﻿१ तिमोथी.
3.
थेद्, चु क्वेंल् त्‍हुबै ताँ ग: खाबज्यै चिब तसि के लबै सैं लस्‍याँ चइ छ्याँबै के लबै सैं लम्। 
छतसि बिश्‍वासीमैं न्होंर्बै चिब तोइ छ्याब् आरेब, प्ह्रेंस्यो घ्रि मत्‍त्रे मुँब, आछ्याँबै सैमैंउँइँले जोगेल् खाँब, ताँनने क्ह्रिल् खाँब, ताँनइ क्वेंब, प्ह्रेंमैं मान लल् ह्रब, झाइले म्हिमैं छेनाले लोमिंल् खाँब, 
प्हा आथुँब, प्होंगि आलब, ह्रिस आखब, सैदिल् खाँब, मुइए लोब आलब तल् त्हुम्। 
छलेन च ह्रोंसए धिंर्बै चाँजो छेनाले लल् खाँब नेरो प्हसेमैं छेनाले लोदा सैंदा लसि ह्रोंसइ बिबै ताँ प्हसेमैंइ ङिंब लल् खाँरिगे। 
तलेबिस्याँ खाबज्यै या ह्रोंसए धिंर्बै परवामैं खागु लल् आखाँ बिस्‍याँ, झन् परमेश्‍वरए फिर बिश्‍वास लब्मैंलाइ खैले खागु लल् खाँमुँ? 
छतसि भर्खर बिश्‍वास लबै म्‍हि चिबए ल्हागिर आत्हाँरिगे, तलेबिस्याँ छाबै म्‍हि चिब तल् पिंइबिस्‍याँ, च थेब् प्हैंसि दुष्‍टइ योंबै दण्ड चज्यै या योंब्‍मुँ। 
म्हिमैंए उँइँरै या च छ्याँब तल् त्हुम्, आस्याँ आगुइ ताँ सेन् तसि च दुष्‍टए ङोर फेब्मुँ। 
छलेन डिकनमैं या छ्याँबै बानि ब्योर प्ह्‍याल् त्‍हुम्, क्ह्रोंसेंन्बै ताँ पोंल् त्‍हुम्। प्हा थुँसि म्हेरल् आत, धै सै न्होरए लोबै या लल् आत। 
येशू ख्रीष्‍टए बारेर परमेश्‍वरजी लोमिंबै ताँमैं चमैंइ छ्याँबै सैंउँइँले सैं न्होंर थेंल् त्‍हुम्। 
ओंसों चमैंए बानि खैब मुँ बिसि जाँच लल् त्हुम्, धै चमैंने तोइ छ्याब् आम्रोंस्याँ चमैंइ डिकनए पदर टिसि सेवा लरिगे। 
छलेन च्हमि-रिमैं या छ्याँबै बानि ब्योर मुँब, फ्रम् ताँ क्योंम् ताँ आलब, आछ्याँबै केमैं आलब, ताँनइ क्वेंब तल् त्‍हुम्। 
डिकनल प्ह्रेंस्यो घ्रि मत्‍त्रे तल् त्‍हुम्। प्‍हसेमैं नेरो धिं छेनाले ङ्‍ह्‍योल् खाँब तल् त्‍हुम्। 
डिकनइ लल् त्हुबै सेवा छेनाले लब्मैंल छ्याँबै इजेत तम्, धै ह्रोंसइ लबै बि‍श्‍वासए बारेर अरूमैंने आङ्हिंन्ले बिल् खाँम्। 
ङ क्‍हि ङाँर युनन् खबै सैं लइमुँ, दिलेया चु प्ह्रिछ्या क्हिलाइ प्ह्रिइमुँ। 
खनिज्यै ङ खब क्हैयाइ बिस्याँ परमेश्‍वरए प्हसेमैंए बानि ब्योर खैब तल् त्‍हुम् बिसि क्हिइ छेनाले सेल् त्हुम्। परमेश्‍वरए प्हसेमैं खोंयोंन् बिलै सोगों तबै परमेश्‍वरए मण्‍डलि ग, धै क्ह्रोंसेंन्बै मुल त्हो नेरो जग ग। 
येशू ख्रीष्‍टए बारेर परमेश्‍वरजी उँइँमिंबै ताँमैं कति थेब मुँ बिसि ङ्योइ क्ह्रोंसेंन्ले थहा सेसि बिम्: येशू ख्रीष्‍ट म्‍हिए क्हो किंसि चु ह्‍युलर युइ, पबित्र प्ल्हउँइँले खी ठिक ठर्दिइ, स्वर्गदूतमैंइ खीलाइ म्रोंइ, ह्रें ह्रेंर्बै म्‍हिमैंए म्हाँजोर खीए बारेर्बै ताँ म्हिमैंइ बिप्रइ, ताँन् ह्‍युलर्बै म्‍हिमैंइ खीए फिर बिश्‍वास लइ, झाइले थेबै मानले खी स्‍वर्गउँइँ क्वेयाइ। 
