﻿भजनमैं.
150.
हल्‍लेलूयाह! खीए पबित्र क्ल्‍ह्‍योर याहवेह मिं क्वेद्; खीजी बनेबै मु बेल्‍ले थेब् तब् म्रोंसि खीए शक्‍तिए बयन लद्! 
खीजी लबै थे-थेबै केमैंए बारेर खीए मिं क्वेद; खी बेल्‍ले थेबै परमेश्‍वर ग, छतसि खीए मिं क्वेद्! 
क्युए रु ह्रासि खीए मिं क्वेद्; बीणा नेरो सारङ्गी ह्रासि खीए मिं क्वेद्! 
खैंचडी ह्रासि सेदै खीए मिं क्वेद्; बीणा-सारङ्गीं नेरो मुराली ह्रासि खीए मिं क्वेद्! 
छिनिमिनि ह्रासि खीए मिं क्वेद्; बेल्‍ले कोल्‍ले छ्योंलो ह्रादै खीए मिं क्वेद्! 
सो प्ह्‍याबै ताँन् सैमैंइ याहवेहए मिं क्वेरिगे! हल्‍लेलूयाह! याहवेहए मिं थेब् लद्!
