﻿DANIELI.
13.
Ase omochie o Babiloni narengeo omonto oyomo ore korokwa Yoakimu, 
Oyo nigo anywomete Susana mosubati bwe Hilkiah. Susana nigo arenge omosubati omonyakieni na nigo amoirogete Nyasae. 
Abaibori baye nigo barenge Abayahudi abwo begeretie omwana obo kobwatia amachiiko a Musa. 
Omosacha oye Yoakimu nigo arenge omonto omonda. Nigo abwate ebitii ebiya agwo ase Abayahudi bamwabo barenge koumerana ase emesangererano yabo, ekiagera bonsi nigo bamosigete mono. 
Ase omwaka oyio abanto babere bagachorwa koba abagaambi. Ase aba babere Nyase agateeba: Obobe bwarure Babuloni korwa ase abagaaka abwo barenge abagaambi b’abaanto. 
Abagaka aba nigo barenge kobera ase enyomba ya Yoakimu na kera omonto obwate ekiina nigo arenge kobaretera aiga. 
Kera rituko nchinsa chia mobaso ekero abanto bonsi bachire, Susana nigo arenge kogenda ase egetii gotara. 
Abagaambi baria babere nigo barenge komosanera kera rituko. 
Bakaba n’okogania ase are goika bakeba gosaba boigo bakeba emeremo yabo y’obogambi. 
Kera oyomo nigo aganetie Susana korende onde taiyo otebetie onde buna aigwete, 
ekiagera kera oyomo nigo asogete gwancherana ogosanera kwaye. 
Ase igo rituko ase rituko bakagenderera komorigereria. 
Rituko erimo bagatebania, “tiga togende torigie endagera ekiagera chinsa echi n’echiendagera.” 
Ase igo bonsi bakagenda korigia endagera ya mobaso kera oyomo akagenda enchera yaye, korende ase ekero egeke kera oyomo akairana gocha korigereria Susana, ase ogotamanya bonsi bakaumerana. Ritangani kera oyomo agatema kwerwanerera eki kiamoirania gocha, korende omoerio bonsi bagancherana okogania kwabo ase Susana. Bagancherana konyora chingaki ekero Susana are bweka. 
Ase igo bakagenderera korigia chingaki chindonge. Rituko erimo Susana akagenda egetii buna botambe ore n’abasomba baye abaiseke. Onde tarenge ororo naende otatiga abagaambi baria babere boka, abwo bebisete barigereretie Susana. 
Nigo yarenge chingaki chi’omobaso omororo erio ere akagania gwesibia. 
Agatebia abasomba baye, “indetere amabuta y’ogwesiarera n’amanukato na mosieke ebisieri erio tinchandwa.” 
Abasomba baria bagasieka egesieri gia isiko erio bakagenda koreta ebinto biria Susana abatomete. Barobwo tibaroche abasacha baria babere. 
Magega ko abasomba baria bachiire, abasacha baria babere bagacharoka korwa ase bebisete bakaminyoka gochia ase Susana; 
bakamotebia, “Ebita nigo bisiekire onde taiyo oratorore. Intwe nigo tore n’okogania korara naye ase igo twanchere torare naye. 
Onye togotwanchera, nigo tokogenda ase ekegambero totiane buna nigo twakorora kogoseria abasomba bao erio otigare aye bweka n’omomura onde.” 
“Tekonyarekana,” Susana agateba. “Ngise kobanchera nigo ndaitwe inkwe ase ogokora obonyaka. Ngise kwanga nigo moransibe. 
Nachorire gotakora bo; mbuya ngwe ase amaboko aino kobua gokora ebibe ase Omonene.” 
Erio Susana agakura n’eriogi rinene, na abagaambi baria babere bakamotogonyera. 
Oyomo akaminyoka akaigora egesieri gia isiko. 
Ekero abasomba baigwete eriogi, bakabinyoka gochia egetii goetera egesieri gi’ensemo korora eki kiaberete Susana. 
Abagaambi baria bagateba omogano obo na ekero abasomba baria baigwete omogano oyio bagasoka mono, ekiagera mangana anga buna aya tanya kobera Susana rinde. 
Rituko riare kobwatia ekero abanto basangererekanete ase enyomba ya Yoakimu, abagaambi baria babere bagacha bakaroberia goikerania emeroberio yabo emebe y’ogosoera Susana aitwe akwe. Ase obosio bw’abaanto bagateba, 
“Reta Susana mosubati bwe Hilkia moka omorwoti Yoakimu.” Ekero arangeretigwe, 
agacha n’abana baye, abaibori baye, boigo n’abairi baye bonsi. 
Susana nigo arenge omokungu bw’okogokia na omonyakieni. 
Ekero aigete abasacha baria babere bagachika arusigwe ekerebi kiaye erio bagenderere korigereria ekieni kiaye. 
Abanto b’enka yaye na kera omonto bagachaaka korera. 
Abagaambi baria babere bagatenena ase obosio bw’abaanto, bakabeka amaboko abo ase omotwe o Susana bagachaaka komosoera. 
Susana nigo arenge korera okorera gwoka erio akarigereria igoro ekiagera egenete Omonene. 
