﻿EZEKIELI.
15.
Ring’ana ri’Omonene rigaacha asende, riganteebia: 
“Aye Mwanyabaanto, Inee, naki omote bw’omosabibu gose orosagia rw’aye robuete emete ende yonsi, ase ogotogigwa, ase egati y’emete ende ere ase rinani? 
Inee! Omote oyio nonachwe okorerwe moremo onde? Gose abanto mbaroisie egekongo korwa ase omote oyio basungere egento kende gionsi. 
Nigo okoba chinko orutwa riko. Ekero omorero osambire chinsinyo chiaye chionsi, na obogati bwaye bwarurirwe, Inee, bono moremo ki orakorerwe? 
Naama! Onye ekero omosabibu oyio orenge omogima togwenerete gokorerwa moremo onde bwensi, bono ekero oyire na korurwa nomorero, ’moremo ki orakorerwe? 
“Ase ayio, aya naro Omonene agoteeba: Buna koreng’ana naruure omote bw’omosabibu ore ase egati y’emete ende ere ase rinani outerwe omorero oyie, naboigo ndatugute abanto ba Yerusalemu. 
Nigo ndababee; nonya bagochia gotooreka korwa ase omorero, naende omorero n’oro orabasirie. Erio nario moramanye ng’a inche ninche Omonene, nababeeire. 
Ninsirie ense eyio ebe bosa, ekiagera bakorire aya atari ay’obwegenwa. Nabo Omonene ateebire.” 
