﻿भजनमैं.
18.
क्वे प्रिंब्मैंए चिबए ल्हागिर याहवेहए के लबै दाऊदए भजन घ्रि। चए ताँन् शत्तुरमैं नेरो शाऊलए योउँइँले फ्रेमिंबै त्हिंइर चइ याहवेहने चु क्वेए ताँफुँमैं बिइ। ओ याहवेह, क्हिजी ङलाइ भों पिंम्, ङइ क्हिलाइ म्हाँया लम्। 
याहवेह ङ लोबै पारा, ङए किल्‍ला नेरो ङ जोगेमिंबै ङए परमेश्‍वर ग। ङए परमेश्‍वर ङ रक्षा लमिंबै पारा ग। ढाल धोंले भोंब् तसि खीजी ङलाइ जोगेमिंम्! ङ खाबज्यै तोइ लल् आखाँबै क्ल्ह्‍योर खीजी थेंमिंइ। 
ङ याहवेहए मिं किंम्, खी मान लल् त्हुब मुँ, ङए शत्तुरमैंउँइँले खीजी ङ जोगेमिंब्मुँ। 
कालए छोइ ङ कारग्यु लखइ, नास लवाबै बाढिइ ङ आदेल् लइ। 
क्रोंर्बै छोमैंइ ङ फैवाइ, कालए ङोइ ङए घ्याँ थोइ। 
ङए सैंरै आमैंबै दुःखमैं ङए फिर तखमा ङइ याहवेहने ग्वार ह्रिइ, छले ल्होमिंन् बिसि ङए परमेश्‍वरलाइ हुइमा खीजी ह्रोंसए टिबै क्ल्ह‍योउँइँले ङए ताँ थेमिंइ। 
च्हमा सयो खसि ह्‍युल लायाइ, कोंमैंए तेंमैं या थरथरले लायाइ, तलेबिस्याँ खी ह्रिस खल। 
खीए नखुँउँइँले मिखु त्होंइ, खीए सुँउँइँले त्होंबै मिइ ताँन् ख्रोंवाइ, धै लुँरिबै मिए राब खीए सुँउँइँले लुँइ। 
खी स्वर्ग थोंसि क्युरु युइ; म्‍लोंकि ब्योंबै न्हाँम्स्यो खीए प्हले न्होंर मुँल। 
खी करूबए फिर क्रेसि प्हुरइ; धै खैंए प्ह्‍यागोंर कैंडो प्हुरयाइ। 
मिछु खैब खीजी ह्रोंसए नेंबै सै लइ; क्युइ म्‍लोंग्या लवाबै रुँदो न्हाँम्स्यो खीजी ह्रोंसए टिबै क्ल्ह्‍यो लइ। 
खीए चारबै ह्‍वेर न्हाँम्स्योउँइँले काम्‍लि तिम्‍लि, तिस्यु नेरो मिए राब युइ। 
याहवेहजी स्वर्गउँइँले थेबै कै तेमा, ताँन् भन्दा थेबै परमेश्‍वरए कै खन्तोंदोंन् कोयाइ। छतमा तिस्यु नेरो मिए राब तेयुइ। 
खीजी ह्रोंसए मे ल्हिसि शत्तुरमैं सग्याँ-प्हुग्याँ लवाइ, धै नाँम्रिइ ल्हिसि चमैं खैला तोला लवाइ। 
ओ याहवेह, क्हिजी हौदिमा, क्हिए नखुँउँइँले त्होंबै थेबै सोइ मा ङ्युँइए तेंमैं नरो पृथ्बीए तेंमैं म्रोंयाँइ। 
खीजी स्वर्गउँइँले ह्रोंसए यो स्योंसि ङलाइ क्हासि, मा ङ्युँइए गैरुउँइँले ङलाइ चैंसि तेमिंइ। 
ङ भन्दा भोंबै शत्तुर नेरो ङलाइ आखोब्मैंउँइँले खीजी फ्रेमिंइ, तलेबिस्याँ चमैं ङ भन्दा बेल्‍ले भोंब मुँल। 
ङए फिर दुःख तमा चमैं ङए फिर ह्‍वाखइ, दिलेया याहवेहजी ङ ल्होमिंइ। 
खीजी ङ खाबज्यै तोइ लल् आखाँबै क्ल्ह्‍योर पखसि ङलाइ जोगेमिंइ, तलेबिस्याँ खी ङने बालुन् सैं तोंल। 
ङइ ठिक के लबइले याहवेहजी ङ इनाम पिंइ, ङए योइ लबै छ्याँबै केमैं ङ्‍ह्‍योसि खीजी ङ आशिक पिंइ। 
तलेबिस्याँ ङ याहवेहए घ्याँर प्रइमुँ, ङए परमेश्‍वरउँइँले ह्रेंगो तसि ङइ आछ्याँबै केमैं आलइमुँ। 
खीजी पिंबै ठिममैं ङइ म्हाँदिइमुँ, धै खीजी ल्हैदिबै केमैं ङइ आपिइमुँ। 
ङइ आछ्याँबै केमैं तोइ आलल्‍ले टिल। छतसि खीए उँइँर ङ छ्याब् आरेब् मुँल। 
छतसि याहवेहजी ङइ लबै ठिक के, नेरो खीए उँइँर ङए योमैंइ लबै ठिक केमैं ङ्‍ह्‍योसि ङलाइ आशिक पिंइँमुँ। 
क्हिजी बिब् ङिंब्मैंने क्हि म्हाँया लम्। छ्याब् आरेब्मैंलाइ क्हिजी छ्याब् आरेबन् उँइँमिंम्। 
छ्याँबै के लब्मैंने क्हिजी छ्याँबन् लमुँ, धै खाबने या आक्ह्रिबै म्हिमैंने क्हिजी आक्ह्रिबै ब्यबहार लम्। 
थेब् आप्हैंब्मैंलाइ क्हिजी जोगेमिंब्मुँ, दिलेया थेब् प्हैंब्मैं बिस्याँ क्हिजी कुरुवाब्मुँ। 
ओ याहवेह, क्हिजी ङए बत्ति लुँरिल् पिंम्, ङ मिछु खैबर प्ररिमा ङए परमेश्‍वरजी मि म्रोंल् लमिंम्। 
क्हिजी ल्होमिंमा ङ सिपाइमैंने नेनिल् खाँम्, ङए परमेश्‍वरजी ल्होमिंबइले ङइ गारा ङ्वैल् खाँम्। 
परमेश्‍वरए बारेर बिब् ग बिस्याँ, खीए घ्याँ बेल्‍ले छ्याँब मुँ, याहवेहजी बिबै बाछा भर लल् खाँब मुँ; खीए प्हलेर ग्वार योंब्मैं ताँनए ल्हागिर ढाल ग। 
तलेबिस्याँ याहवेह धों तबै परमेश्‍‍वर अरू खाब् मुँ? ङ्योए परमेश्‍वर धों तबै लोबै पारा अरू खाब् मुँ रो? 
