﻿ZABURI.
129.
“Ababisa nigo batochaandete korwa oboke bwaito.” Nabo Abaisraeli bagoteeba. 
“Ee, barabwo nigo batochaandete korwa oboke bwaito, korende tibana‐gotobua. 
Bakang’ororia emegongo yaito buna emegondo. Bakayetambeyia emeng’ororia yaabo.” 
Omonene nigo are omonyene oboronge, ere obutoire chingori chi’abakori amabe. 
Abwo bonsi bageechete Sayoni, taga basookigwe na koiranigwa magega. 
Barabwo tiga babe buna obonyansi bore kerama igoro, bogosusana botarakina; 
tibori goichora okoboko kw’omosangereria, gose kobogwa omosaima okoboko. 
Abanto bagoeta inchera tibakonyaara goteeba, “Omonene abasesenie!” Gose goteeba, “Nkobasesenia tore inwe ase erieta ri’Omonene!” 
