LUK 6:48 च म्‍हि धिं बनेबै म्‍हि धों तब् ग। च म्‍हिइ गैरु जग त्‍हासि पारए फिर जग झोंइ। झाइले नाँ बाडि तसि थेबै प्हँले च धिंए फिर उँयालेया च धिं तोइ आत, तलेबिस्याँ चइ भोंन्‍ले धिं बनेल।
LUK 6:49 दिलेया खाबइ ङए ताँ थेसेया ङइ बिब् धों आल, च म्‍हि अर्को धिं बनेबै म्‍हि धों तब् ग। च म्‍हिइ गैरु जग आतल्‍ले सए फिर्न धिं बनेइ। धै च धिंए फिर प्हँले युमा युनन् फु‍याम्। झाइले चला थेबै नोक्सन् त‍याइ।”
LUK 7:1 छले खीजी बिल् त्हुबै ताँमैं ताँन् बिल् खाँबै लिउँइँ येशू कफर्नहुम बिबै नाँसर ह्‍याइ।
LUK 7:2 च नाँसर रोमी कप्‍तानइ बेल्‍ले खोबै के लबै म्हि घ्रि नसि सिबिन् छेल।
LUK 7:3 च कप्‍तानइ येशूए बारेर्बै ताँ थेल। छतसि खीए के लबै म्हि सल् लमिंरिगे बिसि यहूदीमैंए चिबनाँब्मैं येशू ङाँर यो छ्युँ लबर कुलइ।
LUK 7:4 चमैं येशू ङाँर खसि यो छ्युँ लदै बिइ, “ओ गुरु, कप्‍तानए के लबै म्हि बेल्‍ले नसि सिबर होंइमुँ, छतसि चलाइ सल् लमिंरिगे बिसि क्हिने यो छ्युँ लबर चइ ङि चुर कुलब् ग। च क्हिए ल्हयो योंबै लायकर्बै मुँ।
LUK 7:5 तलेबिस्याँ च ङ्यो यहूदीमैंलाज्यै या म्‍हाँया लबै म्हि ग, ङ्योए च्हों धिं चइन बनेमिंब् ग।”
LUK 7:6 चमैंए ताँ थेसि येशू चमैंने ह्‍याइ। कप्‍तानए धिंर फेखबि छेमा च कप्‍तानइ ह्रोंसए थुमैं येशू ङाँर छ बिबर कुलइ: “ओ प्रभु, क्‍हि दुःख आयोंरिद् तलेबिस्याँ क्‍हि ङए धिंर खसि टिबै लायकर्बै ङ आरे।
LUK 7:7 ङै या क्हिए ङाँर खबै लायकर्बै आरे। बरु क्‍हिजी सुँइ मत्‍त्रे पोंमिंलै या ङए के लबै म्हि सयाब्‍मुँ।
LUK 7:8 ङज्‍यै या थेबै म्‍हिमैंउँइँले हुकुम योंसि ङए न्‍होंर्बै सिपाइमैंने हुकुम पिंम्। ङइ घ्रिने ‘ह्‍याद्’ बिस्‍याँ च ह्‍याम्, धै अर्कोने ‘खो’ बिस्‍याँ च खम् ङए के लबै म्हिने या ‘ङइ तो लद्’ बिमुँ चइ चन् लम्।”
LUK 7:9 चु ताँ थेसि येशू प्लेटोयाइ, धै खीजी ह्रोंसए लिलि खबै हुल ङाँइ तोसि “ङ क्‍हेमैंने बिमुँ, च्हौ थेबै बिश्‍वास लबै म्‍हि ङइ तोगो समा खोंयोंइ आम्रोंइमुँ। छाबै बिश्‍वास इस्राएली म्‍हिमैंने या आरे।”
LUK 7:10 झाइले कप्‍तानइ कुल्मिंबै म्‍हिमैं चए धिंर एह्‍याइ चमैं धिंर फेनेमा नबै म्हि सयाब् म्रोंइ।
LUK 7:11 प्हाँन्हाँग्धों येशू नाइन बिबै नाँसर ह्‍यामा खीए चेलामैं नेरो म्हिए हुलै या खीने बालुन् ह्‍याल।
LUK 7:12 नाँसर फेखबि छेमा ल्‍हें म्‍हिमैं सि‍याबै कोलो सबर ह्‍यासिन् ‍मुँल। च कोलोए आमाल च च्‍ह घ्रिन् मुँल, चए आबा या ओंसोंन् सि‍याल।
LUK 7:13 च कोलोए आमा म्रोंसि येशूए सैंर बेल्‍ले ल्‍हयो खसि चने “आक्रोद्,” बिइ।
LUK 7:14 खीजी च कोलो नोबै खाट छुइमा कोलो नोब्‍मैं रायाइ। येशूजी च सि‍याबै कोलोने बिइ, “ओ बाबु, ङइ क्हिने बिमुँ, ‘रेद्!’”
LUK 7:15 येशूजी छबिमा सियाबै कोलो सोगों तसि क्हुँइ, धै पोंबर होंइ। झाइले येशूजी कोलो चए आमाने पिंइ।
LUK 7:16 छाबै के म्रोंसि ताँन् म्‍हिमैं बेल्‍ले ङ्हिंयाँइ, धै “परमेश्‍वर बेल्‍ले थेब नेरो छ्याँब् मुँन! ङ्योए म्‍हाँजोर थेबै अगमबक्‍ता युइमुँ! खी ह्रोंसए म्‍हिमैं जोगेमिंबर युइमुँ,” बिइ।
LUK 7:17 येशूजी छले कोलो सोल् लमिंबै ताँ यहूदीया नेरो च खागुबै ह्‍युल तिगोंन् थेनेइ।
LUK 7:18 च त्‍हेर क्युर प्ल्हुँसि बप्‍तिस्मा पिंबै यूहन्‍ना झेलर मुँल। छतसि खीए चेलामैं झेलर खसि येशूजी लबै ताँन् केमैं यूहन्‍नाने बिइ।
LUK 7:19 चु ताँ थेसि यूहन्‍नाइ ह्रोंसए चेलामैं न्होंर्बै म्हि ङ्हिं प्रभु येशू ङाँर चु ताँ ङ्योएबर कुलइ, “युल् त्हुबै म्रुँ ख्रीष्‍ट क्‍हिन् उ? ङिइ अर्को म्‍हिए घ्याँ ङ्‍ह्‍योल् त्‍हुब् जा?”
LUK 7:20 चेलामैं येशू ङाँर खसि बिइ, “क्युर प्ल्हुँसि बप्‍तिस्मा पिंबै यूहन्‍नाइ क्‍हि ङाँर चु ताँ ङ्योएबर ङि कुलइमुँ, ‘युल् त्‍हुबै म्‍हि क्हिन् उ, ङिइ अर्को म्‍हिए घ्याँ ङ्‍ह्‍योले?’” (चेलामैं येशू ङाँर खसि “युम् बिबै म्रु ख्रीष्‍ट क्हिन् उ ङिइ अर्को म्हिए घ्याँ ङ्‍ह्‍योल् त्हुब् जा? बिसि क्युर प्ल्हुँसि बप्‍तिस्मा पिंबै यूहन्‍नाइ क्‍हि ङाँर चु ताँ ङ्योएबर ङि कुलइमुँ,” बिइ।)
LUK 7:21 च त्‍हेर्न येशूजी ल्‍हें म्‍हिमैंए नब-छब नेरो मोंमैंइ स्याबै म्हिमैं सल् लमिंल, धै ल्‍हें कनमैंलाज्यै या मि म्रोंल् लमिंल।
LUK 7:22 झाइले येशूजी चमैंने बिइ, “क्‍हेमैंइ चुर तोगो तो-तो म्रोंइ तो-तो थेइ च ताँन् यूहन्‍ना ङाँर ह्‍यासि बिमिंन्। कनमैंइ धबै म्रोंइमुँ, डुँड्मैं प्रइमुँ, कोर खब्‍मैं सइमुँ, न्हउसिमैंइ न्‍ह थेइमुँ, सियाब्‍मैं या सोगो तइमुँ धै ङ्हाँदुमैंलाज्यै या सैं तोंबै ताँ बिमिंइमुँ बिद्।
LUK 7:23 चु ताँ या बिद्, खाबइ संका आलल्‍ले ङए ताँ क्वेंमुँ, चए फिर परमेश्‍वरजी आशिक पिंब्मुँ।”
LUK 7:24 यूहन्‍नाइ कुल्मिंबै चेलामैं एह्‍याबै लिउँइँ येशूजी यूहन्‍नाए बारेर म्हिए हुलने बिइ, “क्‍हेमैं क्यु आयोंबै क्ल्ह्‍योर तो ङ्‌ह्‍योबर ह्‍याल? खैंइ लाबै म्वो धुँ ङ्‌ह्‍योबर ह्‍याल् वा?
LUK 7:25 क्‍हेमैं तो सै ङ्‌ह्‍योबर ह्‍याल? छ्याँबै क्‍वें खिबै म्‍हि ङ्‌ह्‍योबर ह्‍याल् वा? छ्याँबै क्‍वें खिसि लिंब्-लिंबै सैमैं चबै म्‍हिमैंम् म्रुँए दरबारर टिम्।
LUK 7:26 बित्ति! क्‍हेमैं तो ङ्‌ह्‍योबर ह्‍याल? अगमबक्‍ता ङ्ह्‍योबर ह्‍याल् वा? ङ क्‍हेमैंने बिमुँ, अगमबक्‍ता भन्दा थेबै म्‍हि घ्रि क्‍हेमैंइ म्रोंइमुँ!
LUK 7:27 परमेश्‍वरए छ्वेर यूहन्‍नाए बारेर छले प्‍ह्रिइमुँ: ‘ङ्‍ह्‍योद्! क्‍हिए घ्‍याँ तयार लमिंरिगे बिसि क्हि भन्दा ओंसों ङइ ङए स्यार्बो कुल्मिंम्।’
LUK 7:28 ङ क्हेमैंने बिमुँ, च्हमिरि ङाँइले फिब्मैं न्होंरि यूहन्‍ना भन्दा थेबै म्‍हि खाबै आरे, दिलेया खाबइ ङइ लबै के म्रोंसि ङइ बिबै ताँ थेसि ङइ बिब् धोंले परमेश्‍वर म्हाँदिमुँ, च म्‍हि च्‍योंब मुँलेया यूहन्‍ना भन्दा थेब तमुँ।”
LUK 7:29 चु ताँ थेसि ताँन् म्‍हिमैं नेरो बालि रेब्‍मैंज्‍यै या परमेश्‍वरए क्ह्रोंसेंन्बै ताँ क्वेंइ। तलेबिस्याँ चमैंइ यूहन्‍नाउँइँले क्युर प्लुँसि बप्‍तिस्मा किंल।
LUK 7:30 दिलेया फरिसीमैं नेरो परमेश्‍वरए छ्वे लोमिंब्मैंइ बिस्याँ परमेश्‍वरजी ह्रोंस ङाँर खबै ल्हागिर बनेबै घ्याँ केर आफेब् ङ्हाँसि यूहन्‍नाउँइँले क्युर प्लुँसि बप्‍तिस्मा आकिंल।
LUK 7:31 धबै येशूजी बिइ, “तिंजरोबै म्‍हिमैं ङ‍इ तो सैने च्‍हैंले? चमैं तो धोंब मुँ?
LUK 7:32 चमैं बजारर क्हुँरिबै कोलोमैं धों तब् मुँ, चमैंइ खेंमैंए न्होंर्न घ्रिइ-घ्रिने छ बिदै हौदिम्। ‘ङिइ क्‍हेमैंए ल्हागिर मुराली ह्रामिंइ, दिलेया क्हेमैं आसे। ङि क्रोमा क्हेमैं आक्रो।’
LUK 7:33 बप्‍तिसमा पिंबै यूहन्‍ना युइ, चइ क्हें आचमल प्हा या आथुँमल। दिलेया क्‍हेमैंइ चलाइ ‘मोंइ स्‍याइमुँ’ बिमल।
LUK 7:34 परमेश्‍वरजी कुल्मिंबै म्हिए च्ह चु ह्‍युलर युसि चमा, थुँमा ‘चुम् चप्ला प्हाको बालि रेब्‍मैं नेरो पापिमैंए थु मुँनमैं,’ बिसि क्‍हेमैंइ बिम्।
LUK 7:35 दिलेया बुद्धि ठिक ग बिबै ताँ बुद्धिए लिलि प्रब्मैंइ मत्‍त्रे बुद्धि ठिक ग बिसि ठर्दिल् खाँम्।”
LUK 7:36 तिगें फरिसी घ्रिइ येशूलाइ चब् चबर न्हिम्तो लल। छतसि खी चए धिंर ह्‍यासि चबर टिइ।
LUK 7:37 च सहरर आछ्याँबै छ्ह थोबै पापि च्हमिरि घ्रि मुँल। येशू च फरिसीए धिंर मुँ बिब् थेसि सै ल्हें फेबै अत्तर पुरुर झोंसि च च्हमिरि चर खइ।
LUK 7:38 झाइले येशूए लिउँइँले खसि खीए प्‍हले ङाँर रासि क्रोदै चए मिग्लिइ येशूए प्‍हले प्हँवाबर होंइ, धै च्हि तुँसि ह्रोंसए क्रप्होइ खीए प्‍हले फ्‍योमल। येशूए प्‍हलेर म्वें लदै चइ छ्याँबै थाँ खबै अत्तर फोमिंमल।
LUK 7:39 छ लब् म्रोंसि येशूलाइ न्हिम्तो लबै फरिसीइ सैं न्हों-न्हों “चु म्‍हि क्‍ह्रोंसेंन्ले अगमबक्‍ता ङिब् ग बिस्‍याँ चुइ खीलाइ छुइबै च्हमिरि खैतबै म्हि जा बिसि सेमल। चु पापि च्हमिरि ग!” बिबर होंइ।
LUK 7:40 येशूजी फरिसीए सैंर्बै ताँ सेसि “ओ सिमोन क्‍हिने ताँ घ्रि बिल् त्‍हुइमुँ,” बिइ। सिमोनइ बिइ, “तो ताँ मुँ गुरु? बिद्।”
LUK 7:41 येशूजी चने बिइ, “प्लबै म्हि घ्रिल छे बोबै असामि ङ्हिं मुँल। चमैंइ घ्रिने हजार ङ्‍ह अर्कोने मुइ ङ्‍हच्‍यु हजार किंल् त्हुमल।
LUK 7:42 ङ्हिंना-ङ्हिंनइ च छे फोल् आखाँमा प्लबै म्हिइ चमैं ङ्हिंए छे माफ लमिंइ। छतसि लु बित्ति! तारे चमैं ङ्हिंए न्‍होंरि खाबइ च म्हिलाइ ल्हें म्‍हाँया ललै?”
LUK 7:43 सिमोनइ बिइ, “ङए सैंर, छे ल्हें माफ योंबै म्हिइ ल्‍हें म्‍हाँया ललै।” येशूजी चने बिइ, “क्‍हिइ ठिक ताँ मैंना।”
LUK 7:44 झाइले येशूजी च च्हमिरि ङाँइ तोसि सिमोनने बिइ, “चु च्हमिरिलाइ म्रोंइमुँ वा? ङ क्‍हिए धिंर खमा क्‍हिइ प्‍हले ख्रुबै क्‍यु या आपिं, दिलेया चुइ खीए मिग्लिइ ङए प्‍हले ख्रुमिंसि क्रप्होइ फ्‍योमिंइ।
LUK 7:45 क्‍हिइ ङ म्वें आल, दिलेया ङ चु धिंर होंब् ओंनोंन् चुइ ङए प्‍हले म्वें लब आपिइमुँ।
LUK 7:46 क्‍हिइ ङए क्रर छ्युगु आफोमिं, दिलेया चुइ ङए प्‍हलेरै या सै ल्हें फेबै अत्तर फोमिंइमुँ।
LUK 7:47 छतसि ङ क्‍हिने बिमुँ, चुइ ङलाइ च्‍हौ ल्‍हें म्‍हाँया लइमुँ। छतसि चुए पाप ल्हें मुँलेया क्षमा तइमुँ, दिलेया च्‍युगुदे पाप माफ योंबै म्हिइ ङलाइ च्युगुदेन् म्हाँया लमुँ।”
LUK 7:48 झाइले येशूजी च च्हमिरिने “क्‍हिए पाप क्षमा तयाइमुँ,” बिइ।
LUK 7:49 चु ताँ थेसि अरू चब् चबर टिब्‍मैंइ, “पाप क्षमा पिंब चु खाब् जा?” बिसि खें-खेंमैंन् बिबर होंइ।
LUK 7:50 दिलेया येशूजी च च्हमिरिने बिइ, “क्‍हिए बिश्‍वासइ लमा क्‍हि जोगेएइमुँ, छिं ङ्हाँन्ले ह्‍याद्।”
LUK 8:1 च लिउँइँ येशू सहर-सहर, नाँस-नाँसर स्‍युरसि परमेश्‍वरए ग्याल्सर्बै सैं तोंबै ताँ बिप्रइ। खीने बालु च्युसे ङ्हिं चेलामैं या मुँल।
LUK 8:2 अरू ल्हें च्हमिरिमैं या खीने बालु मुँल। च च्हमिरिमैं मोंइ स्‍यासि सब्मैं नेरो अरू नब् छबउँइँले सब्मैं मुँल। चमैं न्होंरि मरियम बिबै मग्‍दालाथेंस्‍यो मुँल। चउँइँले येशूजी मों ङिउँलो ल्‍हाल।
LUK 8:3 चमैं न्‍होंरि योअन्‍ना बिबै च्हमिरि घ्रि मुँल। च खुजास बिबै म्‍हिए प्ह्रेंस्यो मुँल। च खुजास हेरोद म्रुँए दरबारर चिबै के लमल। झाइले अर्को सुसन्‍ना बिबै च्हमिरि मुँल। चमैं नेरो अरू ल्‍हें च्हमिरिमैंज्‍यै या ह्रोंसए मुइ खर्ज लसि खीए सेवा लमल।
LUK 8:4 नाँस-नाँसउँइँले म्‍हिए हुल खागु तसि खी ङाँर खइ। झाइले खीजी चमैंने चु अहान् घ्रि बिइ।
LUK 8:5 “तिगें म्‍हि घ्रि प्‍लु प्‍लुबर ह्‍याल। प्‍लु प्‍लुमा कोइ प्‍लु घ्‍याँर तेइ, कोइ प्‍लु गेगरर तेइ, कोइ प्‍लु पुजु मुँबै क्‍ल्‍ह्‍योर तेइ, कोइ प्‍लु छ्याँबै स मुँबै क्ल्ह्‍योर तेइ। घ्‍याँर तेयाबै प्‍लुमैं म्हिमैंइ प्‍लेवाइ, नमेमैं खसि चवाइ।
LUK 8:6 गेगरर तेयाबै प्‍लुमैं म्‍लोखलेया युनन् सियाइ तलेबिस्याँ चर्बै स कारयाल।
LUK 8:7 छलेन पुजु मुँबै क्‍ल्‍ह्‍योर तेयाबै प्लु म्‍लोखलेया पुजुए छ्यारइ च प्लु बडिल् आपिं।
LUK 8:8 छ्याँबै सर तेबै प्‍लु बिस्याँ छेनले म्‍लोखइ। धै च प्‍लु थेब् तसि ल्‍हें रो रोइ।” च्हौ बिल् खाँसि येशूजी थेबै कैले बिइ, “थेबै न्ह मुँब्मैंइ थेरिगे।”
LUK 8:9 चेलामैंइ खीजी बिबै ताँ छेनाले आक्होसि चु अहानइ बिल् म्हैब तो जा बिसि येशूने ङ्योएइ।
LUK 8:10 येशूजी चमैंने बिइ, “परमेश्‍वरए ग्याल्सर्बै थेब् थेबै ताँमैं क्होबै ज्ञान क्हेमैंलाइ पिंइमुँ। दिलेया अरूमैंने बिस्याँ ङ अहानउँइँले पोंब्मुँ, तलेबिस्याँ परमेश्‍वरए छ्वेर प्‍ह्रिब् धोंले: ‘चमैंइ ङ्‌ह्‍योलेया आम्रोंरिगे, थेलेया आक्‍होरिगे।’”
LUK 8:11 येशूजी चमैंने बिइ, “अहानए अर्थ चु ग: प्‍लु बिब परमेश्‍वरए ताँ ग।
LUK 8:12 घ्‍याँर तेबै प्‍लु चुन् ग: परमेश्‍वरए ताँ थेब्मैंइ आक्वेंरिगे धै चमैं जोगेल् आयोंरिगे बिसि दुष्‍ट बिबै सै खसि चमैंइ थेबै ताँ ताँन् युनन् म्‍लेल् लवाम् धै क्वेंल् आपिं।
LUK 8:13 झाइले गेगरर तेबै प्‍लु चुन् ग: खाबइ परमेश्‍वरए ताँ थेसि सैं तों-तोंइ क्‍वेंम्। दिलेया चमैंए जरा आत। छतसि चमैंइ तिस्याँदे मत्‍त्रे च ताँ क्वेंम्, तलेबिस्याँ ह्रोंसए फिर दुःखमैं तमा बिब् धों आतमा चमैंइ पिवाम्।
LUK 8:14 छलेन पुजु मुँबै क्‍ल्‍ह्‍योर तेबै प्‍लु चुन् ग: खाबइ परमेश्‍वरए ताँ थेमुँ। दिलेया लिउँइँ चु छ्ह खैले थोब् ङ्‍हे बिसि न्‍हुँ लमुँ धै सम्‍पति खैले योंब् ङ्‍हे बिसि ह्‍युलर्बै सैमैंर सैं ह्‍यासि चमैंए बिश्‍वास म्‍हयाम्। छतमा चमैं भोंसि आत।
LUK 8:15 दिलेया छ्याँबै सर तेबै प्‍लु चुन् ग: खाबइ परमेश्‍वरए ताँ थेसि छेनाले खोंर थेंमुँ। धै चए फिर तोइ तखलेया सैदिसि ल्हें रोमैं रोम्।”
LUK 8:16 येशूजी धबै बिइ, “खाब‍ज्यै बत्ति म्रोसि भाँडोइ आउथें, खाट न्होंरै या आथें। बरु धिं न्‍होंर खब्‍मैंइ मि म्रोंरिगे बिसि बत्ति नुबै क्‍ल्‍ह्‍योर थेंम्।
LUK 8:17 तो सै या लोइरि थेंल् आँखाँ, लोथेंइरि आम्रोंबै सै तोइ आरे। छलेन लोथेंबै ताँमैं तो मुँलेया लिउँइँ खन्तोंदोंन् थेनेसि ताँनइ सेम्।
LUK 8:18 “छतसि न्ह क्रों मि क्रों तद्, क्‍हेमैंइ थेबै ताँ छेन्‍ले सैंर थेंन्। तलेबिस्याँ ङइ लोमिंबै ताँ छेनाले थेब्मैंइ झन् क्होल् योंब्मुँ, दिलेया ङए ताँ आथेब्मैंइ क्होइ बिसि ह्रब् प्हैंलेया चमैं ङाँइँले प्हेंवाब्मुँ।”
LUK 8:19 तिगें येशूए आमा नेरो अलिमैं येशूने त्‍होबर खइ। दिलेया म्‍हि हुलइ लमा चमैंइ येशूने त्‍होल् आयोंल।
LUK 8:20 छतमा म्‍हि घ्रिइ येशूने बिइ, “क्‍हिए आमा नेरो अलिमैं क्हिने त्होबै सैं लसि बैरु रारिइमुँ।”
LUK 8:21 छबिमा येशूजी चमैंने बिइ, “खाबइ परमेश्‍वरजी बिबै ताँ थेसि खीजी बिब् धों लमुँ, चमैंन् ङए आमा अलिमैं ग।”
LUK 8:22 तिगें येशू ह्रोंसए चेलामैंने डुँङ्गार क्रेसि “तारे, ङ्यो तालए क्‍योंजा ह्‍याले ओ,” बिसि ह्‍याइ।
LUK 8:23 छले ह्‍यारिमा येशू न्‍हरु च्‍हुयाइ। तालर थेबै नाँ खै खसि डुँङ्गार क्‍यु प्‍लिंबर होंइ। छतमा चमैं बेल्‍ले आतिदिइ।
LUK 8:24 झाइले चेलामैं येशू ङाँर खसि “ओ गुरु, ङ्योम् क्युर प्ल्हुँसि सिबर होंइ,” बिदै खीलाइ छोरवाइ। छबिमा येशू रेसि नाँ खैं नेरो क्‍युए भेल्‍गा हौदिइ। छले हौदिमा नाँ खैं नेरो क्युए भेल्गा च्याँ तयाइ।
LUK 8:25 झाइले येशूजी खीए चेलामैंने बिइ, “क्‍हेमैंए बिश्‍वास खनि ह्‍याइ?” चमैं ङ्हिंसि प्लेटोयाइ धै खें-खेंमैं न्होंर “चु म्हि खाब् मुँगे? नाँ खैं नेरो क्युए भेल्गालाज्यै या खीजी च्याँ तयाद् बिमा चमैंज्यै या खीजी बिब ङिंब!” बिबर होंइ।
LUK 8:26 येशू नेरो खीए चेलामैं गालीलए क्योंजा गेरासेनस ह्‍युलर फेखइ।
LUK 8:27 झाइले येशू डुँङ्गाउँइँले पखर त्‍होंमा मोंइ स्‍याबै नाँसर्बै म्‍हि घ्रि येशूने त्‍होइ। च म्‍हिइ ल्हें ओंसों ओंनोंन् क्‍वें आखिमल धै धिंरै या आटिमल छगोंजरे टिमल।
LUK 8:28 चइ येशू म्रोंबै तोदोंन् चिरदै खीए उँइँर पद्खु तसि थेबै कैले बिइ, “ओ ताँन् भन्दा थेबै परमेश्‍वरए च्‍ह येशू, क्‍हिल ङने तो के मुँ? यो छ्युँ लमुँ, ङलाइ दुःख आपिंन्।”
LUK 8:29 तलेबिस्याँ येशूजी च म्हिउँइँले मों त्होंइ ह्‍याद् बिल। च म्हिलाइ ल्हें खे मोंइ दुःख पिंब्ब्रें लमाल। छतसि चलाइ सँउँलिइ फैसि म्हिमैंइ रुँमल। दिलेया चइ खीलाइ फैथेंबै सँउँलि छ्याँन् छिन् लवामल। धै मोंइ चलाइ क्यु आयोंबै क्ल्ह्‍योजरे बोयामल।
LUK 8:30 येशूजी चने “क्‍हिए मिं तो जा?” बिसि ङ्योएमा चइ बिइ, “ङए मिं फौज ग।” तलेबिस्याँ ल्हें मोंमैंइ चलाइ स्याल।
LUK 8:31 “ङि सजैं पिंबै ल्हागिर क्रोंर आल्हाद्,” बिसि मोंमैंइ येशूने यो छ्युँ लइ।
LUK 8:32 चेंदोर्बै कोंर तिलिए बगाल रेंरिल। धै चमैंइ तिलिमैंए न्होंर होंल् पिंन् बिसि यो छ्युँ लमा येशूजी च मोंमैं ह्‍याल् पिंइ।
LUK 8:33 झाइले मोंमैं च म्‍हिउँइँले त्‍होंसि तिलिमैंए न्होंर ‍होंयाइ। छतमा तिलिमैं सोबाल तसि कोंउँइँले मा ङ्युँइर ते‍यासि सियाइ।
LUK 8:34 छ तब् म्रोंसि च तिलि छबै म्‍हिमैं न्हेयासि च ताँमैं सहर नेरो नाँसजरे बिमिंइ।
LUK 8:35 चमैंए ताँ थेसि “तो तगे” बिसि ङ्‌ह्‍योबर म्हिमैं येशू ङाँर खमा ओंसों मोंइ स्‍यासि सोबल् तबै म्‍हि सैं चिसि क्‍वें खिसि येशूए प्‍हले ङाँर टिरिब चमैंइ म्रोंइ। छाब् म्रोंसि चमैं ङ्हिंयाँइ।
LUK 8:36 च मोंइ स्याबै म्हि खैले सइ बिसि म्रोंब्मैंइ ङ्ह्‍योएबर खब्मैंने बिमिंइ।
LUK 8:37 छतमा गेरासेनस ह्‍युलर्बै म्‍हिमैंइ येशूलाइ खेंमैंए नाँसउँइँले ह्‍यामिंन् बिसि यो छ्युँ लइ, तलेबिस्याँ चमैं बेल्‍ले ङ्हिंयाँल। छबिमा येशू डुँङ्गार क्रेसि ह्‍याबि छेमा।
LUK 8:38 मोंइ स्यासि सयाबै च म्‍हिइ येशूने “ओ प्रभु ङै या क्‍हिने बालु ह्‍याल् पिंन् बिसि यो छ्युँ लबर होंइ।” दिलेया येशूजी चने बिइ,
LUK 8:39 “क्हि ह्रोंसए धिंर एह्‍याद्, धै परमेश्‍वरजी क्‍हिए ल्हागिर लमिंबै च्हौ थबै के अरूमैंने बिद्।” छबिमा च म्‍हि ह्‍यासि येशूजी खीए ल्हागिर लमिंबै थेबै के ताँन् नाँसजरे बिबर होंइ।
LUK 8:40 येशू ताल क्योंज‍उँइँले एखमा म्‍हि हुलइ खीलाइ बेल्‍ले मान लइ, तलेबिस्याँ चमैं ताँनइ येशू खोंयों खब् ङ्‍हे बिसि ह्रेरिल।
LUK 8:41 च त्हेर्न च्हों धिंर्बै याइरस बिबै चिब घ्रि येशू ङाँर खसि प्‍हले फ्‍योसि चए धिंर खमिंन् बिसि खीने यो छ्युँ लइ।
LUK 8:42 तलेबिस्याँ चल च्युसे ङ्हिंदिंर्बै घ्रिदे मुँबै च्हमि सिबिन् छेल। चए फिर ल्हयो खसि येशू चने बालु ह्‍याइ। छले ह्‍यारिमा म्हिए हुल कारर्ग्यु तखसि खीलाइ बेल्‍ले घच्याट तल।
LUK 8:43 च हुल न्‍होंरि च्युसे ङ्हिंदिं समा को त्हबै बेथाइ दुःख योंबै च्हमिरि घ्रि मुँल। चइ खीए बेथा सबर ल्‍हें म्‍हिमैंने ङ्‍ह्‍योब्-लिब् लसि ह्रोंसने मुँबै ताँन् मुइ खर्ज लल् खाँल। दिलेया खाबज्यै या सल् लल् आखाँल।
LUK 8:44 च च्हमिरिइ येशूए लिउँइँले खसि येशूए क्‍वेंए ङोर छुइबै तोदोंन् चए को त्हब टि‍याइ।
LUK 8:45 च त्हेर्न येशूजी “ङलाइ खाबइ छुइ?” बिमा चर्बै ताँन् म्हिमैंइ “ङिइ आछुइ,” बिइ। दिलेया पत्रुस नेरो चमैंने मुँब्मैंइ बिइ, “ओ गुरु, क्‍हिए कारर्ग्युले म्हिए हुल घचेट तरिइमुँ!”
LUK 8:46 दिलेया येशूजी बिइ, “म्‍हि घ्रिइ ङलाइ छुइबन् ग। तलेबिस्याँ ङ ङाँउँइँले शक्‍ति त्‍होंह्‍याब ङइ सेल।”
LUK 8:47 च्हौ तसेरो तारे लोइ टिरिब आतमना बिब् सेसि च च्हमिरि ङ्हिंसि त्हारदै खीए ओंसों पत्खु तइ। चइ येशूलाइ तले छुइ, धै छुइबै तोदोंन् खी खैले सइ बिबै तोन्दोंरि ताँ म्‍हिमैंए उँइँर बिइ।
LUK 8:48 येशूजी च च्हमिरिने बिइ, “ओ च्हमिच्‍यों, क्‍हिए बिश्‍वासइ लमा क्हि सयाइमुँ, छतसि छिं ङ्हाँन्ले ह्‍याद्।”
LUK 8:49 येशू च च्हमिरिने पोंरिमा च्हों धिंर्बै चिबए धिंउँइँले म्‍हि घ्रि खसि याइरसने बिइ, “क्‍हिए च्हमि सि‍ल् खाँइ। तारे गुरुलाइ दुःख आपिंरिद्।”
LUK 8:50 चु ताँ थेसि येशूजी याइरसने बिइ, “आङ्हिंन्! ङए ताँ क्वेंन्! क्‍हिए च्हमि सोब्‍मुँ।”
LUK 8:51 झाइले याइरसए धिंर फेनेसि येशूजी पत्रुस, याकूब, यूहन्‍ना नेरो च्हमिरि कोलोए आबा-आमा बाहेक अरू खाबलाज्यै या खीने बालु धिं न्‍होंर होंल् आपिं।
LUK 8:52 चर ताँन् म्‍हिमैं क्रोरिल। झाइले येशूजी चमैंने “आक्रोद्, कोलो आसिइमुँ, न्‍हरु च्‍हुइरिब् ग,” बिइ।
LUK 8:53 च कोलो सियाल् खाँइ बिब् सेसि चमैंइ येशूए बिल्‍लि लबर होंइ। तलेबिस्याँ च कोलो क्ह्रोंसेंनन् सियाल् खाँल।
LUK 8:54 दिलेया येशूजी च च्हमिरि कोलोए योर क्‍हासि “ओ च्हमिच्‍यों रेद्,” बिमा
LUK 8:55 च च्हमिरि कोलो सोसि युन्ले रेइ। धै येशूजी “चु कोलोलाइ चबै सैमैं पिंन्” बिसि ल्हैदिइ।
LUK 8:56 छाब् म्रोंसि कोलोए आबा-आमा प्लेटोयाइ। दिलेया “चुर तबै ताँ खाबलाज्यै या आबिद् ओ बिसि येशूजी चमैंने,” बिइ।
LUK 9:1 च लिउँइँ येशूजी ह्रोंसए च्युसे ङ्हिं चेलामैं हुइसि चमैंलाइ मों ल्‍हाल् खाँब् नेरो नब् छब्मैं सल् लल् खाँबै शक्‍ति नेरो अधिकार पिंइ।
LUK 9:2 झाइले “परमेश्‍वरए ग्याल्सए बारेर बिप्रदै नब् छब्‍मैं सल् लद्।
LUK 9:3 क्‍हेमैं ह्‍यामा प्‍हरे, झोला, चबै सै, मुइ, फेर्दिबै क्वेंमैं तोइ आबोद्।
LUK 9:4 क्‍हेमैं खाब् धिंर होंमुँ चर्न टिद्, धै च धिंउँइँलेन् एखो।
LUK 9:5 खाब् नाँसर क्‍हेमैंए मान आल, टिल् आपिं, चमैंए नाँसउँइँले त्‍होंमा ग्वाइए ल्हागिर ह्रोंसए प्‍हलेर ङ्हाँबै त्‍हूलैया चमैंए उँइँर खारथेंन्।”
LUK 9:6 खीजी बिब् धोंले चेलामैं नाँ-नाँसर ह्‍यासि खन्‍तोंदोंन् परमेश्‍वरउँइँले खबै सैं तोंबै ताँ बिप्रदै नब् छब्मैं सल् लमिंदै प्रइ।
LUK 9:7 येशूजी लबै केमैंए बारेर थेसि गालील ह्‍युलर्बै हेरोद म्रुँ अलमल्‍ला तयाइ, तलेबिस्याँ “क्युर प्ल्हुँसि बप्‍तिस्मा पिंबै यूहन्‍ना सिबउँइँले धबै सोसि खना,” बिसि को-कोइ बिमल।
LUK 9:8 कोइ “स्‍योंम्‍बै एलिया अगमबक्‍ता धबै सोसि खना,” बिमल। कोइ “स्योंम्बै अगमबक्‍तामैं न्होंर्बै घ्रि धबै सोसि खना,” बिमल।
LUK 9:9 दिलेया हेरोद म्रुँइ बिइ, “यूहन्‍नाए क्रम् ङइ थोबर ल्हैदिल। दिलेया चु म्हि खाब् मुँगे? चुए बारेर च्‍हौ थेबै क्‍वेंल् आखाँबै ताँमैं ङइ थेइमुँ।” छतसि चइ येशूने त्होबै सैं लइ।
LUK 9:10 कुल्मिंबै चेला चिब्मैं एखसि खेंमैंइ लबै केमैं ताँन् यशूने बिइ। झाइले येशूजी चमैं बोसि बेथसेदा बिबै नाँसर म्‍हिमैंइ आसेल्‍ले ह्‍याइ।
LUK 9:11 दिलेया म्हिमैंइ खी छले ह्‍याब सेसि म्‍हिए हुल येशू ङाँर खइ। छले खमा खीजी परमेश्‍वरए ग्याल्सर्बै बारेर चमैंलाइ बिमिंइ। धै नब् छब्मैं या सल् लमिंइ।
LUK 9:12 झाइले त्‍हिंयाँ लिबि छेमा च्युसे ङ्हिं चेलामैं येशू ङाँर खसि बिइ, “चुर धिंमैं आरे। छतसि चु हुलमैं चु खागुबै नाँसजरे ह्‍यासि चबै सै नेरो टिबै क्ल्ह्‍यो म्‍हैरिगे बिसि चुमैं कुलद्।”
LUK 9:13 दिलेया येशूजी चमैंने बिइ, “क्‍हेमैंइन चमैं चल् पिंन्।” छबिमा चेलामैंइ बिइ, “ङिने बालु चबै सै ल्‍हें आरे। क्‍हें ङ्‌हबो नेरो ताँग ङ्हिं मत्‍त्रे मुँ। आतस्याँ ङि ह्‍यासि चुमैंए ल्हागिर चबै सै किंसि पल् त्हुलै।”
LUK 9:14 च हुलर मुँयुँमैं मत्‍त्रे हजार ङ्‍हदे मुँल। दिलेया येशूजी खीए चेलामैंने बिइ, “ङ्‍हच्यु-ङ्‍हच्युबै ल्हस्यार लसि ताँन् म्हिमैं सर क्‍हुँल् पिंन्।”
LUK 9:15 चमैंइ म्हिमैं छलेन् क्‍हुँबर ल्हैदिइ।
LUK 9:16 झाइले येशूजी च क्‍हें ङ्‌हबो नेरो ताँग ङ्हिं छेसि मुउँइँ ङ्‍ह्‍योसि परमेश्‍वरलाइ धन्‍यबाद पिंसि क्‍हें लुँइ, धै “हुलमैं चुमिंन्” बिसि चेलामैंने पिंइ।
LUK 9:17 झाइले चेलामैंइ क्हें चुमिंइ, धै चमैं ताँनइ म्रेंन्ले चसेया ङैबै क्हें लुँठेमैं च्युसे ङ्हिं ट्‍हलो चेलामैंइ खुइ।
LUK 9:18 तिगें येशू खी घ्रिन् प्राथना लरिमा चेलामैं या खी ङाँर्न मुँल। प्राथना लल् खाँसि खीजी चेलामैंने “म्‍हिमैंइ ङलाइ खाब् बिम्?” बिसि ङ्योएइ।
LUK 9:19 चेलामैंइ बिइ, “कोइ ‘क्युर प्ल्हुँसि बप्‍तिस्मा पिंबै यूहन्‍ना’ बिमुँ, कोइ ‘स्‍योंम्‍बै एलिया’ बिमुँ, कोइ ‘अगमबक्‍तामैं न्होंर्बै घ्रि धबै सोगो तसि खना,’ बिमुँ।”
LUK 9:20 झाइले येशूजी “क्‍हेमैंइन ङलाइ खाब् बिम्दि?” बिसि चमैंने बिइ। छबिमा पत्रुसइ बिइ, “क्‍हिम् परमेश्‍वरजी कुल्मिंबै म्रुँ ग।”
LUK 9:21 झाइले येशूजी “क्हेमैंइ चु ताँ खैलसे खाबलाज्यै या आबिद् ओ,” बिइ।
LUK 9:22 खीजी धबै बिइ, “परमेश्‍वरउँइँले कुल्‍मिंबै म्हिए च्हजी ल्हें दुःख नोल् त्हुम्। ख्रो पिंबै खेगि चिब्मैं, शास्‍त्रिमैं नेरो अरू चिबनाँब्मैंइ खैच्हिजी लसि खीलाइ सैवाब्‍मुँ, दिलेया सोंरोंर धबै सोगों तसि रेइ खब्‍मुँ।”
LUK 9:23 धै खीजी चमैं ताँन्‍ने बिइ, “खाबै ङए लिलि खबै सैं लस्याँ, चइ ह्रोंसए तोन्‍दोंरि इच्‍छामैं पिवाल् त्‍हुम्, कति दुःख तलेया सैदिसि त्हिंइ ह्रोंसे ङए लिलि प्रल् त्‍हुम्।
LUK 9:24 “खाबइ ह्रोंसए ज्यु जोगेबै सैं लमुँ च नास त‍याब्मुँ। दिलेया खाबइ ङए ल्हागिर ह्रोंसए ज्यु पिंमुँ चइ ह्रोंसए ज्यु जोगेब्मुँ।
LUK 9:25 तलेबिस्याँ ह्‍युलर्बै ताँन् सुख सै न्होर योंलैया ह्रोंस् सिसि नर्गर ह्‍याल् त्हुस्याँ तो फायदा तमुँ?
LUK 9:26 म्हिए च्ह स्‍वर्गर परमेश्‍वर आबा नेरो खीए पबित्र स्‍वर्गदूतमैंने टिरिब्‍मुँ। परमेश्‍वर आबाए मिं थेब लबर खीए शक्‍तिर स्‍वर्गदूतमैंने चु ह्‍युलर खी धबै युब्मुँ। झाइले ङ नेरो ङए बचनउँइँले फापिसि खा-खाबइ ‘ङइ येशू ङो आसे,’ बिल, ङज्यै या च त्‍हेर क्हेमैं ङो आसे बिब्‍मुँ।
LUK 9:27 दिलेया क्ह्रोंसेंन ङ क्‍हेमैंने बिमुँ, क्‍हेमैं चुर राब्‍मैं न्‍होंरि को-कोइ म्‍हिइ परमेश्‍वरजी ग्याल्स लब आम्रोंन् समा सिरिब् आरे।”
LUK 9:28 चु ताँ बिबै सद घ्रि लिउँइँ पत्रुस, याकूब नेरो यूहन्‍ना बोसि प्राथना लबर खी कोंउँइँ ह्‍याइ।
LUK 9:29 खी कोंर फेनेसि प्राथना लरिमा येशूए मोड फेर्दियाइ। धै खीए क्‍वें बिजुलि चारब धोंले चारयाइ।
LUK 9:30 च त्‍हेर्न खीने बालु म्हि ङ्हिं ताँ सेरिल। चमैं स्‍योंम्‍बै मोशा नेरो एलिया मुँल।
LUK 9:31 चमैं स्वर्गर्बै बेल्‍ले चारबै ह्‍वेर युसि येशू यरूशलेमर सिल् त्हुम् बिसि खीने ताँ सेरिल।
LUK 9:32 पत्रुस नेरो चए थुमैं न्‍हरु च्‍हुइरिल। छोरमा बेल्‍ले चारबै ह्‍वेर येशूने बालु म्हि ङ्हिं रारिब चमैंइ म्रोंइ।
LUK 9:33 मोशा नेरो एलिया येशूउँइँले ह्‍याबि छेरिमा पत्रुसइ येशूने बिइ, “ओ गुरु, ङ्यो चुर टिब स्वाब मुँन। ङ्योइ सौंलो प्ह्रों बनेले ओ, घ्रि क्‍हिए ल्हागिर, घ्रि मोशाए ल्हागिर, घ्रि एलियाए ल्हागिर।” छले खिइ तो पोंइ बिब पत्रुसइ थाइ आसे।
LUK 9:34 पत्रुसइ छ बिरिमा न्‍हाँम्‍स्यो युसि खेंमैंलाइ हुवाइ। खैंमैंलाइ छले न्हाँम्स्योइ हुवाब् म्रोंसि चमैं बेल्‍ले ङ्हिंयाँइ।
LUK 9:35 झाइले न्‍हाँम्‍स्यो न्‍होंउँइँले “चु ङइ त्हाँबै ङए च्‍ह ग। चइ बिबै ताँ छेनाले थेद्,” बिबै कै चमैंइ थेइ।
LUK 9:36 छ बिबै लिउँइँ येशू खी घ्रिन् चर रारिल। छतब् म्रोंसि चेलामैं च्याँ तयाइ, धै चमैंइ म्रोंबै ताँमैं च त्हेर खाबलाज्यै या आबि।
LUK 9:37 च प्‍हँन्हाँग्धों येशू नेरो चेलामैं कोंउँइँले क्‍युरु युरिमा म्‍हिए हुल खीने त्‍होबर खइ।
LUK 9:38 च हुल न्‍होंउँइँले म्‍हि घ्रिइ कै तेसि बिइ, “ओ गुरु, ङ क्‍हिने यो छयुँ लमुँ, ङए च्‍ह सल् लमिंन्, तलेबिस्याँ च ङए घ्रिदे मबै च्ह ग।
LUK 9:39 चलाइ मोंइ स्‍याइमुँ। च बेल्‍ले चिरब्ब्रें लसि क्हुरिह्‍याम् चए सुँउँइँले पिबि त्होमुँ, नें आम्‍योंन् समा च मोंइ ङए च्‍ह आपि।
LUK 9:40 छतसि च मों ल्‍हामिंन् बिसि क्‍हिए चेलामैंने ङइ यो छयुँ लइ। चमैंइ ल्हाल् म्हैलेया ल्‍हाल् आखाँ।”
LUK 9:41 येशूजी चमैंने बिइ, “ओ बिश्‍वास आरेबै आच्योबै म्हिमैं, ङ खोंयों समा क्‍हेमैंने तरिमुँ, धै क्‍हेमैंलाइ कति सैदिल् त्‍हुब् जा? क्‍हिए च्‍ह चुर पउ।”
LUK 9:42 च कोलो पसि खरिमा मोंइ धबै सर प्‍योवासि स्याला म्हाला लवाइ। छतमा येशूजी च मोंलाइ हौदिसि च कोलो सल् लमिंसि चए आबाने पिंइ।
LUK 9:43 परमेश्‍वरए च्हौ थेबै शक्‍ति म्रोंसि चमैं ताँन् प्लेटोयाइ। धै येशूजी लब्ब्रें लबै केमैंउँइँले ताँन् म्हिमैं अचम्‍मा तब् म्रोंसि खीजी ह्रोंसए चेलामैने बिइ,
LUK 9:44 “ङइ बिबर होंबै ताँ क्हेमैंइ छेनले सैंर थेंन्, तलेबिस्याँ म्‍हिमैंइ ङ म्हिए च्हलाइ म्‍हिमैंए योर सुम्‍पिदिवाब्‍मुँ।”
LUK 9:45 दिलेया येशूजी बिबै ताँ चेलामैंइ आक्‍हो। तलेबिस्याँ चु ताँ चमैंइ आक्‍होरिगे बिसि परमेश्‍वरजी चमैंउँइँले चए अर्थ लोथेंल। चेलामैंइ चु ताँ आक्होलेया येशूने ङ्योएबर ङ्हिंइ।
LUK 9:46 च त्हेर्न चेलामैं न्होंरि खाब् थेब् जा बिसि छलफल लरिल।
LUK 9:47 दिलेया येशूजी चमैंए सैंर्बै ताँ था सेसि येशूजी च्योंने कोलो घ्रि पखसि ह्रोंसए उँइँर थेंइ।
LUK 9:48 झाइले चेलामैंने बिइ, “खाबइ ङए मिंर चु कोलोलाइ मान लमुँ, चइ ङलाज्यै या मान लमुँ। धै ङलाइ मान लब्‍मैंइ ङ कुल्मिंबै परमेश्‍वर आबालाज्यै या मान लमुँ। छलेन क्‍हेमैंए न्‍होंरि खाब् च्‍योंने तसि टिमुँ चन् ताँन् भन्दा थेब् तम्।”
LUK 9:49 झाइले यूहन्‍नाइ बिइ, “ओ गुरु, क्‍हिए मिं तेसि मों ल्‍हाबै म्‍हि घ्रि ङिइ म्रोंइ, दिलेया ङिइ चने ‘छ आलद्’ बिइ, तलेबिस्याँ च म्‍हि ङिने बालु प्रसि क्हिइ बिब् धों आल।”
LUK 9:50 छबिमा येशूजी चने बिइ, “चने तोइ आबिद्, मों ल्‍हाल् पिंन्, तलेबिस्या क्हिए बिरोध आलब्मैं क्‍हिए ख लब्मैं तम्।”
LUK 9:51 खी स्वर्ग ह्‍याबै त्‍हे चेंदो तखमा येशूजी यरूशलेमर्न ह्‍याबै सैं लइ।
LUK 9:52 झाइले चब् टिबै तौदु लद् बिसि खीजी ह्रोंस् भन्दा ओंसों सामरिया ह्‍युलर्बै नाँस घ्रिर म्हिमैं कुलइ।
LUK 9:53 दिलेया “येशू यरूशलेमर ह्‍याम्” बिब् था सेसि च नाँसथेंमैंइ खीलाइ मान आल।
LUK 9:54 छतब् म्रोंसि येशूए चेलामैं याकूब नेरो यूहन्‍नाइ बिइ, “प्रभु, क्हिए सैंर खै ङ्हाँइमुँ? स्वर्गउँइँले मि कुलसि चुमैं सैवाद् बिसि ङिइ बिले वा।”
LUK 9:55 छबिमा येशूजी लिग्‍याँ तोसि चमैं हौदिइ।
LUK 9:56 झाइले खेंमैं अर्को नाँसर ह्‍याइ।
LUK 9:57 खेंमैं घ्‍याँर ह्‍यारिमा म्‍हि घ्रिइ येशूने बिइ, “ओ गुरु, क्‍हि खनिर ह्‍यामुँ ङै या क्‍हिए लिलि ह्‍याम्।”
LUK 9:58 येशूजी चने बिइ, “सेलमैंल रो मुँ, नमेंमैंल च्‍हों मुँ, दिलेया म्हिए च्ह तनाबिलेया ङल क्र लोबै क्‍ल्‍ह्‍यो या आरे।”
LUK 9:59 खीजी अर्को म्‍हि घ्रिने “ङए लिलि प्रद्,” बिइ। दिलेया च म्‍हिइ बिइ, “ओ गुरु, ओंसों ङए आबा पाबर ह्‍याल् पिंन्।”
LUK 9:60 खीजी चने बिइ, “सिनुमैंलाइ सिनुमैंन पारिगे। क्‍हि बिस्याँ ह्‍यासि ‘परमेश्‍वरजी ग्याल्स लबर होंइ। खीजी बिब ङिंनु, झाइले खीजी क्‍हेमैंलाइ आशिक पिंब्‍मुँ’ बिसि बिप्रद्।”
LUK 9:61 अर्को म्‍हि घ्रिज्यै या येशूने बिइ, “प्रभु, क्‍हिए लिलि ङ प्रमुँ, दिलेया ओंसों ङ धिंर एह्‍यासि धिंर्बै म्हिमैंने बिदा ह्रिल् पिंन्।”
LUK 9:62 दिलेया येशूजी चने बिइ, “ह्रोंसए यो क्होरर थेंसि लिग्याँ तोइ ङ्‌ह्‍योब्मैं खाबै या परमेश्‍वरए ग्याल्सर केर आफे।”
LUK 10:1 च लिउँइँ प्रभुजी अरू ङिच्‍यु चेलामैं त्हाँसि खी ह्‍याबि छेबै सहर नेरो नाँसजरे ह्रोंस् भन्दा ओंसों चमैं ङ्हिं-ङ्हिं लसि कुलइ।
LUK 10:2 येशूजी चमैंने बिइ, “मिंबै रोमैं ल्हें मुँ, दिलेया रोमैं खुबै म्रोंमैं बिस्याँ च्युगुदे मुँ। छतसि ‘रा-रोमैं खुबर म्रोंमैं कुल्मिंन्,’ बिसि रोमैंए क्‍ल्‍हेने प्राथना लद्।
LUK 10:3 ह्‍याद्! ङइ क्‍हेमैं प्याँगुमैंए हुलर क्‍युमैं धोंले कुलम्।
LUK 10:4 क्‍हेमैंइ मुइ, झोला, जुत्ता तोइ आबोद्। झाइले घ्‍याँर खाब्ने या ताँ सेबर ल्‍हें समा आटिद्, बरु युना ह्‍याद्।
LUK 10:5 “क्‍हेमैं खाब् धिंर होंमुँ, चर होंबै तोदोंन् ‘चु धिंर शान्‍ति तरिगे’ बिद्।
LUK 10:6 च धिंर शान्‍ति म्‍हैबै म्‍हि मुँस्‍याँ क्‍हेमैंए शान्‍तिए आशिक चने ल्‍हैदिब्‍मुँ। च धिंर शान्‍ति म्‍हैबै म्‍हि आरेस्‍याँ च शान्तिए आशिक क्‍हिमैंने बालुन् एखब्मुँ।
LUK 10:7 झाइले च धिं घ्रिर्न बास टिद्। च धिंर्बै म्‍हिमैंइ क्‍हेमैंलाइ तो पिंमुँ चन् चसि चर्न टिद्। तलेबिस्याँ म्रोंमैंइ ह्रोंसए नों सै योंल् त्हुम्।
LUK 10:8 क्हेमैं खाब् नाँसर ह्‍यामुँ चर्बै म्‍हिमैंइ क्‍हेमैं मान लसि चबै सेमैं तो पिंमुँ चन् चद्।
LUK 10:9 झाइले च नाँसर्बै नब्-छब्मैं सल् लद्, धै ‘परमेश्‍वरए ग्याल्स क्‍हेमैंए ङाँर्न फेखइमुँ’ बिसि चमैंने बिद्।
LUK 10:10 दिलेया क्हेमैं नाँस घ्रिर ह्‍यामा चर्बै म्‍हिमैंइ क्‍हेमैं बास आपिं, मान आल बिस्याँ च नाँसर्बै घ्‍याँजरे ह्‍यासि बिद्,
LUK 10:11 ‘क्‍हेमैं परमेश्‍वरए बिरोधी तइ। छतसि चु छ्याब् पिंबै प्रमाणए ल्हागिर ङिए प्‍हलेर ङ्हाँबै त्‍हुलै या ङिइ चुर्न खारथेंम्। दिलेया चु ताँ सैंर थेंन् परमेश्‍वरए ग्याल्स क्‍हेमैंए ङाँर्न फेखइमुँ,’ बिद्।
LUK 10:12 ङ क्‍हेमैंने बिमुँ, परमेश्‍वरजी निसाफ लबै त्हिंइर सदोमथेंमैंइ भन्दा च नाँसथेंमैंइ झन् थेबै सजैं योंब्‍मुँ।
LUK 10:13 “धिक्‍कार मुँ खोराजीनथेंमैं! क्‍हेमैं बेल्‍ले सैं क्रोल् त्‍‍हुम्! धिक्‍कार मुँ बेथसेदाथेंमैं, क्‍हेमैं या बेल्‍ले सैं क्रोल् त्‍‍हुम्! तलेबिस्याँ क्‍हेमैंए नाँसजरे तब् धोंबै परमेश्‍वरए शक्‍तिए केमैं टुरोस नेरो सिदोनर तस्‍याँ चर्बै म्‍हिमैं स्‍योंमन् ह्रेंगा खिसि मेब्रो फिर क्हुँसि खेंमैंए आछ्याँबै बानि पिसि परमेश्‍वरउँइँ सैं एमल।
LUK 10:14 परमेश्‍वरजी निसाफ लबै त्हिंइर टुरोस नेरो सिदोनथेंमैंइ भन्दा क्‍हेमैंइ झन् थेबै सजैं योंब्‍मुँ।
LUK 10:15 ओ कफर्नहुमथेंमैं! क्हेमैं स्वर्गर ह्‍याल् योंम् ङ्हाँल् वा? आयों! क्‍हेमैं नर्गर्न भ्‍योंवाब्‍मुँ।”
LUK 10:16 येशूजी धबै चेलामैंने बिइ, “खाब‍इ क्‍हेमैंइ बिबै ताँ थेमुँ, चइ ङए ताँ थेम्। दिलेया खाबइ क्‍हेमैंइ बिब आङिंसि बिरोध लम्, चइ ङए बिरोध लम्। छलेन खाबइ ङइ बिब आङिंसि बिरोध लमुँ, चइ ङ कुल्‍मिंबै परमेश्‍वर आबालाज्यै या बिरोध लम्।”
LUK 10:17 च लिउँइँ ङिच्यु चेलामैं बेल्‍ले सैं तोंदै येशू ङाँर एखसि बिइ, “ओ प्रभु, ङिइ क्‍हिए मिं किंसि मोंमैं ल्‍हामा चमैंइ ङिइ बिबै ताँ ङिंइ।”
LUK 10:18 छबिमा येशूजी चमैंने बिइ, “ओं, काम्‍लि-तिम्‍लि युब् धोंले मोंमैंए म्रुँ दुष्‍ट स्‍वर्गउँइँले क्युरु खारयुब ङइ म्रोंइ।
LUK 10:19 ङ‍ए ताँ थेद्! ङइ क्‍हेमैंलाइ प्‍हुरिमैं, बिच्‍छिमैं प्लेल् खाँब नेरो शत्तुरमैंए ताँन् शक्‍तिए फिर ट्होल् खाँबै हग पिंइमुँ। छतसि तोइ सैज्यै या क्‍हेमैंलाइ न्होह्रों लल् खाँरिब् आरे।
LUK 10:20 दिलेया क्‍हेमैंइ बिब मोंमैंइ ङिंना बिसि सैं आतोंन्, बरु परमेश्‍वरजी क्‍हेमैंए मिं स्वर्गर प्‍ह्रिथेंइमुँ बिसि सैं तोंन्।”
LUK 10:21 च त्‍हेर्न येशू परमेश्‍वरए पबित्र प्ल्हजी प्लिंसि सैं तोंदै बिइ, “ओ आबा, स्वर्ग नेरो पृथ्‍बीर्बै क्‍ल्‍हे क्हिन् ग, ज्ञान मुँब्‍मैं नेरो ह्रब्-सेब्मैंउँइँले लोथेंबै छ्याँबै ताँ कोलोमैं धों तबै तोइ आह्र आसेब्मैंलाइ क्‍हिइ क्होमिंइमुँ। ओ आबा, क्‍हिजी छान् लब छ्याँब ङ्हाँइ। छतसि ङ क्हिलाइ धन्यबाद पिंमुँ।
LUK 10:22 “ङए परमेश्‍वर आबाजी तोन्दोंरि सै ङलाइ पिंइमुँ। च्‍ह खाब् जा बिसि परमेश्‍वर आबाजी मत्‍त्रे सेमुँ अरूमैंइ आसे, परमेश्‍वर आबा खाब् जा बिसि च्हइ मत्‍त्रे सेमुँ अरूमैंइ आसे। ‘परमेश्‍वर आबा ङो सेरिगे’ बिसि ङइ उँइँदा ङ्हाँब्मैंइ मत्‍त्रे खीलाइ ङो सेम्, अरू खाबज्‍यै या परमेश्‍वर आबा ङो आसे।”
LUK 10:23 येशूजी ह्रोंसए चेलामैं ङाँइ तोसि अरू म्हिमैंइ आथेल्‍ले बिइ, “क्‍हेमैंइ म्रोंबै सैमैं म्रोंल् योंब्मैं ङ्‍हो सब्मैं ग।
LUK 10:24 तलेबिस्याँ ङ‍इ क्हेमैंने बिमुँ, स्‍योंम्‍बै अगमबक्‍ता नेरो म्रुँमैंज्यै या क्‍हेमैंइ म्रोंबै केमैं ङ्‍ह्‍योदा ङ्हाँल, दिलेया ङ्‍ह्‍योल् आयोंल। छलेन क्‍हेमैंइ थेबै ताँमैं थेदा ङ्हाँइ, दिलेया थेल् आयोंल।”
LUK 10:25 परमेश्‍वरए छ्वे ह्रबै म्‍हि घ्रिइ येशूए जाँच लसि ताँ क्हाल् त्हुइ बिबै सैंले खीने ङ्योएइ, “ओ गुरु, खोंयोंइ आखाँबै छ्ह योंबै ल्हागिर ङइ तो लल् त्‍हुम्?”
LUK 10:26 येशूजी चने बिइ, “मोशाए ठिमर तो प्‍ह्रिइमुँ? चर क्‍हिइ तो खेइ?”
LUK 10:27 चइ बिइ, “‘क्‍हिइ ह्रोंसए प्रभु परमेश्‍वरलाइ ह्रोंसए खों न्होंउँइँले, सैं न्होउँइँले, ह्रोंसइ ह्रब्दे, सेब्दे, खाँब्दे म्‍हाँया लद्, धै ह्रोंसए ङ्‍हेब-ट्हुब्मैं ह्रोंस धोंलेन् म्‍हाँया लद्।’”
LUK 10:28 पेयेशूजी चने बिइ, “क्‍हिइ ठिकन् बिइ। छान् लद्, छ लइबिस्‍याँ क्‍हिइ खोंयोंइ आखाँबै छ्ह योंब्‍मुँ।”
LUK 10:29 दिलेया च म्‍हिइ ह्रोंस ठिक के लबै म्हि ग बिसि प्हैंबर “छ बिस्‍याँ ङए ङ्‍हेब्-ट्हुब् खाब् जा?” बिसि ङ्योएमा
LUK 10:30 येशूजी अहानउँइँले छले बिइ, “म्‍हि घ्रि यरूशलेम सहरउँइँले जेरिको नाँसउँइँ ह्‍याबै घ्‍याँर खी घ्रिन् ह्‍यारिल। छले ह्‍यारिमा घ्‍याँर ह्‍योमैंइ चलाइ क्‍हासि चए मारा, मुइ, नेरो क्वें प्‍हेंवासि क्लुँनन् लसि सो मत्‍त्रे चैल्‍ले बेल्‍ले धोंसि घ्‍याँर्न वाथेंइ।
LUK 10:31 तिस्याँदे लिउँइँ ख्रो पिंबै खेगि घ्रि च घ्‍याँउँइँले खइ। दिलेया ह्‍योइ धोंवाबै म्‍हि म्रोंसि च तिरइले छ्युडिह्‍याइ।
LUK 10:32 छलेन च धोंलेन् मन्दिरर्बै खेगि लेबीए खलकर्बै म्हि या च क्‍ल्‍ह्‍योर फेखसि च म्‍हि म्रोंमा चै या घ्याँए रे रेउँइँले छ्युडिह्‍याइ।
LUK 10:33 “च लिउँइँ सामरिया ह्‍युलर्बै म्‍हि घ्रि या च घ्याँ तसि खरिमा च ह्‍योइ धोंवाबै म्‍हि म्रोंसि चए सैंर बेल्‍ले ल्‍होयो खइ।
LUK 10:34 धै च ङाँर ह्‍यासि मैं फोमिंसि चए घार पट्टि फैमिंसि खीए गधाए फिर थेंसि ठाँटि घ्रिर बोसि चए सुसार लइ।
LUK 10:35 प्‍हँन्हाँग्धों ह्‍याबै त्‍हेर च सामरियाथेंइ ठाँटिर्बै क्‍ल्‍हेने चाँदिए मुइ ङ्हिं पिंसि चु म्‍हि छेनले ङ्‍ह्‍योमिंन् अरू कति खर्ज ल्‍हौदिलेया ङ एखमा फोमिंस्‍यो,” बिइ।
LUK 10:36 चु अहान् बिल् खाँसि येशूजी च ठिम लोमिंबै गुरुने “चु सौंलो म्हिमैं न्‍होंरि खाबइ च ह्‍योइ धोंवाबै म्‍हिलाइ ङ्‍हेब्-ट्हुब्मैं धोंले म्‍हाँया लइ?” बिसि ङ्योएमा
LUK 10:37 च ठिम लोमिंबै गुरुइ बिइ, “चए फिर ल्हयो खबै सामरियाथेंइ।” येशूजी चने बिइ, “छ बिस्याँ ह्‍याद् क्‍हिज्‍यै या छाबै केन् लद्।”
LUK 10:38 झाइले येशू चेलामैंने बालु घ्‍याँर ह्‍यारिमा नाँस घ्रिर फेखइ। च नाँसर मार्था बिबै च्हमिरिइ खीलाइ ह्रोंसए धिंर चब् चबर हुइ।
LUK 10:39 मार्थाल मरियम मिं मुँबै अङाँ मुँल। मरियम प्रभु येशूए प्‍हले ङाँर क्हुँसि खीजी लोमिंबै ताँ थेरिल।
LUK 10:40 दिलेया मार्था बिस्याँ चब् लबर आतुर तरिल। छतसि मार्था येशू ङाँर ह्‍यासि बिइ, “ओ प्रभु, ङए अङाँइ के लबर ङलाइ आल्‍हो! क्‍हिइ चु ताँए बिचार आल वा? के ल्‍होब‍र च ङ ङाँर कुलमिन्।”
LUK 10:41 दिलेया प्रभु येशूजी चने बिइ, “ओ, मार्था क्‍हिइ ल्‍हें ताँर न्हुँ लम्।
LUK 10:42 दिलेया ताँ घ्रि मत्‍त्रे चैदिम्। काजी मरियमइ च छ्याँबै ताँ त्‍हाँइ। छतसि च ताँ चउँइँले ङइ प्हेंरिब् आरे।”
LUK 11:1 तिगें क्‍ल्‍ह्‍यो घ्रिर येशू प्राथना लरिल। खीजी प्राथना लल् खाँबै लिउँइँ खीए चेला घ्रिइ खीने बिइ, “ओ प्रभु, क्युर प्ल्हुँसि बप्‍तिस्मा पिंबै यूहन्‍नाइ ह्रोंसए चेलामैं प्राथना लब् लोमिंब् धोंले ङिलाज्यै या लोमिंन्।”
LUK 11:2 येशूजी चमैंने बिइ, “क्‍हेमैंइ प्राथना लमा छले लद्: ‘ओ आबा, ताँन् म्हिमैंइ क्हिए मिं पबित्र म्हाँदिरिगे, क्हिए ग्याल्स युरिगे,
LUK 11:3 ङिए त्हिंइ ह्रोंसेबै चबै सै तिंयाँ ङि पिंनुँ।
LUK 11:4 ङिए पाप क्षमा लमिंनु, तलेबिस्याँ ङिए फिर आछ्याँबै के लब्मैंलाइ ङिज्यै या ङि क्षमा लम्। ङि सैदिल् आखाँबै जाँजर च्होंल् आपिंनु।’”
LUK 11:5 झाइले येशूजी ह्रोंसए चेलामैंने चु अहान् बिइ, “क्‍हेमैंए न्‍होंरि खाब् मुँलेया म्‍हुँइँस आधार थु ङाँर ह्‍यासि ‘ओ थु, म्‍ल्‍हसि सोंम्ना खिद्,’ बिम्।
LUK 11:6 तलेबिस्याँ थु घ्रि तोगो ङ ङाँर बास टिबर खइमुँ, दिलेया ङने चल् पिंबै सै तोइ आरे।
LUK 11:7 “दिलेया क्हिए थुइ धिं न्‍होंउँइँले ‘छोरो ङ्हाँन् आबित्ति। ङइ म्रा तोरवाइ। तोगो ङए कोलोमैं ङने बालु न्‍हरु च्‍हुइरिइमुँ। तोगो ङ रेसि क्‍हिलाइ तोइ पिंल् आखाँ,’ बिम्।
LUK 11:8 “ङइ क्‍हेमैंने बिमुँ, थु तना बिलेया च रेसि क्हिलाइ तोइ आपिं, दिलेया क्‍हिइ ह्रिबै-ह्रिबन् लमा च रेसि क्‍हिलाइ चैदिबै तोन्दोंरि सै पिंब्‍मुँ।
LUK 11:9 “छतसि ङ क्‍हेमैंने बिमुँ, तो सै चैदिमुँ ह्रिब्रें लद्, झाइले परमेश्‍वरजी पिंब्‍मुँ। म्‍हैब्रें लद् क्‍हेमैंइ स्याब्‍मुँ। म्रार ह्राब्रें लद् क्‍हेमैंए ल्हागिरि खीजी म्रा थोंमिंब्‍मुँ।
LUK 11:10 तलेबिस्याँ ह्रिब्मैंइ योंब्‍मुँ, म्‍हैब्मैंइ स्याब्‍मुँ, झाइले म्रार ह्राब्मैंए ल्हागिर परमेश्‍वरजी म्रा थोंमिंब्‍मुँ।
LUK 11:11 “सैंर मैंन्दि, क्‍हेमैंए न्‍होंरि ह्रोंसए च्‍हइ क्हें ह्रिमा युँमा पिंबै आबा खाब् मुँगे धै ताँग ह्रिमा ताँगए साटोर प्‍हुरि पिंम्‌ रो वा?
LUK 11:12 छलेन क्‍हिए प्हसेइ नग फुँ ह्रिमा क्‍हिइ बिच्‍छि पिंम्‌ रो वा? आपिं!
LUK 11:13 क्‍हेमैं दुष्‍ट तलेया ह्रोंसए प्हसेमैंलाइ छ्याँबै सैमैं पिंल् ह्रम् बिस्याँ, झन् स्‍वर्गर टिबै क्हेमैंए परमेश्‍वर आबाजी खीने बालु ह्रिब्मैंलाइ कति ल्हें पबित्र प्ल्ह पिंब्‍मुँ।”
LUK 11:14 तिगें येशूजी मोंइ स्यासि लड तयाबै म्‍हि घ्रिउँइँले मों ल्‍हामा मों त्होंयाबै लिउँइँ च लडा पोंबर होंइ। छ तब् म्रोंसि च खाउ मुँबै म्‍हिमैं प्लेटोयाइ।
LUK 11:15 दिलेया चमैं न्होंर्बै को-कोइइ “मोंमैंए चिब बालजिबुलउँइँले चइ मोंमैं ल्‍हाम्,” बिइ।
LUK 11:16 अरू म्हिमैंइ बिस्याँ “परमेश्‍वरजी क्‍हिलाइ शक्‍ति पिंब् ग बिस्याँ स्वर्गर्बै चिनु घ्रि उँइँन्,” बिसि येशूए जाँच लइ।
LUK 11:17 दिलेया येशूजी चमैंए सैंर्बै ताँ सेसि चमैंने बिइ, “ग्याल्स घ्रिर्बै म्‍हिमैं खें-खेंमैंए न्होंर्न आक्ह्रिस्‍याँ च ग्याल्स नास तयाम्। छलेन धिं घ्रिर्बै परवामैं आक्‍ह्रिस्‍याँ चमैं या नास त‍याम्।
LUK 11:18 च धोंलेन् दुष्‍ट ह्रोंसनेन् आक्ह्रिस्याँ चए ग्याल्स खैले टिक्दिल् खाँम्? “तलेबिस्याँ बालजिबुलए शक्‍तिउँइँले ङइ मोंमैं ल्‍हाम् बिसि क्हेमैंइ बिम्।
LUK 11:19 बालजिबुलए शक्‍तिउँइँले ङइ मों ल्‍हाम् बिस्‍याँ, क्‍हेमैंए टोलिर्बै म्‍हिमैंइ खाबै शक्‍तिउँइँले मोंमैं ल्‍हाम्? छतसि चमैंइन क्‍हेमैंए निसाफ लब्मुँ।
LUK 11:20 दिलेया परमेश्‍वरए शक्‍तिउँइँले ङइ मोंमैं ल्‍हाम् बिस्याँ, परमेश्‍वरए ग्याल्स‍र्बै शक्‍ति क्‍हेमैंए म्‍हाँजोर तखइमुँ बिसि क्‍हेमैंइ सेल् त्‍हुम्।
LUK 11:21 “झाइले अर्को ताँ थेद्! भोंबै म्‍हि घ्रिइ हत्‍यारमैं छेसि ह्रोंसए धिं रुँम् बिस्याँ चए सै न्होर खाबज्‍यै या बोल् आखाँ।
LUK 11:22 दिलेया च भन्दा भोंबै म्‍हि चए फिर ह्‍वानेसि ट्वाहोवाम्, धै च म्‍हिइ भर लबै हत्‍यारमैं प्‍हेंवाम्, धै चए धिंर मुँबै सैमैं बोयासि अरूमैंलाइ चुमिंम्।
LUK 11:23 छतसि ङए ख आलबै म्हि ङए बिरोधी ग। धै ङने बालु आखुबै म्हइ खन्तोंदोंन् फ्रुँवाम्।
LUK 11:24 “झाइले अर्को ताँ: म्हिउँइँले मों त्‍होंबै लिउँइँ च मों बास म्‍हैबै ल्हागिर छाइ छुइ खन्तोंदोंन् प्रम्। दिलेया खनिरै बास आयोंमा ‘ओंसों टिबै धिंर्न ङ एह्‍याम्,’ बिम्।
LUK 11:25 “छले च मों एखमा च धिं खाँसों ङ्हाँन्ले फ्योसि सजेथेंब् चइ स्याम्।
LUK 11:26 छतसि च मों ह्‍यासि अझै ह्रोंस् भन्दा दुष्‍ट मों ङिउँलो पखसि चमैं ताँन् च न्होंर टिम्। झाइले च म्‍हिए छ्ह ओंसोंबै भन्दा लिउँइँबै झन् आछ्याँब तम्।”
LUK 11:27 येशूजी छ बिरिमा हुल न्‍होंउँइँले च्हमिरि घ्रिइ थेबै कैले बिइ, “क्‍हिलाइ फिसि ङ्‍हे तिंबै आमाइ बेल्‍ले आशिक योंइमुँ।”
LUK 11:28 दिलेया येशूजी च च्हमिरिने बिइ, “ओ नानि, ङए ताँ थेद्! परमेश्‍वरए ताँ थेसि खीजी बिब् म्हाँदिबै म्‍हिइ झन् आशिक योंब्मुँ।”
LUK 11:29 छले म्हिए हुल् ल्हें तदै ह्‍यामा येशूजी बिइ, “तिंजोरोबै म्‍हिमैं दुष्‍ट ग। चुमैंइ ङ परमेश्‍वरजी कुल्‍मिंबै म्हि ग बिस्याँ ङिने प्रमाण उँइँन् बिम्। दिलेया स्‍योंम्‍बै योना बिबै अगमबक्‍ताए छ्हर तब् धों तबै चिनु मत्‍त्रे चुमैंइ म्रोंल योंब्मुँ, अरू चिनु म्रोंल् योंरिब् आरे।
LUK 11:30 तलेबिस्याँ निनबे बिबै सहरर्बै म्‍हिमैंए ल्हागिर योना औदिबै चिनु तब् धोंले म्हिए च्ह तिंजोरोबै म्‍हिमैंए ल्हागिर प्रमाण तब्मुँ।
LUK 11:31 झाइले निसाफ लबै त्हिंइर शेबा बिबै ह्‍युलर्बै म्रुँस्‍यो रासि तिंजोरोबै म्हिमैंलाइ छ्याब् ल्‍हैदिब्‍मुँ, तलेबिस्याँ स्‍योंम्‍बै इस्राएल ह्‍युलर्बै सोलोमन म्रुँए ज्ञानए ताँ थेबर ह्रेंगो ह्‍युलउँइँले च म्रुँस्‍यो खइ। दिलेया थेद्! सोलोमन म्रुँ भन्दा झन् थेबै म्‍हि तोगो चुर मुँ।
LUK 11:32 झाइले निसाफ लबै त्हिंइर निनबे बिबै सहरर्बै म्‍हिमैंइ तिंइजोरोबै म्‍हिमैंए फिर छ्याब् मुँबन् ठर्दिब्‍मुँ, तलेबिस्याँ योनाउँइँले परमेश्‍वरए ताँ थेसि निनबे बिबै सहरर्बै म्‍हिमैंइ ह्रों-ह्रोंसए आछ्याँबै के पिसि परमेश्‍वरउँइँ सैं एल। छतसि थेद्! योना भन्दा झन् थेबै म्‍हि चुर मुँ।”
LUK 11:33 येशूजी धबै बिइ, “खाबज्‍यै या बत्ति म्रोसि च्‍ह्‍योगों न्होंर आलो, मतलब भाँडोइ आउथें, बरु धिं न्‍होंर खबै म्‍हिमैंइ मि म्रोंरिगे बिसि नुबै क्‍ल्‍ह्‍योर थेंम्।
LUK 11:34 क्‍हिए मि ज्युर्बै बत्ति ग। क्‍हिए मिइ छ्याँबै सै ङ्‍ह्‍योइ बिस्‍याँ क्‍हिए सैं या छ्याँब तसि चारब तम्। दिलेया मिइ आछ्याँब सै ङ्‍ह्‍योइ बिस्‍याँ क्‍हिए सैं या आछ्याँब तसि मिछु तयाम्।
LUK 11:35 छतसि क्‍हेमैंने मुँबै चारब मि मिछु आतरिगे बिसि सैं चिद्।
LUK 11:36 क्‍हिए ज्युर मिछु आतल्‍ले ज्यु तिगोंन् चारब सै मुँस्‍याँ बत्ति चारब धोंले क्‍हिए ज्युउँइँले परमेश्‍वर‍ए मिं चारब्मुँ।”
LUK 11:37 येशूजी चु ताँमैं बिल् खाँबै लिउँइँ फरिसी घ्रिइ येशूलाइ खीए धिंर चब् चबर हुइ। झाइले येशू चए धिंर ह्‍यासि चब् चबर क्हुँइ।
LUK 11:38 येशूजी यो आख्रुल्‍ले चब् म्रोंसि च न्हिम्तो लबै फरिसी प्लेटोयाइ।
LUK 11:39 छतमा येशूजी चने बिइ, “क्‍हेमैं फरिसीमैं थलि प्‍हेलाए फि-फि छेन्‍ले म्याम्। दिलेया क्हेमैंए सैंर बिस्याँ आछ्याँबै ताँमैं नेरो लोबइ प्‍लिंइमुँ।”
LUK 11:40 “ओ, आमादुमैं! बैरुबै सै बनेबै परमेश्‍वरजीन् न्‍होंर्बै सै या बनेब आङिं वा?
LUK 11:41 क्‍हिए थलि प्‍हेलार मुँबै सैमैं आयोंब्मैं पिंन्। छ लस्याँ न्‍हों मुँलेया बैरु मुँलेया क्‍हेमैंए ल्हागिर ताँन् चोखो तब्‍मुँ।
LUK 11:42 “धिक्‍कार मुँ फरिसीमैं क्हेमैं सैं क्रोल् त्‍हुम्! क्‍हेमैंइ जिरा-मरिज पतिना छाबै च्‍युगुथिर सैमैंलै या च्‍योसि च्‍युबाँर्बै तिबाँ परमेश्‍वरए मिंर पिंमुँ, दिलेया क्‍हेमैंइ अरूए फिर ठिक निसाफ आल, धै परमेश्‍वरलाइ सैं न्होंउँइँले म्‍हाँया आल। च्‍युबाँर तिबाँ पिंब छ्याँब ग, दिलेया अरू केमैं या क्हेमैंइ छेनाले लल् त्‍हुमल।
LUK 11:43 “धिक्‍कार मुँ फरिसीमैं क्‍हेमैं सैं क्रोल् त्‍हुम्! क्‍हेमैं च्हों धिंजगोर ह्‍यामा मान योंल् त्हुबै क्‍ल्‍ह्‍योर क्हुँल् म्‍हैमुँ! धै बजारजरे ह्‍यामै या म्‍हिमैंइ मान लसि म्हाँदिरिगे ङ्हाँम्।
LUK 11:44 “धिक्‍कार मुँ क्‍हेमैं सैं क्रोल् त्‍हुम्! क्‍हेमैं छ्यों म्ह्‍यों आयोंबै छगों धों तब् ग, ‘न्‍होंर सिनु मुँ’ बिब आसेसि म्हिमैं च‍ए फिफि प्रम्।”
LUK 11:45 शास्‍त्रिमैंए न्होंर्बै घ्रिइ येशूने बिइ, “ओ गुरु, क्हिइमि छाबै ताँमैं बिसि ङिए आब्रु वाइ।”
LUK 11:46 येशूजी बिइ, “क्हेमैं शास्‍त्रिमैंलाज्यै या धिक्‍कार मुँ! सैं क्रोल् त्‍हुम्! म्हिमैंइ नोल् आखाँबै ते क्‍हेमैंइ नोद् बिमुँ, दिलेया क्हेमैं बिस्याँ यो च्याफै टिरिम्।
LUK 11:47 “धिक्‍कार मुँ, क्‍हेमैं क्रोल् त्‍हुम्! तलेबिस्याँ क्‍हेमैंए खेमैंइ सैवाबै स्योंम्बै अगमबक्‍तामैंए मान लब् प्हैंसि क्हेमैंइ छ्याँबै देवलमैं बनेमुँ।
LUK 11:48 क्‍हेमैंइ छलमा ‘ङिए खेमैंए केमैं ठिकन् मुँल,’ बिमुँ। तलेबिस्‍याँ चमैंइ स्‍योंम्‍बै अगमबक्‍तामैं सैवाइ, दिलेया क्हेमैंइ चमैंए ल्हागिर देवल बनेइ।
LUK 11:49 छतसि ‘ङइ चमैं ङाँर अगमबक्‍तामैं नेरो स्यार्बो कुलम्,’ बिसि तोन्दोंरि ताँ सेबै परमेश्‍वरजी बिल। ‘दिलेया च कुलब्‍मैं न्‍होंरि को‍-कोइलाइ चमैंइ सैवाब्‍मुँ, कोइलाइ ह्रुगुदिब्‍मुँ।’
LUK 11:50 छतसि ह्‍युल केब् ओंनोंबै तिंयाँ समा अगमबक्‍तामैं सैवाबै पापए सजैं तिंजोरोबै म्हिमैंइ बेहोर्दिल् त्‍हुम्।
LUK 11:51 ओं, ङ क्हेमैंने बिमुँ, हाबिल सैवाबै त्हे ओंनोंबै पबित्र मन्दिर नेरो ख्रो पिंबै क्ल्ह्‍योए म्हाँजोर जखरिया सैवाबै त्हे समार्बै ताँन् सजैं तिंजोरोबै म्‍हिमैंइ बेहोर्दिल् त्‍हुम्।
LUK 11:52 “क्‍हेमैं शास्‍त्रिमैं धिक्‍कार क्हेमैं क्रोल् त्‍हुम्! क्‍हेमैंइ क्‍ह्रोसेंन्‍बै ज्ञान बुद्धि योंबै म्राए साँजु किंबम् किंइ, दिलेया क्‍हेमैं ह्रोंसै या न्होंर आहों, होंल् म्‍हैब्मैंलाज्यै या क्‍हेमैंइ होंल् आपिं।”
LUK 11:53 येशू च धिंउँइँले त्‍होंबै लिउँइँ शास्‍त्रिमैं नेरो फरिसीमैंइ खीए बिरोध लदै खीने ल्‍हें ताँमैं ङ्योएबर होंइ।
LUK 11:54 “येशूजी ताँ पोंमा खनिज्यै गल्‍ति स्यासि ताँ क्हाल् योंम् उ?” बिसि चमैंइ दाउ ङ्‍ह्‍योबर होंइ।
LUK 12:1 च त्हेर्न हजार हजार म्‍हिमैं चर खागु तइ। छले ल्हें म्‍हिमैं तमा म्हिइ म्‍हिन् प्लेबर होंइ। धै येशूजी ओंसों ह्रोंसए चेलामैंने बिइ, “फरिसीमैंए क्हेंर झोंबै प्लेढाउँइँले जोगेइ टिद्। चमैंल स्‍योलिबै ताँमैं लोमिंबै बानि मुँ। छतसि छेनाले ताँ क्होसि न्ह क्रों मि क्रोंले टिद्।
LUK 12:2 तलेबिस्याँ तोगो क्‍हेमैंइ तो सै हुथेंलेया लिउँइँ ताँन् म्हिमैंइ म्रोंब्‍मुँ। झाइले तो ताँ लोथेंबै लिउँइँ ताँन् म्हिमैंइ सेब्‍मुँ।
LUK 12:3 छतसि क्‍हेमैंइ मिछु खैबर बिबै ताँमैं लिउँइँ त्‍हिंइर म्हिमैंइ थेब्‍मुँ। धिं न्‍होंर क्‍हेमैंइ सो कैले पोंबै ताँ या धिं प्हेंउँइँले खन्‍तोंदोंन् थेनेब्‍मुँ।”
LUK 12:4 येशूजी धबै बिइ, “ओ ङए थुमैं! ङ क्‍हेमैंने बिमुँ, क्‍हेमैंए ज्यु सैल् खाँबै म्‍हिमैं म्रोंसि आङ्हिंन्। तलेबिस्याँ ज्यु सैल् खाँलेया चमैंइ च भन्दा ल्हें तोइ लल् आखाँ।
LUK 12:5 दिलेया खाब् म्रोंसि ङ्हिंल् त्‍हुम् बिस्याँ ङ क्‍हेमैंने बिमुँ, क्‍हेमैं परमेश्‍वर म्रोंसि ङ्हिंनु, तलेबिस्याँ म्हि सैवासि नर्गर भ्‍योंवाबै शक्‍ति खीने मुँ।
LUK 12:6 “मुइ ङ्हिफुँर कोर्में ङ्‌ह आलों वा? च्हगर्न योंबै कोर्में घ्रिलाज्यै या परमेश्‍वरजी आम्‍लेनले छेनाले ङ्‌ह्‍योम् बिस्याँ
LUK 12:7 झन् क्हेमैंलम् क्रप्हो या घ्रि घ्रिले परमेश्‍वरजी च्योइ थेंइमुँ। छतसि तिफुँइ आङ्हिंन्, परमेश्‍वरए उँइँर ल्‍हें कोर्में भन्दा क्‍हेमैं सै ल्हें फेब मुँ।
LUK 12:8 “छतसि ङइ क्‍हेमैंने बिमुँ, खाबइ म्‍हिमैंए उँइँर ‘येशू ङए प्रभु ग’ बिमुँ, च म्हिलाज्यै या परमेश्‍वरउँइँले कुल्‍मिंबै म्हिए च्हजी परमेश्‍वरए स्‍वर्गदूतमैं उँइँर ‘चुम् ङए म्‍हि ग’ बिब्‍मुँ।
LUK 12:9 दिलेया खाबइ म्‍हिमैंए उँइँर ‘ङइ येशू ङो आसे,’ बिमुँ, ङज्यै या परमेश्‍वरए स्‍वर्गदूतमैंए उँइँर ‘चु ङइ ङो आसे,’ बिब्‍मुँ।
LUK 12:10 “झाइले म्हिए च्हए बिरोधर पोंब्मैंइ क्षमा योंब्मुँ। दिलेया पबित्र प्ल्हए बिरोधर पोब्मैंइ क्षमा योंरिब आरे।
LUK 12:11 “झाइले म्हिमैंइ क्‍हेमैंलाइ च्हों धिंर्बै चिब्मैं नेरो क्रथेमैं ङाँर क्हाबोमा ‘ङइ तो पोंब् ङ्‍हे? ङइ तो बिल् त्‍हुब् ङ्‍हे?’ बिसि न्हुँ आलद्।
LUK 12:12 तलेबिस्याँ क्‍हेमैंइ बिल् त्‍हुबै ताँ पबित्र प्ल्हजी च त्‍हेर्न क्‍हेमैंलाइ लोमिंब्‍मुँ।”
LUK 12:13 येशूजी ह्रोंसए चेलामैं लोमिंरिमा हुलउँइँले म्‍हि घ्रिइ येशूने बिइ, “ओ गुरु, ङिए आबाए सै न्होर अँश लमिंन् बिसि ङए आघेंने बिमिंन् ओ।”
LUK 12:14 दिलेया खीजी चने बिइ, “ओ थु, क्‍हेमैंए फिर निसाफ लब् नेरो क्हेमैंए सै न्होर चुमिंन् बिसि ङलाइ खाबइ ल्हैदिइ?”
LUK 12:15 खीजी धबै चर मुँब्मैंने बिइ, “छेनाले मैंन्, नना ओलिबै लोब् आलद्, तलेबिस्याँ म्‍हि कति प्‍ल्हो‍ब तनाबिलेया सै न्होरउँइँले क्‍ह्रोंसेंन्‍बै छ्ह योंल् आखाँ।”
LUK 12:16 च लिउँइँ येशूजी चमैंने अहान् घ्रि बिइ, “प्‍ल्होबै म्‍हि घ्रिल म्रोंउँइँले छेज्याल्हुल्हुले रा-रोमैं खइ।
LUK 12:17 छतमा ‘च्‍हौ ल्‍हें रा-रोमैं थेंबै धन्‍सार ङने आरे! तारे ङ तो लब् ङ्‍हे?’ बिसि चइ सैं न्‍हों न्‍हों मैंइ।
LUK 12:18 झाइले चइ बिइ, ‘ङए धन्‍सारमैं फुवासि बेल्‍ले थेब् थेब लमुँ। झाइले ङए रा-रोमैं नेरो अरू सै न्होर चर्न थेंम्।
LUK 12:19 झाइले ङइ ह्रोंसनेन् क्हिए ल्हागिर ल्‍हें बर्ष समा योबै रा-रोमैं मुँ। तारे पिरु चदु, थुँनु, धै मोज-मज्‍जा लसि सुखले टिद्,’ बिब्मुँ।
LUK 12:20 दिलेया चइ छले मैंरिमा परमेश्‍वरजी चने बिइ, ‘ओ आमादु! तिंयाँ म्‍हुँइँसर्न क्‍हि सिल् त्‍हुब्मुँ। तारे क्‍हिइ साँथेंबै सै न्होर खाबल् तब्मुँ?’”
LUK 12:21 येशूजी धबै बिइ, “ह्रोंसए ल्हागिर सै न्होर थुपर्दिसि प्लब तब दिलेया परमेश्‍वरए उँइँर आप्‍ल्होबै म्‍हिए गति छाबन् तम्।”
LUK 12:22 येशूजी ह्रोंसए चेलामैंने बिइ, “छतसि ङ क्‍हेमैंने बिमुँ, सोबै ल्हागिर ‘ङ तो चब् ङ्‍हे? तो थुँब् ङ्‍हे? धै ज्युए ल्हागिर तो खिब् ङ्‍हे?’ बिसि न्हुँ आलद्।
LUK 12:23 तलेबिस्याँ चबै सै भन्दा जीबन थेब मुँ, झाइले क्‍वें भन्दा ज्यु थेब मुँ।
LUK 12:24 “कगामैं ङ्‌ह्‍योत्ति! चमैंइ खेति आल्‍हैदि, रो या आखु, चमैंल भकारि आरे, धनसारमैं या आरे। दिलेया परमेश्‍वरजी चमैंलाइ चल् पिंरिइमुँ। छाबै नमेंमैं भन्दा क्‍हेमैं झन् बेल्‍ले थेब मुँ।
LUK 12:25 क्‍हेमैंए न्होंरि खाबइ न्हुँ लसि ह्रोंसए आयु च्‍हौदे या थप्दिल् खाँम्‍मा?
LUK 12:26 क्‍हेमैंइ च्‍हौ च्‍योंबै के या लल् आखाँ बिस्‍याँ अरू सैर तले न्हुँ लमुँ?
LUK 12:27 “झाइले अर्को ताँ: क्ह्‍योंर्बै प्हारबै टमैं ङ्‌ह्‍योसि सैंर मैंन्। चमैंइ दुःखै आल, ह्रोंसए ल्हागिर क्‍वें या आरो। दिलेया ङ क्‍हेमैंने बिमुँ, स्‍योंम्‍बै सोलोमन म्रुँ बेल्‍ले प्‍ल्‍होसि छ्याँब् छ्याँबै क्‍वें खिनाबिलेया चु टमैं प्‍हारब् धोंले छ्याँब आरेल।
LUK 12:28 चु टमैं तिंयाँ प्‍हारसि प्‍हँन्हाँग कारयासि म्हिमैंइ मिर ख्रोंवाम्। छ तनाबिलेया परमेश्‍वरजी च्‍हौ छेन्‍ले पैरेमिंइमुँ बिस्याँ झन् क्‍हेमैंलाइमि बेल्‍ले छेनाले पैरेमिंब्मुँ।
LUK 12:29 “छतसि तो चब, तो थुँब बिसि क्हेमैं म्हैइ आप्रद्, धै न्हुँ या आलद्।
LUK 12:30 छाबै न्हुँ परमेश्‍वर ङो आसेब्‍मैंइ लम्। क्‍हेमैंलाइ चु सैमैं चैदिम् बिसि क्हेमैंए परमेश्‍वर आबाजी सेम्।
LUK 12:31 बरु ओंसों परमेश्‍वरए ग्याल्स म्‍हैद्‌। झाइले खीजी चु ताँन् सैमैं क्‍हेमैंलाइ पिंब्‍मुँ।
LUK 12:32 ओ ङए च्‍युगुथिरि बगाल, आङ्हिंन्। तलेबिस्याँ क्हेमैंए परमेश्‍वर आबाजी ह्रोंसए ग्याल्स क्हेमैंलाइ पिंबर सैं तोंइमुँ।
LUK 12:33 “छतसि क्हेमैंए सै न्होर चुँसि योंबै मुइ आयोंब्मैं पिंन्। झाइले ह्रोंसए ल्हागिर खोंयोंइ स्योब आतबै नेंदोमैं रोसि नाँस आतबै सै न्होर स्‍वर्गर साँन्। स्‍वर्गर थेंबै सै न्होर खोंयोंइ आम्ह, तलेबिस्याँ खाबज्यै ह्‍योल् आँखाँ, झाइले प्‍हुँलुँज्‍यै आच।
LUK 12:34 तलेबिस्याँ क्‍हेमैंए सै न्होर मुँबै क्ल्ह्‍योर्न क्‍हेमैंए सैं तब्‍मुँ।
LUK 12:35 “क्हेमैंए क्रे फगि खिसि न्ह क्रों मि क्रोंले क्हेमैंए बत्ति म्रोथेंन्।
LUK 12:36 ब्ह्‍या भत्‍यारउँइँले धिं क्‍ल्‍हे खोंयों खम् बिसि घ्याँ ङ्‍ह्‍योरिबै केब्छैंमैं धोंब क्हेमैं तल् त्हुम्। धिं क्‍ल्‍हे एखसि हुइबै तोदोंन् म्रा थोंमिंबै केब्छैंमैं धों तब क्हेमैं तल् त्‍हुम्।
LUK 12:37 धिं क्‍ल्‍हे एखमा केब्छैंमैं तयार तसि न्ह क्रों मि क्रोंले टिरिब स्यास्‍याँ क्ल्हे सैं तोंसि केब्छैंमैंइ स्‍याबासि योंब्‍मुँ। क्ह्रोंसेंन ङ क्‍हेमैंने बिमुँ, धिं क्‍ल्‍हेइ ह्रोंसए केब्छैंमैं प्‍ह्रेंमैं धोंले टिबै सै तिमिंसि चबै सैं चल् पिंम्।
LUK 12:38 धिं क्‍ल्‍हे म्‍हुँइँस आधार खलेया च भन्दा क्हैल्‍ले खलेया खीए केब्छैंमैं न्हरु आच्हुइल्‍ले टिरिब स्यास्‍याँ च केब्छैंमैंइ झन् स्‍याबासि योंब्‍मुँ।
LUK 12:39 “अझै चु ताँ सैंर मैंथेंन्, ह्‍यो कति त्‍हेर खमुँ बिसि सेस्‍याँ धिं क्‍ल्‍हे न्हरु आच्हुइल्‍ले टिरिमल, धै ह्‍यो धिं न्होंर होंल् आपिंमल।
LUK 12:40 छलेन क्‍हेमैं या न्ह क्रों मि क्रोंले टिद्, तलेबिस्याँ क्‍हेमैंए सैंरै आमैंबै त्‍हेर म्हिए च्ह एयुब्‍मुँ।”
LUK 12:41 येशूए ताँ थेसि पत्रुसइ बिइ, “ओ प्रभु, चु अहान् ङिए ल्हागिर मत्‍त्रे बिल् उ, अरू म्हिमैंए ल्हागिरै बिल?”
LUK 12:42 प्रभु येशूजी बिइ, “भर लल् खाँब नेरो बुद्धि मुँबै म्हि खाब् जा? धिं क्‍ल्‍हेइ ह्रोंसए धिंर्बै तोन्दोंरि सैए जिम्‍मा पिंसि ह्‍याबै लिउँइँ भर लल् खाँब नेरो बुद्धि मुँबै म्हिइ अरू केब्छैंमैंलाइ चब् थुँबै तौदु छेनाले लमिंम्।
LUK 12:43 धिं क्‍ल्‍हे एखमा ह्रोंसजी ल्‍हैदिबै के केब्छैंइ छेनाले लरिब स्‍याइबिस्‍याँ च केब्छैंइ स्याबासि योंब्‍मुँ!
LUK 12:44 क्ह्रोंसेंन ङ क्हेमैंने बिमुँ, क्ल्हेइ ह्रोंसए धिंर्बै ताँन् सै न्होरए जिम्मा चलाइ पिंब्मुँ।
LUK 12:45 दिलेया च केब्छैंइ ‘ङए क्‍ल्‍हे खब क्‍हैलै तोगोन् आखालै,’ ङ्हाँसि अरू केब्छैंमैं धोंब, तो चदा ङ्हाँमुँ चब, प्हा ल्‍हें थुँसि न्‍हेल्‍ले टिइ बिस्‍याँ,
LUK 12:46 चए सैंज्यै आमैंबै त्हेर थाइ आसेल्‍ले धिं क्‍ल्‍हे फेखब्‍मुँ, धै चलाइ सजैं पिंब्‍मुँ। झाइले चए गति परमेश्‍वर आम्हाँदिब्‍मैंल् धोंब तब्‍मुँ।
LUK 12:47 “ह्रोंसए क्ल्हेए सैंर्बै ताँ क्होसेया खीए सैंर मैंब् धों आलब्मैंइ बेल्‍ले दुःख योंब्मुँ।
LUK 12:48 दिलेया धिं क्ल्हेए सैंर्बै ताँ आक्होसि ल्हें सजैं योंल् त्हुबै के लनाबिलेया चइ च्युगुदे मत्‍त्रे सजैं योंब्मुँ। परमेश्‍वरजी ल्‍हें आशिक पिंब्मैंउँइँले ल्हेंन् ह्रिब्मुँ, छलेन ल्‍हें सैए जिम्‍मा पिंब्मैंउँइँले झन ल्‍हें किंब्मुँ।
LUK 12:49 “ङ आछ्याँबै सैमैं ख्रोंवाबै ल्हागिर पृथ्‍बीर मि भोर कुमिंबर युब् ग। च मि ओंसों ओंनोंन् त्हयास्‍याँ छ्याँब तमल।
LUK 12:50 ङइ किंल् त्हुब थेबै दुःखर्बै बप्‍तिस्मा घ्रि मुँ, च बप्‍तिस्मा आकिंन् समा ङए सैं छिं आङ्हाँ।
LUK 12:51 “ङ पृथ्‍बीर क्ह्रिल् लबर युब् ग बिसि क्‍हेमैंइ मैंल् वा? ङ क्‍हेमैंने बिमुँ, क्ह्रिल् लबर युब आङिं, बरु आक्‍ह्रिल् लबर युब् ग।
LUK 12:52 तलेबिस्याँ तारे पिरु म्हि ङ्‍ह मुँबै परवार ह्रों-ह्रोंसए न्होंर्न आक्ह्रिसि खेंमैंए पार्लेन् टिब्मुँ। सोंए फिर ङ्हिंइ बिरोध लब्मुँ, झाइले ङ्हिंए फिर सोंइ बिरोध लब्‍मुँ।
LUK 12:53 चमैं ह्रों-ह्रोंसए पारन् तब्‍‍मुँ। आबाइ च्‍हए बिरोध लब्‍मुँ, च्‍हइ आबाए बिरोध लब्मुँ। आमाइ चमिए बिरोध लब्‍मुँ, चमिइ आमाए बिरोध लब्मुँ। स्‍युमिइ चोंए बिरोध लब्‍मुँ धै चोंइ स्‍युमिए बिरोध लब्मुँ।”
LUK 12:54 येशूजी म्हि हुलने बिइ, “क्‍हेमैंइ न्‍हाँम्‍स्यो ल्हुउँइँले (पश्‍चिमउँइँले) रेब् म्रोंमा ‘नाँ युलै’ बिमुँ। झाइले छान तम्।
LUK 12:55 झाइले दक्षिणउँइँले खैं खब् सेसि क्‍हेमैंइ ‘बेल्‍ले ख्वाललै बिमुँ।’ झाइले छान् तम्।
LUK 12:56 ओ फिब्लो पार्दिब्‍मैं! पृथ्‍बी नेरो मुँ ङ्‌ह्‍योसि तारे तो तम् बिसि क्‍हेमैंइ सेम् बिस्याँ, तिंजरो तरिबै ताँमैं म्रोंसि क्‍हेमैंइ तारे तखबै ताँमैंए बारेर तले सेल् आखाँ?
LUK 12:57 “क्ह्रोंसेंन्बै ताँ तो जा? बिसि क्हेमैंइ तले आक्होल?
LUK 12:58 क्‍हिने आक्ह्रिबै म्‍हिइ निसाफ लबै म्हिए उँइँर क्हिलाइ बोमा खाँन् समा घ्‍याँर्न क्‍ह्रिबै ताँ लद्, छ आलस्‍याँ चइ क्‍हि नि‍याधिश ङाँर चैंबोब्‍मुँ। झाइले नि‍याधिशइ क्‍हि थेबै अफिसरए योर पिंवाब्मुँ। झाइले अफिसरइ क्‍हि झेलर च्युवाब्‍मुँ।
LUK 12:59 ङ क्‍हिने बिमुँ, क्‍हिइ फोल् त्‍हुबै मुइ घ्रि-घ्रिले आफोन् समा क्हि खैलसे या झेलउँइँले त्‍होंल् योंरिब् आरे।”
LUK 13:1 “गालील ह्‍युलर्बै को-कोइ म्हिमैंइ यरूशलेम सहरर्बै मन्दिरर परमेश्‍वरए मिंर क्‍यु सैसि ख्रो पिंमा पिलातस बिबै रोमी क्रथेइ चमैंलाइन सैवासि च म्‍हिमैंए को ख्रो पिंबै क्‍युए कोर कोंवाल बिसि च त्‍हेर चर खागु तबै म्हिमैंइ येशूने,” बिइ।
LUK 13:2 छबिमा येशूजी चमैंने बिइ, “चमैंइ छाबै ङ्हिंन् तबै दुःख योंइ बिबर्न अरू गालीलथेंमैं भन्दा चमैं पापि मुँन बिसि क्हेमैंइ मैंल् वा?
LUK 13:3 ङ क्‍हेमैंने बिमुँ, छले आङिं। ताँन् म्‍हिमैं पापिन् मुँ। क्‍हेमैंइ दुष्‍ट के लब् आपिइ बिस्‍याँ क्‍हेमैं या छलेन् नास तब्‍मुँ।
LUK 13:4 झाइले अर्को ताँ, सिलोआम बिबै क्ल्ह्‍योर्बै धरर फुयासि च्युसे प्रे म्‍हि सि‍याल। चमैं या अरू यरूशलेमथेंमैं भन्दा ल्हें पापिमैं तसि सिब् वा?
LUK 13:5 ङ क्‍हेमैंने बिमुँ, छले आङिं, ताँन् म्‍हिमैं पापि मुँ। क्‍हेमैंइ दुष्‍ट के लब् आपिइ बिस्‍याँ क्‍हेमैं ताँन् छलेन् नास तब्‍मुँ।”
LUK 13:6 च लिउँइँ येशूजी चु अहान् बिइ, “म्‍हि घ्रिइ ह्रोंसए म्रोंर तुँबु धुँ घ्रि रुँइँल। च धुँर रो रोइ उ बिसि च ङ्‍ह्‍योबर खब्ब्रें लमल। खोंयों खलैया च धुँर रो आरोब् म्रोंसि
LUK 13:7 चइ के लबै म्हिने ‘ङइ चु तुँबु धुँर रो म्‍हैब सोंदिं तइ, दिलेया खोंयोंइ रो आरो। क्ल्ह्‍यो पैबर तले थेंरिब? छतसि चु धुँ थोवाद्,’ बिइ।
LUK 13:8 “दिलेया के लबै म्हिइ बिइ, ‘ओ चिब, अझै तिदिंदे चु धुँ आथोले। ङइ चु धुँए जरर तासि मला झोंम्।
LUK 13:9 क्‍हुरिमा रो रोइबिस्‍याँ छ्याँबन् तइ, आरोइ बिस्‍याँ थोइ भ्योंवाले।’”
LUK 13:10 तिगें प्रिबै त्हिंइर येशू च्हों धिं घ्रिर लोमिंसिन् मुँल।
LUK 13:11 चर मोंइ स्‍यासि नबै च्हमिरि घ्रि मुँल। च मोंइ स्यासि नब च्युसे प्रेदिं तयाल। च क्वार्ग तयल, ठाड्ले प्रल् आखाँमल।
LUK 13:12 येशूजी च च्हमिरि म्रोंइ, धै हुइसि बिइ। “ओ नानि, क्‍हिलाइ ठाड् तल् आपिंबै सै त्होंयाँइ, तारे क्हि ठाड् तल् खाँम्।”
LUK 13:13 च्हौ बिसि येशूजी ह्रोंसए यो चए फिर थेंबै तोदोंन् च च्हमिरि ठाड् तइ धै परमेश्‍वरए मिं क्वेबर होंइ।
LUK 13:14 येशूजी प्रिबै त्हिंइर च च्हमिरि सल् लमिंब् म्रोंसि च्हों धिंर्बै चिब बेल्‍ले ह्रिस खसि चर्बै म्‍हिमैंने बिइ, “के लब टुरो मुँ, छतसि च टुरो न्‍होंर खसि सस्याँ तम्। प्रिबै त्हिंइर छ लब आत।”
LUK 13:15 दिलेया प्रभु येशूजी चने बिइ, “ओ फिब्लो पार्दिब्‍मैं! क्‍हेमैंए न्होंरि खाबज्यै या प्रिबै त्हिंइर ह्रोंसए गधामैं नेरो क्‍ल्‍यामैं प्ह्रोंउँइँले पिसि क्‍यु थुँबर आबो वा?
LUK 13:16 चु अब्राहामए कुलर्बै च्हमि च्युसे प्रेदिं समा दुष्‍टइ फैथेंबै फैंसों प्रिबै त्हिंइर प्ल्हमिंल् त्हुब् आङिं वा?
LUK 13:17 येशूजी चु ताँ बिल् खाँबै लिउँइँ खीए बिरोधीमैं ताँन् फापिन् तयाइ। दिलेया खीजी लबै औदिबै के म्रोंसि चर्बै म्हिमैं बेल्‍ले सैं तोंइ।”
LUK 13:18 येशूजी बिइ, “परमेश्‍वरए ग्याल्स तो धों तब मुँ? ङइ तो सैने च च्‍हैंले?
LUK 13:19 च च्‍युगुथिरि पासगि प्‍लु धोंन् तब् ग। म्‍हि घ्रिइ च प्‍लु ह्रोंसए म्रोंर बोसि प्‍लुइ। झाइले च फारसी सिं धुँ धोंले थेब तइ। धै मुर्बै नमेमैंइ चए हाँगजरे च्‍हों थाइ।”
LUK 13:20 येशूजी धबै बिइ, “परमेश्‍वरए ग्याल्स ङइ तो सैने च्‍हैंले?
LUK 13:21 च प्लेढा धों तबै सै ग। च्हमिरि घ्रिइ क्हें झोंबै प्रो सोंब्‍योंर प्लेढा म्‍लोथेंमा लिउँइँ च ताँन् क्हें फुल्दिम्।”
LUK 13:22 च लिउँइँ येशू सहर सहर नाँ-नाँसर ह्‍यासि म्हिमैंलाइ परमेश्‍वरए ताँमैं लोमिंदै यरूशलेमउँइँ ह्‍याइ।
LUK 13:23 छले ह्‍यारिमा म्‍हि घ्रिइ खीने “ओ गुरु, च्युगुदे म्हिइ मत्‍त्रे खोंयोंइ आखाँबै छ्ह योंम्मा?” बिसि ङ्योएइ।
LUK 13:24 येशूजी चमैंने बिइ, “रुबै म्राउँइँले न्‍होंर होंबै भों लद्, तलेबिस्याँ ङ क्‍हेमैंने बिमुँ, ल्‍हें म्‍हिमैं रुबै म्राउँइँले न्‍होंर होंल् म्‍हैब्‍मुँ, दिलेया होंल् खाँरिब् आरे।
LUK 13:25 धिं क्‍ल्‍हे रेसि म्रा तोरवाबै लिउँइँ क्‍हेमैं बैरु रासि म्रा ह्रादै ‘ओ प्रभु, म्रा थोंमिंन्,’ बिब्‍मुँ, दिलेया खीजी ‘क्‍हेमैं खनिउँइँले खल ङइ क्‍हेमैं ङो आसे,’ बिब्मुँ।
LUK 13:26 “च त्हेर क्‍हेमैंइ ‘ङिइ क्‍हिने बालु चमल थुँमल। झाइले ङिए नाँसजरे क्हिजी लोमिंमल,’ बिब्मुँ।
LUK 13:27 “दिलेया ‘क्हेमैं खनिउँइँले खल ङइ आसे। ओ दुष्‍ट के लब्मैं, ङ ङाँइँले ह्रेंगो तयाद् बिसि च क्‍ल्‍हेइ क्‍हेमैंने,’ बिब्मुँ।
LUK 13:28 “झाइले परमेश्‍वरए ग्याल्सर स्‍योंम्‍बै अब्राहाम, इसहाक, याकूब नेरो अगमबक्‍तामैं टिरिब क्‍हेमैंइ म्रोंब्‍मुँ। दिलेया परमेश्‍वरजी क्‍हेमैं बैरु भ्योंवाब्‍मुँ, झाइले क्हेमैं क्रोदै स ह्राब्मुँ।
LUK 13:29 पूर्व, पश्‍चिम, उत्तर नेरो दक्षिणउँइँले ल्‍हें म्‍हिमैं खसि स्‍वर्गर्बै भत्‍यारर टिब्‍मुँ।
LUK 13:30 थेद्! तोगो लिउँइँ तब्मैं ओंसों तब्‍मुँ, धै तोगो ओंसों तब्मैं लिउँइँ तब्मुँ।”
LUK 13:31 च त्‍हेर्न को-कोइ फरिसीमैं येशू ङाँर खसि खीने बिइ, “छुइले छ्युडिह्‍याद् तलेबिस्याँ हेरोद म्रुँइ क्‍हि सैल् म्‍हैइमुँ।”
LUK 13:32 येशूजी चमैंने बिइ, “‘तिंयाँ नेरो प्‍हँना मोंइ स्‍यासि नब्मैं नेरो अरू बेथाइ नब्‍मैं ङइ सल् लसिन् मुँ, नोगि मत्‍त्रे ङए के खाँम्’ बिसि च सेला हेरोदने बिने।
LUK 13:33 ‘तिंयाँ, प्‍हँना नेरो नोगि या ङ‍ चु जरेन् प्रल् त्हुम्। तलेबिस्याँ यरूशलेम बाहेक अरू क्ल्ह्‍योर अगमबक्‍तामैं सैल् आखाँ।’”
LUK 13:34 झाइले येशूजी बिइ, “यरूशलेमथेंमैं, ओ यरूशलेमथेंमैं, क्‍हेमैंइ अगमबक्‍तामैं सैवाइमुँ, छलेन क्हेमैं ङाँर खब्मैंलाज्यै या युँमाइ प्रिंइ। नग आमाइ प्हसेमैं प्‍ह्‍याइ हुब् धोंले ङइ ल्‍हें खे क्‍हेमैंलाइ हुल् म्हैइ, दिलेया क्‍हेमैं आङिं।
LUK 13:35 ङ्‍ह्‍योद्! तारे क्‍हेमैंए सहर परमेश्‍वरजी नास लवाब्‍मुँ। ङ क्‍हेमैंने बिमुँ, क्‍हेमैंइ ‘परमेश्‍वर आबाजी कुल्‍मिंबै म्‍हिए मान तरिगे’ आबिन् समा क्‍हेमैंइ ङ म्रोंरिब् आरे।”
LUK 14:1 तिगें प्रिबै त्हिंइर येशू फरिसी घ्रिए धिंर चब् चबर ह्‍याइ। च म्‍हि फरिसीमैं न्‍होंर्बै चिब मुँल। “येशूजी तो-तो लमगे?” बिसि म्हिमैंइ छैं लरिल।
LUK 14:2 च त्‍हेर्न यो प्‍हले रोंबै म्‍हि घ्रि येशूए उँइँर मुँल।
LUK 14:3 “प्रिबै त्हिंइर नबै म्हिमैं सल् लब ठिक मुँ उ आरे? बिसि येशूजी धर्मगुरुमैं नेरो फरिसीमैंने ङ्योएइ।”
LUK 14:4 दिलेया चमैंइ तोइ बिल् आखाँ। येशूजी च यो प्हले रोंसि नबै म्‍हिए फिर यो थेंसि चलाइ सल् लमिंसि कुल्मिंइ।
LUK 14:5 च लिउँइँ येशूजी चमैंने बिइ, “क्‍हेमैं न्‍होंरि खबलैया प्रिबै त्हिंइर क्‍ल्‍या खोल्‍सर पायस्‍याँ क्हेमैंइ खोल्सउँइँले आते रो वा?”
LUK 14:6 चमैंइ चु ताँरै या तोइ ज्वाफ पिंल् आखाँ।
LUK 14:7 च फरिसीए धिंर खबै प्‍ह्रेंमैंइ चिब्मैं क्हुँबै छ्याँ-छ्याँबै क्‍ल्‍ह्‍यो त्‍हाँरिब् म्रोंसि येशूजी चु अहान् बिइ,
LUK 14:8 “क्हेमैं ब्ह्‍या भत्‍यारर ह्‍यामा छ्याँबै क्‍ल्‍ह्‍योर आक्हुँन्, तलेबिस्याँ क्‍हि भन्दा थेबै म्‍हि च न्हिम्तोर खल् खाँम्।
LUK 14:9 न्हिम्तो लबै म्‍हिइ क्‍हिने ‘चु क्‍ल्‍ह्‍योर चु म्‍हि क्हुँल् पिंन् बिस्याँ’ क्‍हि फापिन् तसि ताँन् भन्दा च्योंब्मैंए क्‍ल्‍ह्‍योर क्हुँल् त्‍हुब्मुँ।
LUK 14:10 छतसि खाबज्यै क्हिलाइ न्हिम्तो लइ बिस्याँ ताँन् भन्दा च्योंब्मैं टिबै क्‍ल्‍ह्‍योर ह्‍यासि टिद्। झाइले न्हिम्तो लबै म्‍हि खसि क्हिने ‘ओहो, ङए थु, चु छ्याँबै क्‍ल्‍ह्‍योर क्हुँन्’ बिब्मुँ, च त्हेर क्हिने बालु मुँबै प्‍ह्रेंमैंए उँइँर क्‍हिइ मान योंब्‍मुँ।
LUK 14:11 तलेबिस्याँ ह्रोंसन् थेब् प्‍हैंबै म्हिमैं परमेश्‍वरजी च्‍योंब लवाब्‍मुँ, दिलेया ह्रोंसन् च्‍योंने तसि टिब्मैंलाइ परमेश्‍वरजी थेब लमिंब्‍मुँ।”
LUK 14:12 छलेन खीलाइ न्हिम्तोर हुइबै म्‍हिलाज्यै या येशूजी बिइ, “क्‍हिइ भत्‍यार लमा ह्रोंसए थुमैं, ह्रजे-म्‍हजे, आघें-अलि ह्रोंसए म्‍हिमैं नेरो प्‍ल्होबै ङ्‌हेब-ट्हुब्मैं न्हिम्तो आलद्, तलेबिस्याँ चमैंज्यै क्‍हिलाइ न्हिम्तोर हुइब्‍मुँ, धै खि फोब् धोंन् तब्‍मुँ।
LUK 14:13 बरु भत्‍यार लमा ङ्हाँदुमैं, डुँडामैं, खोडमैं नेरो कन‍मैं हुइद्।
LUK 14:14 छ लस्याँ क्‍हिइ आशिक योंब्‍मुँ। तलेबिस्याँ क्‍हिए खि चमैंइ फोल् आखाँ। दिलेया परमेश्‍वरजी बिब म्हाँदिबै म्हिमैं सिसि धबै सोगों तमा आयोंब्मैंलाइ पिंबै सैमैंए खि परमेश्‍वरजी क्‍हि पिंब्‍मुँ।”
LUK 14:15 चु ताँ थेसि येशूने बालु चबर टिब्मैं न्होंर्बै म्‍हि घ्रिइ खीने बिइ, “परमेश्‍वरए ग्याल्सर्बै भत्‍यार चल् योंब्‍मैं ङ्‍हो सब्मैं ग!”
LUK 14:16 येशूजी चने अहान् घ्रि बिइ, “म्‍हि घ्रिइ बेल्‍ले थेबै भत्‍यार लसि ल्‍हें म्‍हिमैं हुइ।
LUK 14:17 भत्‍यार चबै त्‍हेर च म्‍हिइ न्हिम्तो योंब्‍मैंने ‘भत्‍यार तयार तइ तारे चबर खो’ बिसि हुइबर कुलइ।
LUK 14:18 “दिलेया चमैं ताँनइ निउ घ्रि-घ्रि लबर होंइ। ओंसों त्‍होबै म्‍हिइ ‘ङलम् म्रों किंइमुँ छतसि ङ च म्रों ङ्ह्‍योबर ह्‍याल् त्हुम्। माफ लद् ओ ङ खल् आखाँ,’ बिइ।
LUK 14:19 झाइले अर्कोइ ‘ङइ क्‍ल्या ङ्‌हगुर किंइमुँ, छतसि ङ क्‍ल्‍या क्योब ङ्ह्‍योबर ह्‍याबि छेइमुँ। माफ लद् ओ ङ खल् आखाँ,’ बिइ।
LUK 14:20 छलेन अर्कोज्यै या ‘ङल भर्खर ब्ह्‍या लइमुँ, छतसि ङ खल् आयों,’ बिइ।
LUK 14:21 “झाइले के लबै म्हि एखसि ताँन् ताँ ह्रोंसए क्‍ल्‍हेने बिइ, छतमा धिं क्‍ल्‍हे ह्रिस खसि के लबै म्हिने बिइ, ‘तारे युन्ले सहरर ह्‍याद् धै सहरर्बै घ्‍याँए रेजरेबै ङ्हाँदुमैं, डुँडामैं, खोडमैं नेरो कन‍मैं हुइसि पउ,’ बिमा के लबै म्हि धबै हुइबर ह्‍याइ।
LUK 14:22 “के लबै म्हि एखसि बिइ, ‘ओ चिब, क्‍हिइ हुइ पउ बिबै म्‍हिमैं ङइ हुइ पखइ। दिलेया भत्‍यारर टिबै क्‍ल्‍ह्‍यो अझै मुँ।’
LUK 14:23 “धबै धिं क्‍ल्‍हेइ के लबै म्हिने बिइ, ‘ङए धिं प्‍लिंबै ल्हागिर सहरर्बै घ्याँए रेजरे खन्तोंदोंन् ह्‍यासि चर्बै ताँन् म्हिमैं कर ल्‍हैदिसि पखो।
LUK 14:24 छेनाले थेद्! ओंसोंबै न्हिम्तो योंब्‍मैं न्‍होंरि खाबज्‍यै या ङए भत्‍यारर्बै चबै सैमैं कति लिंब मुँगे बिसि म्‍ह्‍योंल् योंरिब् आरे।’”
LUK 14:25 म्‍हि हुल येशूने बालु ह्‍यारिमा खीजी लिंउँइँ तोसि चमैंने बिइ,
LUK 14:26 “ङए लिलि खब्मैंइ ह्रोंसए आबा, आमा, प्ह्रेंस्यो, प्‍हसेमैं, अलि-अङाँमैं नेरो ह्रोंसए ज्यु या तो धोंइ आङ्हाँ बिस्याँ च ङए चेला तल् आखाँ।
LUK 14:27 खाबइ ह्रोंसए क्रूस नोसि ङए लिलि आप्र च ङए चेला तल् आखाँ।
LUK 14:28 “क्‍हेमैं न्‍होंरि खाबज्‍यै या धिं बनेदा ङ्हाँस्‍याँ ‘धिं लबै ल्हागिर खर्ज कति ल्‍हैदिम्? ङने मुँबै मुइइ योम् उ आयो?’ बिसि ओंसोंन् चइ बिचार आल रो वा?
LUK 14:29 बिचार आलस्‍याँ चइ जग मत्‍त्रे झोंसि धिं प्हें सैल् आखाँस्‍याँ म्रोंब्मैं ताँनइ क्हिलाइ प्‍‍ह्रब्मुँ।
LUK 14:30 ‘चु म्‍हिइ धिं बनेबर होंइ दिलेया धिं प्हें सैल् आखाँ बिसि चमैंइ,’ बिब्मुँ।
LUK 14:31 “झाइले अर्को ताँ: म्रुँ घ्रिइ अर्को म्रुँने नेबर ह्‍यामा ‘ङए हजार च्‍यु फौजइ ङ्हिस्‍यु हजार फौजलाइ ट्‍होल् खाँम् उ आखाँ बिसि चइ ओंसोंन् आमैं रो वा?’
LUK 14:32 ह्रोंसने बालु भों आरेस्‍याँ अर्को म्रुँ ह्रेंगोन् मुँमा चइ क्‍ह्रिबै ल्हागिर म्‍हि कुलब्मुँ।
LUK 14:33 छतसि क्हेमैंए न्होंरि खाबइ ह्रोंसने मुँबै तोन्दोंरि सै आवथें च ङए चेला तल् आखाँ।
LUK 14:34 “चज छ्याँबै सै ग, दिलेया चजए स्‍वाद म्हयाइ बिस्‍याँ धबै चए स्‍वाद तो सैइ खल् लब?
LUK 14:35 च म्हिमैंए ल्हागिर केर आफे सए ल्हागिरै या मला आत। छतसि च स्‍वाद आरेबै चज म्हिमैंइ भ्‍योंवाम्। “थेबै न्ह मुँब्मैंइ थेरिगे।”
LUK 15:1 तिगें रोमी म्रुँए ल्हागिर बालि रेब्‍मैं नेरो अरू आछ्याँबै के लब्मैं खीए ताँ थेबर खीए ङाँर खल।
LUK 15:2 छाब् म्रोंसि फरिसीमैं नेरो शास्‍त्रिमैंइ “चु म्‍हिइमि आछ्याँबै के लब्मैं या खोमन। झाइले चमैंने बालुन् चब् थुँब् लमन बिसि,” गनगन लबर होंइ।
LUK 15:3 छतसि येशूजी चमैंने चु अहान् बिइ,
LUK 15:4 “क्‍हेमैं न्‍होंरि खाबलैया क्‍यु प्र मुइबिस्‍याँ च क्यु प्रए न्‍होंरि घ्रि म्‍हयास्‍याँ चइ कुच्युसे कु क्यु क्ह्‍योंर्न वाथेंसि म्हयाबै क्‍यु आयोंन् समा आम्‍है रो वा?
LUK 15:5 म्हयाबै क्यु योंबै लिउँइँ च क्‍ल्‍हे बेल्‍ले सैं तोंसि क्यु काँधर तेंसि प्‍ह्रोंर पखम्।
LUK 15:6 छले प्‍ह्रोंर खसि चइ ह्रोंसए थुमैं नेरो ङ्‌हेब्-ट्हुबमैं हुइसि ‘ङ बेल्‍ले तोंइमुँ, क्‍हेमैं या सैं तोंन्। तलेबिस्याँ ङए म्‍हयाबै क्‍यु योंइ,’ बिम्।
LUK 15:7 “ङ क्हेमैंने बिमुँ, ‘ङइ पाप के लइमुँ ङलाइ क्षमा पिंन्,’ बिल् आत्हुबै कुच्युसे कु धर्मि म्‍हिमैं भन्दा ‘ङ पापि मुँ, ङइ पाप केमैं लइमुँ, ङलाइ क्षमा पिंन्,’ बिसि सैं एबै म्‍हि घ्रि म्रोंसि परमेश्‍वर स्‍वर्गर बेल्‍ले सैं तोंम्।”
LUK 15:8 येशूजी धबै अर्को ताँ बिइ, “च्हमिरि घ्रिने चाँदिए मुइ च्‍युउँलो मुँल। दिलेया चाँदिए मुइ घ्रि म्‍हयास्‍याँ चइ बत्ति म्रोंसि कुजाइ फ्‍योसि च आयोंन् समा फन् फन्‌ले आम्‍है रो वा?
LUK 15:9 च मुइ योंबै लिउँइँ ह्रोंसए थुमैं नेरो ङ्‌हेब्-ट्हुब्‍मैं हुइसि ‘ङ बेल्‍ले सैं तोंइमुँ, क्‍हेमैं या सैं तोंन्। तलेबिस्याँ ङए म्‍हयाबै मुइ योंइ,’ बिसि चइ बिब्मुँ।
LUK 15:10 ङ कहेमैंने बिमुँ, च धोंलेन् दुष्‍ट के पिसि खी ङाँइ सैं एसि छ्याँबै घ्‍याँर प्रबै म्‍हि घ्रि म्रोंसि परमेश्‍वरए स्‍वर्गदूतमैं बेल्‍ले सैं तोंम्।”
LUK 15:11 येशूजी धबै बिइ: “म्‍हि घ्रिल च्‍ह ङ्हिं मुँल।
LUK 15:12 च्‍ह च्‍योंबइ आबाने बिइ, ‘आबा, ङए अँश कति योंमुँ, च तोगोन् ङलाइ पिंन्।’ च्हइ छबिमा आबाइ ह्रोंसए सै न्होर च्‍ह ङ्हिं चुमिंइ।
LUK 15:13 दे त्हे लिउँइँ च्‍ह च्‍योंबइ ह्रोंसए अँश चुँवाँसि ताँन् मुइ खागु लसि धिंउँइँले त्‍होंयाइ। धै ह्रेंगोर्बै ह्‍युलर ह्‍यासि बेल्‍ले फुर्मास लसि मुइ ताँन् नुवाइ।
LUK 15:14 मुइ ताँन् नुवाल् खाँबै लिउँइँ च ह्‍युलर थेबै अँङ्गल् तसि च फोत्तेन् तयाइ।
LUK 15:15 छतमा च ह्‍युलर्बै म्‍हि घ्रि ङाँर के म्‍हैबर ह्‍याइ। च म्‍हिइ ह्रोंसए म्रोंर तिलिमैं छबर कुलइ।
LUK 15:16 तिलिइ चबै सैमैं म्रोंसि च बेल्‍ले म्रोमल। दिलेया खाबज्‍यै चलाइ चबै सै आपिंमल।
LUK 15:17 “च त्‍हेर बल्‍ल चइ आबाए धिं मैंइ। झाइले चइ बिइ, ‘ङए आबाए के लब्मैंइ चब् म्रेंन्‍ले चसेया चबै सै ङैंम्, ङ बिस्‍याँ चुर चल् आयोंसि सिबर होंइमुँ।
LUK 15:18 तारे ङ आबा ङाँर ह्‍यासि आबाने छ बिम्, “ओ आबा, ङइ क्हिए ताँ आङिंसि परमेश्‍वर नेरो क्‍हिए बिरोधर आछ्याँबै के लइ।
LUK 15:19 तारे ङ क्‍हिए च्‍ह बिबै लायकर्बै आरे। बरु ङ क्‍हिए के लबै म्‍हि घ्रि धोंलेन् क्‍हि ङाँर टिल् पिंन्,” बिब्मुँ’ बिसि चए सैंर मैंइ।
LUK 15:20 “झाइले च रेसि आबा ङाँर ह्‍यारिमा च धिंउँइँले ह्रेंगोर खरिब चए आबाइ म्रोंइ। छले ह्रोंसए च्ह एखरिब् म्रोंसि आबा बेल्‍ले सैं तोंइ। धै च्‍ह ङाँर न्हेह्‍यासि अँउँलो खोएसि म्वें लइ।
LUK 15:21 च्‍हइ आबाने बिइ, ‘ओ आबा, ङइ क्हिए ताँ आङिंसि परमेश्‍वर नेरो क्‍हिए बिरोधर आछ्याँबै के लइ। तारे ङ क्‍हिए च्‍ह बिबै लायकर्बै आरे।’
LUK 15:22 “दिलेया आबाइ के लबै म्हिमैं हुइसि बिइ, ‘युन्ले ताँन् भन्दा छ्याँबै क्‍वें नेरो च्या पखसि चु खिमिंन्, जुत्‍तै या खिमिंन्।
LUK 15:23 झाइले छोबै क्‍यु साँडे सैसि भत्‍यार लसि ङ्यो बेल्‍ले सैं तोंदै चले।
LUK 15:24 तलेबिस्याँ चु ङए च्‍ह सियाल, दिलेया सोसि खइ; म्‍हयाल, दिलेया योंइ।’ छतसि चमैं सैं तोंदै भत्‍यार लसि चब् थुँब लबर होंइ।
LUK 15:25 “च त्‍हेर च्‍ह थेब म्रोंर मुँल। च म्रोंउँइँले धिंए चेंदो फेखमा धिंर बाजा ह्रासि सेब्-प्रिंब लरिबै कै थेइ।
LUK 15:26 छतसि चइ के लबै म्हि घ्रि हुइसि ‘धिंर तो लबर होंइमुँ जा?’ बिसि ङ्योएइ।
LUK 15:27 “के लबै म्हिइ बिइ, ‘क्‍हिए अलि खइमुँ, छले च छेनाले एखब् म्रोंसि क्‍हिए आबा सैं तोंसि ङ्यो बाजा ह्रादै सेदै प्रिंदै सैं तोंदै चब् थुँब् लले बिसि छोबै क्यु सैसि भत्यार लइमुँ।’
LUK 15:28 “चु ताँ थेसि च्‍ह थेब बेल्‍ले ह्रिस खसि धिं न्‍होंर ह्‍याल् आङिं। छतमा आबा बैरु त्‍होंसि च वाँबर होंइ।
LUK 15:29 दिलेया चइ आबाने बिइ, ‘च्‍हौ ल्‍हें बर्ष समा ङइ क्‍हिए केब्छैंइ धोंले के लइ। क्‍हिइ ल्‍हैदिबै के तो मुँलेना ङइ आल! आबिमल। दिलेया ङइ तो योंइ? सैं तोंल्‍ले थुमैंने स्‍योगैं चरिगे बिसि क्हिइ र-झज घ्रि या ङ आपिं।
LUK 15:30 क्‍हिए सै न्होर बोसि ताँन् नुवाबै च्ह एखमा चए ल्हागिर क्‍हिइ छोबै क्‍यु साँडे सैसि च्‍हौ थेबै भत्‍यार लमिंब आ।’
LUK 15:31 “छबिमा आबाइ चने बिइ, ‘ठागु, क्‍हिम् खोंयोंन् बिलै ङने बालुन् मुँ। ङने मुँबै सै न्होर ताँन् क्‍हिलन् ग।
LUK 15:32 तिंयाँ ङ्योइ भत्‍यार लसि बेल्‍ले सैं तोंल् त्‍हुम्। तलेबिस्याँ क्‍हिए अलि सियाल, सोसि खइ, म्‍हयालेया योंइ।’”
LUK 16:1 येशूजी ह्रोंसए चेलामैंने बिइ, “प्लबै म्‍हि घ्रिल चाँजो लबै नाइके म्हि घ्रि मुँल। चइ ह्रोंसए क्ल्हेए सम्पति उडिदिवाइ बिसि म्हिमैंइ चए फिर छ्याब् ल्हैदिल।
LUK 16:2 “छतमा प्लबै म्हिइ चलाइ हुइसि बिइ, ‘क्‍हिए बारेर ङइ थेबै ताँ तो जा? क्‍हिइ लबै केए हिसाब ङलाइ पिंन्। तलेबिस्याँ तारे क्‍हि ङए सै न्होरए चाँजो लल् योंरिब् आरे।’
LUK 16:3 “छतमा च नाइकेइ सैं न्‍हों-न्‍हों बिइ, ‘ङए क्‍ल्‍हेइ ङ केउँइँले तेबर होंना। ङइ ताब क्योब लल् आखाँ, म्हिमैंने ह्रिसि चब् बिलेया ङ फापिम्‌।
LUK 16:4 छतसि तारे ङइ तो लल् त्हुमुँ ङइ मैंल् खाँइमुँ। केउँइँले तेवाबै लिउँइँ ङइ स्वाब थुमैंने ङो सेब् मिं सेब् लल् त्‍हुइ। झाइले क्‍ल्‍हेइ ङ केउँइँले तेवाबै लिउँइँ च थुमैंइ खेंमैंए धिंर ङ मान लब्‍मुँ।’
LUK 16:5 “च लिउँइँ चइ क्‍ल्‍हेए असामिमैं घ्रि घ्रिले हुइसि ओंसों खबै असामिने ‘ङए क्‍ल्‍हेलाइ फोल् त्हुबै छे कति मुँ?’ बिसि ङ्योएइ।
LUK 16:6 “चइ बिइ, ‘हजार सों लिटर जैतून‍ए छ्युगु फोल् त्‍हुम्।’ “नाइकेइ चने बिइ, ‘क्‍हिए तमसुकर तारे हजार घ्रिसे ङ्‍हब्र मत्‍त्रे प्‍ह्रिद्।’
LUK 16:7 “झाइले चइ अर्कोने बिइ, ‘क्‍हिइ कति फोल त्‍हुमुँ बिमा।’ “च म्हिइ बिइ, ‘ङ्हिब्र म्हुरि गहुँ फोल् त्हुम्।’ “नाइकेइ च म्हिने बिइ, ‘क्‍हिए तमसूकरै या प्ह्रसे टुच्यु म्हुरि मत्‍त्रे प्‍ह्रिद्।’
LUK 16:8 “च बेमान लबै नाइकेइ छले असामिमैंए छे च्युगुदे लमिंइ बिब् सेसि च क्‍ल्‍हेइ नाइके बाठो मुँन बिसि सेइ। तलेबिस्याँ चु ह्‍युलर्बै म्‍हिमैंइ ह्रोंसए थुमैंने के लमा चारबै ह्‍वे योंबै परमेश्‍वरए सन्तानमैं भन्दा बेल्‍ले बाठो तम्।
LUK 16:9 “ङ क्हेमैंने बिमुँ, ह्रोंसए ल्हागिर ह्‍युलर्बै स न्होरउँइँले क्ह्रिबै थुमैं बनेद्। छ लस्‍याँ क्‍हेमैंए मुइ खाँयाबै त्‍हेर चमैंइ क्‍हेमैं स्‍वर्गर स्वागत लब्मुँ।”
LUK 16:10 येशूजी धबै बिइ, “च्‍युगुथिरि ताँर भर लल् खाँबै म्हि थेब् थेबै ताँरै या भर लल् खाँब तम्। दिलेया च्‍युगुथिरि ताँर बेमान लबै म्हि थेबै ताँरै या बेमान तम्।
LUK 16:11 छतसि क्हेमैं ह्‍युलर्बै सै न्होरर भर लल् खाँब आतइ बिस्‍याँ, स्‍वर्गर्बै खोंयोंइ आखाँबै सै न्होरए जिम्मा क्‍हेमैंलाइ खाबइ पिंमुँ?
LUK 16:12 क्हेमैं अरूए सै न्होरर भर लल् खाँब आतइ बिस्‍याँ, क्‍हेमैंइन योंल् त्हुबै सै न्होर खाबइ पिंमुँ? खाबज्यै आपिं।”
LUK 16:13 येशूजी धबै बिइ, “खाबज्यै या क्‍ल्‍हे ङ्हिंए के तिखेर्न लल् आखाँ। तलेबिस्याँ चइ घ्रिलाइ हेल लमुँ, झाइले अर्कोने म्‍हाँया लमुँ। छलेन क्‍ल्‍हे घ्रिइ बिब छेनाले ङिमुँ, अर्को क्ल्हेलाइ तो धोंइ आङ्हाँ। च धोंलेन् क्‍हेमैंज्यै या परमेश्‍वर नेरो मुइए सेवा तिखेर्न लल् आखाँ।”
LUK 16:14 येशूजी बिबै ताँ थेसि फरिसीमैंइ खीए बिल्‍लि लइ। तलेबिस्याँ चमैंए ल्हागिर मुइ थेबै सै मुँल।
LUK 16:15 धबै येशूजी चमैंने बिइ, “क्‍हेमैं म्‍हिमैंए उँइँरि ‘ङ छ्याँब धर्मि म्‍हि ग’ बिसि थेब प्‍हैंम्। दिलेया क्हेमैंए सैं न्होंर तो मुँ बिसि परमेश्‍वरजी सेम्। म्‍हिमैंए सैंर थेब ङ्हाँबै सै परमेश्‍वरए उँइँर तोइ आङिंबै सै ग।
LUK 16:16 “बप्‍तिस्मा पिंबै यूहन्‍नाए पलो समा स्‍योंमा परमेश्‍वरजी मोशाने पिंबै ठिम नेरो अगमबक्‍तामैंइ प्‍ह्रिबै छ्वे मत्‍त्रे मुँल। च त्हेसेरो तिंयाँ समा ‘परमेश्‍वरजी ग्याल्स लबर होंइमुँ। छतसि खीलाइ म्‍हाँदिद्, छ लस्याँ खीजी क्‍हेमैंए फिर आशिक पिंब्‍मुँ,’ बिसि परमेश्‍वरए ग्याल्सर्बै सैं तोंबै ताँ बिप्रइमुँ। छतसि ताँन् म्‍हिमैं ह्रोंसइ खाँन् समा भों लसि परमेश्‍वरए ग्याल्सए न्होंर होंम्।
LUK 16:17 दिलेया मु नेरो पृथ्‍बी म्‍हयाल् खाँमुँ, परमेश्‍वरए छ्वेर प्ह्रिबै ताँ घ्रि या आम्ह।
LUK 16:18 “छतसि ह्रोंसए प्ह्रेंस्यो वासि अर्कोने ब्ह्‍या लबै म्हिइ ब्यभिचार लम्। छलेन पार लबै च्हमिरिने ब्ह्‍या लबै मुँयुँज्यैया ब्यभिचार लम्।”
LUK 16:19 येशूजी धबै बिइ, “छाबै प्लबै म्‍हि घ्रि मुँल। चइ सै ल्हें फेबै छ्याँबै क्‍वेंमैं खिमल। त्हिंइ ह्रोंसे लिं-लिंबै चबै सैमैं चसि मजाले त्हिंइ थोमल।
LUK 16:20 दिलेया लाजरस बिबै ङ्हाँदु म्हि घ्रि मुँल। च‍ए ज्यु तिगोंन् पोर मुँल। चलाइ अरू म्हिमैंइ प्लबै म्‍हिए तगारर्न पखसि थेंमिंमल।
LUK 16:21 ‘प्‍ल्हो‍बै म्‍हिइ चब् चमा सर तेयाबै क्हें ठाँडा-ठुँडे चल् योंम् उ?’ ङ्हाँसि लाजरस ङाँइ ङ्‌ह्‍योरिमल। दिलेया चल् आयोंमल, च मत्‍त्रे आङिं, नगिमैं खसि चए पोरमैं ल्‍हेंमल।
LUK 16:22 “तिगें लाजरस सियाइ। धै स्‍वर्गदूतमैं युसि च स्‍वर्गर अब्राहामए क्वेंदर बोइ थेंइ। झाइले च प्‍ल्हो‍बै म्हि या सियासि म्हिमैंइ पावाइ।
LUK 16:23 च नर्गर फेनेसि बेल्‍ले दुःख योंरिमा चइ कैंडु स्‍वर्गउँइँ ङ्‌ह्‍योइ छले ङ्ह्‍योमा ह्रेंगोउँइँलेन् अब्राहाम नेरो चए क्वेंदर लाजरस क्हुँरिब् म्रोंइ।
LUK 16:24 “चइ कै तेसि बिइ, ‘ओ बाज्‍यू अब्राहाम, ङए फिर ल्हयो खसि लाजरस ङ ङाँर कुल्मिंन्। चए योरि क्‍युर प्‍ल्हुँसि ङए सुँर झोंमिंरिगे। तलेबिस्या ङ चु मिए राबर थेबै दुःख योंरिइमुँ।’
LUK 16:25 “दिलेया अब्राहामइ बिइ, ‘बाबु, क्‍हिइ मैंन्। क्‍हिए छ्हर छ्याँ-छ्याँबै सैमैं योंसि क्हिइ सुखले छ्ह थोइ। दिलेया लाजरसइ दुःखै दुःखर्न छ्ह थोइ। दुःख योंलेया चइ परमेश्‍वर मैंइ, क्हिइ बिस्याँ परमेश्‍वर खोंयोंइ आमैं, ङम् ङन् ग बिसि टिइ। छतसि तोगो लाजरसइ चुर सुख योंइमुँ, क्‍हिइ बिस्याँ चर दुःख योंइमुँ।
LUK 16:26 चुर्बै म्‍हिमैं छुइले चर ह्‍याल् आखाँरिगे, धै चर्बै म्हिमैं या चुर ङि ङाँर खल् आखाँरिगे बिसि क्‍हेमैं नेरो ङिए म्‍हाँजोरि बेल्‍ले थेबै गैरु होंल्दों मुँ।’
LUK 16:27 “छबिमा च प्‍ल्हो‍बै म्‍हिइ बिइ, ‘छ बिस्‍याँ, ओ बाज्‍यू, ङ यो छ्युँ लमुँ क्‍हिइ लाजरस ङए आबाए धिंर कुल्‍मिंन्।
LUK 16:28 तलेबिस्याँ ङए त्येमैं ङ्‍हउलो चर मुँ। चमैं या चु नर्गर आयुरिगे बिबै ल्हागिर लाजरस ह्‍यासि चु दुःख योंबै क्‍ल्ह्‍योए बारेर्बै ताँ चमैंने बिमिंरिगे।’
LUK 16:29 “दिलेया अब्राहामइ बिइ, ‘चमैंने बालु स्‍योंम्‍बै मोशा नेरो अगमबक्‍तामैंइ प्‍ह्रिबै छ्वे मुँ। चमैंइ च छ्वेर प्ह्रिबै ताँमै छेनाले खेरिगे, थेरिगे।’
LUK 16:30 “च प्‍ल्हो‍बै म्‍हिइ धबै बिइ, ‘आङिं, बाज्‍यू अब्राहाम, चमैंइ प्ह्रिबै ताँ आक्वेंलै या सियाबै म्‍हिमैंउँइँले घ्रि सोगों तसि चमैं ङाँर ह्‍याइ बिस्‍याँ बल्‍ल चमैंइ ह्रोंसए आछ्याँबै केमैंउँइँले सैं एसि परमेश्‍वरए ताँ क्वेंब्मुँ।’
LUK 16:31 “दिलेया अब्राहामइ चने बिइ, ‘मोशा नेरो अगमबक्‍तामैंए ताँ आक्वेंस्याँ म्‍हि घ्रि सिबउँइँले सोगों तसि चमैं ङाँर ह्‍याना बिलेया चमैंइ क्‍वेंरिब् आरे।’”
LUK 17:1 येशूजी ह्रोंसए चेलामैंने बिइ, “म्हिलाइ पापर च्होवाबै सैमैं खैलेबिलेन् खब्मुँ, दिलेया आछ्याँबै पाप केमैं लबर ल्हैदिबै म्हिइ थेबै सजैं योंब्मुँ।
LUK 17:2 चु च्‍युगुथिरि कोलोमैं धों तबै म्हि घ्रिलाइ पाप के लबर ल्हैदिस्याँ च म्हिइ सजैं योंब् भन्दा चए खरिर ह्रेंदो च्‍योसि मा ङ्युँइर भ्‍योंवाब् चए ल्हागिर छ्याँब तब्मुँ।
LUK 17:3 छतसि ह्रोंसए बारेर न्ह क्रों मि क्रोंले टिद्। “क्‍हिए अलिइ क्हिए फिर आछ्याँबै के लइबिस्‍याँ चलाइ छ्याँबै सुँइ लोदा सैंदा लद्, झाइले ‘ङइ पाप लइ ङलाइ माफ पिंन्,’ बिसि चइ बिस्‍याँ माफ पिंन्।
LUK 17:4 क्‍हिए अलिइ क्‍हिए फिर तिगेंर्न ङिखे समा आछ्याँबै के लना बिलेया ङिखेन् क्‍हि ङाँर खसि ङ ‘माफ पिंन्’ बिस्‍याँ क्हिइ चलाइ माफ पिंल् त्‍हुम्।”
LUK 17:5 कुल्मिंबै चेला चिब्मैंइ प्रभुने बिइ, “ओ प्रभु, ङिए बिश्‍वास बडिमिंन्।”
LUK 17:6 प्रभु येशूजी बिइ, “क्‍हेमैंने पासगिए फुँ धों प्रेथेबै च्‍युगुथिरि मत्‍त्रे बिश्‍वास मुँ बिस्याँ ‘चु काफलए धुँ मा ङ्युँइर रुँइँयाद्,’ बिलेया चइ ङिंब्मुँ।”
LUK 17:7 येशजी धबै बिइ, “क्‍हेमैं खाबज्यै या ह्रोंस‍ए के लबै म्‍हि म्रोंर के लसि र-क्‍यु छसि धिंर खबै तोदोंन् चने युन्ले ‘कैं चखो,’ बिम्‌ रो वा?
LUK 17:8 छ बिबै साटोरि बरु ‘क्रेर फगि खिसि ङए ल्हागिर युनन् कैं, ट्हा ह्‍योसि ङ चल् पिंन्। ङइ चल् खाँबै लिउँइँ मत्‍त्रे क्हि चद्,’ आबि रो वा?
LUK 17:9 क्ल्हेइ ल्हैदिबै के लना बिलेया क्ल्हेइ केब्छैंलाइ धन्‍यबाद पिंम्‌ रो वा? आपिं।
LUK 17:10 छलेन क्‍हेमैंज्यै या ह्रोंसने ल्‍हैदिबै ताँन् केमैं लल् खाँसि ‘ङि केर आफेबै केब्छैं ग, ङिइ ललन् त्हुबै के मत्‍त्रे लइमुँ।’ बिद्।”
LUK 17:11 येशू यरूशलेम सहरउँइँ ह्‍यामा सामरिया नेरो गालील ह्‍युलए साँदउँइँले तसि ह्‍याइ।
LUK 17:12 येशू नाँस घ्रिर फेबि छेमा चर खीने कोर खबै म्‍हि च्‍यु त्‍होइ। चमैंइ दे ह्रेंगोन् रासि
LUK 17:13 येशूने थेबै कैले बिइ, “ओ येशू प्रभु, ङिए फिर ल्हयो खमिंन्।”
LUK 17:14 चमैंलाइ म्रोंसि येशूजी बिइ, “ह्‍याने! ख्रो पिंबै खेगि ङाँर ह्‍यासि ह्रोंसलाइ उँइँन्।” येशूजी बिब् धोंले चमैं खेगि ङाँर ह्‍यारिमा घ्‍याँर्न चमैंए कोर सयाइ।
LUK 17:15 चमैंए न्होंर म्‍हि घ्रिइ खी सयाब था सेसि थेबै कैले परमेश्‍वरए मिं क्वेदै येशू ङाँर एखइ।
LUK 17:16 झाइले येशूए प्‍हले फ्‍योसि येशूलाइ धन्‍यबाद पिंइ। च सामरियाथें मुँल।
LUK 17:17 येशूजी बिइ, “सब म्हि च्युउलो आङिं वा? अरू म्‍हि कु खनिर मुँ?
LUK 17:18 परमेश्‍वरए मिं थेब् लबर चु सामरी मत्‍त्रे एखइ वा अरू खनिर ह्‍याइ?”
LUK 17:19 च लिउँइँ येशूजी च सामरियाथेंने बिइ, “रेदु, धै ह्रोंसए घ्याँ क्हाद्। क्‍हिए बिश्‍वासइ क्‍हि सइमुँ।”
LUK 17:20 कोइ फरिसीमैंइ येशूने “परमेश्‍वरए ग्याल्स खोंयोंसेरो खम्?” बिसि ङ्योएमा येशूजी चमैंने बिइ, “परमेश्‍वरए ग्याल्स म्हिमैंए मिइ म्रोंल्‍ले आखा।
LUK 17:21 ‘ङ्‌ह्‍योत्ति! परमेश्‍वरए ग्याल्स चुर मुँ’ ‘चर मुँ’ बिसि खाबज्‍यै बिल् आखाँ। तलेबिस्याँ परमेश्‍वरए ग्याल्स क्‍हेमैंए म्‍हाँजोर्न मुँ।”
LUK 17:22 येशूजी खीए चेलामैंने बिइ, “तिंगेंन् बिलेया म्हिए च्हजी ग्याल्स लब् म्रोंल् योंस्याँ तमल बिबै त्‍हे प्हँन लिउँइँ खब्मुँ, दिलेया क्हेमैंइ म्रोंल् योंरिब् आरे।
LUK 17:23 म्हिमैंइ क्‍हेमैंने ‘ङ्‍ह्‍योत्ति! येशू चर मुँ’, ‘चुर मुँ,’ बिब्‍मुँ। दिलेया चमैंइ बिब आक्वेंन्, चमैंए लिलि आप्रद्।
LUK 17:24 तलेबिस्याँ मुर काँम्‍लि-तिम्‍लि रामा मुए छेउ घ्रिउँइँले अर्को छेउ समा चारमुँ, छलेन म्हिए च्ह युबै त्हिंइरै या छान् तब्मुँ।
LUK 17:25 दिलेया खीजी ओंसों ल्हें दुःख सैदिल् त्हुब्मुँ, धै चु पुस्तार्बै म्हिमैंइ खीलाइ म्हि आच्हिसि खीए फिर बिश्वास आल।
LUK 17:26 “स्‍योंम्‍बै नोआए पलोर खै तल, म्हिए च्ह धबै युबै त्‍हेरै या छान् तब्‍मुँ।
LUK 17:27 नोआ क्‍यु झाजर आहोंन् समा च त्‍हेर्बै म्हिमैं चब, थुँब, ब्ह्‍या लब लसिन् मुँल, चमैं छले ढुक्‍कले ह्रों-ह्रोसए पार्लेन् प्ररिबै त्हेर्न थाइ आसेल्‍ले थेबै नाँ बाडिइ युसि म्हिमैं ताँन् सैवाइ।
LUK 17:28 “स्‍योंम्‍बै लोतए पलोरै या छान् तल। सदोमथेंमैं चइ-थुँइन मुँल, चुँब्-किंब लसिन् मुँल, बालि-पुलि ल्‍हैदिसिन् मुँल, धिंमैं बनेसिन् मुँल।
LUK 17:29 दिलेया लोतइ सदोम सहर पिबै त्हिंइर्न परमेश्‍वरजी मुउँइँले मि नेरो बारुद भ्‍योंमिंसि चर्बै म्हिमैं ताँन् सैवाइ।
LUK 17:30 म्हिए च्ह युबै त्हेरै या छान् तब्‍मुँ।
LUK 17:31 “च त्हिंइर धिंए फि तलर मुँब्‍मैं ह्रोंसए चैदिबै सैमैं किंनेल् त्हुइ बिसि क्युरु आतरिगे छलेन म्रोंजरे के लब्‍मैंया धिंउँइँ आएखरिगे।
LUK 17:32 लोतए प्ह्रेंस्योए ताँ क्‍हेमैंइ मैंन्।
LUK 17:33 खाबइ ह्रोंस जोगेल् म्‍हैमुँ, चइ खोंयोंइ आखाँबै छ्ह योंरिब् आरे, दिलेया खाबइ ह्रोंसलाइ तो धोंइ आङ्हाँ चमैंइ खोंयोंइ आखाँबै छ्ह योंब्‍मुँ।
LUK 17:34 ङ धबै क्‍हेमैंने बिमुँ, च म्‍हुँइँसर क्‍ल्‍ह्‍यो घ्रिर्न रोरिब्मैं ङ्हिंए न्‍होंरि घ्रि परमेश्‍वरजी बोब्‍मुँ, घ्रि वाथेंब्‍मुँ।
LUK 17:35 छलेन बालुन् ह्रेंदो प्‍ह्रोरिबै च्हमिरिमैं ङ्हिंरै या घ्रि परमेश्‍वरजी बोब्मुँ घ्रि वाथेंब्‍मुँ। [
LUK 17:36 च धोंलेन् बारिर के लब्मैं न्‍होंरै या घ्रि बोब्‍मुँ, घ्रि वाथेंब्‍मुँ।]”
LUK 17:37 छाबै ताँ थेसि चेलामैंइ येशूने ङ्योएइ, “प्रभु चु केमैं खनिर तमुँ?” येशूजी चमैंने बिइ, “खनिर सिनु तमुँ चर्न क्‍व्रेमैं खागु तम्।”
LUK 18:1 चेलामैं खोंयोंन् बिलै प्राथना लरिगे धै सैं च्योंब आलरिगे बिबै सैंले येशूजी अहान् घ्रि बिइ।
LUK 18:2 “सहर घ्रिर नि‍याधिश घ्रि मुँल। च परमेश्‍वर म्रोंसेया आङ्हिंमल, म्हिमैंलाज्यै या तोइ वास्ता आलमल।
LUK 18:3 च सहरर म्हरेस्‍यो घ्रि मुँल। च नियाधिश ङाँर ह्‍याब्ब्रें लसि ‘ङए शत्तुरइ ङ बेल्‍ले दुःख पिंइमुँ। छतसि ङए निसाफ लमिंन्,’ बिमल।
LUK 18:4 ल्‍हें त्‍हे समा नियाधिशइ थेबै न्ह आलल्‍ले टिइ। दिलेया ‘ङइ परमेश्‍वरै या आम्हाँदि, म्‍हिमैंलाज्यै या तोइ वास्ता आल, दिलेया चु म्हरेस्योइमि छोंरों ङ्हाँनन् लइ,’ बिसि चइ सैं न्हों-न्हों मैंइ।
LUK 18:5 छतसि तारे चुए निसाफ लमिंल् त्‍हुइ। निसाफ आलमिंस्‍याँ च खब्ब्रें लसि ङलाइ छोंरो ङ्हाँन् लब्‍मुँ।”
LUK 18:6 प्रभुजी धबै चमैंने बिइ, “च अधर्मि नियाधिशइ तो बिइमुँ, मैंन्दि।
LUK 18:7 छलेन परमेश्‍वरजी त्हाँबै म्हिमैंइ त्हिंयाँ म्हुँइँस खीने प्राथना लब्मैंए निसाफ खीजी आलमिं रो वा? क्हेमैंए ल्हागिर निसाफ लमिंबर खीजी क्हैल् लम् रो वा?
LUK 18:8 ङ क्हेमैंने बिमुँ, खीजी ह्रोंस‍ए म्हिमैंए ल्हागिरि युनन् निसाफ लमिंब्मुँ। दिलेया म्हिए च्ह धबै ह्‍युलर युमा बिश्‍वास लसि टिरिब्मैं खीजी त्‍होल् योंलै रो वा?”
LUK 18:9 ङ ठिक के लबै म्हि ग बिब् प्हैंसि अरूमैंलाइ तो धोंइ आङ्हाँबै को-कोइ म्हिमैंलाइ येशूजी चु अहान् बिइ,
LUK 18:10 “म्‍हि ङ्हिं मन्दिरर प्राथना लबर ह्‍याइ। चमैं ङ्हिंर घ्रि फरिसी टोलिर्बै म्‍हि, अर्को रोमी म्रुँए ल्हागिर बालि रेबै म्‍हि मुँल।
LUK 18:11 फरिसीइ रासि सैं न्हों-न्हों छले प्राथना लइ, ‘ओ परमेश्‍वर, ङ क्हिलाइ धन्‍यबाद पिंमुँ, तलेबिस्याँ ङ अरू म्‍हिमैं धोंले लोब लब, स्योर तेब, च्हमिरिमैंए फिर आछ्याँबै सैं मैंबै म्हि आङिं, धै चु बालि रेबै म्‍हि धों तबै या ङ आङिं।
LUK 18:12 ङ सदर ङ्हिब्ले बर्त टिम्। ङइ योंबै तोन्दोंरि सैमैंउँइँले च्‍युबाँर्बै तिबाँ क्‍हिए मिंर पिंम्।’
LUK 18:13 “दिलेया च बालि रेबै म्‍हि ह्रेंगोन् रासि ‘ङम् स्वर्गउँइँ ङ्‌ह्‍योबै लायकर्बै आरे’ ङ्हाँइ। धै सैं च्योंने लदै ह्रोंसए तिंर ठौदिदै ‘ओ परमेश्‍वर, ङ पापि म्‍हि ग। ङए फिर ल्हयो खमिंन्,’ बिइ।
LUK 18:14 “ङ क्हेमैंने बिमुँ, च फरिसी भन्दा बालि रेबै म्‍हि परमेश्‍वरए उँइँर ठिक ठर्दिसि धिंर एह्‍याइ। तलेबिस्याँ तोगो च्योंने तसि कुरब्मैंलाइ परमेश्‍वरजी थेब लमिंब्मुँ। तोगो ङम् ङन् ग बिसि थेब् प्हैंब्मैं परमेश्‍वरजी कुरवाब्‍मुँ।”
LUK 18:15 खेंमैंए कोलोमैंए फिर येशूजी यो थेंसि आशिक पिंरिगे ङ्हाँसि म्हिमैंइ खी ङाँर कोलोमैं पखइ। कोलोमैं पखब् म्रोंसि चेलामैंइ चमैं हौदिइ।
LUK 18:16 दिलेया येशूजी कोलोमैं ह्रोंस ङाँर हुइसि चेलामैंने बिइ, “कोलोमैं ङ ङाँर खल् पिंन्। चमैंलाइ आखो आबिद्, तलेबिस्याँ परमेश्‍वरए ग्याल्स चुमैं धों तब्मैंल् ग।
LUK 18:17 क्ह्रोंसेंन्ले ङ क्हेमैंने बिमुँ, ह्रोंसए आबा-आमाइ बिब चु च्‍योंबै कोलोमैंइ ङिंम्। छतसि क्हेमैं या परमेश्‍वरजी बिब् ङिंन्। आङिंइ बिस्याँ क्हेमैं परमेश्‍वरए ग्याल्सर होंल् योंरिब् आरे।”
LUK 18:18 चु ताँ थेसि यहूदी चिब घ्रिइ येशूने “ओ स्वाबै गुरु! खोंयोंइ आखाँबै छ्ह योंबै ल्हागिर ङइ तो लल् त्‍हुम्?” बिसि ङ्योएइ।
LUK 18:19 येशूजी चने बिइ, “क्‍हिइ ङने तले स्वाब बिमुँ? परमेश्‍वर बाहेक अरू खाबै या स्वाब आरे।
LUK 18:20 परमेश्‍वरए छ्वेर्बै ताँ क्‍हिइ आसे वा? ‘व्यभिचार आलदु, म्‍हि आसैदु, आह्‍योदु, स्‍योर आतेदु धै ह्रोंसए आबा-आमाइ बिब ङिंनु,’ बिसि चर प्‍ह्रिइमुँ,” आङिं वा।
LUK 18:21 चइ बिइ, “चु ताँमैंम् ङइ फ्रेंसि ओंनोंन् लइमुँ।”
LUK 18:22 चए ताँ थेसि येशूजी चने बिइ, “अझै क्‍हिइ लल् त्‍हुबै के घ्रि चैमुँ। क्‍हिने मुँबै सैमैं ताँन् चुँसि योंबै मुइ ङ्हाँदुमैं चुमिंन्, धै ङए लिलि प्रद्, छलस्याँ क्‍हिइ स्‍वर्गर सै न्होर योंब्‍मुँ।”
LUK 18:23 येशूए ताँ थेसि चए लि छु तयाइ। तलेबिस्याँ च बेल्‍ले प्लबै म्हि मुँल।
LUK 18:24 चए लि छु तब् म्रोंसि येशूजी चने बिइ, “प्‍लबै म्‍हिमैं परमेश्‍वर‍ए ग्याल्सर होंब बेल्‍ले गारो मुँ!
LUK 18:25 तलेबिस्याँ प्लबै म्हिमैं परमेश्‍वरए ग्याल्सर होंब् भन्दा सलु (ऊँट) ताए मिर क्युलब सजिल् तम्।”
LUK 18:26 चु ताँ थेब्‍मैंइ “छ बिस्‍याँ खाबइ मुक्‍ति योंल् खाँमुँ?” बिसि येशूने ङ्योएइ।
LUK 18:27 येशूजी चमैंने बिइ, “म्हिमैंइ लल् आखाँबै के परमेश्‍वरजी लल् खाँम्।”
LUK 18:28 छबिमा पत्रुसइ बिइ, “ङिम् ह्रोंसए धिं-नाँ वाथेंसि क्‍हिए लिलि प्रइमुँ।”
LUK 18:29 येशूजी चमैंने बिइ, “क्‍ह्रोंसेंन ङ क्हेमैंने बिमुँ: परमेश्‍वरजी बिब म्हाँदिबै ल्हागिर खाबइ धिं-नाँ, म्रिं-प्‍हसे, अलि-अङाँ आबा-आमा वाथेंमुँ,
LUK 18:30 चइ चु जुगर्न अझै च भन्दा ल्‍हें योंब्‍मुँ। धै तारे खबै जुगरै या खोंयोंइ आखाँबै छ्ह योंब्‍मुँ।”
LUK 18:31 च लिउँइँ येशूजी ह्रोंसए च्युसे ङ्हिं चेलामैं तिराइ बोसि बिइ, “तारे ङ्यो यरूशलेम सहरउइ ह्‍याइन मुँ। म्हिए च्हए बारेर अगमबक्‍तामैंइ प्‍ह्रिबै ताँन् ताँ पूरा तब्मुँ।
LUK 18:32 चमैंइ प्‍ह्रिब् धोंले म्हिमैंइ म्हिए च्ह अरू ह्रेंमैंए योर पिंवाब्‍मुँ। चमैंइ खीए बिल्‍लि लसि थुइब्मुँ धै खीए आब्रु वाब्मुँ।
LUK 18:33 चमैंइ खी कोर्राइ प्रुब्मुँ धै क्रूसर च्योवासि सैवाब्‍मुँ। दिलेया सोंरोर खी धबै सोगों तसि खब्‍मुँ।”
LUK 18:34 दिलेया चेलामैंइ चु ताँ तिफुँइ आक्‍हो। चु ताँए अर्थ परमेश्‍वरजी चमैंउँइँले लोसि थेंइ। छतसि चमैंइ येशूजी बिबै ताँ क्‍होल् आखाँ।
LUK 18:35 येशू यरिहो सहरर फेखमा चर मि आम्रोंबै म्‍हि घ्रि घ्याँए रेर क्हुँसि चर प्रब्मैंने बालु मुइ ह्रिरिल।
LUK 18:36 घ्‍याँर ल्हें म्हि प्रबै कै थेसि “तो तरिइमुँ जा?” बिसि चइ ङ्योएइ।
LUK 18:37 म्हिमैंइ चने बिइ, “नासरतथें येशू चु घ्‍याँउँइँलेन् खसिन् मुँ।”
LUK 18:38 छ बिब् थेसि चइ “ओ दाऊदए च्ह येशू! ङए फिर ल्हयो लमिंन्,” बिसि ओरइ।
LUK 18:39 घ्याँर प्रबै म्‍हिमैंइ “तले छले ओरल?” बिसि चलाइ हौदिइ। दिलेया “ओ दाऊद म्रुँए कुलर्बै च्ह! ङए फिर ल्हयो खमिंन्,” बिसि च झन् ओरइ।
LUK 18:40 चए कै थेसि येशू प्ररिबै तोंर्न रायाइ, धै “चलाइ ङ ङाँर पउ!” बिइ। धै च मि आम्रोंबै म्‍हि खी ङाँर पखबै लिउँइँ येशूजी चने
LUK 18:41 “क्हिलाइ तो चैदिइ? ङइ क्हिए ल्हागिरि तो लमिंले?” बिसि ङ्योएइ। चइ येशूने “प्रभु ङए मि म्रोंल् खाँरिगे,” बिइ।
LUK 18:42 येशूजी चने बिइ, “क्‍हिइ ङए फिर बिश्‍वास लबइले क्हिए मि म्रोंल् खाँब् तयाइमुँ।”
LUK 18:43 येशूजी छ बिबै तोदोंन् चए मि म्रोंयाँइ। झाइले च सैं तोंदै परमेश्‍वरए मिं क्वेदै येशूए लिलि प्रयाइ। छतब् म्रोंसि ताँन् म्हिमैंज्यै या परमेश्‍वरए मिं क्वेबर होंइ।
LUK 19:1 येशू यरिहो सहर तदै ह्‍यारिमा।
LUK 19:2 च सहरर जखायस बिबै म्‍हि घ्रि रोमी म्रुँए ल्हागिर बालि रेब्‍मैं न्‍होंर्बै चिब नेरो प्लबै म्हि मुँल।
LUK 19:3 “येशू खाब् मुँगे” बिसि चइ ङ्‌‍ह्‍योबै सैं लइ। दिलेया मोब तबइले म्‍हिए हुलइ लमा चइ येशू म्रोंल् आखाँ।
LUK 19:4 छतसि च ओंसों न्हेयासि येशू ङ्ह्‍योबर तुँबुए धुँर क्रेइ। तलेबिस्याँ येशू च घ्‍याँ तसि खसिन् मुँल।
LUK 19:5 येशू चर फेखसि ताइ ङ्‌‍ह्‍योसि बिइ, “ओ जखायस, युना क्युरु तयु, तलेबिस्याँ ङ तिंयाँ क्‍हिए धिंर बास टिल् त्‍हुइमुँ।”
LUK 19:6 छबिमा च युन्ले सर तयुइ। धै सैं तोंदै येशू धिंर बोसि मान लइ।
LUK 19:7 छले येशू जखायसए धिंर ह्‍याब् म्रोंसि “अच्‍या छाबै पापि म्हिए धिंरै या प्ह्रें तबर ह्‍याइ बिसि म्हिमैंइ खीए ताँ लबर होंइ।”
LUK 19:8 च्हमन् जखायस रासि प्रभु येशूने बिइ, “प्रभु, ङ तारे ह्रोंसए सै न्होरए आधा भाग ङ्हाँदुमैं चुमिंम्। झाइले ङइ रोमी म्रुँए ल्हागिर बालि रेमा खाबलाज्यै या लुसि मुइ किंना बिलेया तिबाँर प्लिबाँ तेंसि चमैं एमिंब्‍मुँ।”
LUK 19:9 येशूजी चने बिइ, “तिंयाँ चु धिंर्बै म्हिमैंइ मुक्‍ति योंइमुँ, तलेबिस्याँ चु या अब्राहामए सन्तान ग।
LUK 19:10 तलेबिस्याँ म्हिए च्ह छलेन् घ्याँ आसेसि म्हप्ररिब्मैंलाइ म्हैबर नेरो जोगेमिंबर युब् ग।”
LUK 19:11 येशू यरूशलेम सहर चेंदो फेख‍मा म्‍हिमैंए सैंर “परमेश्‍वरजी ग्याल्स लबै त्‍हे युनन् तबि छेना बिब् मैंसि खीए ताँ थेरिल। छतमा येशूजी चमैंने परमेश्‍वरए ग्याल्सए बारेर्बै ताँ अहानउँइँले बिइ।”
LUK 19:12 येशूजी बिइ, “प्लबै म्हि घ्रिइ ह्रेंगोर्बै ह्‍युल घ्रि ङए हग न्होंर पखल त्हुइ बिबै सैं लइ।
LUK 19:13 झाइले खी ह्‍याब् भन्दा ओंसों ह्रोंसए के लबै म्हिमैं च्‍युउलो हुइसि ‘ङ आएखन् समा चु माराए सिक्‍काउँइँले छों लद्,’ बिसि माराए सिक्‍का घ्रि घ्रि पिंइ।
LUK 19:14 “दिलेया चए ह्‍‍युलर्बै म्हिमैंइ च चिबलाइ आखोमल। छतसि चिब ह्‍याबै लिउँइँ ‘चु म्‍हि ङिए फिर म्रुँ तब ङि आसैदि,’ बिद् बिसि थेबै म्रुँ ङाँर चमैंइ स्यार्बो कुलइ।
LUK 19:15 “दिलेया च चिब म्रुँ तसि एखबै तोदोंन् ह्रोंसइ मुइ पिंथेंबै के लबै म्हिमैं खी ङाँर हुइबर ल्हैदिइ। झाइले छों लसि चमैंइ कति कमदिइ बिसि क्होल् म्हैइ।
LUK 19:16 ओंसोंबै के लबै म्हि खसि बिइ, ‘ओ चिब, क्‍हिइ पिंबै माराए सिक्‍का घ्रिउँइँले ङइ सिक्‍का च्‍यु कमदिइमुँ।’
LUK 19:17 “च म्रोंसि म्रुँ बेल्‍ले सैं तोंदै बिइ, ‘स्‍याबास! क्‍हि स्‍वाबै के लबै म्हि मुँन! च्‍युगुदे सैर क्‍हि भर लल् खाँब तइ। छतसि तारे सहर च्‍युए फिर क्हि क्ल्हे तब्मुँ।’
LUK 19:18 “छलेन अर्को के लबै म्हि खसि बिइ, ‘ओ चिब, क्‍हिइ पिंबै माराए सिक्‍का घ्रिउँइँले ङइ सिक्‍का ङ्‍ह कमदिइमुँ।’
LUK 19:19 “झाइले म्रुँइ चलाज्यै या बिइ, ‘क्‍हि सहर ङ्‍हए फिर क्ल्हे तल् योंब्मुँ।’
LUK 19:20 “अर्को के लबै म्हि खसि बिइ, ‘ओ चिब, क्‍हिइ पिंबै माराए सिक्‍का ङइ ह्रुमालर चोसि थेंल। चुर मुँ नाँ बिइ।
LUK 19:21 क्‍हि म्रोंसि ङ ङ्हिंइ, तलेबिस्याँ क्हि सारो सैं मुँबै म्हि मुँ। क्हिइ थेंइ आथेंबै सै किंल् म्हैम्, धै प्लुइ आप्‍लुबै सैन् खैंम्।’
LUK 19:22 “क्ल्हेइ च के लबै म्हिने बिइ, ‘ओ, केर आफेबै म्हि! क्‍हिइ पोंबै ताँउँइँलेन् ङइ क्हिए निसाफ लब्मुँ। ङए सैं सारो मुँ, ङइ थेंइ आथेंबै सैन् किंमुँ, धै प्लुइ आप्‍लुबै सैन् खैंम् बिब क्‍हिइ सेना।
LUK 19:23 छ बिस्‍याँ क्‍हिइ ङए मुइ बेङ्गर तले आथेंल? बेङ्गर थेंस्‍याँ ङ एखमा ब्याजै योंमल।’
LUK 19:24 झाइले च जरे रारिब्‍मैंने खीजी बिइ, ‘चउँइँले माराए सिक्‍का प्‍हेंसि सिक्‍का च्‍यु मुँबै म्हिलाइ पिंवान्।’
LUK 19:25 “दिलेया च‍मैंइ खीने बिइ, ‘ओ चिब चनेम् माराए सिक्‍का च्‍यु मुँदि!’
LUK 19:26 “ङ क्हेमैंने बिमुँ, खाब्ने मुँ चलाइ झन् ल्हें पिंब्‍मुँ। खाब्ने आरे चने मुँबै या प्‍हेंवाब्‍मुँ।
LUK 19:27 तारे ङलाइ आखोसि ‘म्रुँ आतरिगे’ बिब्‍मैं चुर पखसि ङए उँइँर सैवाद्।”
LUK 19:28 चु अहान् बिल् खाँबै लिउँइँ येशू ह्रोंसए चेलामैं भन्दा ओंसों यरूशलेमउँइँ ह्‍याइ।
LUK 19:29 बेथफागे नेरो बेथानिया बिबै नाँसए चेंदो जैतून बिबै कोंर फेखमा येशूजी ह्रोंसए चेलामैं ङ्हिंने छ बिसि कुलइ,
LUK 19:30 “च चेंदोबै नाँसर ह्‍यादु। चर ह्‍याम खाबै आक्रेबै गधा झज च्युँइँथेंब क्‍हेमैंइ स्‍याब्‍मुँ। च पिसि चुर पखो।
LUK 19:31 चलाइ पिमा ‘तले पिल?’ बिसि खाबज्‍यै ङ्योस्याँ ‘प्रभुए ल्हागिर चैदिइमुँ,’ बिद्।”
LUK 19:32 कुल्मिंबै चेलामैं ङ्हिं ह्‍यामा येशूजी बिब् धोंलेन् गधाए झज स्‍याइ।
LUK 19:33 गधा पिबर होंमा गधाए क्‍ल्‍हेइ “चु गधा तले पिल?” बिसि ङ्योएइ।
LUK 19:34 चमैंइ गधाए क्ल्हेने बिइ, “चु प्रभुए ल्हागिर चैदिइमुँ।”
LUK 19:35 छले चमैंइ गधाए झज पिसि येशू ङाँर बोइ। झाइले ह्रोंसए क्‍वेंमैं गधा झजए फिर तिसि येशूलाइ क्रेल् पिंइ।
LUK 19:36 येशू गधा फिर क्रेसि ह्‍यामा खीए मान लबर म्हिमैंइ खेंमैंए क्‍वें प्‍लिसि घ्‍याँर तिमिंइ।
LUK 19:37 छले येशू यरूशलेमए चेंदो मुँबै जैतून बिबै कोंउँइँले क्युरु फेयुमा खीजी लबै औदिबै थे-थेबै केमैं मैंदै खीए ताँन् चेलामैं सैं तोंसि परमेश्‍वरए मिं क्वेदै थेबै कैले ओरबर होंइ।
LUK 19:38 “परमेश्‍वए मिंर युबै म्रुँ बेल्‍ले थेब मुँ। स्वर्ग नेरो पृथ्‍बीर शान्ति तरिगे। खीए मिं खोंयोंन् बिले थेब् तरिगे,” बिदै ओरइ।
LUK 19:39 म्‍हिए हुल न्‍होंरि को-कोइ फरिसीमैंइ येशूने बिइ, “ओ गुरु, क्‍हिए चेलामैंने ‘छले आओरद्’ बिसि हौदिसे।”
LUK 19:40 येशूजी चमैंने बिइ, “ङ क्हेमैंने बिमुँ, चुमैं छले आपोंस्‍याँ युँमामैंन् थेबै कैले ओरब्मुँ।”
LUK 19:41 येशू यरूशलेम सहर चेंदो फेखमा। च सहर म्रोंसि खी सैं नसि क्रोइ।
LUK 19:42 चर्बै म्‍हिमैंए बारेर खीजी छले बिइ, “शान्‍ति तो ताँइ पखम् बिसि क्‍हेमैंइ तिंयाँ सेस्‍याँ तमल! दिलेया तारे क्‍हेमैंए मिइ म्रोंल् आयों।
LUK 19:43 तलेबिस्याँ क्हेमैंए फिर छाबै त्हिंइ खब्मुँ: शत्तुरमैंइ क्हिए कारग्युले गारा रुइब्मुँ धै क्हेमैं बैरु त्होंल् आयोंन्ले च्युथेंब्‍मुँ।
LUK 19:44 चमैंइ चु सहर फुवासि चु न्‍होंर्बै ताँन् म्‍हिमैं या सैवाब्‍मुँ। धिंए गारार युँमा घ्रिए फिर अर्को युँमा तरिब् आरे। तलेबिस्याँ ‘ङिं जोगेमिंबर परमेश्‍वर युल!’ बिबै ताँ क्हेमैंइ क्होल् आखाँल।”
LUK 19:45 च लिउँइँ येशू यरूशलेम सहरर्बै मन्दिरर ह्‍यासि चर्बै छों लबै ताँन् म्हिमैं ल्हावाइ।
LUK 19:46 झाइले चमैंने बिइ, “परमेश्‍वरजी खीए छ्वेर ‘ङए धिं प्राथना लबै धिं तब्‍मुँ,’ बिसि प्‍ह्रिइमुँ, दिलेया क्‍हेमैंइमि ह्‍योमैंए धिं लना।”
LUK 19:47 छले येशूजी त्हिंइ ह्रोंसे मन्दिरर म्हिमैं लोमिंमल। छतसि ख्रो पिंबै खेगि चिब्मैं, शास्‍त्रिमैं नेरो चिबनाँब्मैं क्ह्रिसि येशू सैल् म्‍हैमल।
LUK 19:48 दिलेया खी सैबै ल्हागिर चमैंइ तोइ निउँ आयों। तलेबिस्याँ येशूजी लोमिंबै ताँ बेल्‍ले छ्याँब म्हाँदिसि म्हिमैंइ थेमल।
LUK 20:1 तिगें येशूजी मन्दिरर परमेश्‍वरउँइँले खबै सैं तोंबै ताँमैं म्हिमैं लोमिंरिल। छतमा चिबनाँब्मैं, ख्रो पिंबै खेगि चिब्मैं नेरो शास्‍त्रिमैं येशू ङाँर खसि
LUK 20:2 “ङिंने बिद्, चु केमैं लब क्हिला तो हक मुँ, क्‍हिलाइ चु हग पिंब खाब् जा?” बिसि ङ्योएइ।
LUK 20:3 येशूजी चमैंने बिइ, “छ बिस्याँ ङज्यै या क्हेमैंने ताँ घ्रि ङ्योएम् चए ज्वाफ पिंन्।
LUK 20:4 यूहन्‍नाइ म्हिमैं क्‍युर प्ल्‍हुँसि बप्‍तिस्मा पिंबै हग परमेश्‍वरउँइँले योंइ उ म्‍हिमैंउँइँले योंइ?”
LUK 20:5 चु ताँ थेसि चमैं खें-खेंमैंए न्होंरि छलफल लबर होंइ, “ङ्योइ खै बिब? ‘परमेश्‍वरउँइँले’ बिइ बिस्‍याँ क्‍हेमैंइ ‘तले यूहन्‍नाए ताँ आक्‍वेंल?’ बिसि चइ बिब्‍मुँ।
LUK 20:6 ‘म्हिउँइँले’ बिले बिस्‍याँ चुर्बै म्‍हिमैं ताँनइ ङ्यो युँमाइ प्रिंसि सैवाब्‍मुँ, तलेबिस्याँ यूहन्‍ना अगमबक्‍ता ग बिसि चमैंइ क्वेंम्।”
LUK 20:7 छतसि चमैंइ येशूने बिइ, “तुसि, खनिउँइँले योंइ? ङिइ आसे।”
LUK 20:8 येशूजी चमैंने बिइ, “छ बिस्‍याँ ङज्यै या खाबै हकउँइँले चु केमैं लमुँ बिसि क्हेमैंने आबि।”
LUK 20:9 च लिउँइँ येशूजी म्हिमैंने अहान् बिइ, “म्‍हि घ्रिइ अँगुरए खेति ल्हैदिसि म्हिमैंने आधेर पिसि खी अर्को ह्‍युलर ह्‍यासि ल्हें त्हे समा टिइ।
LUK 20:10 अँगुर मिंबै त्‍हेर क्‍ल्‍हेइ के लबै म्हि घ्रि आधे किंबर कुलइ। दिलेया आधे लब्‍मैंइ च म्हि धोंसि क्होतेन् कुल्मिंइ।
LUK 20:11 झाइले क्‍ल्‍हेइ अर्को के लबै म्हिलाइ कुलइ। चलाज्यै या चमैंइ धोंसि आब्रु वासि तोइ आपिंन्ले क्होतेन् ल्‍हामिंइ।
LUK 20:12 च लिउँइँ धबै अर्को के लबै म्हि कुलइ। चलाज्यै या चमैंइ आधकल्सो लसि भ्‍योंवाइ।
LUK 20:13 “च्‍हौ तसेरो अँगुरए क्‍ल्‍हेइ बिइ, ‘तारे खाब् कुलब् ङ्‍हे? ङए च्हलाइमि चमैंइ मान ललै, छतसि ङ ह्रोंसए खोबै च्हन् कुलल् त्हुइ ङ्हाँसि कुलइ।’
LUK 20:14 दिलेया क्‍ल्‍हेए च्‍ह ह्रेंगोउँइँलेन् म्रोंसि आधे लब्‍मैंइ ‘चुम् क्‍ल्‍हेए च्‍ह ग। चुम् हक योंल् त्हुबै म्हि ग। छतसि चलाइ सैवाले धै चए सै न्होर ङ्योलन् तब्‍मुँ बिसि खेंमैं न्‍होंरि ताँ लबर होंइ।’
LUK 20:15 छ बिसि चमैंइ चलाइ अँगुर मुँबै क्ल्ह्‍योउँइँले बैरु बोसि सैवाइ। “तारे अँगुरए क्‍ल्‍हेइ चमैंलाइ तो ललै?
LUK 20:16 च खसि च आधे लब्‍मैं सैवाब्मुँ, धै म्रों अरू म्हिमैंलाइन पिंवाब्मुँ।” चु ताँ थेसि म्हिमैंइ बिइ, “छाबम् खोंयोंइ आतरिगे!”
LUK 20:17 येशूजी चमैं ङाँइ ङ्‍ह्‍योसि बिइ, “छ बिस्‍याँ छ्वेर प्‍ह्रिबै चु ताँए मतलब तो जा? ‘गारा झोंब्‍मैंइ केर आफे बिसि भ्योंवाबै युँमान् तेंर्बै क्र युँमा तइ?’
LUK 20:18 च युँमाए फिर तेयाब्‍मैं ताँन् कुदुकुदु तयाब्मुँ, छलेन खाबै फिर च युँमा तेमुँ च त्‍हूलफुँ लवाब्‍मुँ।”
LUK 20:19 येशूजी चु अहान् खेंमैंए बारेर्न पोंरिइमुँ बिसि शास्‍त्रिमैं नेरो खेगि चिब्मैंइ क्‍होइ। छतसि च त्‍हेर्न चमैंइ येशू क्‍हाल् म्‍हैइ। दिलेया चमैं म्हि हुल म्रोंसि ङ्हिंमल।
LUK 20:20 येशूजी बिबै ताँमैंउँइँले खीलाइ फसेदिसि रोमी क्रथेए योर पिंवाबै दाउ चमैंइ ङ्‍ह्‍योरिल। छतसि छ्याँबै के लब्मैं धों ब्योंबै म्‍हिमैं छैं लबर चमैंइ येशू ङाँर कुलइ।
LUK 20:21 चमैंइ येशूने बिइ, “ओ गुरु, क्‍हिइ छ्याँबै ताँ पोंमुँ धै खाबलाज्यै या आफेलल्‍ले परमेश्‍वरए क्‍ह्रोंसेंन्‍बै ताँ छेनाले लोमिंम् बिसि ङिइ सेइमुँ।
LUK 20:22 छतसि ङिलाइ बिमिंन्दि। ङिंइ रोमी कैसर म्रुँलाइ बालि फोल् त्हुम् उ आत्हु?”
LUK 20:23 दिलेया खीए सैं किंबर चमैंइ छले ताँ ङ्योएब् ग बिब् सेसि येशूजी चमैंने बिइ,
LUK 20:24 “खोइ ङने मुइ घ्रि उँइँन्दि। च मुइर खाबै नक्‍सा नेरो मिं छाप्‍दिइमुँ?” चमैंइ बिइ, “कैसर म्रुँए मिं नेरो नक्सा मुँ।”
LUK 20:25 येशूजी चमैंने बिइ, “छ बिस्याँ कैसर म्रुँलाइ पिंल् त्हुबै सै कैसर म्रुँलाइन पिंन्। धै परमेश्‍वरए मिंर पिंल् त्हुबै सै परमेश्‍वरलाइन पिंन्।”
LUK 20:26 छबिमा म्‍हिमैंए उँइँर चमैंइ येशूए ताँ क्हाबै क्ल्ह्‍यो आयों। बरु येशूजी बिबै ताँ थेसि चमैं प्लेटोयासि तोइ आबिल्‍ले टिइ।
LUK 20:27 च लिउँइँ धबै को-कोइ सदुकी टोलिर्बै यहूदीमैं येशू ङाँर खइ। चमैंइ “सिबै लिउँइँ म्‍हि धबै सोगों आत,” बिमल। छतसि चमैंइ येशूने ङ्योएइ,
LUK 20:28 “गुरु, मुँयुँ घ्रि ब्ह्‍या लसि प्‍हसे आतन्‍ले सि‍याइ बिस्याँ, आघेंए ल्हागिर सन्तान तरिगे बिसि चए अलिइ ह्रोंसए चों ब्ह्‍या लल् त्‍हुम् बिसि स्‍योंमा मोशाइ ङ्योए ल्हागिर ठिम प्‍ह्रिथेइमुँ।
LUK 20:29 धिं घ्रिर त्येमैं ङिउँलो मुँल। ठागुइ ब्ह्‍या लइ। दिलेया च्‍ह-चमि आतल्‍ले च सियाइ।
LUK 20:30 छतमा म्हैलइ ह्रोंसए चों पखइ। दिलेया चै या प्‍हसे आतल्‍ले सियाइ।
LUK 20:31 च लिउँइँ साँइँलाज्‍यै या चों पखइ। चै या प्‍हसे आतन्‍ले सियाइ। छलेन चमैं ताँनइ पलो पलोले चोंने ब्ह्‍या लइ, दिलेया चमैं या प्‍हसे आतल्‍लेन् ताँन् सियाइ।
LUK 20:32 लिउँइँ च च्हमिरि या सियाइ।
LUK 20:33 छतसि सियाब्‍मैं धबै सोगों तमा च च्हमिरि खाबै प्‍ह्रेंस्‍यो तलै? तलेबिस्याँ च च्हमिरि त्ये ङिंउँलोलन् प्ह्रेंस्यो तल् खाँल।”
LUK 20:34 येशूजी चमैंने बिइ, “चु ह्‍युलर म्हिमैं ब्ह्‍या लमुँ, ब्ह्‍या लमिंमुँ।
LUK 20:35 दिलेया सिबउँइँले सोगों तसि स्वर्गर ह्‍याबै योग्यर्बै ठर्दिबै म्हिमैंइ ब्ह्‍या आल, ब्ह्‍या आलमिं।
LUK 20:36 तलेबिस्याँ चमैं स्‍वर्गदूत धोंबन् तम्। चमैं सिसि धबै सोगों तबइले चमैं परमेश्‍वरए सन्तान ग। छतसि चमैं खोंयोंइ सिरिब् आरे।
LUK 20:37 “दिलेया सिब्‍मैं धबै सोगों तसि परमेश्‍वरने टिम् बिबै ताँ मोशाज्‍यै या लुँरिबै झ्याङए बारेर प्‍ह्रिमा याहवेहलाइ ‘अब्राहामए परमेश्‍वर, इसहाकए परमेश्‍वर नेरो याकूबए परमेश्‍वर’ बिसि प्रमाण उँइँमिंइ।
LUK 20:38 याहवेह सियाबै म्‍हिमैंए परमेश्‍वर आङिं, सोगों तब्मैंए परमेश्‍वर ग, तलेबिस्याँ खीए ल्हागिर ताँन् म्हि सोगों मुँ।”
LUK 20:39 खीए ताँ थेसि को-कोइ शास्‍त्रिमैंइ बिइ, “ओ गुरु, क्‍हिइ ठिकन् बिइ।”
LUK 20:40 च लिउँइँ खाबज्यै या खीने तोइ ताँ या ङ्योएबै आँट लल् आखाँ।
LUK 20:41 येशूजी चमैंने बिइ, “‘परमेश्‍वरउँइँले कुल्‍मिंबै म्रुँ ख्रीष्‍ट, दाऊद म्रुँए हाँगउँइँले युब् ग’ बिसि म्हिमैंइ खैले बिल् खाँम्?
LUK 20:42 तलेबिस्याँ ‘प्रभु परमेश्‍वरजी ङए प्रभुने बिइ,
LUK 20:43 “ङइ क्‍हिए शत्तुरमैं क्‍हिए प्‍हले न्‍होंर आथेंन् समा क्‍हि ङए क्‍योलोउँइँ टिद्,”’ बिसि भजनमैंर दाऊद म्रुँइ बिइमुँ।
LUK 20:44 छले दाऊद ह्रोंसइन ख्रीष्‍टने प्रभु बिइमुँ बिस्याँ ख्रीष्‍ट दाऊदए च्ह खैले तइ?”
LUK 20:45 छले ताँन् म्हिमैंइ ताँ थेरिमा येशूजी ह्रोंसए चेलामैंने बिइ,
LUK 20:46 ह्रिंबै क्वे खिसि “शास्‍त्रिमैं प्हैंसि छाइ-छुइ बजारजरे प्रमा म्हिमैंइ म्हाँदिरिगे ङ्हाँब, च्हों धिंजरे ह्‍यामा म्हिमैंइ थेब लरिगे ङ्हाँब छलेन भत्‍यारजरे ह्‍यामा मान तबै क्‍ल्‍ह्‍योर क्हुँल् म्‍हैबै शास्त्रिमैंने जोगेसि टिद्।
LUK 20:47 चमैंइ म्हरेस्‍योमैंए धिं नाँ लुडिमुँ। दिलेया म्‍हिमैंए उँइँरि बिस्याँ बेल्‍ले प्राथना लब् प्हैंम्। छाब्‍मैंइ झन् थेबै सजैं योंब्‍मुँ।”
LUK 21:1 खीजी ङ्ह्‍योरिमा प्ल्हो-प्ल्होबै म्हिमैंइ मन्दिरर्बै भेटि बकसर भेटि झोंरिब् म्रोंइ।
LUK 21:2 झाइले ङ्हाँदु म्हरेस्‍यो घ्रिइ मुइ ङ्हिफुँ झोंबै या खीजी म्रोंइ।
LUK 21:3 छतमा खीजी बिइ, “क्‍ह्रोंसेन ङ क्‍हेमैंने बिमुँ, च तोइ आरेबै म्हरेस्‍योइ अरूमैंइ भन्दा ल्‍हें भेटि झोंइमुँ।
LUK 21:4 तलेबिस्याँ अरूमैंइ ह्रोंसने मुँबै ल्हें मुइमैंउँइँले ल्हेंन् झोंइ, दिलेया चु म्हरेस्‍यो ङ्हाँदु तनाबिलेया खीने तिफुँइ आचैल्‍ले ह्रोंसने मुँबै मुइ ताँन् झोंइ।”
LUK 21:5 “छ्याँ-छ्याँबै युँमाजगो नेरो परमेश्‍वरए मिंर पिंबै छ्याँ-छ्याँबै सैमैंइ सिङाँर्दिसि चु मन्दिर बेल्‍ले छ्याँब् तइमुँ,” बिसि येशूए को-कोइ चेलामैंइ ताँ लरिमा येशूजी बिइ,
LUK 21:6 “क्‍हेमैंइ चु ताँन् सैमैं तोगो म्रोंइमुँ, दिलेया तिगें चु ताँन् फुयाब्‍मुँ। युँमा घ्रिए फिर अर्को युँमा आचैल्‍ले नास तयाब्‍मुँ।”
LUK 21:7 “ओ गुरु, चु ताँन् चिनुमैं खोंयों तम्? चु तबि छेइ बिसि म्हिमैंइ खैले सेल् खाँम्?” बिसि चमैंइ येशूने ङ्योएइ।
LUK 21:8 येशूजी बिइ, “न्ह क्रों मि क्रोंले टिद्, क्हेमैंलाइ खाबज्यै लुल् आखाँरिगे। ल्‍हें म्हिमैं ङए मिं किंसि खब्मुँ, ‘ङ परमेश्वरजी कुलबै म्रुँ ख्रीष्‍ट ग’ बिब्‍मुँ, झाइले अरू म्हिमैंइ ‘ख्रीष्‍ट युबै त्‍हे चेंदो तखइमुँ’ बिब्‍मुँ, दिलेया चमैंए लिलि आल्‍हैदिद्, चमैंइ बिब आङिंन्।
LUK 21:9 ल्हडें नेरो प्‍होंब् नेब तइमुँ रो बिब क्हेमैंइ थेब्मुँ च त्हेर आङ्हिंन् तलेबिस्याँ म्हिए च्ह युब् भन्दा ओंसों चु ताँन् ताँमैं तलन् त्‍हुम्। छ तनाबिलेया ह्‍युलए नास अझै तरिब आरे।”
LUK 21:10 येशूजी धबै बिइ, “ह्‍युलए बिरोधर ह्‍युल, ग्याल्सए बिरोधर ग्याल्स रेसि ल्हडें तब्‍मुँ।
LUK 21:11 क्‍ल्‍ह्‍यो क्‍ल्‍ह्‍योरि थेब् थेबै सयो खब्मुँ, अङ्गल तब्‍मुँ, झाइले ङ्हिंन् तबै रोगमैं खब्मुँ। मुर थेब् थेबै ङ्हिंन् ङ्हाँबै चिनुमैं म्रोंब्‍मुँ।
LUK 21:12 चु ताँन् सैमैं तब् भन्दा ओंसों म्हिमैंइ क्हेमैंलाइ ह्रुगुदिब्‍मुँ। चमैंइ क्‍हेमैं क्हासि च्हों धिंजरे बोसि क्हेमैंए मिंर मुद्दा झोंसि झेलर च्युवाब्‍मुँ। क्हेमैंइ ङए मिं किंबइले म्रुँमैं नेरो क्रथेमैंए उँइँर बोब्‍मुँ।
LUK 21:13 दिलेया चमैंने सैं तोंबै ताँ बिबै मौका च त्हेर क्हेमैंइ योंब्‍मुँ।
LUK 21:14 छतसि ह्रोंस जोगेबै ल्हागिर खै बिब् ङ्‍हे बिसि क्हेमैंइ न्हुँ लल् आत्हु।
LUK 21:15 तलेबिस्याँ ङइ क्‍हेमैंलाइ छाबै ज्ञान बुद्धिए ताँ पोंल् पिंब्मुँ, च ताँ पोंमा चमैंइ क्‍हेमैंए ताँए ज्वाफ पिंल् खाँरिब् आरे, क्हेमैंए ताँ थोल् खाँरिब् आरे।
LUK 21:16 ह्रोंसए आबा-आमा, आघें-अलिमैं, ह्रोंसए थुमैं नेरो ह्रजे-म्हजेमैंज्यै क्‍हेमैं शत्तुरमैंए योर पिंवाब्‍मुँ, झाइले क्हेमैंए न्होंरि को-कोइ चमैंइ सैवाब्‍मुँ।
LUK 21:17 क्‍हेमैंइ ङए मिं किंबइले ताँन् म्हिमैंइ क्हेमैं हेल लब्‍मुँ।
LUK 21:18 दिलेया क्‍हेमैंए क्र प्हो घ्रि या नास तरिब् आरे।
LUK 21:19 छतसि आनारद्, आसिन् समा सैदिद्, छलस्याँ क्‍हेमैं खोंयोंइ बिलै सोसि परमेश्‍वरने टिल् योंब्मुँ।”
LUK 21:20 येशूजी धबै बिइ, “यरूशलेमलाइ सेनामैंइ घेर्दिरिब् म्रोंमा तारे यरूशलेम नास तबै त्हे तबि छेना बिब क्हेमैंइ सेद्।
LUK 21:21 च त्‍हेर यहूदीया ह्‍युलर मुँब्‍मैं कोंउँइँ भौदिरिगे। यरूशलेम सहर न्‍होंर मुँब्‍मैं सहर बैरु भौदिह्‍यारिगे, छलेन नाँसर मुँब्‍मैं यरूशलेम सहर न्‍होंर आहोंरिगे।
LUK 21:22 तलेबिस्याँ परमेश्‍वरए छ्वेर प्ह्रिबै ताँमैं ताँन् पूरा तबै ल्हागिरि परमेश्‍वरजी बदला किंबै त्‍हिंइ च तब्‍मुँ।
LUK 21:23 च त्‍हेर प्‍हसे नोब्‍मैं नेरो क्‍वेंदर कोलो मुँबै आमामैं खै लब ओंछेंमैं! तलेबिस्याँ ह्‍युल तिगोंन् बेल्‍ले ङ्हिंन् तबै दुःख खब्मुँ, झाइले चु ह्रेंए फिर परमेश्‍वर ह्रिस खब्मुँ।
LUK 21:24 शत्तुरमैंइ चमैं को-कोइ सेलाँइ (तरवारइ) सैवाब्‍मुँ, कोइ फैसि ह्‍युल ह्‍युलर बोब्‍मुँ। परमेश्‍वरजी चमैंने तोक्‍दिबै त्‍हे आतन् समा अरू ह्रेंर्बै म्हिमैंइ यरूशलेम खेंमैंए अधीनर थेंब्मुँ।”
LUK 21:25 येशूजी धबै बिइ, “लयाँ, त्‍हिंयाँ नेरो मुर्बै सारामैंर औदिबै चिनुमैं म्रोंब्‍मुँ। थेबै कैले खबै मा ङ्युँइए भेल्‍गइ लमा ताँन् ह्‍युलर्बै म्‍हिमैं ङ्हिंसि बेल्‍ले आतिदिब्‍मुँ।
LUK 21:26 ह्‍युलर ङ्हिंन् ङ्हाँन् तब्‍मुँ बिसि म्‍हिमैं मुर्छा तयाब्मुँ। तलेबिस्याँ च त्हेर मुर्बै सैमैं या लायाब्मुँ‌।
LUK 21:27 च लिउँइँ म्हिए च्ह थेबै शक्‍ति नेरो म्हारल्‍ले न्‍हाँम्‍स्योर युरिब म्हिमैंइ म्रोंब्‍मुँ।
LUK 21:28 छाबै ताँ तबर होंमा क्‍हेमैं रेसि क्र कैंडु लद्। तलेबिस्याँ च त्‍हेर्न क्‍हेमैं जोगेमिंबै त्‍हे चेंदो तब्‍मुँ।”
LUK 21:29 खीजी चमैंने चु अहानै बिइ, “तुँबु धुँ नेरो अरू सिं धुँमैं ङ्‍ह्‍योद्।
LUK 21:30 च सिं धुँमैं छारा प्‍हो पलेब् म्रोंसि क्हेमैंइ बर्ख ल्‍हौदिना बिसि सेम्।
LUK 21:31 छलेन ङइ बिबै चु ताँन् ताँमैं तखब् म्रोंसि परमेश्‍वरए ग्याल्स चेंदोन् मुँन बिब क्‍हेमैंइ सेद्।
LUK 21:32 क्ह्रोंसेंन ङ क्हेमैंने बिमुँ, ङइ बिबै चु ताँन् ताँमैं पूरा आतन् समा चु पुस्ता म्हरिब् आरे।
LUK 21:33 मु नेरो पृथ्‍बी नास तयाब्‍मुँ, दिलेया ङइ बिबै ताँ म्‍हरिब आरे।
LUK 21:34 “छतसि क्हेमैं खैले टिल् त्‍हुम् बिसि सैंर मैंसि टिद्! ल्हें चब-थुँबाए लिलि आप्रद्, प्हा ल्‍हें थुँसि आम्हेरद् धै छ्ह खैले थोब् ङ्‍हे बिसि न्हुँ आलद्। छले ह्‍युलर्बै सैमैंर सैं ह्‍यारिमा थाइ आसेल्‍ले तिखेर्न च त्हिंइर क्हेमैं ङोर स्‍याब् धोंले स्याब्मुँ।
LUK 21:35 तलेबिस्याँ छलेन थाइ आसेल्‍ले पृथ्‍बीर्बै ताँन् म्हिमैंए फिर च त्हिंइ खब्मुँ।
LUK 21:36 छतसि च ङ्हिंन् तबै ताँमैंउँइँले जोगेसि म्हिए च्हए उँइँर राल् योंबै ल्हागिर परमेश्‍वरने प्राथना लब्रें लसि न्ह क्रोंले टिद्।”
LUK 21:37 येशूजी त्हिंइ ह्रोंसे मन्दिरर परमेश्‍वरए ताँमैं लोमिंमल। धै म्‍हुँइँसर जैतून बिबै कोंर ह्‍यासि बास टिब्रें लमल।
LUK 21:38 झाइले खीजी लोमिंबै ताँ थेबर म्हिमैं न्‍हाँकर्न मन्दिरर खमल।
LUK 22:1 च त्हेर प्लेढा आझोंबै क्‍हें चबै चाड खबि छेल। च त्हिंइने दुःखने फ्रेबै चाड बिमल।
LUK 22:2 ख्रो पिंबै खेगि चिब्मैं नेरो शास्‍त्रिमैं बिस्याँ येशू खैले सैब् ङ्‍हे बिसि दाउ ङ्‍ह्‍योरिल। दिलेया म्‍हिमैं म्रोंसि चमैं ङ्हिंमल।
LUK 22:3 च त्‍हेर्न यहूदा इस्‍करियोतए सैंर दुष्‍ट होंइ। च यहूदा येशूए च्युसे ङ्हिं चेलामैं न्‍होंर्बै घ्रि मुँल।
LUK 22:4 यहूदा ख्रो पिंबै खेगि चिब्मैं नेरो मन्दिर रुँबर टिबै सिपाइमैं न्होंर्बै कप्‍तानमैं ङाँर ह्‍यासि, “ङइ येशू ङो सेमिंस्यो बिसि सल्‍ला लइ।”
LUK 22:5 यहूदाए ताँ थेसि चमैं सैं तोंसि “ङिइ क्‍हि मुइ पिंस्‍यो,” बिसि बाछा फैइ।
LUK 22:6 चमैंइ छबिमा इस्‍करियोतइ “तम्” बिसि म्‍हिए हुल आरेबै त्हेर येशू क्‍हाल् पिंबै दाउ ङ्‍ह्‍योइ।
LUK 22:7 प्लेढा आझोंबै क्हें चबै चाडर म्हिमैंइ क्‍यु झज ख्रो पिंसि दुःखने फ्रेबै चाड म्हाँदिमल।
LUK 22:8 खीजी पत्रुस नेरो यूहन्‍नालाइ “ह्‍यासि ङ्योए ल्हागिर दुःखने फ्रेबै चाडए भोज तौदु लद्,” बिसि कुलइ।
LUK 22:9 चमैंइ खीने “ओ गुरु, ङिइ चु भोज खनिर तौदु लले?” बिसि ङ्योएइ।
LUK 22:10 येशूजी चमैंने बिइ, “क्‍हेमैं सहरर फेमा क्‍युए गौरि नोबै च्हमिरि घ्रि क्‍हेमैंने त्‍होब्‍मुँ। चए लिलिन् च होंबै धिंर्न ह्‍याद्।
LUK 22:11 झाइले च धिं क्‍ल्‍हेने ‘ङइ ह्रोंसए चेलामैंने दुःखने फ्रेबै चाडए भोज चबै कोठा खनिर जा? बिसि गुरुजी क्हिने ङ्योएमुँ,’ बिद्।
LUK 22:12 छले ङ्योएमा चइ क्‍हेमैं फितलर्बै छेनाले सजेथेंबै कोठा उँइँमिंब्‍मुँ। चर्न क्हेमैंइ भोजए तौदु लद्।”
LUK 22:13 छले चमैं ह्‍यामा खीजी खै बिल छाबन् स्याइ। झाइले चमैंइ दुःखने फ्रेबै चाडए भोज चर्न तयार लइ।
LUK 22:14 लिउँइँ चब् चबै त्‍हे तमा येशू कुल्मिंबै चेला चिब्मैंने बालु चब् चबर क्हुँइ।
LUK 22:15 येशूजी चमैंने बिइ, “ङइ दुःख नोब् भन्दा ओंसों क्हेमैंने बालु दुःखने फ्रेबै चाडए भोज चबै सैं मुँ।
LUK 22:16 तलेबिस्याँ ङ क्‍हेमैंने बिमुँ, परमेश्‍वरए सैंर मैंब् धों आतन् समा तारे ङइ चु भोज धबै चरिब आरे।”
LUK 22:17 च लिउँइँ येशूजी प्‍हेला छेसि परमेश्‍वरलाइ धन्‍यबाद पिंसि चेलामैंने बिइ, “चु प्‍हेला किंसि क्‍हेमैं न्‍होंरि चुसि थुँन्।
LUK 22:18 तलेबिस्याँ ङ क्‍हेमैंने बिमुँ, परमेश्‍वरजी खन्‍तोंदोंन् ग्याल्स आलन् समा ङइ अँगुरए खु धबै थुरिब् आरे।”
LUK 22:19 झाइले येशूजी योर क्हें किंइ धै परमेश्‍वरलाइ धन्‍यबाद पिंसि क्‍हें लुँसि चेलामैं चुमिंसि बिइ, “चु क्‍हें ङए ज्यु ग। क्‍हेमैंए ल्हागिर ङए ज्यु ख्रो पिंब् ग। छतसि ङ मैंबै ल्हागिरि छलेन् क्हें चब्रें लद्।”
LUK 22:20 छलेन क्हें चल् खाँबै लिउँइँ येशूजी प्‍हेला घ्रि छेइ, झाइले चमैंने पिंसि बिइ, “चु क्‍हेमैंए ल्हागिर बगेबै ङए को ग। चु को परमेश्‍वरजी क्‍हेमैंने फैबै छारा बाछाए छाप ग।
LUK 22:21 “दिलेया ङ्ह्‍योद्! ङलाइ क्‍हाल् पिंबै म्‍हि ङने बालुन् चरिइमुँ।
LUK 22:22 तलेबिस्याँ परमेश्‍वरजी बिब् धोंलेन् म्हिए च्ह सिलन् त्हुब्‍मुँ। दिलेया धिक्‍कार मुँ ङ शत्तुरमैंए योर पिंवाबै म्‍हि चइ थेबै दुःख योंब्‍मुँ।”
LUK 22:23 चु ताँ थेसि चेलामैंइ “ङ्योए न्‍होंरि छाबै के लब खाब मुँगे?” बिसि खें-खेंमैंन् ङ्योएबर होंइ।
LUK 22:24 च लिउँइँ “ङ्योए न्होंर ताँन् भन्दा थेब खाब् तब् ङ्‍हें?” बिसि चेलामैंए न्‍होंरि हानथाप तबर होंइ।
LUK 22:25 छतब् म्रोंसि येशूजी चमैंने बिइ, “चु ह्‍युलर्बै म्रुँमैंइ जनताए फिर हुकुम लम्। छले हुकुम लब्मैंइ खेंमैंलाइ छ्याँबै के लबै म्हि बिद् बिसि बिबर ल्हैदिम्।
LUK 22:26 दिलेया क्‍हेमैं न्‍होंरि छ तल् आत। क्‍हेमैं न्‍होंरि ताँन् भन्दा थेबै म्‍हि ताँन् भन्दा च्‍योंने तल् त्‍हुम्। धै चिबै के लबै म्हिइ अरूमैंए सेवा लल् त्‍हुम्।
LUK 22:27 चब् चबर टिबै म्हि नेरो चब् पामिंबै म्हि न्होंरि खाब् थेब् जा? च ब् चबर टिबै म्हि थेब् आङिं वा? दिलेया क्‍हेमैं न्‍होंरि ङम् सेवा लबै म्‍हि धों तइमुँ।
LUK 22:28 “छतसि क्हेमैं ङए दुःखर ल्‍होल् खाँब्मैं तद्।
LUK 22:29 ङए आबाजी ङलाइ ग्याल्स घ्रि पिंइ। ङज्‍यै या क्‍हेमैंलाइ पिंमुँ।
LUK 22:30 झाइले क्‍हेमैं या ङए ग्याल्सर ङने बालु चल् योंब्‍मुँ, थुँल् योंब्‍मुँ। धै राजगद्दिर क्हुँसि इस्राएलर्बै च्युसे ङ्हिं कुलए निसाफ लब्‍मुँ।”
LUK 22:31 “ओ सिमोन, सिमोन, थेद्! म्हिमैंइ नौलिर गहुँ टाब् धोंले दुष्‍टइ क्‍हि टाल् योंरिगे बिसि यो छ्युँ लइमुँ।
LUK 22:32 दिलेया क्‍हिए बिश्‍वास आम्‍हरिगे बिसि ङइ क्‍हिए ल्हागिर प्राथना लइ। छतसि क्‍हि धबै ङ ङाँइन एखब्मुँ, क्हिए सैं ङ ङाँइ एबै लिउँइँ ह्रोंसए आघें अलिमैंए सैं भोंब् लमिंन्।”
LUK 22:33 छबिमा सिमोन पत्रुसइ खीने बिइ, “ओ प्रभु, ङ क्‍हिने बालुन् झेलर टिल् त्‍हुलेया, सिल् त्‍हुलेया तयार मुँ।”
LUK 22:34 येशूजी पत्रुसने बिइ, “पत्रुस, ङ क्हिने बिमुँ, क्हिइ सोंखे समा ङ ङो आसे आबिन् समा तिंयाँ नग भाले ओररिब् आरे।”
LUK 22:35 येशूजी चमैंने बिइ, “ङइ क्‍हेमैं मुइ, झोला, जुत्ता तोइ आबोल्‍ले कुलमा क्हेमैंलाइ तोइ सैलेया खाँचो तल् वा?” चमैंइ “अहँ, तोइ सैलेया खाँचो आत,” बिइ।
LUK 22:36 येशूजी बिइ, “दिलेया तारेपिरु ‘मुइ मुँब्मैंइ मुइ किंन्, झोला मुँब्मैंइ झोला नोद्’, झाइले ‘सेलाँ आरेब्मैंइ ह्रोंसए बखु चुँसि सेलाँ किंरिगे।’
LUK 22:37 ङ क्हेमैंने बिमुँ, ‘खी अपराधिमैं धोंबन् तइ’ बिसि प्‍ह्रिबै ताँ ङए छ्हर पूरा तलन् त्हुम्। क्ह्रोंसेंन ङए बारेर प्ह्रिबै ताँ पूरा तसिन् मुँ।”
LUK 22:38 दिलेया सेलाँए बारेर्बै ताँ तिफुँइ आक्‍होसि चेलामैंइ बिइ, “ओ प्रभु, ङ्‌ह्‍योत्ति! चुर सेलाँ ङ्हिं मुँ।” छबिमा येशूजी “तइ! मुँरिगे,” बिइ।
LUK 22:39 च क्‍ल्‍ह्‍योउँइँले त्‍होंसि सोदा ह्‍याब् धोंले येशू जैतून कोंउँइँ ह्‍याइ। चेलामैं या खीए लिलिन् ह्‍याइ।
LUK 22:40 च क्‍ल्‍ह्‍योर फेखसि येशूजी चेलामैंने बिइ, “क्‍हेमैं ङोर आफेरिगे बिसि प्राथना लरिद्।”
LUK 22:41 च लिउँइँ येशू दे क्‍याइ दने ह्‍यासि च्‍हि तुँसि छले प्राथना लइ।
LUK 22:42 “ओ आबा, क्‍हिए इच्छा मुँस्‍याँ ङ ङाँइँले चु दुःख स्‍योमिंन्। दिलेया ङए इच्छा आङिं, क्‍हिए इच्छा पूरा तरिगे।”
LUK 22:43 च लिउँइँ स्‍वर्गउँइँले स्‍वर्गदूत घ्रि येशू ङाँर युसि खीलाइ सैदिल् खाँबै भों पिंइ।
LUK 22:44 च त्‍हेर येशूए सैंर बेल्‍ले दुःख मुँल। छतमा यो छ्युँ लदै खीजी प्राथना लरिमा खीए छैब् थे-थेब कोए थब्लो धों तब सर तेरिल।
LUK 22:45 छले प्राथना लसि येशू ह्रोंसए चेलामैं ङाँर एखमा चमैं शोकइ लमा नारसि रोरिब स्याइ।
LUK 22:46 येशूजी चमैंने बिइ, “क्‍हेमैं तले रोरिल? रेद्, पापर आच्होरिगे बिसि प्राथना लद्।”
LUK 22:47 येशूजी छ बिरिमा म्‍हिए हुल चर फेखइ। च्युसे ङ्हिं चेलामैं न्‍होंर्बै यहूदा च म्‍हिमैंए ओंसों ओंसों खसि येशूलाइ म्वें लबर खीए ङाँर खइ।
LUK 22:48 येशूजी चने बिइ, “ओ यहूदा, ‘क्हिइ’ म्हिए च्हलाइ म्वें लब् धों लसि खीए फिर धोका पिंदा ङ्हाँइमुँ वा?”
LUK 22:49 येशूने मुँबै चेलामैंइ तबि छेबै ताँमैं क्‍होसि “ओ प्रभु, ङिइ चमैंलाइ सेलाँइ प्रिंवाले वा?” बिसि ङ्योएइ।
LUK 22:50 झाइले चेलामैं न्‍होंर्बै घ्रिइ सेलाँ (तरबार) ट्हुइसि ख्रो पिंबै खेगि क्रथेए के लबै म्हि घ्रिए क्‍योलोउँइँबै न्‍ह च्‍वाट्टन् थोवाइ।
LUK 22:51 दिलेया येशूजी “तै मुँरिगे! छ आलद्!” बिसि खीजी च के लबै म्हिए न्‍ह छुइसि सल् लमिंइ।
LUK 22:52 ख्रो पिंबै खेगि चिब्मैं, मन्दिरर्बै थेबै फौजमैं नेरो यहूदीमैंए चिबनाँब्मैं येशूलाइ क्‍हाबर खल। छले खब् म्रोंसि येशूजी चमैंने बिइ, “ङ ह्‍यो वा? छले क्हेमैं सेलाँ नेरो प्‍हरे छेसि ङ क्‍हाबर खब?
LUK 22:53 ङ त्हिंइ ह्रोंसे क्‍हेमैंने ‍बालुन् मन्दिरर मुँमा क्‍हेमैंइ ङ आक्हा। दिलेया तारे क्हेमैंए त्हे तइमुँ। छतसि क्हेमैं तो के लबर खल, च के लद्, तलेबिस्याँ मिछु खैबर्बै शक्‍तिए के लबै त्हे चुन् ग।”
LUK 22:54 च त्‍हेर्न म्हिमैंइ येशू क्‍हासि ख्रो पिंबै खेगि क्रथेए धिंर बोइ, पत्रुस बिस्याँ दे ह्रेंगोउँइँलेन् खीए लिलि लिलि ह्‍याइ।
LUK 22:55 ख्रो पिंबै खेगि क्रथेए धिंर्बै ह्‍युर म्‍हिमैं मि त्हेरिल। छतसि पत्रुसै या चमैंने बालुन् क्हुँइ।
LUK 22:56 केब्स्यो घ्रिइ पत्रुस मि त्हेरिब म्रोंसि च ङाँइ ङ्‌ह्‍योसि “चु म्हि या येशूने बालुन् मुँल,” बिइ।
LUK 22:57 दिलेया पत्रुसइ च च्हमिरिने “ओ नानि, ङइ खी ङो आसे,” बिइ।
LUK 22:58 तिस्याँदे लिउँइँ अर्को म्‍हि घ्रिइ चलाइ म्रोंसि बिइ, “क्‍हि या चमैं न्होंर्बै आङिं वा?” दिलेया पत्रुसइ चने या “अहँ, ङ चए थु आङिं,” बिइ।
LUK 22:59 घण्‍टा घ्रिदे लिउँइँ अर्को म्‍हि घ्रिइ बिइ, “चु म्हि या येशूनेन् बालु मुँल। तलेबिस्याँ चु या गालीलथेंन् मुँन।”
LUK 22:60 दिलेया पत्रुसइ बिइ, “अबुइ, तो ताँ लल? क्‍हिइ बिबै ताँ ङइ तोइ आक्‍हो!” पत्रुसइ छ बिरिबै तोंर्न नग भाले ओरइ।
LUK 22:61 छतमा प्रभु येशूजी लिग्‍याँ तोसि पत्रुसलाइ ङ्ह्‍योमा “क्हिइ सोंखे समा ङलाइ ङो आसे आबिन् समा नग भाले ओररिब् आरे,” बिसि येशूजी बिबै ताँ पत्रुसइ मैंइ।
LUK 22:62 झाइले पत्रुस बैरु त्‍होंह्‍यासि बेल्‍ले क्रोइ।
LUK 22:63 येशू रुँबै म्‍हिमैंइ खीए बिल्‍लि लसि धोंइ।
LUK 22:64 चमैंइ खीए मि हुवासि प्रिंदै “लु अगमबाणि बिद्, बित्ति क्‍हिलाइ प्रिंब खाब् जा? बिसि ङ्योएइ।”
LUK 22:65 चमैंइ खीए बिरोधर अरू ल्‍हें आब्रु वाबै ताँमैं या बिइ।
LUK 22:66 नाँ न्होंबै तोदोंन् यहूदी ह्‍युलर्बै चिब्मैं, ख्रो पिंबै खेगि चिब्मैं नेरो शास्‍त्रिमैं ताँन् खागु तसि येशूलाइ थेबै म्हि च्होंए उँइँर बोमा चमैंइ बिइ,
LUK 22:67 “क्‍हि परमेश्‍वरजी कुल्‍मिंबै म्रुँ ख्रीष्‍ट ग बिस्‍याँ ङिने बिद्।” येशूजी चमैंने बिइ, “ङइ बिनाबिलेया क्‍हेमैंइ आक्वें।
LUK 22:68 ङइ तो ङ्योएलै या क्‍हेमैंइ ज्वाफ आपिं।
LUK 22:69 दिलेया तारे म्हिए च्ह परमेश्‍वरए थेबै भों नेरो शक्‍ति मुँबै क्‍योलोउँइँ टिब्‍मुँ।”
LUK 22:70 चमैं ताँनइ बिइ, “छ बिस्‍याँ क्‍हि परमेश्‍वरए च्‍हन् वा?” येशूजी बिइ, “ङ चन् ग बिसि क्‍हेमैंइन बिइमुँ।”
LUK 22:71 येशूए ताँ थेसि चमैंइ खें-खेंमैंन् बिइ, “ङ्योइ चए सुँउँइँलेन् थेइ, छतसि ङ्योलाइ अरू ग्वाइ तले चैदिइ?”
LUK 23:1 च लिउँइँ थेबै च्हों धिंर मुँबै म्हिमैंइ येशूलाइ क्रथे पिलातस ङाँर बोसि
LUK 23:2 “चुइ ‘रोमी म्रुँलाइ बालि फोल् आत्‍हु,’ बिम्, धबै ‘ङ ख्रीष्‍ट म्रुँ ग,’ बिसि चुइ ङ्योए म्हिमैं भाँडिवाइ,” बिसि चमैंइ येशूए फिर छ्याब् ल्हैदिबर होंइ।
LUK 23:3 चमैंए ताँ थेसि पिलातसइ येशूने “क्‍हि यहूदीमैंए म्रुँ वा?” बिसि ङ्योएइ। येशूजी चने बिइ, “क्‍हिइन छ बिरिइमुँ।”
LUK 23:4 “ङइ चु म्‍हिने तोइ दोष आयों बिसि ख्रो पिंबै खेगि चिब्मैं नेरो चर मुँबै हुलने पिलातसइ,” बिइ।
LUK 23:5 दिलेया चमैंइ बेल्‍‍‍ले सारले ओरदै बिइ, “चुजी ताँन् यहूदीया नेरो गालील ह्‍युलउँइँले किंसि तोगो चु यरूशलेम सहर समन् खीए ताँ लोमिंसि भाँडिरिइमुँ।”
LUK 23:6 छ बिब् थेसि पिलातसइ “चु म्‍हि गालीलथें वा? बिसि ङ्योएइ।”
LUK 23:7 छले ङ्योएमा येशू हेरोद म्रुँए ह्‍युलर्बै म्‍हि मुँन बिब् सेसि चइ येशूलाइ हेरोद ङाँर कुलइ, तलेबिस्याँ च त्‍हेर हेरोद म्रुँ यरूशलेम सहरर्न मुँल।
LUK 23:8 येशूलाइ म्रोंल् योंमा हेरोद बेल्‍ले सैं तोंइ। तलेबिस्याँ येशूजी लबै थेबै केमैं नेरो छ्याँबै ताँमैं बारेर हेरोदइ ओंसोंन् थेल। छतसि ओंसों ओंनोंन् हेरोदए सैंर येशू म्रोंल् योंस्याँ तमल ङ्हाँरिल। धै येशूजी लबै औदिबै चिनु ङ्‍ह्‍योबै सैं मुँल।
LUK 23:9 हेरोद म्रुँइ येशूने ल्‍हें ताँमैं ङ्योएइ। दिलेया येशूजी तोइ ज्वाफ आपिं।
LUK 23:10 चर रारिबै ख्रो पिंबै खेगि चिब्मैं नेरो शास्‍त्रिमैं बिस्याँ येशूए बिरोधर सार-सारले ओरदै खीए फिर छ्याब् ल्‍हैदिबर होंइ।
LUK 23:11 च लिउँइँ हेरोद नेरो चए सिपाइमैंइ येशूए आब्रु वासि बेल्‍ले बिल्‍लि लइ। च लिउँइँ म्रुँइ खिब् धों तबै क्‍वें येशूलाइ खिमिंसि पिलातस ङाँर एमिंइ।
LUK 23:12 च त्हिंइसेरो हेरोद नेरो पिलातस क्‍ह्रिइ। चु भन्दा ओंसों चमैं ङ्हिं आक्ह्रिमल।
LUK 23:13 च लिउँइँ पिलातसइ ख्रो पिंबै खेगि चिब्मैं नेरो इस्राएल ह्‍युलर्बै चिबनाँब्मैं खागु लसि
LUK 23:14 बिइ, “चु म्हिजी म्हिमैं भाँडिवाइ बिसि क्‍हेमैंइ चुलाइ ङ ङाँर पखइ। तोगो क्‍हेमैंए उँइँर्न ङ्युँलु च्युलु लमा क्‍हेमैंइ चुए फिर ल्हैदिबै छ्याब् ङइ तोइ आयों।
LUK 23:15 हेरोद म्रुँज्‍यै या चुए फिर तोइ छ्याब् आयोंसि चु ङ्यो ङाँर्न एमिंइ। चुइ सिबै सजैं योंबै के तोइ आलइमुँ।
LUK 23:16 छतसि ङइ चु कोर्राइ प्रुसि पिमिंम्।”
LUK 23:17 चमैंए छ्यार सालै ह्रोंसे दुःखने फ्रेबै चाडर पिलातसइ झेलउँइँले म्हि घ्रि पिल् त्‍हुमल।
LUK 23:18 दिलेया म्‍हिए हुलइ थेबै कैले “चु आङिं! ङिए ल्हागिर बारब्‍बा पिमिंन् बिसि ओरइ।”
LUK 23:19 च बारब्‍बा सहरर आछ्याँबै के लसि म्‍हि सैबै केसर झेलर च्‍युथेंल।
LUK 23:20 हुलइ छ बिलेया पिलातसइ येशूलाइ पिदा ङ्हाँसि “चुलाइ पिवाले बिसि” धबै चमैंने ताँ लइ।
LUK 23:21 दिलेया “चलाइ क्रूसर च्‍योवाद्! क्रूसर च्‍योवाद्!” बिदै चमै ओरइ।
LUK 23:22 दिलेया पिलातसइ सोंखेबै लारै या बिइ, “तले? चु म्हिजी आछ्याँबै के तो लइमुँ? चुलाइ सैवाबै सजैं पिंबै कारण ङइ तोइ आयोंइमुँ। छतसि चु कोर्राइ मत्‍त्रे प्रुसि पिमिंम्।”
LUK 23:23 दिलेया चमैं झन् बेल्‍ले थेबै कैले “चलाइ क्रूसर च्‍योवालन् त्‍हुम् बिदै ओरइ।” लिउँइँ पिलातसइ चर मुँबै म्हिमैंइ बिब् धोंन् लल् त्‍हुइ।
LUK 23:24 छतसि पिलातसइ चमैंइ बिब् धोंले येशूलाइ क्रूसर च्‍योवासि सैवाबै सजैं पिंइ।
LUK 23:25 छले चमैंइ बिब् धोंलेन् म्‍हि सैसि झेलर च्‍युथेंबै बारब्‍बा पिमिंइ। धै चमैंइ बिब् धोंलेन् पिलातसइ येशूलाइ चमैंए योर्न पिंवाइ।
LUK 23:26 छले रोमी सिपाइमैंइ येशू क्रूसर च्‍योवाबर बोरिमा सिमोन बिबै कुरेनीथें नाँसउँइँले सहरउँइँ युरिमा चमैंइ चलाइ क्‍हासि येशूए क्रूस नोसि खीए लिलि लिलि प्रबर ल्हैदिइ।
LUK 23:27 म्हिए हुल येशूए लिलि प्ररिल। चमैं न्‍होंरि च्हमिरिमैं या मुँल। चमैं सैं आतोंसि क्रोरिल।
LUK 23:28 येशूजी लिग्‍याँ तोसि चमैंने बिइ, “ओ यरूशलेम सहरर्बै च्हमिमैं, क्हेमैं ङए ल्हागिर आक्रोद्, क्हेमैं ह्रोंस् नेरो ह्रोंसए च्‍ह-चमिए ल्हागिर क्रोद्।
LUK 23:29 तारे लिउँइँ बेल्‍ले दुःख तबै त्‍हे खम्। च त्‍हेर ‘प्‍हसे आतबै थरिमैं नेरो ङ्‍हे तिंल् आत्‍हुबै च्हमिरिमैं ङ्‍हो सब्मैं ग बिसि म्हिमैंइ,’ बिब्मुँ।
LUK 23:30 च त्‍हेर म्हिमैंइ ‘कोंमैंने ङिए फिर उँयान् बिब्मुँ, धै नुबै डिस्कामैंने ङि हुवासि म्यारवाद्’ बिबर होंब्‍मुँ।
LUK 23:31 तलेबिस्याँ चमैंइ सिधुँ पिंङक्यो ब्योंब छ्याँब मुँबर्न छ लम् बिस्याँ कारयामा खै ललै?”
