﻿Egetabu gia Tobiti.
1.
Oyo nomogano igoro y’obogima bwa Tobiti omwana o Tobieli, omwana bw’Ananieli, omwana o Adueli, omwana o Gabaeli, bw’ororeria rwa Asaeli bw’egesaku kia Nafutali, 
oyio ase chingaki Salimaneseri arenge omorwoti bw’Abasiria aosetwe korwa Tisbe eyio ere Irianyi ya Kedesh aria ase ense ya Nafutali sugugu ya Galili bosongo yomochie bwa Hazori boigo na sugusu ya Shefati. 
Inche Tobiti nabwatirie chinchera chi’ekeene na gokora amaya ase obogima bwane bwonsi. Chingaki chinyinge nigo nakonyete abaminto boigo n’bayahudi baminto abataka abwo bang’anyetigwe amo nainche gochia ase omochie o Ninawi agwo ase ense ya Asuri. 
Ekero narenge ase ense yaito aria Israeli ekero narenge omosae, ebisaku bionsi bi’Abaisraeli nigo biatakeire korwera Omonene ekengwanso aria Yerusalemu oyio orenge omochie omochore Omonene Nyasae achorete korwa ase emechie yonsi y’Abaisraeli, ase hekalu yaye yarenge gocha kwagachwa agwo nao obomenyo bwaye bwarenge. Korende egesaku kiane kia Nafutali kegeatanana korwa ase omochie o Yerusalemu amo negesaku gionsi gia Daudi 
Abaminto bonsi negesaku kia Nafutali bakarwera emori eria omorwoti Jeroboam o Israeli atenenetie aria ase omochie o Dan ase egetunwa kia Galili. 
Ase abanto baminto bonsi ninche bweka narenge kogenda Yerusalemu kera engaki goikerania keria ogochika kwa Musa koria kwabwatete Abaisraeli bonsi kwaganetie. Nigo nare kwayerera gochia Yerusalemu nokwama kwane kw’eritang’ani, nogwechitugo chiane, boigo namarionya yechingondi. Erio natenena ase egesasiimero ase Hekalu narua ekengwanso ase Abakuani, n’abamura ba Aroni. 
Ebinto ebi nigo narenge koa abakuani abana ba Aroni ase engencho ya amatabau. Nigo narenge kobaa ensemo yane ya ikomi yokwama kwane, edivai, engano, amasautuni, amakomamanga, boigo namatunda ande. Ase emiaka etano nomo nigo narenge koira chifeta nechisadaka narwa aria Yerusalemu. 
Ensemo ya gatato yokorwa nigo nare koa chintakana ababoraka boigo nabamenyi abwo bamenyete ase egati yabaanto baane. Nigo narenge koyereta ase omwaka ogatato na kobaa buna ekeegwa erio twayeria kobwatekana namachiiko a Musa boigo n’oboseemia nanyorete korwa ase Debora ng’ina sokoro yane Ananieli, ekiagera konya tata ominto okuure ontigire inde entakana. 
Ekero nabeete omonto omonene ’nkanywoma Anna oyio orenge omoiseke korwa ase egesaku giaito, erio togasesenigwa nomwana tokamoroka Tobiasi. 
Magega yaye ’nkairwa obosomba ase ense ya Ninawi. Ekero tore ase ense eyio, abanto bonsi baminto nigo bare koria chindagera chi’abaanto b’ebisaku. 
Korende inche ’nkanga koria endagera eria, 
ase engencho nasigete mono amachiiko a Nyasae ore igoro, 
ere agakora omorwoti Shalmanesa gonsika mono erio nkabekwa gotenenera ebinto bionsi ebio biare kogorwa ase enka yomorwoti. 
Magega omorwoti Shalimanesa ataarakwa nigo narenge kogenda nonya ngoika ense ya’Bamidia komogorera ebinto aroro. Rituko erimo konde ase omochie oyomo ore korokwa Rage ase ense ya Midia, nkamotigera Gabaeli momura omwabo Gabria chifeta chiarenge emebuko ime nkamoboria angachere. Ime ase emebuko eyio ’chiarengeo chishaba ange chikiro 300. 
Ekero Shalmanesa akwete, momura oye ore korokwa Senakeribu akaba omorwoti ribaga riaye nagwo chinchera chiare kogenda media chigasiekwa ase engencho abauri nigo bare koboera abanto ase chinchera echio, erio inche ngasinywa kogenda aroro. 
Ase chingaki chiria Shalimanesa arenge omorwoti nigo nabete ngokorera abanto baminto Abayahudi abwo barenge abataka amaya. 
Nigo narenge koa baria barenge nenchara endagera yane boigo na koa baria baare getirianda chianga chiane. Ekero nare konyora emebere yoyomo bw’abaanto baane otugutire isiko y’orwaki rw’omochie, nigo nare koyobogoria na koyotindeka ase amasikani. 
Ekero omorwoti Senakeribu are goita monto onde bwensi ore gotamera ense yaye korwa Yudea, inche nigo nare komotindeka bobisi. Omorwoti nigo aitete abanto abange mono erio gokendia endamwamu yaye. Magega yaye ekero are korigia emebere ya baria aitire tare koyenyora. 
Korende omonto oyomo o Ninawi agateebia omorwoti buna ninche nare gotindeka emebere y’Abaisraeli baria bare goitwa. Ekero namanya buna omorwoti omanyire amang’ana ane onsi, na abanto nigo bare kondigia bang’ite, ngasogwa nobwoba ngatama. 
Ebinto biane bionsi bikabwatwa bikairwa ase enyomba yomorwoti bikagachwa aroro. Kende tikeri giatigarete ase inde otatiga omong’ina one Anna nomwana one Tobia. 
Magega yechichuma ange isano nemo, abana babere b’omorwoti Senakeribu bagaita ise erio bagatama gochia ase ebitunwa bia Ararati. Esarhadoni omwana onde bw’omorwoti akaba omorwoti erio akabeka Ahika omwana omomura ominto Anaeli koba omoteneneri bwe chitaabu boigo namang’ana onsi y’oborwoti. 
Ahika akandwanerera erio nkairana Ninawi. Eri neriakabere Ahika koba nekerogo eke, ekiagera konya obeire omoteneneri omonene bw’edivai, omoteneneri bwe chitaabu, boigo nomoteneneri bw’ekemanyererio ki’omorwoti, inse y’oborwoti bwa Senakeribu erio na Esarhadoni akamobeka emeremo eyio. Aika nigo arenge omoigwa one. 
