﻿ZABURI.
148.
Motogie Omonene! Motogie Omonene korwa agwo igoro! Momotogie agwo igoro mono! 
Inwe abamalaika baye mwensi, motogie, nainwe emeganda yaye yonsi, motogie! 
Aye risase, na aye omotienyi, motogie, nainwe ching’enang’eni chionsi chikobara, motogie. 
Inwe igoro ya igoro chionsi, motogie Nainwe amaache are igoro ya igoro, motogie! 
Ebinto ebio bionsi tiga bitogie erieta ri’Omonene, ekiagera nere ochiigete, na ebio bigatongwa. 
Omonene obibeekire bigenderere kobao goika kare na kare; nigo abibeekerete ogochika okwo gotaetanigwe. 
Motogie Omonene korwa ase ense, nainwe ebitongwa bie chinyancha ne chindiba chionsi! 
Motogie, inwe omorero na amagena y’embura, na obokeng’entu, na amare, na aye omwaga omotindi ogoikerania aya achiigete! 
Motogie Omonene, inwe ebitunwa na ebigoro bionsi, nainwe emete ekwama amatunda, na emecharake yonsi, 
nainwe ching’iti chi’orosana na echitugire chionsi, nainwe echikwagura amo ne chinyoni chionsi! 
Motogie inwe abarwoti b’ense na abanto bonsi, nainwe abagaambi na abanachi ebiina mwensi, 
nainwe abamura na abaiseke mwensi, nainwe abanto abagotu na abana. 
Inwe mwensi, togia erieta ri’Omonene, ekiagera erieta riaye nario rioka rire rinene rikobakwa; obonene bwaye nigo boetanaine ense na igoro. 
Omonene omeririe abanto baye ching’unchara, erinde abachenu baye bonsi bamotogie; ee, Abaisraeli abwo bare ang’e nere bamotogie! Motogie Omonene! 