LUK 23:32 सिपाइमैंइ आछ्याँबै के लबै म्हि ङ्हिं या येशूने बालुन् सैबर बोल।
LUK 23:33 चमैं क्र खोप्‍लें बिबै क्‍ल्‍ह्‍योर फेनेसि चमैंइ येशूलाइ क्रूसर च्‍योवाइ। धै च आछ्याँबै के लबै म्हि ङ्हिं या घ्रि खीए क्योलोउँइ, घ्रि खीए त्हेब्रेउँइँ क्रूसर च्योवाइ।
LUK 23:34 च्हमा येशूजी बिइ, “ओ आबा, चुमैं क्षमा लमिंन्, तलेबिस्याँ चुमैंइ तो लरिइमुँ बिब था आसे।” दिलेया सिपाइमैंइ येशूए क्वें चिट्ठा झोंसि खेंमैंए न्‍होंरि चुइ।
LUK 23:35 म्हिमैं रासि ङ्‌ह्‍योरिल। यहूदी चिबनाँब्मैंइ येशूए बिल्‍लि लसि बिइ, “चुइ अरूमैं जोगेमिंइ। चु परमेश्‍वरजी कुल्‍मिंबै म्रुँ ख्रीष्‍ट ग बिस्‍याँ चुइ ह्रोंसलाज्यै या जोगेरिगे।”
LUK 23:36 सिपाइमैं या खसि आलिंबै प्हा क्युँ पिंदै येशूए बिल्‍लि लइ।
LUK 23:37 “क्‍हि यहूदीमैंए म्रुँ ग बिस्‍याँ ह्रोंसलाज्यै जोगेद्।”
LUK 23:38 “चु यहूदीमैंए म्रुँ ग” बिसि छ्याब् ल्हैदिबै ताँ प्ह्रिसि खीए क्होवाइ क्रूसर टाँउँदिथेंल।
LUK 23:39 च क्रूसर च्‍योवाबै आछ्याँबै के लबै म्हि घ्रिइ येशूए बिल्‍लि लदै बिइ, “क्‍हि परमेश्‍वजी कुल्मिंबै म्रुँ ख्रीष्‍ट आङिं वा? ङिंबन् ग बिस्‍याँ क्हिलाज्यै जोगेदु, ङिलाज्यै या जोगेमिंन्।”
LUK 23:40 दिलेया अर्को आछ्याँबे के लबै म्हिइ चलाइ हौदिसि बिइ, “क्‍हि परमेश्‍वर म्रोंसि आङ्हिं वा? खीजी योंब् धों तबै सजैं क्हिज्यैया योंरिइमुँ।
LUK 23:41 दिलेया ङ्यो ङ्हिंम् आछ्याँबै के लसि योंल् त्‍हुबै सजैं योंरिइमुँ, दिलेया चु म्‍हिजीम् आछ्याँबै के तोइ आलइमुँ।”
LUK 23:42 छबिसि चइ येशूने बिइ, “ओ येशू, क्‍हि म्रुँ तसि युमा ङलाज्यै मैंमिंन् ओ।”
LUK 23:43 येशूजी चने बिइ, “क्‍ह्रोसेंन ङ क्हिने बिमुँ, क्‍हि तिंयाँन् ङने स्‍वर्गर तब्‍मुँ।”
LUK 23:44 त्‍हिंयाँ आधा तमा ह्‍युल तिगोंन् घण्‍टा सोंदे समा मिछु खैयाइ।
LUK 23:45 त्हिंयाँ या चारब म्हयाइ। च त्‍हेर्न यरूशलेम सहरर्बै मन्दिरर च्योथेंबै पर्दा क्‍वें या ङ्हिंबाँ फैले म्हाँजोर्न ट्होयाइ।
LUK 23:46 झाइले येशूजी थेबै कैले बिइ, “ओ आबा, ङए प्ल्ह ङइ क्‍हिए योर्न थेंमुँ।” च्हौ बिसि येशूजी खीए सो पिवाइ।
LUK 23:47 छतब् म्रोंसि “क्‍ह्रोंसेंन चु म्‍हि धर्मि मुँन!” बिदै रोमी कप्‍तानइ परमेश्‍वरए मिं क्वेइ।
LUK 23:48 चर ङ्ह्‍योबर खबै म्हिमैंइ छ तब् म्रोंसि बेल्‍ले सैं नसि ह्रों-ह्रोंसए तिंर प्रिंदै धिंर एह्‍याइ।
LUK 23:49 छलेन खीलाइ ङो सेब्मैं नेरो गालील ह्‍युलउँइँले खीए लिलि खबै च्हमिरिमैं ह्रेंगोन् रासि चर तरिबै ताँन् सै ङ्‍ह्‍योरिल।
LUK 23:50 योसेफ मिं मुँबै म्‍हि घ्रि स्‍वाब नेरो धर्मि म्‍हि मुँल। च थेबै म्हि च्होंर्बै चिब मुँल।
LUK 23:51 येशूलाइ सैले बिसि मत लबै म्हिमैंने योसेफ आक्ह्रिल। च यहूदीया ह्‍युलर्बै अरिमथियाथें मुँल। परमेश्‍वरजी खन्‍तोंदोंन् ग्याल्स खोंयों लब् ङ्‍हे बिसि चइ घ्‍याँ ङ्‌ह्‍योरिल।
LUK 23:52 च पिलातस ङाँर ह्‍यासि येशूए सिनु ह्रिइ।
LUK 23:53 झाइले क्रूसउँइँले सिनु तमिंसि। च सिनु सुतिए क्‍वेंइ म्होरइ धै पारा कोप्दिसि बनेबै उर थेंइ। ओंसों च उर खाबै या आथेंल।
LUK 23:54 प्रिबै त्हिंइ खबि छेल। छतसि च त्हिंइ प्हँन्हाँबै प्रिबै त्हिंइए ल्हागिर तोन्‍दोंरि सै तौदु लथेंल् त्हुबै त्हिंइ मुँल।
LUK 23:55 गालील ह्‍युलउँइँले येशूने खबै च्हमिरिमैं योसेफए लिलि ह्‍यासि सिनु थेंबै क्‍ल्‍ह्‍यो ङ्‍ह्‍योइ।
LUK 23:56 च लिउँइँ चमैं खेंमैं टिबै क्‍ल्‍ह्‍योर एह्‍यासि येशूए सिनुर फोब् बिसि अत्तर नेरो मलममैं बनेइ। झाइले छ्वेर बिब् धोंले प्रिबै त्हिंइर चमैंइ भों न्‍हइ।
LUK 24:1 झाइले आइतबार न्‍हाँक्‍कर्न च्हमिरिमैं खेंमैंइ बनेबै लिंबै थाँ खबै छ्युगु बोसि येशू थेंबै उर ह्‍याइ।
LUK 24:2 चर फेनेमा उए सुँर हुथेंबै युँमा स्‍योथेंब चमैंइ म्रोंइ।
LUK 24:3 चमैं उ न्‍होंर होंमा प्रभु येशूए सिनुआम्रों।
LUK 24:4 छतमा चमैं अलमल्‍ल तरिल। च त्‍हेर्न फोस्रे ब्योंबै चारबै क्‍वें खिबै मुँयुँमैं ङ्हिं खेंमैंए रेर रारिब् चमैंइ म्रोंइ।
LUK 24:5 छाब् म्रोंसि चमैं ङ्हिंसि पत्‍खु तयाइ। दिलेया च मुँयुँमैंइ चमैंने बिइ, “क्‍हेमैंइ सोगों म्हिलाइ छगोंर तले म्‍हैल?
LUK 24:6 येशू चुर आरे, खी सोगों तसि रेह्‍याल् खाँइ। गालीलर मुँमा खीजी क्‍हेमैंने तो बिल च ताँ मैंन्दि।
LUK 24:7 ‘परमेश्‍वरजी कुल्‍मिंबै म्‍हिए च्ह पापि म्‍हिमैंए योर फेब्मुँ, क्रूसर च्‍योवाब्मुँ। दिलेया सोंरोर सोगों तसि रेल् त्‍हुम्,’ बिब आङिं वा?”
LUK 24:8 चमैंए ताँ थेसि च्हमिरिमैंइ येशूजी बिबै ताँ चिइ।
LUK 24:9 च च्हमिरिमैं छगोंउँइँले एह्‍यासि चु ताँ च्युसे घ्रि चेलामैं नेरो अरू चेलामैंने या बिमिंइ।
LUK 24:10 च च्हमिरिमैं मग्‍दलाथेंस्‍यो मरियम, योअन्‍ना नेरो याकूबए आमा मरियम बिब् मुँल। चमैंने मुँबै अरू च्हमिरिमैंज्यै या चु ताँ कुल्मिंबै चेला चिब्मैंने बिइ।
LUK 24:11 दिलेया चेलामैंइ “चु स्योलिबै ताँ ग” ङ्हाँसि च च्हमिरिमैंइ बिबै ताँ आक्‍वें।
LUK 24:12 दिलेया पत्रुस रेसि छगोंर न्हेह्‍याइ, धै क्वारले न्‍होंर ङ्ह्‍योमा ट्हि क्‍वें मत्‍त्रे म्रोंइ। छाब् म्रोंमा च प्लेटोयासि धिंर एह्‍याइ।
LUK 24:13 च त्हिंइर्न चेलामैं ङ्हिं इम्‍माउस बिबै नाँसउँइँ ह्‍यारिल। च नाँस यरूशलेमउँइँले च्युसे घ्रि किलोमेटर ह्रेंगो मुँल।
LUK 24:14 छले ह्‍यारिमा भर्खर तरिबै ताँए बारेर चमैं ताँ लरिल।
LUK 24:15 चमैं ताँ लदै ह्‍यारिमा येशू खसि चमैंने बालु प्रबर होंइ।
LUK 24:16 चमैंइ येशू म्रोंलेया ङो सेल् आखाँल।
LUK 24:17 “क्‍हेमैं प्रदै तो ताँए बारेर छलफल लरिल?” बिसि येशूजी चमैंने ङ्योएमा चमैं प्ररिबै तोंर्न सैं आतोंब् धोंले रायइ।
LUK 24:18 चमैं न्‍होंरि क्‍लेओपास बिबै म्‍हिइ येशूने बिइ, “यरूशलेम स्युरै खसेया तिंयाँ प्हँनाँ चर तो तरिइमुँ बिब क्हिइ आसे वा?”
LUK 24:19 “तो ताँ जा?” बिसि येशूजी चमैंने ङ्योएमा चमैंइ बिइ, “नासरतथें येशूए बारेर्बै ताँ खी अगमबक्‍ता मुँल, खीजी परमेश्‍वर नेरो म्हिमैंए उँइँरि शक्‍ति मुँबै के लसि छ्याँबै ताँमैं लोमिंमल।
LUK 24:20 दिलेया ङ्योए खेगि चिब्मैं नेरो चिबनाँब्मैंइ सैबै सजैं पिंरिगे बिसि रोमी म्रुँए योर पिंवाइ। धै चमैंइ येशूलाइ क्रूसर च्‍योसि सैवाइ।
LUK 24:21 ‘ङ्योए इस्राएलीमैंलाइ जोगेमिंबै म्‍हि येशून् ग,’ बिसि ङिइ आशा लल। दिलेया येशू सिसि तिंयाँ सोंरो तल् खाँइ।
LUK 24:22 दिलेया ङिए टोलिर्बै को-कोइ च्हमिरिमैंइ बिबै ताँ थेसि ङि प्लेटोयाइमुँ। चमैं तिंयाँ न्हाँक्‍कर्न छगोंर ह्‍यामा
LUK 24:23 येशूए सिनु आम्रोंना। चमैं ङाँर स्‍वर्गदूत युसि येशू सोगोंन् मुँ बिइ रो। चमैं खसि ङिने बिइ।
LUK 24:24 चमैंए ताँ थेसि ङिए को-कोइ थुमैं छगोंर ङ्ह्‍योबर ह्‍यामा च्हमिरिमैंइ खै बिल छाबन् म्रोंइ। दिलेया येशू बिस्याँ आम्रों।”
LUK 24:25 च लिउँइँ येशूजी चमैंने बिइ, “ओ, ताँ आक्होबै आम्हादुमैं! क्हेमैंए सैं खैले छले आक्होब् तयाल? अगमबक्‍तामैंइ बिबै ताँमैं तिफुँइ आक्वें वा!
LUK 24:26 परमेश्‍वरजी कुल्मिंबै जोगेमिंबै म्रुँ ख्रीष्‍टजी छाबै दुःख योंल् त्‍हुम्। झाइले ह्रोंसए मान योंबै कल्ह्‍योर ह्‍याल् आत्हु वा?”
LUK 24:27 च लिउँइँ मोशा नेरो अगमबक्‍तामैंइ खीए बारेर प्‍ह्रिथेंबै ताँमैंए अर्थ खीजी चमैंलाइ क्होमिंइ।
LUK 24:28 चमैं इम्‍माउस नाँसए चेंदो फेखमा येशू अझै क्याइन ह्‍याल् म्हैब् धों लइ।
LUK 24:29 छतसि “म्‍हुँइँस तबर होंइ। तिंयाँ ङिने बालुन् टिमिंन्!” बिसि चमैंइ खीने कर ल्हैदिइ। छबिमा येशू चमैंने बालुन् टिबर धिं न्होंर होंइ।
LUK 24:30 चमैंने बालु चब् चबर क्हुँमा खीजी क्‍हें किंसि परमेश्‍वरलाइ धन्यबाद पिंइ, धै क्‍हें लुँसि चमैंलाइ पिंइ।
LUK 24:31 छलमा बल्‍ल चमैंए मि थोंसि “खीन् मुँन!” बिब् सेइ। दिलेया येशू चमैंउँइँले म्हयाइ।
LUK 24:32 छतमा चमैंइ खेंमैंए न्होंर बिइ, “खीजी ङ्योने घ्‍याँर ताँमैं लसि परमेश्‍वरए छ्वेर्बै ताँए अर्थ क्होमिंमा ङ्योए सैं बेल्‍ले तोंसि छिं ङ्हाँल, आङिं वा?”
LUK 24:33 च त्हेर्न चमैं रेसि यरूशलेमउँइँ एह्‍याइ। धै च्युसे घ्रि कुल्मिंबै चेला चिब्मैं नेरो चमैंने मुँबै अरू म्हिमैंने त्‍होइ।
LUK 24:34 झाइले “प्रभु येशू क्‍ह्रोंसेंन सोगों तसि रेखना! धै सिमोन ङाँर म्रोंखन!” बिसि चमैंने बिइ।
LUK 24:35 झाइले च चेलामैंइ घ्‍याँर तबै ताँ नेरो येशूजी क्‍हें लुँसि पिंमा खीलाइ ङो सेबै ताँ अरू चेलामैंने बिमिंइ।
LUK 24:36 चमैंइ चु ताँमैं लरिमा येशू चमैंए म्‍हाँजोर राखसि “क्‍हेमैंने शान्‍ति तरिगे,” बिइ।
LUK 24:37 छबिमा चमैंइ “मों म्रोंइ” ङ्हाँसि प्‍ल्‍ह लोंसि ङ्हिंयाइ।
LUK 24:38 दिलेया खीजी चमैंने बिइ, “क्‍हेमैं तले आदिदिसि संका लल?
LUK 24:39 ङए यो प्‍हले ङ्ह्‍योद्! ङ येशून् ग, ङलाइ छुइद्। तलेबिस्याँ मोंमैंलम् से आत, ह्रिबै या आत। दिलेया ङलम् ह्रिबै मुँ से या मुँ बिसि क्हेंमैइ म्रोंइमुँ।”
LUK 24:40 छ बिसि खीजी ह्रोंसए यो प्‍हले चमैंने उँउँइ।
LUK 24:41 छाबै क्वेंलै आखाँबै ताँ म्रोंमा चमैं सैं तोंसि प्लटोयाइ। छतमा “क्हेमैंने चबै सैमैं तोइ मुँवा वा?” बिसि खीजी चमैंने ङ्योएइ।
LUK 24:42 छबिमा चमैंइ तेबै ताँग घ्रि खीलाइ पिंइ।
LUK 24:43 छले पिंमा खीजी च ताँग चमैंए उँइँर्न चइ।
LUK 24:44 झाइले खीजी चमैंने बिइ, “मोशाइ प्‍ह्रिबै ठिम, अगमबक्‍तामैंइ प्‍ह्रिबै ताँमैं नेरो भजनसंग्रहर ङए बारेर प्‍ह्रिथेंबै ताँमैं पूरा तल् त्‍हुम् बिसि ङइ ओंसोंन् क्‍हेमैंने मुँमा बिल।”
LUK 24:45 छ बिसि परमेश्‍वरए छ्वेर्बै ताँ क्‍होरिगे बिसि खीजी चमैंए सैं प्ल्हमिंइ।
LUK 24:46 येशूजी चमैंने बिइ, “‘परमेश्‍वरजी कुल्मिंबै म्रुँ ख्रीष्‍टजी दुःख नोल् त्‍हुम्, धै सिसि सोंरोर धबै सोगों तसि रेल् त्‍हुम्,’ बिसि परमेश्‍वरए छ्वेर प्‍ह्रिइमुँ।
LUK 24:47 ह्रोंसइ लबै आछ्याँबै केमैं पिसि परमेश्‍वरउँइँ सैं एइस्याँ म्हिमैंइ पाप क्षमा योंम् बिबै ताँ ओंसों यरूशलेमर बिप्रबइले ताँन् ह्रें-ह्रेंर्बै म्हिमैंने बिमिंल् त्हुम्।
LUK 24:48 तलेबिस्याँ क्‍हेमैंन् चु ताँए ग्वाइ पिंब्मैं ग।
LUK 24:49 परमेश्‍वर आबाजी बाछा फैसि पिंम् बिबै बरदान ङइ क्हेमैंए फिर कुल्मिंब्मुँ। दिलेया परमेश्‍वरजी पिंबै शक्‍ति क्हेमैंए फिर आयुन् समा क्हेमैं चु सहरर्न टिरिद्।”
LUK 24:50 छ बिबै लिउँइँ येशूजी चमैं बेथानिया बिबै नाँस समा बोयाइ, धै ह्रोंसए यो क्वेसि चमैंए फिर आशिक पिंइ।
LUK 24:51 छले आशिक पिंरिबै तोंर्न खी चमैंउँइँले स्वर्गर बोवाइ।
LUK 24:52 छाब् म्रोंसि चमैं परमेश्‍वर‍ए मिं क्वेदै येशू क्ह्रोंसेंन परमेश्‍वर मुँन बिसि सैं तों-तोंइ यरूशलेमउँइँ एखइ।
LUK 24:53 झाइले खोंयोंन् बिलै परमेश्‍वए मिं क्वेदै चमैं यरूशलेमर्बै मन्दिरर्न टिरिमल।
JOH 1:1 ताँन् भन्दा ओंसों बचन मुँल। च बचन परमेश्‍वरने बालु मुँल। धै बचन परमेश्‍वरन् मुँल।
JOH 1:2 खी ओंसों ओंनोंन् परमेश्‍वरने बालु मुँल।
JOH 1:3 तोन्दोंरि सै खीजीन् बनेइ, बनेबै तोन्दोंरि सैमैं खी बिना आबन्दि।
JOH 1:4 खीने बालु खोंयोंइ आखाँबै छ्ह मुँल, च छ्ह म्हिमैंए चारबै ह्‍वे मुँल।
JOH 1:5 च चारबै ह्‍वे मिछु खैबर चारमुँ, धै मिछु खैबइ च चारबै ह्‍वेए फिर खोंयोंइ ट्होल् आखाँ।
JOH 1:6 परमेश्‍वरजी कुल्मिंबै म्हि घ्रि मुँल। चए मिं यूहन्‍‍ना मुँल।
JOH 1:7 यूहन्‍नाउँइँले ताँन् म्हिमैंइ परमेश्‍वरए ताँ क्वेंरिगे बिसि च चारबै ह्‍वेए बारेर ग्वाइ पिंबर युइ।
JOH 1:8 यूहन्‍ना ह्रोंसन् च चारबै ह्‍वे आङिंल, दिलेया च चारबै ह्‍वेए ग्वाइ पिंबर युल।
JOH 1:9 ताँन् म्हिमैंलाइ ज्ञान पिंबै क्‍ह्रोंसेंन्‍बै चारबै ह्‍वे ह्‍युलर युसिन् मुँल।
JOH 1:10 खी ह्‍युलर युल् खाँल। ह्‍युल खीजीन् बनेइ, दिलेया ह्‍युलर्बै म्हिमैंइ खीलाइ ङो आसे।
JOH 1:11 खी ह्रोंसए म्हिमैं ङाँर युइ, दिलेया ह्रोंसए म्हिमैंइ खीए फिर बिश्‍वास आल।
JOH 1:12 दिलेया खा-खाबइ खीए ताँ थेसि खीए फिर बिश्‍वास लइ, खीजी चमैंलाइ परमेश्‍वरए सन्तान तबै हग पिंइ।
JOH 1:13 चमैं म्हिए सैंर मैंब् धोंले से ने को कोंसि फिब आङिं, परमेश्‍वरउँइँले फिब्मैं ग।
JOH 1:14 परमेश्‍वरए बचन म्हिए क्हो किंसि ङ्योए म्हाँजोर युसि टिइ। खी दयाम्हाँया मुँब नेरो कह्रोंसेंन्बै ताँ पोंमल खीए चारबै ह्‍वे ङिइ म्रोंइमुँ, च चारबै ह्‍वे परमेश्‍वर आबाउँइँले युबै घ्रि मत्‍त्रे च्‍हल् मुँल।
JOH 1:15 यूहन्‍नाइ येशूए बारेर ग्वाइ पिंदै थेबै कैले बिइ, “ङए लिलि युबै म्हि ङ भन्दा थेब मुँ, तलेबिस्याँ ङ फिब् भन्दा ओंसों ओंनोंन् खी मुँल। चए बारेर ङइ ओंसोंन् बिल।”
JOH 1:16 खी दयाम्हाँयाइ प्लिंबइले ङ्योइ दयाम्हाँया फिर झन् थेबै दयाम्हाँया योंइँमुँ।
JOH 1:17 स्‍योंम्‍बै मोशालाइ परमेश्‍वरजी खीए ठिम पिंइ, दिलेया येशू ख्रीष्‍टउँइँले क्‍ह्रोंसेंन्‍बै ताँ नेरो बेल्‍ले थेबै दयाम्हाँया ङ्योइ योंइ।
JOH 1:18 परमेश्‍वर खाबज्यै खोंयोंइ या आम्रोंइँमुँ, दिलेया परमेश्‍वरने टिबै खीए घ्रि मत्‍त्रे च्‍हजी परमेश्‍वर खैब मुँ बिसि ङ्योने उँइँमिंइँमुँ।
JOH 1:19 च्हमा यरूशलेमउँइँले यहूदी चिब्मैंइ खेगिमैं नेरो लेबीमैं यूहन्‍नाने “क्‍हि खाब् जा?” ङ्योएबर कुलइ।
JOH 1:20 यूहन्‍नाइ स्योर आतेल्‍ले ग्वाइ पिंइ, “ङ परमेश्‍वरजी कुल्मिंबै म्रुँ ख्रीष्‍ट आङिं।”
JOH 1:21 चमैंइ चने ङ्योएइ, “छ बिस्‍याँ क्‍हि खाब् जा? क्हि एलिया वा?” यूहन्‍नाइ बिइ, “ङ आङिं।” च्हमा चमैंइ ङ्योएइ, “क्हि च अगमबक्‍ता वा?” चइ बिइ, “ङ आङिं।”
JOH 1:22 चमैंइ धबै बिइ, “छ बिस्याँ क्‍हि खाब् जा? ङिने बिद्। ङि कुल्मिंबै म्हिमैंने ङिइ ताँ बिल् त्‍हुम्। क्‍हिइ ह्रोंसए बारेर तो बिम्?”
JOH 1:23 यूहन्‍नाइ बिइ, “स्योंम्बै येशैया अगमबक्‍ताइ बिब् धोंले, ‘याहवेहए ल्हागिर घ्‍याँ क्योंएँन्!’ बिसि, म्हि आटिबै क्ल्ह्‍योर तेबै कै घ्रि ङन् ग।”
JOH 1:24 फरिसीमैंइ कुल्मिंबै म्हिमैंइ
JOH 1:25 यूहन्‍नाने ङ्योएइ, “क्‍हि परमेश्‍वरजी कुल्मिंबै म्रुँ ख्रीष्‍ट या आङिं, एलिया या आङिं, धै अगमबक्‍ता या आङिं, बिस्याँ क्हिइ म्हिमैं तले क्‍युर प्‍ल्हुँसि बप्‍तिस्‍मा पिंरिमुँ?”
JOH 1:26 यूहन्‍नाइ चमैंने बिइ, “ङइ मि म्हिमैं क्‍युर प्‍ल्हुँसि बप्‍तिस्‍मा पिंम्, दिलेया क्‍हेमैंए म्‍हाँजोर क्‍हेमैंइ ङो आसेबै म्हि घ्रि मुँ।
JOH 1:27 खी ङए लिलि युलेया खीए जुत्ताए तनि प्‍ल्ह्‍बर ङ्हेंब ङ आरे।”
JOH 1:28 चु ताँमैं यर्दन स्‍यों क्‍योंजा बेथानिया बिबै क्‍ल्‍ह्‍योर तल। चर यूहन्‍नाइ म्हिमैं बप्‍तिस्‍मा पिंरिल।
JOH 1:29 प्‍हँन्हाँग्धों यूहन्‍नाइ येशू खरिब् म्रोंसि बिइ, “ङ्‌ह्‍योत्ति! ह्‍युलर्बै पाप नोइ बोयाबै परमेश्‍वरए क्‍यु झज।
JOH 1:30 खीए बारेर ङइ ओंसोंन् छले बिल, ‘म्हि घ्रि ङए लिलि युब्‍मुँ, दिलेया ङ फिब् भन्दा ओंसोंन् खी मुँल। छतसि खी ङ भन्दा थेब मुँ।’
JOH 1:31 ङज्यै खी ङो आसेल, दिलेया इस्राएलीमैंइ खी ङो सेरिगे बिसि म्हिमैं क्‍युर प्‍ल्हुँमिंसि बप्‍तिस्‍मा पिंदै ङ खइ।”
JOH 1:32 धै यूहन्‍नाइ चु ग्वाइ पिंइ, “ङइ पबित्र प्ल्ह तोंगुए क्होर स्वर्गउँइँले युसि खीए फिर टिब् म्रोंइ।
JOH 1:33 ओंसों ङइ खी ङो आसेल, दिलेया परमेश्‍वरजी ङ कुलसि बिइ, ‘म्हिमैं क्युर प्ल्हुँमिंसि बप्‍तिस्‍मा पिंन्।’ धै खीजीन् ङने बिल, ‘खाबै फिर क्हिइ पबित्र प्ल्ह तयुसि टिब् म्रोंब्मुँ, पबित्र प्ल्हउँइँले बप्‍तिस्मा पिंबै म्हि खीन् ग।’
JOH 1:34 ङइ म्रोंइमुँ धै ग्वाइ पिंइँमुँ, परमेश्‍वरए च्‍ह खीन् ग।”
JOH 1:35 च प्‍हँन्हाँग्धों यूहन्‍नाइ ह्रोंसए चेलामैं न्होंर्बै चेला ङ्हिंने रारिमा
JOH 1:36 येशू ह्‍यारिब् म्रोंसि बिइ, “ङ्‌ह्‍योत्‍ति, परमेश्‍वरए क्‍यु झज खीन् ग।”
JOH 1:37 चइ बिबै ताँ थेसि च चेलामैं ङ्हिं येशूए लिलि ल्हैदिइ।
JOH 1:38 येशूजी लिग्‍याँइ तोसि ङ्‍ह्‍योमा चमैं खीए लिलि खरिब् म्रोंसि चमैंने ङ्योएइ, “क्हेमैंइ तो म्हैल?” चमैंइ खीने बिइ, “रब्बि, क्हि खनिर टिमुँ?”। (रब्बि बिब गुरु ग)
JOH 1:39 खीजी चमैंने बिइ, “खइरि ङ्‍ह्‍योद्।” चमैं ह्‍यासि खी टिबै क्ल्ह्‍यो म्रोंइ। च त्हिंइर चमैं खीनेन् टिइ तलेबिस्याँ च त्हेर प्लि ह्राल् खाँल।
JOH 1:40 यूहन्‍नाए ताँ थेसि येशूए लिलि ल्हैदिबै च म्हि ङ्हिं न्‍होंरि घ्रि सिमोन पत्रुसए अलि अन्‍द्रियास मुँल।
JOH 1:41 चइ ह्रोंसए आघें सिमोनने त्होसि बिइ, “ङिइ मसीह त्होइ।” (मसीह बिब ग्रिक क्युइर परमेश्‍वरजी कुल्मिंबै म्रुँ ख्रीष्‍ट ग।)
JOH 1:42 अन्द्रियासइ सिमोन येशू ङाँर पखइ। येशूजी च ङाँइ ङ्‍ह्‍योसि बिइ, “क्हि योआनेसए च्ह सिमोन ग, दिलेया ङइ क्हिने केफास बिब्मुँ।” (केफासए अर्थ युमा ग। ग्रिक क्युइरि पत्रुस बिम्।)
JOH 1:43 च प्‍हँन्हाँग्धों येशूजी गालील ह्‍युलर ह्‍याबै सैं लइ। धै खीजी फिलिप बिबै म्हि त्‍होसि चने बिइ, “ङए लिलि प्रद्।”
JOH 1:44 अन्‍द्रियास नेरो पत्रुस धोंलेन् फिलिपै या बेथसेदाथें मुँल।
JOH 1:45 च लिउँइँ फिलिपइ नथानेलने त्होसि बिइ, “मोशाए ठिम नेरो अगमबक्‍तामैंज्यै या म्हि घ्रिए बारेर प्ह्रिथेंल, च म्हि तिंयाँ ङिइ त्होइ खी योसेफए च्‍ह नासरतथें येशू मुँन।”
JOH 1:46 नथानेलइ चने ङ्योएइ, “नासरतउँइँले तोइ छ्याँबै सै खल् खाँम्‌ रो वा?” फिलिपइ चने बिइ, “खइरि ङ्‍ह्‍योद्।”
JOH 1:47 येशूजी नथानेल खी ङाँइ खरिब् म्रोंसि चए बारेर बिइ, “ङ्‌ह्‍योत्ति, पक्‍क इस्राएलीथें घ्रि। चने तोइ छल आरे।”
JOH 1:48 नथानेलइ खीने ङ्योएइ, “क्‍हिजी ङ खैले ङो सेइ?” येशूजी बिइ, “फिलिपइ क्हि हुइब् भन्दा ओंसोंन् ङइ क्‍हि तुँबुए धुँ न्‍होंर म्रोंल।”
JOH 1:49 नथानेलइ खीने बिइ, “रब्बि, क्‍हि परमेश्‍वरए च्‍ह ग! क्हि इस्राएलर्बै म्रुँ ग!”
JOH 1:50 येशूजी चने बिइ, “ङइ क्हि तुँबुए धुँ न्‍होंर म्रोंल बिबर्न क्‍हिइ बिश्‍वास लम्मा? क्‍हिइ लिउँइँ चु भन्दा थे-थेबै सैमैं म्रोंब्‍मुँ।”
JOH 1:51 धबै येशूजी बिइ, “क्ह्रोंसेंन ङइ क्हेमैंने बिमुँ, क्‍हेमैंइ स्‍वर्ग थोंब नेरो परमेश्‍वरए स्‍वर्गदूतमैं ङ म्हिए च्‍हए फिर क्रेदै, तदै लरिब म्रोंब्‍मुँ।” (खी स्वर्ग नेरो पृथ्‍बीए म्हाँजोर्बै घ्याँ ग।)
JOH 2:1 चए नुँइँम्‍धों गालीलर्बै काना नाँसर ब्ह्‍या मुँल। येशूए आमा या चर्न मुँल।
JOH 2:2 येशू नेरो खीए चेलामैं या च ब्ह्‍यार हुइल।
JOH 2:3 चर अँगुरए प्हा नुयामा येशूए आमाइ खीने “चुमैंने प्हा खाँयाँना,” बिइ।
JOH 2:4 येशूजी चने बिइ, “ङइ तो लल् त्हुम् बिसि क्हिइ ङने बिल् आत्हु। तलेबिस्याँ ङए के लबै त्हे अझै आतइमुँ।”
JOH 2:5 छबिमा येशूए आमाइ चर्बै के लबै म्हिमैंने “खीजी बिब् धोंलेन् क्हेमैंइ लद्,” बिइ।
JOH 2:6 यहूदीमैंए छ्यार चोखो तबै ल्हागिरि क्यु ल्हें चैदिमल। छतसि प्र लिटरदे क्यु त्हेबै युँमाए कुँइँडि टुग्लो चर थेंल।
JOH 2:7 येशूजी चर्बै के लबै म्हिमैंने “कुँइँडिर क्यु खासि प्लिंल् लद्,” बिमा। चमैंइ ताँन् कुँइँडि तिगोले क्यु प्लिंमिंइ।
JOH 2:8 च लिउँइँ खीजी चमैंने “च्युगुदे बोसि भत्‍यारर्बै चिबने म्ह्‍योंबर पिंन्,” बिमा चमैंइ च्युगुदे बोसि पिंइ।
JOH 2:9 चिबइ च क्‍यु म्‍ह्‍योंमा क्‍ह्रोंसेंन अँगुरए प्हा तयाल। चु अँगुरए प्हा खनिउँइँले पखए बिसि चइ था आसेल, के लबै म्हिमैंइ बिस्याँ था सेल। छतमा भत्‍यारर्बै चिबइ प्ह्रेंरो हुइसि बिइ।
JOH 2:10 “म्हिमैंइमि ओंसों लिंबै प्हा थुँल् पिंसि लिउँइँ आलिंबै अँगुरए प्हा पिंम्, दिलेया क्‍हिइमि ताँन् भन्दा लिंबै अँगुरए प्हा तोगो समा साँथेंना!”
JOH 2:11 धाँसे ओंसों येशूजी औदिबै चिनु गालील ह्‍युलर्बै काना नाँसर लइ। छले खीजी औदिबै के उँइँमिंइ, छाब् म्रोंसि चेलामैंइ खीए फिर बिश्‍वास लइ।
JOH 2:12 च लिउँइँ खी ह्रोंसए आमा, अलिमैं नेरो चेलामैंने कफर्नहुम नाँसर ह्‍यासि दे त्हिंइ चर्न टिइ।
JOH 2:13 च त्‍हेर यहूदीमैंए दुःखने फ्रेबै चाड खबि छेमा येशू यरूशलेमर ह्‍याइ।
JOH 2:14 खी मन्दिरर ह्‍यामा चर र-क्यु, क्ल्या, तोंगु चुँब्मैं नेरो मुइ त्हेब्मैंइ छों लरिब् स्याइ।
JOH 2:15 छतमा खीजी छोए ट्‍हो बनेसि मन्दिरउँइँले ताँन् म्हिमैं नेरो चमैंए खेदोमैं, र-क्‍युमैं ताँन् बैरु ल्हवाइ, धै मुइ त्हेब्मैंए टेबलमैं प्लिंमिंसि मुइ ताँन् फ्रुँवाइ
JOH 2:16 खीजी तोंगु चुँब्मैंने “क्हेमैंए ताँन् सैमैं छुइले बोह्‍याद्। ङए आबाए धिंलाइ छों लबै धिं आलद्,” बिइ।
JOH 2:17 छ लब् म्रोंसि खीए चेलामैंइ परमेश्‍वरए छ्वेर प्‍ह्रिथेंबै चु ताँ चिइ, “ओ परमेश्‍वर, क्‍हिए धिं ङलाइ बेल्‍ले म्हाँया खम्। छतसि मिइ ख्रोंब् धोंले ङए सैं बेल्‍ले ख्रोंइँमुँ।”
JOH 2:18 दिलेया यहूदी चिबनाँब्मैंइ खीने बिइ, “छले छों लब्मैंलाइ ल्हावाब क्हिने तो हग मुँ? हग मुँ बिस्याँ खैबै औदिबै चिनु उँइँमुँ?”
JOH 2:19 येशूजी चमैंने बिइ, “औदिबै के म्रोंदा ङ्हाँस्‍याँ क्हेमैंइ चु मन्दिर फुवाद्, धै ङइ सोंरोर्न चु बनेमिंब्मुँ।”
JOH 2:20 झाइले यहूदीमैंइ बिइ, “चु मन्दिर बनेबर प्लिच्युसे टुदिं छ्युल, क्‍हिजी सोंरोर्न बनेल् खाँम्मा?”
JOH 2:21 दिलेया खीजी बिबै मन्दिर ह्रोंसए ज्युए बारेर मुँल।
JOH 2:22 येशू सिसि धबै सोगों तमा खीए चेलामैंइ ओंसोंन् येशूजी बिबै ताँमैं चिइ, धै परमेश्‍वरए छ्वेर प्ह्रिथेंबै ताँमैं नेरो येशूजी पोंबै ताँमैं चमैंइ क्वेंइ।
JOH 2:23 झाइले दुःखने फ्रेबै चाडए त्‍हेर येशू यरूशलेमर मुँमा। खीजी लबै औदिबै चिनुमैं म्रोंसि ल्‍हें म्हिमैंइ खीए मिंर बिश्‍वास लइ।
JOH 2:24 दिलेया येशूजी चमैं फिर भर आम्हाँदि।
JOH 2:25 तलेबिस्याँ म्हिमैंए सैं खैब तम् बिब खीजी सेइमुँ। छतसि म्हिए बारेर खाबज्यै खीलाइ लोमिंल् आत्हु।
JOH 3:1 फरिसीमैं न्होंर निकोदेमस मिं मुँबै म्हि घ्रि मुँल। च यहूदी चिबनाँब्मैं न्होंर्बै म्हि घ्रि मुँल।
JOH 3:2 च म्‍हुँइँसर येशू ङाँर खसि खीने बिइ, “ओ गुरु, क्‍हि परमेश्‍वरउँइँले युबै लोमिंबै म्हि ग बिसि ङिइ सेइमुँ, तलेबिस्याँ परमेश्‍वरजी आल्होमिंस्याँ क्‍हिइ लब् धों तबै चु औदिबै चिनुमैं खाबज्यै लल् आखाँ।”
JOH 3:3 येशूजी चने बिइ, “क्‍ह्रोंसेंन ङ क्‍हिने बिमुँ, छारा तसि आफिइ बिस्याँ खाबै या परमेश्‍वरए ग्याल्स म्रोंल् आखाँ।”
JOH 3:4 निकोदेमसइ खीने बिइ, “म्हि खिब् तल् खाँबै लिउँइँ धबै खैले फिल् खाँमुँ? च आमाए फोर धबै होंसि फिल् खाँम्मा?”
JOH 3:5 येशूजी बिइ, “क्‍ह्रोंसेंन ङ क्‍हिने बिमुँ, क्‍यु नेरो परमेश्‍वरए प्ल्हउँइँले आफिइ बिस्याँ खाबै या परमेश्‍वरए ग्याल्सर होंल् आखाँ।
JOH 3:6 ज्युउँइँले फिब ज्युन् ग, धै पबित्र प्ल्हउँइँले फिब प्ल्हन् ग।
JOH 3:7 ङइ क्हिने ‘छारा तसि फिल् त्हुमुँ’ बिमा अचम्मा आङ्हाँन्।
JOH 3:8 खैं खनि ह्‍यादा ङ्हाँमुँ छाइन ह्‍याम्। क्हिइ खैंए कै थेमुँ, दिलेया खैं खनिउँइँले खसि खनि ह्‍याम् च क्हिइ आसे। छलेन परमेश्‍वरए प्ल्हउँइँले फिबै म्हि या छाबन् तम्।”
JOH 3:9 निकोदेमसइ खीने “चु खैले तल् खाँमुँ?” बिसि ङ्योएमा
JOH 3:10 येशूजी चने बिइ, “क्‍हि इस्राएलीमैंए गुरु तसेया च्हग ताँ या आक्हो वा?
JOH 3:11 क्ह्रोंसेंन ङ क्हिने बिमुँ, ङिइ था सेबै ताँए बारेर बिम्, धै ङिइ म्रोंबै ताँए ग्वाइ पिंम्, दिलेया क्हेमैंइ ङिए ताँ आक्वें।
JOH 3:12 ङइ क्हेमैंने पृथ्‍बीर तबै ताँए बारेर बिमा क्‍हेमैंइ आक्‍वें बिस्याँ, झन् स्‍वर्गर्बै ताँ बिइ बिस्याँ खैले क्‍वेंल् खाँमुँ?
JOH 3:13 स्वर्गउँइँले युबै म्हिए च्ह बाहेक अरू खाबै या स्वर्गर आह्‍याइमुँ।
JOH 3:14 “मोशाइ म्हि आटिबै क्ल्ह्‍योर पितलए प्हुरि खैले त्होर च्योसि क्वेल,
JOH 3:15 छलेन ङ म्हिए च्‍हए फिर बिश्‍वास लब्मैंइ खोंयोंइ आनुबै छ्‍ह योंरिगे बिसि ङलाज्यै या क्वेल् त्हुब्मुँ।
JOH 3:16 तलेबिस्याँ खीए च्हए फिर बिश्‍वास लब्मैं खाबै या नास आतरिगे, बरु खोंयोंइ आनुबै छ्ह योंरिगे बिसि परमेश्‍वरजी ह्‍युलर्बै म्हिमैंने ल्‍हें म्हाँया लसि खीए घ्रि दे मुँबै च्‍ह पिंइ।
JOH 3:17 तलेबिस्याँ ह्‍युलर्बै म्हिमैं दोषि ठर्दिबर परमेश्‍वरजी ह्रोंसए च्हलाइ कुलब आङिं, दिलेया चमैंलाइ जोगेबर कुल्मिंइ।
JOH 3:18 “खीए फिर बिश्‍वास लब्मैं दोषि आठर्दि, दिलेया बिश्‍वास आलब्मैं बिस्याँ ओंसोंन् दोषि ठर्दिल् खाँइमुँ, तलेबिस्याँ परमेश्‍वरए घ्रिदे मुँबै च्हए फिर चमैंइ बिश्‍वास आलइँमुँ।
JOH 3:19 ताँ चुन् ग: चारबै ह्‍वे ह्‍युलर युइमुँ, दिलेया म्हिमैंए के दुष्‍ट मुँबइले चमैंइ चारबै ह्‍वे भन्दा मिछु खैबन् खोइ।
JOH 3:20 तलेबिस्याँ दुष्‍ट के लब्मैंइ चारबै ह्‍वेलाइ आखो, तलेबिस्याँ खेंमैंइ लबै के म्‍हिमैंइ म्रोंवाब्मुँ बिसि चमैं चारबै ह्‍वेर आखा।
JOH 3:21 दिलेया क्ह्रोंसेंन्बै छ्ह थोबै म्हिमैं चारबै ह्‍वेर खम्। धै चमैंइ लबै केमैं परमेश्‍वरजी बिब् धोंले लब् ग बिसि छेनले म्रोंल् खाँम्।”
JOH 3:22 च लिउँइँ येशू नेरो खीए चेलामैं यहूदीया ह्‍युलर ह्‍याइ, धै चर दे त्हिंइ समा चमैंने टिमा म्हिमैं बप्‍तिस्‍मा पिंइ।
JOH 3:23 यूहन्‍नाज्यै या सालीम नाँसए रेर्बै एनोन बिबै क्ल्ह्‍योर म्हिमैं बप्‍तिस्‍मा पिंमल, तलेबिस्याँ चर क्यु ल्हें मुँल। छतसि चर ल्हें म्हि खसि बप्‍तिस्मा किंमल।
JOH 3:24 च त्‍हे समा यूहन्‍ना झेलर आफेल।
JOH 3:25 च त्हेर्न यूहन्‍नाए चेलामैं यहूदी घ्रिने क्‍युइ ख्रुसि चोखो तबै बारेर छलफल तइ।
JOH 3:26 चमैं यूहन्‍ना ङाँर खसि बिइ, “गुरु! यर्दन स्‍यों क्‍योंजा क्‍हिने मुँबै म्हिए बारेर ओंसों क्हिइ ग्वाइ पिंल, तिंजोरोम् खीजीन् म्हिमैं क्युर प्ल्हुँसि बप्‍तिस्‍मा पिंरिइमुँ। धै ताँन् म्हिमैं खी ङाँर्न ह्‍यारिइमुँ।”
JOH 3:27 यूहन्‍नाइ बिइ, “परमेश्‍वरजी स्वर्गउँइँले आपिंइ बिस्‍याँ म्हिमैंइ तोइ सै योंल् आखाँ।
JOH 3:28 ‘परमेश्‍वरजी कुल्‍मिंबै म्रुँ ख्रीष्‍ट ङ आङिं, दिलेया खी भन्दा ङ ओंसों कुल्‍मिंब् ग।’ बिसि ङइ बिबै ताँ क्हेमैंइ ओंसोंन् थेइमुँ
JOH 3:29 खाब्ने बालु प्ह्रेंस्यो मुँ, चन् प्ह्रेंरो ग। प्ह्रेंरोए थु प्ह्रेंरो ङाँर रासि खीए कै थेसि बेल्‍ले सैं तोंम्। छतसि ङ बेल्‍ले सैं तोंइँमुँ।
JOH 3:30 खी थेब् तदै ह्‍याल् त्‍हुम्, ङ बिस्याँ च्‍योंब तदै ह्‍याल् त्‍हुम्।
JOH 3:31 “स्‍वर्गउँइँले युबै म्हि ताँन् भन्दा थेब मुँ। पृथ्‍बीर फिब्मैं पृथ्‍बीर्बैन् ग, छतसि पृथ्‍बीर्बै ताँ पोंम्। दिलेया स्‍वर्गउँइँले युबै म्हि ताँन् भन्दा थेब मुँ।
JOH 3:32 खीजी तो म्रोंइँमुँ, तो थेइमुँ, चन् बिम्, दिलेया खीजी बिबै ताँ खाबज्यै आक्‍वें।
JOH 3:33 दिलेया खीए ताँ क्वेंब्मैंइ परमेश्‍वर क्ह्रोंसेंन्बै मुँ बिसि प्रमाण पिंम्।
JOH 3:34 परमेश्‍वरजी कुल्मिंबै म्हिइ परमेश्‍वरए ताँ पोंम्, तलेबिस्याँ परमेश्‍वरजी खीए पबित्र प्ल्हइ प्लिमिंम्।
JOH 3:35 परमेश्‍वर आबाजी खीए च्‍हलाइ म्‍हाँया लम्, छतसि तोन्दोंरि सै खीए योर्न पिंइमुँ।
JOH 3:36 परमेश्‍वरए च्‍हए फिर बिश्‍वास लब्मैंने खोंयोंइ आनुबै छ्‍ह मुँ। परमेश्‍वरए च्हइ बिबै ताँ आङिंब्मैंइ खोंयोंइ आनुबै छ्‍ह योंल् आखाँ, दिलेया परमेश्‍वरए दण्ड खोंयोंइ बिलै चए फिर तरिम्।”
JOH 4:1 यूहन्‍नाइ भन्दा येशूजी ल्हें चेलामैं बनेसि बप्‍तिस्‍म या पिंरिइमुँ बिबै ताँ फरिसीमैंइ थेइ।
JOH 4:2 (येशू ह्रोंसजीन् बप्‍तिस्मा आपिंमल। दिलेया खीए चेलामैंइ म्हिमैं बप्‍तिस्मा पिंमल।)
JOH 4:3 फरिसीमैंइ छाबै ताँ थेइमुँ बिब् सेसि येशू धबै यहूदीया ह्‍युल पिसि गालील ह्‍युलर एह्‍याइ।
JOH 4:4 येशू चर ह्‍यामा सामरिया नाँसउँइँले तसि ह्‍याल् त्‍हुमल।
JOH 4:5 झाइले खी सामरियार्बै सुखार बिबै क्ल्ह्‍योर फेखइ। च क्‍ल्‍ह्‍यो याकूबइ चए च्ह योसेफलाइ पिंबै क्ल्ह्‍‍योए चेंदो मुँल।
JOH 4:6 चर याकूबइ ताबै क्‍यउदु घ्रि मुँल। येशू प्रना प्रन् नारासि च क्यउदुए रेर क्हुँरिल। च त्हेर त्हिंइ आधा तल।
JOH 4:7 च्हमा सामरियाथेंस्यो घ्रि चर क्यु खाबर खइ। येशूजी चने “ङलाइ क्यु थुँल् पिंन्,” बिइ।
JOH 4:8 च त्हेर खीए चेलामैं बजारर चबै सैमैं किंबर ह्‍याल।
JOH 4:9 छबिमा च सामरियाथेंस्योइ खीने बिइ, “क्‍हि, यहूदी ह्रें तसेया ङ सामरियाथेंस्योए योउँइँले खैले क्यु थुँमुँ?” (तलेबिस्याँ यहूदीमैंइ सामरीमैंने खोंयोंइ प्रब्-टिब आल।)
JOH 4:10 येशूजी चने बिइ, “परमेश्‍वरए आशिक नेरो क्हिने क्यु ह्रिबै म्हि क्हिइ ङो सेस्याँ क्हिइ ङने क्यु ह्रिमल, धै खीजी खोंयों बिलै सोल् लमिंबै क्यु क्हिलाइ पिंमल।”
JOH 4:11 च च्हमिरिइ खीने बिइ, “क्हिने क्यु ख्योबै सै आरे, क्यउदु या ल्हें गैरु मुँ। छतसि क्हिजी खनिउँइँले च सोल् लमिंबै क्यु पखमुँ?
JOH 4:12 ङिए खे याकूबइ चु क्यउदु ङिए ल्हागिर बनेमिंइ, धै च, चए सन्तानमैं नेरो चए खेदोमैंज्यै चु क्यउदुर्बै क्यु थुँइ। ङिए खे याकूब भन्दा क्हि थेब वा?”
JOH 4:13 येशूजी चने बिइ, “चु क्‍यु थुँब्‍मैं धबै क्‍यु पिब्मुँ,
JOH 4:14 दिलेया ङइ पिंबै क्‍यु थुँब्मैं खोंयोंइ क्‍यु पिरिब् आरे। तलेबिस्याँ ङइ पिंबै क्‍यु चए न्‍होंर खोंयोंइ आखाँबै छ्ह योंबै ल्हागिरि प्योरिबै मुल तब्मुँ।”
JOH 4:15 छबिमा च च्हमिरिइ खीने बिइ, “छबिस्याँ ङै या च क्यु पिंन्, धै ङ क्यु पिरिब् आरे, धै क्यु खाबरै या चुर खरिल् आत्हु।”
JOH 4:16 येशूजी चने “ह्‍याद्! क्‍हिए प्‍युँ हुइ पउ,” बिइ।
JOH 4:17 च च्हमिरिइ “ङला प्‍युँ आरे,” बिमा। येशूजी चने बिइ, “क्हिए ‘प्‍युँ आरे’ बिसि क्हिइ ठिकन् बिइ।
JOH 4:18 तलेबिस्याँ क्‍हिला ङ्‍हउँलो प्युँ तयाल् खाँइ, तोगो क्‍हिने मुँबै या क्हिए प्युँ आङिं। क्‍हिइ बिबै ताँ क्‍ह्रोंसेंन् ग।”
JOH 4:19 च च्हमिरिइ खीने बिइ, “अँ, क्‍हि अगमबक्‍ता मुँन बिब ङइ था सेइ।
JOH 4:20 ङिए खेमैंइ चु कोंर परमेश्‍वरए मिं क्वेमल, क्‍हेमैं यहूदीमैं बिस्याँ परमेश्‍वरए मिं क्वेबै क्‍ल्‍ह्‍यो यरूशलेमर मत्‍त्रे ग बिम्।”
JOH 4:21 येशूजी चने बिइ, “ओ नानि, ङए फिर बिश्‍वास लद्, च त्हे खसिन् मुँ, च त्हेर क्हेमैंइ परमेश्‍वरए मिं क्‍वेबर चु कोंरै ह्‍याल् आत्हु, यरूशलेमरै या ह्‍याल् त्हुरिब् आरे।
JOH 4:22 क्हेमैंइ म्हाँदिरिबै सै क्‍हेमैंइ आसे। ङि यहूदीमैंइ बिस्‍याँ तो म्हाँदिरिइमुँ बिसि सेइमुँ। तलेबिस्याँ यहूदीमैंउँइँले ताँन् म्‍हिमैंइ मुक्‍ति योंब्मुँ।
JOH 4:23 दिलेया त्हे खसिन् मुँ, च त्हे तोगोंन् ग, परमेश्‍वर आबालाइ क्‍ह्रोंसेंन्ले म्हाँदिब्मैंइ परमेश्‍वर खैबै मुँ बिसि छेनाले क्होसि पबित्र प्ल्हउँइँले म्हाँदिब्मुँ। परमेश्‍वर आबा म्हाँदिब्मैंइ ह्रोंसए खों न्होउँइँले म्हाँदिब्मुँ। छाबै म्हिमैंन् परमेश्‍वर आबाजी म्‍हैम्।
JOH 4:24 परमेश्‍वर प्ल्ह ग। छतसि खीलाइ म्हाँदिब्मैंइ खी खैतबै परमेश्‍वर जा बिसि खीए पबित्र प्ल्हउँइँले मत्‍त्रे छेनाले म्हाँदिल् त्‍हुम्।”
JOH 4:25 च च्हमिरिइ खीने बिइ, “ङइ सेइमुँ परमेश्‍वरजी कुल्मिंबै म्रुँ ख्रीष्‍ट युसिन् मुँ, खोंयों खी युमुँ, च्हमन् खीजीन् तोन्दोंरि ताँमैं ङिने बिमिंब्मुँ।”
JOH 4:26 येशूजी चने बिइ, “तोगो क्‍हिने पोंरिबै म्हि, च ख्रीष्‍ट ङन् ग।”
JOH 4:27 च त्‍हेर्न येशूए चेलामैं बजारउँइँले एखमा। खी च्हमिरि घ्रिने ताँ लरिब् म्रोंसि चमैं प्लेटोयाइ। दिलेया “क्हि तो चैदिइ?” “क्‍हि चु च्हमिरिने तले पोंरिल?” बिसि खाबज्यै आङ्योए।
JOH 4:28 झाइले च च्हमिरि गौरि चर्न वाथेंसि नाँसर ह्‍यासि चर्बै म्‍हिमैंने बिइ,
JOH 4:29 “खो, म्हि घ्रि ङ्‍ह्‍योबर खो! ङइ लबै तोन्दोंरि केमैं खीजी बिमिंइ। खनिज्यै खीन् परमेश्‍वरजी कुल्मिंबै म्रुँ ख्रीष्‍ट मुँइ उ?”
JOH 4:30 चु ताँ थेसि नाँसर्बै म्‍हिमैं त्होंसि येशू ङाँर ह्‍याइ।
JOH 4:31 च त्हेर्न चेलामैंइ येशूने “गुरु, च्हौदे चबै सै चद्,” बिसि यो छ्युँ लइ।
JOH 4:32 दिलेया खीजी चमैंने बिइ, “ङने चबै सै मुँ। च चबै सै तो जा बिसि क्हेमैंइ आसेइमुँ।”
JOH 4:33 छबिमा “खाबज्यै खीलाइ चबै सै पिंखइ उ तो जा?” बिसि चेलामैंइ खें-खेंमैं न्‍होंर्न ङ्योएबर होंइ।
JOH 4:34 येशूजी चमैंने बिइ, “ङलाइ कुल्मिंबै परमेश्‍वर आबाजी बिब् ङिंब नेरो खीजी पिंबै के खाँन् लबन् ङए चबै सै ग।
JOH 4:35 ‘बालि मिंब म्हैंन प्लिल् चैइमुँ,’ बिसि क्हेमैंइ बिमुँ, दिलेया ङइ बिमुँ, म्रोंजरे, सउरजरे छेनाले ङ्‍ह्‍योद्! बालि मिंसि खैंबै त्हे तल् खाँइमुँ।
JOH 4:36 बालि खैंब्मैंइ नों सै योंब्‍मुँ, धै खोंयोंइ आखाँबै छ्ह योंबै ल्हागिर बालि खागु लम्, झाइले प्लुब्मैं नेरो खैंब्मैं ङ्हिंना ङ्हिंन् सैं तोंब्मुँ।
JOH 4:37 तलेबिस्याँ ‘म्हि घ्रिइ प्लुमुँ, धै अर्कोइ खैंम्,’ बिबै ताँ क्ह्रोसेंन्बै ग।
JOH 4:38 अरूइ प्लुबै बालिमैं खैंबर ङइ क्हेमैं कुलइ। अरूइ दुःखले ल्हैदिबै बालि क्हेमैंइ योंइँमुँ।”
JOH 4:39 “ङइ लबै तोन्दोंरि केमैं खीजी ङने बिमिंइ” बिबै च च्हमिरिइ पिंबै ग्वाइ लमा च नाँसर्बै सामरीमैं न्होंरि ल्हें म्हिइ येशूए फिर बिश्‍वास लइ।
JOH 4:40 छतसि सामरीमैं खी ङाँर खसि, “ङिने बालुन् टिमिंन्,” बिसि येशूने यो छ्युँ लइ, धै खी ङ्हिरो समा चर्न टिइ।
JOH 4:41 झाइले खीजी बिबै ताँमैं थेसि ल्‍हें म्हिमैंइ खीए फिर बिश्‍वास लइ।
JOH 4:42 चमैंइ च च्हमिरिने बिइ, “तोगो क्‍हिइ बिबै ताँ थेसि ङिइ खीए फिर बिश्‍वास लब आङिं, दिलेया ङिइ ह्रोंसइन खीए ताँ थेबइले क्ह्रोंसेंन खी ताँन् ह्‍युलर्बै मुक्‍तिदाता मुँन बिसि ङिइ सेइमुँ।”
JOH 4:43 येशू चर ङ्हिरो टिसि छाइले गालीलर ह्‍याइ।
JOH 4:44 अगमबक्‍तालाइ ह्रोंसए नाँसर्बै म्‍हिमैंइ म्हि आच्‍हि बिसि येशू ह्रोंसइन बिल।
JOH 4:45 खी गालील ह्‍युलर फेखमा गालीलथेंमैंइ खीए मान लइ, तलेबिस्याँ चमैं यरूशलेमर दुःखने फ्रेबै चाडर ह्‍यामा खीजी लबै औदिबै केमैं चमैंइ म्रोंल।
JOH 4:46 च लिउँइँ खी धबै गालीलर्बै काना बिबै नाँसर ह्‍याइ। खीजी चर ओंसों क्युउँइँले अँगुरए प्हा लमिंल। कफर्नहुमर कर्मचारि घ्रि मुँल, चए च्ह नरिल।
JOH 4:47 येशू यहूदीयाउँइँले गालीलर युइमुँ बिब् थेसि च कर्मचारि येशू ङाँर ह्‍यासि “ङ ङाँर युसि ङए च्ह सल् लमिंन्।” बिसि यो छ्युँ लइ, तलेबिस्याँ चए च्ह सिबि छेल।
JOH 4:48 दिलेया येशूजी चने बिइ, “क्हेमैंइ थेब् थेबै केमैं नेरो औदिबै चिनुमैं आम्रोंन् समा खैलसे या क्वेंरिब् आरे।”
JOH 4:49 च कर्मचारिइ खीने “गुरु, ङए च्ह आसिबन् खमिंन्,” बिइ।
JOH 4:50 येशूजी चने बिइ, “ह्‍याद्, क्‍हिए च्‍ह सोब्‍मुँ।” चइ येशूजी बिबै ताँ क्वेंसि ह्रोंसए घ्याँ क्हाइ।
JOH 4:51 झाइले च ह्‍यारिमा घ्याँर्न चए के लब्मैंने त्होमा चमैंइ “क्हिए च्ह सोयाइमुँ,” बिइ।
JOH 4:52 चइ चमैंने “कति त्‍हेसेरो सइ?” बिसि ङ्योएमा चमैंइ बिइ, “तेल् त्हिंयाँर्बै घ्रि ह्राबसेरो तापइ पिवाइ।”
JOH 4:53 येशूजी च कर्मचारिने “क्‍हिए च्‍ह सोब्‍मुँ,” बिबै त्हे ओंनोंन् सयान बिब कर्मचारिइ था सेइ। छतमा च नेरो चए ताँन् परवाइ येशूए फिर बिश्‍वास लइ।
JOH 4:54 खी यहूदीया ह्‍युलउँइँले गालील ह्‍युलर खसि लबै औदिबै चिनुमैं न्होंर्बै चु ङ्हिखेबै मुँल।
JOH 5:1 च लिउँइँ यहूदीमैंला चाड खल। छतसि येशू धबै यरूशलेमर ह्‍याइ।
JOH 5:2 यरूशलेमर्बै सहर न्होंरि क्यु मिं मुँबै थेबै म्रा मुँ। च म्राए चेंदो ठाँटि ङ्‍ह मुँबै क्यु ह्रा मुँ। हिब्रू क्‍युइर च ह्राए मिं बेथेस्दा बिमुँ।
JOH 5:3 चर कनमैं, डुँडामैं, स्याले म्हिमैं, ल्‍हें खालर्बै नब्‍मैं रोरिमल। [“क्‍यु खोंयों ओलेब् ङ्‍हे” बिसि चमैं पैंरिमल।
JOH 5:4 तलेबिस्याँ खोंयों म्होंयों परमेश्‍वरए स्‍वर्गदूत घ्रि युसि ह्राए क्‍यु लामिंमल। धै क्‍यु लाबै त्हेर ओंसों क्युर होंबै म्हिला खैबै नब् छब् मुँलेना च नबै म्हि सयामल।]
JOH 5:5 चर सोंच्‍युसे प्रेदिं ओंनोंन् नरिबै म्हि घ्रि मुँल।
JOH 5:6 येशूजी च म्हि चर रोरिब् म्रोंइ, छतमा ल्‍हें त्हे ओंनोंन् च म्हि नरिना बिब् सेसि येशूजी चने “क्‍हिए नब सरिगे ङ्हाँइमुँ वा?” बिइ।
JOH 5:7 नबै म्हिइ खीने बिइ, “चिब, क्‍यु लाबै त्‍हेर ह्रार प्‍ल्हुँमिंबै म्हि ङला खाबै आरे। छतसि ङ ह्‍याना ह्‍यान् ङ भन्दा ओंसोंन् अरूमैंन् क्युर होंयाम्।”
JOH 5:8 येशूजी चने बिइ, “रेदु धै ह्रोंसए क्‍ल्‍ह्‍यो नोसि प्रयाद्।”
JOH 5:9 छ बिबै तोंदोंन् च नबै म्हि सयाइ, धै ह्रोंसए क्ल्ह्‍यो नोसि प्रयाइ। च त्हिंइ प्रिबै त्हिंइ मुँल।
JOH 5:10 छतसि को-कोइ यहूदी चिबनाँब्मैंइ च सबै म्हिने बिइ, “तिंयाँ प्रिबै त्हिंइ ग। छतसि क्‍हिइ क्‍ल्‍ह्‍यो नोइ प्रब आत।”
JOH 5:11 च नबै म्हिइ चमैंने बिइ, “ङलाइ सल् लमिंबै म्हिजीन् ह्रोंसए क्‍ल्‍ह्‍यो नोसि प्रयाद्,” बिइ।
JOH 5:12 चमैंइ च नबै म्हिने “क्हिने ‘क्‍ल्‍ह्‍यो नोसि प्रद्’ बिबै म्हि खाब् जा?” बिसि ङ्योएमा।
JOH 5:13 नब् सबै म्हिइ खी खाब् मुँल बिसि ङो आसेल। तलेबिस्याँ चर म्हिए हुल तबइले येशू च क्ल्ह्‍योउँइँले ह्‍याल् खाँल।
JOH 5:14 च लिउँइँ येशूजी च नबै म्हि मन्दिरर त्होसि बिइ, “ङ्‍ह्‍योद्! क्हि सल् खाँइमुँ। क्हिए फिर तोइ दुःखमैं आखरिगे बिसि धबै पाप आलद्।”
JOH 5:15 च लिउँइँ च म्हि ह्‍यासि यहूदीमैंए चिबनाँब्मैंने, “ङलाइ सल् लमिंबै म्हि येशू मुँनमैं,” बिइ।
JOH 5:16 छ बिब् थेसि यहूदी चिबनाँब्मैंइ येशूलाइ दुःख पिंबर होंइ, तलेबिस्याँ के लल् आतबै प्रिबै त्हिंइर खीजी सल् लल।
JOH 5:17 दिलेया येशूजी चमैंने बिइ, “ङए आबाजी तोगो समा के लरिइमुँ। छतसि ङज्यै या के लरिइमुँ।”
JOH 5:18 चु ताँ थेसि यहूदी चिबनाँब्मैंइ येशूलाइ सैबै घ्याँ म्‍हैइ। तलेबिस्याँ खीजी प्रिबै त्हिंइर के लब् मत्‍त्रे आङिं, दिलेया परमेश्‍वरलाइ ह्रोंसए आबा ग बिसि ह्रोंसलाइन परमेश्‍वर धों तब् ग बिल।
JOH 5:19 येशूजी चमैंने बिइ, “क्ह्रोंसेंन ङ क्हेमैंने बिमुँ, च्हइ ह्रोंसइन तोइ लल् आखाँ, दिलेया आबाजी तो लब् म्रोंमुँ चन् मत्‍त्रे लम्। तलेबिस्याँ आबाजी तो लमुँ, च्हज्यै या छान् लमुँ।
JOH 5:20 तलेबिस्याँ आबाजी च्‍हने म्‍हाँया लम्, धै ह्रोंसजी लरिबै ताँन् केमैं च्‍हने उँइँमिंम्। चु स्याले म्हि सल् लमिंब् भन्दा अझै थेबै केमैं खीजी च्हने उँइँमिंब्मुँ, धै क्हेमैं प्लेटोयाब्मुँ।
JOH 5:21 तलेबिस्याँ खैले आबाजी सियाब्‍मैं सोगों लमिंसि छारा छ्ह पिंमुँ, छलेन च्हज्यै या खाबलाइ छ्ह पिंदा ङ्हाँमुँ, चमैंलाइ छ्ह पिंब्मुँ।
JOH 5:22 तलेबिस्याँ आबाजी खाबलै या निसाफ आल। दिलेया खीजी ताँन् निसाफ लबै के च्हने पिंइँमुँ।
JOH 5:23 तलेबिस्याँ खैले म्हिमैंइ परमेश्‍वर आबाए मान लमुँ, छलेन ताँन् म्हिमैंइ खीए च्हए मान लरिगे। च्‍हए मान आलब्मैंइ च्‍हलाइ कुल्‍मिंबै आबालै या मान आल।
JOH 5:24 “क्ह्रोंसेंन ङ क्हेमैंने बिमुँ, खाबइ ङए ताँ थेसि ङ कुल्मिंबै आबाए फिर बिश्‍वास लमुँ, चइ खोंयोंइ आनुबै छ्ह योंम्। चए निसाफ आत, चइ सजैं योंल् आत्हु, बरु च म्हि सिबउँइँले धबै सोसि खोंयोंइ आखाँबै छ्ह योंइमुँ।
JOH 5:25 क्ह्रोंसेंन ङ क्हेमैंने बिमुँ, च त्हे खसिन् मुँ, च त्हे तोगोन् ग। सियाब्‍मैंइ परमेश्‍वरए च्‍हए कै थेब्मुँ, धै च्हए कै थेब्मैं सोल् योंब्मुँ।
JOH 5:26 तलेबिस्याँ आबा ह्रोंसनेन् खोंयोंइ आखाँबै छ्ह मुँ, छलेन खीजी च्हलाज्यै या छ्हए मुल तबै हग पिंइमुँ।
JOH 5:27 झाइले निसाफ लसि फैसला लबै हग येशूलाइ पिंइँमुँ, तलेबिस्याँ खी म्हिए च्ह ग।
JOH 5:28 चु ताँर अचम्मा आङ्हाँन्, तलेबिस्याँ छगोंर मुँब्मैं ताँनइ खीए कै थेबै त्‍हे खइन मुँ।
JOH 5:29 झाइले चमैं बैरु त्होंखब्‍मुँ: छ्याँबै के लब्‍मैं खोंयोंइ खाखाँबै छ्ह योंबर सोगों तब्‍मुँ, दिलेया आछ्याँबै के लब्‍मैं सजैं योंबर सोगों तब्‍मुँ।
JOH 5:30 “ङ ह्रोंसइन तोइ लल् आखाँ। परमेश्‍वर आबाजी खै बिमुँ छलेन ङइ निसाफ लब्मुँ। छतमा ङइ लबै निसाफ ठिक ठर्दिम्, तलेबिस्याँ ङ ह्रोंसइ मैंब् धोंले आल, दिलेया ङ कुल्‍मिंबै परमेश्‍वर आबाजी मैंब् धोंले लमुँ।
JOH 5:31 “ङइ ह्रोंसए बारेर ग्वाइ पिंइ बिस्‍याँ ङइ बिबै ताँ क्ह्रोंसेंन आतमल।
JOH 5:32 “ङए बारेर ग्वाइ पिंब अर्कोन् मुँ, खीजी ङए बारेर तो बिमुँ, च ताँ क्ह्रोंसेंन ग बिसि ङइ सेइमुँ।
JOH 5:33 “क्हेमैंइ यूहन्‍ना ‍ङाँर ताँ ङ्योएबर म्हिमैं कुल्मिंइ। झाइले चज्यै या ङए बारेर क्‍ह्रोंसेंन्‍बै ग्वाइ पिंइमुँ।
JOH 5:34 “दिलेया ङइ चैदिबै ग्वाइ म्हिमैंल् आङिं, बरु क्‍हेमैं जोगेल् योंरिगे बिसि ङइ चु ताँ बिब् ग।
JOH 5:35 यूहन्‍ना लुँरिबै चारब बत्ति धोंब मुँल। छतसि क्‍हेमैं चए चारबै बत्तिर तिस्याँदे सैं तोंसि टिबै सैं लइ।
JOH 5:36 “दिलेया यूहन्‍नाइ पिंबै ग्वाइ भन्दा ङए बारेर थेबै ग्वाइ मुँ। तलेबिस्याँ आबाजी ङने तो केमैं पूरा लबर पिंइँमुँ, च केमैं ङइ लरिइमुँ, धै आबाजी ङ कुल्मिंब् ग बिसि च केमैंइ ङए बारेर ग्वाइ पिंरिइमुँ।
JOH 5:37 “ङ कुल्मिंबै आबाजीन् ङए बारेर ग्वाइ पिंइँमुँ। दिलेया क्हेमैंइ खीए कै खोंयोंइ आथेइमुँ, खीलाज्यै खोंयोंइ आम्रोंइँमुँ।
JOH 5:38 खीए ताँ क्हेमैंए सैं न्होंर आथें, तलेबिस्याँ खीजी कुल्मिंबै म्हिए फिर क्हेमैंइ बिश्‍वास आल।
JOH 5:39 “परमेश्‍वरए छ्वेर खोंयोंइ आखाँबै छ्ह योंम् बिसि क्‍हेमैंइ म्हैरिम्, ङए बारेर ग्वाइ पिंबम् परमेश्‍वरए छ्वे ग।
JOH 5:40 दिलेया क्‍हेमैं खोंयोंइ आखाँबै छ्ह योंबर ङ ङाँर खल् आङिं।
JOH 5:41 “म्हिमैंइ ‘ङ थेब लरिगे’ बिसि ङ आमैं।
JOH 5:42 दिलेया क्हेमैंइ परमेश्‍वरलाइ सैं न्होंउँइँले म्हाँया आल बिसि ङइ सेइमुँ।
JOH 5:43 ङ ह्रोंसए आबाए मिंर युइमुँ, दिलेया क्‍हेमैंइ ङलाइ आक्वें। कोइ म्हि ह्रोंसए हगर्न खइ बिस्‍याँ क्‍हेमैंइ चए मान लम्।
JOH 5:44 क्‍हेमैं न्होंरि घ्रि-घ्रिइ ह्रोंसलाइन थेब लरिगे ङ्हाँमुँ, दिलेया घ्रि मत्‍त्रे मुँबै परमेश्‍वरउँइँले योंबै मान आम्‍है। छ तसेरो क्‍हेमैंइ ङए फिर खैले बिश्‍वास लल् खाँमुँ?
JOH 5:45 “आबाए उँइँर ङइ क्‍हेमैं छ्याब् ल्हैदिब्‍मुँ बिसि आमैंन्। क्‍हेमैंलाइ छ्याब् ल्हैदिबै म्हि स्‍योंम्‍बै मोशा ग! चए फिर्न क्‍हेमैंइ आशा थेंइँमुँ।
JOH 5:46 दिलेया क्‍हेमैंइ मोशाए फिर क्ह्रोंसेंन्ले बिश्‍वास लइमुँ बिस्‍याँ ङए फिरै या बिश्‍वास लमल। तलेबिस्याँ चइ ङए बारेर प्‍ह्रिथेंल।
JOH 5:47 दिलेया क्‍हेमैंइ मोशाइ प्‍ह्रिबै ताँमैं आक्वें बिस्याँ, ङइ बिबै ताँ खैले क्वेंमुँ?”
JOH 6:1 चु ताँमैं तबै लिउँइँ येशू गालील अथवा तिबेरियस बिबै मा ङ्युँइ क्योंजा ह्‍याइ।
JOH 6:2 झाइले ल्हें म्हि खीए लिलि खइ, तलेबिस्याँ खीजी नबै म्हिमैं सल् लमिंबै औदिबै चिनुमैं चमैंइ ओंसोंन् म्रोंल।
JOH 6:3 येशू चर्बै कोंर ह्‍यासि ह्रोंसए चेलामैंने चर्न टिइ।
JOH 6:4 च त्‍हेर यहूदीमैंए दुःखने फ्रेबै चाड खबि छेल।
JOH 6:5 येशूजी म्हिए हुल खी ङाँइ खरिब् म्रोंसि खीए चेला फिलिपने बिइ, “चुमैं चल् पिंबै ल्हागिर ङ्योइ खनिउँइँले क्हें पखब् ङ्‍हे?”
JOH 6:6 खीजी फिलिपए सैं किंबर चु ताँ बिल, तलेबिस्याँ खीजी तो लबर होंइँमुँ बिब खीजी था सेल।
JOH 6:7 फिलिपइ खीने बिइ, “च्‍हौ ल्‍हें म्हिमैंलाइ च्‍युगु च्‍युगु पिंना बिलेया ङ्हिब्ब्रा चाँदिए मुइइ क्हें किंलेया योरिब् आरे।”
JOH 6:8 येशूए चेलामैं न्होंर्बै सिमोन पत्रुसए अलि अन्‍द्रियासइ बिइ,
JOH 6:9 “ओ गुरु, चुर फ्रेंसि घ्रिने झउए क्हें ङ्‍हबो नेरो ताँग ङ्हिं मुँ। दिलेया च्‍हौ ल्‍हें म्हिए ल्हागिर च्हगइ योम् रो वा?”
JOH 6:10 येशूजी चेलामैंने बिइ, “ताँन् म्हिमैं चु जरे क्हुँल् पिंन्, चर छि मुँबै प्ल्हाबै क्ल्ह्‍यो मुँल।” छतसि ताँन् म्हिमैं चर्न क्हुँइ। चर योद आयोद हजार ङ्‌ह मुँयुँमैं मुँल।
JOH 6:11 झाइले येशूजी च क्‍हें किंसि परमेश्‍वरलाइ धन्‍यबाद पिंइ, धै क्हुँबै म्हिमैं चुमिंइ। छलेन ताँगै या चुमिंइ। चमैंइ म्रेंन्ले चइ।
JOH 6:12 चमैं म्रेंल् खाँबै लिउँइँ येशूजी चेलामैंने बिइ, “चसि ङैंबै क्हें लुँठेमैं खेरो आह्‍यानले खागु लद्।”
JOH 6:13 छतसि ङैबै क्हेंए लुँठेमैं चमैंइ खागु लमा च्युसे ङ्हिं ट्हलो प्‍लिंइ।
JOH 6:14 खीजी लबै छाबै औदिबै चिनु म्रोंसि च म्हिमैंइ “ह्‍युलर युल् त्हुबै अगमबक्‍ता क्ह्रोंसेंन चुन् मुँन,” बिइ।
JOH 6:15 चमैंइ खैच्हिजिले बोसि म्रुँ लबर होंइमुँ बिब् सेसि यशू खी घ्रिन् धबै कोंउँइँ ह्‍याइ।
JOH 6:16 ङेसा तबै लिउँइँ येशूए चेलामैं मा ङ्युँइउँइँ ह्‍‍याइ।
JOH 6:17 धै चमैं डुँङ्गार क्रेसि कफर्नहुमउँइँ ह्‍याबर होंइ। च त्हेर म्हुँइँस तयाल, दिलेया येशू बिस्याँ चेलामैं ङाँर आयुल।
JOH 6:18 चमैं ह्‍यारिमा थेबै खैं खल। छतसि मा ङ्युँइर थेबै क्युए भेल्ग खबर होंइ।
JOH 6:19 च चेलामैं डुँङ्गा ओलेसि किलोमिटर ङ्‍ह ट्हु ह्‍याल् खाँबै लिउँइँ येशू मा ङ्युँइए फि फि प्रसि डुँङ्गाए चेंदो खरिब चमैंइ म्रोंइ। छाब् म्रोंसि चेलामैं बेल्‍ले ङ्हिंयाँइ।
JOH 6:20 दिलेया येशूजी चेलामैंने “आङ्हिंन्! ङन् ग,” बिइ।
JOH 6:21 छ बिब् थेसि चमैं सैं तोंदै येशूलाइ डुँङ्गार क्रेल् पिंइ। धै क्रेबै तोंदोंन् चमैं ह्‍याल् म्हैबै क्ल्ह्‍योर फेनेइ।
JOH 6:22 प्हँन्हाँग्धों मा ङ्युँइए क्‍योंजा मुँबै म्हिमैंइ चर डुँङ्गा घ्रि मत्‍त्रे म्रोंइ। येशू खीए चेलामैंने डुँङ्गार आक्रेल, खीए चेलामैं मत्‍त्रे ह्‍याल बिब चमैंइ सेल।
JOH 6:23 च त्हेर्न तिबेरियास बिबै नाँसउँइँले अरू डुँङ्गामैं येशूजी धन्यबाद पिंसि म्हिमैंलाइ क्हें चल् पिंबै क्ह्‍योर फेखइ।
JOH 6:24 दिलेया येशू नेरो खीए चेलामैं चर आरेब सेसि च म्हिमैं डुँङ्गामैंर क्रेसि येशूलाइ म्‍हैबर कफर्नहुम नाँसर ह्‍याइ।
JOH 6:25 झाइले चमैंइ मा ङ्युँइए चोंजा खीने त्होसि, “ओ गुरु, क्‍हि चुर खोंयों खल? बिसि ङ्योएइ।”
JOH 6:26 येशूजी चमैंने बिइ, “क्ह्रोंसेंन ङ क्हेमैंने बिमुँ, ङइ लबै औदिबै चिनुमैं म्रोंसि क्हेमैंइ ङलाइ म्हैब आङिं, दिलेया म्रेंन्ले क्‍हें चल् योंबइले ङलाइ म्‍हैब् ग।
JOH 6:27 नास तयाबै चबै सैए ल्हागिर दुःख आलद्, बरु खोंयोंइ बिलै सोरिल् योंबै चबै सैए ल्हागिर दुःख लद्। चु खोंयोंन् बिलै सोल् योंबै क्हें म्हिए च्ह ङइ क्हेमैंलाइ पिंब्मुँ, तलेबिस्याँ क्हेमैं खोंयोंन् बिलै सोरिगे बिसि परमेश्‍वर आबाजी ङलाइ त्हाँसि कुल्मिंब् ग।”
JOH 6:28 चमैंइ खीने “छ बिस्‍याँ परमेश्‍वरजी खोबै के लबर ङिइ तो लल् त्हुम्?” बिसि ङ्योएइ।
JOH 6:29 येशूजी चमैंने बिइ, “खीजी कुल्‍मिंबै म्हिए फिर बिश्‍वास लद्, चुन् परमेश्‍वरजी खोबै के ग।”
JOH 6:30 छबिमा चमैंइ येशूने बिइ, “क्हिए फिर बिश्‍वास लरिगे बिसि क्हिजी खैतबै चिनु ङिने उँइँमिंमुँ?
JOH 6:31 ङिए खेमैंइ म्हि आटिबै क्ल्ह्‍योर मन्‍न बिबै चबै सै चइ। छ बिबै ताँ परमेश्‍वरए छ्वेर प्ह्रिइमुँ, ‘खीजी चमैं स्‍वर्गउँइँले क्हें चल् पिंइ।’”
JOH 6:32 येशूजी चमैंने बिइ, “क्‍ह्रोंसेंन ङ क्‍हेमैंने बिमुँ, क्हेमैंलाइ स्वर्गउँइँले क्हें पिंब मोशाइ आङिं, स्वर्गउँइँले क्हेमैंलाइ क्ह्रोंसेंन्बै क्हें पिंब ङए आबा ग।
JOH 6:33 तलेबिस्याँ परमेश्‍वरजी पिंबै क्हें तो जा बिस्‍याँ, च स्‍वर्गउँइँले तयुसि ह्‍युलर्बै म्हिमैंलाइ खोंयोंइ आखाँबै छ्ह पिंबै म्हि ग।”
JOH 6:34 छबिमा चमैंइ खीने बिइ, “प्रभु, चु क्हें ङिलाइ खोंयों बिलै पिंरिद्।”
JOH 6:35 येशूजी चमैंने बिइ, “खोंयोंइ आखाँबै छ्ह पिंबै क्हें ङन् ग। ङ ङाँर खब्‍मैं खोंयोंइ फो ख्रेंरिब आरे, धै ङए फिर बिश्‍वास लब्‍मैं खोंयोंइ क्‍यु पिरिब आरे।
JOH 6:36 दिलेया ङइ क्हेमैंने बिल् खाँइमुँ, क्‍हेमैंइ ङलाइ म्रोंसेया ङए फिर बिश्‍वास आल।
JOH 6:37 ङए आबाजी ङने पिंब्‍मैं ताँन् ङ ङाँर खब्‍मुँ, धै ङ ङाँर खब्‍मैंलाइ ङइ खैलसे या पिरिब् आरे।
JOH 6:38 ह्रोंसए सैंर्बै ताँ पूरा लबर ङ स्वर्गउँइँले युब आङिं, ङलाइ कुल्‍मिंबै आबाए सैंर मैंबै केमैं पूरा लबर ङ युब् ग।
JOH 6:39 खीजी ङने पिंब्‍मैं खाबै आम्हरिगे, दिलेया ह्‍युलर्बै आखिरि त्हिंइर ङइ चमैं ताँन् सोगों लमिंरिगे बिब ङलाइ कुल्‍मिंबै आबाए सैं मुँ।
JOH 6:40 खीए च्ह ङाँइ ङ्‍ह्‍योसि खीए फिर बिश्‍‍वास लब्‍मैं ताँनइ खोंयोंइ आखाँबै छ्‍ह योंरिगे बिब ङए आबाए सैं मुँ। झाइले ह्‍युलर्बै आखिरि त्हिंइर ङइ चमैं सोगों लमिंब्मुँ।”
JOH 6:41 येशूजी “स्‍वर्गउँइँले तयुबै क्हें ङन् ग” बिबइले यहूदीमैंइ खीए बिरोधर गनगन लबर होंइ।
JOH 6:42 “चु योसेफए च्‍ह येशू आङिं वा? चुए आबा-आमा ङिइ ङो सेम्। तोगो चुइ खैले ङ स्‍वर्गउँइँले तयुब् ग बिसि बिमुँ?” बिसि चमैंइ बिइ।
JOH 6:43 येशूजी चमैंने बिइ, “क्‍हेमैं न्होंर गनगन आलरिद्।
JOH 6:44 ङ कुल्‍मिंबै आबाजी ङ ङाँर खबै सैं आपिंइ बिस्‍याँ खाबै या ङ ङाँर खल् आखाँ। दिलेया ङ ङाँर खब्‍मैंलाइन ङइ आखिरि त्हिंइर सोगों लमिंब्मुँ।
JOH 6:45 ‘ताँन् म्हिमैंलाइ परमेश्‍वरजीन् लोमिंब्मुँ,’ बिसि अगमबक्‍तामैंइ परमेश्‍वरए छ्वेर प्‍ह्रिथेंइँमुँ। धै परमेश्‍वर आबाजी बिबै ताँ थेब्मैं नेरो लोब्मैं ङ ङाँर खम्।
JOH 6:46 म्हिमैं खाबज्यै या परमेश्‍वर आम्रोंइँमुँ, दिलेया परमेश्‍वरउँइँले युबै म्हिजी मत्‍त्रे परमेश्‍वर आबा म्रोंइँमुँ।
JOH 6:47 क्ह्रोंसेंन ङ क्हेमैंने बिमुँ, ङए फिर बिश्‍वास लब्मैंने खोंयोंइ आखाँबै छ्‍ह मुँ।
JOH 6:48 खोंयोंइ आखाँबै छ्ह पिंबै क्हें ङन् ग।
JOH 6:49 क्‍हेमैंए खेमैंइ म्हि आटिबै क्ल्ह्‍योर मन्‍न बिबै क्हें चलेया चमैं सियाइ।
JOH 6:50 चु खोंयोंइ आखाँबै छ्ह पिंबै क्हें चब्मैं खोंयोंइ आसिरिगे बिसि चु क्हें स्‍वर्गउँइँले तयुइ।
JOH 6:51 स्‍वर्गउँइँले तयुबै सोल् लमिंबै क्हें ङन् ग। च क्हें चब्मैं खोंयोंन् बिलै सोरिब्मुँ। ह्‍युलर्बै म्हिमैं खोंयोंन् बिलै सोल् योंरिगे बिसि ङइ क्हें पिंब्मुँ। च क्हें ङए ज्यु ग।”
JOH 6:52 “चु म्हिजी खैले ह्रोंसए ज्यु ङ्यो चबर पिंल् खाँम्?” बिसि यहूदीमैं खें-खेंमैंए न्होंरि ताँ लबर होंइ।
JOH 6:53 येशूजी चमैंने बिइ, “क्‍ह्रोंसेंन ङ क्हेमैंने बिमुँ, क्‍हेमैंइ म्हिए च्‍हए ज्यु आचस्याँ, खीए को आथुँस्याँ, क्हेमैंने खोंयोंइ आखाँबै छ्ह तरिब आरे।
JOH 6:54 ङए ज्यु चब्‍मैं नेरो ङए को थुँब्‍मैंने खोंयोंइ आखाँबै छ्ह मुँ, छतसि ह्‍युलर्बै आखिरि त्हिंइर ङइ चमैं सोगों लमिंब्मुँ।
JOH 6:55 तलेबिस्याँ ङए ज्यु क्‍ह्रोंसेंन्‍बै चबै सै ग, धै ङए को क्‍ह्रोंसेंन्‍बै थुँबै सै ग।
JOH 6:56 ङए ज्यु चब्मैं नेरो ङए को थुँब्मैं ङने तरिम्, धै ङ चमैंने बालु तरिम्।
JOH 6:57 सोगों परमेश्‍वर आबाजी ङ कुल्मिंइ, धै आबाए शक्‍तिउँइँलेन् ङ सोरिमुँ। छलेन ङलाइ चब्मैं या ङए शक्‍तिउँइँले सोरिब्मुँ।
JOH 6:58 स्वर्गउँइँले युबै क्हें ङए ज्यु ग। चु क्हें क्हेमैंए खेमैंइ चबै मन्‍न धों तब आङिं, चमैंइ च मन्‍न बिबै क्हें चलेया सियाइ। दिलेया चु क्हें चब्मैं खोंयोंइ या सोरिब्मुँ।”
JOH 6:59 येशूजी चु ताँ कफर्नहुम नाँसर्बै म्हि च्हों धिंर लोमिंमा बिब् ग।
JOH 6:60 चु ताँ थेसि येशूए चेलामैं न्होंर्बै ल्हेइ बिइ, “चु ताँ बेल्‍ले गारो मुँ। खाबइ चु ताँ थेल् खाँमुँ?”
JOH 6:61 दिलेया चु ताँ थेमा खीए चेलामैंइ सैं आक्होसि ताँ लबर होंइ बिब था सेसि येशूजी चमैंने बिइ, “चु ताँ थेसि क्हेमैं ङए लिलि प्रब पिवाम्मा?
JOH 6:62 म्हिए च्ह ओंसों टिबै स्वर्गर एह्‍यारिब् म्रोंस्याँ क्हेमैं तो लमुँ?
JOH 6:63 दिलेया परमेश्‍वरए प्ल्हजी मत्‍त्रे छ्ह पिंमुँ, छाबै के म्हिमैंए भोंइ लल् आखाँ। ङइ क्हेमैंने बिरिबै ताँमैं परमेश्‍वरए प्ल्हउँइँले योंबै खोंयोंइ आखाँबै छ्हर्बै ताँ ग।
JOH 6:64 दिलेया क्‍हेमैंए न्‍होंरि कतिइ ङए ताँमैं आक्वें।” (खीए फिर बिश्‍वास आलब्मैं नेरो खीलाइ धोका पिंसि क्हाल् पिंबै म्हि येशूजी ओंसों ओंनोंन् ङो सेल।)
JOH 6:65 येशूजी धबै बिइ, “छतसि ङए आबाजी ङ ङाँर खबै सैं आपिंस्याँ खाबै या ङ ङाँर खल् आखाँ,” बिसि ङइ ओंसोंन् क्‍हेमैंने बिल।
JOH 6:66 च लिउँइँ येशूए चेलामैं न्होंर्बै ल्हें चेलामैं बिश्‍वास लब् पिसि खीने प्रब पिवाइ।
JOH 6:67 छतमा येशूजी च्युसे ङ्हिं चेलामैंने “क्हेमैं या ङलाइ वाथेंसि ह्‍याम्‍म?” बिसि ङ्योएमा।
JOH 6:68 सिमोन पत्रुसइ बिइ, “ओ प्रभु, क्हिनेन् खोंयोंइ आखाँबै छ्ह पिंबै ताँमैं मुँ। ङि खाबै ङाँर ह्‍याब?
JOH 6:69 क्हि परमेश्‍वरजी कुल्मिंबै पबित्र म्हि ग बिब् सेसि ङिइ क्हिए फिर बिश्‍वास लइमुँ।”
JOH 6:70 येशूजी चमैंने बिइ, “क्‍हेमैं च्युसे ङ्हिं ङइन त्‍हाँब, आङिं वा? दिलेया क्‍हेमैंए न्‍होंरि दुष्‍ट धों तबै म्हि घ्रि मुँ।”
JOH 6:71 येशूजी चु ताँ सिमोन इस्‍करियोतए च्‍ह यहूदाए बारेर बिल, तलेबिस्याँ यहूदा च्युसे ङ्हिं चेलामैं न्‍होंर्बै मुँनबिलेया चइ खीलाइ क्हाल् पिंसि धोका पिंल् म्हैल।
JOH 7:1 च लिउँइँ येशू यहूदीया ह्‍युलर ह्‍यादा आङ्हाँसि गालील ह्‍युलर्न स्युररिल। तलेबिस्याँ यहूदी चिबनाँब्मैंइ खीलाइ सैबै घ्याँ म्हैरिल।
JOH 7:2 च त्‍हेर यहूदीमैंला प्ह्रोंर टिसि म्हाँदिबै चाड खबि छेल।
JOH 7:3 छतसि येशूए अलिमैंइ येशूने बिइ, “क्‍हिजी लरिबै केमैं क्‍हिए चेलामैंइ म्रोंरिगे। छतसि चु क्‍ल्‍ह्‍यो पिसि क्हि यहूदीया ह्‍युलर ह्‍याद्।
JOH 7:4 ह्रोंसइ लबै के अरूइ म्रोंरिगे ङ्हाँब्मैंइ ह्रोंसइ लबै छ्याँबै के आलोथें। छतसि क्‍हिजी चु केमैं लम् बिस्याँ ह्‍युलर्बै म्हिमैंने उँइँमिंन्।”
JOH 7:5 तलेबिस्याँ खीए अलिमैंज्यै या खीए फिर बिश्‍वास आलमल।
JOH 7:6 येशूजी चमैंने बिइ, “ङए ल्हागिर ठिक त्हे तोगो समा आखइमुँ, दिलेया क्हेमैंए ल्हागिरि खोंयों बिलै या छ्याँबन् मुँ।
JOH 7:7 चु ह्‍युलर्बै म्हिमैंइ क्‍हेमैंलाइ हेल् आल, दिलेया ङलाइमि हेल् लम्, तलेबिस्याँ चमैंइ लबै केमैं आछ्याँब मुँ बिसि ङइ बिमिंम्।
JOH 7:8 क्‍हेमैं चाड म्हाँदिबर ह्‍याद्। ङ चु चाड म्हाँदिबर आह्‍या, तलेबिस्याँ ङए त्हे अझै आतइमुँ।”
JOH 7:9 चमैंने छ बिसि खी गालील ह्‍युलर्न टिइ।
JOH 7:10 दिलेया येशूए अलिमैं चाडर ह्‍याल् खाँबै लिउँइँ खी या खाबज्यै आसेल्‍ले चाड म्हाँदिबै क्ल्ह्‍योर ह्‍याइ।
JOH 7:11 चाडर यहूदी चिबनाँब्मैंइ येशूलाइ म्हैदै “खनिर मुँगे?” बिसि ङ्योएरिल।
JOH 7:12 म्हि हुलए न्होंरि खीए बारेर खें-खेंमैंन् ताँ लरिल। कोइ म्हिमैंइ “खी छ्याँबै म्हि ग बिमल,” कोइ “आङिं, चम् म्हिमैंने स्योर तेइ मत्‍त्रे प्रइमुँ बिमल।”
JOH 7:13 दिलेया यहूदी चिबनाँब्मैंने ङ्हिंसि खीए बारेर खाबज्‍यै छेनाले तोइ पोंल् आखाँल।
JOH 7:14 चाड आधा तबि छेमा येशू मन्दिर न्होंर ह्‍यासि ताँमैं लोमिंइ।
JOH 7:15 खीजी लोमिंबै ताँ थेसि यहूदी चिबनाँब्मैंइ अचम्‍मा ङ्हाँसि बिइ, “तोइ आखेबै म्हिइ खैले च्हौ ल्हें ताँमैं ह्रल् खाँगे?”
JOH 7:16 छबिमा येशूजी चमैंने बिइ, “ङइ लोमिंबै ताँमैं ङल् आङिं, दिलेया ङ कुल्‍मिंबै परमेश्‍वर आबाला ग।
JOH 7:17 खाबज्यै परमेश्‍वरजी बिब् धोंले के लदा ङ्हाँम् बिस्याँ, ‘ङइ लोमिंबै ताँ परमेश्‍वरउँइँले युब् उ, ह्रोंसए सैंर मैंसि पोंब् जा’ बिसि चइ सेब्मुँ।
JOH 7:18 ह्रोंसन् ह्रब् सेब् प्हैंसि पोंब्मैंइ ह्रोंसए मान म्हैम्, दिलेया खाबइ खी कुल्मिंबै परमेश्‍‍वरए मान म्हैमुँ, चन् क्ह्रोंसेंन्बै सैं प्ह्‍याबै म्हि ग। चइ तो ताँरै या स्योर आतेनाले क्ह्रोंसेंन्बै ताँ पोंम्।
JOH 7:19 ङ्योए खे मोशाइ क्‍हेमैंने परमेश्‍वरए ठिम पिंइ, आपिं वा? दिलेया क्‍हेमैं खाबज्‍यै च ठिम आम्हाँदि। क्हेमैं झन् ङलाइ सैल् म्‍हैब् वा?”
JOH 7:20 म्हिए हुलइ बिइ, “क्‍हि मोंइ स्‍याइमुँ उ तो जा? खाबइ क्‍हि सैल् म्हैमु?”
JOH 7:21 येशूजी चमैंने बिइ, “ङइ औदिबै के घ्रि लब् म्रोंसि क्हेमैं ताँन् आचम्म ङ्हाँल् वा।
JOH 7:22 मोशाइ क्‍हेमैंने ज्युर चिनु लबै छ्या पिंइमुँ। (दिलेया चु छ्या मोशाउँइँले तखब आङिं, मोशा भन्दा ओंसोंबै खेमैंउँइँले तखब ग।) दिलेया प्रिबै त्हिंइ तलेया क्हेमैंइ ह्रोंसए च्हमैंए ट्हुबिर चिनु लम्।
JOH 7:23 क्हेमैंइ मोशाइ पिंबै ठिम म्हाँदिबर प्रिबै त्हिंइर ह्रोंसए च्हए ट्हुबिर चिनु लम् बिस्याँ, ङइ प्रिबै त्हिंइर म्हि घ्रिए ताँन् नब् सल् लमिंमा क्हेमैं तले ङने ह्रिस खल?
JOH 7:24 छतसि म्हि ङ्‍ह्‍योसि निसाफ आलद्, दिलेया छेनाले ताँ क्होसि निसाफ लद्।”
JOH 7:25 यरूशलेमर्बै को-कोइ म्हिमैंइ बिइ, “चिबनाँब्मैंइ सैल् म्‍हैबै म्हि चुन् आङिं वा?
JOH 7:26 ङ्‌ह्‍योत्ति! ताँन् म्हिमैंए ओंसों चइ आङ्हिंन्ले पोंरिइमुँ, दिलेया खाबज्यै चने तोइ आबिइमुँ! चुन् परमेश्‍वरजी कुल्मिंबै म्रुँ ख्रीष्‍ट ग बिसि धर्म-गुरुमैंइ क्‍ह्रोंसेंन था सेना उ तो जा?
JOH 7:27 चु म्हि खनिउँइँले खब् जा बिसि ङिइ सेइमुँ। दिलेया परमेश्‍वरजी कुल्मिंबै म्रुँ ख्रीष्‍ट युमा खी खनिर्बै जा बिसि खाबज्यै सेल् खाँरिब् आरे।”
JOH 7:28 येशूजी मन्दिरर लोमिंरिमा थेबै कैले बिइ, “क्हेमैंइ ङलाइ ङो सेम्, धै ङ खनिउँइँले युइ बिबै ताँ या क्हेमैंइ सेइमुँ। ङ ह्रोंसए सैंर मैंब् धोंले युब आङिं, दिलेया ङलाइ कुल्मिंबै परमेश्‍वर आबा क्ह्रोंसेंन्बै मुँ। क्हेमैंइ खीलाइ ङो आसे।
JOH 7:29 दिलेया ङइ खीलाइ ङो सेमुँ, तलेबिस्याँ खीजीन् ङ कुल्मिंसि खीउँइँलेन् युब् ग।”
JOH 7:30 चु ताँ थेसि चर्बै म्हिमैंइ खीलाइ क्हाबर होंइ। दिलेया खाबज्यै खीए फिर यो झोंल् आखाँ। तलेबिस्याँ खीए सिबै त्हे अझै आतल।
JOH 7:31 दिलेया चर मुँबै ल्‍हें म्हिमैंइ खीए फिर बिश्‍वास लसि बिइ, “परमेश्‍वरजी कुल्मिंबै म्रुँ ख्रीष्‍ट युमा येशूजी लबै औदिबै चिनुमैं भन्दा थेबै केमैं लम् रो वा?”
JOH 7:32 चर्बै म्हि हुलइ खीए बारेर ताँमैं लरिब फरिसीमैंइ थेइ। छतसि ख्रो पिंबै खेगि चिब्मैं नेरो फरिसीमैंइ मन्दिर रुँबै सिपाइमैं खीलाइ क्हाबर कुलइ।
JOH 7:33 येशूजी चमैंने बिइ, “अझै दे त्हे ङ क्‍हेमैंने बालु टिब्‍मुँ, च लिउँइँ ङ कुल्मिंबै आबा ङाँर ह्‍याब्‍मुँ।
JOH 7:34 च त्‍हेर क्‍हेमैंइ ङलाइ म्‍हैब्‍मुँ, दिलेया स्यारिब् आरे। तलेबिस्याँ ङ ह्‍याबै क्‍ल्‍ह्‍योर क्‍हेमैं खल् आखाँ।”
JOH 7:35 छबिमा यहूदीमैंइ खें-खेंमैंए न्होंरि बिइ, “चु म्हि खनिर ह्‍याल् म्हैगे? ङ्योइ खी स्याल् आखाँ बिब? चु ह्रोंसए ह्‍युल पिसि खन्तोंदोंन् प्हुँइ टिबै यहूदीमैं ङाँर ह्‍यासि ग्रिकमैंलाइ लोमिंल् ङ्हाँइँमुँ उ तो जा?
JOH 7:36 ‘क्‍हेमैंइ ङलाइ म्‍हैब्‍मुँ, दिलेया स्यारिब् आरे’, धै ‘ङ ह्‍याबै क्‍ल्‍ह्‍योर क्‍हेमैं खल् आखाँ।’ बिसि चुइ बिबै ताँ तो मुँगे?”
JOH 7:37 धबै चाडए लिउँबै मुख्य त्हिंइर, येशू ताँन् म्हिमैंए ओंसों रासि थेबै कैले छ बिइ, “खाबै या क्‍यु पिइ बिस्याँ च ङ ङाँर खरिगे धै थुँरिगे।
JOH 7:38 परमेश्‍वरए छ्वेर बिब् धोंले ‘ङए फिर बिश्‍वास लब्मैंए सैं न्‍होंउँइँले सोगों लमिंबै क्‍युए स्योंमैं त्होंब्मुँ।’”
JOH 7:39 येशूजी चु ताँ पबित्र प्ल्हए बारेर बिल। तलेबिस्याँ येशूए फिर बिश्‍वास लब्‍मैंइ पबित्र प्ल्ह योंमल। च त्‍हेर परमेश्‍वरजी खीए प्ल्ह म्हिमैं फिर आकुलल। तलेबिस्याँ च त्हे समा येशू मान योंबै स्‍वर्गर आह्‍याल।
JOH 7:40 येशूजी बिबै ताँ थेसि को-कोइ म्हिमैंइ बिइ, “क्‍ह्रोंसेंन खिम् युल् त्हुबै अगमबक्‍ता मुँन।”
JOH 7:41 को-कोइ “खी परमेश्‍वरजी कुल्मिंबै म्रुँ ख्रीष्‍ट ग,” बिइ। दिलेया को-कोइ “म्रुँ ख्रीष्‍ट गालीललउँइँले खम् रो वा?” बिइ।
JOH 7:42 “म्रुँ ख्रीष्‍ट दाऊदए कुलकर्बै तब्‍मुँ, धै दाऊद नाँस बेथलेहेमउँइँलेन् खब्मुँ। बिसि परमेश्‍वरए छ्वेर आप्ह्रिइमुँ वा?”
JOH 7:43 येशूए बारेर्बै चु ताँइ लमा म्हिमैं न्‍होंर आक्ह्रिन् तयाइ।
JOH 7:44 चमैं न्होंरि को-कोइ खीलाइ क्‍हाल् म्‍हैइ। दिलेया खाबज्यै खीए फिर यो आझोंल।
JOH 7:45 छतमा येशू क्हाबर कुल्मिंबै मन्दिर रुँबै सिपाइमैं छलेन् एखमा ख्रो पिंबै खेगि चिब्मैं नेरो फरिसीमैंइ चमैंने “क्हेमैंइ च तले क्हाइ आपखल?” बिसि ङ्योएइ।
JOH 7:46 सिपाइमैंइ बिइ, “चु म्हिइ पोंब् धों तबै छ्याँबै ताँ अरू खाबज्‍यै खोंयोंइ आपोंइँमुँ!”
JOH 7:47 छबिमा फरिसीमैंइ चमैंने बिइ, “क्‍हेमैं या चइ लुवाइ उ तो जा?
JOH 7:48 ङि चिबनाँब्मैं नेरो फरिसीमैंए न्होंर खाबज्‍यै चए ताँ क्वेंब क्‍हेमैंइ म्रोंइँमुँ वा?
JOH 7:49 चुर्बै म्हि हुलइ परमेश्‍वरए ठिमर्बै ताँमैं आसेइमुँ, दिलेया चमैंइ सराप योंइँमुँ।”
JOH 7:50 ओंसोंन् येशू ङाँर खबै चमैंए न्होंर्बै निकोदेमस बिबै म्हिइ चिबनाँब्मैंने बिइ,
JOH 7:51 “ङ्योए ठिमर बिब् धोंले छ्याब् ल्हैदिबै म्हिए ताँ आथेल्‍ले, धै चइ लबै केमैं छेनाले आक्होल्‍ले चलाइ छ्याब् ल्हैदिल् तम् रो वा?”
JOH 7:52 चमैंइ चने बिइ, “क्‍हि या गालीलथें वा? परमेश्‍वरए छ्वे म्हैसि छेनाले खेद्। गालीलउँइँले अगमबक्‍ता आख बिसि क्हिइ सेब्मुँ।”
JOH 7:53 [झाइले चमैं ताँन् ह्रों-ह्रोंसए धिंर ह्‍याइ।
JOH 8:1 दिलेया येशू जैतून बिबै कोंर ह्‍याइ।
JOH 8:2 प्‍हँन्हाँग्धों न्‍हाँक्‍कर्न खी धबै कोंउँइँले युसि मन्दिरर ह्‍यामा ताँन् म्हिमैं खी ङाँर खइ। धै येशू क्हुँसि चमैं लोमिंर होंइ।
JOH 8:3 च त्हेर्न शास्‍त्रिमैं नेरो फरिसीमैंइ च्हमिरि घ्रि फ्रें क्ल्योंरिबै त्हेर स्‍यासि क्हाइ पखइ, धै ताँन् म्हिमैंए म्हाँजोर राल् पिंइ।
JOH 8:4 चमैंइ यशूने बिइ, “ओ गुरु, चु च्हमिरि फ्रें क्ल्योंरिबै त्हेर ङिइ स्‍याइ।
JOH 8:5 परमेश्‍वरजी पिंबै ठिमर मोशाइ छाबै म्हिमैं युँमाइ प्रिंसि सैवाद् बिइमुँ। चु ताँर क्‍हिजी तो बिमुँ?”
JOH 8:6 चमैंइ येशूए सैं किंबर चु ताँ बिल। दिलेया येशू कुरसि योरिइ सर प्ह्रिबर होंइ।
JOH 8:7 चमैंइ घरि-घरि येशूने ताँमैं ङ्योएरिमा येशू रासि चमैंने बिइ, “क्‍हेमैंए न्‍होंरि खाबइ तिफुँइ पाप आलइमुँ, चइन ओंसों चु च्हमिरि युँमाइ प्रिंरिगे।”
JOH 8:8 छ बिबै लिउँइँ येशू धबै कुरसि योरिइ सर प्‍ह्रिइ।
JOH 8:9 चु ताँ थेमा ओंसों खिब्मैं त्होंह्‍याइ, धै घ्रि घ्रिले अरू म्हिमैं या त्होंह्‍याइ। छतमा येशू घ्रिन् च च्हमिरिने तयाइ, च च्हमिरि बिस्याँ खीए ओंसों रारिल।
JOH 8:10 झाइले येशूजी च च्हमिरि ङाँइ ङ्‍ह्‍योसि बिइ, “ओ नानि, चमैं खनिर ह्‍याइ? खाबज्यै क्हिए फिर छ्याब् आल्हैदि वा?”
JOH 8:11 चइ बिइ, “प्रभु, खाबज्यै या आल्हैदि।” येशूजी बिइ, “ङज्‍यै या क्‍हि छ्याब् आल्हैदि। ह्‍याद्! तारे धबै पाप आलद्।”]
JOH 8:12 येशूजी धबै चमैंने बिइ, “ङ ह्‍युलर्बै चारबै ह्‍वे ग। ङए लिलि प्रबै म्हि मिछु खैबर प्रल् त्‍हुरिब् आरे। दिलेया चइ खोंयोंइ आखाँबै छ्ह पिंबै चारबै ह्‍वे योंब्‍मुँ।”
JOH 8:13 येशूए ताँ थेसि फरिसीमैंइ खीने बिइ, “क्‍हिजी ह्रोंसए बारेर ग्वाइ पिंरिइमुँ। छतसि क्‍हिए ग्वाइ क्‍ह्रोंसेंन्‍बै तल् आखाँ।”
JOH 8:14 येशूजी बिइ, “ङइ ह्रोंसए बारेर ग्वाइ पिंलेना ङए ग्वाइ क्ह्रोंसेंन्बै मुँ। ङ खनिउँइँले युजी खनिर ह्‍यासिन् मुँ बिसि ङइ सेइमुँ, दिलेया ङ खनिउँइँले युइ धै खनिर ह‍यासिन् मुँ बिब क्हेमैंइ आसे।
JOH 8:15 क्‍हेमैंइ म्हिइ लब् धोंले निसाफ लमुँ, ङइ खाबलाज्यै या निसाफ आल।
JOH 8:16 ङइ निसाफ लइ बिस्याँ ङइ लबै निसाफ क्ह्रोंसेंन्बै तब्मुँ, तलेबिस्याँ निसाफ लब ङ घ्रि आरे, ङ कुल्मिंबै आबा या ङने बालु मुँ।
JOH 8:17 क्हेमैंए ठिमरै या म्हि ङ्हिंइ पिंबै ग्वाइ क्ह्रिबिस्याँ च ताँ क्ह्रोंसेंन्बै तब्मुँ बिसि प्ह्रिइमुँ।
JOH 8:18 ङए बारेर ङ ह्रोंसइन ग्वाइ पिंमुँ, धै ङ कुल्मिंबै आबाज्यै या ङए बारेर ग्वाइ पिंमुँ।”
JOH 8:19 चमैंइ खीने “क्‍हिए आबा खनिर मुँ?” बिसि ङ्योएमा येशूजी चमैंने बिइ, “क्‍हेमैंइ ङै या ङो आसे, ङए आबालाज्यै या ङो आसे। क्‍हेमैंइ ङलाइ ङो सेस्‍याँ ङए आबालाज्यै ङो सेमल।”
JOH 8:20 चु ताँमैं येशूजी मन्दिरर मुइ झोंबै बाकस ङाँर क्हुँसि बिब् ग। दिलेया खाबज्‍यै या खीलाइ आक्‍हा। तलेबिस्याँ खीए सिबै त्हे अझै आतल।
JOH 8:21 येशूजी धबै चमैंने बिइ, “ङ छुइले ह्‍याब्मुँ, झाइले क्‍हेमैंइ ङ म्‍हैब्‍मुँ, दिलेया क्‍हेमैं ह्रोंसए पापर्न सियाब्मुँ। तलेबिस्याँ ङ ह्‍याबै क्ल्ह्‍योर क्‍हेमैं खल् आखाँ।”
JOH 8:22 छबिमा यहूदी चिबनाँब्मैंइ बिइ, “तो बिगे, छ बिब? ‘ङ ह्‍याबै क्ल्ह्‍योर क्हेमैं खल् आखाँ’ बिब चुम् सिल् म्हैमुँ उ तो जा?”
JOH 8:23 धबै येशूजी चमैंने बिइ, “क्‍हेमैं न्होंउँइँबै ग। ङ क्‍होउँइँबै ग। क्‍हेमैं चु ह्‍युलर्बै ग। ङ चु ह्‍युलर्बै आङिं।
JOH 8:24 ङइ क्हेमैंने बिइ, क्‍हेमैं ह्रोंसए पापर्न सिब्मुँ, तलेबिस्याँ ‘ङ जोगेमिंबै म्रुँ ख्रीष्‍ट ग’ बिसि क्हेमैंइ आक्वेंस्याँ क्हेमैं ह्रोंसए पापर्न सिब्मुँ।”
JOH 8:25 चमैंइ खीने “छ बिस्‍याँ क्‍हि खाब जा?” बोसि ङ्योएमा येशूजी चमैंने बिइ, “ङ जोगेमिंबै म्रुँ ख्रीष्‍ट ग बिसि ङइ ओंसों ओंनोंन् क्हेमैंने बिइना मुँ।
JOH 8:26 ङइ क्‍हेमैंए बारेर बिल् त्हुबै ताँमैं नेरो निसाफ लल् त्हुबै ताँमैं ल्हें मुँ। दिलेया ङ कुल्‍मिंबै परमेश्‍वर क्‍ह्रोंसेंन्‍ब मुँ, छतसि खीउँइँले ङइ तो थेमुँ चन् ङइ ह्‍युलर्बै म्हिमैंने बिमिंमुँ।”
JOH 8:27 चु ताँ खीजी परमेश्‍वर आबाए बारेर बिब् ग बिसि चमैंइ आक्‍हो।
JOH 8:28 छतमा येशूजी चमैंने बिइ, “क्‍हेमैंइ म्हिए च्‍ह कैंडो क्वेवाबै लिउँइँ ‘ङम् ङन् ग’ बिसि क्‍हेमैंइ सेब्‍मुँ, ङए हगउँइँले ङ तोइ आल, दिलेया आबाजी लोमिंबै ताँमैं मत्‍त्रे ङइ लम् बिसि क्हेमैंइ सेब्मुँ।
JOH 8:29 ङ कुल्‍मिंबै आबा ङने बालुन् मुँ। खीजी ङ घ्रिन् आवाथेंइँमुँ, तलेबिस्याँ ङइ खोंयों बिलैया खीए सैं तोंन् लबै केमैं मत्‍त्रे लम्।”
JOH 8:30 खीजी छाबै ताँ पोंमा ल्‍हें म्हिमैंइ खीए फिर बिश्‍वास लइ।
JOH 8:31 येशूजी खीए फिर बिश्‍वास लबै यहूदीमैंने बिइ, “क्‍हेमैंइ ङइ बिबै ताँ ङिंस्‍याँ क्‍हेमैं ङए क्‍ह्रोंसेंन्‍बै चेलामैं तब्‍मुँ।
JOH 8:32 झाइले क्हेमैंइ क्‍ह्रोंसेंन्बै ताँ तो जा बिसि सेब्मुँ, धै च क्ह्रोंसेंन्बै ताँइ क्हेमैंलाइ दुःखउँइँले फ्रेमिंब्मुँ।”
JOH 8:33 दिलेया चमैंइ खीने बिइ, “ङिम् अब्राहामए सन्तानमैं ग। तोगो समा ङि खाबै केब्छैं तसि टिल् आत्हुइमुँ। ‘क्हेमैं दुःखउँइँले फ्रेयाब्मुँ’ बिसि खैले बिल?”
JOH 8:34 येशूजी चमैंने बिइ, “क्ह्रोंसेंन ङ क्हेमैंने बिमुँ, पाप लब्मैं ताँन् पापए केब्छैं ग।
JOH 8:35 धिंर्बै केब्छैं खोंयोंन् बिलै च धिंर टिल् आयों, दिलेया च्‍ह बिस्याँ खोंयोंन् बिलै धिंर्न टिल् योंम्।
JOH 8:36 छतसि परमेश्‍वरए च्‍हजी क्हेमैंलाइ दुःखउँइँले फ्रेमिंइ बिस्याँ क्ह्रोंसेंन क्हेमैं दुःखउँइँले फ्रेयाब्मुँ।
JOH 8:37 क्‍हेमैं अब्राहामए सन्तानमैं ग बिसि ङइ सेइमुँ। दिलेया क्‍हेमैंइ ङ सैल् म्हैमुँ, तलेबिस्याँ ङइ बिबै ताँ क्‍हेमैंइ थेदा आङ्हाँ।
JOH 8:38 ङए आबा ङाँर मुँमा ङइ तो-तो म्रोंइँमुँ, चन् ङइ बिमुँ। छलेन क्‍हेमैंए आबाउँइँले क्‍हेमैंइ तो थेमुँ चन् लमुँ।”
JOH 8:39 चमैंइ खीने बिइ, “ङिए आबाम् अब्राहाम ग।” येशूजी चमैंने बिइ, “क्‍हेमैं अब्राहामए सन्तानमैं ङिंब् ग बिस्‍याँ अब्राहामइ लब् धों तबै केमैं क्‍हेमैंज्‍यै लमल।
JOH 8:40 ङइ परमेश्‍वरउँइँले थेबै क्ह्रोंसेंन्बै ताँ क्हेमैंने बिइमुँ, दिलेया तोगो क्‍हेमैंइ ङ सैल् म्हैइमुँ। अब्राहामइ छाबै के आलल।
JOH 8:41 दिलेया क्‍हेमैंइमि क्‍हेमैंए आबाइ तो लइ चन् लइमुँ।” चमैंइ खीने बिइ, “ङि प्रोग्यामैं आङिं! परमेश्‍वरन् ङिए घ्रि मत्‍त्रे आबा ग।”
JOH 8:42 येशूजी चमैंने बिइ, “क्‍हेमैंए आबा क्‍ह्रोंसेंन परमेश्‍वरन् ङिंस्‍याँम् क्‍हेमैंइ ङने म्हाँया लमल, तलेबिस्याँ ङ परमेश्‍वरउँइँले युब् ग। ङ ह्रोंसन् युदा ङ्हाँसि युब आङिं, दिलेया परमेश्‍वरजी ङ कुल्मिंब् ग।
JOH 8:43 ङइ बिबै ताँमैं क्‍हेमैंइ तले आक्‍हो? तलेबिस्याँ क्हेमैंइ ङइ बिबै ताँमैं थेल् आखाँ।
JOH 8:44 क्‍हेमैं ह्रोंसए आबा दुष्‍टल् ‍ग। छतसि क्‍हेमैंए आबाए सैंर मैंब् धोंले क्हेमैंइ लल् म्हैम्। चम् ओंसों ओंनोंन् सैब् म्‍लोब लमल। क्‍ह्रोंसेंन्‍बै ताँने चए ताँ खोंयोंन् बिलै क्ह्रिल् आखाँ। तलेबिस्याँ चने क्ह्रोंसेंन्बै ताँ तिफुँइ आरे। छतसि स्‍योर ताँ पोंम्, चए ब्योर खैतब् मुँ चइ छाबन् पोंम्, तलेबिस्याँ च स्‍योर्गु ग, च स्‍योर तेब्‍मैंए आबा ग।
JOH 8:45 ङइ क्‍ह्रोंसेंन्‍बै ताँ पोंमुँ, दिलेया क्‍हेमैंइ ङए फिर बिश्‍वास आल।
JOH 8:46 क्‍हेमैंए न्‍होंरि खाबइ ङए फिर छ्याब् ल्हैदिल् खाँमुँ? ङइ क्ह्रोंसेंन्बै ताँ पोंम् बिस्याँ क्हेमैंइ तले ङए फिर बिश्‍वास आल?
JOH 8:47 परमेश्‍वरए सन्तानइ परमेश्‍वरए ताँ थेम्। क्‍हेमैं परमेश्‍वरए सन्तान आङिं। छतसि क्हेमैंइ परमेश्‍वरए ताँ आथे।”
JOH 8:48 यहूदीमैंइ येशूने बिइ, “क्‍हि सामरियाथें ग, क्हिलाइ मोंइ स्याइमुँ?” बिसि ङिइ बिबै ताँ ठिक आङिं वा?
JOH 8:49 येशूजी बिइ, “ङलाइ मोंइ आस्‍याइमुँ। ङ ङए आबाए मान लमुँ, दिलेया क्‍हेमैंइ ङलाइ म्हि आच्‍हिइमुँ।
JOH 8:50 दिलेया ङ ह्रोंसए मान आम्है, ङए मान लरिगे ङ्हाँब घ्रि मुँ खीजी ङए निसाफ लमुँ।
JOH 8:51 क्ह्रोंसेंन ङ क्हेमैंने बिमुँ, ङइ बिबै ताँ ङिंब्मैं खोंयोंइ सिल् त्हुरिब् आरे।”
JOH 8:52 यहूदी चिबनाँब्मैंइ खीने बिइ, “क्हि मोंइ स्‍याइमुँ बिसि ङिइ तोगो छेनाले था सेइ! ङिए खे अब्राहाम सियाइ, धै अगमबक्‍तामैं या सियाइ, दिलेया क्‍हि बिस्याँ ‘ङइ बिब् ङिंब्मैं खोंयोंइ सिल् त्हुरिब् आरे बिमुँ।’
JOH 8:53 ङिए खे अब्राहाम नेरो अगमबक्‍तामैं भन्दा क्हि थेब वा? क्‍हि ह्रोंसलाइ खाब् बिमुँ?”
JOH 8:54 येशूजी बिइ, “ङइ ह्रोंसइन ह्रोंस क्वेइ बिस्याँ च फाक्‍कर्न तम्। ङलाइ क्वेबाम् ङए आबा मुँ। खीनेन् क्‍हेमैंइ ‘ङिए परमेश्‍वर’ बिम्।
JOH 8:55 क्‍हेमैंइ खी ङो आसेइमुँ, दिलेया ङइ खी ङो सेइमुँ। ङज्यै या खीलाइ ङो आसे बिम् बिस्‍याँ ङै या क्‍हेमैं धों तबै स्‍योर्गुन् तब्मुँ। दिलेया ङइ खीलाइ छेनाले ङो सेमुँ, छतसि खीजी बिबै ताँ ङइ ङिंमुँ।
JOH 8:56 क्‍हेमैंए खे अब्राहामइ ओंसोंन् ङ चु ह्‍युलर युब्मुँ बिब् सेसि सैं तोंल, झाइले ङ युब् म्रोंसि बेल्‍ले सैं तोंइ।”
JOH 8:57 छबिमा यहूदी चिबनाँब्मैंइ खीने बिइ, “क्‍हि ङ्‍हच्‍यु बर्ष आयुबै म्हिजी खैले ङिए खे अब्राहाम म्रोंइ?”
JOH 8:58 येशूजी चमेंने बिइ, “क्ह्रोंसेंन ङ क्हेमैंने बिमुँ, अब्राहाम मुँब् भन्दा ओंसों ओंनोंन् ङम् ङन् ग।”
JOH 8:59 छबिमा चमैंइ खी ल्हिब बिसि युँमा तोमा येशू लोसि मन्दिरउँइँले बैरु त्‍होंयाइ।
JOH 9:1 येशू च क्ल्ह्‍योउँइँले ह्‍यारिमा फिब् ओंनोंबै कन तबै म्हि घ्रि म्रोंइ।
JOH 9:2 छाब् म्रोंसि खीए चेलामैंइ खीने, “गुरु, चु म्हि फिब् ओंनोंबै तले कन तगे? खाबइ पाप लगे? चुइ उ चुए आबा-आमाइ पाप लगे?” बिसि ङ्योएमा।
JOH 9:3 येशूजी बिइ, “चुज्यै पाप आल, चुए आबा-आमाज्यै पाप आल। चु कनउँइँले परमेश्‍वरए थेबै केमैं म्हिमैंइ म्रोंरिगे बिसि चु म्हि कन तब् ग।
JOH 9:4 ङ कुल्मिंबै आबाजी ल्‍हैदिबै केमैं ङ्योइ त्हिंयाँ मुँमन् लल् त्हुम्। म्‍हुँइँस त‍यासेरो खाबज्यै के लल् आखाँ।
JOH 9:5 ङ ह्‍युलर मुँरिन् समा ङ ह्‍युलर्बै चारबै ह्‍वे ग।”
JOH 9:6 चु ताँ बिसि येशूजी सर थुइसि स च्‍येंसि च कनए मिर फोमिंइ।
JOH 9:7 धै खीजी चने बिइ, “सिलोआम ङ्‍ह्‍योखोर ह्‍यासि क्‍हिए मि ख्रुद्।” (सिलोआमए अर्थ कुल्मिंब् ग।) छबिमा च ह्‍यासि ख्रुइ, झाइले मि म्रोंल् खाँब् तसि एखइ।
JOH 9:8 चए ङ्‍हेब् ट्हुब्मैं नेरो ओंसोंन् घ्याँजरे ह्रिसि टिरिब् म्रोंब्‍मैंइ “ह्रिसि टिबै म्हि चुन् आङिं वा?” बिइ।
JOH 9:9 को-कोइ “ओं, चु च म्हिन् ग,” बिइ। कोइ “आङिं, चुम् च धों ब्‍योंब् म्रोंइमुँ,” बिइ। दिलेया च म्हिइ “ङ चन् ग,” बिइ।
JOH 9:10 झाइले “क्हिए मि खैले म्रोंल् खाँब् तइ?” बिसि चमैंइ ङ्योएमा।
JOH 9:11 चइ बिइ, “येशू बिबै म्हिजी स च्‍येंसि ङए मिर फोमिंइ, धै ‘सिलोआमर ह्‍यासि ख्रुद्’ बिइ। ङ ह्‍यासि ख्रुबै तोंदोंन् ङए मि म्रोंल् खाँब् तइ।”
JOH 9:12 “येशू खनिर मुँ दि?” बिसि चमैंइ ङ्योएमा चइ “तुसि ङइ आसे,” बिइ।
JOH 9:13 ओंसों मि आम्रोंबै म्हिलाइ चमैंइ फरिसीमैं ङाँर पखइ।
JOH 9:14 येशूजी स च्‍येंसि च म्हिए मि म्रोंल् लमिंबै त्हिंइ प्रिबै त्हिंइ मुँल।
JOH 9:15 छतसि “क्हि खैले मि म्रोंल् खाँब् तइ?” बिसि फरिसीमैंइ चने ङ्योएमा। चइ बिइ, “खीजी ङए मिर स चेंसि फोमिंइ। झाइले ङइ ख्रुमा ङए मि म्रोंल् खाँब् तयाइ।”
JOH 9:16 फरिसीमैं न्होंर्बै को-कोइ बिइ, “च परमेश्‍वरउँइँले युबै म्हि आङिं, तलेबिस्याँ चइ प्रिबै त्हिंइ आम्हाँदि।” दिलेया अरूमैंइ बिइ, “चु पापि म्हि मुँस्याँ, चुइ छाबै औदिबै चिनुमैं खैले लल् खाँइ?” चु ताँइ लमा चमैं न्‍होंरि आक्‍ह्रि।
JOH 9:17 “चइ क्हिए मि म्रोंल् लमिंसेरो तारे चए बारेर क्हिइ तो बिम्दि?” बिसि चमैंइ च म्हिने ङ्योएमा चइ बिइ, “खी अगमबक्‍ता ग।”
JOH 9:18 यहूदी चिबनाँब्मैंइ च कन मुँल धै तोगो म्रोंल् खाँब् तइ बिबै ताँ आक्वें। छतसि चमैंइ चए आबा-आमा हुइसि ङ्योएइ।
JOH 9:19 “चु क्‍हेमैंए च्‍ह वा? चु फिब् ओंनोंबै कन मुँल् वा? धै तोगो चु खैले मि म्रोंल् खाँब् तइ?”
JOH 9:20 छबिमा चए आबा-आमाइ बिइ, “अँ, चु ङिए च्‍ह ग, चु फिब् ओंनोंन् कन मुँल।
JOH 9:21 दिलेया चुइ खैले मि म्रोंल् खाँब् तइ बिसि ङिइ आसे। धै चुए मि खाबइ म्रोंल् लमिंइ, चै या ङिइ आसे। चु सैं चियाल् खाँइमुँ छतसि चुनेन् ङ्योएद्। ह्रोंसए बारेर च ह्रोंसइन पोंब्मुँ।”
JOH 9:22 “येशून् परमेश्‍वरजी कुल्मिंबै म्रुँ ख्रीष्‍ट ग बिबै म्हिलाइ च्हों धिंउँइँले तेवाल त्हुम्,” बिसि यहूदीमैंइ ओंसों ओंनोंन् मत लल। छतसि चए आबा-आमा यहूदी चिबनाँब्मैं म्रोंसि ङ्हिंसि
JOH 9:23 “चुए उमेर योल् खाँइमुँ। चनेन् ङ्योएद्,” बिइ।
JOH 9:24 छतमा चमैंइ च मि म्रोंल् खाबै म्हि धबै हुइसि बिइ, “परमेश्‍वरए मिं थेब् लद्। चु म्हि पापि ग बिसि ङिइ सेइमुँ।”
JOH 9:25 चइ बिइ, “खी पापि म्हि ङिंब् उ आङिं, ङइ आसे। ताँ घ्रि मत्‍त्रे ङइ सेइमुँ। ङ कन मुँल, तोगो म्रोंल् खाँब् तइमुँ।”
JOH 9:26 “चइ क्‍हि तो लइ? चइ क्‍हिए मि खैले म्रोंल् लमिंइ?” बिसि चमैंइ चने ङ्योएमा।
JOH 9:27 चइ चमैंने बिइ, “ङइ तलन् बिल् खाँइ, दिलेया क्‍हेमैंइ आथे। धबै तोगो तले थेदा ङ्हाँइ? क्‍हेमैं या खीए चेला तदा ङ्हाँइमुँ उ तो?”
JOH 9:28 चमैंइ चलाइ हौदिदै बिइ, “क्हि ग चए चेला तइ! ङिम् आङिं! ङिम् मोशाए चेलामैं ग।
JOH 9:29 मोशाने परमेश्‍वर पोंमल बिसि ङिइ सेइमुँ, दिलेया चु म्हि खाब् जा? खनिर्बै जा? बिसि ङिइ था आसे।”
JOH 9:30 च म्हिइ चमैंने बिइ, “खैतबै औदिबै ताँ! खी खनिउँइँले खइ बिसि क्‍हेमैंइ आसे, दिलेया ङए मि खीजीन् म्रोंन् लमिंइ।
JOH 9:31 परमेश्‍वरजी पापिमैं ताँ आथे, दिलेया परमेश्‍वरने ङ्हिंसि खीए मान लब्‍मैं नेरो खीजी बिब् धोंले के लब्‍मैंए ताँ परमेश्‍वरजी थेम् बिसि ङ्योइ सेइमुँ।
JOH 9:32 ह्‍युल बनेब् ओंनोंन् फिब् ओंनोंबै आम्रोंबै म्हिए मि म्रोंल् लमिंबै ताँ खाबज्यै आथेइमुँ!
JOH 9:33 छतसि चु म्हि परमेश्‍वरउँइँले आयुस्‍याँ खीजी तोइ लल् आखाँमल।”
JOH 9:34 छबिमा “क्‍हिम् पापर्न फिल! छाबै म्हिज्यै ङि लोमिंल् म्हैम्मा?” बिसि चमैंइ चलाइ च्हों धिंउँइँले बैरु तेवाइ।
JOH 9:35 चमैंइ च म्हि बैरु तेवाइ बिब येशूजी थेइ, छतसि येशूजी चने त्होसि “क्हि ‘म्हिए च्‍हए’ फिर बिश्‍वास लम्मा?” बिसि ङ्योएइ।
JOH 9:36 च म्हिइ बिइ, “प्रभु, खी खाब् जा? ङ खीए फिर बिश्‍वास लब्मुँ।”
JOH 9:37 येशूजी चने बिइ, “क्‍हिइ खीलाइ म्रोंइमुँ, तोगो क्‍हिने पोंरिब खीन् ग।”
JOH 9:38 झाइले चइ “प्रभु, ङ बिश्‍वास लम्,” बिसि येशूलाइ फ्‍योइ।
JOH 9:39 झाइले येशूजी बिइ, “आम्रोंब्मैंइ म्रोंरिगे धै म्रोंब्मैंइ म्रोंल् आखाँरिगे बिसि ङ निसाफ लबर ह्‍युलर युइ।”
JOH 9:40 चु ताँ थेसि येशूए ङाँर मुँबै फरिसीमैंए न्होंर्बै को-कोइ खीने “ङि या कनमैं रो वा?” बिसि ङ्योएमा।
JOH 9:41 येशूजी चमैंने बिइ, “क्‍हेमैं कनमैं मुँस्‍याँम् पापए दोषि आतमल, दिलेया क्हेमैंइ ‘ङि म्रोंल् खाँम्’ बिमुँ, छतसि क्हेमैंए पाप क्हेमैंनेन् तरिम्।”
JOH 10:1 येशूजी बिइ “क्ह्रोंसेंन ङ क्हेमैंने बिमुँ, खाब् म्हि क्‍यु प्ह्रोंए म्राउँइँले न्होंर आहोंल्‍ले अरू क्ल्ह्‍योउँइँले क्रेसि होंमुँ च ह्‍यो नेरो डाँकु ग।
JOH 10:2 दिलेया म्राउँइँले न्होंर होंबै म्हि क्युमैंए प्ह्रोंछैं ग।
JOH 10:3 म्रा रुँबै म्हिइ प्ह्रोंछैंए ल्हागिर म्रा थोंमिंम्। झाइले प्ह्रोंछैंइ ह्रोंसए क्युमैंए मिं तेसि हुइमा क्युमैंइ खीए कै थेम्। धै प्ह्रोंछैंइ क्युमैं बैरु छबर बोयाम्।
JOH 10:4 प्ह्रोंछैंइ ह्रोंसए ताँन् क्‍युमैं बैरु तेल् खाँबै लिउँइँ खी चमैंए ओंसों-ओंसों प्रमुँ, धै क्युमैं खीए लिलि प्रम्। तलेबिस्याँ चमैंइ खीए कै ङो सेम्।
JOH 10:5 ङो आसेबै म्हिए लिलि चमैं आल्हैदि, बरु चलाइ म्रोंसि भौदियाम्। तलेबिस्याँ ङो आसेबै म्हिए कै चमैंइ आसे।”
JOH 10:6 येशूजी चमैंने चु अहान् बिइ, दिलेया खीजी बिबै ताँमैं चमैंइ आक्हो।
JOH 10:7 छतसि येशूजी धबै चमैंने बिइ, “क्ह्रोंसेंन ङ क्‍हेमैंने बिमुँ, क्युमैंए खोरए म्रा ङन् ग।
JOH 10:8 ङ भन्दा ओंसों खब्मैं ताँन् ह्‍यो नेरो डाँकुमैं ग। दिलेया क्युमैंइ चमैंए ताँ थेल् आङेंल।
JOH 10:9 म्रा ङन् ग। ङउँइँले न्‍होंर होंब्मैं ताँन् जोगेल् योंब्‍मुँ। धै चमैं खोरए न्हों, बैरु ह्‍याब खब लल् योंब्मुँ, धै छि मुँबै क्ल्ह्‍योर रेंल् योंब्‍मुँ।
JOH 10:10 ह्‍योम् ह्‍योब, सैब नेरो नास लबर मत्‍त्रे खम्। ङम् म्हिमैंइ खोंयोंइ आखाँबै छ्ह छ्याजा ल्हुल्हुले योंरिगे बिसि युइ।
JOH 10:11 “छ्याँबै प्ह्रोंछैं ङन् ग। छ्याँबै प्ह्रोंछैंजी ह्रोंसए क्युमैं जोगेबै ल्हागिरि ह्रोंसए ज्यु पिंम्।
JOH 10:12 मुइ पिंसि थेंबै म्हि बिस्याँ क्ह्रोंसेंन्बै प्ह्रोंछैं धों आत। क्युमैं ह्रोंसल् आङिंसेरो चइ प्याँउँ खरिब् म्रोंस्याँ क्युमैं वाथेंसि भौदियाम्। छतमा प्याँउँइँ क्युमैं ह्‍वाखम्, धै सोग्याँ प्हुग्याँ लवाम्।
JOH 10:13 च मुइ पिंसि थेंबै म्हि मत्‍त्रे ग, छतसि चइ क्युमैं छेनाले आङ्‌ह्‍यो।
JOH 10:14 “छ्याँबै प्ह्रोंछैं ङन् ग। ङइ ह्रोंसए क्युमैं ङो सेम्, धै ङए क्युमैंइ ङलाइ ङो सेम्।
JOH 10:15 “आबाजी ङलाइ ङो सेम्, ङज्यै या आबा ङो सेब् धोंले ङइ ह्रोंसए क्युमैं ङो सेम्। ङए क्युमैंज्यै या ङलाइ ङो सेम्। छतसि क्युमैं जोगेबै ल्हागिर ह्रोंसए ज्यु या पिम्।
JOH 10:16 ङला अरू क्युमैं या मुँ, चमैं चु प्ह्रोंर्बै आङिं। दिलेया ङइ चमैं या पखल् त्हुब्मुँ। चमैंइ ङए कै थेब्मुँ, धै ताँन् क्युमैं बगाल घ्रिन् तब्मुँ, छतसि प्ह्रोंछैं या घ्रिन् तब्मुँ।
JOH 10:17 “ङ धबै सोगों तसि खरिगे बिसि ङए ज्यु पिंम्। छतसि आबाजी ङने म्‍हाँया लम्।
JOH 10:18 खाबज्यै या ङ ङाँइँले ङए सो किंल् आखाँ, दिलेय ङ ह्रोंसइन ह्रोंसए सो पिंम्। ह्रोंसए सो पिंबै हग ङने मुँ, धै किंबै हगैया ङनेन् मुँ। चु ताँ ङए आबा ङाँइँले ङइ योंब् ग।”
JOH 10:19 चु ताँइ लमा यहूदी चिबनाँब्मैंए न्‍होंरि धबै सैं आक्ह्रिसि ङ्हिबाँ तयाइ।
JOH 10:20 चमैं न्होंर्बै ल्‍हें म्हिमैंइ “चु मोंइ स्यासि सोबल् तयाइमुँ। क्‍हेमैंइ चुए ताँ तले थेमुँ?” बिमल।
JOH 10:21 दिलेया को-कोइ म्हिमैंइ “मोंइ स्‍याबै म्हिए ताँ छाब आत! मोंइ मि आम्रोंबै म्हिए मि म्रोंल् लल् खाँम् रो वा?” बिमल।
JOH 10:22 यरूशलेमर मन्दिर परमेश्‍वरए योर सुम्पिदिबै चाड मुँल।
JOH 10:23 च त्हे सर्खर मुँल। येशू मन्दिर न्होंर्बै सोलोमनइ बनेबै ठाँटिर प्ररिल।
JOH 10:24 यहूदी चिबनाँब्मैं खीए कारग्युले खागु तसि बिइ, “क्‍हि खाब् जा बिसि खोंयों समा ङिने आबि? क्हि परमेश्‍वरजी कुल्मिंबै म्रुँ ख्रीष्‍ट ग बिस्याँ ङिने छेनाले बिमिंन्।”
JOH 10:25 येशूजी चमैंने बिइ, “ङइ क्हेमैंने ओंसोंन् बिल् खाँइमुँ, दिलेया क्‍हेमैंइ आक्वें। ङए आबाए मिंर ङइ लबै केमैंइन ङए ग्वाइ पिंम्।
JOH 10:26 दिलेया क्‍हेमैं ङए क्युमैं न्होंर्बै आङिं, छतसि क्‍हेमैंइ ङए फिर बिश्‍वास आल।
JOH 10:27 ङए क्युमैंइ ङए कै थेम्, ङइ चमैंलाइ ङो सेम्। छतसि चमैं ङए लिलि खम्।
JOH 10:28 ङइ चमैंलाइ खोंयोंइ आखाँबै छ्ह पिंमुँ, झाइले चमैं खोंयोंइ या नास आत। धै ङए योउँइँले खाबज्यै चमैं प्हेंसि बोल् खाँरिब् आरे।
JOH 10:29 तलेबिस्याँ ङए आबाजी चमैं ङलाइ पिंइँमुँ, खी ताँन् भन्दा थेब मुँ। छतसि ङए आबाए योउँइँले खाब‍ज्‍यै चमैं प्हेंसि बोल् खाँरिब् आरे।
JOH 10:30 आबा नेरो ङ घ्रिन् ग।”
JOH 10:31 चु ताँ थेसि यहूदी चिबनाँब्मैंइ येशूलाइ प्रिंब् बिसि धबै युँमा तोइ।
JOH 10:32 येशूजी चमैंने बिइ, “ङइ क्हेमैंने ङए आबाउँइँले ल्‍हें छ्याँबै केमैं उँइँमिंइ। च केमैं न्‍होंरि खाब् केए ल्हागिरि क्हेमैंइ ङ युँमाइ प्रिंल् म्‍हैल?”
JOH 10:33 यहूदी चिबनाँब्मैंइ खीने बिइ, “क्हिइ लबै छ्याँबै केमैंए ल्हागिर ङिइ युँमाइ प्रिंल् म्हैब आङिं, दिलेया क्‍हिइ परमेश्‍वरए मिं वाइ। तलेबिस्याँ क्हि म्हि तसेया ह्रोंसलाइन परमेश्‍वर ग बिइमुँ।”
JOH 10:34 येशूजी चमैंने बिइ, “‘ङइ बिमुँ, क्हेमैं देउतमैं ग,’ बिसि क्हेमैंए ठिमर आप्ह्रिइमुँ वा?
JOH 10:35 छ्वेर्बै ताँमैं खोंयोंइ स्योर आत। छतसि खाबै ङाँर परमेश्‍वरए ताँ युमुँ, चमैंने देउतमैं बिम्।
JOH 10:36 दिलेया परमेश्‍वर आबाजी त्हाँसि ङ ह्‍युलर कुल्मिंइ। छतसि ‘परमेश्‍वरए च्ह ङन् ग’ बिमा ङइ खैले परमेश्‍वरए मिं वाइ?
JOH 10:37 ङए आबाए केमैं ङइ आलइमुँ बिस्याँ क्‍हेमैंइ ङए फिर बिश्‍वास आलद्।
JOH 10:38 दिलेया ङइ आबाए केंमैं लसेया क्हेमैंइ ङए फिर बिश्‍वास आल बिस्याँ चु केमैं फिर बिश्‍वास लद्। झाइले बल्‍ल ‘आबा ङने मुँ, ङै या आबाने मुँ,’ बिब क्‍हेमैंइ था सेब्मुँ।”
JOH 10:39 चु ताँ थेसि चमैंइ धबै येशूलाइ क्‍हाल् म्‍हैइ। दिलेया चमैंए योउँइँले खी स्योयाइ।
JOH 10:40 झाइले येशू यर्दन स्यों क्‍योंजा यूहन्‍नाइ ओंसों म्हिमैं बप्‍तिस्‍मा पिंबै क्‍ल्‍ह्‍योर ह्‍यासि चर्न टिइ।
JOH 10:41 ल्‍हें म्हिमैं खी ङाँर खसि खें-खेंमैं न्होंर्न बिइ, “यूहन्‍नाइ औदिबै चिनुमैं तोइ आल, दिलेया यूहन्‍नाइ चु म्हिए बारेर बिबै ताँमैं क्ह्रोंसेंन मुँन।”
JOH 10:42 छतसि चर्बै ल्‍हें म्हिमैंइ खीए फिर बिश्‍वास लइ।
JOH 11:1 बेथानिया बिबै नाँसर्बै लाजरस बिबै म्हि घ्रि नरिल। लाजरसए आनामैं मरियाम नेरो मार्था या च नाँसर्न टिमल।
JOH 11:2 प्रभुए प्हलेर बेल्‍ले लिंबै थाँ खबै अत्तर फोमिंसि ह्रोंसए क्र प्होइ फ्योमिंब चुन् मरियम मुँल। चए अलि लाजरस नरिल।
JOH 11:3 लाजरसए आनामैं ङ्हिंइ “प्रभु, क्‍हिजी बेल्‍ले म्हाँया लबै लाजरस नरिइमुँ” बिसि येशू ङाँर सँउँसर कुलइ।
JOH 11:4 च सँउँसर थेसि येशूजी बिइ, “चु नबइ च आसि। परमेश्‍वरए मिं थेब तरिगे धै परमेश्‍वरए च्हजी मान योंरिगे बिसि च नब् ग।”
JOH 11:5 येशूजी मार्था, मरियम नेरो लाजरसलाइ बेल्‍ले म्हाँया लमल।
JOH 11:6 लाजरस नइमुँ बिबै ताँ थेलेया खी ङ्हिरो समा खी खनिर मुँल चर्न टिरिइ।
JOH 11:7 च लिउँइँ खीजी चेलामैंने “ल्हु, तारे ङ्यो धबै यहूदीया ह्‍युलर एह्‍याले,” बिइ।
JOH 11:8 चेलामैंइ खीने बिइ, “ओ गुरु, दे त्हिंइ ओंसों यहूदी चिबनाँब्मैंइ क्हि युँमाइ प्रिंसि सैल् म्‍हैल! धबै क्‍हि च क्‍ल्‍ह्‍योर्न ह्‍याम्‍मा?”
JOH 11:9 छबिमा येशूजी बिइ, “त्‍हिंयाँर च्युसे ङ्हिं घण्टा आत वा? त्‍हिंयाँर प्रब्मैंए प्हले आथुर। तलेबिस्याँ चइ चु ह्‍युलर्बै ह्‍वे म्रोंम्।
JOH 11:10 दिलेया म्‍हुँइँसर प्रब्मैं बिस्याँ प्हले थुरम्। तलेबिस्याँ च म्हिने चारबै ह्‍वे आत।”
JOH 11:11 च लिउँइँ खीजी चमैंने बिइ, “ङ्योए थु लाजरस न्‍हरु च्‍हुइरिमुँ। छतसि चलाइ न्हरुउँइँले छोरबर ङ चर ह्‍याम्।”
JOH 11:12 चेलामैंइ खीने बिइ, “प्रभु, च न्‍हरु च्‍हुइब् ग बिस्‍याँ च सयाब्मुँ।”
JOH 11:13 येशूजी बिल् म्हैबै ताँ लाजरस सिइ बिल। दिलेया चेलामैंए सैंर लाजरस क्‍ह्रोंसेंन न्‍हरु च्‍हुइरिमुँ बिब् मैंइ।
JOH 11:14 छतसि येशूजी चमैंने “लाजरस सियाल् खाँइमुँ बिसि क्होल्‍ले बिमिंइ।
JOH 11:15 दिलेया क्हेमैंइ ङए फिर थेबै बिश्‍वास लरिगे बिसि क्हेमैंए ल्हागिरि ङ चर आरेबर ङ तोंइँमुँ। तो तलेया ङ्यो च ङाँर ह्‍याले।”
JOH 11:16 झाइले दिदुमस बिबै थोमाइ अरू चेलामैंने बिइ, “ल्हु, ङ्यो या गुरुने ह्‍याले धै सिल् त्हुलेया सिले।”
JOH 11:17 येशू यहूदीया ह्‍युलर फेखमा लाजरस छगोंर पासि प्‍लिरो तल् खाँबा था सेइ।
JOH 11:18 बेथानिया बिबै नाँस यरूशलेमउँइँले किलोमिटर सोंदे ह्रेंगो मुँल।
JOH 11:19 छतसि ल्‍हें यहूदीमैं मार्था नेरो मरियम ङाँर चमैंए अलि सियाबै दुःखरि सैं क्‍होमिंबर खल।
JOH 11:20 येशू खसिन् मुँ बिबै ताँ थेसि मार्था ह्‍यासि येशूने त्‍होइ। मरियम बिस्याँ धिंर्न टिरिइ।
JOH 11:21 मार्थाइ येशूने बिइ, “प्रभु, क्‍हि चुर्न मुँस्‍याँ ङए अलि आसिमल।
JOH 11:22 दिलेया क्‍हिजी परमेश्‍वरने तो ह्रिमुँ, च सै परमेश्‍वरजी क्हिलाइ पिंब्मुँ,” बिब ङइ सेइमुँ।
JOH 11:23 येशूजी चने बिइ, “क्‍हिए अलि धबै सोगों तब्मुँ।”
JOH 11:24 मार्थाइ खीने बिइ, “ह्‍युल नुयाबै त्हिंइर सियाब्मैं सोगों तमा चै या सोगों तब्मुँ,” बिब ङइ सेइमुँ।
JOH 11:25 येशूजी चने बिइ, “सियाब्‍मैं सोगों लमिंब नेरो खोंयोंइ आखाँबै छ्ह पिंब ङन् ग। ङए फिर बिश्‍वास लब्‍मैं सिलेया सोगों तब्‍मुँ।
JOH 11:26 झाइले ङए फिर बिश्‍वास लसि सोब्मैं खोंयोंइ या सिरिब् आरे। क्हिइ चु ताँ क्वेंम्मा?”
JOH 11:27 मार्थाइ खीने बिइ, “अँ प्रभु, क्‍हि परमेश्‍वरए च्ह ख्रीष्‍ट ह्‍युलर युब् ग बिसि ङ क्वेंम्।”
JOH 11:28 च्‍हौ बिसि मार्था धिंर एह्‍यासि मरियमलाइ हुइसि खाबज्यै आथल्‍ले “गुरु फेखइमुँ, खीजी क्हि हुइरिमुँ,” बिइ।
JOH 11:29 चु ताँ थेबै तोदोंन् मरियम रेसि येशू ङाँर ह्‍याइ।
JOH 11:30 च त्हे समा येशू नाँसर आफेखल। खी मार्थाइ त्होबै क्ल्ह्‍योर्न मुँल।
JOH 11:31 मरियमए सैं क्‍होमिंबर धिंर खागु तबै यहूदीमैंइ मरियम आतुरले ह्‍याब् म्रोंसि, “च छगोंर क्रोबर ह्‍याइ उ?” ङ्हाँसि चमैं चए लिलि ह्‍याइ।
JOH 11:32 झाइले मरियम येशू मुँबै क्ल्ह्‍योर फेनेसि खीलाइ म्रोंमा खीए प्हलेर फ्योसि “ओ प्रभु, क्हि चुर मुँस्याँ ङए अलि आसिमल,” बिइ।
JOH 11:33 मरियम नेरो चने बालु खबै यहूदीमैं या क्रोरिब् म्रोंसि येशूए सैं बेल्‍ले नसि खैता-खैता तइ।
JOH 11:34 येशूजी चमैंने “क्‍हेमैंइ च खनिर पाइमुँ?” बिसि ङ्योएमा। चमैंइ खीने “प्रभु, खइरि ङ्‌ह्‍योद्,” बिइ।
JOH 11:35 च त्हेर येशू क्रोइ।
JOH 11:36 छाब् म्रोंसि यहूदीमैंइ “ङ्‌ह्‍योत्ति! खीजी चए फिर कति थेबै म्‍हाँया लमना,” बिइ।
JOH 11:37 दिलेया को-कोइ, “कनए मि म्रोंल् लमिंब चुन् आङिं वा? छतसि चुइ लाजरसलाइ कालउँइँले तले जोगेल् आखाँल?” बिइ।
JOH 11:38 धबै येशूए सैं बेल्‍ले नसि छगोंर ह्‍याइ। च छगों उ धों तब मुँल। उए सुँर युँमाइ हुथेंल।
JOH 11:39 छतसि येशूजी “युँमा स्योयाद् बिमा।” सियाबै म्हिए आना मार्थाइ खीने बिइ, “ओ प्रभु, च सिसि प्लिरो तयाल् खाँइ। छतसि चु त्हे समा चम् थाँ नाँयाल् खाँलै।”
JOH 11:40 येशूजी चने बिइ, “क्हिइ बिश्‍वास लस्याँ परमेश्‍वरए औदिबै के म्रोंब्‍मुँ बिसि ङइ क्हिने बिब् आङिं वा?”
JOH 11:41 चमैंइ युँमा स्‍योवाबै लिउँइँ येशूजी मुउँइँ ङ्‌ह्‍योसि बिइ, “ओ आबा, ङ क्हिलाइ धन्यबाद पिंमुँ, तलेबिस्याँ क्‍हिजी ङए ताँ थेमिंइँमुँ।
JOH 11:42 क्हिजी ङए ताँ खोंयोंन् बिलै थेमुँ बिसि ङइ सेइमुँ। दिलेया क्हिजी ङ कुल्मिंब् ग बिब चुर रारिबै म्हिमैंइ क्वेंरिगे बिसि ङइ चु ताँ बिब् ग।”
JOH 11:43 चु ताँ बिबै लिउँइँ खीजी थेबै कैले “लाजरस, बैरु त्होंइ खो बिसि ओरइ।”
JOH 11:44 छबिमा सियाबै लाजरस ज्युर म्होरबै ट्हि क्वेंनेन् बैरु त्‍होंयुइ। छले त्होंयुमा येशूजी चर्बै म्हिमैंने “चए ट्हि क्वें प्ल्हमिंसि च ह्‍याल् पिंन्,” बिइ।
JOH 11:45 मरियम ङाँर खबै ल्‍हें यहूदीमैंइ येशूजी लबै चु के म्रोंसि खीए फिर बिश्‍वास लइ।
JOH 11:46 दिलेया चमैंए न्होंर्बै को-कोइ बिस्याँ फरिसीमैं ङाँर ह्‍‍यासि येशूजी लबै केमैं बिमिंइ।
JOH 11:47 ख्रो पिंबै खेगि चिब्मैं नेरो फरिसीमैंइ थेबै म्हि च्होंर्बै म्हिमैं हुइसि बिइ, “चु म्‍हिइमि ल्हें औदिबै चिनुमैं लसिन् मुँ। छतसि तारे ङ्योइ तो लले?
JOH 11:48 चुलाइ छलेन् पिवाइ बिस्‍याँ ताँ‍नइ चुए फिर बिश्‍वास लब्मुँ, झाइले रोमी सिपाइमैं खसि ङ्योए मन्दिर नेरो ङ्योए ह्रेंमैं नास लवाब्मुँ।”
JOH 11:49 चमैंए न्होंरि कैयाफा बिबै म्हि च सालर्बै ख्रो पिंबै खेगि क्रथे मुँल। चइ “क्‍हेमैंइ तिफुँइ आक्होइमुँ!” बिइ।
JOH 11:50 “ताँन् ह्‍युलर्बै म्हिमैं नास तब् भन्दा बरु चमैंए ल्हागिर म्हि घ्रि सिबन् छ्याँब् तम् बिब क्हेमैंइ आक्हो वा?”
JOH 11:51 चइ चु ताँ ह्रोंसए सैंउँइँले बिब आङिं। दिलेया च सालर्बै ख्रो पिंबै खेगि क्रथे तबइले यहूदी ह्रेंए ल्हागिर येशू सिब्मुँ बिसि अगमबाणि पोंब् ग।
JOH 11:52 यहूदी ह्रेंए ल्हागिर मत्‍त्रे आङिं, दिलेया खन्तोंदोंन् प्हुँयाबै परमेश्‍वरए सन्तानमैं खागु लसि घ्रि लबै ल्हागिर येशू सिब्मुँ।
JOH 11:53 चइ छ बिबै त्हिंइसेरोन् यहूदी चिबनाँब्मैंइ येशूलाइ सैबै मत लइ।
JOH 11:54 छतसि येशू धबै यहूदीमैंइ म्रोंन्‍ले प्रब्-टिब आल। दिलेया यरूशलेम पिसि म्हि आटिबै क्ल्ह्‍योए चेंदोर्बै एफ्राइम बिबै नाँसर ह्‍यासि चर्न ह्रोंसए चेलामैंने बालु टिइ।
JOH 11:55 च त्हेर यहूदीमैंए दुःखने फ्रेबै चाड खबि छेल। छतसि नाँ-नाँसर्बै ल्‍हें म्हिमैं ह्रों-ह्रोंसलाइ चोखो लब् बिसि दुःखने फ्रेबै चाड खब् भन्दा ओंसोंन् यरूशलेमर ह्‍याइ।
JOH 11:56 झाइले चमैंइ येशूलाइ म्‍हैइ। धै चमैं मन्दिरर रासि “क्हेमैं खै ङ्हाँमुँ? चु चाडर खी आख उ?” बिसि खें-खेंमैं न्होंरि बिबर होंइ।
JOH 11:57 ख्रो पिंबै खेगि चिब्मैं नेरो फरिसीमैंइ येशू क्हाबै ल्हागिर खी खनिर मुँलेया खाबज्यै सेस्याँ था पिंन् बिसि बिल।
JOH 12:1 दुःखने फ्रेबै चाडए टुरो ओंसों येशू बेथानिया बिबै नाँसर खइ। चर येशूजी सिबउँइँले सोगों लमिंबै लाजरस बिबै म्हि टिमल।
JOH 12:2 खीए थुमैंइ चर खीए मान लबर ङेसर्बै चब् चबर हुइल। मार्थाइ चबै सैमैं पिंसेन् मुँल। लाजरसै या खीने बालु चब् चबर टिब्मैं न्होंर्बै घ्रि मुँल।
JOH 12:3 च त्‍हेर्न मरियमइ सै ल्हें फेबै लिंबै थाँ खबै जटामसिए अत्तर तिम्‍नादे पखसि येशूए प्हलेर फोमिंइ। धै ह्रोंसए क्रप्होइ फ्‍योमिंइ। छलमा धिं तिगोंन् अत्तरए लिंबै थाँ नाँइ।
JOH 12:4 येशूए चेलामैं न्होंर्बै खीलाइ क्हाल् म्हैबै इस्‍करियोतथें यहूदाइ बिइ।
JOH 12:5 “चु अत्तर सोंब्रा चाँदिए सिक्‍कर चुँसि योंबै मुइ ङ्हाँदुमैं पिंस्याँ आतमल् वा?”
JOH 12:6 चइ ङ्हाँदुमैंए फिर ल्हयो खसि चु ताँ बिब् आङिंल। तलेबिस्याँ च ह्‍यो मुँल। मुइ झोंबै नेंदो चने मुँल। छतसि च नेंदोउँइँले चइ मुइ ह्‍योब्रें लमल।
JOH 12:7 दिलेया येशूजी बिइ, “लरिगे, चने तोइ आबिद्! ङ पाबै त्हिंइए ल्हागिर चइ लिंबै थाँ खबै अत्तर ओंसोंन् फोमिंब् ग।
JOH 12:8 तलेबिस्याँ ङ्हाँदुमैं खोंयोंइ या क्‍हेमैंने तरिम्। ङ बिस्याँ खोंयोंइ क्‍हेमैंने बालु आत।”
JOH 12:9 ल्हें यहूदी म्हिमैंइ येशू बेथानिया नाँसर मुँ बिब् सेसि ल्हें म्हि चर खइ। चमैं येशूलाइ मत्‍त्रे ङ्योबर आङिं, दिलेया खीजी सिबउँइँले सोगों लमिंबै लाजरसै या ङ्‍ह्‍योब् बिसि खल।
JOH 12:10 छतमा ख्रो पिंबै खेगि चिब्मैंइ लाजरसलाज्यै या सैबै मत लइ।
JOH 12:11 तलेबिस्याँ येशूजी लाजरस सोगों लमिंमा ल्हें यहूदीमैंइ यहूदी चिब्मैं पिवासि येशूए फिर बिश्‍वास लबर होंल।
JOH 12:12 प्‍हँन्हाँग्धों दुःखने फ्रेबै चाडर खबै म्हिए हुलइ येशू यरूशलेमर खइनामुँ बिब् थेइ।
JOH 12:13 झाइले चमैंइ छोडाए हाँगमैं छेसि “होसन्‍ना! याहवेहए मिंर युबै इस्राएलर्बै म्रुँए जय जय तरिगे!” बिदै ओरदै खीए मान लबर त्होंइ।
JOH 12:14 धै येशूजी गधा झज घ्रि स्यासि चए फिर क्रेइ। चु ताँए बारेर परमेश्‍वरए छ्वेर छले प्‍ह्रिथेंमुँ:
JOH 12:15 सियोनए च्हमि आङ्हिंन्! ङ्‌ह्‍योद्! क्‍हेमैंए म्रुँ गधा झजए फिर क्रेसि खइनमुँ।
JOH 12:16 खीए चेलामैंइ ओंसों चु ताँमैं आक्होल। दिलेया येशू सिबउँइँले सोगों तसि स्वर्गर्बै मान योंबै लिउँइँ मत्‍त्रे खीए बारेर चु ताँ छ्वेर प्ह्रिब् मुँन धै चु केमैं खीए मान लबै ल्हागिरि यरूशलेमथेंमैंइ लना बिसि चमैंइ क्होइ।
JOH 12:17 येशूजी लाजरस छगोंउँइँले हुइसि सिबउँइँले सोगों लमिंमा। खीने बालु मुँबै म्हिमैंइ खीए ग्वाइ अरूमैंने बिरिल।
JOH 12:18 छलेन खीजी चु औदिबै के लइमुँ बिब् थेसि म्हिए हुल खीने त्होबर खल।
JOH 12:19 छतमा फरिसीमैंइ खेंमैंए न्होंर “ङ्‍ह्‍‍योत्ति! कहेमैंइ तोइ लल् खाँरिब् आरे। म्रोंइँमुँ वा, ह्‍युलर्बै ताँन् म्हिमैं चए लिलि ल्हैदिल् खाँइ बिबर होंइ।”
JOH 12:20 चाड म्हाँदिबर ह्‍याब्मैं न्होंरि को-कोइ ग्रिक ह्‍युलर्बै म्हिमैं या मुँल।
JOH 12:21 चमैंइ गालीलर्बै बेथसेदाथें फिलिप ङाँर खसि “ओ चिब, ङि येशूने त्होदा ङ्हाँइमुँ,” बिसि यो छ्युँ लइ।
JOH 12:22 छबिमा फिलिप ह्‍यासि अन्‍द्रियासने ताँ लइ। झाइले चमैं ङ्हिंना ङ्हिंन् येशू ङाँर ह्‍यासि च ताँ बिमिंइ।
JOH 12:23 येशूजी चमैंने बिइ, “तारे म्हिए च्हजी थेबै मान योंबै त्‍हे तखइमुँ।
JOH 12:24 क्ह्रोंसेंन ङ क्हेमैंने बिमुँ, गहुँए फुँ सर तेसि आक्राँइ बिस्याँ च फुँ घ्रिन् तरिम्। दिलेया च फुँ सर तेसि क्राँइ बिस्याँ चइ ल्हें रोमैं रोम्।
JOH 12:25 ह्रोंसए ज्यु म्हाँया लब्मैंला ज्यु नास तयाब्मुँ। दिलेया परमेश्‍वरए केए ल्हागिरि सिलन् त्हुलेया तो धोंइ आङ्हाँन्ले प्रब्मैंइ बिस्याँ खोंयोंइ आखाँबै छ्ह योंब्‍मुँ।
JOH 12:26 “ङए सेवा लदा ङ्हाँब्मैं ङए लिलि प्ररिगे। छलमा ङ खनिर टिमुँ, ङए सेवा लब्मैं चर्न तब्मुँ। ङए सेवा लब्मैंलाइ ङए आबाजी मान लब्मुँ।”
JOH 12:27 “तोगो ङए सैं खैता-खैता ङ्हाँइमुँ। छतसि ङइ तो बिले? ‘ओ आबा, चु खबि छेबै दुःखउँइँले ङ जोगेमिंन्,’ बिब् उ? आङिं, तलेबिस्याँ चु दुःख नोबै ल्हागिर्न ङ चु ह्‍युलर युब् ग।
JOH 12:28 छतसि, ओ आबा, क्‍हिए मिंए थेबै मान तल् पिंन्।” बिबै तोदोंन् “ङए मिंए मान ङइ तल् पिंइँमुँ, धबै तल् पिंब्मुँ बिबै कै घ्रि स्‍वर्गउँइँले युइ।”
JOH 12:29 चर रारिबै म्हिए हुलइ च कै थेसि “मु ङ्‌हेब् ग,” बिइ। कोइइ “स्‍वर्गदूत खीने पोंब् ग,” बिइ।
JOH 12:30 येशूजी चमैंने बिइ, “चु स्वर्गउँइँले युबै कै ङए ल्हागिर युब आङिं, क्हेमैंइ थेरिगे बिसि युब् ग।
JOH 12:31 तलेबिस्याँ तारे परमेश्‍वरजी चु ह्‍युलर्बै म्हिमैंए निसाफ लब्मुँ, धै चु ह्‍युलर्बै म्रुँलाइ बैरु भ्योंवाब्मुँ।
JOH 12:32 झाइले ङलाइ कैंडो क्वेवामा ङइ ताँन् म्हिमैं ङ ङाँइन चैंब्मुँ।”
JOH 12:33 खी खैले सिल् त्हुम् बिबै ताँ म्हिमैंइ क्होरिगे बिसि खीजी चु ताँ बिल।
JOH 12:34 चर्बै म्हिमैंइ खीने “परमेश्‍वरजी कुल्मिंबै म्रुँ ख्रीष्‍ट खोंयोंन् बिलै तरिम् बिबै ताँ छ्वेउँइँले ङिइ थेइमुँ। दिलेया म्हिए च्ह कैंडो क्वेलन् त्हुम् बिसि क्हिजी खैले बिल् खाँमुँ? चु म्हिए च्ह बिब् खाब् जा?” बिसि ङ्योएइ।
JOH 12:35 येशूजी चमैंने बिइ, “अझै तिस्याँदे समा चारबै ह्‍वे क्‍हेमैंनेन् तब्मुँ। मिछु खैबइ क्हेमैं आहुरिगे बिसि चारबै ह्‍वे क्हेमैंने मुँरिबर्न प्ररिद्। मिछु खैबर प्रबै म्हिइ ह्रोंस् खनिर ह्‍यारिइमुँ बिसि सेल् आखाँ।
JOH 12:36 क्हेमैं चारबै ह्‍वे योंब्मैं तरिगे बिसि ह्‍वे क्हेमैंने मुँरिबर्न चारबै ह्‍वेर बिश्‍वास लद्।” चु ताँ बिबै लिउँइँ येशू च क्ल्ह्‍योउँइँले ह्‍याइ, धै चमैंउँइँले लोसि टिइ।
JOH 12:37 येशूजी यहूदीमैंए उँइँर ल्हें औदिबै चिनुमैं लल। दिलेया चमैंइ खीए फिर बिश्‍वास आल।
JOH 12:38 यशैया अगमबक्‍ताइ बिबै ताँ पूरा तरिगे बिसि चु तलन् त्हुमल। “ओ याहवेह, ङिइ बिबै ताँ खाबइ क्‍वेंइ? धै याहवेहजी लबै शक्‍तिए केमैं खाब्ने उँइँमिंइ?” बिसि यशैयाइ बिल।
JOH 12:39 छतसि चमैंइ बिश्‍वास लल् आखाँ। तलेबिस्याँ यशैयाइ धबै छ बिइमुँ,
JOH 12:40 ङइ चमैंलाइ सल् लमिंल् आत्हुरिगे बिसि चमैंए मिइ आम्रोंरिगे, खोंइ आक्होरिगे, धै चमैं सैं एसि ङ ङाँर आखरिगे बिसि ङइ चमैंए मि म्रोंल् आखाँब् लमिंइँमुँ, धै चमैंए खों सारो लमिंइँमुँ, बिसि परमेश्‍वरजी बिइमुँ।
JOH 12:41 यशैयाइ येशूए थेबै मान म्रोंसि खीए बारेर चु ताँ बिल।
JOH 12:42 छान् तलेया यहूदी चिबनाँब्मैंए न्होंरि ल्हें म्हिइ येशूए फिर बिश्‍वास लइ। दिलेया चमैं फरिसीमैंने ङ्हिंसि “म्हि च्हों धिंउँइँले तेवाम् उ?” ङ्हाँसि खेंमैंइ येशूए फिर बिश्‍वास लबै बारेर खाबने या आबिमल।
JOH 12:43 तलेबिस्याँ चमैंइ परमेश्‍वरउँइँले योंबै मान भन्दा म्हिमैंउँइँले योंबै मान खोमल।
JOH 12:44 येशूजी थेबै कैले बिइ, “ङए फिर बिश्‍वास लब्‍मैंइ ङए फिर मत्‍त्रे आङिं, ङ कुल्मिंबै आबाए फिरै या बिश्‍वास लमुँ।
JOH 12:45 ङलाइ म्रोंब्मैंइ ङ कुल्मिंबै आबालाज्यै या म्रोंब्मुँ।
JOH 12:46 ङए फिर बि‍श्‍वास लब्मैं मिछु खैबर टिल् आत्हुरिगे बिसि ङ ह्‍युलर चारबै ह्‍वे तसि युइमुँ।
JOH 12:47 ङइ बिबै ताँमैं थेसेया च ताँ आङिंइ बिस्याँ, ङइ चए निसाफ लरिब् आरे, तलेबिस्याँ ङ ह्‍युलर्बै म्हिमैंए निसाफ लबर युब आङिं, दिलेय ह्‍युलर्बै म्हिमैं जोगेमिंबर युब् ग।
JOH 12:48 ङलाइ आम्हाँदिब्मैं नेरो ङए ताँ आक्वेंब्मैंए ल्हागिर नियाधिश घ्रि मुँ। चु ह्‍युल नुयाबै त्हिंइर ङइ पोंबै ताँमैंइन चमैंए निसाफ लब्मुँ।
JOH 12:49 तलेबिस्याँ ङइ च ताँमैं ह्रोंसए सैंउँइँले पोंब आङिं। ङइ बिल् त्हुबै ताँ नेरो पोंल् त्हुबै ताँ ङ कुल्मिंबै आबाजीन् ङलाइ ‘पोंन्’ बिसि ल्हैदिइमुँ।
JOH 12:50 खीजी ल्हैदिबै ताँउँइँले म्हिमैंइ खोंयोंइ आखाँबै छ्ह योंम् बिसि ङइ सेइमुँ। छतसि आबाजी ल्हैदिब् धोंलेन् ङइ पोंम्।”
JOH 13:1 खीजी चु ह्‍युल पिसि परमेश्‍वर आबा ङाँर ह्‍याबै त्हे तखइमुँ बिसि दुःखने फ्रेबै चाडए ओंसोंन् येशूजी था सेल। खीजी ह्‍युलर मुँबै ह्रोंसए चेलामैंने खोंयोंइ म्हाँया लरिमल, धै लिउँइँ समन् चमैंने म्हाँया लरिइ।
JOH 13:2 दिलेया ङेसार्बै चब् चबै त्हे भन्दा ओंसोंन् दुष्‍टइ येशूलाइ क्हाल् पिंबै सैं इस्करयोतथें सिमोनए च्ह यहूदाए सैंर झोंल् खाँल।
JOH 13:3 आबाजी तोन्दोंरि सै खीए योर पिंइँमुँ। धै खी परमेश्‍वरउँइँले युब् ग, झाइले परमेश्‍वर ङाँर्न ह्‍यासिन् मुँ बिबै ताँ येशूजी था सेल।
JOH 13:4 छतमा खी चबै क्ल्ह्‍योउँइँले रेइ, धै फिर्बै क्वें प्लिसि पछ्यौर घ्रि खीए क्रेर फैइ।
JOH 13:5 झाइले खीजी भाँडोर क्‍यु झोंसि चेलामैंए प्हले ख्रुमिंसि खीए क्रेर फैबै पछ्यौरइ चमैंए प्हले फ्‍योबर होंइ।
JOH 13:6 खी सिमोन पत्रुस ङाँर खमा चइ खीने बिइ, “प्रभु, क्‍हिजी ङए प्हले ख्रुमिंब् आ?”
JOH 13:7 येशूजी चने बिइ, “ङइ तो लरिइमुँ क्‍हिइ तोगो आक्हो। लिउँइँ बिस्याँ क्हिइ क्‍होब्‍मुँ।”
JOH 13:8 पत्रुसइ खीने बिइ, “क्‍हिजी ङए प्‍हले खोंयोंइ या ख्रुरिब् आरे!” येशूजी चने बिइ, “ङइ क्हिए प्हले आख्रुस्‍याँ क्‍हि ङए चेला तरिब् आरे।”
JOH 13:9 सिमोन पत्रुसइ खीने बिइ, “छ बिस्याँ ओ प्रभु, ङए प्‍हले मत्‍त्रे आङिं, ङए यो नेरो क्रया ख्रुमिंन्।”
JOH 13:10 येशूजी चने बिइ, “ख्रुल् खाँबै म्हिला प्हले मत्‍त्रे ख्रुल् त्हुम्, चए अरू ज्यु ताँन् चोखो मुँ। क्हेमैं चोखो मुँ, दिलेया ताँनन् आङिं।”
JOH 13:11 तलेबिस्याँ खीलाइ क्हाल् पिंबै म्हि खीजी ङो सेल् खाँल। छतसि खीजी, “क्हेमैं ताँनन् चोखो आरे,” बिल।
JOH 13:12 चमैंए प्हले ख्रुल् खाँबै लिउँइँ क्वें खिसि खी धबै चबर टिबै लिउँइँ चमैंने बिइ, “ङइ क्हेमैंए ल्हागिरि तो लइ बिसि क्हेमैंइ क्होइमुँ वा?
JOH 13:13 क्‍हेमैंइ ङने ‘गुरु’ नेरो ‘प्रभु’ बिमुँ। चु क्हमैंइ ठिकन् बिम्, तलेबिस्याँ ङ चन् ग।
JOH 13:14 ङ क्‍हेमैंए प्रभु नेरो गुरु तसेया ङइ क्हेमैंए प्हले ख्रुमिंइँमुँ बिस्याँ क्हेमैंज्यै या घ्रिइ-घ्रिए प्हले ख्रुमिंल् त्हुम्।
JOH 13:15 तलेबिस्याँ ङइ लब् धोंले क्‍हेमैंज्यै या लरिगे बिसि ङइ उँइँमिंइँमुँ। छतसि क्हेमैंज्यै या छान् लद्।
JOH 13:16 क्ह्रोंसेंन ङ क्हेमैंने बिमुँ, केब्छैं ह्रोंसए क्ल्हे भन्दा थेब आत, छलेन स्यार्बो चलाइ कुल्मिंबै म्हि भन्दा थेब आत।
JOH 13:17 क्‍हेमैंइ चु ताँ क्होसि छलेन् लइ बिस्याँ क्हेमैं ङ्‌हो सब्मैं तब्मुँ।
JOH 13:18 “ङइ क्हेमैं ताँनए बारेर बिब् आङिं। ङइ त्हाँबै म्हि ङइ सेमुँ। दिलेया ‘ङए क्हें चबै म्हिइ ङए फिर प्हलेइ ह्‍याँइ’ दिलेया ठिमर प्ह्रिबै ताँ पूरा तरिगे बिसि छ तब् ग।
JOH 13:19 चु ताँ तब् भन्दा ओंसोंन् तोगो ङ क्हेमैंने बिमुँ। खैंमा चु तखमुँ ‘ङम् ङन् ग’ बिसि क्हेमैंइ क्वेंब्मुँ।
JOH 13:20 क्ह्रोंसेंन ङ क्हेमैंने बिमुँ, ङइ कुल्मिंबै म्हिलाइ मान लब्मैंइ ङलाज्यै या मान लमुँ, छलेन ङलाइ मान लब्मैंइ ङ कुल्मिंबै आबालाज्यै या मान लमुँ।”
JOH 13:21 चु ताँ बिबै लिउइ येशूए सैं खैता-खैता तइ धै ग्वाइ पिंसि बिइ, “क्ह्रोंसेंन ङ क्हेमैंने बिमुँ, क्हेमैं न्होंर्बै म्हि घ्रिइ ङलाइ क्हाल् पिंब्मुँ।”
JOH 13:22 खीजी खाबए बारेर बिब् मुँगे बिब आसेसि चेलामैंइ घ्रिइ-घ्रि ङ्‍ह्‍योबर होंइ।
JOH 13:23 येशूए चेलामैं न्होंर्बै खीजी खोबै चेला येशूए तिंर केंरिल।
JOH 13:24 झाइले सिमोन पत्रुसइ चने हस्‍ता लसि “खीजी चु ताँ खाबै बारेर बिगे? बिसि ङ्योएइ।”
JOH 13:25 झाइले च चेलाइ येशूए तिंर केंदै खीने “प्रभु, च खाब् जा?” बिसि ङ्योएमा।
JOH 13:26 येशूजी बिइ, “खाबलाइ ङइ क्हें लुँठे प्हेलार तुँइसि पिंमुँ, च चन् ग।” छ बिसि खीजी क्हें लुँठे प्हेलार तुँइसि सिमोनए च्‍ह यहूदा इस्‍करियोतथें पिंइ।
JOH 13:27 चइ च क्हें लुँठे चबै तोदोंन् चए सैंर दुष्‍ट होंइ। झाइले येशूजी चने “क्‍हिइ तो लल् म्हैल, च युनन् लद्,” बिइ।
JOH 13:28 दिलेया येशूजी तले चने छ बिगे बिसि चब् चबर टिब्मैं खाबज्यै आक्हो।
JOH 13:29 यहूदाने मुइ झोंबै नेंदो मुँल। छतसि “येशूजी चने ‘चाडए ल्हागिर चैदिबै सैमैं किंन्’ अथवा ‘ङ्हाँदुमैंलाइ च्हौदे मुइ पिंन्,’ बिब् मुँलै,” बिसि को-कोइ चेलामैंइ मैंइ।
JOH 13:30 क्हेंए लुँठे चबै तोदोंन् यहूदा बैरु त्होंयाइ। च त्हेर म्हुँइँस तल् खाँल।
JOH 13:31 यहूदा बैरु ह्‍याल् खाँबै लिउँइँ येशूजी बिइ, “तारे म्हिए च्हजी थेबै मान योंब्मुँ, धै ङउँइँले परमेश्‍वरजी थेबै मान योंब्मुँ।
JOH 13:32 छले ङउँइँले परमेश्‍वरजी थेबै मान योंइबिस्याँ परमेश्‍वरजी ह्रोंसइन म्हिए च्ह थेबै मान पिंब्मुँ, खीजी चु के युनन् लब्मुँ।
JOH 13:33 “ओ ङए च्योंनें कोलोमैं, दे त्हे समा मत्‍त्रे ङ क्हेमैंने बालु तब्मुँ! क्हेमैंइ ङ म्हैब्मुँ, ङइ यहूदी चिबनाँब्मैंने बिब् धोंले तारे क्हेमैंने या बिमुँ, ङ ह्‍याबै क्ल्ह्‍योर क्हेमैं खल् आखाँ।
JOH 13:34 लद् बिबै छारा ताँ घ्रि ङइ क्हेमैंने बिमुँ: क्हेमैंइ घ्रिइ-घ्रिने म्हाँया लद्। ङइ क्हेमैंने म्हाँया लब् धोंले क्हेमैंज्यै या घ्रिइ-घ्रिने म्हाँया लद्।
JOH 13:35 छले क्हेमैंइ घ्रिइ-घ्रिने म्हाँया लइ बिस्याँ, क्हेमैं ङए चेलामैं मुँन बिसि ताँनइ सेब्मुँ।”
JOH 13:36 छबिमा सिमोन पत्रुसइ खीने “ओ प्रभु, क्‍हि खनिर ह्‍यासिन् मुँ?” बिमा। येशूजी बिइ, “तोगो क्हि ङ ह्‍याबै क्ल्ह्‍योर ङए लिलि खल् आखाँ। लिउँइँ बिस्याँ क्हि ङए लिलि खब्मुँ।”
JOH 13:37 पत्रुसइ खीने बिइ, “ओ प्रभु, तोगोन ङ क्‍हिए लिलि तले खल् आखाँ? क्‍हिए ल्हागिर ङ सिल् त्हुलेया सिम्।”
JOH 13:38 येशूजी बिइ, “ङए ल्हागिरि क्हिइ ह्रोंसए ज्यु पिंम्मा? क्ह्रोंसेंन ङ क्हिने बिमुँ, क्‍हिइ सोंखे समा ङलाइ ङो आसे आबिन् समा नग भाले ओररिब् आरे।
JOH 14:1 “क्‍हेमैंए सैं खैता-खैता आङ्हाँन्। क्हेमैंइ परमेश्‍वरए फिर बिश्‍वास लमुँ, छलेन ङए फिरै या बिश्‍वास लद।
JOH 14:2 ङए आबाए धिंर टिबै क्‍ल्‍ह्‍योमैं ल्हें मुँ। ङ क्हेमैंए ल्हागिर टिबै क्ल्ह्‍यो तयार लबर ह्‍यासिन् मुँ। छ आङिस्याँ ङइ क्हेमैंने चु ताँ आबिमल।
JOH 14:3 ङ ह्‍यासि क्हेमैंए ल्हागिर क्ल्ह्‍यो तयार लल् खाँबै ‍लिउँइँ ङ धबै युब्मुँ, धै क्हेमैं ङ ङाँर बोयाब्मुँ। झाइले ङ टिबै क्ल्ह्‍योर क्हेमैं या टिल् योंब्मुँ।
JOH 14:4 ङ खनिर ह्‍यारिइमुँ, चर ह्‍याबै घ्याँ क्हेमैंज्यै या सेब्मुँ।”
JOH 14:5 थोमाइ येशूने बिइ, “ओ प्रभु, क्‍हि खनिर ह्‍यासिन् मुँ ङिइ आसे, छतसि ङिइ घ्याँ खैले ङो सेब?”
JOH 14:6 येशूजी चने बिइ, “घ्याँ, क्ह्रोंसेंन्बै ताँ, नेरो छ्ह ङन् ग। ङउँइँले बाहेक् खाबै या परमेश्‍वर आबा ङाँर फेनेल् आखाँ।
JOH 14:7 क्हेमैंइ ङलाइ ङो सेस्याँ ङए आबालाज्यै ङो सेमल। तारे क्हेमैंइ खीलाइ ङो सेब्मुँ, तलेबिस्याँ क्हेमैंइ खीलाइ म्रोंल् खाँइमुँ।”
JOH 14:8 फिलिपइ खीने बिइ, “ओ प्रभु, ङिने आबा उँइँमिंन्। छ लमिंस्याँ ङिलाइ तोइ आचैदि।”
JOH 14:9 येशूजी चने बिइ, “ओ फिलिप! च्‍हौ ल्‍हें त्हिंइ समा ङ क्‍हेमैंने बालुन् टिइ, अझै क्हिइ ङलाइ ङो आसे वा? ङलाइ म्रोंब्मैंइ आबालाज्यै या म्रोंइँमुँ। छतसि ‘ङिने आबा उँइँमिंन्?’ बिसि क्हिइ खैले बिल् खाँमुँ?
JOH 14:10 ङ आबाने मुँ, आबा या ङने बालु मुँ बिबै ताँ क्हिइ आक्वें वा? ङइ क्हेमैंने बिबै ताँमैं ङ ह्रोंसए सैंर मैंसि पोंब् आङिं। दिलेया ङने टिबै आबाजी ङउँइँले ह्रोंसए केमैं लम।
JOH 14:11 ङ आबाने मुँ आबा या ङने मुँ बिबै ताँ क्वेंन्। आक्वेंस्याँ ङइ लबै केमैं म्रोंसि क्वेंन्।
JOH 14:12 “क्ह्रोंसेंन ङ क्हेमैंने बिमुँ, ङलाइ बिश्‍वास लब्मैंइ ङइ लबै केमैं लब्मुँ। च भन्दा थेबै केमैं या लब्मुँ। तलेबिस्याँ ङ आबा ङाँर ह्‍यासिन् मुँ।
JOH 14:13 क्हेमैंइ ङए मिंर तो ह्रिलैया च्हउँइँले आबाए मान तरिगे बिसि क्हेमैंइ ह्रिबै सैमैं ङइ पूरा लमिंब्मुँ।
JOH 14:14 क्‍हेमैंइ ङए मिंर तोइ सै ह्रिलेया ङइ पिंब्मुँ।
JOH 14:15 “क्‍हेमैंइ ङलाइ म्हाँया लम् बिस्याँ ङइ बिबै ताँमैं या ङिंब्‍मुँ।
JOH 14:16 झाइले ङ आबाने यो छ्युँ लब्मुँ, धै खीजी क्हेमैं ङाँर अर्को ल्होमिंबै थु कुलब्मुँ। धै खी क्हेमैंने खोंयोंन् बिलै तरिब्‍मुँ।
JOH 14:17 खी क्ह्रोंसेंन्बै ताँ लोमिंबै पबित्र प्ल्ह ग। ह्‍युलर्बै म्हिमैंइ खीलाइ आक्वें, तलेबिस्याँ ह्‍युलर्बै म्हिमैंइ खी म्रोंइ आम्रोंइमुँ, सेइ आसेइमुँ। दिलेया क्हेमैंमि खीलाइ सेइमुँ। तलेबिस्या खी क्हेमैंने बालुन् टिमुँ, धै खी क्हेमैंनेन् तरिब्मुँ।
JOH 14:18 “ङइ क्हेमैं आबा आरेब्मैं धोंले पिथेंरिब् आरे। ङ धबै क्हेमैं ङाँर युब्मुँ।
JOH 14:19 तारे तिस्‍याँदे लिउँइँ ह्‍युलर्बै म्हिमैंइ ङ म्रोंरिब् आरे। दिलेया क्हेमैंइ बिस्याँ ङ म्रोंब्मुँ। ङ सोगों तबइले क्हेमैं या सोगों तरिब्मुँ।
JOH 14:20 ङ ङए आबाने मुँ, क्हेमैं ङने मुँ, धै ङै या क्हेमैंने मुँ बिब च त्हिंइर क्हेमैंइ सेब्मुँ।
JOH 14:21 ङइ बिबै ताँ ङिंब्मैं ङलाइ म्हाँया लब्मैं ग। धै ङलाइ म्हाँया लब्मैंने ङए आबाजी म्हाँया लब्मुँ। ङज्यै या चमैंलाइ म्हाँया लब्मुँ, झाइले ङ चमैं ङाँर म्रोंयुब्मुँ।”
JOH 14:22 यहूदइ (इस्‍करियोतथें आङिं) येशूने “प्रभु, क्हिजी तो बिब् जा छ बिब क्हि ङि ङाँर मत्‍त्रे म्रोंयुम्‍मा? ह्‍युलर्बै म्हिमैं ङाँर आम्रोंयु वा?” बिसि ङ्योएमा।
JOH 14:23 येशूजी चने बिइ, “खाबइ ङलाइ म्हाँया लमुँ, चइ ङए ताँ ङिंमुँ, धै ङए आबाजी चलाइ म्‍हाँया लब्‍मुँ, झाइले आबा नेरो ङ च ङाँर युसि चने बालु टिब्‍मुँ।
JOH 14:24 ङलाइ म्हाँया आलब्‍मैंइ ङए ताँ आङिं। क्हेमैंइ थेरिबै ताँ ङल् आङिं, ङ कुल्‍मिंबै आबाल् ग।
JOH 14:25 “ङ क्‍हेमैंने बालु मुँमन् ङइ चु ताँ क्‍हेमैंने बिइमुँ।
JOH 14:26 आबाजी ङए मिंर क्हेमैंलाइ ल्होमिंबै पबित्र प्ल्ह कुलमिंब्मुँ। खीजी क्‍हेमैंलाइ तोन्दोंरि ताँमैं लोमिंब्‍मुँ। धै ङइ क्‍हेमैंने ओंसोंन् बिबै ताँन् ताँमैं क्हेमैंलाइ चिमिंब्‍मुँ।
JOH 14:27 “ङए शान्ति क्हेमैंने पिंथेंब्मुँ। ङ ह्रोंसए शान्ति क्‍हेमैंलाइ पिंब्मुँ। चु ह्‍युलर्बै म्हिमैंइ पिंब् धोंबै शान्ति ङइ क्हेमैंलाइ आपिं। छतसि क्हेमैंए सैं खैता-खैता आतदु धै आङ्हिंन्।
JOH 14:28 ‘ङ ह्‍यासिन् मुँ, धबै क्हेमैं ङाँर’ युब्मुँ बिसि ङइ बिबै ताँ क्हेमैंइ थेइ। क्हेमैंइ ङलाइ म्हाँया लस्याँ ङ आबा ङाँर ह्‍यासिन् मुँ बिब् थेसि क्हेमैं सैं तोंमल। तलेबिस्याँ ङ भन्दा थेब आबा मुँ।
JOH 14:29 च ताँ तखबै त्हेर क्हेमैंइ ङए ताँ क्वेंरिगे बिसि ङइ चु ताँ तब् भन्दा ओंसोंन् क्हेमैंने बिमिंइँमुँ।
JOH 14:30 तारे चु ह्‍युलर्बै म्रुँ खसिन् ‍मुँ। छतसि ङ क्‍हेमैंने ल्‍हें पोंरिब् आरे। चइ ङए फिर तोइ लल् आखाँ।
JOH 14:31 दिलेया ङइ आबाने म्हाँया लम् बिब ह्‍युलर्बै म्हिमैंइ सेरिगे बिसि आबाजी ङने लद् बिबै केमैं ङ लरिमुँ। “रेद्, ङ्यो छुइले ह्‍याले।”
JOH 15:1 “क्ह्रोंसेंन्बै अँगुरए धुँ ङन् ग, ङए आबा बिस्याँ धुँमैं छेनाले ङ्‍ह्‍योबै क्ल्हे ग।
JOH 15:2 ङने मुँबै हाँगमैं न्होंरि रोमैं आरोबै हाँग खीजी छाँडेब्मुँ। धै रोमैं रोबै हाँगमैं बिस्याँ अझै ल्हें रोमैं रोरिगे बिसि खीजी छिमल्दिब्मुँ।
JOH 15:3 ङइ क्हेमैंने बिबै ताँमैंउँइँले क्हेमैं ओंसोंन् चोखो तल् खाँइमुँ।
JOH 15:4 ङने टिद्, धै ङ या क्हेमैंने टिब्मुँ। हाँग अँगुरए धुँर आटिस्याँ च हाँगइ रोमैं रोल् आखाँ, छलेन क्हेमैं या ङने आटिइ बिस्याँ रोमैं रोल् आखाँ।
JOH 15:5 “अँगुरए धुँ ङन् ग, क्‍हेमैं हाँगमैं ग। खाबै ङने टिइ बिस्याँ, धै ङ चने तइ बिस्याँ, चइ ल्हें रोमैं रोब्मुँ। तलेबिस्याँ ङ ङाँइँले स्यो तसि क्हेमैंइ तोइ लल् आखाँ।
JOH 15:6 ङने आटिब्मैं बिस्याँ रोमैं आरोबै हाँग धोंले बैरु भ्योंवाब्मुँ, धै कारयाब्मुँ। छाबै हाँगमैं म्हिमैंइ खागु लसि मिर ख्रोंवाब्मुँ।
JOH 15:7 क्‍हेमैं ङने टिइ बिस्याँ, धै ङए ताँ क्हेमैंए सैं न्होंर थेंइ बिस्याँ, क्हेमैंइ तो ह्रिदा ङ्हाँमुँ ह्रिद्, परमेश्‍वरजी क्हेमैंए ल्हागिर पिंब्मुँ।
JOH 15:8 क्‍हेमैंइ ल्हें रोमैं रोसि ङए चेलामैं ग बिसि उँइँमिंइ बिस्याँ ङए आबाए मिं थेब तब्मुँ।
JOH 15:9 “आबाजी ङने खैले म्‍हाँया लइमुँ, ङज्यै या क्हेमैंने छाबन् म्हाँया लइमुँ। छतसि क्हेमैं ङए म्हाँयार टिरिद्।
JOH 15:10 ङए आबाए ताँमैं ङिंसि खीए म्हाँयार ङ टिरिब् धोंले क्हेमैंइ ङइ बिबै ताँमैं ङिंइ बिस्याँ क्हेमैं ङए म्हाँयार टिरिब्मुँ।
JOH 15:11 ङए सैं तोंब् धोंलेन क्हेमैं या बेल्‍ले सैं तोंरिगे बिसि ङइ क्हेमैंने चु ताँ बिइमुँ।
JOH 15:12 “ङइ बिबै ताँ चुन् ग, ङइ क्‍हेमैंने म्‍हाँया लब् धोंलेन् क्‍हेमैंज्यै या घ्रिइ-घ्रिने म्‍हाँया लद्।
JOH 15:13 ह्रोंसए थुमैंए ल्हागिर ह्रोंसै ज्यु पिंब् भन्दा थेबै म्हाँया अरू तोइ आरे।
JOH 15:14 ङइ बिबै ताँमैं क्हेमैंइ लइ बिस्याँ क्हेमैं ङए खोबै थुमैं तब्मुँ।
JOH 15:15 तारेसेरो ङइ क्हेमैंने केब्छैं आबि, तलेबिस्याँ क्ल्हेइ तो लम् बिसि केब्छैंइ था आसे। दिलेया ङइ क्हेमैंने थु बिइमुँ, तलेबिस्याँ ङए आबाउँइँले थेबै तोन्दोंरि ताँ ङइ क्हेमैंने बिमिंइँमुँ।
JOH 15:16 क्‍हेमैंइ ङलाइ त्‍हाँब आङिं, ङइ क्हेमैं त्हाँब् ग। क्हेमैं ह्‍यासि रामैं रोरिगे धै क्हेमैंए रामैं खोंयोंन् बिलै तरिगे बिसि ङइ क्हेमैं हुइ। छलमा क्हेमैंइ ङए मिंर आबाने तो सै ह्रिलेया खीजी क्हेमैंलाइ पिंब्मुँ।
JOH 15:17 क्हेमैंज्यै या घ्रिइ-घ्रिने म्हाँया लरिगे बिसि ङ चु ताँमैं क्हेमैंने बिमुँ।
JOH 15:18 “ह्‍युलर्बै म्हिमैंइ क्‍हेमैं प्ह्रइ बिस्‍याँ, क्हेमैं प्ह्रब् भन्दा ओंसों चमैंइ ङलाइ प्ह्रब् ग बिसि क्हेमैंइ मैंन्।
JOH 15:19 क्‍हेमैं चु ह्‍युलर्बै आङिं, क्हेमैं चु ह्‍युलर्बै ङिंस्याँम् ह्‍युलर्बै म्हिमैंइ क्हेमैं ह्रोंसल धों ङ्हाँसि म्हाँया लमल। ङइ क्हेमैं चु ह्‍युलउँइँले त्हाँइ। छतसि ह्‍युलर्बै म्हिमैंइ क्हेमैंलाइ हेल लम्।
JOH 15:20 केब्छैं ह्रोंसए क्ल्हे भन्दा थेब् आत बिसि ङइ क्हेमैंने बिबै ताँ मैंन्। म्हिमैंइ ङ ह्रुगुदिइ बिस्याँ क्हेमैंलाज्यै या ह्रुगुदिब्मुँ। चमैंइ ङए ताँ ङिंइ बिस्याँ क्हेमैंए ताँ या ङिंब्मुँ।
JOH 15:21 क्हेमैंइ ङए मिं किंसेरो म्हिमैंइ चु तोन्दोंरि दुःख क्हेमैंलाइ पिंब्मुँ। तलेबिस्याँ चमैंइ ङ कुल्मिंबै आबा ङो आसे।
JOH 15:22 ङ युसि चु ह्‍युलर्बै म्हिमैंने आबिमिंस्याँ चमैंने पापए दोष आतमल। दिलेया तारेम् चमैंए पापए ल्हागिरि चमैंने तोइ न्युँ आरे।
JOH 15:23 ङलाइ हेल लब्मैंइ ङए आबालाज्यै या हेल लम्।
JOH 15:24 अरू खाबज्यै या लल् आखाँबै औदिबै केमैं ङइ चमैंए उँइँर आलस्याँ चमैं पापए दोष आतमल। दिलेया चमैंइ ङ नेरो ङए आबा ङ्हिंना-ङ्हिंन् म्रोंसेया हेल लइमुँ।
JOH 15:25 दिलेया छ्वेर प्ह्रिथेंबै चु ताँ पूरा तबर छ तब् ग, ‘चमैंइ तोनतोर्न ङलाइ हेल लइ बिसि चर प्ह्रिथेंइमुँ।’
JOH 15:26 “ङइ आबाउँइँले ल्होमिंबै पबित्र प्ल्ह क्हेमैं ङाँर कुल्मिंब्मुँ, खी परमेश्‍वर आबाउँइँले युब्मुँ, खीजीन् ङए बारेर ग्वाइ पिंब्मुँ।
JOH 15:27 क्हेमैं ओंसों ओंनोंन् ङने बालु मुँबइले क्हेमैं या ङए साक्षि ग।”
JOH 16:1 “क्‍हेमैंइ दुःख आयोंरिगे बिसि ङइ चु ताँन् ताँमैं क्हेमैंने बिब् ग।
JOH 16:2 म्हिमैंइ क्हेमैं यहूदीमैंए च्हों धिंउँइँले तेवाब्मुँ। क्हेमैंलाइ सैब्मैंइ परमेश्‍वरए सेवा लसिन् मुँ बिसि मैंबै त्हे खसिन् मुँ।
JOH 16:3 आबा नेरो ङ ङो आसेबइले चमैंइ चु के लब्मुँ।
JOH 16:4 दिलेया चमैंइ चु के लमा ङइ बिबै ताँ क्हेमैंइ मैंरिगे बिसि ङइ चु ताँमैं क्हेमैंने बिइमुँ। “ङइ ओंसोंन् क्हेमैने चु ताँ आबि, तलेबिस्याँ ङ क्हेमैंनेन् मुँल।
JOH 16:5 ङ तारे ङ कुल्मिंबै आबा ङाँर ह्‍याइनमुँ, दिलेया क्हेमैं खाबज्यै ‘क्हि खनिर ह्‍याइनमुँ?’ बिसि ङने आङ्योए।
JOH 16:6 दिलेया ङइ चु ताँ बिबइले क्हेमैंए सैंर बेल्‍ले न्हुँ तइमुँ।
JOH 16:7 छान् तलेया ङइ क्हेमैंने क्ह्रोंसेंन्बै ताँ बिमुँ, ङ छुइले ह्‍याबन् क्हेमैंए ल्हागिर छ्याँब् तम्। तलेबिस्याँ ङ आह्‍याइ बिस्याँ ल्होमिंबै पबित्र प्ल्ह क्हेमैं ङाँर युरिब् आरे। ङ ह्‍याइ बिस्याँ पबित्र प्ल्ह क्हेमैं ङाँर कुल्मिंब्मुँ।
JOH 16:8 झाइले पबित्र प्ल्ह युबै लिउँइँ ह्‍युलर्बै म्हिमैंलाइ पाप, धार्मिकता नेरो नियाए बारेर दोषि ठर्दिब्मुँ।
JOH 16:9 ङए फिर बिश्‍वास आलब पाप ग बिसि खीजी चमैंने उँइँमिंब्मुँ।
JOH 16:10 खीजी परमेश्‍वरए उँइँर तो ठिक मुँ चन् उँइँमिंब्मुँ तलेबिस्याँ ङ आबा ङाँर ह्‍याइनमुँ, क्हेमैंइ धबै ङ म्रोंरिब् आरे।
JOH 16:11 परमेश्‍वरए निसाफ खैबै तम् बिसि खीजी म्हिमैंने उँइँमिंब्मुँ। तलेबिस्याँ चु ह्‍युलर्बै म्रुँ दोषि ठर्दिल् खाँइमुँ।
JOH 16:12 “ङइ क्‍हेमैंने बिल् त्‍हुबै ताँ ल्‍हेन् मुँ, दिलेया च ताँमैं तोगो क्हेमैंइ सैदिल् आखाँ।
JOH 16:13 दिलेया क्ह्रोंसेंन्बै ताँ लोमिंबै पबित्र प्ल्ह युब्मुँ, धै खीजी क्हेमैं ताँन् क्ह्रोंसेंन्बै छ्याँबै घ्याँर डोरेमिंब्मुँ। खीजी ह्रोंसए सैंर मैंब् धोंले आपों। खीजी तो ताँ थेमुँ चन् पोंब्मुँ, धै लिउँइँ तखबै ताँमैं क्हेमैंने बिमिंब्मुँ।
JOH 16:14 ङइ बिबै ताँमैं खीजी क्हेमैंने बिमिंसि ङए मान लब्मुँ।
JOH 16:15 आबाने मुँबै ताँन् सैमैं ङल् ग। छतसि पबित्र प्ल्हजी ङए ताँ क्हेमैंने बिमिंब्मुँ बिब् ग।
JOH 16:16 “तिस्‍याँदे लिउँइँ क्‍हेमैंइ ङ म्रोंरिब् आरे, झाइले तिस्याँदे लिउँइँ क्हेमैंइ धबै ङ म्रोंब्मुँ।”
JOH 16:17 छले खीए को-कोइ चेलामैंइ घ्रिइ-घ्रिने बिइ, “‘तिस्‍याँदे लिउँइँ क्‍हेमैंइ ङ म्रोंरिब् आरे। तिस्याँदे लिउँइँ क्हेमैंइ धबै ङ म्रोंब्मुँ, तलेबिस्याँ ङ आबा ङाँर ह्‍यासिन् मुँ।’ बिसि खीजी ङ्योने बिब तो जा?”
JOH 16:18 चमैंइ बिइ, “खीजी ‘तिस्‍याँदे लिउँइँ’ बिब तो जा? ङिइ था आसे, खीजी बिल् म्हैबै ताँ ङिइ आक्हो।”
JOH 16:19 चमैंइ खीने चु ताँए बारेर ङ्योएबै सैं लसिन् मुँ बिब येशूजी था सेइ। छतसि खीजी बिइ, “‘तिस्‍याँदे लिउँइँ क्‍हेमैंइ ङ म्रोंरिब् आरे, झाइले तिस्याँदे लिउँइँ क्हेमैंइ ङ धबै म्रोंब्मुँ,’ बिबै अर्थ तो मुँगे बिसि क्हेमैंए न्होंर छलफल लरिल् वा?
JOH 16:20 क्ह्रोंसेंन ङ क्हेमैंने बिमुँ, क्हेमैं न्हुँ लसि क्रोब्मुँ, दिलेया ह्‍युलर्बै म्हिमैं बिस्याँ सैं तोंब्मुँ। क्हेमैं न्हुँ लसि टिलेया लिउँइँ सैं तोंल् योंब्मुँ।
JOH 16:21 कोलो फिबै त्‍हे तमा च्हमिरिमैं बेल्‍ले दुःख तम्, दिलेया कोलो फिल् खाँब लिउँइँ चइ ताँन् दुःख म्‍ले‍याम्। तलेबिस्याँ ह्‍युलरि कोलो घ्रि फिइ बिसि च बेल्‍ले सैं तोंम्।
JOH 16:22 छलेन तोगो क्हेमैंलाइ शोक तमुँ। दिलेया ङ धबै क्‍हेमैंने त्‍होयुमा क्‍हेमैंए सैं बेल्‍ले तोंब्‍मुँ। धै खाबज्यै क्हेमैंलाइ सैं आतोंल् लल् खाँरिब् आरे।
JOH 16:23 “च त्‍हिंइर क्‍हेमैंइ ङने तोइ ङ्योएरिब् आरे। क्ह्रोंसेंन ङ क्हेमैंने बिमुँ, क्हेमैंइ ङए मिंर आबाने तोइ ह्रिलेया खीजी क्हेमैंलाइ पिंब्‍मुँ।
JOH 16:24 तोगो समा ङए मिंरि क्‍हेमैंइ आबाने तोइ आह्रिइमुँ। तारे ह्रिद् क्‍हेमैंइ योंब्मुँ। झाइले क्‍हेमैं बेल्‍ले सैं तोंल् योंब्‍मुँ।
JOH 16:25 “तोगो ङइ क्हेमैंने अहानउँइँले ताँ लरिइमुँ। प्हँन लिउँइँ बिस्याँ परमेश्‍वर आबाए बारेर ङइ क्हेमैंइ क्होल्‍ले बिमिंब्मुँ।
JOH 16:26 च त्हिंइर क्‍हेमैं ह्रोंसइन ङए मिंर परमेश्‍वरने ह्रिब्मुँ। ङइ क्‍हेमैंए ल्हागिर आबाने ह्रिमिंल् आत्हु।
JOH 16:27 तलेबिस्याँ आबाजी क्‍हेमैंने म्हाँया लम्। तलेबिस्याँ क्हेमैंइ ङलाइ म्हाँया लइमुँ, धै ङ परमेश्‍वर आबाउँइँले युब् ग बिसि क्वेंइमुँ।
JOH 16:28 ङ आबउँइँले ह्‍युलर युइमुँ, तारे ह्‍युल पिसि ङ आबा ङाँर एह्‍याम्।”
JOH 16:29 खीए चेलामैंइ बिइ, “तोगोम् क्हिजी अहान आबिल्‍ले बेल्‍ले क्होल्‍ले पोंरिइमुँ।
JOH 16:30 क्हिजी तोन्दोंरि ताँ सेमना बिसि तारे ङिइ क्होइ। खाबज्यै या क्हिने ताँमैं ङ्योएल् आत्हु। छतसि क्हि परमेश्‍वर आबाउँइँले युब् ग बिसि ङिइ क्वेंइमुँ।”
JOH 16:31 येशूजी चमैंने बिइ, “क्हेमैंइ तारे ङए फिर बिश्‍वास लम्मा?
JOH 16:32 ङ्ह्‍योत्ति! त्हे खसिन् मुँ, खल् खाँइ। च त्हेर क्हेमैं खन्तोदोंन् प्हुँयासि ह्रों-ह्रोंसए धिंर ह्‍याब्मुँ धै ङ घ्रिन् वाथेंब्मुँ। दिलेया ङ घ्रि आरे, तलेबिस्याँ आबा ङने बालुन् मुँ।
JOH 16:33 “क्हेमैं ङने बालु टिमा छिं ङ्हाँरिगे बिसि ङइ क्हेमैंने चु ताँमैं बिइमुँ। ह्‍युलर मुँमा क्हेमैंलाइ दुःख तब्मुँ, दिलेया सैं थेब लद्। ङइ ह्‍युललाइ ट्होवाइमुँ।”
JOH 17:1 चु ताँ बिल् खाँबै लिउँइँ येशूजी स्वर्गउँइँ ङ्‍ह्‍योसि बिइ, “ओ आबा, क्जिजी तोक्दिबै त्हे तखइमुँ। च्हइ क्हिए थेबै मान उँइँमिंरिगे बिसि च्हए थेबै मान तल् पिंन्।
JOH 17:2 खीने पिंबै ताँन् म्हिमैंलाइ खीजी खोंयोंइ आखाँबै छ्ह पिंरिगे बिसि क्‍हिजी खीलाइ ताँन् म्हिमैंए फिर हग पिंइँमुँ।
JOH 17:3 म्हिमैंइ क्हि घ्रि मत्‍त्रे क्ह्रोंसेंन्बै परमेश्‍वरलाइ ङो सेब नेरो क्हिजी कुल्मिंबै येशू ख्रीष्‍टलाइ ङो सेबन् खोंयोंइ आखाँबै छ्ह ग।
JOH 17:4 क्हिजी ङने लद् बिसि पिंबै के खाँन् लसि चु ह्‍युलर क्हि कति थेब मुँ बिसि उँइँमिंइमुँ।
JOH 17:5 ओ आबा, ह्‍युल बनेब् भन्दा ओंसोंन् क्हि ङाँर ङला थेबै मान मुँल। तारे ङ क्हि ङाँर खमा च थेबै मान ङलाइ पिंन्।
JOH 17:6 “क्हिजी ह्‍युलउँइँले त्हाँसि ङने पिंबै म्हिमैंलाइ ङइ क्हि ङो सेल् पिंइँमुँ। चमैं क्हिल्ना मुँल दिलेया क्हिजी चमैं ङलाइ पिंइँमुँ। चमैंइ क्हिए ताँमैं ङिंइँमुँ।
JOH 17:7 क्हिजी ङलाइ पिंबै तोन्दोंरि सै क्हिउँइँले युब् ग बिसि चमैंइ तोगो था सेइमुँ।
JOH 17:8 तलेबिस्याँ क्हिजी ङने पिंबै ताँ ङइ चमैंने पिंइँमुँ। धै चमैंइ च ताँ क्वेंसि ङ क्हि ङाँइले युब् ग बिसि क्ह्रोंसेंन्ले सेइमुँ। झाइले क्हिजीन् ङ कुल्मिंब् ग बिसि चमैंइ क्वेंइँमुँ।
JOH 17:9 “ङ चमैंए ल्हागिर प्राथना लमुँ। ह्‍युलर्बै म्हिमैंए ल्हागिर प्राथना आल, दिलेया क्हिजी ङने पिंबै म्हिमैंए ल्हागिर ङ प्राथना लमुँ, तलेबिस्याँ चमैं क्हिलन् ग।
JOH 17:10 ङने मुँबै ताँन् म्हि क्‍हि‍लन् ग, धै क्हिने मुँबै ताँन् म्हि ङल् ग। ङए मान चमैंउँइँले तइमुँ।
JOH 17:11 तारे ङ क्हि ङाँर खसिन् मुँ। ङ चु ह्‍युलर ल्हें आटि, चुमैं बिस्याँ चु ह्‍युलर्न टिम्। ओ पबित्र आबा, ङ्यो घ्रि तब् धोंलेन् क्हिजी ङने पिंब्मैं या घ्रिन् तरिगे बिसि क्हिए मिंए शक्‍तिउँइँले चमैं जोगेसि थेंमिंन्।
JOH 17:12 ङ चमैंने मुँमा क्हिए मिंए शक्‍तिउँइँले ङइ चमैं जोगेसि थेंमिंइ। परमेश्‍वरए छ्वेर प्ह्रिबै ताँ पूरा तबै ल्हागिर नास तल् त्हुबै चेला बाहेक अरू खाबै या नास आतइमुँ।
JOH 17:13 “तारे ङ क्हि ङाँर खसिन्‌ मुँ, दिलेया चमैंए सैं ङइ पिंथेंबै आनन्दइ प्लिंरिगे बिसि ह्‍युलर मुँमा ङइ चु ताँमैं बिइमुँ।
JOH 17:14 ङइ चमैंलाइ क्‍हिए ताँ लोमिंइ। ङ ह्‍युलर्बै आङिंब् धोंले चमैं या चु ह्‍युलर्बै आङिं। छतसि चु ह्‍युलर्बै म्हिमैंइ चमैं हेल् लम्।
JOH 17:15 क्हिजी चमैं चु ह्‍युलउँइँले बोमिंन् बिसि ङ यो छ्युँ आल। दिलेया दुष्‍टउँइँले जोगेमिंन् बिसि ङ यो छ्युँ लम्।
JOH 17:16 ङ चु ह्‍युलर्बै आङिंब् धोंलेन् चमैं या चु ह्‍युलर्बै आङिं।
JOH 17:17 क्हिए ताँ क्ह्रोंसेंन्ब ग। छतसि क्हिए क्ह्रोंसेंन्बै ताँउँइँले चमैं क्हिए पबित्र म्हिमैं लमिंन्।
JOH 17:18 क्हिजी ङ चु ह्‍युलर कुलब् धोंले ङज्यै या चमैं ह्‍युलर कुल्मिंइमुँ।
JOH 17:19 चमैं क्ह्रोंसेंन्बै पबित्र म्हिमैं तरिगे बिसि ङ चमैंए ल्हागिर ह्रोंसलाइ पबित्र लम्।
JOH 17:20 “ङ चुमैंए ल्हागिर मत्‍त्रे प्राथना आल, चुमैंइ बिबै ताँउँइँले ङए फिर बिश्‍वास लब्मैंए ल्हागिरै या प्राथना लम्।
JOH 17:21 ओ आबा, चमैं ताँन् घ्रिन् तरिगे बिसि ङ प्राथना लम्। धै क्हि ङने बालु मुँ, ङ क्हिने बालु मुँब् धोंलेन् चमैं या ङ्योने बालु तरिगे। चमैं ताँन् घ्रिन् तमा क्हिजी ङ कुल्मिंब् ग बिसि ह्‍युलर्बै म्हिमैंइ क्वेंरिगे बिसि ङ प्राथना लम्।
JOH 17:22 क्हि नेरो ङ घ्रिन् तब् धोंलेन् चमैं या घ्रिन् तरिगे बिसि क्हिजी ङने पिंबै मान ङइ चमैंलाज्यै या पिंइँमुँ।
JOH 17:23 क्हिजी ङ कुल्मिंब् ग धै क्हिजी ङने म्हाँया लब् धोंलेन् क्हिजी चमैंलाज्यै या म्हाँया लइमुँ। छतसि चमैं तोन्दोंरि सैर क्ह्रिसि घ्रिन् तरिगे बिसि ङ चमैंने बालु मुँ, क्हि ङने बालु मुँ बिब ह्‍युलर्बै म्हिमैंइ सेरिगे।
JOH 17:24 “ओ आबा, चु ह्‍युल बनेब् भन्दा ओंसों ओंनोंन् क्हिजी ङलाइ म्हाँया लसि थेबै मान पिंइ। क्हिजी ङने पिंबै म्हिमैं ङए थेबै मान म्रोंबर चमैं ङ टिबै क्ल्ह्‍योरि ङने बालुन् तरिगे बिब ङए सैं मुँ।
JOH 17:25 ओ क्ह्रोंसेंन्बै निसाफ लबै आबा, ह्‍युलर्बै म्हिमैंइ क्‍हिलाइ ङो आसे। दिलेया ङइ क्‍हिलाइ ङो सेइमुँ। झाइले क्‍हिजी ङ कुल्‍मिंब् ग बिसि चुमैंइ सेइमुँ।
JOH 17:26 क्हिजी ङने खैबै म्हाँया लइमुँ, छाबन् म्हाँया चमैंने या तरिगे, धै ङ चमैंने बालु तरिगे बिसि ङइ क्हिए मिं चुमैंलाइ सेल् पिंइमुँ, अझै सेल् पिंरिब्मुँ।”
JOH 18:1 चु ताँ बिल् खाँसि येशू ह्रोंसए चेलामैंने बालु किद्रोन बिबै खोल्सए क्योंजार्बै बगैंचार ह्‍याइ।
JOH 18:2 येशू ह्रोंसए चेलामैंने बालु चर खागु तब्रें लमल, छतसि खी क्हाल् पिंबै येहूदाइ च क्ल्ह्‍यो सेमल।
JOH 18:3 च त्हेर्न यहूदाइ रोमी सिपाइमैं ख्रो पिंबै खेगि चिब्मैं नेरो फरिसीमैंइ कुल्मिंबै मन्दिर रुँबै म्हिमैं च बगैंचार बत्ति नेरो प्हरे-क्होजमैं छेसि मेंदों म्रोसि चर फेखइ।
JOH 18:4 ह्रोंसए फिर तखबै ताँन् ताँमैं था सेसि येशू ओंसों खसि चमैंने “क्हेमैंइ खाबलाइ म्‍हैरिल?” बिसि ङ्योएमा।
JOH 18:5 चमैंइ खीने “नासरतथें येशू म्हैलो,” बिइ। येशूजी चमैंने बिइ, “ङम् ङन् ग।” खी क्हाल् पिंबै यहूदा या चमैंने बालुन् रारिल।
JOH 18:6 येशूजी चमैंने “ङम् ङन् ग” बिमा चमैं ताँन् लिउँइँ स्योयाइ धै सर क्हुरियाइ।
JOH 18:7 खीजी धबै चमैंने “क्‍हेमैंइ खाब् म्‍हैरिल?” बिसि ङ्योएमा चमैंइ बिइ, “नासरतथें येशू।”
JOH 18:8 येशूजी बिइ, “ङइ क्हेमैंने तलन् बिल् खाँइ, ङम् ङन् ग। छतसि क्हेमैंइ ङलाइ म्हैब् ग बिस्याँ चु म्हिमैंलाइ ह्‍याल् पिंन्।”
JOH 18:9 “क्हिजी ङलाइ पिंब्मैं न्होंरि घ्रि या म्हल् आपिं” बिसि खीजी बिबै ताँ पूरा तबै ल्हागिर छ तब् ग।
JOH 18:10 सिमोन पत्रुसइ ह्रोंसए सेलाँ (तरवार) ट्हुइसि ख्रो पिंबै खेगि क्रथेए केब्छैंलाइ प्रिंमा चए क्योलोउँइँबै न्हेमें च्वाट्टले प्‍योथोवाइ। च केब्छैंए मिं माल्खस मुँल।
JOH 18:11 येशूजी पत्रुसने बिइ, “क्‍हिए सेलाँ स्युर झोंन्। आबाजी ङलाइ पिंबै दुःखए प्हेला ङइ आथुँले वा?”
JOH 18:12 च लिउँइँ रोमी कप्‍तान, सिपाइमैं नेरो यहूदीमैंए मन्दिर रुँबै म्हिमैंइ येशू क्हासि फैइ।
JOH 18:13 ओंसों चमैंइ खी हन्‍नास ङाँर बोइ। हन्‍नास बिब च सालर्बै ख्रो पिंबै खेगि क्रथे कैयाफाए क्यें मुँल।
JOH 18:14 “ताँन् ह्रेंर्बै म्हिमैंए ल्हागिर म्हि घ्रि सिबन् छ्याँब तम् बिसि कैयाफाइ ओंसोंन् यहूदी चिब्मैंने बिल।”
JOH 18:15 सिमोन पत्रुस नेरो येशूए अर्को चेला घ्रि येशूए लिलि प्रयाइ। च अर्को चेला ख्रो पिंबै खेगि क्रथेइ ङो सेबै म्हि मुँल। छतसि च येशूने बालु ख्रो पिंबै खेगि क्रथेए ह्‍युर ह्‍याइ।
JOH 18:16 दिलेया पत्रुस म्रा बैरुन् रारिल। च ख्रो पिंबै खेगि क्रथेइ ङो सेबै चेला बैरु त्होंसि म्रार टिबै च्हमिरिने बिसि पत्रुस न्होंर पखइ।
JOH 18:17 झाइले म्रार टिबै च्हमिरिइ पत्रुसने बिइ, “क्हि या च म्हिए चेलामैं न्होंर्बै घ्रि आङिं वा?” पत्रुसइ “ङ आङिं,” बिइ।
JOH 18:18 खुँबै त्हे तबइले केब्छैंमैं नेरो मन्दिर रुँब्मैं मि त्हेसि रारिल। छतसि पत्रुस या चमैंने बालु रासि मि त्हेबर होंइ।
JOH 18:19 झाइले ख्रो पिंबै खेगि क्रथेइ येशूने खीए चेलामैं नेरो खीजी लोमिंबै ताँए बारेर ङ्योएइ।
JOH 18:20 येशूजी चने बिइ, “ङइ म्हिमैंए उँइँर ताँनइ थेल्‍ले बिइमुँ। ङइ खोंयोंन् बिलै यहूदीमैं खागु तबै म्हि च्हों धिंर नेरो मन्दिरर लोमिंमल। ङइ आसेल्‍ले तोइ आबिइमुँ।
JOH 18:21 ङने तले ङ्योएरिल? ङइ तो बिइ बिसि ङए ताँ थेब्मैंनेन् ङ्योएद्। ङइ बिबै ताँमैं चमैंइ सेइमुँ।”
JOH 18:22 येशूजी चु ताँ बिमा खीए चेंदो रारिबै मन्दिर रुँब्मैं न्होंर्बै घ्रिइ “ख्रो पिंबै खेगि क्रथेने छले पोंम्मा?” बिदै येशूलाइ प्रिंइ।
JOH 18:23 येशूजी चने बिइ, “ङइ आछ्याँबै ताँ बिइमुँ बिस्याँ चए ग्वाइ पिंन्। ङइ छ्याँब ताँ पोंइमुँ बिस्याँ तले ङलाइ प्रिंमुँ?”
JOH 18:24 च लिउँइँ हन्‍नासइ येशू फैसिन् ख्रो पिंबै खेगि क्रथे कैयाफा ङाँर कुल्मिंइ।
JOH 18:25 सिमोन पत्रुस रासि मि त्‍हेरिल। चर्बै म्हिमैंइ चने बिइ, “क्हि या चए चेलामैं न्होंर्बै घ्रि आङिं वा?” चइ “अँहँ, ङ आङिं,” बिइ।
JOH 18:26 चर पत्रुसइ न्हेमें थोवाबै म्हिए ह्रजे म्हजे घ्रि मुँल। च ख्रो पिंबै खेगि क्रथेए केब्छैंमैं न्होंर्बै घ्रि मुँल। चइ पत्रुसने बिइ, “ङइ क्हिलाइ चने बालु बगैंचार म्रोंइ आङिं वा?”
JOH 18:27 पत्रुसइ अझै “आङिं!” बिइ। छ बिबै तोंदोंन् नग भाले ओरइ।
JOH 18:28 चमैंइ न्हाँगर्न येशू कैयाफाए धिंउँइँले रोमी सरकारए क्रथेए दरबारउँइँ बोइ। दिलेया यहूदी चिबनाँब्मैं “दुःखने फ्रेबै चाडए भोज चबै ल्हागिर ङ्यो चोखो तल् त्हुम्,” बिसि दरबार न्होंर आहों।
JOH 18:29 छतसि पिलातस बिबै क्रथे चमैं ङाँर बैरु त्होंसि “क्‍हेमैंइ चु म्हिए बिरोधर तो छ्याब् ल्हैदिल?” बिसि ङ्योएमा
JOH 18:30 चमैंइ “चु म्हिइ आछ्याँबै केमैं आलस्याँ ङिइ चु क्‍हि ङाँर आपखमल,” बिइ।
JOH 18:31 पिलातसइ चमैंने “क्‍हेमैंइन चु म्हि बोसि क्हेमैंए ठिमर बिब् धोंले चुए निसाफ लद्,” बिमा चमैंइ, “खाबलाज्यै या सैबै दण्ड पिंबै हग ङिने आरे,” बिइ।
JOH 18:32 (खी खैले सिल् त्‍हुम् बिसि ओंसोंन् येशूजी बिबै ताँ पूरा तबर छ तला।)
JOH 18:33 पिलातस धबै दरबार न्‍होंर होंइ, धै येशूलाइ हुइसि “क्हि येहूदिमैंए म्रुँ वा?” बिसि ङ्योएइ।
JOH 18:34 येशूजी बिइ, “क्हि ह्रोंसइन ङ्योएब् उ अरू खाबज्यै ङए बारेर क्हिने बिइ?”
JOH 18:35 पिलातसइ बिइ, “क्हिइमि ङ यहूदी ङ्हाँल् वा? क्‍हिए ह्रेंमैं नेरो ख्रो पिंबै खेगि चिब्मैंइ क्‍हि ङए योर पिंवाइमुँ। क्हिजी तो के लल?”
JOH 18:36 येशूजी बिइ, “ङए ग्याल्स चु ह्‍युलर्बै आङिं। ङए ग्याल्स चु ह्‍युलर्बै ङिंस्याँम् ङ येहूदिमैंए योर आफेरिगे बिसि ङए चेलामैं ङए ल्हागिर नेमल। धै ङ यहूदीमैंए योर आफेमल। दिलेया ङए ग्याल्स चु ह्‍युलर्बै आङिं।”
JOH 18:37 पिलाताइ खीने “छ बिस्याँ क्हि म्रुँन् वा?” बिसि ङ्योएमा येशूजी बिइ, “ङ म्रुँ ग बिसि क्‍हिइन बिइमुँ। क्‍ह्रोंसेंन्‍बै ताँए ग्वाइ पिंबै ल्हागिर ङ फिब् ग। छतसि ङ चु ह्‍युलर युब् ग। क्ह्रोंसेंन्बै ताँ खोब्मैंइ ङए ताँ थेमुँ।”
JOH 18:38 पिलातसइ येशूने “क्‍ह्रोंसेंन्‍बै ताँ तो जा?” बिसि च धबै बैरु त्होंह्‍यासि येहूदिमैंने बिइ, “ङइ चु म्हिने तोइ छ्याब् योंल् आखाँ।
JOH 18:39 दुःखने फ्रेबै चाडर क्हेमैंए ल्हागिर ङइ झेलर च्युथेंबै म्हि घ्रि पिमिंब क्हेमैंए रोस मुँ। छतसि क्हेमैंइ यहूदीमैंए म्रुँ पिमिंरिगे ङ्हाँइमुँ वा?”
JOH 18:40 छबिमा चमैंइ धबै ओरदै “चु आङिं, बरु बरब्‍बा पिमिंन्,” बिइ। (बरब्‍बा बिबै म्हि ह्‍यो मुँल।)
JOH 19:1 झाइले पिलातसइ येशू न्होंर बोसि कोर्राइ प्रुबर ल्‍हैदिइ।
JOH 19:2 च लिउँइँ सिपाइमैंइ पुजुए मुकुट बनेसि येशूए क्रर कुमिंइ, धै कलेजी रङर्बै क्वें खिमिंइ।
JOH 19:3 झाइले चमैं खी ङाँर खसि “येहूदिमैंए म्रुँ जय तरिगे!” बिदै खीलाइ प्लाँइ।
JOH 19:4 पिलातस धबै बैरु त्होंसि यहूदीमैंने बिइ, “ङइ चने तोइ छ्याब् आयों बिब क्हेमैंज्यै या सेरिगे बिसि ङइ च म्हि क्हेमैं ङाँर बैरु पुइमुँ।”
JOH 19:5 च लिउँइँ पुजुए मुकुट नेरो कलेजी रङर्बै क्वें खिसि येशू बैरु त्होंयुमा पिलातसइ चमैंने बिइ, “लु, चु म्हिलाइ ङ्‍ह्‍योद्।”
JOH 19:6 येशू म्रोंबै तोदोंन् ख्रो पिंबै खेगि चिब्मैं नेरो मन्दिर रुँब्मैंइ ओरदै, “च क्रूसर च्योवाद्! च क्रूसर च्योवाद्! बिबर होंइ।” छतमा पिलातसइ चमैंने बिइ, “क्‍हेमैंइन चु म्हि बोसि क्रूसर च्योवद्। तलेबिस्याँ ङइ चुने तोइ छ्याब् आयोंइमुँ।”
JOH 19:7 यहूदी चिबनाँब्मैंइ चने बिइ, “ङिए ठिमर बिब् धोंले चु सिलन् त्हुम्। तलेबिस्याँ चुइ ह्रोंसलाइन परमेश्‍वरए च्ह ग बिइमुँ।”
JOH 19:8 चु ताँ थेसि पिलातस झन् ङ्हिंयाँइ।
JOH 19:9 छतमा च धबै दरबार न्‍होंर होंसि “क्‍हि खनर्बै जा?” बिसि येशूने ङ्योएमा येशूजी चने तिजी या ज्वाफ आपिं।
JOH 19:10 छतमा पिलातसइ खीने बिइ, “क्हि ङने आपों वा? क्हि पिवाबै हग ङने मुँ, धै क्रूसर च्योवाबै हगै या ङने मुँ बिसि क्हिजी आसेइमुँ वा?”
JOH 19:11 येशूजी बिइ, “परमेश्‍वरजी आपिंस्याँ क्हिला ङए फिर तोइ हग आतमल। छतसि ङलाइ क्हिए योर पिंवाबै म्हिए फिर पापए छ्याब् झन् ल्हें तब्मुँ।”
JOH 19:12 च लिउँइँ पिलातसइ येशूलाइ पिवाल् म्हैइ। दिलेया यहूदीमैं छ बिदै ओरइ, “क्हिइ चु म्हि पिवाइ बिस्याँ क्हि रोमी कैसर म्रुँए थु तरिब् आरे। ह्रोंसलाइन म्रुँ ग बिबै म्हिन् कैसरए बिरोधर तब्मुँ।”
JOH 19:13 पिलातसइ चु ताँ थेसि येशू दरबारए बैरु पुयुसि “युँमाइ स्युबै ह्‍यु” बिबै क्ल्ह्‍योरि निसाफ लबर क्हुँइ। (हिब्रू क्युइर च ह्‍युए मिं गब्‍बथा बिमुँ।)
JOH 19:14 च त्हे दुःखने फ्रेबै चाडए ल्हागिर चैदिबै सैमैं तयार लबै त्हिंइ मुँल। च त्हेर त्हिंयाँर्बै च्युसे ङ्हिं ह्राबि छेमा। पिलातसइ यहूदीमैंने “ङ्‌ह्‍योद्, क्हेमैंए म्रुँ,” बिइ।
JOH 19:15 छबिमा “बोयाद्, बोयाद्, च क्रूसर च्योवाद्!” बिसि चमैं ओरइ। छतमा पिलातसइ चमैंने “ङइ क्‍हेमैंए म्रुँ क्रूसर च्योवाद् वा?” बिसि ङ्योएमा “रोमी कैसर म्रुँ बाहेक् ङिला अरू म्रुँ आरे,” बिसि ख्रो पिंबै खेगि चिब्मैंइ बिइ।
JOH 19:16 झाइले पिलातसइ येशूलाइ क्रूसर च्योवाद् बिसि यहूदीमैंए योर पिंवाइ। धै सिपाइमैंइ येशू बोयाइ।
JOH 19:17 येशूजी ह्रोंसए क्रूस ह्रोंसइन नोसि क्र खोप्‍लें बिबै क्ल्ह्‍योर ह्‍याइ। (हिब्रू क्युइर च क्ल्ह्‍योए मिं गलगथा बिमुँ।)
JOH 19:18 चर चमैंइ खी क्रूसर च्योवाइ धै खीए क्‍योलोउँइँ म्हि घ्रि त्हर्ग्योउँइँ म्हि घ्रि च्योवाइ। येशू बिस्याँ चमैंए म्हाँजोर मुँल।
JOH 19:19 झाइले पिलातसइ “नासरतरथें येशू, यहूदीमैंए म्रुँ ग” बिबै छ्याब् प्ह्रिसि क्रूसए फिर टौंदिल् पिंइ।
JOH 19:20 येशू क्रूसर च्योवाबै क्ल्ह्‍यो यरूशलेम सहरए चेंदोन् मुँल। छतसि ल्हें म्हिइ छले प्ह्रिथेंबै छ्याब् खेइ। च ताँ हिब्रू, रोमी, नेरो ग्रिक क्युइर प्ह्रिथेंल।
JOH 19:21 ख्रो पिंबै खेगि चिब्मैंइ पिलातसने बिइ, “‘यहूदीमैंए म्रुँ ग’ बिब आङिं, बरु ‘चुइ ङ यहूदीमैंए म्रुँ ग बिल’ बिसि प्ह्रिमिंन्।”
JOH 19:22 दिलेया पिलातसइ “मुँरिगे! ङइ तो प्ह्रिइ छाबन् मुँरिगे,” बिइ।
JOH 19:23 झाइले सिपाइमैंइ येशू क्रूसर च्योवासि खीए क्वें प्लिसि प्लिबाँ लसि ताँन् सिपाइमैंइ चुइ। धै खीए फिर्बै क्वें या चमैंइ किंइ। च क्वें ताइले माइ समन् आटुल्‍ले योइ रोब् मुँल।
JOH 19:24 छतसि चमैंइ खेंमैंए न्होंर बिइ, “चु क्वें आट्होले, बरु चु खाबल् तम् बिसि चिट्ठा झोंले।” परमेश्‍वरए छ्वेर प्ह्रिबै ताँ पूरा तरिगे बिसि छ तब् ग। “चमैंइ ङए क्‍वें खें-खेंमैंए न्‍होंर चुइ, फिर्बै क्‍वेंए ल्हागिर बिस्याँ चिट्ठा झोंइ।” बिसि प्ह्रिथेंल। छतसि सिपाइमैंइ छाबै के लइ।
JOH 19:25 येशूए क्रूस ङाँर्न खीए आमा, खीए आमाए अङाँ, क्लोपासए प्ह्रेंस्यो मरियम नेरो मरियम बिबै मग्दालाथेंस्यो रारिल।
JOH 19:26 झाइले येशूजी खीए आमा नेरो खीजी खोबै चेला चर रारिब् म्रोंसि आमाने बिइ, “ओ आमा, ङ्‍ह्‍योद्, चु क्हिए च्ह ग!”
