﻿प्रस्थान.
21.
“तारे ङइ क्हेमैंए ल्हागिर पिंबै ठिममैं चुन् ग। 
“क्हेमैंइ हिब्रू म्हि मुइ फोसि केब्छैं तबर थेंइ बिस्याँ चइ टुदि समा मत्‍त्रे क्हेमैंए के लरिगे। ङिदिर च तोइ आफोन्ले ह्रोंसए धिंर ह्‍याल् पिंन्। 
केब्छैं तबर च घ्रिन् खब् ग बिस्याँ च घ्रिन् ह्‍यारिगे। चइ ब्ह्‍या लसि प्ह्रेंस्योने बालु खब् ग बिस्याँ प्ह्रेंस्यो बोसिन् ह्‍यारिगे। 
“चए क्ल्हेइ चलाइ ब्ह्‍या लमिंसि च्ह च्हमिंमैं योंइ बिस्याँ, म्रिं प्हसेमैं क्ल्हे ङाँर्न टिल् त्हुब्मुँ, च म्हि घ्रि मत्‍त्रे ह्‍याल् योंब्मुँ। 
दिलेया च केब्छैंइ ‘ङ ह्रोंसए क्ल्‍हे नेरो म्रिं, प्हसेमैंए म्हाँया खमुँ, छतसि ङ ह्रोंसए धिंर आह्‍या’ बिइ बिस्याँ, 
चए क्ल्हेइ चलाइ निसाफ लबै म्हिमैं ङाँर बोसि म्रार राल् पिंसि चए न्ह थोंमिंरिगे। छ लबै लिउँइँ आसिन् समा च म्हि क्ल्हेए केब्छैं तब्मुँ। 
“खाबज्यै या ह्रोंसए च्हमि केब्स्यो तबर चुँइँमुँ बिस्याँ मुयु केब्छैंमैं धोंले च केब्स्यो धबै क्ल्हेए धिंउँइँले ह्‍याल् योंरिब् आरे। 
दिलेया च च्हमिरि ह्रोंसए ल्हागिरि पखबै लिउँइँ क्ल्हेइ चलाइ आखोइ बिस्याँ केब्स्योए आबाइ मुइ पिंसि चलाइ आबाइ बोयाल् त्हुम्। क्ल्हेइ चए फिर ठिक के आलबइले चलाइ अरू ह्रेंमैंने चुँल् योंरिब् आरे। 
दिलेया क्ल्हेइ चलाइ ह्रोंसए च्हए प्ह्रेंस्यो तबर त्हाँइ बिस्याँ, चने केब्स्यो धोंन् आङिं, च्हमिं धोंन् ङ्हाँल् त्हुम्। 
च केब्स्यो पखसि क्ल्हेइ अर्को प्ह्रेंस्यो पखइ बिस्याँ, थेब्स्योलाइ चब् थुँब्, नेरो क्वें पिंसि प्ह्रेंस्योलाइ म्हाँया लब आपिरिगे। 
क्ल्हेइ चने चु केमैं सों आलस्याँ, मुइ तिफुँइ आफोल्‍ले च फ्रेयाल् खाँब्मुँ। 
“खाबज्यै या म्हिलाइ प्रिंसि सैवास्याँ चलाज्यै या सैवाल् त्हुम्। 
दिलेया खाबज्यै या ह्रना-ह्रन् म्हि आसैलै या परमेश्‍वरजीन् छ तल् पिंब् ग बिस्याँ, चए ल्हागिर भौदिह्‍याबै क्ल्ह्‍यो घ्रि ङइ तोक्दिमिंब्मुँ। 
दिलेया म्हि ह्रिस खसि दाउ ङ्‍ह्‍योसि म्हिलाइ सैइ बिस्याँ, छाबै म्हिलाइ सैबर बोयाद्, ङए ख्रो पिंबै क्ल्ह्‍योर ह्‍यसि टिलेया सैबर बोयाद्। 
“ह्रोंसए आबा-आमालाइ प्रिंबै म्हिलाइ सैवालन् त्हुम्। 
“खाबइ म्हिमैं क्हासि चुँमुँ अथवा आचुँले थेंमुँ, छाबै म्हिलाज्यै या सैवालन् त्हुम्। 
“ह्रोंसए आबा आमाए फिर गाल् केबै म्हि या सैवालन् त्हुम्। 
“म्हिमैं प्होंगि कैगि लसि घ्रिइ घ्रिलाइ युँमा नेरो योइ ल्हिमा च म्हि सिबम् आसि दिलेया आधा कल्सो तसि क्ल्ह्‍योर तयास्याँ 
