﻿EKERERO.
3.
Inche nomonto narorire emechando inse y’endamwamu y’Omonene ere buna enyimbo. 
Ontang’anire na kong’etia ase omosunte, gose tari ase omobaso 
Ekeene, nigo akona‐koonchora okoboko kwaye igoro yane, ekero ase ekero omobaso boira. 
Otigire chinyama chi’omobere one, ne risankwa, bigosareka; obunire amauga aane. 
Onsibire ase eburi ime na ong’etananeirie obororo na obokong’u. 
Ombekire imenye ase omosunte, buna abanto baria bakwete kare. 
Onsiekeire ase chinsemo chionsi, tinkonyara gosoka; onsibeire ebinyuri ebirito. 
Nonya nkorera neriogi rinene ng’a nkonywe, ere bwangire koigwa ogosaba kwane. 
Oribirie chinchera chiane namagena abaachire, oonchoranire oboeto bwane. 
Nigo amboerete buna edubu, enyang’au entindi, ekoboera, na buna endo eboerete eite. 
Oonchoranire chinchera chiane na kombutorana ebing’ese, ontigire ntang’ang’ete bosa. 
Otingire obota bwaye, na ombekire imbe ekerenga akoruta chinsara. 
Ere ondasire ne chinsara chi’egochi yaye, chiasoire ase chinyigo chiane. 
Inche nabeire oyo ogosekererwa nabaanto bane bonsi, na engeero y’ogochaaya kwabo omobaso boira. 
Ong’ichoirie nobororo, ong’eire ekenyugwa ekeroro nanyure. 
Obunire amaino aane ase ogontakunia chinche chi’amagena, ontubire neribu. 
Aye kwarusirie omorembe ase omoyo one, na inche nebire ayare ay’omogooko. 
Ngateeba, “Chinguru chiane chiaerire, na ogosemeria kwane ase Omonene boigo.” 
Inyora emechando yane, na obokong’u bwane, buna nanyure ay’obororo na obosongo. 
Omoyo one nigo ogendererete koyainyora, na bwekeeirie ime yane. 
Korende amang’ana aya nigo nkoyainyora ase omoyo one, ase ayio ninde nogosemeria. 
Nobwanchani bw’Omonene botari koera ng’a titosiriri, ekiagera amaabera aye tari koera; 
nigo bire ebiyia ase kera emambia, ee, obwegenwa bwao nigo bore obonene. 
Omonene nere egetari kiane, ayio naro omoyo one ontebirie, ase ayio nimosemeretie. 
Omonene nigo are omuya ase onde bwensi omoganyete, ee, nomuya ase oyo okomorigia. 
Nigo ere buya ase omonto okoba n’obotoereru na koganya ogotooreka gokorwa ase Omonene. 
Nigo ere buya ase omonto okobogoria rikorogoto ekero are omoke. 
Tiga aikaranse ao bweka akire‐kiri, ekiagera Omonene nere omotwekire egurube eyio. 
Tiga abeete omonwa oye ase riroba akire‐kiri, aande nabo ogosemeria korabeo. 
Tiga aonchore orosea rwaye gochia ase oyio okomoaka, na oyio aisaneke noborami. 
Omonene tagotuguta omonto goika kare na kare. 
Nonya omobekire ase omoichano, namororere amaabera naende, ase engencho y’obwanchani bwaye obonene bwa botambe. 
Ere tari gwancha gochanda Mwanyabaanto, gose kobaichania. 
Omonto ogotiringera inse abasibwa bonsi bare ase ense, 
gose koonchorana oboronge bw’omonto ase obosio bw’Oyore Igoro Mono, 
gose gokorekania ekiina ki’omonto onde bwensi. Inee! Ayi’Omonene nkoyaanchera are? 
Ning’o okwanete ring’ana, na rirorio rigakoreka, onye Omonene tarichiigete rikorwe? 
Inee! Amabe na amaya, tari korwa ase omonwa bw’Oyore Igoro Mono? 
Nase ki rende Mwanyabaanto ore moyo akwemurunganeria? Nase ki akwemurungania ekero akonyora egesusuro ase engencho y’ebibe biaye. 
Tiga twetuke intwe abanyene na toteeme chinchera chiaito, erio tomoiranere Omonene! 
Tiga toimokererie chinkoro chiaito igoro, na amaboko aito, gochia ase Nyasae ore igoro, totebe: 
“Intwe twasaririe asore, twabeire abatari abaigweri, naye togotwabera. 
“Aye gwetubire endamwamu na gwatochandire, gwaitire, gose tobeti namaabera. 
Aye omonyene gwetubire riire, ng’a ogosaba gwaito tikogoika ang’e. 
Aye gwatokorire twabeire eubi na abaangire, ase egati y’ebisaku bi’ense. 
“Ababisa baito bonsi baasamirie emenwa yabo gotosekerera. 
Obwoba ne chiirima biatocheire amo nogosaria na ogosirigwa. 
Amaiso aane nigo agoitera amariga amange buna amaache a rooche, ase engencho y’ogosirigwa kw’omochie bw’abaanto bane. 
“Amaiso aane abeire agoitera amariga atari gokama, gose korosa, 
goika ekero Omonene ararigererie korwa igoro na arore ayio onsi. 
Amaiso aane agerire nabeire nomoichano ase omoyo one ase engencho y’abaiseke bonsi b’omochie one. 
“Nigo narenge korigigwa buna enyoni nabwo baarenge ababisa bane engencho ende etaiyo. 
Bakanduta ase engoro ime inde moyo, na konduta amagena. 
Amaache agaichora agaeta ase omotwe one igoro, ngateeba: Omoerio one oikire. 
“Aye Omonene, nigo narangeretie erieta riao korwa ase engoro entambe, 
na aye okaigwa okorera kwane; toticha amato ao ase ogwechanda kwane ekero nkorera. 
Aye nigo kwang’igete ang’e ase rituko riria narerete asore, oganteebia: Toondoka! 
“Aye Omonene, kwarwanereire omoyo one na gwatooririe obogima bwane. 
Kwarorire obobe obo nakoreirwe, onache ekiina kiane ase oboronge. 
Aye kwarorire buna ababisa bane baganetie korusia egesiomba, na buna bakorire emeroberio emebe ase ’nde. 
“Aye Omonene, noigwete okorama kwabo, na emeroberio yabo yonsi igoro yane. 
Aya abwo bakondwania bagokwana na korengereria, nigo bare mamincha yane omobaso boira. 
Rora, ekero abwo baikaransete, na ekero bakoimoka, ninche engeero yabo bagochaaya. 
“Aye Omonene, nobaakane koreng’ana nogokora kw’amaboko abo. 
Otube chinkoro chiabo nomosunte; okoragereria kwao kobe igoro yabo. 
Aye Omonene, babwatie nendamwamu yao, obasirie, basire korwa inse y’erioba!” 
