﻿Obong’aini bwa Sulemani.
1.
Ancha gokorera ekeene inwe abarai b’ense. Beeka ebirengererio biaino ase Omonene na momorigie n’echinkoro chiaino. 
Ekiagera ere nigo are ang’e nabwo batari komoteema, na nigo akweorokia ase abwo bamosemeretie. 
Ebirengererio ebikorekanu nigo bigwatanana abanto korwa ase Nyasae, na ekero chinguru chiaye chigotemwa, nigo chikoorokia oboriri bwaito. 
Obong’aini tibogosoa ase omonto omong’ainereria gose ase omonyabibe. 
Oyore omochenu nigo agwetanga korwa ase obongainereria. Omonto oyio nigo akwerusanania korwa ase ebirengererio bi’oboriri, na nigo akoba n’obwoba ekero ekeene getari gwanchwa. 
Obong’aini nigo bobwate omoyo bw’amaabera, korende tibokwabera onde bwensi orabe mamincha ya Nyasae. Nyasae namanyete ebirengererio biaito na nigo akoigwa kera ring’ana togokwana. 
Omoika bw’Omonene nigo agoichora ense yonsi na kobeka ebinto bionsi amo, na komanya kera egento bwanyabaanto agokwana. 
Onde bwensi orakwane mamincha yaye takonyara kwebisa, na ekero ekiina gekonachwa ere naegwe egesusuro kegwenerete. 
Ebirengererio bi’abanyabibe mbiorokigwe maiso marore n’Omonene nanyore amang’ana a kera omonto, erio abae egesusuro kobwatekana nogokora kwabo. 
Omonene nigo aigwete kera egento na onde taiyo orebise korwa ase are. 
Ase igo eatanane korwa ase okwemurungania na tobaisa gosega abanto. Nyasae nigo akoigwa nonya n’okwemurungania kwa bobisi. Oy’ogokwana oborimo nigo agosiria omoyo oye ere omonyene. 
Ase igo tibweretera amakweri ase engencho y’ebibe biao, gose koarigania ogosirigwa ase engencho y’ogokora kwao okobe. 
Amakweri tarentetwe na Nyasae, ekiagera Nyasae tari kogokera ogokwa kwa monto onde bwensi. 
Nyasae nigo atongete ebitongwa bionsi bigenderere koba ao, Ime yebitongwa ebi gento kende nkiarengeo kegoita, makweri tabwate kobua ase ense eye 
ekiagera ekeene kia Nyasae tikegokwa. 
Korende baria batamoirogeti Nyasae nigo bakwerangereria amakweri goetera ase ogokora kwabo boigo n’amang’ana bagokwana, nigo bagokora okobwatana n’amakweri; bono barabwo mbabe abasomba b’amakweri. 