JOH 19:27 छलेन खीजी खोबै चेलाने बिइ, “ङ्‍ह्‍योद्, चु क्हिए आमा ग!” च त्हेसेरो च चेलाइ येशूए आमा खीए धिंर न्हबर बोइ।
JOH 19:28 च लिउँइँ येशूजी तारे ताँन् के लल् खाँइ बिब् सेसि परमेश्‍वरए छ्वेर प्ह्रिबै ताँ पूरा तरिगे बिसि “ङ क्यु पिइ,” बिइ।
JOH 19:29 चर प्हा क्युँइ प्लिंबै कुँइँडि घ्रि मुँल। चमैंइ च प्हा क्युँर ह्रुइ प्ल्हुँसि हिसप बिबै सिंए प्हरेर फैसि खीए सुँर झोंमिंइ।
JOH 19:30 झाइले येशूजी प्हा क्युँ थुँसि बिइ, “तारे ङए के खाँयाँइ!” च्हौ बिसि क्र कुरसि खीजी सो पिवाइ।
JOH 19:31 च त्हिंइ प्रिबै त्हिंइए ल्हागिर चैदिबै सैमैं तयार लबै त्हिंइ मुँल। यहूदीमैंइ प्रिबै त्हिंइर के आलमल। धै च खास प्रिबै त्हिंइ मुँल। छतसि सिनुमैं क्रूसर आतरिगे बिसि चमैंइ पिलातसने यो छ्युँ लसि “चमैंए प्हले चोवासि चमैंए ज्यु बोयारिगे,” बिइ।
JOH 19:32 छबिमा सिपाइमैं खसि येशूने बालु क्रूसर च्योवाब्मैंए प्हले घ्रि घ्रिले चोवाइ।
JOH 19:33 झाइले चमैं येशूए प्हले चोबर खमा खीजी ओंसोंन् सो पिवाल् खाँब् म्रोंइ। छतसि खीए प्हले आचो।
JOH 19:34 दिलेया सिपाइमैं न्होंर्बै घ्रिइ खीए कोखर बर्साइ ल्हिबै तोदोंन् को नेरो क्यु त्होंइ।
JOH 19:35 (क्हेमैंज्यै या क्वेंल् खाँरिगे बिसि चु ताँ म्रोंबै म्हिइ खै तब् म्रोंइ छाबन ग्वाइ पिंसि बिब् ग। चए ग्वाइ क्ह्रोंसेंन्ब मुँ, धै ह्रोंसइ क्ह्रोंसेंन्बै ताँ बिइमुँ बिसि चइ सेइमुँ।)
JOH 19:36 “खीए ह्रिब घ्रि या चोयाब् आरे।” बिसि परमेश्‍वरए छ्वेर प्ह्रिबै ताँ पूरा तरिगे बिसि छ तब् ग।
JOH 19:37 धबै परमेश्‍वरए छ्वेर्बै अर्को क्ल्ह्‍योर छले बिइमुँ। “चमैंइ म्‍लोबै म्हिलाइ ङ्‍ह्‍योब्मुँ।”
JOH 19:38 अरिमाथियाथें योसेफ बिबै म्हि घ्रि येशूए चेला मुँल। च यहूदी चिबनाँब्मैंने ङ्हिंमल छतसि आसेल्‍ले न्हों-न्हों मत्‍त्रे येशूए चेला मुँल। चइ पिलातसने येशूए सिनु बोयाल् पिंन् बिसि यो छ्युँ लमा पिलातसइ येशूए सिनु बोल् पिंइ। धै चइ येशूए सिनु बोइ।
JOH 19:39 म्हुँइँसर ओंसोंन् येशू ङाँर खबै निकोदेमस या योसेफने बालु ह्‍याइ। चइ सोंच्युसे सों किलोदे गन्धरस नेरो एलवा कोंबै द्रब्य किंसि चर बोइ।
JOH 19:40 यहूदीमैंए सिबै त्हेर लबै रोस् धोंले चमैंइ लिंबै थाँ खबै अत्तर येशूए सिनुर फोसि सुतिए क्वेंर म्होरइ।
JOH 19:41 येशू क्रूसर च्योवाबै क्ल्ह्‍योए रेर्न बगैंचा घ्रि मुँल। च बगैंचार खाबइ आपाबै छारा छगों घ्रि मुँल।
JOH 19:42 च त्हे क्‍यु सैसि म्हाँदिबै चाडए ल्हागिर तयार लबै त्हिंइ मुँल। धै च छगों या चेंदोन् मुँबइले चमैंइ येशू चर्न थेंइ।
JOH 20:1 आइतबार न्हाँगर्न मि छेनाले आम्रोंबर्न मग्दालाथेंस्यो मरियम छगोंर ह्‍यामा छगोंउँइँले युँमा स्योथेंब् म्रोंइ।
JOH 20:2 झाइले च सिमोन पत्रुस नेरो येशूजी खोबै अर्को चेला ङाँर न्हेह्‍यासि बिइ, “म्हिमैंइ प्रभु छगोंउँइँले बैरु बोयाना! दिलेया खीलाइ खनिर थेंइँमुँ ङिइ आसे।”
JOH 20:3 छबिमा पत्रुस नेरो अर्को चेला बैरु त्‍होंसि छगोंउँइँ ह्‍याइ।
JOH 20:4 चमैं ङ्हिंना-ङ्हिंन् न्हेह्‍याइ दिलेया अर्को चेला पत्रुस भन्दा ओंसों छगोंर फेनेइ।
JOH 20:5 च कुरसि छगों न्‍होंर ङ्‌ह्‍योमा सुतिए ट्हि क्वेंमैं मत्‍त्रे म्रोंइ, दिलेया च छगों न्होंर आहों।
JOH 20:6 च लिउँइँ सिमोन पत्रुस या फेनेसि छगों न्होंर होंइ। चज्यै या ट्हि क्वेंमैं मत्‍त्रे म्रोंइ।
JOH 20:7 येशूए क्रर फैबै ह्रुमल ट्हि क्वेंमैंने आरेल। च तिराइ तासि मुँल।
JOH 20:8 छगोंर ओंसोंन् फेखबै अर्को चेला या न्होंर होंइ। चज्यै छाब् म्रोंसि येशू सिबउँइँले सोगों तना बिबै ताँ क्वेंइ।
JOH 20:9 (तलेबिस्याँ चमैंइ च त्हे समा येशू सिबउँइँले सोगों तल् त्हुम् बिसि परमेश्‍वरए छ्वेर प्‍ह्रिबै ताँमैं आक्होल।)
JOH 20:10 च लिउँइँ च चेलामैं ह्रोंसए धिंर एह्‍याइ।
JOH 20:11 मरियम बिस्याँ छगोंए बैरु रासि क्रोरिल। च क्रोदै कुरसि छगोंउँइँ ङ्‍ह्‍योमा
JOH 20:12 येशूए सिनु थेंबै क्ल्ह्‍योर तार्ग्या क्वें खिबै स्वर्गदूतमैं ङ्हिं घ्रि क्रउँइँ अर्को प्हलेउँइँ टिरिब चइ म्रोंइ।
JOH 20:13 स्वर्गदूतमैंइ चने “ओ नानि, क्‍हि तले क्रोरिल?” बिसि ङ्योएमा चइ बिइ, “म्हिमैंइ ङए प्रभु बोयाना। दिलेया खी खनिर थेंगे ङइ आसे।”
JOH 20:14 च्हौ ताँ बिसि च लिउँइँ तोमा चइ येशू रारिब् म्रोंइ। दिलेया येशून् ग बिसि ङो आसेल।
JOH 20:15 येशूजी चने “ओ नानि, क्‍हि तले क्रोरिल? क्‍हिइ खाब् म्‍हैल?” बिसि ङ्योएमा चइ खी बगैंचार के लबै म्हि धों ङ्हाँसि बिइ, “चिब, क्‍हिइ छुइले खीलाइ बोयास्याँ, खनिर थेंइँमुँ ङने बिमिंन्। खीलाइ ङ बोह्‍याम्।”
JOH 20:16 येशूजी चने “ओ मरियम” बिमा चइ खी ङाँइ तोसि हिब्रू क्युइर खीने “रब्‍बोनि” बिइ। (छ बिब “ओ गुरुज्‍यू” ग।)
JOH 20:17 येशूजी चने बिइ, “ङ आछुइद् तलेबिस्याँ ङ तोगो समा आबा ङाँर आह्‍याइमुँ। बरु ङए अलिमैं ङाँर ह्‍यासि चमैंने ‘तारे ङ ङए आबा, क्हेमैंए आबा, धै ङए परमेश्‍वर, क्हेमैंए परमेश्‍वर ङाँर ह्‍यासिन् मुँ’ बिसि ङए ताँ बिमिंन्।”
JOH 20:18 छबिमा मग्दालाथेंस्यो मरियम ह्‍यासि चेलामैंने “ङइ प्रभु म्रोंइ!” बिबै ताँ नेरो प्रभुजी बिबै ताँ या चमैंने बिइ।
JOH 20:19 च आइतबारए ङेसार चेलामैं यहूदी चिबनाँब्मैंने ङ्हिंसि म्रा तोरसि धिं न्होंर टिरिल। छले टिरिमा येशू चमैंए म्हाँजोर राखसि “क्हेमैं छिं ङ्हाँरिगे,” बिइ।
JOH 20:20 च्हौ बिसि खीजी चमैंने खीए यो नेरो कोखै या उँइँइ। “प्रभुन् मुँन” बिब् सेसि चेलामैं बेल्‍ले सैं तोंइ।
JOH 20:21 येशूजी धबै चमैंने बिइ, “क्‍हेमैं छिं ङ्हाँरिगे! आबाजी खैले ङ कुल्‍मिंइ, छलेन ङज्‍यै या क्‍हेमैं कुल्मिंब्मुँ।”
JOH 20:22 च्हौ बिसि खीजी चमैंए फिर सो फुइसि बिइ, “पबित्र प्ल्ह किंन्।
JOH 20:23 खाबै पाप क्हेमैंइ क्षमा लमुँ, चमैंए पाप क्षमा तमुँ। छलेन खाबै पाप क्हेमैंइ क्षमा आल, चमैंए पाप क्षमा आत।”
JOH 20:24 येशू चेलामैं ङाँर खमा च्युसे ङ्हिं चेलामैं न्होंर्बै दिदुमस बिबै थोमा चमैंने बालु आरेल।
JOH 20:25 छतसि अरू चेलामैंइ थोमाने बिइ, “ङिइ प्रभु म्रोंइ।” दिलेया थोमाइ चमैंने बिइ, “खीए किला क्योबै यो आम्रोंन् समा धै किला क्योबै यो नेरो खीए कोखर ङए यो आझोंन् समा ङ चु ताँ क्वेंरिब् आरे।”
JOH 20:26 प्रेरो लिउँइँ खीए चेलामैं म्रा तोरसि धिं न्होंर्न टिरिल। थोमा या चमैंने बालुन् मुँल। च त्हेर्न येशू धिं न्होंर होंखसि चमैंए म्हाँजुर रासि “क्‍हेमैं छिं ङ्हाँरिगे,” बिइ।
JOH 20:27 झाइले खीजी थोमाने बिइ, “योरि चुर झोंसि ङए योमैं ङ्‍ह्‍योद्। धै क्‍हिए यो ङए कोखरै झोंन्। संका आलल्‍ले बिश्‍वास लद्।”
JOH 20:28 छबिमा थोमाइ खीने “ओ ङए प्रभु, ओ ङए परमेश्‍वर!” बिइ।
JOH 20:29 येशूजी चने बिइ, “क्‍हिइमि ङ म्रोंबइले ङए फिर बिश्‍वास लइ, दिलेया ङ आम्रोंलेया ङए फिर बिश्‍वास लब्मैं ङ्‍हो सब्मैं ग।”
JOH 20:30 येशूजी अरू ल्हें औदिबै चिनुमैं चेलामैंए उँइँर लइ। च केमैं चु कितबर आप्ह्रिइमुँ।
JOH 20:31 दिलेया “येशू परमेश्‍वरए च्ह नेरो खीजी कुल्‍मिंबै म्रुँ ख्रीष्‍ट ग,” बिब क्हेमैंइ क्वेंरिगे धै खीए फिर बिश्‍वास लबइले क्हेमैंइ खोंयोंइ आखाँबै छ्ह योंरिगे बिसि ङइ चु ताँमैं प्ह्रिइमुँ।
JOH 21:1 च लिउँइँ येशू गलिलर्बै तिबेरियास मा ङ्युँइए रेर चेलामैं ङाँर धबै म्रोंखल। खी छले त्होखल:
JOH 21:2 सिमोन पत्रुस, जौंले बिबै थोमा, गालीलर्बै कानाथें नथानेल, याकूब, यूहन्‍ना, नेरो येशूए चेलामैं न्होंर्बै अरू म्हि ङ्हिं या बालुन् मुँल।
JOH 21:3 च त्हेर सिमोन पत्रुसइ थुमैंने “ङम् ताँग क्हाबर ह्‍याम्,” बिमा चमैंइ “ङि या क्हिने बालुन् ह्‍याम्,” बिसि डुँङ्गार क्रेसि ह्‍याइ। दिलेया च म्हुँइँसर चमैंइ ताँग घ्रि या आस्याल।
JOH 21:4 न्हाँग छजँ येशू मा ङ्युँइए छेउर राखइ। दिलेया चेलामैंइ खी येशून् ग बिसि आसे।
JOH 21:5 येशूजी चमैंने “ओ कोलोमैं, क्हेमैंइ ताँग क्हाइ वा?” बिमा “घ्रि या आस्याइमुँ!” बिसि चमैंइ बिइ।
JOH 21:6 खीजी चमैंने बिइ, “जाल डुँङ्गाए क्योलो हारइ प्रिंन्दि ताँग स्याब्मुँ।” खीजी बिब् ङिंसि चमैंइ जाल प्रिंमा ल्हें ताँगमैं स्यासि चमैंइ जाल चैंल् आखाँ।
JOH 21:7 येशूजी खोबै चेलाइ पत्रुसने बिइ, “खिम् प्रभु ग मुँन!” “खी प्रभु मुँन!” बिब् थेसि सिमोन पत्रुसइ ह्रोंसए प्लिथेंबै क्वें क्रेर फैसि क्युर फाल् झोंइ।
JOH 21:8 अरू चेलामैं बिस्याँ डुँङ्गार्न क्हुँसि जाल चैंरिल। चमैं माँङ्युँइए रेउँइँले ह्रेंगो आरेल। योदा आयोदा प्र मिटरदे ह्रेंगो मुँल।
JOH 21:9 झाइले चमैं तालए छेउर तमा मि राबार ताँग नेरो क्हें थेंब म्रोंइ।
JOH 21:10 येशूजी चमैंने बिइ, “क्‍हेमैंइ भर्खर क्‍हाबै च्हौदे ताँग पउदि।”
JOH 21:11 झाइले सिमोन पत्रुसइ डुँङ्गार क्रेसि प्रसे ङ्‌हच्युसे सों थेब्-थेबै ताँगइ प्लिंबै जाल चैंसि पखर पखइ। ल्हें ताँगमैं तनाबिलेया जाल आट्होल।
JOH 21:12 येशूजी चमैंने “प्रुगैं चबर खो बिइ।” दिलेया चेलामैं न्होंर्बै खाबज्यै या “क्हि खाब् जा?” बिसि ङ्योएबै आँट लल् आखाँ। तलेबिस्याँ चमैंइ खी प्रभुन् ग बिसि ङो सेल।
JOH 21:13 येशूजी क्हें छेखसि चमैंलाइ पिंइ, छलेन ताँगै या पिंइ।
JOH 21:14 येशू सिबउँइँले सोगों तसि खबै लिउँइँ चेलामैं ङाँर म्रोंखब चु सोंखेबै ला मुँल।
JOH 21:15 चमैंइ चल् खाँबै लिउँइँ येशूजी सिमोन पत्रुसने “ओ यूहन्‍नाए च्ह सिमोन, क्हिइ ङने चुमैंइ भन्दा ल्हें म्हाँया लम्मा?” बिमा चइ खीने बिइ, “अँ प्रभु, ङइ क्हिलाइ म्हाँया लम् बिब क्हिजी सेइमुँ।” खीजी चने बिइ, “छ बिस्याँ ङए क्यु झजमैं चल् पिंन्।”
JOH 21:16 येशूजी ङ्हिखेबै लारै या चने “ओ यूहन्‍नाए च्ह सिमोन, क्हिइ ङने म्हाँया लम्मा?” बिसि ङ्योएमा चइ खीने बिइ, “अँ प्रभु, ङइ क्हिलाइ म्हाँया लम् बिसि क्हिजी सेइमुँ।” खीजी चने बिइ, “छ बिस्याँ ङए क्युमैं छेनाले छैं लद्।”
JOH 21:17 येशूजी सोंखेबै लारै या चने “ओ यूहन्‍नाए च्ह सिमोन, क्हिइ ङलाइ म्हाँया लम्मा?” बिसि ङ्योएमा पत्रुसए सैं च्योंब तयाइ तलेबिस्याँ येशूजी सोंखेबै लारै या चने “क्हिइ ङलाइ म्हाँया लम्मा?” बिसि ङ्योएइ। छतसि चइ खीने बिइ, “प्रभु, क्हिजी तोन्दोंरि ताँ सेइमुँ। ङइ क्हिलाइ म्हाँया लम् बिसि क्हिजी सेइमुँ।” छबिमा येशूजी चने “ङए क्युमैं चल् पिंन्,” बिइ।
JOH 21:18 “क्ह्रोंसेंन ङ क्हिने बिमुँ, क्हि फ्रेंसि मुँमा ह्रोंसइन ह्रोंसए फगि फैमल, धै खनिर ह्‍यादा ङ्हाँमुँ चर ह्‍यामल। दिलेया क्हि खेब् तमा क्हिइ ह्रोंसए यो स्योंब्मुँ, धै आगुइन क्हिए फगि फैमिंब्मुँ। धै क्हि ह्‍यादा आङ्हाँबै क्ल्ह्‍योर बो‍याब्मुँ।”
JOH 21:19 (परमेश्‍वरए मिं थेब् लबै ल्हागिर पत्रुस खैले सिल् त्‍हुम् बिसि येशूजी छ बिल।) चु ताँमैं बिल् खाँबै लिउँइँ येशूजी चने “ङए लिलि प्रद्!” बिइ।
JOH 21:20 पत्रुसइ लिग्‍याँइ तोसि ङ्‌ह्‍योमा येशूजी खोबै चेला लिलि खरिब् म्रोंइ। चइ ओंसों ङेसर्बै चब् चबै त्हेर येशूए तिंर केंसि “प्रभु, क्हिलाइ क्हाल् पिबै म्हि खाब् जा?” बिसि ङ्योएल।
JOH 21:21 च म्रोंसि पत्रुसइ येशूने “प्रभु, चुलाइ तो तम् दि?” बिसि ङ्योएइ।
JOH 21:22 येशूजी चने बिइ, “ङ आयुन् समा चइ ङ पैंरिगे बिब ङए सैं मुँलेया क्हिलाइ चु ताँ तले चैदिइ? क्हिम् ङए लिलि प्रद्!”
JOH 21:23 छतसि च चेला सिरिब आरे बिबै ताँ अरू अलिमैं न्होंर थेनेइ। दिलेया येशूजी “च आसि” आबिल। “ङ आयुन् समा च सोरिगे बिब ङए सैं मुँलेया क्‍हिलाइ च ताँ तले चैदिइ?” बिसि खीजी बिल।
JOH 21:24 चु ताँन् ताँ ग्वाइ पिंसि प्ह्रिबै चेला येशूजी खोबै चेला ग। चए ग्वाइ क्ह्रोंसेंन्बै मुँ बिसि ङिइ सेइमुँ।
JOH 21:25 येशूजी अरू ल्हेंन् केमैं या लइ। च ताँन् केमैं घ्रि घ्रिले प्ह्रिइ बिस्याँ प्ह्रिबै कितबमैं ह्‍युलर आत्हेमल बिसि ङए सैंर ङ्हाँम्।
ACT 1:1 ओ थियोफिलस, येशूजी सुरु लबै के नेरो लोमिंल् म्हैबै ताँए बारेर ङइ “लूका” बिबै कितबर ओंसोंन् प्ह्रिथेंइँमुँ।
ACT 1:2 च के लब नेरो ताँ लोमिंबर होंबै त्हेउँइँले खीलाइ स्‍वर्गर बोह्‍याबै त्हे समार्बै ताँन् ताँमैं ङइ चर प्ह्रिथेंइँमुँ। स्वर्गउँइँ बोयाब् भन्दा ओंसों येशूजी त्‍हाँबै कुल्मिंबै चेला चिब्मैंलाइ खीजी पबित्र प्ल्हउँइँले “छ-छ लद्” बिइ।
ACT 1:3 येशूजी ल्हें दुःख नोबै लिउँइँ खीजी “ङ सोगों मुँ” बिसि खाबज्यै या थोल् आखाँबै ल्हें थेबै प्रमाणउँइँले चमैंए उँइँर उँइँमिंइ। प्लिच्यु त्हिंइ समा खी चमैं ङाँर म्रोंखब्रें लइ धै परमेश्‍वरए ग्याल्सए ताँ चमैंने बिमिंइ।
ACT 1:4 झाइले तिखे चमैंने बालु चब् चबर टिमा खीजी चमैंने बिइ, “क्हेमैं यरूशलेमउँइँले खनिरै आह्‍याद्। दिलेया ङए आबाजी बाछा फैसि पिंम् बिबै बरदान पैंसि टिरिद्। च बरदानए ताँ ङउँइँले क्हेमैंइ थेल् खाँइमुँ।
ACT 1:5 तलेबिस्याँ यूहन्‍नाइमि क्युइ बप्‍तिस्‍मा पिंइ, तारे दे त्हिंइ लिउँइँ पबित्र प्ल्हउँइँले क्हेमैंए बप्‍तिस्मा तब्‍मुँ।”
ACT 1:6 छतसि कुल्मिंबै चेला चिब्मैं खागु तसि, “ओ प्रभु, क्‍हिजी तोगोन् इस्राएलर्बै ग्याल्स धबै बनेमिंम्मा?” बिसि खीने ङ्योएइ।
ACT 1:7 खीजी चमैंने बिइ, “परमेश्‍वर आबाजी ह्रोंसए हगउँइँले तोक्‍दिबै त्हे खीजीन् सेमुँ, क्‍हेमैंइ सेल् आत्‍हु।
ACT 1:8 दिलेया पबित्र प्ल्ह क्‍हेमैंए फिर युबै लिउँइँ क्‍हेमैंइ शक्‍ति योंब्‍मुँ। धै क्हेमैं यरूशलेमर, ताँन् यहूदीया नेरो सामरियार, धै ह्‍युलए कुना-कुना समा ङए ग्वाइ पिंब्मैं तब्मुँ।”
ACT 1:9 खीजी चु ताँ बिबै लिउँइँ चमैंइ ङ्‍ह्‍योना ङ्‍ह्‍योन् खी कैंडो क्वेयाइ, झाइले न्‍हाँम्‍स्योइ हुवाइ। छले चमैंइ खीलाइ म्रोंल् आखाँ।
ACT 1:10 चमैं खी मुउँइँ ह्‍यारिब् ङ्‍ह्‍योरिमा तार्ग्‍या क्‍वें खिबै म्हि ङ्हिं चमैं ङाँर रायुसि बिइ,
ACT 1:11 “ओ गालीलथेंमैं, क्हेमैं तले मुउँइँ ङ्‍ह्‍योसि रारिल? चुन् येशू, क्हेमैंउँइँले परमेश्‍वरजी स्वर्गर बोयाइ। तोगो खी खैले स्वर्गर ह्‍यारिब क्हेमैंइ म्रोंइ छलेन खी धबै युब्मुँ।”
ACT 1:12 च लिउँइँ चमैं जैतून बिबै कोंउँइँले यरूशलेमर एखइ। यरूशलेमउँइँले चु कों किलोमिटर घ्रि दे ह्रेंगो मुँल।
ACT 1:13 चमैं सहरर ह्‍याबै लिउँइँ खेंमैं टिबै धिंए आटिफिर ह्‍याइ। चमैं पत्रुस, यूहन्‍ना, याकूब, अन्‍द्रियास, फिलिप, थोमा, बारथोलोमाइ, मत्ती, अल्‍फयसए च्‍ह याकूब, नेरो ह्रोंसए ह्‍युल म्हाँया लबै सिमोन, नेरो याकूबए च्‍ह यहूदा मुँल।
ACT 1:14 कोइ च्हमिरिमैं नेरो येशूए आमा मरियम, येशूए अलिमैंने बालु सैं घ्रि तसि खोंयोंन् बिलै प्राथना लरिमल।
ACT 1:15 दे त्हे लिउँइँ येशूए फिर बिश्‍वास लबै प्रसे ङ्हिस्युदे म्हिमैं खागु तमा चमैंए म्हाँजोर पत्रुस रासि बिइ,
ACT 1:16 “ओ अलि-अङाँमैं, येशू क्हाब्मैंए घ्‍याँ उँइँमिंबै यहूदाए बारेर दाऊदए सुँउँइँले ओंसोंन् पबित्र प्ल्हजी बिमिंल। च छ्‍वेर प्ह्रिथेंबै ताँ ताँन् तखल् त्हुमल।
ACT 1:17 ङि धोंलेन् चैया प्रभुए च्युसे ङ्हि कुल्मिंबै चेलामैं न्होंर्बै घ्रि मुँल, छतसि ङिइ लब् धों तबै के चज्यै या लल् योंइ।”
ACT 1:18 (च म्हिइ छाबै आछ्याँबै केमैं लसि योंबै मुइइ क्ल्ह्‍यो घ्रि किंइ, धै च क्ल्ह्‍योर्न च क्युरु थिंले तेयाइ। छतमा चए फो तियासि चए न्हाँनु-भुँडिमैं ताँन् स्वालयाइ।
ACT 1:19 चु ताँ यरूशलेमर टिबै ताँन् म्हिमैंइ था सेइ। धै च क्ल्ह्‍योए मिं खेंमैंए क्युइर आखेल्दामा थेंइ। चुए अर्थ कोए म्रों ग।)
ACT 1:20 धबै पत्रुसइ बिइ, “भजनसंग्रह बिबै कितबर छले प्‍ह्रिइमुँ, ‘चए धिं क्होत्‍तेन् तरिगे, धै चर टिब्मैं खाबइ आयोंरिगे।’ छलेन ‘चइ लबै केए जिम्मा आगुइ योंरिगे।’
ACT 1:21 छतसि प्रभु येशू ङ्योए म्हाँजोर मुँमा खोंयोंन् बिलै ङ्योने बालु मुँबै म्हि घ्रि त्हाँल् त्हुम्।
ACT 1:22 यूहन्‍नाइ येशूलाइ बप्‍तिस्‍मा पिंबै त्हिंइउँइँले येशू स्वर्गर बोवाबै त्हे समा ङ्योने बा-बालु प्रब्-टिबै म्हि तल् त्हुम्। च म्हिइ येशू सिबउँइँले धबै सोगों तइ बिसि ग्वाइ पिंल् खाँब तल् त्हुम्।”
ACT 1:23 चु ताँ थेसि चमैंइ बारसा‍बास नेरो मतियास त्हाँइ। (बारसा‍बासए अर्को मिंमैं योसेफ नेरो युस्तस मुँल।)
ACT 1:24 चमैंइ छले प्राथना लइ, “ओ प्रभु, क्‍हिजी ताँन् म्‍हिए सैं न्‍होंर्बै ताँ था सेम्। छतसि चु बारसाबास नेरो मत्तियासए न्‍होंरि क्‍हिजी त्‍हाँबै म्हि ङिने उँइँमिंन्।
ACT 1:25 तलेबिस्याँ च यहूदा क्हिए के लबै ल्हागिर कुल्मिंबै चेला चिब तबर क्हिजी त्हाँलेया चइ च के पिसि सजैं योंबै क्ल्ह्‍योर ह्‍याइ।”
ACT 1:26 झाइले चमैंइ च म्हि ङ्हिंए म्हाँजोर चिट्ठा झोंमा मतियासए मिंर फेइ, धै कुल्मिंबै चेला चिब्मैं च्युसे घ्रिने बालु चैया च्योइ।
ACT 2:1 पेन्‍तिकोसए त्हिंइर खमा, येशूए फिर बिश्‍वास लब्मैं ताँन् क्ल्ह्‍यो घ्रिर खागु तल।
ACT 2:2 च त्हेर्न स्वर्गउँइँले तिखेर्न थेबै खैं खब् धों तसि चमैं टिबै धिं न्हों ताँन् प्लिंयाँइ।
ACT 2:3 झाइले मिए ले धों तबै सै चमैं ङाँर म्रोंयुसि चमैं ताँनए फिर टिइ।
ACT 2:4 छतमा चमैं ताँन् परमेश्‍वरए पबित्र प्ल्हजी प्लिंयाँइ, धै पबित्र प्ल्हजी पिंबै शक्‍तिउँइँले चमैंइ स्यो-स्योबै क्युइर पोंबर होंइ।
ACT 2:5 स्वर्गए न्होंर मुँबै ताँन् ह्‍युलउँइँले परमेश्‍वर म्हाँदिबै यहूदीमैं च त्हेर यरूशलेमर टिल।
ACT 2:6 छाबै कै थेसि ल्हें म्हि चर खागु तइ, झाइले चमैं प्लेटोयाइ तलेबिस्याँ ताँनइ खें-खेंमैंए क्‍युइर पोंरिब थेइ।
ACT 2:7 झाइले चमैं ताँन् बेल्‍ले प्लेटोयासि, “चु पोंब्मैं ताँन् गालीलथेंमैंन् आङिं वा?” बिसि बिबर होंइ।
ACT 2:8 “खैले चुमैं ताँनइ ङ्योए ह्रोंसए क्युइर्न पोंरिब ङ्योइ थेइमुँ?
ACT 2:9 ङ्यो चुर पार्थीमैं, मादीमैं, एलामीमैं, मेसोपोटामियाथेंमैं, यहूदीयाथेंमैं, कापाडोकियाथेंमैं, पोन्‍टसथेंमैं नेरो एशियाथेंमैं मुँ।
ACT 2:10 झाइले फ्रिगिया, पामफिलिया, मिश्र नेरो कुरेनी चेंदोले मुँबै लिबियार्बै ल्हें क्ल्ह्‍योउँइँले खब्मैं नेरो रोम ह्‍युलउँइँले खबै यहूदी नेरो यहूदीमैंने क्ह्रिब्मैं ङ्हिना ङ्हिन् मुँ।
ACT 2:11 झाइले क्रेटथेंमैं नेरो अरबीमैं या चुर मुँ। चमैंइ परमेश्‍वरए थेबै केमैंए बारेर पोंरिब ङ्योइ ह्रों-ह्रोंसए क्युइर थेरिइमुँ!”
ACT 2:12 चमैं ताँन् अलमल् तसि प्लेटोयाइ, धै घ्रिइ-घ्रिने “चुए अर्थ तो जा?” बिबर होंइ।
ACT 2:13 दिलेया अरूमैंइ नि लसि बिइ, “चुमैं प्हाइ म्हे‍रइमुँ।”
ACT 2:14 पत्रुसइ अरू कुल्मिंबै चेला चिब्मैं च्युसे घ्रिने बालुन् रासि थेबै कैले चर्बै म्हिमैंने बिइ, “ओ यहूदीयार्बै म्हिमैं, नेरो ताँन् यरूशलेमथेंमैं, क्हेमैंइ ङए ताँ छेनाले थेसि चु ताँ क्होद्।
ACT 2:15 क्हेमैंइ मैंब् धोंले चुमैं प्हाइ आम्हेरइमुँ, तलेबिस्याँ तोगो न्हाँगर्बै कु मत्‍त्रे ह्राइमुँ।
ACT 2:16 योएल अगमबक्‍ताइ स्योमा बिबै ताँ चुन् ग:
ACT 2:17 ‘नुखबै त्हिंइजरे छ तब्मुँ बिसि परमेश्‍वरजी बिइमुँ, ङइ ताँन् म्हिमैंए फिर ङए पबित्र प्ल्ह कुल्मिंब्मुँ। धै क्‍हेमैंए च्‍ह-च्हमिमैंइ अगमवाणि पोंब्मुँ, क्‍हेमैंए फ्रेंसिंमैंइ दर्शनमैं म्रोंब्मुँ, धै क्‍हेमैंए खेब्मैंइ म्‍होंडा म्होंब्मुँ।
ACT 2:18 ओं, च त्हिंइर ङइ ह्रोंसए सेवा लब्मैंए फिर ङए पबित्र प्ल्ह कुमिंब्मुँ, धै चमैंज्‍यै या ङए ताँ पोंब्मुँ।
ACT 2:19 ङइ मुर औदिबै केमैं, नेरो माइ पृथ्‍बीर प्लेटोयाबै चिनुमैं उँइँमिंब्मुँ। च चिनुमैं को, मि नेरो मिखुए प्हैं तब्मुँ।
ACT 2:20 याहवेहए थेबै ह्‍वे चारबै त्हिंइ खब् भन्दा ओंसों त्हिंयाँ मिछु खैयाब्मुँ, धै लयाँ को धोंले ओल्‍ग्‍या तयाब्मुँ।
ACT 2:21 दिलेया याहवेहए मिं किंब्मैंइ मुक्‍ति योंब्मुँ।’
ACT 2:22 “ओ इस्राएलीमैं, चु ताँ थेद्, नासरतथें येशू परमेश्‍वरजी कुल्‍मिंबै म्‍हि मुँन बिब क्हेमैंइ सेरिगे नेरो क्होरिगे बिसि परमेश्‍वरजी येशूउँइँले शक्‍तिए केमैं, प्लेटोयाबै केमैं, नेरो चिनुमैं उँइँमिंसि क्हेमैंए म्हाँजोरि प्रमाण पिंल् खाँइमुँ। खीजी चु केमैं लब क्हेमैंइ सेइमुँ।
ACT 2:23 दिलेया परमेश्‍वरजी ओंसोंन् चाँजो लसि येशूलाइ क्‍हेमैंए योर पिंवाँइ। धै दुष्‍ट म्हिमैंउँइँले क्हेमैंइ येशू क्रूसर च्योवासि सैवाइ।
ACT 2:24 सैवालेया परमेश्‍वरजी खी सिबउँइँले धबै सोगों लमिंइ। तलेबिस्याँ खी सिबै सिबन् तल् आखाँमल।
ACT 2:25 चु ताँर दाऊदइ या येशूए बारेर छले बिइमुँ, ‘ङइ खोंयोंन् बिलै प्रभु ङए उँइँर म्रोंइ, तलेबिस्याँ ङ आङ्हिंरिगे बिसि ङए क्‍योलोउँइँ खी मुँ।
ACT 2:26 छतसि ङ खों न्होंर सैं तोंरिमुँ, धै सैं तोंबै क्वेमैं प्रिंरिमुँ। ङ सियाल् त्हुलेया ङ धबै सोगों तब्मुँ बिसि ङइ खीए फिर आशा लइमुँ।
ACT 2:27 तलेबिस्याँ क्हिजी ङए प्ल्ह क्रोंर्न वाथेंरिब् आरे, धै क्‍हिजी ह्रोंसए पबित्र म्हिए ज्यु क्राँल् पिंरिब् आरे।
ACT 2:28 क्‍हिजी ङने छ्ह योंबै घ्‍याँ उँइँमिंइ, धै क्हि ङने बालु तसि ङए सैं बेल्‍ले तोंन् लमिंब्मुँ।’
ACT 2:29 “ओ अलि-अङाँमैं, ङ्योए खे दाऊदए बारेर क्ह्रोंसेंन्ले ङइ क्हेमैंने बिल् खाँम्। खी सिइ धै पावाइ, खीए छगों तिंयाँ समन् मुँ।
ACT 2:30 दिलेया दाऊद अगमबक्‍ता तबइले परमेश्‍वरजी फैबै बाछा धोंलेन् चए सन्तानउँइँले म्हि घ्रि चए क्ल्ह्‍योर म्रुँ तल् पिंब्मुँ बिसि खिइ ओंसोंन् था सेल।
ACT 2:31 छतसि परमेश्‍वरजी कुल्मिंबै म्रुँ ख्रीष्‍ट सिसि धबै सोगों तबै बारेर दाऊदइ ओंसों ओंनोंन् म्रोंबइले खिइ चु ताँ प्‍ह्रिथेंइ, ‘परमेश्‍वरजी खीलाइ क्रोंर आवाथें धै खीए ज्यु या क्राँल् आपिं।’
ACT 2:32 चुन् येशू परमेश्‍वरजी सिबउँइँले सोगों लमिंइ। चु ताँए साक्षि ङि ताँन् मुँ।
ACT 2:33 परमेश्‍वर आबाजी येशूलाइ थेब् लमिंसि खीए क्‍योलोउँइँ थेंइँमुँ। धै ह्रोंसजी बाछा फैब् धोंले येशूलाइ पबित्र प्ल्ह पिंइ। च पबित्र प्ल्ह प्रभु येशूजी तोगो ङिए फिर कुमिंब् ग। चु ताँमैं क्हेमैंइ तोगो थेइमुँ, म्रोंइमुँ।
ACT 2:34 तलेबिस्याँ स्वर्गर क्रेयाबै म्हि दाऊद आङिंल, दिलेया दाऊदइ ह्रोंसै‍न बिइ, ‘याहवेहजी ङए प्रभुने बिइ,
ACT 2:35 ङइ क्‍हिए शत्तुरमैं क्‍हिए प्‍हले न्होंर आलन् समा क्हि ङए क्‍योलोउँइँ टिद्।’
ACT 2:36 छतसि तारे इस्राएलर्बै ताँन् म्‍हिमैंइ चु ताँ छेनाले क्होरिगे: क्हेमैंइ क्रूसर च्योवाबै चु येशून् परमेश्‍वरजी ताँन् म्हिमैंए प्रभु नेरो जोगेमिंबै म्रुँ ख्रीष्‍ट लमिंइँमुँ।”
ACT 2:37 चु ताँ थेसि चमैंए सैंर खैला तोला तइ। धै चमैंइ पत्रुस नेरो अरू कुल्मिंबै चेला चिब्मैंने “ओ आघें-अलिमैं, तारे ङिइ तो लले?” बिसि ङ्योएइ।
ACT 2:38 पत्रुसइ बिइ, “ङिइ आछ्याँबै केमैं लना बिसि क्‍हेमैं ताँनइ‍ ह्रों-ह्रोंसए आछ्याँबै केमैं पिसि परमेश्‍वरउँइँ सैं एद्, धै क्हेमैंए पाप क्षमा तबै ल्हागिर येशू ख्रीष्‍टए मिंर बप्‍तिस्‍मा किंन्। छलमा परमेश्‍वरउँइँले क्हेमैंइ पबित्र प्ल्हए बरदान योंब्मुँ।
ACT 2:39 परमेश्‍वरजी ‘पबित्र प्ल्ह पिंब्मुँ’ बिसि फैबै बाछा क्हेमैंए ल्हागिरि, क्हेमैंए सन्तानए ल्हागिरि, नेरो अरू ह्रें-ह्रेंगो मुँबै अरू ह्रेंर्बै म्हिमैंए ल्हागिरि ग। ङ्योए प्रभु परमेश्‍वरजी हुइब्मैं ताँनए ल्हागिर च बाछा फैइमुँ।”
ACT 2:40 छतसि “चु दुष्‍ट पुस्‍ताउँइँले क्हेमैंइ ह्रोंसलाइ जोगेद्,” बिसि पत्रुसइ अरू ल्‍हें ताँउँइँले चमैंलाइ क्होमिंइ।
ACT 2:41 झाइले पत्रुसए ताँ क्वेंबै म्हिमैंइ बप्‍तिस्मा किंइ। च त्हिंइर्न योदा आयोदा हजार सोंदे म्हिमैं चमैंए फिर थब्दिइ।
ACT 2:42 चमैं प्रभु येशूए फिर बिश्‍वास लसि कुल्मिंबै चेला चिब्मैंने लोदै, संगति लदै, बालुन् चब् चसि प्रभु भोज चदै, खोंयोंन् बिलै प्राथना लरिमल।
ACT 2:43 कुल्मिंबै चेला चिब्मैंइ ल्हें औदिबै केमैं लदै ल्हें चिनुमैं उँइँमल। छतसि ल्हें म्हि परमेश्‍वरने ङ्हिंबर होंइ।
ACT 2:44 येशूए फिर बिश्‍वास लब्मैं ताँन् बालुन् टिमल, धै चमैंने मुँबै तोन्दोंरि सैमैं गमस्तर तमल।
ACT 2:45 चमैंइ ह्रोंसए क्‍ल्‍ह्‍यो न्‍हें नेरो अरू सैमैं चुँसि योंबै मुइ खाँचो तब्मैंलाइ चुमिंमल।
ACT 2:46 चमैं त्हिंइ ह्रोंसे मन्दिरर खागु तमल, धै धिं-धिंर चमैं सैं घ्रिले प्रभु भोज चसि सैं तोंदै बालुन् चब् चब्रें लमल।
ACT 2:47 झाइले परमेश्‍‍वरए मिं क्वेदै, ताँन् म्हिमैंउँइँले मान योंमल। धै प्रभुजी त्हिंइ ह्रोंसे जोगेमिंबै म्‍हिमैं चमैंए फिर थप्‍दिमिंब्रें लमल।
ACT 3:1 तिगें त्हिंइर्बै सों ह्रामा प्राथना लबै त्हे तसि पत्रुस नेरो यूहन्‍ना मन्दिरर ह्‍यारिल।
ACT 3:2 च त्हेर म्हिमैंइ फिब् ओंनोंबै डुँड् तबै म्हि घ्रिलाइ नोसि पखमल। मन्दिर न्होंर खब्मैंने भिक् ह्रिरिगे बिसि म्हिमैंइ च म्हि त्हिंइ ह्रोंसे मन्दिरर्बै “छ्याँबै मिं” बिबै म्रार पखसि थेंमिंब्रें लमल।
ACT 3:3 पत्रुस नेरो यूहन्‍ना मन्दिर न्होंर होंल् म्हैब् म्रोंसि चइ मुइ ह्रिइ।
ACT 3:4 चमैंइ च ङाँइ ङ्‍ह्‍योसि बिइ, “ङि ङाँइ ङ्‍ह्‍योद्।”
ACT 3:5 चमैंउँइँले तोइ योंम् उ ङ्हाँसि चइ चमैं ङाँइ ङ्‍ह्‍योइ।
ACT 3:6 झाइले पत्रुसइ चने बिइ, “ङने मारा चाँदि आरे, दिलेया ङने तो मुँ चन् ङइ क्हिलाइ पिंस्यो। नासरतर्बै येशू ख्रीष्‍टए मिंर रेसि प्रह्‍याद्।”
ACT 3:7 छ बिसि पत्रुसइ चए क्योलो योर क्हासि रेमिंबै तोंदोंन् चए प्हलेमैं नेरो च्हि गाँठोजरे भों खइ।
ACT 3:8 झाइले च जुरुक्‍कन् रेसि प्रबर होंइ, धै उफर्दिदै न्हेदै परमेश्‍वरए मिं क्वेदै चमैंने बालु मन्दिरर होंइ।
ACT 3:9 चइ परमेश्‍वरए मिं क्वेदै प्ररिब ताँन् म्हिमैंइ म्रोंइ।
ACT 3:10 मन्दिरर्बै छ्याँबै म्रार क्होएसि टिरिबै म्हि चुन् ग बिसि चमैंइ सेइ। धै च म्हि खैले प्रल् खाँब् तगे बिसि चमैं प्लेटोयाइ।
ACT 3:11 छले च म्हिइ पत्रुस नेरो यूहन्‍ना क्हाब् म्रोंसि ताँन् म्हिमैं प्लेटोयासि सोलोमन बिबै ठाँटिर चमैं ङाँर न्हेखइ।
ACT 3:12 चु म्रोंसि पत्रुसइ म्हिमैंने बिइ, “ओ इस्राएलीमैं, चु ताँर क्हेमैं तले अचम्‍मा ङ्हाँल? ङिइ ह्रोंसए शक्‍ति अथवा भक्‍तिउँइँले चु म्हिलाइ प्रल् खाँब् लमिंइ बिसि क्हेमैं तले ङिलाइ ङ्ह्‍योबै ङ्‍ह्‍योबन् लरिल?
ACT 3:13 अब्राहाम, इसहाक नेरो याकूबए परमेश्‍वर, ङ्योए खेमैंए परमेश्‍वरजी ह्रोंसए सेवा लबै येशूलाइ कति थेब लमिंइ। दिलेया क्हेमैंइ खी क्हासि सैबर पिलातसलाइ पिंवाइ। पिलातसइ खीलाइ पिमिंबै सैं ललेया क्हेमैंइ पिलातसए उँइँर्न खीए बिरोध लसि खीलाइ पिल् आपिं।
ACT 3:14 क्हेमैंइ पबित्र नेरो छ्याब आरेबै म्हिलाइ पिल् आपिंसि खीए क्ल्ह्‍योर म्हि-सैलाइ पिमिंन् बिइ।
ACT 3:15 झाइले म्‍हिमैंलाइ खोंयोंन् बिलै आखाँबै छ्ह पिंबै येशू क्‍हेमैंइ सैवाइ। दिलेया परमेश्‍वरजी खीलाइ सिबउँइँले धबै सोगों लमिंइ। चु ताँ ङिइ म्रोंइमुँ।
ACT 3:16 क्हेमैंइ ङो सेबै चु सबै म्हिइ येशूए मिंए फिर बिश्‍वास लबइले खीजी चुलाइ भोंब् लमिंइ। धै क्हेमैं ताँनए उँइँरि छेनाले सल् लमिंइ।
ACT 3:17 “ओ आघें अलिमैं, क्‍हेमैं नेरो क्‍हेमैंए चिबनाँब्मैंइ येशू खाब् जा बिब् आसेसि खीलाइ सैइ बिब ङइ सेइमुँ।
ACT 3:18 ओंसोंन् ख्रीष्‍टजी दुःख नोल् त्हुम् बिसि ताँन् अगमबक्‍तामैंउँइँले परमेश्‍वरजी बिबै ताँ खीजी छले पूरा लइ।
ACT 3:19 छतसि खीजी क्हेमैंए पाप ख्रुमिंरिगे, खीउँइँले क्हेमैं छिं ङ्हाँन् योंरिगे, झाइले खीजी क्हेमैंए ल्हागिर ओंसोंन् त्हाँबै म्रुँ ख्रीष्‍ट येशू कुल्‍मिंरिगे बिसि
ACT 3:20 क्हेमैंइ पाप लब पिसि परमेश्‍वर ङाँइ सैं एद्।
ACT 3:21 दिलेया स्योंमन् परमेश्‍वरजी ह्रोंसए ताँ बिमिंबै पबित्र म्‍हिमैंइ बिब् धोंले तोन्दोंरि सैमैं छारा लबै त्हे आखन् समा ख्रीष्‍ट स्वर्गर्न टिल् त्हुम्।
ACT 3:22 मोशाइ या छ बिल, ‘क्हेमैंए याहवेह परमेश्‍वरजी ङलाइ त्हाँब् धोंले क्हेमैंए आघें अलिमैंए म्हाँजोउँइँले अगमबक्‍ता घ्रि क्हेमैंए ल्हागिर त्हाँब्मुँ। खीजी क्हेमैंने बिबै ताँमैं क्हेमैंइ थेलन् त्हुम्।
ACT 3:23 च म्हिइ बिबै ताँ आथेब्मैं परमेश्‍वरए म्‍हिमैंउँइँले स्‍यो लवासि ताँन् नास तयाब्मुँ।’
ACT 3:24 शामूएल नरो चए लिउँइँबै अगमबक्‍तामैं ताँनइ तिंजोरो तरिबै ताँमैंए बारेर बिल।
ACT 3:25 अगमबक्‍तामैं नेरो परमेश्‍वरजी क्हेमैंए खेमैंने फैबै बाछा क्हेमैंए ल्हागिर्न ग। खीजी अब्राहामने बिइ, ‘क्हिए सन्तानउँइँलेन् ह्‍युलर्बै ताँन् ह्रेंमैंइ आशिक योंब्मुँ।’
ACT 3:26 क्हेमैंलाइ ह्रोंसए आछ्याँबै केमैंउँइँले एपखसि आशिक पिंबै ल्हागिर परमेश्‍वरजी ह्रोंसए सेवा लबै म्हि त्हाँसि ताँन् भन्दा ओंसों क्हेमैं इस्राएलीमैं ङाँर कुल्मिंइ।”
ACT 4:1 पत्रुस नेरो यूहन्‍ना म्हिमैंने पोंरिमा को-कोइ ख्रो पिंबै खेगिमैं, मन्दिरर्बै कप्‍तान नेरो सदुकीमैं चमैं ङाँर खइ।
ACT 4:2 “येशू सिसि धबै सोगों तब् धोंलेन् म्हिमैं सिलेना धबै सोगों तब्मुँ,” बिसि पत्रुस नेरो यूहन्‍नाइ म्हिमैंने लोमिंमल। छतमा च सदुकीमैं ह्रिस खल।
ACT 4:3 छतमा चमैंइ पत्रुस नेरो यूहन्‍नालाइ क्हासि प्हँन्हाँग्धों समा झेलर च्युथेंइ तलेबिस्याँ च त्हेर ङेसा तल् खाँल।
ACT 4:4 दिलेया चमैंए ताँ थेब्मैंए न्होंर ल्हें म्हिइ येशूए फिर बिश्‍वास लइ। खीए फिर बिश्‍वास लब्मैं योदा-अयोदा हजार ङ्‍हदे तल।
ACT 4:5 प्‍हँन्हाँग्‍धों क्रथे मिंथेमैं, अरू यहूदी चिब्मैं, नेरो शास्‍त्रिमैं ताँन् थेबै म्हि च्होंर यरूशलेमर खागु तल।
ACT 4:6 ख्रो पिंबै खेगि क्रथे हन्‍नास, कैयाफा, यूहन्‍ना, अलेक्जेन्डर नेरो ख्रो पिंबै खेगि क्रथेए परवा ताँन् चर्न मुँल।
ACT 4:7 चमैंइ पत्रुस नेरो यूहन्‍नालाइ म्हाँजोर राल् पिंसि “क्हेमैंइ खाब् शाक्‍तिउँइँले नेरो खाबै मिंर चु के लल?” बिसि ङ्योएइ।
ACT 4:8 छबिमा पबित्र प्ल्हजी प्लिंसि पत्रुसइ चमैंने बिइ, “ओ म्हिए फिर्बै क्रथे नेरो चिबनाँब्मैं!
ACT 4:9 तिंयाँ ङिइ डुँड् म्हि सल् लमिंमा खैले सल् लमिंइ बिसि ङ्योएम् बिस्याँ,
ACT 4:10 नासरतर्बै येशू ख्रीष्‍टए मिंर चु म्हि ससि क्हेमैंए उँइँर राइमुँ बिसि क्हेमै नेरो इस्राएलर्बै ताँन् म्हिमैंइ सेल् त्हुम्। क्हेमैंइ येशूलाइ क्रूसर च्योवाल, दिलेया परमेश्‍वरजी खीलाइ सिबउँइँले धबै सोगों लमिंइ।
ACT 4:11 क्‍हेमैं गारा झोंब्‍मैंइ केर आत्हु बिबै युँमा चुन् येशू ग, दिलेया खी तोगो ताँन् भन्दा केर त्हुबै जगर्बै युँमा तखइमुँ।
ACT 4:12 अरू खाबज्यै मुक्‍ति पिंल् आखाँ तलेबिस्याँ ङ्योइ मुक्‍ति योंबर स्वर्गए न्होंरि म्हिमैंए ल्हागिर अरू खाबै मिं या परमेश्‍वरजी आपिंइँमुँ।”
ACT 4:13 झाइले पत्रुस नेरो यूहन्‍ना आखेबै म्हिमैं मुँलेना आङ्हिंन्ले पोंल् खाँब् म्रोंसि चमैं प्लेटोयाइ। धै चुमैं येशूने बालुन् टिब्मैं मुँन बिसि चमैंइ था सेइ।
ACT 4:14 दिलेया नब् सबै म्हि चमैंने बालु रारिब् म्रोंसि चमैंइ तोइ बिल् आखाँ।
ACT 4:15 छतसि चमैंलाइ थेबै म्हि च्होंउँइँले बैरु ह्‍याद् बिसि चमैंइ छ बिसि मत लइ:
ACT 4:16 “तारे ङ्योइ चु म्‍हिमैं खै लले? क्ह्रोंसेंन्ले चुमैंउँइँले औदिबै चिनु तइमुँ बिसि यरूशलेमर टिब्मैं ताँनइ सेल् खाँइ। छतसि ङ्योइ चु आङिं बिल् आखाँ।
ACT 4:17 दिलेया चु ताँ अरू म्‍हिमैंइ आसेरिगे बिसि ‘धबै चु मिंर खाब्ने या क्हेमैंइ तोइ आबिद्’ बिसि ङ्योइ चमैंने हौदिले।”
ACT 4:18 झाइले चमैंइ पत्रुस नेरो यूहन्‍ना हुइसि “तारे पिरु येशूए मिंर क्हेमैंइ तोइ आबिद्, तोइ ताँ या आलोमिंन्!” बिसि ल्हैदिइ।
ACT 4:19 दिलेया पत्रुस नेरो यूहन्‍नाइ चमैंने बिइ, “परमेश्‍वरए ताँ ङिंब उ क्हेमैंए ताँ ङिंब? परमेश्‍वरए उँइँर तो छ्याँब तमुँ क्हेमैं ह्रोंसैना मैंन्।
ACT 4:20 तलेबिस्याँ ङिम् ङिइ म्रोंब नेरो थेबै ताँमै आपोंल्‍ले टिलन् आखाँ।”
ACT 4:21 छले चमैंइ सजैं पिंबै ताँ तोइ आयों तलेबिस्याँ चर तरिबै ताँए ल्हागिर ताँन् म्हिमैंइ परमेश्‍वरए मिं क्वेरिल। छतसि चमैंइ पत्रुस नेरो यूहन्‍नालाइ बेल्‍ले हौदिसि पिमिंइ।
ACT 4:22 च अचम्माले सबै म्हि प्लिच्यु बर्ष क्हो-क्होबै मुँल।
ACT 4:23 छाइले त्होंखसि पत्रुस नेरो यूहन्‍ना खेंमैए थुमैं ङाँर खसि ख्रो पिंबै खेगि चिब्मैं नेरो चिबनाँब्मैंइ बिबै ताँन् ताँमैं चमैंने बिइ।
ACT 4:24 चु ताँ थेसि चमैंइ बालुन् परमेश्‍वरने कै तेसि बिइ, “ओ प्रभु! क्हिजी स्वर्ग, पृथ्बी, मा ङ्युँइ नेरो चर मुँबै तोन्दोंरि सैमैं बनेमिंइ।
ACT 4:25 पबित्र प्ल्हउँइँले क्हिजी ह्रोंसए सेवा लबै म्हि ङिए खे दाऊदए सुँउँइँले स्योमा बिइ, ‘अरू ह्रेंमैं तले ह्रिस खगे, धै म्हिमैंइ केर आफेबै ताँमैं तले मैंगे?
ACT 4:26 याहवेह नेरो खीजी त्हाँबै म्हिए बिरोधर ह्‍युलर्बै म्रुँमैं राइ, धै क्रथे मिंथेमैं ताँन् खागु तइ।’
ACT 4:27 क्ह्रोंसेंन हेरोद म्रुँ, पन्तियस पिलातस, अरू ह्रेंमैं नेरो इस्राएलीमैं या चु सहरर्न क्हिजी त्हाँबै सेवा लबै पबित्र येशूए बिरोधर खागु तल।
ACT 4:28 छतमा ओंसों ओंनोंन् क्हिए योउँइँले क्हिजी लबै चाँजोमैं च बिरोधीमैंइ पूरा लइ।
ACT 4:29 ओ प्रभु तारे, चमैंइ ङिलाइ हौदिमा क्हिजी ङ्ह्‍योमिंन्, धै क्हिए केब्छैंमैंइ आङ्हिंन्ले क्हिए ताँ पोंबै भों पिंन्।
ACT 4:30 झाइले नबै म्हिमैं सल् लमिंबर क्हिजी ह्रोंसए यो स्योंमा, ह्रोंसए सेवा लबै पबित्र येशूए मिंउँइँले औदिबै केमैं नेरो चिनुमैं तरिगे।”
ACT 4:31 चमैंइ प्राथना लल् खाँबै लिउँइँ चमैं खागु तबै क्ल्ह्‍यो लायाइ, धै चमैं ताँन् पबित्र प्ल्हजी प्लिंयाँइ, छतमा चमैंइ आङ्हिंन्ले परमेश्‍वरए ताँ पोंइ।
ACT 4:32 प्रभुए फिर बिश्‍वास लब्मैं ताँनए सैं, खों घ्रिन् मुँल। चमैंए न्होंर खाबज्यै या चमैंने मुँबै सैमैं ह्रोंसल् आबिमल। चमैंए ताँन् सैमैं गमस्तर तमल।
ACT 4:33 झाइले च कुल्मिंबै चेला चिब्मैंइ तिफुँइ आङ्हिंन्ले प्रभु येशू सिबइले धबै सोगों तइमुँ बिसि ग्वाइ पिंमल, छतमा परमेश्‍वरजी चमैं ताँनए फिर थेबै आशिक पिंमल।
ACT 4:34 चमैंए न्‍होंर खाबलाज्यै तो सैलै या खाँचो आतमल, तलेबिस्याँ क्ल्ह्‍यो न्हें मुँब्मैंइ च चुँसि योंबै मुइ पखमल,
ACT 4:35 झाइले कुल्मिंबै चेला चिब्मैंए उँइँर थेंमिंमल। धै खा-खाबलाइ तो-तो सैए खाँचो तमल, चमैंलाइ म्हिमैंइ च मुइ चुमिंमल।
ACT 4:36 च त्हेर साइप्रस ह्‍युलर्बै लेबी कुलार्बै योसेफ मुँल चलाइ कुल्मिंबै चेला चिब्मैंइ बर्णाबास बिसि मिं थेंल। (च मिंए अर्थ अरूए सैं भोंब् लमिंब् ग।)
ACT 4:37 चुइ क्ल्ह्‍यो चुँसि योंबै मुइ पखसि कुल्मिंबै चेला चिब्मैंए योर पिंइ।
ACT 5:1 तिगें हननिया मिं मुँबै म्हि नेरो चए प्ह्रेंस्यो सफिराइ च्युगुदे क्ल्ह्‍यो चुँइ,
ACT 5:2 झाइले प्ह्रेंस्योने मत लब् धोंले योंबै मुइ ह्रोंसने च्युगुदे थेंइ। धै च्हौदे मुइ बोसि कुल्मिंबै चेला चिब्मैंए उँइँर थेंमिंइ।
ACT 5:3 दिलेया पत्रुसइ चने बिइ, “ओ हननिया, क्ल्ह्‍यो चुँसि योंबै मुइ च्युगुदे ह्रोंसने थेंसि पबित्र प्ल्हने स्योर तेब दुष्‍टइ क्हिए सैंर खैले झोंमिंइ?
ACT 5:4 च क्ल्ह्‍यो आचुँन् समा क्हिल्‍नाँ आङिंल् रो वा? धै च क्ल्ह्‍यो चुँसि योंबै मुइ या क्हिल्‍नाँ आङिं वा? छाबै के लबै सैं क्हिए खोंर खैले खइ? क्हिइ म्हिमैंने आङिं परमेश्‍व‍रने स्योर तेइमुँ।”
ACT 5:5 चु ताँ थेबै तोंदोंन् हननिया सर क्हुरिह्‍याइ धै सो पिवाइ। चु ताँ थेब्मैं ताँन् बेल्‍ले ङ्हिंयाँइ।
ACT 5:6 झाइले फ्रेंसिमैं खसि चए सिनु क्वेंइ म्होरसि बैरु बोसि पावाइ।
ACT 5:7 झाइले घण्‍टा सोंदे लिउँइँ चए प्ह्रेंस्यो सफिरै या न्होंर खइ। चइ चए प्युँ सियाइ बिसि था आसेल।
ACT 5:8 पत्रुसइ चने “ङने बिद्, क्‍हेमैंइ क्ल्ह्‍यो च्हगर्न चुँल् वा?” बिसि ङ्योएइ। चइ “ओं, च्‍हगर्न ग,” बिइ।
ACT 5:9 छबिमा पत्रुसइ चने बिइ, “प्रभुए प्ल्हए जाँच लबर क्‍हेमैं ङ्हिंना-ङ्हिंन् क्ह्रिसि खैले मत लल? ङ्‍ह्‍योद्! क्हिए प्युँ पाब्मैं म्रार्न मुँ। चमैंइ क्हि या बैरु बोयाब्मुँ।”
ACT 5:10 छ बिबै तोंदोंन् सफिरा पत्रुसए प्हले ङाँर क्हुरिह्‍यासि सो पिवाइ। धै फ्रेंसिमैं न्होंर खमा च सियाल् खाँब् म्रोंसि बैरु बोसि चए प्युँ ङाँर्न पावाइ।
ACT 5:11 छतमा ताँन् चर्च नेरो चु ताँ थेबै ताँन् म्हिमैं बेल्‍ले ङ्हिंयाँइ।
ACT 5:12 छले कुल्मिंबै चेला चिब्मैंए योउँइँले ल्हें औदिबै केमैं लसि प्लेटोयाबै चिनुमैं म्हिमैंए म्हाँजोर तबर होंइ। छतमा येशूए फिर बिश्‍वास लब्मैं ताँन् सोलोमन बिबै ठाँटिर खागु तल।
ACT 5:13 दिलेया अरू खाबै या चमैंने बालु क्ह्रिबै आँट लल् आखाँ। छान् तलेया म्हिमैंइ चमैंलाइ मान लमल।
ACT 5:14 छतमा प्रभुए फिर बिश्‍वास लबै मुँयुँमैं नेरो च्हमिरिमैं झन् ल्हें तबर होंइ।
ACT 5:15 छतसि पत्रुस खमा चए छरि मत्‍त्रे मुँलेया चमैंए न्होंर्बै को-कोए फिर फेरिगे बिसि म्हिमैंइ घ्याँ-घ्याँर्न नब्मैं क्ल्ह्‍यो नेरो खाटर रोथेंमल।
ACT 5:16 यरूशलेमजरेबै ह्‍युलउँइँले या ल्हें म्हिइ नब्मैं, नेरो दुष्‍टइ ह्रुगुदिब्मैं पइ खमल, धै चमैं ताँन् सयामल।
ACT 5:17 छतमा ख्रो पिंबै खेगि क्रथे नेरो चने बालु मुँबै सदुकीमैं ताँनइ कुल्मिंबै चेला चिब्मैंए फिर ह्रिस लसि चमैंए बिरोध लबर होंइ।
ACT 5:18 धै चमैं क्हासि झेलर च्युवाइ।
ACT 5:19 दिलेया म्‍हुँइँसर प्रभुए स्वर्गदूत घ्रिइ झेलए म्रामैं थोंमिंइ, धै खीजी चमैंलाइ बैरु तेवासि बिइ,
ACT 5:20 “मन्दिरर ह्‍यासि खोंयोंन् बिलै आखाँबै छ्ह योंबै ताँमैं ताँन् म्हिमैंने बिद्।”
ACT 5:21 चु ताँ थेसि चमैं न्हाँकार्न मन्दिर न्होंर होंसि म्हिमैंलाइ लोमिंबर होंइ। छतमा ख्रो पिंबै खेगि क्रथे नेरो चने बालु मुँब्मैंइ थेबै म्हि च्हों खागु लबर इस्रालिमैंए ताँन् चिबनाँब्मैं हुइइ। धै चमैंइ “चमैं पखो” बिसि झेलउँइँ म्हिमैं कुलइ।
ACT 5:22 दिलेया चमैंइ झेलर च्युथेंबै कुल्मिंबै चेला चिब्मैं आम्रोंमा एखसि चु ताँ बिइ,
ACT 5:23 “ङिइ झेलर छेनाले साँजु झोंथेंब नेरो झेल रुँबै म्हिमैं या म्राजरेन् रारिबा म्रोंइ, दिलेया ङिइ म्रा थोंसि ङ्ह्‍योमा न्होंर खाबै या आम्रों!”
ACT 5:24 चु ताँ थेसि मन्दिर रुँबै सिपाइमैंए कप्‍तान नेरो ख्रो पिंबै खेगि चिब्मैंइ, “तारे कुल्मिंबै चेला चिब्मैं खै तब् ङ्‍हे” ङ्हाँसि खैला तोला तइ।
ACT 5:25 च त्हेर्न म्हि घ्रि खसि चमैंने बिइ, “थेत्ति, क्हेमैंइ झेलर च्युथेंबै म्हिमैं मन्दिरर रासि म्हिमैंलाइ लोमिंसिन् मुँ!”
ACT 5:26 चु ताँ थेसि कप्‍तान नेरो चए सिपाइमैं ह्‍यासि चमैंलाइ क्हासि खैच्हिजी आलल्‍ले छेनाले पखइ, तलेबिस्याँ म्हिमैंइ खेंमैं युँमाइ प्रिंम् उ ङ्हाँसि चमैं ङ्हिंयाँइ।
ACT 5:27 झाइले थेबै म्हि च्होंए उँइँर राल् पिंइ, धै ख्रो पिंबै खेगि क्रथेइ चमैंने ताँमैं ङ्योएइ। ५:२७
ACT 5:28 “ङिइ क्हेमैंने खाबलाज्यै येशूए मिंर तोइ आलोमिंन् बिसि बिल, दिलेया क्हेमैंइ यरूशलेम तिगोंन् लोमिंल् खाँना। च म्हि सैवाबै छ्याब् क्हेमैइ ङिए फिर ल्हैदिदा ङ्हाँइमुँ वा?”
ACT 5:29 दिलेया पत्रुस नेरो कुल्मिंबै चेला चिब्मैंइ बिइ, “ङिइ म्हिमैंए ताँ आङिं, परमेश्‍वरजी बिब ङिंलन् त्हुम्।
ACT 5:30 क्हेमैंइ यशूलाइ सिए क्रूसर च्योवासि सैवाइ। दिलेया ङ्योए खेंमैंए परमेश्‍वरजी येशू सिबउँइँले धबै सोगों लमिंइ।
ACT 5:31 इस्राएलीमैंइ परमेश्‍वरउँइँ सैं एसि पाप क्षमा योंरिगे बिसि परमेश्‍वरजी येशूलाइ म्रुँ नेरो जोगेमिंबै म्हि लमिंसि ह्रोंसए क्योलोउँइँ धाँसे नुल्‍ले थेंमिंइ।
ACT 5:32 चु ताँन् ताँए साँक्षिमैं ङि मुँ, धै परमेश्‍वरजी बिब् ङिंब्मैंलाइ पिंबै पबित्र प्ल्ह या साँक्षि मुँ।”
ACT 5:33 चु ताँ थेसि चमैं बेल्‍ले ह्रिस खसि चमैंलाइ सैल् म्हैइ।
ACT 5:34 दिलेया गमलियल मिं मुँबै फरिसी थेबै म्हि च्होंए उँइँर राइ। च छ्वेर्बै ताँ ह्रब् सेब, ताँनइ म्हाँदिब, नेरो परमेश्‍वरए ठिम लोमिंबै म्हि मुँल। चइ सिपाइमैंने “चमैं तिस्याँदे बैरु कुलद्,” बिइ।
ACT 5:35 धै चइ थेबै म्हि च्होंर्बै म्हिमैंने बिइ, “ओ इस्राएलीमैं, चु म्हिमैंलाइ क्हेमैंइ तो लल् म्हैमुँ, चु ताँर न्ह क्रों मि क्रों तद्।
ACT 5:36 तलेबिस्याँ चु त्हे भन्दा ओंसों थुदासइ ङम् ङन् ग बिसि थेब् प्हैंल, धै चए लिलि योदा-अयोदा प्लिब्रादे म्हिमैं प्रल। छान् तलेया च सैवाइ, धै चए लिलि प्रब्मैं या ताँन् प्हुँयाँइ। छतमा चइ लबै के फाक्‍कर्न तयाइ।
ACT 5:37 चु म्हिए लिउँइँ ह्‍युलर ताँन् म्हिमैं च्योबै त्हेर (जनगणना लबै त्हेर) गालीलर्बै यहूदा बिब रेइ, धै ल्हें म्हि च ङाँइ चैंइ। चै या नास तयाइ, धै चए लिलि प्रब्मैं या प्हुँयाँइ।
ACT 5:38 छतसि तोगोबै चु ताँए बारेर ङ क्हेमैंने बिमुँ, चु म्हिमैंउँइँले स्योले टिद्, धै चु म्हिमैंलाइ पिवाद्। तलेबिस्याँ चुमैंए ताँ नेरो केए चाँजो म्हिमैंउँइँले मुँस्याँ चमैंए मिं क्रन् म्हयाब्मुँ।
ACT 5:39 दिलेया चु के परमेश्‍वरउँइँले तब् ग बिस्याँ क्हेमैंइ चु म्हिमैंने ‘चु के आलद्’ बिल् आखाँ। आस्याँ क्हेमैं या परमेश्‍वरए बिरोधर राब्मैं तब्मुँ।”
ACT 5:40 छले चमैंइ गमलियलइ बिबै ताँ ङिंइ, दिलेया चमैंइ कुल्मिंबै चेला चिब्मैंलाइ न्होंर हुइसि धोंइ, धै चमैंने बिइ, “येशूए मिंर खोंयोंन् बिलै तोइ आपोंन्!” छ बिसि चमैं पिवाइ।
ACT 5:41 झाइले चमैंए सैंर, म्हिमैंइ म्हि आच्जिल् ललेया येशूए मिंरि सैदिल् खाँब्मैं ङ्यो तइ ङ्हाँसि सैं तोंदै चमैं थेबै म्हि च्होंउँइँले त्होंह्‍याइ।
ACT 5:42 दिलेया चमैंइ त्हिंइ ह्रोंसे मन्दिर नेरो धिं-धिंर ह्‍यासि “येशून् परमेश्‍वरजी कुल्मिंबै म्रुँ ख्रीष्‍ट ग” बिसि बिप्रब आपि।
ACT 6:1 च त्हेर चेलामैं ल्हें ततै ह्‍याल। छले चेलामैं ल्हें ततै ह्‍यामा हिब्रू क्युइ पोंब्मैंने ग्रिक क्युइ पोंब्मैं गनगन् लबर होंइ, तलेबिस्याँ त्हिंइ ह्रोंसे चबै सै चुमा ग्रिक पोंबै चेलामैंए म्हरेस्योमैंइ चैदिबै चबै सै आयोंल।
ACT 6:2 छतमा च्युसे ङ्हिं कुल्मिंबै चेला चिब्मैंइ प्रभुए चेलामैं ताँन् हुइसि चमैंने बिइ, “परमेश्‍वरए ताँ बिप्रब पिसि ङि चब् थुँबै लिलि प्रब छ्याँब आत।
ACT 6:3 छतमा ओ अलि-अङाँमैं, क्हेमैंए न्होंउँइँलेन् पबित्र प्ल्हजी नेरो बुद्धिइ प्लिंब धै ताँनइ म्हाँदिबै म्हि ङिउँलो त्हाँन्। धै ङ्योइ चमैंलाइ चु चब् चुबै के पिंले।
ACT 6:4 ङि बिस्याँ खोंयोंन् बिलै प्राथना नेरो परमेश्‍वरए ताँ बिमिंबै केर प्रब्मुँ।”
ACT 6:5 चु ताँ थेसि चर खागु तब्मैं ताँनइ छ्याँब ङ्हाँइ झाइले चमैंइ पबित्र प्ल्हजी प्लिंब नेरो ताँनइ म्हाँदिबै, स्तिफनस, फिलिप, प्रखरस, निकनोर, तिमोन, पर्मिनास नेरो एन्‍टिओखियार्बै येहूदिमैंने क्ह्रिबै निकोलाउस त्हाँइ।
ACT 6:6 चमैंइ च त्हाँबै म्हिमैं कुल्मिंबै चेला चिब्मैंए उँइँर पखइ धै कुल्मिंबै चेला चिब्मैंइ चमैंए फिर यो थेंसि प्राथना लमिंइ।
ACT 6:7 झाइले परमेश्‍वरए ताँ खन्तोंदोंन् फेनेइ, धै चेलामैं यरूशलेम तिगोंन् प्लिंइ। छतमा ख्रो पिंबै ल्हें खेगिमैंइ येशूए फिर बिश्‍वास लइ।
ACT 6:8 स्तिफनसइ परमेश्‍वरए दयाम्हाँया नेरो शक्‍तिइ प्लिंसि म्हिमैंए म्हाँजोर थेबै औदिबै के नेरो चिनुमैं लइ।
ACT 6:9 दिलेया को-कोइ यहूदीमैंइ स्तिफनसए बिरोधर प्होंबर होंइ। (चमैं “केब्छैंउँइँले फ्रेल् योंब्मैं” बिबै च्हों धिंर्बै म्हिमैं मुँल। चमैं कुरेनी, अलेक्जेन्ड्रिया, किलिकिया नेरो एशिया बिबै ह्‍युलर्बै म्हिमैं मुँल।)
ACT 6:10 दिलेया पबित्र प्ल्हजी स्तिफनसलाइ बुद्धि पिंबइले चइ पोंबै ताँ चमैंइ थोल् आखाँल।
ACT 6:11 झाइले चमैंइ खाबज्यै आसेल्‍ले को-कोइ म्हिमैंलाइ वाँसि “मोशा नेरो परमेश्‍वरए बिरोधर स्तिफनसइ पोंब ङिइ थेइ, बिद्,” बिसि होंसेइ।
ACT 6:12 छलेन चमैंइ चर्बै म्हिमैं, चिबनाँब्मैं नेरो शास्‍त्रिमैं सुरिदिवाइ, धै चमैंइ स्तिफनस क्हासि थेबै म्हि च्होंए उँइँर पखइ।
ACT 6:13 झाइले चमैंइ स्तिफनसए बारेर स्योर ताँमैं पोंबै म्हिमैं ओंसों पखइ। धै च म्हिमैंइ बिइ, “चु म्हिइ चु पबित्र मन्दिर नेरो मोशाइ पिंबै ठिमए बिरोधर पोंब खोंयोंन् बिलै आपि।
ACT 6:14 नासरतर्बै येशूइ चु मन्दिर नास लवासि मोशाइ ङ्योने पिंबै ठिममैं या फेर्दिवाम् रो बिब ङिइ थेइ!”
ACT 6:15 थेबै म्हि च्होंर्बै ताँन् म्हिमैंइ स्तिफनसए लि ङ्ह्‍योमा चए लि स्वर्गदूतल् धोंन् तब् म्रोंइ।
ACT 7:1 झाइले ख्रो पिंबै खेगि क्रथेइ स्‍तिफनसने “चु छ्याब् ल्हैदिबै ताँ क्ह्रोंसेंन् वा?” बिसि ङ्योएइ।
ACT 7:2 चइ बिइ, “ओ ङए आबामैं, आघें-अलिमैं, ङए ताँ थेद्। थेबै मान मुँबै परमेश्‍वरजी ङ्योए खे अब्राहाम हारानर टिब् भन्दा ओंसोंन् मेसोपोटामियार च ङाँर म्रोंयुसि
ACT 7:3 ‘क्हि ह्रोंसए ह्‍युल नेरो ह्रोंसए ङ्हेब्-ट्हुब्मैंउँइँले त्होंसि, ङइ क्हिने तेंबै ह्‍युलर ह्‍याद्’ बिल।
ACT 7:4 “छबिमा च कल्दिमैंए ह्‍युलउँइँले त्होंसि हारानर खसि टिइ, धै चए आबा सिबै लिउँइँ परमेश्‍वरजी चलाइ क्हेमैं तोगो टिरिबै चु ह्‍युलर्न पखइ।
ACT 7:5 च त्हेर परमेश्‍वरजी चलाइ चु ह्‍युलर धिं नाँ तोइ आपिंल, प्हले म्हैबै क्ल्ह्‍यो या आपिंल। च्हमा चला प्हसेमैं आतलेया परमेश्‍वरजी खीने ‘चु ह्‍युल ङइ क्हिए सन्तान्‍मैं पिंब्मुँ’ बिसि बाछा फैल।
ACT 7:6 परमेश्‍वरजी खीने, ‘क्‍हिए सन्‍तान्मैं आगुए ह्‍युलर ह्‍यासि टिल् त्हुब्मुँ। चर्बै म्हिमैंइ चमैं फिर बेल्‍ले दुःख पिंसि केब्छैं लसि प्लिब्ब्रा बर्ष समा थेंब्मुँ,’ बिल
ACT 7:7 दिलेया परमेश्‍वरजी खीने बिइ, ‘चमैं खाब् ह्रेंए केब्छैं तसि टिमुँ च ह्रेंलाज्यै या ङइ दण्ड पिंब्मुँ। च लिउँइँ चमैं त्होंखब्मुँ धै चु क्ल्ह्‍योर्न ङए मिं क्वेब्मुँ।’
ACT 7:8 परमेश्‍वरजी अब्राहामने ज्युर चिनु लल् त्हुम् बिबै बाछा या फैल। च लिउँइँ अब्राहामइ इसहाक च्ह योंसि इसहाक फिबै प्रेरोर चए ज्युर चिनु लमिंइ। इसहाक याकूबए आबा तइ, धै याकूब ङ्योए ह्रेंए च्युसे ङ्हिं खेमैंए आबा तइ।
ACT 7:9 “याकूबए च्ह योसेफने चए अलिमैंइ ह्रिस लमल। छतसि चमैंइ योसेफ मिश्र ह्‍युलर चुँवाँइ। दिलेया परमेश्‍वर चने बालु मुँल,
ACT 7:10 परमेश्‍वरजी चए ताँन् दुःखउँइँले फ्रेमिंसि मिश्र ह्‍युलर्बै फारो म्रुँए उँइँरि चलाइ बुद्धि पिंमा फारोइ चलाइ मिश्र ह्‍युल नेरो ह्रोंसए धिंर्बै ताँन् सैमैंए फिरि क्ल्हे तल् पिंइ।
ACT 7:11 च लिउँइँ कनान नेरो मिश्र ह्‍युल तिगोंन् अङ्गल् तसि थेबै दुःख तइ, धै ङ्योए खेमैंइ चबै सैमैं तोइ आयोंल।
ACT 7:12 दिलेया याकूबइ मिश्र ह्‍युलरि चबै सैमैं मुँ रो बिब् थेसि ङ्योए खेमैं ओंसों चर कुलइ।
ACT 7:13 झाइले ङ्हिखेबै लार चए आघेंमैं त्होमा योसेफइ ङो सेब् मि सेब् लइ। छलमा फारो म्रुँइ चुमैं योसेफए परवामैं मुँन बिसि सेइ।
ACT 7:14 च लिउँइँ योसेफइ ह्रोंसए आबा याकूब नेरो खीने टिबै ङिच्युसे ङ्‍ह (पचत्तर) परवामैं च ङाँर हुइ।
ACT 7:15 च लिउँइँ याकूब मिश्र ह्‍युलर ह्‍यासि चर्न सियाइ, धै ङ्योए खेमैं या चर्न सियाइ।
ACT 7:16 चमैंए सिनु शकेमर बोइ, धै अब्राहामइ ओंसोंन् शकेमर हामोरए च्हमैंने सै फोसि किंबै छगोंर पाइ।
ACT 7:17 “झाइले परमेश्‍वरजी अब्राहामने फैबै बाछाए त्हे तखमा मिश्र ह्‍युलर ङ्योए इस्राएली म्हिमैं बडिदै ह्‍यासि ल्हें तइ।
ACT 7:18 लिउँइँ योसेफलाइ ङो आसेबै अर्कोन् म्रुँइ मिश्र ह्‍युलर ग्याल्स लबर होंइ।
ACT 7:19 चइ ङ्योए ह्रेंमैंए फिर बेल्‍ले आछ्याँबै केमै लइ चमैंइ भर्खर फिबै ताँन् कोलोमैं सियारिगे बिसि ङ्योए खेमैंने चमैंए ओंलाँ कोलोमैं बैरु थेंबर ल्हैदिमल।
ACT 7:20 “च त्हेर्न मोशा फिइ। परमेश्‍वरए उँइँर च बेल्‍ले छ्याँब मुँल। च म्हैंन सोंल् समा चए आबाए धिंर्न न्हइ।
ACT 7:21 मोशा बैरु भ्योंवाबै लिउँइँ फारोए च्हमिंइ बोसि ह्रोंसए च्ह धोंलेन् न्हइ।
ACT 7:22 धै मोशाइ मिश्रीमैंए तोन्दोंरि ज्ञानमैं लोइ। छतमा मोशा पोंल् ह्रब नेरो छ्याँबै के लबै म्हि तइ।
ACT 7:23 “झाइले च प्लिच्यु बर्ष तमा ह्रोंसए इस्राएली म्हिमैंने त्होबै सैं लइ।
ACT 7:24 तिगें ह्रोंसए ह्रेंर्बै म्हि घ्रिलाइ मिश्री म्हिइ दुःख पिंरिब् म्रोंसि मोशाइ च मिश्री सैवासि ह्रोंसए ह्रेंर्बै म्हि जोगेमिंइ।
ACT 7:25 ‘परमेश्‍वरजी ङए योउँइँले चमैं जोगेमिंब्मुँ बिब ङए म्हिमैंइ क्होब्मुँ’ बिसि चए सैंर मैंल। दिलेया चमैंइ च ताँ आक्हो।
ACT 7:26 “प्हँन्हाँग्धों चमैं खें-खेंमैंए न्होंर्न प्होंरिबै त्हेर मोशा खसि चमैंलाइ क्ह्रिमिंबै सैं लसि बिइ, ‘ओ आघें-अलिमैं, क्हेमैंम् त्येमैं फोमैं तसेया क्हेमैं तले आक्ह्रिल?’
ACT 7:27 छबिमा आगुलाइ दुःख पिंबै इस्राएली म्हिइ मोशालाइ कैवासि बिइ, ‘ङिए फिर चिब् तसि निसाफ लबर खाबइ क्हि कुलइ?
ACT 7:28 तेल् च मिश्री म्हि सैवाब् धोंले क्हिइ ङलाज्यै या सैदा ङ्हाँइमुँ वा?’
ACT 7:29 चए ताँ थेसि मोशा भौदिसि मिद्यान ह्‍युलर ह्‍यासि टिइ। चर्न चए च्ह ङ्हिं योंइ।
ACT 7:30 “प्लिच्यु बर्ष तबै लिउँइँ सिनै बिबै कोंर्बै क्यु आयोंबै क्ल्ह्‍योर लुँरिबै मिए राबार स्वर्गदूत घ्रि च ङाँर म्रोंयुइ।
ACT 7:31 छतब् म्रोंसि मोशा प्लेटोयाइ, धै च ङ्‍ह्‍योबर चेंदो ह्‍यामा परमेश्‍वरए छ बिबै कै थेइ,
ACT 7:32 ‘ङ क्‍हिए खेमैं अब्राहाम, इसहाक नेरो याकूबए परमेशवर ग।’ छ बिब् थेसि मोशा ङ्हिंसि त्हारइ, धै छाइ ङ्‍ह्‍योबै आँट लल् आखाँ।
ACT 7:33 “दिलेया परमेश्‍वरजी चने बिइ, ‘क्‍हिए प्हलेर्बै जुत्ता प्‍लिवाद्, तलेबिस्याँ क्‍हि राबै क्‍ल्‍ह्‍यो पबित्र क्ल्ह्‍यो ग।
ACT 7:34 मिश्रर मुँबै ङए म्‍हिमैंए दुःख ङइ म्रोंइ, चमैं क्रोबै या ङइ थेइ। छतसि चमैंए दुःखउँइँले फ्रेमिंबर ङ तयुइमुँ। तारे ङइ क्हि मिश्र ह्‍युलर कुलब्मुँ।’
ACT 7:35 “चु मोशाने इस्रालिमैंइ ‘क्हि ङिए फिर्बै चिब तसि निसाफ लबर खाबइ कुलल?’ बिमा चमैंइ खीजी बिबै ताँ आङिंल। दिलेया परमेश्‍वरए स्वर्गदूत मोशाने झ्याडिर म्रोंयुल। झाइले च स्वर्गदूतजी ल्होमिंबइले चमैंए फिर्बै चिब नेरो चमैं जोगेमिंबै म्हि लसि परमेश्‍वरजी मोशा कुल्मिंइ।
ACT 7:36 चु मोशाइन मिश्र ह्‍युलर, ओल्ग्या मा ङ्युँइर, नेरो क्यु आयोंबै क्ल्ह्‍योरि प्लिच्यु बर्ष समन् औदिबै के नेरो चिनुमैं उँइँसि चमैं मिश्रउँइँले बैरु तेमिंइ।
ACT 7:37 “च मोशाइन इस्राएलीमैंने बिल, ‘परमेश्‍वरजी ङ त्हाँब् धोंले क्हेमैंए आघें-अलिमैं न्होंउँइँले क्हेमैंए ल्हागिर अगमबक्‍ता घ्रि त्हाँब्मुँ।’
ACT 7:38 इस्राएलीमैं क्यु आयोंबै क्ल्ह्‍योर सिनै कोंर खागु तमा मोशा स्वर्गदूतने मुँल। च स्वर्गदूतइ ङ्योए खेमैंने सिनै कोंर पोंल। स्वर्गदूतउँइँले योंबै सोगों लमिंबै ताँमैं मोशाइ ङ्यो इस्राएलीमैंलाइ लोमिंल।
ACT 7:39 “दिलेया ङ्योए खेमैंइ मोशाइ बिबै ताँमैं आङिंल। बरु चमैंइ च वाथेंसि मिश्र ह्‍युलर्न एह्‍याबै सैं लइ।
ACT 7:40 चमैंइ हारूनने छ बिइ, ‘मिश्रउँइँले ङिलाइ तेपखबै मोशा तो तगे बिसि ङिइ आसे। छतसि ङिए घ्याँ उँइँबै ल्हागिर देवतामैं बनेमिंन्।’
ACT 7:41 झाइले चमैंइ क्ल्या भाराए कु (मूर्ति) घ्रि बनेसि चए उँइँर ख्रो पिंइ, छले ह्रोंसए योइन लबै सैर सैं तोंइ।
ACT 7:42 छतसि परमेश्‍वर चमैंउँइँले एसि, ‘चमैंइ मुसारा, त्हियाँ, लयाँ नेरो ग्रहा-नक्षत्रमैं फ्योरिगे’ बिसि पिवाइ। चुए बारेर अगमबक्‍ताइ ओंसोंन् प्ह्रिइमुँ, ओ इस्राएलीमैं! क्हेमैइ प्‍लिच्‍यु बर्ष स‍मा क्यु आयोंबै क्ल्ह्‍योर ङए ल्हागिर खेदोए ख्रो नेरो भेटिमैं पिंल् वा?
ACT 7:43 क्‍हेमैंइ मोलोख देवताए तम्‍बु नेरो क्हेमैंला रेफन बिबै देवताए मुसारा नोसि बोइ। ‘देवतामैं’ बिसि फ्योबै ल्हागिर क्हेमैंइ च कुमैं बनेइ। छतसि तारे ङइ क्हेमैं बेबिलोनउँइँले क्योंजा ल्हवाब्मुँ।
ACT 7:44 “परमेश्‍वर खोंयोंइ ङ्योने मुँ बिब् था सेरिगे बिसि परमेश्‍वरजी म्हि आटिबै क्ल्ह्‍योर मोशाने थेबै तम्‍बु बनेल् पिंइ। झाइले खीजी नमुना उँइँमिंब् धोंले मोशाइ थेबै तम्‍बु बनेइ।
ACT 7:45 लिउँइँ यहोशूए पलोर ङ्योए खेमैं चु कनान ह्‍युलर खमा परमेश्‍वरजी चमैंए लागिर चु ह्‍युलर्बै ह्रेंमैंलाइ ल्‍हावाइ। धै चमैंइ च तम्‍बु चुर्न नोइ पइ। धै दाऊद म्रुँए पलो समा या च तम्‍बु चुर्न मुँल।
ACT 7:46 दाऊद परमेश्‍वरजी खोबै म्हि मुँल, छतसि दाऊदइ परमेश्‍वरने, ‘ओ याकूबए पेरमेश्‍वर, ङइ क्हिए ल्हागिरि पक्कि टिबै क्ल्ह्‍यो घ्रि ङ बनेल् पिंन्,’ बिसि यो छ्युँ लइ।
ACT 7:47 छान् बिलेया चए च्ह सोलोमनइ परमेश्‍वरए ल्हागिर मन्दिर बनेइ।
ACT 7:48 “दिलेया म्हिमैंए योइ बनेबै धिंमैंर धाँसे थेबै परमेश्‍वर आटि। अगमबक्‍ताइ छलेन बिइमुँ,
ACT 7:49 ‘ङ टिबै राजगद्दि स्वर्ग ग, धै ङए प्‍हले म्हैबै क्‍ल्‍ह्‍यो पृथ्‍बी ग। छतसि क्‍हेमैंइ ङए ल्हागिर खैबै धिं बनेम्? ङए भों न्‍हबै क्‍ल्‍ह्‍यो खनिर जा?
ACT 7:50 चु तोन्दोंरि सै ङए योजीन् बनेब आङिं वा?’ बिसि प्रभुजी बिइमुँ।
ACT 7:51 “ओ, आच्योबै म्हिमैं, सारो सैं प्ह्‍‍याब्मैं नेरो न्ह आथेब्मैं! क्हेमैंइ खोंयोंन् बिलै पबित्र प्ल्हए बिरोध लइमुँ। क्हेमैंए खेमैंइ लब् धोंले क्हेमैंज्यै या छान् लइमुँ।
ACT 7:52 ताँन् अगमबक्‍तामैंलाइ चमैंइ ह्रुगुदिल! खीए पबित्र के लबै म्हि युसिन् मुँ ओंसों बिबै म्हिमैंलाज्यै या चमैंइ सैवाल। तोगो च म्हि युज्यै या क्हेमैंइ चलाइ क्हाल् पिंसि सैवाइमुँ।
ACT 7:53 क्हेमैंइ स्वर्गदूतउँइँले परमेश्‍वरए ठिम योंल, दिलेया च ताँ क्हेमैंइ आम्हाँदि।”
ACT 7:54 स्तिफनसए ताँ थेसि चमैं बेल्‍ले ह्रिस खसि स ह्राइ।
ACT 7:55 दिलेया स्तिफनस परमेश्‍वरए पबित्र प्ल्हजी प्लिंसि स्वर्गउँइँ ङ्ह्‍योरिमा परमेश्‍वरए चारबै ह्‍वे नेरो येशू परमेश्‍वरए क्योलोउँइँ रारिब् म्रोंइ।
ACT 7:56 चइ बिइ, “ङ्ह्‍योद्! स्‍वर्ग थोंब नेरो म्हिए च्ह परमेश्‍वरए क्‍योंलोंउँइँ रारिबै या ङइ म्रोंइँमुँ।”
ACT 7:57 स्तिफनसइ छबिमा चमैं थेबै कैले ओरसि ह्रों-ह्रोंसए न्ह म्रुइ। धै चमैं ताँनइ तिखेर्न चए फिर ह्‍वानेइ।
ACT 7:58 चए बिरोधर ग्वाइ पिंब्मैंइ ह्रों-ह्रोंसए क्वें प्लिसि शाऊल मिं मुँबै फ्रेंसिए प्हले ङाँर थेंइ। धै चमैंइ स्तिफनस सहरउँइँले बैरु तेइ बोसि युँमाइ ल्हिइ।
ACT 7:59 चमैंइ युँमाइ ल्हिरिमा स्तिफनसइ बिइ, “ओ प्रभु येशू, ङए प्ल्ह क्हिजी किंनु।”
ACT 7:60 झाइले चइ च्हि तुँसि थेबै कैले ओरसि बिइ, “ओ प्रभु, चु पापए छ्याब चुमैंए फिर आल्हैदिरिगे।” च्हौ बिसि चइ सो पिवाइ।
ACT 8:1 शाऊल या स्तिफनस सैबै म्हिमैंने क्ह्रिल। च त्हिंइ सेरोन् यरूशलेमर मुँबै चर्चए फिर थेबै दुःख तबर होंइ। छान् तलेया कुल्मिंबै चेला चिब्मैं चर्न टिइ। अरू चेलामैं बिस्याँ येहूदिया नेरो सामरिया ह्‍युलउँइँ प्हुँयाँइ।
ACT 8:2 परमेश्‍वर म्हाँदिब्मैं को-कोइ बेल्‍ले क्रोदै स्तिफनसए सिनु बोसि छगोंर पाथेंइ।
ACT 8:3 शाऊल बिस्याँ धिं-धिंर होंसि चर्च नास लरिल। चइ मुँयुँमैं नेरो च्हमिरिमैं स्याला म्हालाले चैंबोसि झेलर च्युवामाल।
ACT 8:4 च त्हेर प्हुँयाँबै चेलामैंइ खन्तोंदोंन् ह्‍यासि येशूउँइँले खबै सैं तोंबै ताँ बिप्रइ।
ACT 8:5 फिलिप बिस्याँ सामरिया ह्‍युलर्बै सहर घ्रिर ह्‍यासि चर्बै म्हिमैंने परमेश्‍वरजी कुल्मिंबै म्रुँ ख्रीष्‍टए बारेर बिमिंइ।
ACT 8:6 फिलिपइ बिबै ताँमैं थेसि, धै चइ लबै औदिबै चिनुमैं म्रोंसि, चर्बै ल्हें म्हिइ सैं घ्रिन् तसि चए ताँ छेनाले थेइ।
ACT 8:7 तलेबिस्याँ ल्हें म्हिउँइँले मोंमैं थेबै कैले ओरसि त्होंमल। छलेन यो प्हले ओलेल् आखाँबै ल्हें स्याले म्हिमैं या सल् लमिंइ।
ACT 8:8 छले च सहरर्बै म्हिमैं बेल्‍ले सैं तोंइ।
ACT 8:9 च सहरर सिमोन बिबै म्हि घ्रि मुँल। चइ ओंसों ओंनोंन् चर जादु लसि सामरियार्बै म्हिमैं प्लेटोयाल् लमल, धै चइ ङम् ङन् ग बिसि प्हैंमल।
ACT 8:10 छतमा च ह्‍युलर्बै थेब च्योंब ताँनइ “चु परमेश्‍वरए थेबै शक्‍ति मुँबै म्हि मुँन!” बिमल।
ACT 8:11 चइ ल्हें त्हे ओंनोंन् जादु लसि म्हिमैं प्लेटोयाबै केमैं लरिल। छतसि चमैंइ च म्हिलाइ म्हाँदिमल।
ACT 8:12 दिलेया लिउँइँ परमेश्‍वरए ग्याल्सर्बै ताँमैं नेरो येशू ख्रीष्‍ट उँइँले खबै सैं तोंबै ताँमैं फिलिपइ बिमिंमा चर्बै म्हिमैंइ चए ताँ क्वेंइ, धै मुँयुँमैं, च्हमिरिमैं ताँनइ बप्‍तिस्मा किंइ।
ACT 8:13 चु ताँमैं च जादु लबै सिमोनज्यै क्वेंइ, धै चज्यैया बप्‍तिस्‍मा किंसि फिलिपने बालु प्रइ। झाइले फिलिपइ लबै थे-थेबै औदिबै चिनुमैं म्रोंसि च प्लेटोयाइ।
ACT 8:14 सामरियाथेंमैंइ परमेश्‍वरए ताँ क्वेंइ रो बिब् थेसि यरूशलेमर मुँबै कुल्मिंबै चेला चिब्मैंइ पत्रुस नेरो यूहन्‍ना चमैं ङाँर कुलइ।
ACT 8:15 पत्रुस नेरो यूहन्‍ना चर खसि चर्बै बिश्‍वासीमैंइ पबित्र प्ल्ह योंरिगे बिसि चमैंए ल्हागिर प्राथना लमिंइ।
ACT 8:16 तलेबिस्याँ च त्हे समा चमैं खाबै फिरै या पबित्र प्ल्ह आयुल। चमैंए बप्‍तिस्मा प्रभु येशूए मिंर मत्‍त्रे तल।
ACT 8:17 छतसि पत्रुस नेरो यूहन्‍नाइ चमैंए फिर यो थेंसि प्राथना लमिंमा चमैंइ पबित्र प्ल्ह योंइ।
ACT 8:18 छले कुल्मिंबै चेला चिब्मैंइ यो थेंमा पबित्र प्ल्ह योंब् म्रोंसि सिमोनइ छ बिदै चमैंलाइ मुइ पिंबर होंइ,
ACT 8:19 “ङइ खा-खाबै फिर यो थेंमुँ चमैंइ पबित्र प्ल्ह योंरिगे बिसि ङलाज्यै या छाबन् शक्‍ति पिंन्।”
ACT 8:20 छबिमा पत्रुसइ बिइ, “क्‍हिए मुइ क्हिनेन् नास तयारिगे, तलेबिस्याँ परमेश्‍वरए बरदान मुइइ किंल् खाँम् बिसि क्हिइ मैंइ!
ACT 8:21 परमेश्‍वरए उँइँरि क्हिए सैं छ्याँब आरेना। छतसि चु के क्हिइ कति लल् आयों!
ACT 8:22 छतसि क्हिइ ह्रोंसए चु दुष्‍ट केउँइँले सैं एद् धै प्रभुने प्राथना लद्, छलस्याँ क्हिइ मैंबै आछ्याँबै ताँमैं क्षमा योंलै।
ACT 8:23 क्हिए सैं इखइ प्लिंब नेरो क्हिलाइ पापइ फैथेंब ङइ म्रोंइँमुँ।”
ACT 8:24 चु ताँ थेसि सिमोनइ बिइ, “क्हेमैंइ बिबै तोइ ताँ या ङए फिर आतरिगे बिसि, ङए ल्हागिर प्रभुने प्राथना लमिंन्।”
ACT 8:25 झाइले चमैंइ प्रभुए बारेर ग्वाइ पिंसि प्रभुए ताँ लोमिंल् खाँबै लिउँइँ सामरीमैंए नाँसजरे सैं तोंबै ताँ बिमिंदै चमैं यरूशलेमर एखइ।
ACT 8:26 च लिउँइँ प्रभुए स्वर्गदूत घ्रिइ फिलिपलाइ बिइ, “रेसि ल्हुँउँइँ (दक्षिण) ह्‍यासि म्हि आटिबै क्ल्ह्‍योर्बै घ्याँर ह्‍याद्। च घ्याँ यरूशलेमउँइँले गाजा ह्‍युलउँइँ ह्‍याम्।”
ACT 8:27 छबिमा फिलिप रेसि ह्‍यामा इथियोपियार्बै हिचड घ्रिने त्होइ। च यरूशलेमर परमेश्‍वर म्हाँदिसि धिंउँइँ एखरिल। च इथियोपिया ह्‍युलर्बै म्रुँस्यो कन्दाकिए थेबै पदर के लब नेरो ताँन् सै न्होरए कोषाध्यक्ष मुँल।
ACT 8:28 च रथर क्हुँसि यशैया अगमबक्‍ताइ प्ह्रिबै कितब खेरिल।
ACT 8:29 पबित्र प्ल्हइ फिलिपने “च रथए ङाँर ह्‍याद्,” बिइ।
ACT 8:30 फिलिप च रथ ङाँइ न्हेह्‍यामा चइ यशैया अगमबक्‍ताइ प्ह्रिबै कितब खेरिब् थेसि चइ “क्हिइ खेरिबै ताँ क्होइमुँ वा?” बिसि चने ङ्योएइ।
ACT 8:31 छबिमा चइ बिइ, “खाबज्यै आबिमिंस्याँ ङइ खैले क्होल् खाँमुँ?” च्हौ बिसि चइ फिलिपने “रथर क्रेसि ङने बालु टिद्,” बिइ।
ACT 8:32 चइ खेरिबै कितबर्बै ताँ चु मुँल, “सैबर बोबै क्यु नेरो पै प्ह्रेबै क्यु पै प्ह्रेबै म्हिए उँइँर तोइ आबिल्‍ले टिब् धोंले, खीजी ह्रोंसए सुँउँइँले तिजी या आपों।
ACT 8:33 खीलाइ म्हि आच्हिसि च्योंरि लबै त्हेरै या खीजी निसाफ आयों। खी पृथ्‍बीउँइँले सियाबै लिउँइँ खीए सन्तानए बयन खाबइ लब?”
ACT 8:34 झाइले च हिचडइ फिलिपने बिइ, “अगमबक्‍ताइ चु ताँ खाबै बारेर बिब् जा? ह्रोंसए बारेर बिब् उ अरूए बारेर बिब् जा? गार आम्हाँदिल्‍ले ङने बिमिंन्।”
ACT 8:35 छबिमा फिलिपइ परमेश्‍वरए छ्वेर्बै च खण्‍डउँइँलेन् येशूउँइँले खबै सैं तोंबै ताँ चने बिमिंइ।
ACT 8:36 धै चमैं घ्‍याँर ह्‍याना-ह्‍यान् क्‍यु मुँबै क्‍ल्‍ह्‍यो ङाँर फेनेमा च हिचडइ बिइ, “ङ्‍ह्‍योत्ति, चुर क्यु मुँन। ङ बप्‍तिस्मा किंबउँइँले तो सैइ क्वेल् खाँम्?”
ACT 8:37 [फिलिपइ चने बिइ, “क्‍हिइ ह्रोंसए खों न्होंउँइँलेन् प्रभु येशूए फिर बिश्‍वास लम् बिस्याँ क्हिइ बप्‍तिस्मा किंल् खाँम्।” चइ बिइ, “येशू ख्रीष्‍टन् परमेश्‍वरए च्ह मुँन बिसि ङइ क्वेंम्,”]
ACT 8:38 झाइले हिचडइ “रथ न्हद्!” बिइ। धै फिलिप नेरो हिचड ङ्हिंना-ङ्हिंन् क्युर तसि फिलिपइ चलाइ बप्‍तिस्मा पिंइ।
ACT 8:39 झाइले चमैं क्‍युउँइँले बैरु त्‍होंखबै लिउँइँ प्रभुए प्ल्हजी फिलिप बोयाइ। हिचडइ फिलिप धबै आम्रोंलेया सैं तोंदै ह्रोंसए घ्‍याँ क्‍हाइ।
ACT 8:40 दिलेया फिलिप अश्दोद बिबै क्ल्ह्‍योर म्रोंखइ, धै कैसरिया आफेन् समन् ताँन् नाँसजरे सैं तोंबै ताँ बिमिंदै प्रइ।
ACT 9:1 शाऊल अझै समा प्रभुए चेलामैंए बिरोध लसि सैबै धम्कि लदै यरूशलेमर्बै ख्रो पिंबै खेगि क्रथे ङाँर ह्‍याइ।
ACT 9:2 झाइले चइ चने “येशूए लिलि प्रबै मुँयुँमैं-च्हमिरिमैं खाब् स्यालेन ङइ चमैंलाइ क्‍हासि यरूशलेमर बोल् पिंन् बिबै प्ह्रिछ्यामैं दमस्‍कस सहरर्बै म्हि च्हों धिंमैंए म्हिमैंए मिंरि प्ह्रिमिंन् ओ,” बिइ।
ACT 9:3 धै च प्ह्रिछ्यामैं किंसि शाऊल प्रदै दमस्कसए चेंदो फेनेमा तिखेर्न स्वर्गउँइँले चारबै ह्‍वे युसि चए खागु चारइ।
ACT 9:4 छतमा च सर क्हुरियाइ, धै “ओ शाऊल, शाऊल, क्हिइ तले ङ छले ह्रुगुदिरिमुँ?” बिबै कै चइ थेइ।
ACT 9:5 चइ बिइ, “प्रभु, क्‍हि खाब् जा?” छबिमा खीजी बिइ, “ङ क्हिइ ह्रुगुदिरिबै येशू ग।
ACT 9:6 तारे रेसि सहरर ह्‍याद्, क्‍हिइ तो लल् त्‍हुम् बिसि म्हि घ्रिइ क्हिने बिमिंब्‍मुँ।”
ACT 9:7 च त्हेर शाऊलने बालु ह्‍याबै थुमैंइ कै बिस्याँ थेइ, दिलेया खाबै आम्रोंमा प्लेटोयाल्‍ले रारिइ।
ACT 9:8 शाऊल रेसि मि ङ्‍ह्‍योमा चइ तोइ म्रोंल आखाँल। छतमा चने ह्‍याबै थुमैंइ च डोरेसि दमस्कसर पखइ।
ACT 9:9 सोंरो समा च मि आम्रोंब् तयाइ, धै चइ चब्-थुँब या तोइ आल।
ACT 9:10 च त्हेर दमस्‍कसर हननिया मिं मुँबै चेला घ्रि मुँल। प्रभु च ङाँर म्रोंयुसि चने “ओ हननिया,” बिइ। चइ “प्रभु, ङ चुर्न मुँ,” बिइ।
ACT 9:11 झाइले प्रभुजी चने बिइ, “रेसि ‘सिधा’ बिबै सहरए न्होंर्बै घ्याँर ह्‍याद्। चर यहूदा बिबै म्हिए धिंर शाऊल मिं मुँबै टार्ससथें म्हैद्। तलेबिस्याँ च प्राथना लरिइमुँ।
ACT 9:12 चइ दर्शनर हननिया मिं मुँबै म्हि घ्रि धिं न्होंर खसि चइ मि म्रोंरिगे बिसि ह्रोंसए फिर यो थेंब म्रोंइँमुँ।”
ACT 9:13 दिलेया हननियाइ बिइ, “प्रभु, चु म्हिइ यरूशलेमर क्‍हिए म्हिमैं फिर बेल्‍ले दुःख पिंइँमुँ बिबै ताँ ङइ ल्हें म्हिउँइँले थेइमुँ।
ACT 9:14 चुरै या क्हिए मिं किंब्मैं ताँन् क्हासि झेलर च्युवाबै हग ख्रो पिंबै खेगि चिब्मैंउँइँले चइ योंइँमुँ।”
ACT 9:15 दिलेया प्रभुजी चने बिइ, “ह्‍याद्, तलेबिस्याँ अरू ह्रेंमैं, म्रुँमैं नेरो इस्राएलर्बै म्हिमैंए उँइँर ङए मिंए बारेर बिमिंबर ङइ त्हाँबै म्हि चन् ग।
ACT 9:16 ङए मिंर बिश्‍वास लमा चइ कति थेबै दुःख नोल् त्हुम् बिब ङइ चने उँइँमिंब्मुँ।”
ACT 9:17 छबिमा हननिया ह्‍यासि शाऊल टिबै धिं न्होंर होंइ। धै चए फिर यो थेंसि बिइ, “ओ अलि शाऊल, क्हि खरिबै घ्याँर क्हि ङाँर म्रोंयुबै येशूजीन् क्हिए मि म्रोंरिगे धै पबित्र प्ल्हजी प्लिंरिगे बिसि ङ कुल्मिंब् ग।”
ACT 9:18 हननियाइ छ बिबै तोंदोंन् शाऊलए मिर्बै ताँगए कत्‍ला धों तबै सै खारयासि चइ धबै मि म्रोंइ। धै च रेसि बप्‍तिस्मा किंइ।
ACT 9:19 झाइले चब् चसि चइ भों योंइ। धै शऊल दे त्हिंइ समा दमस्‍कसर मुँबै चेलामैंने टिइ।
ACT 9:20 झाइले चर टिबै तोंदोंन् चइ येशू परमेश्‍वरए च्ह ग बिसि म्हि च्हों धिंजरे येशूए ताँमैं बिबर होंइ।
ACT 9:21 चए ताँ थेब्मैं ताँनइ प्लेटोयासि बिइ, “यरूशलेमरि येशूए मिं किंब्मैंलाइ दुःख पिंसि सैल् म्हैबै म्हि चुन् आङिं वा? छलेन चु दमस्‍कसरै या चमैंलाइ फैसि ख्रो पिंबै खेगि चिब्मैं ङाँर बोयाबै सैं लसि च खब आङिं वा?”
ACT 9:22 दिलेया शाऊल आङ्हिंनले येशूए ताँ बिमिंबर भोंब् ततै ह्‍याइ, धै येशून् परमेश्‍वरजी कुल्मिंबै म्रुँ ख्रीष्‍ट ग बिसि प्रमाण पिंमा दमस्कसर्बै येहूदिमैंइ अकमक्‍क तसि तोइ ज्वाफ पिंल् आखाँ।
ACT 9:23 छतमा ल्‍हें त्हिंइ लिउँइँ यहूदीमैंइ चलाइ सैवाबै घ्याँ म्हैइ।
ACT 9:24 दिलेया चमैंइ चलाइ सैल् म्हैबै ताँ शाऊलइ सेइ। चमैंइ चलाइ सैबै ल्हागिर त्हिंइ म्‍हुँइँस सहरर्बै म्रार चए छैं लसि टिमल।
ACT 9:25 दिलेया चए चेलामैंइ म्‍हुँइँसर्न च ट्हलर झोंसि बानुउँइँले तमिंइ।
ACT 9:26 शाऊल यरूशलेमर खबै लिउँइँ चइ चेलामैंने क्ह्रिल् म्हैइ। दिलेया चमैंइ च येशूए चेला ग बिब आक्वेंसि ताँन् चने ङ्हिंइ।
ACT 9:27 दिलेया बारनाबास बिबै चेलाइ शावल त्होसि चलाइ कुल्मिंबै चेला चिब्मैं ङाँर बोमिंइ। “घ्याँर प्रमा शाऊलइ प्रभु म्रोंइ, प्रभु चने बालु पोंइ, झाइले दमस्कसर येशूए मिंउँइँले खबै सैं तोंबै ताँ आङ्हिंन्ले अरूमैंने बिमिंइ,” बिबै ताँ या बारनाबासइ चेला चिब्मैंलाइ बिइ।
ACT 9:28 झाइले शाऊल यरूशलेमर चमैंने बा-बालु खुल्‍ल तसि प्रबर होंइ, धै आङ्हिंन्ले प्रभुए मिंउँइँले खबै सैं तोंबै ताँ म्हिमैंने बिप्रबर होंइ।
ACT 9:29 झाइले चइ ग्रिक क्युइ पोंबै यहूदीमैंने या छलफल लमल, दिलेया चमैंइ चलाइ सैल् म्हैमल।
ACT 9:30 चु ताँ था सेसि येशूए फिर बिश्‍वास लबै आघें-अलिमैंइ शाऊल कैसरियार पखइ, धै च क्ल्ह्‍योउँइँले टार्ससर कुल्मिंइ।
ACT 9:31 छले यहूदीया, गालील नेरो सामरियार्बै चर्चर शान्ति तइ धै चर्च भोंब् तइ। चमैंइ प्रभुलाइ म्हाँदिदै प्रमा पबित्र प्ल्हजी चमैंए सैंर भों पिंइ। छतमा प्रभुए फिर बिश्‍वास लब्मैं ल्हें ततै ह्‍याइ।
ACT 9:32 पत्रुस छाइछुइ ताँन् क्ल्ह्‍योजरे स्युरदै लुड्डा बिबै नाँसर्बै प्रभुए म्हिमैं ङाँरै या फेखइ।
ACT 9:33 पत्रुसइ चर एनियास मिं मुँबै म्हि घ्रि त्‍होइ। च म्हि प्रेदिं ओंनोंन् यो प्हलेमैं ओलेल् आखाँबै स्याले तसि क्ल्ह्‍योर्न रोरिल।
ACT 9:34 पत्रुसइ चने बिइ, “ओ एनियास! येशू ख्रीष्‍टजी क्‍हि सल् लमिंम्। रेसि क्हिए क्‍ल्ह्‍यो त्युइद्।” छ बिबै तोंदोंन् च रेयाइ।
ACT 9:35 च छले सब् म्रोंसि लुड्डा नाँस नेरो शारोन बिबै ह्‍युलर टिबै ताँन् म्‍हिमैं प्रभुउँइँ सैं एइ।
ACT 9:36 योप्‍पा बिबै नाँसर तबिता बिब येशूए फिर बिश्‍वास लबै च्हमिरि घ्रि मुँल। ग्रिक क्युइर चने डोरकास बिमल। चइ छ्याँबै केमैं लब् नेरो ङ्हाँदुमैंए खाँचोमैं टार्दिमिंब्रें लमल।
ACT 9:37 च त्हेजरेन् तबिता नसि सियाइ, झाइले म्हिमैंइ च सिनु ख्रुमिंसि आटि फिर्बै कोठा घ्रिर थेंइ।
ACT 9:38 लुड्डा नाँस योप्पाउँइँले चेंदोन् मुँ, धै योप्पार मुँबै चेलामैंइ पत्रुस लुड्डार मुँ बिब् थेसि, “गाह्र आम्हाँदिन्ले युनन् ङि ङाँर खमिंन् ओ,” बिसि चए ङाँर म्हि ङ्हिं कुलइ।
ACT 9:39 चु ताँ थेबै लिउँइँ पत्रुस चमैंने बालु ह्‍याइ। चर फेनेसि चमैंइ चलाइ आटि फिर्बै कोठार बोइ। चर्बै ताँन् म्हरेस्योमैं पत्रुसए ङाँर खइ, धै डोरकास खेंमैंने बालु मुँमा चइ टुइ थेंबै भोटो, चोला नेरो अरू क्वेंमैं पत्रुसने उँइँसि चमैं क्रोबर होंइ।
ACT 9:40 झाइले पत्रुसइ चमैं ताँन् बैरु कुल्मिंसि च्हि तुँसि परमेश्‍वरने प्राथना लइ। धै च सिनु ङाँइ तोसि, “तबिता, रेद्!” बिमा चइ मि ङ्‍ह्‍योइ, झाइले पत्रुस म्रोंसि रेसि क्हुँइ।
ACT 9:41 पत्रुसइ चए यो क्हासि रेमिंइ, धै बिश्‍वासीमैं नेरो म्हरेस्योमैं हुइसि च सियाल् खाँबै तबिता सोगों तइ बिसि उँइँमिंइ।
ACT 9:42 चु ताँ योप्‍पा तिगोंन् थेनेइ, धै ल्हें म्हिइ प्रभुए फिर बिश्‍वास लइ।
ACT 9:43 झाइले पत्रुस दे त्हिंइ समा योप्पार सिमोन बिबै ट्हिबिए के लबै म्हिने टिइ।
ACT 10:1 कैसरिया बिबै क्ल्ह्‍योर कर्नेलियस मिं मुँबै म्हि घ्रि मुँल। च इटालिया बिबै पल्टनर्बै कप्‍तान मुँल।
ACT 10:2 चइ परमेश्‍वर म्हाँदिमल, धै च नेरो चए परवा ताँनइ परमेश्‍वरजी बिब ङिंमल। चइ थेबै सैंइ म्हिमैंए खाँचोमैं टार्दिमिंसि परमेश्‍वरने खोंयोंन् बिलै प्राथना लरिमल।
ACT 10:3 तिगें त्हिंइर्बै सों ह्राबै त्हेजरे परमेश्‍वरए स्वर्गदूत घ्रि दर्शनर च ङाँइ युसि, “ओ कर्नेलियस!” बिरिब चइ थेइ।
ACT 10:4 छबिमा कर्नेलियस ङ्हिंसि स्वर्गदूत ङाँइ ङ्ह्‍योबै-ङ्ह्‍योबन् लसि, “बिल् त्हुबै ताँ तोइ मुँ वा?” बिइ। स्‍वर्गदूतइ चने बिइ, “क्हिइ ङ्हाँदुमैंए खाँचो टार्दिमिंबै छ्याँबै केमैं नेरो क्हिइ लबै प्राथना परमेश्‍वरए उँइँर फेनेइमुँ।
ACT 10:5 तारे पत्रुस बिबै सिमोन हुइबर योप्पार म्हिमैं कुल्मिंन्।
ACT 10:6 च ट्हिबिए के लबै सिमोन ङाँर टिइमुँ। चए धिं मा ङ्युँइए छेउर मुँ।”
ACT 10:7 च्हक बिसि स्वर्गदूत कर्नेलियसउँइँले छ्युडिह्‍याइ। च लिउँइँ कर्नेलियसइ चए केब्छैंमैंर म्हि ङ्हिं नेरो खीलाइन सेवा लरिबै सिपाइ घ्रि हुइ। च सिपाइ परमेश्‍वरलाइ म्हाँदिब् मुँल।
ACT 10:8 झाइले खिइ म्रोंबै ताँन् ताँ चमैंने बिसि चमैंलाइ योप्पार कुल्‍मिंइ।
ACT 10:9 प्‍हँन्हाँग्धों त्हिंइर्बै च्युसे ङ्हिं ह्राबै त्हेजरे चमैं योप्‍पा सहरए चेंदो फेखइ। च त्हेजरे पत्रुस प्राथना लबर धिंए आडि फिर ह्‍याइ।
ACT 10:10 च प्राथना लदै मुँमा फो ख्रेंसि तो मुँलै चल् योंस्याँ तमल ङ्हाँरिल, दिलेया अरूमैंइ चब् ह्‍योरिबै त्हेर च प्रभुने बेल्‍ले चेंदो तमा
ACT 10:11 चइ स्‍वर्ग थोंब नेरो च्हो प्लिर्न फैबै तन्‍न धों तबै सै ताले माइ पृथ्बीउँइँ तयुरिब् म्रोंइ।
ACT 10:12 च च्यादरर पृथ्बीर्बै ताँन् खालर्बै प्हले प्लि प्ह्‍याबै खेदोमैं, फोइ क्ल्‍‍याँइ प्रबै प्हँलाँ प्हुँलुमैं नेरो मुर्बै नेमामैं मुँल।
ACT 10:13 च्हमा “ओ पत्रुस, रेद्, चु सैमैं सैसि चद्,” बिबै कै चइ थेइ।
ACT 10:14 दिलेया पत्रुसइ बिइ, “आङिं, प्रभु! ङइ चोखो आरेब् नेरो चल् आतबै सैमैं खोंयोंइ आचइमुँ।”
ACT 10:15 पत्रुसइ छबिमा धबै “परमेश्‍वरजी चोखो लमिंबै सै क्हिइ ‘चोखो आरे’ बिसि आमैंन्!” बिबै कै चइ थेइ।
ACT 10:16 चु ताँ सोंब्‍ले समा छान् बिरिइ। च तोंदोंन् च च्यादर स्वर्गउँइँ बोयाइ।
ACT 10:17 छतमा पत्रुस ह्रोंसइ म्रोंबै दर्शनए अर्थ तो मुँगे बिसि सैं न्हों-न्हों खैला-तोला तरिबै त्हेर्न कर्नेलियसइ कुल्मिंबै म्हिमैं सिमोनए धिं म्हैरि योंसि म्रार राइ।
ACT 10:18 झाइले च म्हिमैंइ, “पत्रुस बिबै सिमोन चुर टिइमुँ वा?” बिसि थेबै कैले ङ्योएइ।
ACT 10:19 पत्रुस ह्रोंसइ म्रोंबै दर्शन तो मुँगे बिसि मैंरिमा पबित्र प्ल्हजी चने बिइ, “ङ्‍ह्‍योद्, म्हि सोंइ क्हि म्हैरिमुँ।
ACT 10:20 रेसि क्युरु तद्, धै छोरों आङ्हाँन्ले चमैंने बालु ह्‍याद्, तलेबिस्याँ चमैं ङइ कुल्मिंब् ग।”
ACT 10:21 छबिमा पत्रुस क्युरु तसि च म्हिमैं ङाँर ह्‍यासि, “क्हेमैंइ म्हैबै म्हि ङन् ग। क्हेमैं चुर तो केइ खल?” बिइ।
ACT 10:22 चमैंइ बिइ, “कप्‍तान कर्नेलियसइ ङि चुर कुलब् ग। च छ्याँब सैं प्ह्‍याब नेरो परमेश्‍वर म्हाँदिबै म्हि मुँ, धै ताँन् यहूदी ह्रेंमैंउँइँले मान योंबै म्हि ग। चए धिंर क्हि हुइसि क्हिउँइँले ताँ थेद् बिसि पबित्र स्वर्गदूत घ्रिइ चने बिइमुँ।”
ACT 10:23 झाइले पत्रुसइ चमैं धिं न्होंर हुइसि चमैंए मान लइ। प्‍हँन्हाँग्धों पत्रुस रेसि चमैंने बालु ह्‍याइ, धै योप्पार्बै बिश्‍वासीमैं या चने बालुन् ह्‍याइ।
ACT 10:24 नुँइम्धों चमैं कैसरिया फेनेइ। कर्नेलियसइ ह्रोंसए ङेमैं नेरो क्ह्रिबै थुमैं हुइसि चमैं खागु तसि पत्रुसलाइ प्रेंरिल।
ACT 10:25 पत्रुस फेखसि धिं न्होंर होंबि छेमा कर्नेलियस चने त्होसि चए प्हले क्हासि फ्योइ।
ACT 10:26 दिलेया पत्रुसइ, “आफ्योद्, ङैना म्हिन् ग,” बिदै चलाइ रेइ।
ACT 10:27 झाइले पत्रुस चने बालु ताँ लदै धिं न्होंर होंमा चर ल्हें म्हि खागु तब चइ म्रोंइ।
ACT 10:28 छतमा पत्रुसइ चमैंने बिइ, “यहूदीए ल्हागिर अरू ह्रेंमैंने त्होसि प्रब-टिब् लब बेल्‍ले आछ्याँबै ताँ ग बिसि क्हेमैंइ सेइमुँ। दिलेया ‘म्हिमैं खाबै या चोखो आरे आङ्हाँन्,’ बिसि परमेश्‍वरजी ङने उँइँमिंइँमुँ।
ACT 10:29 छतसि क्हेमैंइ हुइबै तोंदोंन् तोइ आङ्हाँन्ले ङ क्हेमैं ङाँर खइ। लु बिद्, क्हेमैंइ ङलाइ तले हुइल?”
ACT 10:30 झाइले कर्नेलियसइ बिइ, “प्लिरो ओंसों सों ह्राबै त्हेजरे ङ धिंर प्राथना लरिमा फोस्रे ब्योंबै क्वें खिबै म्हि घ्रि ङए उँइँर रासि
ACT 10:31 बिइ, ‘कर्नेलियस! परमेश्‍वरजी क्हिए प्राथना थेइमुँ, धै क्हिइ ङ्हाँदुमैंलाइ तो चैदिमु च पिंबै छ्याँबै केमैं या मैंइमुँ।
ACT 10:32 छतसि योप्पार म्हिमैं कुलसि सिमोन पत्रुस बिबै म्हि हुइपउ। च मा ङ्युँइए छेउर ट्हिबिए के लबै सिमोनए धिंर टिइमुँ।’
ACT 10:33 छ बिबै तोंदोंन क्हि ङाँर म्हि कुल्मिंइ, धै क्हि या गार आम्हाँदिन्ले खमिंइ। तारे प्रभुजी क्हिने बिद् बिबै ताँमैं थेबै ल्हागिर ङि ताँन् चुर परमेश्‍वरए उँइँर खागु तइमुँ।”
ACT 10:34 झाइले पत्रुस पोंबर होंइ, “क्ह्रोंसेंन परमेश्‍वरजी खाबलाज्यै आफेल बिसि ङइ तोगो क्होइमुँ।
ACT 10:35 ताँन् म्हिमैं खाब ह्रेंर्बै मुँलेया परमेश्‍वरने ङ्हिंसि छ्याँबै के लमुँ च म्हिमैंलाइ खीजी खोमुँ।
ACT 10:36 येशू ख्रीष्‍टउँइँले छिं ङ्हाँल् लबै सैं तोंबै ताँ परमेश्‍वरजी इस्राएलीमैंलाइ बिइ बिसि क्हेमैंइ सेइमुँ। (येशू ख्रीष्‍टन् ताँनए प्रभु ग।)
ACT 10:37 यूहन्‍नाइ बप्‍तिस्मा किंन् बिसि बिप्रबै लिउँइँसेरो गालील ह्‍युलउँइँले तों लसि ताँन् यहूदीया तिगोंन् बिप्रबै ताँ क्हेमैंइ सेइमुँ।
ACT 10:38 परमेश्‍वरजी नासरतथें येशूलाइ पबित्र प्ल्ह नेरो शक्‍तिजी प्लिंमिंसि खीजी छ्याँबै केमैं लदै, दुष्‍टइ ह्रुगुदिब्मैं सल् लमिंदै प्रइ, तलेबिस्याँ परमेश्‍वर खीने बालु मुँल।
ACT 10:39 खीजी यहूदीमैंए ह्‍युल नेरो यरूशलेमर लबै ताँन् केमैं ङिइ म्रोंइँमुँ। च लिउँइँ म्हिमैंइ खी क्रूसर च्योवासि सैवाइ।
ACT 10:40 दिलेया परमेश्‍वरजी येशूलाइ धबै सोंरोर सोगों लमिंइ, धै म्हिमैं ङाँर खी म्रोंखल् पिंइ।
ACT 10:41 ताँन् म्हिमैं ङाँर खी आम्रोंखा, दिलेया खी ङि ङाँर मत्‍त्रे, तलिबिस्याँ खी सिसि धबै सोगों तबै लिउँइँ ङिइ खीने बालुन् चब-थुँब लइ। चु ताँए ग्वाइ पिंबर परमेश्‍वरजी ओंसों ओंनोंन् ङिलाइ त्हाँल।
ACT 10:42 ‘म्हिमैंने सैं तोंबै ताँ बिमिंबर’ धै ‘सोगोंमैं नेरो सियाब्मैंए निसाफ लबर परमेश्‍वरजी त्हाँबै म्हि येशून् ग,’ बिसि ङिलाइ ग्वाइ पिंबर परमेशजी ल्हैदिइमुँ।
ACT 10:43 स्योंम्बै अगमबक्‍तामैंइ ‘खीए फिर बिश्‍वास लब्मैं ताँनइ खीए मिंउँइँले पाप क्षमा योंम्,’ बिसि खीए ग्वाइ पिंइँमुँ।”
ACT 10:44 पत्रुसइ चु ताँमैं पोंना-पोंन् ताँ थेरिब्मैं ताँनए फिर पबित्र प्ल्ह युइ।
ACT 10:45 अरू ह्रेंमैंए फिरै या पबित्र प्ल्ह युब् म्रोंसि पत्रुसने बालु खबै प्रभुए फिर बिश्‍वास लबै यहूदीमैं बेल्‍ले प्लेटोयाइ।
ACT 10:46 तलेबिस्याँ स्यो-स्योबै क्युइर पोंसि चमैंइ परमेश्‍वरए मिं क्वेरिब चमैंइ थेइ। छतब् म्रोंसि पत्रुसइ बिइ,
ACT 10:47 “ङ्योइ धोंलेन् चुमैंज्यै या पबित्र प्ल्ह योंसेरो क्युए बप्‍तिस्मा आकिंन् बिसि खाबइ बिल् खाँमुँ?”
ACT 10:48 छतसि चइ येशू ख्रीष्‍टए मिंरि चमैं बप्‍तिस्मा पिंन् बिइ। धै चमैंइ “दे त्हिंइ गार आम्हाँदिन्ले चुर्न टिमिंन्,” बिसि पत्रुसने बिइ।
ACT 11:1 अरू ह्रेंमैंज्यै या परमेश्‍वरए ताँ क्वेंइ रो बिबै ताँ यहूदीयार्बै प्रभु येशूजी कुल्मिंबै चेला चिब्मैं नेरो अरू बिश्‍वासीमैंइ थेइ।
ACT 11:2 झाइले पत्रुस यरूशलेमर खमा को-कोइ यहूदी बिश्‍वासीमैंइ चने त्होइ। चमैंइ “अरू ह्रेंर्बै बिश्‍वासीमैंलाज्यै या ट्हुबि क्ह्‍याँसि चिनु लल् त्हुम्” बिइ।
ACT 11:3 छतसि “ज्युर चिनु आलबै म्हिमैं ङाँर ह्‍यासि चमैंने बालु क्हिइ तले चब्-थुँब लल!” बिसि चमैंइ पत्रुसलाइ छ्याब् ल्हैदिइ।
ACT 11:4 छबिमा पत्रुसइ ताँन् ताँमैं तोंफ्यार्लै चमैंने बिबर होंइ:
ACT 11:5 “ङ योप्पा सहरर प्राथना लरिमा प्रभुने बेल्‍ले चेंदो तमा ङइ दर्शन म्रोंइ। च दर्शनर तन्‍ना धों तबै च्हो प्लिर क्हासि स्वर्गउँइँले क्युरु ङ ङाँर युरिल।
ACT 11:6 ङइ छेनाले ङ्‍ह्‍योमा चर प्हले प्लि प्ह्‍याबै खेदोमैं, क्ह्‍योंर्बै खेदोमैं, सर क्ल्याँसि प्रबै प्हँलाँ-प्हुँलुँ नेरो मुर्बै नमेमैं म्रोंइ।
ACT 11:7 झाइले ‘पत्रुस रेद्, धै च सैमैं सैसि चद्,’ बिबै कै ङइ थेइ।
ACT 11:8 दिलेया ङइ बिइ, ‘आङिं प्रभु! छाबै चोखो आरेब् नेरो चल् आतबै सै ङइ खोंयोंइ आचइमुँ।’
ACT 11:9 “ङ्हिखेबै लारै या, ‘परमेश्‍वरजी चोखो लमिंबै सैमैं क्हिइ चोखो आरे आबिद्!’ बिसि च कैइ स्वर्गउँइँले ङने बिइ।
ACT 11:10 सोंखे समा छान् तइ, धै च ताँन् सैमैं धबै स्वर्गउँइँन बोयाइ।
ACT 11:11 “च त्हेर्न कैसरिया नाँसउँइँले ङ ङाँर कुल्मिंबै म्हि सों ङि टिबै धिंर फेखइ।
ACT 11:12 झाइले पबित्र प्ल्हजी, ‘चमैंने बालु तोइ आङ्हाँन्ले ह्‍याद्,’ बिसि ङने बिइ। छबिमा चु अलिमैं टुग्लो या ङने बालुन् कैसरिया नाँसर ह्‍यासि ङि कर्नेलियसए धिंर होंइ।
ACT 11:13 धै कर्नेलियसइ ङिने बिइ, ‘स्वर्गदूत घ्रि ङए धिंर रायुसि, योप्पार म्हिमैं कुलसि पत्रुस बिबै म्हि हुइ पउ।
ACT 11:14 चइ क्हिने परमेश्‍वरए ताँ बिमिंब्मुँ, धै च ताँउँइँले क्हि नेरो क्हिए ताँन् परवामैं जोगेब्मुँ,’ बिइ।
ACT 11:15 “धै ङ च म्हिमैंने पोंबर होंमा ङिए फिर ओंसों पबित्र प्ल्ह तयुब् धोंलेन् चमैंए फिरै या तयुइ।
ACT 11:16 छतमा ‘यूहन्‍नाइ क्युइ बप्‍तिस्मा पिंइ, दिलेया तारे पिरु परमेश्‍वरए पबित्र प्ल्हजी क्हेमैंलाइ बप्‍तिस्मा पिंब्मुँ,’ बिसि प्रभुजी ओंसोंन् बिबै ताँ ङइ मैंइ।
ACT 11:17 ङ्योइ प्रभु येशू ख्रीष्‍टए फिर बिश्‍वास लमा परमेश्‍वरजी ङ्योलाइ खैबै बरदान पिंल, चमैंलाज्यै या छाबन् बरदान पिंसेरो ङइ परमेश्‍वरने ‘आपिंन्’ बिब ङ खाब् जा?”
ACT 11:18 चु ताँ थेसि यरूशलेमर्बै बिश्‍वासीमैंइ पत्रुसलाइ छ्याब् ल्‍हैदिब् पिवाइ, धै “तारे अरू ह्रेंर्बै म्हिमैंज्यै या मुक्‍ति योंरिगे बिसि परमेश्‍वरजी चमैंलाइ सैं एबै मौका पिंना!” बिसि चमैंइ ताँ क्होइ। झाइले चमैंइ परमेश्‍वरए मिं क्वेइ।
ACT 11:19 स्‍तिफनस सैवाबै लिउँइँ प्रभुए फिर बिश्‍वास लब्मैंलाइ ल्हाबइले ताँन् भौदियाइ। दिलेया को-कोइ फोनिके, साइप्रस नेरो एन्‍टिओखिया बिबै ह्‍युलमैं समा फेनेसि अरू ह्रेंमैंने आबिल्‍ले यहूदीमैंने मत्‍त्रे परमेश्‍वरए ताँ बिप्रइ।
ACT 11:20 दिलेया चमैंए न्होंरि को-कोइ साइप्रस नेरो कुरेनीर्बै म्हिमैं मुँल। चमैंइ एन्‍टिओखियार खसि अरू ह्रेंर्बै ग्रिकमैंने या प्रभु येशूउँइँले खबै सैं तोंबै ताँ बिमिंइ।
ACT 11:21 प्रभुए आशिक ने शक्‍ति चमैए फिर तबाइले ल्हें ल्हें म्हिइ प्रभु येशूए फिर बिश्‍वास लसि खी ङाँइ सैं एइ।
ACT 11:22 चु ताँ यरूशलेमर्बै बिश्‍वासीमैंइ थेइ। छतसि चमैंइ बारनाबास एन्‍टिओखियार कुल्मिंइ।
ACT 11:23 झाइले बारनाबास चर खमा परमेश्‍वरए आशिक नेरो दयाम्हाँया चमैंए फिर तब् म्रोंसि सैं तोंइ, धै चमैं ताँनने “खों न्होंउँइँलेन् प्रभुए फिर क्ह्रोंसेंन्ले बिश्‍वास लसि खी आपिल्‍ले टिरिल् त्हुम्,” बिसि चमैंए सैं भोंमिंइ।
ACT 11:24 तलेबिस्याँ बारनाबास पबित्र प्ल्हजी प्लिंब नेरो प्रभुए फिर बेल्‍ले थेबै बिश्‍वास लबै छ्याँबै म्हि मुँल। छतमा ल्हें म्हिइ प्रभुए फिर बिश्‍वास लइ।
ACT 11:25 झाइले बारनाबास शाऊल म्हैबर टार्सस बिबै सहर ह्‍याइ।
ACT 11:26 बारनाबासइ शाऊल टार्ससर त्होसि एन्‍टिओखियार पखइ। तिदिं समन् चमैं बिश्‍वासीमैंने त्होब्‍ब्रें लसि ल्हें म्हिलाइ लोमिंइ। एन्‍टिओखियार्न धाँसे ओंसों ख्रीष्‍टए चेलामैंने ख्रीष्‍टियान बिबै मिं थेंइ।
ACT 11:27 च त्हेर्न कोइ अगमबक्‍तामैं यरूशलेमउँइँले एन्‍टिओखियार युइ।
ACT 11:28 चमैंए न्‍होंरि अगाबस मिं मुँबै म्हि घ्रि मुँल। ताँन् ह्‍युलर थेबै अँङ्गल् तबि छेइमुँ बिसि लिउँइँ तखबै ताँ पबित्र प्ल्हउँइँले चइ पोंइ। (च अँङ्गल् थेबै क्‍लौडियस म्रुँए पलोर तल।)
ACT 11:29 छाबै ताँ थेसि चेलामैं ताँनइ ह्रों-ह्रोंसइ पिंल् खाँबै सैमैं रेसि यहूदीयार्बै बिश्‍वासीमैं ल्होबर पिमिंबै सैं लइ।
ACT 11:30 झाइले चमैंइ छान् लसि रेबै सैमैं बारनाबास नेरो शाऊलए योउँइँले यरूशलेमर्बै एल्डरमैंए ङाँर चमैंइ पिमिंइ।
ACT 12:1 च त्हेजरे हेरोद म्रुँइ को-कोइ बिश्‍वासीमैं क्हासि चमैंए फिर बेल्‍ले दुःख पिंबर होंइ।
ACT 12:2 चइ यूहन्‍नाए आघें याकूबलाइ सेलाँइ (तरवारइ) सैवाल् पिंइ।
ACT 12:3 छलमा यहूदीमैं सैं तोंब् म्रोंसि चइ पत्रुसलाज्यै या क्हाइ। (चु ताँमैं प्लेढा आझोंबै क्हें चबै चाडर तल।)
ACT 12:4 हेरोदइ पत्रुस क्हासि झेलर च्युवाइ, धै दुःखने फ्रेबै चाडए लिउँइँ पत्रुसलाइ म्हिमैंए उँइँर पखबै सैं लसि चलाइ रुँबै ल्हागिर सिपाइमैंए टोलि प्लिए जिम्मार पिंइ।
ACT 12:5 छले पत्रुस झेलर च्युवामा चए ल्हागिर बिश्‍वासीमैंइ बेल्‍ले भों खसि परमेश्‍वरने प्राथना लरिल।
ACT 12:6 हेरोदइ पत्रुस बैरु तेसि म्हिमैंए उँइँर पखल् म्हैबै म्हुँइँसर पत्रुस सँउँलि ङ्हिंइ फैसि सिपाइ ङ्हिंए म्हाँजोर रोरिल। धै अरू सिपाइमैं या झेलए म्राए ओंसों रूँरिल।
ACT 12:7 च त्हेर्न प्रभुए स्‍वर्गदूत घ्रि चर म्रोंयुमा च कोठर व्हे-व्हे तयाइ। स्‍वर्गदूतइ पत्रुस छोरबर कोखर कैसि “युनन् रेद्!” बिमा पत्रुसए योमैंउँइँले सँउँलि प्ल्हयाइ।
ACT 12:8 धै स्‍वर्गदूतजी चने “क्वें खिद्, जुत्ता खिद्!” बिइ। चइ छान् लमा स्‍वर्गदूतइ “ह्रडि कुसि ङए लिलि खो!” बिइ।
ACT 12:9 छबिमा पत्रुस स्‍वर्गदूतए लिलि ह्‍याइ। स्वर्गदूतइ लबै के क्ह्रोंसेंन् ग बिब चइ आसेल। दर्शन म्रोंरिब् बिसि चइ मैंरिल।
ACT 12:10 झाइले चमैं ओंसोंबै ने अर्को रुँबर टिबै म्हिमैं वाथेंसि ह्‍याइ। धै चमैं सहरर होंबै पैए म्रार फेनेमा च म्रा खीन् थोंयाँइ। छतमा चमैं बैरु त्होंसि घ्याँ घ्रिर फेनेमा स्वर्गदूत पत्रुस पिथेंसि ह्‍याइ।
ACT 12:11 च त्हेर्न पत्रुसइ सैं चिसि बिइ, “तोगो ङइ क्ह्रोंसेंन्‍ले सेइ, प्रभुजी खीए स्‍वर्गदूत कुल्मिंसि हेरोद म्रुँए योउँइँले नेरो यहूदीमैंइ लल् म्हैबै ताँन् सैउँइँले ङ फ्रेमिंइ।”
ACT 12:12 चु ताँ था सेसि पत्रुस मर्कूस बिबै यूहन्‍नाए आमा मरियमए धिंर ह्‍याइ। चर ह्‍यामा ल्हें म्हि खागु तसि प्राथना लरिल।
ACT 12:13 पत्रुसइ म्रा ह्रामा रोदा मिं मुँबै केब्स्यो म्रा थोंबर खइ।
ACT 12:14 चइ पत्रुसए कै ङो सेसि सैं तोंदै म्रा आथोंल्‍ले न्होंर न्हेह्‍यासि बिइ, “पत्रुस म्राए बैरु रारिइमुँ!”
ACT 12:15 छबिमा चमैंइ चने “क्‍हि सोबल तइमुँ वा!” बिइ। दिलेया चइ ढिपि लसि बिइ, “क्ह्रोंसेंन पत्रुसन् ग।” छतमा चमैंइ “च पत्रुसए स्वर्गदूत मुँलै,” बिइ।
ACT 12:16 पत्रुस बिस्याँ म्रान् ह्रारिइ। चमैंइ म्रा थोंमा पत्रुस म्रोंसि चमैं प्लेटोयाइ।
ACT 12:17 पत्रुसइ तोइ आबिद् बिसि योइ हस्त लइ, झाइले प्रभुजी च झेलउँइँले खैले बैरु तेमिंइ बिबै ताँ चमैंने बिइ। धै “चु ताँ याकूब नेरो अरू आघें-अलिमैंने या बिद् ओ,” बिसि च छाइले अर्को क्ल्ह्‍योर छ्युडिह्‍याइ।
ACT 12:18 मि म्रोंबै लिउँइँ पत्रुसलाइ तो तगे बिसि रुँबै सिपाइमैं न्होंरि बेल्‍ले खैला-बैला लइ।
ACT 12:19 हेरोदइ चलाइ म्हैबर हुकुम पिंइ। दिलेया खनरै म्हैसे आयोंमा सिपाइमैंलाइ केर्दिसि चमैंलाइ सैबर ल्हैदिइ। हेरोद बिस्याँ यहूदीयाउँइँले कैसरिया सहरर ह्‍यासि चर्न टिइ।
ACT 12:20 हेरोद टुरोसथेंमैं नेरो सिदोनथेंमैने बेल्‍ले ह्रिस खल। चमैंए ह्‍युलर्बै म्हिमैंइ चबै सैए ल्हागिर म्रुँए ह्‍युलने आड किंल् त्हुमल। छतसि चमैं ताँन् खागु तसि म्रुँ ङाँर खइ, धै चमैंइ म्रुँए दरबारर्बै के लब्मैंए चिब बलस्तसने न्हों-न्हों सुँने सुँ क्ह्रिबै ल्हागिरि यो छ्युँ लइ।
ACT 12:21 म्रुँइ त्हाँबै त्हिंइर म्रुँमैंइ खिबै क्वें खिसि हेरोद चए राजगद्दिर क्हुँसि चमैंए उँइँर भाषण लइ।
ACT 12:22 छतमा म्‍हिमैंइ “चुम् म्हिए ताँ आङिं! देवताए ताँ ग!” बिसि हेरोदए मिं थेब् लसि ओरइ।
ACT 12:23 दिलेया चइ परमेश्‍वरए मान आलबइले च त्हेर्न प्रभुए स्वर्गदूतइ चम्हिमैंए उँइँरलाइ ल्हिवाइ धै चए ज्युर प्हुँलुँ उजी उजी तसि च म्रुँ सियाइ।
ACT 12:24 दिलेया परमेश्‍वरए ताँ बडिदै खन्‍तोंदोंन् फेनेइ।
ACT 12:25 झाइले बारनाबास नेरो शाऊल ह्रोंसइ लल् त्हुबै के खाँसि यरूशलेमउँइँले एह्‍यामा मर्कूस बिबै यूहन्‍ना या चमैंने ह्‍याइ।
ACT 13:1 एन्‍टिओखियार्बै चर्चर अगमबक्‍तामैं नेरो लोमिंबै म्हिमैं मुँल। चमैं बारनाबास बिब, काला बिबै शिमियोन, कुरेनीथें लुकियस, धै हेरोद म्रुँने बालु फारबै मनेन बिब नेरो शाऊलै या मुँल।
ACT 13:2 चमैं बर्त टिसि प्राथना लसि परमेश्‍वरए मिं क्वेरिबै त्हेर पबित्र प्ल्हजी चमैंने बिइ, “ङए ल्हागिरि बारनाबास नेरो शाऊल ङइ खाब् केए ल्हागिरि त्हाँइमुँ च केए ल्हागिर्न स्यो लद्।”
ACT 13:3 चमैं बर्त टिसि प्राथना लइ, धै चमैंए फिरि यो थेंसि चमैं कुल्मिंइ।
ACT 13:4 पबित्र प्ल्हजी कुल्मिंबइले चमैं सिलुकिया नाँसर ह्‍याइ, छाइले झाजर क्रेसि साइप्रस बिबै टापुएउँइँ ह्‍याइ।
ACT 13:5 चर्बै सलामिस नाँसर फेनेसि चमैंइ येहूदिमैंए च्हों धिंजरे परमेश्‍वरए सैं तोंबै ताँ बिमिंइ। चमैंलाइ ल्होमिंबर यूहन्‍ना मार्कुसै या चमैंने बालु ह्‍याल।
ACT 13:6 चमैं साइप्रसर मुँबै ताँन् क्ल्ह्‍योजरे स्युरदै पाफोस नाँसर फेखमा चर चमैंइ बार-येशू बिबै जादु लबै म्हि घ्रि त्होइ। चइ अगमबक्‍ता ग बिसि स्योर तेमल।
ACT 13:7 च जादु लबै म्हि साइप्रस टापूर्बै क्रथे सर्गियस पौलुस बिबै म्हिने टिमल। सर्गियस पौलुस बुद्धि मुँबै म्हि मुँल। चइ शाऊल नेरो बारनाबास हुइसि परमेश्‍वरए ताँ थेबै सैं लइ।
ACT 13:8 दिलेया सर्गियस पौलुसइ परमेश्‍वरए ताँ आक्वेंरिगे बिसि एलुमास बिबै जादु लबै म्हिइ शाऊल नेरो बारनाबासए बिरोध लइ। (ग्रिक क्युइर एलुमासए अर्थ जादु लबै म्हि ग।)
ACT 13:9 दिलेया शाऊललाइ पबित्र प्ल्हजी प्लिंसि च ङाँइ ङ्‍ह्‍योबै-ङ्‍ह्‍योबन् लसि एलुमासने बिइ (शाऊललाइ पावलै या बिमुँ):
ACT 13:10 “ओ दियाबलसए च्ह! क्हि ताँन् छ्याँबै केमैंए शत्तुर, ताँन् दुष्‍ट सैमैंइ प्लिंब नेरो स्योर तेब! क्हि प्रभुए सोजो घ्याँ खेदा-ख्योदे लब खोंयोंन् बिलै आपि वा?
ACT 13:11 तारे ङ्‍ह्‍योद्, प्रभुए यो क्हिए फिर फेइमुँ! तारे क्हि तिस्याँदे समा त्हिंयाँए ह्‍वे म्रोंल् आखाँसि कन तयाब्मुँ।” छबिबै तोंदोंन् म्हस्यो नेरो मिछु खैबइ चए मि हुवाइ। छतमा खाबज्यै चए यो क्हासि डोरेमिंम् उ ङ्हाँसि च छाम-छुम् लबर होंइ।
ACT 13:12 चु ताँ म्रोंसि चर्बै क्रथेइ प्रभुए फिर बिश्‍वास लइ, तलेबिस्याँ प्रभुए बारेर्बै ताँ थेसि च छक्‍कन् तयाइ।
ACT 13:13 पावल नेरो चए थुमैं पाफोसउँइँले क्‍यु झाजर क्रेसि पामफिलिया ह्‍युलर्बै पर्गार फेनेइ। दिलेया मर्कूस बिबै यूहन्‍ना बिस्याँ चमैंने फ्रेसि च क्ल्ह्‍योउँइँले यरूशलेमर एह्‍याइ।
ACT 13:14 पावल नेरो बारनाबास पर्गाउँइँले त्होंसि पिसिदिया बिबै ह्‍युलर्बै एन्‍टिओखिया सहरर फेनेइ, धै प्रिबै त्हिंइर यहूदीमैंए च्हों धिंर ह्‍यासि टिइ।
ACT 13:15 झाइले म्हिमैंइ मोशाइ पिंबै ठिम नेरो अगमबक्‍तामैंए कितब खेबै लिउँइँ च्हों धिंर्बै चिब्मैंइ, “ओ अलि-अङाँमैं, क्हेमैंने म्हिमैंए ल्हागिरि अर्तिए ताँमैं तोइ मुँस्याँ बिमिंन्,” बिसि पावल नेरो चए थुमैं ङाँर सँउँसर पिमिंइ।
ACT 13:16 छबिमा पावल रासि योइ हस्त लसि बिइ: “ओ इस्राएलर्बै म्हिमैं नेरो परमेश्‍वर म्हाँदिबै अरू ह्रेंर्बै म्हिमैं, थेद्।
ACT 13:17 इस्राएली ह्रेंर्बै परमेश्‍वरजी ङ्योए खेमैं त्हाँइ। चमैं मिश्र ह्‍युलर टिमा खीजी चमैंलाइ थेबै ह्रें लमिंइ, धै खीए शक्‍ति मुँबै योजी चमैं च ह्‍युलउँइँले तेसि पखमिंइ।
ACT 13:18 प्लिच्यु बर्ष समा क्यु आयोंबै क्ल्ह्‍योर खीजी चमैं छेनाले ङ्‍ह्‍योमिंइ।
ACT 13:19 झाइले खीजी कनान ह्‍युलर्बै ङिउँलो ह्रेंमैंलाइ नास लसि च ह्‍युलर्बै हग ङ्योए खेमैंलाइ पिंइ।
ACT 13:20 च के लमा प्लिब्ब्रासे ङ्‍हच्यु बर्ष तल। “च लिउँइँ परमेश्‍वरजी ङ्योए खेमैंलाइ जोगेमिंबै ल्हागिर खीए ताँ बिमिंबै शामूएलए पलो समा चमैंए ल्हागिर निसाफ लबै म्हिमैं पिंइ।
ACT 13:21 च लिउँइँ ङ्योए खेमैंइ म्रुँ ह्रिइ, धै परमेश्‍वरजी बेन्यामीन कुलर्बै किशाए च्ह शाऊल प्लिच्यु बर्ष समा चमैंए म्रुँ तल् पिंइ।
ACT 13:22 झाइले परमेश्‍वरजी शाऊल स्योवासि दाऊदलाइ चमैंए म्रुँ तल् पिंइ। दाऊदए बारेर परमेश्‍वरजी ग्वाइ पिंसि बिइ, ‘ङए खों न्होंर मैंब् धोंबै म्हि ङइ यिशैए च्ह दाऊद योंइ। ङए सैंर मैंबै ताँन् के चइ लब्मुँ।’
ACT 13:23 परमेश्‍वरजी बाछा लब् धोंले दाऊदए सन्तानउँइँले इस्राएलीमैं जोगेमिंबै ल्हागिर खीजी येशूलाइ कुल्मिंइ।
ACT 13:24 खी युब् भन्दा ओंसों यूहन्‍नाइ इस्राएलर्बै ताँन् म्हिमैं परमेश्‍वरउँइँ सैं एसि बप्‍तिस्मा किंन् बिदै खन्तोंदोंन् बिप्रल।
ACT 13:25 यूहन्‍नाइ ह्रोंसए केमैं खाँबि छेमा छ बिल, ‘क्हेमैंइ ङ खाब् जा बिसि मैंल? जोगेमिंबै म्रुँ ख्रीष्‍ट ङ आङिं। दिलेया ङए लिउँइँ म्हि घ्रि युसिन् मुँ, खीए प्हलेर्बै जुत्ताए तनि प्‍ल्हबर ङ्हेंब ङ आरे।’
ACT 13:26 “ओ आघें-अलिमैं, अब्राहामए सन्तान्मैं, नेरो परमेश्‍वर म्हाँदिबै अरू ह्रेंर्बै म्हिमैं! परमेश्‍वरजी ङ्योए ङाँर्न चु जोगेमिंबै ताँ कुल्मिंइँमुँ।
ACT 13:27 दिलेया यरूशलेमथेंमैं नेरो चमैंए क्रथे मिंथेमैंइ येशू खाब् जा बिसि ङो आसेल, धै प्रिबै त्हिंइ ह्रोंसे अगमवक्‍तए ताँ खेलेया, चमैंइ च ताँ तो जा बिसि आक्होल। छतसि चमैंइ येशूलाइ सजैं पिंसि अगमबक्‍तामैंइ खीए बारेर ओंसोंन् पोंब् धोंले पूरा लइ।
ACT 13:28 खीलाइ सिल् त्हुबै छ्याब् तोइ आयोंलेया चमैंइ खीलाइ सैल् त्हुम् बिसि च ह्‍युलर्बै रोमी क्र थे पिलातस ङाँर ह्‍यासि यो छ्युँ लइ।
ACT 13:29 खीए बारेर स्योंमन् प्ह्रिबै ताँन् ताँमैं लल् खाँबै लिउँइँ चमैंइ खीलाइ क्रूसउँइँले तवासि उर मुँबै छगोंर थेंइ।
ACT 13:30 दिलेया परमेश्‍वरजी खी सिबइले धबै सोगों लमिंइ।
ACT 13:31 झाइले ल्हें त्हिंइ समन् ह्रोंसने बालु गालीलउँइँले यरूशलेमर खब्मैंने खी सोगों तसि त्होब्रें लइ। तोगो च म्हिमैं इस्राएलीमैंए उँइँर खीलाइ म्रोंइ बिसि ग्वाइ पिंब्मैं ग।
ACT 13:32 “परमेश्‍वरजी येशू सिबइले धबै सोगों लमिंसि खीजी ङ्योए खेमैंने फैबै बाछा ङ्योए ल्हागिर्न पूरा लमिंइ। चु सैं तोंबै ताँ ङि क्हेमैंए ङाँर पखइमुँ।
ACT 13:33 छाबन् भजनसंग्रह ङ्हिंरै या प्ह्रिइमुँ, ‘क्‍हि ङए च्‍ह ग, तिंयाँ ङइ क्‍हि योंइँमुँ।’
ACT 13:34 खीजी ख्रीष्‍टलाइ खोंयोंन् बिलै आक्राँल्‍ले सिबइले धबै सोगों लमिंबै बारेर छ बिइमुँ, ‘ङ क्हेमैंलाइ दाऊदलाइ पिंबै पबित्र नेरो खोंयोंन् बिलै तरिबै आशिक पिंब्मुँ।’
ACT 13:35 अर्को भजन संग्रहरै या दाऊदइ छलेन् बिइमुँ, ‘क्‍हिजी ह्रोंसए पबित्र म्हिए ज्यु क्राँल् पिंरिब् आरे।’
ACT 13:36 चु ताँ दाऊदइ ह्रोंसए बारेर बिब आङिं, तलेबिस्‍याँ दाऊदइ ह्रोंसए पलोर परमेश्‍वरजी बिब् धोंलेन् के लसि सिइ। धै चए खेमैंने बालु पावाइ, धै चए ज्यु क्राँयाइ।
ACT 13:37 दिलेया परमेश्‍वरजी येशूए ज्यु आक्राँल्‍ले सिबइले धबै खी सोगों लमिंइ।
ACT 13:38 “छतसि, ओ आघें-अलिमैं, चु येशूउँइँलेन् पापए क्षमा तम् बिसि क्हेमैंइ सेल् त्हुम्।
ACT 13:39 मोशाइ पिंबै ठिमउँइँले क्हेमैं पापमैंउँइँले फ्रेयाल् आखाँमल, दिलेया येशूए फिर बिश्‍वास लब्मैंइ खीउँइँलेन् च ताँन् पापमैंउँइँले फ्रेयाइमुँ।
ACT 13:40 छतसि न्ह क्रों मि क्रों तद्, आस्याँ अगमबक्‍तामैंए कितबर प्ह्रिबै नास तबै ताँमैं क्हेमैंए फिर्न खब्मुँ:
ACT 13:41 ‘ओ बिल्‍लि लब्मैं! ङ्‍ह्‍योसि अचम्‍म म्हाँदिद् धै नास तयाद्, तलेबिस्याँ क्हेमैंए पलोर ङइ के घ्रि लरिमुँ। च केए बारेर खाबज्यै क्हेमैंने बिमिंलै या क्हेमैंइ खोंयोंइ क्वेंरिब् आरे।’”
ACT 13:42 चु ताँमैं बिबै लिउँइँ पावल नेरो बारनाबास च्हों धिंउँइँले बैरु त्होंल् म्हैमा “तारे खबै प्रिबै त्हिंइरै या छाबै ताँमैं बिमिंन् ओ!” बिसि म्हिमैंइ चमैंने यो छ्युँ लइ।
ACT 13:43 च्हों धिंर्बै ताँमैं खाँबै लिउँइँ ल्‍हें यहूदीमैं नेरो यहूदी धर्म म्‍हाँदिबै अरू ह्रेंर्बै म्‍हिमैं पावल नेरो बारनाबासए लिलि प्रइ। धै पावल नेरो बारनाबासइ चमैंए सैं भोंब लमिंसि बिइ, “परमेश्‍वरए दयाम्हाँयार खोंयोंन् बिलै तरिद् ओ।”
ACT 13:44 अर्को प्रिबै त्हिंइर सहरर्बै त्हेन् म्हिमैं प्रभु येशूए बारेर्बै ताँ थेबर खइ।
ACT 13:45 छले च्हौ ल्हें म्हि खब् म्रोंसि बिश्‍वास आलबै यहूदीमैं बेल्‍ले ह्रिस खइ, धै पावलइ बिबै ताँ थोसि चलाइ आछ्याँन्ले स्यारइ।
ACT 13:46 छान् तलेया पावल नेरो बारनाबासइ आङ्हिंन्ले बिइ, “परमेश्‍वरए ताँ धाँसे ओंसों क्हेमैं यहूदीमैंनेन् बिल् त्हुमल। दिलेया क्हेमैंइ चु ताँ थेल् आङिंसि खोंयोंन् बिलै आखाँबै छ्ह योंदा आङ्हाँमा तारे ङि अरू ह्रेंमैं ङाँर ह्‍याम्।
ACT 13:47 तलेबिस्याँ प्रभुजी ङिने छान् लद् बिइमुँ: ‘पृथ्‍बी तिगोंन् मुक्‍ति योंबै ताँमैं बिमिंबर अरू ह्रेंमैंए ल्हागिरि ह्‍वे तबर ङइ क्‍हि त्हाँइमुँ।’”
ACT 13:48 पावलइ बिबै ताँ थेसि अरू ह्रेंमैं सैं तोंइ, धै परमेश्‍वरए ताँ बेल्‍ले छ्याँब मुँ बिसि थेब् लइ, धै खोंयोंन् बिलै आखाँबै छ्ह योंबर परमेश्‍वरजी ओंसों ओंनोंन् त्हाँब्मैंइ येशूए फिर बिश्‍वास लइ।
ACT 13:49 छतमा प्रभुए ताँ ताँन् ह्‍युलजरे थेनेइ।
ACT 13:50 दिलेया यहूदीमैंइ परमेश्‍वरलाइ म्हाँदिबै थेबै कुलर्बै च्हमिरिमैं नेरो च सहरर्बै चिब्मैं सुरिदिवामा चमैंइ पावल नेरो बारनाबासए बिरोध लसि चमैंलाइ खेंमैंए ह्‍युलउँइँले ल्हावाइ।
ACT 13:51 छलमा चमैंइ ह्रोंसए प्हलेर्बै त्हुला चमैंए बिरोधर खारसि आइकोनियन बिबै सहरर ह्‍याइ।
ACT 13:52 दिलेया एन्‍टिओखियार्बै चेलामैं पबित्र प्ल्हजी प्लिंसि सैं तोंइ।
ACT 14:1 पावल नेरो बारनाबास आइकोनियन सहरर ह्‍यामा एन्‍टिओखिया सहरर तब् धोंलेन् चरै या तइ। चमैं येहूदिमैंए च्हों धिंर होंसि प्रभु येशूउँइँले खबै सैं तोंबै ताँ छेनाले बिमिंमा चर्बै ल्हें यहूदीमैं नेरो ग्रिकमैंइ येशूए फिर बिश्‍वास लइ।
ACT 14:2 दिलेया चमैंए ताँ आक्वेंबै यहूदीमैंइ बिस्याँ अरू ह्रेंमैं होंसिदिसि प्रभुए फिर बिश्‍वास लबै अलि-अङाँमैंए बिरोध लसि चमैंए सैं ककाँ क्युँक्युँ ङ्हाँन् लवाइ।
ACT 14:3 पावल नेरो बर्णाबास ल्‍हें त्हिंइ समा च सहरर टिसि चमैंइ प्रभुए फिर भर थेंसि प्रभुए बारेर आङ्हिंन्ले पोंइ। छतमा प्रभुजी चमैंए योउँइँले औदिबै केमैं नेरो चिनुमैं तल् पिंइ, छतमा खीए बेल्‍ले थेबै म्हाँयाए बारेर चमैंइ लोमिंबै ताँ क्‍ह्रोंसेन् ग बिसि ग्वाइ पिंइ।
ACT 14:4 दिलेया सहरर्बै म्हिमैं आक्ह्रिबर होंइ, धै कोइ यहूदीमैंने त्हुँयाँइ, कोइ कुल्मिंबै चेला चिब्मैंने त्हुँइ।
ACT 14:5 छतमा अरू ह्रेंमैं नेरो यहूदीमैं ङ्हिंना-ङ्हिंनइ खेंमैंए चिबनाँब्मैंने त्हुँसि पावल नेरो बारनाबास ह्रुगुदिब नेरो युँमाइ ल्हिबै मत लइ।
ACT 14:6 चमैंइ चु ताँ सेसि लुकोनिया ह्‍युलर्बै सहरमैं लुस्‍त्रा, डर्बि नेरो च खागुबै क्ल्ह्‍योजरे भौदिह्‍याइ।
ACT 14:7 चरै या चमैंइ सैं तोंबै ताँ बिप्रइ।
ACT 14:8 लुस्‍त्रा सहरर प्हले ओलेल् आखाँबै म्हि घ्रि मुँल। च फिब् ओंनोंबै डुँड मुँल, छतमा च खैमैंइ आप्रल।
ACT 14:9 पावलइ पोंरिमा चइ थेरिल। च ङाँइ ङ्‍ह्‍योमा “ङ सल् खाँम्” बिबै बिश्‍वास चने मुँन बिसि पावलइ सेइ।
ACT 14:10 छतसि पावलइ थेबै कै तेसि चने बिइ, “क्हिए प्हलेर राद्!” छबिमा च म्हि रेसि प्रबर होंइ।
ACT 14:11 चर्बै ल्हें म्हिइ पावलइ लबै के म्रोंसि चमैंइ खेंमैंए लुकोनिया क्युइर थेबै कैले बिइ, “देवतामैं म्हिए क्हो किंसि ङ्यो ङाँर तयुना।”
ACT 14:12 चमैंइ बारनाबासने जिउस बिबै देवता धै पावल ताँ पोंल् ह्रबै चिब तबइले चने हेर्मेस बिबै देवता बिइ।
ACT 14:13 च सहरए उँइँर मुँबै जिउसए मन्दिरर्बै ख्रो पिंबै खेगिइ मुल म्रामैंर क्ल्यामैं नेरो टए मालामैं पखइ, तलेबिस्याँ चर्बै म्हिमैंने क्ह्रिसि चइ बारनाबास नेरो पावलए उँइँर ख्रो पिंबै सैं लइ।
ACT 14:14 चु ताँ थेसि कुल्मिंबै चेला चिब्मैं बारनाबास नेरो पावलइ खेंमैंए क्वें ट्होसि ओरदै च म्हिए हुलर न्हेयासि छ बिइ,
ACT 14:15 “ओ म्हिमैं! क्‍हेमैंइ तले छाबै के लमुँ? ङि या क्हेमैं धोंबन् दुःख सुख भुँदिबै म्हिमैंन् ग। चु स्योलिबै के पिसि क्हेमैं परमेश्‍वरउँइँ सैं एखरिगे बिसि ङिइ खीउँइँले खबै सैं तोंबै ताँ बिमिंब् ग। मु, पृथ्‍बी, मा ङ्युँइ नेरो चर मुँबै तोन्दोंरि सैमैं बनेबै सोगों परमेश्‍वर खीन् ग।
ACT 14:16 खीजी ओंसोंबै पुस्तए ताँन् ह्रेंमैं ह्रों-ह्रोंसए रोसर्न प्रल् पिंइ।
ACT 14:17 दिलेया खीजी क्हेमैंए फिर ल्हयो खसि स्वर्गउँइँले नाँ कुलसि रा-रोमैं रोबै त्हेर क्हेमैं चल् योंरिगे बिसि ल्हें रोमैं रोमिंइ धै क्हेमैं सैं तोंल् पिंइ। छाबै के लसि क्हेमैंए उँइँर परमेश्‍वरजी खीए ग्वाइ पिंइँमुँ।”
ACT 14:18 चु ताँमैं बिसि चमैंइ बेल्‍ले गारले च म्हिमैंलाइ ख्रो पिंबै पूजा लल् आपिं।
ACT 14:19 च लिउँइँ एन्‍टिओखिया नेरो आइकोनियनउँइँले को-कोइ यहूदीमैं चर फेखइ, धै चमैंइ चर्बै म्हिमैं वाँसि पावललाइ युँमाइ ल्हिल् पिंइ, धै पावल सियाइ बिब् मैंसि सहर बैरु चैं बोइ।
ACT 14:20 दिलेया चेलामैं पावलए कारग्युले रारिमा च रेयाइ, धै सहरउँइँ ह्‍याइ। प्हँन्हाँग्धों पावल नेरो बारनाबास डर्बि सहरर ह्‍याइ।
ACT 14:21 चमैंइ च सहररै या सैं तोंबै ताँ बिमिंसि ल्हें चेलामैं बनेइ। झाइले चमैं ङ्हिं लुस्‍त्रा, आइकोनियन ततै एन्‍टिओखियार एइ।
ACT 14:22 चमैंइ च क्ल्ह्‍योर्बै चेलामैंए सैं भोंब् लमिंदै “खोंयोंन् बिलै परमेश्‍वरए ताँर बिश्‍वास लसि टिरिद्,” बिसि अर्थि पिंइ, धै “परमेश्‍वरए ग्याल्सर होंबै ल्हागिर ङ्योइ ल्हें दुःख सैदिल् त्हुम्,” बिबै ताँ या लोमिंइ।
ACT 14:23 झाइले चमैंइ ताँन् चर्चर एल्डरमैं त्हाँइ, धै बर्त टिसि प्राथना लसि चमैंइ च एल्डरमैं खेंमैंइ बिश्‍वास लबै प्रभुए जिम्मार पिंवाइ।
ACT 14:24 च लिउँइँ चमैं पिसिदिया तदै पामफिलिया ह्‍युलर युमा
ACT 14:25 चमैंइ पर्गा सहररै या परमेश्‍वरए ताँ बिमिंसि अटालिया नाँसर तयुइ।
ACT 14:26 च क्ल्ह्‍योउँइँले चमैं क्यु झाजर क्रेसि सिरिया ह्‍युलर्बै एन्‍टिओखियार एखइ। चर्बै बिश्‍वासीमैंइ ओंसों पावल नेरो बारनाबास परमेश्‍वरए दयाम्हाँयार प्रभुए के लबर कुलल। तोगो च केमैं लल् खाँसि चमैं चर्न एखल।
ACT 14:27 झाइले चमैं एन्‍टिओखियार फेखसि चर्चर्बै म्हिमैं खागु लसि परमेश्‍वरजी खेंमैंउँइँले लबै ताँन् केमैं सुनेइ, धै परमेश्‍वरजी खैले अरू ह्रेंमैंए ल्हागिर प्रभुए फिर बिश्‍वास लबै म्रा थोंमिंइ बिबै ताँ या बिइ।
ACT 14:28 धै चर चमैं चेलामैंने ल्हें त्हिंइ समा टिइ।
ACT 15:1 छले एन्टिओखियार टिरिमा यहूदीया ह्‍युलउँइँले को-कोइ म्हिमैं चर युसि येशूए फिर बिश्‍वासीमैंने, “मोशाए ठिमर प्ह्रिब् धोंले क्हमैंलाइ ज्युर चिनु आललै बिस्याँ क्हेमैंइ खोंयोंन् बिलै आखाँबै छ्ह योंल् आखाँ,” बिसि लोमिंबर होंइ।
ACT 15:2 छाबै ताँ थेसि चमैंने पावल नेरो बारनाबास आक्ह्रिमा चमैं बेल्‍ले प्होंइ। छतसि चर्बै बिश्‍वासीमैंइ पावल, बारनाबास नेरो अरू म्हिमैंने बिइ, “चु ताँए छ्याँन् मिंन् लबै ल्हागिर यरूशलेमर्बै कुल्मिंबै चेला चिब्मैं नेरो एल्डरमैं ङाँर ह्‍याद्।”
ACT 15:3 छतमा चर्चर्बै म्हिमैंइ चमैं छाइले बिदा लसि कुल्मिंइ। चमैं फोनिके नेरो सामरिया ह्‍युल तसि ह्‍यामा अरू ह्रेंमैंज्यै या येशूए फिर बिश्‍वास लबै ताँ चमैंने छेनाले बिमिंइ। चु ताँ थेसि चर्बै ताँन् अलि-अङाँमैं बेल्‍ले सैं तोंइ।
ACT 15:4 झाइले चमैं यरूशलेमर फेखमा चर्चर्बै म्हिमैं, कुल्मिंबै चेला चिब्मैं नेरो एल्डरमैंइ चमैंए मान लइ। परमेश्‍वरजी खेंमैंउँइँले लबै ताँन् केमैंए बयन चमैंइ चरै या लइ।
ACT 15:5 दिलेया फरिसीमैं न्होंर्बै प्रभुए फिर बिश्‍वास लबै को-कोइ म्हिमैं रासि बिइ, “ज्युर चिनु लसि चमैंइ मोशाए ठिमर प्ह्रिबै ताँ लद् बिसि अरू ह्रेंमैंलाज्यै या ल्‍हैदिल् त्‍हुम्।”
ACT 15:6 चु ताँ छेनाले क्होबर कुल्मिंबै चेला चिब्मैं नेरो एल्डरमैं खागु तइ।
ACT 15:7 ल्‍हें ताँमैं तबै लिउँइँ पत्रुस रासि चमैंने बिइ, “ओ अलि-अङाँमैं, अरू ह्रेंमैंज्यै या प्रभु येशूउँइँले खबै सैं तोंबै ताँ थेसि मुक्‍ति योंरिगे बिसि परमेश्‍वरजी क्हेमैंए म्हाँजोउँइँले ओंसोंन् ङ त्हाँइ बिसि क्हेमैंइ सेइमुँ।
ACT 15:8 खोंर्बै ताँ सेबै परमेश्‍वरजी ङ्योलाइ पबित्र प्ल्ह पिंब् धोंलेन् अरू ह्रेंर्बै म्हिमैंलाज्यै या पबित्र प्ल्ह पिंसि चमैं खीए म्हिमैं तल् पिंइमुँ बिबै ताँ ङ्योने उँइँमिंइ।
ACT 15:9 खीजी यहूदी नेरो अरू ह्रेंर्बै म्हिमैंए न्होंरि तोइ सैरै या आफेल। चमैंइ येशूए फिर बिश्‍वास लबइले परमेश्‍वरजी चमैंए आछ्याँबै के क्षमा पिंसि चमैंए सैं या शुद्ध लमिंइ।
ACT 15:10 छतसि नोलै आखाँबै खर्गु चेलामैंए प्हैंदार थेंमिंसि तले परमेश्‍वरए जाँच लमुँ? चु खर्गु ङ्योए खेमैंज्यै नोल् आखाँल, ङ्योज्यै या नोल् आखाँइमुँ।
ACT 15:11 दिलेया प्रभु येशूए फिर बिश्‍वास लबइले खीए दयाम्हाँयाउँइँले ङ्योइ खैले मुक्‍ति योंइमुँ, छलेन चमैंज्यै या मुक्‍ति योंइमुँ।”
ACT 15:12 चु ताँ थेसि चर मुँबै ताँन् म्हिमैं च्याँ तयाइ, धै अरू ह्रेंमैंए म्हाँजोर परमेश्‍वरजी खेंमैंउँइँले खैबै औदिबै चिनु मुँबै केमैं लइ बिसि बारनाबास नेरो पावलइ धबै बिमिंमा चमैंइ छेनाले थेइ।
ACT 15:13 चमैंइ पोंल् खाँबै लिउँइँ याकूबइ बिइ, “ओ अलि-अङाँमैं, ङए ताँ थेद्।”
ACT 15:14 परमेश्‍वरजी अरू ह्रेंमैंए फिर ल्हयो खसि ह्रें घ्रि त्हाँसि आशिक पिंइ बिबै ताँ सिमोन पत्रुसइ भर्खर बिमिंइ।
ACT 15:15 चु ताँ अगमबक्‍ताइ प्ह्रिथेंबै ताँने क्ह्रिइमुँ,
ACT 15:16 “‘च लिउँइँ ङ एयुब्मुँ, धै दाऊदए फुयाबै धिं धबै बनेब्‍मुँ। चए फुयासि खयाल आडिबै गाह्रा ङइ धबै बनेमिंब्‍मुँ, धै भोंब् लमिंब्मुँ।
ACT 15:17 छलमा ङए म्हिमैं तबर हुइबै ताँन् चैबै अरू ह्रेंमैंइ, याहवेह म्हैल् खाँब्मुँ,
ACT 15:18 बिसि याहवेहजी बिइमुँ। खीजी चु ताँ स्योंम् ओंनोंन् था सेल् पिंइँमुँ।’
ACT 15:19 “छतसि परमेश्‍वरउँइँ सैं एबै अरू ह्रेंमैंलाइ ङ्योइ दुःख आपिंले बिब ङए सैं मुँ,
ACT 15:20 दिलेया चमैंए ल्हागिरि चु ताँ प्लि प्ह्रिमिंले: कुलाइ चडिसि जुट् तबै सै चमैंइ आचरिगे, ब्यभिचार आलरिगे, खर्जी ङिसि सैबै खेदोए से आचरिगे, धै को या आचरिगे।
ACT 15:21 तलेबिस्याँ ओंसोंबै पुस्ता ओनोंन् सहर सहरजरे मोशाए ठिम प्रचार तरिइमुँ, तलेबिस्याँ प्रिबै त्हिंइ ह्रोंसे चु ताँ च्हों धिंमैंर खेरिइमुँ।”
ACT 15:22 च लिउँइँ कुल्मिंबै चेला चिब्मैं, एल्डरमैं नेरो ताँन् चर्चर्बै म्हिमैं क्ह्रिसि खेंमैंए न्होंउँइँले को-कोइ म्हिमैं त्हाँसि पावल नेरो बारनाबासने एन्‍टिओखियार कुलल् त्हुइ बिसि मैंइ, च म्हिमैं न्होंरि यहूदा बिबै बारसाबास नेरो सिलास त्हाँइ। प्रभुए फिर बिश्‍वास लब्मैं न्होंरि चमैं ङ्हिं अगुवामैं मुँल।
ACT 15:23 झाइले बिश्‍वासीमैंइ पिमिंबै प्ह्रिछ्यार चु छाबै ताँमैं मुँल: “एन्‍टिओखिया, सिरिया नेरो किलिकियार मुँबै येशूए फिर बिश्‍वास लबै अरू ह्रेंर्बै अलि-अङाँमैंलाइ कुल्मिंबै चेला चिब्मैं नेरो एल्डरमैंउँइँले जय मसीह मुँ।
ACT 15:24 ङिए न्होंर्बै को-कोइ म्हिमैं चर ह्‍यासि स्योलिबै ताँमैं क्हेमैंलाइ लोमिंसि क्हेमैंए सैं ङ्हिरि लवासि दुःख पिंइ बिब ङिइ थेइमुँ। च म्हिमैं ङिंइ कुलब आङिं।
ACT 15:25 छतसि ङि ताँनइ सल्‍ला लसि ङिंए ताँमैं क्हेमैं ङाँर बिमिंबर ङिए न्होंर्बै कोइ म्हिमैं त्हाँसि ङिए खोबै थुमैं बारनाबास नेरो पावलने क्हेमैं ङाँर कुलब छ्याँब ङ्हाँइ।
ACT 15:26 बारनाबास नेरो पावलइ ह्रोंसए ज्युए म्हाँया आलल्‍ले प्रभु येशू ख्रीष्‍टउँइँले खबै सैं तोंबै ताँ बिप्रइ।
ACT 15:27 छतसि ङिइ चुमैं ङ्हिंने यहूदा नेरो सिलास कुलइमुँ, ङिंइ प्ह्रिबै ताँमैं चमैंज्यै क्हेमैंने बिमिंब्मुँ।
ACT 15:28 चु चैदिबै ताँमैं बाहेक अरू ति क्हेमैंलाइ नोल् पिंब आत बिसि पबित्र प्ल्ह नेरो ङिइ छ्याँब ङ्हाँइ:
ACT 15:29 कुलाइ चडेबै सै तोइ आचद्, को या थुँब-चब् आलद्, खर्जी ङ्हेसि सैबै खेदोए से आचद्, धै ब्यभिचार आलद्। छाबै केमैंउँइँले स्योले टिइ बिस्याँ छ्याँब तब्मुँ। जय मसीह।”
ACT 15:30 च लिउँइँ चमैं ह्‍यासि एन्‍टिओखियार फेनेइ, धै चर्बै चर्चर्बै म्हिमैं खागु लसि च प्ह्रिछ्या पिंइ।
ACT 15:31 प्ह्रिछ्यार प्ह्रिबै अर्थिए ताँमैं थेसि चमैं सैं तोंइ।
ACT 15:32 यहूदा नेरो सिलास अगमबक्‍तामैं तबइले चर्बै अलि-अङाँमैंलाइ परमेश्‍वरए ताँउँइँले ल्हें अर्थि बुद्धिए ताँमैं लोमिंसि चमैं प्रभुए फिर बिश्‍वास लबर भोंब् लमिंइ।
ACT 15:33 चमैं दे त्हिंइ समा चर टिबै लिउँइँ चर्बै अलि-अङाँमैंइ चमैंलाइ कुल्मिंबै चेला चिब्मैं ङाँर्न कुलमा “छेनाले ह्‍याद् ओ!” बिसि बिदा लइ।
ACT 15:34 [दिलेया सिलासइ बिस्याँ चर्न टिब छ्याँब ङ्हाँइ।]
ACT 15:35 पावल नेरो बारनाबास बिस्याँ दे त्हिंइ समा एन्टिओखियार टिसि अरू ल्हें म्हिने प्रभुए ताँ बिमिंदै लोमिंदै टिइ।
ACT 15:36 दे त्हिंइ लिउँइँ पावलइ बारनाबासने बिइ, “ह्‍याले, ङ्योइ प्रभुए ताँ बिमिंबै सहरजरे ह‍यासि प्रभुए फिर बिश्‍वास लबै अलि-अङाँमैंने त्होले, धै चमैं खै तरिगे बिसि ङ्‍ह्‍योले।”
ACT 15:37 बारनाबासइ मर्कूस बिबै यूहन्‍ना खेंमैंने बालु बोबै सैं लइ।
ACT 15:38 दिलेया पावलइ मर्कूस खेंमैंने बालु बोयाब आतलै ङ्हाँइ, तलेबिस्याँ चइ लल् त्हुबै के पूरा आलल्‍ले ओंसोंन् पामफिलिया ह्‍युलउँइँले चमैंने फ्रेसि एह्‍याल।
ACT 15:39 च ताँइ लमा चमैं न्होंरि सैं ख्रेलेयासि चमैं फ्रेयाइ। धै बारनाबास मर्कूस किंसि मा ङ्युँइए क्याँ ततै साइप्रस बिबै टापूर ह्‍याइ।
ACT 15:40 पावलइ बिस्याँ खीने बालु ह्‍याबर सिलास त्हाँइ। झाइले बिश्‍वासीमैंइ “परमेश्‍वरए दयाम्हाँया क्हेमैंए फिर तरिगे!” बिसि चमैंलाइ पर्मेश्‍वरए योर पिंसि बिदा पिंइ।
ACT 15:41 चमैं सिरिया नेरो किलिकियाजरे स्युरदै बिश्‍वासीमैं भोंब् लमिंदै प्रइ।
ACT 16:1 पावल डर्बि नेरो लुस्‍त्रा बिबै सहररै या खइ। चर तिमोथी मिं मुँबै चेला घ्रि मुँल। चए आमा येशूए फिर बिश्‍वास लबै यहूदीस्यो मुँल, आबा बिस्याँ ग्रिक ह्रेंर्बै म्हि मुँल।
ACT 16:2 लुस्‍त्रा नेरो आइकोनियर्बै प्रभुए फिर बिश्‍वास लबै अलि-अङाँमैंए म्हाँजोर चला छ्याँबै बयन नेरो मिं चल्दिब मुँल।
ACT 16:3 पावलइ च ह्रोंसने बालुन् बोदा ङ्हाँइ। धै च क्ल्ह्‍योर्बै यहूदीमैंइ दुःख आपिंरिगे बिसि पावलइ तिमोथी बोसि चए ज्युर चिनु लइ, तलेबिस्याँ चए आबा ग्रिक ग बिसि यहूदीमैंइ था सेला
ACT 16:4 च लिउँइँ चमैंइ चमैं सहर सहरर ह्‍यासि चजरेबै बिश्‍वासीमैंने “यरूशलेमर्बै कुल्मिंबै चेला चिब्मैं नेरो एल्डरमैंइ निर्नय लबै ताँमैं ङिंल् त्हुम्,” बिसि बिइ।
ACT 16:5 छतसि बिश्‍वासीमैं बिश्‍वासर भोंब् ततै ह्‍याइ धै त्हिंइ ह्रोंसे बिश्‍वासीमैं ल्हें बडिदै ह्‍याइ।
ACT 16:6 पबित्र प्ल्हजी एशिया ह्‍युलरि प्रभुए ताँ बिल् आपिंबइले चमैं फ्रिगिया नेरो गलातिया ह्‍युल ततै ह्‍यामा
ACT 16:7 माइसिया ह्‍युलर्बै साँदर खबै लिउँइँ चमैंइ बिथिनिया ह्‍युलउँइँ ह्‍याबै सैं लइ, दिलेया येशूए प्ल्हजी चमैं चर ह्‍याल् आपिं।
ACT 16:8 छतसि चमैं माइसिया तसि त्रोआस सहरर फेनेइ।
ACT 16:9 म्हुँइँसर पावलइ छाबै दर्शन घ्रि म्रोंइ: माकेडोनिया ह्‍युलर्बै म्हि घ्रि रासि “माकेडोनियार खसि ङि ल्होमिंन्!” बिसि यो छ्युँ लरिल।
ACT 16:10 पावलइ छाबै दर्शन म्रोंबै तोंदोंन् ङि माकेडोनियार ह्‍याबर छेइ। तलेबिस्याँ चमैंने सैं तोंबै ताँ बिमिंबर परमेश्‍वरजी ङि हुइना बिसि ङिइ सेइ।
ACT 16:11 झाइले ङि त्रोआसउँइँले क्यु झाजर क्रेसि सरासर सामोथ्राके टापुउँइँ ह्‍याइ, धै प्हँन्हाँग्धों नियापोलिसर फेखइ।
ACT 16:12 छाइले फिलिप्‍पीर फेखइ। च सहर माकेडोनिया बिबर्बै थेबै सहर नेरो ल्हें रोमीमैं टिबे क्ल्ह्‍यो मुँल। ङि च सहरर दे त्हिंइ टिइ।
ACT 16:13 झाइले प्रिबै त्हिंइर सहरए म्राउँइँले बैरु त्होंसि स्योंए छेउर ह्‍याइ, तलेबिस्याँ चर प्राथना लबै क्ल्ह्‍यो मुँ बिसि ङिइ मैंल। ङि चर क्हुँसि चर खागु तबै च्हमिरिमैंने ताँमैं सेबर होंइ।
ACT 16:14 छले ताँ सेरिमा थिआटीरा सहरर्बै कलाँजी रङबै क्वेंए छों लबै च्हमिरि घ्रि चर्न मुँल। चए मिं लिडिया मुँल। चइ परमेश्‍वर म्हाँदिमल धै पावलइ पोंबै ताँ छेनाले थेरिगे बिसि प्रभुजी चए खों थोंमिंइ।
ACT 16:15 झाइले च नेरो चए धिंर्बै ताँनइ बप्‍तिस्मा किंइ। च लिउँइँ चइ ङिने यो छ्युँ लसि बिइ, “क्हेमैंइ ङ क्ह्रोंसेंन प्रभुए फिर बिश्‍वास लबै अङाँ बिसि मैंम् बिस्याँ ङए धिंर खसि टिमिंन् ओ।” छ बिसि ङिने कर ल्हैदिइ।
ACT 16:16 तिगें ङि प्राथना लबै क्ल्ह्‍योर ह्‍यारिमा मोंइ स्याबै केब्स्यो घ्रि त्होइ। चइ च मोंए शक्‍तिउँइँले ङ्‍ह्‍योब् लिब् लसि चए क्ल्हेए ल्हागिर ल्हें मुइ खुमिंमल।
ACT 16:17 च पावल नेरो ङिए लिलि खसि, “चु म्हिमैं धाँसे थेबै परमेश्‍वरए सेवा लब्मैं ग। चुमैंइ क्हेमैं मुक्‍ति योंबै घ्याँ बिमिंरिमुँ,” बिदै ओरइ।
ACT 16:18 चइ ल्हें त्हिंइ समा छान् बिरिइ। छतमा पावल छोंरों ङ्हाँसि फनक्‍क तोसि च मोंने बिइ, “येशू ख्रीष्‍टए मिंर क्हि च च्हमिरि ङाँइले त्होंसि ह्‍याद्।” छ बिबै तोंदोंन् च मों त्होंह्‍याइ।
ACT 16:19 दिलेया चए क्ल्हेमैंइ खेंमैंए मुइ खबै घ्याँन् म्हयाब् म्रोंसि पावल नेरो सिलास क्हासि सहरए म्हाँजोरि चिबनाँब्मैं ङाँर चैंसि बोइ।
ACT 16:20 चमैं सहरर्बै निसाफ लब्मैं ङाँर बोसि बिइ, “चु म्हिमैं यहूदी ह्रेंमैं ग। चुमैंइ ङ्योए सहरर गालमल् लइनमुँ।
ACT 16:21 ङ्यो रोमीमैंइ छाब् ङिंल् ने म्हाँदिल् आतबै ताँमैं चुमैंइ लोमिंम्।”
ACT 16:22 छबिमा ल्हें म्‍हिमैं क्ह्रिसि पावल नेरो सिलासए फिर ह्‍वाखइ। सहरर्बै निसाफ लब्मैंइ चमैंए क्वें ट्होवासि भ्योंवाइ, धै चमैं प्हरेइ प्रुद् बिसि ल्हैदिइ।
ACT 16:23 चमैंइ पावल नेरो सिलास प्हरेइ बेल्‍ले प्रुसि झेलर च्युवाइ, धै “चु म्हिमैं छेनाले रुँन्,” बिसि झेलर्बै क्रथेने बिइ।
ACT 16:24 छ बिबै लिउँइँ चइ चमैंलाइ झेलर्बै न्होंसे न्होंर बोसि चमैंए प्हलेर सिंए ठिंगुरा क्योसि थेंइ।
ACT 16:25 दिलेया म्‍हुँइँस आधाजरे पावल नेरो सिलास प्राथना लदै परमेश्‍वरए क्वेमैं प्रिंरिमा झेल न्होंर मुँबै म्हिमैंइ थेरिल।
ACT 16:26 च त्हेर्न एक्‍कासि थेबै सयो खसि झेलर्बै जगमैं लायाइ। च तोंदोंन् ताँन् म्रामैं थोंयाइ धै झेलर टिबै ताँन् म्हिमैंए फैसोमैं प्ल्हयाइ।
ACT 16:27 झेलर्बै क्रथे न्हरुउँइँले छोरयाइ। धै झेलर्बै म्रामैं थोंयाब् म्रोंइ। च्युथेंब्मैं ताँन् भौदिह्‍यान बिब् मैंसि चइ सेलाँ (तरवार) ट्हुइसि ह्रोंसलाइन सैबर होंइ।
ACT 16:28 दिलेया पावलइ थेबै कैले “छ आलद्! ङि ताँन् चुर्न मुँ।” बिइ।
ACT 16:29 छले थेमा क्रथेइ बत्ति ह्रिसि फाल् न्हेदै न्होंर खइ, धै ङ्हिंसि त्हारदै पावल नेरो सिलासए ओंसों पत्खु तइ।
ACT 16:30 च लिउँइँ चमैं बैरु बोसि “मुक्‍ति योंबै ल्हागिरि ङइ तो लल् त्हुम्?” बिसि ङ्योएइ।
ACT 16:31 झाइले चमैंइ बिइ, “प्रभु येशूए फिर बिश्‍वास लद्। छलस्याँ क्हि नेरो क्हिए परवाज्यै मुक्‍ति योंब्मुँ।”
ACT 16:32 चमैंइ च क्रथे नेरो चए धिंर मुँबै ताँन‍ने प्रभुए ताँमैं बिमिंइ।
ACT 16:33 झाइले च म्‍हुँइँसर्न क्रथेइ पावल नेरो सिलास बोसि घामैं ख्रुमिंइ। धै च तोंदोंन् च नेरो चए ताँन् परवाइ बप्‍तिस्मा किंइ।
ACT 16:34 च लिउँइँ चमैं धिंर बोसि चब् चल् पिंइ, धै चए धिंर्बै ताँन् म्‍हिमैंइ परमेश्‍वरए फिर बिश्‍वास लबइले चए धिंर्बै परवाने च सैं तोंइ।
ACT 16:35 झाइले नाँ न्होंबै लिउँइँ सहरर्बै रोमी निसाफ लब्मैंइ पुलिसमैं कुलसि बिइ, “च च्युथेंबै म्हिमैं पिवाद्।”
ACT 16:36 च्हमरे झेलर्बै क्रथेइ पावलने चु ताँ बिइ, “निसाफ लब्मैंइ क्हेमैं पिवाद् बिसि बिइमुँ। छतसि तारे क्हेमैं त्होंसि सैं तोंदै ह्‍याद्।”
ACT 16:37 दिलेया पावलइ पुलिसमैंने बिइ, “ङि रोमी नागरिकमैं मुँलेया चमैंइ तोइ छ्याब् आस्यालेया ताँन् म्हिमैंए उँइँर धोंसि झेलरै या च्युवाइ। तारे म्हिमैंइ आसेल्‍ले ङिलाइ तेल् म्हैल् वा? छ तल् आखाँ। चमैं खेंमैंन् खसि ङि तेइ बोरिगे।”
ACT 16:38 च पुलिसमैंइ निसाफ लब्मैं ङाँर ह्‍यासि “चमैंम् रोमीथेंमैं मुँन!” बिमा निसाफ लब्मैं ङ्हिंयाँइ।
ACT 16:39 छतसि चमैं खसि पावल नेरो सिलासने क्षमा ह्रिइ, धै चमैं झेलउँइँले बैरु बोमा “गार आम्हाँदिल्‍ले सहर पिसि ह्‍यामिंन् ओ!” बिसि यो छ्युँ लइ।
ACT 16:40 पावल नेरो सिलास झेलउँइँले बैरु त्होंसि लिडियाए धिंर ह्‍याइ। धै येशूए फिर बिश्‍वास लबै अलि-अङाँमैंने त्होसि चमैंए सैं भोंब् ने आङ्हिब् लमिंसि सहरउँइँले त्होंयाँइ।
ACT 17:1 पावल नेरो सिलास अम्‍फिपोलिस नेरो अपोल्‍लोनियाए घ्याँ ततै थेसलोनिकार फेखइ। चर यहूदीमैंए च्हों धिं घ्रि मुँल।
ACT 17:2 पावल सोदा धोंलेन् यहूदीमैंए च्हों धिंर ह्‍याइ। धै सद सों समा प्रिबै त्हिंइर चमैंने छलफल लरिइ।
ACT 17:3 “परमेश्‍वरजी कुल्मिंबै म्रुँ ख्रीष्‍टजी क्ह्रोंसेंन दुःख नोसि सिबउँइँले धबै सोगों तल् त्हुमल। येशूउँइँले खबै सैं तोंबै ताँ ङ क्हेमैंने बिमिंम्। खीन् परमेश्‍वरजी कुल्मिंबै म्रुँ ख्रीष्‍ट ग!” बिसि चइ परमेश्‍वरए छ्वेउँइँले प्रमाण उँइँइ।
ACT 17:4 पावल नेरो सिलासए ताँ थेसि चमैंए न्‍होंर्बै को-कोइ यहूदीमैंइ चमैंइ बिबै ताँ क्वेंसि पावल नेरो सिलास ङाँइ ल्हैदिइ। धै परमेश्‍वर म्‍हाँदिबै ल्‍हें ग्रिकमैं नेरो ल्हें क्रथे मिंथे च्हमिरिमैं या चमैं ङाँइ ल्हैदिइ।
ACT 17:5 दिलेया कोइ यहूदीमैंइ ह्रिस लसि बजारर्बै बदमासमैं खागु लसि ल्हें म्हि रेसि सहरर खैला-बैला लबर होंइ, धै यासोनए धिंर खैच्हिजिले होंसि पावल नेरो सिलास म्हिमैंए उँइँर पखल् म्हैइ।
ACT 17:6 दिलेया चमैंइ पावल नेरो सिलास स्याल् आखाँमा यासोन नेरो प्रभुए फिर बिश्‍वास लबै को-कोइ आघें-अलिमैं सहरर्बै चिबनाँब्मैं ङाँर चैं पखसि बिइ, “ह्‍युलन् उल्टो-पुल्टु लबै म्हिमैं चुरै या फेखइमुँ,” बिसि ओरइ।
ACT 17:7 “चु यासोनए धिंर चमैं प्ह्रें तसि टिइमुँ, चमैं ताँनइ येशू बिबै अर्को थेबै म्रुँ घ्रि मुँ बिसि कैसर म्रुँए बिरोधर के लम्।”
ACT 17:8 चु ताँ थेसि म्हिमैं नेरो सहरर्बै चिबनाँब्मैं आल-मल तयाइ।
ACT 17:9 झाइले सहरर्बै चिबनाँब्मैंइ यासोन नेरो चने बालु मुँबै अरू म्हिमैंने धरौटि किंसि चमैं पिमिंइ।
ACT 17:10 झाइले च तोंदोंन् प्रभुए फिर बिश्‍वास लबै अलि-अङाँमैंइ पावल नेरो सिलास म्‍हुँइँसर्न बेरिया सहरउँइँ कुल्मिंइ, चमैं चर फेनेसि यहूदीमैंए च्हों धिं न्होंर ह्‍याइ।
ACT 17:11 चर्बै यहूदीमैं थेसलोनिकाथेंमैं भन्दा स्वाब मुँल: चमैंइ परमेश्‍वरए ताँ बेल्‍ले छ्याँब ङ्हाँसि सैंर किंइ, धै चु ताँमैं पावलइ बिबै ताँने क्ह्रिम् उ आक्ह्रि बिसि त्हिंइ ह्रोंसे परमेश्‍वरए छ्वेर्बै ताँमैं खेसि क्होल् म्हैमल।
ACT 17:12 छतसि चुमैंए न्होंर्बै ल्हें म्हिइ प्रभु येशूए फिर बिश्‍वास लइ। थेबै कुलर्बै ग्रिक च्हमिरिमैं नेरो ल्हें ग्रिक मुँयुँमैंज्यै या प्रभुए फिर बिश्‍वास लइ।
ACT 17:13 दिलेया थेसलोनिकार्बै यहूदीमैंइ “पावलइ परमेश्‍वरए ताँ बेरियारै या बिइ प्रइमुँ!” बिब् सेसि चमैं चरै या म्हिमैं उस्केबर फेखइ।
ACT 17:14 च तोंदोंन् बेरियार्बै प्रभुए फिर बिश्‍वास लबै अलि-अङाँमैंइ पावल मा ङ्युँइए रेजरे कुल्मिंइ। सिलास नेरो तिमोथी बिस्याँ चर्न टिइ।
ACT 17:15 पावल सनेब्मैंइ चलाइ एथेन्‍स समा सनेइ। चर फेनेसि पावलइ “सिलास नेरो तिमोथी खाँन् समा युन्‍ले ङ ङाँर कुल्‍मिंन्,” बिसि सनेब्मैंने सँउँसर कुल्मिंइ।
ACT 17:16 पावलइ एथेन्‍स सहरर सिलास नेरो तिमोथी पैंरिमा च सहर तिगोंन् कुमैंइ प्लिंरिब् म्रोंसि चए सैं बेल्‍ले नइ।
ACT 17:17 छतमा च यहूदीमैं च्हों धिंर ह्‍यासि यहूदीमैं नेरो परमेश्‍वर म्‍हाँदिबै ग्रिक म्हिमैंने छलफल लरिमल, धै बजारर खीने त्होब्मैंने या त्हिंइ ह्रोंसे छलफल लरिमल।
ACT 17:18 को-कोइ इपिक्‍युरि नेरो स्‍तोइकि ह्रब्-सेब्मैंज्यै या पावलने छलफल लइ। चमैं न्होंर्बै कति म्हिमैंइ “चु ल्हें पोंबै म्हिइ तो बिइमुँ जा?” बिसि ङ्योएमल। अरू म्हिमैंइ बिइ, “आगुए ह्‍युलर्बै देवतामैंए ताँ लरिब् धों ङ्हाँम्।” तलेबिस्याँ पावलइ येशूए बारेर नेरो म्हिमैं सिसि धबै सोगों तबै ताँमैं बिरिमल।
ACT 17:19 छतसि चमैंइ पावल अरियोपागसर्बै म्हि च्होंर बोसि, “क्हिइ लोमिंबै चु छारा ताँमैं तो जा? ङिज्यै या क्होल् खाँम्‍मा?” बिसि ङ्योएइ।
ACT 17:20 “तलेबिस्याँ क्हिइ ङिने औदिबै ताँमैं बिरिइमुँ। छतसि चु ताँइ बिल् म्हैब तो जा? ङि च ताँमैं क्होदा ङ्हाँइमुँ।”
ACT 17:21 (ताँन् एथेनिथेंमैंइ नेरो चर टिबै आगुए ह्‍युलर्बै म्हिमैंइ नौले-नौले ताँमैं मत्‍त्रे लसि त्हिंइ थोरिमल।)
ACT 17:22 छतमा पावलइ अरियोपागसए म्हि च्होंए म्हाँजोर रासि बिइ, “ओ एथेन्‍सथेंमैं! क्हेमैं बेल्‍ले धर्मए केमैं लदा ङ्हाँब्मैं मुँन बिब ङइ सेइमुँ।
ACT 17:23 तलेबिस्याँ ङ चु सहर स्युरदै प्रमा क्हेमैंइ फ्योबै सैमैं ङइ ल्हें म्रोंइ। ङइ छाबै ख्रो पिंबै क्ल्ह्‍यो घ्रि या स्याइ। चर ‘ङो आसेबै देवता’ बिसि प्ह्रिथेंना। छतसि क्हेमैंइ आह्रसि फ्योबै ‘ङो आसेबै देवता’ खाब् जा बिसि ङइ क्हेमैंने क्होमिंस्यो।
ACT 17:24 परमेश्‍वरजी ह्‍युल नेरो चर मुँबै तोन्दोंरि सैमैं बनेमिंइ। खी स्वर्ग नेरो पृथ्बीर्बै प्रभु तबइले म्हिमैंए योइ बनेबै मन्दिरर खी आटि।
ACT 17:25 खीजीन् ताँनलाइ जीवन, सो नेरो तोन्दोंरि सै पिंमुँ। छतसि खीलाइ तोइ सैए खाँचो तब् धोंले म्हिए योउँइँले खीए सेवा लल् त्हुम् बिसि आमैंन्।
ACT 17:26 खीजी म्‍हि घ्रिउँइँले ल्हें ह्रेंमैं बनेसि पृथ्बी तिगोंन् टिल् पिंइ। धै म्हिमैं चु पृथ्‍बीर सोबै त्हे निबै टिबै क्ल्ह्‍योए साँदमैं या ओंसों ओंनोंन् तोक्दिमिंइमुँ।
ACT 17:27 ‘म्हिमैंइ परमेश्‍वर म्हैरिगे धै खनिज्यै चमैंइ छाम् छुमले म्हैसि खी स्याम् उ’ बिबै आशार खीजी छ लइ। दिलेया खी ङ्योउँइँले ह्रेंगो आरे।
ACT 17:28 तलेबिस्याँ म्हि घ्रिइ बिब् धोंले, ‘ङ्यो खीउँइँलेन् सोमुँ, खीउँइँलेन् प्रब-टिब लमुँ, धै खीउँइँलेन् ङ्योइ छ्ह योंम्।’ क्हेमैंए कबिता प्ह्रिबै म्हिमैंज्यै या छान् बिसि प्ह्रिइमुँ: ‘क्ह्रोंसेंन ङ्यो खीए सन्तान्मैं ग।’
ACT 17:29 छले ङ्यो परमेश्‍वरए सन्तान तबइले खी मारा-चाँदि नेरो युँमा धों तबन् ग बिसि ङ्योइ मैंल् आत। तलेबिस्याँ चु सैमैं म्हिमैंइ सैंर मैंसि चमैंए योर्बै सिपउँइँले बनेबै सैमैं मत्‍त्रेन् ग।
ACT 17:30 छतसि म्हिमैंइ ओंसोंन् परमेश्‍वर ङो आसेमा लबै केमैं खीजी वास्ता आल। तारे परमेश्‍वरजी ताँन् क्ल्ह्‍योर्बै म्हिमैंइ ह्रों-ह्रोंसइ लबै पाप केमैं पिसि परमेश्‍वरउँइँ सैं एद् बिसि बिइमुँ।
ACT 17:31 तलेबिस्याँ खीजी ह्‍युलर्बै ताँन् म्हिमैंए निसाफ लबै त्हिंइ तोक्दिमिंइँमुँ। च त्हिंइर खीजी त्हाँबै म्हि घ्रिउँइँले ह्‍युलर्बै ताँन् म्हिमैंए निसाफ लब्मुँ। च म्हिने निसाफ लबै हग मुँ बिसि प्रमाण ताँनने उँइमिंबर परमेश्‍वरजी च म्हि सिबउँइँले सोगों लमिंइ।”
ACT 17:32 म्हि सिसि धबै सोगों तबै ताँ थेसि चमैं न्होंर्बै को-कोइ बिल्‍लि लइ। दिलेया अरूमैंइ बिइ, “चु ताँए बारेर क्हिए ताँ धबै ङि थेब्मुँ।”
ACT 17:33 च लिउँइँ पावल चमैंउँइँले ह्‍याइ।
ACT 17:34 पावलइ बिबै ताँ क्वेंसि को-कोइ म्हिमैं चने बालुन् ह्‍याइ। चमैंए न्होंरि म्हि च्होंर्बै डियनुसियस बिबै म्हि, दामारिस बिबै च्हमिरि, नेरो अरू म्हिमैंज्यै या प्रभुए फिर बिश्‍वास लइ।
ACT 18:1 च लिउँइँ पावल एथेन्‍सउँइँले कोरिन्‍थ सहर ह्‍याइ।
ACT 18:2 चर चइ पोन्‍टसथें अकिलास बिबै यहूदी घ्रिने त्होइ। च ह्रोंसए प्ह्रेंस्यो प्रिस्‍किलाने इटालिया ह्‍युलउँइँले खल, तलेबिस्याँ क्‍लौडियस बिबै रोमी थेबै म्रुँइ ताँन् यहूदीमैं रोम शहारउँइँले त्होंइ ह्‍याद् बिसि ल्हैदिल। पावल चमैंने त्होबर ह्‍यासि
ACT 18:3 चमैंनेन् टिसि के लइ, तलेबिस्याँ पावलइ धोंले चमैंज्यै या तम्बु बनेबै के लमल।
ACT 18:4 पावल प्रिबै त्हिंइ ह्रोंसे यहूदीमैंए च्हों धिंर ह्‍यासि परमेश्‍वरए ताँ बिमिंसि यहूदीमैं नेरो ग्रिकमैंने ताँ छलफल लसि परमेश्‍वरए ताँ क्होमिंबै भों लमल।
ACT 18:5 झाइले सिलास नेरो तिमोथी माकेडोनियाउँइँले फेखमा पावल अरू के आलल्‍ले परमेश्‍वरए ताँ बिमिंमल, धै “येशून् परमेश्‍वरजी कुल्मिंबै म्रुँ ख्रीष्‍ट ग!” बिसि यहूदीमैंने ग्वाइ पिंमल।
ACT 18:6 दिलेया यहूदीमैंइ पावलए बिरोध लसि आछ्याँबै ताँमै पोंसि पावल स्यारबर होंइ। छतमा पावलइ ह्रोंसए क्वें खारसि चमैंने बिइ, “क्‍हेमैं नास तइबिस्‍याँ क्हेमैंए दोषइ लबर्न नास तब्मुँ, च दोष ङलाइ आल्‍हैदि। तारे पिरु ङ अरू ह्रेंमैं ङाँर ह्‍याब्मुँ।”
ACT 18:7 च्हौ बिसि पावल च क्ल्ह्‍योउँइँले परमेश्‍वरलाइ म्‍हाँदिबै तीतस युस्‍तस मिं मुँबै अरू ह्रेंर्बै म्हिए धिंर ह्‍याइ। चए धिं च्हों धिंए रेर्न मुँल।
ACT 18:8 च्हों धिंर्बै चिब क्रिस्‍पस नेरो चए ताँन् परवाइ प्रभुए फिर बिश्‍वास लइ, धै कोरिन्‍थिमैं न्होंरै या ल्हें म्हिइ पावलए ताँ थेइरि बिश्‍वास लसि बप्‍तिस्मा किंइ।
ACT 18:9 तिगें म्‍हुँइँसरि प्रभुजी दर्शनर पावलने बिइ,
ACT 18:10 “आङ्हिंन्! आपोंन्ले आटिद्, सैं तोंबै ताँ बिमिंदै ह्‍याद्। ङ क्हिने बालु मुँ। छतसि खाबज्यै या क्हि तोइ लल् आखाँ, तलेबिस्याँ चु सहरर ङला ल्हें म्हि मुँ।”
ACT 18:11 झाइले पावल परमेश्‍वरए ताँ लोमिंदै तिदिंसे म्हैंन ट्हुल् समा चमैंने बालु टिइ।
ACT 18:12 अखैया बिबै ह्‍युलर गलियोन बिबै म्हि रोमी क्रथे तमा यहूदीमैं ताँन् क्ह्रिसि पावलए बिरोध लइ, धै अदालतर बोइ।
ACT 18:13 झाइले चमैंइ बिइ, “परमेश्‍वर म्हाँदिबै ल्हागिर चु म्हिइ ङ्योए ठिमने आक्ह्रिल्‍ले म्हिमैंलाइ लोमिंरिइमुँ।”
ACT 18:14 झाइले पावल पोंबि छेमा गलियोनइ च यहूदीमैंने बिइ, “ओ यहूदीमैं, क्ह्रोंसेंन चुइ तोइ अनिया नेरो आछ्याँबै के लस्याँ ङइ क्हेमैंए ताँ थेसि निसाफ लल् त्हुमल।
ACT 18:15 दिलेया चु ताँम् क्हेमैंए ठिमर्बै ताँफुँमैं नेरो मिंमैंए बारेर मत्‍त्रे मुँन! छतसि क्हेमैं ह्रोंसन् क्ह्रिल् त्हुम्। छाबै ताँए निसाफ ङइ आल।”
ACT 18:16 छ बिसि चइ अदालतउँइँले यहूदीमैं ल्हावाइ।
ACT 18:17 छतमा च त्हेर्न चमैं ताँनइ च्हों धिंर्बै चिब सोस्‍थेनिस क्हासि अड्डा धिंए ओंसों धोंरिइ। दिलेया गलियोनइ च ताँए तोइ वास्ता आल।
ACT 18:18 च लिउँइँ पावल ल्हें त्हिंइ समा कोरिन्थर्न टिइ। धै अलि-अङाँमैंने फ्रेसि किंक्रिया बिबै नाँसर ह्‍याइ। पावलइ ओंसोंन् भक्‍कल लसि क्र आखोरल, दिलेया च भक्‍कलए त्हे पूरा तबइले चइ किंक्रियार क्र खोरइ। झाइले क्यु झाजर क्रेसि सिरिया ह्‍याइ। चने बालु प्रिस्‍किला नेरो अकिलासै या ह्‍याइ।
ACT 18:19 झाइले चमैं एफिससर फेखसि पावलइ प्रिस्‍किला नेरो अकिलास चर्न वाथेंइ। पावल बिस्याँ च्हों धिंर होंसि यहूदीमैंने छलफल लबर होंइ।
ACT 18:20 एफिसीमैंइ पावलने “अझै दे त्हिंइ टिमिंन्!” बिसि यो छ्युँ लमा पावल आङिं।
ACT 18:21 धै पावलइ चमैंने बिइ, “परमेश्‍वरए इच्छा मुँस्याँ ङ धबै क्हेमैं ङाँर खब्मुँ।” छ बिसि क्यु झाजर क्रेसि एफिससउँइँले ह्‍याइ।
ACT 18:22 झाइले च कैसरिया फेनेसि यरूशलेमउँइँ कैंडो क्रेयासि चर्बै बिश्‍वासीमैंने त्होसि एन्‍टिओखियाउँइँ तइ।
ACT 18:23 पावल एन्‍टिओखियार दे त्हिंइ टिसि च क्ल्ह्‍योउँइँले त्होंसि गलातिया नेरो फ्रिगिया जरेर्बै ताँन् चेलामैं सैं भोंसि लमिंदै ल्हें क्ल्ह्‍योजरै या ह्‍याइ।
ACT 18:24 अलेक्‍जेन्‍ड्रियाथें अपोल्‍लस मिं मुँबै यहूदी म्हि घ्रि एफिससर खइ। च बेल्‍ले पोंल् ह्रब नेरो परमेश्‍वरए छ्वेर्बै ताँमैं ताँन् ह्रब मुँल।
ACT 18:25 चइ मुक्‍ति पिंबै प्रभु येशूए बारेरर्बै ताँमैं सेल। चइ खों न्होंउँइँले भों खदै येशूए बारेर्बै ताँमैं छेनाले लोमिंब्रें लमल। छान् तलेया चइ यूहन्‍नाइ पिंबै बप्‍तिस्मा मत्‍त्रे था सेल।
ACT 18:26 अपोल्‍लस च्हों धिंर आङ्हिंन्ले पोंबर होंइ। छले चइ पोंबै ताँ थेसि प्रिस्‍किला नेरो अकिलासइ च ह्रोसए धिंर पखइ, धै चमैंइ परमेश्‍वरए ताँमैं अपोल्‍लसलाइ झन् छेनाले क्होमिंइ।
ACT 18:27 झाइले अपोल्‍लसइ अखैया ह्‍युलर ह्‍याबै सैं लमा अलि-अङाँमैंइ च चर ह्‍याबर भों पिंइ, धै चइ बिबै ताँ क्वेंरिगे बिसि चर्बै चेलामैंए मिंरि भों पिंदै प्ह्रिछ्या (चिट्ठि) प्ह्रिइ। अपोल्‍लस चर फेनेसि परमेश्‍वए दयाम्हाँयाउँइँले प्रभुए फिर बिश्‍वास लबै म्हिमैंलाइ बेल्‍ले ल्होमिंइ।
ACT 18:28 तलेबिस्याँ चइ ताँन् म्हिमैंए उँइँर परमेश्‍वरए छ्वेर्बै ताँमैंउँइँले, “येशून् परमेश्‍वरजी कुल्मिंबै म्रुँ ख्रीष्‍ट ग,” बिसि यहूदीमैंए ताँ थोमा चमैंइ तोइ ज्वाफ पिंल् आखाँब् लइ।
ACT 19:1 अपोल्‍लस कोरिन्‍थ सहरर मुँमा पावल एशिया ह्‍युलउँइँले एफिसस सहरर खइ। चर्बै को-कोइ चेलामैंने त्होसि
ACT 19:2 चइ चमैंने “क्हेमैंइ प्रभुए फिर बिश्‍वास लइरि पबित्र प्ल्ह योंइ वा?” बिसि ङ्योएइ। चमैंइ बिइ, “पबित्र प्ल्ह मुँ बिब ङिइ आथेइमुँ।”
ACT 19:3 “छ बिस्‍याँ क्हेमैंइ खैबै बप्‍तिस्मा किंइ?” बिसि पावलइ ङ्योएमा चमैंइ बिइ, “यूहन्‍नाए बप्‍तिस्मा किंइ।”
ACT 19:4 झाइले पावलइ बिइ, “यूहन्‍नाइ पिंबै बप्‍तिस्माम् पाप केमैं पिसि परमेश्‍वरउँइँ सैं एरिगे बिब् मुँल। दिलेया तारे पिरु युबै येशूए फिर बिश्‍वास लल् त्हुम् बिसि चइ म्हिमैंने लोमिंमल।”
ACT 19:5 चु ताँ थेसि चमैंइ प्रभु येशूए मिंर बप्‍तिस्‍मा किंइ।
ACT 19:6 झाइले पावलइ चमैंए फिर यो थेंमा पबित्र प्ल्ह चमैं फिर युइ, धै चमैं स्यो-स्योबै क्युइर पोंब नेरो अगमबाणि लबर होंइ।
ACT 19:7 च म्हिमैं च्युसे ङ्हिं दे मुँल।
ACT 19:8 पावल च्हों धिंर ह्‍यासि म्हैंन सोंल् समन् परमेश्‍वरए ग्याल्सए बारेर चमैंने आङ्हिंन्ले छलफल लसि म्हिंमैंइ क्होरिगे बिसि लोमिंरिइ।
ACT 19:9 दिलेया को-कोइ सैं सारो लसि क्वेंल् आङिं। धै झन् मुक्‍ति योंबै घ्याँए बिरोध लसि ताँनए उँइँर चमैं पोंबर होंइ। छतमा पावल चमैंउँइँले फ्रेसि चेलामैं बोसि टुरान्‍नस बिबै स्कूलर म्हिमैंने छलफल लसि परमेश्‍वरए ताँ त्हिंइ ह्रोंसे लोमिंमल।
ACT 19:10 ङ्हिंदि समन् चु के तरिइ, छतमा एशिया ह्‍युलर्बै ताँन् म्हिमैं, यहूदी नेरो ग्रिक ङ्हिंना-ङ्हिंनइ, प्रभुए ताँ थेइ।
ACT 19:11 परमेश्‍वरजी पावलए योउँइँले थे-थेबै औदिबै केमैं लइ।
ACT 19:12 नबै म्हिमैं सरिगे बिसि को-कोइ म्हिमैंइ ह्रुमल नेरो पछ्यउरमैं या पावलए ज्युर छुइसि नबै म्हिमैं ङ्हाँर बोमिंमल, धै चमैंए ज्युर्बै नब ससि मोंमैं या त्होंह्‍यामल।
ACT 19:13 छाब् म्रोंसि को-कोइ स्युरदै प्रबै यहूदी फा फुइ लब्मैंइ मोंइ स्याब्मैंने प्रभु येशूए मिं तेदै बिइ, “पावलइ बिप्रबै येशूए मिंउँइँले त्होंह्‍याद् बिसि ङ क्हिने बिम्।”
ACT 19:14 चर स्‍केवास मिं मुँबै यहूदी ख्रो पिंबै खेगि क्रथेए च्ह ङिउँलोज्यै या छाबन् के लमल।
ACT 19:15 दिलेया मोंइ चमैंने बिइ, “ङइ येशू सेमुँ, पावलै या सेम्, दिलेया क्हेमैं खाब्मैं जा?”
ACT 19:16 धै च मोंइ स्याबै म्हि चमैंए फिर उफर्दिदै ट्होवासि चमैं ताँन् प्योवाइ। छतमा चमैं नें-म्योंसि च धिंउँइँले क्लिउँनन् न्हेह्‍याइ।
ACT 19:17 एफिससर टिबै ताँन् यहूदीमैं नेरो ग्रिकमैंइ चु ताँ थेसि ङ्हिंयाँइ, धै प्रभु येशूए मिं क्वेइ।
ACT 19:18 बिश्‍वास लबै ल्हें म्हि खसि ह्रों-ह्रोंसइ लबै आछ्याँबै केमैं लइमु बिसि म्हिमैंए उँइँर बिइ।
ACT 19:19 झाइले चमैंए न्होंर्बै टुना लब्मैंज्यै या ह्रों-ह्रोंसए छ्वेमैं खागु लसि पखइ, धै ताँनए उँइँर ख्रोंवाइ। चमैंइ च छ्वेमैंए सै लमा ङच्यु हजार चाँदिए सिक्‍का फेइ।
ACT 19:20 छले प्रभुए ताँ खन्तोंदोंन् फेनेसि बडिदै ह्‍याइ।
ACT 19:21 चु ताँमैं तबै लिउँइँ, पबित्र प्ल्हजी बिब् धोंले पावल माकेडोनिया नेरो अखैया ह्‍युलए घ्याँ तसि यरूशलेम ह्‍याबै सैं लइ। “धै चर फेबै लिउँइँ ङ रोम सहरर खैलसेया ह्‍यालन् त्हुम्,” बिइ।
ACT 19:22 झाइले चइ ह्रोंसए सेवा लबै तिमोथी नेरो इरास्‍तस माकेडोनियार कुल्मिंइ, च बिस्याँ दे त्हिंइ एशिया ह्‍युलर्न टिइ।
ACT 19:23 च त्हेजरे एफिसस सहरर मुक्‍ति योंबै घ्‍याँए बारेर ल्हें म्हिइ खैला-बैला मचेरिल।
ACT 19:24 तलेबिस्याँ डेमेत्रियस मिं मुँबै चाँदिए के लबै म्हि घ्रिइ देबि आर्तेमिसए च्यों-च्योंबै चाँदिए कु धिंमैं बनेसि, बुट्ट झोंल् ह्रबै म्हिमैं के पिंसि ल्हें मुइ योंमल।
ACT 19:25 झाइले डेमेत्रियसइ ह्रोंसए के लब्मैं नेरो चमैंइ धोंबन् के लब्मैं खागु लसि बिइ, “ओ अलि-अङाँमैं, चु केउँइँलेन् ङ्योला ल्हें मुइ खइमुँ बिब क्हेमैंइ सेइमुँ।
ACT 19:26 दिलेया पावलइ एफिससर मत्‍त्रे आङिं, एशियार्बै ल्हें क्ल्ह्‍योर ‘योइ बनेबै देवतामैं तोइ सैइ आङिं’ बिसि ल्हें म्हिने लोमिंब क्हेमैंइ म्रोंरिइमुँ, थेरिइमुँ।
ACT 19:27 छतसि ङ्योए के मत्‍त्रे म्हयाब् आङिं, थेबै देबि आर्तेमिसए कु धिं या केर आत्हुब् तब्मुँ, धै एशिया नेरो ह्‍‍युल तिगोंबै म्हिमैंइ म्हाँदिइ खबै देबिला मिंन् म्हयाब्मुँ।”
ACT 19:28 चु ताँ क्होसि चमैं बेल्‍‍ले ह्रिस खइ। झाइले चमैंइ “एफिसीथेंमैंए आर्तेमिस बेल्‍ले थेब ग!” बिसि ओरबर होंइ।
ACT 19:29 छतमा च सहर तिगोंन् खैला-बैला तइ धै चमैं घ्रि तसि पावलने प्रबै माकेडोनियाथेंमैं ङ्हिं गायस नेरो अरिस्‍तार्खस क्हासि रङ्गशालए न्होंर चैंदै बोइ।
ACT 19:30 छाब् म्रोंसि पावल म्हिमैं हुलर ह्‍याल् म्हैइ, दिलेया चेलामैंइ ह्‍याल् आपिं।
ACT 19:31 एशियार्बै को-कोइ क्रथे मिंथेमैं पावलए थुमैं मुँल। चमैंइ पावललाइ “रङ्गशालए न्होंर आह्‍याद्!” बिसि यो छ्युँ लइ।
ACT 19:32 रङ्गशालर मुँबै म्हिमैं स्यो-स्योबै ताँ बिदै ओरबर होंइ। च म्हि हुलर खैला-बैला तरिल, धै चर्बै ल्हें म्हिइ “ङ्यो तले खागु तगे?” बिसि था आसेल।
ACT 19:33 च त्हेर यहूदीमैंइ अलेक्जेन्डर बिबै म्हि ओंसों पोंबर ल्हैदिइ। चर्बै म्हिमैं च्याँ तरिगे बिसि अलेक्जेन्डरइ म्हिमैंए उँइँर योइ हस्त लसि ह्रोंस बचेबै ल्हागिर “ङिइ तोइ गल्ति आलइमुँ!” बिसि पोंबै सैं लइ।
ACT 19:34 दिलेया चमैंइ “चम् यहूदी मुँन” बिब् सेसि ताँनइ कै घ्रिले घण्टा ङ्हिंदे समा “एफिससथेंमैंए आर्तेमिस बेल्‍ले थेब ग!” बिदै झन् ओररिइ।
ACT 19:35 बल्‍ल-बल्‍ल सहरर्बै क्रथेइ म्हिमैं च्याँ लसि बिइ, “ओ एफिससथेंमैं, थेबै आर्तेमिसए कु धिं नेरो मुउँइँले तयुबै चए कु थेंबै क्ल्ह्‍यो एफिसस सहर ग बिसि खाबइ आसेइमुँ रो?
