﻿ZABURI.
99.
Omonene nere okogamba! Ase ayio, abanto b’ebisaku nigo bakoiguswa. Omonene nigo amenyete nobonene bwaye igoro y’ebitongwa bibwate chimbaba, na ense nigo egotengechigwa. 
Omonene nigo are omonene ase Sayoni, oimokererigwe igoro kobua abanto b’ebisaku bionsi. 
Abanto bonsi tiga batogie erieta riaye rinene na eri’okoirokia. Ere nigo are omochenu. 
Aye omorwoti ore nokobua, nigo bwanchete ekeene, aye gwakorire oboronge botenene bokong’u, nigo okonacha ebiina bi’ekeene na oboronge ase abanto b’ororeria rwa Yakobo. 
Moimokererie Omonene, Nyasae oito, igoro, mosasime agwo ase egeteni kiaye ki’amagoro! Ere nigo are omochenu. 
Musa na Aroni nigo barenge abamo b’abakuani b’Omonene, boigo Samweli nigo arenge oyomo bw’abaanto barenge korangeria erieta riaye. Abanto abwo nigo barangeretie Omonene ng’a abakoonye, nere akabaigwa. 
Nigo akwanete nabarabwo, ore ime ase riire. Abanto abwo nigo babwatete oborori bwaye, na amachiiko abaete. 
Aye Omonene, Nyasae oito, nigo kwaigwete abanto baria, nigo kwarenge Nyasae, kwarenge kobaabera, nonya naboigo nigo kwarenge kobaa egesusuro ase engencho y’ogokora kwabo okobe. 
Moimokererie Omonene, Nyasae oito, igoro! Inchuo mosasimere ase egetunwa kiaye egechenu, ekiagera Omonene, Nyasae oito, nigo are omochenu. 
