﻿ZABURI.
119.
Inaki bagasesenirie abwo chinchera chiabo chire chindonge! Barabwo abagendererete kobwatia amachiiko y’Omonene! 
Mbasesenirie abwo barendete oborori bwaye, abwo bakorigia Omonene ne chinkoro chiabo chionsi, 
abwo batari gokora amabe, korende nigo bakobwatia chinchera chiaye. 
Aye gwatoeire amachiiko ao, toyarende nomokia. 
Nigo nganetie ng’a chinchera chiane chibe chindonge, erinde ndende emeroberio yao echiikire. 
Rirorio tingosookigwa ekero ’ndabe ’ndigereretie amachiiko ao onsi. 
Ekero ’ndabe neorokereirie okogaamba kwao kw’oboronge, rirorio nimbe nkona‐kogotogia nenkoro endonge. 
Ninyigwere amachiiko ao; tobaisa gontiga. 
Naki omonto omosae arakore arende obochenu bw’obogima bwaye? Nase okorenda orogeendo rwaye kobwatekana ne ring’ana riao. 
Inche nigo ’ngokorigia nenkoro yane yonsi; ondende timbaisa gotiga amachiiko ao. 
Nagachire ring’ana riao ase enkoro yane ime, ng’a tinkora ebibe asore. 
Aye Omonene nigo osesenegete. Inyorokererie emeroberio yao echiikire. 
Nimbe ’nkona‐koraria aya onsi gwanchiikire nomonwa oo. 
Nigo ’nde n’omogooko ase obonene bwe chinkuma chiao; kobua koba nobotenenku obonene. 
Nimbe ’nkorengereria mono igoro y’amachiiko ao, naende ’mbe ’nkorigereria chinchera chiao chionsi. 
Ningokere emeroberio yao echiikire; tinkweba ring’ana riao. 
’nkorere amaya, inche omosomba oo, erio nario ’ndabe moyo, ’mbwate ring’ana riao. 
Ndamokie amaiso, inyare korora amang’ana y’ogokumia y’amachiiko ao. 
Inche nigo ’nde omoeti ase ense, tobaisa kombisa amachiiko ao. 
Enkoro yane yarang’ire namaiga, chingaki chionsi nigo eganetie komanya okogania kwao. 
Aye nigo ogotogonyera abanto abaenenu, abwo baragereirie, baria batigire kobwata amachiiko ao. 
Onduserie ogochecherigwa na ogochaaywa kwabo, ekiagera inche nigo ’ndendete oborori bwao. 
Abagaambi nabaikaransa amo koroberia bankorere bobe, korende inche, omosomba oo, nigo nkona‐koiranerera emeroberio yao echiikire. 
Nigo ’ngokerete oborori bwao, ekiagera nabwo bogonseemia. 
Omoyo one otiringeirwe inse, ’ng’a obogima oboyia koreng’ana ne ring’ana riao. 
Ekero naorogetie amakora aane nigo kwanyigwete; ’nyorokererie emeroberio yao echiikire! 
Inyorokererie, erinde imanye chinchera chi’amachiiko ao, nimbe ’nkona koiranerera ogokora kwao kw’ogokumia. 
Omoyo one obuirwe n’emechando, ’mbeeke chinguru koreng’ana ne ring’ana riao. 
Nduserie chinchera chi’obong’ainereria chibe aare korwa ase ’nde, ase obuya bwao ’nyorokererie amachiiko ao. 
Inche nachoorire enchera y’ekeene, nayabeekire motwe aria gwanchiikire. 
Aye Omonene, nabwatereire oborori bwao, tobaisa gontiga ’nsookigwe. 
Ekero oramanyie enkoro yane obuya bwao, niminyoke ’nyigwere amachiiko ao. 
Aye Omonene, ’nyorokererie enchera y’emeroberio yao echiikire; na inche nin’yerende goika omoerio. 
Imanyie amachiiko ao, erinde ’n’yabwate na koyarenda nenkoro yane yonsi. 
Indaae ’mbwatie enchera y’amachiiko ao, ekiagera inche nigo ’ngokirie naro. 
Oonchore enkoro yane. Yanche oborori bwao, na toyetiga ebe nokogania kwe ribero. 
Oyaonchore amaiso aane tarigereria amang’ana atagwenereti; ing’a obogima oboyia ’mbwatie chinchera chiao. 
