﻿प्रस्थान.
29.
“ङए सेवा लबर हारून नेरो चए च्हमैंलाइ पबित्र लबर क्हिइ चमैंए ल्हागिर लल् त्हुबै के चुन् ग: तोइ खोट आरेबै क्ल्या भारा नेरो क्यु साँड् ङ्हिं पइ खो। 
झाइले गहुँए प्रोए क्हें, छ्युगुर चेंबै फुरौला नेरो छ्युगु फोबै बाबर क्हें प्लेढा आझोंल्‍ले बनेद्। 
ट्हलोर झोंसि क्हेंए ट्हलो क्ल्या भारा नेरो क्यु साँड्मैं पइ खो। 
“च लिउँइँ हारून नेरो चए च्हमैं ङ टिबै पबित्र तम्बुए म्रा ङाँर पखसि चमैंलाइ ख्रुमिंन्। 
झाइले हारूनलाइ लबेदा, एपोद न्होंर खिबै क्वें, एपोद, नेरो तिंर खिबै क्वें खिसि चए फिर फगि खिमिंन्। 
चए क्रर क्रेगि तिमिंन् झाइले क्रेगिए फिर पबित्र मुकुट कुमिंन्। 
च लिउँइँ अभिषेक लबै छ्युगु चए क्रर कुमिंसि चलाइ स्यो लद्। 
“हारूनए च्हमैं पखसि लबेदा खिमिंन्। 
हारूनए च्हमैंए क्रर क्रेगि तिंमिंन्। धै हारून नेरो चए च्हमैंलाइ फगि खिमिंन्। झाइले खोंयोंन् बिलै चमैं खेगि तल् योंब्मुँ। छले हारून नेरो चए च्हमैं खेगि के लबर त्हाँन्। 
“च क्ल्या भारा ङ टिबै पबित्र तम्बुए ओंसों पइ खो, चमैंए क्रए फिर हारून नेरो चए च्हमैंइ यो थेंबर ल्हैदिद्। 
च क्ल्या भारा ङ टिबै पबित्र तम्बुए म्रा ओंसों सैसि ख्रो पिंन्। 
क्ल्या भाराए च्युगुदे को योरिंइ किंसि ख्रो पिंबै क्ल्ह्‍योए कुना प्लिर्बै रुर फोद्, धै ङैबै को ख्रो पिंबै क्ल्ह्‍योए न्होंर ङेवाद्। 
झाइले न्हाँनु भुँडिमैं हुबै छि नेरो ओएटा, खइ नेरो चए फिर्बै छि किंसि ख्रो पिंबै क्ल्ह्‍योर ख्रोंन्। 
दिलेया, क्ल्या भाराए से, ट्हुबि नेरो न्हाँनुमैं म्हिमैं टिबै ब्यारेकए बैरु बोसि ख्रोंन्। चु खेगिमैंए पाप ख्रुबै ख्रो ग। 
“धबै क्यु साँड् घ्रि किंसि चए क्रर हारून नेरो चए च्हमैंने यो थेंबर ल्हैदिद्। 
च क्यु साँड् ख्रो पिंसि चए को ख्रो पिंबै क्ल्ह्‍योए कारग्युले फ्रुँन्। 
क्यु साँड्लाइ कुदु-कुदु लसि चए न्हाँनु नेरो प्हलेमैं ख्रुसि क्रने बालन् थेंमिंन्। 
च सक्लोन् क्यु साँड् ख्रो पिंबै क्ल्ह्‍योर ख्रोंन्। चए छ्याँब थाँइ ङ सैं तोंन् लम्। 
“क्हिइ अर्को क्यु साँड् किंन्, हारून नेरो चए च्हमैंइ च क्यु साँडए क्रर यो थेंबर ल्हैदिद्। 
च क्यु ख्रो पिंसि चए च्युगुदे को किंसि हारून नेरो चए च्हमैंए क्योलो हारबै न्हमे नेरो चमैंए क्योलो योए यो आबा नेरो प्हले आबार फोद्। ङैब को ख्रो पिंबै क्ल्ह्‍योए कारग्युले फ्रुँमिंन्। 
ख्रो पिंबै क्ल्ह्‍योर्बै को नेरो अभिषेक लबै छ्युगु च्युगुदे किंसि हारून नेरो चए क्वेंर फ्रुमिन्। छलेन हारूनए च्हमैं नेरो चमैंए क्वेंरै या फ्रुमिंन्। छलमा हारून, चए च्हमैं नेरो चमैंए क्वेंमैं या पबित्र तब्मुँ। 
“चु क्यु साँडेए छि, छि मुँबै मे, न्हाँनु भुँडिमैं हुबै छि, ओएटा, छि मुँबै पाङरु ङ्हिं नेरो क्योलो प्हाँ क्ह्‍याँसि किंन्। 
याहवेहए उँइँर मुँबै प्लेढा आझोंबै क्हें झोंबै ट्हलोउँइँले क्हें घ्रि नेरो छ्युगुर ख्रोंबै फुरौला घ्रि नेरो बाबर किंसि 
चु ताँन् हारून नेरो चए च्हमैंए योर थेंन्। चु सैमैं याहवेहजी खोबै छ्याँबै ख्रो तबर पिंबर ल्हैदिद्। 
