﻿ZABURI.
97.
Omonene nere omorwoti. Aye ense, goka! Na inwe ebisinka ebinge, chenga! 
Amare na omosunte ekerima nigo bimoetanaine; oboronge na ekeene nabio bire oboroso bw’ekerogo kiaye ki’obonene. 
Omorero nigo otang’aine bosio bwaye, oro nigo ogosamba ababisa baye abwo bamoetanaine. 
Okomesa kwaye gwe chinkoba nigo gokomoreka ense eye; ense nigo ekorora okomesa okwo yatengechigwa. 
Ebitunwa nigo bikonyititoka buna obochoe ase obosio bw’Omonene, ee, ase obosio bw’Omonene bw’ense yonsi. 
Igoro chionsi nigo chikoraria oboronge bwaye, na abanto bonsi barora obonene bwaye. 
Abanto bonsi abagosasiima emegwekano nigo bagosookigwa, ee, abwo bagwetogeria emegwekano y’ogosasimwa ere bosa; inwe chinyasae chionsi, tung’ama ase obosio bwaye. 
Abanto ba Sayoni nigo bakoigwa ayio bagoka, na ab’emechie ya Yuda bachenga, ekiagera aye Nyasae kwanachire ebiina. 
Aye Omonene, naye ore omonene goetania ense yonsi, aye kwaimokererigwe igoro kobua chinyasae chionsi. 
Inwe abamwanchete Omonene, gecha obobe! Ere nigo akorenda emioyo y’abachenu baye; nigo akobatooria korwa ase amaboko ’abakori amabe. 
Oborabu nigo bokomocheera oyore omooronge, na omogooko obachera abare ne chinkoro chindonge. 
Inwe mwensi abamore abaronge, goka ase Nyasae, moake ng’a mbuya mono ase erieta riaye richenu. 
