﻿ZABURI.
130.
Aye Omonene, nigo nkorera asore, korwa ase chindiba ime. 
Omonene, igwa eriogi riane; tegerera oigwe eriogi ri’ogosaba kwane. 
Aye Omonene, onye ’nkware gokora omobaro bw’ebibe, ning’o ore konyaara gotenena ase obosio bwao? 
Korende aye nigo ore omwaberi, erinde onyaare koirokwa. 
Inche nigo ’nganyete Omonene, ee, omoyo one nigo omoganyete; nigo ’nsemeretie ring’ana riaye. 
Omoyo one nigo oganyete Omonene, kobua buna abarendi bakoganya ogokiamoka, ee, kobua abarendi baganyete ng’a bokie. 
Inwe Abaisraeli, mosemerie Omonene, ekiagera Omonene nigo are nobwanchani bogendererete botambe, na ogotooreka okonge nigo gokorwa asare. 
Ere naboorie Abaisraeli korwa ase ebibe biabo bionsi. 