झाइले याहवेहजी खोबै थाँ तरिगे बिसि ङइ खोबै भेटिमैं चमैंए योइ मिइ ख्रोंबै ख्रोने बालु ख्रो पिंबै क्ल्ह्‍योर ख्रोंवान्। चु याहवेहए ल्हागिर मिउँइँले चडेबै ख्रो ग। 
“झाइले हारूनइ ख्रो पिंबै क्यु साँडए कु से किंसि याहवेहजी खोबै छ्याँबै ख्रो तबर पिंन्। च क्हिए भाग तब्मुँ। 
“अर्पण लबै क्यु साँडउँइँले हारून नेरो चए च्हमैंए ल्हागिर क्युए कु से नेरो प्हाँ से पबित्र लद्। 
इस्राएलीमैंइ हारून नेरो चए च्हमैंए ल्हागिर खोंयोंन् बिलै पिंल् त्हुबै भाग चुन् तल् त्हुम्। तलेबिस्याँ इस्राएलीमैंइ क्ह्रिमिंबै भेटिमैंउँइँले याहवेहए ल्हागिर पिंल् त्हुबै भाग चुन् ग। 
“हारूनए पबित्र क्वें चए च्हमैंलाइ पिंन्, चमैंइ च क्वें खिसि अभिषेक लसि खेगि तबर त्हाँन्। 
हारूनए साटोर खेगि के लबै च्ह ङ टिबै पबित्र तम्बु न्होंर सेवा लबर खमा ङिगैं समा च कवें खिल् त्हुम्। 
“खेगि त्हाँमा सैबै क्यु साँड् बोसि चए से पबित्र क्ल्ह्‍योर ह्‍योद्। 
च लिउँइँ हारून नेरो चए च्हमैंइ च क्युए से नेरो ट्हलोर मुँबै क्हें ङ टिबै पबित्र तम्बुए म्रा ङाँर चरिगे। 
चमैंलाइ त्हाँसि पबित्र लबर तो-तो सैमैंइ ओलेल, च सैमैं चमैंइ चरिगे। अरू म्हिमैंइ बिस्याँ आचरिगे, तलेबिस्याँ च पबित्र मुँ। 
क्युए से नेरो क्हेंमैं प्हन्हाँग समा ङैस्याँ च मिर ख्रोंवान्। च खाबज्यै या आचद्, तलेबिस्याँ च पबित्र मुँ। 
“ङइ क्हिने बिब् धोंले हारून नेरो चए च्हमैंने लद् बिद्। ङिगैं छ्युल्‍ले चमैंलाइ त्हाँन्। 
पाप क्षमा तबै ल्हागिर त्हिंइ ह्रोंसे क्हिइ क्ल्या भारा सैसि ख्रो पिंन्, धै ख्रो पिंबै क्ल्ह्‍यो क्षमा तबै ल्हागिर ख्रो पिंमा चलाइ पबित्र लबर जैतुनए छ्युगु कुसि अभिषेक लद्। 
ख्रो पिंबै क्ल्ह्‍योलाइ पाप क्षमा तब नेरो पबित्र लबै ल्हागिर ङिगैं समा क्हिइ ख्रो पिंबै क्ल्ह्‍योर छ्युगु कुसि अभिषेक लद्। छलमा ख्रो पिंबै क्ल्ह्‍यो बेल्‍ले पबित्र तब्मुँ धै चलाइ छुइबै तोन्दोंरि सैमैं या पबित्र तब्मुँ। 
“ख्रो पिंबै क्ल्ह्‍योर खोंयोंन् बिलै त्हिंइ ह्रोंसे तिदिंर्बै क्यु ङ्हिं क्हिइ ख्रो पिंल् त्हुम्। 
क्यु घ्रि न्हाँगर क्यु घ्रि ङेसर ख्रो पिंन्। 
न्हाँगर सैबै क्युने बालु लिटर घ्रि जैतुनए छ्युगुर चेंबै किलो घ्रि प्रो नेरो अर्ग बलिए ल्हागिर लिटर घ्रि अँगुरए कुमिंन्। 
ङेसर सैबै क्युने बालु या न्हाँगर्बै धोंलेन् रा-रोए ख्रो नेरो अर्ग बलि पिंल् त्हुम्। याहवेहए ल्हागिर लिंबै थाँ खबै ख्रो या मिर ख्रोंसि पिंल् त्हुम्। 
“क्हेमैंए पुस्ता-पुस्ता समा याहवेहए उँइँर पबित्र तम्बुए म्रा ङाँर मिर ख्रोंसि ख्रो पिंब्रें लद्। च क्ल्ह्‍योर्न ङ क्हिने ताँ लबर क्हिने त्होब्मुँ। 
इस्राएलीमैंने ङ चर्न त्होब्मुँ। ङए चारबै ह्‍वेइ च तम्बु पबित्र लब्मुँ। 
“ङइ ख्रो पिंबै क्ल्ह्‍यो नेरो तम्बु पबित्र लब्मुँ। झाइले हारून नेरो चए च्हमैंलाज्यै या खेगि तसि ङए सेवा लबै ल्हागिर पबित्र लब्मुँ। 
इस्राएलीमैंए म्हाँजोर ङ टिब्मुँ, धै चमैंए परमेश्‍वर तब्मुँ। 
ङ याहवेह चमैंए परमेश्‍वर ग धै ङ चमैंए म्हाँजोर टिबै ल्हागिर ङइ चमैंलाइ मिश्र ह्‍युलउँइँले तेइ पखइ बिसि चमैंइ सेब्मुँ। ङ याहवेह चमैंए परमेश्‍वर ग। 
