﻿MARIKO.
15.
Erio kobwachia gokia mambia, abakuani abanene bagakora ekiina amo nabagaaka na aborokia b’amariiko, na ekegambero ekegima. Bagasiba Yeso, bakamoira, bakamomoa Pilato. 
Pilato akamobooria, “Aye naye Omorwoti bw’Abayahudi?” Akamoiraneria, “Naboigo, aye gwateebire.” 
Abakuani abanene bakamosoera ase amang’ana amange. 
Pilato akamobooria naende, akabora, “Tokoiraneria ing’ana? Rora amang’ana aya amange bagosoereire.” 
Korende Yeso tairaneria ing’ana rinde naende, goika Pilato agakumia. 
Nabo ase rituko rinene nigo anarete kobasiborera omosibwa oyomo, oyobarigetie. 
Narengeo omonto ore korokwa Baraba, osibetwe amo nabaanto abakorete eburuburu, na gokora oboiti ase eburuburu. 
Omoganda ogotiira gochiao, na barabwo bagachaaka gosaba Pilato abakorere buna anarete kobakorera. 
Pilato akababoria, “Morigetie mbasiborere Omorwoti bw’Abayahudi?” 
Ekiagera amanyete ng’a abakuani abanene nigo bamorure ase obogechi. 
Abakuani abanene bakagenka abanto b’omoganda, erinde anche kobasiborera Baraba. 
Pilato akairaneria naende, akabateebia, “Imokore naki oyo mogoteeba ng’a n’Omorwoti bw’Abayahudi?” 
Bagaaka eriogi naende, “Mobambe!” 
Pilato akababoria, “Nase ki? Mbobe ki akorete?” Bakamenta mono goaka eriogi, “Mobambe!” 
Pilato agancha gokora ayaragwenere omoganda, akabasiborera Baraba, na ekero aakire Yeso chinkini, akamorua abambwe. 
Abarwani bakaira Yeso ime ase enyomba y’ekegambero (nero Praitorio), bagasangererekana amo ekeombe ekegima. 
Bakamoboyia eanga emonyinga, bagatwang’a egutwa y’amagwa, bakamobekera motwe, 
bagachaaka komokwania, “Masoge, Omorwoti bw’Abayahudi!” 
Bakamoaka omotwe negetonto, bakamotwera amate, bakabeka amaru inse, bakamosasiima. 
Kobamochecheirie, bakamorusia eanga eria emonyinga, bakamoboyia chianga chiaye omonyene. Bakamoira isiko komobamba. 
Bakabetereria omonto orenge goeta, Simioni Omokurene, ore korwa borabu, ise Alekisanda na Rufo, abogorie omosalaba o Yeso. 
Bakamoira aase akorokwa Gologotha (engencho yaye: Aase Ekeore). 
Bakamoa edivai yochoganirie na manemane anywe, ko tancha konywa. 
Bakamobamba, bagaatanana chianga chiaye, bagachiakera obomera eye kera omonto araire. 
Nigo chiare chinsa isato ekero bamobambete. 
Na amariiko y’ogosoerwa kwaye nigo ariikire igoro, “OMORWOTI BW’ABAYAHUDI.” 
Amo nere bakabamba abauri babere, oyomo ensemo y’okoboko kwaye gw’okorio, na oyonde okoboko gw’okobee.  
Nabo ririiko rigaikerana, erigoteeba, “Obareraniigwe amo nabasaria.” 
Na abanto abaare goeta bakamorama, bagosinga‐singisia emetwe yabo, bagoteeba, “A! Aye oyogotagora Hekalu na koyeagacha ase amatuko atato, 
etoorie, ika korwa ase omosalaba!” 
Naboigo nabakuani abanene bakamosekereria barabwo ase barabwo, amo naborokia b’amariiko, bagateeba, “Natooretie abande, ere omonyene takonyara gwetooria. 
Tiga Kristo, Omorwoti bw’Abaisraeli, aike bono korwa ase omosalaba, tonyare korora na kwegena!” Na barabwo abaabambetwe amo nere bakamoraama. 
Ekero chinsa isano nemo chiaika omosunte okaba igoro ase ense yonsi goika chinsa kianda. 
Ne chinsa kianda Yeso akarera ase eriogi rinene, “Eloi, Eloi, lama sabakitani?” Okoonchorwa kwaye: “Nyasae one, Nyasae one, naki gwantigire?” 
Na abande b’abwo bateneine ang’e koyaigwa bakaboora, “Rora, nkorangeria are Elija.” 
Omonto akaminyoka bwango, akaimokia esifunchi, akayeichoria chinkama, akayebeka igoro ase egetonto, akamoa anywe, okobora, “Tiga torore gose Elija ngocha are komoikia.” 
Yeso agaaka eriogi rinene, agatweka mo. 
Egetambaa gi’okonacha Hekalu kegatondoka korwa igoro goika inse, gekaba bibere. 
Na ekero omotang’ani bw’abarwani rigana ateneine amorigereretie, agachia korora ng’a otwekire mo, akabora, “Ekeene, omonto oyo nigo arenge Omwana o Nyasae.” 
Mbarengeo abakungu barigereretie korwa are. Ase abwo nigo barenge Mariamu Magadalena na Mariamu ng’ina Yakobo omoke na Yose, na Salome. 
Aba nabwo bamotuny’anete ekero arenge Galili na komokorera, amo nabande abange abakungu abatiirete amo nere goika Yerusalemu. 
Riachia koba mogoroba, ekiagera nerituko ri’okwebeka ang’e, nario rituko ri’ogotang’anera Esabato, 
Yusufu omonto bw’Arimathaya agacha, oyorenge omosike, omonto bw’ekegambero. Ere omonyene nigo aganyete oborwoti bwa Nyasae; agasoa noboremu ase obosio bwa Pilato, agasaba aegwe omobere o Yeso. 
Pilato agakumia, ekiagera aikire gokwa, akarangeria omotang’ani oria bw’abarwani rigana, akamobooria gose nkare akwete. 
Goika agachia konyora ekeene ng’a okuure, akaa Yusufu omobere. 
Yusufu akagora egetambaa ki’egatani, akamoikia, akamoboyia egetambaa keria, akamobeka ase oboina bwabaachetwe ase egetare. Naende agaturunkania rigena gochia ase egesieri ki’oboina. 
Mariamu Magadalena na Mariamu ng’ina Yose bakarigereria aase abegetwe. 
