﻿ZABURI.
146.
Togia Omonene! Aye omoyo one, togia Omonene! 
Nimbe ngotogia Omonene kongendererete koba moyo, ninterere Nyasae one ase okomotogia kondagenderere kobao. 
Timobaisa gosemeria abagaambi, gose Mwanyabaanto abwo batanyaare gokonya kende. 
Ekero omoika orure ase omonto, ere nigo akoirana ase amaroba, ase arwete. Ase rituko erio erio emeroberio yaye nigo egosira. 
Nasesenirie omonto oyio Nyasae o Yakobo are ogokonywa kwaye, oyio osemeretie Omonene, Nyasae oye, 
Nyasae oria otongete igoro na ense, na enyancha, na ebinto bionsi bire imeo. Ere nigo agendererete koba omwegenwa goika kare na kare. 
Omonene nigo akoa abwo bagokorerwa bobe oboronge bwabo, na abare nenchara nigo akobaa endagera. Omonene nigo agosibora abwo basibire. 
Omonene nigo akoramokia emeuko amaiso na kogororokia abwo bakumbirwe gochia inse. Omonene nigo anchete abanyaboronge. 
Omonene nigo akorenda abanto abageni, nigo akoa chintakana na ababoraka ogosemeria, korende chinchera chi’abakori amabe nigo agochisiria. 
Omonene nagambe goika kare na kare; aye Sayoni, Nyasae oo nagambere ebiaare bionsi. 
