﻿उत्पत्ति.
11.
च त्हेर पृथ्बीरि ताँन् म्हिमैंइ क्युइ घ्रिन् पोंमल। 
म्हिमैं स्यारउँइँ सर्दिदै ह्‍यामा शिनार बिबै ह्‍युलर च्येप्ला तबै क्ल्ह्‍यो स्यासि चर्न टिइ। 
चमैंइ खेंमैंए न्होंर “ल्हु, ङ्योइ इँट बनेसि ख्रोंले।” बिसि चमैंइ युँमाए क्ल्ह्‍योरि इँट नेरो सए क्ह्‍लोरि अलकत्रा ओलेइ। 
झाइले चमैंइ बिइ, “ल्हु, ङ्यो ह्रोंसए ल्हागिर सहर घ्रि नेरो स्वर्ग समा फेनेबै नुबै धररा घ्रि बनेसि। ह्रोंसए मिं थेंले। धै ङ्यो पृथ्बीर खनिरै आप्हुँले।” 
झाइले म्हिमैंइ बनेबै सहर नेरो धरर ङ्ह्‍यो‍बर याहवेह क्युरु युइ। 
याहवेहजी बिइ, “चुमैं क्युइ घ्रिन् पोंबै ह्रेंमैं तइ बिस्याँ तारे चुमैंइ लल् म्हैब तोइ मुँलेया लल् खाँम्। 
छतसि खो, ङ्यो क्युरु ह्‍यासि चमैंइ घ्रिइ पोंबै क्युइ घ्रिइ आक्हिरिगे बिसि चमैंए क्युइ खलबल लवाले।” 
छले याहवेहजी च क्ल्ह्‍योउँइँले चमैं ह्‍युल तिगोंन् प्हुँमिंइ। छ लवामा चमैंइ च सहर बनेब पिवाइ। 
छतसि च क्ल्ह्‍योए मिं बाबेल थेंमिंइ। तलेबिस्याँ याहवेहजी चर्न ताँन् पृथ्‍बीर्बै क्युइ खलबल लवाल। च क्ल्ह्‍योउँइँलेन् चमैं पृथ्‍‍बि तिंगोंन् प्हुँमिंइ। 
शेमए च्ह-क्वेंमैंए ताँमैं चुन् ग। नाँ बाडि तबै ङ्हिंदिं लिउँइँ शेम प्र बर्षर्बै तमा अर्पक्षद बिबै च्ह योंइ। 
अर्पक्षद फिबै लिउँइँ शेम ङ्‍हब्ब्रा बर्ष समा सोसि अरू च्ह-च्हमिमैं या योंइ। 
अर्पक्षद सोंच्युसे ङ्‍हदिं तमा शेलह बिबै च्ह योंइ। 
शेलह फिबै लिउँइँ अर्पक्षद प्लिब्ब्रासे सोंदिं समा सोसि अरू च्ह-च्हमिमैं या योंइ। 
शेलह सोंच्यु बर्षर्बै तमा एबेर बिबै च्ह योंइ। 
एबेर फिबै लिउँइँ शेलह प्लिब्ब्रासे सोंदिं समा सोसि अरू च्ह-च्हमिमैं या योंइ। 
एबेर सोंच्युसे प्लिदिं तमा पेलेग बिबै च्ह योंइ। 
पेलेग फिबै लिउँइँ एबेर प्लिब्ब्रासे सोंदिं समा सोसि अरू च्ह-च्हमिमैं या योंइ। 
पेलेग सोंच्यु बर्षर्बै तमा चइ रऊ बिबै च्ह योंइ। 
रऊ फिबै लिउँइँ पेलेग ङ्हिंब्ब्रासे कुदिं समा सोसि अरू च्ह-च्हमिमैं या योंइ। 
रऊ सोंच्युसे ङ्हिंदि तमा सरूग बिबै च्ह योंइ। 
सरूग फिबै लिउँइँ रऊ ङ्हिंब्ब्रासे ङिदिं समा सोसि अरू च्ह-च्हमिमैं या योंइ। 
सरूग सोंच्यु बर्षर्बै तमा चइ नाहोर बिबै च्ह योंइ। 
नाहोर फिबै लिउँइँ सरूग ङ्हिंब्ब्रा बर्ष समा सोसि अरू च्ह-च्हमिमैं या योंइ। 
नाहोर ङ्हिस्युसे कुदिं तमा तेरह बिबै च्ह योंइ। 
तेरह फिबै लिउँइँ नाहोर प्रसे च्युसे कुदिं समा सोसि अरू च्ह-च्हमिमैं या योंइ। 
तेरह ङिच्यु बर्षर्बै तमा अब्राहम, नाहोर नेरो हरान बिबै च्हमैं योंइ। 
तेरहए ताँमैं चुन् ग। अब्राहम, नाहोर नेरो हरानए आबा तेरह मुँल। धै हरानए च्ह लोत मुँल। 
हरान कल्दिमैंए ऊर बिबै क्ल्ह्‍योर फिल। चए आबा तेरह सोगों मुँमन् हरान च ह्‍युलर सिइ। 
अब्राहम नेरो नाहोरइ ब्ह्‍या लसि प्ह्रेंस्यो पखइ। अब्राहमए प्ह्रेंस्योए मिं साराई नेरो नाहोरए प्ह्रेंस्योए मिं मिल्का मुँल। मिल्का हरानए च्हमि मुँल। मिल्का नेरो यिस्काए आबा हरान मुँल। 
साराई थरि मुँल चल च्ह-च्हमि तोइ आरेल। 
तेरहइ ह्रोंसए च्ह अब्राहम हरानए च्ह ह्रोंसए क्वें लोत नेरो अब्राहमए प्ह्रेंस्यो ह्रोंसए चों साराई किंसि कल्दिमैंए ऊर बिबै क्ल्‍योंउँइँले कनान ह्‍युलर ह्‍याब् बिसि चमैं बालुन् त्होंइ। दिलेया हरान बिबै क्ल्ह्‍योर फेनेसि चर्न टिइ। 
तेरह ङ्हिंब्ब्रासे ङ्‍हदिं सोसि हरानर सिइ। 
