﻿SIRA.
6.
Chimbwa chimbe nigo chikoreta obosooku amo n’ogotogonyerwa, buna ayakomonyora omonto omorimo naende omonyabibe. 
Tobaisa gwancha kogamberwa n’okogania kwao okobe, ekiagera okogania okwo nigo korataborane omoyo oo buna eeri 
eraimokerereri ebisago bi’emete yao na gotuguta amatunda ao onsi. Erio otigare buna omote bwomire. 
Okogania okobe nigo kogosiria omonto omonyene, erio yagera osekererwa n’ababisa baye. 
Amang’ana y’obwororo nigo akomomentera omonto abasani, n’ogotwara amasikani nigo gokoreta oboamate obuya gati y’abanto. 
Kabe n’abasani abange mogokwanania nabwo, korende ase barabwo abwo oyokogosemia abe oyomo ase abanto abwo elifu. 
Koganetie gotwara omosani, karamoitona ritang’ani, toayerera komwegena. 
Ekiagera nareo orabe omosani ase engencho aganetie ogokoonya kwao, oyio otaabeo ekero aye ore n’emechando. 
Naende nareo omosani oraonchoke koba omobisa oo, na koreta okoamerererania okwo korarete eriomana gati yaiino. 
Naboigo, nareo omosani oyio ore omosani ekero kiendagera; korende ekero kiemechando takororekana nonya ng’ake erio agokoonye. 
Omonto nareo oraikaranse naye ekero ebinto bionsi bire buya ase ore; erio bwebeka ekerengo buna aye na gochaka koa abakoreri bao amachiiko. 
Korende, ekero kwaereirwe n’enibo erio oonchoka, na gochaka kweongora korwa ase abanto. 
Bera aare n’ababisa bao, erende n’abasani. 
Omosani omwegenwa nigo anga buna oboroso, oyonyorire omosani buna oyio onyorire ekeegwa kiobogima. 
Omosani omwegenwa nigo are omonto bw’engencho mono kobua ebinto bionsi, n’onde taiyo oranyare korenga obuya bwaye. 
Omosani omuya nigo anga buna eriogo erio rikoreta chinguru ase omobere. Abanto bamoirogete omonene nabwo boka bakonyora omosani buna oyio. 
Oyomwenerete Nyasae, oyio nigo akonyora omosani bw’ekeene, ekiagera buna omonto are naende nabo akonyora omosani omobwekaine. 
Omwana one, korwa ase obwana bwao, chora okworokereria nonya n’ekero orabe omogotu n’ogenderere koba gokomonyora ere oyio ore chisemi. 
Kora omokia buna omoremi ase okomonyora chisemi, na konyora rigesa riao rigiya. Nekobetereretie ase chingaki chitari inke, korende ase engaki enke n’oragere korwa ase rigesa riao. 
Abanto batabwati chimbwa chingiya nigo bakomorora chisemi koba omotindi, ase abanto abariri mbakonyara kobeera nere ase egeka egetaambe. 
Ase abande chisemi echinga buna omonto omorito buna rigena riokorengera, na barabwo tibagoteebana komotugutera aare. 
Chisemi nabo are buna erieta riaye rire, ekiagera ere chisemi, tari konakwemanyekania ase abanto. 
Omwana one, ’ntegerere kegima na obwatie ogosemia kwane. Tobaisa kwanga amang’ana yogosemia kwane. 
Esibe n’echinyororo chi’echisemi goetanana ’amagoro, tomocha gwesiba n’ebigoti biao boigo. 
Bogoria omosigo oye, koreende torosa n’oborito bwaye. 
Mochiere ere chisemi n’omoyo oo bwonsi, na kobwatia ebirage biaye n’echinguru chiao chionsi. 
Moitone na komorigia chisemi, nere neorokie ogocha asore. Ko’ kwamonyorire chisemi tobaisa gotiga komotunyana. 
Omoerio oye, ng’onyore omotimoko okorwa asare. 
Ebimanyererio bie ebinyuri nigo birabe enguba y’oboroso bw’oboikeranu bwao, na ebinyuri ebio mbibe buna richoki ase rigoti riaye. 
Ekemanyererio ki’ebinyuri biaye nigo bire buna ogwechabera Kw’amameka ’amaabera. Ebinyuri ebio mbibe okoginga kwao ase engoba y’obogambi. 
N’obeeke chisemi nigo chinga buna egutwa y’obogambi. 
Omwana one, onye kore n’okogania nosome. Onye gotagete koba omong’aini nabo okonyara onye gokwerwa ase okomanya. 
Onye kwerwete gotegerera, nabo ogosoma na koba n’obong’aini. 
Bera ase abanto abanene bare; barenge buya orore gose omonto omong’aini nare ase egati yobo, erio obere nere. 
Obe ang’e gotegerera kera okworokereria na totiga obosemia bw’emebayeno bokominchorie. 
Korarore omonto omong’aini, mochiere bwango, morosie ase egesieri kiaye ase okomotaarera. 
Rengereria amachiiko y’Omonene enarie emeroberio yaye. Ere naikeranie ebirengererio biao naye nochinyore chisemi oganetie. 