Ikerania ase ’nde, inche omosomba oo, eira kwandierete, eira eyio okoa abakoirogete. 
Induserie amang’ana y’ogochaaywa inyirogete, ekiagera aya gwachiikire nigo are amaya. 
Rora, inche nigo ’nganetie koigwera amachiiko ao; ing’a obogima oboyia goetera ase oboronge bwao. 
Aye Omonene, orokia ase ’nde obwanchani bwao botakoera, naende ontoorie buna kwandierete eira. 
Erio inyore ring’ana ’ndairanerie abwo bagonchecheria, ekiagera nigo ’nyegenete ring’ana riao. 
Tobaisa korusia nonya ng’ake ring’ana ri’ekeene korwa ase omonwa one, ekiagera nigo ’nsemeretie aria gwachiikire. 
Nimbe ’nkoigwera amachiiko ao botambe goika kare na kare. 
Nimbe ’ngotaara ase obosibore, ekiagera neorokereirie amachiiko ao. 
Nindue oborori bwao ase amasio y’abarwoti ’ntari nobosooku. 
Inche nigo ’nde n’omogooko ase amachiiko ao, ekiagera ayio nin’yanchete. 
Nindambore amaboko aane ’mbwate amachiiko ao nyanchete, na nimbe ’nkorengereria igoro y’emeroberio yao echiikire. 
Inyora ring’ana riao gwakwanete ase ’nde inche omosomba oo, ekiagera ase rirorio kwang’eire ogosemeria. 
Egekondemia ase emechando yane n’eke: Ring’ana riao nigo rigonkora naba omoyia. 
Abanto abamwenu nigo bagonchecheria mono, nonya naboigo tindi gotiga amachiiko ao. 
Aye Omonene, ekero ’nkoinyora okogaamba kwao korwa kare, nigo ’nkoba nokoremigwa. 
Nigo ’nde n’okogeechigwa okonene ase engencho y’abakori amabe, ekiagera bagosaria amachiiko ao. 
Ekero imenyete ase enyomba yane y’obogeni, nabeire ’nkona‐gotererera emeroberio yao echiikire. 
Aye Omonene, nigo ’nkoinyora erieta riao botuko, nigo ’ndendete amachiiko ao. 
Oko nakwo ogosesenigwa kwane, ng’a nabeire ’ndendete amachiiko ao. 
Omonene, aye negetare kiane; nariire eira koigwera amang’ana ao. 
Nigo ’nkogosorora nenkoro yane yonsi: Ondorere amaabera koreng’ana ne ring’ana riao. 
Nigo nareengereretie igoro ye chinchera chiane, ’nkaonchora amagoro aane ’nkabwatia oborori bwao. 
Nigo ’nkoayerera, tingotebana koigwera amachiiko ao. 
Chingori chi’abakori amabe chiang’etananire, korende tinkweba amachiiko ao. 
Nigo ’nkobooka botuko gati kogoakera ng’a mbuya mono, ekiagera okogaamba kwao nokoronge. 
Inche nigo ’nde omogisangio bw’abwo bonsi bakoirogete, abwo barendete amachiiko ao. 
Aye Omonene, obwanchani bwao bogendererete botambe nigo boichire ase ense, ’nyorokererie imanye emeroberio yao echiikire. 
Aye Omonene, koreng’ana ne ring’ana riao gwankoreire inche omosomba oo obuya obonge. 
Inyorokererie imanye kogaamba buya na imbe ne chisemi, ekiagera nigo ’nyegenete amachiiko ao. 
Ekero konya ’ntaraegwa egesusuro, nigo nareenge omosiru, korende bono nigo ’ndendete ring’ana riao. 
Aye nigo ore omuya, naende nigo ogokora amaya, ase ayio ’nyorokererie emeroberio yao echiikire. 
Abanto abamwenu nigo bakongamba na gokwana oborimo igoro yane, korende inche nigo ’ndendete amachiiko ao nenkoro yane yonsi. 
Chinkoro chiabo nigo chinorete buna ebitinya, korende inche nigo ’nde n’omogooko ase amachiiko ao. 
Nigo yabeete buya mono ase ’nde konyora egesusuro keria, ekiagera ayio naro agerete neorokereirie emeroberio yao echiikire. 
