﻿भजनमैं.
113.
याहवेहए मिं थेब् लद्! ओ याहवेहए सेवा लब्मैं, खीए मिं थेब् लद्! खीए मिं क्वेद्! 
तोगोउँइँले खोंयोंन् बिलै याहवेहए मिं थेब् तरिगे! 
त्हिंयाँ प्योबै त्हे सेरो त्हिंयाँ लिबै त्हे समन् खीए मिं थेब् तल् त्हुम्! 
याहवेहजी ताँन् ह्रेंमैंए फिर ग्याल्स लम्, धै खीए मान मु भन्दा नुब मुँ बिसि ताँन् म्हिमैंने उँइँमिंन्! खीए मिंर क्वे प्रिंब मु भन्दा नुब मुँ। 
ङ्योए याहवेह परमेश्‍वर धों तब खाब् मुँ? खी ताँन् भन्दा नुबै क्‍ल्‍ह्‍योर म्रुँ तसि क्हुँम्, 
दिलेया मु नेरो पृथ्बी ङ्ह्‍योबर खी कुरम्। 
खीजी आयों आख्युब्मैं त्हुलउँइँले रेमिंम्, धै ङ्हाँदुमैं मेब्रोए रासउँइँले क्वेमिंम्। 
खीए म्हिमैंए क्रथे मिंथेमैंने प्रे ग्याल्स लबै ल्हागिर खीजी चमैं टिल् पिंम्। 
थरिस्योलाइ खीजी सैं तोंल्‍ले टिबै ल्हागिरि परवा पिंम्। याहवेहए मिं थेब् लद्! 