ACT 19:36 चु ताँ क्रोंसेंन्बै ग बिसि ताँनइ सेइमुँ। छतसि क्हेमैं च्याँ तल् त्हुम्। च्हैंब-मैंब् आलल्‍ले उतउलो तसि जोस खइरि तोइ के लल् आत।
ACT 19:37 तलेबिस्याँ क्हेमैंइ क्हासि पखबै चु म्हिमैंइ कु धिंर्बै सैमैं तोइ आह्‍योइमुँ ङ्योए देबिला आछ्याँबै ताँमैं या आलइमुँ।
ACT 19:38 अदालतमैं चुर्न मुँ, निसाफ लब्मैं या मुँ। छतसि डेमेत्रियस नेरो चने मुँबै बुट्ट प्रिंल् ह्रब्मैंला खाब् मुँले म्हिने आक्ह्रिबै ताँ तोइ मुँस्याँ चमैंइ घ्रिइ घ्रिए बिरोधर मुद्दा नेरिगे।
ACT 19:39 चु बाहेक क्हेमैंइ अरू ताँ रेल् म्हैम् बिस्याँ ङ्योए सहरर्बै म्हि च्होंर्न च ताँ टोंल् खाँब्मुँ।
ACT 19:40 तलेबिस्याँ तिंयाँबै चु म्हिमैंइ लबै खैला-बैलाए छ्याब् ङ्योए फिर खलै खाँम्, तलेबिस्याँ चु फाक्‍कर्न तबै ताँए ज्वाफ ङ्योइ पिंल् आखाँ।”
ACT 19:41 च्हौ बिसि चइ म्हि च्हों प्हुँवाइ।
ACT 20:1 चु खैला-बैला च्याँ तबै लिउँइँ पावलइ चर्बै चेलामैं हुइसि चमैंलाइ अर्थि पिंइ। धै चमैंने फ्रेसि माकेडोनिया ह्‍युलउँइँ ह्‍याइ।
ACT 20:2 च क्ल्ह्‍योजरे या चेलामैंए सैं क्होबै ताँ बिमिंसि च ग्रिस बिबै ह्‍युलर ह्‍याइ।
ACT 20:3 पावल चर म्हैंन सोंल् समा टिइ। धै क्यु झाजर क्रेसि सिरिया ह्‍युलउँइँ ह्‍याबर होंमा यहूदीमैंइ चए बिरोधर जाल लइमुँ बिब् सेसि पावल माकेडोनिया तसिन् एह्‍याबै सैं लइ।
ACT 20:4 झाइले पावलने बालु बेरियाथें पुरसए च्ह सोपात्रोस, थेसलोनिकाथेंमैं अरिस्‍तार्खस नेरो सिकन्‍दस, डर्बिथें गायस, तिमोथी, नेरो एशियाथेंमैं तुखिकस नेरो त्रोफिमस ह्‍याइ।
ACT 20:5 ङि ह्‍याब् भन्दा ओंसोंन् चमैं ह्‍यासि त्रोआस बजारर ङि पैंरिल।
ACT 20:6 ङि बिस्याँ प्लेढा आझोंबै क्हें चबै त्हिंइए लिउँइँ फिलिप्‍पी शहारउँइँले क्यु झाजर क्रेसि ङ्‍हरोर त्रोआस बजारर चमैं ङाँर फेखइ, धै चर ङि ङिरो टिइ।
ACT 20:7 आइतबार त्हिंइर ङि प्रभु भोज चबर खागु तमा पावलइ प्हँन्हाँग्धों ह्‍याबै सैं लबइले म्‍हुँइँस आधा समन् चमैंने बालु ताँमैं सेरिल।
ACT 20:8 ङि खागु तबै फिर्बै कोठर ल्हें बत्तिमैं म्रोल।
ACT 20:9 युटिकस मिं मुँबै फ्रेंसि घ्रि झ्यालर क्हुँल। पावलइ ल्हें त्हे समा ताँ लरिमा चलाइ न्हरु खइ। न्हरुइ लमा च तल सोंउँइँले तेयाइ। च रेबर ह्‍यामा च सियाल् खाँना।
ACT 20:10 छतमा पावल क्युरु तयुसि चए फिर पत्खु तसि अँगलो झोंसि “क्हेमैं आआतिद्। चु सोगोंन् मुँ!” बिइ।
ACT 20:11 झाइले पावल फिर क्रेयासि क्हें चुसि प्रभु भोज चल् खाँबै लिउँइँ न्हाँगर मि आम्रोंन् समा ल्हें त्हे ताँ लसि टिइ, धै च लिउँइँ फ्रेयाइ।
ACT 20:12 धै चमैंइ च फ्रेंसिलाइ सोगोंन् धिंर बोसि चमैं ताँन् सैं तोंइ।
ACT 20:13 पावल प्हलेइ प्रसि ह्‍याबै सैं लमा खिइ बिब् धोंले ङि ओंसोंन् क्यु झाज मुँबै क्ल्ह्‍योर ह्‍याइ, धै क्यु झाजर क्रेसि ङि अस्‍सोसर ह्‍याइ। ङिइ अस्‍सोसर पावललाइ क्यु झाजर क्रेमिंदा ङ्हाँल।
ACT 20:14 दिलेया च अस्सोसर समा प्हलेइ प्रसिन् खइ, धै ङिइ खीलाइ क्यु झाजर क्रेमिंसि ङि ताँन् मितिलेनेर खइ।
ACT 20:15 च क्ल्ह्‍योउँइँले क्यु झाजर क्रेसि प्हँन्हाँग्धों खियस टापूए रेर फेखइ, धै नुँइम्धों सामोस टापूर फेखइ। चए सोंजमा ङि मिलेटस नाँसर खइ।
ACT 20:16 पावल खाँन् समा पेन्‍तिकोसए त्हिंइर यरूशलेमर्न फेबै सैं लबइले च एशिया ह्‍युलर टिबै सैं आल। छतसि च एफिससर आहोंल्‍ले ह्‍याबै सैं लइ।
ACT 20:17 पावलइ मिलेटसउँइँले एफिससर मुँबै चर्चर्बै एल्डरमैं हुइबर म्हिमैं कुलइ।
ACT 20:18 चमैं खबै लिउँइँ खिइ चमैंने बिइ: “ओ अलि-अङाँमैं ङइ एशिया ह्‍युलर प्हले म्हैबै त्हिंइ ओंनोंन् ङइ क्हेमैंए म्हाँजोर खैले त्हिंइ थोइ बिब क्हेमैंइ सेइमुँ।
ACT 20:19 च्योंने तसि मिक्लि पिदै यहूदीमैंइ लबै जाल झेलर ने दुःख कष्‍टरै या ङइ प्रभुए सेवा लइ।
ACT 20:20 क्हेमैंए ल्हागिर छ्याँब तबै ताँमैं ताँनए उँइँर बिमिंबर नेरो धिं-धिंर ह्‍यासि क्हेमैं लोमिंबर ङ लिलि आस्यो।
ACT 20:21 यहूदीमैं नेरो ग्रिकमैंने पाप केमैं पिसि परमेश्‍वरउँइँ सैं एद् धै ङ्योए प्रभु येशूए फिर बिश्‍वास लद् बिसि ङइ ग्वाइ पिंइँमुँ।
ACT 20:22 “तारे पबित्र प्ल्हजी खैलसे या यरूशलेमउँइँ ह्‍याद् बिबइले ङ चर ह्‍यासिन् मुँ। चर ङए फिर तो तम् बिब ङइ आसे।
ACT 20:23 चर्बै म्हिमैंइ ङ झेलर च्युवाब्मुँ धै ङए फिर दुःख खब्मुँ बिसि पबित्र प्ल्हजी ताँन् सहरर ङने था पिंइँमुँ, च्हौ मत्‍त्रे ङइ सेइमुँ।
ACT 20:24 दिलेया ङइ ह्रोंसए छ्ह ह्रोंसए ल्हागिर तोइ सैइ आमैं। बरु परमेश्‍वरजी म्हिमैंए फिर दयाम्हाँया लबै बारेर सैं तोंबै ग्वाइ बिप्रबर प्रभु येशूजी पिंबै के ङइ ताँन् लल् खाँरिगे बिब् मत्‍त्रे ङइ मैंम्।
ACT 20:25 “क्हेमैंए म्हाँजोर ङइ परमेश्‍वरए ग्याल्सर्बै ताँ बिदै प्रइ, तारे क्हेमैंइ ङ धबै खोंयोंन् बिलै म्रोंरिब् आरे बिसि ङइ सेइमुँ।
ACT 20:26 छतसि तिंयाँन् ङइ क्हेमैंने ग्वाइ पिंसि बिमुँ, क्हेमैं न्होंरि खाबै या नर्गर फेस्‍याँ ङ चए दोषि तरिब् आरे।
ACT 20:27 तलेबिस्याँ परमेश्‍वरजी ङ्योए ल्हागिर लमिंबै केमैंए बारेर ङइ क्हेमैंने तोन्दोंरि ताँ बिल् खाँइँमुँ।
ACT 20:28 तारे क्हेमैं ह्रोंसै या न्ह क्रों मि क्रोले टिद्, धै पबित्र प्ल्हजी क्हेमैंने जिम्मा पिंबै बगालै या छेनाले ङ्‍ह्‍योद्। प्रभु येशूजी ह्रोंसए को पिंसि परमेश्‍वरए चर्च किंब् ग। छतसि चए छैं छेनाले लद्।
ACT 20:29 ङ ह्‍याबै लिउँइँ ङ्हिंन् ङ्हाँबै प्याउँमैं धों तबै म्हिमैं क्‍हेमैंए म्‍हाँजोरि खसि बिश्‍वासीमैंलाइ ल्हें दुःख पिंब्‍मु।
ACT 20:30 क्‍हेमैंए न्होंउँइँलेन् स्‍योर ताँमैं पोंबै म्हिमैं रेसि चेलामैं चमैंए लिलि बोयाब्मुँ।
ACT 20:31 छतसि चु ताँ मैंसि छेनाले टिद्! सोंदिं समन् त्हिंयाँ म्‍हुँइँसा मिक्लि पिंदै ताँन् म्हिमैंने ङइ लोमिंबै ताँ आम्‍लेद्।
ACT 20:32 “तारे ङइ क्‍हेमैंलाइ परमेश्‍वरए जिम्‍मार सुम्‍पिदिइमुँ। खीए दयाम्हाँयाए बारेर्बै ताँइ क्‍हेमैंए सैं भोंब् लमिंल् खाँम्, झाइले खीए म्‍हिमैंए फिर पूरा आशिक पिंब्‍मुँ।
ACT 20:33 ङइ खाबलै या मारा, चाँदि नेरो क्वेंए लोब आल।
ACT 20:34 दिलेया ङए योइन ङला नेरो ङने मुँब्मैंए चैदिबै सैमैं योल् लइमुँ बिसि क्हेमैंइ सेइमुँ।
ACT 20:35 प्रभु येशूजी बिबै चु ताँ मैंन्, ‘किंबै म्हि भन्दा पिंबै म्हिइ आशिक् योंम्।’ छतसि क्हेमैंज्यै या बेल्‍ले भोंले के लसि भों आरेब्मैं ल्होल् त्हुम् बिसि क्हेमैंए उँइँर्न ङइ के लसि नमुना उँइँमिंइँमुँ।”
ACT 20:36 पावलइ च्हौ बिसि च्हि तुँसि चमैंने बालु प्राथना लइ।
ACT 20:37 झाइले चमैं ताँन् क्रोसि पावलने अँगलो झोंसि म्वें लइ।
ACT 20:38 “तारे क्हेमैंइ ङ म्रोंरिब् आरे” बिबै पावलए ताँ मैंसि चमैंए सैं बेल्‍ले क्रोइ। च लिउँइँ चमैंइ चलाइ क्यु झाज क्रेबै क्ल्ह्‍यो समा सनेइ।
ACT 21:1 एफिसस चर्चर्बै एल्डरमैंने फ्रेसि ङि क्यु झाजर क्रेसि कोस बिबै क्ल्ह्‍योर सरासर खइ, धै प्हँन्हाँग्धों रोडसर फेखइ, छाइले नुइँम्दों पटारा बिबै सहरर फेखइ।
ACT 21:2 झाइले फोनिके ह्‍युलर ह्‍याबै क्यु झाज घ्रि स्यासि ङि चर क्रेसि ह्‍याइ।
ACT 21:3 छले ह्‍यामा ङि साइप्रस बिबै टापूए चेंदो फेखमा ङिइ च टापूए त्हेब्ब्रेउँइँले सिरिया ह्‍युलउँइँ ह्‍यासि टुरोस सहरर तइ, तलेबिस्याँ क्यु झाजर्बै समनमैं चर खारल् त्हुमल।
ACT 21:4 झाइले ङि चर्बै चेलामैंने त्होसि ङिरो चर्न टिइ। पबित्र प्ल्हउँइँले चमैंइ “यरूशलेमउँइँ आह्‍याद्!” बिसि पावलने बिइ।
ACT 21:5 च क्ल्ह्‍योउँइँले ङि प्रबै त्हे तबइले ङि चमैंने फ्रेसि ह्रोंसए घ्याँ क्हामा। चर्बै प्रभुए फिर बिश्‍वास लब्मैंइ ह्रोंसए परवा, प्हसेमैं ताँन् किंसि ङि सहरए बैरु समन् सबर खइ। धै ङि मा ङ्युँइए छेउर च्हि तुँसि प्राथना लइ, धै चमैंने फ्रेसि
ACT 21:6 ङि क्यु झाजर क्रेइ। चमैं बिस्याँ खेंमैंए धिंर एह्‍याइ।
ACT 21:7 टुरोसउँइँले मा ङ्युँइए घ्याँ क्हासि ङि टोलेमाइसर फेखइ। चर प्रभुए फिर बिश्‍वास लब्मैंने त्होसि चमैंने बालु तिरो टिइ।
ACT 21:8 प्हँन्हाँग्धों ङि चमैंने फ्रेसि कैसरियार खइ, धै सैं तोंबै ताँ बिदै प्रबै फिलिपए धिंर ह्‍यासि चर्न टिइ। फिलिप यरूशलेमर प्रभुए सेवा लबर त्हाँबै ङिउलो न्‍होंर्बै म्‍हि घ्रि मुँल।
ACT 21:9 चला ब्ह्‍या आलबै च्हमि प्लि मुँल। चमैं या अगमबक्‍तामैं मुँल।
ACT 21:10 ङि चर दे त्हिंइ टिमा यहूदीयाउँइँले अगाबस मिं मुँबै अगमबक्‍ता घ्रि खइ।
ACT 21:11 चइ पावलए फगि किंसि ह्रोंसए यो प्हले फैसि बिइ, “‘चु फगिए क्ल्हे यरूशलेमर ह्‍याइ बिस्याँ चर्बै यहूदीमैंइ चलाइ छलेना फैसि अरू ह्रेंमैंए योर पिंवाब्मुँ,’ बिसि पबित्र प्ल्हजी बिइमुँ।”
ACT 21:12 चु ताँ थेसि ङि नेरो चर्बै म्हिमैं क्ह्रिसि पावलने “यरूशलेमर आह्‍याद् ओ!” बिसि यो छ्युँ लइ।
ACT 21:13 दिलेया खिइ बिइ, “क्‍हेमैं छले क्रोसि ङए सैं तले च्योंब् लमुँ? प्रभु येशूए ल्हागिर ङ जेलर फैब् मत्‍त्रे आङिं, यरूशलेमर सिल् त्हुनाबिलेया ङ तयार मुँ।”
ACT 21:14 ङिइ बिब खिइ आङिंमा “प्रभुए सैंर मैंब् धों तरिगे,” बिसि ङि तोइ आबिल्‍ले टिइ।
ACT 21:15 च लिउँइँ ङिइ चैदिबै समानमैं तोन्दोंरि तौदु लसि यरूशलेमउँइँ ह्‍याइ।
ACT 21:16 ङिने बालु कैसरियार्बै को-कोइ चेलामैं या ह्‍याल। चमैंइ ङिलाइ मनासोन बिबै साइप्रसथेंए धिंर बोइ। च ओंसोंन प्रभुए फिर बिश्‍वास लबै म्हि मुँल। चए ङाँर्न ङि टिइ।
ACT 21:17 झाइले ङि यरूशलेमर फेनेमा, चर्बै प्रभुए फिर बिश्‍वास लब्मैंइ सैं तोंसि ङि बेल्‍ले मान लइ।
ACT 21:18 प्‍हँन्हाँग्‍धों पावल ङिने याकूब ङाँर ह्‍यामा चर्चर्बै ताँन् एल्डरमैं चर खागु तल।
ACT 21:19 चमैंने जय मसीह लसि पावलइ “अरू ह्रेंमैंए म्हाँजोर सैं तोंबै ताँ बिप्रमा परमेश्‍वरजी ङउँइँले तो-तो केमैं लइ,” बिसि ताँन् ताँमैं घ्रि-घ्रिले चमैंने बिइ।
ACT 21:20 चु ताँ थेबै लिउँइँ चमैंइ परमेश्‍वरए मिं क्वेइ। धै च एल्डरमैंइ पावलने बिइ, “थेद् अलि, चुर यहूदीमैं न्होंरै या प्रभुए फिर बिश्‍वास लब्‍मैं ल्हेंन् मुँ। चमैंइ मोशाइ पिंबै ठिममैं या छेनाले म्हाँदिम्।
ACT 21:21 दिलेया चमैंइ क्हिए बारेर स्योलिबै ताँ थेइ। ‘मोशाइ पिंबै ठिम पिवाद्, धै कोलोमैंए ज्युर चिनु आलद्, यहूदी रोस आम्हाँदिद्,’ बिसि क्हिइ अरू ह्रेंमैंए म्हाँजोर टिबै यहूदीमैंलाइ लोमिंइँमुँ रो।
ACT 21:22 तोगो क्हि खइमुँ बिब चमैंइ खैले बिलेन् थेब्मुँ। तारे तो लब् जा?
ACT 21:23 छतसि ङिइ बिब् धों लद्। चोखो तले बिसि भक्‍कल् लबै म्हि प्लि ङिने बालु मुँ।
ACT 21:24 चमैंने बालु क्हि या चोखो तदु, चमैंए खर्ज या क्हिइन फोमिंनु। धै चमैंइ क्र खोररिगे। छले क्हिइ ठिम म्हाँदिब् म्रोंसि क्हिए बारेर ओंसों थेबै आछ्याँबै ताँ क्ह्रोंसेंन् आङिंन बिसि ताँनइ सेब्मुँ।
ACT 21:25 प्रभु येशूए फिर बिश्‍वास लबै अरू ह्रेंमैंइ बिस्याँ, ‘कुर ख्रो पिंबै सैमैं नेरो को आचदु, खरि ङिसि सैबै खेदोए से आचदु, धै ब्यभिचार आलदु,’ बिसि ङिइ प्ह्रिछ्यार प्ह्रिइमुँ।”
ACT 21:26 छबिमा पावलइ च भक्‍कल् लबै म्हि प्लि बोसि प्हँन्हाँग्धों चमैंने बालु ह्रोंसै या चोखो तबै के लइ। धै खेंमैंए चोखो तबै त्हिंइ खोंयों पूरा तब् ङ्‍हे धै चमैं घ्रि-घ्रिए ल्हागिर ख्रो खोंयों पिंब्मुँ बिसि था पिंबर पावल मन्दिर न्होंर होंइ।
ACT 21:27 छले चमैं चोखो तसि ङिरो तबि छेमा एशिया ह्‍युलर्बै यहूदीमैंइ मन्दिरर पावल म्रोंमा चर्बै म्हिए हुललाइ सुरिदिवासि पावललाइ क्हाइ।
ACT 21:28 “ओ इस्राएलर्बै म्हिमैं, ङि ल्होमिंन्! तलेबिस्याँ चु खन्तोंदोंबै म्हिमैंने ङ्योए ह्रें, ङ्योए ठिम नेरो चु मन्दिरए बिरोधर लोमिंदै प्रबै म्हि चुन् ग। च्हौ मत्‍त्रे आङिं, चुइ ग्रिकमैं या चु मन्दिर न्होंर पखसि ङ्योए पबित्र क्ल्ह्‍यो अशुद्ध लवाइमुँ,” बिदै चमैं ओरबर होंइ।
ACT 21:29 तलेबिस्याँ ओंसों चमैंइ एफिससथें त्रोफिमस बिबै म्हि घ्रि पावलने बालु सहरर म्रोंबइले पावलइ च म्हि मन्दिर न्होंर पखब ग ङ्हाँइ।
ACT 21:30 ताँन् सहरर खैला-बैला तमा ल्हें म्हि न्हेखसि पावल क्हाइ। चमैंइ मन्दिरउँइँले पावल बैरु चैं पखमा खेगिमैंइ युन्ले मन्दिरर्बै म्रामैं तोरावाइ।
ACT 21:31 झाइले चमैंइ पावल सैल् म्हैल। च त्हेर्न यरूशलेम तिगोंन् खैला-बैला तरिइमुँ बिबै ताँ रोमी पल्टनर्बै चिबए न्हर थेनेइ।
ACT 21:32 चिबइ चु ताँ थेबै तोंदोंन् सिपाइमैं नेरो कप्‍तानमैं बोसि चमैं ङाँर न्हेयाइ। चमैंइ पल्टनर्बै चिब नेरो सिपाइमैं खरिब् म्रोंमा पावल धोंब पिवाइ।
ACT 21:33 च पल्टनर्बै चिब खसि पावल क्हासि सँउँलि ङ्हिंइ फैबर ल्हैदिइ। धै “चु म्हि खाब् जा? चुइ तो लइ?” बिसि चर्बै म्हिमैंने ङ्योएइ।
ACT 21:34 चर्बै म्हिमैं न्होंरि कोइ तिथो, कोइ अर्कोन् ताँ लसि ओरइ। छले चर्बै म्हिमैंए हल्‍लाइ लमा चर तो तरिइमुँ बिसि क्होल् आखाँबइले पल्टनर्बै चिबइ सिपाइमैंने “पावल ब्यारेकर बोयाद्!” बिइ।
ACT 21:35 छले पावल ब्यारेकर्बै खटकटिर फेखमा म्हिमैं झन् ह्रिसइ बेल्‍ले ओरसि पावलए उँइँर कारग्यु तखइ। छतब् म्रोंसि सिपाइमैंइ च क्वेबोइ।
ACT 21:36 तलेबिस्याँ म्हिए हुल चए लिलि ल्हैदिसि “च सैलन् त्हुम्!” बिसि ओरदै खइ।
ACT 21:37 ब्यारेक न्होंर होंबि छेमा पावलइ पल्टनर्बै चिबने “चिब, ङइ ताँ घ्रि क्हिने बिल् योंम् उ?” बिमा चिबइ बिइ, “क्हिइ ग्रिक क्युइ पोंल् ह्रम्मा?
ACT 21:38 क्हि च मिश्रथें आङिं वा? चइ ओंसों प्होंगि कैगि लसि हजार प्लि प्होंगि लब्मैं क्यु आयोंबै क्ल्ह्‍योर बोयाल।”
ACT 21:39 छबिमा पावलइ बिइ, “आङिं चिब। ङम् किलिकिया ह्‍यलर्बै टार्ससथें यहूदी ग। च टार्सस थेबै सहर ग। चु म्हिमैंने ङइ ताँ तिजी-ङ्हिजी बिल् पिंन् ओ।”
ACT 21:40 पावलए ताँ थेसि चिबइ पोंल् पिंइ, धै पावल खटकटिर रासि म्हिमैंने योइ हस्त लमा म्हिमैं तोइ आबिल्‍ले च्याँ तबै लिउँइँ चइ चमैंने हिब्रू क्युइर पोंबर होंइ।
ACT 22:1 “ओ आघें-अलि नेरो आबामैं, ङइ क्हेमैंए उँइँर बिल् त्हुबै ताँ तारे थेमिंन्।”
ACT 22:2 पावलइ हिब्रू क्युइर पोंब् थेसि चमैं ताँन् च्याँ तयाइ। छतमा चइ बिइ,
ACT 22:3 “ङ किलिकिया ह्‍युलर्बै टार्ससथें यहूदी ग, दिलेया ङ चु यरूशलेमर गमलिएल बिबै ङए गुरुए योउँइँले फारब् ग। धै ङ्योए खेमैंइ म्हाँदिबै रोसमैं ङइ छेनाले लोइमुँ। तिंयाँ क्‍हेमैंइ परमेश्‍वरलाइ सैं न्होंउँइँले म्‍हाँदिब् धोंले ङज्‍यै या खीलाइ म्‍हाँदिदा ङ्हाँइँमुँ।
ACT 22:4 येशूए घ्याँर प्रबै म्हिमैंलाइ ङइ ह्रुगुदिसि सैल् म्हैमल, मुँयुँमैं नेरो च्हमिरिमैं ङ्हिंना-ङ्हिंन् फैसि झेलर च्युवामल।
ACT 22:5 चु ङइ बिबै ताँ क्ह्रोंसेंन् ग बिसि ख्रो पिंबै खेगि क्रथे नेरो ताँन् थेबै म्हि च्हों या ग्वाइ पिंल् खाँम्। खेंमैंउँइँले ङइ दमस्‍कस सहरर्बै यहूदीमैंए मिंर प्ह्रिछ्या योंइ। छले हग योंसि ङइ दमस्‍कसर मुँबै प्रभुए फिर बिश्‍वास लब्मैं सजैं पिंबर फैसि यरूशलेमर पखबर दमस्कसर ह्‍याल।
ACT 22:6 “ङ ह्‍यामा-ह्‍याम् दमस्‍कस फेखबि छेमा त्हिंयाँ आधाजरे तिखेर्न स्वर्गउँइँले थेबै ह्‍वे ङए कारग्यु चारइ।
ACT 22:7 छतमा ङ सर क्हुरिह्‍याइ, धै ‘ओ शाऊल, शाऊल, क्हिइ तले ङ ह्रुगुदिमुँ?’ बिबै कै घ्रि ङइ थेइ।
ACT 22:8 “छबिमा ‘ओ प्रभु, क्हि खाब् जा?’ बिसि ङइ ङ्योएमा खीजी ‘क्हिइ ह्रुगुदिरिबै नासरतर्बै येशू ङन् ग,’ बिइ।
ACT 22:9 ङने मुँबै म्हिमैंइ व्हेम् म्रोंइ, ङइ थेबै कै बिस्याँ चमैंइ आथे।
ACT 22:10 “छतमा ‘ओ प्रभु, तारे ङइ तो लले?’ बिसि ङइ ङ्योएमा प्रभुजी ङने बिइ, ‘रेसि दमस्‍कसर ह्‍याद्, परमेश‍वरजी क्हिने लद् बिबै केमैं ङइ क्हिने बिमिंब्मुँ।’
ACT 22:11 च ह्‍वे चाराबै लमा ङइ तोइ म्रोंल् आखाँ। छतसि ङने मुँब्मैंइ डोरेदै ङ दमस्‍कसर पखइ।
ACT 22:12 “चर हननिया बिबै म्‍हि घ्रि मुँल। चइ मोशाइ पिंबै ठिम बेल्‍ले छेनाले म्हाँदिमल। धै दमस्कसर टिबै ताँन् यहूदीमैंइ चए मान लमल।
ACT 22:13 च हननिया ङ ङाँर खसि ङए उँइँर रासि ङने बिइ, ‘शाऊल अलि, क्हिए मि म्रोंल् खाँरिगे।’ छ बिबै तोंदोंन् ङए मि म्रोंल् खाँब् तसि ङइ चलाइ म्रोंइ।
ACT 22:14 च लिउँइँ चइ ङने बिइ, ‘ङ्योए खेमैंए परमेश्‍वरजी खीए सैंर्बै ताँ क्हिइ सेल् खाँरिगे, खीए छ्याँबै के लबै येशूलाइ म्रोंल् खाँरिगे, धै खीए सुँउँइँले पोंबै ताँमैं थेल् खाँरिगे बिसि क्हिलाइ त्हाँइमुँ।
ACT 22:15 तलेबिस्याँ क्हिइ म्रोंब नेरो थेबै ताँमैं ताँन् म्हिमैंए उँइँर खीए ग्वाइ तसि क्हिजी बिमिंल् त्हुब्मुँ।
ACT 22:16 छतसि तारे तले क्हैल् लरिमुँ? रेद्! येशूए मिं किंसि ह्रोंसए आछ्याँबै केमैं ख्रुवाबर क्युर प्ल्हुँसि बप्‍तिस्मा किंन्।’
ACT 22:17 “च क्ल्ह्‍योउँइँले यरूशलेमर एखबै लिउँइँ मन्दिरर प्राथना लरिमा ङ प्रभुने बेल्‍ले चेंदो तसि ङइ प्रभु म्रोंइ।
ACT 22:18 खीजी ङने, ‘युनन् यरूशलेमउँइँले त्होंह्‍याद्, तलेबिस्याँ ङए बारेर क्हिइ पिंबै ग्वाइ चमैंइ क्वेंरिब् आरे,’ बिमा
ACT 22:19 ङइ बिइ, ‘ओ प्रभु, ङइ च्हों धिंजरे ह्‍यासि क्हिए फिर बिश्‍वास लब्मैं धोंसि झेलर च्युवाब चमैं ताँनइ सेइमुँ।
ACT 22:20 चमैंइ क्हिए ग्वाइ पिंबै स्‍तिफनस सैवामा ङै या चमैंने क्ह्रिसि चलाइ सैवाबै म्हिमैंए क्वें रुँसि टिल।’
ACT 22:21 छबिमा प्रभुजी ङने ‘ह्‍याद्, तलेबिस्याँ ह्रें-ह्रेंगोर्बै अरू ह्रेंमैं ङाँर ङइ क्हि कुल्मिंब्मुँ,’ बिइ।”
ACT 22:22 म्हि हुलइ पावलए ताँ च्हौ समा छेनाले थेइ। दिलेया च लिउँइँ चमैइ “छाबै म्हि पृथ्‍बीउँइँले स्योवाद्। च सोबै लायकर्बै आरे,” बिदै ओरबर होंइ।
ACT 22:23 धै ह्रिसइ खेंमैंए क्वें ट्होदै त्हुल् उडिदै चमैं झन् सारले ओरइ।
ACT 22:24 छतमा रोमी पलटनर्बै चिबइ बिइ, “चलाइ ब्यारेक न्होंर पखसि कोर्राइ प्रुद्। चए बिरोधर म्हिमैं तले छले कै तेसि ओररिइमुँ बिसि चने ङयोएद्।”
ACT 22:25 झाइले सिपाइमैंइ पावललाइ ट्हिबिए छोइ फैबर होंमा पावलइ चेंदो रारिबै कप्‍तानने “तोइ छ्याब् आरेबै रोमी नागरिकलाइ क्हेमैंइ कोर्राइ प्रुब ठिक मुँ वा?” बिसि ङ्योएइ।
ACT 22:26 चु ताँ थेसि कप्‍तानइ पल्टनर्बै चिब ङाँर ह्‍यासि “क्हिइ तो लल् म्हैल? चु म्हिम् रोमी नागरिक मुँन,” बिइ।
ACT 22:27 झाइले पल्टनर्बै चिब पावल ङाँर खसि “ङने बिद्, क्हि रोमी नागरिक वा?” बिसि ङ्योएमा खिइ बिइ, “ओं, ङिंबन् ग।”
ACT 22:28 छबिमा चिबइ “ङम् मुइ ल्हें फोसि रोमी नागरिक तब् ग,” बिमा पावलइ बिइ, “ङम् फिब् ओंनोंन् रोमी नागरिक ग।”
ACT 22:29 चु ताँ थेबै तोंदोंन् पवालने ङ्युलु-च्युलु लबै म्हिमैं स्योयाइ। पावल रोमी नागरिक मुँन बिब् सेसि चिबै या ङ्हिंयाँइ, तलेबिस्याँ चइ पावल फैबर ल्हैदिल।
ACT 22:30 दिलेया प्हँन्हाँग्धों यहूदीमैंइ पावलए फिर तो ताँर छ्याब् ल्हैदिगे बिसि पल्टनर्बै चिबइ क्होबै सैं लसि चलाइ प्ल्हमिंइ, धै ख्रो पिंबै खेगि क्रथेमैं नेरो थेबै म्हि च्हों खागु लसि पावल क्युरु पुइसि चमैंए उँइँर राल् पिंइ।
ACT 23:1 पावलइ थेबै म्हि च्हों ङाँइ ङ्ह्‍योसि बिइ, “ओ आघें-अलिमैं, तिंयाँबै त्हिंइ समा परमेश्‍वरए उँइँरि ङइ छ्याँबै छ्ह थोइमुँ बिसि ङए सैंइ बिम्।”
ACT 23:2 पावलए ताँ थेसि ख्रो पिंबै खेगि क्रथे हननियाइ पावलए ङाँर रारिबै म्हिमैंने “चए सुँर प्रिंन्!” बिइ।
ACT 23:3 छबिमा पावलइ चने बिइ, “ओ सुँइ छ्याँब लब सैंइ बिस्याँ आछ्याँब मैंबै म्हि! क्हिलाज्यै या परमेश्‍वरजी प्रिंब्मुँ। क्हि परमेश्‍वरए ठिमइ बिब् धोंले ङए निसाफ लबर टिसि ठिमए बिरोधर ङलाइ प्रिंबर ल्हैदिम्मा?”
ACT 23:4 चु ताँ थेसि पावलए ङाँर रारिब्मैंइ पावलने बिइ, “क्हि परमेश्‍वरए मिंर ख्रो पिंबै खेगि क्रथेने म्हि आच्हिल्‍ले पोंम्मा?”
ACT 23:5 पावलइ बिइ, “ओ अलिमैं, चु ख्रो पिंबै खेगि क्रथे ग बिसि ङइ आसेल। ‘क्हिइ ह्रोंसए म्हिमैंए चिबए फिर आछ्याँबै ताँ आपोंन्।’ बिसि ठिमर प्ह्रिथेंइँमुँ।”
ACT 23:6 च थेबै म्हि च्होंर सदुकीमैंए टोलि नेरो फरिसीमैंए टोलि मुँन बिब सेसि पावलइ थेबै कैले बिइ, “ओ अलिमैं, ङम् फरिसीमैंए च्ह फरिसीन् ग। म्हि सिइरि धबै सोगों तब्मुँ बिबै आशा ङइ थेंबइले ङए फिर चु मुद्दा ल्हैदिइमुँ।”
ACT 23:7 चइ छ बिबै लिउँइँ फरिसीमैं नेरो सदुकीमैंए सैं ख्रेलेयासि चमैं आक्ह्रि।
ACT 23:8 तलेबिस्याँ सदुकीमैंइ म्हि सिइरि धबै सोगों आत, स्वर्गदूत नेरो प्ल्ह बिब तोइ या आत बिमल। दिलेया फरिसीमैंइ चु ताँन् सैमैं तम् बिसि क्वेंमल।
ACT 23:9 चर थेबै खैला-बैला तमा फरिसीमैं न्होंर्बै को-कोइ शास्‍त्रिमैंइ रेसि “चु म्हिने ङिइ तोइ दोष आयों। प्ल्ह नेरो स्वर्गदूतइ चुने पोंइ बिस्याँ तो तइ दि?” बिइ।
ACT 23:10 छले चमैंए सैं ख्रेलसि चर थेबै खैला-बैला तबइले “चमैंइ पावल लाछिवाम्दो!” बिब् मैंसि रोमी पल्टनर्बै चिबइ सिपाइमैंने “क्युरु ह्‍यासि चमैंए म्हाँजोउँइँले पावल पखसि ब्यारेक न्होंर बोद्,” बिसि ल्हैदिइ।
ACT 23:11 चए प्हँन्हाँग्धों म्‍हुँइँसर प्रभुजी पावल ङाँर रासि बिइ, “आङ्हिंन्, तलेबिस्याँ क्हिइ यरूशलेमर ङए बारेर ग्वाइ पिंब् धोंले रोम शहाररै या ग्वाइ पिंल् त्हुम्।”
ACT 23:12 न्हाँगर मि म्रोंबै लिउँइँ यहूदीमैंइ खेंमैंए न्होंर मत फैसि “पावल आसैन् समन् ङि तोइ आच तोइ आथुँ,” बिबै कसम चइ।
ACT 23:13 छाबै जाल रोसि सैवाम् बिबै म्हिमैं प्लिच्यु भन्दा ल्हें मुँल।
ACT 23:14 च लिउँइँ चमैं ख्रो पिंबै खेगि चिब्मैं नेरो चिबनाँब्मैं ङाँर ह्‍‍यासि बिइ, “पावल आसैन् समा ङि तोइ आच बिसि कसम चइमुँ।
ACT 23:15 छतसि क्हेमैं नेरो थेबै म्हि च्हों क्ह्रिसि रोमी पल्टनर्बै चिब ङाँर ह्‍यासि ‘पावलए फिर ल्हैदिबै मुद्दाए ताँर छेनाले फैसला लल् त्हुम्,’ बिसि स्योर तेसि बिद्। धै ‘चलाइ ब्यारकउँइँले तेइ पउ,’ बिद्। पावल चुर फेखउनो ङिइ च सैम्।”
ACT 23:16 चमैंइ छले जाल रोबै ताँ था योंसि पावलए भान्जइ ब्यारेक न्होंर ह्‍यासि चु ताँ पावलने बिइ।
ACT 23:17 झाइले पावलइ कप्‍तानमैं न्होंर्बै म्हि घ्रि हुइसि बिइ, “चु कोलो पल्टनर्बै चिब ङाँर सथेमिंन्, तलेबिस्याँ चुइ चिबने तोइ ताँ बिदा ङ्हाँइँमु रो।”
ACT 23:18 छबिमा कप्‍तानइ च कोलो चिब ङाँर बोसि बिइ, “ओ चिब, झेल न्होंर मुँबै पावलइ ङ हुइसि चु कोलो क्हि ङाँर बोमिंन् बिइ। चुइ क्हिने बिल् त्हुबै ताँ मुँ रो।”
ACT 23:19 चिबइ च कोलोए यो क्हासि तिराइ बोसि “क्हिइ ङने बिल् त्हुबै ताँ तो जा?” बिसि ङ्योएइ।
ACT 23:20 च कोलोइ बिइ, “पावलए बारेर छेनाले ताँमैं ङ्योएबै निउँ लसि ‘चलाइ प्हँन्हाँग थेबै म्हि च्होंर पखमिंन्’ बिसि क्हिने बिबर यहूदीमैंइ मत लसि क्‍ह्रिइमुँ।
ACT 23:21 दिलेया क्हिइ चमैंए ताँ आङिंन्, तलेबिस्याँ चमैं न्होंर म्हि प्लिच्यु भन्दा ल्हेइ ‘च आसैन् समा ङि तोइ आच तोइ आथुँ!’ बिबै कसम चसि च सैबर क्ह्‍वेइ टिइमुँ। चमैंइ क्हिइ तो बिब् ङ्‍हे बिसि ह्रेरिइमुँ।”
ACT 23:22 चु ताँ थेसि पल्टनर्बै चिबइ “क्हिइ ङने बिबै चु ताँ खाब्ने या आबिद्,” बिसि च कोलोलाइ कुलइ।
ACT 23:23 च लिउँइँ पल्टनर्बै चिबइ कप्‍तानमैं न्होंर्बै म्हि ङ्हिं हुइसि बिइ, “तिंयाँ म्‍हुँइँसर्बै कु ह्राबै त्हेजरे सिपाइमैं ङ्हिंब्ब्रा, घोडा क्रेब्मैं ङिच्यु, धै बर्षा छेब्मैं ङ्हिंब्ब्रा कैसरियार ह्‍याबै ल्हागिर तयार लद्।”
ACT 23:24 झाइले पावलए ल्हागिरै या घोडा म्हैदु धै चलाइ छेनाले क्रथे फेलिक्स ङाँर सने।
ACT 23:25 च्हौ बिल् खाँसि चइ छाबै प्ह्रिछ्या या प्ह्रिइ:
ACT 23:26 “ओ चिब, क्रथे फेलिक्‍स, ङ क्‍लौडियस लुसियसउँइँले छ्याज्यालो मुँ!
ACT 23:27 यहूदीमैंइ चु म्हि क्हासि सैबर म्हैल, दिलेया च रोमी नागारिक मुँन बिब ङइ सेइ। छतसि ङ सिपाइमैं बोसि चलाइ जोगेमिंइ।
ACT 23:28 चुमैंइ तो ताँर चए फिर छ्याब् ल्हैदिगे बिसि क्होबर ङइ चु म्हि यहूदीमैंए थेबै म्हि च्होंर बोइ।
ACT 23:29 चमैंइ खेंमैंए ठिमर्बै ताँर चए फिर छ्याब् ल्हैदिना, दिलेया म्हिन् सैल् त्हुब नेरो झेलर च्युल् त्हुब तोइ छ्याब् ङइ आस्या।
ACT 23:30 चु म्हिए बिरोधर जाल लसिन् मुँ बिबै ताँ ङइ सेसि चलाइ क्हि ङाँर कुल्मिंइँमुँ। चए बिरोधर छ्याब् ल्हैदिब्मैं या क्हिए उँइँर ताँ लद् बिसि ङइ चुर्बै यहूदीमैंने बिइमुँ।”
ACT 23:31 पल्टनर्बै चिबइ बिब् धोंले सिपाइमैंइ पावल म्‍हुँइँसर्न एन्‍टिपाट्रिस बिबै नाँसर सनेइ।
ACT 23:32 प्हँन्हाँग्धों प्हलेइ प्रयाबै सिपाइमैंइ पावललाइ घोडा क्रेबै सिपाइमैंए जिम्मार पिंथेंसि यरूशलेमर्बै ब्यारेकर एखइ।
ACT 23:33 घोडा क्रेबै सिपाइमैं कैसरियार फेबै लिउँइँ रोमी क्रथे फेलिक्‍सने प्ह्रिछ्या पिंसि पावल या चए जिम्मर्न पिंइ।
ACT 23:34 क्रथेइ प्ह्रिछ्या खेल् खाँसि पावलने “क्हि खाब् ह्‍युलर्बै जा?” बिसि ङ्योएइ। धै पावलइ “ङ किलिकिया ह्‍युलर्बै म्हि ग,” बिइ।
ACT 23:35 छतमा क्रथेइ पावलने “क्‍हिए फिर छ्याब् ल्हैदिब्मैं खबै लिउँइँ क्हिए ताँ थेस्यो!” बिसि “चुलाइ बोसि हेरोदइ बनेबै दरबारर थेंन्,” बिसि सिपाइमैंने ल्हैदिइ।
ACT 24:1 ङ्‍हरो लिउँइँ ख्रो पिंबै खेगि क्रथे हननिया नेरो को-कोइ चिबनाँब्मैं नेरो तर्तुल्‍लस मिं मुँबै वकिल घ्रि चर युसि पावलए बिरोधर रोमी क्रथे ङाँर मुद्दा झोंइ।
ACT 24:2 म्हिमैंइ पावललाइ क्रथे ङाँर पखबै लिउँइँ तर्तुल्‍लसइ चए फिर छ्याब् ल्हैदिबर होंइ, “चिब फेलिक्स, क्हिउँइँले ङिइ थेबै शान्ति योंरिइमुँ, क्हिइ ङिए ह्रेंए ल्हागिरि छ्याँबै केमैं लबर होंइँमुँ।
ACT 24:3 छतसि चु ताँ खोंयोंन् बिलै ताँन् क्ल्ह्‍योर ङिइ सैं तोंसि म्हाँदिम्।
ACT 24:4 दिलेया क्हिए ल्हें त्हे ङि आकिं। गार आम्हाँदिल्‍ले, ङिए च्युगुथिरि ताँ थेमिंन्।
ACT 24:5 “चु म्हिइ ह्‍युल तिगोंन् दुःख पिंदै प्रसि ताँन् यहूदीमैंए म्हाँजोर प्होंगि लवाम्, धै नासरतथेंए टोलिर्बै चिब तसि प्रब ङिइ स्याइमुँ।
ACT 24:6 चुइ यरूशलेमर्बै मन्दिर या अशुद्ध लल् म्हैल। छतसि ङिइ चुलाइ क्हाइ। [ङिए ठिमइ बिब् धोंले चुलाइ सजैं पिंदा ङ्हाँल।
ACT 24:7 दिलेया पल्टनर्बै चिब लुसियस ङि ङाँर खसि ङाँमाङाँज्युले ङिए योउँइँले चलाइ प्हेंसि क्हि ङाँर पखइ, धै चुए बिरोधर छ्याब् ल्हैदिब्मैं क्हि ङाँर ह्‍याद् बिसि कुलइ।]
ACT 24:8 तारे क्हिइ चु म्हिए जाँच लइबिस्‍याँ ङिइ चुए फिर ल्हैदिबै छ्याबए बारेर क्हिइ चुउँइँलेन् था सेल् खाँम्।”
ACT 24:9 अरू यहूदीमैंज्यै या सुँ घ्रिन तसि “चइ बिबै ताँ क्ह्रोंसेंन् ग!” बिइ।
ACT 24:10 झाइले क्रथेइ चने पोंन् बिसि हस्त लबै लिउँइँ पावलइ बिइ: “क्हि ल्हें बर्ष ओंनोंन् चु यहूदी ह्रेंर्बै नियाधिश तइमुँ बिब ङइ था सेइमुँ। छतसि ङइ ह्रोंसए ताँ क्हिए उँइँर पोंल् योंमा ङ सैं तोंइमुँ।
ACT 24:11 ङ यरूशलेमर परमेश्‍वरए मिं क्वेबर ह्‍याब च्युसे ङ्हिं त्हिंइ भन्दा ल्हें आतइमुँ बिसि क्हि ह्रोंसैन था सेल् खाँम्।
ACT 24:12 चुमैंइ ङ खाब्ने या प्होंरिब आस्याइमुँ, धै मन्दिरर, च्हों धिंजरे, नेरो सहरर्बै म्हिमैंलाज्यै या सुरेदिरिब चुमैंइ आस्याइमुँ,
ACT 24:13 तोगो ङए फिर छ्याब् ल्हैदिरिबै ताँरै या चुमैंइ प्रमाण पिंल् आखाँ।
ACT 24:14 ङ क्हिए उँइँर चु ताँ बिमुँ: चु मुक्‍ति पिंबै घ्याँने चुमैंइ स्योर्गु घ्याँ बिम्, दिलेया ङ च घ्याँर प्रसि ङए खेमैंए परमेश्‍वरए मिं क्वेम्। धै मोशाइ पिंबै ठिमर मुँबै ताँ नेरो स्योंम्बै अगमबक्‍तामैंइ प्ह्रिबै कितबमैंर बिबै ताँन् ताँ ङइ क्वेंम्।
ACT 24:15 छ्याँब ने आछ्याँबै के लब्मैं ङ्हिंना-ङ्हिंन् सिइरि सोगों तम् बिसि चुमैंइ क्वेंब् धोंलेन् ङज्यै या परमेश्‍वरए फिर आशा थेंम्।
ACT 24:16 छतसि परमेश्‍वर नेरो म्हिमैंए उँइँर खोंयोंन् बिले ङए सैंइ लद् बिब् धोंले ठिक के मत्‍त्रे ङइ लबै भों लरिमुँ।
ACT 24:17 “ङ दे बर्ष अरू ह्‍युलजरे टिबै लिउँइँ ह्रोंसए ह्रेंए ल्हागिर दान पिंबर नेरो परमेश्‍वरए मिंर ख्रो पिंबर यरूशलेमर खल।
ACT 24:18 चुमैंइ मन्दिरर ङलाइ त्होमा ङइ चोखो तबै के ताँन् लल् खाँल। चर म्हिए हुल नेरो खै‍ला-बैला तोइ आरेल, दिलेया एशियार्बै को-कोइ यहूदीमैं चर मुँल।
ACT 24:19 चमैं क्हिए उँइँर चुर मुल त्हुमल। ङए बिरोधर तोइ बिल् त्हुबै ताँ मुँस्याँ चमैं क्हिए ङाँर युसि छ्याब् ल्हैदिल् खाँमल।
ACT 24:20 आस्याँ, थेबै म्हि च्होंए उँइँर ङ रामा ङने तो गल्ति स्याइ बिसि चुर मुँबै म्हिमैंइन बिरिगे।
ACT 24:21 चु ताँ घ्रिर मत्‍त्रे चमैंइ ङए फिर छ्याब् ल्हैदिल् खाँम्। च तो जा बिस्याँ चमैंए उँइँर रासि ङइ थेबै कैले ओरसि ‘म्हिमैं सिइरि धबै सोगों तब्मुँ!’ बिल, च ताँए बारेर्न तिंयाँ क्हेमैंए उँइँर ङए फिर चु मुद्दा तरिइमुँ।”
ACT 24:22 दिलेया फेलिक्सइ मुक्‍ति योंबै घ्याँए बारेर छेनाले था सेल। छतसि चु ताँमैं थेबै लिउँइँ बिइ, “पल्टनर्बै चिब लुसियस चुर युबै लिउँइँ ङइ क्हेमैंए मुद्दा फैसला लमिंस्यो।”
ACT 24:23 च लिउँइँ फेलिक्सइ कप्‍तानने “पावल छेनाले रुँसि थेंन्, दिलेया ल्हें गार आलद्। चए थुमैंइ चैदिबै सैमैं चलाइ पिंबर खस्याँ खल् पिंन्,” बिइ।
ACT 24:24 दे त्हिंइ लिउँइँ फेलिक्स ह्रोंसए यहूदी प्ह्रेंस्यो द्रुसिल्‍लाने बालु खसि पावललाइ हुइइ। धै ख्रीष्‍ट येशूए फिर बिश्‍वास लबै बारेर्बै ताँ चउँइँलेन् थेइ।
ACT 24:25 दिलेया “ठिक के लल् त्हुम्, आछ्याँबै के आलबर ह्रोंसए सैं फैल् त्हुम्, तलेबिस्याँ परमेश्‍वरजी निसाफ लबै त्हिंइ खसिन् मुँ,” बिसि पावलइ बिरिमा फेलिक्स ङ्हिंयाँइ, धै “तोगो मुँरिगे। क्हि ह्‍याद्। मौका योंबै त्हेर ङइ क्हि हुइस्यो,” बिइ।
ACT 24:26 चइ पावलउँइँले मुइ योंम् उ ङ्हाँसि आशा या लल। छतसि चइ घरि-घरि ताँ लबर पावल हुइब्रें लमल।
ACT 24:27 दिलेया ङ्हिंदिं लिउँइँ फेलिक्सए क्ल्ह्‍योर पर्किअस फेस्‍तस बिबै क्रथे खइ। झाइले फेलिक्सइ यहूदीमैं सैं तोंन् लबर पावल झेलर्न वाथेंसि ह्‍याइ।
ACT 25:1 फेस्तस यहूदीया ह्‍युलर्बै कैसरियार खबै सोंरो लिउँइँ यरूशलेमउँइँ ह्‍याइ।
ACT 25:2 चर ख्रो पिंबै खेगि चिब्मैं नेरो यहूदीमैंए न्होंर्बै क्रथे मिंथेमैंइ पावलए फिर छ्याब् ल्हैदिइ।
ACT 25:3 चमैंइ पावल घ्याँर्न सैवाबै सैं लसि, “पावल यरूशलेमर कुल्‍मिंन्,” बिसि फेस्‍तसने यो छ्युँ लइ।
ACT 25:4 दिलेया फेस्‍तसइ चमैंने बिइ, “पावल कैसरियार्न च्‍युथेंइँमुँ, ङै या युनन् चर ह्‍याइन मुँ।
ACT 25:5 छतसि क्हेमैं न्होंर्बै चिब्मैं ङने चर ह्‍यारिगे, धै च म्हिने तोइ आछयाँबै ताँमैं स्यास्याँ चए बिरोधर उजुर झोंरिगे।”
ACT 25:6 फेस्तस चमैंने बालु प्रेरो च्युरो दे भन्दा ल्हें आटिल्‍ले कैसरियाउँइँ एह्‍याइ। चर फेनेबै प्हँन्हाँग्धोंन् निसाफ लबै क्ल्ह्‍योर टिसि चइ सिपाइमैंने “पावल चुर पखो!” बिइ।
ACT 25:7 पावल फेखबै तोंदोंन् यरूशलेमउँइँले युबै यहूदीमैं चए कारग्युले रासि चए बिरोधर बेल्‍ले आछ्याँबै छ्याब्मैं ल्हैदिइ। दिलेया चमैंइ खेंमैंइ ल्हैदिबै छ्याब्मैंला तोइ प्रमाण पिंल् आखाँल।
ACT 25:8 पावलइ ह्रोंसए बारेर पोंदै छ बिइ, “ङइ यहूदीमैंए ठिमए बिरोधर, मन्दिरए बिरोधर नेरो कैसरए बिरोधर तोइ आछ्याँबै के आलइमुँ।”
ACT 25:9 दिलेया फेस्‍तसइ यहूदीमैं सैं तोंन् लबर पावलने बिइ, “यरूशलेमर ह्‍यासि चर्न ङइ चु ताँए बारेर निसाफ लम् क्हिए सैं तो मुँ? तम् उ आत?”
ACT 25:10 पावलइ बिइ, “ङ कैसर म्रुँए निसाफ लबै क्‍ल्‍ह्‍योर्न रारिइमुँ, चुर्न ङए निसाफ तल् त्‍हुम्। यहूदीमैंला ङइ तोइ न्होह्रों आलइमुँ। चु ताँ क्हिज्यै या छेनालेन् सेइमुँ।
ACT 25:11 ङइ परमेश्‍वरए ठिममैं आम्‍हाँदिस्‍याँ, सिल् त्हुबै के या ङइ लस्‍याँ, ङ सिबरै या तयारन् मुँ। दिलेया यहूदीमैंइ ङए फिर ल्‍हैदिबै ताँन् छ्याब्मैं क्‍ह्रोंसेंन् आङिंस्‍याँ ङ चमैंए योर खाबज्‍यै पिंल् आखाँ। छतसि ङए ताँ थेमिंन् बिसि थेबै कैसर म्रुँनेन् ङ यो छ्युँ लम्।”
ACT 25:12 पावलए ताँ थेसि फेस्तसइ चिबनाँब्मैंने सल्‍ला लसि पावलने बिइ, “क्हिइ कैसर म्रुँ ङाँर ह्‍याम् बिबइले ङइ क्हि कैसर ङाँर्न कुलब्मुँ।”
ACT 25:13 दे त्हिंइ लिउँइँ अग्रिपास म्रुँ नेरो चए अङाँ बरनिकि बिब फेस्तसने त्होबर कैसरियार खइ।
ACT 25:14 चमैं चर दे त्हिंइ टिबै लिउँइँ फेस्तसइ म्रुँने पावलए मुद्दाए बारेर छले ताँ लइ: “फेलिक्सइ च्युथेंबै म्हि घ्रि चुर मुँ।
ACT 25:15 ङ यरूशलेमर मुँमा, ख्रो पिंबै खेगि चिब्मैं नेरो यहूदी चिबनाँब्मैंइ चए बिरोधर छ्याब् ल्हैदिसि चलाइ दण्ड पिंन् बिसि ङने बिल।
ACT 25:16 दिलेया ङइ चमैंने बिइ, ‘छ्याब् ल्हैदिबै म्हिमैं नेरो छ्याब् योंबै म्हि ङ्हिंना-ङ्हिंन्‍ने सुँने सुँ आतन् समा, धै ह्रोंसए फिर ल्हैदिबै छ्याब्मैंए बारेर पोंबै मौका आयोंन् समा, खाबलाज्यै या छलेन् दण्ड पिंब रोमी सरकारए रोसर आरे।’
ACT 25:17 “छतमा चमैं खागु तसि चुर युमा ङइ क्हैल् आलन्ले प्हँन्हाँग्धोंन् निसाफ लबै क्‍ल्‍ह्‍योर टिसि, ‘पावल चुर पखो,’ बिसि ल्हैदिइ।
ACT 25:18 दिलेया ङइ मैंब् धोंले छ्याब् ल्हैदिब्मैंइ पावलए मुद्दार आछ्याँबै ताँ तोइ पखल् आखाँल।
ACT 25:19 चमैंए आक्ह्रिबै ताँ चमैंए धर्मए बारेर नेरो सिल् खाँबै येशू बिबै म्हिए बारेर मुँन। पावलइ येशू अझै सोंगोंन् मुँ बिसि बिमना।
ACT 25:20 छतसि चु ताँमैंए बारेर ङइ छेनाले आक्होबइले चु ताँए बारेर ‘निसाफ लबर यरूशलेमर ह्‍याबै सैं मुँ उ?’ बिसि ङइ पावलने ङ्योएइ।
ACT 25:21 दिलेया ‘रोमी थेबै म्रुँइ फैसला आलन् समा ङलाइ झेलर्न च्युथेंन्,’ बिसि पावलइ यो छ्युँ लइ। छतसि चलाइ कैसर म्रुँ ङाँर आकुलन् समा छेनाले रुँन् बिसि ङइ सिपाइमैंने ल्हैदिइ।”
ACT 25:22 चु ताँ थेसि अग्रिपासइ “चु म्हिए ताँ ङज्यै या थेदा ङ्हाँइमुँ,” बिमा फेस्‍तसइ “प्हँन क्हिइ चए ताँ थेब्मुँ,” बिइ।
ACT 25:23 प्हँन्हाँग्धों अग्रिपास नेरो बरनिकि थेबै मानले खइ। धै रोमी पल्टनर्बै चिब्मैं नेरो कैसरिया सहरर्बै चिबनाँब्मैंने थेबै च्हों धिं न्होंर होंइ। धै फेस्‍तसइ “पावल चुर पउ!” ल्हैदिमा सिपाइमैंइ च पखइ।
ACT 25:24 च लिउँइँ फेस्‍तसइ बिइ, “ओ अग्रिपास म्रुँ नेरो चुर मुँबै ताँन् चिबनाँब्मैं! क्‍हेमैंइ चु म्हि म्रोंइँमुँ। ताँन् यहूदीमैंइ चु म्हि तारे सैवाल् त्हुम् बिसि यरूशलेमर नेरो चुरै या ङने यो छ्युँ लइमुँ।
ACT 25:25 दिलेया चु म्हि सैलन् त्हुबै केमैं ङइ तोइ आयों। धै चज्यै या रोमी थेबै म्रुँ ङाँर ह्‍याम् बिसि यो छ्युँ लबइले ङइ चु कुलबर होंइँमुँ।
ACT 25:26 दिलेया चुए बारेर ङइ रोमी थेबै म्रुँलाइ प्ह्रिबै ताँमैं तोइ आरे। छतसि ङइ चु म्हि क्हेमैंए उँइँर नेरो खास लइरि अग्रिपास म्रुँए उँइँर पखइमुँ। ङ्योइ चने ताँमैं ङ्युँलु-च्युलु लबै लिउँइँ चुए बारेर ङइ रोमी म्रुँलाइ ताँमैं प्ह्रिल् योंब्मुँ।
ACT 25:27 तलेबिस्याँ चए बारेर ल्हैदिबै छ्याब्‌मैं तोइ आप्ह्रिल्‍ले चलाइ छलेन् कुलबर छ्याँब आङ्हाँ।”
ACT 26:1 च लिउँइँ अग्रिपासइ पावलने बिइ, “तारे क्‍हिइ ह्रोंसए ताँ बिद्।” छबिमा पावलइ यो स्‍योंसि ह्रोंसलाइ जोगेबै ताँ छले बिबर होंइ,
ACT 26:2 “ओ अग्रिपास म्रुँ! यहूदीमैंइ ङए फिर ल्हैदिबै ताँन् छ्याबए बारेर्बै ताँमैंउँइँले ह्रोंसलाइ जोगेबर तिंयाँ ङइ क्हिए उँइँर बिल् योंमा ङ बेल्‍ले ङ्‍हो सब् मुँन ङ्हाइमुँ!
ACT 26:3 यहूदीमैंए ताँन् रोसमैं नेरो छलफल लबै ताँमैं क्हिइ छेनाले सेइमुँ। छतसि गार आम्हाँदिल्‍ले ङए ताँ थेमिंन् बिसि ङ यो छ्युँ लमुँ।
ACT 26:4 “ङए ह्‍युलर नेरो यरूशलेमर ङ फ्रेंसि तब् ओंनोंन् ङइ खैले छ्ह थोइ, तो-तो लइ, बिबै ताँमैं ताँन् यहूदीमैंइ सेइमुँ।
ACT 26:5 ङ्योए यहूदीमैंए धर्म न्होंरि फरिसीमैं ताँन् भन्दा कट्टर टोलि मुँ। ङै या फरिसी तसि छ्ह थोमल बिसि ओंसों ओनोंन् चमैंइ सेइमुँ। चमैंइ बिदा ङ्हाँस्याँ चु ग्वाइ पिंल् खाँम्।
ACT 26:6 परमेश्‍वरजी ङ्योए स्योंम्बै खेमैंने फैबै बाछार ङइ आशा थेंबइले तिंयाँ ङ क्हेमैंए उँइँर राल् त्हुइमुँ।
ACT 26:7 परमेश्‍वरजी फैबै बाछा योंबर ङ्योए च्युसे ङ्हिं कुलमैंइ त्हिंयाँ, म्हुँइँस सैं घ्रिले खीए मिं क्वेरिम्। ओ म्रुँ, छले ङज्यै या चु आशा थेंबइले ङए फिर यहूदीमैंइ छ्याब् ल्हैदिइमुँ।
ACT 26:8 परमेश्‍वरजी सियाब्मैं धबै सोगों लमिंब्मुँ बिबै ताँ क्हेमैं तले क्वेंल् आखाँ?
ACT 26:9 “ओंसों ङज्यै या नासरतर्बै येशूए मिंर खाँन् समा या बिरोध लल् त्हुम् बिसि मैंमल।
ACT 26:10 ङइ यरूशलेमर छान् लइ। ख्रो पिंबै खेगि चिब्मैंउँइँले हग योंसि प्रभुए म्हिमैं झेलर झोंब् मत्‍त्रे आङिं, चमैं सैवामा ङै या चमैंने त्हुँल।
ACT 26:11 ल्हें खे ङइ चमैंने ‘तारेसेरो नासरतर्बै येशूए फिर बिश्‍वास आलद्’ बिसि च्हों धिंजरे सजैं पिंबर ल्हैदिइ, धै चमैं म्रोंसि ङ बेल्‍ले ह्रिस खसि अरू ह्‍युलर्बै सहरजरे या ह्‍यासि चमैंलाइ ह्रुगुदिइ।
ACT 26:12 “प्रभु येशूए फिर बिश्‍वास लबै म्हिमैं ह्रुगुदिबर ख्रो पिंबै खेगि चिब्मैंउँइँले हग योंसि ङ दमस्कस शहारउँइँ ह्‍याइ।
ACT 26:13 ओ अग्रिपास म्रुँ, च त्हिंइ आधार ङि घ्याँर ह्‍यारिमा त्हिंयाँ भन्दा चारबै ह्‍वे ङइ स्वर्गउँइले युब म्रोंइ। च ह्‍वे ङ नेरो ङने ह्‍याब्मैंए कारग्युले चाररिल।
ACT 26:14 च ह्‍वेइ लमा ङि ताँन् सर क्हुरियाइ। धै हिब्रू क्युइर ङने, ‘ओ शाऊल, शाऊल, क्हिइ तले ङ छले ह्रुगुदिरिल? क्हिए प्‍हलेइ म्ह्रु छु तबै प्हरेर ल्हिमा क्‍हिलाइन नब्मुँ,’ छ बिरिबै कै ङइ थेइ।
ACT 26:15 झाइले ङइ ‘ओ प्रभु क्‍हि खाब् जा?’ बिसि ङ्योएमा प्रभुजी बिइ, ‘ङ क्हिइ ह्रुगुदिरिबै येशू ग।
ACT 26:16 तारे रेद्। क्‍हि ङए सेवा लबर नेरो ङए ग्वाइ पिंबर त्हाँइमुँ। छतइरि ङ क्‍हि ङाँर म्रोंयुइमुँ। तिंयाँ क्हिइ ङ म्रोंबै ताँ नेरो तारे पिरु ङइ क्‍हिने उँइँमिंबै ताँमैं या क्‍हिइ ग्वाइ पिंल् त्हुम्।
ACT 26:17 क्हिए ह्रेंमैं नेरो अरू ह्रेंमैं ङाँर ङइ क्हिलाइ कुल्मिंब्मुँ। चमैंउँइँले ङइ क्‍हिलाइ जोगेमिंब्मुँ।
ACT 26:18 चमैं मिछु खैबाउँइँले चारबै व्हेर खरिगे धै दुष्‍टए शक्‍तिउँइँले फ्रेसि परमेश्‍वरउँइँ एरिगे बिसि क्हिइ चमैंए मि थोंमिंन्। छले चमैंइ पापए क्षमा योंब्मुँ धै ङए फिर बिश्‍वास लसि पबित्र तबै म्हिमैं टिबै क्ल्ह्‍योर चमैं टिल् योंब्मुँ।’
ACT 26:19 “छतसि, ओ अग्रिपास म्रुँ, स्‍वर्गउँइँले बिबै ताँ ङइ ङिंइ।
ACT 26:20 ङ ओंसों डमस्‍कस नेरो यरूशलेम सहरजरे, यहूदीमैंए ताँन् ह्‍युलरि, झाइले अरू ह्रेंमैंए ह्‍युलरै या ह्‍यासि पाप केमैं पिसि परमेश्‍वरउँइँ सैं एद् धै ह्रोंसइ सैं एइ बिब उँइँबर छ्याँबै केमैं लल् त्‍हुम् बिसि लोमिंइ।
ACT 26:21 छबिमा यहूदीमैंइ मन्दिरर ङलाइ क्हासि सैल् म्हैइ।
ACT 26:22 दिलेया तिंयाँबै त्हिंइ समा परमेश्‍वरजी ङलाइ जोगेमिंइमुँ। छतसि तिंयाँ चुर मुँबै थेब, च्योंब, ताँनए उँइँर चु ताँमैंए ग्वाइ पिंदै ङ चुर राल् योंइमुँ। अगमबक्‍तामैं नेरो मोशाइ लिउँइँ तखब्मुँ बिबै ताँमैं बाहेक अरू ङइ तोइ आबिइमुँ।
ACT 26:23 तो ताँमैं जा बिस्याँ, परमेश्‍वरजी कुल्मिंबै म्रुँ ख्रीष्‍टजी दुःख योंसि सिल् त्हुब्मुँ, धै सिसि धबै सोगों तब्मैंए न्होंर ताँन् भन्दा ओंसों खी सोगों तसि ह्रोंसए यहूदी ह्रें नेरो अरू ह्रेंमैंने या परमेश्‍वरए ह्‍वे सेल् पिंब्मुँ बिसि चमैंइ बिल।”
ACT 26:24 पावलइ बिबै चु ताँ थेसि फेस्‍तसइ थेबै कै तेसि बिइ, “ओ पावल, क्‍हि सोबाल् तयाना! ल्हें ह्रब् सेबइ क्हि सोबाल् लवाना!”
ACT 26:25 दिलेया पावलइ बिइ, “ओ चिब फेस्‍तस, ङ सोबाल् तब् आङिं। ङइ क्ह्रोंसेंन्बै नेरो च्हैंसि मैंसि ताँमैं पोंमुँ।
ACT 26:26 अग्रिपास म्रुँइ चु ताँए बारेर सेइमुँ। छतसि चए उँइँर ङ आङ्हिंन्ले पोंइँनमुँ। खिइ चु तोन्दोंरि ताँ सेइमुँ, तलेबिस्याँ चु ताँ खाबज्यै आसेल्‍ले लबै ताँ आङिं।
ACT 26:27 ओ अग्रिपास म्रुँ, क्‍हिइ अगमबक्‍तामैंइ प्ह्रिबै ताँ क्वेंम्मा? क्हिइ क्वेंम् बिब ङइ सेइमुँ।”
ACT 26:28 अग्रिपासइ पावलने बिइ, “तिस्यार्न क्हिइ ङ ख्रीष्‍टियान लल् म्हैल् वा?”
ACT 26:29 पावलइ बिइ, “तिस्यार्न मुरिद् उ ल्हें त्हेर्न मुरिद्, चु सँउँलिमैं पिसि, क्हि मत्‍त्रे आङिं, तिंयाँ ङए ताँ थेब्मैं ताँन् ङ धोंबन् तरिगे बिसि ङ परमेश्‍वरने प्राथना लम्।”
ACT 26:30 पावलइ चु ताँ बिमा चर्बै अग्रिपास म्रुँ, क्रथे फेसतुस, बरनिकि, नेरो चर टिब्मैं ताँन् रेयाइ।
ACT 26:31 झाइले चमैं त्होंह्‍याबै लिउँइँ, “चु म्हिइ झेलर च्युल् त्हुब नेरो सैल् त्हुबै के तोइ आलइमुँ,” बिसि खें-खेंमैंए न्होंर्न ताँ लइ।
ACT 26:32 धबै अग्रिपास म्रुँइ फेस्तसने बिइ, “चइ कैसर म्रुँ ङाँर चए मुद्दा फैसला लरिगे बिसि यो छ्युँ आलस्याँ पिवालै खाँमल।”
ACT 27:1 झाइले ङि इटालिया ह्‍युलर ह्‍याल् त्हुम् बिसि क्रथे फेस्‍तसइ निर्नय लइ। छतमा चमैंइ पावल नेरो अरू कैदिमैं युलियस मिं मुँबै कप्‍तानए जिम्मार पिंइ। च “आगस्ट थेबै म्रुँ” बिबै फौजर्बै कप्‍तान घ्रि मुँल।
ACT 27:2 ङि एड्रामिटेनोस सहरउँइँले एशिया ह्‍युलए रे-रेबै क्ल्ह्‍यो ततै ह्‍याबै क्यु झाजर क्रेइ। छले ह्‍यामा माकेडोनिया ह्‍युलर्बै थेसलोनिकाथें अरिस्‍तार्खस बिबै म्हि घ्रि या ङिने बालु मुँल।
ACT 27:3 प्‍हँन्हाँग्धों ङि सिदोन बिबै सहरर फेनेइ। चर कप्‍तान युलियसइ पावलए फिर ल्हयो खसि चने “क्हिलाइ तोइ सैमैं खाँचो तस्याँ क्हिए थुमैं ङाँर ह्‍यासि चैदिबै सैमैं किंल् खाँम्,” बिइ।
ACT 27:4 च क्ल्ह्‍योउँइँले ङि क्रेबै क्यु झाज धबै मा ङ्युँइउँइँ ह्‍यारिमा मा ङ्युँइर थेबै खैं खबइले ङि खैंउँइँले जोगेरिगे बिसि साइप्रस बिबै टापू लिउँइँ ततै ह्‍याइ।
ACT 27:5 झाइले किलिकिया नेरो पामफिलियाए क्योंजउँइँबै मा ङ्युँइर फेसि ङि लुकिया ह्‍युलर्बै माइरा बिबै सहरर फेखइ।
ACT 27:6 चर इटालिया ह्‍युलर ह्‍याबै अलेक्‍जेन्ड्रिया सहरर्बै क्यु झाज घ्रि स्यासि कप्‍तानइ ङि चर क्रेमिंइ।
ACT 27:7 खैंइ लमा क्यु झाज क्हैनाँले प्रबइले ल्हें त्हिंइ छ्युसि गार्ले ङि क्‍निडस बिबै क्ल्ह्‍योर फेखइ। खैंइ क्यु झाज ओंसों ह्‍याल् आपिंबइले ङि क्रेट बिबै टापूए पूर्व नेरो दक्षिण हारउँइँ ह्‍याइ, तलेबिस्‍याँ चर खैं ल्‍हें आचल्‍दिमल। चर ह्यामा सालोमोन बिबै क्‍ल्‍हो म्रोंइ।
ACT 27:8 बेल्‍ले गार्ले टापूए रे-रे ततै ङि “क्यु झाज न्हबर छ्याँब” बिबै क्ल्ह्‍योर फेखइ। च क्ल्ह्‍योउँइँले लासिया बिबै सहर चेंदोन् मुँल।
ACT 27:9 ङि चर फेबर ल्हें त्हे ह्‍याल् खाँल, धै पछुत लसि बर्त टिबै चाड या ह्‍‍याल् खाँल। धै मा ङ्युँइर ह्‍याबै या ङ्हिंन् ङ्हाँन् तल। छतसि पावलइ म्हिमैंने छले बिइ,
ACT 27:10 “ओ थुमैं, ङए सैंर छुइले ङ्यो ह्‍याइ बिस्याँ क्यु झाज नेरो समनए नोक्सन् मत्‍त्रे आङिं, ङ्योए ज्यु या ह्‍यालै ङ्हाँइमुँ।”
ACT 27:11 दिलेया कप्‍तानइ पावलए ताँ आथेल्‍ले क्यु झाज ओलेबै म्हि नेरो क्यु झाजए क्ल्हेए ताँ क्वेंइ।
ACT 27:12 च क्यु झाज न्हबै क्ल्ह्‍योर सर्ख थोब गारो तबइले खैलसे या फोनिक्‍सर्न फेनेसि सर्ख थोल् त्हुम् बिसि चर मुँबै ल्हें म्हिइ क्यु झाज ओलेद् बिइ। फोनिक्‍स क्रेट ह्‍युलर्बै क्यु झाज न्हबै क्ल्ह्‍यो घ्रि ग, च ल्हुउँइँ न्हुउँइँ (दक्षिण-पश्चिमउँइँ) नेरो ताइ न्हुउँइँ (उतर-पश्चिमउँइँ) ह्‍वेंब मुँ।
ACT 27:13 च त्हेर ल्हुँउँइँले (दक्षिणउँइँले) खैं च्युगु च्युगु खबर होंमा चमैंइ सैंर मैंब् धोंन् तइ ङ्हाँसि क्यु झाज फैथेंबै अँगुसि तेवासि चमैं क्रेट बिबै टापूए रे-रे ततै ह्‍याबर होंइ।
ACT 27:14 छले ह्‍यारिबै तिस्या दे लिउँइँ च टापू पट्टिउँइँले बेल्‍ले थेबै उत्तर-पूर्व बिबै खैं खइ।
ACT 27:15 छले थेबै खैं खमा ङिइ क्यु झाज ओलेल् आखाँसि क्यु झाज खनि ह्‍यालै ह्‍यारिगे बिसि पिवाइ।
ACT 27:16 छले क्यु झाज ह्‍यामा क्‍लौडा बिबै च्युथिरि टापू ङाँर फेनेबै लिउँइँ ङिइ बेल्‍ले गार्ले क्यु झाजर्बै डुँङ्गा जोगेल् खाँइ।
ACT 27:17 च डुङ्गा कैंडो क्वेबै लिउँइँ क्यु झाज ओलेब्मैंइ क्यु झाज तोइ आतरिगे बिसि क्यु झाज छोमैंइ भोंन्ले फैइ। धै सिरटिस् बिबै क्यु न्होंर्बै बालुवाए खादर क्होयाम् उ बिब् ङ्हिंसि चमैंइ पालमैं खारवाइ। छतमा क्यु झाज क्युए फिर्न ल्हाइ टिइ।
ACT 27:18 थेबै नाँ-खैंइ लमा क्यु झाजर ङि छाइ खैने माइ खै तबर होंइ, छतमा प्हँन्हाँग्धों चमैंइ क्यु झाज योंरिगे बिसि क्यु झाजर्बै समनमैं भ्योंबर होंइ।
ACT 27:19 झाइले सोंरोर चमैंइ खेंमैंए योइन झाज ओलेबर चैदिबै सैमैं नेरो छोमैं या भ्योंवाइ।
ACT 27:20 ल्‍हें त्हिंइ समा ङिइ त्हिंया नेरो मुसारामैं तोइ म्रोंल् आयों। नाँ-खैं खबै-खब् तरिमा सोबै आशा या ङिला म्हयाल।
ACT 27:21 ल्हें त्हिंइ समा म्हिमैंइ तोइ चल् आयोंल। छतमा पावलइ चमैं ङाँर खसि बिइ, “ओ थुमैं, क्हेमैंइ ङए ताँ ङिंसि क्रेटउँइँले क्यु झाज आओलेल् त्हुमल, धै छाबै दुःख नेरो नोक्सान् क्हमैंइ आयोंमल।
ACT 27:22 दिलेया क्हेमैं आङ्हिंन्। क्हेमैं खाबै या सिरिब् आरे, क्यु झाज बिस्याँ नास तयाब्मुँ।
ACT 27:23 तलेबिस्याँ ङ परमेश्‍वरए म्हि ग, ङ खीए सेवा लमुँ, धै खीए स्वर्गदूत घ्रि तिंयाँ म्हुँइँसर ङ ङाँर रायुइ।
ACT 27:24 च स्वर्गदूतइ ङने बिइ, ‘ओ पावल, आङ्हिंन्! क्हि कैसर म्रुँए उँइँर खैलसे या राल् त्हुम्। धै क्हिने क्यु झाजर क्रेब्मैं ताँनए ज्यु परमेश्‍वरजी क्हिए योर पिंइमुँ।’
ACT 27:25 छतसि, ओ थुमैं, आङ्हिंन्! परमेश्‍वरजी ङने खै बिइमुँ, छान् तब्मुँ बिसि ङ खीए फिर बिश्‍वास लम्।
ACT 27:26 दिलेया ङ्यो टापू घ्रिर थुरल् त्हुब्मुँ।”
ACT 27:27 छले ङि क्रेबै क्यु झाज नाँ-खैंए न्होंर एड्रियास बिबै मा ङ्युँर छाइ खैने माइ खै तरिब च्युसे प्लि त्हिंइ तल् खाँल। च्हमरे म्‍हुँइँस आ‍धाजरे क्यु झाज ओलेब्मैंइ स मुँबै क्ल्ह्‍योर फेखब्धों ङ्हाँइ।
ACT 27:28 झाइले चमैंइ मा ङ्युँइ कति गैरु मुँन बिसि छोइ च्हैंमा सोंच्यु से ङि मिटर मुँन बिसि सेइ, धबै दे क्याइ ह्‍यासि गैरु च्हैमा चमैंइ ङ्हिस्युसे ट्हु मिटर मुँन बिसि सेइ।
ACT 27:29 झाइले क्यु च्युगुदे ततै ह्‍यामा खनिज्यै क्यु झाज युँमार थुरयाम् उ बिसि ङ्हिंसि चमैंइ क्यु झाजए लिउँइँले अँगुसि मुँबै सँउँलिमैं प्लिउँलो खारवाइ, धै युनन् नाँ न्होंरिगे बिसि प्राथना लबर होंइ।
ACT 27:30 छले प्राथना लरिमा क्यु झाज ओलेब्मैंइ क्यु झाजए ओंसोंबै सँउँलि खारबै निउ लसि डुँङ्गा मा ङ्युँइर तवासि खेंमैं भौदिल् म्हैरिल।
ACT 27:31 छतमा पावलइ कप्‍तान नेरो सिपाइमैंने बिइ, “चु म्हिमैं क्यु झाजर आटिइ बिस्याँ क्हेमैं सोल् खाँरिब् आरे।”
ACT 27:32 चु ताँ थेसि सिपाइमैंइ डुँङ्गा फैबै छोमैं क्ह्‍याँसि डुँङ्गा क्युर भ्योंवाइ।
ACT 27:33 मि म्रोंबि छेमा पावलइ चमैंने बिइ, “क्हेमैं न्हुँ लसि तोइ आचल्‍ले टिब तिंयाँ च्युसे प्लि त्हिंइ तल् खाँइ।
ACT 27:34 छतसि ङ क्हेमैंने बिमुँ, चबै सै चद्। चब् चस्याँ क्हेमैंइ भों योंब्मुँ, धै क्हेमैं खाबलै या क्रप्हो घ्रि या खाररिब् आरे।”
ACT 27:35 छबिसि पावलइ क्हें किंसि ताँनए उँइँर परमेश्‍वरलाइ धन्यबाद पिंइ, धै क्हें लुँसि चबर होंइ।
ACT 27:36 चमैं सैं भोंल् योंसि सैं तोंदै चब् चइ।
ACT 27:37 (क्यु झाजर ङि ताँन् लसि ङ्हिंब्ब्रासे ङिच्युसे ट्हु म्हिमैं मुँल।)
ACT 27:38 धै म्रेंनाले चब् चबै लिउँइँ, चमैंइ क्यु झाज योंरिगे बिसि गहुँए बोरामैं मा ङ्युँइर भ्योंवाइ।
ACT 27:39 मि म्रोंयाबै लिउँइँ क्यु झाज ओलेब्मैंइ माँ ङ्युँइँए छेउ म्रोंइ, दिलेया खनर फेखइ बिब आसे। दिलेया चमैंइ क्यु झाज टिल् खाँब् धों ब्योंब बलुवा मुँबै क्ल्ह्‍यो घ्रि म्रोंइ। धै खाँन् समा क्यु झाज चए रेर बोबै सैं लइ।
ACT 27:40 छतसि चमैंइ क्यु झाज फैबै सँउँलिमैं खारवासि क्युर पिवाइ। धै क्यु झाज ओलेबै सैमैं फैथेंबै छोमैं प्ल्हवासि ओंसोंबै पाल क्वेसि खैं खबै हाराइ तोमिंमा क्यु झाज माँ ङ्युँइँए छेउउँइँ चैं बोइ।
ACT 27:41 क्यु झाज छले ह्‍यारिमा क्यु न्होंर्बै बालुवाए रासर थुरसि चर्न क्होयाइ, धै क्यु झाजए ओंसोंबै भाग क्होयासि ओलेल् आखाँ। छतमा लिउँइँबै भाग क्युए भेल्गइ चोवाबर होंइ।
ACT 27:42 च त्हेर कैदिमैं क्युर क्योवालसि न्हेह्‍याम् उ बिब् मैंसि सिपाइमैंइ चमैं सैबै सैं लइ।
ACT 27:43 दिलेया कप्‍तानइ पावल जोगेबै सैं लसि चमैंलाइ छ लल् आपिं। बरु “क्योवालल् खाँम्मैं ताँन् क्यु झाजउँइँले ओंसों फाल् न्हेसि छेउउँइँ त्होंन्।
ACT 27:44 धै अरू चर मुँब्मैं फालेजरे नेरो क्यु झाजए टुक्‍क्रजरे क्हासि क्योंजा ह्‍याद्,” कप्‍तानइ बिइ। छले ङि ताँन् छेनाले नें आम्योंल्‍ले मा ङ्युँइए छेउर फेइ।
ACT 28:1 ङि मा ङ्युँइए छेउर खबै लिउँइँ च टापूए मिं माल्‍टा मुँन बिसि ङिइ था योंइ।
ACT 28:2 चर्बै म्‍हिमैंइ ङि फिर बेल्‍ले ल्हयो खइ। च त्हेर नाँ युसि बेल्‍ले खुँल। छतसि चमैंइ मि फुइसि ङि मि त्‍हेबर हुइसि मान लइ।
ACT 28:3 पावलज्यै या प्हैं घ्रि सिं खुसि मिर झोंइ। मिए राबाइ लमा प्‍हुरि घ्रि त्होंखसि पावलए योर बेर्दि‍याइ।
ACT 28:4 पावलए योर प्‍हुरि बेर्दिब् म्रोंसि चर्बै म्‍हिमैंइ, “चु म्‍हि क्ह्रोंसेंन्ले म्हि सैबै म्हि तल् त्‍हुम्! च मा ङ्युँइउँइँले सोइ खलेना निसाफउँइँले चु स्योरल् आखाँ,” बिसि खेंमैंए न्होंर बिबर होंइ।
ACT 28:5 दिलेया पावलइ च प्हुरि मिर खारवामा प्हुरिइ पावललाइ तोइ न्होह्रों आल।
ACT 28:6 दिलेया “तिस्याँदे लिउँइँ बिख ल्‍हैदिसि चए ज्यु रोंलै, सर क्हुरह्‍यासि सियालै,” बिसि चर मुँबै म्हिमैंइ मैंरिल। ल्हें त्हे समा च तोइ आतब् म्रोंसि चमैंइ अरू सैंन् मैंसि “चुम् देवता ग मुँन!” बिइ।
ACT 28:7 च टापूर्बै क्ह्रों पब्‍लियसए क्ल्ह्‍यो-न्हें च क्ल्ह्‍योए चेंदो मुँल। चइ ङि चए धिंर हुइसि मान लइ। धै सोंरो समा प्‍ह्रें तसि ङि चर्न टिइ।
ACT 28:8 च त्हेर पब्‍लियसए आबा जर खब नेरो फो नब तल। छतसि पावल च नबै म्‍हिलाइ ङ्‍ह्‍योबर ह्‍यासि चए ल्हागिर प्राथना लइ, धै चए फिर यो थेंसि च नबै म्हि सल् लमिंइ।
ACT 28:9 छतसि च टापूर टिबै अरू नबै म्हिमैं या पावल ङाँर खमा चमैं या सइ।
ACT 28:10 चमैंइ ङि ल्‍हें मान लसि ल्हें क्होल्सैंमैं पिंइ। धै ङि माल्‍टाउँइँले ह्‍याब् बिसि क्यु झाजर क्रेबि छेमा चमैंइ घ्‍याँर ङिलाइ चैदिबै सैमैं या क्यु झाजर झोंमिंइ।
ACT 28:11 म्हैंन सोंल् लिउँइँ ङि अलेक्जेन्ड्रियार्बै क्यु झाजर क्रेइ। चु क्यु झाज सर्खर माल्टर्बै टापूर्न मुँल। चु क्यु झाजए ओंसों जौंले देवतामैंए मूर्ति कुन्दिल।
ACT 28:12 ङि सुराकुसाइ बिबै सहरर फेनेसि सोंरो समा चर्न टिइ।
ACT 28:13 सुराकुसाइउँइँले ङि मा ङ्युँइए छेउ-छेउउँइँले रेगियन सहरर फेखइ। चए प्हँन्हाँग्धों ल्हुँउँइँले (दक्षिणउँइँले) खैं खइ, धै नुयुँम्धों ङि पटिओलि बिबै सहरर फेखइ।
ACT 28:14 चर ङिइ प्रभुए फिर बिश्‍वास लबै अलि-अङाँमैं त्होइ। चमैंइ “सद घ्रि समा ङिने टिमिंन्” बिइ। छतसि ङि ङिरो चमैंनेन् टिबै लिउँइँ ङि रोम बिबै सहरर फेखइ।
ACT 28:15 रोमर्बै प्रभुए फिर बिश्‍वास लबै अलि-अङाँमैंइ ङि खसिन् मुँ बिबै ताँ थेसि को-कोइ म्हिमैं ङिने त्होबर अप्‍पियस बिबै बजार नेरो सों पाटि बिबै क्ल्ह्‍यो समा खइ। चमैं म्रोंसि पावलइ भों योंसि परमेश्‍वरलाइ धन्यबाद पिंइ।
ACT 28:16 ङि रोम खबै लिउँइँ पावल रुँबै सिपाइ घ्रिने बालो च घ्रिन् टिल् पिंइ।
ACT 28:17 सोंरो लिउँइँ पावलइ चर्बै यहूदीमैंए चिबनाँब्मैं हुइसि खागु लइ। चमैं खागु तबै लिउँइँ पावलइ चमैंने बिइ, “ओ अलिमैं, ङ्योए ह्‍युलर्बै म्हिमैं नेरो ङ्योए खेमैंए रोसमैंए बिरोधर ङइ तोइ आछ्याँबै के आलल। दिलेया म्हिमैंइ ङ यरूशलेमर क्हासि रोमीमैंए योर पिंवाइमुँ।
ACT 28:18 रोमीमैंइ ङलाइ ङ्युलु च्युलु लमा सैल् त्हुबै छ्याब् तोइ आस्यासि ङ पिवाबै सैं लल।
ACT 28:19 दिलेया यहूदीमैंइ बिरोध लबइले ङइ कैसर म्रुँ ङाँर ह्‍याल् योंरिगे बिसि यो छ्युँ ललन् त्हुइ। छान् तलेया ङए ह्रेंए बिरोधर तोइ छ्याब् पिंबै ताँ ङने आरेल।
ACT 28:20 छतसि ङइ क्हेमैंने त्होसि चु ताँमैं क्होमिंबर क्हेमैंलाइ हुइब् ग। तलेबिस्याँ ‘परमेश्‍वरजी मुक्‍ति पिंबै म्रुँ ख्रीष्‍ट कुल्मिंब्मुँ,’ बिसि ङ्यो इस्राएलीमैंइ आशा थेंइमुँ। झाइले च म्रुँ युल् खाँइ बिसि ङइ बिप्रबइले ङ चु सँउँलिइ फैथेंइँमुँ।”
ACT 28:21 पावलए ताँ थेसि चमैंइ बिइ, “ङिइमि क्हिए बारेर यहूदीया ह्‍युलउँइँले तोइ प्ह्रिछ्या आयोंइँमुँ। धै अलि-अङाँमैं खाबै खसि क्हिए बिरोधर आछ्याँब ताँ तोइ आपोंइँमुँ।
ACT 28:22 दिलेया क्‍हिए सैंर मैंबै ताँमैं ङिइ क्हिउँइँलेन् थेदा ङ्हाँइँमुँ, तलेबिस्याँ खन्तोदोंन् म्हिमैंइ क्हिए टोलिमैंए बारेर बिरोध लसि पोंरिब ङिइ थेइमुँ।”
ACT 28:23 च लिउँइँ चमैंइ पावलए ताँ थेबर त्हिंइ घ्रि तोक्दिइ। छतमा ल्हें म्हि पावल टिबै क्ल्ह्‍योर खइ। धै चइ न्हाँगउँइँले ङेसा समा परमेश्‍वरए ग्याल्सर्बै ताँमैं लोमिंइ। चइ मोशाइ पिंबै ठिम नेरो अगमबक्‍तामैंए कितबमैंउँइँले पावलइ परमेश्‍वरए ग्याल्सर्बै ग्वाइ पिंसि यशूए बारेर्बै ताँमैं क्होमिंबै भों लरिल।
ACT 28:24 चइ बिबै ताँ थेसि को-कोइइ क्वेंइ, को-कोइइ आक्वें।
ACT 28:25 छतसि चमैं खें-खेंमैंन् ताँ आक्‍ह्रिसि ह्‍याबि छेमा पावलइ चमैंने बिइ, “परमेश्‍वरए प्ल्हजी क्हेमैंए खेमैंने यशैया अगमबक्‍ताउँइँले बिमिंबै चु ताँ ठिकन् मुँल,
ACT 28:26 चु म्‍हिमैं ङाँर ह्‍यासि बिद्, ‘क्हेमैंइ थेबम् थेब्मुँ, दिलेया खोंयोंन् बिलै आक्‍हो; ङ्ह्‍योबम् ङ्ह्‍योब्मुँ, दिलेया खोंयोंन् बिलै आम्रों।’
ACT 28:27 तलेबिस्याँ चमैंए खों सारो तइमुँ, चमैंए न्ह थेल् आखाँब् तइमुँ, धै चमैंइ मि च्‍युँल्‍ले टिइमु। आस्याँ चमैंए मिइ म्रोंब्मुँ, चमैंए न्हइ थेब्मुँ, चमैंए खोंइ क्होब्मुँ, धै चमैं सैं एसि ङ ङाँर खब्मुँ, ङइ चमैंलाइ सल् लमिंब्मुँ बिसि परमेश्‍वरजी बिइमुँ।
ACT 28:28 छतसि ‘परमेश्‍वरजी म्हिमैं जोगेमिंब्‍मुँ,’ बिबै सैं तोंबै ताँ अरू ह्रेंर्बै म्हिमैंए ल्हागिर खीजी पिमिंइँमुँ, धै चमैंज्यै थेब्‍मुँ, बिसि क्‍हेमैं था सेल् त्‍हुम्।”
ACT 28:29 [पावलइ चु ताँ बिबै लिउँइँ, यहूदीमैं खें-खेंमैंन् आक्ह्रिसि ठटा ठुटु तसि ह्‍याइ।]
ACT 28:30 पावल ङ्हिंदि समा ह्रोंसए खर्जर्न रोमर टिइ, धै च ङाँर खब्मैं ताँनलाइ खिइ मान लमल।
ACT 28:31 चइ आङ्हिंनले परमेश्‍वरए ग्याल्सर्बै ताँ बिमल, प्रभु येशू ख्रीष्‍टए बारेर लोमिंमल, धै खाब्ज्यै या पावल आक्वै।
ROM 1:1 येशू ख्रीष्‍टए के लबर त्हाँबै ङ पावलउँइँले क्हेमैं रोम सहरर्बै बिश्‍वासीमैंलाइ जय मसीह मुँ, सैं तोंबै ताँ बिप्रबै ल्हागिर नेरो कुल्मिंबै चेला चिब तबर परमेश्‍वरजी ङ त्‍हाँब् ग।
ROM 1:2 परमेश्‍वरजी स्‍योंमन् चु सैं तोंबै ताँ म्‍हिमैंलाइ पिंम् बिसि बाछा फैल। छले खीजी बाछा फैबै ताँ अगमबक्‍तामैंइ परमेश्‍वरए छ्वेर प्‍ह्रिथेंइ।
ROM 1:3 चु सैं तोंबै ताँ खीए च्‍ह येशू ख्रीष्‍टए बारेर ग। खी म्हि तसि स्‍योंम्‍बै दाऊद म्रुँए खलकर फिइ।
ROM 1:4 ङ्योए प्रभु येशू ख्रीष्‍ट सिसेया पबित्र प्ल्हए थेबै शक्‍तिउँइँले सोगों तबइले “येशू परमेश्‍वरए च्‍हन् ग!” बिबै प्रमान खीजी ङ्योलाइ उँइँमिंइ।
ROM 1:5 प्रभु येशू ख्रीष्‍टउँइँले परमेश्‍वरजी ङए फिर दयाम्हाँया उँइँसि ख्रीष्‍टए के लबै ल्हागिर ङ कुल्मिंबै चेला चिब तल् पिंइ। ताँन् ह्रेंर्बै म्‍हिमैंइ बिश्‍वास लसि परमेश्‍वरजी बिबै ताँ म्हाँदिरिगे बिसि खीजी ङलाइ त्‍हाँइ।
ROM 1:6 छलेन क्‍हेमैं रोमर टिब्‍मैंलाज्यै या येशू ख्रीष्‍टए म्‍हिमैं तरिगे बिसि परमेश्‍वरजी त्‍हाँइमुँ।
ROM 1:7 परमेश्‍वरजी क्‍हेमैंए फिर म्हाँया लसि खीए म्‍हिमैं तरिगे बिसि त्‍हाँइमुँ। छतसि क्‍हेमैं रोमर टिब्‍मैंलाइ ङइ चु ताँमैं प्‍ह्रिसिन् मुँ: ङ्योए परमेश्‍वर आबा नेरो प्रभु येशू ख्रीष्‍टउँइँले क्‍हेमैंए फिर दयाम्हाँया नेरो शान्‍ति तरिगे।
ROM 1:8 ओंसों बिल् त्हुबै ताँ, येशू ख्रीष्‍टए फिर क्‍हेमैंइ बिश्‍वास लइमुँ बिबै छ्याँबै ताँमैंए बयन ह्‍युल तिगोंन् थेनेइमुँ। छतसि क्‍हेमैं ताँनए ल्हागिर येशू ख्रीष्‍टउँइँले ङए परमेश्‍वरलाइ धन्‍यबाद पिंम्।
ROM 1:9 ङइ प्राथना लमा खोंयोंन् बिलै क्‍हेमैंलाज्यै मैंम् बिबै ताँ परमेश्‍वरजी सेइमुँ। खीए च्‍हउँइँले योंबै सैं तोंबै ताँ बिप्रसि ङइ खीए के छेनाले लम्।
ROM 1:10 ङ क्‍हेमैं ङाँर खैलसेया खल् योंरिगे बिसेया ङइ परमेश्‍वरने प्राथना लसिन् मुँ।
ROM 1:11 तलेबिस्याँ परमेश्‍वरए ताँमैं अझै छेनाले लोमिंसि क्हेमैंलाइ बिश्‍वासर भोंब् लमिंबै ल्हागिर ङ क्हेमैं ङाँर खदा ङ्हाँइमुँ।
ROM 1:12 छले ङ्यो घ्रिइ घ्रिए बिश्‍वास म्रोंसि ङ्यो भों खबै के तरिगे बिब ङए सैं मुँ।
ROM 1:13 ङए अलि-अङाँमैं, क्हेमैंइ चु ताँ सेरिगे बिब ङए सैं मुँ। ङइ अरू ह्रेंर्बै म्हिमैं बिश्‍वासर पखसि चमैंलाइ परमेश्‍वरए के छेनाले लल् खाँब्मैं लमिंइ। छलेन क्‍हेमैंलाज्यै बिश्‍वासर भोंब् लमिंसि परमेश्‍वरए के छेनाले लल् खाँब्मैं लमिंबै ल्हागिर क्हेमैं ङाँर ङ ल्हें खे खबै सैं लइ, दिलेया तो आङिं तो के पर्दिबइले तोगो समा खल् आयों।
ROM 1:14 तलेबिस्याँ ह्रोंसए ह्रेंर्बै मुँलेया, अरून् ह्रेंर्बै मुँलेया, ह्रब् सेब्मैं मुँलेया, आह्र आसेब्मैं मुँलेया, ताँनने परमेश्‍वरउँइँले खबै सैं तोंबै ताँ ङइ बिलन् त्हुम्।
ROM 1:15 छतसि खाँन् समा चु सैं तोंबै ताँ क्‍हेमैं रोमथेंमैंने या ङइ बिल् योंस्याँ तमल ङ्हाँइमुँ।
ROM 1:16 तलेबिस्याँ ख्रीष्‍टउँइँले योंबै सैं तोंबै ताँ म्हिमैंने बिबै ल्हागिर ङ फा आपि। यहूदीमैं मुँलेया अरू ह्रेंमैंन् मुँलेया चु सैं तोंबै ताँउँइँलेन् खीए फिर बिश्‍वास लब्‍मैंलाइ परमेश्‍वरजी मुक्‍ति पिंम्।
ROM 1:17 तलेबिस्याँ चु सैं तोंबै ताँउँइँलेन् परमेश्‍वरजी म्‍हिमैंलाइ ह्रोंसए उँइँरि खैले ठिक ठर्दिम् बिसि उँइँम्। झाइले ओंसोंउँइँले लिउँइँ समा बिश्‍वासइ मत्‍त्रे म्‍हिमैं परमेश्‍वरए उँइँर ठिक ठर्दिल् खाँम्। छलेन “बिश्‍वास लसिन् परमेश्‍वरए उँइँर ठिक ठर्दिबै म्हिइ खोंयोंइ आखाँबै छ्ह योंम्।” बिसि परमेश्‍वरए छ्वेर प्ह्रिइमुँ।
ROM 1:18 म्‍हिमैंए पाप नेरो आछ्याँबै केमैं परमेश्‍वरजी स्‍वर्गउँइँले म्रोंम्। परमेश्‍वरए बारेर्बै क्ह्रोंसेंन्बै ताँ चमैंए पापइ सेल् आपिं। छतमा खीजी निसाफ लमा ह्रिस उँइँम्।
ROM 1:19 परमेश्‍वरए बारेर म्‍हिमैंइ सेल् त्‍हुबै ताँ छर्लङ्गन् मुँ, तलेबिस्याँ परमेश्‍वरजी चमैंलाइ चु ताँ उँइँमिंइमुँ।
ROM 1:20 ह्‍युल बनेबै त्हे ओनोंन् परमेश्‍वरजी बनेबै सै म्रोंसि ताँन् म्‍हिमैंइ परमेश्‍वर खैब मुँ बिसि म्रोंल् योंइमुँ। परमेश्‍वरने खोंयोंन् बिलै तरिबै भों नेरो खीए बानि ब्योर आम्रोंबै सै मुँलेया म्‍हिमैंइ छेनाले क्‍होल् खाँम्। छतमा म्‍हिइ परमेश्‍वरलाइ ङो आसे बिबै निउँ लबै घ्याँ आरे।
ROM 1:21 चमैंइ परमेश्‍वरलाइ ङो सेनाबिलेया परमेश्‍वरलाइ लल् त्‍हुबै मान आल। धै चमैंइ खोंयोंइ परमेश्‍वरलाइ धन्‍यबाद आपिं, उल्‍टो चमैं ह्रोंसए सैंर तो मैंमुँ चन् लसि केर आफेब् तयाइ, छतमा चमैंए बुद्धि आरेबै खोक्रो सैं मिछु तयाइ।
ROM 1:22 “ङ बुद्धि मुँबै म्हि ग” बिसि मैंनाबिलेया चमैंल बुद्धि तिफुँइ आरे।
ROM 1:23 चमैंइ खोंयोंइ तरिबै परमेश्‍वरलाइ मान आलल्‍ले झन् नास तयाबै म्‍हि, खेदो, नमेमैं नेरो सर क्‍ल्याँबै प्हलाँ प्हुलुँमैंए कु बनेसि फ्योइ।
ROM 1:24 छतसि चमैंइ लदा ङ्हाँबै आछ्याँबै केमैंन् लरिगे बिसि परमेश्‍वरजी चमैंलाइ पिवाइ। धै चमैंइ खेंमैंए न्होंर्न फा पिन् तबै केमैं लइ।
ROM 1:25 चमैंइ परमेश्‍वरए क्‍ह्रोंसेंन्‍बै ताँ क्‍वेंब् पिसि स्‍योलिबै ताँ क्‍वेंसि तोन्दोंरि सै बनेबै परमेश्‍वरलाइ आम्हाँदिल्‍ले परमेश्‍वरजी बनेबै सैमैंए पूजा लसि चमैंन् म्हाँदिइ।
ROM 1:26 छतसि परमेश्‍वरजी चमैंलाइ चमैंए सैंर मैंब् धोंलेन् फापिन् तबै के लबर पिवामा चमैंए च्हमि रिमैंइ ह्रोंसए प्युँने मत्‍त्रे लबै के खें-खेंमैंए न्होंर्न लइ।
ROM 1:27 छलेन मुँयुँमैंज्‍यै या च्हमिरिमैंने लबै के पिसि घ्रिइ घ्रिए फिर सैं ह्‍यासि मुँयुँमैंइ मुँयुँमैंनेन् आछ्याँबै के लइ। झाइले चमैंइ खेंमैंए ज्युर्न लबै पापए सजैं योंइ।
ROM 1:28 म्‍हिमैंइ परमेश्‍वरलाइ पिंल् त्हुबै मान आपिं, छतसि चमैंइ तो लदा ङ्हाँम् लरिगे बिसि पिवाइ।
ROM 1:29 छतसि चमैं ताँन् खालर्बै आछ्याँबै के, दुष्‍ट के, लोब लब, ह्रिस लब, सैं आसब, आगुए न्होह्रों तबै केमैं लब, म्हि सैब, प्होंगि मिब, आगुए के न्होंवाब, फ्रम् ताँ लब,
ROM 1:30 आगुलाइ स्यारब, परमेश्‍वरलाइ आम्हाँदिब, खाबलाज्यै या म्‍हि आलब, थेब् प्‍हैंब, पाप केमैं लदै प्रब, आबा-आमाइ बिबै ताँ आङिंब,
ROM 1:31 छ्याँब आछ्याँब फेलबै बुद्धि आरेब, लम् बिबै के आलब नेरो आगुए फिर ल्हयो आखब्मैं तइमुँ।
ROM 1:32 छाबै म्‍हिमैं ताँन् सिल् त्हुम् बिसि परमेश्‍वरए छ्वेर प्ह्रिबै ताँ चमैंइ सेना बिलेया चमैंइ च केन् लम्। च्‍हौ मत्‍त्रे आङिं, अझै उल्‍टो च आछ्याँबै के लब्‍मैंने या क्ह्रिम्।
ROM 2:1 ओ अरूए फिर छ्याब् ल्‍हैदिबै म्हि, क्‍हि खाब् मुँलेया निउँ लबै घ्याँ तोइ आरे, तलेबिस्याँ क्‍हिइ अरूए फिर खैले छ्याब् ल्‍हैदिमुँ छाबन् के क्हिज्यै लम्। छतसि खाबइ आगुए फिर छ्याब् ल्हैदिमुँ च ह्रोंसन् दोषि ठर्दिम्।
ROM 2:2 परमेश्‍वरजी निसाफ लमा छाबै के लबै म्हिमैं दोषि ठर्दिम् बिबै ताँ ङ्योइ सेइमुँ।
ROM 2:3 छाबै आछ्याँबै के लइ बिसि क्हिइ अरूलाइ दोष ल्हैदिमुँ, दिलेया ह्रोंसज्यै च केन् लप्रम् बिस्याँ परमेश्‍वरजी निसाफ लमा क्‍हि स्योल् खाँम्‍मा? आखाँ!
ROM 2:4 परमेश्‍वरजी क्हिए फिर ल्हयो खम्, छतसि युनन् सजैं आपिं, बरु ल्हें समा क्हिलाइ सैदिसि म्हाँया लम्। दिलेया क्‍हिइ खीलाइ अझै म्‍हि आल! क्‍हिए सैं खी ङाँइ एरिगे बिसि परमेश्‍वरजी क्हिए फिर ल्हयो लम् बिब क्‍हिइ आसे वा?
ROM 2:5 दिलेया क्‍हिइ सैं सारो लसि परमेश्‍वर ङाँइ सैं एदा आङ्हाँ। छतसि परमेश्‍वरजी ठिक निसाफ लबै त्हिंइर क्‍हिइ अझै थेबै सजैं योंब्‍मुँ।
ROM 2:6 म्‍हिमैंइ खैबै के लइमुँ छाबन् इनाम परमेश्‍वरजी पिंब्‍मुँ।
ROM 2:7 तोन् तलेया छ्याँबै के लसि स्‍याबासि, इजेत नेरो खोंयोंइ आखाँबै छ्ह म्‍हैब्मैंलाइ परमेश्‍वरजी खोंयोंइ आखाँबै छ्ह पिंब्‍मुँ।
ROM 2:8 दिलेया प्होंगि कैगि लब्मैं, क्ह्रोंसेंन्बै ताँ आङिंब्मैं नेरो आछ्याँबै के लब्मैंए फिर बिस्याँ परमेश्‍वर ह्रिस खसि सजैं पिंब्‍मुँ।
ROM 2:9 आछ्याँबै के लबै ताँन् म्‍हिमैंए फिर दुःख कष्‍ट तब्‍मुँ, ओंसों यहूदी ह्रेंए फिर झाइले अरू ह्रेंमैंए फिर।
ROM 2:10 छलेन छ्याँबै के लब्‍मैंलाइ परमेश्‍वरजी स्‍याबासि, इजेत नेरो शान्‍ति पिंब्‍मुँ, ओंसों यहूदीमैंलाइ झाइले अरू ह्रेंमैंलाइ।
ROM 2:11 तलेबिस्याँ परमेश्‍वरजी खाबलाज्यै आफेल।
ROM 2:12 परमेश्‍वरजी मोशाने पिंबै ठिम अरू ह्रेंमैंने आरे। छतसि पाप लमा चमैं नास तम्, दिलेया च नास तबै सजैं च ठिमउँइँले आख। दिलेया यहूदीमैंइ बिस्याँ ठिमर्बै ताँ सेइमुँ। छतसि चमैं पाप लमा च ठिमउँइँलेन् दोषि ठर्दिम्।
ROM 2:13 तलेबिस्याँ ठिमर प्ह्रिबै ताँमैं थेइरि मत्‍त्रे परमेश्‍वरए उँइँरि ठिक आठर्दि, चर प्ह्रिब् धोंले प्रब्मैं मत्‍त्रे परमेश्‍वरए उँइँर ठिक ठर्दिम्।
ROM 2:14 मोशाने पिंबै ठिम आरेबै म्‍हिमैं ठिमर प्ह्रिब् धोंलेन् प्रम् बिस्याँ चमैंने ठिम आरेलैया ठिमर बिब् धोंले प्रबइले चमैं ह्रोंसए ल्हागिर ह्रोंसन् ठिम तम्।
ROM 2:15 चमैंइ ह्रोंसए सैंर्न ठिमर्बै ताँमैं प्‍ह्रिथेंइमुँ बिब खेंमैंए चाल चलनउँइँले उँइँम्। चमैंए सैंरै या छाबन् मैंम्, दिलेया चमैंइ खोंयों छ्याँबन् लइमुँ ङ्हाँम्, खोंयों आछ्याँब लइदो ङ्हाँम्।
ROM 2:16 छतमा निसाफ लबै त्हिंइर परमेश्‍वरजी येशू ख्रीष्‍टउँइँले म्‍हिमैंए सैं न्‍होंर्बै ताँमैंए निसाफ लब्‍मुँ। ङइ बिबै सैं तोंबै ताँइ बिब् धोंलेन् चु ताँ तब्मुँ।
ROM 2:17 दिलेया क्‍हेमैंए म्‍हाँजोरि खाब् मुँलेया “ङ यहूदी ग, ङइ परमेश्‍वरलाइ ङो सेम्,
ROM 2:18 परमेश्‍वरजी बिब् धोंले तो लल् त्‍हुम् बिब ङइ सेइमुँ,” बिसि ठिमर भर तसि थेब् प्हैंम्। धै ठिमइ लोमिंबै छ्याँब-छ्याँबै ताँमैं या क्हिइ क्वेंइमुँ।
ROM 2:19 “क्‍ह्रोंसेंन्बै ताँ आसेब्मैंलाइ ङइ लोल् खाँम्, झाइले मिछु खैबर प्रब्मैंलाज्यै चारबै ह्‍वे पिंल् खाँम्,
ROM 2:20 बुद्धि आरेब्‍मैंलाइ ङइ छ्याँबै ताँ लोमिंल् खाँम्, आक्होब्‍मैंलाइ ङइ छेनाले क्होमिंल् खाँम्। झाइले परमेश्‍वरए ठिम ङिने बालुन् मुँबइले क्होल् त्‍हुबै ताँन् ताँ ङइ सेइमुँ,” बिसि क्हि प्हैंसि पोंम्।
ROM 2:21 छले अरूलाइ छ्याँबै घ्याँर डोरेल् खाँम् बिबै म्हि ह्रोंसन् आछ्याँबै घ्याँर प्रब् वा? अरूने “ह्‍योल् आत” बिसि लोमिंबै म्हि ह्रोंसन् ह्‍योब् आ?
ROM 2:22 क्‍हिइ आगुनेम् “ब्यभिचार लल् आत!” बिब ह्रोंसन् ब्यभिचार लब् वा? क्‍हिइ कुमैंम् आखो बिब मन्‍दिरर्बै कुमैंन् ह्‍योब् आ?
ROM 2:23 परमेश्‍वरजी पिंबै ठिम क्‍हिने बालु मुँ बिसि क्‍हि प्‍हैंमुँ, दिलेया ठिमर मुँबै ताँ क्‍हिइ आम्हाँदि, धै परमेश्‍वरलाइ तो धोंइ आङ्हाँ, आङिं वा?
ROM 2:24 तलेबिस्याँ परमेश्‍वर ङो आसेब्मैंए म्हाँजोर परमेश्‍वरए मिं क्हेमैं यहूदीमैंइन वाइमुँ, बिसि परमेश्‍वरए छ्वेर प्ह्रिइमुँ।
ROM 2:25 परमेश्‍वरए ठिम म्हाँदिस्याँ ज्युर चिनु लब फायदन् तम्। दिलेया चिनु ललेया क्‍हिइ परमेश्‍वरए ठिम छेनाले आम्हाँदिस्‍याँ ज्युर चिनु आलबै अरू ह्रेंर्बै म्‍हि धोंन् क्‍हि तम्।
ROM 2:26 बरु ज्युर चिनु आलबै म्‍हिइ ठिमर्बै ताँ म्हाँदिइ बिस्‍याँ च परमेश्‍वरए उँइँर ज्युर चिनु लब् धोंन् तम्।
ROM 2:27 छतसि अरू ह्रेंर्बै म्‍हिमैंइ ज्युर चिनु आललेया ठिम म्हाँदिइ बिस्याँ, क्हेमैं यहूदीमैंलाइ चमैंइन दोषि ठर्दिब्मुँ। तलेबिस्याँ प्ह्रिबै ठिम क्हेमैंने मुँलेया, क्हेमैंइ ज्युर चिनु ललेया क्हेमैंइ ठिम आम्हाँदि।
ROM 2:28 यहूदीमैंइ लब् धों ललेया क्हि क्ह्रोंसेंन्बै यहूदी तल् आखाँ। छलेन ज्युर चिनु ललेया क्ह्रोंसेंन्बै यहूदी आत।
ROM 2:29 बरु सैं न्‍होंर परमेश्‍वरजी चिनु लबै म्‍हि क्‍ह्रोंसेंन्‍बै यहूदी ग। चु सैं न्‍होंर चिनु लबै के ठिमइ लल् आखाँ, चु परमेश्‍वरए प्ल्हइ लबै के ग। छाबै म्‍हिइ म्‍हिमैंउँइँले आङिं, परमेश्‍वरउँइँले मान योंम्।
ROM 3:1 छ तस्‍याँ यहूदी तसि तो फायदा तइ दि? धै ज्युर चिनु लसि तो फायदा मुँ?
ROM 3:2 ल्हें सैर चु केर फेम्! परमेश्‍वरजी ताँन् भन्दा ओंसों यहूदीमैंलाइन खीए पबित्र ताँ म्हाँदिबर पिंइ।
ROM 3:3 यहूदीमैं न्होंर्बै को-कोइइ खीए पबित्र बचन आक्वेंरि तो तइ दि? चमैंइ आक्वेंलै या परमेश्‍वर भर लल् खाँबन् मुँ।
ROM 3:4 ताँन् म्‍हिमैं स्‍योर्गु मुँलेया परमेश्‍वर क्ह्रोंसेंन्बै मुँ, खीजी स्योर आते। “क्‍हिजी क्ह्रोंसेंन्बै ताँ पोंमुँ, निसाफ तबै त्हेर क्‍हि ट्होगों तब्‍मुँ,” बिसि परमेश्‍वरए छ्वेर प्ह्रिइमुँ।
ROM 3:5 ङ्योइ लबै आछ्याँबै केमैंउँइँलेन् परमेश्‍वरजी लबै छ्याँबै केमैं म्हिमैंइ म्रोंम् बिस्याँ ङ्योइ तो बिब् दि? “खीए ह्रिस ङ्योए फिर उँइँमा परमेश्‍वरजी लल् आतबै के लइ!” बिब् वा? आङिं! (दिलेया म्हिमैंइ छलेन मैंल् खाँम्।)
ROM 3:6 छाबै ताँ कत्ति मैंल् आत! खी ठिक निसाफ लबै परमेश्‍वर ग! आस्याँ खीजी खैले ह्‍युलर्बै म्हिमैंए निसाफ छेनाले लल् खाँम्?
ROM 3:7 “ङइ लबै स्‍योलिबै ताँमैंइ लमा परमेश्‍वरजी ङइ योंल् त्हुबै सजैं पिंसि खीए मिं कैंडों लम् बिब सेना-सेन् ङ तले पापर च्होरिइमुँ?”
ROM 3:8 छतसि “परमेश्‍वरए छ्याँबै बानि झन् छेनाले म्रोंरिगे बिसि ङ्योइ झन् पाप लले।” बिम् रो बिसि को-कोइ म्‍हिमैंइ ङ्योए फिर स्योलिबै छ्याब् ल्‍हैदिम्। छले आगुए फिर छ्याब् ल्हैदिबै म्हिमैंइ थेबै दण्ड योंब्मुँ।
ROM 3:9 छ बिस्‍याँ अरू म्हिमैं भन्दा ङि यहूदीमैं ठिक मुँ वा? तिफुँइ आरे! तलेबिस्याँ यहूदी मुँलेया अरू ह्रेंमैं मुँलेया ताँन् म्हिमैं पापर्न मुँ बिसि ङइ ओंसों बिवाल् खाँइमुँ।
ROM 3:10 परमेश्‍वरए छ्वेर छले प्ह्रिइमुँ: “परमेश्‍वरए उँइँरि खाबज्यै या ठिक के आल, अँहँ ठिक के लबै म्हि घ्रि या आरे।
ROM 3:11 खीए बारेर्बै ताँ क्‍होबै म्‍हि खाबै आरे, खीलाइ म्हैब खाबै आरे।
ROM 3:12 ताँन् म्हिमैंइ आछ्याँबै घ्‍याँ क्हाइमुँ, ताँन् म्‍हिमैं केर आफेब् तइमुँ। ठिक के लब्मैं खाबै आरे, खाबज्यै ठिक के आल, अँहँ घ्रि या आरे।
ROM 3:13 चमैंइ पोंबै ताँमैं छगोंर थेंसि सइ आउबै सिनुए थाँ धों तम्। चमैंए लेइ स्‍योलिबै ताँ मत्‍त्रे पोंम्, चमैंए ताँ प्‍हुरिए बिख धों तम्।
ROM 3:14 चमैंए सुँइ खोंयोंन् बिलै गाल् नेरो सराप मत्‍त्रे झोंम्।
ROM 3:15 चमैं म्हि सैबर वारम्।
ROM 3:16 चमैं खनिर ह्‍यालेया म्‍हिमैंलाइ दुःख पिंसि सैब् म्‍लुब् लम्।
ROM 3:17 चमैंइ शान्‍तिए घ्‍याँ आसेइमुँ।
ROM 3:18 चमैं परमेश्‍वरने आङ्हिं।”
ROM 3:19 ठिमर्बै ताँ ठिम म्हाँदिब्मैंए ल्हागिर्न बिब ङिइ सेइमुँ। छतमा ताँन् ह्‍युलर्बै म्‍हिमैं परमेश्‍वरए उँइँर निसाफर रामा खाबज्‍यै या तोइ पोंबै घ्‍याँ आरे।
ROM 3:20 छतसि ठिमर्बै ताँमैं छेनाले म्हाँदिलै या परमेश्‍वरए उँइँरि ठिक ठर्दिल् आखाँ। तलेबिस्याँ ठिमर्बै ताँउँइँलेन् म्‍हिमैंइ पाप तो जा बिसि सेम्।
ROM 3:21 दिलेया तिंजोरोम् ठिम आम्हाँदिलैया खीए उँइँर म्हिमैं ठिक ठर्दिबै घ्‍याँ परमेश्‍वरजी उँइँमिंइमुँ। ठिम नेरो अगमबक्‍तामैंइ चु ताँए ग्वाइ पिंइमुँ।
ROM 3:22 छतमा येशू ख्रीष्‍टए फिर बिश्‍वास लब्मैं ताँनलाइ परमेश्‍वरजी ठिक ठर्दिम्। यहूदी नेरो अरू ह्रेंमैं खाबलाज्यै या खीजी आफेल।
ROM 3:23 तलेबिस्याँ ताँन् म्‍हिइ पाप लइमुँ, छतसि खी ङाँर फेनेल् आखाँइमुँ।
ROM 3:24 दिलेया परमेश्‍वरजी दयाम्हाँया लसि येशू ख्रीष्‍टउँइँले ताँन् म्हिलाइ छलेन् ठिक ठर्दिमिंइमुँ।
ROM 3:25 म्‍हिमैंए पाप मेटिदिमिंबै घ्‍याँ येशू तरिगे बिसि परमेश्‍वरजी ख्रीष्‍ट येशूलाइ ङ्योए पापए ल्हागिर ख्रो तसि सिबर कुल्मिंइ। छतसि ङ्योए ल्हागिर ख्रो तसि येशूजी को बग्दिइ बिब म्‍हिमैंइ क्वेंस्याँ चमैं परमेश्‍वरए उँइँरि ठिक ठर्दिम्। येशू युब् भन्दा ओंसोंन् म्हिमैंइ पाप ललेया परमेश्‍वरजी ह्रिस थाँम्‍दिसि म्‍हिमैंलाइ पापए सजैं आपिंइमुँ,
ROM 3:26 तलेबिस्याँ खीजी चमैं ङ्योने बालु खागु लइ, धै च ताँन् पापए सजैं येशूजी नोमिंइ। परमेश्‍वरजी ठिक निसाफ लमुँ धै येशूए फिर बिश्‍वास लब्मैं ताँनलाइ खीजी ठिक ठर्दिमिंम् बिसि उँइँमिंबै ल्हागिर्न खीजी छान् लइ।
ROM 3:27 छतसि ङ्योइ तले प्हैंल् त्हुइ? प्‍हैंबै ताँ तोइ आरे। ङ्योइ ठिमइ बिब् ङिंसि परमेश्‍वरए उँइँर ठिक ठर्दिस्‍याँ प्‍हैंबै घ्याँ या तमल, दिलेया येशू ख्रीष्‍टए फिर बिश्‍वास लसि मत्‍त्रे ठिक ठर्दिबइले प्‍हैंबै ताँ तोइ आरे।
ROM 3:28 छतसि ठिमइ बिब् म्हाँदिसि परमेश्‍वरए उँइँर ठिक ठर्दिल् आखाँ, दिलेया येशू ख्रीष्‍टए फिर बिश्‍वास लसि मत्‍त्रेन् परमेश्‍वरए उँइँरि म्‍हिमैं ठिक ठर्दिम्।
ROM 3:29 परमेश्‍वर यहूदीमैंए परमेश्‍वर मत्‍त्रे आङिं। अरू ह्रेंमैंलैया परमेश्‍वर ग।
ROM 3:30 तलेबिस्याँ परमेश्‍वर घ्रि मत्‍त्रे मुँ। छतसि ज्युर चिनु लबै यहूदी मुँलेया, ज्युर चिनु आलबै अरू ह्रेंमैं मुँलेया, ताँन् म्‍हिमैंइ येशू ख्रीष्‍टए फिर बिश्‍वास लसिन् मत्‍त्रे परमेश्‍वरए उँइँर ठिक ठर्दिम्।
ROM 3:31 येशू ख्रीष्‍टए फिर बिश्‍वास लसिन् मत्‍त्रे परमेश्‍वरए उँइँर ठिक ठर्दिम् बिस्याँ खीए ठिम केर आफेब तइ वा? कत्ति आत! बरु ङ्योइ खीए ठिम छेनाले म्हाँदिम्।
ROM 4:1 ङि यहूदीमैंए खे अब्राहाम परमेश्‍वरए उँइँर खैले ठिक ठर्दिइ? चए बारेर सैंर मैंले।
ROM 4:2 अब्राहाम केउँइँलेन् परमेश्‍वरए उँइँर ठिक ठर्दिस्‍याँ चलाइ प्‍हैंबै घ्‍याँ तमल, दिलेया परमेश्‍वरए उँइँरि चल प्‍हैंबै घ्याँ तोइ आरेल।
ROM 4:3 तलेबिस्याँ अब्राहामए बारेर ठिमर छले प्ह्रिइमुँ: “अब्राहामइ परमेश्‍वरए फिर बिश्‍वास लइ। चए बिश्‍वासइ लमा परमेश्‍वरजी चलाइ ठिक ठर्दिइ।”
ROM 4:4 अर्को नमुना: के लब्‍मैंइ नों सै योंम्, के लसि योंबै नों सै दान आङिं, म्हिमैंइ के लसेरो नों सै योंलन् त्हुम्।
ROM 4:5 धर्म-कर्म आलन बिलेया ठिक ठर्दिमिंबै परमेश्‍वरए फिर बिश्‍वास लस्याँ, चइ बिश्‍वास लबइले परमेश्‍वरजी चलाइ छ्याब् आरेबन् ठर्दिमिंम्।
ROM 4:6 धर्म-कर्म तोइ आलल्‍ले परमेश्‍वरए उँइँर ठिक ठर्दिबै म्‍हि बेल्‍ले ङ्‍हो सब् ग बिसि स्‍योंम्‍बै दाऊद म्रुँज्‍यै या छले बिइमुँ:
ROM 4:7 “चमैं बेल्‍ले ङ्‍हो सब्मैं ग! तलेबिस्याँ चमैंए छ्याब्मैं परमेश्‍वरजी क्षमा पिंइमुँ, धै चमैंए पापमैं खीजी मेटिमिंइमुँ।
ROM 4:8 याहवेहजी पापए हिसाब आकिंबै म्हि बेल्‍ले ङ्‍हो सब् ग!”
ROM 4:9 चु “ङ्‍हो सब् ग” बिबै ताँ ज्युर चिनु लबै यहूदीमैंए ल्हागिर मत्‍त्रे आङिं, ज्युर चिनु आलब्‍मैंए ल्हागिरै ग। तलेबिस्याँ ठिमर्बै ताँ ङिइ ओंसोंन् बिल, “अब्राहामइ परमेश्‍वरए फिर बिश्‍वास लइ। चए बिश्‍वासइ लमा परमेश्‍वरजी चलाइ ठिक ठर्दिमिंइ।”
ROM 4:10 परमेश्‍वरजी अब्राहाम खोंयों ठिक ठर्दिइ? चइ ज्युर चिनु लबै लिउँइँ उ ओंसोंन्? ज्युर चिनु लब् भन्दा ओंसोंन् च ठिक ठर्दिइ।
ROM 4:11 अब्राहामइ ज्युर चिनु लब् भन्दा ओंसोंन् परमेश्‍वरए फिर बिश्‍वास लबइले परमेश्‍वरजी चलाइ च त्हेर्न ठिक ठर्दिइ। च लिउँइँ परमेश्‍वरजी चलाइ ठिक ठर्दिबै चिनु तरिगे बिसि ज्युर चिनु लल् पिंइ। ज्युर चिनु लब् भन्दा ओंसोंन् अब्राहाम ठिक ठर्दिबइले ज्युर चिनु आललैया बिश्‍वास लब्‍मैंए खे अब्राहाम तइ, तलेबिस्याँ ज्युर चिनु आललैया म्‍हिमैंइ बिश्‍वास लसिन् परमेश्‍वरए उँइँर ठिक ठर्दिम्।
ROM 4:12 ज्युर चिनु लब् भन्दा ओंसोंन् अब्राहामइ परमेश्‍वरए फिर बिश्‍वास लइ। छतसि ज्युर चिनु लबै यहूदीमैं या अब्राहामइ धोंलेन् परमेश्‍वरए फिर बिश्‍वास लइबिस्‍याँ चमैंए खे अब्राहामन् ग।
ROM 4:13 अब्राहाम नेरो चए सन्तान ह्‍युलर्बै हकवालामैं तम् बिसि परमेश्‍वरजी फैबै बाछा अब्राहामइ ठिमर बिब् धोंले लसि बाछा फैब् आङिं, परमेश्‍वरए फिर बिश्‍वास लसि ठिक ठर्दिबइले परमेश्‍वरजी च नेरो चए सन्‍तानने चु बाछा फैइ।
ROM 4:14 ठिमर प्ह्रिबै ताँ म्हँदिब्‍मैं मत्‍त्रे ह्‍युलर्बै हाकवालमैं तम् बिस्याँ बिश्‍वास लसि फायदा आरे। छ तस्याँ बाछा फाक्‍कर्न तमल।
ROM 4:15 तलेबिस्याँ ठिमर्बै ताँ आम्हाँदिब्मैं म्रोंसि परमेश्‍वर ह्रिस खम्, दिलेया ठिमन् आरेस्याँ पाप तो जा बिसेया आसेमल।
ROM 4:16 परमेश्‍वरजी पिंम् बिसि फैबै बाछा अब्राहामए सन्‍तानमैंइ योंरिगे बिसि म्‍हिमैंइ बिश्‍वास लबइले परमेश्‍वरजी पिंइ। च थेबै दयाम्हाँया ठिमर्बै ताँमैं म्हाँदिबै सन्‍तानए ल्हागिर मत्‍त्रे आङिं, अब्राहामइ धोंले बिश्‍वास लब्‍मैंए ल्हागिरै ग। तलेबिस्याँ ङ्यो ताँनए खे अब्राहाम ग।
ROM 4:17 परमेश्‍वरए छ्वेर छले प्ह्रिइमुँ, “ङइ क्‍हिलाइ ह्रें-ह्रेंमैंए खे तल् पिंइमुँ।” अब्राहामइ परमेश्‍वरए फिर बिश्‍वास लबइले परमेश्‍वरए उँइँर अब्राहाम ङ्यो ताँनए खे ग। परमेश्‍बरजी सियाबै म्हिलाइ सोगों लमिंम्, धै म्‍हिमैंइ लल् आखाँबै सै या खीजी पोंसि तल् लमिंम्।
ROM 4:18 छलेन “क्‍हिए सन्‍तानै या च्योलै आखाँल्‍ले तब्‍मुँ” बिसि परमेश्‍वरजी चने बिल। छतसि प्हसे तम् बिसि तिफुँइ आशा आरेबै त्हेरै या अब्राहामइ बिश्‍वास लसि आशा थेंबइले च ह्रें-ह्रेंमैंए खे तइ।
ROM 4:19 च त्हेर अब्राहाम प्र बर्ष तबर होंल च सिबै त्हे तयालैया, ह्रोंसए प्ह्रेंस्यो सारा या माँब् तसि प्‍हसे तल् आखाँ बिब् सेलैया अब्राहामइ परमेश्‍वरए ताँर कत्ति संका आल।
ROM 4:20 परमेश्‍वरजी फैबै बाछा चइ छेनाले बिश्‍वास लसि संका आलल्‍ले बिश्‍वासर भोंब तसि परमेश्‍वरए मिं क्वेइ।
ROM 4:21 तलेबिस्याँ परमेश्‍वरजी फैबै बाछा खैले बिलेन् तब्‍मुँ बिसि चइ क्वेंल।
ROM 4:22 छले अब्राहामइ बिश्‍वास लबइले “परमेश्‍वरजी चलाइ ठिक ठर्दिइ।”
ROM 4:23 “परमेश्‍वरजी चलाइ ठिक ठर्दिइ” बिबै ताँ चए ल्हागिर मत्‍त्रे प्‍ह्रिब् आङिं।
ROM 4:24 ङ्योए ल्हागिरै या प्‍ह्रिब् ग। तलेबिस्याँ प्रभु येशूलाइ सिबइले धबै सोगों लमिंबै परमेश्‍वरए फिर ङ्योइ बिश्‍वास लइमुँ। चु बिश्‍वासइ लमा ङ्योलाज्यै या “परमेश्‍वरजी ठिक ठर्दिमिंब्‍मुँ।”
ROM 4:25 ङ्योइ लबै पाप त्होमिंबै ल्हागिर येशू ख्रो तसि सिमिंइ, धै ङ्योलाइ ठिक ठर्दिबै ल्हागिर परमेश्‍वरजी येशूलाइ धबै सोगों लमिंइ।
ROM 5:1 ङ्योइ बिश्‍वास लबइले परमेश्‍वरए उँइँरि ठिक ठर्दिसि प्रभु येशू ख्रीष्‍टउँइँले ङ्यो परमेश्‍वरने क्ह्रिल् योंइमुँ।
ROM 5:2 खीए फिर बिश्‍वास लबइले ङ्योइ खीए दयाम्हाँया योंइमुँ। परमेश्‍वरए दयाम्हाँया तोगो ङ्योइ योंइमुँ, छतसि ङ्योइ परमेश्‍वरए चारबै ह्‍वे योंम् बिबै आशा थेंसि ङ्यो सैं तोंम्।
ROM 5:3 च्‍हौ मत्‍त्रे आङिं, दुःख तलेया ङ्यो सैं तोंम्, तलेबिस्याँ दुःख तस्‍याँ ङ्योइ दुःख सैदिबै भों योंम् बिब ङ्योइ सेम्।
ROM 5:4 छलेन दुःख सैदिबै भोंइ ङ्योए बिश्‍वास भोंब तमुँ, बिश्‍वासर भोंबइले ङ्योइ आशा योंल् खाँम्।
ROM 5:5 ङ्योइ थेंबै आशार ङ्यो सैं च्योंब तल् आपिं, तलेबिस्याँ परमेश्‍वरजी खीए पबित्र प्ल्ह ङ्योलाइ पिंइमुँ, छतसि परमेश्‍वरजी ङ्योए फिर बेल्‍ले म्हाँया लइमुँ बिसि पबित्र प्ल्हजी ङ्योए सैं न्‍होंर छेनाले सेल् पिंम्।
ROM 5:6 तलेबिस्याँ मुक्‍ति योंबर ङ्योइ तोइ लल् आखाँमै या ख्रीष्‍ट ह्रोंसन् युसि पापिमैंए पाप त्होमिंबर ठिक त्हेर सिमिंइ।
ROM 5:7 ठिक के लबै म्‍हिए ल्हागिर बेल्‍ले गारोले को-कोइ सिलै, छ्याँबै के लबै म्‍हिए ल्हागिरै या को-कोइ सिबै आँट ललै।
ROM 5:8 दिलेया परमेश्‍वरजी खीए म्हाँया ङ्योए फिर कति ल्हें मुँ बिसि छले उँइँइँमुँ, ङ्यो पापि मुँमन् ङ्योए पाप त्होमिंबर येशू ख्रीष्‍ट सिमिंइ!
ROM 5:9 छतसि ङ्योए पापए ल्हागिर येशू ख्रो तसि सिमिंबइले ङ्यो परमेश्‍वरए उँइँर ठिक ठर्दिइमुँ। छतसि परमेश्‍वरए ह्रिसउँइँले येशूजी ङ्योलाइ जोगेमिंब्मुँ।
ROM 5:10 तलेबिस्याँ ङ्यो परमेश्‍वरए शत्तुर मुँमन् खीए च्‍ह येशू ख्रीष्‍ट सिमिंबइले परमेश्‍वरजी ङ्यो खीए म्हिमैं तल् पिंइमुँ बिस्याँ, खीए म्हिमैं तबइले झन् ख्रीष्‍टए कोजी ङ्योलाइ खैलेबिलेन् जोगेमिंब्मुँ।
ROM 5:11 च्‍हौ मत्‍त्रे आङिं, येशू ख्रीष्‍टउँइँले ङ्यो परमेश्‍वरर सैं तोंरिइमुँ, तलेबिस्याँ येशू ख्रीष्‍टउँइँले ङ्यो परमेश्‍वरए म्हिमैं तल् योंइमुँ।
ROM 5:12 ताँन् भन्दा ओंसोंबै म्‍हि आदमइ परमेश्‍वरजी बिब् आङिंबइले ह्‍युलर पाप तखइ, च पापइ लमा म्हिमैं सिल् त्‍हुइ। ताँन् म्‍हिमैंइ पाप लबइले म्‍हिमैं ताँन् सिल् त्हुइ।
ROM 5:13 परमेश्‍वरजी ठिम पिंब् भन्दा ओंसों या ह्‍युलर म्‍हिमैंइ पाप लमल, दिलेया ठिम आरेबइले पापए हिसाब आत।
ROM 5:14 दिलेया आदमए पलो ओंनों मोशाए पलो समा ताँन् म्‍हिमैं सिल् त्‍हुइ। आदमइ लब् धोंबै के आलबै म्हिमैं या सिल् त्हुइ। आदमइ लबै केए नों ताँन् म्‍हिमैंइ योंब् धोंले येशू ख्रीष्‍टजी लबै केए नों या ताँनइ योंम्। छतसि येशू ख्रीष्‍टए नमुना आदम तइ।
ROM 5:15 दिलेया चमैं ङ्हिंए के स्योन् मुँ: तलेबिस्याँ आदम बिबै म्‍हि घ्रिइ लबै पापउँइँले ल्हें म्‍हिमैं सिइ। दिलेया परमेश्‍वरए दयाम्हाँया नेरो येशू ख्रीष्‍ट बिबै म्‍हि घ्रिउँइँले ल्हें म्हिइ छलेन् आशिक योंइ।
ROM 5:16 छलेन् पिंबै आशिक आदम बिबै म्हि घ्रिइ लबै पापए नों धों तब आङिं। आदमइ लबै पापउँइँले म्‍हिमैं दोषि ठर्दिसि चमैंइ सजैं योंइ। दिलेया म्‍हिमैंइ पाप ल्हें लनाबिलेया परमेश्‍वरजी खीए थेबै दयाम्हाँयाउँइँले आशिक पिंसि म्‍हिमैंलाइ छलेन् ठिक ठर्दिमिंइ।
ROM 5:17 म्‍हि घ्रिए पापइ लमा ताँन् म्‍हिमैं सिल त्हुइ बिस्याँ, झन ल्हें परमेश्‍वरए दयाम्हाँया नेरो येशू ख्रीष्‍टए छ्याँबै केउँइँले आशिक छलेन् योंबै म्हिमैंइ येशू ख्रीष्‍टउँइँले खोंयोंइ आखाँबै छ्ह योंब्‍मुँ।
ROM 5:18 खैले म्हि घ्रिए पापइ लमा ताँन् म्हिमैंइ पापए सजैं योंल् त्‍हुइ, छलेन म्हि घ्रिए छ्याँबै केइ लमा ताँन् म्‍हिमैं परमेश्‍वरए उँइँर ठिक ठर्दिसि खोंयोंइ आखाँबै छ्ह योंब् तइ।
ROM 5:19 खैले म्हि घ्रिइ परमेश्‍वरए ताँ आङिंसि ताँन् म्‍हिमैं पापि तइ, छलेन येशू ख्रीष्‍टजी परमेश्‍वरजी बिब् ङिंबइले ल्हें म्‍हिमैं परमेश्‍वरए उँइँरि ठिक ठर्दिल् योंब्‍मुँ।
ROM 5:20 पाप कति ल्हें लइ बिब् सेरिगे बिसि परमेश्‍वरजी ठिम पिंइ। खैले पाप ल्हें ततै ह्‍याइ, छलेन परमेश्‍वरए दयाम्हाँया झन् ल्हें ततै ह्‍याइ।
ROM 5:21 पापइ लमा खैले म्हिमैं सिल् त्हुइ, छलेन परमेश्‍वरए दयाम्हाँयाजी लमा खीजी ङ्योलाइ ठिक ठर्दिमिंइमुँ, धै प्रभु येशू ख्रीष्‍टउँइँले ङ्योइ खोंयोंइ आखाँबै छ्ह योंइमुँ।
ROM 6:1 छतसि ङ्योइ तो बिले? परमेश्‍वरए दयाम्हाँया झन् ल्हें योंरिगे बिसि ङ्यो झन् पापन् लरिब् आ?
ROM 6:2 कत्ति आङिं! छ लब आत। पापए लेखि ङ्यो सिल् खाँइ, छतसि ङ्यो अझै पापन् लरिब् आ?
ROM 6:3 क्‍युर प्‍ल्हुँसि बप्‍तिस्‍मा किंबै मतलब क्‍हेमैंइ म्‍लेयाइ वा? येशू ख्रीष्‍टए मिंर ङ्योइ बप्‍तिस्‍मा किंमा प्रभुने बालुन् सिब् ग बिब क्‍हेमैंइ सेइमुँ।
ROM 6:4 छतसि ङ्योइ बप्‍तिस्‍मा किंमा येशूने बालुन् सिसि पाइ, धै थेबै शक्‍ति मुँबै परमेश्‍वर आबाजी येशू ख्रीष्‍टलाइ सिबउँइँले धबै सोगों लमिंइ, छतसि ङ्योइ ओंसों लब् धोंबै आछ्याँबै केमैं पिसि छ्याँबै केमैं लल् त्हुम्।
ROM 6:5 येशू सिमिंबइले ङ्यो या खीनेन् घ्रिन् तइमुँ बिस्याँ, येशू धबै सोगों तब् धोंले ङ्यो या धबै सोगों तब्‍मुँ।
ROM 6:6 ङ्योइ पाप आलरिगे धै ङ्यो पापए न्होंर आटिरिगे बिसि परमेश्‍वरजी ङ्योए ओंसोंबै छ्ह येशू ख्रीष्‍टने बालु क्रूसर च्योवाइमुँ बिब ङ्योइ सेइमुँ।
ROM 6:7 तलेबिस्याँ सियाल् खाँबै म्‍हिइ पाप आल।
ROM 6:8 ङ्यो ख्रीष्‍टने बालुन् सिइमुँ बिस्याँ, खीने बालुन् सोब्मुँ बिसि ङ्योइ बिश्‍वास लम्।
ROM 6:9 तलेबिस्याँ ख्रीष्‍ट सिसेया धबै सोगों तइमुँ, तारे खी खोंयोंइ आसि, खीलाइ कालइ तोइ लल् आखाँ बिसि ङ्योइ सेइमुँ।
ROM 6:10 पाप नास लवाबै ल्हागिर ख्रीष्‍ट तिला सिमिंइ, दिलेया ख्रीष्‍ट धबै सोसि परमेश्‍वरए सैंर मैंब् धोंबै के लसिन् टिरिइमुँ।
ROM 6:11 च धोंलेन् क्‍हेमैंज्‍यै या ह्रों-ह्रोंसलाइ पापए लेखि सिसि परमेश्‍वरए मान लबै ल्हागिर ख्रीष्‍टने बालुन् सोरिइमुँ बिसि मैंल् त्‍हुम्।
ROM 6:12 छतसि पाप लबै सैं आखरिगे बिसि क्‍हेमैंए सिल् त्‍हुबै ज्युर पाप लल् आपिंन्।
ROM 6:13 छलेन ह्रोंसए ज्युर्बै भागमैंलाइ पाप केमैं लबर आल्हैदिद्। बरु सिबइले धबै सोगों तबै म्‍हि धोंले छ्याँबै के लबै ल्हागिर ह्रोंसलाइन परमेश्‍वरए योर पिंवाँन्।
ROM 6:14 तारे क्‍हेमैंए फिर पापइ तोइ लल् खाँरिब् आरे, तलेबिस्याँ क्‍हेमैं ठिमए न्होंर आरे, परमेश्‍वरए दयाम्हाँयाए न्‍होंर मुँ।
ROM 6:15 तारे तो बिले? ङ्यो ठिमए न्होंर आरे, दयाम्हाँया न्‍होंर मुँ बिसि पाप लब् वा? आङिं, लल् आत!
ROM 6:16 क्हेमैंइ ह्रोंसलाइ खाबै योर पिंवाँमुँ? चए केब्छैंन् क्हेमैं तल् त्‍हुम्। पापए केब्छैं तसि चइ बिब ङिंइ बिस्याँ क्हि सिल् त्हुब्मुँ, दिलेया परमेश्‍वरजी बिब ङिंइ बिस्याँ खीए उँइँर क्‍हेमैं ठिक ठर्दिब्मुँ।
ROM 6:17 ओंसों क्‍हेमैं पापए केब्छैं मुँल, दिलेया तोगो क्‍हेमैंए सैं न्होंउँइँले परमेश्‍वरजी बिबै ताँ ङिंब्मैं तइमुँ। छतसि परमेश्‍वरलाइ धन्‍यबाद तरिगे।
ROM 6:18 क्‍हेमैं पाप के लब् पिसि परमेश्‍वरए के लब्मैं तइमुँ।
ROM 6:19 क्हेमैंइ क्होल् आखाँ उ बिसि ङइ क्‍होल्‍ले बिरिइमुँ। ओंसों क्हेमैंइ खैले ह्रोंसए यो प्हलेलाइ पापर च्होवाबै आछ्याँबै केमैं लल् पिंल। छलेन तारे पापर आच्होरिगे बिसि ह्रोंसए यो प्हले परमेश्‍वरए के लबै ल्हागिर पिंवाँन्।
ROM 6:20 ओंसों क्‍हेमैं पापए न्होंर टिमा परमेश्‍वरए उँइँरि ठिक तबै के लल् आत्हुमल।
ROM 6:21 ओंसों लबै आछ्याँबै केमैं मैंसि क्हेमैं तिंजोरो फापिम्। च केमैं लसि क्‍हेमैंइ तो योंइ? च केमैं लइरिम् क्हेमैं सिल् त्हुम्।
ROM 6:22 दिलेया तारे क्‍हेमैं पापउँइँले फ्रेसि परमेश्‍वरए के लबै म्हिमैं तइमुँ। छतसि तारे क्हेमैंने तल् त्हुबै रो छ्याब् आरेबै छ्ह ग। छले क्हेमैंइ खोंयोंइ आखाँबै छ्ह योंम्।
ROM 6:23 तलेबिस्याँ पाप लब्मैंइ योंबै नों सिब ग! दिलेया परमेश्‍वरजी छलेन् पिंबै दान ङ्योए प्रभु येशू ख्रीष्‍टउँइँले खोंयोंइ आखाँबै छ्ह योंब् ग।
ROM 7:1 ओ अलि-अङाँमैं, क्हेमैं ठिमर्बै ताँ क्होब्मैंने ङ बिमुँ: म्हिमैं सोगों मुँन् समा मत्‍त्रे ठिमइ के लम् बिब क्‍हेमैंइ आसेइमुँ वा?
ROM 7:2 नमुना घ्रि बिले, ब्ह्‍या लबै च्हमिरिल ह्रोंसए प्युँ सोन् समा ठिमर बिब् धोंले च प्युँनेन् टिल् त्हुम्। दिलेया प्युँ सियास्‍याँ च च्हमिरिलाइ ठिमइ फैल् आखाँ।
ROM 7:3 दिलेया ह्रोंसए प्युँ मुँन-मुँन् अरू मुँयुँने बालु प्रइबिस्‍याँ च ब्यभिचार लबै च्हमिरि तब्‍मुँ। दिलेया प्युँ सियाइबिस्‍याँ च च्हमिरि ठिमए न्होंर टिल् आत्हु। झाइले अर्को मुँयुँने बालु ब्ह्‍या ललेया चए फिर ब्यभिचारए छ्याब् आल्‍हैदि।
ROM 7:4 छतसि ओ ङए अलि-अङाँमैं, सिबउँइँले धबै सोगों तबै ख्रीष्‍टए ज्युने घ्रिन् तसि परमेश्‍वरए सैंर मैंब् धोंले लल् खाँरिगे बिसि ख्रीष्‍ट सिब् धोंलेन् क्हेमैं या ठिमए लेखि सिइमुँ।
ROM 7:5 ओंसों ङ्यो पाप लदै छ्ह थोरिल, छतसि कालए सुँर फेनेबै आछ्याँबै केमैं लबर ठिमइ भों पिंसि पाप लदा ङ्हाँबै सैं खसि ङ्योइ ज्युर आछ्याँबै के लमल।
ROM 7:6 दिलेया तारे ङ्योलाइ फैथेंबै ठिमए लेखि ङ्यो सियाइमुँ। छतसि ङ्यो ठिमइ बिब् धोंले ओंसोंबै तरिकाले आङिं, परमेश्‍वरए प्ल्हजी लोमिंब् धोंले छारा तरिकाले सेवा लम्।
ROM 7:7 छ बिस्‍याँ ङ्यो तो बिले? ठिमन् पाप वा? कत्ति आङिं! ठिम आरेस्याँ ङइ पाप बिब तो जा बिसि आसेमल, तलेबिस्याँ ठिमइ “लोब आलद्” आबिस्‍याँ ङइ लोब लब तो जा बिसि आसेमल,
ROM 7:8 दिलेया ठिमइ “लोब आलद्” बिबइले ङए आछ्याँबै इच्‍छाइ मौका च्ह्‍यासि ङए सैंइ ल्हें खालर्बै लोब खल् पिंमल, तलेबिस्याँ ठिम आरेबै त्हेर आछ्याँबै केमैं ललेया ङइ आछ्याँबै के लइ बिसि ङइ आसेमल।
ROM 7:9 ठिमइ बिबै ताँ आसेमा ङ सोगों मुँल, दिलेया ङइ ठमर्बै ताँ था सेबइले आछ्याँबै इच्छा भोंब तइ, ङ बिस्याँ सिल् त्हुइ।
ROM 7:10 छले छ्ह पिंबै ठिमइ ङलाइ सैवाइ।
ROM 7:11 तलेबिस्याँ पापइ ठिमर्बै ताँउँइँले मौका च्ह्‍यासि ठिमउँइँले ङलाइ लुसि सैवाइ।
ROM 7:12 परमेश्‍वरजी पिंबै ठिम पबित्र मुँ, धै चुइ ठिक ताँ लोमिंम्, म्‍हिमैंए ल्हागिर चु छ्याँब मुँ।
ROM 7:13 छ बिस्याँ छ्याँबै ठिमइ ङलाइन सैवाइ बिब् तम्‍मा? आत! बरु पाप पापए रुपर्न म्रोंरिगे बिसि पापइ छ्याँबै केउँइँले ङलाइ सैवाब् ग। तलेबिस्याँ ठिमइ पाप बेल्‍ले आछ्याँबै सै ग बिसि छेनाले उँइँम्।
ROM 7:14 ठिम पबित्र प्ल्हउँइँले खबै छ्याँबै सै ग बिसि ङ्योइ सेइमुँ, दिलेया ङ ह्रोंसए सैंर मैंब् धोंले आछ्याँबै केमैं लप्रबै म्हि तबइले ङ केब्छैं तयाइमुँ धै चए न्होंर मुँ।
ROM 7:15 ङइ लबै के तले ङइ लरिइमुँ बिसि ङइ था आसे, तलेबिस्याँ ङइ लदा ङ्हाँबै छ्याँबै के आल, बरु लदा आङ्हाँबै आछ्याँबै केन् ङइ लम्।
ROM 7:16 ङइ लदा आङ्हाँबै आछ्याँबै केमैंन् लइ बिस्याँ ठिम छ्याँब मुँ बिसि ङइ म्हाँदिम्।
ROM 7:17 छतसि आछ्याँबै केमैं लब ङइ आङिं, ङए न्‍होंर्बै पापइ लब् ग।
ROM 7:18 ङए न्होंरि, अथवा ङए ओंसोंबै बानिरि, छ्याँबै सै तोइ आरे बिसि ङइ सेइमुँ। तलेबिस्याँ छ्याँबै के लदा ङ्हाँलेया ङइ च के लल् आखाँ।
ROM 7:19 ङइ लदा ङ्हाँबै छ्याँबै के ङ आल, बरु ङइ लदा आङ्हाँबै आछ्याँबै केन् ङइ लम्।
ROM 7:20 छतसि ङइ लदा आङ्हाँबै केन् लम् बिस्‍याँ च के लब ङ आङिं, बरु ङए सैंर टिबै पापइ लब् ग।
ROM 7:21 छतसि ङइ छले क्होइमुँ: छ्याँबै के लदा ङ्हाँना-ङ्हाँन् ङइ पाप मत्‍त्रे लम्,
ROM 7:22 तलेबिस्याँ ङए सैं घ्रिइ परमेश्‍वरए ठिम म्हाँदिबर बेल्‍ले सैं तोंम्,
ROM 7:23 दिलेया ङ न्होंर्बै अर्को सैंइ ङए सैंइ खोबै ठिमए बिरोध लम्। च बिरोध लबै सैंइ ङलाइ आछ्याँबै इच्‍छाए न्होंर फैवाम्।
ROM 7:24 ओहो, ङ खैबै ङ्‍हो आसबै म्‍हि! ङलाइ सैवाबै आछ्याँबै इच्‍छाए न्होंरउँइँले खाबइ ङ जोगेमिंब् ङ्‍हे?
ROM 7:25 परमेश्‍वरलाइ धन्‍यबाद तरिगे, तलेबिस्याँ प्रभु येशू ख्रीष्‍टजीन् ङ्योलाइ जोगेमिंइमुँ! छतमा ङए हालत छाबन् ग। ङइ ह्रोंसए सैंइ मत्‍त्रे परमेश्‍वरए ठिम म्हाँदिम्, दिलेया ङए ओंसोंबै बानिइ पापए सेवा लम्।
ROM 8:1 छतसि ख्रीष्‍ट येशूए फिर बिश्‍वास लब्‍मैंए ल्हागिर दण्ड आरे।
ROM 8:2 तलेबिस्याँ ठिमइ ङइ लबै पापए निसाफ लसि सिबै दण्ड पिंलेया परमेश्‍वरए प्ल्हए शक्‍तिजी ङलाइ ख्रीष्‍ट येशूने घ्रिन् लसि छारा छ्ह पिंसि च दण्डउँइँले फ्रेमिंइमुँ।
ROM 8:3 म्‍हिए आछ्याँबै इच्‍छाए भोंलाइ ट्होरिगे बिसि परमेश्‍वरजी खीए च्ह येशूलाइ ख्रो तबर चु ह्‍युलर कुल्‍मिंइ। परमेश्‍वरए च्‍ह येशूजी म्‍हिए कमजोरि आछ्याँबै बानि मुँबै रुप किंसि ख्रो तसि म्हिमैंए आछ्याँबै इच्‍छाए भोंलाइ नास लवाइ। छले ठिमइ लल् आखाँबै के परमेश्‍वरजी लमिंइ।
ROM 8:4 ङ्योए ओंसोंबै बानिइ बिब् ङिंसि आङिं, बरु परमेश्‍वरए पबित्र प्ल्हजी बिब् ङिंबइले ङ्योइ ठिमइ बिबै ठिक ताँमैं ङिंल् खाँरिगे बिसि परमेश्‍वरजी छ लइ।
ROM 8:5 छ्ह थोबै तरिका ङ्हिं मुँ: घ्रि, ह्रोंसए ओंसोंबै बानि अनुसार प्रब्मैंए सैं ओंसोंबै बानिए इच्‍छार्न ह्‍याम्। अर्को, परमेश्‍वरए प्ल्हजी बिब् धोंले प्रब्मैं खीए प्ल्हए इच्‍छार्न सैं ह्‍याम्।
ROM 8:6 ओंसोंबै बानिए इच्‍छार सैं ह्‍यास्याँ म्‍हि सिम्, परमेश्‍वरए प्ल्हए इच्‍छार सैं ह्‍यास्याँ म्‍हिइ छारा छ्ह नेरो शान्‍ति योंम्।
ROM 8:7 छतसि ओंसोंबै बानिए लिलि प्रब्मैं परमेश्‍वरए शत्तुर ग, तलेबिस्याँ चमैंइ ठिमर्बै ताँ आम्हाँदि, म्हाँदिलै या आखाँ।
ROM 8:8 ओंसोंबै बानिए लिलि प्रब्‍मैंइ परमेश्‍वरए सैं तोंन् लल् आखाँ।
ROM 8:9 दिलेया परमेश्‍वरए प्ल्ह क्‍ह्रोंसेंन्‍ले क्‍हेमैंने टिस्याँ क्‍हेमैं ओंसोंबै बानिए लिलि आप्र, बरु परमेश्‍वरए प्ल्हए लिलि प्रम्। येशू ख्रीष्‍टए प्ल्ह आरेबै म्‍हि ख्रीष्‍टल् आङिं।
ROM 8:10 दिलेया क्‍हेमैंए ओंसोंबै बानि आछ्याँब तबइले ज्यु सिल् त्हुम्। छ तलेया क्‍हेमैंए सैंर येशू ख्रीष्‍ट टिस्याँ क्‍हेमैं परमेश्‍वरए उँइँर ठिक ठर्दिमुँ, धै क्‍हेमैंए प्ल्ह सोम्।
ROM 8:11 चए फिरै या येशू सिसेया परमेश्‍वरजी खीलाइ धबै सोगों लमिंइ। छतसि खीए प्ल्ह क्‍हेमैंए सैंर टिस्याँ ख्रीष्‍टलाइ सोगों लमिंबै परमेश्‍वरए प्ल्हजी क्‍हेमैंए सिल् त्‍हुबै ज्यु या सोगों लमिंब्मुँ।
ROM 8:12 छतसि ओ अलि-अङाँमैं, तारे ङ्योए आछ्याँबै बानिइ ल्हैदिब ङ्योइ ङिंल् आत्‍हु।
ROM 8:13 तलेबिस्याँ ह्रोंसए आछ्याँबै बानिइ बिब् ङिंस्‍याँ क्‍हेमैं सिल् त्‍हुम्। दिलेया परमेश्‍वरए प्ल्हए भोंउँइँले क्‍हेमैंइ ह्रोंसए ओंसोंबै आछ्याँबै बानिमैं पिवास्‍याँ क्‍हेमैंए प्ल्ह सोब्‍मुँ।
ROM 8:14 परमेश्‍वरए प्ल्हजी डोरेबै घ्‍याँर प्रब्मैं परमेश्‍वरए च्‍ह-च्हमिमैं ग।
ROM 8:15 तलेबिस्याँ परमेश्‍वरजी क्‍हेमैंलाइ पिंबै प्ल्हजी क्‍हेमैंलाइ क्ल्हे म्रोंसि ङ्हिंबै केब्छैं धों तल् आत्हुब् लमिंइमुँ, बरु पबित्र प्ल्हजी क्‍हेमैंलाइ परमेश्‍वरए च्‍ह-च्हमिमैं लमिंइ, छतसि खीए पबित्र प्ल्हए भोंउँइँले ङ्योइ परमेश्‍वरने “आबा, ओ ङए आबा,” बिल् योंइमुँ।
ROM 8:16 परमेश्‍वरए प्ल्ह ङ्योए सैं न्‍होंर टिम्, छतसि खीजीन् ङ्योलाइ परमेश्‍वरए च्‍ह-च्हमिमैं ग बिसि ग्वाइ पिंम्।
ROM 8:17 ङ्यो परमेश्‍वरए च्‍ह-च्हमिमैं तसेरो परमेश्‍वरजी खीए च्‍ह-च्हमिमैंए ल्हागिर साँथेंबै अँश ङ्योइ योंब्‍मुँ, धै परमेश्‍वरजी ख्रीष्‍टए ल्हागिर साँथेंबै अँश या ङ्योइ खीने बालो योंब्‍मुँ। तलेबिस्याँ येशू ख्रीष्‍टजी दुःख नोब् धोंले ङ्योज्यै या छाबै दुःख नोस्‍याँ खीजी योंबै मान ङ्योज्यै या योंब्‍मुँ।
ROM 8:18 चु छ्हर ङ्योइ भुँदिबै दुःखमैं लिउँइँ योंबै सुखने च्हैंल् आखाँ बिसि ङइ सेइमुँ।
ROM 8:19 परमेश्‍वरजी बनेबै तोन्दोंरि सैइ परमेश्‍वरए च्‍ह-च्हमिमैं खाब्मैं ङ्‍हे बिसि ङो सेबै त्हिंइ खैंमा ङ्‍हे बिसि ह्रेरिइमुँ।
ROM 8:20 तलेबिस्याँ परमेश्‍वरजी बनेबै तोन्दोंरि सै केर आफेब् तयाइमुँ, दिलेया छ तब ह्रोंसए इच्‍छाइ आङिं, परमेश्‍वरजीन् छ लवाब् ग।
ROM 8:21 तोन्दोंरि सैमैं नास तबउँइँले खीजी तिगें जोगेमिंब्मुँ, धै परमेश्‍वरए च्‍ह-च्हमिमैंइ खोंयोंइ आखाँबै छ्ह योंब् धोंले सृष्‍टि या खोंयोंन् बिलै नास तल् आत्हु बिसि सृष्‍टिइ आशा लइमुँ।
ROM 8:22 सुत्‍केरि बेथा ल्‍हैदिब् धोंले ताँन् सृष्‍टिइ तिंयाँ समा दुःखए सो सेंरिइमुँ बिसि ङ्योइ सेइमुँ।
ROM 8:23 सृष्‍टि मत्‍त्रे आङिं, ङ्योज्‍यै या दुःखए सो सेंसिन् परमेश्‍वरए घ्‍याँ ङ्‌ह्‍योरिइमुँ। परमेश्‍वरजी लिउँइँ पिंबै ताँन् आशिकए फुइ तोगोइन खीए पबित्र प्ल्ह ङ्योए ल्हागिर पिंइमुँ। छतमा खीजी ङ्योलाइ खीए च्‍ह-च्हमिमैं लमिंसि जोगेमिंब्मुँ बिसि ङ्योइ घ्‍याँ ङ्‌ह्‍योरिइमुँ।
ROM 8:24 ङ्योइ थेंबै आशा ताँन् पूरा तरिगे बिसि परमेश्‍वरजी ङ्योलाइ जोगेमिंइ। (म्रोंबै सैमैंल खाबज्‍यै आशा आल।
ROM 8:25 दिलेया आम्रोंबै सैए आशा ङ्योइ थेंस्‍याँ ङ्योइ चए ल्हागिर तो दुःख तलेया ढुक्‍कले पैंरिल् त्‍हुम्।)
ROM 8:26 छलेन ङ्योइ प्राथना खैले लल् त्हुम बिब ङ्योइ आसेबै त्हेर पबित्र प्ल्हजी ङ्योलाइ ल्होमिंम्। ङ्योइ सो खुइले बिलै आह्रबै ताँफुँमैं क्होसि पबित्र प्ल्ह खीजीन् ङ्योए ल्हागिर परमेश्‍वरने प्राथना लमिंम्।
ROM 8:27 झाइले म्‍हिमैंए सैंर्बै ताँमैं था सेबै परमेश्‍वरजी पबित्र प्ल्हए बिचारै या था सेम्, तलेबिस्याँ पबित्र प्ल्हजी परमेश्‍वरए म्‍हिमैंए ल्हागिर परमेश्‍वरजी मैंब् धोंले खीने यो छ्युँ लमिंम्।
ROM 8:28 परमेश्‍वरलाइ म्हाँया लब्मैं नेरो खीए सैंर मैंब् धोंले लरिगे बिसि त्हाँब्मैंए ल्हागिर खीए पबित्र प्ल्हजी तोन्दोंरि सैर छ्याँबन् लमिंम् बिब ङ्योइ सेइमुँ।
ROM 8:29 तलेबिस्याँ खीए च्‍ह येशू ल्हें अलि-अङाँमैं न्‍होंर्बै च्ह थेब तरिगे बिसि खीजी ओंसोंन् ङो सेबै म्‍हिमैंलाइ ह्रोंसए च्‍ह-च्हमिमैं लबै ल्हागिर त्हाँइ।
ROM 8:30 छतसि परमेश्‍वरजी ओंसोंन् त्हाँब्‍मैं हुइइ, धै हुइब्‍मैंलाइ ह्रोंसए उँइँरि ठिक ठर्दिइ, ठिक ठर्दिब्‍मैंलाइ खीजी थेबै मान या पिंइमुँ।
ROM 8:31 चु ताँमैं सैंर मैंमा ङ्योइ अझै या तो बिल् खाँम्? परमेश्‍वरन् ङ्योने बालुन् मुँ बिस्याँ, ङ्योए बिरोधर खाब् तम्?
ROM 8:32 परमेश्‍वरजी ह्रोंसए घ्रिदे मुँबै च्‍हलाइ जोगेसि आथें, बरु ङ्यो ताँनए ल्हागिर ख्रो तबर पिंवाइ। ङ्योए ल्हागिर ह्रोंसए च्‍हलाइ पिंल् खाँबै परमेश्‍वरजी झन् अरू तोन्दोंरि सैमैं ङ्योलाइ आपिं रो वा?
ROM 8:33 ह्रोंसजी त्‍हाँबै म्‍हिमैंलाइ परमेश्‍वरजीन् छ्याब् आरेब् ठर्दिमिंइमुँ बिस्याँ चमैंलाइ खाबइ छ्याब् ल्‍हैदिल् खाँम्?
ROM 8:34 ख्रीष्‍ट येशून् चमैंए ल्हागिर सजैं नोसि सिमिंइ, दिलेया सिबइले परमेश्‍वरजी खीलाइ धबै सोगों लमिंइ। धै तिंजोरो ख्रीष्‍ट परमेश्‍वरए क्‍योलोउँइँ टिसि ङ्योए ल्हागिर परमेश्‍वरने यो छ्युँ लमिंसिन् मुँ। छतमा ङ्योलाइ खाबइ सजैं पिंल् खाँम्?
ROM 8:35 छतसि तो सैइ ङ्योलाइ ख्रीष्‍टजी लबै म्हाँयाउँइँले फ्रेवाल् खाँम्? अँहँ, तो सैज्‍यै या फ्रेवाल् आखाँ! ङ्योए फिर थेबै कष्‍ट तलेया, दुःख तलेया, म्हिमैंइ ङ्योलाइ ह्रुगुदिलेया, चब-खिब आयोंसि ङ्हाँदु तल् त्‍हुलेया, खतरा तखलेया, सिल् त्‍हुलेया, तो सैज्‍यै या ङ्योलाइ ख्रीष्‍टजी लबै म्हाँयाउँइँले खैलसे फ्रेवाल् आखाँ।
ROM 8:36 (ङ्योए फिर दुःख तम् बिबै ताँ परमेश्‍वरए छ्वेर छले बिइमुँ: “ओ परमेश्‍वर, क्‍हिए फिर ङिइ बिश्‍वास लबइले ङि त्‍हिंइतिमिन् सिब् धोंन् तल् त्हुम्, ङि सैबर होंबै क्युमैं धोंन् तइमुँ।”
ROM 8:37 दिलेया चु ताँन्दुःख ङ्योए फिर तनाबिलेया ङ्योलाइ म्हाँया लबै ख्रीष्‍टउँइँलेन् ङ्यो चु ताँन् सैए फिर ट्होगों तइमुँ।
ROM 8:38 तलेबिस्याँ ङइ चु ताँ पक्‍का था सेइमुँ: तो सैज्‍यै या ङ्योलाइ ख्रीष्‍टजी लबै म्हाँयाउँइँले फ्रेवाल् आखाँ। स्‍वर्गदूतमैंइ, ह्‍युलर्बै भों मुँबै सैमैंइ, आछ्याँबै भों मुँबै सैमैंइ, तोगो तरिबै सैमैंइ, लिउँइँ तखबै सैमैंइ, अथवा कालइ,
ROM 8:39 तो सैज्‍यै या ङ्योए प्रभु येशू ख्रीष्‍टर मुँबै परमेश्‍वरए म्हाँयाउँइँले ङ्योलाइ फ्रेवाल् आखाँ।
ROM 9:1 तोगो ङइ बिबै ताँ क्ह्रोंसेंन्बै ग। ङ ख्रीष्‍टल् ग, ङ स्‍योर आते। धै पबित्र प्ल्हए न्होंर मुँबै ङए सैंज्‍यै या स्‍योर आते बिसि ङए सैंइ साक्षि पिंम्।
ROM 9:2 ताँ तो जा बिस्‍याँ, ङइ खोबै यहूदी म्हिमैंए बारेर ङए सैंर ल्हें दुःख नेरो पिर मुँ।
ROM 9:3 ङए ह्रेंर्बै अलि अङाँमैंइ खोंयोंइ आखाँबै छ्ह योंबै ल्हागिर परमेश्‍वरजी ङलाइ सराप पिंसि ङन् ख्रीष्‍टउँइँले फ्रेवाल् त्‍हुलेया ङ सैं तोंमल।
ROM 9:4 परमेश्‍वरजी चमैंलाइ ह्रोंसए म्‍हिमैं तबै ल्हागिर त्‍हाँइ। खीजी चमैंलाइ ह्रोंसए प्‍हसेमैं लसि खीए औदिबै केमैं उँइँमिंइ। खीजी चमैंए खेमैंने बाछा फैसि ठिम पिंइ, धै खीए सेवा लबै या लोमिंइ, छले खीजी फैबै बाछामैं चमैंइ योंइ।
ROM 9:5 स्योंम्बै मिं कालदिबै थे-थेबै चिबनाँब्मैं यहूदीमैंए खेमैंन् ग। धै ख्रीष्‍ट या म्‍हि तसि च ह्रेंर्न फिइ। म्‍हि तनाबिलेया खी ताँन् म्‍हिमैंए फिर ग्याल्स लबै परमेश्‍वर ग। छतसि खोंयोंन् बिलै खीए मिं थेब् लल् त्हुम्। आमेन, छान् तरिगे।
ROM 9:6 ल्हें यहूदीमैं ख्रीष्‍टए लिलि आप्र बिबर्न परमेश्‍वरजी चमैंए खेमैंने फैबै बाछामैं फाक्‍कर्न तइ बिब् वा? आङिं, तलेबिस्याँ इस्राएली ह्रेंर फिबै ताँन् म्‍हिमैं परमेश्‍वरजी त्‍हाँबै म्‍हिमैं ग बिल् आखाँ।
ROM 9:7 झाइले अब्राहामए ताँन् सन्तानमैं परमेश्‍वरए च्ह-च्हमिमैं आङिं। अब्राहामल च्‍ह ङ्हिं मुँनबिलेया परमेश्‍वरजी छ बिल, “इसहाकउँइँले योंबै सन्‍तान मत्‍त्रे क्‍हिए सन्‍तान ठर्दिब्‍मुँ।”
ROM 9:8 चुए अर्थ, से कोउँइँले फिब्मैं परमेश्‍वरए च्ह-च्हमिमैं आङिं। बरु परमेश्‍वरजी बाछा फैसि पिंम् बिसि योंबै च्ह-च्हमिमैं मत्‍त्रे अब्राहामए सन्‍तान ठर्दिम्।
ROM 9:9 तलेबिस्याँ परमेश्‍वरजी अब्राहामने छले बाछा फैथेंल, “क्‍हुरिमा चु त्हेर्न ङ युमा क्‍हिए प्‍ह्रेंस्‍यो साराई च्‍ह फिब्‍मुँ।”
ROM 9:10 च च्ह ङ्योए खे इसहाक मुँल, लिउँइँ इसहाकए प्‍ह्रेंस्‍यो रिबेकाइ जौंले च्‍हमैं फिइ।
ROM 9:11 चमैंइ छ्याँब आछ्याँब तोइ आलमन् फो न्होंर मुँमन् चमैंए के ङ्‌ह्‍योसि आङिं, बरु परमेश्‍वरजी बिब् धोंलेन्, च च्हमैं ङ्हिंर घ्रिलाइ त्हाँल बिबै प्रमाण उँइँबर
ROM 9:12 “थेब च्‍योंबए के लबै म्हि तब्‍मुँ,” बिसि ओंसोंन् खीजी रिबेकाने बिल।
ROM 9:13 “याकूबलाइ म्हाँया लसि त्‍हाँइ, दिलेया एसावलाइ ङइ आखो बिसि,” परमेश्‍वरए छ्वेर प्ह्रिइमुँ।
ROM 9:14 चु ताँर ङ्योइ तो बिब् दि? परमेश्‍वरजी अनिया लइ बिब् वा? आङिं, कत्ति अनिया आलइमुँ! तलेबिस्याँ
ROM 9:15 “ङइ खाब‍ए फिर म्हाँया लदा ङ्हाँमुँ, चलाइन म्हाँया लम्। ङइ खाबै फिर ल्हयो खदा ङ्हाँमुँ, चए फिर्न ल्हयो खम्।” बिसि खीजी स्‍योंमन् मोशाने बिल।
ROM 9:16 छतसि म्‍हिए इच्छा नेरो भोंइ आङिं, परमेश्‍वरए म्हाँयाजी म्हिलाइ त्‍हाँब् ग।
ROM 9:17 मिश्र ह्‍युलर्बै फारो म्रुँए बारेर परमेश्‍वरए छ्वेर छले प्ह्रिइमुँ, “क्हिइ ङए शक्‍ति ह्‍युल तिगोंन् उँइँरिगे, धै ङए शक्‍ति मुँबै मिं बिप्ररिगे ङ्हाँसि, ङइ क्हिलाइ म्रुँ लमिंइ।”
ROM 9:18 छले परमेश्‍वरजी खीजी ल्हयो खदा ङ्हाँब्‍मैंए फिर ल्हयो खम्, धै सैं सारो लमिंदा ङ्हाँब्‍मैंलाइ खीजी सैं सारो लम्।
ROM 9:19 क्‍हेमैं न्‍होंरि को-कोइइ बिमुँ, “छ बिस्‍याँ परमेश्‍वरजी तले म्‍हिमैं छ्याब् मुँबन् ठर्दिमुँ? तलेबिस्याँ खीए इच्छाए बिरोधर खाब् राल् खाँम्?”
ROM 9:20 छतसि म्‍हिमैंइ परमेश्‍वरए बिरोध लसि पोंबै घ्याँ आरे। सए भाँडोइ कुमालेलाइ “क्हिइ तले ङलाइ छाब् लल?” बिम्‌ रो वा? आबि!
ROM 9:21 कुमालेइ ह्रोंसइ चेंबै सउँइँले ह्रोंसए सैंर मैंब् धों तबै भाँडो लबै हग मुँ। छतसि चइ चेंबै सउँइँले कोइ छ्याँबै केए ल्हागिर मत्‍त्रे ओलेबै भाँडो बनेम्, कोइ खोंयोंन् बिलै ओलेबै भाँडो बनेम्। कुमालेइ मैंब् धोंले बनेम्।
ROM 9:22 छलेन परमेश्‍वरलै या ह्रोंसए ह्रिस नेरो शक्‍ति उँइँबै सैं मुँ। दिलेया ह्रिसर कुमालेइ भाँड कोचेब् धोंले कोचेल् त्हुबै म्‍हिमैं मुँलेया खीजी चमैंए आछ्याँबै केमैं सैदिसि टिइमुँ।
ROM 9:23 चमैंलाइ तले सैदिइ बिस्‍याँ परमेश्‍वरजी खीए बेल्‍ले थेबै मान तबै चारबै ह्‍वे ताँनलाइ उँइँबै सैं लइ। च ह्‍वे ङ्योज्‍यै या योंरिगे बिसि ङ्योलाइ थेबै केर फेबै भाँडो धों तब् लमिंइ,
ROM 9:24 तलेबिस्याँ खीजी हुइबै म्‍हिमैं ङ्यो ग। खीजी यहूदीमैं मत्‍त्रे हुइब आङिं, अरू ह्रेंमैंलाज्यै या हुइमुँ।
ROM 9:25 होशे मिं मुँबै अगमबक्‍ताइ अरू ह्रेंमैंए बारेर परमेश्‍वरए छ्वेर छले प्ह्रिइमुँ, “ओंसों ङए म्‍हिमैं आङिंब्मैंलाइ तारे ङए म्‍हिमैं बिब्‍मुँ। ङइ आखोबै ह्रेंमैंलाज्यै लिउँइँ ङइ खोसि हुइब्‍मुँ।
ROM 9:26 क्‍हेमैं ङए म्‍हिमैं आङिं बिबै क्ल्ह्‍योर्न ‘क्‍हेमैं सोगों परमेश्‍वरए सन्‍तान ग’ बिसि हुइब्‍मुँ।”
ROM 9:27 यशैया मिं मुँबै अर्को अगमबक्‍ताइ यहूदीमैंए बारेर छले बिइमुँ, “यहूदीमैंए सन्तान मा ङ्युँइर्बै बालुवा धोंलेन् ल्हें तलेया चमैं न्‍होंरि च्‍युगुदे मत्‍त्रेन् जोगेब्‍मुँ।
ROM 9:28 तलेबिस्याँ याहवेहजी युनन् सजैं पिंसि ह्‍युल नास लवाब्‍मुँ।”
ROM 9:29 चु भन्दा ओंसों यशैयाइ चु या बिइमुँ, “स्वर्गर्बै सेनामैंए चिब याहवेहजी सदोम नेरो गमोरा बिबै सहरर्बै म्‍हिमैं नास लवामा ङ्योए ल्हागिर सन्‍तान घ्रि या आथेंस्‍याँ ङ्यो यहूदीमैं च सहरर्बै म्‍हि धोंलेन् नास तबर फेमल।”
ROM 9:30 छतसि ङ्योइ तो बिल् त्‍हुम्? ठिमइ बिब् धोंले आप्रलैया अरू ह्रेंर्बै म्‍हिमैंइ बिश्‍वास लबइले परमेश्‍वरजी चमैंलाइ खीए उँइँरि ठिक ठर्दिइ।
ROM 9:31 दिलेया यहूदीमैं परमेश्‍वरए उँइँरि ठिक ठर्दिबै ल्हागिर ठिमइ बिब् धोंलेन् लल् म्हैइ दिलेया लल् आखाँ।
ROM 9:32 तले आखाँ बिस्‍याँ चमैंइ बिश्‍वास आलल्‍ले धर्म‍-कर्म लसि परमेश्‍वरए उँइँर ठिक ठर्दिम् बिसि मैंरिल। छतसि चमैंए ल्हागिर येशू ख्रीष्‍ट प्हले थुरबै युँमा धोंन् तइ।
ROM 9:33 येशू ख्रीष्‍टए बारेर परमेश्‍वरए छ्वेर छले प्ह्रिइमुँ, “ङ्‌ह्‍योद्, ङइ यहूदीमैंए म्‍हाँजोरि प्हले थुरबै युँमा थेंम्, च युँमार ल्हें म्‍हि थुरसि क्‍हुरयाब्‍मुँ, दिलेया खीए फिर बिश्‍वास लब्मैं खाबै या सैं च्योंब तल् त्हुरिब् आरे।”
ROM 10:1 ओ अलि-अङाँमैं, ङए सैं न्‍होंउँइँलेन् यहूदीमैंलाइ परमेश्‍वरजी जोगेमिंरिगे बिब ङए थेबै इच्छा मुँ, चमैंइ खोंयोंइ आखाँबै छ्ह योंरिगे बिसि ङइ परमेश्‍वरने प्राथना लम्।
ROM 10:2 चमैंइ परमेश्‍वरलाइ बेल्‍ले छेनाले म्हाँदिदा ङ्हाँमुँ बिसि ङ साक्षि पिंल् खाँम्; दिलेया खैले म्हाँदिल् त्हुम् बिसि चमैंइ आसेइमुँ।
ROM 10:3 परमेश्‍वरजी म्हिलाइ खैले ठिक ठर्दिमुँ बिब चमैंइ वास्ता आल, बरु चमैंइ ह्रोंसइ लबै धर्म-कर्मइ परमेश्‍वरए उँइँरि ठिक ठर्दिल् म्‍हैइ। छतमा चमैं परमेश्‍वरए उँइँर ठिक ठर्दिबै घ्याँर प्रल् आङिं।
ROM 10:4 तलेबिस्याँ खीए फिर बिश्‍वास लब्मैं ताँन् परमेश्‍वरए उँइँर ठिक ठर्दिरिगे बिसि ङ्योए ल्हागिर ख्रीष्‍टजीन् ठिमइ बिब् धोंबै के लमिंइ।
ROM 10:5 ठिमइ बिब् धोंले प्रसि परमेश्‍वरए उँइँर ठिक ठर्दिल् म्हैब्मैंए बारेर मोशाइ छले प्‍ह्रिइमुँ, “ठिमइ बिब् धोंले प्रबै म्‍हि सोब्मुँ।”
ROM 10:6 दिलेया ख्रीष्‍टए फिर बिश्‍वास लसि मत्‍त्रे परमेश्‍वरए उँइँर ठिक ठर्दिम् बिबै बारेर ठिमइ छले बिइमुँ, “क्हेमैंए सैंर ‘ख्रीष्‍टलाइ क्युरु पुइबर स्‍वर्गर खाब् ह्‍यामुँ?’ आबिद्।
ROM 10:7 छलेन ‘ख्रीष्‍टलाइ सिबउँइँले पखबर क्रोंर खाब् ह्‍याब?’ बिबै सैं या आमैंन्।”
ROM 10:8 बरु ठिमए ताँ चु ग, “परमेश्‍वरए ताँ क्‍हेमैंए ङाँर्न मुँ। क्‍हेमैंए सुँ नेरो सैं न्‍होंर्न मुँ।” ङिइ म्हिमैंने बिमिंबै ताँ: येशूए फिर बिश्‍वास लद् बिबै सैं तोंबै ताँ ग।
ROM 10:9 तलेबिस्याँ क्‍हिइ ह्रोंसए सुँइ “येशून् ङए प्रभु ग” बिसि अरूलाइ साक्षि पिंम् बिस्‍याँ, झाइले “परमेश्‍वरजी येशूलाइ सिबइले धबै सोगों लमिंइ” बिसि सैंर बिश्‍वास लम् बिस्‍याँ क्‍हिइ मुक्‍ति योंब्‍मुँ।
ROM 10:10 तलेबिस्याँ ङ्योए सैंइ बिश्‍वास लसिन् ङ्यो परमेश्‍वरए उँइँर ठिक ठर्दिम्, झाइले ङ्योए बिश्‍वास लबै ताँ अरूलाज्यै या बिमिंस्याँ ङ्योइ मुक्‍ति योंमुँ।
ROM 10:11 परमेश्‍वरए छ्वेर चु या बिइमुँ, “खीए फिर भर लब्मैं खाबै या फापिल् त्हुरिब् आरे।”
ROM 10:12 तलेबिस्याँ यहूदी नेरो अरू ह्रेंमैंए न्‍होंरि खाबै या स्यो आरे। घ्रि मत्‍त्रेन् परमेश्‍वर ताँनए प्रभु ग। खीने प्राथना लब्‍मैं ताँनए फिर खीजी आशिक पिंम्।
ROM 10:13 तलेबिस्याँ “प्रभुए मिं किंब्‍मैं ताँनइ मुक्‍ति योंब्‍मुँ,” बिसि परमेश्‍वरए छ्वेइ बिइमुँ।
ROM 10:14 दिलेया परमेश्‍वरए फिर बिश्‍वास आलब्‍मैंइ खीने खैले प्राथना लब? धै परमेश्‍वरए बारेर आथेब्‍मैंइ खीए फिर खैले बिश्‍वास लब? झाइले परमेश्‍वरए बारेर खाबज्‍यै आबिमिंस्‍याँ म्‍हिमैंइ खैले थेब?
ROM 10:15 छलेन खाबज्‍यै बिमिंबै म्‍हिमैं आकुलस्‍याँ चमैंइ खैले बिप्रब? “सैं तोंबै ताँ बिमिंबै म्हिमैंए प्हले कति छ्याँब,” बिसि परमेश्‍वरए छ्वेर प्ह्रिइमुँ।
ROM 10:16 दिलेया सैं तोंबै ताँ थेनाबिलेया ल्हें म्हिइ वास्‍था आल। छतसि “ओ प्रभु, ङिइ बिबै ताँ खाबै क्‍वेंइमुँ?” बिसि यशैया अगमबक्‍ताइ ओंसोंन् बिइमुँ।
ROM 10:17 सैं तोंबै ताँ थेसिन् बिश्‍वास खम्, धै ख्रीष्‍टए बारेर बिप्रबै ताँमैंन् सैं तोंबै ताँ ग।
ROM 10:18 बरु ङ चु ताँ ङ्योएम्: यहूदीमैंइ थेल् आयों रो वा? थेइमुँ, तले आथेब! तलेबिस्याँ परमेश्‍वरए छ्वेर छले प्ह्रिइमुँ: “चमैंए कै पृथ्‍बी तिगोंन् थेनेइमुँ, चमैंइ बिबै ताँ ह्‍युलए कुना-कुना समन् फेनेइमुँ।”
ROM 10:19 छतसि ङ चु ताँ धबै ङ्योएम्: यहूदीमैंइ चु सैं तोंबै ताँ आक्हो वा? क्होबमि क्होइ दिलेया आक्‍वें। ओंसों परमेश्‍वरजी मोशाउँइँले यहूदीमैंने छ बिल, “ङलाइ ङो आसेबै म्हिमैंउँइँलेन् ङइ क्‍हेमैंलाइ चमैंए फिर ह्रिस लब्मैं तल् पिंब्मुँ, तोइ आह्र आसेबै म्‍हिमैंउँइँलेन् ङइ क्‍हेमैंए त्होंदो राल् पिंब्‍मुँ।”
ROM 10:20 छलेन यशैयाइ अझै भों खल्‍ले अरू ह्रेंमैंए बारेर छले बिइमुँ, “ङलाइ आम्‍हैब्‍मैंइ ङलाइ योंइ, ङलाइ आम्हैब्मैंए म्हाँजोर ङ ह्रोंसन् म्रोंयुइमुँ।”
ROM 10:21 दिलेया इस्राएलीमैंए बारेर खीजी बिइमुँ, “ङइ बिब् आङिंब्मैं नेरो ङए बिरोधर राबै म्हिमैंए ल्हागिर ङइ त्हिंइतिमिन् यो स्‍योंइ।”
ROM 11:1 छ बिस्‍याँ परमेश्‍वरजी खीए यहूदी म्‍हिमैं त्‍याग्‍दिइ वा? आङिं, कत्ति आङिं! तलेबिस्याँ ङै या अब्राहमए सन्तानउँइँले फिबै बेन्‍यामिनए कुलर्बै इस्राइलि ग।
ROM 11:2 परमेश्‍वरजी ओंसोंन् त्हाँबै म्‍हिमैंलाइ आत्‍याग्‍दिइमुँ। परमेश्‍वरए छ्वेर एलिया अगमबक्‍ताइ लबै प्राथनाए बारेर क्‍हेमैंइ सेइमुँ। एलियाइ यहूदीमैंए बिरोधर परमेश्‍वरने छले बिल,
ROM 11:3 “ओ याहवेह, चमैंइ क्‍हिए ताँ बिमिंबै म्‍हिमैं सैवाइ, क्‍हिए मिंर ख्रो पिंबै क्ल्ह्‍योमैं फुवाइमुँ। क्हिए ताँ बिमिंबै म्‍हिमैं न्‍होंरि ङ घ्रि मत्‍त्रे चैमुँ, ङलाज्यै या चमैंइ सैल् म्‍हैइमुँ।”
ROM 11:4 दिलेया परमेश्‍वरजी एलियाने छाबै ज्वाफ पिंइ, “बाल बिबै देवताए पूजा आलबै हजार ङि म्हिमैं ङइ ह्रोंसए ल्हागिर थेंइमुँ।”
ROM 11:5 छलेन तोगो या परमेश्‍वरजी दयाम्हाँया लसि त्हाँबै को-कोइ यहूदीमैं अझै चैइमुँ।
ROM 11:6 चमैंइ धर्म-कर्म लसि आङिं, परमेश्‍वरए दयाम्हाँयाइ लमा खीजी चमैंलाइ त्‍हाँब् ग, आस्याँ खीए दयाम्हाँया छलेन् पिंबै दयाम्हाँया आतमल।
ROM 11:7 छ बिस्‍याँ चु ताँए अर्थ तो तइ दि? खेंमैंइ म्‍हैबै मुक्‍ति ताँन् यहूदीमैंइ आयों। दिलेया परमेश्‍वरजी त्‍हाँबै यहूदीमैंइ मत्‍त्रे मुक्‍ति योंइ। अरू चैबै यहूदीमैंए सैं सारो तइ।
ROM 11:8 परमेश्‍वरए छ्वेर छले प्ह्रिइमुँ, “परमेश्‍वरजी चमैंलाइ क्होल् आखाँबै सैं पिंइमुँ, चमैंलाइ आम्रोंबै मि नेरो आथेबै न्ह पिंइमुँ, छतसि तिंयाँ समन् चमैं छाबन् मुँ।”
ROM 11:9 दाऊद म्रुँज्यै या छलेन् बिइमुँ, “चमैंए भोज भत्‍यार जाल नेरो ङो धोंन् तरिगे, चमैं चर्न थुरसि सजैं योंरिगे।
ROM 11:10 चमैंए मि तोइ म्रोंल् आखाँब् तयारिगे, झाइले चमैंए क्रे खोंयोंन् बिलै क्वार् तरिगे।”
ROM 11:11 छतसि ङइ ङ्योएम्, “यहूदीमैं थुरसि नास तयाइ वा दि?” अँहँ, आत! चमैं पाप लसि क्‍हुरियामा चमैंइ योंल् त्‍हुबै मुक्‍ति अरू ह्रेंर्बै म्‍हिमैंइ योंइ। झाइले छ तब् म्रोंसि यहूदीमैंइ “ङ्योज्यै छाबै मुक्‍ति योंस्‍याँ तमल,” बिसि ह्रिस लरिगे बिब परमेश्‍वरए सैं मुँल।
ROM 11:12 यहूदीमैंइ पाप लमा ह्‍युलर्बै ताँन् म्‍हिमैंइ थेबै आशिक योंइ, धै यहूदीमैंए नोक्सनउँइँले अरू ह्रेंमैंइ थेबै आशिक योंइ। छतसि ताँन् यहूदीमैंइ बिश्‍वास लस्‍याँ ह्‍युलर्बै ताँन् म्‍हिमैंइ झन् थेबै आशिक योंब्‍मुँ।
ROM 11:13 ङइ चु ताँमैं क्‍हेमैं अरू ह्रेंमैंलाइ बिमुँ: अरू ह्रेंर्बै म्‍हिमैंए ल्हागिर ङ कुल्मिंबै चेला चिब तबइले क्हेमैंए ल्हागिर के लल् योंमा ङ सैं तोंइमुँ।
ROM 11:14 चु केइ लमा ह्रोंसए ह्रेंर्बै म्‍हिमैंज्‍यै या क्‍हेमैं म्रोंसि ह्रिस लसि को-कोइ परमेश्‍वर ङाँइ सैं एल् खाँलै।
ROM 11:15 तलेबिस्याँ परमेश्‍वरजी चमैंलाइ त्‍याग्‍दिवामा ताँन् ह्‍युलर्बै म्‍हिमैं परमेश्‍वरए म्‍हि तइबिस्‍याँ परमेश्‍वरजी चमैंलाइ खी ङाँइ एपमा तो तब्‍मुँ? चमैं सिसि धबै सोगों तब् धोंन् तब्‍मुँ।
ROM 11:16 अहान् घ्रिदे ङ्हिंदे बिले: ओंसोंबै क्‍हें फ्‍वि परमेश्‍वरए मिंर पिंस्‍याँ ताँन् क्‍हें पबित्र तम्। छलेन सिं धुँए जरा पबित्र मुँ बिस्‍याँ हाँगै या पबित्र तम्।
ROM 11:17 छलेन रोमैं रोबै सिं धुँए को-कोइ हाँगमैं चोवाब् धोंले कोइ यहूदीमैं या परमेश्‍वरउँइँले फ्रेयाइमुँ। धै क्‍हेमैं अरू ह्रेंर्बै म्‍हिमैं तबइले क्ह्‍योंर्बै सिं धुँए हाँग धोंन् तसि अरू छ्याँबै हाँगमैंए माँजोरि से घ्रिले गैंदिइमुँ। छतसि यहूदीमैंए जराउँइँले खुगु योंब् धोंले क्‍हेमैंइ तोगो भों नेरो आशिक योंइमुँ।
ROM 11:18 छतसि क्‍हेमैं च चोयाबै हाँग धों तबै यहूदीमैंलाइ हेल लल् आत। चमैं भन्दा ह्रोंसन् स्‍वाब मुँ ङ्हाँस्‍याँ, चु ताँ सैंर मैंन्: क्‍हेमैं सिं धुँने प्हेरबै हाँग धों तब्मैं मत्‍त्रे ग। क्‍हेमैंइ जरा आधाँदिइमुँ, बरु जराइ क्‍हेमैंलाइ धाँदिइमुँ।
ROM 11:19 दिलेया क्‍हेमैंइ अरू ह्रेंमैंने छ बिलै, “ओं, ङलाइ रोमैं रोबै सिं धुँने गैंदिबर परमेश्‍वरजी च हाँगमैं चोवाइमुँ।”
ROM 11:20 च ठिक ताँ मुँ, दिलेया चु मैंन्: चमैंइ बिश्‍वास आलबइले परमेश्‍वरजी चमैंलाइ चोवाइ। छलेन क्‍हेमैंइ बिश्‍वास लसिन् मत्‍त्रे टिल् योंइमुँ। छतसि थेब् आप्हैंन्, बरु न्ह क्रों मि क्रोंले टिद्।
ROM 11:21 तलेबिस्याँ परमेश्‍वरजी क्‍ह्रोंसेंन्‍बै हाँगलाइ भ्‍योंवाइ बिस्याँ, क्‍हेमैंइ बिश्‍वास लब् पिवास्‍याँ क्‍हेमैंलाज्यै या आभ्‍यों रो वा?
ROM 11:22 परमेश्‍वरजी खैले ल्हयो खमुँ, छलेन सैं सारो या लम् बिसि सैंर मैंन्। खीउँइँले फ्रेयाब्‍मैंने परमेश्‍वरजी सैं सारो लमुँ, दिलेया क्‍हेमैं परमेश्‍वरए ल्हयो न्होंरि टिरिस्‍याँ क्‍हेमैंइ परमेश्‍वरए ल्हयो योंम्। आस्‍याँ थोवाबै हाँगमैंलाइ धोंले क्हेमैंलाज्यै या थोवाब्‍मुँ।
ROM 11:23 छलेन यहूदीमैंइ अबिश्‍वास लब् पिवासि धबै बिश्‍वास लसि एखम् बिस्‍याँ परमेश्‍वरजी चमैंलाइ ओंसों मुँबै क्‍ल्‍ह्‍योर हाँग धोंले गैंदिमिंब्‍मुँ, तलेबिस्याँ परमेश्‍वर धबै चमैंलाइ गैंदिल् खाँम्।
ROM 11:24 क्‍हेमैं अरू ह्रेंर्बै म्‍हिमैं क्ह्‍योंर्बै सिं धुँउँइँले हाँग थोवासि बगैंचार्बै सिं धुँने से आक्ह्रिलेया गैंदिइमुँ। यहूदीमैं बगैंचार्बै सिं धुँए हाँगमैं धों तब् ग। क्ह्‍योंर्बै हाँगमैं भन्दा च ओंसों थोवाबै हाँगमैं धबै एपसि गैंदिब परमेश्‍वरए ल्हागिर झन् स्वाब तम्।
ROM 11:25 ओ अरू ह्रेंर्बै अलि-अङाँमैं, क्‍हेमैं थेब आप्हैंरिगे बिसि क्हेमैंइ चु खास ताँ घ्रि क्होल् त्हुम्: परमेश्‍वरजी त्‍हाँबै अरू ह्रेंर्बै ताँन् म्‍हिमैंइ येशू ख्रीष्‍टए फिर बिश्‍वास आलन् समा मत्‍त्रे यहूदीमैंइ सैं सारो लब्मुँ।
ROM 11:26 च लिउँइँ ताँन् यहूदी ह्रेंमैंइ मुक्‍ति योंब्‍मुँ। परमेश्‍वरए छ्वेर छले प्ह्रिइमुँ: “सियोनउँइँले जोगेमिंबै म्‍हि युब्‍मुँ, याकूबए सन्तानलाइ दुष्‍ट के लबउँइँले खीजी जोगेमिंब्‍मुँ।
ROM 11:27 ङइ चमैंए पाप मेटिदिसि चमैंने बालु फैबै बाछा पूरा लमिंब्‍मुँ।”
ROM 11:28 सैं तोंबै ताँए फिर बिश्‍वास आलसि यहूदीमैं परमेश्‍वरए शत्तुर तबइले क्‍हेमैंलाइ फायदा तब् ग। दिलेया परमेश्‍वरजी चमैंए खेमैंलाइ त्‍हाँबइले चमैंलाज्यै या खोम्।
ROM 11:29 तलेबिस्याँ परमेश्‍वरजी खीजी त्‍हाँबै म्हिमैंलाइ युगुर्ले आत्‍याग्‍दि, धै खीजी पिंबै आशिकमैं या आप्हें।
ROM 11:30 स्‍योंम क्‍हेमैं अरू ह्रेंर्बै म्‍हिमैंइ परमेश्‍वरए ताँ आक्वेंमल, दिलेया यहूदीमैंइ परमेश्‍वरजी बिब् आङिंबइले क्‍हेमैंइ परमेश्‍वरए ल्हयो योंबै मौका योंइमुँ।
ROM 11:31 छलेन क्‍हेमैंइ ल्हयो योंबइले परमेश्‍वरजी बिब् धोंले चमैंज्यै या ल्हयो योंरिगे बिसि तिंजोरो यहूदीमैंए सैं सारो तइ।
ROM 11:32 तलेबिस्याँ खीए दयाम्हाँया ताँन् म्‍हिमैंइ योंरिगे बिसि परमेश्‍वरजी चमैं ताँनए सैं सारो लवासि बिब् आङिंब्मैं तल् पिंइ।
ROM 11:33 ओहो, परमेश्‍वरजी ताँनए फिर लबै दयाम्हाँया बेल्‍ले थेब नेरो छ्याँब मुँ। खीए ज्ञान बुद्धिए ताँमैं गैरु मुँ। खाबइ खीए ताँमैंए बयन लल् खाँम्? खाबइ खीजी लबै के क्‍होल् खाँम्?
ROM 11:34 परमेश्‍वरए छ्वेर छले प्ह्रिइमुँ, “याहवेहए सैंर्बै ताँ खाबइ सेइमुँ? झाइले खीलाइ खाबइ सल्‍ला पिंल् खाँम्?”
ROM 11:35 “खाबज्यै या परमेश्‍वरलाइ तोइ सै पिंइमुँ वा? परमेश्‍वरजी खाबलाज्यै तोइ सैए खि फोल् आत्‍हु।”
ROM 11:36 तलेबिस्याँ परमेश्‍वरजी तोन्दोंरि सै बनेइ, तोन्दोंरि सै खीउँइँलेन् खीए ल्हागिर्न ग। परमेश्‍वरए मिं खोंयोंन् बिलै थेब तरिगे। आमेन, छान् तरिगे।
ROM 12:1 छतसि ओ ङइ खोबै अलि-अङाँमैं, परमेश्‍वरजी ङ्योए फिर च्हौ थेबै ल्हयो लबइले ङ क्‍हेमैंने यो छ्युँ लमुँ: सोगों ख्रो धोंले ह्रों-ह्रोंसए ज्यु परमेश्‍वरलाइ पिंन्। छाबै ख्रो पबित्र नेरो परमेश्‍वरलाइ सैं तोंन् लबै क्‍ह्रोंसेंन्‍बै सेवा ग।
ROM 12:2 चु ह्‍युलर्बै म्‍हिमैंइ लब् धोंबै आछ्याँबै केमैं क्‍हेमैंइ आलद्, बरु ह्रोंसए सैंर छारा तसि सैं न्होंउँइँले ओंनों छ्याँब तद्। छ तस्‍याँ मत्‍त्रे क्‍हेमैंइ परमेश्‍वरए इच्छा तो मुँ बिसि था सेल् खाँम्, अथवा तो सै स्‍वाब मुँ, तो सैइ परमेश्‍वरए सैं तोंन् लमना, तो सै छ्याँब मुँन बिसि क्‍हेमैंइ सेब्‍मुँ।
ROM 12:3 परमेश्‍वरजी ङलाइ खीए दयाम्हाँया पिंबइले ङइ क्‍हेमैं ताँनने यो छ्युँ लमुँ: ह्रोंसलाइ थेब आमैंन्, परमेश्‍वरजी क्हिलाइ पिंबै बिश्‍वास अनुसार ह्रोंस खैतब् मुँ छाबन् मैंन्।
ROM 12:4 तलेबिस्याँ नमुना घ्रि बिले: ङ्योए ज्युर ल्हें भागमैं मुँ, दिलेया ताँन् भागइ स्‍यो स्‍योबै केमैं लम्।
ROM 12:5 छलेन ङ्यो ल्‍हेंन् मुँनबिलेया येशूए फिर बिश्‍वास लसेरो खीने घ्रिन् तसि ज्यु घ्रिन् ग। झाइले ङ्यो ताँन् ज्यु घ्रिर्बै स्‍यो स्‍योबै भाग तसि घ्रि घ्रिने गैंदिइमुँ।
ROM 12:6 छतसि परमेश्‍वरजी खीए दयाजी ङ्योलाइ पिंबै स्‍यो स्‍योबै बरदानमैं अनुसार के लले। अगमबाणि पोंबै बरदान क्हिलाइ पिंइबिस्‍याँ ह्रोंसइ येशू ख्रीष्‍टए फिर लबै बिश्‍वास अनुसार अरूने पोंन्।
ROM 12:7 अरूए सेवा लबै बरदान पिंइबिस्‍याँ सेवा लद्। झाइले अर्थ खोल्‍दिबै बरदान क्हिलाइ पिंइबिस्‍याँ अर्थ खोल्‍दिद्।
ROM 12:8 ठिक घ्‍याँर प्रबर लोमिंबै बरदान पिंइबिस्‍याँ अरूमैंलाइ लोमिंन्। पिंबै बरदान पिंइबिस्‍याँ अरूए खाँचोर सैं प्ल्हसि पिंन्। चिब तबै बरदान पिंइबिस्‍याँ ढुक्‍कले चिबइ लल् त्हुबै के लद्। ल्हयो खबै बरदान पिंइबिस्‍याँ सैं तोंन्‍ले ल्होद्।
ROM 12:9 क्हेमैंइ फिब्लो पार्दिबै म्हाँया आलद्, क्‍ह्रोंसेंन्‍लेन् सैं न्होंउँइँलेन् म्हाँया लद्। आछ्याँबै केमैं पिवासि छ्याँबै केमैं लरिद्।
ROM 12:10 ह्रोंसए तेमैंने धोंले घ्रिइ घ्रिने क्‍ह्रोंसेंन्‍बै म्हाँया लदु। अरूलाइ सैं न्होंउँइँले ओंनों मान लद्।
ROM 12:11 प्ल्हेउ आतल्‍ले लल् त्हुबै केमैं लद्। सैं न्होंउँइँले आनारल्‍ले परमेश्‍वरए सेवा लद्।
ROM 12:12 क्‍हेमैंइ थेंबै आशार सैं तोंन्ले टिरिद्। दुःख तमा सैं भोंब लद्। झाइले खोंयोंन् बिलै प्राथना लरिद्।
ROM 12:13 बिश्‍वासीमैंए खाँचोर ल्होद्, ह्रोंसए धिंर खबै प्ह्रेंमैंलाइ बास पिंसि छेनाले चब् थुँब् पिंन्।
ROM 12:14 छलेन क्हेमैंए फिर दुःख पिंब्‍मैंलाइ सराप आपिंन्, बरु चमैंए ल्हागिर परमेश्‍वरने आशिक ह्रिमिंन्।
ROM 12:15 सैं तोंब्‍मैंने बालु सैं तोंन्, क्रोब्‍मैंने बालु क्रोद्।
ROM 12:16 ताँनने क्‍ह्रिइ टिद्, थेब् आप्हैंन्, बरु कुरब्मैंने बालु प्रद्, ह्रोंसन् बेल्‍ले ह्रब्-सेब् आप्हैंन्।
ROM 12:17 क्‍हेमैंए फिर न्होह्रों लब्मैंए न्होह्रों आलद्। म्‍हिमैंए उँइँरि तो छ्याँब तम् चन् लरिद्।
ROM 12:18 खाँन् समा ताँनने क्ह्रिसि टिद्।
ROM 12:19 ओ ङए खोबै अलि-अङाँमैं, ह्रोंसए न्होह्रों लब्मैंने खोंयोंइ खि आकिंन्। चमैंलाइ परमेश्‍वरए ह्रिसर्न पिवाद्, तलेबिस्याँ “खि किंबै के ङल् ग, ङजीन् खि किंब्‍मुँ,” बिसि छ्वेर प्ह्रिइमुँ।
ROM 12:20 बरु परमेश्‍वरए छ्वेर बिब् धोंले, “क्‍हिए शत्तुर फो ख्रेंस्‍याँ चलाइ चल् पिंन्, च क्‍यु पिइबिस्‍याँ क्‍यु पिंन्। छ लस्याँ क्‍हिए शत्तुर फा पिन् तसि चए क्रर मि राब उँवाब् धोंन् तम्।”
ROM 12:21 छतसि अरूमैंए आछ्याँबै केइ ह्रोंसलाइ ट्होल् आपिंन्, बरु क्हेमैंइ छ्याँबै के लसिन् आछ्याँबै के ट्होवाद्।
ROM 13:1 ताँन् म्हिमैं सरकारए ठिमए न्होंर टिल् त्‍हुम्, तलेबिस्याँ परमेश्‍वरए इच्छा आरेस्याँ सरकार तल् आखाँ। ताँन् सरकारलाइ परमेश्‍वरजीन् खटिदिब् ग।
ROM 13:2 छतसि खाबइ सरकारए बिरोध लमुँ चइ परमेश्‍वरजी खटिदिबै म्हिलाइ बिरोध लम्। छ लब्‍मैंइ सजैं योंब्‍मुँ,
ROM 13:3 तलेबिस्याँ थेब-थेबै पद मुँब्मैं म्रोंसि ठिक के लब्‍मैं ङ्हिंल् आत्‍हु, दिलेया आछ्याँबै के लब्‍मैं बिस्याँ ङ्हिंल् त्‍हुम्। क्‍हेमैं सरकारने आङ्हिंल्‍ले टिदा ङ्हाँइमुँ वा? छ बिस्‍याँ ठिक के लद्, झाइले क्‍हेमैंइ सरकारउँइँले स्‍याबासि योंम्,
ROM 13:4 तलेबिस्याँ क्‍हेमैंए फायदाए ल्हागिर परमेश्‍वरजी सरकारलाइ ह्रोंसए सेवा लब्मैं खटिदिब् ग। दिलेया पाप लस्‍याँ सरकार म्रोंसि ङ्हिंल् त्‍हुम्, तलेबिस्याँ सरकारने सजैं पिंबै शक्‍ति नेरो हग मुँ। पाप लब्‍मैंलाइ सजैं पिंबै ल्हागिर परमेश्‍वरजी सरकारलाइ खटिदिब् ग।
ROM 13:5 छतसि खीउँइँले सजैं आयोंरिगे बिसि मत्‍त्रे आङिं, दिलेया ह्रोंसए सैंज्यै या “छ लब ठिक मुँ” बिब् मैंसि सरकारए ठिमए न्होंर टिलन् त्‍हुम्।
ROM 13:6 छतसि ङ्योइ बालि फोल् त्‍हुम् तलेबिस्याँ सरकारज्यै या लल् त्हुबै केमैं लमा परमेश्‍वरए सेवा लरिम्।
ROM 13:7 छतसि क्हेमैंइ सरकारलाइ फोल् त्‍हुबै सैमैं ताँन् फोद्। धै मान लल् त्‍हुब्‍मैंलाइ मान लद्।
ROM 13:8 घ्रिइ घ्रिने म्हाँया लब बाहेक अरू तो सैरै या भारा आनोद्। तलेबिस्याँ ह्रोंसए ङ्‍हेब् ट्हुब्मैंए फिर म्हाँया लब्‍मैंइ परमेश्‍वरजी पिंबै ठिम पूरा लम्।
ROM 13:9 मोशाइ प्‍ह्रिबै ठिममैं न्‍होंरि “ब्यभिचार आलदु, म्‍हि आसैदु, आह्‍योदु, लोब आलदु,” बिबै ताँमैं मुँ। दिलेया “ह्रोंसलाइ धोंले ङ्‍हेब् ट्हुब्मैंलाज्यै या म्हाँया लद्” बिबै ताँ ङिंस्याँ ठिमर बिबै ताँन् ताँ लब् धोंन् तम्।
ROM 13:10 ह्रोंसए ङ्‍हेब् ट्हुब्मैं म्हाँया लबै म्हिइ चमैंए फिर तोइ न्होह्रों आल। छतसि म्हाँया लब्मैंइ मोशाइ पिंबै ठिम पूराले म्हाँदिम्।
ROM 13:11 मैंन्‍दि, खैबै जुग खबर होंइमुँ बिसि क्‍हेमैंज्यै सेइमुँ। तारे क्‍हेमैं न्‍हरुउँइँले छोरसि न्ह क्रों मि क्रोंले टिद्। थेद्, ओंसोंबै बिश्‍वास लबै त्हिंइ भन्दा तिंजोरो ङ्योलाइ जोगेमिंबै त्हिंइ झन् चेंदो तखइमुँ।
ROM 13:12 म्‍हुँइँस ह्‍याल् खाँइ, तारे त्हिंयाँ प्रेबर होंइमुँ। छतसि मिछु खैबर लबै केमैं पिवाद्। बरु परमेश्‍वरए ह्‍वेर टिसि छ्याँबै के लद्, हत्‍यारमैं छेसि पापने नेद्।
ROM 13:13 त्हिंर्बै ह्‍वेर टिब्‍मैं धोंले छ्याँबै छ्ह थोले। सयल लप्रब, प्हा को तब, ब्यभिचार लब, तो लदा ङ्हाँमुँ चन् लब, प्होंगि मिब नेरो ह्रिस लब छाबै केमैं ताँन् पिवाद्।
ROM 13:14 बरु येशू ख्रीष्‍ट धोंन् तबर भों लद्, धै ह्रोंसए सैंउँइँले खबै आछ्याँबै इच्‍छामैं पिवाद्।
ROM 14:1 बिश्‍वासर आभोंब्मैंलाइ म्हाँया लसि ह्रोंसए संगतिर टिल् पिंन्। दिलेया चमैंइ पोंबै ताँर छ्याब् ल्हैदिसि प्होंगि मिबै के आलद्।
ROM 14:2 तलेबिस्याँ को-कोइइ तोन्दोंरि सै चल् तम् बिम्, दिलेया बिश्‍वासर आभोंब्‍मैंइ से चल् आत बिम्, छतसि चमैंइ ट्हा ट्हु मत्‍त्रे चम्।
ROM 14:3 तोन्दोंरि सै चबै म्‍हिइ से आचबै म्हिलाइ च्‍योंब् मैंल् आत। छलेन से आचब्‍मैंइ तोन्दोंरि सै चब्‍मैंलाइ छ्याब् आल्‍हैदिरिगे, तलेबिस्याँ परमेश्‍वरजी च म्हिमैंलाज्यै या खीए सन्तान तल् पिंइमुँ।
ROM 14:4 प्रभुए के लबै म्हिए फिर छ्याब् ल्‍हैदिब क्‍हिल तोइ हग आरे। चइ लबै के ठिक मुँ उ आरे बिसि चए क्ल्हेजीन् निसाफ लब्‍मुँ। झाइले च के लबै म्हिए बिश्‍वास आभोंब मुँनबिलेया निसाफ लबै त्हिंइर च ठिक ठर्दिब्‍मुँ, तलेबिस्याँ के लबै म्हिलाइ ठिक ठर्दिबै शक्‍ति प्रभु येशूने मुँ।
ROM 14:5 झाइले अर्को ताँ, को-कोइइ कोइ त्हिंइलाइ अरू त्हिंइ भन्दा मुख्‍य नेरो छ्याँब म्हाँदिम्, दिलेया को-कोइइ ताँन् त्हिंइ छ्याँबन् ग बिम्। छतसि ताँन् म्‍हिमैं ह्रोंसइ लबै बिश्‍वासर ह्रोंसन् पक्‍का तल् त्हुम्।
ROM 14:6 कोइ त्हिंइ छ्याँब कोइ त्हिंइ आछ्याँब बिबै म्हिइ परमेश्‍वरए मान तरिगे बिसिन् छ बिब् ग। झाइले से चबै म्हिज्यै या परमेश्‍वरए मान तरिगे बिसिन् चब् ग, छलेन से आचबै म्हिज्‍यै या परमेश्‍वरए मान तरिगे बिसिन् आचब् ग, तलेबिस्याँ परमेश्‍वरए म्हिमैंइ तोन् ललेया खीलाइ धन्‍यबाद पिंम्।
ROM 14:7 ङ्यो खाबै या ह्रोंसए ल्हागिर आसो, ह्रोंसए ल्हागिर आसि।
ROM 14:8 ङ्यो सोलेया प्रभुए ल्हागिर्न सोम्, सिलैया प्रभुए ल्हागिर्न सिम्। छतसि सोलेया सिलेया ङ्यो प्रभुल ग।
ROM 14:9 तलेबिस्याँ येशू ख्रीष्‍ट सिब्‍मैं नेरो सोब्‍मैंए प्रभु तबै ल्हागिर सिसि धबै सोगों तइ।
ROM 14:10 छतसि क्‍हि से आचब्‍मैंइ बिश्‍वासी अलिमैंलाइ तले छ्याब् ल्‍हैदिमुँ? झाइले क्‍हि ताँन् सै चब्‍मैंइ से आचबै बिश्‍वासी अलिलाइ तले च्‍योंब मैंमुँ? ङ्यो ताँन् परमेश्‍वरए उँइँर्न निसाफ लबै ल्हागिर राल् त्‍हुम्।
ROM 14:11 परमेश्‍वरए छ्वेर छले प्ह्रिइमुँ, “याहवेहजी बिइमुँ, ङ खोंयोंन् बिलै तरिबै परमेश्‍व ग। छतसि ताँन् म्‍हिमैंइ ङलाइ फ्‍योब्‍मुँ, ताँनइ ङए मिं थेब् लब्‍मुँ।”
ROM 14:12 छतमा ङ्यो ताँनइ ह्रों-ह्रोंसइ लबै केए हिसाब परमेश्‍वरलाइ बुजीदिल् त्‍हुम्।
ROM 14:13 छतसि ङ्यो घ्रिइ घ्रिने फाक्‍कर्न छ्याब् आल्‍हैदिले, ङ्योइ ह्रोंसए अलिमैंलाइ पापर च्होवाबै केमैं खोंयोंइ आलले बिसि सैंर मैंले।
ROM 14:14 प्रभु येशूए फिर बिश्‍वास लबइले ङइ चु ताँ पक्‍का सेइमुँ, चबै सै तो मुँले चल् आतब आरे। दिलेया खाबज्‍यै तो मुँले चबै सै अशुद्धन् मैंइ बिस्याँ च सै चए ल्हागिर अशुद्धन् तयाम्।
ROM 14:15 क्‍हिइ तो मुँले चबै सै चमा ह्रोंसए अलिलाइ सैं नल् लइबिस्‍याँ क्‍हिइ चलाइ म्हाँया आल। येशू ख्रीष्‍टजी ह्रोंसए ज्यु पिंसि च अलिलाइ जोगेमिंइ। छतसि च अलि क्‍हिइ चबै सैइ नास आतरिगे।
ROM 14:16 छतसि क्‍हिइ ठिक ठर्दिबै केलाइ अरूइ ठिक आरे बिल् आयोंरिगे।
ROM 14:17 तलेबिस्याँ ङ्योइ परमेश्‍वरलाइ म्रुँलाइ धोंले म्हाँदिइ बिस्‍याँ खीजी ङ्योलाइ थेबै आशिक पिंम्। च आशिक तो जा बिस्‍याँ तोन्‍दोंरि सै चब् थुँब् योंब मत्‍त्रे आङिं, दिलेया पबित्र प्ल्हजी ठिक ठर्दिमिंसि पिंबै शान्‍ति नेरो आनन्‍द ग।
ROM 14:18 खाबइ छले येशू ख्रीष्‍टए सेवा लमुँ, छाबै म्हिने परमेश्‍वर सैं तोंम्, झाइले चइ म्हिमैंउँइँले या स्‍याबासि योंम्।
ROM 14:19 छतसि ङ्यो क्ह्रिसि घ्रिइ घ्रिलाइ ल्होबै केमैं खोंयोंन् बिलै लरिले।
ROM 14:20 चबै सैइ लमा परमेश्‍वरजी लबै केलाइ नास तल् आपिंन्। ताँन् सै चल् तम्, दिलेया ङ्योइ चबै सैइ अरूलाइ पापर च्होवाब आछ्याँबै ताँ ग।
ROM 14:21 छतसि खास ताँ, से चब, प्हा थुँब मत्‍त्रे आङिं, क्हिइ तो के ललेया अलिलाइ पापर आच्होवारिगे।
ROM 14:22 छतसि चु ताँर क्हिइ लबै बिश्‍वास परमेश्‍वर नेरो क्हिए म्हाँजोर मत्‍त्रे थेंन्। ह्रोंसइ लबै के ठिक मुँ ङ्हाँबै म्हि ङ्‍हो सब् ग।
ROM 14:23 दिलेया खाबज्‍यै या “चु सै चल् आत उ?” ङ्हाँलै या चइ बिस्‍याँ परमेश्‍वरजी चलाइ दोषि ठर्दिम्, तलेबिस्याँ चइ छेनाले बिश्‍वास आलल्‍ले चइ। झाइले बिश्‍वास आलल्‍ले लबै के तो मुँले या च पाप ग।
ROM 15:1 ङ्यो बिश्‍वासर भोंसि तब्‍मैंइ बिश्‍वासर आभोंबै अलिमैंइ संका लबै ताँमैं सैदिल् त्‍हुम्। छलेन ङ्योइ ह्रोंस मत्‍त्रे सैं तोंबै केमैं लल् आत,
ROM 15:2 बरु ह्रोंसए अलिमैं प्रभुए फिर बिश्‍वास लबर भोंब तरिगे बिसि ङ्यो ताँनइ भों पिंल् त्‍हुम्,
ROM 15:3 तलेबिस्याँ ख्रीष्‍टज्‍यै या ह्रोंसए सैं तोंन् लबै केमैं आल, बरु परमेश्‍वरजी लद् बिबै केमैं लसिन् दुःख योंइ। छतसि “क्हिलाइ गाल् केब्‍मैंए गाल् ङए फिर तइमुँ,” बिसि परमेश्‍वरए छ्वेर प्ह्रिइमुँ:
ROM 15:4 ङ्योए आशालाइ बडिबर धै ङ्योए फिर तो तलेया सैदिबै भों पिंबर परमेश्‍वरए छ्वेर प्‍ह्रिबै ताँन् ताँ ङ्योलाइ लोमिंबर प्‍ह्रिब् ग।
ROM 15:5 सैदिबै भों पिंबै परमेश्‍वरउँइँलेन् क्‍हेमैं ख्रीष्‍टए घ्याँर प्रसि सैं घ्रिन् तबै भों योंरिगे।
ROM 15:6 झाइले क्‍हेमैं ताँनइ सैं घ्रिन् तसि कै घ्रिले, ङ्योए प्रभु येशू ख्रीष्‍टए आबा परमेश्‍वरए मिं थेब् लल् खाँरिगे।
ROM 15:7 येशू ख्रीष्‍टजी क्‍हेमैंलाइ म्हाँया लसि ख्वेब् धोंले परमेश्‍वरए थेबै मान तबै ल्हागिर क्‍हेमैंज्‍यै या घ्रिइ घ्रिलाइ म्हाँया लसि ख्वेद्।
ROM 15:8 तलेबिस्याँ ङ क्हेमैंने बिमुँ, यहूदीमैंए खेमैंने परमेश्‍वरजी फैबै बाछा पूरा लबै ल्हागिर परमेश्‍वर क्ह्रोंसेंन्ले भर लल् खाँब मुँ बिसि उँइँबर येशू ख्रीष्‍टजी यहूदीमैंलाइ ल्होमिंइ।
ROM 15:9 झाइले अरू ह्रेंमैंज्‍यै या परमेश्‍वरजी पिंबै ल्हयो योंसेरो खीए मिं थेब् लरिगे बिसि ख्रीष्‍ट युब् ग। चु ताँए बारेर परमेश्‍वरए छ्वेर छले प्ह्रिइमुँ, “ङइ अरू ह्रेंमैंए म्‍हाँजोरि क्‍हिए मिं थेब् लब्‍मुँ, झाइले क्‍हिए मिंर भजन प्रिंब्‍मुँ।”
ROM 15:10 छलेन मोशाइ प्‍ह्रिल, “ओ अरू ह्रेंमैं, परमेश्‍वरजी त्‍हाँबै म्‍हिमैंने क्ह्रिसि सैं तोंन्।”
ROM 15:11 छाबन् भजनसंग्रहर म्‍हि घ्रिइ बिइमुँ, “ओ अरू ह्रेंमैं, प्रभुए मिं थेब् लद्। ह्‍युलर्बै ताँन् ह्रेंमैं, खीए मिं थेब् लद्।”
ROM 15:12 झाइले यशैया अगमबक्‍ताज्‍यै या येशू ख्रीष्‍ट युबै बारेर छ बिल, “दाऊद म्रुँए खलकउँइँले म्‍हि घ्रि युब्‍मुँ, खीजी अरू ह्रेंर्बै म्‍हिमैंए फिर ग्याल्स लब्‍मुँ, खीए फिर अरू ह्रेंर्बै म्‍हिमैंइ आशा थेंब्‍मुँ।”
ROM 15:13 छतसि पबित्र प्ल्हए शक्‍तिजी क्‍हेमैंए आशा बडिमिंरिगे बिसि क्ह्रोंसेंन्बै आशा पिंबै परमेश्‍वरए फिर क्हेमैंइ बिश्‍वास लबइले क्‍हेमैंइ सैं तोंसि छिं ङ्हाँल् योंरिगे।
ROM 15:14 ओ ङए अलि-अङाँमैं, क्‍हेमैंइ छ्याँबै केमैं लरिइमुँ, धै तोन्दोंरि ताँर ह्रब् सेब् तसि घ्रिइ घ्रिलाइ छेनाले लोमिंल् खाँब्मैं तइमुँ बिसि ङइ सेइमुँ।
ROM 15:15 दिलेया परमेश्‍वरजी पिंबै थेबै दयाम्हाँयाजी लमा को-कोइ ताँमैं क्‍हेमैंइ अझै छेनाले च्हैंब् मैंब् लल् खाँरिगे बिसि ङइ थेबै आँट लसि चु प्ह्रिछ्या प्ह्रिइमुँ।
ROM 15:16 तलेबिस्याँ परमेश्‍वरजी ङलाइ अरू ह्रेंमैंए ल्हागिर येशू ख्रीष्‍टए सेवा लबै म्‍हि तल् पिंइमुँ। छतसि ख्रो पिंबै खेगिमैंइ परमेश्‍वरजी खोबै भेटि पिंब् धोंले ङइ सैं तोंबै ताँ बिमिंसि अरू ह्रेंमैंलाज्यै परमेश्‍वर ङाँर पमुँ। चमैंलाइ पबित्र प्ल्हजी चोखो लसि चमैं परमेश्‍वरजी खोबै भेटि तइमुँ।
ROM 15:17 छतसि येशू ख्रीष्‍टने घ्रिन् तसि परमेश्‍वरए ल्हागिर ङइ लबै के म्रोंसि ङ सैं तोंइमुँ।
ROM 15:18 तलेबिस्याँ अरू सैए बारेर आङिं, दिलेया येशू ख्रीष्‍टजी ङए छ्हउँइँले लबै केए बारेर मत्‍त्रे प्‍हैंमुँ। ङए के नेरो प्रचारउँइँले,
ROM 15:19 झाइले बेल्‍ले थेबै औदिबै चिनुमैं नेरो पबित्र प्ल्हजी पिंबै भोंउँइँले येशू ख्रीष्‍टजी अरू ह्रेंमैंलाइ परमेश्‍वरलाइ म्हाँदिल् पिंइ। चु ताँर मत्‍त्रे ङ क्‍हेमैंने बिमुँ। ङइ यरूशलेम सहरउँइँले इल्‍लुरिकन बिबै ह्‍युल समा ह्‍यासि खन्तोंदोंन् येशू ख्रीष्‍टए बारेर सैं तोंबै ताँ बिप्रइमुँ। सैं तोंबै ताँउँइँलेन् अरू ह्रेंमैंए म्हाँजोरि औदिबै (थेब्-थेबै) केमैं लमिंबइले ङ सैं तोंइमुँ।
ROM 15:20 ख्रीष्‍टए मिं या आथेबै म्हिमैं ङाँर खीउँइँले खबै सैं तोंबै ताँ बिप्रब ङए सैं मुँ। अरूइ झोंथेंबै जगए फिर धिं बेनब छ्याँब आत। छतसि अरूइ ओंसोंन् बिप्रबै क्‍ल्‍ह्‍यो जरे ङ बिप्रदा आङ्हाँ।
ROM 15:21 परमेश्‍वरए छ्वेर छलेन् प्ह्रिइमुँ, “खाबज्‍यै या परमेश्‍वरए बारेर था आपिंबै म्हिमैंइ खीलाइ म्रोंब्‍मुँ, छलेन परमेश्‍वरए बारेर्बै ताँ खोंयोंइ आथेब्‍मैंइ खीए ताँ क्‍होब्‍मुँ।”
ROM 15:22 ल्हें खे ङ क्‍हेमैं ङाँर खबै सैं लइ, दिलेया खल् आयों।
ROM 15:23 दिलेया तोगो चु क्‍ल्‍ह्‍योजरे ङइ के लल् खाँइमुँ, धै ल्हें ओंसों ओनोंन् क्‍हेमैंने त्‍होदा ङ्हाँल।
ROM 15:24 छतसि तारे ङ स्‍पेन बिबै ह्‍युलर ह्‍यासिन्मुँ, च्हमन् क्‍हेमैंने त्‍होबै आशा मुँ। चर क्हेमैंने तिस्‍याँदेन् बिलै संगति लदा ङ्हाँइमुँ। धै स्‍पेन ह्‍याबै ल्हागिर क्‍हेमैंइ ङलाइ ल्होलै ङ्हाँइमुँ।
ROM 15:25 दिलेया तोगो ङ यरूशलेम सहरर परमेश्‍वरए म्‍हिमैंलाइ ल्होबर ह्‍यासिन् मुँ।
ROM 15:26 तलेबिस्याँ ग्रिस नेरो म्‍याकेडोनिया ह्‍युलजरेबै बिश्‍वासीमैंइ यरूशलेमर्बै यहूदी ङ्हाँदु बिश्‍वासी अलि-अङाँमैंए ल्हागिर च्हौदे मुइ पिमिंइमुँ।
ROM 15:27 चु मुइ चमैंइन पिंबै सैं लब् ग। बिलन त्हुमा च ङ्हाँदुमैं ल्होल् त्‍हुब्मैंन् ग, तलेबिस्याँ यहूदीमैंउँइँलेन् अरू ह्रेंमैंइ सैं तोंन् लबै ताँमैं थेल् योंइ, छतसि चमैंए खि फोबर अरू ह्रेंमैंज्‍यै या यहूदीमैंए खाँचोर ल्होल् त्‍हुम्।
ROM 15:28 छतसि चमैंए ल्हागिर रेबै मुइ सनेसि ङ यरूशलेमउँइँले क्हेमैं ङाँर खसि स्‍पेन ह्‍युलर ह्‍याब्‍मुँ।
ROM 15:29 ङ क्‍हेमैं ङाँर खमा येशू ख्रीष्‍टउँइँले खबै आशिकए बारेर ङइ अझै छेनाले क्होमिंल् खाँब्मुँ बिसि ङइ सेइमुँ।
ROM 15:30 ओ अलि-अङाँमैं, ङ्योए प्रभु येशू ख्रीष्‍टउँइँले नेरो खीए प्ल्हजी पिंबै म्हाँयाजी परमेश्‍वरने ङए ल्हागिरि ल्हें प्राथना लमिंन् बिसि ङ यो छ्युँ लमुँ।
ROM 15:31 यहूदीयार्बै येशूए फिर बिश्‍वास आलब्‍मैंउँइँले परमेश्‍वरजी ङलाइ जोगेमिंरिगे, झाइले यरूशलेमर्बै परमेश्‍वरए म्‍हिमैंइ ङइ बोबै मुइ किंरिगे बिसि प्राथना लमिंन्।
ROM 15:32 झाइले परमेश्‍वरए इच्छा मुँस्याँ ङ यरूशलेमउँइँले क्‍हेमैं ङाँर सैं तोंन्लेन् खब्मुँ, झाइले ङ्यो सैं तोंन्ले बालुन् टिस्यो।
ROM 15:33 शान्‍ति पिंबै परमेश्‍वर क्‍हेमैं ताँनने तरिगे। आमेन, छान तरिगे।
ROM 16:1 तारे ङ ङ्योए अङाँ फिबिलाइ क्‍हेमैंने ङो सेब् मिं सेब् लमिंम्। चइ किंक्रिया नाँसर्बै बिश्‍वासीमैंलाइ ल्होमिंम्।
ROM 16:2 चइ ल्हें म्हिलाइ ल्होइमुँ, ङलाज्यै या ल्हें ल्होइमुँ। छतसि क्‍हेमैंज्‍यै परमेश्‍वरए पबित्र म्हिमैंइ लब् धोंले प्रभुए मिंरि चलाइ मान लद्, झाइले चलाइ चैदिबै तोन्दोंरि सैर ल्होद्।
ROM 16:3 येशू ख्रीष्‍टए के लमा ङने बालुन् के लबै प्रिस्‍का नेरो चए प्युँ अकिलासने ङए जय मसीह मुँ बिमिंन्।
ROM 16:4 ङलाइ जोगेबर चमैं सिल् त्हुलेया लिलि आस्यो ङए फिर चमैंल थेबै गुन् मुँ। ङ मत्‍त्रे आङिं, अरू ह्रेंर्बै बिश्‍वासमैंए फिरै या चमैंल थेबै गुन् मुँ।
ROM 16:5 चमैंए धिंर मुँबै बिश्‍वासीमैंलाज्यै या ङए जय मसीह बिमिंन्। ङइ खोबै थु इपेनितसलाज्यै या जय मसीह मुँ। च एशिया ह्‍युलर्बै येशू ख्रीष्‍टए फिर बिश्‍वास लबै ओंसोंबै म्‍हि ग।
ROM 16:6 छलेन क्‍हेमैंए ल्हागिर बेल्‍ले के लबै मरियमलाज्यै या जय मसीह मुँ।
ROM 16:7 झाइले ङने बालुन् झेलर च्युवाबै यहूदी थुमैं एन्‍ड्रोनिकस नेरो चए प्ह्रेंस्यो युनियाने जय मसीह मुँ बिमिंन्। चमैं येशू ख्रीष्‍टए कुल्मिंबै चेला चिब्मैं न्होंर्बै ताँनइ ङो सेब्मैं ग। झाइले ङइ बिश्‍वास लब् भन्दा ओंसों चमैंइ येशू ख्रीष्‍टए फिर बिश्‍वास लल।
ROM 16:8 झाइले एम्प्लिआतसलाइ ङए जय मसीह मुँ। चइ प्रभुए फिर बिश्‍वास लबइले ङइ बेल्‍ले खोम्।
ROM 16:9 छलेन ख्रीष्‍टए ल्हागिर ङने बालुन् के लबै उर्बानस नेरो ङइ खोबै थु स्‍ताकिसलाज्यै या ङए जय मसीह मुँ बिमिंन्।
ROM 16:10 अपेल्‍लेसलाज्यै या ङए जय मसीह मुँ। च ख्रीष्‍टए के लबै म्‍हि ग बिसि म्‍हिमैंइ छेनाले सेइमुँ। अरिस्‍तोबुलसए धिंर्बै परवालाज्यै ङए जय मसीह मुँ बिमिंन्।
ROM 16:11 ङए यहूदी अलिमैं हेरोदियनलाइ ङए जय मसीह मुँ बिमिंन्। झाइले नर्किससए धिंर्बै प्रभुए फिर बिश्‍वास लबै ताँनलाइ ङए जय मसीह मुँ बिमिंन्।
ROM 16:12 झाइले प्रभुए के बेल्‍ले लबै अङाँमैं त्रुफेना नेरो त्रोफोसालाइ ङए जय मसीह मुँ बिमिंन्। झाइले प्रभुए ल्हागिर ल्हें के लबै खोबै परसिसलाइ ङए जय मसीह मुँ बिमिंन्।
ROM 16:13 झाइले प्रभुए ल्हागिर थेबै के लबै रूफसलाइ ङए जय मसीह मुँ। रूफसए आमालाज्यै या ङए जय मसीह मुँ बिमिंन्। चइ ङलाइ खीए च्‍ह धोंलेन् म्हाँया लमल।
ROM 16:14 छलेन असिंक्रितस, फ्लेगन, हर्मेस, पत्रोबास, हर्मास नेरो चमैंने मुँबै अरू अलि-अङाँमैंलाज्यै या ङए जय मसीह मुँ बिमिंन्।
ROM 16:15 झाइले फिलोलोगस, युलिया, नेरियस, चए अङाँ, ओलिम्‍पास नेरो चमैंने बालु मुँबै ख्रीष्‍टर बिश्‍वास लब्‍मैंलाइ ङए जय मसीह मुँ बिमिंन्।
ROM 16:16 घ्रिइ घ्रिने खोंउँइँलेन् म्हाँया लद्। चुर्बै ताँन् बिश्‍वासीमैंज्यै या क्‍हेमैंलाइ जय मसीह बिमिंइमुँ।
ROM 16:17 ओ अलि-अङाँमैं, ङ क्‍हेमैंने यो छ्युँ लमुँ, भाँडिदिब्‍मैं नेरो क्हेमैंलाइ लोमिंबै परमेश्‍वरए ताँए बिरोधर पोंसि आक्ह्रिल् लब्‍मैंउँइँले न्ह क्रों मि क्रोंले स्‍योले टिद्।
ROM 16:18 तलेबिस्याँ छाबै म्‍हिमैंइ ङ्योए प्रभु येशू ख्रीष्‍टए ल्हागिर आङिं, दिलेया ह्रोंसए फोए ल्हागिर सेवा लम्। चमैंइ ननाओलिबै छ्याँबै ताँमैं पोंसि सोजो म्‍हिमैं धोका पिंम्।
ROM 16:19 दिलेया क्‍हेमैंइ सैं तोंबै ताँ छेनाले म्हाँदिसि च अनुसार प्रम् बिब ताँनइ थेइमुँ। चु ताँर ङए सैं बेल्‍ले तोंइमुँ। अझै क्‍हेमैं छ्याँबै के लबर सिपालु तरिगे, धै आछ्याँबै केमैंए छ्याब क्हेमैंए फिर आखरिगे बिब ङए सैं मुँ।
ROM 16:20 ङ्योलाइ शान्‍ति पिंबै परमेश्‍वरजी युनन् दुष्‍टलाइ क्‍हेमैंए प्‍हलेइ प्‍लेल् पिंब्‍मुँ। ङ्योए प्रभु येशूए थेबै दयाम्हाँया क्‍हेमैंने बालु तरिगे।
ROM 16:21 ङने बालु के लबै तिमोथी, धै ङए यहूदी अलिमैं लुकियस, यासोन नेरो सोसिपात्रोज्‍यै या क्‍हेमैंने जय मसीह बिमिंइमुँ।
ROM 16:22 (पावलइ बिबै ताँ चु प्ह्रिछ्यार प्‍ह्रिमिंबै म्‍हि ङ तर्तियसउँइँले या प्रभुए मिंर क्‍हेमैंलाइ जय मसीह मुँ।)
ROM 16:23 ङ नेरो ताँन् बिश्‍वासीमैंलाइ मान लबै गायसज्यै या क्‍हेमैंलाइ जय मसीह मुँ बिमिंइमुँ। झाइले चु धिंर मुँबै बिश्‍वासीमैंइ क्‍हेमैंलाइ जय मसीह बिमिंइमुँ। छलेन चु सहरर्बै कोशाध्‍यक्ष इरास्‍तस नेरो ङ्योए अलि क्‍वार्टसज्‍यै या क्‍हेमैंलाइ जय मसीह बिमिंइमुँ।
ROM 16:24 ङ्योए प्रभु येशू ख्रीष्‍टए दयाम्हाँया क्‍हेमैं ताँनने तरिगे। आमेन। छान् तरिगे।
ROM 16:25 ङ्यो ताँनइ परमेश्‍वरए मिं थेब लले! खीजी क्‍हेमैंलाइ बिश्‍वासर भोंसि लमिंल् खाँम्। येशू ख्रीष्‍टउँइँले खबै सैं तोंबै ताँ ङइ बिप्रमा जुग जुग ओनोंन् लोथेंबै ताँ तारे छर्लङ्ग तसि ताँनइ सेइमुँ।
ROM 16:26 चु क्ह्रोंसेंन्बै ताँ परमेश्‍वरए छ्वेर अगमबक्‍तामैंइ प्‍ह्रिथेंल छतसि तारे म्‍हिमैंइ छेनाले क्‍होल् खाँम्। खोंयोंइ तरिबै सोगों परमेश्‍वरजी बिब् धोंले च आसेल्‍ले मुँबै सैं तोंबै ताँ ताँन् ह्रेंमैंलाइ बिमिंसिन् मुँ। च आसेल्‍ले मुँबै ताँ तो मुँ बिस्‍याँ यहूदी मुँले अरू ह्रें मुँले ताँन् ह्रेंमैंइ बिश्‍वास लसिन् परमेश्‍वरलाइ म्हाँदिल् योंम्।
ROM 16:27 तोन्दोंरि ज्ञान-बुद्धि मुँबै परमेश्‍वरलाइ येशू ख्रीष्‍टउँइँले म्‍हिमैंइ खीए मिं खोंयोंन् बिलै थेब लरिगे। आमेन।
1CO 1:1 परमेश्‍वरए सैंर मैंब् धोंबै के लबर ख्रीष्‍ट येशूउँइँले कुल्मिंबै चिब चेला ङ पावल नेरो ङ्योए सोस्थेनेस बिबै अलिउँइँले
1CO 1:2 कोरिन्थ सहरर्बै बिश्‍वासी अलि-अङाँमैंलाइ जय मसीह मुँ। परमेश्‍वरजी क्हेमैंलाइ खीए म्हिमैं तबर हुइमुँ। क्हेमैं नेरो क्ल्ह्‍यो-क्ल्ह्‍योर्बै ङ्योए प्रभु येशू ख्रीष्‍टए फिर बिश्‍वास लबै ताँन् म्हिमैंए प्रभु येशू ख्रीष्‍टन् ग। परमेश्‍वरजी क्हेमैं नेरो चमैं ताँनलाइ ख्रीष्‍ट येशूने घ्रिन् लसि पबित्र लइमुँ।
1CO 1:3 ङ्योए परमेश्‍वर आबा नेरो प्रभु येशू ख्रीष्‍टउँइँले क्‍हेमैं ताँनइ दयाम्हाँया नेरो शान्‍ति योंरिगे।
1CO 1:4 क्‍हेमैंए ल्हागिर खोंयोंन् बिलै ङए परमेश्‍वरलाइ धन्‍यबाद पिंम्, तलेबिस्याँ येशू ख्रीष्‍टउँइँले क्‍हेमैंइ खीए दयाम्हाँया योंइमुँ।
1CO 1:5 छले येशू ख्रीष्‍टउँइँले दयाम्हाँया योंबइले क्हेमैं ताँन् सैमैंर प्ल्होइमुँ धै तोन्दोंरिर ह्रब् सेब् तसि पोंल् ह्रब् तइमुँ।
1CO 1:6 तलेबिस्याँ येशू ख्रीष्‍टउँइँले खबै सैं तोंबै ताँ क्ह्रोंसेंन् ग बिसि परमेश्‍वरजी क्‍हेमैंए सैंर पक्‍का लमिंइमुँ।
1CO 1:7 छतसि ङ्योए प्रभु येशू ख्रीष्‍ट युबै त्हिंइए घ्‍याँ ङ्ह्‍योरिमा क्‍हेमैंलाइ चैदिबै परमेश्‍वरउँइँले योंल् त्हुबै बरदान तो मुँलेया क्हेमैंने खाँचो तरिब् आरे।
1CO 1:8 ङ्योए प्रभु येशू ख्रीष्‍ट युबै त्हिंइर क्‍हेमैंलाइ तोइ छ्याब् आरेब लमिंरिगे बिसि खीजीन् लिउँइँ समा क्हेमैंए बिश्‍वासर भोंब लमिंब्मुँ।
1CO 1:9 तलेबिस्याँ परमेश्‍वर बेल्‍ले भर लल् खाँब मुँ, खीजी ह्रोंसए च्‍ह येशू ख्रीष्‍ट ङ्योए प्रभुने बालु टिबर क्‍हेमैंलाइ त्‍हाँइ।
1CO 1:10 छतसि ओ अलि-अङाँमैं, ङ्योए प्रभु येशू ख्रीष्‍टए थेबै मिंर ङ क्हेमैंने यो छ्युँ लमुँ: क्‍हेमैं सैं फो क्ह्रिसि टिब्मैं तद्, क्हेमैंए सैं आक्ह्रिसि ह्रों-ह्रोंसए न्होंर्न फ्रेब् प्ह्राब् आतरिगे।
1CO 1:11 तलेबिस्याँ ओ ङए अलि अङाँमैं, क्‍हेमैं ह्रों-ह्रोंसए न्‍होंर्न प्होंगि कैगि लम् बिबै ताँ क्‍लोए बिबै म्हिए परवार्बै म्‍हिमैंइ ङने बिल।
1CO 1:12 क्‍हेमैं न्‍होंर कोइइ “ङ पावलए चेला ग,” कोइइ “ङ अपोल्‍लसए चेला ग,” कोइइ “ङ पत्रुसए चेला ग,” कोइइ “ङ ख्रीष्‍टए चेला ग,” बिम् रो।
1CO 1:13 ख्रीष्‍ट ङ्हिंदे सोंदे मुँ रो वा? आङिं, घ्रिन् ग! क्‍हेमैंए ल्हागिर ङ पावल क्रूसर च्योसि सिल् रो वा? आसि! क्‍हेमैंइ ङए मिंर बप्‍तिस्‍मा किंल् रो वा?
