﻿LUKA.
24.
Korende rituko rie ritang’ani ri’echuma, kobogokiamoka, abakungu baria bakagenda ase oboina, bakaira amanukato aria, ayababegete ang’e. 
Bakanyoora rigena riria riatigerigwe korwa ase oboina, 
korende ekero basoa, tibanyoora omobere Omonene Yeso. 
Ekero baichanete ase aya, rora, abanto babere bagatenena ang’e ase bare, beboyetie chianga chikomeka‐meka. 
Abakungu baria bagasogwa nomoondoko, bagatung’ama inse. Abanto baria bakabateebia, “Nase ki mokorigia oyore moyo ase ebitondo? Tari aa, korende obokire. 
Inyora buna abatebeetie ekero arenge Galili, 
ng’a nemogwenerete Omwana‐o‐Mwanyabaanto abekwe ase amaboko y’abanto abanyene ebibe, na kobambwa, na ase rituko ria gatato nabooke.” 
Bakainyora amang’ana aye. 
Bakairana korwa ase oboina, bagateebia baria ikomi nomo na baria abande bonsi amang’ana ayio onsi. 
Na baria bateebetie abatomwa amang’ana aya nabwo aba: Mariamu Magidalena, na Yoana, na Mariamu ng’ina Yakobo na abakungu bande abarenge amo nabarabwo. 
Amang’ana abo akarorekana koba ng’a naya bosa ase bare, gose tibayancha.  
Korende Petero akaimoka, akagenda bwango ase oboina, agatung’ama, akarigereria ime, akarora ebitambaa biria bireo bioka, akairana bwoye, okumetie ase aya akorekire. 
Rituko riria babere ase bare nkogenda baare ase omochie okorokwa Emau, orenge oboare korwa Yerusalemu ang’e chimaeli isano na isato. 
Na barabwo ngokwana baare barabwo ase barabwo igoro ase aya onsi akorekire. 
Kabagokwana na koborania, Yeso omonyene agaika ang’e, akagenda amo nabarabwo. 
Amaiso abo agatubwa, tibanyara komomanya. 
Akababoria, “Mang’ana ki aya mokoborania ase orogendo rwaino?” Bagatenena, baichanete. 
Oyomo obo, erieta riaye Kiliopa, akamoiraneria, “Inee! Naye bweka ore omogeni ase Yerusalemu, otamanyeti ayare ime yaye amatuko aya?” 
Akababoria, “Mang’ana ki?” Bakamoteebia, “Amang’ana a Yeso Omonazareti, oyorenge omobani, omonyene chinguru ase ogokora na ase ring’ana, ase obosio bwa Nyasae, na ase abanto bonsi; 
na buna abakuani abanene na abanene baito bamoruete ase ekiina ki’ogokwa, bakamobaamba. 
Korende intwe nigo twasemeretie ng’a nere oraboorie Abaisraeli. Kobua aya onsi, reero nerituko ria gatato korwa ekero ayio akorekanete. 
Naende abakungu bande ba seito nigo batoichanetie. Abwo barenge ase oboina mambia, 
na ekero batanyorete omobere oye, bakairana, bakaboora ng’a baorokeirwe nabamalaika ababatebetie ng’a moyo are. 
Naende abande abarenge amo naintwe bakagenda ase oboina, bakarora buna abakungu bateebete, korende ere tibamorora.” 
Ere akabateebia, “Inwe abanto abariri, nabanyene chinkoro chinyoro ase okwegena onsi aya ababani bateebete. 
Inee! Tiyamogwenerete Kristo konyora emechando eye ritang’ani atarasoa ase obonene bwaye?” 
Agachaakera korwa Musa na ababani bonsi akabateebereria korwa ase amariiko onsi amang’ana ariikire igoro yaye. 
Bagaika omochie oria ase baare kogenda, na ere agekora buna nigo arigetie kobaetania. 
Bakamosorora, bakaboora, “Kabe amo naintwe, ekiagera bwairire, na omobaso oerire bono.” Agasoa koba amo nabarabwo. 
Ekero aikaransire amo nabarabwo koragera, akabogoria omogati, akayosesenia, akayosamunyora, akabaa. 
Erio amaiso abo akaramokigwa, bakamomanya; na agwo kegima agasira, tarorekana ase bare. 
Bakaboorania, “Inee! Emioyo yaito tiyarenge gwoka ekero aba ngokwana are naintwe inchera na gotworokereria amariiko?” 
Bakaimoka ensa eria eria, bakairana Yerusalemu, bakanyoora baria ikomi nomo basangererekanete, na baria abarenge amo nabarabwo, 
bakaboora, “Ekeene, Omonene obokire, oorokeire Simioni.” 
Na barabwo bakabateebia aya akoreka inchera, buna emanyekania ase bare ase ogosamunyora omogati. 
Ekero baare gokwana iga, Yeso omonyene agatenena egati yabo, akabateebia, “Omorembe obe ase more!” 
Bakegosa, bagasogwa nomoondoko, bagakaga ng’a nerirengari barorire. 
Akabateebia, “Inaki mogoichana? Naende inaki ogosiereria kwaimokire ase chinkoro chiaino? 
Rora amaboko aane na amagoro aane, ng’a ninche omonyene; mbwata‐bwate, morore, ekiagera rirengari tiriri nomobere na amauga buna mondoche inche inde nabio.” 
Ekero akoorire gokwana aya akaborokia amaboko aye na amagoro aye. 
Ekero bataregena ase engencho y’omogooko, na ogokumia, akababoria, “More na gento mokoria aa?” 
Bakamoa egesamunye gi’enswe gesambire na obooke boke. 
Akabibogoria, akabiria ase amaiso abo. 
Akabateebia, “Aya naro amang’ana aane nare kona‐kobateebia ekero narenge amo nainwe, buna onsi agwenerete goikeranigwa, ayarigetwe igoro yane ase amachiiko a Musa, na ase ababani, na ase Zaburi.” 
Erio akaigora chinkoro chiabo, banyare komanya amariiko. 
Akabateebia, “Naboigo yarigetwe ng’a nemogwenerete Kristo gochandwa, na koboka korwa ase abakuure ase rituko ria gatato; 
na ebisaku bionsi mbiranderigwe ase erieta riaye okoonchoka na okorusigwa kw’ebibe, gochaakera Yerusalemu. 
Inwe mbirori b’amang’ana aya. 
Rigereria, nintome ase more aya Tata abarierete eira, korende ikaransa ase omochie oyo Yerusalemu goika mobekwe chinguru chikorwa igoro.” 
Akabatang’ana gochia isiko goika Bethania; akaimokia amaboko aye, akabasesenia. 
Kabasesenirie ageatanana korwa ase bare akabogorigwa gochia igoro. 
Na barabwo bakamosasiima, bakairana Yerusalemu nomogooko omonene; 
bakaba botambe ime ase Hekalu, bakomotogia Nyasae.
