﻿ZABURI.
108.
(Ogoteera gwa Daudi) Aye Nyasae, enkoro yane nigo ere n’oboremu! Nintere na gochenga! Omoyo one bwonsi, boka! 
Inwe amakano aane onsi, boka! Nainche nimboke mambia chuni. 
Aye Omonene, ninkoiranerie ng’a mbuya mono ase egati y’ abanto, nimbe ’ngotera amatera y’okogotogia ase egati y’ebisaku. 
Amaabera ao nigo are amanene aigete aaria igoro, obwegenwa bwao nigo boigete igoro ase amare. 
Aye Nyasae, oorokie ng’a nigo ore omonene goetania igoro chionsi. Tiga obonene bwao bororekane ase ense yonsi. 
Intoorie n’okoboko kwao gw’okorio na oigwe aya ’nkogosaba. 
Nyasae orire eira korwa ase obomenyo bwaye obochenu, ogoteeba, “Ase omochengo ninyatanane Sekemu, na ense omweya ya Sukoti ni’nyiate chincherere. 
Gileadi neyaane, na Manase neyaane; Efraimu nekegogwa kiane gi’ekioma, na Yuda nenyimbo yane y’obogaambi. 
Moabu negetaabo kiane ngoisabera, nindute egekooroto kiane igoro ase Edomu, ning’ake eriogi ri’okobua igoro y’ense y’Abafilisti.” 
Ning’o orandaae ansoyie ase omochie ogiteire chindwaki? Ning’o orantang’ane gochia Edomu? 
Aye Nyasae, Inee, ngwatotigire kegima? Aye tori kogeenda amo nabarwani baito b’esegi. 
Tokoonye, torwanie ababisa baito tobabue, ekiagera ogokoonywa gokorwa ase Mwanyabaanto mbosa. 
Ekero tore amo na Nyasae, ’natokore amang’ana amanene, nere orabue ababisa baito na kobatiringera inse. 
