﻿ZABURI.
101.
(Ogosaba gwa Daudi) Nintere igoro y’amaabera ao na oboronge bwao; ningoterere aye Omonene. 
Nigo nganetie na korenda enchera y’oboronge. Inee! Ndiriri orache ase ’nde? Nigo nganetie imbe norogendo ororonge ase enyomba yane imenyete. 
Tinkobeeka ase obosio bwane ing’ana rinde rionsi ri’obobe; nigo ngechete ogokora kw’abaanto bagotiga obwegenwa, tinkonyara kobwatwa ne chingencho chiabo. 
Nimbeere aare korwa ase abwo bare ne chinkoro chi’obokorekanu, ring’ana rinde rionsi ri’obobe ribe aare nainche. 
Ninsirie omonto okona‐gokwana bobe omonto onde bobisi, tinkoremereria omonto omoenenu na omweanchi. 
Amaiso aane narigereretie abegenwa bare ase ense, abwo mbamenye amo nainche. Omonto okobwatia chinchera chi’oboronge, oyio nabe ogonkorera. 
Omonto okwenaria obong’ainereria takomenya ase enyomba yane, oyo ogoteeba oborimo takobeera ase obosio bwane. 
Kera emambia nimbe ngosiria abakori amabe bonsi abare ase ense, nindusie abakori ebibe bonsi korwa ase omochie O’ Omonene. 