1CO 1:14 क्हेमैं न्होंरि खाबलाज्यै या ङइ बप्‍तिस्‍मा आपिंइमुँ बिसि ङइ परमेश्‍वरलाइ धन्‍यबाद पिंम्! ओं, क्रिस्‍पस नेरो गायस बिबै म्हिमैंलाइ मत्‍त्रे ङइ बप्‍तिस्‍मा पिंल।
1CO 1:15 छतसि क्हेमैं खाबज्‍यै या “पावलए मिंर बप्‍तिस्‍मा किंल!” बिल् योंरिब् आरे।
1CO 1:16 (ओं, ङइ स्‍तिफनसए परवालाज्यै या बप्‍तिस्‍मा पिंल। चु म्हिमैं बाहेक अरू खाबलाज्यै या ङइ बप्‍तिस्मा पिंइ उ आपिं बिसि ङलाइ था आरे।)
1CO 1:17 तलेबिस्याँ ख्रीष्‍टजी ङलाइ बप्‍तिस्‍मा पिंबर आङिं, खीउँइँले खबै सैं तोंबै ताँ बिप्रबर कुल्‍मिंब् ग। धै ख्रीष्‍टजी ङ्योए ल्हागिर क्रूसर पिंबै ख्रो फाक्‍कर्न आतरिगे बिसि च सैं तोंबै ताँ बिप्रमा ङइ चु ह्‍युलउँइँले खबै ज्ञान-बुद्धिइ आपों।
1CO 1:18 तलेबिस्याँ ङ्योए पाप ख्रुमिंबै ल्हागिर येशू ख्रीष्‍टजी क्रूसर ख्रो पिंब् ग बिबै ताँ नास तबर होंब्मैंइ बुद्धि आरेब्मैंए ताँ धों ङ्हाँम्, दिलेया येशूए फिर बिश्‍वास लसि पापउँइँले फ्रेब्मैंइ बिस्याँ ङ्योए ल्हागिर चु ताँ परमेश्‍वरए शक्‍ति ग ङ्हाँम्।
1CO 1:19 तलेबिस्याँ “बुद्धि मुँब् प्हैंब्मैंए बुद्धि ङइ नास लवाब्मुँ, धै बाठो प्हैंब्मैंइ लबै चाँजोमैं केर आफेब् लवाब्मुँ,” बिसि परमेश्‍वरजी खीए पबित्र छ्वेर प्ह्रिइमुँ।
1CO 1:20 छतसि बुद्धि मुँब्मैं खनिर मुँ? छ्वेर्बै ताँ लोमिंब्मैं खनिर मुँ? चु जुगर्बै ह्रब्-सेब्मैं खनिर मुँ? परमेश्‍वरजी ह्‍युलर्बै बुद्धि मुँब् प्हैंब्मैंलाइ आमादु आलइमुँ वा?
1CO 1:21 तलेबिस्याँ परमेश्‍वरए बुद्धिउँइँलेन् म्‍हिमैंइ ह्रोंसने बुद्धि मुँब् धों ङ्हाँलेया चमैंइ खेंमैंए “बुद्धिउँइँले” खीलाइ ङो सेल् आखाँ। छतसि ङ्योइ बिप्रबै सैं तोंबै ताँउँइँलेन् खीजी ह्रोंसए फिर बिश्‍वास लब्‍मैंलाइ जोगेबै चाँजो लइ।
1CO 1:22 यहूदीमैंइ अचम्मबै चिनुमैं म्‍हैम्, ग्रिकमैंइ ज्ञान-बुद्धिए ताँमैं म्‍हैम्।
1CO 1:23 दिलेया ङ्योइ बिस्याँ क्रूसर च्योवाबै येशू ख्रीष्‍टउँइँले खबै सैं तोंबै ताँ बिप्रम्। चु ताँ यहूदीमैंइ तिफुँइ आखो, छलेन अरू ह्रेंमैंए ल्हागिर चु ताँ बुद्धि आरेब्मैंइ पोंबै ताँ धों ङ्हाँम्।
1CO 1:24 दिलेया यहूदी मुँलेया, अरू ह्रेंमैं मुँलेया खीजी त्हाँबै म्हिमैंए ल्हागिर बिस्याँ ख्रीष्‍ट येशून् परमेश्‍वरए शक्‍ति नेरो बुद्धि ग।
1CO 1:25 तलेबिस्याँ परमेश्‍वरउँइँले खबै ताँ म्‍हिमैंइ “बुद्धि आरेब्” धों ङ्हाँलेया च ताँ म्‍हिमैंए “बुद्धि” भन्दा झन् ल्हें ज्ञान मुँबै ताँ ग, झाइले परमेश्‍वरउँइँले खबै ताँ म्‍हिमैंइ “तोन् तोबै” ङ्हाँलेया च ताँ म्‍हिमैंए भों भन्दा झन् ल्हें भोंब मुँ।
1CO 1:26 छतसि ओ अलि-अङाँमैं, परमेश्‍वरजी क्हेमैंलाइ त्‍हाँब् भन्दा ओंसों क्हेमैं खैले छ्ह थोरिल बिसि मैंन्। क्‍हेमैं न्‍होंरि बुद्धि मुँब्मैं, भों मुँब्मैं नेरो चिब्मैं ल्हें आरेल।
1CO 1:27 दिलेया बुद्धि मुँब् प्हैंब्मैंलाइ फा पिन् लवाबै ल्हागिर परमेश्‍वरजी बुद्धि आरेब्मैंलाइ त्‍हाँइ, धै भों मुँब् प्हैंब्‍मैंलाइ फा पिन् लबर परमेश्‍वरजी भों आरेबै म्हिमैंलाइ त्हाँइ।
1CO 1:28 छले ह्‍युलर्बै म्हिमैंइ म्हि आच्हिबै म्हिमैंलाइन परमेश्‍वरजी ह्रोंसए के लबै ल्हागिर त्हाँइ। ह्‍युलर्बै म्हिमैंइ थेब ङ्हाँबै सैमैंलाइ केर आफेब् लवाबै ल्हागिर खीजी छ लब् ग।
1CO 1:29 छतसि खाबज्यै या परमेश्‍वरए उँइँर थेब आप्‍हैंरिगे।
1CO 1:30 तलेबिस्याँ ख्रीष्‍टउँइँलेन् परमेश्‍वरजी ङ्योलाइ छ्ह पिंइमुँ, ख्रीष्‍टउँइँले ङ्योइ बुद्धि योंइमुँ, ख्रीष्‍टउँइँलेन् ङ्योइ ठिक के लल् खाँमुँ, ख्रीष्‍टउँइँलेन् ङ्यो पबित्र तइमुँ, ख्रीष्‍टउँइँलेन् परमेश्‍वरजी ङ्योलाइ जोगेमिंइमुँ।
1CO 1:31 छतसि “थेब् प्‍हैंदा ङ्हाँब्मैं प्रभुजी लबै केर्न थेब् प्‍हैंरिगे,” बिसि परमेश्‍वरए छ्वेर प्ह्रिइमुँ।
1CO 2:1 ओ अलि-अङाँमैं, ङ क्‍हेमैं ङाँर खमा ङ परमेश्‍वरए बारेर खाबज्यै आसेबै ताँ बिप्रबै ल्हागिर ङ थे-थेबै ताँमैं नेरो बुद्धिउँइँले आपोंल।
1CO 2:2 तलेबिस्याँ ङ क्‍हेमैंने मुँमा येशू ख्रीष्‍टलाइ क्रूसर च्योवाबै ताँ मत्‍त्रे लम् बिब ङए सैंर मुँल।
1CO 2:3 छतसि ङ क्‍हेमैं ङाँर भों आरेबै म्हि धोंले ङ्हिंदा-ङ्हिंदाले त्हारदै खइ।
1CO 2:4 क्‍हेमैंए बिश्‍वास म्‍हिमैंए बुद्धिर आङिं, परमेश्‍वरए शक्‍तिए फिर तरिगे बिसि ङइ क्हेमैंने बिबै ताँमैं बुद्धि मुँब्मैंइ पोंबै ताँ धोंले क्हेमैंए सैं छुइबै ताँ आरेल। दिलेया ङइ पोंबै ताँमैंइ पबित्र प्ल्हए शक्‍तिए प्रमाण उँइँल।
1CO 2:6 दिलेया परमेश्‍वरए फिर बिश्‍वासर भोंब्मैंए उँइँर ङ्यो बुद्धिए ताँमैं या पोंम्। ङ्योइ पोंबै बुद्धिए ताँमैं चु ह्‍युलर्बै आङिं, ह्‍युलर ग्याल्स लब्मैंउँइँले खबै या आङिं। (चु ह्‍युलर ग्याल्स लब्मैं नास तयाम्।)
1CO 2:7 दिलेया ङ्योइमि परमेश्‍वरउँइँले खबै बुद्धिए ताँमैं बिप्रम्। च बुद्धिए ताँ म्हिमैंइ तिफुँइ क्होल् आखाँब् मुँल। दिलेया ङ्योइ खीउँइँले आशिक योंरिगे बिसि स्योंम् ओंनोंन् परमेश्‍वरजी चु बुद्धि ङ्योए ल्हागिर साँथेंल।
1CO 2:8 चु ह्‍युलर ग्याल्स लब्मैंइ चु ताँ आक्होल। चमैंइ चु ताँ क्होस्याँ ताँन् भन्दा थेबै प्रभुलाइ क्रूसर आच्योवामल।
1CO 2:9 चु ताँए बारेर परमेश्‍वरए छ्वेर छले प्ह्रिइमुँ, “म्‍हिमैंइ खोंयोंइ आम्रोंब, खोंयोंइ आथेब, म्हिमैंए सैंरै आमैंबै ताँमैं, परमेश्‍वरजी खीलाइ म्हाँया लब्‍मैंए ल्हागिर तयार लथेंइमुँ।”
1CO 2:10 चुन् क्होल् आखाँबै ताँमैं परमेश्‍वरजी खीए पबित्र प्ल्हउँइँले ङ्योलाइ क्होल् लमिंइ। तलेबिस्याँ पबित्र प्ल्हजी परमेश्‍वरए ताँन् सै म्हैमुँ, तिफुँइ क्होल् आखाँबै परमेश्‍वरए गैरु-गैरु ताँमैं या खीजी म्हैमुँ।
1CO 2:11 म्हिमैंए सैंर तो मुँ बिब ह्रोंसए सैंइ मत्‍त्रे सेमुँ, अरूइ आसे, छलेन परमेश्‍वरए सैंर्बै ताँ या खीए पबित्र प्ल्हजी मत्‍त्रे सेम्।
1CO 2:12 धै खीजी ङ्योलाइ पिंल् खाँबै ताँन् सै था सेरिगे बिसि खीजी ङ्योलाइ चु ह्‍युलर्बै सैं आङिं, बरु खीउँइँले युबै पबित्र प्ल्ह पिंइमुँ।
1CO 2:13 छतसि ङ्योइ बिप्रबै ताँमैं म्‍हिमैंए बुद्धिउँइँले खबै ताँमैं आङिं, पबित्र प्ल्हउँइँले लोमिंबै ताँमैं ग। छतमा पबित्र प्ल्हउँइँले खबै ताँमैंए अर्थ ङ्योइ पबित्र प्ल्ह मुँबै म्हिमैंलाइ क्होमिंम्।
1CO 2:14 पबित्र प्ल्ह आरेबै म्हिमैंइ परमेश्‍वरजी बिबै ताँ क्होल् आखाँ। च ताँ चमैंए ल्हागिर केर आफेबै ताँ धों तम्, तलेबिस्याँ पबित्र प्ल्हजी पिंबै ज्ञान-बुद्धिउँइँले मत्‍त्रे च ताँमैं क्होल् खाँम्।
1CO 2:15 पबित्र प्ल्ह मुँबै म्हि बिस्याँ ताँन् सै छेनाले क्होल् खाँम्, दिलेया खाबज्यै या छाबै म्हिलाइ छ्याब् ल्हैदिल् आखाँ।
1CO 2:16 परमेश्‍वरए छ्वेर प्ह्रिब् धोंले, “याहवेहलाइ खाबइ लोमिंल् खाँमुँ? खीए सैंर्बै ताँ खाबइ सेइमुँ? खाबज्यै आसे।” दिलेया ङ्योइमि ख्रीष्‍टए सैंर्बै ताँ सेइमुँ।
1CO 3:1 ओ अलि-अङाँमैं, ङ क्‍हेमैं ङाँर खमा पबित्र प्ल्ह मुँबै म्हिमैंने पोंब् धोंले ङ क्‍हेमैंने पोंल् आखाँल, भर्खर बिश्‍वास लबै म्हिमैंने धोंले पोंल् त्हुइ।
1CO 3:2 ङइ क्‍हेमैंलाइ ङ्‍हे मत्‍त्रे थुँल् पिंइ, सारो सैमैं चल् आपिं, तलेबिस्याँ क्हेमैं सारो सैमैं चल् आखाँब्मैं मुँल, अझै या छाबन् मुँ।
1CO 3:3 क्‍हेमैं अझै परमेश्‍वरए फिर बिश्‍वास आलब्मैं धोंबन् मुँ। तलेबिस्याँ क्‍हेमैं ह्रों-ह्रोंसए न्होंर्न ह्रिस लब, प्होंगि कैगि लब तसेरो क्हेमैं परमेश्‍वरए फिर बिश्‍वास आलब्मैं धोंन् तइ, आङिं वा?
1CO 3:4 क्‍हेमैं न्‍होंरि कोइइ “ङ पावलए चेला ग,” कोइइ “ङ अपोल्‍लसए चेला ग” बिम् बिस्याँ, क्‍हेमैं बिश्‍वास आलबै म्‍हिमैं धोंन् तइ, आङिं वा?
1CO 3:5 अपोल्‍लोस खाब् जा? ङै या खाब् जा? ङिम् परमेश्‍वरए के लबै म्‍हिमैं मत्‍त्रे ग। ङिउँइँले क्‍हेमैंइ खीए फिर बिश्‍वास लइ। खीजी खटिदिबै के ङि लमुँ।
1CO 3:6 ङइ प्‍लु प्‍लुइ, अपोल्‍लसइ क्‍यु झोंइ, दिलेया परमेश्‍वरजीन् धुँ बडिमिंइ।
1CO 3:7 छतसि प्‍लु प्‍लुबै म्‍हि नेरो क्‍यु झोंबै म्‍हि थेब आङिं, क्हेमैंए बिश्‍वास बडिमिंबै परमेश्‍वरन् थेब ग।
1CO 3:8 प्‍लु प्‍लुबै म्‍हि नेरो क्‍यु झोंबै म्‍हिए के घ्रिन् ग। चमैंइ लबै के अनुसार्बै नों सै परमेश्‍वरजी चमैंलाइ पिंब्मुँ।
1CO 3:9 ङि बालुन् परमेश्‍वरए के लब्मैं ग, क्‍हेमैं बिस्याँ छ्याँबै रोमैं रोमिंबै म्रों नेरो परमेश्‍वरए धिं ग।
1CO 3:10 परमेश्‍वरउँइँले योंबै ज्ञान बुद्धिउँइँले ङइ धिं बनेबै सिपालु कर्मिइ धोंले छेनाले तें (जग) झोंइमुँ। च तेंए फिर गारा झोंब्मैं ताँनइ छेनाले च्हैंसि मैंसि परमेश्‍वरउँइँले योंबै भों मुँबै बरदान अनुसार के लसि छेनाले गारा झोंल् त्हुम्।
1CO 3:11 परमेश्‍वरजी झोंबै तें येशू ख्रीष्‍ट ग। म्हिमैंइ येशू बाहेक अरू तें झोंल् आखाँ।
1CO 3:12 चु तेंए फिर खाबज्यै या सै ल्हें फेबै सैमैं, मारा, चाँदि हिरा मोति, छि, सिं परालमैंइ धिं बनेलैया,
1CO 3:13 ख्रीष्‍टजी निसाफ लबै त्हिंइर ताँन् म्हिमैंइ लबै केमैं खीजी उँइँमिंब्मुँ। तलेबिस्याँ खीए ओंसों तोइ सै या लोल् आखाँ। म्हिमैंए के खैब मुँगे बिसि खीजी मिउँइँले जाँच लब्मुँ।
1CO 3:14 छतसि च तेंए फिर म्हिमैंइ झोंबै गारा मिइ जाँच लमा खाब्मैंए गारा मिइ आख्रों चमैंइ इनाम योंब्‍मुँ।
1CO 3:15 खाब्मैंए गारा मिइ ख्रोंवामुँ चमैंइ इनाम आयों, दिलेया मिउँइँले त्होंखब् धोंले प्रभुजी चमैं जोगेमिंब्मुँ।
1CO 3:16 क्‍हेमैंन् परमेश्‍वरए मन्दिर ग, परमेश्‍वरए पबित्र प्ल्ह क्‍हेमैंए न्‍होंरि टिम् बिब क्हेमैंइ आसे वा?
1CO 3:17 छतसि खाबज्‍यै परमेश्‍वरए मन्दिर नास लवाम् बिस्याँ परमेश्‍वरज्यै या चलाइ नास लवाब्‍मुँ, तलेबिस्याँ परमेश्‍वरए मन्दिर पबित्र तल् त्हुम्, च मन्दिर क्हेमैंन् ग।
1CO 3:18 ह्रोंसैन ह्रोंसलाइ धोका आपिंन्: क्हेमैंए न्होंरि खाबज्‍यै या “चु ह्‍युलर्बै बुद्धि मुँबै म्हि ङन् ग” बिसि मैंम् बिस्याँ क्ह्रोंसेंन्बै बुद्धि मुँबै म्हि तल् खाँरिगे बिसि च बुद्धि आरेबै म्हि धों तल् त्हुम्।
1CO 3:19 तलेबिस्याँ चु ह्‍युलउँइँले खबै बुद्धि परमेश्‍वरए उँइँर बुद्धि आरेब् धोंन् तब् ग। परमेश्‍वरए छ्वेर छले प्ह्रिइमुँ, “बुद्धि मुँब् प्हैंब्मैंलाइ चमैंइ स्योर तेसि के लरिबै त्हेर्न खीजी क्हावाब्मुँ।”
1CO 3:20 धबै परमेश्‍वरए छ्वेर चु या प्ह्रिइमुँ, “बुद्धि मुँब्मैंइ मैंबै ताँमैं या केर आफेबन् तम् बिसि परमेश्‍वरजी सेम्।”
1CO 3:21 छतसि खाबज्यै चेला चिबइ लबै केरि आप्‍हैंरिगे, तलेबिस्याँ तोन्दोंरि क्‍हेमैंलन् ग:
1CO 3:22 पावल, अपोल्‍लस, पत्रुस, चु ह्‍युल, तिंजोरोबै सैमैं, प्‍हँना लिउँइँबै सैमैं, क्हेमैं सोलेया, सिलेया — ताँन् क्‍हेमैंलन् ग।
1CO 3:23 झाइले क्‍हेमैं ख्रीष्‍टल् ग, धै ख्रीष्‍ट परमेश्‍वरल् ग।
1CO 4:1 छतसि ङिलाइ येशू ख्रीष्‍टए के लब्मैं नेरो परमेश्‍वरउँइँले खबै बुद्धिए ताँमैं ङिए जिम्‍मार थेंइमुँ बिसि म्हिमैंइ मैंल् त्‍हुम्।
1CO 4:2 परमेश्‍वरए छाबै के लब्मैं ताँनइ भर लल् खाँब्मैं तल् त्हुम्।
1CO 4:3 क्हेमैंइ ङए फिर छ्याब् ल्हैदिलेया, थे-थेबै अदालतर बोसि दोष ल्हैदिलेया, ङ तोइ धोंइ आङ्हाँ। ङइ छ्याँबै केमैं लइमुँ उ आलइमुँ बिसि ङइ ह्रोंसलाज्यै या जाँच आल।
1CO 4:4 तलेबिस्याँ ङइ आछ्याँबै के तोइ आलइमुँ बिसि ङए सैंर मैंलेया ङ छ्याब् आरेब् तइ बिल् आखाँ। ङलाइ जाँच लब खाब् जा बिस्याँ प्रभुन् ग।
1CO 4:5 छतसि ठिक त्हे आतन् समा खाबै फिरै या क्हेमैंइ छ्याब् आल्हैदिद्, ताँनए निसाफ प्रभुजीन् च त्हेर लम्। म्हिमैंइ आसेल्‍ले लबै आछ्याँबै केमैं या ताँनइ सेल् लमिंब्मुँ, छलेन म्‍हिमैंए सैं न्‍होंर्बै ताँमैं या उँइँमिंब्‍मुँ। धै म्हिमैंइ खैबै केमैं लइमुँ च अनुसार्बै इनाम परमेश्‍वरजी चमैंलाइ पिंब्‍मुँ।
1CO 4:6 ओ अलि-अङाँमैं, क्हेमैं बिब् धों तरिगे बिसि ङइ क्हेमैंने अपोल्‍लस नेरो ङए नमुना उँइँसि चु ताँमैं प्ह्रिइमुँ। तलेबिस्याँ ङि धोंलेन् क्हेमैं या परमेश्‍वए छ्वेर बिब् धोंले छ्ह थोल् खाँरिगे, धै क्हेमैं न्होंरि खाबज्यै या कोइलाइ थेब् लब कोइलाइ च्योंब् लबै के आतरिगे।
1CO 4:7 खाबइ क्हिलाइ अरूमैं भन्दा थेब् लमिंइ? क्‍हिने मुँबै सैमैं ताँन् परमेश्‍वरजी पिंब आङिं वा? क्‍हिइ योंबै तोन्दोंरि सैमैं परमेश्‍वरजी पिंबै बरदान आङिं वा? छतसि क्हेमैं तले थेब् प्हैंमुँ?
1CO 4:8 क्‍हेमैंइ चैदिबै सैमैं तोन्दोंरि योंल् खाँइमुँ वा? क्‍हेमैं प्‍ल्‍होल् खाँइमुँ वा? ङि आरेल्‍लै या क्हेमैं म्रुँ तइमुँ वा? ओं, ङि या क्‍हेमैंने बालुन् ग्याल्स लल् खाँरिगे बिसि क्‍हेमैंइ क्‍ह्रोंसेंन ग्याल्स लस्याँ तमल!
1CO 4:9 ङए सैंरम् ङि कुल्मिंबै चेला चिब्मैंलाइमि परमेश्‍वरजी ताँन् भन्दा च्‍योंबै क्‍ल्‍ह्‍योर थेंब् धों ङ्हाँइमुँ, तलेबिस्याँ चु ह्‍युलए उँइँर, म्हिमैंए उँइँर नेरो स्वर्गदूतमैंए उँइँरै या ङि सिबै सजैं योंल् त्हुबै म्हि धोंन् तइमुँ।
1CO 4:10 ङिम् ख्रीष्‍टए ल्हागिर बुद्धि आरेब्मैं धोंन् तइमुँ, क्‍हेमैंम् ख्रीष्‍टर बुद्धि मुँब्मैं धों तइमुँ! ङि भों आरेब्मैं धोंन् तइमुँ, क्हेमैंम् भों मुँब्मैं धों तइमुँ! म्‍हिमैंइ क्‍हेमैंलाइ मान लम्, ङिलाइ हेल लम्।
1CO 4:11 तिंयाँ समा ङिइ धोंब-टिंब सैदिसिन् मुँ, ङि फो ख्रेंइमुँ, क्यु पिइमुँ, क्‍लुनान् मुँ, ङिल धिं नाँ या आरे,
1CO 4:12 चब-थुँबै ल्हागिर ङिइ ह्रोंसइन बेल्‍ले दुःख लमुँ। म्हिमैंइ ङिए फिर सराप झोंलेया ङिइ चमैंए फिर आशिकन् पिंमुँ। म्हिमैंइ ङिने खैन् ललेया ङि सैदिम्।
1CO 4:13 म्‍हिमैंइ ङिए आब्रु वानाबिलेया ङिइ चमैंने छ्याँबै सुँलेन् पोंमु। तोगो समा ङि म्हिमैंए उँइँर ह्‍युलर्बै केर आफेसि वाबै कसिं धोंन् तइमुँ।
1CO 4:14 क्‍हेमैंलाइ फाफिन् लबर ङइ चु ताँ प्ह्रिब् आङिं, ह्रोंसए खोबै कोलोमैंलाइ धोंलेन् क्हेमैंलाज्यै या लोदा सैंदा लबर प्ह्रिब् ग।
1CO 4:15 तलेबिस्याँ क्हेमैंलाइ ख्रीष्‍टए ताँ लोमिंबै म्हिमैं हजार च्‍युन् मुँलेया ख्रीष्‍टउँइँले खबै सैं तोंबै ताँ धाँसे ओंसो क्हेमैंने बिमिंसि क्हेमैंलाइ ख्रीष्‍ट ङो सेल् लमिंबै क्हेमैंए आबा ङन् ग।
1CO 4:16 छतसि ङइ लब् धोंन् लद् बिसि ङ क्हेमैंने यो छ्युँ लम्।
1CO 4:17 ङइ क्हेमैं ङाँर प्रभुए फिर बिश्‍वास लबै खोबै तिमोथी कुलइमुँ। च ङए च्‍ह धोंन् तब् ग। ङइ क्ल्ह्‍यो-क्ल्ह्‍योर्बै बिश्‍वासीमैंलाइ लोमिंब् धोंलेन् ख्रीष्‍टर ङइ खैबै छ्ह थोइमुँ बिबै ताँ चइ क्‍हेमैंने बिब्‍मुँ।
1CO 4:18 ङ क्हेमैं ङाँर आखलै ङ्हाँसि क्‍हेमैंए न्‍होंरै या को-कोइ थेब् प्हैंसि प्रइमुँ रो।
1CO 4:19 दिलेया प्रभुए सैं मुइबिस्‍याँ ङ क्‍हेमैं ङाँर युनन् खब्मुँ। धै च थेब् प्हैंसि प्रब्मैंए ताँ आङिं, चमैंए के लबै शक्‍ति क्होब्मुँ।
1CO 4:20 तलेबिस्याँ परमेश्‍वरए ग्याल्स म्हिमैंइ पोंबै ताँर आङिं, खीउँइँलेन् खबै शक्‍तिर मुँ।
1CO 4:21 क्‍हेमैंए सैंर खै ङ्हाँमुँ, ङ क्‍हेमैं ङाँर प्हरे छेसि खले उ? म्हाँया नेरो लोदा सैंदा लबर खले?
1CO 5:1 क्‍हेमैं न्‍होंरि ब्यभिचार तइमुँ रो, चु छाबै आछ्याँबै के बिश्‍वास आलब्‍मैं न्होंरै या आत। तलेबिस्याँ क्‍हेमैं न्‍होंर्बै म्‍हि घ्रि ह्रोंसए आम्‍ज्‍यों आमान् किंसि टिइमुँ रो बिबै ताँ ङइ थेइमुँ।
1CO 5:2 क्‍हेमैं न्‍होंर्न छाबै आछ्याँबै के लबै म्हि मुँसेया क्‍हेमैं खैले थेब् प्‍हैंमुँ? क्‍हेमैंम् शोक लल् त्‍हुमल आङिं वा? छाबै आछ्याँबै के लबै म्हिलाइ क्‍हेमैंए न्‍होंउँइँले तेवाद्।
1CO 5:3 क्‍हेमैंने बालु ङ आरेलै या ङए सैं क्‍हेमैंनेन् मुँ। छतसि ङ चर मुँब् धोंलेन् चए निसाफ ङइ लल् खाँइमुँ।
1CO 5:4 क्‍हेमैं ङ्योए प्रभु येशूए मिंर खागु तमा ङए सैं या क्‍हेमैंने बालु तमुँ। धै ङ्योए प्रभु येशूए शक्‍तिए के चर तब्मुँ।
1CO 5:5 तारेसेरो चइ छाबै पाप केमैं आलरिगे, धै प्रभु येशू युबै त्हिंइर चए प्ल्ह सोरिगे बिसि च म्हिलाइ दुष्‍टए योर पिंवाँन्।
1CO 5:6 क्हेमैं थेब् प्‍हैंब ठिक आरे। च्युगुदे प्लेढाइ ल्हें क्हें फुल्दिवाम् बिब क्‍हेमैंइ आसेइमुँ वा?
1CO 5:7 क्‍हेमैं प्लेढा आझोंबै क्हें धों तबै ल्हागिर क्हेमैंए आछ्याँबै बानि ब्योर पिवाद्। तलेबिस्याँ ङ्योलाइ दुःखइले फ्रेमिंबै ल्हागिर ख्रो तसि येशू ख्रीष्‍ट सिल् खाँइमुँ। छतसि क्‍हेमैं चोखो तल् खाँइमुँ।
1CO 5:8 छतमा तारे ङ्योइ प्लेढा झोंबै क्हें धों तबै ओंसोंबै आछ्याँबै बानि ब्योर पिवासि छ्याँबै केमैं लदै क्ह्रोंसेंन्बै ताँमैं पोंदै प्लेढा आझोंबै क्हें चसि चाड म्हाँदिले।
1CO 5:9 ङइ क्‍हेमैंलाइ ओंसों प्‍ह्रिबै प्ह्रिछ्यार ब्यभिचार लब्‍मैंने बालु आप्रद् बिसि प्‍ह्रिल।
1CO 5:10 ङइ बिल् म्हैबै ताँ, प्रभु येशूलाइ आम्हाँदिबै ब्यभिचार लब्‍मैंने, लोबिमैंने, लुडिब्मैंने, कु पूजा लब्‍मैंने कत्ति आप्रद् बिब आङिं। चमैंने आप्रइ बिस्याँम् क्‍हेमैं चु ह्‍युलउँइँले त्‍होंह्‍याल् त्‍हुमल।
1CO 5:11 ङइ बिल् म्हैबै ताँ तो जा बिस्‍याँ, “ङ प्रभु येशूए फिर बिश्‍वास लबै म्हि ग” बिमुँ दिलेया चइ आछ्याँबै केमैं, व्यभिचार, लोबि, कु पूजा लब, गाल् केब, प्हा को तब, ह्‍योब, छाबै के लइबिस्‍याँ चने बालु प्रब्-टिब आलद्।
1CO 5:12 तलेबिस्याँ बैरुबै म्हिमैंए निसाफ लबै के ङल आङिं। दिलेया चर्ज न्होंर्बै म्हिमैंए निसाफ ङ्योइ लल् त्हुम्।
1CO 5:13 बैरुबै म्हिमैंए निसाफ परमेश्‍वरजीन् लमुँ। छतसि “क्‍हेमैंए न्होंउँइँले दुष्‍ट म्हिमैं तेवाद्।” बिसि परमेश्‍वरए छ्वेर बिइमुँ।
1CO 6:1 क्‍हेमैं न्‍होंरि म्हि घ्रि अर्को म्हिने प्होंगि तइ बिस्‍याँ निसाफ लमिंन् बिसि परमेश्‍वरए म्‍हिमैं ङाँर आह्‍याल्‍ले? बिश्‍वास आलबै म्हिमैं ङाँर ह्‍याम्मा?
1CO 6:2 परमेश्‍वरए म्‍हिमैंइ ह्‍युलर्बै म्‍हिमैंए निसाफ लब्‍मुँ बिब क्‍हेमैंइ आसेइमुँ वा? ह्‍युलए निसाफ क्‍हेमैंना लल् त्‍हुम् बिस्‍याँ, च्‍युथिरि ताँमैं क्‍हेमैंना क्‍ह्रिमिंल् आखाँ वा?
1CO 6:3 ङ्योइ स्‍वर्गदूतमैंलाज्यै या निसाफ लम् बिबै ताँ क्‍हेमैंइ आसेइमुँ वा? छतसि चु छ्हर तखबै च्यु-च्युथुरि ताँमैंम् ङ्योए ल्हागिर तोइ आङिं।
1CO 6:4 क्हेमैंए न्होंरि छाबै आक्ह्रिबै ताँ मुँ बिस्याँ, बिश्‍वासीमैंइ तो धोंइ आङ्हाँबै म्हिमैं ङाँर निसाफ लमिंन् बिबर तले ह्‍यामुँ?
1CO 6:5 क्‍हेमैंलाइ फापिल् लबर्न ङइ चु ताँ बिब् ग: ह्रोंसए आघें-अलिमैं न्होंर्बै आक्ह्रिबै ताँ क्‍ह्रिमिंल् खाँबै बुद्धि मुँबै म्‍हि क्हेमैं न्होंर खाबै आरे वा?
1CO 6:6 दिलेया अलि घ्रिइ अर्को अलिए बिरोध लसि निसाफ म्हैबर बिश्‍वास आल्ब्मैंए उँइँर अड्डार ह्‍याम्।
1CO 6:7 क्‍हेमैं न्‍होंरि घ्रिइ घ्रिए बिरोधर मुद्दा नेब छ्याँब ताँ आङिं। बरु तोन् तलै सैदिसिन् टिब छ्याँब ग।
1CO 6:8 दिलेया क्हेमैंम् ह्रों-ह्रोंसए न्होंर्न घ्रि‍इ घ्रिलाइ स्योर तेसि लुडिबै के लरिमुँ।
1CO 6:9 अधर्मिमैंइ परमेश्‍वरए ग्याल्सर्बै आशिक आयों बिब क्‍हेमैं आसेइमुँ वा? क्‍हेमैंइ धोका योंबै के आतरिगे। छेरन् तबै के लब्‍मैं, कु पूजा लब्मैं, ब्यभिचारिमैं, मुयुँमैंनेन् आछ्याँबै के लबै मुयुँमैं,
1CO 6:10 ह्‍योमैं, लोबिमैं, प्हा ल्हें थुँसि म्हेरब्‍मैं, ह्रिस लब्‍मैं, आगुलाइ लुडिब्मैं, खाबज्‍यै या परमेश्‍वरउँइँले योंल् त्‍हुबै आशिक योंल् आखाँ।
1CO 6:11 क्‍हेमैं न्‍होंरि ओंसों को-कोइ छाबै म्हिमैं मुँल, दिलेया तिंजोरो प्रभु येशू ख्रीष्‍टए मिंउँइँले नेरो ङ्योए परमेश्‍वरए प्ल्हउँइँले क्‍हेमैं पापउँइँले चोखो तइमुँ, क्‍हेमैं परमेश्‍वरए म्‍हिमैं तइमुँ, झाइले परमेश्‍वरए उँइँर क्‍हेमैं ठिक ठर्दिइमुँ।
1CO 6:12 खाबज्‍यै या “ताँन् सै ङए ल्हागिर ठिक मुँ” ङ्हाँलै, दिलेया ताँन् सै केर फेब् आरे। छलेन ङज्यै या “ताँन् सै ङए ल्हागिर ठिक मुँ” बिल् खाँम्, दिलेया ङ तोइ सैए न्होंर टिरिब् आरे।
1CO 6:13 छलेन खाबज्‍यै या “चबै सै फोए ल्हागिर ग, धै फो चबै सैए ल्हागिर ग,” बिलै। दिलेया परमेश्‍वरजी ङ्हिंना ङ्हिंनलाइ नास लवाब्‍मुँ। म्‍हिए ज्यु ब्यभिचार लबै ल्हागिर आङिं, प्रभुए सेवा लबै ल्हागिर ग, झाइले ङ्योए ज्युलाइ चैदिबै सै या प्रभुजीन् पिंम्।
1CO 6:14 परमेश्‍वरजी ह्रोंसए शक्‍तिजी प्रभु येशू सिबउँइँले सोगों लमिंइ। छलेन ङ्योलाज्यै या खीए शक्‍तिजी सोगों लमिंब्‍मुँ।
1CO 6:15 क्‍हेमैंए ज्यु ख्रीष्‍टए ज्युर्बै भागमैं ग बिब क्‍हेमैंइ आसे वा? ङइ ख्रीष्‍टए ज्युए भाग घ्रि बोसि फ्यालुस्योए ज्युए भाग लवाब् वा? आङिं, छ कत्ति आतरिगे!
1CO 6:16 फ्यालुस्योने प्रबै म्हि ज्युरै या चनेन् क्ह्रिम् बिब क्‍हेमैंइ आसे वा? तलेबिस्याँ “चमैं ङ्हिं ज्यु घ्रिन् तब्‍मुँ।” बिसि परमेश्‍वरए छ्वेर बिइमुँ।
1CO 6:17 दिलेया प्रभु येशूने प्रबै म्हि खीने सैं घ्रि तम्।
1CO 6:18 ब्यभिचार आलद्। अरू पाप लइ बिस्याँ ज्युलाइ नोक्सन् आल, दिलेया ब्यभिचार लइबिस्‍याँ ह्रोंसए ज्युलाइन नोक्सन् लम्।
1CO 6:19 परमेश्‍वरजी क्हेमैंलाइ पबित्र प्ल्ह पिंइ, छतसि क्हेमैंए ज्यु पबित्र प्ल्ह टिबै मन्‍दिर ग बिब क्‍हेमैंइ आसे वा? क्‍हेमैं ह्रोंसल्न आङिं, क्‍हेमैं परमेश्‍वरल् ग।
1CO 6:20 तलेबिस्याँ खीजी क्‍हेमैं सै फोसि किंब् ग। छतसि ह्रोंसए ज्युज्यै या क्हेमैंइ परमेश्‍वरए मिं थेब् तबै के लद्।
1CO 7:1 क्‍हेमैंइ प्‍ह्रिबै प्ह्रिछ्यार्बै ताँमैंए ज्वाफ ङइ चु प्ह्रिछ्यार प्‍ह्रिइमुँ। “म्हिइ ब्ह्‍या आलल्‍ले टिब छ्याँब ग” बिसि क्हेमैंइ प्ह्रिइ।
1CO 7:2 दिलेया [ङइ छ बिम्:] च्‍हौ ल्हें ब्यभिचार तबइले ताँन् मुँयुँमैंल ह्रों-ह्रोंसल्न प्ह्रेंस्यो मुँल् त्‍हुम्, छलेन ताँन् च्हमिरिमैंलै या ह्रों-ह्रोंसल्न प्युँ मुल् त्‍हुम्।
1CO 7:3 प्युँइ ह्रोंसए प्ह्रेंस्योए ल्हागिर लल् त्‍हुबै केमैं लरिगे, छलेन प्ह्रेंस्योज्यै या प्युँए ल्हागिर लल् त्‍हुबै केमैं लरिगे।
1CO 7:4 प्ह्रेंस्योए ज्यु ह्रोंसल् आङिं, चए ज्यु प्युँल् तम्। छलेन प्युँए ज्यु या ह्रोंसल् आङिं, चए प्ह्रेंस्योल् तम्।
1CO 7:5 छतसि क्‍हेमैं क्‍ह्रिसि टिबै ल्हागिर घ्रिइ बिब घ्रिइ ङिंल् त्हुम्। दिलेया प्राथना लबै ल्हागिर क्हेमैं सल्‍ला लसि तिस्या स्यो तलेया लिउँइँ क्‍हेमैं बालुन् तल् त्‍हुम्। छ आलस्याँ क्‍हेमैंइ सैं फैल् आखाँबइले दुष्‍टइ मौका योंल् खाँम्।
1CO 7:6 क्हेमैंइ ब्ह्‍या ललन् त्हुम् बिसि ङइ कर आल्‍हैदि, दिलेया क्हेमैं ब्ह्‍या लबै सैं मुँस्याँ ललेन् तम्।
1CO 7:7 ङए सैंरम् क्‍हेमैं ताँन् ङ धोंलेन् ब्ह्‍या आलल्‍ले टिरिगे ङ्हाँइमुँ। दिलेया ताँन् म्हिलाइ परमेश्‍वरजी स्‍यो-स्‍योबै बरदान पिंइमुँ। कोइलाइ घ्रि खालर्बै बरदान पिंइमुँ बिस्याँ, कोइलाइ अर्कोन् खालर्बै बरदान पिंइमुँ।
1CO 7:8 तारे ब्ह्‍या आलब्‍मैं नेरो म्हरेस्योमैंने ङ बिमुँ: क्‍हेमैं ङ धोंलेन् ब्ह्‍या आलल्‍ले टिब ठिक मुँ।
1CO 7:9 दिलेया क्‍हेमैं ब्ह्‍या आलल्‍ले टिमा ह्रोंसए सैं फैल् आखाँस्‍याँ क्हेमैंइ ब्ह्‍या लबन् छ्याँब् तम्। तलेबिस्याँ ज्युर्बै इच्‍छाइ दुःख पिंब् भन्दा क्हेमैंए ल्हागिर ब्ह्‍या लब छ्याँब मुँ।
1CO 7:10 तारे ब्ह्‍या लब्‍मैंने ङइ चु ताँ बिम्। प्ह्रेंस्यो ह्रोंसए प्युँने फ्रेयाल् आत। चु ताँ ङइ मत्‍त्रे बिब आङिं, प्रभु येशूजीन् बिब् ग।
1CO 7:11 च ह्रोंसए प्युँने फ्रेसि टिलेया ब्ह्‍या आलल्‍ले टिल् त्‍हुम्, धै ह्रोंसए प्युँने बालु क्ह्रिल् त्‍हुम्। छलेन प्युँज्‍यैया प्ह्रेंस्योलाइ पार लल् आत।
1CO 7:12 अरूमैंलाज्यै या ङइ चु ताँ बिमुँ। (चु ताँ प्रभु येशूजी बिब आङिं, ङइ बिबै ताँ ग।) येशूए फिर बिश्‍वास लबै मुँयुँल बिश्‍वास आलबै प्ह्रेंस्यो मुँस्‍याँ, च प्ह्रेंस्योइ च मुयुँने अझै टिबै सैं लस्‍याँ च बिश्‍वास लबै मुँयुँइ ह्रोंसए प्ह्रेंस्यो पार लल् आत।
1CO 7:13 छलेन येशूए फिर बिश्‍वास लबै च्हमिरिल बिश्‍वास आलबै प्युँ मुँस्‍याँ, च प्‍युँइ च च्हमिरिने टिबै सैं लस्‍याँ च च्हमिरिइ ह्रोंसए प्‍युँलाइ पार लल् आत।
1CO 7:14 तलेबिस्याँ बिश्‍वास लबै प्ह्रेंस्योउँइँले बिश्‍वास आलबै प्युँ पबित्र तम्। छलेन अबिश्‍वासी प्ह्रेंस्यो बिश्‍वासी प्‍युँउँइँले पबित्र तम्। च पबित्र आतस्‍याँ क्‍हेमैंए प्‍हसेमैं पबित्र आतमल, छतसि क्ह्रोंसेंन क्‍हेमैंए प्‍हसेमैं या परमेश्‍वरए म्‍हिमैं तसि पबित्र तइमुँ।
1CO 7:15 दिलेया बिश्‍वास आलबै मुँयुँ अथवा च्हमिरिइ फ्रेयाबै सैं लस्‍याँ फ्रेयारिगे। छ तस्याँ बिश्‍वासी म्हि चए न्होंर टिल् आत्हु, तलेबिस्याँ परमेश्‍वरजी ङ्योलाइ शान्तिर टिबर त्‍हाँब् ग।
1CO 7:16 ओ बिश्‍वासी च्हमिरि, क्‍हिइ आसे वा? ह्रोंसए अबिश्‍वासी प्‍युँलाइ परमेश्‍वरए घ्‍याँउँइँ डोरेल् खाँम् उ? छलेन ओ बिश्‍वासी मुँयुँ, क्‍हिइ आसे वा? ह्रोंसए अबिश्‍वासी प्ह्रेंस्योलाइ परमेश्‍वरए घ्‍याँउँइँ डोरेल् खाँम् उ?
1CO 7:17 परमेश्‍वरजीन् ङ्यो ताँनलाइ त्हाँब् ग, बरदानै या खीजीन् पिंब् ग। छतसि ह्रोंसइ योंबै बरदान अनुसार्बै केमैं लसि छ्ह थोल् त्हुम्। ताँन् क्‍ल्‍ह्‍योर्बै बिश्‍वासीमैंने ङइ चु ताँन् बिइमुँ।
1CO 7:18 ज्युर चिनु लबै म्हिलाइ परमेश्‍वरजी त्हाँइमुँ बिस्याँ चइ च चिनु मेटिदिवाबै सैं आलरिगे। छलेन ज्युर चिनु आलबर्न परमेश्‍वरजी त्हाँइमुँ बिस्याँ चइ ज्युर चिनु आलरिगे।
1CO 7:19 तलेबिस्याँ ज्युर चिनु लबै ताँ थेब आङिं। बरु परमेश्‍वरजी बिबै ताँ ङिंब थेबै ताँ ग।
1CO 7:20 परमेश्‍वरजी त्हाँमा क्हेमैं खैले छ्ह थोरिल, छलेन् क्हेमैं थोल् त्हुँम्।
1CO 7:21 परमेश्‍वरजी क्हिलाइ त्हाँमा क्‍हि केब्छैं मुँस्‍याँ तोइ न्हुँ आलद्। दिलेया क्ल्हेए धिंउँइँले त्होंसि ह्‍याबै मौका योंस्‍याँ ह्‍याद्।
1CO 7:22 तलेबिस्याँ प्रभुजी त्हाँमा केब्छैं मुँलेया तारे चलाइ प्रभु येशूजी केब्छैं तबइले फ्रेमिंइमुँ। छलेन प्रभुजी त्हाँबै त्हेसेरो च म्हि केब्छैं तबइले फ्रेमिंइमुँ, छतसि च म्‍हि प्रभुए के लबै म्हि तइमुँ।
1CO 7:23 परमेश्‍वरजी क्‍हेमैं सै फोसि खामिंब् ग, तारे क्हेमैं पापए न्होंर टिल् आत्हु। छतसि क्‍हेमैं म्‍हिमैंए केब्छैं आतद्।
1CO 7:24 ओ ङए अलि-अङाँमैं, परमेश्‍वरजी त्हाँमा क्‍हेमैंइ खैले छ्ह थोरिल, छलेन् परमेश्‍वरने संगति लसिन् टिरिद्।
1CO 7:25 तारे कन्‍येमैंए बारेर प्रभु येशूउँइँले बिल् त्‍हुबै ताँ ङने तोइ आरे। दिलेया प्रभु येशूउँइँले दयाम्हाँया योंसि ङ म्हिमैंइ क्वेंल् खाँबै म्हि तबइले ङइ क्‍हेमैंलाइ सल्‍ला पिंम्।
1CO 7:26 तिंजोरो ल्हें दुःख म्रोंमा खाब् खैले मुँ छलेन् टिस्याँ छ्याँब तम् बिब ङए सैं मुँ।
1CO 7:27 क्‍हिइ ब्ह्‍या लइमुँ बिस्याँ ह्रोंसए ह्रेंस्योने फ्रेयाबै सैं आलद्। छलेन क्‍हिइ ब्ह्‍या आलइमुँ बिस्‍याँ ब्ह्‍या लल् आम्हैद्।
1CO 7:28 दिलेया क्‍हिइ ब्ह्‍या ललेया पाप आख, कन्‍ये च्हमिरिइ ब्ह्‍या ललेया च पाप आङिं। दिलेया ब्ह्‍या लब्‍मैंइ त्हिंइ ह्रोंसे न्हुँ लल् त्हुम्। छतसि क्हेमैंइ छले न्हुँ लल् आत्हुरिगे बिब ङए सैं मुँ।
1CO 7:29 ओ अलि-अङाँमैं, ङइ बिल् म्हैबै ताँ चुन् ग: प्रभु युबै त्हिंइ चेंदोन् तखइमुँ। छतसि ब्ह्‍या लब्मैं ब्ह्‍या आलब्‍मैं धों तसि प्रभुए के लद्।
1CO 7:30 झाइले न्हुँ लब्मैं न्हुँ आलब्मैं धोंले टिरिद्। छलेन सैं तोंब्‍मैं सैं आतोंब्मैं धोंले टिरिद्, किंसि पखबै सैमैं या ह्रोंसल् धों आङ्हाँन्।
1CO 7:31 झाइले छों लब्मैं छों आलब्मैं धोंन् तरिगे तलेबिस्याँ चु ह्‍युल युनन् नास तयाम्।
1CO 7:32 क्‍हेमैं चु ह्‍युलर टिमा तोइ न्हुँ लल् आत्हुरिगे बिब ङए सैं मुँ। ब्ह्‍या आलबै म्‍हिइ प्रभुलाइ खैले सैं तोंन् लब् ङ्‍हे ङ्हाँसि प्रभुए केर मत्‍त्रे न्हुँ लम्।
1CO 7:33 दिलेया ब्ह्‍या लबै म्‍हिइ ह्रोंसए प्ह्रेंस्योए सैं खैले तोंन् लब् ङ्‍हे ङ्हाँसि ह्‍युलर्बै सैर न्हुँ लम्।
1CO 7:34 छाबै म्हिए सैं ङ्हिरि तम्। छलेन ब्ह्‍या आलबै च्हमिरिइ अथवा कन्येइ ज्यु नेरो सैं ङ्हिंन-ङ्हिंनइ प्रभुए के खैले लब् ङ्‍हे बिसि प्रभुए केर्न सैं पिंम्। दिलेया ब्ह्‍या लबै च्हमिरिइ ह्रोंसए प्युँए सैं तोंन् लबै ल्हागिर ह्‍युलर्बै सैर न्हुँ लम्।
1CO 7:35 क्‍हेमैंइ ब्ह्‍या आलरिगे बिसि ङइ चु ताँ बिब आङिं। क्हेमैं सैं घ्रिन् तसि प्रभुए के छेनाले लसि छ्ह थोल् खाँरिगे धै क्हेमैंलाइन छ्याँब तरिगे बिसि ङइ चु ताँ बिब् ग।
1CO 7:36 खाबज्यै या ब्ह्‍या लब् बिसि ह्रिथेंबै च्हमिरिने खेंमैं ङ्हिंन् सल्‍ला लसि “दे त्हे ङ्यो ब्ह्‍या आलल्‍ले टिले” बिलेया, लिउँइँ मुँयुँए ब्ह्‍या लबै सैं खस्याँ चमैं ब्ह्‍या लरिगे। छले लबै ब्ह्‍या पाप आङिं।
1CO 7:37 दिलेया च म्हिइ ह्रोंसए सैं फैल् खाँमुँ, ब्ह्‍या आलल्‍ले टिल् खाँमुँ, बिस्याँ च ह्रिथेंबै च्हमिरिने चइ ब्ह्‍या आललै या ठिकन् मुँ।
1CO 7:38 छलेन खाबइ ह्रोंसइ ह्रिथेंबै च्हमिरिने ब्ह्‍या लमुँ, चइ ठिकन् लम्। दिलेया ब्ह्‍या आलल्‍ले टिस्याँ झन् छ्याँब तम्।
1CO 7:39 ह्रोंसए प्युँ आसिन् समा च्हमिरि ह्रोंसए प्‍युँनेन् टिल् त्हुम्। दिलेया प्युँ सियाबै लिउँइँ धबै च म्हरेस्योइ ब्ह्‍या लदा ङ्हाँस्याँ चइ ब्ह्‍या ललेया तम्। दिलेया चु ब्ह्‍या प्रभु येशूए फिर बिश्‍वास लबै म्‍हिनेन् तल् त्हुम्।
1CO 7:40 दिलेया चइ ब्ह्‍या आलल्‍ले टिम् बिस्याँ झन् छ्याँब तम्। चु ङए सैंर्बै ताँ ग, ङने या परमेश्‍वरए प्ल्ह मुँ बिब ङइ मैंमुँ।
1CO 8:1 तारे कुर चडेबै चबै सैए बारेर ङ ताँ लम्। “ङि ताँन् ह्रब-सेब् मुँ” बिबै क्हेमैंए ताँ ठिकन् ग। दिलेया ह्रब-सेब् मुँ बिसि क्हेमैं ह्रोंसन् थेब् प्हैंइमुँ, खाबइ आगुए फिर म्हाँया लमुँ, चइ अरूमैंलाइन थेब् लमिंम्।
1CO 8:2 खाबज्‍यै या “ङइ तोन्दोंरि ह्रइमुँ” बिलेया ह्रल् त्‍हुबै ताँ चइ तोइ या आह्रइमुँ।
1CO 8:3 दिलेया परमेश्‍वरउँइँ सैं एसि खीलाइ म्हाँया लबै म्हिलाइन परमेश्‍वरजी ङो सेम्।
1CO 8:4 छतसि कुर चडेबै सै चल् तम् उ आत बिबै ताँ ङ्योइ सेइमुँ, “परमेश्‍वर घ्रि मत्‍त्रे मुँ, कु परमेश्‍वर आङिं।” कु म्हिए योइ बनेबै सै मत्‍त्रे ग।
1CO 8:5 मु नेरो पृथ्‍बीर ल्हें “देवतामैं” नेरो ल्हें “प्रभुमैं” मुँलै। छाबै केर आफेबै देवतामैं नेरो प्रभुमैं मुँलेया
1CO 8:6 ङ्योए ल्हागिरि घ्रि मत्‍त्रे परमेश्‍वर आबा मुँ। खीजीन् तोन्दोंरि सै बनेइ, छतसि खीए ल्हागिर्न ङ्यो सोम्। धबै ङ्योए ल्हागिरि प्रभु घ्रि मत्‍त्रे मुँ, खी येशू ख्रीष्‍ट ग। खीउँइँलेन् ताँन् सैमैं तखइ, धै खीउँइँलेन् ङ्यो सोल् योंम्।
1CO 8:7 दिलेया ताँन् बिश्‍वासीमैंइ चु क्ह्रोंसेंन्बै ताँ छेन्‍ले आसेइमुँ। ङ्यो न्‍होंरि कोइ म्‍हिमैंइ ओंसों ओनोंन् कुलाइ चडेबै बानि मुँबइले “कुलाइ पिंबै सै कुल्न ग” बिसि अझै मैंम्। छतसि चमैंइ छ्याँब आछ्याँब छेनाले फेलल् आखाँबइले च कुर चडेबै सैमैं चल् आत बिसि मैंम्।
1CO 8:8 दिलेया चबै सैइ ङ्यो परमेश्‍वरए ङाँर बोल् आखाँ। कुर चडेबै सै चलैया आचलैया ङ्योलाइ नोक्‍सानै आत, फायदै आत।
1CO 8:9 बरु छेन्ले मैंन्! क्हिइ तोइ आमैंन्ले कुर चडेबै सै चलेन् तम् बिसि चबइले बिश्‍वासर आभोंबै म्हिमैं पापर आच्होरिगे।
1CO 8:10 तलेबिस्याँ क्‍हिइ कुर चडेबै सै चलेन् तम् बिसि कु थेंबै मन्‍दिरर कुर चडेबै सैमैं चरिब बिश्‍वासर आभोंबै म्हिमैंइ म्रोंइ बिस्याँ चमैंज्‍यै या कुर चडेबै सै चलेन् तमना बिसि आचलै वा?
1CO 8:11 क्हिइ चबै सै तो चलेन् तम् बिसि चबइले बिश्‍वासर आभोंबै अलिमैं पापर च्होम्। च बिश्‍वासर आभोंबै अलिए ल्हागिरै या ख्रीष्‍ट सिब् ग।
1CO 8:12 छले क्हेमैंइ बिश्‍वासर आभोंबै अलिलाइ पापर च्होवासि ख्रीष्‍टए बिरोधर पाप लइमुँ।
1CO 8:13 छतसि बिश्‍वासर आभोंबै अलिलाइ ङइ चबै सैइ पापर च्होवाम् बिस्‍याँ, कुर चडेबै सै ङइ खोंयोंइ चरिब् आरे।
1CO 9:1 ङ पावल खाबै न्होंर मुँ रो वा? ङ कुल्मिंबै चेला चिब आङिं वा? ङ्योए प्रभु येशूलाइ ङइ आम्रोंइमुँ वा? क्हेमैंन् प्रभुए ल्हागिर ङइ लबै केए रोमैं आङिं वा?
1CO 9:2 को-कोइ म्‍हिमैंइ ङ कुल्मिंबै चेला चिब आङिं ङ्हाँलेया ङलाइ प्रभुइ कुल्मिंबै चेला चिब बिसि क्‍हेमैंइ म्हाँदिम्। तलेबिस्याँ ङउँइँले सैं तोंबै ताँ थेसि क्‍हेमैंइ प्रभुए फिर बिश्‍वास लइ छतसि “ङ कुल्मिंबै चेला चिब ग” बिबै प्रमाण क्हेमैंन पिंम्!
1CO 9:3 ङए बिरोधर पोंब्मैंलाइ ङए ज्वाफ चुन् ग।
1CO 9:4 छतसि कुल्मिंबै चेला चिबए के ङइ लसेरो चब् थुँबै खर्ज ङइ योंल् आत्हु वा?
1CO 9:5 पत्रुस, प्रभु येशूए अलिमैं नेरो अरू कुल्मिंबै चेला चिब्मैं धोंलेन् ङज्यै या प्रभु येशूए फिर बिश्‍वास लबै च्हमिरि ब्ह्‍या लसि प्रल् आयों रो वा?
1CO 9:6 बर्णाबास नेरो ङइ मत्‍त्रे के लसि ह्रोंसए फो न्हल् त्हुब् रो वा?
1CO 9:7 फौजर मुँमा सिपाइमैंइ ह्रोंसए खर्जर्न के लम् रो वा? अँगुरए धुँ रुँइँसि अँगुरए रो आचब खाब मुँ? छलेन र-क्‍युमैं न्हसि चए ङ्‍हे आथुँब खाब् मुँ?
1CO 9:8 चु म्हिमैंइ बिबै ताँ मत्‍त्रे आङिं, परमेश्‍वरए छ्वेरै या छाबन् ताँ प्ह्रिइमुँ।
1CO 9:9 “दाँइ झोंबै क्‍ल्‍याए सुँर म्‍हुँलु आझोंन्” बिसि मोशाइ प्‍ह्रिबै ठिमरि प्ह्रिइमुँ। चु ताँ परमेश्‍वरजी क्‍ल्‍याए ल्हागिर मत्‍त्रे बिब् आङिं,
1CO 9:10 म्हिमैंए ल्हागिरै या बिब् ग। चु ताँ ङ्योए ल्हागिर्न प्ह्रिब् ग। तलेबिस्याँ क्योबै म्हि नेरो दाँइ झोंबै म्हि ङ्हिंन-ङ्हिंनैन रा-रो योंम् बिबै आशार के लम्।
1CO 9:11 ङिइ क्‍हेमैंए सैंर पबित्र प्ल्हउँइँले खबै प्‍लु प्‍लुइमुँ। छतसि ङिलाइ चैदिबै सैमैं च्युगु-च्युगु पिंबर्न क्हेमैंइ थेबै सै पिंब् धोंन् ङ्हाँइ वा?
1CO 9:12 क्‍हेमैंउँइँले अरूमैंइ चैदिबै सैमैं योंम् बिस्याँ, झन् ङिइमि क्‍हेमैंउँइँले ल्हें योंल् त्हुम्। दिलेया ङिइ चु हग आम्हैइमुँ। बरु ख्रीष्‍टउँइँले खबै सैं तोंबै ताँ म्हिमैंने बिप्रमा क्‍हेमैंए फिर तोइ दुःख आतरिगे बिसि ङिइ तोन्दोंरि दुःख सैदिइ।
1CO 9:13 मन्दिरर के लबै म्‍हिइ मन्दिरर खबै सैमैंउँइँलेन् चल् योंम्, छलेन ख्रो पिंबै क्ल्ह्‍योर के लबै म्‍हिमैंइ ख्रो पिंबै सैउँइँलेन् ह्रोंसए भाग योंम्।
1CO 9:14 छलेन सैं तोंबै ताँ बिप्रब्‍मैंइ सैं तोंबै ताँ बिप्रबै केउँइँलेन् चल्-थुँल् योंरिगे बिसि प्रभुजी बिइमुँ।
1CO 9:15 दिलेया ङइ चु हग आम्है। तोगो या ङइ चु प्ह्रिछ्या हग योंरिगे बिसि प्ह्रिब् आङिं। ङइ प्हैंबै ताँ खाबज्यै या थोब् भन्दा बरु ङलाइ सिब सब् मुँ!
1CO 9:16 तलेबिस्याँ ङइ सैं तोंबै ताँ म्हिमैंने बिप्रइ बिसि ङ थेब् प्‍हैंल् त्हुबै ताँ तोइ आरे। तलेबिस्याँ ङइ सैं तोंबै ताँ बिप्रलन् त्हुम्। ङइ सैं तोंबै ताँ आबिप्रइ बिस्‍याँ ङ आसोलै तम्।
1CO 9:17 ङइ ह्रोंसए इच्छाइ चु के लस्याँ चु केए नों सै म्हैमल। बरु चु के ङइ ललन् त्हुबै के ग, तलेबिस्याँ परमेश्‍वरजी ङलाइ चु के लबै जिम्‍मा पिंइमुँ।
1CO 9:18 छ बिस्‍याँ ङइ योंल् त्हुबै नों सै तो जा? मुइ आकिंल्‍ले सैं तोंबै ताँ बिप्रल् योंबन् ग! छतसि सैं तोंबै ताँ बिप्रमा योंल् त्हुबै हग ङइ आम्है।
1CO 9:19 ङ खाबै न्होंरै या आरे, दिलेया खाँन् समा ल्हें म्हिइ येशू ख्रीष्‍टए फिर बिश्‍वास लरिगे बिसि ङ ताँनए के लबै म्हि धोंन् तइमुँ।
1CO 9:20 यहूदीमैंइ येशू ख्रीष्‍टए फिर बिश्‍वास लरिगे बिसि ङ यहूदी धोंन् तइ। छलेन मोशाइ पिंबै ठिम (नियम) म्हाँदिबै म्हिमैंइ येशू ख्रीष्‍टए फिर बिश्‍वास लरिगे बिसि ङइ च ठिम आम्हाँदिलै या चमैंए ल्हागिर ङै या च ठिम म्हाँदिबै म्हि धोंन् तइ।
1CO 9:21 छलेन ठिम आम्हाँदिबै अरू ह्रेंमैंए म्हाँजोर ङइ के लमा चमैंइ येशू ख्रीष्‍टए फिर बिश्‍वास लरिगे बिसि ङ मोशाइ पिंबै ठिम आम्हाँदिबै म्हि धोंन् तइ। (दिलेया ङ परमेश्‍वरए ठिमए न्होंर टिसि ख्रीष्‍टजीन् बिबै ताँ ङिंम्।)
1CO 9:22 छलेन बिश्‍वासर आभोंब्मैंए बिश्‍वास भोंब् तरिगे बिसि ङै या बिश्‍वासर आभोंब्मैं धोंन् तइ। खैले तमुँ छले खाब् आङिं खाबइ प्रभुए फिर बिश्‍वास लरिगे बिसि म्हिमैं खै तल ङै या छान् तल।
1CO 9:23 चु सैं तोंबै ताँ खन्तोंदोंन् फेनेरिगे धै चु ताँउँइँले योंबै आशिक ङज्यै या योंरिगे बिसि ङइ छ लम्।
1CO 9:24 चु ताँ क्‍हेमैंज्यै सेइमुँ: न्हेबर भाग किंब्मैं ताँन् न्हेम्, दिलेया पुरस्‍कार घ्रिइ मत्‍त्रे योंम्। छतसि क्हेमैं या पुरस्‍कार योंल् खाँल्‍ले न्हेद्।
1CO 9:25 खेलर भाग किंबै म्हिमैं तोन्दोंरि सैर ह्रोंसए ज्यु तार झोंम्। चमैं नास तयाबै पुरस्‍कार योंबै ल्हागिर छ लम्, दिलेया ङ्यो खोंयोंइ नास आतबै पुरस्कार योंबै ल्हागिर छ लम्।
1CO 9:26 छतसि तोक्‍दिबै क्‍ल्‍ह्‍योर आफेनेन् समा ङ न्हेम्। खैंर मुड्किइ ल्हिब्मैंइ धोंले ङ मुड्किइ आल्हि।
1CO 9:27 ङइ ह्रोंसए ज्यु भोंब् लबै ल्हागिर तालिम पिंब् धोंले ह्रोंसए न्होंर थेंम्। तले छ लम् बिस्‍याँ ङइ अरूमैंलाइ “खेलर भों लद्” बिसेरो ङ फेल आतरिगे बिसि छ लब् ग।
1CO 10:1 ओ अलि-अङाँमैं, ङ्योए इस्राएली खेमैंलाइ खै तल बिसि क्‍हेमैंइ सेरिगे बिब ङए सैं मुँ, चमैं मोशाए लिलि मिश्र ह्‍युलउँइँले त्‍होंखमा न्‍हाँम्‍स्योइ घ्याँ तेंमिंदै बोल, धै चमैं ताँन् ओल्ग्‍या मा ङ्युँइए म्हाँजोउँइँले तसि ह्‍याल।
1CO 10:2 न्‍हाँम्‍स्योए लिलि नेरो मा ङ्युँइए म्हाँजोर [ओबानो घ्‍याँर] ह्‍यामा मोशाउँइँले चमैंइ बप्‍तिस्‍मा किंब् धों तइ [अथवा चए लिलि ल्‍हैदिबै सैं पिंइ]।
1CO 10:3 चमैं ताँनइ पबित्र प्ल्हउँइँले योंबै चबै सै चइ।
1CO 10:4 झाइले चमैं ताँनइ पबित्र प्ल्हउँइँले योंबै क्यु पाराउँइँले थुँइ। चमैंने बालु प्रबै पारा ख्रीष्‍टन् मुँल।
1CO 10:5 दिलेया चमैं न्होंरि ल्हें म्हि म्रोंसि परमेश्‍वर सैं आतोंल, छतसि चमैं क्यु आयोंबै क्ल्ह्‍योर नास तयाइ।
1CO 10:6 ङ्योए खेमैंइ धोंले ङ्योज्यै या आछ्याँबै के लबै सैं आखरिगे बिसि चु ताँन् ताँ ङ्योए ल्हागिर्न मैंल् त्हुबै ताँ ग।
1CO 10:7 चमैं न्‍होंरि को-कोइ कु पूजा लब् धोंले ङ्योइ कुर पूजा लब आत। च कु पूजा लबै बारेर परमेश्‍वरए छ्वेर छले प्ह्रिइमुँ, “म्‍हिमैं [कुर पूजा लमा] मज्‍जाले चब्-थुँबर क्हुँइ, झाइले छाडाले सेबर रेइ।”
1CO 10:8 छलेन चमैं न्‍होंरि को-कोइइ ब्यभिचार लब् धोंले ङ्योइ ब्यभिचार लब आत। चमैंइ ब्यभिचार लबइले परमेश्‍वरजी सजैं पिंसि तिगेंर्न ङ्हिस्युसे सों हजार (२३,०००) म्‍हि सियाल।
1CO 10:9 झाइले चमैं न्‍होंरि को-कोइ प्रभुए जाँच लब् धोंले ङ्योइ प्रभुए जाँच लल् आत। प्रभुए जाँच लबइले चमैंलाइ प्‍हुरिइ नास लवाइ।
1CO 10:10 छतसि ङ्योइ गनगन लल् आत, च खेमैंइ गनगन लबइले नास लवाबै स्‍वर्गदूतइ चमैंलाइ सैवाइ।
1CO 10:11 चमैंए फिर तबै चु ताँन् ताँमैं अरूमैंलाइ लोमिंबै ल्हागिर तल। च ताँमैं ङ्योज्यै सेरिगे बिसि प्‍ह्रिथेंइ। तलेबिस्याँ चु ह्‍युल नुखबै त्हे तखइमुँ।
1CO 10:12 छतसि क्‍हेमैं न्‍होंरि ङ बिश्‍वासर भोंब् मुँ बिसि प्‍हैंबै म्‍हिइ ह्रोंस पापर आच्होरिगे बिसि झन् न्ह क्रों मि क्रोंले टिल् त्‍हुम्।
1CO 10:13 म्हिए फिर तखबै जाँच बाहेक अरू जाँच क्‍हेमैंए फिर आतइमुँ। दिलेया परमेश्‍वर भर लल् खाँब मुँ, खीजी फैबै बाछा पूरा लम्। छतसि क्‍हेमैंइ सैदिलै आखाँबै जाँचर खीजी फेल् आपिं। जाँचर फेमा सैदिल् खाँरिगे बिसि खीजी क्हेमैंलाइ जाँचउँइँले स्योरल् खाँबै घ्याँ या पिंमुँ।
1CO 10:14 छतसि ओ ङइ खोबै अलि-अङाँमैं, कु पूजा लन् आलद्।
1CO 10:15 च्हैंब् मैंब् लल् खाँबै म्हिमैंने धोंले ङइ क्हेमैंने बिइमुँ, ङइ बिबै ताँ क्हेमैंइ बिचार लद्।
1CO 10:16 ङ्योइ प्रभु भोजरि परमेश्‍वरलाइ धन्‍यबाद पिंसि प्‍हेलाउँइँले थुँम्। छले थुँमा ङ्योइ ख्रीष्‍टए कोए भाग योंम्। छलेन क्‍हें चमा ङ्योइ ख्रीष्‍टए ज्युए भाग योंम्।
1CO 10:17 प्रभु भोजरि क्‍हें घ्रि मत्‍त्रे तम्। छतसि ल्हें मुँलेया ङ्यो ताँन् ज्यु घ्रि धोंन् तब् ग, तलेबिस्याँ ङ्योइ क्‍हें घ्रिउँइँले चम्।
1CO 10:18 झाइले अर्को नमुना: इस्राएलीमैं ङ्‍ह्‍योद्, परमेश्‍वरए मिंर ख्रो पिंबै सै चब्‍मैं ख्रो पिंबै म्हिने घ्रिन् तइ।
1CO 10:19 ङइ बिल् म्हैब तो जा बिस्‍याँ “कुर चडेबै सै तोइ आङिं!” धै “कु या तोइ आङिं!”
1CO 10:20 दिलेया कुर ख्रो पिंब्‍मैंइ परमेश्‍वरलाइ पिंब आङिं, स्यागि म्होंगिलाइ पिंम्। छतसि क्‍हेमैं स्यागि म्होंगिए घ्याँर प्ररिगे बिब ङए सैं आरे।
1CO 10:21 क्‍हेमैंइ प्रभुए प्‍हेला नेरो स्यागि म्होंगिए प्‍हेला ङ्हिंना ङ्हिंनउँइँले थुँल् आखाँ। छलेन क्‍हेमैंइ प्रभुए टेबल नेरो स्यागि म्होंगिए टेबलउँइँले या चल् आखाँ।
1CO 10:22 क्हेमैंइ छाबै ताँ क्‍होसे या अझै प्रभुलाइ ह्रिस खल् लब् वा? प्रभु भन्दा ङ्यो भोंब मुँ ङ्हाँइमुँ वा?
1CO 10:23 “क्हेमैंइ तो ललेन् तम्,” बिम्। दिलेया ताँन् सैइ क्हेमैंए फायदा आत। क्हेमैंइ “ताँन् सै छ्याँब मुँ बिमुँ,” दिलेया कति सैम् आछ्याँबै तम्।
1CO 10:24 खाबज्यै या ह्रोंसल् मत्‍त्रे छ्याँब तरिगे बिसि आमैंन्, अरूमैंलाज्यै छ्याँब तरिगे बिसि मैंन्।
1CO 10:25 छतसि छ लद् ओ: से चुँबै क्‍ल्‍ह्‍योरि तोए से मुँलेना सैंर तोइ आङ्हाँन्‍ले चवाद्। “चु से कुर चडेब् उ?” बिसि आङ्योएद्।
1CO 10:26 तलेबिस्याँ “पृथ्‍बी नेरो चर मुँबै तोन्दोंरि सै प्रभुलन् ग,” बिसि परमेश्‍वरए छ्वेर प्ह्रिइमुँ।
1CO 10:27 छलेन येशूए फिर बिश्‍वास आलब्‍मैं खाबै मुँलेया क्‍हेमैंलाइ चब् चबर न्हिम्तो लइबिस्‍याँ, क्‍हेमैं या ह्‍याबै सैं मुँस्‍याँ, क्‍हेमैंलाइ तो सै चल् पिंमुँ, च सै तोइ संका आलल्‍ले चद्। चु कुर चडेबै सै वा बिसि आङ्योएद्।
1CO 10:28 दिलेया खाबै मुँले क्‍हेमैंने, “चु कुर चडेबै सै ग,” बिस्‍याँ च सै आचद्। तलेबिस्‍याँ, चु कुर चडेबै सै ग बिमिंबै म्‍हिए ल्हागिर नेरो चइ छ्याँब् नेरो आछ्याँब फेलल् खाँना बिब् मैंसि च सैमैं आचद्।
1CO 10:29 क्‍हिइ छ्याँब् नेरो आछ्याँब फेलल् खाँमना बिसि बिब् आङिं, बिश्‍वासर आभोंबै अलि अङाँमैंए सैं आन्होंरिगे बिसि छ बिब् ग। “ङइ ताँन् के लबै हग मुँ। छतसि अरू म्‍हिमैंइ छ्याँब् आछ्याँब फेलल् खाँइ बिबर्न ङइ लदा ङ्हाँबै के आलब?”
1CO 10:30 ङइ परमेश्‍वरलाइ धन्‍यबाद पिंसि चबै सै चइ बिस्‍याँ अरूमैंइ तले ङए ताँ लल् त्हुइ?
1CO 10:31 ङइ तो बिम् बिस्‍याँ: क्‍हेमैंइ चलेया, थुँलेया, तो ललेया परमेश्‍वरए थेबै मान तबै ल्हागिर मत्‍त्रे लद्।
1CO 10:32 क्‍हेमैंइ छ्ह थोमा यहूदी मुँले, अरू ह्रेंमैं मुँले, परमेश्‍वरए फिर बिश्‍वास लब्मैं मुँले, खाबलाज्यै या सैं नल् लबै के आलद्।
1CO 10:33 ङज्यै या ङइ लबै तोन्दोंरि केर म्हिमैंए सैं खैले तोंन् लब् ङ्‍हे ङ्हाँम्। ङइ ह्रोंसल् मत्‍त्रे छ्याँब् तरिगे धै सैं तोंल् योंरिगे आङ्हाँ, बरु ताँन् म्हिमैंइ मुक्‍ति योंसि छ्याँब् तरिगे बिब ङए सैं मुँ।
1CO 11:1 छतसि ख्रीष्‍टजी लब् धोंलेन् ङइ लइमुँ, क्‍हेमैंज्‍यै या ङइ लब् धोंलेन् लद्।
1CO 11:2 ङइ क्‍हेमैंलाइ स्‍याबासि पिंम्, तलेबिस्याँ क्‍हेमैंइ खोंयोंन् बिलै ङलाइन मैंसि ङइ लोमिंब् धोंले लरिइमुँ।
1CO 11:3 अझै क्‍हेमैंइ चु ताँ सेरिगे बिब ङए सैं मुँ: ख्रीष्‍ट ताँन् म्हिमैंए क्र ग, झाइले प्युँ प्ह्रेंस्योए क्र ग, परमेश्‍वर ख्रीष्‍टए क्र ग।
1CO 11:4 छतसि प्राथना लमा अथवा अगमबाणि पोंमा ह्रोंसए क्र हुबै मुँयुँइ ह्रोंसए क्र [अथवा ख्रीष्‍टए] मान आल।
1CO 11:5 छलेन क्र आउल्‍ले प्राथना लब नेरो अगमबाणि पोंबै च्हमिरिइ ह्रोंसए क्र [अथवा ह्रोंसए प्युँए] मान आल, तलेबिस्याँ च च्हमिरिए क्र खोरवाब् धोंन् तम्।
1CO 11:6 च्हमिरिमैंइ क्र आउ बिस्‍याँ चइ क्र खोरवालेन् तम्। दिलेया क्र खोरवामा फा पिम् बिस्याँ चइ क्रमुँ कुल् त्‍हुम्
1CO 11:7 मुँयुँमैंइ क्र हुल आत, तलेबिस्याँ मुँयुँमैं परमेश्‍वर धों ब्योंब मुँ धै चमैंइ परमेश्‍वरए ङ्‍हो लोंबै के लम्। छलेन च्हमिरिइ ह्रोंसए प्युँए ङ्‍हो लोंबै के लम्।
1CO 11:8 तलेबिस्याँ मुँयुँ च्हमिरिउँइँले बनेब आङिं, च्हमिरि मुँयुँउँइँले बनेब् ग।
1CO 11:9 छलेन मुँयुँ च्हमिरिए ल्हागिर बनेब आङिं, च्हमिरि मुँयुँए ल्हागिर बनेब् ग।
1CO 11:10 छतसि स्वर्गदूतमैंए उँइँरि ह्रोंसए प्युँए न्होंर टिइमुँ बिब् उँइँबर च्हमिरिमैंइ क्रमुँइ क्र हुल् त्हुम्।
1CO 11:11 दिलेया प्रभुए उँइँर, प्ह्रेंस्यो या ह्रोंसए प्युँए न्होंर टिल् त्हुमुँ, छलेन प्युँ या ह्रोंसए प्ह्रेंस्योए न्होंर टिल् त्हुम्।
1CO 11:12 तलेबिस्याँ मुँयुँउँइँले च्हमिरि बनेब् ग, मुँयुँ च्हमिरिइ फिब् ग। चु तोन्दोंरि सै परमेश्‍वरउँइँलेन् तब् ग।
1CO 11:13 क्हेमैं ह्रोंसन् बिचार लद्, च्हमिरिइ क्र आउल्‍ले परमेश्‍वरने प्राथना लब ङ्‍हेंम्‍मा?
1CO 11:14 मुँयुँमैंइ ह्रिंग्‍यो क्र न्‍हस्‍याँ चए ल्हागिर फापिन् तबै ताँ ग बिसि ह्‍युलर्बै छ्याइ ङ्योलाइ लोमिंम्, आङिं रो वा?
1CO 11:15 दिलेया च्हमिरिए क्र ह्रिंग्‍यो मुइबिस्‍याँ च बेल्‍ले ङ्‍हेंम्। तलेबिस्याँ ह्रिंग्‍यो क्र परमेश्‍वरजी चलाइ हुबै ल्हागिर पिंब् ग।
1CO 11:16 दिलेया चु ताँए बारेर को-कोइइ तोइ बिदा ङ्हाँम् बिस्‍याँ ङइ चमैंने बिमुँ, ङिए न्होंरि अरू तोइ रोसमैं आरे, परमेश्‍वरए बिश्‍वासीमैं न्‍होंरै या अरू तोइ रोसमैं आरे।
1CO 11:17 तारे अरू ताँरै या क्हेमैंइ ठिक के लइ बिसि ङइ बिल् आखाँ, तलेबिस्याँ क्‍हेमैं खागु तसि लल् म्हैबै केर छ्याँब् भन्दा आछ्याँब् त्हेन् तम्।
1CO 11:18 ओंसों बिलन् त्हुमा, क्‍हेमैं परमेश्‍वरए सेवार खागु तमा ह्रों-ह्रोंसए न्‍होंर्न सैं फो आक्ह्रि रो बिबै ताँ ङइ थेइमुँ। चु ताँए बारेर ङए सैंरै या दे दे छान् ङ्हाँइमुँ।
1CO 11:19 (छ्याँब नेरो आछ्याँबै म्‍हि छेनाले सेबै ल्हागिर क्‍हेमैं न्‍होंर आक्ह्रिबै ताँमैं या तलन् त्हुम्।)
1CO 11:20 क्‍हेमैं खागु तसि चब् चमा च प्रभु भोजन् आङिं,
1CO 11:21 तलेबिस्याँ चब् चबर टिमा क्‍हेमैं ह्रों-ह्रोंसइ पखबै सैमैं चम्, दिलेया तोइ आपखब्मैं बिस्याँ फोत्तेन् तम्, धै कोइ प्हा थुँसि म्हेरम्।
1CO 11:22 चब् थुँब् लबै ल्हागिर क्हेमैंए धिं आरे वा? क्‍हेमैंइ परमेश्‍वरए म्हिमैंलाइ तो धोंइ आङ्हाँ वा, धै तोइ आरेब्‍मैंलाइ फा पिन् लब् वा? क्‍हेमैंए सैंर खै ङ्हाँइमुँ? छाबै केए ल्हागिर क्हेमैंइ ठिक लइ बिसि बिब् वा? अँहँ, ङइ तिफुँइ बिल् आखाँ।
1CO 11:23 तलेबिस्याँ प्रभुजी ङने लोमिंबै ताँमैंन् क्हेमैंलाज्यै या ङइ लोमिंइमुँ। खीलाइ क्हाबै म्‍हुँइँसर खीजी क्‍हें छेइ,
1CO 11:24 झाइले परमेश्‍वरलाइ धन्‍यबाद पिंसि क्‍हें लुँसि छ बिइ, “चु क्‍हें क्‍हेमैंए ल्हागिर ङए ज्यु ग। ङलाइ मैंबै ल्हागिर चब्रें लद्।”
1CO 11:25 छलेन क्हें चल् खाँबै लिउँइँ प्रभुजी प्‍हेला छेसि बिइ, “चु प्‍हेला ङए कोर मुँबै छारा बाछा ग। चु बाछार ङए कोइ छाप झोंइमुँ। ङ मैंबै ल्हागिर चु क्‍हेमैंइ थुँब्रें लद्।”
1CO 11:26 छले चु क्‍हें चमा, चु प्‍हेलाउँइँले थुँमा प्रभु आयुन् समा क्‍हेमैंइ प्रभु सिबै बारेर आगुलाइ उँइँमिंब्रें लब्मुँ।
1CO 11:27 छतसि खाबइ आगुए सैं फो नल् लसेया च ताँमैं आक्ह्रिल्‍लेन् चु क्‍हें चमुँ, धै चु प्‍हेलाउँइँले थुँम् बिस्याँ, प्रभुए ज्यु नेरो को तो धोंइ आङ्हाँन्ले चबइले प्रभुए उँइँर च म्‍हि दोषि तब्‍मुँ।
1CO 11:28 छतसि ताँन् म्‍हिमैंइ ओंसों “ङ प्रभु भोज चबर लायकबै मुँ उ आरे?” बिसि ह्रोंसइन ह्रोंसलाइ जाँचेरिगे। च लिउँइँ मत्‍त्रे क्‍हें चरिगे धै प्‍हेलाउँइँले थुँरिगे।
1CO 11:29 तलेबिस्याँ प्रभुए ज्यु कति थेबै सै जा बिसि छेनाले आक्होल्‍लेन् खाबइ क्‍हें चमुँ, प्‍हेलाउँइँले थुँमुँ चइ ह्रोंसए फिर्न दण्ड पखब्मुँ।
1CO 11:30 छेनाले आक्होल्‍ले चबइले क्‍हेमैं न्‍होंरि ल्हें म्‍हिमैं नब छब तइमुँ, धै को-कोइम् सियाइमुँ।
1CO 11:31 छतसि “ङ प्रभु भोज चबै लायकबै मुँ उ आरे?” बिसि ह्रोंसइन ह्रोंसलाइ जाँचेसि ङ्योइ प्रभु भोज चस्‍याँ परमेश्‍वरउँइँले ङ्योइ दण्ड योंरिब् आरे।
1CO 11:32 दिलेया प्रभुजी ङ्योए निसाफ लमा खीए फिर बिश्‍वास आलब्मैं धोंलेन् ङ्यो या नास आतरिगे बिसि ङ्योलाइ तार झोंम्।
1CO 11:33 छतसि ओ ङए अलि-अङाँमैं, प्रभु भोज चबर खागु तमा ताँन् बिश्‍वासीमैं आखन् समा पैंन्।
1CO 11:34 बरु क्‍हेमैंइ प्रभु भोज चमा परमेश्‍वरजी दोषि आठर्दिरिगे बिसि क्‍हेमैं न्‍होंरि को-कोइ फो ख्रेंस्‍याँ धिंर्न चद्। अरू ताँमैं ङ क्‍हेमैं ङाँर खसि लस्यो।
1CO 12:1 ओ अलि-अङाँमैं, क्हेमैंज्यै या पबित्र प्ल्हजी पिंबै बरदानए बारेर क्होरिगे बिब ङए सैं मुँ।
1CO 12:2 ओंसों ख्रीष्‍टए फिर बिश्‍वास आलमा केर आफेबै पोंलै आखाँबै कुमैंए लिलि क्‍हेमैं प्ररिल।
1CO 12:3 छतसि क्‍हेमैंइ चु ताँ क्होरिगे बिब ङए सैं मुँ, परमेश्‍वरए प्ल्हउँइँले पोंबै म्हिइ येशूलाइ स्यारल् आखाँ, झाइले अर्को ताँ पबित्र प्ल्हउँइँले मत्‍त्रे “येशून् प्रभु ग” बिल् खाँम्।
1CO 12:4 पबित्र प्ल्हजी पिंबै बरदानमैं ल्हें खालर्बै मुँ, दिलेया पबित्र प्ल्ह घ्रि मत्‍त्रे मुँ।
1CO 12:5 सेवा लबै तरिका ल्हें मुँ, दिलेया सेवा लल् त्हुबै प्रभु घ्रि मत्‍त्रे मुँ।
1CO 12:6 झाइले ल्हें खालर्बै केमैं मुँ, दिलेया च के लबर परमेश्‍वर घ्रिजीन् ताँनलाइ के लबै भों पिंम्।
1CO 12:7 खीए के ताँनइ म्रोंरिगे बिसि ताँनए फायदाए ल्हागिर्न पबित्र प्ल्हजी ताँन् म्हिमैंलाइ के लबै बरदान पिंइमुँ।
1CO 12:8 पबित्र प्ल्हउँइँले कोइइ ज्ञान-बुद्धि मुँबै ताँ पोंबै भों योंइमुँ, कोइइ परमेश्‍वरए बारेर्बै छ्याँबै ताँमैं पोंबै भों योंइमुँ,
1CO 12:9 कोइइ पबित्र प्ल्हउँइँलेन् परमेश्‍वरए फिर बिश्‍वास लबै सैं योंइमुँ, कोइइ नब छब्मैं सल् लबै बरदानमैं योंइमुँ,
1CO 12:10 छलेन कोइइ औदिबै केमैं लब, कोइइ अगमबाणि पोंब, कोइइ पबित्र प्ल्हउँइँले खबै ताँ नेरो दुष्‍टउँइँले खबै ताँमैं फेलल् खाँब, कोइइ ल्हें खालर्बै क्युइ पोंल् ह्रब, कोइइ च क्युइमैं क्होबै बरदान योंइमुँ।
1CO 12:11 चु ताँन् केमैं पबित्र प्ल्ह घ्रिए केमैंन् ग। खीजी ताँन् म्हिमैंलाइ खीए सैंर मैंब् धोंले स्‍यो-स्‍योबै बरदान पिंम्।
1CO 12:12 ज्यु घ्रि मुँ, दिलेया चर ल्हें भागमैं तम्, ज्युर ल्हें भाग मुँलेया ज्यु घ्रिन् तम्, च धोंले येशू ख्रीष्‍ट या छाबन् ग।
1CO 12:13 ङ्यो यहूदी मुँलेया, अरू ह्रेंमैं मुँलेया, आगुए न्होंर के लब्मैं मुँलेया, खाब् मुँलेया ङ्योइ पबित्र प्ल्ह घ्रिउँइँलेन् ज्यु घ्रिर्न बप्‍तिस्‍मा किंइमुँ। छतसि पबित्र प्ल्ह घ्रिउँइँलेन् ङ्यो ताँनइ तोन्दोंरि सै योंइमुँ।
1CO 12:14 तलेबिस्याँ ज्यु भाग घ्रिउँइँले मत्‍त्रे तब आङिं, ज्यु ल्हें भागउँइँले बनेइमुँ।
1CO 12:15 प्‍हलेइ “ङ ज्युर्बै भाग आङिं, तलेबिस्याँ ङ यो आङिं” बिइ बिस्याँ, च ज्युर्बै भाग आत रो वा?
1CO 12:16 छलेन न्‍हेमेंइ “ङ ज्युए भाग आङिं, तलेबिस्याँ ङ मि आङिं,” बिइ बिस्याँ च ज्युर्बै भाग आत रो वा?
1CO 12:17 ङ्योए ज्युर मि मत्‍त्रे मुँस्‍याँ ङ्योइ तोइ थेब? छलेन ङ्योए ज्युर न्‍हेमें मत्‍त्रे मुँस्‍याँ ङ्योइ तोइ थाँ नाँब?
1CO 12:18 परमेश्‍वरजी भाग घ्रिउँइँले मत्‍त्रे ज्यु आल, खीजी ह्रोंसए सैंर मैंब् धोंले स्‍यो-स्‍योबै सैमैं बनेसि ज्युर क्ह्रिल्‍ले थेंमिंइँमुँ।
1CO 12:19 ताँन् तिथु सै मत्‍त्रे मुँस्‍याँ ज्यु आतमल।
1CO 12:20 दिलेया ल्हें भाग मुँलेया ज्यु बिस्याँ घ्रिन् मुँ।
1CO 12:21 छतसि मिइ योने “ङलाइ क्‍हि आचैदि” बिल् आखाँ। छलेन क्रज्‍यैया प्‍हलेने “ङलाइ क्‍हि आचैदि” बिल् आखाँ।
1CO 12:22 ङ्योइ ज्युर्बै कोइ भागलाइ तोइ आङिंबै सै मैंलेया झन् च सै चैदिम्।
1CO 12:23 झाइले ङ्योइ तोइ आङिंब् मैंबै ज्युर्बै भागमैंलाइ ङ्योइ ल्हें वास्ता लम्। धै म्रोंल् आतबै भागमैंलाइ ङ्योइ झन् छेनाले वास्ता लम्,
1CO 12:24 दिलेया ङ्योए ज्युर्बै अरू भागमैंलाइ छाबै वास्ता लल् आत्हु। परमेश्‍वरजीन् ज्युर्बै भागमैं छेनाले क्ह्रिल्‍ले थेंमिंइमुँ।
1CO 12:25 छतसि ज्युर मुँबै [अथवा बिश्‍वासीमैं न्‍होंरि] च भागमैं आक्ह्रिब आतरिगे, बरु चु ताँन् स्‍यो-स्‍योबै भागमैं क्ह्रिसि घ्रिइ घ्रिए वास्ता छेनाले लरिगे बिब परमेश्‍वरए सैं मुँ।
1CO 12:26 छतसि भाग घ्रिइ दुःख योंस्‍याँ ताँन् भागज्‍यैया दुःख योंम्, छलेन भाग घ्रिइ छ्याँबै बयन योंस्‍याँ अरू भागमैं या सैं तोंम्।
1CO 12:27 क्‍हेमैं ताँन् ख्रीष्‍टए ज्यु ग। झाइले ताँन् म्‍हिमैं च ज्युर्बै भागमैं ग।
1CO 12:28 ख्रीष्‍टए फिर बिश्‍वास लब्मैं न्‍होंरि परमेश्‍वरजीन् केए भाग थेंमिंइँमुँ। ओंसोंबै कुल्मिंबै चेला चिब्मैं, ङ्हिं अगमबक्‍तामैं, सों परमेश्‍वरए बारेर ताँ लोमिंबै म्‍हिमैं, झाइले परमेश्‍वरए मिंर औदिबै के लब्मैं, नब् छब् सल् लबै बरदान योंब्‍मैं, अरूमैंलाइ ल्होमिंब्‍मैं, रेखदेख लब्मैं, ल्हें खालर्बै क्युइ पोंब्‍मैं ताँनलाइ परमेश्‍वरजी खेंमैंए क्‍ल्‍ह्‍योर थेंमिंइमुँ।
1CO 12:29 ताँन् म्‍हिमैं कुल्मिंबै चेला चिब्मैं आत, ताँन् म्‍हिमैं अगमबाणि पोंब्‍मैं आत, ताँन् म्हिमैं परमेश्‍वरए बारेर ताँ लोमिंब्‍मैं आत, छलेन ताँन् म्हिमैं औदिबै के लब्मैं आत।
1CO 12:30 छलेन ताँनने नब सल् लबै बरदान आत, ताँनइ ल्हें खालर्बै क्युइ पोंल् आखाँ, ताँनइ क्युइमैं क्होल् आखाँ।
1CO 12:31 छतसि थेबै बरदानमैं योंबै सैं लद्। ङइ क्हेमैंलाइ च बरदानमैं योंबै छ्याँबै घ्याँ उँइँमिंब्मुँ।
1CO 13:1 ङइ म्‍हिमैंए ल्हें खालर्बै क्युइमैं नेरो स्‍वर्गदूतमैंए क्युइर पोंलेया ङइ अरूमैंए फिर म्हाँया आलस्‍याँ, ङइ पोंबै ताँ ड्वाँ ड्वाँले ह्राबै ङ्‌ह नेरो झ्याँइ झ्याँइले ह्राबै छ्योंले धोंन् तम्।
1CO 13:2 छलेन ङइ अगमबाणि पोंबै भों योंलेया, क्होल् आखाँबै ताँमैं क्होल् खाँलेया, तोन्दोंरि सैर ह्रब-सेब तलेया, झाइले कोंमैं स्‍योवाल् खाँबै बिश्‍वास ङने मुँलेया ङइ अरूए फिर म्हाँया आलस्‍याँ ङ तोइ सैरै या केर आफेबै म्हि तम्।
1CO 13:3 छलेन ङए ताँन् सै न्होर ङ्हाँदुमैंलाइ चुवालेया, धै ह्रोंसए ज्यु ख्रोंवाबर पिंवालेया ङइ अरूए फिर म्हाँया आलस्‍याँ ङलाइ तोइ फायदा आत।
1CO 13:4 म्हाँया लबै म्‍हिइ दुःखरै या ढुक्‍कले सैदिम्, आगुए फिर ल्हयो खम्। म्हाँया लबै म्‍हिइ आगुए ह्रिस आल, थेबै या आप्‍हैं।
1CO 13:5 म्हाँया लबै म्हिइ सैं सारो आल, ह्रोंसए फायदा मत्‍त्रे आम्है, ह्रिसै आख, धै आगुइ ह्रोंसलाइ न्होह्रों ललेया चए खी आफो।
1CO 13:6 आगुए फिर दुःख तमा म्हाँया लबै म्हि सैं आतों, दिलेया क्ह्रोंसेंन्बै ताँर सैं तोंम्।
1CO 13:7 अरूमैंइ तो ललेया म्हाँया लबै म्‍हिइ सैदिम्, ताँन् सैर खोंयोंइ बिश्‍वास लम्, तोन्दोंरि सैर आशा थेंम्, धै ताँन् सै ढुक्‍कले सैदिम्।
1CO 13:8 अगमबाणि पोंबै बरदान म्हयाब्‍मुँ, ल्हें खालर्बै क्युइमैं पोंल् ह्रबै बरदान म्हयाब्‍मुँ, परमेश्‍वरए बारेर्बै ताँमैं ह्रब्-सेबै बरदान म्हयाब्‍मुँ, दिलेया म्हाँया बिस्याँ खोंयोंइ म्हरिब् आरे।
1CO 13:9 ङ्योए ज्ञान बुद्धि खोंयोंइ बिलै ङ्योने आत, अगमबाणि पोंबै बरदानमैं या खोंयोंन् बिलै ङ्योने आत।
1CO 13:10 क्ह्रोंसेंन्बै ताँ तखबै त्हेर खोंयोंन् बिलै आचैबै सैंमैं म्हयाब्‍मुँ।
1CO 13:11 ङ कोलो मुँमा कोलो धोंलेन् पोंमल, कोलोए सैं लमल, कोलोइ धोंलेन् मैंमल, दिलेया तारेम् ङ थेब तइमुँ, छतसि कोलोर धों तबै बानि पिवाइ।
1CO 13:12 आछ्याँबै दर्पनर ङ्ह्‍योमा लि छर्लङ्गले आम्रोंब् धोंलेन् तिंजोरो ङ्योइ परमेश्‍वरए बारेर छेनाले क्होल् आखाँ, दिलेया खीने त्‍होबै त्हेर बिस्याँ खी खैब मुँन बिब छेनाले क्होल् खाँब्‍मुँ। तिंजोरो ङइ परमेश्‍वरलाइ दे दे मत्‍त्रे सेम्, दिलेया खीजी ङलाइ छेनाले ङो सेब् धोंले ङज्यै या खीलाइ च त्हेरि छेनाले ङो सेब्‍मुँ।
1CO 13:13 छतसि खीए फिर थेंबै बिश्‍वास, खीए फिर लबै आशा नेरो म्हाँया लब, चु ताँ सों खोंयोंइ तरिम्। चुमैं न्‍होंरि ताँन् भन्दा थेब म्हाँया लब् ग।
1CO 14:1 ताँन् भन्दा थेबै ताँ क्हेमैंइ ताँनए फिर म्हाँया लद्। झाइले पबित्र प्ल्हजी पिंबै बरदानमैं योंबै सैं लद्। चमैं न्होंरि अगमबाणि पोंबै बरदान योंबै भों लद्।
1CO 14:2 तलेबिस्याँ म्हिमैंइ क्होल् आखाँबै क्युइ पोंबै म्हिमैंइ म्‍हिमैंने आङिं, परमेश्‍वरने पोंम्, तलेबिस्याँ खाबज्‍यै या चए ताँ आक्‍हो। चइ परमेश्‍वरए प्ल्हए भोंउँइँले म्हिमैंइ क्होल् आखाँबै ताँमैं पोंम्।
1CO 14:3 दिलेया अगमबक्‍ताइ म्‍हिमैंने पोंम्, झाइले म्‍हिमैंलाइ प्रभुए ताँ लोमिंसि चमैंए सैं भोंब् लमिंम् धै सैं क्‍होल् लमिंम्।
1CO 14:4 म्हिमैंइ क्होल् आखाँबै क्युइ पोंबै म्‍हिइ ह्रोंसलाइ मत्‍त्रे फायदा लम्, दिलेया अगमबक्‍ताइ पोंमा ताँन् बिश्‍वासीमैंलाइ फायदा तम्।
1CO 14:5 क्‍हेमैं ताँनइ म्हिमैंइ क्होल् आखाँबै क्युइ पोंरिगे बिब ङइ ङ्हाँइमुँ, दिलेया च भन्दा अगमबाणि पोंल् खाँरिगे ङ्हाँइमुँ। म्हिमैंइ क्होल् आखाँबै क्युइ पोंब् भन्दा अगमबाणि पोंब बेल्‍ले छ्याँब ग। दिलेया ताँन् बिश्‍वासीमैंइ क्होरिगे बिसि आक्होबै क्युइए अर्थ खोल्दिबै म्‍हि मुँस्‍याँ ठिक तम्।
1CO 14:6 छतसि ओ अलि-अङाँमैं, ङ क्‍हेमैं ङाँर खमा क्हेमैंइ आक्होबै क्युइ मत्‍त्रे पोंस्‍याँ ङउँइँले क्‍हेमैंलाइ तोइ फायदा आत। दिलेया ङइ परमेश्‍वरए आक्होबै ताँमैंए अर्थ खोल्‍दिस्‍याँ, ज्ञान योंबै ताँ बिस्‍याँ, परमेश्‍वरए भोंउँइँले ताँ बिस्‍याँ, अथवा परमेश्‍वरए बारेर्बै ताँ लोमिंस्‍याँ मत्‍त्रे क्‍हेमैंइ फायदा योंम्।
1CO 14:7 मुरलि अथवा बिणाउँइँले खबै कै आत्होंस्याँ तो ह्रारिइमुँ बिसि खाबज्‍यै क्‍होल् आखाँ।
1CO 14:8 छलेन थुतुरु ह्राबै म्‍हिइ छेनाले फरासिलोले आह्रास्‍याँ फौजीमैं ल्हडें लबर खैले तयार तब?
1CO 14:9 च धोंलेन् क्हेमैंज्यै या म्हिमैंइ क्होल् आखाँबै क्युइ पोंमा “क्हेमैंइ तो बिइ?” बिसि खाबज्‍यै या क्‍होल् आखाँ। छतसि क्‍हेमैं पोंब फाक्‍कर्न तम्।
1CO 14:10 ह्‍युलरि स्यो स्योबै क्युइमैं ल्‍हेन् मुँ, चु ताँन् क्युइमैंल अर्थ मुँ।
1CO 14:11 दिलेया खाबइ मुँले ङइ आक्‍होबै क्युइर ङने पोंस्‍याँ च पोंबै म्‍हि ङए ल्हागिर अरू ह्‍युलर्बै म्हि धोंन् तम्, झाइले ङ चए ल्हागिर अरू ह्‍युलर्बै म्हि धोंन् तम्।
1CO 14:12 क्हेमैंइ पबित्र प्ल्हजी पिंबै बरदानमैं योंबै सैं लबइले क्हेमैंइ योंबै पबित्र बरदानउँइँले बिश्‍वासीमैंए ल्हागिर भों खबै के लद्।
1CO 14:13 छतसि क्होल् आखाँबै क्युइ पोंबै म्‍हिइ च क्युइए अर्थ खोल्‍दिबै बरदान योंबै ल्हागिर प्राथना लरिगे।
1CO 14:14 म्हिमैंइ आक्होबै क्युइर ङइ प्राथना लमा ङए प्ल्हइ प्राथना लम्, दिलेया ङए सैंइ तोइ आल।
1CO 14:15 दिलेया ङइ तो लल् त्‍हुम्? आक्होबै क्युइर ङए प्ल्हइ प्राथना लम्, धै ङए सैंज्‍यैया प्राथना लम्। ङए प्ल्हइ भजन प्रिंम्, छलेन ङए सैंज्‍यैया भजन प्रिंम्।
1CO 14:16 क्‍हिइ पबित्र प्ल्हजी पिंबै आक्होबै क्युइर परमेश्‍वरलाइ धन्‍यबाद पिंइबिस्‍याँ अरू म्‍हिमैंइ “आमेन,” अथवा छान तरिगे, बिल् आखाँ। तलेबिस्याँ क्‍हिइ तो बिइमुँ बिसि चमैंइ आक्‍हो।
1CO 14:17 छले क्‍हिइ परमेश्‍वरए मिंर छ्याँबै प्राथना लनाबिलेया च प्राथनाइ अरू म्‍हिमैंलाइ तोइ फायदा आत।
1CO 14:18 क्हेमैंइ भन्दा ङइ आक्होबै क्युइमैं ल्हें पोंल् ह्रम्। छतसि ङ परमेश्‍वरलाइ धन्‍यबाद पिंम्।
1CO 14:19 दिलेया बिश्‍वासीमैं खागु तमा ङइ आक्होबै क्यइर हजार च्यु ताँफुँमैं पोंब् भन्दा बरु ताँफुँ ङ्‍हन् पोंलेया ह्रोंसए सैंउँइँलेन् ताँनइ क्होबै क्युइर ङ पोंदा ङ्हाँम्।
1CO 14:20 ओ अलि-अङाँमैं, च्हैंब्-मैंब् लल् त्हुबै केर कोलोमैं धों आतद्। आछ्याँबै केर कोलोमैं धों तद्, दिलेया च्हैंब्-मैंब् लल् त्हुबै केर पाको म्हि धों तद्।
1CO 14:21 परमेश्‍वरए छ्वेर छले प्ह्रिइमुँ, “आक्होबै क्युइ पोंबै म्‍हिमैंउँइँले ङ चु म्हिमैंने पोंब्मुँ, छलेन् अरू ह्‍युलर्बै म्हिमैंए सुँउँइँले या ङ चुमैंने पोंब्‍मुँ। दिलेया चमैंइ ङए ताँ थेल् ङिंरिब आरे बिसि याहवेहजी बिइमुँ।”
1CO 14:22 म्हिमैंइ आक्होबै क्युइ पोंबै बरदान परमेश्‍वरए फिर बिश्‍वास लब्‍मैंए ल्हागिर आङिं, बरु बिश्‍वास आलब्‍मैंए ल्हागिर परमेश्‍वरजी पिंबै चिनु ग। दिलेया अगमबाणि पोंबै बरदान बिस्याँ खीजी बिबै ताँ थेल् आङिंब्‍मैंए ल्हागिर आङिं, खीए फिर बिश्‍वास लब्‍मैंए ल्हागिर ग।
1CO 14:23 छतसि बिश्‍वासीमैं खागु तमा क्‍हेमैं ताँनइ आक्होबै क्युइर पोंइबिस्‍याँ, चर परमेश्‍वरए फिर बिश्‍वास आलब्‍मैं अथवा च क्युइ आक्होब्मैं खइबिस्याँ चमैंइ क्‍हेमैंने सोबालमैं आबि रो वा?
1CO 14:24 दिलेया क्‍हेमैं ताँनइ अगमबाणि पोंरिमा बिश्‍वास आलब्‍मैं नेरो तोइ आह्र-आसेब्मैं चर खसि क्हेमैंइ पोंबै ताँ थेइबिस्‍याँ, च ताँन् ताँउँइँले चमैंइ खेंमैंए पापए बारेर सेब्मुँ, धै च ताँन् ताँमैंउँइँले चमैंइ ह्रोंसए जाँच लब्‍मुँ।
1CO 14:25 चमैंइ खेंमैंए सैं न्‍होंर्बै ताँमैं था सेब्मुँ, धै “क्‍ह्रोंसेंन परमेश्‍वर क्‍हेमैंए म्‍हाँजोर्न मुँन,” बिसि चमैंइ पद्खु तसि परमेश्‍वरलाइ फ्‍योब्‍मुँ।
1CO 14:26 छतसि ओ अलि-अङाँमैं, ङइ बिल् म्हैबै ताँ चुन् ग: क्‍हेमैं परमेश्‍वरए मिं क्वेबर खागु तमा क्हेमैं न्होंरि कोइल भजन प्रिंबै के तमुँ, कोइल परमेश्‍वरए ताँउँइँले लोमिंबै के तमुँ, कोइने परमेश्‍वरजी उँइँमिंबै ताँ तमुँ, कोइइ आक्होबै क्युइ पोंमुँ, कोइइ आक्होबै क्युइए अर्थ खोल्दिमिंम्। चु ताँन् केउँइँले बिश्‍वासीमैं परमेश्‍वरर भोंब् तबै के लल् त्हुम्।
1CO 14:27 खाबज्‍यै या म्हिमैंइ आक्होबै क्युइर पोंम् बिस्‍याँ म्‍हि ङ्हिं, अथवा ल्हें मुँस्‍याँ म्‍हि सोंइ मत्‍त्रे पलो पलोले पोंरिगे। धै म्‍हि घ्रिइ च आक्होबै क्युइए अर्थ खोल्दिमिंरिगे।
1CO 14:28 दिलेया चर आक्होबै क्युइए अर्थ खोल्दिमिंबै म्‍हि खाबै आरेस्याँ च आक्होबै क्युइ पोंबै म्‍हि तोइ आपोंल्‍ले टिरिगे। बरु च ह्रोंसनेन् नेरो परमेश्‍वरने पोंरिगे।
1CO 14:29 अगमबाणि पोंबै म्हि या ङ्हिंदे सोंदेइ मत्‍त्रे पोंरिगे। धै चमैंइ पोंबै ताँ परमेश्‍वरए ताँ ङिंउ उ आङि? बिसि अरूमैंइ छेनाले जाँच लरिगे।
1CO 14:30 दिलेया चर मुँबै म्हिमैंए न्होंरि खाबलाज्यै या परमेश्‍वरजी “चु ताँ बिद्” बिस्याँ, ओंसों पोंरिबै म्‍हि आपोंरिगे।
1CO 14:31 चर्बै म्हिमैं ताँनइ छेनाले ताँ क्होल् खाँरिगे धै चमैंए सैं भोंब् तरिगे बिबै ल्हागिर क्हेमैं ताँनइ पलो पलोले अगमबाणि पोंल् खाँम्।
1CO 14:32 अगमबाणि पोंबै म्‍हिमैंइ ह्रोंसए पोंबै ताँ अधीनर थेंल् त्हुम्।
1CO 14:33 तलेबिस्याँ क्हेमैंइ परमेश्‍वरए सेवा लमा गोलमोल आतल्‍ले छेनाले लल् त्हुम् बिब खीए सैं मुँ। ताँन् क्‍ल्‍ह्‍योर्बै परमेश्‍वरए फिर बिश्‍वास लबै म्‍हिमैं धोंले
1CO 14:34 परमेश्‍वरए सेवा लमा च्हमिरिमैं तोइ आपोंन्ले टिरिगे, तलेबिस्याँ परमेश्‍वरए मिं क्वेबै त्हेर चमैंइ ताँ लल् आत। यहूदीमैंए ठिमइ बिब् धोंले चमैंइ ह्रोंसलाइ अधीनर थेंरिगे।
1CO 14:35 तोइ ताँमैं क्होबै सैं मुँस्‍याँ चमैंइ धिंर ह्‍यासि ह्रोंसए प्‍युँनेन् ङ्योएरिगे, तलेबिस्याँ चर्जर च्हमिरिमैंइ छलफल लब फापिबै ताँ ग।
1CO 14:36 परमेश्‍वरए ताँ क्‍हेमैंउँइँले त्‍होंब् रो वा? क्‍हेमैंइ मत्‍त्रे परमेश्‍वरए ताँ सेइमुँ वा? आङिं!
1CO 14:37 खाबज्यै या ह्रोंसलाइ अगमबक्‍ता अथवा पबित्र प्ल्ह मुँबै म्‍हि ग बिसि मैंम् बिस्याँ, ङइ प्‍ह्रिबै चु ताँमैं प्रभुजी लद् बिबै ताँमैं ग बिसि चइ सेरिगे।
1CO 14:38 दिलेया खाबज्यै चु ताँए वास्ता आलबिस्याँ, चलाज्यै या वास्ता लरिब आरे।
1CO 14:39 छतसि ओ ङए अलि-अङाँमैं, अगमबाणि पोंबै बरदान योंरिगे बिबै सैं लद्, धै आक्होबै क्युइर पोंब्मैंलाज्यै या आपोंन् आबिद्।
1CO 14:40 छले ताँन् केमैं क्ह्रिल्‍ले छेनाले लल् त्हुम्।
1CO 15:1 ओ अलि-अङाँमैं, ङइ क्हेमैंने बिमिंबै सैं तोंबै ताँए बारेर ङ क्‍हेमैंने धबै बिदा ङ्हाँइमुँ। चु सैं तोंबै ताँ क्‍हेमैंइ थेइ, धै भोंन्‍ले बिश्‍वास लरिइमुँ।
1CO 15:2 चु सैं तोंबै ताँ क्वेंसि क्हेमैं बिश्‍वासर भोंब् तस्याँ क्‍हेमैंइ मुक्‍ति योंम्। आस्‍याँ क्‍हेमैंइ फाक्‍कर्न बिश्‍वास लइ।
1CO 15:3 तलेबिस्याँ ङइ योंबै ताँन् भन्दा थेबै सै ङइ क्‍हेमैंलाइ पिंइमुँ। च थेबै सै चुन् ग: परमेश्‍वरए छ्वेर प्‍ह्रिब् धोंले ङ्योए पाप त्होमिंबै ल्हागिर येशू ख्रीष्‍ट सिमिंइ।
1CO 15:4 म्‍हिमैंइ खीलाइ पाइ, दिलेया परमेश्‍वरए छ्वेर प्‍ह्रिब् धोंले सोंरोर परमेश्‍वरजी खीलाइ धबै सोगों लमिंइ।
1CO 15:5 च लिउँइँ येशू पत्रुस नेरो च्युसे ङ्हिं कुल्मिंबै चेला चिब्मैंने या त्‍होखइ।
1CO 15:6 च लिउँइँ धबै खी ङ्‌हप्रदे भन्दा ल्हें अलि-अङाँमैंने तिखेर्न त्‍होखइ। चमैं न्होंरि को-कोइ सियालेन् त्हेन् जसो तोगोइ या सोगोंन् मुँ।
1CO 15:7 च लिउँइँ याकूबने त्‍होखइ, झाइले ताँन् कुल्मिंबै चेला चिबमैंने या त्‍होखइ।
1CO 15:8 धाँसे लिउँइँ ङ ला आयोल्‍ले फिबै कोलो धों तब्ने या प्रभु त्‍होखइ।
1CO 15:9 तलेबिस्याँ कुल्मिंबै चेला चिब्मैं न्‍होंरि ङ धाँसे केर आफेब् ग। ङ कुल्मिंबै चेला चिब बिबै लायकर्बै आरे, तलेबिस्याँ ङइ ओंसों परमेश्‍वरए म्‍हिमैंलाइ बेल्‍ले दुःख पिंल।
1CO 15:10 दिलेया परमेश्‍वरए दयाम्हाँया योंसि ङ तिंजोरो कुल्मिंबै चेला चिब तइ। झाइले परमेश्‍वरजी ङए फिर लबै दयाम्हाँया फाक्‍कर्बै आतइमुँ, बरु ङइ अरू कुल्मिंबै चेला चिब्मैंइ भन्दा ल्हें के लइमुँ। दिलेया चु छाबै के ङ ह्रोंसैन लब आङिं, ङने मुँबै परमेश्‍वरए दयाम्हाँयाजी लब् ग।
1CO 15:11 छतसि ङइ मुँले अरू कुल्मिंबै चेला चिब्मैंइ मुँले, ङिइ चु सैं तोंबै ताँ बिप्रइ, धै ङिइ बिबै ताँ थेसि क्‍हेमैंइ बिश्‍वास लइमुँ।
1CO 15:12 सिबै लिउँइँज्यै या ख्रीष्‍ट सोगों तइमुँ बिबै सैं तोंबै ताँ ङिइ बिइमुँ। दिलेया सियाब्‍मैं धबै सोगों तल् आखाँ बिसि क्‍हेमैं न्‍होंरि को-कोइइ खैले बिल् खाँइ?
1CO 15:13 क्‍हेमैंइ बिब् धोंले सियाब्‍मैं धबै सोगों आतस्याँ ख्रीष्‍टै या सिसि धबै सोगों तब आङिं।
1CO 15:14 ख्रीष्‍ट सिसि धबै सोगों आतस्याँ ङिइ बिमिंबै सैं तोंबै ताँ फाक्‍कर्बै तम्, धै क्‍हेमैंइ लबै बिश्‍वासै या फाक्‍कर्ब तम्।
1CO 15:15 चए फिरै या ङि परमेश्‍वरए बारेर स्योर तेसि पोंब्मैं तब्मुँ, तलेबिस्याँ परमेश्‍वरजी “ख्रीष्‍टलाइ सिबउँइँले धबै सोगों लमिंइ” बिसि खीए बारेर ङिइ ग्वाइ पिंइमुँ। क्ह्रोसेंन सियाब्मैं धबै सोगों आतस्याँ खीजी ख्रीष्‍टलाज्यै या सोगों आलमल।
1CO 15:16 तलेबिस्याँ सियाब्मैं धबै सोगों आत बिस्याँ ख्रीष्‍ट या सिबउँइँले धबै सोगों आत।
1CO 15:17 धै ख्रीष्‍ट सिबउँइँले धबै सोगों आतइ बिस्‍याँ क्‍हेमैंइ लबै बिश्‍वास फाक्‍कर्न तम्, झाइले क्‍हेमैं अझै या ह्रोंसए पाप नोसि क्षमा आयोंन्‍ले टिरिइमुँ।
1CO 15:18 छ बिस्याँम् येशू ख्रीष्‍टए फिर बिश्‍वास लसि सियाब्मैं या नास तयाइमुँ।
1CO 15:19 तोगोबै छ्हए ल्हागिर मत्‍त्रे ङ्योइ ख्रीष्‍टए फिर आशा थेंब् ग बिस्याँ ताँन् म्‍हिमैं भन्दा ङ्यो ल्‍हयो खन् तब्मुँ।
1CO 15:20 दिलेया छ बिब आत! ख्रीष्‍ट सिबउँइँले धबै सोगों तब क्‍ह्रोसेंन् ग। सियाब्‍मैं न्‍होंरि ताँन् भन्दा ओंसों येशू सिबउँइँले सोगों तइ। छतसि सिसि न्‍हरु च्‍हुइरिब्‍मैं धबै सोगों तब्मुँ बिबै प्रमाण येशू ख्रीष्‍टन् ग।
1CO 15:21 तलेबिस्याँ खैले म्‍हि घ्रिउँइँले ताँन् म्हिमैं सिल् त्‍हुइ, छलेन म्‍हि घ्रिउँइँलेन् ताँन् म्‍हिमैं सिबउँइँले धबै सोगों तल् योंब्मुँ।
1CO 15:22 तलेबिस्याँ ताँन् म्‍हिमैं आदमउँइँले सिल् त्‍हुइ, छलेन ताँन् म्हिमैंइ ख्रीष्‍टउँइँले सोल् योंम्।
1CO 15:23 दिलेया ताँन् खें-खेंमैंए पलोर सोगों तम्। ख्रीष्‍ट बिस्याँ धाँसे ओंसों सोगों तइ, धै खी एयुबै त्हेर खीए फिर बिश्‍वास लब्मैं सोगों तब्‍मुँ।
1CO 15:24 च लिउँइँ चु ह्‍युलए आखिरि त्हिंइ खब्‍मुँ। च त्हेर ख्रीष्‍टजी ताँन् शासकमैं, अधिकारमैं नेरो ताँन् भों मुँबै सैमैं नास लवासि परमेश्‍वर आबालाइ ग्याल्स लबर पिंब्मुँ।
1CO 15:25 तलेबिस्याँ परमेश्‍वरजी खीए शत्तुरमैं ताँन् ट्होवासि ख्रीष्‍टए प्‍हले न्‍होंर आथेंन् समा ख्रीष्‍टजी ग्याल्स ललन् त्‍हुम्।
1CO 15:26 धाँसे लिउँइँ नास लल् त्हुबै शत्तुर काल ग।
1CO 15:27 तलेबिस्याँ परमेश्‍वरए छ्वेरि छले प्‍ह्रिइमुँ, “परमेश्‍वरजी तोन्दोंरि सै म्‍हिए प्‍हले न्‍होंर थेंइ।” झाइले “तोन्दोंरि सै” बिबै मतलब परमेश्‍वरजी खी बाहेक अरू तोन्दोंरि सै ख्रीष्‍टए न्होंर थेंम् बिब् ग।
1CO 15:28 छले परमेश्‍वरजी तोन्दोंरि सै ख्रीष्‍टए न्होंर थेंब्मुँ, दिलेया ख्रीष्‍ट बिस्याँ खीए प्हले न्होंर तोन्दोंरि सै थें‍मिंबै परमेश्‍वर आबाए न्होंर टिब्‍मुँ, धै परमेश्‍वरजीन् ताँन् सैए फिर ग्याल्स लब्‍मुँ।
1CO 15:29 धै सिब्‍मैं धबै सोगों आतब् ङिंस्‍याँ म्‍हिमैंइ सियाब्‍मैंए ल्हागिर बप्‍तिस्‍मा किंसि तो फायदा तम्? सिब्‍मैं सोगों आतब् ङिंस्‍याँ चमैंइ सिब्‍मैंए ल्हागिर तले बप्‍तिस्‍मा किंब?
1CO 15:30 सियाब्मैं सोगों आतब् ङिंस्‍याँ ङइ खोंयोंइ तले दुःख नोरिब?
1CO 15:31 ओ अलि-अङाँमैं, ङ्योए प्रभु येशूए फिर क्हेमैंइ बिश्‍वास लबइले ङए सैं भोंइमुँ। छतसि प्रभुए के लबर ङ त्हिंइ ह्रोंसे या सिल् खाँम्।
1CO 15:32 एफिसस सहरर ङइ बेल्‍ले दुःख योंइ - चर क्ह्‍योंर्बै सिंह भलु धों तबै म्हिमैंने या ङ नेइ। दिलेया को-कोइ म्हिमैंइ बिब् धोंलेन् सियाब्मैं सोगों आतब् ङिंस्‍याँ ङलाइ तो फायदा तइ? छले फायदा आतब् ङिंस्याँ, “ङ्यो चले, थुँले, तो लदा ङ्हाँम् लले, तलेबिस्याँ प्‍हँन्हाँगम् ङ्यो सियाम्।”
1CO 15:33 छतसि न्ह क्रों मि क्रों तद्, खाब तोदोंए ताँ आङेंन्। तलेबिस्याँ “आछ्याँबै के लब्मैंने प्रस्याँ छ्याँबै म्हि या आछ्याँबन् तयाम्।”
1CO 15:34 सैं चित्, तारे पिरु पाप के आलद्। छाबै आछ्याँबै केमैं क्‍हेमैंए ल्हागिर फापिन् तबै ताँ ग। छतसि चु ताँ ङइ क्हेमैंने बिल् त्हुम्, तलेबिस्याँ क्‍हेमैंए न्‍होंरि को-कोइ म्हिमैंइ परमेश्‍वरलाइ छेनाले ङो आसेइमुँ।
1CO 15:35 “सियाब्मैं खैले सोगों तल् खाँमुँ? चमैंए ज्यु खैब तमुँ?” बिसि को-कोइ म्‍हिमैंइ ङ्योएलै।
1CO 15:36 ओ बुद्धि आरेबै म्‍हि, क्हिइ प्‍लुबै प्लु आक्राँन् समा आम्‍लो आङिं वा?
1CO 15:37 क्हिइ गहुँ, मखैं, तो प्‍लुलेया प्लु मत्‍‍त्रे प्‍लुम्, बडिबै धुँन् आप्‍लु।
1CO 15:38 झाइले परमेश्‍वरजी ह्रोंसए सैंर मैंब् धोंले ताँन् प्‍लुलाइ ह्रों-ह्रोंसए खालर्बै धुँ लमिंम्।
1CO 15:39 ताँन् सैमैंए से घ्रिन् आत। म्‍हि, खेदो, नमेमैं, ताँग, ताँन् सैमैंए से स्‍यो-स्‍योबन् तम्।
1CO 15:40 छलेन ज्यु या स्‍वर्गर्बै नेरो पृथ्‍बीर्बै स्यो स्यो तम्। स्‍वर्गर्बै सैमैंए ज्यु स्‍योन् तमुँ, पृथ्‍बीर्बै सैमैंए ज्यु स्योन् तम्। दिलेया चमैं ताँनन् बेल्‍ले छ्याँब् मुँ।
1CO 15:41 त्‍हिंयाँ या छ्याँब मुँ, लयाँ या छ्याँब मुँ, मुसारमैं या छ्याँब मुँ। धै मुसारमैंए न्होंरै या घ्रि भन्दा घ्रि झन छ्याँब मुँ। दिलेया चमैं ताँन् स्यो-स्योन् मुँ।
1CO 15:42 च धोंलेन् सियाब्‍मैं सोसि खबै ज्यु या छान् तम्। सियाबै ज्यु पावास्‍याँ क्राँह्‍याम्, दिलेया च खोंयोंइ सिल् आत्हुल्‍ले परमेश्‍वरजी सोगों लमिंम्।
1CO 15:43 पाबै त्हेरि च ज्यु आछ्याँब नेरो भों आरेब् तम्, दिलेया परमेश्‍वरजी सोगों लमिंमा च ज्यु छ्याँब नेरो भोंब तम्।
1CO 15:44 ज्यु से-कोनेन् छगोंर पावामुँ, दिलेया सोगों लमिंमा च ज्यु प्ल्हर सोम्। खैले ङ्योल से ने कोए ज्यु तमुँ, छलेन ङ्योए प्ल्हर्बै ज्यु या तम्।
1CO 15:45 तलेबिस्याँ परमेश्‍वरए छ्वेरै या छले प्ह्रिइमुँ, “ओंसोंबै म्‍हि आदम छ्ह मुँबै म्‍हि तइ।” लिउँइँबै आदम (अथवा येशू ख्रीष्‍ट) छ्ह पिंबै पबित्र प्ल्ह तइ।
1CO 15:46 ओंसोंबै म्हि प्ल्हर ज्यु मुँबै म्हि आङिं, से-कोए ज्युर प्ल्ह मुँबै म्हि ग। लिउँइँबै म्हि प्ल्हर ज्यु मुँबै म्हि ग।
1CO 15:47 ओंसोंबै म्‍हि सउँइँले बनेबै पृथ्‍बीर्बै म्हि ग, लिउँइँबै म्हि स्‍वर्गर्बै म्हि ग।
1CO 15:48 पृथ्‍बीर्बै ताँन् म्‍हिमैं सउँइँले बनेबै म्‍हि आदम धों तब् ग। स्‍वर्गर्बै म्हिमैं स्‍वर्गउँइँले युबै म्हि येशू ख्रीष्‍ट धोंन् तब् ग।
1CO 15:49 खैले ङ्यो सउँइँले बनेबै म्हि आदम धोंन् ब्योंब् तइ, छलेन ङ्यो स्‍वर्गर्बै म्हि धोंन् ब्योंब् तब्‍मुँ।
1CO 15:50 छतसि ओ अलि-अङाँमैं, ङइ बिल् म्हैबै ताँ तो जा बिस्याँ, से कोए ज्युनेन् ङ्यो परमेश्‍वरए ग्याल्सर, अथवा स्‍वर्गर, होंल् आयों। धै नास तल् त्‍हुबै ज्युइ खोंयोंइ नास आतबै प्ल्हर ज्यु योंल् आखाँ।
1CO 15:51 थेद्, ङइ क्‍हेमैंने म्हिमैंइ क्होल् आखाँबै ताँ बिम्। ङ्यो न्होंरि को-कोइ सियालेया ताँन् सिरिब् आरे, दिलेया ङ्यो ताँनए से-कोए ज्यु मि चिब्‍लि लबर्न परमेश्‍वरजी फेर्दिवाब्‍मुँ।
1CO 15:52 तलेबिस्याँ आखिरि थुतुरु ह्राबै त्हेर खीजी ओंसों सियाब्‍मैं खोंयोंइ या आसिबै छ्ह पिंसि सोगों लमिंब्‍मुँ, झाइले ङ्यो ताँनए ज्यु या फेर्दिवाब्‍मुँ।
1CO 15:53 तलेबिस्याँ नास तल् त्हुबै सैइ नास आतबै सै नेरो सिल् त्हुबै ज्युइ क्वें खिब् धोंले खोंयोंइ आसिबै ज्यु खिल् त्‍हुम्।
1CO 15:54 खैम नास तयाबै सैइ नास आतबै सै नेरो सिल् त्हुबै ज्युइ सिल् आत्हुबै ज्यु खिमुँ, च्हमन् परमेश्‍वरए छ्वेर प्‍ह्रिबै ताँ पूरा तम्, “ओ काल, परमेश्‍वरजी क्हिलाइ ट्होवाल् खाँइमुँ!”
1CO 15:55 “ओ काल, खोइ! क्‍हिइ ट्होइ वा? ओ काल, क्‍हिए भों खोइ?”
1CO 15:56 कालए भों पाप ग, झाइले पापए भों ठिम ग।
1CO 15:57 दिलेया परमेश्‍वरलाइ धन्‍यबाद तरिगे, तलेबिस्याँ खीजी ङ्योए प्रभु येशू ख्रीष्‍टउँइँले ङ्योलाइ ट्होगों लमिंब्मुँ।
1CO 15:58 छतसि ओ ङइ खोबै अलि-अङाँमैं, क्हेमैं छाइ-छुइ आतल्‍ले भोंन्ले टिद्। खोंयोंन् बिलै प्रभुए के लरिद्। तलेबिस्याँ प्रभुए ल्हागिर लबै के फाक्‍कर्न आत बिबै ताँ क्‍हेमैंइ सेइमुँ।
1CO 16:1 यहूदीया ह्‍युलर्बै परमेश्‍वरए म्‍हिमैंलाइ ल्होबर रेबै भेटिए बारेर ताँ घ्रि बिल् त्‍हुम्। ङइ गलातिया ह्‍युलर्बै बिश्‍वासीमैंने बिब् धोंले क्‍हेमैंज्‍यै या लद्।
1CO 16:2 सद् ह्रोंसे क्हेमैं ताँनइ ह्रों‍-ह्रोंसए कमैं अनुसार मुइ स्यो थेंन्। छ लस्याँ ङ खबै त्हेर मुइ स्योरिल् आत्‍हु।
1CO 16:3 धै ङ खसि क्‍हेमैंइ त्‍हाँबै म्हिमैंए योर्न प्ह्रिछ्या पिंसि क्हेमैंइ स्योबै मुइ पिंनेबर चमैं यरूशलेमर कुल्‍मिंब्‍मुँ।
1CO 16:4 ङन् ह्‍याल् त्हुलेया ङ चमैं बोसिन् ह्‍याब्मुँ।
1CO 16:5 ङला माकेडोनिया ह्‍युलर ह्‍याल् त्हुबै के मुँ। छतसि माकेडोनियाउँइँलेन् ङ क्‍हेमैंने त्होबर खम्।
1CO 16:6 दे त्हे ङ क्‍हेमैं ङाँर्न टिमुँ, खै ग तस्याँ सर्ख तिमिंन् टिब्मुँ। च लिउँइँ ङ खनिर ह्‍यालेया ङलाइ चैदिबै घ्याँ खर्ज क्‍हेमैंइ पिंल् खाँब्मुँ।
1CO 16:7 चु लार ङ क्‍हेमैंने दे त्हे मत्‍त्रे आङिं, प्रभुजी ङलाइ टिल् पिंस्‍याँ ङ क्‍हेमैंने ल्‍हेन् टिबै सैं मुँ।
1CO 16:8 पेन्‍तिकोसए चाड समाम् ङ एफिसस सहरर्न टिम्।
1CO 16:9 बिरोध लब्मैं ल्‍हेन् मुँलेया चुर सैं तोंबै ताँ बिमिंबै थेबै मौका ङइ योंइमुँ।
1CO 16:10 तिमोथी क्‍हेमैं ङाँर खमा चलाइ छेनाले मान लद्। चइ तोइ सैरै न्हुँ लल् आत्हुरिगे, तलेबिस्याँ ङइ लब् धोंलेन् चज्‍यै या प्रभुए के लम्।
1CO 16:11 छतसि खाबज्‍यै या चए सैं नल् आलरिगे, बरु च ङ ङाँर एखबै ल्हागिर छेनाले कुल्मिंन्। तलेबिस्याँ अरू बिश्‍वासमैंने बालुन् चै या ङ ङाँर खब्मुँ बिसि ङइ ह्रेरिइमुँ।
1CO 16:12 अलि अपोल्‍लसए बारेर्बै ताँ तो जा बिस्याँ, चलाइ अरू अलिमैंने क्‍हेमैं ङाँर ह्‍यारिगे बिसि ङइ ल्‍हेन् यो छ्युँ लइ। तिंयाँ समा चइ ह्‍याबै सैं आल, दिलेया लिउँइँ बिस्याँ मौका योंस्‍याँ खबै सैं लइमुँ।
1CO 16:13 न्ह क्रों मि क्रोंले टिद्, बिश्‍वासर भों तद्, सैं भोंब् लद्, आङ्हिंन्ले टिद्।
1CO 16:14 ताँनने म्हाँया लद्। छेनाले क्ह्रिसि के लद्।
1CO 16:15 अखैया ह्‍युलर्बै स्‍तिफनस नेरो चए परवाए बारेर क्‍हेमैंइ था सेइमुँ। च ह्‍युलर्बै म्हिमैं न्होंरि चमैं ताँन् भन्दा ओंसों प्रभुए फिर बिश्‍वास लब्मैं ग। परमेश्‍वरए म्‍हिमैंए सेवा छेनाले लबर चमैंइ ह्रोंसलाइन पिंवाइमुँ।
1CO 16:16 छतसि ओ अलि-अङाँमैं, क्‍हेमैं या छाबै म्‍हिमैं नेरो चमैंने क्ह्रिसि छलेन् के लब्‍मैंइ बिबै ताँमैं ङिंन् बिसि ङ क्‍हेमैंने यो छ्युँ लम्।
1CO 16:17 स्‍तिफनस, फोर्टुनाटस नेरो अखाइकस चुर खमा ङ सैं तोंइ। तलेबिस्याँ क्‍हेमैं चुर आरेलेया क्‍हेमैं मुँब् धोंन् ङ्हाँइ।
1CO 16:18 चमैंइ क्हेमैंए सैं तोंन् लब् धोंले ङलाज्यै या तोंन् लमिंइमुँ। छाबै म्‍हिमैंए मान लल् त्हुम्।
1CO 16:19 चु एशिया ह्‍युलर्बै बिश्‍वासीमैंइ क्‍हेमैंने जय मसीह बिमिंइमुँ। अकिलास, प्रिस्‍का नेरो चमैंए धिंर खागु तबै बिश्‍वासीमैंज्यै या क्‍हेमैंलाइ प्रभुए मिंरि जय मसीह बिमिंइमुँ।
1CO 16:20 चुर मुँबै ताँन् अलि-अङमैंज्यै या क्‍हेमैंने जय मसीह बिमिंइमुँ। क्‍हेमैंज्यै या घ्रिइ घ्रिने ह्रोंसए अलि-अङमैंने धोंलेन् म्हाँया लद्।
1CO 16:21 ह्रोंसए योइन ङ पावलइ क्हेमैंलाइ जय मसीह प्ह्रिरिइमुँ।
1CO 16:22 प्रभुलाइ म्हाँया आलबै म्हिइ सराप योंरिगे। ओ प्रभु यु।
1CO 16:23 प्रभु येशू ख्रीष्‍टए दयाम्हाँया क्हेमैंए फिर तरिगे।
1CO 16:24 क्हेमैं ख्रीष्‍ट येशूए फिर बिश्‍वास लब्मैं ताँनए फिर ङइ म्हाँया खरिम्।
2CO 1:1 परमेश्‍वरए इच्‍छाउँइँले येशू ख्रीष्‍टजी के लबर कुल्मिंबै चेला चिब ङ पावल नेरो ङ्योए अलि तिमोथीउँइँले कोरिन्‍थ सहरर्बै बिश्‍वासीमैं नेरो ग्रिस ह्‍युलर्बै परमेश्‍वरए ताँन् म्‍हिमैंलाइ जय मसीह मुँ।
2CO 1:2 ङ्योए परमेश्‍वर आबा नेरो प्रभु येशू ख्रीष्‍टजी क्हेमैंलाइ दयाम्हाँया नेरो शान्ति पिंरिगे।
2CO 1:3 ङ्योए प्रभु येशू ख्रीष्‍टए परमेश्‍वर, अथवा खीए आबाजी ङ्योए फिर ल्हयो खसि सैं क्होमिंम्। छतसि खीए मिं खोंयोंन् बिलेया थेब तरिगे।
2CO 1:4 ङ्योए ताँन् दुःखर खीजी ल्होमिंसि सैं क्‍होल् लमिंम्। छतसि खीजी ङ्योए सैं क्‍होमिंब् धोंले ङ्योज्‍यै या अरूमैंए फिर दुःख तमा ल्होमिंसि चमैंए सैं क्‍होमिंल् खाँम्।
2CO 1:5 ख्रीष्‍टजी ल्हें दुःख नोब् धोंले ङ्योज्यै या दुःख नोइबिस्‍याँ ख्रीष्‍टजी ङ्योए सैं क्होमिंम्।
2CO 1:6 परमेश्‍वरजी क्हेमैंलाइ जोगेमिंसि ल्होमिंरिगे बिसि ङिइ दुःख नोसिन् मुँ। धै परमेश्‍वरजी ङिए दुःखर ल्होमिंब् धोंले खीजी क्हेमैंलाज्यै या ल्होमिंब्मुँ, झाइले ङिइ नोब् धों तबै दुःख क्हेमैंज्यै या नोस्याँ क्‍हेमैंइ सैदिबै भों योंम्।
2CO 1:7 छतसि क्‍हेमैं म्रोंसि ङि भों खइमुँ, तलेबिस्याँ ङिइ नोब् धों तबै दुःख क्‍हेमैंज्‍यै नोबइले ङिइ सैं क्होबै भों योंब् धोंले क्‍हेमैंज्‍यै या सैं क्होबै भों योंब्मुँ बिसि ङिइ सेइमुँ।
2CO 1:8 ओ अलि-अङाँमैं, एशिया ह्‍युलर ङिइ योंबै दुःखए बारेर क्‍हेमैंज्यै था सेरिगे ङ्हाँइमुँ। ङिइ चर बेल्‍ले थेबै दुःख योंल। छतसि तारे ङि सोल् योंब्मुँ बिसि ङिइ आमैंल।
2CO 1:9 तारेम् च्हगन् तइ ङिम् सिबन् मुँन बिब् समन् ङिइ मैंयाल। दिलेया ङिइ ह्रोंसए फिर भर आलरिगे बरु सिब्‍मैंलाइ सोगों लमिंबै परमेश्‍वरए फिर भर लरिगे बिसि छ तब् मुँन।
2CO 1:10 छाबै ङ्हिंन् ङ्हाँबै दुःखउँइँले या परमेश्‍वरजी ङिलाइ जोगेमिंइ। ओं, अझैन खीजी ङिलाइ जोगेमिंब्मुँ। खीजी जोगेमिंब्मुँ बिसि ङिइ खीए फिर्न भर लइमुँ।
2CO 1:11 चए ल्हागिरि क्‍हेमैंज्‍यै या ङिलाइ प्राथना लसि ल्होमिंल् त्हुम्। खीजी अझै ङिलाइ ल्होमिंब्‍मुँ। ल्हें म्‍हिमैंइ छले प्राथना लमिंमा खीजी प्राथना थेसि आशिक पिंब्‍मुँ। छतसि खीजी ङिलाइ ल्होमिंबइले ल्हें म्‍हिमैंइ परमेश्‍वरलाइ धन्‍यबाद पिंब्‍मुँ।
2CO 1:12 चु ताँ बिल् योंमा ङि ङ्‍हो च्हौ प्ल्ह्‍याब् धों ङ्हाँइमुँ, ङिए सैंज्यै या छान् बिम्। ङिइ चु ह्‍युलर छ्ह थोमा छ्याँबै केमैं लसि छेनाले प्रब्-टिब लइ, क्‍हेमैंने मुँमै या ङि छेनाले प्रब्-टिब पोंब लसि परमेश्‍वरए क्‍ह्रोंसेंन्बै घ्याँर प्रल। ङिइ छाबै केमैं म्‍हिए ज्ञान बुद्धिउँइँले लब आङिं, चु केमैं ङिइ परमेश्‍वरए दयाम्हाँयाउँइँले लल् खाँब् ग।
2CO 1:13 तलेबिस्याँ क्हेमैंइ खेल् आखाँबै ताँ नेरो क्होल् आखाँबै ताँ ङिइ आप्ह्रिइमुँ। छतसि चु प्ह्रिछ्यार्बै ताँ खेमा क्हेमैंइ छेनाले क्‍होब्मुँ बिब ङइ मैंइमुँ।
2CO 1:14 तोगो समा क्‍हेमैंइ ङि छेनाले आसेइमुँ, दिलेया लिउँइँ ङ्योए प्रभु येशू युबै त्हिंइर ङिलाइ क्‍हेमैंइ छेनाले सेब्मुँ। क्हेमैं म्रोंसि ङि ङ्‍हो लोंब् धोंले च्हमा ङि म्रोंसि क्हेमैं या ङ्‍हो लोंब्मुँ।
2CO 1:15 ङि म्रोंसि क्हेमैं ङ्‍हो लोंल् योंम् बिसि ङइ सेल। छतसि ङ क्‍हेमैं ङाँर ङ्हिखे खल् योंरिगे बिसि ङइ ओंसों क्‍हेमैं ङाँर खबै सैं लइ।
2CO 1:16 ङ माकेडोनिया ह्‍युलर ह्‍यामा क्हेमैं ङाँर त्होबर खमुँ, धै माकेडोनियाउँइँले धबै क्‍हेमैं ङाँर्न एखब्मुँ, झाइले क्‍हेमैं ङाँइले यहूदीया ह्‍युलर ह्‍याबै ङए घ्याँ खर्ज क्हेमैंइ ल्होमिंलै बिब ङए सैंर मुँल।
2CO 1:17 दिलेया क्हेमैं कोरिन्थथेंमैं ङाँर ङ आह्‍याल। ङइ लबै चाँजोउँइँले ङ भर पर्दिल् आखाँबै म्हि धों क्हेमैंइ मैंल् वा? चु चाँजो ङए खुशिइ लब् धों ङ्हाँल् वा? तो ङइ सुँइ घ्रिइन खोंयों “खमुँ” खोंयों “आख” बिम् बिसि क्हेमैं मैंल् वा?
2CO 1:18 छ आमैंन्! खैले परमेश्‍वर बिश्‍वास योग्यर्बै मुँ, छलेन ङिइ क्‍हेमैंलाइ बिबै ताँ या क्‍ह्रोंसेंन् ग। छतसि “ङिंबन् ग” नेरो “आङिं” बिसि ङ आपों।
2CO 1:19 परमेश्‍वरए च्‍ह येशू ख्रीष्‍टए बारेर बिबै ताँ “ङिंबन् ग” नेरो “आङिं” आत। तलेबिस्याँ येशू ख्रीष्‍टर मुँबै ताँन् सै खोंयोंन् बिलै “ङिंबन् तम्” बिसि सिलास, तिमोथी नेरो ङइ क्हेमैंए म्हाँजोर खीए बारेर बिल।
2CO 1:20 तलेबिस्याँ परमेश्‍वरजी लबै ताँन् बाछामैं येशू ख्रीष्‍टर पूरा तम्। छतसि परमेश्‍वरए थेबै मानए ल्हागिर “येशू ख्रीष्‍टए मिंउँइँले छान् तरिगे” बिसि ङ्योइ बिल् खाँम्।
2CO 1:21 ङ्योलाइ त्‍हाँसि ख्रीष्‍ट येशूए फिर बिश्‍वास लबर भोंब लमिंब परमेश्‍वरन् ग।
2CO 1:22 खीजीन् ङ्योलाइ खीए म्‍हिमैं लबै ल्हागिर छाप झोंमिंसि बैनाए रुपर खीए पबित्र प्ल्ह ङ्योए सैंर पिंसि ङ्यो खीए म्हिमैं ग बिबै ताँ पक्‍का लमिंइ।
2CO 1:23 ङए खोंर्बै ताँ सेबै परमेश्‍वरए मिंर ङ क्हेमैंने बिमुँ: क्‍हेमैं कर आयोंन् आतरिगे बिबै सैं मैंसि ङ कोरिन्‍थर आखब् ग।
2CO 1:24 ङिइ क्‍हेमैंलाइ “छाबै बिश्‍वास ललन् त्‍हुम्” बिसि कर आल्‍हैदि, तलेबिस्याँ क्‍हेमैं ह्रोंसन् बिश्‍वासर भोंब तइमुँ। बरु क्‍हेमैंए सैं तोंन् लमिंबै ल्हागिर ङि क्‍हेमैंने क्ह्रिसि के लबै सैं मुँ।
2CO 2:1 ङइ लमा क्‍हेमैंए सैं आनरिगे बिसि ङ धबै क्‍हेमैं ङाँर आखबै सैं लइ,
2CO 2:2 तलेबिस्याँ ङइ क्हेमैंए सैं नल् लवाइ बिस्याँ खाबइ ङए सैं क्‍होमिंम्? ङए सैं क्होमिंबम् क्हेमैंन् ग।
2CO 2:3 छतसि ङ क्‍हेमैं ङाँर खमा ङए सैं तोंन् लमिंब्मैं ङाँइलेन् ङए सैं च्योंब् तल् आत्हुरिगे बिसि ओंसोंबै प्ह्रिछ्यार क्‍हेमैंलाइ छ छ लद् बिसि प्‍ह्रिब् ग। ङए सैं तोंमा क्‍हेमैं या सैं तोंम् बिब ङइ सेइमुँ।
2CO 2:4 तलेबिस्याँ क्हेमैंए सैं नल् लबर आङिं, बरु क्हेमैंए फिर ङइ कति थेबै म्हाँया लम् बिब क्हेमैंइ सेरिगे बिसि सैंर बेल्‍ले न्हुँ लसि क्रोदै क्‍हेमैंलाइ च प्ह्रिछ्या प्‍ह्रिल।
2CO 2:5 क्‍हेमैं न्‍होंर्बै खाबज्यै क्हेमैंलाइ सैं नल् लवाइमुँ बिस्याँ, चइ ङए सैं नल् लब आङिं, क्हेमैंए सैं नल् लब् ग। तोन् तलेया चए फिर सैं सारो आलद्।
2CO 2:6 क्‍हेमैं न्‍होंर्बै ल्हें म्‍हिमैंइ चलाइ सजैं पिंसेरो तइ।
2CO 2:7 तारे क्‍हेमैंइ च म्हिलाइ क्षमा पिंसि भों या पिंल् त्‍हुम्। छ आलस्‍याँ च म्‍हि झन् न्हुँ लसि सैं च्योंब तम्।
2CO 2:8 छतसि क्‍हेमैंइ च म्हिलाइ अझै म्हाँया लद्। क्हमैंइ म्हाँया लइमुँ बिब चइ सेरिगे बिसि ङइ क्‍हेमैंने यो छ्युँ लम्।
2CO 2:9 क्‍हेमैंए जाँच लबै ल्हागिर नेरो ताँन् सैर क्‍हेमैंइ ङइ बिबै ताँ ङिंम् उ आङिं बिबै ताँ था सेबर ङइ च ओंसोंबै प्ह्रिछ्या प्‍ह्रिल।
2CO 2:10 क्‍हेमैंइ खाबलाइ क्षमा पिंमुँ ङज्‍यैया चलाइ क्षमा पिंम्। तलेबिस्याँ ङइ खाबलाज्यै क्षमा पिंइमुँ बिस्‍याँ क्‍हेमैं क्ह्रिरिगे बिसि ख्रीष्‍ट येशूए उँइँर क्षमा पिंइमुँ।
2CO 2:11 ङ्योए फिर दुष्‍टइ तोइ लल् आखाँरिगे बिसि च पाप लबै म्हिलाइ क्षमा पिंल् त्‍हुम्, तलेबिस्याँ दुष्‍टइ खैले पापर च्होवाम् बिब ङ्योइ सेइमुँ।
2CO 2:12 ख्रीष्‍ट येशूउँइँले खबै सैं तोंबै ताँ बिबर ङ त्रोआस बिबै नाँसर ह्‍यामा प्रभुजी ङलाइ चर खीए के लबै मौका पिंइ।
2CO 2:13 दिलेया चर ङए अलि तीतसलाइ त्‍होल् आयोंमा ङए सैं आतों। छतसि तीतसने घ्‍याँर त्‍होम् उ ङ्हाँसि चर्बै म्‍हिमैंने बिदा तसि ङ माकेडोनिया ह्‍युलउँइँ ह्‍याइ।
2CO 2:14 परमेश्‍वरलाइ धन्‍यबाद तरिगे! तलेबिस्याँ खीजी ङ्योलाइ ख्रीष्‍ट येशूने घ्रिन् लमिंसि ट्होगों घ्याँर डोरेब्मुँ! धै छ्याँबै थाँ खबै धुप धों तबै खीए ज्ञानए ताँमैं ङ्योउँइँलेन् ताँन् क्‍ल्‍ह्‍योजरे फेनेब्मुँ।
2CO 2:15 तलेबिस्याँ मुक्‍ति योंब्मैं नेरो नास तबि छेब्मैंए म्‍हाँजोरै या ङ्यो परमेश्‍वरए ल्हागिर ख्रीष्‍टए छ्याँबै थाँ खबै धुप धों तइमुँ।
2CO 2:16 दिलेया नास तब्‍मैंए ल्हागिर ङ्यो सिनु थाँ नाँब् धों तम्। छतसि चमैं नर्गर फेनेम्। मुक्‍ति योंब्‍मैंए ल्हागिर ङ्यो लिंबै थाँ खबै धुप धोंन् तम्। छतसि चमैं स्वर्गर फेनेम्। च्हौ थेबै के खाबइ लल् खाँम्?
2CO 2:17 ल्हें म्हिइ धोंले परमेश्‍वरए ताँ छों लब्मैं ङि आङिं, तलेबिस्याँ ङिलाइमि परमेश्‍वरजीन् कुल्‍मिंब् ग। छतसि ङि ख्रीष्‍टए सेवा लसि खीए ओंसों स्योर ताँ आकोंल्‍ले परमेश्‍वरए ताँ पोंमुँ।
2CO 3:1 ङिइ ह्रोंसए बयन लइमुँ वा? ङिइ “छ्याँबै के लइमुँ” बिसि अरूमैंइ धोंले प्ह्रिछ्या प्ह्रिसिन् ङिइ क्‍हेमैंलाइ उँइँल् त्‍हुम्‌ रो वा? छलेन क्‍हेमैंज्यै अरूमैंलाइ छाबै प्ह्रिछ्या प्ह्रिसिन् उँइँल् त्‍हुम्मा?
2CO 3:2 आत्‍हु! तलेबिस्याँ क्हेमैंन् ङिए ल्हागिर प्ह्रिछ्या ग। च प्ह्रिछ्या ताँन् म्हिमैंइ था सेल्‍ले, खेल् खाँल्‍ले ङ्योए खोंर प्ह्रिथेंइमुँ।
2CO 3:3 ङिइ लबै केमैंए रो नेरो ख्रीष्‍टजी प्‍ह्रिबै प्ह्रिछ्या क्‍हेमैंन् ग। मसिइ प्‍ह्रिबै प्ह्रिछ्या क्हेमैं आङिं, क्हेमैंने मुँबै प्ह्रिछ्या खोंयोंन् बिलै तरिबै परमेश्‍वरए प्ल्हजी प्‍ह्रिब् ग। चु युँमा प्‍लानर प्ह्रिब् धोंबै प्ह्रिछ्या आङिं, क्‍हेमैंए खोंर्न प्‍ह्रिथेंबै प्ह्रिछ्या ग।
2CO 3:4 ख्रीष्‍टउँइँलेन् ङिइ परमेश्‍वरए फिर बिश्‍वास लबइले ङिइ छाबै क्ह्रोंसेंन्बै ताँमैं बिल् खाँइमुँ।
2CO 3:5 ह्रोंसए भोंजीन् चु के लइ बिसि ङिइ बिबै घ्याँ आरे, दिलेया ङिइ के लबै भों परमेश्‍वरउँइँले योंम्।
2CO 3:6 छारा बाछार्बै के लल् खाँब्मैं खीजी ङिलाइ लमिंइ। च बाछा म्‍हिइ प्‍ह्रिबै ठिम आङिं, दिलेया पबित्र प्ल्हजी फैबै बाछा ग। तलेबिस्याँ म्‍हिइ प्ह्रिबै ठिम म्हाँदिल् आखाँबइले ताँन् म्‍हि सिल् त्‍हुमल, दिलेया पबित्र प्ल्हजी ङ्योलाइ पापउँइँले फ्रेमिंसि छारा छ्ह पिंम्।
2CO 3:7 परमेश्‍वरजी मोशालाइ पिंबै ठिम युँमा प्‍लानर कुन्दिथेंल। च युँमार प्‍ह्रिबै ठिम म्‍हिमैंलाइ पिंमा परमेश्‍वरए थेबै ह्‍वे चारइ। च थेबै ह्‍वे मदुरो तदै ह्‍यालेया इस्राएलीमैंइ मोशाए लि ङ्ह्‍योल् आखाँमल।
2CO 3:8 झन् पबित्र प्ल्हजी लबै केरि बेल्‍ले थेबै ह्‍वे चारम्।
2CO 3:9 म्हिमैंलाइ दोषि ठर्दिबै ठिमै या छले चारल बिस्याँ, झन् म्हिमैंलाइ ठिक ठर्दिमिंबै के बेल्‍ले चारब्मुँ।
2CO 3:10 तलेबिस्याँ तिंजोरोबै चारबै ह्‍वेइ लमा ओंसोंबै चारब म्हह्‍याइ।
2CO 3:11 छले म्हह्‍याबै ठिमलै या मान तसेरो खोंयोंन् बिलै तरिबै छारा बाछाल झन् थेबै मान तल् त्हुम्।
2CO 3:12 छतसि ङिल छाबै क्ह्रोंसेंन्बै आशा मुँबइले सैं तोंबै ताँ बिप्रमा थेबै भों खम्।
2CO 3:13 ङि मोशा धों तबै म्‍हिमैं आङिं, तलेबिस्याँ चइ ह्रोंसए मोंडउँइँले म्ह‍-म्हइ ह्‍याबै ह्‍वे इस्राएलीमैंइ आम्रोंरिगे बिसि खीए मोंड क्‍वेंइ हुमल।
2CO 3:14 मोशाए मोंड क्वेंइ हुब् धोंले इस्राएलथेंमैंए सैं या हुथेंब् धोंन् तइमुँ। छतसि तिंयाँ समै या ठिम खेमा चमैंइ परमेश्‍वरए ताँ क्‍होल् आखाँ। ख्रीष्‍ट येशूजी मत्‍त्रे च हुथेंबै क्‍वें स्‍योवासि परमेश्‍वरए ताँ क्होमिंल् खाँम्।
2CO 3:15 ओं, तिंयाँ समै या चमैंए सैं हुथेंब् धोंन् तइमुँ। छतसि चमैंइ मोशाए ठिम खेमा तोइ क्‍होल् आखाँ।
2CO 3:16 दिलेया खाब्मैंइ सैं एसि याहवेहउँइँ तोमुँ चमैंए सैंलाइ हुथेंबै क्‍वें खीजी स्‍योवाब्मुँ।
2CO 3:17 “याहवेह” पबित्र प्ल्ह ग, छतसि खाब्ने याहवेहए प्ल्ह तमुँ, च म्‍हि खाँसों ङ्हाँन् तल् योंम्।
2CO 3:18 छतमा तारे ङ्यो ताँनइ मोंड आउल्‍लेन् प्रभुए चारबै ह्‍वे ङ्योए मोंडउँइँले चारल् पिंम्। झाइले खीउँइँले योंबै ह्‍वेइ लमा प्रभुजी अथवा पबित्र प्ल्हजी ङ्योलाइ झन् झन् खी धोंले चारब लदै बोम्।
2CO 4:1 परमेश्‍वरजी खीए दयाम्हाँयाउँइँले ङिलाइ खीए सेवा लबै के पिंइमुँ। छतसि ङिए सैं खोंयोंइ च्योंब आत।
2CO 4:2 छलु-म्हिलु नेरो फा पिन् तबै केमैं ङिइ पिवाइमुँ। छलेन ङिइ परमेश्‍वरए ताँमैं म्हिमैंने बिप्रमा स्योलिबै ताँमैं कोंसि आबि। बरु म्हिमैंलाइ क्ह्रोंसेंन्बै ताँ उँइँमिंसि परमेश्‍वर नेरो म्हिमैंए उँइँर ह्रोंसलाइ ठिक ठर्दिबै केमैं ङि लम्।
2CO 4:3 छतसि ङिइ बिबै सैं तोंबै ताँ नास तब्मैंए ल्हागिर मत्‍त्रे हुथेंब् धों तइमुँ।
2CO 4:4 परमेश्‍वर खैब मुँ, ख्रीष्‍टै या छाबन् मुँ। खी ङाँइँले खबै सैं तोंबै ताँ आक्होरिगे बिसि चु ह्‍युलर्बै देवताइ बिश्‍वास आलब्मैंए सैंर्बै मिइ च ताँ म्रोंल् आखाँब लवाइमुँ।
2CO 4:5 ङिइ ह्रोंसए ताँ आबि, दिलेया येशूए ल्हागिर ङि क्‍हेमैंए केब्छैंमैं धोंन् तसि येशू ख्रीष्‍टन् प्रभु ग बिबै ताँ ङि बिप्रम्।
2CO 4:6 “मिछु खैबै क्‍ल्‍ह्‍योउँइँले ह्‍वे चाररिगे” बिसि परमेश्‍वरजी बिइ। येशू ख्रीष्‍टए लिउँइँले परमेश्‍वरए चारबै ह्‍वे कति थेब् मुँ बिब ङिइ सेरिगे बिसि खीजी ह्रोंसए ह्‍वे ङिए खोंर चारल् पिंइमुँ।
2CO 4:7 ताँन् भन्दा थेबै शक्‍ति ङिल आङिं, परमेश्‍वरलन् ग बिसि छेनाले उँइँमिंबै ल्हागिर चु सै न्होर ङि सए पुमैं धों तबै म्हिमैंने खीजी थेंमिंइमुँ।
2CO 4:8 ङिइ खन्तोंदोंउँइँले दुःख योंइमुँ, दिलेया आप्लेइमुँ। खैला-तोला तसि सैं ङ्हिरि तनाबिलेया ङिए सैं च्योंब आतइमुँ।
2CO 4:9 ङिए बिरोध लब्मैं ल्‍हेंन् मुँलेया परमेश्‍वरजी ङिलाइ खोंयोंइ आपिइमुँ। ङिलाइ ल्हिसि क्हुरलेया ङि आसिइमुँ।
2CO 4:10 येशूजी थोब् धों तबै छ्ह ङिज्यै या थोल् खाँरिगे बिसि ङिए ल्हागिर खी सिमिंबै दुःख मैंसि ङिज्यै या ह्रोंसए ज्युर्न खोंयोंइ बिलै दुःख नोप्रम्।
2CO 4:11 सिसि ह्‍याल् त्हुबै ङिए ज्युउँइँले या अरूमैंइ येशूजी थोबै छ्ह म्रोंरिगे बिसि ङि सोगों मुँमा खोंयोंन् बिलै येशूए ल्हागिर कालए सुँर्न फेनेम्।
2CO 4:12 छले येशूउँइँले खबै सैं तोंबै ताँ बिप्रमा ङि सिब् धों तलेया क्‍हेमैंइ खोंयोंइ आखाँबै छ्ह योंइमुँ।
2CO 4:13 भजनसंग्रहर बिब् धोंले, “ङइ परमेश्‍वरए फिर बिश्‍वास लइ, छतसि ङइ खीए ताँ पोंइ।” छ बिब् धोंलेन् ङिज्यै या खीए फिर बिश्‍वास लइ, छतसि ङि खीए ताँ पोंम्।
2CO 4:14 येशू ख्रीष्‍टलाइ सिबउँइँले सोगों लमिंबै परमेश्‍वरजी ङिलाज्यै या येशू ख्रीष्‍टने घ्रिन् लसि सिबउँइँले सोगों लमिंब्‍मुँ, धै खीजी ङिलाइ क्‍हेमैंने बालुन् खीए ङाँर बोब्‍मुँ बिब ङि सेइमुँ।
2CO 4:15 तलेबिस्याँ ङिइ दुःख नोदै के लब क्‍हेमैंए ल्हागिर्न ग। खैले परमेश्‍वरए दयाम्हाँया ल्हें म्‍हिमैंइ योंइमुँ, छलेन परमेश्‍वरए मान कति थेब मुँ बिसि धन्‍यबाद पिंब्‍मैं या ल्हेंन् तब्मुँ।
2CO 4:16 छतसि ङि सैं च्योंब आल। ङिए ज्युर्बै भों नु-नुइ ह्‍यालेया ङिए सैं त्हिंइ ह्रोंसे भोंब् ततै ह्‍याम्।
2CO 4:17 तलेबिस्याँ ङिइ योंबै तिस्याँबै च्‍युगुथिरि दुःखइ ङिए ल्हागिर खोंयोंइ आखाँबै छ्ह नेरो थेबै मान योंबै के लइन मुँ।
2CO 4:18 म्रोंल् खाँबै सैमैंम् नास तयाम्, आम्रोंबै सै खोंयोंन् बिलै तरिम्। छतसि ङि म्रोंबै सैमैंए लिलि आप्र, आम्रोंबै सैमैंए लिलि प्रम्।
2CO 5:1 चु ङ्योए ज्यु नास तयाम् बिसि ङ्योइ सेइमुँ। दिलेया परमेश्‍वरजी खोंयोंइ नास आतबै स्‍वर्गर्बै धिं ङ्योए ल्हागिर बनेथेंइमुँ। च धिं म्‍हिमैंइ बनेब आङिं, परमेश्‍वरजीन् ङ्योए ल्हागिर बनेमिंब् ग।
2CO 5:2 चु ज्युर मुँमा ङ्योलाइ दुःख तम्, स्वर्गर्बै ज्युर मुँमा दुःख आत। छतसि क्वें फेर्दिब् धोंलेन् ज्यु या फेर्दिल् योंस्याँ तमल बिबै सैं खम्।
2CO 5:3 तलेबिस्याँ ङ्योए ल्हागिर स्वर्गरै या धिं मुँ। छतसि सिबै लिउँइँ ङ्यो क्लुना नेरो ज्यु आरेब्मैं तरिब् आरे।
2CO 5:4 चु ज्युर मुँमा ङ्योए फिर ल्हें दुःखमैं तमा ङ्योइ दुःखए सो हेंम्। दिलेया ङ्यो क्लुना तरिगे बिसि आङिं, झन ल्हें छ्याँबै क्वेंमैं खिल् योंरिगे, धै चु सिसि क्राँयाबै ज्यु खोंयोंइ आसिबै प्ल्हर्बै ज्यु तरिगे बिबै सैं खम्।
2CO 5:5 चु ज्यु फेर्दिबै ल्हागिर ङ्योलाइ परमेश्‍वरजीन् तयार लमिंइमुँ। चु केए बैनाए रुपर खीजीन् ङ्योलाइ पबित्र प्ल्ह पिंइमुँ।
2CO 5:6 छतसि ङ्योए सैंर बेल्‍ले भों खम्। ङ्यो ज्युर मुँन् समा ङ्यो प्रभुउँइँले ह्रेंगोन् तम् बिबै ताँ ङ्योइ सेइमुँ।
2CO 5:7 छतसि म्रोंबै सैए लिलि ङ्यो आप्रा, बिश्‍वास लसिन् प्रम्।
2CO 5:8 ङ्योए सैंर बेल्‍ले भों खम्, धै ङ्यो चु ज्युउँइँले फ्रेसि ङ्यो प्रभुने बालुन् टिबै सैं खम्।
2CO 5:9 छतसि ङ्यो ज्युर मुँलेया, ज्युने फ्रेलेया प्रभुजी खोबै के ङ्यो लदा ङ्हाँम्।
2CO 5:10 तलेबिस्याँ ख्रीष्‍टजी निसाफ लमा ङ्यो ताँन् खीए उँइँर राल् त्‍हुम्। ङ्यो सोगों मुँमा छ्याँबै के ललेया, आछ्याँबै के ललेया ह्रोंसइ लबै केए नों ङ्योइ योंब्‍मुँ।
2CO 5:11 छतसि परमेश्‍वरने ङ्हिंल् त्हुम् बिब् सेसि ङिइ अरू म्‍हिमैंलाइ प्रभुए बारेर लोमिंम्। ङि खैब मुँ बिब परमेश्‍वरजी सेइमुँ, झाइले ङिइ खैले छ्ह थोइमुँ बिब क्‍हेमैंइ छेनाले था सेरिगे बिब ङए सैंर मुँ।
2CO 5:12 क्हेमैंए उँइँर ङिइ धबै ह्रोंसलाइन थेब् लदै प्‍हैंसि आपों, बरु को-कोइ म्हिमैंइ म्रोंल् खाँबै सैए बारेर थेब् प्हैंसि पोंम्, खों न्होंर्बै ताँए बारेर वास्ता आल। छाबै म्हिमैंए ताँ क्हेमैंइ थोल् खाँरिगे बिसि ङिए बारेर क्हेमैं थेब प्हैंसि चमैंए उँइँर पोंल् योंरिगे बिसि ङिइ क्‍हेमैंलाइ मौका पिंब् ग।
2CO 5:13 “ङिए सैं क्ल्ह्‍योर आरे,” बिसि म्हिमैंइ मैंस्याँ च परमेश्‍वरए ल्हागिर्न ग। ङिए सैं क्ल्ह्‍योर मुँस्‍याँ, च क्‍हेमैं छ्याँब् तबै ल्हागिर्न ग।
2CO 5:14 येशू ख्रीष्‍टजी ङ्योने म्हाँया लबइले ङ्यो खीए अधीनर मुँ, तलेबिस्याँ ताँन् म्‍हिमैंए ल्हागिर ख्रीष्‍ट सिमिंबइले ङ्यो ताँन् खीने बालुन् सिब् धोंन् तइ बिबै ताँ ङ्योइ सेइमुँ।
2CO 5:15 ङ्यो ह्रोंसए ल्हागिर छ्ह थोब आङिं, खीए ल्हागिर छ्ह थोरिगे बिसि येशू ख्रीष्‍ट ङ्योए ल्हागिर सिमिंसि धबै सोगों तइ।
2CO 5:16 छतसि तारे ङिइ म्हिमैंलाइ ङ्ह्‍योमा चमैंने मुँबै बैरुबै सैमैंउँइँले आङ्ह्‍यो। ख्रीष्‍टलाज्यै ओंसों ङिइ छलेन् ङ्ह्‍योमल, तारे ङिइ खीलाइ छले आङ्ह्‍यो।
2CO 5:17 तलेबिस्याँ खाबइ ख्रीष्‍टए फिर बिश्‍वास लइमुँ च म्‍हि छारा तम्। ओंसोंबै आछ्याँबै सैमैं ताँन् म्हह्‍याइ, तोन्‍दोंरि सै छारा तयाल् खाँइमुँ।
2CO 5:18 चु ताँन् छारा के परमेश्‍वरजीन् लमिंब् ग। परमेश्‍वर खीजीन् ख्रीष्‍टउँइँले ङ्योलाइ खीने क्ह्रिल् लमिंइमुँ, धै अरू म्हिमैंलाज्यै या खीने क्ह्रिल् लमिंबै के ङ्योलाइ पिंइमुँ।
2CO 5:19 ङिइ बिबै सैं तोंबै ताँ चुन् ग: परमेश्‍वरजी ख्रीष्‍टउँइँले ताँन् म्‍हिमैंलाइ खीने बालु क्ह्रिल् लमिंइमुँ। म्‍हिमैंइ लबै पापए सजैं परमेश्‍वरजी आपिं। छतसि म्‍हिमैंलाइ खीने बालु क्ह्रिल् लमिंबै ल्हागिर खीए बारेर्बै ताँ म्हिमैंने बिमिंबै जिम्‍मा ङिलाइ पिंथेंइमुँ।
2CO 5:20 छतसि ङि येशू ख्रीष्‍टउँइँले खबै सैं तोंबै ताँ बिप्रब्‍मैं ग। ख्रीष्‍टए मिंर ङिइ क्हेमैंने यो छ्युँ लमुँ। क्हेमैं खीने ख्रे लब् पिवासि खीने क्ह्रिद् बिसि परमेश्‍वर ङिउँइँलेन् तसि क्हेमैंने पोंइमुँ।
2CO 5:21 तलेबिस्याँ ङ्यो ख्रीष्‍टउँइँले ठिक ठर्दिरिगे बिसि तोइ पाप आरेबै येशू ख्रीष्‍टलाइ परमेश्‍वरजी ङ्योइ लबै पापए ति नोल् पिंइ।
2CO 6:1 ङि परमेश्‍वरने बालु के लब्मैं तबइले क्‍हेमैंने यो छ्युँ लमुँ, क्‍हेमैंइ योंबै परमेश्‍वरए दयाम्हाँया छलेन् खेरो ह्‍याल् आपिंन्।
2CO 6:2 तलेबिस्याँ “क्‍हेमैंइ ग्वार ह्रिमा ङइ क्‍हेमैंए ताँ थेइ, झाइले जोगेमिंबै त्हिंइर ङइ क्‍हेमैंलाइ ल्होमिंइ।” बिसि परमेश्‍वरजी बिइमुँ। थेद्, परमेश्‍वरए दयाम्हाँया योंबै त्हे तोगोंन् ग, मुक्‍ति योंबै त्हिंइ तोगोंन् ग।
2CO 6:3 ङिइ परमेश्‍वरए सेवा लमा आगुइ ताँ सेन् आछेरिगे बिसि ङिइ खाबलाज्यै सैं नल् लबै के आल।
2CO 6:4 बरु ङि “परमेश्‍वरए के लबै चेलामैं मुँन” बिब म्‍हिमैंइ सेरिगे बिसि ङिइ खोंयोंन् बिलै छ्याँबै के लसि उँइँम्। खैतबै दुःखन् तलेया ङिइ सैदिम्।
2CO 6:5 धोंलै, टिंलै, झेलर च्युलै, हुल त्हुँसि दुःख पिंलै, गारो केमैं लल् त्‍हुलै, न्‍हरु च्‍हुइल् आयोंलै, चल्-थुँल् आयोंलै,
2CO 6:6 ङि स्योर आतेल्‍ले, ज्ञान-बुद्धिए ताँमैं बिदै, दुःख सैदिदै, ताँनए फिर ल्हयो खदै, पबित्र प्ल्हउँइँले भों योंसि खाबलाज्यै या आफेलल्‍ले ताँनने म्हाँया लम्।
2CO 6:7 क्ह्रोंसेंन्बै ताँ बिदै, परमेश्‍वरउँइँले भों योंसि खीए फिर थेबै बिश्‍वास लदै खीए बचनर बिब् धोंलेन् ङिइ ठिक के लइमुँ।
2CO 6:8 ङिइ मानै योंइ, हेलै तइ। छ्याँब मिं योंइ, आछ्याँब मिं योंइ। म्‍हिमैंइ ङिलाइ स्‍योर्गु मैंम्, दिलेया ङि क्‍ह्रोंसेंन्‍बै ताँ पोंब्मैं ग।
2CO 6:9 ङिलाइ खाबज्यै ङो आसे बिलेया ताँनइ ङो सेइमुँ। ङि सियाब् धों तलेया ङि अझै सोगोंन् मुँ। ङिलाइ सजैं पिंलेया तिंयाँ समा आसैइमुँ।
2CO 6:10 न्हुँ खलेया ङि खोंयोंन् बिलै सैं तोंरिम्, ङ्हाँदुमैं तलेया ङिइ ल्हें म्‍हिमैंलाइ प्‍ल्होब लमिंम्, ङि तोइ आरेब् धों तलेया ख्रीष्‍टए फिर बिश्‍वास लबइले ङिइ तोन्दोंरि सै योंइमुँ।
2CO 6:11 ओ कोरिन्‍थथेंमैं, ङिइ सैंर तोइ ताँ आलोल्‍ले छेनाले क्हेमैने बिमिंइमुँ।
2CO 6:12 ङिइमि क्‍हेमैंए फिर बेल्‍ले म्हाँया लइमुँ, बरु क्‍हेमैंइ गो ङिए फिर म्हाँया आलब् धों तइमुँ।
2CO 6:13 ङइ क्‍हेमैंने ह्रोंसए प्‍हसेमैंने धोंले चु ताँ बिमुँ: ङिइ क्‍हेमैंने लब् धोंबै म्हाँया ङिलाज्यै लद्।
2CO 6:14 येशू ख्रीष्‍टए फिर बिश्‍वास आलब्‍मैंने घ्रि तसि आप्रद्। धर्मि नेरो अधर्मि खैले क्‍ह्रिमुँ? चारबै ह्‍वे नेरो मिछु खैब खैले बालु तल् खाँमुँ?
2CO 6:15 येशू ख्रीष्‍ट नेरो दुष्‍ट खैले क्‍ह्रिमुँ? बिश्‍वास लब्मैं बिश्‍वास आलब्‍मैंने खैले घ्रि तल् खाँम्?
2CO 6:16 ङ्यो परमेश्‍वर टिबै क्‍ल्‍ह्‍यो तबइले ङ्योइ कु म्हाँदिल् खाँम्मा? आखाँ! तलेबिस्याँ ङ्योए ज्यु क्ह्रोंसेंन खोंयोंइ तरिबै परमेश्‍वर टिबै क्‍ल्‍ह्‍यो ग। परमेश्‍वरजी ङ्योए बारेर छ बिइमुँ: “ङए म्‍हिमैंने ङ टिब्‍मुँ, झाइले चमैंने प्रब्मुँ। ङ चमैंए परमेश्‍वर तब्‍मुँ, झाइले चमैं ङए म्हिमैं तब्‍मुँ।”
2CO 6:17 छतसि याहवेहजी छ बिइमुँ: “क्‍हेमैं च आछ्याँबै म्‍हिमैंए म्हाँजोउँइँले त्होंइ खो, क्‍हेमैं चमैं ङाँइले स्‍यो तल् त्‍हुम्। पापर च्होवाबै सैमैं आछुइद्, झाइले ङइ क्‍हेमैं ङ ङाँर खल् पिंस्‍यो।
2CO 6:18 ङ क्‍हेमैंए आबा तब्‍मुँ, झाइले क्‍हेमैं ङए च्‍ह-चमिंमैं तब्‍मुँ। बिसि ताँन् भन्दा थेबै शक्‍ति मुँबै याहवेहजी बिइमुँ।”
2CO 7:1 ओ ङइ खोबै अलि-अङाँमैं, चु ताँन् बाछामैं ङ्योए ल्हागिर्न ग। छतसि ङ्योए ज्यु नेरो सैं पापर च्होवाबै सैमैंउँइँले ङ्यो स्‍यो तले। झाइले ङ्यो परमेश्‍वरने ङ्हिंसि खीए उँइँर ज्युर सैंर छ्याँब् ततै ह्‍याले।
2CO 7:2 क्हेमैंए सैंर्बै ताँ ङिने आलोद्, क्‍हेमैंए सैंर तो मुँ चन् ङिने बिद्। ङिइ खाबलै या न्होह्रों आलइमुँ, खाबलाज्यै या नास तबै के आलइमुँ। ङिए केउँइँले ङिइ खाब्ने या फायदा आकिंइमुँ।
2CO 7:3 क्‍हेमैंलाइ छ्याब् ल्हैदिबर ङइ छ बिब आङिं। ङइ ओंसों बिब् धोंलेन्, ङिए सैंर क्हेमैंए फिर ल्हें म्हाँया मुँ, छतसि सिलेया सोलेया ङि खोंयोंन् बिलै क्‍हेमैंने बालुन् तब्मुँ।
2CO 7:4 क्‍हेमैं म्रोंसि ङ ढुक्‍का तसि ङ्‍हो लोंइँमुँ। क्हेमैं म्रोंसि ङए सैं क्होइमुँ। छतसि ङिइ खैतबै दुःख योंलेया ङ सैं तोंन्लेन् टिम्।
2CO 7:5 ङि माकेडोनिया ह्‍युलर फेनेसि तीतसइ पबै सँउँसर आयोंन् समा सन्‍दोक आरेल। चर ङिइ तो के ललेया खन्तोंदोंउँइँले दुःखन् तखइ, म्हिमैं ङिने प्‍होंमल, ङिए सैं ङ्हिंमल।
2CO 7:6 दिलेया सैं च्‍योंब तब्‍मैंलाइ सैं थेब् लमिंबै परमेश्‍वरजी तीतस ङि ङाँर कुल्मिंसि ङिए सैं भोंब् लमिंइ।
2CO 7:7 तीतस खसि मत्‍त्रे आङिं, क्‍हेमैंइ चलाइ भों पिंबै ताँ थेसि ङि झन् सैं तोंइ। क्‍हेमैं ङने त्‍होदा ङ्हाँइमुँ रो, ह्रोंसइ लबै आछ्याँबै केमैंइ लमा क्हेमैंइ पछुत लइमुँ रो, झाइले म्हिमैंइ ङए बारेर आछ्याँबै ताँ पोंमा क्‍हेमैंइ ङए ख लसि पोंम् रो बिबै ताँमैं थेसि ङ झन् बेल्‍ले सैं तोंइ।
2CO 7:8 ङइ ओंसों च हौदिबै प्ह्रिछ्या प्‍ह्रिसि क्‍हेमैंए सैं नवालेया ङइ च प्ह्रिछ्या प्‍ह्रिलन् त्हुमल। च प्ह्रिछ्याइ तिस्याँदे क्‍हेमैंए सैं नइ। क्हेमैंए सैं नब् म्रोंसि ङइ “आप्‍ह्रिलेन् तमल” ङ्हाँइ,
2CO 7:9 दिलेया तोगो ङ सैं तोंइमुँ। क्‍हेमैंए सैं नल् लवासि ङ सैं तोंब आङिं, बरु च प्ह्रिछ्याए ताँइ लमा क्‍हेमैंइ ह्रोंसए आछ्याँबै केउँइँले सैं एइमुँ बिब् थेसि ङ सैं तोंइमुँ। क्हेमैंए सैं परमेश्‍वरजीन् नल् लब् ग, छतसि क्‍हेमैंए सैं नलेया ङि ङाँइँले क्‍हेमैंला तोइ न्होह्रों आतइमुँ।
2CO 7:10 तलेबिस्याँ परमेश्‍वरउँइँले खबै न्हुँइ लमा क्हेमैंइ आछ्याँबै के लब् पिसि खोंयोंइ आखाँबै छ्ह योंम्। खीए छ्याँबै घ्‍याँर प्रमा ङ्यो खोंयोंइ पछुत् खल् आत्‍हु। दिलेया ह्‍युलउँइँले खबै न्हुँइ बिस्याँ ङ्यो नास लवाम्।
2CO 7:11 मैंन्दि, परमेश्‍वर ङाँइले खबै न्हुँइ लमा क्‍हेमैंला थेबै फायदा तइमुँ! क्‍हेमैंला खैबै फायदा तइमुँ बिस्‍याँ: क्‍हेमैंला छ्याँबै के लबै सैं खइमुँ, झाइले म्हिमैंए उँइँर “ङि छ्याब् आरेब्” खैले तब् ङ्‍हे बिबै सैं खइमुँ, पाप लब् म्रोंसि ह्रिस खइमुँ, परमेश्‍वरए ताँ आङिंना बिब् सेसि आतिदिइमुँ, ङने त्‍होदा ङ्हाँइमुँ, झन् झन् छ्याँबै के लबै सैं खइमुँ, च आछ्याँबै के लबै म्हिलाइ सजैं पिंबै सैं खइमुँ। छले क्‍हेमैंइ चु ताँन् केमैं ठिक लसि ह्रोंसलाइ छ्याब आरेब् उँइँइमुँ।
2CO 7:12 ङइ च प्ह्रिछ्या आछ्याँबै के लबै म्हिलाइ हौदिबर मत्‍त्रे आङिं, झाइले सैदिबै म्हिलाइ ल्होबरै या आङिं, परमेश्‍वरए उँइँर क्हेमैंइ ङिए फिर कति थेबै म्हाँया लइमुँ बिब क्हेमैंइ सेरिगे बिसि प्‍ह्रिब् ग।
2CO 7:13 ङिइ बिबै ताँ क्हेमैंइ ङिंब् म्रोंसि ङिए सैं क्‍होइ। ङिए सैं क्‍होब मत्‍त्रे आङिं, क्‍हेमैंइ तीतसलाइ छ्याँन् लसि चए सैं तोंन् लमिंब् म्रोंसि ङि झन् सैं तोंइमुँ।
2CO 7:14 क्‍हेमैंए बारेर ङइ तीतसने प्हैंलेया क्‍हेमैंए बारेर ङ फापिल् त्हुबै घ्याँ तोइ आरेल। ङिइ खोंयोंन् बिलै क्‍हेमैंने क्‍ह्रोंसेंन्‍बै ताँ बिइमुँ। छलेन ङिइ तीतसने क्‍हेमैंए बारेर प्हैंब् धों तबै के क्‍हेमैंइ लसि उँइँइ।
2CO 7:15 क्‍हेमैं तीतसने ङ्हिंसि चलाइ बेल्‍ले मान लइ, झाइले क्‍हेमैं ताँनइ चइ बिबै ताँ ङिंबर तयार तइ। छतसि क्‍हेमैंइ लबै च्हौ छ्याँबै केमैं मैंसि तीतसइ क्हेमैंए फिर म्हाँया झन् ल्हें लइमुँ।
2CO 7:16 क्‍हेमैंइ लबै ताँन् केमैं म्रोंसि ङ बेल्‍ले तोंइमुँ, तलेबिस्याँ क्हेमैंए फिर ङल थेबै बिश्‍वास मुँ।
2CO 8:1 ओ अलि-अङाँमैं, माकेडोनिया ह्‍युलर्बै बिश्‍वासीमैं न्‍होंरि परमेश्‍वरजी कति थेबै दयाम्हाँया लइ बिबै बारेर ङिइ क्‍हेमैंने बिम्।
2CO 8:2 चमैंए फिर थेबै दुःख तनबिलेया, चमैं बेल्‍ले ङ्हाँदुमैं मुँलेया चमैंइ बेल्‍ले सैं तोंदै थेबै सैं लसि अरूमैंलाइ ल्होबै ल्हागिर भेटि पिंइ।
2CO 8:3 ङइ क्‍हेमैंने चु ताँ ग्वाइ पिंल् खाँम्: चमैं ङ्हाँदुमैं मुँलेया सैं तोंदै ल्हें मुइ पिंइ।
2CO 8:4 “अरू बिश्‍वासीमैंलाइ ल्होमिंबै ल्हागिर ङिज्‍यै या भेटि पिंल् योंम्मा?” बिसि ङिने यो छ्युँ लइ।
2CO 8:5 ङिए सैंर मैंब् धोंले चमैंइ आल, बरु चमैंइ ओंसों ह्रोंसलाइ प्रभुने सुम्पिदिइ, धै परमेश्‍वरए सैंर मैंब् धोंले खीए के लबर चमैंइ ह्रोंसलाइ ङिने सुम्पिदिइ।
2CO 8:6 छतसि चु भेटि रेबै केर तीतसइ क्हेमैंलाइ ल्होरिगे धै क्हेमैंज्यै च छ्याँबै के पूरा लल् खाँरिगे बिसि ङइ चने यो छ्युँ लइमुँ। तलेबिस्याँ ओंसों ओंनोंन् तीतसइ छाबै के लसेन्मुँ।
2CO 8:7 क्‍हेमैं तोन्दोंरि सैर ओंसों बडिदै ह्‍याइमुँ: प्रभु येशूए फिर बिश्‍वास लबर, छेनाले ताँ पोंबर, ज्ञानर, भों खल्‍ले छ्याँबै के लबर, ङिए फिर म्हाँया लबर। छलेन छाबै छ्याँबै केमैं क्‍हेमैंइ ल्हें लरिगे बिब ङिए सैं मुँ।
2CO 8:8 ङइ क्‍हेमैंलाइ हुकुम पिंसि बिब आङिं, दिलेया अरूमैंइ भों खल्‍ले छ्याँबै के लब् म्रोंसि क्‍हेमैंए म्हाँया क्‍ह्रोंसेंन ङिंब् उ आङिं बिसि जाँच लबर ग।
2CO 8:9 तलेबिस्याँ ङ्योए प्रभु येशू ख्रीष्‍टजी ङ्योए फिर कति थेबै दयाम्हाँया लइमुँ बिब क्हेमैंइ सेइमुँ। येशू ख्रीष्‍टने तोन्दोंरि सै मुँलेया क्‍हेमैंए ल्हागिर ङ्हाँदु तइ। तलेबिस्याँ खीए ङ्हाँदुउँइँले क्‍हेमैं प्लब् तरिगे बिब खीए सैं मुँल।
2CO 8:10 क्हेमैंइ तुग्युमसेरो भेटि पिंबै के तों मत्‍त्रे आल, दिलेया ओंसों ओंनोंन् चु के लबै सैं क्हेमैंल मुँल। छतसि तारे चु के पूरा लस्याँ क्हेमैंए ल्हागिर छ्याँब तमुँ बिसि ङइ चु केर सल्‍ला पिंम्।
2CO 8:11 छतसि तोगो क्‍हेमैंइ तों लबै के या पूरा लद्। खैले क्‍हेमैं च के लबर तयार मुँल, छलेन क्‍हेमैंइ पिंल् खाँब् दे पिंसि च के पूरा लद्।
2CO 8:12 तलेबिस्याँ पिंबै सैं मुँस्याँ क्‍हेमैंइ पिंल् खाँब् दे पिंबै भेटि म्रोंसि परमेश्‍वर सैं तोंम्। आरेस्याँ म्हैसि पिंल् आत्हु।
2CO 8:13 क्‍हेमैंलाइ गारो तरिगे अरूलाइ ल्हें योंरिगे बिसि ङइ चु ताँ बिब आङिं, दिलेया ताँन् बराबर तरिगे बिबै ङए सैं मुँ।
2CO 8:14 छलेन अरूमैंइ लिउँइँ ल्हें योंमा क्‍हेमैंलाइ खाँचो तबै त्हेर क्‍हेमैंलाइ ल्होरिगे बिसि तिंजोरो क्‍हेमैंने ल्‍हेन् मुँसेरो चमैंए खाँचो तबै त्हेर चमैंलाइ ल्होल् त्‍हुम्। छलस्याँ ताँन् बराबर तब्‍मुँ।
2CO 8:15 परमेश्‍वरए छ्वेरै या मन्‍ना बिबै चबै सै खुमा बराबर तबै ताँ छले प्ह्रिइमुँ, “ल्हें खुबै म्‍हिने तोइ आचै, च्‍युगुदे खुबै म्‍हिने या खाँचो आत।”
2CO 8:16 परमेश्‍वरलाइ धन्‍यबाद तरिगे, तलेबिस्याँ खीजी तीतसलाइ क्‍हेमैं ल्होमिंबै सैं पिंइमुँ।
2CO 8:17 छतसि ङिइ बिबै ताँ ङिंसि मत्‍त्रे आङिं, चइ सैं न्होंउँइँलेन् क्‍हेमैं ङाँर ह्‍याबै सैं लसि क्हेमैं ङाँर खसिन्मुँ।
2CO 8:18 ङिइ तीतसने अर्को अलि या कुलसिन् मुँ। सैं तोंबै ताँ बिप्रमा ताँन् क्‍ल्‍ह्‍योर्बै बिश्‍वासीमैं न्‍होंरि च अलि मान योंसि मिं कालिदिइमुँ।
2CO 8:19 च्हौ मत्‍त्रे आङिं, प्रभुए मिं थेब् तबै के लबै ल्हागिर नेरो ङिलाइ ल्होबर ताँन् क्‍ल्‍ह्‍योर्बै बिश्‍वासीमैंइ ङिने ह्‍यारिगे बिसि चलाइ त्‍हाँइ।
2CO 8:20 सैं प्ल्हसि पिंबै चु भेटिए बारेर खाबज्यै ङिलाइ छ्याब् आल्हैदिरिगे बिब ङिए सैं मुँ।
2CO 8:21 ङिइ परमेश्‍वरए उँइँर मत्‍त्रे आङिं, म्हिमैंए उँइँरै या ठिक के लम्।
2CO 8:22 चमैंने ङिए अर्को बिश्‍वासी अलि या क्‍हेमैं ङाँर कुल्मिंइमुँ। च अलिलाइ ङिइ ल्हें खे तोन्दोंरि सैर जाँच लमा चल छ्याँबै के लबै सैं मुँ बिब ङिइ सेल् खाँइमुँ। तोगो च अलिइ क्‍हेमैंए फिर बेल्‍ले भर म्हाँदिसि अझै छ्याँबै के लबै सैं लइमुँ।
2CO 8:23 तीतस बिस्याँ ङए थु तसि ङने बालुन् क्हेमैंलाइ ल्होबै के लम्। चने बालु खबै अरू अलिमैं ख्रीष्‍टए मान तबै के लबर बिश्‍वासीमैंइ कुल्मिंब् ग।
2CO 8:24 चमैंए फिर क्हेमैंइ कति थेबै म्हाँया लम् बिसि चमैंने उँइँन्, झाइले ङिइ क्‍हेमैंए बारेर प्हैंसि पोंबै ताँ क्ह्रोंसेंन् मुँन बिब ताँन् क्‍ल्‍ह्‍योर्बै बिश्‍वासीमैंइ सेरिगे।
2CO 9:1 यहूदीया ह्‍युलर्बै बिश्‍वासीमैंए ल्हागिर पिंबै भेटिए बारेर ङइ क्हेमैंलाइ प्‍ह्रिरिल् आत्हु।
2CO 9:2 तलेबिस्याँ क्‍हेमैंइ पिंबै सैं मुँ बिब ङइ सेइमुँ। छतसि ङइ माकेडोनिया ह्‍युलर्बै म्‍हिमैंने क्‍हेमैंए बारेर छ्याँबै बयन लसि छ बिइ, “अखैया ह्‍युलर्बै अलिमैं तुग्‍युम् ओंनोंन् भेटि रेसि ल्होबर तयार तइमुँ।” आगुलाइ ल्होबै ल्हागिर क्‍हेमैंइ सैं थेब् लब् म्रोंसि म्‍हिमैं या छाबन् के लबर भों खइमुँ।
2CO 9:3 दिलेया ङिइ क्‍हेमैंए बारेर प्हैंसि पोंब स्योलिन् आतरिगे, धै ङइ चुर बिब् धोंलेन् क्‍हेमैंइ मुइ रेरिगे बिसि ङइ च अलिमैंलाइ ङ खब् भन्दा ओंसों क्‍हेमैं ङाँर कुल्मिंइमुँ।
2CO 9:4 तलेबिस्याँ माकेडोनियार्बै म्‍हिमैं ङने बालु क्हेमैं ङाँर खमा क्‍हेमैं तयार आतब् स्‍यास्‍याँ ङि बेल्‍ले फा पिन् तब्‍मुँ, क्‍हेमैं या फा पिन् तब्मुँ, तलेबिस्याँ क्‍हेमैंइ खैले बिलै मुइए तौदु लम् बिब ङिए सैं मुँ।
2CO 9:5 छतसि क्हेमैंइ पिंम् बिबै भेटि ङि खब् भन्दा ओंसोंन् रेसि थेंरिगे बिसि चु अलिमैं सों ओंसोंन् कुलबै सैं खइ। क्‍हेमैंइ च भेटि करइ पिंब आङिं, सैं तोंदै पिंबै भेटि तब्मुँ।
2CO 9:6 खाबइ च्‍युगुदे प्‍लु प्‍लुमुँ चइ च्‍युगुदेन् रा-रोमैं खुब्‍मुँ, खाबइ ल्हें प्‍लु प्‍लुमुँ चइ ल्‍हेन् खुब्‍मुँ।
2CO 9:7 छतसि ताँन् म्हिमैंइ ह्रोंसइ कति पिंल् खाँमुँ च्हगन् पिंन्, आगुइ कर ल्हैदिसि सैं आतोंदै आपिंन्। तलेबिस्याँ सैं तोंदै भेटि पिंबै म्‍हि म्रोंसि परमेश्‍वर सैं तोंम्।
2CO 9:8 क्हेमैंने बालु खोंयोंन् बिलै तोन्दोंरि सै छ्येज्याल्हुल्हुले तरिगे, धै छ्याँबै केए ल्हागिर क्हेमैंइ ल्हें ल्हें पिंल् खाँरिगे बिसि परमेश्‍वरजी क्‍हेमैं ताँनलाइ आशिक् पिंल् खाँम्।
2CO 9:9 परमेश्‍वरए छ्वेर पिंबै म्‍हिए बारेर छले प्ह्रिइमुँ: “चइ प्लुमुँ, धै ङ्हाँदुमैंलाइ पिंमुँ, चइ लबै छ्याँबै के खोंयोंन् बिलै तरिम्।”
2CO 9:10 परमेश्‍वरजी प्‍लु प्‍लुबै म्हिलाइ प्‍लु पिंम्, धै म्‍हिमैंलाइ चबै सै पिंम्। च धोंले परमेश्‍वरजी क्‍हेमैंलाइ चैदिबै प्‍लु पिंसि चलाइ बडिमिंब्‍मुँ, झाइले क्‍हेमैंइ लबै छ्याँबै केल ल्हें रोमैं तब्‍मुँ।
2CO 9:11 छलेन क्‍हेमैंइ ताँन् छ्याँबै केर भेटि पिंल् खाँरिगे बिसि खीजी खोंयोंन् बिलै क्‍हेमैंलाइ योबा-ख्‍युबा लमिंब्‍मुँ। क्‍हेमैंइ पिंबै भेटि ङिए योउँइँले ङ्हाँदुमैंइ योंमा चमैंइ परमेश्‍वरलाइ धन्‍यबाद पिंब्‍मुँ।
2CO 9:12 क्‍हेमैंइ छले रेबै भेटिमैंइ परमेश्‍वरए म्‍हिमैंलाइ खाँचो तमा चमैंए खाँचोमैं पूरा लल् खाँम्। च्हौ मत्‍त्रे आङिं, चु केउँइँले चमैंइ परमेश्‍वरलाइ खोंयोंन् बिलै धन्‍यबाद पिंरिब्‍मुँ।
2CO 9:13 ख्रीष्‍टउँइँले खबै सैं तोंबै ताँर बिब् धोंले क्‍हेमैं प्रसि यहूदीमैं नेरो अरू म्हिमैंए ल्हागिर क्हेमैंइ सैं प्ल्हसि पिंबै भेटिउँइँले परमेश्‍वरए मिं थेब् तब्मुँ।
2CO 9:14 परमेश्‍वरजी क्हेमैंलाइ बेल्‍ले थेबै दयाम्हाँया लबै सैं पिंइमुँ बिसि यहूदीमैंइ क्‍हेमैंए फिर म्हाँया खसि क्‍हेमैंए ल्हागिर प्राथना लब्‍मुँ।
2CO 9:15 बयन लसे लल् आखाँबै बेल्‍ले थेबै बरदान परमेश्‍वरजी ङ्योलाइ पिंसेरो खीलाइ धन्‍यबाद पिंले।
2CO 10:1 क्‍हेमैंए न्‍होंरि को-कोइइ “पावल ङिउँइँले ह्रेंगो तमा ङिलाइ हौदिबै प्ह्रिछ्या प्‍ह्रिम्, दिलेया ङि ङाँर मुँमा च्‍योंब तसि तोइ आबिल्‍ले टिम्,” बिसि बिम् रो। दिलेया ख्रीष्‍टजी ङ्योए फिर म्हाँया लब् धोंले ङए सैंरै या ल्हयो खबइले क्हेमैने ङ यो छ्युँ लम्:
2CO 10:2 “ङ क्हेमैं ङाँर खमा ङइ ह्रिस उँइँल् आत्हुरिगे।” तलेबिस्याँ ङिइ आछ्याँबै सैंइ के लम् रो बिब्मैं म्रोंसि ङ ह्रिस खम्।
2CO 10:3 ङि चु ह्‍युलर टिलेया, चु ह्‍युलर्बै म्‍हिमैं धोंले ङि प्होंब्-न्हेब् आल।
2CO 10:4 तलेबिस्याँ ङिइ छेबै हातियार ह्‍युलर्बै म्‍हिमैंइ छेब् धों तब आङिं, ङिइ छेबै हातियारम् परमेश्‍वरए थेबै शक्‍ति मुँबै बचन ग। च बचनइ भोंबै किल्‍लामैं नास लवाल् खाँम्।
2CO 10:5 परमेश्‍वरए ज्ञानए बिरोध लसि आतबै ताँ पोंब्मैं नेरो थेब् प्हैंसि पोंबै म्हिमैंए बिचारमैं ङिइ नास लवाम्, धै छाबै म्हिमैंलाइ ख्रीष्‍टजी बिबै ताँ म्हाँदिलन् त्हुब लवाम्।
2CO 10:6 ङिइ लद् बिबै केमैं ताँन् क्‍हेमैंइ लल् खाँबै लिउँइँ ङिइ बिब् आङिंब्‍मैंलाइ दण्‍ड पिंबर ङि तयार तब्‍मुँ।
2CO 10:7 क्‍हेमैंइ ह्रोंसए मिइ म्रोंबै सैमैं मत्‍त्रे ङ्ह्‍योम्। क्हेमैंए न्होंरि खाबज्यै या “ङ येशू ख्रीष्‍टए म्‍हि ग!” बिम् बिस्याँ च धोंलेन् ङि या ख्रीष्‍टए म्हिन् ग बिसि चइ क्होल् त्हुम्।
2CO 10:8 प्रभुजी ङिलाइ पिंबै अधिकार क्‍हेमैंलाइ न्‍होह्रों लबै ल्हागिर पिंब आङिं, बरु क्‍हेमैंलाइ भोंब् लमिंबै ल्हागिर पिंब् ग। छतसि प्रभुजी ङिलाइ पिंबै अधिकारए बारेर ङइ प्हैंसि पोंलेया ङ फापिल् त्हुरिब् आरे।
2CO 10:9 ङइ क्हेमैंलाइ प्‍ह्रिबै प्ह्रिछ्यामैं क्‍हेमैंलाइ ङ्हिंन् लबर प्ह्रिब् ग बिसि आमैंन्।
2CO 10:10 “पावलए प्ह्रिछ्यामैंरम् दयाम्हाँया आरेबै म्हिइ धोंले हौदिबै ताँमैं प्‍ह्रिम्, दिलेया ङ्यो ङाँर मुँमा चइ तोइ बिल् आखाँ,” बिसि को-कोइ बिम्।
2CO 10:11 छ बिबै म्‍हिमैंइ चु ताँ सेल् त्हुम्, प्ह्रिछ्यार ङिइ खैले प्ह्रिइमुँ, क्‍हेमैं ङाँर खमैं या ङिइ छलेन् के लम्!
2CO 10:12 ह्रोंसइ ह्रोंसलाइन थेब् लसि प्हैंबै म्हिमैंने ङि च्हैंदा आङ्हाँ। चमैंइ ह्रोंसलाइन अरूमैंने च्हैंसि ङ्‍ह्‍योमा चमैं कत्ति बुद्धि आरेब्‍मैं तब्मुँ।
2CO 10:13 दिलेया ङिम् छले थेब् प्हैंसि आपों। बरु परमेश्‍वरजी ङिने “लद्” बिबै केमैं मत्‍त्रे ङिइ लम्, धै क्‍हेमैंए ङाँर खसि लबै केमैं या परमेश्‍वरजी ङिने “लद्” बिबै केन् ग।
2CO 10:14 परमेश्‍वरजी क्हेमैं ङिए जिम्मार पिंइमुँ। छतसि ख्रीष्‍टउँइँले खबै सैं तोंबै ताँ धाँसे ओंसों क्‍हेमैं ङाँर बिखब्मैं ङिन् ग।
2CO 10:15 ङिलाइ परमेश्‍वरजी पिंबै जिम्मा बाहेक् अरू चेलामैंइ लबै केर ङिइ यो झोंसि थेब् आप्‍हैं। बरु क्‍हेमैंए बिश्‍वास भोंब् तरिगे धै परमेश्‍वरजी ङिलाइ जिम्‍मा पिंब् धोंले ङिइ क्‍हेमैंने बालु झन् ल्हें के लल् खाँरिगे बिब ङिए आशा मुँ।
2CO 10:16 झाइले क्‍हेमैंए ह्‍युलर मत्‍त्रे आङिं, अरू ह्रें-ह्रेंगोबै ह्‍युलजरै या येशू ख्रीष्‍टउँइँले खबै सैं तोंबै ताँ ङि बिप्रल् खाँम्। झाइले अरूइ लबै केर आङिं, ह्रोंसइ लल् खाँबै केर मत्‍त्रे ङिइ थेब् प्‍हैंल् योंब्‍मुँ।
2CO 10:17 परमेश्‍वरए छ्वेर छले प्ह्रिइमुँ, “खाब‍ज्‍यै या थेब् प्‍हैंसि पोंदा ङ्हाँस्‍याँ, चइ याहवेहजी लबै केर्न प्‍हैंसि पोंरिगे।”
2CO 10:18 तलेबिस्याँ ह्रोंसइन ह्रोंसलाइ थेब् प्हैंसि पोंबै म्हिलाइ प्रभुजी आखो, बरु प्रभुजी ठिक ठर्दिबै म्‍हिन् ठिक ठर्दिम्।
2CO 11:1 ङ तोइ बुद्धि आरेबै म्हि धों तलेया क्‍हेमैंइ सैदिल् खाँस्‍याँ छ्याँब तमल बिब ङए सैं मुँ। गार आम्हाँदिल्‍ले ङए ताँ थेमिंन् ओ!
2CO 11:2 तलेबिस्याँ क्‍हेमैं कन्‍ये धों तब् ग, ख्रीष्‍टने बालुन् ब्ह्‍या लमिंबै ल्हागिर ङइ क्हेमैंलाइ ह्रिथेंइमुँ। छतसि क्‍हेमैंए फिर्बै ङए ह्रिस परमेश्‍वरल् धोंन् तबै ह्रिस ग।
2CO 11:3 क्हेमैंइ छलकपट आलल्‍ले ख्रीष्‍टए फिर बिश्‍वास लबै सैं लइ, दिलेया स्‍योंम्‍बै हब्बालाइ प्‍हुरिइ खैले स्योर तेसि लुइ, छलेन क्हेमैंए सैं या न्होंवाम् उ बिसि ङ ङ्हिंइमुँ।
2CO 11:4 क्‍हेमैं ङाँर म्‍हि घ्रि खसि ङिइ बिबै येशू भन्दा अर्कोन् येशूए बारेर्बै ताँ बिइ बिस्याँ, झाइले क्‍हेमैंइ योंबै पबित्र प्ल्ह भन्दा चइ बिबै अर्कोन् प्ल्हए ताँ क्हेमैंइ क्वेंइ बिस्याँ, छलेन ङिइ बिमिंबै सैं तोंबै ताँ भन्दा अर्को ताँमैं क्‍हेमैंइ क्वेंइ बिस्याँ, च म्हिए ताँ क्हेमैंइ सैं तोंन्ले थेमना!
2CO 11:5 दिलेया “ङि कुल्मिंबै चेला चिब्मैं ग” बिसि थेब् प्हैंसि पोंब्मैं भन्दा ङ तोइ सैरै या च्योंरि आरे।
2CO 11:6 ओं, ङ छेनाले पोंल् आह्रलैया ङ बेल्‍ले ह्रब् सेब मुँ। खैले तमुँ छले ङिइ ह्रब्-सेबै ताँमैं क्हेमैंलाइ छेनाले क्होमिंइमुँ।
2CO 11:7 क्‍हेमैंलाइ थेब् लबै ल्हागिर ह्रोंसलाइन च्योंब् लसि येशूउँइँले खबै सैं तोंबै ताँ क्‍हेमैंने छलेन् बिमिंमा ङइ पाप लइ वा?
2CO 11:8 क्‍हेमैंए सेवा लबै ल्हागिर ङइ अरू क्‍ल्‍ह्‍योर्बै बिश्‍वासीमैंउँइँले मुइ योंमा ङइ क्‍हेमैंए ल्हागिर चमैंलाइ लुडिब् धोंन् तइ।
2CO 11:9 ङ क्‍हेमैं ङाँर मुँबै त्हेर ङलाइ मुइ चैदिमा ङइ क्‍हेमैंने तोइ खर्ज आह्रिल। बरु माकेडोनिया ह्‍युलउँइँले खबै अलिमैंइ ङए खाँचो पूरा लमिंइ। ङइ क्‍हेमैंलाइ ओंसों या तोइ सैरै या दुःख आपिंल, लिउँइँज्‍यै या तोइ दुःख पिंरिब आरे।
2CO 11:10 ख्रीष्‍टजी क्ह्रोंसेंन्बै ताँ बिब् धोंले ङज्‍यै या क्ह्रोंसेंन्बै ताँ बिम्: “ङइ क्‍हेमैंलाइ दुःख आपिं” बिसि प्हैंबै ताँ अखैया ह्‍युल तिगोंन् खाबज्‍यै ङलाइ आपोंन् बिल् आखाँ।
2CO 11:11 ङइ तले छ बिगे? ङइ क्‍हेमैंलाइ म्हाँया आल बिसि छ बिब् वा? आङिं! ङइ क्‍हेमैंलाइ म्हाँया लम् बिसि परमेश्‍वरजी सेइमुँ!
2CO 11:12 ङिइ धोंलेन् के लइमुँ बिसि थेब् प्हैंसि पोंब्मैंए ताँ थोरिगे बिसि ङइ लरिबै के खोंयोंन् बिलै ङ लरिब्मुँ।
2CO 11:13 तलेबिस्याँ छाबै म्‍हिमैं क्‍ह्रोंसेंन्‍बै कुल्मिंबै चेला चिब्मैं आङिं, दिलेया “ङि येशू ख्रीष्‍टए क्‍ह्रोंसेंन्‍बै कुल्मिंबै चेला चिब्मैं ग” बिसि स्योर तेसि लुप्रब्मैं मत्‍त्रे ग।
2CO 11:14 चु ताँर प्लेटोरिल् आत्हु! तलेबिस्याँ दुष्‍टै या चारबै स्‍वर्गदूत धों तल् खाँम्।
2CO 11:15 छतसि दुष्‍टए सेवा लब्मैं परमेश्‍वरए सेवा लब्मैं धोंले प्रलेया औदिबै ताँ आङिं। चमैंइ लबै केए नों लिउँइँ योंब्‍मुँ।
2CO 11:16 ङइ धबै बिमुँ, ङलाइ खाबज्‍यै या बुद्धि आरेब आमैंरिगे। दिलेया क्‍हेमैंइ ङलाइ बुद्धि आरेबन् मैंलेया ङइ थेब् प्‍हैंल् योंरिगे बिसि ङलाइ सैदिद्।
2CO 11:17 (ङइ तोगो बिबै ताँ प्रभुउँइँले बिबै ताँ आङिं, दिलेया थेब् प्‍हैंबै ताँर ङ बुद्धि आरेब्‍मैंइ धोंले पोंरिइमुँ।
2CO 11:18 ल्हें म्‍हिमैंइ थेब् प्‍हैंसि पोंबइले ङै या चमैं धोंले थेब् प्‍हैंसि पोंम्।)
2CO 11:19 क्‍हेमैं बेल्‍ले बुद्धि मुँब्मैं तमा क्‍हेमैंइ बुद्धि आरेब्‍मैंलाइ सैं तोंन्लेन् सैदिमना! ङए सुजाब (बुद्धि आरेब्‍मैंलाइ सैं तोंन्लेन् सैदिसि!) क्‍हेमैं बेल्‍ले बुद्धि मुँब्मैं तइ।
2CO 11:20 छलेन म्‍हि घ्रिइ क्‍हेमैंलाइ केब्छैं लवालेया, क्‍हेमैंए मुइ लुडिवालेया, क्‍हेमैंलाइ ङोर स्‍याब् धोंले च्युवालेया, क्‍हेमैंलाइ प्ह्रलेया, क्‍हेमैंए क्‍ह्राँबोर ल्हिलेया क्‍हेमैंइ ह्रिस आखल्‍ले सैदिमना!
2CO 11:21 ङिइमि छ लल् आखाँ, फा पिल् त्‍हुबै ताँ मुँ। दिलेया खाबज्‍यै या तो मुँले ताँर थेब् प्‍हैंम् बिस्याँ, ङै या बुद्धि आरेबै म्हि धोंले च ताँर्न थेब् प्हैंसि पोंम्।
2CO 11:22 चमैं हिब्रू क्‍युइ पोंल् खाँम्‍मा? ङै या पोंल् खाँम्। चमैं इस्राएलीमैं वा? ङै या इस्राएली ग। चमैंए खे अब्राहाम वा? ङए खे या अब्राहाम ग।
2CO 11:23 चमैं येशू ख्रीष्‍टए सेवा लब्मैं वा? चमैं भन्दा ङ झन् छेनाले सेवा लबै म्‍हि ग। छबिमा ङ सोबल धोंले पोंइ। ङइ बेल्‍ले दुःखले ख्रीष्‍टए सेवा लइमुँ, ङ ल्हें खे झेलर टिल् त्‍हुइ, ङलाइ ल्हें खे कोर्राइ प्रुइ, छले ल्हें खे ङ कालए सुँर फेइ।
2CO 11:24 ङ्‌हखे समा यहूदीमैंइ ङलाइ सोंच्युसे कु कोर्रा प्रुइ।
2CO 11:25 सोंखे समा रोमथेंमैंइ ङलाइ प्‍हरेइ प्रुइ, झाइले क्ल्ह्‍यो घ्रिर ङलाइ म्हिए हुलइ युँमाइ प्रिंइ। सोंखे समा ङ क्रेबै क्‍यु झाज मा ङ्युँइर तेसि नास तयामा त्हिंयाँ-म्‍हुँइँस ङ मा ङ्युँइर्न टिल् त्‍हुइ।
2CO 11:26 छलेन येशू ख्रीष्‍टउँइँले खबै सैं तोंबै ताँ बिप्रमा ल्हें खे ङलाइ स्‍योंइ नोबोल् म्हैइ, ह्‍योमैंइ ङ सैल् म्हैइ, ह्रोंसए यहूदी ह्रेंमैं नेरो अरू ह्रेंमैंज्‍यै या ङलाइ दुःख पिंइ। सहरजरे या, म्‍हि आटिबै ह्‍युलरै या, मा ङ्युँइरै या, झाइले स्‍योर्गु थुमैंउँइँले या ङइ दुःख योंइ।
2CO 11:27 झाइले गारो केमैं लल् त्‍हुइ, ल्हें खे न्‍हरु च्‍हुइल् आयों, फो ख्रेंन्ले क्यु पिल्‍ले टिल् त्‍हुइ, ल्हें खे चल् आयोंल्‍ले, बास आयोंल्‍ले, क्वें खिल् आयोंल्‍ले टिल् त्‍हुइ।
2CO 11:28 च्हौ मत्‍त्रे आङिं, च भन्दा थेबै दुःख त्हिंइ ह्रोंसे ताँन् क्‍ल्‍ह्‍योर्बै बिश्‍वासीमैंए ल्हागिर ङलाइ न्हुँ मुँ।
2CO 11:29 तलेबिस्याँ दुःख योंब्मैं मुँस्‍याँ ङै या दुःख योंब् धोंन् तमल। खाबै या पापर च्होयास्याँ ङए सैंर बेल्‍ले न्हुँ खमल।
2CO 11:30 ङइ प्‍हैंलन् त्‍हुम् बिस्‍याँ ङइ योंबै दुःखए ताँमैंर मत्‍त्रे प्‍हैंम्।
2CO 11:31 ङइ स्‍योर आतेइमुँ बिबै ताँ खोंयोंन् बिलै म्हाँदिल् त्हुबै प्रभु येशूए आबा परमेश्‍वरजी सेइमुँ।
2CO 11:32 ङ दमस्‍कस सहरर मुँमा अरितस म्रुँए न्होंर्बै क्रथेइ ङलाइ क्‍हाबै ल्हागिर सहरए मुल म्रार पालेमैं थेंल।
2CO 11:33 दिलेया ङए थुमैंइ ङलाइ ट्हलोर झोंसि सहरलाइ कारग्युले झोंबै गाराए झ्यालउँइँले खारमिंबइले ङ क्रथेए योउँइँले स्योरल् खाँइ।
2CO 12:1 खाबलाइ तोइ फायदा आतलेया ङइ ङ्‍हो लोंबै के लल् त्‍हुम्। तोगो ङइ प्रभुउँइँले योंबै दर्शनमैं नेरो क्होसे क्होल् आखाँबै ताँमैंए बारेर बिरिइमुँ।
2CO 12:2 येशूए फिर बिश्‍वास लबै ङइ ङो सेबै म्हि घ्रिलाइ च्युसे प्लिदि भन्दा ओंसों परमेश्‍वरजी तल सोंर्बै स्वर्ग समा क्‍वेबोइ। चलाइ ज्युर्न बोइ उ प्ल्ह मत्‍त्रे बोइ च ङइ आसे, च ताँ परमेश्‍वरजी सेइमुँ।
2CO 12:3 च म्हिलाइ स्वर्गर बोयाबै ताँ ङइ सेइमुँ, दिलेया चलाइ ज्युर्न बोइ उ प्ल्ह मत्‍त्रे बोइ च ङइ आसे, च ताँ परमेश्‍वरजीन् सेइमुँ।
2CO 12:4 चर म्हिए सुँउँइँले त्होंलै आतबै औदिबै ताँमैं चइ थेइ। च ताँमैं म्‍हिए सुँउँइँले पोंलन् आत।
2CO 12:5 छाबै म्‍हिए बारेर मत्‍त्रे ङइ प्‍हैंसि पोंमुँ, दिलेया ह्रोंसए बारेर बिस्याँ ङइ योंबै दुःख बाहेक अरू ताँर प्‍हैंसि आपों।
2CO 12:6 ङइ प्हैंबै सैं ललेया ङ बुद्धि आरेब् धों आत, तलेबिस्याँ ङइ क्ह्रोंसेंन्बै ताँ मत्‍त्रे पोंमल। दिलेया छाबै ताँर ङ थेब् प्‍हैंदा आङ्हाँ। तलेबिस्याँ म्‍हिमैंइ ङइ तो लब म्रोंइमुँ, ङउँइँले तो ताँ थेइमुँ, च भन्दा बडि चमैंइ ङलाइ आमैंरिगे बिब ङए सैं मुँ।
2CO 12:7 दिलेया छाबै औदिबै दर्शनमैं ङइ ल्हें म्रोंलेया ङ थेब् आप्‍हैंरिगे बिसि प्रभुजी ङए ज्युर पुजु घ्रि थेंमिंइ। ङ थेब् आप्हैंरिगे बिसि च पुजु अथबा दुष्‍टए दूत घ्रि ङलाइ ह्रुगुदिबर थेंमिंइ।
2CO 12:8 “चु दुःख पिंबै पुजु ङउँइँले स्‍योमिंन्” बिसि ङइ सोंखे समा प्रभुने प्राथना लइ।
2CO 12:9 दिलेया प्रभुजी ङने बिइ, “ङए दयाम्हाँया योंसेरो क्हिलाइ अरू सै तोइ आचैदि, तलेबिस्याँ क्‍हि आखाँ आथुबै त्हेर ङए भोंइन तोन्दोंरि के लम्।” छतसि ख्रीष्‍टए भों ङने तरिगे बिसि आखाँ आथुबै त्हेरै या ङ सैं तोंन्लेन् प्हैंब्मुँ।
2CO 12:10 छतसि ख्रीष्‍टए मिं थेब् तरिगे बिसि ङ आखाँ आथुलेया, म्‍हिमैंइ ङलाइ प्ह्रलेया, सैदिलै आखाँबै दुःख तलेया ङ सन्‍दोक तम्, तलेबिस्याँ आभोंबै त्हेरै या ङ बेल्‍ले भोंब् तम्।
2CO 12:11 ङलाइ बुद्धि आरेबै म्हि तबर क्‍हेमैंन कर ल्‍हैदिइ। क्‍हेमैंइ अरूमैंए छ्याँबै बयन लसि चमैंलाइन “बेल्‍ले छ्याँबै कुल्मिंबै चेला चिब्मैं” बिमुँ, चमैंए उँइँरम् क्‍हेमैंइ ङए बारेर छ्याँबै बयन लल् त्‍हुमल। तलेबिस्याँ ङ तोइ आङिंलेया चमैं भन्दा ङ तोरै च्‍योंब् आरे।
2CO 12:12 “ङ क्‍ह्रोंसेंन कुल्मिंबै चेला चिब ग” बिसि उँइँबर ङइ सैदिल् त्हुबै सैमैं तोन्दोंरि सैदिसि क्‍हेमैंए उँइँर ङइ औदिबै चिनु मुँबै केमैं लल।
2CO 12:13 अरू क्‍ल्‍ह्‍योर्बै बिश्‍वासीमैंलाइ भन्दा क्‍हेमैंलाइ ङइ च्युगुदे म्हाँया लइमुँ वा? ओं, बिलन् त्हुमा क्हेमैंइ ङलाइ क्षमा पिंल् त्हुबै ताँ घ्रि मुँ, तलेबिस्याँ क्हेमैंने ङइ खर्ज आह्रि!
2CO 12:14 तारे चु सोंखेबै लारै या ङ क्‍हेमैं ङाँर खसिन्मुँ। ङइ क्‍हेमैंने तोइ खर्ज ह्रिरिब आरे, तलेबिस्याँ ङलाइ क्‍हेमैंए मुइ आङिं क्‍हेमैं चैदिम्। आबा-आमाए ल्हागिर प्‍हसेमैंइ सै न्होर आसाँथें, दिलेया प्‍हसेमैंए ल्हागिर आबा-आमामैंइ सै न्होर साँथेंम्।
2CO 12:15 क्‍हेमैंए ल्हागिर सैं तोंदै ङने मुँबै ताँन् सै न्होर नेरो ङए ज्यु या पिंब्मुँ। छले ङइ क्‍हेमैंए फिर ल्हें म्हाँया लसेरो क्‍हेमैंइ ङलाइ च्युगुदे म्हाँया लब् वा?
2CO 12:16 ङइ क्‍हेमैंलाइ तोइ सैरै दुःख आपिंइमुँ बिसि क्हेमैंज्यै सेइमुँ। दिलेया ङइ बाठो तसि क्हेमैंलाइ फसदिइ बिसि क्हेमैंइ ङलाइ छ्याब् ल्‍हैदिम् रो।
2CO 12:17 क्हेमैं ङाँर कुल्‍मिंबै म्हिमैं न्होंर्बै खाब् म्हिउँइँले ङइ क्हेमैंने मुइ किंइ? आकिं।
2CO 12:18 ङइ तीतसलाइ क्हेमैं ङाँर ह्‍याद् बिसि चने बालु बिश्‍वासी अलि या कुल्‍मिंइ। तीतसइ लोब लसि क्हेमैंने बालु मुइ किंइ वा? आकिं। तीतस नेरो ङइ सैं घ्रिलेन् के आल वा? ङि घ्याँ घ्रिर्न आप्र वा?
