﻿मत्ती.
10.
खीजी ह्रोंसए च्युसे ङ्हिं चेलामैं हुइसि मोंमैं ल्‍हाब नेरो ताँन् खालर्बै नब् छब्मैं सल् लमिंबै हग पिंइ। 
च्युसे ङ्हिं कुल्मिंबै चेला चिब्मैंए मिं चुमैंन् ग: ओंसों पत्रुस बिबै सिमोन, चए अलि अन्‍द्रियास, जब्दियाए च्ह याकूब नेरो चए अलि यूहन्‍ना, 
झाइले फिलिप नेरो बारथोलोमाइ, थोमा, रोमी म्रुँए ल्हागिर बालि रेबै मत्ती, अल्‍फयसए च्‍ह याकूब, थेदियस, 
ह्रोंसए ह्‍युलए फिर म्हाँया लबै सिमोन नेरो यहूदा इस्‍करियोत। चु इस्‍करयोतइ लिउँइँ येशूलाइ धोका पिंसि क्हाल् पिंइ। 
येशूजी च च्युसे ङ्हिं चेलामैंने “क्‍हेमैं अरू ह्रेंमैं ङाँर नेरो सामरीमैंए नाँसजरे आह्‍याद्,” बिसि कुलइ। 
“बरु इस्राएलीमैं ङाँर ह्‍याद्। चमैं म्‍हयाबै क्‍यु धों तब्‍मैं ग। 
चर ह्‍यामा ‘स्वर्गर्बै ग्याल्स चेंदो फेखइमुँ,’ बिसि बिप्रद्। 
नब् छब्मैं सल् लद्, सि‍याब्‍मैं सोंगों लद्, कोर खब्‍मैं सल् लद् धै मोंमैं ल्‍हावाद्। क्‍हेमैंइ परमेश्‍वरए आशिक छलेन् योंइ, छतसि अरू म्‍हिमैंलाज्यै या छलेन् पिंन्। 
“क्हेमैंइ फगिर मारा, चाँदि नेरो क्‍योरए मुइमैं आनोद्। 
क्हेमैं ह्‍यामा झोला, फेर्दिबै क्‍वें, जुत्ता आबोद्, प्‍हरे या आछेद्, तलेबिस्याँ म्रोंमैंइ चब्-थुँब् योंल् त्हुम्। 
“सहरर मुँले नाँसर मुँले क्हेमैं ह्‍यासि चर्बै छ्याँबै सैं प्ह्‍याबै म्‍हि म्हैसि च नाँसर टिन् समा च म्‍हि ङाँर्न टिद्। 
चए धिंर होंमा क्‍हिइ ‘छिं ङ्हाँरिगे’ बिसि आशिक पिंन्। 
च धिंर्बै म्‍हिमैंए सैं छ्याँब मुँस्‍याँ क्‍हेमैंइ पिंबै आशिक चमैंइ योंरिगे, दिलेया चमैंए सैं छ्याँब आरेस्‍याँ क्‍हेमैंए छिं ङ्हाँब क्हेमैंनेन् एखरिगे। 
खाबज्यै या क्‍हेमैंलाइ मान आलस्‍याँ, क्‍हेमैंए ताँ थेल् आङिंस्‍याँ च धिं नेरो च क्ल्ह्‍योउँइँले त्होंमा ह्रोंसए प्‍हलेर्बै त्‍हुला चर्न खारथेंन्। 
क्ह्रोंसेंन ङ क्हेमैंने बिमुँ, लिउँइँ परमेश्‍वरजी निसाफ लबै त्हिंइर स्‍योंम्‍बै पाप लबै सदोमथेंमैं नेरो गमोराथेंमैंइ भन्दा च सहरर्बै म्‍हिमैंइ ल्हें सजैं योंब्मुँ।” 
