﻿ZABURI.
85.
(Ogoteera kwa basinto ba Kora) Omonene, kare nigo kwarenge namaabera ase ense yao, nigo kwairaneretie abanto ba Yakobo amaya abo. 
Aye nigo kwaberete abanto bao obobe bwabo, nigo gwatubete ebibe biabo bionsi. 
Boigo ngwatigete koba nekeririanda, ngwatigete kegima kogechigwa nabarabwo. 
Aye Nyasae, Omotooria oito, otoiranere, rusia ekeririanda kiao korwa ase tore. 
Inee! Nigo ogochia koba nendamwamu ase tore kogenderera botambe? Inee! Endamwamu yao nigo egendererete koba ase ebiaare bionsi? 
Inee! Togotokora abayia naende, erinde intwe abanto bao tobe nomogooko asore? 
Aye Omonene, otoorokerie obwanchani bwao bogendererete botambe, na otoe ogotooreka kwao. 
Nimbe nkoigwa amang’an’Omonene Nyasae agokwana; ere nigo agokwana amang’ana ’omorembe ase abanto baye abachenu, tobatiga baonchokere oboriri naende. 
Ekeene, ogotooreka kwaye nigo kore ang’e ase abanto bairogete Omonene; obonene mbobe bomenyete ase ense yaito. 
Aase agwo obwanchani bogendererete botambe na ekeene mbiumerane, boigo oboronge na omorembe mbinyunyuntane. 
Aase agwo obwegenwa mbooroke ase ense, na oboronge mborigererie korwa igoro. 
Ekeene, Omonene narue ayare amaya, na orogongo rwaito rorue okwama kwaye. 
Oboronge mbotang’ane bosio bwaye, naende bobwatie ase aetete. 