2CO 12:19 चु ताँन् ताँमैं बिमा ङि छ्याँब् मुँ बिसि क्हेमैंए उँइँर पोंइ वा? छ कत्ति आङिं! बरु परमेश्‍वरए उँइँर ख्रीष्‍टजी बिब् धोंले ङि पोंम्। ओ ङए खोबै अलि-अङाँमैं, ङिइ लबै ताँन् केमैं क्‍हेमैंलाइ भोंब् लमिंबै ल्हागिर्न ग।
2CO 12:20 क्‍हेमैंए बानि छ्याँब तरिगे बिब ङए सैं मुँ। दिलेया क्‍हेमैं ङाँर ङ खमा ङए सैंर मैंब् धों तब क्‍हेमैं आत उ, छलेन क्‍हेमैंए सैंर मैंब् धों तब ङै या आत उ बिसि ङ ङ्हिंइमुँ। तलेबिस्याँ क्‍हेमैं न्होंरि प्होंगि कैगि लब, ख्रे लब, ह्रिस लब, ह्रोंसए फायदा मत्‍त्रे म्‍हैब, अरूलाइ प्ह्रब, फ्रम् ताँ क्‍योंम् ताँ लब, थेब् प्हैंब, बिब् आङिंब तलै खाँम्।
2CO 12:21 क्‍हेमैं न्‍होंरि ल्हें म्हिइ पाप केमैं लल, चमैंइ आछ्याँबै के, ब्यभिचार लसेया, खै तदा ङ्हाँमुँ छान् तसेया सैं आएलै। छतसि ङ धबै क्‍हेमैं ङाँर खमा छाब् म्रोंसि ङए सैं नल् त्हुलै, धै चु ताँर परमेश्‍वरजी ङलाइ क्‍हेमैंए उँइँरि फा पिन् लम् उ बिसि ङ ङ्हिंइमुँ।
2CO 13:1 तारे ङ सोंखेबै लार क्‍हेमैं ङाँर खसिन् मुँ। खाब् मुँलै म्हिए फिर तोइ दोष ल्हैदिस्याँ परमेश्‍वरए छ्वेर प्‍ह्रिब् धोंले, “म्‍हि ङ्हिं सोंइ बिबै ताँ क्ह्रिस्याँ मत्‍त्रे च ताँ पक्‍का तम्।”
2CO 13:2 ओंसोंन् ङ क्‍हेमैं ङाँर मुँमा पाप लब्मैं आलब्मैं ताँनलाइ ङइ लोदा सैंदा लब् धोंलेन्, तोगो ह्रेंगो मुँलेया ङइ क्‍हेमैंलाइ लोदा सैंदा लम्: ङ धबै क्‍हेमैं ङाँर खमा ओंसों पाप लब्मैं मत्‍त्रे आङिं, ङइ लोदा सैंदा लसेया अझै पाप के लरिब्मैं खाबै मुँस्याँ चमैंलाज्यै या ङइ सजैं पिंब्मुँ।
2CO 13:3 छतसि ङउँइँले ख्रीष्‍ट पोंम् उ आपों बिब क्‍हेमैंइ प्रमाण म्हैम् बिस्याँ छेनाले मैंन्, ख्रीष्‍टजी क्‍हेमैंए म्हाँजोर खाबलाज्यै आफेलल्‍ले निसाफ लमा खी आभोंब् तरिब् आरे, खी बेल्‍ले भोंब् तब्मुँ।
2CO 13:4 तलेबिस्याँ भों आरेबै म्हि धों तसि खी क्रूसर च्‍योसि सिइ, दिलेया परमेश्‍वरए शक्‍तिजी खीलाइ धबै सोगों लमिंइ। येशूने घ्रिन् तमा ङि भों आरेब्मैं तलेया क्‍हेमैं छ्याँब् तरिगे बिबै ल्हागिर परमेश्‍वरजीन् ङिलाइ ख्रीष्‍टजी थोब् धों तबै छ्ह थोबै भों पिंब्मुँ।
2CO 13:5 क्‍हेमैं बिश्‍वासर भोंब मुँ उ आरे बिसि ह्रोंसए जाँच लद्। जाँचर फेल् आतस्याँ येशू ख्रीष्‍ट क्‍हेमैंने बालु तम् बिसि क्हेमैंइ सेल् त्हुम्।
2CO 13:6 दिलेया ङि फेल् आतइमुँ बिबै ताँ क्‍हेमैंइ सेब्‍मुँ बिसि ङइ आशा लइमुँ।
2CO 13:7 ङिइ छ्याँबै के लसि पास तइ बिसि क्‍हेमैंने उँइँबर आङिं, बरु ङि फेल् तब् धों तलेया क्‍हेमैंइ तोइ पाप आलल्‍ले छ्याँबै के लरिगे बिसि ङिइ परमेश्‍वरने क्हेमैंए ल्हागिर प्राथना लम्।
2CO 13:8 तलेबिस्याँ ङि येशू ख्रीष्‍टउँइँले खबै क्ह्रोंसेंन्बै सैं तोंबै ताँ मत्‍त्रे पोंम्, क्ह्रोंसेंन्बै ताँ ङिइ थोल् आखाँ।
2CO 13:9 ङि छले भों आरेब् धों तलेया क्‍हेमैं भोंब् तमा ङि सैं तोंम्। छतसि क्‍हेमैं तोन्दोंरि सैर बिब् धों तरिगे बिसे या ङिइ प्राथना लम्।
2CO 13:10 क्‍हेमैं ङाँर ङ खमा प्रभुजी ङलाइ पिंबै अधिकारउँइँले ङइ क्‍हेमैलाइं हौदिल् आत्‍हुरिगे बिसि क्‍हेमैंने ह्रेंगो मुँमा ङइ चु प्ह्रिछ्या प्ह्रिइमुँ। क्‍हेमैंए न्होह्रों लबर च अधिकार ङलाइ पिंब आङिं, बरु क्‍हेमैं छ्याँब् तरिगे बिसि पिंब् ग।
2CO 13:11 ओ अलि-अङाँमैं, छेन्‍ले टिद् ओ, जय मसीह। ताँन् केमैं छेनाले लबै भों लदु, घ्रिइ-घ्रिए सैं क्होमिंबै के लदु, क्ह्रिसि टिदु, घ्रिइ-घ्रिलाइ सैदिदु। झाइले खीए म्हाँयाउँइँले ङ्योए सैं क्‍होल् लमिंबै परमेश्‍वर क्‍हेमैंने तब्‍मुँ।
2CO 13:12 छ्याँबै खोंउँइँले घ्रिइ घ्रिने जय मसीह लद्।
2CO 13:13 छुइले या परमेश्‍वरए ताँन् म्‍हिमैंइ क्‍हेमैंने जय मसीह बिमिंइमुँ।
2CO 13:14 प्रभु येशू ख्रीष्‍टजी पिंबै दयाम्हाँया, परमेश्‍वर आबाजी लबै म्हाँया नेरो पबित्र प्ल्हउँइँले तबै संगति क्‍हेमैं ताँनने तरिगे।
GAL 1:1 कुल्मिंबै चेला चिब ङ पावलउँइँले जय मसीह मुँ। कुल्मिंबै चेला चिब (तसि परमेश्‍वरए के लबर) ङलाइ म्‍हिमैंइ त्हाँसि कुलब् आङिं, म्‍हिमैंइ खटिदिब आङिं। येशू ख्रीष्‍टलाइ सिबउँइँले सोगों लमिंबै परमेश्‍वर आबा नेरो येशू ख्रीष्‍टजीन् ङलाइ त्‍हाँसि कलब् ग।
GAL 1:2 ङ नेरो ङने मुँबै ताँन् अलि-अङाँमैंउँइँले क्हेमैं गलातिया ह्‍युलर्बै बिश्‍वासीमैं ताँनलाइ जय मसीह मुँ।
GAL 1:3 ङ्योए परमेश्‍वर आबा नेरो प्रभु येशू ख्रीष्‍टउँइँले क्हेमैंइ दयाम्हाँया नेरो छिं ङ्हाँल् योंरिगे।
GAL 1:4 चु जुगर्बै आछ्याँबै शक्‍तिउँइँले ङ्योलाइ फ्रेमिंबै ल्हागिर येशू ख्रीष्‍टजी ङ्योए आछ्याँबै केए सजैं नोइ। ङ्योए परमेश्‍वर आबाए सैंर मैंब् धोंले खीजी ह्रोंसलाइन ङ्योए ल्हागिर सुम्पिदिइ।
GAL 1:5 परमेश्‍वरलाइ खोंयोंन् बिलेया थेबै मान तरिगे। आमेन।
GAL 1:6 ङ क्‍हेमैं म्रोंसि ङ अचम्‍म म्‍हाँदिइमुँ। येशू ख्रीष्‍टए दयाम्हाँयाउँइँले क्‍हेमैंलाइ त्‍हाँबै परमेश्‍वरलाइ च्हौ युनन् पिसि क्‍हेमैं अर्कोन् “सैं तोंबै ताँए” लिलि प्ररिइमुँ।
GAL 1:7 क्‍ह्रोंसेंन येशू ख्रीष्‍टउँइँले खबै सैं तोंबै ताँ बाहेक अर्को सैं तोंबै ताँ आरे। ख्रीष्‍टउँइले खबै सैं तोंबै ताँलाइ तो धोंइ आङ्हाँन्ले खेंमैंए सैंर्बै ताँ पोंब्मैं को-कोइ मुँ। चमैंइ क्हेमैंए सैं ङ्हिंरि लवाइमुँ।
GAL 1:8 दिलेया ङिइ बिप्रबै येशू ख्रीष्‍टउँइँले खबै सैं तोंबै ताँ भन्दा स्‍योबै ताँ ङिइ लोमिंलेया, स्‍वर्गउँइँले युबै स्‍वर्गदूतइ लोमिंलेया च म्हिइ परमेश्‍वरउँइँले सराप योंरिगे।
GAL 1:9 ङिइ ओंसोंन् बिब् धोंले तोगो या धबै बिमुँ, क्‍हेमैंइ बिश्‍वास लबै सैं तोंबै ताँ भन्दा स्‍योबै ताँ खाबज्यै क्हेमैंने बिम् बिस्याँ च म्‍हिइ परमेश्‍वरउँइँले सराप योंरिगे।
GAL 1:10 ङइ म्हिमैंउँइँले स्‍याबासि म्‍हैरिइमुँ उ परमेश्‍वरउँइँले स्‍याबासि म्‍हैरिइमुँ? ङइ म्‍हिमैंए सैं तोंन् लल् म्हैरिइमुँ वा? ङइ अझै म्‍हिमैंए सैं तोंन् लल् म्‍हैरिस्‍याँ ङ ख्रीष्‍टए सेवा लल् आखाँमल।
GAL 1:11 ओ ङए अलि-अङाँमैं, ङइ बिप्रबै सैं तोंबै ताँ म्हिउँइँले खब आङिं। चु ताँ क्‍हेमैंइ सेरिगे बिब ङए सैं मुँ।
GAL 1:12 ङइ चु सैं तोंबै ताँ म्‍हिउँइँले योंब आङिं, खाबज्यै या ङलाइ चु ताँ लोमिंब आङिं, येशू ख्रीष्‍टन् ङलाइ खीए शक्ति उँइँमिंइ। धै चु सैं तोंबै ताँ खि ङाँइँले योंब् ग।
GAL 1:13 ङइ ओंसों खैले छ्ह थोल बिबै ताँ क्‍हेमैंइ थेल् खाँइमुँ: ङइ यहूदी धर्म म्हाँदिबै त्हेर परमेश्‍वरए म्हिमैंलाइ बेल्‍ले ह्रुगुदिसि नास लल् म्हैल।
GAL 1:14 ङए खेमैंइ म्हाँदिरिबै छ्यामैं ङइ बेल्‍ले छेन्ले म्हाँदिमल। यहूदी धर्म म्हाँदिबर ङए ह्रेंर्बै थुमैं न्होंर्बै ङ चिब मुँल।
GAL 1:15 दिलेया परमेश्‍वरजी ह्रोंसए दयाम्हाँयाउँइँले ङ फिब् भन्दा ओंसोंन् खीए म्‍हि तबर ङलाइ त्‍हाँल् खाँल।
GAL 1:16 झाइले ङइ अरू ह्रेंमैं ङाँर सैं तोंबै ताँ बिप्ररिगे बिसि परमेश्‍वरजी ङलाइ खीए च्‍हए दर्शन पिंइ। खीजी छाबै दर्शन पिंबइले ङइ “सैं तोंबै ताँ खैब जा?” बिसि खाब्ने या सल्‍ला किंल् आत्हु।
GAL 1:17 ङ भन्दा ओंसोंन् कुल्मिंबै चेला चिब तब्‍मैं ङाँर सल्‍ला किंबर यरूशलेमर आह्‍याल। बरु ङ युनन् अरब बिबै ह्‍युलर ह्‍याइ, च लिउँइँ दमस्‍कस सहरर एखइ।
GAL 1:18 सोंदि लिउँइँ ङ पत्रुसने त्होबर यरूशलेम सहरउँइँ ह्‍याइ। धै चने बालु च्युसे ङ्‍हगें समा टिइ।
GAL 1:19 दिलेया चर प्रभुए अलि याकूबलाइ मत्‍त्रे ङइ त्होइ, अरू कुल्मिंबै चेला चिब खाबलाज्यै या आत्‍हो।
GAL 1:20 (ङ परमेश्‍वरए उँइँर स्योर आते, ङइ प्‍ह्रिबै ताँ क्‍ह्रोंसेंन्‍बै ग।)
GAL 1:21 च लिउँइँ ङ सिरिया नेरो किलिकिया बिबै ह्‍युलउँइँ ह्‍याइ।
GAL 1:22 च त्हे समा यहूदीया ह्‍युलर्बै बिश्‍वासीमैंइ ङलाइ आम्रोंल,
GAL 1:23 चमैंइ ङए बारेर छाबै बयन मत्‍त्रे थेल: “चइ ओंसों म्हिमैंइ बिश्‍वास आलरिगे बिसि ङिलाइ ह्रुगुदिल, तिंजोरोम् बिश्‍वास लद् बिसि च ह्रोंसइन बिप्रइमुँ।”
GAL 1:24 छले ङइ सैं एसि परमेश्‍वरए के लब् म्रोंसि चमैंइ परमेश्‍वरए मिं क्वेइ।
GAL 2:1 च्युसे प्लिदिं लिउँइँ बारनाबास ने ङ यरूशलेमर ह्‍यामा ङइ तीतसलाज्यै या बोइ।
GAL 2:2 परमेश्‍वरजी ङने चर ह्‍याद् बिबइले ङ ह्‍याइ। ङइ लरिबै के खेरो आह्‍यारिगे बिसि खाबज्यै आसेल्‍ले चर्बै चिब्मैंने मत्‍त्रे ङइ अरू ह्रेंमैंलाज्यै बिमिंबै सैं तोंबै ताँमैंए बारेर बिइ।
GAL 2:3 ङने बालु मुँबै तीतस ग्रिक मुँलेया ट्हुबि क्ह्‍याल् त्हुम् बिसि खाबज्यै कर आल्हैदि।
GAL 2:4 दिलेया स्योलिबै ताँ लोमिंब्मैं ट्हुबि क्ह्‍याल् त्हुम् बिसि खाबज्यै आसेल्‍ले खसि बिश्‍वास लब्मैंए म्‍हाँजोर होंइ। धै ख्रीष्‍टउँइँले मुक्‍ति योंब्मैंलाइ छैं लसि स्योंम्बै ठिममैं म्हाँदिबर कर ल्हैदिमल।
GAL 2:5 सैं तोंबै ताँउँइँले योंबै आशिक क्‍हेमैंए लागिर जोगेल् खाँरिगे बिसि चमैंए उँइँर ङि तिफुँइँ आकुर।
GAL 2:6 च मिं कालदिब्मैं कति ह्रब् सेब् मुँलेया ङलाइ तोइ फरक आपर्दि, तलेबिस्याँ परमेश्‍वरजी म्हि ङ्ह्‍योसि आफेल! दिलेया ङइ बिबै ताँए फिर चमैंइ तोइ ताँ आथप्दिल।
GAL 2:7 बरु सैं तोंबै ताँ बिप्रबर यहूदीमैंए ल्हागिर परमेश्‍वरजी पत्रुसलाइ त्हाँब् धोंले अरू ह्रेंमैंए ल्हागिर खीजी ङलाइ त्हाँइमुँ बिसि चमैंइ क्होइ।
GAL 2:8 तलेबिस्याँ परमेश्‍वरजी खीए शक्‍तिउँइँले सैं तोंबै ताँ बिप्रबर ज्युर चिनु लबै यहूदीमैंए ल्हागिर पत्रुसलाइ त्‍हाँब् धोंले ज्युर चिनु आलबै अरू ह्रेंमैंए ल्हागिर ङलाइ त्‍हाँब् ग।
GAL 2:9 याकूब, पत्रुस नेरो यूहन्‍ना बिश्‍वासीमैं न्होंर्बै चिब्मैं मुँल। परमेश्‍वरए दयाम्हाँया ङए फिर मुँबइले ङइ छ्याँबै के लइमुँ बिब् चमैंइ क्होसि ङ नेरो बारनाबासलाइ खेंमैंने संगतिर घ्रि तल् पिंइ। छले खेंमैंइ यहूदीमैं न्होंर, ङिइ अरू ह्रेंमैं न्होंर परमेश्‍वरए के लबै ल्हागिर चमैं ङिने सैं क्ह्रिइ।
GAL 2:10 चमैंए सैंर खेंमैंए न्होंर्बै ङ्हाँदुमैंलाइ ङिइ ल्होमिंरिगे ङ्हाँमैं, ङलै या छाबै सैंन् मुँल।
GAL 2:11 दिलेया पत्रुस एन्‍टिओखियार खमा ङइ ताँनए उँइँर चए दोषमैं उँइँमिंइ, तलेबिस्याँ चइ गल्‍ति लल।
GAL 2:12 याकूबइ कुल्मिंबै म्हिमैं एन्‍टिओखियार युब् भन्दा ओंसों चइ अरू ह्रेंमैंने बालु चब् थुँब् लमल। दिलेया च “अरू ह्रेंमैंए बिश्‍वासीमैंलाज्यै या ज्युर चिनु लल् त्‍हुम्” बिबै म्हिमैं चर फेनेबै त्हेर अरू ह्रेंमैंने बालु चब आचल्‍ले स्‍योले टिल। तलेबिस्याँ [ज्युर चिनु लल् त्हुम् बिबै यहूदीमैंइ चिनु आलब्‍मैंने चब्-टिब् लल् आत बिमल।]
GAL 2:13 छलेन अरू यहूदी बिश्‍वासीमैंज्यै या लल् आतबै केमैं लमल। चमैंइ छ लब् म्रोंसि बारनाबासज्यै या चमैंइ धोंन् लइ।
GAL 2:14 सैं तोंबै ताँइ बिब् धोंले चमैं आप्रब् म्रोंसि ताँन् म्हिमैंए उँइँर ङइ पत्रुसने बिइ, “क्‍हि यहूदी तसेया यहूदीमैंए छ्यार आप्रल्‍ले अरू ह्रेंमैं धोंले प्रइमुँ। छतसि अरू ह्रेंर्बै म्‍हिमैंने यहूदीमैंए छ्यार प्रल् त्‍हुम् बिसि क्हिइ खैले कर ल्‍हैदिम्?”
GAL 2:15 ङइ पत्रुसने अझै बिइ, “ङ्योम् फिब् ओंनोंबै यहूदी ग, अरू ह्रेंमैं धोंबै पापिमैं ङ्यो आङिं।
GAL 2:16 दिलेया ‘यहूदीमैंए ठिम म्‍हाँदिसि म्हि ठिक आठर्दि, येशू ख्रीष्‍टए फिर बिश्‍वास लसि मत्‍त्रे म्हिमैं परमेश्‍वरए उँइँर ठिक ठर्दिम्,’ बिसि ङ्योइ था सेइमुँ। ठिमइ लद् बिबै के लबर्न परमेश्‍वरए उँइँर खाबै या ठिक ठर्दिल् आखाँ। छतसि ख्रीष्‍टए फिर बिश्‍वास लसि मत्‍त्रे ङ्यो परमेश्‍वरए उँइँर ठिक ठर्दिरिगे बिसि ङ्योज्यै या ख्रीष्‍ट येशूए फिर बिश्‍वास लइ।
GAL 2:17 “ङ्यो यहूदीमैं येशू ख्रीष्‍टए फिर बिश्‍वास लसि परमेश्‍वरए उँइँर ठिक ठर्दिल् म्हैमा अझै ङ्योज्यै या ठिम म्हाँदिब् पिसि आछ्याँबै के लरिब् स्यास्याँ, ख्रीष्‍टजी म्हिमैंलाइ ‘तम् तम्, आछ्याँबै के ललेन् तम्’ बिम् रो वा? आबि! तिफुँइ आबि!
GAL 2:18 तलेबिस्याँ ह्रोंसइ म्‍हाँदिब् पिवाबै ठिम धबै ङइ म्‍हाँदिस्‍याँ ङइ ह्रोंसलाइन ङ आछ्याँबै के लबै म्हि ग बिबै प्रमण पिंम्।
GAL 2:19 तलेबिस्याँ ङ परमेश्‍वरए ल्हागिर सोरिगे बिसि ओंसोंबै ङइ म्हाँदिबै ठिमइ लमा ठिमए ल्हागिर ङ सिब् धोंन् तइमुँ।
GAL 2:20 ङ ख्रीष्‍टने बालुन् क्रूसर च्‍योसि सिइमुँ। छतसि तारे पिरु सोब ङ आङिं, दिलेया ख्रीष्‍ट ङए सैं न्‍होंर तसि सोइमुँ। तोगो चु ज्युर ङ सोरिबै छ्ह परमेश्‍वरए च्‍ह येशू ख्रीष्‍टए फिर बिश्‍वास लसि सोरिबै छ्ह ग, तलेबिस्याँ खीजी ङलाइ म्हाँया लसि ङए ल्हागिर खीए ज्युन् सुम्‍पिदिइ।
GAL 2:21 छतसि ङइ खोंयोंइ बिलै परमेश्‍वरए दयाम्हाँयाए फिर भर लम्, तलेबिस्याँ ठिम म्‍हाँदिसि म्हिमैं परमेश्‍वरए उँइँर ठिक ठर्दिल् खाँम् बिस्‍याँ ख्रीष्‍ट फाक्‍कर्न सिइ!”
GAL 3:1 ओ बुद्धि आरेबै गलातीमैं! खाबइ क्‍हेमैंलाइ म्होंनि झोंइ? येशू ख्रीष्‍ट क्रूसर च्‍योवाबै ताँ क्हेमैंने ङिइ छेनाले बिल।
GAL 3:2 ङ क्हेमैंने ताँ घ्रि ङ्योएम्: परमेश्‍वरए पबित्र प्ल्ह क्‍हेमैंइ खैले योंइ? ठिमइ बिब् धोंले लसि योंइ उ, सैं तोंबै ताँ थेसि क्वेंबइले योंइ?
GAL 3:3 क्‍हेमैं तले छले बुद्धि आरेब्‍मैं धों तल? क्‍हेमैंइ परमेश्‍वरए पबित्र प्ल्हउँइँले छ्ह थोबै सुरु लसि धबै ह्रोंसए सैंर तो मैंमुँ छान् लप्रसि छ्ह थोल् म्‍हैम्‍मा?
GAL 3:4 तिंयाँ समा च्‍हौ ल्‍हें दुःख क्‍हेमैंइ फाक्‍कर्न योंइ वा? क्हेमैंइ योंबै दुःख फाक्‍कर्न आतरिगे!
GAL 3:5 परमेश्‍वरजी क्‍हेमैंलाइ पबित्र प्ल्ह पिंसि क्हेमैंए म्हाँजोर खीजी औदिबै केमैं लम्। छाबै केमैं खीजी क्‍हेमैंइ ठिमइ बिब् धोंबै के लसि लब् उ, येशू ख्रीष्‍टउँइँले खबै सैं तोंबै ताँ थेसि क्हेमैंइ बिश्‍वास लबइले लब् जा?
GAL 3:6 स्‍योंम्‍बै अब्राहामलाइ मैंन्दि। “अब्राहामइ परमेश्‍वरए फिर बिश्‍वास लइ, छतसि परमेश्‍वरजी चलाइ ठिक ठर्दिमिंइ।”
GAL 3:7 छतसि खा-खाबमैंइ बिश्‍वास लमुँ, चमैंन् अब्राहामए सन्‍तान ग बिसि क्‍हेमैंइ क्होल् त्‍हुम्।
GAL 3:8 परमेश्‍वरजी अरू ह्रेंमैंलासेया खीए फिर्बै बिश्‍वासर्न ठिक ठर्दिमिंब्‍मुँ बिबै ताँ ओंसोंन् छ्वेर प्ह्रिथेंल। छतसि परमेश्‍वरजी अब्राहामलाइ “क्‍हिउँइँलेन् ताँन् ह्रेंमैंइ आशिक योंब्‍मुँ” बिसि सैं तोंबै ताँ बिल।
GAL 3:9 छतसि अब्राहामइ परमेश्‍वरए फिर बिश्‍वास लसि आशिक योंइ, च धोंलेन् अरू म्हिमैंज्यै या परमेश्‍वरए फिर बिश्‍वास लस्याँ आशिक योंब्मुँ।
GAL 3:10 दिलेया ठिमइ बिब् धोंले के लसि परमेश्‍वरए उँइँर ठिक ठर्दिबै आशा लब्मैंइ सराप योंम्, तलेबिस्याँ “ठिमर प्‍ह्रिबै ताँन् ताँमैं छेनाले आम्हाँदिब्मैंइ सराप योंम्।” बिसि परमेश्‍वरए छ्वेर प्‍ह्रिइमुँ।
GAL 3:11 छतसि ठिमइ बिब् धोंले लसि खाबै या परमेश्‍वरए उँइँर ठिक ठर्दिल् आखाँ बिसि परमेश्‍वरए छ्वेर छेनाले प्‍ह्रिथेंइमुँ: “खाब् म्‍हिइ परमेश्‍वरए फिर बिश्‍वास लमुँ, च म्‍हिन् खीए उँइँर ठिक ठर्दिब्मुँ, धै चइ खोंयोंइ आखाँबै छ्ह योंब्‍मुँ।”
GAL 3:12 दिलेया ठिमइ बिब् धोंले लबै केमैं नेरो परमेश्‍वरए फिर्बै बिश्‍वासए ताँमैं स्यो स्यो ग, तलेबिस्याँ “खाबइ ठिमइ बिब् धोंबै केमैं लमुँ, च म्‍हि ह्रोंसइ लबै केमैंउँइँलेन् सोब्मुँ।”
GAL 3:13 ङ्योइ योंल् त्हुबै सराप खीजी नोइ, ठिमर्बै सरापउँइँले सै फोसि ङ्योलाइ खामिंइमुँ। तलेबिस्याँ “सिं धुँर च्‍योसि सिब्मैं, परमेश्‍वरउँइँले सराप योंब्मैं ग,” बिसि परमेश्‍वरए छ्वेर प्‍ह्रिइमुँ।
GAL 3:14 परमेश्‍वरजी अब्राहामने पिंबै आशिक येशू ख्रीष्‍टउँइँले अरू ह्रेंमैंज्यै या योंरिगे धै खीजी बाछा फैसि पिंम् बिबै पबित्र प्ल्ह ङ्योए बिश्‍वासउँइँले ङ्योइ योंरिगे बिसि ख्रीष्‍टजी सै फोसि ङ्योलाइ खामिंइ।
GAL 3:15 ओ ङए अलि-अङाँमैं, नमुना घ्रि बिले: तिखे पक्‍का तयाल् खाँबै बाछा कबूल खाबज्यै या प्लिंल् आखाँ, अर्को ताँ या थप्दिल् आखाँ।
GAL 3:16 छलेन अब्राहाम नेरो चए सन्‍तान न्होंर्बै म्हि घ्रिने परमेश्‍वरजी बाछा फैइमुँ। छ्वेर “ल्हें म्हिने बाछा फैइमुँ” आबि, बरु “क्‍हिए सन्‍तान न्होंर्बै म्हि घ्रि” बिसि म्‍हि घ्रिने मत्‍त्रे बाछा फैमुँ। च म्‍हि ख्रीष्‍ट ग।
GAL 3:17 ङइ बिल् म्हैबै ताँ चुन् ग: परमेश्‍वरजी अब्राहामने फैबै बाछा प्लिब्रासे सोंच्‍यु बर्ष लिउँइँ पिंबै ठिमइ प्लिंल् आखाँ, आस्याँ बाछा केर आफेब् तयामल।
GAL 3:18 परमेश्‍वरउँइँले योंबै आशिक ठिमर बिब् धोंले केमैं लसि योंम् बिस्‍याँम्, परमेश्‍वरजी फैबै बाछाउँइँले आशिक आयोंमल। छ आङिं, तलेबिस्याँ परमेश्‍वरजी बाछा फैसिन् अब्राहामलाइ च आशिक छलेन् पिंइ।
GAL 3:19 छ बिस्‍याँ ठिम तले चैदिइ? तलेबिस्याँ अब्राहामए सन्‍तान न्होंर्बै बाछा योंबै म्‍हि ख्रीष्‍ट आयुन् समा आछ्याँबै केमैं तो जा बिसि उँइँबै ल्हागिर ठिम चैदिल। च ठिम स्‍वर्गदूतमैंउँइँले योंइ धै म्हिमैंलाइ स्‍वर्गदूतमैंने क्ह्रिमिंबै ल्हागिर मोशाइ च ठिम स्‍वर्गदूतमैंए योउँइँले किंसि म्हिमैंलाइ पिंइ।
GAL 3:20 क्ह्रिमिंबै म्हि तबै ल्हागिर बाछा लबै टोलि ङ्हिं तल् त्हुम्, दिलेया परमेश्‍वर घ्रिन् मुँ। (क्ह्रिमिंबै म्हि आरेलै खीजी आब्रहामने बाछा फैइ)।
GAL 3:21 छ बिस्‍याँ ठिम परमेश्‍वरजी फैबै बाछाए बिरोधर तइ वा? आत, छाबै ताँ कत्ति तल् आखाँ! म्हिमैंइ खोंयोंइ आखाँबै छ्ह योंरिगे बिसि ठिम पिंब् ग बिस्याँ, ठिमइ लद् बिबै केमैं लसिन् म्हिमैं परमेश्‍वरए उँइँर ठिक ठर्दिमल।
GAL 3:22 दिलेया “ताँन् म्‍हिमैं पापए न्होंर मुँ” बिसि छ्वेइ बिइमुँ। छतसि परमेश्‍वरजी बाछा फैसि पिंम् बिबै खोंयोंइ आनुबै छ्ह येशू ख्रीष्‍टए फिर बिश्‍वास लबइले मत्‍त्रेन् योंइमुँ।
GAL 3:23 ङ्योइ ख्रीष्‍टउँइँले खबै सैं तोंबै ताँ आथेन् समा ङ्यो ठिमए न्होंर्न मुँल। ठिमइ ङ्योलाइ कैदिमैं धोंलेन् च्‍युथेंल।
GAL 3:24 खीए फिर बिश्‍वास लबै त्हे आखन् समा परमेश्‍वरए उँइँर ठिक ठर्दिबै ल्हागिर ङ्योलाइ लोदा-सैंदा लसि ख्रीष्‍ट समा डोरेबर खीजी ङ्योलाइ ठिम पिंइ।
GAL 3:25 तारेम् ङ्योइ बिश्‍वास लबइले ङ्योलाइ लोदा-सैंदा लबै ठिम आचैदि।
GAL 3:26 येशू ख्रीष्‍टए फिर बिश्‍वास लबइले क्‍हेमैं ताँन् परमेश्‍वरए प्हसेमैं तइमुँ,
GAL 3:27 तलेबिस्याँ क्‍हेमैं बप्‍तिस्‍मा किंब्मैं ख्रीष्‍टने घ्रिन् तइमुँ। छतसि छारा क्‍वें खिब् धोंलेन क्हेमैंइ ख्रीष्‍टए छ्याँबै बानि किंइमुँ।
GAL 3:28 छतसि ङ्यो न्होंर खाबै या तोइ सैरैया फरक आरे - यहूदीमैं मुँलेया, अरू ह्रेंमैं मुँलेया, केब्छैं ङिंलेया केब्छैं आङिंलेया, मुँयुँ मुँलेया च्हमिरि मुँलेया, तोइ फरक आरे। तलेबिस्याँ क्‍हेमैं ख्रीष्‍ट येशूने घ्रिन् तसि ताँन् घ्रिन् तइमुँ।
GAL 3:29 छले क्‍हेमैं ख्रीष्‍टने घ्रिन् तबइले क्‍हेमैं अब्राहामए सन्‍तान ग। छतसि परमेश्‍वरजी अब्राहामने बाछा फैसि पिंम् बिबै आशिकए हकवालामैं क्‍हेमैंन् ग।
GAL 4:1 ङइ बिल् म्हैबै ताँ चुन् ग: हकवाला ताँन् सम्‍पत्तिए क्‍ल्‍हे तनाबिलेया च उमेर आयुन् समा केब्छैं धोंलेन् टिल् त्‍हुम्।
GAL 4:2 झाइले आबाइ तोक्दिबै त्हे समा च कोलो ङ्ह्‍योबै म्हिमैंए न्होंर टिल् त्‍हुम्।
GAL 4:3 च धोंलेन् ङ्यो या कोलो मुँन् समा चु ह्‍युलर्बै छ्यामैंए न्होंर मुँल।
GAL 4:4 दिलेया तोक्दिबै त्हे पूरा तमा परमेश्‍वरजी ह्रोंसए च्‍ह कुल्‍मिंइ। खी म्‍हि तसि च्हमिरिए कोखाउँइँले ठिमए न्होंर फिइ।
GAL 4:5 ङ्यो खीए प्हसेमैं तरिगे बिसि परमेश्‍वरजी ठिमए न्होंर टिब्‍मैंलाइ सै फोसि खाबै ल्हागिर ह्रोंसए च्हलाइ कुल्मिंइ।
GAL 4:6 क्‍हेमैं खीए प्हसेमैं तबइले परमेश्‍वरजी ह्रोंसए च्‍हए प्ल्ह ङ्योए सैंर कुल्‍मिंइमुँ। छतसि च प्ल्हउँइँले ङ्योइ परमेश्‍वरने “आबा, ओ ङए आबा” बिम्।
GAL 4:7 छतसि तारे क्हेमैं केब्छैं आङिं, क्हेमैं परमेश्‍वरए प्हसेमैं ग। धै क्हेमैं खीए प्हसेमैं तबइले खीजी क्हेमैंलाइ हगवालामैं या लमिंइमुँ।
GAL 4:8 ओंसों परमेश्‍वरलाइ ङो आसेमा क्‍हेमैं परमेश्‍वर आङिंबै देवतामैं म्हाँदिसि चमैंए न्होंर मुँल।
GAL 4:9 दिलेया तोगो क्‍हेमैंइ परमेश्‍वरलाइ ङो सेइमुँ - बिलन् त्हुमा: परमेश्‍वरजी क्‍हेमैंलाइ ङो सेइमुँ। परमेश्‍वर ङो सेसेया क्‍हेमैं तले ओंसोंन् म्हाँदिबै केर आफेबै सैमैंन् म्हाँदिसि धबै चु ह्‍युलर्बै छ्यामैंए न्होंर तदा ङ्हाँमुँ?
GAL 4:10 क्‍हेमैंइ अझै दिनमैं ङ्ह्‍योसि, बारमैं बार्दिसि, छ्याँब आछ्याँब म्हैंन ङ्‍ह्‍योसि, ल्हो क्ह्रिम् उ आक्ह्रि बिसि स्योंम्बै छ्यान् म्हाँदिम्!
GAL 4:11 छतसि ङ न्हुँ खइमुँ! ङए सैंरम् क्‍हेमैंए ल्हागिर ङइ के लब फाक्‍कर्न तइ ङ्हाँइमुँ।
GAL 4:12 ओ अलि-अङाँमैं, क्‍हेमैं या ङ धोंन् तद् बिसि ङइ क्‍हेमैंने यो छ्युँ लम्। तलेबिस्याँ ङै या क्‍हेमैं धोंन् तइमुँ। क्‍हेमैंइ ङए न्होह्रों तोइ आलइमुँ।
GAL 4:13 क्हेमैं ङाँर सैं तोंबै ताँ ओंसोंबै लार बिखमा ङ नरिल बिब क्‍हेमैंइ सेइमुँ।
GAL 4:14 ङ छले नसि क्‍हेमैंलाइ ल्हें दुःख पिंलेया तो तलै तरिगे बिसि क्‍हेमैंइ ङलाइ हेल आल, दिलेया परमेश्‍वरए स्वर्गदूत नेरो ख्रीष्‍ट येशूलाइन धोंले क्‍हेमैंइ ङलाइ म्हाँया लइ।
GAL 4:15 क्‍हेमैं च त्हेर बेल्‍ले सैं तोंल। ङइ क्‍हेमैंए ल्हागिर चु ग्वाइ पिंल् खाँम्: क्‍हेमैंइ पिंल् तबै सै मुँस्याँ क्‍हेमैंए मिइ या तेसि ङलाइ पिंमल! दिलेया तोगो तो तइ?
GAL 4:16 ङइ क्‍हेमैंने क्ह्रोसेंन्बै ताँ बिमिंबइले ङ क्‍हेमैंए शत्तुर तइ वा?
GAL 4:17 च स्‍योर ताँ लोमिंब्‍मैंइ क्‍हेमैंलाइ खेंमैं ङाँइ बोबै भों लम्, दिलेया क्हेमैंए फिर आछ्याँबै सैं मैंम्। चमैंइ बिबै ताँ क्‍हेमैंइ बेल्‍ले सैं तोंदै क्वेंरिगे बिसि चमैंइ क्‍हेमैंलाइ ङि ङाँइँले फ्रेसि बोल् म्‍हैम्।
GAL 4:18 छ्याँबै के लबर भों खब छ्याँब् ग। ङ क्हेमैं ङाँर मुँमा मत्‍त्रे आङिं, खोंयोंन् बिलै छाबै केमैं लरिल् त्हुम्।
GAL 4:19 ओ, ङए कोलोमैं, क्‍हेमैंए बानि ब्योर ख्रीष्‍टए बानि ब्योर धों आतन् समा सुत्‍केरि बेथा ल्‍हैदिसि नबै च्हमिरि धोंले ङए सैं नसिन् मुँ।
GAL 4:20 ङ तोगोन् क्‍हेमैं ङाँर मुँस्याँ ङइ छले ताँ लल् आत्हुमल। ङ तोगो क्हेमैं ङाँइले ह्रेंगो मुँ, छतसि क्‍हेमैंने खैले ताँ लल् त्हुम् बिसि ङ अलमल् तइमुँ।
GAL 4:21 क्‍हेमैं ठिमए न्होंर टिदा ङ्हाँब्‍मैंइ ङने चु ताँ बिद्: ठिमइ तो बिइमुँ बिसि क्‍हेमैंइ आसेइमुँ वा?
GAL 4:22 अब्राहामल च्‍ह ङ्हिं मुँल। घ्रि खीए केब्स्यो ङाँइँले योंल, अर्को ह्रोंसए प्‍ह्रेंस्‍यो सारा ङाँइँले योंल बिसि परमेश्‍वरए छ्वेर प्‍ह्रिइमुँ।
GAL 4:23 केब्स्‍यो हागार ङाँइँले योंबै च्ह अब्राहामइ ह्रोंसए ज्युर्बै इच्छाउँइँले योंल। दिलेया ह्रोंसए प्‍ह्रेंस्‍यो सारा ङाँइँले योंबै च्ह बिस्याँ परमेश्‍वरजी च्ह पिंम् बिसि बाछा फैबइले योंल।
GAL 4:24 चु च्हमिरि ङ्हिंउँइँले ङ्योइ छले क्होल् खाँम्: च च्हमिरि ङ्हिंए मतलब बाछा ङ्हिं ग। हागार बिबै केब्स्‍योए मतलब सिनै बिबै कोंउँइँले युबै बाछा ग। च केब्स्‍योइ केब्छैं तल् त्हुबै प्‍हसेमैं फिल।
GAL 4:25 च सिनै बिबै कों अरब ह्‍युलर मुँ। हागारए मतलब तिंजोरोबै यरूशलेम ग। चर्बै ताँन् म्हिमैं ठिमए न्होंर मुँबइले केब्स्योए सन्तानमैं धोंन् तइ।
GAL 4:26 दिलेया स्‍वर्गर्बै यरूशलेम बिस्याँ खाँसों ङ्हाँन् तब मुँ। च ङ्योए आमा धों तब् ग।
GAL 4:27 च यरूशलेम ङ्हिंए बारेर परमेश्‍वरए छ्वेर छले प्‍ह्रिइमुँ, “ओ थरिस्योमैं, सैं तोंन्! ओ सुत्‍केरि बेथा सैदिल् आत्हुबै च्हमिरि, सैं तोंसि कै तेद्! तलेबिस्याँ प्युँ मुँबै च्हमिरिल् भन्दा प्‍युँइ वाबै च्हमिरिल् प्‍हसेमैं ल्‍हें तब्मुँ।”
GAL 4:28 ओ अलि-अङाँमैं, इसहाक धोंले ङ्यो या परमेश्‍वरजी फैबै बाछाउँइँले योंबै प्हसेमैं ग।
GAL 4:29 अब्राहामए ज्युर्बै इच्छाउँइँले केब्स्योइ योंबै च्‍हइ च त्हेर परमेश्‍वरए प्ल्हउँइँले योंबै च्‍हलाइ ह्रुगुदिल। च धोंलेन् तिंजोरो या छान् तम्।
GAL 4:30 दिलेया परमेश्‍वरए छ्वेर तो बिइमुँ बिस्‍याँ “केब्स्‍यो नेरो चए च्‍हलाइ ल्हावाद्, तलेबिस्याँ केब्स्यो ङाँइँले योंबै च्‍हइ, केब्स्यो आङिंबै प्‍ह्रेंस्‍यो ङाँइँले योंबै च्‍हइ योंब् धों तबै हक योंल् आखाँ।”
GAL 4:31 छतसि ओ ङए अलि-अङाँमैं, ङ्यो केब्स्‍योए प्‍हसेमैं आङिं, ङ्योम् केब्स्यो आङिंबै प्ह्रेंस्यो ङाँइँले योंबै प्‍हसेमैं ग।
GAL 5:1 ङ्यो केब्छैं-केब्स्‍योमैं आतबै ल्हागिर ख्रीष्‍टजी सै फोसि ङ्योलाइ ठिमउँइँले खामिंइ। छतसि सैं भोंब् लद्। क्‍हेमैं धबै केब्छैं-केब्स्‍योमैं आतद्!
GAL 5:2 थेद्, ङ पावलइ क्हेमैंने बिमुँ: क्‍हेमैंइ यहूदी ठिमर बिब् धोंले ज्युर चिनु लइ बिस्‍याँ क्‍हेमैंए ल्हागिर ख्रीष्‍टजी नोमिंबै दुःख फाक्‍कर्न तइ। खी ङाँइँले क्हेमैंइ तोइ फायदा आयों।
GAL 5:3 ङ धबै चु ताँ बिम्: यहूदी ठिमर बिब् धोंले खाबइ ज्युर चिनु लमुँ, चइ ठिमर्बै ताँमैं ताँन् छेनाले म्‍हाँदिल् त्‍हुम्।
GAL 5:4 ठिमर बिब् धोंले लसि परमेश्‍वरए उँइँर ठिक ठर्दिल् म्‍हैब्मैंइ खेंमैंलाइ ख्रीष्‍टउँइँले फ्रेवाइमुँ, धै परमेश्‍वरए दयाम्हाँयाउँइँले या ह्रेंगो तयाइमुँ।
GAL 5:5 दिलेया ङ्योइ बिस्याँ पबित्र प्ल्हउँइँलेन् ख्रीष्‍टए फिर्बै बिश्‍वासइ परमेश्‍वरए उँइँर ठिक ठर्दिबै ल्हागिर ङ्योइ खीए घ्याँन् ङ्ह्‍योरिम्।
GAL 5:6 तलेबिस्याँ ङ्यो ख्रीष्‍ट येशूने घ्रिन् तमा ज्युर चिनु ललेया आललेया तोइ फायदा आरे। बरु थेबै ताँ तो मुँ बिस्‍याँ, ङ्यो ख्रीष्‍टए फिर बिश्‍वास लब्मैंइ अरूमैंए फिर म्हाँया लसि चमैंए ल्हागिर छ्याँबै के लल् त्‍हुम्।
GAL 5:7 ओंसों क्‍हेमैं छेनालेन् प्ररिल। तोगो खाबइ क्‍हेमैंलाइ चु क्ह्रोंसेंन्बै छ्याँबै घ्‍याँर प्रल् आपिं?
GAL 5:8 चइ तो बिसि क्‍हेमैंलाइ वाँइ? चु छाबै वाँबै ताँ क्‍हेमैंलाइ हुइबै परमेश्‍वर ङाँइँले खब आङिं।
GAL 5:9 चु अहान् मैंन्दि, “च्युगुदे प्लेढाइ ताँन् क्हें फुल्दिम्।”
GAL 5:10 ङ्यो ताँन् प्रभुए फिर बिश्‍वास लब्मैं ग। छतसि ङइ बिबै ताँ थोसि क्हेमैं तिराइ ल्हैदिरिब् आरे बिसि ङइ बिश्‍वास लइमुँ। क्‍हेमैंए सैंलाइ खैला तोला ङ्हाँन् लबै म्हि, खाब मुँलेया, चलाइ परमेश्‍वरजी सजैं पिंब्‍मुँ।
GAL 5:11 ओ अलि-अङाँमैं, “यहूदीमैंइ धोंलेन् क्हेमैंज्यै ज्युर चिनु लल् त्‍हुम्” बिसि तोगो समा ङइ बिप्रस्याँ ङए फिर च्हौ थेबै दुःख तले खइदि? छ बिस्याँम् “ख्रीष्‍ट क्रूसर च्योसि ङ्योए ल्हागिर सिब् ग” बिबै ताँर बिरोध आखमल।
GAL 5:12 क्‍हेमैंलाइ खैला तोला ङ्हाँन् लसि दुःख पिंब्मैंइमि ट्हुबि मत्‍त्रे आङिं, ह्रोंसए ज्युर्बै भागन् क्‍याँस्याँ तमल।
GAL 5:13 ओ अलि-अङाँमैं, क्‍हेमैं ठिमए न्होंर टिल् आत्हुरिगे बिसि परमेश्‍वरजी क्‍हेमैंलाइ त्‍हाँब् ग। छले क्हेमैं खाँसो ङ्हाँन् तल् योंबइले तारे पिरु ह्रोंसए सैंउँइँले खबै आछ्याँबै ताँमैंए लिलि आप्रद्, बरु घ्रिइ घ्रिने म्हाँया लसि घ्रिइ घ्रिए सेवा लद्।
GAL 5:14 तलेबिस्याँ ताँन् ठिमर्बै ताँमैं चु ताँ घ्रिर्न पूरा तइमुँ: “क्हिइ ह्रोंसलाइ म्हाँया लब् धोंले ङ्‍हेब् ट्हुब्मैंए फिरै या म्हाँया लद्।”
GAL 5:15 तलेबिस्याँ क्‍हेमैंए न्होंर्न क्ह्‍योंर्बै खेदोमैं नेब् धोंले घ्रिइ घ्रिलाइ दुःख पिंइ बिस्याँ क्‍हेमैंइ घ्रिइ घ्रिलाइ नास लवाब्‍मुँ। छतसि न्ह क्रों मि क्रों तद्।
GAL 5:16 धबै ङ क्हेमैंने बिमुँ: पबित्र प्ल्हजी बिब् धोंले प्रद्, ह्रोंसए सैंउँइँले खबै आछ्याँबै ताँमैंए लिलि आप्रद्।
GAL 5:17 तलेबिस्याँ म्‍हिमैंए सैंउँइँले खबै आछ्याँबै इच्‍छाइ पबित्र प्ल्हए बिरोध लम्, छलेन पबित्र प्ल्हए छ्याँबै इच्‍छाइ म्‍हिमैंए सैंउँइँले खबै आछ्याँबै इच्‍छाए बिरोध लम्। चुमैं ङ्हिं आक्‍ह्रि। छतमा क्‍हेमैंइ छ्याँबै केमैं लल् म्हैलेया लल् आखाँ।
GAL 5:18 दिलेया पबित्र प्ल्हजी बिब् धोंले क्‍हेमैं प्रइ बिस्याँ क्‍हेमैं ठिमए न्होंर टिल् आत्‍हु।
GAL 5:19 ह्रोंसए सैंउँइँले खबै आछ्याँबै केमैं छेनाले म्रोंल् खाँम्। च केमैं चुमैंन् ग: ब्यभिचार लब, आछ्याँबै सैं मैंब, फापिन् तबै केमैं लब,
GAL 5:20 कु पूजा लब, मन्‍त्र-तन्‍त्र लब, आगुए न्होह्रों लब, प्होंगि कैगि लब, आगुए फिर ह्रिस लब, आगुल छ्याँब तरिगे आङ्हाँब, आक्ह्रिल् लब, आक्ह्रिसि टोलि-टोलि तब,
GAL 5:21 आगुए सैमैं म्रोंसि ह्रिस लब, प्हा ल्‍हें थुँब, सयल लप्रब, छाबै केमैं ताँन् आछ्याँबै सैंउँइँले खबै केमैं ग। ङइ क्‍हेमैंलाइ ओंसोंन् लोदा सैंदा लब् धोंले तोगो या बिम्: छाबै केमैं लप्रब्मैं, परमेश्‍वरए ग्याल्सर्बै हगवाला तरिब् आरे।
GAL 5:22 दिलेया पबित्र प्ल्हए रोमैं छाब् ग: आगुए फिर म्हाँया खब, सैं तोंब, शान्ति तब, सैदिल् खाँब आगुए फिर ल्हयो खब, अरूमैंल छ्याँब तरिगे ङ्हाँब, लम् बिबै के पूरा लब,
GAL 5:23 कुरल् खाँब, आछ्याँबै केमैं आल बिसि सैं फैल् खाँब। चु ताँन् पबित्र प्ल्हए रोमैं ग। छाबै रोमैं मुँबै म्हिमैंए ल्हागिर ठिम आचैदि।
GAL 5:24 येशू ख्रीष्‍टए म्हिमैंइ खेंमैंए सैंउँइँले खबै आछ्याँबै इच्छामैं नेरो आछ्याँबै केमैं येशूने प्रेन् क्रूसर च्योवासि नास लवाइमु।
GAL 5:25 पबित्र प्ल्हउँइँले ङ्योइ छ्ह योंसेरो ङ्यो खीजी बिब् धोंलेन् प्रले।
GAL 5:26 ङ्यो तिफुँइ थेब् आप्‍हैंले, अरूलाइ ह्रिस खल् आलले, झाइले अरूमैंए फिर ह्रिस आलले।
GAL 6:1 ओ ङए अलि-अङाँमैं, खाबज्यै आछ्याँबै केमैं लब स्यास्याँ क्हेमैं पबित्र प्ल्ह मुँबै म्हिमैं च्योंने तसि चलाइ छ्याँबै घ्याँर पखल् त्हुम्। झाइले क्‍हेमैं या छाबै आछ्याँबै केर आफसेरिगे बिसि छेनाले मैंब च्हैंब लसि न्ह क्रों मि क्रोंले टिल् त्‍हुम्।
GAL 6:2 घ्रिए फिर दुःख तमा घ्रिइ ल्होद्। छलमा क्‍हेमैंइ ख्रीष्‍टजी पिंबै ठिम पूरा लब्‍मुँ।
GAL 6:3 तलेबिस्याँ तोइ आह्रबै म्हिइ “ङ थेबै म्हि ग” बिसि ह्रब् प्हैंस्याँ चइ ह्रोंसलाइन धोका पिंम्।
GAL 6:4 छतसि ताँन् म्‍हिमैंइ ह्रोंसइ लबै केमैं ठिक मुँ उ आरे बिसि बिचार लरिगे, धै ह्रोंसइ लबै केमैं छ्याँब तब् म्रोंसि च सैं तोंरिगे। दिलेया अरूइ भन्दा ङइ छ्याँबै केमैं लइ बिसि थेब् आप्हैंरिगे।
GAL 6:5 तलेबिस्याँ ताँन् म्‍हिमैंइ ह्रोंसइ लल् त्‍हुबै के ह्रोंसइन लल् त्‍हुम्।
GAL 6:6 प्रभुए ताँ लोब्मैं ताँनइ ह्रोंसने मुँबै ताँन् छ्याँबै सैमैं ह्रोंसलाइ ताँ लोमिंबै म्हिलाज्यै या पिंरिगे।
GAL 6:7 क्हेमैंइ परमेश्‍वरलाइ स्‍योर तेसि धोका पिंल् आखाँ! छतसि क्हेमैंइ ह्रोंसलाइ धोका आपिंन्! म्‍हिइ तो रुँइँमुँ चन् खैंम्।
GAL 6:8 खाबइ ह्रोंसए आछ्याँबै सैंउँइँले आछ्याँबै इच्‍छाए केमै लमुँ, च नास तयाब्‍मुँ, दिलेया खाबइ पबित्र प्ल्हजी बिब् धोंबै केमैं लमुँ, चइ पबित्र प्ल्हउँइँलेन् खोंयोंइ आखाँबै छ्ह योंब्‍मुँ।
GAL 6:9 छतसि ङ्योइ आनारल्‍ले अरूमैंलाइ ल्होले, तलेबिस्याँ ङ्यो आनारल्‍ले के लसिन् टिइबिस्‍याँ ठिक त्हेर ङ्योइ रोमैं योंब्‍मुँ।
GAL 6:10 छतसि मौका योंन् समा ङ्योइ ताँन् म्हिमैंलाइ ल्होबै केमैं लरिले, खासगरि बिश्‍वासी अलि-अङाँमैंलाइ ल्होले।
GAL 6:11 क्हेमैंए ल्हागिर ङइ ह्रोंसए योइन थे-थेबै अक्षरर चु ताँ प्‍ह्रिरिइमुँ।
GAL 6:12 क्हेमैंलाइ ज्युर चिनु लल् त्‍हुम् बिसि कर ल्‍हैदिब्मैं बैरुबै सै म्रोंसि प्हैंदा ङ्हाँब्मैं ग। “परमेश्‍वरउँइँले खटिदिबै ख्रीष्‍ट म्रुँ क्रूसर च्योसि सिइ,” बिबै ताँ बिप्रमा यहूदीमैंउँइँले खेंमैंलाइ तोइ दुःख आतरिगे बिब् मैंसि चमैंइ “ज्युर चिनु लल् त्‍हुम्” बिब् ग।
GAL 6:13 बिलन् त्हुमा च ज्युर चिनु लब्‍मैंज्‍यै या यहूदी ठिम आम्हाँदि। दिलेया क्‍हेमैंए ज्युर्बै चिनुए बारेर ह्रोंस थेब् प्‍हैंल् योंरिगे बिसि चमैंइ क्‍हेमैंलाइ ज्युर चिनु लल् त्‍हुम् बिसि कर ल्‍हैदिम्।
GAL 6:14 दिलेया ङ्योए प्रभु येशू ख्रीष्‍टए क्रूसए बारेर बाहेक तोइ सैरै या प्हैंबै ताँ ङ ङाँइँले ह्रेंगोन् तरिगे। खी ङ्योए ल्हागिर क्रूसर सिमिंबइले ह्‍युलर्बै सैमैं ङए ल्हागिर तोइ आङिं, ह्‍युलए ल्हागिर ङ क्रूसर च्योवासि सिब् धोंन् तइ।
GAL 6:15 छतसि ज्युर चिनु ललेया आललेया तोइ आत, बरु छारा छ्ह योंसि छारा म्‍हि तब ताँन् भन्दा थेबै ताँ ग।
GAL 6:16 छतसि ङइ बिब् धोंले छ्ह थोब्मैंए फिर नेरो परमेश्‍वरए ताँन् म्‍हिमैंए फिर परमेश्‍वरए दयाम्हाँया नेरो शान्ति खोंयोंन् बिलै तरिगे।
GAL 6:17 आखिरि ताँ: तारे खाबज्यै ङलाइ दुःख आपिंरिगे, तलेबिस्याँ ङइ ङए ज्युर येशूए ल्हागिर सैदिबै घामैंए डाम नोइमुँ।
GAL 6:18 ओ अलि-अङाँमैं, ङ्योए प्रभु येशू ख्रीष्‍टए दयाम्हाँया क्‍हेमैं तानने खोंयोंन् बिलै तरिगे। आमेन, छान तरिगे।
EPH 1:1 परमेश्‍वरए इच्‍छाउँइँले येशू ख्रीष्‍टजी कुल्मिंबै चेला चिब ङ पावलउँइँले एफिसस सहरर मुँबै बिश्‍वासीमैंलाइ जय मसीह मुँ।
EPH 1:2 ङ्योए परमेश्‍वर आबा नेरो प्रभु येशू ख्रीष्‍टउँइँले क्हेमैंइ दयाम्हाँया नेरो छिं ङ्हाँल् योंरिगे।
EPH 1:3 ङ्योए प्रभु येशू ख्रीष्‍टए परमेश्‍वर नेरो आबाए मिं थेब् तरिगे! खीजी ङ्योलाइ ख्रीष्‍टने घ्रिन् लमिंसि पबित्र प्ल्हउँइँले योंबै स्वर्गर्बै ताँन् आशिकमैं पिंइमुँ।
EPH 1:4 च आशिकमैं तो जा बिस्‍याँ, ङ्यो परमेश्‍वरए उँइँर छ्याँबै छ्ह थोल् खाँरिगे बिसि चु ह्‍युल बनेब् भन्दा ओंसोंन् ख्रीष्‍टने घ्रिन् लसि खीजी ङ्योलाइ त्‍हाँइ।
EPH 1:5 परमेश्‍वरजी ङ्योए फिर म्हाँया लसि येशू ख्रीष्‍टउँइँले खीए सन्तान तबर ङ्योलाइ ओंसों ओनोंन् त्‍हाँल। ओंसों ओंनोंन् खीजी ङ्योलाइ त्हाँबै सैं लल।
EPH 1:6 ङ्योइ च्हौ थेबै दयाम्हाँया योंबइले परमेश्‍वरएलाइ धन्यबाद पिंसि खीए मिं बेल्‍ले थेब् लले। खीजी ङ्योलाइ खीए खोबै च्‍हने घ्रिन् लमिंसि आशिकमैं छलेन् पिंइमुँ।
EPH 1:7 ङ्योइ लबै पाप त्होमिंबै ल्हागिर ख्रीष्‍टजी को बग्दिसि ङ्योलाइ खामिंइ, ङ्योए आछ्याँबै केमैं क्षमा लमिंइ। परमेश्‍वरए दयाम्हाँया बेल्‍ले थेब् मुँ!
EPH 1:8 खीजी ङ्योए फिर च्हौ थेबै दयाम्हाँया लइमुँ। खीए ताँन् ज्ञान बुद्धिउँइँले लबै चाँजो
EPH 1:9 येशू ख्रीष्‍टउँइँलेन् पूरा लब्‍मुँ बिसि परमेश्‍वरजी ओंसों ओंनोंन् मैंल। छतसि ख्रीष्‍टउँइँले तोगो खीजी च ताँ ङ्योलाइ सेल् पिंइमुँ।
EPH 1:10 च चाँजो तो जा बिस्‍याँ: खीजी तौदिबै त्हेर स्‍वर्ग नेरो पृथ्‍बीर मुँबै तोन्दोंरि सैमैं खागु लसि येशू ख्रीष्‍टए न्होंर पखब् ग।
EPH 1:11 खीजी मैंबै ताँन् केमैं परमेश्‍वरजी ह्रोंसए चाँजोर्न लम्। छले खीजी ओंसोंन् चाँजो लबइले ङि यहूदीमैंलाइ ख्रीष्‍टने घ्रिन् लमिंसि खीए म्‍हिमैं तबर त्हाँइ।
EPH 1:12 छतसि ख्रीष्‍टए फिर आशा थेंब्‍मैं न्‍होंरि ओंसोंबै म्‍हिमैं तबइले ङि यहूदीमैंइ “परमेश्‍वरए मिं बेल्‍ले थेब् लदै छ्ह थोरिगे!” बिसि खीजी ङिलाइ त्हाँइ।
EPH 1:13 छलेन क्‍हेमैं अरू ह्रेंमैंज्यै या परमेश्‍वरउँइँले योंबै मुक्‍तिए बारर्बै क्ह्रोंसेंन्बै सैं तोंबै ताँ थेसि येशू ख्रीष्‍टए फिर बिश्‍वास लइ। छतसि क्‍हेमैं या परमेश्‍वरए म्‍हिमैं तइ, धै क्‍हेमैंलाइ खीए म्हिमैं लबै ल्हागिर परमेश्‍वरजी ओंसोंन् बाछा फैबइले क्हेमैंए फिर पबित्र प्ल्हए छाप ल्हैदिइमुँ।
EPH 1:14 लिउँइँ आशिक पिब्मुँ बिसि पक्‍का लबै ल्हागिर परमेश्‍वरजी पबित्र प्ल्ह ङ्योलाइ बैना पिंब् ग। खीजी बाछा फैसि पिंम् बिबै आशिक ङ्योइ आयोंन् समा खीजी ङ्योलाइ पबित्र प्ल्ह पिंइमुँ। खीए मिं थेब लले!
EPH 1:15 क्‍हेमैंइ प्रभु येशूए फिर बिश्‍वास लसि परमेश्‍वरए ताँन् म्‍हिमैंए फिर म्हाँया लइमुँ बिबै ताँ ङइ थेइमुँ।
EPH 1:16 चु ताँ थेसि ङइ परमेश्‍वरलाइ धन्‍यबाद पिंब आपिइमुँ। ङइ खोंयोंन् बिलै क्‍हेमैंए ल्हागिर प्राथना लरिम्।
EPH 1:17 ङ्योए प्रभु येशू ख्रीष्‍टए आबा थेबै मान मुँबै परमेश्‍वरजी खीए बारेर अझै क्‍हेमैंइ छेनाले क्होबै ल्हागिर खीए ज्ञान बुद्धि नेरो पबित्र प्ल्ह पिंरिगे बिसे या ङइ क्हेमैंए ल्हागिर प्राथना लइन मुँ।
EPH 1:18 क्‍हेमैंए सैं न्‍होंर्बै मि थोंसि परमेश्‍वरए चारबै ह्‍वे म्रोंरिगे बिसे या ङइ प्राथना लम्। तलेबिस्‍याँ च ह्‍वे म्रोंस्‍याँ क्‍हेमैंइ चु ताँ सों था सेब्‍मुँ: घ्रि, खीजी प्‍हना लिउँइँ क्‍हेमैंलाइ खैबै खालर्बै छार छ्ह पिंम् बिसि क्‍हेमैंइ था सेब्‍मुँ। ङ्हिं, खीए म्‍हिमैंलाइ पिंबै बेल्‍ले छ्याँबै आशिकमैं कति थेब मुँ बिसि क्‍हेमैंइ सेब्‍मुँ।
EPH 1:19 सों, ङ्यो बिश्‍वास लब्मैंए न्होंर खीए के लबै शक्‍ति कति थेब मुँ बिसि क्‍हेमैंइ सेब्मुँ।
EPH 1:20 च थेबै शक्‍तिउँइँलेन् परमेश्‍वरजी येशू ख्रीष्‍टलाइ सिबउँइँले सोगों लमिंसि स्वर्गर ग्याल्स लरिगे बिसि खीए क्‍योलोउँइँ क्हुँल् पिंइमुँ।
EPH 1:21 चर क्हुँसि ख्रीष्‍टजी ताँन् स्‍वर्गदूतमैंए फिर, स्‍वर्गदूतमैंए चिब्मैंए फिर, अधिकारिमैंए फिर नेरो स्‍यागि-म्‍होंगिमैंए चिब्मैंए फिर, तोन्‍दोंरि सैए फिर ग्याल्स लम्। चु जुगर मत्‍त्रे आङिं, तारे तबै जुगर्बै या ताँन् थे-थेबै सैमैंए फिर ख्रीष्‍टलाइ ग्याल्स लल् पिंइमुँ।
EPH 1:22 परमेश्‍वरजी तोन्दोंरि सै ख्रीष्‍टए प्‍हले न्‍होंर थेंमिंइ। ङ्यो बिश्‍वास लब्मैंए ल्हागिर परमेश्‍वरजी ख्रीष्‍टलाइ तोन्दोंरि सैए फिर क्ल्हे लमिंइ।
EPH 1:23 ङ्यो बिश्‍वासीमैं ख्रीष्‍टए ज्यु ग। झाइले ङ्यो ख्रीष्‍टए ज्यु तसेरो ख्रीष्‍ट ङ्योए सैं न्‍होंर टिसि खीजी ङ्योलाइ खी धों तल् लमिंम्। छले ख्रीष्‍टजी ह्रोंसए सैंर मैंब् धोंले ताँन् सै तल् पिंम्।
EPH 2:1 ओंसों क्हेमैं परमेश्‍वरजी बिब् आङिंसि ह्रोंसइ लबै आछ्याँबै केमैंइ लमा सियाब् धोंन् तल।
EPH 2:2 च त्हेर क्‍हेमैं चु ह्‍युलर्बै रोसर प्रमल, धै शक्‍ति मुँबै मुर टिबै सैमैंए चिबलाइ म्‍हाँदिमल। तिंजोरो या परमेश्‍वरलाइ आम्‍हाँदिब्‍मैं च चिबए न्होंर्न टिइमुँ।
EPH 2:3 च म्हिमैं धोंलेन् ङ्यो ताँनइ ओंसों ङ्योए सैंउँइँले खबै आछ्याँबै इच्‍छा पूरा लबै ल्हागिर लोब लमल। छतसि अरूमैंने धोंले ङ्योने या परमेश्‍वर ह्रिस खल।
EPH 2:4 दिलेया सजैं पिंबै साटोर परमेश्‍वरजी बेल्‍ले ल्हयो खसि थेबै म्हाँया लइ।
EPH 2:5 छतसि ङ्योइ पाप लसि सिल् त्हुलेया खीजी ङ्योलाइ ख्रीष्‍टने बालुन् सोगों लमिंइ। परमेश्‍वरए थेबै दयाम्हाँयाजी क्‍हेमैंलाइ जोगेमिंइमुँ।
EPH 2:6 ङ्योलाइ ख्रीष्‍ट येशूने बालुन् सोगों लमिंसि ख्रीष्‍टजी ग्याल्स लबै क्‍ल्‍ह्‍योर ङ्योलाज्यै या खीजी ग्याल्स लल् पिंइ।
EPH 2:7 छाबै के तले लइ बिस्याँ तारे खबै जुगरि झन् खीए बेल्‍ले थेबै दयाम्हाँया उँइँब्‍मुँ। तलेबिस्‍याँ येशू ख्रीष्‍टजी ङ्योए ल्हागिर लबै केमैंइ लमा ङ्योइ च दयाम्हाँया योंइमुँ।
EPH 2:8 छतसि परमेश्‍वरए दयाम्हाँयाइ लमन् क्‍हेमैंए बिश्‍वासउँइँले क्हेमैंइ मुक्‍ति योंइमुँ। क्हेमैंइ छ्याँबै केमैं लसि चु मुक्‍ति योंब आङिं, चुम् परमेश्‍वरजी छलेन् पिंब् ग।
EPH 2:9 छ्याँबै केमैं लसि म्हिमैंइ मुक्‍ति योंल् आखाँ। छतसि छ्याँबै के लइ बिसि खाबै या थेब् प्हैंल् आत्हु।
EPH 2:10 परमेश्‍वरजी ङ्योलाइ ख्रीष्‍टने घ्रिन् तल् पिंसि छ्याँबै के लरिगे बिसि बनेब् ग। ङ्योइ च छ्याँबै केमैं लरिगे बिसि ओंसों ओंनोंन् खीजी च केमैंए तौदु लथेंइ।
EPH 2:11 क्हेमैं अरू ह्रेंर्बै म्हिमैंइ ज्युर चिनु आलमल। छतसि ज्युर चिनु लबै यहूदीमैंइ क्‍हेमैंलाइ च्‍योंब म्‍हाँदिसि “ज्युर चिनु आलब्‍मैं” बिमल। येशूए फिर बिश्‍वास लब् भन्दा ओंसों क्हेमैंइ खैबै छ्ह थोरिल मैंन्दि।
EPH 2:12 च त्हेर क्‍हेमैं ख्रीष्‍टउँइँले ह्रेंगो मुँल, परमेश्‍वरजी त्‍हाँबै ह्रें इस्राएलीमैंने बालु आरेल, छतसि क्‍हेमैं बिदेशिमैं धोंन् तइ टिल, परमेश्‍वरजी खीए म्‍हिमैंने बाछा फैसि पिंम् बिबै आशिकए न्होंर क्हेमैं आरेल, धै चु ह्‍युलर टिमा क्हेमैं परमेश्‍वरलाइ ङो आसेसि आशा आरेल्‍ले टिल।
EPH 2:13 ओंसों क्‍हेमैं परमेश्‍वरउँइँले ह्रेंगो मुँल दिलेया तारेम् क्‍हेमैं ख्रीष्‍टने घ्रिन् तसि ख्रीष्‍टजी ह्रोंसए कोउँइँले क्‍हेमैं परमेश्‍वरए ङाँर पखइमुँ।
EPH 2:14 छले ख्रीष्‍टजी यहूदीमैं नेरो अरू ह्रेंमैंलाइ क्‍ह्रिल् लमिंइ। स्योंम यहूदीमैंए मन्‍दिरर यहूदी नेरो अरू ह्रेंमैंलाइ फेलबै गारा घ्रि मुँल। दिलेया येशू ख्रीष्‍टजी ह्रोंसए ज्युन् पिंसि च गारा फुवासि यहूदीमैं नेरो अरू ह्रेंमैंलाइ घ्रिन् लवाइ।
EPH 2:15 खीजी यहूदी नेरो अरू ह्रेंर्बै म्हिमैंलाइ क्ह्रिमिंसि छारा ह्रें घ्रि लबर खीए ज्युर यहूदीमैंए ठिम नेरो ठिमइ लद् बिबै ताँन् छ्यामैं म्हाँदिल् आत्हुब लमिंइ।
EPH 2:16 खी क्रूसर सिमिंसि च ह्रें ङ्हिंलाइ स्यो लबै गारा नास लवाइ। झाइले ह्रें ङ्हिंलाइ घ्रिन् लसि खीजी चमैं परमेश्‍वरने बालु क्ह्रिमिंइ।
EPH 2:17 छतमा येशू युसि क्‍हेमैं परमेश्‍वरउँइँले ह्रेंगो मुँबै अरू ह्रेंमैं नेरो परमेश्‍वरने चेंदो मुँबै ङि यहूदी ह्रें ङ्हिंन-ङ्हिंनलाइन सैं तोंबै ताँ बिमिंसि क्ह्रिल् लमिंइ।
EPH 2:18 यहूदीमैं मुँलेया अरू ह्रेंमैं मुँलेया ङ्यो ताँनइ पबित्र प्ल्ह घ्रिउँइँलेन् परमेश्‍वर आबा ङाँर ह्‍याल् योंइमुँ।
EPH 2:19 छतसि क्‍हेमैं अरू ह्रेंमैं तारे बिदेशि अथवा स्‍याँमैं आङिं, परमेश्‍वरए म्‍हिमैंइ योंब् धों तबै हग अथवा नागरिकता क्हेमैंज्यै या योंइमुँ। धै क्‍हेमैं या खीए परवार्बै म्हिमैं तइमुँ।
EPH 2:20 कुल्मिंबै चेला चिब्मैं नेरो अगमबक्‍तामैंइ जग झोंइ। च जगए फिर ङि यहूदीमैंलाइ धोंले क्‍हेमैंलाज्यै या खीजी थेंमिंइमुँ। च जगए तेंर्बै क्र युँमा बिस्याँ येशू ख्रीष्‍टन् ग।
EPH 2:21 धिं बनेब्मैंइ छेनाले क्ह्रिल्‍ले गारा रुइब् धोंले ङ्योलाज्यै या ख्रीष्‍टर क्ह्रिल् लमिंइ। छले प्रभुर ताँन् क्ह्रिसि परमेश्‍वरए ल्हागिर पबित्र मन्‍दिर तइमुँ।
EPH 2:22 छले ख्रीष्‍टने घ्रिन् तबइले क्हेमैं अरू ह्रेंमैंलाज्यै या परमेश्‍वरए पबित्र प्ल्ह टिबै धिं बनेसिन् मुँ।
EPH 3:1 छतसि ङ पावल क्हेमैं अरू ह्रेंमैंए ल्हागिर प्राथना लम्। ख्रीष्‍ट येशूजी पिंबै के लबइले ङ झेलर मुँ।
EPH 3:2 अरू ह्रेंमैंए फिरै या खीए दयाम्हाँया उँइँबर परमेश्‍वरजी क्‍हेमैंए ल्हागिर्न ङलाइ खटिदिइमुँ बिसि क्‍हेमैंज्यै सेइमुँ।
EPH 3:3 परमेश्‍वरजी खीए सैंर्बै लोथेंबै चाँजो ङने बिइमुँ। चु ताँए बारेर ङइ ओंसों या च्युगुदे ताँ प्‍ह्रिल् खाँइमुँ।
EPH 3:4 क्हेमैंइ चु ताँ खेमा ख्रीष्‍टए बारेर लोथेंबै चाँजो ङइ कति ल्हें क्होइमुँ बिसि क्‍हेमैंइ सेब्‍मुँ।
EPH 3:5 स्‍योंमन् परमेश्‍वरजी म्हिमैंलाइ चु चाँजो आबिल, दिलेया तिंजोरो परमेश्‍वरजी खीए पबित्र प्ल्हउँइँले कुल्मिंबै चेला चिब्मैं नेरो अगमबक्‍तामैंने च चाँजो बिमिंइमुँ।
EPH 3:6 खीए सैंर्बै लोथेंबै चाँजो तो जा बिस्‍याँ चुन् ग: अरू ह्रेंमैंइ यहूदीमैंइ धोंलेन् सैं तोंबै ताँ क्‍वेंस्‍याँ चमैंज्यै या परमेश्‍वरउँइँले आशिक योंब्‍मुँ। अरू ह्रेंर्बै म्हि या ज्यु घ्रिर्बै भागमैं ग। परमेश्‍वरजी येशू ख्रीष्‍टउँइँले पिंम् बिसि फैबै बाछाए आशिक अरू ह्रेंमैंज्यै या योंइमुँ।
EPH 3:7 खीए दयाम्हाँयाउँइँले शक्‍तिए बरदान पिंसि परमेश्‍वरजी ङलाइ सैं तोंबै ताँ बिप्रबै म्‍हि लमिंइ।
EPH 3:8 ङ परमेश्‍वरए म्‍हिमैं न्‍होंरि ताँन् भन्दा च्‍योंब मुँनबिलेया ख्रीष्‍टने घ्रिन् तसि खोंयोंइ आखाँबै सै न्होरए बारेर अरू ह्रेंमैंने बिप्रबै मौका ङलाइ पिंइ।
EPH 3:9 धै खीए चाँजो खीजी खैले पूरा लम् बिबै ताँ म्‍हिमैंलाइ था पिंबर परमेश्‍वरजी चु शक्‍तिए बरदान ङलाइ पिंइ। खीजी तोन्दोंरि सै बनेइ, धै खीए चाँजो खीजी स्योंम् ओंनोंन् खाबलाज्यै या सेल् आलल।
EPH 3:10 दिलेया तिंजोरो खीए फिर बिश्‍वास लब्मैंउँइँले स्‍वर्गर्बै म्रुँमैं नेरो अधिकारिमैंइ परमेश्‍वरए औदिबै ज्ञान बुद्धिए ताँमै सेरिगे बिसि खीजी चु चाँजो उँइँमिंइ।
EPH 3:11 च चाँजो ह्‍युल बनेब् भन्दा ओंसों ओंनोंन् परमेश्‍वरजी मैंसि ङ्योए प्रभु येशू ख्रीष्‍टउँइँले पूरा लइ।
EPH 3:12 छले ङ्यो ख्रीष्‍टने घ्रिन् तसि खीए फिर बिश्‍वास लबइले ङ्यो तिफुँइ आङ्हिंन्‍ले परमेश्‍वर ङाँर ह्‍याल् योंइमुँ।
EPH 3:13 छतसि ङ क्‍हेमैंने यो छ्युँ लमुँ, क्हेमैंए ल्हागिर ङइ दुःख नोब् म्रोंसि क्‍हेमैं सैं च्योंब् आलद्, तलेबिस्याँ ङइ दुःख नोबइले क्‍हेमैंल फायदा तइमुँ।
EPH 3:14 छतसि ङ च्हि तुँसि परमेश्‍वर आबालाइ फ्योम्।
EPH 3:15 तलेबिस्याँ स्वर्ग नेरो पृथ्‍बीर मुँबै ताँन् परवामैंलाइ परमेश्‍वर आबाजीन् बनेसि मिं थेंइमुँ।
EPH 3:16 क्हेमैंए ल्हागिर ङइ छ बिसि प्राथना लइमुँ: परमेश्‍वरए बेल्‍ले थेबै सै न्होर क्हेमैंलाइ पिंसि खीजी ह्रोंसए पबित्र प्ल्हउँइँले क्‍हेमैंए सैं भोंब् लमिंरिगे।
EPH 3:17 छलसि क्‍हेमैंइ प्रभु येशू ख्रीष्‍टए फिर बिश्‍वास लमा क्‍हेमैंए सैंर खी बास लरिगे। झाइले सिं धुँए जर च्योंब् धोंले क्हेमैंए म्हाँया बडिदै ह्‍यारिगे, धै जगए फिर धिं बनेब् धोंले क्हेमैंए म्हाँया भोंब् तरिगे।
EPH 3:18 धै ख्रीष्‍टए फिर बिश्‍वास लबै ताँन् म्हिमैंने बालुन् तमा खीजी ङ्योए फिर लबै म्हाँया कति प्ल्हाब, कति ह्रिंब, कति नुब, कति गैरु मुँन बिबै ताँ क्हेमैंइ क्होल् खाँरिगे।
EPH 3:19 क्होसे क्होल् आखाँबै ख्रीष्‍टजी लबै म्हाँया क्हेमैंइ सेरिगे, धै परमेश्‍वर खैब मुँ क्हेमैं या छाबन् तरिगे।
EPH 3:20 ङ्योइ ह्रिब् भन्दा, ङ्योइ मैंब् भन्दा थेबै केमैं परमेश्‍वरजी लल् खाँम्। खीजी च के खीए शक्‍तिजी ङ्योए सैं न्‍होंर्न लम्।
EPH 3:21 छतसि तारे खबै ताँन् पुस्‍ता-पुस्तार्बै बिश्‍वासीमैंइ येशू ख्रीष्‍टउँइँलेन् परमेश्‍वरलाइ खोंयोंन् बिलै मान लरिगे। आमेन, छान् तरिगे!
EPH 4:1 प्रभुए ल्हागिर के लबइलेन् ङ झेलर टिल् त्हुइमुँ, दिलेया ङ क्‍हेमैंने यो छ्युँ लमुँ: क्हेमैं परमेश्‍वरजी त्हाँबै म्हिमैं ग। छतसि क्हेमैं छ्याँबै बानि ब्योरउँइँले छ्ह थोद्।
EPH 4:2 थेब् आप्‍हैंन्, च्योंब् तसि ह्रिस आखल्‍ले घ्रिइ घ्रिलाइ सैदिसि म्हाँया लद्।
EPH 4:3 धै पबित्र प्ल्हजी पिंबै शक्‍तिउँइँले क्‍हेमैं छ्याँबै सैंले क्ह्रिसि टिबै भों लद्।
EPH 4:4 ज्यु घ्रिन् मुँ, पबित्र प्ल्ह या घ्रिन् मुँ। च धोंलेन् परमेश्‍वरजी ङ्योलाइ पिंबै आशा या घ्रिन् मुँ।
EPH 4:5 प्रभु घ्रि मुँ, बिश्‍वास लबै घ्‍याँ घ्रिन् मुँ, बप्‍तिस्‍मा किंबै मतलबै या घ्रिन् मुँ,
EPH 4:6 ताँन् म्हिमैंए परमेश्‍वर आबा घ्रिन् मुँ। खीन् ताँनए प्रभु ग, खीजीन् ताँन् म्हिमैंउँइँले के लम्, खी ताँन् म्‍हिमैंए सैं न्‍होंरि मुँ।
EPH 4:7 दिलेया प्रभु येशू ख्रीष्‍टजी ङ्योलाइ आशिक पिंबइले ङ्यो ताँनइ स्‍यो-स्‍योबै बरदान योंइमुँ।
EPH 4:8 परमेश्‍वरए छ्वेर छले प्‍ह्रिइमुँ: “खी नुबर क्रे ह्‍यामा म्हिमैंलाइ पापर च्होवाबै सैमैंलाइ खीजी ह्रोंसनेन् बोइ, धै म्‍हिमैंलाइ बरदानमैं पिंइ।”
EPH 4:9 खी “नुबर क्रे ह्‍याइ” बिबै ताँए मतलब खी ह्‍याब् भन्दा ओंसों खी चु पृथ्‍बीर युसि चए क्रों समा फेनेइ।
EPH 4:10 चु पृथ्‍बीर तयुबै म्हि (येशू) ताँन् स्वर्गमैं भन्दा कैंडो क्रेयाइ। तारे खीजी ह्‍युलर मुँबै ताँन् सैमैं खीए सैंर मैंब् धोंलेन् तल् पिंम्।
EPH 4:11 खीजी पिंबै बरदानमैं ल्‍हें खालर्बै मुँ। कोइलाइ कुल्मिंबै चेला चिब तबर, कोइलाइ अगमबक्‍तामैं तबर, कोइलाइ सैं तोंबै ताँ बिप्रबर, कोइलाइ खीए म्हिमैंलाइ प्‍ह्रोंछैंमैंइ धोंले छेनाले छैं लबर नेरो कोइलाइ खीए ताँ लोमिंबर खटिदिइ।
EPH 4:12 ख्रीष्‍टए ज्यु बडिबै ल्हागिर परमेश्‍वरए ताँन् म्‍हिमैंइ खीए के लरिगे बिसि ख्रीष्‍टजी छाबै बरदानमैं पिंइ।
EPH 4:13 छतसि ताँन् बालु तसि ङ्योइ परमेश्‍वरए च्‍हए फिर छेन्‍ले बिश्‍वास लब्‍मुँ, खीलाइ छेनाले ङो सेब्‍मुँ। धै ङ्यो च्हैंब् मैंब् लल् खाँब्मैं तसि ङ्यो ख्रीष्‍ट धोंन् तब्‍मुँ।
EPH 4:14 धै ङ्यो कोलोमैं धों तरिब् आरे। म्हिमैंइ स्‍योर तेसि स्‍यो स्‍योबै ताँ लोमिंन बिलेया ङ्योइ च्हैब् मैंब् लल् खाँसि सैं ङ्हिं तरिब् आरे। च म्हिमैंइ लुसि स्योलिबै ताँ लोमिंलेया ङ्योइ क्‍वेंरिब् आरे।
EPH 4:15 बरु ङ्योइ म्हाँया लसि खोंयोंइन क्‍ह्रोंसेंन्‍बै ताँ पोंसि ङ्यो तोन्दोंरि सैर बडिसि बिश्‍वासीमैंए क्र ख्रीष्‍ट धोंन् तल् त्‍हुम्।
EPH 4:16 खीए न्होंर ज्युर्बै ताँन् भाग क्‍ह्रिसि टिइमुँ। खीजी ज्युर्बै ताँन् भाग गैंदिसि ठिक ठिक क्ल्ह्‍योर थेंइमुँ। झाइले ताँन् भागइ खेंमैंइ लल् त्हुबै केमैं लइ बिस्याँ ताँन् ज्यु म्हाँयार बडिदै ह्‍याम्।
EPH 4:17 छतसि प्रभुए मिंर ङ क्हेमैंने चु ताँ बिमुँ, परमेश्‍वर आम्हाँदिब्मैं ह्रोंसए सैंर मैंबै आछ्याँबै केर आफेबै ताँमैंए लिलि प्रब् धोंले तारे क्‍हेमैं आप्रद्।
EPH 4:18 चमैं तोइ च्हैंब-मैंब् लल् आखाँब्मैं तयाइमुँ। चमैंए सारो सैंउँइँले त्होंबै केर आफेबै ताँमैंइ लमा परमेश्‍वरजी पिंबै छ्ह चमैंइ आयों।
EPH 4:19 चमैंए सैं सारो तबइले चमैंइ तो धोंइ आङ्हाँन्‍ले तो लदा ङ्हाँमुँ चन् लप्रम्।
EPH 4:20 दिलेया ख्रीष्‍टउँइँलेम् क्‍हेमैंइ छाबै ताँमैं आलोइमुँ।
EPH 4:21 क्हेमैंइ येशू ख्रीष्‍टउँइँले खबै ताँ थेइ, आङिं वा? खीउँइँले परमेश्‍वरए बारेर्बै क्‍ह्रोंसेंन्‍बै ताँ क्हेमैंइ सेइमुँ।
EPH 4:22 छतसि ह्रोंसलाइ नास लवाबै ओंसोंबै धों तबै आछ्याँबै केमैं लबै बानि ब्योर क्हेमैंइ पिवाद!
EPH 4:23 तारे पबित्र प्ल्हजी क्हेमैंए सैं छारा लमिंरिगे।
EPH 4:24 झाइले छारा छ्याँबै क्‍वें खिब् धोंले परमेश्‍वरल् धों तबै छ्याँबै बानि ब्योर क्हेमैंल् तरिगे।
EPH 4:25 छतसि तारे पिरु स्‍योर आतेद्। ङ्यो ताँन् प्रभु येशू ख्रीष्‍टए ज्युए भागमैं ग। छतसि ह्रोंसए बिश्‍वासी अलिमैने क्ह्रोंसेंन्बै ताँ पोंल् त्‍हुम्।
EPH 4:26 ह्रिस खनाबिलेया पाप केमैं आलद्। ह्रिस खलेया त्हिंयाँ लिब् भन्दा ओंसोंन् क्हेमैंए ह्रिस म्हल् त्हुम्।
EPH 4:27 दुष्‍टलाइ मौका आपिंन्।
EPH 4:28 ह्‍योब्मैंइ तारेपिरु आह्‍योरिगे, बरु चमैंइ ह्रोंसए योइ बेल्‍ले दुःखले के लरिगे धै खाँचो तब्मैंलाइ पिंल् खाँरिगे।
EPH 4:29 आछ्याँबै ताँ क्‍हेमैंए सुँउँइँले आत्‍होंरिगे, बरु थेब्मैंलाइ आशिक खल्‍ले आगुलाइ छ्याँबै घ्याँर डोरेबै छ्याँबै ताँमैं मत्‍त्रे पोंब्रें लद्।
EPH 4:30 परमेश्‍वरए पबित्र प्ल्हलाइ सैं नल् आलद्। परमेश्‍वरजी आखिरि त्हिंइर स्‍वर्गर बोबै ल्हागिर खीजी क्हेमैंए फिर ह्रोंसए पबित्र प्ल्हजी छाप ल्हैदिइमुँ।
EPH 4:31 ताँन् खालर्बै आछ्याँबै ताँमैं, ह्रिस खब, ह्रिस लब, गाल् केब, प्होंगि कैगि लब पिवाद्।
EPH 4:32 धै परमेश्‍वरजी ख्रीष्‍टर क्हेमैंलाइ क्षमा लब् धोंले क्हेमैंज्यै या घ्रिइ घ्रिलाइ क्षमा लसि घ्रिइ घ्रिए फिर सैं प्ल्हसि ल्हयो खद्।
EPH 5:1 क्हेमैं परमेश्‍वरजी खोबै प्‍हसेमैं ग, छतसि क्‍हेमैं खी धोंन् तबै भों लद्।
EPH 5:2 ख्रीष्‍टजी ङ्योए फिर म्हाँया लसि ङ्योए पाप ख्रुबर परमेश्‍वरए ल्हागिर लिंबै थाँ खबै धुप धों तसि ह्रोंसन् ख्रो तसि ङ्योए ल्हागिर सिमिंइ। छतसि क्‍हेमैंज्यै या ताँनए फिर म्हाँया लसि परमेश्‍वरए सैं तोंन् लबै केमैं लसि छ्ह थोल् त्हुम्।
EPH 5:3 क्‍हेमैं परमेश्‍वरए म्‍हिमैं तबइले तारेपिरु खाबज्यै या ब्यभिचार आलद्, आछ्याँबै ताँ पोंब नेरो लोब लबउँइँले स्‍यो तद्। परमेश्‍वरए प्हसेमैंइ छाबै ताँमैं लब आङ्‍हें।
EPH 5:4 आछ्याँबै ताँ, केर आफेबै ताँ, नेरो फा पिन् तबै ताँ खोंयोंइ या आपोंन्। बरु खोंयोंन् बिलै परमेश्‍वरलाइ धन्‍यबाद पिंन्।
EPH 5:5 ख्रीष्‍ट नेरो परमेश्‍वरए ग्याल्सर ब्यभिचारिमैं, लोबिमैं, आछ्याँबै के लब्मैं खैलसे होंल् आयों बिसि क्हेमैंइ छेनाले सेल् त्हुम्। [अथवा परमेश्‍वरलाइ आम्‍हाँदिसेरो चमैंइ खी ङाँइले आशिक आयों।] लोब लबै केमैं परमेश्‍वरए उँइँर कु पूजा लब् धोंन् ग।
EPH 5:6 केर आफेबै स्योलिबै ताँए लिलि प्रसि धोकार आफेद्। तलेबिस्याँ बिब् आङिंसि छाबै आछ्याँबै केमैं लप्रब्मैंए फिर परमेश्‍वरजी थेबै ह्रिस ङेब्‍मुँ।
EPH 5:7 छतसि छाबै म्‍हिमैंउँइँले स्यो तद्।
EPH 5:8 ओंसों क्हेमैं मिछु खैबर मुँल, दिलेया तिंजोरो प्रभुए म्‍हिमैं तबइले क्‍हेमैं या खीए ह्‍वेर टिइमुँ। खीए ह्‍वेर टिसि छ्याँबै छ्ह थोद्।
EPH 5:9 तलेबिस्याँ खीए ह्‍वेर टिबइले क्हेमैंइ ताँन् खालर्बै छ्याँबै केमैं, ठिक केमैं, नेरो क्ह्रोंसेंन्बै ताँमैं लम्।
EPH 5:10 परमेश्‍वरजी खोबै ताँ तो जा बिसि क्होबै भों लद्।
EPH 5:11 मिछु खैबर म्हिमैंइ लबै केर आफेबै केमैंउँइँले स्‍यो तद्, बरु छाबै केमैं ह्‍वेर पसि आछ्याँब ग बिसि ताँनने उँइँमिंन्।
EPH 5:12 (चमैंइ आसेल्‍ले लबै केमैंए बारेर पोंबै या फा पिन् तबै ताँ ग।)
EPH 5:13 दिलेया ताँन् के ह्‍वेर पइ बिस्‍याँ च के खैब जा बिसि ताँनइ सेल् खाँम्। छतसि खाबइ ह्रोंसइ लबै केमैंर छ्याँबने छ्याँबन् आछ्याँबने आछ्याँबन् बिमुँ चन् चारबै ह्‍वे ग।
EPH 5:14 छतसि “ओ न्‍हरु च्हुइरिब्‍मैं रेद्, सियाब्मैंए म्हाँजोउँइँले रेखो! झाइले ख्रीष्‍ट क्‍हिए फिर चारब्‍मुँ,” बिसि म्हिमैंइ बिम्।
EPH 5:15 छतसि खैले छ्ह थोरिइमुँ सैंर मैंन्, आह्र-आसेबै म्हि धोंब आतद्, बुद्धि मुँबै म्हि धोंलेन् छ्ह थोद्।
EPH 5:16 चु जुग आछ्याँब मुँ। छतसि क्‍हेमैंने मुँबै त्हे खेरो ह्‍याल् आपिंन्, छ्याँबै केमैं लप्रद्।
EPH 5:17 बुद्धि आरेब्‍मैं धों आतद्, प्रभुजी खोबै के तो जा बिसि क्‍होद्।
EPH 5:18 प्हाइ आम्हेरद्, तलेबिस्याँ च म्हिए सैं न्होवाबै सै ग। बरु परमेश्‍वरए पबित्र प्ल्हजी प्लिंसि खीए न्होंर टिद्।
EPH 5:19 क्हेमैं खागु तमा घ्रिइ घ्रिने ताँ पोंमा भजन नेरो पबित्र प्ल्हजी पिंबै क्वेमैंउँइँले ताँ लद्; धै क्‍हेमैंए सैं न्होंउँइँले प्रभु येशूए मिं थेब् लबर भजन क्वेमैं प्रिंन्।
EPH 5:20 झाइले खोंयोंन् बिलै तोन्दोंरि सैए ल्हागिर प्रभु येशू ख्रीष्‍टए मिंर परमेश्‍वर आबालाइ धन्‍यबाद पिंन्।
EPH 5:21 ख्रीष्‍टलाइ म्हाँदिबइले क्‍हेमैं ताँन् घ्रि घ्रिए न्होंर टिल् त्‍हुम्।
EPH 5:22 ओ च्हमिरिमैं, प्रभुए न्होंर टिब् धोंलेन् ह्रोंसए प्‍युँए न्होंर टिद्।
EPH 5:23 ख्रीष्‍ट बिश्‍वासीमैंए क्र तब् धोंले प्युँ प्‍ह्रेंस्‍योए क्र ग। धै बिश्‍वासीमैंलाइ जोगेमिंब ख्रीष्‍टन् ग, धै बिश्‍वासीमैं खीए ज्युन् ग।
EPH 5:24 छतसि बिश्‍वासीमैं ख्रीष्‍टए न्होंर टिब् धोंले प्‍ह्रेंस्‍योमैं या सैं न्होंउँइँले ह्रों-ह्रोंसए प्‍युँए न्होंर टिल् त्‍हुम्।
EPH 5:25 ओ मुँयुँमैं, ख्रीष्‍टजी बिश्‍वासीमैंलाइ म्हाँया लसि चमैंए ल्हागिर खीए ज्यु या पिंब् धोंले क्‍हेमैंए प्‍ह्रेंस्‍योलाइ म्हाँया लद्।
EPH 5:26 बिश्‍वासीमैंलाइ पबित्र लबर ख्रीष्‍टजी ह्रोंसए बचनउँइँले नेरो क्युइ ख्रुसि चोखो लमिंइ।
EPH 5:27 बिश्‍वासीमैंलाइ पबित्र, छ्याब् आरेब, दाग आरेब, आच्युँब, तोइ खोट आरेब तसि ह्रोंसए ल्हागिर छ्याँबै प्ह्रेंस्यो लबर खीजी ह्रोंसए ज्यु पिंइ।
EPH 5:28 छलेन मुँयुँमैंज्यै या ह्रोंसए ज्युलाइ म्हाँया लब् धोंले ह्रोंसए प्‍ह्रेंस्‍योलाइ म्हाँया लल् त्‍हुम्, तलेबिस्याँ खाबइ ह्रोंसए प्‍ह्रेंस्‍योलाइ म्हाँया लमुँ, चइ ह्रोंसलाइन म्हाँया लम्।
EPH 5:29 (खाबज्यै या ह्रोंसए ज्युलाइ हेल आल, बरु ख्रीष्‍टजी बिश्‍वासीमैंलाइ म्हाँया लब् धोंले ङ्योइ ह्रोंसए ज्युलाइ सुसर लसि चल् पिंम्।
EPH 5:30 तलेबिस्याँ ङ्यो येशू ख्रीष्‍टए ज्युर्बै भागमैं ग।)
EPH 5:31 परमेश्‍वरए छ्वेर छले प्ह्रिइमुँ: “मुँयुँइ ह्रोंसए आबा-आमा पिसि ह्रोंसए प्‍ह्रेंस्‍योने क्ह्रिसि टिब्मुँ, धै चमैं ङ्हिं घ्रिन् तब्‍मुँ।”
EPH 5:32 चुर बेल्‍ले थेबै क्‍ह्रोंसेंन्‍बै ताँ ग। धै चु ताँ ख्रीष्‍ट नेरो बिश्‍वासीमैंए न्होंर्बै ताँ ग बिसि ङइ बिम।
EPH 5:33 तो मुलेया क्‍हेमैं ताँन् ह्रोंसलाइ धोंलेन् मुँयुँमैंइ ह्रोंसए प्‍ह्रेंस्‍योलाइ म्हाँया लल् त्‍हुम्, छलेन प्ह्रेंस्योमैंज्यै या ह्रोंसए प्‍युँलाइ मान लल् त्‍हुम्।
EPH 6:1 ओ प्हसेमैं, प्रभु येशूलाइ म्हाँदिसि ह्रोंसए आबा-आमाइ बिब ङिंन्। छ लब ठिक के ग।
EPH 6:2 परमेश्‍वरजी स्‍योंम्‍बै मोशालाइ पिंबै ठिमर्बै मुख्‍य ताँमैं न्होंर छले प्ह्रिइमुँ, “क्‍हेमैंइ ह्रोंसए आबा-आमाए मान लद्।” बाछा फैसि परमेश्‍वरजी क्हेमैंने ललन् त्हुम् बिबै ओंसोंबै के चुन् ग।
EPH 6:3 छ लस्याँ “क्‍हेमैंइ लबै तोन्दोंरि केमैं छ्याँब तब्‍मुँ, धै चु ह्‍युलर क्‍हेमैंइ ह्रिंबै छ्ह योंब्‍मुँ।”
EPH 6:4 ओ आबामैं, क्‍हेमैंइ ह्रोंसए प्हसेमैंलाइ छोरों ङ्हाँन्ले कच कच लसि ह्रिस खल् आलद्। बरु प्रभुलाइ म्हाँदिबै छ्याँबै बानि लोमिंसि ठिक तार झोंन्।
EPH 6:5 ओ केब्छैं केब्स्योमैं, प्रभुजी बिबै ताँ ङिंब् धोंलेन् क्‍हेमैंए क्ल्हेमैंइ बिबै ताँ या ङिंन्। चमैंने ङ्हिंन् धै छ्याँबै सैंले चमैंए के लद्।
EPH 6:6 क्ल्हेमैंए उँइँर मुँमा चमैं ङाँइले स्‍याबासि योंबै ल्हागिर मत्‍त्रे के लब आङिं, ख्रीष्‍टए क्ह्रोंसेंन्बै केब्छैं केब्स्योमैंइ धोंले सैं झोंसि परमेश्‍वरए सैंर मैंबै ताँ पूरा लद्।
EPH 6:7 म्हिए ल्हागिर मत्‍त्रे लब् धोंले के लब आङिं, दिलेया प्रभुए ल्हागिर लब् धोंले सैं तोंदै के लद्।
EPH 6:8 ङ्यो केब्छैं ङिंले या आङिंले या, ङ्योइ लबै छ्याँबै केए इनाम प्रभुजी पिंब्‍मुँ बिबै ताँ खोंयोंइ या आम्‍लेद्।
EPH 6:9 ओ क्ल्हेमैं, केब्छैंमैंने छ्याँबै ब्यबहार लद्, चमैंलाइ आहौदिद्, तलेबिस्याँ क्‍हेमैंए क्ल्हे नेरो चमैंए क्ल्हे स्‍वर्गर मुँबै प्रभुन् ग। खीजी खाबलाज्यै या आफेल।
EPH 6:10 आखिरिर्बै ताँ चुन् ग: प्रभुने घ्रिन् तसि खीउँइँले योंबै शक्‍तिर क्‍हेमैंए सैं भोंब् लद्।
EPH 6:11 दुष्‍टए बिरोधर राल् खाँबै ल्हागिर परमेश्‍वरए बचन खोंयोंन् बिलै क्हेमैंए सैंर थेंन्।
EPH 6:12 तलेबिस्याँ ङ्यो म्‍हिमैंने नेब्मैं आङिं, ङ्योम् शासकमैं, अधिकारमैं, चु जुगए मिछु खैबर टिबै दुष्‍ट शक्‍ति मुँबै सैमैं नेरो परमेश्‍वरलाइ आम्‍हाँदिबै ताँन् स्‍यागि-म्‍होंगिमैंए बिरोधर नेब्मैं ग।
EPH 6:13 छतसि परमेश्‍वरए बचनइ बिब् धोंलेन् प्रद्। छले प्रसि क्हेमैंए फिर खैबै दु:ख तना बिलेया सैदिल् खाँब्मैं तद्।
EPH 6:14 शत्तुरमैंए उँइँर भोंन्‍ले टिद्। क्रेर फगिइ फैब् धोंले क्हेमैंए सैं परमेश्‍वरए क्ह्रोंसेंन्बै ताँइ फैद्। झाइले तिं नेरो फोए रक्षा लबै कोट खिब् धोंले छ्याँबै खोंउँइँले ठिक केमैं लप्रद्।
EPH 6:15 जुत्ता प्हलेने क्ह्रिब् धोंलेन् म्हिमैंलाइ परमेश्‍वरने क्ह्रिमिंबै ल्हागिर खीउँइँले खबै सैं तोंबै ताँमैं बिप्रबर तयार तद्।
EPH 6:16 धै दुष्‍टइ पिबै मि प्हैंइ ह्रोंसलाइ आटबै ल्हागिर खोंयोंन् बिलै परमेश्‍वरए फिर्बै बिश्‍वासर भोंब तरिदु।
EPH 6:17 झाइले तो सैज्यै या क्रर आटरिगे बिसि पैए कुले कुब् धोंलेन् परमेश्‍वरजी ङ्योलाइ जोगेमिंइमुँ बिसि खैलसे था सेद्। धै पबित्र प्ल्हजी पिंबै सेलाँ छेद्। च तो जा बिस्याँ परमेश्‍वरए बचन ग।
EPH 6:18 च ताँन् के लमा तोन्‍दोंरि ताँर तो सै चैदिले या प्राथना लदै परमेश्‍वरने ह्रिद्। झाइले ह्रोंसए ल्हागिर मत्‍त्रे आङिं, ताँन् बिश्‍वासीमैंए ल्हागिरै या प्राथना लद्, खोंयोंन् बिलै न्ह क्रों मि क्रोंले चमैंए ल्हागिर प्राथना लरिद्।
EPH 6:19 सैं तोंबै ताँ बिप्रबै लमा ङ झेलर तनाबिलेया ङ ख्रीष्‍टए ताँ बिमिंबै स्यार्बो ग। छतसि ङ पोंबर होंमा परमेश्‍वरजी ङए सैंर खीए ताँमैं झोंमिंरिगे, धै सैं तोंबै ताँए बारेर था आसेबै चाँजो ङइ छेनाले था पिंल् खाँरिगे,
EPH 6:20 धै ङइ खैले पोंल् त्हुम् छलेन आङ्हिंन्ले पोंल् खाँरिगे बिसि ङए ल्हागिरै या प्राथना लमिंन्।
EPH 6:21 ङ खैबै म्हि जा, ङइ तो के लमुँ बिबै ताँ ङइ खोबै अलि तुखिकसइ क्‍हेमैंने बिमिंब्मुँ। चइ प्रभुए ल्हागिर छेनाले के लम्।
EPH 6:22 ङिइ चुर लरिबै केमैं था सेसि क्हेमैंए सैं भोंब् तरिगे बिबै सैं मैंसि ङइ चलाइ क्हेमैं ङाँर कुलब् ग।
EPH 6:23 परमेश्‍वर आबा नेरो प्रभु येशू ख्रीष्‍टजी ताँन् बिश्‍वासीमैंलाइ छिं ङ्हाँल् पिंरिगे धै खीए थेबै दयाम्हाँयाजी चमैंए बिश्‍वास भोंब् लमिंरिगे।
EPH 6:24 छले ङ्योए प्रभु येशूए फिर म्हाँया लब्मैं ताँनने खोंयोंन् बिलै परमेश्‍वरए दयाम्हाँया तरिगे।
PHI 1:1 ङि ख्रीष्‍ट येशूए केब्छैंमैं पावल नेरो तिमोथीउँइँले फिलिप्‍पी सहरर्बै बिश्‍वासीमैं नेरो छैं लबै चिबनाँब्मैं धै ल्होमिंबै डिकनमैंलाइ जय मसीह मुँ। क्हेमैं ख्रीष्‍ट येशूने घ्रिन् तसि टिब्मैं ग।
PHI 1:2 ङ्योए परमेश्‍वर आबा नेरो प्रभु येशू ख्रीष्‍टउँइँले क्‍हेमैंइ दयाम्हाँया नेरो शान्‍ति योंरिगे।
PHI 1:3 क्हेमैंए साँ खब्रें लमा खोंयोंन् बिलै ङए परमेश्‍वरलाइ ङइ धन्‍यबाद पिंम्।
PHI 1:4 बेल्‍ले सैं तोंदै ङइ खोंयोंन् बिलै क्‍हेमैंए ल्हागिर प्राथना लमुँ,
PHI 1:5 तलेबिस्याँ येशूउँइँले खबै सैं तोंबै ताँ बिप्रबै ल्हागिर ओंसोंउँइँले तोगो समा क्‍हेमैंइ ङलाइ ल्होसिन् मुँ। चु ताँर ङइ धन्यबाद पिंम्।
PHI 1:6 परमेश्‍वरजी क्हेमैंए न्होंरि छ्याँबै के तों लइ, खीजीन् येशू ख्रीष्‍ट युबै त्हिंइ समा च के नुमिंब्मुँ बिसि ङइ बिश्‍वास लइमुँ।
PHI 1:7 ङइ क्‍हेमैंलाइ खोंयोंन् बिलै ह्रोंसए सैंर थेंइमुँ। ङइ क्हेमैं ताँनए ल्हागिर छले मैंब ठिक मुँ, तलेबिस्याँ परमेश्‍वरजी दयाम्हाँया लसि खीउँइँले खबै सैं तोंबै ताँ जोगेबै के ङलाइ पिंइ, धै ङ झेलर मुँमा बैरु मुँमा क्हेमैं चु केर ङने बालुन् प्रल।
PHI 1:8 क्‍हेमैंए फिर ख्रीष्‍ट येशूजी खैले म्हाँया लमुँ, छलेन ङज्यै या क्‍हेमैं ताँनए फिर म्हाँया लसि साँ खम्। चु ताँ परमेश्‍वरज्यै सेइमुँ।
PHI 1:9 क्‍हेमैंए ल्हागिर ङए प्राथना चुन् मुँ: क्‍हेमैंए म्हाँया बेल्‍ले बडिदै ह्‍यारिगे, धै ज्ञान नेरो छेनाले क्‍होबै बुद्धि बेल्‍ले ल्‍हें योंरिगे।
PHI 1:10 छले क्हेमैंइ ज्ञान नेरो बुद्धि योंसि छ्याँबै ताँ सेल् खाँरिगे, धै येशू ख्रीष्‍ट युबै त्हिंइर क्‍हेमैंने तोइ छ्याब् आम्रोंरिगे।
PHI 1:11 झाइले परमेश्‍वरलाइ मान लसि खीए मिं थेब लबै ल्हागिर येशू ख्रीष्‍टउँइँले योंबै छ्याँबै बानि क्हेमैंने तरिगे।
PHI 1:12 ओ अलि-अङाँमैं, क्‍हेमैंइ चु ताँ सेरिगे बिसि ङए सैंर ङ्हाँइमुँ: तो ताँ बिस्याँ, ङइ योंबै दुःखमैंइ लमा सैं तोंबै ताँ खन्तोंदोंन् फेनेबै के तइमुँ।
PHI 1:13 येशू ख्रीष्‍टए सैं तोंबै ताँ ङइ बिप्रबै लमा ङ झेलर च्युवाब् ग बिसि दरबारर्बै सिपाइमैं नेरो ताँन् म्हिमैंइ सेइमुँ।
PHI 1:14 छले ङ झेलर च्युवासेरो ल्‍हें अलि-अङाँमैं प्रभुए फिर बिश्‍वास लबर भोंब् तइमुँ, धै चमैंइ आङ्हिंनले परमेश्‍वरए ताँ पोंल् खाँइमुँ।
PHI 1:15 दिलेया को-कोइ ङए फिर सैं आससि ह्रिस लसि येशूए सैं तोंबै ताँ बिप्रम्। को-कोइइ बिस्याँ छ्याँबै सैं मैंसिन् येशूए सैं तोंबै ताँ बिप्रम्।
PHI 1:16 सैं तोंबै ताँ बिप्रबै ल्हागिर्न परमेश्‍वरजी ङ कुल्मिंब् ग बिब् सेब्मैंइ सैं तोंन्लेन् चु के लम्।
PHI 1:17 दिलेया ङए फिर सैं आससि ह्रिस लब्मैंइ बिस्याँ, ङलाइ झेलर अझै ल्हें दुःख पिंरिगे बिब् मैंसि आछ्याँबै सैंइ येशूए सैं तोंबै ताँ बिप्रम्।
PHI 1:18 तो तलेया थेबै ताँ चुन् ग: खैबै सैं मैंसि येशूए सैं तोंबै ताँ बिलेया येशू ख्रीष्‍टए सैं तोंबै ताँ बिमिंरिगे, चु ताँर्न ङए सैं बेल्‍ले तोंइमुँ।
PHI 1:19 ओं, ङ तोंब्मुँ, तलेबिस्याँ क्हेमैंए प्राथना नेरो येशू ख्रीष्‍टए प्ल्हजी ल्होमिंबइले युनन् ङ झेलउँइँले त्होंल् योंब्मुँ बिब ङइ सेइमुँ।
PHI 1:20 ङए थेबै इच्छा नेरो आशा चु मुँ: ङ खोंयोंइ फापिल् त्हुरिब् आरे। ङ बेल्‍ले भोंसि तब्मुँ, सिल् त्हुलेया, सोल् योंलेया ओंसोंबै धोंले तोगो या ङउँइँले येशू ख्रीष्‍टए मान तरिगे।
PHI 1:21 तलेबिस्याँ ङए ल्हागिर सोब बिब येशू ख्रीष्‍टने प्रब् ग। धै सिस्‍याँ ख्रीष्‍टने टिसि झन् बेल्‍ले छ्याँब तम्।
PHI 1:22 दिलेया सोरिस्याँ केर फेबै के लल् योंब्मुँ। छान् तलेया ङइ खाब् घ्याँ क्हाब च ङइ बिल आखाँ।
PHI 1:23 ङए सैं ङ्हिरि तइमुँ। चु ङ्हिरोबै छ्ह पिसि ख्रीष्‍टने बालु टिब ङए थेबै सैं मुँ, ङए ल्हागिरि च ताँ बेल्‍ले छ्याँब तमल।
PHI 1:24 दिलेया क्‍हेमैंए ल्हागिर ङ अझै सोल् त्हुम्।
PHI 1:25 च ताँ क्ह्रोंसेंन ङइ सेइमुँ: क्हेमैंए बिश्‍वास भोंसि ततै ह्‍यासि क्हेमैं सैं तोंन् लबर ङ अझै सोम्।
PHI 1:26 ङ धबै क्‍हेमैं ङाँर खमा ख्रीष्‍ट येशूए मिं थेब लबै ताँमैं ङउँइँले तइमुँ बिब् सेसि क्‍हेमैं सैं तोंल् योंब्मुँ।
PHI 1:27 येशू ख्रीष्‍टउँइँले खबै सैं तोंबै ताँइ बिब् धोंले छ्ह थोद्। ङ क्हेमैं ङाँर खलै आखलै क्हेमैंए सैं फो घ्रिन् तसि खोंर थेबै बिश्‍वास लसि सैं तोंबै ताँ म्हिमैंने बिप्रबर भों लइमुँ बिबै ताँ ङइ थेदा ङ्हाँइमुँ।
PHI 1:28 क्हेमैंए फिर तो तखलेया क्हेमैंए शत्तुरमैंने तिफुँइ आङ्हिंन्। खोंयोंइ बिलै प्रभुए फिर बिश्‍वास लबर भोंब् तरिद्। छतस्याँ शत्तुरमैंइ क्हेमैं ट्होल आखाँ, बरु क्‍हेमैंइ ट्होब्‍मुँ, तलेबिस्याँ परमेश्‍वरजी क्‍हेमैं जोगेमिंब्मुँ।
PHI 1:29 क्हेमैंइ ख्रीष्‍टए फिर बिश्‍वास लब मत्‍त्रे आङिं, खीए ल्हागिर दुःख नोसि खीए सेवा लबर दयाम्हाँया योंइमुँ।
PHI 1:30 ङइ ओंसों दुःख योंब क्‍हेमैंइ म्रोंइमुँ, अझै छाबन् दुःख योंरिइमुँ बिब क्हेमैंइ थेइमुँ। छले ङइ योंब् धों तबै दुःखरै या क्‍हेमैं ङने बालु प्रइन मुँ।
PHI 2:1 क्हेमैं येशू ख्रीष्‍टने घ्रिन् तबइले सैं क्‍होल् लमिंबै भों, म्हाँया, पबित्र प्ल्हए संगति नेरो ल्हयो क्‍हेमैंने मुँ।
PHI 2:2 छतसि क्‍हेमैंए सैं फो घ्रिन् तसि, ताँनने म्हाँया घ्रिन् लसि, क्‍ह्रिसि ङए सैं झन् तोंन् लद्।
PHI 2:3 ह्रोंसए फायदाए ल्हागिर मत्‍त्रे तोइ आलद्। तोन् तोर्न थेब प्हैंदै तोइ आलद्, बरु ह्रोंसन् च्‍योंने तसि घ्रिइ घ्रिलाइ ह्रोंस भन्दा थेब् मैंन्।
PHI 2:4 झाइले क्हेमैं ताँनइ ह्रोंसल् मत्‍त्रे छ्याँब लबै सैं आमैंन्, दिलेया अरूमैं या छ्याँब तरिगे बिब् मैंन्।
PHI 2:5 क्हेमैंए सैं येशू ख्रीष्‍टए सैं धों तब प्ह्‍याद्।
PHI 2:6 येशू ख्रीष्‍ट परमेश्‍वर तलेया खीजी परमेश्‍वरए क्ल्ह्‍योर टिबै सैं आल।
PHI 2:7 दिलेया ह्रोंसए हग ताँन् वाथेंसि केब्छैं धोंन् तसि म्हिए क्हो किंसि युइ।
PHI 2:8 छले म्‍हिए क्‍हो किंसि, ह्रोंसन् च्‍योंब तसि क्रूसर सिबै त्हे समा परमेश्‍वरजी बिबै ताँ ङिंइ।
PHI 2:9 छतसि परमेश्‍वरजी खीलाइ ताँन् भन्दा थेब लमिंइ, झाइले ताँन् भन्दा थेबै मिं पिंइ।
PHI 2:10 छतसि स्वर्गरि, पृथ्‍बी फिर नेरो पृथ्‍बी न्होंरि मुँबै ताँन् सो प्ह्‍याबै सैमैंइ येशूए मिंर च्हि तुँल् त्हुब्मुँ।
PHI 2:11 झाइले ताँनइ परमेश्‍वर आबाए मान तबै ल्हागिर “येशू ख्रीष्‍टन् प्रभु ग” बिसि म्हाँदिब्मुँ।
PHI 2:12 छतसि, ओ ङइ खोबै अलि-अङाँमैं, क्हेमैंइ खोंयोंइ ङइ बिबै ताँमैं ङिंरिइमुँ। ङ क्‍हेमैंने मुँमा ङए उँइँर लब् धोंले मत्‍त्रे आङिं, ङ क्हेमैंने आरेबै त्हेरै या छलेन परमेश्‍वरने ङ्हिंदै ह्रोंसइ योंबै मुक्‍ति जोगेबर के लसि उँइँन्।
PHI 2:13 तलेबिस्याँ परमेश्‍वरजी क्‍हेमैं खीए सैंर मैंब् धोंले प्ररिगे धै खीए के लरिगे बिसि खीजी क्हेमैंए न्‍होंर खोंयोंइन के लरिम्।
PHI 2:14 तो के ललेया कचकच आलल्‍ले आप्‍होंनले लल् त्हुबै के लदै ह्‍याद्।
PHI 2:15 छले क्‍हेमैं तोइ छ्याब् आरेब तसि परमेश्‍वर ङो आसेब्मैंए म्हाँजोर तोइ खोट आरेबै परमेश्‍वरए सन्तान तद्। छतस्याँ परमेश्‍वर ङो आसेब्मैंए उँइँर क्‍हेमैं मुसारा धोंले चारब्मुँ।
PHI 2:16 क्‍हेमैंलाइ छ्ह पिंबै परमेश्‍वरए ताँ भोंन्ले क्हाथेंन्। छले क्हाथेंस्याँ येशू ख्रीष्‍ट युबै त्हिंइर ङइ क्हेमैंए ल्हागिर लबै दुःख छलेन् खेरो आह्‍याना बिसि ङए सैं तोंब्मुँ।
PHI 2:17 क्‍हेमैंइ लबै येशू ख्रीष्‍टए फिर्बै बिश्‍वास परमेश्‍वरए मिंर ख्रो पिंब् धों ग। छतसि क्हेमैंइ परमेश्‍वरए मिंर पिंबै सैमैंए फिर ङइ ह्रोंसलाइन् ख्रो पिंल् त्हुलेया, ङए सैं तोंब्मुँ। छले क्हेमैं ताँनने ङ बेल्‍ले तोंइमुँ।
PHI 2:18 छलेन क्‍हेमैं या ङने बालुन् सैं तोंन्।
PHI 2:19 क्‍हेमैंए बारेर्बै ताँ थेल् योंसि ङए सैं तोंल् योंरिगे बिसि ङ क्‍हेमैं ङाँर तिमोथी युनन् कुल्मिंबर प्रभुर आशा लमुँ।
PHI 2:20 तिमोथीइ धोंले क्हेमैं छ्याँब तरिगे बिसि न्हुँ लबै म्‍हि चुर खाबै आरे।
PHI 2:21 (चमैंइ खाबज्यै येशू ख्रीष्‍टए ताँला तोइ वास्‍ता आल, ह्रोंसए फायदा मत्‍त्रे म्हैम्।)
PHI 2:22 तिमोथी खैबै म्हि जा बिसि क्‍हेमैंज्यै सेइमुँ। खैले च्हइ ह्रोंसए आबाइ बिब् धोंले के लमुँ, छलेन तिमोथीइ येशूए सैं तोंबै ताँ बिप्रबै केर ङलाइ ल्होमिंइ।
PHI 2:23 छतसि ङए ल्हागिर चुर तो ताँ तमुँ बिसि क्होबै तोंदोंन् ङइ च क्‍हेमैं ङाँर कुल्‍मिंबै सैं लइमुँ।
PHI 2:24 ङैया क्‍हेमैं ङाँर युनन् खब्मुँ बिसि प्रभुए फिर भर थेंइमुँ।
PHI 2:25 ङए अलि इपाफ्रोडिटस क्हेमैंए सउँसर बिबै म्‍हि ग, ङए खाँचो ल्होबर क्‍हेमैंइ च कुल्मिंल। ङइ सैं तोंबै ताँ बिप्रबै क्ल्ह्‍योजरे ङए फिर दु:ख तमा चज्यै या ङने बा-बालुन् द:ख नोइ। तारे च क्‍हेमैं ङाँर एमिंल् त्हुइ बिसि ङए सैंर ङ्हाँइ,
PHI 2:26 तलेबिस्याँ क्‍हेमैंइ च नइ बिबै ताँ थेसि चइ न्हुँ लइमुँ। छतसि चइ क्‍हेमैंए साँ खसि त्होबै सैं लइमुँ।
PHI 2:27 क्‍ह्रोंसेन च सिया सियाले नल। दिलेया परमेश्‍वरजी चए फिर ल्हयो उँइँमिंइ। चए फिर मत्‍त्रे ल्हयो आल, ङलाइ न्हुँ फिर न्हुँ आतरिगे बिसि ङए फिरै या ल्हयो उँइँमिंइ।
PHI 2:28 छतसि क्‍हेमैंइ चलाइ धबै म्रोंसि क्‍हेमैंए सैं तोंरिगे, धै क्हेमैंए फिर ङइ ल्हें न्हुँ लल् आत्हुरिगे बिसि ङ क्‍हेमैं ङाँर च एमिंदा ङ्हाँइमुँ।
PHI 2:29 छतसि बेल्‍ले सैं तोंदै चए मान लद्। छाबै म्‍हिमैंलाइ मान लल् त्हुम्।
PHI 2:30 तलेबिस्याँ क्हेमैंइ ङए ल्हागिर लल् आखाँबै सेवा पूरा लबर येशू ख्रीष्‍टए केए ल्हागिर च कालए सुँर्न फेल।
PHI 3:1 ओ अलि-अङाँमैं, आखिरि बिलन् त्हुबै ताँ चु मुँ: प्रभुने घ्रिन् तसि खोंयोंन् बिलै सैं तोंन्। क्हेमैंने ओंसोंन् बिल् खाँबै ताँमैं धबै प्‍ह्रिबर ङ छोरों आङ्हाँ, तलेबिस्याँ चु ताँमैंइ क्‍हेमैंलाइ आछ्याँबै घ्याँर प्रबउँइँले जोगेमिंमुँ।
PHI 3:2 आछ्याँबै के लब्‍मैं, नगिमैं धोंले नेब्मैं, नेरो ज्युर्बै ट्हुबि क्‍याँब्मैंउँइँले न्ह क्रों मि क्रोंले टिद्।
PHI 3:3 ङ्योम् ज्युर चिनु लबै केर भर लब्मैं आङिं! ङ्योम् छ्याँबै सैंइ खों न्होंउँइँलेन् परमेश्‍वरलाइ म्हाँदिब्मैं ग, तलेबिस्याँ ङ्योइ परमेश्‍वरए पबित्र प्ल्हउँइँलेन् खीलाइ म्हाँदिइमुँ। धै ख्रीष्‍ट येशूजी लबै केर ङ्योइ प्हैंल् खाँम्।
PHI 3:4 खाबज्यै ज्युर लबै चिनुर भर थेंबै कारण मुँ बिसि मैंम् बिस्याँ, ङलम् झन् ल्हें कारण मुँ।
PHI 3:5 तलेबिस्याँ ङलम् फिबै प्रेरोर ज्युर चिनु लल। ङ इस्राएल ह्रेंर्बै बेन्यामीन कुलर्बै ग, हिब्रूमैंलैया हिब्रू ग, मोशाइ प्ह्रिबै ठिममैं म्हाँदिबै फरिसी घ्रि ग,
PHI 3:6 जोसए बारेर बिले बिस्याँ, ङइ येशू ख्रीष्‍टए फिर बिश्‍वास लब्मैं ह्रुगुदिइ! धै ठिक केमैंए बारेर बिले बिस्याँ मोशाइ प्ह्रिबै ठिममैंइ बिब् धोंबै केमैं लसि छ्याब् आरेबै म्हि मुँल।
PHI 3:7 दिलेया च सैंमैं ङए ल्हागिर ओंसों छ्याँब तना बिलेया ङइ ख्रीष्‍टए उँइँर च सैमैं तो धोंइ आङ्हाँइमुँ।
PHI 3:8 च्हौ मत्‍त्रे आङिं, क्ह्रोंसेंन बिब् गो बिस्याँ येशू ख्रीष्‍ट ङए प्रभु ङो सेल् योंबै थेबै ताँ, अरू सैमैंने च्हैंमा ताँन् सैमैं तोगो ङइ फाकर्बै सैमैं धों ङ्हाँम्। तोगो ङइ ख्रीष्‍ट येशूजी पिंबै ताँन् सैमैं योंल् खाँरिगे बिसि खीए ल्हागिर ताँन् सै पिवाइमुँ, च ताँन् सैमैं स त्हुल धोंन् ङ्हाँइमुँ।
PHI 3:9 छतसि तारे ङ खीने बालुन् तदा ङ्हाँइमुँ। ह्रोंसइ लबै धर्मउँइँले, नेरो मोशाइ प्ह्रिबै ठिममैं म्हाँदिबइले ङ धर्मि तब आङि, बरु येशू ख्रीष्‍टए फिर बिश्‍वास लबइले ङ परमेश्‍वरए उँइँर ठिक ठर्दिइमुँ। छले ङ परमेश्‍वरउँइँले ठिक ठर्दिब् ग।
PHI 3:10 खी सिसि धबै खैले सोइ खगे बिसि खीए शक्‍ति ङइ क्होल् खाँरिगे, धै खी सिब् धोंलेन् ङइ या सिलन् त्हुलै सिसि खीजी नोब् धों तबै दु:ख नोल् खाँरिगे।
PHI 3:11 तल् खाँम् बिस्याँ ङ सिसि धबै सोल् खाँरिगे।
PHI 3:12 ङइ चु ताँन् सै योंल् खाँइमुँ धै ङइ लल् त्हुबै ताँन् के लल् खाँइमुँ बिसि आङिं, दिलेया फेल् त्हुबै क्ल्ह‍योर फेबै ल्हागिर ङ अझै ओंसों बडिरिइमुँ। च फेल् त्हुबै क्ल्ह‍योर ङ फेरिगे बिसि ख्रीष्‍ट येशूजी ङलाइ ओंसोंन् त्हाँइ।
PHI 3:13 अलि-अङाँमैं, अझै ङ फेल् त्हुबै क्ल्ह्‍योर आफेइमुँ। छतसि ङइ ह्‍याल् खाँबै ताँमैं म्‍लेवासि तारे तखबै ताँमैंर भोंन्ले ओंसों बडिबै के लइमुँ।
PHI 3:14 छतसि परमेश्‍वरजी ख्रीष्‍ट येशूर थेंमिंबै स्वर्गर्बै आशिक योंबर फेल् त्हुबै क्ल्ह्‍योर फेबै ल्हागिर ङ भोंन्ले ओंसों बडिसेन्मुँ।
PHI 3:15 ङ्यो येशू ख्रीष्‍टए फिर बिश्‍वास लब्मैं ताँनइ छाबन् सैं मैंल् त्‍हुम्। दिलेया क्‍हेमैं न्‍होंरि को-कोइ स्योबन् सैं मैंस्‍याँ परमेश्‍वरजी च ताँ या क्‍हेमैंलाइ क्होमिंब्‍मुँ।
PHI 3:16 छतसि ङ्यो खैले चु समा खइ, छलेन ओंसों बडिदै ह्‍याले।
PHI 3:17 ओ अलि-अङाँमैं, ङइ लब् धोंले लरिद्। ङिइ लबै केमैं क्हेमैंइ म्रोंइमुँ, क्हेमैंज्यै या छान् लद्। छतसि ङिइ लब् धोंले लबै म्हिमैंलाइ ङ्ह्‍योसि चमैंए लिलि प्रद्।
PHI 3:18 ङइ चु ताँ ल्‍हें खे क्हेमैंने बिल् खाँइमुँ, धबै या बिमुँ। ङए सैं बेल्‍ले नइमुँ। को-कोइ म्हिमैंम् अझै क्रूसर सिमिंबै येशू ख्रीष्‍टए शत्तुरन् तसि छ्ह थोम्।
PHI 3:19 चुमैं लिउँइँ नर्गर नास तब्‍मुँ, तलेबिस्याँ फोन् चुमैंए देवता ग। धै फापिल् त्‍हुबै केमैं लल् योंमा चुमैं सैं तोंम। चमैंए सैं खोंयोंइ बिले चु ह्‍युलर्बै सैमैंर फिरन् तरिम्।
PHI 3:20 दिलेया ङ्योए नागरिकता स्वर्गर मुँ। छतसि ङ्योलाइ मुक्‍ति पिंबर स्वर्गउँइँले युबै प्रभु येशू ख्रीष्‍टए घ्याँ ङ्यो ङ्‍ह्‍योरिम्।
PHI 3:21 च त्हेर खीजी ङ्योए केर आफेबै ज्युलाइ खील् धों तबै ज्यु लमिंब्मुँ। खीजी खैले ताँन् सैमैं खीए न्होंर थेंल् खाँमुँ, छलेन ङ्योए केर आफेबै ज्यु या फेर्दिवासि खील् धों तबन् लमिंब्‍मुँ।
PHI 4:1 छतसि, ङइ खोबै अलि-अङाँमैं, छलेन् क्हेमैं प्रभुए भोंब् तरिद्। ङइ क्‍हेमैंलाइ म्हाँया लमुँ, धै क्हेमैंए साँ खरिम्। क्हेमैंइ ङए सैं तोंन् लमिंइमुँ छतसि क्हेमैं ङए मुकुट ग।
PHI 4:2 इयोदिया नेरो सुन्‍तुखे प्रभुलाइ ङो सेब्मैं तबइले क्हेमैं सैं घ्रिन् तद् बिसि ङ सैं न्होंउँइँले यो छ्युँ लमुँ।
PHI 4:3 ओ ङइ भर लल् खाँबै ङए थु, ङ क्हिने बिमुँ: “च च्हमिरिमैंलासे या ल्होब्रें लद्।” तलेबिस्याँ सैं तोंबै ताँ म्हिमैंने बिप्रबै केर ङ, क्लेमेस नेरो अरू थुमैंने बालुन् चुमैंज्यै या बेल्‍ले के लइमुँ। चुमैंए मिं खोंयोंइ आखाँबै छ्ह योंबै कितबर मुँ।
PHI 4:4 छतसि प्रभुर खोंयोंन् बिलै सैं तोंन्। ङ धबै बिमुँ, सैं तोंन्।
PHI 4:5 क्हेमैं सैदिल् खाँब्मैं ग बिब ताँन् म्हिमैंइ सेरिगे। प्रभु युनन् युमुँ,
PHI 4:6 छतसि तोइ ताँरै या न्हुँ आलद्, बरु तो चैदिले या ताँन् सैए ल्हागिर परमेश्‍वरलाइ धन्यबाद पिंसि प्राथनार ह्रोंस चैदिबै सैमैं ह्रिद्।
PHI 4:7 झाइले सैंज्यै आमैंबै परमेश्‍वरए शान्‍तिजी क्हेमैंए नरिबै सैं नेरो प्ल्होंरिबै खोंलाइ येशूउँइँले छिं ङ्हाँन् लमिंब्मुँ।
PHI 4:8 ओ अलि-अङाँमैं, आखिरि ताँ चु मुँ: तो ताँमैं क्ह्रोंसेंन्बै मुँ, तो ताँमैं म्हाँदिल् त्हुब मुँ, तो ताँमैं ठिक मुँ, तो ताँमैं बेल्‍ले स्‍वाब मुँ, तो ताँमैंए बारेर छ्याँब बयन तमुँ, तो ताँमैं छ्याँब मुँ, तो ताँर म्हाँया लल् त्हुब मुँ, तो ताँर ल्हयो खल् त्हुब मुँ, अझै छ्याँब लल् त्हुब नेरो थेब लल् त्हुबै ताँ तोइ मुँस्याँ, चु ताँमैं छेनाले मैंन्।
PHI 4:9 क्‍हेमैंइ ङउँइँले तो तो ताँ लोइ, धै तो ताँ थेइ, ङए छ्हर क्हेमैंइ तो ताँ म्रोंइ, च धोंन् लद्। छलस्याँ शान्‍ति पिंबै परमेश्‍वर क्‍हेमैंने तब्‍मुँ।
PHI 4:10 ङ प्रभुर बेल्‍ले सैं तोंइमुँ, तलेबिस्याँ ल्हें त्हिं लिउँइँ क्‍हेमैंइ धबै ङलाइ मैंन। क्ह्रोंसेंन क्हेमैंइ ङए ल्हागिर न्हुँ लन, दिलेया क्हेमैंइ ल्होबै मौका आयोंल।
PHI 4:11 खाँचो तइ बिसि ङइ छ बिब आङिं, तलेबिस्याँ ङए फिर खैबै दुःख तलेया सैं तोंब ङइ लोइमुँ।
PHI 4:12 ङ खैले च्योंब् तब, खैले थेब् तब, बिबै ताँ या ङइ सेइमुँ। ङ चल् योंलेया आयोंलेया, ङने तोन्दोंरि सै मुँलेया तोइ आरेलैया, खैबै त्हेरै या सन्तोकले टिल् खाँबै ताँ ङइ सेइमुँ।
PHI 4:13 तलेबिस्याँ ख्रीष्‍टजी ङलाइ तआन् सैए फिर ट्होबै भों पिंइमुँ। छतसि ङइ चु ताँन् सै लल् खाँम्।
PHI 4:14 दिलेया ङलाइ दुःख तबै त्हेर क्‍हेमैंइ ल्होमिंसि छ्याँबै के लइ।
PHI 4:15 ओंसों ङ माकेडोनिया ह्‍युलउँइँले ह्‍यामाइ या घ्याँ खर्ज पिंसि ङलाइ क्‍हेमैंइ ल्होइ, अरू खाबज्‍यै आल्हो बिब क्‍हेमैं फिलिप्‍पीथेंमैंइ सेइमुँ।
PHI 4:16 ङ थेसलोनिका सहरर मुँमै या क्‍हेमैंइ तिब्‍ले मत्‍त्रे आङिं, ल्हें खे ङए खाँचोर ङलाइ ल्होइ।
PHI 4:17 ङइ क्हेमैंउँइँले भेटि म्‍हैब आङिं, क्‍हेमैंइ ङलाइ ल्होमिंबइले क्हेमैंइ ल्हें आशिक योंरिगे बिब ङए सैं मुँ।
PHI 4:18 ङलाइ चैदिब् भन्दा ल्हें ङइ योंइमुँ। क्‍हेमैंइ इपाफ्रोडिटसने पिमिंबै बेल्‍ले लिंबै थाँ खबै परमेश्‍वरजी खोबै ख्रो धों तबै भेटि योंसि ङ बेल्‍ले सैं तोंइमुँ।
PHI 4:19 खैले क्हेमैंइ पिंइमुँ छलेन क्‍हेमैंलासे या तो सै चैदिलेया, ङए परमेश्‍वरजी खीए च्योलै आखाँबै सै न्होरउँइँले ख्रीष्‍ट येशूउँइँले क्हेमैंलाइ चैदिबै सैमैं पिंब्मुँ।
PHI 4:20 छतसि ङ्योए परमेश्‍वर आबाए मिं खोंयोंइ बिलै थेब तरिगे। आमेन।
PHI 4:21 ख्रीष्‍ट येशूए फिर बिश्‍वास लबै ताँन् म्हिमैंने ङए जय मसीह बिमिंन्। झाइले ङने मुँबै अलि-अङाँमैंज्यै या क्‍हेमैंने जय मसीह बिमिंइमुँ।
PHI 4:22 चुर्बै ताँन् बिश्‍वासीमैंइ, खासगरि रोमी म्रुँए दरबारर मुँबै बिश्‍वासीमैंइ, क्‍हेमैंलाइ जय मसीह बिमिंइमुँ।
PHI 4:23 प्रभु येशू ख्रीष्‍टए दयाम्हाँया क्‍हेमैंए सैं न्‍होंर तरिगे।
COL 1:1 परमेश्‍वरजी त्हाँबइले येशू ख्रीष्‍टजी कुल्मिंबै चेला चिब ङ पावल नेरो ङ्योए अलि तिमोथीउँइँले,
COL 1:2 कलस्‍सी नाँसर मुँबै बिश्‍वासीमैंलाइ जय मसीह मुँ। क्हेमैं येशू ख्रीष्‍टए फिर बिश्‍वास लबै ङिए अलि-अङाँमैं नेरो परमेश्‍वरए म्‍हिमैं ग। ङ्योए परमेश्‍वर आबाजी क्‍हेमैंए फिर खीए दयाम्हाँया नेरो शान्ति पिंरिगे।
COL 1:3 ङिइ क्‍हेमैंए ल्हागिर प्राथना लमा ङ्योए प्रभु येशू ख्रीष्‍टए आबा परमेश्‍वरलाइ खोंयोंइ या धन्‍यबाद पिंम्।
COL 1:4 तलेबिस्याँ येशू ख्रीष्‍टए फिर्र क्हेमैंइ लबै बिश्‍वास नेरो परमेश्‍वरए म्‍हिमैं ताँनने क्‍हेमैंइ म्हाँया लइमुँ बिसि ङिइ थेइमुँ।
COL 1:5 क्हेमैंइ योंल् त्हुबै सैमैं परमेश्‍वरजी क्हेमैंए ल्हागिर स्वर्गर जोगेथेंइमुँ बिबै आशा लसि क्हेमैंइ छाबै बिश्‍वास नेरो म्हाँया लब् ग। चु आशाए ताँ ओंसोंन् ख्रीष्‍टउँइँले खबै सैं तोंबै ताँउँइँले सेल।
COL 1:6 ओंसों क्‍हेमैंइ परमेश्‍वरए दयाम्हाँया खैब मुँन बिसि क्‍होबै त्हिंइ सेरोन् क्‍हेमैंइ च सैं तोंबै ताँ क्ह्रोंसेंन् ग बिसि सेल। च त्हिंइ सेरो च ताँइ लमा क्‍हेमैं न्‍होंरि आशिक योंइमुँ। च ताँ क्‍हेमैंइ थेब् धोंलेन् ताँन् ह्‍युल जरे या थेनेसिन् मुँ धै म्हिमैंइ आशिक योंसिन् मुँ।
COL 1:7 ङिने बालु के लबै खोबै थु इपाफ्रासउँइँले क्हेमैंइ सैं तोंबै ताँ थेइ। चइ क्हेमैंए ल्हागिर येशू ख्रीष्‍टए भर पर्दिल्‍ले के लइमुँ।
COL 1:8 परमेश्‍वरए पबित्र प्ल्हजी क्‍हेमैंलाइ पिंबै म्हाँयाए बारेर चइ ङिने बिइ।
COL 1:9 छतसि च ताँ थेबै त्हिंइ सेरोन् ङिइ क्हेमैंए ल्हागिर प्राथना लब आपिइमुँ। परमेश्‍वरए पबित्र प्ल्हजी पिंबै बुद्धि नेरो क्‍होबै सैं योंसि क्हेमैंइ खीजी बिब् धोंले तो के लल् त्‍हुम् बिसि छेनाले क्‍होरिगे बिसि ङिइ यो छ्युँ लम्।
COL 1:10 च क्होस्याँ क्‍हेमैंइ प्रभुए सैं तोंन् लसि खीजी खोबै छ्ह थोब्मुँ, धै क्‍हेमैंइ ताँन् खालर्बै छ्याँबै के लमा क्‍हेमैं छ्याँबै रो रोबै धुँ धों ततै परमेश्‍वरए ज्ञानर बडिदै ह्‍याब्मुँ।
COL 1:11 क्‍हेमैंए फिर तो तलेया क्हेमैंइ ढुक्‍कले सैदिल् खाँरिगे बिसि परमेश्‍वरए थेबै शक्‍तिउँइँले ताँन् भों योंरिगे। छतसि क्हेमैं सैं तोंदै भोंसि तद्।
COL 1:12 तलेबिस्याँ ख्रीष्‍टए फिर बिश्‍वास लब्मैंइ परमेश्‍वरए चारबै ग्यालसर योंल् त्हुबै सैमैं योंबै हग खीजी क्हेमैंलाइ पिंइमुँ। छतसि परमेश्‍वर आबालाइ धन्‍यबाद पिंन्।
COL 1:13 खीजी ङ्योलाइ शैतानए मिछु खैबै ग्याल्सउँइँले फ्रेपखसि खीए खोबै च्‍ह येशू ख्रीष्‍टए ग्याल्सर पखइमुँ।
COL 1:14 खीजीन् ङ्योए पाप क्षमा लमिंसि ङ्यो जोगेमिंइमुँ।
COL 1:15 म्‍हिमैंइ परमेश्‍वर म्रोंल् आखाँ, दिलेया परमेश्‍वर खैब मुँ, येशू ख्रीष्‍टै या छाबन् मुँ। परमेश्‍वरजी ह्‍युल बनेब् भन्दा ओंसोंन् ख्रीष्‍ट मुँल, खी ताँन् बनेबै सै भन्‍दा थेब ग।
COL 1:16 तलेबिस्याँ ख्रीष्‍टउँइँलेन् परमेश्‍वरजी स्‍वर्ग नेरो पृथ्‍बीर्बै ताँन् सैमैं बनेइ। म्रोंल् खाँबै सैमैं, म्रोंल् आखाँबै सैमैं, ताँन् शक्‍ति मुँबै सैमैं परमेश्‍वरजी ख्रीष्‍टउँइँलेन् ख्रीष्‍टए ल्हागिर्न बनेइ।
COL 1:17 ख्रीष्‍ट ताँन् सै भन्दा ओंसों मुँल, खीजी खै बिमुँ ताँन् सैमैं छान् तम्।
COL 1:18 खीए फिर बिश्‍वास लब्मैं खीए ज्यु ग, चमैंए क्र खीन् ग। खीजी चमैंलाइ सोल् लमिंमुँ। ख्रीष्‍ट ताँन् सै भन्दा थेब तरिगे बिसि परमेश्‍वरजी ताँन् भन्दा ओंसों ख्रीष्‍टलाइ सोगों लमिंइ।
COL 1:19 तलेबिस्याँ खीने मुँबै ताँन् गुनमैं ख्रीष्‍टने मुँबइले परमेश्‍वर सैं तोंइ।
COL 1:20 छले क्रूसर येशूजी कोए ख्रो पिंबइले परमेश्‍वरजी पृथ्‍बी नेरो स्‍वर्गर मुँबै ताँन् सैमैं खीने बालुन् क्ह्रिल् लमिंइ।
COL 1:21 ओंसों क्‍हेमैंइ आछ्याँबै सैंले पापए केमैं लसि परमेश्‍वरउँइँले ह्रेंगो तयासि खीए शत्तुरमैं तल।
COL 1:22 दिलेया खीए उँइँर तोइ छ्याब् आरेल्‍ले पबित्र लमिंबै ल्हागिर म्हिए क्हो किंसि युबै ख्रीष्‍ट क्रूसर सिमिंबइले परमेश्‍वरजी क्‍हेमैं खीने क्ह्रिल् लमिंइमुँ।
COL 1:23 छतसि येशू ख्रीष्‍टए फिर भोंन्ले बिश्‍वास लसि क्‍हेमैंइ ख्रीष्‍टउँइँले खबै सैं तोंबै ताँउँइँले योंबै आशा आपिल्‍ले टिद्। (च आशा तो मुँ बिस्याँ ङ्यो येशूने बालु स्‍वर्गर तब्मुँ।) चु सैं तोंबै ताँ बिप्रबै ल्हागिर परमेश्‍वरजी ङ पावलइ या के लबर त्हाँइमुँ, धै चु ताँ स्वर्ग न्होंरि ह्‍युल तिगोंन् ताँन् म्‍हिमैंने बिमिंइमुँ।
COL 1:24 क्हेमैंए ल्हागिर दुःखन् योंरिलेया ङ सैं तोंइमुँ, तलेबिस्याँ ख्रीष्‍टए ज्युए ल्हागिर, खी क्वेंब्मैंए ल्हागिर ङज्यै या नोल् त्हुबै दुःख ङ‍ए ज्युर्न नोसि पूरा लम्।
COL 1:25 परमेश्‍वरजी पिंबै सैं तोंबै ताँ ङइ क्हेमैंलाइ छेनाले बिमिंरिगे बिसि खीजी बिश्‍वासीमैंए ल्हागिर के लबै म्हि ङ तल् पिंइमुँ।
COL 1:26 ओंसों ओंनोंन् म्‍हिमैंइ आसेबै चु औदिबै ताँ तिंयाँ खीजी खीए म्‍हिमैंने सेल् लमिंइमुँ।
COL 1:27 ताँन् ह्रेंमैंए ल्हागिरै या परमेश्‍वरए ताँ कति थेब मुँ बिसि खीजी ह्रोंसए म्हिमैंलाइ था सेमिंब सैं लइ। च औदिबै ताँ तो जा बिस्याँ क्‍हेमैंए सैं न्‍होंर ख्रीष्‍ट मुँब् ग। ख्रीष्‍ट क्‍हेमैं न्‍होंर मुँबइले क्‍हेमैंज्यै या परमेश्‍वरउँइँले थेबै मान योंब्‍मुँ।
COL 1:28 ताँन् म्हिमैं ख्रीष्‍टर भोंसि तरिगे बिसि ङिइ ख्रीष्‍टउँइँले खबै बुद्धिए ताँमैं लोमिंदै ताँन् म्हिमैंने न्ह क्रों मि क्रोंले टिद् बिम्।
COL 1:29 ङए सैं न्होंर ख्रीष्‍टजी थेंमिंबै भोंउँइँले ङ खैबै दुःखन् तलेया चु के लम्।
COL 2:1 क्हेमैं कलस्सिथेंमैं, लाउडिकियाथेंमैं नेरो ङ खोंयोंइ या आम्रोंब्‍मैं ताँनए ल्हागिरै या ङइ बेल्‍ले दुःखले के लइमुँ बिबै ताँ क्‍हेमैंइ सेरिगे बिब ङए सैं मुँ।
COL 2:2 क्‍हेमैं ह्रों-ह्रोंसए न्होंर म्हाँयार सैं घ्रि तसि क्हेमैंए सैं भोंब् तरिगे, धै परमेश्‍वरउँइँले खबै क्ह्रोंसेंन्बै बुद्धिइ प्लिंसि परमेश्‍वरइ लोथेंबै ताँ क्‍हेमैंइ सेरिगे। च ताँ तो जा बिस्याँ, येशू ख्रीष्‍ट ङो सेल् योंब् ग।
COL 2:3 तलेबिस्याँ ताँन् ज्ञान बुद्धिमैं ख्रीष्‍टनेन् मुँ।
COL 2:4 स्योलिबै ताँमैं पोंसि खाबज्यै क्हेमैं लुल् आखाँरिगे बिसि ङ क्‍हेमैंने बिइमुँ।
COL 2:5 तलेबिस्याँ ङ क्हेमैंउँइँले ह्रेंगो मुँलेया ङ खोंयोंन् बिलै क्हेमैंलाइ मैंरिम्। क्‍हेमैं ख्रीष्‍टए फिर बिश्‍वास लबर भोंब् तसि बालुले टिरिब् म्रोंसि ङए सैं तोंइमुँ।
COL 2:6 छतसि क्हेमैंइ ख्रीष्‍ट येशूलाइ प्रभु बिसि म्हाँदिब् धोंले खीनेन् घ्रि तसि छ्ह थोद्।
COL 2:7 खैले सिं धुँए जरा सरि न्होंन्हों च्‍योंमु, छलेन क्‍हेमैं छ्ह थोमा ख्रीष्‍टलाइ सैं पिंसि भोंब् तद्। इपाफ्रासइ क्‍हेमैंलाइ लोमिंब् धोंलेन् ख्रीष्‍टए फिर अझै बिश्‍वास भोंब् लद्। धै खोंयोंन् बिलै धन्‍यबाद पिंबै सैं प्‍ह्‍याद्।
COL 2:8 छतसि न्ह क्रों मि क्रोंले टिद्! म्‍हिउँइँले खबै केर आफेबै स्योलिबै ताँइ क्‍हेमैं परमेश्‍वरए क्ह्रोंसेंन्बै घ्‍याँउँइँले फ्रेल् आखाँरिगे। छाबै स्योलिबै ताँमैं ख्रीष्‍टउँइँले खब आङिं, ह्‌युल ग्याल्स ओलेबै मोंमैंउँइँले नेरो म्‍हिमैंइ लबै रोसमैंउँइँले खब् ग।
COL 2:9 छतसि छाबै स्‍योर ताँ आक्‍वेंन्, तलेबिस्याँ परमेश्‍वरने मुँबै ताँन् गुनमैं येशू ख्रीष्‍टने मुँ।
COL 2:10 क्हेमैं ख्रीष्‍ट येशूने घ्रिन् तबइले छ्हर योंल् त्हुबै ताँन् सैमै योंबै क्ल्ह्‍योर क्हेमैं फेखइमुँ। ताँन् शक्‍तिमैं नेरो ग्याल्समैंए फिर्बै थेब खीन् ग।
COL 2:11 ख्रीष्‍टए फिर बिश्‍वास लसि क्हेमैं ज्युर चिनु लब् धोंन् तइ। दिलेया च ज्युर चिनु लब म्‍हिमैंइ लब आङिं, ख्रीष्‍टजी लबै सैंर्बै चिनु ग। ख्रीष्‍टजी च सैंर्बै चिनु लमा क्हेमैंए सैंर्बै आछ्याँबै सिमैं थोवाइ।
COL 2:12 छलेन क्‍हेमैं क्‍युर प्‍ल्हुँसि बप्‍तिस्मा किंमा क्हेमैं ख्रीष्‍टनेन् बालु सिसि पाब् ग। परमेश्‍वरजी ख्रीष्‍टलाइ सिबइले धबै सोगों लमिंल, धै क्हेमैंइ खीए शक्‍तिए फिर बिश्‍वास लबइले खीजी क्हेमैंलाज्यै या ख्रीष्‍टनेन् बालु सोगों लमिंइमुँ।
COL 2:13 ओंसों क्‍हेमैं ह्रोंसए पाप नेरो ज्युर चिनु आलबइले सिरिल, दिलेया परमेश्‍वरजी ङ्योए ताँन् पाप क्षमा लमिंसि ख्रीष्‍टने बालुन् सोगों लमिंइ।
COL 2:14 ङ्योए पापइ लमा ङ्योइ योंल् त्हुबै सजैं प्‍ह्रिथेंबै तमसुक नेरो ङ्योए फिर छ्याब् ल्हैदिबै कानुनमैं परमेश्‍वरजी क्रूसर च्योमिंसि मेटिदिवाइ।
COL 2:15 येशू ख्रीष्‍ट क्रूसर सिमिंसि खीजी च ताँन् दुष्‍टए शक्‍ति मुँबै सैमैं केर आफेब् लवासि ट्होवाइमुँ। धै “चमैं ताँन् ङए न्होंर मुँ” बिसि खीजी ताँन् म्‍हिमैंए उँइँरि चमैं फाफेल् लवाइ।
COL 2:16 छतसि चब-थुँब, चाड म्हाँदिब, औंसि नेरो प्रिबै त्हिंइ म्हाँदिबै बारेर क्‍हेमैंलाइ खाबज्‍यै छ्याब् आल्‍हैदिरिगे।
COL 2:17 चु ठिममैं पक्‍का ताँ आङिं, छरि मत्‍त्रे ग, दिलेया ख्रीष्‍ट युसेरो खी मत्‍त्रे क्‍ह्रोंसेंन्‍बै म्हाँदिल् त्‍हुबै परमेश्‍वर ग।
COL 2:18 को-कोइइ “ह्रोंसन् च्‍योंब् तसि स्‍वर्गदूतमैंलाइ म्‍हाँदिल् त्‍हुम्,” बिम्। “ङिइ थेबै दर्शन म्रोंइ” बिसि प्हैंम्, चमैंइ खेंमैंए आछ्याँबै सैंइ तोन-तोर्न थेब् प्‍हैंम्। छतसि चमैंइ क्‍हेमैंइ योंल् त्हुबै इनाम योंल् आखाँन् आलरिगे।
COL 2:19 छाबै म्‍हिमैं ख्रीष्‍टए लिलि आप्र। ख्रीष्‍ट क्र ग, झाइले बिश्‍वासीमैं ताँन् खीए ज्यु ग, धै ख्रीष्‍टउँइँलेन् ताँन् ज्युइ भों योंम्। छले मत्‍त्रे अँख्ला बाख्लमैं त्हुँसि ज्यु तम्। छतसि परमेश्‍वरए सैंर मैंब् धोंलेन् ज्यु बडिदै ह्‍याम्।
COL 2:20 छतसि ख्रीष्‍टने बालुन् क्हेमैं सिसि चु ह्‌युल ग्याल्स ओलेबै मोंमैंउँइँले फ्रेइ। छतमा चु ह्‍युलर्बै म्हिमैंइ धोंले “चु लल् तम्, च लल् आत” बिसि क्हेमैंइ तले छ्ह थोरिमुँ?
COL 2:21 “चु सै छेल् आत,” “फलना सै चल् आत,” “चने छुइल् आत,” बिबै ताँमैंए लिलि तले प्ररिमुँ?
COL 2:22 (च ताँन् सै चसि थुँसि म्‍हयाब् ग।) तलेबिस्याँ च म्‍हिमैंइ लबै छ्यामैं नेरो चमैंइ लोमिंबै ताँ मत्‍त्रे ग।
COL 2:23 चु छ्यामैंइ बिब् धोंले “छले म्हाँदिल् त्हुम्, छुले म्हाँदिल् त्हुम्!” धै “ह्रोंसए ज्युलाइन बेल्‍ले दुःख पिंसि ह्रोंस च्योंब् लल् त्हुम्!” च ताँमैं बुद्धि मुँब् धों ग बिलेया चमैंल क्ह्रोंसेंन्बै बुद्धि आरे। च छ्यामैंइ ङ्योए ज्युर्बै आछ्याँबै इच्‍छामैं म्हल् लल् आखाँ।
COL 3:1 क्‍हेमैं ख्रीष्‍टने बालुन् सोगों तसि रेइमुँ! छतसि स्‍वर्गर्बै सैमैं म्हैद्। स्‍वर्गर परमेश्‍वरए क्‍योलोउँइँ ख्रीष्‍ट येशू टिइमुँ।
COL 3:2 छतसि क्‍हेमैंए सैं चु पृथ्‍बीर्बै सैर आल्हैदिद्, स्‍वर्गर मुँबै सैमैं म्हैद्।
COL 3:3 तलेबिस्याँ क्‍हेमैं चु ह्‍युलए ल्हागिर सिल् खाँइमुँ, धै क्हेमैंए क्ह्रोंसेंन्बै छ्ह ख्रीष्‍टने बालुन् परमेश्‍वर ङाँर लोथेंइमुँ।
COL 3:4 ङ्योलाइ छ्ह पिंब येशू ख्रीष्‍ट ग, धै खी धबै ह्‍युलर युमा क्हेमैं या खीने बालुन् म्रोंसि मान योंब्मुँ।
COL 3:5 छतसि क्‍हेमैं ह्‍युलर्बै सैजरे सैं आह्‍याद्: फ्रें क्ल्योंब नेरो रण्डिबाजी लसि फोहोरी के आलद्, छाडा आतद्, दुष्‍ट सैं आप्ह्‍याब नेरो लोब आलद्। लोब लबम् कु पूजा लब् धों तब् ग।
COL 3:6 छाबै पापमैं म्रोंसि बिब् आङिंब्मैंए फिर परमेश्‍वर बेल्‍ले ह्रिस खम्।
COL 3:7 क्‍हेमैं या ओंसों छाबन् सैं प्ह्‍यासि चु सैंमैंन् म्है प्रमल।
COL 3:8 दिलेया तारे क्‍हेमैंज्यै चु ताँन् सै पिवाद्: ह्रिस खब ने आगुए फिर ह्रिस लब, आगु स्यारब, ह्रोंसए सुँउँइँले आछ्याँबै ताँ पोंब पिवाल् त्‍हुम्।
COL 3:9 घ्रिइ घ्रिने स्‍योर आतेद्, तलेबिस्याँ क्‍हेमैंइ ह्रोंसए ओंसोंबै आछ्याँबै बानि नेरो चइ लरिबै आछ्याँबै केमैं पिवाल् खाँइमुँ।
COL 3:10 छतसि छारा बानि योंसि तारे क्हेमैंइ छ्याँबै सैं प्ह्‍यासि छारा म्‍हिमैं तइमुँ। धै क्हेमैंइ खीलाइ छेनाले ङो सेरिगे बिसि परमेश्‍वरजी चु छाबै छारा म्हि बनेसि खी धोंबन् लमिंरिइमुँ।
COL 3:11 छतसि ताँन् म्‍हिमैं घ्रिन् तइमुँ। यहूदीमैं मुँलेया, अरू ह्रेंमैं मुँलेया, ज्युर चिनु ललेया आललेया, आखेब्‍मैं, तोइ आह्रब्मैं मुँलेया, केब्छैंमैं ङिंलेया आङिंलेया, तो मुँलेया, च ताँन् परमेश्‍वरए उँइँर तोइ फरक आरे। ङ्योलाइ चैदिबै सै ख्रीष्‍ट मत्‍त्रे ग, धै ताँन् म्‍हिए सैं न्‍होंर ख्रीष्‍ट टिम्।
COL 3:12 क्हेमैं परमेश्‍वरजी खोबै त्हाँबै पबित्र म्हिमैं ग। छतसि खीए म्हिमैं तबइले क्‍हेमैंइ आगुए फिर ल्‍हयो खसि छ्याँबै के लब, थेब् आप्‍हैंब, ह्रिस आखब, धै सैदिल् खाँब तद्।
COL 3:13 घ्रिइ तोइ लवास्याँ घ्रिज्यै या सैदिब्रें लद्, खाब् मुँले म्हिलाइ छ्याब् ल्हैदिबै ताँ तोइ मुँस्याँ घ्रिइ घ्रिलाइ क्षमा लब्रें लद्। क्‍हेमैंलाइ प्रभुजी क्षमा लमिंब् धोंलेन क्‍हेमैंज्‍यै या अरूलाइ क्षमा लमिंल् त्हुम्।
COL 3:14 चु ताँन् सै भन्दा अरूलाइ ल्हें म्हाँया लबै सैं प्‍ह्‍याद्। म्हाँयाइ लमा आक्ह्रिब्मैं ताँन् क्ह्रिल् खाँम्।
COL 3:15 क्‍हेमैंए सैंर ख्रीष्‍टजी पिंबै शान्तिइ प्लिंरिगे। क्हेमैं ताँन् ज्यु घ्रिर्न क्ह्रिसि शान्ति योंरिगे बिसि परमेश्‍वरजी क्‍हेमैं त्‍हाँब् ग। धै धन्‍यबाद पिंब्‍मैं तद्।
COL 3:16 ख्रीष्‍टउँइँले खबै सैं तोंबै ताँ क्‍हेमैंए सैं न्होंर थेंन्। बेल्‍ले बुद्धि मुँल्‍ले घ्रिइ घ्रिलाइ लोमिंसि अर्थि पिंन्। खों न्होंउँइँले धन्यबाद पिंसि परमेश्‍वरए मिं क्वेबै ल्हागिर भजन, क्वेमैं नेरो पबित्र प्ल्हजी पिंबै क्वेमैं प्रिंसि सैं न्होंउँइँले खीए मिं क्वेद्।
COL 3:17 क्हेमैंइ तो ताँ पोंलेया, तो के ललेया, येशूउँइँलेन् परमेश्‍वर आबालाइ धन्यबाद पिंदै प्रभु येशूए मिंर लद्।
COL 3:18 ओ च्हमिरिमैं, क्हेमैं प्रभुए उँइँर छ्याँब तबै ल्हागिर ह्रों-ह्रोंसए प्‍युँए न्होंर टिद्।
COL 3:19 ओ मुँयुँमैं, क्‍हेमैंए प्‍ह्रेंस्‍योलाइ म्हाँया लद्, चमैंए फिर सैं सार् आप्‍ह्‍याद्।
COL 3:20 ओ कोलोमैं, आबा-आमाइ बिबै तामैं ङिंन्, तलेबिस्याँ क्हेमैंइ आबा-आमाइ बिब ङिंस्याँ परमेश्‍वर सैं तोंम्।
COL 3:21 ओ आबामैं, ह्रोंसए कोलोमैंलाइ ह्रिस खल् आलद्। आस्याँ चमैंए सैं च्योंब् तम्।
COL 3:22 ओ केब्छैंमैं, क्‍हेमैंए चु ह्‍युलर्बै क्ल्हेमैंइ बिबै ताँ ङिंन्। चमैंए उँइँर सैं तोंन् लबै ल्हागिर मत्‍त्रे के आलद्, दिलेया प्रभु येशूइ म्रोंसिन्मुँ ङ्हाँसि “ङइ लल् त्हुबै के लल् त्हुम्” बिसि क्ल्हेमैंए न्होंर टिद्।
COL 3:23 क्‍हेमैंइ तो ललेया सैं न्होंउँइँलेन् लब्रें लद्। म्‍हिए सेवा लब् धोंले आङिं, प्रभुए सेवा लब् धोंले लद्।
COL 3:24 छ लस्याँ क्‍हेमैंइ योंल् त्हुबै इनाम प्रभुए योउँइँले योंब्मुँ, तलेबिस्याँ क्‍हेमैंइ प्रभु ख्रीष्‍टए सेवा लरिइमुँ।
COL 3:25 दिलेया आछ्याँबै के लब्मैंइ आछ्याँबै नोंन् योंब्मुँ, तलेबिस्याँ परमेश्‍वरजी खाबलाज्यै या आफेल।
COL 4:1 ओ क्ल्हेमैं, क्‍हेमैंलै या स्‍वर्गर क्ल्हे मुँ बिब् सेसि क्‍हेमैंइ ठिकले नेरो छेनाले केब्छैंमैं के ल्‍हैदिद्।
COL 4:2 परमेश्‍वरलाइ धन्‍यवाद पिंसि आनारल्‍ले न्ह क्रो मि क्रोंले खोंयोंइ या प्राथना लरिद्।
COL 4:3 ख्रीष्‍टए बारेर्बै ओंसों था आसेबै छ्याँबै ताँ बिप्रबइले ङ चुर झेलर टिल् त्‍हुइ। छतसि परमेश्‍वरजी ङिलाइ च ताँ बिप्रबै छ्याँबै मौका पिंरिगे बिसि ङिए ल्हागिरै या प्राथना लद्।
COL 4:4 ङइ सैं तोंबै ताँ पोंमा म्हिमैंलाइ छेनाले क्होमिंल् खाँरिगे बिसि ङए ल्हागिर प्राथना लमिंन्।
COL 4:5 येशू ख्रीष्‍टए फिर बिश्‍वास आलब्मैंने न्ह क्रों मि क्रोंले प्रद्। धै क्‍हेमैंइ मौका योंमा प्रभुए सैं तोंन् लबै केमैं लद्।
COL 4:6 क्‍हेमैंइ अरूलाइ खोंयोंइ सैं नल् आलल्‍ले छ्याँबै सैं मैंसि ताँ पोंल् त्‍हुम्। धै ताँन् म्‍हिमैंने खैले जवाफ पिंल् त्‍हुम् बिसि क्‍हेमैंइ सेल् खाँम्।
COL 4:7 ङ्योए खोबै अलि तुखिकसइ ङए बारेर्बै ताँन् ताँ क्‍हेमैंने बिमिंब्‍मुँ। च प्रभुए केर ङ्योने बा-बालुन् प्रबै बिश्‍वास मुँबै म्हि ग।
COL 4:8 छलेन चइ ङिए बारेर्बै सौंसर क्‍हेमैंलाइ था सेल् पिंसि सैं क्‍होल् लमिंरिगे बिसि ङइ चलाइ क्‍हेमैं ङाँर कुल्‍मिंब् ग।
COL 4:9 चने बालु क्‍हेमैंए नाँसर्बै ओनेसिमस बिबै म्‍हि या ङइ कुल्‍मिंइमुँ। च येशू ख्रीष्‍टर बिश्‍वास लबै खोबै अलि ग। चुर तरिबै ताँन् ताँमैं चमैंइ क्‍हेमैंने बिमिंब्‍मुँ।
COL 4:10 ङने बालु झेलर च्युथेंबै थु अरिस्‍तार्खसइ क्‍हेमैंने जय मसीह बिमिंइमुँ। छलेन बर्णाबासए अलि फेबै मर्कूसज्‍यै या क्‍हेमैंने जय मसीह बिमिंइमुँ। (च मर्कूसए बारेर ङइ क्‍हेमैंलाइ ओंसों ताँ पिंइ: च क्हेमैं ङाँर खइबिस्‍याँ चए मान लद्।)
COL 4:11 झाइले युस्‍तस बिबै येशूज्‍यै या क्‍हेमैंने जय मसीह बिमिंइमुँ। प्रभुए फिर बिश्‍वास लबै यहूदीमैं न्‍होंर चुमैं सों मत्‍त्रेइ परमेश्‍वरए ग्याल्सर्बै ताँ बिप्रबै के ङने बालुन् लसेन्‍मुँ। चुमैंइ ङए सैं बेल्‍ले क्‍होल् लमिंइमुँ।
COL 4:12 क्‍हेमैं न्‍होंर्बै अर्को येशू ख्रीष्‍टए के लबै म्‍हि इपाफ्रासज्यै या क्‍हेमैंने जय मसीह बिमिंइमुँ। क्‍हेमैंए सैं भोंब् तरिगे, ताँन् सैरि पक्‍का तरिगे, झाइले परमेश्‍वरजी बिब् धोंले क्‍हेमैंइ ताँन् लरिगे बिसि चइ खोंयोंइन क्‍हेमैंए ल्हागिर बेल्‍ले प्राथना लसेन्‍मुँ।
COL 4:13 क्‍हेमैं कलस्‍सीथेंमैं, झाइले लाउडिकियाथेंमैं नेरो हिरापोलिसथेंमैंए ल्हागिर चइ गारो के लइमुँ बिसि ङ ह्रोंसन साक्षि पिंल् खाँम्।
COL 4:14 झाइले खोबै वैद्य लूकाइ नेरो डेमासइ क्‍हेमैंने जय मसीह बिमिंइमुँ।
COL 4:15 लाउडिकिया नाँसर्बै बिश्‍वासीमैं नेरो ङ्योए अङाँ नुम्‍फा, झाइले चए धिंर खागु तबै बिश्‍वासीमैंने ङिए जय मसीह बिमिंन्।
COL 4:16 क्‍हेमैंइ चु प्ह्रिछ्या खेल् खाँबै लिउँइँ लाउडिकिया नाँसर्बै बिश्‍वासीमैंने या खैलसे खेल् पिंन्। झाइले ङइ लाउडिकियालाइ पिमिंबै प्ह्रिछ्या क्‍हेमैंज्‍यै या खेद्।
COL 4:17 झाइले अर्खिप्पसने ङउँइँले “क्‍हिइ प्रभुए सेवा खैले लल् त्‍हुम् बिसि जिम्‍मा योंइमुँ, च के पूरा लद्,” बिसि बिमिंन्।
COL 4:18 ङए योउँइँले ङइ चु ताँ प्‍ह्रिइमुँ: ङ पावलउँइँले जय मसीह मुँ। ङ झेलर च्युइमुँ आम्‍लेल्‍ले ङए ल्हागिर प्राथना लमिंन्। परमेश्‍वरए दयाम्हाँया क्‍हेमैंने तरिगे।
1TH 1:1 ङि पावल, सिलास नेरो तिमोथीउँइँले थेसलोनिका सहरर्बै बिश्‍वासीमैंलाइ जय मसीह मुँ। क्हेमैं परमेश्‍वर आबा नेरो प्रभु येशू ख्रीष्‍टए म्हिमैं ग। क्हेमैंए फिर परमेश्‍वरए दयाम्हाँया नेरो शान्‍ति तरिगे।
1TH 1:2 ङि प्राथना लमा खोंयोंन् बिलै क्‍हेमैंलाइ मैंसि परमेश्‍वरलाइ धन्‍यबाद पिंम्।
1TH 1:3 छले प्राथना लमा चु ताँमैं सों ङिए सैंर मैंम्: क्‍हेमैंइ प्रभु येशूए फिर बिश्‍वास लसि छ्याँबै के लइमुँ। झाइले ताँनने म्हाँया लसि क्‍हेमैंइ थेबै के लइमुँ। प्रभु येशू ख्रीष्‍ट क्ह्रोंसेंन धबै युब्‍मुँ बिसि क्‍हेमैंइ थेबै बिश्‍वास लइमुँ।
1TH 1:4 ओ परमेश्‍वरजी खोबै अलि-अङाँमैं, खीजी क्‍हेमैंलाइ त्हाँब् ग बिसि ङिइ सेइमुँ।
1TH 1:5 तलेबिस्याँ ङिइ क्हेमैंने सैं तोंबै ताँ ओंसोंन् बिमिंमा ङिए सुँइ मत्‍त्रे पोंब आङिं, परमेश्‍वरए पबित्र प्ल्ह नेरो भोंउँइँले बिब् ग। चु ताँ क्ह्रोंसेंन् ग बिब सैं न्‍होंर था सेसि ङि क्‍हेमैं ङाँर युइ। क्‍हेमैंए म्‍हाँजोर टिमा क्‍हेमैंए ल्हागिर्न ङिइ खैले त्हिंइ थोल बिसि क्‍हेमैंज्यै सेइमुँ।
1TH 1:6 ङि नेरो प्रभुजी छ्ह खैले थोल क्हेमैंज्यै या छलेन् छ्ह थोइमुँ, तलेबिस्याँ ल्‍हें दुःख सैदिलेया परमेश्‍वरए पबित्र प्ल्हउँइँले सैं तोंन्‍ले क्‍हेमैंइ सैं तोंबै ताँ थेइ।
1TH 1:7 छले माकेडोनिया नेरो अखैया ह्‍युलजरे मुँबै बिश्‍वासीमैंए म्हाँजोर क्‍हेमैं नमुना तइमुँ।
1TH 1:8 तलेबिस्याँ क्‍हेमैंउँइँले प्रभु येशूए बारेर्बै ताँ माकेडोनिया नेरो अखैया तिगोंन् फेइ। च मत्‍त्रे आङिं, क्हेमैंइ परमेश्‍वरए फिर बिश्‍वास लसि म्हाँदिबै ताँ खन्तोंदोंन् थेनेइमुँ। छतसि ङिइ म्‍हिमैंने त्‍होसि क्‍हेमैंए बारेर तोइ बिरिल् आत्‍हु।
1TH 1:9 तलेबिस्‍याँ ङि क्हेमैं ङाँर खमा क्हेमैंइ ङिलाइ बेल्‍ले मान लइ, धै क्‍हेमैंइ कु (मूर्ति) फ्योब पिसि क्‍ह्रोंसेंन्‍बै परमेश्‍वरउँइँ सैं एसि खीए सेवा लइ बिसि ताँन् म्हिमैंइ बयन लइमुँ।
1TH 1:10 झाइले स्वर्गउँइँले युबै परमेश्‍वरए च्‍ह खोंयों युब् ङ्‍हे बिसि क्हेमैं ह्रेरिइमुँ बिबै ताँ चमैंइ ङिने बिरिमुँ। खीजी ह्रोंसए च्ह येशू सिबइले धबै सोगों लमिंइ, धै येशूजी तारे खबि छेबै दण्डउँइँले ङ्योलाइ जोगेमिंब्मुँ।
1TH 2:1 ओ अलि-अङाँमैं, ङि क्‍हेमैं ङाँर खबै केर च्होइ बिब क्हेमैंइ सेइमुँ।
1TH 2:2 क्‍हेमैं ङाँर खब् भन्दा ओंसों फिलिप्‍पीमैंइ ङि म्हि आच्हिसि बेल्‍ले दुःख पिंब क्हेमैंइ सेइमुँ। छलेन क्‍हेमैंए सहररै या बिरोध लब्मैं ल्हें तनाबिलेया परमेश्‍वरजी ङिए सैं भोंब् लमिंबइले ङिइ क्‍हेमैंलाइ सैं तोंबै ताँ बिल् योंइ।
1TH 2:3 ङिइ क्‍हेमैंने बिबै अर्थिए ताँमैं आछ्याँबै सैंउँइँले बिबै स्योलिबै ताँमैं आङिं, ङिइ क्हेमैंलाइ तोइ लुल् आम्है।
1TH 2:4 छतसि परमेश्‍वरजी ङिलाइ भर म्हाँदिसि खीए सैं तोंबै ताँ बिप्रबै के ङिए जिम्‍मार पिंइ। छतसि म्हिमैंए सैं तोंन् लबर ङि आपो, बरु ङ्योए सैं न्होंर्बै ताँ सेबै परमेश्‍वरए सैं तोंन् लबर ङि पोंम्।
1TH 2:5 ङि क्हेमैं ङाँर खमा ङिइ फिब्लो पार्दिबै ताँमैं तोइ आपों बिसि क्हेमैइ सेइमुँ। धै ङिइ तोइ योंम् उ बिसि लोबै या आलल, चु ताँर परमेश्‍वर ङिए साक्षि मुँ।
1TH 2:6 ख्रीष्‍टजी कुल्मिंबै चेला चिब्मैं तबइले ङिइ क्हेमैंने “च लद्, चु लद्,” बिल् खाँमल। दिलेया ङिइ ना क्‍हेमैंउँइँले, ना अरू म्‍हिमैंउँइँले, खाबउँइँले या ङिइ मान आम्‍हैल,
1TH 2:7 बरु क्‍हेमैंने टिमा आमाइ ह्रोंसए कोलोमैं सुसर लब् धोंले ङिइ क्‍हेमैंए सुसर लइ।
1TH 2:8 ङिइ क्‍हेमैंए फिर ल्‍हें म्हाँया खसि परमेश्‍वरजी पिंबै सैं तोंबै ताँ बिमिंब् मत्‍त्रे आङिं, क्‍हेमैंए सेवा लबर ङि सिबरै या तयार मुँल, तलेबिस्याँ ङिइ क्‍हेमैंए फिर बेल्‍ले म्हाँया लमल।
1TH 2:9 ओ अलि-अङाँमैं, परमेश्‍वरउँइँले खबै सैं तोंबै ताँ क्हेमैंने बिमिंमा क्‍हेमैंलाइ तोइ दुःख आतरिगे बिसि चब-थुँबए ल्हागिर ङिइ त्‍हिंयाँ म्‍हुँइँस ह्रोंसइन बेल्‍ले के लइ बिब क्‍हेमैंज्यै सेइमुँ।
1TH 2:10 ङि क्‍हेमैंने टिमा ङिने तोइ छ्याब् आरेल, ङिइ लबै केमैं ठिक मुँल, ङिइ क्ह्रोंसेंन्बै ताँमैं पोंमल बिबै ताँर क्‍हेमैं नेरो परमेश्‍वर या साक्षि मुँ।
1TH 2:11 आबाइ ह्रोंसए प्हसेमैंलाइ लब् धोंले ङिइ क्हेमैंलाइ ङ्ह‍योइ।
1TH 2:12 परमेश्‍वरजी खोबै छ्ह क्हेमैंइ थोरिगे बिसि ङिज्यै या क्‍हेमैंलाइ लोदा सैंदा लसि भों पिंइ बिसि क्हेमैंइ सेइमुँ। तलेबिस्याँ खीए मिं थेब् लबर परमेश्‍वरजी क्हेमैंलाइ खीए ग्याल्सर हुइब् ग।
1TH 2:13 धै ङिइ क्‍हेमैंने परमेश्‍वरए ताँ बिमिंमा क्‍हेमैंइ “चु क्‍ह्रोंसेंन परमेश्‍वरए ताँ मुँन” बिसि छेनाले थेसि सैं तोंन्‍ले क्‍वेंइ। चु ताँ म्‍हिइ बिबै ताँ आङिं, परमेश्‍वरजी बिबै ताँ क्‍हेमैंइ म्हाँदिइ। धै क्हेमैंए सैंरि परमेश्‍वरजी के लइनमुँ। छतसि ङिइ खोंयोंइ बिलै परमेश्‍वरलाइ धन्‍यबाद पिंरिम्।
1TH 2:14 ओ अलि-अङाँमैं, यहूदीया ह्‍युलर्बै बिश्‍वासीमैंइ योंब् धों तबै दुःख क्हेमैंज्यै योंइ। तलेबिस्याँ चमैंइ खेंमैंए यहूदी म्हिमैंउँइँलेन् दुःख योंब् धोंले क्हेमैंज्यै या ह्रोंसए ह्‍युलर्बै म्‍हिमैंउँइँले दुःख योंइ।
1TH 2:15 च यहूदीमैंइ प्रभु येशू ख्रीष्‍ट नेरो स्योंम्बै अगमबक्‍तामैं सैवाइ, धै ङिलाज्यै या ल्‍हें दुःख पिंसि ल्‍हावाइ। छले चमैंइ ताँन् म्हिमैंए बिरोध लसि परमेश्‍वरए सैं नल् लइमुँ।
1TH 2:16 अरू ह्रेंमैंइ या जोगेरिगे बिसि ङिइ सैं तोंबै ताँ बिबर होंमा चमैंइ ङि पोंल् आपिं। छ लमा चमैंइ लरिबै आछ्याँबै के झन् ल्हें लइमु। छ तसि तोगो परमेश्‍वरए ह्रिस चमैंए फिरि बल्‍ल युइमु।
1TH 2:17 ओ अलि-अङाँमैं, क्‍हेमैंने फ्रेदा आङ्हाँलेया क्हेमैंउँइँले दे त्हिंइए ल्हागिर फ्रेयाल् त्हुइ। म्हि फ्रेसि ह्रेंगो तलेया सैंर आफ्रेइमुँ। छतसि ङि धबै क्‍हेमैंने त्‍होखबै सैं मुँ।
1TH 2:18 ङि क्हेमैं ङाँर खल् म्हैल। ङ पावल ल्‍हें खे खबै सैं लइ, दिलेया दुष्‍टइ ङिलाइ खल् आपिं।
1TH 2:19 तो तलेया ङ्योए प्रभु येशू युमा खीए उँइँर राबै त्हेर ङिए इनाम योंबै आशा, सैं तोंबै ताँ क्हेमैंन् ग। धै क्हेमैं म्रोंसि ङि थेब् प्हैंबै क्रेगि योंब्मुँ।
1TH 2:20 ङिए सैं थेब् लसि सैं तोंन् लमिंब क्ह्रोंसेंन क्हेमैंन् ग।
1TH 3:1 छतसि ङि क्हेमैंउँइँले फ्रेसि टिल् आखाँबइले ङि चु एथेन्‍स सहरर स्योले टिमा
1TH 3:2 ङ्योए अलि तिमोथी क्‍हेमैं ङाँर कुलइमुँ। च परमेश्‍वरए सेवा लसि येशू ख्रीष्‍टए बारेर्बै सैं तोंबै ताँ बिप्रबै म्हि ग।
1TH 3:3 नाँसथेंमैंइ क्हेमैंलाइ दुःख पिंमा क्हेमैं खाबज्यै बिश्‍वास लब आपिरिगे बिसि तिमोथीइ क्हेमैंए बिश्‍वास भोंसि लबर लोदा सैंदा लरिगे बिसि ङिइ चलाइ क्‍हेमैं ङाँर कुल्‍मिंइमुँ। ङ्योइ चु दुःख सैदिल् त्‍हुम् बिसि क्हेमैंज्यै या सेइमुँ।
1TH 3:4 तलेबिस्याँ “ङ्योइ प्रभु येशूए फिर बिश्‍वास लबइले दुःख सैदिल् त्‍हुम्” बिसि ङिइ ओंसोंन् क्‍हेमैंने मुँमा बिल। छाबै दुःख क्‍ह्रोंसेंन तब क्‍हेमैंज्यै सेइमुँ।
1TH 3:5 छतमा ङए सैंइ ङलाइ सुखन् आपिं। धै “दुष्‍टइ क्‍हेमैंलाइ बिश्‍वासउँइँले स्योवासि ङिइ लबै दुःख खेरो ह्‍याम् उ?” बिब् ङ्हिंसि क्हेमैंए बिश्‍वास कति थेब् मुँन बिसि क्होबर ङइ तिमोथी कुल्‍मिंब् ग।
1TH 3:6 तोगो तिमोथी क्‍हेमैंउँइँले ङि ङाँर एखसि क्‍हेमैंइ प्रभुए फिर बिश्‍वास लबै ताँ नेरो क्‍हेमैंए न्‍होंरि म्हाँया लमन बिसि ङिने छ्याँबै सँउँसर बिमिंइ। झाइले क्‍हेमैंइ ङिए फिर म्हाँया खसि ङिइ क्‍हेमैंने त्होदा ङ्हाँब् धोंले क्‍हेमैं या ङिने त्होदा ङ्हाँइमुँ बिबै सँउँसर पखइ।
1TH 3:7 ओ अलि-अङाँमैं, ङिए फिर दुःख तनाबिलेया क्‍हेमैंए बिश्‍वासए बारेर थेल् योंमा ङिए सैं क्होइमुँ।
1TH 3:8 तलेबिस्याँ क्‍हेमैं प्रभुए फिर बिश्‍वास लबर भोंसि तरिस्याँ ङि सिबै म्हि सोगों तब् धोंन् ङ्हाँमल।
1TH 3:9 क्हेमैं प्रभुए फिर बिश्‍वास लबर भोंब् तइमुँ बिबै ताँ थेसि ङि बेल्‍ले सैं तोंइँमुँ। चुए ल्हागिर ङिइ परमेश्‍वरलाइ कति ल्हें धन्‍यबाद पिंम्।
1TH 3:10 क्हेमैंने त्होसि क्हेमैंए बिश्‍वास झन भोंसि लमिंबै सैं मैंसि ङि त्‍हिंयाँ म्‍हुँइँस सैं न्होंउँइँलेन् बेल्‍ले प्राथना लम्।
1TH 3:11 तारे ङ्योए परमेश्‍वर आबा नेरो ङ्योए प्रभु येशूजी ङि क्‍हेमैं ङाँर खबै घ्याँ थोंमिंरिगे,
1TH 3:12 धै ङिइ क्‍हेमैंने म्हाँया लब् धोंले प्रभुजी क्‍हेमैंलाइ घ्रिइ घ्रिने नेरो अरू ताँन् म्‍हिमैंने सब् लमिंबै म्हाँया प्लिंदै बडिमिंरिगे।
1TH 3:13 खीजी क्हेमैंलाइ भोंब् लमिंब्मुँ, धै प्रभु येशू खीए म्हिमैंने बालु धबै चु ह्‍युलर युमा क्हेमैं ङ्योए परमेश्‍वर आबाए उँइँर बेल्‍ले छ्याँब खोट आरेब तब्मुँ।
1TH 4:1 ओ अलि-अङाँमैं, आखिरि ताँ तो मुँ बिस्‍याँ, क्हेमैंइ छ्ह खैले थोल् त्हुमुँ धै परमेश्‍वरए सैं खैले तोंन् लल् त्हुम् बिबै ताँ क्हेमैंइ ङिउँइँले लोइमुँ। छतसि ओंसोंन् लोब् धोंले क्हेमैंइ लसिन् मुँ, अझै छलेन् छ्ह थोदै ह्‍याद् बिसि ङि प्रभु येशूए मिंर क्हेमैंने यो छ्युँ लसि अर्थिमैं पिंम्।
1TH 4:2 प्रभु येशूजी पिंबै हगउँइँले ङिइ लद् बिसि ल्हैदिबै ताँ क्‍हेमैंज्यै सेइमुँ।
1TH 4:3 छलेन क्‍हेमैं परमेश्‍वरए सैंर मैंब् धोंले पबित्र छ्ह थोद्, धै क्हेमैं फ्रें क्ल्योंब ने रण्डि-बाजी लबउँइँले स्यो तद्।
1TH 4:4 झाइले क्‍हेमैं मुँयुँमैंइ ह्रोंसए ज्यु ह्रोंसए अधीनर थेंसि ह्रोंसए प्‍ह्रेंस्‍यो पइ खमा परमेश्‍वरए उँइँर नेरो म्हिमैंए उँइँर छ्याब आरेल्‍ले टिद्।
1TH 4:5 दिलेया परमेश्‍वर ङो आसेब्‍मैं धोंले मुयुँमैं ने च्हमिरिमैं न्होंरि आछ्याँबै सैं मैंसि आप्रद्।
1TH 4:6 झाइले क्हेमैं खाबज्‍यै या ह्रोंसए बिश्‍वासी अलिए प्‍ह्रेंस्‍योने प्रसि आछ्याँब आलद्। तलेबिस्याँ छाबै केमैं लस्याँ परमेश्‍वरजी सजैं पिंब्‍मुँ। ङिइ ओंसोंन् चुए बारेर छेनाले लोमिंल् खाँइमुँ।
1TH 4:7 परमेश्‍वरजी ङ्योलाइ आछ्याँबै केर प्रबर आङिं, बरु पबित्र छ्ह थोबै ल्हागिर हुइब् ग।
1TH 4:8 छतसि खाबइ चु ताँ आम्हाँदि, चइ म्हिमैंए बिरोध लब आङिं, दिलेया क्हेमैंलाइ खीए पबित्र प्ल्ह पिंबै परमेश्‍वरए बिरोध लब् ग।
1TH 4:9 अलि-अङाँमैं न्होंरि लल् त्हुबै म्हाँयाए बारेर खाबज्यै क्हेमैंलाइ प्ह्रिल् आत्हु, तलेबिस्याँ घ्रिइ घ्रिने म्हाँया लरिगे बिसि परमेश्‍वरजीन् क्हेमैंने लोमिंइमुँ।
1TH 4:10 धै क्हेमैंइ माकेडोनिया ह्‍युलर्बै ताँन् प्रभुए फिर बिश्‍वास लबै अलि-अङाँमैंने क्ह्रोंसेंन म्हाँया लइमुँ। ओ अलि-अङाँमैं, छलेन अझै म्हाँया लरिद् बिसि ङि क्हेमैंलाइ अर्थि पिंमुँ।
1TH 4:11 ङिइ क्हेमैंने ओंसोंन् बिब् धोंले, खाब‍ने या आप्‍होंनु, ह्रों-ह्रोंसए के लरिद्, धै ह्रोंसए के ह्रोंसजीन् लसि ह्रोंसए प्‍हलेर राबै भों लद्।
1TH 4:12 क्हेमैंइ छ लस्याँ बैरुबै म्हिमैंउँइँले मान योंब्मुँ धै आगुए भरर टिल् आत्हु।
1TH 4:13 ओ अलि-अङाँमैं, न्‍हरु च्‍हुइरिब्‍मैंए बारेर क्‍हेमैंइ था सेरिगे झाइले प्रभु येशूए फिर आशा आलब्‍मैंइ धोंले न्हुँ आलरिगे बिब ङिए सैं मुँ।
1TH 4:14 तलेबिस्याँ प्रभु येशू सियालेया धबै सोगों तसि रेखइ बिसि ङ्योइ क्वेंम्, छलेन येशूए फिर बिश्‍वास लसि सियाब्‍मैंलाइ परमेश्‍वरजी सोगों लमिंसि येशूने पुयुब्मुँ।
1TH 4:15 प्रभुजी बिबै ताँउँइँले ङिइ क्‍हेमैंने बिमुँ, ङ्यो प्रभु युबै त्हिंइ समा सोरिब्मैं खीए फिर बिश्‍वास लसि ओंसों सियाब्‍मैं भन्दा ओंसों ह्‍याल् आयों,
1TH 4:16 तलेबिस्याँ च त्हिंइर परमेश्‍वरजी हुकुम पिंब्‍मुँ, खीए चिब स्‍वर्गदूतइ कै तेब्‍मुँ, परमेश्‍वरए थुतुरु ह्रासि प्रभु येशू खीन् स्वर्गउँइँले युब्‍मुँ, धै खीए फिर बिश्‍वास लसि सियाब्मैं धबै ओंसोंन् सोगों तब्‍मुँ।
1TH 4:17 झाइले ङ्यो प्रभु येशू युबै त्हिंइ समा सोरिब्मैं मुर प्रभुने त्होबर चमैंनेन् न्‍हाँम्‍स्योने बालु क्वेबोब्मुँ। छले ङ्यो खोंयोंन् बिलै प्रभुनेन् टिब्मुँ।
1TH 4:18 छतसि घ्रिइ घ्रिने चु ताँमैं बिमिंसि सैं क्‍होमिंन्।
1TH 5:1 ओ अलि-अङाँमैं, च ताँ खोंयों तम् बिसि ङइ क्‍हेमैंलाइ तोइ प्‍ह्रिल् आत्‍हु,
1TH 5:2 तलेबिस्याँ म्‍हुँइँसरि ह्‍यो खब् धोंले प्रभु युबै त्हिंइ तब्‍मुँ बिसि क्‍हेमैंज्यै छेनाले सेइमुँ।
1TH 5:3 च त्हेर म्‍हिमैंइ “शान्‍ति ने सुरक्षा तइमुँ, ङ्योए फिर आछ्याँबै ताँ तोइ तल् आखाँ,” बिरिमा सुत्‍केरि बेथा ल्हैदिब् धोंले तिखेर्न चमैंए फिर दुःख तब्‍मुँ। च दुःखउँइँले खाबै या स्योरल् आखाँ।
1TH 5:4 दिलेया ओ अलि-अङाँमैं, क्‍हेमैं मिछु खैबर आरे। छतसि क्हेमैंइ च त्हिंइ ह्‍यो खब् धों ङ्हाँल् आत्‍हु।
1TH 5:5 तलेबिस्याँ क्‍हेमैं ताँन् चारबै ह्‍वेए सन्तान नेरो त्हिंर्बै सन्तान ग। ङ्यो म्‍हुँइँसर्बै नेरो मिछु खैबर्बै म्‍हिमैं आङिं।
1TH 5:6 छतसि अरूमैं धोंले ङ्यो न्‍हरु आच्‍हुइल्‍ले बरु न्ह क्रों मि क्रोंले टिले।
1TH 5:7 तलेबिस्याँ न्हरु च्‍हुइब्मैं म्‍हुँइँसर रोमुँ, प्हा थुँब्मैं म्हुँइँसर्न म्हेरम्।
1TH 5:8 दिलेया ङ्योम् त्हिंर्बै म्‍हिमैं तबइले ङ्यो न्ह क्रों मि क्रोंले टिल् त्‍हुम्। सिपाइमैंइ तिं थोबए ल्हागिर खिबै ढाल धोंले ङ्योए सैं जोगेमिंबै ल्हागिर ङ्योइ बिश्‍वास नेरो सब् लमिंबै म्हाँया लल् त्‍हुम्, झाइले क्र जोगेबै ल्हागिर कुबै कुले धोंले ङ्योइ स्‍वर्गर ह्‍याबै क्ह्रोंसेंन्बै आशा लल् त्‍हुम्।
1TH 5:9 तलेबिस्याँ परमेश्‍वरजी ङ्योलाइ दण्ड पिंबै ल्हागिर त्‍हाँब आङिं, दिलेया ङ्योए प्रभु येशू ख्रीष्‍टउँइँले जोगेबर ओंसों ओंनोंन् खीजी ङ्योलाइ त्‍हाँब् ग।
1TH 5:10 खी युबै त्हेर ङ्यो सिलेन् सोलेन् तोइ फरक आत, ङ्यो येशूने खोंयोंन् बिलै टिल् योंरिगे बिसि ङ्योए ल्हागिर ख्रीष्‍ट सिमिंइ।
1TH 5:11 छतसि क्‍हेमैंइ तोगो लरिब् धोंले घ्रिइ घ्रिलाइ सैं क्होमिंसि भोंब् लबै के अझै लरिदु।
1TH 5:12 ओ अलि-अङाँमैं, ङि क्‍हेमैंने यो छ्युँ लम्: क्‍हेमैंए म्‍हाँजोरि के लबै चिबमैं मुँ। चमैंइ परमेश्‍वरए घ्‍याँर क्हेमैंलाइ डोरेबर बेल्‍ले दुःख लइमुँ। छतसि चमैंए मान लद्।
1TH 5:13 चमैंए छ्याँबै के म्रोंसि चमैंइ बिबै ताँ ङिंनु, धै चमैंलाइ थेबै म्हाँयाले मान लद्। क्‍हेमैं ताँन् क्ह्रिसि टिद्।
1TH 5:14 ओ अलि-अङाँमैं, ङि क्हेमैंलाइ अर्थि पिंमुँ: प्ल्हेउमैंलाइ हौदिद, सैं च्योंब्मैंलाइ सैं भोंब लमिंन्, आखाँब्मैंलाइ ल्होमिंन्, ताँन् म्हिमैंने ह्रिस आखनले सैदिद्।
1TH 5:15 खाबज्‍यै क्हेमैंए न्होह्रों लवालेया खि आफोद्, दिलेया बिश्‍वासीमैंए फिर नेरो अरू म्‍हिमैंए फिरै या छ्याँबै के लबै सैं मैंन्।
1TH 5:16 खोंयोंन् बिलै सैं तोंरिद्।
1TH 5:17 खोंयोंन् बिलै परमेश्‍वरने प्राथना लरिद्।
1TH 5:18 तो तलेया परमेश्‍वरलाइ धन्‍यबाद पिंरिद्, तलेबिस्याँ क्‍हेमैं ख्रीष्‍ट येशूने बालु छ्ह थोमा परमेश्‍वरजी छान् तरिगे ङ्हाँइमुँ।
1TH 5:19 परमेश्‍वरए प्ल्हजी बिब क्‍हेमैंइ ङिंनु।
1TH 5:20 अगमबक्‍तामैंइ पोंबै ताँ फाकर्बै आमैंन्,
1TH 5:21 दिलेया चमैंइ बिबै ताँन् ताँमैं छेनाले मैंन्, धै छ्याँबै ताँ म्हाँदिद्,
1TH 5:22 ताँन् आछ्याँबै केमैंउँइँले स्यो तद्।
1TH 5:23 शान्ति पिंबै परमेश्‍वरजी ताँन् सैर क्‍हेमैंलाइ पबित्र लमिंरिगे, धै ङ्योए प्रभु येशू युबै त्हेर क्हेमैंए ज्यु, सैं, खों, बेल्‍ले छ्याँब नेरो खोट आरेब तरिगे।
1TH 5:24 क्हेमैंलाइ हुइबै परमेश्‍वर भर पर्दिब मुँ, छतसि खीजी चु के खैलसेया लमिंब्‍मुँ।
1TH 5:25 ओ अलि-अङाँमैं, ङिए ल्हागिरै या प्राथना लमिंन्।
1TH 5:26 ताँन् अलि-अङाँमैंलाइ सैं न्होंउँइँलेन् जय मसीह मुँ बिमिंन्।
1TH 5:27 प्रभु येशूजी पिंबै हगउँइँले ङ क्हेमैंने अर्थि पिंम्: चु प्ह्रिछ्या खेसि ताँन् अलि-अङाँमैंलाइ खैलसे या थेल् पिंन्।
1TH 5:28 ङ्योए प्रभु येशू ख्रीष्‍टए दयाम्हाँया क्‍हेमैंने तरिगे।
2TH 1:1 ङि पावल, सिलास नेरो तिमोथीउँइँले थेसलोनिका सहरर्बै बिश्‍वासीमैंलाइ जय मसीह मुँ। क्हेमैं परमेश्‍वर ङ्योए आबा नेरो प्रभु येशू ख्रीष्‍टए म्हिमैं ग।
2TH 1:2 परमेश्‍वर ङ्योए आबा नेरो प्रभु येशू ख्रीष्‍टजी क्‍हेमैंए फिर दयाम्हाँया नेरो शान्‍ति पिंरिगे।
2TH 1:3 ओ अलि-अङाँमैं, क्‍हेमैंए ल्हागिर ङिइ परमेश्‍वरलाइ खोंयोंन् बिलै धन्‍यबाद पिंलन् त्‍हुम्। छ लब ठिक मुँ, तलेबिस्याँ क्हेमैंइ लबै प्रभु येशूए फिर्बै बिश्‍वास बडिसि ह्रों-ह्रोंसए न्होंरै या घ्रिइ घ्रिने झन् ल्हें म्हाँया लरिइमुँ।
2TH 1:4 क्हेमैंए फिर कति दुःख तलेया च दुःख सैदिसि क्हेमैं बिश्‍वासर भोंब् तब् म्रोंसि परमेश्‍वरए फिर बिश्‍वास लब्मैंए म्हाँजोर ङिइ प्हैंदै पोंल् योंमा ङिए ङ्‍हो च्हौ प्ल्ह्‍याब् धों ङ्हाँइमुँ। धै ङि क्हेमैंए बारेर प्हैंसि पोंम्।
2TH 1:5 चु ताँन् सै परमेश्‍वरजी लबै निसाफ ठिक मुँ बिबै साक्षि ग। च निसाफउँइँले क्‍हेमैं परमेश्‍वरए ग्याल्सर होंबर लायकर्बै तल् खाँम्, तलेबिस्याँ चए ल्हागिर्न क्हेमैंइ दुःख योंरिइमुँ।
2TH 1:6 परमेश्‍वरजी छेनाले निसाफ लम्, क्‍हेमैंए फिर दुःख पिंब्‍मैंलाइ खीजी दुःख पिंम्,
2TH 1:7 झाइले क्‍हेमैं दुःख योंब्‍मैं नेरो ङि या परमेश्‍वरजी सुख पिंब्‍मुँ। प्रभु येशू ह्रोंसए शक्‍ति मुँबै स्‍वर्गदूतमैंने लुँरिबै मिने स्‍वर्गउँइँले युबै त्हेर परमेश्‍वरजी ङ्योलाइ च सुख पिंब्मुँ।
2TH 1:8 परमेश्‍वर ङो सेल् आङिंब्मैं नेरो ङ्योए प्रभु येशूउँइँले खबै सैं तोंबै ताँ आक्वेंब्‍मैं ताँनलाइ खीजी दण्ड पिंब्‍मुँ।
2TH 1:9 चमैं प्रभुउँइँले ह्रेंगो लवाब्मुँ, धै खीउँइँले योंबै खोंयोंइ आनुबै छ्ह नेरो खीए थेबै दयाम्हाँयाउँइँले फ्रेवासि नास लवाब्मुँ।
2TH 1:10 च त्हिंइर प्रभु येशूजी खीए म्‍हिमैंउँइँले थेबै मान योंबर नेरो बिश्‍वासीमैं ताँन प्लेटोयाल् लबर खी युब्‍मुँ। क्हेमैं या चमैं न्होंर तब्मुँ तलेबिस्याँ खीए बारेर ङिइ बिबै ताँ क्‍हेमैंइ क्वेंल।
2TH 1:11 छतसि ङ्योए परमेश्‍वरजी क्‍हेमैंलाइ खैबै छ्ह थोबर त्‍हाँइमुँ छाबन् छ्ह थोल् खाँब लमिंरिगे, झाइले क्‍हेमैं ताँनइ छ्याँबै सैंइ बिश्‍वास लसि लल् त्हुबै केमैं खीए शक्‍तिउँइँले छेनाले लल् खाँरिगे बिसि ङिइ क्हेमैंए ल्हागिर खोंयोंइन बिलै प्राथना लरिइमुँ।
2TH 1:12 छतस्याँ ङ्योए परमेश्‍वर नेरो प्रभु येशू ख्रीष्‍टजी दयाम्हाँया लमा ङ्योए प्रभु येशू ख्रीष्‍टए मिं क्हेमैंए छ्हर चाररिगे, धै क्हेमैं प्रभु येशूने घ्रिन् तसि क्‍हेमैंज्यैया मान योंरिगे।
2TH 2:1 ओ अलि-अङाँमैं, अर्को ताँ, ङ्योए प्रभु येशू ख्रीष्‍ट धबै युबै ताँ नेरो ङ्यो खागु तसि खीने त्होबै ताँए बारेर ङिइ क्‍हेमैंने चु यो छ्युँ लम्:
2TH 2:2 “प्रभु युल् खाँइ बिसि पावलइ लोमिंइ,” बिबै स्योलिबै ताँ खाबज्यै या आक्वेंन्, क्‍हेमैंए सैं आआदिद्। ङिइ छले सुँइ आबि, प्ह्रिछ्यार आप्ह्रि, तोइ अगमबाणि आपों।
2TH 2:3 खाबज्‍यै या क्‍हेमैंलाइ लुल् आपिंन्, तलेबिस्याँ प्रभु येशू युब् भन्‍दा ओंसों ल्‍हें म्‍हिमैंइ परमेश्‍वरए बिरोध लब्मुँ, धै परमेश्‍वरए थेबै शत्तुर घ्रि त्‍होंब्‍मु। च ठिम बिरोध लबै दुष्‍ट शत्तुर आखिरर नास तल् त्‍हुब्‍मु।
2TH 2:4 म्हिमैंइ म्हाँदिरिबै ताँन् सैमैं भन्दा खी थेब् ग बिसि म्हिमैंइ म्हाँदिरिबै सैमैंए बिरोध चइ लम्। धै ङन् परमेश्‍वर ग बिसि च परमेश्‍वरए मन्‍दिरर क्हुँम्।
2TH 2:5 ओंसोंन ङ क्‍हेमैंने मुँमा ङइ चु ताँ बिब तो क्हेमैंइ आमैं वा?
2TH 2:6 च चए ठिक त्हेर्न मत्‍त्रे त्होंरिगे बिसि तोगो समा खाबइ क्वेइ थेंइमुँ बिब क्हेमैंइ सेइमुँ।
2TH 2:7 तलेबिस्याँ चइ ओंसों ओंनोंन् खाबइ आसेल्‍ले न्हों-न्होंनो आछ्याँबै के लरिइमुँ। तोगो समा परमेश्‍वरजीन् च च्युथेंइमुँ, छतसि परमेश्‍वरजीन् आपिन् समा च त्होंल् खाँरिब् आरे।
2TH 2:8 लिउँइँ परमेश्‍वरजी पिवासि च दुष्‍ट शत्‍त्रु त्‍होंब्मुँ, दिलेया प्रभु येशू युबै त्हेर्बै चारबै ह्‍वे नेरो खीए सुँउँइँले त्होंबै सोइ चलाइ नास लवाब्‍मुँ।
2TH 2:9 झाइले च दुष्‍ट शत्‍त्रुइ स्योलिबै ताँमैं पोंसि शैतान बिबै दुष्‍टए शक्‍तिउँइँले चइ म्हिमैंए उँइँर औदिबै प्लेटोयान् तबै केमैं नेरो स्योलिबै चिनुमैं लब्‍मुँ।
2TH 2:10 धै नास तयाब्मैंने औदिबै स्योलिबै ताँमैं पोंब्मुँ। चमैं नास तयाब्मुँ तलेबिस्याँ चमैंइ क्ह्रोंसेंन्बै ताँ आक्वें धै छ्याँबै घ्याँरै या आप्र।
2TH 2:11 छतसि स्योलिबै ताँ क्वेंरिगे बिसि परमेश्‍वरजी चमैंए ङाँर बेल्‍ले स्योर तेल् ह्रबै सैमैं कल्मिंब्मुँ।
2TH 2:12 क्ह्रोंसेंन्बै ताँ आक्वेंसि आछ्याँबै केर सैं तोंब्मैं ताँन् दोषि ठर्दिरिगे बिसि परमेश्‍वरजी छ लब् ग।
2TH 2:13 प्रभुजी खोबै अलि-अङाँमैं, क्‍हेमैंए ल्हागिर ङिइ खोंयोंन् बिलै परमेश्‍वरलाइ धन्‍यबाद पिंल् त्हुम्, तलेबिस्याँ परमेश्‍वरए प्ल्हजी क्हेमैंलाइ पबित्र लमिंबै केउँइँले नेरो क्हेमैंइ क्ह्रोंसेंन्बै ताँ क्वेंबइले परमेश्‍वरजी क्‍हेमैंलाइ जोगेबर त्हाँइ।
2TH 2:14 ङिइ क्हेमैंने बिबै सैं तोंबै ताँउँइँले ङ्योए प्रभु येशू ख्रीष्‍टए मान क्हेमैंज्यै या योंरिगे बिसि परमेश्‍वरजी क्हेमैं हुइब् ग।
2TH 2:15 छतसि, ओ अलि-अङाँमैं, ङिइ क्‍हेमैंने बिमिंबै ताँ नेरो प्ह्रिछ्यार प्‍ह्रिबै ताँमैं सैंर मैंसि तारे पिरु क्हेमैं भोंसि तसि बिश्‍वास लसिन् टिरिद्।
2TH 2:16 परमेश्‍वरजी ङ्योलाइ म्हाँया लइमुँ धै खीए दयाम्हाँयाउँइँले ङ्योलाइ थेबै आशा नेरो सैं क्होल् लबै भों पिंइमुँ। धै ङ्योए प्रभु येशू ख्रीष्‍ट नेरो ङ्योए परमेश्‍वर आबाजी
2TH 2:17 क्‍हेमैंए सैं भोंब लमिंरिगे धै तोन्‍दोंरि छ्याँबै केमैं लबर नेरो छ्याँबै ताँमैं पोंबर ल्होमिंरिगे बिसि ङइ प्राथना लमुँ।
2TH 3:1 ओ अलि-अङाँमैं, प्रभुउँइँले खबै सैं तोंबै ताँ क्हेमैंए म्हाँजोर तब् धोंले खन्तोंदोंन् बिप्रल् खाँरिगे धै म्हिमैंइ म्हाँदिरिगे बिसि ङिए ल्हागिरै या प्राथना लब्रें लद्।
2TH 3:2 को-कोइ म्‍हिमैंइ च सैं तोंबै ताँ आपदे। छतसि च आछ्याँब नेरो दुष्‍ट म्‍हिमैंउँइँले ङि जोगेमिंन् बिसि परमेश्‍वरने प्राथना या लब्रें लद्।
2TH 3:3 दिलेया प्रभु येशू भर पर्दिब् मुँ। खीजी क्‍हेमैंए सैं भोंब् लमिंब्मुँ धै दुष्‍टउँइँले जोगेमिंब्‍मुँ।
2TH 3:4 ङिइ बिबै ताँ खैले तोगो क्‍हेमैंइ लरिइमुँ, च ताँ धबै लिउँइँज्‍यै या लरिब्‍मुँ बिसि प्रभुजी ङिलाइ पक्‍का था पिंइमुँ।
2TH 3:5 क्‍हेमैंए फिर दुःखन् तलेया दुःख सैदिल् खाँबै भों प्रभुजी क्हेमैं पिंब्मुँ। धै परमेश्‍वरजी क्‍हेमैंए फिर कति थबै म्हाँया लम् बिबै ताँ क्होमिंदै खीजीन् क्‍हेमैं डोरेमिंरिगे।
2TH 3:6 ओ अलि-अङाँमैं, ङ्योए प्रभु येशू ख्रीष्‍टए मिंर ङिइ क्हेमैंने बिमुँ: ङिइ क्हेमैंने लोमिंबै ताँर आप्रबै प्ल्हेउ अलि-अङाँमैंउँइँले स्‍योले टिद्।
2TH 3:7 ङि क्‍हेमैंने टिमा प्ह्‍लेउ तसि आटिल, चु ताँ क्‍हेमैंज्यै था सेइमुँ। छतसि ङिइ खैले के लल, छलेन क्‍हेमैंज्यै लल् त्‍हुम्।
2TH 3:8 ङिइ खाबलैया छलेन् तोइ आचल, खाबलै खर्ज आतरिगे बिसि ङिइ त्‍हिंयाँ म्‍हुँइँस के लमल।
2TH 3:9 ङिइ छलेन् चब् थुँब् योंबै हक मुँल, दिलेया ङिइ लब् धोंले क्‍हेमैंज्‍यै या लरिगे बिसि ङिइ छ लइ।
2TH 3:10 क्‍हेमैंने टिमा ङिइ “खाबइ के आल, चइ चबै या आचरिगे” बिल।
2TH 3:11 क्हेमैंए न्होंरि को-कोइ प्ल्हेउ तसि छ्ह थोरिइमुँ, धै चमैं ह्रोंसइ के आल दिलेया अरूए केर तोनतोर्न यो झोंम् बिब ङिइ थेइमुँ।
2TH 3:12 तारे छाबै म्हिमैंलाइ प्रभु येशू ख्रीष्‍टए मिंर ङिइ चु अर्थि पिंमुँ: चमैंइ चब-थुँबै ल्हागिर खुरूखुरू ह्रोंसैना के लरिगे धै ह्रोंसए कमैं चरिगे।
2TH 3:13 ओ अलि-अङाँमैं, आगुलाइ ल्होबै केमैंर खोंयोंइ आनारद्।
2TH 3:14 ङिइ चु प्ह्रिछ्यार प्‍ह्रिबै ताँ खाबै आङिं, च म्हिलाइ छेन्‍ले ङो सेथेंन्। च फा पिन् तरिगे बिसि चने प्रब-टिब ने पोंब आलद्।
2TH 3:15 दिलेया चलाइ शत्तुर धों आलद्, ह्रोंसए अलिलाइ धोंलेन् लोदा सैंदा लद्।
2TH 3:16 तारे पिरु ङ्योए सैं क्‍होल् लमिंबै प्रभुजी खोंयों बिलै या क्‍हेमैंलाइ खैतबै त्हेर्न बिलै छिं ङ्हाँल् लमिंरिगे। क्‍हेमैं ताँनने प्रभु तरिगे।
2TH 3:17 ङ पावलउँइँले जय मसीह मुँ। ङए ताँन् प्ह्रिछ्यार ङ चु ताँ ह्रोंसए योइन प्ह्रिसि चिनु लम्।
2TH 3:18 ङ्योए प्रभु येशू ख्रीष्‍टए दयाम्हाँया क्‍हेमैं ताँनने प्रे तरिगे।
1TI 1:1 ङ पावलउँइँले तिमोथीलाइ जय मसीह मुँ। ङ्योलाइ मुक्‍ति पिंबै परमेश्‍वर नेरो ङ्योलाइ क्ह्रोंसेंन्बै आशा पिंबै ख्रीष्‍ट येशूजी बिबइले ङ येशू ख्रीष्‍टजी कुल्मिंबै चेला चिब तइमुँ।
1TI 1:2 क्हिइ येशूए फिर बिश्‍वास लबइले क्हि ङए क्ह्रोसेंन्बै च्ह ग। परमेश्‍वर आबा नेरो ङ्योए प्रभु येशू ख्रीष्‍टउँइँले खोंयोंन् बिलै क्हिए फिर दयाम्हाँया, आशिक नेरो शान्ति तरिगे।
1TI 1:3 ङ माकेडोनिया ह्‍युलर ह्‍यामा क्हिलाइ “एफिससर्न टिसि स्योलिबै ताँमैं लोमिंबै म्हिमैंने छाबै स्योलिबै ताँ लोमिंल् आयों बिद्!” बिसि चर्न टिद् बिल।
1TI 1:4 धै चमैं स्‍योंम्‍बै स्‍योर ताँमैं नेरो खेमैंए खोंयोंइ आनुबै ताँर सैं आह्‍यारिगे, तलेबिस्याँ च ताँमैंउँइँले झन प्होंगि कैगि मत्‍त्रे तम्। बरु क्ह्रोंसेंन्बै परमेश्‍वरए ताँमैं क्होबर खीए फिर बिश्‍वास लल् त्हुम्।
1TI 1:5 चर्बै ताँन् प्रभुए फिर बिश्‍वास लब्मैंइ क्ह्रोंसेंन्बै बिश्‍वासउँइँले, छ्याँबै खों प्ह्‍यासि छ्याँबै सैंउँइँले, ताँनने म्हाँया लरिगे बिसि ङइ चु ताँ बिइ।
1TI 1:6 दिलेया को-कोइ म्हिमैं चु छ्याँबै घ्‍याँउँइँले स्योयासि स्योलिबै केर आफेबै घ्‍याँर अलमल् तरिइमुँ।
1TI 1:7 चमैं परमेश्‍वरए ताँमैं लोमिंबै म्‍हि तदा ङ्हाँमुँ, दिलेया चमैंइ खेंमैंइ लोमिंबै ताँ खेंमैंइन आक्‍हो।
1TI 1:8 परमेश्‍वरए ठिम छेनाले म्हाँदिस्याँ छ्याँब तम् बिसि ङ्योइ सेइमुँ।
1TI 1:9 मोशाइ च ठिममैं छ्याँबै के लब्‍मैंए ल्हागिर आपिं, ठिम आङिंब्मैं नेरो आछ्याँबै के लप्रब्मैंए ल्हागिर पिंइ बिसि क्हेमैंइ क्होल् त्हुम्। आबा आमा सैब्मैं, परमेश्‍वरलाइ आम्हाँदिब्मैं, आबा-आमा सैब्मैं, म्हि सैब्मैं,
1TI 1:10 नेरो छमिं न्हब्मैं, फ्रें क्ल्योंब्मैं, मुँयुँमैंइ मुँयुँमैं म्हैब्मैं, रिंमैंइ रिंमैं म्हैब्मैं, म्हि क्हाइ बोब्मैं, ह्‍योमैं, स्योर्गुमैं, स्योर तेसि ग्वाइ पिंब्‍मैं नेरो ठिक ताँमैंए बिरोधर पोंब्मैंए ल्हागिर पिंइ।
1TI 1:11 च ठिक लोमिंबै ताँमैं बेल्‍ले छ्याँबै नेरो ताँनइ म्हाँदिल् त्हुबै परमेश्‍वरजी ङने पिंबै सैं तोंबै ताँने क्ह्रिम्।
1TI 1:12 खीए के लबर ङलाइ भों पिबै येशू ख्रीष्‍ट ङ्योए प्रभुलाइ ङ धन्‍यबाद पिंम्, तलेबिस्याँ ङए फिर बिश्‍वास म्हाँदिसि खीए सेवा लबर खीजी ङलाइ त्हाँइ।
1TI 1:13 ओंसों ङइ खीए बिरोधर आछ्याँबै केमैं लसि खीलाइ बेल्‍ले ह्रुगुदिइ। तलेबिस्याँ च त्हेर ङइ खीए फिर बिश्‍वास आलल छतसि ङइ तो लरिइमुँ बिसि ङइ था आसेल, दिलेया परमेश्‍वरए ल्हयो ङइ योंइ।
1TI 1:14 ङ्योए प्रभुजी खीए बेल्‍ले थेबै दयाम्हाँया ङलाइ उँइँमिंइ। धै ङलाइ खीने घ्रिन् लमिंसि बिश्‍वास नेरो म्हाँया लबै शक्‍ति ङलाइ पिंइ।
1TI 1:15 चु ताँ क्ह्रोंसेंन्बै मुँ, छतसि चु ताँ ताँन् म्हिमैंइ क्वेंल् त्‍हुम्: ङ्योए प्रभु पापिमैं जोगेबर ह्‍युलर युब् ग। पापिमैं न्होंरि ताँन् भन्दा ल्हें पाप लबै म्हि ङन् ग।
1TI 1:16 धै पापिमैं न्होंरि ताँन् भन्दा ल्हें पाप लबै म्‍हि ङ मुँनबिलेया खीए फिर बिश्‍वास लसि खोंयोंइ आखाँबै छ्ह योंब्‍मैं ताँनए ल्हागिर ङ नमुना तरिगे बिसि येशू ख्रीष्‍टए सैदिबै शक्‍ति ङउँइँले म्हिमैंइ म्रोंरिगे बिसि परमेश्‍वरजी ङए फिर ल्हयो लइ।
1TI 1:17 छतसि खोंयोंन् बिलै तरिबै म्रुँ, खोंयोंइ नास आतब, नेरो म्रोंल आखाँबै घ्रि मत्‍त्रे परमेश्‍वर खीलाइन खोंयोंन् बिलै मान, इजेत नेरो महिमा तरिगे। आमेन, छान् तरिगे!
1TI 1:18 ओ ङए च्ह तिमोथी, ङइ क्‍हिने बिमुँ, अगमबक्‍तामैंइ ओंसों क्‍हिए बारेर बिबै तामैंउँइँले भों योंसि बिश्‍वासर छ्याँबै सैं लसि छेनाले के लल् खाँब् तद्।
1TI 1:19 खोंयोंन् बिलै छ्याँबै सैंउँइँले बिश्‍वासर भोंब् तद्। तलेबिस्याँ को-कोइ म्हिमैंए सैं आछ्याँब तबइले चमैं बिश्‍वासउँइँले ह्रेंगो तयाइमुँ।
1TI 1:20 चमैं न्होंरि हुमेनियस नेरो अलेक्जेन्डर बिब छाबै म्‍हिमैं ग। चमैंइ परमेश्‍वरए बारेर आछ्याँबै ताँ आपोंरिगे बिसि ङइ चमैं दुष्‍टए योर्न पिंवाइ।
1TI 2:1 ताँन् भन्दा ओंसों ङइ क्हिने बिल् त्हुबै ताँ, ताँन् म्‍हिमैंए ल्हागिर छ्याँबै खोंउँइँले परमेश्‍वरने प्राथना लसि चमैंए फिर आशिक ह्रिंमिंन्। धै चमैंइ लबै केए ल्हागिरि परमेश्‍वरलाइ धन्‍यबाद पिंन्।
1TI 2:2 छलेन ङ्योइ ढुक्‍कले परमेश्‍वरए केमैं छेनाले लल् योंरिगे बिसि म्रुँमैं नेरो थे-थेबै पदर मुँब्मैंए ल्हागिरै या प्राथनार परमेश्‍वरने आशिक ह्रिमिंन्।
1TI 2:3 ङ्यो जोगेमिंबै परमेश्‍वरए उँइँर चु ताँ बेल्‍ले छ्याँब मुँ।
1TI 2:4 तलेबिस्याँ ताँन् म्हिमैंइ मुक्‍ति योंरिगे धै चमैंइ क्ह्रोंसेंन्बै ताँ था सेरिगे बिब खीए सैं मुँ।
1TI 2:5 तलेबिस्याँ परमेश्‍वर घ्रि मत्‍त्रेन् मुँ, धै परमेश्‍वर ङाँर फेनबै घ्‍याँ या घ्रि मत्‍त्रे मुँ। च घ्‍याँ येशू ख्रीष्‍ट बिबै म्हि ग।
1TI 2:6 खीजी ह्रोंसलाइन पिंसि क्रूसर पापए छे फोमिंसि म्‍हिमैं पापउँइँले फ्रेमिंइ, छले परमेश्‍वरजी ताँन् म्हिमैंइ खोंयोंइ आनुबै छ्ह योंरिगे बिबै प्रमाण ठिक त्हेर उँइँमिंइ।
1TI 2:7 चु ताँमैंए ग्वाइ पिंबर्न परमेश्‍वरजी ङलाइ कुल्मिंबै चेला चिब तबर त्हाँइ। क्ह्रोंसेंन्बै ताँ था सेसि प्रभु येशूलाइ बिश्‍वास लरिगे बिसि अरू ह्रेंमैंलाइ लोमिंबर ङलाइ कुल्मिंइमुँ। ङ स्‍योर आते, चु क्ह्रोंसेंन्बै ताँ ग।
1TI 2:8 छतसि ताँन् क्ल्ह्‍योजरे मुँयुँमैंइ ह्रिस आखल्‍ले, तोइ गनगन आलल्‍ले आछ्याँबै के आलबै यो क्वेसि प्राथना लरिगे बिब ङए सैं मुँ।
1TI 2:9 छलेन च्हमिरिमैंज्यै या ङ्‍हेंबै पैरन लसि, छ्याँबै बानि ब्योरमैं उँइँसि प्राथना लरिगे। धै छ्याँरिगे बिसि सै ल्हें फेबै क्वेंमैं नेरो घाँनामैं खिसि ठाँन् आतेरिगे।
1TI 2:10 बरु छ्याँ-छ्याँबै केमैं लल् ह्रब्मैं तरिगे, तलेबिस्याँ छाबै च्हमिरिमैंन् परमेश्‍वरए सेवा लबर ङ्‍हेंम्।
1TI 2:11 च्हमिरिमैंइ च्याँले टिसि छेनाले लोरिगे।
1TI 2:12 च्हमिरिमैंइ मुँयुँमैंलाइ लोमिंब नेरो मुँयुँमैंए फिर अधिकार लल् आपिं। बरु चमैं तोइ आबिल्‍ले टिरिगे।
1TI 2:13 तलेबिस्याँ परमेश्‍वरजी ओंसों आदम बनेइ, लिउँइँ हब्बा बिबै च्हमिरि बनेइ।
1TI 2:14 ओंसों आदम पापर च्होब् आङिं, बरु हब्बाइ स्योलिबै ताँ क्वेंसि पापर च्होल।
1TI 2:15 दिलेया च्हमिरिमैं थेब आप्हैंल्‍ले, बिश्‍वासर, म्हाँया नेरो पबित्र तइ टिइ बिस्याँ प्‍हसे फिमा परमेश्‍वरजी चमैं जोगेमिंब्मुँ।
1TI 3:1 थेद्, चु क्वेंल् त्‍हुबै ताँ ग: खाबज्यै चिब तसि के लबै सैं लस्‍याँ चइ छ्याँबै के लबै सैं लम्।
1TI 3:2 छतसि बिश्‍वासीमैं न्होंर्बै चिब तोइ छ्याब् आरेब, प्ह्रेंस्यो घ्रि मत्‍त्रे मुँब, आछ्याँबै सैमैंउँइँले जोगेल् खाँब, ताँनने क्ह्रिल् खाँब, ताँनइ क्वेंब, प्ह्रेंमैं मान लल् ह्रब, झाइले म्हिमैं छेनाले लोमिंल् खाँब,
1TI 3:3 प्हा आथुँब, प्होंगि आलब, ह्रिस आखब, सैदिल् खाँब, मुइए लोब आलब तल् त्हुम्।
1TI 3:4 छलेन च ह्रोंसए धिंर्बै चाँजो छेनाले लल् खाँब नेरो प्हसेमैं छेनाले लोदा सैंदा लसि ह्रोंसइ बिबै ताँ प्हसेमैंइ ङिंब लल् खाँरिगे।
1TI 3:5 तलेबिस्याँ खाबज्यै या ह्रोंसए धिंर्बै परवामैं खागु लल् आखाँ बिस्‍याँ, झन् परमेश्‍वरए फिर बिश्‍वास लब्मैंलाइ खैले खागु लल् खाँमुँ?
