﻿प्रस्थान.
37.
बजलेलइ बबुल सिंए मुदुस बनेइ। च ङ्हिउरुसे आधा ह्रिंब, तिउरुसे आधा प्ल्हाब नेरो तिउरुसे आधा नुब मुँल। 
चइ मुदुसए न्हों नेरो बैरु छ्याँबै माराइ म्होरसि कारग्युले माराइ ङाँ सैइ। 
चइ मुदुसर प्ह्‍याबै माराए प्लिउलो न्हमैं बनेसि मुदुसए प्हले प्लिर प्ह्‍यामिंइ। 
छलेन चइ बबुल सिंए प्हरेमैं बनेसि माराइ म्होरइ। 
झाइले मुदुस नोबै ल्हागिर च प्हरेमैं मुदुसए न्हमैंर क्युलइ। 
चइ ङ्हिउरुसे आधा ह्रिंब नेरो तिउरुसे आधा प्ल्हाब छ्याँबै माराला बाछाए मुदुसए का घ्रि बनेइ। 
चइ मुदुसए क्योबै क्ल्ह्‍योर माराए करूब ङ्हिं बनेइ। 
करूब घ्रि छेउ घ्रिर, करूब घ्रि अर्को छेउर प्ह्‍यामिंइ। च करूब ङ्हिं नेरो मुदुसए क्योबै क्ल्ह्‍यो माराए डल्‍ला घ्रिउँइँलेन् बनेइ। 
च करूबमैंइ ह्रों-ह्रोंसए प्ह्‍यामैं फैसि मुदुसए काए फिर छरि लल। चमैंए सुँ उँइँ उँइँ लसि मुदुसए काउँइँ ह्‍वेंल। 
बजलेलइ ङ्हिउरु ह्रिंब तिउरु प्ल्हाब तिउरुसे आधा नुब बबुल सिंए टेबल बनेसि 
छ्याँबै माराइ म्होरइ धै चए कारग्युले माराए ङाँ सैइ। 
टेबलए कारग्युले योरिं प्लि प्ल्हाबै घेरा बनेसि चए कारग्युले माराए ङाँ सैइ। 
टेबलर प्ह्‍याबै ल्हागिर चइ माराए न्ह प्लि बनेसि टेबलए प्हले प्लिए कुनार प्‍ह्‍यामिंइ। 
टेबल नोबै प्हरेमैं क्युलबै ल्हागिर घेराए रेर्न च न्हमैं मुँल। 
चइ टेबल नोबै ल्हागिर बबुल सिंए प्हरेमैं बनेसि माराइ म्होरइ। 
टेबलर थेंबै थलिमैं, धुपरा, प्हेलामैं, प्हा झोंसि चडेबै करुवामैं चइ ताँन् छ्याँबै माराल बनेइ। 
चइ छ्याँब माराए बत्ति म्रोंबै पानस बनेइ। चए क्योबै क्ल्ह्‍यो, डाँठ, ट धोंबै प्हेला, कोपिला, नेरो टमैं माराए डल्‍ला घ्रिउँइँलेन् बनेल। 
तिरै सोंउलो अर्को हार सोंउलो लसि टुउलो हाँगमैंबत्ति म्रोंबै पानसउँइँले बैरु त्होंल। 
हाँग घ्रिर हाडे बदामए ट धों ब्योंबै प्हेला, नेरो कोपिला धै टमै मुँल। अर्को हाँगरै या प्हेला सोंउलो मुँल। पानसउँइँले त्होबै टुउलोन् हाँगमैं घ्रि खालर्बैन् मुँल। 
पानसर हाडे बदामए ट धों ब्योंबै प्हेला प्लि नेरो टमैं धै टै या मुँल। 
पानसउँइँले त्होंबै टुउलो हाँगमैं न्होंर ओंसोंबै हाँग न्होंर कोपिला घ्रि, अर्को हाँग न्होंर कोपिला धै अर्को हाँग न्होंरै या कोपिला मुँल। 
बत्ति म्रोंबै पानस, कोपिला नेरो हाँगमैं माराए डल्‍ला घ्रिउँइँलेन् बनेइ। 
चइ पानसर थेंबै पलमैं, थनर (चिम्टा) नेरो पुज्या झोंबै भाँडो छ्याँबै माराला बनेइ। 
चइ सोंच्युसे ङ्‍ह किलो छ्याँब माराइ बत्ति म्रोंबै पानस नेरो चर सजेबै सैमैं बनेइ। 
चइ धुप म्रोबै क्ल्ह्‍यो बबुल सिंला बनेइ। च ख्रो पिंबै क्ल्ह्‍यो तिउरु ह्रिंब, तिउरु प्ल्हाब, ङ्हिउरु नुब चार पाटे मुँल। ख्रो पिंबै क्ल्ह्‍योए रुमैं या ख्रो पिंबै क्ल्ह्‍यो बनेबै सिंलन् बनेल। 
ख्रो पिंबै क्ल्ह्‍योए हार प्लिर्बै भाग नेरो रुमैं या छ्याँबै माराइ म्होरसि कारग्युले माराए ङाँ बनेइ। 
ख्रो पिंबै क्ल्ह्‍यो नोबै प्हरेमैं क्युलबै ल्हागिर ख्रो पिंबै क्ल्ह्‍योए हार ङ्हिंर्न माराए न्हमैं ङ्हिं बनेसि ख्रो पिंबै क्ल्ह्‍योए हार ङ्हिंर्न प्ह्‍यामिंइ। 
चइ बबुल सिंए प्हरेमैं बनेसि माराइ म्होरइ। 
अभिषेक लबै पबित्र छ्युगु नेरो अत्तर बनेब्मैंइ धोंले लिंबै थाँ खबै धुप चइ बनेइ। 
