﻿मत्ती.
4.
झाइले दुष्‍टउँइँले येशूए जाँच लबर परमेश्‍वरए पबित्र प्ल्हजी येशूलाइ क्यु आयोंबै क्ल्ह्‍योरि बोयाइ। 
चर प्लिच्‍यु त्हिंइ प्लिच्यु म्हुँइँस समा बर्त टिमा येशूलाइ फो ख्रेंइ। 
छतमा दुष्‍टइ येशू ङाँर खसि बिइ, “क्‍हि क्‍ह्रोंसेंन परमेश्‍वरए च्‍ह ग बिस्‍याँ चु युँमामैं ‘क्हें तयाद्,’ बिद्।” 
छबिमा येशूजी बिइ, “परमेश्‍वरए छ्वेर छले प्‍ह्रिइमुँ, ‘चबै सैइ मत्‍त्रे म्हि सोल् आखाँ, परमेश्‍वरए सुँउँइँले त्‍होंबै ताँमैंउँइँले म्‍हि सोल् खाँम्।’” 
छलेन दुष्‍टइ येशूलाइ यरूशलेम सहरर बोसि मन्दिरए धाँसे नुबै च्‍होर राल् पिंसि 
खीने बिइ, “क्‍हि क्‍ह्रोंसेंन परमेश्‍वरए च्‍ह ग बिस्‍याँ छुइले क्युरु फाल् झोंन्। तलेबिस्याँ ‘परमेश्‍वरजी क्हिलाइ जोगेमिंबर ह्रोंसए स्‍वर्गदूतमैं कुलब्मुँ। धै क्हिए प्हले युँमार आथुरिगे बिसि चमैंए योइ क्‍हि तोब्मुँ,’ बिसि छ्वेर प्ह्रिइमुँ।” 
येशूजी चने “‘क्‍हिइ याहवेह ह्रोंसए परमेश्‍वरए जाँच आलद्!’ बिसि छ्वेर प्‍ह्रिइमुँ,” बिइ। 
धबै दुष्‍टइ येशू नुबै कोंर बोसि ह्‍युलर्बै ताँन् ग्याल्स नेरो चर्बै ताँन् छ्याँबै सैमैं खीने उँइँसि 
खीने बिइ, “क्‍हिजी पद्खु तसि ङलाइ फ्‍योइ बिस्‍याँ ङइ चु ताँन् सैमैं क्हिलाइ पिंस्यो।” 
छबिमा येशूजी चने बिइ, “दुष्‍ट, क्हि ङ ङाँइँले ह्रेंगो तयाद्! तलेबिस्याँ ‘क्‍हिइ याहवेह ह्रोंसए परमेश्‍वरलाइ फ्‍योदु, धै खीए सेवा मत्‍त्रे लद्,’ बिसि परमेश्‍वरए छ्वेर प्‍ह्रिइमुँ।” 
येशूजी छ बिबै तोदोंन् दुष्‍ट खीलाइ वाथेंसि ह्‍याइ। धै स्‍वर्गदूतमैं युसि येशूए सेवा लइ। 
हेरोद म्रुँइ यूहन्‍ना झेलर च्युवाइमुँ बिबै ताँ थेसि येशू गालील ह्‍युलर्न एइ। 
येशूजी ह्रोंसए नासरत बिबै नाँस पिसि कफर्नहुम बिबै नाँसर युसि टिबर होंइ। चु सहर जबूलून नेरो नप्‍ताली ह्‍युलए चेंदो मा ङ्युए छेउर मुँ। 
स्‍योंमन् यशैया अगमबक्‍ताइ बिबै ताँ छले पूरा तइ: 
“ओ यर्दन स्‍योंए क्‍योंजा मा ङ्युउँइँले ह्‍याबै घ्‍याँर मुँबै जबूलून नेरो नप्‍तालीथेंमैं नेरो अरू ह्रेंमैं टिबै गालील ह्‍युल। 
मिछु खैबर टिबै म्हिमैंइ थेबै चारबै ह्‍वे म्रोंइमुँ। सिल् त्‍हुबै मिछु खैबै ह्‍युलर टिब्मैंए फिर ह्‍वे घ्रि चारइमुँ।” यशैयाइ बिबै ताँ क्ह्रोंसेंन तबर छ तइ। 
येशू कफर्नहुम नाँसर टिबै त्हे ओंनोंन् म्हिमैंने “पाप केमैं लब् पिसि परमेश्‍वरउँइँ सैं एद्, तलेबिस्याँ स्‍वर्गर्बै ग्याल्स (राज्‍य) चेंदोन् खइमुँ बिबर होंइ।” 
तिगें येशू गालील बिबै मा ङ्युँइए छेउजरे प्ररिमा सिमोन पत्रुस नेरो चए अलि अन्‍द्रियास ङ्हिंना-ङ्हिंन् मा ङ्युँइर जाल प्रिंरिब म्रोंइ। तलेबिस्याँ चमैं ताँग क्हाब्‍मैं मुँल। 
येशूजी चमैंने बिइ, “ङए लिलि प्रद्। ताँग खुब् धोंले अरू म्‍हिमैं ङ ङाँर खुपखब्‍मैं ङइ क्हेमैं लमिंब्मुँ।” 
येशूजी छ बिबै तोदोंन् चमैंइ खेंमैंए जालमैं वाथेंसि खीए लिलि ल्‍हैदिइ। 
येशू छाइले ह्‍यारिमा अर्को त्येमैं ङ्हिं, जब्दियाए च्‍हमैं याकूब नेरो यूहन्‍ना खेंमैंए आबाने डुँङ्गार क्हुँसि ह्रोंसए जाल टुरिब म्रोंसि खीजी चमैं या हुइ। 
हुइबै तोदोंन् चमैंज्‍यै या खेंमैंए डुँङ्गा नेरो आबा वाथेंसि येशूए लिलि ल्‍हैदिइ। 
येशू गालील ह्‍युल तिगोंन् स्‍युरदै चमैंए च्हों धिंजरेबै म्हिमैंने परमेश्‍वरए ताँमैं लोमिंदै स्‍वर्गर्बै ग्याल्सए बारेर सैं तोंबै ताँमैं बिप्रमल। धै ताँन् खालर्बै नब् छब्मैं नेरो मोंइ स्याबै म्‍हिमैं या सल् लमिंमल। 
छले सिरिया ह्‍युल तिगोंन् येशूजी लबै औदिबै केमैंए बयन थेनेइ। छतमा म्‍हिमैंइ ननाओलिबै नब्‍मैं, मोंइ स्‍याब्‍मैं, र बेथाइ स्याब्‍मैं, स्याले बेथाइ स्याब्‍मैं ताँन् म्हिमैंइ खी ङाँर पखइ, धै खीजी चमैं ताँन् सल् लमिंमल। 
छतमा गालील ह्‍युलउँइँले, डिकापोलिस ह्‍युलउँइँले, यरूशलेम सहरउँइँले, यहूदीया ह्‍युलउँइँले नेरो यर्दन स्‍यों क्‍योंजाउँइँले ल्हें म्हि खसि खीए लिलि ल्हैदिइ। 
