﻿Egetabu gia Yoeli.
1.
Eri nario ring’ana ri’Omonene riachete ase Yoel, mosinto o Petueli. 
Inwe abagaaka, igwa amang’ana aya! Inwe abanto bonsi abamomenyete ase ya Yuda, tegerera moigwe! Inee! Amang’ana buna aya anagokorekana ase amatuko aino, gose ase amatuko e chisokoro chiaino? 
Yateebie abana baino amang’ana aya, na abana baino bayateebie abana babo, na abana babo bayateebie ekegori kende. 
Ogosongerera ase obonge gw’echingige, chiagwereire ebimeri, biria chinyanchaba chiatigaretie, chingige chikayeria, na eye chingige chiatigaretie, ebisase bikayeria, na eye ebisase biatigaretie, chingeeti chikayeria. 
Inwe abamwatindire nebinyugwa ebiroro, boka morere! Inwe mwensi aba mokonywa edivai, bokia amagombo, ase engencho amasabibu onsi y’okoroisia edivai enyia, asarigwe. 
Risaga ri’echingige chinyinge riaumokeire ense yaito, nigo rire n’echinguru chi’ogokumia na nigo rire rinene mono; amaino aye nigo agwekaine ay’Endo, na amagegu aye nigo anga buna ay’endo eaberi. 
Giasaririe emesabibu yaito, kiabunire emeko yaito; kiayesaboire, na gotuguta amasabo inse, ne chinsagia chi’emete eyio chiarabire se. 
Rera na kobokia amagombo buna omoiseke omwekungi obegete chianga chi’echigunia, okwereirwe nomosaacha bw’oboke bwaye. 
Okoruegwa kw’endagera na ogw’ekenyugwa biatangirwe, tibirentwa ase enyomba y’Omonene. Abakuani abare abakoreri b’Omonene nigo bakorera. 
Emegondo yatigaire bosa; riroba nigo rikorera ekiagera endagera yasirigwe, edivai tekobao na amaguta ’emezeituni akeeire kegima. 
Inwe abaremi ichana na gosooka, nainwe abaroiseria b’emesabibu, rera, ekiagera engano na esairi biasirigwe amo nokwama gwonsi kw’emegondo. 
Emesabibu yomire, na emeko boigo. Emekomomanga, na emekendo, na emete y’amapera, ee, emete ende yonsi y’emegondo yomire. Ogochenga kwaerire ase egati y’abanto. 
Inwe abakuani, eboyie chigunia, morere, nainwe abakoreri b’egesasiimero, bokia amagombo! Eboyie chigunia, morere ase Hekalu ime ase obotuko bwonsi, ekiagera okoruegwa kw’endagera na ogw’ekenyugwa biaborire, ase enyomba ya Nyasae. 
Raria engaki y’okweng’ata; rangeria omosangererekano bw’ogosasiima! Sangereria abagaaka na abanto bonsi b’ense eye, bache ase enyomba y’Omonene, Nyasae oino, erinde morere ase Omonene. 
Obobe nobwaito, ekiagera rituko ri’Omonene nigo rire ang’e, riraarente ogosirigwa korwa ase Omonguru. 
Endagera yasiriigwe torigereretie na amaiso aito. Omogooko na amaseko arusiigwe korwa ase enyomba ya Nyasae. 
Chimbusuro chagundeire riroba ime; ebiage biatigaire bosa na ebigancha biasarekire, ekiagera endagera ekogachwa yaborire. 
Rigereria chitugo buna chikwana chichandegete, amaicho e chiombe achandekire, ekiagera obonyansi bwaborire chikorisia, nonya namaicho e ching’ondi achandekire. 
Aye Omonene, inche nigo nkorera asore, ekiagera omorero bwomirie obonyansi ase ebitii, n’echimeme chi’omorero chiasiririe emete y’orosana. 
Nonya ne ching’iti chi’orosana nigo chikorera asore, ekiagera chindooche chiakamire, amaache taiyo, ee, omorero oria osambire amarisio ’erooro. 
