﻿प्रस्थान.
25.
याहवेहजी मोशाने बिइ, 
“चमैंइ ङए ल्हागिर भेटि पल् त्हुम् बिसि इस्राएलीमैंने बिद्, चमैं ताँनइ सैं तोंदै पिंबै भेटि क्हिइ ङए ल्हागिर किंन्। 
चमैंइ पिंबै भेटिमैं चुन् तम्: मारा, चाँदि, काँसा, 
नीलो, कलेजी, ओल्ग्या रु, मलमलए क्वें, रए मुइ बनेब क्वें, 
ओल्ग्या रङ झोंबै क्यु साँडए ट्हुबि, ङ्याँ-ङ्याँ ह्‍याबै ट्हुबि, बबुलए सिं, 
बत्तिए म्रोबै ल्हागिर जैतुनए छ्युगु, अभिषेक लबै छ्युगु नेरो लिंबै थाँ खबै धुपए ल्हागिर मसलामैं, 
एपोद नेरो खेगिए तिंर खिबै क्वेंए ल्हागिर आनिक्स नेरो अरू मँगो तुथुमैं। 
“ङ चमैंए म्हाँजोर टिबर चमैंइ ङए ल्हागिर पबित्र तम्बु घ्रि टौंदिल् त्हुम्। 
ङइ क्हिने उँइँबै नमुना धोंले क्हिइ पबित्र तम्बु नेरो चर चैदिबै ताँन् सैमैं बनेद्। 
“चमैंइ बबुल सिंए मुदुस घ्रि बनेरिगे। च ङ्हिउरु ह्रिंब, तिउरुसे आधा प्ल्हाब, तिउरुसे आधा नुब तल् त्हुम्। 
क्हिइ च मुदुसए न्हों, फि छ्याँबै माराइ म्होरद्। चए कारग्युले माराए ङाँ सैद्। 
च नोबै ल्हागिर माराए न्हमैं प्लि बनेसि मुदुसए प्हले प्लि प्ह्‍याद्। न्ह ङ्हिं तिराइ न्ह ङ्हिं तिराइ प्ह्‍यामिंन्। 
छलेन क्हिइ बबुल सिंए प्हरे बनेसि माराइ म्होरद्। 
मुदुस नोबै ल्हागिर च प्हरेमैं मुदुसए हार ङ्हिंर मुँबै न्हमैंर क्ह्‍युद्। 
च प्हरेमैं मुदुसए न्हमैंर क्ह्‍युथेंल् त्हुम्। च प्हरेमैं न्हउँइँले आट्हुइद्। 
ङए ठिममैं प्ह्रिबै युँमाए प्लना ङ क्हिलाइ पिंब्मुँ, च मुदुसर च युँमाए प्लना थेंन्। 
“छलेन छ्याँबै माराए मुदुसए क्हा घ्रि बनेद्। च ङ्हिउरुसे आधा ह्रिंब, तिउरुसे आधा प्ल्हाब तल् त्हुम्। 
माराए प्ह्‍या ङ्हिं मुँबै करूबमैं बनेसि मुदुसए छेउ छेउर थेंन्। 
करूब घ्रि तिरैबै च्होर करूब घ्रि तिरैबै च्होर थेंन्। माराए टुक्र घ्रिउँइँले च क्हा नेरो करूब ङ्हिं बनेद्। 
च करूबमैंइ प्ह्‍यामैं क्होवाइ फैसि मुदुसए क्हालाइ प्ह्‍यामैंइ हुल् त्हुम्। चमैंए सुँ मुदुसउँइँ ह्‍वेंल् त्हुम्। 
च क्हा मुदुसए फिर थेंन्। ङए ठिममैं प्ह्रिबै युँमाए प्लना क्हिलाइ पिंब्मुँ, च युँमाए प्लना च मुदुसर थेंन्, 
चर्न ङ क्हिने त्होब्मुँ। ठिम थेंबै मुदुसए क्हा फिर्बै करूबमैंए म्हाँजोउँइँले इस्राएलथेंमैंए ल्हागिर ङए ताँन् ठिममैं क्हिलाइ पिंब्मुँ। 
“क्हिइ बबुल सिंए टेबल घ्रि बनेद्। च ङ्हिउरु ह्रिंब, तिउरु प्ल्हाब, तिउरुसे आधा नुब तल् त्हुम्। 
च टेबल छ्याँबै माराइ म्होरसि चए कार्ग्यलै माराइ ङाँ सैद्। 
चए कारग्युले योरिं प्लि प्ल्हाब गेर बनेसि चए कारग्युले माराइ ङाँ सैद्। 
टेबल नोबै ल्हागिर माराए न्ह प्लि बनेद्, धै च न्हमैं टेबलए प्हले प्लिर प्ह्‍यामिंन्। 
टेबल नोबै ल्हागिर प्हेरमैं क्ह्‍युबै क्ल्ह्‍यो तल्‍ले च न्हमैं घेराए रेर प्ह्‍याद्। 
टेबल नोबै प्हरे बबुल सिंल बनेसि च प्हरेलाइ माराइ म्होरद्। 
क्हिइ टेबलर थेंबै ल्हागिर छ्याँबै माराए थलिमैं, धुपार, करुवा नेरो प्हेलामैं बनेद्। 
ङए मिंर पिंबै क्हेंमैं टेबलर थेंसि खोंयोंन् बिलै ङए ओंसों थेंमिंन्। 
“क्हिइ छ्याँबै माराए पानस बनेद्। चए क्हाबै क्ल्ह्‍यो, प्हेला धों ब्योंबै ट, टए त्होर नेरो टमैं माराए टुक्राउँइँलेन् बनेद्। 
चए हाँग ट्हु बैरु हार त्होंल् त्हुम्, हाँग सों पानसए तिरै छलेन तिरै हाँग सों तल् त्हुम्। 
ताँन् हाँगर हाडे बदामए ट धोंबै त्होर नेरो प्होमैं मुँबै सों-सौंलो ट बनेसि हाँगमैं पैरेद्। 
छलेन पानस बत्तिर हाडे बदामए ट धोंब प्लिउलो, टए त्होर नेरो ट या तल् त्हुम्। 
सोंजोर हाँगमैंए ताँन् जोर न्होंर घ्रि-घ्रि टए त्होर बनेद्। 
पानस बत्ति, टए त्होर नेरो हाँगमैं छ्याँबै माराए टुक्र घ्रिउँइँलेन् बनेद्। 
पानसए ओंसों मि म्रोंरिगे बिसि ङिउलो पलर छ्युगु झोंसि म्रोंसि पानसए ओंसों थेंन्। 
चए सलेदाए थनर नेरो मोसो झोंबै भाँडो छ्याँबै माराला बनेद्। 
पानस नेरो च ताँन् सजेबै सैमैं सोंच्युसे ङ्‍ह किलो छ्याँबै माराला बनेद्। 
ङइ क्हिने कोंर उँइँबै नमुना धोंले क्हिइ मैंसि च्हैंसि बनेद्। 
