﻿प्रस्थान.
6.
च त्हेर याहवेहजी मोशाने बिइ, “ङइ फारोलाइ तो लब्मुँ बिसि तारे क्हिइ म्रोंब्मुँ। ङए भोंबै योइ लमा चइ क्हेमैं ह्‍याल् पिंब्मुँ। ङए भोंबै योइ लमा चइ ह्रोंसए ह्‍युलउँइँले चमैंलाइ ल्हावाब्मुँ।” 
झाइले परमेश्‍वरजी मोशाने धबै बिइ, “ङ याहवेह ग! 
अब्राहाम, इसहाक नेरो याकूब ङाँर ङ तोन्दोंरि सै लल् खाँबै परमेश्‍वरए क्हो किंसि म्रोंयुइ। दिलेया याहवेह बिबै ङए मिंउँइँले चमैं ङाँर आम्रोंयु। 
चमैं आगुए ह्‍युलर ह्‍यासि टिबै कनान बिबै ह्‍युल ङइ चमैंलाइ पिंम् बिसि चमैंने बाछा फैइ। 
मिश्रीमैंइ केब्छैं लसि थेंबै इस्राएलीमैंइ दुःखए सो हेंब ङइ थेइमुँ। धै ङइ चमैंने फैबै बाछा ङइ मैंइमुँ। 
“छतसि ‘ङ याहवेह ग’ बिसि इस्राएलीमैंने बिद्। ‘ङइ क्हेमैंलाइ मिश्रीमैंइ पिंबै दुःखउँइँले फ्रेमिंब्मुँ, धै चमैंए केब्छैं तसि टिल् त्हुबइले तेइ पखब्मुँ। ङए भों मुँबै यो रेसि चमैंए फिर ङ्हिंन् ङ्हाँबै दुःख पिंसि क्हेमैंलाइ जोगेमिंब्मुँ। 
ङइ क्हेमैंलाइ ङए म्हिमैं तल् पिंब्मुँ, धै ङ क्हेमैंए परमेश्‍वर तब्मुँ। मिश्रीमैंए कब्छैं तसि टिल् त्हुबइले क्हेमैंलाइ तेइ पखबै ङ याहवेह क्हेमैंए परमेश्‍वर ग बिसि क्हेमैंइ सेब्मुँ 
धै ङइ अब्राहाम, इसहाक नेरो याकूबने बाछा फैसि पिंम् बिबै ह्‍युलर क्हेमैंलाइ पखब्मुँ, धै च ह्‍युल क्हेमैंलाइ क्ल्हे तबर पिंब्मुँ। ङन् याहवेह ग।’ बिसि चमैंलाइ बिद्।” 
मोशाइ इस्राएलीमैंने छान् बिसि बिमिंइ, दिलेया चमैं आगुए केब्छैं तसि टिल् त्हुबइले चमैंए सैं सियाल। छतसि चमैंइ मोशाए ताँ थेल् आङिं। 
छतमा याहवेहजी मोशाने बिइ, 
“ह्‍याद्, मिश्रर्बै फारो म्रुँने ‘इस्राएलीमैं क्हिए ह्‍युलउँइँले ह्‍याल् पिंन्!’ बिसि बिद्।” 
छबिमा मोशाइ याहवेहने बिइ, “इस्राएलीमैंइ ङए ताँ आथे! ङ पोंलै आह्रबै म्हि ग, ङए ताँ फारोइ झन् खैले थेम् रो?” 
झाइले याहवेहजी इस्राएलीमैं नेरो मिश्रर्बै फारो म्रुँए बारेर मोशा नेरो हारूनने ताँ ल्हैदिइ। “इस्राएलीमैंलाइ मिश्रउँइँले तेइ पखो!” बिसि चमैंने बिइ। 
इस्राएलए च्ह थेब रूबेनए च्हमैं हानोक, पल्‍लु, हेस्रोन नेरो कर्मि मुँल। चुमैंउँइँले रूबेनए बंशमैं खब् ग। 
शिमियोनए च्हमैं यमूएल, यामिन, ओहद, याकिन, सोहोर नेरो कनानी च्हमिरिए च्ह शौल मुँल। चुमैंउँइँले शिमियोनए बंशमैं खब् ग। 
लेबीए च्हमैं सों गेर्शोन, कहात नेरो मरारि मुँल। चुमैंउँइँले लेबीए बंशमैं खब् ग। (लेबी प्रसे सोंच्युसे ङिदि बर्ष समा सोइ।) 
गेर्शोनए च्हमैं ङ्हिं लिब्नि नेरो शिमि मुँल। 
कहातए च्हमैं अम्राम, यिसहार, हेब्रोन नेरो उज्जीएल मुँल। (कहात प्रसे सोंच्युसे सोंदि समा सोइ।) 
मरारिए च्हमैं महलि नेरो मूशि मुँल। लेबीए बंशमैं चए पुस्ता अनुसार चुमैं ताँन् ग। 
अम्रामइ ह्रोंसए फोज्यों योकेबेदने ब्ह्‍या लसि हारून नेरो मोशा फिइ। (अम्राम प्रसे सोंच्युसे ङिदिं बर्ष समा सोइ।) 
यिसहारए च्हमैं कोरह, नेपेग नेरो जिक्रि मुँल। 
उज्‍जीएलए च्हमैं मीशाएल, एलसाफान नेरो सिथ्रि मुँल। 
हारूनइ अम्मिनादाबए च्हमि नहशोनए अङाँ एलीशेबाने ब्ह्‍या लइ। चइ नादाब, अबिहू, एलाजार नेरो ईतामार फिइ। 
कोरहए च्हमैं अस्सिर, एल्काना नेरो अबिआसाप मुँल। कोरहए बंशमैं चुमैंन् ग। 
हारूनए च्ह एलाजारइ पतिएलए च्हमिमैं न्होंर्बै घ्रिने ब्ह्‍या लसि पिनहास फिइ। लेबीमैंए परवारर्बै चिब्मैं चमैंए बंशमैं चुन् ग। 
याहवेहजी चु हारून नेरो मोशाने “इस्राएलीमैंलाइ कुल कुल लसि मिश्रउँइँले तेइ पखो” बिसि बिल। 
मिश्रर्बै फारो म्रुँने “इस्राएलीमैंलाइ मिश्रउँइँले ह्‍याल् पिंन्!” बिब चु मोशा नेरो हारून मुँल। 
याहवेहजी मिश्रर मोशाने बालु पोंबै त्हिंर, 
“ङ याहवेह ग। ङइ क्हिने तो-तो ताँ बिबर ल्हैदिइमुँ, च ताँन् मिश्रर्बै फारो म्रुँने बिद्,” बिइ। 
दिलेया मोशाइ याहवेहने बिइ, “ङ पोंलै आह्रबै म्हिए ताँ फारोइ खैले थेलै रो?” 
