﻿ZABURI.
64.
(Ogoteera gwa Daudi) Aye Nyasae, igwa eriogi riane ekero nkorera; renda obogima bwane korwa ase omobisa oyo okongosa. 
Imbise korwa ase emeroberio ya bobisi y’abakori amabe, korwa ase eburu-buru y’abakori ebibe. 
Abwo nigo bagotieria chimeme chiabo buna emioro, amang’ana bagokwana nigo are nobororo, anga buna chinsara. 
Korwa ase baboeete nigo bakorasa omonto otari na komocha, bamorasa chinsara mobosokano batari nobwoba. 
Barabwo nigo bakobeekana chinguru ase ogokora ebibe ebio barobeirie; nigo bagokwana amo igoro y’ogotegera abande oboreba bobisi, bagoteebania: “Ning’o torooche?” 
Nigo bagokora emeroberio emebe, bagoteeba, “Bono twakorire omooroberio oito omoikeranu.” Ekeene, ebirengererio bia ime bi’omonto, na enkoro yaye, nigo bisinyete. 
Korende Nyasae nabarase ensara yaye, na barabwo baraswe mobosokano. 
Nasirie abanto abwo ase engencho y’amang’ana amabe bagokwana; bonsi abarabe bakobarora mbasingisie emetwe yabo ase ogoichana. 
Erio abanto bonsi mbairoke, babe bakoraria emeremo ya Nyasae na komanya mono ayakorire. 
Abanyene oboronge mbabe nomogooko ase Omonene na komotamera. Abwo bare ne chinkoro chindonge mbabe bagwetogia. 
