﻿ZABURI.
106.
Motogie Omonene! Moakere Omonene ng’a mbuya mono, ekiagera ere nomuya, na obwanchani bwaye nigo bogendererete goika kare na kare. 
Ning’o oranyare goteeba ogokora okonene kw’Omonene, gose koraria obonene bwaye bwonsi? 
Mbasesenirie abanto abwo bagokora oboronge, abwo bagokora oboronge ase chingaki chionsi. 
Omonene, ong’inyore ekero okororera abanto bao amaabera, onchichere, ontoorie! 
Erio inyare korora ebisio abanto bao abachore baranyore, na inche inyare kogokera omogooko bw’abaanto bao, naende inyare gwetogia amo n’abanto bare omwando oo. 
Intwe twakorire ebibe buna chisokoro chiaito chiakorete; twakorire ayare amabe mono, ee, twakorire ayare amabe. 
Ekero chisokoro chiaito chiarenge Misiri, tichiarengereretie igoro y’emeremo yao y’ogokumia; tichiainyorete obwanchani bwao obonge bogendererete botambe, korende chigasaria asore aaria ase Enyancha Embariri. 
Nonya naboigo Omonene akabatooria ase engencho y’erieta riaye, ng’a anyare komanyekania okobua kwaye okonene. 
Nigo atogonyerete Enyancha eria Embariri egakamoka, erio agaetia Abaisraeli aroro buna nase ense enyomo. 
Naboigo Omonene akabatooria korwa ase amaboko ay’abaabagechete na kobabooria korwa ase chinguru chi’ababisa babo. 
Amaache akamera kegima abachandi baria babo; onde tatigarete ore moyo nonya noyomo. 
Erio bakwegena ring’ana ri’Omonene, agwo bagateera ase okomotogia. 
Korende ase obwango bakeba ogokora kwaye, tibaganyete Omonene abasemie. 
Barabwo nigo babete nobotoonu bw’okogania endagera. Bagateema Nyasae agwo ase erooro. 
Ere akabaa egento baboretie baegwe, korende akabatomera oborwaire bw’okobareyia. 
Ekero abanto b’egetwori babete ne ribero ase Musa, na ase Aroni, oyio orenge omochenu o Nyasae, 
riroba rikabwereka rikamera Datani, na rikamumekeria abanto b’ekeombe ki’Abiiramu. 
Boigo omorero ogatuboka agwo ase egati y’ekeombe kiabo, ekebemberi ki’omorero kegasamba abakori amabe baria. 
Abanto bakaroisia omogwekano bw’emori agwo Horebu, erio bagasasiima omogwekano oria obombire. 
Barabwo bakaonchoreria oyorenge obonene bwabo, bakaonchokera omogwekano bw’eng’ombe ekorisia obonyansi. 
Bakeba Nyasae, Omotooria obo, oria okorete amang’ana amanene aaria Misiri; 
oria okorete ogokora kw’ogokumia ase ense ya Hamu, naende agakora amang’ana ay’okoondokia aaria ase Enyancha Embariri. 
Ase ayio Omonene akarengereria ng’a abasirie, korende Musa, omochore oye, agatenena ase obosio bwaye buna omobwatania, ase ogotanga endamwamu yaye teita abanto. 
Abanto bagachaaya ense eria yarenge engiya, ekiagera tibegenete eira y’Omonene. 
Ekero barenge ase chiema chiabo ime nigo bemurunganetie, tibaigwera eriogi ri’Omonene. 
Ase ayio akarambora okoboko kwaye igoro yaabo, agatiana ng’a abatige bakwere agwo ase erooro, 
naende ng’a asiarere abanto b’ororeria rwabo, bagende komenya ase egati y’abanto b’ebisaku ase chinse ao ao. 
Abaisraeli bakabwatana na Baali, enyasae ya Peori, bakaria ebing’wanso biarenge koruegwa ase chinyasae chitari moyo. 
Ase igo ogokora okwo kwabo gokagechia Omonene goika akaba nendamwamu, na oborwaire bogoita bogatuboka ase egati yaabo. 
Erio Finehasi agatenena agaakanera amabe ayio akoretwe, na oborwaire boria bogatiga goita abanto. 
Ase engencho y’ogokora okwo Finehasi akabarwa ng’a nomonyene oboronge aare, ebiaare ase ebiaare kogenderera botambe. 
Abanto bakagechia Omonene agwo ase amaache a Meriba, na ase engencho yaabo Musa agasoa ase emechando. 
Nigo bagechetie enkoro ya Musa, goika agakwana amang’ana nobororo, ase ogotarengereria buya. 
Abaisraeli tibaitete basirie kegima abanto b’ebisaku, buna Omonene konya achiikire. 
Korende nigo basang’ananete n’abanto abwo bakeorokereria ogokora kwabo. 
Nigo bakorerete emegwekano yaabo baare gosasiima, na eyio ekaba amareba ase bare. 
Barabwo nigo baruete abana babo, abamura na abaiseke, bakaba ebing’wanso ase ebirecha. 
Bagaitera amanyinga ya bana babo, abamura na abaiseke, abatari na komocha, abwo baruete bakaba ebing’wanso ase emegwekano bagasasiima ase ense ya Kaanani; na ense eria ekaba eyetachenegeti ase engencho y’ogoiterwa kw’amanyinga ayio. 
Ase ayio abanto abwo bagesoyia ase ogotacheneka ase engencho y’ogokora kwabo, bagakora obonyaka tibaaba abegenwa. 
Eri’Omonene akaba nendamwamu ase abanto baye, na akagechigwa n’abanto bare omwando oye. 
Akababeka ase amaboko ya banto b’ebisaku, erinde abanto abwo baabagechete bakaba bakobagambera. 
Ababisa babo bakabakorera bobe, bakababua bakababeeka inse yobogambi bwabo. 
Ase chingaki chinyinge Omonene nigo arenge kobatooria, korende ase ogosemania kwabo bagachora gosaria asare: ase igo bakaba bagochandeka mono ase engencho y’ebibe biabo. 
Nonya naboigo nabechanderete ase emechando yaabo, akaigwa ekerero kiabo. 
Ase engencho yaabo nigo ainyorete okobwatana kwaye kw’ogotianania, akabarorera amabeebe, ekiagera are nobwanchani bogendererete botambe. 
Nigo agerete abwo babosete bakabarorera amaabera. 
Aye Omonene, Nyasae oito, totoorie; tosangererie amo, otorusie korwa ase abanto b’ebisaku, erio tonyare gotogia erieta riao richenu, na gochengera obonene bwao. 
Omonene, Nyasae bw’Abaisraeli, atogigwe korwa kare goika kare na kare; na abanto bonsi pi bateebe, “Amina.” Togia Omonene! 
