﻿ZABURI.
75.
(Ogoteera gw’Asafu) Aye Nyasae, nigo togokoiraneria ng’a mbuya mono, naende mbuya mono, ekiagera erieta riao nigo rire ang’e, nigo tokoraareria emeremo yao y’ogokumia. 
“Ekero engaki nachigete eraike, inche Nyasae ninache ekiina kia boronge. 
Ekero ense egotengechigwa amo na bonsi abamenyeteo, ninche omonyene nigo nkobwata chisiiro chiaye bokong’u. 
Nigo ngokania abanto bagwetogia: Timobaisa gwetogia, naende nintebie abakori amabe: Timobaisa komera ching’unchara chi’obomwenu. 
Ee, timobaisa gochiimokereria igoro ase ogwekaga, gose gokwana amabe, inwe abamore abanyabigoti bikong’u.” 
Obonene tibori korwa moocha, gose korwa bosongo, gose tibori korwa ase ebitunwa bi’erooro. 
Korende Nyasae nere okonacha ekiina, okeyia oyomo, na oimokereria oyonde igoro. 
Omonene nabwate egekombe ase okoboko kwaye, geichire nedivai entindi yochoganirie, nayeumorere abakori amabe bonsi b’ense na kobabetereria bayenywe, bayekoore amo neturubo yaye. 
Korende inche nimbe nkona‐koraria kobeeka kogenderera botambe; nimbe nkona‐goteera ogoteera gw’okomotogia Nyasae o Yakobo. 
Omonene nabune kegima ching’unchara chi’abakori amabe, korende echi’abanyaboronge nachiimokererie igoro. 
