﻿Ogoteera gwa Sulemani.
1.
Ogoteera gwa Sulemani okwo kore okuya goetania amatera onsi. 
Tiga anyunyunte nokonyunyunta kw’omonwa oye. Ekiagera obwanchani bwao nobuya kobua edivai. 
Amaguta ao akweakwa nigo are ne rimisu rigiya; erieta riao nigo ringa buna amaguta aumoirwe, ase ayio abakungu nigo bagwanchete. 
Ing’use nkobwatie, tominyoke kogenda. Omorwoti ondetire ase enyomba yaye. Ntokogokere na kogochengera, ntotogie obwanchani bwao kobua edivai. Ekeene, nakio abakungu bagwancherete. 
Inwe abakungu ba Yerusalemu, inche nigo inde omomwamu ti, noyo bw’okogokia. Nigo inga buna chiema chia Kedari, naende buna ebitambaa bi’ogosungwa bia Sulemani. 
Timobaisa kondigereria, ekiagera inde omomwamu ti; nomobaso bw’erioba onsambire. Abamura ba baba nigo bambeete, bakambeeka korenda emegondo y’emesabibu, korende omogondo one bw’emesabibu tinarendete. 
Aye omwanchi bw’omoyo one, nteebie ng’ai okorisia riicho riao. Ng’ai okoriira riakenderera mobaso gati? Nase ki ndabe nkona‐gotayaya ase egati y’amaicho ’abagisangio bao? 
Aye ore omoseera kobua abakungu bonsi; onye tomanyeti, bwatia amabarato e riicho, obe gokorisia chimanwa chiao chie chimbori ang’e ne chiema chi’abarisia. 
Aye omwanchi one, nigo ngokoreng’ania nebarasi eaberi ekong’usa egari ya Farao. 
Chinsea chiao nechinseera, chichabeire n’ebinto bi’oboseera, ne rigoti riao nigo richabeire ne chisonoi. 
Intwe ntokoroiserie ebinyuri bie chitaabu bi’ogwechabera, ebitonire ne chifeta. 
Ekero omorwoti arenge aase aye agotimokera, amaguta aane akorokwa narada agatioka rimisu rigiya. 
Omwanchi one nigo are ase ’nde buna omobuko o manemane, oyo nkobeeka ase egekuba kiane gati gati yechimbeere chiane. 
Omwanchi one nigo are ase ’nde buna egesago ki’ebisicha bikorokwa hena, bire ase emegondo y’emesabibu y’Eni‐Gedi. 
Naama! Aye omwanchi one, naki ore omoseera mono! Ee, nabo ore omoseera mono. Ekieni ki’amaiso ao nigo kenga eki’amaruma. 
Aye omwanchi one, nigo ore omoseera. Ee, aye nigo ore oyo bw’okogokia, oborere bwaito nigo borabe obonyansi bore machani. 
Ebisigisa bi’enyomba yaito nebi’emecharake, ne chindote nechi’emetarakwa. 
