﻿ZABURI.
124.
(Ogoteera kwa Daudi) Inee! Naki yare goocha koba onye Omonene atabeete ase ensemo yaito? Tiga Abaisraeli bairanerie. 
Onye Omonene atabeete ase ensemo yaito, ekero abanto batoumokerete gotorwania, 
nanga nigo batomerete gatore moyo, ekiagera babete n’endamwamu enene ase tore; 
naende emerindo nigo yarenge goocha gotokorobanania, eooro nigo yarenge goocha goeta igoro yaito; 
ee, amaache aichoreranete nigo arenge goocha gotomera kegima. 
Omonene atogigwe, ekiagera tatoruete totaboranwe namaino y’ abanto abwo. 
Emioyo yaito yatoorekire buna enyoni egotooreka korwa ase egesuguni ki’omotegi. Egesuguni kiabutokire, naintwe twaminchoirie na gotama. 
Ogokonywa gwaito nigo gokorwa ase erieta ri’Omonene, oyio otongete igoro na ense. 