1TI 3:6 छतसि भर्खर बिश्‍वास लबै म्‍हि चिबए ल्हागिर आत्हाँरिगे, तलेबिस्याँ छाबै म्‍हि चिब तल् पिंइबिस्‍याँ, च थेब् प्हैंसि दुष्‍टइ योंबै दण्ड चज्यै या योंब्‍मुँ।
1TI 3:7 म्हिमैंए उँइँरै या च छ्याँब तल् त्हुम्, आस्याँ आगुइ ताँ सेन् तसि च दुष्‍टए ङोर फेब्मुँ।
1TI 3:8 छलेन डिकनमैं या छ्याँबै बानि ब्योर प्ह्‍याल् त्‍हुम्, क्ह्रोंसेंन्बै ताँ पोंल् त्‍हुम्। प्हा थुँसि म्हेरल् आत, धै सै न्होरए लोबै या लल् आत।
1TI 3:9 येशू ख्रीष्‍टए बारेर परमेश्‍वरजी लोमिंबै ताँमैं चमैंइ छ्याँबै सैंउँइँले सैं न्होंर थेंल् त्‍हुम्।
1TI 3:10 ओंसों चमैंए बानि खैब मुँ बिसि जाँच लल् त्हुम्, धै चमैंने तोइ छ्याब् आम्रोंस्याँ चमैंइ डिकनए पदर टिसि सेवा लरिगे।
1TI 3:11 छलेन च्हमि-रिमैं या छ्याँबै बानि ब्योर मुँब, फ्रम् ताँ क्योंम् ताँ आलब, आछ्याँबै केमैं आलब, ताँनइ क्वेंब तल् त्‍हुम्।
1TI 3:12 डिकनल प्ह्रेंस्यो घ्रि मत्‍त्रे तल् त्‍हुम्। प्‍हसेमैं नेरो धिं छेनाले ङ्‍ह्‍योल् खाँब तल् त्‍हुम्।
1TI 3:13 डिकनइ लल् त्हुबै सेवा छेनाले लब्मैंल छ्याँबै इजेत तम्, धै ह्रोंसइ लबै बि‍श्‍वासए बारेर अरूमैंने आङ्हिंन्ले बिल् खाँम्।
1TI 3:14 ङ क्‍हि ङाँर युनन् खबै सैं लइमुँ, दिलेया चु प्ह्रिछ्या क्हिलाइ प्ह्रिइमुँ।
1TI 3:15 खनिज्यै ङ खब क्हैयाइ बिस्याँ परमेश्‍वरए प्हसेमैंए बानि ब्योर खैब तल् त्‍हुम् बिसि क्हिइ छेनाले सेल् त्हुम्। परमेश्‍वरए प्हसेमैं खोंयोंन् बिलै सोगों तबै परमेश्‍वरए मण्‍डलि ग, धै क्ह्रोंसेंन्बै मुल त्हो नेरो जग ग।
1TI 3:16 येशू ख्रीष्‍टए बारेर परमेश्‍वरजी उँइँमिंबै ताँमैं कति थेब मुँ बिसि ङ्योइ क्ह्रोंसेंन्ले थहा सेसि बिम्: येशू ख्रीष्‍ट म्‍हिए क्हो किंसि चु ह्‍युलर युइ, पबित्र प्ल्हउँइँले खी ठिक ठर्दिइ, स्वर्गदूतमैंइ खीलाइ म्रोंइ, ह्रें ह्रेंर्बै म्‍हिमैंए म्हाँजोर खीए बारेर्बै ताँ म्हिमैंइ बिप्रइ, ताँन् ह्‍युलर्बै म्‍हिमैंइ खीए फिर बिश्‍वास लइ, झाइले थेबै मानले खी स्‍वर्गउँइँ क्वेयाइ।
1TI 4:1 तारे खबै त्हेजरे स्योलिबै ताँ क्वेंसि दुष्‍टए घ्याँर प्रसि को-कोइ बिश्‍वास लबन् पिवाब्मुँ बिसि पबित्र प्ल्हजी छेनाले बिमिंइमुँ।
1TI 4:2 छाबै ताँमैं स्‍योर तेबै म्हिमैंउँइँले खम्। चमैंए बुद्धि लाबै पैइ ख्रोंवाब् धों तम्।
1TI 4:3 छाबै म्हिमैंइ ब्ह्‍या लल् आत बिम्, धै को-कोइ चबै सै या चल् आत बिम्। दिलेया परमेश्‍वरजी चु तोन्दोंरि सैमैं चबै ल्हागिर बनेइ। छतसि प्रभुलाइ म्हाँदिब्मैंइ क्ह्रोंसेंन्बै ताँ सेबइले धन्‍यबाद पिंसि चलेन् तम्।
1TI 4:4 परमेश्‍वरजी बनेबै ताँन् सैमैं चोखो मुँ। छतसि धन्‍यबाद पिंइरि चस्याँ चल् आतबै सै तोइ आरे।
1TI 4:5 तलेबिस्याँ परमेश्‍वरए बचन नेरो प्राथनाइ ताँन् सै चोखो लम्।
1TI 4:6 प्रभु येशूउँइँले खबै सैं तोंबै ताँमैं नेरो क्हिइ कोलो ओंनोंन् म्हाँदिबै क्ह्रोंसेंन्बै ताँमैं लोबइले क्हि प्रभुए फिर बिश्‍वास लबर भोंब् तसिन्मुँ। छतसि चु ताँमैं क्हिइ अरू अलि-अङाँमैंलाज्यै या लोमिंस्याँ क्‍हि येशू ख्रीष्‍टए के लबै छ्याँबै म्‍हि तब्‍मुँ।
1TI 4:7 छतसि केर आफेबै स्‍योलिबै ताँमैंउँइँले स्‍योले टिद्। बरु परमेश्‍वरए केर फेबै म्हि तबर भों लद्।
1TI 4:8 तलेबिस्याँ ज्युए ल्हागिर लबै के तिस्याँदे मत्‍त्रे फायदा तम्। दिलेया परमेश्‍वरए घ्याँर प्रबै ल्हागिर तालिम लस्‍याँ ल्हें सैर फायदा तम्, तलेबिस्याँ चए रो चु छ्हर मत्‍त्रे आङिं अर्को छ्हरै या योंम्।
1TI 4:9 चु ताँ क्‍ह्रोंसेंन्लेन् क्वेंल् त्हुब नेरो म्हाँदिल् त्हुब मुँ:
1TI 4:10 ङ्योइ खाँन् समा भों लसि छेनाले के लसि छ्ह थोल् त्हुम्, तलेबिस्याँ सोगों परमेश्‍वरए फिर ङ्योइ आशा थेंइमुँ। परमेश्‍वर ताँन् म्हिमैंलाइ, खासगरि खीए फिर बिश्‍वास लब्‍मैंलाइ जोगेमिंबै परमेश्‍वर ग।
1TI 4:11 चु ताँमैंन् बिश्‍वासीमैंने लद् बिसि लोमिंन्।
1TI 4:12 ताँनए फिर म्हाँया लइरि बिश्‍वासर भोंब् तसि, छ्याँबै ताँमैं पोंसि, छ्याँबै बानि ब्योर उँइँसि, छेनाले छ्ह थोसि बिश्‍वासीमैंए उँइँर छ्याँबै नमुना तद्। तलेबिस्याँ फ्रेंसि छजोरे बिसि खाबज्यै या क्हिलाइ आक्वेंब आतरिगे।
1TI 4:13 ङ आखन् समा म्हिमैंलाइ परमेश्‍वरए छ्वेर्बै ताँमैं खेमिंदै, सैं तोंबै ताँ बिमिंदै परमेश्‍वरए ताँ लोमिंसि चमैंए सैं भोंब् लमिंन्।
1TI 4:14 अगमबक्‍तामैंइ पोंब् धोंले चजर्बै एल्डरमैंइ क्हिए क्रर यो थेंसि प्राथना लमा परमेश्‍वरउँइँले क्हिइ योंबै बरदानए हेल आलद्।
1TI 4:15 चु केमैंन् क्हिइ लरिद्। क्हिइ लबै केमैंउँइँले क्हिए छ्ह छ्याँब ततै ह्‍याब ताँनइ म्रोंरिगे।
1TI 4:16 क्हिइ लबै केमैं नेरो पोंबै ताँमैंर ओंसोंन् च्हैंब् मैंब् लद्। छलस्याँ क्‍हिइ ह्रोंसलाज्यै या जोगेब्मुँ, क्‍हिए ताँ ङेंब्‍मैं या जोगेब्मुँ।
1TI 5:1 खेब् माँब्मैंलाइ आहौदिद्, चमैंने आबा आमाने धोंलेन् ब्यबर लद्। धै फ्रेंसिमैंने ह्रोंसए अलिमैं धोंन् ङ्हाँन्।
1TI 5:2 धै छमिंमैंने छ्याँबै सैंउँइँले ह्रोंसए रिंने धोंले ब्यबर लद्।
1TI 5:3 ङ्ह्‍योबै म्हि खाबै आरेबै म्हरेस्योमैं म्हाँया लद्।
1TI 5:4 म्हरेस्योमैंल च्‍ह, च्हमि, क्‍वें, क्‍वेंमिं मुँस्‍याँ, चमैंइ ह्रोंसए बाज्यु भुज्‍यूलाइ मान लसि छेनाले सुसार लरिगे, छले चमैंइ ह्रोंसए आबा, आमा नेरो बाज्‍यू भुज्‍यूए भारा फोरिगे, तलेबिस्याँ छाबै केमैं म्रोंसि परमेश्‍वर बेल्‍ले सैं तोंम्।
1TI 5:5 दिलेया खाबै आरेबै म्हरेस्योमैंइ परमेश्‍वरर मत्‍त्रे आशा थेंम्, धै खीलाइ ल्होमिंन् बिसि त्‍हिंयाँ म्‍हुँइँस परमेश्‍वरने प्राथना लरिम्।
1TI 5:6 दिलेया म्हरेस्यो तसेया च खै तदा ङ्हाँमुँ छान् तप्रस्याँ सोगोंन् तलेया सियाब् धोंन् तब् ग।
1TI 5:7 चमैं तोइ छ्याब् आरेब तरिगे बिसि चु ताँमैं बिद्।
1TI 5:8 खाबज्यै या ह्रोंसए म्हिमैं नेरो बिलन् त्हुमा ह्रोंसए परवालाइ छेनाले आङ्ह्‍यो बिस्‍याँ, चइ लबै बिश्‍वास स्योलिबै ग। च बिश्‍वास आलब्‍मैं भन्दा आछ्याँबै के लबै म्हि तम्।
1TI 5:9 तिब्ले मत्‍त्रे ब्ह्‍या तबै टुच्यु बर्ष कैडोबै म्हरेस्योमैंए मिंमैं मत्‍त्रे सेवा लमिंबर थेंन्।
1TI 5:10 छाबै म्हरेस्योमैं छ्याँबै के लसि छ्याँबै मिं चल्‍दिब धै ह्रोंसए च्‍ह-चमिमैं छेनाले फारब, प्ह्रेंमैंलाज्यै या चब् थुँबर मान लब, थेब् आप्हैंनले बिश्‍वासीमैंए सेवा लब, दुःख तब्‍मैंलाइ ल्होब, छाबै छ्याँबै केमैंर सैं पिंब्मैं तल् त्‍हुम्।
1TI 5:11 दिलेया ट्च्यु बर्ष न्होंर्बै म्हरेस्योमैंए मिं सेवा लमिंबर आप्ह्रिद्, तलेबिस्याँ चमैं ब्ह्‍या लदा ङ्हाँसि ख्रीष्‍टउँइँले ह्रेंगो तयाम्, धै ब्ह्‍या लबै सैं लम्।
1TI 5:12 छ लइबिस्‍याँ चमैंइ “ङम् तारे पिरु बिश्‍वासीमैंए सेवा लम्” बिबै ताँ म्‍लेवासि चमैंइ दण्ड योंम्।
1TI 5:13 च्हौ मत्‍त्रे आङिं चमैं धिं-धिंर स्युरसि प्ल्हेउ तम्, चमैं तब-आतबै ताँमैं पोंब, आगु स्यारब, तोनतोंर्न आगुए केर यो झोंब्मैं तम्।
1TI 5:14 छतसि बिरोधीमैंइ ङ्योए ताँ लल् आयोंरिगे बिसि टुच्यु बर्ष न्होंर्बै ब्ह्‍या लदा ङ्हाँबै म्हरेस्योमैंइ ब्ह्‍या लरिगे, च्‍ह-चमि फिसि छेनाले धिं नाँ चुसि टिरिगे बिब ङए सैं मुँ।
1TI 5:15 तलेबिस्याँ को-कोइ म्हरेस्योमैं प्रभु पिसि दुष्‍टए लिलि प्रयाइमुँ।
1TI 5:16 बिश्‍वासीमैंए फिर खाग आतरिगे बिसि परमेश्‍वरए फिर बिश्‍वास लबै च्हमिरिल ह्रोंसए न्होंरि खाब् मुँले म्हरेस्योमैं मुँस्‍याँ, चइ च म्हरेस्योमैं ल्होल् त्हुम्। खाबै आरेबै म्हरेस्योमैंलाइ बिस्याँ बिश्‍वासीमैंइ ल्होल् त्‍हुम्।
1TI 5:17 बिश्‍वासीमैं छेनाले ल्होमिंबै एल्डरमैं, खासगरि परमेश्‍वरए ताँ बिमिंसि लोमिंबर भों लब्मैंइ दुःख सैदि डबल योंल् त्हुम्।
1TI 5:18 तलेबिस्याँ परमेश्‍वरए पबित्र छ्वेर बिइमुँ “दाँइ झोंबै क्‍ल्‍याए सुँर म्‍हुँलु आझोंन्।” तलेबिस्याँ “के लबै म्‍हिइ नों सै योंल् त्हुम्।”
1TI 5:19 एल्डरए बिरोधर तोइ छ्याब् ल्हैदिस्याँ म्हि ङ्हिंदे सोंदेए ताँ आक्ह्रिन् समा आक्‍वेंन्, दिलेया म्‍हि ङ्हिंदे, सोंदेए ग्वाइ क्‍ह्रिस्‍याँ मत्‍त्रे क्‍वेंन्।
1TI 5:20 खोंयोंइ बिलै पाप के लरिब्‍मैंलाइ ताँन् म्‍हिमैंए उँइँर हौदिद्। छ लस्‍याँ अरूमैं या ङ्हिंब्मुँ।
1TI 5:21 परमेश्‍वर आबा, प्रभु येशू ख्रीष्‍ट नेरो स्‍वर्गदूतमैंए उँइँर ङइ क्हिने बिमुँ, क्हिइ खाबलाज्यै आफेलल्‍ले छेनाले चु केमैं लद्।
1TI 5:22 अरूमैंइ लबै आछ्याँबै केमैंर क्हि सामेल् आतद्। छ्याब आयोंरिगे बिसि प्रभुए के लबै ल्हागिर म्हिमैं त्हाँल् त्हुमा आतुर आतद्। ह्रोंसलाइ पबित्र थेंन्।
1TI 5:23 खों-खोंयों क्हिए फो नब्रें लमुँ, छतसि क्यु मत्‍त्रे आङिं, फो नमा मैए ल्हागिर प्हा या दे-दे थुँन्।
1TI 5:24 को-कोइ म्‍हिमैंइमि छर्लङ्गन् म्रोंबै पाप केमैं लमुँ धै नियाधिश ङाँर फेनेम्, दिलेया को-कोइइ लबै पाप केमैं लिउँइँ मत्‍त्रे म्रोंम्।
1TI 5:25 छलेन छ्याँबै केमैं या छर्लङ्गन् म्रोंम्, छर्लङ्गन् म्रोंल् आखाँबै सै तोइ मुँलेया च खोंयोंन् बिलै लोइ टिल् आखाँ, तिंगें च खैलसे या त्होंयाम् धै ताँनइ म्रोंम्।
1TI 6:1 परमेश्‍वरए मिं नेरो ङ्योइ लोमिंबै ताँमैंल अरूइ ताँ सेन् आछेरिगे बिसि केब्छैं केब्स्योमैंइ ह्रोंसए क्ल्हेए मान छेनाले लरिगे।
1TI 6:2 प्रभुए फिर बिश्‍वास लब्मैं ताँन् घ्रिन् ग बिब् मैंसि केब्छैं केब्स्योमैंइ बिश्‍वास लबै क्ल्हे म्हि आच्हिन् आलरिगे, झन् चमैंइ ह्रोंसए क्ल्हेलाइ बेल्‍ले मान लल् त्हुम्। तलेबिस्याँ चमैंइ के लमा खेंमैंए खोबै बिश्‍वासी अलिलाइन फायदा तम् बिसि केब्छैं केब्स्योमैंलाइ छेनाले लोमिंन्।
1TI 6:3 खाबज्यै प्रभु येशूए ताँने आक्ह्रिबै ताँमैं लोमिंसि ङ्योइ येशूए मिंर लल् त्हुबै केमैं लल् आत्हु बिमुँ,
1TI 6:4 च म्‍हि फाक्‍कर्न ह्रब सेब प्‍हैंम्, चइ तोइ आह्र, तोइ आसे। छाबै म्‍हिमैंइ स्योलिबै ताँ घ्रि लाछेंसि प्‍होंगि मिम्, छाबै ताँमैंउँइँलेन् ह्रिस लब, प्होंगि मिब, आब्रु वाब नेरो आछ्याँबै सैं मैंल् लम्।
1TI 6:5 छाबै म्हिमैं मदि न्होंयाब्मैं नेरो क्ह्रोंसेंन्बै ताँ आक्वेंब्मैं ङाँर ह्‍यासि प्होंगि लल् म्हैम्, धै परमेश्‍वरए मिंर के लब् प्हैंसि ङ खैले प्लब् तब् ङ्‍हे बिसि चमैंइ मैंम्।
1TI 6:6 दिलेया खाबइ ह्रोंसने तो मुँ च सैर्न सन्तोकले परमेश्‍वरए के लमुँ चन् प्लब् तम्।
1TI 6:7 तलेबिस्याँ ङ्योइ चु ह्‍युलरै या तोइ आपुयु धै सिइ ह्‍यामै या तोइ बोल् आयों।
1TI 6:8 छतसि चब् खिब् मत्‍त्रे योलेया ङ्यो सन्‍तोक तले।
1TI 6:9 दिलेया प्लदा ङ्हाँब्मैंइ तब आतबर दुःख योंम्, चमैं आङिं-आङिं तबै सैजरे पानेम्, केरै आफेबै छेरन् तबै सै जरे सैं ह्‍याम्, छाबै सैमैंइ म्हिमैं तोइ आचैन् लवाम्।
1TI 6:10 तलेबिस्याँ ताँन् आछ्याँबै सैमैंए जरन् मारा-मुइए म्हाँया लब् ग। मारा-मुइए लोबइ लमा को-कोइ परमेश्‍वरए फिर बिश्‍वास लबन् पिवासि आछ्याँबै घ्याँउँइँ प्रयाइमुँ, धै चमैंए फिर सैदिलै आखाँन् तबै दुःख तइमुँ।
1TI 6:11 छतसि बाबु, क्‍हि परमेश्‍वरए म्‍हि ग। क्‍हिइ चु छाबै लोबए केमैं आलद्। बरु परमेश्‍वरए उँइँर छेनाले सेवा लबर, बिश्‍वासर, म्हाँयार, खैतबै दुःखन् तलेया भोंब् तसि सैदिसि थेब् आप्हैंनले ढुक्‍कले टिद्।
1TI 6:12 खोंयोंइ आखाँबै छ्ह योंबै ल्हागिर बिश्‍वासर भोंब् तद्। चुए ल्हागिर्न परमेश्‍वरजी क्हिलाइ त्‍हाँब् ग, चु ताँए बारेर्न क्हिइ लबै बिश्‍वासए ग्वाइ क्हिइ ल्‍हें म्‍हिमैंए उँइँर पिंल।
1TI 6:13 ताँन् सैमैंए छ्ह पिंबै परमेश्‍वर नेरो पन्‍तियस पिलातसए ओंसों छ्याँबै ग्वाइ पिंबै प्रभु येशू ख्रीष्‍टए उँइँर ङ क्हिने चु ताँ बिमुँ:
1TI 6:14 ङ्योए प्रभु येशू ख्रीष्‍ट आयुन् समा ङइ क्हिने लद् बिबै केमैं ताँन् छेनाले लद्। आगुइ ताँ सेन् छेबै केमैं आतरिगे।
1TI 6:15 धाँसे थेब ताँनइ म्हाँदिल् त्हुबै परमेश्‍वरजी खीजी ठर्दिबै त्हेर प्रभु येशू ख्रीष्‍ट धबै कुल्मिंब्‍मुँ। म्रुँमैंए म्रुँ, प्रभुमैंए प्रभु परमेश्‍वरन् ग।
1TI 6:16 परमेश्‍वर खोंयोंइ बिलै सोगों मुँ, खी खाबै ह्‍याल् आखाँबै चारबै ह्‍वेर टिमुँ, खीलाइ खाबज्यै या खोंयोंइ आम्रोंइमुँ, म्रोंलैया आखाँ। छाबै परमेश्‍वरए मिं खोंयोंइ बिलै थेब् तरिगे, खीए ग्याल्स खोंयोंन् बिलै तरिगे। आमेन, छान् तरिगे!
1TI 6:17 चु ह्‍युलर्बै प्लबै म्हिमैंने थेब् आप्हैंन् बिद्, चमैं प्लब् आप्‍हैंरिगे, आटिक्‍दिबै सै न्होरर आशा आथेंरिगे, बरु चमैंए आशा ङ्योलाइ चैदिबै सैमैं तोन्दोंरि योल्‍ले ख्युल्‍ले पिंबै परमेश्‍वरए फिर थेंरिगे।
1TI 6:18 चमैंइ छ्याँबै केमैं लरिगे, धै छ्याँबै केमैं लसि म्हिमैं ल्होब्मैं, पिंब्मैं तरिगे बिसि चमैंने बिद्।
1TI 6:19 छले ह्रोंसए ल्हागिर चमैंइ लिउँइँबै जग भोंब् लरिगे, धै खोंयोंइ आखाँबै छ्ह योंल् खाँरिगे।
1TI 6:20 ओ तिमोथी, ङइ क्हिने बिबै ताँमैं छेनाले सैंर मैंथेंन्। कोइ म्हिमैं बुद्धि मुँब प्‍हैंसि आछ्याँबै स्योलिबै ताँ लम्, धै फाक्‍कर्न प्होंगि मिम्। छाबै ताँउँइँले स्‍यो तद्।
1TI 6:21 च ताँमैं क्वेंसि को-कोइइ प्रभुए फिर बिश्‍वास लबन् पिवाइमुँ। दिलेया क्हेमैं ताँनए फिर बिस्याँ परमेश्‍वरए दयाम्हाँया खोंयोंन् बिलै तरिगे।
2TI 1:1 ङ पावलउँइँले तिमोथीलाइ जय मसीह मुँ। परमेश्‍वरए इच्छा अनुसार येशू ख्रीष्‍टजी ङ कुल्मिंबै चेला चिब तबर त्हाँइ। येशू ख्रीष्‍टउँइँले छ्ह योंम् बिसि परमेश्‍वरजी फैबै बाछाए ताँ बिप्रबै ल्हागिर खीजी ङलाइ कुलइमुँ।
2TI 1:2 ओ ङइ खोबै च्ह तिमोथी, ङ्योए परमेश्‍वर आबा नेरो ङ्योए प्रभु येशू ख्रीष्‍टए दयाम्हाँया नेरो शान्ति क्हिए फिर खोंयोंन् बिलै तरिगे।
2TI 1:3 ङए खेमैं-मामैंइ परमेश्‍वरए केमैं छ्याँबै सैंइ लब् धोंले, ङज्यै या छ्याँबै सैंउँइँले परमेश्‍वरए के लम्, छले ताँनइ छ्याँबै सैंउँइँले मान लल् त्हुबै परमेश्‍वरए सेवा लबै म्हि क्हि तबइले ङए प्राथनार खोंयोंइन् बिलै ङइ क्हिए ल्हागिर परमेश्‍वरलाइ धन्‍यबाद पिंम्।
2TI 1:4 ङ्यो फ्रेबै त्हेर क्‍हिइ पिबै मिग्लि मैंमा त्हियाँ-म्हिसा ङ खोंयों क्हिने त्होसि सैं तोंल् योंब् ङ्‍हे ङ्हाँइमुँ।
2TI 1:5 छल कपट तोइ आरेबै क्हिए क्ह्रोंसेंन्बै बिश्‍वास ङइ मैंमुँ। चु बिश्‍वास ओंसों क्‍हिए बुज्‍यू लोइस नेरो क्‍हिए आमा युनिसने या मुँल। चमैंइ लब् धों तबै बिश्‍वास तोगो क्‍हिज्यै या लइमुँ बिब ङइ सेइमुँ।
2TI 1:6 छतसि ङइ क्‍हिए फिर यो थेंसि प्राथना लमा, परमेश्‍वरजी क्हिलाइ पिंबै बरदानमैं आम्‍लेद्। परमेश्‍वरजी पिंबै बरदान अनुसार्बै केमैं क्हिइ लरिद्।
2TI 1:7 तलेबिस्याँ परमेश्‍वरजी ङ्योलाइ ङ्हिंबै सैं आङिं, दिलेया भोंबै सैं, म्हाँया लबै सैं नेरो आछ्याँबै के आल बिसि ह्रोंसए सैं फैल् खाँबै पबित्र प्ल्ह पिंइमुँ।
2TI 1:8 छतसि प्रभुए क्ह्रोंसेंन्बै ताँमैंए ग्वाइ पिंबर फा आपिद्। ङ झेलर मुँबै ताँरै या फा आपिद्। बरु ङ्योए प्रभुउँइँले खबै सैं तोंबै ताँमैं बिप्रमा दुःखन् खलेया सैदिद्।
2TI 1:9 परमेश्‍वरजी ङ्यो जोगेमिंसि खीए म्‍हिमैं लबै ल्हागिर त्‍हाँइ। ङ्योइ छ्याँबै केमैं लमा आङिं, ङ्योए फिर मुँबै खीए दयाम्हाँयाउँइँले परमेश्‍वरजी ङ्यो त्हाँबै सैं खइ। तलेबिस्याँ ह्‍युल बनेब् भन्दा ओंसों ओंनोंन् ख्रीष्‍ट येशूउँइँले खीजी च दयाम्हाँया ङ्योलाइ पिंल।
2TI 1:10 चु दयाम्हाँया ङ्यो मुक्‍ति पिंबै येशू ख्रीष्‍ट युसि उँइँमिंइँमुँ। खीजी कालए फिर ट्होगों तसि खोंयोंइ आखाँबै छ्हलाइ सैं तोंबै ताँउँइँले था सैमिंइमुँ।
2TI 1:11 चु सैं तोंबै ताँ बिप्रबै ल्हागिर्न ङ कुल्मिंबै चेला चिब तसि म्हिमैंलाइ लोमिंबर परमेश्‍वरजी ङलाइ त्हाँइ।
2TI 1:12 छतसि तोगो ङइ चु दुःखमैं नोरिइमुँ, दिलेया ङ फापिसि सैं च्योंब् आल। तलेबिस्याँ ङइ खाबै फिर बिश्‍वास लइमुँ बिब ङइ सेइमुँ, ङलाइ ढुक्‍का मुँ तो सैमैं ङइ खीने थेंल् पिंइमुँ, च सैमैं खीजी छेनाले थेंमिंम्।
2TI 1:13 छतसि ङइ लोमिंबै ताँमैं छेनाले सैंर थेंसि च धोंले छ्ह थोद्। धै येशू ख्रीष्‍टउँइँले खबै बिश्‍वास नेरो म्हाँया खोंयोंन् बिलै लरिद्।
2TI 1:14 ङ्योने मुँबै पबित्र प्ल्हउँइँले क्‍हिए जिम्‍मार पिंबै केमैं छेनाले लद्।
2TI 1:15 एशिया ह्‍युलर्बै म्हिमैं ताँन् ङ ङाँइले स्योयाइ बिब क्हिइ सेइमुँ, स्योइ ह्‍याब्मैं न्होंरि फाइगेलस नेरो हेर्मोगेनेस बिब् ग।
2TI 1:16 दिलेया ओनेसिफरसए परवाए फिर प्रभुजी ल्हयो लरिगे, तलेबिस्याँ च ङ म्रोंसि फा आपिमल। च रोमर खमा फनफनले ङलाइ म्हैसि ङने त्होइ।
2TI 1:17 धै ङने त्होबर झेलर खब्रें लमल धै ङए सैं क्‍होमिंबै ताँमैं लमल।
2TI 1:18 प्रभुइ निसाफ लबै त्हिंइर चइ प्रभुउँइँले आशिक योंरिगे। ङ एफिससर मुँमै या चइ ङ बेल्‍ले ल्होमल बिसि क्‍हिज्यै सेइमुँ।
2TI 2:1 छतसि ओ, ङए च्‍ह तिमोथी, येशू ख्रीष्‍टउँइँले योंबै दयाम्हाँयार क्हि बेल्‍ले भोंब तद्।
2TI 2:2 क्हिइ ल्‍हें म्‍हिए उँइँर ङउँइँले तो ताँमैं थेल, च ताँमैं अरू म्हिमैंलाज्यै या लोमिंल् खाँबै म्हिमैंलाइ लोमिंन्।
2TI 2:3 येशू ख्रीष्‍टजी बिब् ङिंबै सिपाइ तसि दुःख नोल् त्हुलेया ङिइ सैदिब् धोंलेन् क्हिज्यै या सैदिद्।
2TI 2:4 सेनार भर्ति तबै म्हिइ अरू केमैं आल, तलेबिस्याँ चइ खोंयोंन् बिलै खीए कप्‍तानए सैं तोंन् लबै केमैं मत्‍त्रे लम्।
2TI 2:5 छलेन खेल् क्ल्योंबरे भाग किंबै म्‍हिइ खेलर्बै नियम अनुसार आक्ल्योंस्याँ चइ खेलर भाग किंलै या पुरूस्‍कार योंल् आखाँ।
2TI 2:6 झाइले दुःख तलेया छेनाले खेद् ल्हैदिबै म्हिइ खैलसेया ह्रोंसए बालिए रोमैं ओंसों योंल् त्हुम्।
2TI 2:7 ङइ बिबै चु ताँमैं छेनाले सैंर मैंन्, तलेबिस्याँ प्रभुजी क्हिलाइ चु ताँन् ताँमैंए अर्थ क्‍होमिंब्मुँ।
2TI 2:8 सिबउँइँले सोगों तइ खबै दाऊदए खलकर्बै प्रभु येशू ख्रीष्‍टलाइ मैंन्। ङइ बिबै सैं तोंबै ताँ खीए बारेर्न ग।
2TI 2:9 ङइ चु सैं तोंबै ताँ अरू म्हिमैंने बिमिंबै लमा ङ अप्रादिमैं धोंले सँउँलिइ फैसि दुःख नोल् त्‍हुइमुँ। दिलेया परमेश्‍वरए ताँम् खाबज्यै या फैथेंल आखाँ।
2TI 2:10 छतसि परमेश्‍वरजी त्हाँबै म्‍हिमैंइ ख्रीष्‍ट येशूउँइँले खोंयोंइ आखाँबै छ्ह योंल् खाँरिगे बिबै ल्हागिर ङए फिर खैतबै दुःखन् तलेया ङ सैदिम्।
2TI 2:11 चु ताँनइ क्वेंल् त्हुबै ताँ ग: “ङ्यो खीने बालुन् सिइमुँ बिस्‍याँ खीने बालुन् सोगों तसि रेब्मुँ।
2TI 2:12 ङ्योइ दुःख सैदिसि टिइबिस्‍याँ खीनेन् ग्याल्स लल् योंब्‍मुँ। ङ्योइ खीलाइ ‘ङो आसे’ बिइबिस्‍याँ खिज्‍यै या ङ्योलाइ ‘ङो आसे’ बिब्‍मुँ।
2TI 2:13 ङ्योइमि स्योर तेलैया, खीजीम् खोंयोंइ स्‍योर आते, तलेबिस्याँ खीजी तो बिमुँ चन् लम्, खीजी पोंबै ताँ खोंयोंइ आस्यो।”
2TI 2:14 छतसि च्युथिरि ताँमैं लाँछेंसि छ तइ छु तइ आबि प्रद् बिसि चमैंने बिद्, तलेबिस्याँ परमेश्‍वरए प्हसेमैं छ तब आङ्‍हें, छाबै ताँमैंइ म्हिए सैं मत्‍त्रे न्होंवाम्। छाबै ताँमैंइ तोइ फायदा आत।
2TI 2:15 छतमा फापिल् आत्हुल्‍ले परमेश्‍वरजी बिब् धोंबन् के लबै म्हि धोंलेन् क्हिज्यै या ह्रोंसलाइ खीजी खोबै म्‍हि तबै ल्हागिर भों लद्।
2TI 2:16 केर आफेबै ताँमैं आपोंन्, छाबै ताँमैंइ म्‍हिमैं परमेश्‍वरउँइँले ह्रेंगो लवाम्।
2TI 2:17 केर आफेबै ताँमैं खोंयोंइ आसबै घा धों तब् ग। छाबै ताँ पोंब्मैं न्होंरि हुमेनियस नेरो फिलेतस ग।
2TI 2:18 चमैंइ क्ह्रोंसेंन्बै ताँ आपों, चमैंइ म्हिमैं सिबइले सोगों लमिंबै के ओंसोंन् तयाइमुँ बिसि स्योलिबै ताँ पोंम्। चमैंए ताँ थेसि कति म्हिमैंलम् सैं ङ्हिरि तयाइमुँ।
2TI 2:19 दिलेया परमेश्‍वरजी बिबै ताँ बिस्याँ थेबै जग धोंले भोंब मुँ। च जगए फिर पबित्र प्ल्हजी छाप ल्हैदिइमुँ, “प्रभुजी खीए म्हिमैं ङो सेमुँ” धै “प्रभए मिं किंब्मैं ताँन् आछ्याँबै केउँइँले ह्रेंगो तल् त्हुम्।”
2TI 2:20 प्लब्मैंए धिंर मारा नेरो चाँदिए भाँडमैं मत्‍त्रे आत, चर सिं नेरो सए भाडोमैं तम्। मारा नेरो चाँदिए भाँडमैं थे-थेबै केजरे मत्‍त्रे चलेमुँ, सिं नेरो सए भाँडमैं या खोंयोंन् बिलै चलेम्।
2TI 2:21 छलेन खाबै या आछ्याँबै केउँइँले स्‍यो तसि परमेश्‍वर ङाँइ सैं एस्याँ च म्‍हि सै ल्हें फेबै भाँडो धों तब् ग। छलस्याँ च धिं क्ल्हेए ल्हागिर थे-थेबै केमैंर चैदिबै छ्याँबै भाँड धों तब्मुँ।
2TI 2:22 छतसि क्हि फ्रेंसि तमा ज्युइँले खबै आछ्याँबै केउँइँले स्यो तद्, धै छ्याँबै सैंउँइँले प्रभुए मिं किंब्मैंने बा-बालु छ्याँबै केमैं लदै, बिश्‍वासर भोंब् तसि म्हाँयार क्ह्रिसि प्रद्।
2TI 2:23 दिलेया केर आफेबै तामैं आपोंन्, तलेबिस्याँ छाबै ताँमैंउँइँले प्होंगि तम् बिसि क्हिइ सेइमुँ।
2TI 2:24 प्रभुए सेवा लबै म्‍हि प्‍होंगि लब आत, बरु ताँन् म्हिमैंए फिर ल्हयो लब, छेनाले लोमिंल् खाँब, ह्रिस आखल्‍ले लोदा सैंदा लल् खाँब तल् त्हुम्।
2TI 2:25 ह्रोंसने आक्‍ह्रिब्‍मैंलाज्यै या छेनाले लोदा सैंदा लल् खाँब तल् त्‍हुम्। छ लस्याँ परमेश्‍वरजी चमैंए सैं एसि क्ह्रोंसेंन्बै ताँ क्होबै सैं पिंलै।
2TI 2:26 छलेन चमैंए मि थोंयाबइले चमैं दुष्‍टए ङोउँइँले स्योरल् खब्मुँ, तलेबिस्याँ दुष्‍टइ चमैंलाइ क्ह्रोंसेंन्बै ताँ क्होल् आखाँब लथेंल।
2TI 3:1 दिलेया तरे लिउँइँ खबै त्हिंइ जरे बेल्‍ले ङ्हिंन् ङ्हाँबै दुःखए त्हे खब्मुँ, बिब सैंर मैंइ थेंन्।
2TI 3:2 च त्हेर म्हिमैंइ ह्रोंसलाइ मत्‍त्रे म्हाँया लब, मुइए लोब लब, ह्रोंसन् थेब् प्‍हैंब, सैं सार तब, अरूलाइ म्हि आलल्‍ले पोंब, आबा-आमाइ बिब आङिंब, खाबइ तो सै पिंलेया धन्यबाद आपिंब धै परमेश्‍वर आम्हाँदिब गुन् आरेब अपबित्र तब्‍मुँ।
2TI 3:3 धै खाब्ने खैबै म्हाँया लल् त्हुमु छ आलब, आगुए फिर ल्‍हयो आखब, अरूए फिर तोनतोर्न छ्याब् ल्‍हैदिब, आमादु, सैं सार तसि छ्याँबै ताँ आखोब।
2TI 3:4 अझै चमैंइ अरूलइ धोका पिंब, खैचिज्हिले पोंब, ह्रब् प्‍हैंब, परमेश्‍वरए सैं तोंन् लबै साटोर चमैं मोज-मज्‍जा लब् खोब।
2TI 3:5 चमैंइ सुँइ परमेश्‍वरलाइ म्‍हाँदिम् बिम्, दिलेया चमैंए सैंइ परमेश्‍वरए क्‍ह्रोंसेंन्‍बै शक्‍तिलाइ आक्‍वें। छाबै म्‍हिमैंउँइँले स्‍यो तद्।
2TI 3:6 तलेबिस्याँ चमैं न्होंरि को-कोइ धिं-धिंर होंसि पापइ प्लेंथेंब नेरो सैंर आछ्याँबै इच्छा मैंरिबै च्हमिरिमैंलाइ ह्रोंसए अधीनर थेंम्।
2TI 3:7 छाबै च्हमिरिमैंइ लोबम् लोमुँ, दिलेया क्ह्रोंसेंन्बै ताँ खोंयोंइ क्‍होल् आखाँ।
2TI 3:8 यान्‍नेस नेरो याम्‍ब्रेसइ मोशाए बिरोध लब् धोंले छाबै स्योलिबै ताँ लोमिंब्‍मैंइ क्ह्रोंसेंन्बै ताँए बिरोध लम्। छाबै म्हिमैं मदि न्होंयाब्मैं, बिश्‍वास लल् आखाँबै म्हिमैं ग।
2TI 3:9 दिलेया चमैंए स्‍योर ताँ ल्हें समा टिक्दिरिब् आरे। तलेबिस्याँ यान्‍नेस नेरो याम्‍ब्रेसए स्योलिबै ताँ ताँनइ सेब् धोंले चमैंए स्योलिबै ताँ या ताँनइ था सेब्मुँ।
2TI 3:10 दिलेया क्हिइमि ङइ लोमिंबै ताँमैं, ङए बानि ब्योर, ङइ लल् म्हैबै केमैं, ङए बिश्‍वास, ङइ पैंल् खाँबै ताँ, ङइ लबै म्हाँया नेरो दुःख सैदिबै शक्‍ति म्रोंइमुँ।
2TI 3:11 एन्‍टिओखिया, आइकोनियम नेरो लुस्‍त्रार ङइ खै-खैबै दुःखमैं सैदिइ बिसि क्हिइ सेइमुँ। दिलेया प्रभुजी च ताँन् दुःखउँइँले ङ जोगेमिंइ।
2TI 3:12 ख्रीष्‍ट येशए फिर बिश्‍वास लसि छ्ह थोदा ङ्हाँब्मैं ताँनए फिर दुःख तब्मुँ।
2TI 3:13 दिलेया आछ्याँबै के लबै म्हिमैं नेरो आगुलाइ लुब्मैंइ अरूमैंलाइ लुसि अरूमैंउँइँलेन् लुयासि चमैं झन्-झन् दुष्‍ट त-तै ह्‍याम्।
2TI 3:14 दिलेया क्‍हि बिस्याँ बिश्‍वासर भोंब् तसि ह्रोंसइ क्होबै क्ह्रोंसेंन्बै ताँइ बिब् धोंले के लरिद्। च क्ह्रोंसेंन्बै ताँमैं खाबइ लोमिंइ बिसि क्हिइ सेइमुँ।
2TI 3:15 क्‍हिइ कोलो ओनोंन् परमेश्‍वरए छ्वेर्बै ताँ सेइमुँ। च छ्वेर्बै ताँमैंइ ख्रीष्‍ट येशूए फिर बिश्‍वास लब्मैंइ खोंयोंइ आखाँबै छ्ह खैले योंम् बिबै ताँ लोल् खाँम्।
2TI 3:16 चु छ्वेर्बै ताँन् ताँ परमेश्‍वरए प्ल्हजी म्हिमैंने प्ह्रिबर ल्हैदिब् ग। छतसि चु छ्वेर्बै ताँमैं बेल्‍ले केर फेब् मुँ। क्‍ह्रोंसेंन्‍बै ताँ लोमिंबर, अर्थि बुद्धि पिंबर, न्होंह्‍याबै ताँमैं क्योंएँबर, छेनाले लोदा सैंदा लबर चु छ्वेर्बै ताँन् ताँमैं बेल्‍ले केर फेब् मुँ।
2TI 3:17 परमेश्‍वरजी कुल्मिंबै म्‍हि ताँन् छ्याँबै के लल् खाँसि छ्याँबै म्हि तरिगे बिसि खीजी चु छ्वे पिंब् ग।
2TI 4:1 तिगें येशू ख्रीष्‍ट ग्याल्स लबर युब्‍मुँ। च त्हेर खीजी सियाब्‍मैं नेरो सोगोंमैं ताँनए निसाफ लब्‍मुँ। छतसि क्हिइ लल् त्हुबै के तो जा बिबै ताँ ङइ येशू ख्रीष्‍ट नेरो परमेश्‍वर आबाए उँइँर क्हिने बिमुँ।
2TI 4:2 प्रभुउँइँले खबै सैं तोंबै ताँ म्हिमैंने बिप्रद्। खैतबै त्हर्न बिलैया प्रभुउँइँले खबै सैं तोंबै ताँमैं बिब्रें लद्। म्हिमैंलाइ अर्थि बुद्धि पिंन्। चमैंए सैं क्होबै ताँमैं लद्। आतबै ताँमैंर हौदिद् धै म्हिमैंलाइ छेनाले लोदा सैंदा लद्।
2TI 4:3 तलेबिस्याँ म्हिमैंइ क्‍ह्रोंसेंन्‍बै ताँ थेदा आङ्हाँबै त्हे खब्मुँ। च त्हेर चमैंइ खेंमैंए सैंर तो मैंमुँ चन् लप्रब्मुँ। धै खेंमैंइ थेदा ङ्हाँबै ताँमैं मत्रै लोमिंबै म्हिमैं हुइसि चमैंए ताँ थेब्‍मुँ।
2TI 4:4 छले चमैं क्‍ह्रोंसेंन्‍बै ताँमैंउँइँले स्योयासि स्योलिबै ताँमैंए लिलि प्रयाब्मुँ।
2TI 4:5 क्‍हि बिस्याँ दुःख तलेया सैं तोंबै ताँमैं बिप्रबै के लब आपिद्। धै खैतबै दुःख तलेया सैदिद्, छले परमेश्‍वरउँइँले खबै सैं तोंबै ताँ बिप्रदै खीए के छेनाले लद्।
2TI 4:6 तलेबिस्याँ खैले म्हिमैंइ ख्रो पिंबर क्यु सैमुँ, छलेन ङलाज्यै या सैबै त्हे खइमुँ, तारे ङ क्हिने फ्रेइ ह्‍याबै त्हे खइमुँ।
2TI 4:7 ङए छ्हर खैतबै दुःख तलेया ङइ सैदिइ। धै ङइ लल् त्हुबै के छेनाले लइ। छले ङए फिर खैतबै दुःख तलेया ङइ बिश्‍वास लब आपि।
2TI 4:8 छले ङइ लबै केमैं खीए उँइँर ठिक ठर्दिबइले खीजी ङए ल्हागिर थेबै क्रेगि थेंइमुँ। छेनाले निसाफ लबै प्रभुजी च त्हिंइर च क्रेगि ङलाइ पिंब्मुँ - ङलाइ मत्‍त्रे आङिं, दिलेया प्रभुलाइ म्हाँया लसि खी युबै त्हिंइए घ्‍याँ ङ्ह्‍योरिब्‍मैं ताँनलाइ खीजी च क्रेगि पिंब्‍मुँ।
2TI 4:9 छतसि खाँन् समा ङ ङाँर युनन् खो।
2TI 4:10 तलेबिस्याँ डेमासइ चु ह्‍युलर्बै सैमैंए म्हाँया लसि ङलाइ वाथेंसि थेसलोनिका सहरर ह्‍याइ। क्रेसेन्‍स बिबै अलि गलातिया ह्‍युलर ह्‍याइ, धै तीतस दलमातिया बिबै क्‍ल्‍ह्‍योर ह्‍याइ।
2TI 4:11 लूका मत्‍त्रे ङने बालु मुँ। क्‍हि चुर खमा मर्कूसलाज्यै या म्है पखो, तलेबिस्याँ चइ प्रभुए के लबर ङलाइ ल्होम्।
2TI 4:12 तुखिकसलाइ ङइ एफिसस सहरर कुलइमुँ।
2TI 4:13 क्‍हि चुर खमा ङइ त्रोआस नाँसर कार्पसए ङाँर वाथेंबै कोट नेरो काउदमैं, बिलेन् त्हुमा ट्हुबिए काउदमैं खैलसे पइ खो।
2TI 4:14 अलेक्‍जेन्डर बिबै कुमालेइ ङलाइ बेल्‍ले दुःख पिंइ। प्रभुजी चलाइ चइ लबै के अनुसार्बै दण्‍ड पिंब्‍मुँ।
2TI 4:15 छतसि क्हि या चउँइँले जोगेसि टिद्, तलेबिस्याँ ङिइ म्हिमैंने सैं तोंबै ताँ बिमा चइ बेल्‍ले बिरोध लइ।
2TI 4:16 ङइ ओंसों रोमर्बै अड्डारि राइ पोंमा खाबज्यै या ङए ख आल। बरु ताँन् ङलाइ वाथेंसि छ्युडिह्‍याइ। दिलेया चु ताँए दोष चमैंलाइ आल्हैदिरिगे।
2TI 4:17 ताँन् म्हिमैंइ प्रभुए ताँ थेल् योंरिगे बिसि प्रभु ङए ङाँर रायुइ, धै खीए ताँ बिबै ल्हागिर ङलाइ भों पिंइ। छतसि ङ सिंहए सुँउँइँले स्योरसि खल् खाँइ।
2TI 4:18 प्रभुजी ङलाइ ताँन् आछ्याँबै सैमैंउँइँले जोगेमिंब्मुँ। झाइले खीए स्‍वर्गर मुँबै ग्याल्सर बोब्मुँ। खीलाइ म्हिमैंइ खोंयोंइन् बिलै या थेबै मान लरिगे। आमेन, छान् तरिगे!
2TI 4:19 प्रिस्‍किला, अकिलास नेरो ओनेसिफरसए परवाने ङए जय मसीह मुँ बिमिंन्।
2TI 4:20 इरास्‍तस कोरिन्‍थ सहरर्न टिइ, त्रोफिमस बिस्याँ सन्‍ज आतसि ङइ मिलेटस बिबै क्‍ल्‍ह्‍योर्न वाथेंइमुँ।
2TI 4:21 खाँन् समा क्हि सर्ख खब् भन्दा ओंसोंन् खो। युबुलस, पुडेस, लिनस, क्‍लौडिया नेरो चुर्बै ताँन् बिश्‍वासी अलि-अङाँमैंइ क्हिलाइ जय मसीह बिमिंइमुँ।
2TI 4:22 प्रभु खोंयोंन् बिलै क्‍हिने प्रे तरिगे। धै खीए दयाम्हाँया क्हेमैंइ योंरिगे।
TIT 1:1 परमेश्‍वरए के लबै म्हि, येशू ख्रीष्‍टजी कुल्मिंबै चेला चिब ङ पावलउँइँले तीतसलाइ जय मसीह मुँ। परमेश्‍वरजी त्‍हाँबै म्‍हिमैंए बिश्‍वास भोंब् लमिंबर नेरो खीए उँइँर खैले छ्याँबै छ्ह थोल् त्‍हुम् बिबै क्ह्रोंसेंन्बै ताँ लोमिंबर खीजी ङ कुलब् ग।
TIT 1:2 खोंयोंन् बिलै स्योर आतेबै परमेश्‍वर आबाजी सृष्‍टि लब् भन्दा ओंसोंन् खोंयोंइ आखाँबै छ्ह चमैंलाइ पिंम् बिबै बाछा खीजी लल।
TIT 1:3 छतसि ठिक त्हेर ङ्योलाइ मुक्‍ति पिंबै परमेश्‍वर आबाजी खीउँइँले खबै सैं तोंबै ताँ सेल् पिंसि चु ताँ बिप्रबै जिम्मा ङलाइ पिंइ। छतसि ङइ चु सैं तोंबै ताँ ताँनने बिप्रम्।
TIT 1:4 क्हि नेरो ङए बिश्‍वास घ्रिन् तसेरो क्हि ङए च्‍ह धोंन् तइमुँ। परमेश्‍वर आबा नेरो ङ्योलाइ जोगेमिंबै येशू ख्रीष्‍टए दयाम्हाँया नेरो शान्ति क्हिए फिर तरिगे।
TIT 1:5 क्रेट ह्‍युलर लल् त्हुबै केमैं क्‍हिइ पूरा लरिगे बिसि ङइ क्‍हि चर वाथेंइ। ङइ बिब् धोंले क्हिइ नाँ-नाँसर बिश्‍वासीमैं न्‍होंर चिब्मैं त्हाँसि खटिदिद्।
TIT 1:6 क्हिइ त्हाँबै चिब्मैं तोइ छ्याब् आरेब, प्ह्रेंस्यो घ्रि मत्‍त्रे मुँब तल् त्‍हुम्। चए प्‍हसेमैं या बिश्‍वासीमैं मुँल् त्‍हुम्, चमैं बिब् आङिंब, आछ्याँबै बानि ब्योर मुँब आत।
TIT 1:7 तलेबिस्याँ परमेश्‍वरए के लल् त्हुबै म्‍हि तबइले च छ्याब् आरेब तल् त्‍हुम्। च सैं सारो नेरो युनन् ह्रिस खब, प्हा थुँब, प्‍होंगि मिब, मारा-मुइए लोब लल् आत।
TIT 1:8 बरु प्‍ह्रेंमैं मान लब, अरूमैं छयाँब्-क्ह्‍युब् तरिगे ङ्हाँब, ह्रोंसलाइ अधीनर थेंल् खाँब, ताँनइ पदेवा, पबित्र, नेरो आछ्याँबै केमैं आल बिसि ह्रोंसए सैं फैल् खाँबै म्‍हि तल् त्‍हुम्।
TIT 1:9 चलाइ लोमिंबै क्ह्रोंसेंन्बै ताँर च भोंसि तल् त्हुम्, धै चइ क्ह्रोंसेंन्बै ताँ छेनाले लोमिंल् खाँरिगे, खाबज्यै खिइ लोमिंबै ताँ थोसि खेंमैंए स्योलिबै ताँमैं लोमिंल् म्हैस्याँ चइ “क्हेमैंए ताँ स्योर ग” बिसि बिल् खाँरिगे।
TIT 1:10 तलेबिस्याँ ल्‍हें म्‍हिमैं आगुए न्होंर टिदा आङ्हाँब, केर आफेबै ताँमैं ल्हें लब धै स्योर तेब्मैं तम्। चु छाबै केमैं ज्युर चिनु लब्मैंइ झन् ल्हें लम्।
TIT 1:11 छतसि चमैंए सुँर क्हा झोंल् त्‍हुम्, तलेबिस्याँ चमैंइ खेंमैंइ मुइ योंबै ल्हागिर म्हिमैंए धिं-धिंर होंसि स्योलिबै ताँमैं बिप्रसि चमैंए सैं भाँडिदिवाइमुँ। छाबै ताँमैं चमैंइ लोमिंल् आतमल।
TIT 1:12 क्रेटथेंमैं न्‍होंर्बै ह्रब् सेबै म्‍हि घ्रिज्‍यै या बिइमुँ, “क्रेटर्बै म्‍हिमैं खोंयोंइ बिलै स्‍योर ताँ पोंरिम्, चमैं क्ह्‍योंर्बै सिंह भालु धों तब्मैं, केर आफेबै अल्छि चफोमैं ग।”
TIT 1:13 चु क्‍ह्रोंसेंन्बै ताँ ग। छतसि चमैंलाइ बेल्‍ले हौदिद्। छले हौदिमा चमैं बिश्‍वासर भोंसि तरिगे,
TIT 1:14 झाइले परमेश्‍वरजी बिब् आङिंब्मैंइ बिबै ताँ नेरो यहूदीमैंए स्योंम्बै स्‍योलिबै कथामैंर चमैंए सैं आह्‍यारिगे।
TIT 1:15 छ्याँबै सैं प्ह्‍याब्मैंए ल्हागिर ताँन् सै चोखो तम्। दिलेया आछ्याँबै सैं प्ह्‍याब्मैं नेरो येशूए फिर बिश्‍वास आलब्मैंए ल्हागिर तोइ सैया चोखो आत, तलेबिस्याँ चमैंए खों नेरो सैं ङ्हिंना ङ्हिन् आछ्याँब् मुँ।
TIT 1:16 चमैंइ परमेश्‍वर ङो सेइमुँ बिम्, दिलेया चमैंइ परमेश्‍वरजी आखोबै केमैं लम्, तलेबिस्याँ चमैंइ छेरन् तबै बानि प्ह्‍याब्मैं, परमेश्‍वरजी बिब आङिंब्मैं, झाइले छ्याँबै केए ल्हागिर तोइ केरै आफेब्मैं तम्।
TIT 2:1 छतसि क्‍हिइ परमेश्‍वरए बारेर्बै क्ह्रोंसेंन्बै ताँमैं छेनाले लोमिंन्।
TIT 2:2 खेब्‍मैंलाइ “सैं फैल् खाँब, छ्याँबै बानि प्‍ह्‍याब, ताँ क्होब, बिश्‍वासर भोंब, ताँनलाइ म्हाँया लब, धै दुःखन् तलेया सैदिल् खाँब तल् त्हुम्,” बिसि लोमिंन्।
TIT 2:3 छलेन माँब्‍मैंने या “छ्याँबै सैं प्‍ह्‍याल् त्‍हुम्, फ्रोम् ताँ क्योम् ताँ लब आत, प्हा ल्‍हें थुँब आत। बरु अरूलाइ छ्याँबै ताँमैं लोमिंल् त्‍हुम्,” बिद्।
TIT 2:4 झाइले चमैंइ छमिंमैंने “खेंमैंए प्‍युँमैं नेरो प्‍हसेमैंलाइ म्हाँया लब,
TIT 2:5 ताँ क्होब, ह्रोंसए धिं नाँ चुसि टिल् खाँब, आगुए फिर ल्हयो खब, ह्रों-ह्रोंसए प्‍युँमैंए न्होंर टिब तल् त्हुम्,” बिसि लोमिंल् खाँरिगे। छ लइ बिस्‍याँ खाबज्यै या परमेश्‍वरए छ्वेउँइँले लोमिंबै ताँ थोल् खाँरिब् आरे।
TIT 2:6 छलेन फ्रेंसिमैंने या आछ्याँबै केमैंउँइँले ह्रोंसए सैं फैल् खाँल् त्हुम् बिसि छेनाले लोमिंन्।
TIT 2:7 क्हिइ तो सैरै या स्योर आतेद्, ह्रोंसइ लबै ताँन् केमैंर छ्याँबै नमुना उँइँल् त्‍हुम्। छतमा क्हिइ बिबै ताँमैं या अरूइ क्वेंरिगे।
TIT 2:8 क्हिइ खाबज्यै थोल् आखाँबै क्ह्रोंसेंन्बै ताँमैं मत्‍त्रे पोंन्, छले पोंस्‍याँ क्‍हिए ताँ क्हाबै क्ल्ह्‍यो चमैंइ योंरिब् आरे। छतमा ङ्योए बिरोधर राब्मैं खेंमैंन् फा पिन् तयाब्मुँ।
TIT 2:9 छलेन केब्छैंमैंने या ह्रोंसए क्ल्हेए न्होंर टिसि ताँन् सैर क्ल्हेलाइ सैं तोंन् लल् त्‍हुम्, धै क्ल्हेने सुँ सुँर छैल् आत बिसि लोद्।
TIT 2:10 चमैंइ तोइ सै या आह्‍योरिगे, बरु ताँन् सैर भर म्हाँदिल् खाँब तरिगे। छले चमैंए छ्याँबै बानि म्रोंसि म्हिमैंइ ङ्योलाइ जोगेमिंबै परमेश्‍वरए मिं थेब लल् खाँरिगे।
TIT 2:11 तलेबिस्याँ ताँन् म्‍हिमैं जोगेमिंबै ल्हागिर परमेश्‍वरजी खीए दयाम्हाँया उँइँमिंइमुँ।
TIT 2:12 खीए दयाम्हाँयाउँइँले खीजी ङ्योलाइ पाप केमैं नेरो चु ह्‍युलर्बै सैमैं पिवासि, आछ्याँबै केमैंउँइँले सैं फैसि, भक्‍ति लसि छ्याँबै छ्ह थोब लोमिंम्।
TIT 2:13 छाबै छ्ह थोमा ङ्योइ थेंबै आशा तो जा बिस्याँ: ङ्योए ताँन् भन्दा थेबै परमेश्‍वर ङ्योलाइ जोगेमिंबै येशू ख्रीष्‍ट थेबै मानले युबै त्हिंइ पैंरिब् ग।
TIT 2:14 येशू ख्रीष्‍टजी ङ्योइ लबै ताँन् पापउँइँले जोगेमिंबर सै फोसि खामिंइ। छ्याँबै के लबै ह्रोंसए चोखो म्हिमैं तरिगे बिसि ह्रोंसन् ङ्योए ल्हागिरि सिमिंइ।
TIT 2:15 चु ताँन् ताँमैं लोमिंन्, हग मुँल्‍ले लोदा सैंदा लद्, पाप लब्‍मैंलाइ हौदिद्। धै क्हि फ्रेंसि तना निलेया खाबज्‍यै या क्‍हिलाइ म्हि आच्हिन् आलरिगे।
TIT 3:1 “सरकार नेरो अधिकार मुँबै म्हिमैंए न्होंर टिद्, चमैंइ बिबै ताँ ङिंन्, झाइले छ्याँबै के लबर खोंयोंइ बिलै तयार तद्,” बिसि क्‍हिने मुँबै येशूए फिर बिश्‍वास लबै म्‍हिमैंलाइ चु ताँमैं मैंमिंन्।
TIT 3:2 चमैंइ खाबै बारेरै या आछ्याँबै ताँ आपोंरिगे, प्होंगि आलरिगे, च्योंने तसि ताँन् म्‍हिने क्‍ह्रिसि छ्याँबै ब्यबार लरिगे।
TIT 3:3 तलेबिस्याँ ओंसों ङ्योइ या आमादु, बिब आङिंब, आतबै केर प्रब, सयल लब, आगुए फिर ह्रिस लब, आगुइ ङ्योलाइ हेल लमल, ङ्योज्यै या अरूलाइ हेल लमल।
TIT 3:4 दिलेया ङ्योलाइ जोगेमिंबै परमेश्‍वरजी खीए ल्हयो नेरो म्हाँया उँइँमिंसि,
TIT 3:5 खीजीन् ङ्योलाइ जोगेमिंइ। ङ्योइ छ्याँबै के लसि छारा छ्ह योंब आङिं, बरु खीए दयाउँइँले पबित्र प्ल्हजी ङ्योलाइ पापउँइँले ख्रुमिंसि छारा छ्ह पिंसि, छारा लमिंइ।
TIT 3:6 ङ्यो जोगेमिंबै येशू ख्रीष्‍टउँइँले परमेश्‍वरजी खीए पबित्र प्ल्ह ङ्योए सैं न्‍होंर बेल्‍ले ल्हें प्‍लिंमिंइ।
TIT 3:7 छतसि खीए दयाम्हाँयाउँइँले ङ्योलाइ ठिक ठर्दिसि ङ्योइ खोंयोंइ आखाँबै छ्ह योंम् बिसि ह्रेइ टिबै हग मुँब्मैं तइमुँ।
TIT 3:8 च ताँनइ क्वेंल् त्हुबै ताँ ग। चु ताँ क्‍हिइ छेनाले लोमिंरिगे बिब ङए सैं मुँ। परमेश्‍वरए फिर बिश्‍वास लब्मैंइ छ्याँबै केमैं खोंयोंन् बिलै लबर न्ह क्रों मि क्रों तल् त्हुम्, बिद्, तलेबिस्याँ चु ताँमैं म्‍हिमैंए ल्हागिर बेल्‍ले केर फेब् मुँ।
TIT 3:9 दिलेया केर आफेबै ताँ लब्‍मैं, खेमैंए बारेर्बै ताँ लब, प्होंगि लब्मैं, झाइले मोशाइ प्ह्रिबै ठिमए (नियमए) बारेर प्होंगि लब्मैंने स्‍यो तद्। तलेबिस्याँ चु ताँन् ताँमैं फाकर्बै केर आफेब् मुँ।
TIT 3:10 म्‍हिमैंए न्होंरि आक्ह्रिसि फ्रेवाबै म्हिलाइ तिखे ङ्हिखे समा “छाबै के आलद्” बिद्, च्‍हौ बिसेया आङिं बिस्‍याँ चने तोइ केरै या बालु आप्रद्।
TIT 3:11 छाबै म्‍हि न्होंग्याल पापि ग बिसि क्हिइ सेल् त्हुम्। लिउँइँ “ङइ गल्‍ति लना” बिसि च म्हिन् ह्रोंसन् दोषि ठर्दिम्।
TIT 3:12 चु खुँबै म्हैंनर ङ निकोपोलिस बिबै नाँसर टिबै सैं मुँ। छतसि ङइ अर्तिमास अथवा तुखिकसलाइ क्हि ङाँर कुल्‍मिंमा क्हि चर ङ ङाँर खैले बिलेया खो।
TIT 3:13 जेनास बिबै वकिल नेरो अपोल्‍लोसलाइ घ्‍याँर चैदिबै तोन्दोंरि सै पिंन्। चमैंलाइ तोइ सैलैया खाँचो आतरिगे।
TIT 3:14 ङ्योए म्‍हिमैंइ छ्याँबै केमैं लब लोरिगे, धै खाँचो तखबै त्हेर चमैंइ अरूमैं ल्होमिंल् खाँरिगे, छले चमैंए छ्ह छेनाले थोरिगे।
TIT 3:15 ङने चुर मुँबै थुमैं ताँनइ क्‍हिलाइ जय मसीह बिमिंइमुँ। प्रभु येशूए फिर बिश्‍वास लसि ङिलाइ म्हाँया लब्‍मैंलाज्यै या ङिए जय मसीह बिमिंन्। क्‍हेमैं ताँन्‍ने परमेश्‍वरए दयाम्हाँया तरिगे।
PHM 1:1 येशू ख्रीष्‍टउँइँले खबै सैं तोंबै ताँ बिप्रइ बिसि झेलर च्युथेंबै ङ पावल नेरो ङ्योए अलि तिमोथीउँइँले ङिने बालु के लबै थु फिलेमोनलाइ जय मसीह मुँ।
PHM 1:2 झाइले ङिए अङाँ अप्‍फिया, ङिने बा-बालुन् के लबै येशूए सिपाइ अर्खिप्पस नेरो क्‍हिए धिंर खागु तबै बिश्‍वासीमैंने जय मसीह बिमिंन्।
PHM 1:3 ङ्योए परमेश्‍वर आबा नेरो प्रभु येशू ख्रीष्‍‍टउँइँले क्‍हेमैंइ दयाम्हाँया नेरो शान्‍ति योंरिगे।
PHM 1:4 ओ अलि फिलेमोन, ङइ प्राथना लमा क्हिलाइ मैंसि ङए परमेश्‍वरलाइ खोंयोंन् बिलै धन्‍यबाद पिंम्,
PHM 1:5 तलेबिस्याँ क्‍हिइ प्रभु येशूए फिर बिश्‍वास लसि ताँन् बिश्‍वासीमैंने म्हाँया लइमुँ बिबै ताँ ङइ थेइमुँ।
PHM 1:6 क्‍हि नेरो ङिइ ख्रीष्‍टर बिश्‍वास लबइले ख्रीष्‍टर ङ्योए ल्हागिर मुँबै ताँन् छ्याँबै ताँमैं क्होबै ज्ञान ल्हें योंरिगे बिसि ङए प्राथना मुँ।
PHM 1:7 ओ अलि, क्‍हिइ ङने च्हौ थेबै म्हाँया लब् म्रोंसि ङ बेल्‍ले सैं तोंसि भों योंइमुँ, तलेबिस्याँ क्हिइ प्रभुए म्‍हिमैंए सैं क्‍होल् लमिंइमुँ।
PHM 1:8 छतसि ख्रीष्‍टए के लबै ल्हागिर क्हिलाइ के ल्हैदिबै हग ङने मुँलेया “ङइ ल्हैदिबै के ललन् त्हुम्” बिसि क्हिलाइ कर आल्हैदि।
PHM 1:9 दिलेया ङइ क्हिलाइ बेल्‍ले म्हाँया लसि ङइ क्हिने ताँ मत्‍त्रे थेंब् ग। ङ खेब् तयाइमुँ, येशू ख्रीष्‍टउँइँले खबै सैं तोंबै ताँ बिप्रइ बिसि छाबै खेब् तयाबै म्हि या झेलर टिल् त्हुइमुँ।
PHM 1:10 ङए च्ह ओनेसिमसए ल्हागिर ङ क्‍हिने यो छ्युँ लम्। ङ झेलर मुँबै त्हेर ङइ चने प्रभुए ताँ बिमा चइ प्रभुए फिर बिश्‍वास लइ। छतसि च ङए च्ह धोंन् ग।
PHM 1:11 ओंसों क्हिए ल्हागिर च केर आफेब् मुँल, दिलेया तोगो क्‍हि नेरो ङए ल्हागिर च केर फेब् तइमुँ।
PHM 1:12 च ङइ खोबै च्ह ग, दिलेया ङइ च तोगो क्हि ङाँर कुलबै सैं लइमुँ।
PHM 1:13 ङ ङाँर्न चलाइ थेंदा ङ्हाँल, तलेबिस्याँ सैं तोंबै ताँ बिप्रइ बिसि ङलाइ झेलर च्युवामा क्‍हिए क्ल्होरि चइ ङए सेवा लमल।
PHM 1:14 दिलेया क्हिइ लद् आबिन् समा ङइ तोइ के या लदा आङ्हाँ, ङए ल्हागिर छ्याँब तबै केमैं आगुइ कर ल्हैदिसि आलदु, दिलेया ह्रोंसए सैंउँइँलेन् लल् त्हुम् ङ्हाँसि लद् बिब ङए सैं मुँ।
PHM 1:15 च खोंयोंन् बिलै क्हिनेन् टिरिगे बिसि च दे त्हे क्हिउँइँले फ्रेयालै।
PHM 1:16 तारे च क्हिए केब्छैं आङिं, केब्छैं भन्दा थेब क्‍हिइ खोबै अलि तरिगे। ङइ चलाइ बेल्‍ले म्हाँया लमुँ। बिलन् त्हुमा अझै क्हिए ल्हागिरि च क्हिए के लबै म्हि ग, झन् च भन्दै थेबै ताँ च प्रभुए फिर बिश्‍वास लबै खोबै अलि ग। छतमा क्हिज्यै या चलाइ बेल्‍ले म्हाँया लब्‍मुँ बिसि ङए सैंर ङ्हाँइमुँ।
PHM 1:17 छतसि क्‍हिइ ङलाइ ह्रोंसने बालुन् के लबै थु धों ङ्हाँम् बिस्याँ ङलाइ धोंले चलाज्यै या म्हाँया लद्।
PHM 1:18 चइ क्‍हिला तोइ न्होह्रों लस्याँ, चने क्‍हिइ किंल् त्हुबै तोइ सै मुँस्याँ, च ङए मिंर प्ह्रिथेंन्।
PHM 1:19 ङ पावलइ ङए योइन चु ताँ प्ह्रिइमुँ: चइ फोल् त्हुबै सैमैं तोइ मुँस्याँ ङइन फोमिंस्‍यो। (बिलन् त्हुमा ङइ बिबै सैं तोंबै ताँउँइँलेन् क्हिइ खोंयोंइ आखाँबै छ्ह योंइमुँ।)
PHM 1:20 छतसि ओ ङइ खोबै अलि, प्रभु नेरो ङए ल्हागिर चए फिर ल्हयो लमिंन्। ख्रीष्‍टए फिर बिश्‍वास लबै ङए अलि, क्हिइ चु ताँर ङए सैं सन्‍तोक लमिंन्।
PHM 1:21 ङइ बिब् धोंले क्‍हिइ लब्‍मुँ, अझै च भन्दा ल्हें क्‍हिइ लब्‍मुँ बिसि चु ताँ प्‍ह्रिरिमा ङइ मैंइमुँ।
PHM 1:22 अर्को ताँ ङए ल्हागिर टिबै क्ल्ह्‍यो लथेंन्, तलेबिस्याँ क्‍हेमैंए प्राथना थेसि परमेश्‍वरजी ङ क्‍हेमैं ङाँर खल् पिंम् बिसि ङए सैंर आशा लइमुँ।
PHM 1:23 येशू ख्रीष्‍टउँइँले खबै सैं तोंबै ताँ बिप्रइ बिसि ङने बालुन् झेलर च्युथेंबै इपाफ्रासइ क्‍हिने जय मसीह बिइमुँ।
PHM 1:24 छलेन ङने बालु के लब्‍मैं मर्कूस, अरिस्‍तार्खस, डेमास नेरो लूकाज्यै या क्हिलाइ जय मसीह बिमिंइमुँ।
PHM 1:25 ङ्योए प्रभु येशू ख्रीष्‍टए दयाम्हाँया क्‍हेमैंए सैंर तरिगे।
HEB 1:1 स्‍योंमा परमेश्‍वर खीए ताँ बिमिंबै म्हिमैंउँइँले ङ्योए खेमैंने ल्‍हें खे, ल्हें खालर्बै चिनुमैंउँइँले पोंइ।
HEB 1:2 दिलेया चु नुखबै त्हिंइजरे परमेश्‍वर खीए च्‍हउँइँले ङ्योने पोंइमुँ। परमेश्‍वरजी खीए च्हउँइँलेन् ह्‍युलर्बै तोन्दोंरि सैमैं बनेइ। धै ह्‍युलर्बै ताँन् सैए फिर क्ल्हे तबर खीजी खीए च्‍हलाइन त्हाँइ।
HEB 1:3 परमेश्‍वरए ह्‍वे खीए च्हनेन् चारमुँ, परमेश्‍वर खैब मुँ खी या छाबन् मुँ। धै मु नेरो पृथ्‍बी खीए शक्‍ति मुँबै बचनइ धाँदिइमुँ। म्‍हिमैंए पाप त्होमिंबै के लल् खाँसि खी ताँन् भन्दा थेबै शक्‍ति मुँबै परमेश्‍वरए क्‍योलोउँइँ नुबै क्ल्ह्‍योर टिइमुँ।
HEB 1:4 खीजी योंबै मिं स्‍वर्गदूतमैंल् भन्दा थेब मुँ। छलेन खी स्वर्गदूतमैं भन्दा अझै बेल्‍ले थेब तइमुँ।
HEB 1:5 “क्हि ङए च्‍ह ग, तिंयाँ ङ क्‍हिए आबा तइमुँ” बिसि परमेश्‍वरजी स्वर्गदूतमैंने खोंयोंइ आबि, छलेन खाब् स्वर्गदूतए बारेरै या “ङ चए आबा तब्मुँ, धै च ङए च्ह तब्मुँ,” बिसि खीजी खोंयोंइ आबि।
HEB 1:6 खीए घ्रि मुँबै च्ह ह्‍युलर कुलमा खीजी छ बिइमुँ, “परमेश्‍वरए ताँन् स्वर्गदूतमैंइ खीलाइन फ्योरिगे।”
HEB 1:7 परमेश्‍वरजी स्‍वर्गदूतमैंए बारेर छले बिइमुँ: “खीजी ह्रोंसए सेवा लबै स्वर्गदूतमैंलाइ खैं नेरो मिए राब लमिंम्।”
HEB 1:8 दिलेया च्‍हए बारेर बिस्‍याँ खीजी छ बिइमुँ, “ओ परमेश्‍वर, क्‍हिए ग्याल्स खोंयोंन् बिलै तरिब्‍मुँ। क्‍हिजी छेनाले निसाफ लसि ग्याल्स लम्।
HEB 1:9 क्‍हिजी छ्याँबै के खोमुँ, धै आछ्याँबै के आखो। छतसि ओ परमेश्‍वर, क्‍हिए परमेश्‍वरजी क्‍हिलाइ त्हाँसि क्हिए थुमैं न्होंर क्हिलाइ ताँन् भन्दा थेबै मिं पिंसि छ्युगु फोसि सैं तोंन् लमिंइ।”
HEB 1:10 खीजी धबै बिइ, “ओ याहवेह, धाँसे ओंसों क्हिजीन् पृथ्‍बीए जग झोंमिंइ, धै मुर्बै सैमैं क्हिए योजीन् बनेब् ग।
HEB 1:11 चु सैमैं ताँन् नास तयाब्‍मुँ, दिलेया क्हि बिस्याँ खोंयोंइ बिलै तरिब्‍मुँ। चमैं क्‍वें धोंले थौंनि तयाब्‍मुँ,
HEB 1:12 क्हिजी चमैं क्‍वें धोंलेन् फेर्दिब्‍मुँ, धै स्योब क्वें भ्योंब् धोंले चमैं भ्योंवाब्मुँ। दिलेया क्हि खोंयोंइ आफेर्दि, क्‍हि खोंयोंन् बिलै तरिम्।”
HEB 1:13 परमेश्‍वरजी खीए च्‍हने बिइ, “क्‍हिए शत्तुरमैं ङइ क्‍हिए प्‍हले न्‍होंर आथेंन् समा, क्‍हि ङए क्‍योलोउँइँ टिद्।” दिलेया स्‍वर्गदूतमैं खाबने या खीजी छ आबि।
HEB 1:14 स्‍वर्गदूतमैं बिब, परमेश्‍वरए सेवा लबै प्ल्हमैं ग। धै परमेश्‍वरजी येशूए फिर बिश्‍वास लसि मुक्‍ति योंब्मैं ल्होबै ल्हागिरै या चमै कुल्‍मिंम्।
HEB 2:1 छतसि ङ्योइ तो ताँ थेइमुँ च ताँ झन् छेनाले थेल् त्हुम्। छेनाले आथेइ बिस्याँ ङ्योइ घ्‍याँ फ्लेयाम्।
HEB 2:2 स्‍वर्गदूतमैंइ बिबै ताँ चारसि, आछ्याँबै के लब्मैंइ दण्ड योंइ बिस्याँ,
HEB 2:3 खोंयोंइ आखाँबै छ्ह पिंबै च्हौ थेबै मुक्‍तिलाइ तो धोंइ आङ्हाँस्याँ ङ्यो खैले परमेश्‍वरउँइँले स्योरल् खाँमुँ? चु मुक्‍तिए ताँ धाँसे ओंसों प्रभु येशूजीन् बिब् ग, धै खीए ताँ थेब्‍मैंइ चु ताँ क्ह्रोंसेंन ग बिसि ङ्योने उँइँमिंइ।
HEB 2:4 छलेन परमेश्‍वरज्‍यै या थे-थेबै चिनुमैंउँइँले प्लेटोयान् तबै औदिबै केमैं लइ, धै खीए सैंर मैंब् धोंले खीजी म्‍हिमैंलाइ पबित्र प्ल्हउँइँले बरदानमैं पिंसि चु ताँए ग्वाइ पिंइ।
HEB 2:5 ङ्योइ ताँ लबै तारे खबै ह्‍युल परमेश्‍वरजी स्‍वर्गदूतमैंए योर आपिं।
HEB 2:6 परमेश्‍वरए छ्वेर्बै क्ल्ह्‍यो घ्रिर छ बिसि ग्वाइ पिंइमुँ: “म्‍हि तो जा, क्‍हिजी चए वास्ता लमुँ? म्‍हिए च्ह खाब् जा, क्हिजी खीए न्हुँ लमुँ?
HEB 2:7 क्‍हिजी खीलाइ दे त्हेए ल्हागिर स्‍वर्गदूतमैं भन्दा च्योंब लमिंइ। क्हिजी खीलाइ धबै थेब लमिंसि थेबै मान योंबै मुकुट कुमिंइमुँ।
HEB 2:8 क्हिजी ताँन् सै खीए प्हले न्होंर थेंमिंइ।” ताँन् सै खीए न्होंर थेंमिंमा खीउँइँले बैरु तोइ सैया आरेल। दिलेया तिंजोरो ताँन् सै म्हिमैंए न्होंर मुँब ङिइ आम्रों।
HEB 2:9 दिलेया ताँन् सै खीए न्होंर मुँ बिबै ताँ ङिइ सेइमुँ। दे त्हेए ल्हागिर खीलाइ स्वर्गदूतमैं भन्दा दे क्युरु लमिंइ, तलेबिस्याँ म्हिमैंए फिर्बै परमेश्‍वरए दयाम्हाँयाइ लमा म्हिमैंए पाप ख्रुमिंबै ल्हागिर खी दु:खले सिल् त्हुइ। दिलेया सिबइले खी धबै सोगों तसि खइ। छतसि परमेश्‍वरजी खीलाइ थेबै मानए मुकुट कुमिंइ।
HEB 2:10 परमेश्‍वरजी खीउँइँलेन् ताँन् सै बनेइ बनेबै ताँन् सै खीए ल्हागिर्न बनेइ। चु बेल्‍ले छ्याँब मुँल। परमेश्‍वरजी ल्‍हें सन्तानमैं खीने बालुन् मान योंबै क्ल्ह्‍योर पखबै ल्हागिर चमैंए मुक्‍ति पिंबै येशूलाइ ल्‍हें दुःख नोल् पिंसि म्हिमैंए पाप त्होमिंइ।
HEB 2:11 तलेबिस्याँ म्हिमैंलाइ पबित्र लमिंबै येशू नेरो येशूजी पबित्र लमिंल् खाँबै म्हिमैं परवा घ्रिर्बैन् ग। छतसि चमैंने अलि बिबर येशू फा आपे।
HEB 2:12 खीजी छ बिइमुँ, “ङए अलिमैंए उँइँर ङइ क्‍हिए मिं थेब् लब्‍मुँ, म्‍हि च्होंए म्‍हाँजोर ङ क्‍हिए मिं क्वेब्‍मुँ।”
HEB 2:13 अर्को क्‍ल्‍ह्‍योरै या खीजी बिइमुँ, “ङइ खीए फिर्न भर लमुँ।” अर्को क्‍ल्‍ह्‍योरै या खीजी बिइमुँ, “ङ्ह्‍योद्, ङ नेरो परमेश्‍वरजी ङलाइ पिंबै च्ह च्हमिंमैं।”
HEB 2:14 चु च्ह च्हमिंमैं से को कोंसि तबइले येशू या चमैं धोंलेन् से कोए ज्यु तइ। तलेबिस्याँ खी सिमिंसि कालए शक्‍ति मुँबै दुष्‍टलाइ (दियाबलस) नास लवाइ।
HEB 2:15 छले छ्ह तिगोंन् सिल् त्‍हुम् बिसि ङ्हिंरिबै म्हिमैंलाइ ङ्हिंबउँइँले फ्रेमिंइ।
HEB 2:16 तलेबिस्याँ क्ह्रोंसेंन खीजी स्‍वर्गदूतमैंला आङिं, अब्राहामए सन्‍तानमैं ल्हागिर चु के लमिंब् ग।
HEB 2:17 छतसि ताँन् सैर खी ह्रोंसए अलिमैं धोंबन् तल् त्हुइ, धै म्‍हिमैंए पाप त्होमिंसि क्षमा लबै ल्हागिर परमेश्‍वरए सेवा लबै ल्हागिर खी बिश्‍वास मुँब नेरो ल्हयो मुँबै ख्रो पिंबै खेगि क्रथे तइ।
HEB 2:18 तलेबिस्याँ खीजी ह्रोंसजीन् थेबै दुःख नोल् त्हुइ दिलेया दुःखलाइ खीजी ट्होवाइ, छतसि दुःख तब्मैंलाइ खीजी ल्होमिंल् खाँम्।
HEB 3:1 छतसि ओ परमेश्‍वरजी त्‍हाँबै ङिने स्वर्गर्बै हग योंबै अलि अङाँमैं, ङ्योइ बिश्‍वास लबै ङ्योए खेगि क्रथे येशूलाइ मैंन्।
HEB 3:2 ङ्योए खे मोशा परमेश्‍वरए उँइँर ठिक केमैं लबै म्हि मुँल। च धोंलेन् येशूज्यै या ह्रोंसलाइ त्हाँबै परमेश्‍वरजी ल्हैदिबै केमैं झन् छेनाले लइ।
HEB 3:3 धिं भन्दा धिं बनेबै म्‍हि थेब् ग। च धोंलेन मोशा भन्दा येशू थेब् ग।
HEB 3:4 धिंमैंम् म्‍हिमैंइ बनेम्, दिलेया तोन्दोंरि सै बनेबम् परमेश्‍वरन् ग।
HEB 3:5 लिउँइँ तखबै ताँए ग्वाइ पिंबै ल्हागिर परमेश्‍वरए म्हिमैंए न्होंर मोशा ताँन् भन्दा भर लल् खाँबै केब्छैं मुँल।
HEB 3:6 दिलेया ख्रीष्‍ट बिस्याँ परमेश्‍वरए च्‍ह मुँल। छतसि ङ्योइ थेंबै आशार लिउँइँ समा खीए फिर भर थेंसि सैं भोंब् लरिस्याँ ङ्यो या परमेश्‍वरए प्हसेमैं तम्।
HEB 3:7 छतसि पबित्र प्ल्हजी बिइमुँ, “तिंयाँ क्‍हेमैंइ परमेश्‍वरजी बिबै ताँ थेइबिस्‍याँ,
HEB 3:8 क्‍हेमैंए खेमैंइ क्यु आयोंबै क्ल्ह्‍योरि परमेश्‍वरए बिरोध लब् धोंले क्‍हेमैंए सैं सारो आलद्, च त्हेर चमैंइ परमेश्‍वरए सैं फो (जाँच) किंब् धोंलेन् क्‍हेमैंइ खीए सैं फो किंबै के आलद्।
HEB 3:9 च क्ल्ह्‍योर प्लिच्यु बर्ष समा क्हेमैंए खेमैंइ ङइ लबै केमैं म्रोंसेया ङए सैं फो किंबै के लइ।
HEB 3:10 छतब् म्रोंसि ङ बेल्‍ले ह्रिस खसि बिइ, ‘चमैंए सैं खोंयोंन् बिलै ङ ङाँइले ह्रेंगोन् तरिम्, चमैंइ ङए घ्याँ आसेइमुँ।’
HEB 3:11 छतसि ङ ह्रिस खसि छले कसम चइ, ‘चमैं ङए भों न्‍हबै क्‍ल्‍ह्‍योर खोंयोंइ होंल् योंरिब् आरे।’”
HEB 3:12 छतसि ओ अलि-अङाँमैं, सैं चिद्, क्‍हेमैं न्‍होंरि खाबलैया बिश्‍वास आलबै आछ्याँबै सैंइ लमा क्हेमैं सोगों परमेश्‍वरउँइँले ह्रेंगो आबोरिगे।
HEB 3:13 बरु खाबै या पापर आच्होरिगे धै क्हेमैं खाबज्यै या सैं सारो आलरिगे बिसि परमेश्‍वरए छ्वेर बिब् धोंले “तिंयाँबै त्हिंइ” मुँब् समा घ्रिइ घ्रिलाइ अर्थि पिंब्रें लद्।
HEB 3:14 ङ्योइ ओंसों लब् धोंबै बिश्‍वास लिउँइँ समन् लरिस्याँ, ङ्योइ ख्रीष्‍टने बालुन् परमेश्‍वरजी पिंबै हग योंब्‍मुँ।
HEB 3:15 परमेश्‍वरए छ्वेर छले बिइमुँ, “तिंयाँ क्‍हेमैंइ परमेश्‍वरजी बिबै ताँ थेइ बिस्‍याँ, क्हेमैंए खेमैंइ परमेश्‍वरए बिरोध लब् धोंले ह्रोंसए सैं सारो आलद्।”
HEB 3:16 परमेश्‍वरए ताँ थेसेया खीए बिरोध खाबइ लइ? मोशाइ मिश्र ह्‍युलउँइँले तेइ पखबै म्‍हिमैंइ, आङिं वा?
HEB 3:17 परमेश्‍वर प्‍लिच्‍यु बर्ष समा खाबने ह्रिस खल? च पाप लब्‍मैंने आङिं वा? चमैं क्यु आयोंबै क्ल्ह्‍योर सियाल् खाँल।
HEB 3:18 “परमेश्‍वरजी बिबै ताँ आङिंब्मैं खीए भों न्हबै क्‍ल्‍ह्‍योर खोंयोंइ होंल् योंरिब् आरे,” बिसि खीजी चमैंए बारेर कसम चब आङिं वा?
HEB 3:19 परमेश्‍वरए फिर बिश्‍वास आलबइले चमैं भों न्हल् योंबै क्ल्ह्‍योर होंल् आयों।
HEB 4:1 परमेश्‍वरजी खी टिबै क्ल्ह्‍योर भों न्हल् पिंम् बिसि ङ्योने फैबै बाछा अझै मुँ। छतसि न्ह क्रों मि क्रोंले टिद्, क्‍हेमैं न्‍होंरि खाबै या च भों न्‍हबै क्ल्ह्‍योउँइँले स्योवाल् आत्हुरिगे।
HEB 4:2 मोशाइ मिश्र ह्‍युलउँइँले तेइ पखबै इस्राएलीमैंइ धोंले ङ्योज्‍यै या सैं तोंबै ताँ थेइमुँ। दिलेया चमैंइ सैं तोंबै ताँ थेलेया आक्वें छतसि चमैंलाइ तोइ फायदा आत।
HEB 4:3 तलेबिस्याँ ङ्यो खीए फिर बिश्‍वास लब्‍मैं मत्‍त्रे परमेश्‍वरजी भों न्‍हल् पिंबै क्ल्ह्‍योर होंल् योंम्। खीए फिर बिश्‍वास आलब्‍मैंए बारेर परमेश्‍वरजी छ बिइमुँ, “ह्रिस खसि ङइ छाबै कसम चइ, ‘ङए भों न्‍हबै क्‍ल्‍ह्‍योर चमैं खोंयोंइ होंल् योंरिब आरे।’” खीजी चु चाँजो ह्‍ययल् बनेब् ओंनोंन् लथेंल।
HEB 4:4 तलेबिस्याँ खीजी खीए छवेर्बै क्‍ल्‍ह्‍यो घ्रिर ङिरोए बारेर छले बिइमुँ, “परमेश्‍वजी ताँन् केमैं लल् खाँसि ङिरोर भों न्‍हइ।”
HEB 4:5 खीजी धबै छ बिइ, “ङए भों न्हबै क्ल्ह्‍योर चमैं खोंयोंइ होंल् योंरिब आरे।”
HEB 4:6 ओंसोंन् सैं तोंबै ताँ थेब्‍मैंइ परमेश्‍वरजी बिबै ताँ आङिंबइले भों न्‍हल् योंबै क्ल्ह्‍योर होंल् आयों। छतसि भों न्हल् योंबै क्ल्ह्‍योर होंल् त्हुब्मैं अझै को-कोइ चैमुँ।
HEB 4:7 छतसि परमेश्‍वरजी “तिंयाँ” बिसि तिगें तोक्दिइमुँ। खीजी ल्हें त्हे लिउँइँ ङइ ओंसोंन् बिबै ताँ दाऊदउँइँले बिइमुँ, “तिंयाँ क्‍हेमैंइ परमेश्‍वरजी बिबै ताँ थेइबिस्‍याँ, क्‍हेमैंए सैं सारो आलद्।”
HEB 4:8 तलेबिस्याँ यहोशूइ इस्राएलीमैंलाइ परमेश्‍वरजी बाछा फैसि पिंम् बिबै भों न्हबै क्ल्ह्‍योर बोल् खाँस्याँ, लिउँइँ खीजी अर्को त्हिंइए बारेर ताँ आलमल।
HEB 4:9 छतसि परमेश्‍वरजी ङिरोर भों न्‍हब् धोंलेन् खीए म्‍हिमैंए ल्हागिर अझै या भों न्‍हबै क्ल्ह्‍यो मुँ।
HEB 4:10 तलेबिस्याँ परमेश्‍वरजी ह्रोंसए ताँन् केमैं लल् खाँसि भों न्हब् धोंले खीजी भों न्हल् पिंबै क्ल्ह्‍योर होंब्मैं ताँनइ ह्रोंसइ लबै केउँइँले भों न्‍हल् योंम्।
HEB 4:11 छतसि परमेश्‍वरजी भों न्हल् पिंबै क्ल्ह्‍योर होंल् योंबै ल्हागिर ङ्योइ भों लले। स्योंम्बै म्हिमैं परमेश्‍वरजी बिबै ताँ आङिंसि भों न्हबै क्ल्ह्‍योर होंल् आयों छतमा ङ्यो या चमैं धोंब तल आत्हुरिगे।
HEB 4:12 परमेश्‍वरए ताँ सोगों मुँ धै खोंयोंन् बिलै के लरिम्, धै चु धार ङ्हिं मुँबै सेलाँ भन्दा छ्यारब् तम्। चुइ सो नेरो प्ल्हलाइ, चए जोर्नि-जोर्नि नेरो ह्रुइबए टों समा भाग भाग लसि क्योंजा चोंजा तल्‍ले थोंसि सैंर्बै ताँ नेरो बिचार जाँच लल् खाँम्।
HEB 4:13 परमेश्‍वरए उँइँरि तो सै या लोल् आखाँ। ताँन् सै परमेश्‍वरजी म्रोंल् खाँम्, छतसि ङ्योइ लबै केए हिसाब खीलाइन पिंल् त्‍हुम्।
HEB 4:14 छतसि मु थोंसि ह्‍याबै परमेश्‍वरए च्ह येशू ङ्योए ल्हागिर ख्रो पिंबर युबै खेगि क्रथे तबइले ङ्योइ म्हाँदिरिबै बिश्‍वास जोगेसि थेंले।
HEB 4:15 ङ्योए ल्हागिर ख्रो पिंबै खेगि क्रथेजी ङ्योए दुःखर ल्होल् खाँम्। तलेबिस्याँ ङो चुसि ङ्योलाइ पापर च्होवाब् धोंले खीलाज्यै या पापर च्होवाबै ल्हागिर तोन्‍दोंरि सैर ङो चुल, दिलेया खैबै ङोज्यै या खीलाइ पापर च्होवाल् आखाँ।
HEB 4:16 छतसि ङ्योलाइ खाँचो तबै त्हेर खीए साहयता नेरो परमेश्‍वरए दयाम्हाँया योंल् खाँरिगे बिसि सैं भोंब् लसि दयाम्हाँया मुँबै परमेश्‍वरए ङाँर ङ्यो ह्‍याले।
HEB 5:1 ताँन् ख्रो पिंबै खेगि क्रथेमैं म्‍हिमैंउँइँले त्‍हाँम्, धै म्हिमैंए पाप क्षमा लबै ल्हागिर परमेश्‍वरए मिंर भेटि नेरो ख्रो पिंबर खटिदिम्।
HEB 5:2 चमैंए खेगि क्रथे ह्रोंसन् ल्‍हें सैर आह्रब् तमुँ, छतसि था आसेसि घ्याँ फ्लेइ प्ररिब्मैंलाइ चइ ल्‍हयो खम्।
HEB 5:3 छतसि चइ म्हिमैंए पाप क्षमा लबर मत्‍त्रे ख्रो पिंब आङिं, ह्रोंसए पाप क्षमा तरिगे बिसेया ख्रो पिंल् त्‍हुम्।
HEB 5:4 छतसि खाबज्‍यै या ङ खेगि क्रथे तम् बिसि तल् आखाँ, हारूनलाइ धोंले चलाइ परमेश्‍वरजी खटिदिम्।
HEB 5:5 ख्रीष्‍टज्यै या ख्रो पिंबै खेगि क्रथे तबर ह्रोंसइन-ह्रोंसलाइ थेब आलल, दिलेया खीलाइ “क्हि ङए च्‍ह ग, तिंयाँ ङ क्‍हिए आबा तइमुँ,” बिबै परमेश्‍वरजी त्हाँब् ग।
HEB 5:6 अर्को क्‍ल्‍ह्‍योरै या परमेश्‍वरजी छ बिइमुँ, “मल्‍किसेदेक ख्रो पिंबै खेगि तब् धोंले क्हि खोंयोंइ बिलै खेगि तब्‍मुँ।”
HEB 5:7 येशू ह्‍युलर मुँमा खीलाइ सिबउँइँले सोगों लमिंल् खाँबै परमेश्‍वरने बेल्‍ले क्रोदै थेबै कैले प्राथना लइ। खीजी छले सैं न्होंउँइँले यो छ्युँ लसि प्राथना लबइले परमेश्‍वरजी खीए प्राथना थेमिंइ।
HEB 5:8 खी परमेश्‍वरए च्‍ह तनाबिलेया खीजी नोबै दुःखउँइँले परमेश्‍वरजी बिब ङिंब लोइ।
HEB 5:9 खी ताँन् जाँचउँइँले पास तल् खाँसि खीए ताँ म्हाँदिब्‍मैं ताँनए ल्हागिर खी खोंयोंइ आखाँबै छ्हए मुल तइमुँ।
HEB 5:10 छतसि मेल्‍किसेदेक ख्रो पिंबै खेगि क्रथे तब् धोंले परमेश्‍वरजी येशूलाइ खेगि क्रथे तबर त्हाँइ।
HEB 5:11 चु ताँए बारेर ङिइ क्‍हेमैंने बिल् त्हुबै ताँमैं ल्‍हें मुँ, दिलेया क्‍होमिंब गारो मुँ, तलेबिस्याँ क्हेमैंइ छेनाले थेबै सैं आल।
HEB 5:12 तिंयाँ समा क्‍हेमैं अरूमैंलाइ लोमिंल् खाँब्मैं तल् त्‍हुमल, अझै या क्हेमैंलाइ परमेश‍वरए ताँमैं लोमिंल् त्‍हुइमुँ। क्‍हेमैं सारो चबै सै चल् खाँब्मैं धों आङिं, बरु कोलोमैं धोंले ङ्‌हे मत्‍त्रे थुँल् त्‍हुब् धों तइमुँ।
HEB 5:13 ङ्‌हे मत्‍त्रे थुँसि सोब्मैं कोलोमैं धोंबन् ग, छतसि चमैंइ छ्याँबै ताँ नेरो आछ्याँबै ताँ फेलल् आखाँ, तलेबिस्याँ चमैं कोलोमैंन् तरिम्।
HEB 5:14 सारो चबै सै थेब् तल् खाँबै म्‍हिमैंए ल्हागिर ग। चमैं छ्याँब नेरो आछ्याँबै ताँ फेलल् खाँम्‍मैं तम्।
HEB 6:1 छतसि ङ्योइ ख्रीष्‍टए बारेर्बै ओंसों ह्रबै ताँमैं मत्‍त्रे क्होसि आत। बरु खीए ताँइ बिल् म्हैब तो जा बिसि अझै अरू ताँमैं क्होबै सैं लले, कालउँइँ बोबै केमैंउँइँले सैं एसि परमेश्‍वर फिर बिश्‍वास लबै ताँर मत्‍त्रे ल्हैदिरिब् आङिं,
HEB 6:2 बप्‍तिस्मा बारेर्बै ताँमैं, यो थेंसि आशिक पिंबै ताँमैं, परमेश्‍वरजी म्हिमैं सिबउँइँले धबै सोगों लमिंबै ताँमैं धै परमेश्‍वरजी म्हिमैंए निसाफ लमा खोंयोंइ दण्ड योंरिल् त्हुम् बिबै ताँमैं लाछेंरि आटिले।
HEB 6:3 बरु परमेश्‍वरजी बिब् धोंलेन् ङ्यो ओंसों बडिले।
HEB 6:4 तलेबिस्याँ खाब्मैंइ परमेश्‍वरए चारबै ह्‍वे तिब्ले योंल् खाँसि स्वर्गर्बै आशिक सेइमुँ, धै पबित्र प्ल्हए शक्‍ति योंल् खाँइमुँ,
HEB 6:5 धै परमेश्‍वरए ताँ छ्याँब मुँ बिसि था सेइमुँ, धै तारे तखबै जुगर परमेश्‍वरजी लबै शक्‍तिए केमैं या सेल् खाँइमुँ,
HEB 6:6 दिलेया चमैंइ परमेश्‍वरए फिर बिश्‍वास लब पिवास्याँ, चमैंए सैं एसि परमेश्‍वर ङाँर पखल् आखाँ! तलेबिस्याँ चमैंइ खेंमैंइ लबै पापइ लमा परमेश्‍वरए च्‍हलाइ धबै क्रूसर च्योवामुँ, धै ताँनए उँइँरि खीए आब्रु वाम्।
HEB 6:7 नमुना बिले: नाँइ स क्योमिंमा सइ खेति लब्मैंलाइ चैदिबै रा-रोमैं पिंम्, धै परमेश्‍वरजी च सलाइ आशिक पिंम्।
HEB 6:8 दिलेया चइ पुजु नेरो क्ह्रुमैं म्‍लोइ बिस्याँ च तो केरै आफे, धै परमेश्‍वरउँइँले चइ सराप योंल् खाँम्। लिउँइँ च मिर ख्रोंवाम्।
HEB 6:9 ओ ङए खोबै थुमैं, ङिइ छ बिलेया क्‍हेमैंए बारेर छ्याँबै ताँए आशा ङिइ लइमुँ। तलेबिस्याँ मुक्‍ति योंबइले क्हेमैंइ ल्हें छ्याँबै ताँमैं योंब्मुँ बिसि ङिइ सेइमुँ।
HEB 6:10 क्‍हेमैंइ छ्याँबै के लइमुँ, क्‍हेमैंइ परमेश्‍वरलाइ म्हाँया लइमुँ बिब उँइँबै ल्हागिर खीए म्‍हिमैंलाइ ल्होरिइमुँ, अझै क्‍हेमैंइ ल्होरिमुँ। क्‍हेमैंइ लबै छ्याँबै के परमेश्‍वरजी म्‍लेरिब् आरे, तलेबिस्याँ खीजी ठिक निसाफ लम्।
HEB 6:11 क्‍हेमैं ताँनइ ह्रोंसइ थेंबै आशा योंबै ल्हागिर लिउँइँ समा छलेन् छ्याँबै के लरिब्मुँ बिब ङिइ मैंमुँ।
HEB 6:12 क्‍हेमैं प्ल्हेउ आतद्, बरु बिश्‍वास लसि दुःखै या सैदिसि परमेश्‍वरजी पिंम् बिसि बाछा फैबै सैमैं योंबै म्हिमैं तद्।
HEB 6:13 परमेश्‍वरजी ङ्योए खे अब्राहामने बाछा फैमा ह्रोंस भन्दा थेब अरू खाबै आरेबइले खीजी ह्रोंसए मिंर्न छ बिसि कसम चइ,
HEB 6:14 “ङइ क्‍हिलाइ आशिक पिंमुँ, धै क्‍हिए सन्‍तान ल्हें लमिंब्‍मुँ।”
HEB 6:15 छबिमा अब्राहामइ पैंसि टिरिइ, धै परमेश्‍वरजी बाछा फैसि पिंम् बिबै सै चइ योंइ।
HEB 6:16 म्हिमैंइ कसम चल् त्हुमा ह्रोंस् भन्दा थेबै म्हिए मिंर कसम चम्। धै चमैंए आक्ह्रिबै ताँमैं कसम चइरि क्ह्रिल् लमिंम्।
HEB 6:17 परमेश्‍वरजी बाछा फैसि पिंम् बिबै सैमैं योंल् त्‍हुब्‍मैंलाइ “खीए ताँ खोंयोंइ आप्लिं,” बिसि उँइँमिंबै सैं लइ। छतसि खीजी कसम चसिन् च बाछा पक्‍का लइ।
HEB 6:18 खीजी फैबै बाछा नेरो खीजी चबै कसम ङ्हिंना ङ्हिंन् खोंयोंइ प्लिंल् आखाँ, तलेबिस्याँ खीजी खोंयोंइ स्‍योर आते। छतसि खीए फिर भर थेंब्‍मैंइ ङ्योलाइ पिंम् बिबै सै योंबर ङ्योइ थेबै भों योंइमुँ।
HEB 6:19 चु आशार्न ङ्यो सोरिइमुँ। चु आशा क्ह्रोंसेंन्बै मुँ, धै स्‍वर्गर्बै पबित्र क्‍ल्‍ह्‍योर्बै पर्दा क्‍वें न्‍होंर्न फेनेइमुँ।
HEB 6:20 चर मल्‍किसेदेक ख्रो पिंबै खेगि क्रथे तब् धोंले ङ्योए ल्हागिर येशू खेगि क्रथे तसि स्वर्गर फेनेल् खाँइमुँ।
HEB 7:1 चु मल्‍किसेदेक शालेम बिबै सहरर्बै म्रुँ नेरो ताँन् भन्दा थेबै परमेश्‍वरए मिंर ख्रो पिंबै खेगि मुँल। अब्राहामइ म्रुँमैंलाइ ट्होइ एखमा मेल्‍किसेदेकइ चने त्‍होसि आशिक पिंल।
HEB 7:2 अब्राहामइ चने मुँबै ताँन् सैउँइँले च्युबाँरि तिबाँ मेल्‍किसेदेकलाइ पिंइ। (मल्‍किसेदेक बिबै मिंए ओंसोंबै अर्थ हिब्रू क्‍ह्‍युइरि “ठिक के लबै म्रुँ,” धै शालेम सहरर्बै म्रुँ तसि खी “शान्‍ति पिंबै म्रुँ,” ग।)
HEB 7:3 च मल्‍किसेदेकल आबा, आमा नेरो खेमैंए बारेर तोइ था आरे। छलेन फिब नेरो सिबए बारेरै या तोइ था आरे। दिलेया परमेश्‍वरए च्‍ह धोंलेन् च खोंयोंइ बिलै ख्रो पिंबै खेगि तरिम्।
HEB 7:4 तारे सैंर मैंन्दि, च कति थेबै म्हि मुँगे? ङ्योए खे अब्राहामज्यै ल्हडेउँइँले ट्होइ पखबै सैमैंउँइँले च्युबाँरि तिबाँ चलाइ पिंइ।
HEB 7:5 खेगि तबर त्हाँबै लेबीए कुलर्बै म्हिमैं अब्राहामए सन्तानमैंन् मुँलेया चमैंइ ह्रोंसए आघें-अलिमैंउँइँले च्युबाँर्बै तिबाँ किंल् त्हुम् बिसि मोशाइ पिंबै ठिमर बिल।
HEB 7:6 दिलेया मल्‍किसेदेक लेबीए कुलर्बै म्‍हि आङिंलैया खीजी अब्राहामउँइँले च्युबाँर्बै तिबाँ किंइ। परमेश्‍वरजी अब्राहामने बाछा फैसि ङइ आशिक पिंम् बिइ। धै मल्किदेसकजी अब्राहामलाइ आशिक पिंइ।
HEB 7:7 आशिक योंबै म्‍हि भन्दा आशिक पिंबै म्‍हिन् थेब तम् बिसि ङ्योइ सेइमुँ। चुर आक्ह्रिबै ताँ तोइ आरे।
HEB 7:8 छुइ सिल् त्हुबै म्हिमैंइ च्युबाँर्बै तिबाँ किंम्। छाइ मल्किदेसकजी च्युबाँर्बै तिबाँ किंइ, धै खीए बारेर “खोंयोंन् बिलै सोरिम्” बिबै ताँ मुँ।
HEB 7:9 अब्राहामइ च्युबाँर्बै तिबाँ मल्किदेसकने पिंब् म्रोंसि तिबाँर्बै च्युबाँ योंल् त्हुबै लेबीज्यै च्युबाँर्बै तिबाँ पिंइ बिसि बिल् खाँम्,
HEB 7:10 तलेबिस्याँ मेल्‍किसेदेक अब्राहामने त्होमा लेबी आफिल, ह्रोंसए खे अब्राहामए न्होंर्न मुँल।
HEB 7:11 परमेश्‍वरजी मोशाए योउँइँले ठिम ङयोए इस्राएली म्हिमैं पिंमा खीजी लेबीए कुलर्बै म्हिमैंलाइ “ख्रो पिंबै खेगिमैंए के लद्,” बिबै ठिमै या पिंल। दिलेया लेबीए कुलर्बै ख्रो पिंबै खेगिमैंइ लबै केउँइँले म्हिमैं पबित्र तल् खाँस्‍याँ अरू खालर्बै ख्रो पिंबै खेगि, प्रभु येशू ख्रीष्‍टन्, युल् आत्‍हुमल। येशू हारूनए खलकर्बै आङिं, मेल्‍किसेदेक धों तबै ख्रो पिंबै खेगि ग।
HEB 7:12 ख्रो पिंबै खेगि फेर्दिस्‍याँ ठिमै या फेर्दिलन् त्‍हुम्।
HEB 7:13 ङ्योए प्रभु येशू ख्रीष्‍टए बारेर चु ताँ बिब् ग। खी लेबीए कुलर्बै आङिंल, अर्कोन् कुलर्बै ग, धै खीए कुलउँइँले खाबज्‍यै या ख्रो पिंबै क्‍ल्‍ह्‍योर खेगिए के खोंयोंइ आलइमुँ।
HEB 7:14 येशू यहूदाए कुलउँइँले फिब् ग बिसि ताँनइ सेइमुँ, धै यहूदाए कुलउँइँले ख्रो पिंबै खेगि त्हाँबै बारेर मोशाइ तोइ या आबिइमुँ।
HEB 7:15 तारे चु ताँ झन् छेनाले क्होल् खाँम्, तलेबिस्याँ मल्‍किसेदेक धों तबै अर्को ख्रो पिंबै खेगि युल् खाँइमुँ।
HEB 7:16 म्‍हिमैंइ बनेबै ठिमर बिब् धोंले नेरो म्‍हिमैंए रोस अनुसार येशू ख्रो पिंबै खेगि तब आङिं, बरु खोंयोंइ आखाँबै छ्ह पिंबै भोंउँइँले खी ख्रो पिंबै खेगि तइमुँ।
HEB 7:17 तलेबिस्याँ खीए बारेर परमेश्‍वरए छ्वेर छ बिइमुँ: “क्हि मेल्‍किसेदेक धोंलेन् खोंयोंइ तरिबै ख्रो पिंबै खेगि ग।”
HEB 7:18 स्योंम्बै ठिम तोइ लल् आखाँब नेरो केर आफेब मुँ। छतसि परमेश्‍वरजी च ठिम मेटिदिवाइमुँ,
HEB 7:19 तलेबिस्याँ ओंसोंबै ठिमइ तोइ के पक्‍का लल् आखाँ। तारे चए क्ल्ह्‍योर च भन्दा छ्याँबै आशा मुँबै ठिम तइमुँ। च घ्‍याँउँइँले ङ्यो परमेश्‍वरए ङाँर फेनेल् खाँम्।
HEB 7:20 खीलाइ परमेश्‍वरजी कसम चसि खेगि तबर त्हाँब् ग। परमेश्‍वरजी छाबै कसम आचन्ले ओंसोंबै ख्रो पिंबै खेगिमैं त्हाँल।
HEB 7:21 दिलेया येशू बिस्याँ कसम चबइले ख्रो पिंबै खेगि तब् ग, तलेबिस्याँ खीए बारेर परमेश्‍वरजी बिइमुँ, “याहवेहजी खीए सैं खोंयोंइ या फेर्दिरिब् आरे बिसि कसम चइमुँ: ‘क्हि खोंयोंइ बिलै ख्रो पिंबै खेगि तरिब्‍मुँ।’”
HEB 7:22 परमेश्‍वरजी चबै चु कसमउँइँले ओंसों भन्दा छ्याँबै बाछा पक्‍का लमिंबै म्हि येशून् ग।
HEB 7:23 झाइले अर्को ताँ, ओंसों लेबीए कुलर्बै ख्रो पिंबै खेगिमैं ल्‍हेन् मुँल, तलेबिस्याँ चमैं सियासि चमैंइ लबै के युगुर्ले लल् आखाँल।
HEB 7:24 दिलेया येशू बिस्याँ खोंयोंइ बिलै सोगों तबइले खी खोंयोंन् बिलै खेगि क्रथे तरिब्मुँ।
HEB 7:25 छतसि खीउँइँले परमेश्‍वर ङाँर ह्‍याब्‍मैंलाइ येशूजी खोंयोंइन जोगेमिंल् खाँम्, तलेबिस्याँ चमैंए ल्हागिर परमेश्‍वरने प्राथना लबर खी खोंयोंन् बिलै सोगों तरिम्।
HEB 7:26 ङ्योए ल्हागिर छाबै म्हि घ्रि ख्रो पिंबै खेगि क्रथे तल् त्हुम्, तलेबिस्याँ येशू पबित्र, छ्याब् आरेब नेरो तोइ पाप आरेब मुँ। छतसि परमेश्‍वरजी पापि म्‍हिमैंउँइँले स्यो लसि खीलाइ स्‍वर्ग भन्दा ताइ थेंमिंइमुँ।
HEB 7:27 अरू ख्रो पिंबै खेगि क्रथेमैंइ त्हिंइ ह्रोंसे ओंसों ह्रोंसए पाप त्होमिंबै ल्हागिर, झाइले लिउँइँ म्‍हिमैंए पाप त्होमिंबै ल्हागिर ख्रो पिंरिल् त्‍हुरिल। दिलेया येशू चमैं धोंले आङिं। खीजी खोंयोंइ तरिबै ख्रोए ल्हागिर तिखेर्न क्रूसर सिसि ह्रोंसइन चु के लमिंइ।
HEB 7:28 मोशाइ प्ह्रिबै ठिमइ भों आरेबै म्‍हिमैं ख्रो पिंबै खेगि क्रथे तबर त्हाँइ, दिलेया ठिम पिंबै लिउँइँ परमेश्‍वरजी कसम चसि पोंबै बचनइ खोंयोंइ तरिबै पक्‍का खेगि क्रथेए ल्हागिर खीए च्‍हलाइ त्हाँइ।
HEB 8:1 ङिइ बिल् म्हैबै थेबै ताँ चुन् ग: ङ्योला छाबै ख्रो पिंबै खेगि क्रथे मुँ, खी स्‍वर्गर ताँन् भन्दा थेबै परमेश्‍वरए क्‍योलोउँइँ (कयोउँइँ) गद्दिर क्हुँइमुँ।
HEB 8:2 धै खेगि क्रथे तसि येशूजी स्‍वर्गर्बै क्ह्रोंसेंन्बै ताँन् भन्दा पबित्र क्ल्ह्‍योरि सेवा लम्। च पबित्र क्ल्ह्‍यो म्‍हिइ बनेब आङिं, दिलेया प्रभु परमेश्‍वरजी बनेब ग।
HEB 8:3 ताँन् खेगि क्रथे भेटि नेरो ख्रो पिंबर त्‍हाँम्। छतसि ङ्योए खेगि क्रथे येशूने ख्रो पिंबै सै तल् त्हुम्।
HEB 8:4 खी चु पृथ्‍बीर्न मुँरिस्याँम् ख्रो पिंबै खेगि आतमल, तलेबिस्याँ ठिमर बिब् धोंले भेटि पिंबै ल्हागिरि लेबीए कुलर्बै ख्रो पिंबै खेगिमैं चुर्न मुँ।
HEB 8:5 दिलेया चुर्बै ख्रो पिंबै खेगिमैंइ स्‍वर्गर्बै पबित्र क्ल्ह्‍योए नकल लसि छरिए सेवा मत्‍त्रे लम्। तलेबिस्याँ मोशाइ पबित्र क्ल्ह्‍यो बनेल् म्हैमा परमेश्‍वरजी चने बिइ, “क्‍हिने कोंर उँइँमिंबै नमुना अनुसार ताँन् सै बनेद्।”
HEB 8:6 दिलेया च ओंसों फैबै बाछा भन्दा प्रभु येशूजी म्‍हिमैंए ल्हागिर लमिंबै बाछा झन् थेब मुँ। छतसि परमेश्‍वर नेरो म्‍हिमैं न्होंरि येशूजी लमिंबै बाछा ओंसोंबै बाछा भन्दा छ्याँब मुँ। छलेन स्‍योंम्‍बै खेगिमैंइ भन्दा येशूजी झन् बेल्‍ले थेबै के लइमुँ।
HEB 8:7 ओंसों फैबै बाछा केर फेस्याँ चए क्ल्ह्‍योरि अर्को बाछा आचैदिमल।
HEB 8:8 दिलेया म्‍हिमैंए दोष उँइँदै परमेश्‍वरजी बिइमुँ, “इस्राएलर्बै ह्रें नेरो यहूदाए ह्रेंमैंने ङइ छारा बाछा घ्रि फैबै त्हिंइ खब्मुँ।
HEB 8:9 चु बाछा ङइ चमैंए खेमैं-माँमैंने फैबै बाछा धोंब तरिब् आरे। च त्हेरि ङइ चमैंए यो क्‍हासि मिश्र ह्‍युलउँइँले डोरेसि पखल। दिलेया ङइ फैबै बाछाए ताँमैंर चमैं दरले टिल् आखाँ। छतसि ङइ चमैंए वास्‍ता आल,” बिसि याहवहजी बिइमुँ।
HEB 8:10 “दिलेया चु त्‍हिंइ लिउँइँ, बिसि याहवहजी बिइमुँ। ङ इस्राएलए सन्तानमैंने छाबै बाछा फैब्‍मुँ: चमैंए सैंर ङए ठिम थेंमिंब्‍मुँ, धै चमैंए खोंर च ठिममैं प्‍ह्रिमिंब्‍मुँ। ङ चमैंए परमेश्‍वर तब्‍मुँ, धै चमैं ङए म्हिमैं तब्‍मुँ।
HEB 8:11 च त्हेर ‘परमेश्‍वरलाइ ङो सेद्’ बिसि खाबज्‍यै या ह्रोंसए ङ्‍हेब्-ट्हुब्मैं नेरो ह्रोंसए आघें अलिलाइ लोमिंरिब् आरे, तलेबिस्याँ थेब च्‍योंब ताँनइ ङलाइ ङो सेब्‍मुँ।
HEB 8:12 चमैंए पापमैं ङइ क्षमा लमिंब्‍मुँ, धै चमैंए आछ्याँबै केमैं ङइ धबै मैंरिब् आरे।”
HEB 8:13 परमेश्‍वरजी चु बाछाने, “छारा,” बिसि ओंसोंबै बाछा स्योगो लामिंइ, छले चु बाछा केर आफेब् तसि युनन् म्‍हयाम्।
HEB 9:1 ओंसोंबै बाछार परमेश्‍वरए मिं क्वेबर ओलेबै ठिममैं नेरो परमेश्‍वर म्हाँदिबै ल्हागिर म्हिमैंइ बनेबै पबित्र क्ल्‍ह्‍यो घ्रि या मुँल।
HEB 9:2 च पबित्र क्ल्ह्‍योए ओंसोंबै कोठार अर्को च्‍योंबै कोठा या मुँल। ओंसोंबै कोठार बत्ति म्रोंबै पानस घ्रि नेरो टेबल घ्रि मुँल। च टेबलए फिर परमेश्‍वरए मिंर पिंबै क्हें थेंमल। च ओंसोंबै कोठाने “पबित्र क्‍ल्‍ह्‍यो” बिमल।
HEB 9:3 च न्‍होंर्न पर्दा क्‍वें लिउँइँ अर्को च्योंने कोठा मुँल। च “ताँन् भन्दा पबित्र क्‍ल्‍ह्‍यो” मुँल।
HEB 9:4 च क्‍ल्‍होरी माराइ बनेबै धुप झोंबै ख्रो पिंबै क्ल्ह्‍यो नेरो माराइ म्‍होरबै बाकस मुँल। च बाकसर बाछा मैंबै ल्हागिर चिनुमैं झोंथेंल, अथवा मन्‍ना बिबै क्हें झोंबै माराए भाँडो नेरो स्‍योंम्‍बै हारून बिबै म्‍हिइ छेबै पलुवा खबै प्‍हरे, नेरो बाछार्बै ठिममैं प्‍ह्रिथेंबै युँम् प्ला ‍ङ्हिं मुँल।
HEB 9:5 च बाकसए फिर छरि तबै ल्हागिर माराइ बनेबै करूबमैं मुँल। चमैंइ प्‍ह्‍या फैसि क्षमा नेरो ल्हयो लबै क्‍ल्‍ह्‍यो उथेंल। दिलेया चु ताँमैंए बारेर घ्रि घ्रिले ङिइ तोगो बिल् आखाँ।
HEB 9:6 चु ताँन् सैमैं लल् खाँबै लिउँइँ ख्रो पिंबै खेगिमैं ह्रोंसइ लल् त्हुबै के लबर त्हिंइ ह्रोंसे बैरुउँइँबै पबित्र तम्बु न्होंर ह्‍यामल।
HEB 9:7 दिलेया ताँन् भन्दा न्होंर्बै पबित्र क्ल्ह्‍योर ख्रो पिंबै खेगि क्रथे मत्‍त्रे बर्षर तिब्ले ह्‍याल् योंमल। खेगि क्रथे चर ह्‍यामा कोइ या बोसि ह्‍याल् त्हुमल, तलेबिस्याँ ह्रोंसइ लबै पापए ल्हागिर नेरो म्हिमैंइ था आसेन्ले लबै पापए ल्हागिर को पिंल् त्हुमल।
HEB 9:8 बैरुउँइँबै पबित्र क्ल्ह्‍यो मुँरिन् समा “ताँन् भन्दा पबित्र क्ल्ह्‍योर” ह्‍याबै घ्याँ थोंरिब् आरे बिसि पबित्र प्ल्हजी उँइँमिंइमुँ।
HEB 9:9 चु ताँ तिंजरेबै ल्हागिर नमुना घ्रि ग। चुए मतलब भेटिमैं नेरो परमेश्‍वरए मिंर पिंबै र-क्‍युए ख्रोइ म्‍हिए सैंलाइ ख्रुसि चोखो लल् आखाँ।
HEB 9:10 तलेबिस्याँ चु सैमैं ताँन् चब्, थुँबै ल्हागिर नेरो ज्यु ख्रुसि चोखो लबै रोसमैं मत्त्रे ग। परमेश्‍वरउँइँले अर्को छारा ठिम आयुन् समा चु रोसमैंइ ज्युए ल्हागिर मत्‍त्रे के लम्।
HEB 9:11 दिलेया ख्रीष्‍ट बिस्याँ युल् खाँबै ताँन् भन्दा छ्याँबै सैमैंए ख्रो पिंबै खेगि क्रथे तसि युइ। खी अझै थेब नेरो पबित्र क्ल्ह्‍योउँइँले ह्‍याइ, च क्ल्ह्‍यो म्‍हिमैंइ बनेब आङिं। धै चु ह्‍युलर्बै सै या आङिं।
HEB 9:12 र-क्युए कोजी आङिं, दिलेया म्हिमैंए पाप क्षमा लबर ख्रीष्‍टजी ह्रोंसए को पिंसि म्हिमैंलाइ खोंयोंइ आखाँबै छ्ह पिंबै ल्हागिर तिखेर्न ताँन् भन्दा पबित्र क्ल्ह्‍योर होंइ।
HEB 9:13 ओंसोंबै बाछार, र-क्यु, क्‍ल्‍या भाराए को नेरो क्‍ल्‍या भारालाइ ख्रोंबै मेब्रो म्‍हिमैंए फिर फ्रुँस्याँ चमैंए ज्यु चोखो तम् बिस्याँ।
HEB 9:14 ख्रीष्‍टए पबित्र कोजी झन् ङ्योए आछ्याँबै सैंलाइ कति छेनाले ख्रुमिंमुँ। तलेबिस्याँ खीजी परमेश्‍वरए प्ल्हउँइँले ह्रोंसलाइ तोइ खोट आरेबै ख्रो तसि परमेश्‍वरलाइ पिंवाइ। छतसि ख्रीष्‍टए कोजी ङ्योए सैंलाइ छेनाले चोखो लमिंबइले ङ्योइ सोगों परमेश्‍वरए सेवा लल् खाँम्।
HEB 9:15 छतसि ख्रीष्‍टजी छारा बाछा लमिंबइले परमेश्‍वरजी त्‍हाँबै म्‍हिमैंइ खीजी फैबै बाछार्बै खोंयोंन् बिलै तरिबै आशिक योंल् खाँम्। तलेबिस्याँ ओंसोंबै बाछाए न्‍होंर टिमा चमैंइ पाप लइ, दिलेया चमैंए पापए ल्हागिर ख्रीष्‍ट सिमिंसि चमैंलाइ जोगेमिंइमुँ।
HEB 9:16 खाबज्यै या ह्रोंसने मुँबै सै न्होर ह्रोंस सिबै लिउँइँ अरूलाइ पिंदा ङ्हाँस्याँ चइ बाकसपत्र कागज प्‍ह्रिमिंम्। धै “च म्‍हि सियाना” बिसि प्रमाण तबै लिउँइँ मत्‍त्रे म्‍हिमैंइ च कागतर प्‍ह्रिमिंबै सैमैं योंम्।
HEB 9:17 च बाकसपत्र कागज प्‍ह्रिबै म्‍हि आसिन् समा चए सै न्होर अरूइ आयों, प्‍ह्रिथेंबै म्‍हि सिबै लिउँइँ मत्‍त्रे च प्‍ह्रिथेंबै ताँ पक्‍का तम्।
HEB 9:18 छतसि ओंसोंबै बाछा या को आबगेन् समा पक्‍का तल् आखाँ।
HEB 9:19 ठिमर बिब् धोंले लल् त्हुबै ताँमैं मोशाइ इस्राएलीमैंने बिमिंबै लिउँइँ चइ क्‍ल्‍या भारा, र-बुख्या नेरो क्‍युए को, क्यु, ओल्‍ग्‍या पै नेरो हिसप बिबै धुँए प्हो ठिमए फिर नेरो ताँन् म्‍हिमैंए फिर प्राइ।
HEB 9:20 छले कोइ प्रामा मोशाइ बिइ, “परमेश्‍वरजी क्‍हेमैंने बिबै बाछाए को चुन् ग।”
HEB 9:21 छलेन परमेश्‍वरए मिंर ख्रो पिंबै पबित्र क्ल्ह्‍‍यो नेरो पूजा लमा ओलेबै भाँडजरे या मोशाइ च को प्राइ।
HEB 9:22 क्‍ह्रोंसेंन ठिमर बिब् धोंले कोइ ताँन् सै चोखो लम्। को आबगेन् समा पापए क्षमा तलन् आखाँ।
HEB 9:23 स्वर्गर्बै नकल लबै सैमैंलाइमि छले पबित्र लल् त्हुम् बिस्याँ, स्‍वर्गर्बै सैमैंलाइ पबित्र लबै ल्हागिर झन् बेल्‍ले पबित्र सैए ख्रो चैदिइ।
HEB 9:24 ओंसोंबै पबित्र क्‍ल्‍ह्‍यो क्ह्रोंसेंन्बै पबित्र क्ल्ह्‍योए नकल मुँल। दिलेया ख्रीष्‍ट म्‍हिमैंइ बनेबै पबित्र क्‍ल्‍ह्‍योर आहों, खी स्‍वर्ग न्होंर्न होंइ। छले खी ङ्योए ल्हागिर परमेश्‍वरए उँइँर टिइमुँ।
HEB 9:25 यहूदी ख्रो पिंबै खेगि क्रथे पृथ्‍बीर्बै “ताँन् भन्दा पबित्र क्‍ल्‍ह्‍योर” सालर तिला खेदोए को बोसि ह्‍यामल। दिलेया येशू ख्रीष्‍ट बिस्याँ खीए ज्यु ख्रो पिंबर घरि घरि ह्‍याल् आत्हु।
HEB 9:26 ख्रो पिंबर ह्‍याब्रे लल् त्हुस्याँम् खी ह्‍युल बनेबै त्हे ओंनोंन् ल्हें खे दुःख नोब्रें लल् त्‍हुमल। दिलेया म्हिमैंए पाप क्षमा लमिंबर खोंयोंइ बिलैए ल्हागिर ख्रीष्‍ट तिब्‍ले मत्‍त्रे खीए ज्युलाइ ख्रों पिंबर चु जुग नुबै त्हेर युइमुँ।
HEB 9:27 ताँन् म्‍हिमैं तिब्‍ले सिल् त्‍हुम्, धै सिबै लिउँइँ परमेश्‍वरजी लबै इन्‍साफर राल् त्‍हुम्।
HEB 9:28 छलेन ल्‍हें म्‍हिमैंए पाप त्होमिंबर ख्रीष्‍ट या तिब्‍ले ख्रो तसि सिमिंइ। दिलेया खी धबै युब्‍मुँ। च त्हेर खी म्हिमैंए पाप त्होमिंबै ल्हागिर आङिं, दिलेया सैं तोंदै खीलाइ ह्रेरिब्मैंलाइ जोगेमिंबर युब्‍मुँ।
HEB 10:1 यहूदी ठिम तारे तखबै क्ह्रोंसेंन्बै ताँमैं धों तब आङिं, तारे तखबै क्ह्रोंसेंन्बै छ्याँबै सैमैंए छरि मत्‍त्रे ग। छतसि बर्ष ह्रोंसे परमेश्‍वरए मिंर पिंबै ख्रोमैंइ ख्रो पिंबै म्हिमैंए ताँन् पाप ख्रुमिंल् आखाँ।
HEB 10:2 ख्रोमैंइ म्हिमैंए पाप ख्रुमिंल् खाँस्याँ सालै ह्रोंसे म्हिमैंइ ख्रो पिंरिल् आत्हुमल, आङिं वा? तलेबिस्याँ तिखेर्न ख्रो पिंब्मैंए पाप त्होयास्याँ, चए लिउँइँ चमैंए सैंर पाप आतमल।
HEB 10:3 दिलेया चु ख्रो पिंमा म्हिमैंइ सालै ह्रोंसे खेंमैंए पाप सैंर मैंम्,
HEB 10:4 तलेबिस्याँ र क्युए कोइ म्हिमैंए पाप त्होल् आखाँ।
HEB 10:5 छतसि येशू ख्रीष्‍ट चु ह्‍युलर युमा खीजी परमेश्‍वरने छ बिइ, “क्‍हिजी ख्रो नेरो भेटिमैं आम्है, दिलेया क्‍हिजी ङए ल्हागिर ज्यु घ्रि बनेइ।
HEB 10:6 तलेबिस्याँ खेदोमैं ख्रो पिंबै क्ल्ह्‍योर होम लबइले क्हि सैं आतों, झाइले पाप ख्रुबै ल्हागिर ख्रो पिंलेया क्हि सैं आतों।
HEB 10:7 छतसि ङइ बिइ, ‘ओ परमेश्‍वर, ङए बारेर छ्वेर प्ह्रिब् धोंले क्हिए सैंर मैंबै ताँ पूरा लबर ङ युइमुँ।’”
HEB 10:8 ओंसोंन् खीजी बिइ, “ख्रो, भेटिमैं, खेदोए होम लब, पाप ख्रुबै ल्हागिर ख्रोमैं क्‍हिइ आम्है, चु सैमैं क्हिलाइ आचैदि, चु सैमैं म्रोंसि क्हि सैं आतों।” (चु ताँन् ठिमलाइ चैदिबै सैमैं ग।)
HEB 10:9 च लिउँइँ खीजी बिइ, “ओ परमेश्‍वर, क्‍हिए सैंर मैंबै ताँ पूरा लबर ङ युइमुँ।” छले परमेश्‍वरजी ओंसोंबै ख्रो पिंबै रोस स्‍योवासि चए क्ल्ह्‍योर ख्रीष्‍टजी पिंबै ख्रो थेंमिंब्मुँ।
HEB 10:10 तलेबिस्याँ येशू ख्रीष्‍टजी परमेश्‍वरए सैंर मैंबै ताँ पूरा लमिंइ। छतसि येशू ख्रीष्‍टजी खीए ज्यु खोंयोंइ तरिबै ख्रो तिब्ले पिंबइले ङ्यो पबित्र लमिंइमुँ।
HEB 10:11 यहूदी ख्रो पिंबै खेगिमैंइ त्हिंइ ह्रोंसे ख्रो पिंमुँ। दिलेया छाबै ख्रोइ म्‍हिमैंए पाप खोंयोंइ त्होल् आखाँ।
HEB 10:12 दिलेया ख्रीष्‍टजी म्‍हिमैं पापउँइँले फ्रेमिंबर ख्रो घ्रि मत्‍त्रे पिंइ। च ख्रो खोंयोंइ तरिम्, धै खी परमेश्‍वरए क्‍योलोउँइँ टिइमुँ।
HEB 10:13 झाइले परमेश्‍वरजी ख्रीष्‍टए शत्तुरमैं खीए प्‍हले न्‍होंर आलन् समा ख्रीष्‍टजी पैंरिम्।
HEB 10:14 तलेबिस्याँ खीजी पबित्र लमिंबै म्‍हिमैंलाइ खोंयोंइ तरिबै ख्रो घ्रिउँइँलेन् पबित्र लमिंइमुँ।
HEB 10:15 पबित्र प्ल्हज्‍यै या ङ्योने चु ताँए ग्वाइ पिंइमुँ। ओंसों खीजी छ बिइमुँ,
HEB 10:16 “चु त्हिंइ लिउँइँ चमैंने फैबै ङए बाछा चुन् ग, ङइ चमैंए खोंर ङए ठिम थेंमिंब्‍मुँ, धै चमैंए सैंर ङए ठिम प्‍ह्रिमिंब्‍मुँ।”
HEB 10:17 अझै खीजी छ बिइमुँ, “चमैंए पाप नेरो आछ्याँबै केमैं ङइ धबै खोंयोंइ मैंरिब् आरे।”
HEB 10:18 छतसि ताँन् पाप क्षमा तयाबइले तारे पापए ल्हागिर अर्को ख्रो आचैदि।
HEB 10:19 छतसि ओ अलि-अङाँमैं, येशूए कोजी लमा “ताँन् भन्दा पबित्र क्‍ल्‍ह्‍योर” होंबै भों ङ्योइ योंइमुँ।
HEB 10:20 ङ्योए ल्हागिर छारा नेरो खोंयोंइ आखाँबै छ्ह योंबै घ्याँ खीजी थोंमिंइ। खीए ज्यु ख्रो पिंबइले ङ्यो पर्दउँइँले तसि “ताँन् भन्दा पबित्र क्ल्ह्‍योर” होंल् खाँम्।
HEB 10:21 परमेश्‍वरए म्‍हिमैंलाइ छेनाले छैं लबै ल्हागिर ङ्योए खेगि क्रथे घ्रि मुँ।
HEB 10:22 छतसि ङ्योए आछ्याँबै सैंमैं चोखो लसि पबित्र क्युइ ङ्योए ज्यु ख्रुमिंइ, छतसि छ्याँबै सैंइ खीए फिर बिश्‍वास लसि खीए फिर सैं केंसि ङ्यो परमेश्‍वरए उँइँर ह्‍याले।
HEB 10:23 ङ्योइ खीए फिर बिश्‍वास लसि थेंबै आशार सैं ङ्हिरि आलल्‍ले भोंसि तसि टिले, तलेबिस्याँ ङ्योने बाछा फैबै परमेश्‍वर भर लल् खाँब मुँ।
HEB 10:24 घ्रिइ घ्रिलाइ म्हाँया लदै छ्याँबै के लरिबै ल्हागिर ङ्योइ खैले चमैंए सैं भोंन् लमिंब च ताँ सैंर मैंले।
HEB 10:25 को-कोइल संगतिर आह्‍याबै बानि तम्, दिलेया प्रभु युबै त्हिंइ चेंदोन् मुँ बिब क्हेमैंइ सेबइले घ्रिइ घ्रिलाइ संगतिर ह्‍याल् त्हुम् बिदै ङ्यो ताँन् खागु तब आपिले।
HEB 10:26 तलेबिस्याँ क्ह्रोसंन्बै ताँ सेसेया ङ्योइ ह्रना-ह्नन् पाप लइ बिस्याँ पाप त्होमिंबै ल्हागिर तारे अरू ख्रो आरे।
HEB 10:27 बरु ङ्हिंन् ङ्हाँबै दण्ड पैंसि टिल् त्हुम्, धै परमेश्‍वरए बिरोध लब्‍मैंलाइ नास लवाबै मिए राबा मत्‍त्रे तब्मुँ।
HEB 10:28 मोशाइ प्ह्रिबै ठिम आम्हाँदिबै म्हिए बारेर म्‍हि ‍ङ्हिंदे सोंदेए ग्वाइ तइ बिस्याँ च म्हि ल्हयो आयोंल्‍ले सिल् त्हुम्।
HEB 10:29 छतसि क्हेमैं ह्रोंसन् मैंन्दि: को-कोइ परमेश्‍वरए च्‍हलाइ प्हलेइ प्लेम्। धै परमेश्‍वरजी बाछा फैबै कोइ चमैंलाइ पापउँइँले पबित्र लमिंलेया चमैंइ च को तो धोंइ आङ्हाँ। धै ह्रोंसलाइ दयाम्हाँया लबै पबित्र प्ल्हए आब्रु वाम्। छाबै म्हिइ झन् कति थेबै दण्ड योंलै।
HEB 10:30 तलेबिस्याँ “बदला किंबै के ङल् ग, म्हिमैंइ खैबै के लइमुँ छाबन् नों ङइ पिंम्।” बिब परमेश्‍वरन् ग बिसि ङ्योइ सेइमुँ। खीजी धबै बिइमुँ, “याहवेहजी खीए म्‍हिमैंए निसाफ लब्‍मुँ।”
HEB 10:31 सोगों परमेश्‍वरए योर फेब ङ्हिंन् ङ्हाँबै ताँ ग।
HEB 10:32 च ह्‍याबै त्हिंइमैं मैंन्, परमेश्‍वरए चारबै ह्‍वे योंबै लिउँइँ खैबै दुःख योंलेया क्हेमैं बिश्‍वासर भोंसि तइ टिल।
HEB 10:33 खोंयों म्हिमैंइ क्‍हेमैंए आब्रु वासि म्हि आच्हिल्‍ले पोंइ, खोंयों अरूमैंइ दुःख योंमा क्‍हेमैं या चमैंनेन् दुःख योंल् त्हुइ।
HEB 10:34 झेलर मुँब्‍मैंलाइ क्हेमैंइ ल्होमिंइ, ह्रोंसए सै न्होर अरूमैंइ लुडिवालेया क्‍हेमैं सैं तोंसिन् सैदिइ, तलेबिस्याँ क्‍हेमैंल च सै न्होर भन्दा थेब खोंयोंन् बिलै तरिबै स्वाबै सै न्होर मुँ बिसि क्‍हेमैंइ सेल।
HEB 10:35 छतसि क्‍हेमैंइ लबै बिश्‍वास आपिद्, क्हेमैंए ल्हागिर थेबै इनाम मुँ।
HEB 10:36 परमेश्‍वरजी बिब् धोंले के लब नेरो खीजी बाछा फैसि पिंम् बिबै सै योंबै ल्हागिर क्हेमैं बिश्‍वासर भोंसि तइ टिल् त्हुम्।
HEB 10:37 तलेबिस्याँ “तारे तिस्यार्न युम् बिबै येशू युब्‍मुँ, खी युबर क्‍हैल् लरिब् आरे।
HEB 10:38 ङए उँइँर ठिक के लबै म्हि बिस्याँ बिश्‍वासउँइँलेन् सोरिब्मुँ, दिलेया च ङ ङाँइले स्योयास्याँ ङ चने तोंरिब् आरे।”
HEB 10:39 दिलेया ङ्यो लिउँइँ स्योसि नास तब्मैं न्होंर्बै आङिं, ङ्योम् बिश्‍वास लसिन् सोरिब्मैं न्होंर्बै ग।
HEB 11:1 बिश्‍वास बिब तो जा बिस्‍याँ ङ्योए सैंइ तो सैए फिर आशा थेंमुँ च सै क्ह्रोंसेंन तब्‍मुँ, धै मिइ आम्रोंलै या च सै योंब्‍मुँ बिसि भर लब् ग।
HEB 11:2 तलेबिस्याँ छाबन् बिश्‍वास स्‍योंम्‍बै म्‍हिमैंइ लबइले परमेश्‍वरजी चमैंलाइ खोमल।
HEB 11:3 ताँन् ह्‍युल परमेश्‍वरए बचनउँइँले बनेइ, धै म्रोंल् खाँबै सैमैं म्रोंल् आखाँबै ताँउँइँले बनेइ बिसि बिश्‍वासउँइँलेन् ङ्योइ क्होल् खाँम्।
HEB 11:4 बिश्‍वासउँइँलेन् कयिनइ भन्दा हाबिलइ बेल्‍ले छ्याँबै ख्रो परमेश्‍वरलाइ पिंइ। छाबै बिश्‍वासइ लमा हाबिल परमेश्‍वरए उँइँर ठिक ठर्दिइ, तलेबिस्याँ चइ पिंबै ख्रो म्रोंसि परमेश्‍वर सैं तोंइ। हाबिल सियालेया चइ लबै बिश्‍वासउँइँलेन् अझै च पोंसिन्मुँ।
HEB 11:5 बिश्‍वासउँइँलेन् हनोक सिल् आत्हुनले स्‍वर्गर क्वेबोयाइ। चलाइ खाबज्यै या आत्हो, तलेबिस्याँ परमेश्‍वरजी चलाइ स्‍वर्गउँइँ बोयाल। च स्‍वर्गउँइँ क्वेबोब् भन्दा ओंसों चइ परमेश्‍वरलाइ सैं तोंन् लल बिबै ताँ परमेश्‍वरए छ्वेर प्ह्रिइमुँ।
HEB 11:6 बिश्‍वास आलल्‍ले खाबज्‍यै या परमेश्‍वरलाइ सैं तोंन् लल् आखाँ। तलेबिस्याँ खाउ म्हि परमेश्‍वरए चेंदो खमुँ च म्हिइ “परमेश्‍वर क्ह्रोंसेंन मुँ धै खीलाइ म्‍हैब्मैंलाइ खीजी इनाम पिंब्‍मुँ,” बिसि बिश्‍वास लल् त्‍हुम्।
HEB 11:7 बिश्‍वासउँइँलेन् नोआज्यै च त्हे समा आम्रोंबै केमैंए बारेर परमेश्‍वरउँइँले था सेइ। धै खीजी बिबै ताँ क्वेंसि ह्रोंसए परवा जोगेबर नोआइ क्‍यु झाज घ्रि बनेइ। धै “ह्‍युलर्बै म्‍हिमैंइ परमेश्‍वरजी बिबै ताँ आक्वेंइमुँ,” बिसि नोआइ चमैंलाइ छ्याब् मुँबन् ठर्दिइ, दिलेया ह्रोंसए बिश्‍वासउँइँले च ठिक ठर्दिइ।
HEB 11:8 बिश्‍वासउँइँलेन् अब्राहामइ परमेश्‍वरजी बिब ङिंइ, धै ह्‍याद् बिबै क्ल्ह्‍योउँइँ ह्‍याइ। लिउँइँ च क्ल्ह्‍योए क्ल्हे चलाइन तल् पिंबै सैं परमेश्‍वरल् मुँल। दिलेया ह्रोंस खनइ ह्‍यारिइमुँ बिब ह्रोंसलाइन था आरेल।
HEB 11:9 बिश्‍वासउँइँलेन् अब्राहाम आगुए ह्‍युलर्बै म्हि धोंले परमेश्‍वरजी पिंस्‍यो बिसि बाछा फैबै ह्‍युलर टिइ। इसहाक नेरो याकूब धोंले च तम्बुजरे टिइ। चमैं या अब्राहामने बा-बालुन् परमेश्‍वरजी पिंम् बिसि बाछा फैबै हगवालमैं मुँल।
HEB 11:10 तलेबिस्याँ परमेश्‍वरजीन् बनेबै खोंयोंइ बिलै तरिबै जग मुँबै सहरए घ्याँ अब्राहामइ ङ्ह्‍योरिल।
HEB 11:11 बिश्‍वासउँइँलेन् साराज्यै माँब् तल् खाँबै लिउँइँ प्‍हसे नोबै भों योंइ, तलेबिस्याँ “प्हसे फिम् बिसि बाछा फैबै परमेश्‍वर बिश्‍वास योग्यर्बै मुँ” बिसि चइ मैंल।
HEB 11:12 छतसि सिबै त्हे तयाल खाँबै म्हि घ्रिउँइँलेन् मुर्बै सारमैं नेरो मा ङ्युँइए रेर्बै च्योलै आखाँबै बालुवाए त्हुल धोंलेन् ल्हें सन्तान तइ।
HEB 11:13 च ताँन् म्‍हिमैंइ परमेश्‍वरजी पिंम् बिसि बाछा फैबै सैंमैं आयोंलेया बिश्‍वास लसिन् सिइ, दिलेया च सैमैं ह्रेंगोउँइँलेन् म्रोंसि चमैं सैं तोंइ। तलेबिस्याँ चु पृथ्बीर म्हिमैं ङ्हिरोबै प्ह्रें धों तब् मुँन बिबै ताँ चमैंइ सेइ।
HEB 11:14 छाबै ताँ बिबै म्हिमैंइ खोंयोंन् बिलै ह्रोंसलन् तरिबै ह्‍युल घ्रि म्हैरिइमुँ बिसि छेनाले सेल् खाँम्।
HEB 11:15 चमैंइ खेंमैंइ वाथेंबै ह्‍युलर एयाबै सैं लस्‍याँ चमैंलाइ एल् योंबै मौका योंल, दिलेया चमैंइ च ह्‍युलए बारेर तोइ वास्‍ता आल।
HEB 11:16 बरु चमैंल झन् छ्याँबै ह्‍युल, अथवा स्‍वर्गर, ह्‍याबै सैं मुँल। छतसि परमेश्‍वर “चमैंए परमेश्‍वर ग” बिबर फा आपिल, तलेबिस्याँ खीजी चमैंए ल्हागिर सहर घ्रि तयार लथेंइमुँ।
HEB 11:17 परमेश्‍वरजी अब्राहामए जाँच लमा अब्राहामइ बिश्‍वासए भरर्न ह्रोंसए च्ह इसहाक ख्रो पिंबर होंइ। परमेश्‍वरजी ओंसोंन् अब्राहामने बाछा फैलेया अब्राहामइ खीए घ्रिदे मुँबै च्‍हए ख्रो पिंबर छेइ,
HEB 11:18 तलेबिस्याँ “इसहाकउँइँलेन् क्हिए सन्तान तब्मुँ,” बिसि परमेश्‍वरजी ओंसोंन् अब्राहामने बिल।
HEB 11:19 छतसि म्हिमैं सिलेया परमेश्‍वरजी धबै सोगों लमिंल् खाँम् बिबै ताँ अब्राहामइ मैंइ, धै क्ह्रोंसेंन चए च्‍ह इसहाकलाइ सिबउँइँले सोगो लमिब् धोंलेन् चइ धबै योंइ।
HEB 11:20 बिश्‍वासउँइँलेन् इसहाकइ चए च्‍ह ‍ङ्हिं याकूब नेरो एसावलाइ लिउँइँ योंबै आशिक पिंइ।
HEB 11:21 बिश्‍वासउँइँलेन् याकूबइ सिबै त्हेर चए च्ह योसेफए च्‍हमैं ङ्हिंलाइ आशिक पिंइ। झाइले चइ छेबै प्हरेए च्होर पत्खु तसि परमेश्‍वरए मिं क्वेइ।
HEB 11:22 बिश्‍वासउँइँलेन् योसेफइ ह्रोंस सिबै त्हेर इस्राएलीमैं मिश्र ह्‍युलउँइँले त्‍होंखबै बारेर्बै ताँ पोंइ। धै “ङए सिनु या मिश्रउँइँले बोयाद्,” बिसि चइ चमैंने बिथेंल।
HEB 11:23 मोशा फिमा बेल्‍ले छ्याँब मुँल। छतसि बिश्‍वासउँइँलेन् मोशाए आबा-आमाइ म्हैंन सोंल् समा चलाइ लोथेंइ। धै म्रुँइ बिबै ताँ या चमैंइ आङिं।
HEB 11:24 फ्रेंसि तबै लिउँइँ बिश्‍वासउँइँलेन् मोशाइ “च फारो म्रुँए च्हमिंए च्‍ह ग,” बिसि बिल् आङिं।
HEB 11:25 पाप लसि तिस्याँदे सुख योंब् भन्दा बरु परमेश्‍वरए म्‍हिमैंने दुःख योंसिन् टिब चइ त्‍हाँइ।
HEB 11:26 मोशाइ मिश्र ह्‍युलर्बै ताँन् सै न्होर योंब् भन्दा ख्रीष्‍टए ल्हागिर आगुइ स्यारलै सैदिइ टिब थेबै ताँ मैंइ, तलेबिस्याँ परमेश्‍वरउँइँले लिउँइँ योंबै इनाम चइ ङ्ह्‍योरिल।
HEB 11:27 बिश्‍वासउँइँलेन् मोशाइ फारो म्रुँए ह्रिसने आङ्हिंन्‍ले मिश्र ह्‍युल पिवाइ, तलेबिस्याँ परमेश्‍वरलाइ आम्रोंलेया म्रोंब् धोंलेन् च भोंसि तइ।
HEB 11:28 काल पखबै स्‍वर्गदूतइ इस्राएलर्बै म्‍हिमैंए च्‍ह थेबालाइ आस्‍यारिगे बिसि मोशाइ बिश्‍वासउँइँलेन् दुःखने फ्रेबै चाडए रोस म्हाँदिइ। चइ इस्राएलर्बै म्‍हिमैंने क्‍युए ख्रो पिंसि चए को म्रार प्राबर ल्हैदिइ।
HEB 11:29 बिश्‍वासउँइँलेन् इस्राएलीमैंइ ओबानो क्ल्ह्‍योर प्रब् धोंले ओल्ग्या मा ङ्युँइ तर्दिइ, दिलेया चमैंलाइ ल्‍हाखबै मिश्रीथेंमैं छलेन् तर्दिबर होंमा ताँन् प्ल्हुँसि सियाइ।
HEB 11:30 बिश्‍वासउँइँलेन् इस्राएलीमैं यरिहो बिबै सहरर ङिख्खे समा स्‍युररिमा यरिहोर्बै गाह्रा फुयाइ।
HEB 11:31 परमेश्‍वरजी बिबै ताँ आङिंबै यरिहो सहरर्बै म्हिमैंलाइ खीजी नास लमा बिश्‍वासउँइँलेन् फ्यालुस्यो राहाब नास आत, तलेबिस्याँ छैं लबर ह्‍याबै इस्राएलीमैंलाइ मान लसि चइ टिल् पिंल।
HEB 11:32 अरू ल्हें ताँ ङइ तो बिले? तलेबिस्याँ परमेश्‍वरए फिर बिश्‍वास लबै स्‍योंम्‍बै म्हिमैं गिदोन्, बाराक, शिमशोन, यिप्‍ता, दाऊद, शमूएल नेरो अगमबक्‍तामैंए बारेर्बै ताँमैं बिबै त्हे तोगो ङने आरे।
HEB 11:33 बिश्‍वासउँइँलेन् नेसि चमैं न्‍होंरि को-कोइइ ह्‍युलमैं ट्होइ, धै ठिक निसाफ लसि परमेश्‍वरजी बाछा फैसि पिंम् बिबै आशिक चमैंइ योंइ। कोइइ सिंहए सुँ म्रुवाइ,
HEB 11:34 कोइइ बेल्‍ले लुँबै मि सैवाइ, कोइ सेलाँइ (तरवारइ) सैल् म्‍हैब्मैंउँइँले जोगेइ, कोइ भों आरेलेया भोंब् तइ, कोइइ ल्हडें लबर भों योंसि अरू ह्‍युलर्बै फौजीमैं ल्‍हावाइ।
HEB 11:35 कोइ च्हमिरिमैंइ खेंमैंए सियाबै म्‍हिमैं सोगों तसि धबै योंइ। कोइ सिबै लिउँइँ झन् बेल्‍ले छ्याँबै अर्को छ्ह योंबै ल्हागिर थेबै दुःख नोइ।
HEB 11:36 कोइलाइ म्हिमैंइ सँउँलिइ फैसि झेलर च्युवाब, बिल्‍लि लब, कोर्राए प्रुब ताँन् सैदिल।
HEB 11:37 चमैंलाइ म्हिमैंइ युँमाइ प्रिंसि सैइ, करौंतिइ क्‍ल्हेइ, सेलाँइ सैवाइ। छले दुःख पिंसि चमैंए सैमैं नोक्‍सान लवाइ। छतसि चमैं ङ्हाँदु तसि र-क्‍युए ट्हुबिमैं खिसि क्याइ खैने माइ खेले प्ररिइ।
HEB 11:38 (चु ह्‍युल चमैं टिबै लायकबै आरेल!) चमैं क्यु आयोंबै क्ल्ह्‍योजरे, कोंजरे, उजरे नेरो रो न्होंजरे टिप्रल् त्‍हुइ।
HEB 11:39 खेंमैंइ लबै बिश्‍वासइ लमा चमैंल छ्याँबै बयन तइ। दिलेया परमेश्‍वरजी बाछा फैसि पिंम् बिबै सै बिस्याँ चमैंइ आयोंल।
HEB 11:40 तलेबिस्याँ परमेश्‍वरजी ङ्योए ल्हागिर झन् छ्याँबै चाँजो लल, धै ङ्योने बालु मत्‍त्रे चमैं पबित्र तरिगे बिब खीए सैं मुँल।
HEB 12:1 ङ्योए खागु च्‍हौ ल्‍हें म्हि साक्षि मुँबइले, ताँन् खालर्बै दुःख नेरो ङ्योलाइ क्होइ थेंबै पाप स्योवासि तौदिबै क्‍ल्‍ह्‍योर आफेन् समा ङ्यो ढुक्‍कले न्हेले।
HEB 12:2 ङ्योए बिश्‍वास सुरु लब नेरो बिश्‍वास पूरा लमिंबै येशूलाइ मत्‍त्रे ङ्ह्‍योले। खीजी लिउँइँ तखबै सुखा मैंसि म्हिमैंइ खीए आब्रु वालेया तो धोंइ आङ्हाँन्ले क्रूसर्बै थेबै दुःख नोमिंइ। धै तोगो खी परमेश्‍वरए राजगद्दिए क्‍योलोउँइँ क्हुँइमुँ।
HEB 12:3 पापि म्‍हिमैंइ खीए बिरोधर पोंबै च्‍हौ ल्‍हें ताँमैं सैदिल् खाँबै येशूलाइ मैंन्, धै आनरल्‍ले ओंसों बडिद्।
HEB 12:4 तलेबिस्याँ पापए बिरोधर नेल् त्हुमा क्हमैं सिलन् त्हुबर आफेइमुँ।
HEB 12:5 परमेश्‍वरजी लोदा सैंदा लमिंबै ताँ क्हेमैंइ म्‍लेवाइ वा? क्हेमैं खीए प्हसेमैं ग। छतसि खीजी बिइ, “ओ ङए च्‍ह, छ्याँबै बानि तरिगे बिसि प्रभुजी क्‍हिलाइ तार झोंल् म्हैमा छेनाले मैंन्, खीजी दण्ड पिंमा सैं च्योंब आलद्।
HEB 12:6 तलेबिस्याँ याहवेहजी म्हाँया लब्‍मैंलाइ छ्याँबै बानि तरिगे बिसि तार झोंम्, धै ह्रोंसजी खोबै प्हसेमैंलाइ खीजी दण्ड पिंम्।”
HEB 12:7 आबाइ तार झोंल् म्हैब् ग बिब् मैंसि क्‍हेमैंइ सैदिद्। परमेश्‍वरजी क्‍हेमैंए फिर प्‍हसेमैंने धोंलेन् ब्यबहार लमुँ। तलेबिस्याँ आबाइ तार आझोंबै प्हसे खाब् तम् रो?
HEB 12:8 छतसि ताँनइ योंबै दण्ड क्‍हेमैंइ आयोंस्याँ क्‍हेमैं आबाए क्ह्रोंसेंन्बै च्‍हमैं आङिं, प्रग्‍यामैं ग।
HEB 12:9 ङ्योए आबामैंइ ङ्योलाइ तार झोंबइले ङ्योइ खेंमैं मान लम् बिस्याँ झन् ङ्योलाइ खोंयोंइ आखाँबै छ्ह पिंबै स्वर्गर्बै परमेश्‍वर आबालाइमि झन ल्हें मान लल् आत्हु वा?
HEB 12:10 ङ्योए आबामैंइ छ्याँब् मैंब् धों तरिगे बिसि ङ्योलाइ तिस्याँदे तार झोंइ। दिलेया परमेश्‍वर आबाजीम् ङ्यो खी धोंबन् पबित्र तसि ङ्योइ आशिक योंरिगे बिसि तार झोंम्।
HEB 12:11 तार झोंबै त्हेर दुःख तम्, दिलेया तार झोंमा सैदिल् खाँब्मैंइ लिउँइँ परमेश्‍वरए उँइँर छ्याँबै केमैं लसि ताँनने क्ह्रिसि टिल् खाँम्।
HEB 12:12 छतसि क्‍हेमैंए पडेयाबै योमैं क्वेद्, धै त्हारबै च्‍हिमैं भोंब् लद्।
HEB 12:13 डुड् प्हले आथुररिगे, बरु सयारिगे बिसि क्हेमैं प्रबै घ्‍याँ सोद् लद्।
HEB 12:14 ताँन् म्‍हिमैंने क्ह्रिब भों लद्, धै पबित्रले छ्ह थोबै सैं लद्। छले छ्ह आथोस्‍याँ खाबज्‍यै या प्रभु म्रोंल् आखाँ।
HEB 12:15 परमेश्‍वरए दयाम्हाँया आयोंब खाबै आतरिगे बिसि न्ह क्रों मि क्रों तद्। आक्ह्रिबै लमा क्हेमैंए न्होंरि फ्रेब् प्ह्राब् आतरिगे। आस्याँ ल्हें म्हिमैं पापर च्होयाब्मुँ।
HEB 12:16 खाबज्यै या आछ्याँबै केमैं आलरिगे धै स्‍योंम्‍बै एसाव धोंबै परमेश्‍वर आम्हैब आतरिगे। चइ तिछोए ल्हागिर ह्रोंसइ योंल् त्हुबै च्ह थेबाए हग त्हेवाइ।
HEB 12:17 लिउँइँ क्रोदै चइ चए आबाने आशिक ह्रिइ दिलेया आबाउँइँले चइ आशिक आयों। तलेबिस्याँ चइ पछुत ललेया च्ह थेबाइ योंबै हग ओंसोंन् चब् तिछोने त्हेवाल। चु ताँ क्हेमैंइ सेइमुँ।
HEB 12:18 स्‍योंम्‍बै इस्राएलीमैं सिनै बिबै कोंउँइँ ह्‍याइ, दिलेया क्‍हेमैं छाबै छुइल् आँखाँबै कोंर आखइमुँ। क्हेमैं लुँरिबै मि, म्‍लोंग्‍या न्‍हाँम्‍स्यो, मिछु खैबर अथवा थेबै नाँ-खैंए चेंदो या आखइमुँ।
HEB 12:19 क्हेमैं बेल्‍ले ङ्‍हेबै त्हुतुरुए चेंदो आखइमुँ, धै थेबै कै घ्रिए चेंदो या क्हेमैं आखइमुँ। च कै थेब्मैंइ “तारे छाबै कै थेल् आत्हुरिगे,” बिसि यो छ्युँ लइ,
HEB 12:20 तलेबिस्याँ “खेदोज्यै या च कों छुइस्याँ, चलाइ युँमाइ ल्हिसि सैद्,” बिबै ताँ चमैंइ सैदिल् आखाँ।
HEB 12:21 चर म्रोंबै सै बेल्‍ले ङ्हिंन् ङ्हाँब मुँल, छतमा मोशाज्यै “ङ ङ्हिंसि त्‍हारइ” बिल।
HEB 12:22 दिलेया क्हेमैंम् सियोन कोंर खइमुँ, सोगों परमेश्‍वरए सहरर, स्‍वर्गर्बै यरूशलेमर, च्योलै आखाँबै स्‍वर्गदूतमैं सैं तोंदै परमेश्‍वरए मिं क्वेबै क्ल्ह्‍योर,
HEB 12:23 स्वर्गर मिं दर्ता तबै च्‍ह थेब्मैंए ङाँर, ताँनए फिर छेनाले निसाफ लबै परमेश्‍वर ङाँर नेरो पबित्र लमिंबै ठिक के लब्मैंए प्ल्हए ङाँर क्हेमैं खइमुँ।
HEB 12:24 छलेन क्हेमैं नेरो परमेश्‍वरए म्हाँजोर छारा बाछा फैमिंबै येशू ङाँर नेरो खीए पबित्र लमिंबै कोए ङाँर खइमुँ। येशूए कोजी हाबिलए कोइ भन्दा अझै छ्याँबै ताँ पोंम्।
HEB 12:25 छतसि न्ह क्रों मि क्रो तद्, ङ्योने पोंबै परमेश्‍वरजी बिब ङिंन्। तलेबिस्याँ चु पृथ्‍बीर्बै म्‍हि मोशाइ बिबै ताँ इस्राएलीमैंइ थेल् आङिंमा चमैं दण्‍डउँइँले स्योल् आखाँ बिस्याँ, झन् स्‍वर्गउँइँले पोंबै परमेश्‍वरजी बिबै ताँ आङिंब्मैं खैले स्योरल् खाँमुँ?
HEB 12:26 च त्हेर परमेश्‍वरए कैइ पृथ्‍बी त्हारल, दिलेया तारे खीजी बाछा फैसि बिइमुँ, “अझै तिखे पृथ्‍बी मत्‍त्रे आङिं, स्‍वर्ग या ङइ लाब्‍मुँ।”
HEB 12:27 “अझै तिखे” बिबै मतलब, लाल् खाँबै सैमैं, अथवा सृष्‍टि तबै सैमैं ताँन् स्‍योवाब्‍मुँ, दिलेया लाल् आखाँबै सैमैं चैरिब्मुँ बिब् ग।
HEB 12:28 छतसि ङ्योइ लाल् आखाँबै ग्याल्स योंबइले परमेश्‍वरलाइ धन्‍यबाद पिंले, धै खीए मान लदै खीने ङ्हिंदै खीजी खोल्‍ले खीए मिं क्वेले।
HEB 12:29 तलेबिस्याँ ङ्योए परमेश्‍वर नास लवाबै मि ग।
HEB 13:1 क्हेमैं घ्रिइ-घ्रिने ह्रोंसए अलिने धोंलेन् म्हाँया लरिद्।
HEB 13:2 आगुए ह्‍युलउँइँले खबै ङो आसेबै म्‍हिमैंलासे या प्ह्रेंमैं धोंले मान लद्, तलेबिस्याँ को-कोइइ छले स्‍याँ म्‍हिमैं मान लमा था आसेल्‍ले स्‍वर्गदूतमैंए मान लइमुँ।
HEB 13:3 कोइ म्हिमैं झेलर मुँस्याँ ह्रोंसै या चमैंने झेलर मुँब् धों ङ्हाँसि चमैंए वास्था लद्। छलेन दुःख योंब्मैं म्रोंमा ह्रोंसइन दुःख योंब् धों ङ्हाँन्। तलेबिस्याँ क्हेमैं फिरै या छ तल् खाँम्।
HEB 13:4 ताँन् म्हिमैंए उँइँर ब्ह्‍या इजेत मुँल्‍ले तल् त्हुम्। ब्ह्‍या लल् खाँबै लिउँइँ मुँयुँमैं खाबज्यै या छमिं न्हल् आत, छलेन च्हमिरिमैंज्यै या फ्रें क्ल्योंल् आत, तलेबिस्याँ छाबै के लब्मैंए फिर परमेश्‍वरजी थेबै दण्ड पिंम्।
HEB 13:5 क्‍हेमैंइ ल्हें मारा-मुइए लोब आलद्। क्हेमैंने मुँबै सैर्न सन्‍तोक तइ टिद्। तलेबिस्याँ परमेश्‍वरजी बिइमुँ, “ङइ क्‍हेमैं खोंयोंइ वाथेंरिब् आरे, ङइ क्हेमैं पिरिब् आरे।”
HEB 13:6 छतसि ङ्योइ ढुक्‍कले बिले, “याहवेहजी ङलाइ ल्होमिंम्, छतसि ङ ङ्हिंरिब् आरे। म्‍हिमैंइ ङलाइ तो लल् खाँमुँ?”
HEB 13:7 ओंसों क्‍हेमैंने परमेश्‍वरए ताँ बिमिंबै अगुवामैं मैंन्। चमैंइ खैले छ्ह थोइ, चमैंए छ्हर तो-तो तइ धै चमैं खैले सिइ बिसि सैंर मैंन्, धै चमैंइ लब् धोंबै बिश्‍वास क्‍हेमैंज्यै या लद्।
HEB 13:8 येशू ख्रीष्‍ट खोंयोंन् बिलै ङ्‍हरि-कुरि आत! खी तेला, तिंयाँ, खोंयोंइ बिलेन् घ्रिन् तरिम्।
HEB 13:9 क्‍हेमैं तब आतबै ताँमैं लोमिंबै म्हिमैंए लिलि आप्रद्। चु चल् तमु, चु चल् आत िबबै ताँ म्हिमैंइ बिबै ताँ मत्‍त्रे ग, बरु परमेश्‍वरए दयाम्हाँयाउँइँले ङ्योइ सैं भोंब् लबै ताँ छ्याँबै मुँ। चु चल् तमु, चु चल् आत िबबै ताँ ङिंब्मैंइ मुक्‍ति आयों, चमैंला बिब् धोंइ तोइ आतइमुँ।
HEB 13:10 ङ्योए ख्रो पिंबै क्‍ल्‍ह्‍यो घ्रि मुँ। चर ख्रो पिंबै सैमैं पबित्र क्ल्ह्‍योर के लबै खेगिमैंइ चबै हग आरे।
HEB 13:11 परमेश्‍वरए सेवा लबै ख्रो पिंबै खेगि क्रथेइ पाप ख्रुबै ल्हागिर मन्‍दिरर्बै “ताँन् भन्दा पबित्र क्‍ल्‍ह्‍योर” खेदोए को पखमल, दिलेया च खेदोए ज्यु बिस्याँ खेंमैंए नाँसए बैरु बोसि मिर ख्रोंवामल।
HEB 13:12 छलेन येशूज्यै खीए ह्रोंसए कोउँइँले म्‍हिमैं पापउँइँले फ्रेमिंसि पबित्र लमिंबै ल्हागिर खिइ या सहरए बैरु दु:ख नोइ।
HEB 13:13 छतसि ङ्यो या सहरउँइँले बैरु खी ङाँर ह्‍याले, धै खीजी सैदिब् धों तबै दुःख ङ्योज्यै सैदिले।
HEB 13:14 तलेबिस्याँ ङ्योए ल्हागिर चुर खोंयोंइ तरिबै सहर आरे। ङ्योम् लिउँइँ तखबै खोंयोंइ बिलै तरिबै सहरए घ्याँ ङ्‍ह्‍योसि टिब्मैं ग।
HEB 13:15 छतसि येशूए मिंउँइँले परमेश्‍वरए सैं तोंबै ख्रो खोंयोंन् बिलै ङ्योइ पिंरिले। “येशू ङए प्रभु ग,” बिब्मैंइ परमेश्‍वरए छ्याँबै बयन लदै पोंस्याँ, चुन् ङ्योइ परमेश्‍वरए मिंर पिंबै ख्रो धों तब् ग। छले ङ्योइ येशू ख्रीष्‍टन् प्रभु ग बिबन् परमेश्‍वरए सैं तोंन् लबै ख्रो ग।
HEB 13:16 घ्रिइ घ्रिने छ्याँबै के लब नेरो ह्रोंसने मुँबै सै फा-फु चुब आम्‍लेद्, तलेबिस्याँ छाबै ख्रोमैं म्रोंसि परमेश्‍वर सैं तोंम्।
HEB 13:17 क्‍हेमैंए अगुवामैंइ बिब ङिंन्, धै खेंमैंए न्होंर टिद्। तलेबिस्याँ “ङइ लबै केए हिसाब परमेश्‍वरलाइ पिंल् त्‍हुम्” बिब सेसि चमैंइ क्‍हेमैंए छैं छेनाले लरिम्। छतसि चु के चमैंइ सैं तोंन्ले लरिगे, गार म्हाँदिसि आङिं। चमैंइ गार म्हाँदिल्‍ले के लस्याँ क्‍हेमैंला तोइ बिब् धों तरिब् आरे।
HEB 13:18 ङिए ल्हागिरै या प्राथना लद। ङिए सैं छ्याँब मुँ बिसि ङिइ सेइमुँ, धै ताँन् के छेनाले लबै सैं ङिल मुँ।
HEB 13:19 ङ यो छ्यु लमुँ, ङ धबै क्‍हेमैं ङाँर युनन् खल् योंरिगे बिसि ङए ल्हागिरै या प्राथना लमिंन्।
HEB 13:20 परमेश्‍वरजी क्युमैंए क्ह्रोंसेंन्बै छैं ङ्योए प्रभु येशूलाइ खोंयोंन् बिलै तरिबै बाछाए कोउँइँले सिबउँइँले धबै सोगों लमिंइ। तारे म्हिमैंलाइ क्ह्रिल् लमिंबै परमेश्‍वरजी
HEB 13:21 क्‍हेमैं ताँनलाइ छ्याँबै गुनइ प्लिंमिंरिगे, धै खीए सैंर मैंब् धों तब क्हेमैंइ लल् खाँरिगे। परमेश्‍वरजी खोबै के येशू ख्रीष्‍टउँइँले खीजी क्हेमैंए म्हाँजोर लरिगे। येशूए मिं खोंयोंन् बिलै थेब तरिगे। आमेन, छान् तरिगे।
HEB 13:22 ओ ङए अलि-अङाँमैं, क्हेमैंए ल्हागिरि ङइ चु रिन्ठि लोदा सैंदाए ताँमैं प्ह्रिइमुँ। गार आम्हाँदिल्‍ले ङिंन् ओ।
HEB 13:23 ङ क्‍हेमैंने चु ताँ या बिम्: ङ्योए अलि तिमोथी झेलउँइँले त्‍होंल् खाँइमुँ। च युनन् ङ ङाँर खइ बिस्‍याँ च बालुन् ङ क्‍हेमैंने त्‍होबर खब्‍मुँ।
HEB 13:24 क्‍हेमैंए ताँन् अगुवामैं नेरो ताँन् बिश्‍वासीमैंने ङिए जय मसीह मुँ बिमिंन्। छलेन इटालिया ह्‍युलर्बै अलि-अङाँमैंज्यै या क्‍हेमैंने जय मसीह बिमिंइमुँ।
HEB 13:25 क्‍हेमैं ताँनने परमेश्‍वरए दयाम्हाँया खोंयोंन् बिलै तरिगे।
JAM 1:1 परमेश्‍वर नेरो प्रभु येशू ख्रीष्‍टए के लबै म्‍हि याकूबउँइँले चु ह्‍युल तिगोंन् प्हुँइ टिबै च्युसे ङ्हिं कुललाइ जय मसीह मुँ।
JAM 1:2 ओ ङए अलि-अङाँमैं, क्‍हेमैंए फिर ल्हें खालर्बै दुःख खमा बेल्‍ले सैं तोंन्।
JAM 1:3 तलेबिस्याँ क्हेमैंए बिश्‍वासए जाँच लबर छाबै दु:ख तमा क्हेमैंइ झन् सैदिल् खाँबै भों योंम् बिसि क्हेमैंइ सेइमुँ।
JAM 1:4 छले सैदिल् खाँबै भों योंबइले खैबै दु:खर्न बिलै क्हेमैं बिश्‍वासर भोंब तसि ढुक्‍काले टिद्।
JAM 1:5 क्‍हेमैंए न्‍होंर खाबलाज्यै बुद्धि चैदिस्याँ ह्रिस आखल्‍ले सैं तों-तोंदै पिंबै परमेश्‍वरने ह्रिरिगे। छले ह्रिस्याँ खीजी पिंब्‍मुँ।
JAM 1:6 छले ह्रिमा चइ तिफुँइ संका आलल्‍ले “ह्रोंसइ ह्रिबै सै परमेश्‍वरजी क्ह्रोंसेंन पिंम्” बिबै सैं मैंरिगे। संका लबै म्हि थेबै खैंइ छाइ-माइ लबै मा ङ्युँइर्बै क्‍युए भेल्‍गा धों तब्मुँ।
JAM 1:7 छाबै संक लबै म्हिइ प्रभुउँइँले तोइ योंम् उ बिसि आमैंलै तम्।
JAM 1:8 तलेबिस्याँ सैं ङ्हिंरि लबै म्हि तो सैरै या केर आफेब् तम्।
JAM 1:9 परमेश्‍वर म्हाँदिबै म्‍हि ङ्हाँदु मुँलेया “परमेश्‍वरजी ङलाइ थेब लमिंइमुँ!” बिसि चइ सैं थेब लरिगे।
JAM 1:10 छलेन प्लबै म्‍हि ङ्हाँदु तयालेया सैं च्योंब् आलरिगे, तलेबिस्याँ म्हि प्ललैया ङ्हाँदु तलैया ट धोंलेन् ङ्योंलोंयाब्मुँ।
JAM 1:11 तलेबिस्याँ त्‍हिंयाँ सार्ले प्रेमा प्हो ङ्योंलोंवाम्, धै ट खारयासि केर आफेब् तयाम्। च धोंलेन् प्लबै म्‍हि या छ लस्यो छु लस्यो ङ्हाँन-ङ्हाँन् सियाम्।
JAM 1:12 खैबै दुःख तलेया तोइ आङ्हाँन्ले ढुक्‍काले टिबै म्हिइ आशिक योंब्मुँ, तलेबिस्याँ बिश्‍वासए जाँच तमा सैदिल् खाँबै म्हिइ लिउँइँ खोंयोंइ आखाँबै छ्ह योंब्मुँ। चु छ्ह परमेश्‍वरजी खीलाइ म्हाँया लब्मैंलाइ पिंम् बिसि बाछा फैइमुँ।
JAM 1:13 जाँच लबर दुःख तमा खाबज्यै या “परमेश्‍वरजी ङलाइ पापर च्होबर दु:ख पिंइ” आबिरिगे, तलेबिस्याँ आछ्याँबै केउँइँले परमेश्‍वरए जाँज तल् आखाँ, खीजी खाबलाज्यै या जाँच आल।
JAM 1:14 दिलेया ह्रोंसए आछ्याँबै सैंइ लमा म्हिमैं पापर च्होम्।
JAM 1:15 छले आछ्याँबै सैंइ म्हिमैंलाइ पाप के लबर ल्हैदिम्। पाप केमैंइ लमा ङ्यो सिल् त्हुम्।
JAM 1:16 छतसि ओ ङए खोबै अलि-अङाँमैं, फाकर्बै ताँ आक्वेंन्:
JAM 1:17 तलेबिस्याँ ताँन् छ्याँबै दान बरदानमैं त्हिंयाँ नेरो लयाँ बनेबै परमेश्‍वरउँइँले युम्। तलेबिस्याँ खी खोंयोंइ ङ्हरि कुरि आत।
JAM 1:18 खीजी बनेबै ताँन् सैमैं न्‍होंर ङ्यो ओंसोंबै रो धों तरिगे बिसि खीए सैंर मैंब् धोंले खीए क्‍ह्रोंसेंन्‍बै ताँउँइँले ङ्यो खीए प्‍हसेमैं तल् पिंइ।
JAM 1:19 ओ ङए खोबै अलि-अङाँमैं, क्हेमैं ताँनइ चु ताँ सेल् त्हुम्, ताँन् म्हिमैं छिट्ले ङेंब, क्हैल्‍ले पोंल् त्हुम्, धै युनन् ह्रिस खल् आत।
JAM 1:20 तलेबिस्याँ ह्रिस खबै म्हिइ परमेश्‍वरए के छेनाले लल् आखाँ।
JAM 1:21 छतसि ताँन् आछ्याँबै ताँ नेरो दुष्‍ट केमैं लब पिवाद्, बरु परमेश्‍वर म्हाँदिसि खीए छ्वेर बिबै ताँ क्हेमैंए सैंर थेंसि च्योंने तद्। छलस्याँ क्‍हेमैं जोगेब्मुँ।
JAM 1:22 दिलेया परमेश्‍वरए छ्वेर बिबै ताँ थेइरि मत्‍त्रे ह्रोंसलाइ आलुद्, चइ बिब् धोंले प्रद्।
JAM 1:23 परमेश्‍वरए छ्वेर प्ह्रिबै ताँ थेलेया चइ बिब् धोंले आप्रबै म्‍हि दर्बनर लि ङ्ह्‍योबै म्‍हि धोंन् तब् ग।
JAM 1:24 तलेबिस्याँ च म्‍हिइ दर्बनर ह्रोंसए लि ङ्ह्‍योसि ह्‍याम्, दिलेया ह्रोंसए लि खैबै मुँ बिसि चइ म्‍लेयाम्।
JAM 1:25 दिलेया परमेश्‍वरए ठिमर्बै ताँमैं छेनाले थेसि चर बिब् धोंलेन् प्रबै म्‍हिइ आशिक योंब्मुँ। तलेबिस्याँ ठिमइ छ्याँबै छ्ह खैले थोल् त्हुम् बिबै ताँमैं लोमिंम्, धै ठिमर्बै ताँमैं आम्‍लेबै म्हि ठिमइ बिब् धोंलेन् लरिम्।
JAM 1:26 खाबज्यै या “ङइ ठिक के लइमुँ” बिमुँ, दिलेया ह्रोंसए सुँइ तो योंमुँ चन् पोंम् बिस्याँ चइ ह्रोंसलाइन लुम्। छाबै म्हिइ ठिक के ललैया चइ लबै के फाकर्न तम्।
JAM 1:27 बरु ङ्योए परमेश्‍वर आबाजी खोबै केमैं चुन् ग: टार-टोरमैं नेरो म्हरेस्योमैंए दुःखर ल्होमिंब, धै ह्रोंसै या चु ह्‍युलर्बै पाप केउँइँले ह्रेंगो टिब।
JAM 2:1 ओ ङए अलि-अङाँमैं, ताँनइ म्हाँदिल् त्हुबै ङ्योए प्रभु येशू ख्रीष्‍टए फिर क्हेमैंइ बिश्‍वास लइमुँ। छतसि क्हेमैंइ खाबलाज्यै आफेलद्।
JAM 2:2 म्‍हि घ्रि माराए च्यामैं नेरो सै ल्हें फेबै छ्याँ-छ्याँबै क्‍वें खिसि क्‍हेमैंए च्हों धिंर खइ, छलेन ङ्हाँदु म्हि या थौनि क्‍वें खिसि खइ बिस्याँ,
JAM 2:3 क्‍हेमैंइ च छ्याँबै क्वें खिबै म्हिलाइ मान लसि “चु छ्याँबै क्‍ल्‍ह्‍योर क्हुँन्” बिम्, दिलेया च ङ्हाँदु म्‍हिने बिस्याँ क्‍हेमैंइ “क्हि चर्न राद्,” अथवा “ङए प्‍हले ङाँर क्हुँन्,” बिम् बिस्याँ,
JAM 2:4 तो क्हेमैंइ ह्रोंसए न्‍होंर्न फेलब नेरो आछ्याँबै सैं प्ह्‍याबै म्हिमैं धों तइ आङिं वा?
JAM 2:5 ओ ङए खोबै अलि-अङाँमैं, ङए ताँ थेद्, परमेश्‍वरजी चु ह्‍युलर्बै ङ्हाँदुमैंलाइ खीए फिर्बै बिश्‍वासर भोंब् लमिंसि स्वर्ग ग्याल्सर्बै हगवालमैं तबर त्हाँब, आङिं वा? खीलाइ म्हाँया लब्‍मैंने चु ग्याल्स पिंम् बिसि खीजी बाछा फैब, आङिं वा?
JAM 2:6 दिलेया क्‍हेमैंइ मि ङ्हाँदुमैंलाइ म्हि आच्हि। क्‍हेमैंलाइ दुःख पिंब्मैं खाब् जा? च प्लब्‍मैंन् आङिं वा? क्‍हेमैंलाइ नियाधिश ङाँर बोब्मैं चमैंन् आङिं वा?
JAM 2:7 ङ्योए प्रभु येशू ख्रीष्‍टए बारेर आछ्याँबै ताँ पोंब्मैं चमैंन् ग। खीए मिंउँइँलेन् क्हेमैं हुइब् आङिं वा?
JAM 2:8 बरु क्‍हेमैंइ परमेश्‍वरए छ्वेर प्ह्रिबै खीए ग्याल्सर्बै ताँमैं छेनाले म्हाँदिसि क्हेमैंइ “ह्रोंसए ङ्‍हेब् ट्हुब्मैंने ह्रोंसलाइन धोंले म्हाँया लद्!” बिबै ताँ ङिंस्याँ क्हेमैंइ छ्याँबै के लब्मुँ।
JAM 2:9 दिलेया क्‍हेमैंइ म्‍हि ङ्ह्‍योसि के लइ बिस्‍याँ क्हेमैंइ पाप लम्, धै छ्वेर्बै ताँउँइँलेन् क्हेमैं छ्याब् मुँबन् तम्।
JAM 2:10 तलेबिस्याँ छ्वेर्बै ताँन् ठिममैं म्हाँदिसि ठिम घ्रि मत्‍त्रे आम्हाँदिबै म्हिइ छ्वेर्बै ताँन् ठिममैं आम्हाँदिब् धोंन् तसि परमेश्‍वरए उँइँर छ्याब् मुँबन् तम्।
JAM 2:11 तलेबिस्याँ “फ्रें आक्ल्योंन्” बिबै परमेश्‍वरजी “सैब्-म्‍लुब् या आलद्” बिइमुँ। छतसि क्‍हिइ फ्रें आक्ल्योंन्ले सैब्-म्‍लुब् लइबिस्‍याँ क्हि छ्वेर्बै ठिम आम्हाँदिबै छ्याब् मुँबन् तइ।
JAM 2:12 परमेश्‍वरए छ्वेर्बै ठिमइ क्हेमैंलाइ आछ्याँबै बानि-बेहोरमैंउँइँले स्योमिंम्, धै च ठिमइ बिब् धोंले क्‍हेमैंए फिर खीजी निसाफ लब्‍मुँ। छतसि च ठिमइ बिब् धोंले तो पोंमुँ तो लमुँ च छेनाले लद्।
JAM 2:13 अरूए फिर ल्हयो आखबै म्‍हिए फिर परमेश्‍वरज्यै या ल्हयो खरिब् आरे। दिलेया अरूए फिर ल्हयो खइ बिस्‍याँ, परमेश्‍वरजी निसाफ लमा क्‍हेमैं फिरै या ल्हयो खमिंब्‍मुँ।
JAM 2:14 ओ ङए अलि-अङाँमैं, खाबज्‍यै या “ङइ परमेश्‍वर म्हाँदिम्” बिलेया, छ्याँबै के आलस्‍याँ चइ बिश्‍वास लब तो केर फेइ? तो चए बिश्‍वासइ परमेश्‍वरए ह्रिसउँइँले चलाइ जोगेल् खाँम्‍मा?
JAM 2:15 अलि-अङाँए न्होंरि खाब् मुँलै खिबै क्वें आरेस्याँ, चब सै या आयोंस्‍याँ,
JAM 2:16 क्‍हेमैंए न्होंरि खाबज्यै चने “छेनाले ह्‍याद्, टोंन्ले टिद्, म्रेंन्ले चद्” मत्‍त्रे बिसि चए चैदिबै सै तोइ आपिंइ बिस्‍याँ, चइ तो योंइ? तोइ आयों।
JAM 2:17 च धोंलेन् परमेश्‍वर म्हाँदिलेया छ्याँबै केमैं आलस्‍याँ चइ परमेश्‍वर म्हाँदिब फाकर्न ग।
JAM 2:18 दिलेया कोइ म्‍हिइ बिलै, “क्हिने प्रे बिश्‍वास मुँ, ङने प्रे केमैं। ल्हु, छबिस्याँ के आलल्‍ले क्‍हिइ लबै बिश्‍वास ङने उँइँन्दि! धै ङइ के लसि ङइ लबै बिश्‍वास क्‍हिने प्रे उँइँब्मुँ।”
JAM 2:19 परमेश्‍वर घ्रि मत्‍त्रे मुँ बिबै ताँ क्‍हिइ क्वेंम्, चम् ङिंबन् ग! मोंमैंज्यै या छलेन् क्वेंम्, धै ङ्हिंसि त्‍हारम्।
JAM 2:20 ओ ताँ आक्होबै म्‍हि! छ्याँबै के आलब्मैंए बिश्‍वास केर आफेब तम् बिसि ङइ क्‍हिने चिनु उँइँरिगे ङ्हाँइमुँ वा?
JAM 2:21 ङ्योए खे अब्राहामइ ह्रोंसए च्‍ह इसहाकलाइ परमेश्‍वरए मिंर ख्रो पिंबर होंइ। छतसि परमेश्‍वरए उँइँर च ठिक के लबै म्हि तइ, आङिं वा?
JAM 2:22 अब्राहामइ बिश्‍वासउँइँलेन् छाबै के लइ। छले चइ लबै केउँइँलेन् चए बिश्‍वास क्ह्रोंसेंन्बै मुँन बिब् सेइ।
JAM 2:23 छले पबित्र छ्वेर छ बिसि पोंबै ताँ पूरा तइ: “अब्राहामइ परमेश्‍वरए फिर बिश्‍वास लइ, छाबै बिश्‍वासइ लमा परमेश्‍वरए उँइँर च ठिक के लबै म्हि तइ।” छतसि अब्राहाम “परमेश्‍वरए थु,” तइ।
JAM 2:24 छतमा खीए फिर बिश्‍वास लब्मैंइ बिश्‍वास मत्‍त्रे आङिं, छ्याँबै केमैं या लल् त्हुमन। छलस्याँ परमेश्‍वरए उँइँर ठिक के लबै म्हिमैं तब् मुँन।
JAM 2:25 छलेन राहाब बिबै फ्यालुस्योज्‍यै या ङ्योए यहूदी ह्रेंए खेमैं यरिहो सहरर छैं लबर ह्‍यामा ह्रोंस ङाँर खबै यहूदीमैंलाइ चब् थुँब् लमिंसि चर्बै म्हिमैंइ था आसेल्‍ले अर्को घ्‍याँउँइँले कुल्मिंइ। छाबै केउँइँलेन् च ठिक ठहर्दिब आङिं वा?
JAM 2:26 छतसि खैले ज्युर प्‍ल्‍ह आरेस्‍याँ म्हि सियामुँ, छलेन छ्याँबै के आलबै बिश्‍वासै या सियाब् धोंन् ग।
JAM 3:1 ओ अलि-अङाँमैं, क्‍हेमैंए न्होंरि ल्‍हें म्‍हिमैं लोमिंबै चिब तल् आम्‍हैद्, तलेबिस्याँ परमेश्‍वरजी निसाफ लमा लोमिंबै चिब्मैंलाइ कडा निसाफ लब्मुँ बिसि क्‍हेमैंइ था सेइमुँ।
JAM 3:2 ङ्यो ताँनइ ल्‍हें गल्तिमैं लम्, दिलेया खाबइ ह्रोंसइ पोंबै ताँर गल्ति आल, चइ ह्रोंसए ताँन् ज्युइ या तार झोंल् खाँम्, धै च क्ह्रोंसेंन्बै छ्याँबै म्हि तम्।
JAM 3:3 ङ्योइ बिब ङिंरिगे बिसि घोडाए सुँर लगाम झोंस्‍याँ ह्रोंसइ खनिर बोदा ङ्हाँमुँ छाइन बोल् खाँम्।
JAM 3:4 ङ्ह्‍योत्ति, क्यु झाजमैं थेबै खैंए भोंइ प्रम्। क्यु झाजमैं थे-थेब मुँलेया च्‍युथिरि ओलेबै सैउँइँले क्यु झाज ओलेबै म्‍हिइ ह्रोंसइ खनि बोदा ङ्हाँमुँ छाइन बोम्।
JAM 3:5 छलेन ङ्योए ले च्युथिरि मुँलेया ङ्योइ तार आझोंस्याँ चइ थे-थेबै ताँ पोंम्। च्‍युथिरि मिइ थे-थेबै क्ह्‍यों (बन) तिस्यादेर्न ख्रोंवाम्।
JAM 3:6 ङ्योए ले या मि धों तब् ग। ज्युर्बै सैमैं न्होंर ङ्योलाइ पापर च्होवाबै सै चुन् ग। चुइ ताँन् ज्यु पापर च्होवाम्। धै ङ्योइ छ्ह थोमा ङ्योए लेइ नर्गए मि धों तसि लल् त्हुबै केमैंर मि त्हवाम्।
JAM 3:7 ह्‍युलर्बै ताँन् खालर्बै खेदो, नमे, प्‍हुरि, ताँगमैं म्‍हिइ तार झोंल् खाँमुँ।
JAM 3:8 दिलेया म्हिए ले खाबज्‍यै या तार झोंल् आखाँ। लेम् बिखइ प्लिंबै तार झोंल् आखाँबै दुष्‍ट सै ग।
JAM 3:9 चु लेउँइँलेन् ङ्योइ ङ्योए प्रभु नेरो परमेश्‍वर आबाए मिं क्वेम्, धै चु लेउँइँलेन् परमेश्‍वरजी बनेबै म्‍हिमैंलाइ गाल् केम्।
JAM 3:10 च सुँउँइन परमेश्‍वरलाइ धन्यबाद पिंब नेरो म्हिमैंलाइ गाल् केब लम्। ओ ङए अलि-अङाँमैं, छ तल् आतमल।
JAM 3:11 मुल घ्रिउँइँले लिंब नेरो काँबै क्‍यु त्‍होंम् रो वा?
JAM 3:12 ओ ङए अलि-अङाँमैं, तुँबु धुँर जैतुनए रो रोल् खाँम्‍मा? धै अँगुरए धुँर तुँबुए रो रोल् खाँम्‍मा? आखाँ! छलेन काँबै क्‍युए मूलउँइँले लिंबै क्‍यु त्होंल् आखाँ।
JAM 3:13 क्हेमैं न्होंर ह्रब्-सेब नेरो ताँ क्‍होबै म्‍हि खाब मुँ? च म्‍हिइ थेब् आप्‍हैंन्‍ले छ्याँबै बानिउँइँले छ्याँबै केमैं लसि उँइँरिगे।
JAM 3:14 दिलेया क्‍हेमैंए सैंर ह्रिस लब, खोंबै सैं मुँइबिस्‍याँ छाबै ताँर आप्हैंन्। छाबै ताँर थेब प्हैंस्याँ क्हेमैंइ क्ह्रोंसेंन्बै ताँ थोम्।
JAM 3:15 छाबै के परमेश्‍वरउँइँले योंबै ह्रब्-सेबै ताँ आङिं। दिलेया चु ह्‍युलर्बै, ङ्योए आछ्याँबै सैंउँइँले खब नेरो शैतान बिबै दुष्‍टउँइँले खबै ताँ ग।
JAM 3:16 तलेबिस्याँ म्हिमैंइ आगुए फिर ह्रिस लब, खोंसि ल्हें किंल् म्‍हैस्याँ चर सैं आक्ह्रिसि म्हिमैंइ दुष्‍ट केमैं लम्।
JAM 3:17 दिलेया परमेश्‍वरजी ह्रब्-सेबै लमिंबै म्‍हिए सैं छ्याँब तम्, धै चइ आक्ह्रिब्मैं क्ह्रिमिंब, आगुए फिर ल्हयो खब, च्हैंसि मैंसि के लब, दयाम्हाँया लब, छ्याँबै केमैं लब, खाबै आफेलल्‍ले क्ह्रोंसेंन्बै ताँ लब तम्।
JAM 3:18 छले क्ह्रिल् लबै म्‍हिमैंइ क्ह्रिबै ताँ पोंसि ठिक केमैंए रो योंम्।
JAM 4:1 क्‍हेमैंए न्‍होंरि प्होंगि कैगि खनिउँइँले खमुँ? च ताँन् केमैं सयल थोदा ङ्हाँबै सैंउँइँले खम्, आङिं वा? छाबै सयल थोबै ताँ क्‍हेमैंए सैंर खोंयोंइ बिले तरिम्।
JAM 4:2 क्‍हेमैंइ योंरिगे ङ्हाँबै सै योंल् आखाँ। छतसि क्‍हेमैं ह्रों-ह्रोंसए न्होंर्न सैब् म्‍लुब लमुँ, लोब लमुँ, प्होंगि कैगि लमुँ। ह्रोंसलाइ चैदिबै सै परमेश्‍वरने आह्रि, छतसि क्हेमैंइ आयों।
JAM 4:3 धै क्‍हेमैंइ परमेश्‍वरने ह्रिलेया आयों, तलेबिस्याँ क्‍हेमैंइ ह्रोंसए सयल थोबै ल्हागिर मत्‍त्रे आछ्याँबै सैंइ ह्रिम्।
JAM 4:4 ओ ब्यभिचारिमैं, चु ह्‍युलर्बै आछ्याँबै सैए फिर क्हेमैंए सैं ह्‍यास्याँ क्‍हेमैं परमेश्‍वरए ताँ आङिंब्मैं तम् बिब क्हेमैंइ आसे वा? परमेश्‍वर आम्हाँदिब्‍मैंने प्रबै म्हिइ ह्रोंसलाइन परमेश्‍वरए शत्तुर लवाम्।
JAM 4:5 “ङ्योए न्होंर परमेश्‍वरजी थेंमिंबै प्ल्हइ आछ्याँबै सैमैं ङ्योए न्होंर टिब तिफुँइ आसैदि,” बिसि परमेश्‍वरए छ्वेर बिबै ताँ क्हेमैंइ स्योलि धों ङ्हाँइमुँ वा?
JAM 4:6 दिलेया खीजी अझै दयाम्हाँया लम्। छतसि परमेश्‍वरए छ्वेर छले बिइमुँ, “थेब् प्हैंब्मैंलाइ खीजी आखो, दिलेया च्योंने तब्मैंए फिर दयाम्हाँया लम्।”
JAM 4:7 छतसि परमेश्‍वरजी बिब ङिंन्, दुष्‍टए ताँ आङिंन्। छलस्याँ दुष्‍ट क्‍हेमैंउँइँले न्हेह्‍याम्।
JAM 4:8 क्हेमैंए सैं परमेश्‍वर ङाँइ एद्, झाइले परमेश्‍वरै या क्‍हेमैं ङाँर खब्‍मुँ। ओ पापिमैं! आछ्याँबै के लब् पिसि छ्याँबै के लद्। सैं ङ्हिंरि लब्मैं! क्हेमैंए सैं छ्याँब लद्।
JAM 4:9 क्हेमैं बेल्‍ले न्हुँ लद्, धै क्रोद्। क्हेमैं निस्योब्मैं शोक लद्, सैं तोंब्मैं सैं आतोंन्।
JAM 4:10 ह्रोंसलाइ प्रभुए उँइँर च्‍योंब लद्, धै खीजी क्‍हेमैं थेब लमिंब्‍मुँ।
JAM 4:11 ओ अलि-अङाँमैं, क्हेमैंइ घ्रिइ घ्रिए बारेर आछ्याँबै ताँ आलद्। प्रभु म्हाँदिबै अलि-अङाँमैंए बारेर आछ्याँबै ताँ बिसि छ्याब् ल्हैदिबै म्हि परमेश्‍वरए ठिमर्बै ताँ थोम्। छलस्याँ परमेश्‍वरए ठिमलाइ छ्याब् ल्हैदिम्। छले क्हिइ “परमेश्‍वरए ठिम ठिक आरे” बिसि ताँ थोस्याँ, क्हि परमेश्‍वरए ठिम म्हाँदिबै म्हि आङिं, बरु क्हिम् “ठिम ठिक आरे” बिबै म्हि ग तइ।
JAM 4:12 ठिम पिंब नेरो निसाफ लबै परमेश्‍वर घ्रि मत्‍त्रे मुँ, खीजी जोगेलै खाँम्, सैलै खाँम्। छतसि ह्रोंसए ङ्‍हेब् ट्हुब्मैंए फिर छ्याब् ल्‍हैदिब क्हि खाब् जा?
JAM 4:13 “तिं-प्‍हन्हाँ खोंयों मुँले या ङि सहर घ्रिर ह्‍यामुँ धै चर तिंदिं दे टिसि छों लसि नफा लब्मुँ,” बिबै म्हिमैं, ङए ताँ थेद्!
JAM 4:14 प्हँना तो तम् क्हेमैंइ आसे। क्हेमैंए छ्ह तो मुँ रो? क्हेमैंम् न्हाँम्स्‍यो धों तब् ग। च न्हाँम्स्‍यो तिस्याँदे म्रोंबै तोंदोंन् म्‍हयाम्।
JAM 4:15 बरु “प्रभुए सैं मुँस्याँ ङि सोसि छ लब्मुँ छु लब्मुँ,” बिसि क्हेमैंइ बिल् त्हुमल।
JAM 4:16 दिलेया तोगो क्‍हेमैं ह्रों-ह्रोंसन् ह्रब् प्हैंसि चाँजो लम्। छाबै प्हैंबै ताँमैं ताँन् आछ्याँब् ग।
JAM 4:17 छतसि ठिक के लल् ह्रसेया आलबै म्हिइ पाप लम्।
JAM 5:1 ओ प्लबै म्‍हिमैं, ङए ताँ थेद्। क्‍हेमैंए फिर तखबै दुःख मैंसि बेल्‍ले न्हुँ लसि क्रोद्।
JAM 5:2 क्‍हेमैंए सै न्होर क्राँयाइमुँ, धै क्‍हेमैंए क्‍वेंमैं प्‍हुलुँइ चवाइमुँ।
JAM 5:3 क्‍हेमैंए मारा चाँदि साँथेंसि खैर खइमुँ। छले साँथेंबै मारा चाँदिर मुँबै खैरइन क्‍हेमैं मुइ पैसाए म्हाँया लब्‍मैं मुँन बिसि ग्वाइ पिंब्‍मुँ। छले साँथेंबै सै न्होरइन मिइ ख्रोंवाब् धोंले क्हेमैंलाइ ख्रोंवाब्‍मुँ। तलेबिस्याँ नुयाबै त्हिंइए ल्हागिरि क्‍हेमैंइ सै न्होर साँथेंइमुँ।
JAM 5:4 म्रोंर के लबै म्रोंमैंलाइ पिंल् त्हुबै नों सै क्‍हेमैंइ आपिंइमुँ। च नों सैइ क्हेमैंए फिर छ्याब् ल्हैदिइमुँ। ताँन् भन्दा थेबै भों मुँबै परमेश्‍वरजी क्‍हेमैंए म्रोंमैंए सैं क्रोब थेल् खाँइमुँ।
JAM 5:5 क्‍हेमैं चु पृथ्‍बीर बेल्‍ले सयल थोसि सैंर मैंब् धोंले छ्ह थोइमुँ। ख्रो पिंबै त्हिंइर सैबै ल्हागिर छोल्‍ले न्‍हथेंबै क्यु धोंले क्‍हेमैं छोइमुँ।
JAM 5:6 क्‍हेमैंए न्होह्रों आलबै छ्याब् आरेबै म्‍हिलाइ छ्याब मुँ बिसि क्हेमैंइ सैवाइमुँ।
JAM 5:7 छतसि ओ अलि-अङाँमैं, प्रभु आयुन् समा ढुक्‍काले टिद्। ताँ घ्रि बिले, म्रों रुँइँसि म्‍हिइ बालि आखुन् समा ढुक्‍काले टिरिम्। चइ आरुँइँन् समा बर्ख नेरो सर्खर्बै नाँ युब पैंरिम्।
JAM 5:8 च धोंलेन् क्‍हेमैं या ह्रेसि टिरिद्। ह्रोंसए सैं भोंब् लद्, तलेबिस्याँ प्रभु येशू युनन् युब्मुँ।
JAM 5:9 छतसि ओ अलि-अङाँमैं, परमेश्‍वरजी क्‍हेमैंलाइ सजैं आपिंरिगे बिसि खाबज्‍यै या घ्रिइ घ्रिए बारेर ताँ आलद्। निसाफ लबै परमेश्‍वर म्राग्याँर्न मुँ।
JAM 5:10 ओ अलि-अङाँमैं, स्‍योंम्‍बै परमेश्‍वरए ताँ पोंबै म्हिमैंए बारेर सैंर मैंन्। चमैंए फिर दुःख तलेया सैदिसि टिब् धोंले क्हेमैं या टिद्।
JAM 5:11 च आङ्हिंन्ले दुःख सैदिबै म्‍हिमैंने ङ्योइ ङ्‍हो सब्मैं बिम्। स्‍योंम्‍बै अय्यूब बिबै म्‍हिइ सैदिबै दु:ख नेरो प्रभुजी लिउँइँ चए फिर ल्हें आशिकइ प्लिंमिंइ बिबै ताँ या क्‍हेमैंइ थेइमुँ। छतसि प्रभुजी दयाम्हाँया लम् बिबै या ङ्योइ सेइमुँ।
JAM 5:12 ओ अलि-अङाँमैं, ताँन् भन्दा थेबै ताँ चुन् ग: स्‍वर्ग, पृथ्‍बी नेरो अरु तोइ सैए मिंर कसम आचद्। बरु ह्रोंस छ्याब आरेब् तबै ल्हागिर क्ह्रोंसेंन्बै ताँ मुँस्याँ “ङिंबन्” बिद्, आङिंबै ताँ मुँस्याँ “आङिं” मत्‍त्रे बिद्। खै तमुँ, छान् बिद्।
JAM 5:13 क्‍हेमैंए न्‍होंरि खाबलाज्यै या दुःख तइमुँ वा? चइ प्राथना लरिगे। खाबै या सैं तोंरिइमुँ वा? सैं तोंरिइमुँ बिस्याँ चइ प्रभुए मिंर क्वे प्रिंरिगे।
JAM 5:14 तो क्‍हेमैं न्‍होंरि खाबै या नइमुँ वा? नइमुँ बिस्याँ चइ परमेश्‍वर म्हाँदिब्मैं न्‍होंर्बै चिबनाँब्मैं हुइल् त्‍हुम्, धै चमैंइ च नबै म्‍हिलाइ प्रभुए मिंर छ्युगु फोसि प्राथना लमिंरिगे।
JAM 5:15 छले बिश्‍वास लसि लबै प्राथनाइ नबै म्‍हि सब्‍मुँ। धै प्रभुजी चए नब सल् लमिंम्, झाइले चइ पाप लइमुँ बिस्याँ चइ क्षमा योंब्‍मुँ।
JAM 5:16 छतसि क्‍हेमैं घ्रिइ घ्रिने ह्रों-ह्रोंसए पाप आलोद्, पाप लइमुँ बिस्याँ लइमुँन् बिद्। झाइले क्हेमैं सबै ल्हागिर घ्रिइ घ्रिए ल्हागिर प्राथना लद्। छ्याब आरेबै म्हिइ लबै प्राथनार शक्ति मुँ, छतसि चइ के लम्।
JAM 5:17 स्‍योंम्‍बै एलिया बिबै म्‍हिए ताँ मैंन्। च ङ्यो धों तबै म्‍हिन् मुँल। दिलेया चइ नाँ आयुरिगे बिसि सैं न्होंउँइँलेन् प्राथना लमा सोंदिं से म्हैंन ट्हुल् समा च ह्‍युलर नाँ आयुल।
JAM 5:18 लिउँइँ धबै नाँ युरिगे बिसि चइ प्राथना लमा मुउँइँले नाँ युसि सउँइँले या प्लुमैं म्‍लोसि रा-रोमैं रोइ।
JAM 5:19 ओ अलि-अङाँमैं, क्‍हेमैं न्‍होंरि खाबज्यै क्ह्रोंसेंन्बै घ्‍याँ पिवामा खाबज्यै धबै चलाइ बिश्‍वासर एपखस्याँ,
JAM 5:20 चइ चु ताँ था सेरिगे: पापि घ्रिलाइ चए आछ्याँबै घ्‍याँउँइँले एपखबै म्हिइ चलाइ सिबउँइँले जोगेमिंब्मुँ, धै चए ताँन् पापमैं क्षमा तब्मुँ।
1PE 1:1 येशू ख्रीष्‍टजी कुल्मिंबै चेला चिब ङ पत्रुसउँइँले पोन्टस, गलातिया, कापाडोकिया, एशिया नेरो बिथिनिया तिगोंन् प्हुँइ टिब्मैंलाइ जय मसीह मुँ!
1PE 1:2 येशू ख्रीष्‍टजी बिबै ताँ क्हेमैंइ ङिंसि खीए कोजी ख्रुमिंसि पबित्र प्ल्हउँइँले चोखो तबै ल्हागिर परमेश्‍वर आबाजी क्हेमैंलाइ स्योंमन् त्हाँल। क्हेमैं ताँनए फिर परमेश्‍वरए दयाम्हाँया नेरो शान्ति खोंयोंन् बिलै ल्हें ततै ह्‍यारिगे।
1PE 1:3 ङ्योए प्रभु येशू ख्रीष्‍टए आबालाइ ङ्योइ धन्‍यबाद पिंल् त्हुम्! तलेबिस्याँ खीए शक्‍तिजी येशू ख्रीष्‍टलाइ सिबउँइँले धबै सोगों लमिंबइले ङ्योइ छारा छ्ह योंइ। छतसि ङ्योइ खोंयोंन् बिलै परमेश्‍वरने टिल् योंबै क्ह्रोंसेंन्बै आशा योंइमुँ।
1PE 1:4 स्वर्गर क्हेमैंए ल्हागिर साँथेंबै आशिक खोंयोंइ नास आतब, खोंयोंइ आङ्योंलोंब बेल्‍ले छ्याँब मुँ।
1PE 1:5 क्‍हेमैंइ परमेश्‍वर फिर बिश्‍वास लइ। छतसि खीए शक्‍तिउँइँले क्‍हेमैंइ चु आशिक योंबै ल्हागिर खीजी क्हेमैंलाइ जोगेसि थेंइमुँ। च आशिक चु ह्‍युल नुयाबै त्हिंइर खीजी उँइँमिंब्‍मुँ।
1PE 1:6 छतसि तोगो तिस्या क्हेमैंइ ल्हें खालर्बै दुःख भुँदिल् त्‍हुलेया क्हेमैं सैं तोंरिद्।
1PE 1:7 च दुःखमैं तले तम् बिस्याँ क्‍हेमैंइ छेनाले बिश्‍वास लन उ आलन बिसि तब् ग। मारा मिर ख्रोंसि जाँच लब् धोंले क्‍हेमैंलाज्यै या जाँच लब् ग, दिलेया क्‍हेमैंए बिश्‍वास नास तयाबै मारा भन्दा सै ल्हें फेम्। छतसि येशू ख्रीष्‍ट एयुबै त्हिंइर क्‍हेमैंए बिश्‍वास बेल्‍ले छ्याँब तसि क्हेमैंइ स्याबासि, मान नेरो छ्याँबै बयन योंब्मुँ।
1PE 1:8 क्‍हेमैंइ येशू ख्रीष्‍टलाइ खोंयोंइ आम्रोंइमुँ, दिलेया खीलाइ म्हाँया लरिइमुँ। खीलाइ तोगो आम्रोंलेया खीए फिर बिश्‍वास लइमुँ। धै बेल्‍ले सैं तोंरिइमुँ,
1PE 1:9 तलेबिस्‍याँ क्‍हेमैंइ परमेश्‍वरए फिर बिश्‍वास लबइले क्हेमैंइ मुक्‍ति योंइमुँ।
1PE 1:10 परमेश्‍वरजी क्‍हेमैंलाइ पिंबै चु मुक्‍तिए बारेर स्योंम्बै अगमक्‍तामैंज्यै या क्होल् म्हैल, धै परमेश्‍वरजी क्‍हेमैंलाइ पिंबै दयाम्हाँयाए बारेर ताँ पोंइ।
1PE 1:11 अगमबक्‍तामैंइ चु खैले तम् खोंयों तम् बिसि क्होल् म्हैरिल। ख्रीष्‍टजी ल्हें दु:ख नोल् त्हुब्मुँ धै लिउँइँ थेबै मान योंब्मुँ बिसि ओंसोंन् ख्रीष्‍टए प्ल्हजी चमैंलाइ उँइँमिंल।
1PE 1:12 चमैंने उँइँमिंबै ताँ चमैंए ल्हागिर आङिं, चमैंइ क्‍हेमैंए सेवा लरिल बिसि परमेश्‍वरजी सेल् पिंइ। धै चु ताँ स्वर्गउँइँले कुल्मिंबै पबित्र प्ल्हउँइँले क्हेमैंने सैं तोंबै ताँ बिमिंबै म्हिमैंउँइँले क्हेमैंइ थेइमुँ। स्‍वर्गदूतमैंज्यै या चु ताँ था सेदा ङ्हाँइमुँ।
1PE 1:13 छतसि च्हैंब् मैंब् लद्, न्ह क्रों मि क्रों तद्। येशू ख्रीष्‍ट धबै स्‍वर्गउँइँले युमा क्हेमैंइ योंबै दयाम्हाँयार क्ह्रोंसेंन्बै आशा थेंन्।
1PE 1:14 क्‍हेमैं परमेश्‍वरए ताँ ङिंबै प्‍हसेमैं तबइले ओंसों येशूलाइ ङो आसेमा लबै आछ्याँबै केमैं तारे आलद्।
1PE 1:15 क्‍हेमैंलाइ हुइबै परमेश्‍वर पबित्र मुँ, छतसि क्हेमैं या ह्रोंसए छ्हर तोन्दोंरि सैर पबित्र तद्।
1PE 1:16 तलेबिस्याँ ठिमर छले प्ह्रिइमुँ, “क्हेमैं पबित्र तद्, तलेबिस्याँ ङ पबित्र मुँ।”
1PE 1:17 म्हिमैंइ लबै के ङ्‍ह्‍योसि खाबै आफेलनाले निसाफ लबै परमेश्‍वरलाइ आबा बिसि प्राथना लम् बिस्याँ, चु ह्‍युलर टिबै छ्ह तिगोंन् परमेश्‍वरने ङ्हिंसि टिद्।
1PE 1:18 क्‍हेमैंए खेमैंउँइँले खबै स्योलिबै रोसउँइँले क्‍हेमैंलाइ फ्रेमिंबर तो सै फोसि क्हेमैंलाइ खामिंइमुँ बिसि क्हेमैंइ सेइमुँ। मारा चाँदि धोंबै नास तबै सैमैंउँइँले आङिं,
1PE 1:19 दिलेया तोइ खोट नेरो तोइ छ्याब् आरेबै क्यु झज धों तसि ख्रीष्‍टजी को पिंसि क्हेमैंलाइ खामिंइमुँ।
1PE 1:20 परमेश्‍वरजी ह्‍युल बनेब् भन्दा ओंसोंन् ख्रीष्‍टलाइ त्‍हाँल, दिलेया क्हेमैं जोगेबै ल्हागिर चु नुखबै त्हेर खी युइ।
1PE 1:21 क्‍हेमैंइ ख्रीष्‍टउँइँले परमेश्‍वरए फिर बिश्‍वास लइ। परमेश्‍वरजी ख्रीष्‍टलाइ सिबउँइँले धबै सोगों लमिंसि बेल्‍ले थेबै मान पिंइ, छतसि क्‍हेमैंइ परमेश्‍वरए फिर बिश्‍वास नेरो आशा थेंल् खाँइ।
1PE 1:22 क्‍हेमैंइ क्ह्रोंसेंन्बै परमेश्‍वर म्हाँदिसि ह्रोंसलाइ चोखो लबइले, ह्रोंसए आघें अलिलाइ आफेलनाले म्हाँया लद्, धै घ्रिइ घ्रिलाइ सैं न्होंउँइँलेन् म्हाँया लद्,
1PE 1:23 तलेबिस्याँ क्‍हेमैंइ परमेश्‍वरए खोंयोंइ तरिबै सोगों बचनउँइँले खोंयोंइ आखाँबै छ्ह योंइमुँ। चु छ्ह क्‍हेमैंए आबा-आमाउँइँले योंब आङिं, खोंयोंन् बिलै तरिबै सोगों बचनउँइँले छारा तसि क्‍हेमैं फिइमुँ।
1PE 1:24 तलेबिस्याँ छ्वेर छले प्ह्रिइमुँ, “ताँन् म्‍हिमैं छि धों तब् ग, म्‍हिए ज्यु कति छ्याँब मुँलेया ट धों तब् ग। छि ङ्योंलोयाम् धै टै या खारयाम्।
1PE 1:25 दिलेया परमेश्‍वरए बचन खोंयोंन् बिलै तरिम्।” क्‍हेमैंने बिमिंबै सैं तोंबै ताँ चुन् ग।
1PE 2:1 छतसि क्‍हेमैंइ ताँन् खालर्बै स्योलिबै छलु-म्हिलुए ताँमैं, ह्रिस लब, आगु स्यारब नेरो आछ्याँबै केमैं लब पिवाद्।
1PE 2:2 बरु भर्खर फिबै कोलोमैंइ ङ्‍हे म्हैब् धोंले सैं भोंब् लमिंबै परमेश्‍वरए ताँ म्हैद्। छ लस्याँ परमेश्‍वरए फिर लबै क्हेमैंए बिश्‍वास बडिदै ह्‍याल् खाँब्मुँ।
1PE 2:3 तलेबिस्याँ परमेश्‍वरजी बेल्‍ले म्हाँया लम् बिसि क्‍हेमैंइ सेल् खाँइमुँ।
1PE 2:4 छतसि प्रभु येशू ङाँर ह्‍याद्। खी खोंयोंइ तरिबै पारा धों तब् ग। म्हिमैंइ खीलाइ आक्वेंसि तो धोंइ आङ्हाँलैया खी परमेश्‍वरजीन् त्हाँब नेरो योंसे योंल् आखाँब मुँ।
1PE 2:5 छतसि क्हेमैं या येशू ख्रीष्‍टउँइँले परमेश्‍वरजी खोबै सैंर्बै ख्रो पिंबै ल्हागिर पबित्र खेगिमैं तसि खोंयोंइ तरिबै पारा धोंले पबित्र प्ल्ह टिबै धिं बनेदै ह्‍याद्।
1PE 2:6 तलेबिस्याँ छ्वेर छले प्ह्रिइमुँ: “सियोन बिबै मन्‍दिरए तेंर ङजीन् त्हाँबै सै लसे लल् आखाँब थेबै क्र युमाँ घ्रि ङइ थेंइमुँ। छतसि खीए फिर बिश्‍वास लब्मैं खोंयोंइ या फापिल् त्हुरिब् आरे।”
1PE 2:7 छतसि क्हेमैं बिश्‍वास लब्मैंए ल्हागिर च युमाँ बेल्‍ले थेब सै लसे लल् आखाँब मुँ, दिलेया बिश्‍वास आलब्मैंए ल्हागिर बिस्याँ, “धिं बनेब्मैंइ केर आफे बिसि भ्योंवाबै युँमान् तेंर्बै क्र युँमा तइ।”
1PE 2:8 अर्को क्ल्ह्‍योरै या छ बिइमुँ, “च युमाँ खीए फिर बिश्‍वास आलब्मैंलाइ थुरल् लबै युँमा धै प्हलेर्न कुरल् लबै युँमा ग।” तलेबिस्याँ चमैंइ परमेश्‍वरए छ्वेर्बै ताँमैं आक्वें। छतसि चमैं थुरम् धै नास तयाम्। चमैंए ल्हागिरि छान् तबर तोक्दिल।
1PE 2:9 दिलेया क्‍हेमैं छ आत, तलेबिस्याँ क्‍हेमैं परमेश्‍वरजी त्‍हाँबै कुल ग, परमेश्‍वर म्रुँए ख्रो पिंबै खेगिमैं, पबित्र ह्रें नेरो परमेश्‍वरए म्हिमैं ग। तलेबिस्याँ क्‍हेमैंइ “परमेश्‍वरए शक्‍ति ताँन् भन्दा थेब मुँ” बिसि उँइँमिंरिगे बिसि खीजी क्‍हेमैंलाइ मिछु खैबउँइँले तेसि खीए थेबै ह्‍वेर पखइ।
1PE 2:10 ओंसों क्‍हेमैं परमेश्‍वरए म्हिमैं आतल, दिलेया तिंजोरो क्हेमैं खीए म्हिमैं तइमुँ। ओंसों क्हेमैंइ परमेश्‍वरए म्हाँया आयोंल, दिलेया तिंजोरो क्‍हेमैंइ परमेश्‍वरए म्हाँया योंइमुँ।
1PE 2:11 ओ ङए खोबै थुमैं, ङ क्हेमैंने यो छ्युँ लमुँ, क्‍हेमैंइ चु ह्‍युलर ङम् तिस्याबै प्ह्रें धों तब् मत्‍त्रे ग बिब् सेसि आछ्याँबै इच्‍छाउँइँले स्‍यो तद्, तलेबिस्याँ छाबै इच्‍छाजगोइ क्‍हेमैंए सैंलाइ न्होंवाम्।
1PE 2:12 बरु क्‍हेमैं येशूए फिर बिश्‍वास आलब्‍मैंए उँइँर छ्याँबै छ्ह थोद्। म्हिमैंइ क्‍हेमैंलाइ आछ्याँबै के लब्मैं बिसि क्हेमैंए बिरोधर पोंलेया क्हेमैंए छ्याँबै के चमैंइ म्रोंरिगे धै प्रभु येशू युबै त्हिंइर चमैंइ परमेश्‍वरए मिं क्वेरिगे।
1PE 2:13 छतसि प्रभुए मिं आह्‍यारिगे बिसि म्हिमैंइ थेंबै शासकमैं नेरो म्रुँए न्होंर टिद्।
1PE 2:14 दुष्‍ट के लब्मैंलाइ दण्ड पिंबर नेरो छ्याँबै के लब्मैंलाइ मान पिंबर परमेश्‍वरजी चमैंलाइ खटिदिइमुँ।
1PE 2:15 तलेबिस्याँ क्हेमैंइ दुष्‍ट म्हिमैंए उँइँर छ्याँबे के लसि आमादुमैंए सुँ म्रुल् त्हुम् बिब परमेश्‍वरए सैं मुँ।
1PE 2:16 क्‍हेमैं आछ्याँबै सैउँइँले फ्रेमिंबै म्हिमैं धोंले छ्ह थोद्। दिलेया आछ्याँबै सैउँइँले फ्रेमिंबै म्हिमैं ग बिसि ठिमए बिरोधर्बै केमैं आलद्। बरु परमेश्‍वरए के लबै म्हिमैं धोंले छ्ह थोद्।
1PE 2:17 ताँन् म्‍हिमैंलाइ मान लद्। येशूए फिर बिश्‍वास लबै अलि अङाँमैंलाइ म्हाँया लद्, परमेश्‍वरने ङ्हिंन्, धै म्रुँलाइ मान लद्।
1PE 2:18 ओ केब्छैंमैं, ह्रोंसए क्ल्हेए न्होंर टिसि मान लद्। क्हेमैंए फिर ल्हयो खबै क्ल्हेए न्होंर मत्‍त्रे टिब आङिं, ह्रोंसए फिर ल्हयो आखबै क्ल्हेए न्होंरै या टिद्।
1PE 2:19 परमेश्‍वरलाइ मैंसि अनिय नेरो दुःख सैदिब्मैं म्रोंसि खी सैं तोंम्।
1PE 2:20 तलेबिस्याँ क्‍हेमैंइ आछ्याँबै के लसि आगुइ धोंवासि सैदिस्याँ चुर थेबै ताँ तो तइ रो? आछ्याँबै के लसेरो आगुइ धोंबन् तइगोंन् आङिं वा? दिलेया क्हेमैंइ छ्याँबै के लसेया दुःख भुँदिल् त्हुमा तोइ आङ्हाँनले सैदिस्याँ क्‍हेमैं म्रोंसि परमेश्‍वर सैं तोंम्।
1PE 2:21 छाबै खालर्बै दुःख सैदिबै ल्हागिर्न खीजी क्‍हेमैंलाइ त्‍हाँब् ग। ख्रीष्‍टजी क्‍हेमैंए ल्हागिरि नमुना तसि थेबै दुःख सैदिइ, क्हेमैं खीए म्‍हैर्न प्रल् त्हुम्।
1PE 2:22 खीजी तोइ पाप आल, खीजी खोंयोंइ या स्‍योर आते।
1PE 2:23 खीए फिर म्हिमैंइ तब आतब बिसि खीए आब्रु वासेया खीजी चमैंने खि आकिं। खीए फिर दुःख पिंब्मैंलाज्यै या खीजी धम्कि आपिं। बरु छेनाले निसाफ लबै परमेश्‍वरए फिर खीजी भर थेंइ।
1PE 2:24 ङ्यो पापए ल्हागिर सिसि आछ्याँबै के लब् पिसि छ्याँबै के लदै छ्ह थोरिगे बिसि ङ्योइ लबै पापए सजैं खीए ज्युर नोसि ख्रीष्‍ट क्रूसर सिमिंइ। खीजी चबै चोटउँइँलेन् क्‍हेमैं सयाइमुँ।
1PE 2:25 क्‍हेमैं क्युमैं धोंले घ्‍याँ फ्ल्येसि प्ररिल। दिलेया तारेम् क्हेमैंलाइ जोगेमिंबै प्ह्रोंछैं ङाँर क्हेमैं एखइमुँ।
1PE 3:1 ओ च्हमिरिमैं, ह्रोंसए प्‍युँए न्होंर टिद्। तलेबिस्याँ कोइ च्हमिरिए प्‍युँ परमेश्‍वरउँइँले खबै सैं तोंबै ताँ थेल् आङिंलेया क्हेमैंए छ्याँबै बानि ब्योर म्रोंसि चमैंए सैं एब्‍मुँ। क्हेमैंइ तोइ बिल् आत्‍हु,
1PE 3:2 तलेबिस्याँ क्हेमैंइ परमेश्‍वरलाइ छेनाले म्हाँदिसि छ्याँबै बानि लब् म्रोंसि चमैंए सैं एब्‍मुँ।
1PE 3:3 क्‍हेमैं छ्याँब् म्रोंरिगे बिसि सै ल्हें फेबै क्‍वें नेरो घाँनामैं खिसि क्र सिंङ्गार्दिसि प्रब आङिं।
1PE 3:4 बरु क्हेमैंए सैंर आगुए फिर खोंयोंन् बिलै छ्याँब मैंन्। ह्रोंसए प्‍युँलाइ कच कच आलद्, खीने सैं क्‍ह्रिसि टिद्, छलब परमेश्‍वरए उँइँर बेल्‍ले छ्याँब तम्, छाबै घाँना खोंयोंइ आम्‍ह।
1PE 3:5 छलेन ओंसों ओंसों परमेश्‍वरर आशा थेंबै पबित्र च्हमिरिमैंज्यै या ह्रोंसलाइ छलेन् सिङ्गार्दिमल धै प्युँए न्होंर टिमल।
1PE 3:6 छलेन साराई खीए प्युँ अब्राहामइ बिब ङिंसि चलाइ क्ल्हे बिल। क्हेमैंइ छ्याँबै केमैं लदै तोइ सैनेया आङ्हिंइ बिस्याँ क्‍हेमैं या साराए च्हमिंमैं तब्मुँ।
1PE 3:7 छलेन ओ मुँयुँमैं, ह्रोंसए प्ह्रेंस्योने बालु सैं क्ह्रिसि टिद्। क्‍हेमैं भन्दा चमैं आभोंब् मुँ बिब् सेसि ताँन् सैर चमैंलाइ मान लद्, तलेबिस्याँ परमेश्‍वरजी पिंबै छ्ह क्‍हेमैं ङ्हिंना-ङ्हिंनइ योंबै हग बराबर मुँ। क्‍हेमैंए प्राथनार बाधा आखरिगे बिसि ह्रोंसए प्ह्रेंस्योने छेनाले क्‍ह्रिसि टिद्।
1PE 3:8 आखिरि ताँ चु मुँ: क्‍हेमैं ताँनए सैं घ्रि तद्। अरूए फिर दुःख तमा ल्‍हयो खद्। घ्रिइ घ्रिलाइ ह्रोंसए अलि-अङाँमैंने धोंले म्हाँया लद्। आगुए फिर ल्हयो खद्, सैं सारो आलद्।
1PE 3:9 अरूइ क्हेमैंए न्होह्रों ललेया क्हेमैंइ चमैंए न्होह्रों आलद्, अरूइ क्‍हेमैंए फिर गाल् केलेया क्हेमैंइ गाल् आकेद्। बरु आशिक पिंन्, तलेबिस्याँ क्‍हेमैंइ आशिक योंरिगे बिसि परमेश्‍वरजी क्‍हेमैंलाइ हुइब् ग।
1PE 3:10 परमेश्‍वरए छ्वेर छले प्ह्रिइमुँ: “खाब‍इ ह्रोंसए छ्ह छ्याँब तरिगे धै सुखा योंरिगे ङ्हाँमुँ, चए लेइ आछ्याँबै ताँ आपोंरिगे, धै चए सुँइ स्‍योर तेसि आपोंरिगे।
1PE 3:11 चइ पाप लब पिसि छ्याँबै के लरिगे, धै ताँनने क्ह्रिसि आक्ह्रिब्मैंलाइ क्ह्रिमिंबै के लरिगे।
1PE 3:12 तलेबिस्याँ ठिक के लब्‍मैंलाइ परमेश्‍वरजी छेनाले छैं लरिमुँ, धै न्ह क्रोंले खीजी चमैंए प्राथना थेमुँ, दिलेया आछ्याँबै के लब्‍मैंलाइ खीजी बिरोधर लम्।”
1PE 3:13 छ्याँबै सैंउँइँले क्‍हेमैंइ ठिक केमैं लम् बिस्‍याँ, क्‍हेमैंए न्होह्रों खाबइ लमुँ?
1PE 3:14 दिलेया ठिक के लसि दुःख योंनाबिलेया क्‍हेमैंइ आशिक योंब्मुँ। म्‍हिमैंइ तोन् बिलेया चमैं म्रोंसि आङ्हिंन्, न्हुँ आलद्।
1PE 3:15 बरु ह्रोंसए सैं न्‍होंरि ख्रीष्‍टलाइ “प्रभु” मैंसि खीए सेवा छेनाले लद्। खाबज्यै या “क्हेमैंइ ख्रीष्‍टए फिर बिश्‍वास लसि तो योंम्?” बिसि ङ्योएस्याँ छ्याँबै सुँले ह्रिस आखल्‍ले ज्वाफ पिंबर खोंयोंइ बिले तयार तद्।
1PE 3:16 दिलेया क्हेमैं ह्रिस आखल्‍ले, मान तल्‍ले पोंल् त्हुम्। क्हेमैंए बिरोधर पोंब्मैं नेरो ख्रीष्‍टए लिलि प्रसि क्हेमैंइ लबै के आखोबै म्हिमैं फापिन् तरिगे बिसि क्हेमैंए सैं छ्याँब तल् त्हुम्।
1PE 3:17 तलेबिस्याँ आछ्याँबै के लसि दुःख योंब् भन्दा परमेश्‍वरए सैंर मैंब् धों तबै छ्याँबै केमैं लसि दुःख योंब छ्याँब ग।
1PE 3:18 तलेबिस्याँ ङ्योलाइ परमेश्‍वर ङाँर बोबर ख्रीष्‍टै या पापिमैंए ल्हागिर तिल सिमिंइ। पापिमैंए ल्हागिर खीजी दु:ख योंइ। दिलेया म्हिमैंइ खीलाइ सैवालेया प्ल्हए शक्‍तिजी खीलाइ सोगों लमिंइ।
1PE 3:19 छले पबित्र प्ल्हए शक्‍तिर येशू म्‍हि प्‍ल्‍हमैंए नाँसर ह्‍याइ, धै चर च्युथेंबै प्‍ल्‍हमैंलाइ परमेश्‍वरए ताँ बिमिंइ।
1PE 3:20 चमैं स्‍योंम्‍बै नोआ बिबै म्‍हिए पलोर्बै म्‍हिमैं मुँल। नोआइ क्यु झाज बनेरिमा परमेश्‍वरजी बिबै ताँ चमैंइ ङिंम् उ आङिं बिसि परमेश्‍वरजी पैंरिल। दिलेया क्यु झाजर क्रेबै म्हि प्रे मत्‍त्रे थेबै नाँ बाडिउँइँले जोगेमिंइ, अरू ताँन् सियाइ।
1PE 3:21 चु नाँ बाडिए क्यु बप्‍तिस्‍माए नमुना ग, तलेबिस्याँ नोआ नेरो चए परवालाइ क्‍युउँइँले जोगेब् धोंले क्‍हेमैंलाज्यै या येशूए मिंर क्‍युर प्ल्हुँसि जोगेमिंब्मुँ। खैले जोगेम् बिस्‍याँ परमेश्‍वरजी येशू ख्रीष्‍टलाइ सिबइले धबै सोगों लमिंबइले क्‍हेमैंइ छारा छ्ह योंइमुँ। चु बप्‍तिस्‍मा क्‍युइ ज्यु ख्रुब् धों तब आङिं, बरु क्‍हेमैंए सैं छ्याँब् प्ह्‍यासि बानि ब्योर छ्याँब् तरिगे बिबै ल्हागिर परमेश्‍वरउँइँले खबै बाछा ग।
1PE 3:22 येशू स्‍वर्गर ह्‍यासि स्वर्गदूतमैं, अधिकारमैं नेरो ताँन् शक्‍ति मुँबै सैमैं खीए न्होंर थेंसि परमेश्‍वरए क्‍योलोउँइँ टिइमुँ।
1PE 4:1 येशू ख्रीष्‍टजी खैले दुःख नोल, छलेन क्‍हेमैंज्‍यै या दुःख नोल् त्हुलेया नोम् बिबै सैं लद्। तलेबिस्याँ ज्युर दुःख नोबै म्हिमैंइ पाप लब पिवाम्।
1PE 4:2 धै चइ ह्रोंसए चैबै छ्ह म्हिमैंए सैंर मैंब् धोंले आङिं, परमेश्‍वरए सैंर मैंब् धोंले थोल् त्हुम्।
1PE 4:3 ह्‍याबै त्हिंइजरे परमेश्‍वर आम्हाँदिब्मैंइ धोंले क्हेमैंइ ब्यभिचार लब, आछ्याँबै सैं मैंब, प्हा को तब, सैल् लब, छेरन् ब्योंबै कु पूजा लसि ल्हें त्हे खेरो वाइ।
1PE 4:4 तारे क्‍हेमैं खेंमैं प्रबै आछ्याँबै घ्‍याँर आप्रब् म्रोंसि चमैं प्लेटोयाम्, धै क्‍हेमैंए फिर आछ्याँबै ताँमैं लम्।
1PE 4:5 दिलेया सोगों नेरो सियाब्मैंए निसाफ लबै प्रभु येशूलाइ खेंमैंइ लबै केए हिसाब चमैंइ पिंल् त्‍हुब्‍मुँ।
1PE 4:6 छतसि सियाब्‍मैंनेया खीजी सैं तोंबै ताँ बिमिंइ। ताँन् म्हिमैं धोंले ज्युर सजैं योंसि चमैं सिइ, दिलेया प्‍ल्‍हर परमेश्‍वरने टिल् योंरिगे बिसि येशूजी सियाब्मैंलाज्यै या सैं तोंबै ताँ बिमिंइ।
1PE 4:7 ताँन् सै नुयाबै त्हे तखइमुँ। छतसि प्राथना लल् खाँरिगे बिसि छ्याँबै सैं प्ह्‍यासि न्ह क्रों मि क्रों तरिद्।
1PE 4:8 ताँन् भन्दा थेबै ताँ: घ्रिइ घ्रिलाइ खोंयोंन् बिलै म्हाँया लरिद्, तलेबिस्याँ म्हाँयाइ लमा ल्‍हें पापमैं या क्षमा तम्।
1PE 4:9 गनगन आलल्‍ले घ्रिइ घ्रिलाइ प्ह्रेंमैं धोंले मान लद्।
1PE 4:10 परमेश्‍वरए दयाम्हाँयाइ क्हेमैंइ तो-तो बरदान योंइमुँ, च बरदान घ्रिइ घ्रिए ल्हागिर ओलेद्।
1PE 4:11 खाबज्यै पोंम् बिस्याँ, चइ परमेश्‍वरजी पिंबै ताँ पोंब् धोंले पोंरिगे। खाबज्यै सेवा लम् बिस्याँ चइ परमेश्‍वरजी पिंबै शक्‍तिउँइँले लरिगे, तलेबिस्याँ खाबइ तो ललेया येशू ख्रीष्‍टउँइँले परमेश्‍वरलए छ्याँबै बयान तरिगे बिसि च के लल् त्हुम्। येशूए मिंउँइँले खोंयोंन् बिलै परमेश्‍वरल थेबै मान नेरो शक्‍ति तरिगे आमेन, छान् तरिगे।
1PE 4:12 ओ ङइ खोबै थुमैं, क्‍हेमैंलाइ जाँज लबर थेबै दुःख क्‍हेमैं फिर तखमा आतबै के तखइ बिसि क्हेमैं अचम्‍मा आङ्हाँन्।
1PE 4:13 बरु ख्रीष्‍ट बेल्‍ले थेबै मानर युमा क्हेमैं या सैं तोंल् योंरिगे बिसि खीजी सैदिब् धों तबै दुःख क्‍हेमैंज्यै या योंमा सैं तोंन्।
1PE 4:14 क्‍हेमैंइ ख्रीष्‍टए फिर बिश्‍वास लबइले म्‍हिमैंइ क्‍हेमैंए आब्रु वास्‍याँ सैं तोंन्, तलेबिस्याँ छाबै त्हेर ताँन् भन्दा थेबै मान मुँबै परमेश्‍वरए पबित्र प्ल्ह क्‍हेमैंने तब्मुँ।
1PE 4:15 छतसि क्‍हेमैंए न्होंरि खाबज्यै या म्हि सैमैं, ह्‍‍योमैं आछ्याँबै के लब्मैं, आगुए केर ह्रब् प्हैंसि यो झोंल् म्हैब्मैंइ धोंले दुःख योंल् आत्हुरिगे।
1PE 4:16 दिलेया क्‍हेमैं ख्रीष्‍टियान तबइले दुःख योंल् त्‍हुस्‍याँ क्‍हेमैं फा आपिद्, बरु ख्रीष्‍टए मिंउँइँले क्हेमैंइ परमेश्‍वरलाइ धन्‍यबाद पिंन्।
1PE 4:17 तलेबिस्याँ परमेश्‍वरजी निसाफ लबै त्हे तखइमुँ। निसाफ लमा ताँन् भन्दा ओंसों खीजी ह्रोंसए म्‍हिमैंउँइँलेन् तों लम्। छले खीजी ङ्योउँइँलेन् निसाफ तों लम् बिस्याँ, खीउँइँले खबै सैं तोंबै ताँ आक्वेंब्‍मैंलाइ झन खैबै निसाफ ललै?
1PE 4:18 परमेश्‍वरए छ्वेर छले प्ह्रिइमुँ: “ठिक के लब्मैंन् जोगेब गारो मुँ बिस्याँ परमेश्‍वरलाइ आम्‍हाँदिबै पाप लब्‍मैंए गति झन् खै तलै?”
