﻿OGOTEERA GWA SULEMANI.
3.
Botuko ekero naraire borere bwane, nkamorigia oria omoyo one bwanchete, nkamorigia, korende tinamonyora. 
“Erio nkaimoka nkagenda ase omochie, ng’aeta ase chinchera chiaye na ase ebiooreri biaye, nkarigia omwanchi bw’omoyo one.” Nkamorigia, korende tinamonyora. 
Ekero abarendi barenge goetanana omochie koyorata, bakanyoora inche, na inche nkababooria, “Mwarora omwanchi bw’omoyo one?” 
Ase obwango obwo naruete ase abarendi abwo, nkanyora omwanchi bw’omoyo one. Nkamotarera tinamotiga agende; nigo namorentete mwa baba, nkamosoyia gochia ase akanyomba gokorara. 
Inwe abakungu ba Yerusalemu, nigo nkobasorora, nkobatiania ase chingabi na ase chinsune chi’orosana ng’a timobaisa gotabobora obwa’nchani gose koboichania, goika bobe bwancheranire obonyene. 
Ngeto ki keria kegocha korwa ase erooro kenga buna rikundesi ri’erioki? Ninki eke keagete amaguta a manemane na ubani, ebinto ebio bikoonigwa nabakori ebiasara. 
Rora aaria, ekerogo gi’okobogoreria Sulemani, geetananire nabasaacha emerongo etano nomo, abare chituoni chi’Abaisraeli. 
Abwo bonsi nigo beboeranetie emeyio ya birende, na nigo bare abanto bamanyete korwana esegi. Kera oyomo nigo abogoreti omoyio obirende, orendete ase okogoswa kwa botuko. 
Omorwoti Sulemani nigo eroiseretie ekerogo keria korwa ase emete ya Lebanoni. 
Amagoro aye kegotenenera nigo aroiseirie chifeta, na ekiegeko kiaye nigo kiaroiseirie chitaabu; egeikaransero kiaye nigo giatubire negetambaa kere monyinga. Abakungu ba Yerusalemu nigo bagechaberete ime, bare nomoyo bw’ogwancha. 
Inwe abasubati ba Sayoni, inchwo morore Sulemani omorwoti obegeete ekiore keria ng’ina amobeekerete ase rituko riria Sulemani akoreretwe enyangi, rituko riria ri’omogooko bw’enkoro yaye. 
