﻿ZABURI.
141.
(Ogoteera kwa Daudi) Omonene, nigo ’ngokorangeria, ayerera oche bwango! Tegerera oigwe eriogi riane ekero ’ngokorangeria. 
Bwanchere ogosaba kwane buna ubani, na amaboko aane aimokereirie igoro oyanchere buna ekeng’wanso kia mogoroba! 
Aye Omonene, beeka omorendi ase omonwa one, abe okorenda ebikoba biane. 
Totiga enkoro yane egobere yanche amang’ana amabe. Tontiga inare gokora ayaare amabe amo nabwo bagokora ebibe; tingosanga amo nabarabwo ase emeyega. 
Tiga oyore omonyaboronge ang’ake na antogonyere ase obwanchani, okwo nigo konga buna amaguta akweakwa, na omotwe one toyaanga. Botambe nigo ogosaba kwane kore mamincha y’abakori amabe. 
Ekero abagaambi baabo baraturunkanigwe ase egetare, abanto ’mbaanche amang’ana aane ng’a n’amaya. 
Amauga aito nigo asiareire ase egesieri n’erieta riikoro engencho yaye egesieri gose omogwa bw’embeera, buna ebisamunye bie chiinko, gose ebi’amagena bigosiarerwa ase riroba igoro. 
Korende amaiso aane nigo arigereretie goocha asore, aye Omonene; naye ’ngotamera, tibwanga omoyo one. 
Indende korwa ase emeeto bantegeire; na korwa ase amareba y’abakori amabe. 
Tiga abakori amabe abwo bagwe ase ebichanga biabo abanyene, korende inche ’ntooreke. 