Amachiiko ao gwakwanete nigo are amaya ase ’nde, kobua chitaabu ne chifeta chilifu chinyinge. 
Amaboko ao naro ambombete akandoisia, ing’a obong’aini, erinde inyare kweorokereria amachiiko ao. 
Abanto abwo bakoirogete ’mbandore bagoke, ekiagera ’nsemeretie ring’ana riao. 
Aye Omonene, nimanyete ng’a ebiina biao nebia boronge, naende ase bwegenwa bwao, nigo kwang’eire egesusuro gi’okondongeyia. 
Tiga obwanchani bwao bogendererete botambe bondemie, koreng’ana buna kwariire eira ase ’nde, inche omosomba oo. 
Ondorere amaabera, erinde imbe moyo; inche nigo ’ngokerete amachiiko ao. 
Tiga abanto abamwenu barore obosooku, ekiagera bankoreire bobe engencho ende etaiyo, korende inche nigo ’nkona koiranerera amachiiko ao. 
Tiga abanto abwo bakoirogete bache ase ’nde. Abwo bamanyete oborori bwao. 
Tiga enkoro yane ebe etari na komocha ase emeroberio yao echiikire, erinde timbaisa konyora obosooku. 
Omoyo one oganyoire ase okogania ogotooreka kwao, nigo ’nsemeretie ring’ana riao. 
Amaiso aane asundokire ase okoganya ring’ana riao, nigo ’nkoboria, “Indi aye orache kondemia?” 
Inche nabeire buna ekerandi gi’edivai gekorire korwa ase risankwa kere ase erioki, nonya naboigo, tindeba emeroberio yao echiikire. 
Ngoika ririri inche omosomba oo ’ndagenderere koremereria? Ndiriri oranache ekiina ase abachaandi baane? 
Abanto abamwenu batabwateti amachiiko ao nigo bankuunyeire emetaro. 
Amachiiko ao onsi nigo are ay’ekeene, korende abanto nigo bagonchaanda ase okong’aacha. Koranche onkonye! 
Barabwo babeire ang’e gonsiria aiga ase ense, nonya naboigo, tintigeti amachiiko ao. 
Ing’a obogima oboyia ase engencho y’obwanchani bwao bwa botambe, erinde ’mbwatie oborori bwao gwakwanete. 
Aye Omonene, ring’ana riao nigo riteneine bokong’u aaria igoro goika kare na kare. 
Obwegenwa bwao nigo bogendererete ase ebiaare bionsi; aye gwatenenirie ense aase aye, ero nigo eteneine bokong’u. 
Ebinto bionsi nigo bigendererete kobao goika reero buna aye kwabichiigete, ekiagera bionsi nigo bikogokorera. 
Onye ogochika kwao gotarenge omogooko one nanga nigo nasirete ase emechando yane. 
Inche tinkonyaara kweba amachiiko ao, ekiagera aye kwang’eire obogima oboyia goetera ase aro. 
Inche noyoo, ntoorie! Nigo nabeire ’nkona‐koinyora amachiiko ao. 
Abakori amabe nigo bakomboera ng’a bansirie, korende nigo ’nyigwerete oborori bwao. 
Narorire ng’a gento kende tikeri kere noboikeranu, korende amachiiko ao namaikeranu. 
Aa! Naki inyanchete amachiiko ao! Naro nkona‐koiranerera omobaso boira. 
Amachiiko ao nigo agonkora naba omong’aini kobua ababisa baane, ekiagera ayio nigo are ase ’nde chingaki chionsi. 
Inche nigo ’nde nokomanya okonge kobua aborokia baane, ekiagera nigo ’nkona‐korengereria mono igoro y’oborori bwao. 
Nigo ’manyete amange kobua abanto abagotu, ekiagera ’mbwatete amachiiko ao. 
Nigo ’ntangete amagoro aane tabaisa kobwatia enchera ende yonsi y’obobe, erinde ’nyaare korenda ring’ana riao. 
Tindi gotiga aya gwachiikire, ekiagera naye kwanyorokereirie. 
Amang’ana ao naki are amansu ase ’nde! Ee, nigo are amansu ase omonwa one kobua obooke. 
Amachiiko ao ang’eire obong’aini, ase ayio nigo ’ngeechete kera enchera y’obong’ainereria. 
Ring’ana riao netaya ase amagoro aane na omobaso ase enchera ’ngoeta. 
