﻿ZABURI.
63.
(Ogoteera gwa Daudi ekero arenge ase erooro ya Yuda) Aye Nyasae, Nyasae one, naye ngotang’ana korigia. Omoyo one nigo ore nerang’o asore, na omobere one nigo okoganetie, ase ense y’eguru‐gura enyomo pa etari namaache. 
Nabeire ngokorigia ase Obomenyo Obochenu, erinde ndore okobua kwao na obonene bwao. 
Obwanchani bwao bogendererete botambe nigo bore obuya kobua obogima, ase ayio nimbe nkogotogia nomonwa one. 
Nimbe nkona‐kogotogia ase obogima bwane bwonsi, ase erieta riao nindambore amaboko aane gochia igoro. 
Omoyo one oisanekire buna oyorire obonoru bw’emeseto na ebitinya, nimbe nkogotogia nomonwa one ore nebikoba bire nomogooko. 
Ekero indaire ase oborere bwane, nigo nkoba nkorengereretie, ase obotuko obogima ebirengererio biane nigo bikona‐gokoiranerera. 
Aye kwabeire botambe ogokonya kwane, na inse y’ekiiriri gie chimbaaba chiao nintere nomogooko. 
Omoyo one nokobwaterere mono, ekiagera aye nonsiirete nokoboko kwao gw’okorio. 
Abanto abwo bakorigia gosiria obogima bwane, mbagende gochia inse kegima y’ense. 
Barabwo nigo bararuegwe baitwe nemioro, babe endagera ye chisese chi’orosana. 
Nonya naboigo omorwoti nabe okogoka ase Nyasae, na abanto bonsi abagotiana asare mbabe bagwetogia, korende emenwa y’abanto bagokwana oborimo nekirigwe. 
