﻿प्रस्थान.
27.
“क्हिइ बबुल सिंए ङ्‍हउरु ह्रिंब, ङ्‍हउरु प्ल्हाब, सोंउरु नुब चार पाटे मिइ ख्रोंसि ख्रो पिंबै क्ल्ह्‍यो बनेद्। 
चए कुना प्लिर रु घ्रि-घ्रि बनेद्। ख्रो पिंबै क्ल्ह्‍यो नेरो रु सिं घ्रिउँइँलेन् बनेल् त्हुम्। च ख्रो पिंबै क्ल्ह्‍योलाइ काँसाइ म्होरद्। 
छि ङ्हाँबै मेब्रो तोबै भाँडोमैं नेरो बेल्चामैं, प्हेला, अङ्‍कुसि तबै काँटा नेरो मिर ह्‍योबै भाडोमैं ताँन् काँसाल बनेद्। 
काँसाए जालि घ्रि बेनेसि चए कुना प्लिर काँसाए न्ह प्लि प्ह्‍याद्। 
जालि ख्रो पिंबै क्ल्ह्‍योए न्होंर ङाँए च्हो-च्होर थेंन्, छले थेंमा जालि ख्रो पिंबै क्ल्ह्‍योए म्हाँजोर समा फेनेल् त्हुम्। 
ख्रो पिंबै क्ल्ह्‍यो नोबै प्हरेमैं बबुल सिंल बनेसि काँसाइ म्होरद्। 
ख्रो पिंबै क्ल्ह्‍यो नोमा च प्हरेमैं ख्रो पिंबै क्ल्ह्‍योए न्ह ङ्हिंर क्ह्‍युद्। 
ङइ क्हिलाइ कोंर उँइँब् धोंले च ख्रो पिंबै क्ल्ह्‍यो खोत्ते फालेल बनेद्।” 
“क्हिइ ङ टिबै पबित्र तम्बुए कारग्युले ह्‍यु बनेसि बार थोदु, चए छ्यो ल्हुए (दक्षिण) भाग प्र क्रुल तल् त्हुम्, चलाइ थोबै ल्हागिर छेनाले ख्रिंबै सुति क्वेंए पर्दा बनेद्। 
पर्दा च्योबै ल्हागिर काँसाए त्हो ङ्हिस्यु, धै त्हो क्योबै क्ल्ह्‍यो या ङ्हिस्युन् काँसाल् तल् त्हुम्। झाइले चर च्योबै छोमैं नेरो अङ्‍कुसि बिस्याँ चाँदिल् तल् त्हुम्। 
छलेन उत्तरउँइँबै भागए ल्हागिरै या प्र क्रु ह्रिंबै पर्दा तल् त्हुम्। चए त्होमैं ङ्हिस्यु, त्हो क्योबै क्ल्ह्‍यो या ङ्हिस्युन् काँसाल तल् त्हुम्। दिलेया त्होमैंए अङ्‍कुसि नेरो छोमैं बिस्याँ चाँदिल तल् त्हुम्। 
ङाँए छ्यो न्हुउँइँबै पर्दामैं ङ्‍हच्यु क्रु तल् त्हुम्। चए त्होमैं च्युउलो क्योबै क्ल्ह्‍यो या च्युउलो तल् त्हुम्। 
स्यारउँइँबै (पूर्ब पट्टि) भागए ल्हागिर ङ्‍हच्यु क्रुर्बै पर्दा तल् त्हुम्। 
मुल म्राए तिरैबै भागए ल्हागिर च्युसे ङ्‍ह क्रु पर्दा तल् त्हुम्। चए त्होमैं सोंउलो, क्योबै क्ल्ह्‍यो या सोंउलोन् तल् त्हुम्। 
अर्को हारए ल्हागिरै या च्युसे ङ्‍ह क्रु पर्दामैं तल् त्हुम्। चए त्हो सोंउलो क्योबै क्ल्ह्‍यो या सोंउलोन् तल् त्हुम्। 
“म्राए ल्हागिर मु रङ, कलेजी रङ नेरो ओल्ग्या रुइ रोबै क्वें नेरो छेनाले ख्रिंबै सुति क्वेंए बुट्टा झोंबै ङ्हिस्यु क्रुए पर्दा तल् त्हुम्। चए त्होमैं प्लिउलो, क्योबै क्ल्ह्‍यो या प्लिउलो तल् त्हुम्। 
घेराए प्लि हारर्बै त्होमैंए छो नेरो अङ्‍कुसिमैं चाँदिल तल् त्हुम्। चए क्योबै क्ल्ह्‍योमैं काँसाल तल् त्हुम्। 
घेरा प्र क्रु ह्रिंब नेरो ङ्‍हच्यु क्रु प्ल्हाब तल् त्हुम्। चए पर्दामैं छेनाले ख्रिंबै सुति क्वेंए ङ्‍हउरु ह्रिंब तल् त्हुम्। चए क्योबै क्ल्ह्‍योमैं काँसाल तल् त्हुम्। 
पबित्र तम्बुर चैदिबै तोन्दोंरि सैमैं नेरो काँटिमैं काँसाल तल् त्हुम्। 
“बत्ति म्रोबै ल्हागिर म्हाबै जैतुनए छ्याँबै छ्युगु पइ खो बिसि इस्रलिमैंने बिद्। धै बत्तिमैं खोंयोंन् बिलै लुँरिगे। 
पबित्र तम्बुर ठिम थेंबै मुदुसए उँइँर्बै पर्दाए बैरु हारून नेरो चए च्हमैंइ याहवेहए उँइँर च बत्तिमैं ङेसउँइँले न्हाँग समा लुँरिल् लल् त्हुम्। इस्राएलीमैंए पुस्ता-पुस्ता समा खोंयोंन् बिलै चु के लल् त्हुब्मुँ। 
