﻿ZABURI.
143.
(Ogoteera gwa Daudi) Aye Omonene, oigwe ogosaba kwane; ase engencho y’oboronge bwao otegerere ogosorora kwane, ong’iranerie ase engencho y’obwegenwa bwao. 
Tobaisa kong’ira inche omosomba oo ase ekegambero, ekiagera ase abwo bare moyo onde tari ore omooronge asore. 
Omobisa one obeire okorigia omoyo one; obeire ogontiringera inse ase amaroba, ong’ikaransirie ase omosunte, nabeire buna omonto okwete kare. 
Ase ayio omoika ore ime yane oborirwe chinguru, na enkoro yane yairianyekire. 
Nigo ’nkoinyora amatuko a kare, na korengereria igoro y’ogokora kwao gwonsi, naba ’nkona‐koiranerera emeremo y’amaboko ao. 
Nigo ’nkorambora amaboko aane goocha asore, omoyo one nigo ore nerang’o asore, buna riroba rirang’ete embura. 
Aye Omonene, ing’iranerie bwango! Omoika ’nkong’erera ore! Tombisa obosio bwao mbaise koba buna abwo bakogeenda ase abakuure. 
Kera emambia omanyie obwanchani bwao bogenderere botambe, ekiagera naye ’nyegenete. Inyorokererie enchera ’ngwenerete kobwatia, ekiagera narure omoyo one asore. 
Aye Omonene, ’ntoorie korwa ase ababisa baane; nagotameire ombise. 
Inyorokererie imanye gokora ogwancha kwao, ekiagera naye ore Nyasae one! Tiga Omoika oo omuya ondaae ase enchera ere endonge. 
Aye Omonene, ing’a obogima oboyia ase engencho y’erieta riao; na ase engencho y’oboronge bwao rusia omoyo one korwa ase emechando. 
Ase engencho y’obwanchani bwao bwa botambe, siria ababisa baane; basirie kegima bonsi abagochaanda omoyo one, ekiagera inche nigo ’nde omosomba oo. 