Natianire ng’a ning’ikeranie eira eyio yane; nimbwatie aria onsi gwachiikire ase oboronge. 
Aye Omonene, nigo nchaandegete mono, ing’a obogima oboyia koreng’ana ne ring’ana riao. 
Omonene, anchera ogosaba kwane kw’ogoaka ng’a mbuya mono, naende onyorokererie aya gwachiikire. 
Ase chingaki chionsi tinaboegererete obogima bwane, na tinebete amachiiko ao. 
Abakori amabe babeekire omoeto ase ’ngoeta, korende tintantaniri korwa ase amachiiko ao. 
Oborori bwao nabwo omwando one goika kare na kare, ee, nabwo enkoro yane egokerete mono. 
Narure enkoro yane erende amachiiko ao, botambe goika omoerio. 
Nigo ’ngeechete abanyamenwa ebere, korende nigo ’nyanchete amachiiko ao. 
Aye naye ore obwebisero bwane, na enguba yane, nigo ’nsemeretie ring’ana riao. 
Inwe abakori amabe, karue ase ’nde, erinde ’nyaare korenda amachiiko a Nyasae one. 
Ing’a chinguru buna kwariire eira, erinde imbe moyo. Tobaisa gontiga ’ndore obosooku ase ogosemeria kwane. 
Imboanie kegima, ’ngitere buya, inyare gosika botambe emeroberio yao echiikire. 
Aye nigo okwanga abwo bagotantana korwa ase emeroberio yao echiikire; ee, obong’ainereria bwabo nigo bore bosa. 
Aye nigo obarete abakori amabe bonsi b’ense koba bosa buna amabiria; ase ayio inche nigo inyanchete oborori bwao. 
Omobere one nigo okoiguswa ore n’obwoba asore, naende nairokire ebiina biao. 
Inche nakorire amang’ana are ay’ekeene na ay’oboronge; tontiga ase abachandi baane. 
Ontenenere inche omosomba oo inyore ebisio; totiga abanto abamwenu bankorere bobe. 
Amaiso aane arosire ase okoganya ogotooreka gokorwa asore, amo nogoikeranigwa kw’eira yao y’oboronge. 
Nkorere amaya inche omosomba oo koreng’ana nobwanchani bwao bogendererete botambe, naende onyorokererie ’manye emeroberio yao echiikire. 
Inche nigo ’nde omosomba oo, ing’a okomanya, erinde ’manye oborori bwao. 
Engaki yaikire aye Omonene ogwenerete gokora ogokora kwao, ekiagera basaririe amachiiko ao. 
Ase ayio inche nigo ’nyanchete amachiiko ao kobua etaabu, ee, kobua etaabu enkenonoku. 
Na ase ayio nigo ndoche ng’a amachiiko ao onsi namaronge. Nigo ngeechete kera enchera y’obong’ainereria. 
Oborori bwao nigo bore obw’ogokumia, ase ayio nigo mbobwatete nomoyo one bwonsi. 
Ekero amang’ana ao amaanoirwe nigo akorua omobaso na kobaa abatamanyeti amange obong’aini. 
Nigo ngwasamia omonwa one na gwesesa, ekiagera nigo ’nde namaiga imanye amachiiko ao. 
Ndigererie, ondorere amaabera buna egwenerete abwo banchete erieta riao. 
Kong’ia orogendo rwane koreng’ana ne ring’ana riao, totiga obobe bongambere. 
Mboorie korwa ase ogochaandwa kwa Mwanyabaanto, erio nario ndanyaare korenda amachiiko ao. 
Mbarerie inche omosomba oo obosio bwao, na onyorokererie emeroberio yao echiikire. 
Nigo nkorera, naitera amariga amange mono, ekiagera abanto tibarendeti amachiiko ao. 
Aye Omonene nigo ore omonyene oboronge, na okogaambera kwao n’okwaboronge. 
Gwachiikire oborori bwao ase oboronge, na ase obwegenwa bwonsi. 
Risemi riane riandire, ekiagera ababisa baane bebire ring’ana riao. 
Ring’ana riao riateemirwe, nigo riteneine bokong’u, na inche omosomba oo nigo ndianchete. 
Nigo ’nde oyo otasikiri, naende inchayire, korende nonya naboigo tinkweba amachiiko ao. 
