﻿भजनमैं.
140.
क्वे प्रिंबै चिबए ल्हागिर दाऊदए भजन घ्रि। ओ याहवेह, दुष्‍टमैंउँइँले ङ फ्रेमिंनु। म्हिसैमैंउँइँले ङ जोगेमिंन्। 
चमैंइ ह्रोंसए खोंर आछ्याँबै चाँजोमैं लम्, धै त्हिंइ ह्रोंसे नेबै के लम्। 
प्हुरिइ च्हिब् धोंले चमैंए लेइ नल् लम्, चमैंए सुँर प्हुरिए म्येकैं ल्हें तम्। तिस्याँदे मैंन् 
ओ याहवेह, दुष्‍टमैंए योउँइँले ङ जोगेमिंन्, म्हिसैमैंउँइँले ङ रक्षा लमिंन्, ङए प्हले थुरवाबै चाँजो चमैंइ लइमुँ। 
थेब् प्हैंबै म्हिमैंइ ङए ल्हागिर ङो चुइमुँ, चमैंइ ह्रोंसए जालए छो च्योइमुँ, धै ङ प्रबै घ्याँर ङो चुइमुँ। तिस्याँदे मैंन् 
ओ याहवेह, ङ क्हिने बिमुँ, “क्हि ङए परमेश्‍वर ग!” ओ याहवेह, ङइ ग्वार ह्रिब थेमिंनु! 
ओ याहवेह, ङलाइ जोगेमिंबै शक्ति मुँबै परमेश्‍वर, ल्हडें तबै त्हिंइर क्हिजी ङए क्र जोगेमिंमुँ। 
ओ याहवेह, दुष्‍टमैंए सैंर मैंब योल् आपिंनु, चमैंइ लबै चाँजोमैं फुवाद्, आस्याँ चमैं थेब् प्हैंब्मुँ। तिस्याँदे मैंन् 
ङलाइ घेर्दिब्मैंए क्रए फिर चमैंए सुँइ पोंबै आछ्याँबै ताँइन हुवारिगे! 
लुँरिबै मिए राब चमैंए फिर उँयारिगे! बेल्‍ले लुँरिबै मिर चमैं भ्योंवारिगे, धै रेलै आखाँन्ले चमैं हिल् मुँबै होल्दोंर तेयारिगे! 
आगुलाइ स्यारब्मैं चु ह्‍युलर टिल् आयोंरिगे, म्हिसैमैं युनन् नास तबर फेरिगे! 
आगुइ क्र ओलै आपिंब्मैंए ख लसि याहवेहजी मुद्दा नेमिंम्, धै ङ्हाँदुमैंए ठिक निसाफ लमिंब्मुँ बिसि ङ सेइमुँ। 
क्ह्रोंसेन ठिक के लब्मैंइ क्हिए मिंलाइ थेब लब्मुँ, झाइले सोजो म्हिमैं क्हिए उँइँर टिब्मुँ। 