“ङ्‍ह्‍योद्! ङइ क्‍हेमैं प्याँगुमैंए म्हाँजोर क्यु धोंले कुलरिइमुँ। छतसि क्‍हेमैं प्‍हुरि धोंले बाठो, तोंगु धोंले सोजो तसि टिल् त्‍हुम्। 
म्‍हिमैंउँइँले न्हक्रों मि क्रोंले टिद् तलेबिस्याँ चमैंइ क्‍हेमैं क्‍हासि अड्डर उजुर लब्‍मुँ, धै च्हों धिंजगोर बोसि कोर्राइ प्रुब्‍मुँ। 
क्‍हेमैं ङए चेलामैं तबइले म्हिमैंइ क्‍हेमैं क्हासि क्रथेमैं नेरो म्रुँमैंए उँइँर राल् पिंब्‍मुँ। च त्हेर क्‍हेमैंइन चमैं नेरो अरू ह्रेंमैंने ङए ताँमैं बिमिंल् त्‍हुब्‍मुँ। 
दिलेया चमैंइ क्‍हेमैंलाइ क्‍हामा क्‍हेमैंइ खैले पोंब् ङ्‍हे तो बिल् त्हुब् ङ्‍हे बिसि ओंसोंन् न्हुँ आलद्। क्‍हेमैंइ तो पोंल् त्‍हुम् बिसि च त्हेर्न परमेश्‍वरजी क्‍हेमैंने बिमिंब्मुँ। 
तलेबिस्याँ पोंब क्‍हेमैं आङिं, दिलेया क्हेमैंए आबाए प्ल्ह क्‍हेमैंए सुँउँइँले पोंब्‍मुँ। 
“ह्रों-ह्रोंसए त्येमैं न्होंर्न घ्रिइ-घ्रि सैबर पिंवाब्मुँ। छलेन आबाइ च्‍ह-च्हमिमैं सैबर पिंवाब्मुँ, धै च्‍ह-च्हमिंमैंइ आबा-आमामैंए बिरोधर रेसि सैबर ल्हैदिब्मुँ। 
क्हेमैंइ ङए मिं किंबइले ताँन् म्‍हिमैंइ क्‍हेमैं हेल लब्‍मुँ। दिलेया सैदिसि लिउँइँ समा बिश्‍वासर भोंब् तेरिब्‍मैं परमेश्‍वरजी जोगेमिंब्मुँ। 
छतसि म्हिमैंइ क्हेमैंलाइ क्ल्ह्‍यो घ्रिर ह्रुगुदिइ बिस्याँ च क्ल्ह्‍योउँइँले अर्को क्ल्ह्‍योउँइँ भौदिह्‍याद्। क्ह्रोंसेंन ङ क्हेमैंने बिमुँ, परमेश्‍वरउँइँले कुल्‍मिंबै म्हिए च्ह युब् भन्दा ओंसों क्‍हेमैंइ इस्राएलर्बै ताँन् क्ल्ह्‍योर खैलसेया स्युरल् खाँरिब् आरे। 
“चेला ह्रोंसए गुरु भन्दा थेब आत धै क्ल्हे भन्दा केब्छैं थेब आत। 
दिलेया चेला ह्रोंसए गुरु धोंब धै केब्छैं ह्रोंसए क्ल्हे धोंब तल् खाँस्‍याँ सैं तोंल् त्‍हुम्। म्हिमैंइ धिंर्बै क्ल्हेनेन् बालजिबुल बिसि मिं थेंम् बिस्‍याँ खीए परवामैंने झन् खै बिलै? 