लिउँइँ धबै प्हरे तुँसि प्रल् खाँस्याँ, चलाइ प्रिंबै म्हि छ्याब आरेब तब्मुँ। दिलेया च क्ल्ह्‍योर तमा छेनाले आसन् समा प्रिंबै म्हिइन मैंए सै नेरो चब् थुँब ङ्‍ह्‍योल् त्हुम्। 
“खाबज्यै या ह्रोंसए केब्छैं केब्स्योलाइ प्हरेइ प्रिंमा सियाइ बिस्याँ च सैवाबै म्हिइ दण्ड योंलन् त्हुम्। 
दिलेया च म्हि तिगें ङ्हिंगैं लिउँइँ रेइ बिस्याँ च प्रिंबै म्हिलाइ दण्ड आपिंन्, तलेबिस्याँ क्ल्हेइ सै फोसि केब्छैंलाइ किंब् ग। 
“म्हिमैं प्होंब नेब तमा फोर प्हसे मुँबै च्हमिरिलाइ ने म्योंसि फिबै त्हे आतबन् प्हसे फिइ, दिलेया च च्हमिरिलाइ तोइ नोक्सन आतइ बिस्याँ, च्हमिरिए प्युँइ बिब् धोंलेन् नेरो निसाफ लबै म्हिमैंइ तोक्दिब् अनुसार नें म्योंल् लबै म्हिइ मुइ फोल् त्हुम्। 
दिलेया च्हमिरिलाज्यै या नें म्योंइ बिस्याँ सोए खि सो किंल् त्हुम। 
छलेन मिए खि मि, सए खि स, योए खि यो, प्हलेए खि प्हले, 
डामए खि डाम, नें म्योंबए खि नें म्योंब, प्रिंबए खि प्रिंब च म्हिइ योंरिगे। 
“खाबज्यै ह्रोंसए केब्छैं-केब्स्योए मिंर प्रिंसि तिवास्याँ, चए मिंए साटोर चइ तोइ आफोल्‍ले फ्रेसि ह्‍याल् योंम्। 
छलेन ह्रोंसए केब्छैं केब्स्योए सर प्रिंमा स चुयाइ बिस्याँ, च सए साटोर चइ तोइ आफोल्‍ले फ्रेसि ह्‍याल् योंम्। 
“क्ल्याइ रुइ थासि म्हिलाइ सैवाइ बिस्याँ, च क्ल्‍या युँमाइ ल्हिसि सैवाद्, चए से आचद्, धै चए क्ल्हेलाइ दण्ड आपिंन्। 
दिलेया च क्ल्याइ ओंसों या थाब्रें लमल बिसि क्ल्हेने बिलेया चइ क्ल्या च्युँइ आथेंबै लमा म्हिमैं थासि सैवाइ बिस्याँ च क्ल्या युँमाइ ल्हिसि सैवाद्, धै चए क्ल्हेलाज्यै या सैवाद्। 
दिलेया च म्हिलाइ आसैबै ल्हागिर मुइ तोक्दिस्याँ चइ ह्रोंसए ज्यु जोगेबै ल्हागिर तोक्दिबै मुइ फोल् त्हुम्। 
क्ल्याइ कोलोमैं थासि सैवास्याँ, चु ठिमर बिब् धोंले या लद्। 
क्ल्याइ थासि केब्छैं केब्स्यो सैवास्याँ, क्ल्याए क्ल्हेइ केब्छैंए क्ल्हेलाइ चाँदिए सोंच्यु सिक्‍का पिंल् त्हुम्, धै च क्ल्या युँमाइ ल्हिसि सैवाद्। 
“खाबज्यै या इनारए क्हा आझोंल्‍ले ह्‍वाङ्‍गन् थेंमा इनार तासि आहुल्‍ले थेंमा चर क्ल्या अथवा गदा पायास्याँ, 
च इनार बनेबै म्हिइ क्ल्या अथवा गदाए क्ल्हेलाइ मुइ पिंसि च सियाबै खेदो चइन योंरिगे। 
म्हि घ्रिए क्ल्याइ अर्को म्हिए क्ल्यालाइ थासि सैवास्याँ, क्ल्हेमैं ङ्हिं क्ह्रिसि च सोगों क्ल्या चुँसि योंबै सै नेरो सियाबै क्ल्याए से या चुल् त्हुम्। 
दिलेया च क्ल्याइ ओंसों ओंनोंन् थामल बिसि क्ल्हेइ सेलेया च क्ल्या च्युँइँसि आथेंस्याँ, च क्ल्हेइ क्ल्याए खि क्ल्यान् पिंल् त्हुम्, धै सियाबै क्ल्या चलन् तरिगे। 
