﻿ZABURI.
113.
Motogie Omonene! Inwe abasomba b’Omonene, motogie, ee, ritogie erieta riaye! 
Erieta ri’Omonene ritogigwe korwa bono goika kare na kare! 
Erieta ri’Omonene ribe rigotogigwa korwa ekero risase rikooroka goika ekero rikorimera! 
Omonene nigo are omonene igoro ase ebisaku bionsi, na obonene bwaye nigo boetanaine igoro chionsi. 
Ning’o onga buna Omonene, Nyasae oito, oria omenyete aaria igoro mono, 
na origereretie goocha inse aa arore igoro na ense. 
Nigo akoimokia omotaka korwa ase obotaka obwere, na koimokia omoremerwa korwa ase ribu, 
obabeeka baikaransa amo n’abwo bare n’okobua, baria bakogambera abanto baye. 
Nigo akoa omokungu omogomba chinguru chi’okoibora, oba n’omogooko ase obomenyo bwaye. Omonene atogigwe! 