“छतसि म्‍हिमैंने आङ्हिंन्। तलेबिस्याँ तोगो तो सै लोथेंलेया लिउँइँ था सेब्‍मुँ। धै तोगो लोथेंबै ताँ लिउँइँ खन्तोदोंन् थेनेम्। 
छतसि ङइ क्‍हेमैंने मिछु खैबर बिबै ताँ त्‍हिंइर बिमिंन्। धै ङइ क्‍हेमैंने खाबज्यै आथेल्‍ले बिबै ताँ क्हेमैंइ ताँनइ थेल्‍ले धिंए प्हेंउँइँले बिमिंन्। 
“क्‍हिए ज्यु सैल् खाँब्‍मैंने आङ्हिंन्, तलेबिस्याँ चमैंइ क्‍हिए प्‍ल्‍ह सैल् आखाँ। बरु प्‍ल्‍ह नेरो ज्यु ङ्हिंन-ङ्हिंन् नर्गर भ्‍योंवासि नास लल् खाँबै परमेश्‍वर म्रोंसि ङ्हिंन्। 
“मुइ घ्रिर कोर्मे ङ्हिं आलों वा? चमैं च्‍युगुथिरि मुँनबिलेया परमेश्‍वर आबाए इच्छा आरेस्याँ घ्रि या सर तेरिब् आरे। 
परमेश्‍वरजी क्‍हेमैंए क्र प्हो या ताँन् घ्रि-घ्रिले च्‍योइमुँ। 
छतसि क्हेमैं आङ्हिंन्, परमेश्‍वरए उँइँरि ल्‍हें कोर्मे भन्दा क्‍हेमैं झन् बेल्‍ले थेब् मुँ। 
“छतसि खाबइ म्‍हिमैंए उँइँर ‘ङ येशूए म्‍हि ग’ बिमुँ, ङज्यै या ङए स्वर्गर मुँबै परमेश्‍वर आबाए उँइँर ‘चु म्‍हि ङलन् ग’ बिब्‍मुँ। 
खाबइ म्‍हिमैंए उँइँर ‘ङइ येशू ङो आसे’ बिमुँ, ङज्यै या ङए स्वर्गर मुँबै परमेश्‍वर आबाए उँइँरि ‘चुम् ङइ ङो आसे’ बिब्‍मुँ।” 
“ङ ह्‍युलर शान्‍ति पिंबर युब् ग बिसि आमैंन्। शान्‍ति पिंबर ङ युब आङिं, बरु सेलाँ (तरवार) चलेबर युब् ग।” 
तलेबिस्याँ म्हिमैंलाइ चमैंए आबाने आक्ह्रिल् लबर, च्हमिमैं आमाने आक्ह्रिल् लबर, चोंमैं स्‍युमिने आक्ह्रिल् लबर ङ युब् ग। 
म्‍हिए शत्तुर ह्रोंसए परवा न्होंर्बैन् तब्‍मुँ। 
“खाबइ ङ भन्दा ह्रोंसए आबा-आमाए म्हाँया ल्हें लमुँ, च ङए म्‍हि तल् आखाँ। छलेन खाबइ ङ भन्दा ह्रोंसए च्‍ह-चमिए म्हाँया ल्हें लमुँ च ङए म्‍हि तल् आखाँ। 
खाबइ ह्रोंसए क्रूस नोसि ङए लिलि आल्‍हैदि च ङए म्‍हि तल् आखाँ। 
खाबइ ह्रोंसए ज्यु जोगेल् म्‍हैमुँ, चए ज्यु नास तब्‍मुँ। दिलेया ङए चेला तसि ह्रोंसए ज्यु पिंब्मैंइ जीबन योंब्‍मुँ।” 
“क्‍हेमैंलाइ मान लब्मैंइ ङलाज्यै या मान लमुँ, धै ङलाइ मान लब्मैंइ ङ कुल्‍मिंबै परमेश्‍वरलाज्यै या मान लम्। 
खाबइ ‘चु म्‍हि अगमबक्‍ता ग,’ बिसि अगमबक्‍तालाइ मान लमुँ, चज्यै या अगमबक्‍ताइ योंबै इनाम योंब्मुँ। छलेन ठिक के लबै म्हिलाइ ठिक के लबै म्हिन् मैंसि मान लब्मैंइ ठिक के लबै म्हिइ योंबै इनाम योंब्मुँ। 
‘चु म्‍हि येशूए म्‍हि ग,’ बिसि खाबज्यै ङए धाँसे च्‍योंबै चेलालाइ गिलाँस घ्रि ङ्युँबै क्‍यु मत्‍त्रे पिंनाबिले या चइ योंल् त्हुबै इनाम योंब्‍मुँ।” 
