﻿HOSEA.
14.
Inwe Abaisraeli, irana ase Omonene Nyasae oino, ekiagera ebibe biaino nabio biabagochire na kobaiyeria. 
Irana ase Omonene, momoteebie amang’ana aya: Toruserie obobe bwaito bwonsi obwo twakorire, bwanchere ayare amaya, naintwe torue asore ogotogia kw’ebikoba biaito konga buna okoruegwa kw’ebing’wanso bie chieri. 
Abaasuri tibakonyara gototooria; titokoriina chibarasi gose titokogenderera koroka emeremo y’amaboko aito Nyasae oito. Aye Omonene nigo okoorokia amaabera ase oyore entakana. 
“Ningwenie abwo batigire obwegenwa bwabo. Nimbanche nenkoro yane yonsi, ekiagera endamwamu yane yabatigire. 
Niimbe buna riime ase Abaisraeli, na barabwo mbasiche buna ebisicha ebiya, mbakinie emeri buna emete ya Lebanoni. 
Ebisabo biabo mbirande, na obwari bwabo nabobe buna obw’emezeituni, ne rimisu riabo ndiesiarere buna eri’emete ya Lebanoni. 
Abwo baramenye inse ase ekiriri kiabo bairane, bagenderere koreereta buna ebimeri bia mogondo mbasiche, na obonene bwabo bobe buna obw’emesabibu ya Lebanoni. 
Inwe Abaefraimu, naki ngokora nemegwekano yaino mogosasiima? Ninche omonyene naigure ogosaba kwaino inwe Abaefraimu, nimbairanerie, naende ninche mbarendete. Inche nigo inde buna omotarakwa omobese; na okwama kwaino nigo gokonyorekana ime yane.” 
Oyore omong’aini, nere oramanye amang’ana aya; oyore nokomanya, nere orayarengererie. Chinchera chi’Omonene nigo chire chindonge, na abanyene oboronge nabwo baraetere aroro, korende abasaria nigo baragochwe bagwe ase chirochio.