Abasacha baria babere bakarwa oborori bokobwatia: “Nigo twarenge gotara ase egetii ekero omokungu oyo achete n’abasomba baye abasubati babere. Agasieka egeita gia isiko erio agaseria abasomba baye. 
Erio omomura omoke iga oyio bw’ebisete agacha bakarara nere. 
Intwe nigo twarenge ensemo gete y’egetii, na ekero twarora aya arenge gokoreka, tokaminyoka gochia ororo, 
tokabanyora ase egekorwa. Togatema gotaarera omosacha oria, korende ere nigo arenge omokon’gu ase tore, agatobwaa agatama akaigora egesieri akagenda, 
korende intwe tokanya gotaarera omokungu oyo. Tokamoboria igoro y’omosacha oyo, korende ere akanga gototebia. Nigo togotiana buna oborori bwaito n’obwekeene.” 
Ase engencho abasacha baria babere barenge abarai b’ekenyoro naende abagaambi, abanto bakabegena bakanachera Susana ekiina ki’ogokwa. 
Erio Susana agaaka eriogi rinene agateba, “Nyasae o kare na kare, kende tikeiyo kerabiseke korwa ase ore; aye nigo omanyete kera egento nyuma getarakoreka. 
Bono inche nigo inde ange gokwa, korende aye nomanyete buna inche tindi na komocha, abasacha aba bangainereirie. Inki keragere inkwe?” 
Nyasae akaigwa ogosaba kwane, 
ekero are koirwa gochia goitwa, Nyasae akaorokera omosae oyomo ore korokwa Daniel goetera ase Omoika Omochenu, 
agaaka eriogi rinene ogoteeba, “Inche timbarwa koba oyomo bw’ogoitera amanyinga y’omosubati oyo!” 
Kera oyomo agaonchokera Daniel akamoboria, “Inki eke ogokwana?” 
Daniel agatenena ase bare agateba, “Inwe Abaisraeli mboriri ki obo mobwate? Nigo motagete goita omokungu oyo omoisraeli motabwati bomaene.? 
Chaka kogamba ekiina eke buya ekiagera abasacha aba batebire oborimo igoro y’omokuungu oyo.” 
Abanto bonsi bakayerera gochia aria ase ekiina kianacheretwe, abateneneri bagateebia Daniel, Nyasae okoeire obong’aini boetanetie emiaka yao, ase igo inchuo amo naintwe engencho y’amang’ana aya. 
Daniel akabatebia, “Atanana abagaambi aba babere erio mbaborie amaborio kera oyomo ao ao.” 
Erio Daniel akarangeria omogambi bw’eritang’ani akamoteebia, “Aye omogaka oyo omosareku, bono goika oiranerie igoro y’ebibe bionsi gwakorire. 
Kwabeire gokonacha ebina bobe. Kwabeire gokogambia baria batari nokomocha na gotiga baria bare n’okomocha, nonya Nyasae kagoteeba buna tonachera omonto otari na komocha ekiina ki’ogokwa.’ 
Bono ekeene onye aye kwaroche aba babere bagokora obotomani ntebie, inse ya mote ki barenge?” Erio ere akairaneria “Inse y’omoringamu omoke.” 
Daniel agateba “Oborimo obwo bwao kogera bore osirie obogima bwao. Omomalaika o Nyasae oikire koegwa okobua akonachane kabere.” 
Omogambi oria omotang’ani akairwa gochia isiko oria okabere akaretwa ase Daniel. Daniel akamoteebia “Aye nigo obwekaine omokanani tari omoyahudi,” Ekieni ki’omosubati oyo giakogambirie na ogosanera kwao gwaonchoire okorengereria kwao. 
Aye kwabeire gokona kogenda n’abasubati abaisraeli ase engencho bakoirogete, korende bono omokungu nare aiga omoyahudi oyio otanchete amang’ana ao. 
Bono intebie ekeene, “Inse ya mote ki kwabaroche bagokora obotomani.” Ere akairaneria “Inse y’omoaluni omonene,” 
Daniel akamotebia, “Oborimo obwo nkogera bore osirie obogima bwao; omomalaika bw’omonene nigo are n’omoro oye aganyete akonachane ebingese bibere, erio intwe tobasirie inwe babere.” 
Erio abanto bonsi bagaaka eriogi na komotogia Nyasae oyio ogotoria baria bamosemeretie. 
Bagaonchokera abagaambi baria babere ekiagera Daniel abaenekeretie buna nigo bang’ainereretie ase ogotiana. 
Ogochika kwa Musa nigo kogoteeba buna onde bwensi okoba kirori bw’oborimo omonto oyio aitwe akwe, nere naegwe egesusuro ki’ogokwa. Ase igo abagaambi baria babere bagaitwa bagakwa na obogima bw’omokuungu oria otabwate komocha bogatorigwa. 
Abaibori ba Susana, omosacha oye, amo n’abairi baye bonsi bagaakera Nyasae mbuya mono ase engencho Susana atanyoretwe na komocha. 
Korwa rituko erio kogenderera Daniel agasikwa mono. 
