﻿ZABURI.
95.
Inchuo, tomoterere Omonene Nyasae nomogooko, inchwo, tomochengere oyore egetare ki’ogotooreka gwaito! 
Inchuo, togende ase obosio bwaye ase okomoakera ng’a mbuya mono, tomochengere namatera ay’ogotogia! 
Naki Omonene nere Nyasae ore omonene, nere Omorwoti omonene obuete chinyasae chionsi. 
Ere nigo abwatete amakura ’ense ase okoboko kwaye, naboigo nebitunwa ebitambe bire ebiaye. 
Enyancha neyaye, ekiagera nere oyetongete, okoboko kwaye nakwo kwabombete ense enyomo. 
Inchuo, twekumbe ase obosio bw’Omonene, totung’ame asare, ekiagera nere ototongete. 
Ere nere Nyasae oito, na intwe nigo tore abanto b’oborisia bwaye, nigo tore ching’ondi chire ase oborendi bwaye. Naki yare koba buya onye rituko ria reero mwategerera eriogi riaye! 
Timokong’ia chinkoro chiaino, buna abakoro bakorete aaria Meriba; na buna bakorete ase rituko riria aaria Masa agwo ase erooro. 
Aaria chisokoro chiaino nigo chianteemete, nonya chiaroche emeremo yane nigo chiandengete. 
Ase engaki y’emiaka emerongo ene, nigo nagechetigwe nekiaare keria, ngateba, “Abanto aba nabasareku ase chinkoro chiabo ime, tibaraareti chinchera chiane.” 
Ase ayio ngatiana ase endamwamu yane ng’a tibagosoa ase ogotimoka kwane. 