1PE 4:19 छतसि परमेश्‍वरए सैंर मैंब् धोंबै दु:ख योंब्मैंइ छ्याँबै केन् लरिगे, धै तोन्दोंरि सै बनेबै भर लल् खाँबै परमेश्‍वरनेन् चमैंइ ह्रोंसए प्ल्ह सुम्पिदिरिगे।
1PE 5:1 ङ बिश्‍वासी न्होंर्बै एल्डर पत्रुसउँइँले क्‍हेमैंए एल्डरमैंने यो छ्युँ लमुँ। ख्रीष्‍टजी खैले दुःख सैदिल बिबै साक्षि ङ मुँ। धै लिउँइँ खीए थेबै मान तमैंया ङ खीने बालुन् तब्मुँ।
1PE 5:2 परमेश्‍वरजी क्‍हेमैंए जिम्‍मार थेंबै बगालए छैं छेनाले लद्। करइ आङिं, ह्रोंसए सैंइन म्रोंसि लद्। मुइए लोबै आङिं, चु ङइ लल् त्हुबै ङए जिम्‍मार्बै के ग बिब् मैंसि लद्।
1PE 5:3 क्‍हेमैंए जिम्‍मार मुँब्‍मैंए फिर कल्हे प्हैंसि हौदिसि ह्रोंसए न्होंर थेंसि आङिं, बगालमैंए ल्हागिर क्हेमैंन् नमुना तसि छ्याँबै के लसि उँइँन्।
1PE 5:4 छलस्याँ ताँन् भन्दा मूलि प्‍ह्रोंछैं युबै त्हेर क्‍हेमैंइ खोंयोंइ आङ्योंलोंब नास आतबै छ्याँबै मुकुट योंब्‍मुँ।
1PE 5:5 छलेन ओ फ्रेंसि छमिमैं, क्हेमैंए चिब्मैंइ बिब् ङिंन्। क्‍हेमैं ताँन् ह्रोंस ह्रोंसए न्होंर थेब् आप्हैंन्ले घ्रिइ घ्रिए सेवा लद्, तलेबिस्याँ परमेश्‍वरए छ्वेर छले प्ह्रिइमुँ: “परमेश्‍वरजी थेब् प्हैंब्मैंए बिरोध लम्, दिलेया थेब् आप्हैंब्मैंए फिर आशिक पिंम्।”
1PE 5:6 छतसि ह्रोंसन् च्‍योंने तसि थेबै शक्‍ति मुँबै परमेश्‍वरए यो न्होंर टिद्, धै खीजी ठिक त्हेर क्‍हेमैंलाइ थेब् लमिंब्‍मुँ।
1PE 5:7 क्‍हेमैंए ताँन् न्हुँ परमेश्‍वरए प्हलेर थेंन्, तलेबिस्याँ खीजी क्‍हेमैंए वास्ता लम्।
1PE 5:8 बरु न्ह क्रों मि क्रोंले टिद्, तलेबिस्याँ क्‍हेमैंए शत्तुर दियाबलस बिबै दुष्‍ट खाबलाइ सैसि चब् ङ्‍हे बिसि सिंह धोंले बेल्‍ले थेबै कै तेदै स्युर प्रम्।
1PE 5:9 छतसि क्‍हेमैं परमेश्‍वरए फिर भोंन्ले बिश्‍वास लसि च दुष्‍टए बिरोध लद्, तलेबिस्याँ ह्‍युलर्बै ताँन् बिश्‍वासी अलि अङाँमैंज्यै छाबन् दुःख योंरिइमुँ बिसि क्हेमैंइ सेइमुँ।
1PE 5:10 दयाम्हाँया मुँबै परमेश्‍वरजी क्हेमैंलाइ येशू ख्रीष्‍टने घ्रिन् लमिंइमुँ, धै खीजी योंब् धों तबै खोंयोंइ आनुबै मान ङ्योज्यै या योंरिगे बिसि खीजी ङ्योलाइ त्‍हाँइमुँ। क्‍हेमैंइ तिस्याँदे दुःख योंबै लिउँइँ खीजीन् क्हेमैंलाइ धबै छारा लमिंसि, भोंसि लमिंब्मुँ धै बेल्‍ले शक्‍ति मुँब लमिंब्‍मुँ।
1PE 5:11 खीलाइन भों नेरो शक्‍ति खोंयोंन् बिलै तरिगे। आमेन, छाबन् तरिगे।
1PE 5:12 सिलास बिब भर लल् खाँबै अलि ग। चए योउँइँले ङइ चु च्‍युरिन्ठि प्ह्रिछ्या क्‍हेमैंए ल्हागिर प्ह्रिल् पिंइमुँ। परमेश्‍वरए क्ह्रोंसेंन्बै दयाम्हाँया चु प्ह्रिछ्यार ङइ ग्वाइ पिंदा ङ्हाँइमुँ। खीए दयाम्हाँयार्न क्हेमैं भोंसि तद् बिसि ङइ अर्थि पिंम्।
1PE 5:13 चु बेबिलोन सहरर्बै बिश्‍वासीमैं नेरो ङए च्ह मर्कूसज्यै क्‍हेमैंने जय मसीह बिमिंइमुँ। क्‍हेमैंलाइ धोंले चमैंलाज्यै या परमेश्‍वरजी त्‍हाँब् ग।
1PE 5:14 क्‍हेमैं घ्रिइ घ्रिलाइ ख्रीष्‍टजी पिंबै म्हाँयाउँइँले अँखलो ख्वेसि जय मसीह लद्। ख्रीष्‍टए फिर बिश्‍वास लबै क्हेमैं ताँनए फिर खोंयोंन् बिलै शान्‍ति तरिगे।
2PE 1:1 येशू ख्रीष्‍टए के लबै कुल्मिंबै चेला चिब ङ सिमोन पत्रुसउँइँले क्हेमैंलाइ जय मसीह मुँ। ङ्योए परमेश्‍वर नेरो ङ्योलाइ जोगेमिंबै येशू ख्रीष्‍टजी खाबलाज्यै या आफेलल्‍ले ठिक के लइमुँ। खीजी ङिलाइ पिंब् धोंले क्हेमैंलाज्यै या ठिक बिश्‍वास लल् पिंइमुँ।
2PE 1:2 क्हेमैंइ परमेश्‍वर नेरो ङ्योए प्रभु येशूलाइ ङो सेइमुँ, छतसि खीए दयाम्हाँया नेरो शान्ति क्‍हेमैंने ल्हें ततै ह्‍यारिगे।
2PE 1:3 परमेश्‍वर बेल्‍ले छ्याँब नेरो थेब मुँ। ङ्योलाइ हुइबै परमेश्‍वरलाइ ङ्योइ ङो सेइमुँ, छतसि खीए सेवा लबर ङ्योए छ्हर चैदिबै तोन्दोंरि सैमैं खीए अचम्मबै शक्‍तिउँइँले खीजी ङ्योलाइ पिंइमुँ।
2PE 1:4 छलेन ह्रोंसए सैंउँइँले खबै आछ्याँबै केमैं लब् पिरिगे, धै क्हेमैंइ छ्याँबै बानि ब्योरउँइँले परमेश्‍वरजी लब् धोंबै छ्याँबै केमैं लरिगे बिसि खीजी बाछा फैब् धोंले ङ्योलाइ सै ल्हें फेबै बरदानमैं पिंइमुँ।
2PE 1:5 छतसि छ्याँबै केमैं लबै भों लसि क्हेमैंए बिश्‍वासए फिर छ्याँबै बानि लद्। धै छ्याँबै बानिए फिर परमेश्‍वरए इच्‍छाए बारेर क्होबै ज्ञान म्हैद्।
2PE 1:6 च ज्ञान योंसि ह्रोंसलाइ ठिक अधीनर थेंन्। ह्रोंसलाइ ठिक अधीनर थेंसि दुःख ढुक्‍कले सैदिद्। च सैदिबै शक्‍ति योंसि परमेश्‍वरलाइ छेनले म्हाँदिद्।
2PE 1:7 खीलाइ छेन्ले म्हाँदिसि ताँन् बिश्‍वासी अलि-अङाँमैंलाइ म्हाँया लबै सैं लद्, झाइले म्हाँया लसि सब् लमिंबै म्हाँया लल् त्‍हुम्।
2PE 1:8 तलेबिस्याँ चु ताँमैं क्हेमैंइ लइबिस्याँ ङ्योए प्रभु येशू ख्रीष्‍टलाइ छेनले ङो सेल् खाँम्, धै ङ्योइ खीए फिर बिश्‍वास लबै ताँ खेरो ह्‍याल् आपिं।
2PE 1:9 दिलेया छाबै बानि ब्योर आरेबै म्‍हिमैं बिस्याँ कनमैं धों तम्, ओंसों ङइ लबै पापउँइँले ङ ख्रुवाल् खाँइमुँ बिबै ताँ चमैंइ म्‍लेयाइमुँ।
2PE 1:10 छतसि ओ ङए अलि-अङाँमैं, परमेश्‍वरजी क्‍हेमैंलाइ त्हाँसि हुइमुँ बिबै ताँ क्ह्रोंसेंन् ग बिसि उँइँबै ल्हागिर क्हेमैं छेनले छ्ह थोद्। छ लस्‍याँ क्‍हेमैं परमेश्‍वरउँइँले खोंयोंइ ह्रेंगो तरिब् आरे।
2PE 1:11 धै ङ्योलाइ जोगेमिंबै ङ्योए प्रभु येशू ख्रीष्‍टए खोंयोंन् बिलै तरिबै ग्याल्सर परमेश्‍वरजी ङ्योलाइ थेबै मान्ले होंल् पिंब्मुँ।
2PE 1:12 चु ताँन् ताँमैं क्‍हेमैंइ सेलेया, क्‍हेमैंने मुँबै चु क्ह्रोंसेंन्बै ताँर क्‍हेमैं दर मुँलेया, क्हेमैंइ चु ताँ आम्‍लेरिगे बिसि ङइ चु ताँमैं क्‍हेमैंने खोंयोंइ बिरिब् ग।
2PE 1:13 ङ आसिन् समा क्‍हेमैंलाइ न्ह क्रों मि क्रों लमिंबर चु ताँमैं बिल् त्हुम् बिब ङए सैं मुँ।
2PE 1:14 तलेबिस्याँ ङ सिबै त्हे चेंदो तखइमुँ बिसि ङ्योए प्रभु येशू ख्रीष्‍टजी ङलाइ उँइँमिंइमुँ।
2PE 1:15 छतसि ङ सिबै लिउँइँज्‍यै या ङइ बिबै अर्थिए ताँमैं खोंयोंइ या क्‍हेमैंइ मैंल् खाँरिगे बिसि लोमिंबर ङइ बेल्‍ले भों लसिन् मुँ।
2PE 1:16 ङ्योए प्रभु येशू ख्रीष्‍टए शक्‍तिए बारेर नेरो खी धबै युब्मुँ बिबै ताँ ङिइ क्‍हेमैंने बिल। चु ताँ म्हिमैंइ पार्दिबै स्योलिबै ताँमैं आङिं। खीए थेबै शक्‍तिए औदिबै केमैं ङिए मिइन म्रोंल।
2PE 1:17 धै ताँन् भन्दा थेबै परमेश्‍वर आबाजी येशूलाइ थेबै मान पिंसि चारमिंइ, धै च चारबै ह्‍वेइले “चु ङए खोबै च्‍ह ग! चु म्रोंसि ङ बेल्‍ले सैं तोंइमुँ,” बिबै कै ङिइ थेल।
2PE 1:18 च पबित्र कोंर ङि खीने बालुन् मुँमा स्‍वर्गउँइँले पोंबै चु कै ङिइ थेल।
2PE 1:19 धै अगमवक्तामैंइ येशूए बारेर बिबै ताँलाइ ङ्योइ भर लल् खाँम्। न्हाँग छझँ मि म्रोंबै त्हे आतन् समा धै न्हाँग छझँबै मुसारा आत्होंब् धोंले प्रभु येशू ख्रीष्‍ट युसि क्हेमैंए खोंर आचारन् समा अगमवक्तामैंइ प्ह्रिबै ताँ मिछु खैबर चारबै बत्ति धों तम्। छतसि चमैंए ताँलाइ न्ह क्रों मि क्रोंले थेंस्‍याँ क्‍हेमैंलाइ फायदा तम्।
2PE 1:20 परमेश्‍वरए पबित्र छ्वेर्बै अगमबाणिए ताँमैं म्हिमैंइ ह्रों-ह्रोंसए सैंर मैंसि पोंबै ताँमैं आङिं बिसि क्हेमैंइ क्होल् त्हुम्।
2PE 1:21 तलेबिस्याँ अगमबाणि पोंमा म्हिमैंइ खेंमैंए सैंर खबै ताँमैं पोंब आङिं, बरु पबित्र प्ल्हजी म्‍हिमैंलाइ लोमिंसि चमैंइ परमेश्‍वरजी पोंन् बिबै ताँमैं पोंब् ग।
2PE 2:1 ओंसों इस्राएलीमैंए न्‍होंरि परमेश्‍वरए ताँर स्योलिबै ताँ कोंसि लोमिंबै म्हिमैं मुँल। छलेन क्हेमैं न्होंरै या स्योलिबै ताँमैं लोमिंबै म्हिमैं तब्मुँ। क्हेमैंए न्होंरि सैं न्होंवाबै स्योलिबै ताँमैं चमैंइ पोंब्मुँ, ह्रोंसलाइ जोगेमिंबै क्ल्हेलाइ चमैंइ पिवाब्मुँ। छले ह्रोंसए फिर युनन् नास तबै सजैं चमैंइ पखब्मुँ।
2PE 2:2 दिलेया ल्‍हें म्‍हिमैंइ चमैंइ लब् धोंलेन् आछ्याँबै केमैं लब्मुँ। चमैंइ लबै छाबै केमैं म्रोंसि क्ह्रोंसेंन्बै परमेश्‍वरलाइ स्यारब्मुँ।
2PE 2:3 लोब लसि चमैंइ स्योलिबै ताँमैं पार्दिसि क्‍हेमैंउँइँलेन् फायदा किंब्‍मुँ। छतसि ओंसों ओनोंन् चमैंए ल्हागिर परमेश्‍वरजी दण्‍ड तोक्दिथेंइमुँ। चमैंए नास तबै त्हे तबर होंइमुँ।
2PE 2:4 आछ्याँबै के लमा स्‍वर्गदूतलाज्यै या परमेश्‍वरजी ल्हयो आखल्‍ले निसाफ लबै त्हिंइ समा फैसि नर्गर्बै मिछु खबै क्ल्ह्‍योर भ्योंवाइ।
2PE 2:5 छलेन ओंसोंबै पृथ्बीलाज्यै या परमेश्‍वरजी नास लवाइ, खीजी बिब् आङिंसि खैच्हिजी लप्रबै ताँन् म्हिमैंलाइ खीजी क्‍युइ म्‍यालवासि सैवाइ। दिलेया ठिक के लल् त्हुम् बिसि बिप्रबै म्हि नोआ मुँल। छतसि परमेश्‍वरजी नोआ नेरो अरू म्हि ङि जोगेमिंइ।
2PE 2:6 छलेन परमेश्‍वरजी स्‍योंम्‍बै सदोम नेरो गमोरा बिबै सहरमैं ख्रोंसि मि क्ह्रन् म्हलाइ। छले खीजी बिब् आङिंसि खैच्हिजी लब्मैंए ल्हागिर खीजी चु नमुना उँइँमिंइ।
2PE 2:7 चरै या च ठिम आम्हाँदिबै म्हिमैंइ लबै आछ्याँबै केमैं म्रोंसि लोत बिबै छ्याँबै के लबै म्हि छेरइ। छतसि परमेश्‍वरजी सदोम सहर नास लमा लोतलाइ जोगेमिंइ।
2PE 2:8 लोत ठिक के लबै म्‍हि मुँल। च म्‍हिमैंए म्‍हाँजोरि टिमा त्हिंइ ह्रोंसे चमैंइ लबै आछ्याँबै के म्रोंसि, चमैंइ पोंबै आछ्याँबै ताँमैं थेसि लोतए छ्याँबै खों बेल्‍ले नमल।
2PE 2:9 छले खीजी बिबै ताँ ङिंब्मैंलाइ प्रभुजी दुःखउँइँले जोगेमिंल् खाँम्, धै दुष्‍टमैंलाइ दण्ड पिंबै ल्हागिर निसाफ लबै त्हिंइ समा खीजी फैथेंल् खाँम्।
2PE 2:10 बिलन् त्हुमा च म्हिमैं छाब् तम्: चमैंइ ह्रोंसलाइन पापर च्होवाबै केमैं लम्। चमैंइ परमेश्‍वरजी ल्हैदिबै ताँ आङिं। धै छ्याँबै के लबै स्वर्गदूतमैंलाज्यै या चमैंइ तो धोंइ आङ्हाँन्ले पोंम्।
2PE 2:11 छ्याँबै के लबै स्‍वर्गदूतमैंने थेबै शक्ति मुँ, दिलेया प्रभुए उँइँरि चमैंइ आछ्याँबै के लबै स्वर्गदूतमैंए फिर छ्याब् ल्हैदिसि आपों।
2PE 2:12 च स्‍योलिबै ताँ लोमिंब्‍मैं बिस्‍याँ ह्रोंसइन क्होल् आखाँबै ताँमैंए ताँ लप्रम्। छाबै म्हिमैं क्ह्‍योंर टिबै चेत आरेबै खेदोमैं धों तम्। चमैंइ खेंमैंए सैंर तो मैंमुँ चन् लप्रम्। चुमैं क्‍हासि सैवाबै ल्हागिर फिबै खेदोमैं धोंलेन् नास तयाब्मुँ।
2PE 2:13 त्‍हिंयाँर्न ज्युउँइँले खबै इच्छाए केमैं लबर चमैं सैं तोंम्। चमैं इजेत आरेबै फा आपिबै म्हिमैं ग। छतसि क्‍हेमैंने बालु चब् चमा चमैं बेल्‍ले चदै थुँदै मख्ख तब्मुँ। दिलेया चमैंइ लबै आछ्याँबै केमैंए नों चमैंइ भुँदिल् त्‍हुम्।
2PE 2:14 चमैंए सैं खोंयोंन् बिलै म्रिंस्योमैं ङाँइन तमुँ। आछ्याँबै केमैं लसि चमैं खोंयोंइ आम्रें, सैं फैल् आखाँब्मैंलाइ चमैंइ फस्ला फुस्लु लवाम्, छाबै केमैं लबर चमैं तालिम् योंबै म्हिमैं धोंन् तब् मुँ, छतसि चमैं सराप योंल् त्हुबै म्हिमैं ग।
2PE 2:15 ल्हें मुइए लोबइ लमा छ्याँबै घ्‍याँ पिसि चमैं आछ्याँबै घ्‍याँउँइँ ल्‍हैदिइमुँ। छले चमैं स्‍योंम्‍बै बओरए च्‍ह बालामए लिलि प्रइमुँ।
2PE 2:16 च बालामइ लबै आछ्याँबै केमैंइ लमा सुँ आपोंबै गधाइन चलाइ हौदिल् त्हुल। म्‍हिए कैले पोंसि च गधाइ सोबलइ धोंले पोंबै अगमबक्‍तालाइ पोंल् आपिंल।
2PE 2:17 चु स्‍योर ताँ लोमिंब्‍मैं क्‍यु आयुबै मुल नेरो थेबै खैंइ नोइ बोवाबै म्हस्यो धों तब् ग। परमेश्‍वरजी चमैंए ल्हागिर क्रोंर्बै मिछु खैबै क्‍ल्‍ह्‍यो साँथेंइमुँ।
2PE 2:18 चमैंइ ङिम् ङिन् ग बिब् प्हैंसि थे-थेबै ताँमैं लम्, धै भर्खर आछ्याँबै घ्याँ पिसि छ्याँबै घ्याँर ल्हैदिब्मैंलाइ ज्युउँइँले खबै इच्‍छार लोब उँइँमिंसि फस्ला फस्लु लवाम्।
2PE 2:19 ङिइ क्हेमैं छ्याँबै घ्याँर डोरेस्यो बिसि चमैंइ म्हिमैंने बाछा फैमुँ, दिलेया खेंमैंन् आछ्याँबै घ्याँर प्रम्। तलेबिस्याँ म्‍हिइ तो सैलाइ सैं पिंमुँ, च सैए केब्छैं तसि चए न्होंर्न टिल् त्हुम्।
2PE 2:20 ह्रोंसलाइ जोगेमिंबै येशू ख्रीष्‍टलाइ ङो सेसि चु ह्‍युलर्बै ह्रोंसलाइ पापर च्होवाबै सैमैंउँइँले स्योइ खसेया म्हिमैं धबै आछ्याँबै केमैं लसि पापर्न च्होयाम् बिस्याँ चमैंए गति ओंसोंबै भन्दा लिउँइँबै झन् आछ्याँब् तम्।
2PE 2:21 चमैंलाइ पिंबै चु क्ह्रोंसेंन्बै छ्याँबै ताँ चमैंइ सेसेया आसेब् धोंलेन् धबै ओंसोंबै आछ्याँबै घ्याँर्न प्रयाम् बिस्याँ, चमैंए ल्हागिर चु छ्याँबै घ्याँ ग बिसि आसेबन् झन् छ्याँब तमल।
2PE 2:22 “नगिइ ह्रोंसइ रूइबै रुइ ह्रोंसइन ल्हेंम्।” छलेन “ख्रुल् खाँबै तिलि या धबै हिलर ह्‍यासिन् प्होलम्। क्ह्रोंसेंन्लेन् चु क्ह्रोंसेंन्बै अहानर बिब् धोंन् चमैं तइमुँ।”
2PE 3:1 ओ ङए खोबै थुमैं, ङइ धबै क्‍हेमैंलाइ चु प्ह्रिछ्या प्ह्रिइमुँ। क्‍हेमैंए सैंर खोंयोंन् बिलै छ्याँबै ताँ खरिगे बिसि क्‍हेमैंइ म्‍लेयाबै ताँमैं धबै मैंल् लमिंबर ङइ चु प्ह्रिछ्या ङ्हिंना-ङ्हिंनर्न क्हेमैंए सैंर भों खल् लमिंबै ताँमैं प्ह्रिइमुँ।
2PE 3:2 स्‍योंम्‍बै पबित्र अगमबक्‍तामैंइ पोंबै अगमबाणिए ताँमैं नेरो क्‍हेमैं ङाँर खबै कुल्मिंबै चेला चिब्मैंइ बिबै ताँमैं क्हेमैंइ मैंरिगे बिब ङए सैं मुँ।
2PE 3:3 क्हेमैंइ सेल् त्हुबै ताँ: तारे खबै त्हिंइ जरे ह्रोंसए सैंर तो मैंमुँ, चन् लप्रब्मैं त्‍होंब्‍मुँ। क्हेमैंए बिल्‍लि लदै चमैंइ छ बिब्मुँ,
2PE 3:4 “येशूजी खी धबै युम् बिसि बाछा फैल। तिंयाँ समा तले आयु? ङ्योए खेमैं-माँमैं सियाल् खाँइ, झाइले ह्‍युलर मुँबै सैमैं या ह्‍युल् बनेब् ओंनोंबै खैब मुँल तिंयाँ या छाबन् मुँ!” बिसि चमैंइ बिब्मुँ।
2PE 3:5 मु नेरो ह्‍युल स्योंमन् परमेश्‍वरजी बिबै ताँजी बनेब् ग बिसि सेना सेन् आसेब् धोंले चमैंइ च ताँए वास्ता आल। खीजी चु ह्‍युल क्‍युउँइँले फ्रेमिंसि क्यु आरेबै स बनेइ।
2PE 3:6 धै च त्हेर्बै ह्‍युल नाँ बाडिए क्युइ प्ल्हुँवासि नास तयाइ।
2PE 3:7 दिलेया परमेश्‍वरए च ताँउँइँलेन् तिंजरोबै मु नेरो ह्‍युल लिउँइँ मिइ ख्रोंसि नास लबै ल्हागिर तोगो समा नास आतल्‍ले खीजी थेंइमुँ। छले खीलाइ आम्हाँदिब्मैंलाइ दोषि ठर्दिसि निसाफ लबै त्हिंइर मु नेरो ह्‍युलै या खीजी नास लवाब्मुँ।
2PE 3:8 ओ ङइ खोबै थुमैं, ताँ घ्रि खोंयोंइ आम्‍लेद्। प्रभुए ल्हागिर तिगैं हजार साल धों तम्, झाइले हजार साल तिगैं धों तम्।
2PE 3:9 को-कोइए सैंर “प्रभु युबर क्‍हैल् लइ,” ङ्हाँलेया प्रभुजी खीजी फैबै बाछा पूरा लबर क्हैल् आल। खाबै या नास आतरिगे बरु ह्रोंसए पापउँइँले सैं एसि खिउँइँ तोरिगे बिसि प्रभुजी क्हेमैंलाइ सैदिसि पैंरिइमुँ।
2PE 3:10 दिलेया खाबज्यै आसेल्‍ले ह्‍यो खब् धोंले प्रभु खैलसे युब्‍मुँ। च त्हिंइर मु थेबै कैले म्हयाब्मुँ, मुर्बै ताँन् सैमैं मिइ ख्रोंसि नास तयाब्मुँ, धै चु ह्‍युल नेरो ह्‍युलर्बै सैमैं ताँन् म्हयाब्‍मुँ।
2PE 3:11 छले तोन्दोंरि नास तयाम् बिब् सेसेरो क्हेमैं खैबै म्‍हि तल् त्‍हुम्? परमेश्‍वरजी बिब ङिंदै छ्याँबै केमैं लसि क्हेमैं छेनाले छ्ह थोसि
2PE 3:12 परमेश्‍वरए निसाफ लबै त्हिंइलाइ पैंरिल् त्‍हुम्। झाइले प्रभु येशू युबै त्हिंइ युनन तरिगे बिसि बेल्‍ले सैं झोंसि खीए के लद्। च त्हिंइर मुर मि लुँब्मुँ, धै चर मुँबै सैमैं ताँन् मिए राबाइ बिलिदिवाब्‍मुँ।
2PE 3:13 दिलेया ङ्यो बिस्याँ खीजी ङ्योने बाछा फैसि पिंम् बिबै छारा स्वर्ग नेरो छारा ह्‍युलन् ह्रेरिब्मुँ। चर खीजी ठिक ठर्दिमिंब्मैं टिल् योंब्मुँ।
2PE 3:14 छतसि ओ ङए थुमैं, च त्हिंइ खोंयों तब् ङ्‍हे बिसि क्हेमैं खीए घ्‍याँ ङ्ह्‍योब्मैं ग। छतसि प्रभुए उँइँर तोइ खोट नेरो छ्याब् आरेब् तसि ताँनने क्ह्रिसि टिबै भों लद्।
2PE 3:15 झाइले ङ्योए प्रभुजी म्‍हिमैंए पापमैं सैदिमा ङ्यो जोगेबै मौका पिंइमुँ बिसि सैंर मैंन्। चु ताँ ङ्योए खोबै आघें पावलज्यै या परमेश्‍वरजी पिंबै बुद्धिजी चु ताँमैं खीए प्ह्रिछ्यार क्‍हेमैंए ल्हागिर प्ह्रिइमुँ।
2PE 3:16 पावलइ चु ताँए बारेर खीए ताँन् प्ह्रिछ्यारि छले प्ह्रिइमुँ। प्ह्रिछ्यार मुँबै को-कोइ ताँमैं क्‍होब गारो मुँ। छतसि दे आखेब्‍मैं नेरो क्‍होबै सैं आलब्‍मैंइ चु ताँलाज्यै अरू छ्वेर्बै ताँमैं धोंलेन् लिग्याँने उग्याँ लवाम्। धै चमैंइ ह्रोंसए फिर्न नास पखम्।
2PE 3:17 ओ ङए खोबै थुमैं, ओंसों ओंनोंन् क्हेमैंइ चु ताँन् ताँमैं सेइमुँ। छतसि ठिम आम्हाँदिबै म्हिमैंइ परमेश्‍वरए ताँ लिग्याँने उग्याँ लवासि क्हेमैंलाइ आछ्याँबै केर च्होवाल् आखाँरिगे, छतसि ह्रोंसइ लबै बिश्‍वास आपिल्‍ले क्हेमैं न्ह क्रों मि क्रोंले टिद्।
2PE 3:18 बरु ङ्योलाइ जोगेमिंबै प्रभु येशू ख्रीष्‍टए थेबै दयाम्हाँया नेरो बुद्धिर बडिदै ह्‍याद्। खीलाइ तोगो नेरो खोंयोंइ या थेबै मान तरिगे। आमेन, छान् तरिगे।
1JO 1:1 खोंयोंइ आखाँबै छ्ह पिंबै बचन ओंसों ओंनोंन् मुँल। खीए बारेर ङिइ थेइमुँ, ङिए मिइन खीलाइ म्रोंइमुँ, ङिए योइन छुइमुँ।
1JO 1:2 खी चु ह्‍युलर मुँमा ङिइ खीलाइ म्रोंल, छतसि खीए बारेर ङिइ ग्वाइ पिंम्। च खोंयोंइ आखाँबै छ्ह ओंसों ओंनोंन् परमेश्‍वर आबाने मुँल, धै तिंजोरो ङ्यो ङाँर म्रोंयुइ बिसि ङिइ क्हेमैंने बिम्।
1JO 1:3 क्हेमैं या ङिने बालु सैं घ्रिन् तसि प्रल् खाँरिगे बिसि ङिइ थेबै ताँ नेरो म्रोंबै ताँ क्‍हेमैंने बिम्। परमेश्‍वर आबा नेरो खीए च्‍ह येशू ख्रीष्‍टने ङ्यो सैं घ्रिन् तसि प्रम्।
1JO 1:4 छतसि ङ्यो ताँन् बेल्‍ले सैं तोंल् योंरिगे बिसि क्‍हेमैंए ल्हागिर ङिइ चु ताँ प्‍ह्रिइमुँ।
1JO 1:5 परमेश्‍वरए च्‍ह येशूउँइँले ङिइ थेबै चु ताँ ङिइ क्‍हेमैंने बिमिंम्: परमेश्‍वर चारबै ह्‍वे ग, खीने तिफुँइ पाप आरे।
1JO 1:6 छतसि ङ्योइ “परमेश्‍वरने सैं घ्रिन् तसि प्रम्” बिलेया अझै पाप केन् लप्रइबिस्‍याँ ङ्योम् स्‍योर तेब्मैं नेरो क्ह्रोंसेंन्बै घ्‍याँर आप्रब्मैं तम्।
1JO 1:7 दिलेया येशू धोंले ङ्यो परमेश्‍वरए चारबै ह्‍वेर प्रइबिस्‍याँ ङ्योए सैं क्ह्रिसि ङ्योइ घ्रिइ-घ्रिने म्हाँया लमुँ, धै परमेश्‍वरए च्‍ह येशूए कोजी ङ्योए पाप ताँन् ख्रुमिंम्।
1JO 1:8 दिलेया ङ्योइ ह्रोंसने पाप आरे बिम् बिस्याँ, ङ्योइ ह्रोंसलाइन धोका पिंम्, धै ङ्यो क्ह्रोंसेंन्बै ताँ आपोंबै स्योर्गुमैं तम्।
1JO 1:9 दिलेया खीजी फैबै बाछाइ बिब् धोंले परमेश्‍वरजी लम् धै ठिक निसाफ लम्। छतसि “ङिइ पाप केमैं लइमुँ” बिसि ङ्योइ खी ङाँइ सैं एइबिस्‍याँ खीजी ङ्योए पापमैं क्षमा लमिंसि ताँन् पापउँइँले ख्रुमिंम्।
1JO 1:10 दिलेया “ङिइ पाप आलइमुँ!” बिम् बिस्‍याँ ङ्योइ परमेश्‍वरलाइ स्‍योर्गु ठर्दिम्, धै ङ्योलाइ खोंयोंइ आखाँबै छ्ह पिंबै बचन ङ्योने आत।
1JO 2:1 ओ ङए कोलोमैं, क्‍हेमैंइ पाप आलरिगे बिसि ङइ चु प्ह्रिछ्या प्‍ह्रिरिइमुँ। दिलेया खाबज्‍यै या पाप लइबिस्‍याँ ङ्योए ल्हागिर परमेश्‍वर आबाने क्षमा ह्रिमिंबै येशू ख्रीष्‍ट मुँ। खीजी ठिक के लम्।
1JO 2:2 ङ्योइ लबै पाप क्षमा लमिंबै ल्हागिर खीजी घ्‍याँ थोमिंइमुँ, ङ्योए पाप मत्‍त्रे आङिं, दिलेया ह्‍युलर्बै ताँन् म्‍हिमैंए पाप क्षमा लमिंम्।
1JO 2:3 परमेश्‍वरजी बिबै ताँ ङ्योइ ङिंइ बिस्‍याँ क्ह्रोंसेंन खीलाइ ङो सेन बिसि ङ्योइ था सेम्।
1JO 2:4 “ङइ परमेश्‍वरलाइ ङो सेम्,” बिमुँ, दिलेया खीजी बिबै ताँ आङिं बिस्याँ, च म्‍हि स्‍योर्गु ग, चइ क्ह्रोंसेंन्बै ताँ तोइ आपों।
1JO 2:5 दिलेया परमेश्‍वरजी बिबै ताँ ङिंबै म्हिइ क्‍ह्रोंसेंन्लेन् परमेश्‍वरलाइ सैं न्होंउँइँलेन् म्हाँया लम्। छले ङिंइबिस्‍याँ परमेश्‍वर ङ्योने मुँ बिसि पक्‍का था सेम्।
1JO 2:6 “ङ परमेश्‍वरने क्ह्रिसि टिइमुँ” बिब्मैंइ येशू ख्रीष्‍टजी धोंलेन् छ्ह थोल् त्‍हुम्।
1JO 2:7 ओ ङए खोबै थुमैं, चु प्ह्रिछ्यार ङइ क्‍हेमैंलाइ छारा ताँ तोइ आप्‍ह्रिइमुँ, ओंसों ओंनोंन् क्हेमैंने था सेबै ताँमैंन् प्‍ह्रिरिइमुँ। ख्रीष्‍टने प्रब् ओनोंन् चु ताँ क्‍हेमैंइ था सेल। “घ्रिइ घ्रिने सैं न्होंउँइँलेन् म्हाँया लद्” बिबै चु ताँ क्‍हेमैंइ ओंसोंन् थेइमुँ।
1JO 2:8 दिलेया चु घ्रिइ घ्रिने सैं न्होंउँइँलेन् म्हाँया लल् त्हुम् बिबै ताँ ख्रीष्‍टए छ्हर नेरो क्‍हेमैंए छ्हरै या म्‍हिमैंइ म्रोंल् खाँम्। छतसि क्हेमैंए ल्हागिर ङइ प्ह्रिबै ताँ छारा मुँ। तलेबिस्याँ तोगो मिछु खैब ह्‍याल् खाँइमुँ, क्ह्रोंसेंन्‍बै ह्‍वे ओंसों ओंनोंन् चारइमुँ।
1JO 2:9 खाबइ “ङ ह्‍वेर मुँ” बिमुँ, दिलेया ह्रोंसए बिश्‍वासी अलि-अङाँलाइ हेल लमुँ, च अझै मिछु खैबर्न मुँ।
1JO 2:10 दिलेया ह्रोंसए बिश्‍वासी अलि-अङाँलाइ सैं न्होंउँइँलेन् म्हाँया लब्मैं बिस्याँ ह्‍वेर टिम्, झाइले चमैं पापर आच्होल्‍ले प्रल् खाँम्।
1JO 2:11 दिलेया ह्रोंसए बिश्‍वासी अलि-अङाँलाइ हेल लब्मैं मिछु खैबर्न टिम्। मिछु खैबइ चमैंलाइ कन लवासि चमैंए मि म्रोंल् आखाँ, छतसि ह्रोंस खनिर ह्‍यारिइमुँ बिसि चमैंइ था आसे।
1JO 2:12 ओ ङइ खोबै कोलोमैं, ख्रीष्‍टए मिंउँइँले क्‍हेमैंइ ताँन् पापए क्षमा योंइमुँ, छतसि ङइ क्हेमैंलाइ चु ताँ प्‍ह्रिरिइमुँ।
1JO 2:13 ओ चिबनाँब्मैं, ओंसों ओंनोंन् मुँबै परमेश्‍वरलाइ क्‍हेमैंइ ङो सेइमुँ, छतसि ङइ क्हेमैंलाइ चु ताँ प्‍ह्रिरिइमुँ। ओ फ्रेंसिमैं, क्‍हेमैंइ दुष्‍टलाइ ट्होइमुँ, छतसि ङइ क्हेमैंलाइ चु ताँ प्‍ह्रिरिइमुँ। ओ ङइ खोबै कोलोमैं, क्‍हेमैंइ परमेश्‍वर आबालाइ ङो सेइमुँ, छतसि ङइ क्हेमैंलाइ चु ताँ प्‍ह्रिरिइमुँ।
1JO 2:14 ओ चिबनाँब्मैं, ओंसों ओंनोंन् मुँबै परमेश्‍वरलाइ क्‍हेमैंइ ङो सेइमुँ, छतसि ङइ क्हेमैंलाइ चु ताँ प्‍ह्रिरिइमुँ। ओ फ्रेंसिमैं, क्‍हेमैं भोंब मुँ, धै क्‍हेमैंए खोंर परमेश्‍वरए बचन थेंइमुँ, धै क्‍हेमैंइ दुष्‍टलाइ ट्होइमुँ, छतसि ङइ क्हेमैंलाइ चु ताँ प्‍ह्रिरिइमुँ।
1JO 2:15 चु ह्‍युल नेरो ह्‍युलर मुँबै सैमैंए म्हाँया आलद्। ह्‍युललाइ म्हाँया लबै म्हिइ परमेश्‍वरए फिर म्हाँया आल।
1JO 2:16 तलेबिस्याँ चु ह्‍युलर मुँबै तोन्दोंरि सैमैं, अथवा ज्युउँइँले खबै आछ्याँबै इच्छामैं, लोब लब, नेरो थेब् प्‍हैंब, छाबै ताँ परमेश्‍वर आबाउँइँले खब आङिं, चु ह्‍युलउँइँले खबै आछ्याँबै सैमैं ग।
1JO 2:17 चु ह्‍युल नेरो म्‍हिमैंइ म्हाँया लबै सैमैं ताँन् नास तयाम्, दिलेया परमेश्‍वरए सैंर मैंब् धों तबै के लब्मैं खोंयोंन् बिलै तरिम्।
1JO 2:18 ओ ङइ खोबै कोलोमैं, आखिरि त्हे तखइमुँ। क्‍हेमैंइ “आखिरि त्हेर ख्रीष्‍टए बिरोधी त्‍होंब्‍मुँ” बिबै ताँ थेल। धै तिंजोरो ख्रीष्‍टए बिरोधीमैं ल्‍हें त्‍होंइमुँ। छतमा आखिरि त्हे तखन बिसि ङ्योइ सेल् खाँम्।
1JO 2:19 च म्हिमैं ङ्योए संगतिउँइँले त्‍होंइ ह्‍याइ, तलेबिस्याँ चमैं ङ्योल आङिंल। चमैं ङ्योल ङिंस्‍याँम् ङ्योनेन् टिमल। दिलेया चमैं ताँन् ङ्योल आङिं बिसि उँइँबर चमैं त्होंसि ह्‍याब् ग।
1JO 2:20 दिलेया क्‍हेमैंए फिर ख्रीष्‍टजी पबित्र प्ल्ह प्लिंमिंइमुँ, छतसि क्‍हेमैं ताँनइ क्ह्रोंसेंन्बै ताँ सेइमुँ।
1JO 2:21 क्‍हेमैंइ क्ह्रोंसेंन्बै ताँ आसेइमुँ बिसि ङइ चु प्ह्रिछ्या प्‍ह्रिब आङिं, दिलेया क्‍हेमैंइ येशूए बारेर्बै क्ह्रोंसेंन्बै ताँ सेइमुँ। धै क्ह्रोंसेंन्बै ताँउँइँले स्योलिबै ताँ आख बिबै या क्‍हेमैंइ था सेइमुँ। छतसि ङइ चु प्ह्रिछ्या प्‍ह्रिब् ग।
1JO 2:22 छतसि स्‍योर्गु खाब् जा बिस्‍याँ “परमेश्‍वरजी कुल्मिंबै म्रुँ ख्रीष्‍ट येशून् आङिं” बिबै म्हिमैंन् स्‍योर्गुमैं ग। छाबै म्हिमैं परमेश्‍वर आबा नेरो च्‍हलाइ तो धोंइ आङ्हाँ, छतसि चमैं ख्रीष्‍टए बिरोधी ग।
1JO 2:23 च्‍हलाइ मान आलबै म्हिने आबा आटि। बरु “ङ च्‍हलाइ सैं पिंसि मान लमुँ” बिबै म्हिए सैंर आबा टिम्।
1JO 2:24 छतसि क्‍हेमैंइ ओंसों ओनोंन् थेबै ताँ सैं न्‍होंर थेंरिद्। क्‍हेमैंइ च ताँ सैं न्‍होंर थेंइ बिस्‍याँ क्‍हेमैं च्‍ह नेरो आबाने घ्रिन् तसि खोंयोंन् बिलै बालुन् टिब्‍मुँ।
1JO 2:25 धै ख्रीष्‍टजी ङ्योने बाछा फैसि पिंम् बिबै सै खोंयोंइ आखाँबै छ्ह ग!
1JO 2:26 क्‍हेमैंलाइ भाँड्याल् म्‍हैब्‍मैंए बारेर ङइ चु ताँ प्‍ह्रिब् ग।
1JO 2:27 दिलेया ख्रीष्‍टजी ह्रोंसए पबित्र प्ल्हजी क्‍हेमैंलाइ प्लिंमिंइमुँ, छतसि क्‍हेमैंलाइ अरू लोमिंबै म्‍हि आचैदि। ताँन् सैए बारेर खीए प्ल्हजी क्‍हेमैंलाइ लोमिंम्, खीजी लोमिंबै ताँ क्ह्रोंसेंन्बै ग, स्‍योर आङिं। छतसि पबित्र प्ल्हजी लोमिंबै ताँमैं ङिंनु, धै छ्ह तिगोंन् ख्रीष्‍टनेन् घ्रिन् तसि प्रद्।
1JO 2:28 ओ ङइ खोबै कोलोमैं, ख्रीष्‍ट युमा ङ्यो भोंब तरिगे, धै खी युबै त्हिंइर खीए उँइँर ङ्यो फापिल् आत्‍हुरिगे बिसि खीनेन् घ्रिन् तसि प्रद्।
1JO 2:29 ख्रीष्‍टजी ठिक के मत्‍त्रे लम् बिब क्‍हेमैंइ सेइमुँ। छतसि ठिक के लब्मैं ताँन् परमेश्‍वरए प्‍हसेमैं ग बिसि क्‍हेमैंज्यै या सेइमुँ।
1JO 3:1 मैंन्दि, परमेश्‍वर आबाजी ङ्योलाइ कति थेबै म्हाँया लइमुँ। च्‍हौ थेबै म्हाँया लसि खीजी ङ्योलाइ “ह्रोंसए प्‍हसेमैं” बिइमुँ। क्ह्रोंसेंन ङ्यो परमेश्‍वरए प्‍हसेमैं तइमुँ। चु ह्‍युलर्बै म्‍हिमैंइ परमेश्‍वरलाइ ङो आसेइमुँ, छतसि ङ्योलाइ “परमेश्‍वरए प्‍हसेमैं ग,” बिसि आसे।
1JO 3:2 ङइ खोबै थुमैं, ङ्यो तोगो परमेश्‍वरए प्‍हसेमैं ग। प्‍हँना लिउँइँ ङ्यो खै तम् बिसि तोगो बिल् आखाँ, दिलेया ङ्योइ चु ताँ घ्रि सेइमुँ: ख्रीष्‍ट युबै त्हिंइर खी खैब मुँ छाबन् खीलाइ ङ्योइ छेनाले म्रोंब्‍मुँ। छतसि च त्हेर ङ्यो या खी धोंन् तब्‍मुँ।
1JO 3:3 धै ख्रीष्‍टए फिर छाबै आशा थेंब्मैं ख्रीष्‍ट पबित्र मुँब् धोंले पबित्रले प्रम्।
1JO 3:4 पाप लब्मैंइ परमेश्‍वरए ठिमर्बै ताँ आङिं, तलेबिस्याँ ठिमए बिरोध लब पाप ग।
1JO 3:5 म्‍हिमैंए पाप त्होवाबर ख्रीष्‍ट युब् ग, खीने तिफुँइ पाप आरे बिब क्‍हेमैंइ सेइमुँ।
1JO 3:6 छतसि ख्रीष्‍टने घ्रिन् तसि टिरिबै म्हिमैंइ पाप लरिब आरे। दिलेया पाप लरिबै म्हिमैंइ खीलाइ खोंयोंइ आम्रोंइमुँ, ङो या आसेइमुँ।
1JO 3:7 ओ ङइ खोबै कोलोमैं, क्‍हेमैंलाइ खाबज्‍यै या भाँड्याल्आखाँरिगे। प्रभु येशू ख्रीष्‍ट धोंले ठिक के लबै म्हि छ्याँबै सैं प्ह्‍याबै म्‍हि ग।
1JO 3:8 दुष्‍टइ ओंसों ओनोंन् पाप लइमुँ, छतसि पाप लरिबै म्हि दुष्‍टए म्हि ग। दुष्‍टइ लबै पाप केमैं नास लवाबर परमेश्‍वरए च्‍ह ह्‍युलर युब् ग।
1JO 3:9 परमेश्‍वरए प्‍हसेमैंइ पाप केमैं आल, तलेबिस्याँ परमेश्‍वरए छ्याँबै बानि चमैंए सैंर्न तरिम्। परमेश्‍वर चमैंए आबा ग। छतसि चमैंइ पाप लरिल् आखाँ।
1JO 3:10 परमेश्‍वरए प्‍हसेमैं नेरो दुष्‍टए प्‍हसेमैं खैले ङो सेम् बिस्‍याँ, ह्रोंसए बिश्‍वासी अलि-अङाँलाइ सैं न्होंउँइँलेन् म्हाँया आलब्मैं नेरो छ्याँबै केमैं आलबै म्हिमैं परमेश्‍वरए प्‍हसेमैं आङिं।
1JO 3:11 क्‍हेमैंइ घ्रिइ घ्रिने सैं न्होंउँइँलेन् म्हाँया लल् त्‍हुम् बिबै ताँ ओंसों ओंनोंन् थेल।
1JO 3:12 ङ्यो स्‍योंम्‍बै कयिन बिबै म्‍हि धों तब तल् आत। च दुष्‍टल् मुँल, छतसि चइ ह्रोंसए अलि सैवाइ। चइ ह्रोंसए अलि तले सैवाइ बिस्‍याँ चइ लबै के आछ्याँब मुँल, दिलेया अलिइ लबै केमैं छ्याँब मुँल।
1JO 3:13 ओ ङए अलि-अङाँमैं, ह्‍युलर्बै म्‍हिमैंइ क्‍हेमैंलाइ म्हि आच्हिल्‍ले पोंमा क्हेमैं अचम्मा आङ्हाँन्।
1JO 3:14 ङ्यो कालउँइँले जोगेसि छ्ह योंबै क्‍ल्‍ह्‍योर तर्दिल् खाँइमुँ बिसि ङ्योइ सेइमुँ। ङ्योइ बिश्‍वासी अलि-अङाँमैंलाइ सैं न्होंउँइँलेन् म्हाँयाँ लबइले ङ्योइ चु ताँ सेइमुँ। दिलेया ह्रोंसए अलि-अङाँमैंलाइ म्हाँया आलब्मैं कालए न्होंर टिरिमुँ।
1JO 3:15 ह्रोंसए बिश्‍वासी अलि-अङाँमैंलाइ हेल लब्मैं म्हिसै धोंन् तब्मैं ग। म्हिसैमैंने खोंयोंइ आखाँबै छ्ह आत बिब क्‍हेमैंइ सेइमुँ।
1JO 3:16 म्हाँया तो जा बिब ङ्योइ खैले सेइमुँ बिस्‍याँ ख्रीष्‍टजी ङ्योए फिर म्हाँया लसि ङ्योए ल्हागिर खीए सो पिंइ। छतसि ङ्योज्‍यै या ह्रोंसए बिश्‍वासी अलि-अङाँमैंए ल्हागिर ह्रोंसए सो पिंल् त्हुम्।
1JO 3:17 दिलेया प्लबै म्‍हि घ्रिइ ह्रोंसए बिश्‍वासी अलि-अङाँलाइ खाँचो तब् म्रोंसेया चमैंए फिर सैं सारो लइ बिस्‍याँ, परमेश्‍वरए म्हाँया चने तम्‌ रो वा?
1JO 3:18 ओ ङइ खोबै कोलोमैं, ङ्योइ लबै म्हाँया ताँ नेरो सुँइ पोंब मत्‍त्रे आङिं, योज्यै या छ्याँबै के लसि सैं न्होंउँइँलेन् क्ह्रोंसेंन्‍बै म्हाँया लल् त्‍हुम्।
1JO 3:19 छाबै छ्याँबै केमैं लमा ङ्यो क्ह्रोंसेंन्बै परमेश्‍वरए म्हिमैं ग बिसि था सेल् खाँब्मुँ। छतसि खीजी निसाफ लबै त्हिंइर ङ्योए सैंइ दोसिदिलेया ङ्यो खीए उँइँर रामा ङ्यो ङ्हिंल् आत्हु।
1JO 3:20 तलेबिस्याँ परमेश्‍वर ङ्योए सैं भन्दा थेब मुँ, छतसि खीजी तोन्‍दोंरि ताँ था सेम्।
1JO 3:21 ओ ङइ खोबै थुमैं, ङ्योए सैंइ ङ्योलाइ आदोसिदि बिस्‍याँ ङ्यो परमेश्‍वरए उँइँर आङ्हिंन्ले राल् खाँम्।
1JO 3:22 झाइले ङ्योइ खीने तो सै ह्रिलेया योंम्, तलेबिस्याँ खीजी बिबै ताँमैं ङ्योइ ङिंम्, धै खीए सैं तोंन् लबै केमैं ङ्योइ लम्।
1JO 3:23 खीजी बिबै ताँ चुन् ग: खीए च्‍ह येशू ख्रीष्‍टए फिर ङ्योइ बिश्‍वास लल् त्‍हुम्, धै खीजी लद् बिब् धोंले घ्रिइ घ्रिने म्हाँया लल् त्‍हुम्।
1JO 3:24 परमेश्‍वरजी बिब् ङिंब्मैं ताँन् परमेश्‍वरने घ्रिन् तसि टिमुँ, धै परमेश्‍वर चमैंने घ्रिन् तसि टिम्। परमेश्‍वर ङ्योने टिमुँ बिसि खैले सेइमुँ बिस्‍याँ खीजी ह्रोंसए प्ल्ह ङ्योलाइ पिंइमुँ।
1JO 4:1 ओ ङइ खोबै थुमैं, “ङने परमेश्‍वरए प्ल्ह मुँ, ङ अगमबक्‍ता ग,” बिब्‍मैंए ताँ आक्‍वेंन्। चमैंइ पोंबै ताँ पबित्र प्ल्ह परमेश्‍वरउँइँले युबै ताँ ङिंब् उ आङिं बिसि छेनाले च्हैंब् मैंब् लद्। तलेबिस्याँ स्योलिबै ताँ पोंबै ल्हें अगमबक्‍तामैं खन्तोदोंन् फेनेइमुँ।
1JO 4:2 च म्हिमैंइ परमेश्‍वरए पबित्र प्ल्हउँइँले पोंम् उ आपों बिसि क्‍हेमैंइ खैले ङो सेम् बिस्‍याँ, “येशू ख्रीष्‍ट म्‍हि तसि युइ,” बिब्मैंने परमेश्‍वरउँइँले युबै प्ल्ह तम्।
1JO 4:3 दिलेया येशू परमेश्‍वर तसेया म्हिए क्हो किंसि ह्‍युलर युइ आबिब्मैंने परमेश्‍वरए प्ल्ह आत। चमैंने मुँबै प्ल्ह ख्रीष्‍ट बिरोधीए प्ल्ह ग। च बिरोधीए प्ल्ह त्‍होंखम् बिब क्हेमैंइ ओंसोंन् थेल। छ बिब् धोंले चए प्ल्ह चु ह्‍युलर्बै म्‍हिमैं न्‍होंर युल् खाँइमुँ।
1JO 4:4 दिलेया ओ ङइ खोबै कोलोमैं, क्‍हेमैं परमेश्‍वरए म्हिमैं ग। क्‍हेमैंने मुँबै पबित्र प्ल्ह ख्रीष्‍टए फिर बिश्‍वास आलबै म्हिमैंने मुँबै प्ल्ह भन्दा थेबै शक्‍ति मुँबै प्ल्ह ग। छतसि क्‍हेमैंइ स्‍योलिबै ताँ पोंब्‍मैंलाइ ट्होवाइमुँ।
1JO 4:5 च स्‍योलिबै ताँ पोंब्‍मैंइ चु ह्‍युलर्बै ताँमैं पोंम्। चमैं चु ह्‍युलर्बै तबइले चु ह्‍युलर्बै म्‍हिमैंइ चमैंए ताँ क्वेंम्।
1JO 4:6 दिलेया ङ्यो परमेश्‍वरए म्हिमैं ग। छतसि परमेश्‍वरलाइ ङो सेब्‍मैंइ ङ्योए ताँ थेम्, दिलेया परमेश्‍वरए म्हिमैं आङिंब्मैंइ ङ्योए ताँ आथे। चु ताँउँइँलेन् ङ्योइ क्ह्रोंसेंन्बै प्ल्ह नेरो स्योलिबै प्ल्ह था सेल् खाँम्।
1JO 4:7 ओ ङइ खोबै थुमैं, ङ्योइ घ्रिइ घ्रिने सैं न्होंउँइँलेन् म्हाँया लले, तलेबिस्याँ छाबै म्हाँया परमेश्‍वरउँइँले युम्। आगुए फिर सैं न्होंउँइँलेन् म्हाँया लबै म्हि परमेश्‍वरए प्हसे ग, धै परमेश्‍वरलाइ ङो सेम्।
1JO 4:8 दिलेया सैं न्होंउँइँलेन् म्हाँया आलब्‍मैंइ परमेश्‍वरलाइ ङो आसे, तलेबिस्याँ परमेश्‍वरजी म्हाँया लम्।
1JO 4:9 परमेश्‍वरजी ङ्योए फिर कति थेबै म्हाँया लइमुँ बिस्‍याँ, ङ्योइ खीउँइँले खोंयोंइ आखाँबै छ्ह योंरिगे बिसि खीजी ह्रोंसए घ्रिदे मुँबै च्‍हलाइ चु ह्‍युलर कुल्‍मिंइ।
1JO 4:10 ङ्योइ परमेश्‍वरलाइ म्हाँया लबइले आङिं, दिलेया खीजीन् ङ्योए फिर म्हाँया लसि ङ्योए पाप क्षमा लमिंबर खीजी ह्रोंसए च्‍ह ख्रो तबै ल्हागिर कुल्‍मिंइ।
1JO 4:11 छतसि ओ ङइ खोबै थुमैं, परमेश्‍वरजी ङ्योए फिर छले म्हाँया लबइले ङ्योज्‍यै या घ्रिइ घ्रिने सैं न्होंउँइँलेन् म्हाँया लल् त्‍हुम्।
1JO 4:12 खाबज्‍यै या परमेश्‍वरलाइ खोंयोंइ आम्रोंइमुँ, दिलेया ङ्योइ घ्रिइ घ्रिने सैं न्होंउँइँलेन् म्हाँया लइ बिस्‍याँ परमेश्‍वर ङ्योने घ्रिन् तसि टिम्, धै खीए म्हाँया ङ्योए फिर तम् बिसि पक्‍का तम्।
1JO 4:13 परमेश्‍वरजी ङ्योलाइ खीए प्ल्ह पिंबइले “ङ्यो परमेश्‍वरने घ्रिन् तसि टिमुँ, धै परमेश्‍वर ङ्योने घ्रिन् तसि टिम्” बिसि ङ्योइ क्ह्रोंसेंन्लेन् था सेम्।
1JO 4:14 परमेश्‍वर आबाजी खीए च्‍हलाइ ह्‍युलर्बै म्‍हिमैं जोगेबर कुल्‍मिंब् ग बिसि ङिइ म्रोंइमुँ धै ग्वाइ पिंम्।
1JO 4:15 येशून् परमेश्‍वरए च्‍ह ग बिब्मैं परमेश्‍वरने घ्रिन् तसि टिम्, धै परमेश्‍वर चमैंने घ्रिन् तसि टिम्।
1JO 4:16 छले परमेश्‍वरजी ङ्योए फिर म्हाँया लम् बिब् क्होसि ङ्योइ च म्हाँयारन भर थेंइमुँ। परमेश्‍वरजी म्हाँया लम्। छतसि म्हाँया मुँबै के लबै म्हि परमेश्‍वरने घ्रिन् तसि टिमुँ, धै परमेश्‍वर चने घ्रिन् तसि टिम्।
1JO 4:17 छतसि निसाफ लबै त्हिंइर ङ्यो ङ्हिंल् आत्हुरिगे बिसि खीजी ङ्योए फिर क्ह्रोंसेंन म्हाँया लइमुँ। ख्रीष्‍टजी ह्‍युलर छ्ह थोब् धोंलेन् ङ्योज्‍यै या छ्ह थोबइले ङ्यो ङ्हिंल् आत्हु।
1JO 4:18 परमेश्‍वरजी ङ्योलाइ म्हाँया लम्। छतसि ङ्यो खीने ङ्हिंरिल् आत्‍हु। ङ्योए फिर लबै खीए थेबै म्हाँयाजी ङ्योलाइ ङ्हिंन् लबै सै खीजी स्‍योवाम्। छतसि “ङइ सजैं योंम् उ?” बिसि अझै ङ्हिंरिब्मैंइ परमेश्‍वरए म्हाँयाए बारेर छेनाले आक्‍होइमुँ।
1JO 4:19 परमेश्‍वरजी ओंसोंन् ङ्योए फिर म्हाँया लबइले ङ्योज्यै (खी नेरो ङ्योए बिश्‍वासी अलि-अङाँमैंलाइ) म्हाँया लम्।
1JO 4:20 “ङइ परमेश्‍वरलाइ म्हाँया लम्,” बिमुँ, दिलेया ह्रोंसए बिश्‍वासी अलि-अङाँमैंए फिर म्हाँया आल बिस्याँ च म्हि स्‍योर्गु ग। तलेबिस्याँ ह्रोंसइ म्रोंबै बिश्‍वासी अलि-अङाँलाइ सैं न्होंउँइँलेन् म्हाँया आलबै म्हिइ खोंयोंइ आम्रोंबै परमेश्‍वरलाइ खैले म्हाँया लल् खाँम्?
1JO 4:21 खीजी ङ्योने लद् बिबै ताँ चुन् ग: परमेश्‍वरलाइ म्हाँया लबै म्हिइ ह्रोंसए बिश्‍वासी अलि-अङाँमैंलाज्यै या सैं न्होंउँइँलेन् म्हाँया लल् त्‍हुम्।
1JO 5:1 “परमेश्‍वरजी कुल्‍मिंबै म्रुँ ख्रीष्‍ट येशू ग” बिसि बिश्‍वास लबै म्हि परमेश्‍वरए प्‍हसे ग, आबालाइ म्हाँया लबै म्हिइ च्हलाज्यै सैं न्होंउँइँलेन् म्हाँया लम्।
1JO 5:2 छतसि ङ्योइ परमेश्‍वरलाइ म्हाँया लसि खीजी बिबै ताँमैं ङिंस्याँ ङ्योइ खीए प्‍हसेमैंलाज्यै या सैं न्होंउँइँलेन् म्हाँया लल् त्हुम्।
1JO 5:3 ङ्योइ क्ह्रोसेंन्लेन् परमेश्‍वरलाइ म्हाँया लम् बिस्‍याँ खीजी बिबै ताँमैं ङ्योइ ङिंम्। धै खीए ताँ म्हाँदिबर ङ्योलाइ ल्‍हें गारो आरे।
1JO 5:4 तलेबिस्याँ परमेश्‍वरए ताँन् प्‍हसेमैंइ चु ह्‍युलउँइँले खबै पापलाइ ट्होल् खाँम्। खैले ट्होम् बिस्‍याँ ङ्योइ परमेश्‍वरए फिर बिश्‍वास लसि ट्होब् ग।
1JO 5:5 “येशू ख्रीष्‍ट परमेश्‍वरए च्‍ह ग” बिसि बिश्‍वास लबै म्हिन् चु ह्‍युलउँइँले खबै पापलाइ ट्होल् खाँबै म्हि ग।
1JO 5:6 येशू ख्रीष्‍टजी क्युर प्ल्हुँसि बप्‍तिस्‍मा किंइ, धै क्रूसर सिमिंसि ह्रोंसए को पिंइ। छतसि खी म्हि तसि ह्‍युलर युइ बिबै ग्वाइ पिंब्मैं क्यु नेरो को ग। क्युउँइँले मत्‍त्रे आङिं, क्यु नेरो कोउँइँले युइ। खीए ग्वाइ पबित्र प्ल्हज्यै या ग्वाइ पिंइमुँ, तलेबिस्याँ पबित्र प्ल्हजी स्योर आते।
1JO 5:7 ग्वाइ पिंब्मैं सों मुँ:
1JO 5:8 पबित्र प्ल्ह, क्‍यु नेरो को, चुमैं सोंइ ताँ घ्रिलेन् खीए ग्वाइ पिंम्।
1JO 5:9 म्‍हिमैंइ पिंबै ग्वाइ ङ्योइ क्वेंम्। परमेश्‍वरजी पिंबै ग्वाइमि झन् थेब मुँ, धै परमेश्‍वरजीन् खीए च्हए बारेर ग्वाइ पिंइमुँ।
1JO 5:10 छतसि परमेश्‍वरए च्‍हए फिर बिश्‍वास लबै म्हिए सैंर चु ग्वाइ तम्, दिलेया परमेश्‍वरए फिर बिश्‍वास आलबै म्हिमैंइ परमेश्‍वरलाइ स्‍योर्गु ठर्दिम्, तलेबिस्याँ परमेश्‍वरजी खीए च्‍हए बारेर पिंबै ग्वाइ चमैंइ आक्वें।
1JO 5:11 परमेश्‍वरजी पिंबै ग्वाइ चुन् ग: खीजी ङ्योलाइ खोंयोंइ आखाँबै छ्ह पिंइमुँ, धै च छ्ह खीए च्‍हउँइँले ङ्योइ योंम्।
1JO 5:12 खाब्ने परमेश्‍वरए च्‍ह टिमुँ, चइ च छ्ह योंइमुँ, दिलेया खाब्ने परमेश्‍वरए च्‍ह आटि, चइ खोंयोंइ आखाँबै छ्ह आयों।
1JO 5:13 ओ, परमेश्‍वरए च्‍हए फिर बिश्‍वास लब्मैं! क्‍हेमैंइ खोंयोंइ आखाँबै छ्ह योंइमुँ बिसि पक्‍का था सेरिगे बिसि ङइ चु प्ह्रिछ्या क्‍हेमैंलाइ प्‍ह्रिब् ग।
1JO 5:14 झाइले खीए सैंर मैंब् धोंले ङ्योइ खीने तो ह्रिलेया खीजी ङ्योए ताँ थेमिंम् बिब् सेसि ङ्यो खीए उँइँर तोइ आङ्हाँन्ले ह्‍याल् खाँम्।
1JO 5:15 ङ्योइ खीने प्राथना लसि तो सै ह्रिलेया खीजी ङ्योए ताँ थेमिंम् बिब ङ्योइ सेइमुँ। छतसि ङ्योइ खीने तो ह्रिलेया ङ्योइ योंइमुँ बिबै या सेइमुँ।
1JO 5:16 खाबज्‍यै या ह्रोंसए बिश्‍वासी अलि-अङाँइ पाप लरिब् म्रोंस्‍याँ, चइ लबै पाप केमैं नर्गर्न ह्‍याल् त्हुबै खालर्बै आङिंस्‍याँ, च अलि-अङाँए ल्हागिर चइ प्राथना लल् त्‍हुम्, धै नर्गर्न ह्‍याल् त्हुबै खालर्बै पाप आलबै म्हिलाइ परमेश्‍वरजी खोंयोंइ आखाँबै छ्ह पिंब्मुँ। दिलेया नर्गर्न ह्‍याल् त्हुबै खालर्बै पाप या मुँ। छाबै पाप केमैं लबै म्हिए ल्हागिर बिस्याँ परमेश्‍वरने प्राथना लमिंरिगे बिसि ङइ आबि।
1JO 5:17 ताँन् आछ्याँबै केमैं पाप ग, दिलेया को-कोइ पापमैं नर्गर्न ह्‍याल् त्हुबै खालर्बै आत।
1JO 5:18 परमेश्‍वरए प्‍हसेमैं खाबज्यै खोंयोंइ पाप लरिब आरे बिसि ङ्योइ सेइमुँ, तलेबिस्याँ परमेश्‍वरए च्‍हजी चलाइ जोगेथेंम्, छतसि दुष्‍टइ चलाइ छुइल् आखाँ।
1JO 5:19 ङ्योइ चु ताँ या सेइमुँ: चु ह्‍युलर्बै म्‍हिमैं दुष्‍टए न्होंर मुँ, ङ्यो बिस्याँ परमेश्‍वरए म्हिमैं ग।
1JO 5:20 क्ह्रोंसेंन्‍बै परमेश्‍वरलाइ ङ्योइ ङो सेरिगे बिसि खीए च्‍ह युसि ङ्योइ खीलाइ ङो सेबै ज्ञान पिंब ङ्योइ सेइमुँ। झाइले ङ्यो क्ह्रोंसेंन्बै परमेश्‍वरए च्‍ह येशू ख्रीष्‍टने घ्रिन् तसि क्ह्रोंसेंन्‍बै परमेश्‍वरने घ्रिन् तम् बिसे या सेइमुँ। क्ह्रोंसेंन्‍बै परमेश्‍वर खीन् ग धै खीउँइँले खोंयोंइ आखाँबै छ्ह योंम्।
1JO 5:21 ओ ङए कोलोमैं, कु पूजा आलद्।
2JO 1:1 ङ बिश्‍वासीमैं न्होंर्बै एल्डरउँइँले परमेश्‍वरजी त्‍हाँबै आना नेरो क्‍हिए कोलोमैंने जय मसीह मुँ। ङइ क्‍हेमैंलाइ सैं न्होंउँइँलेन् म्हाँया लमुँ। ङइ मत्‍त्रे आङिं, क्ह्रोंसेंन्‍बै ताँ था सेबै ताँन् बिश्‍वासीमैंज्यै या क्‍हेमैंलाइ म्हाँया लम्,
2JO 1:2 तलेबिस्याँ च क्ह्रोंसेंन्‍बै ताँ ङ्योने बालु टिम्, झाइले खोंयोंन् बिलै ङ्योने टिरिब्मुँ।
2JO 1:3 परमेश्‍वर आबा नेरो खीए च्‍ह येशू ख्रीष्‍टउँइँले खबै दयाम्हाँया नेरो ल्हयोइ ङ्यो छिं ङ्हाँल् योंब्मुँ, ङ्यो घ्रिइ घ्रिने म्हाँया लसि क्ह्रोंसेंन्‍बै घ्‍याँर प्रमा चु ताँमैं योंब्मुँ।
2JO 1:4 परमेश्‍वर आबाजी ङ्योलाइ बिब् धोंलेन् क्हिए को-कोइ कोलोमैं क्ह्रोंसेंन्‍बै घ्‍याँर प्रबै ताँ था सेसि ङ बेल्‍ले सैं तोंइमुँ।
2JO 1:5 छतसि ओ आना, ङइ क्हेमैंलाइ छारा ताँ तोइ आप्ह्रिइमुँ, ङ्यो ताँनइ घ्रिइ घ्रिने सैं न्होंउँइँलेन् म्हाँया लल् त्हुम् बिसि ओंसों ओंनोंन् ङ्योने बिबै ताँ ङइ चु प्ह्रिछ्यार प्ह्रिइमुँ।
2JO 1:6 च म्हाँया तो जा बिस्याँ खीजी बिब् धोंले ङ्योइ प्रब् ग। खीजी तो बिइ बिस्याँ क्हेमैंइ सैं न्होंउँइँलेन् म्हाँया लल् त्हम्। च ताँ क्‍हेमैंइ ओंसों ओनोंन् थेइमुँ।
2JO 1:7 “येशू ख्रीष्‍ट म्हि तसि चु ह्‍युलरि युब आङिं” बिसि भाँड्याल् म्हैबै म्हिमैं खन्तोंदोंन् खइमुँ। चुमैंन् स्‍योलिबै ताँ बिब्‍मैं नेरो ख्रीष्‍टए बिरोधीमैं ग।
2JO 1:8 क्हेमैंइ स्वर्गर्बै इनाम योंबै ल्हागिर के लरिइमुँ। छतसि च इनाम आम्हरिगे, बरु ताँन् इनाम योंरिगे बिसि न्ह क्रों मि क्रोंले टिद्।
2JO 1:9 ख्रीष्‍टजी बिब् धोंले आप्रब, खीजी बिबै ताँए फिरि अरू ताँ थप्‍दिब्‍मैंने परमेश्‍वर आटि। दिलेया खीजी बिब् धोंले प्रब्मैंने बालु परमेश्‍वर आबा नेरो च्‍ह ङ्हिंना ङ्हिंन् टिम्।
2JO 1:10 छतसि क्‍हेमैं ङाँर खबै म्हिमैंइ खीजी बिब् धोंले खीए ताँ आलोमिं बिस्याँ, छाबै म्हिमैंलाइ क्‍हेमैंए धिंर मान आलद्, जय मसीह या आलद्।
2JO 1:11 तलेबिस्याँ छाबै म्हिमैंलाइ जय मसीह लइ बिस्याँ, चमैंइ लबै आछ्याँबै केर क्‍हेमैं या क्ह्रिब् धोंन् तम्।
2JO 1:12 ङइ क्‍हेमैंलाइ प्ह्रिल् त्‍हुबै ताँमैं ल्‍हेन् मुँ, दिलेया तोगो तोन्दोंरि ताँमैं प्‍ह्रिदा आङ्हाँ। बरु ङ्यो बेल्‍ले तोंल् योंरिगे बिसि क्हेमैंनेन् त्होसि ताँ लबै सैं ङल् मुँ।
2JO 1:13 परमेश्‍वरजी त्हाँबै क्‍हिए खोबै अङाँए कोलोमैंइ क्हिने जय मसीह बिमिंइमुँ।
3JO 1:1 ङ बिश्‍वासीमैं न्होंर्बै एल्डरउँइँले ङइ खोबै थु गायसलाइ जय मसीह मुँ। ङइ सैं न्होंउँइँले क्हिलाइ म्हाँया लमुँ।
3JO 1:2 ओ ङइ खोबै थु, क्‍हिइ लबै ताँन् केर छ्याँब तरिगे, धै क्हि खोंयोंइ नब छब आतरिगे बिसि ङइ क्हिए ल्हागिर प्राथना लम्। क्‍हि बिश्‍वासर भोंब मुँ बिब ङइ सेइमुँ।
3JO 1:3 क्‍हि क्ह्रोंसेंन्लेन् परमेश्‍वरए घ्याँर प्रइमुँ बिबै ग्वाइ चुर खबै अलिमैंइ पिंमा ङ बेल्‍ले सैं तोंइ। क्ह्रोंसेंन क्‍हि खोंयोंन् बिलै क्ह्रोंसेंन्बै घ्याँर प्रम्।
3JO 1:4 ङए कोलोमैं छले क्ह्रोंसेंन्‍बै घ्याँर प्रइमुँ बिबै ताँ थेमा चु भन्दा थेबै सैं तोंन् लबै ताँ ङए ल्हागिर अरू तोइ आरे।
3JO 1:5 ओ ङए खोबै थु, क्हि ङाँर खबै बिश्‍वासी अलि-अङाँमैं स्याँमैं मुँलेया क्हिइ चमैंए सेवा लसि क्हिइ भर लल् खाँबै के लइमुँ।
3JO 1:6 क्‍हिइ चमैंए फिर सैं न्होंउँइँलेन् म्हाँया लसि ल्होमिंइ बिसि चुर्बै बिश्‍वासीमैंए उँइँरि चमैंइ क्‍हिए बारेर ग्वाइ पिंइमुँ। अझै चमैंए ल्हागिर घ्‍याँर चैदिबै सैमैंए तौदु क्हिइ लमिंइ बिस्याँ झन् परमेश्‍वरजी खोबै छ्याँबै के क्हिइ लब्मुँ।
3JO 1:7 तलेबिस्याँ प्रभु येशूए फिर बिश्‍वास आलब्मैंउँइँले चमैंइ तोइ सै आकिंल्‍ले ख्रीष्‍टए के लबर त्होंखब्मैं ग।
3JO 1:8 छतसि ङ्योज्यै या क्ह्रोंसेंन्बै ताँ बिप्रबै केर ल्होमिंबै ल्हागिर छाबै म्‍हिमैंए सेवा ङ्योइ लल् त्‍हुम्।
3JO 1:9 ङइ बिश्‍वासीमैंए ल्हागिर च्‍यु रिन्ठि प्ह्रिछ्या प्‍ह्रिल, दिलेया क्हेमैंए म्हाँजोर थेब् तल् म्‍हैबै डियोत्रिफसइ ङइ बिबै ताँ आङिं।
3JO 1:10 छतसि ङ चर खसि चइ लबै केमैंए बारेर ताँ रेब्‍मुँ। ङ्योए बिरोधर चइ आछ्याँबै ताँ पोंप्रम्, च्‍हौ मत्‍त्रे आङिं सैं तोंबै ताँ बिप्रबै बिश्‍वासी अलिमैंलाज्यै या चइ धिंर मान आल। चमैंलाइ मान लल् म्‍हैब्‍मैंलाज्यै या चइ छ आलद् बिसि चमैंलाइ मण्डलीउँइँले बैरु तेवाम्।
3JO 1:11 ओ ङइ खोबै थु, आछ्याँबै के लब्मैंइ धोंले आलद्, बरु छ्याँबै के लब्मैंइ धोंलेन् क्हिज्यै या छ्याँबै केमैं लद्। छ्याँबै के लब्मैं परमेश्‍वरए म्हिमैं ग, आछ्याँबै के लब्मैंइ परमेश्‍वरलाइ आम्रोंइमुँ।
3JO 1:12 ताँन् म्‍हिमैंइ डेमेत्रियसए बारेर छ्याँबै बयन लम्। क्ह्रोंसेंन्‍बै ताँइ बिब् धोंले च प्रबइले च छ्याँबै म्हि ग बिसि बयन लम्। ङिज्‍यै या चए बारेर छ्याँबै ग्वाइ पिंम्, झाइले ङिइ बिबै ताँ क्ह्रोंसेंन्बै ग बिसि क्‍हिइ सेइमुँ।
3JO 1:13 ङइ क्हिने बिल् त्‍हुबै ताँ ल्‍हेन् मुँ, छतसि तोगो काउदर कलमइ प्ह्रिब् भन्दा
3JO 1:14 बरु क्‍हिनेन् त्‍होसि ताँ लदा ङ्हाँइमुँ। छतसि ङ्यो तारे युनन् त्होसि ताँमैं लस्यो।
3JO 1:15 क्हिलाइ खोंयोंन् बिलै छिं ङ्हाँल् योंरिगे। चुर्बै थुमैंइ क्हिने जय मसीह बिमिंइमुँ। झाइले चर्बै ङ्योए ताँन् थुमैंलाज्यै या ङिउँइँले जय मसीह बिमिंन् ओ।
JUD 1:1 येशू ख्रीष्‍टए के लबै म्हि ङ याकूबए अलि यहूदाउँइँले परमेश्‍वरजी खोसि त्‍हाँबै म्‍हिमैंलाइ जय मसीह मुँ। परमेश्‍वर आबाजी क्हेमैंलाइ म्हाँया लइमुँ, धै येशू ख्रीष्‍टजी क्हेमैंलाइ रक्षा लथेंइमुँ।
JUD 1:2 छतसि क्‍हेमैंए फिर थेबै दया, शान्ति नेरो म्हाँया ल्हें तदै ह्‍यारिगे।
JUD 1:3 ओ ङए खोबै थुमैं, ङ्यो ताँनइ योंबै मुक्‍तिए बारेर्बै ताँमैं प्‍ह्रिबै सैं ङल मुँल। दिलेया तोगो ङ्योइ बिश्‍वास लल् त्हुबै ताँए बारेर प्‍ह्रिल् त्‍हुइमुँ। खोंयोंन् बिलै तरिबै ल्हागिर परमेश्‍वरजी तिखेर्न खीए म्‍हिमैंलाइ च ताँ लोमिंल् खाँइ। च ताँ जोगेसि थेंन् बिबै ल्हागिर ङइ चु प्ह्रिछ्या प्ह्रिल् त्हुदा ङ्हाँइ।
JUD 1:4 तलेबिस्याँ को-कोइ म्‍हिमैं स्योलिबै ताँ बिबर क्हेमैंए म्हाँजोर था आसेल्‍ले होंयाल् खाँइमुँ। चुमैंइ परमेश्‍वरलाइ आम्हाँदि, धै चुमैंए आछ्याँबै केमैं लबै ल्हागिर ङ्योए परमेश्‍वरए दयाम्हाँयालाइ तो धोंइ आङ्हाँन्ल्‍ले छाइ खैने माइ खै लवाम्। धै ङ्योए घ्रि मत्‍त्रे क्ल्हे प्रभु येशू ख्रीष्‍टए फिर चमैंइ बिश्‍वास आल। छतसि ओंसों ओंनोंन् चमैं दण्ड योंबर ठर्दिल् खाँइमुँ।
JUD 1:5 क्‍हेमैंइ चु ताँ ओंसोंन् था सेल् खाँल। दिलेया धबै क्हेमैंलाइ तिब्ले मैंमिंदा ङ्हाँइ, प्रभुजी इस्राएलीमैंलाइ मिश्र ह्‍युलउँइँले जोगेसि पखल, दिलेया चमैं न्होंरि लिउँइँ बिश्‍वास आलब्मैंलाइ परमेश्‍वरजी नास लवाइ।
JUD 1:6 धै अर्को ताँ, को-कोइ स्‍वर्गदूतमैंइ ह्रोंसए पदर टिसि लल् त्हुबै के आलल्‍ले अर्कोन् के लल् म्हैइ, टिल् त्हुबै क्ल्ह्‍यो पिवाइ। छतसि चमैंलाइ दण्‍ड पिंबै त्हिंइ समा खोंयोंइ त्होंल् आखाँल्‍ले मिछु खैबै क्ल्ह्‍योर खीजी फैथेंइमुँ।
JUD 1:7 धै सदोम, गमोरा नेरो चमैंए खागुबै सहरर्बै म्हिमैंलाइ मैंन्। चमैंइ ब्यभिचार लसि आतबै के लइ। छतसि खोंयोंइ आसिबै मिर दण्‍ड योंसि चमैं नमुना तइमुँ।
JUD 1:8 च धोंलेन् चु स्‍योलिबै ताँमैं लोमिंबै म्‍हिमैंज्‍यै या पाप लम्। फाक्‍कर्बै दर्शन म्रोंसि चुमैंइ ह्रोंसए ज्युलाइन पापर च्होवाम्। झाइले प्रभु येशूए हगलाइ तो धोंइ आङ्हाँ, धै थेबै मान योंबै स्‍वर्गदूतमैंलाइ स्यारसि छ्याब् ल्हैदिम्।
JUD 1:9 दिलेया स्वर्गदूतमैं न्होंर्बै चिब मिखाएलज्यै या मोशाए सिनुए बारेर दुष्‍ट‍ने ताँ लमा गाल् आके, छ्याब् ल्हैदिबै आँटै या आलल, बरु “क्‍हिलाइ याहवेहजीन् हौदिरिगे,” बिल।
JUD 1:10 दिलेया चु स्‍योलिबै ताँ लोमिंब्‍मैंइ ह्रोंसइ आक्‍होबै ताँ या बिल्‍लि लसि पोंम्। धै बुद्धि आरेबै खेदोमैं धोंले च्हैंब् मैंब् आलल्‍ले चमैं सैंर्बै ताँमैंए लिलि प्रसि आछ्याँबै के लम्। छाबै केमैंइन चमैंलाइ नास लवाम्।
JUD 1:11 धिक्‍कार मुँ चमैंलाइ। तलेबिस्याँ स्‍योंम्‍बै कयिनइ लब् धोंबै के चमैंइ लम्। ह्रोंसए फायदए ल्हागिर बालम बिबै म्हिइ लब् धोंबै गल्‍ति चमैंइ लम्। छतसि मोशाए बिरोधर राबै स्‍योंम्‍बै कोरह बिबै म्‍हि धोंले चमैंइ ठिक अधिकारए बिरोध लबइले नास तयाम्।
JUD 1:12 संगति लल् खाँसि चब् थुँब् लमा चुमैं पि आरेल्‍ले चब्मैं ग। तलेबिस्याँ चमैंइ खाबलाज्यै या वास्ता आल, अरूइ चल् योंरिगे उ आयोंरिगे चमैंलाइ न्हुँ आरे। चमैं थेबै खैंइ नोइ बोवाबै नाँ आरेबै न्‍हाँम्‍स्यो धों तब्मैं ग। झाइले रो आरोबै सर्खर्बै सिं धुँ धों तब्मैं ग, ङ्हिब्‍ले सियाबै धुँमैं धोंले चमैं जराउँइँलेन् स्‍युवाइमुँ।
JUD 1:13 चमैं मा ङ्युँरर्बै थेबै भेल्‍गामैं धों तब्मैं ग। चुमैंइ फापिल्‍ले ह्रोंसइ लबै आछ्याँबै केमैं उँइँम्। चमैं क्‍ल्‍ह्‍यो घ्रिर आटिबै मुसारा धोंब मुँ। छाबै म्‍हिमैंए ल्हागिर क्रोंर्बै मिछु खैबै क्‍ल्‍ह्‍यो परमेश्‍वरजी खोंयोंइन साँथेंइमुँ।
JUD 1:14 चमैंए बारेर हनोकइ स्‍योमनन् लिउँइँ तखबै ताँ बिल। (हनोक बिबै म्‍हि परमेश्‍वरजी बनेबै ओंसोंबै म्‍हि आदमउँइँले पुस्‍ता ङि लिउँइँबै म्‍हि मुँल।) “थेद्, प्रभु खीए हजारौं-हजारौं स्‍वर्गदूतमैंने
JUD 1:15 ताँन् म्‍हिए निसाफ लबर युब्‍मुँ। चमैंइ खीलाइ आम्हाँदिल्‍ले आछ्याँबै केमैं लइ, धै खीलाइ आम्हाँदिब्मैंइ खीए बिरोधर आछ्याँबै ताँ पोंइ, छतसि चमैंलाइ निसाफ लसि दण्ड पिंबर खी युब्मुँ।”
JUD 1:16 च स्योलिबै ताँ लोमिंब्‍मैं प्होंगि कैगि लब्मैं, अरूलाइ छ्याब् ल्हैदिब्मैं, ह्रोंसए सैंउँइँले खबै आछ्याँबै ताँमैंए लिलि प्रब्मैं, थेब् प्‍हैंब्मैं, ह्रोंसए फायदाए ल्हागिर म्‍हिमैंलाइ वाँब्मैं ग।
JUD 1:17 छतसि ओ ङए खोबै थुमैं, ङ्योए प्रभु येशू ख्रीष्‍टजी कुल्मिंबै चेला चिब्मैंइ ओंसोंन् बिबै ताँमैं क्हेमैंइ मैंन्।
JUD 1:18 “आखिरि त्हिंइर क्‍हेमैंलाइ बिल्‍लि लब्‍मैं त्होंब्मुँ। चमैं परमेश्‍वरलाइ आम्हाँदिल्‍ले ह्रोंसए सैंउँइँले खबै आछ्याँबै ताँमैंए लिलिन् प्रब्‍मुँ,” बिसि चमैंइ क्‍हेमैंने बिब्रें लमल।
JUD 1:19 परमेश्‍वरलाइ ङो आसेबै म्हिमैं, फोट झोंसि क्हेंमैंए न्होंर आक्ह्रिल् लवाब्मैं नेरो पबित्र प्ल्ह आरेब्मैं चमैंन् ग।
JUD 1:20 दिलेया ओ ङए खोबै थुमैं, क्‍हेमैं बिस्‍याँ ह्रोंसइ लबै पबित्र बिश्‍वासर भोंसि ततै ह्‍याद्, धै पबित्र प्ल्हए शक्‍तिउँइँले प्राथना लद्।
JUD 1:21 धै खोंयोंइ आखाँबै छ्ह योंबै ल्हागिर ङ्योए प्रभु येशू ख्रीष्‍टजी लबै ल्हयो ह्रेरिमा क्हेमैं परमेश्‍वरए म्हाँयार टिरिद्।
JUD 1:22 च स्‍योलिबै ताँ थेसि सैं ङ्हिरि तब्‍मैंए फिर ल्हयो लद्;
JUD 1:23 अरूमैंलाइ मिउँइँले तेवाब् धोंले च स्‍योलिबै ताँउँइँले जोगेमिंन्; धै अरूमैंलाइ ल्हयो लद्, दिलेया चमैंए सैं न्होंउँइँले खबै आछ्याँबै ताँमैंइ क्हेमैंए सैं न्होंवाल् आखाँरिगे बिसि क्हेमैंइ चु के च्हैंसि मैंसि लद्।
JUD 1:24 क्‍हेमैंलाइ पापर च्होवाबै सैउँइँले परमेश्‍वरजी जोगेल् खाँम्, धै तोइ छ्याब् आरेब् लमिंसि परमेश्‍वरए उँइँर सैं तोंन्ले टिल् योंब लमिंल् खाँम्।
JUD 1:25 छाबै ङ्योलाइ जोगेमिंबै घ्रि मत्‍त्रे मुँबै परमेश्‍वरलाइ ङ्योए प्रभु येशू ख्रीष्‍टउँइँले थेबै मान, थेबै शक्‍ति, थेबै भों नेरो अधिकार, ओंसोंउँइँले तिंयाँ धै प्हँना लिउँइँ समा खोंयोंन् बिलै तरिगे! आमेन, छाबन् तरिगे!
REV 1:1 येशू ख्रीष्‍टजी उँइँमिंबै ताँमैं, तारे युनन् तखबै ताँमैं खीए के लब्‍मैंइ क्होरिगे बिसि परमेश्‍वरजी येशूलाइ चु ताँ पिंब् ग। येशूजी खीए सेवा लबै म्‍हि यूहन्‍ना ङाँर खीए स्‍वर्गदूत कुल्‍मिंसि चु ताँमैं बिमिंइ।
REV 1:2 झाइले यूहन्‍नाइ ह्रोंसइ म्रोंबै ताँन् सैमैं बिमिंइमुँ, चइ बिमिंबै परमेश्‍वरउँइँले खबै ताँ नेरो येशू ख्रीष्‍टजी उँइँमिंबै क्ह्रोंसेंन्बै ताँ चुन् ग।
REV 1:3 चु कितब खेमिंबै म्‍हिइ आशिक योंब्मुँ, झाइले चु कितबर्बै ताँ थेसि चर बिब् धोंले छ्ह थोब्मैंइ आशिक योंब्मुँ, तलेबिस्याँ चु ताँन् ताँमैं तबै त्हे चेंदोन् खसिन् मुँ।
REV 1:4 एशिया ह्‍युलर्बै नाँस ङिर्बै बिश्‍वासीमैंने ङ यूहन्‍नाउँइँले जय मसीह मुँ। क्‍हेमैंलाइ परमेश्‍वर, प्ल्ह ङिउलो नेरो येशू ख्रीष्‍टउँइँले दयाम्हाँया नेरो शान्ति तरिगे। परमेश्‍वर मुँल, मुँ, लिउँज्‍यै या युब्‍मुँ। प्ल्ह ङिउलो खीए राजगद्दिए उँइँर मुँ।
REV 1:5 येशू ख्रीष्‍ट क्ह्रोंसेंन्‍बै भर लल् खाबै साक्षि मुँ, सिबउँइँले खी ताँन् भन्दा ओंसों सोगों तल, खी पृथ्‍बीर्बै म्रुँमैंए क्ल्हे ग। प्रभु येशूजी ङ्योलाइ म्हाँया लम्। खी सिमिंसि खीए कोउँइँले ङ्यो पापउँइँले फ्रेमिंइमुँ।
REV 1:6 खीए परमेश्‍वर आबाए सेवा लरिगे बिसि येशूजी ङ्योलाइ परमेश्‍वरए मिंर ख्रो पिंबै खेगिमैं लमिंइमुँ। येशू ख्रीष्‍टए मिं खोंयोंन् बिलै थेब् तरिगे। आमेन, छान् तरिगे।
REV 1:7 ङ्ह्‍योत्ति, येशू न्‍हाँम्‍स्योर युइन मुँ। खीलाइ सैब्मैं नेरो अरू ताँन् म्हिमैंज्यै या खी म्रोंब्‍मुँ। छले खि युरिब् म्रोंमा ह्‍युलर्बै ताँन् म्हिमैं न्हुँ लसि क्रोब्‍मुँ। आमेन, छान् तरिगे।
REV 1:8 “ताँन् भन्दा ओंसोंबै नेरो ताँन् भन्दा लिउँइँबै ङन् ग। बिसि तोन्दोंरि लल् खाँबै परमेश्‍वरजी बिइमुँ, खी मुँल, मुँ, लिउँज्यै या युब्‍मुँ। ग!”
REV 1:9 ङ क्‍हेमैंए आघें यूहन्‍ना ग। येशूए फिर बिश्‍वास लबइले क्‍हेमैंइ धोंलेन् ङज्यैया खैबन् दु:ख तलैया ङइ सैदिइमुँ। येशू ख्रीष्‍टए बारेर ग्वाइ पिंदै परमेश्‍वरए ताँ बिप्रबै लमा म्‍हिमैंइ ङलाइ मा ङ्युँइर मुँबै पत्‍मोस बिबै कोंर च्युथेंल।
REV 1:10 प्रभुए त्हिंइर पबित्र प्ल्हजी ङलाइ प्लिंइ। च्हमा ङए लिउँइँ थुतुरुल् धों तबै कैइ,
REV 1:11 “क्‍हिइ म्रोंबै ताँ कितबर प्‍ह्रिसि नाँस ङिर्बै एफिसस, स्‍मुर्ना, पर्गामम, थिआटीरा, सार्डिस, फिलाडेल्‍फिया नेरो लाउडिकिया बिबै नाँसर्बै बिश्‍वासीलाइ पिमिंन् बिब ङइ थेइ।”
REV 1:12 ङने पोंब खाब् मुँगे बिसि ङ लिग्‍याँ तोइ ङ्‍ह्‍योमा ङइ माराए पानस ङिउलो म्रोंइ।
REV 1:13 च पानसए म्हाँजोर म्‍हिए च्ह धों ब्योंबै म्हि घ्रि म्रोंइ। खीजी प्‍हले समान् युल्‍ले क्‍वें खिल, धै खीए तिंरै या माराए फित्ता मुँल।
REV 1:14 खीए क्र पै, अथवा क्‍लिं धोंले फोस्रे ब्‍योंब मुँल। झाइले खीए मि मिए राब धों तब् मुँल।
REV 1:15 खीए प्‍हले भट्टिर खारदिबै सरेस धोंले वाँ वाँ ब्योंब् मुँल। खीए कै बेल्‍ले ङ्‍हेबै छारे धों तब् मुँल।
REV 1:16 खीए क्‍योलो योर मुसारा ङि मुँल। झाइले खीए सुँउँइँले दोहोरोन् धार मुँबै सेलाँ त्‍होंल। खीए लि त्‍हिंयाँ आधार्बै त्‍हिंयाँ धोंले बेल्‍ले चारब मुँल।
REV 1:17 खीलाइ म्रोंमा ङ सिब् धोंन् तसि खीए प्‍हलेर पत्गु तइ। दिलेया खीए क्‍योलो यो ङए फिर थेंसि खीजी बिइ, “आङ्हिंन्, ताँन् भन्दा ओंसोंबै नेरो ताँन् भन्दा लिउँइँबै ङन् ग।
REV 1:18 सोगों परमेश्‍वर ङन् ग। ङ सियाल, दिलेया तारे ङ खोंयोंइ बिलै सोरिम्। काल नेरो म्‍हि प्‍ल्‍हमैं नाँसर्बै साँजु नेरो हग ङने मुँ।
REV 1:19 छतसि तोगो म्रोंरिबै ताँमैं नेरो लिउँइँ तखबै ताँमैं ङ्हिंन-ङ्हिंन् क्‍हिइ प्‍ह्रिद्।
REV 1:20 ङए क्‍योलो योर क्‍हिइ म्रोंबै मुसारा ङिउलो नेरो माराए पानस ङिउलोए अर्थ चु ग: मुसारा ङिउलोए अर्थ नाँस ङिउलोर्बै बिश्‍वासीमैंए फिर्बै चिब्मैं ग, झाइले चु पानस ङिउलोए अर्थ नाँस ङिउलोर्बै बिश्‍वासीमैं ग।
REV 2:1 “एफिसस नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “मुसारा ङिउलो क्‍योलो योर छेसि माराए पानस ङिउलोए म्‍हाँजोर प्रबै येशूजी चु ताँ बिइमुँ:
REV 2:2 क्हिए बिश्‍वासीमैंइ लबै केमैं, क्हेमैंइ बेल्‍ले भोंले लबै केमैं नेरो क्हेमैंइ सैदिबै दु:खमैं ङइ सेइमुँ। झाइले क्हेमैंइ आछ्याँबै के लबै म्हिमैंलाइ आसैदि बिसे या ङइ सेइमुँ। को-कोइइ ‘ङि प्रभु येशूजी कुल्मिंबै चेला चिब्मैं ग’ बिसि स्योर तेमा चमैंए सैं फो किंसि क्हेमैंइ चमैं स्‍योर्गों मुँन बिब् सेबै या ङइ सेइमुँ।
REV 2:3 क्हेमैंइ ङए फिर बिश्‍वास लबइले कति थेबै दुःख तलेया सैदिसि टिइमुँ, झाइले ङए घ्याँर प्रबर आनारइमुँ।
REV 2:4 दिलेया क्हेमैंए बिरोधर ङइ चु ताँ बिल् त्हुइमुँ: क्हेमैंइ ओंसों धोंले तोगो ङलाइ म्हाँया आलइमुँ।
REV 2:5 क्हिइ लबै आछ्याँबै केमैं मैंन्। च आछ्याँबै केमैंउँइँले सैं एसि ओंसों लब् धोंले तोगोइन ङलाइ म्हाँया लद्। छ आलस्‍याँ ङइ क्‍हेमैंए पानस चए क्‍ल्‍होउँइँले स्‍योवाब्‍मुँ।
REV 2:6 दिलेया निकोलाइटसए लिलि प्रब्मैंए के ङइ आखोब् धोंले क्‍हेमैंज्यै या चमैंए के आखोमना, चु ताँर क्हेमैंइ ठिक लइमुँ।
REV 2:7 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे। “शैतान दुष्‍टए फिर ट्होगों तब्मैंलाइ परमेश्‍वरए बगैंचार मुँबै छ्ह पिंबै सिं धुँर्बै रोमैं ङइ चल् पिंब्‍मुँ।”
REV 2:8 “स्‍मुर्ना नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “चु ताँ ओंसों ओनोंन् मुँब नेरो लिउँइँ समा तरिबै येशूजी बिइमुँ, ङ सियाल, दिलेया धबै सोगों तइ।
REV 2:9 क्‍हिए दुःखमैं नेरो क्‍हि ङ्हाँदु मुँ बिब ङइ सेइमुँ। दिलेया क्‍हिम् क्‍ह्रोंसेंन प्लब मुँ। कोइ म्‍हिमैंइ ‘ङ यहूदी ग,’ बिमुँ, दिलेया चमैं यहूदीमैं आङिं, चमैं दुष्‍टए न्होंर टिब्‍मैं ग। चमैंइ क्‍हिए फिर पोंबै आछ्याँबै ताँमैं ङइ सेइमुँ।
REV 2:10 क्हेमैंए फिर खबि छेबै दुःखने आङ्हिंन्। थेद्, क्‍हेमैंलाइ पापर च्होवाबै ल्हागिर दुष्‍टइ को-कोइलाइ झेलर झोंब्‍मुँ। क्‍हेमैंलाइ च्‍युगैं मत्‍त्रे दुःख तब्‍मुँ। दिलेया क्‍हेमैं आसिन् समा ङए फिर बिश्‍वास लरिद्, छलस्याँ ङइ क्‍हेमैंलाइ इनामर खोंयोंइ आखाँबै छ्ह पिंब्मुँ।
REV 2:11 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे। “शैतान दुष्‍टए फिर ट्होगों तबै म्हि ङ्हिंब्ले सिल् त्हुरिब् आरे, बरु खोंयोंइ आखाँबै छ्ह योंब्मुँ।”
REV 2:12 “पर्गामम नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “छ्यारबै दोहोरो धार मुँबै सेलाँ मुँबै येशूजी चु ताँ बिइमुँ:
REV 2:13 दुष्‍टइ ग्याल्स लबै क्ल्ह्‍योर क्‍हि टिइमुँ बिब ङइ सेइमुँ। दिलेया दुष्‍ट टिबै क्‍ल्‍ह्‍योर ङए बारेर भर लल् खाँबै ग्वाइ पिंबै एण्‍टिपासलाइ म्‍हिमैंइ सैवानाबिलेया क्‍हिइ ङए फिर बिश्‍वास लब आपिइमुँ।
REV 2:14 दिलेया क्हेमैंए बिरोधर को-कोइ ताँ ङइ बिल् त्हुइमुँ, तलेबिस्याँ क्हेमैंए न्होंर को-कोइ स्‍योंम्‍बै बालामए ताँए लिलि प्रब्मैं मुँ। स्योंम्बै इस्राएलीमैंलाइ पापर च्होवाबै ल्हागिर ‘चमैंलाइ कुर चडेबै सै चद्, झाइले ब्यभिचार लद् बिद्,’ बिसि बालामइ बालाक बिबै म्रुँलाइ लोमिंल।
REV 2:15 च धोंलेन् निकोलाइटसइ लोमिंबै ताँए लिलि प्रब्मैं को-कोइ क्हेमैंए न्होंर मुँ।
REV 2:16 छतसि क्हेमैंए पापमैंउँइँले सैं एद्। आस्‍याँ ङ क्‍हि ङाँर युनन् युसि च म्‍हिमैंने बालु ङए सुँउँइँले त्‍होंबै सेलाँइ ङइ ल्हडें लब्‍मुँ।
REV 2:17 “पबित्र प्ल्हजी बिश्‍वासीमैंने बिबै ताँ न्ह मुँब्मैंइ छेनाले थेरिगे। “शैतान दुष्‍टए फिर ट्होगों तब्मैंलाइ लोथेंबै मन्‍न ङइ चल् पिंब्‍मुँ। चलाइ ङइ तार्ग्या युँमा पिंब्‍मुँ। च युँमार चए छारा मिं प्ह्रिइमुँ। च मिं योंबै म्‍हिइ मत्‍त्रे च छारा मिं था सेम्।”
REV 2:18 “थिआटिर नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “चु ताँ मिए राब धों तबै मि नेरो टल्‍कदिबै पित्तल धों तबै प्‍हले मुँबै परमेश्‍वरए च्‍हजी बिइमुँ:
REV 2:19 क्‍हिइ लबै के ङइ सेइमुँ। झाइले क्‍हिइ कति थेबै म्हाँया लमुँ, कति थेबै बिश्‍वास मुँ, कति छ्याँबै सेवा लमुँ, कति ढुक्‍कले सैदिसि टिमुँ, च ताँन् ङइ सेइमुँ। झाइले क्‍हेमैंइ ओंसों लब् भन्दा तिंजोरो झन् ल्हें के लइमुँ बिब् ङइ सेइमुँ।
REV 2:20 दिलेया क्‍हेमैंए बिरोधर चु ताँ ङइ बिल् त्हुइमुँ: क्‍हिइ ईजेबेल बिबै च्हमिरिलाइ क्हेमैंने बालुन् टिल् पिंइमुँ। चइ ह्रोंसलाइन अगमबक्‍ता ग बिसि बिइमुँ, दिलेया चइ ङए के लब्‍मैंलाइ वाँसि ब्यभिचार लले या, कुर चडेबै सै चले या तोइ आत बिसि लोमिंम्।
REV 2:21 ङइ चलाइ पापउँइँले सैं एबै मौका पिंइ, दिलेया चइ ब्यभिचार लबै पापउँइँले एबै सैं आलइमुँ।
REV 2:22 छतसि ङइ च च्हमिरिलाइ नल् लब्‍मुँ, झाइले चने ब्यभिचार लब्‍मैंलाज्यै या थेबै दुःख पिंब्‍मुँ। चमैंइ चने लबै पापउँइँले सैं आएइबिस्‍याँ ङइ चमैंलाइ तोगोंन् थेबै दुःख पिंब्‍मुँ।
REV 2:23 ङइ च च्हमिरिए लिलि प्रबै म्‍हिमैंलाइ सैवाब्‍मुँ। ङइ म्‍हिए सैंर्बै ताँमैं नेरो चमैंइ लबै केमैं था सेमना बिसि ताँन् बिश्‍वासीमैंइ च त्हेर था सेब्‍मुँ, छले क्‍हेमैंइ खैबै के लमुँ, छाबन् नों ङइ क्हेमैं घ्रि घ्रिलाइ पिंब्‍मुँ।
REV 2:24 “दिलेया क्‍हेमैं न्होंर ईजेबेलए लिलि आप्रबै म्हिमैं मुँ। को-कोइ म्‍हिमैंइ चइ लोमिंबै ताँमैंलाइ ‘दुष्‍टए गैरु ताँ ग’ बिलेया क्‍हेमैंइ च ताँ आलोइमुँ। छतसि ङइ क्‍हेमैंने बिमुँ, ङइ क्‍हेमैंए फिर अरू दु:ख पिंरिब आरे।
REV 2:25 तो तलेया ङ आयुन् समा क्‍हेमैंइ तो ताँर बिश्‍वास लइमुँ, च ताँर्न अझै छेनाले बिश्‍वास लरिद्।
REV 2:26 “खाब‍इ दुष्‍टए फिर ट्होमुँ, धै ङइ खोबै केमैं आखिरि त्हिंइ समा लरिमुँ, चमैंलाइ ङइ अरू ह्रेंमैंए फिर ग्याल्स लबै हग पिंब्‍मुँ।
REV 2:27 ङइ ङए आबाउँइँले थेबै हग योंब् धोंले चमैंलासे या ङइ थेबै हग पिंब्‍मुँ। पैए प्हरेइ सए भाँडो फदिवाब् धोंले चमैंइ ह्रें-ह्रेंमैंए फिर ग्याल्स लब्‍मुँ।
REV 2:28 धै चमैं ट्होइ बिसि ङइ इनामर न्‍हाँगर्बै मुसारा या पिंब्‍मुँ।
REV 2:29 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे।
REV 3:1 “सार्डिस नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “चु ताँ परमेश्‍वरए प्ल्ह ङि नेरो मुसारा ङि मुँबै येशूजी बिइमुँ: क्‍हेमैंइ लबै के ङइ सेइमुँ। म्हिमैंइमि क्‍हेमैं सोगोंन् मुँ ङ्हाँइमुँ, दिलेया क्‍हेमैं सियाइमुँ।
REV 3:2 छतसि रेसि न्ह क्रों मि क्रों तद्, झाइले न्होंयाबै केमैं क्योंएँन्। तलेबिस्याँ क्‍हेमैंइ लबै केमैं ङए परमेश्‍वरए उँइँर ठिक आतब ङइ म्रोंइमुँ।
REV 3:3 छतसि क्‍हेमैंइ तो लोइ, तो थेइ, च ताँ मैंन्। च ताँइ बिब् धोंले के लसि पाप लबउँइँले सैं एद्। क्‍हि न्ह क्रों मि क्रों आतइबिस्याँ ह्‍यो खब् धोंले क्‍हेमैंइ था आसेल्‍ले ङ युब्‍मुँ।
REV 3:4 दिलेया क्‍हेमैं सार्डिसथेंमैं न्‍होंरि को-कोइ म्‍हिमैंइ क्‍वेंर क्‍ह्रि ङ्हाँल् आलब् धोंले पापउँइँले स्‍योसि छ्याँबै के लइमुँ। चमैं ङने प्रबै लायकर्बै तसि चमैं फोस्रे ब्योंबै क्‍वें खिसि ङने प्रब्मुँ।
REV 3:5 “शैतान दुष्‍टए फिर ट्होगों तब्मैंलाइ ङइ फोस्रे ब्योंबै क्‍वें खिमिंब्‍मुँ। झाइले छ्ह योंब्‍मैंए मिं प्‍ह्रिथेंबै कितबउँइँले ङइ चए मिं मेटिरिब आरे। ङए आबाए उँइँर नेरो खीए स्‍वर्गदूतमैंए उँइँर ‘च ङल् ग’ बिसि ङइ ग्वाइ पिंब्‍मुँ।
REV 3:6 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे।
REV 3:7 “फिलाडेल्‍फिया नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “पबित्र नेरो क्ह्रोंसेंन्बै ताँ पोंबै येशूजी चु ताँ बिइमुँ: ङने स्‍योंम्‍बै दाऊद म्रुँए साँजु मुँ। छतसि ङइ थोंबै म्रा खाबज्‍यै तोरल् आखाँ, छलेन ङइ तोरबै म्रा खाबज्‍यै थोंल् आखाँ।
REV 3:8 क्‍हेमैंइ लबै केमैं ङइ सेइमुँ। क्‍हेमैंने भों ल्हें आरेलेया क्‍हेमैं ङइ लोमिंब् धोंले प्रइमुँ, धै ङलाइ आपिइमुँ। ङइ क्‍हेमैंए ल्हागिर म्रा थोंथेंइमुँ, च म्रा खाबज्‍यै तोरल् आखाँ।
REV 3:9 थेद्, को-कोइ दुष्‍टए न्होंर टिब्मैंइ ‘ङ यहूदी ग’ बिम् दिलेया चमैं क्ह्रोंसेंन्बै यहूदी आङिं। च स्‍योर्गुमैंलाइ ङइ क्‍हेमैंए प्‍हले फ्‍योबर ल्‍हैदिब्‍मुँ। झाइले ङइ क्‍हेमैंलाइ म्हाँया लरिमना बिब चमैं ताँनइ था सेब्‍मुँ।
REV 3:10 पृथ्‍बीर्बै ताँन् म्हिलाइ जाँच लबर दुःख तबै त्हे खब्‍मुँ। दिलेया ङइ ‘ढुक्‍कले सैदिद्’ बिमा क्‍हेमैंइ ङिंइ, छतसि च जाँच लबै त्हेर खबै दु:खउँइँले ङइ क्‍हेमैंलाइ जोगेमिंस्‍यो।
REV 3:11 ङ युनन् युम्। क्हेमैंइ ट्होसि योंल् त्हुबै इनाम खाबज्‍यै क्हेमैंउँइँले प्‍हेंइ बोल् आखाँरिगे बिसि क्हेमैंइ तो ताँर बिश्‍वास लइमुँ, च ताँर्न अझै छेनाले बिश्‍वास लद्।
REV 3:12 “ट्होबै म्हिमैंलाइ ङइ ङए परमेश्‍वरए मन्‍दिरर्बै त्हो लमिंम्। झाइले चमैं मन्‍दिरउँइँले बैरु त्होंल् आत्हु। चमैंए ङ्होर ङइ ङए परमेश्‍वरए मिं प्‍ह्रिमिंब्‍मुँ, झाइले स्‍वर्गउँइँले क्युरु युबै परमेश्‍वरए छारा यरूशलेम बिबै सहरए मिं प्‍ह्रिमिंब्‍मुँ, झाइले ङए छारा मिं या च म्‍हिमैंए ङ्होर ङइ प्‍ह्रिमिंब्‍मुँ।
REV 3:13 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे।
REV 3:14 “लाउडिकिया नाँसर्बै बिश्‍वासीमैंलाइ लोदा सैंदा लबै ल्हागिर चर्बै चिबए मिंर चु ताँ प्‍ह्रिद् बिसि येशूजी यूहन्‍नाने ल्हैदिइ: “भर लल् खाँब नेरो क्ह्रोंसेंन्बै ग्वाइ पिंबै येशूजी चु ताँ बिइमुँ: ङउँइँले परमेश्‍वरजी तोन्दोंरि सै बनेइमुँ, छतसि ङ आमेन ग।
REV 3:15 क्हेमैंइ लबै ताँन् के ङइ सेइमुँ। क्हेमैंए बिश्‍वास ललै आरे, ङ्युँबै आरे। क्हेमैं तो तलेया तिथु तस्याँ तमल।
REV 3:16 दिलेया क्हेमैंए बिश्‍वास हलहलु तब् मत्‍त्रे मुँ, ललै आरे, ङ्युँबै आरे। छतसि ङइ क्हेमैंलाइ थुइवाब्मुँ।
REV 3:17 क्हेमैंइ ‘ङ प्लब मुँ, ङलाइ तोए सैरै या खाँचो आरे,’ बिम्। दिलेया ह्रोंस् ङ्‍हो आसब, ङ्हाँदु, मि आम्रोंब, क्‍लुना मुँ बिब क्‍हेमैंइ था आसे।
REV 3:18 छतसि ङइ क्हेमैंलाइ चु सल्‍ला पिंम्: क्‍हि प्लब् तबै ल्हागिर मिर खारदिबै छ्याँबै मारा ङउँइँले किंन्, म्‍हिमैंइ क्‍हेमैंलाइ क्‍लुना तब् आम्रोंरिगे बिसि खिबै ल्हागिर ङउँइँले फोस्रे ब्योंबै क्‍वें किंन्, झाइले क्‍हिए मि म्रोंरिगे बिसि ङउँइँले मि म्रोंल् लबै मैं किंसि फोद्।
REV 3:19 म्हाँया लब्मैंलाइ ङइ हौदिमुँ, धै तार झोंम्। छतसि भों लसि क्‍हिइ लबै पापउँइँले सैं एद्।
REV 3:20 थेद्, ङ म्रार रासि हुइमुँ। खाबज्‍यै या ङए कै थेसि म्रा थोंस्‍याँ ङ न्‍होंर खब्मुँ, धै चने बालु चब्‍मुँ, चै या ङने बालुन् चब्‍मुँ।
REV 3:21 “शैतान दुष्‍टए फिर ट्होगों तब्मैंलाइ ङइ ङए राजगद्दिर ङने बालुन् क्हुँल् पिंब्‍मुँ। ङज्‍यै या ट्होसि ङए आबाने खीए राजगद्दिर क्हुँल् योंब् धोंलेन् ट्होबै म्‍हि या ङने बालुन् क्हुँल् योंब्‍मुँ।
REV 3:22 “पबित्र प्ल्हजी बिश्‍वासीमैंने बिबै ताँ न्‍ह मुँब्मैंइ छेनाले थेरिगे।”
REV 4:1 च लिउँइँ ङइ धबै दर्शनर स्‍वर्गर्बै म्रा थोंथेंब् म्रोंइ। धै ङइ ओंसों थेबै कैइ “छुइ कैंडो खो, ङइ क्हिलाइ तारे लिउँइँ तबै ताँमैं उँइँमिंस्‍यो” बिबै बिगुलए कै ङइ थेइ।
REV 4:2 च तोंदोंन् पबित्र प्ल्हजी ङ प्लिंयाइ, धै स्वर्गर राजगद्दि घ्रि मुँल, चर परमेश्‍वर क्हुँरिल।
REV 4:3 खीए लि बिल्‍लौर नेरो लालमणि धोंले टल्‍कदिब् मुँल। राजगद्दिए कारग्युले पिंग्‍या रङर्बै पन्‍ना धों तबै ह्‍यार्गों मुँल।
REV 4:4 च राजगद्दिए कारग्यु ङ्हिस्यु से प्लि ठिमैं मुँल। च ठिमैंए फिर क्हुँबै ङ्हिस्युसे प्लि चिब्मैंइ माराए मुकुट कुसि फोस्रे ब्योंबै क्‍वें खिल।
REV 4:5 च राजगद्दिउँइँले काम्‍लि तिम्‍लि धोंबै चारबै बत्तिमैं म्रोंमल धै मु ङ्‌हेबै कैमैं थेमल। च राजगद्दिए उँइँरि मि लुँब् धोंबै बत्ति ङि मुँल। च बत्तिमैं परमेश्‍वरए प्ल्ह ङि मुँल।
REV 4:6 च राजगद्दिए उँइँर सिसा धोंबै टल्‍कदिबै मा ङ्युँइ धों तबै सै मुँल। राजगद्दिए कारग्युले सो प्ह्‍याबै सैमैं प्लि मुँल। चए ज्यु तिगोंन् मि-मि मुँल।
REV 4:7 च सो प्ह्‍याबै सैमैं घ्रि सिंह धों ब्‍योंब् मुँल। घ्रि क्ल्या भारा धों ब्योंब् मुँल। घ्रि म्‍हि धों ब्योंब मुँल। झाइले घ्रि प्‍हुररिबै क्व्रे धों ब्योंब् मुँल।
REV 4:8 च सो प्ह्‍याबै सैमैं प्लिल प्‍ह्‍या टु-टु मुँल, चमैंए ज्यु तिगोंन् नेरो प्‍ह्‍यागों न्होंरै या मि-मि मुँल। चमैंइ त्‍हिंयाँ म्‍हुँइँस “तोन्दोंरि लल् खाँबै याहवेह परमेश्‍वर पबित्र, पबित्र, पबित्र मुँ। खी ओंसों ओनोंन् मुँल, तिंयाँ या मुँ, लिउँज्‍यै या तरिब्‍मुँ।” बिसि भों आन्हल्‍ले भजन प्रिंबै प्रिंबन् लरिमल।
REV 4:9 चर मुँबै सो प्ह्‍याबै सै प्लिइ राजगद्दिर क्हुँबै खोंयोंइ या तरिबै परमेश्‍वरलाइ थेबै मानले भजनमैं प्रिंसि खीए मिंलाइ थेब् लसि धन्‍यबाद पिंरिम्।
REV 4:10 छ लरिमा च ङ्हिस्युसे प्लि चिब्मैंइ राजगद्दिर क्हुँबै खोंयोंइ या तरिबै परमेश्‍वरलाइ पद्खु तसि फ्योम्, झाइले खेंमैंइ कुबै मुकुट राजगद्दिए उँइँर थेंसि छ बिरिम्,
REV 4:11 “ओ ङिए प्रभु परमेश्‍वर, क्‍हि थेबै मान, थेबै मिं नेरो हग योंल् त्हुब मुँ। तलेबिस्याँ ताँन् सै क्‍हिजीन् बनेब् ग, झाइले क्‍हिए सैंर मैंब् धोंले च ताँन् सैमैं तसि सो प्ह्‍याइ।”
REV 5:1 ङइ राजगद्दिर क्हुँबै परमेश्‍वरए क्‍योलो योरि दोहोरोन् प्‍ह्रिबै काउद प्हैं म्रोंइ। च काउद प्हैं लसि छाप ङि झोंल।
REV 5:2 झाइले बेल्‍ले भोंबै स्‍वर्गदूत ङइ म्रोंइ। चइ थेबै कैले, “चु फैथेंबै काउदए प्हैं प्‍ल्हबै लायकर्बै खाब् मुँ?” बिइ।
REV 5:3 दिलेया च काउदए प्हैं प्‍ल्हसि ङ्ह्‍योल् खाँबै म्‍हि स्‍वर्गरि, पृथ्‍बीरि नेरो क्रोंरै या खाबै आरेल।
REV 5:4 च काउदए प्हैं प्‍ल्हसि ङ्ह्‍योबै लायकर्बै म्‍हि खाबै आरेबइले ङ बेल्‍ले क्रोइ।
REV 5:5 ङ छले क्रोमा ङ्हिस्युसे प्लि न्‍होंर्बै चिब घ्रिइ ङने बिइ, “आक्रोद्, ङ्ह्‍योद्! यहूदाए कुलर्बै सिंह, खी स्‍योंम्‍बै दाऊद म्रुँए खलगउँइँले फिब् ग। खीजी ट्होइमुँ। छतसि खीजीन् चु छाप ङि फोर्दिसि चु काउदए प्हैं प्ल्हल् खाँम्।”
REV 5:6 झाइले ङइ राजगद्दिए म्‍हाँजोरि, अथवा च सो प्ह्‍याबै सै प्लि नेरो ङ्हिस्युसे प्लि चिब्मैंए म्‍हाँजोरि, क्‍यु च्हज घ्रि रारिब् म्रोंइ। च क्‍यु च्हज सैवाल् खाँब् धों ब्‍योंब् मुँल। चल रुँ ङि नेरो मि ङि मुँल। चए मिमैं पृथ्‍बी तिगोंन् कुल्‍मिंबै परमेश्‍वरए प्ल्ह ङि मुँल।
REV 5:7 क्‍यु च्हज ह्‍यासि राजगद्दिर क्हुँबै परमेश्‍वरए क्‍योलो योर मुँबै काउदए प्हैं किंइ।
REV 5:8 च्हमा चर्बै सो प्ह्‍याबै सै प्लि नेरो ङ्हिस्युसे प्लि चिब्मैंइ क्‍यु च्हजलाइ पद्खु तसि फ्‍योइ। चमैं ताँनए योर बीणा नेरो धुप झोंबै माराए धुपारामैं मुँल। च धुपए थाँ परमेश्‍वरए म्‍हिमैंए प्राथनमैं मुँल।
REV 5:9 झाइले चमैंइ छारा भजन घ्रि प्रिंइ: “च काउदए प्हैं किंसि चर्बै छाप फोर्दिसि ङ्‍ह्‍योबै लायकर्बै क्‍हि मुँ। तलेबिस्याँ म्‍हिमैंइ क्हिलाइ सैवाल, दिलेया ताँन् कुलउँइँले, ताँन् क्युइ पोंब्‍मैंउँइँले, ताँन् ह्‍युलर्बै म्हिमैंउँइँले नेरो ताँन् ह्रेंमैंउँइँले, क्‍हिए कोजी परमेश्‍वरए ल्हागिर क्हिजी म्हिमैंलाइ खामिंइ।
REV 5:10 धै क्‍हिजी चमैंलाइ म्रुँमैं नेरो ङ्योए परमेश्‍वरए सेवा लबर ख्रो पिंबै खेगिमैं लमिंइ। छले चमैंइ पृथ्‍बीए फिर ग्याल्स लब्मुँ।”
REV 5:11 झाइले ङइ धबै ङ्ह्‍योमा राजगद्दि, सो प्ह्‍याबै सै प्लि नेरो ङ्हिस्युसे प्लि चिब्मैंए कारग्युले च्योसे च्योल् आखाँबै स्‍वर्गदूतमैं मुँल।
REV 5:12 च स्वर्गदूतमैंइ बेल्‍ले थेबै कैले “सैवाबै क्‍यु च्हज तोन्दोंरि लल् खाँब, भोंब, ह्रब, म्हारब, छ्याँब, माब, ताँनइ म्हाँदिल् त्हुब मुँ!” बिसि क्वे प्रिंमल।
REV 5:13 छलेन स्‍वर्गर, पृथ्‍बीर, क्रोंर, मा ङ्युँइर, खन्तोंदोंन् मुँबै सो प्ह्‍याबै सैमैंइ “राजगद्दिर क्हुँबै परमेश्‍वर नेरो क्‍यु च्हजलाइ धन्‍यबाद, थेबै मान नेरो भों खोंयोंन् बिलै तरिगे।” बिसि क्वे प्रिंब ङइ थेइ।
REV 5:14 झाइले सो प्ह्‍याबै सै प्लिइ बिइ, “आमेन, छान् तरिगे!” छबिबै तोदोंन् ङ्हिस्युसे प्लि चिब्मैंइ पद्खु तसि फ्‍योइ।
REV 6:1 झाइले क्‍यु च्हजजी छाप ङि न्‍होंर्बै ओंसोंबै छाप फोर्दिब ङइ म्रोंइ। च लिउँइँ च सो प्ह्‍याबै सै प्लि न्‍होंर्बै घ्रिइ मु ङ्‌हेब् धों तबै कैइ “खो” बिब ङइ थेइ।
REV 6:2 झाइले ङइ ङ्ह्‍योमा चर फोस्रे ब्योंबै घोडा म्रोंइ। च घोडाए फिर क्रेबै म्‍हिइ त्‍हले छेल। धै चए क्रर मुकुट घ्रि कुमिंइ। झाइले चइ ट्होसि धबै अरूलाइ ट्होबर ह्‍याइ।
REV 6:3 च क्‍यु च्हजजी धबै अर्को छाप फोर्दिमा अर्को सो प्ह्‍याबै सैइ “खो” बिब ङइ थेइ।
REV 6:4 झाइले ओल्‍ग्‍या घोडा घ्रि त्‍होंखइ। पृथ्‍बीर म्हिमैंइ खेंमैंइ-खेंमैंन् सैवारिगे बिसि च ओल्‍ग्‍या घोडाए फिर क्रेबै म्हिलाइ ल्हडें लल् पिंबै हग नेरो थेबै सेलाँ घ्रि पिंइ।
REV 6:5 झाइले च क्‍यु च्हजजी अर्को छाप फोर्दिमा अर्को सो प्ह्‍याबै सैइ “खो” बिब ङइ थेइ। ङइ ङ्ह्‍योमा म्‍लोंग्‍या घोडा घ्रि त्‍होंब् म्रोंइ। च म्‍लोंग्‍या घोडाए फिर क्रेबै म्हिइ ह्रोंसए योर पार छेल।
REV 6:6 झाइले सो प्ह्‍याबै सैमैंए म्‍हाँजोउँइँले कै घ्रि धों तब ङइ थेइ। चइ बिइ, “तिगेंर्बै नों सै गहुँ किंस्याँ ङ्हिंम्‍ना, जौ किंस्याँ ट्हुम्‍ना पिंन्, दिलेया जैतुनए छ्युगु नेरो अँगुरए प्हा बिस्याँ जोगेसि थेंन्।”
REV 6:7 झाइले च क्‍यु च्हजजी अर्को छाप फोर्दिमा अर्को सो प्ह्‍याबै सैइ “खो” बिब ङइ थेइ।
REV 6:8 ङइ उर्ग्या घोडा म्रोंइ। चए फिर क्रेबै म्‍हिए मिं “काल” मुँल, चए लिलि क्रों प्रमल। धै पृथ्‍बीर मुँबै म्हिमैं न्होंर्बै प्ल्हिबाँर्बै तिंबाँ सैबै हग चमैंलाइ पिंल। छतसि चमैंइ सेलाँइ ल्हिल् पिंब, अँङ्गल् तल् पिंब, नब छब तल् पिंब, धै क्ह्‍योंर्बै खेदोमैंइ थाल् पिंब लमल।
REV 6:9 झाइले क्‍यु च्हजजी अर्को छाप फोर्दिमा परमेश्‍वरए मिंर ख्रो पिंबै क्ल्ह्‍योए न्‍होंर प्रभुए ल्हागिर सियाब्‍मैं ङइ म्रोंइ। चमैंइ परमेश्‍वरए ताँ बिप्रबइले, प्रभुए ल्हागिर ग्वाइ पिंबइले, म्‍हिमैंइ चमैंलाइ सैवाल।
REV 6:10 “ओ, तोन्दोंरि सै लल् खाँबै प्रभु, पबित्र नेरो क्ह्रोंसेंन्‍बै परमेश्‍वर, ह्‍युलर्बै म्हिमैंइ ङिलाइ सैवाइमुँ। छतसि चमैंए निसाफ लसि चमैंइ लबै केए खि खोंयों समा क्हिजी आकिं?” बिसि चमैं थेबै कैले ओरइ।
REV 6:11 चमैं घ्रि घ्रिलाइ फोस्रे ब्योंबै क्‍वें पिंसि “म्‍हिमैंइ क्‍हेमैंलाइ सैवाब् धोंलेन्, क्‍हेमैंए अलि-अङाँमैं नेरो अरू के लबै थुमैंलाज्यै या सैवाब्‍मुँ। च सैल् त्हुब्मैं ताँन् आसैन् समा अझै तिस्‍याँदे पैंन्,” बिसि परमेश्‍वरजी चमैंने बिइ।
REV 6:12 झाइले च क्‍यु च्हजजी धबै अर्को छाप फोर्दिब् ङइ म्रोंइ। च लिउँइँ थेबै सयो खइ। त्‍हिंयाँ म्‍लोंग्‍या रुँदो क्‍वें धोंन् तयाइ। लयाँ को धोंले ओल्‍ग्‍या तयाइ।
REV 6:13 थेबै खैं खमा तुँबु धुँउँइँले आमिंबै तुँबुए रोमैं खारब् धोंले मुर्बै मुसारामैं पृथ्‍बीर खारयाइ।
REV 6:14 काउदए प्हैं बेर्दिब् धोंले बेर्दियासि मु म्हयाइ। झाइले ताँन् कोंमैं नेरो मा ङ्युँइए म्हाँजोर मुँबै टापूमैं खेंमैंए क्‍ल्‍ह्‍योउँइँले स्‍योह्‍याइ।
REV 6:15 छतमा पृथ्‍बीर्बै म्रुँमैं, शासन लब्मैं, फौजए कप्‍तानमैं, प्लब्‍मैं, थे-थेबै म्‍हिमैं, झाइले केब्छैंमैं, केब्छैं आङिंब्मैं, ताँन् म्‍हिमैं कों जरेर्बै उ नेरो पाराजरे लोबर ह्‍याइ।
REV 6:16 धै चमैंइ थे-थेबै कोंमैं नेरो पारामैंने “राजगद्दिर क्हुँबै परमेश्‍वर नेरो क्‍यु च्हजए ह्रिसउँइँले जोगेमिंबै ल्हागिर ङि हुद्।
REV 6:17 तलेबिस्याँ खेंमैं बेल्‍ले ह्रिस खबै त्हिंइ खइमुँ। खेंमैंए उँइँर खाब् राल् खाँब?” बिसि चमैंइ बिइ।
REV 7:1 च लिउँइँ ङइ पृथ्‍बीए कुना प्‍लिर स्‍वर्गदूत प्लि रारिब् म्रोंइ। पृथ्‍बी, मा ङ्युँइ नेरो सिं धुँमैंर खैं आखरिगे बिसि चमैंइ खैं थोमल।
REV 7:2 च स्‍वर्गदूत प्लिइ पृथ्‍बी नेरो मा ङ्युँइलाइ नास लबै हग योंल। झाइले सोगों परमेश्‍वरए छाप छेबै अर्को स्‍वर्गदूत घ्रि स्यारउँइँले खरिब् ङइ म्रोंइ। चइ अर्को स्‍वर्गदूत प्लिने थेबै कैले बिइ,
REV 7:3 “ङ्योए परमेश्‍वरए के लब्‍मैंए ङ्‌होर ङिइ परमेश्‍वरए छाप आझोंन् समा पृथ्‍बी, मा ङ्युँइ नेरो सिं धुँमैंलाइ नास आलद्।”
REV 7:4 कति म्हिलाइ छाप झोंइ बिस्‍याँ लाख घ्रि से प्लिच्यु से प्लि हजार (१,४४,०००) म्हिमैंए ङ्‌होर छाप झोंइ बिब ङइ थेइ। चमैं इस्राएली ह्रेंर्बै च्युसे ङ्हिं कुलर्बै म्हिमैं मुँल।
REV 7:5 यहूदाए कुलउँइँले १२,००० रूबेनए कुलउँइँले १२,००० गादए कुलउँइँले १२,०००
REV 7:6 आशेरए कुलउँइँले १२,००० नप्‍तालीए कुलउँइँले १२,००० मनश्‍शेए कुलउँइँले १२,०००
REV 7:7 शिमियोनए कुलउँइँले १२,००० लेबीए कुलउँइँले १२,००० इस्‍साखारए कुलउँइँले १२,०००
REV 7:8 जबूलूनए कुलउँइँले १२,००० योसेफए कुलउँइँले १२,००० बेन्‍यामिनए कुलउँइँले १२,०००।
REV 7:9 च लिउँइँ खाबज्‍यै च्योसे च्‍योल् आखाँबै म्‍हिए हुल ङइ म्रोंइ। चमैं ताँन् ह्रें-ह्रेंर्बै, ताँन् कुलर्बै, ताँन् ह्‍युलर्बै नेरो ताँन् ह्रों-ह्रोंसए क्युइ पोंब्‍मैं मुँल। चमैं फोस्रे ब्योंबै क्‍वें खिसि छोरए धुँए हाँगमैं योर छेसि राजगद्दि नेरो क्‍यु च्हजए उँइँर रारिल।
REV 7:10 झाइले चमैंइ थेबै कैले बिइ, “राजगद्दिर क्हुँबै ङ्योए परमेश्‍वर नेरो क्‍यु च्हजजी मुक्‍ति पिंम्।”
REV 7:11 राजगद्दि, ङ्हिस्युसे प्लि चिब्मैं नेरो सो प्ह्‍याबै सै प्लिए कारग्युले स्‍वर्गदूतमैं मुँल। चमैं ताँनइ राजगद्दिए उँइँर पद्खु तसि छ बिदै परमेश्‍वरलाइ फ्योइ,
REV 7:12 “आमेन! ङ्योए परमेश्‍वरए मिं खोंयोंन् बिलै थेब् तरिगे! थेबै मान, ह्रब् सेब, धन्‍यबाद, ट्होब नेरो भोंब खोंयोंन् बिलै या खीलन् तरिगे। आमेन!”
REV 7:13 धै ङ्हिस्युसे प्लि चिब्मैं न्‍होंर्बै घ्रिइ “च फोस्रे ब्योंबै क्‍वें खिब्‍मैं खाब् जा? चमैं खनिउँइँले खइ?” बिसि ङने ङ्योएइ।
REV 7:14 ङइ चने बिइ, “ओ चिब, ङलाइ था आरे। चु ताँ क्‍हिजीन् सेइमुँ।” चइ ङने बिइ, “चमैं थेबै दुःख सैदिसि खब्‍मैं ग। चमैंइ ह्रों-ह्रोंसए क्‍वेंमैं क्‍यु च्हजए कोर ख्रुसि फोस्रे ब्योंब लइमुँ।
REV 7:15 छतसि परमेश्‍वरए राजगद्दिए उँइँर रासि चमैंइ परमेश्‍वरए मन्‍दिरर त्‍हिंयाँ, म्‍हुँइँस खीए सेवा लरिम्। राजगद्दिर क्हुँबै परमेश्‍वर चमैंए म्हाँजोर खोंयोंन् बिलै तरिम् धै खीजी चमैंए रक्षा लमिंम्।
REV 7:16 चमैं तारे खोंयोंइ या फो ख्रेंरिब् आरे, खोंयोंइ या क्‍यु पिरिब् आरे। छलेन त्‍हियाँ नेरो अरू तो सैज्‍यै या चमैंलाइ ख्रोंरिब् आरे।
REV 7:17 तलेबिस्याँ राजगद्दिए म्‍हाँजोर मुँबै क्‍यु च्हजजीन् चमैंए प्‍ह्रोंछैं तसि रक्षा लब्मुँ, धै खोंयोंइ आखाँबै छ्ह योंबै क्‍युए मूलर खीजी चमैंलाइ डोरेसि बोमिंब्‍मुँ। धै परमेश्‍वरजी चमैंए मिर्बै मिग्लि फ्‍योमिंब्‍मुँ।”
REV 8:1 धबै क्‍यु च्हजजी ङिखेबै छाप फोर्दिमा स्‍वर्गर आधा घण्‍टा समा तोए कै या आथे।
REV 8:2 च लिउँइँ परमेश्‍वरए उँइँर रारिबै स्‍वर्गदूत ङि ङइ म्रोंइ। च स्‍वर्गदूतमैंए योरि खीजी थुतुरु ङि पिंइ।
REV 8:3 झाइले माराए धुपारा छेबै अर्को स्‍वर्गदूत घ्रि परमेश्‍वरए मिंर ख्रो पिंबै क्ल्ह्‍योर खसि राइ। चइ परमेश्‍वरए राजगद्दिए उँइँर्बै माराइ बेनबै ख्रो पिंबै क्ल्ह्‍योए फिर परमेश्‍वरए ताँन् म्‍हिमैंए प्राथनाने बालु चडेबै ल्हागिर चलाइ ल्हें धुप पिंल।
REV 8:4 धुपए मिखु नेरो परमेश्‍वरए म्‍हिमैंइ लबै प्राथनामैं बालुन् स्‍वर्गदूतए योउँइँले परमेश्‍वरए उँइँर ह्‍याइ।
REV 8:5 झाइले च स्‍वर्गदूतइ ख्रो पिंबै क्ल्ह्‍योर्बै मि भुर धूपारार तिगोंले झोंसि पृथ्‍बीर भ्‍योंवाइ। झाइले मु ङ्‌हेसि, काम्‍लि तिम्‍लि रासि पृथ्‍बीर सयो ह्‍याइ।
REV 8:6 च लिउँइँ च थुतुरु छेबै स्‍वर्गदूत ङिइ थुतुरु ह्राबर होंइ।
REV 8:7 ओंसोंबै स्‍वर्गदूतइ थुतुरु ह्रामा को कोंबै तिस्‍यु नेरो मि पृथ्‍बीर युइ। पृथ्‍बीए भाग सोंबाँर्बै तिबाँ, सिं धुँए भाग सोंबाँर्बै तिबाँ, झाइले पृथ्‍बीर मुँबै ताँन् सिं धुँमैं नेरो प्याँ पिंमैं ताँन् ख्रोंवाइ।
REV 8:8 झाइले अर्को स्‍वर्गदूतइ ह्रोंसने मुँबै थुतुरु ह्रामा मि लुँरिबै थेबै कों घ्रि धों तबै सै परमेश्‍वरजी मा ङ्युँइर भ्‍योंवाइ। झाइले मा ङ्युँइर्बै क्‍यु सोंबाँर्बै तिबाँ को तयाइ,
REV 8:9 मा ङ्युँइर्बै सो प्ह्‍याबै सैमैं या सोंबाँर तिबाँ सियाइ, झाइले मा ङ्युँइर्बै क्‍यु झाजमैंए या सोंबाँर तिबाँ नास तयाइ।
REV 8:10 झाइले अर्को स्‍वर्गदूतइ थुतुरु ह्रामा मिए राब धोंले लुँरिबै थेबै मुसारा घ्रि मुउँइँले तेयुसि स्‍योंमैं सोंबाँर तिबाँ नेरो क्युए मूलमैंए फिर तेयुइ।
REV 8:11 च मुसाराए मिं “बेल्‍ले काँब ग”। छतसि क्‍यु सोंबाँर्बै तिबाँ बेल्‍ले काँब तबइले ल्‍हें म्‍हिमैं च क्‍यु थुँसि सियाइ।
REV 8:12 झाइले अर्को स्‍वर्गदूतइ थुतुरु ह्रामा त्‍हिंयाँ, लयाँ नेरो मुसारामैं सोंबाँर तिबाँलाइ ल्हिनेइ धै चमैंए ह्‍वे सोंबाँर तिबाँ म्हयाइ। छतसि त्‍हिंयाँ नेरो म्‍हुँइँसल सोंबाँर्बै तिबाँ मिछु तयाइ।
REV 8:13 च लिउँइँ ङइ धबै ङ्ह्‍योमा “तारेबै स्‍वर्गदूत सोंइ ह्राबै थुतुरुए कै थेबै लिउँइँ पृथ्‍बीर्बै म्‍हिमैंए फिर बेल्‍ले थेबै दुःख तब्मुँ,” बिसि प्‍हुररिबै क्व्रे घ्रिइ बिरिब ङइ थेइ।
REV 9:1 च लिउँइँ धबै अर्को स्‍वर्गदूतइ थुतुरु ह्रामा ङइ मुसारा घ्रि स्‍वर्गउँइँले पृथ्‍बीर खारयुब म्रोंइ। च मुसारालाइ परमेश्‍वारजी क्रोंर्बै साँजु पिंइ,
REV 9:2 धै चइ क्रों थोंवाँइ। झाइले थेबै कोदाउँइँले मिखु खब् धोंले च क्रोंउँइँले थेबै मिखु खइ। धै च मिखुइ त्‍हिंयाँ नेरो मु हुवाइ धै मिछु खैयाइ।
REV 9:3 च मिखुउँइँले पृथ्‍बीर तिरिमैं त्होंइ। झाइले चमैंलाइ बिच्‍छिमैंइ च्हिब् धोंले च्हिबै भों पिंइ।
REV 9:4 झाइले परमेश्‍वरजी तिरिमैंलाइ छ बिइ, “पृथ्‍बीर्बै छि प्याँ पिमैं नेरो सिं धुँमैं, नास आलद्, दिलेया खाब् म्‍हिए ङ्‌होर ङए छाप आरे, चमैंलाइ च्हिद्।
REV 9:5 चमैंलाइ सैबम् आसैद्, दिलेया म्हैंन ङ्‌हल् समा बेल्‍ले नल् लद्।” बिच्‍छिइ च्‍हिसि नब् धोंले चमैं नरिगे।
REV 9:6 च त्हेर चमैंइ सिल् योंस्याँ तमल ङ्हाँब्‍मुँ, दिलेया चमैं सिल् योंरिब् आरे।
REV 9:7 च तिरिमैं ल्हडें लबर तयार तबै घोडा धों तब् मुँल। चमैंए क्रर माराए मुकुट धों तबै सै मुँल, धै चमैंए लि म्‍हिल् धों तब मुँल।
REV 9:8 चमैंए क्रप्हो च्हमिरिमैंए क्रप्हो धों तब् मुँल। चमैंए स सिंहए स धों तब् मुँल।
REV 9:9 झाइले चमैंइ खेंमैंए तिंर पैए प्लाँ धों तबै सै खिल। चमैंए प्‍ह्‍याउँइँले खबै कै ल्हडेंर ह्‍याबै त्हेर न्हेबै ल्हें घोडामैं नेरो रथमैंए कै धों तब् मुँल।
REV 9:10 चमैंए म्येर बिच्‍छिल् धों तबै खिल मुँल। चमैंए म्येर म्हैंन ङ्‌हल् समा म्‍हिमैंलाइ नल् लल् खाँबै भों मुँल।
REV 9:11 च क्रोंर्बै दूत च तिरिमैंए म्रुँ मुँल। हिब्रू क्‍ह्‍युइरि च म्रुँए मिं “एबाड्डोन” ग, ग्रिक क्युइरि चए मिं “अपोल्‍लियोन” ग। च मिंए मतलब नास लब् ग।
REV 9:12 छले ओंसोंबै दुःख ह्‍याइ। चु लिउँइँ धबै अर्को दुःख ङ्हिं चैइमुँ।
REV 9:13 झाइले धबै अर्को स्‍वर्गदूतइ थुतुरु ह्रामा परमेश्‍वरए उँइँर्बै माराइ बेनबै ख्रो पिंबै क्ल्ह्‍योए कुना प्लिर मुँबै रुँउँइँले खबै कै घ्रि ङइ थेइ।
REV 9:14 च कैइ च थुतुरु ह्राबै स्वर्गदूतने “यूफ्रेटिस बिबै थेबै स्‍योंर च्‍युँइँथेंबै दूत प्लि पिवाद्,” बिइ।
REV 9:15 धै म्‍हिमैं सोंबाँर तिबाँलाइ सैबर च स्वर्गदूत प्लि पिवाइ। परमेश्‍वरजी चमैंलाइ चु बर्ष, चु म्हैंन, चु त्हिंइ नेरो चु त्हेए ल्हागिर्न ओंसों ओंनोंन् तयार लथेंल।
REV 9:16 च घोडार क्रेबै फौजमैं ङ्हिस्‍यु करोड (२०,००,००,०००) मुँल।
REV 9:17 झाइले ङइ दर्शनर घोडामैं नेरो घोडा क्रेब्‍मैं म्रोंइ। घोडाए फिर क्रेब्‍मैंए तिंर्बै पैए प्लाँ मि लुँब् धोंबै ओल्‍ग्‍या, निलम् बिबै युँमा धों तबै मु रङबै नेरो उर्ग्‍या मुँल। च घोडामैंए क्र सिंहमैंल् धों ब्योंब मुँल। धै च घोडामैंए सुँउँइँले मि, मिखु नेरो आछ्याँबै थाँ नाँबै सै त्‍होंरिल।
REV 9:18 च दुःख सोंउँइँले, अथवा चमैंए सुँउँइँले त्‍होंबै मि, मिखु नेरो आछ्याँबै थाँ नाँबै सैउँइँले सोंबाँर्बै तिबाँ म्हिमैं सैवाइ।
REV 9:19 च घोडामैंए भों चमैंए सुँ नेरो म्येर मुँल, तलेबिस्याँ चमैंए म्ये प्‍हुरि धों तब् मुँल, धै म्येल क्र मुँल। च म्येउँइँले घोडामैंइ म्‍हिमैंलाइ नल् लमल।
REV 9:20 छाबै दुःखउँइँले सोसेया चैबै म्‍हिमैंइ खेंमैंइ लबै पापउँइँले सैं आए। झन चमैंइ मोंए पूजा लब, धै मारा, चाँदि, पित्तल, युँमा, सिं, छाबै सैउँइँले बनेबै म्रोंल् आखाँब, थेल् आखाँब, प्रल् आखाँबै कुमैं पूजा लब आपि।
REV 9:21 चमैंइ म्हि सैब, म्हुत मोंब, फा-फुइ टुना मुना लब, ब्यभिचार लब, ह्‍योब, छाबै आछ्याँबै केमैंउँइँले या सैं आए।
REV 10:1 च लिउँइँ अर्को बेल्‍ले भों मुँबै स्‍वर्गदूत घ्रि स्‍वर्गउँइँले युरिब् ङइ म्रोंइ। च स्‍वर्गदूतलाइ न्‍हाँम्‍स्योइ बेर्दिल, झाइले चए क्र कारग्युले ह्‍यागों मुँल। चए लि त्‍हिंयाँ धों तब् मुँल, धै चए प्‍हले लुँरिबै मिए प्हैं धों तब् मुँल।
REV 10:2 चए योर च्‍युथिरि प्ल्हसि थेंबै काउदए प्हैं मुँल। चइ ह्रोंसए क्‍योलो प्‍हले मा ङ्युँइए फिर, त्हर्ग्यों प्‍हले पृथ्‍बीए फिर थेंल।
REV 10:3 झाइले सिंह ङ्‌हेब् धोंले चइ थेबै कै तेइ। चइ कै तेबै लिउँइँ काम्‍लि तिम्‍लि रादै मुउँइँले थेबै कै ङि त्होंइ।
REV 10:4 च कैमैं त्होंमा ङ चमैंइ बिबै ताँ प्‍ह्रिबर होंइ, दिलेया “चु ङ्‌हेबै कैमैंइ बिबै ताँमैंर छाप ल्हैदिद्, चमैंइ बिबै ताँ आप्‍ह्रिद्, चु ताँ खाबलाज्यै आबिद्!” बिसि स्‍वर्गउँइँले युबै कै ङइ थेइ।
REV 10:5 च लिउँइँ धबै प्हले घ्रि पृथ्‍बीर, प्हले घ्रि मा ङ्युँइर लसि रारिब ङइ म्रोंइ, च स्‍वर्गदूतइ ह्रोंसए यो स्‍वर्गउँइँ क्वेइ।
REV 10:6 धै स्‍वर्ग नेरो चर्बै सैमैं, पृथ्‍बी नेरो चर्बै सैमैं, मा ङ्युँइ नेरो चर्बै सैमैं बनेब नेरो खोंयोंन् बिलै तरिबै परमेश्‍वरए मिंरि च स्‍वर्गदूतइ कसम चसि छ बिइ, “तारे आक्‍है!
REV 10:7 छतसि तारे अर्को स्‍वर्गदूतइ चए थुतुरु ह्राबै लिउँइँ परमेश्‍वरजी खीए सेवा लबै अगमबक्‍तामैंने बिब् धोंले खाबज्यै आसेल्‍ले थेंबै खीए ताँमैं खीजी पूरा लब्‍मुँ।”
REV 10:8 झाइले स्‍वर्गउँइँले युबै कैइ ङने धबै बिइ, “ह्‍याद्, धै प्हले घ्रि मा ङ्युँइ प्हले घ्रि पृथ्‍बीर लसि रारिबै स्‍वर्गदूतए योर मुँबै प्ल्हसि थेंबै काउदए प्हैं किंन्।”
REV 10:9 छतसि ङ स्‍वर्गदूत ङाँर ह्‍यासि च च्‍युथिरि काउदए प्हैं ह्रिमा चइ ङने बिइ, “न, चु किंनु, धै चद्। चुइ क्‍हिए फो क्युँब्‍मुँ, दिलेया सुँर खुदु धोंले किगिब्‍मुँ।”
REV 10:10 च्हमा ङइ स्‍वर्गदूतउँइँले च च्‍युथिरि काउदए प्हैं किंसि चवाइ। च ङए सुँर खुदु धोंले बेल्‍ले किगिइ, दिलेया फो न्‍होंर ह्‍याबै तोंदोंन् बेल्‍ले क्युँइ।
REV 10:11 झाइले कै घ्रिइ ङने बिइ, “क्‍हिइ ल्हें म्‍हिमैं, ल्हें ह्रेंमैं, ल्हें क्युइ पोंब्‍मैं नेरो ल्हें म्रुँमैंए फिर परमेश्‍वरउँइँले तखम् बिबै ताँमैं धबै बिल् त्‍हुब्‍मुँ।”
REV 11:1 च लिउँइँ च्हैंबै प्हरे धों तबै सै घ्रि परमेश्‍वरजी ङलाइ पिंसि बिइ, “रेद्, धै ङए मन्‍दिर नेरो ङए मिंर ख्रो पिंबै क्ल्ह्‍यो च्हैंन्, धै चर ङए मिं क्वेब्मैं कति मुँ च्‍योद्।
REV 11:2 दिलेया मन्‍दिर बैरुबै ह्‍युमैं बिस्याँ आच्हैंन्, तलेबिस्याँ ङलाइ बिश्‍वास आलबै अरू ह्रेंमैंलाइ ङइ च ह्‍यु पिंइमुँ। प्लिच्यु से म्हैंन ङ्हिंल् समा (४२) चमैंइ पबित्र सहरलाइ प्‍लेथेंब्‍मुँ।
REV 11:3 दिलेया ङए ग्वाइ पिंब्‍मैं ङ्हिंलाइ हजार घ्रिसे ङ्हिप्रसे ट्हुच्‍यु त्हिंइ समा ह्रेंग खिसि ङए ताँ पोंबै भों पिंब्‍मुँ।”
REV 11:4 चु ग्वाइ पिंब्‍मैं प्रभुए उँइँर मुँबै जैतुनए धुँ ङ्हिं नेरो पानस ङ्हिं ग।
REV 11:5 खाबज्यै चमैंलाइ न्होह्रों लबै सैं लइ बिस्याँ, च ग्वाइ पिंब्‍मैंए सुँउँइँले त्‍होंबै मिइ चमैं नास लवाब्‍मुँ। छले चमैंलाइ न्होह्रों लल् म्हैब्मैं नास तयाब्मुँ।
REV 11:6 खेंमैंइ परमेश्‍वरए ताँ छेनाले बिप्रल् योंबै ल्हागिर मुउँइँले नाँ युल् आलबै शक्‍ति चमैंने मुँ, चमैंइ स्योंमैं या को लवाल् खाँमुँ, छलेन चमैंए सैंर मैंबै त्हेर पृथ्‍बीर तब आतब दुःख पल् खाँबै शक्‍ति या चमैंने मुँ।
REV 11:7 छले चमैंइ परमेश्‍वरए ताँ बिप्रबै के लल् खाँबै लिउँइँ च क्रोंउँइँले त्होंखबै खेदोइ च ग्वाइ पिंब्‍मैं ङ्हिंने ल्हडें लसि चमैंलाइ ट्होसि सैवाब्‍मुँ।
REV 11:8 झाइले चमैंए सिनुमैं खेंमैंए प्रभुलाइ क्रूसर सैबै थेबै सहरए घ्याँर तब्‍मुँ। (च सहरलाइ अहानर सदोम सहर नेरो मिश्र ह्‍युल बिम्।)
REV 11:9 सोंरो से आधा त्हिंइ समा चमैंए सिनुमैं ताँन् कुलर्बै म्‍हिमैंइ, ताँन् ह्‍युलर्बै म्‍हिमैंइ, ताँन् क्युइ पोंब्‍मैंइ नेरो ताँन् ह्रेंर्बै म्‍हिमैंइ ङ्ह्‍योरिगे बिसि च सिनुमैंलाइ छगोंर पाल् पिंरिब् आरे।
REV 11:10 चु अगमबक्‍तामैं ङ्हिंइ पृथ्‍बीर्बै म्‍हिमैं ल्हें दुःख पिंल। छतसि चमैंए सिनु म्रोंसि पृथ्‍बीर्बै म्‍हिमैं बेल्‍ले सैं तोंब्‍मुँ, धै चमैंइ खें-खेंमैंए न्होंर चिनु पिंब-किंब लब्‍मुँ।
REV 11:11 दिलेया सोंरो से आधा त्हिंइ लिउँइँ परमेश्‍वरउँइँले छ्ह योंबै सो च सिनु ङ्हिंए न्‍होंर होंइ। धै चमैं ह्रोंसए प्हलेर्न राइ। छले राब् म्रोंसि म्हिमैं बेल्‍ले ङ्हिंयाँइ।
REV 11:12 धै स्‍वर्गउँइँले खबै थेबै कैइ “छुइ कैंडो खो!” बिब च अगमबक्‍ता ङ्हिंइ थेइ। छ बिबै तोंदोंन् खेंमैंए शत्तुरमैंइ ङ्‍ह्‍योन-ङ्‍ह्‍योन् चमैं ङ्हिं न्‍हाँम्‍स्योने बालुन् स्‍वर्गउँइँ ह्‍याइ।
REV 11:13 धै च तोंदोंन् थेबै सयो ह्‍याइ, सहरर्बै च्‍युबाँरि तिबाँ नास तयाइ, धै हजार ङि म्हिमैं सैवाइ। अरू चैबै म्‍हिमैं बेल्‍ले ङ्हिंसि “स्‍वर्गर्बै परमेश्‍वर बेल्‍ले थेब मुँन!” बिसि खीए मिं क्वेइ।
REV 11:14 ङ्हिंखेबै थेबै दुःख तल् खाँइ, दिलेया धबै सोंखेबै दुःख युनन् खसिन् मुँ।
REV 11:15 झाइले धाँसे लिउँबै स्‍वर्गदूतइ थुतुरु ह्रामा स्‍वर्गउँइँले थेबै कैमैंइ “ङ्योए याहवेह परमेश्‍वर नेरो खीजी कुल्मिंबै म्रुँ ख्रीष्‍टजी पृथ्‍बीर्बै ग्याल्स लबै हग योंइमुँ। खीजी खोंयोंन् बिलै ग्याल्स लरिब्‍मुँ,” बिरिल।
REV 11:16 छबिमा परमेश्‍वरए उँइँर्बै ठिमैंर क्हुँरिबै ङ्हिस्युसे प्लि चिब्मैंइ परमेश्‍वरलाइ पद्खु तसि फ्‍योइ।
REV 11:17 झाइले चमैंइ बिबर होंइ, “ओ ताँन् भन्दा थेबै शक्‍ति मुँबै याहवेह परमेश्‍वर, क्‍हि ओंसों ओंनोंन् मुँल, क्हि खोंयोंन् बिलै या तरिम्। क्‍हिइ ह्रोंसए थेबै हगइ ग्याल्स लबर होंइमुँ। छतसि ङि क्हिलाइ धन्‍यबाद पिंम्।
REV 11:18 ह्रें-ह्रेंमैं त्होंदो राइमुँ, दिलेया क्‍हि झन् बेल्‍ले ह्रिस खइमुँ, तलेबिस्याँ क्हिए फिर बिश्‍वास आलल्‍ले सियाब्‍मैंए ल्हागिर ठिक निसाफ लबै त्हे चेंदोन् खइमुँ। दिलेया क्‍हिए सेवा लबै अगमबक्‍तामैं, क्‍हिए पबित्र म्‍हिमैं नेरो क्‍हिने ङ्हिंब्‍मैं, थेब, च्‍योंब ताँनलाइ, इनाम पिंबै त्हे तइमुँ। छलेन पृथ्‍बीलाइ न्होह्रों लब्मैं ताँनलाइ नास लबै त्हे तइमुँ।”
REV 11:19 च लिउँइँ स्वर्गर परमेश्‍वरए मन्‍दिरर्बै म्रा थोंयाइ, धै खीजी फैबै बाछाए ठिम झोंथेंबै म्हदुस मन्‍दिर न्होंर म्रोंइ। च्हमा काम्‍लि तिम्‍लि चारइ, मु ङ्‌हेइ, सयो खइ धै थे-थेबै तिस्‍यु युइ।
REV 12:1 च लिउँइँ मुर औदिबै चिनु म्रोंइ: च्हमिरि घ्रिइ त्‍हिंयाँ खिल, चए प्‍हले न्‍होंर लयाँ मुँल, धै चए क्रर च्युसे ङ्हिं मुसारए मुकुट मुँल।
REV 12:2 चइ प्‍हसे नोल, धै प्‍हसे फिबै रें खसि थेबै कै तेरिल।
REV 12:3 च लिउँइँ धबै मुर अर्को औदिबै चिनु म्रोंइ: चर बेल्‍ले थेबै ओल्‍ग्‍या अजिङ्गर मुँल। चए क्र ङि मुँल, धै क्र ह्रोंसे मुकुट मुँल। झाइले चए रुँ च्‍यु मुँल।
REV 12:4 चए म्येइ मुर्बै सारा सोंबाँर तिबाँ सोर्दिसि पृथ्‍बीर भ्‍योंवाइ। कोलो फिबै तोंदोंन् क्ल्ह्‍योंवाब् बिसि च अजिङ्गर कोलो फिबि छेबै च्हमिरिए उँइँर रारिल।
REV 12:5 धै च च्हमिरिइ च्ह घ्रि फिइ। (च च्हइ पैए प्‍हरे छेसि ताँन् ह्रेंमैंए फिर ग्याल्स लब्मुँ।) कोलो फिबै तोंदोंन् दूत घ्रिइ कोलोलाइ परमेश्‍वर ङाँर बोसि खीए राजगद्दिर थेंइ।
REV 12:6 च च्‍ह फिबै च्हमिरि बिस्याँ क्यु आयोंबै क्ल्ह्‍योउँइँ भौदिह्‍याइ। चरि चए ल्हागिर हजार घ्रिसे ङ्हिब्रसे ट्हुच्‍यु (१,२६०) त्हिंइ समार्बै चब् थुँबै सैमैं परमेश्‍वरजी ओंसोंन् तौदु लथेंल।
REV 12:7 च लिउँइँ स्‍वर्गर ल्हडें तइ। मिखाएल बिबै थेबै स्‍वर्गदूत नेरो चए न्होंर्बै स्‍वर्गदूतमैंइ च अजिङ्गरने ल्हडें लइ। च अजिङ्गर नेरो चए दूतमैं या चमैंने ल्हडें लइ।
REV 12:8 दिलेया मिखाएलइ ट्होवासि च अजिङ्गर नेरो चए दूतमैं च त्हेउँइँले स्‍वर्गर टिल् आयों।
REV 12:9 मिखाएलइ च थेबै अजिङ्गरलाइ स्‍वर्गउँइँले भ्‍योंवाइ। च अजिङ्गर स्‍योंम्‍बै प्‍हुरि ग, चलाइ स्‍युर्गु नेरो दुष्‍ट बिम्। चइ ताँन् ह्‍युलर्बै म्‍हिमैंने स्‍योर तेसि लुइमुँ। च नेरो चए दूतमैंलाइ परमेश्‍वरए दूतमैंइ पृथ्‍बीर भ्‍योंवाइ।
REV 12:10 झाइले स्‍वर्गर छ बिबै थेबै कै ङइ थेइ, “तारे ङ्योए परमेश्‍वरजी ह्रोंसए म्हिमैं जोगेमिंइमुँ! खीजी ह्रोंसए ग्याल्स लबै भों उँइँमुँ! तारे परमेश्‍वरजी कुल्मिंबै म्रुँ ख्रीष्‍टजी ह्रोंसए ग्याल्स लबै हग उँइँमुँ! तलेबिस्याँ ङ्योए अलि-अङाँमैंलाइ परमेश्‍वरए उँइँर त्‍हिंयाँ म्‍हुँइँस छ्याब् ल्‍हैदिबै दुष्‍ट स्‍वर्गउँइँले मिखाएलइ भ्‍योंवाइमुँ।
REV 12:11 ङ्योए अलि-अङाँमैंइ क्‍यु च्हजए को नेरो खेंमैंइ पिंबै ग्वाइउँइँले च दुष्‍टए फिर ट्होइमुँ, तलेबिस्याँ खेंमैंए ज्युए म्हाँया आलल्‍ले चमैं सिबरै या तयार मुँल।
REV 12:12 छतसि स्‍वर्ग नेरो चर मुँब्‍मैं सैं तोंन्। दिलेया पृथ्‍बीर नेरो मा ङ्युँइर मुँब्मैंए फिर बिस्याँ थेबै दुःख तब्‍मुँ, तलेबिस्याँ च स्युर्गु दुष्‍ट क्‍हेमैं ङाँर युइमुँ, झाइले चए त्हे च्‍युगुदे मत्‍त्रे चैमुँ बिब् सेसि च बेल्‍ले ह्रिस खइमुँ।”
REV 12:13 ह्रोंसलाइ स्‍वर्गउँइँले पृथ्‍बीर भ्योंवाब् था सेसि अजिङ्गरइ कोलो फिबै च्हमिरिलाइ ल्हाइ।
REV 12:14 दिलेया च च्हमिरि अजिङ्गरउँइँले लोबर म्‍हि आटिबै क्‍ल्‍ह्‍यो समा प्‍हुरह्‍यारिगे बिसि परमेश्‍वजी चलाइ थेबै क्व्रेए प्‍ह्‍या ङ्हिं पिंइ। च म्हि आटिबै क्‍ल्‍ह्‍योर सोंदिं से म्हैंन ट्हुल् समा च च्हमिरिए ल्हागिर चब-थुँबै सैमैं परमेश्‍वरजी ओंसोंन् तौदु लथेंल।
REV 12:15 झाइले च च्हमिरिलाइ नोबोरिगे बिसि च अजिङ्गरइ ह्रोंसए सुँउँइँले थेबै स्‍यों तेइ।
REV 12:16 दिलेया च च्हमिरिलाइ जोगेमिंबै ल्हागिर पृथ्‍बीइ सुँ फैसि च अजिङ्गरए सुँउँइँले त्‍होंबै स्‍यों क्‍ल्‍ह्‍योंवाइ।
REV 12:17 छतमा च अजिङ्गर च च्हमिरिने बेल्‍ले ह्रिस खइ। धै च च्हमिरिए अर्को सन्‍तानमैंने, अथवा परमेश्‍वरए ताँ ङिंब्‍मैं नेरो येशूए बारेर क्ह्रोंसेंन्‍बै ग्वाइ पिंब्मैंने ल्हडें लबर ह्‍याइ।
REV 12:18 धै च धबै मा ङ्युँइए रेर राइ।
REV 13:1 च लिउँइँ मा ङ्युँउँइँले खेदो घ्रि त्‍होंरिब् ङइ म्रोंइ। च खेदोल रुँ च्‍यु, क्र ङि मुँल। चए रुँ ह्रोंसे मुकुट मुँल, क्र ह्रोंसे परमेश्‍वरए मिं वाबै आछ्याँबै मिं प्‍ह्रिल।
REV 13:2 ङइ म्रोंबै च खेदो चितुवा धों ब्योंब् मुँल। चए प्‍हले भलुए प्‍हले धों तब् मुँल, झाइले चए सुँ सिंहल् धों ब्योंब् मुँल। च अजिङ्गरइ च चितुवा धों ब्योंबै खेदोलाइ ह्रोंसए शक्‍ति, थेबै हग नेरो राजगद्दि पिंइ।
REV 13:3 च खेदोए क्र ङि न्‍होंर्बै क्र घ्रिर बेल्‍ले नल् लब थेबै घा धों तब् म्रोंइ, दिलेया लिउँइँ च घा सयाइ। छतसि ताँन् पृथ्‍बीर्बै म्‍हिमैं प्लेटोयासि च खेदोए लिलि ल्‍हैदिइ।
REV 13:4 झाइले च अजिङ्गरइ ह्रोंसए हग खेदोलाइ पिंबइले ताँन् म्‍हिमैंइ अजिङ्गरलाइ फ्‍योइ। चमैंइ च खेदोलाज्यै या फ्‍योसि बिइ, “चु खेदो धों तब खाब् मुँ? चुने बालु खाबै या ल्हडें लल् आखाँ।”
REV 13:5 च खेदोलाइ परमेश्‍वरए बिरोधर आछ्याँबै ताँमैं पोंल् पिंइ। चलाइ प्लिच्‍यु से म्हैंन ङ्हिल् समा पाप लबै हग पिंल।
REV 13:6 छतसि च खेदोइ परमेश्‍वरए बिरोधर आछ्याँबै ताँ पोंसि परमेश्‍वरए मिं, परमेश्‍वर टिबै क्‍ल्‍ह्‍यो नेरो स्‍वर्गर टिब्मैं ताँनए बिरोधर आछ्याँबै ताँ पोंबर होंइ।
REV 13:7 च खेदोइ परमेश्‍वरए म्‍हिमैंने ल्हडें लसि चमैंलाइ ट्होवाल् पिंइ। झाइले ताँन् कुलर्बै म्‍हिमैं, ताँन् ह्‍युलर्बै म्‍हिमैं, ताँन् क्युइ पोंब्‍मैं नेरो ताँन् ह्रेंर्बै म्‍हिमैंए फिरै या चलाइन ग्याल्स लल् पिंइ।
REV 13:8 पृथ्‍बीर टिब्मैं ताँनइ च खेदोलाइ फ्‍योब्‍मुँ, दिलेया खाब् म्‍हिमैंए मिं सैवाबै क्‍यु च्हजए कितबर ह्‍युल बनेब् भन्दा ओंसोंन् प्ह्रिल, चमैंइ च खेदोलाइ आफ्यो। छ्ह योंब्‍मैंए मिं क्‍यु च्हजए कितबर प्‍ह्रिल् खाँइमुँ।
REV 13:9 “न्‍ह मुँब्मैंइ चु ताँ छेनाले थेद्।
REV 13:10 झेलर झोंल् त्हुब्मैं झेलर्न झोंब्मुँ। सेलाँइ सैल् त्हुब्मैं, सेलाँइन सैब्मुँ। छतब म्रोंलेया परमेश्‍वरए म्‍हिमैं आङ्हिंन्, ढुक्‍कले बिश्‍वासर भोंब् तद्।”
REV 13:11 च लिउँइँ धबै अर्को खदो घ्रि पृथ्‍बीउँइँले त्‍होंखरिब् ङइ म्रोंइ। च खेदोल क्यु च्हजए रुँ धों ब्योंबै रुँ ङ्हिं मुँल। दिलेया अजिङ्गर धोंलेन् च खेदो पोंमल।
REV 13:12 चइ ओंसोंबै खेदोए ताँन् हग चए उँइँर्न ओलेमल। पृथ्‍बी नेरो पृथ्‍बीर टिब्मैंलाइ च ओंसोंबै खेदोलाइ चइ फ्‍योद् बिसि ल्‍हैदिमल। च ओंसोंबै खेदोए थेबै घा सयाल।
REV 13:13 चइ मुउँइँले पृथ्‍बी समा मिए राब खारमिंसि म्हिमैंए उँइँर प्लेटोयान् तबै केमैं लमल।
REV 13:14 ओंसोंबै खेदोए उँइँर चइ औदिबै चिनु मुँबै केमैं लबै शक्ति योंल, छतसि प्लेटोयान् तबै केमैं लसि चइ पृथ्‍बीर टिब्मैंए सैं खेंमैं ङाँइ लवाइ। धै “सेलाँइ ल्हिबै घा ससि सोबै ओंसोंबै खेदोए मान लबै ल्हागिर खेदोए कु घ्रि बनेद्” बिसि चइ म्‍हिमैंलाइ कर ल्‍हैदिइ।
REV 13:15 च कु पोंल् खाँरिगे, धै च कुलाइ आम्हाँदिब्‍मैंलाइ चइ सैवाल् खाँरिगे बिसि च लिउँबै खेदोइ च कुलाइ सोगों तबै हग पिंइ।
REV 13:16 झाइले च खेदोइ थेब नेरो च्‍योंब, प्लब नेरो ङ्हाँदु, केब्छैं ङिंलेया आङिंलेया, ताँन् म्हिलाइ चमैंए क्‍योलो योर अथवा ङ्‌होर छाप झोंबर ल्‍हैदिइ।
REV 13:17 च खेदोए मिंए छाप, अथवा चए मिंए नम्‍बरए छाप, ह्रोंसए ज्युर आरेइबिस्‍याँ खाबज्यै तोइ सै किंलै आयोंमल, तोइ चुँलै आयोंमल।
REV 13:18 चु ताँ क्‍होबै ल्हागिर ज्ञान चैदिम्। मैंल् खाँबै म्हिइ च खेदोए नम्‍बरए अर्थ क्‍होल् खाँम्, तलेबिस्याँ च नम्‍बर म्‍हि घ्रिए मिंए नमुना ग। चए नम्‍बर टुब्रासे टुच्‍यु से टु (६६६) ग।
REV 14:1 ङइ धबै ङ्ह्‍योमा क्‍यु च्हज सियोन बिबै कोंर रारिब् म्रोंइ। खीने बालु लाख घ्रि से प्लिच्यु से हजार प्लि (१,४४,०००) म्‍हि मुँल। चमैंए ङ्‌होर क्‍यु च्हजए मिं नेरो खीए आबाए मिं प्‍ह्रिथेंल।
REV 14:2 झाइले ङइ स्‍वर्गउँइँले बेल्‍ले नुबै क्‍यु छारेए कै धों तब, अथवा थेबै मु ङ्‌हेब् धों तबै कै थेइ। चए कै बीणा ह्राब्मैंइ ह्राबै बिणाए कै धों तब् मुँल।
REV 14:3 च लाख घ्रि से प्लिच्यु से प्लि हजार म्‍हिमैं राजगद्दिए ओंसों सो प्ह्‍याबै सै प्लि, नेरो ङ्हिस्युसे प्लि चिब्मैंए उँइँर रारिल। चमैंइ छारा भजन प्रिंमल, तलेबिस्याँ खीए ल्हागिर फुइ धों तरिगे बिसि पृथ्‍बीर्बै म्हिमैंए म्हाँजोउँइँले खीजी चुमैं त्हाँब् ग।
REV 14:4 चुमैं च्हमिरिमैंने आन्‍होंल्‍ले टिब्‍मैं ग। क्‍यु च्हज खनि खनि ह्‍यामुँ, चुमैं या खीए लिलिन् ह्‍यामल। चुमैं परमेश्‍वर नेरो क्‍यु च्हजए ल्हागिर म्हिमैंए न्होंउँइँले खासि ओंसोंबै रोए फुइ धोंले त्हाँब्मैं ग।
REV 14:5 चुमैंइ स्‍योर ताँ खोंयोंइ आपोंमल, चुमैं तोइ छ्याब् आरेबै म्‍हिमैं मुँल।
REV 14:6 च लिउँइँ ङइ स्‍वर्गदूत घ्रि मुर प्‍हुररिब् म्रोंइ। खोंयोंइ तरिबै सैं तोंबै ताँ चने मुँल। च सैं तोंबै ताँ पृथ्‍बीर्बै म्‍हिमैंए ल्हागिर, अथवा ताँन् ह्रें, ताँन् कुल, ताँन् क्युइ पोंब्‍मैं नेरो ताँन् ह्‍युलर्बै म्‍हिमैंए ल्हागिर मुँल।
REV 14:7 चइ थेबै कैले बिइ, “परमेश्‍वरने ङ्हिंन्, धै खीए मिं क्वेद्। तलेबिस्याँ खीजी म्‍हिमैंलाइ निसाफ लबै त्हे तखइमुँ। स्वर्ग, पृथ्‍बी, मा ङ्युँइ नेरो क्‍युए मुल्मैं बनेबै परमेश्‍वरलाइ पद्खु तसि फ्‍योद्।”
REV 14:8 झाइले अर्को स्‍वर्गदूत ओंसोंबै स्‍वर्गदूतए लिलि ल्‍हैदिसि बिइ, “नास तयाइ! च बेबिलोन बिबै थेबै सहर नास तयाइ। च सहरर्बै म्‍हिमैंइ खैले खेंमैंइ ब्यभिचार लमुँ छलेन ताँन् ह्‍युलर्बै म्हिमैंलाइ ब्यभिचार लबर ल्हैदिल।”
REV 14:9 झाइले अर्को स्‍वर्गदूत ओंसोंबै स्‍वर्गदूत ङ्हिंए लिलि ल्‍हौदिसि थेबै कैले बिइ, “खाब‍मैंइ च खेदो नेरो चए कुलाइ पूजा लमुँ, धै ह्रोंसए यो नेरो ङ्‌होर च खेदोए छाप झोंमुँ,
REV 14:10 चमैंइ परमेश्‍वरए बेल्‍ले थेबै ह्रिसए प्हा थुँल् त्‍हुब्‍मुँ। च त्हेर तिफुँइ ल्हयो आखल्‍ले परमेश्‍वरजी सजैं पिंब्‍मुँ। च म्‍हिमैंइ पबित्र स्‍वर्गदूतमैं नेरो क्‍यु च्हजए उँइँरि मि नेरो गन्‍धकरि बेल्‍ले दुःख योंब्‍मुँ।
REV 14:11 चमैंए सजैं पिंबै मिए मिखु खोंयोंइन कैंडो ह्‍यारिब्‍मुँ। च खेदो नेरो चए कुलाइ पूजा लब्मैं, धै चए मिंए छाप झोंल् ङिंब्मैंइ त्‍हिंयाँ म्‍हुँइँस सजैं योंसि खोंयोंइ छिं ङ्हाँल् योंरिब् आरे।”
REV 14:12 दिलेया परमेश्‍वरए म्‍हिमैं बिस्याँ आङ्हिंन्ले ढुक्‍क तसि बिश्‍वासर भोंब तल् त्हुम्।
REV 14:13 च लिउँइँ “चु ताँ प्‍ह्रिद्: प्रभुए फिर बिश्‍वास लबइले तारे पिरु दु:ख योंसि सिब्‍मैंइ आशिक योंब्मुँ,” बिसि स्‍वर्गउँइँले युबै कै ङइ थेइ। झाइले पबित्र प्ल्हजी बिइ, “चु ताँ क्‍ह्रोंसेंन् ग। चमैंइ दु:खले लबै केमैंए नों योंसि छिं ङ्हाँल् योंब्‍मुँ।”
REV 14:14 झाइले ङइ फोस्रे ब्योंबै न्‍हाँम्‍स्यो म्रोंइ। च न्‍हाँम्‍स्योए फिर म्‍हि घ्रिइ योर कोरे छेसि टिरिब् म्रोंइ। चए क्रर माराए मुकुट मुँल।
REV 14:15 झाइले अर्को स्‍वर्गदूत मन्‍दिरउँइँले बैरु त्‍होंसि थेबै कैले च न्हाँम्स्योर क्हुँरिबै म्हिने बिइ, “क्‍हिए कोरे छेसि बालि खैंन्, तलेबिस्याँ पृथ्‍बीर्बै बालिमैं खैंबै त्हे तयाल् खाँइमुँ।”
REV 14:16 छबिमा च न्‍हाँम्‍स्योर क्हुँबै म्‍हिइ ह्रोंसने मुँबै कोरेइ पृथ्‍बीर्बै ताँन् बालिमैं खैंवाइ।
REV 14:17 च लिउँइँ स्‍वर्गर्बै मन्‍दिरउँइँले अर्को स्‍वर्गदूत बैरु त्‍होंब् ङइ म्रोंइ। चने या बेल्‍ले छ्यारबै कोरे मुँल।
REV 14:18 छलेन अर्को स्‍वर्गदूत ख्रो पिंबै क्ल्ह्‍योउँइँले खइ। च स्‍वर्गदूतइ लुँरिबै मि सिल् आपिंबै जिम्‍मा योंल। च स्‍वर्गदूतइ बेल्‍ले छ्यारबै कोरे छेबै स्‍वर्गदूतने थेबै कैले बिइ, “पृथ्‍बीर्बै अँगुर ताँन् मिंल् खाँइमुँ। छतसि क्हिए कोरे छेसि थुद्।”
REV 14:19 छबिमा च स्‍वर्गदूतइ ह्रोंसए कोरेइ पृथ्‍बीर्बै ताँन् अँगुरमैं थुसि कोलर झोंइ। च कोल परमेश्‍वरए ह्रिस ग।
REV 14:20 च अँगुर म्हाबै क्ल्ह्‍यो सहरए बैरु मुँल। चर बोसि म्हाबै अँगुरउँइँले त्होंबै कोइ सोंप्र किलो मिटर समा प्हानेल धै च को सोंग्रु गैरु मुँल।
REV 15:1 धबै स्‍वर्गर बेल्‍ले थेबै औदिबै चिनु घ्रि ङइ म्रोंइ। चर स्‍वर्गदूत ङि मुँल, चमैंने आखिरि थेबै दुःख ङि मुँल। च दुःख तल् खाँबै लिउँइँ मत्‍त्रे परमेश्‍वरए ह्रिस म्हम्।
REV 15:2 च लिउँइँ मिने सिसा कोंब् धों तबै मा ङ्युँइ ङइ म्रोंइ। झाइले च खेदोए फिर, चए कुए फिर, चए मिंए नम्‍बरए फिर ट्होब्‍मैं ङइ म्रोंइ। चमैं परमेश्‍वरजी पिंबै बीणा छेसि सिसा धों तबै मा ङ्युँइए रेर रारिल।
REV 15:3 चमैंइ परमेश्‍वरए के लबै स्‍योंम्‍बै मोशा नेरो क्‍यु च्हजए भजन प्रिंरिल: “ओ ताँन् भन्दा भोंबै याहवेह परमेश्‍वर, क्‍हिए केमैं बेल्‍ले थेब नेरो औदिबै मुँ! ओ ताँन् ह्रेंमैंए म्रुँ, क्‍हिजी लबै के ठिक नेरो क्ह्रोंसेंन्बै मुँ।
REV 15:4 ओ प्रभु, क्‍हि म्रोंसि ताँन् म्‍हिमैं ङ्हिंल् त्‍हुम्, धै ताँन् म्हिमैंइ क्हिए मान लल् त्‍हुम्, तलेबिस्याँ क्‍हि मत्‍त्रे पबित्र परमेश्‍वर ग। ताँन् ह्रेंमैं क्‍हि ङाँर खसि क्हिलाइ फ्‍योब्‍मुँ, तलेबिस्याँ क्‍हिजी ठिक निसाफ लम् बिसि ताँनइ म्रोंल् खाँइमुँ।”
REV 15:5 च लिउँइँ स्‍वर्गर्बै मन्‍दिर थोंथेंब् ङइ म्रोंइ। परमेश्‍वरए बारेर ग्वाइ पिंबै सैमैं थेंबै तम्‍बु या च न्‍होंर ङइ म्रोंइ।
REV 15:6 झाइले थेबै दुःख ङि नोबै स्‍वर्गदूत ङि मन्‍दिरउँइँले बैरु त्‍होंइ। चमैंइ फोस्रे ब्योंबै चारबै क्‍वें खिल, झाइले चमैंए तिंर माराए पेटि फैल।
REV 15:7 चर्बै सो प्ह्‍याबै सै प्लि न्‍होंर्बै घ्रिइ च स्‍वर्गदूत ङिलाइ खोंयोंइ तरिबै परमेश्‍वरए ह्रिसइ प्लिंबै प्‍हेल ङि पिंइ। च प्‍हेल ङि माराल् मुँल।
REV 15:8 च त्हेर परमेश्‍वरए चारबै ह्‍वे नेरो शक्‍तिउँइँले त्होंबै मिखुइ मन्‍दिर प्‍लिंयाइ। छतसि च स्‍वर्गदूत ङिउँइँले खबै थेबै दुःख ङि आखाँन् समा खाबै या च मन्‍दिर न्‍होंर ह्‍याल् आखाँ।
REV 16:1 झाइले च स्‍वर्गदूत ङिलाइ स्‍वर्गउँइँले थेबै कैले छ बिब ङइ थेइ, “ह्‍याद्, धै प्‍हेल ङिर मुँबै परमेश्‍वरए ह्रिस पृथ्‍बीए फिर युवाद्।”
REV 16:2 छबिमा ओंसोंबै स्‍वर्गदूतइ ह्‍यासि पृथ्‍बीए फिर ह्रोंसने मुँबै प्‍हेलार्बै ह्रिस युवाइ। च लिउँइँ खेदोए छाप मुँब्‍मैं नेरो चए कुलाइ पूजा लब्मैंए ज्युर बेल्‍ले नल् लबै छेरन ङ्हाँबै घामैं खइ।
REV 16:3 झाइले अर्को स्‍वर्गदूतइ ह्रोंसने मुँबै प्‍हेलर्बै ह्रिस मा ङ्युँइर युवाइ। छलमा च मा ङ्युँइर्बै क्‍यु सियाबै म्‍हिए को धोंन् तयाइ। धै मा ङ्युँइर्बै ताँन् सो प्ह्‍याबै सैमैं सियाइ।
REV 16:4 च लिउँइँ अर्को स्‍वर्गदूतइ ह्रोंसने मुँबै प्‍हेलर्बै ह्रिस स्‍योंमैं नेरो क्‍युए मूलमैंर युवाइ। छलमा चर्बै ताँन् क्‍यु को तयाइ।
REV 16:5 झाइले ताँन् ‍क्युए फिर हग मुँबै स्‍वर्गदूतइ छ बिब ङइ थेइ, “ओ पबित्र परमेश्‍वर, क्‍हि ओंसों ओनोंन् मुँल। तोगो या मुँ, क्‍हिइ क्ह्रोंसेंन्बै ठिक निसाफ लइमुँ!
REV 16:6 तलेबिस्याँ पृथ्‍बीर्बै म्‍हिमैंइ क्‍हिए पबित्र म्‍हिमैं नेरो क्‍हिए अगमबक्‍तामैं सैवासि को-कोन् लवाइ। छतसि चमैंए खि फोबर तोगो क्‍हिजी चमैंलाइ को थुँल् पिंइमुँ। चु चमैंइ योंल् त्हुबै सजैं ग।”
REV 16:7 च लिउँइँ ख्रो पिंबै क्ल्ह्‍योइ छ बिब ङइ थेइ, “ओ ताँन् भन्दा थेबै शक्‍ति मुँबै याहवेह परमेश्‍वर, क्‍हिजी क्ह्रोंसेंन्बै ठिक निसाफ लमुँ।”
REV 16:8 झाइले अर्को स्‍वर्गदूतइ ह्रोंसने मुँबै प्‍हेलर्बै ह्रिस त्‍हिंयाँए फिर युवामा त्‍हियाँइ म्‍हिमैंलाइ ख्रोंवाबै शक्‍ति योंइ।
REV 16:9 छतसि त्‍हिंयाँ बेल्‍ले छसि म्‍हिमैंलाइ ख्रोंवाइ। धै चमैंइ च्हौ थेबै दुःख पिंल् खाँबै परमेश्‍वरए मिं स्यारइ। दिलेया चमैंइ खेंमैंइ लबै पापउँइँले अझै सैं आए, धै परमेश्‍वरए मानै या आल।
REV 16:10 झाइले अर्को स्‍वर्गदूतइ खीने मुँबै प्‍हेलर्बै ह्रिस च खेदोए राजगद्दिर युवाइ। छलमा च खेदोए ग्याल्सर मिछु खैयाइ। धै चर्बै म्‍हिमैं नब छब तसि बेल्‍ले दुःख योंइ, छतसि चमैंइ ह्रों-ह्रोंसए ले क्रेइ।
REV 16:11 झाइले चमैंलाइ बेल्‍ले नल् लबै घा नेरो रुँइ दुःख पिंमा चमैंइ स्वर्गर्बै परमेश्‍वरए फिर गाल् केइ। दिलेया चमैं खेंमैंइ लबै पापउँइँले अझै सैं आए।
REV 16:12 झाइले अर्को स्‍वर्गदूतइ ह्रोंसने मुँबै प्‍हेलर्बै ह्रिस यूफ्रेटिस बिबै थेबै स्‍योंर युवाइ। छलमा स्यारउँइँले खबै म्रुँमैंए ल्हागिर घ्‍याँ तरिगे बिसि च स्‍यों ङ्‌हारयाइ।
REV 16:13 झाइले अजिङ्गरए सुँउँइँले, आछ्याँबै खेदोए सुँउँइँले नेरो स्योलिबै ताँ पोंबै अगमबक्‍ताए सुँउँइँले प्‍हत्‍गु धों तबै स्यागि म्होंगि सों त्‍होंह्‍याब ङइ म्रोंइ।
REV 16:14 च स्यागि म्होंगि सों औदिबै चिनु मुँबै केमैं लसि उँइँबै प्ल्हमैं ग। चमैं पृथ्‍बीर्बै ताँन् म्रुँमैं ङाँर ह्‍याम्, धै ताँन् भन्दा थेबै परमेश्‍वरजी बिबै त्हिंइर ल्हडें लबर चमैंलाइ खागु लम्।
REV 16:15 प्रभु येशूजी बिइ, “थेद्, क्‍हेमैंइ था आसेल्‍ले ङ ह्‍यो धोंले युब्मुँ। छतसि न्ह क्रों मि क्रोंले टिबै म्हि ङ्‍हो सब् ग। ह्रोंस क्‍लुना तसि म्‍हिमैंए उँइँर फा पिन् आतरिगे बिसि ह्रोंसए क्‍वें ह्रोंसनेन् साँथेंम्।”
REV 16:16 झाइले च स्यागि म्होंगि सोंइ च ताँन् म्रुँमैं हिब्रू क्युइरि आर-मागेड्डोन बिबै क्‍ल्‍ह्‍योर खागु लइ।
REV 16:17 अर्को स्‍वर्गदूतइ ह्रोंसने मुँबै प्‍हेलर्बै ह्रिस मुर युवाइ। झाइले मन्‍दिरर्बै राजगद्दिउँइँले “तारे खाँयाइ!” बिबै थेबै कैइ थेइ।
REV 16:18 छबिमा काम्‍लि तिम्‍लि राइ, थेबै कैमैं थेइ, बेल्‍ले मु ङ्‌हेइ धै बेल्‍ले थेबै सयो खइ। म्‍हिमैं बनेब् ओंनोंन् छाबै ङ्हिंन् ङ्हाँबै सयो खोंयोंइ आखल।
REV 16:19 च लिउँइँ च थेबै सहर सोंबाँ तयाइ। झाइले ताँन् ह्‍युलर्बै सहरमैं नास तयाइ। च त्हेर परमेश्‍वरजी बेबिलोन बिबै थेबै सहरलाइ मैंइ। छतसि खीए बेल्‍ले थेबै ह्रिसइ प्लिंबै प्‍हेल बेबिलोनलाइ थुँबर कर ल्‍हैदिइ।
REV 16:20 थेबै सयो खमा मा ङ्युँइर मुँबै कोंमैं नेरो अरू कोंमैं या ताँन् म्हयाइ।
REV 16:21 प्लिच्यु-प्लिच्यु किलोर्बै थे-थेबै तिस्‍यु मुउँइँले म्‍हिमैंए फिर युइ। छतमा बेल्‍ले थेबै दुःख तसि म्‍हिमैंइ परमेश्‍वरए फिर गाल् केइ।
REV 17:1 झाइले च प्‍हेल ङि छेबै स्‍वर्गदूत ङि न्‍होंर्बै घ्रि ङ ङाँर खसि बिइ, “छुइ खो, ङइ क्हिलाइ च मिं चल्‍दिबै फ्यालुस्योइ खैबै सजैं योंम् बिसि उँइँमिंस्‍यो। च सहरए कार्ग्युले ल्हें स्योंमैं मुँ।
REV 17:2 पृथ्‍बीर्बै ताँन् म्रुँमैं च फ्यालुस्योने टिइमुँ। धै ह्‍युलर्बै म्‍हिमैं या च फ्यालुस्योनेन् ब्यभिचार लसि प्हा थुँब् धोंले म्हेरइमुँ।”
REV 17:3 झाइले ङ पबित्र प्ल्हए न्होंर मुँमा च स्‍वर्गदूतइ क्यु आयोंबै क्ल्ह्‍योरि ङलाइ क्‍हासि बोइ। चर च्हमिरि घ्रि ओल्‍ग्‍या खेदो फिर क्हुँरिब् ङइ म्रोंइ। च खेदोए ज्यु तिगोंन् परमेश्‍वरए आब्रु वाबै ताँमैं प्‍ह्रिथेंल, धै चल क्र ङि नेरो रुँ च्‍यु मुँल।
REV 17:4 च च्हमिरिइ कलाँजी रङर्बै क्‍वें नेरो ओल्‍ग्‍या क्‍वें खिल, धै चइ माराए घानामैं नेरो सै ल्हें फेबै सकलि तुथुमैं पैरेल। चए योर्बै माराए प्‍हेल चइ लबै ब्यभिचारए केमैंइ प्‍लिंल।
REV 17:5 च च्हमिरिए ङ्‌होर मिं घ्रि प्‍ह्रिल। च मिंए अर्थ “थेबै बेबिलोन सहर, अथवा पृथ्‍बीर्बै आछ्याँबै ब्यभिचार लबै ताँन् फ्यालुस्योमैं नेरो छेरन ङ्हाँबै के लबै ताँन् म्‍हिए आमा चुन् ग बिब् मुँल।”
REV 17:6 झाइले च च्हमिरिइ परमेश्‍वरए म्‍हिमैंए को नेरो येशूए ल्हागिर सिब्‍मैंए को थुँसि म्हेरब ङइ म्रोंइ। च म्रोंसि ङ प्लेटोयाइ।
REV 17:7 दिलेया स्‍वर्गदूतइ ङने बिइ, “क्‍हि तले प्लेटोयाल? ङइ क्हिने च फ्यालुस्योलाइ नोबै क्र ङि नेरो रुँ च्‍यु मुँबै खेदोए अर्थ खोल्‍दिमिंस्‍यो।
REV 17:8 च खेदो ओंसों मुँल, दिलेया तोगो आरे। च बेल्‍ले गैरु क्रोंउँइँले त्होंब्मुँ, झाइले नास तयाब्‍मुँ। धै ह्‍युल बनेब् भन्दा ओंसों छ्ह योंब्‍मैंए मिं प्‍ह्रिथेंबै कितबर मिं आरेब्मैं च खेदो म्रोंसि प्लेटोयाब्‍मुँ। तलेबिस्याँ च खेदो ओंसों सोगों मुँल, तोगो आरेलेया धबै सोसि खब्मुँ।
REV 17:9 “क्होबै म्हिमैंइ मत्‍त्रे चु ताँ क्‍होल् खाँम्: च क्र ङिए अर्थ कों ङि ग, धै च कों ङिए फिर च च्हमिरि क्हुँमुँ। झाइले च क्र ङिए अर्को मतलब म्रुँ ङि ग।
REV 17:10 चमैं न्होंरि म्रुँ ङ्‌हए पलो तल् खाँइ, म्रुँ घ्रिइ अझै ग्याल्स लसिन् मुँ, ङिखेबै म्रुँल अझै पलो आखइमुँ। च म्रुँ खसि तिस्याँदे मत्‍त्रे ग्याल्स लल् योंब्‍मुँ।
REV 17:11 झाइले ओंसों सोगों मुँब दिलेया तोगो सियाबै खेदो प्ह्रेखेबै लार्बै म्रुँ ग। चु म्रुँ ङि न्‍होंर्बै घ्रि ग, दिलेया च नास तयाब्‍मुँ।
REV 17:12 “क्‍हिइ म्रोंबै रुँ च्‍युए अर्थ च्‍योंबै म्रुँ च्‍यु ग। चमैंइ तिंयाँ समा ग्याल्स लल् आयोंइमुँ, दिलेया चमैंइ च खेदोने बालु घण्टा घ्रिए ल्हागिर ग्याल्स लल् योंब्‍मुँ।
REV 17:13 च म्रुँ च्‍युए सैं घ्रिन् तसि खेंमैंए ग्याल्सए हग नेरो भों च खेदोलाइ पिंब्मुँ।
REV 17:14 चमैंइ क्‍यु च्हजए बिरोधर ल्हडें लब्‍मुँ। दिलेया क्‍यु च्हज नेरो खीजी हुइसि त्‍हाँबै बिश्‍वास लबै म्‍हिमैंइ चमैंलाइ ट्होवाब्‍मुँ, तलेबिस्याँ खी प्रभुमैंए फिर्बै प्रभु नेरो म्रुँमैंए फिर्बै म्रुँ ग।”
REV 17:15 झाइले च स्‍वर्गदूतइ ङने बिइ, “च फ्यालुस्यो मुँबै सहरए कारर्ग्युबै स्योंमैं क्‍हिइ म्रोंइमुँ वा? चमैंए अर्थ स्यो-स्यो ह्‍युलमैं, स्यो-स्यो म्‍हिमैं, स्यो-स्यो ह्रेंमैं नेरो स्यो-स्यो क्युइमैं ग।
REV 17:16 क्‍हिइ म्रोंबै च रुँ च्‍यु मुँबै खेदोइ च फ्यालुस्योलाइ हेल लब्मुँ, धै चने मुँबै ताँन् सैमैं प्हेंवासि चलाइ क्‍लुना लवाब्‍मुँ। चमैंइ चए से चब्‍मुँ, झाइले चलाइ मिर झोंवाब्‍मुँ।
REV 17:17 तलेबिस्याँ च म्रुँमैं च्‍युलाइ परमेश्‍वरजी छाबै के लबै सैं पिंइ: परमेश्‍वरजी बिबै ताँ ताँन् आतन् समा च खेदोइ ग्याल्स लरिगे बिसि चमैंइ ताँन् सैं घ्रिले खेंमैंए ग्याल्स लबै भों च खेदोलाइ पिंब्मुँ।
REV 17:18 “क्‍हिइ म्रोंबै च्हमिरि थेबै सहर ग, चइ पृथ्‍बीर्बै ताँन् म्रुँए फिर ग्याल्स लम्।”
REV 18:1 च लिउँइँ ङइ स्‍वर्गउँइँले अर्को स्‍वर्गदूत घ्रि युरिब् म्रोंइ। च स्‍वर्गदूतने थेबै हग मुँल, चए लिर्बै ह्‍वेइ ताँन् ह्‍युल चारयाइ।
REV 18:2 चइ थेबै कै तेसि बिइ, “थुँयाइमुँ! थुँयाइमुँ! बेबिलोन बिबै थेबै सहर थुँयाइमुँ! चर स्यागि म्होंगिमैंइ प्लिंयाइमुँ, आछ्याँबै सैं प्ह्‍याबै प्ल्हमैंइ प्लिंइमुँ, धै से चल् आतबै नमेमैं नेरो से चल् आतबै खेदोमैं ताँन् चर मुँ।
REV 18:3 च च्हमिरिने ल्हैदिबै ताँन् ह्रेंर्बै म्‍हिमैं प्हाइ धोंले म्हेरइमुँ। पृथ्‍बीर्बै म्रुँमैं या च च्हमिरिने ल्हैदिइमुँ। च फ्यालुस्योइ तो लदा ङ्हाँमुँ चन् लप्रइमुँ, धै छों लब्मैं चने क्ह्रिसि प्लइमुँ।”
REV 18:4 धबै स्‍वर्गउँइँले छ बिबै कै ङइ थेइ, “ओ ङए म्‍हिमैं, खो! च सहरउँइँले त्‍होंसि चुर खो। चए फिर तखबै थेबै दुःख क्‍हेमैंइ नोल् आत्‍हुरिगे चइ लबै पापर चने बालु आप्रद्।
REV 18:5 तलेबिस्याँ चइ लबै पापमैं मु समा फेखइमुँ, चइ लबै आछ्याँबै केमैं परमेश्‍वरजी मैंरिइमुँ।
REV 18:6 चइ खै लल चने छान् लद्, चइ तिल दुःख पिंल, क्हिइ ङ्हिल दु:ख पिंन्। चइ क्हेमैंलाइ तो सैइ म्हेरल् लल च भन्दा झन् म्हेरल् लबै सैइ क्हिइ चलाइ म्हेरल् लवाद्।
REV 18:7 चइ खैले सयल लसि सुख योंल, छलेन् चए फिर दुःख नेरो शोक तल् पिंन्। तलेबिस्याँ ‘ङ चुर म्रुँस्‍यो तसि टिइमुँ। म्हरेस्योलाइ धोंले ङलाइ शोक तरिब् आरे, ङ क्रोब-म्‍होब खोंयोंइ लल् त्हुरिब् आरे!’ बिसि चइ मैंम्।
REV 18:8 दिलेया चए फिर तिगेंर्न ल्हें दु:खमैं खसि, रोग, शोक नेरो अँङ्गल् तब्‍मुँ। झाइले चलाइ मिर ख्रोंवाब्‍मुँ, तलेबिस्याँ चए निसाफ लबै याहवेह परमेश्‍वर थेबै शक्‍ति मुँबै परमेश्‍वर ग।
REV 18:9 “चलाइ ख्रोंवाबै मिखु म्रोंसि च च्हमिरिने ल्हैदिसि सयल लबै पृथ्‍बीर्बै म्रुँमैं क्रोब-म्‍होब तसि थेबै शोक तब्‍मुँ।
REV 18:10 चमैं चए थेबै दुःख म्रोंसि ङ्हिंब्मुँ। झाइले चमैं ह्रेंगोन् रासि ‘आमै! आमै! कति थेबै नोक्‍सान तना! च थेब नेरो भोंबै बेबिलोन सहरइ तिस्यार्न सजैं योंना,’ बिब्मुँ।
REV 18:11 “झाइले पृथ्‍बीर्बै छों लब्मैं या चए ल्हागिर क्रोब-म्‍होब लसि थेबै शोक लब्‍मुँ, तलेबिस्याँ चमैंए समान तारे खाबज्‍यै या आकिं।
REV 18:12 चमैंए मारा, चाँदि, सै ल्हें फेबै हिरामोतिमैं, सै ल्हें फेबै क्‍वें, कलाँजी रङर्बै क्‍वें, रेशमि क्‍वें, ओल्‍ग्‍या क्‍वें; झाइले छ्याँबै थाँ खबै सिंमैं नेरो हात्तिए दाराउँइँले बनेबै सैमैं, सै ल्हें फेबै सिं, पित्तल, पै, छ्याँबै युँमा छाबै सैमैंउँइँले बनेबै ताँन् खालर्बै सैमैं;
REV 18:13 झाइले लेपो, मसल, धुप, छ्याँबै थाँ खबै अत्तर, लोबान बिबै धुप, प्हा नेरो छ्युगु, प्रो नेरो गहुँ, म्‍ये, मगि नेरो र-क्यु, घोडा नेरो गाडामैं, झाइले केब्छैं-केब्स्योमैं या तारे खाबज्यै आकिं।
REV 18:14 छतसि च छों लब्मैंइ च बेबिलोन सहरलाइ बिम्, ‘क्‍हिइ म्हैबै छ्याँबै सैमैं ताँन् थुँयाइ। क्‍हिए ताँन् सै न्होर नेरो ठाँन् तेबै सैमैं ताँन् थुँयाइमुँ। क्‍हिइ तारे खोंयोंइ च सैमैं योंरिब् आरे!’
REV 18:15 च सहरने क्ह्रिसि छों लसि प्लब्मैं च सहर नास तयाब् म्रोंसि ङ्हिंब्मुँ। छतसि
REV 18:16 ‘आमै! आमै! च्‍हौ थेबै सहर नास तयान बिसि ह्रेंगोन् रासि क्रोब-म्‍होब लब्‍मुँ। चइ मलमलए क्‍वेंमैं, कलाँजी रङर्बै क्‍वेंमैं, नेरो ओल्‍ग्‍या क्‍वेंमैं खिमल माराए घाना नेरो सै ल्हें फेबै तुथुमैं प्हिरुमैं या पैरेमल।
REV 18:17 तोगो तिस्यार्न चल च्‍हौ ल्हें सै न्होर थुँयाइ।’ “झाइले क्‍यु झाजर्बै कप्‍तानमैं, क्यु झाजर क्रेब्‍मैं नेरो क्यु झाजर के लसि छ्ह थोब्‍मैं ताँन् ह्रेंगोन् रासि
REV 18:18 च सहरलाइ ख्रोंवाबै मिखु म्रोंसि कै तेसि बिइ, ‘च धों तबै थेबै सहर अरू खाबै आरेल!’
REV 18:19 झाइले चमैंइ खेंमैंए क्रर त्‍हुल फ्रुँसि न्हुँ लइ। धै क्रोदै बिइ, ‘आमै! आमै! च सहरम् थुँयाना! चए सैंन्होरउँइँलेन् ताँन् क्यु झाज ओलेब्मैं प्लब् तल, दिलेया तिस्यार्न थुँयाइ।’”
REV 18:20 (ओ स्वर्ग, च सहर थुँयाब् म्रोंसि सैं तोंन्! ओ परमेश्‍वरए म्‍हिमैं, कुल्मिंबै चेला चिब्मैं नेरो अगमबक्‍तामैं क्हेमैं ताँन् सैं तोंन्। तलेबिस्याँ च सहरइ क्‍हेमैं बेल्‍ले दुःख पिंल, छतसि परमेश्‍वरजी चलाइ नास लवाइ।)
REV 18:21 च लिउँइँ धबै बेल्‍ले भोंबै स्‍वर्गदूत घ्रिइ ह्रेंदो धों तबै थेबै युँमा घ्रि छेसि मा ङ्युँइर भ्‍योंवासि “च थेबै बेबिलोन सहरलाज्यै या छलेन् भ्‍योंवाब्‍मुँ,” बिइ। “तारे क्हेमैंइ च धबै म्रोंरिब् आरे।
REV 18:22 च सहरर बीणा नेरो अरू बाजामैंए कै, क्‍वे प्रिंब्‍मैं नेरो मुरलि थुतुरुए कै खोंयोंइ या थेरिब् आरे। अरू के लब्मैं नेरो सिंए के लब्मैं च सहरर खोंयोंइ या योंरिब् आरे, ह्रेंदोए कै या खोंयोंइ या थेरिब् आरे।
REV 18:23 च सहर न्‍होंर बत्तिए ह्‍वे खोंयोंइ या म्रोंरिब् आरे, प्ह्रेंरो नेरो प्‍ह्रेंस्‍योइ पोंबै ताँ या खोंयोंइ या थेरिब् आरे। तलेबिस्याँ बेबिलोन सहरर्बै छों लब्मैं चु पृथ्‍बीरि थेबै चिब्‍मैं मुँल, झाइले च सहरर्बै म्‍हिमैंइ अरू ताँन् ह्‍युलर्बै ह्रेंमैंलाइ जादु लसि लुडिमल।
REV 18:24 अगमबक्‍तामैं नेरो परमेश्‍वरए म्‍हिमैं सैवाबै को च सहर तिगोंन् तल, छलेन पृथ्‍बीर म्हिमैंइ सैवाब्मैंए को या च सहरर्न मुँल।”
REV 19:1 छ तबै लिउँइँ स्‍वर्गर म्‍हिए हुलइ थेबै कैले छ बिरिब ङइ थेइ, “परमेश्‍वरए मिं थेब तरिगे! खीए मान तरिगे! तलेबिस्याँ खीए शक्‍तिजी ङ्योलाइ जोगेथेंइमुँ,
REV 19:2 खीजी ठिक निसाफ लम्। पृथ्‍बीर्बै ताँन् म्‍हिमैंलाइ ब्यभिचार लबर ल्हैदिसि न्होंवाबै च फ्यालुस्योलाइ खीजी दण्ड पिंइमुँ। छले खीए के लब्‍मैंलाइ सैवाबै खि खीजी किंइ।”
REV 19:3 धबै चमैंइ थेबै कैले बिइ, “परमेश्‍वरए मिं थेब तरिगे! च थेबै सहर ख्रोंसि खबै मिखु खोंयोंन् बिलै कैंडो ह्‍यारिब्‍मुँ।”
REV 19:4 झाइले ङ्हिस्युसे प्लि चिब्मैं नेरो सो प्ह्‍याबै सै प्‍लिइ राजगद्दिर टिरिबै परमेश्‍वरलाइ पद्खुले फ्‍योसि बिइ, “आमेन। परमेश्‍वरए मिं थेब तरिगे!”
REV 19:5 झाइले राजगद्दिउँइँले छ बिबै कै थेइ, “ओ परमेश्‍वरए के लब्मैं, ओ खीलाइ म्हाँदिब्मैं, ओ कोल्मैं नेरो चिब्मैं ङ्योए परमेश्‍वरए मिं क्वेद्।”
REV 19:6 च लिउँइँ ङइ धबै कै थेइ। च कै म्‍हि हुलए कै धों तब, क्‍यु छारेए कै धों तब नेरो मु ङ्‌हेब् धों तब मुँल। च कैइ बिइ, “परमेश्‍वरए मिं थेब तरिगे! तलेबिस्याँ याहवेह ङ्योए परमेश्‍वर, ताँन् भन्दा थेबै शक्‍ति मुँबै परमेश्‍वर ग, खीजी ताँन् सैए फिर ग्याल्स लम्।
REV 19:7 छतसि ङ्यो बेल्‍ले सैं तोंले, खीलाइ थेब लले। तलेबिस्याँ क्‍यु च्हजए ब्ह्‍या लबै त्हिंइ खइमुँ। क्‍यु च्हजए प्‍ह्रेंस्‍योइ ह्रोंसलाइ पैरिदिइमुँ।
REV 19:8 च प्‍ह्रेंस्‍योलाइ खिबै ल्हागिर परमेश्‍वरजी फोस्रे ब्योंबै छ्याँबै मलमलए क्‍वें पिंइ।” (च छ्याँबै मलमलए क्‍वें परमेश्‍वरए म्‍हिमैंए छ्याँबै केमैं ग।)
REV 19:9 च लिउँइँ स्‍वर्गदूतइ ङने बिइ, “चु ताँ प्‍ह्रिद्: क्‍यु च्हजए ब्ह्‍याए न्हिम्तोर हुइब्मैं ङ्‍हो सब्मैं ग।” स्‍वर्गदूतइ धबै बिइ, “परमेश्‍वरजी बिबै क्ह्रोंसेंन्बै ताँमैं चुमैंन् ग।”
REV 19:10 स्‍वर्गदूतइ छबिमा ङ चलाइ फ्‍योबर पद्खु तइ, दिलेया चइ ङने बिइ, “छ आलद्! ङ परमेश्‍वरए के लबै दूत मत्‍त्रे ग। ङज्यै या क्‍हि नेरो क्हिए अलि-अङाँमैं धोंले येशूए ताँ क्‍वेंम्। परमेश्‍वरलाइ मत्‍त्रे फ्‍योद्।” तलेबिस्याँ येशूजी पिंबै ग्वाइ अगमबक्‍तामैंइ पोंइ।
REV 19:11 ङइ स्वर्ग थोंब् म्रोंइ। चर फोस्रे ब्योंबै घोडा घ्रि मुँल। च घोडाए फिर क्रेबै म्‍हिए मिं “भर लल् खाँब नेरो क्ह्रोंसेंन” बिब् मुँल। खीजी ठिक निसाफ लम्, ठिक निसाफ लबै ल्हागिर खीजी ल्हडें लम्।
REV 19:12 खीए मि मिए राब धों तब् मुँल। खीए क्रर ल्हें मुकुटमैं मुँल। खीए ज्युर मिं प्‍ह्रिथेंल, दिलेया च मिं खीजी मत्‍त्रे सेल।
REV 19:13 खीजी कोर प्ल्हुँबै क्‍वें खिल। खीए मिं “परमेश्‍वरए ताँ” बिब् मुँल।
REV 19:14 स्‍वर्गर्बै फौजमैं खीए लिलि प्रइ। चमैं बेल्‍ले छ्याँब फोस्रे ब्योंबै क्‍वें खिसि फोस्रे ब्योंबै घोडाए फिर क्रेल।
REV 19:15 ताँन् ह्रेंमैंलाइ ल्हिबर खीए सुँउँइँले छ्यारबै सेलाँ त्‍होंल। खीजी पैए प्‍हरे छेसि ताँन् ह्रेंमैंए फिर ग्याल्स लमा ताँन् भन्दा थेबै शक्‍ति मुँबै परमेश्‍वरए ह्रिसइ प्लिंबै कोल खीजी प्लेवाब्‍मुँ।
REV 19:16 खीए क्‍वें नेरो प्‍हाँर “प्रभुमैंए फिर्बै प्रभु, झाइले म्रुँमैंए फिर्बै म्रुँ,” बिबै मिं प्‍ह्रिल।
REV 19:17 च लिउँइँ स्‍वर्गदूत घ्रि त्‍हिंयाँए फिर रारिब् ङइ म्रोंइ। चइ थेबै कैले मुर प्‍हुरबै ताँन् नमेमैंने बिइ, “थेबै परमेश्‍वरए भत्यरर खो।
REV 19:18 म्रुँमैं, कप्‍तानमैं, सिपाइमैं, घोडामैं नेरो घोडाए फिर क्रेब्‍मैं थेब, च्‍योंब, केब्छैंमैं, केब्छैं आङिंब्मैं ताँनए से चद्।”
REV 19:19 धबै च खेदो, पृथ्‍बीर्बै म्रुँमैं नेरो चमैंए फौजमैं च घोडाए फिर क्रेबै म्‍हि नेरो खीए फौजए बिरोधर ल्हडें लबर खब ङइ म्रोंइ।
REV 19:20 दिलेया परमेश्‍वरए फौजमैंइ च खेदो नेरो स्योर तेबै अगमबक्‍तालाइ क्‍हाइ। (च स्योर तेबै अगमबक्‍ताइ च खेदोए उँइँर ओंसों औदिबै चिनुमैं लसि खेदोए छाप किंब्‍मैं नेरो चए कुए पूजा लब्‍मैंलाइ स्योलिबै ताँ पोंसि चमैंए सैं खेंमैं ङाँइ च्यारवाल।) छतसि चमैं ङ्हिं सोगोंन् मि लुँरिबै बारुदए होंल्दोंर भ्योंवाइ।
REV 19:21 झाइले चमैंए ताँन् फौजमैंलाइ घोडाए फिर क्रेबै म्‍हिए सुँउँइँले त्‍होंबै सेलाँइ सैवाइ। धै ताँन् नमेमैंइ चमैंए से म्रेंन्ले चइ।
REV 20:1 च लिउँइँ ङइ स्‍वर्गउँइँले स्‍वर्गदूत घ्रि युरिब् म्रोंइ। चइ क्रोंर्बै साँजु नेरो बेल्‍ले ल्‍हिबै सँउँलि छेल।
REV 20:2 च स्‍वर्गदूतइ च अजिङ्गरलाइ, अथवा स्‍योंम्‍बै प्‍हुरिए क्हो किंबै स्‍योर्गु, शैतान बिबै दुष्‍टलाइ क्‍हासि हजार घ्रि बर्ष समा सँउँलिइ फैसि
REV 20:3 च दुष्‍टलाइ क्रोंर भ्‍योंवाइ, धै चर्बै म्रार साँजु झोंवाइ। तारे च स्‍योर्गुइ पृथ्‍बीर्बै ह्रेंमैंलाइ हजार घ्रि बर्ष समा लुसि ह्रोंस ङाँइ च्यारल् आयों। च लिउँइँ दुष्‍टलाइ तिस्याँए ल्हागिर पिवाल् त्‍हुम्।
REV 20:4 झाइले ङइ ठिमैं म्रोंइ। धै परमेश्‍वरजी चए फिर क्हुँब्मैंलाइ निसाफ लबै हग पिंइ। येशूए ल्हागिर ग्वाइ पिंमा नेरो परमेश्‍वरए क्ह्रोंसेंन्बै ताँ बिप्रमा सैवाब्मैंए प्‍ल्‍ह ङइ म्रोंइ। च खेदोए छाप चमैंए ङ्‌हो नेरो योर आल्‍हैदिल, झाइले च खेदो नेरो चए कुलाज्यै या चमैंइ आफ्योल। चमैं सिबउँइँले धबै सोगों तसि ख्रीष्‍टने बालुन् हजार घ्रि बर्ष ग्याल्स लइ।
REV 20:5 चुमैंन् सिबउँइँले ओंसों सोगों तब्मैं ग। अरू चैबै सियाब्‍मैं हजार घ्रि बर्ष आतन् समा धबै सोगों आत।
REV 20:6 च ओंसोंबै सिबउँइँले सोगों तल् योंब्‍मैं आशिक योंबै म्‍हिमैं ग, चमैं ङ्हिंखे सिल् आत्‍हु। चमैं परमेश्‍वर नेरो ख्रीष्‍टए ख्रो पिंबै खेगिमैं तसि टिल् योंम्। चमैंइ हजार घ्रि बर्ष समा ख्रीष्‍टने ग्याल्स लब्‍मुँ।
REV 20:7 च हजार घ्रि बर्ष तल् खाँबै लिउँइँ परमेश्‍वरजी च दुष्‍टलाइ च्युथेंबै क्‍ल्‍ह्‍योउँइँले पिवाब्मुँ।
REV 20:8 च लिउँइँ शैतान बिबै दुष्‍ट ह्‍युलर्बै ताँन् ह्रेंमैं ङाँर लुबर ह्‍याब्मुँ। (च ह्रेंमैं गोग नेरो मागोग बिब्‍मैं ग।) चमैंलाइ वाँसि शैतानइ ल्हडें लबर हुइब्‍मुँ। झाइले चमैं खागु तसि मा ङ्युँइर्बै बालुवा धोंले बेल्‍ले ल्हें तब्‍मुँ।
REV 20:9 चमैं ताँन् ह्‍युल तिगोंन् ह्‍यासि परमेश्‍वरए म्‍हिमैं टिबै क्‍ल्‍ह्‍यो नेरो परमेश्‍वरजी खोबै सहर घेर्दिइ। दिलेया स्‍वर्गउँइँले मि युसि चमैंलाइ नास लवाइ।
REV 20:10 झाइले च ह्रेंमैंलाइ लुबै स्योर्गुलाइ बारुदए थाँ खबै लुँरिबै मिए होंल्दोंर भ्‍योंवाइ। च खेदो नेरो स्योर तेबै अगमबक्‍तालाज्यै या ओंसोंन् चर भ्‍योंवाल। चर चमैंइ त्‍हिंयाँ म्‍हुँइँस खोंयोंन् बिलै थेबै दुःख योंल् त्‍हुब्‍मुँ।
REV 20:11 झाइले फोस्रे ब्योंबै थेबै राजगद्दि नेरो चर क्हुँबै परमेश्‍वर ङइ म्रोंइ। खीउँइँले पृथ्‍बी नेरो मु भौदियाइ, चमैंइ खनिरै क्ल्ह्‍यो आयों।
REV 20:12 सियाब्‍मैं, थेब, च्‍योंब ताँन् राजगद्दिए उँइँर रारिब् ङइ म्रोंइ। परमेश्‍वरजी कितबमैं फैथेंल। सियाब्‍मैंइ सोगों मुँमा तो तो के लल, च केमैं ताँन् च कितबर प्‍ह्रिथेंल। धै चमैंइ लबै के ङ्‍ह्‍योसि परमेश्‍वरजी निसाफ लमल। (अर्को कितब घ्रि या खीजी फैइ। च कितबर खोंयोंइ आखाँबै छ्ह योंबै म्हिमैंए मिं प्‍ह्रिल।)
REV 20:13 मा ङ्युँइर सिबै म्‍हिमैं मा ङ्युँइइ पिंइ, छलेन काल नेरो क्रोज्यै या खेंमैंने मुँबै सिनुमैं पिंइ। धै चमैंइ लबै केमैं ङ्‍ह्‍योसि परमेश्‍वरजी निसाफ लइ।
REV 20:14 च लिउँइँ परमेश्‍वरजी काल नेरो क्रोंलाइ मि मुँबै होंल्दोंर भ्‍योंवाइ। च मि मुँबै होंल्दों प्ल्हइ दु:ख योंबै क्ल्ह्‍यो ग।
REV 20:15 खोंयोंइ आखाँबै छ्ह योंब्मैंए मिं प्‍ह्रिबै कितबर मिं आरेबै म्‍हिमैंलाइ परमेश्‍वरजी च मि मुँबै होंल्दोंर भ्‍योंवाइ।
REV 21:1 झाइले ङइ छारा पृथ्‍बी नेरो छारा मु म्रोंइ। ओंसोंबै मु नेरो पृथ्‍बी म्हयाल, मा ङ्युँइ या म्हयाल।
REV 21:2 दिलेया छारा यरूशलेम, “परमेश्‍वरए पबित्र सहर” प्ह्रेंरोए ल्हागिर प्‍ह्रेंस्‍यो पैरेब् धोंले पैरिसि स्‍वर्गउँइँले युरिब ङइ म्रोंइ।
REV 21:3 धै राजगद्दिउँइँले थेबै कैले छ बिब ङइ थेइ, “तारे परमेश्‍वर म्‍हिमैंने टिब्‍मुँ, झाइले चमैं खीए म्‍हिमैं तब्‍मुँ। परमेश्‍वर खीन् चमैंने तब्‍मुँ, धै खी चमैंए परमेश्‍वर तब्मुँ।
REV 21:4 खीजी चमैंए मिग्लि योगुर्ले फ्‍योमिंब्‍मुँ। च त्हेसेरो खाबै आसि, शोक आत, क्रोब-म्‍होब नेरो दुःख कष्‍ट खोंयोंइ या आत। ओंसोंबै ताँन् सैमैं म्हयाल् खाँइमुँ।”
REV 21:5 राजगद्दिर क्हुँरिबै परमेश्‍वरजी ङने बिइ, “तारे ङइ ताँन् सैमैं छारा लम्।” खीजी धबै ङने बिइ, “चु ताँ प्‍ह्रिद्, तलेबिस्याँ चु ताँमैं क्वेंल् त्हुब नेरो भर लल् खाँब मुँ।”
REV 21:6 खीजी धबै बिइ, “लल् त्हुबै ताँन् केमैं लल् खाँइ! ताँन् भन्दा ओंसोंबै नेरो ताँन् भन्दा लिउँइँबै ङन् ग, तों लबै ङन् ग, तों नुबै या ङन् ग। क्‍यु पिब्‍मैंलाइ ङइ खोंयोंइ आखाँबै छ्ह पिंबै क्‍यु मूलउँइँले छलेन् थुँल् पिंब्‍मुँ।
REV 21:7 दुष्‍टए फिर ट्होब्मैंइ चु ताँन् आशिकमैं योंब्मुँ। धै ङ चमैंए परमेश्‍वर तब्‍मुँ, चमैं या ङए प्हसेमैं तब्‍मुँ।
REV 21:8 दिलेया ङ्हिंब्मैं, येशूए फिर बिश्‍वास लबर फा पिब्‍मैं, छेरन् तबै के लब्मैं, म्हि सैमैं, ब्यभिचार लब्मैं, फाफुइ लब्मैं, कु पूजा लब्मैं नेरो स्योर्गुमैं ताँन् प्ल्हइ दु:ख योंबै क्ल्ह्‍योर ह्‍याल् त्हुब्मुँ। चर बारुद नेरो लुँरिबै मिए होंल्दों मुँ। चु प्ल्हइ दु:ख योंबै क्ल्ह्‍यो ग।”
REV 21:9 झाइले परमेश्‍वरए ह्रिसइ प्लिंबै प्हेल ङि छेबै स्‍वर्गदूत ङि न्‍होंर्बै घ्रि ङ ङाँर खसि बिइ, “खो, ङइ क्हिलाइ क्‍यु च्हजए प्‍ह्रेंस्‍यो उँइँमिंस्‍यो।”
REV 21:10 च्हमा ङ परमेश्‍वरए प्ल्हजी प्लिंल, स्‍वर्गदूतइ ङलाइ बेल्‍ले नुबै कोंर बोइ। झाइले परमेश्‍वर टिबै स्वर्गउँइँले क्युरु तयुरिबै पबित्र सहर यरूशलेम चइ ङने उँइँइ।
REV 21:11 च सहर परमेश्‍वरए ह्‍वेइ चारल, च ह्‍वे सै ल्हें फेबै तोथुमैं बिल्‍लौर स्फटिक धोंले चारब् मुँल।
REV 21:12 च सहरए कारग्युले बेल्‍ले थेब नेरो नुबै बानु मुँल। च बानुर च्युसे ङ्हिं थेबै म्रा मुँल। च म्रा ह्रोंसे स्‍वर्गदूत घ्रि-घ्रि राल। च म्रामैंए फिर इस्राएलर्बै च्युसे ङ्हिं कुलमैंए मिं प्‍ह्रिल।
REV 21:13 स्यारउँइँ (पूर्वउँइँ) म्रा सों, न्हुँउँइँ म्रा सों, पश्‍चिमउँइँ म्रा सों, झाइले उत्तरउँइँ म्रा सों मुँल।
REV 21:14 च सहरर्बै बानुए तेंजरे च्युसे ङ्हिं थे-थेबै युमाँ मुँल, धै चए फिर क्‍यु च्हजए च्युसे ङ्हिं चेला चिब्मैंए मिं प्‍ह्रिल।
REV 21:15 च सहर, चए म्रामैं, नेरो चए बानु च्हैंबै ल्हागिर ङने पोंबै स्‍वर्गदूतने माराए प्‍हरे मुँल।
REV 21:16 च सहर ह्रिंब, प्ल्ह्‍याब, नुब ताँन् घ्रिन् मुँल। च स्‍वर्गदूतइ ह्रोंसने मुँबै प्‍हरेइ च सहर च्हैंइ। च सहर हजार ङ्हिंसे प्लिब्र किलो मिटर ह्रिंब मुँल। छलेन चए प्लोया च्हगन् प्ल्हाब मुँल नुबै या च्हगन् मुँल।
REV 21:17 झाइले च स्‍वर्गदूतइ बानु च्हैंमा म्‍हिमैंए चलेबै नाप अनुसार च बानु ट्हुच्युसे ङ्‍ह मिटर प्ल्हाब मुँल।
REV 21:18 च बानु बेल्‍ले छ्याँबै टल्‍कदिबै बिल्‍लौर बिबै तुथुइ बनेल, च सहर बिस्याँ माराइ बनेब् मुँल। च सिसा धोंले टल्कदिमल।
REV 21:19 च बानुए तेंर ल्हें खालर्बै हिरामोतिइ बुट्‍ट झोंल। च च्युसे ङ्हिं तुथुमैं बिल्‍लौर, निर, हरित रत्न, पन्‍ना,
REV 21:20 आनिक्‍स, लालमणि, पितमणि, बेरुज, पुष्‍पराज, लसुने, नीलमणि नेरो कटेलाल् मुँल।
REV 21:21 च च्युसे ङ्हिं म्रा च्युसे ङ्हिं मोतिमैंल् मुँल। च म्रामैं स्यो-स्योबै मोतिइ बनेल। च सहरए घ्याँ दर्पन धोंले टल्‍कदिबै माराल मुँल।
REV 21:22 ङइ च सहरर मन्‍दिर आम्रों, तलेबिस्याँ चर्बै मन्‍दिर ताँन् भन्दा थेबै शक्‍ति मुँबै याहवेह परमेश्‍वर नेरो क्‍यु च्हज ग।
REV 21:23 च सहरर मि म्रोंबै ल्हागिर त्हिंयाँ नेरो लयाँ आचैदि, तलेबिस्याँ परमेश्‍वरए ह्‍वे चए फिर चारमुँ, च सहरर्बै बत्ति क्‍यु च्हजन् ग।
REV 21:24 ह्‍युलर्बै म्‍हिमैं च सहरर परमेश्‍वरए छ्याँबै ह्‍वेर प्रब्मुँ, झाइले ह्‍युलर्बै म्रुँमैंइ खेंमैंए सै न्होर चर पखब्मुँ।
REV 21:25 च सहरर खोंयोंइ म्‍हुँइँस आत, छतसि चर्बै म्रामैं खोंयोंइ तोल् आत्हु।
REV 21:26 ह्रें-ह्रेंमैंइ खेमैंने मुँबै सै न्होर च सहरर पखब्मुँ धै खैबै मान योंब्मैं मुँनबलेया चमैं परमेश्‍वरए उँइँर कुरब्मुँ।
REV 21:27 दिलेया खोंयोंइ आखाँबै छ्ह योंब्मैंए मिं प्ह्रिबै क्‍यु च्हजने मुँबै कितबर मिं मुँब्‍मैं मत्‍त्रे च सहरर होंल् योंब्‍मुँ। चर आछ्याँबै सैं प्ह्‍याब्मैं, छेरन् ङ्हाँबै के लब्मैं नेरो स्‍योर ताँ पोंब्‍मैं खाबइ या होंल् योंरिब् आरे।
REV 22:1 च लिउँइँ च स्‍वर्गदूतइ खोंयोंइ आखाँबै छ्ह पिंबै क्‍यु मुँबै स्‍यों ङलाइ उँइँइ। च स्‍यों बेल्‍ले टल्‍कदिबै तुथु धोंले वाँ-वाँ ब्योंब् मुँल। च स्‍यों परमेश्‍वर नेरो क्‍यु च्हजए राजगद्दिउँइँले त्होंसि,
REV 22:2 सहरए म्‍हाँजोर्बै घ्याँ तसि स्यों प्ररिल। च स्‍योंए रेर छ्ह पिंबै सिं धुँ मुँल। च धुँर सालर्बै च्युसे ङ्हिं म्हैनन् च्युसे ङ्हिं खालर्बै रोमैं रोमल। च सिंधुँए प्‍हो ह्रें-ह्रेंमैंलाइ सल् लबै ल्हागिर मुँल।
REV 22:3 तारे पिरु चर खोंयोंइ सराप तरिब आरे। परमेश्‍वर नेरो क्‍यु च्हज क्हुँबै राजगद्दि च सहर न्‍होंर तब्‍मुँ। झाइले खीए के लब्‍मैंइ खीए मिं क्वेसि खीलाइ फ्‍योब्‍मुँ।
REV 22:4 चमैंइ परमेश्‍वरए लि म्रोंब्‍मुँ, धै चमैंए ङ्‌होर खीए मिं तब्‍मुँ।
REV 22:5 च सहरर खोंयोंइ या म्‍हुँइँस तरिब् आरे। छतसि चमैंलाइ बत्ति नेरो त्‍हिंयाँ चैदिरिब आरे, तलेबिस्याँ याहवेह परमेश्‍वरए ह्‍वेजीन् चमैंए मि म्रोंल् लमिंब्मुँ। धै म्रुँइ लब् धोंले चमैंइ खोंयोंइ या ग्याल्स लब्‍मुँ!
REV 22:6 च लिउँइँ स्‍वर्गदूतइ ङने बिइ, “चु ताँमैं क्वेंल् त्हुब नेरो भर लल् खाँब् मुँ। याहवेह परमेश्‍वरजी खीए अगमबक्‍तामैंलाइ खीए प्ल्ह पिंम्। तारे युनन् तखबै सैमैं उँइँबर परमेश्‍वरजी ह्रोंसए स्‍वर्गदूतलाइ खीए के लब्मैं ङाँर कुल्मिंइमुँ।”
REV 22:7 “थेद्! ङ युनन् युब्‍मुँ बिसि,” येशूजी बिइमुँ। “चु कितबर प्ह्रिबै ‘लिउँइँ तखम्’ बिबै ताँ ङिंबै म्‍हिइ आशिक योंब्मुँ।”
REV 22:8 चु ताँमैं थेब नेरो म्रोंबै म्हि ङ यूहन्‍ना ग। चु ताँन् ताँमैं थेसि, म्रोंसि, ङलाइ चु ताँमैं उँइँमिंबै स्‍वर्गदूतए प्‍हले फ्‍योबर ङ पद्खु तइ।
REV 22:9 दिलेया चइ ङने बिइ, “छ आलद्! परमेश्‍वर मत्‍त्रे फ्‍योद्! क्हि, अगमबाणि पोंबै क्‍हिए आघें-अलिमैं नेरो चु कितबर मुँबै ताँमैंइ बिब् धोंले प्रब्मैं धोंबन् ङ परमेश्‍वरए के लबै दूत मत्‍त्रे ग।”
REV 22:10 धबै चइ ङने बिइ, “चु परमेश्‍वरए ताँ आलोथेंन्, तलेबिस्याँ चु ताँन् ताँ तबि छेबै त्हे चेंदोन् तखइमुँ।
REV 22:11 आछ्याँबै के लब्मैंइ आछ्याँबै केन् लरिगे, छेरन् ङ्हाँबै केमैं लब्मैंइ छेरन् ङ्हाँबै केन् लरिगे। झाइले छ्याँबै केमैं लब्मैंइ छ्याँबै केमैंन् लरिगे, परमेश्‍वरलाइ म्हाँदिब्मैइ अझै परमेश्‍वरलाइ म्हाँदिरिगे।”
REV 22:12 “थेद्! म्हिमैंइ खैबै के लइमुँ छाबन् नों पिंबर ङ युनन् युब्‍मुँ बिसि,” येशूजी बिइमुँ।
REV 22:13 “ताँन् भन्दा ओंसोंबै नेरो ताँन् भन्दा लिउँइँबै ङन् ग, तों लबै ङन् ग, तों नुबै या ङन् ग।”
REV 22:14 खोंयोंइ आखाँबै छ्ह पिंबै सिंधुँउँइँले रोमैं चल् योंसि सहरर्बै म्रामैंउँइँले होंल् योंरिगे बिसि ह्रोंसए क्‍वें ख्रुब्‍मैं ङ्‍हो सब्मैं ग।
REV 22:15 दिलेया सहरए बैरु बिस्याँ आछ्याँबै सैं प्ह्‍याब्मैं: फाफुइ लब्मैं, ब्यभिचार लब्मैं, म्हि सैब्मैं, कु फ्योब्‍मैं, स्‍योलिबै ताँ पोंब्‍मैं नेरो स्‍योलिबै के लब्मैं तम्।
REV 22:16 येशूजी बिइमुँ, “क्हेमैं ङए फिर बिश्‍वास लब्‍मैंए ल्हागिर चु ताँ बिमिंबर ह्रोंसए स्‍वर्गदूत ङइ कुल्मिंइमुँ। ङ दाऊदए सन्‍तानर्बै मुल खे ग। न्‍हाँगर्बै चारबै मुसारा ङन् ग।”
REV 22:17 पबित्र प्ल्ह नेरो प्‍ह्रेंस्‍योइ खीने बिइमुँ, “यु”। चु ताँ थेबै म्हिमैंज्यै या छलेन खीने “यु” बिल् त्‍हुम्। क्‍यु पिब्मैं क्‍यु मूलर खरिगे। छ्ह पिंबै क्‍यु थुँदा ङ्हाँब्मैंइ छलेन् थुँरिगे।
REV 22:18 चु कितबर्बै तारे तखबै ताँमैं थेब्‍मैंलाइ ङ यूहन्‍नाइ बिमुँ: चु ताँमैंए फिर अर्को ताँमैं थप्‍दिबै म्हिए फिर चु कितबर प्‍ह्रिबै थेबै दुःखमैं परमेश्‍वरजी थप्‍दिमिंब्‍मुँ।
REV 22:19 छलेन चु कितबर मुँबै ताँमैं थोबै म्हिउँइँले छ्ह पिंबै सिधुँउँइँले चइ योंल् त्हुबै रोए भाग परमेश्‍वरजी थोवाब्‍मुँ, धै खीए पबित्र सहरर टिबै हग या प्हेंवाब्‍मुँ। छले च छ्ह पिंबै सिंधुँ नेरो परमेश्‍वरए पबित्र सहरए बारेर्बै ताँ चु कितबर प्ह्रिइमुँ।
REV 22:20 चु ताँन् ताँए ग्वाइ पिंबै प्रभु येशूजी “क्ह्रोंसेंन, ङ युनन् युसिन् मुँ,” बिइमुँ। आमेन! ओ प्रभु येशू, युनन् यु!
REV 22:21 प्रभु येशूए दयाम्हाँया परमेश्‍वरए ताँन् म्‍हिमैंने तरिगे। छान् तरिगे!
