﻿ISAYA.
46.
“Beli yaguure inse, na Nebo yekumbire; emegwekano ye chinyasae chiria eberekire ne ching’iti ne chiombe; ebinto ebio bibogoirie nigo bire chigurube chindito ase ching’iti echio chiarosire. 
Chinyasae echio nigo chiekumbete gochia inse amo, tichikonyara gotooria chigurube chiria, echio chinyene nigo chigwoswa chiairwa ase obosomba. 
“Inwe ab’ororeeria rwa Yakobo, inwe abatigari bonsi b’Abaisraeli, inwe aba nabeire mbabogoretie korwa ekero mwarenge ase chinda chi’abanyoko, na korwa ekero mwaagatire ase amaboko ’abanyoko, inyigwere! 
Ninche ndabe amo nainwe nonya ngoika engaki y’obogotu bwaino, ekero morabe mwagotire kegima ne chimbuche chiarabire se, nimbe nkobabogoria. Ninche nabatongete, nimbarende, nimbabogorie na kobatooria. 
“Ning’o moranyare kondeng’ania ng’a imbe buna oyio? Ning’o moranyare kongwekania ng’a togwekane nere? 
Abanto nigo bakoumora chitaabu korwa emebuko yabo na korenga chifeta nekerengero, erio baakanera omoturi bw’etaabu, nere oyeroisia yaba enyasae, na abanto abwo batungama bosio bw’enyasae eyio bayesasiima. 
Erio bayeimokia bayebeeka ase amareko abo, bayebogoria, bayetereka aase aye, yabeera aroro; tekonyara gotigera korwa aase agwo. Omonto naisa korera ase enyasae eria, ero tekonyara komoigwa gose komotooria korwa ase emechando yaye. 
“Inwe abasaria, inyora amang’ana ayio, moyarengererie mono. 
Inyora amang’ana abeete kare; inche ninche Nyasae, onde tari; ninche Nyasae, onde tari onga buna inche. 
Korwa omochakano nigo naraaretie aya agochia koba; agwo kare nigo nabaanete aya ataraba, ngateeba: Emeroberio yane goika eikerane, onsi aya nganetie ninyakore. 
Nindangerie ensoti eche korwa moocha, na omonto okorwa ense y’aare nache akore aya naroberetie. Aya nakwanire, goika nyaikeranie, na aya narobeirie, goika nyakore. 
“Inwe abamore abanyabigoti bikong’u, inwe abamore aare korwa ase oboronge, inyigwera! 
Narentire oboronge bwane ang’e, tibori aare, na ogotooreka kwane tikogoteebana; nimbeeke ogotooreka ase Sayoni; ning’ee Abaisraeli obonene bwane.” 