परमेश्‍वरजीन् ङलाइ भोंब लमिंम्, धै ङइ लल् म्हैबै केमैं खीजी छ्याँब् लमिंम्। 
खीजी ङए प्हलेमैं भोंब लमिंमुँ, छतसि फो धोंले ङ नु-नुबै क्ल्ह्‍योजरेया प्रल् खाँम्। 
छलेन ल्हडे खैले ट्होमुँ बिसेया खीजी ङलाइ लोमिंइमुँ, छतसि ङए योइ काँसाए त्हँलेमैंया कुरल् खाँम्। 
ङलाइ जोगेमिंबै ल्हागिर क्हिन् ङए ढाल तइमुँ। धै क्हिए क्योलो योजी ङ ल्होमिंइमुँ, ङलाइ थेब् लमिंबै ल्हागिर क्हि ह्रोंसन् कुरइमुँ। 
ङ प्रबै ल्हागिर क्हिजी प्ल्हाबै घ्याँ बनेमिंम्, छतसि ङए प्हले प्लेरिब् आरे। 
ङए शत्तुरमैं ल्हाबोमा ङइ चमैं स्याइ, चमैंलाइ आसैन् समा ङ आएखल। 
चमैं रेलै आखाँन्ले ङइ प्रिंइ, धै चमैं ङए प्हले ङाँर क्हुरियाइ। 
क्हिजी ङ शत्तुरमैंने नेबै ल्हागिर भोंब लमिंइ; क्हिजी ङए शत्तुरमैं ङए प्हलेर कुरामिंइ। 
क्हिजी ङए शत्तुरमैं लिग्याँ तोसि न्हेयाल् पिंइ, छतसि ङए शत्तुरमैं ङइ सैवाइ। 
चमैंइ ल्होमिंन् बिसि ग्वार ह्रिइ, दिलेया चमैं जोगेमिंब खाबै आरेल। चमैंइ याहवेहने या ग्वार ह्रिइ, दिलेया खीजी चमैंने तोइ ज्वाफ आपिं। 
खैंइ नोइ बोबै त्हुल धोंले ङइ चमैं त्हुल भुँ लवासि घ्याँर्बै हिल धोंले ङइ चमैं भ्योंवाइ। 
ङए बिरोधीमैंए योउँइँले क्हिजी ङ जोगेमिंइमुँ, क्हिजी ङ अरू ह्रेंमैंए चिब लमिंइमुँ, ङो आसेबै म्हिमैं या ङए न्होंर मुँ। 
ङए ताँ थेबै तोंदोंन् चमैंइ ङइ बिब् धोंन् लम्, अरू ह्‍युलर्बै म्हिमैं या ङए उँइँर कुरम्। 
चमैं ङ्हिंसि लल-लुलु तयाम्, चमैं ह्रों-ह्रोसए लोबै किल्‍लाउँइँले ङ्हिंसि त्हारदै त्होंह्‍याम्। 
याहवेह सोगों मुँ! ङ लोबै पाराए मिं थेब तरिगे! ङ जोगेमिंबै परमेश्‍वरए मिं बेल्‍ले थेब तरिगे। 
ङए शत्तुरमैंने खि किंब नेरो म्हिमैंलाइ ङए न्होंर थेंमिंब परमेश्‍वरन् ग। 
खीजी ङलाइ ङए शत्तुरमैंउँइँले जोगेमिंम्। ङए शत्तुरमैंए फिर क्हिजी ङ ट्होगो लमिंइ, म्हिसै प्रब्मैंए योउँइँले क्हिजी ङ जोगेमिंइ। 
छतसि ओ याहवेह, अरू ह्रेंमैंए म्हाँजोर ङ क्हिए मिं थेब लब्मुँ, धै क्हिए मिं क्वेब्मुँ। 
खीजी ह्रोंसए म्रुँलाइ ट्होगों लमिंम्, धै खीजी त्हाँबै म्रुँ दाऊद नेरो चए सन्तानए फिर खोंयोंइ आनुबै म्हाँया लरिम्। 