Oboronge bwao nigo bore obwa kare na kare, n’amachiiko ao nigo are ay’ekeene. 
Emechando na omoichano bianyorire, korende nigo ’ngokerete amachiiko ao. 
Oborori bwao nigo bore oboronge goika kare na kare; on g’e okomanya, erinde imbe moyo. 
Aye Omonene, nigo ’ngokorangeria nenkoro yane yonsi, inyigwe, na inche nimbwate emeroberio yao echiikire. 
Nigo ’nkorera asore, ontoorie, erinde ’mbwate oborori bwao. 
Nigo ’nkobooka mambia chuni gokorangeria ng’a onkonye, ninsemeretie amang’ana ao. 
Nigo nkogeesa botuko bokia, mbe nkona‐koiranerera ring’ana riao. 
Omonene, igwa eriogi riane ase engencho y’obwanchani bwao botari koera; ong’e obogima oboyia koreng’ana noboronge bwao. 
Abwo bakominyokera amabe bambereire ang’e; abwo nigo bare aare korwa ase amachiiko ao. 
Korende aye Omonene nigo ore ang’e, n’amachiiko ao onsi nigo are ay’ekeene. 
Korwa kare nimanyete korwa ase oborori bwao ng’a naye kwabobegete bobeo goika kare na kare. 
Rigereria emechando yane, ontoorie, ekiagera tinyebeti amachiiko ao. 
Indwanerere, omboorie, ong’e obogima oboyia koreng’ana ne ring’ana riao. 
Ogotooreka nigo kore aare korwa ase abakori amabe, ekiagera barabwo tibari korigia emeroberio yao echiikire. 
Aye Omonene, amaabera ao nigo are amanene; ong’e obogima oboyia koreng’ana nokogaamba kwao. 
Abagonchaanda na abare ababisa baane nigo bare abange, korende tinkogobera ase okorwa oborori bwao. 
Ekero nkorigereria abatari abegenwa nigo nkogeechigwa nabarabwo, ekiagera tibabwateti ring’ana riao. 
Aye Omonene, rora buna nyanchete amachiiko ao! Ong’e obogima oboyia koreng’ana nobwanchani bwao botari koera. 
Amang’ana ao onsi nay’ekeene, na okogaamba kwao gwonsi kw’oboronge nogwa kare na kare. 
Abagaambi nigo bagonchaanda bosa ’ntari na komocha, korende enkoro yane nigo eirogete amang’ana ao. 
Nigo nkogokera ring’ana riao, naba buna oyo onyorire ebisakorwa ebinge. 
Nigo ngeechete kegima oborimo bonde bwonsi, korende nigo nyanchete amachiiko ao. 
Ara gatan’akabere ase rituko nigo ’nkogotogia, ase engencho y’emeroberio yao y’oboronge echiikire. 
Abwo banchete amachiiko ao nigo bare n’omorembe omonene mono, kende tikeri gekobagoocha. 
Aye Omonene, nigo ’nganyete ng’a ontoorie, naende nigo ’ngokora buna amachiiko ao agoteeba. 
Omoyo one nigo obwatete oborori bwao, nigo ’mbwanchete mono. 
Nigo imbwatete amachiiko ao, na oborori bwao, ekiagera nigo omanyete chinchera chiane chionsi. 
Aye Omonene, tiga okorera kwane goike ase obosio bwao; ing’a obong’aini koreng’ana ne ring’ana riao! 
Tiga ogosaba kwane goike asore; ontoorie koreng’ana ne ring’ana riao! 
Nimbe ’nkona‐kogotogia nebikoba biane, ekiagera aye kwanyorokereirie ’manye emeroberio yao echiikire. 
Oromeme rwane ’ndoteere ring’ana riao, ekiagera amachiiko ao onsi nigo are amaronge. 
Okoboko kwao, tiga kobe ang’e gonkonya, ekiagera nachoorire kobwatia amachiiko ao. 
Aye Omonene, nigo ’nde namaiga ng’a ontoorie, n’amachiiko ao nigo angogetie mono. 
Tiga omoyo one obe moyo, erinde ’ngotogie, na aya gwachiikire, tiga ankonye. 
Inche nasirire buna eng’ondi ensiru, ’ndigie inche omosomba oo, ekiagera tinyebeti amachiiko ao. 
