﻿भजनमैं.
111.
याहवेहए मिं थेब लद्! ठिक के लब्मैंए म्हाँजोर नेरो म्हि ल्हें च्होंबै क्ल्ह्‍योर ङए सैं न्होंउँइँले याहवेहलाइ धन्यबाद पिंब्मुँ। 
याहवेहजी लबै केमैं बेल्‍ले थेब मुँ, खीए केमैं म्रोंसि सैं तोंब्मैं ताँनइ च केमैं क्होल् म्हैम्। 
खीजी लबै केमैंइ खीए मान नेरो इजेत थेब लमुँ, धै खीजी लबै ठिक केमैं खोंयोंन् बिलै तरिम्। 
खीजी ह्रोंसए औदिबै केमैं मैंरिल् पिंइमुँ; याहवेहजी ङ्योए फिर ल्हयो खसि दयाम्हाँया लम्। 
खीने बालु ङ्हिंब्मैंलाइ खीजी चबै सैमैं जुटेमिंब्मुँ; धै खीजी फैबै बाछा खोंयोंइ मैंरिम्। 
अरू ह्रेंमैंए क्ल्ह्‍यो-ने ह्रोंसए म्हिमैंलाइ पिंसि खीजी ह्रोंसइ लबै औदिबै केमैं खीए म्हिमैंलाइ उँइँमिंइमुँ। 
खीए योजी लबै केमैं भर लल् खाँब नेरो ठिक मुँ; खीजी के ल्हैदिबै ताँमैं भर लल् खाँब तम्। 
खीजी बिबै ताँमैं खोंयोंन् बिलै तरिम्, चु ताँ पिंमा याहवेह भर लल् खाँब नेरो क्ह्रोंसेंन्बै मुँल। 
खीजी ह्रोंसए म्हिमैंलाइ जोगेमिंइ; ह्रोंसइ फैबै बाछा खोंयोंन् बिलै तरिगे बिसि खीजी बिइ। खीए मिं पबित्र नेरो मान लल् त्हुब मुँ! 
याहवेहलाइ मान लब बुद्धि योंबै घ्याँ ग; खीजी बिबै ताँ ङिंब्मैंइ छेनाले च्हैंब् मैंब् लल् खाँम्। खीए मिं खोंयोंन् बिलै थेब् तरिम्! 
