﻿भजनमैं.
122.
कैंडो क्रेबै त्हेए ल्हागिर दाऊदइ प्ह्रिबै क्वे घ्रि “लु, ङ्यो याहवेहए धिंर ह्‍याले!” बिसि म्हिमैंइ ङने बिमा ङए सैं तोंइ। 
ओ यरूशलेम, ङिए प्हलेमैं क्हिए म्रामैं न्होंर राइमुँ! 
छेन्ले क्ह्रिबै सहर घ्रि धोंले यरूशलेम बेल्‍ले छेन्ले बनेइमुँ। 
याहवेहजी इस्राएलीमैंने ताँ बिब् धोंले कुल-कुलर्बै म्हिमैं, याहवेहए कुलमैं, खीए मिंलाइ धन्यबाद पिंबर चु सहरर ह्‍यामुँ। 
चुर्न दाऊदए खलगर्बै म्रुँमैं निसाफ लबर चु सहरर्बै गद्दिमैंए फिर क्हुँम्। 
यरूशलेमर शान्ति तरिगे बिसि प्राथना लद्! “क्हिए फिर म्हाँया लब्मैंल बिब् धों तरिगे! 
क्हिए गारमैंए न्होंर शान्ति तरिगे, धै क्हिए किल्‍लामैंए न्होंर छ्याँब क्ह्‍युब तरिगे!” 
“क्हिए न्होंर शान्ति तरिगे!” बिसि ङए आघें-अलिमैं नेरो ङए थुमैंए ल्हागिर ङइ बिब्मुँ। 
याहवेह ङ्योए परमेश्‍वरए धिं छेन् लल् खाँरिगे बिसि “ङइ क्हिए ल्हागिर” प्राथना लइमुँ। 
