﻿भजनमैं.
27.
दाऊदए भजन याहवेह ङए चारबै ह्‍वे नेरो ङए मुक्‍ति ग! ङ खाब्ने ङ्हिंब? याहवेहन् ङए रक्षा लबै किल्‍ला ग। छतसि ङ खाब् म्रोंसि ङ्हिंब? 
ङए शत्तुरमैं नेरो बिरोधीमैं दुष्‍ट म्हिमैं ग! चमैं ङए से चबर ङए बिरोधर रामा चमैंए प्हले थुरियासि क्हुरह्‍याम्। 
सेनामैं ङए बिरोधर कारग्यु तखलेया, ङए सैं ङ्हिंरिब् आरे। ङए बिरोधर लडें तलेया ङ परमेश्‍वरए फिर भर थेंब्मुँ। 
ङइ याहवेहने ताँ घ्रि ह्रिइमुँ, ङइ म्हैबै ताँ चुन् ग: खी टिबै क्ल्ह‍योर ङइ खीलाइ म्हैल् खाँरिगे, ङए छ्ह तिगोंन् याहवेहए धिंर टिल् योंरिगे, धै खीए छ्याँबै केमैं ङ्ह्‍योल् योंरिगे। 
तलेबिस्याँ दुःख तमा खीजी खी टिबै क्‍ल्‍ह्‍योर ङलाइ जोगेसि थेंमिंब्मुँ, खीए पबित्र तम्बु न्होंर खीजी ङ लोसि थेंमिंब्मुँ, धै थेबै पाराए फिर खीजी ङ नुल्‍ले थेंमिंब्मुँ। 
झाइले ङए कारग्यु तखबै शत्तुरमैंए फिर खीजी ङए क्र कैंडो लमिंब्मुँ, छतसि खीए पबित्र तम्बुर ङ सैं तोंदै ओरादै ख्रो पिंखब्मुँ; धै भजन प्रिंदै याहवेहए मिं थेब् लब्मुँ। 
ओ याहवेह, ङइ थेबै कै तेसि ग्वार ह्रिमा क्हिजी थेमिंन्; ङए फिर दयाम्हाँया लमिंन् धै ङलाइ ज्वाफ पिंन्! 
“क्हेमैंइ ङए मोंड म्हैद्!” बिसि क्हिजी बिइ। छतसि ङए सैंइ क्हिने बिइ, “ओ याहवेह, क्हिए मोंड ङ म्हैब्मुँ।” 
ओ ङए मुक्‍ति पिंबै परमेश्‍वर! क्हिए मोंड ङ ङाँइँले आलोमिंन्, ह्रिस खमा क्हिए के लबै म्हिलाइ आस्योमिंन्। ङलाइ जोगेमिंबै परमेश्‍वर क्हि ग। छतसि ङलाइ आपिमिंन्। 
ङए आबा-आमाइ ङलाइ वाथेंलेया याहवेहजी ङलाइ समल्दिब्मुँ। 
ओ याहवेह, क्हिए छ्याँबै घ्याँर प्रबर ङलाइ लोमिंन्। ङए शत्तुरमैं ल्हें मुँ, छतसि क्हिए छ्याँबै घ्याँर डोरेमिंन्। 
शत्तुरमैंए योर ङलाइ आपिंमिंन्; तलेबिस्याँ ङए बिरोधर स्योर ताँ पोंब्मैं रेइमुँ, चमैं सैब् म्‍लोब् लब् बिसि प्रइमुँ। 
सोगोंमैंए ह्‍युलर ङ याहवेहए छ्याँबै केमैं म्रोंब्मुँ बिब ङलाइ अझै बिश्‍वास मुँ। 
याहवेहए घ्याँ ङ्‍ह्‍योरिद्; सैं च्योंब आलद्, खीजी क्हिए सैं भोंब् लमिंब्मुँ; छतसि ङ बिमुँ! याहवेहए घ्याँ ङ्‍ह्‍योरिद्। 
